external

Սիմեոն Նոր Աստվածաբան

Սիմեոն Նոր Աստվածաբան (949 Գալաթիա – 1022 Խրիսուպոլիս), ուղղափառ վանական, փիլիսոփա, աստվածաբան, շարականների ու հոգևոր բանաստեղծությունների հեղինակ, Ուղղափառ Եկեղեցու սուրբ: Սիմեոն Նոր Աստվածաբանը իր ստեղծագործությամբ մերժում է եկեղեցու քահանայապետությունը, գտնելով, որ մարդը պետք է հասնի անձի սրբացմանը և Աստծու հետ հաղորդակցվ իր սեփական ուժերով, առանց միջնորդների։ Բյուգանդական բանաստեղծի հիմների մի մասը ներկայանում է որպես տրամախոսություն, սակայն դրանց մեծագույն մասը բանաստեղծի ներքին խոհերն են։ Թվում է, թե նա վարել է մի իրական զրույց Աստծո հետ։

Աղոթք Սուրբ Հոգուն

Ե՛կ, ճշմարիտ լույս: 
Ե՛կ, հավիտենական կյանք: 
Ե՛կ, ծածուկ խորհուրդ: 
Ե՛կ, անճառելի գանձ: 
Ե՛կ, աննկարագրելի իրականություն: 
Ե՛կ, Անձ, ում ոչ մի միտք չի կարող ըմբռնել: 
Ե՛կ, անվերջ երջանկություն: 
Ե՛կ, անմայրամուտ լույս: 
Ե՛կ, փրկվածների ճշմարիտ հույս: 
Ե՛կ, ննջեցյալների վերազարթոնք: 
Ե՛կ, մեռյալների հարություն: 
Ե՛կ, Ամենակարո՜ղ: Դու, որ միայն կամքիդ գործադրմամբ ամեն բան ստեղծում, վերստեղծում և փոխակերպում ես: 
Ե՛կ, անտեսանելի, ամբողջովին անշոշափելի: 
Ե՛կ, հավիտենական ուրախություն: 
Ե՛կ, իմ շունչ և իմ կյանք: 
Ե՛կ, իմ թշվառ հոգու կատարյալ մխիթարիչ: 
Ե՛կ, քաղցրություն իմ, իմ փառք, իմ անվերջ բերկրանք: 
Շնորհակալություն եմ հայտնում Քեզ, որ եղար իմ համար անմարելի լույս, անմայրամուտ արեգակ, որովհետև չկա մի վայր, որ կարող է թաքցնել Քեզ. Քեզ, որ ամբողջ տիեզերքը լցնում ես Քո փառքով: […]
Ե՛կ, Տեր, այսօր ինձնում հաստատիր Քո վրանը, իմ մեջ հաստատիր Քո բնակությունը, մնա՛ ընդմիշտ, իմ՝ Քո ծառայի մեջ մնա՛ մինչև վերջ. Դու, որ բարի ես: Որպեսզի այս աշխարհից դուրս գալուս ժամանակ և դուրս գալուցս հետո՝ ես վերագտնեմ ինձ Քո մեջ և թագավորեմ Քո հետ, Աստվա՜ծ, որ ամենքից ու ամեն ինչից գերիվեր ես: […]
Եվ այնպես արա՛, որ անդադար Քեզ նայելով, ես՝ որ մեռած եմ, ապրեմ. Քեզ ունենալով, ես՝ որ աղքատ եմ, դառնամ հարուստ. և ավելի հարուստ կլինեմ, քան բոլոր թագավորները:
Քեզ ուտելով և ըմպելով, և պատշաճ ժամանակին Քեզնով զգեստավորվելով, վերագտնեմ ինձ աննկարագրելի բարիքների մեջ և դրանք վայելեմ լիովին:
Որովհետև Դու ամբողջովին բարիք ես, ամբողջովին փառք, ամբողջովին բերկրանք:
Քեզ վայել է փառք, համագոյակից և կենարար Երրորդությանդ, որ երկրպագություն, դավանություն, պաշտամունք ու ծառայություն ես ստանում բոլոր հավատացյալներից, այժմ և միշտ և հավիտյանս հավիտենից:
Ամեն: