ԵԼՔ

1

ԵԳԻՊՏՈՍԻՑ ԵԼՔԸ

(1.1–15.21)

Եգիպտացիների անգթությունը

¹ Սրանք են անունները Իսրայելի որդիների, որոնք իրենց հոր՝ Հակոբի հետ մտան Եգիպտոս։ Յուրաքանչյուրն իր ընտանիքով մտավ. ² Ռուբեն, Շմավոն, Ղևի, Հուդա, ³ Իսաքար, Զաբուղոն, Բենիամին, ⁴ Դան, Նեփթաղիմ, Գադ և Ասեր։ ⁵ Իսկ Հովսեփը Եգիպտոսում էր։ Հակոբից սերած բոլորը յոթանասունհինգ հոգի էին։ ⁶ Վախճանվեց Հովսեփը, ինչպես նաև նրա բոլոր եղբայրներն ու այն ողջ սերունդը։ ⁷ Իսրայելի որդիներն աճեցին ու բազմացան, բազմամարդ դարձան ու շատ հզորացան։ Երկիրը նրանցով լցվեց։

⁸ Գահ բարձրացավ մեկ այլ թագավոր, որը չգիտեր Հովսեփին։ ⁹ Նա իր ժողովրդին ասաց. «Ահա Իսրայելի որդիների ազգը մեծ է զորությամբ և մեզնից ավելի է զորանում։ ¹⁰ Արդ, եկեք մի միջոց գտնենք, որպեսզի չլինի թե երբ նրանք բազմանան, և երբ մենք պատերազմի մեջ մտնենք, նրանք միանան թշնամիներին ու մեր դեմ կռվելով՝ դուրս ելնեն այս երկրից»։ ¹¹ Եվ նրանց վրա գործավարներ կարգեց, որպեսզի չարչարեն նրանց աշխատանքով։ Եվ փարավոնի համար կառուցեցին պարսպապատ քաղաքներ՝ Փիդովնը, Ռամեսեն և Ովնը՝ Արեգ քաղաքը։ ¹² Բայց որչափ ճնշում էին նրանց, այնքան ավելի էին բազմանում ու հույժ զորանում, և եգիպտացիներն ատում էին Իսրայելի որդիներին։ ¹³ Եգիպտացիները բռնությամբ ճնշում էին նրանց ¹⁴ ու դառնացնում էին նրանց կյանքը տաժանակիր աշխատանքով՝ կավագործությամբ, աղյուսաշինությամբ ու դաշտային զանազան գործերով։ Բոլոր գործերում նրանց ծառայեցնում էին ստրկաբար։

¹⁵ Եվ եգիպտացիների արքան խոսեց եբրայեցիների մանկաբարձների հետ, որոնցից մեկի անունը Սեպփովրա էր, իսկ երկրորդի անունը՝ Փուա, ¹⁶ և ասաց. «Երբ ծնեցնում եք եբրայեցիների կանանց, ծնելու պահին, եթե արու լինի, սպանե՛ք նրան, իսկ եթե էգ՝ թողե՛ք՝ ապրի»։ ¹⁷ Մանկաբարձները, սակայն, երկյուղ կրելով Աստծուց, չանսացին եգիպտացիների արքայի հրամանին և թողնում էին, որ արուներն ապրեն։ ¹⁸ Եգիպտացիների արքան կանչեց մանկաբարձներին ու ասաց նրանց. «Ինչո՞ւ եք այդպես վարվում և ողջ եք թողնում արուներին»։ ¹⁹ Մանկաբարձները փարավոնին ասացին. «Եբրայուհիները եգիպտացի կանանց նման չեն. մանկաբարձները դեռ չհասած՝ նրանք արդեն ծննդաբերում են»։ Եվ շարունակում էին ծննդաբերել։ ²⁰ Եվ Աստված բարի եղավ մանկաբարձների նկատմամբ, իսկ ժողովուրդը բազմանում և հույժ զորանում էր։ ²¹ Եվ քանի որ մանկաբարձները երկյուղ ունեցան Աստծուց, ընտանիքներ ստեղծեցին իրենց համար։

²² Փարավոնը հրաման տվեց իր ողջ ժողովրդին՝ ասելով. «Եբրայեցիներից ծնված ամեն մի արու զավակի գե՛տը գցեք, իսկ բոլոր էգերին կենդանի՛ թողեք»։

2

Մովսեսի ծնունդը

¹ Ղևիի ցեղից մի մարդ կար, որն իրեն կին էր առել Ղևիի դուստրերից մեկին։ ² Սա հղիացավ ու մի արու զավակ ծնեց։ Տեսնելով, որ նա կայտառ է, երեք ամիս թաքցրին նրան։ ³ Երբ այլևս չէին կարողանում թաքցնել, նրա մայրն առավ եղեգյա մի զամբյուղ, ծեփեց այն կպրաձյութով, մանկանը դրեց դրա մեջ և գետափին՝ ծանծաղուտ մի տեղում, թողեց։ ⁴ Մանկան քույրը հեռվից հետևում էր՝ տեսնելու, թե ի՛նչ է լինելու նրա հետ։ ⁵ Այդ ժամանակ փարավոնի դուստրն իջավ գետում լվացվելու։ Նրա նաժիշտները շրջում էին գետափին։ Նա, ծանծաղուտի մեջ տեսնելով զամբյուղը, ուղարկեց մի նաժիշտի՝ հանելու այն։ ⁶ Բացեց ու տեսավ մանկանը, որ լաց էր լինում զամբյուղում։ Փարավոնի դուստրը գթաց նրան և ասաց. «Սա եբրայեցիների երեխաներից է»։ ⁷ Մանկան քույրն ասաց փարավոնի դստերը. «Ցանկանո՞ւմ ես, որ եբրայեցիներից մի դայակ կին կանչեմ, որ սնի այդ մանկանը քեզ համար»։ ⁸ Փարավոնի դուստրն ասաց. «Գնա՛»։ Աղջիկը գնաց ու կանչեց մանկան մորը։ ⁹ Փարավոնի դուստրը նրան ասաց. «Վերցրո՛ւ այդ մանկանը և սնի՛ր նրան ինձ համար։ Ես քեզ կվարձատրեմ»։ Կինը վերցրեց մանկանն ու սնեց նրան, ¹⁰ և երբ մանուկը մեծացավ, բերեց նրան փարավոնի դստեր մոտ, և նա եղավ նրա որդեգիրը։ Նրան անվանեց Մովսես՝ ասելով. «Ջրից հանեցի նրան»։

¹¹ Շատ ժամանակ անց, երբ Մովսեսը մեծացավ, գնաց իր եղբայրների՝ Իսրայելի որդիների մոտ, տեսավ նրանց չարչարանքը։ Տեսավ, որ մի եգիպտացի ծեծում էր իր եբրայեցի եղբայրներից մեկին։ ¹² Նայելով այս ու այն կողմ՝ տեսավ, որ մարդ չկա, սպանեց եգիպտացուն և թաքցրեց ավազի տակ։ ¹³ Հաջորդ օրը, տեսնելով, որ երկու եբրայեցիներ կռվում էին միմյանց հետ, անիրավողին ասաց. «Ինչո՞ւ ես հարվածում ընկերոջդ»։ ¹⁴ Նա պատասխանեց. «Ո՞վ քեզ իշխան և դատավոր կարգեց մեզ վրա, թե՞ ինձ էլ ես ցանկանում սպանել, ինչպես երեկ սպանեցիր եգիպտացուն»։ Մովսեսը վախեցավ և ասաց, թե այսպիսով հայտնի եղավ իր արածը։

¹⁵ Երբ փարավոնը լսեց այդ մասին, ցանկացավ սպանել Մովսեսին։ Մովսեսը փախավ փարավոնի մոտից և բնակվեց Մադիամի երկրում։ Գալով Մադիամի երկիրը՝ նստեց մի ջրհորի մոտ։ ¹⁶ Մադիանացիների քուրմը յոթ դուստր ուներ, որոնք արածեցնում էին իրենց հոր հոտերը։ Նրանք եկել էին ջուր հանելու, որպեսզի լցնեն ավազանները՝ իրենց հոր ոչխարներին ջուր տալու համար։ ¹⁷ Բայց ուրիշ հովիվներ եկան և նրանց քշեցին։ Մովսեսը ելնելով վռնդեց նրանց և ջուր հանեց ու խմեցրեց նրանց հոտերը։ ¹⁸ Աղջիկները եկան Ռագուելի՝ իրենց հոր մոտ։ Նա նրանց հարցրեց. «Ինչպե՞ս եղավ, որ այսօր արևը մայր չմտած՝ եկաք»։ ¹⁹ Նրանք պատասխանեցին. «Մի եգիպտացի այր փրկեց մեզ հովիվներից և ջուր հանեց ու տվեց մեր հոտերին»։ ²⁰ Եվ նա ասաց իր դուստրերին. «Որտե՞ղ է, որտե՞ղ թողեցիք այդ մարդուն։ Արդ, կանչե՛ք նրան, որ մեզ հետ հաց ուտի»։ ²¹ Եվ Մովսեսը բնակվեց այդ մարդու մոտ, և սա իր դուստր Սեպփովրային կնության տվեց Մովսեսին։ ²² Կինը հղիացավ ու ծնեց որդի, որին Մովսեսը Գերսամ անվանեց՝ ասելով. «Ես պանդուխտ եմ օտար երկրում»։

²³ Շատ օրեր անց մեռավ եգիպտացիների թագավորը։ Իսրայելի որդիները շարունակում էին տառապել գործերից և աղաղակ էին վեր առաքում։ Նրանց աղաղակը հասավ Աստծուն։ ²⁴ Աստված լսեց նրանց հեծեծանքը, հիշեց իր ուխտը Աբրահամի, Իսահակի ու Հակոբի հետ, ²⁵ նայեց Իսրայելի որդիներին ու հայտնվեց նրանց։

3

Աստված կանչում է Մովսեսին

¹ Մովսեսն արածեցնում էր իր աներոջ՝ Հոթորի՝ մադիանացիների քրմի հոտերը։ Մի օր նա հոտերը տարավ անապատի միջով ու եկավ Աստծու լեռը՝ Քորեբ։ ² Տիրոջ հրեշտակը կրակի բոցով մորենու միջից երևաց նրան։ Եվ Մովսեսը տեսավ, որ մորենին կրակով վառվում էր, բայց չէր կիզվում։ ³ Մովսեսն ասաց. «Առաջ անցնեմ և տեսնեմ այս զարմանալի տեսարանը. ինչպե՞ս է, որ մորենին չի կիզվում»։ ⁴ Երբ Տերը տեսավ, որ մոտենում է տեսնելու, մորենու միջից ձայն տվեց նրան ու ասաց. «Մովսե՛ս, Մովսե՛ս»։ Նա ասաց. «Ի՞նչ է»։ ⁵ Եվ ասաց. «Մի՛ մոտեցիր այս տեղին։ Կոշիկներդ հանի՛ր ոտքերիցդ, որովհետև կանգնածդ վայրը սուրբ տեղ է»։ ⁶ Եվ ասաց նրան. «Ես եմ քո հոր Աստվածը, Աբրահամի Աստվածը, Իսահակի Աստվածն ու Հակոբի Աստվածը»։ Մովսեսը շրջեց իր դեմքը, քանի որ երկնչում էր ուղիղ նայել Աստծուն։

⁷ Տերն ասաց Մովսեսին. «Ես իսկապես տեսա իմ ժողովրդի չարչարանքը Եգիպտոսում և լսեցի նրանց աղաղակը իրենց գործավարների պատճառով, գիտեմ նրանց վշտերը ⁸ և իջա փրկելու նրանց եգիպտացիների ձեռքից, հանելու նրանց այն երկրից ու տանելու բարի ու ընդարձակ մի երկիր, որ կաթ ու մեղր է բխեցնում՝ քանանացիների, քետացիների, ամորհացիների, փերեզացիների, խևացիների, գերգեսացիների և հեբուսացիների երկիրը։ ⁹ Եվ արդ, ահա Իսրայելի որդիների աղաղակը հասել է ինձ, և տեսա այն նեղությունը, որով եգիպտացիները նեղեցին նրանց։ ¹⁰ Արդ, արի՛ առաքեմ քեզ եգիպտացիների արքայի՝ փարավոնի մոտ, որ հանես իմ ժողովրդին՝ Իսրայելի որդիներին, եգիպտացիների երկրից»։

¹¹ Եվ Մովսեսն ասաց Աստծուն. «Ո՞վ եմ ես, որ գնամ եգիպտացիների արքայի՝ փարավոնի մոտ և Իսրայելի որդիներին հանեմ եգիպտացիների երկրից»։ ¹² Բայց Աստված ասաց. «Ես քեզ հետ կլինեմ։ Եվ պատրվակն այն պիտի լինի, որ ես ուղարկել եմ քեզ՝ հանելու իմ ժողովրդին Եգիպտոսից, որպեսզի պաշտեք Աստծուն այս լեռան վրա»։

¹³ Եվ Մովսեսն ասաց Աստծուն. «Ահա ես գնում եմ Իսրայելի որդիների մոտ ու ասում եմ նրանց. “Ձեր հայրերի Աստվածն ուղարկեց ինձ ձեզ մոտ”։ Եվ երբ ինձ հարցնեն, թե ի՛նչ է նրա անունը, ի՞նչ ասեմ նրանց»։ ¹⁴ Եվ Աստված ասաց Մովսեսին. «Ես եմ Աստված, որ Է»։ Եվ ավելացրեց. «Այսպե՛ս ասա Իսրայելի որդիներին. “Է-ն առաքեց ինձ ձեզ մոտ”»։ ¹⁵ Եվ Աստված նորից ասաց Մովսեսին. «Այսպե՛ս ասա Իսրայելի որդիներին. “Տերը՝ ձեր հայրերի Աստվածը, Աբրահամի Աստվածը, Իսահակի Աստվածը և Հակոբի Աստվածը, առաքեց ինձ ձեզ մոտ”։ Այս է իմ հավիտենական անունը, որով կհիշեք ինձ սերնդեսերունդ։ ¹⁶ Արդ, կգնաս և կհավաքես Իսրայելի որդիների ավագանուն ու կասես նրանց. “Տերը՝ ձեր հայրերի Աստվածը՝ Աբրահամի Աստվածը, Իսահակի Աստվածը և Հակոբի Աստվածը, երևաց ինձ ու ասաց. “Այցելեցի ձեզ և տեսա այն ամենը, ինչ որ պատահում է ձեզ հետ Եգիպտոսում։ ¹⁷ Ասում եմ, հանելու եմ ձեզ եգիպտացիների՝ չարչարանքի երկրից դեպի քանանացիների, քետացիների, ամորհացիների, փերեզացիների, գերգեսացիների, խևացիների ու հեբուսացիների երկիրը, որ կաթ ու մեղր է բխեցնում”, ¹⁸ և նրանք կանսան քո ձայնին։ Դու և Իսրայելի որդիների ավագանին կմտնեք եգիպտացիների արքայի՝ փարավոնի մոտ, և նրան կասես. “Տերը՝ եբրայեցիների Աստվածը, մեզ կանչում է իր մոտ։ Արդ, մենք երեք օրվա ճանապարհ պիտի գնանք դեպի անապատ, որպեսզի Տիրոջը՝ մեր Աստծուն, զոհ մատուցենք”։ ¹⁹ Եվ ես գիտեմ, որ եգիպտացիների արքան չի թողնելու ձեզ մեկնելու, եթե մի հզոր ձեռք իրեն չստիպի։ ²⁰ Եվ երկարելով իմ ձեռքը՝ հարվածելու եմ Եգիպտոսին իմ բոլոր հրաշքներով, որ անելու եմ նրանց մեջ, և ապա կարձակի ձեզ։ ²¹ Ես եգիպտացիների առաջ շնորհ եմ անելու իմ ժողովրդին, և երբ ելնեք, դատարկ ձեռքով չեք ելնի։ ²² Այլ ամեն մի կին իր դրացուց և երդկակցից կխնդրի ոսկե ու արծաթե զարդեր, նաև զգեստներ։ Եվ կզարդարեք ձեր որդիներին ու ձեր դուստրերին և այդպիսով մերկացրած կլինեք եգիպտացիներին»։

4

Աստված Մովսեսին հրաշագործության կարողություն է տալիս

¹ Պատասխան տվեց Մովսեսն ու ասաց. «Եթե չհավատան ինձ և իմ ձայնին ականջ չդնեն՝ ասելով. “Աստված քեզ չի երևացել”, ի՞նչ ասեմ նրանց»։ ² Տերը նրան ասաց. «Այդ ի՞նչ է քո ձեռքին»։ Նա ասաց. «Գավազան»։ ³ Եվ ասաց. «Գցի՛ր դա գետնին»։ Եվ գցեց այն գետնին, և օձ դարձավ, ու Մովսեսը փախավ դրանից։ ⁴ Տերն ասաց Մովսեսին. «Երկարի՛ր ձեռքդ և բռնի՛ր դրա պոչից»։ Մովսեսը ձեռքը երկարեց ու բռնեց պոչից, և գավազան դարձավ իր ձեռքում։ ⁵ «Սա՝ որպեսզի քեզ հավատան, որ քեզ երևացել է Տերը՝ նրանց հայրերի Աստվածը՝ Աբրահամի Աստվածը, Իսահակի Աստվածը և Հակոբի Աստվածը»։

⁶ Տերը դարձյալ ասաց նրան. «Ձեռքդ դի՛ր ծոցդ»։ Եվ ձեռքը դրեց իր ծոցը, ապա հանեց այն իր ծոցից, և ձեռքը բորոտությունից սպիտակեց, ինչպես ձյունը։ ⁷ Եվ ասաց նրան. «Ձեռքդ դի՛ր ծոցդ»։ Ձեռքը դրեց ծոցը, ապա այն հանեց իր ծոցից, և ձեռքը նորից ստացավ իր մարմնի գույնը։ ⁸ Եվ ասաց. «Եթե չհավատան քեզ և չանսան առաջին նշանի ձայնին, ապա կհավատան քո երկրորդ նշանի ձայնին։ ⁹ Եթե պատահի, որ չհավատան այդ երկու նշաններին էլ և չանսան քո ձայնին, ապա գետի ջրից կվերցնես, կթափես ցամաքին, և գետից վերցրած ջուրը ցամաքի վրա արյուն կդառնա»։

¹⁰ Մովսեսն ասաց Տիրոջը. «Աղաչում եմ քեզ, Տե՛ր, ես կարող մեկը չեմ, այլ ցածրաձայն ու ծանրախոս եմ, և սա ոչ թե երեկվանից կամ նախանցյալ օրվանից, և ոչ էլ այն պահից, երբ սկսեցիր խոսել քո ծառայի հետ»։ ¹¹ Տերն ասաց Մովսեսին. «Ո՞վ է մարդուն բերան տվել կամ ո՞վ է մեկին խուլ և համր դարձրել, տեսնող ու կույր։ Ո՞չ արդյոք ես՝ Աստվածս։ ¹² Արդ, գնա՛, և ես կբացեմ քո բերանը. դու կասես այն, ինչ պետք է ասել»։ ¹³ Եվ ասաց. «Աղաչում եմ քեզ, Տե՛ր, մեկ այլ կարող մարդո՛ւ ընտրիր ուղարկելու համար»։ ¹⁴ Տերը խիստ բարկացավ Մովսեսի վրա ու ասաց. «Մի՞թե ղևտացի Ահարոնը քո եղբայրը չէ։ Գիտեմ, որ նա քո փոխարեն կխոսի։ Ահա նա քեզ ընդառաջ կելնի և քեզ տեսնելով՝ կուրախանա։ ¹⁵ Կխոսես նրա հետ և իմ պատգամները կդնես նրա շուրթերին։ Եվ ես կբացեմ քո բերանն ու նրա բերանը և կասեմ ձեզ, թե ի՛նչ պետք է անեք։ ¹⁶ Նա քո անունից կխոսի ժողովրդի հետ, քեզ բերան կլինի, իսկ դու նրան կխոսես Աստծու անունից։ ¹⁷ Այն գավազանը, որ օձ դարձավ, կառնես ձեռքդ և դրանով հրաշքներ կգործես»։

Մովսեսը վերադառնում է Եգիպտոս

¹⁸ Մովսեսը վերադարձավ Հոթորի՝ իր աներոջ մոտ ու ասաց նրան. «Վերադառնամ Եգիպտոսում գտնվող իմ եղբայրների մոտ և տեսնեմ, թե տակավին կենդանի՞ են»։ Եվ Հոթորն ասաց Մովսեսին. «Բարի ճանապարհ»։

¹⁹ Բազում օրեր անց վախճանվեց եգիպտացիների արքան։ Եվ Տերը Մադիամում ասաց Մովսեսին. «Գնա՛, վերադարձի՛ր Եգիպտոս, որովհետև մահացան բոլոր նրանք, ովքեր փնտրում էին քեզ»։ ²⁰ Եվ Մովսեսը, առնելով իր կնոջն ու երեխաներին, նրանց նստեցրեց գրաստների վրա ու վերադարձավ Եգիպտոս։ Մովսեսն իր ձեռքում ուներ այն գավազանը, որ Աստված էր տվել իրեն։ ²¹ Տերն ասաց Մովսեսին. «Եգիպտոս վերադառնալիս տե՛ս, որ բոլոր հրաշքները, որ տվեցի քո ձեռքը, անես փարավոնի առաջ։ Եվ ես խստացնելու եմ նրա սիրտը, ու չի արձակելու իմ ժողովրդին։ ²² Եվ դու կասես փարավոնին. “Այսպես է ասում Տերը. “Իսրայելն իմ անդրանիկ որդին է։ ²³ Քեզ ասացի՝ արձակի՛ր իմ ժողովրդին, որ պաշտի ինձ։ Իսկ եթե չուզենաս արձակել նրան, ահա ես կսպանեմ քո անդրանիկ որդուն”»։

²⁴ Եվ եղավ, որ ճանապարհին՝ իջևանատանը, նրան հանդիպեց Տիրոջ հրեշտակը, որն ուզում էր սպանել նրան։ ²⁵ Սեպփովրան, վերցնելով մի գայլախազ, կտրեց իր որդու թլիփը, նետեց նրա ոտքերի տակ և ասաց. «Արյան փեսա եղար ինձ համար»։ ²⁶ Հրեշտակը հեռացավ նրանից, քանի որ նա թլփատության համար ասել էր. «Արյան փեսա»[8]։

²⁷ Եվ Տերն ասաց Ահարոնին. «Ընդառա՛ջ գնա Մովսեսին՝ դեպի անապատ»։ Եվ գնաց ու դիմավորեց նրան Աստծու լեռան վրա ու համբուրեց նրան։ ²⁸ Մովսեսն Ահարոնին պատմեց այն մասին, թե ինչպե՛ս Տերը առաքեց իրեն և հայտնեց այն նշանների մասին, որ պատվիրել էր իրեն անել։ ²⁹ Եվ Մովսեսն ու Ահարոնը գնացին ու հավաքեցին Իսրայելի որդիների ողջ ավագանուն։ ³⁰ Ահարոնը նրանց հաղորդեց բոլոր պատգամները, որ Տերը հայտնել էր Մովսեսին, և Մովսեսը ժողովրդի առաջ ցույց տվեց նշանները։ ³¹ Ժողովուրդը հավատաց և ուրախացավ, որ Աստված այցելել է Իսրայելի որդիներին և տեսել է նրանց նեղությունները։ Ժողովուրդը խոնարհվեց ու երկրպագեց։

5

Մովսեսը և Ահարոնը փարավոնի առջև

¹ Այնուհետև Մովսեսն ու Ահարոնը մտան փարավոնի մոտ ու ասացին նրան. «Այսպես է ասում Տերը՝ Իսրայելի Աստվածը. “Արձակի՛ր իմ ժողովրդին, որ ինձ համար տոն անեն անապատում”»։ ² Եվ փարավոնն ասաց. «Ո՞վ է նա, որի ձայնին անսալով՝ արձակեմ Իսրայելի որդիներին։ Ես չեմ ճանաչում Տիրոջը և Իսրայելին չեմ արձակի»։ ³ Նրան ասացին. «Եբրայեցիների Աստվածը մեզ կանչել է իր մոտ։ Արդ, դեպի անապատ երեք օրվա ճանապարհ ունենք գնալու, որպեսզի զոհ մատուցենք Տիրոջը՝ մեր Աստծուն, այլապես մեզ մահ կամ սպանություն կարող է պատահել»։ ⁴ Եգիպտացիների արքան նրանց ասաց. «Ինչո՞ւ եք դուք, Մովսե՛ս և Ահարո՛ն, ժողովրդին կտրում իրենց գործից։ Ամեն մեկդ ձեր գործի՛ն գնացեք»։ ⁵ Եվ փարավոնն ասաց. «Ահա երկրիս մեջ խիստ բազմանում է այս ժողովուրդը. արդ նրանց գործից չկտրենք»։

⁶ Փարավոնն այդ օրը ժողովրդի գործավարներին ու դպիրներին հրամայեց՝ ասելով. ⁷ «Այդ մարդկանց այլևս հարդ չտաք աղյուս շինելու համար, ինչպես որ երեկ էր և նախանցյալ օրը։ Իրենք թող գնան ու իրենց համար հարդ հավաքեն։ ⁸ Սակայն աղյուսների քանակը, ինչպես որ միշտ կար, նույնքան պահանջե՛ք նրանցից և մի՛ պակասեցրեք, որովհետև պարապ են մնում և այդ պատճառով էլ աղաղակում են ու ասում. “Գնանք զոհ մատուցենք մեր Աստծուն”։ ⁹ Թող այդ մարդկանց գործը ծանրանա, որպեսզի դրանով զբաղվեն և ոչ թե դատարկ բաների մասին մտածեն»։ ¹⁰ Ժողովրդի գործավարներն ու դպիրները ճնշում էին նրանց. նրանք խոսեցին ժողովրդի հետ ու ասացին. «Այսպես է ասում փարավոնը. “Ձեզ այլևս հարդ չեմ տա։ ¹¹ Դուք ինքներդ գնացե՛ք, որտեղից ուզում եք, ձեզ համար հա՛րդ հավաքեք, բայց սահմանված չափից ոչինչ չպիտի պակասի”»։ ¹² Եվ ժողովուրդը սփռվեց եգիպտացիների երկրով մեկ, որպեսզի եղեգ հավաքի հարդ պատրաստելու համար։ ¹³ Իսկ գործավարներն ստիպում էին նրանց՝ ասելով. «Ձեր պատրաստածը պետք է հաստատված չափով լինի, այնքան, որքան պատրաստում էիք այն ժամանակ, երբ ձեզ հարդ էին տալիս»։ ¹⁴ Իսրայելի որդիներից նշանակված գործավարներն անգամ տանջանքի էին ենթարկվում փարավոնի վերակացուներից, որոնք ասում էին. «Ինչո՞ւ այնքան աղյուս չեք տալիս այսօր, որքան երեկ էր և առաջի օրը»։

¹⁵ Եվ Իսրայելի որդիներից նշանակված գործավարները բողոք բարձրացրին փարավոնի առաջ՝ ասելով. «Ինչո՞ւ ես այդպես վարվում քո ծառաների հետ։ ¹⁶ Քո ծառաներին հարդ չեն տալիս, բայց հրամայում են, որ աղյուս շինենք։ Ահա քո ծառաները տանջանքի մեջ են։ Անիրավում ես քո ժողովրդին»։ ¹⁷ Եվ նրանց ասաց. «Դուք ծույլ ու անբան մարդիկ եք, դրա համար էլ ասում եք. “Գնանք զոհ մատուցենք մեր Աստծուն”։ ¹⁸ Արդ, գնացեք աշխատե՛ք, որովհետև ոչ ոք ձեզ հարդ չի տալու, բայց դուք աղյուսի սահմանված քանակը պետք է տաք»։

¹⁹ Իսրայելի որդիներից նշանակված գործավարներն իրենք իրենց տեսան չարչարանքի մեջ և ասացին. «Ոչ ոք չի նվազեցնի մեր՝ աղյուս շինելու ամենօրյա քանակը»։ ²⁰ Նրանք հանդիպեցին Մովսեսին ու Ահարոնին, որոնք, փարավոնի մոտից ելնելով, գալիս էին դեպի իրենք։ ²¹ Եվ ասացին նրանց. «Թող Աստված տեսնի և դատի ձեզ, քանի որ մեր հոտը գարշելի դարձրիք փարավոնի ու նրա պաշտոնյաների աչքին և սուր տվեցիք նրա ձեռքը՝ մեզ կոտորելու»։

Մովսեսը գանգատվում է Աստծուն

²² Եվ Մովսեսը, դառնալով դեպի Տերը, ասաց. «Տե՛ր, ինչո՞ւ չարչարեցիր քո ժողովրդին և ինչո՞ւ ուղարկեցիր ինձ։ ²³ Այն բանից հետո, երբ մտա փարավոնի մոտ քո անունից խոսելու, չարչարեց ժողովրդին, և դու չփրկեցիր քո ժողովրդին»։

6

¹ Տերն ասաց Մովսեսին. «Հիմա կտեսնես, թե ի՛նչ եմ անելու փարավոնին։ Իմ հզոր ձեռքը կստիպի նրան ձեզ արձակել, և իմ բարձրացած բազուկը կստիպի նրան, որ ձեզ հանի իր երկրից»։

Աստված կանչում է Մովսեսին

² Աստված ասաց Մովսեսին. «Ես եմ Տերը, ³ որ երևացի Աբրահամին, Իսահակին ու Հակոբին։ Նրանց Աստվածն եմ, և իմ անունը Տեր է, բայց նրանց այդ չհայտնեցի։ ⁴ Ես իմ ուխտը հաստատեցի նրանց հետ՝ տալու նրանց քանանացիների երկիրը, որտեղ նրանք պանդուխտ եղան։ ⁵ Ես լսեցի Իսրայելի որդիների հեծեծանքը եգիպտացիների ճնշման պատճառով և հիշեցի ձեզ տված իմ ուխտը։ ⁶ Գնա՛ Իսրայելի որդիների մոտ ու ասա՛. “Ես՝ Տերը, ազատելու եմ ձեզ եգիպտացիների բռնությունից և հանելու եմ ձեզ նրանց ծառայությունից, փրկելու եմ ձեզ իմ հզոր բազկով ու նրանց մեծ պատիժներ հասցնելով։ ⁷ Ձեզ պիտի վերցնեմ որպես իմ ժողովուրդը և պիտի լինեմ ձեր Աստվածը, և պիտի իմանաք, որ ես՝ Տերը, ձեր Աստվածն եմ, որ ձեզ հանելու եմ եգիպտացիների բռնությունից ⁸ և ձեզ տանելու եմ այն երկիրը, որ երդվեցի տալ Աբրահամին, Իսահակին ու Հակոբին։ Այն ձեզ եմ տալու որպես ժառանգություն, որովհետև ես եմ Տերը”»։ ⁹ Մովսեսն այսպես խոսեց Իսրայելի որդիների հետ, բայց նրանք չլսեցին նրան կարճամտության և տաժանելի աշխատանքի պատճառով։

¹⁰ Եվ Տերը Մովսեսին ասաց. ¹¹ «Մտի՛ր ու խոսի՛ր եգիպտացիների արքա փարավոնի հետ, որ նա Իսրայելի որդիներին արձակի եգիպտացիների երկրից»։ ¹² Մովսեսը Տիրոջ առջև ասաց. «Ահա Իսրայելի որդիներն ինձ չլսեցին, փարավոնն ինչպե՞ս ինձ կլսի, հատկապես որ ես լավ խոսող մեկը չեմ»։ ¹³ Եվ Տերը խոսեց Մովսեսի ու Ահարոնի հետ և պատվիրեց նրանց ասել Իսրայելի որդիներին ու եգիպտացիների արքա փարավոնին, որ Իսրայելի որդիները դուրս պիտի գան եգիպտացիների երկրից։

Մովսեսի և Ահարոնի ազգաբանությունը

¹⁴ Նրանց ցեղերի ընտանիքների նահապետները սրանք են՝ Իսրայելի անդրանիկի՝ Ռուբենի որդիները՝ Ենովքը, Փաղղուսը, Ասրովնը ու Քարմին. սա է Ռուբենի ցեղը։

¹⁵ Շմավոնի որդիներն են Համուելը, Համինը, Ահովդը, Հաքինը, Սահառն ու Սավուղը, որը փյունիկուհուց էր ծնվել։ Սրանք Շմավոնի որդիների ընտանիքների նահապետներն են։

¹⁶ Սրանք են Ղևիի որդիների անունները, ըստ իրենց սերունդների՝ Գեթսոն, Կահաթ և Մերարի։ Ղևին ապրեց հարյուր երեսունյոթ տարի։ ¹⁷ Գեթսոնի որդիներն են Ղոբենին և Սեմեին. սրանք ընտանեկան տների նահապետներն են։ ¹⁸ Կահաթի որդիներն են Ամրամը, Իսահառը, Քեբրոնն ու Ոզիելը։ Կահաթն ապրեց հարյուր երեսուներեք տարի։ ¹⁹ Մերարիի որդիներն են Մոոլին ու Մուսին։ Սրանք Ղևիի նահապետական տներն են ըստ իրենց ընտանիքների։ ²⁰ Ամրամն իրեն կին առավ իր հորեղբոր դուստր Հովքաբեթին, որը նրան ծնեց Ահարոնին, Մովսեսին ու նրանց քույր Մարիամին։ Ամրամն ապրեց հարյուր երեսունյոթ տարի։ ²¹ Իսահառի որդիներն են Կորխը, Նափեգն ու Զեքրին։ ²² Ոզիելի որդիներն են Միսայելը, Ելիսափանն ու Սեթրին։ ²³ Ահարոնն իրեն կին առավ Ամինադաբի դուստր՝ Նաասովնի քույր Եղիսաբեթին, որը նրան ծնեց Նադաբին, Աբիուդին, Եղիազարին ու Իթամարին։ ²⁴ Կորխի որդիներն են Ասիրը, Եղկանան ու Բիասափը։ Սրանք Կորխի ծնունդներն են։ ²⁵ Ահարոնի որդի Եղիազարը իրեն կին առավ Փուտիելի դուստրերից, որը նրա համար ծնեց Փենեեսին։ Սրանք են ղևտացիների նահապետական տների իշխանները ըստ իրենց ընտանիքների։

Աստծու հրամանը Մովսեսին և Ահարոնին

²⁶ Այս Ահարոնն ու Մովսեսն էին, որոնց Աստված պատվիրեց Իսրայելի բոլոր որդիներին իրենց ողջ ունեցվածքով հանել եգիպտացիների երկրից։ ²⁷ Այս Ահարոնն ու Մովսեսն էին, որ խոսում էին եգիպտացիների արքա փարավոնի հետ՝ Եգիպտոսից հանելու Իսրայելի որդիներին, ²⁸ այն օրը, երբ Տերը եգիպտացիների երկրում խոսեց Մովսեսի հետ, ²⁹ ասաց. «Ես եմ Տերը։ Ասա՛ եգիպտացիների արքա փարավոնին այն ամենը, ինչ կասեմ քեզ»։ ³⁰ Եվ Մովսեսը Տիրոջ առջև ասաց. «Ահա ես ձայն չունեմ, փարավոնն ինձ ինչպե՞ս կլսի»։

7

¹ Տերն ասաց Մովսեսին. «Փարավոնի առջև հանդես կգաս իբրև աստված, իսկ քո եղբայր Ահարոնը թող լինի քո մարգարեն։ ² Դու Ահարոնին կհայտնես այն ամենը, ինչ կպատվիրեմ քեզ, իսկ քո եղբայր Ահարոնը թող խոսի փարավոնի հետ՝ Իսրայելի որդիներին արձակելու իր երկրից։ ³ Սակայն ես կկարծրացնեմ փարավոնի սիրտը և կբազմապատկեմ իմ նշաններն ու հրաշքները եգիպտացիների երկրում, ⁴ և փարավոնը չի լսի ձեզ. ես իմ ձեռքը կդնեմ Եգիպտոսի վրա և իմ զորությամբ իմ ժողովրդին՝ Իսրայելի որդիներին, կհանեմ եգիպտացիների երկրից՝ մեծապես վրեժխնդիր լինելով։ ⁵ Եվ եգիպտացիները կիմանան, որ ես եմ Տերը։ Ես իմ ձեռքը կերկարեմ Եգիպտոսի վրա և Իսրայելի որդիներին կհանեմ նրանց միջից»։ ⁶ Եվ Մովսեսն ու Ահարոնն արեցին այնպես, ինչպես Տերը պատվիրեց իրենց։

⁷ Մովսեսն ութսուն տարեկան էր, իսկ Ահարոնը՝ ութսուներեք, երբ նրանք խոսեցին փարավոնի հետ։

Ահարոնի գավազանը

⁸ Տերը Մովսեսին ու Ահարոնին ասաց. ⁹ «Եթե փարավոնը խոսի ձեզ հետ ու ասի՝ “Մեզ նշան կամ հրա՛շք ցույց տվեք”, այն ժամանակ քո եղբայր Ահարոնին կասես. “Ա՛ռ քո գավազանը, գետնի՛ն գցիր փարավոնի ու նրա պաշտոնյաների առաջ, և այն օձ կդառնա”»։

¹⁰ Մովսեսն ու Ահարոնը մտան փարավոնի մոտ և արեցին այնպես, ինչպես իրենց պատվիրել էր Տերը։ Ահարոնը գավազանը գցեց փարավոնի ու նրա պաշտոնյաների առաջ, և այն օձ դարձավ։ ¹¹ Փարավոնը կանչեց եգիպտացիների իմաստուններին ու կախարդներին։ Եգիպտացիների գիտունները նույնն արեցին իրենց կախարդությամբ։ ¹² Յուրաքանչյուրն իր գավազանը գցեց գետնին, և դրանք վիշապներ դարձան, բայց Ահարոնի գավազանը կուլ տվեց նրանց գավազանները։ ¹³ Սակայն փարավոնի սիրտը կարծրացավ, և նա չլսեց նրանց, ինչպես որ ասել էր Տերը։

Տասը հարվածները

1. Արյուն

¹⁴ Տերն ասաց Մովսեսին. «Փարավոնի սիրտը կարծրացել է, որ չարձակի ժողովրդին։ ¹⁵ Առավոտյան գնա՛ փարավոնի մոտ։ Երբ նա ելնի դեպի ջուրը, կանգնի՛ր նրա առջև՝ գետափին, քո ձեռքում բռնած այն գավազանը, որ օձ դարձավ։ ¹⁶ Եվ նրան կասես. “Տերը՝ եբրայեցիների Աստվածը, ուղարկել է ինձ քեզ մոտ՝ ասելով. “Արձակի՛ր իմ ժողովրդին, որ պաշտի ինձ անապատում”, թեև մինչև հիմա ինձ չլսեցիր։ ¹⁷ Տերն այսպես է ասում. “Բայց դու պիտի իմանաս, որ ես եմ Տերը. ահա ես իմ ձեռքի գավազանով կհարվածեմ գետի ջրին, և այն կվերածվի արյան։ ¹⁸ Եվ գետի մեջ եղած ձկները կսատկեն, գետը կնեխի, և եգիպտացիները չեն կարողանա գետից ջուր խմել”»։

¹⁹ Տերն ասաց Մովսեսին. «Ահարոնին ասա՛. “Վերցրո՛ւ գավազանդ և ձեռքդ երկարի՛ր Եգիպտոսի ջրերի վրա՝ նրանց գետերի վրա, նրանց լճերի վրա, նրանց ջրանցքների վրա, նրանց ջրակույտերի վրա, և ջուրը կվերածվի արյան։ Եվ արյուն կդառնա եգիպտացիների ողջ երկրում եղած փայտե ու քարե ամանների ջուրը”»։ ²⁰ Մովսեսն ու Ահարոնն արեցին այնպես, ինչպես իրենց պատվիրել էր Տերը. Ահարոնը փարավոնի ու նրա պաշտոնյաների առաջ, վեր բարձրացնելով իր գավազանը, հարվածեց գետի ջրին և գետի ողջ ջուրը արյուն դարձրեց։ ²¹ Գետում եղած ձկները սատկեցին, գետը նեխեց, և եգիպտացիները չէին կարողանում գետից ջուր խմել։ Եգիպտացիների ողջ երկրում արյուն էր։ ²² Իրենց կախարդությամբ նույնն արեցին նաև եգիպտացիների գիտունները։ Եվ փարավոնի սիրտը կարծրացավ, և ինչպես որ ասել էր Տերը, նա նրանց չլսեց։ ²³ Փարավոնը վերադարձավ, մտավ իր տուն, և իր միտքը սրանով ևս չփոխվեց։ ²⁴ Եվ բոլոր եգիպտացիները հորեր փորեցին գետի շուրջը, որպեսզի խմելու ջուր ունենան, որովհետև գետից չէին կարողանում ջուր խմել։

2. Գորտեր

²⁵ Եվ յոթ օր անցավ Տիրոջ կողմից գետը հարվածելուց հետո։ ²⁶ [9] Տերն ասաց Մովսեսին. «Մտի՛ր փարավոնի մոտ ու ասա՛ նրան. “Այսպես է ասում Տերը. “Արձակի՛ր իմ ժողովրդին, որ պաշտեն ինձ։ ²⁷ Իսկ եթե չկամենաս արձակել, ես քո ողջ երկիրը կհարվածեմ գորտեր լցնելով։ ²⁸ Գետը գորտեր կառաջացնի, որոնք ելնելով կմտնեն քո տները, քո սենյակների պահարանները, քո գահույքները, քո պաշտոնյաների ու քո ժողովրդի տները, քո թոնիրներն ու քո խմորի զանգվածների մեջ։ ²⁹ Գորտերը կբարձրանան նաև քեզ վրա, քո ժողովրդի ու քո պաշտոնյաների վրա”»։

8

¹ Եվ Տերն ասաց Մովսեսին. «Քո եղբայր Ահարոնին ասա՛. “Ձեռքով գավազանդ երկարի՛ր գետի վրա, ջրանցքների, ծանծաղուտների վրա և գորտե՛ր դուրս բեր եգիպտացիների երկրի վրա”»։ ² Ահարոնն իր ձեռքը երկարեց եգիպտացիների ջրերի վրա ու գորտեր դուրս բերեց։ Գորտը ելավ ու ծածկեց եգիպտացիների երկիրը։ ³ Իրենց կախարդություններով նույնն արեցին նաև եգիպտացի գիտունները և գորտեր հանեցին եգիպտացիների երկրի վրա։

⁴ Փարավոնը կանչեց Մովսեսին ու Ահարոնին և ասաց. «Աղոթե՛ք Տիրոջը, որ նա գորտերը հեռացնի ինձնից ու իմ ժողովրդից, և ես կարձակեմ ձեր ժողովրդին, և զոհ կմատուցեն Տիրոջը»։ ⁵ Մովսեսը փարավոնին ասաց. «Սահմանի՛ր ինձ, թե ե՛րբ աղոթեմ քեզ համար, քո պաշտոնյաների ու քո ժողովրդի համար, որպեսզի գորտերը չքանան քո, քո ժողովրդի մոտից ու ձեր տներից և մնան միայն գետում»։ ⁶ Նա ասաց. «Վաղը»։ Եվ սա ասաց. «Թող ասածիդ պես լինի, որ իմանաս, թե Տիրոջից՝ մեր Աստծուց բացի այլ աստված չկա։ ⁷ Եվ գորտերը կչքանան քո պալատներից, քո, քո ծառաների, քո ժողովրդի մոտից և կմնան միայն գետի մեջ»։ ⁸ Եվ Մովսեսն ու Ահարոնը դուրս ելան փարավոնի մոտից։ Մովսեսն աղաղակեց Տիրոջը, որպեսզի գորտերը հեռանան ըստ փարավոնի սահմանած ժամի։ ⁹ Տերն արեց այնպես, ինչպես խնդրել էր Մովսեսը։ Գորտերը վերացան տներից, բակերից ու դաշտերից։ ¹⁰ Դրանք հավաքեցին կույտ-կույտ, և երկիրը գարշահոտեց։ ¹¹ Երբ փարավոնը տեսավ, որ հանգստություն տիրեց, կարծրացավ նրա սիրտը, և չլսեց նրանց, ինչպես ասել էր Տերը։

3. Մժեղ

¹² Տերն ասաց Մովսեսին. «Ահարոնին ասա՛. “Ձեռքիդ գավազանը երկարի՛ր ու հարվածի՛ր գետնին, և եգիպտացիների ողջ երկրում մարդկանց ու անասունների վրա մժեղ կլինի”»։ Այդպես էլ արեցին. ¹³ Ահարոնն իր ձեռքով գավազանը երկարեց ու հարվածեց գետնին։ Եվ մժեղ եղավ մարդկանց, անասունների ու բոլոր հողակտորների վրա՝ եգիպտացիների ողջ երկրում։ ¹⁴ Իրենց կախարդություններով նույնը փորձեցին անել նաև եգիպտացի գիտունները, որպեսզի մժեղ հանեն, բայց չկարողացան։ Եվ մժեղը տարածվեց մարդկանց ու անասունների վրա։ ¹⁵ Եվ գիտուններն ասացին փարավոնին. «Սրա մեջ Աստծու մատը կա»։ Սակայն փարավոնի սիրտը կարծրացավ, և նա, ինչպես ասել էր Տերը, չլսեց նրանց։

4. Շնաճանճ

¹⁶ Տերն ասաց Մովսեսին. «Վաղ առավոտյան վե՛ր կաց, կանգնի՛ր փարավոնի առաջ, երբ նա դեպի ջուրը կգնա։ Եվ նրան կասես. “Այսպես է ասում Տերը. “Արձակի՛ր իմ ժողովրդին, որ պաշտեն ինձ։ ¹⁷ Իսկ եթե չկամենաս արձակել իմ ժողովրդին, ես շնաճանճեր կուղարկեմ քեզ վրա, քո պաշտոնյաների ու քո ժողովրդի վրա և ձեր տների վրա։ Եվ եգիպտացիների տներն ու նրանց բնակեցրած երկիրը կլցվեն շնաճանճերով։ ¹⁸ Նույն օրը փառավոր կդարձնեմ Գեսեմ երկիրը, որտեղ իմ ժողովուրդն է, և այնտեղ շնաճանճեր չեն լինի, որպեսզի իմանաս, որ ես եմ Տերը՝ ամբողջ երկրի Տերը։ ¹⁹ Եվ տարբերություն պիտի դնեմ իմ ժողովրդի և քո ժողովրդի միջև։ Վաղն իսկ շնաճանճը կտարածվի քո երկրում”»։ ²⁰ Տերն այդպես էլ արեց։ Բազում շնաճանճեր թափվեցին փարավոնի տների, նրա պաշտոնյաների տների ու եգիպտացիների ողջ երկրի վրա։ Եվ երկիրը շնաճանճերից ոչնչացավ։

²¹ Փարավոնը կանչեց Մովսեսին ու Ահարոնին և ասաց. «Գնացե՛ք և այստե՛ղ զոհ մատուցեք Տիրոջը՝ ձեր Աստծուն»։ ²² Մովսեսն ասաց. «Հնարավոր չէ այդպես անել, որովհետև եգիպտացիներին գայթակղեցնող կենդանիներ պիտի զոհենք Տիրոջը՝ մեր Աստծուն, և եթե եգիպտացիներին գայթակղեցնող կենդանիներ զոհենք նրանց առաջ, մեզ կքարկոծեն։ ²³ Այլ պետք է երեք օրվա ճանապարհ գնանք դեպի անապատ և զոհ մատուցենք Տիրոջը՝ մեր Աստծուն, ինչպես որ պատվիրել է մեզ Տերը»։ ²⁴ Փարավոնն ասաց. «Ես արձակում եմ ձեզ. անապատո՛ւմ զոհ մատուցեք Տիրոջը՝ ձեր Աստծուն, սակայն հեռու չգնաք։ Արդ, նաև ինձ համա՛ր աղոթեք Տիրոջը»։ ²⁵ Մովսեսն ասաց. «Ես քո մոտից կելնեմ և կաղոթեմ Աստծուն, և վաղն իսկ շնաճանճերը կչքանան փարավոնի, իր պաշտոնյաների ու իր ժողովրդի վրայից։ Միայն թե փարավոնը նորից չխաբի՝ չարձակելով ժողովրդին՝ Տիրոջը զոհ մատուցելու»։ ²⁶ Մովսեսը փարավոնի մոտից դուրս եկավ և աղոթեց Աստծուն։ ²⁷ Եվ Տերն արեց այնպես, ինչպես խնդրեց Մովսեսը. շնաճանճերը վերացրեց փարավոնի, նրա պաշտոնյաների ու ժողովրդի վրայից։ Մի շնաճանճ անգամ չմնաց։ ²⁸ Այս անգամ էլ փարավոնը կարծրացրեց իր սիրտը և չկամեցավ ժողովրդին արձակել։

9

5. Անասունների կոտորածը

¹ Տերն ասաց Մովսեսին. «Մտի՛ր փարավոնի մոտ ու նրան ասա՛. “Այսպես է ասում Տերը՝ եբրայեցիների Աստվածը. “Արձակի՛ր իմ ժողովրդին, որ պաշտեն ինձ։ ² Իսկ եթե չկամենաս արձակել իմ ժողովրդին և շարունակես պահել նրան, ³ Տիրոջ ձեռքը կիջնի դաշտերում գտնվող քո հոտերի վրա, ձիերի, էշերի, ուղտերի, արջառների ու ոչխարների վրա, և շատ մեծ կոտորած կլինի։ ⁴ Ես կզատորոշեմ եգիպտացիների հոտերը Իսրայելի որդիների հոտերից, և Իսրայելի որդիներից ոչինչ չի կորչի”»։ ⁵ Եվ Աստված ժամ նշանակեց ու ասաց. «Վաղն իսկ Տերը կիրագործի այդ բանը երկրի վրա»։ ⁶ Եվ Տերը հաջորդ օրն իսկ արեց այդ բանը. եգիպտացիների բոլոր անասունները սատկեցին, իսկ Իսրայելի որդիների ոչ մի անասուն չոչնչացավ։ ⁷ Թեև փարավոնը տեսավ, որ Իսրայելի որդիների ոչ մի անասուն չի ոչնչացել, կարծրացավ նրա սիրտը, և նա ժողովրդին չարձակեց։

6. Խոցեր

⁸ Տերը Մովսեսին ու Ահարոնին ասաց. «Ձեր լիքը ձեռքով հնոցի մոխի՛ր վերցրեք, և Մովսեսը փարավոնի ու նրա պաշտոնյաների առաջ այն դեպի երկինք թող ցանի։ ⁹ Եվ եգիպտացիների ողջ երկիրը կծածկվի փոշով։ Մարդկանց ու անասունների վրա խոցեր կառաջանան, մարդկանց ու անասունների վրա վերքեր կելնեն եգիպտացիների ողջ երկրով մեկ»։ ¹⁰ Նրանք հնոցի մոխիր վերցրին, և Մովսեսը փարավոնի առաջ այն դեպի երկինք ցանեց։ Եվ մարդկանց ու անասունների վրա խոցեր և այրվող վերքեր առաջացան։ ¹¹ Կախարդները խոցերի պատճառով չէին կարողանում Մովսեսի առաջ կանգնել, որովհետև խոցերը նաև նրանց վրա ելան ու եգիպտացիների ողջ երկրով մեկ։ ¹² Տերը կարծրացրեց փարավոնի սիրտը, և ինչպես ասել էր Տերը Մովսեսին, փարավոնը չլսեց նրանց։

7. Կարկուտ

¹³ Տերն ասաց Մովսեսին. «Վաղ առավոտյան կանգնի՛ր փարավոնի առաջ ու նրան ասա՛. “Այսպես է ասում Տերը՝ եբրայեցիների Աստվածը. “Արձակի՛ր իմ ժողովրդին, որ պաշտեն ինձ, ¹⁴ որովհետև այս անգամ ամեն տեսակ փորձանքներով պիտի պատուհասեմ նաև քեզ, քո պաշտոնյաներին ու քո ժողովրդին, որպեսզի իմանաս, որ ամբողջ աշխարհում ինձ նմանը չկա։ ¹⁵ Եթե իմ ձեռքը երկարելով՝ մահվամբ հարվածեմ քեզ ու քո ժողովրդին, կվերանաս երկրից։ ¹⁶ Ես քեզ խնայեցի այն բանի համար, որ քեզ ցույց տամ իմ զորությունը, և իմ անունը հռչակվի ողջ աշխարհում։ ¹⁷ Եվ դու տակավին պիտի շարունակես չարչարե՞լ իմ ժողովրդին։ ¹⁸ Ես ահա վաղն իսկ՝ հենց այս ժամին, այնպիսի սաստիկ կարկուտ պիտի տեղացնեմ, որպիսին դեռևս չի եղել Եգիպտոսում՝ իր գոյության օրվանից մինչև այսօր։ ¹⁹ Արդ, շտապի՛ր հավաքել քո անասունները և այն ամենը, ինչ ունես դաշտում, որովհետև դաշտում գտնվող ու դեռևս տուն չմտած մարդկանց ու անասունների վրա կարկուտ է թափվելու և ոչնչացնելու է նրանց”»։ ²⁰ Փարավոնի պաշտոնյաներից նա, ով վախեցավ Տիրոջ խոսքից, իր ծառաներին ու անասունները տուն արեց, ²¹ իսկ ով չանսաց Տիրոջ խոսքին, դաշտում թողեց իր ծառաներին ու անասունները։

²² Տերն ասաց Մովսեսին. «Ձեռքդ երկարի՛ր դեպի երկինք, և թող կարկուտ թափվի եգիպտացիների երկրի վրա, ինչպես նաև մարդկանց ու անասունների և եգիպտացիների երկրի դաշտերի բոլոր բույսերի վրա»։ ²³ Մովսեսը ձեռքը մեկնեց դեպի երկինք, և Տերը որոտ ու կարկուտ ուղարկեց, ու երկրի վրա սկսեց կրակ թափվել։ Տերը կարկուտ տեղացրեց եգիպտացիների ողջ երկրի վրա։ ²⁴ Կարկուտ էր և կարկուտի մեջ՝ բորբոքված կրակ։ Կարկուտն այնքան սաստիկ էր, որ նմանը չէր եղել եգիպտացիների ողջ երկրի վրա՝ այնտեղ մարդ բնակվելուց ի վեր։ ²⁵ Կարկուտը հարվածեց եգիպտացիների ողջ երկիրը, այն ամենը, ինչ դաշտում էր մնացել՝ մարդուց մինչև անասուն։ Կարկուտը հարվածեց դաշտում եղած ողջ բուսականությանը, ջարդուփշուր արեց դաշտում եղած բոլոր ծառերը։ ²⁶ Սակայն Իսրայելի որդիների ապրած Գեսեմ երկրում կարկուտ չտեղաց։ ²⁷ Փարավոնը կանչեց Մովսեսին ու Ահարոնին և ասաց նրանց. «Այս անգամ մեղանչեցի։ Տերն արդար է, իսկ ես ու իմ ժողովուրդը՝ ամբարիշտ։ ²⁸ Ինձ համար աղոթե՛ք Տիրոջը, որ Աստծու որոտը, կարկուտն ու կրակը դադարեն։ Եվ կարձակեմ ձեզ. այլևս այստեղ չեք մնա»։ ²⁹ Եվ Մովսեսն ասաց նրան. «Երբ դուրս գամ քաղաքից, ձեռքս կմեկնեմ առ Աստված, և որոտը կդադարի, կարկուտ ու անձրև այլևս չեն տեղա, որպեսզի դու համոզվես, որ երկիրը Տիրոջն է։ ³⁰ Բայց գիտեմ, որ դու և քո պաշտոնյաները դեռևս չեք վախենում Տիրոջից՝ Աստծուց»։ ³¹ Կտավատն ու գարին կարկտահարվեցին, որովհետև գարին հասած էր, կտավատը՝ սերմնակալած, ³² իսկ ցորենն ու հաճարը կարկտահար չեղան, որովհետև դեռ չէին հասունացել։

³³ Մովսեսը փարավոնի մոտից ելավ ու գնաց քաղաքից դուրս, ձեռքը մեկնեց Տիրոջը, և որոտն ու կարկուտը դադարեցին, ու երկրի վրա այլևս անձրև չտեղաց։ ³⁴ Երբ փարավոնը տեսավ, որ անձրևը, կարկուտն ու որոտը դադարել են, դարձյալ մեղանչեց. կարծրացրեց իր ու իր պաշտոնյաների սրտերը։ ³⁵ Եվ այսպիսով փարավոնի սիրտը կարծրացավ, ու նա չարձակեց Իսրայելի որդիներին, ինչպես հայտնել էր Տերը Մովսեսի միջոցով։

10

8. Մորեխներ

¹ Տերն ասաց Մովսեսին. «Մտի՛ր փարավոնի մոտ, որովհետև ես կարծրացրել եմ նրա ու նրա պաշտոնյաների սրտերը, որպեսզի իմ պատիժները հերթով թափվեն նրանց վրա, ² որպեսզի դուք պատմեք ձեր որդիներին ու ձեր որդիների որդիներին, թե ինչպե՛ս վարվեցի եգիպտացիների հետ և ի՛նչ հրաշքներ գործեցի, որպեսզի ճանաչեք, որ ես եմ Տերը»։

³ Մովսեսն ու Ահարոնը մտան փարավոնի մոտ և ասացին նրան. «Այսպես է ասում Տերը՝ եբրայեցիների Աստվածը. “Մինչև ե՞րբ չես պատկառելու ինձնից։ Արձակի՛ր իմ ժողովրդին, որպեսզի պաշտեն ինձ։ ⁴ Եվ եթե չկամենաս արձակել իմ ժողովրդին, վաղն իսկ՝ հենց այս ժամին, անթիվ-անհամար մորեխ կթափեմ քո տարածքների վրա։ ⁵ Դրանք կծածկեն ողջ երկրի երեսը, և դու չես կարողանա տեսնել երկիրը։ Դրանք կուտեն կարկուտից փրկվածը, կխժռեն բոլոր տունկերը, որ բուսել են երկրի վրա ձեզ համար։ ⁶ Քո տները, քո պաշտոնյաների տները և եգիպտացիների ողջ երկրի բոլոր տներն այնպես կլցվեն մորեխներով, որ ո՛չ ձեր հայրերը, ո՛չ էլ նրանց նախահայրերը երբեք չեն տեսել երկրի վրա՝ իրենց ծնված օրից մինչև այսօր”»։ Եվ Մովսեսը դուրս եկավ փարավոնի մոտից։

⁷ Փարավոնի պաշտոնյաները նրան ասացին. «Մինչև ե՞րբ պիտի տառապենք։ Արձակի՛ր մարդկանց, որպեսզի պաշտեն Տիրոջը՝ իրենց Աստծուն, թե՞ ցանկանում ես տեսնել, թե ինչպե՛ս է կործանվում Եգիպտոսը»։ ⁸ Եվ նրանք Մովսեսին ու Ահարոնին վերադարձրին փարավոնի մոտ։ Եվ նրանց ասաց. «Գնացեք պաշտե՛ք Տիրոջը՝ ձեր Աստծուն։ Սակայն ովքե՞ր են լինելու գնացողները»։ ⁹ Մովսեսն ասաց. «Գնալու ենք մեր երիտասարդներով ու ծերերով, մեր տղաներով ու դուստրերով, մեր արջառներով ու ոչխարներով, որովհետև Տիրոջ՝ մեր Աստծու տոնն է»։ ¹⁰ Եվ նրանց ասաց. «Թող այդպես լինի։ Տերը ձեզ հետ։ Պատրաստ եմ ձեզ արձակելու, բայց ոչ ձեր ունեցվածքը։ Երևում է, որ չար մտադրություն ունեք։ ¹¹ Այդպես չի լինի, այլ միայն տղամարդիկ թող գնան և պաշտեն Աստծուն, քանի որ այդքան ուզում եք»։ Եվ նրանց վռնդեցին փարավոնի մոտից։

¹² Տերն ասաց Մովսեսին. «Ձեռքդ մեկնի՛ր եգիպտացիների երկրի վրա, և մորեխ կելնի եգիպտացիների երկրի վրա և կուտի երկրի այն ողջ բուսականությունն ու ծառերի պտուղները, որ փրկվել են կարկուտից»։ ¹³ Մովսեսը ձեռքը մեկնեց դեպի երկինք, և Տերը մի ամբողջ ցերեկ ու գիշեր հարավային հողմ բարձրացրեց երկրի վրա։ Երբ առավոտ եղավ, հարավային հողմն առավ մորեխն ¹⁴ ու ցրեց եգիպտացիների ողջ երկրի վրա ու սփռեց նրա տարածքների վրա։ Դրանից առաջ այդքան մորեխ չէր եղել և ոչ էլ դրանից հետո։ ¹⁵ Մորեխը ծածկեց ողջ երկիրը, և երկիրն ապականվեց։ Կերավ երկրի ողջ բուսականությունն ու ծառերի պտուղները, որ փրկվել էին կարկուտից։ Եգիպտացիների ողջ երկրում կանաչ բան չմնաց ո՛չ ծառերի, ո՛չ էլ դաշտային տունկերի վրա։

¹⁶ Փարավոնը շտապ կանչեց Մովսեսին ու Ահարոնին և ասաց. «Մեղանչեցի Տիրոջ՝ ձեր Աստծու և ձեր առաջ։ ¹⁷ Արդ, ներե՛ք իմ այս հանցանքը ևս և աղաչե՛ք Տիրոջը՝ ձեր Աստծուն, որ ինձ ազատի այս մորեխներից»։ ¹⁸ Մովսեսը ելավ փարավոնի մոտից և աղոթքի կանգնեց առ Աստված։ ¹⁹ Աստված ծովի կողմից սաստիկ հողմ բարձրացրեց. հողմն առավ մորեխն ու լցրեց Կարմիր ծովը։ Եվ եգիպտացիների ողջ երկրում մորեխ չմնաց։ ²⁰ Տերը կարծրացրեց փարավոնի սիրտը, և նա չարձակեց Իսրայելի որդիներին։

9. Թանձրամած խավար

²¹ Տերն ասաց Մովսեսին. «Ձեռքդ մեկնի՛ր դեպի երկինք, և եգիպտացիների երկրի վրա խավար կտիրի, թանձրամած խավար»։ ²² Մովսեսը ձեռքը մեկնեց դեպի երկինք, և եգիպտացիների ողջ երկրի վրա երեք օր խավար, մեգ ու մութ եղավ։ ²³ Ոչ ոք եղբորը երեք օր չտեսավ, երեք օր ոչ ոք իր անկողնուց չելավ, մինչդեռ Իսրայելի բոլոր որդիների բոլոր բնակավայրերում լույս էր։

²⁴ Փարավոնը կանչեց Մովսեսին ու Ահարոնին և ասաց նրանց. «Գնացեք պաշտե՛ք Տիրոջը՝ ձեր Աստծուն, բայց ձեր արջառն ու ոչխարը թողե՛ք այստեղ, իսկ մնացածը թող գա ձեզ հետ»։ ²⁵ Մովսեսն ասաց. «Ողջակիզության ու զոհաբերության անասուններ էլ դու պիտի տաս մեզ, որ մատուցենք Տիրոջը՝ մեր Աստծուն։ ²⁶ Մեր անասուններն էլ մեզ հետ պիտի գնան. մենք մի կճղակ անգամ չենք թողնելու այստեղ, որովհետև Տիրոջը՝ մեր Աստծուն, դրանցից պիտի զոհ մատուցենք։ Մինչև մեր այնտեղ հասնելը մենք դեռ չգիտենք, թե ի՛նչ պիտի զոհաբերենք Տիրոջը՝ մեր Աստծուն»։ ²⁷ Տերը կարծրացրեց փարավոնի սիրտը, և փարավոնը չկամեցավ արձակել նրանց։ ²⁸ Փարավոնն ասաց. «Հեռացի՛ր ինձնից. զգո՛ւյշ եղիր, այլևս չհամարձակվես իմ աչքին երևալ, որովհետև որ օրը երևաս ինձ, կմեռնես»։ ²⁹ Իսկ Մովսեսը պատասխանեց. «Ինչպես ասացիր. այլևս ինձ չես տեսնի»։

11

10. Անդրանիկների մահը

¹ Եվ Տերն ասաց Մովսեսին. «Մի պատուհաս էլ պիտի հասցնեմ փարավոնին ու Եգիպտոսին, որից հետո փարավոնը ձեզ կարձակի այստեղից։ Եվ երբ ձեզ արձակի, ձեզ կվռնդի ամեն ինչով։ ² Արդ, ժողովրդին գաղտնի հայտնի՛ր, որ յուրաքանչյուր ոք իր ընկերոջից և յուրաքանչյուր կին իր հարևանուհուց ոսկյա և արծաթյա իրեր ու զգեստներ թող փոխ առնեն»։ ³ Տերը շնորհ պարգևեց իր ժողովրդին եգիպտացիների առաջ, և զարդեր տվեցին նրանց։ Մովսեսը եգիպտացիների, փարավոնի, նրա բոլոր պաշտոնյաների առաջ ու ժողովրդի աչքին շատ պատկառելի դարձավ։

⁴ Մովսեսն ասաց. «Այսպես է ասում Տերը. “Կեսգիշերին ես կմտնեմ Եգիպտոս, ⁵ և եգիպտացիների երկրում կմեռնեն բոլոր անդրանիկները՝ իր գահին բազմած փարավոնի անդրանիկից մինչև երկանքի մոտ աշխատող աղախնի անդրանիկն ու բոլոր անասունների առաջնածինները։ ⁶ Եգիպտացիների ողջ երկրում այնպիսի մեծ աղաղակ կբարձրանա, որի նմանը չի եղել և չի էլ լինի։ ⁷ Բայց Իսրայելի որդիների մոտ մի շուն անգամ չի հաչա մարդու կամ անասունի վրա, և այդպիսով կիմանաք, որ Տերը սքանչելիքներ անելով Իսրայելին զատեց եգիպտացիներից։ ⁸ Եվ քո բոլոր ծառաները պիտի գան ինձ մոտ և երկրպագեն ինձ ու ասեն. “Ելի՛ր դու և քո ողջ ժողովուրդը, որին դու ես առաջնորդում”։ Եվ այդ ժամանակ կելնենք»։

Մովսեսը խիստ զայրացած ելավ փարավոնի մոտից։ ⁹ Եվ Տերն ասաց Մովսեսին. «Փարավոնը ձեզ չի լսի, որպեսզի ես եգիպտացիների երկրում նշաններ ու հրաշքներ անեմ»։ ¹⁰ Մովսեսն ու Ահարոնը այս բոլոր նշաններն ու հրաշքներն արեցին եգիպտացիների երկրում՝ փարավոնի առաջ։ Տերը կարծրացրեց փարավոնի սիրտը, և չկամեցավ Իսրայելի որդիներին արձակել եգիպտացիների երկրից։

12

Զատիկը

(Բ Օր. 16.1-2, 4-7)

¹ Տերը եգիպտացիների երկրում Մովսեսին ու Ահարոնին ասաց. ² «Այս ամիսը թող ձեզ համար ամիսների սկիզբը լինի. այն թող տարվա առաջին ամիսը լինի։ ³ Խոսի՛ր Իսրայելի որդիների ողջ ժողովրդի հետ՝ ասելով. “Այս ամսի տասներորդ օրը ամեն մարդ թող մի գառ առնի իր ընտանիքի համար՝ ամեն մի տան համար մի գառ։ ⁴ Եթե մի տանը քիչ են, որ չեն կարող մեկ գառ ուտել, ապա թող կանչեն իրենց հարևանին կամ ընկերոջն այն հաշվով, որ բավարար լինեն գառի համար։ ⁵ Գառը կատարյալ, արու, մեկ տարեկան ու առանց արատի պիտի լինի՝ ոչխարներից կամ այծերից։ ⁶ Այն կպահեք մինչև այս ամսի տասնչորսերորդ օրը, և Իսրայելի որդիները այն թող մորթեն երեկոյան։ ⁷ Թող վերցնեն նրա արյունից ու քսեն այն տան դռան երկու սյուներին ու բարավորին, որտեղ այն ուտելու են։ ⁸ Այդ գիշեր թող ուտեն միսը՝ կրակի վրա խորոված, բաղարջ հացով ու դառը խոտերով։ ⁹ Դրանցից հում կամ խաշած չուտեք, այլ կրակի վրա խորովելով։ Կուտեք նաև գլուխը, ոտքերն ու փորոտիքը։ ¹⁰ Առավոտյան դրանից ոչինչ թող չմնա։ Եվ ոչխարի ոսկորները մի՛ ջարդեք, ու ինչ որ ավելանա առավոտյան, կրակով կայրեք։ ¹¹ Կուտեք այսպես. ձեր գոտիները թող ձեր մեջքին լինեն, ձեր կոշիկները՝ ձեր ոտքերին, ձեր ցուպերը՝ ձեր ձեռքին։ Արագ կուտեք, որովհետև Տիրոջ զատիկն է։ ¹² Այդ գիշեր ես պիտի անցնեմ եգիպտացիների ողջ երկրով և պիտի հարվածեմ եգիպտացիների երկրի բոլոր անդրանիկներին՝ մարդկանցից մինչև անասուն։ Եվ եգիպտացիների բոլոր աստվածներից վրեժ պիտի լուծեմ, որովհետև ես եմ Տերը։ ¹³ Եվ նշված արյունը այն տների վրա, որտեղ ուտելու եք, թող ձեր նշանը լինի։ Եվ տեսնելով այդ արյունը՝ պիտի խնայեմ ձեզ, և ձեր գլխին մահաբեր հարվածներ չեն իջնի, երբ հարվածեմ եգիպտացիների երկիրը։ ¹⁴ Այդ օրը ձեզ համար հիշատակի օր թող լինի, և դուք իբրև Տիրոջ տո՛ն տոնեք այն սերնդեսերունդ, որպես հավիտենական օրե՛նք տոնեք այն”»։

Բաղարջակերաց տոնը

(Ելք 23.15–34.18, Բ Օր. 16.3-4ա, 8)

¹⁵ «Յոթ օր բաղարջ հաց կուտեք. առաջին իսկ օրից ձեր տնից կվերացնեք թթխմորը։ Բոլոր նրանք, ովքեր առաջին օրից մինչև յոթերորդ օրը թթխմորով հաց կուտեն, թող վերանան Իսրայելի միջից։ ¹⁶ Առաջին օրը թող սուրբ հռչակվի։ Թող սուրբ լինի նաև յոթերորդ օրը։ Այդ օրերին ոչ մի աշխատանք չկատարեք, այլ կատարեք միայն ա՛յն, ինչ կապված է յուրաքանչյուր մարդու անձնական կարիքների հետ։ ¹⁷ Իմ այս պատվիրանները կպահեք, քանի որ այդ օրը ձեր բանակը հանելու եմ եգիպտացիների երկրից։ Այդ օրը, իբրև հավիտենական օրենք, կնշեք սերնդեսերունդ։ ¹⁸ Առաջին ամսվա տասնչորսերորդ օրվա երեկոյից սկսած՝ բաղարջ հաց կուտեք մինչև ամսի քսանմեկերորդ օրվա երեկոն։ ¹⁹ Յոթ օր ձեր տներում թթխմոր չպիտի լինի։ Բոլոր նրանք, ովքեր թթխմորով հաց կուտեն, թող վերանան Իսրայելի միջից։ Ձեր երկիր եկած եկվորներ լինեն թե տեղաբնակներ, ²⁰ ոչ ոք թթխմորով հաց թող չուտի։ Ձեր բոլոր բնակավայրերում բաղարջ հաց պիտի ուտեք»։

Առաջին Զատիկը

²¹ Մովսեսը կանչեց Իսրայելի որդիների ողջ ավագանուն ու նրանց ասաց. «Գնացե՛ք, ձեր յուրաքանչյուր ընտանիքի համար մի գա՛ռ առեք և մորթե՛ք զատկի համար։ ²² Վերցրե՛ք մի մշտիկ, դռան մոտ այն թաթախե՛ք արյան մեջ և դրանով նշա՛ն արեք դռան երկու սյուներին ու բարավորին։ Բայց ձեզնից ոչ ոք մինչև առավոտ իր տան դռնից թող դուրս չգա։ ²³ Տերն անցնելու է եգիպտացիներին կոտորելու համար։ Նա, տեսնելով դռան բարավորի և երկու սյուների վրայի արյունը, կանցնի այդ դռան մոտով և ոչնչացնողին թույլ չի տա մտնել ձեր տներն ու կոտորել ձեզ։ ²⁴ Կատարե՛ք այս ամենը, և այն թող հավիտենական օրենք լինի ձեզ և ձեր որդիների համար մինչև հավիտյան։ ²⁵ Եվ եթե մտնեք այն երկիրը, որ Տերը, ինչպես որ խոստացել է, տալու է ձեզ, կկատարեք այդ ծեսը։ ²⁶ Եվ եթե պատահի, որ ձեր որդիները հարցնեն ձեզ, թե՝ “Ի՞նչ է այս ծեսը”, ²⁷ նրանց կասեք, որ սա Տիրոջ համար զատկի զոհն է, երբ Եգիպտոսում խնայեց Իսրայելի որդիների տները, մինչ հարվածում էր եգիպտացիներին, և մեր տները փրկեց»։ Եվ ժողովուրդը խոնարհվեց ու երկրպագեց։ ²⁸ Իսրայելի որդիները գնացին ու արեցին այնպես, ինչպես Տերը պատվիրել էր Մովսեսին ու Ահարոնին։

Անդրանիկների մահը

²⁹ Կեսգիշեր եղավ, և Տերը հարվածեց եգիպտացիների երկրի բոլոր անդրանիկներին՝ փարավոնի գահաժառանգ անդրանիկից մինչև բանտարկված գերու անդրանիկը, նաև անասունների բոլոր առաջնածիններին։ ³⁰ Գիշերը վեր կացավ փարավոնը, ինչպես նաև նրա բոլոր պաշտոնյաներն ու բոլոր եգիպտացիները։ Եգիպտացիների ողջ երկրում մեծ աղաղակ բարձրացավ, որովհետև տուն չկար, որտեղ մահացած մեկը չլիներ։

³¹ Փարավոնը գիշերով կանչեց Մովսեսին ու Ահարոնին և ասաց նրանց. «Վե՛ր կացեք և հեռացե՛ք իմ ժողովրդից, և՛ դուք, և՛ Իսրայելի որդիները. գնացեք պաշտե՛ք Տիրոջը՝ ձեր Աստծուն, ինչպես որ ասացիք։ ³² Ձեզ հետ վերցնելով ձեր արջառն ու ոչխարը՝ գնացե՛ք, ինչպես որ ասացիք, բայց ի՛նձ էլ օրհնեցեք»։ ³³ Եվ եգիպտացիներն ստիպում էին նրանց շուտ հեռանալ երկրից, որովհետև ասում էին. «Բոլորս էլ կմեռնենք»։

³⁴ Ժողովուրդն իր հունցած, բայց դեռևս չհասած խմորը շորերի մեջ փաթաթելով՝ ուսն առավ։ ³⁵ Իսրայելի որդիներն արեցին այնպես, ինչպես իրենց հրամայել էր Մովսեսը. եգիպտացիներից խնդրեցին ոսկյա և արծաթյա իրեր ու զգեստներ։ ³⁶ Եվ Տերը շնորհ արեց իր ժողովրդին եգիպտացիների առաջ, և զարդեր տվեցին նրանց. այսպես կողոպտեցին եգիպտացիներին։

Իսրայելացիները հեռանում են Եգիպտոսից

³⁷ Եվ Իսրայելի որդիները՝ վեց հարյուր հազար հետիոտն այր, չհաշված կանանց ու երեխաներին, Ռամեսեից մեկնեցին դեպի Սոկքովթ։ ³⁸ Նրանց հետ ճանապարհ ընկավ մի խառն բազմություն, իրենց հետ նաև մեծ քանակությամբ արջառ, ոչխար ու անասուն։ ³⁹ Նրանք Եգիպտոսից հանած ու դեռ չհասունացած խմորով բաղարջ հաց եփեցին, որովհետև այն դեռ չէր խմորվել, քանի որ եգիպտացիները երկրից հանել էին իրենց, և իրենք չէին կարողացել սպասել ու իրենց համար ճանապարհի պաշար չէին պատրաստել։

⁴⁰ Իսրայելի որդիներն իրենք ու իրենց հայրերը քանանացիների երկրում և եգիպտացիների երկրում ապրեցին չորս հարյուր երեսուն տարի։ ⁴¹ Երբ չորս հարյուր երեսուն տարին լրացավ, նույն օրն իսկ Տիրոջ ամբողջ ժողովուրդը գիշերով եգիպտացիների երկրից դուրս եկավ։ ⁴² Տերն այն գիշեր անքուն մնաց, որպեսզի նրանց դուրս բերի եգիպտացիների երկրից. դրա համար այդ գիշերը Իսրայելի որդիների համար սերնդեսերունդ պիտի լինի հսկումի գիշեր։

Զատկի տոնակատարության կարգը

⁴³ Տերը Մովսեսին ու Ահարոնին ասաց. «Սա է զատկի կարգը. ոչ մի օտարական չպիտի ուտի դրանից։ ⁴⁴ Որևէ մեկի ծառան ու փողով գնված ստրուկը կարող է ուտել, եթե նախ թլփատվի։ ⁴⁵ Պանդուխտն ու վարձկանը թող չուտեն դրանից։ ⁴⁶ Տան մեջ պետք է ուտվի այն. միսը տնից դուրս չպիտի հանեք և դրա ոսկորը չպիտի ջարդեք։ ⁴⁷ Իսրայելի ողջ ժողովուրդը պետք է կատարի դա։ ⁴⁸ Եթե մի օտարական մոտենա ձեզ և ցանկանա կատարել Տիրոջ զատիկը, նախ պետք է թլփատվեն նրա բոլոր արու զավակները, և ապա միայն նա կարող է մոտենալ՝ կատարելու այն, ինչպես տեղաբնակը։ Ոչ մի անթլփատ դրանից չպետք է ուտի։ ⁴⁹ Օրենքը նույնն է և՛ տեղաբնակի, և՛ ձեզ մոտ ապրել ցանկացող օտարականի համար»։ ⁵⁰ Եվ Իսրայելի բոլոր որդիներն արեցին այնպես, ինչպես պատվիրել էր Տերը Մովսեսին ու Ահարոնին։ ⁵¹ Ճիշտ այդ օրը Տերը Իսրայելի որդիներին իրենց բանակով հանեց եգիպտացիների երկրից։

13

Անդրանիկները Տիրոջն են պատկանում

¹ Տերը Մովսեսին ասաց. ² «Ինձ նվիրաբերի՛ր բոլոր արու անդրանիկներին, որոնք բացում են արգանդը Իսրայելի որդիների մեջ, մարդուց մինչև անասուն, որովհետև անդրանիկը իմն է»։

Բաղարջակերաց տոնը

³ Մովսեսն ասաց ժողովրդին. «Հիշե՛ք այս օրը, երբ դուք դուրս եկաք Եգիպտոսից՝ ստրկության այս տնից, որովհետև Տերն իր հզոր ձեռքով ձեզ հանեց այստեղից։ Այս օրը թթխմորով հաց չպիտի ուտեք, ⁴ որովհետև դուք ելնում եք այսօր՝ Կանխոց [*  Ավիվ] ամսին։ ⁵ Երբ Տերը՝ քո Աստվածը, քեզ տանի քանանացիների, քետացիների, ամորհացիների, խևացիների, հեբուսացիների, փերեզացիների ու գերգեսացիների երկիրը, որ քո հայրերին խոստացավ տալ քեզ, որ կաթ ու մեղր է բխեցնում, այս ամսին այդ ծեսը կանես։ ⁶ Վեց օր բաղարջ կուտեք, և յոթերորդ օրը Տիրոջ տոնն է. բաղարջ կուտեք։ ⁷ Յոթ օր ձեր տանը թթխմորով հաց չլինի. քո ողջ երկրի սահմաններում թթխմոր թող չլինի։ ⁸ Այդ օրը քո որդուն կպատմես, թե ի՛նչ է արել Տերը՝ Աստված, Եգիպտոսից ելնելիս։ ⁹ Այն թող նշան լինի քո ձեռքի վրա և Հիշատակ[10]՝ քո աչքերի առաջ, որպեսզի Տիրոջ օրենքը լինի քո բերանին, որովհետև Տերն իր հզոր ձեռքով հանեց քեզ Եգիպտոսից։ ¹⁰ Սա կատարե՛ք ամեն տարի՝ իր ժամանակին»։

Անդրանիկները Տիրոջն են պատկանում

¹¹ «Երբ Տերը՝ քո Աստվածը, բերի քեզ քանանացիների երկիրը, ինչպես խոստացել է քո հայրերին, և այն տա քեզ, ¹² Տիրոջ համար կառանձնացնես արգանդ բացող ամեն մի արու, և ամեն ինչ, որ բացում է արգանդը, լինի քո նախրից թե այլ անասուններից. արուները կնվիրաբերես Տիրոջը։ ¹³ Ամեն մի արգանդ բացող էշ պիտի փոխանակես մի ոչխարով, իսկ եթե չցանկանաս փոխանակել, կարող ես այն վերագնել [*  ծոծրակը կոտրի՛ր]։ Քո որդիների բոլոր անդրանիկներին պետք է փրկագնես։ ¹⁴ Եթե երբևէ որդիդ հարցնի քեզ ու ասի, թե՝ “Ի՞նչ է այս”, նրան կասես. “Տերը հզոր ձեռքով հանեց մեզ եգիպտացիների երկրից՝ ստրկության տնից։ ¹⁵ Երբ փարավոնի սիրտը կարծրացավ, ու մեզ չարձակեց, Տերը եգիպտացիների երկրում կոտորեց բոլոր անդրանիկներին՝ մարդուց մինչև անասունների առաջնածինները։ Այդ պատճառով էլ ես Տիրոջն եմ նվիրաբերում ամեն մի արուի, որ արգանդ է բացում, և իմ որդիներից բոլոր անդրանիկներին փրկագին պետք է տամ”։ ¹⁶ Եվ դա թող լինի նշան ձեր ձեռքի վրա և հաստատուն՝ ձեր աչքերի առաջ, որովհետև Տերն իր հզոր ձեռքով հանեց մեզ Եգիպտոսից»։

Ամպի և կրակի սյունը

¹⁷ Երբ փարավոնն արձակեց ժողովրդին, Աստված նրանց կարճ ճանապարհով փղշտացիների երկիր չառաջնորդեց, որովհետև Աստված մտածեց, թե ժողովուրդը կարող է վախենալ պատերազմից ու վերադառնալ Եգիպտոս։ ¹⁸ Դրա համար Աստված ժողովրդին շրջանցիկ՝ անապատի ճանապարհով տարավ դեպի Կարմիր ծով։ Իսրայելի որդիները եգիպտացիների երկրից դուրս եկան հինգերորդ սերնդի ժամանակ։ ¹⁹ Մովսեսն իր հետ տարավ Հովսեփի ոսկորները, որովհետև Հովսեփը երդվեցրել էր Իսրայելի որդիներին՝ ասելով. «Երբ Տերը ձեզ այցի գա, իմ ոսկորները ձեզ հետ կհանեք այստեղից»։

²⁰ Սոկքովթից ելնելով՝ Իսրայելի որդիները բանակեցին Ոթոմում՝ անապատի եզրին։ ²¹ Աստված առաջնորդում էր նրանց. ցերեկը ամպի սյունով էր ցույց տալիս ճանապարհը, իսկ գիշերը՝ հրե սյունով, որպեսզի նրանց լուսավորի, և գիշեր-ցերեկ գնան։ ²² Ցերեկը ամպի սյունը, իսկ գիշերը հրե սյունը երբեք չէր անհայտանում Իսրայելի որդիների առջևից։

14

Անցում Կարմիր ծովով

¹ Տերն ասաց Մովսեսին. ² «Խոսի՛ր Իսրայելի որդիների հետ, որ վերադառնան և բանակեն Մագդովղի ու ծովի միջև գտնվող Հանգրվանում [*  Պի հախիրոտ]՝ Բեեղսեպփովնի դիմաց։ Դրա դիմաց՝ ծովեզերքին, թող բանակեն։ ³ Եվ փարավոնը կասի իր ժողովրդին. “Իսրայելի որդիները մոլորվել են երկրում, քանի որ անապատը շրջափակել է նրանց”։ ⁴ Ես պիտի կարծրացնեմ փարավոնի սիրտը. նա պիտի հետապնդի նրանց, և պիտի փառավորվեմ փարավոնի ու նրա ողջ զորքի միջոցով։ Եվ բոլոր եգիպտացիները պիտի իմանան, որ ես եմ Տերը»։ Եվ արեցին այդպես։

⁵ Եգիպտացիների արքային հայտնեցին, որ ժողովուրդը փախել է։ Փարավոնն ու նրա պաշտոնյաները զղջացին և ասացին. «Այս ի՞նչ արեցինք. ինչո՞ւ արձակեցինք Իսրայելի որդիներին, որ այլևս չեն ծառայելու մեզ»։ ⁶ Եվ փարավոնը ⁷ լծեց իր կառքերն ու իր հետ վերցրեց իր բոլոր մարտիկներին։ Վերցրեց վեց հարյուր ընտիր կառքեր, եգիպտացիների ողջ հեծելազորն ու սպառազեն մարդկանց։ ⁸ Տերը կարծրացրեց եգիպտացիների արքա փարավոնի սիրտը, և նա հետապնդեց Իսրայելի որդիներին։ Իսկ Իսրայելի որդիները գնում էին Բարձր ձեռքի առաջնորդությամբ։ ⁹ Եգիպտացիները հետապնդեցին նրանց ու նրանց գտան ծովեզերքի մոտ բանակած։ Փարավոնի ողջ հեծելազորն ու կառքերը, նրա հեծյալներն ու բանակը կանգնեցին Հանգրվանի մոտ՝ Բեեղսեպփովնի դիմաց։

¹⁰ Փարավոնը մոտեցավ։ Իսրայելի որդիները, բարձրացնելով աչքերը, տեսան, որ եգիպտացիները գալիս են իրենց հետևից, և սաստիկ վախեցան։ Եվ Իսրայելի որդիներն աղաղակեցին առ Աստված ¹¹ ու ասացին Մովսեսին. «Եգիպտացիների երկրում գերեզմաններ չկայի՞ն, որ հանեցիր մեզ անապատում սպանվելու։ Այս ի՞նչ արեցիր մեզ հետ՝ հանելով մեզ Եգիպտոսից։ ¹² Մի՞թե եգիպտացիների երկրում քեզ չասացինք. “Թո՛ւյլ տուր, որ ծառայենք եգիպտացիներին”։ Մեզ համար ավելի լավ էր ծառայել եգիպտացիներին, քան մեռնել այս անապատում»։ ¹³ Եվ Մովսեսն ասաց ժողովրդին. «Քաջալերվե՛ք, պի՛նդ կացեք և կտեսնեք փրկությունը Տիրոջից, որ անելու է ձեզ համար այսօր, քանի որ այնպես, ինչպես այսօր կտեսնեք եգիպտացիներին, այլևս հավիտյանս չեք տեսնի։ ¹⁴ Տե՛րը պիտի պատերազմի ձեր փոխարեն, իսկ դուք լռե՛ք»։

¹⁵ Տերն ասաց Մովսեսին. «Ինչո՞ւ ես կանչում ինձ։ Ասա՛ Իսրայելի որդիներին, որ գնան։ ¹⁶ Իսկ դու ա՛ռ գավազանդ, ձեռքդ մեկնի՛ր ծովի վրա, ճեղքի՛ր այն, և Իսրայելի որդիները թող մտնեն ծովն ու անցնեն ցամաքով։ ¹⁷ Ես կկարծրացնեմ փարավոնի և բոլոր եգիպտացիների սրտերը, և կգան դրանց հետևից, ու ես կփառավորվեմ փարավոնի, նրա ամբողջ զորքի, կառքերի ու հեծելազորի առաջ։ ¹⁸ Եվ բոլոր եգիպտացիները կիմանան, որ ես եմ Տերը, երբ փառավորվեմ փարավոնի, նրա կառքերի ու հեծելազորի առաջ»։

¹⁹ Եվ Իսրայելի որդիների բանակի առջևից գնացող Աստծու հրեշտակն անցավ նրանց հետևը։ Նրանց առջևից վեր բարձրացավ նաև ամպի սյունն ու կանգնեց նրանց թիկունքին, ²⁰ ապա մտավ եգիպտացիների ու Իսրայելի բանակների միջև։ Խավար ու մեգ եղավ։ Գիշերն անցավ, բայց ողջ գիշեր բանակներն իրար չմոտեցան։

²¹ Մովսեսը ձեռքը մեկնեց ծովի վրա, և Տերը հարավային հողմի ուժով ողջ գիշեր ծովը հետ մղեց և ծովը ցամաք դարձրեց՝ պատռելով ջուրը։ ²² Իսրայելի որդիները մտան ծովի մեջ, ինչպես ցամաքի, ու ջուրը նրանց աջ ու ձախ կողմերից պարիսպ դարձավ։

²³ Եգիպտացիները հետապնդեցին, և փարավոնի ամբողջ հեծելազորը, նրա կառքերն ու հեծյալները նրանց հետևից մտան ծովը։ ²⁴ Առավոտյան Տերը հրի ու ամպի սյան միջով նայեց եգիպտացիների բանակին և խուճապի մատնեց եգիպտացիների բանակը։ ²⁵ Նա կապեց նրանց կառքերի անիվները, և սկսեցին դժվարությամբ շարժվել։ Եգիպտացիներն ասացին. «Հեռո՛ւ փախչենք Իսրայելի որդիներից, որովհետև Տերն է նրանց փոխարեն պատերազմում եգիպտացիներիս դեմ»։

²⁶ Եվ Տերն ասաց Մովսեսին. «Ձեռքդ մեկնի՛ր ծովի վրա, և ջրերը թող վերամիանան ու ծածկեն եգիպտացիներին, նրանց կառքերն ու հեծյալներին»։ ²⁷ Մովսեսը ձեռքը մեկնեց ծովի վրա, և ջրերն առավոտյան լցվեցին իրենց տեղը։ Եգիպտացիները փորձեցին փախչել ջրից, բայց Տերը եգիպտացիներին ընկղմեց ծովում ²⁸ և ջուրը հետ բերելով՝ ծածկեց կառքերը, հեծյալներին ու փարավոնի ամբողջ զորքը, որոնք ծովն էին մտել նրանց հետ։ Նրանցից ոչ ոք կենդանի չմնաց։ ²⁹ Իսկ Իսրայելի որդիներն անցան ծովի միջով, ինչպես ցամաքի վրայով, և ջուրը նրանց աջ ու ձախ կողմերից պարիսպ էր դարձել։ ³⁰ Եվ Տերն այդ օրը Իսրայելի որդիներին փրկեց եգիպտացիների ձեռքից։ Իսրայելը տեսավ եգիպտացիների դիակները ծովի ափին։ ³¹ Երբ Իսրայելի որդիները տեսան, թե Տերն ինչպիսի՛ հզոր ձեռքով պատուհասեց եգիպտացիներին, վախեցան Տիրոջից, հավատացին Աստծուն ու նրա ծառա Մովսեսին։

15

Մովսեսի երգը

¹ Այդ ժամանակ Մովսեսն ու Իսրայելի որդիներն այս օրհներգն ուղղեցին Աստծուն՝ ասելով.

«Օրհնենք Տիրոջը,

քանզի փառքով է փառավորված։

Նրանց երիվարներն ու հեծյալներին

ծովը գցեց։

² Տերն իմ օգնականն է և հովանավորը,

որ եղավ իմ փրկությունը։

Նա է իմ Աստվածը,

նրան եմ փառաբանելու։

Իմ հոր Աստվածն է,

նրան եմ մեծարելու։

³ Տերը խորտակում է պատերազմները,

Տեր է նրա անունը։

⁴ Նա փարավոնի կառքերն ու զորքերը ծովը գցեց,

ընտիր հեծյալներին ու սպառազեն մարդկանց

ընկղմեց Կարմիր ծովում։

⁵ Խորքը ծածկեց նրանց.

քարի պես ընկղմվեցին անդունդը։

⁶ Քո աջը, Տե՛ր, զորությամբ փառավորվեց,

քո աջը, Տե՛ր, խորտակեց թշնամուն։

⁷ Քո փառքի հզորությամբ

ջարդուփշուր արեցիր հակառակորդներին,

առաքեցիր քո բարկությունը,

և կերավ նրանց, ինչպես կրակը՝ եղեգը։

⁸ Քո զայրույթի հողմից ճեղքվեցին ջրերը,

պարիսպների նման քարացան ջրերը,

ալիքները ծովի մեջ քարացան։

⁹ Թշնամին ասաց. “Հետապնդեմ ու հասնեմ,

բաժանեմ ավարը և դրանցով հագեցնեմ ինձ։

Սրով սպանեմ, և իմ ձեռքը տիրի նրանց”։

¹⁰ Քո հողմն առաքեցիր, և ծովը ծածկեց նրանց.

կապարի պես սուզվեցին սաստկացած ջրերում։

¹¹ Աստվածների մեջ, Տե՛ր, ո՞վ կա քեզ նման,

ո՞վ կարող է նմանվել քեզ,

փառավորյա՛լդ սրբերի մեջ,

սքանչացյա՛լդ փառքի մեջ,

որ հրաշքներ ես գործում։

¹² Մեկնեցիր քո աջը,

և երկիրը կուլ տվեց նրանց։

¹³ Արդարությամբ առաջնորդեցիր քո այս ժողովրդին, որին փրկեցիր,

քո զորությամբ բերեցիր դեպի քո սուրբ բնակավայրը։

¹⁴ Լսեցին ժողովուրդները և դողացին։

Սարսափը պատեց Քանանի բնակիչներին։

¹⁵ Տագնապեցին Եդովմի դատավորներն ու Մովաբի իշխանները։

Դող բռնեց նրանց, հալվեցին Քանանի բոլոր բնակիչները։

¹⁶ Թող պատեն նրանց ահն ու սարսափը,

քո բազկի հզորությամբ թող քարանան,

մինչև որ անցնի քո ժողովուրդը, Տե՛ր,

մինչև որ անցնի քո այս ժողովուրդը, որին ստացար։

¹⁷ Տանելով հաստատի՛ր նրանց քո ժառանգության լեռան վրա,

որ պատրաստել ես քո բնակության համար

և որ սրբություն ես դարձրել, Տե՛ր։

Տե՛ր, որ պատրաստեցին քո ձեռքերը։

¹⁸ Տե՛ր, թագավո՛ր հավիտենական,

միշտ և հավիտյան»։

¹⁹ Երբ փարավոնի հեծելազորն իր կառքերով ու հեծյալներով մտավ ծովը, Տերը նրա վրա թափեց ծովի ջրերը, իսկ Իսրայելի որդիներն անցան ծովի միջով, ինչպես ցամաքով։

Մարիամ մարգարեուհու երգը

²⁰ Մարիամ մարգարեուհին՝ Ահարոնի քույրը, իր ձեռքն առավ թմբուկը, և բոլոր կանայք գնացին նրա հետևից՝ թմբուկ խփելով ու պարելով։ ²¹ Առջևից գնում էր Մարիամն ու ասում.

«Օրհնենք Տիրոջը,

քանզի նա փառքով է փառավորված.

երիվարներն ու հեծյալներին

ծովը գցեց»։

ԱՆԱՊԱՏԻ ԴԺՎԱՐՈՒԹՅՈՒՆՆԵՐԸ

(15.22–19.25)

Դառը ջուրը

²² Մովսեսն Իսրայելի որդիներին Կարմիր ծովից տարավ հասցրեց Սուր անապատը։ Նրանք երեք օրվա ճանապարհ գնացին անապատի միջով, բայց խմելու ջուր չգտան։ ²³ Եկան Մեռա, բայց Մեռայում էլ չկարողացան ջուր խմել, որովհետև այն դառն էր։ Այդ պատճառով էլ Մովսեսն այդ վայրն անվանեց Դառնություն [*  Մեռա]։ ²⁴ Եվ ժողովուրդը տրտնջաց Մովսեսի դեմ ու ասաց. «Ի՞նչ խմենք»։ ²⁵ Մովսեսն աղաղակեց առ Աստված, և Տերը նրան մի փայտ ցույց տվեց։ Այն նետեց ջրի մեջ, և ջուրը քաղցրահամ դարձավ։ Այնտեղ Աստված ժողովրդին տվեց օրենք ու պատվիրաններ և այնտեղ էլ փորձության ենթարկեց նրան։ ²⁶ Եվ ասաց. «Եթե լսես Տիրոջը՝ քո Աստծուն, նրա համար հաճելի գործեր կատարես, ունկնդիր լինես նրա պատվիրաններին ու կատարես նրա բոլոր հրամանները, քեզ վրա չեմ թափի բոլոր այն հիվանդությունները, որ թափեցի եգիպտացիների վրա, քանզի ես Տերն եմ՝ քեզ բժշկողը»։

²⁷ Եվ եկան հասան Եղիմ։ Այնտեղ կային ջրի տասներկու աղբյուր ու յոթանասուն արմավենի։ Եվ բանակեցին այնտեղ՝ ջրի մոտ։

16

Մանանան և լորամարգիները

¹ Իսրայելի որդիների ողջ ժողովուրդը Եղիմից չվեց ու եկավ Սին անապատը, որը գտնվում է Եղիմի ու Սինայի միջև, եգիպտացիների երկրից դուրս գալու երկրորդ ամսվա տասնհինգերորդ օրը։

² Իսրայելի որդիների ողջ ժողովուրդը անապատում դժգոհեց Մովսեսից ու Ահարոնից։ ³ Եվ Իսրայելի որդիները նրանց ասացին. «Ավելի լավ կլիներ՝ Տիրոջ հարվածներից մահանայինք եգիպտացիների երկրում, երբ մսով լի կաթսաների մոտ էինք նստում ու կուշտ հաց ուտում, քան բերեիք մեզ այս անապատը, որ ողջ ժողովրդին սովամահ անեք»։ ⁴ Եվ Տերն ասաց Մովսեսին. «Ահա ես ձեզ համար հաց եմ տեղացնելու երկնքից։ Ժողովուրդը թող ելնի ու հավաքի այն, ինչքան անհրաժեշտ է յուրաքանչյուր օրվա համար։ Եվ կփորձեմ, թե կապրե՞ն իմ օրենքներով, թե՞ ոչ։ ⁵ Իսկ վեցերորդ օրը ինչ որ պիտի հավաքեն և բերեն, թող նախորդ յուրաքանչյուր օրվա համար հավաքածի կրկնապատիկը լինի»։ ⁶ Եվ Մովսեսն ու Ահարոնն ասացին Իսրայելի բոլոր որդիներին. «Երեկոյան կիմանաք, որ Տերն է հանել ձեզ եգիպտացիների երկրից, ⁷ իսկ առավոտյան ականատես կլինեք Տիրոջ փառքին, որովհետև նա լսել է ձեր տրտունջը Աստծու դեմ։ Մենք ո՞վ ենք, որ տրտնջում եք մեր դեմ»։ ⁸ Եվ Մովսեսն ասաց. «Տերը լսեց մեր դեմ ուղղված ձեր տրտունջը, դրա համար էլ նա երեկոները ձեզ ուտելու միս, իսկ առավոտները հագենալու չափ հաց պիտի տա։ Մենք ո՞վ ենք, որ ձեր տրտունջը մեր դեմ եք ուղղում. ձեր տրտունջը Աստծու դեմ է ուղղված»։ ⁹ Եվ Մովսեսն ասաց Ահարոնին. «Ասա՛ Իսրայելի որդիների ողջ ժողովրդին. “Եկե՛ք Տիրոջ առաջ, որովհետև լսեց ձեր տրտունջը”»։

¹⁰ Մինչ Ահարոնը խոսում էր Իսրայելի որդիների ողջ ժողովրդի հետ, դարձան դեպի անապատը, և ահա Տիրոջ փառքը երևաց ամպի մեջ։ ¹¹ Եվ Տերը Մովսեսին ասաց. ¹² «Լսեցի Իսրայելի որդիների տրտունջը։ Արդ, խոսի՛ր նրանց հետ ու ասա՛. “Երեկոները միս կուտեք, իսկ առավոտները հացով կհագենաք։ Եվ կիմանաք, որ ես եմ Տերը՝ ձեր Աստվածը”»։

¹³ Երեկոյան լորամարգիներ ելան ու ծածկեցին բանակատեղին։ Առավոտյան, երբ ցողը վերանում էր բանակատեղիի շրջապատից, ¹⁴ անապատի երեսին գինձի սերմի նման մանր, սպիտակ, եղյամի նման մի բան եղավ։ ¹⁵ Երբ Իսրայելի որդիները տեսան այն, իրար ասացին. «Ի՞նչ է սա»։ Որովհետև չգիտեին, թե դա ի՛նչ է։ Եվ Մովսեսն ասաց նրանց. «Դա այն հացն է, որ Տերը տվեց ձեզ՝ ուտելու։ ¹⁶ Եվ այս է Տիրոջ պատվերը. “Յուրաքանչյուր ոք դրանցից թող հավաքի այնքան, որքան անհրաժեշտ է՝ ըստ ձեր ընտանիքների շնչերի թվի։ Հավաքե՛ք ըստ յուրաքանչյուր վրանում գտնվող մարդկանց թվի”»։ ¹⁷ Իսրայելի որդիներն այդպես էլ արեցին. հավաքեցին ըստ իրենց կարիքի. որը՝ շատ, որը՝ քիչ։ ¹⁸ Չափեցին և տեսան՝ ումը որ շատ էր սահմանված չափից, չավելացավ, իսկ ումը՝ քիչ սահմանված չափից, չպակասեց։ Յուրաքանչյուրն իր կարիքի չափով էր հավաքել։ ¹⁹ Եվ Մովսեսն ասաց նրանց. «Ոչ ոք մինչև առավոտ դրանից ավելցուկ չթողնի»։ ²⁰ Սակայն ոմանք Մովսեսին չլսեցին. դրանից ավելցուկ մնաց առավոտյան։ Դա որդնոտեց ու նեխեց։ Եվ Մովսեսը զայրացավ նրանց վրա։ ²¹ Դրանից հետո ամեն առավոտ յուրաքանչյուրը հավաքում էր իրեն պետք եղածի չափ։ Եվ երբ արևը տաքացնում էր, այն հալվում էր։ ²² Իսկ վեցերորդ օրը հավաքեցին պետք եղածի կրկնապատիկը՝ ամեն մեկի համար երկուական բաժին։ Եվ ժողովրդի բոլոր առաջնորդները գնացին ու պատմեցին Մովսեսին։

²³ Մովսեսն ասաց նրանց. «Տիրոջ հրահանգն այս է. “Վաղը շաբաթ է, հանգիստ է, Տիրոջը նվիրված սուրբ օր։ Ինչ որ եփելու եք, եփե՛ք, և ինչ որ թխելու եք, թխե՛ք. ինչ որ ավելանա, թող ձեր ամաններում մնա մինչև առավոտ”»։ ²⁴ Եվ դա թողեցին մինչև առավոտ, ինչպես որ հրամայել էր Մովսեսը, և այն չնեխեց ու չորդնոտեց։ ²⁵ Մովսեսն ասաց. «Այդ կերե՛ք այսօր, քանի որ այսօր Տիրոջ շաբաթն է. դրանից այսօր դաշտում չեք գտնի։ ²⁶ Վեց օր կհավաքեք դա, իսկ յոթերորդ օրը՝ շաբաթ օրը, դրանից չի լինի»։ ²⁷ Եվ յոթերորդ օրը ժողովրդի միջից ոմանք ելան դրանից հավաքելու, բայց չգտան։ ²⁸ Եվ Տերն ասաց Մովսեսին. «Մինչև ե՞րբ պիտի չանսաք իմ պատվիրաններին ու օրենքներին։ ²⁹ Տեսե՛ք, Տերը այս օրը ձեզ շաբաթ՝ հանգիստ տվեց։ Դրա համար էլ նա վեցերորդ օրը ձեզ երկու օրվա հաց տվեց՝ ասելով. “Ձեզնից յուրաքանչյուրը յոթերորդ օրը թող նստի իր տանը, և թող ոչ ոք չելնի իր տեղից”»։ ³⁰ Եվ ժողովուրդը յոթերորդ օրը հանգստացավ։ ³¹ Եվ Իսրայելի որդիները դրա անունը դրեցին մանանա։ Դա գինձի սերմի նման սպիտակ էր ու մեղրախորիսխի համ ուներ։

³² Մովսեսն ասաց. «Ահա թե ի՛նչ հրամայեց Աստված. “Մի ամանի մեջ մեկ չափ մանանա՛ լցրեք և այն պահե՛ք ձեր սերունդների համար, որպեսզի աչքի առաջ ունենաք այն հացը, որ դուք կերաք անապատում, երբ Տերը ձեզ հանեց եգիպտացիների երկրից”»։ ³³ Մովսեսն ասաց Ահարոնին. «Մի ոսկե սափո՛ր վերցրու, դրա մեջ մեկ չափ մանանա՛ լցրու և դի՛ր Աստծու առաջ՝ ձեր սերունդների համար պահելու»։ ³⁴ Ինչպես Տերը հրամայեց Մովսեսին, Ահարոնն այն ի պահ դրեց Վկայության[11] առաջ։ ³⁵ Իսրայելի որդիները քառասուն տարի մանանա կերան, մինչև որ հասան շեն երկիր։ Նրանք մանանա էին ուտում, մինչև որ հասան փյունիկեցիների կողմերը։ ³⁶ Մեկ չափը հավասար է երեք գրիվի մեկ տասներորդ մասի։

17

Ջուր ապառաժից

(Թվ. 20.1-13)

¹ Տիրոջ խոսքով Իսրայելի որդիների ողջ ժողովուրդը Սին անապատից գնաց՝ ըստ իրենց բանակների, և բանակեց Ռափիդիմում։ Բայց ջուր չկար, որ ժողովուրդը խմեր։ ² Եվ ժողովուրդն սկսեց մեղադրել Մովսեսին՝ ասելով. «Մեզ ջո՛ւր տուր, որ խմենք»։ Մովսեսը նրանց ասաց. «Ինչո՞ւ եք ինձ մեղադրում և ինչո՞ւ եք փորձում Տիրոջը»։ ³ Ժողովուրդը ծարավեց, տրտնջաց Մովսեսի դեմ ու ասաց. «Ինչո՞ւ մեզ հանեցիր Եգիպտոսից, որ ծարավից կոտորվե՞նք մենք և մեր որդիներն ու հոտերը»։ ⁴ Եվ Մովսեսն աղաղակեց Տիրոջը՝ ասելով. «Ի՞նչ անեմ այս ժողովրդին։ Քիչ էլ մնա՝ ինձ կքարկոծեն»։ ⁵ Եվ Տերն ասաց Մովսեսին. «Գնա՛ ժողովրդի առջևից, քեզ հետ վերցրո՛ւ ժողովրդի ծերերին, ձեռքդ ա՛ռ քո այն գավազանը, որով հարվածեցիր գետին, և ճամփա՛ ընկիր։ ⁶ Ես, քեզնից առաջ այնտեղ հասնելով, կկանգնեմ Քորեբում՝ մի ժայռի վրա։ Կհարվածես ժայռին, դրանից ջուր կբխի, և ժողովուրդը կխմի»։ Մովսեսն այդպես էլ արեց Իսրայելի որդիների ներկայությամբ։ ⁷ Եվ այդ վայրը կոչեց Փորձություն [*  Մասսա] ու Բամբասանք [*  Մերիվա]՝ Իսրայելի որդիների բամբասանքի և Տիրոջը փորձելու և ասելու համար, թե՝ «Տերը մեր մե՞ջ է, թե՞ ոչ»։

Պատերազմ Ամաղեկի դեմ

⁸ Ամաղեկացիներն եկան ու Ռափիդիմում պատերազմեցին Իսրայելի դեմ։ ⁹ Մովսեսն ասաց Հեսուին. «Ուժեղ տղամարդի՛կ ընտրիր և առավոտյան վեր կենալով՝ պատերազմի՛ր ամաղեկացիների դեմ։ Ես կգամ ու կկանգնեմ բլրի գագաթին, և Աստծու գավազանը կլինի իմ ձեռքին»։ ¹⁰ Հեսուն արեց այնպես, ինչպես իրեն ասել էր Մովսեսը. նա պատերազմեց ամաղեկացիների դեմ։ Մովսեսը, Ահարոնն ու Ովրը բարձրացան բլրի գագաթը։ ¹¹ Եվ երբ Մովսեսը բարձրացնում էր ձեռքերը, հաղթում էր Իսրայելը, իսկ երբ իջեցնում էր ձեռքերը, հաղթում էին ամաղեկացիները։ ¹² Եվ քանի որ Մովսեսի ձեռքերը ծանրանում էին, Ահարոնն ու Ովրը մի քար բերեցին, և նա նստեց դրա վրա, ապա Ահարոնն ու Ովրը՝ մեկն այս կողմից, մյուսն այն կողմից, բռնեցին նրա թևերի տակից։ Այսպիսով Մովսեսի ձեռքերը մինչև արևի մայր մտնելը բարձրացած մնացին։ ¹³ Հեսուն սրակոտոր արեց ամաղեկացիներին ու նրանց ողջ զորքը։ ¹⁴ Եվ Տերն ասաց Մովսեսին. «Այս դեպքը որպես հիշատակ գրի՛ առ։ Հաղորդի՛ր Հեսուին, որ ամաղեկացիների հիշատակը ջնջելու եմ երկրի վրայից՝ երկնքի ներքո»։ ¹⁵ Մովսեսը Տիրոջ համար զոհասեղան շինեց և դրա անունը դրեց «Տերն իմ ապավենն է» [*  Եհովա-նիսսի]՝ ¹⁶ ասելով. «Տերն իր անտեսանելի ձեռքով պատերազմելու է ամաղեկացիների դեմ սերնդից սերունդ»։

18

Հոթորի այցը Մովսեսին

¹ Մադիամի քուրմ Հոթորը՝ Մովսեսի աները, լսեց այն ամենի մասին, ինչ Տերն արել էր Մովսեսին ու Իսրայելին՝ իր ժողովրդին. քանի որ Տերը Իսրայելին հանել էր Եգիպտոսից։ ² Հոթորը՝ Մովսեսի աները, վերցրեց Սեպփովրային՝ Մովսեսի կնոջը, որ ուղարկվել էր իր մոտ, ³ ու նրա երկու որդիներին, որոնցից մեկի անունը Գերսամ էր և նշանակում էր «Պանդուխտ եմ օտար երկրում», ⁴ իսկ երկրորդի անունը՝ Եղիազար, որ նշանակում էր «Իմ հոր Աստվածը իմ օգնականն է, և նա փրկեց ինձ փարավոնի ձեռքից»։ ⁵ Հոթորը՝ Մովսեսի աները, նրա կինը և նրա որդիները եկան Մովսեսի մոտ՝ անապատ, որտեղ նա բնակվում էր Աստծու լեռան վրա։ ⁶ Հայտնեցին Մովսեսին՝ ասելով. «Ահա քո աները՝ Հոթորը, գալիս է քեզ մոտ, և նրա հետ են քո կինը և քո երկու որդիները»։ ⁷ Մովսեսն ընդառաջ ելավ իր աներոջը, երկրպագեց նրան և համբուրեց նրան։ Ողջագուրվեցին խաղաղությամբ, և նրանց տարավ իր վրանը։ ⁸ Եվ Մովսեսն իր աներոջը պատմեց այն ամենը, ինչ Իսրայելի համար Տերն արել էր փարավոնի ու եգիպտացիների հետ, ինչպես նաև այն բոլոր դժվարությունները, որ իրենք կրել էին ճանապարհին, և թե Տերն ինչպե՛ս փրկեց իրենց։ ⁹ Հոթորն ուրախացավ այն բոլոր բարեգործությունների համար, որ Տերն արել էր նրանց և փրկել եգիպտացիների ձեռքից ու փարավոնի ձեռքից։ ¹⁰ Եվ Հոթորն ասաց. «Օրհնյա՜լ է Տերը, որ փրկեց սրանց եգիպտացիների ձեռքից ու փարավոնի ձեռքից, օրհնյա՜լ է Տերը, որ փրկեց ժողովրդին եգիպտացիների ձեռքի տակից։ ¹¹ Արդ գիտեմ, որ Տերն ավելի մեծ է, քան բոլոր աստվածները, քանի որ նա ազատեց նրանց բռնացողների ձեռքից»։ ¹² Հոթորը՝ Մովսեսի աները, ողջակեզ ու զոհ մատուցեց Աստծուն։ Եվ Մովսեսը, Ահարոնն ու Իսրայելի բոլոր ծերերը Մովսեսի աներոջ հետ գնացին հաց ուտելու Տիրոջ առջև։

Դատավորների հաստատումը

(Բ Օր. 1.9-18)

¹³ Առավոտյան Մովսեսը նստեց ժողովրդին դատելու։ Ողջ ժողովուրդը առավոտից մինչև երեկո շրջապատել էր Մովսեսին։ ¹⁴ Հոթորը, տեսնելով այն ամենը, ինչ Մովսեսն անում էր ժողովրդին, ասաց. «Դու այդ ի՞նչ ես անում ժողովրդին։ Ինչո՞ւ ես դու միայնակ նստած, իսկ ողջ ժողովուրդը առավոտից մինչև երեկո կանգնած է քո շուրջը»։ ¹⁵ Մովսեսն ասաց իր աներոջը. «Որովհետև ժողովուրդը գալիս է ինձ մոտ՝ Աստծուց իրավունք խնդրելու։ ¹⁶ Երբ նրանց միջև վեճ է ծագում, գալիս են ինձ մոտ։ Ես դատում եմ նրանցից յուրաքանչյուրին և հայտնում Աստծու հրամաններն ու օրենքները»։ ¹⁷ Մովսեսի աները նրան ասաց. «Քո արածը ուղիղ չէ։ ¹⁸ Սոսկալի տանջանքներով տանջում ես և՛ քեզ, և՛ քեզ հետ եղող ողջ ժողովրդին։ Ծանր է քո գործը, և միայնակ չես կարող այդ անել։ ¹⁹ Արդ, լսի՛ր ինձ, ես քեզ խորհուրդ պիտի տամ, և Աստված քեզ հետ կլինի։ Աստծու մոտ եղի՛ր ժողովրդի ներկայացուցիչը և մարդկանց ասածը հաղորդի՛ր Աստծուն։ ²⁰ Եվ դրանց վկայի՛ր Աստծու հրամաններն ու օրենքները և ցո՛ւյց տուր այն ճանապարհը, որով ընթանալու են, և այն գործերը, որ պետք է կատարեն։ ²¹ Դու ողջ ժողովրդի միջից ընտրի՛ր կարող մարդկանց՝ աստվածապաշտ, արդարադատ, գոռոզությունն ատող մարդկանց ու ժողովրդի վրա նրանց հազարապետներ, հարյուրապետներ, հիսնապետներ ու տասնապետնե՛ր կարգիր։ ²² Նրանք մշտապես թող դատեն ժողովրդին. կարևոր գործերը թող հանձնեն քեզ, իսկ փոքր դատաստանները թող իրենք անեն. դրանով կթեթևացնես քո գործերը, և կլինեն քո օգնականները։ ²³ Եթե այս բանն անես, Աստված կզորացնի քեզ, և կկարողանաս տոկալ, և ողջ ժողովուրդը խաղաղությամբ կվերադառնա իր տեղը»։

²⁴ Մովսեսն անսաց իր աներոջ ասածին և արեց այն ամենը, ինչ նա ասաց իրեն։ ²⁵ Մովսեսը ողջ Իսրայելից ընտրեց կարող մարդկանց և ժողովրդի վրա նրանց հազարապետներ, հարյուրապետներ, հիսնապետներ ու տասնապետներ կարգեց։ ²⁶ Նրանք մշտապես դատում էին ժողովրդին։ Բայց կարևոր գործերը հանձնում էին Մովսեսին, իսկ թեթև գործերը իրենք էին դատում։ ²⁷ Մովսեսը ճանապարհ դրեց իր աներոջը, որը գնաց իր երկիրը։

19

Իսրայելացիները Սինա լեռան մոտ

¹ Իսրայելի որդիները եգիպտացիների երկրից դուրս գալու երրորդ ամսվա նույն օրը հասան Սինայի անապատը։ ² Ռափիդիմից գնալով՝ եկան Սինայի անապատը և բանակեցին անապատում։ Իսրայելը բանակեց այնտեղ՝ լեռան դիմաց։ ³ Մովսեսը բարձրացավ Աստծու լեռը։ Աստված լեռան վրայից կանչեց նրան ու ասաց. «Այսպես կասես Հակոբի տանը և կհայտնես Իսրայելի որդիներին. ⁴ “Դուք ինքներդ տեսաք, թե ի՛նչ արեցի եգիպտացիներին, և կարծես ձեզ արծիվների թևերի վրա դնելով՝ մոտեցրի ինձ։ ⁵ Արդ, եթե ուշադիր լսեք իմ ասածը և պահեք իմ ուխտը, դուք բոլոր ազգերի մեջ կլինեք իմ սեփական ժողովուրդը, որովհետև իմն է ողջ երկիրը։ ⁶ Դուք կլինեք ինձ համար քահանաների թագավորություն և սուրբ ազգ”։ Այս ամենը հաղորդի՛ր Իսրայելի որդիներին»։ ⁷ Մովսեսը եկավ, կանչեց ժողովրդի ծերերին և նրանց հաղորդեց բոլոր այն խոսքերը, որ նրան պատվիրել էր Աստված։ ⁸ Ժողովուրդը միահամուռ պատասխան տվեց ու ասաց. «Այն ամենը, ինչ ասել է Աստված, կկատարենք ու կլսենք»։ Մովսեսը ժողովրդի ասածը հաղորդեց Աստծուն։ ⁹ Եվ Տերն ասաց Մովսեսին. «Ահա ես գալու եմ քեզ մոտ ամպի սյունով, որ ժողովուրդը լսի այն, ինչ ես ասելու եմ քեզ, և նա հավիտյան պիտի հավատա քեզ»։ Մովսեսը ժողովրդի ասածը պատմեց Տիրոջը։ ¹⁰ Եվ Տերն ասաց Մովսեսին. «Իջի՛ր, վկայի՛ր ժողովրդին և մաքրի՛ր նրանց այսօր և վաղը, և թող լվանան իրենց զգեստները։ ¹¹ Թող երրորդ օրը պատրաստ լինեն, որովհետև երրորդ օրը Տերը պիտի իջնի ողջ ժողովրդի առաջ՝ Սինա լեռան վրա։ ¹² Ժողովրդի ու լեռան միջև տարածություն կթողնես և կասես. “Զգո՛ւյշ եղեք լեռան վրա բարձրանալուց ու մոտենալուց, որովհետև լեռանը մոտեցողը կմեռնի։ ¹³ Լեռանը ոչ մի ձեռք չպետք է դիպչի, այլապես կքարկոծվի կամ նետերով կխոցոտվի. անասուն լինի, թե մարդ՝ չի ապրի”։ Նրանք կարող են լեռը բարձրանալ միայն այն ժամանակ, երբ որոտներն ու շեփորահարությունը դադարի, ու ամպը վերանա լեռան վրայից»։

¹⁴ Մովսեսը լեռից իջավ ժողովրդի մոտ ու մաքրեց նրանց։ Եվ լվացին իրենց զգեստները։ ¹⁵ Եվ ասաց ժողովրդին. «Պատրա՛ստ եղեք. երեք օր կանանց չմերձենաք»։

¹⁶ Երրորդ օրն առավոտյան Սինա լեռան վրա ձայներ, փայլատակումներ ու միգախառն ամպ եղավ, և շեփորի ձայնը հնչում էր ուժգին։ Բանակատեղիում գտնվող ողջ ժողովուրդը զարհուրեց։ ¹⁷ Մովսեսը ժողովրդին բանակատեղիից տարավ Աստծուն հանդիպելու և կանգնեցրեց Սինա լեռան ստորոտին։ ¹⁸ Սինա լեռն ամբողջովին ծխում էր, քանի որ Աստված հրով իջել էր նրա վրա, և նրա ծուխը ելնում էր, ինչպես հնոցի ծուխ։ Եվ ողջ ժողովուրդը խիստ զարհուրեց։ ¹⁹ Աստիճանաբար շեփորի ձայնն ավելի ու ավելի էր հզորանում ու սաստկանում։ Մովսեսը խոսում էր, իսկ Աստված պատասխանում էր նրան։ ²⁰ Տերն իջավ Սինա լեռան վրա՝ լեռան կատարին։ Տերը կանչեց Մովսեսին լեռան գագաթը, և Մովսեսը ելավ այնտեղ։ ²¹ Եվ Աստված ասաց Մովսեսին. «Իջի՛ր, ասա՛ ժողովրդին, որ չմերձենան Աստծուն տեսնելու, որպեսզի նրանցից շատերը չկորչեն։ ²² Նույնիսկ քահանաները, որ սպասարկում են Աստծուն, պետք է սրբվեն, որպեսզի Տերը կորստյան չմատնի նրանց»։ ²³ Մովսեսն Աստծուն ասաց. «Ժողովուրդը չի կարող Սինա լեռը բարձրանալ, որովհետև դու ինքդ ես մեզ պատվիրել և ասել. “Մարդկանց ու լեռան միջև տարածություն կթողնես և լեռը սուրբ կհռչակես”»։ ²⁴ Եվ Տերն ասաց նրան. «Գնա՛, իջի՛ր ու հետո այստե՛ղ բարձրացիր Ահարոնի հետ, բայց քահանաներն ու ժողովուրդը թող չհանդգնեն բարձրանալ Աստծու մոտ, որպեսզի Տերը նրանց կորստյան չմատնի»։ ²⁵ Մովսեսն իջավ ժողովրդի մոտ և ասաց նրանց.

20

ՕՐԵՆՔՆԵՐԻ ԳԻՐՔԸ

(20.1–24.18)

Տասը պատվիրանները

(Բ Օր. 5.6-21)

¹ Տերը հայտնեց այս բոլոր պատգամները և ասաց.

² «Ես եմ Տերը՝ քո Աստվածը, որ հանեցի քեզ եգիպտացիների երկրից՝ ստրկության տնից։ ³ Ինձնից բացի այլ աստվածներ չունենաս։

⁴ Քեզ համար կուռքեր չպատրաստես ո՛չ երկնքում եղածների, ո՛չ երկրի վրայի, ո՛չ էլ երկրի ջրերի մեջ եղած որևէ բանի նմանությամբ։ ⁵ Մի՛ երկրպագիր ու մի՛ պաշտիր նման բաների, որովհետև քո Աստվածը ես եմ՝ Տերը, Աստված նախանձախնդիր, ես, որ հայրերի մեղքերի համար պատժում եմ որդիներին մինչև երրորդ ու չորրորդ սերունդը, եթե ատում են ինձ, ⁶ իսկ ինձ սիրող ու իմ հրամանը կատարող մարդկանց մինչև հազարերորդ սերնդին ողորմություն եմ անում։

⁷ Տիրոջ՝ քո Աստծու անունը զուր տեղը մի՛ օգտագործիր, որովհետև Տերը չի արդարացնի նրան, ով իր անունը զուր տեղն է օգտագործում։

⁸ Հիշի՛ր շաբաթ օրը, որպեսզի սուրբ պահես այն։ ⁹ Վեց օր աշխատի՛ր և արա՛ քո բոլոր գործերը, ¹⁰ իսկ յոթերորդ օրը շաբաթ է՝ Տիրոջը՝ քո Աստծուն նվիրված օր։ Այդ օրը ոչ մի գործ չանես ո՛չ դու, ո՛չ էլ քո տղան ու դուստրը կամ քո ծառան ու քո աղախինը, քո եզն ու քո էշը և քո բոլոր անասունները, ինչպես նաև օտարականն ու քեզ մոտ բնակվող պանդուխտը, ¹¹ որովհետև Տերը՝ Աստված, վեց օրում ստեղծեց երկինքն ու երկիրը, ծովն ու այն ամենը, ինչ դրանց մեջ է, իսկ յոթերորդ օրը հանգստացավ։ Դրա համար էլ Տերն օրհնեց յոթերորդ օրը և այն սուրբ հռչակեց։

¹² Պատվի՛ր քո հորն ու քո մորը, որպեսզի բարիք գտնես, երկար ապրես բարեբեր այն երկրի վրա, որ Տերը՝ քո Աստվածը, տալու է քեզ։

¹³ Մի՛ սպանիր։

¹⁴ Մի՛ շնացիր։

¹⁵ Մի՛ գողացիր։

¹⁶ Քո նմանի դեմ սուտ վկայություն մի՛ տուր։

¹⁷ Մի՛ ցանկացիր քո նմանի կնոջը, քո նմանի տանը կամ էլ նրա ագարակին աչք մի՛ դիր, ո՛չ էլ նրա ծառային կամ աղախնին, ո՛չ նրա եզանը, ո՛չ նրա էշին, կամ նրա այլ անասունին, ո՛չ էլ այն ամենին, ինչ քո նմանինն է»։

Ժողովրդի վախը

(Բ Օր. 5.22-33)

¹⁸ Ողջ ժողովուրդը լսում էր որոտի ու շեփորի ձայնը, տեսնում բոցերն ու ծխացող լեռը։ Ողջ ժողովուրդը զարհուրեց, ընկրկեց ու կանգնեց հեռու։ ¹⁹ Եվ ասացին Մովսեսին. «Դո՛ւ խոսիր մեզ հետ, և մենք կլսենք։ Աստված թող չխոսի մեզ հետ, թե չէ կարող է մեռնենք»։ ²⁰ Եվ Մովսեսն ասաց նրանց. «Քաջալերվե՛ք, որովհետև Աստված ձեզ փորձելու համար եկավ ձեզ մոտ, որպեսզի նրա երկյուղը լինի ձեր մեջ, և դուք չմեղանչեք»։ ²¹ Ժողովուրդը կանգնած էր հեռու, և Մովսեսը մտավ մառախուղի մեջ, որտեղ Աստված էր։

Օրենքներ խորանի մասին

²² Տերն ասաց Մովսեսին. «Այսպե՛ս ասա Հակոբի տանը և հաղորդի՛ր Իսրայելի որդիներին. “Դուք ինքներդ տեսաք, որ երկնքից խոսեցի ձեզ հետ։ ²³ Ձեզ համար ոսկե ու արծաթե աստվածներ չպատրաստեք։ ²⁴ Իսկ ինձ համար մի հողե զոհասեղա՛ն պատրաստեք և դրա վրա՛ մատուցեք ձեր ողջակեզն ու ձեր փրկության զոհը՝ ոչխար և արջառ, ամեն տեղ, որտեղ ես իմ անունը կծանուցեմ։ Եվ ես կգամ ու կօրհնեմ ձեզ։ ²⁵ Իսկ եթե զոհասեղանը քարից կառուցես, կոփածո մի՛ արա, որովհետև եթե քո ձեռքի գործիքը դիպցնես դրան, ապա դա պղծված կլինի։ ²⁶ Իմ զոհասեղանի վրա աստիճաններով չբարձրանաս, որպեսզի դրա վրա քո ամոթույքը չերևա”»։

21

Գերիների հետ վարվելը

(Բ Օր. 15.12-18)

¹ «Սրանք են այն հրահանգները, որ պիտի տաս նրանց։

² Եթե եբրայեցի ստրուկ գնես, նա թող ծառայի քեզ վեց տարի և յոթերորդ տարում առանց փրկագնի ազատ թող արձակվի։ ³ Եթե նա միայնակ է տունդ մտել, միայնակ էլ թող գնա, իսկ եթե իր կնոջ հետ է մտել, կինն էլ թող գնա նրա հետ։ ⁴ Եթե իր տերը նրան կին տա, և նրա համար տղաներ ու դուստրեր ծնի, ապա կինն ու զավակները թող պատկանեն նրա տիրոջը, և միայն նա թող ազատ արձակվի։ ⁵ Եթե ստրուկն ասի. “Սիրեցի իմ տիրոջը, իմ կնոջն ու իմ զավակներին և չեմ ցանկանում ազատ արձակվել”, ⁶ նրա տերը նրան թող կանգնեցնի Աստծու ատյանի առաջ, այնուհետև բերի իր տան դռան սեմի մոտ, հերյունով ծակի նրա ականջը, և նա թող ծառայի իրեն ցմահ։

⁷ Եթե որևէ մեկն իր դստերը վաճառի աղախնության, ապա այդ աղջիկը թող չազատագրվի այնպես, ինչպես ազատագրվում են ստրկուհիները։ ⁸ Եթե նրա տերն այլևս չցանկանա նրան, ապա պիտի թույլ տա նրան փրկագնով հետ գնելու. ամեն դեպքում օտարազգիի չի կարող վաճառել, քանի որ նրան անարգել է։ ⁹ Իսկ եթե նրան գնել է իր որդու համար, նրա հետ թող վարվի իր դուստրերի պես։ ¹⁰ Եթե նա այլ կին ևս առնի, նրան թող չզրկի սննդից, հագուստից ու ամուսնական պարտականությունից։ ¹¹ Եթե այս երեք պահանջները չկատարի նրա նկատմամբ, ապա նա առանց փրկագնի թող ազատ արձակվի»։

Զանազան օրենքներ

¹² «Եթե որևէ մեկը հարվածի մեկին, և սա մահանա, ապա հարվածողը մահապատժի թող ենթարկվի։ ¹³ Եթե սպանությունը կատարվել է ոչ թե սպանողի կամքով, այլ Աստված է մատնել նրա ձեռքը, ապա սպանողին թող ցույց տրվի մի տեղ, որտեղ նա ապաստան կգտնի։

¹⁴ Եթե մեկը մտադրվելով նենգությամբ սպանի իր նմանին, անգամ եթե փախուստի դիմելով ապաստանի իմ զոհասեղանին, նրան պիտի պոկել զոհասեղանից ու սպանել։

¹⁵ Ով հարվածի իր հորը կամ մորը, մահապատժի թող ենթարկվի։ ¹⁶ Ով որ չարաբանի իր հորն ու իր մորը, մահապատժի թող ենթարկվի։

¹⁷ Եթե մեկը գողանա Իսրայելի որդիներից մեկին և վաճառի, և կամ իր մոտ գտնեն նրան, ապա մահապատժի թող ենթարկվի։

¹⁸ Եթե երկու մարդ կռվեն, և նրանցից մեկը քարով կամ բռունցքով հարվածի մյուսին, և սա ոչ թե մահանա, այլ անկողին ընկնի, ¹⁹ և եթե ոտքի կանգնի ու կարողանա ցուպի օգնությամբ քայլել, հարվածողը թող անպարտ լինի, բայց տուժածի աշխատանքից զրկվելու վնասի ու բժշկության համար թող հատուցում վճարի։

²⁰ Եթե մեկը գավազանով հարվածի իր ստրուկին կամ իր ստրկուհուն, և սա մեռնի նրա հարվածից, ապա տերը վրեժխնդրության պիտի ենթարկվի դատաստանով, ²¹ իսկ եթե նա մեկ կամ երկու օր ապրի, տերը վրեժխնդրության չի ենթարկվի, քանի որ նրան իր արծաթով է գնել։

²² Եթե երկու տղամարդ կռվելիս զարնվեն մի հղի կնոջ, և կինը, երեխան դեռ չձևավորված, վիժի, հարվածողը թող հատուցի վնասն ըստ կնոջ ամուսնու պահանջի և ըստ դատավորների։ ²³ Իսկ եթե երեխան ձևավորված լինի, ապա թող հատուցի ըստ հետևյալ կարգի՝ կյանքի դիմաց՝ կյանք, ²⁴ աչքի դիմաց՝ աչք, ատամի դիմաց՝ ատամ, ձեռքի դիմաց՝ ձեռք, ոտքի դիմաց՝ ոտք, ²⁵ խարանի դիմաց՝ խարան, վերքի դիմաց՝ վերք, հարվածի դիմաց՝ հարված։

²⁶ Եթե մեկը հարվածի իր ստրուկի կամ իր աղախնու աչքին ու կուրացնի նրան, ապա թող նրան ազատ արձակի իր վնասված աչքի փոխարեն։ ²⁷ Եթե ջարդի իր ստրուկի կամ աղախնու ատամը, ապա իր ջարդած ատամի համար նրան թող ազատ արձակի»։

²⁸ «Եթե մի ցուլ հարվածի մի տղամարդու կամ կնոջ, և սրանք մեռնեն, ապա ցուլը թող քարկոծվի, նրա միսը թող չուտեն, բայց ցլի տերը անպարտ թող լինի։ ²⁹ Եթե ցուլը նախկինում ևս հարվածող է եղել, և նրա տիրոջը բողոքած են եղել, բայց սա ցլին մեջտեղից չի վերացրել, և եթե ցուլը տղամարդ կամ կին սպանի, ապա ցուլը թող քարկոծվի, և ցլի տերը նրա հետ թող մահապատժի ենթարկվի։ ³⁰ Իսկ եթե նրան թույլատրվի փրկագին վճարել, ապա թող վճարի կյանքի համար այնչափ, որչափ կնշանակվի փրկագինը։ ³¹ Եթե ցուլը մի տղայի կամ մի աղջկա հարվածի, նույն կերպ թող վարվեն նրա հետ։ ³² Իսկ եթե ցուլը մի ստրուկի կամ աղախնու հարվածի, ցլատերը նրանց տիրոջը երեսուն կրկնադրամ արծաթ թող վճարի, իսկ ցուլը թող քարկոծվի։

³³ Եթե մեկը փոս բացի կամ ջրհոր փորի ու դրանք չծածկի, և դրանց մեջ արջառ կամ էշ ընկնի, ³⁴ փոսի տերը արծաթ թող վճարի անասունի տիրոջը, իսկ լեշը թող իրենը լինի։

³⁵ Եթե մեկի ցուլը հարվածի մի ուրիշ մարդու ցլին, և սա սատկի, կենդանի մնացած ցուլը թող վաճառեն և դրա արժեքը թող բաժանեն։ Թող բաժանեն նաև սպանված ցուլը։ ³⁶ Իսկ եթե նախկինում էլ գիտեին, որ ցուլը հարվածող է, և դրա տիրոջը բողոքած են եղել, բայց նա իր ցլին մեջտեղից չի վերացրել, թող ցլի փոխարեն ցուլ տա, իսկ սպանված ցուլը թող նրան տրվի»։

Փոխհատուցման հրահանգները

³⁷ [12] «Իսկ եթե մեկը արջառ կամ ոչխար գողանա և մորթի կամ վաճառի, ապա մեկ արջառի փոխարեն հինգ արջառ թող հատուցի, իսկ մեկ ոչխարի փոխարեն՝ չորս ոչխար։

22

¹ Եթե գողը գողության պահին նկատվի և խոցվելով մահանա, դա սպանություն չպետք է համարվի։ ² Իսկ եթե գիշերային գողը արևածագից հետո սպանվի, սպանողը մահապարտ է և մահվամբ պիտի հատուցի։ Եթե գողը հատուցելու ոչինչ չունենա, ապա թող վաճառվի իր գողության փոխարեն։ ³ Իսկ եթե նա բռնվի, և գողոնը՝ արջառ, էշ կամ ոչխար, իր ձեռքում լինի, կրկնակի թող հատուցի։

⁴ Եթե մեկն իր անասունն արածեցնելիս թույլ է տալիս, որ անասունն արածի ուրիշի հանդում, ապա իր հանդից թող հատուցի ըստ փչացրած բերքի չափի։ Իսկ եթե հանդը փչացրել է ամբողջությամբ, ապա թող հատուցի իր հանդի ու իր այգու ընտիր հատվածով։

⁵ Եթե կրակը փշերն այրելով տարածվի ու այրի մեկ ուրիշի կալը կամ ցորենի շեղջը կամ հանդը, ապա կրակ անողը թող վնասը հատուցի։

⁶ Եթե մեկը մի մարդու արծաթ կամ որևէ այլ իր տա պահելու, և այն գողացվի այդ մարդու տնից, եթե գողը գտնվի, թող կրկնակին հատուցի, ⁷ իսկ եթե գողը չգտնվի, ապա տան տերը թող Աստծու առաջ երդվի, որ ինքն ամենևին չի յուրացրել այդ մարդու ավանդը։

⁸ Արջառի ու էշի, ոչխարի ու հագուստի և ամեն տեսակ բաների կորուստներին վերաբերող և վեճ հարուցող խնդիրների իսկությունը պարզելու նպատակով երկու կողմերը թող կանգնեն Աստծու դատաստանի առաջ։ Նրանցից ում Աստված մեղավոր ճանաչի, նա կրկնակին թող հատուցի մյուսին։

⁹ Եթե մեկը մի մարդու էշ, եզ, ոչխար կամ որևէ այլ անասուն պահ տա, և այն վնասվածք ստանա, սատկի կամ հափշտակվի, և այդ բանը հաստատող ոչ մի վկա չլինի, ¹⁰ ապա երկուսի միջև թող Աստծուն տրված երդումը որպես վկայություն լինի։ Նա, ում մոտ անասունը պահ է տրված եղել, եթե երդվի, որ երբեք նենգ մտադրություն չի ունեցել մյուսի տված ավանդի նկատմամբ, ապա տերը թող բավարարվի դրանով, իսկ պահողը թող չտուգանվի։ ¹¹ Իսկ եթե ապացուցվի, որ յուրացրել է այն, ապրանքի տիրոջը թող հատուցի վնասը։ ¹² Իսկ եթե պահ տրված անասունին մի գազան է հոշոտել, որպես ապացույց նա թող բերի անասունի լեշը և վնասը չհատուցի։

¹³ Եթե մեկը իր կամ անասուն խնդրի մեկ ուրիշից, որը ջարդվի կամ սատկի կամ հափշտակվի, և տերը ներկա չլինի, թող վնասը հատուցի։ ¹⁴ Եթե տերը ներկա լինի, թող չհատուցի։ Եթե վարձով է առել, վարձը բավական թող լինի»։

¹⁵ «Եթե մեկը խաբի չնշանված մի կույսի և պառկի նրա հետ, թող օժիտ վճարի ու ամուսնանա նրա հետ։ ¹⁶ Եվ եթե աղջկա հայրը չհամաձայնի նրան կնության տալ իր աղջկան, խաբողը նրա հորը արծաթ թող վճարի այնքան, ինչքան սահմանված է կույսերի համար։

¹⁷ Մի՛ թողեք, որ կախարդներն ապրեն։

¹⁸ Ով կենակցի անասունի հետ, նրան մահապատժի՛ ենթարկեք։

¹⁹ Ով կուռքերին զոհ մատուցի, մահապատժի թող ենթարկվի։ Զո՛հ մատուցեք միայն Տիրոջը։

²⁰ Պանդուխտին մի՛ չարչարեք և մի՛ նեղեք նրան, որովհետև դուք ևս պանդուխտ էիք եգիպտացիների երկրում։

²¹ Ոչ մի այրի կնոջ կամ որբի մի՛ տանջեք։ ²² Եթե տանջեք նրանց, և նրանք բողոք բարձրացնելով դիմեն ինձ, ես կլսեմ նրանց ձայնը, ²³ սաստիկ կբարկանամ, սրով կկոտորեմ ձեզ, և ձեր կանայք այրի կդառնան, իսկ ձեր մանուկները՝ որբ։

²⁴ Եթե արծաթ ես փոխ տալիս աղքատ մեկին, նեղը մի՛ գցիր նրան և տոկոսներ մի՛ պահանջիր նրանից։

²⁵ Եթե գրավ վերցնես մեկի բաճկոնը, մինչև արևի մայր մտնելը վերադարձրո՛ւ այն, ²⁶ որովհետև դա նրա և՛ վերարկուն է, և՛ նրա մերկությունը ծածկող հանդերձը, որով և նա քնում է։ Եվ եթե նա բողոքի ինձ, ես կլսեմ նրան, որովհետև ողորմած եմ։

²⁷ Քո Աստծուն մի՛ վատաբանիր և քո ժողովրդի իշխանին մի՛ հայհոյիր։

²⁸ Քո կալի ու հնձանի արդյունքը մի՛ կտրիր ինձնից։

Քո որդիների անդրանիկներին ինձ կնվիրաբերես։ ²⁹ Նույն կերպ կվարվես քո արջառի, ոչխարի ու էշի հետ։ Դրանք յոթ օր թող մնան իրենց մոր մոտ, իսկ ութերորդ օրը դրանք կնվիրաբերես ինձ։

³⁰ Դուք ինձ համար սուրբ մարդիկ պիտի լինեք, որովհետև ես եմ Տերը՝ ձեր Աստվածը։

Գազանի հոշոտած կենդանու միս մի՛ կերեք, այլ շա՛նը նետեք»։

23

¹ «Ականջ մի՛ դիր սուտ լուրերին։ Մի՛ գործակցիր անիրավի հետ՝ սուտ վկայելով։

² Մեծամասնությանը հետևելով՝ չար գործերի հետևից մի՛ ընկիր։ Բազմությանը մի՛ խառնվիր՝ անիրավություն գործելու համար նրան ենթարկվելով։ ³ Դատի ժամանակ մի՛ խղճա հանցավորին աղքատ լինելու համար։

⁴ Եթե հանդիպես քո թշնամու մոլորված եզանը կամ էշին, դրան վերադարձրո՛ւ և հասցրո՛ւ իր տիրոջը։

⁵ Եթե տեսնես, որ քո ընկերոջ գրաստն ընկել է ծանր բեռան պատճառով, նրա կողքից անտարբեր մի՛ անցիր, այլ միասին բարձրացրե՛ք այն։

⁶ Աղքատի իրավունքը մի՛ անտեսիր նրա դատի ժամանակ։

⁷ Քեզ հեռո՛ւ պահիր ամեն տեսակ անիրավ բաներից։ Մի՛ սպանիր անպարտին ու արդարին։

Մեղավորին կաշառքով մի՛ արդարացրու։ ⁸ Կաշառք չվերցնես, որովհետև կաշառքը կուրացնում է անգամ պայծառ տեսնողների աչքերը և ապականում արդար խոսքերը։

⁹ Պանդուխտին մի՛ նեղեք. դուք գիտեք պանդուխտ մարդկանց վիճակը, որովհետև դուք ևս պանդուխտ էիք եգիպտացիների երկրում»։

Յոթերորդ տարին և օրը

¹⁰ «Վեց տարի կսերմանես քո հողը և կհավաքես դրա բերքը։ ¹¹ Յոթերորդ տարում պիտի թողնես, որ այն հանգստանա։ Ինքնաբույս բերքը թող ուտեն քո ազգի աղքատները, իսկ դրանից ավելացածները՝ վայրի գազանները։ Այդպես կվարվես քո այգու և քո ձիթաստանի հետ։

¹² Վեց օր կաշխատես, իսկ յոթերորդ օրը կթողնես, որ հանգստանան քո եզն ու էշը, հանգստանան նաև քո աղախնու որդին և օտարականը։

¹³ Ինչ որ ասացի ձեզ, կկատարեք։ Օտար աստվածների մի՛ պաշտեք, և նրանց անունները ձեր բերանից թող չլսվեն»։

Երեք մեծ տոները

(Ելք 34.18-26, Բ Օր. 16.1-17)

¹⁴ «Տարվա մեջ երեք անգամ ինձ համար տոն կկատարեք։

¹⁵ Բաղարջակերաց տոնը կպահեք։ Կանխոց ամսին յոթ օր բաղարջ հաց կուտեք, ինչպես պատվիրել եմ ձեզ, որովհետև դուք այդ ժամանակ ելաք եգիպտացիների երկրից։

Իմ առաջ դատարկաձեռն չերևաս։

¹⁶ Կկատարես ամառվա քո առաջին բերքը քաղելու տոնը, ինչ էլ ցանած լինես քո հանդում։

Տոն կկատարես նաև տարվա վերջում, երբ հանդից հավաքած կլինես քո բերքը։

¹⁷ Քո ժողովրդի բոլոր արու զավակները տարվա մեջ երեք անգամ պետք է ներկայանան Տիրոջը՝ քո Աստծուն։

¹⁸ Քո արած զոհաբերության արյունը թթխմորով հացի վրա չթափես և իմ տոնին արված զոհաբերության ճարպը մինչև առավոտ չպահես։

¹⁹ Քո առաջին բերքի արդյունքը կբերես Տիրոջ՝ քո Աստծու տունը։

Գառն իր մոր կաթի մեջ չեփես»։

Խոստումներ և ուսուցումներ

²⁰ «Եվ ահա ես իմ հրեշտակին ուղարկում եմ քո առջևից՝ քեզ ճանապարհին պահպանելու ու այն երկիրը տանելու, որ պատրաստեցի քեզ համար։ ²¹ Զգո՛ւյշ եղիր, լսի՛ր ու հնազանդվի՛ր նրան, որպեսզի նա չխորշի քեզնից, որովհետև նա իմ անունով է գործելու։ ²² Եթե ուշադիր լսես իմ խոսքը և կատարես այն ամենը, ինչ ասել եմ քեզ, կլինեմ քո թշնամիների թշնամին և քո հակառակորդների հակառակորդը, ²³ որովհետև իմ հրեշտակն առաջնորդելու է քեզ և տանելու է քեզ դեպի ամորհացիները, քետացիները, փերեզացիները, քանանացիները, գերգեսացիները, խևացիներն ու հեբուսացիները, և կոտորելու եմ նրանց։

²⁴ Չերկրպագես նրանց աստվածներին, չպաշտես նրանց և չկատարես այն, ինչ նրանք են կատարում, այլ քարուքա՛նդ արա դրանք և փշրի՛ր նրանց արձանները։ ²⁵ Պաշտի՛ր Տիրոջը՝ քո Աստծուն, և ես կօրհնեմ քո հացը և քո ջուրը և ձեզնից կվանեմ հիվանդությունները։ ²⁶ Քո երկրում անսերմ տղամարդ և ամուլ կին չեն լինելու։ Ես ավելացնելու եմ քո կյանքի տարիները։ ²⁷ Ես պիտի ուղարկեմ իմ ահը, որ առաջնորդի քեզ, պիտի սարսափեցնեմ բոլոր այն ազգերին, որոնց երկիրը պիտի մտնես։ Քո բոլոր հակառակորդներին փախուստի պիտի մատնեմ։ ²⁸ Քո առջևից իշամեղուներ պիտի ուղարկեմ, որ քեզնից հեռու քշեն ամորհացիներին, խևացիներին, քանանացիներին ու քետացիներին։ ²⁹ Մի տարվա ընթացքում չէ, որ պիտի հեռացնեմ նրանց քեզնից, որպեսզի երկիրը անապատի չվերածվի, և քո շրջակայքում չբազմանան երկրի գազանները։ ³⁰ Կամաց-կամաց պիտի հեռացնեմ նրանց քեզնից, մինչև որ բազմանաս ու ժառանգես երկիրը։

³¹ Քո երկրի տարածքը սահմանելու եմ Կարմիր ծովից մինչև Փղշտացիների [Միջերկրական] ծովը և անապատից մինչև Եփրատ մեծ գետը։ Ձեր ձեռքը պիտի հանձնեմ այդ երկրի բնակիչներին ու նրանց հեռու պիտի քշեմ քեզնից։ ³² Դու նրանց ու նրանց աստվածների հետ ուխտ չկապես։ ³³ Նրանք քո երկրում չպիտի բնակվեն, որպեսզի իմ նկատմամբ հանցանքի չմղեն քեզ, որովհետև եթե ծառայես նրանց աստվածներին, նրանք գայթակղություն կլինեն քեզ համար»։

24

Իսրայելի հետ կնքված ուխտը

¹ Եվ ասաց Մովսեսին. «Բարձրացե՛ք Տիրոջ մոտ դու, Ահարոնը, Նադաբը, Աբիուդն ու Իսրայելի ծերերից յոթանասուն այր։ Նրանք Տիրոջը թող երկրպագեն հեռվից։ ² Աստծուն թող մոտենա միայն Մովսեսը, իսկ մյուսները թող չմոտենան։ Բայց ժողովուրդը նրանց հետ թող չբարձրանա»։ ³ Մովսեսը եկավ ու ժողովրդին հայտնեց Աստծու բոլոր պատգամներն ու կանոնները։ Ողջ ժողովուրդը միաձայն պատասխան տվեց ու ասաց. «Կկատարենք այն բոլոր պատգամները, որ տվել է Տերը, և կլսենք»։

⁴ Մովսեսը գրի առավ Տիրոջ բոլոր պատգամները։ Մովսեսը, առավոտյան կանուխ վեր կենալով, զոհասեղան կառուցեց լեռան ստորոտին և տասներկու վեմ կանգնեցրեց՝ ըստ Իսրայելի տասներկու ցեղերի թվի։ ⁵ Նա Իսրայելի որդիներից երիտասարդներ ուղարկեց, որոնք ողջակեզներ մատուցեցին և որպես փրկության զոհ՝ հորթեր զոհեցին Աստծուն։ ⁶ Մովսեսը, վերցնելով զոհերի արյան կեսը, լցրեց ամանների մեջ, իսկ արյան մյուս կեսը հեղեց զոհասեղանի առաջ։ ⁷ Նա, վերցնելով Ուխտի գիրքը, կարդաց ի լուր ժողովրդի։ Եվ ասացին. «Այն ամենը, ինչ ասել է Տերը, կկատարենք ու կլսենք»։ ⁸ Մովսեսը, վերցնելով արյունը, շաղ տվեց ժողովրդի վրա ու ասաց. «Սա այն ուխտի արյունն է, որ Տերը կնքեց ձեզ հետ, որպեսզի կատարեք նրա բոլոր պատգամները»։

⁹ Մովսեսը, Ահարոնը, Նադաբը, Աբիուդն ու Իսրայելի յոթանասուն ծերերը բարձրացան ¹⁰ և տեսան այն վայրը, որտեղ Իսրայելի Աստվածն էր։ Նրա ոտքերի տակ կարծես շափյուղայի աղյուսներով էր զարդարված և ջինջ երկնքի պես լուսավոր էր։ ¹¹ Իսրայելի ընտրյալներից ոչ մեկը չմեռավ։ Նրանք եղան Աստծու վայրում, կերան ու խմեցին։

Մովսեսը Սինա լեռան վրա

¹² Եվ Տերն ասաց Մովսեսին. «Բարձրացի՛ր ինձ մոտ՝ լեռը, այնտե՛ղ եղիր, և քեզ պիտի տամ քարե տախտակներ, օրենքներ ու պատվիրաններ, որ գրեցի նրանց համար, որ հետևեն դրանց»։ ¹³ Մովսեսն ու նրա գործակից Հեսուն բարձրացան Աստծու լեռը։ ¹⁴ Եվ ծերերին ասաց. «Հանգստացե՛ք այստեղ, մինչև որ մենք վերադառնանք ձեզ մոտ։ Ահա Ահարոնն ու Ովրը ձեզ հետ են։ Եթե որևէ մեկը վեճ ունենա, թող գնա նրանց մոտ»։ ¹⁵ Մովսեսը բարձրացավ լեռը, և ամպը ծածկեց լեռը։ ¹⁶ Տիրոջ փառքն իջավ Սինա լեռան վրա, և ամպն այն ծածկեց վեց օր։ Եվ յոթերորդ օրը Տերը ամպի միջից կանչեց Մովսեսին։ ¹⁷ Տիրոջ փառքի տեսիլքը՝ իբրև բորբոքված հուր, լեռան գագաթին էր՝ Իսրայելի որդիների առաջ։ ¹⁸ Մովսեսը մտավ ամպի մեջ ու բարձրացավ լեռը։ Մովսեսը լեռան վրա մնաց քառասուն օր ու քառասուն գիշեր։

25

ՎԿԱՅՈՒԹՅԱՆ ԽՈՐԱՆԸ ԵՎ ՔԱՀԱՆԱՅՈՒԹՅՈՒՆԸ

(25.1–40.36)

Ընծաներ սուրբ խորանին

(Ելք 35.4-9)

¹ Տերը Մովսեսին ասաց. ² «Ասա՛ Իսրայելի որդիներին, և նրանցից ընծանե՛ր առեք ինձ համար։ Ընդունե՛ք բոլոր նրանցից, ովքեր սիրով են մատուցում։ ³ Սրանք են այն ընծաները, որ պիտի ընդունեք նրանցից՝ ոսկի, արծաթ, պղինձ, ⁴ կապույտ, ծիրանագույն և վառ կարմիր մանվածքներ, նրբահյուս բեհեզ, այծի մազ, ⁵ կարմիր ներկված խոյի մորթիներ, կապույտ ներկված մորթիներ և չփտող փայտեր, ⁶ լուսավորության համար ձիթայուղ, օծության յուղի և խնկի համար անուշահոտ նյութեր, ⁷ սարդիոնի քարեր, նաև հղկված ակնաքարեր՝ զարդարելու քահանայական լանջապանակը[13] և պատմուճանը։ ⁸ Ինձ համար սրբարան կկառուցես, որտեղ ես կերևամ ձեզ։ ⁹ Կպատրաստես այնպես, ինչպես ցույց կտամ քեզ լեռան վրա՝ իբրև նախօրինակ խորանի ու նրա ողջ սպասքի։ Այսպե՛ս պատրաստիր։

Ուխտի տապանակը

(Ելք 37.1-9)

¹⁰ Չփտող փայտից պատրաստի՛ր Ուխտի տապանակը՝ երկուսուկես կանգուն երկարությամբ, մեկուկես կանգուն լայնությամբ և մեկուկես կանգուն բարձրությամբ։ ¹¹ Այն ներսից պատի՛ր մաքուր ոսկով, արտաքինից ոսկեզօծի՛ր և վերևի եզրին ալյակաձև ոսկե շրջանա՛կ արա։ ¹² Չորս ոսկե օղակներ կձուլես և կամրացնես դրա չորս անկյուններին. երկու օղակները՝ մի կողմից, երկու օղակները՝ մյուս կողմից։ ¹³ Չփտող փայտից բռնակներ կպատրաստես և դրանք կպատես ոսկով։ ¹⁴ Բռնակները կանցկացնես տապանակի կողքերին ամրացված օղակների մեջ, որպեսզի դրանցով բարձրացնեն տապանակը։ ¹⁵ Բռնակները Ուխտի տապանակի օղակների մեջ թող անշարժ մնան։ ¹⁶ Տապանակի մեջ կդնես Վկայության այն տախտակները, որ ես պիտի տամ քեզ։

¹⁷ Տապանակի կափարիչը, որ կոչվելու է Քավություն, կպատրաստես մաքուր ոսկուց, երկուսուկես կանգուն երկարությամբ և մեկուկես կանգուն լայնությամբ։ ¹⁸ Քանդակված ոսկյա երկու քերովբեներ կպատրաստես և կդնես Քավության երկու ծայրերի վրա։ ¹⁹ Քերովբեներից մեկը թող լինի Քավության մի ծայրին, իսկ մյուսը՝ մյուս ծայրին։ Երկու քերովբեներ կանես դրա երկու ծայրերին. ²⁰ թող քերովբեները դեպի վեր տարածեն իրենց թևերը և իրենց թևերով հովանի անեն Քավության վրա։ Նրանց դեմքերը թող նայեն միմյանց, որպեսզի քերովբեների երեսները հայեն Քավությանը։ ²¹ Քավությունը կդնես տապանակի վրա՝ վերևի կողմից։ Տապանակի մեջ կդնես այն վկայությունները, որ ես պիտի տամ քեզ։ ²² Ես քեզ կհայտնվեմ այնտեղ և քեզ հետ կխոսեմ Քավության վրայից՝ երկու քերովբեների մեջտեղից, որոնք Ուխտի տապանակի վրա են. ամեն անգամ, երբ ցանկանամ մի հրաման տալ Իսրայելի որդիներին»։

Առաջավորության հացի սեղանը

(Ելք 37.10-16)

²³ «Չփտող փայտից սեղա՛ն պատրաստիր երկու կանգուն երկարությամբ, մեկ կանգուն լայնությամբ և մեկուկես կանգուն բարձրությամբ։ ²⁴ Այն պատի՛ր մաքուր ոսկով, նրա շուրջբոլորը ալյակաձև ոսկե եզրե՛ր ²⁵ արա և շուրջանակի չորս մատնաչափ մեծությամբ մի պսակ։ Պսակի շուրջբոլորը ևս ալյակաձև եզրե՛ր արա։ ²⁶ Եվ չորս ոսկե օղակնե՛ր պատրաստիր ու դրանք դի՛ր չորս անկյուններին՝ չորս ոտքերից վերև, ²⁷ պսակից ներքև։ Օղակները ծառայելու են սեղանը բարձրացնելու համար՝ բռնակները դրանց մեջ անցկացնելով։ ²⁸ Բռնակները պատրաստի՛ր չփտող փայտից ու դրանք պատի՛ր մաքուր ոսկով, և դրանցով թող սեղանը բարձրացվի։

²⁹ Պատրաստի՛ր խնկաղացներ, խնկատուփեր, գավաթներ ու սկիհներ, որոնցով գինի պիտի մատուցես։ Մաքուր ոսկո՛ւց պատրաստիր դրանք։

³⁰ Սեղանի վրա իմ առաջ մշտապես կդնես Առաջավորության հացը»։

Աշտանակը

(Ելք 37.17-24)

³¹ «Մաքուր ոսկուց աշտանակ կպատրաստես՝ քանդակված, իր բնով, ճյուղերով, սկահակներով, գնդերով ու զարդածաղիկներով միաձույլ։ ³² Վեց ճյուղեր պետք է տարածվեն նրա կողքերից. աշտանակի երեք ճյուղերը պետք է լինեն մի կողմից, իսկ աշտանակի մյուս երեք ճյուղերը՝ մյուս կողմից։ ³³ Ամեն մի ճյուղ պետք է ունենա գնդիկից ու զարդածաղկից բաղկացած ընկուզաձև երեք սկահակ։ Մյուս ճյուղերն էլ պետք է ունենան գնդիկից ու ծաղկից բաղկացած ընկուզաձև երեք սկահակ։ Այսպես թող լինեն աշտանակի կողքերից դուրս եկած վեց ճյուղերը. ³⁴ աշտանակի վրա պետք է լինեն ընկուզաձև չորս սկահակներ՝ իրենց խոյակներով և զարդածաղիկներով։ ³⁵ Բնից դուրս եկած երկու ճյուղերը ներքևում պիտի միանան մի գնդիկով։ Իրենց բնի կողքերից դուրս եկած երկու մյուս ճյուղերի տակ նույնպես պետք է լինի մի գնդիկ։ Նույն ձևով կպատրաստես աշտանակի կողքերից դուրս եկած վեց ճյուղերն ³⁶ այնպես, որ նրանց գնդիկներն ու ճյուղերը դուրս եկած լինեն իրենց բնի կողքերից՝ ամբողջությամբ քանդակազարդ, մեկ կտոր մաքուր ոսկուց։ ³⁷ Դրա համար յոթ ճրագարան կպատրաստես և դրանք կդնես աշտանակի վրա այնպես, որ դրանք լուսավորեն դիմացից՝ մի կողմից։ ³⁸ Դրա յուղամաններն ու յուղամանի տակի ափսեները կպատրաստես մաքուր ոսկուց։ ³⁹ Այս ամբողջ սպասքը մի տաղանդ մաքուր ոսկուց կպատրաստես։ ⁴⁰ Ուշադի՛ր եղիր. կանես ըստ այն օրինակի, որ քեզ ցույց տրվեց լեռան վրա»։

26

Վկայության խորանը

(Ելք 36.8-38)

¹ «Խորանը պատրաստի՛ր տասը վարագույրով՝ մանված բեհեզից և կապույտ, ծիրանագույն ու վառ կարմիր կերպասից։ Դրանց վրա կասեղնագործես քերովբեների պատկերներ։ ² Ամեն մի վարագույրի երկարությունը պետք է լինի քսանութ կանգուն, իսկ լայնությունը՝ չորս կանգուն։ Բոլոր վարագույրների չափսերը նույնը պետք է լինեն։ ³ Հինգ վարագույրները պետք է միացած լինեն իրար։ Իրար պետք է միացած լինեն նաև մյուս հինգ վարագույրները։ ⁴ Վարագույրների առաջին կցվածքի վերջին վարագույրի ծայրին կապույտ ճարմանդներ կպատրաստես։ Նույնը պետք է անես նաև երկրորդ կցվածքի առաջին վարագույրի եզրին։ ⁵ Հիսուն ճարմանդ կդնես մի վարագույրի վրա, հիսուն ճարմանդ էլ կդնես երկրորդ կցվածքի վարագույրի կողմից։ Բոլոր ճարմանդները միմյանց դեմ դիմաց պետք է լինեն։ ⁶ Կպատրաստես հիսուն ոսկե օղակներ և վարագույրները միմյանց կմիացնես օղակներով։ Այսպիսով կստացվի խորան։

⁷ Խորանը ծածկելու համար այծի մազից հյուսված տասնմեկ վարագույրներ կպատրաստես։ ⁸ Ամեն մի վարագույրի երկարությունը պետք է լինի երեսուն կանգուն, իսկ լայնությունը՝ չորս կանգուն։ Տասնմեկ վարագույրների չափսերը նույնը պետք է լինեն։ ⁹ Հինգ կտորները իրար կմիացնես առանձին և վեց կտորները՝ առանձին։ Վեցերորդ կտորը կծալես խորանի ճակատին։ ¹⁰ Հիսուն ճարմանդ կպատրաստես մի կցվածքի եզերքին, հիսուն ճարմանդ էլ՝ երկրորդ կցվածքի եզերքին։ ¹¹ Կպատրաստես պղնձե հիսուն օղակներ և ճարմանդները օղակների մեջ անցկացնելով՝ իրար կմիացնես վարագույրները, և մեկ կլինեն։ ¹² Վարագույրների ավելացած մասերը թող թափվեն խորանի կողքերին. վարագույրների ավելորդ մնացած կես մասով կծածկես խորանը հետևի կողմից։ ¹³ Խորանի վարագույրների երկարության ավելացած մասից մի կանգուն թող կախվի այս կողմից, և մի կանգուն՝ այն կողմից։ Խորանի կողքերը թող ծածկվեն այս ու այն կողմից։ ¹⁴ Խորանի ծածկը կպատրաստես խոյերի շիկակարմիր մորթուց, իսկ դրա վրա էլ մի ծածկ կդնես կապույտ մորթուց։

¹⁵ Խորանի մույթերը կպատրաստես չփտող փայտից։ ¹⁶ Ամեն մույթի երկարությունը տասը կանգուն թող լինի, իսկ լայնությունը՝ մեկուկես կանգուն։ ¹⁷ Ամեն մի մույթ իրար միացած երկու ագույց թող ունենա։ Այդպես կպատրաստես խորանի բոլոր մույթերը։ ¹⁸ Խորանի հյուսիսային կողմում կդնես քսան մույթ ¹⁹ և այդ քսան մույթերի համար կպատրաստես արծաթե քառասուն խարիսխ. երկուական խարիսխ՝ յուրաքանչյուր մույթի համար։ ²⁰ Խորանի մյուս՝ հարավային կողմում նույնպես կդնես քսան մույթ ²¹ արծաթե քառասուն խարիսխներով. երկուական խարիսխ՝ յուրաքանչյուր մույթի համար։ ²² Խորանի հետևում՝ ծովահայաց կողմում, կդնես վեց մույթ։ ²³ Երկու մույթ կշինես խորանի հետևի կողմի անկյունների համար։ ²⁴ Դրանք թող լինեն կրկնակի, միացած մույթեր՝ հատակից մինչև գագաթը։ Նույն ձևով կշինես երկու անկյունների մույթերը։ ²⁵ Այսպիսով կստացվի ութ մույթ, և դրանց արծաթե խարիսխները՝ տասնվեց խարիսխ. երկու կողմերից մեկ մույթի համար երկուական խարիսխ։ Երկու խարիսխ մյուս մույթի համար ևս։ ²⁶ Չփտող փայտից նիգեր կպատրաստես. հինգ նիգ՝ մի կողմի մույթաշարքի համար, ²⁷ հինգ նիգ՝ խորանի երկրորդ կողմի մույթաշարքի համար և հինգ նիգ՝ խորանի թիկունքի՝ ծովահայաց կողմի մույթաշարքի համար։ ²⁸ Մի նիգ էլ մույթերի միջով թող անցնի մի ծայրից մինչև մյուսը։ ²⁹ Մույթերը կպատես ոսկով։ Կպատրաստես ոսկե օղակներ, որոնց մեջ կհագցնես նիգերը։ Նիգերը կպատես ոսկով։ ³⁰ Խորանը կկանգնեցնես այն ձևով, որ ցույց տրվեց քեզ լեռան վրա։

³¹ Մի վարագույր կպատրաստես կապույտ, ծիրանագույն ու վառ կարմիր մանվածքից և ասեղնագործված բեհեզից։ Դրանց վրա կասեղնագործես քերովբեների պատկերներ։ ³² Այն կամրացնես չփտող փայտից շինված և ոսկով պատած չորս մույթերի վրա, որոնց խոյակները ոսկուց պիտի լինեն, իսկ խարիսխները՝ արծաթից։ ³³ Վարագույրը կձգես մույթից մույթ։

Ուխտի տապանակը կտանես վարագույրից ներս, և վարագույրը սրբությունը կառանձնացնի Սրբություն սրբոցից։ ³⁴ Սրբություն սրբոցում Ուխտի տապանակի վրա կդնես Քավարանը։

³⁵ Սեղանը կդնես վարագույրից դուրս, իսկ աշտանակը՝ սեղանի դիմաց՝ խորանի հարավային կողմում, մինչ սեղանը կդնես խորանի հյուսիսային կողմում։

³⁶ Խորանի դռան համար մեկ այլ վարագույր կպատրաստես կապույտ, ծիրանագույն և կարմիր մանվածքից և նրբահյուս բեհեզից՝ հմտորեն ասեղնագործված։ ³⁷ Վարագույրի համար չփտող փայտից հինգ մույթ կպատրաստես և դրանք կոսկեզօծես։ Դրանց խոյակները թող լինեն ոսկուց։ Դրանց համար պղնձե հինգ խարիսխ կձուլես»։

27

Զոհասեղանը

(Ելք 38.1-7)

¹ «Չփտող փայտից զոհասեղա՛ն պատրաստիր՝ հինգ կանգուն երկարությամբ և հինգ կանգուն լայնությամբ։ Քառակուսի թող լինի զոհասեղանը՝ երեք կանգուն բարձրությամբ։ ² Դրա չորս անկյունների վրա եղջյուրնե՛ր արա այնպես, որ դրանք միաձույլ լինեն զոհասեղանի հետ։ Դրանք կպատես պղնձով։ ³ Զոհասեղանի ծայրերին եզե՛րք պատրաստիր։ Մոխրի ամանները, տաշտերը, մսահանները, կրակամանները և ամբողջ սպասքը պղնձից կպատրաստես։ ⁴ Դրա համար պղնձից վանդակավոր կասկարա կպատրաստես։ Կասկարայի համար չորս կողմից չորս պղնձե օղակներ կպատրաստես։ ⁵ Դրանք կդնես զոհասեղանի կասկարայի տակ՝ ներքևի մասում։ Կասկարան թող հասնի մինչև զոհասեղանի մեջտեղը։ ⁶ Զոհասեղանի համար լծակնե՛ր պատրաստիր չփտող փայտից և դրանք պատի՛ր պղնձով։ ⁷ Լծակները մտցրո՛ւ օղակների մեջ։ Լծակները թող լինեն զոհասեղանի երկու կողմերից՝ այն բարձրացնելու համար։ ⁸ Զոհասեղանը պիտի լինի մույթերով, մեջը դատարկ, ըստ այն օրինակի, որ ցույց է տրվել քեզ լեռան վրա»։

Տիրոջ խորանի բակը և վարագույրը

(Ելք 38.9-20)

⁹ «Խորանի առաջ բա՛կ շինիր, բակի հարավային կողմում՝ նրբահյուս բեհեզից պատրաստված առագաստ՝ հարյուր կանգուն երկարությամբ՝ մի կողմում։ ¹⁰ Սյուները թող լինեն քսան հատ, դրանց պղնձե խարիսխները՝ քսան հատ։ Դրանց օղակներն ու խոյակները թող արծաթից լինեն։

¹¹ Նույնը և հյուսիսային կողմում. առագաստների երկարությունը թող լինի հարյուր կանգուն։ Դրանց պղնձե սյուները թող լինեն քսան հատ, դրանց պղնձե խարիսխները՝ քսան հատ։ Դրանց գալարազարդերը, սյուները և խարիսխները թող լինեն արծաթապատ։

¹² Բակի ծովահայաց կողմի առագաստների երկարությունը թող լինի հիսուն կանգուն։ Դրանց սյուները թող լինեն տասը հատ, դրանց խարիսխները՝ տասը հատ։

¹³ Բակի արևելյան կողմի առագաստների երկարությունը թող լինի հիսուն կանգուն։ Դրանց սյուները թող լինեն տասը հատ, դրանց խարիսխները՝ տասը հատ։ ¹⁴ Ընդ որում՝ դռան մի թևի առագաստների երկարությունը[14] թող լինի տասնհինգ կանգուն։ Դրանց սյուները թող լինեն երեք հատ, դրանց խարիսխները՝ երեք հատ։ ¹⁵ Դռան մյուս թևի առագաստների երկարությունը թող լինի տասնհինգ կանգուն։ Դրանց սյուները թող լինեն երեք հատ, դրանց խարիսխները՝ երեք հատ։ ¹⁶ Բակի դռան վարագույրի երկարությունը թող լինի քսան կանգուն։ Կապույտ, ծիրանի ու կարմիր մանվածքից և նրբահյուս բեհեզից պատրաստված թող լինի այն՝ նկարագեղ ասեղնագործությամբ։ Դրանց սյուները թող լինեն չորս հատ, խարիսխներն էլ՝ չորս հատ։

¹⁷ Բակը շրջափակող բոլոր սյուներն արծաթապատ թող լինեն, դրանց խոյակները՝ արծաթից, դրանց խարիսխները՝ պղնձից։

¹⁸ Բակի երկարությունը հարյուր կանգուն թող լինի, լայնությունը՝ հիսուն, իսկ բարձրությունը՝ հինգ կանգուն։

Առագաստը նրբահյուս բեհեզից թող լինի։ Դրանց խարիսխները պղնձից թող լինեն։ ¹⁹ Խորանի ամբողջ սպասքը, դրա բոլոր գործիքները և գավթի բոլոր ցցերը պղնձից թող լինեն»։

Ձեթ՝ ճրագի համար

(Ղևտ. 24.1-4)

²⁰ «Պատվիրի՛ր Իսրայելի որդիներին, որ քեզ ձիթենու զուլալ, անարատ, ծեծած ձիթապտղի ձեթ բերեն լույսի համար, որպեսզի մշտավառ ճրագ լինի ²¹ Վկայության խորանում՝ Ուխտի տապանակի վարագույրի դիմաց։ Ահարոնն ու նրա որդիները երեկոյից մինչև առավոտ թող այն վառեն Տիրոջ առաջ։ Դա Իսրայելի որդիների կողմից կատարվելիք հավիտենական օրենք թող լինի սերնդեսերունդ»։

28

Քահանաների զգեստները

(Ելք 39.1-30)

¹ «Դու Իսրայելի որդիներից քեզ մոտ կբերես քո եղբայր Ահարոնին, նրա հետ նաև նրա որդիներին, որ ինձ համար քահանայություն անեն Ահարոնը և նրա որդիներ Նադաբը, Աբիուդը, Եղիազարն ու Իթամարը։ ² Քո եղբայր Ահարոնի համար սրբազան զգեստներ կպատրաստես պատվավոր և փառավոր ծառայության համապատասխան։ ³ Դու կխոսես մտքով իմաստուն բոլոր մարդկանց հետ, որոնց ես իմաստության հոգով եմ լցրել, որ նրանք Ահարոնի սրբազան հանդերձանքը պատրաստեն, որ դրանք սրբացնեմ և դրանցով նա քահանայության պաշտոն կատարի ինձ համար։ ⁴ Այս է այն հանդերձանքը, որ նրանք պիտի պատրաստեն. լանջապանակը[15], պատմուճանը, եփուդը՝ ուսերի և լանջի համար, բեհեզյա շապիկը, խույրը և գոտին։ Սրբազան զգեստներ թող պատրաստեն քո եղբայր Ահարոնի ու նրա որդիների համար, որպեսզի ինձ համար քահանայություն անեն։ ⁵ Նրանք թող վերցնեն ոսկի, կապույտ, ծիրանի ու կարմիր մանվածք և նրբահյուս բեհեզ։

⁶ Եփուդը թող պատրաստեն մաքուր ոսկուց, կապույտ, ծիրանագույն և կարմիր մանվածքից և նրբահյուս բեհեզից՝ հմտորեն ասեղնագործված։ ⁷ Թող լինեն երկու կտորներ, որոնք կարող են իրար կապվել երկու ծայրերից։ ⁸ Եփուդի վերևի մասը նույն ձևով պետք է պատրաստված լինի՝ մաքուր ոսկուց, կապույտ, ծիրանագույն և կարմիր մանվածքից և նրբահյուս բեհեզից։ ⁹ Զմրուխտե երկու ակնաքար կվերցնես և դրանց վրա կփորագրես Իսրայելի որդիների անունները։ ¹⁰ Նրանցից վեցի անունները կփորագրես մի ակնաքարի վրա և մյուս վեցինը՝ երկրորդ ակնաքարի վրա՝ ըստ իրենց ցեղերի։ ¹¹ Դա ակնագործների արվեստին վայել մի գործ պետք է լինի։ Իսրայելի որդիների անունները կքանդակես երկու ակնաքարերի վրա այնպես, ինչպես կնիքներն են քանդակում։ Դրանց շուրջը ոսկով կզարդարես։ ¹² Երկու ակնաքարերը կզետեղես եփուդի երկու ուսերի վրա. այդ ակնաքարերը խորհրդանիշ են Իսրայելի որդիների։ Ահարոնը, ի հիշատակ նրանց, Աստծու առաջ իր երկու ուսերի վրա պետք է բարձրացնի Իսրայելի որդիների անունները։ ¹³ Վահանակներ կպատրաստես մաքուր ոսկուց։ ¹⁴ Կհյուսես երկու շղթա՝ մաքուր ոսկուց, ասեղնագործված ծաղիկներով, և շղթաները կամրացնես օղակներին՝ ուսակապերի մոտ, նրանց առջևի կողմից»։

Լանջապանակը

(Ելք 39.8-21)

¹⁵ «Դատաստանի լանջապանակը հմտորեն ասեղնագործված կանես եփուդի նման՝ ոսկուց, կապույտ, ծիրանագույն և կարմիր մանվածքից և նրբահյուս բեհեզից։ ¹⁶ Կպատրաստես այն քառակուսի՝ մեկ թիզ երկարությամբ և մեկ թիզ լայնությամբ կտորից։ ¹⁷ Դրա վրա ակնաքարերը կշարես չորս շարք ընդելուզվածքով։ Ակնաքարերի շարքերն այսպես թող լինեն. առաջինը՝ զմրուխտ, սարդիոն և տպազիոն՝ մեկ շարքով։ ¹⁸ Երկրորդ շարքը՝ նռնաքար, շափյուղա և հասպիս։ ¹⁹ Երրորդ շարքը՝ գոճազմ, ագատ և սուտակ։ ²⁰ Չորրորդ շարքը՝ հակինթ, բյուրեղ և եղնգաքար։ Դրանք թող դասավորվեն ըստ իրենց նշված շարքերի՝ ընդելուզված, ոսկով ամրացված։ ²¹ Իսրայելի որդիների անուններով փորագրված ակնաքարերը թող լինեն տասներկուսը՝ ըստ նրանց անունների թվի։ Յուրաքանչյուրն ըստ այդ տասներկու ցեղերի թող ունենա իր անունը։ ²² Լանջապանակի վրա մաքուր ոսկուց շինված ոլորուն շղթա կպատրաստես։ ²³ Լանջապանակի վրա երկու շղթա կպատրաստես ոսկուց և երկու ոսկյա օղակներ կամրացնես լանջապանակի երկու ծայրերին։ ²⁴ Երկու ոսկե շղթաները կանցկացնես լանջապանակի ծայրերին ամրացված երկու օղակների մեջ։ ²⁵ Երկու շղթաների երկու ծայրերը կմտցնես երկու օղակների մեջ և եփուդի առջևի կողմից տանելով՝ կանցկացնես եփուդի հետևի կողմը։ ²⁶ Երկու ոսկե օղակներ էլ կպատրաստես և դրանք կամրացնես լանջապանակի ներքևի երկու ծայրերին՝ եփուդին կցված եզրերին։ ²⁷ Երկու ոսկե այլ օղակներ կպատրաստես և դրանք կանցկացնես եփուդի երկու ուսերին ներքևի կողմից՝ միմյանց դեմ դիմաց։ Դրա կոճակները թող լինեն եփուդի գոտու վրա։ ²⁸ Լանջապանակի ու եփուդի օղակների միջով կապույտ թել անցկացնելով՝ դրանք թող պինդ ամրացվեն իրար այնպես, որ լանջապանակը լինի եփուդի գոտու վրա և եփուդից չառանձնանա։ ²⁹ Երբ Ահարոնը սրբարան մտնի, նա իր կրծքի վրա թող կրի Իսրայելի որդիների անուններով քանդակված դատաստանի լանջապանակը, որպեսզի Աստծու առաջ հավիտենապես պահպանի նրանց հիշատակը։ ^29ա Դատաստանի լանջապանակին կամրացնես շղթաների ծայրերը և լանջապանակի երկու կողմերից կկապես։ Երկու օղակ կդնես եփուդի երկու ուսերին՝ առջևի կողմից և ներքևից։ ³⁰ Դատաստանի լանջապանակի վրա կդնես Հայտնությունն ու Ճշմարտությունը[16] [*  Ուրիմ և Թումիմ]։ Դա թող լինի Ահարոնի կրծքի վրա, երբ նա, սրբարան մտնելով, ներկայանա Տիրոջը։ Ահարոնը Տիրոջ առաջ իր կրծքի վրա միշտ թող կրի Իսրայելի որդիների դատաստանի լանջապանակը»։

Քահանայական սրբազան այլ զգեստներ

(Ելք 39.22-31)

³¹ «Պատմուճան կպատրաստես ամբողջությամբ կապույտ թելով հյուսված կտավից։ ³² Դրա վերին մասը շուրջանակի կլոր կտրելով՝ բացվածք կթողնես։ Միացման տեղերը ամբողջական՝ մեկ կտոր թող լինեն, որպեսզի այդ զգեստը չպատռվի։ ³³ Պատմուճանի ներքևի քղանցքին մանված կապույտ, ծիրանի ու կարմիր թելերով և նրբահյուս բեհեզով նռան ծաղկաբողբոջներ կգործես։ Դրանք կգործես պատմուճանի ներքևի քղանցքների շուրջբոլորը։ Այդ զարդերը թող ունենան նռան ծաղկաբողբոջի ձևը, և դրանց միջև շուրջանակի ոսկե զանգակներ թող լինեն։ ³⁴ Ոսկե զանգակներն ու նռան ծաղկաբողբոջները շուրջանակի թող զարդարեն պատմուճանի ներքևի քղանցքները։ ³⁵ Դա թող հագնի Ահարոնը, որպեսզի երբ պաշտամունք է կատարում, Տիրոջ առաջ սրբարան մտնելիս ու ելնելիս լսվեն դրանց արձակած ձայները, և Ահարոնը չմեռնի։

Խույրը

³⁶ Մաքուր ոսկուց թիթեղ կպատրաստես և դրա վրա, ինչպես կնիքի վրա են փորագրում, “Ընծայված Տիրոջը” կփորագրես։ ³⁷ Այն կամրացնես նրբահյուս կապույտ ժապավենի վրա։ ³⁸ Դա կկապես Ահարոնի գլխին դրվող խույրի ճակատին։ Ահարոնը թող իր վրա վերցնի այն բոլոր մեղքերը, որ Իսրայելի որդիները կգործեն սուրբ բաներ ընծայաբերելու ժամանակ։ Դա միշտ Ահարոնի ճակատին պետք է լինի, որպեսզի այդ ընծաները ընդունելի լինեն Տիրոջը։

³⁹ Պատմուճանը բեհեզից կպատրաստես։ Բեհեզից կպատրաստես նաև ապարոշն ու նախշազարդ գոտին։

⁴⁰ Ահարոնի որդիների համար պատմուճաններ, գոտիներ ու ապարոշներ կպատրաստես՝ պատվի և փառքի համար։ ⁴¹ Դրանք կհագցնես քո եղբայր Ահարոնին ու նրա որդիներին։ Կօծես նրանց, կնվիրագործես նրանց ձեռքերն ու կսրբագործես նրանց, որպեսզի ինձ համար քահանայություն անեն։

⁴² Նրանց համար կտավից անդրավարտիքներ կպատրաստես, որպեսզի դրանք, նրանց մեջքից մինչև սրունքները հասնելով, ծածկեն նրանց ամոթույքը։ ⁴³ Ահարոնն ու նրա որդիները թող հագնեն այն, երբ մտնեն Վկայության խորանը կամ երբ պաշտամունք կատարելու համար մոտենան սուրբ սեղանին։ Նրանք մեղք թող չգործեն, որպեսզի չմեռնեն։ Դա թող լինի հավիտենական օրենք իր և իրեն հաջորդող սերնդի համար»։

29

Ձեռնադրության հրահանգներ

(Ղևտ. 8.1-36)

¹ «Ահա թե ի՛նչ պիտի անես նրանց սրբելու համար, որպեսզի ինձ համար քահանայություն անեն։ Հոտից կընտրես մի զվարակ և երկու խոյ՝ արատ չունեցող, ² կվերցնես յուղով հունցված բաղարջ հացեր և բաղարջ կարկանդակներ ու յուղով օծված բաղարջ բլիթներ։ Այդ բոլորը յուղով հունցված նաշիհով կպատրաստես։ ³ Կդնես մի զամբյուղի մեջ և զամբյուղով էլ կմատուցես դրանք, ինչպես նաև զվարակն ու երկու խոյերը։

⁴ Ահարոնին ու նրա որդիներին կբերես Վկայության խորանի դռան մոտ և նրանց կլվանաս ջրով։ ⁵ Զգեստներն առնելով՝ կհագցնես Ահարոնին՝ քո եղբորը, երկար շապիկը, պատմուճանը, եփուդն ու լանջապանակը։ Լանջապանակը կամրացնես եփուդին։ ⁶ Խույրը կդնես նրա գլխին, իսկ ոսկյա սուրբ թիթեղը կդնես խույրի ճակատին։ ⁷ Կվերցնես օծության յուղից, կթափես նրա գլխին և կօծես նրան։ ⁸ Մոտ կբերես նրա որդիներին, նրանց նույնպես կհագցնես շապիկները, ⁹ գոտիները կկապես Ահարոնի ու նրա որդիների մեջքին, կդնես ապարոշները. այսուհետև նրանք հավիտյան քահանայագործելու են ինձ համար։ Եվ կսրբագործես Ահարոնի ձեռքերն ու նրա որդիների ձեռքերը։

¹⁰ Զվարակը կբերես Վկայության խորանի դռան մոտ, և Ահարոնն ու նրա որդիները Վկայության խորանի դռան մոտ՝ Տիրոջ առաջ, իրենց ձեռքերը թող դնեն զվարակի գլխին։ ¹¹ Զվարակը կմորթես Տիրոջ առաջ՝ Վկայության խորանի դռանը։ ¹² Կառնես զվարակի արյունից և մատով կքսես զոհասեղանի եղջյուրներին, իսկ մնացած ամբողջ արյունը կհեղես զոհասեղանի հատակին։ ¹³ Կվերցնես փորոտիքը ծածկող ամբողջ ճարպը, լյարդի տակի բլթակը և երկու երիկամներն իրենց ճարպի հետ, կդնես զոհասեղանի վրա։ ¹⁴ Զվարակի միսը, մորթին ու փորոտիքը թող այրեն բանակատեղիից դուրս։ Այդ զոհաբերությունը մեղքերի համար է։

¹⁵ Կվերցնես խոյերից մեկը, և Ահարոնն ու նրա որդիները իրենց ձեռքերը թող դնեն խոյի գլխին։ ¹⁶ Մորթի՛ր խոյը և վերցնելով նրա արյունը՝ հեղի՛ր զոհասեղանի շուրջը։ ¹⁷ Խոյը անդամահատի՛ր, ջրով լվա՛ նրա փորոտիքն ու ոտքերը և դրանք նրա գլխի հետ դի՛ր կտրտած անդամների վրա։ ¹⁸ Ողջ խոյը կմատուցես զոհասեղանին՝ իբրև ողջակեզ, անուշահոտություն Տիրոջ համար։ Դա Տիրոջ զոհն է։

¹⁹ Կվերցնես երկրորդ խոյը, և Ահարոնն ու նրա որդիները իրենց ձեռքերը թող դնեն խոյի գլխին։ ²⁰ Կմորթես խոյը, կվերցնես նրա արյունից և կքսես Ահարոնի աջ ականջի բլթակին, նրա աջ ձեռքի ծայրերին, նրա աջ ոտքի ծայրերին, նրա որդիների աջ ականջների բլթակներին, նրանց աջ ձեռքերի ծայրերին, նրանց աջ ոտքերի ծայրերին։ Եվ արյունը կհեղես զոհասեղանի շուրջը։ ²¹ Կվերցնես զոհասեղանի վրա գտնվող արյունից ու օծության յուղից և կցանես Ահարոնի ու նրա զգեստների վրա, նրա որդիների ու նրա որդիների զգեստների վրա, որպեսզի սրբագործվեն ինքն ու իր զգեստները, նրա որդիներն ու նրա որդիների զգեստները։ Խոյի արյունը կհեղես զոհասեղանի շուրջը։ ²² Կվերցնես խոյի ճարպը, դմակը, փորոտիքը ծածկող ճարպը, լյարդի տակի բլթակը, երկու երիկամներն իրենց ճարպով և աջ զիստը։ Դա նվիրագործման կիզակետն է։

²³ Տիրոջ առաջ դրված բաղարջների զամբյուղից կվերցնես մի հաց, յուղով հունցված մի կարկանդակ ու մի բլիթ, ²⁴ այդ ամենը կդնես Ահարոնի ձեռքերի վրա, նրա որդիների ձեռքերի վրա և որպես ընծա կնվիրաբերես Տիրոջ առաջ։ ²⁵ Կվերցնես նրանց ձեռքերից և կհանես ողջակեզների զոհասեղանին՝ իբրև անուշահոտություն Տիրոջ համար։ Դա Տիրոջը նվիրված զոհ է։

²⁶ Կվերցնես Ահարոնին քահանա օծելու համար զոհաբերված խոյի կուրծքը և այն որպես ընծա կնվիրաբերես Տիրոջ առաջ, և դա կլինի քո բաժինը։ ²⁷ Խոյի կուրծքը, ինչպես նաև նրա զիստը, պիտի համարվի սուրբ, որ պիտի անջատվի խոյից Ահարոնի և նրա որդիների նվիրագործման համար. ²⁸ դա թող հավիտենական օրենք լինի Ահարոնի և նրա որդիների վերաբերյալ՝ Իսրայելի որդիների համար, քանզի դա է նրանց բաժինը։ Եվ դա Իսրայելի որդիների՝ իրենց փրկության համար Տիրոջ առաջ զոհաբերվելիք նվերը թող լինի։

²⁹ Ահարոնի սրբազան զգեստներն իրենից հետո թող պատկանեն իր որդիներին, որպեսզի նրանք այդ զգեստով օծվեն, ու նրանց ձեռքերը սրբվեն։ ³⁰ Նրա որդիներից նա, ով պիտի փոխարինի նրան, երբ մտնի Վկայության խորան՝ սրբարանում պաշտամունք կատարելու, թող յոթ օր այդ զգեստները հագնի։

³¹ Սրբացման համար մատուցվող խոյը և դրա միսը կեփես մի սուրբ վայրում։ ³² Ահարոնն ու նրա որդիները թող ուտեն խոյի մսից և սկուտեղի վրայի բաղարջ հացերից Վկայության խորանի դռանը։ ³³ Թող ուտեն այն բաները, որոնցով նրանք սրբագործվել են և մաքրել իրենց ձեռքերը։ Այլ ոք թող դրանցից չուտի, որովհետև դրանք սուրբ ուտելիքներ են։ ³⁴ Եթե սրբացման համար մատուցված զոհի մսից ու հացից մնա մինչև առավոտ, ապա դրանք կայրես կրակով. այն թող չուտվի, որովհետև սուրբ է։

³⁵ Այն ամենը, ինչ կարգադրում եմ քեզ Ահարոնի ու նրա որդիների վերաբերյալ, կկատարես։ Յոթ օր կկատարես նրանց ձեռքերի սրբագործումը։ ³⁶ Սրբագործման յուրաքանչյուր օր մեկական զվարակ կզոհես՝ իբրև մեղքերի քավության զոհ։

³⁷ Յոթ օր կմաքրես և կսրբագործես զոհասեղանը, որպեսզի զոհասեղանը լինի սրբագույն։ Զոհասեղանին դիպչող ամեն ոք կսրբվի»։

Ամենօրյա ընծաներ

(Թվ. 28.1-8)

³⁸ «Ահա թե ի՛նչ պիտի զոհես զոհասեղանի վրա. ամեն օր, մշտապես, արատ չունեցող մեկ տարեկան երկու գառ. դա ամենօրյա զոհաբերություն պիտի լինի։ ³⁹ Գառներից մեկը կզոհես առավոտյան, իսկ մյուս գառը կզոհես երեկոյան։ ⁴⁰ Ամեն մի գառան հետ կբերես նաև շուրջ մեկուկես լիտր զտված յուղ՝ շաղված երեք կիլոգրամ նաշիհի հետ, ինչպես նաև մեկուկես լիտր գինի՝ իբրև ընծա։ ⁴¹ Երկրորդ գառը կզոհես երեկոյան այնպես, ինչպես առավոտյան զոհված գառը՝ բերելով նույն ընծաները՝ որպես անուշահոտ ընծա Տիրոջ համար։ ⁴² Այս ամենօրյա զոհաբերությունը պիտի լինի մշտապես, Վկայության խորանի դռանը՝ Տիրոջ առաջ, որտեղ ես քեզ կհայտնվեմ և կխոսեմ քեզ հետ։ ⁴³ Այնտեղ պիտի երևամ Իսրայելի որդիներին, ու պիտի հայտնվի իմ սրբությունը փառքով։ ⁴⁴ Ես պիտի սրբագործեմ Վկայության խորանն ու զոհասեղանը, պիտի սրբագործեմ Ահարոնին ու նրա որդիներին, որպեսզի նրանք ինձ համար քահանայություն անեն։ ⁴⁵ Այսպիսով Իսրայելի որդիները կկանչեն ինձ, և ես կլինեմ նրանց Աստվածը։ ⁴⁶ Եվ նրանք կիմանան, որ ես՝ Տերը՝ իրենց Աստվածը, որ իրենց հանեցի եգիպտացիների երկրից, պիտի բնակվեմ նրանց մեջ»։

30

Խնկարկության սեղանը

(Ելք 37.25-28)

¹ «Խնկարկության սեղան կպատրաստես չփտող փայտից։ ² Այն կշինես քառակուսի՝ մեկ կանգուն երկարությամբ, մեկ կանգուն լայնությամբ և երկու կանգուն բարձրությամբ, եղջյուրները նույն կտոր փայտից։ ³ Մաքուր ոսկով կպատես այն, ինչպես նաև դրա կասկարան, չորս կողմերն ու եղջյուրները։ Դրա շուրջբոլորը ոսկե պսակ կդնես։ ⁴ Երկու կողմերից մաքուր ոսկուց երկուական օղակներ կպատրաստես պսակից ներքև։ Դրանք կամրացնես նրա երկու անկյուններին, որպեսզի լծակները օղակների մեջ անցկացնելով՝ այն բարձրացվի։ ⁵ Լծակները կպատրաստես չփտող փայտից ու դրանք կպատես ոսկով։ ⁶ Այն կդնես պատվիրանները պարունակող տապանակի առջև գտնվող վարագույրի առաջ, որով ես երևալու եմ քեզ այնտեղ։ ⁷ Ահարոնն ամեն առավոտ դրա վրա մանրացրած, բաղադրյալ խունկ թող դնի, և երբ կանթեղներն է պատրաստում, թող դրա վրա ծխի։ ⁸ Երբ Ահարոնը երեկոյան վառի կանթեղները, Տիրոջ առաջ՝ խնկարկության սեղանի վրա, միշտ խունկ թող ծխի։ Դա նրանց սերունդների մեջ խնկարկության մշտնջենական կարգ թող լինի։ ⁹ Խնկարկության սեղանի վրա օտար խունկ մի՛ ծխեք, ողջակեզներ, զոհեր ու գինի մի՛ մատուցեք։ ¹⁰ Ահարոնը տարին մեկ անգամ խնկարկության սեղանի եղջյուրների վրա մեղքերի թողության և քավության ծես պետք է անի մեղքերի քավության համար զոհվող կենդանու արյամբ։ Նրա սերունդները տարին մեկ անգամ թող սրբագործեն այն, որովհետև դա Տիրոջ սրբությունների սրբությունն է»։

Սրբարանի տուրքը

¹¹ Տերն ասաց Մովսեսին. ¹² «Երբ Իսրայելի որդիների թիվն իմանալու համար մարդահամար անես, նրանք Տիրոջը թող տան իրենց փրկագինը, որպեսզի մարդահամարի ժամանակ պատուհասի չենթարկվեն։ ¹³ Մարդահամարի ենթարկվողները պետք է փրկագին վճարեն երկդրամյանի կեսի չափով՝ ըստ սրբարանի սակագնի։ Երկդրամյանը քսան դանգի է հավասար։ Երկդրամյանի կեսը թող լինի Տիրոջը հասանելիք տուրքը։ ¹⁴ Քսան տարեկան և ավելի բարձր տարիք ունեցող բոլոր նրանք, ովքեր կանցնեն մարդահամարով, Տիրոջը հասանելիք տուրքը պետք է վճարեն։ ¹⁵ Իսրայելի որդիներից մեծահարուստը թող չավելացնի, իսկ աղքատը թող չպակասեցնի Տիրոջը որպես տուրք հասանելիք կես երկդրամյանը, որպեսզի դա ձեզ համար քավություն լինի։ ¹⁶ Իսրայելի որդիներից կվերցնես Տիրոջ հասանելիք արծաթը և այն կհատկացնես Վկայության խորանի սպասավորությանը։ Դա Տիրոջ առաջ հիշատակ կլինի Իսրայելի որդիների համար՝ որպես քավություն նրանց»։

Պղնձե ավազանը

(Ելք 38.8)

¹⁷ Տերն ասաց Մովսեսին. ¹⁸ «Պղնձե ավազա՛ն պատրաստիր պղնձե պատվանդանով, որպեսզի լվացվեք նրա մեջ։ Այն դի՛ր Վկայության խորանի ու զոհասեղանի միջև։ Դրա մեջ ջուր կլցնես։ ¹⁹ Ահարոնն ու նրա որդիները դրա մեջ կլվանան իրենց ձեռքերն ու ոտքերը։ ²⁰ Երբ մտնեն Վկայության խորանը, ջրով թող լվացվեն, և չեն մեռնի։ Կամ երբ մերձենան զոհասեղանին՝ ծառայելու և Տիրոջը ողջակեզները մատուցելու, ²¹ թող լվանան իրենց ձեռքերն ու ոտքերը, որպեսզի չմեռնեն։ Դա նրանց համար թող հավիտենական օրենք լինի, նրա և նրա հետնորդների համար»։

Օծության յուղը

(Ելք 37.29ա)

²² Տերն ասաց Մովսեսին. ²³ «Վերցրո՛ւ անուշահոտ խունկեր. զմռնենու հինգ հարյուր սիկղ ընտիր ծաղիկներ, դրա կեսի չափ՝ երկու հարյուր հիսուն սիկղ, անուշաբույր կինամոն, երկու հարյուր հիսուն սիկղ անուշաբույր խնկեղեգ, ²⁴ սրբարանի հինգ հարյուր սիկղ հիրիկ և մեկ հիմեն ձիթապտղի ձեթ։ ²⁵ Կպատրաստես սուրբ օծության յուղ, եփված յուղ ըստ անուշահոտություն պատրաստող վարպետների արվեստի։ Այն սուրբ օծության յուղը թող լինի։ ²⁶ Դրանով կօծես Վկայության խորանը, Ուխտի տապանակը, ²⁷ զոհասեղանն ու նրա ամբողջ սպասքը, աշտանակն ու նրա ամբողջ սպասքը, խնկարկության սեղանը, ²⁸ ողջակեզների զոհասեղանն ու նրա ամբողջ սպասքը, ավազանն ու նրա պատվանդանը։ ²⁹ Կսրբագործես դրանք, և դրանք կլինեն սրբությունների սրբություն։ Ամեն ոք, որ դիպչի դրանց, կմաքրվի։

³⁰ Կօծես Ահարոնին ու նրա որդիներին, կսրբես նրանց, որպեսզի ինձ համար քահանայագործեն։ ³¹ Կասես Իսրայելի որդիներին. “Օծության այս յուղը թող սուրբ լինի ձեզ և ձեր սերունդների համար։ ³² Այն մարդու մարմինը օծելու համար թող չօգտագործվի։ Ձեզ համար նույն բաղադրությամբ նման բան չպատրաստեք, որովհետև դա սրբություն է և ձեզ համար սրբություն էլ թող մնա։ ³³ Ով այդպիսի բան պատրաստի և ով դրանից օտարականի տա, թող վերանա իր ժողովրդի միջից”»։

Խունկը

(Ելք 37.29բ)

³⁴ Տերն ասաց Մովսեսին. «Վերցրո՛ւ անուշաբույր նյութեր. ստաշխ, եղնգաքար, անուշաբույր քաղբան և մաքուր կնդրուկ։ Դրանք թող քաշով իրար հավասար լինեն։ ³⁵ Եվ դրանցով յուղագործի արվեստով բաղադրյալ խունկ կպատրաստես, մաքուր, սուրբ գործ։ ³⁶ Դրանք կմանրացնես և կդնես Վկայությունների դիմաց՝ Վկայության խորանի մեջ, որտեղից պիտի երևամ քեզ։ Այդ խունկը սրբություն թող լինի ձեզ համար։ ³⁷ Ձեզ համար նույն բաղադրությամբ խունկ մի՛ պատրաստեք, որովհետև դա Տիրոջը պատկանող սրբություն է։ ³⁸ Այն մարդը, որ նույն այս բաղադրությամբ խունկ կպատրաստի հոտոտելու համար, կվերանա իր ժողովրդի միջից»։

31

Սրբարանը պատրաստող պաշտոնյաները

(Ելք 35.30–36.1)

¹ Տերը խոսեց Մովսեսի հետ և ասաց. ² «Ահա անվանապես ընտրեցի Բեսելիելին՝ Հուդայի ցեղից Ովրի որդի Ուրիի որդուն։ ³ Եվ լցրի նրան աստվածային իմաստության հոգով, հանճարով և գիտությամբ՝ ամեն մի գործի համար՝ ⁴ խելամուտ լինելու և ճարտարապետելու, մշակելու ոսկին, արծաթն ու պղինձը, մանելու կապույտ, ծիրանի ու կարմիր մանվածք, ⁵ կարող լինելու զբաղվելու ակնագործությամբ, նաև ատաղձագործությամբ և հաջողությամբ կատարելու ամեն մի գործ։ ⁶ Ահա ես նրան օգնական տվեցի Եղիաբին՝ Դանի ցեղից Աքիսամի որդուն, նաև շատերին տվեցի իմաստություն, որպեսզի անեն այն, ինչ պատվիրել եմ քեզ՝ ⁷ Վկայության խորանը, Ուխտի տապանակն ու նրա վրայի Քավությունը և խորանի ողջ սպասքը, ⁸ զոհարաններն ու սեղանը և ողջ սպասքը, սուրբ աշտանակն ու նրա ամբողջ սպասքը, խնկարկության սեղանը, ողջակեզների սեղանն ու նրա ողջ սպասքը, ⁹ ավազանն ու նրա պատվանդանը, ¹⁰ ծիսակատարության զգեստները, Ահարոն քահանայի սրբազան զգեստներն ու նրա որդիների զգեստները՝ ինձ քահանայություն անելու, ¹¹ օծության յուղն ու սրբարանի բաղադրյալ խունկը։ Այն ամենը, ինչ պատվիրել եմ քեզ, կանես»։

Շաբաթը՝ հանգստյան օր

(Ելք 35.1-3)

¹² Տերը խոսեց Մովսեսի հետ և ասաց. ¹³ «Խոսի՛ր Իսրայելի որդիների հետ և ասա՛. “Զգո՛ւյշ եղեք, պահե՛ք իմ շաբաթները, որովհետև դա իմ ու ձեր միջև դրված նշանն է սերնդեսերունդ, որպեսզի ճանաչեք, որ ես Տերն եմ՝ ձեզ սրբագործողը։ ¹⁴ Պահե՛ք շաբաթները, քանի որ շաբաթը սուրբ է ձեզ համար՝ ընծայված Տիրոջը։ Ով այն պղծի, թող մահվան դատապարտվի։ Ամեն ոք, ով այդ օրը գործ անի, թող վերանա իր ժողովրդի միջից։ ¹⁵ Վեց օր աշխատե՛ք, իսկ յոթերորդ օրը շաբաթ է՝ Տիրոջը նվիրված սուրբ հանգստյան օր։ Ով շաբաթ օրը գործ անի, թող մահվան դատապարտվի։ ¹⁶ Իսրայելի որդիները թող պահեն շաբաթները սերնդեսերունդ՝ որպես հավիտենական ուխտ։ ¹⁷ Իմ ու Իսրայելի որդիների միջև հավիտենական նշան է, որովհետև Տերը վեց օրում ստեղծեց երկինքն ու երկիրը, իսկ յոթերորդ օրը դադար առավ և հանգստացավ”»։

¹⁸ Եվ երբ Սինա լեռան վրա ավարտեց իր խոսքը, Մովսեսին տվեց Վկայության երկու տախտակները՝ քարեղեն տախտակներ՝ գրված Աստծու մատով։

32

Ոսկե հորթը

(Բ Օր. 9.7-29)

¹ Իսկ ժողովուրդը, տեսնելով, որ լեռից Մովսեսի իջնելն ուշացավ, հավաքվեց Ահարոնի մոտ ու ասաց նրան. «Վե՛ր կաց և մեզ համար աստվածնե՛ր ստեղծիր, որ առաջնորդեն մեզ, որովհետև չգիտենք, թե ի՛նչ եղավ այն մարդը՝ Մովսեսը, որ մեզ Եգիպտոսից դուրս հանեց»։ ² Ահարոնն ասաց նրանց. «Ձեր կանանց, ձեր տղաների ու աղջիկների ականջներից հանե՛ք ոսկե գինդերը և բերե՛ք ինձ»։ ³ Ողջ ժողովուրդն իրենց կանանց ականջներից հանեց ոսկե գինդերը և բերեց Ահարոնին։ ⁴ Եվ վերցրեց նրանց ձեռքից, կաղապարի մեջ ձուլեց և ձուլածո մի հորթ պատրաստեց։ Եվ ասացին. «Սրանք են քո աստվածները, Իսրայե՛լ, որ հանեցին քեզ եգիպտացիների երկրից»։

⁵ Երբ Ահարոնն այդ տեսավ, նրա առաջ զոհասեղան շինեց։ Եվ Ահարոնը քարոզեց ու ասաց. «Վաղը Տիրոջ տոնն է»։ ⁶ Առավոտյան վեր կենալով՝ նա ողջակեզներ մատուցեց, ինչպես նաև փրկության զոհեր։ Ժողովուրդը նստեց ուտելու և ըմպելու, ապա վեր կացավ պարելու։

⁷ Տերը Մովսեսին ասաց. «Գնա՛, շտապ իջի՛ր, որովհետև քո ժողովուրդը, որին հանեցիր եգիպտացիների երկրից, անօրինացավ։ ⁸ Շուտ շեղվեցին այն ճանապարհից, որ պատվիրեցիր նրանց. իրենց համար ձուլածո հորթ ստեղծեցին և երկրպագում են նրան, զոհեր մատուցում ու ասում. “Սրանք են քո աստվածները, Իսրայե՛լ, որ հանեցին քեզ Եգիպտոսից”»։ ⁹ Եվ Տերն ասաց Մովսեսին. «Տեսնում եմ, որ այս ժողովուրդը խստապարանոց է։ ¹⁰ Թող, որ իմ զայրույթով կոտորեմ նրանց և քեզ մեծ ազգ դարձնեմ»։ ¹¹ Մովսեսն աղաչեց Տիրոջը՝ իր Աստծուն՝ ասելով. «Տե՛ր, ինչո՞ւ ես այդպես խիստ զայրանում քո ժողովրդի վրա, որին քո մեծ զորությամբ ու հզոր բազկով դուրս բերեցիր եգիպտացիների երկրից։ ¹² Այնպես չլինի, որ եգիպտացիները, որոնց միջից հանեցիր մեզ, ասեն. “Չար մտադրությամբ դուրս բերեց նրանց, որպեսզի լեռների վրա կոտորի և ջնջի նրանց երկրի երեսից”։ Մի՛ զայրացիր, հրաժարվի՛ր քո ժողովրդին չարիք պատճառելուց։ ¹³ Հիշի՛ր քո ծառաներ Աբրահամին, Իսահակին ու Հակոբին, որոնց քո անձով երդվեցիր, խոսեցիր նրանց հետ՝ ասելով. “Երկնքի աստղերի չափ պիտի բազմացնեմ ձեր սերունդը”։ Եվ այն երկիրը, որ խոստացար տալ նրանց զավակներին, թող հավիտյան տիրեն դրան»։ ¹⁴ Եվ Տերը մեղմացավ ու նրանց չպատժեց։

¹⁵ Մովսեսը վերադառնալով իջավ լեռից՝ Վկայության երկու տախտակները ձեռքին։ Քարե տախտակներ՝ գրված երկու երեսին՝ այս ու այն կողմից։ ¹⁶ Տախտակներն Աստծու գործն էին, տախտակների վրա դրոշմած գիրը՝ Աստծու գիրը։ ¹⁷ Հեսուն, լսելով աղաղակող ժողովրդի ձայնը, Մովսեսին ասաց. «Բանակատեղիից պատերազմի ձայն է գալիս»։ ¹⁸ Մովսեսն ասաց. «Ո՛չ հարձակվողների կոչեր են և ո՛չ էլ պարտվածների աղաղակ։ Այլ գինուց ընդարմացած մարդկանց ձայնն եմ ես լսում»։ ¹⁹ Երբ Մովսեսը մոտեցավ բանակատեղիին և տեսավ հորթն ու պարողներին, խիստ զայրացավ, նետեց ձեռքում եղած երկու տախտակներն ու դրանք ջարդուփշուր արեց լեռան ստորոտին։

²⁰ Եվ վերցնելով նրանց ստեղծած հորթը՝ այրեց կրակով, ապա մանրեց, փոշու վերածեց, փոշին խառնեց ջրին ու խմեցրեց Իսրայելի որդիներին։

²¹ Մովսեսն ասաց Ահարոնին. «Ի՞նչ է արել քեզ այս ժողովուրդը, որ նրան այդպիսի մեծ մեղքերի մղեցիր»։ ²² Ահարոնն ասաց Մովսեսին. «Մի՛ զայրացիր, տե՛ր իմ, որովհետև դու ինքդ էլ գիտես քո ժողովրդի մոլուցքը։ ²³ Որովհետև ասացին. “Մեզ համար աստվածնե՛ր ստեղծիր, որ մեզ առաջնորդեն, որովհետև չգիտենք, թե ի՛նչ պատահեց այն մարդուն՝ Մովսեսին, որը Եգիպտոսից հանեց մեզ”։ ²⁴ Եվ նրանց ասացի. “Եթե որևէ մեկը ոսկի ունի, նրա վրայից հանե՛ք դա և բերե՛ք ինձ”։ Նրանք ինձ տվեցին ոսկին. ես այն նետեցի կրակը, և ահա եղավ այս հորթը»։

²⁵ Մովսեսը տեսավ, որ ժողովուրդը հանցանքի մեջ է ընկել, որովհետև Ահարոնը նրանց մղել է դրան՝ ի չարախնդություն իրենց թշնամիների։ ²⁶ Մովսեսը, կանգնելով բանակատեղիի մուտքի մոտ, ասաց. «Ով Տիրոջն է պատկանում, ինձ մոտենա»։ Նրա շուրջը հավաքվեցին Ղևիի բոլոր որդիները։ ²⁷ Եվ նրանց ասաց. «Այսպես է ասում Տերը՝ Իսրայելի Աստվածը. “Յուրաքանչյուրն իր սուրը թող կապի իր ազդրին. մտե՛ք բանակատեղիի մի մուտքից ու անցե՛ք դեպի մյուսը, և ձեզնից յուրաքանչյուրը թող սպանի իր եղբորը, իր ընկերոջն ու իր մերձավորին”»։ ²⁸ Ղևիի որդիներն արեցին այնպես, ինչպես ասել էր Մովսեսը։ Այդ օրը ժողովրդի միջից շուրջ երեք հազար մարդ ընկավ։ ²⁹ Մովսեսն ասաց նրանց. «Այսօր ձեր ձեռքով ծառայեցիք Տիրոջը՝ յուրաքանչյուրդ սպանելով իր որդուն կամ իր եղբորը, որի համար այսօր ձեզ վրա կիջնի Տիրոջ օրհնությունը»։

³⁰ Հաջորդ օրը Մովսեսն ասաց ժողովրդին. «Դուք մեծ մեղք եք գործել, բայց ես հիմա կբարձրանամ Աստծու մոտ, որպեսզի ձեր մեղքերի համար քավություն խնդրեմ»։ ³¹ Մովսեսը վերադարձավ Տիրոջ մոտ ու ասաց նրան. «Աղաչում եմ քեզ, Տե՛ր, այս ժողովուրդը մեծ մեղք է գործել՝ իր համար ոսկե աստվածներ պատրաստելով։ ³² Արդ, եթե ներելու ես նրանց մեղքերը, ների՛ր, իսկ եթե ոչ, ուրեմն իմ անունը ևս ջնջի՛ր քո մատյանից, որի մեջ գրեցիր»։

³³ Տերն ասաց Մովսեսին. «Եթե մեկը մեղանչի իմ առաջ, կջնջեմ նրան իմ մատյանից։ ³⁴ Բայց հիմա գնա՛, իջի՛ր և այդ ժողովրդին առաջնորդի՛ր այն վայրը, որի մասին ասել եմ քեզ։ Իմ հրեշտակը կգնա քո առջևից։ Բայց այն օրը, երբ այցելեմ, նրանց մեղքերը իրենց վրա պիտի դնեմ»։ ³⁵ Եվ Տերը ժողովրդին պատուհասեց այն հորթի համար, որ ստեղծել էր Ահարոնը։

33

Մեկնումի հրաման

¹ Տերն ասաց Մովսեսին. «Ելե՛ք այստեղից դու և քո ժողովուրդը, որին հանեցիր եգիպտացիների երկրից, դեպի այն երկիրը, որ երդվել եմ Աբրահամին, Իսահակին ու Հակոբին՝ ասելով. “Ձեր զավակներին եմ տալու այն”։ ² Ես քո առջևից կուղարկեմ իմ հրեշտակին, որը կքշի քանանացիներին, ամորհացիներին, քետացիներին, փերեզացիներին, գերգեսացիներին, խևացիներին ու հեբուսացիներին ³ և քեզ կտանի այն երկիրը, որ կաթ ու մեղր է բխեցնում։ Բայց ես չեմ գա ձեզ հետ, որովհետև խստապարանոց ժողովուրդ եք, որ չլինի թե ճանապարհին ձեզ կոտորեմ»։ ⁴ Ժողովուրդը, լսելով այդ խիստ խոսքերը, մեծ սուգ արեց, և ոչ ոք իր վրա զարդ չկրեց։ ⁵ Տերն ասաց Մովսեսին. «Ասա՛ Իսրայելի որդիներին. “Դուք խստապարանոց ժողովուրդ եք։ Զգո՛ւյշ եղեք, որ այլ պատուհաս չբերեմ ձեր գլխին և կոտորեմ ձեզ։ Արդ, հանե՛ք ձեր շքեղ պատմուճանները, ձեր զարդերը, և ցույց կտամ ձեզ, թե ի՛նչ եմ անելու ձեզ”»։ ⁶ Եվ Իսրայելի որդիները Քորեբ լեռան մոտ հանեցին իրենց զարդերն ու իրենց պատմուճանները։

Տիրոջ ներկայության խորանը

⁷ Եվ Մովսեսը, վերցնելով իր վրանը, խփեց բանակատեղիից դուրս՝ մեկուսի մի տեղում։ Եվ այն կոչվեց Վկայության խորան։ Ով ինչ հայցում էր Տիրոջից, գալիս էր բանակատեղիից դուրս գտնվող Վկայության խորանը։ ⁸ Երբ Մովսեսը դեպի խորանն էր գնում, ողջ ժողովուրդը, ամեն մեկն իր վրանի դռան մոտ կանգնած, ուշադիր հետևում էր նրան, մինչև որ նա մտնում էր խորանը։ ⁹ Երբ Մովսեսը մտնում էր խորանը, ամպի մի սյուն էր իջնում ու կանգնում խորանի դռանը, և Տերը խոսում էր Մովսեսի հետ։ ¹⁰ Ողջ ժողովուրդը, տեսնելով խորանի դռանը կանգնած ամպի սյունը, ոտքի էր կանգնում, և յուրաքանչյուրը երկրպագում էր իր վրանի դռան մոտից։ ¹¹ Տերը Մովսեսի հետ խոսում էր դեմ հանդիման, ինչպես մեկը կխոսեր իր բարեկամի հետ, և ապա Մովսեսը վերադառնում էր բանակատեղի։ Բայց նրա սպասավոր Հեսուն՝ Նավեի որդին, խորանից չէր հեռանում։

Տերը խոստանում է լինել իր ժողովրդի հետ

¹² Մովսեսն ասաց Տիրոջը. «Ահա ինձ ասում ես. “Տա՛ր այս ժողովրդին”, բայց դու չես հայտնել, թե ո՛ւմ ես ուղարկելու ինձ հետ։ Դու ինձ ասացիր՝ “Քեզ բոլորից բարձր եմ դասում, և վայելում ես իմ շնորհը”։ ¹³ Արդ, եթե շնորհ եմ գտել քո առաջ, ինձ ցո՛ւյց տուր քո անձը, որպեսզի իմանամ, թե ինչո՛վ եմ արժանացել քո շնորհին, և իմանամ, որ քո այս ժողովուրդը մեծ ազգ է լինելու»։ ¹⁴ Եվ Տերն ասաց. «Ես ինքս պիտի գնամ քո առջևից և քեզ տեղավորեմ»։ ¹⁵ Եվ ասաց նրան. «Եթե դու ինքդ մեզ հետ չգաս, ուրեմն մեզ այստեղից մի՛ հանիր։ ¹⁶ Եվ ինչի՞ց պիտի իմացվի, որ ես ու քո ժողովուրդն իրոք շնորհ ենք գտել քո առաջ։ Եթե դու մեզ հետ գաս, ես ու քո ժողովուրդը կփառավորվենք շատ ավելի, քան երկրի վրա եղած բոլոր ազգերը»։

¹⁷ Եվ Տերն ասաց Մովսեսին. «Քո այդ ասածն էլ կկատարեմ, որովհետև շնորհ գտար իմ առաջ, և քեզ ավելի եմ գնահատում, քան մյուսներին»։ ¹⁸ Մովսեսն ասաց. «Ցո՛ւյց տուր ինձ քո փառքը»։ ¹⁹ Եվ ասաց. «Ես քո առաջ ցույց կտամ իմ փառքը և քեզ կհայտնեմ իմ անունը՝ Տեր. կողորմեմ նրան, ում ողորմելու եմ, և կգթամ նրան, ում գթալու եմ»։ ²⁰ Եվ ասաց. «Դու չես կարող տեսնել իմ երեսը, որովհետև մարդ չի կարող տեսնել իմ երեսն ու կենդանի մնալ»։ ²¹ Եվ Տերը շարունակեց. «Ահա իմ առաջ մի տեղ կա. կանգնի՛ր այս ժայռի վրա։ ²² Երբ ես անցնեմ իմ փառքով, քեզ կդնեմ ժայռի ծերպի մեջ և իմ ձեռքով կծածկեմ քեզ, մինչև որ անցնեմ։ ²³ Իմ ձեռքը քո վրայից կվերցնեմ, և ապա դու ինձ կտեսնես թիկունքից։ Բայց իմ դեմքը չես տեսնի»։

34

Քարե նոր տախտակները

(Բ Օր. 10.1-5)

¹ Տերն ասաց Մովսեսին. «Երկու քարե տախտակնե՛ր կոփիր՝ առաջին տախտակների նման, և ինձ մոտ՝ լե՛ռը բարձրացիր, և այդ տախտակների վրա կգրեմ այն պատգամները, որ առաջին տախտակների վրա էին, որոնք ջարդուփշուր արեցիր։ ² Պատրա՛ստ եղիր. առավոտյան բարձրանալու ես Սինա լեռը և այնտեղ ինձ սպասելու ես լեռան գագաթին։ ³ Քեզ հետ ոչ ոք թող չբարձրանա և լեռան վրա ոչ ոք թող չերևա։ Նույնիսկ արջառ ու ոչխար թող չարածեն լեռան մոտ»։ ⁴ Եվ Մովսեսը քարե երկու տախտակներ կոփեց առաջին տախտակների նմանությամբ և վաղ առավոտյան վեր կենալով՝ բարձրացավ Սինա լեռը, ինչպես հրամայել էր իրեն Տերը. Մովսեսն իր հետ վերցրեց քարե երկու տախտակները։ ⁵ Տերն իջավ ամպով, կանգնեց այնտեղ՝ նրա դիմաց, ու կոչեց իր անունը՝ Տեր։ ⁶ Եվ Տերն անցավ Մովսեսի առջևից՝ ասելով. «Տերը՝ Աստված, գթացող է և ողորմած, երկայնամիտ, բազումողորմ ու ճշմարիտ, ⁷ որ պաշտպանում է արդարությունը և ողորմություն է անում հազարավոր մարդկանց, վերացնում է անօրենությունները, անիրավություններն ու մեղքերը, մեղավորին չի ազատում պատժից, հայրերի գործած մեղքերը բարդում է որդիների և որդիների որդիների վրա մինչև երրորդ ու չորրորդ սերունդը»։ ⁸ Մովսեսը, իսկույն խոնարհվելով, երկրպագություն արեց ⁹ ու ասաց. «Տե՛ր, եթե շնորհ գտա քո առաջ, ուրեմն Տերը մեզ հետ թող շարժվի, որովհետև այս ժողովուրդը խստապարանոց է։ Դու կներես մեր անօրենություններն ու մեղքերը, և մենք կլինենք քոնը»։

Ուխտի նորոգումը

(Ելք 23.14-19, Բ Օր. 7.1-5, 16.1-17)

¹⁰ Տերն ասաց Մովսեսին. «Ահա ես քեզ հետ ուխտ եմ կապում։ Քո ողջ ժողովրդի առաջ այնպիսի հրաշքներ պիտի անեմ, որ ամբողջ երկրի վրա և բոլոր ազգերի մեջ չեն կատարվել, և ողջ ժողովուրդը, որոնց մեջ դու ես, տեսնելու է Տիրոջ գործերը։ Որովհետև իմ արածները ձեզ համար զարմանալի պիտի լինեն։ ¹¹ Ուշադի՛ր եղիր, թե ի՛նչ եմ պատվիրում քեզ այսօր։ Ահա ես ձեզնից վանելու եմ ամորհացիներին, քանանացիներին, քետացիներին, փերեզացիներին, խևացիներին, գերգեսացիներին ու հեբուսացիներին։ ¹² Զգո՛ւյշ եղիր. ուխտ չկապես այն երկրի բնակիչների հետ, ուր մուտք ես գործելու, որպեսզի հանկարծ գայթակղություն չլինի։ ¹³ Քարուքանդ կանեք նրանց բագինները, կփշրեք նրանց արձանները, կջարդեք նրանց պաշտամունքային փայտե սյուները [*  Աշերայն] և հրով կայրեք նրանց աստվածների արձանները։ ¹⁴ Օտար աստվածների չերկրպագեք, որովհետև Տերը անունն է պահանջկոտ Աստծու. Աստված նախանձախնդիր է։ ¹⁵ Չլինի թե ձեր մարդիկ ուխտ կապեն այդ երկրի բնակիչների հետ և նրանց աստվածներին պաշտամունք մատուցելով՝ պոռնկանան ու զոհեր մատուցեն նրանց աստվածներին և հրավիրեն քեզ, ու ուտես նրանց զոհերից։ ¹⁶ Եվ նրանց դուստրերին առնես ձեր տղաների համար և քո դուստրերին կնության տաս նրանց տղաներին, և այդպիսով քո դուստրերը, նրանց հետ նրանց աստվածներին պաշտամունք մատուցելով, պոռնկանան, և կամ պոռնկացնեն քո տղաներին՝ իրենց աստվածներին պաշտամունք մատուցելով։ ¹⁷ Քեզ համար կուռք աստվածներ չձուլես։

¹⁸ Կպահես Բաղարջակերաց տոնը. Կանխոց ամսին, ինչպես պատվիրել եմ քեզ, յոթ օր բաղարջ հաց կուտես, քանի որ Կանխոց ամսին ես դուրս եկել Եգիպտոսից։

¹⁹ Արգանդ բացող բոլոր արուները ինձ պիտի պատկանեն, ²⁰ ինչպես նաև քո անասունների արուները՝ արջառի առաջնածինն ու ոչխարի առաջնածինը։ Էշի առաջնածինին կփրկագնես գառով, իսկ եթե չփրկագնես այն, կվճարես դրա արժեքը։ Քո որդիների բոլոր անդրանիկների համար փրկագին պիտի տաս։

Իմ առաջ ձեռնունայն չերևաս։

²¹ Վեց օր կաշխատես, իսկ յոթերորդ օրը կհանգստանաս։ Կհանգստանաս նաև ցանքի ու հնձի ժամանակ։

²² Յոթօրյակի տոնը ինձ համար կկատարես ցորենի հնձի սկզբում, իսկ բերքահավաքի տոնը՝ տարվա կեսին։

²³ Տարին երեք անգամ քո բոլոր արու զավակները թող ներկայանան Տիրոջը՝ Իսրայելի Աստծուն, ²⁴ որովհետև ես ազգեր պիտի հեռացնեմ քո առաջից, պիտի ընդարձակեմ քո սահմանները, և ոչ ոք աչք չպիտի ունենա քո երկրի վրա, եթե տարվա մեջ երեք անգամ ներկայանաս Տիրոջը՝ Աստծուն։

²⁵ Իմ զոհերի արյունը խմորի հետ չմատուցեք, և զատկի տոնի զոհը մինչև առավոտ չմնա։

²⁶ Քո երկրի առաջին բերքը կտանես Տիրոջ՝ քո Աստծու տունը։

Գառն իր մոր կաթի մեջ չեփես»։

²⁷ Տերն ասաց Մովսեսին. «Գրի՛ առ այդ պատգամները, որովհետև այդ խոսքերով եմ ուխտ կապում քեզ հետ և Իսրայելի հետ»։

²⁸ Մովսեսը Տիրոջ առջև էր քառասուն օր ու քառասուն գիշեր։ Նա հաց չկերավ, ջուր չխմեց և տախտակների վրա գրի առավ ուխտի խոսքերը՝ տասը պատվիրանները։

Մովսեսն իջնում է Սինա լեռից

²⁹ Մովսեսն իջնում էր Սինա լեռից, և ուխտի երկու տախտակները նրա ձեռքին էին։ Լեռից իջնելիս Մովսեսը չգիտեր, որ Տիրոջ հետ խոսելու պատճառով իր երեսը ճառագում է։ ³⁰ Ահարոնն ու Իսրայելի բոլոր որդիները տեսան, որ նրա երեսի գույնը լուսափայլ էր, և վախեցան մոտենալ նրան։ ³¹ Մովսեսը կանչեց նրանց. Ահարոնն ու ժողովրդի բոլոր իշխանները եկան նրա մոտ, և Մովսեսը խոսեց նրանց հետ։ ³² Ապա նրան մոտեցան Իսրայելի բոլոր որդիները, և պատմեց նրանց այն ամենը, ինչ Տերը խոսել էր իր հետ Սինա լեռան վրա։ ³³ Երբ Մովսեսն իր խոսքն ավարտեց, երեսը ծածկեց քողով։ ³⁴ Երբ Մովսեսը Տիրոջ հետ խոսելու համար ներկայանում էր նրան, հանում էր քողը մինչև այնտեղից հեռանալը։ Եվ երբ հեռանում էր այնտեղից, նա Իսրայելի բոլոր որդիներին հաղորդում էր այն, ինչ Տերը հրամայել էր իրեն։ ³⁵ Իսրայելի որդիները տեսնում էին, որ Մովսեսի երեսը ճառագում է։ Մովսեսը քողով ծածկում էր երեսը մինչև խոսելու համար Տիրոջ մոտ մտնելը։

35

Շաբաթը՝ հանգստյան օր

(Ելք 31.12-18)

¹ Մովսեսը հավաքեց Իսրայելի որդիների ողջ ժողովրդին ու ասաց նրանց. «Ահա այն բաները, որ Տերն ասաց, որ պետք է անել. ² “Վեց օր պիտի աշխատեք, իսկ յոթերորդ օրը պիտի հանգստանաք. շաբաթ օրը սուրբ է՝ Տիրոջը նվիրված հանգստյան օր։ Ով այդ օրն աշխատի, կմեռնի։ ³ Շաբաթ օրը ձեր բոլորի տներում կրակ չպիտի վառվի, որովհետև ես եմ Տերը”»։

Խորանի ընծաներ

(Ելք 25.1-9)

⁴ Մովսեսը, դիմելով Իսրայելի որդիների ողջ ժողովրդին, ասաց. «Այս է այն պատգամը, որ պատվիրեց Տերը՝ ասելով. ⁵ “Դուք Տիրոջը ընծա՛ տվեք. յուրաքանչյուրն ըստ իր ցանկության թող բերի՝ ոսկի, արծաթ, պղինձ, ⁶ կապուտակ, ծիրանի և կրկնակի կարմիր մանվածք, նրբահյուս բեհեզ, այծի մազ, ⁷ կարմիր ներկված խոյի մորթի, կապույտ ներկված մորթիներ, չփտող փայտեր, ⁸ լուսավորության համար ձիթայուղ, օծության յուղի համար անուշահոտ նյութեր, բաղադրյալ խունկ, ⁹ սարդիոն քարեր, զմրուխտ քարեր, եփուդի և պատմուճանի համար քարեր”»։

Տիրոջ խորանի առարկաները

(Ելք 39.31-43)

¹⁰ «Ձեր բոլոր հմուտ մասնագետները թող գան ու պատրաստեն այն ամենը, ինչ պատվիրեց Տերը. ¹¹ խորանը և նրա ծածկը, նրա ծոպավոր վարագույրներն ու օղակները, նրա տախտակներն ու նիգերը, նրա սյուներն ու խարիսխները, ¹² Ուխտի տապանակը, նրա լծակները, Քավությունը, վարագույրը, բակի առագաստն ու նրա սյուները, զմրուխտ քարերը, խնկերը, օծության յուղը, ¹³ սեղանն ու նրա ամբողջ սպասքը, սեղանի ամպհովանին, նրա լծակներն ու ամբողջ սպասքը, Առաջավորության հացը, ¹⁴ լույսի աշտանակն ու նրա բոլոր մասերը, նրա կանթեղներն ու լուսավորության ձիթայուղը, ¹⁵ խնկարկության սեղանն ու նրա լծակները, օծության յուղը, բաղադրյալ խունկը, խորանի դռան վարագույրը, ¹⁶ ողջակեզների զոհասեղանն ու նրա պղնձե կասկարան, նրա լծակներն ու ամբողջ սպասքը, ավազանն ու նրա պատվանդանը, ¹⁷ բակի առագաստը, նրա սյուներն ու խարիսխները, ¹⁸ բակի դռան վարագույրը, խորանի ցցերն ու բակի ցցերը, դրանց պարանները, ¹⁹ այն զգեստները, որոնցով սրբազան պաշտամունք պիտի կատարեն սրբարանում, Ահարոն քահանայի սրբազան զգեստներն ու Ահարոնի որդիների քահանայության զգեստները»։

Ընծաների նվիրաբերում

²⁰ Իսրայելի որդիների ողջ ժողովուրդը ելավ Մովսեսի մոտից, ²¹ և ամեն մեկը բերեց իր սրտից բխածը։ Նրանք Տիրոջն էին նվիրաբերում այն ամենը, ինչ անհրաժեշտ էր Վկայության խորանի, նրա պարագաների և սրբազան զգեստների համար։ ²² Տղամարդիկ, ամեն մեկը ինչ որ ցանկացավ, իրենց կանանցից բերեցին թանկագին քարեր, գինդեր, մատանիներ, ծամակալներ, մանյակներ ու ամեն տեսակ ոսկե անոթներ։ Բոլոր տղամարդիկ ոսկե նվերներ էին բերում Տիրոջը։ ²³ Ամեն մեկը ինչ որ գտնում էր՝ կապուտակ, ծիրանի և կարմիր մանվածք, բեհեզ, այծի մազ, խոյի կարմիր ներկված մորթիներ, կապույտ ներկված մորթիներ, բերում էր։ ²⁴ Նվիրաբերողներն արծաթե ու պղնձե նվերներ էին բերում Տիրոջը։ Ում մոտ կահույքի համար պիտանի չփտող փայտ կար, բերում էր։ ²⁵ Բոլոր շնորհալի կանայք իրենց ձեռքով կապույտ, ծիրանի ու կարմիր գույնի թելեր ու բեհեզ էին հյուսում և նվեր բերում։ ²⁶ Բոլոր կանայք հոժարակամ այծերի մազ էին մանում հմտությամբ։ ²⁷ Իշխանները բերում էին զմրուխտե քարեր, եփուդի ու լանջապանակի համար անհրաժեշտ քարեր, ²⁸ բաղադրյալ խունկ, լուսավորության համար ձիթայուղ ու օծության յուղ։ ²⁹ Եվ բոլոր տղամարդիկ ու կանայք հոժարակամ գալիս էին՝ կատարելու այն բոլոր գործերը, որ Տերը պատվիրել էր անել Մովսեսի միջոցով։ Իսրայելի որդիները նվերներ էին մատուցում Տիրոջը։

Տիրոջ խորանի գործավորները

(Ելք 31.1-11)

³⁰ Մովսեսն ասաց Իսրայելի որդիներին. «Տեսե՛ք, Աստված անվանապես կանչեց Հուդայի ցեղից Ովրի որդի Ուրիի որդուն՝ Բեսելիելին։ ³¹ Աստված նրան լցրել է ամեն ինչի համար անհրաժեշտ աստվածային իմաստության ոգով, հանճարով և գիտությամբ, ³² որպեսզի նա ամեն գործ կատարի հմտությամբ. մշակի ոսկին, արծաթն ու պղինձը, ³³ մշակի քարերը, մշակի փայտը և ամեն մի գործ կատարի վարպետորեն ու խելամիտ կերպով, որովհետև Տերը նրան իմաստություն է պարգևել, ³⁴ ինչպես նաև Դանի ցեղից Աքիսամի որդի Եղիաբին։ ³⁵ Եվ նրանց իմաստուն մտքով ու խելամտությամբ լցրեց, որպեսզի կատարեն սրբարանի բոլոր գործերը. հյուսեն ու ասեղնագործեն կապույտ, ծիրանի ու կարմիր ներկված թելերով կտորներ ու բեհեզ, նկարեն ու քանդակեն»։

36

¹ Բեսելիելը, Եղիաբն ու բոլոր տղամարդիկ, որոնց Տիրոջից իմաստություն և գիտություն տրվեց՝ գործի մեջ խելամուտ լինելու, ըստ ամենայնի կատարեցին սրբարանը հանդերձավորելու աշխատանքներն այնպես, ինչպես հրամայել էր Տերը։

² Մովսեսը կանչեց Բեսելիելին, Եղիաբին ու բոլոր նրանց, ովքեր սրտում ունեին իմաստություն, և որոնց Աստված հանճար էր պարգևել, բոլորին, ովքեր հոժար կամքով ուզում էին ձեռնարկել ու ավարտել այդ գործը։ ³ Նրանք Մովսեսից ստացան այն բոլոր նվերները, որ Իսրայելի որդիները բերել էին սրբարանի գործերի համար։ Իրենք նույնպես ամեն առավոտ ընդունում էին նվիրատուների բերած նվերները։ ⁴ Գալիս էին սրբարանի գործերը կատարող բոլոր վարպետները, որպեսզի յուրաքանչյուրն ըստ իր մասնագիտության գործադրի իր վարպետությունը։ ⁵ Նրանք խոսեցին Մովսեսի հետ ու ասացին. «Ժողովուրդը շատ ավելին է բերում, քան անհրաժեշտ է Աստծու հրամայած գործերը կատարելու համար»։ ⁶ Մովսեսը կարգադրեց բանակատեղիում հայտարարություն անել և ասել. «Տղամարդ լինի թե կին, սրբարանի համար այլևս նվերներ չպատրաստի»։ Դրանից հետո ժողովրդին արգելեցին նվերներ բերել։ ⁷ Նրանց բերածը բավարար էր, որպեսզի ավարտեն բոլոր գործերը։ Եվ մարդիկ դադարեցին բերելուց։

Տիրոջ խորանի շինությունը

(Ելք 26.1-37)

⁸ Հմուտ մասնագետները արհեստավորների հետ պատրաստեցին խորանի տասը վարագույր՝ կապույտ, ծիրանագույն ու վառ կարմիր նրբահյուս բեհեզից. դրանք զարդարեցին ասեղնագործ քերովբեներով։ ⁹ Մեկ վարագույրի երկարությունը քսանութ կանգուն էր, իսկ լայնությունը՝ չորս կանգուն։ Բոլոր վարագույրների չափսերը նույնն էին։ ¹⁰ Հինգ վարագույրները միացած էին միմյանց, իսկ մյուս հինգ վարագույրներն էլ միմյանց էին միացած։ ¹¹ Նա կապույտ ճարմանդներ դրեց վարագույրների առաջին շարքի կցման եզրին։ ¹² Նույնն արեց վարագույրների երկրորդ շարքի կցման եզրին։ ¹³ Հիսուն ճարմանդ դրեց մի շարքի և հիսուն ճարմանդ էլ՝ երկրորդ շարքի կցման եզրերին, որպեսզի ճարմանդներից յուրաքանչյուրը միանա մյուսին։ Պատրաստեց հիսուն ոսկե օղակ և դրանցով վարագույրների շարքերը միացրեց միմյանց, որպեսզի խորանն ամբողջական լինի։

¹⁴ Խորանի ծածկի համար այծի մազից հյուսված տասնմեկ վարագույրներ պատրաստեց։ ¹⁵ Մեկ վարագույրի երկարությունը երեսուն կանգուն էր, իսկ լայնությունը՝ չորս կանգուն։ Տասնմեկ վարագույրների չափսերը նույնն էին։ ¹⁶ Հինգ վարագույրները միացրեց առանձին և մնացած վեց վարագույրներն էլ՝ իրար։ ¹⁷ Կցման տեղում՝ յուրաքանչյուր շարքի եզրին, դրեց հիսունական ճարմանդ։ ¹⁸ Պատրաստեց պղնձե հիսուն օղակ և խորանը կցեց, որ ամբողջանա։

¹⁹ Եվս երկու ծածկոց պատրաստեց խորանի համար՝ խոյերի կարմիր ներկված մորթիներից և կապույտ մորթուց արտախուրակներ՝ վերևի կողմից։

²⁰ Խորանի մույթերը պատրաստեց չփտող փայտից և կանգնեցրեց դրանք։ ²¹ Մեկ մույթի երկարությունը տասը կանգուն էր, իսկ հաստությունն ու լայնությունը՝ մեկուկես կանգուն։ ²² Ամեն մի մույթի վրա դրեց դրանք իրար միացնող երկու ագույց։ Այդպես պատրաստեց նաև խորանի բոլոր մույթերը։

²³ Խորանի համար մույթեր պատրաստեց. քսան մույթ դրեց հարավային կողմում և այդ քսան մույթերի համար պատրաստեց արծաթե քառասուն խարիսխ. ²⁴ մեկ մույթի համար՝ երկու խարիսխ և մյուս մույթի համար էլ՝ երկու խարիսխ։

²⁵ Խորանի երկրորդ՝ հյուսիսային կողմի համար պատրաստեց քսան մույթ ²⁶ և արծաթե քառասուն խարիսխ. մեկ մույթի համար՝ երկու խարիսխ և մյուս մույթի համար էլ՝ երկու խարիսխ։

²⁷ Խորանի հետևի՝ ծովահայաց կողմում դրեց վեց մույթ ²⁸ և երկու մույթ էլ դրեց խորանի հետևի անկյուններին։ ²⁹ Ներքևի կողմից նրանք միացած էին. նույն օրինակով միացած էին վերևի կողմից, միահյուսված. նույնպես արեց նաև անկյունների երկու մույթերի համար։ ³⁰ Այսպիսով ստացվեց ութ մույթ։ Դրանց խարիսխներն արծաթից էին. ընդամենը տասնվեց խարիսխ. յուրաքանչյուր մույթի համար՝ երկու խարիսխ։

³¹ Եվ չփտող փայտից նիգեր պատրաստեց. հինգը՝ խորանի մի կողմի մույթերի համար, ³² հինգը՝ խորանի մյուս կողմի մույթերի համար և հինգն էլ՝ խորանի թիկունքի՝ ծովահայաց կողմի մույթերի համար։ ³³ Մեջտեղի նիգը մույթերի մի ծայրից մինչև մյուսն անցկացրեց։ ³⁴ Մույթերը պատեց ոսկով։ Ոսկուց պատրաստեց նրանց օղակները, որոնց մեջ մտնում էին նիգերը։ Նիգերը նույնպես պատեց ոսկով։

³⁵ Կապույտ, ծիրանագույն ու կարմիր մանվածքից և նրբահյուս բեհեզից վարագույր պատրաստեց՝ ասեղնագործ քերովբեներով, ³⁶ և ամրացրեց չփտող փայտից շինված ոսկեպատ չորս մույթերի վրա։ Դրանց խոյակները ոսկուց էին, իսկ չորս խարիսխները՝ արծաթից։ ³⁷ Վկայության խորանի դռան վարագույրը կապույտ, ծիրանագույն և կարմիր մանվածքից և նրբահյուս բեհեզից պատրաստեց՝ ասեղնագործ քերովբեներով։ ³⁸ Դրանց մույթերը հինգն էին, ու դրանց օղակներն ու խոյակները պատեց ոսկով։ Դրանց հինգ խարիսխները պղնձյա էին։

37

Ուխտի տապանակի պատրաստումը

(Ելք 25.10-22)

¹ Բեսելիելը տապանակը շինեց չփտող փայտից, երկուսուկես կանգուն երկարությամբ, մեկուկես կանգուն լայնությամբ և մեկուկես կանգուն բարձրությամբ։ Այն ներսից ու դրսից պատեց ոսկով, ² դրա վրա շուրջանակի ոսկե պսակ շինեց։ ³ Չորս կողմերի համար չորս ոսկե օղակներ ձուլեց. երկու օղակներ՝ մի կողմի և երկու օղակներ՝ մյուս կողմի համար ու դրանք հագցրեց լծակներին։ ⁴ Լծակները շինեց չփտող փայտից և դրանք պատեց ոսկով։ ⁵ Լծակները տապանակի կողքերից մտցրին օղակների մեջ, որպեսզի դրանցով բարձրացնեն այն։

⁶ Տապանակի վրայի Քավությունը պատրաստեցին մաքուր ոսկուց, երկուսուկես կանգուն երկարությամբ և մեկուկես կանգուն լայնությամբ։ ⁷ Քավության երկու ծայրերին երկու ոսկյա հղկված քերովբեներ պատրաստեց։ ⁸ Մի քերովբեն դրված էր Քավության մի ծայրին, իսկ մյուս քերովբեն՝ Քավության մյուս ծայրին։ Երկու քերովբեները միաձույլ էին Քավության երկու ծայրերին։ ⁹ Քերովբեները դեպի վեր էին տարածել իրենց թևերը և իրենց թևերով հովանի էին անում Քավության վրա։ Քավության վրայի քերովբեների դեմքերը նայում էին միմյանց։

Աստծուն մատուցված հացի սեղանի պատրաստումը

(Ելք 25.23-30)

¹⁰ Առաջավորության հացի սեղանը պատրաստեց մաքուր ոսկուց։ Դրա համար ոսկե չորս օղակներ ձուլեց. երկուսը՝ մի կողմի և երկուսը՝ մյուս կողմի համար։ Պատրաստեց նաև լծակներ, որպեսզի դրանցով բարձրացնեն սեղանը։ Տապանակի ու սեղանի լծակները պատրաստեց չփտող փայտից և դրանք պատեց ոսկով։ Երկու կանգուն էր սեղանի երկարությունը, մեկուկես կանգուն[17]՝ դրա լայնությունը, և մեկուկես կանգուն՝ դրա բարձրությունը։ ¹¹ Այն պատեց մաքուր ոսկով և շուրջանակի պատեց ոսկե պսակով։ ¹² Դրա վրա շուրջանակի մեկ թզաչափ բարձրությամբ շրջանակ դրեց և շրջանակի չորս կողմը ոսկե պսակներ դրեց։ ¹³ Սեղանի համար ոսկե չորս օղակներ պատրաստեց և օղակներն ամրացրեց չորս անկյուններին, ¹⁴ որոնք նրա չորս ոտքերի վրա էին՝ պսակի տակ։ Օղակները լծակների համար իբրև ագույց ծառայեցին սեղանը բարձրացնելու համար։ ¹⁵ Չփտող փայտից երկու լծակներ պատրաստեց, որպեսզի դրանցով բարձրացնեն սեղանը, և դրանք պատեց ոսկով։ ¹⁶ Մաքուր ոսկուց պատրաստեց սեղանի անոթները՝ խնկամաններն ու սկուտեղները, գավաթներն ու սկիհները, որոնցով գինի են նվիրաբերում։

Աշտանակի պատրաստումը

(Ելք 25.31-40)

¹⁷ Ձույլ ոսկուց պատրաստեց լույսի աշտանակը՝ բունն ու նրա երկու կողմերի թևերը։ Աշտանակի թևերից բաժանվում էին ճյուղերը. երեքը՝ մի կողմից, և երեքը՝ մյուս կողմից՝ իրար հավասար։ Ձույլ ոսկուց պատրաստեց նաև աշտանակի ընկուզաձև ծայրեր ունեցող լուսակալներն ու ճրագակալները, որոնց վրա ճրագամաններն են դրվում, և աշտանակի լուսակալի գլխին յոթերորդ կանթեղը, որը բնի ամենավերին մասում է դրվում, ձույլ ոսկուց էր։ Մաքուր ոսկուց պատրաստեց աշտանակի վրա գտնվող յոթ ճրագամանները, ունելիներն ու մոխրակալները։ Քանդակազարդ արեց աշտանակը՝ բունն ու նրա թևերն ու ճյուղերը։ Հղկված պատրաստեց աշտանակը, բունը և նրա ճյուղերը։ Սկահակները, գնդիկներն ու շուշանաձև ծաղիկները միաձույլ էին։ ¹⁸ Վեց ճյուղեր էին բաժանվում նրա երկու կողմերից. երեք ճյուղը՝ աշտանակի մի կողմից, և երեք ճյուղը՝ աշտանակի մյուս կողմից։ ¹⁹ Մի ճյուղն ուներ գնդիկից ու շուշանաձև ծաղկից բաղկացած ընկուզաձև երեք սկահակ, մյուս ճյուղն էլ ուներ գնդիկից ու շուշանաձև ծաղկից բաղկացած ընկուզաձև երեք սկահակ։ Այսպես բոլոր վեց ճյուղերը դուրս էին գալիս աշտանակի երկու կողմերից։ ²⁰ Աշտանակի բնի վրա քանդակված էին ընկուզաձև չորս սկահակներ՝ իրենց գնդիկներով ու շուշանաձև ծաղիկներով։ ²¹ Երկու ճյուղերի տակ՝ մեկական գնդիկ ու ծաղիկ՝ բնին ձուլված. այսպես էին բնից բաժանված վեց ճյուղերը։ ²² Դրանց գնդիկներն ու ծաղիկները միաձույլ էին՝ բոլորը քանդակված մի կտոր մաքուր ոսկուց։ ²³ Դրա յոթ ճրագամանները, ունելիներն ու մոխրակալները մաքուր ոսկուց էին։ ²⁴ Մի տաղանդ մաքուր ոսկուց պատրաստեց աշտանակն ու դրա բոլոր մասերը։

Խնկարկության սեղանի պատրաստումը

(Ելք 30.1-5)

²⁵ Նա խնկարկության սեղանը՝ ոսկեպատ, պատրաստեց չփտող փայտից, քառակուսի, մեկ կանգուն երկարությամբ, մեկ կանգուն լայնությամբ և երկու կանգուն բարձրությամբ։ Դրա եղջյուրավոր անկյունները զոհասեղանի հետ միաձույլ էին։ ²⁶ Մաքուր ոսկով պատեց այն, ինչպես նաև դրա կափարիչը, բոլոր կողերն ու եղջյուրավոր անկյունները։ ²⁷ Դրա չորս կողմերի համար պատրաստեց ոսկե պսակներ, պսակների տակ՝ երկու կողմերին, ոսկե երկու օղակներ ամրացրեց, որպեսզի այն բարձրացնելիս լծակները մտցնեն այդ օղակների մեջ։ ²⁸ Լծակները պատրաստեց կարծր փայտից և դրանք պատեց ոսկով։

Օծության յուղի և խնկի պատրաստությունը

(Ելք 30.22-38)

²⁹ Նա վարպետ յուղագործների նման պատրաստեց օծության սուրբ յուղը և բաղադրյալ խունկը։

38

Զոհասեղանի պատրաստումը

(Ելք 27.1-8)

¹ Չփտող փայտից պղնձապատ զոհասեղան պատրաստեց այն բուրվառների պղնձով, որոնք Կորխի ժողովրդի հետ ապստամբած մարդկանց ձեռքին էին։ Զոհասեղանը քառակուսի էր՝ հինգ կանգուն երկարությամբ, հինգ կանգուն լայնությամբ, երեք կանգուն բարձրությամբ։ ² Զոհասեղանի չորս անկյուններին պատրաստեց եղջյուրներ, որոնք զոհասեղանի հետ միաձույլ էին, և դրանք պատեց պղնձով։ ³ Պատրաստեց զոհասեղանի ամբողջ սպասքը՝ մոխիրի ամանները, մոխրահավաքները, տաշտերը, մսահաններն ու կրակամանները։ Այդ ամբողջ սպասքը պատրաստեց պղնձից։ ⁴ Նա բուրվառներից պատրաստեց զոհասեղանի վանդակավոր կասկարան, ներքևից մինչև զոհասեղանի մեջտեղը։ ⁵ Զոհասեղանի կասկարայի չորս կողմերին ամրացրեց պղնձե չորս օղակներ, որպեսզի լծակներն անցկացնեն այդ օղակների մեջ։ ⁶ Լծակները շինեց չփտող փայտից և դրանք պատեց պղնձով։ ⁷ Լծակներն անցկացրին զոհասեղանի կողքերին գտնվող օղակների մեջ, որպեսզի զոհասեղանը դրանցով բարձրացնեն։ Այն պատրաստված էր մույթերից։

Պղնձե ավազանի պատրաստումը

(Ելք 30.18)

⁸ Պղնձե ավազանն ու դրա պղնձե պատվանդանը պատրաստեց ուխտավոր այն կանանց հայելիների պղնձից, որոնք վրանը խփելու օրը Վկայության խորանի դռան մոտ էին հավաքվել։

Բակի շինությունը

(Ելք 27.9-19)

⁹ Կառուցեց մի բակ։ Բակի հարավային կողմի առագաստները հարյուր կանգուն երկարություն ունեին՝ նրբահյուս բեհեզից։ ¹⁰ Դրանց սյուները քսան հատ էին, դրանց պղնձե խարիսխները՝ քսան հատ։ Սյուների զարդերն ու խոյակներն արծաթից էին։ ¹¹ Հյուսիսային կողմի առագաստներն ունեին հարյուր կանգուն երկարություն։ Դրա սյուները քսան հատ էին, պղնձե խարիսխները՝ քսան հատ։ Սյուների զարդերն ու խոյակներն արծաթից էին։ ¹² Բակի ծովահայաց կողմի առագաստները հիսուն կանգուն էին։ Դրանց սյուները տասը հատ էին, խարիսխները՝ տասը հատ։ Սյուների զարդերն ու խոյակներն արծաթից էին։ ¹³ Բակի արևելյան կողմի առագաստները հիսուն կանգուն էին, ¹⁴ մի թևի առագաստները տասնհինգ կանգուն էին։ Դրանց սյուները երեք հատ էին, խարիսխները՝ երեք հատ։ ¹⁵ Դռան մյուս թևի առագաստները տասնհինգ կանգուն էին։ Դրանց սյուները երեք հատ էին, խարիսխները՝ երեք հատ։ ¹⁶ Խորանի չորս կողմերի բոլոր առագաստները նրբահյուս բեհեզից էին։ ¹⁷ Սյուների խարիսխները պղնձից էին, սյուների դրվագներն ու դրանց գալարազարդերը՝ արծաթից, դրանց խոյակները՝ արծաթապատ, բակի բոլոր սյուները՝ արծաթապատ։

¹⁸ Բակի դռան վարագույրները կապույտ, ծիրանի ու կարմիր մանվածքից էին և նրբահյուս բեհեզով զարդարված։ Քսան կանգուն էր դրանց երկարությունը։ Բարձրությունը հինգ կանգուն էր՝ բակի առագաստներին հավասար։ ¹⁹ Դրանց սյուները չորս հատ էին, դրանց պղնձե խարիսխները՝ չորս հատ։ Դրանց չորս գալարազարդերն արծաթից էին, իսկ դրանց խոյակները՝ արծաթապատ։ ²⁰ Բակի ու խորանի չորս կողմերի բոլոր ցցերը պղնձից էին։

Օգտագործված մետաղների քանակը

²¹ Ահա Վկայության խորանի կառուցման հաշիվը, ինչպես հրաման տվեց Մովսեսը, ղևտացիների ծառայության համար, Ահարոն քահանայի որդի Իթամարի միջոցով։ ²² Հուդայի ցեղից Բեսելիելը՝ որդին Ուրիի, որը որդին էր Ովրի, արեց այնպես, ինչպես Տերը հրամայել էր Մովսեսին։ ²³ Բեսելիելին օգնում էր Դանի ցեղից Աքիսամի որդի Եղիաբը, որը, կապույտ, ծիրանագույն ու կարմիր մանված նրբահյուս բեհեզ գործածելով, կատարում էր ոստայնանկության, ասեղնագործության ու նկարչության աշխատանքները։

²⁴ Սրբարանի բոլոր գործերի համար օգտագործված ոսկու կշիռը, որը գոյացել էր նվերներից, եղավ քսանինը տաղանդ և յոթ հարյուր երեսուն սիկղ՝ ըստ սրբարանի կշռաչափի։ ²⁵ Մարդկանցից հավաքված արծաթե նվերները կշռում էին հարյուր տաղանդ և հազար յոթ հարյուր յոթանասունհինգ սիկղ՝ ըստ սրբարանի կշռաչափի. մարդագլուխը՝ կես սիկղ՝ ըստ սրբարանի սակագնի։ Քսան տարեկան և ավելի բարձր տարիք ունեցող մարդիկ, որոնք անցնում էին մարդահամարով, վեց հարյուր երեք հազար հինգ հարյուր հիսուն հոգի էին։ ²⁶ Հարյուր տաղանդ արծաթ ձուլվեց խորանի հարյուր խոյակների և վարագույրի խոյակների համար. ²⁷ հարյուր տաղանդ՝ հարյուր խոյակի համար. մեկ տաղանդ՝ ամեն մի խոյակի համար։ ²⁸ Հազար յոթ հարյուր յոթանասունհինգ սիկղը գործածվեց սյուների գալարազարդերի համար. ոսկով պատվեցին դրանց խոյակները և զարդարվեցին։ ²⁹ Նվիրած պղինձը յոթանասուն տաղանդ և երկու հազար չորս հարյուր սիկղ էր։ ³⁰ Դրանով պատրաստվեցին Վկայության խորանի դռան խարիսխները, պղնձե զոհասեղանը, պղնձե զոհասեղանի կասկարան, զոհասեղանի ամբողջ սպասքը, բակի չորս կողմերի խարիսխները, բակի դռան խարիսխները, ³¹ խորանի բոլոր ցցերը, բակի չորս կողմի բոլոր ցցերը և կապույտ, ծիրանագույն և կարմիր մանվածքից և նրբահյուս բեհեզից հյուսված պարանների ծայրերի օղերը։

39

Քահանաների զգեստների պատրաստությունը

(Ելք 28.1-14)

¹ Պատրաստեց պաշտամունքի զգեստներ՝ սրբարանում պաշտամունք կատարելու համար։ Պատրաստեց նաև սրբարանում Ահարոն քահանայի հագնելիք զգեստներն այնպես, ինչպես Տերն էր հրամայել Մովսեսին։

Եփուդը

(Ելք 28.6-14)

² Եփուդը պատրաստեցին ոսկով, ծիրանի, կապուտակ ու կարմիր մանվածքով և նրբահյուս բեհեզով։ ³ Ոսկու թերթերը թել-թել կտրում էին, որպեսզի դրանք կապեն կապուտակ, ծիրանի ու կարմիր ժապավենով և նրբահյուս բեհեզով։ Զարդարված եփուդի համար պատրաստեցին փոկեր, ⁴ որպեսզի այն ամրացնեն երկու կողմից։ ⁵ Նույն ձևով ոսկուց և կապույտ, ծիրանագույն և կարմիր մանվածքից և նրբահյուս բեհեզից պատրաստեցին եփուդի վրայի ժապավենը, ինչպես Տերն էր հրամայել Մովսեսին։ ⁶ Ոսկով ժապավենված և ընդելուզված զմրուխտե երկու ակնաքարերի վրա փորագրեցին Իսրայելի որդիների անուններն այնպես, ինչպես կնիքներն են փորագրում, և դրանք ամրացրին եփուդի վրա։ ⁷ Իսրայելի որդիների հիշատակի ակնաքարերն ամրացրին եփուդի ուսին, ինչպես որ Տերը հրամայել էր Մովսեսին։

Լանջապանակի պատրաստությունը

(Ելք 28.15-30)

⁸ Լանջապանակը պատրաստեցին ոսկուց, կապույտ, ծիրանագույն և կարմիր մանվածքից և նրբահյուս բեհեզից՝ հմտորեն ասեղնագործված, ինչպես եփուդն էին պատրաստել։ ⁹ Քառակուսի և կրկնածալ արեցին լանջապանակը. այն ուներ մի թզաչափ երկարություն և մի թզաչափ լայնություն։ ¹⁰ Դրա վրա կար ակնաքարերի չորս շարք։ Առաջին շարքի վրա կային սարդիոն, տպազիոն և զմրուխտ։ Դա առաջին շարքն էր։ ¹¹ Երկրորդ շարքը նռնաքար էր, շափյուղա և հասպիս։ ¹² Երրորդ շարքը սուտակ էր, ագատ և մեղեսիկ։ ¹³ Չորրորդ շարքը ոսկեքար էր, եղնգաքար և բյուրեղ՝ ոսկով պատված և ընդելուզված։ ¹⁴ Ակնաքարերն ըստ Իսրայելի որդիների անունների էին։ Նրանց տասներկու անունները գրված և փորագրված էին ըստ տասներկու ցեղերից յուրաքանչյուրի անվան։ ¹⁵ Լանջապանակի երկու օղակների վրա ամրացրին մաքուր ոսկուց պատրաստված հյուսկեն շղթաներ։ ¹⁶ Պատրաստեցին ոսկե երկու կոճակներ և ոսկե երկու օղակներ. ոսկե երկու օղակներն ամրացրին լանջապանակի վերին երկու ծայրերին։ ¹⁷ Հյուսկեն շղթաները լանջապանակի երկու կողմերից ամրացրին երկու օղակների մեջ, իսկ երկու շղթաների ծայրերը մտցրին երկու անցքերի մեջ։ Լանջապանակը դրեցին եփուդի ուսերին՝ երեսի կողմից իրար դեմ դիմաց։ ¹⁸ Պատրաստեցին ոսկե երկու այլ օղակներ և լանջապանակի ներսի կողմից ամրացրին եփուդին կցված մասի երկու ծայրերին։ Պատրաստեցին ոսկե երկու այլ օղակներ և դրեցին եփուդի երկու ուսերին ներսի կողմից՝ եփուդի առջևի միացման տեղում։ ¹⁹ Լանջապանակի օղակների ու եփուդի օղակների միջով կապույտ ժապավեն անցկացնելով՝ այդ երկուսը միացրին իրար այնպես, որ լանջապանակն ու եփուդը միմյանցից չառանձնանան, ինչպես Տերն էր հրամայել Մովսեսին։

Քահանայական այլ զգեստներ

(Ելք 28.31-43)

²⁰ Եփուդի վրա ամբողջությամբ կապուտակ ժապավեններով հյուսված կտավից պատմուճաններ պատրաստեցին։ ²¹ Դրանց օձիքը հյուսածո գործվածքի ճիշտ մեջտեղից էր, իսկ օձիքի շուրջանակի բացվածքը չքանդվող եզր ուներ։ ²² Պատմուճանի փեշերին կապույտ, ծիրանագույն և կարմիր մանվածքից և նրբահյուս բեհեզից նռան ծաղկաբողբոջներ գործեցին։ ²³ Մաքուր ոսկուց զանգակներ պատրաստեցին և զանգակները պատմուճանների ներքևում շուրջանակի դրեցին նռնազարդերի միջև։ ²⁴ Նռնազարդերն ու զանգակները պատմուճանների ներքևում շուրջանակի հաջորդում էին միմյանց. պաշտամունք կատարելու համար, ինչպես Տերն էր հրամայել Մովսեսին։

²⁵ Նրանք բեհեզյա հյուսված շապիկներ պատրաստեցին Ահարոնի ու նրա որդիների համար, ²⁶ ինչպես նաև բեհեզյա ապարոշներ, բեհեզյա խույր, ²⁷ բեհեզյա անդրավարտիք։ ²⁸ Նրանց համար պատրաստեցին բեհեզից և մանված կապուտակ, ծիրանի ու կարմիր ժապավեններով հյուսված գոտիներ՝ զարդանախշ մի գործ, ինչպես Տերն էր հրամայել Մովսեսին։

²⁹ Թիթեղը պատրաստեցին մաքուր ոսկուց և դրա վրա փորագրեցին «Ընծայված Տիրոջը»։ ³⁰ Այն կապեցին մի կապույտ ժապավենով, որպեսզի վերևի կողմից ամրացնեն խույրի վրա, ինչպես Տերն էր հրամայել Մովսեսին։

Գործի ավարտը

(Ելք 35.10-19)

³¹ Ավարտվեց Վկայության խորանի ամբողջ գործը։ Իսրայելի որդիներն արեցին ամեն ինչ. ինչպես Տերն էր հրամայել Մովսեսին, այդպես էլ արեցին։ Նվերներից ավելացած ոսկին նրանք վերածեցին սպասքի, որոնցով Տիրոջ առաջ պաշտամունք են կատարում։ ³² Մովսեսի մոտ՝ խորան բերեցին զգեստները, վրանի ծածկն ու դրա բոլոր մասերը, դրա ճարմանդները, փայտերը, միջաձողերը, դրա սյուները, վերջինիս խարիսխները, ³³ խոյերի կարմիր ներկված, մշակված և անմշակ մորթիները, կապույտ վարագույրները, ³⁴ Ուխտի տապանակը ծածկող վարագույրը, ³⁵ լծակները, կափարիչը, Առաջավորության հացի սեղանն ու դրա ամբողջ սպասքը, Առաջավորության հացը, ³⁶ սուրբ աշտանակն ու դրա ճրագամանները, կանթեղներն ու դրա բոլոր մասերը, լուսավորության ձեթը, ³⁷ ոսկե սեղանը, օծության յուղը, բաղադրյալ խունկը, ³⁸ մուտքի վարագույրը, խորանը, ³⁹ պղնձե զոհասեղանը, դրա լծակներն ու ամբողջ սպասքը, ավազանն ու դրա պատվանդանը, բակի առագաստները, դրա սյուներն ու խարիսխները, ⁴⁰ վրանի դռան և բակի դռան վարագույրները, պարաններն ու ցցերը, Վկայության խորանի ամբողջ սպասքը, ⁴¹ սրբարանում պաշտամունք կատարելու սրբազան զգեստները, Ահարոն քահանայի սրբազան զգեստներն ու նրա որդիների քահանայության համար նախատեսված զգեստները։ ⁴² Ինչպես Տերը պատվիրել էր Մովսեսին, Իսրայելի որդիներն այդ ամենը այդպես էլ կատարեցին։

⁴³ Մովսեսը տեսավ բոլոր գործերը, որ նրանք կատարել էին այնպես, ինչպես Տերն էր հրամայել Մովսեսին։ Նրանք ճիշտ նույն ձևով էին կատարել։ Եվ Մովսեսն օրհնեց նրանց։

40

Վկայության խորանի կանգնեցումն ու օծումը

¹ Տերն ասաց Մովսեսին. ² «Առաջին ամսի առաջին օրը կկանգնեցնես Վկայության խորանը, ³ այնտեղ կդնես Ուխտի տապանակը և տապանակը կծածկես շղարշով։

⁴ Ներս կտանես սեղանը և դրա վրա կդասավորես հացը։ Ներս կտանես աշտանակը և դրա վրա կդնես նրա ճրագամանները։ ⁵ Խունկ ծխելու ոսկե սեղանը կտեղավորես Ուխտի տապանակի առաջ։ Քողե վարագույր կանցկացնես Վկայության խորանի դռանը։

⁶ Ողջակեզների զոհասեղանը կդնես Վկայության խորանի դռանը և շուրջանակի կօծես խորանն ու այն ամենը, ինչ նրա մեջ է. դրանց չորսբոլորը կսրբես։ ⁷ Ավազանը կդնես Վկայության խորանի ու զոհասեղանի միջև և դրա մեջ ջուր կլցնես։ ⁸ Բակը շուրջանակի կօծես և կիջեցնես բակի դռան վարագույրը։ ⁹ Կվերցնես օծության յուղը, կօծես խորանն ու այն ամենը, ինչ դրա մեջ է. կսրբագործես դա ու դրա ամբողջ սպասքը. այնուհետև դրանք սուրբ կլինեն։

¹⁰ Կօծես ողջակեզների զոհասեղանն ու դրա ամբողջ սպասքը։ ¹¹ Կսրբագործես զոհասեղանը, և դա սուրբ սրբություն կլինի։

Կօծես ավազանն ու նրա պատվանդանը և կսրբագործես այն։

¹² Ահարոնին ու նրա որդիներին կբերես Վկայության խորանի դռան մոտ և նրանց կլվանաս ջրով։ ¹³ Ահարոնին կհագցնես սրբազան հանդերձանքը, կօծես նրան, կսրբագործես նրան, և նա ինձ համար քահանայություն կանի։ Կբերես նրա որդիներին, նրանց հանդերձանքներ կհագցնես, կօծես նրանց այնպես, ինչպես օծեցիր նրանց հորը, և նրանք ինձ համար քահանայություն կանեն։ Նրանց քահանայական օծումը իրենց սերունդների մեջ հավիտենական թող լինի»։

¹⁴ Մովսեսն այդ ամենը արեց այնպես, ինչպես որ Տերը պատվիրել էր իրեն. նա հենց այդպես էլ արեց։ ¹⁵ Եգիպտացիների երկրից նրանց դուրս գալու երկրորդ տարվա առաջին ամսին՝ ամսամուտին, խորանը կանգնեցվեց։ ¹⁶ Մովսեսը կանգնեցրեց խորանը. դրեց դրա խարիսխները և կանգնեցրեց դրա սյուները, դրանց վրա ամրացրեց խոյակները, ¹⁷ տեղադրեց միջաձողերը, խորանի վրա տարածեց տանիքի ծածկոցները։ Ծածկի երկու շերտերը գցեց խորանի վրա, ինչպես Տերն էր հրամայել Մովսեսին։ ¹⁸ Վերցրեց օրենքի քարե տախտակները, դրեց տապանակի մեջ, կրելու ձողերն անցկացրեց տապանակին և Քավությունը դրեց տապանակի վրա։ ¹⁹ Տապանակը տարավ խորանի ներսը, քաշելով քողաձև վարագույրը՝ ծածկեց Ուխտի տապանակը, ինչպես Տերն էր հրամայել Մովսեսին։

²⁰ Սեղանը դրեց Վկայության խորանի մեջ՝ խորանի հյուսիսային կողմից, խորանի վարագույրից դուրս։ ²¹ Դրա վրա Տիրոջ առաջ դասավորեց Առաջավորության հացը, ինչպես Տերն էր հրամայել Մովսեսին։

²² Աշտանակը դրեց Վկայության խորանի մեջ՝ սեղանի դիմաց, խորանի հարավային կողմում։ ²³ Ճրագամանները դրեց դրա վրա՝ Տիրոջ առաջ, ինչպես Տերն էր հրամայել Մովսեսին։

²⁴ Ոսկե սեղանը դրեց Վկայության խորանի մեջ՝ վարագույրի դիմաց։ ²⁵ Եվ խունկ ծխեց դրա վրա՝ պատրաստված խունկից, ինչպես Տերն էր հրամայել Մովսեսին։ ²⁶ Նա կախեց խորանի դռան վարագույրը։

²⁷ Ողջակեզների զոհասեղանը դրեց Վկայության խորանի դռան մոտ և դրա վրա ողջակեզներ ու զոհեր մատուցեց, ինչպես Տերն էր հրամայել Մովսեսին։

²⁸ Ավազանը դրեց Վկայության խորանի ու զոհասեղանի միջև և դրա մեջ ջուր լցրեց, ²⁹ որպեսզի Մովսեսը, Ահարոնն ու նրա որդիները դրանով լվանան իրենց ձեռքերն ու ոտքերը, ³⁰ երբ Վկայության խորանը մտնեն կամ երբ զոհասեղանին մոտենան՝ պաշտամունք կատարելու։ Նրանք լվացվում էին դրա միջի ջրով, ինչպես Տերն էր հրամայել Մովսեսին։

³¹ Բակ կառուցեց խորանի ու զոհասեղանի շուրջը և քաշեց բակի դռան վարագույրը։ Մովսեսն այսպես ավարտեց իր ամբողջ գործը։

Վկայության խորանը՝ լցված Տիրոջ փառքով

(Թվ. 9.15-23)

³² Ամպը ծածկեց Վկայության խորանը, և խորանը լցվեց Տիրոջ փառքով։ ³³ Մովսեսը չէր կարողանում մտնել Վկայության խորան, որովհետև ամպը ծածկել էր այն, և խորանը լցված էր Տիրոջ փառքով։

³⁴ Երբ ամպը վերանում էր խորանի վրայից, Իսրայելի որդիները գնում էին իրենց ամբողջ բազմությամբ, ³⁵ իսկ երբ ամպը չէր վերանում, չէին գնում, մինչև ամպը վերանար, ³⁶ որովհետև Իսրայելի որդիների ողջ երթի ընթացքում ցերեկները խորանի վրա Տիրոջ ամպն էր, գիշերները՝ կրակ։

ՂԵՎՏԱԿԱՆ

1

ԶՈՀԱԲԵՐՈՒԹՅՈՒՆՆԵՐ

(1–7)

Ողջակեզ զոհ

¹ Տերը կանչեց Մովսեսին, խոսեց նրա հետ Վկայության խորանից՝ ասելով. ² «Խոսի՛ր Իսրայելի որդիների հետ և ասա՛ նրանց. “Եթե ձեզանից մեկը Տիրոջը ընծա մատուցի հոտերից, արջառ կամ ոչխար թող լինի ձեր ընծան։

³ Եթե ողջակեզի համար նրա ընծան արջառներից է, արու և առանց արատի թող լինի։ Այն թող բերի Վկայության խորանի դռան մոտ, որպեսզի ընդունվի Տիրոջ առջև քավության համար։ ⁴ Նա իր ձեռքը թող դնի ընծայի գլխին՝ ընդունելի լինելու անձի քավության համար։ ⁵ Ապա թող Տիրոջ առաջ մորթեն զվարակը և քահանաները՝ Ահարոնի որդիները, արյունը թող բերեն ու շաղ տան Վկայության խորանի դռան առջև գտնվող զոհասեղանի վրա՝ շուրջանակի։ ⁶ Ողջակեզը թող քերթեն և անդամահատեն։ ⁷ Քահանաները՝ Ահարոնի որդիները, զոհասեղանի վրա կրակ թող դնեն և կրակի վրա փայտ դիզեն։ ⁸ Ահարոնի որդիները՝ քահանաները, անդամատված մասերը, գլուխն ու ճարպը թող դնեն զոհասեղանի կրակին դիզված փայտի վրա։ ⁹ Փորոտիքն ու ոտքերը թող լվանան ջրով, և քահանաները դրանք նույնպես թող դնեն զոհասեղանի վրա, որովհետև զոհը ողջակեզ է՝ անուշահոտություն Տիրոջ համար։

¹⁰ Եթե Տիրոջը մատուցվող ողջակեզի ընծան ոչխարների ցեղից է՝ գառ կամ ուլ, թող մատուցի արու և առանց արատի, իր ձեռքը թող դնի նրա գլխին, ¹¹ այն թող մորթեն Տիրոջ առաջ՝ զոհասեղանի հյուսիսային կողմում, և Ահարոնի որդիները՝ քահանաները, արյունը թող շուրջանակի շաղ տան զոհասեղանի վրա։ ¹² Այն թող անդամատեն և քահանաները գլխով ու ճարպով հանդերձ թող դնեն զոհասեղանի վրա եղած կրակի և փայտի վրա, ¹³ փորոտիքն ու ոտքերը թող լվանան ջրով, և քահանան դրանք նույնպես թող բերի ու դնի զոհասեղանի վրա, որովհետև ողջակեզ զոհ է՝ անուշահոտություն Տիրոջ համար։

¹⁴ Իսկ եթե Տիրոջը մատուցվող ողջակեզի ընծան թռչուն է, տատրակ կամ աղավնի թող լինի ընծան։ ¹⁵ Քահանան այն թող մոտ բերի զոհասեղանին, ոլորելով պոկի գլուխը, դնի զոհասեղանին, իսկ արյունը քամի զոհասեղանի խարսխին։ ¹⁶ Թող պոկի քարաճիկը և իր կեղտով[18] նետի զոհասեղանի մոտ գտնվող մոխրակույտի մեջ։ ¹⁷ Ապա այն թող ջարդի թևերից, սակայն բաժան-բաժան չանի։ Քահանան այն թող դնի զոհասեղանի վրայի կրակին դիզված այրվող փայտի վրա, որովհետև զոհը ողջակեզ է՝ անուշահոտություն Տիրոջ համար”»։

2

Անարյուն ընծա

¹ «Եթե մեկը անարյուն ընծա մատուցի Տիրոջը, թող իր ընծան նաշիհ լինի, վրան ձիթայուղ լցնի ու կնդրուկ դնի։ ² Այն թող տանի քահանաներին՝ Ահարոնի որդիներին։ Քահանան թող վերցնի ձիթայուղով հունցված մի բուռ նաշիհ ու ողջ կնդրուկը և դրանք դնի զոհասեղանին՝ իբրև հիշատակի ընծա՝ անուշահոտություն Տիրոջ համար։ ³ Այդ ընծայի մնացյալ մասը թող պատկանի Ահարոնին ու նրա որդիներին։ Դա Տիրոջը մատուցվող ամենասուրբ զոհատեսակներից է։

⁴ Եթե մեկը որպես անարյուն ընծա մատուցի թոնրի մեջ եփվածը, ապա Տիրոջը թող ընծայի ձիթայուղով հունցված նաշիհից բաղարջ նկանակ և բաղարջ լավաշ։ ⁵ Եթե քո ընծան եփված է տապակի մեջ, այն թող բաղարջ լինի ձիթայուղով հունցված նաշիհից։ ⁶ Այն կբրդես և վրան ձիթայուղ կլցնես։ Այն Տիրոջը մատուցվող անարյուն զոհ է։ ⁷ Եթե քո ընծան կասկարայի վրա եփված է, ապա ձիթայուղով հունցված նաշիհից թող պատրաստվի։

⁸ Տիրոջը մատուցվող անարյուն ընծաներն այդպես պատրաստելով՝ մատուցի՛ր քահանային։ Եվ քահանան, մոտենալով զոհասեղանին, ⁹ մի մաս թող վերցնի և դնի զոհասեղանին իբրև հիշատակի մաս՝ անուշահոտություն Տիրոջ համար։ ¹⁰ Իսկ մնացած մասը թող պատկանի Ահարոնին ու նրա որդիներին։ Դա կրակի վրա Տիրոջը մատուցած ամենասուրբ ընծաներից է։

¹¹ Տիրոջը մատուցվող ոչ մի անարյուն ընծա թթխմորով չպատրաստեք։ Թթխմորով ու մեղրով պատրաստված որևէ ընծա Տիրոջը չմատուցեք։ ¹² Դրանք կարող եք մատուցել Տիրոջը՝ որպես բերքի երախայրիք, բայց զոհասեղանի վրա այն չայրեք իբրև անուշահոտություն Տիրոջ համար։ ¹³ Ձեր բոլոր անարյուն ընծաները թող աղով աղվեն. Աստծու ուխտի աղը մի՛ պակասեցրեք ձեր զոհերից. բոլոր ընծաների հետ ա՛ղ մատուցեք։

¹⁴ Եթե բերքի երախայրիքից Տիրոջն ընծա մատուցես, մաքրած ու բոված նոր ցորե՛ն մատուցիր՝ իբրև քո բերքի երախայրիքի ընծա։ ¹⁵ Վրան ձիթայո՛ւղ լցրու և կնդրո՛ւկ դիր։ Դա անարյուն ընծա է։ ¹⁶ Քահանան թող կրակի վրա դնի ձիթայուղով աղանձից և ողջ կնդրուկը՝ իբրև հիշատակի ընծա, որովհետև ընծա է Տիրոջ համար»։

3

Փրկության զոհ

¹ «Եթե Տիրոջը մատուցվող ընծան փրկության զոհ է, եթե արջառ է, արու լինի թե էգ, Տիրոջ առջև արատ չունեցողը թող մատուցվի։ ² Նա իր ձեռքը թող դնի ընծայի գլխին և մորթի այն Վկայության խորանի դռան մոտ։ Ահարոնի որդիները՝ քահանաները, արյունը թող շաղ տան ողջակեզի զոհասեղանի վրա՝ շուրջանակի։ ³ Փրկության զոհից Տիրոջը թող մատուցեն փորի ճարպաթաղանթն ու փորոտիքի ամբողջ ճարպը, ⁴ երկու երիկամները, դրանց վրայի ճարպը, ազդրին կից ճարպը. երիկամների հետ պետք է հանվի նաև լյարդի բլթակը։ ⁵ Ահարոնի որդիները՝ քահանաները, դրանք թող դնեն ողջակեզի զոհասեղանի կրակին դիզված փայտի վրա։ Այն կրակով այրվող զոհ է՝ անուշահոտություն Տիրոջ համար։

⁶ Եթե Տիրոջը մատուցվող ընծան փրկության զոհ է ոչխարների ցեղից, արու լինի թե էգ, թող արատ չունեցողը մատուցի։ ⁷ Եթե իր ընծան գառ է, այն թող մատուցի Տիրոջ առջև։ ⁸ Իր ձեռքը թող դնի ընծայի գլխին և մորթի այն Վկայության խորանի դռանը։ Ահարոնի որդիները՝ քահանաները, արյունը թող շաղ տան ողջակեզի զոհասեղանի վրա՝ շուրջանակի։ ⁹ Փրկության զոհից Տիրոջը ընծա թող մատուցեն ճարպը, ողնաշարը՝ զիստերով հանդերձ, փորի ճարպաթաղանթը, փորոտիքի ամբողջ ճարպը, ¹⁰ երկու երիկամներն ու դրանց վրայի ճարպը, ազդրին կից ճարպը. երիկամների հետ պետք է հանվի նաև լյարդի բլթակը։ ¹¹ Այս ամենը քահանան թող դնի զոհասեղանին՝ որպես այրվող զոհ՝ անուշահոտություն Տիրոջ համար։

¹² Իսկ եթե իր ընծան այծ լինի, այն թող մատուցի Տիրոջ առջև, ¹³ իր ձեռքը թող դնի նրա գլխին, թող մորթեն Տիրոջ առջև՝ Վկայության խորանի դռանը, և Ահարոնի որդիները՝ քահանաները, արյունը թող շաղ տան զոհասեղանի վրա՝ շուրջանակի։ ¹⁴ Եվ դրանից Տիրոջն ընծա թող մատուցեն փորի ճարպաթաղանթը և փորոտիքի ամբողջ ճարպը, ¹⁵ երկու երիկամներն ու դրանց վրայի ճարպը, ազդրին կից ճարպը. երիկամների հետ պետք է հանվի նաև լյարդի բլթակը։ ¹⁶ Քահանան դրանք թող դնի զոհասեղանին՝ իբրև ընծա՝ անուշահոտություն Տիրոջ համար։ Ողջ ճարպը պատկանում է Տիրոջը։ ¹⁷ Հավիտենական օրենք թող լինի ձեր սերունդների համար, որտեղ էլ բնակվելիս լինեք. ճարպ և արյուն երբեք չուտեք»։

4

Քավության զոհ

¹ Տերն ասաց Մովսեսին. ² «Խոսի՛ր Իսրայելի որդիների հետ ու ասա՛.

“Եթե մեկն ակամա մեղանչի Տիրոջ առջև, անի բաներ, որոնք դեմ են Տիրոջ պատվիրանին, ³ եթե օծված քահանայապետը մեղանչի՝ ժողովրդին հանցավոր դարձնելով, իր գործած մեղքը քավելու համար նա Տիրոջը առանց արատի մի արջառ թող մատուցի։ ⁴ Նա արջառը թող բերի Վկայության խորանի դռան մոտ՝ Տիրոջ առջև, իր ձեռքը Տիրոջ առջև թող դնի նրա գլխին, և արջառը թող մորթեն Տիրոջ առջև։ ⁵ Զոհաբերությունը կատարող օծյալ քահանան, իր ձեռքով վերցնելով արջառի արյունից, այն թող տանի Վկայության խորան։ ⁶ Քահանան իր մատը թող թաթախի արյան մեջ, այդ արյունից թող յոթ անգամ իր մատով շաղ տա Տիրոջ առջև՝ սրբարանի վարագույրի մոտ։ ⁷ Քահանան արջառի արյունից թող քսի Տիրոջ առջև՝ Վկայության խորանում դրված խնկարկության սեղանի եղջյուրներին, իսկ մնացած արյունը թող հեղի Վկայության խորանի դռանը գտնվող ողջակեզի զոհասեղանի խարսխին։ ⁸ Նա թող հանի մեղքերի քավության համար զոհաբերվող արջառի ճարպը, փորի ճարպաթաղանթը և փորոտիքի ամբողջ ճարպը, ⁹ երկու երիկամներն ու դրանց վրայի ճարպը, ազդրին կից ճարպը, երկու երիկամների հետ պետք է հանվի նաև լյարդի բլթակը. ¹⁰ այնպես, ինչպես արվում է փրկության համար զոհաբերվող արջառի դեպքում։ Քահանան այս ամենը թող դնի ողջակեզի զոհասեղանին։ ¹¹ Արջառի մորթը, նրա ամբողջ մարմինը գլխի ու ոտքերի, փորոտիքի հետ՝ ¹² արջառն ամբողջությամբ, թող հանեն բանակատեղիից դուրս՝ մի մաքուր տեղ, ուր մոխիրն են թափում, և փայտի կրակի վրա թող այրեն այն։ Արջառը պետք է այրվի մոխիրը թափելու վայրում։

¹³ Եթե Իսրայելի ողջ ժողովուրդն ակամա մոլորվի՝ անելով մի բան, որ չեն թույլատրում Տիրոջ պատվիրանները, և այդպիսով մեղանչի, և այդ բանը վրիպած լինի ժողովրդի աչքից, ¹⁴ իսկ դրանից հետո հայտնի դառնա նրանց կատարած մեղքը, ժողովուրդն իր գործած մեղքը քավելու համար նախրից առանց արատի մի արջառ թող զոհաբերի։ Այն թող բերեն Վկայության խորանի դռան մոտ, ¹⁵ ժողովրդի ծերերը Տիրոջ առջև իրենց ձեռքը թող դնեն արջառի գլխին և Տիրոջ առջև թող մորթեն այն։ ¹⁶ Օծյալ քահանան արջառի արյունից թող տանի Վկայության խորան ¹⁷ և մատը թաթախելով արջառի արյան մեջ՝ Տիրոջ առջև յոթ անգամ թող շաղ տա սրբարանի վարագույրի դիմաց։ ¹⁸ Քահանան արջառի արյունից թող քսի Տիրոջ առջև՝ Վկայության խորանում դրված խնկարկության սեղանի եղջյուրներին, իսկ մնացած արյունը թող հեղի Վկայության խորանի դռան մոտ գտնվող ողջակեզի զոհասեղանի խարսխին։ ¹⁹ Ապա թող հանի ամբողջ ճարպը և դնի զոհասեղանին։ ²⁰ Այդ արջառի զոհաբերությունը թող կատարի ըստ մեղքերի քավության համար մատուցվող արջառի զոհաբերության կարգի։ Քահանան նույն կերպ թող կատարի նրանց մեղքի զոհը, և նրանց մեղքերը կներվեն։ ²¹ Արջառն ամբողջությամբ պետք է հանեն բանակատեղիից դուրս և այրեն այնպես, ինչպես նախորդ արջառն այրեցին, որովհետև ժողովրդի մեղքերի համար է։

²² Իսկ եթե մեղանչի իշխանը՝ անելով մի բան, որ չեն թույլատրում Տիրոջ՝ Աստծու պատվիրանները, և այդպիսով մեղանչի ակամա, ²³ և իրեն հայտնի դառնա այն մեղքը, որ գործել է, ապա թող ընծա մատուցի այծերից արու և արատ չունեցող մի նոխազ։ ²⁴ Նա իր ձեռքը թող դնի նոխազի գլխին, թող այն մորթեն Տիրոջ առջև՝ այնտեղ, որտեղ ողջակեզներն են մորթում, քանի որ սա մեղքի զոհ է։ ²⁵ Քահանան մեղքերի զոհի արյունը մատով թող քսի ողջակեզի զոհասեղանի եղջյուրներին, ապա մնացած ամբողջ արյունը թող հեղի ողջակեզի զոհասեղանի խարսխին։ ²⁶ Ապա ամբողջ ճարպը թող դնի զոհասեղանին, փրկության զոհի ճարպի նման։ Քահանան քավություն կանի նրա մեղքերին, և նրա մեղքերը կներվեն։

²⁷ Եթե երկրի բնակիչներից մեկն ակամա մեղք գործի՝ անելով մի բան, որ չեն թույլատրում Տիրոջ պատվիրանները, և այդպիսով մեղանչի, ²⁸ և երբ իրեն հայտնի դառնա այն մեղքը, որ գործել է, իր գործած մեղքի համար թող ընծա մատուցի այծերից էգ և արատ չունեցող մի ուլ։ ²⁹ Իր ձեռքը թող դնի նրա գլխին, և մեղքերի քավության համար զոհաբերվող ուլը թող մորթեն այնտեղ, որտեղ ողջակեզներն են մորթում։ ³⁰ Քահանան իր մատով թող վերցնի զոհի արյունից և քսի ողջակեզի զոհասեղանի եղջյուրներին։ Մնացած ամբողջ արյունը թող հեղի ողջակեզի զոհասեղանի խարսխին։ ³¹ Ապա թող հանի ամբողջ ճարպը, փրկության զոհի ճարպի նման, և քահանան թող դնի այն զոհասեղանին՝ անուշահոտություն Տիրոջ համար, և այսպիսով քահանան թող քավի նրա մեղքերը, և նա թող թողություն ստանա։ ³² Իսկ եթե իր մատուցած ընծան ոչխար լինի, թող էգը և արատ չունեցողը մատուցի։ ³³ Իր ձեռքը թող դնի մեղքի զոհի գլխին, ապա թող մորթեն այն այնտեղ, որտեղ ողջակեզներն են մորթում։ ³⁴ Քահանան իր մատով թող վերցնի մեղքի զոհի արյունից և քսի ողջակեզի զոհասեղանի եղջյուրներին։ Մնացած ամբողջ արյունը թող հեղի ողջակեզի զոհասեղանի խարսխին։ ³⁵ Ապա թող հանի ամբողջ ճարպը փրկության համար մատուցվող ոչխարի ճարպի նման, և քահանան թող դնի այն զոհասեղանին՝ որպես ողջակեզ Տիրոջ համար, և այսպիսով քահանան թող քավի նրա մեղքերը, և նա թող թողություն ստանա”»։

5

¹ «Եթե մեկը մեղանչի, երբ հրավիրվի երդումով վկայություն տալու մի բանի մասին, որ տեսել է կամ տեղյակ է, և չհայտնի, մեղքի տակ կընկնի։

² Եթե մեկը դիպչի անմաքուր մի բանի, ինչպես օրինակ սատկածի կամ գազանի կողմից հոշոտվածի, լինեն դրանք սողուն թե անմաքուր կենդանի, ինքն էլ կպղծվի ու մեղավոր կդառնա։ ³ Կամ դիպչի մարդկային ամեն տեսակի պղծությունների, որոնց դիպչելիս մարդ պղծվում է, սակայն անգիտակից լինի իր մեղքին, և երբ գիտակցի այն, մեղավոր կլինի։

⁴ Նա, ով խոստանա չար կամ բարի գործ կատարել և այդ խոստումը հաստատի երդմամբ, և հետո անդրադառնա, որ սխալ է, թեկուզ և չանի, միևնույն է, երկու դեպքում էլ մեղանչել է։ ⁵ Պետք է խոստովանի իր գործած մեղքերը։

⁶ Տիրոջ նկատմամբ կատարած իր հանցանքների ու գործած մեղքերի համար նա հոտից մի էգ գառ կամ մի էգ ուլ թող մատուցի՝ իբրև մեղքի զոհ։ Քահանան թող քավի նրա մեղքերը, և նրա մեղքերը թող ներվեն։

⁷ Իսկ եթե կարողություն չունի ոչխարի, իր գործած մեղքերի համար երկու տատրակ կամ աղավնիների երկու ձագ թող մատուցի. մեկը՝ մեղքի համար, մյուսը՝ որպես ողջակեզ։ ⁸ Դրանք թող բերի քահանային։ Քահանան նախ թող ներս տանի մեղքի զոհը, գլուխը ոլորելով պոկի ողնաշարից, բայց մարմնից չանջատի։ ⁹ Նա զոհասեղանի պատին թող շաղ տա մեղքի զոհի արյունից, իսկ մնացած արյունը թող քամի զոհասեղանի խարսխին, որովհետև մեղքի զոհ է։ ¹⁰ Երկրորդ թռչունը թող ողջակեզ անի, ինչպես որ կարգն է։ Այդպես քահանան քավություն կտա նրա գործած մեղքերին, և նա թողություն կստանա։

¹¹ Եթե նա ի վիճակի չէ զույգ տատրակներ կամ աղավնիների երկու ձագեր մատուցելու, իր գործած մեղքերի քավության համար թող նվիրաբերի մեկ տասներորդ գրիվ նաշիհ՝ իբրև մեղքի զոհ։ Դրա վրա թող ձիթայուղ չլցնի և կնդրուկ չդնի, որովհետև մեղքի զոհ է։ ¹² Նա այդ թող տանի քահանային, և քահանան, դրանից մի բուռ վերցնելով իբրև հիշատակի բաժին, թող դնի Տիրոջ ողջակեզի զոհասեղանին, որովհետև մեղքի զոհ է։ ¹³ Քահանան թող քավի նրա գործած մեղքերից յուրաքանչյուրը, և նրա մեղքը կներվի։ Մնացյալը թող պատկանի քահանային, ինչպես նաշիհի ընծան»։

Վերանորոգման զոհ

¹⁴ Տերն ասաց Մովսեսին. ¹⁵ «Այն անձը, որ կվրիպի ու Տիրոջ սրբությունների հանդեպ ակամա կմեղանչի, իր հանցանքի համար թող Տիրոջը ոչխարների հոտից հիսուն արծաթ սիկղ արժողությամբ, ըստ սրբարանի սիկղաչափի, արատ չունեցող մի խոյ մատուցի, ¹⁶ թող հատուցի նաև սրբություններին հասցրած վնասը՝ դրան ավելացնելով արժեքի մեկ հինգերորդը, և տա քահանային։ Քահանան հանցանքի քավության խոյով թող թողություն տա նրա հանցանքին և ների նրան։

¹⁷ Այն անձը, որ անգիտակցաբար վրիպի՝ կատարելով բաներ, որոնք դեմ են Տիրոջ պատվիրաններին և մեղանչի, սակայն ընդունի իր մեղքը, ¹⁸ իր հանցանքի թողության համար իր հոտից նա քահանային թող բերի մեկ արծաթ արժողությամբ արատ չունեցող մի խոյ, որով քահանան թող քավի անգիտակցաբար գործած նրա մեղքը, և թողություն տա նրան, ¹⁹ որովհետև հանցանք էր գործել Տիրոջ առջև»։

²⁰ Տերն ասաց Մովսեսին. ²¹ «Եթե մեկը մեղանչի և արհամարհի Տիրոջ պատվիրանները, ընկերոջ կողմից իրեն պահ տրված ավանդը կամ գրավը ուրանա, հափշտակի կամ որևէ վնաս հասցնի իր մերձավորին և ²² կամ կորած մի բան գտնի, բայց ուրանա և սուտ երդում տա այս ամենից որևէ բանի վերաբերյալ, որոնք անում է մարդ և դրանով իսկ մեղանչում, ²³ երբ այսպիսի գործերով մեղանչի և հանցանքի մեջ ընկնի, նա պետք է հատուցի իր հափշտակածը կամ իր հասցրած վնասը, կամ իրեն պահ տրված ավանդը կամ կորածը, որ գտել է։ ²⁴ Այն ամենը, որոնց մասին սուտ երդում է տվել, պետք է հատուցի ամբողջությամբ, դրան ավելացրած նաև վնասի մեկ հինգերորդը։ Ումը որ լինի, թող հատուցի նույն օրը, երբ իր մեղքը հայտնի դառնա։ ²⁵ Իր գործած մեղքի համար նա Տիրոջը պետք է հոտից, իր գործած հանցանքի արժողության համաձայն, արատ չունեցող մի խոյ մատուցի։ ²⁶ Քահանան Տիրոջ առջև թող քավություն անի նրա համար նրա այն հանցանքը, որ նա գործել է, և թողություն տա նրան»։

6

ԶՈՀԵՐԻ ԵՎ ԱՆԱՐՅՈՒՆ ԸՆԾԱՆԵՐԻ ՄԱՏՈՒՑՄԱՆ ԿԱՐԳԸ

(6–7)

¹ Տերն ասաց Մովսեսին. ² «Պատվիրի՛ր Ահարոնին ու նրա որդիներին՝ ասելով. “Այս է ողջակեզի կարգը. զոհասեղանի վրա այն պետք է մնա ամբողջ գիշեր՝ մինչև առավոտ, և զոհասեղանի վրա այրվող կրակը չպետք է հանգչի։ ³ Քահանան կտավե պատմուճան թող հագնի և կտավե անդրավարտիք՝ իր մարմնի վրա։ Կրակով այրված ողջակեզի մոխիրը թող հավաքի զոհասեղանի վրայից ու դնի զոհասեղանի մոտ։ ⁴ Ապա թող հանի իր պատմուճանը և հագնի այլ պատմուճան ու մոխիրը թող տանի բանակատեղիից դուրս՝ մի մաքուր տեղ։ ⁵ Զոհասեղանի վրա վառվող կրակը չպետք է հանգչի։ Քահանան առավոտները դրա վրա թող փայտ ավելացնի, դնի ողջակեզը և փրկության զոհի ճարպը։ ⁶ Կրակը միշտ պիտի վառվի զոհասեղանի վրա ու երբեք չհանգչի”»։

⁷ «Այս է անարյուն ընծա մատուցելու կարգը, որը Տիրոջ առջև՝ զոհասեղանի դիմաց, պետք է անեն Ահարոնի որդիները՝ քահանաները։ ⁸ Քահանան, իբրև հիշատակի բաժին, մի բուռ պիտի առնի նվիրաբերվող նաշիհից՝ նրա վրա դրված յուղով ու կնդրուկով հանդերձ, և դնի զոհասեղանին՝ անուշահոտություն Տիրոջ համար։ ⁹ Մնացած նաշիհը պիտի ճաշակեն Ահարոնն ու նրա որդիները։ Այս բաղարջը պիտի ուտվի սուրբ վայրում՝ Վկայության խորանի բակում։ ¹⁰ Այն թթխմորով չպիտի եփվի։ Ինձ հատկացված ընծայի այդ մասը ես իրենց տվեցի։ Դրանք սրբությունների սրբություն են՝ լինի այդ մեղքի զոհ, թե հանցանքների զոհ։ ¹¹ Քահանաների ընտանիքների բոլոր արու անդամները թող ուտեն դրանից։ Այս թող լինի Տիրոջը մատուցվելիք նվիրաբերության հավիտենական կարգը ձեր սերունդների մեջ։ Ով որ դիպչի դրանց, կսրբանա»։

¹² Տերն ասաց Մովսեսին. ¹³ «Այս է Ահարոնի ու նրա որդիների ընծան, որ իրենց օծվելու օրը պիտի մատուցեն Տիրոջը. ամենօրյա ընծա՝ մեկ տասներորդ գրիվ նաշիհ. կեսը՝ առավոտյան, կեսը՝ երեկոյան։ ¹⁴ Յուղով հունցելուց հետո տապակի մեջ պիտի պատրաստվի այն։ Դա կտրտված, մաքուր վիճակում պիտի մատուցվի՝ իբրև Տիրոջն ընծայաբերվող անուշահոտ ընծա։

¹⁵ Այս բանը պիտի կրկնի Ահարոնի որդիներից նա, որն օծվելով՝ պիտի հաջորդի նրան։ Սա հավիտենական օրենք է և պիտի կատարվի ամբողջությամբ։ ¹⁶ Քահանայի բոլոր զոհերը ողջակեզ պետք է լինեն, դրանցից ոչ մի բան չպիտի ուտվի»։

¹⁷ Տերն ասաց Մովսեսին. ¹⁸ «Խոսի՛ր Ահարոնի ու նրա որդիների հետ՝ ասելով. “Մեղքի համար զոհ մատուցելու կարգն այս է. մեղքի զոհը թող մորթեն այնտեղ, որտեղ ողջակեզի զոհն են մորթում՝ Տիրոջ առջև։ Դա սրբությունների սրբություն զոհ է։ ¹⁹ Զոհ մատուցող քահանան պետք է ուտի այն։ Այն պետք է ուտել սուրբ վայրում՝ Վկայության խորանի բակում։ ²⁰ Այդ մսին դիպչողը կսրբանա, և եթե դրա արյունից ընկնի զգեստի վրա, այն պետք է լվացվի մաքուր վայրում։ ²¹ Կավե անոթը, որի մեջ կեփվի, պետք է ջարդվի, իսկ եթե եփվի պղնձե անոթի մեջ, պետք է այն շփել ու ջրով ողողել։ ²² Քահանաների ընտանիքների բոլոր արու անդամները թող ուտեն դրանից, որովհետև դա Տիրոջը մատուցվող սրբությունների սրբություն զոհ է։ ²³ Մեղքի ամեն մի զոհ, որի արյան մի մասը բերվում է Վկայության խորան՝ սրբարանում քավություն ստանալու համար, չպետք է ուտվի, այլ կրակով պետք է այրվի”։

7

¹ Հանցանքի համար մատուցվող խոյի զոհաբերման կարգն այս է. դա սրբությունների սրբություն զոհ է։ ² Հանցանքի զոհը պետք է մորթել ողջակեզի խոյ մորթելու վայրում՝ Տիրոջ առջև, իսկ արյունը թող հեղի զոհասեղանի խարսխին՝ շուրջանակի։ ³ Թող հանի նրա ամբողջ ճարպը, դմակը, փորի ողջ ճարպաթաղանթը և փորոտիքի ամբողջ ճարպը, ⁴ պոկի երկու երիկամները, դրանց վրայի ճարպը, մկանների վրայի՝ մինչև ազդրերը հասնող ճարպը և լյարդի բլթակը՝ երիկամներով հանդերձ։ ⁵ Քահանան դրանք թող դնի զոհասեղանին՝ այրելու Տիրոջ համար. դա հանցանքի զոհ է։ ⁶ Քահանայական դասի բոլոր արուները թող ուտեն դրանից. սուրբ վայրում թող ուտեն, քանի որ դա սրբությունների սրբություն զոհ է։ ⁷ Ինչպես մեղքի զոհի պարագայում է, նույնը և հանցանքինն է։ Միևնույն օրենքն է երկուսի համար էլ։ Պատկանում է քահանային, որը կատարում է քավության կարգը։ ⁸ Քահանային, որ ողջակեզի կարգ է կատարում, պատկանում է ողջակեզի մորթին։ ⁹ Թոնրում պատրաստվող ամեն մի զոհ, ինչպես նաև կասկարայի կամ տապակի մեջ պատրաստվող ամեն մի զոհ, թող պատկանի այն քահանային, որ կատարում է այդ կարգը, ¹⁰ իսկ ձիթայուղով հունցված ամեն մի զոհ, ինչպես նաև չհունցվածը, պատկանում է Ահարոնի որդիներից յուրաքանչյուրին հավասարապես։

¹¹ Այս է Տիրոջը մատուցվող փրկության զոհի կարգը. ¹² եթե գոհության համար է մատուցվում այն, ապա իբրև գոհության զոհ թող մատուցեն ձիթայուղով հունցված նաշիհից պատրաստված բաղարջ հաց, ձիթայուղով օծված բաղարջ կարկանդակ, ձիթայուղով շաղախված նաշիհ։ ¹³ Խաղաղության համար գոհության զոհը թող մատուցվի նաշիհի բաղարջ հացերով հանդերձ։ ¹⁴ Իր յուրաքանչյուր ընծայի մի մասը Տիրոջը թող նվիրի, որպեսզի պատկանի խաղաղության զոհի արյունը հեղող քահանային։ ¹⁵ Նրան թող պատկանի նաև խաղաղության համար մատուցված գոհության զոհի միսը, որը պիտի ուտվի նույն օրը, երբ զոհաբերվում է. մինչև առավոտ դրանից ոչինչ չպետք է մնա։

¹⁶ Իսկ եթե մատուցվածը ուխտի կամ կամավոր զոհ է, ապա դրա միսը կարող է ուտվել թե՛ զոհի մատուցման և թե՛ հաջորդ օրը, ¹⁷ իսկ մինչև երրորդ օրը մնացած զոհի միսը պետք է հրով այրվի։ ¹⁸ Իսկ եթե մեկը խաղաղության իր զոհի՝ երրորդ օրը մնացած միսն ուտի, զոհաբերությունն ընդունելի չի լինի, և այն նրա օգտին չի համարվի, որովհետև այն անպետք է ու պիղծ։ Այն ուտողը մեղքի մեջ կընկնի։

¹⁹ Միսը, որ դիպել է որևէ պղծության, չի կարելի ուտել, այլ պետք է կրակով այրվի։

Միսը թող ուտեն բոլոր մաքուրները։ ²⁰ Այն անձը, որ անմաքուր լինելով կուտի խաղաղության զոհից, որ Տիրոջն է, թող կորչի իր ժողովրդի միջից։ ²¹ Այն անձը, որ դիպչի որևէ պիղծ բանի՝ մարդկային պղծության կամ անմաքուր անասունների և կամ այլ գարշելի պղծությունների, և ապա ուտի խաղաղության զոհից, որ Տիրոջն է, թող կորչի իր ժողովրդի միջից»։

²² Տերն ասաց Մովսեսին. ²³ «Խոսի՛ր Իսրայելի որդիների հետ և ասա՛. “Արջառի, ոչխարի ու այծի ճարպերից ոչինչ չուտեք։ ²⁴ Սատկածի կամ գազանից հոշոտվածի ճարպը կարող եք օգտագործել զանազան նպատակներով, սակայն ոչ իբրև կերակուր։ ²⁵ Ամեն ոք, որ ուտի այն անասունների ճարպից, որ մատուցվում են Տիրոջը՝ իբրև այրվող ընծա, թող կորչի իր ժողովրդի միջից։

²⁶ Ձեր բոլոր բնակավայրերում արյուն չուտեք՝ ո՛չ թռչունի, ո՛չ անասունի։ ²⁷ Ամեն ոք, որ արյուն ուտի, թող կորչի իր ժողովրդի միջից”»։

²⁸ Տերն ասաց Մովսեսին. ²⁹ «Խոսի՛ր Իսրայելի որդիների հետ և ասա՛. “Ով Տիրոջը խաղաղության զոհ մատուցի, նա իր խաղաղության զոհից Տիրոջն ընծա թող մատուցի։ ³⁰ Նա իր ձեռքով թող մատուցի Տիրոջ ընծան՝ կրծքի ճարպն ու լյարդի բլթակը՝ դնելով Տիրոջ առջև, ³¹ և քահանան դրանք թող դնի զոհասեղանին, իսկ կուրծքը պատկանում է Ահարոնին ու նրա որդիներին։ ³² Ձեր խաղաղության զոհի աջ թևը որպես հաս տվեք քահանային։ ³³ Ահարոնի որդիներից նա, ով կմատուցի փրկության զոհի արյունն ու ճարպը, նրան թող լինի աջ թևը՝ իբրև բաժին։ ³⁴ Որովհետև կուրծքն ու թևը ես վերցրի Իսրայելի որդիների խաղաղության զոհերից և տվեցի Ահարոն քահանային ու նրա որդիներին։ Դա Իսրայելի որդիների համար հավիտենական օրենք թող լինի”»։

³⁵ Սրանք են իրավունքները Ահարոնի ու նրա որդիների՝ Տիրոջը նվիրաբերվող ընծաներից, այն օրվանից, երբ նրանց քահանա կարգեց։ ³⁶ Այն օրվանից, երբ Տերն օծեց նրանց, պատվիրեց, որ տրվի նրանց բաժինը Իսրայելի որդիներից՝ իբրև հավիտենական օրենք սերնդեսերունդ։ ³⁷ Այս է կարգը ողջակեզի, անարյուն զոհի, մեղքերի քավության, հանցանքի, նվիրագործման ու խաղաղության զոհերի, ³⁸ ինչպես որ պատվիրեց Տերը Մովսեսին Սինա լեռան վրա այն օրը, երբ Տերը պատվիրեց, որ Իսրայելի որդիներն իրենց ընծաները մատուցեն Տիրոջ առջև՝ Սինայի անապատում։

8

ՔԱՀԱՆԱՅՈՒԹՅՈՒՆԸ

(8–10)

Ահարոնի և իր որդիների օծումը

(Ելք 29.1-37)

¹ Տերն ասաց Մովսեսին. ² «Վերցրո՛ւ Ահարոնին ու նրա որդիներին, նրանց հանդերձանքը ու օծության յուղը, մեղքերի քավության զվարակը, երկու խոյերն ու բաղարջ հացերի զամբյուղը ³ և ողջ ժողովրդին հավաքի՛ր Վկայության խորանի դռան առջև»։ ⁴ Եվ Մովսեսն արեց այն, ինչ Տերը հրամայել էր իրեն. նա ժողովրդին հավաքեց Վկայության խորանի դռան առջև։

⁵ Եվ Մովսեսն ասաց ժողովրդին. «Տերը պատվիրել է այսպես անել»։ ⁶ Մովսեսը բերեց Ահարոնին ու նրա որդիներին, լողացրեց նրանց ջրով, ⁷ Ահարոնին հագցրեց շապիկը և գոտին կապեց նրա մեջքին, գցեց պատմուճանը, դրա վրա դրեց եփուդը և այն եփուդի ժապավեններով ամրացրեց նրա վրա։ ⁸ Եփուդի վրա կապեց լանջապանակը, վերջինիս վրա դրեց Հայտնությունն ու Ճշմարտությունը [*  Ուրիմ և Թումիմ]։ ⁹ Նրա գլխին դրեց խույրը, խույրի ճակատին ամրացրեց ոսկյա սուրբ թիթեղը, ինչպես որ Տերը պատվիրել էր Մովսեսին։ ¹⁰ Մովսեսը, վերցնելով օծության յուղից, ¹¹ յոթ անգամ ցանեց զոհասեղանի վրա, օծելով սրբագործեց զոհասեղանը, նրա ողջ սպասքը, ավազանն ու նրա խարիսխը։ Ապա օծեց ու սրբագործեց խորանը և խորանում եղած ամեն ինչ։ ¹² Մովսեսն օծության յուղից հեղեց Ահարոնի գլխին, օծեց ու սրբագործեց նրան։ ¹³ Ապա Մովսեսն առաջ բերեց Ահարոնի որդիներին և նրանց պատմուճաններ հագցրեց, նրանց մեջքերին կապեց գոտիներ, գլուխներին դրեց ապարոշներ, ինչպես որ Տերը պատվիրել էր Մովսեսին։

¹⁴ Մովսեսն այնուհետև մոտ բերեց մեղքերի քավության զվարակը, Ահարոնն ու նրա որդիներն իրենց ձեռքերը դրեցին մեղքերի քավության զվարակի գլխին, ¹⁵ Մովսեսը մորթեց այն, վերցրեց նրա արյունից և իր մատով մեկ առ մեկ քսեց զոհասեղանի եղջյուրներին՝ սրբագործելով զոհասեղանը։ Մնացած արյունը թափեց զոհասեղանի խարսխին։ Այսպես սրբագործեց զոհասեղանը, որպեսզի նրա վրա քավության զոհ մատուցի։ ¹⁶ Ապա Մովսեսը հանեց փորոտիքի ամբողջ ճարպը, լյարդի բլթակը, երկու երիկամներն ու դրանց վրայի ամբողջ ճարպը և դրեց զոհասեղանին։ ¹⁷ Իսկ զվարակը՝ կաշին, միսն ու փորոտիքը, հրով այրեց բանակատեղիից դուրս, ինչպես որ Տերը պատվիրել էր Մովսեսին։

¹⁸ Ապա Մովսեսը մոտ բերեց ողջակեզի խոյը, և Ահարոնն ու նրա որդիներն իրենց ձեռքերը դրեցին խոյի գլխին։ ¹⁹ Մովսեսը մորթեց խոյը և նրա արյունը շուրջանակի թափեց զոհասեղանի վրա։ ²⁰ Նա խոյը կտրատեց ըստ անդամների. գլուխը, անդամ-անդամ կտրտված միսն ու ճարպը դրեց զոհասեղանին, ²¹ փորոտիքն ու ոտքերը լվաց ջրով և խոյն ամբողջությամբ տեղադրեց զոհասեղանի վրա, քանի որ ողջակեզ է՝ անուշահոտություն Տիրոջ համար, ինչպես որ Տերը պատվիրել էր Մովսեսին։

²² Մովսեսն առաջ բերեց երկրորդ խոյը՝ նվիրագործման խոյը, և Ահարոնն ու նրա որդիներն իրենց ձեռքերը դրեցին խոյի գլխին, ²³ ապա Մովսեսը մորթեց այն, վերցրեց նրա արյունից և քսեց Ահարոնի աջ ականջի բլթակին, աջ ձեռքի ծայրին ու աջ ոտքի ծայրին։ ²⁴ Մովսեսն առաջ բերեց Ահարոնի որդիներին, այդ արյունից քսեց նրանց աջ ականջների բլթակներին, նրանց աջ ձեռքերի ծայրին ու նրանց աջ ոտքերի ծայրին, իսկ մնացած արյունը շուրջանակի թափեց զոհասեղանի վրա։ ²⁵ Վերցրեց ճարպն ու դմակը, փորի վրայի ճարպը, լյարդի բլթակը, երկու երիկամներն ու դրանց վրայի ճարպը և աջ թևը։ ²⁶ Նվիրագործման զամբյուղից, որ դրված էր Տիրոջ առաջ, մի բաղարջ հաց վերցրեց, ինչպես նաև ձիթայուղով հունցված մի հաց, և դրեց ճարպի ու աջ թևի վրա։ ²⁷ Այդ ամենը դրեց Ահարոնի ձեռքերին ու նրա որդիների ձեռքերին և դրանք ընծայաբերեց Տիրոջը։ ²⁸ Ապա Մովսեսը նրանց ձեռքերից վերցրեց այդ ամենը և դրեց զոհասեղանին՝ նվիրագործման ողջակեզի վրա՝ իբրև նվեր և անուշահոտություն Տիրոջ համար, ինչպես որ պատվիրել էր Տերը։ ²⁹ Մովսեսը, վերցնելով նվիրագործման խոյի կուրծքը, նվիրաբերեց Տիրոջը։ Դա Մովսեսի հասանելիք բաժինն էր, ինչպես որ Տերը պատվիրել էր Մովսեսին։

³⁰ Մովսեսը, վերցնելով օծության յուղից ու զոհասեղանի վրայի արյունից, ցանեց Ահարոնի ու նրա հանդերձանքի, նրա որդիների ու նրանց հանդերձանքների վրա և սրբագործեց Ահարոնին ու նրա հանդերձանքը, նրա հետ նաև նրա որդիներին ու նրանց հանդերձանքները։

³¹ Մովսեսն ասաց Ահարոնին ու նրա որդիներին. «Միսը եփե՛ք Վկայության խորանի բակում՝ սուրբ վայրում, և այնտեղ կերե՛ք այն, ինչպես նաև նվիրագործման զամբյուղի հացերը, ինչպես որ պատվիրել էր ինձ Տերը՝ ասելով. “Ահարոնն ու նրա որդիները թող ուտեն դրանք”։ ³² Հացի ու մսի մնացորդը այրե՛ք հրով։ ³³ Վկայության խորանի դռնից յոթ օր դուրս չեք գա, մինչև ձեր նվիրագործման օրերի լրումը, որովհետև Տերը յոթ օրում պետք է սրբագործի ձեզ։ ³⁴ Ինչպես որ այսօր եղավ, Տերը պատվիրել է անել շարունակ՝ ձեր քավության համար։ ³⁵ Վկայության խորանի դռանը նստե՛ք յոթ օր՝ գիշեր ու ցերեկ և պահե՛ք Տիրոջ պատվիրանները, որպեսզի չմեռնեք։ Այդպես է ինձ պատվիրել Տերը»։ ³⁶ Ահարոնն ու նրա որդիներն արեցին այն ամենը, ինչ որ Տերը պատվիրել էր Մովսեսին։

9

Քահանայության համար առաջին զոհաբերությունները

¹ Ութերորդ օրը Մովսեսը կանչեց Ահարոնին ու նրա որդիներին, ինչպես նաև Իսրայելի ծերակույտին։ ² Մովսեսն ասաց Ահարոնին. «Քեզ համար նախրից ընտրի՛ր մի զվարակ՝ մեղքերի քավության համար, ու մի խոյ՝ ողջակեզի համար, երկուսն էլ առանց արատի, և դրանք մատուցի՛ր Տիրոջ առջև։ ³ Դիմի՛ր Իսրայելի որդիներին ու նրանց ասա՛. “Ձեզ համար մեղքերի քավության նպատակով այծերից ընտրե՛ք մի նոխազ, իսկ ողջակեզի համար՝ մի խոյ, մի զվարակ և մի տարեկան գառ՝ ողջակեզի համար, բոլորն էլ առանց արատի։ ⁴ Նաև մի զվարակ ու մի խոյ՝ Տիրոջ առջև փրկության զոհ մատուցելու համար, ինչպես և ձիթայուղով հունցված նաշիհ, որովհետև այսօր Տերը պիտի հայտնվի ձեզ”»։ ⁵ Եվ Վկայության խորանի առջև բերեցին այն ամենը, ինչ Մովսեսը հրամայել էր։ Ողջ ժողովուրդը հավաքվեց ու կանգնեց Տիրոջ առջև։ ⁶ Եվ Մովսեսն ասաց. «Այս է, որ Տերը պատվիրեց անել, որպեսզի Տիրոջ փառքը երևա ձեզ»։ ⁷ Իսկ Ահարոնին Մովսեսն ասաց. «Մոտեցի՛ր զոհասեղանին ու մատուցի՛ր քո մեղքերի զոհը, և քո ողջակեզի զոհը, և քավի՛ր քո և քո տան մեղքերը։ Ապա մատուցի՛ր քո ժողովրդի ընծաները՝ նրանց մեղքերի քավության համար»։ Այսպես է պատվիրել Տերը Մովսեսին։ ⁸ Ահարոնը մոտեցավ զոհասեղանին և մորթեց իր մեղքերի քավության զվարակը։ ⁹ Ահարոնի որդիներն արյունը տվեցին նրան, և նա, մատը թաթախելով արյան մեջ, քսեց զոհասեղանի եղջյուրներին և արյունը հեղեց զոհասեղանի խարսխին։ ¹⁰ Ապա մեղքի զոհի ճարպը, երիկամներն ու լյարդի բլթակը դրեց զոհասեղանին, ինչպես որ Տերը պատվիրել էր Մովսեսին։ ¹¹ Միսն ու կաշին հրով այրեցին բանակատեղիից դուրս։ ¹² Ապա մորթեց ողջակեզի զոհը, Ահարոնի որդիներն արյունը տվեցին նրան, և նա այն շուրջանակի հեղեց զոհասեղանի վրա։ ¹³ Ողջակեզը բերեցին նրա մոտ՝ անդամ-անդամ արած, ինչպես նաև գլուխը։ Եվ դրեց զոհասեղանին։ ¹⁴ Ապա ջրով լվաց փորոտիքն ու ոտքերը և դրեց ողջակեզի վրա՝ զոհասեղանին։

¹⁵ Դրանից հետո մատուցեցին ժողովրդի ընծաները։ Վերցրեց ժողովրդի մեղքերի քավության նոխազը և այն մորթեց նախորդի նման։ ¹⁶ Ողջակեզի զոհը նույնպես մատուցեց ըստ կարգի։ ¹⁷ Ապա մատուցեց ընծան, մի բուռ վերցրեց դրանից և դրեց զոհասեղանին, բացի առավոտյան ողջակեզից։ ¹⁸ Ապա մորթեց ժողովրդի փրկության զոհ զվարակն ու խոյը։ Ահարոնի որդիներն արյունը տվեցին նրան, և նա այն շուրջանակի հեղեց զոհասեղանի վրա։ ¹⁹ Նաև զվարակի ու խոյի ճարպն ու դմակը, փորի թաղանթի ճարպը, երկու երիկամները՝ ճարպով հանդերձ, լյարդի բլթակը ²⁰ և ճարպերը դրեցին կրծքերի վրա, ապա ճարպը կրծքերի հետ դրեցին զոհասեղանին։ ²¹ Եվ կուրծքն ու աջ թևը նվիրաբերեց Տիրոջ առջև, ինչպես Տերն էր պատվիրել Մովսեսին։ ²² Ահարոնը, ձեռքերը վեր բարձրացնելով, օրհնեց ժողովրդին և իջավ՝ մեղքերի քավության, ողջակեզի ու փրկության զոհաբերությունները կատարելուց հետո։ ²³ Մովսեսն ու Ահարոնը մտան Վկայության խորանը և այնտեղից դուրս գալով՝ օրհնեցին ողջ ժողովրդին։ Եվ Տիրոջ փառքը երևաց ողջ ժողովրդին։ ²⁴ Տիրոջ կողմից կրակ եկավ և կերավ այն ամենը, ինչ որ կար զոհասեղանի վրա՝ ողջակեզն ու ճարպը։ Ողջ ժողովուրդը տեսավ այդ, սարսափեց, ու բոլորն ընկան երեսնիվայր։

10

Նադաբի և Աբիուդի մեղքը

¹ Ահարոնի երկու որդիները՝ Նադաբն ու Աբիուդը, բուրվառներ վերցնելով, դրանց մեջ կրակ դրեցին, խունկ գցեցին և Տիրոջ առջև անվավեր կրակ մատուցեցին, որը Տերը չէր պատվիրել նրանց։ ² Տիրոջից հուր ելավ ու կլանեց նրանց, ու մեռան Տիրոջ առաջ։ ³ Մովսեսն ասաց Ահարոնին. «Այս ասաց Տերը. “Ինձ մերձեցողներին պիտի ցույց տամ իմ սրբությունը և պիտի փառավորվեմ ողջ ժողովրդի առաջ”»։ Եվ Ահարոնի սիրտը կսկծաց։ ⁴ Ապա Մովսեսը կանչեց Միսադայիին և Եղիսափանին՝ Ահարոնի հորեղբայր Ոզիելի որդիներին, և ասաց նրանց. «Մոտեցե՛ք և ձեր եղբայրներին իրենց հագուստներով սրբարանի առջևից տարե՛ք բանակատեղիից դո՛ւրս»։ ⁵ Մոտեցան և բանակատեղիից դուրս հանեցին նրանց՝ իրենց հագուստներով հանդերձ, ինչպես որ պատվիրեց Մովսեսը։

⁶ Եվ Մովսեսն ասաց Ահարոնին ու նրա մյուս որդիներին՝ Եղիազարին ու Իթամարին. «Ձեր գլուխները մի՛ բացեք և ձեր հանդերձները մի՛ պատառոտեք, որպեսզի չմահանաք, և ժողովրդի վրա բարկություն չիջնի։ Տիրոջ կողմից այրվածների համար թող ողբան ձեր եղբայրները և Իսրայելի ողջ տունը։ ⁷ Վկայության խորանի դռնից մի՛ հեռացեք, որպեսզի չմեռնեք, որովհետև օծության յուղը, որ Տիրոջից է, ձեզ վրա է»։ Եվ վարվեցին ըստ Մովսեսի խոսքի։

Քահանաների պարտականությունները զոհաբերությունների վերաբերյալ

⁸ Տերն ասաց Ահարոնին. ⁹ «Դու և քեզ հետ քո որդիները, երբ մտնելու լինեք Վկայության խորանը կամ երբ մոտենալու լինեք զոհասեղանին, գինի և ցքի չխմեք, որպեսզի չմեռնեք։ Դա հավիտենական օրենք թող լինի սերնդեսերունդ։ ¹⁰ Որպեսզի կարողանաք տարբերել սուրբը պիղծից, մաքուրը՝ անմաքուրից, ¹¹ և սովորեցնեք Իսրայելի որդիներին ողջ օրենքը, որ նրանց տվել է Տերը Մովսեսի ձեռքով»։

¹² Եվ Մովսեսն ասաց Ահարոնին ու նրա մյուս որդիներին՝ Եղիազարին ու Իթամարին. «Տիրոջը մատուցված այրվող անարյուն ընծայից մնացածը վերցրե՛ք և բաղա՛րջ կերեք զոհասեղանի առաջ, որովհետև դա սրբությունների սրբություն է։ ¹³ Կերե՛ք այն սուրբ վայրում, թող օրենք լինի քեզ համար և օրենք քո որդիների համար՝ Տիրոջը մատուցված զոհերի վերաբերյալ։ Այդպես է հրամայվել ինձ։

¹⁴ Զոհի կուրծքը և աջ թևը նույնպես կերեք սուրբ վայրում, դու, քո որդիները և քեզ հետ քո ընտանիքը, որովհետև այն օրինական կերպով է քեզ և քո որդիներին տրվել Իսրայելի որդիների փրկության զոհերից։ ¹⁵ Բայց ընծայի աջ թևն ու կուրծքն այրվելիք ճարպի հետ նախ թող մատուցեն Տիրոջ առաջ։ Թող հավիտենական օրենք լինի քեզ և քո որդիներին և քեզ հետ՝ քո դուստրերին, ինչպես որ պատվիրել է Տերը Մովսեսին»։

¹⁶ Մովսեսը հետաքրքրվեց մեղքերի քավության նոխազով, բայց այն արդեն այրվել էր, և բարկացավ Ահարոնի որդիներ Եղիազարի ու Իթամարի վրա՝ ասելով. ¹⁷ «Ինչո՞ւ մեղքի զոհը չկերաք սուրբ վայրում։ Չէ՞ որ այն սրբությունների սրբություն է, որ տրվել էր ձեզ ուտելու, որպեսզի վերացնեք ժողովրդի մեղքերը և նրանց համար քավություն անեք Տիրոջ առաջ։ ¹⁸ Քանի որ նրա արյունից սրբարանի ներսը՝ դիմացը, չմտավ, այն պետք է ուտեիք սուրբ վայրում, ինչպես որ պատվիրվել է ինձ»։ ¹⁹ Ահարոնը խոսեց Մովսեսի հետ և ասաց. «Մեղքի զոհը և ողջակեզի զոհերը մատուցեցին Տիրոջ առաջ այսօր, երբ ինձ հետ այսպիսի դեպք պատահեց, այսօր մեղքի զոհից ուտելը արդյո՞ք հաճո կլիներ Տիրոջը»։ ²⁰ Մովսեսը լսեց և հավանություն տվեց նրա ասածներին։

11

ՕՐԵՆՔՆԵՐ ՄԱՔՈՒՐԻ ԵՎ ԱՆՄԱՔՈՒՐԻ ՄԱՍԻՆ

(11-16)

Մաքուր և անմաքուր կենդանիները

(Բ Օր. 14.3-21)

¹ Տերն ասաց Մովսեսին և Ահարոնին. ² «Խոսե՛ք Իսրայելի որդիների հետ և ասե՛ք նրանց. “Սրանք են այն անասունները, որ կարող եք ուտել երկրի վրայի բոլոր կենդանիներից։ ³ Կարող եք ուտել այն կենդանիները, որոնք թաթահերձ կճղակավորներ են, որոնց թաթերը երկուսի են բաժանված և որոճացողներ են։ ⁴ Մի՛ կերեք այն կենդանիները, որոնք թեև որոճում են, սակայն թաթահերձ կճղակավոր չեն, ինչպես օրինակ ուղտը, որ թեև որոճում է, սակայն կճղակը երկուսի չի բաժանված, այն թող ձեզ համար անմաքուր լինի։ ⁵ Ինչպես նաև նապաստակը, որ թեև որոճում է, սակայն թաթը երկուսի չի բաժանված, այն թող ձեզ համար անմաքուր լինի։ ⁶ Նաև ճագարը, որ թեև որոճում է, սակայն թաթը երկուսի չի բաժանված, այն թող ձեզ համար անմաքուր լինի։ ⁷ Իսկ խոզը, որ թեև թաթահերձ կճղակավոր է, սակայն չի որոճում, այն նույնպես ձեզ համար թող անմաքուր լինի։ ⁸ Դրանց միսը մի՛ կերեք և սատկած մարմիններին մի՛ դիպչեք, որովհետև դրանք ձեզ համար անմաքուր են։

⁹ Ջրային կենդանիներից կարող եք ուտել նրանք, որոնք ունեն լողակներ ու թեփուկ և ապրում են ջրերում, ծովերում և գետերում։ ¹⁰ Իսկ ջրերում, ծովերում ու գետերում ապրող բոլոր այն կենդանիները, որոնք լողակներ ու թեփուկ չունեն, մի՛ կերեք. նման բոլոր ծովային կենդանիները անմաքուր են։ ¹¹ Եվ քանի որ դրանք անմաքուր են, դրանց միսը չուտեք և սատկած մարմիններին չդիպչեք, ¹² քանի որ ջրային այն բոլոր կենդանիները, որ լողակներ ու թեփուկ չունեն, անմաքուր են։

¹³ Սրանք են այն թռչունները, որ պիղծ են, որոնցից պիտի գարշեք և դրանց միսը պիտի չուտեք. արծիվը, գիշանգղը, ջրարծիվը, ¹⁴ անգղը, ցինը և նրանց նմանները, ¹⁵ ագռավը և նրա նմանները, ¹⁶ ջայլամը, բուն, որորը և նրանց նմանները, բազեն և նրա նմանները, ¹⁷ հավապատիրը, հողամաղը, քաջահավը, ¹⁸ փարփարը, հավալուսնը, կարապը, ¹⁹ արագիլը, քարադրը և նրանց նմանները, հոպոպը և չղջիկը։

²⁰ Չորքոտանի թևավոր միջատներն անմաքուր են, ²¹ բացի նրանցից, որոնք իրենց ոտքերի վրա սրունք ունեն և դրանցով կարողանում են ոստոստել երկրի վրա։ ²² Սրանցից կարող եք ուտել ջորյակը և նրա նմանները, խարագուլը և նրա նմանները, մորեխը և նրա նմանները, օձամարտը և նրա նմանները։ ²³ Մնացած բոլոր թռչող չորքոտանի միջատներն անմաքուր են։ ²⁴ Դրանցով մի՛ պղծվեք։ Նա, ով դիպչի նրանց սատկած մարմիններին, մինչև երեկո թող անմաքուր համարվի։ ²⁵ Նրանց սատկած մարմինները վերցնողը պետք է իր հագուստները լվանա և մինչև երեկո անմաքուր համարվի։

²⁶ Բոլոր այն կենդանիները, ուրեմն, որոնք թաթահերձ կճղակավոր են, սակայն չեն որոճում, անմաքուր են, նրանց սատկած մարմիններին դիպչողը մինչև երեկո թող անմաքուր համարվի։

²⁷ Բոլոր կենդանիները, որոնք քայլում են ետևի թաթերով, անմաքուր են։ Ով դիպչի նրանց սատկած մարմիններին, մինչև երեկո թող անմաքուր համարվի։ ²⁸ Նրանց սատկած մարմինները վերցնողը պետք է իր հագուստները լվանա և մինչև երեկո անմաքուր համարվի։ Այդ ամենը թող ձեզ համար անմաքուր լինեն։

²⁹ Երկրի վրա սողացող սողուններից ձեզ համար անմաքուր պիտի լինեն աքիսը, մուկը, տիտեռը, ³⁰ մկնաքիսը, գետնառյուծը, բծավոր մողեսը, մողեսն ու խլուրդը։ ³¹ Երկրի վրա սողացող այս սողուններն անմաքուր են, և նա, ով դիպչի նրանց սատկած մարմիններին, մինչև երեկո թող անմաքուր համարվի։

³² Եվ այն ամենը, ինչի մեջ ընկնի նրանց սատկած մարմինը, անմաքուր կլինի։ Փայտե անոթ կամ հանդերձանք կամ կաշվեղեն կամ քուրձ. այդ ամենը պիտի լվացվի ջրով և մինչև երեկո անմաքուր համարվի և ապա միայն մաքուր համարվի։ ³³ Եթե խեցեղեն անոթի մեջ դրանցից ընկնի, անոթի մեջ եղածը կպղծվի, իսկ անոթը պիտի ջարդվի։ ³⁴ Ամեն կերակուր, որի վրա պղծված անոթի ջրից կլցվի, կպղծվի, ինչպես նաև այդ անոթի միջի խմելու ջուրը պղծված կլինի։ ³⁵ Այն ամենը, ինչի վրա ընկնեն դրանց սատկած մարմինները, կպղծվեն։ Թոնիր թե օջախ, նման դեպքում պիտի քանդեն, քանի որ պղծվել են։ Դրանք անմաքուր պիտի լինեն ձեզ համար, ³⁶ բացի ջրի աղբյուրներից, ջրհորներից ու ջրավազաններից, որոնք միշտ սուրբ պիտի համարվեն։ Նա, ով դիպչի նրանց սատկած մարմիններին, թող անմաքուր համարվի։ ³⁷ Եթե սատկած մարմին ընկնի սերմացուի մեջ, սերմացուն մաքուր պիտի համարվի, ³⁸ իսկ եթե սերմացուի վրա ջուր լցվի և ապա դրա մեջ կենդանու սատկած մարմին ընկնի, ապա այն անմաքուր կդառնա։

³⁹ Եթե ձեր ուտելու կենդանիներից մեկը սատկի, նա, ով դիպչի նրանց սատկած մարմիններին, մինչև երեկո թող անմաքուր համարվի։ ⁴⁰ Այդ սատկած մարմինները վերցնողը պետք է լվանա իր հագուստները և մինչև երեկո անմաքուր համարվի։

⁴¹ Երկրի վրա սողացող բոլոր սողուններն անմաքուր են և չի կարելի ուտել։ ⁴² Իրենց փորի վրա սողացողներ՝ չորս ոտք ունեցողներից մինչև բազմոտանի զեռուններ, չի կարելի ուտել, քանի որ անմաքուր են։ ⁴³ Ձեզ մի՛ ապականեք երկրի վրա սողացող սողուններ ուտելով, և նրանցով մի՛ պղծեք ձեզ, որպեսզի անմաքուր չհամարվեք։

⁴⁴ Ես եմ Տերը՝ ձեր Աստվածը, սրբվե՛ք և սո՛ւրբ եղեք, քանի որ սուրբ եմ ես՝ Տերը, ձեր Աստվածը։ Ձեր անձերը մի՛ պղծեք՝ երկրի վրա շարժվող զեռուններ ուտելով։ ⁴⁵ Ես եմ Տերը՝ ձեր Աստվածը, որ հանեց ձեզ եգիպտացիների երկրից, լինելու ձեր Աստվածը։ Դուք սո՛ւրբ եղեք, որովհետև ես սուրբ եմ։

⁴⁶ Այս է օրենքը՝ անասունները և թռչունները, ինչպես ջրային, այնպես էլ երկրի վրա շարժվող ամեն մի կենդանի ⁴⁷ դասակարգելու ըստ մաքուրի և ըստ անմաքուրի և ուսուցանելու Իսրայելի որդիներին, թե ո՛ր կենդանիները կարելի է ուտել, և որոնք՝ ոչ”»։

12

Կանանց մաքրվելը որդեծնությունից հետո

¹ Տերն ասաց Մովսեսին. ² «Խոսի՛ր Իսրայելի որդիների հետ և ասա՛ նրանց. “Եթե որևէ կին հղիանա և արու զավակ ծնի, թող նա անմաքուր համարվի յոթ օր, իր դաշտանի շրջանի օրերի չափով անմաքուր թող համարվի։ ³ Ութերորդ օրը թող որդու մարմնի անթլփատությունը թլփատի։ ⁴ Եվ երեսուներեք օր էլ նրա արյան մաքրման օրեր պիտի լինեն։ Նա ոչ մի մաքուր բանի ձեռք չպիտի տա և սրբարան չպիտի մտնի, մինչև լրանան նրա մաքրվելու օրերը։ ⁵ Իսկ եթե նա աղջիկ ծնի, թող յոթ օր անմաքուր համարվի՝ ըստ դաշտանի օրերի, և վաթսունվեց օր էլ նրա արյան մաքրման օրեր պիտի լինեն։ ⁶ Երբ լրանան նրա մաքրման օրերը, որդու կամ դստեր ծննդյան պարագայում, նա թող մեկ տարեկան գառ ողջակեզ մատուցի և մի զույգ աղավնի կամ տատրակ՝ իբրև մեղքի զոհ, Վկայության խորանի դուռը՝ քահանայի մոտ, թող բերի։ ⁷ Քահանան այն թող մատուցի Տիրոջ առաջ, քավություն տա նրան, և մաքուր համարի նրան արյան հեղման պատճառով անմաքուր համարվելուց։ Այս է կարգը նրա մասին, ով արու զավակ կամ աղջիկ կծնի։ ⁸ Եթե նա ի վիճակի չէ իբրև ողջակեզի զոհ գառ բերելու, թող երկու տատրակ կամ աղավնու երկու ձագ բերի՝ մեկը ողջակեզի, իսկ մյուսը՝ մեղքերի քավության համար։ Քահանան թող քավություն տա նրան, և նա թող մաքրված համարվի”»։

13

Բորոտության մասին օրենքներ

¹ Տերն ասաց Մովսեսին ու Ահարոնին.

² «Եթե որևէ մեկի մարմնի մաշկի վրա սպի, պալար, բշտիկ և կամ բորոտության վերք երևա, թող գա Ահարոն քահանայի կամ նրա քահանա որդիներից մեկի մոտ։ ³ Քահանան թող զննի նրա մաշկի վրայի վերքը։ Եթե վերքի մազերը սպիտակել են, և վերքն ավելի խորն է երևում, քան մարմնի մաշկը, ուրեմն դա բորոտության վերք է։ Քահանան պետք է զննի և նրան անմաքուր համարի։ ⁴ Եթե նրա մարմնի մաշկի վրայի բշտիկն սպիտակ է, բայց մաշկից խորը չի երևում, ու մազն էլ չի սպիտակել, այլ մուգ է, ապա քահանան ախտակրին յոթ օր պետք է մեկուսացնի։ ⁵ Քահանան յոթերորդ օրը պետք է զննի նրան, և եթե վերքը նույն վիճակում է մնացել, մաշկի վրա չի տարածվել, ապա քահանան նրան պետք է մեկուսացնի ևս յոթ օր։ ⁶ Քահանան յոթերորդ օրը պետք է մի անգամ ևս զննի, և եթե վերքը մուգ լինի և մաշկի վրա այլ գույնի չի փոխվել, նրան պետք է մաքուր համարի, որովհետև դա անվնաս նշան է։ Նա թող լվանա իր զգեստները և մաքուր համարվի։ ⁷ Իսկ եթե քահանայի զննելուց և մաքուր համարելուց հետո վերքը տարածվի մաշկի վրա, նա պետք է վերստին գա քահանայի մոտ։ ⁸ Քահանան թող զննի, եթե վերքը տարածվել է մաշկի վրա, նրան պետք է անմաքուր համարի, որովհետև դա բորոտություն է։ ⁹ Եթե մեկի վրա բորոտության վերք երևա, պետք է գա Ահարոն քահանայի մոտ։ ¹⁰ Քահանան պետք է զննի։ Եթե մաշկի վրա սպիտակ պալար լինի, և մազը սպիտակել է, բայց պալարի մեջ մարմինն առողջ է, ¹¹ դա հին բորոտություն է նրա մարմնի մաշկի վրա։ Քահանան պետք է նրան անմաքուր համարի և մեկուսացնի նրան, որովհետև անմաքուր է։ ¹² Եթե բորոտությունը գնալով տարածվի նրա մաշկի վրա, և սպիտակությունը ծածկի մարմնի ամբողջ մաշկը՝ գլխից մինչև ոտքերը, ինչքան որ, անշուշտ, քահանան կարող է զննել, ¹³ և քահանան տեսնի, որ սպիտակությունը տարածվել է մարմնի ամբողջ մաշկի վրա, ապա մաքուր թող համարի հիվանդին, որովհետև նրա մարմինն ամբողջությամբ սպիտակել է։ Եվ նա մաքուր է։ ¹⁴ Այն օրը, երբ այդ մարդու մաշկի վրա զգայուն վերք նկատվի, նա թող անմաքուր համարվի։ ¹⁵ Քահանան, տեսնելով մաշկի վրայի զգայուն վերքը, թող նրա ամբողջ մարմինը անմաքուր համարի, որովհետև դա բորոտություն է։ ¹⁶ Եթե մաշկի զգայուն վերքը դարձյալ անցնի և սպիտակի, հիվանդը պետք է գա քահանայի մոտ, ¹⁷ և քահանան պետք է զննի նրան։ Եթե նրա վերքը դարձյալ սպիտակել է, քահանան հիվանդին թող մաքուր հայտարարի, որովհետև նա մաքուր է։

¹⁸ Եթե մեկն իր մարմնի մաշկի վրա խոց ունենա, և դա լավանա, ¹⁹ բայց խոցի տեղը սպիտակ-փայլուն, լուսնասպիտակ կամ կարմրավուն լինի, նա պետք է այն ցույց տա քահանային։ ²⁰ Քահանան պետք է զննի նրան։ Եթե այն ավելի խորն է, քան մաշկը, և այդ մասի մազերն էլ սպիտակել են, ապա քահանան նրան թող անմաքուր համարի, որովհետև խոցով արտահայտված բորոտություն է։ ²¹ Եթե քահանան տեսնի, որ մազերը սպիտակ չեն, և խոցն էլ մարմնի մաշկից խորը չէ և մուգ է, ապա քահանան հիվանդին յոթ օր թող մեկուսացնի։ ²² Եվ եթե այն տարածվի մաշկի վրա, ապա քահանան նրան թող անմաքուր համարի, քանի որ դա բորոտության վերք է՝ խոցով բորբոքված։ ²³ Իսկ եթե փայլունը նույն տեղում մնա և չտարածվի, ապա դա խոցի սպի է. քահանան նրան թող մաքուր համարի։

²⁴ Եթե մարմնի մաշկը կրակով այրված լինի, նրա մաշկն այրվածքից ապաքինվի, իսկ այրվածքի տեղում փայլուն սպիտակ, կարմրավուն կամ լուսնասպիտակ բշտիկ առաջանա, ²⁵ քահանան թող քննի նրան. եթե փայլունացած տեղում մազը սպիտակ է դարձել, և այն ավելի խորն է, քան մաշկը, ուրեմն նրան անմաքուր թող համարի, որովհետև դա բորոտության վերք է։ ²⁶ Իսկ եթե քահանան տեսնի, որ փայլունացած տեղում սպիտակ մազ չկա, և այն մաշկից խորը չէ, իսկ գույնը մուգ է, ապա քահանան նրան յոթ օր թող մեկուսացնի։ ²⁷ Յոթերորդ օրը քահանան թող զննի նրան. եթե վերքը տարածվել է մաշկի վրա, նրան թող անմաքուր համարի, որովհետև դա խոցով արտահայտված բորոտության վերք է։ ²⁸ Եվ եթե փայլունացած մասը նույն տեղում մնա՝ չտարածվի մաշկի վրա, և գույնն էլ մուգ լինի, ուրեմն դա այրվածքի սպի է։ Քահանան մաքուր թող համարի նրան, որովհետև դա այրվածքի հետք է միայն։

²⁹ Եթե տղամարդու կամ կնոջ գլխի կամ կզակի վրա բորոտության վերք լինի, ³⁰ քահանան թող զննի այն, և եթե վերքն ավելի խորն է, քան մաշկը, և դրա վրայի մազը վերածվել է խարտյաշ աղվամազի, ապա քահանան նրան թող անմաքուր համարի, քանի որ այդ գոնջությունը գլխի բորոտություն է, կամ կզակի բորոտություն։ ³¹ Եթե քահանան տեսնի, որ գոնջության վերքն ավելի խորը չէ, քան մաշկը, և ոչ էլ մազն է խարտյաշ դարձել, ապա գոնջացածին թող մեկուսացնի յոթ օր։ ³² Քահանան յոթերորդ օրը թող զննի գոնջության վերքը և տեսնելով, որ այն չի տարածվել մաշկի վրա, մազը խարտյաշ չի դարձրել, ոչ էլ գոնջացած մասն է ավելի խորը, քան մաշկը, ³³ թող մաշկը սափրի, սակայն գոնջացած մասը թող չսափրի։ Քահանան հիվանդին թող մեկուսացնի ևս յոթ օր։ ³⁴ Քահանան յոթերորդ օրը վերքը թող զննի և տեսնելով, որ սափրելուց հետո վերքը մաշկի վրա չի տարածվել, և գոնջացած մասն ավելի խորը չէ, քան մաշկը, նրան մաքուր թող համարի, և իր զգեստները լվանալով՝ մաքուր թող համարվի։ ³⁵ Բայց եթե սափրելուց հետո վերքը տարածվի մաշկի վրա, ³⁶ և քահանան տեսնի, որ գոնջությունը տարածվել է մաշկի վրա, թող այլևս խարտյաշ մազերին չնայի, քանի որ հիվանդն անմաքուր է։ ³⁷ Իսկ եթե գոնջությունը նույն տեղում մնա, և թուխ մազ բուսած լինի, ուրեմն գոնջությունը բուժվել է։ Քահանան թող մաքուր համարի նրան։

³⁸ Եթե տղամարդու կամ կնոջ մարմնի մաշկի վրա լուսնասպիտակ պսպղուն փայլ լինի, ³⁹ և քահանան զննելով տեսնի, որ մարմնի մաշկի վրա լուսնասպիտակ փայլ կա, դա մարմնի մաշկի վրա տարածված թեփուկ է, ուրեմն նա մաքուր է։

⁴⁰ Եթե որևէ մեկի գլխի մազերը թափվեն, նա հերաթափ է լինում, բայց մաքուր է։ ⁴¹ Եթե նրա գլխի առջևի մասի մազերը թափվեն, ուրեմն նա ճաղատ է և մաքուր է։ ⁴² Եթե նրա հերաթափ կամ ճաղատ գլխի վրա սպիտակ կամ կարմրավուն վերք լինի, ապա նրա հերաթափության կամ ճաղատության տակ բորոտություն է թաքնված։ ⁴³ Երբ քահանան զննի նրան և տեսնի, որ ճաղատացած մասի վերքի տեսքը սպիտակ է կամ կարմրավուն, նման մարմնի մաշկի վրայի բորոտության, ⁴⁴ նա բորոտ է, անմաքուր է։ Քահանան անմաքուր պետք է համարի նրան, քանի որ վերքը նրա գլխի վրա է։ ⁴⁵ Եվ բորոտը, որի վրա վերք կա, պետք է պատռված զգեստներ կրի, գլուխը բաց լինի, բերանը՝ ծածկված, և նա անմաքուր պետք է համարվի։ ⁴⁶ Քանի դեռ վերքը նրա վրա է, նա անմաքուր պետք է համարվի։ Իբրև անմաքուր՝ նա պետք է մեկուսացած մնա և բանակատեղիից դուրս բնակվի»։

⁴⁷ «Եթե հագուստի վրա բորոտության բիծ լինի, լինի այն բրդե կամ քաթանե հագուստ, ⁴⁸ լինի գործվածք թե կարվածք, լինի քաթանից թե բրդից գործված, կաշվի վրա կամ մշակված կաշվից պատրաստված իրի վրա, ⁴⁹ եթե այդ բիծը կանաչած կամ կարմրավուն լինի, կաշվի կամ հագուստի, գործվածքի կամ կարվածքի, մշակված կաշվից պատրաստված ցանկացած իրի վրա, դա բորոտության բիծ է, և պետք է ցույց տրվի քահանային։ ⁵⁰ Քահանան պետք է զննի բիծը և յոթ օր մեկուսացնի այն։ ⁵¹ Քահանան յոթերորդ օրը պետք է զննի բիծը։ Եթե այն տարածվել է հագուստի, գործվածքի կամ կարվածքի, քաթանե կամ բրդե, կաշվի կամ մշակված կաշվից պատրաստված իրի վրա, այդ բիծը մնայուն բորոտություն է։ Դա անմաքուր է։ ⁵² Քահանան պետք է այրի այդ հագուստները, դրանք լինեն գործվածք թե կարվածք, բրդից թե քաթանից կամ ամեն տեսակ կաշվե առարկաներ, որոնց վրա կա բիծը, քանի որ դա մնայուն բորոտություն է, կրակով պետք է այրվի։ ⁵³ Եթե քահանան տեսնի, որ բիծը չի տարածվել հագուստի վրա, դա լինի գործվածք թե կարվածք, բրդից կամ քաթանից կամ ամեն տեսակ կաշվե իր, ⁵⁴ թող քահանան հրամայի, որ լվանան այն, որի վրա կա այդ բիծը։ Այնուհետև քահանան այն թող մեկուսացնի ևս յոթ օր։ ⁵⁵ Քահանան թող զննի բիծը լվանալուց հետո։ Եթե բծի տեսքը դեպի լավը չի փոխվել, թեև այն տարածված էլ չլինի, պիղծ է, թող կրակով այրվի, քանզի բույն է դրել հագուստի՝ գործվածքի կամ կարվածքի վրա։ ⁵⁶ Իսկ եթե քահանան տեսնի, որ բիծը լվացվելուց հետո թխագույն է դարձել, ապա այդ մասը թող կտրի-անջատի հագուստից, կաշվե առարկայից, գործվածքից և կարվածքից։ ⁵⁷ Եթե բիծը նորից երևա հագուստի, գործվածքի կամ կարվածքի, կամ ամեն տեսակ կաշվե առարկայի վրա, դա բորբոքված բորոտություն է. ախտով վարակվածը կրակով թող այրվի։ ⁵⁸ Հագուստ, գործվածք կամ կարվածք կամ ամեն տեսակ կաշվե առարկա, որի վրայից բիծը լվացվելուց հետո կանհայտանա, թող մի անգամ ևս լվացվի, ապա մաքուր համարվի։ ⁵⁹ Ահա այս թող լինի բրդե, քաթանե հագուստի, գործվածքի կամ կարվածքի և ամեն տեսակ կաշվե առարկայի վրա երևացող բորոտության բծի մաքուր կամ անմաքուր համարվելու մասին օրենքը»։

14

¹ Տերն ասաց Մովսեսին. ² «Այս թող լինի բորոտի կարգն այն օրը, երբ նա մաքուր համարվի։ Նրան թող բերեն քահանայի մոտ։ ³ Քահանան թող դուրս գա բանակատեղիից, զննի նրան, և եթե բորոտի վրայի բորոտության վերքը բժշկվել է, ⁴ քահանան թող հրաման տա, որ մաքրվողի համար բերեն կենդանի, մաքուր երկու թռչուն, եղևնու փայտ, կարմիր մանվածք և ծոթրին։ ⁵ Քահանայի հրամանով թռչուններից մեկը թող մորթեն աղբյուրի ջրով լցված խեցե անոթի մեջ։ ⁶ Ապա քահանան թող վերցնի կենդանի մնացած թռչունը, եղևնու փայտը, կարմիր մանվածքն ու ծոթրինը և դրանք, ինչպես նաև կենդանի մնացած թռչունը, թող թաթախի ջրի վրա մորթված թռչունի արյան մեջ։ ⁷ Նա բորոտությունից մաքրվողի վրա դրանից յոթ անգամ թող շաղ տա և մաքուր համարի նրան, իսկ կենդանի մնացած թռչունը թող բաց թողնի դեպի դաշտ։ ⁸ Մաքրվածը թող լվանա իր հագուստները, ածիլի իր բոլոր մազերը, լողանա ջրով և մաքուր համարվի։ Ապա նա թող մտնի բանակատեղի, բայց իր տնից դուրս ապրի յոթ օր։ ⁹ Յոթերորդ օրը նա թող ածիլի իր մարմնի բոլոր մազերը՝ և՛ գլուխը, և՛ մորուքը, և՛ հոնքերը. պետք է ածիլի իր բոլոր մազերը։ Թող լվանա իր հագուստները, ջրով լողացնի իր մարմինը և մաքուր համարվի։

¹⁰ Ութերորդ օրը նա թող առնի արատ չունեցող մեկ տարեկան երկու գառ, արատ չունեցող մեկ տարեկան մի ոչխար, յուղով հունցված երեք տասներորդ գրիվ նաշիհ՝ իբրև անարյուն զոհ և մեկ գավաթ ձիթայուղ։ ¹¹ Մաքրող քահանան մաքրվող մարդուն և զոհաբերության ընծաները թող բերի Վկայության խորանի առաջ։ ¹² Քահանան թող վերցնի մի գառը և մատուցի այն իբրև հանցանքի զոհ, վերցնի նաև մեկ գավաթ ձիթայուղը և որպես ընծա մատուցի Տիրոջ առջև։ ¹³ Մյուս գառը թող մորթի այն վայրում, որտեղ մորթում են ողջակեզն ու մեղքի զոհը, այսինքն՝ սուրբ վայրում։ Որովհետև մեղքի զոհը և հանցանքի զոհը նույն կերպ են արվում և պատկանում են քահանային և ամենասուրբ զոհ են։ ¹⁴ Քահանան թող վերցնի հանցանքի զոհի արյունից և քսի մաքրվողի աջ ականջի բլթակին, նրա աջ ձեռքի ծայրին և նրա աջ ոտքի ծայրին։ ¹⁵ Քահանան, վերցնելով գավաթի միջի ձիթայուղից, այն թող լցնի իր ձախ ափի մեջ։ ¹⁶ Քահանան իր աջ ձեռքի մատը թող թաթախի ձախ ափի ձիթայուղի մեջ և այդ մատով յոթ անգամ թող շաղ տա Տիրոջ առջև։ ¹⁷ Ափի մեջ մնացած ձիթայուղը քահանան թող քսի մաքրվածի աջ ականջի բլթակին, նրա աջ ձեռքի ծայրին և նրա աջ ոտքի ծայրին՝ այն տեղերը, որտեղ քսվում է հանցանքի զոհի արյունը։ ¹⁸ Քահանան իր ափի մեջ մնացած ձիթայուղը թող քսի մաքրվողի գլխին։ Քահանան թող նրան քավություն տա Տիրոջ առաջ։ ¹⁹ Ապա քահանան թող ընծայի մեղքի զոհը և քավություն տա մաքրվողին իր մեղքերից։ Դրանից հետո քահանան թող մորթի ողջակեզը ²⁰ և ողջակեզն ու անարյուն զոհը թող դնի Տիրոջ առջև՝ զոհասեղանին։ Քահանան թող նրա համար քավություն անի և նրան մաքրի։

²¹ Եթե նա աղքատ է և չունի այդ կարողությունը, իր կատարած հանցանքի քավության համար թող բերի մեկ գառ՝ իբրև հանցանքի զոհ, յուղով հունցված մեկ տասներորդ գրիվ նաշիհ և մեկ գավաթ ձիթայուղ ²² և երկու տատրակ կամ աղավնու երկու ձագ, որը կարող է. մեկը՝ մեղքի համար, մյուսը՝ որպես ողջակեզ։ ²³ Այս բոլորը նա ութերորդ օրը թող տանի քահանայի մոտ, Տիրոջ առաջ՝ Վկայության խորանի դուռը՝ մաքրվելու համար։ ²⁴ Քահանան, վերցնելով հանցանքի գառը և ձիթայուղի գավաթը, իբրև նվեր թող դնի Տիրոջ առջև։ ²⁵ Քահանան թող մորթի հանցանքի գառը, ապա վերցնելով հանցանքի զոհի արյունից՝ թող քսի մաքրվողի աջ ականջի բլթակին, նրա աջ ձեռքի ծայրին ու նրա աջ ոտքի ծայրին։ ²⁶ Քահանան այդ յուղից թող լցնի իր ձախ ափի մեջ ²⁷ և աջ ձեռքի մատով ձախ ափի մեջ եղած յուղից յոթ անգամ թող ցանի Տիրոջ առջև։ ²⁸ Քահանան իր ափում եղած յուղից թող քսի մաքրվողի աջ ականջի բլթակին, նրա աջ ձեռքի ծայրին ու նրա աջ ոտքի ծայրին՝ այն տեղերը, որտեղ քսվում է հանցանքի զոհի արյունը։ ²⁹ Իր ափի մեջ մնացած յուղը քահանան թող քսի մաքրվողի գլխին և նրան քավություն տա Տիրոջ առջև։ ³⁰ Իր կարողության չափով բերած տատրակներից կամ աղավնիների ձագերից մեկը ³¹ թող զոհ մատուցի մեղքի համար, իսկ մյուսը անարյուն զոհի հետ ողջակեզ անի։ Քահանան Տիրոջ առջև թող քավություն անի մաքրվողի համար։ ³² Այս է նվազ կարողության տեր բորոտի մաքրվելու կարգը»։

³³ Տերն ասաց Մովսեսին ու Ահարոնին. ³⁴ «Երբ մտնեք քանանացիների երկիրը, որը ես ձեզ իբրև սեփականություն եմ տալու, և ձեր ստացած երկրի տներում բորոտության ախտ ուղարկեմ, ³⁵ այն ժամանակ տանտերը թող գա և քահանային պատմի ու ասի. “Ինչ-որ ախտ երևաց իմ տանը”։ ³⁶ Քահանան թող հրաման տա, որ տունը դատարկեն, մինչ քահանան կմտնի զննելու համար այդ տունը, որպեսզի տան մեջ գտնվող իրերն անմաքուր չհամարվեն։ Դրանից հետո թող քահանան մտնի տունն ստուգելու։ ³⁷ Քահանան թող քննի տան պատերին եղող ախտը՝ եթե խորն ընկած կանաչած կամ կարմրավուն փոսեր են, որոնց տեսքն ավելի խորն է, քան պատինը, ³⁸ քահանան, տանից ելնելով, թող կարգադրի, որ տան դուռը յոթ օր փակի տակ պահվի։ ³⁹ Քահանան յոթերորդ օրը նորից թող գա և զննի տունը։ Եթե տեսնի, որ ախտը տարածված է տան պատերին, ⁴⁰ հրաման թող տա, որ քանդեն-հանեն այն քարերը, որոնց վրա ախտ կա։ Թող այդ քարերը հանեն քաղաքից դուրս՝ մի անմաքուր տեղ։ ⁴¹ Թող տունը ներսից շուրջանակի քերեն և քերված ծեփը թափեն քաղաքից դուրս՝ մի անմաքուր տեղ։ ⁴² Այնուհետև թող առնեն հղկված այլ քարեր և տեղադրեն հանված քարերի տեղում, ուրիշ հող բերեն ու ծեփեն տունը։ ⁴³ Եթե քարերը տեղահանելուց, պատերը քերելուց և նորից ծեփելուց հետո տան մեջ վերստին երևա ախտը, ⁴⁴ ապա քահանան նորից թող մտնի ու զննի. եթե ախտը տարածված է տան մեջ, ուրեմն տան մեջ մնայուն բորոտություն կա. այդ տունը անմաքուր է։ ⁴⁵ Պետք է քանդել տունը և նրա փայտերը, նրա քարերն ու տան ամբողջ հողը պետք է հանել քաղաքից դուրս՝ մի անմաքուր տեղ։ ⁴⁶ Փակի տակ պահված բոլոր օրերին ով մտնի այդ տունը, մինչև երեկո թող անմաքուր համարվի։ ⁴⁷ Ով որ քնի այդ տան մեջ, պետք է լվանա իր հագուստները և անմաքուր համարվի մինչև երեկո։ Ով որ ուտի այդ տան մեջ, պետք է լվանա իր հագուստները և անմաքուր համարվի մինչև երեկո։ ⁴⁸ Եթե քահանան գա մտնի, զննի ու տեսնի, որ այդ տանը, ծեփվելուց հետո, ախտը չի տարածվել, թող այն մաքուր հայտարարի, քանի որ ախտը բուժված է։ ⁴⁹ Տունը մաքրագործելու համար քահանան թող վերցնի կենդանի մաքուր թռչուն, եղևնու փայտ, կարմիր մանվածք և ծոթրին։ ⁵⁰ Թռչուններից մեկը թող մորթի աղբյուրի ջրով լեցուն խեցե անոթի մեջ։ ⁵¹ Ապա քահանան թող վերցնի եղևնու փայտը, կարմիր մանվածքը, ծոթրինն ու կենդանի մնացած թռչունը և դրանք թող թաթախի աղբյուրի ջրի վրա մորթած թռչունի արյան մեջ և դրանցով թող յոթ անգամ շաղ տա այդ տանը։ ⁵² Տունը թող մաքրի թռչունի արյամբ, աղբյուրի ջրով, կենդանի մնացած թռչունով, եղևնու փայտով, ծոթրինով և կարմիր մանվածքով, ⁵³ իսկ կենդանի մնացած թռչունը բաց թողնի քաղաքից դուրս, դեպի դաշտ։ Եվ այդ տան համար քավություն թող անի, և տունը թող մաքրվի ու մաքուր համարվի։ ⁵⁴ Այս թող լինի օրենքը բորոտության ու գոնջության բոլոր ախտերի պարագայում, ⁵⁵ նաև հագուստի ու տան բորոտության, ⁵⁶ սպիի, պալարի ու բշտիկի, ⁵⁷ թե ո՛ր օրն է անմաքուր և ո՛ր օրը՝ մաքուր։ Այս է բորոտության վերաբերյալ օրենքը»։

15

Սեռական անմաքրություններ

¹ Տերն ասաց Մովսեսին ու Ահարոնին. ² «Խոսի՛ր Իսրայելի որդիների հետ ու ասա՛ նրանց. “Եթե որևէ այր մարդու մարմնից սերմի ծորում լինի, նրա այդ ծորումն անմաքուր է։ ³ Այս է նրա մաքրվելու մասին օրենքը, որի մարմնից սերմ է ծորում կամ թե սերմի ծորումից մարմինը հյուծվում է. իր մարմնից ծորում լինելու և ծորումից մարմինը հյուծվելու բոլոր օրերն անմաքրության շրջան թող համարվեն նրա համար։ Դա մարմնի անմաքրություն է։

⁴ Ամեն անկողին, որի մեջ սերմի ծորում ունեցողը քնի, անմաքուր թող համարվի. այն ամենը, որի վրա նստի, թող անմաքուր համարվի։ ⁵ Նրա անկողնուն դիպչողը պետք է լվանա իր հագուստները և լողանա ջրով։ Նա անմաքուր է մինչև երեկո։ ⁶ Ով որ նստի սերմի ծորում ունեցողի նստած առարկայի վրա, պետք է լվանա իր հագուստները և լողանա ջրով։ Նա անմաքուր է մինչև երեկո։ ⁷ Ով որ դիպչի սերմի ծորում ունեցողի մարմնին, նա պետք է լվանա իր հագուստները և լողանա ջրով։ Նա անմաքուր է մինչև երեկո։ ⁸ Եթե սերմի ծորում ունեցողի թուքը դիպչի մաքուր մարդու, վերջինս պետք է լվանա իր հագուստները և լողանա ջրով։ Նա անմաքուր է մինչև երեկո։ ⁹ Էշի թամբը, որի վրա նստած է եղել սերմի ծորում ունեցողը, անմաքուր է մինչև երեկո։ ¹⁰ Ով որ դիպչի սերմի ծորում ունեցողի տակ գտնվող որևէ իրի, անմաքուր է մինչև երեկո։ ¹¹ Եթե սերմի ծորում ունեցողն առանց ձեռքերը լվանալու դիպչի որևէ մեկին, սա պետք է լվանա իր հագուստները, իր մարմինը լվա ջրով։ Նա անմաքուր է մինչև երեկո։ ¹² Խեցե որևէ անոթ, որին կդիպչի սերմի ծորում ունեցողը, պետք է ջարդվի, իսկ փայտե ամանները պետք է լվացվեն ջրով, որպեսզի մաքուր համարվեն։

¹³ Երբ սերմի ծորում ունեցողի ծորումը դադարի, նա պետք է յոթ օր հատկացնի իր մաքրության համար. լվանա իր հագուստները, մարմինը լվա հոսող ջրով, որից հետո մաքուր համարվի։ ¹⁴ Ութերորդ օրը պետք է առնի երկու տատրակ կամ աղավնու երկու ձագ, բերի Տիրոջ առջև՝ Վկայության խորանի դուռը, և տա քահանային։ ¹⁵ Քահանան դրանցից մեկը պետք է զոհի մեղքի համար, իսկ մյուսը՝ իբրև ողջակեզ։ Քահանան այդ ձևով Տիրոջ առաջ պետք է քավություն անի նրա համար նրա ծորումի պատճառով։

¹⁶ Եթե որևէ տղամարդ սերմի արտահոսում ունենա, նա իր ամբողջ մարմինը պետք է լվա ջրով։ Նա անմաքուր պետք է լինի մինչև երեկո։ ¹⁷ Ամեն հագուստ և կաշի, որին կդիպչի տղամարդու արտահոսած սերմը, պետք է լվացվի ջրով։ Դա անմաքուր է մինչև երեկո։

¹⁸ Երբ մի կին ընդունի տղամարդու սերմը, երկուսն էլ պետք է լվացվեն ջրով։ Նրանք անմաքուր են մինչև երեկո։

¹⁹ Այն կինը, որից արյուն հոսի, և արյան հոսումը բնական հոսումն է, նա յոթ օր կլինի իր դաշտանի մեջ։ Ով որ դիպչի նրան, անմաքուր կհամարվի մինչև երեկո։ ²⁰ Ինչի վրա որ պառկի այդ կինն իր դաշտանի ընթացքում և ինչի վրա որ նստի նա, անմաքուր պետք է համարվի։ ²¹ Ով որ դիպչի նրա անկողնուն, պետք է լվանա իր հագուստները, իր մարմինը լվա ջրով։ Նա անմաքուր է մինչև երեկո։ ²² Ով որ դիպչի մի առարկայի, որի վրա այդ կինը նստել է, պետք է լվանա իր հագուստները, լողանա ջրով։ Նա անմաքուր է մինչև երեկո։ ²³ Եվ եթե նա անկողնում լինի կամ որևէ բանի վրա նստած, և մեկը մոտենա նրան, թող անմաքուր համարվի մինչև երեկո։

²⁴ Եվ եթե որևէ մեկը քնի նրա հետ, և նրա պղծությունը դիպչի իրեն, յոթ օր թող անմաքուր համարվի։ Մինչև երեկո թող անմաքուր համարվի նաև այն անկողինը, որի վրա այդ մարդը կքնի։

²⁵ Եթե մի կին բազում օրեր արյունահոսություն ունի, սակայն ոչ դաշտանի ժամանակ կամ դաշտանի օրերից հետո, այդ բոլոր օրերը թող անմաքուր համարվեն դաշտանի օրերի նման և թող անմաքուր համարվի։ ²⁶ Այն անկողինը, որի մեջ նա կպառկի իր արյունահոսության օրերին, դաշտանի օրերի նման անմաքուր թող համարվի։ Ամեն առարկա, որի վրա նա կնստի այս շրջանում, դաշտանի օրերի նման թող անմաքուր համարվի։ ²⁷ Ով որ դիպչի նրան, թող անմաքուր համարվի։ Նա պետք է լվանա իր հագուստները և իր մարմինը լվա ջրով։ Նա անմաքուր է մինչև երեկո։

²⁸ Երբ դադարի կնոջ արյունահոսությունը, նա պետք է մաքրվի յոթ օր, ապա մաքուր համարվի։ ²⁹ Ութերորդ օրը պետք է վերցնի երկու տատրակ կամ աղավնու երկու ձագ, բերի քահանայի մոտ՝ Վկայության խորանի դուռը։ ³⁰ Քահանան դրանցից մեկը պետք է զոհի մեղքերի քավության համար, իսկ մյուսը՝ իբրև ողջակեզ։ Քահանան այդ ձևով Տիրոջ առաջ պետք է քավություն տա նրան իր անմաքուր ծորումի համար”։

³¹ Իսրայելի որդիներին խստորեն զգուշացրե՛ք իրենց անմաքրություններից, որպեսզի իրենց մեջ գտնվող իմ խորանը չպղծեն ու իրենց այդ անմաքրության պատճառով չմեռնեն։ ³² Այս է կարգը սերմի ծորումի պատճառով և սերմի արտահոսման պատճառով անմաքուր դարձածի ³³ և դաշտանի ժամանակ արյունահոսություն ունեցող կնոջ, ծորում ունեցողի, տղամարդ լինի թե կին, ինչպես նաև դաշտանի մեջ եղող կնոջ հետ պառկող տղամարդու վերաբերյալ»։

16

Մեղքերի քավության օրը

¹ Տերը խոսեց Մովսեսի հետ անվավեր կրակ մատուցելու պատճառով Ահարոնի որդիների մեռնելուց հետո։ ² Եվ Տերը ասաց Մովսեսին. «Խոսի՛ր քո եղբայր Ահարոնի հետ, որ ամեն վայրկյան չմտնեն սրբարան՝ վարագույրից այն կողմ, Քավության առջև, որը ծածկում է Ուխտի տապանակը, որպեսզի չմեռնեն. որովհետև ես Քավության վրա՝ ամպի մեջ եմ երևալու։ ³ Ահա թե Ահարոնն ինչպես կարող է մտնել սրբարան. նա մեղքի զոհի համար նախրից մի զվարակ և ողջակեզի համար մի խոյ թող բերի։ ⁴ Նա թող հագնի քաթանե սրբագործված շապիկը, մարմնի վրա՝ քաթանե անդրավարտիքը, մեջքին կապի քաթանե գոտին, գլխին դնի քաթանե ապարոշ, որովհետև դրանք սուրբ հանդերձանք են։ Իր ամբողջ մարմինը թող լվա ջրով և թող հագնի դրանք։ ⁵ Իսրայելի որդիների համայնքից էլ նա մեղքի զոհի համար երկու արու այծ թող վերցնի և ողջակեզի համար՝ մեկ խոյ։ ⁶ Ահարոնը իր մեղքի զոհ զվարակը թող զոհաբերի և դրանով քավի իր ու իր ընտանիքի մեղքերը։ ⁷ Նա թող վերցնի երկու այծերը, դրանք կանգնեցնի Տիրոջ առաջ՝ Վկայության խորանի դռանը։ ⁸ Ահարոնը երկու այծերի համար թող վիճակ գցի. մեկը՝ Տիրոջ համար, մյուսը՝ արձակելու [*  Ազազել][19] համար։ ⁹ Ահարոնը թող մատուցի այն այծը, ¹⁰ որի վրա ընկել էր արձակելու վիճակը։ Թող կենդանի կանգնեցնի Տիրոջ առջև, որպեսզի նրանով քավություն անի՝ առաքելով նրան արձակման ու բաց թողնելով դեպի անապատ։ Եվ թող այծն իր հետ նրանց անօրենություններն անապատ տանի։

¹¹ Ապա Ահարոնը թող մատուցի իր մեղքի զոհի համար ընտրված զվարակը և թող քավություն տա իր և իր ընտանիքի մեղքերին։ Նա իր մեղքերի քավության համար թող մորթի զվարակը։ ¹² Նա թող առնի Տիրոջ առաջ գտնվող զոհասեղանից վերցված վառված ածուխներով լի բուրվառը, իր բուռը լցնի մանր աղացած խունկ և տանի վարագույրից ներս։ ¹³ Նա խունկը թող լցնի կրակի վրա՝ Տիրոջ առաջ։ Խնկի ծուխը թող ծածկի Ուխտի տապանակի վրա գտնվող Քավությունը։ Եվ չի մեռնի։ ¹⁴ Նա թող վերցնի զվարակի արյունից և իր մատով Քավության վրա ցանի արևելյան կողմից։ Քավության առջև այդ արյունից իր մատով թող ցանի յոթ անգամ։ ¹⁵ Տիրոջ առաջ նա թող մորթի ժողովրդի մեղքերի քավության այծը և դրա արյունից թող տանի վարագույրից ներս ու ցանի այնպես, ինչպես զվարակի արյունը։ Նա թող այդ արյունից ցանի Քավության վրա՝ Քավության առջև։ ¹⁶ Նա այդ կերպ սրբարանը թող մաքրի Իսրայելի որդիների պղծություններից, նրանց կատարած անիրավություններից և նրանց բոլոր մեղքերից։ Նույն կերպ թող վարվի Վկայության խորանի հետ, որ կանգնեցված է բանակատեղիում՝ նրանց անմաքրություններով շրջապատված։ ¹⁷ Ոչ ոք չպետք է լինի Վկայության խորանում, երբ Ահարոնը մտնի և քավություն անի սրբարանում, մինչև որ դուրս գա և քավություն անի իր, իր ընտանիքի և Իսրայելի ամբողջ ժողովրդի համար։ ¹⁸ Այնուհետև նա թող գնա դեպի Տիրոջ առաջ գտնվող զոհասեղանը և քավության ծես կատարի դրա մաքրման համար։ Նա թող առնի զվարակի արյունից ու այծի արյունից և շուրջանակի քսի զոհասեղանի եղջյուրներին։ ¹⁹ Նա այդ արյունից իր մատով յոթ անգամ թող ցանի դրա վրա և Իսրայելի որդիների պղծությունից թող մաքրի այն ու սրբացնի։

²⁰ Նա այսպիսով թող ավարտի սրբարանի, Վկայության խորանի ու զոհասեղանի սրբագործումը։ Նա թող սրբագործի նաև քահանաներին։ Նա թող մոտ բերի կենդանի այծին։ ²¹ Ահարոնն իր ձեռքերը թող դնի կենդանի այծի գլխին և նրա վրա խոստովանի Իսրայելի որդիների բոլոր անօրենությունները, նրանց բոլոր անարդարություններն ու նրանց բոլոր մեղքերը և այդ ամենը թող դնի կենդանի նոխազի գլխին և նշանակված մի մարդու առաջնորդությամբ այն արձակի դեպի անապատ։ ²² Նոխազը, իր վրա վերցնելով նրանց անիրավությունները, իր հետ պիտի տանի մի անկոխ վայր. նոխազին պիտի արձակի դեպի անապատ։ ²³ Ահարոնն այնուհետև պիտի մտնի Վկայության խորանը, պիտի հանի քաթանե հանդերձը, որը հագել էր սրբարան մտնելու ժամանակ, և այն պիտի թողնի այնտեղ։ ²⁴ Նա սուրբ վայրում իր մարմինը թող լվա ջրով, հագնի իր պատմուճանը և դուրս գալով զոհաբերի իր ողջակեզն ու ժողովրդի ողջակեզը, որով նա քաված պիտի լինի իր, իր ընտանիքի և ժողովրդի, ինչպես նաև քահանաների գործած մեղքերը։ ²⁵ Մեղքերի քավության համար զոհաբերվող կենդանիների ճարպը թող դնի զոհասեղանին։

²⁶ Արձակման այծին առաջնորդողը վերադառնալով թող լվանա իր հագուստները, իր մարմինը լվա ջրով և ապա մտնի բանակատեղի։

²⁷ Մեղքերի զվարակն ու մեղքերի այծը, որոնց արյունը քավություն անելու համար բերված էր սրբարան, պետք է հանեն բանակատեղիից դուրս և դրանք այրեն հրով՝ նրանց կաշիները, նրանց միսն ու նրանց թափոնը։ ²⁸ Դրանք այրողը այնուհետև պետք է լվանա իր հագուստները, իր մարմինը լվա ջրով և ապա մտնի բանակատեղի։

²⁹ Սա ձեզ համար հավիտենական օրենք թող լինի. յոթերորդ ամսվա տասներորդ օրը զրկանքի պիտի ենթարկեք ձեր անձերը. այդ օրը ոչ մի գործ չպետք է անեք։ Դա վերաբերում է և՛ տեղաբնակ իսրայելացուն, և՛ դրսից եկած ու ձեր մեջ բնակություն հաստատած պանդուխտին։ ³⁰ Այդ օրը ձեզ համար քավության օր պիտի լինի, որպեսզի Տիրոջ առաջ մաքրվեք ձեր բոլոր մեղքերից ու սրբվեք, ³¹ որովհետև դա շաբաթների շաբաթն է։ Սա ձեզ համար պիտի լինի հանգստյան օր, և դուք զրկանքի պիտի ենթարկեք ձեր անձերը։ Դա թող հավիտենական օրենք լինի։ ³² Եվ այսպես շարունակ. այն քահանան, որն օծվել է և իր հորից հետո քահանայագործելու իրավունք ստացել, թող անի քավությունը։ Նա թող հագնի քաթանե հանդերձը՝ սուրբ հանդերձը, ³³ սրբագործի սրբարանը, Վկայության խորանն ու զոհասեղանը, քավություն անի քահանաներին և ամբողջ ժողովրդին։ ³⁴ Իսրայելի որդիների բոլոր մեղքերի քավության համար սա թող հավիտենական օրենք լինի ձեզ և տարին մեկ անգամ թող կատարվի, ինչպես Տերը հրամայեց Մովսեսին»։

17

ՍՐԲՈՒԹՅԱՆ ԿԱՆՈՆԱԿԱՐԳԸ

(17-27)

Կանոններ արյան վերաբերյալ

¹ Տերն ասաց Մովսեսին. ² «Խոսի՛ր Ահարոնի, նրա որդիների ու Իսրայելի բոլոր որդիների հետ ու ասա՛ նրանց. “Այս է այն բանը, որ Տերը պատվիրեց ձեզ ու ասաց. ³ “Իսրայելի որդիներից որևէ մեկը, եթե բանակատեղիում կամ բանակատեղիից դուրս արջառ, ոչխար կամ այծ զոհի ⁴ և այն Վկայության խորանի առջև չմատուցի՝ որպես Տիրոջն ընդունելի անուշահոտ ողջակեզ փրկության համար, ապա նրա թափած արյունը մարդու արյուն թափելու հավասար կհամարվի։ Նա պիտի սպանվի իր ժողովրդի կողմից, որովհետև արյուն է հեղել”։ ⁵ Հետևաբար, Իսրայելի որդիներն իրենց զոհելիք անասունները դաշտում մորթելու փոխարեն թող մատուցեն Տիրոջ առջև՝ Վկայության խորանի դռանը, քահանայի մոտ, և դրանք զոհեն Տիրոջը՝ փրկության համար”։ ⁶ Քահանան արյունը շուրջանակի թող թափի զոհասեղանի վրա՝ Տիրոջ դիմաց, Վկայության խորանի դռանը, և ճարպը թող այրի իբրև անուշահոտություն Տիրոջը։ ⁷ Նրանք այլևս իրենց զոհերը թող չզոհաբերեն սնոտի կուռքերին, որոնց հետևելով պոռնկանում էին։ Դա ձեզ ու ձեր սերունդների համար հավիտենական օրենք թող լինի։ ⁸ Եվ նրանց ասա՛. “Իսրայելի որդիներից կամ դրսից եկած ու ձեր մեջ բնակություն հաստատածներից որևէ մեկը եթե ողջակեզ կամ զոհ մատուցի ⁹ և այն Տիրոջը զոհելու համար Վկայության խորանի դուռը չբերի, այդ մարդը թող սպանվի իր ժողովրդի կողմից։

¹⁰ Եթե Իսրայելի որդիներից կամ դրսից եկած ու ձեր մեջ բնակություն հաստատածներից մեկը որևէ կենդանու արյուն ուտի, ես իմ հայացքը կուղղեմ արյուն ուտող այդ մարդու վրա և կկորցնեմ նրան իր ժողովրդի միջից, ¹¹ որովհետև ամեն մի մարմնի շունչը իր արյունն է։ Այդ արյունը ես եմ տվել ձեզ՝ զոհասեղանին ձեր անձերը սրբելու համար, որպեսզի նրա արյունով քավվեն ձեր անձերը։ ¹² Դրա համար էլ Իսրայելի որդիներին ասացի. “Ձեզնից ոչ ոք արյուն թող չուտի։ Արյուն թող չուտի նաև դրսից եկած ու ձեր մեջ բնակություն հաստատած մարդը”։ ¹³ Իսրայելի որդիներից կամ դրսից եկած ու ձեր մեջ բնակություն հաստատած մեկը, եթե որևէ վայրի կենդանի կամ ուտելի թռչուն որսա, պետք է թափի դրա արյունն ու այն ծածկի հողով, ¹⁴ որովհետև ամեն մի մարմնի շունչը իր արյունն է։ Ես Իսրայելի որդիներին ասացի. “Ոչ մի մարմնի արյուն չուտեք”, որովհետև ամեն մի մարմնի շունչը իր արյունն է։ Ով որ ուտի դա, կմեռնի։ ¹⁵ Ով մեռելոտի կամ գազանից հոշոտված կենդանու միս ուտի, լինի նա տեղաբնակ թե եկվոր, պետք է լվանա իր հագուստները, լվա իր մարմինը։ Նա անմաքուր թող լինի մինչև երեկո և ապա մաքուր համարվի։ ¹⁶ Իսկ եթե նա իր զգեստները չլվանա և իր մարմինը չլվա ջրով, ապա անօրենությունը կծանրանա իր անձի վրա”»։

18

Անբարոյական սեռական հարաբերությունների արգելք

¹ Տերն ասաց Մովսեսին. ² «Խոսի՛ր Իսրայելի որդիների հետ ու ասա՛ նրանց. “Ես եմ Տերը՝ ձեր Աստվածը։ ³ Մի՛ առաջնորդվեք եգիպտացիների սովորություններով, որոնց երկրում պանդուխտ էիք, և ոչ էլ վարք ու բարքով քանանացիների երկրի, ուր ես տանելու եմ ձեզ, և նրանց օրենքներով մի՛ շարժվեք։ ⁴ Կատարե՛ք իմ հրամանները և պահե՛ք իմ պատվիրաններն ու կառաջնորդվեք դրանցով։ Ես եմ Տերը՝ ձեր Աստվածը։ ⁵ Պահեք իմ բոլոր պատվիրաններն ու իմ բոլոր պատգամները կատարեք։ Այդ ամենը կատարող մարդը կփրկվի դրանցով։ Ես եմ Տերը՝ ձեր Աստվածը։ ⁶ Որևէ մեկն իր արյունակից հարազատին թող չմոտենա նրա ամոթույքը բանալու նպատակով։ Ես եմ Տերը։ ⁷ Քո հոր և քո մոր ամոթույքը մի՛ բացիր, որովհետև նա քո մայրն է։ Նրա ամոթույքը չտեսնես։ ⁸ Մի՛ անպատվիր քո հորը՝ քո հոր կնոջ ամոթույքը տեսնելով։ ⁹ Քո հորից կամ մորից ծնված, քո տան մեջ կամ դրսում ծնված քրոջդ ամոթույքը չտեսնես։ ¹⁰ Քո որդու աղջկա ամոթույքը կամ քո դստեր աղջկա ամոթույքը չտեսնես, որովհետև դա նաև քո ամոթույքն է։ ¹¹ Քո հոր կնոջ դստեր ամոթույքը չտեսնես, որովհետև նա նույն հորից ծնված քո քույրն է։ Նրա ամոթույքը չտեսնես։ ¹² Քո հորաքրոջ ամոթույքը չտեսնես, որովհետև նա քո հոր արյունակիցն է։ ¹³ Քո մորաքրոջ ամոթույքը չտեսնես, որովհետև նա քո մոր արյունակիցն է։ ¹⁴ Մի՛ անպատվիր քո հորեղբորը՝ նրա կնոջը մերձենալով, որովհետև նա քո ազգականն է։ ¹⁵ Քո հարսի ամոթույքը չտեսնես, որովհետև նա քո որդու կինն է. նրա ամոթույքը չտեսնես։ Նրա որդու աղջկան կամ դստեր աղջկան չմերձենաս՝ տեսնելու նրանց ամոթույքը, որովհետև նրանք քո արյունակիցներն են։ Դա ամբարշտություն է։ ¹⁶ Մի՛ անպատվիր քո եղբորը՝ նրա կնոջ ամոթույքը տեսնելով։ ¹⁷ Նրա կնոջ և դստեր ամոթույքը չտեսնես։ Նրա որդու աղջկան կամ դստեր աղջկան չմերձենաս՝ տեսնելու նրանց ամոթույքը, որովհետև նրանք քո արյունակիցներն են։ Դա ամբարշտություն է։ ¹⁸ Քենուդ հետ չամուսնանաս, քանի դեռ կինդ ողջ է, որովհետև մեկի ներկայությամբ մյուսի ամոթույքը տեսնելով՝ խանդ կառաջացնես։ ¹⁹ Դաշտանի պղծության մեջ գտնվող կնոջը չմերձենաս՝ նրա ամոթույքը տեսնելու։ ²⁰ Քո մերձավորի կնոջը քո սերմը չտաս, որպեսզի նրա հետ չպղծվես։ ²¹ Քո սերնդից ոչ մեկին իշխանի [*  Մոլեխի] ծառայությանը չհանձնես[20] և դրանով իմ անունը չպղծես, քանզի ես եմ Տերը։ ²² Այր մարդուն չմերձենաս, ինչպես մերձենում ես կնոջը, որովհետև դա պղծություն է։ ²³ Ոչ մի անասունի հետ չխառնակվես՝ պղծվելով նրա հետ։ Կինը որևէ անասունի չպետք է մոտենա՝ նրա հետ մերձենալու. դա գարշելի է։ ²⁴ Այս ամեն տեսակ անմաքուր արարքներով մի՛ պղծվեք, որովհետև նման արարքներով պղծված ժողովուրդներին ես ձեր առջևից պիտի վանեմ։ ²⁵ Նրանց պատճառով երկիրը գարշելի դարձավ, ես պատժեցի նրանց անօրենությունները, և երկիրը նողկաց իր բնակիչներից։ ²⁶ Պահե՛ք իմ օրենքներն ու իմ բոլոր պատգամները։ Ո՛չ տեղաբնակը, ո՛չ դրսից եկած ու ձեր մեջ բնակություն հաստատած պանդուխտը չպետք է կատարի այդ բոլոր պղծությունները, ²⁷ որովհետև այդ բոլոր պղծությունները կատարեցին ձեզնից առաջ այդ երկրում ապրած մարդիկ, և երկիրը պղծվեց։ ²⁸ Որպեսզի ձեզանից էլ չնողկա երկիրը, երբ պղծեք այն, ինչպես որ նողկաց ձեզնից առաջ այստեղ ապրած ազգերից։ ²⁹ Ով նման պիղծ արարքներ կատարի, նա կվերանա իր ժողովրդի միջից։ ³⁰ Պահե՛ք իմ պատվիրանները, այն է՝ մի՛ կատարեք այն ամենը, ինչն օրինական է պիղծերի համար, և որ գործվել են ձեզանից առաջ, մի՛ պղծվեք դրանցով, քանզի ես եմ Տերը՝ ձեր Աստվածը”»։

19

Սրբության և արդարության օրենքներ

¹ Տերն ասաց Մովսեսին. ² «Խոսի՛ր Իսրայելի բոլոր որդիների հետ և ասա՛ նրանց. “Սո՛ւրբ եղեք, քանզի ես՝ Տերը, ձեր Աստվածը, սուրբ եմ։

³ Թող յուրաքանչյուրդ ակնածի իր հորից ու իր մորից։

Պահե՛ք իմ շաբաթ օրերը, քանզի ես եմ Տերը՝ ձեր Աստվածը։

⁴ Մի՛ պաշտեք կուռքերին և ձեզ համար ձուլածո աստվածներ մի՛ կերտեք։ Ես եմ Տերը՝ ձեր Աստվածը։

⁵ Եթե Տիրոջը փրկության զոհ մատուցեք, այնպե՛ս արեք, որ ընդունելի լինի։ ⁶ Այն պետք է ուտել ընծայման օրն ու հաջորդ օրը, և եթե որևէ բան մնա երրորդ օրվան, այն կրակով պետք է այրվի։ ⁷ Իսկ եթե մեկն ուտի երրորդ օրը, այն զոհ չի լինի և ընդունելի չի համարվի։ ⁸ Ով ուտի այն, մեղք գործած կլինի, որովհետև Տիրոջ սրբությունն է պղծած լինում։ Նրանք, ովքեր կուտեն, կվերանան իրենց ժողովրդի միջից։

⁹ Ձեր դաշտերի հունձը հնձելիս մինչև վերջ մի՛ հնձեք և հնձի ժամանակ ընկած հասկերը մի՛ հավաքեք։ ¹⁰ Ձեր այգին ճռաքաղ մի՛ արեք, և ոչ էլ այգեկութից հետո ձեր այգում մնացած խաղողի ողկույզները հավաքեք։ Դրանք թող մնան տնանկին ու պանդուխտին։ Ես եմ Տերը՝ ձեր Աստվածը։

¹¹ Մի՛ գողացեք, մի՛ ստեք, ոչ մեկը մյուսին թող չզրպարտի։ ¹² Իմ անունով սուտ երդում մի՛ տվեք և ձեր Աստծու անունը մի՛ պղծեք։ Ես եմ Տերը՝ ձեր Աստվածը։

¹³ Մի՛ զրկիր քո մերձավորին և մի՛ հափշտակիր։ Վարձկանի վարձը մինչև առավոտ մոտդ մի՛ պահիր։ ¹⁴ Համրին մի՛ վիրավորիր, կույրի ճանապարհին խոչ ու խութ մի՛ դիր։ Երկնչի՛ր Տիրոջից՝ քո Աստծուց. ես եմ Տերը՝ քո Աստվածը։

¹⁵ Դատի ժամանակ անիրավ մի՛ եղիր, աղքատի հանդեպ աչառություն մի՛ արա, հարուստին մի՛ շողոքորթիր։ Արդա՛ր դատիր քո մերձավորին։

¹⁶ Քո ազգակիցների հանդեպ նենգություն չգործես և քո մերձավորի արյան թափվելուն պատճառ չդառնաս։ Ես եմ Տերը՝ ձեր Աստվածը։ ¹⁷ Քո սրտում ատելություն չպահես եղբորդ նկատմամբ։ Հանդիմանի՛ր նրան սխալների համար, որպեսզի նրա պատճառով մեղքերի մեջ չընկնես։ ¹⁸ Քո հայրենակիցների նկատմամբ վրեժխնդիր մի՛ լինիր և ոխ մի՛ պահիր։ Սիրի՛ր քո մերձավորին այնպես, ինչպես ինքդ քեզ։ Ես եմ Տերը։

¹⁹ Իմ օրենքները պահե՛ք։ Չթողնես, որ քո անասունը այլ տեսակի անասունի հետ խառնակվի։ Նույն հողամասի վրա երկու տեսակի սերմեր մի՛ ցանիր։ Երկու տարբեր կտորներից խարդախորեն կարված հագուստները մի՛ հագիր։ ²⁰ Եթե մեկը կենակցի մեկ ուրիշի համար նախատեսված աղախնի հետ, որը փրկագնով չի փրկագնված և նրան ազատություն չի շնորհված, երկուսն էլ պետք է հանդիմանվեն, բայց մահվան չպիտի դատապարտվեն, քանի որ կինն անազատ է։ ²¹ Իր գործած հանցանքը քավելու համար Վկայության խորանի դռան առաջ մեղքերի քավության խոյ պիտի մատուցի Տիրոջը։ ²² Քահանան հանցանքների քավության խոյը թող զոհաբերի Տիրոջ առջև՝ նրա մեղքերի քավության համար, և նրա մեղքերին թողություն կտրվի։

²³ Երբ մտնեք այն երկիրը, որ Տերը՝ Աստված, տալու է ձեզ, ամեն տեսակի պտղատու ծառե՛ր տնկեցեք և մաքրե՛ք նրա անմաքրությունը։ Առաջին երեք տարիների բերքը թող անմաքուր լինի ձեզ համար. այն չուտեք։ ²⁴ Չորրորդ տարվա բոլոր պտուղները պիտի սուրբ համարվեն և նվիրվեն Տիրոջը՝ ի փառաբանություն։ ²⁵ Հինգերորդ տարին կարող եք ուտել դրա պտուղը։ Այդ տարուց սկսած այդ բերքը կլինի ձեզ եկամուտ։ Ես եմ Տերը՝ ձեր Աստվածը։

²⁶ Լեռների վրա մի՛ կերեք։ Մի՛ զբաղվեք գուշակությամբ, հատկապես թռչնագուշակությամբ։

²⁷ Ձեր գլխի մազերը վերև մի՛ հավաքեք և ձեր մորուքի տեսքը մի՛ փչացրեք։ ²⁸ Մահացած որևէ մեկի հիշատակի համար ձեր մարմնի վրա կտրվածքներ և դաջվածքներ մի՛ արեք։ Ես եմ Տերը՝ ձեր Աստվածը։

²⁹ Մի՛ պղծիր քո դստերը՝ նրան պոռնկության տալով, որպեսզի երկիրը պոռնկության մեջ չընկնի ու անօրենությամբ չլցվի։

³⁰ Իմ շաբաթ օրերը պահե՛ք և իմ սրբարանին երկյուղածությամբ կմոտենաք. ես եմ Տերը։

³¹ Վհուկներին մի՛ հետևեք և ոգեհարցների հետ մի՛ առնչվեք, որպեսզի նրանցով չպղծվեք։ Ես եմ Տերը՝ ձեր Աստվածը։

³² Ալեհեր մարդկանց առաջ ոտքի՛ կանգնեք և պատվե՛ք ծերերին։ Երկնչի՛ր քո Աստծուց։ Ես եմ Տերը՝ քո Աստվածը։

³³ Եթե ձեր երկրում օտարական հաստատվի, նրան չնեղեք։ ³⁴ Ձեր երկրի տեղաբնակի պե՛ս ընդունեք նրան, և եկվորը թող բնակվի ձեզ մոտ։ Նրան սիրի՛ր քո անձի պես, որովհետև դուք էլ պանդուխտ եղաք եգիպտացիների երկրում։ Ես եմ Տերը՝ ձեր Աստվածը։

³⁵ Անիրավություն մի՛ արեք դատ-դատաստանի ժամանակ, չափելու, կշռաքարերի ու կշռելու մեջ։ ³⁶ Կշեռքները ճիշտ պետք է լինեն, կշռաքարերը՝ ճշգրիտ, չափամանները՝ ճշգրիտ, հեղուկաչափը՝ ճշգրիտ։ Ես եմ Տերը՝ ձեր Աստվածը, որ ձեզ հանեց եգիպտացիների երկրից։

³⁷ Պահպանե՛ք իմ բոլոր օրենքներն ու իմ բոլոր հրամանները և կատարե՛ք դրանք։ Ես եմ Տերը՝ Աստված”»։

20

Պատիժներ ծանր հանցանքների համար

¹ Տերն ասաց Մովսեսին. ² «Խոսի՛ր Իսրայելի որդիների հետ ու ասա՛. “Եթե Իսրայելի որդիներից որևէ մեկը կամ նրանց մեջ բնակություն հաստատած որևէ պանդուխտ իր զավակներից որևէ մեկին ծառայության տա իշխանին,[21] նա մահապատժի պիտի ենթարկվի։ Այդ երկրի մարդիկ թող քարկոծեն նրան քարերով։ ³ Ես նրա դեմ կդարձնեմ իմ երեսը և նրան կվերացնեմ ժողովրդի միջից, քանի որ նա իր զավակներից տվեց իշխանին՝ պղծելով իմ սրբարանը և անարգելով ինձ նվիրվածների անունը։ ⁴ Եթե տեղաբնակներն անտեսեն իր զավակներից մեկին իշխանին հանձնած մարդու արարքն ու չսպանեն նրան, ⁵ ես հայացքս նրա ու նրա հարազատների դեմ կդարձնեմ և իր ժողովրդի միջից կվերացնեմ նրան ու նրանց, ովքեր համախոհ եղան նրան՝ իշխանին ծառայելու։ ⁶ Ես դեմ կելնեմ այն անձին, որ ծառայի վհուկներին ու ոգեհարցներին, ու կվերացնեմ նրան իր ժողովրդի միջից։ ⁷ Սրբե՛ք ու սո՛ւրբ եղեք, քանզի ես՝ Տերը, ձեր Աստվածը, սուրբ եմ։ ⁸ Պահե՛ք ու կատարե՛ք իմ հրամանները։ Ես եմ Տերը՝ ձեր Աստվածը, ձեզ սուրբ դարձնողը։

⁹ Եթե որևէ մեկը վատաբանի իր հորը կամ իր մորը, նա մահապատժի թող ենթարկվի։ Եթե նա վատաբանում է իր հորը կամ իր մորը, հանցավոր է։

¹⁰ Եթե մի տղամարդ շնանա ամուսնացած մի կնոջ հետ կամ իր հարևանի կնոջ հետ, մահապատժի թող ենթարկվեն և՛ շնացողը, և՛ շնացածը։ ¹¹ Նա, որ պառկի իր հոր կնոջ հետ, նա բացած է լինում իր հոր ամոթույքը։ Երկուսն էլ թող մահվան դատապարտվեն, քանի որ նրանք ամբարշտացել են և հանցավոր են։ ¹² Եթե որևէ մեկը պառկի իր հարսի հետ, թող երկուսն էլ մահվան դատապարտվեն, քանի որ նրանք ամբարշտացել են և հանցավոր են։ ¹³ Եթե որևէ տղամարդ մեկ այլ տղամարդու հետ պառկի, ինչպես կնոջ հետ, երկուսն էլ պղծություն գործած կլինեն։ Երկուսն էլ մահվան թող դատապարտվեն, որովհետև հանցավոր են։ ¹⁴ Եթե որևէ տղամարդ կին առնի մի աղջկա ու նրա մորը, անօրենություն է։ Նրանք երեքն էլ թող այրվեն կրակով, որպեսզի ձեր մեջ նման անօրենություններ չլինեն։

¹⁵ Կենդանու հետ կենակցող տղամարդը թող մահապատժի ենթարկվի, իսկ կենդանուն պետք է սատկեցնել։ ¹⁶ Խառնակվելու նպատակով որևէ կենդանու մերձեցող կնոջն ու կենդանուն սպանե՛ք, թող մեռնեն, քանի որ հանցավոր են։

¹⁷ Եթե մեկն ամուսնանա նույն հորից կամ նույն մորից ծնված իր քրոջ հետ և տեսնի նրա ամոթույքը, իսկ քույրն էլ տեսնի նրա ամոթույքը, ապա դա նախատինք է. նրանք պետք է վերանան իրենց ժողովրդի միջից, որովհետև նա իր քրոջ ամոթույքն է բացել։ Նրանք պիտի ընդունեն իրենց մեղքերի հատուցումը։

¹⁸ Այն տղամարդը, որ պառկի դաշտանի մեջ գտնվող կնոջ հետ և տեսնի նրա ամոթույքը, տեսած է լինում նրա արյան աղբյուրը, իսկ կինը ցույց տված է լինում իր արյան աղբյուրը, ուրեմն երկուսն էլ թող վերանան իրենց ժողովրդի միջից։

¹⁹ Քո հորաքրոջ և մորաքրոջ ամոթույքը չտեսնես, որովհետև տեսած ես լինում մերձավորներիդ ամոթույքները, նրանք իրենց մեղքի պատիժը պիտի կրեն և անժառանգ մեռնեն։ ²⁰ Եթե որևէ տղամարդ պառկի իր քեռու կնոջ հետ, նա անպատվում է իր քեռուն։ Իրենց մեղքի պատիժը պիտի կրեն և անժառանգ մեռնեն։ ²¹ Եթե որևէ տղամարդ պառկի իր եղբոր կնոջ հետ, դա պղծություն է. նա անպատվում է իր եղբորը. անժառանգ թող մեռնեն։

²² Պահե՛ք իմ բոլոր հրամաններն ու իմ բոլոր պատվիրանները և կատարե՛ք դրանք, որպեսզի ձեզանից չխորշի այն երկիրը, ուր ես տանելու եմ ձեզ այնտեղ բնակվելու համար։ ²³ Մի՛ հետևեք այն ժողովուրդների օրենքներին, որոնց ես վանելու եմ ձեզանից, որովհետև նրանք կատարեցին բոլոր այդ վատ արարքները, և ես նողկանք զգացի նրանց հանդեպ։ ²⁴ Ես ձեզ ասացի. “Դուք կժառանգեք այդ երկիրը, և ես ձեզ այն կտամ իբրև սեփականություն, մի երկիր, որը կաթ ու մեղր է բխեցնում”։ Ես եմ Տերը՝ ձեր Աստվածը, որ ձեզ առանձնացրեց բոլոր ժողովուրդներից։

²⁵ Տարբերակե՛ք մաքուր անասունները անմաքուր անասուններից, մաքուր թռչունները՝ անմաքուրներից, ձեզ մի՛ պղծեք անմաքուր անասուններով, թռչուններով ու երկրի ամեն տեսակ սողուններով, որոնց ես առանձնացրել եմ ձեզ համար՝ իբրև անմաքուրների։ ²⁶ Սո՛ւրբ եղեք, որովհետև ես՝ Տերը, ձեր Աստվածը, սուրբ եմ։ Ես ձեզ առանձնացրի բոլոր ժողովուրդներից, որպեսզի իմը լինեք։

²⁷ Եթե որևէ տղամարդ կամ կին վհուկ կամ ոգեհարց լինի, թող մահապատժի ենթարկվի, թող նրանց քարկոծեն, որովհետև հանցավոր են”»։

21

Քահանայության սրբությունը

¹ Տերն ասաց Մովսեսին. «Խոսի՛ր Ահարոնի որդիների՝ քահանաների հետ և ասա՛ նրանց. “Թող անմաքուր չդառնան իրենց հայրենակիցների մեջ՝ դիակի դիպչելով, ² բացառությամբ մտերիմ ազգականի՝ հոր և մոր, որդու, դստեր և եղբոր, ³ նաև չամուսնացած կույս և իրենց մոտ ապրող քրոջ, որոնց դիակներին դիպչելով՝ անմաքուր չեն համարվի։ ⁴ Չպետք է հանկարծակի անմաքուր դառնան ժողովրդի մեջ՝ պղծելով իրենց։ ⁵ Ի նշան սգի՝ իրենց գլուխը թող չածիլեն, մորուքների ծայրերը չկտրեն և իրենց մարմնի վրա դաջվածքներ չանեն։ ⁶ Թող սուրբ լինեն իրենց Աստծու առջև և չարատավորեն իրենց Աստծու անունը, որովհետև Տիրոջ զոհերը՝ իրենց Աստծու ընծաները, նրանք են մատուցում։ Նրանք սուրբ պետք է լինեն։ ⁷ Քահանաները պոռնիկ կամ պղծված կին չպետք է առնեն։ Չպետք է առնեն նաև ամուսնուց բաժանված կին, որովհետև քահանան սուրբ պետք է լինի Տիրոջ՝ իր Աստծու համար։ ⁸ Պետք է սուրբ պահի իրեն, որովհետև Տիրոջ՝ ձեր Աստծու ընծաները նա է մատուցում։ Նա սուրբ պետք է լինի, քանզի ես՝ Տերս, որ սրբագործում եմ քահանաներին, սուրբ եմ։ ⁹ Եթե քահանայի դուստրը պոռնկությամբ պղծվի, նա արատավորած կլինի իր հոր անունը. նա պետք է հրով այրվի։ ¹⁰ Գլխին օծության յուղ ունեցող, պատմուճան հագնելու արժանացած և իր եղբայրների մեջ ավագ եղող քահանան, ի նշան սգո, գլխարկը թող չհանի, իր հագուստները չպատառոտի, ¹¹ վախճանված մարդուն չդիպչի, եթե նույնիսկ դա իր հայրը կամ մայրն է, և իրեն չպղծի։ ¹² Սրբարանից թող դուրս չգա, որպեսզի իր Աստծու սրբարանը չպղծի, որովհետև նա իր վրա կրում է Աստծու օծության սուրբ յուղը։ Ես եմ Տերը։ ¹³ Նա կին թող առնի իր ցեղի միջից կույս մեկին։ ¹⁴ Այրի, ամուսնալուծված կամ պոռնիկ կին չպիտի առնի, այլ իր ցեղի միջից մի կույս աղջիկ թող առնի որպես կին։ ¹⁵ Նա իր սերունդը չպիտի պղծի, որովհետև ես եմ Տերը, որ սրբագործում եմ նրան»։

¹⁶ Տերն ասաց Մովսեսին. ¹⁷ «Խոսի՛ր Ահարոնի հետ և ասա՛. “Եթե քո սերունդից և քո գալիք սերունդներից որևէ մեկն արատ ունենա, չպետք է քահանայագործի և իր Աստծուն տրված ընծաների զոհաբերությունն անի։ ¹⁸ Արատ ունեցող որևէ մարդ, լինի նա կաղ կամ կույր, քթատ կամ ականջատ, ¹⁹ ձեռքից կամ ոտքից հաշմանդամ, ²⁰ կուզ կամ շիլ, աչքը վնասված, քոս, քաղցկեղ կամ մեկ ամորձի ունեցող, ²¹ Ահարոն քահանայի սերնդից արատ ունեցող որևէ մեկը թող չմոտենա քո Աստծուն զոհ մատուցելու, որովհետև նա արատավոր է, թող չմերձենա Աստծու ընծաները մատուցելու։ ²² Աստծու ընծաներն ամենասուրբ են, այդ սուրբ ընծաներից կարող է ուտել, ²³ բայց վարագույրին թող չմոտենա և զոհասեղանին թող չդիպչի, որովհետև արատավոր է և Աստծու սրբարանը նա չպետք է պղծի, քանզի ես եմ Տերը, որ սրբագործում եմ նրանց”»։

²⁴ Եվ Մովսեսը խոսեց Ահարոնի, նրա որդիների ու Իսրայելի բոլոր որդիների հետ։

22

¹ Տերն ասաց Մովսեսին. ² «Ահարոնին ու նրա որդիներին ասա՛, որ զգուշությամբ վարվեն Իսրայելի որդիների՝ ինձ մատուցած ընծաների հետ, որպեսզի իրենց մատուցած զոհերով չարատավորեն իմ սուրբ անունը. ես եմ Տերը։ ³ Ասա՛ նրանց. “Ձեր սերունդների մեջ ձեր զավակներից որևէ մեկը, եթե անմաքուր վիճակում մոտենա Վկայության խորանին, որպեսզի զոհ մատուցի այն, ինչ Իսրայելի որդիներն են մատուցում Տիրոջը, ապա կհեռացվի իմ առջևից. ես եմ Տերը։ ⁴ Եթե Ահարոն քահանայի որդիներից մեկը բորոտ է կամ սերմնահոսություն ունի, իրավունք չունի սուրբ զոհաբերություններից ուտելու, մինչև չմաքրվի։ Նա, ով դիպչի անմաքուր մեկի, կամ եթե ինքն է անմաքուր՝ առնական սերմի կորուստ ունենալով, ⁵ նա, ով դիպչի մի պիղծ սողունի, որը կպղծի իրեն, կամ մի մարդու, որը կարող է պղծել ամեն տեսակ պղծություններով, ⁶ նա, ով դիպչի դրանց, թող անմաքուր համարվի մինչև երեկո և մատուցված սուրբ զոհաբերություններից չպետք է ուտի, մինչև որ իր մարմինը չլվա ջրով։ ⁷ Արևը մայր մտնելուց հետո նա մաքուր թող համարվի և դրանից հետո միայն թող ուտի մատուցված սուրբ զոհաբերություններից, որովհետև այն իր կերակուրն է։ ⁸ Սատկած կամ գազանից հոշոտված կենդանու միս չպետք է ուտի, որպեսզի դրանցով չպղծվի։ Ես եմ Տերը։ ⁹ Նրանք պետք է կատարեն իմ պատվիրանները, որպեսզի մեղք գործած չլինեն և մահապատժի չենթարկվեն իրենց պղծելու հետևանքով։ Ես եմ նրանց սրբագործող Տերը։

¹⁰ Որևէ մեկը, եթե քահանայական սերնդից չէ, սրբագործված ուտելիքից չպետք է ուտի։ Ո՛չ քահանայի մոտ եկած պանդուխտը, ո՛չ էլ վարձկանն այդ սրբագործված ուտելիքից չպետք է ուտեն։ ¹¹ Իսկ եթե քահանան արծաթով մարդ է գնել, այդ մարդը կարող է ուտել այդ հացից։ Նրա ծառաներից ծնվածները ևս կարող են ուտել այդ հացից։ ¹² Եթե քահանայի դուստրը ամուսնանա քահանայական ընտանիքից չսերած մի տղամարդու հետ, ապա նա չի կարող ուտել սուրբ երախայրիքներից։ ¹³ Իսկ եթե քահանայի դուստրն այրիանա կամ ամուսնալուծվի և առանց զավակ ունենալու վերադառնա հայրական տունը, ապա, ինչպես իր մանկության օրերին, կարող է ուտել իր հոր հացից։ Քահանայական ընտանիքին չպատկանող որևէ մեկը թող դրանից չուտի։ ¹⁴ Եթե որևէ մեկն անգիտակցաբար ուտի սրբություններից, թող իր կերածի արժեքի վրա ավելացնի դրա մեկ հինգերորդը և վերադարձնի քահանային։ ¹⁵ Թող նրանք չպղծեն այն սուրբ ընծաները, որ Իսրայելի որդիներն առանձնացրել են Տիրոջ համար։ ¹⁶ Նրանք, սուրբ ընծաներն ուտելով, իրենց վրա վերցնում են մեղքեր ու հանցանքներ, քանզի ես եմ նրանց սրբագործող Տերը”»։

Զոհի մասին օրենքներ

¹⁷ Տերն ասաց Մովսեսին. ¹⁸ «Խոսի՛ր Ահարոնի, նրա որդիների ու ողջ Իսրայելի ժողովրդի հետ ու ասա՛ նրանց. “Եթե Իսրայելի որդիներից մեկը կամ Իսրայելի որդիների մեջ բնակություն հաստատած եկվորներից մեկը ըստ իր ուխտի և կամ կամավոր՝ զոհ ցանկանա մատուցել Տիրոջը որպես ողջակեզ, ¹⁹ ընդունե՛ք միայն արուն և արատ չունեցողը՝ արջառ, ոչխար կամ այծ։ ²⁰ Արատավոր անասուն չմատուցեք Տիրոջը, որովհետև այն ընդունելի չի լինի։ ²¹ Եթե որևէ մեկը Տիրոջը փրկության զոհ մատուցի ըստ իր ուխտի կամ ըստ իր ցանկության, լինի դա արված ուխտ թե կամավոր զոհաբերություն և կամ տոնի առիթով, ապա արջառների կամ ոչխարների նախրից բերված կենդանին ընդունելի կլինի, եթե այն արատավոր չէ։ Այն ոչ մի արատ չպետք է ունենա։ ²² Կույր, կաղ, ջարդվածք ունեցող, լեզուն կտրած կամ ուռուցք ունեցող, քոսոտ կամ որքինոտ անասուն թող չմատուցեն Տիրոջը, դրանցից Տիրոջ զոհասեղանին ողջակեզ չբերեք։ ²³ Ականջը կտրած կամ պոչատ արջառն ու ոչխարը կարող ես մորթել քեզ համար իբրև ուտելիք, բայց ոչ իբրև ուխտի զոհ։ ²⁴ Ամորձիները հարվածված, ճզմված, կռտած կամ կտրված կենդանին Տիրոջը չմատուցեք և ձեր երկրում նման զոհեր չմատուցեք։ ²⁵ Այլազգի մարդուց ոչ մի նմանօրինակ կենդանի չառնեք ձեր Աստծուն զոհաբերելու համար, որովհետև դրանք խեղված ու արատավոր են։ Նման կենդանիներ չընդունեք”»։

²⁶ Տերն ասաց Մովսեսին. ²⁷ «Նորածին հորթը, գառը կամ ուլը յոթ օր պետք է մնա մոր մոտ։ Ութերորդ օրից սկսած և դրանից հետո այն կարող է ընդունելի նվեր լինել Տիրոջը զոհաբերելու համար։ ²⁸ Կովն իր հորթի հետ, ոչխարն իր գառնուկի հետ միևնույն օրը մի՛ մորթեք։ ²⁹ Եթե Տիրոջը գոհության զոհ ես մատուցում, ապա այն այնպե՛ս մատուցիր, որ քո զոհածն ընդունելի լինի։ ³⁰ Զոհի միսը պետք է ուտվի նույն օրը. այդ մսից հաջորդ օրվան չթողնեք։ Ես եմ Տերը։ ³¹ Պահե՛ք իմ պատվիրանները և կատարե՛ք դրանք, քանզի ես եմ Տերը։ ³² Իմ սուրբ անունը մի՛ արատավորեք, քանզի ես եմ Տերը։ Ես սուրբ պիտի ճանաչվեմ Իսրայելի որդիների կողմից։ Ես եմ ձեզ սրբագործող Տերը, ³³ որ ձեզ հանեցի եգիպտացիների երկրից, որպեսզի ձեր Աստվածը լինեմ։ Ես եմ Տերը»։

23

ԻՍՐԱՅԵԼԻ ՏՈՆԵՐԸ

(23.1–25.17)

(Թվ. 28.16–29.39)

¹ Տերն ասաց Մովսեսին. ² «Խոսի՛ր Իսրայելի որդիների հետ և ասա՛ նրանց. “Տիրոջը նվիրված այն տոները, երբ սուրբ հավաք պիտի անեք, դրանք են իմ տոները. ³ Վեց օր պիտի աշխատես, իսկ յոթերորդ օրը թող շաբաթ՝ հանգստյան օր լինի և սուրբ համարվի՝ Տիրոջը նվիրված։ Այդ օրը ոչ մի աշխատանք չկատարեք, որովհետև այն Տիրոջը նվիրված շաբաթ է, որտեղ էլ բնակվելու լինեք։ ⁴ Տիրոջը նվիրված տոները, երբ սուրբ հավաք պիտի անեք, և որոնք պիտի նշեք իրենց ժամանակին, սրանք են.

Զատկի և Բաղարջակերաց տոները

(Թվ. 28.16-25)

⁵ Առաջին ամսի տասնչորսերորդ օրվա երեկոյան Տիրոջ զատիկն է։

⁶ Նույն ամսի տասնհինգերորդ օրը Տիրոջը նվիրված Բաղարջակերաց տոնն է. յոթ օր բաղարջ հաց պիտի ուտեք։ ⁷ Առաջին օրը սուրբ հավա՛ք արեք։ Առտնին ոչ մի գործ չպիտի անեք։ ⁸ Յոթ օր ողջակեզներ պիտի մատուցեք Տիրոջը, իսկ յոթերորդ օրը սուրբ հավա՛ք արեք։ Առտնին ոչ մի գործ չպիտի անեք”»։

⁹ Տերն ասաց Մովսեսին. ¹⁰ «Խոսի՛ր Իսրայելի որդիների հետ և ասա՛ նրանց. “Երբ մտնեք այն երկիրը, որ ես տալու եմ ձեզ, և հնձեք նրա հունձը, առաջին բերքից մի խուրձ կբերեք քահանայի մոտ։ ¹¹ Նա խուրձը պետք է բերի Տիրոջ առջև՝ որպես ընդունելի ընծա ձեզանից. քահանան այն պետք է բարձրացնելով ընծայաբերի առաջին օրվա հաջորդ օրը։ ¹² Խուրձը ընծայաբերելու օրը նաև արատ չունեցող մեկ տարեկան ոչխար պետք է ողջակեզ անել Տիրոջ համար։ ¹³ Նաև յուղով հունցված երկու տասներորդ գրիվ նաշիհ պիտի մատուցեք որպես ողջակեզ, անուշահոտություն Տիրոջ համար, ինչպես նաև իբրև նվեր՝[22] մեկ քառորդ դորակ գինի։ ¹⁴ Մինչև այն օրը, երբ այդ ընծաները ձեր Աստծուն կմատուցեք, նոր բերքից հաց կամ բոված ցորեն չուտեք։ Դա հավիտենական օրենք թող լինի ձեր սերունդների մեջ, որտեղ էլ բնակվելու լինեք։

Պենտեկոստեի և առաջին բերքի տոները

(Թվ. 28.26-31, Բ Օր. 16.9-12)

¹⁵ Հաշվե՛ք խուրձի նվեր մատուցելու շաբաթ օրվա հաջորդ օրվանից յոթ ամբողջ շաբաթ, ¹⁶ մինչև վերջին շաբաթվա հաջորդ օրն անում է հիսուն օր։ Այդ օրն էլ Տիրոջը նոր զո՛հ մատուցեք։ ¹⁷ Ձեր տներից ընծայաբերեք ձեր հացի նվերը՝ առաջին բերքից թթխմորով եփված երկու հաց, յուրաքանչյուր հացը՝ երկու տասներորդական հունցված նաշիհից։ ¹⁸ Հացերի հետ պիտի մատուցեք արատ չունեցող մեկ տարեկան յոթ գառ, նախրից՝ մեկ զվարակ և արատ չունեցող երկու խոյ։ Դրանք ողջակեզ պիտի լինեն Տիրոջը։ Անարյուն զոհերն ու գինին անուշահոտություն են Տիրոջ համար։

¹⁹ Առաջին բերքի հացի հետ մատուցե՛ք մեկ նոխազ այծերից՝ իբրև մեղքի զոհ, և մեկ տարեկան երկու գառ՝ փրկության համար։ ²⁰ Քահանան դրանք առաջին բերքի հացերի հետ թող մատուցի Տիրոջ առջև, երկու գառների հետ թող ընծայաբերվեն Տիրոջը և պատկանեն ծիսակատար քահանային։

²¹ Այդ օրը սուրբ հավա՛ք արեք, այդ օրը ձեզ համար սուրբ թող լինի. առտնին ոչ մի գործ չանեք։ Դա հավիտենական օրենք թող լինի ձեր սերունդների համար, որտեղ էլ բնակվելիս լինեք։

²² Եվ երբ հնձեք ձեր արտերի հունձը, կրկին չվերադառնաք չհնձվածը հնձելու կամ հնձի ժամանակ ընկած հասկերը հավաքելու համար, այլ դրանք աղքատին ու պանդուխտին թողեք։ Ես եմ Տերը՝ ձեր Աստվածը”»։

Յոթերորդ ամսվա առաջին օրը

(Թվ. 29.1-6)

²³ Տերն ասաց Մովսեսին. ²⁴ «Խոսի՛ր Իսրայելի որդիների հետ և ասա՛. “Յոթերորդ ամսի առաջին օրը ձեզ համար հանգստյան օր թող լինի՝ Տիրոջը նվիրաբերված մի սուրբ տոն՝ շեփորահարություններով և սուրբ հավաքներով։ ²⁵ Այդ օրն առտնին ոչ մի գործ չպիտի անեք, այլ Տիրոջը ողջակեզ պիտի մատուցեք”»։

Քավության օրը

(Թվ. 29.7-11)

²⁶ Տերն ասաց Մովսեսին. ²⁷ «Այս յոթերորդ ամսի տասներորդ օրը Քավության օր է, սուրբ հավա՛ք արեք։ Իններորդ օրվա երեկոյից սկսած ձեր անձը խոնարհեցրե՛ք և Տիրոջը ողջակեզնե՛ր մատուցեք։ ²⁸ Այդ օրն առտնին ոչ մի գործ չանեք, քանզի դա Քավության օր է ձեզ համար, որպեսզի դուք ձեր մեղքերը քավեք Տիրոջ՝ ձեր Աստծու առաջ։ ²⁹ Ով այդ օրն իրեն չխոնարհեցնի, կվերանա իր ժողովրդի միջից։ ³⁰ Ով այդ օրը գործ անի, կվերանա իր ժողովրդի միջից։ ³¹ Առտնին ոչ մի գործ չանեք։ Դա հավիտենական օրենք թող լինի ձեր սերունդների մեջ, որտեղ էլ բնակվելիս լինեք։ ³² Դա շաբաթների շաբաթ թող լինի ձեզ համար։ Ամսի իններորդ օրվա երեկոյից մինչև հաջորդ օրվա երեկոն խոնարհեցրե՛ք ձեզ. պահե՛ք ձեր շաբաթները»։

Տաղավարահարաց տոնը

(Թվ. 29.12-39, Բ Օր. 16.13-17)

³³ Տերն ասաց Մովսեսին. ³⁴ «Խոսի՛ր Իսրայելի որդիների հետ և ասա՛. “Յոթերորդ ամսի տասնհինգերորդ օրը ի պատիվ Տիրոջը յոթ օր պիտի նշեք Տաղավարահարաց տոնը։ ³⁵ Առաջին օրը սուրբ հավա՛ք արեք, այդ օրը առտնին ոչ մի գործ չանեք։ ³⁶ Յոթ օր ողջակեզնե՛ր մատուցեք Տիրոջը և յոթերորդ օրը սուրբ հավա՛ք արեք։ Ողջակե՛զ մատուցեք Տիրոջը, որովհետև դա տոնի վերջին օրն է։ Այդ օրը առտնին ոչ մի գործ չանեք։ ³⁷ Սրանք են Տիրոջ համար կատարվող տոները, որ դուք պիտի նշեք և սուրբ հավաք անեք, որպեսզի Տիրոջն ընծա մատուցեք ձեր ողջակեզները, զոհերն ու նվերները՝ ըստ օրերի, ³⁸ բացի այն ընծաներից, որոնք ընծայաբերվում են Տիրոջը շաբաթ օրերին, բացի ձեր ուխտի ընծաներից և ձեր մյուս կամավոր զոհաբերություններից, որոնք մատուցվում են Տիրոջը։ ³⁹ Յոթերորդ ամսի տասնհինգերորդ օրը, երբ բերքահավաքն ավարտեք, Տիրոջ համար յոթ օր տոն պիտի կատարեք։ Առաջին և ութերորդ օրերը պիտի հանգստանաք։ ⁴⁰ Առաջին օրը ծառերի ընտիր պտուղներ, արմավենու ճյուղեր կվերցնեք, տերևախիտ ծառերի և ուռենիների ճյուղեր, ձորի բարդիների ճյուղեր, որպեսզի Տիրոջ առաջ յոթ օր ուրախանաք։ ⁴¹ Տարվա յոթ օր որպես Տիրոջ տոն տոնեք։ Դա հավիտենական օրենք թող լինի ձեր սերունդների մեջ։ Յոթերորդ ամսին կկատարեք այդ տոնը։ ⁴² Յոթ օր վրանների մեջ կապրեք։ Իսրայելի բոլոր տեղաբնակները վրանների մեջ թող ապրեն, ⁴³ որպեսզի ձեր բոլոր սերունդներն իմանան, որ երբ ես Իսրայելի որդիներին հանեցի եգիպտացիների երկրից, վրանների մեջ բնակեցրի նրանց։ Ես եմ Տերը՝ ձեր Աստվածը”»։

⁴⁴ Այսպիսով Մովսեսն Իսրայելի որդիներին հայտնեց Տիրոջ տոները։

24

Սրբարանի աշտանակը

(Ելք 27.20-21)

¹ Տերն ասաց Մովսեսին. ² «Իսրայելի որդիներին պատվիրի՛ր, որ լույս վառելու համար ձիթապտղի ճզմած յուղ բերեն քեզ, որպեսզի միշտ վառ մնա այն ճրագը, ³ որ կա Վկայության խորանի մեջ՝ վարագույրի դրսի կողմում։ Ահարոնն ու նրա որդիները երեկոյից մինչև առավոտ այն տևապես թող վառ պահեն Տիրոջ առջև։ Դա հավիտենական օրենք թող լինի ձեր սերունդների համար։ ⁴ Տիրոջ առջև՝ սուրբ աշտանակի վրա, մինչև առավոտ վա՛ռ պահեք ճրագները։

Աստծուն մատուցված հացը

⁵ Կվերցնեք նաշիհ և դրանից տասներկու հաց կպատրաստեք, յուրաքանչյուրը երկու տասներորդական քաշով։ ⁶ Տիրոջ առաջ՝ սուրբ սեղանի վրա, դրանք կդնեք երկու դիզված կույտով, ամեն կույտում՝ վեց հաց։ ⁷ Յուրաքանչյուր դիզված կույտի վրա կդնես մաքուր կնդրուկ և աղ, որպեսզի Տիրոջ առջև հիշատակի նվեր լինեն։ ⁸ Յուրաքանչյուր շաբաթ այդ տասներկու հացերը մշտապես պիտի դրվեն Տիրոջ առջև Իսրայելի որդիների կողմից՝ իբրև հավիտենական ուխտ։ ⁹ Այդ հացերը պատկանում են Ահարոնին ու նրա որդիներին։ Դրանք թող ուտեն սուրբ վայրում, քանի որ դա Տիրոջն ընծայաբերվող նվերների մեջ ամենասուրբն է։ Դա հավիտենական օրենք է»։

Արդար և ուղիղ պատժի օրինակ

¹⁰ Իսրայելացի մի կնոջ որդի, որի հայրը եգիպտացի էր և բնակվում էր Իսրայելի որդիների մեջ, մի օր բանակատեղիում կռիվ արեց մի իսրայելացու հետ։ ¹¹ Իսրայելացի կնոջ որդին տվեց Տիրոջ անունը և հայհոյեց։ Նրան բերեցին Մովսեսի մոտ։ Նրա մոր անունը Սալամիթ էր։ Նա Դանի ցեղից Դաբրիի դուստրն էր։ ¹² Նրան բանտարկեցին՝ Աստծու հրամանի համաձայն դատելու համար։ ¹³ Տերն ասաց Մովսեսին. ¹⁴ «Հայհոյող մարդուն հանե՛ք բանակատեղիից դուրս, և բոլոր վկաները թող իրենց ձեռքերը դնեն նրա գլխին, և ապա ամբողջ ժողովուրդը թող քարկոծի նրան։ ¹⁵ Խոսի՛ր Իսրայելի որդիների հետ և ասա՛ նրանց. “Ով որ հայհոյի Աստծուն, մեղքի մեջ կընկնի։ ¹⁶ Տիրոջ անունը տվողը թող մահապատժի ենթարկվի։ Ողջ ժողովուրդը թող քարկոծի նրան։ Տիրոջ անունը տվողը, պանդուխտ լինի նա թե բնիկ, մահապատժի թող ենթարկվի։

¹⁷ Եթե որևէ մեկը հարվածի ու մարդ սպանի, մահապատժի թող ենթարկվի։ ¹⁸ Ով անասունի հարվածի և սա սատկի, տիրոջը նույնպիսի անասունով թող հատուցի։ ¹⁹ Եթե որևէ մեկը խեղանդամ դարձնի իր նմանին, ինչ որ արել է, նույնն էլ թող անեն իրեն։ ²⁰ Կոտրվածքի դիմաց՝ կոտրվածք, աչքի դիմաց՝ աչք, ատամի դիմաց՝ ատամ։ Ինչ խեղվածք որ պատճառել է մեկին, նույնով թող հատուցվի։ ²¹ Եթե մարդ է ծեծել, և սա մահացել է, ծեծողը ևս թող մահանա։ ²² Միևնույն օրենքը թող կիրառվի և՛ օտարականի, և՛ տեղաբնակի նկատմամբ։ Ես եմ Տերը՝ ձեր Աստվածը”»։

²³ Մովսեսը խոսեց Իսրայելի որդիների հետ, և բանակատեղիից դուրս հանեցին հայհոյողին, ու ողջ ժողովուրդը քարկոծեց նրան։ Իսրայելի որդիներն արեցին այնպես, ինչպես Տերն էր պատվիրել Մովսեսին։

25

Յոթերորդ տարին

(Բ Օր. 15.1-11)

¹ Տերը Սինա լեռան վրա ասաց Մովսեսին. ² «Խոսի՛ր Իսրայելի որդիների հետ և ասա՛ նրանց. “Երբ մտնեք այն երկիրը, որ ես տալու եմ ձեզ, թող հանգստանա այդ հողը, որ տալու եմ ձեզ իբրև Տիրոջ շաբաթ։ ³ Վեց տարի վարի՛ր քո արտը, վեց տարի էտի՛ր քո այգին և հավաքի՛ր դրանց բերքը։ ⁴ Յոթերորդ տարին շաբաթ՝ հանգիստ թող լինի այդ հողի համար՝ Տիրոջ շաբաթ։ Քո արտը չմշակես, քո այգին չէտես։ ⁵ Քո արտի ինքնիրեն աճածը չհնձես, Տիրոջը նվիրաբերվելիք խաղողը չքաղես, քանի որ այն հողի հանգստյան տարին է։ ⁶ Հանգստյան տարվա ինքնաբույս բերքը կերակուր թող լինի ձեզ՝ քո ծառայի, քո աղախնու, քո վարձկանի, քեզ մոտ բնակություն հաստատած օտարականի, ⁷ քո անասունի և վայրի կենդանիների համար։ Նրա տված ամբողջ բերքը թող կերակուր լինի նրանց համար”։

Հոբելյանական տարի

⁸ Հաշվի՛ր հանգստյան յոթ տարի՝ յոթ անգամ յոթ տարի, և կլինի քառասունինը տարի։ ⁹ Ապա, յոթերորդ ամսի տասներորդ օրը շեփորի ձայնով ազդարարե՛ք Քավության օրը ձեր ողջ երկրում, ձեր ամբողջ երկրում շեփորով ազդարարե՛ք։ ¹⁰ Կսրբագործեք հիսուներորդ տարին և ձեր երկրի բոլոր բնակիչներին թողություն կազդարարեք, թողության տարի թող նշանակի այն ձեզ համար, յուրաքանչյուր ոք վերստանա իր կալվածքը, և յուրաքանչյուր ոք ազատվելով՝ թող վերադառնա իր տունը, ¹¹ որովհետև դա թողության ազդարարն է։

Հիսուներորդ տարին թող ձեզ համար հոբելյանական տարի լինի։ Մի՛ ցանեք և ոչ էլ հնձեք ինքնիրեն աճածը և մի՛ հավաքեք Տիրոջն ընծայվածը, ¹² քանի որ թողության ազդարարն է. սուրբ թող լինի ձեզ համար։ Սնվե՛ք դաշտերի բարիքներից։ ¹³ Երբ թողության տարի հռչակվի, յուրաքանչյուր ոք թող վերադառնա իր կալվածքը։ ¹⁴ Եթե որևէ մեկն իր մերձավորին որևէ բան է վաճառում կամ իր մերձավորից որևէ բան է գնում, թող նրան չխաբի։ ¹⁵ Հռչակումից հետո եղած տարիների հաշվով պիտի գնես քո մերձավորից, և նա էլ բերքի տարիների հաշվով պիտի վաճառի քեզ։ ¹⁶ Ինչքան շատ լինեն տարիները, այդքան թանկ պիտի լինի արժեքը, և ինչքան քիչ լինեն տարիները, այդքան էժան, որովհետև բերքի քանակով է նա վաճառելու այն։ ¹⁷ Եվ ոչ ոք իր մերձավորին չպետք է խաբի։ Երկնչի՛ր Տիրոջից՝ քո Աստծուց. Ես եմ Տերը՝ ձեր Աստվածը։

¹⁸ Կատարե՛ք իմ բոլոր պատգամներն ու վճիռները, պահե՛ք ու կատարե՛ք դրանք և երկրի վրա կապրեք ապահով, ¹⁹ հողը կտա իր բերքը, դուք կուշտ կուտեք և երկրում կապրեք ապահով։ ²⁰ Իսկ եթե ասեք. “Ի՛նչ պիտի ուտենք այդ յոթերորդ տարում, եթե չցանենք և մեր բերքը չհավաքենք”, ²¹ վեցերորդ տարում ես ձեզ կուղարկեմ իմ օրհնությունը, և հողը երեք տարվա բերք կտա։ ²² Ութերորդ տարում կցանեք, իսկ հին բերքը կուտեք մինչև իններորդ տարին. մինչև նոր բերքը հասնելը կուտեք հին բերքից։

Երկիրը՝ Աստծու սեփականություն

²³ Հողը վերջնականապես չպետք է վաճառվի, քանզի հողն իմն է, իսկ դուք իմ առաջ պնդուխտ ու նժդեհ եք։ ²⁴ Ձեր կալվածքը եղող ամբողջ հողի համար փրկագին պիտի տաք։ ²⁵ Եթե մեկն աղքատանա և վաճառի իր կալվածքից, ապա իր մոտիկ ազգականը կարող է գալ ու վերստին գնելով՝ փրկել իր մերձավորի կալվածքը։ ²⁶ Իսկ եթե ազգական չունենա, բայց ինքը հետո հարստանա և ի վիճակի լինի իր կալվածքը հետ վերցնելու փրկագին տալ, ²⁷ նա թող հաշվի և հանի վաճառքից հետո անցած տարիները և մնացածը վճարի նրան, ով գնել էր այն, և վերադարձնի իր կալվածքը։ ²⁸ Իսկ եթե նա այդքան կարողություն չունենա, որ կարողանա հողի տիրոջը հատուցել փոխարժեքը, ապա վաճառվածը մինչև թողության տարին թող պատկանի նրան, ով այն գնել էր, և թողության տարում թող վերադարձնի իր կալվածքը։

²⁹ Եթե որևէ մեկը վաճառի պարսպապատ քաղաքում գտնվող մի բնակելի տուն, ապա փրկագին ունենա, նա կարող է այն հետ գնել մեկ տարվա ընթացքում։ ³⁰ Իսկ եթե վաճառողը մեկ տարվա ընթացքում ի վիճակի չլինի այն հետ գնելու, ապա պարսպապատ քաղաքի մեջ եղած տունը թող առհավետ պատկանի գնողին ու իր սերունդներին, և թողության տարում իսկ չվերադարձնի։ ³¹ Պարիսպ չունեցող ավաններում գտնվող տները թող ագարակների պես համարվեն։ Դրանք միշտ ենթակա են հետգնման, իսկ թողության տարում պետք է վերադարձվեն։ ³² Իսկ ղևտացիների քաղաքների տները, որոնք գտնվում են նրանց ժառանգական քաղաքներում, կարող են միշտ հետ գնվել ղևտացիների կողմից։ ³³ Եթե որևէ մեկը ղևտացու տուն գնի, ապա թողության տարում նրանց ժառանգական քաղաքներում գտնվող տնից նա դուրս պետք է գա, որովհետև Իսրայելի որդիների մեջ ղևտացիների քաղաքներում գտնվող տները նրանց սեփականությունն են։ ³⁴ Ղևտացիների ագարակները, որոնք քաղաքների շուրջն են գտնվում, վաճառքի ենթակա չեն, որովհետև դրանք նրանց հավիտենական կալվածքներն են։

Փոխատվություն աղքատներին

³⁵ Եթե եղբայրդ աղքատանա և ի վիճակի չլինի աշխատելու, նրան պիտի պատսպարես, ինչպես եկվորին ու պանդուխտին։ Նա քեզ մոտ պիտի ապրի։ ³⁶ Նրանից վաշխ ու տոկոս չպիտի վերցնես։ Վախեցի՛ր քո Աստծուց, ես եմ Տերը։ Քո եղբայրը թող քեզ մոտ ապրի։ ³⁷ Նրան փողը տոկոսով չպիտի տաս և ավելին ստանալու ակնկալությա՛մբ չպիտի կերակրես նրան։ ³⁸ Ես եմ Տերը՝ ձեր Աստվածը, որ հանեց ձեզ եգիպտացիների երկրից, որպեսզի ձեզ տա քանանացիների երկիրը և լինի ձեր Աստվածը։

Գերիների ազատագրում

³⁹ Եթե քո եղբայրն աղքատանա և քեզ վաճառվի, ապա թող քեզ ստրուկի ծառայությամբ չծառայի։ ⁴⁰ Վարձկանի կամ պանդուխտի նման թող լինի քեզ մոտ և թող աշխատի քեզ մոտ մինչև ազատագրման տարին։ ⁴¹ Ազատագրման տարում ինքն իր երեխաների հետ թող ազատ արձակվի և վերադառնա իր ցեղի մոտ և թող վերադառնա իր հայրենի կալվածքը։ ⁴² Որովհետև նրանք, որոնց ես հանեցի եգիպտացիների երկրից, իմ ծառաներն են. թող իբրև ստրուկ չվաճառվեն։ ⁴³ Մի՛ տառապեցրու նրան չարչարանքով, երկնչի՛ր քո Տիրոջից՝ Աստծուց։ ⁴⁴ Ստրուկներ կամ ստրկուհինե՛ր գնիր քո շուրջը եղող ազգերից։ ⁴⁵ Կարող ես գնել նաև ձեր մեջ ապրող օտարականների զավակներից ու նրանց ազգականներից։ Ինչքան որ ձեր երկրում լինեն, կարող են դառնալ ձեր սեփականությունը։ ⁴⁶ Նրանց կարող եք ժառանգություն թողնել ձեր որդիներին՝ իբրև մշտական ստրուկների, բայց ձեր եղբայրներին՝ Իսրայելի որդիներին, մի՛ տառապեցրեք չարչարանքով։ ⁴⁷ Եթե քեզ մոտ հաստատված եկվորը կամ պանդուխտը հարստանա, և քո աղքատացած եղբայրը վաճառվի քեզ մոտ հաստատված այդ եկվորին կամ պանդուխտին կամ վերջիններիս ընտանիքներում ծնվածին, ⁴⁸ վաճառվելուց հետո նա կարող է փրկագնով ազատվել. նրա եղբայրներից մեկնումեկը փրկագնով կարող է ազատել նրան։ ⁴⁹ Նրան փրկագնով կարող է ազատել նրա հորեղբայրը, հորեղբոր որդին կամ իր ցեղի արյունակից ազգականներից մեկը։ Իսկ եթե ինքը հարստանա, ինքը կարող է փրկագնով ազատել իրեն։ ⁵⁰ Թող իրեն գնողի հետ հաշվեն իր փրկագնի չափը՝ նկատի ունենալով վարձու աշխատողի վարձի չափը և նրա մոտ աշխատած տարիների քանակը՝ սկսած իր վաճառվելու տարվանից մինչև ազատագրման տարին։ ⁵¹ Ինչքան շատ տարիներ լինեն մինչև ազատագրման տարին, այնքան համապատասխան արծաթ փրկագին պիտի հատուցվի, ⁵² իսկ եթե մինչև ազատագրման տարին քիչ տարիներ են մնացել, թող հաշվի և ըստ մնացած տարիների տա իր փրկագինը։ ⁵³ Իբրև տարեկան վարձկանի՛ վարվիր նրա հետ։ Քո առջև մի՛ տառապեցրու նրան չարչարանքով։ ⁵⁴ Իսկ եթե այս ձևերից որևէ մեկով չփրկագնվի, ապա ազատագրման տարում թող ազատ արձակվեն ինքն ու իր զավակները նրա հետ, ⁵⁵ որովհետև Իսրայելի որդիները, որոնց հանեցի եգիպտացիների երկրից, իմ ստրուկներն ու ծառաներն են. ես եմ Տերը՝ ձեր Աստվածը»։

26

¹ «Ձեզ համար ձեռակերտ կամ քանդակված կուռքեր մի՛ ստեղծեք, արձան մի՛ կանգնեցրեք և ձեր երկրում երկրպագելու համար քարակոթող մի՛ դրեք։ Ես եմ Տերը՝ ձեր Աստվածը։ ² Իմ շաբաթները պահե՛ք և իմ սրբարանից երկնչե՛ք. ես եմ Տերը։

Օրհնություններ Օրենքին հնազանդվողներին

(Բ Օր. 28.1-14)

³ Եթե ըստ իմ հրամանի ընթանաք, իմ պատվիրանները պահպանեք և կատարեք դրանք, ⁴ ապա անձրև կուղարկեմ ձեզ իր ժամանակին, և հողն իր բերքը կտա, իսկ դաշտերի ծառերը կտան իրենց պտուղները։ ⁵ Ձեր կալսումը կտևի մինչև այգեկութ, իսկ ձեր այգեկութը՝ մինչև նոր ցանքսի ժամանակը։ Դուք կուշտ հաց կուտեք և ձեր երկրում անհոգ կապրեք։ ⁶ Ձեր երկրին խաղաղություն կպարգևեմ, կքնեք, և չի լինի մեկը, որ ձեզ վախեցնի։ Ձեր երկրից կվերացնեմ չար գազաններին։ Եվ ձեր երկրում պատերազմ չի լինի։ ⁷ Դուք կհալածեք ձեր թշնամիներին, և նրանք սպանված կընկնեն ձեր առաջ։ ⁸ Ձեր հինգ հոգին կհալածի հարյուր հոգու, իսկ ձեր հարյուրը՝ բյուրավորների, ձեր թշնամիները սրի հարվածներից կընկնեն ձեր առաջ։ ⁹ Իմ հայացքը ձեզ վրա կլինի, կաճեցնեմ ու կբազմացնեմ ձեզ և հաստատ կմնամ ձեզ հետ կնքած իմ ուխտին։ ¹⁰ Կուտեք նախորդ ու դրանից էլ առաջ ստացած բերքը և ստիպված հին բերքը շտեմարանից պիտի հանեք՝ այն նոր բերքով լցնելու։ ¹¹ Ես իմ ուխտը կհաստատեմ ձեր մեջ և ես ձեզնից չեմ խորշի։ ¹² Ես կքայլեմ ձեր մեջ և կլինեմ ձեր Աստվածը, իսկ դուք կլինեք իմ ժողովուրդը։ ¹³ Ես եմ Տերը՝ ձեր Աստվածը, որ ձեզ հանեցի եգիպտացիների երկրից, երբ դեռ ստրուկ էիք, քանդեցի ձեր ստրկական լծի կապանքները և ձեզ համարձակ այստեղ բերեցի»։

Անեծքներ Օրենքին անհնազանդներին

(Բ Օր. 28.15-68)

¹⁴ «Բայց եթե չլսեք ինձ և չկատարեք իմ այս բոլոր հրամանները, ¹⁵ այլ արհամարհեք դրանք, իմ կարգադրություններից ձանձրանալով՝ չկատարեք իմ պատվիրաններն ու լուծարեք իմ հաստատած ուխտը, ¹⁶ ապա ես նույնը կանեմ ձեր նկատմամբ. տագնապալից տարակույսների կմատնեմ ձեզ, քոսով ու դեղնախտով կհիվանդացնեմ ձեզ, որ պակասի ձեր աչքի լույսը, և դուք հալումաշ լինեք։ Այնժամ զուր տեղը պիտի ցանեք ձեր սերմերը, և այն ձեր հակառակորդները պիտի ուտեն։ ¹⁷ Ես իմ հայացքը ձեր դեմ պիտի հառեմ, և դուք պիտի ընկնեք ձեր թշնամիների առաջ։ Ձեզ ատողները ձեզ պիտի հալածեն, և դուք փախստական պիտի լինեք, եթե անգամ որևէ մեկը չհալածի ձեզ։ ¹⁸ Եթե այդքանից հետո էլ ինձ չլսեք, ձեր գործած մեղքերի համար յոթնապատիկ ավելի պիտի պատժեմ։ ¹⁹ Ես պիտի խորտակեմ ձեր ամբարտավան պարծենկոտությունը, երկինքը ձեզ վրա երկաթի պես ծանր պիտի դարձնեմ, իսկ ձեր հողը՝ պղնձի պես կարծր։ ²⁰ Ձեր զորությունն ի չիք պիտի դառնա, հողն իր բերքը չպիտի տա, ոչ էլ վայրի ծառերը պտուղ պիտի տան։ ²¹ Իսկ եթե դուք շարունակեք շեղվել ուղիղ ճանապարհից ու չկամենաք լսել ինձ, ըստ ձեր գործած մեղքերի՝ յոթնապատիկ ավելի պիտի պատժեմ ձեզ։ ²² Ձեզ վրա երկրի վայրի գազաններ պիտի ուղարկեմ, նրանք պիտի ուտեն ձեզ ու պիտի հոշոտեն ձեր անասունները։ Այսպիսով պիտի պակասեցնեմ ձեր թիվը, և ձեր ճանապարհները կամայանան։ ²³ Իսկ եթե դրանից հետո էլ չխրատվեք և դեռ հակառակվեք ինձ, ²⁴ ես ևս զայրանալով պիտի հակառակվեմ ձեզ և ձեր գործած մեղքերի դիմաց յոթնապատիկ ավելի պիտի պատժեմ ձեզ։ ²⁵ Ձեզ սրակոտոր պիտի անեմ՝ վրեժ առնելով ուխտը խախտելու համար։ Եվ եթե պատսպարվեք ձեր քաղաքներում, ես ձեզ մահ պիտի ուղարկեմ, և դուք թշնամիների ձեռքը պիտի մատնվեք։ ²⁶ Երբ ձեզ նեղեմ հացի պակասությամբ, մեկ թոնիրը բավական կլինի տասը կնոջ հաց եփելու համար, և ձեզ հաց պիտի բաժանեն հաշված կշռով։ Պիտի ուտեք ու չպիտի կշտանաք։

²⁷ Եթե դրանից հետո էլ ինձ չանսաք ու հակառակ գնաք ինձ, ²⁸ ես նույնպես զայրանալով պիտի հակառակվեմ ձեզ և ձեր գործած մեղքերի համեմատ յոթնապատիկ ավելի պիտի պատժեմ ձեզ։ ²⁹ Եվ կուտեք ձեր տղաների մարմինները, կուտեք ձեր դուստրերի մարմինները։ ³⁰ Ես պիտի կործանեմ ձեր արձանները, պիտի խորտակեմ ձեր փայտյա ձեռակերտ կուռքերը։ Ձեր դիակները պիտի նետեմ ձեր ջարդուփշուր եղած կուռքերի բեկորների վրա, և իմ հոգին պիտի խորշի ձեզնից։ ³¹ Ձեր քաղաքներն ավերակ պիտի դարձնեմ, պիտի ամայացնեմ ձեր տաճարները և ձեր զոհերի անուշ բույրն այլևս չպիտի հոտոտեմ։ ³² Պիտի ավերեմ ձեր երկիրը, և նրա մեջ ապրող ձեր թշնամիները պիտի զարմանան դրա վրա։ ³³ Ձեզ պիտի ցրեմ տարբեր ժողովուրդների մեջ, և ձեզ վրա իջած սուրը պիտի կոտորի ձեզ։ Ձեր երկիրն ավերակ պիտի դառնա, իսկ ձեր քաղաքները՝ ամայի։ ³⁴ Այնքան ժամանակ, մինչ երկիրն ավերակ պիտի մնա, պիտի վայելի իր հանգստյան օրերը, իսկ դուք պիտի լինեք ձեր թշնամիների երկրում՝ օտար երկրում։ Այնքան ժամանակ, մինչ երկիրն ավերակ պիտի մնա, պիտի վայելի իր շաբաթները, ³⁵ ավերման բոլոր օրերին պիտի հանգստանա այն շաբաթների փոխարեն, որ չհանգստացավ ձեր՝ այնտեղ բնակվելու ժամանակ։ ³⁶ Ձեր թշնամիների երկրում վերապրածներիդ սրտում վախ պիտի գցեմ. նրանք պիտի սարսռան տերևների սոսափյունից, նրանք փախուստի պիտի դիմեն, ինչպես փախչում են ռազմի դաշտից, և պիտի ընկնեն առանց որևէ մեկից հալածված լինելու։ ³⁷ Եղբայրը պիտի լքի իր եղբորը, ինչպես ռազմի դաշտում, առանց որևէ մեկից հետապնդված լինելու։ Դուք չպիտի կարողանաք դիմադրել ձեր թշնամիներին։ ³⁸ Դուք պիտի կորչեք ժողովուրդների մեջ, և ձեր թշնամիների երկիրը ձեզ կուլ պիտի տա։ ³⁹ Ձեզնից վերապրածներն իրենց գործած մեղքերի համար պիտի կոտորվեն իրենց թշնամիների երկրում և իրենց հայրերի մեղքերի համար նրանց հետ հալումաշ պիտի լինեն։ ⁴⁰ Նրանք պիտի խոստովանեն իրենց ու իրենց հայրերի գործած մեղքերը, որ հանցանք են գործել և արհամարհել են ինձ, և որ հակառակվել են ինձ, ⁴¹ դրա համար ես էլ նրանց հակառակվեցի բարկությամբ և ոչնչացրի նրանց իրենց թշնամիների երկրում։

Այնժամ պիտի ամաչի նրանց անթլփատ սիրտը, և այնժամ պիտի ընդունեն իրենց մեղքերը։ ⁴² Ես էլ կհիշեմ Հակոբին, Իսահակին և Աբրահամին տված իմ խոստումը, կհիշեմ նաև այն երկիրը, ⁴³ որը, լքվելով նրանց կողմից, պիտի վայելի իր շաբաթները, քանի որ այն ավերակ էր դարձել իր բնակիչների պատճառով։ Նրանք պիտի պատժվեն իրենց կատարած անօրենությունների համար այն բանի փոխարեն, որ արհամարհեցին իմ պատվիրանները, և իմ հրամանները նրանց համար տաղտկալի դարձան։ ⁴⁴ Երբ նրանք իրենց թշնամիների երկրում էին, ես նրանց անտես չարեցի և ոչ էլ զզվեցի նրանցից՝ նրանց ոչնչացնելու և նրանց հետ իմ կապած ուխտը լուծելու համար, քանզի ես եմ Տերը՝ նրանց Աստվածը։ ⁴⁵ Ես կհիշեմ նրանց հետ կապած իմ նախկին ուխտը, երբ բոլոր հեթանոս ժողովուրդների աչքի առաջ նրանց հանում էի եգիպտացիների երկրից՝ ստրկության բնակավայրից, որպեսզի լինեմ նրանց Աստվածը, քանզի ես եմ Տերը»։

⁴⁶ Սրանք են այն պատգամները, հրամաններն ու օրենքները, որը Տերը Սինա լեռան վրա Մովսեսի միջոցով հաստատեց իր և Իսրայելի որդիների միջև։

27

Օրենքներ՝ Աստծուն տրվելիք նվերների համար

¹ Տերն ասաց Մովսեսին. ² «Խոսի՛ր Իսրայելի որդիների հետ և ասա՛ նրանց. “Եթե մեկն ուխտ անի Տիրոջը, ապա իր անձի համար պիտի վճարի Տիրոջը. ³ տղամարդու պարագայում՝ քսան տարեկանից մինչև վաթսուն տարեկանը, սրբարանի կշռաչափի հիսուն երկդրամյան արծաթ։ ⁴ Կնոջ դեպքում՝ երեսուն երկդրամյան։ ⁵ Հինգ տարեկանից մինչև քսան տարեկան արուի դեպքում՝ քսան երկդրամյան, իսկ նույն տարիքի աղջկա դեպքում՝ տասը երկդրամյան։ ⁶ Մեկ ամսականից մինչև հինգ տարեկան արուի դեպքում՝ հինգ երկդրամյան արծաթ, իսկ նույն տարիքի աղջկա դեպքում՝ երեք երկդրամյան արծաթ։ ⁷ Եթե վաթսուն տարեկանից բարձր է տղամարդը, նրա գինն է տասնհինգ երկդրամյան արծաթ, իսկ նույն տարիքի կնոջը՝ տասը երկդրամյան։ ⁸ Եթե որևէ մեկն աղքատ լինի՝ վճարելու այդ գինը, նա պետք է դիմի քահանային, և քահանան նրա գինը թող նվազեցնի։ Ինչ կարողություն որ ունի ուխտ անողը, ըստ այդմ էլ նրա համար գին թող նշանակի քահանան։

⁹ Եթե ուխտը վերաբերում է զոհի համար ընդունելի կենդանիներին, ապա Տիրոջն ընծայված ամեն կենդանի սուրբ է։ ¹⁰ Լավը վատի հետ թող չփոխի, ոչ էլ վատը՝ լավի։ Եթե իր ուխտած կենդանին փոխանակի մեկ այլ կենդանիով, ապա երկու կենդանիներն էլ թող սուրբ լինեն։ ¹¹ Եթե ուխտածն անմաքուր կենդանի է՝ ոչ ենթակա Տիրոջն ընծա մատուցվելու, այդ կենդանին թող բերի քահանայի առաջ, ¹² քահանան, ըստ լավի ու վատի, թող գնահատի այն։ Ինչպես որ քահանան գնահատի, այդպես էլ թող լինի։ ¹³ Իսկ եթե ուխտ անողը ցանկանա կենդանու փոխարեն վճարել նրա արժեքը, ապա դրա վրա պետք է ավելացնի նաև որոշված արժեքի մեկ հինգերորդ մասը։

¹⁴ Եթե մեկը ցանկանա իր տունը նվիրել Տիրոջը, քահանան թող գին սահմանի՝ նկատի ունենալով տան լավ կամ վատ վիճակը. քահանայի գնահատումը վերջնական թող լինի։ ¹⁵ Իսկ եթե նվիրաբերողը ցանկանա հետ գնել իր տունը, ապա տան արժեքի վրա թող ավելացնի դրա մեկ հինգերորդ մասը, և տունն իրենը կլինի։

¹⁶ Եթե մեկն իր կալվածքը հանդիսացող ագարակն է ուխտում նվիրել Տիրոջը, ապա դրա արժեքը թող լինի ըստ դրա վրա ցանված սերմի։ Մեկ քոռ սերմի համար թող վճարի հիսուն երկդրամյան արծաթ։ ¹⁷ Եթե ագարակը նվիրաբերի ազատագրման տարվանից, նրա ամբողջ արժեքը պետք է հաշվվի։ ¹⁸ Իսկ եթե իր ագարակը նվիրաբերում է ազատագրման տարուց հետո, ապա քահանան պետք է հաշվի արժեքը՝ ըստ մինչև հաջորդ ազատագրման տարին ընկած տարիների քանակի, և հանվի նրա ընդհանուր արժեքից։ ¹⁹ Եթե ագարակը նվիրողը ցանկանա այն հետ գնել, դրա գնի վրա թող ավելացնի գնահատվածի մեկ հինգերորդ չափով արծաթ, որից հետո ագարակը կլինի իրենը։ ²⁰ Իսկ եթե հետ չգնի իր ագարակը, այլ վաճառի մի ուրիշ մարդու, ապա այն հետ գնելու իրավունք այլևս չի ունենա։ ²¹ Ազատագրման տարում այն թող նվիրվի Տիրոջը և դառնա քահանայի սեփականություն։ ²² Եթե նա իր ժառանգությունը չհանդիսացող, այլ դրամով գնած ագարակից նվիրաբերի Տիրոջը, ²³ թող քահանան գնահատի այն՝ ըստ մինչև ազատագրման տարին մնացած տարիների, և հետ գնել ցանկացողն այդ օրը Տիրոջը թող վճարի որոշված արժեքը։ ²⁴ Ազատագրման տարում կալվածքի նախկին տերն այն հետ պիտի ստանա։

²⁵ Բոլոր գները պիտի սահմանվեն ըստ սրբարանի կշռաչափի. մեկ երկդրամյանը քսան դանգի համարժեք թող լինի։ ²⁶ Քո անասունների բոլոր առաջին ծնունդները Տիրոջն են պատկանում։ Այն ոչ ոք չի կարող նվիրաբերել. լինի դա արջառ թե ոչխար, պատկանում է Տիրոջը։ ²⁷ Անմաքուր չորքոտանի կենդանին կարող է հետ գնվել՝ դրա արժեքի վրա ավելացնելով մեկ հինգերորդը, որից հետո կպատկանի իրեն։ Իսկ եթե հետ չգնի, ապա թող վաճառվի իր արժեքով։ ²⁸ Իսկ ամեն մի նվեր, որ մարդ իր ունեցած ամեն ինչից տալիս է Տիրոջը՝ լինի դա մարդ թե անասուն կամ սեփական կալվածք, չի կարող վաճառվել կամ հետ գնվել։ Նման բոլոր նվիրաբերումները սրբություն սրբոց են և պատկանում են Տիրոջը։ ²⁹ Մարդկանցից ով նվիրաբերվի, չի կարող հետ գնվել, այլ անպայման պիտի մեռնի։

³⁰ Հողի բերքի՝ ցանքսի արդյունքի և ծառերի պտուղների մեկ տասներորդ մասը Տիրոջն է պատկանում՝ իբրև Տիրոջ սրբություն։ ³¹ Եթե մեկը ցանկանա հետ գնել իր տասանորդը, նա պետք է դրա վրա ավելացնի դրա արժեքի մեկ հինգերորդ մասը, որից հետո տասանորդը կլինի իրենը։ ³² Տասը արջառից ու ոչխարից մեկը, ինչպես նաև հովվի գավազանի տակ հաշվված տասը անասունից մեկը պատկանում են Տիրոջը։ ³³ Խտրություն թող չլինի լավի ու վատի միջև, և լավը վատով չփոխարինես։ Իսկ եթե այնուամենայնիվ փոխարինես, և՛ այն, և՛ փոխարինվողը պետք է նվիրաբերես և իրավունք չպիտի ունենաս դրանք հետ գնելու”»։

³⁴ Սրանք են այն պատվիրանները, որ Տերը Սինա լեռան վրա Մովսեսի միջոցով հաղորդեց Իսրայելի որդիներին։

ԹՎԵՐ

1

Իսրայելի առաջին մարդահամարը

¹ Եգիպտացիների երկրից նրանց դուրս գալու երկրորդ տարվա երկրորդ ամսի առաջին օրը Սինայի անապատում՝ Վկայության խորանում, Տերը խոսեց Մովսեսի հետ և ասաց. ² «Հաշվառե՛ք Իսրայելի որդիների ողջ ժողովրդին ըստ ցեղերի, ըստ նահապետական տների, անուն առ անուն, մեկ առ մեկ։ ³ Դու և Ահարոնը հաշվառմա՛ն ենթարկեք քսանամյա և ավելի բարձր տարիք ունեցող բոլոր տղամարդկանց, Իսրայելի բոլոր զինապարտներին իրենց զորախմբերով։ ⁴ Ձեզ հետ ամեն ցեղից նահապետական մի տան իշխան թող լինի։ ⁵ Սրանք են այն մարդկանց անունները, որ պիտի օգնեն ձեզ.

Ռուբենի ցեղից՝ Սեդիուրի որդի Եղիսուրը,

⁶ Շմավոնի ցեղից՝ Սուրիսադայի որդի Սաղամիելը,

⁷ Հուդայի ցեղից՝ Ամինադաբի որդի Նաասովնը,

⁸ Իսաքարի ցեղից՝ Սովգարի որդի Նաթանայելը,

⁹ Զաբուղոնի ցեղից՝ Քելոնի որդի Եղիաբը,

¹⁰ Հովսեփի որդիներից Եփրեմի ցեղից՝ Եմիուդի որդի Եղիսաման,

Մանասեի ցեղից՝ Փադասուրի որդի Գամաղիելը,

¹¹ Բենիամինի ցեղից՝ Գեդեոնի որդի Աբիդանը,

¹² Դանի ցեղից՝ Ամիսադայի որդի Աքիեզերը,

¹³ Ասերի ցեղից՝ Եքրանի որդի Փագեելը,

¹⁴ Գադի ցեղից՝ Ռագուելի որդի Եղիսափանը,

¹⁵ Նեփթաղիմի ցեղից՝ Ենանի որդի Աքիրեն»։

¹⁶ Սրանք ընտրվեցին ժողովրդից՝ ըստ նահապետական տների, որպես ցեղերի իշխաններ և Իսրայելի հազարապետներ։ ¹⁷ Մովսեսն ու Ահարոնը վերցրին անվանապես կանչված այս մարդկանց ¹⁸ և երկրորդ տարվա երկրորդ ամսի առաջին օրը հավաքելով ողջ ժողովրդին՝ հաշվառեցին ըստ ցեղերի, ըստ նահապետական տների, անուն առ անուն, մեկ առ մեկ քսան տարեկան և ավելի բարձր տարիք ունեցող արական սեռի բոլոր մարդկանց։ ¹⁹ Ինչպես որ Տերը հրամայել էր Մովսեսին, հաշվառումը կատարեցին Սինայի անապատում։

²⁰ Ռուբենի՝ Իսրայելի անդրանիկի որդիները եղան ²¹ 46,500 հոգի։

²² Շմավոնի որդիները՝ ²³ 59,300 հոգի։

²⁴ Հուդայի որդիները՝ ²⁵ 74,600 հոգի։

²⁶ Իսաքարի որդիները՝ ²⁷ 54,400 հոգի։

²⁸ Զաբուղոնի որդիները՝ ²⁹ 57,400 հոգի։

³⁰ Հովսեփի որդիներից Եփրեմի որդիները՝ ³¹ 40,500 հոգի։

³² Իսկ Մանասեի որդիները՝ ³³ 32,300 հոգի։

³⁴ Բենիամինի որդիները՝ ³⁵ 35,400 հոգի։

³⁶ Գադի որդիները՝ ³⁷ 45,650 հոգի։

³⁸ Դանի որդիները՝ ³⁹ 62,700 հոգի։

⁴⁰ Ասերի որդիները՝ ⁴¹ 41,500 հոգի։

⁴² Նեփթաղիմի որդիները՝ ⁴³ 53,400 հոգի։

⁴⁴ Այս է այն հաշվառումը, որ կատարեցին Մովսեսը, Ահարոնն ու Իսրայելի իշխանները՝ տասներկու այրերը, ամեն մի ցեղից մեկը՝ ըստ իրենց նահապետական տների։ ⁴⁵ Կատարվեց Իսրայելի որդիների քսան և ավելի բարձր տարիք ունեցող բոլոր զինապարտների ամբողջական հաշվառումը։ ⁴⁶ Հաշվառման ենթարկվածների ընդհանուր թիվը՝ 603,650 հոգի։ ⁴⁷ Բայց ղևտացիները՝ իրենց նահապետական տներով, Իսրայելի որդիների հետ չհաշվառվեցին։

Ղևտացիների կարգավիճակը

⁴⁸ Տերն խոսեց Մովսեսի հետ և ասաց. ⁴⁹ «Տե՛ս, Ղևիի ցեղը նրանց հետ չհաշվառես, և նրանց թիվն Իսրայելի որդիների թվի մեջ չառնես։ ⁵⁰ Ղևտացիներին վերակացո՛ւ կարգիր Վկայության խորանի, նրա ողջ սպասքի և նրանում գտնվող ամենի ինչի վրա։ Նրանք ուսերի վրա պիտի տանեն խորանն ու նրա ողջ սպասքը, նրանք թող ծառայեն խորանում և բնակվեն նրա շուրջը։ ⁵¹ Մեկնելիս խորանը թող ղևտացիներն իջեցնեն, բանակելիս խորանը թող ղևտացիները կանգնեցնեն։ Կողմնակի մեկը, որ մերձենա դրան, թող մեռնի։ ⁵² Իսրայելի որդիները թող բանակեն ըստ իրենց կարգի և պատկանելության՝ իրենց զորախմբերի հետ։ ⁵³ Իսկ ղևտացիները թող բանակեն Վկայության խորանի շուրջը՝ Տիրոջ առջև, որպեսզի Իսրայելի որդիները չմեղանչեն՝ խորանին դիպչելով, ղևտացիները թող պահպանեն Վկայության խորանը»։ ⁵⁴ Եվ Իսրայելի որդիները վարվեցին այնպես, ինչպես որ Տերը պատվիրեց Մովսեսին ու Ահարոնին։

2

Ցեղերին տրված կարգադրությունը իջևանում

¹ Տերը խոսեց Մովսեսի և Ահարոնի հետ և ասաց. ² «Յուրաքանչյուր մարդ թող իր գնդի դրոշակի տակ քայլի՝ ըստ իր նահապետական տան։ Իսրայելի որդիները թող բանակեն ըստ իրենց բանակատեղիի կարգի։

³ Արևելյան կողմում նախ թող Հուդայի ցեղը բանակի իր զորքով, և Հուդայի որդիների իշխանը Ամինադաբի որդի Նաասովնը լինի։ ⁴ Նրա զորքում հաշվառված է 74,600 մարդ։ ⁵ Ապա թող բանակի Իսաքարի ցեղը, և Իսաքարի որդիների իշխանը Սովգարի որդի Նաթանայելը լինի։ ⁶ Նրա զորքում հաշվառված է 54,400 մարդ։ ⁷ Նրանց կողքին թող բանակի Զաբուղոնի ցեղը, և Զաբուղոնի որդիների իշխանը Քելոնի որդի Եղիաբը լինի։ ⁸ Նրա զորքում հաշվառված է 57,400 մարդ։ ⁹ Այս բոլորը կազմում են Հուդայի բանակը՝ 186,400. իրենց զորքով առաջինը թող գնան։

¹⁰ Ռուբենի բանակը թող հարավային կողմում հաստատվի իր գնդով, և Ռուբենի որդիների իշխանը Սեդիուրի որդի Եղիսուրը լինի։ ¹¹ Նրա զորքում հաշվառված է 46,500 մարդ։ ¹² Նրանց կողքին թող բանակի Շմավոնի ցեղը, և Շմավոնի որդիների իշխանը Սուրիսադայի որդի Սաղամիելը լինի։ ¹³ Նրա զորքում հաշվառված է 59,300 մարդ։ ¹⁴ Նրանց կողքին թող բանակի Գադի ցեղը, և Գադի որդիների իշխանը Ռագուելի որդի Եղիսափանը լինի։ ¹⁵ Նրա զորքում հաշվառված է 45,650 մարդ։ ¹⁶ Այս բոլորը կազմում են Ռուբենի բանակը՝ 151,450 մարդ. իրենց զորքով երկրորդը թող գնան։

¹⁷ Այնուհետև պիտի շարժվի Վկայության խորանը և ղևտացիների խումբը՝ բանակների մեջտեղում. ինչպես որ բանակում են, այնպես էլ թող գնան՝ յուրաքանչյուրն ըստ իր կարգի՝ միմյանց հետևից։

¹⁸ Եփրեմի բանակը թող ծովի կողմում հաստատվի իր զորքով հանդերձ, և Եփրեմի որդիների իշխանը Եմիուդի որդի Եղիսաման լինի։ ¹⁹ Նրա զորքում հաշվառված է 40,500 մարդ։ ²⁰ Նրանցից հետո թող բանակի Մանասեի ցեղը, և Մանասեի որդիների իշխանը Փադասուրի որդի Գամաղիելը լինի։ ²¹ Նրա զորքում հաշվառված է 32,300 մարդ։ ²² Նրանցից հետո բանակողը Բենիամինի գունդը թող լինի, և Բենիամինի որդիների իշխանը Գեդեոնի որդի Աբիդանը լինի։ ²³ Նրա զորքում հաշվառված է 35,400 մարդ։ ²⁴ Այս բոլորը կազմում են Եփրեմի բանակը՝ 180,200 մարդ. իրենց զորքով երրորդը թող գնան։

²⁵ Դանի բանակը թող հյուսիսային կողմում հաստատվի իր զորքով հանդերձ, և Դանի որդիների իշխանը Ամիսադայի որդի Աքիեզերը լինի։ ²⁶ Նրա զորքում հաշվառված է 62,700 մարդ։ ²⁷ Նրանցից հետո բանակողը Ասերի ցեղը թող լինի, և Ասերի որդիների իշխանը Եքրանի որդի Փագեելը լինի։ ²⁸ Նրա զորքում հաշվառված է 41,500 մարդ։ ²⁹ Նրանցից հետո բանակողը Նեփթաղիմի ցեղը թող լինի, և Նեփթաղիմի որդիների իշխանը Ենանի որդի Աքիրեն լինի։ ³⁰ Նրա զորքում հաշվառված է 53,400 մարդ։ ³¹ Այս բոլորը կազմում են Դանի բանակը՝ 157,600 մարդ, իրենց զորքով վերջինը թող գնան՝ ըստ իրենց գնդերի»։

³² Այս է Իսրայելի որդիների հաշվառումը՝ ըստ իրենց նահապետական տների, բանակների ամբողջական հաշվառումով, իրենց զորախմբերով հանդերձ՝ 603,650 մարդ։

³³ Ղևտացիները, սակայն, նրանց հետ չհաշվառվվեցին, ինչպես որ Տերը պատվիրել էր Մովսեսին։

³⁴ Իսրայելի որդիներն արեցին այն ամենը, ինչ Տերը հրամայել էր Մովսեսին։ Նրանք բանակում էին ըստ իրենց գնդերի և մեկնում՝ յուրաքանչյուրն իր զորախմբի հետ, ըստ իրենց նահապետական տների։

3

Ահարոնի որդիները

¹ Այն օրը, երբ Տերը Սինա լեռան վրա խոսեց Մովսեսի հետ, Ահարոնի որդիները սրանք էին. ² Ահարոն քահանայի որդիների անուններն էին՝ Նադաբ, որ անդրանիկն էր, Աբիուդ, Եղիազար և Իթամար։ ³ Սրանք են Ահարոնի որդիները՝ օծված քահանաներ, որոնց սրբագործեցին քահանայագործելու համար։ ⁴ Սակայն Նադաբն ու Աբիուդը վախճանվեցին, երբ Սինայի անապատում հակականոնական կրակ մատուցեցին Տիրոջը։ Սրանք զավակներ չունեին։ Իրենց հոր՝ Ահարոնի հետ քահանայագործեցին Եղիազարն ու Իթամարը։

Ղևտացիները կարգվում են ծառայության

⁵ Տերը խոսեց Մովսեսի հետ և ասաց. ⁶ «Վերցրո՛ւ Ղևիի ցեղին և կարգի՛ր Ահարոն քահանայի առջև, որ օգնեն նրան. ⁷ նրա ու Իսրայելի որդիների փոխարեն պահպանեն Վկայության խորանն ու ծառայեն դրան՝ կատարելով խորանի բոլոր աշխատանքները։ ⁸ Նրանք թող պահպանեն Վկայության խորանի ամբողջ սպասքը և Իսրայելի որդիներին անհրաժեշտ խորանի ողջ ծառայությունը։ ⁹ Ղևտացիներին կկարգես քո եղբայր Ահարոնի ու նրա որդիների՝ քահանաների իշխանության տակ՝ իբրև Իսրայելի որդիներից ինձ տրված ընծա։ ¹⁰ Ահարոնին ու նրա որդիներին կհանձնես Վկայության խորանի՝ ինչպես զոհասեղանին, այնպես էլ վարագույրից ներս կատարվելիք ծիսական պարտականությունները։ Եթե օտար մեկը մոտենա նրան, թող մեռնի»։

¹¹ Տերը խոսեց Մովսեսի հետ և ասաց. ¹² «Ես ահա վերցրի ղևտացիներին Իսրայելի որդիների միջից՝ Իսրայելի որդիների՝ արգանդ բացող բոլոր անդրանիկների փոխարեն. թող լինեն նրանց փրկագինը և ինձ պատկանեն, ¹³ որովհետև բոլոր անդրանիկներն իմն են։ Այն օրը, երբ եգիպտացիների երկրում կոտորեցի բոլոր անդրանիկներին, Ինձ համար առանձնացրի Իսրայելի բոլոր անդրանիկներին՝ մարդուց մինչև անասուն, որովհետև ես եմ Տերը»։

Ղևտացիների մարդահամարը

¹⁴ Տերը Սինայի անապատում խոսեց Մովսեսի հետ և ասաց. ¹⁵ «Հաշվառի՛ր Ղևիի որդիներին՝ ըստ իրենց նահապետական տների, ըստ իրենց տոհմերի, ըստ իրենց ընտանիքների։ Հաշվառի՛ր մեկ ամսականից սկսած բոլոր արուներին»։ ¹⁶ Եվ Մովսեսն ու Ահարոնը հաշվառեցին նրանց ըստ Տիրոջ խոսքի, այնպես, ինչպես նրանց հրամայել էր Տերը։

¹⁷ Ղևիի որդիները, ըստ իրենց անունների, սրանք են՝ Գեթսոն, Կահաթ և Մերարի։

¹⁸ Գեթսոնի որդիների անունները, ըստ իրենց տոհմերի, սրանք են՝ Ղոբենի և Սեմեի։

¹⁹ Կահաթի որդիները, ըստ իրենց տոհմերի, սրանք են՝ Ամրամ, Իսահառ, Քեբրոն և Ոզիել։

²⁰ Մերարիի որդիները, ըստ իրենց տոհմերի, սրանք են՝ Մոոլի և Մուսի։

Ղևտացիների գնդերը, ըստ իրենց տոհմերի, սրանք են.

²¹ Գեթսոնինը՝ Ղոբենիի գունդն ու Սեմեիի գունդը։ Սրանք Գեթսոնի գնդերն են։ ²² Մեկ ամսականից սկսած բոլոր արուների հաշվառման թիվը՝ 7,500։ ²³ Գեթսոնի այս գնդերը բանակելու են խորանի հետևում՝ դեպի ծովի կողմը։ ²⁴ Գեթսոնի տոհմի նահապետական տան առաջնորդը Լաելի որդի Եղիսափանն է։ ²⁵ Գեթսոնի որդիները պահպանելու են Վկայության խորանը, խորանի արտաքին ծածկոցը և դռան վարագույրը, ²⁶ բակի առագաստները, բակի մուտքի վարագույրները, ինչպես նաև դրանց բոլոր պարագաները։

²⁷ Կահաթինը՝ Ամրամի գունդը, Իսահառի գունդը, Քեբրոնի գունդը և Ոզիելի գունդը։ Սրանք Կահաթի գնդերն են։ ²⁸ Մեկ ամսականից սկսած բոլոր արուների հաշվառման թիվը՝ 8,300, որոնք և պահպանելու են սրբարանը։ ²⁹ Կահաթի որդիների գնդերը բանակելու են խորանի հարավային կողմում։ ³⁰ Կահաթի գնդերի նահապետների տան առաջնորդը Ոզիելի որդի Եղիսափանն է։ ³¹ Նրանք պահպանելու են տապանակը, սեղանը, աշտանակը, զոհարանները և սրբարանի սպասքը, որով պաշտամունք էին մատուցում, և վարագույրը՝ իր բոլոր պարագաներով։ ³² Սրբարանի պահպանությանը հսկում էր ղևտացիների իշխանաց իշխանը՝ Ահարոն քահանայի որդի Եղիազարը։

³³ Մերարիինը՝ Մոոլիի գունդն ու Մուսիի գունդը։ Սրանք Մերարիի գնդերն են։ ³⁴ Մեկ ամսականից սկսած բոլոր արուների հաշվառման թիվը՝ 6,200։ ³⁵ Մերարիի գնդի նահապետների տան իշխանը Աբիքաիլի որդի Սուրիելն է։ Նրանք բանակելու են խորանի հյուսիսային կողմում։ ³⁶ Մերարիի որդիները պահպանելու են խորանի խոյակները, նիգերը, սյուները, խարիսխներն ու դրանց բոլոր պարագաները, ³⁷ բակի չորս բոլոր սյուները, սրանց խարիսխները, ցցերը և պարանները։

³⁸ Վկայության խորանի դիմաց՝ արևելյան կողմում, թող բանակեն Մովսեսն ու Ահարոնը և նրա որդիները։ Իսրայելի որդիների փոխարեն նրանք են ստանձնելու սրբարանի ծառայությունը։ Եթե օտար մեկը մոտենա նրան, թող մեռնի։

³⁹ Ղևտացիների ողջ հաշվառումով, որ կատարեցին Մովսեսն ու Ահարոնը Տիրոջ հրամանով, ըստ իրենց գնդերի, մեկ ամսականից սկսած բոլոր արուները՝ 22,000 հոգի։

Ղևտացիները՝ անդրանիկների փոխարեն

⁴⁰ Տերը խոսեց Մովսեսի հետ և ասաց. «Հաշվառի՛ր Իսրայելի որդիների՝ մեկ ամսականից սկսած բոլոր արու անդրանիկներին և գրանցի՛ր նրանց թիվն ըստ իրենց անունների։ ⁴¹ Ղևտացիներին, սակայն, ինձ պիտի շնորհես Իսրայելի որդիների բոլոր անդրանիկների փոխարեն, ինչպես և ղևտացիների անասունները՝ Իսրայելի որդիների անասունների առաջին ծնունդների փոխարեն, որովհետև ես եմ Տերը»։ ⁴² Մովսեսը հաշվառեց Իսրայելի որդիների բոլոր անդրանիկներին, ինչպես որ պատվիրել էր Տերը։ ⁴³ Իսրայելի որդիների մեկ ամսականից սկսած արու անդրանիկների թիվը անուն առ անուն՝ 22,273։ ⁴⁴ Տերը խոսեց Մովսեսի հետ և ասաց. ⁴⁵ «Ղևտացիներին Իսրայելի որդիների բոլոր անդրանիկների փոխարեն հանձնիր ինձ, ինչպես նաև ղևտացիների անասունները՝ նրանց անասունների անդրանիկների փոխարեն։ Ղևտացիներն ինձ պիտի պատկանեն, որովհետև ես եմ Տերը։ ⁴⁶ Իսրայելի որդիների 273 անդրանիկների դիմաց, որ գերազանցում են ղևտացիների թվին, փրկագին կվերցնես. ⁴⁷ յուրաքանչյուրի դիմաց՝ հինգ սիկղ՝ ըստ սրբարանում ընդունված սակագնի, ըստ որի՝ մեկ սիկղը հավասար է քսան դանգի։ ⁴⁸ Եվ փրկագնի արծաթը կտաս Ահարոնին ու նրա որդիներին»։ ⁴⁹ Մովսեսը հավաքեց փրկագնի արծաթը ղևտացիների թվից ավելի ⁵⁰ Իսրայելի որդիների անդրանիկների դիմաց՝ հազար երեք հարյուր վաթսունհինգ սիկղ՝ ըստ սրբարանում ընդունված սիկղի չափի։ ⁵¹ Իսրայելի որդիների՝ թվով ավելի անդրանիկների դիմաց ստացած փրկագինը Տիրոջ խոսքի համաձայն Մովսեսը հանձնեց Ահարոնին ու նրա որդիներին, ինչպես որ Տերը հրամայել էր Մովսեսին։

4

Կահաթի որդիների պարտականությունները

(Թվ. 3.31-32)

¹ Տերը խոսեց Մովսեսի և Ահարոնի հետ և ասաց. ² «Ղևիի ցեղի միջից հաշվառի՛ր Կահաթի որդիներին ըստ իրենց գնդերի, ըստ իրենց նահապետական տների՝ ³ քսանհինգից մինչև հիսուն տարեկան բոլորին, ովքեր սպասավորության են մտնելու Վկայության խորանում և կատարելու են բոլոր գործերը։ ⁴ Ղևիի որդիների միջից ըստ իրենց գնդերի, ըստ իրենց նահապետական տների Կահաթի որդիների գործը Վկայության խորանում Սրբություն սրբոցի պահպանությունն է։ ⁵ Տեղափոխվելու ժամանակ Ահարոնն ու իր որդիները թող մտնեն ներս, իջեցնեն հովանի վարագույրը և դրանով ծածկեն Ուխտի տապանակը։ ⁶ Այն թող ծածկեն կաշվե կապույտ ծածկոցով, իսկ դրա վրա կապույտ ձորձ գցեն, և ապա հագցնեն բռնակները։

⁷ Առաջավորության հացի սեղանը թող ծածկեն ծիրանի կերպասով, և դրա վրա դնեն ափսեները, խնկամանները, գավաթները և սափորները, որոնցով կատարում են նվիրաբերումը։ Դրա վրա պիտի լինի նաև հանապազօրյա հացը։ ⁸ Այս ամենը թող ծածկեն կարմիր կերպասով, որի վրա կաշվե կապույտ ծածկոց թող գցեն, և ապա տեղադրեն բռնակները։

⁹ Այնուհետև կապույտ կերպասով թող ծածկեն լույսի աշտանակը, նրա երկու ճրագարանները, նրա բռնակները, նրա ճրագակալները և յուղի բոլոր ամանները, որոնցով պաշտամունք են կատարում։ ¹⁰ Աշտանակն ու նրա մասերը թող ծածկեն կաշվե կապույտ ծածկոցով և դնեն լծակների վրա։

¹¹ Ոսկե զոհասեղանը թող ծածկեն կապույտ կերպասով, դրա վրա կաշվե կապույտ ծածկոց գցեն և ապա տեղադրեն բռնակները։ ¹² Ապա թող վերցնեն պաշտամունքի ողջ սպասքը, որոնցով պաշտամունք են կատարում սրբարանում, պատեն կապույտ կերպասով և ծածկեն կաշվե կապույտ ծածկոցով ու դնեն լծակների վրա։

¹³ Զոհասեղանի վրա թող ծածկոց փռեն, ապա այն ծածկեն ծիրանի կերպասով։ ¹⁴ Ապա թող դրա վրա դնեն զոհասեղանի վրա կատարվող պաշտամունքի սպասքը՝ բուրվառները, մսահանները, տաշտերը, ծածկիչներն ու զոհասեղանի ողջ սպասքը։ Դրա վրա կաշվե կապույտ ծածկոց թող գցեն և տեղադրեն բռնակները։

Ապա ծիրանի կերպասով թող ծածկեն ավազանն ու նրա խարիսխները, դրանց վրա կաշվե կապույտ ծածկոց գցեն և դնեն լծակների վրա։

¹⁵ Երբ Ահարոնն ու նրա որդիները չվելու ժամանակ ավարտեն սրբարանը և դրա ողջ սպասքը ծածկելու գործը, միայն Կահաթի որդիները պիտի ներս մտնեն և վերցնեն դրանք, սակայն սրբություններին չպիտի դիպչեն, որպեսզի չմեռնեն։ Ահա այն ամենը, որ պիտի կրեն Կահաթի որդիները Վկայության խորանից։

¹⁶ Այս ամենի վերակացուն Ահարոն քահանայի որդի Եղիազարն է։ Նա թող հոգա լուսավորության յուղի, բաղադրյալ խնկերի, հանապազօրյա զոհերի և օծության յուղի մասին, հսկի ողջ խորանին ու նրա բոլոր պարագաներին, սրբարանին ու նրա ողջ սպասքին»։

¹⁷ Տերը խոսեց Մովսեսի և Ահարոնի հետ ու ասաց. ¹⁸ «Թող ղևտացիներից Կահաթի տոհմը չվերանա. ¹⁹ այնպե՛ս արեք, որ նրանք ապրեն և Սրբություն սրբոցին մոտենալով՝ չմեռնեն։ Նախ թող Ահարոնն ու նրա որդիները մտնեն ներս և նրանցից յուրաքանչյուրին կարգեն իր բեռը կրելու, ²⁰ որպեսզի անսպասելիորեն ներս չմտնեն և սրբությունները տեսնելով՝ չմեռնեն»։

Գեթսոնի որդիների պարտականությունները

(Թվ. 3.25-26)

²¹ Տերը խոսեց Մովսեսի հետ և ասաց. ²² «Հաշվառի՛ր Գեթսոնի որդիներին ըստ իրենց նահապետական տների, ըստ իրենց գնդերի՝ ²³ քսանհինգից մինչև հիսուն տարեկան բոլորին, ովքեր սպասավորության են մտնելու և կատարելու են Վկայության խորանի գործերը։ ²⁴ Այս է Գեթսոնի գնդի պարտականությունը ծառայելիս և բարձելիս. ²⁵ նրանք թող կրեն խորանի տանիքը, Վկայության խորանը, արտաքին վարագույրները, խորանի վրա գցվող կապույտ ծածկոցը, Վկայության խորանի դռան վարագույրը, ²⁶ բակի վարագույրները, Վկայության խորանի վրա եղող ամեն ինչ, պարանները և այն ամբողջ սպասքը, որով պաշտամունք են կատարում։ ²⁷ Գեթսոնի որդիներն իրենց ողջ ծառայության մեջ, թե ինչ են կրելու և ինչ աշխատանք են անելու, թող հետևեն Ահարոնի ու նրա որդիների ցուցմունքներին. նրանց հաշվառե՛ք անուն առ անուն և ճշտե՛ք յուրաքանչյուրի կրելիքը։ ²⁸ Այս է Գեթսոնի որդիների պարտականությունը Վկայության խորանում, որոնց վերակացուն Ահարոն քահանայի որդի Իթամարն է»։

Մերարիի որդիների պարտականությունները

(Թվ. 3.36-37)

²⁹ «Հաշվառե՛ք Մերարիի որդիներին ըստ իրենց գնդերի, ըստ իրենց նահապետական տների՝ ³⁰ հաշվառե՛ք քսանհինգից մինչև հիսուն տարեկան բոլորին, ովքեր սպասավորության են մտնելու և կատարելու են Վկայության խորանի գործերը։ ³¹ Նրանց պարտականությունն է կրել խորանի խոյակները, նիգերը, նրա սյուները և նրա խարիսխները, խորանի ծածկոցը, նրանց խարիսխներն ու սյուները և խորանի դռան վարագույրը, ³² բակի չորս կողմերի սյուները, դրանց խարիսխները, բակի դռան վարագույրի սյուները և դրանց խարիսխները, ցցերը, պարաններն ու բոլոր բաղադրիչ մասերը։ Հաշվառե՛ք նրանց անուն առ անուն և ճշտե՛ք, թե ի՛նչ պիտի կրի յուրաքանչյուրը։ ³³ Այս է Վկայության խորանում Մերարիի որդիների գնդի պարտականությունն իրենց գործերում, Ահարոն քահանայի որդի Իթամարի հսկողության ներքո»։

Ղևտացիների մարդահամարը

³⁴ Մովսեսը, Ահարոնն ու Իսրայելի իշխանները հաշվառեցին Կահաթի որդիներին ըստ իրենց տոհմերի, ըստ իրենց նահապետական տների՝ ³⁵ քսանհինգից մինչև հիսուն տարեկան բոլորին, ովքեր սպասավորության են մտնելու և կատարելու Վկայության խորանի գործերը։ ³⁶ Ըստ իրենց գնդերի՝ նրանց թիվը՝ 2,750։ ³⁷ Այս է Կահաթի գնդի՝ Վկայության խորանում սպասավորություն կատարող մարդկանց թիվը. հաշվառում, որ կատարեցին Մովսեսն ու Ահարոնը ըստ Տիրոջ՝ Մովսեսին տված հրամանի։

³⁸ Հաշվառվեցին նաև Գեթսոնի որդիներն ըստ իրենց գնդերի, ըստ իրենց նահապետական տների՝ ³⁹ քսանհինգից մինչև հիսուն տարեկան բոլորին, ովքեր սպասավորության են մտնելու և կատարելու են Վկայության խորանի գործերը։ ⁴⁰ Ըստ իրենց գնդերի, ըստ իրենց նահապետական տների՝ նրանց թիվը՝ 2,630։ ⁴¹ Այս է Գեթսոնի որդիների գնդի՝ Վկայության խորանում սպասավորություն կատարող մարդկանց թիվը. հաշվառում, որ կատարեցին Մովսեսն ու Ահարոնը ըստ Տիրոջ՝ Մովսեսին տված հրամանի։

⁴² Հաշվառվեցին նաև Մերարիի որդիներն ըստ իրենց գնդերի, ըստ իրենց նահապետական տների՝ ⁴³ քսանհինգից մինչև հիսուն տարեկան բոլորին, ովքեր սպասավորության են մտնելու և կատարելու են Վկայության խորանի գործերը։ ⁴⁴ Ըստ իրենց գնդերի, ըստ իրենց նահապետական տների՝ նրանց թիվը՝ 3,200։ ⁴⁵ Այս է Մերարիի որդիների գնդի մարդկանց թիվը. հաշվառում, որ կատարեցին Մովսեսն ու Ահարոնը ըստ Տիրոջ՝ Մովսեսին տված հրամանի։

⁴⁶ Մովսեսի, Ահարոնի ու Իսրայելի իշխանների կատարած հաշվառման արդյունքում բոլոր ղևտացիների թիվն ըստ իրենց տոհմերի, ըստ իրենց նահապետական տների՝ ⁴⁷ քսանհինգ տարեկանից մինչև հիսուն տարեկան, բոլորին, ովքեր սպասավորության են մտնելու Վկայության խորանում և կրելու են այն, ⁴⁸ հաշվառվեցին 8,580 հոգի։ ⁴⁹ Տիրոջ հրամանի համաձայն՝ Մովսեսի ձեռքով նրանք հաշվառվեցին, և յուրաքանչյուրին տրվեց իր կատարելիք սպասավորությունն ու մատնանշվեց իր փոխադրելիքը։ Նրանք հաշվառվեցին ըստ Մովսեսին տրված Տիրոջ հրամանի։

5

Անմաքուր մարդկանց արտաքսումը

¹ Տերը խոսեց Մովսեսի հետ և ասաց. ² «Հրամայի՛ր Իսրայելի որդիներին, որ բանակատեղիից արտաքսեն բոլոր բորոտներին, սերմի ծորում ունեցող բոլոր մարդկանց և բոլոր նրանց, ովքեր, դիակի ձեռք տալով, պիղծ են դարձել, ³ տղամարդ լինեն թե կին, բանակատեղիից արտաքսե՛ք նրանց, որպեսզի չպղծեն բանակատեղիները, որտեղ ե՛ս եմ բնակվում»։ ⁴ Այդպես էլ արեցին Իսրայելի որդիները. բանակատեղիից արտաքսեցին նրանց։ Ինչպես Տերը հրամայել էր Մովսեսին, այդպես էլ արեցին Իսրայելի որդիները։

Հատուցում սխալների փոխարեն

⁵ Տերը խոսեց Մովսեսի հետ և ասաց. ⁶ «Խոսի՛ր Իսրայելի որդիների հետ և ասա՛. “Տղամարդ կամ կին, որը մարդկային որևէ մեղք գործի, և դրանով արհամարհի Տիրոջ պատվիրանները և հանցավոր դառնա, ⁷ թող խոստովանի իր մեղքը, թող տուժածին հատուցի ամբողջ վնասը՝ մեկ հինգերորդ մասով ավելի։ ⁸ Եթե վնասի հատուցում ստացող չլինի, ապա հատուցումը թող ընծայվի Տիրոջը և պատկանի քահանային, բացի քավության խոյից, որով նա պետք է քավի իր մեղքը։

⁹ Իսրայելի որդիների՝ Տիրոջը մատուցած բոլոր տեսակի պտուղները թող քահանային պատկանեն։ ¹⁰ Ամեն մարդու սրբագործվածը իրենը թող լինի, իսկ եթե մեկն ընծա տա քահանային, նրան թող պատկանի”»։

Օրենքներ պղծության և խանդի մասին

¹¹ Տերը խոսեց Մովսեսի հետ և ասաց. ¹² «Խոսի՛ր Իսրայելի որդիների հետ և ասա՛ նրանց. “Եթե մեկի կինը հանցանք գործի՝ դավաճանելով նրան, ¹³ եթե մեկը կենակցի նրա հետ սերմի արձակումով, եթե անգամ այդ վրիպի ամուսնու աչքից, թաքուն մնա, վկա չլինի ու կինն էլ հղի չմնա, միևնույն է, կինը պղծված է։

¹⁴ Եթե խանդի ոգին տիրի մեկին, և նա խանդի իր կնոջը, բայց կինը մաքուր լինի, կամ եթե խանդի ոգին տիրի մեկին, ու նա խանդի իր կնոջը, և կինը պղծված լինի, ¹⁵ երկու դեպքում էլ ամուսինն իր կնոջը թող տանի քահանայի մոտ և նրա համար մեկ տասներորդ գրիվ գարու ալյուր մատուցի՝ առանց վրան յուղ լցնելու և կնդրուկ դնելու, որովհետև դա խանդի ընծայաբերում է, հիշատակի ընծայաբերում, մեղքը հիշեցնող ընծայաբերում։ ¹⁶ Քահանան կնոջը թող բերի և կանգնեցնի Տիրոջ առջև, ¹⁷ խեցե ամանով աղբյուրից հոսող մաքուր ջուր վերցնի և Վկայության խորանի հատակի հողից վերցնելով՝ լցնի ջրի մեջ։ ¹⁸ Քահանան կնոջը թող կանգնեցնի Տիրոջ առջև, մերկացնի նրա գլուխը, նրա ձեռքը տա հիշատակի զոհը՝ խանդի զոհը։ Քահանան, իր ձեռքին ունենալով նզովքի հանդիմանության ջուրը, ¹⁹ թող երդվեցնի կնոջը և ասի նրան. “Եթե ուրիշի հետ չես կենակցել, հանցանք չես գործել՝ ամուսնուդ դավաճանելով, ապա անմասն լինես նզովքի հանդիմանության այս ջրից։ ²⁰ Իսկ եթե ամուսնուդ իշխանության տակ լինելով՝ հանցանք ես գործել և պղծվել ես՝ ամուսնուդ փոխարեն ուրիշի սերմը ընդունելով”,- ²¹ քահանան թող երդվեցնի կնոջը այս նզովքի երդմամբ և ասի նրան. “Տերը թող քեզ նզովքի ու երդման արժանացնի քո ժողովրդի մեջ՝ քայքայելով քո զիստերը և ուռեցնելով քո որովայնը։ ²² Նզովքի ջուրը թող լցվի քո որովայնը, ուռեցնի քո որովայնը և քայքայի քո զիստերը”։ Կինը թող պատասխանի. “Թող լինի, թող լինի”։ ²³ Քահանան այս նզովքը թող գրի առնի, ապա այդ գրվածքը ջնջի-մաքրի նզովքի հանդիմանության ջրի մեջ, ²⁴ ապա նզովքի հանդիմանության այդ ջուրը թող տա կնոջը խմելու, որպեսզի նրա մեջ լցվի նզովքի հանդիմանության ջուրը։ Խմելուց առաջ ²⁵ քահանան կնոջ ձեռքից թող վերցնի խանդի զոհը, դնի այն Տիրոջ առջև և մատուցի զոհասեղանին։ ²⁶ Քահանան բռով թող վերցնի նրա հիշատակի զոհից և դնի զոհասեղանին։ Դրանից հետո կնոջը թող խմել տա հանդիմանության ջուրը։ ²⁷ Եթե իրոք պղծված է, և նա իր արարքը թաքցրել է ամուսնուց, ապա նզովքի հանդիմանության ջուրը թող մտնի նրա մեջ, ուռեցնի նրա որովայնը, քայքայի նրա զիստերը, և կինը նզովված լինի իր ժողովրդի մեջ։ ²⁸ Իսկ եթե կինը պղծված չէ, մաքուր է, ապա թող նա արդարացվի և ստանա իր ամուսնու սերմը։ ²⁹ Այս է խանդի օրենքը, երբ կինը, ամուսնու իշխանության տակ լինելով, պղծվի ³⁰ կամ երբ խանդի զգացում տիրի տղամարդուն, և նա խանդի իր կնոջը։ Այս դեպքում նա կնոջը պիտի կանգնեցնի Տիրոջ առջև, իսկ քահանան նրա նկատմամբ պետք է կիրառի այս օրենքը։ ³¹ Եթե կինը հանցավոր լինի, այդ դեպքում ամուսինը թող անպարտ լինի, իսկ կինը թող կրի իր գործած մեղքի պատասխանատվությունը”»։

6

Ուխտյալների կանոններ

¹ Տերը խոսեց Մովսեսի հետ և ասաց. ² «Խոսի՛ր Իսրայելի որդիների հետ և ասա՛ նրանց. “Եթե մի տղամարդ կամ մի կին ուխտի իրեն նվիրել Տիրոջը, ³ պետք է հրաժարվի գինուց և ցքիից, գինու քացախ կամ ցքիի քացախ չպետք է խմի, և խաղողից պատրաստված որևէ բան չպետք է խմի, թարմ խաղող և չամիչ չպետք է ուտի։ ⁴ Իր ուխտի ողջ ընթացքում նա որթատունկից ստացվող ոչ մի բան չպետք է օգտագործի՝ ո՛չ գինի, ո՛չ էլ չամիչից մինչև կորիզ։ ⁵ Իր ուխտի ողջ ընթացքում իր գլխին ածելի չպետք է կպցնի, մինչև Տիրոջն ուխտած օրերը վերջանալը նա մաքուր պետք է մնա՝ իր գլխի մազերն աճեցնելով ⁶ Տիրոջն ուխտած բոլոր օրերին։ Մահացածին չպետք է դիպչի՝ ⁷ ո՛չ հորը կամ մորը, ո՛չ եղբորը կամ քրոջը։ Նրանց մահվան ժամանակ նրանցով թող չպղծվի, որովհետև Տիրոջն արած ուխտը իր գլխի վրա է։ ⁸ Իր ուխտի բոլոր օրերին նա սուրբ պետք է լինի Տիրոջ համար։ ⁹ Իսկ եթե որևէ մեկը հանկարծ մեռնի իր առջև, ապա անմիջապես կպղծվի նրա ուխտյալ գլուխը. այդ օրն իսկ նա պետք է ածիլի իր գլուխն ու մաքրվի. յոթերորդ օրը նորից թող ածիլվի։ ¹⁰ Իսկ ութերորդ օրը նա քահանայի մոտ՝ Վկայության խորանի դուռը, թող բերի երկու տատրակ կամ աղավնու երկու ձագ։ ¹¹ Քահանան մեկը թող մատուցի որպես մեղքերի քավության զոհ, իսկ մյուսը՝ ողջակեզի զոհ։ Այդպիսով քահանան թող քավի նրա մեղքը, որ ձեռք էր բերել դիակի հետ շփվելուց, և նույն օրն իսկ ենթական թող կրկին սրբագործի իր գլուխը ¹² և կրկին Տիրոջը նվիրվելու ուխտ անի։ Եվ մեկ տարեկան գառ թող նվիրաբերի իր մեղքերի քավության համար։ Իր ուխտին նախորդած օրերը հաշվի չպիտի առնվեն, որովհետև նրա ուխտ արած գլուխը պղծվեց”։

¹³ Այս է ուխտյալին վերաբերող օրենքը. երբ վերջանան նրա ուխտի օրերը, նա թող Վկայության խորանի դուռը գա ¹⁴ և Տիրոջը մատուցի իր նվերը՝ արատ չունեցող մեկ տարեկան գառ՝ ողջակեզի համար, արատ չունեցող մեկ տարեկան էգ գառ՝ մեղքերի քավության համար, և արատ չունեցող մի խոյ՝ իբրև փրկության զոհ, ¹⁵ մի զամբյուղ նաշիհի բաղարջ հաց, ձիթայուղով շաղված բլիթներ և յուղով հունցված բաղարջ հացիկներ, իրենց ընծաները և իրենց նվերները։ ¹⁶ Քահանան այս բոլորը թող դնի Տիրոջ առջև, կատարի մեղքերի քավության և ողջակեզի զոհերը։ ¹⁷ Այնուհետև թող Տիրոջը մատուցի խոյը՝ իբրև փրկության զոհ՝ բաղարջ հացի զամբյուղի հետ։ Ապա քահանան թող ընծայաբերի նրա ընծաները և նվերները։ ¹⁸ Վկայության խորանի մուտքի մոտ ուխտավորը թող ածիլի ուխտ արած իր գլուխը և մազը գցի այն կրակի մեջ, որի վրա փրկության զոհն է։ ¹⁹ Ապա քահանան թող վերցնի խոյի եփված թևը, զամբյուղից մի բաղարջ հաց ու մի բաղարջ կարկանդակ և դնի ուխտավորի ձեռքերի մեջ, երբ նա ածիլած կլինի իր գլուխը։ ²⁰ Քահանան այն թող ընծայաբերի Տիրոջ առջև. դրանք պատկանում են քահանային՝ ընծայի կրծքի ու ազդրի հետ միասին։ Դրանից հետո ուխտյալը թող խմի գինին։ ²¹ Ահա այս է իրեն Տիրոջը ուխտած մարդու և նրա ընծայի մասին օրենքը։ Իսկ եթե ուխտել է ավելին անել, թող կատարի իր խոստացածը»։

Քահանայական օրհնություն

²² Տերը խոսեց Մովսեսի հետ և ասաց. ²³ «Խոսի՛ր Ահարոնի ու նրա որդիների հետ և ասա՛. “Երբ օրհնեք Իսրայելի որդիներին, ասե՛ք նրանց. Այսպիսով, կկոչեն իմ անունը Իսրայելի որդիների համար, և ես՝ Տերս, կօրհնեմ նրանց։ ²⁴ Տերն օրհնի քեզ ու պահպանի քեզ, ²⁵ Տերն իր երեսը թող ցույց տա քեզ ու ողորմի քեզ։ ²⁶ Տերն իր երեսը թող դեպի քեզ դարձնի և քեզ խաղաղություն պարգևի”»։

7

Սրբարանին նվիրված սայլեր

¹ Երբ Մովսեսը կանգնեցրեց խորանը, օծեց այն ու նրա ողջ սպասքը, զոհասեղանն ու նրա ողջ սպասքը, օծեց ու սրբագործեց դրանք։ ² Իսրայելի իշխանները՝ նահապետական տների տասներկու իշխանները, ընծաներ մատուցեցին։ Սրանք ցեղերի իշխաններն էին և վերակացուները։ ³ Նրանք Տիրոջ առջև մատուցեցին իրենց ընծաները՝ վեց ծածկված սայլ ու տասներկու եզ. մեկական սայլ՝ երկու իշխանի կողմից և մեկական եզ՝ յուրաքանչյուր իշխանի կողմից, որոնք բերեցին խորանի առջև։ ⁴ Տերը խոսեց Մովսեսի հետ և ասաց. ⁵ «Նրանցից ընդունի՛ր այդ ընծաները։ Դրանք թող ծառայեն Վկայության խորանի սպասավորությանը։ Դրանք կտաս ղևտացիներին՝ յուրաքանչյուրին ըստ իր սպասավորության»։ ⁶ Եվ Մովսեսը, ընդունելով սայլերն ու եզները, տվեց ղևտացիներին։ ⁷ Նա երկու սայլ ու չորս եզ տվեց Գեթսոնի որդիներին՝ ըստ նրանց սպասավորության։ ⁸ Չորս սայլ և ութ եզ տվեց Մերարիի որդիներին՝ ըստ նրանց սպասավորության՝ Ահարոն քահանայի որդի Իթամարի ղեկավարության ներքո։ ⁹ Կահաթի որդիներին նա ոչինչ չտվեց, որովհետև նրանց պարտականությունը սրբազան սպասքն իրենց ուսերի վրա կրելն էր։

¹⁰ Զոհասեղանի նավակատիքին, այն օրը, երբ օծեց այն, իշխաններն իրենց ընծաները բերեցին զոհասեղանի առջև։ ¹¹ Տերն ասաց Մովսեսին. «Օրական մեկական իշխան թող մատուցի իր ընծաները զոհասեղանի նավակատիքին»։

¹² Առաջին օրն իր ընծաները մատուցեց Ամինադաբի որդի Նաասովնը՝ Հուդայի ցեղի իշխանը։ ¹³ Նա որպես ընծա մատուցեց հարյուր երեսուն կշռորդ քաշ ունեցող արծաթե մեկ կոնք, յոթանասուն սիկղ քաշ ունեցող արծաթե մեկ տաշտ՝ ըստ սրբարանի սիկղի, երկուսի մեջ էլ իբրև ընծա՝ յուղով հունցված լիքը նաշիհ, ¹⁴ տասը դահեկան արժողությամբ խնկով լի ոսկե մեկ խնկաման, ¹⁵ իբրև ողջակեզի զոհ՝ մի զվարակ, մի խոյ, մեկ տարեկան մի գառ, ¹⁶ իբրև մեղքերի քավության զոհ՝ այծերից մի նոխազ, ¹⁷ իբրև փրկության զոհ՝ երկու երինջ, հինգ խոյ, հինգ նոխազ, մեկ տարեկան հինգ էգ գառ։ Այս է Ամինադաբի որդի Նաասովնի ընծան։

¹⁸ Երկրորդ օրը մատուցեց Սովգարի որդի Նաթանայելը՝ Իսաքարի ցեղի իշխանը։ ¹⁹ Նա որպես ընծա մատուցեց հարյուր երեսուն կշռորդ քաշ ունեցող արծաթե մեկ կոնք, յոթանասուն սիկղ քաշ ունեցող արծաթե մեկ տաշտ՝ ըստ սրբարանի սիկղի, երկուսի մեջ էլ իբրև ընծա՝ յուղով հունցված լիքը նաշիհ, ²⁰ տասը դահեկան արժողությամբ խնկով լի ոսկե մեկ խնկաման, ²¹ իբրև ողջակեզի զոհ՝ մի զվարակ, մի խոյ, մեկ տարեկան մի գառ, ²² իբրև մեղքերի քավության զոհ՝ այծերից մի նոխազ, ²³ իբրև փրկության զոհ՝ երկու երինջ, հինգ խոյ, հինգ նոխազ, մեկ տարեկան հինգ էգ գառ։ Այս է Սովգարի որդի Նաթանայելի ընծան։

²⁴ Երրորդ օրն իր ընծաները մատուցեց Քելոնի որդի Եղիաբը՝ Զաբուղոնի որդիների իշխանը։ ²⁵ Նրա ընծան՝ հարյուր երեսուն կշռորդ քաշ ունեցող արծաթե մեկ կոնք, յոթանասուն սիկղ քաշ ունեցող արծաթե մեկ տաշտ՝ ըստ սրբարանի սիկղի, երկուսի մեջ էլ իբրև ընծա՝ յուղով հունցված լիքը նաշիհ, ²⁶ տասը դահեկան արժողությամբ խնկով լի ոսկե մեկ խնկաման, ²⁷ իբրև ողջակեզի զոհ՝ մի զվարակ, մի խոյ, մեկ տարեկան մի գառ, ²⁸ իբրև մեղքերի քավության զոհ՝ այծերից մի նոխազ, ²⁹ իբրև փրկության զոհ՝ երկու երինջ, հինգ խոյ, հինգ նոխազ, մեկ տարեկան հինգ էգ գառ։ Այս է Քելոնի որդի Եղիաբի ընծան։

³⁰ Չորրորդ օրն իր ընծաները մատուցեց Սեդիուրի որդի Եղիսուրը՝ Ռուբենի որդիների իշխանը։ ³¹ Նրա ընծան՝ հարյուր երեսուն կշռորդ քաշ ունեցող արծաթե մեկ կոնք, յոթանասուն սիկղ քաշ ունեցող արծաթե մեկ տաշտ՝ ըստ սրբարանի սիկղի, երկուսի մեջ էլ իբրև ընծա՝ յուղով հունցված լիքը նաշիհ, ³² տասը դահեկան արժողությամբ խնկով լի ոսկե մեկ խնկաման, ³³ իբրև ողջակեզի զոհ՝ մի զվարակ, մի խոյ, մեկ տարեկան մի գառ, ³⁴ իբրև մեղքերի քավության զոհ՝ այծերից մի նոխազ, ³⁵ իբրև փրկության զոհ՝ երկու երինջ, հինգ խոյ, հինգ նոխազ, մեկ տարեկան հինգ էգ գառ։ Այս է Սեդիուրի որդի Եղիսուրի ընծան։

³⁶ Հինգերորդ օրն իր ընծաները մատուցեց Սուրիսադայի որդի Սաղամիելը՝ Շմավոնի որդիների իշխանը։ ³⁷ Նրա ընծան՝ հարյուր երեսուն կշռորդ քաշ ունեցող արծաթե մեկ կոնք, յոթանասուն սիկղ քաշ ունեցող արծաթե մեկ տաշտ՝ ըստ սրբարանի սիկղի, երկուսի մեջ էլ իբրև ընծա՝ յուղով հունցված լիքը նաշիհ, ³⁸ տասը դահեկան արժողությամբ խնկով լի ոսկե մեկ խնկաման, ³⁹ իբրև ողջակեզի զոհ՝ մի զվարակ, մի խոյ, մեկ տարեկան մի գառ, ⁴⁰ իբրև մեղքերի քավության զոհ՝ այծերից մի նոխազ, ⁴¹ իբրև փրկության զոհ՝ երկու երինջ, հինգ խոյ, հինգ նոխազ, մեկ տարեկան հինգ էգ գառ։ Այս է Սուրիսադայի որդի Սաղամիելի ընծան։

⁴² Վեցերորդ օրն իր ընծաները մատուցեց Ռագուելի որդի Եղիսափանը՝ Գադի որդիների իշխանը։ ⁴³ Նրա ընծան՝ հարյուր երեսուն կշռորդ քաշ ունեցող արծաթե մեկ կոնք, յոթանասուն սիկղ քաշ ունեցող արծաթե մեկ տաշտ՝ ըստ սրբարանի սիկղի, երկուսի մեջ էլ իբրև ընծա՝ յուղով հունցված լիքը նաշիհ, ⁴⁴ տասը դահեկան արժողությամբ խնկով լի ոսկե մեկ խնկաման, ⁴⁵ իբրև ողջակեզի զոհ՝ մի զվարակ, մի խոյ, մեկ տարեկան մի գառ, ⁴⁶ իբրև մեղքերի քավության զոհ՝ այծերից մի նոխազ, ⁴⁷ իբրև փրկության զոհ՝ երկու երինջ, հինգ խոյ, հինգ նոխազ, մեկ տարեկան հինգ էգ գառ։ Այս է Ռագուելի որդի Եղիսափանի ընծան։

⁴⁸ Յոթերորդ օրն իր ընծաները մատուցեց Եմիուդի որդի Եղիսաման՝ Եփրեմի որդիների իշխանը։ ⁴⁹ Նրա ընծան՝ հարյուր երեսուն կշռորդ քաշ ունեցող արծաթե մեկ կոնք, յոթանասուն սիկղ քաշ ունեցող արծաթե մեկ տաշտ՝ ըստ սրբարանի սիկղի, երկուսի մեջ էլ իբրև ընծա՝ յուղով հունցված լիքը նաշիհ, ⁵⁰ տասը դահեկան արժողությամբ խնկով լի ոսկե մեկ խնկաման, ⁵¹ իբրև ողջակեզի զոհ՝ մի զվարակ, մի խոյ, մեկ տարեկան մի գառ, ⁵² իբրև մեղքերի քավության զոհ՝ այծերից մի նոխազ, ⁵³ իբրև փրկության զոհ՝ երկու երինջ, հինգ խոյ, հինգ նոխազ, մեկ տարեկան հինգ էգ գառ։ Այս է Եմիուդի որդի Եղիսամայի ընծան։

⁵⁴ Ութերորդ օրն իր ընծաները մատուցեց Փադասուրի որդի Գամաղիելը՝ Մանասեի որդիների իշխանը։ ⁵⁵ Նրա ընծան՝ հարյուր երեսուն կշռորդ քաշ ունեցող արծաթե մեկ կոնք, յոթանասուն սիկղ քաշ ունեցող արծաթե մեկ տաշտ՝ ըստ սրբարանի սիկղի, երկուսի մեջ էլ իբրև ընծա՝ յուղով հունցված լիքը նաշիհ, ⁵⁶ տասը դահեկան արժողությամբ խնկով լի ոսկե մեկ խնկաման, ⁵⁷ իբրև ողջակեզի զոհ՝ մի զվարակ, մի խոյ, մեկ տարեկան մի գառ, ⁵⁸ իբրև մեղքերի քավության զոհ՝ այծերից մի նոխազ, ⁵⁹ իբրև փրկության զոհ՝ երկու երինջ, հինգ խոյ, հինգ նոխազ, մեկ տարեկան հինգ էգ գառ։ Այս է Փադասուրի որդի Գամաղիելի ընծան։

⁶⁰ Իններորդ օրն իր ընծաները մատուցեց Գեդեոնի որդի Աբիդանը՝ Բենիամինի որդիների իշխանը։ ⁶¹ Նրա ընծան՝ հարյուր երեսուն կշռորդ քաշ ունեցող արծաթե մեկ կոնք, յոթանասուն սիկղ քաշ ունեցող արծաթե մեկ տաշտ՝ ըստ սրբարանի սիկղի, երկուսի մեջ էլ իբրև ընծա՝ յուղով հունցված լիքը նաշիհ, ⁶² տասը դահեկան արժողությամբ խնկով լի ոսկե մեկ խնկաման, ⁶³ իբրև ողջակեզի զոհ՝ մի զվարակ, մի խոյ, մեկ տարեկան մի գառ, ⁶⁴ իբրև մեղքերի քավության զոհ՝ այծերից մի նոխազ, ⁶⁵ իբրև փրկության զոհ՝ երկու երինջ, հինգ խոյ, հինգ նոխազ, մեկ տարեկան հինգ էգ գառ։ Այս է Գեդեոնի որդի Աբիդանի ընծան։

⁶⁶ Տասներորդ օրն իր ընծաները մատուցեց Ամիսադայի որդի Աքիեզերը՝ Դանի որդիների իշխանը։ ⁶⁷ Նրա ընծան՝ հարյուր երեսուն կշռորդ քաշ ունեցող արծաթե մեկ կոնք, յոթանասուն սիկղ քաշ ունեցող արծաթե մեկ տաշտ՝ ըստ սրբարանի սիկղի, երկուսի մեջ էլ իբրև ընծա՝ յուղով հունցված լիքը նաշիհ, ⁶⁸ տասը դահեկան արժողությամբ խնկով լի ոսկե մեկ խնկաման, ⁶⁹ իբրև ողջակեզի զոհ՝ մի զվարակ, մի խոյ, մեկ տարեկան մի գառ, ⁷⁰ իբրև մեղքերի քավության զոհ՝ այծերից մի նոխազ, ⁷¹ իբրև փրկության զոհ՝ երկու երինջ, հինգ խոյ, հինգ նոխազ, մեկ տարեկան հինգ էգ գառ։ Այս է Ամիսադայի որդի Աքիեզերի ընծան։

⁷² Տասնմեկերորդ օրն իր ընծաները մատուցեց Եքրանի որդի Փագեելը՝ Ասերի որդիների իշխանը։ ⁷³ Նրա ընծան՝ հարյուր երեսուն կշռորդ քաշ ունեցող արծաթե մեկ կոնք, յոթանասուն սիկղ քաշ ունեցող արծաթե մեկ տաշտ՝ ըստ սրբարանի սիկղի, երկուսի մեջ էլ իբրև ընծա՝ յուղով հունցված լիքը նաշիհ, ⁷⁴ տասը դահեկան արժողությամբ խնկով լի ոսկե մեկ խնկաման, ⁷⁵ իբրև ողջակեզի զոհ՝ մի զվարակ, մի խոյ, մեկ տարեկան մի գառ, ⁷⁶ իբրև մեղքերի քավության զոհ՝ այծերից մի նոխազ, ⁷⁷ իբրև փրկության զոհ՝ երկու երինջ, հինգ խոյ, հինգ նոխազ, մեկ տարեկան հինգ էգ գառ։ Այս է Եքրանի որդի Փագեելի ընծան։

⁷⁸ Տասներկուերորդ օրն իր ընծաները մատուցեց Ենանի որդի Աքիրեն՝ Նեփթաղիմի որդիների իշխանը։ ⁷⁹ Նրա ընծան՝ հարյուր երեսուն կշռորդ քաշ ունեցող արծաթե մեկ կոնք, յոթանասուն սիկղ քաշ ունեցող արծաթե մեկ տաշտ՝ ըստ սրբարանի սիկղի, երկուսի մեջ էլ իբրև ընծա՝ յուղով հունցված լիքը նաշիհ, ⁸⁰ տասը դահեկան արժողությամբ խնկով լի ոսկե մեկ խնկաման, ⁸¹ իբրև ողջակեզի զոհ՝ մի զվարակ, մի խոյ, մեկ տարեկան մի գառ, ⁸² իբրև մեղքերի քավության զոհ՝ այծերից մի նոխազ, ⁸³ իբրև փրկության զոհ՝ երկու երինջ, հինգ խոյ, հինգ նոխազ, մեկ տարեկան հինգ էգ գառ։ Այս է Ենանի որդի Աքիրեի ընծան։

⁸⁴ Զոհասեղանի օծման օրը Իսրայելի որդիների իշխանների մատուցած ընծաները սրանք են. արծաթե տասներկու կոնք, արծաթե տասներկու տաշտ, ոսկե տասներկու խնկաման։ ⁸⁵ Յուրաքանչյուր կոնքի քաշը հարյուր երեսուն սիկղ էր, յուրաքանչյուր տաշտի քաշը՝ յոթանասուն սիկղ։ Սպասքի ամբողջ արծաթը երկու հազար չորս հարյուր սիկղ էր՝ ըստ սրբարանի սիկղի։ ⁸⁶ Խնկով լցված ոսկե խնկամանների թիվը տասներկու էր։ Խնկամանների ամբողջ ոսկին հարյուր քսան դահեկան էր։ ⁸⁷ Ողջակեզի զոհերն էին՝ տասներկու զվարակ, տասներկու խոյ, տասներկու մեկ տարեկան արատ չունեցող գառ՝ անարյուն ընծաների հետ միասին, իսկ մեղքերի քավության համար՝ այծերից տասներկու նոխազ։ ⁸⁸ Որպես ողջակեզի զոհ՝ տասներկու արջառ, քսանչորս երինջ, վաթսուն խոյ, վաթսուն նոխազ, մեկ տարեկան արատ չունեցող վաթսուն էգ գառ։

Այս է զոհասեղանի նավակատիքը, նրանց ձեռքերը սրբագործելուց հետո։

⁸⁹ Երբ Մովսեսը մտավ Վկայության խորան՝ Տիրոջ հետ խոսելու, լսեց նրա ձայնը, որ խոսում էր իր հետ, որ գալիս էր Ուխտի տապանակի վրայի երկու քերովբեների միջև դրված Քավության վերևից։

8

Լապտերների տեղադրումը

¹ Եվ Տերը խոսեց Մովսեսի հետ և ասաց. ² «Խոսի՛ր Ահարոնի հետ և ասա՛ նրան. “Երբ ճրագները տեղադրես, այնպե՛ս արա, որ յոթ ճրագներն էլ լուսավորեն աշտանակի առջևի կողմը”»։ ³ Ահարոնն այդպես էլ արեց. նա ճրագները վառեց աշտանակի մի կողմից՝ առջևի կողմից, ինչպես որ Տերը հրամայեց Մովսեսին։ ⁴ Այսպիսին էր աշտանակի կառուցվածքը. նրա բունն ու ճյուղերը ձույլ ոսկի էին։ Աշտանակը պատրաստված էր ըստ այն օրինակի, որ Տերն էր ցույց տվել Մովսեսին։

Ղևտացիների սրբագործումը և նվիրաբերումը

⁵ Տերը խոսեց Մովսեսի հետ և ասաց. ⁶ «Ղևտացիներին առանձնացրո՛ւ Իսրայելի որդիների միջից և սրբագործի՛ր նրանց։ ⁷ Նրանց սրբագործի՛ր այսպես. նրանց վրա մաքրագործման ջո՛ւր ցանիր, ապա թող ածիլեն իրենց ամբողջ մարմինը, լվանան իրենց զգեստները և մաքրվեն։ ⁸ Նրանք թող վերցնեն մեկ զվարակ, նաև զոհ՝ յուղով հունցված նաշիհ, և մեղքերի քավության համար մեկ տարեկան հորթ։ ⁹ Ղևտացիներին բե՛ր Վկայության խորանի առջև, հավաքի՛ր Իսրայելի բոլոր որդիներին. ¹⁰ ղևտացիները թող կանգնեն Տիրոջ առջև, և Իսրայելի որդիներն իրենց ձեռքերը թող դնեն ղևտացիների վրա։ ¹¹ Ապա Ահարոնն Իսրայելի որդիների կողմից ղևտացիներին թող նվիրաբերի Տիրոջը, և նրանք թող դառնան Տիրոջ խորանի սպասավորները։ ¹² Այնուհետև ղևտացիներն իրենց ձեռքերը թող դնեն զվարակների գլխին։ Դրանցից մեկը զոհի՛ր մեղքերի քավության համար, մյուսը՝ իբրև Տիրոջը նվիրված ողջակեզ, որպեսզի քավվեն նրանց մեղքերը։ ¹³ Ապա ղևտացիներին կանգնեցրո՛ւ Տիրոջ առջև, Ահարոնի ու նրա որդիների առջև, և նվիրաբերի՛ր Տիրոջը՝ իբրև ընծա։ ¹⁴ Այսպես ղևտացիներին կառանձնացնես Իսրայելի որդիների միջից, և նրանք իմը կլինեն։ ¹⁵ Այնուհետև ղևտացիները կանցնեն Վկայության խորանի սպասավորության գործին։ Կսրբես նրանց և իբրև ընծա՝ կնվիրաբերես Տիրոջ առաջ, ¹⁶ որովհետև նրանք ինձ ընծա են տրվում Իսրայելի որդիների միջից՝ Իսրայելի որդիների կողմից, արգանդ բացող անդրանիկների փոխարեն. նրանց ինձ վերցրի, ¹⁷ քանի որ Իսրայելի որդիների բոլոր անդրանիկները՝ մարդ թե անասուն, ինձ են պատկանում։ Այն օրվանից, երբ հարվածեցի եգիպտացիների երկրի բոլոր անդրանիկներին, ես սրանց իմը դարձրի, ¹⁸ իսկ ղևտացիներին վերցրի Իսրայելի որդիների բոլոր անդրանիկների փոխարեն։ ¹⁹ Իսրայելի որդիներից ես առանձնացրի ղևտացիներին և նրանց տվեցի Ահարոնին ու նրա որդիներին, որպեսզի Վկայության խորանում կատարեն սպասավորության գործը Իսրայելի որդիների փոխարեն, քավեն Իսրայելի որդիների մեղքերը, որպեսզի Իսրայելի որդիները սրբություններին չդիպչեն»։

²⁰ Մովսեսը, Ահարոնն ու Իսրայելի բոլոր որդիները ղևտացիների հանդեպ վարվեցին այնպես, ինչպես Տերն էր պատվիրել Մովսեսին։ ²¹ Ղևտացիները մաքրվեցին, լվացին իրենց զգեստները և իրենց անձերը հանձնեցին Ահարոնին՝ իբրև ընծա Տիրոջ առջև։ Ապա Ահարոնը կատարեց նրանց մեղքերի քավությունը՝ սրբագործելով նրանց։ ²² Այնուհետև ղևտացիներն անցան Վկայության խորանի սպասավորությանը՝ Ահարոնի ու նրա որդիների իշխանության ներքո։ Ինչպես Տերը պատվիրեց Մովսեսին ղևտացիների վերաբերյալ, այդպես էլ վարվեցին նրանց հետ։

²³ Տերը խոսեց Մովսեսի հետ և ասաց. ²⁴ «Ղևտացիներին վերաբերող կարգն այս է. քսանհինգ տարեկանից սկսած միայն կարող են անցնել Վկայության խորանի սպասավորությանը։ ²⁵ Հիսուն տարին լրանալուց հետո նրանք պետք է հեռանան սպասավորությունից և այլևս չաշխատեն։ ²⁶ Նրանք կարող են օգնել իրենց ղևտացի եղբայրներին՝ կատարելու Վկայության խորանի պահպանության գործը, բայց ոչ սպասավորություն անելու։ Այսպե՛ս կարգավորիր ղևտացիների ծառայությունը»։

9

Զատկի տոնակատարության օրը

¹ Եգիպտոսից Իսրայելի որդիների ելքի երկրորդ տարվա առաջին ամսին Սինայի անապատում Տերն ասաց Մովսեսին. ² «Իսրայելի որդիներին ասա՛, որ Զատիկը կատարեն իր ժամանակին։ ³ Այն թող կատարեն առաջին ամսի տասնչորսերորդ օրը, այն կատարեն երեկոյան՝ համաձայն սահմանված ժամանակի, օրենքի և ծեսի»։ ⁴ Եվ Մովսեսը խոսեց Իսրայելի որդիների հետ՝ Զատիկը կատարելու վերաբերյալ։ ⁵ Եվ ամսվա տասնչորսերորդ օրվա սկզբին, ինչպես որ Սինայի անապատում Տերը հրամայել էր Մովսեսին, այդպես էլ Իսրայելի որդիները տոնեցին այն։

⁶ Սակայն գտնվեցին մարդիկ, որոնք պղծված էին՝ դիակի դիպած լինելով, և այդ օրը չկարողանալով Զատիկ անել՝ եկան Մովսեսի ու Ահարոնի մոտ ⁷ և ասացին նրանց. «Մենք, մարդու դիակի դիպած լինելով, անմաքուր ենք։ Արդյոք պիտի զրկվե՞նք Իսրայելի որդիների նման ժամանակին Տիրոջը զոհ մատուցելուց»։ ⁸ Մովսեսը նրանց ասաց. «Համբերե՛ք, մինչև Տերը հայտնի ինձ իր որոշումը ձեր մասին»։

⁹ Տերը խոսեց Մովսեսի հետ և ասաց. ¹⁰ «Խոսի՛ր Իսրայելի որդիների հետ և ասա՛ նրանց. “Եթե ձեզանից մեկը կամ ձեր սերնդից մեկը դիակի դիպչելու պատճառով պղծվել է և կամ հեռավոր ճանապարհորդության մեջ է, թող Տիրոջ զատիկը կատարի ¹¹ երկրորդ ամսվա տասնչորսերորդ օրվա երեկոյան և Զատիկի գառն ուտի բաղարջ հացով ու դառը խոտով։ ¹² Նրանից առավոտյան ոչինչ չպետք է մնա, նրանից ոչ մի ոսկոր չպետք է ջարդվի։ Ըստ Զատիկի օրենքի թող կատարեն այն։ ¹³ Բայց այն մարդը, որ մաքուր է և հեռու ճանապարհորդության մեջ չէ, ու թերանում է Զատիկը կատարել, թող վերացվի իր ժողովրդից, քանի որ նա Տիրոջ նվերը իր ժամանակին չի մատուցել։ Այդ մարդը թող կրի իր մեղքի պատասխանատվությունը։ ¹⁴ Եթե ձեր երկիր որևէ օտարական գա և Տիրոջ զատիկը կատարի, ապա այն թող կատարի ըստ զատկի օրենքի և ծեսի։ Մի օրենք թող լինի թե՛ եկվորի և թե՛ բնիկի համար”»։

Հրեղեն ամպը

(Ելք 40.32-36)

¹⁵ Այն օրը, երբ խորանը կանգնեցվեց, ամպը ծածկեց խորանը՝ Վկայության տունը։ Երեկոյան խորանի վրա ամպը կրակի տեսք էր ստանում մինչև առավոտ։ ¹⁶ Այդպես լինում էր մշտապես. ամպն այն ծածկում էր ցերեկը, իսկ գիշերը կրակի տեսք էր ունենում։ ¹⁷ Իսկ երբ ամպը վերանում էր խորանի վրայից, Իսրայելի որդիները ճանապարհ էին ընկնում և որտեղ ամպը կանգնում էր, այնտեղ էլ բանակում էին։ ¹⁸ Իսրայելի որդիները Տիրոջ հրամանով բանակում էին և Տիրոջ հրամանով մեկնում։ Այն բոլոր օրերին, երբ ամպը հովանի էր լինում խորանին, Իսրայելի որդիները բանակում էին։ ¹⁹ Անգամ եթե ամպը բազում օրեր էր մնում խորանի վրա, Իսրայելի որդիները պահում էին Տիրոջ պատվերը և չէին մեկնում։ ²⁰ Եթե պատահեր, որ ամպը քիչ օրեր հովանի լիներ խորանին, Տիրոջ հրամանով բանակում էին և Տիրոջ հրամանով ճանապարհ ընկնում։ ²¹ Եթե պատահեր, որ ամպը երեկոյից մինչև առավոտ լիներ և առավոտյան վերանար, անմիջապես մեկնում էին, ցերեկ լիներ թե գիշեր։ Եվ քանի դեռ ամպը չէր վերացել, նրանք չէին մեկնում։ ²² Եթե ամպն անգամ մեկ ամիս մնար ու հովանի լիներ խորանին, Իսրայելի որդիները բանակում էին ու չէին մեկնում։ ²³ Նրանք միայն Տիրոջ հրամանով էին մեկնում։ Իսրայելի որդիները պահում էին Տիրոջ այս հրամանը, որ նա Մովսեսի միջոցով տվել էր իրենց։

10

Իսրայելացիների մեկնումը

¹ Տերը խոսեց Մովսեսի հետ և ասաց. ² «Երկու կռածո փո՛ղ պատրաստիր, արծաթի՛ց պատրաստիր դրանք։ Դրանք թող ծառայեն քեզ ժողովրդին հավաքելու և բանակների մեկնելն ազդարարելու համար։ ³ Երբ նրանցով փողահարեն, ողջ ժողովուրդը թող հավաքվի Վկայության խորանի դուռը։ ⁴ Իսկ եթե մեկ փող հնչեցնեն, թող քեզ ներկայանան բոլոր իշխանները՝ Իսրայելի հրամանատարները։ ⁵ Երբ մեկնելու ազդարարությամբ փող հնչեցնեք, թող ճանապարհ ընկնեն արևելյան մասում բանակած գնդերը։ ⁶ Երբ մեկնելու երկրորդ ազդարարությունը հնչեցնեք, ճանապարհ թող ընկնեն հարավային մասում բանակած գնդերը։ Երբ մեկնելու երրորդ ազդարարությունը հնչեցնեք, ճանապարհ թող ընկնեն արևմտյան մասում բանակած գնդերը։ Եվ երբ հնչի մեկնելու չորրորդ ազդարարությունը, ճանապարհ թող ընկնեն հյուսիսային մասում բանակած գնդերը։ Մեկնելու ազդարարության փող թող փչեն ճանապարհ ընկնելիս։ ⁷ Երբ ժողովրդին հավաքելու լինեք, փո՛ղ հնչեցրեք, բայց ոչ մեկնելու ազդարարության։ ⁸ Փողահարությունը Ահարոնի որդիները՝ քահանաները, պետք է անեն։ Ձեր սերունդների մեջ հավիտենական օրենք թող լինի ձեզ համար։ ⁹ Եթե ձեր երկրում պատերազմի ելնեք ձեր հակառակորդների դեմ, փո՛ղ հնչեցրեք և կհիշվեք Տիրոջ առջև ու կփրկվեք ձեր թշնամիներից։ ¹⁰ Փո՛ղ հնչեցրեք ձեր ուրախության օրերին, ամսվա առաջին օրերին, ինչպես նաև ողջակեզներ և փրկության զոհեր մատուցելիս, և կհիշվեք Տիրոջ առջև։ Ես եմ Տերը՝ ձեր Աստվածը»։

¹¹ Երկրորդ տարվա երկրորդ ամսի քսանին ամպը վերացավ Վկայության խորանի վրայից։ ¹² Իսրայելի որդիներն իրենց ամբողջ ունացվածքով մեկնեցին Սինայի անապատից։ Ամպը կանգ առավ Փառանի անապատում։ ¹³ Իսրայելի որդիները մեկնեցին ըստ Մովսեսի միջոցով Տիրոջ տված հրամանի։ ¹⁴ Նախ ճանապարհ ընկան Հուդայի բանակի գնդերն իրենց զորքերով։ Հուդայի ցեղի զորքի առաջնորդը Ամինադաբի որդի Նաասովնն էր։ ¹⁵ Իսաքարի ցեղի զորքի առաջնորդը Սովգարի որդի Նաթանայելն էր։ ¹⁶ Զաբուղոնի ցեղի զորքի առաջնորդը Քելոնի որդի Եղիաբն էր։ ¹⁷ Գեթսոնի ու Մերարիի որդիները խորանը իջեցնում էին, բարձում ու մեկնում։ ¹⁸ Ապա շարժվեցին Ռուբենի բանակի գնդերն իրենց զորքերով։ Սրանց զորքի առաջնորդը Սեդիուրի որդի Եղիսուրն էր։ ¹⁹ Շմավոնի ցեղի զորքի առաջնորդը Սուրիսադայի որդի Սաղամիելն էր։ ²⁰ Գադի ցեղի զորքի առաջնորդը Ռագուելի որդի Եղիսափանն էր։ ²¹ Ապա շարժվեցին Կահաթի որդիները, որոնք պետք է փոխադրեին սրբությունները, և մինչև նրանց հասնելը մյուսները պետք է կանգնեցնեին խորանը։ ²² Ապա շարժվեցին Եփրեմի բանակի գնդերն իրենց զորքերով։ Եփրեմի ցեղի զորքի առաջնորդը Եմիուդի որդի Եղիսաման էր։ ²³ Մանասեի ցեղի զորքի առաջնորդը Փադասուրի որդի Գամաղիելն էր։ ²⁴ Բենիամինի ցեղի զորքի առաջնորդը Գեդեոնի որդի Աբիդանն էր։ ²⁵ Վերջում ճանապարհ ընկան Դանի բանակի գնդերն իրենց զորքերով։ Դանի ցեղի զորքի առաջնորդը Ամիսադայի որդի Աքիեզերն էր։ ²⁶ Ասերի ցեղի զորքի առաջնորդը Եքրանի որդի Փագեելն էր։ ²⁷ Նեփթաղիմի ցեղի զորքի առաջնորդը Ենանի որդի Աքիրեն էր։ ²⁸ Սրանք են Իսրայելի որդիների զորքերը, որոնք մեկնեցին իրենց զորքերով։

²⁹ Մովսեսն իր աներոջ՝ մադիանացի Ռագուելի որդուն՝ Հովբաբին ասաց. «Ահա մենք շարժվում ենք դեպի այն երկիրը, որ Աստված խոստացավ տալ մեզ։ Արի՛ մեզ հետ, և քեզ բարիք կանենք, որովհետև Տերը Իսրայելին բարիքներ է խոստացել»։ ³⁰ Նա պատասխանեց. «Ես չեմ գա, այլ կգնամ իմ երկիրն ու իմ ազգականների մոտ»։ ³¹ Մովսեսն ասաց նրան. «Մի՛ լքիր մեզ, մեզ հետ էիր անապատում, առաջնորդի՛ր մեզ անապատում։ ³² Եթե մեզ հետ գաս, Տերն ինչ բարիք որ մեզ անի, նույնը կանենք քեզ»։

³³ Երբ մեկնեցին Տիրոջ լեռից, երեք օրվա ճանապարհ անցան։ Այդ երեք օրերի ընթացքում Տիրոջ Ուխտի տապանակը գնում էր առջևից՝ նրանց համար հանգստանալու տեղ գտնելու նպատակով։ ³⁴ Տապանակը ճանապարհ ընկնելիս Մովսեսն ասում էր. «Վե՛ր կաց, Տե՜ր, և թող ցանուցիր լինեն քո թշնամիները, թող փախուստի դիմեն բոլոր քեզ ատողները»։ ³⁵ Իսկ երբ տապանակը դադար էր առնում, ասում էր. «Դարձի՛ր, Տե՜ր, դեպի Իսրայելի հազարավոր ու բյուրավոր որդիները»։ ³⁶ Երբ բանակատեղիից մեկնում էին, ամպը ցերեկը հովանի էր լինում նրանց վրա։

11

Տերը հուր թափեց

¹ Ժողովուրդն սկսեց չարաչար տրտնջալ Տիրոջ առաջ։ Տերը լսեց, խիստ բարկացավ ու նրանց վրա հուր թափեց, որը ոչնչացրեց բանակատեղիի մի մասը։ ² Ժողովուրդն աղաղակով դիմեց Մովսեսին։ Մովսեսն աղոթեց Տիրոջը, և հուրը հանգավ։ ³ Այդ վայրը կոչվեց Հրայրյաց [*  Տավըերա], որովհետև Տերը նրանց վրա հուր թափեց։

⁴ Նրանց մեջ գտնվող օտարների խառնամբոխը սկսեց զանազան պահանջներ ունենալ։ Իսրայելի որդիներն էլ նստած լաց էին լինում և ասում. «Ո՞վ մեզ միս կտա ուտելու։ ⁵ Հիշում ենք այն ձուկը, որ Եգիպտոսում ձրի էինք ուտում, սեխը, վարունգը, պրասը, սոխն ու սխտորը։ ⁶ Իսկ այժմ մենք կորչում ենք, մեր աչքերը մանանայից բացի ուրիշ ոչինչ չեն տեսնում»։ ⁷ Մանանան գինձի սերմի նման սպիտակ էր ու սառույցի տեսք ուներ։ ⁸ Ժողովուրդը շրջում էր ու այն հավաքում, երկանքով աղում կամ սանդի մեջ ծեծում, ապա կաթսայի մեջ եփում և բլիթ էր պատրաստում։ Այն յուղով ու մեղրով պատրաստված խորիզի նման քաղցր էր։ ⁹ Երբ գիշերը բանակատեղիի վրա ցող էր իջնում, մանանան իջնում էր նրա վրա։

Մովսեսն ընտրում է յոթանասուն առաջնորդներ

¹⁰ Մովսեսը լսեց իրենց վրանների դռանը խումբ-խումբ հավաքվածների լաց ու կոծը։ Տերը խիստ բարկացավ. Մովսեսը նույնպես վրդովվեց ¹¹ ու դիմեց Տիրոջը. «Ինչո՞ւ ես ինձ՝ քո ծառային, չարչարում, Տե՜ր, ինչո՞ւ քո առջև շնորհք չգտա, և այս ժողովրդի ողջ բարկությունն իմ վրա թափեցիր։ ¹² Մի՞թե ես հղիացա այս ողջ ժողովրդին կամ թե ե՞ս ծնեցի նրանց, որ ինձ ասում ես. “Ա՛ռ դրան քո գիրկը, ինչպես դայակն է գրկում ծծկեր երեխային՝ տանելու այն երկիրը, որը դու խոստացար իրենց հայրերին”։ ¹³ Արդ, ինձ որտեղի՞ց միս, որ տամ այս ողջ ժողովրդին, քանի որ նրանք լաց են լինում ինձ մոտ և ասում. “Մեզ մի՛ս տուր, որ ուտենք”։ ¹⁴ Ես միայնակ չեմ կարող կրել այս ժողովրդին, որովհետև իմ ուժերից վեր է այդ։ ¹⁵ Եթե այդպես պիտի վարվես ինձ հետ, ավելի լավ է սպանի՛ր ինձ, եթե արժանի եմ շնորհի և ողորմության, որպեսզի չտառապեմ»։ ¹⁶ Իսկ Տերն ասաց Մովսեսին. «Հավաքի՛ր Իսրայելի ծերերից յոթանասուն այր, որոնք ժողովրդի ավագներն ու ղեկավարներն են։ Նրանց Վկայության խորա՛ն առաջնորդիր և կանգնեցրո՛ւ քո կողքին։ ¹⁷ Ես կիջնեմ, կխոսեմ քեզ հետ, կվերցնեմ քո ոգուց, որ ես եմ տվել ու կդնեմ նրանց վրա, որպեսզի քեզ հետ միասին կրեն ժողովրդի բեռը, և դու այլևս միայնակ չկրես այն։ ¹⁸ Իսկ ժողովրդին ասա. “Մաքրվե՛ք մինչև վաղը, քանի որ միս պիտի ուտեք, որովհետև լաց լինելով Տիրոջ առջև՝ ասում էիք. “Ո՞վ մեզ միս կտա ուտելու։ Եգիպտոսում ավելի լավ էր մեզ համար”։ Արդ, Տերը ձեզ ուտելու միս է տալու, և դուք միս կուտեք։ ¹⁹ Եվ այն ուտելու եք ոչ թե մեկ, երկու կամ հինգ օր, ոչ էլ տասը կամ քսան օր, ²⁰ այլ ուտելու եք մեկ ամիս, ամեն օր, մինչև որ ձեր քթից դուրս գա, մինչև որ համն ատելի դառնա ձեզ, որովհետև արհամարհեցիք Տիրոջը, որ միշտ ձեր մեջ է, լաց եղաք նրա առջև և ասացիք. “Ինչո՞ւ ելանք Եգիպտոսից”»։

²¹ Մովսեսն ասաց. «Ժողովուրդն ունի վեց հարյուր հազար հետևակ, որոնց մեջ եմ և ես, և դու ասում ես, թե՝ “Միս տամ նրանց, որ մեկ ամիս ուտեն”։ ²² Ինչքան արջառ ու ոչխար էլ մորթվի, նրանց չի բավարարի, և եթե ծովի ողջ ձուկը հավաքվի, նրանց չի բավարարի»։ ²³ Եվ Տերն ասաց Մովսեսին. «Տիրոջ ձեռքը մի՞թե ուժասպառվել է։ Այժմ կտեսնես՝ իմ ասածը կկատարվի՞, թե՞ ոչ»։ ²⁴ Մովսեսը դուրս եկավ ու ժողովրդին հաղորդեց Տիրոջ պատգամը։ Նա ժողովրդի ծերերից ընտրեց յոթանասուն տղամարդ ու նրանց կանգնեցրեց խորանի շուրջը։ ²⁵ Տերն իջավ ամպով, խոսեց Մովսեսի հետ, առավ նրա վրայի ոգուց և դրեց յոթանասուն ավագների վրա։ Երբ ոգին հանգչեց նրանց վրա, նրանք մարգարեացան բանակում, բայց չշարունակեցին։ ²⁶ Սակայն այդ տղամարդկանցից երկուսը մնացել էին բանակատեղիում. մեկի անունը Ելդադ էր, մյուսինը՝ Մովդադ։ Ոգին նաև նրանց վրա հանգչեց։ Նրանք յոթանասուն գրանցվածների մեջ էին, և թեև խորան չէին եկել, բայց մարգարեացան բանակատեղիում։ ²⁷ Մի պատանի, գալով Մովսեսի մոտ, պատմեց այդ մասին ու ասաց. «Ելդադն ու Մովդադը մարգարեացան բանակատեղիում»։ ²⁸ Նավեի որդի Հեսուն՝ Մովսեսի ընտրյալ պաշտոնյան, պատասխանեց՝ ասելով. «Տե՛ր Մովսես, արգելի՛ր նրանց»։ ²⁹ Մովսեսը նրան ասաց. «Իմ փոխարեն դո՞ւ ես նեղվում։ Երանի՜ Տերն իր ոգին տար ողջ ժողովրդին, և նրանք բոլորը դառնային Տիրոջ մարգարեները»։ ³⁰ Դրանից հետո Մովսեսն ու Իսրայելի ծերերը վերադարձան բանակատեղի։

Տերը լորամարգիներ է ուղարկում

³¹ Տերը քամի բարձրացրեց և ծովի կողմից լորամարգիներ բերեց-թափեց բանակատեղիի շուրջբոլորը մեկ օրվա ճանապարհի երկարությամբ ու գետնից երկու կանգուն բարձրությամբ։ ³² Եվ ժողովուրդը ելնելով ողջ ցերեկն ու ողջ գիշերը, նաև հաջորդ ամբողջ օրը մինչև երեկո լորամարգի էր հավաքում։ Ամենաքիչ հավաքողը տասը քոռ հավաքեց։ Մորթեցին, ապխտեցին ու փռեցին բանակատեղիի շուրջը։ ³³ Դեռ միսը նրանց ատամի տակ էր ու դեռ չէին դադարել ուտելուց, Տերը զայրացավ ժողովրդի վրա ու մեծամեծ հարվածներ հասցրեց նրանց։ ³⁴ Այդ վայրը կոչվեց Ցանկության գերեզմաններ [*  Կիվռոտ-Հատտաավա], որովհետև այնտեղ թաղվեցին ոչ ժուժկալ ժողովրդից շատերը։

³⁵ Ցանկության գերեզմաններից ժողովուրդը ճանապարհ ընկավ դեպի Ասերովթ։

12

Մարիամը պատժվում է

¹ Մարիամն ու Ահարոնը վատաբանեցին Մովսեսին եթովպացի կնոջ պատճառով, որին Մովսեսը կնության էր առել։ ² Եվ ասացին. «Տերը միայն Մովսեսի՞ հետ խոսեց, մի՞թե նա մեզ հետ ևս չխոսեց»։ Եվ Տերը լսեց։ ³ Մովսեսը երկրի վրա ապրող բոլոր մարդկանցից ավելի հեզ էր։ ⁴ Տերն անմիջապես ասաց Մովսեսին, Ահարոնին ու Մարիամին. «Դուք երեքդ էլ Վկայության խորա՛ն գնացեք»։ Եվ երեքով գնացին Վկայության խորան։ ⁵ Տերն ամպի սյան մեջ իջավ և կանգնեց Վկայության խորանի դռանը։ Նա կանչեց Ահարոնին ու Մարիամին, և երկուսով դուրս եկան։ ⁶ Տերն ասաց նրանց. «Լսե՛ք իմ խոսքերը. եթե ձեզանից որևէ մեկը Տիրոջ մարգարե դառնա, ես տեսիլքով կերևամ նրան և երազի մեջ կխոսեմ նրա հետ։ ⁷ Ո՛չ այնպես, ինչպես իմ ծառա Մովսեսի հետ, որին ես վստահել եմ իմ ողջ տունը։ ⁸ Ես նրա հետ բերան առ բերան եմ խոսում, բացահայտ և ոչ թե առակներով։ Նա տեսավ Տիրոջ փառքը։ Եվ ինչպե՞ս չերկյուղեցիք վատաբանել իմ ծառա Մովսեսին»։ ⁹ Եվ Տերը բարկացավ նրանց վրա ու հեռացավ։ ¹⁰ Ամպը վերացավ խորանից, իսկ Մարիամը ձյան նման բորոտ դարձավ։ Ահարոնը նայեց Մարիամին և տեսավ, որ նա բորոտ է դարձել։ ¹¹ Ահարոնն ասաց Մովսեսին. «Խնդրում եմ քեզ, տե՛ր, մի՛ պատժիր մեզ մեր մեղքերի պատճառով, որ գործեցինք չիմանալով։ ¹² Թող չնմանվի այն վիժվածին, որ մահացած է ելնում մոր արգանդից՝ կեսը սպառված մարմնով»։ ¹³ Այն ժամանակ Մովսեսն աղաղակեց Տիրոջը և ասաց. «Խնդրում եմ քեզ, Աստվա՛ծ, բուժի՛ր նրան»։ ¹⁴ Տերն ասաց Մովսեսին. «Եթե Մարիամի հայրը թքեր նրա երեսին, մի՞թե նա յոթ օր ամոթ չէր կրելու։ Ուրեմն յոթ օր նա թող հեռանա բանակատեղիից և հետո վերադառնա»։ ¹⁵ Եվ Մարիամը յոթ օր հեռացվեց բանակատեղիից։ Ժողովուրդը ճանապարհ չընկավ, մինչև որ Մարիամը չմաքրվեց։

¹⁶ Դրանից հետո ժողովուրդը մեկնեց Ասերովթից և բանակեց Փառանի անապատում։

13

Խոստացված երկրի հետախուզումը

(Բ Օր. 1.19-33)

¹ Տերը խոսեց Մովսեսի հետ և ասաց. ² «Մարդի՛կ ուղարկիր՝ հետախուզելու քանանացիների երկիրը, որ ես իբրև կալվածք տալու եմ Իսրայելի որդիներին։ Յուրաքանչյուր ցեղից մի մարդ, նրանց նահապետական տների ամենագլխավորներին ուղարկի՛ր»։ ³ Եվ Մովսեսը, անսալով Տիրոջ խոսքին, ուղարկեց նրանց Փառանի անապատից։ Նրանք բոլորն էլ Իսրայելի որդիների գլխավորներն էին։ ⁴ Եվ սրանք են նրանց անունները. Ռուբենի ցեղինը՝ Զաքուրի որդի Սալամիելը, ⁵ Շմավոնի ցեղինը՝ Սուրիի որդի Սափատը, ⁶ Հուդայի ցեղինը՝ Հեփոնեի որդի Քաղեբը, ⁷ Իսաքարի ցեղինը՝ Հովսեփի որդի Գաղամը, ⁸ Եփրեմի ցեղինը՝ Նավեի որդի Ավսեն, ⁹ Բենիամինի ցեղինը՝ Ռափուի որդի Փալտին, ¹⁰ Զաբուղոնի ցեղինը՝ Սուդիի որդի Գուդիելը, ¹¹ Հովսեփի ցեղինը՝ Մանասեի որդիներից՝ Սուսիի որդի Գադդին, ¹² Դանի ցեղինը՝ Գամալիի որդի Ամիելը, ¹³ Ասերի ցեղինը՝ Միքայելի որդի Սաթուրը, ¹⁴ Նեփթաղիմի ցեղինը՝ Հաբիի որդի Նաբին, ¹⁵ Գադի ցեղինը՝ Մակքիի որդի Գուդիելը։

¹⁶ Սրանք են այն մարդկանց անունները, որոնց Տերն ուղարկեց՝ հետախուզելու քանանացիների երկիրը։ Մովսեսը Նավեի որդի Ավսեին վերանվանեց Հեսու։ ¹⁷ Եվ Մովսեսը Փառանի անապատից նրանց ուղարկեց՝ հետախուզելու քանանացիների երկիրը, և ասաց նրանց. «Գնացե՛ք անապատով և բարձրացե՛ք լեռը, ¹⁸ քննե՛ք այն երկիրը, թե ինչպիսի՛ն է, և այն ժողովուրդը, որ բնակվում է այնտեղ, հզո՞ր է, թե՞ թույլ, սակավաթի՞վ են, թե՞ բազմամարդ, ¹⁹ Ինչպիսի՞ն է այն երկիրը, որտեղ նրանք բնակվում են, բարի՞ է, թե՞ չար, և ինչպիսի՞ն են այն քաղաքները, որտեղ նրանք բնակվում են, պարսպապա՞տ են, թե՞ անպարիսպ, ²⁰ ինչպիսի՞ն է հողը, պարա՞րտ է, թե՞ լքված, ծառեր կա՞ն այնտեղ, թե՞ ոչ։ Եվ աշխատե՛ք վերցնել այն երկրի պտուղներից»։

Գարնան վերջն էր՝ առաջին խաղողի հասունանալու ժամանակը։ ²¹ Եվ գնացին, հետախուզեցին երկիրը Սինայի անապատից մինչև Րոոբ՝ Եմաթի մուտքը։ ²² Գնացին անապատով և հասան մինչև Քեբրոն՝ Ենակի հետնորդներ Աքիմանի, Սեսիի և Թաղամիի երկիրը։ Քեբրոնը յոթ տարի ավելի շուտ էր կառուցվել, քան Եգիպտոսի Տանիս քաղաքը։ ²³ Հասան մինչև Ողկույզի [*  Էշքոլ] ձորը, հետախուզեցին այն, կտրեցին որթի ուռ և նրանից խաղողի մի ողկույզ, բարձեցին այն լծակներով։ Նաև նուռ ու թուզ վերցրին։ ²⁴ Եվ այդ վայրն անվանեցին Ողկույզի ձոր այն ողկույզի պատճառով, որ կտրեցին Իսրայելի որդիները։ ²⁵ Քառասուն օր հետո Իսրայելի որդիները վերադարձան այն երկիրը հետախուզելուց։ ²⁶ Եկան հասան Մովսեսի, Ահարոնի ու Իսրայելի որդիների ողջ ժողովրդի մոտ, Փառան անապատը, Կադես, և պատմեցին նրանց ու ողջ ժողովրդին և ցույց տվեցին երկրի պտուղները, ²⁷ պատմեցին նրանց ու ասացին նրան. «Հասանք այն երկիրը, ուր մեզ ուղարկեցիր, մի երկիր, որ կաթ ու մեղր է բխեցնում, և ահա նրա պտուղները։ ²⁸ Սակայն այնտեղ բնակվող ազգը հզոր է, քաղաքները՝ ամուր, պարսպապատ և շատ մեծ։ Այնտեղ տեսանք Ենակի ազգը։ ²⁹ Երկրի հարավային կողմում բնակվում են ամաղեկացիները, լեռնային շրջանում՝ քետացիները, խևացիները, հեբուսացիները և ամորհացիները, իսկ ծովեզերքին ու Հորդանան գետի երկարությամբ՝ քանանացիները»։ ³⁰ Իսկ Քաղեբը Մովսեսի առջև լռեցրեց նրանց՝ ասելով. «Այդպես չէ, այլ պետք է ելնենք ու ժառանգենք այն, որովհետև կարո՛ղ ենք նրանց հաղթել»։ ³¹ Իսկ նրա հետ եղողներն ասում էին. «Չպիտի ելնենք, քանի որ չենք կարող այդ ազգի դեմ գնալ, որովհետև մեզանից շատ ավելի հզոր են»։ ³² Եվ նրանք վախեցրին Իսրայելի որդիներին այն երկրով, որ հետախուզել էին՝ ասելով. «Այն երկիրը, ուր մենք գնացինք հետախուզելու, իր բնակիչներին լափող երկիր է։ Եվ ողջ ազգը, որ մենք տեսանք այնտեղ, հաղթանդամ մարդիկ են։ ³³ Այնտեղ տեսանք նաև հսկաների, որոնց համեմատ մենք մորեխների ենք նմանվում»։

14

Ժողովրդի տրտունջը

¹ Եվ ողջ ժողովուրդն աղաղակեց, ու ազգը լացեց ողջ գիշեր։ ² Եվ Իսրայելի բոլոր որդիները տրտնջացին Մովսեսից ու Ահարոնից։ Ողջ ժողովուրդը նրանց ասաց. «Ավելի լավ էր՝ մեռնեինք եգիպտացիների երկրում, քան թե այս անապատում։ ³ Եվ ինչո՞ւ է Տերը մեզ տանում այն երկիրը՝ պատերազմում ընկնելու, իսկ մեր կանանց ու մեր զավակներին՝ հափշտակվելու։ Արդ, մեզ համար ավելի լավ չէ՞ վերադառնալ Եգիպտոս»։ ⁴ Եվ մեկը մյուսին ասացին. «Եկեք հրամանատար ընտրենք և վերադառնանք Եգիպտոս»։ ⁵ Մովսեսն ու Ահարոնը երեսնիվայր ընկան Իսրայելի բոլոր որդիների առջև։ ⁶ Իսկ Նավեի որդի Հեսուն և Հեփոնեի որդի Քաղեբը, որոնք երկիրը հետախուզողներից էին, պատառոտեցին իրենց հանդերձները ⁷ և խոսեցին Իսրայելի որդիների ողջ ժողովրդի հետ՝ ասելով. «Այն երկիրը, որ մենք հետախուզեցինք, չափազանց լավն է։ ⁸ Եթե Աստված մեր նկատմամբ բարեհաճ լինի, մեզ կառաջնորդի այն երկիրը և այն կտա մեզ։ Այն մի երկիր է, որ կաթ ու մեղր է բխեցնում։ ⁹ Միայն թե Տիրոջ դեմ մի՛ ապստամբեք և մի՛ վախեցեք այդ երկրի բնակիչներից, որովհետև մեր բաժինն են։ Տերը հեռացել է նրանցից, Տերը մեզ հետ է։ Մի՛ վախեցեք նրանցից»։ ¹⁰ Եվ ողջ ժողովուրդը սպառնաց քարկոծել նրանց քարերով։

Մովսեսն աղոթում է ժողովրդի համար

Եվ Տիրոջ փառքը Վկայության խորանի վրա ամպի մեջ երևաց Իսրայելի բոլոր որդիներին։ ¹¹ Տերն ասաց Մովսեսին. «Այս ժողովուրդը մինչև ե՞րբ պիտի զայրացնի ինձ, մինչև ե՞րբ չպիտի հավատա ինձ այն բոլոր հրաշքներից հետո, որ կատարեցի նրանց մեջ։ ¹² Թո՛ւյլ տուր ինձ՝ հարվածեմ մահվամբ և կորստյան մատնեմ նրանց, իսկ քեզ ու քո հոր տունը անեմ մեծ ազգ ու ավելի բազմանդամ, քան այս»։ ¹³ Եվ Մովսեսն ասաց Տիրոջը. «Այժմ եգիպտացիներն իմացան, որ դու քո մեծ ուժով այս ժողովրդին հանեցիր իրենց միջից, ¹⁴ և այս երկրի բոլոր բնակիչները հասու են դարձել, որ դու, Տե՛ր, այս ժողովրդի մեջ ես, դեմ հանդիման երևում ես ինձ, Տե՜ր, և քո ամպը նրանց վրա է, և ցերեկը սյունակերպ ամպի մեջ գնում ես նրանց առաջից, իսկ գիշերը՝ հրե սյան նման։ ¹⁵ Արդ, եթե դու այդ ժողովրդին մի մարդու պես ոչնչացնես, ապա ազգերը, որ լսեցին քո անունը, կասեն. ¹⁶ “Քանի որ Տերը չկարողացավ այս ժողովրդին տանել այն երկիրը, որ խոստացել էր նրանց, ոչնչացրեց նրանց այս անապատում”։ ¹⁷ Արդ, թող բարձրանա քո ձեռքը, Տե՛ր, ինչպես որ խոսեցիր ու ասացիր, ¹⁸ թե՝ “Տերը երկայնամիտ է, բազումողորմ ու ճշմարիտ, որ ներում է անօրենությունները, անիրավություններն ու մեղքերը, բայց ամենևին չի մաքրում մեղավորներին, և հայրերի մեղքերը հատուցել է տալիս նրանց զավակներին մինչև երրորդ ու չորրորդ սերունդը”։ ¹⁹ Ելնելով քո մեծ ողորմությունից՝ թողությո՛ւն տուր քո ժողովրդի մեղքերին, ինչպես ներել ես նրանց Եգիպտոսից ելնելուց մինչև հիմա»։

Տերը պատժում է Իսրայելին

(Բ Օր. 1.34-46)

²⁰ Տերն ասաց Մովսեսին. «Կներեմ նրանց, ինչպես դու ասացիր, ²¹ բայց կենդանի եմ ես, կենդանի է իմ անունը, և Տիրոջ փառքը պիտի լցնի ամբողջ երկիրը։ ²² Քանի որ բոլոր մարդիկ, որ տեսան իմ փառքը և հրաշքները, որ արեցի Եգիպտոսում ու այս անապատում, և տասն անգամ փորձեցին ինձ, ու չլսեցին իմ ձայնին, ²³ չեն տեսնի այն երկիրը, որ ես խոստացա նրանց հայրերին։ Այլ այս երկիրը կտամ նրանց որդիներին, որ այստեղ՝ ինձ հետ են, անտեղյակ են չարին ու բարուն, անփորձ մանուկներ են։ Եվ բոլոր նրանք, ովքեր բարկացրին ինձ, այդ երկիրը չեն տեսնի։ ²⁴ Իսկ իմ ծառա Քաղեբին, որի մեջ այլ ոգի դրսևորվեց և եկավ իմ հետևից, կտանեմ այն երկիրը, ուր նա մտավ, և նրա հետնորդները կժառանգեն այն։ ²⁵ Ամաղեկացիներն ու քանանացիները բնակվում են ձորում. դուք վաղը վերադարձե՛ք և գնացե՛ք անապատով՝ Կարմիր ծով տանող ճանապարհով»։

²⁶ Տերը խոսեց Մովսեսի և Ահարոնի հետ ու ասաց. ²⁷ «Մինչև ե՞րբ պիտի հանդուրժեմ, որ այս չար ժողովուրդը տրտնջա իմ առջև։ Լսեցի Իսրայելի որդիների տրտունջը ձեր դեմ։ ²⁸ Արդ, նրանց կասես. “Կենդանի եմ ես,- ասում է Տերը,- և ես կվարվեմ ձեզ հետ այն խոսքերի համաձայն, որ ասացիք իմ ականջներին. ²⁹ ձեր ոսկորները պիտի ընկնեն այս անապատում, ինչպես նաև ձեր ողջ զորահանդեսը՝ հաշվառման ենթարկված քսան տարեկան և բարձր բոլոր նրանք, ովքեր տրտնջացին ինձանից։ ³⁰ Չեք մտնի այն երկիրը, որի վրա բարձրացնելով իմ ձեռքը՝ երդվեցի՝ “Ձեզ կբնակեցնեմ այնտեղ”, բացի Հեփոնեի որդի Քաղեբից ու Նավեի որդի Հեսուից։ ³¹ Իսկ ձեր զավակները, որոնց մասին ասացիք, թե կհափշտակվեն, նրանց կտամ այդ երկիրը, նրանք կժառանգեն այն, որից դուք հրաժարվեցիք։ ³² Ձեր ոսկորները ցրիվ կգան այս անապատում, ³³ իսկ ձեր զավակները քառասուն տարի կթափառեն այս անապատում և կհատուցեն ձեր պոռնկության դիմաց, մինչև ձեր ոսկորները մաշվեն այս անապատում։ ³⁴ Քառասուն օրերի դիմաց քառասուն տարի պիտի ընդունեք ձեր մեղքերի պատիժը և կճանաչեք իմ բարկության մոլուցքը։ ³⁵ Ես՝ Տերս, ասացի, մի՞թե այդպես չեմ վարվելու իմ վրա ելած այս չար ժողովրդի նկատմամբ։ Այս անապատում պիտի հյուծվեն և այստեղ էլ պիտի մեռնեն”»։ ³⁶ Եվ այն մարդիկ, որոնց Մովսեսն ուղարկեց հետախուզելու երկիրը և որոնք վերադառնալով ժողովրդի առաջ թյուր բաներ ասացին՝ չար համբավ տարածելով այդ երկրի մասին, ³⁷ այդ մարդիկ, որոնք չար համբավ տարածեցին այդ երկրի մասին, չարաչար հարվածներով մեռան Տիրոջ առաջ։ ³⁸ Բոլոր այն մարդկանցից, որոնք գնացել էին այդ երկիրը հետախուզելու, փրկվեցին միայն Նավեի որդի Հեսուն և Հեփոնեի որդի Քաղեբը։

³⁹ Մովսեսն Իսրայելի բոլոր որդիներին հաղորդեց Տիրոջ այս պատգամները, և ժողովուրդը մեծապես սգաց։ ⁴⁰ Եվ վաղ առավոտյան բարձրացան լեռան գագաթը և ասացին. «Այո՛, մեղանչեցինք, սակայն այժմ պատրաստ ենք բարձրանալու այն տեղը, որ Տերն ասաց»։ ⁴¹ Եվ Մովսեսն ասաց. «Ինչո՞ւ զանց առաք Տիրոջ խոսքը։ Դուք հաջողություն չեք ունենա։ ⁴² Մի՛ ելեք, որովհետև Տերը ձեզ հետ չէ, և կընկնեք ձեր թշնամիների առաջ։ ⁴³ Որովհետև ամաղեկացիներն ու քանանացիներն այնտեղ՝ ձեր առջևն են, և դուք կընկնեք սրով։ Քանի որ հեռացաք Տիրոջից և նրան չանսացիք, Տերը ձեզ հետ չի լինի»։ ⁴⁴ Բայց նրանք չլսեցին ու բարձրացան լեռան գագաթը, սակայն Տիրոջ Ուխտի տապանակն ու Մովսեսը բանակատեղիից չշարժվեցին։ ⁴⁵ Լեռան վրա բնակվող ամաղեկացիներն ու քանանացիներն իջան, հարվածեցին նրանց ու կոտորեցին՝ քշելով մինչև Հերմա։ Ապա վերադարձան բանակատեղի։

15

Նվիրաբերումի կանոններ

¹ Տերը խոսեց Մովսեսի հետ և ասաց. ² «Խոսի՛ր Իսրայելի որդիների հետ և ասա՛ նրանց. “Երբ մտնեք ձեր բնակության երկիրը, որ ես տալու եմ ձեզ, ³ և Տիրոջը ողջակեզ, ողջընծայի զոհ մատուցեք, դրանք լինեն ուխտի, կամավոր, ձեր տոնակատարությունների առթիվ մատուցվող զոհ՝ որպես անուշահոտություն Տիրոջը, եթե արջառ է կամ ոչխար, ⁴ զոհաբերողը Տիրոջը թող մատուցի նաև քառորդ դորակ յուղով հունցված մեկ տասներորդ գրիվ նաշիհ, ⁵ ողջակեզ կամ զոհ մատուցելիս՝ քառորդ դորակ գինի որպես հեղման ընծա. յուրաքանչյուր զոհաբերվող գառան համար այդչափ գինի կընծայես՝ որպես անուշահոտություն Տիրոջ համար։ ⁶ Խոյը ողջակիզելիս կամ իբրև զոհ նվիրաբերելիս մատուցի՛ր մեկ երրորդ դորակ յուղով հունցված երկու տասներորդ գրիվ նաշիհ, ⁷ ինչպես նաև որպես հեղման ընծա՝ մեկ երրորդ դորակ գինի՝ իբրև անուշահոտություն Տիրոջ համար։ ⁸ Իսկ եթե Տիրոջը արջառ մատուցեք՝ որպես ողջակեզ կամ ուխտի կատարման զոհ կամ փրկության զոհ, ⁹ զվարակի հետ կես դորակ յուղով հունցված երեք տասներորդ գրիվ նաշիհ կնվիրաբերես, ¹⁰ և որպես հեղման ընծա՝ կես դորակ գինի՝ իբրև անուշահոտություն Տիրոջ համար։ ¹¹ Այդպես կվարվես մեկ զվարակի, մեկ խոյի, մեկ գառան, մեկ ոչխարի կամ այծի դեպքում. ¹² ըստ զոհերի թվի, որ կմատուցեք, նույնն արեք յուրաքանչյուրի դեպքում՝ ըստ դրանց թվի։ ¹³ Բոլոր բնիկները թող այդպես անեն՝ նույնպիսի ընծաներ մատուցելով իբրև անուշահոտություն Տիրոջ համար։ ¹⁴ Եվ եթե մի եկվոր միանա ձեզ ձեր երկրում և սերնդեսերունդ ապրի ձեզ հետ և ընծա մատուցի՝ իբրև անուշահոտություն Տիրոջ համար, ինչպես դուք եք անում, նույնպես էլ թող անի եկվորը. ողջ ժողովուրդն այդպես պիտի զոհ մատուցի Տիրոջը։ ¹⁵ Միևնույն օրենքը պետք է գործի և՛ ձեզ համար, և՛ ձեզ հետ բնակվող եկվորի համար։ Դա հավիտենական օրենք պետք է լինի ձեր սերունդների համար։ Ինչպիսին դուք եք, այդպիսին էլ պետք է լինի եկվորը Տիրոջ առջև։ ¹⁶ Միևնույն օրենքը պետք է գործի, միևնույն իրավունքը պիտի ունենաք և՛ դուք, և՛ ձեր մեջ բնակվող եկվորը”»։

¹⁷ Տերը խոսեց Մովսեսի հետ և ասաց. ¹⁸ «Խոսի՛ր Իսրայելի որդիների հետ և ասա՛ նրանց. “Երբ մտնեք այն երկիրը, ուր ես տանելու եմ ձեզ, ¹⁹ և երբ այդ երկրի հացից ուտեք, մի մասն իբրև նվեր տվեք Տիրոջը. ²⁰ ձեր առաջին խմորից Տիրոջը որպես հաս հաց կտանեք, այն կհատկացնեք Տիրոջը կալից ստացվածի հասի պես։ Այդպես էլ այն առանձնացրեք ²¹ և ձեր առաջին խմորից Տիրոջը սերնդեսերունդ հաս տվեք։

²² Եթե մեղանչեք և չկատարեք այս բոլոր պատվիրանները, որ պատվիրեց Տերը Մովսեսին, ²³ ինչպես որ Տերը Մովսեսի միջոցով հրամայել էր ձեզ և այն օրից հավիտյանս պատվիրել ձեզ և ձեր սերունդներին, ²⁴ և եթե այդ մեղքը ժողովրդի աչքից վրիպի և ակամա գործված լինի, ապա ժողովուրդը նախրից մի անարատ զվարակ թող ողջակեզ անի՝ իբրև անուշահոտություն Տիրոջը։ Եվ դրա հետ՝ անարյուն զոհ և հեղման ընծա՝ ըստ կարգի, և այծերից մի նոխազ՝ մեղքերի համար։ ²⁵ Քահանան թող քավություն անի Իսրայելի որդիների ողջ հավաքի համար և թողություն տա նրանց, քանի որ ակամա են մեղանչել և բերել են իրենց ընծան որպես զոհ Տիրոջը՝ նրա հանդեպ գործած մեղքերի, իրենց ակամա հանցանքի համար։ ²⁶ Եվ թող ներվի Իսրայելի որդիների ողջ հավաքին, ինչպես նաև ձեզ մոտ հաստատված եկվորին, որովհետև ողջ ժողովուրդն է ակամա հանցանք գործել։

²⁷ Իսկ եթե մի անձ ակամա մեղանչում է, թող մեկ տարեկան մի էգ ուլ մատուցի մեղքերի քավության համար։ ²⁸ Քահանան թող քավություն անի ակամա մեղանչողի՝ Տիրոջ առջև ակամա մեղք գործողի մեղքերին։ ²⁹ Իսրայելի որդիների բնիկներին և նրանց մեջ հաստատված եկվորի համար մի օրենք թող գործի ակամա մեղանչողի համար։

³⁰ Իսկ այն անձը, որ գիտակից կերպով մեղանչի, բնիկ լինի թե եկվոր, եթե Աստծուն բարկացնի, այդ անձը թող վերանա իր ժողովրդի միջից, ³¹ որովհետև արհամարհեց Տիրոջ խոսքը և նրա պատվիրաններն անտեսեց։ Այն անձը թող բնաջնջվի իր ժողովրդի միջից, քանի որ նրա մեղքն իր մեջ է”»։

Շաբաթը խախտող մարդը

³² Իսրայելի որդիներն անապատում էին։ Նրանք տեսան մի մարդու, որ շաբաթ օրը փայտ էր հավաքում։ ³³ Տեսնողները նրան՝ շաբաթ օրը փայտ հավաքողին, բերեցին Մովսեսի, Ահարոնի ու Իսրայելի որդիների ողջ ժողովրդի մոտ ³⁴ և բանտարկեցին, որովհետև չէին կարողանում որոշել, թե ի՛նչ անեն նրան։ ³⁵ Տերը խոսեց Մովսեսի հետ և ասաց. «Մահվան թող դատապարտվի այդ մարդը։ Ողջ ժողովուրդը քարերով թող քարկոծի նրան»։ ³⁶ Եվ ողջ ժողովուրդը նրան բանակատեղիից դուրս հանեց, և ողջ ժողովուրդը բանակատեղիից դուրս քարկոծեց նրան, ինչպես Տերը հրամայել էր Մովսեսին։

Ծոպավոր զգեստների կանոնները

³⁷ Տերը խոսեց Մովսեսի հետ և ասաց. ³⁸ «Խոսի՛ր Իսրայելի որդիների հետ և ասա՛ նրանց, որ սերնդեսերունդ իրենց հագուստների քղանցքներին ծոպեր անեն, և քղանցքների ծոպերին կապույտ ժապավեն դնեն։ ³⁹ Այս ծոպերը ձեր զգեստների վրա պիտի լինեն, որպեսզի տեսնելով դրանք՝ հիշեք Տիրոջ պատվիրանները և կատարեք դրանք և չշեղվեք՝ ձեր մտքերին ու աչքերին հետևելով, որով դուք պոռնկանում եք։ ⁴⁰ Որպեսզի դուք հիշեք ու կատարեք իմ բոլոր պատվիրանները, և սուրբ կլինեք ձեր Աստծու առջև, ⁴¹ քանզի ես եմ Տերը՝ ձեր Աստվածը, որ հանեցի ձեզ եգիպտացիների երկրից, որպեսզի լինեմ ձեր Աստվածը։ Ես եմ Տերը՝ ձեր Աստվածը»։

16

Կորխի, Դաթանի և Աբիրոնի ապստամբությունը

¹ Կորխը՝ Ղևիի որդի Կահաթի որդի Իսահառի որդին, Դաթանն ու Աբիրոնը՝ Ռուբենի որդի Եղիաբի որդիները, ինչպես նաև Օնանը՝ Ռուբենի որդի Փաղեթի որդին, իրար հետ պայմանավորվելով՝ ² ըմբոստացան Մովսեսի դեմ։ Նրանց միացան նաև Իսրայելի որդիներից երկու հարյուր հիսուն այրեր՝ ժողովրդի առաջնորդներ, խորհրդականներ ու անվանի մարդիկ։ ³ Նրանք միացան Մովսեսի ու Ահարոնի դեմ և ասացին. «Բավակա՛ն է ձեզ, քանի որ ողջ ժողովուրդը և ամեն ոք սուրբ են, և Տերը նրանց մեջ է։ Արդ, ինչո՞ւ եք ձեզ Տիրոջ ժողովրդից բարձր դասում»։ ⁴ Այդ լսելով՝ Մովսեսը երեսնիվայր ընկավ գետնին ⁵ և խոսելով Կորխի ու նրա հետ եղողների հետ՝ ասաց. «Աստված այցի եկավ, ճանաչեց յուրայիններին և սրբերին ու նրանց մերձեցրեց իրեն։ Իսկ նրանց, որոնց չընտրեց, չմերձեցրեց իրեն։ ⁶ Արդ, այսպե՛ս արեք. Կո՛րխ, դու և քեզ հետևողները, վերցրե՛ք ձեր բուրվառները, ⁷ դրանց մեջ կրա՛կ դրեք և խո՛ւնկ լցրեք և վաղը խնկարկե՛ք Տիրոջ առաջ։ Տերը ում որ ընտրի, նա՛ է սուրբը։ Բավակա՛ն է ձեզ, Ղևիի՛ որդիներ»։ ⁸ Մովսեսն ասաց Կորխին. «Լսե՛ք ինձ, Ղևիի՛ որդիներ։ ⁹ Մի՞թե քիչ է ձեզ համար այն, որ Իսրայելի Աստվածը ձեզ առանձնացրեց իր ժողովրդի միջից և ձեզ մերձեցրեց իրեն, որպեսզի սպասավորեք Տիրոջ խորանին և կանգնեք ժողովրդի առջև՝ ծառայելու նրանց։ ¹⁰ Քեզ և քո բոլոր եղբայրներին՝ Ղևիի որդիներին, մերձեցրեց իրեն, և այժմ ցանկանում եք նաև քահանա՞ դառնալ։ ¹¹ Այժմ դու և քո մարդիկ գումարվել եք Աստծու դեմ, քանի որ ո՞վ է Ահարոնը, որ նրա դեմ եք տրտնջում»։ ¹² Եվ Մովսեսը մարդ ուղարկեց, որ կանչեն Դաթանին ու Աբիրոնին՝ Եղիաբի որդիներին։ Նրանք ասացին. «Չենք գա։ ¹³ Մի՞թե քիչ է այն, որ մեզ հանեցիր այն երկրից, որ կաթ ու մեղր էր բխեցնում, որպեսզի սպանես մեզ այստեղ՝ անապատում։ Իսկ հիմա սաստո՞ւմ ես մեզ, ի՞նչ է, դո՞ւ ես իշխանը։ ¹⁴ Արդյո՞ք տարար մեզ այն երկիրը, որ կաթ ու մեղր է բխեցնում, և այնտեղ մեզ անդաստաններ ու այգինե՞ր տվեցիր որպես ժառանգություն։ Եթե անգամ մեր աչքերը հանես, քեզ մոտ չենք գա»։ ¹⁵ Մովսեսը շատ բարկացավ և Տիրոջն ասաց. «Մի՛ նայիր նրանց զոհերին, որովհետև նրանցից ոչ մի լավ բան չեմ տեսել և նրանցից ոչ մեկին վատ բան չեմ արել»։ ¹⁶ Եվ Մովսեսն ասաց Կորխին. «Մաքրի՛ր քո մարդկանց, և առավոտյան պատրա՛ստ եղեք Տիրոջ առաջ կանգնելու դու և Ահարոնը։ ¹⁷ Յուրաքանչյուրդ վերցրե՛ք ձեր բուրվառը և խո՛ւնկ դրեք նրանց վրա. յուրաքանչյուրն իր բուրվառը թող մատուցի Տիրոջ առջև՝ երկու հարյուր հիսուն բուրվառ, նաև դու և Ահարոնը՝ յուրաքանչյուրդ ձեր բուրվառով»։ ¹⁸ Եվ դրանց վրա կրակ դրեցին և խունկ լցրին ու կանգնեցին Վկայության խորանի դռանը, նաև Մովսեսն ու Ահարոնը։ ¹⁹ Կորխն իր բոլոր մարդկանց հավաքեց նրանց շուրջը՝ Վկայության խորանի դռանը։ Եվ Տիրոջ փառքը երևաց ողջ ժողովրդին։ ²⁰ Այն ժամանակ Տերը խոսեց Մովսեսի ու Ահարոնի հետ ու ասաց. ²¹ «Հեռացե՛ք այդ ժողովրդի միջից, որ ես միանգամից ոչնչացնեմ դրանց»։ ²² Մովսեսն ու Ահարոնը, երեսնիվայր ընկնելով, ասացին. «Ո՛վ Աստված, Աստված հոգիների ու բոլոր մարմինների, եթե մի մարդ մեղանչեց, ողջ ժողովրդի՞ վրա պիտի գա Տիրոջ բարկությունը»։ ²³ Տերը խոսեց Մովսեսի հետ և ասաց. ²⁴ «Խոսի՛ր ժողովրդի հետ և ասա՛. “Հեռացե՛ք Կորխի, Դաթանի ու Աբիրոնի բնակավայրի շրջապատից”»։ ²⁵ Մովսեսը վեր կացավ և գնաց Դաթանի ու Աբիրոնի մոտ։ Նրա հետ գնացին նաև Իսրայելի որդիների բոլոր տարեցները։ ²⁶ Մովսեսը խոսեց ժողովրդի հետ՝ ասելով. «Հեռացե՛ք այդ խստասիրտ մարդկանց վրաններից, և մի՛ դիպչեք նրանց իրերին, որպեսզի նրանց մեղքի պատճառով դուք էլ չկորչեք»։ ²⁷ Նրանք հեռացան Կորխի վրանի շրջակայքից, իսկ Դաթանն ու Աբիրոնը, նրանց կանայք ու երեխաներն իրենց իրերով դուրս եկան ու կանգնեցին իրենց վրանների դռանը։ ²⁸ Մովսեսն ասաց. «Սրանով դուք կիմանաք, որ Տերն է ուղարկել ինձ այս բոլոր գործերը կատարելու համար, և ոչ թե ես ինձանից եմ անում դրանք. ²⁹ եթե Դաթանն ու Աբիրոնը մեռնեն մարդկային բնական մահով, կամ մյուս մարդկանց բախտին արժանանան, ապա Տերը չէ, որ ուղարկել է ինձ։ ³⁰ Իսկ եթե Տերը մի նոր նշան ցույց տա, երկիրն իր բերանը բացելով կլանի նրանց, նրանց տները և նրանց ողջ ունեցվածքը, և ողջ-ողջ դժոխք իջնեն, իմացե՛ք, որ այդ մարդիկ զայրացրին Տիրոջը»։ ³¹ Երբ Մովսեսն ավարտեց իր խոսքը, նրանց ոտքի տակ երկիրը պատռվեց, ³² երկիրը բացվեց և կուլ տվեց նրանց ու նրանց տները, Կորխին հարած մարդկանց ու նրանց անասուններին։ ³³ Նրանք իրենց ունեցվածքով ողջ-ողջ իջան դժոխք, երկիրը ծածկեց նրանց, և նրանք վերացան ժողովրդի միջից։ ³⁴ Նրանց շուրջը գտնվող ողջ Իսրայելը փախավ նրանց ձայնից՝ վախենալով, թե երկիրն իրենց էլ կարող է կուլ տալ։ ³⁵ Տիրոջից հուր ելավ ու ճարակեց այն երկու հարյուր հիսուն մարդկանց, որոնք խունկ էին մատուցում։

17

Բուրվառները՝ սրբագործված

¹ Եվ Տերն ասաց Մովսեսին ² ու Ահարոնի որդի Եղիազար քահանային. «Այրվածների միջից վերցրե՛ք պղնձե բուրվառները, բայց նրանց օտար կրակը թափե՛ք հեռու։ ³ Այդ բուրվառները սրբագործվեցին մեղավորների անձերի գնով։ Այդ բուրվառները դրվագածո թիթեղների՛ վերածիր և դրանցով ծածկի՛ր զոհասեղանը, որովհետև դրանք մատուցվեցին Տիրոջ առջև և սրբագործվեցին։ Դրանք Իսրայելի որդիների համար նշան թող լինեն»։ ⁴ Ահարոն քահանայի որդի Եղիազարը վերցրեց պղնձե բուրվառները, որոնք մատուցեցին հրո ճարակ դարձած այրերը, դրանցից զոհասեղանի համար թիթեղ պատրաստեց ⁵ որպեսզի Իսրայելի որդիներին հիշեցնի, որ Ահարոնից չսերած որևէ օտար մարդ խունկ դնելու համար չմոտենա Տիրոջը, որպեսզի նրա հետ էլ չպատահի այն, ինչ պատահեց Կորխի ու նրան հարած ամբոխի հետ։ Այդ էր Տերը հայտնել Մովսեսի միջոցով։

Ահարոնը փրկում է ժողովրդին

⁶ Հետևյալ օրն Իսրայելի որդիները տրտնջացին Մովսեսի ու Ահարոնի դեմ՝ ասելով. «Դուք կոտորեցիք Տիրոջ ժողովրդին»։ ⁷ Երբ ժողովուրդը համախմբվեց Մովսեսի ու Ահարոնի դեմ, նրանք դիմեցին դեպի Վկայության խորան։ Ամպն իսկույն ծածկեց խորանը, և երևաց Տիրոջ փառքը։ ⁸ Մովսեսն ու Ահարոնը կանգնեցին Վկայության խորանի առջև։ ⁹ Տերը խոսեց Մովսեսի ու Ահարոնի հետ ու ասաց. ¹⁰ «Հեռացե՛ք այդ ժողովրդի միջից, որ ես միանգամից ոչնչացնեմ նրանց»։ Մովսեսն ու Ահարոնը երեսնիվայր ընկան գետնին։ ¹¹ Մովսեսն ասաց Ահարոնին. «Վերցրո՛ւ բուրվառը, դրա մեջ զոհասեղանի վրայից վերցրած կրա՛կ դիր, դրա վրա խո՛ւնկ լցրու, շտապ տա՛ր բանակատեղի և քավությո՛ւն խնդրիր նրանց մեղքերի համար, որովհետև Տերը զայրացել է և սկսել է կոտորել ժողովրդին»։ ¹² Ահարոնը վերցրեց բուրվառը, ինչպես իրեն ասել էր Մովսեսը, և գնաց ժողովրդի մոտ։ Մարդկանց կոտորածն արդեն սկսվել էր։ Ահարոնը խնկարկեց և քավություն խնդրեց ժողովրդի գործած մեղքերի համար։ ¹³ Նա կանգնեց սպանված ու կենդանի մարդկանց միջև, և կոտորածը դադարեց։ ¹⁴ Կոտորվածների թիվը հասավ տասնչորս հազար յոթ հարյուր հոգու՝ չհաշված Կորխի պատճառով մեռածները։ ¹⁵ Ահարոնը վերադարձավ Մովսեսի մոտ՝ Վկայության խորանի դուռը, և կոտորածը դադարեց։

Ահարոնի ծաղկող գավազանը

¹⁶ Տերը խոսեց Մովսեսի հետ և ասաց. ¹⁷ «Խոսի՛ր Իսրայելի որդիների հետ և ըստ իրենց նահապետական տների՝ նրանց ցեղերի բոլոր իշխաններից մեկական գավազա՛ն վերցրու, ընդամենը տասներկու գավազան։ Յուրաքանչյուր իշխանի անունը կգրես իր գավազանի վրա։ ¹⁸ Ահարոնի անունը կգրես իր գավազանի վրա։ Իսրայելի ամեն մի ցեղ մեկ գավազան է տալու ըստ իր նահապետական տան։ ¹⁹ Դրանք կդնես Վկայության խորանում, որով այնտեղ պիտի երևամ քեզ։ ²⁰ Թող ծաղկի այն մարդու գավազանը, որին ես կընտրեմ։ Դրանով կվերացնեմ Իսրայելի որդիների տրտունջը, որ ուղղված է ձեր դեմ»։

²¹ Մովսեսը խոսեց Իսրայելի որդիների հետ, և նրանց իշխանները նրան տվեցին իրենց գավազանները. յուրաքանչյուր իշխան տվեց մեկ գավազան՝ ըստ իրենց նահապետական տան, ընդամենը տասներկու գավազան։ Դրանց մեջ էր նաև Ահարոնի գավազանը։ ²² Մովսեսն այդ գավազանները դրեց Տիրոջ առջև՝ Վկայության խորանում։ ²³ Հաջորդ օրը Մովսեսն ու Ահարոնը մտան Վկայության խորան և տեսան, որ Ղևիի տան՝ Ահարոնի գավազանը ծաղկել է և ճյուղեր արձակել, ծաղիկ է տվել և ընկույզ բռնել։ ²⁴ Մովսեսը գավազաններն առավ Տիրոջ առաջից և ցույց տվեց Իսրայելի բոլոր որդիներին։ Նրանք տեսան այդ և ամեն մեկը վերցրեց իր գավազանը։ ²⁵ Տերն ասաց Մովսեսին. «Ահարոնի այդ գավազանը դի՛ր մյուս վկայությունների կողքին ի պահ, որպես նշան անհնազանդ որդիների, որպեսզի դադարի նրանց տրտունջն իմ դեմ, և նրանք չմեռնեն»։ ²⁶ Մովսեսն ու Ահարոնն արեցին այնպես, ինչպես Տերն էր հրամայել Մովսեսին. նրանք այդպես էլ արեցին։ ²⁷ Եվ Իսրայելի որդիները Մովսեսին ասացին. «Մենք կոտորվում, կորչում, նվազում ենք։ ²⁸ Ով մոտենում է Տիրոջ խորանին, մեռնում է։ Մի՞թե մենք իսպառ պիտի ոչնչանանք»։

18

Քահանաների և ղևտացիների պարտականությունները

¹ Եվ Տերն ասաց Ահարոնին. «Դու, քո որդիներն ու քո նահապետական տունը պատասխանատու եք սրբությունների նկատմամբ կատարվող մեղսագործությունների համար, ինչպես նաև դու և քո որդիներն եք կրելու ձեր քահանայագործության ժամանակ ձեր կատարած զանցանքների պատասխանատվությունը։ ² Քեզ մո՛տ վերցրու քո եղբայրներին՝ քո նախահայր Ղևիի ցեղի որդիներին, և նրանք թող միանան քեզ ու ծառայեն քեզ։ Վկայության խորանում պիտի սպասավորեք դու և քեզ հետ՝ քո որդիները։ ³ Նրանք թող սպասավորեն քեզ և կատարեն Վկայության խորանի հանդեպ իրենց պարտականությունները, բայց իմ սուրբ սպասքին ու զոհասեղանին չպետք է մերձենան, որպեսզի և՛ նրանք, և՛ դուք չմեռնեք։ ⁴ Նրանք պիտի միանան քեզ, որ կատարեն Վկայության խորանի հանդեպ իրենց պարտականություններն ըստ խորանի բոլոր ծառայությունների։ Ոչ մի կողմնակի մարդ քեզ չպիտի մոտենա։ ⁵ Դուք ինքներդ կատարեք սրբությունների ու զոհասեղանի սպասավորությունները, որպեսզի Իսրայելի որդիների վրա այլևս չիջնի Տիրոջ բարկությունը։ ⁶ Ես Իսրայելի որդիների միջից, որպես Տիրոջը տրված ընծա, վերցրի ձեր ղևտացի եղբայրներին, որպեսզի նրանք սպասավորեն Վկայության խորանում, ⁷ իսկ դու և քեզ հետ՝ քո որդիները պահպանե՛ք ձեր քահանայությունը, արե՛ք զոհասեղանին վերաբերող բոլոր գործերը, ինչպես նաև վարագույրի հետևում գտնվողներինը. այս են քահանայական ձեր պարտականությունները, իսկ կողմնակի մարդը, եթե մոտենա, կմեռնի»։

⁸ Տերն ասաց Ահարոնին. «Ահա ես ձեզ հանձնեցի ինձ նվիրաբերված ընծաների պահպանությունը. Իսրայելի որդիների՝ ինձ նվիրած ամեն ինչ իբրև պարգև տալիս եմ քեզ ու քո հետնորդներին, և սա թող հավիտենական օրենք լինի։ ⁹ Ահա սրանք են սուրբ ընծաներից ձեզ պատկանող բաները. նրանց բոլոր զանցանքների, նրանց բոլոր մեղսագործությունների համար ինձ նվիրաբերվող նրանց բոլոր նվերներից, նրանց բոլոր զոհերից քեզ և քո որդիներին բաժին պիտի հասնի։ ¹⁰ Ամենասուրբ տեղում կուտեք դրանք. ով արու է, կարող է ուտել այն. միայն դու և քո արու զավակները, և քեզ համար դրանք սուրբ պիտի լինեն։

¹¹ Ձեզ պիտի պատկանեն նաև Իսրայելի որդիների մատուցած բերքի առաջին պտուղները։ Բոլոր նվերներից տալիս եմ քեզ և քեզ հետ՝ քո տղաներին ու դուստրերին։ Սա թող հավիտենական օրենք լինի։ Քո տան ամեն մաքուր մարդ կարող է ուտել այն։ ¹² Տիրոջը մատուցված նոր բերքի ընտիր յուղը, նոր գինին և նոր ցորենը քեզ եմ տալիս։ ¹³ Իրենց երկրի հացաբույսերի առաջին բերքը, որ Տիրոջն են մատուցում, թող քեզ պատկանի։ Քո տան ամեն մաքուր մարդ կարող է ուտել այն։

¹⁴ Իսրայելի որդիներից ինձ նվիրաբերվող ամեն ինչ քեզ թող պատկանի։ ¹⁵ Ամեն մի մարմնի արգանդ բացող՝ մարդ թե անասուն, որ Տիրոջն են նվիրում, թող քեզ պատկանի։

Մարդկանց անդրանիկները, սակայն, պետք է հետ գնվեն։ Պետք է հետ գնվեն նաև անմաքուր անասունների առաջնածինները։ ¹⁶ Հետգնումը թող տեղի ունենա ծննդից մեկ ամիս անցնելուց հետո, իսկ դրա գինը, ըստ սրբարանի սիկղի, հինգ սիկղ թող լինի, որը հավասար է քսան դանգի։ ¹⁷ Բայց արջառների, ոչխարների ու այծերի առաջնածինները հետ չգնես, որովհետև սուրբ են։ Նրանց արյունը կհեղես զոհասեղանի մոտ, իսկ ճարպը կմատուցես կիզման՝ իբրև անուշահոտություն Տիրոջ համար։ ¹⁸ Ինչպես որ քեզ են պատկանում կուրծքն ու աջ թևը, նույնպես միսը թող քեզ պատկանի։ ¹⁹ Սրբություններից այն ամենը, ինչ որ Իսրայելի որդիները Տիրոջն են տալիս որպես տուրք, քեզ եմ տալիս, քո զավակներին և քեզ հետ՝ քո տղաներին ու դուստրերին։ Դա հավիտենական օրենք թող լինի, որովհետև դա Տիրոջ առաջ անբեկանելի ուխտ է քեզ համար և քեզնից հետո՝ քո սերնդի համար»։ ²⁰ Տերն ասաց Ահարոնին. «Նրանց երկրում ոչ մի ժառանգություն չպիտի ունենաս, և դու նրանց հետ ոչ մի բաժին չպիտի ունենաս, որովհետև ես եմ քո բաժինն ու ժառանգությունը Իսրայելի որդիների մեջ»։

Ղևտացիների բաժինը

²¹ «Ղևիի որդիներին իբրև ժառանգություն տալիս եմ Իսրայելի որդիների բոլոր եկամուտների տասանորդները նրանց այն ծառայության համար, որ նրանք պիտի կատարեն Վկայության խորանում։ ²² Իսրայելի որդիներն այլևս չպետք է մերձենան Վկայության խորանին, որպեսզի չմեղանչեն և չմեռնեն։ ²³ Միայն ղևտացիները թող սպասավորություն անեն Վկայության խորանում և պատասխանատու լինեն նրա համար։ Դա հավիտենական օրենք թող լինի Իսրայելի որդիների մեջ իրենց բոլոր սերունդներում։ Ղևտացիները ժառանգություն չպետք է ժառանգեն. ²⁴ Իսրայելի որդիների տասանորդները, որ հատկացնելու են Տիրոջն իբրև տուրք, տվեցի ղևտացիներին՝ որպես ժառանգություն։ Դրա համար էլ ասացի, որ նրանք ժառանգություն չպիտի ունենան Իսրայելի որդիների մեջ»։

Ղևտացիների տասանորդը

²⁵ Տերը խոսեց Մովսեսի հետ և ասաց. ²⁶ «Խոսի՛ր ղևտացիների հետ ու ասա՛ նրանց. “Եթե Իսրայելի որդիներից տասանորդ ստանաք, որը ես ձեզ եմ տվել, դուք էլ դրանից պետք է տուրք տաք Տիրոջը՝ տասանորդի մեկ տասներորդը։ ²⁷ Ձեր տուրքը պիտի համապատասխանի կալից ընծայված ցորենին և հնձանից ընծայված պտուղին։ ²⁸ Ըստ այդմ էլ դուք մաս պիտի հանեք Տիրոջը այդ տուրքից, որ պիտի ստանաք Իսրայելի որդիներից իբրև տասանորդ, և դրանից տուրք պիտի տաք Տիրոջը, Ահարոն քահանային։ ²⁹ Ձեր ստացած բոլոր տասանորդներից Տիրոջը մաս պիտի հանեք, այդ թվում՝ նաև առաջին բերքից սրբագործվածից”։ ³⁰ Դու ղևտացիներին ասա՛. “Երբ դրանից ընտիրը նվիրաբերեք Տիրոջը, մնացյալը թող պատկանի ղևտացուն՝ կալի արդյունք և հնձանի պտուղ։ ³¹ Դուք և ձեր ընտանիքները դա կարող եք ուտել ամեն տեղ, որովհետև դա ձեր վարձն է Վկայության խորանում ձեր ծառայության դիմաց։ ³² Եվ դրա համար դուք մեղք կրած չեք լինի, եթե դրանից տուրք հանած լինեք Տիրոջը։ Իսրայելի որդիների սուրբ ընծաները մի՛ պղծեք, որպեսզի չմեռնեք”»։

19

Կարմիր երինջի մոխիրը

¹ Տերը խոսեց Մովսեսի ու Ահարոնի հետ։ ² Սա է այն կարգը, որ Տերը պատվիրեց Մովսեսին՝ ասելով. «Իսրայելի որդիներին ասա՛, որ քեզ մոտ բերեն արատ չունեցող մի կարմիր երինջ, որ ոչ մի բիծ չունենա ու լծի տակ մտած չլինի։ ³ Այն կհանձնես Եղիազար քահանային։ Թող հանեն դա բանակատեղիից դուրս՝ մի մաքուր տեղ, և այն զոհեն նրա առջև։ ⁴ Եղիազարը թող առնի նրա արյունից և յոթ անգամ ցանի Վկայության խորանի դիմաց։ ⁵ Երինջը թող այրեն նրա առջև. դրա մորթը, միսն ու արյունը թող այրեն իր աղտեղիքի հետ։ ⁶ Քահանան թող վերցնի եղևնու փայտ, զոպա ու կարմիր թել և նետի երինջի այրվածքի մեջ։ ⁷ Ապա քահանան թող լվանա իր հագուստները, մարմինը լվանա ջրով և հետո միայն մտնի բանակ։ Քահանան մինչև երեկո անմաքուր թող համարվի։ ⁸ Երինջն այրողը նույնպես թող լվանա իր հագուստները, մարմինը լվանա ջրով և անմաքուր համարվի մինչև երեկո։ ⁹ Մի մաքուր մարդ թող հավաքի երինջի մոխիրը և կուտակի բանակատեղիից դուրս՝ մի մաքուր տեղ։ Մոխիրը պիտի պահվի Իսրայելի ժողովրդի համար. դրանով պիտի պատրաստվի մաքրության ջուրը, քանի որ դա սրբություն է։ ¹⁰ Երինջի մոխիրը հավաքողը թող լվանա իր մարմինն ու հագուստները և անմաքուր համարվի մինչև երեկո։ Եվ այս հավիտենական օրենք թող լինի թե՛ Իսրայելի որդիների և թե՛ նրանց հարած եկվորների համար»։

Օրենք մաքրման մասին

¹¹ «Նա, ով կդիպչի մեռած մարդու, անմաքուր թող համարվի յոթ օր։ ¹² Նա պետք է մաքրվի երրորդ ու յոթերորդ օրերին, որից հետո մաքուր կհամարվի։ Իսկ եթե երրորդ ու յոթերորդ օրերին չմաքրվի, մաքուր չի համարվի։ ¹³ Ով դիպչի մեռած մարդու ու չմաքրվի, նա պղծած է լինում Տիրոջ խորանը։ Այդ մարդը թող վերանա Իսրայելի միջից։ Քանի որ մեղքերի մաքրման ջուր չցանվեց նրա վրա, նա անմաքուր է, որովհետև նրա պղծությունը մնում է իր մեջ։

¹⁴ Տան մեջ մեռնող մարդու մասին օրենքն այս է. ով մտնի այդ տունը, և ինչ որ կա այդ տան մեջ, անմաքուր թող համարվի յոթ օր։ ¹⁵ Բաց, կափարիչով չծածկված կամ բերանը չկապած որևէ աման անմաքուր թող համարվի։ ¹⁶ Ով դաշտում սպանված կամ մեռած մարդու, կամ մարդու ոսկորի կամ գերեզմանի դիպչի, յոթ օր թող պիղծ համարվի։ ¹⁷ Անմաքուր համարվածի համար թող առնեն մեղքերի մաքրման համար այրված երինջի մոխրից, դնեն մի ամանի մեջ և վրան ջուր ավելացնեն։ ¹⁸ Մաքուր մի մարդ թող վերցնի զոպան և այն սուրբ ջրի մեջ թաթախելով՝ ցանի տան, կահկարասու, ամանների, այնտեղ գտնվող մարդկանց վրա, ինչպես նաև մարդու ոսկորին, սպանված կամ մեռած մարդու դիակին կամ գերեզմանին ձեռք տված մարդու վրա։ ¹⁹ Մաքուր մարդը երրորդ ու յոթերորդ օրերն անմաքուր մարդու վրա ջուր թող ցանի, և նա յոթերորդ օրը մաքուր թող համարվի։ Նա թող լվանա իր հագուստները, իր մարմինը լվանա ջրով և մինչև երեկո անմաքուր համարվի։

²⁰ Այն մարդը, որ պղծվել է, բայց չի մաքրվում, թող վերանա իր ժողովրդի միջից, որովհետև նա Տիրոջ սրբարանն է պղծել, սրսկման ջուր չի սրսկվել նրա վրա, անմաքուր է։ ²¹ Դա ձեզ համար հավիտենական օրենք թող լինի։ Սրսկման ջուրը սրսկողը պետք է լվանա իր հագուստները։ Ով մերձենում է սրսկման ջրին, մինչև երեկո անմաքուր թող համարվի։ ²² Ինչի էլ որ դիպչի անմաքուրը, մինչև երեկո դա անմաքուր թող համարվի, իսկ ով դիպչի անմաքուր մարդուն, նա էլ մինչև երեկո անմաքուր թող համարվի»։

20

Կադեսի դեպքերը։ Ջուր ապառաժից

(Ելք 17.1-7)

¹ Իսրայելի որդիները ողջ ժողովրդով առաջին ամսին եկան Սինայի անապատ, և ժողովուրդը բանակեց Կադեսում։ Մարիամը վախճանվեց այնտեղ ու այնտեղ էլ թաղվեց։

² Այնտեղ խմելու ջուր չկար ժողովրդի համար, ուստի ելան Մովսեսի և Ահարոնի դեմ։ ³ Ժողովուրդը, Մովսեսի դեմ գանգատվելով, ասում էր. «Ավելի լավ կլիներ, եթե մենք էլ մեռնեինք, երբ Տիրոջ առջև կոտորվում էին մեր եղբայրները։ ⁴ Ինչո՞ւ Տիրոջ ժողովրդին բերեցիք այս անապատը, որ կոտորվենք մենք ու մեր անասունները։ ⁵ Ինչո՞ւ հանեցիք մեզ եգիպտացիների երկրից, որ գանք հասնենք այս չար տեղը, որտեղ ո՛չ սերմ կլինի ցանել, ո՛չ թզենի կա, ո՛չ խաղողի այգիներ, ո՛չ նռնենիներ և ո՛չ էլ խմելու ջուր»։ ⁶ Մովսեսն ու Ահարոնը ժողովրդի մոտից գնացին Վկայության խորանի դուռը և երեսնիվայր ընկան գետնին։ Եվ Տիրոջ փառքը երևաց նրանց։

⁷ Տերը խոսեց Մովսեսի հետ և ասաց. ⁸ «Վերցրո՛ւ գավազանը, դու և քո եղբայր Ահարոնը ժողովրդին հավաքե՛ք, և նրանց ներկայությամբ խոսե՛ք այդ ապառաժի հետ, և նա կտա իր ջուրը։ Այդ ապառաժից ջուր կհանեք և կխմեցնեք ժողովրդին ու նրանց անասուններին»։ ⁹ Մովսեսը վերցրեց Տիրոջ առջև գտնվող գավազանը, ինչպես Տերն էր հրամայել իրեն։ ¹⁰ Մովսեսն ու Ահարոնը ժողովրդին հավաքեցին ապառաժի դիմաց։ Եվ նրանց ասաց. «Լսե՛ք ինձ, անհավաննե՛ր, հնարավո՞ր է, որ այս ապառաժից ձեզ համար ջուր հանենք»։ ¹¹ Եվ Մովսեսը, իր ձեռքը բարձրացնելով, երկու անգամ հարվածեց ապառաժին։ Առատ ջուր բխեց, և ժողովուրդն ու անասունները խմեցին։

¹² Տերն ասաց Մովսեսին ու Ահարոնին. «Քանի որ դուք ինձ չհավատացիք, որ ցույց տաք իմ սրբությունն Իսրայելի որդիների առջև, ուստի դուք այդ ժողովրդին չեք առաջնորդի այն երկիրը, որ դրանց եմ տվել»։ ¹³ Այդ աղբյուրը կոչվեց Հակառակության ջուր [*  Մե-Մերիվա], որովհետև Իսրայելի որդիները գանգատվեցին Տիրոջ առջև, որը հայտնեց նրանց իր սրբությունը։

Եդովմի թագավորը արգելում է իսրայելացիներին անցնել

¹⁴ Մովսեսը Կադեսից պատգամավորներ ուղարկեց Եդովմի արքայի մոտ և ասաց. «Այսպես է ասում քո եղբայր Իսրայելը. “Դու ինքդ տեղյակ ես այն բոլոր նեղություններին, որ կրեցինք մենք, ¹⁵ թե ինչպես մեր հայրերը գնացին Եգիպտոս, որտեղ պանդուխտ եղանք երկար ժամանակ, թե եգիպտացիներն ինչքան չարչարեցին մեզ ու մեր հայրերին։ ¹⁶ Մենք բողոք բարձրացրինք Տիրոջ առջև, նա լսեց մեր ձայնը և հրեշտակ ուղարկելով՝ հանեց մեզ Եգիպտոսից։ Եվ հիմա մենք Կադես քաղաքում ենք՝ քո երկրի սահմանների մոտ։ ¹⁷ Արդ, թույլ տուր անցնենք քո երկրով։ Մենք ո՛չ քո դաշտերով կանցնենք, ո՛չ քո այգիներով, ո՛չ իսկ ջուր կխմենք քո ջրհորներից։ Արքունի ճանապարհներով կգնանք, աջ կամ ձախ չենք շեղվի, մինչև որ դուրս գանք քո սահմաններից”»։ ¹⁸ Եդովմի արքան նրան ասաց. «Իմ երկրով չեք անցնի, այլապես պատերազմի կելնեմ ձեր դեմ»։ ¹⁹ Իսրայելի որդիները նրան ասացին. «Թո՛ւյլ տուր լեռան մոտով անցնենք։ Եթե մենք ու մեր հոտերը խմենք քո ջրից, քեզ դրա գինը կտանք։ Մենք շատ բան չենք պահանջում, թող անցնենք լեռան մոտով»։ ²⁰ Նա պատասխանեց. «Չեք անցնի իմ երկրով»։ Եվ Եդովմը նրանց դեմ ելավ մեծ ամբոխով ու հզոր ձեռքով։ ²¹ Եդովմը չցանկացավ Իսրայելին ճանապարհ տալ իր սահմանների միջով, ուստի Իսրայելը խուսափեց նրանից։ ²² Եվ Իսրայելի որդիները, ողջ ժողովրդով Կադեսից մեկնելով, եկան Հովր լեռը։

Ահարոնի մահը

²³ Տերը Հովր լեռան վրա՝ եդովմացիների երկրի սահմանի մոտ, խոսեց Մովսեսի ու Ահարոնի հետ և ասաց. ²⁴ «Ահարոնը թող միանա իր ժողովրդին, որովհետև նա չի մտնելու այն երկիրը, որ ես տվել եմ Իսրայելի որդիներին, որովհետև դուք ինձ բարկացրիք Հակառակության ջրի մոտ։ ²⁵ Դու վերցրո՛ւ Ահարոնին ու նրա որդի Եղիազարին և ամբողջ ժողովրդի ներկայությամբ բարձրացրո՛ւ Հովր լեռը։ ²⁶ Ահարոնի վրայից հանի՛ր նրա պատմուճանը և այն հագցրո՛ւ նրա որդի Եղիազարին, և Ահարոնն այնտեղ թող մեռնի ու միանա իր նախնիներին»։ ²⁷ Մովսեսն արեց այնպես, ինչպես Տերն էր հրամայել իրեն. նա ամբողջ ժողովրդի ներկայությամբ Ահարոնին բարձրացրեց Հովր լեռը, ²⁸ նրա վրայից հանեց նրա հագուստները և դրանք հագցրեց նրա որդի Եղիազարին։ ²⁹ Ահարոնը մահացավ լեռան գագաթին, իսկ Մովսեսն ու Եղիազարը իջան լեռից։ ³⁰ Ամբողջ ժողովուրդը տեսավ, որ վախճանվեց Ահարոնը, և Իսրայելի ողջ տունը երեսուն օր ողբաց Ահարոնին։

21

Իսրայելի հաղթանակը քանանացիների հանդեպ

¹ Երբ Արադի քանանացի արքան, որը բնակվում էր անապատի մոտ, լսեց, որ Իսրայելի որդիները գալիս են Աթարինի ճանապարհով, պատերազմ մղեց Իսրայելի որդիների դեմ և նրանցից գերիներ վերցրեց։ ² Իսրայելը Տիրոջը ուխտեց՝ ասելով. «Եթե իմ ձեռքը հանձնես այդ ժողովրդին, նրան ու նրա քաղաքները կկործանենք[23]»։ ³ Տերը լսեց Իսրայելի ձայնը և քանանացուն մատնեց նրանց ձեռքը, և ոչնչացրին նրան ու նրա քաղաքները և այդ տեղի անունը դրեցին Նզովք։

Պղնձե օձը

⁴ Հովր լեռից մեկնելով Կարմիր ծովը տանող ճանապարհով՝ շրջանցեցին Եդովմը։ Սակայն ժողովուրդը հուսահատվեց ճանապարհին ⁵ և սկսեց գանգատվել Աստծուց ու Մովսեսից, և ասացին. «Ինչո՞ւ մեզ հանեցիր Եգիպտոսից, որ մեզ այս անապատում կոտորես։ Ո՛չ հաց կա և ո՛չ ջուր։ Մենք զզվել ենք այս խղճուկ սննդից»։ ⁶ Տերը ժողովրդին թունավոր օձեր ուղարկեց, որոնք խայթում էին մարդկանց. Իսրայելի որդիներից շատերը մեռան։ ⁷ Եվ գալով Մովսեսի մոտ՝ ասացին. «Մեղք ենք գործել, որովհետև չարախոսել ենք Տիրոջն ու քեզ։ Արդ, աղոթի՛ր Տիրոջը, որ նա մեր միջից վերացնի այդ օձերը»։ Մովսեսն աղոթեց Տիրոջը ժողովրդի համար։ ⁸ Եվ Տերն ասաց Մովսեսին. «Դու մի օ՛ձ պատրաստիր և այն դի՛ր ձողի վրա։ Երբ օձը մարդ խայթի, և օձից խայթվողը նայի դրան, կփրկվի»։ ⁹ Մովսեսը պղնձե օձ պատրաստեց և այն դրեց ձողի վրա։ Եվ երբ օձը խայթում էր մեկին, նա, նայելով պղնձե օձին, կենդանի էր մնում։

Հովր լեռից դեպի Մովաբի հովիտ

¹⁰ Իսրայելի որդիները մեկնեցին ու բանակեցին Ովբովթում։ ¹¹ Ովբովթից մեկնելով՝ բանակեցին Աքեղգայիում՝ անապատի այն կողմում, որը Մովաբի դիմաց է գտնվում, նրանից արևելք։ ¹² Այնտեղից էլ ճանապարհ ընկնելով՝ բանակեցին Զարեդ ձորում։ ¹³ Այնտեղից էլ մեկնելով՝ բանակեցին Առնովնից այն կողմ՝ անապատում, ամորհացիների սահմանների ելքի մոտ. որովհետև Առնովնը մովաբացիների սահմանն է՝ մովաբացիների ու ամորհացիների սահմանների միջև։ ¹⁴ Դրա համար էլ Տիրոջ պատերազմների գրքում գրված է.

«Կրակի մատնեց Զովդն ու Առնովնի ձորը։

¹⁵ Նա ձորում բնակվողներին տարավ բնակեցնելու Էրում,

որը սահմանակից էր Մովաբին»։

¹⁶ Եվ այնտեղից հասան Ջրհոր [*  Բեեր]։ Դա այն ջրհորն է, որի մասին Տերն ասաց Մովսեսին. «Հավաքի՛ր ժողովրդին, որ ես նրանց խմելու ջուր տամ»։ ¹⁷ Այն ժամանակ Իսրայելը ջրհորի մոտ այս օրհներգը երգեց.

«Փառաբանե՜ք այն ¹⁸ ջրհորը, որ փորեցին իշխանները,

այն տաշեցին ազգերի թագավորներն

իրենց թագավորության և տիրապետության ժամանակ»։

Ապա Ջրհորից գնացին դեպի Մանթանին, ¹⁹ Մանթանինից՝ Մանայել, Մանայելից՝ Բամովթ, ²⁰ Բամովթից մի հովիտ Մովաբում՝ Կոփածո [*  Պիսգա] կոչված լեռան գագաթի մոտ, որ նայում է դեպի անապատ։

Անդրհորդանանի նվաճումը

²¹ Մովսեսն ամորհացիների արքայի մոտ պատգամավորներ ուղարկեց խաղաղության խոսքերով։ Նա ասաց. ²² «Թո՛ւյլ տուր անցնենք քո երկրով։ Ճանապարհով կգնանք, չենք շեղվի ո՛չ դաշտերի, ո՛չ էլ այգիների մեջ և ո՛չ էլ քո ջրհորներից ջուր կխմենք։ Արքունի ճանապարհով կգնանք, մինչև որ անցնենք քո սահմաններից»։ ²³ Սեհովնը Իսրայելի որդիներին թույլ չտվեց անցնել իր սահմաններով։ Սեհովնը հավաքեց իր ողջ ժողովրդին ու Իսրայելի դեմ պատերազմելու ելավ անապատում։ Նա եկավ Սիասար և պատերազմ մղեց Իսրայելի դեմ։ ²⁴ Իսրայելը սրով կոտորեց նրան, և տիրեցին նրա երկրին Առնովնից մինչև Հաբոկ, մինչև Ամովնի որդիների երկիրը, որովհետև Հազերը Ամովնի որդիների սահմանն էր։ ²⁵ Իսրայելը գրավեց այդ բոլոր քաղաքները և բնակվեց ամորհացիների բոլոր քաղաքներում՝ Եսեբոնում ու նրա բոլոր արվարձաններում, ²⁶ որովհետև Եսեբոնը ամորհացիների արքա Սեհովնի քաղաքն էր։ Նա մինչ այդ պատերազմ էր մղել Մովաբի արքայի դեմ ու գրավել նրա ամբողջ երկիրը՝ Արոյերից մինչև Առնովն։ ²⁷ Դրա համար բոլոր առակասացներն ասում են.

«Եկե՛ք Եսեբոն,

որպեսզի կառուցվի ու բարեկարգվի Սեհովնի քաղաքը,

²⁸ քանզի հուր ելավ Եսեբոնից,

և բոց՝ Սեհովնի քաղաքից,

այրեց մինչև Մովաբ

և լափեց Առնովնի արձանները։

²⁹ Վա՜յ քեզ, Մովա՛բ,

կորա՜ր, Քամովսի ժողովուրդ։

Նրանց որդիները փախուստի մատնվեցին,

նրանց դուստրերը գերի ընկան

ամորհացիների թագավորի ձեռքը։

³⁰ Նրանց սերունդները կկոտորվեն Եսեբոնից մինչև Դեբովն,

և նրանց կանայք անգամ կրակ գցեցին Մովաբի վրա»։

³¹ Իսրայելը բնակվեց ամորհացիների բոլոր քաղաքներում։ ³² Մովսեսը մարդ ուղարկեց, որ հետախուզեն Հազերը։ Եվ գրավեցին այն ու նրա ավանները և դուրս քշեցին այնտեղ բնակվող ամորհացուն։ ³³ Այնտեղից դուրս եկան ու գնացին Բասան տանող ճանապարհով։ Եվ Բասանի Օվգ թագավորը Եդրայինում նրանց դեմ պատերազմի ելավ իր ողջ ժողովրդով։ ³⁴ Եվ Տերն ասաց Մովսեսին. «Մի՛ վախեցիր նրանից, որովհետև քո ձեռքն եմ մատնել նրան, նրա ողջ ժողովրդին ու նրա ողջ երկիրը։ Նրա հետ կվարվես այնպես, ինչպես վարվեցիր Եսեբոնում բնակվող ամորհացիների արքա Սեհովնի հետ»։ ³⁵ Եվ հարվածեց նրան ու նրա որդիներին և նրա ողջ ժողովրդին, մինչև որ նրանցից ոչ մի մարդ ողջ չմնաց, և ժառանգեցին նրանց երկիրը։

22

Մովաբի թագավորը Բաղաամի մոտ բանագնաց է ուղարկում

¹ Այնտեղից մեկնելով՝ Իսրայելի որդիները բանակեցին Մովաբի արևմտյան մասում՝ Հորդանան գետի մոտ, Երիքովի դիմաց։

² Բաղակը՝ Սեպփովրի որդին, տեսավ այն ամենը, ինչ Իսրայելն արեց ամորհացիներին։ ³ Մովաբը խիստ վախեցավ այդ ժողովրդից, որովհետև նրանք շատ էին. Մովաբը զարհուրեց Իսրայելի որդիներից։ ⁴ Մովաբն ասաց Մադիամի ծերակույտին. «Արդ այս ժողովուրդը կխժռի ամեն բան, որ մեր շուրջն է, այնպես, ինչպես արջառն է խժռում դաշտի դալար խոտը»։ Բաղակը՝ Սեպփովրի որդին, այդ ժամանակ Մովաբի արքան էր։ ⁵ Նա պատգամավորներ ուղարկեց Բաղաամի՝ Բեովրի որդու մոտ, Փաթուրն քաղաքը, որ գետեզրին է, իր ազգակիցների երկիրը, որպեսզի կանչի նրան՝ ասելով. «Ահա մի ժողովուրդ է ելել Եգիպտոսից, որ ծածկել է երկրի երեսը և իջևանել իմ մոտակայքում։ ⁶ Արդ, արի՛, ինձ համար անիծի՛ր այս ժողովրդին, որովհետև նա ինձանից ուժեղ է։ Թերևս կարողանանք կոտորել նրանցից ոմանց ու հալածել մեր երկրից։ Գիտեմ, որ այն, ինչ դու օրհնում ես, օրհնված է, և ինչ անիծում ես, անիծված է»։

⁷ Մովաբի ծերակույտն ու Մադիամի ծերակույտը գնացին՝ իրենց ձեռքում ունենալով մոգության վարձը։ Նրանք եկան Բաղաամի մոտ և հայտնեցին նրան Բաղակի խոսքերը։ ⁸ Եվ նրանց ասաց. «Այս գիշեր մնացե՛ք այստեղ, և ես ձեր խնդրին պատասխան կտամ, ինչ Տերը կհայտնի ինձ»։ Մովաբի իշխանները գիշերեցին Բաղաամի մոտ։ ⁹ Աստված եկավ Բաղաամի մոտ և նրան ասաց. «Ովքե՞ր են այս մարդիկ, որ քեզ մոտ են»։ ¹⁰ Բաղաամը պատասխանեց Աստծուն. «Մովաբի արքա Բաղակը՝ Սեպփովրի որդին է ուղարկել նրանց ինձ մոտ և ասել. ¹¹ “Ահա մի ժողովուրդ է ելել Եգիպտոսից և ծածկել երկրի երեսը և իջևանել իմ մոտակայքում։ Արդ, արի՛, ինձ համար անիծի՛ր նրանց, որպեսզի թերևս կարողանամ նրանց կոտորելով՝ հալածել իմ երկրից”»։ ¹² Եվ Աստված ասաց Բաղաամին. «Մի՛ գնա նրանց հետ և մի՛ անիծիր ժողովրդին, որովհետև նա օրհնյալ է»։ ¹³ Եվ Բաղաամը, առավոտյան վեր կենալով, ասաց Բաղակի իշխաններին. «Վերադարձե՛ք ձեր տիրոջ մոտ, որովհետև Աստված թույլ չի տալիս ինձ, որ գամ ձեզ հետ»։ ¹⁴ Մովաբի իշխանները վեր կացան, եկան Բաղակի մոտ ու ասացին. «Բաղաամը չկամեցավ գալ մեզ հետ»։ ¹⁵ Բաղակը սրանցից ավելի շատ և պատվավոր իշխաններ ուղարկեց։ ¹⁶ Բաղաամի մոտ գալով՝ նրանք ասացին. «Այսպես է ասում Բաղակը՝ Սեպփովրի որդին. “Աղաչում եմ քեզ, շտապ ինձ մո՛տ արի, ¹⁷ որովհետև մեծապես պատվելու եմ քեզ, և ինչ էլ ասես, կանեմ քեզ համար։ Արդ, արի՛, ինձ համար անիծի՛ր այս ժողովրդին”»։ ¹⁸ Բաղաամը պատասխան տվեց Բաղակի իշխաններին՝ ասելով. «Եթե Բաղակն ինձ անգամ իր տնով լի արծաթ ու ոսկի տա, ես չեմ կարող ոտնահարել Տիրոջ՝ Աստծու խոսքը և այն իմ մտքում մեծ կամ փոքր դարձնել։ ¹⁹ Արդ, այս գիշեր մնացե՛ք այստեղ, որպեսզի իմանամ, թե Տերն էլ ինչ կասի ինձ»։ ²⁰ Գիշերն Աստված եկավ Բաղաամի մոտ և ասաց նրան. «Քանի որ քեզ կանչելու համար են եկել այս մարդիկ, վե՛ր կաց, գնա՛ նրանց հետ, բայց կանես այն, ինչ ես կասեմ քեզ»։

Բաղաամի էշը խոսում է

²¹ Բաղաամը, առավոտյան վեր կենալով, համետեց իր էշը և գնաց Մովաբի իշխանների հետ։ ²² Աստված խիստ բարկացավ, որ նա գնում է։ Աստծու հրեշտակը եկավ, կանգնեց նրա առաջ որպես հակառակորդ։ Բաղաամը նստել էր իր էշի վրա, և նրա հետ էին իր երկու ծառաները։ ²³ Երբ էշը տեսավ, որ Աստծու հրեշտակը մերկացրած սուրը ձեռքին փակել է ճանապարհը, մի կողմ քաշվեց ճանապարհից և գնում էր դաշտի միջով։ Բաղաամը գավազանով հարվածեց էշին, որպեսզի նրան ուղղի դեպի ճանապարհը։ ²⁴ Աստծու հրեշտակը կանգնեց այգիների առվամիջին։ Այգիներն այս ու այն կողմից ցանկապատեր ունեին։ ²⁵ Էշը, տեսնելով Աստծու հրեշտակին, նետվեց պատի կողմը և ճզմեց Բաղաամի ոտքը։ Նա սկսեց ավելի սաստիկ հարվածել էշին։ ²⁶ Աստծու հրեշտակն ավելի առաջ գնաց և կանգնեց նեղ տեղում, որտեղից էշն այլևս չէր կարող աջ կամ ձախ թեքվել։ ²⁷ Էշը, տեսնելով Աստծու հրեշտակին, կքեց Բաղաամի տակ։ Բաղաամը բարկացավ և էշին հարվածեց գավազանով։ ²⁸ Աստված բացեց էշի բերանը, և սա ասաց Բաղաամին. «Ի՞նչ եմ քեզ արել, որ այս երրորդ անգամ է՝ հարվածում ես ինձ»։ ²⁹ Բաղաամն էշին ասաց. «Որովհետև ինձ ծաղրուծանակի ենթարկեցիր, եթե սուր լիներ ձեռքիս, արդեն սպանած կլինեի քեզ»։ ³⁰ Էշն ասաց Բաղաամին. «Ես այն էշը չե՞մ, որի վրա դու հեծել ես քո մանկության օրից մինչև այսօր։ Ես երբևէ ծուլացե՞լ եմ ու քեզ այսպես արել»։ Նա պատասխանեց՝ ո՛չ։ ³¹ Աստված բացեց Բաղաամի աչքերը, և նա տեսավ, որ Տիրոջ հրեշտակը մերկացրած սուրը ձեռքին կանգնած է ճանապարհի վրա։ Նա, երեսնիվայր ընկնելով, երկրպագեց։ ³² Աստծու հրեշտակը նրան ասաց. «Ինչո՞ւ երեք անգամ հարվածեցիր քո էշին։ Ես ահա քեզ խանգարելու ելա, որովհետև քո ճանապարհն ուղիղ չէ իմ առջև։ ³³ Էշդ ինձ տեսավ ու երեք անգամ մի կողմ քաշվեց, և եթե ինձնից չխուսափեր, հիմա ես քեզ սպանած կլինեի, իսկ դրան կենդանի կթողնեի»։ ³⁴ Բաղաամն ասաց Տիրոջ հրեշտակին. «Մեղանչեցի, որովհետև չգիտեի, որ դու էիր ճանապարհս փակողը։ Արդ, եթե քեզ ցանկալի չէ գնալս, կվերադառնամ»։ ³⁵ Աստծու հրեշտակն ասաց Բաղաամին. «Գնա՛ այս մարդկանց հետ, բայց զգո՛ւյշ եղիր և խոսի՛ր այն, ինչ ասելու եմ քեզ»։ Բաղաամը գնաց Բաղակի իշխանների հետ։

Բաղակի և Բաղաամի հանդիպումը

³⁶ Բաղակը, լսելով, որ գալիս է Բաղաամը, ընդառաջ գնաց նրան մինչև Մովաբի քաղաքը, որը Առնովնի սահմանին է։ ³⁷ Բաղակն ասաց Բաղաամին. «Մարդ չե՞մ ուղարկել, որ քեզ կանչեն ինձ մոտ։ Ինչո՞ւ չէիր գալիս ինձ մոտ. կարծում էիր, թե ի վիճակի չէ՞ի քեզ պատվելու»։ ³⁸ Բաղաամը պատասխանեց Բաղակին. «Ահա եկել եմ քեզ մոտ։ Արդ, կարո՞ղ եմ մի բան ասել, եթե այն Աստված իմ բերանը չդնի»։ ³⁹ Բաղաամը գնաց Բաղակի հետ, և հասան Հանգրվանների քաղաքը [*  Կիրյաթ-Խուցոտ]։ ⁴⁰ Բաղակն արջառ ու ոչխար մորթեց և ուղարկեց Բաղաամին ու այն իշխաններին, որ նրա հետ էին։

⁴¹ Երբ լույսը բացվեց, Բաղակը, իր հետ վերցնելով Բաղաամին, նրան հանեց Բահաղի բարձունքում և այնտեղից նրան ցույց տվեց ժողովրդի մի մասը։

23

Բաղաամի առաջին մարգարեությունը

¹ Բաղաամն ասաց Բաղակին. «Այստեղ ինձ համար յոթ բագի՛ն կառուցիր և այստեղ ինձ համար յոթ զվարակ ու յոթ խո՛յ պատրաստիր»։ ² Բաղակն արեց այնպես, ինչպես իրեն ասել էր Բաղաամը, և ամեն մի բագինի վրա զվարակ ու խոյ մատուցեց։ ³ Բաղաամն ասաց Բաղակին. «Դու կանգնի՛ր քո զոհի մոտ, իսկ ես գնամ. գուցե Աստված ընդառաջ ելնելով երևա ինձ։ Այն, ինչ նա ցույց կտա ինձ, կհաղորդեմ քեզ»։ Բաղակը կանգնեց իր զոհի մոտ։ Բաղաամը գնաց Աստծուն հարցում անելու։ Նա ուղիղ առաջ էր գնում։ ⁴ Աստված երևաց Բաղաամին, և Բաղաամն ասաց. «Յոթ բագին պատրաստեցի և ամեն մի բագինի վրա զվարակ ու խոյ մատուցեցի»։ ⁵ Աստված Բաղաամի բերանը խոսք դրեց և ասաց. «Վերադարձի՛ր Բաղակի մոտ և այսպե՛ս խոսիր»։ ⁶ Վերադարձավ նրա մոտ, և նա կանգնած էր իր ողջակեզների մոտ։ Նրա հետ էին նաև մովաբացիների բոլոր իշխանները։ ⁷ Աստծու հոգին իջավ Բաղաամի վրա, և նա առակի ձևով ասաց.

«Միջագետքից կանչեց ինձ մովաբացիների Բաղակ արքան,

Արևելքի լեռներից, և ասաց.

“Արի՛, նզովի՛ր Հակոբին ինձ համար,

արի՛, անիծի՛ր Իսրայելին ինձ համար”։

⁸ Ինչպե՞ս նզովեմ նրան,

որին Տերը չի նզովում,

կամ ինչպե՞ս անիծեմ,

որին Աստված չի անիծում։

⁹ Լեռներից եմ տեսնում նրան,

բլուրների բարձունքից եմ նայում նրան։

Ահա կա մի ժողովուրդ,

որ առանձին պիտի բնակվի,

ազգերի մեջ չպիտի դասվի։

¹⁰ Ո՞վ է ճշտել Հակոբի սերնդի թիվը,

ո՞վ է հաշվել Իսրայելի տոհմերը։

Երանի՜ ես մեռնեի այդ արդար մարդկանց հետ,

և իմ զավակները նրա զավակների պես լինեին»։

¹¹ Բաղակն ասաց Բաղաամին. «Այդ ի՞նչ արեցիր։ Ես քեզ կանչեցի իմ թշնամիներին անիծելու համար, իսկ դու օրհնությամբ օրհնեցի՞ր»։ ¹² Բաղաամն ասաց Բաղակին. «Մի՞թե չասացի, որ Աստված ինչ դնի իմ բերանը, այն էլ կասեմ»։

Բաղաամի երկրորդ մարգարեությունը

¹³ Բաղակն ասաց նրան. «Ինձ հետ արի՛ մի այլ տեղ, որտեղից նրան չես տեսնի, այլ կտեսնես նրա մի մասը, ամբողջությամբ չես տեսնի։ Այնտեղից նրանց անիծի՛ր ինձ համար»։ ¹⁴ Նա վերցրեց նրան ու գնաց Դիտանոց [*  Ցոֆիմ] ագարակը՝ Կոփածո լեռան գագաթին, այնտեղ կառուցեց յոթ բագին և ամեն մի բագինի վրա մատուցեց մեկական զվարակ ու խոյ։ ¹⁵ Բաղաամն ասաց Բաղակին. «Դու կանգնի՛ր քո զոհի մոտ, իսկ ես գնամ Աստծուն հարցում անելու»։ ¹⁶ Աստված ընդառաջ եկավ Բաղաամին, խոսք դրեց նրա բերանը՝ ասելով. «Վերադարձի՛ր Բաղակի մոտ և այսպե՛ս խոսիր»։ ¹⁷ Եվ վերադարձավ նրա մոտ, որը կանգնած էր իր ողջակեզի մոտ։ Նրա հետ էին նաև մովաբացիների բոլոր իշխանները։ Բաղակը նրան ասաց. «Ի՞նչ խոսեց Տերը»։ ¹⁸ Բաղաամն առակի ձևով ասաց.

«Արի՛, Բաղա՜կ, և լսի՛ր,

իբրև վկա՝ ակա՛նջ դիր, ո՜վ Սեպփովրի որդի։

¹⁹ Աստված մարդու նման չէ, որ խաբի,

և ոչ էլ մարդու որդու նման, որ սպառնա։

Ասաց և չի՞ անի,

Խոստացավ և չի՞ մնա իր խոսքին։

²⁰ Արդ, ես հրաման եմ ստացել, որ օրհնեմ,

ուրեմն կօրհնեմ և չեմ հրաժարվի դրանից։

²¹ Հակոբի սերունդները թող նեղություն չկրեն,

Իսրայելի մեջ հոգնություն թող չլինի։

Տերը՝ նրա Աստվածը, նրա հետ է,

իշխանների փառքն ու պատիվը՝ նրա մեջ։

²² Աստվա՛ծ նրանց հանեց Եգիպտոսից,

և նա իբրև միեղջերուի զորություն է նրանց համար։

²³ Հակոբի մեջ կախարդություն անող չկա,

ոչ էլ Իսրայելի մեջ՝ մոգություն։

Ժամանակին թող հայտնվի Հակոբին ու Իսրայելին,

ինչ որ Աստված կատարելու է։

²⁴ Ահա այդ ժողովուրդը՝ իբրև առյուծի կորյուն,

ոտքի պետք է ելնի

և իբրև առյուծ պետք է պարծենա։

Նա չի քնի, մինչև չուտի իր որսը,

և չխմի խոցոտվածների արյունը»։

²⁵ Բաղակն ասաց Բաղաամին. «Լավ, նրան չես անիծում, գոնե մի՛ էլ օրհնիր նրան»։ ²⁶ Բաղաամը պատասխան տվեց Բաղակին՝ ասելով. «Քեզ հետ չխոսեցի՞, չասացի՞, թե՝ “Աստված ինչ որ ասի ինձ, այն էլ կանեմ”»։

Բաղաամի երրորդ մարգարեությունը

²⁷ Եվ Բաղակն ասաց Բաղաամին. «Արի՛ քեզ տանեմ մեկ այլ տեղ, գուցե դա հաճո լինի Աստծուն, և ինձ համար դու այնտեղից անիծես նրանց»։ ²⁸ Բաղակը Բաղաամին տարավ Փոգովրի գագաթը, որը դեպի անապատ է ձգվում։ ²⁹ Բաղաամն ասաց Բաղակին. «Ինձ համար այստեղ յոթ բագի՛ն կառուցիր և ինձ համար այստեղ յոթ զվարակ ու յոթ խո՛յ պատրաստիր»։ ³⁰ Բաղակն արեց այնպես, ինչպես նրան ասել էր Բաղաամը. նա զվարակ ու խոյ մատուցեց ամեն մի բագինի վրա։

24

¹ Բաղաամը, տեսնելով, որ Տիրոջը հաճելի է Իսրայելին օրհնելը, այլևս հմայությունների չդիմեց, ինչպես սովոր էր, այլ երեսը դարձրեց դեպի անապատ։ ² Բաղաամը, իր աչքերը բարձրացնելով, տեսավ Իսրայելին՝ բանակած ըստ ցեղերի։ Աստծու հոգին իջավ նրա վրա, ³ և նա առակի ձևով ասաց.

«Խոսում է Բաղաամը՝ Բեովրի որդին,

⁴ խոսում է ճշմարտատես այրը,

որ քնի մեջ բաց աչքերով է տեսել Աստծու տեսիլը։

⁵ Ինչքա՜ն գեղեցիկ են քո տները, Հակո՛բ,

և քո վրանները, Իսրայե՛լ։

⁶ Դրանք նման են հովանի անող անտառների,

և գետերի ափին գտնվող բուրաստանների,

և վրանների, որ կանգնեցրեց Տերը,

և նման են հոսող ջրերի ափին գտնվող մայրիների։

⁷ Այդ սերնդից պիտի ծնվի մի մարդ,

որ պիտի տիրի բազում ազգերի։

Նրա թագավորությունը Գովգի թագավորությունից հզոր պիտի լինի,

նրա թագավորությունը պիտի բարգավաճի։

⁸ Աստված նրան առաջնորդեց Եգիպտոսից,

և նա իբրև միեղջերուի զորություն է նրա համար։

Նա պիտի ուտի իր թշնամի ժողովուրդներին,

նրանց գիրությունը պիտի հյուծի

և իր նետերով նետահար պիտի անի իր թշնամիներին։

⁹ Նա փռված պիտի հանգստանա առյուծի պես,

և առյուծի կորյունի պես։

Ո՞վ կհամարձակվի զարթնեցնել նրան։

Թող օրհնվեն քեզ օրհնողները,

և անիծվեն քեզ անիծողները»։

¹⁰ Բաղակը բարկացավ Բաղաամի վրա և ափերն իրար զարկեց։ Բաղակն ասաց Բաղաամին. «Ես քեզ կանչեցի, որպեսզի անիծես իմ թշնամիներին, իսկ դու ահա օրհնելով օրհնեցիր նրանց երեք անգամ։ ¹¹ Արդ, փախի՛ր քո տեղը։ Ուզում էի պատվել քեզ, բայց Տերը շեղեց քեզ փառքից»։ ¹² Բաղաամն ասաց Բաղակին. «Մի՞թե ինձ մոտ ուղարկած քո բանագնացներին չասացի. ¹³ “Եթե Բաղակն ինձ իր տնով լի արծաթ ու ոսկի էլ տա, ես չեմ կարող անտեսել Տիրոջ խոսքը և ոչ էլ կարող եմ ինձնից լավ կամ վատ դարձնել այն։ Ինչ որ ասի Աստված, այն էլ խոսելու եմ”։

Բաղաամի վերջին մարգարեությունը

¹⁴ Իսկ հիմա ահա գնում եմ իմ տեղը։ Արի՛ քեզ հայտնեմ, թե այդ ժողովուրդն առաջիկայում ի՛նչ է անելու քո ժողովրդին»։ ¹⁵ Եվ նա առակով ասաց.

«Խոսում է Բաղաամը՝ Բեովրի որդին,

ճշմարտատես այն մարդը,

¹⁶ որ լսել է Աստծու պատգամները

և հմուտ է Բարձրյալի գիտությանը,

քնի մեջ բաց աչքերով է տեսել Աստծու տեսիլը։

¹⁷ Ես ցույց եմ տալու նրան, բայց ոչ հիմա,

երանելի եմ դարձնելու նրան, բայց ոչ մոտ ժամանակում։

Ծագելու է Հակոբի աստղը,

մի մարդ է բարձրանալու Իսրայելից

և հարվածելու է Մովաբի իշխաններին,

գերեվարելու է Սեթի բոլոր հետնորդներին։

¹⁸ Նա պիտի ժառանգի Եդովմը,

որ պատկանում է իր թշնամի Եսավին։

Եվ դա Իսրայելն անելու է զորությամբ։

¹⁹ Հակոբի ցեղից պիտի ելնի այդ այրը

և պիտի կոտորի այդ քաղաքից փրկվածներին»։

²⁰ Ամաղեկացիներին տեսնելով՝ նա առակի կարգով ասաց.

«Ամաղեկացիները ազգերից հնագույնն են,

բայց կորստյան պիտի մատնվի նրանց սերունդը»։

²¹ Կինեցիներին տեսնելով՝ նա առակով ասաց.

«Ամուր է քո բնակավայրը,

բայց եթե քարանձավներում էլ դնես քո բույնը,

²² եթե անգամ Բեովրի հմտությամբ կառուցվի ձեր բույնը,

միևնույնն է, ասորեստանցիները գերեվարելու են ձեզ»։

²³ Ապա առակով ասաց.

«Ո՞վ ողջ կմնա, եթե Աստված այս բաներն անի։

²⁴ Կիտացիները կգան

ու կչարչարեն Ասուրին

ու կչարչարեն եբրայեցիներին,

բայց իրենք էլ գլխովին կկորչեն»։

²⁵ Բաղաամը վեր կացավ, վերադարձավ, գնաց իր բնակատեղին, իսկ Բաղակն էլ գնաց իր բնակատեղին։

25

Իսրայելացիների կռապաշտությունը

¹ Իսրայելը բանակեց Սատտիմում, և ժողովուրդը պղծվեց՝ Մովաբի դուստրերի հետ պոռնկանալով։ ² Եվ հրավիրեցին նրանց իրենց կուռքերի զոհերին, և ժողովուրդը կերավ նրանց զոհերից ու երկրպագեց նրանց կուռքերին։ ³ Իսրայելը հարեց Բելփեգովրին, և Տերը խիստ բարկացավ Իսրայելի վրա։ ⁴ Տերն ասաց Մովսեսին. «Վերցրո՛ւ ժողովրդի բոլոր իշխաններին և հրապարակավ պատժի՛ր նրանց Տիրոջ առջև՝ արեգակի դեմ, որպեսզի Տիրոջ զայրույթը վերանա Իսրայելի վրայից»։ ⁵ Մովսեսն ասաց Իսրայելի ցեղերին. «Ամեն մեկը թող կոտորի Բելփեգովրին հարած իր հարազատին»։

⁶ Եվ ահա մի իսրայելացի Մովսեսի ու Իսրայելի որդիների ողջ ժողովրդի ներկայությամբ, մինչ նրանք լաց էին լինում Վկայության խորանի դռանը, իր եղբորն առաջնորդեց մադիանացի մի կնոջ մոտ։ ⁷ Ահարոն քահանայի որդի Եղիազարի որդի Փենեեսը, տեսնելով դա, վեր կացավ ժողովրդի միջից և իր ձեռքն առնելով տեգը՝ ⁸ այդ տղամարդու հետևից մտավ կրակարան ու խոցեց երկուսին էլ՝ իսրայելացի տղամարդուն ու այդ կնոջը՝ իր արգանդից։ Այդ ժամանակ էլ դադարեց Իսրայելի որդիների կոտորածը։ ⁹ Այդ կոտորածից քսանչորս հազար մարդ մեռավ։

¹⁰ Տերը խոսեց Մովսեսի հետ և ասաց. ¹¹ «Փենեեսը՝ Ահարոն քահանայի որդի Եղիազարի որդին, մեղմեց Իսրայելի որդիների նկատմամբ ունեցած իմ զայրույթը, քանի որ նա նրանց մեջ իմ հանդեպ նախանձախնդրություն դրսևորեց։ Եվ ես Իսրայելի որդիներին իմ բարկությամբ չոչնչացրի։ ¹² Իսկ հիմա այսպես կասես. “Ես ահա նրա հետ խաղաղության ուխտ եմ կնքում։ ¹³ Նրան և նրա հետնորդներին հավիտենական քահանայություն եմ խոստանում, որ նա իր Աստծու փոխարեն վրեժխնդիր լինելով՝ քավեց Իսրայելի որդիների մեղքերը”»։ ¹⁴ Մադիանացի կնոջ հետ սպանված իսրայելացի տղամարդու անունը Զամբրի էր։ Նա Սաղովմի որդին էր՝ Շմավոնների նահապետական տան իշխանը, ¹⁵ իսկ սպանված մադիանացի կնոջ անունը Քազբի էր։ Նա Մադիամի նահապետական տան Ամովթի ազգի Սուր իշխանի դուստրն էր։

¹⁶ Տերը խոսեց Մովսեսի հետ և ասաց. ¹⁷ «Խոսի՛ր Իսրայելի որդիների հետ և ասա՛. “Թշնամացե՛ք մադիանացիների հետ և հարվածե՛ք նրանց, ¹⁸ որովհետև նրանք նենգությամբ թշնամություն են անում ձեզ. նրանք ձեզ դավեցին Փոգովրի միջոցով, նաև Մադիամի իշխանի դուստր Քազբիի՝ իրենց քրոջ միջոցով, որն սպանվեց Փոգովրի պատճառով սկսված կոտորածների օրը”»։

26

Երկրորդ մարդահամարը

¹ Այդ կոտորածից հետո Տերը խոսեց Մովսեսի ու Եղիազար քահանայի հետ ու ասաց. ² «Հաշվառմա՛ն ենթարկեք Իսրայելի որդիներին՝ քսան տարեկան և ավելի մեծ, ըստ իրենց նահապետական տների, բոլոր նրանց, ովքեր ընդունակ են պատերազմելու»։ ³ Մովսեսն ու Եղիազար քահանան Մովաբի հովտում՝ Հորդանանի ափին, Երիքովի դիմաց ասացին. ⁴ «Տերը հրամայել է Մովսեսին հաշվառման ենթարկել քսան տարեկան և ավելի մեծերին»։ Իսրայելի որդիները, որոնք ելան Եգիպտոսից, սրանք են.

⁵ Ռուբենը՝ Իսրայելի անդրանիկ որդին, և Ռուբենի որդիները՝ Ենովքը և Ենովքի գունդը, Փաղղուսը և Փաղղուսի գունդը, Քարմին և Քարմիի գունդը, ⁶ Ասրովնը և Ասրովնի գունդը։ ⁷ Սրանք Ռուբենի գնդերն են. նրանց թիվը 43,730 է։ ⁸ Փաղղուսի որդին՝ Եղիաբը, ⁹ և Եղիաբի որդիներ Նամուելը, Դաթանը և Աբիրոնը։ Սրանք ժողովրդի երևելի մարդկանցից էին. սրանք էին, որ ելան Տիրոջ դեմ՝ Կորխի հետնորդների հետ ապստամբելով Մովսեսի ու Ահարոնի դեմ, ¹⁰ և երկիրը, բացելով իր բերանը, կուլ տվեց նրանց ու Կորխին, իր ժողովրդի հետ։ Այդ ժամանակ կրակը լափեց երկու հարյուր հիսուն հոգու, որպեսզի մյուսների համար դաս լինի։ ¹¹ Սակայն Կորխի որդիները չմեռան։

¹² Շմավոնի որդիները և նրանց գնդերը՝ Համուելը և Համուելի գունդը, Համինը և Համինի գունդը, Հաքինը և Հաքինի գունդը, ¹³ Զարան և Զարայի գունդը, Սավուղը և Սավուղի գունդը։ ¹⁴ Սրանք են Շմավոնի գնդերը, ըստ հաշվառման՝ 22,200 հոգի։

¹⁵ Հուդայի որդիները՝ Էրը, Օնանը, Սելովմը, Փարեսը և Զարան։ Էրն ու Օնանը մեռան քանանացիների երկրում։ ¹⁶ Հուդայի որդիներն ու նրանց գնդերն են՝ Սելովմը և Սելովմի գունդը, Փարեսը և Փարեսի գունդը, Զարան և Զարայի գունդը։ ¹⁷ Փարեսի որդիները՝ Ասրովնը և Ասրովնի գունդը, Համուելը և Համուելի գունդը։ ¹⁸ Սրանք են Հուդայի գնդերը, ըստ հաշվառման՝ 76,500 հոգի։

¹⁹ Իսաքարի որդիներն ըստ իրենց գնդերի՝ Թովլան և Թովլայի գունդը, Փուան և Փուայի գունդը, ²⁰ Հասուբը և Հասուբի գունդը, Սամրանը և Սամրանի գունդը։ ²¹ Սրանք են Իսաքարի գնդերը, ըստ հաշվառման՝ 64,300 հոգի։

²² Զաբուղոնի որդիներն ըստ իրենց գնդերի՝ Սարեդը և Սարեդի գունդը, Ալլովնը և Ալլովնի գունդը, Աղելը և Աղելի գունդը։ ²³ Սրանք են Զաբուղոնի գնդերը, ըստ հաշվառման՝ 60,500 հոգի։

²⁴ Գադի որդիներն ըստ իրենց գնդերի՝ Սափովնը և Սափովնի գունդը, Անգին և Անգիի գունդը, Սունին և Սունիի գունդը, ²⁵ Ազենին և Ազենիի գունդը, Ադդին և Ադդիի գունդը, ²⁶ Արուադին և Արուադիի գունդը, Արիելը և Արիելի գունդը։ ²⁷ Սրանք են Գադի որդիների տոհմերը, ըստ հաշվառման՝ 44,500 հոգի։

²⁸ Ասերի որդիներն ըստ իրենց գնդերի՝ Համինը և Համինի գունդը, Հեսուն և Հեսուի գունդը, Բարիան և Բարիայի գունդը, ²⁹ Քոբերը և Քոբերի գունդը, Մելքիելը և Մելքիելի գունդը։ ³⁰ Իսկ Ասերի դստեր անունն էր Սարա։ ³¹ Սրանք են Ասերի ցեղի գնդերը, ըստ հաշվառման՝ 43,600 հոգի։

³² Հովսեփի որդիներն ըստ իրենց ցեղերի՝ Մանասեն և Եփրեմը։

³³ Մանասեի որդիները՝ Մաքիրը և Մաքիրի գունդը։ Մաքիրը ծնեց Գաղաադին։ Գաղաադը և Գաղաադի գունդը։ ³⁴ Գաղաադի որդիները՝ Աբիեզերը և Աբիեզերի գունդը, Քեղեգը և Քեղեգի գունդը, ³⁵ Եսրիելը և Եսրիելի գունդը, Սյուքեմը և Սյուքեմի գունդը, ³⁶ Սիմային և Սիմայիի գունդը, Ոփերը և Ոփերի գունդը։ ³⁷ Ոփերի որդի Սաղպաադն արու զավակներ չունեցավ, այլ դուստրեր։ Սաղպաադի դուստրերի անուններն են՝ Մաաղա, Նուա, Եգղա, Մեղքա և Թերսա։ ³⁸ Սրանք են Մանասեի գնդերը, ըստ հաշվառման՝ 52,700 հոգի։

³⁹ Եփրեմի որդիները՝ Սուտաղան և Սուտաղայի գունդը, Տանաքը և Տանաքի գունդը։ ⁴⁰ Սրանք են Սուտաղայի որդիները. Եդենը և Եդենի գունդը։ ⁴¹ Սրանք են Եփրեմի գնդերը, ըստ հաշվառման՝ 32,500 հոգի։ Ահա սրանք են Հովսեփի որդիներն ըստ իրենց գնդերի։

⁴² Բենիամինի որդիներն ըստ իրենց գնդերի՝ Բալեն և Բալեի գունդը, Ասբերը և Ասբերի գունդը, Հաքերանը և Հաքերանի գունդը, ⁴³ Սափանը և Սափանի գունդը։ ⁴⁴ Բալեի որդիներն են՝ Ադարը և Ադարի գունդը, Նոյեմանը և Նոյեմանի գունդը։ ⁴⁵ Սրանք են Բենիամինի որդիներն ըստ իրենց գնդերի, ըստ հաշվառման՝ 35,500 հոգի։

⁴⁶ Դանի որդիներն ըստ իրենց գնդերի՝ Սամին և Սամիի գունդը։ Սրանք են Դանի գնդերն ըստ իրենց գնդերի։ ⁴⁷ Սամիի բոլոր գնդերը, ըստ հաշվառման՝ 64,600 հոգի։

⁴⁸ Նեփթաղիմի որդիներն ըստ իրենց գնդերի՝ Ասիելը և Ասիելի գունդը, Գավնին ու Գավնիի գունդը, ⁴⁹ Հեսերը և Հեսերի գունդը, Սելլեմը և Սելլեմի գունդը։ ⁵⁰ Սրանք են Նեփթաղիմի գնդերը, ըստ հաշվառման՝ 40,300 հոգի։

⁵¹ Իսրայելի որդիների ընդհանուր թիվը եղավ 601,730։

⁵² Տերը խոսեց Մովսեսի հետ և ասաց. ⁵³ «Երկիրը դրանց միջև թող բաժանվի իբրև ժառանգություն ըստ անունների թվի։ ⁵⁴ Մեծաքանակ ցեղին մեծ ժառանգությո՛ւն տուր, փոքրաքանակին՝ փոքր, յուրաքանչյուրին ժառանգությո՛ւն տուր ըստ հաշվառման։ ⁵⁵ Երկիրը թող բաժանվի վիճակ գցելով. ըստ անունների, ըստ իրենց նահապետական ցեղերի թող ժառանգություն ստանան։ ⁵⁶ Բազմանդամներն ու սակավաթիվները վիճակ գցելով թող ժառանգեն իրենց բաժինը»։

⁵⁷ Իսկ Ղևիի որդիներն ըստ իրենց գնդերի սրանք են՝ Գեթսոնը և Գեթսոնի գունդը, Կահաթը և Կահաթի գունդը, Մերարին և Մերարիի գունդը։ ⁵⁸ Սրանք են Ղևիի որդիների գնդերը. Ղոբենիի գունդը, Քեբրոնի գունդը, Կորխի գունդը և Մուսիի գունդը։ Կահաթը ծնեց Ամրամին։ ⁵⁹ Նրա կնոջ անունն էր Հովքաբեթ, որ Ղևիի դուստրն էր։ Նա Ղևիի համար Եգիպտոսում Ամրամից ունեցավ Ահարոնին, Մովսեսին ու Մարիամին՝ նրանց քրոջը։ ⁶⁰ Ահարոնի որդիներն էին Նադաբը, Աբիուդը, Եղիազարն ու Իթամարը։ ⁶¹ Նադաբն ու Աբիուդը մեռան, երբ Տիրոջ առաջ օտար կրակ մատուցեցին Սինայի անապատում։ ⁶² Ղևիի ցեղի մեկ ամսական և ավելի մեծ տարիք ունեցող արական սեռին պատկանողների թիվն ըստ հաշվառման՝ 23,000 հոգի։ Սրանք հաշվառման ենթարկված Իսրայելի որդիների մեջ չընդգրկվեցին, քանի որ Իսրայելի որդիների մեջ նրանց վիճակ չէր նախատեսված։

⁶³ Այս է Մովսեսի ու Եղիազար քահանայի կատարած հաշվառումը, Իսրայելի որդիների հաշվառումը, որ կատարվեց Մովաբի հովտում՝ Հորդանանի մոտ, Երիքովի դիմաց։ ⁶⁴ Սրանց մեջ չկար Իսրայելի որդիներից որևէ մարդ, որ Մովսեսի և Ահարոնի կողմից հաշվառման ենթարկված լիներ Սինայի անապատում, ⁶⁵ քանի որ Տերը նրանց մասին ասել էր՝ «Անապատում իսպառ պիտի մեռնեն»։ Եվ նրանցից ոչ ոք չմնաց, բացի Հեփոնեի որդի Քաղեբից ու Նավեի որդի Հեսուից։

27

Սաղպաադի աղջիկների պահանջը

¹ Մովսեսի մոտ եկան Հովսեփի որդիներից Մանասեի գնդից Մաքիրի որդի Գաղաադի որդի Ոփերի որդի Սաղպաադի դուստրերը, որոնց անուններն էին՝ Մաաղա, Նուա, Եգղա, Մեղքա և Թերսա։ ² Նրանք, կանգնելով Մովսեսի, Եղիազար քահանայի, իշխանների և ողջ ժողովրդի առաջ, Վկայության խորանի դռանը, ասացին. ³ «Մեր հայրը մեռավ անապատում, նա Տիրոջ դեմ ընդվզած Կորխի ամբոխի մեջ չէր։ Նա մեռավ իր մեղքի համար և որդիներ չուներ։ ⁴ Արդ, մեր հոր անունը թող չջնջվի իր ցեղի միջից նրա համար, որ որդի չունեցավ։ Մեզ, մեր հոր եղբայրներին հավասար, ժառանգությո՛ւն տվեք»։ ⁵ Մովսեսը նրանց պահանջը ներկայացրեց Տիրոջ առաջ։ ⁶ Տերը խոսեց Մովսեսի հետ և ասաց. ⁷ «Ճիշտ են ասում Սաղպաադի դուստրերը։ Նրանց նույնպես ժառանգության կալվա՛ծ տուր իրենց հոր եղբայրներին հավասար. իրենց հոր հասանելիք վիճակը կհատկացնես նրանց։ ⁸ Իսրայելի որդիներին բացատրելով՝ կասես. “Եթե մեռնող մարդը որդի չի ունենում, նրա ժառանգությունը պետք է անցնի իր դստերը։ ⁹ Եթե նա դուստր չունի, նրա ժառանգությունը տվե՛ք իր եղբորը։ ¹⁰ Եթե նա եղբայր էլ չունի, նրա ժառանգությունը տվե՛ք իր հորեղբորը։ ¹¹ Եվ եթե հորեղբայրներ էլ չունի, նրա ժառանգությունը տվե՛ք նրա մերձավոր ազգականին։ Նրա ունեցածն իր ցեղից որևէ մեկը թող ժառանգի։ Դա Իսրայելի որդիների համար դատաստանական օրենք թող լինի, ինչպես Տերն է հրամայել Մովսեսին”»։

Հեսուն՝ Մովսեսի հաջորդը

(Բ Օր. 31.1-8)

¹² Տերն ասաց Մովսեսին. «Բարձրացի՛ր այն կողմում գտնվող լեռը՝ Նաբավ լեռը, և դիտի՛ր քանանացիների երկիրը, որը ես Իսրայելի որդիներին եմ տալու որպես կալվածք։ ¹³ Կտեսնես այն, և դու նույնպես կմիանաս քո նախնիներին, ինչպես քո եղբայր Ահարոնը միացավ Հովր լեռան վրա, ¹⁴ որովհետև Սին անապատում ոտնակոխ արեցիք իմ պատգամները, երբ ժողովուրդը հակառակվեց ինձ, և դուք նրա ներկայությամբ չփառաբանեցիք ինձ, երբ ջուր հանեցիք»։ Խոսքը վերաբերում էր Սին անապատի Հակառակության ջրին։

¹⁵ Մովսեսն ասաց Տիրոջը. ¹⁶ «Նշանակի՛ր, Տե՛ր, Աստվա՛ծ հոգիների ու բոլոր մարմինների, մի այր այս ժողովրդի վրա, ¹⁷ որ կարողանա առաջնորդել նրան, որ դուրս հանի և ներս բերի նրանց, որպեսզի Տիրոջ ժողովուրդը չնմանվի այն ոչխարներին, որոնք հովիվ չունեն»։ ¹⁸ Տերը խոսեց Մովսեսի հետ և ասաց. «Վերցրո՛ւ Նավեի որդի Հեսուին, որի մեջ Հոգի կա, և ձեռքդ դի՛ր նրա վրա։ ¹⁹ Նրան կկանգնեցնես Եղիազար քահանայի առջև և պատվեր կտաս նրան ամբողջ ժողովրդի ներկայությամբ։ ²⁰ Քո փառքից կտաս նրան, որպեսզի Իսրայելի որդիները հնազանդվեն նրան։ ²¹ Եղիազար քահանան թող նրա համար Հայտնությամբ [*  Ուրիմ] հարցում անի Տիրոջը։ Նրա խոսքով պիտի շարժվեն, և նրա խոսքերով պիտի գործեն բոլորը՝ Հեսուն և Իսրայելի բոլոր որդիները՝ ողջ ժողովուրդը»։ ²² Եվ Մովսեսն արեց այնպես, ինչպես Տերը պատվիրել էր իրեն։ Հեսուին վերցնելով՝ կանգնեցրեց Ահարոն քահանայի որդի Եղիազարի ու ողջ ժողովրդի առջև։ ²³ Եվ իր ձեռքերը դրեց նրա վրա և նրան նշանակեց իր փոխարեն, ինչպես Տերն էր պատվիրել Մովսեսին։

28

Ամենօրյա ընծաներ

(Ելք 29.38-46)

¹ Տերը խոսեց Մովսեսի հետ և ասաց. ² «Պատվիրի՛ր Իսրայելի որդիներին և նրանց ասա՛. “Հետամո՛ւտ եղեք, որ իմ տոներին մատուցեք իմ պատարագները, իմ ընծաներն ու իմ զոհերը՝ որպես անուշահոտություն”։ ³ Նրանց ասա՛. “Սրանք են այն զոհերը, որ պիտի մատուցեք Տիրոջը. ամեն օր արատ չունեցող երկու գառ՝ իբրև ամենօրյա ողջակեզ։ ⁴ Մի գառը կզոհես առավոտյան, իսկ երկրորդ գառը կզոհես երեկոյան։ ⁵ Դրանց հետ կմատուցես քառորդ դորակ յուղով հունցված մեկ տասներորդ գրիվ նաշիհ։ ⁶ Սա ամենօրյա ողջակեզ է, որ առաջին անգամ մատուցվեց Սինա լեռան վրա՝ իբրև անուշահոտություն Տիրոջը։ ⁷ Առավոտյան գառի հետ պիտի ընծայաբերես նաև քառորդ դորակ հեղման ընծա. ըմպելի նվերը Տիրոջը պիտի նվիրես Սրբությունում։ ⁸ Երկրորդ գառը կզոհես երեկոյան՝ իր անարյուն զոհի և հեղման ընծայի հետ՝ իբրև անուշահոտություն Տիրոջը”»։

Շաբաթ օրվա ընծան

⁹ «Շաբաթ օրը կմատուցես արատ չունեցող մեկ տարեկան երկու գառ և յուղով հունցված երկու տասներորդ գրիվ նաշիհ՝ իբրև անարյուն զոհ, և հեղման ընծան։ ¹⁰ Այս ողջակեզը կմատուցեք ամեն շաբաթ օր, բացի ամենօրյա ողջակեզից և նրա հեղման ընծայից»։

Ամսվա առաջին օրվա ընծան

¹¹ «Ամիսների առաջին օրերին Տիրոջը ողջակեզ կմատուցեք նախրից երկու զվարակ, մի խոյ, և մեկ տարեկան յոթ գառ։ ¹² Ամեն մի զվարակի հետ պետք է լինի յուղով հունցված երեք տասներորդ գրիվ նաշիհ, ամեն մի խոյի հետ՝ յուղով հունցված երկու տասներորդ գրիվ նաշիհ, ¹³ ամեն մի գառան հետ՝ յուղով հունցված մեկ տասներորդ գրիվ նաշիհ՝ իբրև անուշահոտություն՝ զոհ Տիրոջը։ ¹⁴ Ամեն մի զվարակի հետ պետք է ընծայաբերեք կես դորակ հեղման ընծա, ամեն մի խոյի հետ՝ մեկ երրորդ դորակ, իսկ ամեն մի գառան հետ՝ մեկ քառորդ դորակ։ Այս ողջակեզները պիտի մատուցեք յուրաքանչյուր ամսվա առաջին օրը, տարվա բոլոր ամիսներին։

¹⁵ Ամեն օրվա ողջակեզից ու դրա հեղման ընծայից բացի, մեղքերի քավության համար Տիրոջը պետք է մատուցվի այծերից մեկ նոխազ»։

Զատկի և Բաղարջակերաց տոները

(Ղևտ. 23.5-14)

¹⁶ «Առաջին ամսի տասնչորսերորդ օրը Տիրոջ զատիկն է։

¹⁷ Նույն ամսի տասնհինգերորդ օրը տոն է։ Յոթ օր բաղարջ կուտեք։ ¹⁸ Առաջին օրը սուրբ հավա՛ք արեք. այդ օրը ոչ մի աշխատանք չկատարեք։ ¹⁹ Տիրոջը ողջակեզ և ընծա մատուցեք երկու զվարակ նախրից, մեկ խոյ, արատ չունեցող մեկ տարեկան յոթ գառ։ ²⁰ Նաև ամեն մի զվարակի հետ պետք է մատուցվի յուղով հունցված երեք տասներորդ գրիվ նաշիհ, ամեն խոյի հետ՝ երկու տասներորդ, ²¹ իսկ յոթ գառներից ամեն մեկի հետ՝ մեկ տասներորդ։ ²² Իսկ մեղքերի քավության համար այծերից մի նոխազ կընծայաբերեք, ²³ բացի ամեն օր առավոտյան կատարվող ողջակեզից, որը ամենօրյա ողջակեզ է։ ²⁴ Այս օրինակով ամեն օր, յոթ օր շարունակ, պատարագ և զո՛հ մատուցեք՝ իբրև անուշահոտություն Տիրոջը, ամենօրյա ողջակեզից և նրա հեղման ընծայից բացի։ ²⁵ Յոթերորդ օրը նույնպես սուրբ հավա՛ք արեք։ Այդ օրը ոչ մի աշխատանք չկատարեք»։

Շաբաթների և առաջին բերքի տոները

(Ղևտ. 23.15-22)

²⁶ «Երախայրիքի տոնին, այսինքն՝ Շաբաթների[24] տոնին, երբ նոր բերքից անարյուն զոհ մատուցեք Տիրոջը, սուրբ հավա՛ք արեք ձեզ. ոչ մի աշխատանք չպետք է կատարեք։ ²⁷ Իբրև անուշահոտություն Տիրոջը՝ ողջակե՛զ մատուցեք երկու զվարակ նախրից, մի խոյ և արատ չունեցող մեկ տարեկան յոթ գառ։ ²⁸ Նաև՝ ամեն մի զվարակի հետ յուղով հունցված երեք տասներորդ գրիվ նաշիհ, խոյի հետ՝ երկու տասներորդ, ²⁹ յոթ գառներից ամեն մեկի հետ՝ մեկ տասներորդ։

³⁰ Կնվիրաբերեք նաև այծերից մի նոխազ ձեր մեղքերի քավության համար՝ ³¹ չհաշված ամենօրյա ողջակեզները, դրանց անարյուն զոհերը և հեղման ընծաները. զոհաբերվող ամեն ինչ անարատ թող լինի»։

29

Յոթերորդ ամսվա առաջին օրը

(Ղևտ. 23.23-25)

¹ «Յոթերորդ ամսի առաջին օրը սուրբ հավա՛ք արեք։ Այդ օրը ոչ մի աշխատանք չկատարեք։ Փող հնչեցնելու օր թող լինի ձեզ համար։ ² Իբրև անուշահոտություն Տիրոջը՝ ողջակե՛զ մատուցեք մի զվարակ նախրից, մի խոյ և արատ չունեցող մեկ տարեկան յոթ գառ։ ³ Զվարակի հետ կմատուցեք յուղով հունցված երեք տասներորդ գրիվ նաշիհ, խոյի հետ՝ երկու տասներորդ գրիվ նաշիհ ⁴ և յոթ գառներից յուրաքանչյուրի հետ՝ մեկ տասներորդ գրիվ նաշիհ։

⁵ Ինչպես նաև այծերից մի նոխազ կմատուցեք մեղքերի քավության համար՝ ⁶ չհաշված յուրաքանչյուր ամսվա առաջին օրը սահմանված ողջակեզը, դրա անարյուն զոհերն ու հեղման ընծաները՝ իբրև անուշահոտություն Տիրոջը»։

Քավության օրը

(Ղևտ. 23.26-32)

⁷ «Նույն ամսվա տասներորդ օրը ևս սուրբ հավա՛ք արեք։ Այդ օրը ծոմ կպահեք և ոչ մի աշխատանք չկատարեք։ ⁸ Իբրև անուշահոտություն Տիրոջը՝ ողջակե՛զ մատուցեք մի զվարակ նախրից, մի խոյ և արատ չունեցող մեկ տարեկան յոթ գառ։ ⁹ Զվարակի հետ կմատուցեք յուղով հունցված երեք տասներորդ գրիվ նաշիհ, խոյի հետ՝ երկու տասներորդ գրիվ նաշիհ, ¹⁰ և յոթ գառներից յուրաքանչյուրի հետ՝ մեկ տասներորդ գրիվ նաշիհ։

¹¹ Ինչպես նաև այծերից մի նոխազ կմատուցեք ձեր մեղքերի քավության համար՝ չհաշված մեղքերի քավության համար զոհաբերվող նոխազը, ինչպես նաև ամենօրյա ողջակեզները և նրանց անարյուն զոհերն ու հեղման ընծաները՝ ըստ սահմանված կարգի, իբրև անուշահոտություն Տիրոջը»։

Տաղավարահարաց տոնը

(Ղևտ. 23.33-44)

¹² «Նույն յոթերորդ ամսվա տասնհինգերորդ օրը սուրբ հավա՛ք արեք. ոչ մի աշխատանք չկատարեք և յոթ օր Տիրոջ տո՛նը տոնեք։ ¹³ Ողջակեզներ և զոհե՛ր մատուցեք՝ իբրև անուշահոտություն Տիրոջը։

Առաջին օրը՝ նախրից տասներեք զվարակ, երկու խոյ և մեկ տարեկան տասնչորս գառ. բոլորն էլ թող առանց արատի լինեն։ ¹⁴ Տասներեք զվարակներից յուրաքանչյուրի հետ կընծայաբերեք յուղով հունցված երեք տասներորդ գրիվ նաշիհ, երկու խոյերից յուրաքանչյուրի հետ՝ երկու տասներորդ, ¹⁵ տասնչորս գառներից յուրաքանչյուրի հետ՝ մեկ տասներորդ։

¹⁶ Ինչպես նաև մի նոխազ՝ մեղքերի քավության համար, բացի ամենօրյա ողջակեզներից, դրանց անարյուն զոհերից ու հեղման ընծաներից։

¹⁷ Երկրորդ օրը կմատուցեք տասներկու զվարակ, երկու խոյ և արատ չունեցող մեկ տարեկան տասնչորս գառ։ ¹⁸ Զվարակների, խոյերի ու գառների հետ մատուցվող անարյուն զոհերն ու հեղման ընծաները թող լինեն նրանց քանակին համապատասխան՝ ըստ սահմանված կարգի։

¹⁹ Մատուցե՛ք նաև այծերից մի նոխազ մեղքերի քավության համար, բացի ամենօրյա ողջակեզներից, դրանց անարյուն զոհերից ու հեղման ընծաներից։

²⁰ Երրորդ օրը կմատուցեք տասնմեկ զվարակ, երկու խոյ և արատ չունեցող մեկ տարեկան տասնչորս գառ։ ²¹ Զվարակների, խոյերի ու գառների հետ մատուցվող անարյուն զոհերն ու հեղման ընծաները թող լինեն նրանց քանակին համապատասխան։

²² Նաև այծերից մի նոխազ՝ մեղքերի քավության համար, բացի ամենօրյա ողջակեզներից, դրանց անարյուն զոհերից ու հեղման ընծաներից։

²³ Չորրորդ օրը կմատուցեք տասը զվարակ, երկու խոյ և արատ չունեցող մեկ տարեկան տասնչորս գառ։ ²⁴ Զվարակների, խոյերի ու գառների հետ մատուցվող անարյուն զոհերն ու հեղման ընծաները թող լինեն նրանց քանակին համապատասխան՝ ըստ սահմանված կարգի։

²⁵ Մատուցե՛ք նաև այծերից մի նոխազ մեղքերի քավության համար, բացի ամենօրյա ողջակեզներից, դրանց անարյուն զոհերից ու հեղման ընծաներից։

²⁶ Հինգերորդ օրը կմատուցեք ինը զվարակ, երկու խոյ և արատ չունեցող մեկ տարեկան տասնչորս գառ։ ²⁷ Զվարակների, խոյերի ու գառների հետ մատուցվող անարյուն զոհերն ու հեղման ընծաները թող լինեն նրանց քանակին համապատասխան՝ ըստ սահմանված կարգի։

²⁸ Մատուցե՛ք նաև այծերից մի նոխազ մեղքերի քավության համար, բացի ամենօրյա ողջակեզներից, դրանց անարյուն զոհերից ու հեղման ընծաներից։

²⁹ Վեցերորդ օրը կմատուցեք ութ զվարակ, երկու խոյ և արատ չունեցող մեկ տարեկան տասնչորս գառ։ ³⁰ Զվարակների, խոյերի ու գառների հետ մատուցվող անարյուն զոհերն ու հեղման ընծաները թող լինեն նրանց քանակին համապատասխան՝ ըստ սահմանված կարգի։

³¹ Մատուցե՛ք նաև այծերից մի նոխազ մեղքերի քավության համար, բացի ամենօրյա ողջակեզներից, դրանց անարյուն զոհերից ու հեղման ընծաներից։

³² Յոթերորդ օրը կմատուցեք յոթ զվարակ, երկու խոյ և արատ չունեցող մեկ տարեկան տասնչորս գառ։ ³³ Զվարակների, խոյերի ու գառների հետ մատուցվող անարյուն զոհերն ու հեղման ընծաները թող լինեն նրանց քանակին համապատասխան՝ ըստ սահմանված կարգի։

³⁴ Մատուցե՛ք նաև այծերից մի նոխազ մեղքերի քավության համար, բացի ամենօրյա ողջակեզներից, դրանց անարյուն զոհերից ու հեղման ընծաներից։

³⁵ Ութերորդ օրը ձեր տոնի վերջին օրը թող լինի։ Ոչ մի աշխատանք չկատարեք այդ օրը։ ³⁶ Իբրև Տիրոջ համար անուշահոտություն՝ ողջակեզ կմատուցեք մեկ զվարակ, մեկ խոյ և արատ չունեցող մեկ տարեկան յոթ գառ։ ³⁷ Զվարակների, խոյերի ու գառների հետ մատուցվող անարյուն զոհերն ու հեղման ընծաները թող լինեն նրանց քանակին համապատասխան՝ ըստ սահմանված կարգի։

³⁸ Մատուցե՛ք նաև այծերից մի նոխազ մեղքերի քավության համար, բացի ամենօրյա ողջակեզներից, դրանց անարյուն զոհերից ու հեղման ընծաներից։

³⁹ Այս ամենը կմատուցեք Տիրոջը ձեր տոների ժամանակ՝ չհաշված ձեր ուխտածները, ձեր կամավոր նվերները, ձեր ողջակեզները, ձեր անարյուն զոհերը, ձեր հեղման ընծաները և փրկության զոհերը»։

30

Օրենքներ ուխտերի մասին

¹ Մովսեսն Իսրայելի որդիներին հաղորդեց այն ամենը, ինչ Տերն էր պատվիրել իրեն։ ² Մովսեսն Իսրայելի որդիների իշխաններին ասաց. «Ահա թե ի՛նչ է հրամայել Տերը. ³ “Եթե որևէ մեկը Տիրոջը ուխտ է անում, երդվում կամ երդումով պարտավորվում է մի բան անել, ապա նա չպետք է դրժի իր երդումն ու խոստումը. նա պետք է կատարի այն ամենը, ինչ դուրս է եկել իր բերանից։

⁴ Եթե մի կին իր հոր տանը դեռևս երիտասարդ հասակում Տիրոջը ուխտ է արել կամ երդումով պարտավորվել անել, ⁵ և եթե նրա հայրը լսել է նրա ուխտը կամ խոստումը և լռելյայն հավանություն տվել դրան, ապա այդ կնոջ բոլոր ուխտերն ու խոստումները ուժի մեջ պետք է մնան և կատարվեն։ ⁶ Իսկ եթե նրա հայրը հավանություն չի տվել այն օրը, երբ լսել էր նրա բոլոր ուխտերն ու խոստումները, ապա անվավեր թող լինեն դրանք, և Տերն այդ կնոջն անպարտ թող համարի, քանի որ նրա հայրը հանձնառու չի եղել։

⁷ Եթե կինն ամուսնանա և նախքան ամուսնանալը Տիրոջն ուխտ արած կամ խոստում տված լինի, ⁸ ու եթե այդ մասին իմանա նրա ամուսինը և լռելյայն հավանություն տա այն օրը, երբ լսել էր այդ մասին, ապա նրա բոլոր ուխտերն ու խոստումները պետք է մնան ուժի մեջ և կատարվեն։ ⁹ Իսկ եթե նրա ամուսինը հավանություն չի տալիս այն օրը, երբ լսել էր նրա բոլոր ուխտերն ու խոստումները, ապա դրանք անվավեր են, քանի որ ամուսինը հանձնառու չի եղել։ Տերն այդ կնոջն անպարտ թող համարի։

¹⁰ Այրի կամ բաժանված կնոջ ուխտերն ու խոստումները պետք է կատարվեն։

¹¹ Իսկ եթե կինն իր ամուսնու տանն է ուխտ արել կամ երդումով խոստումներ տվել, ¹² և եթե նրա ամուսինը լսել է այդ մասին և լռելյայն հավանություն տվել, ապա այդ կնոջ բոլոր ուխտերն ու խոստումներն ուժի մեջ են. դրանք պետք է կատարվեն։ ¹³ Իսկ եթե նրա ամուսինը լսած օրը կտրականապես խափանի կնոջ շուրթերով արված ուխտերն ու խոստումը, ապա դրանք անվավեր են, կարող են չկատարվել, քանի որ զանց անողը նրա ամուսինն է, ուստի Տիրոջ առջև այդ կինն անպարտ է։ ¹⁴ Ինքն իրեն զրկելու համար արված յուրաքանչյուր ուխտ կամ խոստում նրա ամուսինը պետք է հաստատի կամ մերժի։ ¹⁵ Եթե կնոջ ուխտի կամ խոստումի մասին տեղյակ լինի ամուսինը և բազում օրեր լռի, ուրեմն հաստատած և ընդունած է լինում կնոջ ուխտն ու խոստումը, քանի որ լսած օրը դրանց համար չի առարկել։ ¹⁶ Եվ եթե նրա ամուսինն իր լսած օրից հետո առարկի, ուրեմն ինքն է իր վրա կրում մեղքը”»։

¹⁷ Սրանք են այն պատգամները, որ Տերը տվեց Մովսեսին ամուսնու և նրա կնոջ, հոր և նրա դստեր մասին, որը դեռևս երիտասարդ հասակում իր հոր տանն է գտնվում։

31

Պատերազմ մադիանացիների դեմ

¹ Տերը խոսեց Մովսեսի հետ և ասաց. ² «Իսրայելի որդիների վրեժն ա՛ռ մադիանացիներից և դրանից հետո միացի՛ր քո նախնիներին»։ ³ Մովսեսը, դիմելով ժողովրդին, ասաց. «Ձեր միջից զինե՛ք տղամարդկանց, որ պատերազմեն Մադիամի դեմ Տիրոջ առաջ, որպեսզի Տիրոջ վրեժն առնեք Մադիամից։ ⁴ Իսրայելի որդիների յուրաքանչյուր ցեղից հազարական այր ուղարկե՛ք պատերազմելու համար»։ ⁵ Եվ Իսրայելի որդիների ամեն մի ցեղից ընտրեցին հազարական տղամարդ, ընդամենը տասներկու հազար՝ զինված պատերազմելու համար։ ⁶ Մովսեսը յուրաքանչյուր ցեղից ուղարկեց հազարական տղամարդ իրենց զենքով հանդերձ, նրանց հետ նաև Ահարոն քահանայի որդի Եղիազարի որդի Փենեեսին՝ նրանց ձեռքը հանձնելով սուրբ սպասքն ու ազդարարության փողերը։ ⁷ Նրանք ճակատամարտ մղեցին մադիանացիների դեմ, ինչպես Տերն էր հրամայել Մովսեսին։ Նրանք կոտորեցին բոլոր արուներին։ ⁸ Մյուս սպանվածների հետ սպանեցին նաև մադիանացիների թագավորներ Եվինին, Սուրին, Րոկոմին, Ուրին և Ռոբոքին՝ Մադիամի հինգ թագավորներին։ Սպանվածների հետ սրախողխող արեցին նաև Բեովրի որդի Բաղաամին։ ⁹ Մադիամի կանանց, նրանց երեխաներին, նրանց անասունները, նրանց ամբողջ ունեցվածքն ու կարողությունն ավար առան։ ¹⁰ Հրկիզեցին նրանց բոլոր քաղաքները, որտեղ բնակվում էին, ինչպես նաև նրանց ավանները։ ¹¹ Գերեվարեցին ու ավար առան նրանց ամեն ինչը՝ մարդ թե անասուն։ ¹² Գերիներին, բանակի կողոպուտն ու ավարը բերեցին Մովսեսի, Եղիազար քահանայի և Իսրայելի բոլոր որդիների մոտ՝ Մովաբի հովտում, Երիքովի դիմաց, Հորդանանի եզերքին։

¹³ Մովսեսն ու Եղիազար քահանան և ժողովրդի բոլոր իշխանները բանակատեղիից դուրս ելան նրանց ընդառաջ։ ¹⁴ Մովսեսը բարկացավ զորահրամանատարների՝ ռազմադաշտից վերադարձած հազարապետների ու հարյուրապետների վրա՝ ¹⁵ ասելով. «Ինչո՞ւ եք կենդանի թողել բոլոր կանանց։ ¹⁶ Չէ՞ որ սրանք էին, որ Բաղաամի խորհրդով մոլորեցրին Իսրայելի որդիներին, որոնք հանուն Փոգովրի շեղվեցին Տիրոջից և արհամարհեցին նրա խոսքը, և Տիրոջ ժողովրդի վրա պատուհաս եկավ։ ¹⁷ Արդ, կոտորե՛ք բոլոր արու երեխաներին, նաև այն բոլոր կանանց, որոնք տղամարդու են մերձեցել, կոտորե՛ք։ ¹⁸ Իսկ բոլոր կանանց, որոնք տղամարդու չեն մերձեցել, խնայե՛ք։ ¹⁹ Իսկ դուք յոթ օր բանակատեղիից դո՛ւրս բնակվեք։ Ով սպանել է կամ ձեռք տվել մեռածի, թե՛ դուք և թե՛ ձեր գերիները, թող մաքրվի երրորդ և յոթերորդ օրը։ ²⁰ Մաքրե՛ք նաև բոլոր հագուստները, կաշվե բոլոր անոթները, մազից գործած ու փայտից պատրաստված ամեն ինչ»։

²¹ Եղիազար քահանան ասաց ռազմադաշտից վերադարձած զինվորներին. «Այս է Օրենքի կարգը, որ Տերը տվել է Մովսեսին. ²² ոսկուց, արծաթից, պղնձից, երկաթից, կապարից ու անագից բացի ²³ այն ամենը, ինչ հրակայուն է, թող հրով մաքրվի, ապա նաև սրբազան ջրով, իսկ ինչ որ կրակի չի դիմանա, թող ջրով մաքրվի։ ²⁴ Ձեր հագուստները յոթերորդ օրը լվալով՝ մաքուր կլինեք, որից հետո կմտնեք բանակատեղի»։

²⁵ Տերը խոսեց Մովսեսի հետ և ասաց. ²⁶ «Դու, Եղիազար քահանան և ժողովրդի նահապետական տների իշխանները կազմե՛ք ավարի ցանկը՝ մարդուց մինչև անասուն։ ²⁷ Ավարը բաժանե՛ք պատերազմին մասնակցածների և ամբողջ ժողովրդի միջև։ ²⁸ Պատերազմին մասնակցածներին բաժին ընկած հինգ հարյուր գերիներից մեկին կընծայեք Տիրոջը։ Նույնը նաև անասունների վերաբերյալ՝ լինի արջառ, ոչխար ու այծ։ ²⁹ Պատերազմիկների բաժնից կառնես ու կտաս Եղիազար քահանային՝ իբրև Տիրոջը մատուցվելիք նվեր, ³⁰ իսկ Իսրայելի որդիներին հասնող բաժնի ամեն հիսուն գերիներից և բոլոր անասուններից՝ արջառից, ոչխարից, էշից մեկը կհանձնես ղևտացիներին, որոնք ծառայում են Տիրոջ խորանում»։ ³¹ Մովսեսն ու Եղիազար քահանան արեցին այնպես, ինչպես Տերը հրամայել էր Մովսեսին։

³² Պատերազմին մասնակցած տղամարդկանց բերած ավարի ընդհանուր թիվը՝ 675,000 ոչխար, ³³ 72,000 արջառ, ³⁴ 61,000 էշ։ ³⁵ Այն կանանց թիվը, որոնք տղամարդու չէին մերձեցել, 32,000 էր։ ³⁶ Պատերազմի մասնակիցների ավարի բաժինը՝ 337,500 ոչխար, ³⁷ որոնցից Տիրոջը որպես հաս տրվեց 675 ոչխար, ³⁸ 36,000 արջառ, որոնցից Տիրոջը որպես հաս տրվեց 72-ը, ³⁹ և 30,500 էշ, որոնցից Տիրոջը որպես հաս տրվեց 61-ը, ⁴⁰ իսկ գերեվարված մարդկանց թիվը՝ 16,000, որոնցից Տիրոջը որպես հաս տրվեց 32 հոգի։ ⁴¹ Մովսեսը Տիրոջ հասը՝ Աստծու նվերը, հանձնեց Եղիազար քահանային, ինչպես Տերն էր հրամայել Մովսեսին։

⁴² Սա ավարի այն կեսից էր, որ Մովսեսը որպես բաժին տվել էր պատերազմի մասնակիցներին։ ⁴³ Ժողովրդին բաժին ընկնող ավարի մյուս կեսն էր՝ 337,500 ոչխար, ⁴⁴ 36,000 արջառ, ⁴⁵ 30,500 էշ ⁴⁶ և 16,000 մարդ։ ⁴⁷ Մովսեսը Իսրայելի որդիներին հասնող ավարի այս բաժնից յուրաքանչյուր հիսուն մարդուց և անասունից վերցրեց մեկին և տվեց ղևտացիներին, որոնք ծառայում էին Տիրոջ խորանում, ինչպես Տերն էր հրամայել Մովսեսին։

⁴⁸ Մովսեսին ներկայացան բոլոր զորահրամանատարները՝ հազարապետներն ու հարյուրապետները, ⁴⁹ և ասացին նրան. «Մենք՝ քո ծառաները, հաշվառման ենթարկեցինք ռազմիկներին և տեսանք, որ նրանցից ոչ ոք չի պակասում։ ⁵⁰ Դրա համար Տիրոջը որպես ընծա բերել ենք ինչ ոսկյա իր որ գտնվում է յուրաքանչյուրիս մոտ՝ թևնոց, ապարանջան, մատանի, մանյակ և ընդելուզված ծամկալ, որպեսզի Տիրոջից քավություն ստանանք»։ ⁵¹ Մովսեսն ու Եղիազար քահանան նրանցից վերցրին ոսկուց պատրաստված բոլոր իրերը։ ⁵² Հազարապետների կողմից Տիրոջը որպես հաս տրված ամբողջ ոսկին 16,750 սիկղ էր։ ⁵³ (Որովհետև ռազմիկներից յուրաքանչյուրն ավարից իր համար բաժին էր վերցրել)։ ⁵⁴ Մովսեսն ու Եղիազար քահանան, հազարապետներից ու հարյուրապետներից վերցնելով ոսկին, տարան Վկայության խորան՝ որպես Իսրայելի որդիների հիշատակ Տիրոջ առաջ։

32

Հորդանան գետի արևելքում ժառանգություն ստացած ցեղերը

(Բ Օր. 3.12-22)

¹ Իսրայելի որդիները բազում անասուններ ունեին, բայց Ռուբենի ու Գադի ցեղերի ունեցածները չափազանց շատ էին։ Նրանք տեսան, որ Հազերի ու Գաղաադի շրջանները հոտերի համար հարմար արոտավայրեր են։ ² Ռուբենի որդիներն ու Գադի որդիները, գալով Մովսեսի, Եղիազար քահանայի ու ժողովրդի իշխանների մոտ, ասացին. ³ «Ատարովթը, Դեբովնը, Հազերը, Նամբրան, Եսեբոնը, Եղեաղեթը, Սեբաման, Նաբավը և Բեանը՝ ⁴ այն վայրերը, որ Տերը հանձնել է Իսրայելի որդիների ձեռքը, անասունների արոտներ են, իսկ մենք՝ քո ծառաները, անասուններ ունենք»։ ⁵ Նրանք ավելացրին. «Եթե քո առաջ շնորհ ենք գտել, այդ վայրերը մեզ՝ քո ծառաներին, իբրև կալվա՛ծք տուր և մեզ Հորդանանը մի՛ անցկացրու»։ ⁶ Մովսեսը Գադի որդիներին ու Ռուբենի որդիներին պատասխանեց. «Ձեր եղբայրները գնան պատերազմելու, իսկ դուք այստեղ նստե՞ք։ ⁷ Ինչո՞ւ եք պղտորում Իսրայելի որդիների հոգին, այնպես անում, որ չուզենան անցնել այն երկիրը, որը Տերը տալու է նրանց։ ⁸ Ձեր հայրերը նույն կերպ չվարվեցի՞ն, երբ նրանց ուղարկեցի Կադեսբառնեայից, որպեսզի հետախուզեն երկիրը։ ⁹ Նրանք հասան Ողկույզի ձորը, հետախուզեցին երկիրը, բայց վերադառնալով հեղաշրջեցին Իսրայելի որդիների մտքերը, որ չմտնեն այն երկիրը, որ Տերը տվել էր նրանց։ ¹⁰ Այդ պատճառով Տերը խիստ զայրացավ այդ օրը և երդվելով ասաց. ¹¹ “Եգիպտոսից դուրս եկած քսան տարեկան և ավելի մեծ տարիք ունեցող տղամարդիկ, որոնք գիտեն չարն ու բարին, թող չտեսնեն այն երկիրը, որ երդվեցի տալ Աբրահամին, Իսահակին ու Հակոբին, քանի որ ինձ չհետևեցին, ¹² բացի Հեփոնեի որդի Քաղեբից ու Նավեի որդի Հեսուից, քանի որ նրանք հետևեցին Տիրոջը”։ ¹³ Տերը, խիստ զայրանալով Իսրայելի որդիների վրա, քառասուն տարի նրանց թափառել տվեց անապատում, մինչև որ մեռավ Տիրոջ առաջ չարիք գործող ամբողջ սերունդը։ ¹⁴ Հիմա էլ դուք եք ելել ձեր հայրերի փոխարեն, ո՜վ մեղավոր մարդկանց ամբոխներ, որպեսզի է՛լ ավելի բորբոքեք Տիրոջ բարկությունն Իսրայելի վրա։ ¹⁵ Քանի որ դուք խոտորվել եք Աստծուց, նա ձեզ դարձյալ կթողնի այս անապատում, և դուք պատճառ կդառնաք, որ ամբողջ ժողովուրդը կործանվի»։ ¹⁶ Նրանք, դիմելով Մովսեսին, ասացին. «Մեր ոչխարների ու մյուս անասունների համար պատսպարաններ շինենք, մեր ընտանիքների համար՝ քաղաքներ, ¹⁷ իսկ մենք ինքներս կզինվենք Տիրոջ առջև, կգնանք Իսրայելի մյուս որդիների առջևից, մինչև որ նրանց հաստատենք իրենց տեղերում։ Իսկ մեր ժողովուրդը, որպեսզի ապահով լինի այս երկրի բնակիչներից, թող բնակվի պարսպապատ քաղաքներում։ ¹⁸ Մենք չենք վերադառնա մեր տները, մինչև Իսրայելի որդիներից յուրաքանչյուրն իր ժառանգությունը չստանա։ ¹⁹ Մենք Հորդանան գետի այն կողմում և ավելի հեռու նրանց մեջ ժառանգություն չենք ստանա, որովհետև մենք մեր բաժինն ստացել ենք Հորդանանի այս կողմում՝ արևելքում»։ ²⁰ Մովսեսն ասաց նրանց. «Եթե անեք այնպես, ինչպես ասում եք, այսինքն՝ Տիրոջ հրամանով պատերազմի համար զինվեք, ²¹ ձեր բոլոր ռազմիկները Տիրոջ կարգադրության համաձայն անցնեն Հորդանան գետի այն կողմը, մասնակցեն պատերազմին, մինչև Տիրոջ առջև ոչնչանա նրա թշնամին, ²² և երկիրը նվաճվի ըստ Տիրոջ ցանկության, ապա վերադառնաք, Տիրոջ ու Իսրայելի առջև անպարտ կլինեք, և այս երկիրը Տիրոջ առաջ ձեր կալվածքը թող լինի։ ²³ Իսկ եթե այդպես չվարվեք, մեղավոր կհամարվեք Տիրոջ առջև և ձեր մեղքերը կճանաչեք, երբ չարիք հասնի ձեզ։ ²⁴ Արդ, դուք քաղաքնե՛ր շինեք ձեր ընտանիքների համար և տեղեր՝ ձեր անասունների համար, և ինչ որ դուրս է եկել ձեր բերանից, կատարե՛ք»։ ²⁵ Ռուբենի որդիներն ու Գադի որդիները, դիմելով Մովսեսին, ասացին. «Մենք՝ քո ծառաները, կվարվենք այնպես, ինչպես դու՝ մեր տերը, հրամայեցիր մեզ։ ²⁶ Մեր երեխաներն ու կանայք, մեր բոլոր անասունները թող մնան Գաղաադի քաղաքներում, ²⁷ իսկ մենք՝ քո ծառաները, զինավառ ու պատրաստ Տիրոջ առջև, կանցնենք-կգնանք պատերազմի, ինչպես որ հրամայի Տերը»։ ²⁸ Մովսեսը նրանց մասին հրահանգ տվեց Եղիազար քահանային, Նավեի որդի Հեսուին և Իսրայելի ցեղերի նահապետական տների իշխաններին։ ²⁹ Մովսեսն ասաց նրանց. «Եթե Ռուբենի որդիներն ու Գադի որդիները Տիրոջ առջև սպառազինված ձեզ հետ անցնեն Հորդանան գետի այն կողմը, և եթե դուք նվաճեք այդ երկիրը, ապա իբրև կալվածք կտաք նրանց Գաղաադի երկիրը։ ³⁰ Իսկ եթե սպառազինված ձեզ հետ պատերազմի չելնեն Տիրոջ առջև, ապա նրանց երեխաներին, կանանց ու անասուններին, նախքան ձեր անցնելը, կփոխադրեք քանանացիների երկիրը, և նրանք ևս ձեզ հետ թող ժառանգություն ստանան քանանացիների երկրում»։ ³¹ Ռուբենի որդիներն ու Գադի որդիները պատասխան տվեցին՝ ասելով. «Տերն ինչ որ հրամայի իր ծառաներին, այդ էլ կկատարենք։ ³² Սպառազինված կանցնենք քանանացիների երկիրը, և մեզ կալվածքներ կտաք Հորդանանի այս կողմում»։

³³ Եվ Մովսեսը Գադի որդիներին, Ռուբենի որդիներին, Հովսեփի որդիներից Մանասեի կես ցեղին տվեց ամորհացիների Սեհովն արքայի թագավորությունը, Բասան երկրի Օվգ արքայի թագավորությունը, այդ երկիրը՝ իր սահմաններում գտնվող բոլոր քաղաքներով, ինչպես նաև սահմանամերձ քաղաքներով։

³⁴ Գադի որդիները կառուցեցին Դեբովնը, Ատարովթը, Արոյերը, ³⁵ Սոփարն ու Հազերը, դրանք շրջապատեցին բարձր պարիսպներով։ ³⁶ Կառուցեցին նաև Նամբրանը, Բեթառանը. ամուր քաղաքներ ու հոտերի գոմեր։

³⁷ Ռուբենի որդիները կառուցեցին Եսեբոնը, Եղեաղեթը, Կարիեթեմը, ³⁸ Բեելմեովնը՝ չորս կողմից պարսպապատ, և Սեբաման։ Կառուցած քաղաքներն անվանեցին իրենց անուններով։

³⁹ Մանասեի որդի Մաքիրի հետնորդները գնացին Գաղաադ, գրավեցին այն ու ոչնչացրին այնտեղ բնակվող ամորհացիներին։ ⁴⁰ Մովսեսը Գաղաադը տվեց Մանասեի որդի Մաքիրին, որը բնակվեց այնտեղ։ ⁴¹ Իսկ Մանասեի որդի Հայիրը գրավեց նրանց ավանները, որոնք կոչեց «Հայիրի ավաններ»։ ⁴² Եվ Նաբավը գնաց գրավեց Կանաաթն ու նրա ավանները, որոնք իր անունով կոչեց Նաբոթ։

33

Հանգրվաններ Եգիպտոսից դուրս գալուց հետո

¹ Սրանք են կայանները Իսրայելի որդիների, որոնք Մովսեսի և Ահարոնի գլխավորությամբ իրենց զորքով դուրս ելան Եգիպտոսից։ ² Մովսեսը Տիրոջ հրամանով գրի առավ Իսրայելի որդիների երթն ու նրանց կայանները։ Սրանք են նրանց երթի կայանները։ ³ Իսրայելի որդիները Ռամեսեից ճանապարհ ընկան առաջին ամսի տասնհինգերորդ օրը։ Զատկի հաջորդ օրը նրանք, բոլոր եգիպտացիների աչքի առջև, Աստծու հզոր պաշտպանությամբ ելան Եգիպտոսից, ⁴ երբ եգիպտացիները թաղում էին իրենց մեռելներին, որոնց կոտորել էր Տերը՝ եգիպտացիների երկրի բոլոր անդրանիկներին։ Տերը նրանցից վրեժ էր լուծել իրենց աստվածների համար։

⁵ Իսրայելի որդիները, Ռամեսեից մեկնելով, բանակեցին Սոկքովթում։ ⁶ Սոկքովթից մեկնելով՝ բանակեցին Բութանում, որն անապատի մի մասն է։ ⁷ Բութանից մեկնելով՝ բանակեցին Եիրովթի մոտ, որը գտնվում է Բեեղսեպփովնի դիմաց, և բանակեցին Մագդովղի դիմաց։ ⁸ Եիրովթից մեկնեցին և ծովի միջով անցան դեպի անապատ, անապատի միջով երեք օրվա ճանապարհ կտրեցին և բանակեցին Դառն աղբյուրների մոտ։ ⁹ Մեկնեցին Դառն աղբյուրների մոտից և եկան Եղիմ։ Եղիմում ջրի տասներկու աղբյուր կար և արմավի յոթանասուն ծառ։ Նրանք բանակեցին այնտեղ՝ ջրի մոտ։ ¹⁰ Մեկնեցին Եղիմից և բանակեցին Կարմիր ծովի ափին։ ¹¹ Մեկնեցին Կարմիր ծովից և բանակեցին Սին անապատում։ ¹² Մեկնեցին Սին անապատից և բանակեցին Ռափայում։ ¹³ Մեկնեցին Ռափայից և բանակեցին Եղուսում։ ¹⁴ Մեկնեցին Եղուսից և բանակեցին Ռափիդինում։ Այստեղ ժողովուրդը խմելու ջուր չուներ, ¹⁵ ուստի մեկնեցին Ռափիդինից և բանակեցին Սինայի անապատում։ ¹⁶ Մեկնեցին Սինայի անապատից և բանակեցին Ցանկության գերեզմաններում։ ¹⁷ Մեկնեցին Ցանկության գերեզմաններից և բանակեցին Ասերովթում։ ¹⁸ Մեկնեցին Ասերովթից և բանակեցին Ռաթամայում։ ¹⁹ Մեկնեցին Ռաթամայից և բանակեցին Ռեմովն Փարեսում։ ²⁰ Մեկնեցին Ռեմովն Փարեսից և բանակեցին Ղեմոնայում։ ²¹ Մեկնեցին Ղեմոնայից և բանակեցին Դեսսայում։ ²² Մեկնեցին Դեսսայից և բանակեցին Մակեղղաթում։ ²³ Մեկնեցին Մակեղղաթից և բանակեցին Սոփարում։ ²⁴ Մեկնեցին Սոփարից և բանակեցին Քարադաթում։ ²⁵ Մեկնեցին Քարադաթից և բանակեցին Մակեղովթում։ ²⁶ Մեկնեցին Մակեղովթից և բանակեցին Կատաաթում։ ²⁷ Մեկնեցին Կատաաթից և բանակեցին Տարաթում։ ²⁸ Մեկնեցին Տարաթից և բանակեցին Մատեկկայում։ ²⁹ Մեկնեցին Մատեկկայից և բանակեցին Սելմովնայում։ ³⁰ Մեկնեցին Սելմովնայից և բանակեցին Մասուրութում։ ³¹ Մեկնեցին Մասուրութից և բանակեցին Բանեայում։ ³² Մեկնեցին Բանեայից և բանակեցին Գադգադ լեռան վրա։ ³³ Մեկնեցին Գադգադ լեռից և բանակեցին Ետեբաթայում։ ³⁴ Մեկնեցին Ետեբաթայից և բանակեցին Եբրոնայում։ ³⁵ Մեկնեցին Եբրոնայից և բանակեցին Գեսիովն Գաբերում։ ³⁶ Մեկնեցին Գեսիովն Գաբերից և բանակեցին Սին անապատում։ Մեկնեցին Սին անապատից և բանակեցին Փառանի անապատում, այսինքն՝ Կադեսում։ ³⁷ Մեկնեցին Կադեսից և բանակեցին Հովր լեռան վրա՝ Եդովմի երկրի մոտ։

³⁸ Ահարոն քահանան Տիրոջ հրամանով բարձրացավ լեռը և մեռավ այնտեղ եգիպտացիների երկրից Իսրայելի որդիների դուրս գալու քառասուներորդ տարվա հինգերորդ ամսի առաջին օրը։ ³⁹ Ահարոնը հարյուր քսաներեք տարեկան էր, երբ մեռավ Հովր լեռան վրա։

⁴⁰ Քանանացիների երկրում բնակվող Արադի արքա Քանանեսը տեղեկացավ, որ Իսրայելի որդիները մուտք են գործում իր երկիրը, պատերազմեց Իսրայելի դեմ և նրանցից գերի վերցրեց։

⁴¹ Իսրայելի որդիները, Հովր լեռից մեկնելով, բանակեցին Սելմովնայում։ ⁴² Մեկնեցին Սելմովնայից և բանակեցին Փենովում։ ⁴³ Մեկնեցին Փենովից և բանակեցին Ովբովթում։ ⁴⁴ Մեկնեցին Ովբովթից և բանակեցին Գայիում՝ Հորդանան գետի այն կողմը, Մովաբի սահմաններում։ ⁴⁵ Մեկնեցին Գայիից և բանակեցին Դեբովն Գադում։ ⁴⁶ Մեկնեցին Դեբովն Գադից և բանակեցին Գեղմովն Դեբղաթեմում։ ⁴⁷ Մեկնեցին Գեղմովն Դեբղաթեմից և բանակեցին Աբարիմ լեռների վրա՝ Նաբավի դիմաց։ ⁴⁸ Մեկնեցին Աբարիմի լեռներից և բանակեցին մովաբացիների երկրի արևմտյան կողմում՝ Հորդանան գետի մոտ, Երիքովի դիմաց։ ⁴⁹ Նրանք բանակեցին Հորդանան գետի մոտ՝ Եսիմովթի և Մեղսատովի միջև, մովաբացիների երկրի արևմտյան կողմում։

⁵⁰ Տերը Մովաբի արևմտյան մասում՝ Հորդանան գետի մոտ, Երիքովի դիմաց, խոսեց Մովսեսի հետ և ասաց. ⁵¹ «Դիմի՛ր Իսրայելի որդիներին և ասա՛ նրանց. “Ահա դուք Հորդանանով անցնում եք դեպի քանանացիների երկիրը։ ⁵² Երկրի բոլոր բնակիչներին կոչնչացնեք ձեր առջևից, կկործանեք նրանց պատկերազարդ կոթողները, կոչնչացնեք նրանց ձուլածո բոլոր կուռքերը, նրանց բոլոր հուշասյուները կվերացնեք մեջտեղից։ ⁵³ Կոչնչացնեք երկրի բնակիչներին և կբնակվեք այնտեղ, որովհետև նրանց երկիրը ձեզ եմ տվել իբրև ժառանգություն։ ⁵⁴[25] Ըստ ձեր ցեղերի՝ բազմանդամներին մեծ բաժին կհատկացնեք, իսկ սակավանդամներին՝ փոքր բաժին։ Յուրաքանչյուր ցեղ թող ստանա այն, ինչ վիճակ կելնի նրա անվանը։ Բաժանումը պետք է կատարվի ըստ ձեր նահապետական ցեղերի։ ⁵⁵ Եթե երկրի բնակիչներին չոչնչացնեք, ձեր կենդանի թողածները փուշ կլինեն ձեր աչքերին և նետեր՝ ձեր կողերին։ Նրանք ձեր թշնամիները կլինեն այն երկրում, որտեղ դուք եք բնակվում։ ⁵⁶ Եվ ինչ մտադրվել էի անել նրանց նկատմամբ, կանեմ ձեր նկատմամբ”»:

34

Քանանի սահմանները

¹ Տերը խոսեց Մովսեսի հետ և ասաց. ² «Պատվիրի՛ր Իսրայելի որդիներին ու նրանց ասա՛. “Դուք մտնում եք քանանացիների երկիրը։ Այն թող ձեր ժառանգությունը լինի, Քանանի երկիրն իր սահմաններով հանդերձ։

³ Նրա հարավային սահմանը թող լինի Սին անապատից մինչև Եդովմի երկրի մերձակայքը։ Հարավային սահմանն արևելյան կողմից թող սկիզբ առնի Մեռյալ ծովի եզրից, ⁴ ապա թող շրջանաձև բարձրանա դեպի Ակրաբինի սարը, անցնի Ենակով, դեպի հարավ ձգվելով՝ հասնի մինչև Կադեսբառնեա, շարունակվի դեպի Արադի ավանը և անցնի Ասեմովնով, ⁵ ապա Ասեմովնից շրջանաձև թող դառնա դեպի եգիպտացիների ձորը և դուրս գա դեպի ծով։

⁶ Ձեր արևմտյան սահմանը թող լինի Մեծ ծովը. դա ձեր արևմտյան սահմանն է։

⁷ Ձեր հյուսիսային սահմանը թող այս լինի. Մեծ ծովից ուղիղ գծով մինչև Լեռ լեռը, ⁸ այդտեղից՝ լեռներից ուղիղ գծով մինչև Եմաթի մուտքը, ապա թող հասնի մինչև Արադաքի սահմանները, ⁹ այնտեղից թող անցնի Զեփրոնի սահմաններով և հասնի մինչև Ասիռնային։ Սրանք թող լինեն ձեր հյուսիսային սահմանները։

¹⁰ Ձեր արևելյան սահմանները պետք է անցնեն Ասիռնայինից մինչև Սեպփամար։ ¹¹ Այս սահմանագիծը Սեպփամարից թող ձգվի մինչև Բեղա՝ Աղբյուրների արևելյան կողմը, ապա Բեղայից թող իջնի մինչև Քեներեթի ծովի արևելյան կողմը։ ¹² Սահմանագիծն այնուհետև թող ձգվի մինչև Հորդանան գետը՝ հասնելով մինչև Մեռյալ ծով։ Այդ բովանդակ երկիրն ու նրա շրջակայքը ձեզ թող պատկանեն”»։

¹³ Մովսեսը պատվիրեց Իսրայելի որդիներին ու ասաց. «Սա է այն երկիրը, որ պիտի ժառանգեք վիճակ գցելով։ Ինչպես Տերն է հրամայել, այն պիտի տրվի ինը ցեղերին ու Մանասեի կես ցեղին, ¹⁴ որովհետև Ռուբենի ու Գադի ցեղերը՝ իրենց նահապետների տներով, ¹⁵ և Մանասեի կես ցեղն իրենց բաժինն ստացել են Հորդանան գետի այն կողմում՝ Երիքովի դիմաց, հարավից դեպի արևելք ձգվող մասում»։

¹⁶ Տերը խոսեց Մովսեսի հետ և ասաց. ¹⁷ «Սրանք են այն մարդկանց անունները, որոնք ձեզ պիտի բաժանեն երկիրը՝ Եղիազար քահանան, Նավեի որդի Հեսուն, ¹⁸ նաև ամեն մի ցեղից վերցրե՛ք մեկական իշխան, որոնք երկիրը պիտի բաժանեն ձեր միջև։ ¹⁹ Սրանք են այդ մարդկանց անունները՝ Հուդայի ցեղից՝ Հեփոնեի որդի Քաղեբը, ²⁰ Շմավոնի ցեղից՝ Եմիուդի որդի Սաղամիելը, ²¹ Բենիամինի ցեղից՝ Քասղովնի որդի Ելդադը, ²² Դանի ցեղից՝ Եգղիի որդի իշխան Բակքիրը, ²³ Հովսեփի որդիներից Մանասեի ցեղից՝ Ուփիի որդի իշխան Անիելը, ²⁴ Եփրեմի ցեղից՝ Սաբաթի որդի իշխան Կամուելը, ²⁵ Զաբուղոնի ցեղից՝ Փառնաքի որդի իշխան Եղիսափանը, ²⁶ Իսաքարի ցեղից՝ Ոզիայի որդի իշխան Փաղտիելը, ²⁷ Ասերի ցեղից՝ Սելեմիի որդի իշխան Աքիորը, ²⁸ Նեփթաղիմի ցեղից՝ Մեուդի որդի իշխան Փադայելը։ ²⁹ Տերը սրանց հրամայեց քանանացիների երկիրը բաժանել Իսրայելի որդիների միջև»։

35

Ղևտացիներին հատկացված քաղաքները

¹ Տերը Մովաբի արևմտյան մասում՝ Հորդանանի եզերքին, Երիքովի դիմաց, խոսեց Մովսեսի հետ և ասաց. ² «Հրամայի՛ր Իսրայելի որդիներին, որ իրենց բաժին հասած կալվածքներից բնակվելու համար քաղաքներ և այդ քաղաքների շուրջն ընկած ագարակները տան ղևտացիներին։ ³ Այդ քաղաքները նրանց բնակության վայրերը թող լինեն, իսկ ագարակները թող լինեն նրանց հոտերի և ամեն տեսակ չորքոտանիների համար արածելու վայրեր։ ⁴ Քաղաքների շուրջը գտնվող ագարակները, որ տալու եք ղևտացիներին, քաղաքի պարիսպներից դուրս շուրջանակի երկու հազար կանգուն շառավիղով տարածություն պետք է ունենան։ ⁵ Քաղաքից դուրս՝ արևելյան կողմում, չափե՛ք երկու հազար կանգուն, արևմտյան կողմում՝ երկու հազար կանգուն, հյուսիսային կողմում՝ երկու հազար կանգուն, հարավային կողմում՝ երկու հազար կանգուն։ Դրանց մեջտեղում գտնվող քաղաքը, ինչպես և նրա շուրջն ընկած տարածքը պետք է պատկանեն ղևտացիներին։

⁶ Ղևտացիներին տրվելիք քաղաքներից վեցը պետք է լինեն ապաստանի քաղաքներ, որոնք ապաստան պիտի ծառայեն սպանություն գործած փախստականների համար։

Այս քաղաքներից բացի, նրանց պիտի տաք ևս քառասուներկու քաղաքներ։ ⁷ Ղևտացիներին տրվելիք քաղաքների թիվը իրենց արվարձաններով հանդերձ քառասունութը պիտի լինեն։ ⁸ Իսրայելի որդիների ժառանգած կալվածքներից ղևտացիներին տրվելիք քաղաքները պիտի լինեն ըստ նրանց ստացած քաղաքների թվի. շատ ստացողը շատ պիտի տա, քիչ ստացողը՝ քիչ։ Յուրաքանչյուր ցեղ ըստ ժառանգած տարածության քաղաքներ թող տա ղևտացիներին»։

Ապաստանի քաղաքներ

(Բ Օր. 19.1-13, Հես. 20.1-9)

⁹ Տերը խոսեց Մովսեսի հետ և ասաց. ¹⁰ «Դիմի՛ր Իսրայելի որդիներին ու նրանց ասա՛. “Դուք ահա Հորդանան գետի վրայով անցնում եք քանանացիների երկիրը։ ¹¹ Այնտեղ առանձնացրե՛ք քաղաքներ, որոնք ձեզ համար ապաստան պիտի ծառայեն, որպեսզի այնտեղ փախչի մարդասպանը, նա, ով ակամա սպանել է մեկին։ ¹² Այդ քաղաքները ձեզ համար սպանվածի ազգականի վրեժխնդրությունից փրկվելու համար ապաստան թող լինեն։ Սպանողը թող մահվան չդատապարտվի, մինչև ժողովրդի դատաստանի առջև չկանգնի։ ¹³ Ղևտացիներին տրվելիք քաղաքներից վեցը որպես ապաստան թող ծառայեն։ ¹⁴ Երեք քաղաք տվե՛ք Հորդանան գետի այն կողմում, երեք քաղաք՝ քանանացիների երկրում։ ¹⁵ Այդ քաղաքներն իբրև ապաստան թող ծառայեն Իսրայելի որդիների, այլև օտարականների ու ձեր մեջ պանդխտելու եկածների համար։ Այդ քաղաքներն իբրև ապաստան թող ծառայեն, որպեսզի այնտեղ փախչեն բոլոր նրանք, ովքեր ակամա մարդ են սպանել։

¹⁶ Եթե որևէ մեկը երկաթե առարկայով հարվածի ու սպանի մեկին, նա մարդասպան է. մահվան թող դատապարտվի մարդասպանը։ ¹⁷ Եթե որևէ մեկը քարով հարվածի ու սպանի մեկին, մարդասպան է. մահվան թող դատապարտվի մարդասպանը։ ¹⁸ Եթե փայտե առարկայով հարվածի ու սպանի մեկին, մարդասպան է. մահվան թող դատապարտվի մարդասպանը։ ¹⁹ Սպանվածի մերձավորը թող սպանի մարդասպանին. երբ հանդիպի նրան, թող սպանի։ ²⁰ Եթե որևէ մեկը թշնամության հողի վրա հրի մի մարդու կամ չարամտությամբ նրա վրա որևէ իր նետի, ու նա մեռնի ²¹ կամ քինախնդրության համար ձեռքով հարվածի ու սպանի նրան, հարվածողը մահվան թող դատապարտվի։ Նա մարդասպան է. մահվան թող դատապարտվի մարդասպանը։ Սպանվածի մերձավորը որտեղ հանդիպի նրան, թող սպանի։

²² Իսկ եթե սխալմամբ և ոչ թե թշնամության հողի վրա է հրել նրան, նրա վրա նետել որևէ իր ոչ չար դիտավորությամբ ²³ կամ մահ պատճառող քարով առանց չարամտության է հարվածել նրան ու սպանել, սակայն սպանվողը նրա թշնամին չէր, և նա չէր ցանկանում նրան չարիք պատճառել, ²⁴ այդ դեպքում ժողովուրդը հարվածողի և սպանվածի մերձավորի միջև դատ թող անի ըստ հետևյալ դատաստանի. ²⁵ ժողովուրդը սպանողին թող փրկի սպանվածի մերձավորների ձեռքից։ Ժողովուրդը նրան թող հետ ուղարկի ապաստան-քաղաք, որտեղ նա ապաստանել էր։ Նա թող բնակվի այնտեղ, մինչև որ վախճանվի սուրբ յուղով օծված քահանայապետը։ ²⁶ Իսկ եթե սպանողը դուրս գա այն քաղաքի սահմաններից, որտեղ ապաստանել էր, ²⁷ և սպանվածի մերձավորը նրան գտնի նրա ապաստանած քաղաքի սահմաններից դուրս, ապա սպանվածի արյունակիցը թող սպանի մարդասպանին և մահապարտ չդիտվի։ ²⁸ Դրա համար էլ մարդասպանը պետք է բնակվի իր ապաստանած քաղաքում, մինչև որ վախճանվի քահանայապետը։ Քահանայապետի վախճանվելուց հետո միայն մարդասպանը թող վերադառնա իր կալվածքը։ ²⁹ Սա ձեր սերունդների մեջ արդարադատության օրենք թող լինի ձեր բնակության բոլոր վայրերում։

Վկաների մասին

(Բ Օր. 19.15-21)

³⁰ Ով մեկին սպանի, վկաներո՛վ թող սպանեն մարդասպանին։ Մեկ հոգու վկայությունը բավարար չէ մահվան վճիռ արձակելու համար։

³¹ Մահապարտ մարդասպանից փրկագին չպետք է վերցնեք։ Նա պետք է մահապատժի ենթարկվի։ ³² Ապաստան-քաղաք փախած մարդասպանից փրկագին չպետք է վերցնեք իր կալվածքը վերադառնալու և վերստին այնտեղ բնակվելու համար, մինչև քահանայապետի վախճանվելը։ ³³ Մի՛ պղծեք երկիրը. երկիրն իր վրա թափված արյան համար այլ հատուցում չի պահանջում, քան հեղումը նրա՛ արյան, ով արյուն է թափել։ ³⁴ Մի՛ պղծեք այն երկիրը, որտեղ բնակվում եք, և որտեղ ես եմ բնակվում ձեր մեջ, քանզի ես եմ Տերը՝ ձեր Աստվածը, որ բնակվում եմ Իսրայելի որդիների մեջ”»։

36

Կանանց ժառանգության հարցը

¹ Հովսեփի որդիներից Մանասեի որդի Մաքիրի որդի Գաղաադի որդիների ցեղի իշխանները, դիմելով Մովսեսին, Եղիազար քահանային ու Իսրայելի որդիների նահապետական տների իշխաններին, ² ասացին. «Տերը մեր տիրոջը՝ Մովսեսին հրամայել է, որ վիճակ գցելով՝ քանանացիների երկիրը ժառանգություն տա Իսրայելի որդիներին։ Տերը մեր տիրոջը հրամայել է նաև, որ մեր եղբայր Սաղպաադի բաժինը տրվի նրա դուստրերին։ ³ Արդ, եթե նրանք ամուսնանան Իսրայելի մեկ այլ ցեղի տղամարդկանց հետ, ապա նրանց վիճակը պիտի անջատվի՞ իրենց հոր կալվածքից և ավելանա այն ցեղի ժառանգության վրա, որոնց կնության կգնան։ Այսպիսով մեր ժառանգությունից այդ բաժինը պիտի վերցվի՞։ ⁴ Եվ երբ գա Իսրայելի որդիների հոբելյանական տարին, նրանց ժառանգությունը վերջնականապես կգումարվի՞ այն ցեղի ժառանգության վրա, որոնց կնության են գնացել, որով մեր ցեղի ժառանգությունից նրանց բաժին ընկած ժառանգության մասը պիտի վերանա՞»։

⁵ Մովսեսը Տիրոջ հրամանով Հովսեփի որդիների ասածի մասին Իսրայելի որդիներին ասաց. ⁶ «Սաղպաադի դուստրերի մասին Տերը այս հրամանն է տվել և ասել. “Նրանք թող ամուսնանան այն տղամարդկանց հետ, որոնք իրենց աչքին հաճելի կթվան՝ պայմանով, որ այդ տղամարդիկ իրենց հայրական ցեղից լինեն։ ⁷ Իսրայելի որդիների ժառանգությունը ցեղից ցեղ թող չանցնի, որպեսզի Իսրայելի որդիներից յուրաքանչյուրն ի՛ր ցեղի հայրենի ժառանգությանը կապվի։ ⁸ Իսրայելի որդիների որևէ ցեղից ժառանգություն ստացած ամեն մի աղջիկ թող դառնա իր հայրական ցեղին պատկանող որևէ տղամարդու կինը, որպեսզի Իսրայելի որդիները պահպանեն իրենց հայրենի ժառանգությունը։ ⁹ Ժառանգության բաժինը մի ցեղից մյուսը չպետք է անցնի, Իսրայելի որդիներից յուրաքանչյուրը պետք է կապվի իր ժառանգությանը”»։

¹⁰ Եվ Տերն ինչպես հրամայել էր Մովսեսին, Սաղպաադի դուստրերն այդպես էլ արեցին։ ¹¹ Թերսան, Եգղան, Մեղքան, Նուան և Մաաղան՝ Սաղպաադի դուստրերը, ամուսնացան իրենց հորեղբայրների որդիների հետ։ ¹² Նրանք Հովսեփի որդիներից Մանասեի ցեղի տղամարդկանց կանայք դարձան, և նրանց ժառանգությունը մնաց իրենց հոր ազգատոհմին։

¹³ Սրանք են այն պատվիրանները, օրենքներն ու դատաստանները, որ Տերը Մովաբի արևմտյան մասում՝ Հորդանանի եզերքին, Երիքովի դիմաց, տվեց Մովսեսի միջոցով։

ՕՐԵՆՔԻ ԵՐԿՐՈՐԴՈՒՄԸ

1

Ներածություն

¹ Սրանք են այն պատգամները, որ Մովսեսը խոսեց ողջ Իսրայելին Հորդանան գետի այն կողմում՝ անապատի արևմտյան մասում, Փառանի, Տիփողի, Ղոբանի, Հանգրվանների [*  Խացերոտ] ու Ոսկեկի [*  Դի-զահավ] միջև։

² Քորեբից մինչև Կադեսբառնեա, Սեիր լեռան ուղղությամբ, տասնմեկ օրվա ճանապարհ է։

³ Քառասուներորդ տարվա տասնմեկերորդ ամսվա առաջին օրը Մովսեսը Իսրայելի բոլոր որդիներին ասաց այն ամենը, ինչ Տերը պատվիրել էր իրեն նրանց վերաբերյալ։ ⁴ Դա եղավ Եսեբոնում բնակվող ամորհացիների արքա Սեհովնին և Աստարովթում ու Եդրայինում բնակվող Բասանի արքա Օվգին հաղթելուց հետո։ ⁵ Հորդանան գետի այն կողմում՝ Մովաբի երկրում, Մովսեսն սկսեց մեկնել Օրենքը՝ ասելով.

⁶ «Տերը՝ մեր Աստվածը, մեզ ասաց Քորեբում. “Բավական է որքան բնակվեցիք այս լեռան վրա։ ⁷ Դարձե՛ք և հեռացե՛ք այստեղից, գնացե՛ք ամորհացիների լեռը և Արաբա դաշտը, Քանանի լեռներն ու դաշտերը, դեպի հարավ ու դեպի ծովեզերք, դեպի Անդրլիբանան, մինչև Մեծ գետը՝ Եփրատ գետը։ ⁸ Տեսե՛ք, ահա ձեզ հանձնեցի այդ երկիրը. մտե՛ք ու ժառանգե՛ք այն, որը ես երդվեցի ձեր հայրերին՝ Աբրահամին, Իսահակին ու Հակոբին, տալու նրանց ու նրանցից հետո նրանց զավակներին, մի երկիր, որ մեղր ու կաթ է բխեցնում”։

Մովսեսը դատավորներ է կարգում

(Ելք 18.13-27)

⁹ Այն ժամանակ ես ձեզ ասացի. “Ես միայնակ չեմ կարող պատասխանատու լինել ձեր բոլորի համար։ ¹⁰ Տերը՝ մեր Աստվածը, բազմացրեց ձեզ, և ահա դուք այսօր երկնքի աստղերի չափ շատ եք։ ¹¹ Թող Տերը՝ մեր հայրերի Աստվածը, հազարապատիկ ավելացնի ձեզ և թող օրհնի ձեզ, ինչպես որ ասել է ձեզ։ ¹² Ես միայնակ ինչպե՞ս կարող եմ կրել ձեր նեղսրտությունները, ձեր պահանջներն ու ձեր հակառակությունները։ ¹³ Արդ, ձեր ցեղերի միջից ընտրե՛ք իմաստուն, փորձառու ու շրջահայաց մարդկանց, և ես նրանց ձեզ վրա իշխաններ կկարգեմ”։ ¹⁴ Դուք ինձ պատասխանեցիք՝ ասելով. “Այդ լավ առաջարկ է”։ ¹⁵ Այդպիսով ես ձեր միջից վերցրի ցեղապետներին՝ իմաստուն, փորձառու ու շրջահայաց այրերի, և նրանց նշանակեցի ձեզ առաջնորդներ՝ հազարապետներ, հարյուրապետներ, հիսնապետներ, տասնապետներ, դատավորների ատենադպիրներ։

¹⁶ Եվ այն ժամանակ պատվիրելով ձեր դատավորներին՝ ասացի. “Լսե՛ք ձեր եղբայրներին և արդարությա՛մբ դատեք ամեն մեկի հարցը թե՛ իր եղբոր և թե՛ եկվորի հետ։ ¹⁷ Դատի ժամանակ չպետք է ազդվեք որևէ մեկից։ Ինչպես դատում եք փոքրին, այնպես էլ դատեք մեծին։ Ոչ մեկից մի՛ վախեցեք, որովհետև դատը Աստծուն է պատկանում։ Իսկ եթե որևէ խնդիր ձեր ուժից վեր է, կհանձնեք ինձ, և ես կլսեմ այն”։ ¹⁸ Այն ժամանակ ձեզ պատվիրեցի այն ամենը, ինչ պետք է անեք»։

Խոստացված երկրի հետախուզումը

(Թվ. 13.1-33)

¹⁹ «Եվ Քորեբից մեկնելով անցանք այն մեծ և ահավոր անապատով, որ տեսաք՝ գնալով դեպի ամորհացիների լեռը, ինչպես որ մեզ պատվիրել էր Տերը՝ մեր Աստվածը, և եկանք մինչև Կադեսբառնեա։ ²⁰ Եվ ձեզ ասացի. “Ահա եկաք մինչև ամորհացիների լեռը, որ Տերը՝ մեր Աստվածը, տալու է ձեզ։ ²¹ Տեսե՛ք, ահա Տերը՝ մեր Աստվածը, ձեզ հանձնեց այս երկիրը։ Ելե՛ք և ժառանգե՛ք այն, ինչպես Տերը՝ մեր հայրերի Աստվածը, ասել է ձեզ, մի՛ վախեցեք և մի՛ երկնչեք”։

²² Եվ բոլորդ ինձ մոտենալով՝ ասացիք. “Մեզանից առաջ մարդիկ ուղարկենք, որ հետախուզեն երկիրը և ներկայացնեն մեզ այն ճանապարհը, որով ընթանալու ենք, և այն քաղաքները, ուր մտնելու ենք”։ ²³ Ընդունելով ձեր առաջարկը՝ ձեզանից ընտրեցի տասներկու մարդու՝ մեկական մարդ յուրաքանչյուր ցեղից։ ²⁴ Նրանք գնացին բարձրացան լեռը, հասան մինչև Ողկույզի ձորն ու հետախուզեցին այն։ ²⁵ Նրանք, վերցնելով այդ երկրի պտուղներից, վերադարձան մեզ մոտ և մեզ տեղեկություն բերելով՝ ասացին. “Բարեբեր է այն երկիրը, որ Տերը՝ Աստված, տալու է մեզ”։ ²⁶ Բայց դուք չկամեցաք ելնել, անտեսեցիք Տիրոջ՝ մեր Աստծու խոսքը, ²⁷ և ձեր վրաններում տրտնջալով ասացիք. “Տերը ատելության պատճառով հանեց մեզ եգիպտացիների երկրից, որպեսզի մեզ մատնի ամորհացիների ձեռքը՝ մեզ կոտորելու։ ²⁸ Արդ, ո՞ւր ելնենք”։ Ձեր եղբայրները վախ գցեցին ձեր սրտերը՝ ասելով. “Այդ ազգը մեծ է, բազմանդամ ու մեզանից հզոր, նրանց քաղաքները մեծ են ու մինչև երկինք հասնող պարիսպներ ունեն։ Նաև հսկաների որդիներ տեսանք այնտեղ”։ ²⁹ Ես ձեզ ասացի. “Մի՛ վախեցեք, մի՛ զարհուրեք նրանցից։ ³⁰ Տերը՝ մեր Աստվածը, որ գնում է ձեր առջևից, ձեր փոխարեն կպատերազմի նրանց դեմ, ինչպես որ ձեր աչքի առջև դա արեց եգիպտացիների երկրում, ³¹ և այս անապատում, որ տեսաք։ Որովհետև Տերը՝ քո Աստվածը, սնեց քեզ այնպես, ինչպես մեկը սնում է իր որդուն, ձեր ողջ ճանապարհի ընթացքում, մինչև որ եկաք այս վայրը։ ³² Այս խոսքից հետո էլ չվստահեցիք Տիրոջը՝ մեր Աստծուն, ³³ որ ձեր ճանապարհին ընթանում է ձեր առջևից, ձեզ համար տեղ ընտրում, գիշերը առաջնորդում ձեզ հրով, իսկ ցերեկը՝ ամպով, ցույց տալով ձեզ այն ճանապարհը, որով պիտի գնաք”»։

Տերը պատժում է Իսրայելին

(Թվ. 14.20-45)

³⁴ «Տերը լսեց ձեր տրտունջները, բարկացավ ու երդվեց՝ ասելով. ³⁵ “Այս մարդկանցից ոչ ոք չի տեսնելու այն բարեբեր երկիրը, որ երդվել էի տալ նրանց հայրերին, ³⁶ բացի Հեփոնեի որդի Քաղեբից։ Նա պիտի տեսնի այն, և ես նրան ու նրա որդիներին պիտի տամ այն երկիրը, ուր պիտի հասնեն, որովհետև նա հնազանդ եղավ Տիրոջը”։ ³⁷ Եվ Տերը, ձեր պատճառով բարկանալով ինձ վրա, ասաց. “Դու էլ չես մտնի այնտեղ, ³⁸ այլ քո սպասավորը՝ Նավեի որդի Հեսուն կմտնի այնտեղ։ Նրան զորացրո՛ւ, որովհետև նա է այդ երկիրը հանձնելու Իսրայելին։ ³⁹ Ձեր ծնունդներն ու որդիները, որոնց մասին ասացիք, թե պիտի հափշտակվեն, բոլոր մատաղ մանուկները, որոնք այսօր դեռևս չգիտեն չարն ու բարին, նրանք կմտնեն այնտեղ, և նրանց պիտի տամ այն, նրանք կժառանգեն այն։ ⁴⁰ Իսկ դուք շրջվեք և գնացե՛ք անապատ՝ Կարմիր ծով տանող ճանապարհով”։

⁴¹ Այն ժամանակ դուք պատասխան տվեցիք ինձ՝ ասելով. “Մեղանչեցինք Տիրոջ՝ մեր Աստծու առջև։ Արդ, ելնենք ու պատերազմ տանք, ինչպես պատվիրեց մեզ Տերը՝ մեր Աստվածը”։ Եվ յուրաքանչյուրդ, վերցնելով ձեր պատերազմելու զենքը, հավաքվեցիք ու սկսեցիք բարձրանալ լեռը։ ⁴² Եվ Տերն ինձ ասաց. “Նրանց ասա՛. պատերազմելու մի՛ ելեք, որովհետև ես ձեզ հետ չեմ, որպեսզի չլինի թե ձեր թշնամիների առջև կործանվեք”։ ⁴³ Ես խոսեցի ձեզ հետ, բայց դուք չլսեցիք ինձ և անտեսեցիք Տիրոջ խոսքերը, չսաստվեցիք և սկսեցիք բարձրանալ լեռը։ ⁴⁴ Այդ ժամանակ ամորհացիները, որոնք բնակվում էին այդ լեռան վրա, մեղուների պես ձեր դեմ ելնելով՝ հալածեցին ու խոցոտեցին ձեզ Սեիրից մինչև Հերմա։ ⁴⁵ Դուք նստած լաց եղաք Տիրոջ առջև, բայց Տերը չլսեց ձեր ձայնը և չանսաց ձեզ։ ⁴⁶ Եվ շատ օրեր սպասումով մնացիք Կադեսում»։

2

Անապատային տարիները

¹ «Վերադարձանք ու եկանք անապատ Կարմիր ծով տանող ճանապարհով, ինչպես Տերն էր ասել ինձ, և շատ օրեր պտտվեցինք Սեիր լեռան շուրջը։

² Տերն ինձ ասաց. ³ “Բավական է, որքան պտտվեցիք լեռան շուրջը։ Այժմ շրջվեք դեպի հյուսիս։ ⁴ Ժողովրդին պատվիրի՛ր՝ ասելով. “Դուք ահա անցնում եք Սեիրում բնակվող ձեր եղբայրների՝ Եսավի որդիների սահմաններով։ Նրանք ձեզանից պիտի վախենան, բայց դուք զգո՛ւյշ եղեք, ⁵ նրանց դեմ պատերազմ չհրահրեք, որովհետև նրանց երկրից մի քայլ իսկ չեմ տալու ձեզ, որովհետև Սեիր լեռը Եսավին եմ տվել իբրև սեփականություն։ ⁶ Նրանցից սնո՛ւնդ գնեք ու կերե՛ք, ջուրը նրանցից առե՛ք արծաթով ու խմե՛ք։ ⁷ Որովհետև Տերը՝ մեր Աստվածը, օրհնեց քեզ քո ձեռնարկած բոլոր գործերում։ Հիշի՛ր, թե ինչպե՛ս անցար մեծ ու ահարկու անապատը։ Ահա քառասուն տարի է, ինչ Տերը՝ քո Աստվածը, քեզ հետ է, և ոչ մի զրկանք չտեսար”։

⁸ Սեիրում բնակվող մեր եղբայրների՝ Եսավի որդիների մոտով Արաբա տանող ճանապարհով անցանք Եդովմից ու Գեսիովն Գաբերից, ապա շրջվեցինք ու ընթացանք դեպի Մովաբի անապատը։ ⁹ Տերն ինձ ասաց. “Թշնամություն մի՛ արեք մովաբացիների հետ, նրանց դեմ պատերազմ մի՛ հրահրեք, որովհետև նրանց երկրից ձեզ բաժին չեմ տալու, որովհետև Արը[26] Ղովտի որդիներին եմ տվել իբրև սեփականություն”։ ¹⁰ (Նրանցից առաջ այնտեղ բնակվում էին օմմինները՝ մի մեծ, բազմանդամ ու հզոր ազգ՝ նման Ենակի որդիներին։ ¹¹ Սրանք էլ ռափայինների նման հսկաներ էին, ինչպես նաև Ենակի որդիները, և մովաբացիները նրանց անվանում են օմմիններ:

¹² Իսկ Սեիրում նախկինում բնակվում էին քոռեցիները, որոնց Եսավի որդիները կոտորեցին և հալածեցին իրենց առջևից ու բնակվեցին նրանց փոխարեն, ինչպես Իսրայելը վարվեց իր ժառանգած երկրի հետ, որ Տերը տվեց նրան)։ ¹³ “Արդ, վե՛ր կացեք, գնացե՛ք ու անցե՛ք Զարեդ ձորը”։

¹⁴ Կադեսբառնեայից մինչև Զարեդ ձորն անցնելը տևեց երեսունութ տարի, մինչև որ բանակի բոլոր պատերազմող այրերն ընկան, ինչպես որ Աստված երդվել էր նրանց։ ¹⁵ Եվ Աստծու ձեռքն ընկավ նրանց վրա, որպեսզի նրանց կորստյան մատնի բանակից, մինչև որ մեռան։

¹⁶ Եվ երբ ժողովրդի միջից վերացան պատերազմող բոլոր տղամարդիկ, ¹⁷ Տերն ինձ ասաց. ¹⁸ “Դու այսօր Մովաբի սահմանով կանցնես դեպի Ար[27]։ ¹⁹ Եվ կմոտենաք Ամովնի որդիներին։ Նրանց հետ թշնամություն չանեք, նրանց դեմ պատերազմ չհրահրեք, որովհետև Ամովնի որդիների երկիրն իբրև սեփականություն ձեզ չեմ տա, որովհետև այն իբրև սեփականություն տվել եմ Ղովտի որդիներին։ ²⁰ (Այս երկիրը ռափայիններինն էր համարվում, որովհետև առաջ նրանք էին բնակվում այնտեղ։ Ամովնացիները նրանց անվանում էին զոմզոմիններ։ ²¹ Նրանք Ենակի որդիների նման մեծ, բազմամարդ ու հզոր ազգ էին։ Տերը սրանց վերացրեց մեջտեղից, և նրանց փոխարեն ամովնացիները բնակվեցին այդտեղ։ ²² Այդպես արեց նաև Եսավի որդիներին՝ Սեիրում բնակվողներին. նույն կերպ Տերը նրանց առաջ ոչնչացրեց քոռեցիներին, և Եսավի որդիները, ստանալով այդ երկիրը, նրանց փոխարեն բնակվում են այդտեղ մինչև այսօր։ ²³ Խևացիները, որոնք բնակվում էին Ասիրովթից մինչև Գազա, ոչնչացան գամիրների (կափթորիմացիների) կողմից, որոնք Կափթորից գալով՝ նրանց փոխարեն բնակվեցին այդ երկրում):

²⁴ Արդ անցեք Առնովնի ձորը։ Ահա քո ձեռքն եմ հանձնում Եսեբոնի արքա ամորհացի Սեհովնին, ե՛լ տիրելու նրա երկրին ու պատերա՛զմ հրահրիր նրա դեմ։ ²⁵ Այսօրվանից սկսի՛ր ահ ու սարսափ տարածել երկնքի տակ գտնվող բոլոր ազգերի վրա։ Ով որ լսի քո անունը, թող խռովվի, և քո սարսափը թող պատի նրանց”»։

Սեհովնի թագավորության նվաճումը

(Թվ. 21.21-30)

²⁶ «Կեդմովթի անապատից խաղաղության առաջարկով բանագնացներ ուղարկեցի Եսեբոնի արքա Սեհովնի մոտ և ասացի. ²⁷ “Թո՛ւյլ տուր անցնեմ քո երկրով։ Ճանապարհով կգնամ, աջ կամ ձախ չեմ թեքվի։ ²⁸ Մեր սնունդը քեզանից կգնենք արծաթով, մեր խմելու ջուրը նույնպես արծաթով կգնենք քեզանից, միայն թե ճանապա՛րհ տուր անցնենք։ ²⁹ Այնպես, ինչպես վարվեցին ինձ հետ Սեիրում բնակվող Եսավի որդիները և Արոյերում բնակվող մովաբացիները, մինչև որ անցնեմ Հորդանանը և հասնեմ այն երկիրը, որ Տերը՝ Աստված, տալու է մեզ”։ ³⁰ Սակայն Եսեբոնի արքա Սեհովնը չկամեցավ, որ մենք անցնենք նրա երկրով, որովհետև Տերը՝ մեր Աստվածը, խստացրել էր նրա հոգին ու կարծրացրել նրա սիրտը, որպեսզի նրան այդ օրը հանձնի քո ձեռքը։ ³¹ Եվ Տերն ինձ ասաց. “Ահա Եսեբոնի արքա ամորհացի Սեհովնին ու նրա երկիրը հանձնում եմ քեզ։ Գրավի՛ր ու ժառանգի՛ր նրա երկիրը”։

³² Եսեբոնի արքա Սեհովնը, ինքն ու իր ժողովուրդը Սիասարում պատերազմի ելան մեր դեմ։ ³³ Տերը՝ մեր Աստվածը, նրան մատնեց մեր ձեռքը, մենք հարվածեցինք նրան, նրա որդիներին ու նրա ամբողջ ժողովրդին։ ³⁴ Այդ ժամանակ նվաճեցինք նրա բոլոր քաղաքները, մեկ առ մեկ ոչնչացրինք նրա բոլոր քաղաքները, նրանց կանանց ու նրանց ժառանգներին՝ ոչ ոքի կենդանի չթողնելով։ ³⁵ Միայն հոտերը ավար վերցրինք և քաղաքների ավարը։ ³⁶ Առնովնի ձորի եզերքին գտնվող Արոյեր քաղաքից, և այն քաղաքից, որ գտնվում է այդ ձորում, մինչև Գաղաադի սահմանները քաղաք չմնաց, որ փրկվեր մեր ձեռքից. բոլորը Տերը՝ մեր Աստվածը, մատնեց մեր ձեռքը։ ³⁷ Սակայն Ամովնի որդիների երկրին չմոտեցանք, ինչպես նաև Հաբոկի ձորի բնակավայրերին ու լեռնային բոլոր քաղաքներին, ինչպես որ պատվիրել էր մեզ Տերը՝ մեր Աստվածը»։

3

Օվգի թագավորության նվաճումը

(Թվ. 21.31-35)

¹ «Այդտեղից ուղղվեցինք դեպի Բասան։ Բասանի արքա Օվգը, ինքն ու իր ողջ ժողովուրդը պատերազմի ելան մեր դեմ Եդրայինում։ ² Եվ Տերն ինձ ասաց. “Նրանից մի՛ վախեցիր, որովհետև նրան, նրա ամբողջ ժողովրդին ու նրա ամբողջ երկիրը մատնելու եմ քո ձեռքը։ Նրա հետ կվարվես այնպես, ինչպես վարվեցիր Եսեբոնում բնակվող ամորհացի Սեհովն արքայի հետ”։ ³ Եվ Տերը՝ մեր Աստվածը, Բասանի արքա Օվգին ու նրա ամբողջ ժողովրդին մատնեց մեր ձեռքը։ Եվ մենք բնաջնջեցինք նրանց սերունդը։ ⁴ Այդ ժամանակ մենք նվաճեցինք նրա բոլոր քաղաքները։ Քաղաք չմնաց, որ նրանցից գրաված չլինեինք, վաթսուն քաղաք Արգոբի շրջանում, որ պատկանում էր Բասանի Օվգ թագավորին։ ⁵ Բոլոր քաղաքներն ամրացրել էին բարձր պարիսպներով, դարպասներով ու դռնափակերով, չհաշված փերեզացիների չպարսպապատված բազմաթիվ քաղաքները։ ⁶ Նրանց կոտորեցինք այնպես, ինչպես Եսեբոնի արքա Սեհովնին։ Մեկ առ մեկ ոչնչացրինք բոլոր քաղաքները, ինչպես նաև նրանց կանանց ու մանուկներին։ Ոչ մեկը չազատվեց։ ⁷ Իսկ բոլոր անասուններն ու քաղաքների ունեցվածքը ավար վերցրինք։ ⁸ Այդ ժամանակ ամորհացիների երկու թագավորներից գրավեցինք Հորդանան գետի այն կողմում գտնվող երկիրը՝ Առնովնից մինչև Ահերմոն։ ⁹ (Փյունիկեցիները Ահերմոնն անվանում են Սանիովր, իսկ ամորհացիները՝ Սանիր)։ ¹⁰ Միսովրի բոլոր քաղաքները, ողջ Գաղաադը, ողջ Բասանը մինչև Եղքա ու Եդրային Բասանի Օվգի թագավորության քաղաքներն էին։ ¹¹ Ռափայիններից մնաց միայն Բասանի թագավոր Օվգը։ Նրա երկաթե մահճակալը [*  սարկոֆագը]՝ ինը կանգուն երկարությամբ, և չորս կանգուն լայնությամբ, ըստ սովորական կանգունաչափի, այժմ գտնվում է Ամովնի որդիների ամրոցում»:

Հորդանան գետի արևելքում ժառանգություն ստացած ցեղերը

(Թվ. 32.1-42)

¹² «Այն ժամանակ ժառանգեցինք այդ երկիրը՝ Առնովնի ձորի եզերքում գտնվող Արոյեր քաղաքից մինչև Գաղաադի կեսը, և նրա քաղաքները տվեցի Ռուբենի ու Գադի ցեղերին։ ¹³ Գաղաադի մնացած մասն ու ամբողջ Բասանը՝ Օվգի թագավորությունը, տվեցի Մանասեի ցեղի կեսին (Արգոբի ողջ շրջանը՝ Բասանը, ռափայինների երկիր էր համարվում)։ ¹⁴ Մանասեի որդի Հայիրը վերցրեց Արգոբի ողջ շրջանը մինչև Գարգասիի ու Օմաքատիի սահմանները։ Բասանը կոչեց իր անունով՝ Ավովթ Հայիր, և մինչև այսօր էլ այդպես է կոչվում։ ¹⁵ Իսկ Մաքիրին տվեցի Գաղաադի մի մասը։ ¹⁶ Ռուբենի ու Գադի ցեղերին տվեցի Գաղաադից մինչև Առնովնի ձորը (սահմանը անցնում է ձորի միջով) և մինչև Հաբոկ. ձորը Ամովնի որդիների սահմանն է։ ¹⁷ Արաբան և Հորդանան գետը նրա սահմանն է, Քեներեթից մինչև Արաբայի ծովը՝ Աղի ծովը, որից արևելք Փասգա լեռան ստորոտն է։

¹⁸ Այն ժամանակ ես ձեզ պատվիրեցի՝ ասելով. “Տերը՝ մեր Աստվածը, այս երկիրը ձեզ տվեց որպես ժառանգություն։ Ձեզանից բոլոր կռվողները թող սպառազինվեն ու անցնեն իրենց եղբայրների՝ Իսրայելի որդիների առաջ։ ¹⁹ Իսկ ձեր կանայք, երեխաները և անասունները, գիտեմ, որ շատ անասուն ունեք, թող բնակվեն ձեր այն քաղաքներում, որ ես տվեցի ձեզ, ²⁰ մինչև որ Տերը՝ մեր Աստվածը, տեղավորի ձեր եղբայրներին, ինչպես որ ձեզ արեց, որպեսզի նրանք էլ ժառանգեն այն երկիրը, որ Տերը՝ մեր Աստվածը, տալու է նրանց Հորդանան գետի այն կողմում։ Այն ժամանակ կվերադառնաք յուրաքանչյուրդ իր ժառանգությունը, որ տվեցի ձեզ”։

²¹ Այն ժամանակ ես Հեսուին պատվիրեցի՝ ասելով. “Ձեր աչքերը տեսան այն ամենը, ինչ Տերը՝ քո Աստվածը, արեց այդ երկու թագավորներին։ Տերը նույն կերպ կվարվի բոլոր այն թագավորությունների հետ, որոնց վրա դու կհարձակվես։ ²² Մի՛ վախեցեք, որովհետև Տերը՝ մեր Աստվածն ինքն է պատերազմելու ձեր փոխարեն”»։

Մովսեսին չի թույլատրվում մտնել Քանան

²³ «Այդ ժամանակ աղաչեցի Տիրոջը՝ Աստծուն, ասելով. ²⁴ “Տե՛ր, Տե՛ր, դու սկսեցիր քո ծառային ցույց տալ քո մեծությունն ու զորությունը, հզոր ձեռքն ու բարձր բազուկը։ Երկնքում կամ երկրի վրա գտնվող այդ ո՞ր աստվածն է, որ կարող է անել այն, ինչ դու արեցիր քո զորությամբ։ ²⁵ Արդ, թող անցնեմ, տեսնեմ բարեբեր երկիրը, որ գտնվում է Հորդանան գետից այն կողմ, սքանչելի լեռներն ու Անդրլիբանանը”։ ²⁶ Տերը ձեր պատճառով անտեսեց ու չլսեց ինձ։ Տերն ինձ ասաց. “Բավական է, այլևս ինձ հետ այդ մասին չխոսես։ ²⁷ Բարձրացի՛ր Կոփածո [*  Պիսգա] լեռան գագաթը, աչքերովդ նայի՛ր ծովի, հյուսիսի, հարավի ու արևելքի ուղղությամբ, աչքերովդ տե՛ս, որովհետև Հորդանան գետի այն կողմը չես անցնելու։ ²⁸ Քո պատվերները տո՛ւր Հեսուին, զորացրո՛ւ, քաջալերի՛ր նրան, որովհետև նա է անցնելու իմ այդ ժողովրդի գլուխը, և նա է ժառանգեցնելու նրանց այն երկիրը, որ տեսար”։ ²⁹ Այն ժամանակ մենք հաստատվեցինք հովտում, Փոգովրի տան մոտ»։

4

Մովսեսը հորդորում է Իսրայելին հնազանդվել

¹ «Եվ այժմ, Իսրայե՜լ, լսի՛ր այն օրենքներն ու կանոնները, որ ես այսօր ուսուցանում եմ քեզ, որպեսզի ապրեք և մտնելով ժառանգեք այն երկիրը, որ Տերը՝ մեր Աստվածը, տալիս է ձեզ։ ² Ոչինչ մի՛ ավելացրեք իմ ասածին ու ոչինչ մի՛ կրճատեք դրանից։ Պահպանե՛ք Տիրոջ՝ մեր Աստծու այն պատվիրանները, որ ես պատգամում եմ ձեզ։ ³ Ձեր աչքերը տեսան, թե ինչ արեց Տերը Բելփեգովրին, երբ Տերը՝ մեր Աստվածը, ձեր միջից վերացրեց նրանց, ովքեր պաշտեցին Բելփեգովրին, ⁴ իսկ դուք, որ հարեցիք Տիրոջը՝ ձեր Աստծուն, բոլորդ էլ կենդանի եք մնացել մինչ այսօր։ ⁵ Տեսե՛ք, ես ձեզ սովորեցրի օրենքն ու իրավունքը, ինչ որ Տերն էր ինձ պատվիրել, որպեսզի դրանք կիրառվեն այն երկրում, ուր մտնելու եք՝ այն ժառանգելու։ ⁶ Պահպանե՛ք ու կիրառե՛ք, որովհետև դրանց մեջ է ձեր իմաստնությունն ու խոհեմությունը բոլոր ազգերի առաջ, որոնք, լսելով այս բոլոր օրենքները, պիտի ասեն. “Ահավասիկ մի իմաստուն ժողովուրդ, մի հանճարեղ ու մեծ ազգ”։ ⁷ Որովհետև այդ ո՞ր մեծ ազգն է, որին Աստված այդքան մոտ է, ինչպես մեզ Տերը՝ մեր Աստվածը, ամեն ինչում, երբ դիմում ենք իրեն։ ⁸ Եվ այդ ո՞ր մեծ ազգն է, որն ունի այնպիսի արդար օրենքներ ու կանոններ՝ նման այս օրենքներին, որ ես այսօր տալիս եմ ձեզ»։

Հայտնություն Քորեբ լեռան վրա

⁹ «Նայի՛ր ինքդ քեզ և չափազանց զգո՛ւյշ եղիր. մի՛ մոռացիր այն բոլոր բաները, որ տեսան քո աչքերը. քո կյանքի բոլոր օրերում քո սրտից թող դուրս չգան դրանք։ Կպատմես քո որդիներին ու որդիների որդիներին, ¹⁰ թե ինչպես կանգնեցիք դուք Տիրոջ՝ ձեր Աստծու առջև Քորեբում, հավաքույթի օրը, երբ Տերն ինձ ասաց. “Ժողովրդին հավաքի՛ր ինձ մոտ, և թող լսեն իմ պատգամները, որ սովորեցնելու եմ նրանց, որպեսզի, այնքան ժամանակ, որքան ապրեն նրանք երկրի վրա, երկնչեն ինձանից ու դրանք սովորեցնեն իրենց որդիներին”։ ¹¹ Դուք մոտենալով կանգնեցիք լեռան ստորոտին։ Լեռը հրով բորբոքվում էր մինչև երկինք։ Խավար, մեգ ու մառախուղ էր։ ¹² Եվ Տերը կրակի միջից խոսեց ձեզ հետ։ Դուք պատգամների ձայնը լսեցիք, բայց կերպարանք չտեսաք, կար միայն ձայնը։ ¹³ Նա հայտնեց ձեզ իր ուխտը, պատվիրեց պահել տասը պատվիրանները, և դրանք գրեց քարե երկու տախտակների վրա։ ¹⁴ Այդ ժամանակ նա ինձ պատվիրեց, որ ձեզ ուսուցանեմ օրենքներն ու կանոնները, որ դուք դրանք կիրառեք այն երկրում, ուր մտնելու եք՝ այն ժառանգելու»։

Զգուշացում կռապաշտությունից

¹⁵ «Չափազանց զգո՛ւյշ եղեք ձեր անձերի համար. այն օրը, երբ Տերը Քորեբ լեռան վրա կրակի միջից խոսեց ձեզ հետ, կերպարանք չտեսաք։ ¹⁶ Հետևաբար որևէ կերպարանքով՝ արական կամ իգական, ձեզ համար կուռքեր չստեղծեք՝ օրենքից դուրս բան անելով, ¹⁷ ո՛չ էլ երկրի վրա գտնվող որևէ անասունի կերպարանքով կամ երկնքի տակ թռչող որևէ թռչունի կերպարանքով, ¹⁸ ո՛չ երկրի վրա սողացող որևէ սողունի կերպարանքով, ո՛չ երկրի ներքին մասում՝ ջրերում եղող որևէ ձկան կերպարանքով։ ¹⁹ Եվ կամ չլինի, որ դեպի երկինք նայելով, արեգակը, լուսինը, աստղերն ու երկնքի բոլոր զարդերը տեսնելով՝ մոլորվեք ու դրանց երկրպագեք ու դրանց պաշտեք։ Սրանք Տերը՝ Աստված, տվել է երկնքի տակ ապրող բոլոր ժողովուրդներին։ ²⁰ Իսկ ձեզ Աստված վերցրեց ու հանեց երկաթե հնոցից՝ Եգիպտոսից, որպեսզի լինեք իր սեփական ժողովուրդը, ինչ որ ե՛ք այսօր։

²¹ Տերը ձեր ասած խոսքերի համար բարկացավ ինձ վրա և երդվեց, որ ես չեմ անցնի Հորդանանը և չեմ մտնի այն երկիրը, որ Տերը՝ քո Աստվածը, տալիս է քեզ իբրև ժառանգություն։ ²² Արդ, ես ահա մեռնում եմ այս երկրում և չեմ անցնում Հորդանանը։ Սակայն դուք պիտի անցնեք ու ժառանգեք այդ բարեբեր երկիրը։ ²³ Ուշադի՛ր եղեք, չլինի թե մոռանաք Տիրոջ՝ մեր Աստծու՝ ձեզ տված ուխտը և ձեզ կուռքեր ստեղծեք այս կամ այն կերպարանքով, մի բան, որ արգելել է քեզ Տերը՝ քո Աստվածը, ²⁴ որովհետև Տերը՝ քո Աստվածը, լափող կրակ է, նախանձախնդիր Աստված։

²⁵ Եթե ծնես որդիներ և որդիների որդիներ ու այդ երկրում երկար ժամանակ ապրես և օրինազանց լինելով՝ որևէ արարածի կերպարանքով կուռք ստեղծես, և այդպիսի չար գործ կատարելով՝ բարկացնես Տիրոջը՝ ձեր Աստծուն, ²⁶ ապա այսօր վկա եմ կանչում երկինքն ու երկիրը, որ կվերանաք Հորդանան գետի այն կողմում գտնվող երկրից, ուր դուք գնում եք՝ այն ժառանգելու։ Երկար կյանք չեք ունենա այնտեղ, այլ անպայման կոչնչանաք։ ²⁷ Տերը ձեզ կցրի բոլոր ազգերի մեջ, սակավաթիվ կլինեք այն ազգերի մեջ, ուր Տերը կտանի ձեզ, ²⁸ այնտեղ պաշտելով մարդու ձեռքով փայտից ու քարից պատրաստված օտար աստվածներ, որոնք ո՛չ տեսնում են, ո՛չ լսում, ո՛չ ուտում են և ո՛չ էլ հոտոտում։ ²⁹ Այնտեղ ձեր նեղության ժամանակ կգտնեք Տիրոջը՝ ձեր Աստծուն, եթե փնտրեք նրան ձեր ամբողջ սրտով ու ձեր ամբողջ հոգով։ ³⁰ Այս բոլորը իրականություն կդառնա վերջին օրերին. դու կդիմես Տիրոջը՝ քո Աստծուն, և կլսես նրա ձայնը, ³¹ որովհետև Աստված ողորմած է. նա քեզ չի լքի ու քեզ չի կործանի, չի մոռանա քո հայրերի ուխտը, որ տվել է նրանց։

³² Հարցրե՛ք ձեզանից առաջվա ժամանակների մասին. այն օրվանից, երբ Աստված ստեղծեց մարդուն երկրի վրա, երկնքի մի ծայրից մյուս ծայրը, թե՝ “Երբևէ այսպիսի մեծ բան եղե՞լ է”, “Այսպիսի բան լսվե՞լ է”, ³³ “Որևէ ազգ կրակի միջից խոսող կենդանի Աստծու ձայնը լսե՞լ է”, ինչպես դու լսեցիր ու կենդանի մնացիր, ³⁴ “Հոժարե՞լ է Աստված մտնել ու ազգերից իր համար ազգ ընտրել փորձությամբ, նշաններով, հնարքներով, պատերազմով, հզոր ձեռքով ու բարձր բազկով, մեծամեծ տեսիլներով՝ այն բոլոր միջոցներով, որ Տերը՝ մեր Աստվածը, գործադրեց Եգիպտոսում քո իսկ առջև, որպեսզի տեսնես”։ ³⁵ Որպեսզի իմանաս, որ Տերն է Աստվածը, և նրանից բացի այլ աստված չկա։ ³⁶ Երկնքից լսելի եղավ քեզ խրատող նրա խոսքը, երկրի վրա ցույց տվեց քեզ իր մեծ կրակը, և կրակի միջից լսեցիր նրա պատգամները, ³⁷ որովհետև նա սիրում է քո հայրերին և նրանց հետնորդներին՝ ձեզ, նախընտրեց բոլոր ազգերից և իր մեծ զորությամբ հանեց քեզ Եգիպտոսից՝ ³⁸ քո առաջ ոչնչացնելու քեզանից մեծ և հզոր ազգերի, տանելու քեզ ու իբրև սեփականություն քեզ տալու նրանց երկիրը, ինչպես որ ունես այսօր։ ³⁹ Արդ, իմացի՛ր այսօր և մտածի՛ր, որ Տերը՝ քո Աստվածը, նա է Աստվածը վերևում՝ երկնքում, և ներքևում՝ երկրի վրա, և նրանից բացի այլ աստված չկա։ ⁴⁰ Պահպանի՛ր նրա օրենքներն ու պատվիրանները, որոնք ես պատգամում եմ քեզ այսօր, որպեսզի լավ լինի քեզ ու քեզանից հետո գալիք քո որդիների համար, որպեսզի երկար ժամանակ մնաս այն երկրում, որ Տերը՝ Աստված, ընդմիշտ տալիս է քեզ»։

Հորդանան գետի արևելքում գտնվող ապաստարանի քաղաքները

⁴¹ Այն ժամանակ Մովսեսը Հորդանան գետի արևելյան կողմում առանձնացրեց երեք քաղաքներ, ⁴² որպեսզի այնտեղ ապաստանելով՝ փրկվի այն մարդասպանը, որ թեև սպանել է իր մերձավորին, սակայն ակամայից, և որին չէր ատում նախապես։ ⁴³ Դրանք են՝ Ռուբենի ցեղի շրջանի դաշտային մասում՝ անապատում գտնվող Բոսոր քաղաքը, Գադի ցեղի շրջանի Ռամովթ քաղաքը՝ Գաղաադում, և Մանասեի ցեղի շրջանի Գաղոն քաղաքը՝ Բասանում։

⁴⁴ Սա է այն օրենքը, որ Մովսեսը դրեց Իսրայելի որդիների առաջ։ ⁴⁵ Սրանք են այն պատվիրանները, օրենքներն ու կանոնները, որ Մովսեսը հայտնեց Իսրայելի որդիներին, որոնք դուրս էին եկել եգիպտացիների երկրից, ⁴⁶ Հորդանան գետի այն կողմում՝ Փոգովրի տան մոտ գտնվող ձորում, Եսեբոնում ապրող ամորհացիների Սեհովն արքայի երկրում, որի բնակիչներին ոչնչացրել էին Մովսեսն ու Իսրայելի որդիները, եգիպտացիների երկրից դուրս գալուց հետո։ ⁴⁷ Նրանք ժառանգեցին նրանց երկիրը, ինչպես նաև Բասանի Օվգ թագավորի երկիրը, այսինքն՝ ամորհացի երկու թագավորների երկրները, որոնք գտնվում էին Հորդանան գետից այն կողմ՝ արևելյան մասում, ⁴⁸ Առնովնի ձորի եզերքին գտնվող Արոյերից սկսած մինչև Սեհովնի [*  Սիոն] լեռը, որը Ահերմոնն է, ⁴⁹ ամբողջ Արաբան, որ գտնվում է Հորդանան գետից այն կողմ՝ արևելյան մասում, մինչև Արաբայի ծովը՝ Կոփածո լեռան [*  Աշդոտ-Պիսգա] ստորոտը։

5

Տասը պատվիրանները

(Ելք 20.2-17)

¹ Մովսեսը կանչեց Իսրայելի բոլոր որդիներին և ասաց նրանց. «Լսի՛ր, Իսրայե՛լ, այն օրենքներն ու կանոնները, որ ես այսօր հաղորդելու եմ քեզ։ Սովորե՛ք և հետևե՛ք, որ կիրառեք դրանք։ ² Տերը՝ մեր Աստվածը, ուխտ դրեց ձեզ հետ Քորեբում։ ³ Տերն այդ ուխտը դրեց ոչ թե ձեր հայրերի, այլ ձեզ հետ, և դուք բոլորդ կենդանի եք այսօր։ ⁴ Տերը դեմ հանդիման խոսեց ձեզ հետ լեռան վրա, կրակի միջից։ ⁵ Ես այն ժամանակ կանգնած էի Տիրոջ ու ձեր միջև, որպեսզի ձեզ հայտնեմ Տիրոջ պատգամները, որովհետև դուք վախենում էիք կրակից ու լեռը չբարձրացաք։ Տերն ասաց.

⁶ “Ես՝ Տերը, քո Աստվածն եմ, որ քեզ հանեցի եգիպտացիների երկրից՝ ստրկության տնից։ ⁷ Իմ աչքի առջև օտար աստվածներ չունենաս, ⁸ քեզ համար կուռքեր չշինես ոչ մի արարածի կերպարանքով, որ կա վերևում՝ երկնքում, ներքևում՝ երկրի վրա, կամ երկրի ներքին մասում՝ ջրերի մեջ։ ⁹ Դրանց չերկրպագես ու դրանց չծառայես, որովհետև ես եմ Տերը՝ քո Աստվածը, մի նախանձախնդիր Աստված, որ հայրերի գործած մեղքերի համար հատուցում եմ պահանջում նրանց որդիներից, ինձ ատողների երրորդ ու չորրորդ սերունդներից։ ¹⁰ Իսկ ինձ սիրողների ու իմ հրամանները կատարողների հազար սերունդների նկատմամբ ողորմածություն եմ անում։

¹¹ Տիրոջ՝ քո Աստծու անունը անիմաստ տեղը մի՛ արտասանիր, որովհետև Տերը՝ քո Աստվածը, չի արդարացնի նրան, ով իր անունը անիմաստ տեղն է օգտագործում։

¹² Շաբաթ օրը սո՛ւրբ պահիր, ինչպես պատվիրել է քեզ Տերը՝ քո Աստվածը։ ¹³ Վեց օր աշխատի՛ր և արա՛ քո բոլոր գործերը, ¹⁴ իսկ յոթերորդ օրը շաբաթ է, նվիրված Տիրոջը՝ քո Աստծուն, այդ օրը ոչ մի գործ չպետք է անես, ո՛չ դու, ո՛չ քո տղան ու դուստրը, ոչ քո ծառան ու աղախինը, ո՛չ իսկ քո եզը, քո էշն ու քո մյուս անասունները, ինչպես նաև քո հարկի տակ գտնվող եկվորը, որովհետև քո ծառան ու աղախինը պետք է հանգստանան, ինչպես և դու։ ¹⁵ Հիշի՛ր, որ դու էլ ստրուկ էիր եգիպտացիների երկրում, և Տերը՝ քո Աստվածը, այնտեղից քեզ դուրս բերեց հզոր ձեռքով ու բարձր բազկով, որի համար Տերը՝ քո Աստվածը, քեզ պատվիրեց պահել շաբաթ օրն ու սրբագործել այն։

¹⁶ Պատվի՛ր քո հորն ու քո մորը, ինչպես պատվիրել է քեզ Տերը՝ քո Աստվածը, որպեսզի բարիքի արժանանաս, և երկար ապրես այն երկրի վրա, որ Տերը՝ քո Աստվածը, տալու է քեզ։

¹⁷ Մի՛ շնացիր։

¹⁸ Մի՛ սպանիր։

¹⁹ Մի՛ գողացիր։

²⁰ Քո մերձավորի մասին սուտ վկայություն մի՛ տուր։

²¹ Քո մերձավորի կնոջը մի՛ ցանկացիր. աչք մի՛ դիր ո՛չ քո մերձավորի տան, ո՛չ նրա հանդի, ո՛չ նրա ծառայի, ո՛չ նրա աղախնի, ո՛չ նրա եզան, ո՛չ նրա էշի, ո՛չ նրա որևէ անասունի, ո՛չ էլ որևէ այլ բանի վրա, ինչ քո մերձավորին է պատկանում”։

²² Տերը այս պատգամները ձեր ժողովրդին տվեց լեռան վրա, որը խավարով, մեգով ու մառախուղով էր պատված, կրակի միջից, բարձր ձայնով։ Ապա ոչինչ չավելացրեց։ Նա դրանք գրեց քարե երկու տախտակների վրա ու տվեց ինձ»։

Մովսեսը՝ Աստծու պատգամախոս

(Ելք 20.18-21)

²³ «Երբ դուք կրակի միջից ձայնը լսեցիք, և լեռը բորբոքված էր կրակով, ձեր ցեղերի իշխաններն ու ձեր ծերերը, ինձ մոտենալով, ²⁴ ասացին. “Տերը՝ Աստված, ահա մեզ ցույց տվեց իր փառքն ու իր մեծությունը, և նրա ձայնը լսեցինք կրակի միջից։ Այսօր տեսանք, որ Աստված խոսում է մարդու հետ, և մարդը կենդանի է մնում։ ²⁵ Բայց չմեռնենք, որովհետև այս մեծ կրակը կարող է մեզ սպանել. եթե մյուս անգամ դարձյալ լսենք Տիրոջ՝ մեր Աստծու ձայնը, ապա կմեռնենք։ ²⁶ Որովհետև միս ու արյունից կազմված այդ ո՞ր մարդն է, որ կրակի միջից լսել է կենդանի Աստծու ձայնը, ինչպես մենք լսեցինք, ու կենդանի է մնացել։ ²⁷ Դու մոտեցի՛ր ու լսի՛ր, ինչ որ Տերը՝ մեր Աստվածը, կասի, և մեզ հաղորդի՛ր այն ամենը, ինչ Տերը՝ մեր Աստվածը, կասի քեզ։ Մենք կլսենք ու կկատարենք”։ ²⁸ Տերը լսեց ինձ ասած ձեր խոսքերը։ Տերն ասաց ինձ. “Լսեցի ժողովրդի այն խոսքերը, որ ասացին քեզ։ Նրանք ամեն ինչ ճիշտ ասացին։ ²⁹ Ո՞վ կարող է նրանց սրտերը այնպես անել, որ երկնչեն ինձանից ու պահեն իմ պատվիրանները բոլոր օրերում, որպեսզի հավիտյան լավ լինի նրանց ու նրանց որդիների համար։ ³⁰ Արդ, գնա՛ և ասա՛ նրանց. “Վերադարձե՛ք ձեր տները”։ ³¹ Դու մնա՛ այստեղ՝ ինձ մոտ, և քեզ կհաղորդեմ այն պատվիրանները, օրենքներն ու կանոնները, որ պիտի սովորեցնես նրանց, և նրանք պիտի գործադրեն այն երկրում, որ ես նրանց տալու եմ իբրև ժառանգություն”։ ³² Հետևե՛ք, որ դրանք գործադրեք այնպես, ինչպես պատվիրել է քեզ Տերը՝ քո Աստվածը։ Չշեղվեք ո՛չ աջ, ո՛չ ձախ։ ³³ Գնացե՛ք այն ճանապարհով, որ պատվիրել է ձեզ Տերը՝ մեր Աստվածը, որպեսզի տեղավորի ձեզ ու բարիք գործի ձեզ համար, և դուք երկար ապրեք այն երկրում, որ ստանալու եք իբրև ժառանգություն»։

6

Մեծ պատվիրանը

¹ «Սրանք են այն պատվիրանները, օրենքներն ու կանոնները, որ Տերը՝ մեր Աստվածը, հրամայեց ուսուցանել ձեզ, որպեսզի դրանք գործադրեք այն երկրում, ուր պիտի մտնեք՝ ժառանգելու։ ² Պետք է երկնչեք Տիրոջից՝ մեր Աստծուց, պետք է պահեք նրա բոլոր օրենքներն ու կանոնները, որ ես պատգամում եմ ձեզ այսօր, որպեսզի երկար ապրեք, և՛ դու, և՛ քո որդիներն ու քո որդիների որդիները ձեր կյանքի բոլոր օրերին։ ³ Լսի՛ր, Իսրայե՛լ, և հետևի՛ր, որ կատարես դրանք, որպեսզի լավ լինի քեզ համար, ու դուք չափազանց բազմանաք, ինչպես քո հայրերի Աստված խոստացավ տալ քեզ այն երկիրը, որ կաթ ու մեղր է բխեցնում»։

⁴ Սրանք են այն օրենքներն ու կանոնները, որ Մովսեսն անապատում հաղորդեց Իսրայելի որդիներին եգիպտացիների երկրից ելնելուց հետո։

«Լսի՛ր, Իսրայե՛լ, Տերը և միայն Տերն է մեր Աստվածը։ ⁵ Սիրի՛ր Տիրոջը՝ քո Աստծուն, քո ամբողջ սրտով, քո ամբողջ հոգով ու քո ամբողջ ուժով։ ⁶ Այս պատգամները, որ այսօր հաղորդում եմ քեզ, կպահես քո սրտում և քո հոգու մեջ։ ⁷ Դրանք կհաղորդես քո որդիներին և դրանց մասին կխոսես տանը նստած, ճանապարհ գնալիս, ննջելիս ու արթնանալիս։ ⁸ Դրանք որպես նշան կկապես քո ձեռքին, որ մնան անշարժ քո աչքերի առջև, ⁹ դրանք կգրես քո տների մուտքին ու դռների վրա»։

Զգուշացում անհնազանդության դեմ

¹⁰ «Եվ երբ Տերը՝ քո Աստվածը, տանի քեզ այն երկիրը, որ երդվեց տալ քո հայրերին՝ Աբրահամին, Իսահակին ու Հակոբին, և քեզ տա մեծամեծ ու գեղեցիկ քաղաքներ, որոնք դու չես կառուցել, ¹¹ ամեն տեսակի բարիքներով լցված տներ, որոնք դու չես լցրել, փորված ջրհորներ, որոնք դու չես բացել, այգիներ ու ձիթաստաններ, որոնք դու չես տնկել, և ուտես ու հագենաս, ¹² զգո՛ւյշ եղիր, որ չմոռանաս Տիրոջը՝ քո Աստծուն, որ հանեց քեզ եգիպտացիների երկրից՝ ստրկության տնից։ ¹³ Երկնչի՛ր Տիրոջից՝ քո Աստծուց, միայն նրա՛ն պաշտիր, նրա՛ն հետևիր ու նրա՛ անունով երդվիր։ ¹⁴ Օտար աստվածների, ձեր շուրջը գտնվող ժողովուրդների աստվածների հետևից մի՛ գնա, ¹⁵ որովհետև Տերը՝ քո Աստվածը, որ ձեր մեջ է, նախանձախնդիր Աստված է։ Այնպես չլինի, որ Տերը՝ քո Աստվածը, սրտմտելով բարկանա ու քեզ վերացնի երկրի երեսից։

¹⁶ Մի՛ փորձիր Տիրոջը՝ քո Աստծուն, ինչպես փորձեցիք Փորձությունում [*  Մասսա]։ ¹⁷ Անսասա՛ն պահիր Տիրոջ՝ քո Աստծու՝ քեզ հաղորդած պատվիրանները, օրենքներն ու կանոնները։ ¹⁸ Կատարի՛ր այն, ինչ բարի ու հաճելի է Տիրոջ՝ քո Աստծու առջև, որպեսզի լավ լինի քեզ համար, և դու մտնես ու ժառանգես այն բարեբեր երկիրը, որ Տերը երդվեց տալ մեր հայրերին՝ ¹⁹ հալածելով բոլոր թշնամիներին քո առջևից, ինչպես ասել է։

²⁰ Եվ երբ վաղը քո որդին քեզ հարցնի ու ասի՝ “Այդ ի՞նչ պատվիրաններ, օրենքներ ու կանոններ են, որ Տերը՝ մեր Աստվածը, պատվիրել է մեզ”, ²¹ ապա քո որդուն կասես. “Եգիպտոսում փարավոնի ստրուկներն էինք մենք, և Տերը՝ Աստված, հզոր ձեռքով ու բարձր բազկով մեզ դուրս բերեց այնտեղից։ ²² Տերը եգիպտացիների երկրում փարավոնի ու նրա տան վրա մեր ներկայությամբ սոսկալի նշաններ և մեծագործություններ արեց։ ²³ Նա մեզ դուրս բերեց այնտեղից, որպեսզի բերի այստեղ, մեզ տա այն երկիրը, որ երդվել էր տալ մեր հայրերին։ ²⁴ Տերը մեզ պատվիրեց գործադրել բոլոր այս օրենքները, երկնչել Տիրոջից՝ մեր Աստծուց, որպեսզի լավ լինի մեզ համար մեր կյանքի բոլոր օրերում, և ապրենք, ինչպես որ ապրում ենք այսօր։ ²⁵ Մեզ ողորմածություն կլինի, եթե Տիրոջ՝ մեր Աստծու առջև զգուշությամբ կատարենք բոլոր այս պատվիրանները, ինչպես որ Տերը պատվիրեց մեզ”»։

7

Տիրոջ սեփական ժողովուրդը

(Ելք 34.11-16)

¹ «Երբ Տերը՝ քո Աստվածը, տանի քեզ այն երկիրը, ուր պիտի մտնես՝ այն ժառանգելու, և քո առջևից հալածի մեծ ու բազմաթիվ ազգերին՝ քետացիներին, գերգեսացիներին, ամորհացիներին, քանանացիներին, փերեզացիներին, խևացիներին ու հեբուսացիներին՝ քեզանից մեծ ու հզոր յոթ ազգերին, ² և Տերը՝ քո Աստվածը, նրանց մատնի քո ձեռքը, կհարվածես և կոչնչացնես նրանց։ Նրանց հետ ուխտ չդնես և նրանց չխնայես։ ³ Նրանց հետ խնամիություն չհաստատես. քո աղջկան նրա որդուն չտաս, նրա աղջկան քո որդու համար կին չառնես, ⁴ որպեսզի քո որդուն իմ դեմ չապստամբեցնեն, և նա օտար աստվածների չպաշտի, և Տերը սաստիկ չբարկանա ձեզ վրա ու անմիջապես կոտորի ձեզ։ ⁵ Այլ նրանց հետ վարվե՛ք այսպես. կործանե՛ք նրանց բագինները, փշրե՛ք նրանց արձանները, ջարդե՛ք նրանց պաշտամունքային փայտե սյուները, կրակի՛ մատնեք նրանց կուռքերը։ ⁶ Որովհետև դու սուրբ ժողովուրդ ես և պատկանում ես Տիրոջը՝ քո Աստծուն, և Տերը՝ քո Աստվածը, քեզ ընտրեց՝ երկրի վրա ապրող մնացած բոլոր ազգերից՝ լինելու իր սեփական ժողովուրդը։ ⁷ Տերը բարեհաճեց ու ընտրեց ձեզ ոչ թե նրա համար, որ դուք բոլոր ազգերից բազմամարդ եք. իրականում դուք բոլոր ազգերից սակավաթիվ եք, ⁸ այլ նրա համար, որ Տերը սիրում էր ձեզ և ուզում էր պահել այն երդումը, որ տվել էր ձեր հայրերին։ Տերը հզոր ձեռքով ու բարձր բազկով հանեց ձեզ ու փրկեց ստրկության տնից՝ եգիպտացիների փարավոնի ձեռքից։ ⁹ Պետք է իմանաս, որ Տերը՝ քո Աստվածը, միակ ճշմարիտ Աստվածն է, հավատարիմ Աստված, որ պահում է ուխտը և ողորմում է իրեն սիրող և իր պատվիրանները պահող մարդկանց մինչև հազար սերունդ, ¹⁰ իսկ իրեն ատողներին փոխհատուցում է՝ նրանց սպանելով, պատժում է առանց հապաղելու, անմիջապես փոխհատուցում է նրանց։

¹¹ Պետք է պահես քեզ տված իմ պատվիրանները, օրենքներն ու կանոնները»։

Հնազանդության օրհնությունները

(Բ Օր. 28.1-4)

¹² «Եթե ենթարկվես այս բոլոր օրենքներին, պահես ու գործադրես դրանք, ապա Տերը՝ քո Աստվածը, կպահի իր ուխտն ու կողորմի, ինչպես որ երդվել է մեր հայրերին։ ¹³ Եվ կսիրի քեզ, կօրհնի ու կբազմացնի քեզ։ Կօրհնի քո որովայնի ծնունդները, քո երկրի բերքը՝ ցորենը, գինին ու յուղը, քո արջառների նախիրները, քո ոչխարների հոտերն այն երկրում, որ Տերը երդվեց տալ քո հայրերին։ ¹⁴ Օրհնյալ կլինես դու բոլոր ազգերից ավելի։ Ձեր մեջ ամուլ և անծնունդ չի լինի, ոչ էլ ձեր անասունների մեջ։ ¹⁵ Տերը քեզանից կվերացնի բոլոր հիվանդությունները։ Եգիպտացիների բոլոր սոսկալի ցավերը, որոնք դու տեսար և իմացար, Տերը քեզ վրա չի բերի, այլ դրանք կտա քո թշնամիներին և բոլոր քեզ ատողներին։ ¹⁶ Դու կուտես ավարն այն բոլոր ազգերի, որոնց քո ձեռքն է մատնելու Տերը՝ քո Աստվածը։ Քո աչքը թող չխնայի նրանց, և չպաշտես նրանց կուռքերը, որովհետև դրանք քեզ համար որոգայթ են»։

Աստված՝ պաշտպան իր ժողովրդի

¹⁷ «Իսկ եթե քո մտքում ասես. “Այդ ազգը մեզանից բազմամարդ է, ես ինչպե՞ս կարող եմ կոտորել նրանց”, ¹⁸ ապա մի՛ վախեցիր նրանցից։ Լա՛վ հիշիր այն ամենը, ինչ արեց Տերը՝ քո Աստվածը, փարավոնի, նրա ծառաների ու բոլոր եգիպտացիների գլխին. ¹⁹ ինչպիսի մեծամեծ փորձանքներ, որ քո աչքերը տեսան, ինչպիսի նշաններ, մեծագործություններ, որ նա արեց հզոր ձեռքով և բարձր բազկով, ինչպես այնտեղից հանեց քեզ Տերը՝ քո Աստվածը, նույնպես կանի այն բոլոր ազգերի նկատմամբ, որոնցից վախենում ես դու։ ²⁰ Տերը՝ քո Աստվածը, նրանց վրա պիծակներ կուղարկի, մինչև որ կոտորվեն մնացածներն ու նրանք, որ թաքնվել են քեզանից։ ²¹ Մի՛ վախեցիր նրանցից, որովհետև Տերը՝ քո Աստվածը՝ մեծ ու հզոր, քո մեջ է։ ²² Եվ Տերը՝ քո Աստվածը, աստիճանաբար կվերացնի այդ ազգերին քո առջևից։ Դու չպետք է նրանց միանգամից կոտորես, որպեսզի երկիրն ամայի չդառնա, և անապատի գազանները չբազմանան քո շուրջը։ ²³ Տերը՝ քո Աստվածը, նրանց կհանձնի քո ձեռքը և նրանց կորստյան կմատնի մեծ պատուհասներով, մինչև որ վերացնի նրանց։ ²⁴ Նրանց թագավորներին կմատնի քո ձեռքը, և նրանց անունները կջնջեք այդ տեղից։ Ոչ ոք չի կանգնի քո դեմ, մինչև որ բնաջնջես նրանց։ ²⁵ Նրանց աստվածների կուռքերը կայրես հրով, դրանց վրա եղած արծաթի ու ոսկու վրա աչք չունենաս, չվերցնես դրանք, որպեսզի մեղք գործած չլինես, որովհետև այն Տիրոջ՝ քո Աստծու համար գարշելի է։ ²⁶ Այդպիսի պիղծ բան չտանես քո տունը, որպեսզի դու էլ դրա նման նզովված չլինես, այլ պետք է բոլորովին գարշես դրանից և պիղծ համարես այն, որովհետև այն նզովված է»։

8

Անապատի փորձությունը

¹ «Տեսե՛ք, որ կատարեք ձեզ հաղորդած իմ բոլոր պատվիրանները, որպեսզի ապրեք, բազմապատկվեք, մտնեք ու ժառանգեք այն երկիրը, որ Տերը երդվեց տալ մեր հայրերին։ ² Հիշի՛ր այն ամբողջ ճանապարհը, որով Տերը քեզ առաջնորդեց անապատի միջով, որպեսզի քեզ տանջելով փորձի ու իմանա, թե ի՛նչ կա քո սրտում, պահո՞ւմ ես նրա պատվիրանները, թե՞ ոչ։ ³ Նա չարչարեց քեզ, սոված պահեց, կերակրեց քեզ մանանայով, որին ծանոթ չէիր, և ծանոթ չէին նաև քո հայրերը, որպեսզի քեզ ցույց տա, թե մարդը միայն հացով չի ապրում, այլ այն ամեն խոսքով, որ ելնում է Աստծու բերանից։ ⁴ Քո զգեստները չմաշվեցին, քո ոտքերը այն քառասուն տարին կոշտուկներով չպատվեցին։

⁵ Հոգուդ մեջ պիտի համոզվես, որ ինչպես մարդ խրատում է իր որդուն, այնպես էլ Տերը՝ քո Աստվածը, խրատեց քեզ։ ⁶ Պահի՛ր Տիրոջ՝ քո Աստծու պատվիրանները, գնա՛ նրա ճանապարհներով և երկյո՛ւղ կրիր նրանից։ ⁷ Այն երկիրը, որ Տերը՝ քո Աստվածը, տանելու է քեզ, լավ ու բերրի մի երկիր է, որտեղ դաշտերում ու լեռներում բխում են ջրերի վտակներ ու երկրի խորքերից՝ աղբյուրներ։ ⁸ Դա ցորենի, գարու և գինու, այգիների ու նռնենիների երկիր է, ձիթենիների, յուղի ու մեղրի երկիր, ⁹ որտեղ առանց նեղություն զգալու քո հացը պիտի գտնես և նրանում ոչ մի բանի կարոտ չպիտի լինես։ Երկիր, որի քարերը երկաթ են, իսկ նրա լեռներից կարող ես պղինձ հատել։ ¹⁰ Կուտես, կհագենաս ու կօրհնես Տիրոջը՝ քո Աստծուն, այն բարեբեր երկրում, որ նա տվեց քեզ։

¹¹ Զգո՛ւյշ եղիր, չլինի թե մոռանաս Տիրոջը՝ քո Աստծուն, չպահես նրա պատվիրանները, նրա կանոններն ու օրենքները, որ ես հաղորդում եմ քեզ։ ¹² Չլինի թե երբ ուտես ու կշտանաս, գեղեցիկ տներ կառուցես ու դրանց մեջ բնակվես, ¹³ և քո արջառն ու ոչխարը բազմանան, քո արծաթն ու ոսկին շատանան, քո ունեցած ամեն ինչը բազմանա, ¹⁴ գոռոզամտանաս ու մոռանաս Տիրոջը՝ քո Աստծուն, որը հանեց քեզ եգիպտացիների երկրից՝ քո ստրկության տնից, ¹⁵ անցկացրեց քեզ մեծ ու ահազդու անապատի միջով, որտեղ օձն ու կարիճը խայթում էին, ծարավում էինք և ջուր չկար, և նա քեզ համար ապառաժ քարից ջրի աղբյուր բխեցրեց։ ¹⁶ Նա անապատում կերակրեց քեզ մանանայով, որը անծանոթ էր քո հայրերին, որպեսզի քեզ չարչարի ու փորձի, և վերջում բարություն անի քեզ։ ¹⁷ Քո մտքում մի՛ ասա. “Իմ ուժով ու ձեռքի զորությամբ եմ տիրացել այս մեծ հարստությանը”, ¹⁸ այլ հիշի՛ր Տիրոջը՝ քո Աստծուն, որովհետև նա է քեզ ուժ տալիս այդ հարստությանը հասնելու համար, որպեսզի հաստատի իր այն ուխտը, որ երդվել է քո հայրերին, ինչպես այսօր։

¹⁹ Եվ եթե պատահի, որ մոռանաս Տիրոջը՝ քո Աստծուն, և գնաս օտար աստվածների հետևից, պաշտես ու երկրպագես դրանց, այսօր երդվում եմ երկնքով ու երկրով, որ դուք անհետ կկորչեք։ ²⁰ Եթե չանսաք Տիրոջ՝ ձեր Աստծու ձայնին, կկորչեք այնպես, ինչպես կորան մյուս ազգերը, որոնց վերացրեց Տերը ձեր առջևից»։

9

Իսրայելի անհնազանդությունը

¹ «Լսի՛ր, Իսրայե՜լ։ Այսօր դու անցնում ես Հորդանան գետից այն կողմ՝ մտնելու ու ժառանգելու քեզանից մեծ ու հզոր ժողովուրդներ, մեծամեծ ու մինչև երկինք հասնող պարիսպներով քաղաքներ, ² մեծ, բազմամարդ ու հաղթանդամ մի ժողովուրդ՝ Ենակի որդիներին, որոնց դու ճանաչում ես և լսել ես, թե՝ “Ո՞վ կարող է դեմ կանգնել Ենակի որդիներին”։ ³ Դու այսօր կիմանաս, որ Տերը՝ քո Աստվածը, նա ինքը, որ լափող կրակ է, գնալու է քո առջևից։ Նա կոտորելու է, ոչնչացնելու է նրանց քո առջև, կոտորելու է նրանց ու ոչնչացնելու անմիջապես, ինչպես որ ասաց քեզ Տերը։ ⁴ Քո առջև Տիրոջ՝ քո Աստծու կողմից նրանց ոչնչանալը տեսնելով՝ քո սրտում չասես. “Իմ արդար լինելու համար է Տերն ինձ բերել այստեղ՝ ժառանգելու այս լավ երկիրը”։ Ոչ թե քո արդար լինելու, այլ այդ ազգերի ամբարիշտ լինելու համար է Տերը՝ քո Աստվածը, ոչնչացնում նրանց քո առջևից։ ⁵ Ոչ թե քո արդար լինելու և քո սրտի մաքրության համար ես մտնում նրանց երկիրը՝ ժառանգելու այն, այլ այդ ազգերի անօրենության համար է Տերը՝ քո Աստվածը, ոչնչացնում նրանց քո առջևից, որպեսզի հաստատի այն ուխտը, որ երդվել է Տերը մեր հայրերին՝ Աբրահամին, Իսահակին ու Հակոբին։ ⁶ Դու պիտի իմանաս այսօր, որ քո արդար լինելու համար չէ, որ Տերը՝ քո Աստվածը, իբրև ժառանգություն տալիս է քեզ այս բարեբեր երկիրը, քանի որ դու խստապարանոց ժողովուրդ ես»։

Ոսկե հորթը. ժողովրդի սխալը

(Ելք 32.1-35)

⁷ «Հիշի՛ր, մի՛ մոռացի՛ր, թե որքան ես անապատում բարկացրել Տիրոջը՝ քո Աստծուն։ Այն օրից սկսած, ինչ դուրս եկաք եգիպտացիների երկրից ու եկաք մինչև այս վայրը, շարունակ ըմբոստանում էիք Տիրոջ դեմ։ ⁸ Քորեբում բարկացրիք Տիրոջը, և Տերը զայրացավ ձեզ կոտորելու աստիճան, ⁹ երբ ես բարձրացել էի լեռը, որպեսզի ստանամ քարե տախտակները, ուխտի այն տախտակները, որ Տերը տվեց ձեզ։ Ես քառասուն օր, քառասուն գիշեր մնացի լեռան վրա, հաց չկերա, ջուր չխմեցի, ¹⁰ և Տերն ինձ տվեց քարե երկու տախտակներ՝ իր իսկ ձեռքով գրած, և դրանց վրա գրված էին բոլոր այն պատգամները, որ Տերը լեռան վրա հաղորդել էր ձեր հավաքի օրը։ ¹¹ Քառասուն օր, քառասուն գիշեր հետո Տերն ինձ տվեց քարե երկու տախտակները՝ ուխտի տախտակները։ ¹² Եվ Տերն ինձ ասաց. “Վե՛ր կաց, շուտ իջի՛ր այստեղից, որովհետև անօրեն արարք կատարեց քո ժողովուրդը, որին հանեցիր եգիպտացիների երկրից, և որոնք այդքան շուտ շեղվեցին այն ուղուց, որ պատվիրել էի նրանց, և իրենց համար ձուլածո կուռքեր պատրաստեցին”։ ¹³ Տերն ինձ ասաց. “Մեկ երկու անգամ ասել եմ քեզ ու կրկին ասում եմ. Տեսա այդ ժողովրդին. այդ ժողովուրդը խստապարանոց է։ ¹⁴ Թո՛ւյլ տուր ինձ, որ կոտորեմ նրանց, նրանց անունը ջնջեմ երկնքի տակից և քեզ ավելի մեծ, հզոր ու բազմամարդ ազգ դարձնեմ, քան նրանք են”։ ¹⁵ Եվ վերադառնալով իջա լեռից՝ երկու տախտակներն իմ երկու ձեռքին, մինչ լեռը բորբոքված էր կրակով։ ¹⁶ Տեսնելով, որ մեղանչել եք Տիրոջ՝ մեր Աստծու առջև, ձեզ համար ձուլածո կուռքեր եք պատրաստել, շեղվել եք այն ուղուց, որ Տերն էր պատվիրել, ¹⁷ իմ ձեռքի երկու տախտակները ձեր աչքի առջև ջարդուփշուր արեցի։

¹⁸ Տիրոջ առջև կրկին աղաչեցի, ինչպես առաջին անգամ, քառասուն օր, քառասուն գիշեր հաց չկերա, ջուր չխմեցի ձեր գործած բոլոր մեղքերի քավության համար, որովհետև Տիրոջ՝ մեր Աստծու առջև չար գործեր էիք կատարել ու բարկացրել նրան։ ¹⁹ Ես վախենում էի նրա բարկությունից ու զայրույթից, որովհետև Տերը բարկացել էր ձեզ վրա ձեզ կոտորելու աստիճան։ Տերն այս անգամ էլ լսեց ինձ։ ²⁰ Նա խիստ բարկացել էր նաև Ահարոնի վրա, ուզում էր սպանել նրան։ Ես աղոթեցի Ահարոնի համար էլ, ²¹ ձեր գործած մեղքը՝ հորթը, վերցրի ու այրեցի կրակով, փշուր-փշուր արեցի ու մանրեցի այն աստիճան, որ մանր փոշու վերածվեց։ Այդ փոշին ես լցրի լեռից իջնող վտակի մեջ։

²² Տիրոջը՝ ձեր Աստծուն, բարկացրիք նաև Հրայրյացում [*  Տավերա], Փորձությունում [*  Մասսա] ու Ցանկության գերեզմաններում [*  Կիվռոտ-Հատտաավա]։ ²³ Եվ երբ Տերը ձեզ ուղարկեց Կադեսբառնեայից, ասաց. “Ելե՛ք ու ժառանգե՛ք այն երկիրը, որ տալու եմ ձեզ”, դուք անտեսեցիք Տիրոջ՝ ձեր Աստծու խոսքը, չհավատացիք նրան, և չանսացիք Տիրոջ ձայնին։ ²⁴ Դուք Տիրոջ հրամանին անհնազանդ էիք այն օրվանից ի վեր, ինչ այն ծանուցվեց ձեզ։ ²⁵ Ես Տիրոջ առջև աղաչեցի քառասուն օր, քառասուն գիշեր։ Ես աղաչեցի, որովհետև Տերն ասում էր, որ կկոտորի ձեզ։ ²⁶ Տիրոջ առջև աղոթք անելով՝ ասացի. “Տե՛ր, Տե՛ր, աստվածների՛ թագավոր, մի՛ կոտորիր քո ժողովրդին ու քո բաժինը, որին փրկեցիր քո մեծ զորությամբ, որին դուրս բերեցիր Եգիպտոսից քո մեծ զորությամբ և կարող ձեռքով ու բարձր բազկով։ ²⁷ Հիշի՛ր քո ծառաներին՝ Աբրահամին, Իսահակին ու Հակոբին, որոնց երդվեցիր քո անունով։ Մի՛ նայիր այդ ժողովրդի խստությանը, ամբարշտությանն ու մեղքերին։ ²⁸ Չլինի այնպես, որ այն երկրի բնակիչները, որտեղից դուրս բերեցիր մեզ, ասեն. “Քանի որ Տերը չկարողացավ նրանց տանել այն երկիրը, որ խոստացել էր նրանց, և քանի որ Տերն ատում էր նրանց, դուրս բերեց նրանց, որպեսզի կոտորի անապատում”։ ²⁹ Սրանք քո ժողովուրդն են ու քո ժառանգությունը, որոնց քո մեծ զորությամբ ու բարձր բազկով դուրս բերեցիր եգիպտացիների երկրից”»։

10

Աստծու ներումը

(Ելք 34.1-9)

¹ «Այն ժամանակ Տերն ինձ ասաց. “Երկու քարե տախտա՛կ կոփիր նախկինների նման ու բարձրացի՛ր լեռը։ Նաև փայտից տապանա՛կ պատրաստիր, ² և ես այդ տախտակների վրա կգրեմ այն նույն պատգամները, որ կային առաջին տախտակների վրա, որոնք դու ջարդեցիր։ Սրանք կդնես տապանակի մեջ”։ ³ Ես չփտող փայտից տապանակ պատրաստեցի։ Ապա առաջինների պես երկու քարե տախտակներ կոփեցի և բարձրացա լեռը։ Երկու տախտակներն իմ ձեռքին էին։ ⁴ Եվ Տերը նախկինում գրածի նման երկու տախտակների վրա գրեց այն տասը պատվիրանները, որ ձեզ հաղորդել էր լեռան վրա, կրակի միջից, և Տերը դրանք տվեց ինձ։ ⁵ Ես դառնալով իջա լեռից ու տախտակները դրեցի տապանակի մեջ, և դրանք այնտեղ են մնում, ինչպես պատվիրել էր ինձ Տերը։

⁶ Իսրայելի որդիները Հակիմի որդիների Բերովթից գնացին դեպի Մադաի։ Այնտեղ Ահարոնը մահացավ ու այնտեղ թաղվեց։ Նրա փոխարեն քահանայացավ նրա որդի Եղիազարը։ ⁷ Այնտեղից գնացին դեպի Գադգադ, Գադգադից՝ դեպի Ետակա՝ ջրերի վտակների երկիրը։

⁸ Այդ ժամանակ Տերը Ղևիի ցեղին առանձնացրեց, որ նրանք տանեն Տիրոջ Ուխտի տապանակը, կանգնեն Տիրոջ առջև՝ ծառայելու նրան ու օրհնելու նրա անունը, ինչպես որ լինում է մինչև այսօր։ ⁹ Այդ իսկ պատճառով ղևտացիներն իրենց եղբայրների նման բաժին ու ժառանգություն չունեն, քանի որ Տերն ինքն է նրանց բաժինն ու ժառանգությունը, ինչպես որ ասաց նրանց։

¹⁰ Եվ ես քառասուն օր ու քառասուն գիշեր մնացի լեռան վրա, և այս անգամ էլ Տերը լսեց ինձ ու չկոտորեց ձեզ։ ¹¹ Տերն ինձ ասաց. “Գնա՛, քայլի՛ր այդ ժողովրդի առջևից, որպեսզի նրանք մտնեն ու ժառանգեն այն երկիրը, որ նրանց հայրերին երդումով խոստացա տալ նրանց”»։

Սիրո և հնազանդության օրենքը

¹² «Արդ, Իսրայե՛լ, ի՞նչ է պահանջում քեզանից Տերը՝ քո Աստվածը. միայն այն, որ երկնչես Տիրոջից՝ քո Աստծուց և ընթանաս նրա բոլոր ճանապարհներով, սիրես նրան ու պաշտես Տիրոջը՝ քո Աստծուն, քո ամբողջ սրտով և քո ամբողջ հոգով ¹³ պահես Տիրոջ՝ քո Աստծու պատվիրաններն ու նրա օրենքները, որ ես այսօր պատգամում եմ քեզ, որպեսզի քեզ համար լավ լինի։ ¹⁴ Ահա Տիրոջը՝ քո Աստծունն են երկինքն ու երկինքների երկինքը, ինչպես նաև երկիրն ու նրանց մեջ գտնվող ամեն ինչ։ ¹⁵ Սակայն Տերը բարեհաճ գտնվեց ու սիրեց ձեր հայրերին և նրանցից հետո բոլոր ազգերից ընտրեց ձեզ՝ նրանց հետնորդներին, ինչպես որ տեսնում եք մինչև այսօր։ ¹⁶ Վերացրե՛ք ձեր խստասրտությունը և այլևս կամակոր մի՛ եղեք, ¹⁷ որովհետև Տերը՝ մեր Աստվածը, աստվածների Աստվածն է, տերերի Տերը, մեծ, հզոր ու ահավոր Աստված, որ ոչ մեկին աչառություն չի անում ու կաշառք չի առնում։ ¹⁸ Նա պաշտպանում է եկվորի, որբի ու այրու իրավունքները, սիրում է պանդուխտին, նրան հաց ու հագուստ է տալիս։ ¹⁹ Դուք էլ սիրե՛ք պանդխտին, որովհետև դուք էլ պանդուխտ էիք եգիպտացիների երկրում։ ²⁰ Տիրոջից՝ քո Աստծուց, երկնչի՛ր, պաշտի՛ր նրան, հարի՛ր նրան և երդվի՛ր նրա անունով, ²¹ որովհետև նա է քո պարծանքը, նա է այն Աստվածը, որ քեզ համար մեծ ու փառավոր գործեր արեց, որոնք տեսան քո աչքերը։ ²² Քո նախնիները յոթանասուն հոգով իջան Եգիպտոս, իսկ հիմա Տերը՝ քո Աստվածը, քեզ երկնքի աստղերի չափ բազմամարդ դարձրեց»։

11

Աստծու մեծությունը

¹ «Սիրի՛ր Տիրոջը՝ քո Աստծուն, և պահի՛ր նրա պատգամները և նրա օրենքները, նրա պատվիրաններն ու նրա կանոնները քո կյանքի բոլոր օրերին։ ² Այսօր իմ խոսքը չեմ ուղղում ձեր որդիներին, որոնք ո՛չ գիտեն, ո՛չ էլ տեսել են Տիրոջ՝ քո Աստծու դաստիարակությունը՝ նրա մեծագործությունները, հզոր ձեռքը և բարձր բազուկը, ³ նրա նշաններն ու զարմանահրաշ գործերը, որ նա արեց Եգիպտոսում եգիպտացիների փարավոնի և նրա ամբողջ երկրի հանդեպ։ ⁴ Նաև այն, թե Տերն ի՛նչ բերեց եգիպտացիների զորքերի, նրանց կառքերի ու երիվարների գլխին, թե նրանց ինչպե՛ս ջրասույզ արեց Կարմիր ծովի մեջ, երբ սրանք հարձակվում էին մեր թիկունքից, և անհետացրեց նրանց հավիտյան։ ⁵ Նաև այն, թե ի՛նչ արեց ձեզ համար անապատում, մինչև որ եկաք այս վայրը։ ⁶ Եվ թե ի՛նչ բերեց Դաթանի ու Աբիրոնի գլխին, որոնք Ռուբենի ցեղից Եղիաբի որդիներն էին, թե ինչպես երկիրը, իր երախը բանալով, ամբողջ Իսրայելի միջից կուլ տվեց նրանց, նրանց ընտանիքներն ու վրանները, նրանց ողջ ունեցվածքը։ ⁷ Ձեր աչքերը տեսան Տիրոջ բոլոր մեծամեծ գործերը, որ նա արեց ձեր մեջ մինչև այսօր»։

Խոստացված երկրի օրհնությունները

⁸ «Ուրեմն պահե՛ք նրա բոլոր պատվիրանները, որ ես այսօր պատգամում եմ ձեզ, որպեսզի ապրեք, բազմանաք, մտնեք ու ժառանգեք այն երկիրը, դեպի ուր անցնում եք Հորդանան գետով՝ ժառանգելու այն, ⁹ որպեսզի երկար ապրեք այն երկրում, որ Տերը երդվեց ձեր հայրերին՝ տալու նրանց, և նրանցից հետո՝ նրանց զավակներին, մի երկիր, որ կաթ ու մեղր է բխեցնում։

¹⁰ Այն երկիրը, ուր դուք մտնելու եք՝ ժառանգելու, նման չէ եգիպտացիների երկրին, որտեղից դուք դուրս եկաք, որտեղ երբ սերմը ցանում էիք, պետք է ջրեիք ու տքնաջան աշխատեիք ձեր ոտքերով, ինչպես բանջարանոցը։ ¹¹ Իսկ այն երկիրը, ուր դուք պիտի մտնեք ժառանգելու համար, լեռնային ու դաշտային երկիր է և երկնքի անձրևի ջուրն է խմում։ ¹² Դա մի երկիր է, որը Տերը՝ քո Աստվածը, խնամում է, տարվա սկզբից մինչև տարվա վերջը շարունակ Տիրոջ՝ քո Աստծու աչքը նրա վրա է։

¹³ Եթե ընդունես նրա բոլոր պատվիրանները, որոնք ես այսօր հաղորդում եմ քեզ, այն է՝ սիրես Տիրոջը՝ քո Աստծուն, պաշտես նրան քո ամբողջ սրտով ու քո ամբողջ հոգով, ¹⁴ ապա նա իր ժամանակին ձեր երկրին կտա գարնանային ու աշնանային անձրևները, որպեսզի կարողանաս ամբարել քո ցորենը, քո գինին ու քո յուղը։ ¹⁵ Նա քո դաշտերին խոտ կտա քո անասունների համար։ Կուտես և կհագենաս։ ¹⁶ Զգո՛ւյշ եղեք, չլինի թե ամբարտավանանան ձեր սրտերը, և մեղք գործեք՝ օտար աստվածների պաշտելով ու երկրպագելով նրանց։ ¹⁷ Այն ժամանակ Տերը խիստ կզայրանա ձեզ վրա, արգելք կդնի երկնքի վրա, անձրև չի լինի, հողն իր բերքը չի տա, և դուք շատ արագ կկորչեք այս բարեբեր երկրից, որ Տերը տվել է ձեզ։

¹⁸ Այս խոսքերը դրե՛ք ձեր սրտում ու ձեր հոգում, որպես նշան դրանք կապե՛ք ձեր ձեռքերին, որ մշտապես մնան ձեր աչքերի առջև։ ¹⁹ Դուք դրանք սովորեցրե՛ք ձեր որդիներին և դրանց մասին խոսե՛ք տանը նստելիս ու ճանապարհ գնալիս, ննջելիս ու արթնանալիս։ ²⁰ Դրանք գրե՛ք ձեր տների դրանդիներին ու ձեր դռներին, ²¹ որպեսզի ձեր կյանքը երկար լինի, ինչպես նաև ձեր որդիների կյանքը այն երկրի վրա, որ Տերը երդվել է ձեր հայրերին՝ տալու ձեզ, այնքան ժամանակ, որքան որ երկինքը կլինի երկրի վրա։

²² Եթե ընդունեք այս բոլոր պատվիրանները, որոնք ես այսօր հաղորդում եմ ձեզ անել, և սիրեք Տիրոջը՝ ձեր Աստծուն, գնաք նրա ճանապարհով ու հարեք նրան, ²³ ապա Տերը ձեր առջևից կհեռացնի այդ բոլոր ազգերին, և դուք կնվաճեք ձեզանից մեծ ու հզոր ազգերի։ ²⁴ Բոլոր այն վայրերը, ուր կկոխեն ձեր ոտքերը, ձերը կլինեն. անապատից մինչև Անդրլիբանան, Մեծ գետից՝ Եփրատ գետից մինչև Արևմտյան ծովը կլինեն ձեր սահմանները։ ²⁵ Ոչ ոք ձեզ չի դիմադրի, Տերը՝ ձեր Աստվածը, ձեր ահն ու սարսափը կսփռի ամբողջ երկրի վրա, ուր դուք ոտք կդնեք, ինչպես ասել է ձեզ Տերը»։

Օրհնություններ ու անեծքներ

²⁶ «Ես այսօր, ահա, ձեր առջև եմ դնում օրհնություններ ու անեծքներ։ ²⁷ Օրհնություն, եթե լսեք պատվիրանները, որոնք ես այսօր պատգամում եմ ձեզ, ²⁸ և անեծքներ՝ եթե չլսեք Տիրոջ՝ ձեր Աստծու պատվիրանները, որոնք ես այսօր հաղորդում եմ ձեզ, շեղվեք այն ճանապարհից, որ ես պատվիրեցի ձեզ՝ գնալով ու պաշտելով օտար աստվածների, որոնց չեք ճանաչում։ ²⁹ Երբ Տերը՝ քո Աստվածը, տանի քեզ այն երկիրը, դեպի ուր անցնում ես Հորդանան գետով, որպեսզի ժառանգես այն, ապա օրհնությունները կանչիր Գարիզին լեռան վրա և անեծքները՝ Գեբաղ լեռան վրա։ ³⁰ (Դրանք Հորդանան գետի այն կողմում են՝ դեպի արևմուտք տանող ճանապարհի հետևում, քանանացիների երկրում, որոնք բնակվում են արևմուտքում, Գաղգաղայի մոտ, Բարձր կաղնու [*  Էլոնե Մորեք] մերձակայքում)։ ³¹ Դուք պիտի անցնեք Հորդանան գետը՝ մտնելու և ժառանգելու այն երկիրը, որ Տերը՝ Աստված, տալու է ձեզ որպես ժառանգություն հավիտյան։ Ժառանգե՛ք այն և բնակվե՛ք նրա մեջ:

³² Զգո՛ւյշ եղեք, որ կատարեք նրա բոլոր հրամանները և այս կանոնները, որ ես այսօր տալիս եմ ձեզ»։

12

Պաշտամունքի միակ տեղը

¹ «Սրանք են այն հրամաններն ու կանոնները, որ դուք պետք է ուշադիր լինեք՝ կատարելու ձեր կյանքի բոլոր օրերին այն երկրում, որը Տերը՝ ձեր հայրերի Աստվածը, տալու է ձեզ որպես ժառանգություն։ ² Ոչնչացրե՛ք բարձր լեռների, բլուրների վրա ու սաղարթախիտ ծառերի տակ գտնվող բոլոր վայրերը, որտեղ մյուս ազգերը պաշտել են իրենց կուռքերին, և որոնց դուք պիտի տիրանաք։ ³ Կործանե՛ք նրանց բագինները, փշրե՛ք նրանց արձանները, ջարդե՛ք նրանց պաշտամունքային փայտե սյուները և այրե՛ք նրանց քանդակված կուռքերը, նրանց անունները վերացրե՛ք այդ վայրերից։

⁴ Բայց այդպես չվարվեք Տիրոջ՝ ձեր Աստծու նկատմամբ։

⁵ Փնտրե՛ք այն տեղը, որ Տերը՝ ձեր Աստվածը, կընտրի ձեր ցեղերից մեկի տարածքում, և այդ կլինի նրա բնակության և նրա անվան պաշտամունքի վայրը. այնտե՛ղ մտեք։ ⁶ Այնտե՛ղ կմատուցեք ձեր ողջակեզները, ձեր զոհերը, ձեր տասանորդը, ձեր առաջին բերքը, ձեր ուխտի, ձեր կամավոր և ձեր խոստովանության նվերները, նաև ձեր արջառի ու ոչխարի առաջնածինները։ ⁷ Եվ այնտեղ Տիրոջ՝ ձեր Աստծու առջև կուտեք ձեր ընտանիքներով և կուրախանաք այն ամենի համար, ինչի որ հասել եք, և ինչի համար որ օրհնել է քեզ Տերը՝ քո Աստվածը։

⁸ Մի՛ արեք այն ամենը, ինչ որ այսօր մենք անում ենք այստեղ. յուրաքանչյուրն ինչ ուզում, այն էլ անում է. ⁹ Այդ պատճառով էլ մինչև այսօր չհասաք հանգստի ու ժառանգության այն երկիրը, որ Տերը՝ մեր Աստվածը, տալու է մեզ։ ¹⁰ Դեռ պետք է անցնեք Հորդանան գետը, որպեսզի բնակվեք այն երկրում, որ Տերը՝ մեր Աստվածը, իբրև ժառանգություն տալու է ձեզ։ Այնտեղ ձեր շուրջը գտնվող բոլոր թշնամիներից նա ձեզ կապահովի հանգստով, ու դուք կապրեք ապահով։ ¹¹ Այն ժամանակ այն վայրը, որ կընտրի Տերը՝ մեր Աստվածը, իր անունը պաշտելու համար, այնտեղ կբերեք այն ամենը, ինչ այսօր պատգամում եմ ձեզ՝ ձեր ողջակեզները, ձեր զոհերը, ձեր տասանորդը, ձեր ձեռքերի անդրանիկ պտուղները, ընծաները և ձեր նվերների ընտիրները, որ ուխտել եք տալ ձեր Աստծուն։ ¹² Եվ կուրախանաք Տիրոջ՝ մեր Աստծու առջև դուք, ձեր տղաներն ու աղջիկները, ձեր ծառաներն ու աղախինները, ինչպես նաև ղևտացին, որ ապրելու է ձեր դարպասներից դուրս, որովհետև երկրից բաժին ու սեփականություն չի ստանալու, ինչպես դուք։ ¹³ Զգո՛ւյշ եղիր, որ քո ողջակեզները չմատուցես ուր որ պատահի. ¹⁴ այլ այն տեղում, որը կընտրի Տերը՝ քո Աստվածը, քո ցեղերից մեկի տարածքում, այնտեղ կմատուցես քո ողջակեզները և այնտեղ կկատարես այն ամենը, ինչ այսօր հաղորդում եմ քեզ։ ¹⁵ Իսկ եթե ցանկանաս մի կենդանի մորթել նրա միսը ուտելու համար, որը տվել է քեզ Տերը՝ քո Աստվածը, իր օրհնությամբ կարող ես ուտել այն բոլոր քաղաքներում։ Թե՛ մաքուրը, թե՛ անմաքուրը կարող են ուտել այն, ինչպես ուտում են այծյամն ու եղջերուն։ ¹⁶ Սակայն արյունը չպետք է ուտեք, այլ իբրև ջուր այն թափեք գետնին։

¹⁷ Սակայն չհամարձակվես քո ցորենի, քո գինու, քո յուղի տասանորդը, քո արջառի ու ոչխարի առաջնածինը, քո ուխտ արած ամեն ինչը, քո խոստացած նվերներն ու ձեռքի առաջին պտուղներն ուտել քո քաղաքներում։ ¹⁸ Այլ դրանք կուտեք Տիրոջ՝ ձեր Աստծու առջև, այն վայրում, որը Տերը՝ Աստված, կընտրի իր համար. ինչպես դու, այնպես էլ քո տղան ու քո աղջիկը, քո ծառան ու քո աղախինը, քո քաղաքներում բնակվող պանդուխտը։ Եվ կուրախանաս Տիրոջ՝ քո Աստծու առաջ այն ամենի համար, ինչ արել ես քո ձեռքով։ ¹⁹ Զգո՛ւյշ եղիր, որ ղևտացուն չանտեսես այնքան ժամանակ, քանի դեռ ապրում ես երկրի վրա։

²⁰ Երբ Տերը՝ քո Աստվածը, իր խոստացածի համաձայն ընդարձակի քո սահմանները, և ցանկանաս միս ուտել ու ասես՝ “Միս ուտեմ”, ապա կարող ես միս ուտել, ըստ քո ցանկության։ ²¹ Եվ եթե քեզանից հեռու լինի այն վայրը, որ Տերը՝ քո Աստվածը, ընտրել է իր անվան պաշտամունքի համար, ապա Աստծու՝ քեզ տված արջառներից կամ ոչխարներից կարող ես մորթել, այնպես, ինչպես պատվիրել եմ քեզ, և ուտել քո քաղաքում՝ ըստ քո ցանկության։ ²² Կարող են ուտել թե՛ անմաքուրը և թե՛ մաքուրը, ինչպես երբ ուտում եք այծյամ ու եղջերու։ ²³ Զգո՛ւյշ եղիր, որ արյունը չուտես, որովհետև արյունն անասունի շունչն է։ Շունչը մսի հետ չուտես. ²⁴ այն իբրև ջուր գետնի՛ն թափիր, ²⁵ այն մի՛ կեր, որպեսզի լավ լինի քեզ և քեզանից հետո քո որդիներին, բարին ու հաճելին գործելով Տիրոջ՝ քո Աստծու առջև։ ²⁶ Իսկ քո սուրբ ընծաները, եթե ունենաս, և քո ուխտած բաները վերցնելով՝ կգաս այն վայրը, որը Տերը՝ քո Աստվածը, կընտրի իր համար, որպեսզի այնտեղ պաշտվի իր անունը։ ²⁷ Կանես քո ողջակեզները. միսը կդնես Տիրոջ՝ քո Աստծու զոհասեղանին, զոհի արյունը կթափես Տիրոջ՝ քո Աստծու զոհասեղանի հատակին՝ հիմքի մոտ, իսկ միսը կուտես։

²⁸ Զգո՛ւյշ եղիր ու լսի՛ր. կկատարես այն ամենը, ինչ պատգամում եմ քեզ, որպեսզի հավիտյանս լավ լինի քեզ և քո որդիների համար, եթե բարին ու հաճելին անես Տիրոջ՝ քո Աստծու առջև»։

Զգուշացում կռապաշտությունից

²⁹ «Եթե Տերը՝ քո Աստվածը, քո առջևից ազգեր կոտորի, և դու մտնելու լինես նրանց երկիրը ժառանգելու, ժառանգես այն ու բնակվես նրանց երկրում, ³⁰ ապա զգո՛ւյշ եղիր, որ քո առջև նրանց կոտորվելուց հետո չգնաս նրանց հետքերով, չգայթակղվես, որ նրանք պաշտում են կուռքերին, ու չասես. “Այս ազգերը ինչ արել են իրենց կուռքերին, նույնն էլ ես անեմ Տիրոջը”։ ³¹ Նույն կերպ չվարվես Տիրոջ՝ քո Աստծու նկատմամբ, որովհետև նրանք հանուն իրենց աստվածների գարշելի բաներ են անում, որոնք ատելի են Տիրոջը, որովհետև նրանք իրենց տղաներին ու աղջիկներին հանուն իրենց աստվածների այրում են կրակի վրա»։

13

Պատիժ կռապաշտություն հորդորողներին

¹ «Զգո՛ւյշ եղիր, որ կատարես այն ամենը, ինչ ես այսօր հաղորդում եմ քեզ։ Դրա վրա ոչինչ մի՛ ավելացրու և դրանից ոչինչ մի՛ պակասեցրու։ ² Եթե ձեր մեջ մարգարե կամ երազահան ելնի և քեզ մի նշան կամ հրաշք ցույց տա, ³ քեզ ասած նշանը կամ հրաշքը կատարվի, և հետո նա ասի՝ “Գնանք պաշտենք աստվածների”, որոնք օտար են և անծանոթ ձեզ համար, ⁴ մի՛ լսեք այդ մարգարեի խոսքերը կամ երազահանի երազները, որովհետև Տերը՝ Աստված, դրանով փորձում է ձեզ՝ իմանալու, թե սիրո՞ւմ եք Տիրոջը՝ մեր Աստծուն, ձեր ամբողջ սրտով ու ձեր ամբողջ հոգով։ ⁵ Տիրոջ՝ ձեր Աստծու հետևի՛ց գնացեք, նրանից երկնչե՛ք, նրա պատվիրանները կատարե՛ք, անսացե՛ք նրա ձայնին ու նրան հարե՛ք, ⁶ Իսկ այն մարգարեն կամ այն երազահանը թող մեռնի, որովհետև փորձեց քեզ ապստամբեցնել Տիրոջ՝ քո Աստծու դեմ, որը քեզ դուրս բերեց եգիպտացիների երկրից, փրկեց քեզ ստրկության երկրից, և շեղել քեզ այն ճանապարհից, որով Տերը՝ քո Աստվածը, պատվիրեց քեզ ընթանալ։ Դրանով չարը կվերացնես ձեր միջից։

⁷ Եթե քո հոր կամ մոր կողմից քո եղբայրը կամ քո տղան կամ քո դուստրը կամ քո ծոցում պառկող կինը կամ անձիդ պես սիրելի բարեկամդ գաղտնաբար խնդրի քեզ ու ասի. “Գնանք պաշտենք օտար աստվածների”, որոնց դու և քո հայրերը չեք ճանաչել, ⁸ որոնք ձեր շուրջը գտնվող, քեզ մոտիկ կամ քեզանից հեռու, երկրի մի ծայրից մինչև երկրի մյուս ծայրը գտնվող ազգերի աստվածներ են, ⁹ չենթարկվես, չլսես նրան, չխնայես, չգթաս նրան ու չթաքցնես նրան՝ չծածկես նրա արարքը։ ¹⁰ Ամենուր կհայտնես այդ մասին. նախ քո ձեռքը թող բարձրանա նրան սպանելու համար, որից հետո թող բարձրանա ամբողջ ժողովրդի ձեռքը։ ¹¹ Թող քարկոծեն ու սպանեն նրան, որովհետև նա փորձեց քեզ ապստամբեցնել Տիրոջ՝ քո Աստծու դեմ, որը քեզ դուրս բերեց եգիպտացիների երկրից՝ ստրկության տնից։ ¹² Ամբողջ Իսրայելը, այդ լսելով, թող զարհուրի, և ձեր մեջ ոչ ոք թող չհանդգնի նման չար արարք կատարել։

¹³ Եթե լսես քաղաքներից մեկում, որոնք Տերը՝ քո Աստվածը, բնակվելու համար տալու է քեզ, ¹⁴ թե՝ Ձեր միջից անօրեն մարդիկ դուրս ելան ու հեղաշրջեցին իրենց քաղաքի բոլոր բնակիչներին՝ ասելով. “Գնանք պաշտենք օտար աստվածների”, որոնք անծանոթ են ձեզ համար, ¹⁵ ապա կքննես, հարցուփորձ կանես և մանրակրկիտ կստուգես նրանց։ Եվ եթե իրոք հավաստի է, որ այդ սրբապղծությունը տեղի է ունեցել ձեր մեջ, ¹⁶ ապա սրի հարվածներով կկոտորեք այդ երկրի բոլոր բնակիչներին, կնզովեք այդ քաղաքն ու այն ամենը, ինչ կա այնտեղ, և նրանց անասունները սրի կքաշեք։ ¹⁷ Քաղաքի ամբողջ ավարը կհավաքես փողոցները և քաղաքն ու ողջ ավարը կայրես հրով՝ Տիրոջ՝ քո Աստծու առջև, և այն ավերակի թող վերածվի հավիտյան և այլևս չվերակառուցվի։ ¹⁸ Նրա նզովված իրերից ոչինչ չվերցնես, որպեսզի Տերը մեղմի իր բարկությունը, գթառատ լինի քո նկատմամբ, ողորմի քեզ և քեզ բազմացնի այնպես, ինչպես երդվել էր Տերը քո հայրերին, ¹⁹ եթե անշուշտ լսես Տիրոջ՝ քո Աստծու ձայնը, պահես նրա բոլոր պատվիրանները, որ ես այսօր հաղորդում եմ քեզ, Տիրոջ՝ քո Աստծու առջև բարին և հաճելին գործես»։

14

Զգուշացում ցուցադրական սգից

¹ «Դուք Տիրոջ՝ ձեր Աստծու որդիներն եք։ Մեռելի վրա սգալիս ձեզ մի՛ ծվատեք և ձեր ճակատի մազերը մի՛ փետեք, ² որովհետև դուք Տիրոջ՝ ձեր Աստծու սուրբ ժողովուրդն եք։ Տերը՝ ձեր Աստվածը, երկրի վրա ապրող բոլոր ազգերից քեզ է ընտրել՝ լինելու իր սեփական ժողովուրդը»։

Մաքուր և անմաքուր կենդանիներ

(Ղևտ. 11.1-47)

³ «Ամեն մի բան, որ անմաքուր է, մի՛ կերեք։

⁴ Սրանք են այն կենդանիները, որ կարող եք ուտել. արջառ, ոչխար, այծ, ⁵ եղջերու, այծյամ, գոմեշ, իշայծյամ, այծքաղ, վայրի այծ և եղնիկ։ ⁶ Կուտեք նաև թաթը ճեղքված, կճղակաբաշխ ու որոճացող բոլոր կենդանիները։ ⁷ Մի՛ կերեք այն կենդանիները, որոնք թեև որոճում են, բայց թաթը ճեղքված կամ կճղակաբաշխ չեն։ Ուղտը, նապաստակն ու ճագարը թեև որոճում են, բայց կճղակաբաշխ չեն. դրանք ձեզ համար թող անմաքուր լինեն։ ⁸ Խոզը թեև ճեղքված թաթ ունի ու կճղակաբաշխ է, բայց չի որոճում. ուստի նա ձեզ համար անմաքուր է. մի՛ կերեք նրա միսը և դրանց սատկած մարմնին մի՛ մոտեցեք։

⁹ Սրանք են ջրային այն կենդանիները, որ կարող եք ուտել. կարող եք ուտել ջրային բոլոր այն կենդանիները, որոնք լողակ ու թեփուկ ունեն։ ¹⁰ Մի՛ կերեք բոլոր այն կենդանիները, որոնք լողակ ու թեփուկ չունեն. դրանք ձեզ համար անմաքուր են։

¹¹ Բոլոր մաքուր թռչունները կարող եք ուտել։ ¹² Սրանք են այն թռչունները, որ չպետք է ուտեք. արծիվ, կորճ, անգղ, ¹³ գետարծիվ, ցին և դրանց նմանները, ¹⁴ որի և դրա նմանները, ¹⁵ ջայլամ, բու, ճայ, ¹⁶ արագիլ, կարապ, հողամաղ, ¹⁷ քաջահավ, սոխակ, ագռավ, ¹⁸ հավալուսն, քաղադր և դրանց նմանները, նաև՝ հոպոպ և չղջիկ։ ¹⁹ Ձեզ համար անմաքուր թող լինեն բոլոր թևավոր զեռունները, դրանք մի՛ կերեք։ ²⁰ Կարող եք ուտել միայն բոլոր մաքուր թռչունները։

²¹ Ոչ մի սատկած անասունի միս չուտեք։ Այն կտաք ձեր քաղաքներում գտնվող պանդուխտին, որ ուտի, կամ էլ կվաճառեք օտար մարդու, որովհետև դու Տիրոջ՝ քո Աստծու սուրբ ժողովուրդն ես։

Գառն իր մոր կաթի մեջ չեփես»։

Տասանորդի օրենքը

²² «Ամեն տարի կառանձնացնես քո սերմանածի ողջ արդյունքի ու քո դաշտերի բերքի տասանորդը ²³ և դա կուտես Տիրոջ՝ քո Աստծու առջև, այն վայրում, որ կընտրի Տերը՝ քո Աստվածը, իր անվան պաշտամունքի համար։ Այնտեղ կմատուցես քո ցորենի, քո գինու, քո յուղի տասանորդը, քո արջառի ու ոչխարի առաջնածինները, որպեսզի սովորես հավիտյանս երկնչել Տիրոջից՝ քո Աստծուց։ ²⁴ Եվ եթե Տիրոջ՝ քո Աստծու օրհնությամբ քո բերքը շատ առատ լինի, ճանապարհն էլ շատ հեռու, և դու չկարողանաս տանել այն, քանի որ քեզանից հեռու է այն վայրը, որ ընտրել է Տերը՝ քո Աստվածը՝ իր անվան պաշտամունքի համար, ²⁵ կվաճառես այն արծաթի դիմաց և այդ արծաթը վերցնելով՝ կգնաս այն վայրը, որ կընտրի Տերը՝ քո Աստվածը։ ²⁶ Այդ արծաթով կգնես այն ամենը, ինչ ինքդ կկամենաս՝ արջառ, ոչխար, գինի, ցքի կամ այն ամենը, ինչ ինքդ կկամենաս, և կուտես այնտեղ Տիրոջ՝ քո Աստծու առջև, և կուրախանաք դու և քո որդին։ ²⁷ Քո քաղաքներում գտնվող ղևտացուն աչքաթող չանես, որովհետև նա հողից ո՛չ բաժին ունի, ո՛չ էլ ժառանգություն։

²⁸ Երեք տարի անցնելուց հետո կառանձնացնես այդ տարվա բերքի բոլոր տասանորդները և կպահես քո քաղաքներում։ ²⁹ Եվ այն կուտի ղևտացին, որովհետև նա ո՛չ բաժին ունի, ո՛չ էլ ժառանգություն, կուտի եկվորը, որբն ու այրին, կուտեն ու կկշտանան, և Տերը՝ քո Աստվածը, կօրհնի քո բոլոր գործերը»։

15

Յոթերորդ տարին

(Ղևտ. 25.1-7)

¹ «Ամեն յոթ տարին մեկ թողություն կանես։ ² Թողության օրենքը հետևյալն է. չեղյալ կհամարես այն ողջ պարտքը, որ քո ընկերը պարտք է քեզ. մի՛ պահանջիր քո ընկերոջից և քո եղբորից, որովհետև այդ թողությունը հանուն Տիրոջ՝ քո Աստծու է։ ³ Օտարից կպահանջես այն, ինչ քոնն է, սակայն քո եղբոր պարտքը զիջի՛ր նրան։ ⁴ Թող ձեր մեջ կարիքավորներ չլինեն, և Տերը՝ քո Աստվածը, օրհնելու է քեզ այն երկրում, որ Տերը՝ քո Աստվածը, տալու է քեզ, որպեսզի այն տիրես իբրև ժառանգություն։ ⁵ Եթե լսես Տիրոջ՝ քո Աստծու ձայնը, պահես ու կատարես բոլոր պատվիրանները, որ ես այսօր պատգամում եմ քեզ, ⁶ Տերը՝ քո Աստվածը, կօրհնի քեզ, ինչպես խոստացել է քեզ։ Շատ ազգերի փոխ կտաս, բայց ինքդ պարտք չես վերցնի, բազում ազգերի կտիրես, բայց քեզ չեն տիրի։

⁷ Եվ եթե ձեր մեջ քո եղբայրներից մեկը կարիքի մեջ լինի, Տիրոջ՝ քո Աստծու քեզ տված երկրի քաղաքներից որևէ մեկում, ապա նրանից երես մի՛ թեքիր, քո կարիքավոր եղբոր նկատմամբ ժլատություն մի՛ արա, ⁸ այլ առատաձե՛ռն եղիր նրա նկատմամբ, նրան պարտք տո՛ւր այնքան, որքան կխնդրի նա իր կարոտության մեջ։ ⁹ Զգո՛ւյշ եղիր, չլինի թե մտքումդ ծածուկ չար բան լինի և ասես. “Մոտ է յոթերորդ տարին՝ թողության տարին”, և անգթորեն վերաբերվես կարիքի մեջ գտնվող քո եղբորը և նրան պարտք չտաս։ Եթե նա քո դեմ բողոքի Տիրոջը, ապա դու մեծ մեղքի տակ կընկնես։ ¹⁰ Պա՛րտք տուր նրան այնքան, որքան անհրաժեշտ է։ Եվ մի՛ տրտմիր, որովհետև դրա համար քո Տերը՝ Աստված, կօրհնի քեզ քո բոլոր գործերում, ինչ էլ որ ձեռնարկես։ ¹¹ Քանի որ կարիքավորներն անպակաս են լինելու երկրի վրա, դրա համար էլ այս բանը պատվիրելով՝ ասում եմ. “Առատաձե՛ռն եղիր քո աղքատ և տառապյալ եղբոր նկատմամբ, որը ապրում է քո երկրում”»։

Գերիների ազատագրումը

(Ելք 21.2-11)

¹² «Եթե եբրայեցի քո եղբայրը կամ եբրայեցի մի կին վաճառվի քեզ, ապա վեց տարի նա թող ծառայի քեզ, իսկ յոթերորդ տարում նրան ազատ կարձակես քեզնից։ ¹³ Երբ նրան ազատ արձակես, ձեռնունայն չարձակես. ¹⁴ նրան կապահովես քո ոչխարներից, քո ցորենից ու քո հնձանի բարիքից։ Ինչպես որ Տերը՝ քո Աստվածը, օրհնեց քեզ, դու էլ նրա՛ն տուր։ ¹⁵ Հիշի՛ր, որ դու էլ ստրուկ էիր եգիպտացիների երկրում, և Տերը՝ քո Աստվածը, փրկեց քեզ այնտեղից։ Դրա համար էլ քեզ պատվիրում եմ, որ կատարես այս բաները։ ¹⁶ Իսկ եթե քեզ ասի՝ “Քեզանից չեմ հեռանա”, քանի որ սիրել է քեզ ու քո ընտանիքը, որովհետև նրա համար հարմար է քեզ մոտ մնալը, ¹⁷ ապա հերյունը կվերցնես, դռան սեմի վրա կծակես նրա ականջը, և նա ցմահ կդառնա քո ստրուկը։ Նույն կերպ կվարվես քո աղախնի նկատմամբ։ ¹⁸ Քեզ ծանր թող չթվա, եթե քեզանից ազատ արձակես քո ստրուկներին, քանի որ նրանք վեց տարի ծառայել են քեզ և վարձկանից կրկնակի օգուտ են տվել քեզ։ Այն ժամանակ Տերը՝ քո Աստվածը, կօրհնի քեզ քո բոլոր գործերում»։

Արջառի և ոչխարի անդրանիկ ծնունդները

¹⁹ «Քո նախիրներում ու հոտերում ծնված բոլոր առաջնածին արուներին կնվիրաբերես Տիրոջը՝ քո Աստծուն։ Քո առաջնածին եզը գործի չլծես և քո հոտերի առաջին ծնունդները չխուզես։ ²⁰ Ամեն տարի դու և քո ընտանիքը կուտեք այն Տիրոջ առջև, այն վայրում, որ կընտրի Տերը՝ քո Աստվածը։ ²¹ Եթե այդ անասունը արատավոր լինի՝ կաղ, կույր կամ որևէ ուրիշ արատ ունենա, դրան Տիրոջը՝ քո Աստծուն, մի՛ զոհիր, ²² այլ կե՛ր քո քաղաքում։ Այնտեղ գտնվող անմաքուրն ու մաքուրը նույնպես թող ուտեն այն, ինչպես ուտում են այծյամին ու եղջերուին։ ²³ Սակայն արյունը չուտես, այլ իբրև ջուր կթափես գետնին»։

16

Զատկական և Բաղարջակերաց տոները

(Ելք 12.1-20, 23.15, 34.18)

¹ «Պահի՛ր Կանխոց ամիսը, կատարի՛ր Տիրոջ՝ քո Աստծու զատիկը, որովհետև Կանխոց ամսին գիշերով դուրս եկաք Եգիպտոսից։ ² Եվ կմորթես Տիրոջ՝ քո Աստծու զատիկը՝ ոչխարներ ու արջառներ, այն վայրում, որ կընտրի Տերը՝ քո Աստվածը, իր անվան պաշտամունքի համար։ ³ Դրա հետ թթխմորով բան չուտես։

Դրա հետ յոթ օր բաղարջ՝ չարչարանաց հաց կուտես, որովհետև տագնապով դուրս եկաք Եգիպտոսից, որպեսզի ձեր կյանքի բոլոր օրերին հիշեք եգիպտացիների երկրից ձեր դուրս գալու օրը։ ⁴ Քո բոլոր բնակավայրերում յոթ օր թթխմորով բան չերևա, և մինչև հաջորդ առավոտ չմնա այն մսից, որ մորթել ես առաջին օրվա երեկոյան։

⁵ Չհամարձակվես քո զատիկը մորթել քո քաղաքներից մեկում, որ Տերը՝ քո Աստվածը, տալու է քեզ. ⁶ այլ զատիկը կմորթես այն վայրում, որ կընտրի Տերը՝ քո Աստվածը, իր անվան պաշտամունքի համար։ Այնտեղ կզոհես զատիկը երեկոյան՝ մայրամուտին, այն ժամանակ, երբ դուրս եկար Եգիպտոսից։ ⁷ Կեփես, կխորովես ու կուտես այն վայրում, որ կընտրի Տերը՝ քո Աստվածը, և վաղ առավոտյան կվերադառնաս քո տունը։

⁸ Վեց օր բաղարջ հաց կուտես։ Յոթերորդ օրը կտոնես մեծ շուքով. այն նվիրված է Տիրոջը՝ քո Աստծուն։ Այդ օրը ոչ մի գործ չես կատարի, բացի անձնական պետքերից»։

Շաբաթների կամ բերքի առաջնեկի տոնը

Հնձի տոնը

(Ելք 34.22, 23.16ա, Ղևտ. 23.15-21)

⁹ «Այն օրվանից, երբ կսկսես մանգաղով հնձել ցորենը, կհաշվես յոթ շաբաթ ¹⁰ և կկատարես Շաբաթների տոնը՝ նվիրված Տիրոջը՝ քո Աստծուն. կբերեք ձեր կամավոր նվերները, համաձայն քեզ տրված Տիրոջ՝ քո Աստծու հրամանի։ ¹¹ Եվ կուրախանաք Տիրոջ՝ քո Աստծու առջև, դու, քո տղան ու քո դուստրը, քո ծառան ու քո աղախինը, քո քաղաքում բնակվող ղևտացին, պանդուխտը, որբն ու այրին, այն վայրում, որ կընտրի Տերը՝ Աստված, իր անվան պաշտամունքի համար։ ¹² Եվ հիշի՛ր, որ ստրուկ էիր եգիպտացիների երկրում, և հետամո՛ւտ եղիր, որ կատարես այս պատվիրանները»։

Տաղավարահարաց տոնը

(Ելք 23.16բ, Ղևտ. 23.33-43)

¹³ «Տաղավարահարաց տոնը կկատարես յոթ օր, երբ կհավաքես քո կալի ու քո հնձանի բերքը։ ¹⁴ Քո տոնին կուրախանաք դու, քո տղան ու դուստրը, քո ծառան ու քո աղախինը, քո քաղաքում բնակվող ղևտացին, պանդուխտը, որբն ու այրին։ ¹⁵ Յոթ օր Տիրոջ՝ քո Աստծու տոնը կանես այն վայրում, որ կընտրի Տերը՝ քո Աստվածը։ Եվ Տերը՝ քո Աստվածը, կօրհնի քո բոլոր բերքը և քո ձեռնարկած բոլոր գործերը, և ուրախ կլինես։

¹⁶ Տարին երեք անգամ՝ Բաղարջակերաց տոնին, Շաբաթների տոնին և Տաղավարահարաց տոնին, քո արուները պետք է կանգնեն Տիրոջ՝ քո Աստծու առջև այն վայրում, որ կընտրի Տերը։ Ոչ ոք Տիրոջ՝ քո Աստծու առջև դատարկաձեռն չպետք է երևա, ¹⁷ յուրաքանչյուրն ըստ իր կարողության՝ համաձայն Տիրոջ՝ քո Աստծու քեզ տրված հրամանի»։

Արդարադատության օրենքներ

¹⁸ «Այն բոլոր քաղաքներում, որ Տերը՝ քո Աստվածը, տալու է քեզ, ըստ ցեղերի դատավորներ ու օրենսգետներ կկարգես, որպեսզի ժողովրդին դատեն արդար դատաստանով, ¹⁹ աչառություն չանեն ու կաշառք չվերցնեն, որովհետև կաշառքը կուրացնում է իմաստունների աչքերը և ապականում արդարների խոսքերը։ ²⁰ Արդար դատ կանեք, որպեսզի ապրեք և մտնելով ժառանգեք այն երկիրը, որ Տերը՝ Աստված, տալու է ձեզ։

²¹ Տիրոջ՝ քո Աստծու զոհասեղանի շուրջը պաշտամունքային ոչ մի փայտյա սյուն մի՛ կանգնեցրու, ոչ էլ որևէ ծա՛ռ տնկիր՝ պաշտելու համար, ²² ոչ էլ արձան կանգնեցրու, մի բան, որ ատում է Տերը՝ քո Աստվածը»։

17

¹ «Տիրոջը՝ քո Աստծուն, մի՛ զոհիր որևէ արջառ կամ ոչխար, որը արատ կամ թերություն ունենա, որովհետև դա պիղծ է Տիրոջ՝ քո Աստծու առջև։

² Եթե քո մեջ, քո քաղաքներից մեկում, որը Տերը՝ քո Աստվածը, տալու է քեզ, գտնվի մի այր կամ կին, որը չար գործ անի Տիրոջ՝ քո Աստծու առջև, դրժի նրա ուխտը, ³ և գնալով պաշտի օտար աստվածների, երկրպագի նրանց, արեգակին կամ լուսնին կամ երկնքի զարդերից որևէ մեկին, որոնք ես չեմ հրամայել ⁴ ու հանձնարարել քեզ, ապա խստորեն հարցուփորձ կանես, և եթե իրոք այդպիսի բան եղել է, և այդ պղծությունը կատարվել է Իսրայելի մեջ, ⁵ ապա այդ չար բանը կատարած տղամարդուն կամ կնոջը կբերես ձեր քաղաքի դռների մոտ, և քարկոծելով կսպանեք նրանց։ ⁶ Երկու կամ երեք մարդկանց վկայությամբ պետք է մեռնի մահվան դատապարտվածը. մեկ մարդու վկայությամբ չի կարելի նրան մահվան դատապարտել։ ⁷ Նախ վկաները թող քար նետեն նրա վրա՝ սպանելու նրան, ապա՝ ամբողջ ժողովուրդը։ Դրանով դու չարը ձեր միջից կվերացնես։

Բարձրագույն արդարադատությունը

⁸ Եթե քո քաղաքներից մեկի դատարանում ներկայանա մի դժվար հարց, ինչպես սպանության, կռվի, հակառակության վերաբերյալ դատական մի գործ, և չկարողանաս կողմնորոշվել, ապա վե՛ր կաց ու գնա՛ այն վայրը, որ կընտրի Տերը՝ քո Աստվածը, իր անվան պաշտամունքի համար։ ⁹ Կգնաս ղևտացի քահանաների և այդ օրվա դատավորի մոտ, և նրանք, գործը քննելով, քեզ կհայտնեն վճիռը։ ¹⁰ Եվ կվարվես ըստ այն վճռի, որ կտրվի այն վայրում, որ ընտրելու է Տերը՝ քո Աստվածը։ Խստորեն հետևի՛ր, որ կատարես ճիշտ այնպես, ինչպես վճռել են։ ¹¹ Կկիրառես այն օրենքները և կարձակես այն վճիռները, որ նրանք կհաղորդեն քեզ։ Նրանց ասածից ո՛չ աջ կշեղվես, ո՛չ ձախ։ ¹² Այն մարդը, որ գոռոզամտության պատճառով չլսի Տիրոջը՝ քո Աստծուն ծառայող քահանայի կամ այդ օրվա դատավորի ասածը, մահապատժի կենթարկվի։ Դրանով դու չարը կվերացնես Իսրայելի միջից, ¹³ և ամբողջ ժողովուրդը, այդ լսելով, կվախենա ու այլևս չի գոռոզամտանա»։

Օրենքներ թագավորի վերաբերյալ

¹⁴ «Եվ եթե մտնես այն երկիրը, որ Տերը՝ քո Աստվածը, տալու է քեզ, ժառանգես այն ու բնակվես նրա մեջ և ասես՝ “Մենք էլ իշխան ունենանք, մեր շուրջը գտնվող մյուս ազգերի նման”, ¹⁵ ապա իշխան կկարգես նրան, որին կընտրի Տերը՝ քո Աստվածը։ Քո եղբայրների՛ց քեզ իշխան կկարգես։ Չհամարձակվես կարգել օտար մի մարդու, որ քո եղբայրը չէ։ ¹⁶ Իշխանը չպետք է մտածի իր երիվարները բազմացնելու մասին, ոչ էլ ժողովրդին Եգիպտոս ուղարկի, որովհետև Տերն ասել է. “Այլևս նույն ճանապարհով հետ չեք դառնալու”։ ¹⁷ Ոչ էլ շատ կանայք պետք է ունենա, որպեսզի նրա սիրտը չգայթակղվի, ոչ էլ շատ արծաթ ու ոսկի կուտակի։ ¹⁸ Երբ նա նստի իր իշխանության գահին, պետք է իր համար արտագրի այս Երկրորդ օրենքի գիրքը այն մատյանից, որ ղևտացի քահանաների մոտ է պահվում։ ¹⁹ Այդ պատճենը պետք է մնա նրա մոտ, և նա իր կյանքի բոլոր օրերին պետք է կարդա դա, որպեսզի սովորի երկնչել Տիրոջից՝ քո Աստծուց, պահի այս բոլոր պատվիրանները և կիրառի այս օրենքները, ²⁰ որպեսզի չմեծամտանա իր եղբայրների մոտ, պատվիրաններից աջ կամ ձախ չշեղվի, որպեսզի իր իշխանությունը, ինքը և իր որդիները երկարակյաց լինեն Իսրայելի որդիների մեջ»։

18

Ղևտացի քահանաների իրավունքները

¹ «Ղևտացի քահանաները՝ Ղևիի որդիները, երկրից բաժին ու ժառանգություն չպետք է ունենան Իսրայելի որդիների հետ։ Տիրոջն արված նվիրաբերումնե՛րը թող լինեն նրանց բաժինը. դրա՛նք թող ուտեն։ ² Նրանք իրենց եղբայրների մեջ երկրից բաժին չպետք է ունենան. Տերն է նրանց բաժինը, ինչպես ասաց նրանց։

³ Քահանաների իրավունքը ժողովրդից հետևյալն է. զոհ մատուցողը, եթե զոհը արջառ է կամ ոչխար, քահանային պետք է տա թևը, ծնոտներն ու փորը։ ⁴ Նրանց պետք է տաս նաև քո ցորենի, քո գինու, քո յուղի առաջին բերքը, քո ոչխարների առաջին խուզից ստացած բուրդը, ⁵ որովհետև նրան է ընտրել Տերը քո բոլոր ցեղերի միջից, որպեսզի նա ու նրա որդիները հավիտյանս կանգնեն Տիրոջ՝ ձեր Աստծու առջև՝ պաշտելու նրան և օրհնելու նրա անունը։

⁶ Իսկ եթե Իսրայելի որդիներին պատկանող մի քաղաքից այնտեղ բնակվող ղևտացին իր ցանկությամբ գա Տիրոջ ընտրած վայրը, ⁷ կարող է ծառայել Տիրոջը՝ իր Աստծուն, իր բոլոր ղևտացի եղբայրների նման, որոնք այնտեղ ծառայում են Տիրոջը՝ Աստծուն, ⁸ և թող բաժին ստանա՝ անկախ իր հայրական տանը ստացած եկամուտից»։

Սուտ մարգարեներ և ճշմարիտ մարգարեն

⁹ «Եթե մտնես այն երկիրը, որը Տերը՝ Աստված, տալու է քեզ, չյուրացնես այդտեղ ապրող ազգերի գարշելի սովորությունները։ ¹⁰ Ձեր մեջ թող չգտնվի այնպիսի մեկը, որն իր տղային կամ դստերը կրակով զոհի, կախարդությամբ կամ գուշակությամբ զբաղվի, թռչուններին նայելով՝ կանխագուշակումներ անի, ¹¹ մոգություններով զբաղվի, վհուկ կամ մեռելահմա լինի, ոգեհարցությամբ զբաղվի, ¹² որովհետև Տիրոջ համար պիղծ է նա, ով զբաղվում է այդպիսի բաներով. այդպիսի գարշելի բաների համար է Տերը նրանց վերացնում քո առջևից։ ¹³ Տիրոջ՝ քո Աստծու առջև կատարյալ պետք է լինես։ ¹⁴ Քո ժառանգելիք երկրի ազգերը հավատում են հմայություններին ու կախարդություններին, բայց Տերը՝ քո Աստվածը, քեզ այդպես վարվելու հրաման չի տվել։

¹⁵ Քո եղբայրների միջից Տերը՝ քո Աստվածը, ինձ նման մարգարե պիտի մեջտեղ հանի, նրա՛ն կլսեք, ¹⁶ քանի որ երբ Քորեբում հավաքվել էիք, Տիրոջը՝ ձեր Աստծուն, խնդրելով ասում էիք. “Այլևս չլսենք Տիրոջ՝ մեր Աստծու ձայնը, այդ մեծ կրակն այլևս չտեսնենք, որպեսզի չմեռնենք”։ ¹⁷ Եվ Տերն ինձ ասաց. “Նրանք ճիշտ են ասում։ ¹⁸ Ես նրանց եղբայրներից քեզ նման մի մարգարե մեջտեղ կհանեմ, իմ պատգամները կդնեմ նրա բերանը, և նա նրանց կասի այն, ինչ ես կպատվիրեմ նրան։ ¹⁹ Այն մարդը, որ չի լսի իմ անունից խոսող մարգարեին, նրանից վրեժ կլուծեմ։

²⁰ Իսկ եթե մարգարեն հանդգնի իմ անունից ասել այնպիսի բաներ, որ ես չեմ հրամայել ասել, կամ եթե խոսի օտար աստվածների անունից, այդ մարգարեն կմեռնի։ ²¹ Իսկ եթե ձեր մտքում ասեք՝ “Ինչպե՞ս իմանանք, թե Տերը չի ասել այդ խոսքերը”, ²² ապա իմացե՛ք. եթե Տիրոջ անունից մարգարեի ասածը չի կատարվում, չի լինում, ապա դա Տիրոջ ասած խոսքը չէ. մարգարեն ամբարշտությամբ է խոսել, նա չպիտի ապրի”»։

19

Ապաստանի քաղաքներ

(Թվ. 35.9-29)

¹ «Երբ Տերը՝ քո Աստվածը, կոտորի այն ազգերին, որոնց երկիրը տալու է քեզ, և երբ ժառանգես այն ու բնակվես նրանց քաղաքներում ու տներում, ² այդ ժամանակ Տիրոջ՝ քո Աստծու՝ քեզ տված երկրի մեջ երեք քաղաք կառանձնացնես։ ³ Նկատի առնելով ճանապարհները՝ երեքի կբաժանես Տիրոջ՝ քո Աստծու՝ քեզ բաժին տված երկիրը, որպեսզի այդ քաղաքները ապաստան լինեն մարդասպանություն կատարած մարդկանց համար։

⁴ Այնտեղ թող փախչեն ու փրկվեն այն մարդասպանները, որոնք սպանել են ակամա և երբեք թշնամություն չեն ունեցել սպանվողի նկատմամբ։ ⁵ Ինչպես օրինակ՝ նա, ով իր մերձավորի հետ մայրու անտառ է մտնում՝ ծառ կտրելու, և փայտ կտրելու համար բարձրացնում է կացինը, և կացնի գլուխը թռչում է և դիպչում ընկերոջը, ու սա մահանում է, նա թող փախչի, ընկնի այդ քաղաքներից մեկնումեկը և փրկվի։ ⁶ Այնպես չլինի, որ սպանվածի արյունակից հարազատը, որի սիրտը այրվում է, սպանողին հետապնդի և ճանապարհի հեռու լինելու պատճառով հասնի ու սպանի նրան, ով մահվան դատապարտվելու ենթակա չէր, որովհետև նախապես սպանվածի նկատմամբ թշնամություն չէր ունեցել։ ⁷ Դրա համար էլ քեզ պատվիրում եմ ու ասում հետևյալը. երեք քաղաք կառանձնացնես այդ նպատակի համար։

⁸ Եվ եթե Տերը՝ քո Աստվածը, ընդարձակի քո սահմանները, ինչպես Տերը երդվել է քո հայրերին, և Տերը քեզ տա ամբողջ երկիրը, որ խոստացել է քո հայրերին, ⁹ և դու լսես ու կատարես այսօր քեզ հաղորդած իմ բոլոր այս պատվիրանները, այն է՝ սիրես Տիրոջը՝ քո Աստծուն, հավիտյան ընթանաս նրա ուղիով, ապա այդ երեք քաղաքներին կավելացնես ևս երեքը, ¹⁰ որպեսզի անմեղ արյուն չթափվի այն երկրում, որը Տերը՝ Աստված, տալու է քեզ իբրև ժառանգություն, և քո մեջ արյան պարտական մեկը չլինի։

¹¹ Իսկ եթե մեկն ատի իր մերձավորին և դարանակալելով հարձակվի նրա վրա, հարվածելով սպանի նրան ու փախչի այդ քաղաքներից մեկնումեկը, ¹² ապա նրա քաղաքի ծերերը պետք է մարդ ուղարկեն, վերցնեն նրան այնտեղից ու հանձնեն սպանվածի արյունակից հարազատի ձեռքը, և թող մեռնի։ ¹³ Դու նրան չպետք է խնայես։ Իսրայելի միջից կմաքրես թափված անմեղ արյան մեղքը, որպեսզի քեզ բարիք լինի»։

Հին կալվածքի սահմաններ

¹⁴ «Մի՛ խախտիր քո մերձավորի այն սահմանները, որ հաստատել են քո հայրերը՝ իբրև ժառանգություն, որը Տերը՝ քո Աստվածը, այդ երկրում քեզ է տալու իբրև ժառանգություն»։

Վկաների մասին

(Թվ. 35.30)

¹⁵ «Որևէ մեկի անօրենությունները, հանցանքներն ու կատարած մեղքերն ապացուցելու համար մեկ մարդու վկայությունը բավական չէ։ Երկու կամ երեք վկաների բերանով պետք է հաստատվի ամեն բան։

¹⁶ Եթե մի վկա սուտ վկայություն տա մի մարդու մասին և մեղադրի նրան անօրենության մեջ, ¹⁷ ապա երկուսն էլ, որոնց մեջ հակառակություն կա, պետք է կանգնեն Տիրոջ առջև, քահանաների առջև, այդ օրվա դատավորների առջև, ¹⁸ և դատավորները պետք է արդարությամբ քննեն գործը։ Եթե հաստատվի, որ վկան սուտ վկայություն տալով է մեղադրել իր եղբորը, ¹⁹ ապա նրա նկատմամբ կկիրառեք այն պատիժը, որ նա մտադիր էր հասցնել իր եղբորը։ Դրանով չարը կվերացնեք ձեր միջից։ ²⁰ Ուրիշները, այդ լսելով, կվախենան և այլևս չեն հանդգնի այդպիսի չար բան անել ձեր մեջ։ ²¹ Նրան մի՛ խնայեք։ Կյանքի դիմաց՝ կյանք, աչքի դիմաց՝ աչք, ատամի դիմաց՝ ատամ, ձեռքի դիմաց՝ ձեռք, ոտքի դիմաց՝ ոտք»։

20

Օրենք պատերազմի մասին

¹ «Եթե պատերազմի ելնես քո թշնամիների դեմ և տեսնես, որ նրանց նժույգները, հեծյալներն ու ժողովուրդը քեզանից շատ են, մի՛ վախեցիր նրանցից, որովհետև Տերը՝ քո Աստվածը, որ հանեց քեզ եգիպտացիների երկրից, քեզ հետ է։ ² Երբ հասնի պատերազմելու ժամը, քահանան մոտենալով թող խոսի ժողովրդի հետ ³ և ասի նրանց. “Լսե՛ք, Իսրայե՛լ, ահավասիկ դուք այսօր պատերազմի եք ելնում ձեր թշնամիների դեմ։ Ձեր սրտերը թող չթուլանան, մի՛ վախեցեք, մի՛ զարհուրեք ու նրանց առջևից մի՛ նահանջեք, ⁴ որովհետև Տերը՝ մեր Աստվածը, ձեզ հետ գնում է ձեր առջևից, որպեսզի ձեզ հետ պատերազմելով ձեր թշնամիների դեմ՝ փրկի ձեզ”։

⁵ Դպիրները թող խոսեն ժողովրդի հետ և ասեն. “Այն մարդը, որը նոր տուն է կառուցել, բայց բնակարանամուտ չի արել, թող վերադառնա իր տունը. չլինի թե պատերազմի ժամանակ նա սպանվի, և ուրիշ մարդ մտնի նրա կառուցած տունը։ ⁶ Այն մարդը, որն այգի է տնկել, բայց դեռ դրա բերքը չի վայելել, թող վերադառնա իր տունը. չլինի թե պատերազմի ժամանակ սպանվի, և ուրիշ մարդ դրա բերքը վայելի։ ⁷ Այն մարդը, որը մի աղջկա հետ նշանվել է, բայց նրա հետ դեռ չի ամուսնացել, թող վերադառնա իր տունը. չլինի թե պատերազմի ժամանակ սպանվի, և ուրիշ մարդ առնի նրա նշանածին”։ ⁸ Ապա դպիրները թող շարունակեն և ասեն. “Այն մարդը, որ վախենում է, թուլասիրտ է, թող վերադառնա իր տունը, որպեսզի իր եղբորն էլ իր նման վախկոտ չդարձնի”։ ⁹ Երբ դպիրները վերջացնեն ժողովրդի հետ խոսելը, զորքի հրամանատարներ թող նշանակվեն՝ բանակն առաջնորդնելու համար։

¹⁰ Եթե մոտենաս մի քաղաքի՝ նրա դեմ պատերազմելու համար, նախ նրա բնակիչներին խաղաղության կո՛չ արա։ ¹¹ Եթե խաղաղությունն ընդունեն և քո առջև բաց անեն դարպասները, ապա այդ քաղաքի մեջ գտնվող ամբողջ ժողովուրդը հարկատու և հնազանդ թող լինի քեզ։ ¹² Իսկ եթե չհնազանդվեն քեզ և պատերազմեն քո դեմ, ապա կպաշարես քաղաքը։ ¹³ Եվ Տերը՝ քո Աստվածը, այն կմատնի քո ձեռքը. և դու սրակոտոր կանես նրա բոլոր արուներին, ¹⁴ կխնայես կանանց, երեխաներին ու բոլոր անասուններին և այն ամենը, ինչ գտնվում է քաղաքում։ Ամբողջ ավարը կվերցնես քեզ և կուտես քո թշնամիների ունեցվածքը, որը Տերը՝ քո Աստվածը, տալու է քեզ։ ¹⁵ Այդպես կվարվես նաև շատ հեռու գտնվող բոլոր քաղաքների հետ, որոնք այս ազգերի քաղաքներից չեն, ¹⁶ այլ այն ազգերի քաղաքներից, որոնք նույնպես Տերը՝ քո Աստվածը, տալու է քեզ իբրև ժառանգություն։ Դրանցից ոչ մեկում կենդանի շունչ չթողնեք, ¹⁷ ամբողջապես կոչնչացնեք նրանց՝ քետացիներին, ամորհացիներին, քանանացիներին, փերեզացիներին, խևացիներին, հեբուսացիներին և գերգեսացիներին, ինչպես պատվիրել է Տերը՝ քո Աստվածը, ¹⁸ որպեսզի ձեզ չսովորեցնեն անել իրենց այն բոլոր գարշելի բաները, որ նրանք անում են իրենց չաստվածների համար, և դրանով դուք մեղանչեք Տիրոջ՝ ձեր Աստծու առջև։

¹⁹ Եթե երկար ժամանակ պաշարում ես մի քաղաք՝ այն գրավելու համար, կացնահարելով նրա պտղատու ծառերը չկտրես. այլ կե՛ր դրանց պտղից, բայց մի՛ կտրիր. ծառը մի՞թե դաշտում գտնվող մարդ է, որ կարողանա քեզանից հեռանալով՝ պաշարվածներին միանալ։ ²⁰ Կտրի՛ր ու կոտորի՛ր այն ծառը, որ պտղատու չէ, այն կտրի՛ր ու կտրատի՛ր և դրանով քո դեմ պատերազմող քաղաքի շուրջը պատնե՛շ կառուցիր, մինչև որ այդ քաղաքը հանձնվի»։

21

Չբացահայտված մարդասպանությունների մասին

¹ «Եթե մի վիրավոր գտնվի այն երկրում, որը Տերը՝ քո Աստվածը, տալու է քեզ իբրև ժառանգություն, և ընկած լինի դաշտի մեջ, ու չիմանան, թե ո՛վ է նրան խոցողը, ² ապա թող ելնեն քո ծերերն ու քո դատավորները և չափեն սպանվածի և նրա շուրջը գտնվող քաղաքների միջև ընկած տարածությունը։ ³ Սպանվածի վայրին առավել մոտիկ քաղաքի ծերերը արջառների միջից թող վերցնեն չբանեցված ու լուծ չկրած մի երինջ. ⁴ այդ քաղաքի ծերերն այդ երինջը թող իջեցնեն ապառաժոտ մի ձորի մեջ, որտեղ ո՛չ վար է արված, ո՛չ սերմ ցանված, և այդ ձորում ջլակոտոր թող անեն երինջը։ ⁵ Այնտեղ թող գան նաև ղևտացի քահանաները, որովհետև Տերը՝ քո Աստվածը, նրանց է ընտրել՝ իր առջև կանգնելու և իր անունով օրհնելու. թող նրանց ասածով վերանան բոլոր վեճերն ու գրգռությունները։ ⁶ Սպանվածին առավել մոտիկ գտնվող քաղաքի բոլոր ծերերն իրենց ձեռքերը թող լվան ձորում ջլակոտոր արված երինջի գլխի վրա ⁷ և պատասխան տալով՝ թող ասեն. “Մեր ձեռքերը չեն թափել այս արյունը, և մեր աչքերը չեն տեսել։ ⁸ Տե՜ր, քավությո՛ւն արա Իսրայելին՝ քո ժողովրդին, որին փրկեցիր, որպեսզի առանց պատճառի թափված արյունը Իսրայելին՝ քո ժողովրդին չվերագրվի”։ Դրանով նրանք թափված արյան մեղքից զերծ կմնան։ ⁹ Այս ձևով դու ձեր միջից կսրբես առանց պատճառի թափված արյունը՝ անելով այն, ինչ բարի ու հաճելի է Տիրոջ՝ քո Աստծու առջև»։

Գերի կանանց կին առնելու կարգի մասին

¹⁰ «Երբ պատերազմի ելնես քո թշնամիների դեմ, և Տերը՝ քո Աստվածը, նրանց մատնի քո ձեռքը, ավար վերցնես նրանց ունեցվածքը ¹¹ և գերեվարվածների մեջ գեղեցիկ կին տեսնես ու ցանկանաս նրան քեզ կին առնել, ¹² նրան կտանես քո տունը, կածիլես նրա գլուխը, կկտրես նրա եղունգները, ¹³ կհանես նրա գերության զգեստները, ապա նա թող նստի քո տանը ու մեկ ամիս թող սուգ անի իր հոր ու մոր համար։ Դրանից հետո միայն կմերձենաս նրան, կապրես նրա հետ, և նա քո կինը կլինի։ ¹⁴ Եթե դու նրանից գոհ չլինես, ապա նրան ազատ կարձակես։ Նրան արծաթով չվաճառես ու նրան չստրկացնես, քանի որ քո կինն է եղել»։

Անդրանիկ զավակի ժառանգության մասին

¹⁵ «Եթե մի տղամարդ երկու կին ունենա, որոնցից մեկը սիրելի լինի, իսկ մյուսը՝ ատելի, և նրանք՝ սիրելին ու ատելին, նրա համար որդիներ ծնեն, և անդրանիկը լինի ատելի կնոջ որդին, ¹⁶ ու երբ վրա հասնի իր ունեցվածքը որդիներին ժառանգություն տալու օրը, ապա այդ մարդն իրավունք չունի անդրանիկի իրավունքը տալ իր սիրելի կնոջ որդուն՝ անտես անելով ատելի կնոջ անդրանիկ որդուն. ¹⁷ նա պարտավոր է անդրանիկ ճանաչել ատելի կնոջ որդուն և իր ունեցածի կրկնակի բաժինը նրան տալ, որովհետև նա է նրա անդրանիկ որդին, և անդրանկության իրավունքը նրան է պատկանում»։

Անհնազանդ զավակի մասին

¹⁸ «Եթե մեկն ունի անհնազանդ ու անզգամ որդի, որն իր հորն ու մորը չի լսում, որին խրատում են, բայց նա չի լսում նրանց, ¹⁹ ապա նրա հայրն ու մայրը նրան բռնելով թող տանեն իրենց քաղաքի ծերերի մոտ՝ իրենց ատյանի առջև, ²⁰ և ասեն իրենց քաղաքի մարդկանց. “Մեր այս որդին անհնազանդ է ու անզգամ. և մեր ասածը չի լսում, ուխտազանց է ու հարբեցող”։ ²¹ Այն ժամանակ նրա քաղաքի մարդիկ քարերով թող քարկոծեն նրան, և թող մեռնի։ Դրանով դուք չարը վերացրած կլինեք ձեր միջից, իսկ ուրիշները, այդ լսելով, կվախենան»։

Զանազան օրենքներ

²² «Եթե մեկը մահվան դատապարտվելու արժանի հանցանք կատարի, և մահվան դատապարտվի, ու նրան կախեն ծառից, ²³ ապա նրա մարմինը ծառի վրա թող չմնա. նույն օրն իսկ կթաղեք նրան, որովհետև Աստծուց անիծված է նա, ով կախված է ծառից։ Մի՛ պղծեք այն երկիրը, որ Տերը՝ քո Աստվածը, տալու է քեզ իբրև ժառանգություն»։

22

¹ «Չլինի թե ճանապարհին տեսնես քո եղբոր մոլորված արջառը կամ ոչխարը և անտես անես դրանք. անպատճառ պետք է վերադարձնես դրանք ու բերես քո եղբոր մոտ։ ² Եթե քո եղբայրը քեզ մոտիկ վայրում չի ապրում, կամ դու չես ճանաչում նրան, ապա դրանք կբերես քո տունը. դրանք թող մնան քեզ մոտ, մինչև որ քո եղբայրը փնտրի դրանք, ու դու վերադարձնես նրան։ ³ Նույն կերպ կվարվես նրա էշի հետ, նույն կերպ կվարվես նրա հանդերձների հետ, նույն կերպ կվարվես քո եղբոր կորցրած բոլոր իրերի հետ։ Եթե նա ինչ-որ բան կորցնի, ու դու գտնես, չհանդգնես անուշադրության մատնել այն։ ⁴ Երբ կտեսնես, որ քո եղբոր էշը կամ եզը ընկած է ճանապարհին, ապա դրանց կողքով անտարբեր չանցնես, այլ կօգնես նրան՝ այն ոտքի հանելու։

⁵ Կինը տղամարդու հագուստ չպետք է հագնի, իսկ տղամարդն էլ կանացի զգեստ չպետք է հագնի, որովհետև նա, ով անում է այդ բանը, պիղծ է Տիրոջ՝ քո Աստծու առջև։

⁶ Եթե քո ճանապարհին հանդիպես թռչունի բույնի, ծառի վրա լինի, թե գետնի, և մայրը թուխս նստած տաքացնելիս լինի ձագերին կամ ձվերը, ապա մորը ձագերի հետ չվերցնես. ⁷ ազատ կարձակես մորը և միայն ձագերին կվերցնես քեզ, որպեսզի բարիքի արժանանաս և այդ երկրի վրա երկարակյաց լինես։

⁸ Նոր տուն կառուցելիս բազրիք կշինես տանիքի շուրջը, որպեսզի եթե մեկն այնտեղից ընկնի, դու քո տան մեջ սպանություն գործած չլինես։

⁹ Խաղողի այգուդ մեջ այլ սերմեր չցանես, այլապես թե՛ այգու բերքը, թե՛ սերմի բերքը կպատկանեն Տիրոջը։

¹⁰ Վար անելիս էշն ու եզը միասին չլծես։

¹¹ Տարբեր նյութերից՝ բրդից ու վուշից միասին գործված հագուստ չհագնես։ ¹² Ինչ էլ որ հագնես, քո հագած հագուստի չորս կողմերի վրա մանվածո ծոպեր կդնես»։

Օրենքներ սեռական կյանքի մասին

¹³ «Եթե մեկը կին առնի՝ ամուսնանա նրա հետ, բայց ատի նրան, ¹⁴ նրան բամբասելով՝ մեղքեր բարդի նրա վրա, նրա անունը վարկաբեկելով՝ ասի՝ “Այս կնոջ հետ ամուսնացա, բայց երբ մերձեցա, նրան կույս չգտա”, ¹⁵ կնոջ հայրն ու մայրը, իրենց դստերն առնելով, դստեր կուսության նշանը թող ցուցադրեն ատյանում՝ ծերերի առջև։ ¹⁶ Կնոջ հայրը թող ասի ծերերին. “Իմ այս դստերը կնության տվեցի այս մարդուն, և նրան ատելով՝ ¹⁷ սա բամբասում է ու զրպարտում, թե՝ “Քո դստերը կույս չգտա”։ Ահա իմ դստեր կուսության նշանները”։ Այն ժամանակ այդ քաղաքի ծերերի առջև թող բացեն լաթը։ ¹⁸ Այդ քաղաքի ծերերը թող կանչեն ու հանդիմանեն այդ մարդուն։ ¹⁹ Նրանից թող գանձեն հարյուր սիկղ, հանձնեն կնոջ հորը այն բանի դիմաց, որ նա վարկաբեկել է իսրայելացի կույսի անունը։ Նա թող մնա նրա կինը, և տղամարդը երբեք չհամարձակվի արձակել նրան։ ²⁰ Իսկ եթե ճիշտ լինի նրա ասածը, և աղջկա կուսության ապացույց չգտնեն, ²¹ ապա աղջկան թող բերեն իր հոր դուռը, և քաղաքի բնակիչները քարկոծելով թող սպանեն նրան, որովհետև Իսրայելի որդիների մեջ անպատիվ գործ է արել. պոռնկացել է իր հոր տանը։ Դրանով ձեր միջից չարը վերացրած կլինեք։

²² Եթե գտնվի մի տղամարդ, որ շնանում է ամուսնացած կնոջ հետ, կսպանեք երկուսին էլ՝ կնոջ հետ շնացող տղամարդուն ու այդ կնոջը. դրանով Իսրայելի միջից չարը վերացրած կլինեք։

²³ Եթե քաղաքում մի տղամարդ հանդիպի նշանված կույս աղջկա և պառկի նրա հետ, ²⁴ ապա երկուսին էլ կբերեք իրենց քաղաքի մուտքի մոտ և քարկոծելով կսպանեք նրանց. աղջկան կսպանեք, որովհետև քաղաքում լինելով՝ օգնության չի կանչել, իսկ տղամարդուն՝ այն բանի համար, որ բռնաբարել է իր մերձավորի նշանածին։ Դրանով դուք չարը վերացրած կլինեք ձեր միջից։ ²⁵ Իսկ եթե տղամարդը դաշտում հանդիպի նշանված մի աղջկա և բռնությամբ պառկի նրա հետ, ապա կսպանեք աղջկան բռնաբարած տղամարդուն, ²⁶ իսկ աղջկան ոչինչ չեք անի, քանի որ աղջիկը մահվան արժանի բան չի արել. սա նման է այն դեպքին, երբ մեկի վրա հարձակվում են ու սպանում նրան։ ²⁷ Նա դաշտի մեջ է հանդիպել նրան, նշանված աղջիկը դիմադրել է, և ոչ ոք չի եղել, որ օգներ նրան։

²⁸ Եթե մեկը չնշանված կույս աղջկա հանդիպի ու բռնությամբ պառկի նրա հետ, ²⁹ ապա աղջկան բռնաբարող տղամարդը աղջկա հորը պետք է տա հիսուն երկդրամյա արծաթ, իսկ աղջիկը պետք է դառնա նրա կինը։ Տղամարդը երբեք չպետք է հանդգնի արձակել նրան։

23

¹ Ոչ ոք իրավունք չունի ամուսնանալու իր հոր կնոջ հետ, որպեսզի իր հորը այդպիսով անպատված չլինի»։

Տիրոջ ժողովարանի միջից արտաքսում

² «Ամորձիքը ճզմած կամ կռտած մարդն իրավունք չունի Աստծու ժողովարանը մտնելու։ ³ Պոռնկորդին իրավունք չունի Աստծու ժողովարանը մտնելու։

⁴ Ամովնացին ու մովաբացին իրավունք չունեն Տիրոջ ժողովարանը մտնելու, անգամ մինչև տասներորդ սերունդը և հավիտյանս հավիտենից, ⁵ որովհետև Եգիպտոսից դուրս գալուց հետո նրանք հաց ու ջուր չտվեցին ձեզ և որովհետև քո դեմ վարձեցին միջագետքցի Բեորի որդի Բաղաամին, որպեսզի անիծի քեզ։ ⁶ Սակայն Տերը՝ քո Աստվածը, չկամեցավ լսել Բաղաամին, և Տերը՝ քո Աստվածը, անեծքը վերածեց օրհնության, քանի որ Տերը՝ քո Աստվածը, սիրեց քեզ։ ⁷ Քո կյանքի բոլոր օրերին, մինչև հավիտյան նրանց հետ դաշինք չկնքես։

⁸ Սակայն եդովմացուց մի՛ խորշիր, որովհետև նա քո եղբայրն է։ Եգիպտացուց նույնպես մի՛ խորշիր, որովհետև պանդուխտ էիր նրա երկրում։ ⁹ Նրանց երրորդ սերունդը կարող է մտնել Տիրոջ ժողովարանը»։

Բանակատեղին մաքուր պահել

¹⁰ «Եթե պատերազմի ելնես քո թշնամիների դեմ, զգուշացի՛ր ամեն տեսակ չար բաներից։ ¹¹ Եթե ձեր մեջ գտնվի մի մարդ, որն իր երազախաբության պատճառով անմաքուր է դարձել, ապա թող բանակատեղիից դուրս ելնի և բանակ չմտնի։ ¹² Երեկոյան նա իր մարմինը պետք է լվա ջրով և արևը մայր մտնելու ժամանակ մտնի բանակատեղի։ ¹³ Բանակատեղիից դուրս առանձնացված մի տեղ պետք է ունենաս ու այնտեղ արտաքնոց գնաս։ ¹⁴ Քո գոտուց կախված պետք է ունենաս մի ցից, որպեսզի երբ արտաքնոց գնաս, դրանով փոս բացես և քո աղտեղությունն այնտեղ նետելով՝ ծածկես. ¹⁵ որովհետև Տերը՝ քո Աստվածը, շրջում է քո բանակատեղիում, որպեսզի փրկի քեզ և քո թշնամուն մատնի քո ձեռքը։ Դրա համար էլ քո բանակատեղին մաքուր պետք է մնա, քո միջավայրում աղտեղություն չպետք է երևա, որպեսզի քեզանից չհեռանա»։

Զանազան օրենքներ

¹⁶ «Իր տիրոջից փախած և քեզ մոտ եկած ստրուկին մի՛ հանձնիր նրա նախկին տիրոջը. ¹⁷ նա թող բնակվի քեզ հետ ու քեզ մոտ տեղավորվի այնտեղ, որտեղ հարմար է գտնում։ Նրան նեղություն մի՛ պատճառեք։

¹⁸ Իսրայելի դուստրերի մեջ և ոչ Իսրայելի որդիների մեջ պոռնիկ չպետք է լինի։ Իսրայելի դուստրերից և որդիներից որևէ մեկին չընծայաբերեք կուռքերի պոռնկության[28]։

¹⁹ Տղամարդ կամ կին պոռնկի վարձը որևէ ուխտ կատարելու համար քո Աստծու տուն չտանես, որովհետև Տիրոջ՝ քո Աստծու առջև դրանք գարշելի են։

²⁰ Քո եղբորը վաշխով արծաթ չտաս կամ տոկոսով կերակուր և կամ այլ բան։ ²¹ Օտարից տոկոս կվերցնես, բայց ոչ քո եղբորից, որպեսզի Տերը՝ քո Աստվածը, օրհնի քեզ քո բոլոր գործերում այն երկրում, ուր դու մտնելու ես այն ժառանգելու համար։

²² Եթե ուխտ ես անում Տիրոջը՝ քո Աստծուն, ապա մի՛ հապաղիր այն կատարել, որովհետև Տերը՝ քո Աստվածը, անպայման պահանջելու է քեզանից, և չկատարելու դեպքում մեղք կբարդես վրադ։ ²³ Եթե չես ցանկանում ուխտել, ապա դա մեղք չի համարվի քեզ։ ²⁴ Ինչ որ դուրս է գալիս քո շրթունքներից, զգո՛ւյշ եղիր, որ անես այնպես, ինչպես որ ուխտել ես Տիրոջը՝ քո Աստծուն։ Տո՛ւր այն նվերը, որ խոստացել ես քո բերանով։

²⁵ Եթե մտնես քո մերձավորի արտը, ապա հասկը կարող ես քաղել ձեռքով, բայց քո մերձավորի արտում մանգաղ չգործածես։ ²⁶ Եթե մտնես քո մերձավորի այգին, ապա խաղող կարող ես ուտել մինչև հագենալդ, բայց ամանի մեջ լցնելով չտանես»։

24

Ապահարզան և վերամուսնություն

¹ «Եթե մեկը կին առնի ու մերձենա նրան, բայց այնպես պատահի, որ նրա մեջ անարգության հանգամանք նկատելով՝ դադարի նրան սիրելուց, ապա ապահարզանի թուղթ թող գրի, տա նրա ձեռքը և նրան արձակի իր տնից։ ² Եթե այս կինն ամուսնանա այլ մարդու հետ, ³ և երկրորդ ամուսինն էլ ատի նրան, ապա սա էլ թող գրի արձակման թուղթ, տա նրա ձեռքը և նրան արձակի իր տնից։ Իսկ եթե նրա երկրորդ ամուսինը մեռնի, ⁴ ապա առաջին ամուսինը, որ արձակեց նրան, իրավունք չունի նրան նորից կնության առնելու, որովհետև համարվում է պիղծ, մերժելի է Տիրոջ՝ քո Աստծու առջև։ Մի՛ պղծեք այն երկիրը, որ Տերը՝ Աստված, տալու է ձեզ իբրև ժառանգություն»։

Զանազան օրենքներ

⁵ «Եթե մի տղամարդ նոր է ամուսնացել, ապա նա պատերազմի թող չգնա. նրա վրա ոչ մի պարտականություն թող չդրվի, ազատ թող լինի մեկ տարի իր տան մեջ և ուրախացնի իր առած կնոջը։

⁶ Երկանքի վերին ու ստորին մասերը գրավ չվերցնես, որովհետև այդպիսով դրա տիրոջ կյանքն ես գրավ վերցրած լինում։

⁷ Եթե բռնվի մեկը, որ իր եղբայրներից՝ Իսրայելի որդիներից մեկին գողանալով վաճառի, ապա գողը պետք է մահվան դատապարտվի։ Դրանով դուք չարը վերացրած կլինեք ձեր միջից։

⁸ Զգուշացի՛ր բորոտությունից, հետամո՛ւտ եղիր, որ կատարես բոլոր այն օրենքները, որ քեզ կհաղորդեն ղևտացի քահանաները, ինչպես որ ես եմ պատվիրել ձեզ, որ զգույշ լինեք։ ⁹ Հիշե՛ք, թե Տերը՝ ձեր Աստվածը, ի՛նչ արեց Մարիամին, երբ դուք Եգիպտոսից ճանապարհ էիք ընկել։

¹⁰ Եթե քո մերձավորը որևէ բան է պարտք քեզ, ապա գրավ վերցնելու համար նրա տունը չմտնես. ¹¹ կանգնի՛ր դրսում, և պարտք ունեցող մարդն ինքը թող գրավը դուրս հանի։ ¹² Եթե աղքատ է այդ մարդը և գրավ է տվել իր հագուստը, ապա նրա գրավը չվերադարձրած՝ չքնես, ¹³ այլ արևը մայր մտնելու ժամանակ նրա գրավը կվերադարձնես. նա թող պառկի իր հագուստով, օրհնի քեզ, և Տերը՝ քո Աստվածը, կհիշի քո արածը։

¹⁴ Մի՛ ուշացրու աղքատ ու կարիքավոր եղբայրների կամ քո քաղաքներում գտնվող եկվորների վարձը տալ. ¹⁵ նույն օրը տո՛ւր նրա վարձը, քանի դեռ արևը մայր չի մտել, որովհետև նա աղքատ է, և դա է նրա հույսը։ Նա քո մասին թող չբողոքի Տիրոջը, որպեսզի մեղքի տակ չընկնես։

¹⁶ Հայրերը չպետք է մեռնեն որդիների փոխարեն, ոչ էլ որդիները պետք է մեռնեն հայրերի փոխարեն։ Ամեն մարդ պետք է մեռնի իր գործած մեղքերի համար։

¹⁷ Եկվորի, որբի և այրու իրավունքը մի՛ ոտնահարիր, այրու զգեստները գրավ մի՛ վերցրու, ¹⁸ որովհետև ստրուկ էիր եգիպտացիների երկրում, և Տերը՝ քո Աստվածը, փրկեց քեզ այնտեղից։ Դրա համար էլ պատվիրում եմ քեզ կատարել այս բաները։

¹⁹ Երբ քո արտը հնձելուց հետո որա մոռանաս քո արտում, մի՛ վերադարձիր այն վերցնելու համար. դա թող պատկանի աղքատին, եկվորին, այրուն ու որբին, որպեսզի Տերը՝ քո Աստվածը, օրհնի քեզ քո բոլոր այն գործերում, որոնք ձեռնարկում ես։ ²⁰ Երբ քաղես քո այգին, քաղից հետո ճռաքաղ չանես. դա թող պատկանի եկվորին, որբին և այրուն։ Հիշի՛ր, որ ստրուկ էիր եգիպտացիների երկրում, որի համար էլ պատվիրում եմ քեզ կատարել այս բաները։ ²¹ Եթե ձիթապտուղ ես քաղում, քաղից հետո մի՛ վերադարձիր պտղաքաղ անելու համար. դա թող պատկանի եկվորին, որբին և այրուն։ ²² Հիշի՛ր, որ ստրուկ էիր եգիպտացիների երկրում, որի համար էլ պատվիրում եմ քեզ կատարել այս բաները»։

25

Արդարություն անելու կերպը

¹ «Եթե վեճ լինի մարդկանց միջև, ապա թող դատարան ներկայանան, ու դատ լինի։ Թող արդարացնեն արդարին, իսկ մեղավորին պատժեն։ ² Եթե մեղավորը գանահարության է արժանի, ապա նրան թող նստեցնեն դատավորների առջև և նրանց առջև նրան գանահարեն ըստ նրա մեղավորության՝ ³ քառասուն հարված, բայց ոչ ավելի։ Իսկ եթե նրան դրանից ավելի գանահարեն, ապա դա քո առջև կատարված անարգանք կլինի քո եղբոր հանդեպ։

⁴ Կալում աշխատող եզան դունչը չկապես»։

Անժառանգ այրին

⁵ «Եթե եղբայրներն ապրում են միասին, և նրանցից մեկը առանց զավակ ունենալու մեռնի, ապա մեռած եղբոր կինը օտարի հետ թող չամուսնանա։ Նրա մոտ թող մտնի իր ամուսնու եղբայրը, սա թող կին առնի նրան ու ապրի այդ կնոջ հետ։ ⁶ Նրանցից ծնված երեխան թող լինի մահացած եղբոր անունով, որպեսզի նրա անունը Իսրայելից չջնջվի։ ⁷ Իսկ եթե եղբայրը չցանկանա ամուսնանալ իր մահացած եղբոր կնոջ հետ, ապա կինը թող դուրս գա քաղաքի դարպասի մոտ՝ ծերերի առջև, և ասի. “Իմ ամուսնու եղբայրը չի ուզում Իսրայելի մեջ պահպանել իր եղբոր անունը”։ ⁸ Այն ժամանակ իր քաղաքի ծերերը թող կանչեն մահացածի եղբորը, խոսեն նրա հետ։ Եթե նա կանգնի ու ասի՝ “Չեմ ուզում առնել նրան”, ⁹ ապա նրա եղբոր կինը, մոտենալով ծերերին, նրա ոտքից թող հանի մի կոշիկը, թքի նրա երեսին և ասի. “Այսպես են վարվում այն մարդու հետ, որը չի շինում իր եղբոր տունը”։ ¹⁰ Նա Իսրայելի մեջ թող կոչվի “բոբկացած մարդու տուն”»։

Ուրիշ օրենքներ

¹¹ «Եթե մեկը կռվի իր եղբոր հետ, և նրանցից մեկի կինն իր ամուսնուն ազատելու նպատակով մոտենա իր ամուսնու հետ կռվողին և ձեռքը մեկնելով՝ բռնի նրա ամորձիքներից, ¹² ապա առանց խղճալու պետք է կտրես նրա ձեռքը։

¹³ Տոպրակիդ մեջ երկու չափի՝ ծանր ու թեթև կշռաքարեր թող չլինեն։ ¹⁴ Քո տանը երկու չափս՝ երկար ու կարճ, թող չլինի։ ¹⁵ Ճշգրիտ ու արդար կշռաքարեր պետք է ունենաս, նաև ճշգրիտ ու արդար չափ, որպեսզի երկար ապրես այն երկրում, որ Տերը՝ քո Աստվածը, իբրև ժառանգություն տալու է քեզ, ¹⁶ որովհետև Տիրոջ՝ քո Աստծու համար պիղծ է նա, ով վարվում է այդ կերպ, ով անարդարություն է գործում»։

Ամաղեկացիները՝ ժառանգական թշնամիներ

¹⁷ «Հիշի՛ր, թե ի՛նչ արեց քեզ Ամաղեկը, երբ Եգիպտոսից դուրս գալով՝ ճանապարհ էիր ընկել, ¹⁸ թե ինչպե՛ս ճանապարհին ելավ քո դեմ և չվախենալով Աստծուց՝ կոտորեց քո բանակի վերջապահներին ու հոգնելու պատճառով հետ ընկածներին, երբ դու քաղցած ու հոգնած էիր։ ¹⁹ Եվ երբ Տերը՝ քո Աստվածը, քեզ ազատի քո շրջապատում գտնվող քո բոլոր թշնամիներից այն երկրում, որ Տերը՝ քո Աստվածը, տալու է քեզ իբրև ժառանգություն, Ամաղեկի անունը կջնջես երկնքի տակից։ Չմոռանա՛ս»։

26

Առաջին բերքը

¹ «Երբ մտնես այն երկիրը, որ Տերը՝ քո Աստվածը, տալու է քեզ իբրև ժառանգություն, երբ ժառանգես այն ու բնակվես այնտեղ, ² կվերցնես Տիրոջ՝ քո Աստծու՝ քեզ տված երկրի պտուղների երախայրիքը, կլցնես զամբյուղի մեջ և կգնաս այնտեղ, որը կընտրի Տերը՝ Աստված, իր անվան պաշտամունքի համար։ ³ Կգնաս քահանայի մոտ, որ հերթապահում է այն օրը, և նրան կասես. “Այսօր գոհություն եմ հայտնում Տիրոջը՝ իմ Աստծուն, քանի որ մտա այն երկիրը, որ Տերը երդվեց մեր հայրերին՝ մեզ տալ”։ ⁴ Քահանան քո ձեռքից թող վերցնի զամբյուղը և այն դնի Տիրոջ՝ քո Աստծու զոհասեղանի առջև։ ⁵ Պատասխան տալով՝ կասես Տիրոջ՝ քո Աստծու առջև. “Իմ հայրը թողեց Ասորիքն ու իջավ Եգիպտոս, այնտեղ պանդուխտ գնաց սակավաթիվ մարդկանցով, բայց այնտեղ մեծ ազգ դարձավ, խիստ բազմացավ։ ⁶ Եգիպտացիները չարչարեցին, ճնշեցին, տաժանակիր աշխատանքի լծեցին մեզ։ ⁷ Մենք աղաղակ բարձրացրինք դեպի Տերը՝ մեր հայրերի Աստվածը, նա լսեց մեր ձայնը, տեսավ մեր տառապանքները, չարչարանքն ու նեղությունը, ⁸ և Տերն ինքը հանեց մեզ Եգիպտոսից մեծ զորությամբ, հզոր ձեռքով ու բարձր բազկով, մեծամեծ տեսիլքներով, նշաններով ու զարմանահրաշ գործերով, ⁹ մեզ բերեց այս վայրը, մեզ տվեց այս երկիրը, մի երկիր, որ կաթ ու մեղր է բխեցնում։ ¹⁰ Արդ, ահա բերել եմ Տիրոջ՝ ինձ տված երկրի բերքի երախայրիքը, մի երկրի, որ կաթ ու մեղր է բխեցնում”։ Եվ կթողնես դրանք Տիրոջ՝ քո Աստծու առջև ու այնտեղ երկրպագություն կանես Տիրոջ՝ քո Աստծու առջև, ¹¹ այնտեղ կուրախանաք դու, ղևտացին ու քեզ մոտ բնակվող պանդուխտը բոլոր այն բարիքների համար, որ Տերը՝ քո Աստվածը, տվել է քեզ ու քո ընտանիքին։

Երրորդ տարվա տասանորդը

¹² Երբ երրորդ տարում քո ստացվածի տասանորդն առանձնացնես, երկրորդ մի տասանորդ կտաս ղևտացուն, պանդուխտին, որբին և այրուն, և թող ուտեն քո քաղաքներում և հագենան։ ¹³ Եվ Տիրոջ՝ քո Աստծու առջև կասես. “Իմ տնից հանեցի այն, ինչ առանձնացված էր որպես սուրբ, և հանձնեցի ղևտացուն, եկվորին, որբին և այրուն՝ ըստ ինձ տված քո պատվիրանների, Տե՛ր, որոնք անտես չարեցի և չմոռացա։ ¹⁴ Վշտիս օրերին դրանից չկերա ու անմաքուր ժամանակ դրան չդիպա, դրանից որևէ մեռելի բաժին չհանեցի։ Լսեցի Տիրոջ՝ իմ Աստծու խոսքը և արեցի այնպես, ինչպես պատվիրել էիր ինձ։ ¹⁵ Արդ, նայի՛ր քո սուրբ բնակության վայրից՝ երկնքից, և օրհնի՛ր Իսրայելին՝ քո ժողովրդին, և այն երկիրը, որ տվեցիր նրանց, ինչպես երդվել ես մեր հայրերին, թե մեզ կտաս մի երկիր, որը կաթ ու մեղր է բխեցնում”»։

Իսրայելը՝ Տիրոջ ժողովուրդ

¹⁶ «Այն օրը Տերը՝ մեր Աստվածը, պատվիրեց մեզ կատարել այս բոլոր օրենքներն ու կանոնները։ Պահե՛ք դրանք ու կատարե՛ք ձեր ամբողջ սրտով ու ձեր ամբողջ հոգով։ ¹⁷ Այսօր Տիրոջը՝ քո Աստծուն, ընտրի՛ր՝ քեզ Աստված լինելու։ Ընթացե՛ք նրա ճանապարհներով, պահպանե՛ք նրա օրենքներն ու կանոնները, անսացե՛ք նրա ձայնին։ ¹⁸ Տերը նույնպես, ինչպես որ խոստացել էր, այսօր քեզ ընտրեց՝ լինելու իր սեփական ժողովուրդը, պահելու նրա բոլոր պատվիրանները ¹⁹ և բոլոր ազգերից բարձր լինելու։ Նա քեզ դարձրել է անվանի, բարգավաճ ու փառավոր, որպեսզի իր խոստման համաձայն Տիրոջ՝ քո Աստծու սուրբ ժողովուրդը լինես»։

27

Աստծու օրենքները՝ գրված քարերի վրա

¹ Մովսեսը Իսրայելի ծերերի հետ պատվերներ տվեց՝ ասելով. «Պահե՛ք բոլոր այն պատվիրանները, որ ես այսօր պատգամում եմ ձեզ։ ² Այն օրը, երբ անցնեք Հորդանան գետը և մտնեք այն երկիրը, որ Տերը՝ ձեր Աստվածը, տալու է ձեզ, այնտեղ մեծամեծ քարեր կկանգնեցնեք ու ծեփով կծեփեք դրանք։ ³ Եվ այդ քարերի վրա կգրեք այս օրենքի բոլոր պատգամները, երբ անցնեք Հորդանանը ու մտնեք այն երկիրը, որ Տերը՝ ձեր հայրերի Աստվածը, տալու է ձեզ, մի երկիր, որը կաթ ու մեղր է բխեցնում, ինչպես խոստացել է Տերը՝ ձեր հայրերի Աստվածը, տալու քեզ։ ⁴ Երբ անցնեք Հորդանան գետը, այն քարերը, որ ես այսօր պատվիրում եմ ձեզ, կկանգնեցնեք Գեբաղ լեռան վրա և դրանք կծեփեք ծեփով։ ⁵ Այնտեղ Տիրոջ՝ քո Աստծու համար քարե զոհասեղան կպատրաստես։ Դրան երկաթ չպետք է դիպչի։ ⁶ Չհղկված քարերով կպատրաստես Տիրոջ՝ քո Աստծու զոհասեղանը։ Դրա վրա Տիրոջ՝ քո Աստծու համար ողջակեզներ կմատուցես։ ⁷ Այնտեղ Տիրոջ՝ քո Աստծու համար փրկության զոհ կմատուցես, կուտես ու կկշտանաս այնտեղ, կուրախանաս Տիրոջ՝ քո Աստծու առջև ⁸ և քարերի վրա խիստ պարզորոշ կգրես այս բոլոր օրենքները»։

⁹ Մովսեսը, քահանաներն ու ղևտացիները, խոսելով Իսրայելի բոլոր որդիների հետ, ասացին. «Լո՛ւռ մնա ու լսի՛ր, Իսրայե՜լ։ Այսօր Տիրոջ՝ քո Աստծու ժողովուրդը դարձար։ ¹⁰ Լսի՛ր Տիրոջ՝ քո Աստծու ասածը, կատարի՛ր նրա բոլոր պատվիրաններն ու նրա օրենքները, որ ես այսօր պատգամում եմ քեզ»։

Տասներկու անեծքներ

¹¹ Եվ Մովսեսն այդ օրը ժողովրդին պատվիրեց՝ ասելով. ¹² «Երբ Հորդանանն անցնեք, Շմավոնի, Ղևիի, Հուդայի, Իսաքարի, Հովսեփի և Բենիամինի ցեղերը թող կանգնեն Գարիզին լեռան վրա՝ ժողովրդին օրհնելու համար։ ¹³ Իսկ Ռուբենի, Գադի, Ասերի, Զաբուղոնի, Դանի և Նեփթաղիմի ցեղերը թող կանգնեն Գեբաղ լեռան վրա՝ ժողովրդին անիծելու։

¹⁴ Ղևտացիները, սկսելով, թող բարձրաձայն ասեն ողջ Իսրայելին.

¹⁵ «Անիծյալ լինի նա, ով կպատրաստի կոփածո կամ ձուլածո կուռք, արվեստագետի ձեռքի գործ, ու այն գաղտնի կպաշտի, քանի որ պիղծ է Տիրոջ համար»։ Եվ ժողովուրդը պատասխան տալով՝ թող ասի. «Ամեն»։

¹⁶ «Անիծյալ լինի նա, ով կանարգի իր հորը կամ իր մորը»։ Եվ ամբողջ ժողովուրդը թող ասի. «Ամեն»։

¹⁷ «Անիծյալ լինի նա, ով կխախտի իր հարևանի սահմանները»։ Եվ ամբողջ ժողովուրդը թող ասի. «Ամեն»։

¹⁸ «Անիծյալ լինի նա, ով կույրին կմոլորեցնի ճանապարհից»։ Եվ ամբողջ ժողովուրդը թող ասի. «Ամեն»։

¹⁹ «Անիծյալ լինի նա, ով կոտնահարի եկվորի, որբի և այրու իրավունքները»։ Եվ ամբողջ ժողովուրդը թող ասի. «Ամեն»։

²⁰ «Անիծյալ լինի նա, ով կպառկի իր հոր կնոջ հետ, քանի որ դրանով բացած կլինի իր հոր ամոթույքը»։ Եվ ամբողջ ժողովուրդը թող ասի. «Ամեն»։

²¹ «Անիծյալ լինի նա, ով կկենակցի անասունի հետ»։ Եվ ամբողջ ժողովուրդը թող ասի. «Ամեն»։

²² «Անիծյալ լինի նա, ով կկենակցի իր քրոջ հետ՝ նույն հորից կամ նույն մորից»։ Եվ ամբողջ ժողովուրդը թող ասի. «Ամեն»։

²³ «Անիծյալ լինի նա, ով կկենակցի իր զոքանչի հետ»։ Եվ ամբողջ ժողովուրդը թող ասի. «Ամեն»։ «Անիծյալ լինի նա, ով կկենակցի իր կնոջ քրոջ հետ»։ Եվ ամբողջ ժողովուրդը թող ասի. «Ամեն»։

²⁴ «Անիծյալ լինի նա, ով նենգությամբ կհարվածի իր մերձավորին»։ Եվ ամբողջ ժողովուրդը թող ասի. «Ամեն»։

²⁵ «Անիծյալ լինի նա, ով կաշառք կվերցնի անմեղ մարդ սպանելու համար»։ Եվ ամբողջ ժողովուրդը թող ասի. «Ամեն»։

²⁶ «Անիծյալ լինեն բոլոր նրանք, որոնք չեն պահի այս օրենքները և դրանք չեն կատարի»։ Եվ ամբողջ ժողովուրդը թող ասի. «Ամեն»։

28

Օրհնություններ

(Ղևտ. 26.3-13)

¹ «Եթե անսաք Տիրոջ՝ մեր Աստծու ձայնին, և կատարեք նրա բոլոր պատվիրանները, որ ես այսօր պատգամում եմ ձեզ, ապա Տերը՝ ձեր Աստվածը, ձեզ երկրի բոլոր ազգերից ավելի բարձր կդասի։ ² Եվ այս օրհնությունները կիջնեն քեզ վրա ու կգտնեն քեզ, եթե լսես Տիրոջ՝ քո Աստծու ձայնը։ ³ Օրհնյալ կլինես դու և՛ քաղաքում, և՛ օրհնյալ՝ դաշտում։ ⁴ Օրհնյալ կլինեն քո որովայնի ծնունդները, քո երկրի բերքը, քո արջառների նախիրները և քո ոչխարների հոտերը։ ⁵ Օրհնյալ կլինեն քո շտեմարաններն ու քո ամբարները։ ⁶ Օրհնյալ կլինես դու ելնելիս և մտնելիս։ ⁷ Տերը՝ քո Աստվածը, քո առջև կկոտորի քո թշնամիներին ու հակառակորդներին։ Նրանք քո դեմ կելնեն մեկ ճանապարհով, բայց յոթ ճանապարհով կփախչեն քեզանից։ ⁸ Տերը օրհնություն կառաքի քեզ, քո շտեմարաններին ու բոլոր այն գործերին, որոնք կձեռնարկես այն երկրում, որ Տերը՝ քո Աստվածը, տալու է քեզ։ ⁹ Տերը՝ քո Աստվածը, քեզ իր սուրբ ժողովուրդը կդարձնի, ինչպես երդվել է քո հայրերին, եթե անսաս Տիրոջ՝ մեր Աստծու ձայնին և ընթանաս նրա ճանապարհով։ ¹⁰ Եվ երկրի բոլոր ազգերը կտեսնեն, որ քեզ վրա է դրված Տիրոջ անունը, ու քեզանից կվախենան։ ¹¹ Տերը՝ քո Աստվածը, քեզ կբազմացնի բարիքներով՝ քո որովայնի ծնունդներով, քո երկրի բերքով, քո անասունների ծնունդներով այն երկրում, որ քո հայրերի Տերը երդվել է տալ քեզ երկնքի ու երկրի ստեղծվելու օրից ի վեր։ ¹² Տերը քեզ համար կբացի իր բարիքների շտեմարանը՝ երկինքը, որպեսզի ժամանակին անձրև տա քո երկրին։ Օրհնելու է քո ձեռնարկած բոլոր գործերը. փոխ կտաս շատ ազգերի, բայց ինքդ նրանցից փոխ չես առնի։ ¹³ Բազում ազգերի վրա կիշխես, բայց քեզ վրա չեն իշխի։ Տերը՝ քո Աստվածը, քեզ գլուխ կկարգի, և ոչ թե վերջնամաս, բարձր կլինես և ոչ թե ցածր, եթե լսես Տիրոջ՝ քո Աստծու պատվիրանները, որ ես հաղորդում եմ քեզ այսօր՝ դրանք պահելու և կատարելու համար։ ¹⁴ Այն պատվիրաններից, որ ես այսօր հաղորդում եմ քեզ, չպետք է շեղվես ո՛չ աջ և ո՛չ ձախ, որ չգնաս օտար աստվածների հետևից՝ նրանց պաշտելու»։

Անեծքներ

(Ղևտ. 26.14-45)

¹⁵ «Իսկ եթե ականջ չդնես Տիրոջ՝ քո Աստծու ձայնին՝ չպահես ու չկատարես նրա բոլոր պատվիրանները, որ ես այսօր պատգամում եմ քեզ, ապա այս անեծքները կթափվեն քո գլխին, կհասնեն քեզ։ ¹⁶ Անիծյալ կլինես դու և՛ քաղաքում, և՛ անիծյալ՝ դաշտում։ ¹⁷ Անիծյալ կլինեն քո շտեմարաններն ու քո ամբարները։ ¹⁸ Անիծյալ՝ քո որովայնի ծնունդները, քո երկրի բերքը, քո արջառների նախիրներն ու ոչխարների հոտերը։ ¹⁹ Անիծյալ կլինես դու մտնելիս և ելնելիս։ ²⁰ Տերը քեզ աղքատ ու կարիքավոր կդարձնի և ձեռնարկած ու ձեռնարկելիք բոլոր գործերդ անհաջողության կմատնի, մինչև որ կոտորի քեզ Տերը, մինչև որ քեզ իսկույն ոչնչացնի քո չար ընթացքի համար, քանի որ դու ինձ լքեցիր։ ²¹ Տերը մահ կսփռի քեզ վրա, մինչև որ վերացնի քեզ այն երկրից, ուր մտնելու ես՝ այն ժառանգելու համար։ ²² Տերը քեզ կտանջի տարակուսանքներով, տենդով և դողէրոցքով, խստությամբ ու երկյուղով, խորշակով ու դժգունությամբ, և սրանք քեզ կհետապնդեն, մինչև որ քեզ կորստյան մատնեն։ ²³ Քո գլխի վրա երկինքը պղնձից կլինի, իսկ քո ոտքի տակի երկիրը՝ երկաթից։ ²⁴ Տերը քո արտին փոշու անձրև կթափի, քեզ վրա երկնքից հող կթափի, մինչև որ քեզ սպանի ու կորստյան մատնի։ ²⁵ Տերը թշնամիներիդ առջև քեզ պարտության կմատնի. դու նրանց դեմ մեկ ճանապարհով կելնես, բայց յոթ ճանապարհով կփախչես նրանցից։ Ցրիվ կգաս երկրի բոլոր թագավորությունների մեջ։ ²⁶ Ձեր դիակները երկնքի թռչունների ու երկրի գազանների կեր կդառնան, և ոչ ոք չի լինի, որ քշի դրանց։ ²⁷ Տերը քեզ կհիվանդացնի եգիպտացիների խոցով ու թութքով, սուր քոսով ու բորոտությամբ, որպեսզի չկարողանաս բուժվել։ ²⁸ Տերը քեզ կհիվանդացնի մտագարությամբ, կուրությամբ ու ցնորամտությամբ։ ²⁹ Օրը ցերեկով կխարխափես այնպես, ինչպես կույրն է խարխափում խավարի մեջ, և քո ուղիղ ճանապարհը չես գտնի։ Այդ ժամանակ հավիտենապես զրկված ու կողոպտված կլինես, և ոչ ոք օգնության չի գա քեզ։ ³⁰ Կին կառնես, բայց մի ուրիշ տղամարդ նրան կխլի քեզանից։ Տուն կշինես, բայց ինքդ չես բնակվի նրա մեջ։ Այգի կտնկես, բայց բերքը չես քաղի։ ³¹ Քո արջառը կմորթվի քո առջև, բայց դու չես ուտի դրանից։ Քո էշը կգողանան քեզանից, և դու այն հետ չես ստանա։ Քո ոչխարը կմատնվի քո թշնամու ձեռքը, և ոչ ոք չի լինի, որ օգնի քեզ։ ³² Քո տղաներն ու աղջիկները օտար ազգի ձեռքը կմատնվեն. դու կկոցած աչքերով կնայես նրանց, և քո ձեռքը չի հասնի նրանց։ ³³ Քո երկրի բերքն ու քո ամբողջ վաստակը կուտի քեզ անծանոթ մի ազգ, և դու մշտապես զրկված ու խորտակված կմնաս։ ³⁴ Քո տեսնելիք արհավիրքներից կցնորվես։ ³⁵ Տերը ծնկներդ ու սրունքներդ, ոտքերիդ ծայրից մինչև գլուխդ անբուժելի խոցերով կվարակի, և դու չես կարողանա բուժվել։ ³⁶ Տերը քեզ և քո ժողովրդի վրա նշանակված իշխաններին կտանի կհանձնի այնպիսի մի ազգի ձեռքը, որին ո՛չ դու, ո՛չ քո հայրերն են ճանաչել, և այնտեղ կպաշտես օտար՝ փայտե ու քարե աստվածների։ ³⁷ Զվարճաբանության, առակի և ծաղրուծանակի նյութ կդառնաս բոլոր այն ազգերի մեջ, որոնց կհանձնի քեզ Տերը։ ³⁸ Շատ սերմ կցանես արտում, բայց քիչ բերք կհավաքես, որովհետև մորեխը կուտի այն։ ³⁹ Այգիներ կտնկես ու կմշակես, բայց գինի չես խմի, դրանցով չես ուրախանա, որովհետև որդը կուտի այգիդ։ ⁴⁰ Քո բոլոր սահմաններին ձիթենիներ կլինեն, բայց յուղով չես օծվի, որովհետև քո ձիթենիները բերք չեն տա։ ⁴¹ Տղաներ ու աղջիկներ կծնես, բայց նրանք քեզ չեն մնա, որովհետև գերության կմատնվեն։ ⁴² Քո բոլոր տնկած ծառերին ու հողի բերքին թրթուրը կհարվածի։ ⁴³ Քեզ մոտ բնակվող եկվորը քեզանից ավելի կբարձրանա, իսկ դու գնալով կիջնես։ ⁴⁴ Նա քեզ փոխ կտա, իսկ դու չես կարողանա նրան փոխ տալ։ Նա գլուխ կլինի, իսկ դու՝ վերջնամաս։ ⁴⁵ Քեզ վրա կիջնեն այս անեծքները, կհալածեն քեզ, մինչև որ կոտորեն, ոչնչացնեն քեզ, քանի որ ականջ չդրեցիր Տիրոջ՝ քո Աստծու ձայնին, չպահեցիր նրա այն պատվիրաններն ու օրենքները, որ նա պատվիրեց քեզ։ ⁴⁶ Քեզ ու քո սերնդի վրա հավիտյան նշաններ ու զարմանահրաշ գործեր կլինեն ⁴⁷ այն բանի փոխարեն, որ Տիրոջը՝ քո Աստծուն ուրախությամբ ու անկեղծ սրտով չպաշտեցիր ամեն ինչի առատության համար։ ⁴⁸ Դրա համար էլ ամեն տեսակ սովի, ծարավի, մերկության ու աղքատության մեջ կծառայես քո թշնամիներին, որ Տերը կուղարկի քո դեմ։ Նա երկաթե լուծ կդնի քո վզին, մինչև որ ոչնչացնի քեզ։ ⁴⁹ Քո դեմ կհանի մի ազգ, հեռու վայրերից՝ երկրի ծագերից, նման խոյացող արծվի, ազգ, որի լեզուն չես հասկանա։ ⁵⁰ Այդ ազգը դեմքով լպիրշ կլինի, ծերերին չի հարգի և մանուկներին չի խղճա։ ⁵¹ Նա կուտի քո հոտերից ծնված անասուններին և քո երկրի բերքը։ Նա կխլի քո ցորենը, գինին, յուղը, կվերցնի քո արջառների նախիրներն ու ոչխարների հոտերը, մինչև որ կորստյան մատնի քեզ։ ⁵² Քեզ կնեղի քո բոլոր քաղաքներում, մինչև որ տապալվեն քո բարձր պարիսպներն ու ամրությունները, որոնց վրա հույս ես դրել քո ամբողջ երկրում։ Քեզ կնեղի քո բոլոր այն քաղաքներում, որ Տերը՝ քո Աստվածը, տվեց քեզ։ ⁵³ Քո թշնամու՝ քեզ պատճառած տառապանքի ու նեղության ժամանակ կուտես քո որովայնի ծնունդները՝ Տիրոջ քեզ տված տղաներիդ ու աղջիկներիդ միսը։

⁵⁴ Ձեր մեջ գտնվող ամենափափկակյաց և նուրբ տղամարդը չար աչքով պիտի նայի իր եղբորը, ինչպես նաև իր ծոցում պառկող կնոջն ու ողջ մնացած իր որդիներին, ⁵⁵ և նրանցից ոչ մեկին չի տա իր որդիների մսից, որ ինքը կուտի։ Այսպես պիտի վարվի նա, որովհետև քո անձկության և նեղության մեջ, որոնցով պիտի նեղեն քեզ քո թշնամիները քո բոլոր քաղաքներում, նրան ուտելու ոչինչ չպիտի մնա։ ⁵⁶ Ձեր մեջ գտնվող ամենափափկակյաց և քնքուշ կինը, որը քնքուշ ու փափկակյաց լինելու պատճառով փորձ իսկ չի արել գետնի վրա ոտքով քայլելու, չար աչքով պիտի նայի իր ծոցում գտնվող ամուսնուն, իր տղային ու աղջկան։ ⁵⁷ Զրկված լինելու պատճառով նա իր անձկության և նեղության մեջ բոլորից թաքուն պիտի խորովի և ուտի իր միջից ընկած ընկերքն ու իր իսկ ծնած զավակին, որովհետև թշնամին քո բոլոր քաղաքներում քեզ տառապանք է պատճառելու։

⁵⁸ Եթե հանձն չառնեք կատարել այս գրքում գրված օրենքների բոլոր խոսքերը, չվախենաք Տիրոջ՝ ձեր Աստծու պատվական ու սքանչելի անունից, ⁵⁹ ապա Տերը նոր նշաններով, մեծ ու զարմանալի հարվածներով, խոր ու խիստ ցավերով կպատուհասի քեզ ու քո սերնդին։ ⁶⁰ Նա քեզ կհիվանդացնի եգիպտացիների բոլոր վատ հիվանդություններով, որոնցից սոսկում էիր, և որոնք բուն կդնեն քո մեջ։ ⁶¹ Օրենքների այս գրքում գրված բոլոր հիվանդություններն ու արհավիրքները Տերը կթափի քո գլխին, մինչև որ ոչնչացնի քեզ։ ⁶² Թեև երկնքի աստղերի չափ շատ էիք, բայց սակավաթիվ կմնաք, որովհետև չլսեցիք Տիրոջ՝ ձեր Աստծու ասածը։ ⁶³ Տերն ինչպես որ ուրախանում էր ձեր մեջ ձեզ բարություն անելով ու ձեզ բազմացնելով, Տերը նույն ձևով կուրախանա ձեզ կոտորելով, և դուք կվերանաք այն երկրից, ուր մտնելու եք՝ այն ժառանգելու։ ⁶⁴ Տերը՝ քո Աստվածը, քեզ կցրի բոլոր ազգերի մեջ՝ երկրի մի ծայրից մինչև մյուս ծայրը, և դու այնտեղ կպաշտես քեզ ու քո հայրերին անծանոթ փայտե ու քարե օտար աստվածների։ ⁶⁵ Այդ ազգերի մեջ էլ հանգստություն չի տա քեզ, և քո ոտքերը կանգնելու տեղ չեն ունենա։ Այնտեղ նա քեզ կտա տխուր սիրտ, արտասվաթոր աչքեր ու հյուծված հոգի։ ⁶⁶ Քո աչքերի առաջ քո կյանքը մազից կախված կլինի, գիշեր ու ցերեկ կզարհուրես ու վստահ չես լինի քո կյանքի համար։ ⁶⁷ Քո սրտի ապրած վախի ու քո աչքերի տեսած դեպքերի պատճառով առավոտները կասես. “Ե՞րբ է երեկո լինելու”, իսկ գիշերները կասես. “Ե՞րբ է առավոտ լինելու”։ ⁶⁸ Տերն այդտեղից նավերով, հազարավոր զորքերով քեզ կվերադարձնի Եգիպտոս այն նույն ճանապարհով, որն այլևս չէիք տեսնելու։ Այնտեղ ձեր թշնամիներին իբրև ստրուկ ու աղախին կվաճառվեք, բայց ոչ ոք ձեզ չի գնի»։

⁶⁹ Սրանք են ուխտի այն խոսքերը, որ Տերը պատվիրեց Մովսեսին հաստատել Իսրայելի որդիների հետ Մովաբի երկրում, բացի այն ուխտից, որ կնքել էր նրանց հետ Քորեբում։

29

Տիրոջ ուխտը Իսրայելի հետ

¹ Մովսեսը, կանչելով Իսրայելի բոլոր որդիներին, ասաց նրանց. «Դուք ինքներդ տեսաք այն ամենը, ինչ ձեր առաջ արեց Տերը Եգիպտոսում փարավոնի, նրա ծառաների ու նրա ամբողջ երկրի նկատմամբ. ² հզոր ձեռքով ու բարձր բազկով կատարված այն մեծամեծ փորձանքները, նշաններն ու զարմանահրաշ գործերը, որոնք տեսան ձեր աչքերը։ ³ Տերը՝ ձեր Աստվածը, մինչև այսօր ձեզ ո՛չ միտք տվեց, որ գիտենաք, ո՛չ աչքեր, որ տեսնեք, ո՛չ ականջ, որ լսեք։ ⁴ Քառասուն տարի նա ձեզ տարավ անապատով։ Ո՛չ ձեր զգեստները հնացան, ո՛չ ձեր ոտքերի կոշիկները մաշվեցին։

⁵ Հաց չկերաք և գինի ու ցքի չխմեցիք, որպեսզի համոզվեիք, որ ես՝ Տերս, ձեր Աստվածն եմ, ⁶ և եկաք մինչև այս վայրը։ Մեր դեմ պատերազմի ելան Եսեբոնի թագավոր Սեհովնը և Բասանի թագավոր Օվգը։ Հարվածեցինք նրանց ⁷ ու գրավեցինք նրանց երկիրը, և այն ժառանգություն տվեցի Ռուբենի ցեղին, Գադի ցեղին ու Մանասեի կես ցեղին։ ⁸ Հետևե՛ք, որ կատարեք այս ուխտի բոլոր խոսքերը, որպեսզի իմանաք այն ամենը, թե ինչ եք անելու։

⁹ Տիրոջ՝ ձեր Աստծու առջև այսօր ահա կանգնած եք դուք բոլորդ՝ ձեր ցեղապետները, ձեր ծերերը, ձեր դատավորները, ձեր ատենադպիրները, Իսրայելի բոլոր տղամարդիկ, ¹⁰ ձեր կանայք ու ձեր որդիները, ձեր մեջ բնակվող եկվորը, ձեր փայտահատից մինչև ձեր ջրկիրը, ¹¹ որպեսզի չխախտեք Տիրոջ՝ ձեր Աստծու ուխտը, որ Տերը՝ ձեր Աստվածը, ուխտեց ձեզ այսօր, և արժանանաք նրա նզովքներին, ¹² որպեսզի ձեզ դարձնի իր ժողովուրդը, և նա լինի ձեզ համար Աստված, ինչպես ասել է և ինչպես երդվել է ձեր հայրերին՝ Աբրահամին, Իսահակին ու Հակոբին։

¹³ Ես այս ուխտերն ու այս նզովքները ոչ միայն ձեզ համար եմ անում՝ ¹⁴ նրանց համար, ովքեր այսօր մեզ հետ են՝ Տիրոջ՝ մեր Աստծու առջև, այլ նաև նրանց համար, ովքեր այսօր մեզ հետ չեն։ ¹⁵ Դուք ինքներդ էլ գիտեք, թե ինչպես ապրեցինք եգիպտացիների երկրում, թե ինչպես անցանք այն ազգերի միջից, որոնց երկրով անցաք դուք։ ¹⁶ Դուք տեսաք նրանց գարշելի գործերն ու նրանց փայտե, քարե, արծաթե ու ոսկե կուռքերը։ ¹⁷ Ձեր մեջ թող չգտնվի այր կամ կին, ազգ կամ ցեղ, որի միտքը Տիրոջից՝ իր Աստծուց շեղված լինելով՝ գնա ու պաշտի այդ ազգերի կուռքերին։ Ձեր մեջ ոչ մեկը բուսած դառն ու դաժան արմատ չլինի։ ¹⁸ Եթե լինի մեկը, որ, լսելով այս նզովքի պատգամները, մտածի ու ասի՝ “Թողություն կլինի ինձ, թեև ես իմ մոլոր ճամփով եմ ընթանում”, այդ դեպքում մեղավորն անմեղին կորստյան կմատնի։ ¹⁹ Աստված չի ուզենա ներել նրան, այլ կբորբոքվեն նրա բարկությունն ու նախանձը այդ մարդու վրա, նրա վրա կթափվեն այս օրենքների գրքում գրված այս ուխտի բոլոր նզովքները, և Տերը նրա անունը կջնջի երկրի վրայից։ ²⁰ Ըստ այս օրենքների գրքում գրված այս ուխտի բոլոր նզովքների՝ Տերը նրան կմեկուսացնի Իսրայելի բոլոր որդիներից, որպեսզի չարիք հասցնի նրան։ ²¹ Եվ մյուս ազգերը, ձեզանից հետո եկող ձեր որդիները, հեռու երկրներից եկած օտարները, տեսնելով այդ երկրում տիրող արհավիրքները, նրանց վրա Տիրոջ ուղարկած հիվանդությունները, կասեն. ²² “Ողջ հողը այրվել է ծծումբով ու աղով, ոչ մի բան չի ցանվի նրա հողի մեջ ու չի բուսնի, և ոչ մի դալար բույս չի բարձրանա այդ հողից։ Երկիրը լինելու է Սոդոմի ու Գոմորի, Ադամայի ու Սեբոյիմի նման, որոնք Տերը կործանեց սրտմտությամբ ու բարկությամբ”։ ²³ Եվ բոլոր ազգերը կասեն. “Ինչո՞ւ Տերն այդպես արեց այդ երկրին, ո՞րն է նրա խոր զայրույթի և այդ բարկության պատճառը”։ ²⁴ Ու կասեն. “Որովհետև լքեցին իրենց հայրերի Աստծու ուխտը, որ Տերը ուխտել էր նրանց հայրերի հետ, երբ նրանց դուրս բերեց եգիպտացիների երկրից։ ²⁵ Նրանք գնացին պաշտեցին օտար աստվածների, երկրպագեցին նրանց, որոնց չգիտեին և որոնց Աստված չէր տվել նրանց։ ²⁶ Տերը սրտմտությամբ բարկացավ այդ երկրի վրա՝ դրա վրա թափեց այս օրենքների մատյանի մեջ գրված ուխտի բոլոր նզովքները։ ²⁷ Տերը շատ խիստ բարկությամբ, սրտմտությամբ ու զայրույթով նրանց վերացրեց իրենց երկրից և նրանց մինչև այսօր նետել է օտար երկիր”։ ²⁸ Գաղտնի բաները Տիրոջը՝ մեր Աստծունն են, իսկ հայտնիները՝ մերն ու մեր որդիներինը հավիտյան. կատարենք այս օրենքների բոլոր խոսքերը»։

30

Իսրայելը պիտի վերադառնա Աստծուն

¹ «Երբ իրականանան իմ այս բոլոր պատգամները կամ օրհնությունները և կամ անեծքները, որ ներկայացրի ձեզ, և հոգուդ մեջ պահես դրանք այն բոլոր ազգերի մեջ, ուր Տերը քեզ ցրելու է, ² և դառնաս դեպի Տերը՝ քո Աստվածը, քո ամբողջ սրտով ու քո ամբողջ հոգով, և լսես նրա բոլոր պատգամները, որոնք ես հաղորդում եմ քեզ այսօր, ³ Տերը կների քո բոլոր մեղքերը, կողորմի քեզ և դարձյալ կհավաքի քեզ բոլոր այն ժողովուրդների միջից, որոնց մեջ ցրել էր Տերը քեզ։ ⁴ Անգամ եթե դու ցրիվ ես եկել երկրի մի ծայրից մինչև մյուս ծայրը, կհավաքի քեզ Տերը՝ քո Աստվածը։ ⁵ Այնտեղից Տերը՝ քո Աստվածը, կվերցնի քեզ, և Տերը՝ քո Աստվածը, քեզ կբերի քո հայրերի ժառանգած երկիրը։ Կժառանգես այն, քեզ համար լավ կլինի, և Աստված քեզ քո հայրերից տասնապատիկ ավելի կբազմացնի։ ⁶ Տերը կմաքրի քո ու քո սերնդի սիրտը, որպեսզի Տիրոջը՝ քո Աստծուն սիրես քո ամբողջ սրտով ու քո ամբողջ հոգով, որպեսզի ապրեք դու և քո սերունդը։ ⁷ Այն ժամանակ Տերը՝ քո Աստվածը, այս նզովքները կթափի քո թշնամիների ու քեզ ատողների գլխին, որոնք հալածելու են քեզ։ ⁸ Դու կդառնաս ու կլսես Տիրոջ՝ քո Աստծու խոսքը և կկատարես նրա պատվիրանները, որոնք ես այսօր պատգամում եմ քեզ։ ⁹ Տերը՝ քո Աստվածը, հաջողություն կպարգևի քեզ քո ձեռնարկած բոլոր գործերում՝ քո որովայնի ծնունդներով, քո երկրի բերքով ու քո անասունների ծնունդներով։ Տերը՝ քո Աստվածը, դարձյալ կդառնա դեպի քեզ, կուրախանա քեզ բարություն անելով, ինչպես քո հայրերի համար էր ուրախացել, ¹⁰ եթե ականջ դնես Տիրոջ՝ քո Աստծու ձայնին՝ պահես ու կատարես այս օրենքների գրքում գրված նրա բոլոր պատվիրանները, նրա օրենքներն ու նրա կանոնները, Տիրոջը՝ քո Աստծուն, վերադառնաս քո ամբողջ սրտով և քո ամբողջ հոգով։

¹¹ Այն պատվիրանները, որոնք այսօր ես հաղորդում եմ քեզ, ո՛չ դժվար են, ո՛չ էլ քեզ անմատչելի։ ¹² Դրանք ո՛չ երկնքում են, որ ասես. “Մեզնից ո՞վ կելնի երկինք, որ վերցնի դրանք, որ լսենք և կատարենք”, ¹³ ո՛չ էլ ծովի մյուս ափին, որ ասես. “Ո՞վ պիտի անցնի ծովի մյուս կողմը, որ մեզ համար վերցնի դրանք, մեզ համար կարդա, և մենք կատարենք”։ ¹⁴ Քեզ չափազանց մոտիկ է այդ խոսքը. քո բերանում և քո սրտում է, և քեզանից է կախված դա կատարելը։

Երկու ճանապարհներ

¹⁵ Այսօր ահա քո առջևն եմ դնում կյանքն ու մահը, բարին ու չարը։ ¹⁶ Եթե լսես Տիրոջ՝ մեր Աստծու պատվիրանները, որ ես այսօր հաղորդում եմ քեզ, սիրես Տիրոջը՝ քո Աստծուն, ընթանաս նրա ճանապարհներով, պահես նրա օրենքները, նրա պատվիրաններն ու նրա կանոնները, կապրեք ու բազմամարդ կլինեք, և Տերը՝ քո Աստվածը, կօրհնի քեզ ողջ երկրում, ուր կմտնես՝ այն ժառանգելու համար։ ¹⁷ Իսկ եթե քո սիրտը փոխվի, և չլսես, մոլորվելով երկրպագես օտար աստվածների ու պաշտես դրանք, ¹⁸ ապա այսօր քեզ հայտնում եմ, որ կկորչեք, երկար չեք մնա այն երկրում, ուր դուք կանցնեք Հորդանան գետը կտրելով՝ այն ժառանգելու։ ¹⁹ Այսօր ձեզ վկա ունեմ երկինքն ու երկիրը, ձեր առջևն եմ դնում կյանքն ու մահը, օրհնություններն ու անեծքները։ Ընտրի՛ր կյանքը, որպեսզի ապրեք դու և քո սերունդը։ ²⁰ Ընտրի՛ր Տիրոջը՝ քո Աստծուն սիրելը, նրա ձայնին անսալը, նրան կապված մնալը, որովհետև այդ է քո կյանքն ու քո երկարակեցությունը, որպեսզի բնակվես այն երկրում, որ Տերը երդվեց քո հայրերին՝ Աբրահամին, Իսահակին ու Հակոբին, որ կտա նրանց»։

31

Հեսուն՝ Մովսեսի հաջորդը

(Թվ. 27.12-23)

¹ Մովսեսը ավարտեց այս բոլոր պատգամները Իսրայելի որդիներին հաղորդելը։ ² Ապա նրանց ասաց. «Այսօր ես հարյուր քսան տարեկան եմ, այլևս չեմ կարող ելնել ու մտնել։ Որովհետև Տերն ինձ ասել է՝ “Հորդանան գետը չես անցնի”։ ³ Տերը՝ քո Աստվածը, կընթանա քո առջևից, նա քո առջևից կվերացնի այդ ազգերին, և դու կտիրես նրանց։ Հեսուն պիտի առաջնորդի քեզ, ինչպես ասել է Տերը։ ⁴ Տերը նրանց հետ պիտի վարվի այնպես, ինչպես վարվեց Սեհովնի ու Օվգի հետ՝ Հորդանան գետի այն կողմում գտնվող ամորհացի երկու թագավորների ու նրանց երկրի հետ, ինչպես որ կոտորեցինք նրանց։ ⁵ Տերը նրանց պիտի հանձնի ձեր ձեռքը, և դուք նրանց հետ պիտի վարվեք այնպես, ինչպես պատվիրել եմ ձեզ։ ⁶ Քա՛ջ եղիր ու զորացի՛ր, մի՛ երկնչիր ու մի՛ վախեցիր, մի՛ զարհուրիր նրանցից, քանի որ Տերը՝ քո Աստվածն ինքը, պիտի գնա ձեր առջևից, ձեր մեջ։ Նա չի լքելու ձեզ ու չի անտեսելու ձեզ»։

⁷ Մովսեսը կանչեց Հեսուին ու Իսրայելի բոլոր որդիների առջև նրան ասաց. «Քա՛ջ եղիր ու զորացի՛ր, որովհետև դու պիտի առաջնորդես այս ժողովրդին՝ մտնելու այն երկիրը, որ Տերը՝ ձեր հայրերի Աստվածը, երդվեց տալ նրանց, և դու պիտի այն նրանց ժառանգել տաս։ ⁸ Տերը, որ գնալու է քո առջևից, չի լքելու և չի անտեսելու քեզ։ Մի՛ երկնչիր, մի՛ վախեցիր»։

Օրենքը պիտի կարդացվի ամեն յոթ տարին մեկ

⁹ Մովսեսն այս օրենքների բոլոր խոսքերը գրեց մատյանում, այն տվեց քահանաներին՝ Ղևիի որդիներին, որոնք վերցնում էին Տիրոջ Ուխտի տապանակը, և Իսրայելի որդիների ծերերին։ ¹⁰ Մովսեսն այդ օրը նրանց պատվիրեց՝ ասելով. «Ամեն յոթ տարին մեկ՝ թողության տարում, Տաղավարահարաց տոնին, ¹¹ երբ ամբողջ Իսրայելը հավաքվի, Տիրոջ՝ քո Աստծու առջև կանգնելու համար, այն վայրում, որ կընտրի Տերը, այս օրենքները կկարդաք Իսրայելի որդիներին ի լուր, ¹² երբ ժողովուրդը՝ տղամարդիկ, կանայք, երեխաներն ու ձեր քաղաքներում գտնվող եկվորները, հավաքված կլինեն, որպեսզի լսեն ու սովորեն երկնչել Տիրոջից՝ մեր Աստծուց և սովորեն կատարել այս օրենքի բոլոր պատգամները։ ¹³ Նրանց որդիները, որոնք չգիտեն, թող լսեն ու սովորեն երկնչել Տիրոջից՝ մեր Աստծուց, այն բոլոր ժամանակ, որքան որ կապրեն այն երկրում, որ դուք Հորդանան գետով անցնելով՝ պիտի ժառանգեք»։

Իսրայելի անհնազանդությունը

¹⁴ Տերն ասաց Մովսեսին. «Ահա մոտեցան քո մահվան օրերը։ Կանչի՛ր Հեսուին և կանգնե՛ք Վկայության խորանի դռանը, որպեսզի պատվեր տամ նրան»։ Մովսեսն ու Հեսուն գնացին դեպի Վկայության խորանը և կանգնեցին Վկայության խորանի դռանը։ ¹⁵ Տերն իջավ ամպի սյունով ու կանգնեց Վկայության խորանի դռանը. ամպի սյունը կանգնեց խորանի դռանը։ ¹⁶ Տերն ասաց Մովսեսին. «Ահա դու պիտի ննջես քո հայրերի հետ, և այս ժողովուրդը պիտի ելնի ու պոռնկանա՝ հետևելով օտար աստվածներին այն երկրի, ուր պիտի մտնի։ Եվ պիտի լքեն ինձ ու խախտեն իմ ուխտը, որ կնքեցի նրանց հետ։ ¹⁷ Այդ օրը սրտմտությամբ պիտի բարկանամ նրանց վրա, պիտի լքեմ նրանց, երեսս պիտի թեքեմ նրանցից, նրանք թշնամիների կեր պիտի դառնան, բազում չարիքներ ու նեղություններ պիտի գտնեն ու այդ օրը պիտի ասեն. “Այս չարիքները մեզ վրա թափվեցին, քանի որ Տերը՝ մեր Աստվածը, մեզ հետ չէ”։ ¹⁸ Ես այդ օրը իմ երեսը պիտի դարձնեմ նրանցից բոլոր այն չարիքների համար, որ նրանք գործեցին, քանի որ հարեցին օտար աստվածների։

¹⁹ Ուրեմն գրե՛ք օրհներգության այս խոսքերը, դրանք սովորեցրե՛ք Իսրայելի որդիներին, դրանք դրե՛ք նրանց բերանը, և այդ օրհներգությունն Իսրայելի որդիների մեջ ինձ համար վկայություն թող լինի։ ²⁰ Արդարև, ես նրանց տանելու եմ այն բարեբեր երկիրը, որ երդվել եմ նրանց հայրերին, մի երկիր, որ կաթ ու մեղր է բխեցնում։ Թող ուտեն ու լիուլի հագենան։ Հետո նորից պիտի հարեն օտար աստվածների, պիտի պաշտեն դրանց, պիտի զայրացնեն ինձ ու դրժեն իրենց հետ կնքած իմ ուխտը։ ²¹ Այն ժամանակ այդ օրհներգությունն իբրև վկայություն նրանց դեմ պիտի ելնի, նրանք ու նրանց հետնորդները չպիտի մոռանան դա։ Ես գիտեմ նրանց չարությունը, որ նրանք գործեցին այսօր այստեղ, նախքան ես նրանց կտանեմ այն բարեբեր երկիրը, որը խոստացա նրանց հայրերին»։

²² Այդ օրը Մովսեսը գրեց այս օրհներգությունը և այն սովորեցրեց Իսրայելի որդիներին։

²³ Մովսեսը Նավեի որդի Հեսուին պատվիրեց՝ ասելով. «Քա՛ջ եղիր ու զորացի՛ր, որովհետև Իսրայելի որդիներին դու ես տանելու այն երկիրը, որ Տերը խոստացավ տալ նրանց, և նա քեզ հետ է լինելու»։

²⁴ Երբ Մովսեսն այս օրենքների բոլոր խոսքերը մինչև վերջ գրեց մատյանի մեջ ու ավարտեց, ²⁵ պատվիրեց ղևտացիներին, որոնք կրում էին Տիրոջ Ուխտի տապանակը, և ասաց. ²⁶ «Օրենքների այս մատյանն առե՛ք և դրե՛ք Տիրոջ՝ մեր Աստծու Ուխտի տապանակի մի կողմում։ Դա այնտեղ ձեզ համար վկայություն թող լինի։ ²⁷ Ես գիտեմ ձեր ըմբոստությունն ու կամակորությունը. եթե այսօր, երբ ես կենդանի եմ ու ձեր մեջ, և դուք Աստծու դեմ ապստամբում եք, ապա իմ մահվանից հետո ինչե՜ր կանեք։ ²⁸ Արդ, ինձ մոտ հավաքե՛ք ձեր ցեղապետներին ու ծերերին, ձեր դատավորներին ու ատենադպիրներին, որպեսզի նրանց ասեմ բոլոր այս խոսքերը և ձեր դեմ վկա ունենամ երկինքն ու երկիրը։ ²⁹ Գիտեմ, որ իմ մահվանից հետո անպայման անօրենություններ եք անելու, շեղվելու եք այն ճանապարհից, որ ես ձեզ պատվիրեցի, և վերջին օրերին ձեզ չարիքներ պիտի պատահեն, որովհետև չար գործ եք կատարելու Տիրոջ առջև՝ ձեր ձեռնարկած գործերով բարկացնելու եք նրան»։

³⁰ Եվ Մովսեսն ասաց Իսրայելի հավաքված բոլոր որդիներին օրհներգության այս խոսքերը, մինչև վերջ։

32

Մովսեսի օրհներգությունը

¹ «Նայի՛ր, երկի՛նք, խոսելու եմ,

և երկիրը թող լսի իմ բերանի պատգամները։

² Իմ խոսքը թող ընդունվի անձրևի նման,

և պատգամները թող իջնեն իբրև ցող,

իբրև սեզի վրա տեղացող անձրև

ու խոտի վրա տեղացող տեղատարափ,

³ որովհետև կանչել եմ Տիրոջ անունը։

Օրհնությո՛ւն առաքեք Տիրոջը՝ մեր Աստծուն,

⁴ Աստված, որի գործերը ճշմարիտ են,

ու նրա ուղիները՝ օրինավոր։

Աստված հավատարիմ է,

և նրա մեջ անիրավություն չկա,

Տերն արդար է ու անարատ։

⁵ Մեղք գործեցին,

այլևս նրա որդիները չեն այս արատավորները,

սա թյուր ու մոլորված մի ազգ է։

⁶ Ինչո՞ւ եք Տիրոջը այդպես հատուցում,

հիմար ու անմի՛տ ժողովուրդ,

Մի՞թե նա այն հայրը չէ,

որ քեզ ձեռք բերեց, քեզ արարեց ու մեծացրեց քեզ։

⁷ Հիշի՛ր անցած օրերը,

մտաբերի՛ր անցած սերունդների տարիները,

հարցրո՛ւ քո հայրերին, և նրանք քեզ կպատմեն,

քո ծերերին, և նրանք քեզ կասեն։

⁸ Երբ Բարձրյալն իրարից բաժանեց բոլոր ազգերին,

երբ սփռեց Ադամի որդիներին,

ազգերի սահմանները սահմանեց ըստ Աստծու հրեշտակների թվի։

⁹ Տիրոջ բաժինը եղավ իր ժողովուրդը՝ Հակոբը,

իսկ իր ժառանգության վիճակը՝ Իսրայելը։

¹⁰ Նա հոգաց նրա պետքերն անապատում,

ջրից զուրկ վայրում,

ծարավեցնող տոթից պաշտպանեց նրան,

խրատեց ու աչքի բիբի պես պահեց նրան։

¹¹ Իր բույնն ու իր ձագերին թևի տակ առնող արծվի նման գթաց,

տարածեց իր թևերն ու ընդունեց նրան,

և իր մեջքին դրած բարձրացրեց նրան։

¹² Միայն Տերն էր առաջնորդում նրանց,

և նրանց հետ օտար աստված չկար։

¹³ Նրանց հաստատեց երկրի բարձրաբերձ վայրերում,

նրանց կերակրեց դաշտերի բերքով,

ժայռից ծորող մեղրով ու ապառաժ քարից հոսող յուղով կերակրեց նրանց։

¹⁴ Նրանց տվեց կովերի կարագ ու մաքիների կաթ,

գառների, խոյերի, ցուլերի ու նոխազների ճարպ,

և ընտիր ցորենի ալյուր, որ նման է ճարպոտ երիկամների,

և ըմպեցին խաղողի արյուն՝ գինի։

¹⁵ Հակոբը կերավ ու հագեցավ,

ճարպակալեց ու գոռոզացավ այդ սիրելի մարդը։

Գիրացավ, հաստացավ ու լայնացավ,

լքեց Տիրոջը՝ Աստծուն՝ իր Արարչին,

և ապստամբեց Աստծու՝ իր Փրկչի դեմ։

¹⁶ Ինձ բարկացրին օտար աստվածներով

և իրենց գարշելի պաշտամունքով դառնացրին ինձ։

¹⁷ Զոհ մատուցեցին դևերին և ոչ թե Աստծուն,

կուռքերին, որոնց չէին ճանաչում,

որոնք նոր էին ու ժամանակավոր,

և որոնց չէին ճանաչում ձեր հայրերը։

¹⁸ Դու լքեցիր Աստծուն, որը ծնեց քեզ,

մոռացար Աստծուն՝ քեզ կերակրողին։

¹⁹ Տերը տեսավ ու վրդովվեց,

սրտմտեց իր տղաների ու աղջիկների բարկացնող արարքների համար։

²⁰ Եվ ասաց. Իմ երեսը կթեքեմ նրանցից և նրանց ցույց կտամ,

թե ի՛նչ կլինի նրանց վախճանը,

որովհետև սրանք մոլորված ազգ են,

հավատ չունեցող որդիներ։

²¹ Նրանք իմ նախանձը շարժեցին՝ պաշտելով չաստվածների,

ինձ բարկացրին իրենց կուռքերով,

ուրեմն ես էլ նրանց նախանձը կգրգռեմ ազգ չեղող մարդկանցով,

նրանց կբարկացնեմ անմիտ ժողովրդով։

²² Իմ բարկությունից հուր է բորբոքվել։

Դա կայրի մինչև դժոխքի խորքերը,

կլափի հողն ու նրա բերքը,

կբորբոքի լեռների հիմքերը։

²³ Նրանց վրա չարիք պիտի կուտակեմ

ու իմ նետերն սպառեմ նրանց վրա։

²⁴ Նրանք պիտի հյուծվեն սովից ու թռչունների չափաբաժին ուտելուց։

Անբուժելի հիվանդություններ

և գազանների ժանիքներ

և երկրի երեսին բարկությամբ սողացողների

պիտի ուղարկեմ նրանց վրա։

²⁵ Դրսից սուրը թող նրանց անզավակ դարձնի,

իսկ ներսից երկյուղը սպանի երիտասարդներին ու կույս աղջիկներին,

մանուկներին ու ալևոր ծերերին։

²⁶ Նրանց կցրեի,

մարդկանց միջից կվերացնեի նրանց հիշատակը,

²⁷ եթե չլիներ թշնամիների զայրույթը.

չլինի թե հակառակորդները երկար ապրեն ու ասեն.

“Ոչ թե Տերն արեց այս ամենը,

այլ մեր բարձր ձեռքերը”։

²⁸ Սրանք անխոհեմ ազգ են,

ու նրանց մեջ իմաստություն չկա։

²⁹ Նրանք չխորհեցին մտքում ունենալ այս.

արդ, կստանան ապագայում։

³⁰ Մի մարդ ինչպե՞ս կարող է հալածել հազարին,

և երկուսը՝ հետապնդել տասը հազարին,

եթե Աստված նրանց չլքի,

եթե Տերը նրանց կորստյան չմատնի։

³¹ Նրանց աստվածները մեր Աստծու նման չեն,

իսկ մեր թշնամիներն անխոհեմ են։

³² Սոդոմի որթատունկից է նրանց որթատունկը,

իսկ նրանց վազը՝ Գոմորից։

Նրանց խաղողը լեղի է,

նրանց ողկույզը՝ դառն։

³³ Նրանց գինին վիշապների ժահր է և իժերի մահառիթ թույն։

³⁴ Մի՞թե այս ամենն ինձ մոտ չի հավաքված

և կնքված չի պահվում իմ գանձարանում։

³⁵ Կհատուցեմ վրեժխնդրության օրը,

այն ժամանակ, երբ նրանք կշեղեն իրենց ուղին,

որովհետև մոտ է նրանց կորստյան օրը,

և ձեր դատաստանը պատրաստ է։

³⁶ Տերը դատելու է իր ժողովրդին

և մխիթարվելու է իր ծառաներով,

որովհետև տեսել է, որ նրանք հյուծված են,

լքված ու գերության մատնված։

³⁷ Եվ Տերը պիտի ասի. Որտե՞ղ են նրանց աստվածները,

որոնց ապավինում էին,

³⁸ որոնց զոհերի ճարպն էիք ուտում,

նրանց նվիրաբերումների գինին խմում։

Թող վեր կենան, օգնեն, պաշտպան կանգնեն ձեզ։

³⁹ Տեսե՛ք, տեսե՛ք, որ ես եմ միայն,

և ինձանից բացի ուրիշը չկա։

Ես եմ սպանում և ես եմ փրկում,

ես եմ հարվածում և ես եմ բժշկում։

Չկա մեկը, որ կարողանա փրկել իմ ձեռքից։

⁴⁰ Ձեռքս երկինք բարձրացնելով՝ երդվում եմ իմ աջով ու ասում.

Կենդանի եմ ես հավիտյան,

⁴¹ որովհետև իմ սուսերը սրելու եմ կայծակի նման,

իմ ձեռքն է կայացնելու դատաստանի վճիռը,

և իմ թշնամիներից ես պիտի վրեժ լուծեմ։

Հատուցելու եմ նաև ինձ ատելի մարդկանց։

⁴² Իմ նետերն արյամբ պիտի հագենան,

իսկ իմ սուրը պիտի ուտի միսը և արյունը վիրավորների և գերիների

և գլուխները ինձ թշնամի իշխանների։

⁴³ Երկի՛նք, ուրախացի՛ր Նրա հետ,

Նրան թող երկրպագեն Աստծու բոլոր որդիները։

Ազգե՛ր, ուրախացե՛ք Նրա ժողովրդի հետ,

նրան թող զորացնեն Աստծու բոլոր հրեշտակները,

որովհետև նրա որդիների արյան վրեժն է պահանջվում.

թշնամիների վրեժն է պահանջվելու,

և դատաստան է արվելու։

Թող ատելի մարդկանց հատուցի,

և Տերը թող սրբագործի իր ժողովրդի երկիրը»։

⁴⁴ Մովսեսն այս օրհներգությունները գրեց այդ օրը և այն սովորեցրեց Իսրայելի որդիներին։ Մովսեսը մտավ ժողովրդի մեջ, և ինքն ու Նավեի որդի Հեսուն օրենքի բոլոր խոսքերը լսելի դարձրին ժողովրդի ականջին։ ⁴⁵ Մովսեսն այս խոսքերը Իսրայելի բոլոր որդիներին հաղորդելուց հետո ⁴⁶ նրանց ասաց. «Ձեր սրտում պահե՛ք բոլոր այն խոսքերը, որոնք ես այսօր վկայություն եմ դնում ձեր առջև։ Դրանք պատվիրե՛ք ձեր որդիներին, որպեսզի պահեն ու կատարեն օրենքի բոլոր խոսքերը։ ⁴⁷ Սա ոչ թե դատարկ խոսք է, այլ ձեր կյանքն է։ Դրանով դուք երկար կապրեք այն երկրում, որ դուք, անցնելով Հորդանան գետը, պիտի ժառանգեք»։

⁴⁸ Տերը, նույն օրը խոսելով Մովսեսի հետ, ասաց. ⁴⁹ «Բարձրացի՛ր Աբարիմ լեռնաշղթայի Նաբավ լեռը, որը գտնվում է Մովաբի երկրում՝ Երիքովի դիմաց, և դիտի՛ր այն երկիրը, որ տալու եմ Իսրայելի որդիներին իբրև ժառանգություն։ ⁵⁰ Եվ վախճանվի՛ր այն լեռան վրա, որ պիտի ելնես, ու միացի՛ր քո ժողովրդին, ինչպես որ Հովր լեռան վրա մեռավ քո եղբայր Ահարոնն ու միացավ իր ժողովրդին։ ⁵¹ Քանի որ անտեսեցիք իմ խոսքերը և Իսրայելի որդիների աչքում չսրբացրիք ինձ, երբ գտնվում էիք Հակառակության ջրերի [*  Մե-Մերիվա] մոտ, Կադեսում՝ Սին անապատում, ⁵² դիմացի՛ց պիտի տեսնես այդ երկիրը, բայց այնտեղ չպիտի մտնես»։

33

Մովսեսն օրհնում է Իսրայելի տասներկու ցեղերը

¹ Այս է այն օրհնությունը, որով Մովսեսը՝ Աստծու մարդը, նախքան մեռնելը օրհնեց Իսրայելի որդիներին՝ ² ասելով.

«Տերը եկավ Սինայից

և մեզ երևաց Սեիրից։

Նա փութաց Փառանի լեռից դեպի Կադես՝

աջ կողմում ունենալով բյուր հրեշտակների,

³ որովհետև գթաց իր ժողովրդին։

Բոլոր նրանք, որ սրբագործված են,

Քո ձեռքի հովանու տակ են.

Նրանք քո ենթակայությամբ են։

⁴ Եվ ընդունեց նրա խոսքերից օրենքներ,

որոնք մեզ հաղորդեց Մովսեսը՝

իբրև հոգևոր ժառանգություն Հակոբի ցեղերին։

⁵ Եվ կլինի իշխան իր սիրեցյալների մեջ,

երբ ժողովրդի իշխանները հավաքվեն Իսրայելի ցեղերի հետ։

⁶ Ռուբենը թող ապրի և չմեռնի,

և թող թվով բազմաքանակ լինի»։

⁷ Հուդայի մասին ասաց հետևյալը.

«Տե՜ր, լսի՛ր Հուդայի ձայնը և այցելի՛ր նրա ժողովրդին։

Թող իր ձեռքերով պաշտպանի իրեն,

իսկ դու օգնակա՛ն եղիր նրան թշնամիների դեմ»։

⁸ Ղևիի մասին ասաց.

«Ղևիին տվե՛ք նրա Հայտնությունը,

և նրա Ճշմարտությունը,

այն անարատ մարդուն,

որին փորձեցին Փորձությունում [* Մասսա]

ու Հակառակության ջրերի [* Մե-Մերիվա] վրա բամբասեցին նրան,

⁹ որ ասում էր իր հորն ու իր մորը,

թե՝ “Քեզ չեմ տեսել”,

և չճանաչեց իր եղբայրներին

ու իր որդիներին անտեսեց,

հետևեց քո խոսքերին ու պահեց քո ուխտը։

¹⁰ Քո իրավունքները կպատմեն Հակոբին,

քո օրենքները՝ Իսրայելին։

Քո զոհասեղանի վրա նրանք մշտապես խունկ պիտի ծխեն

քո արդար բարկությունը մեղմելու համար։

¹¹ Տե՜ր, օրհնի՛ր նրա զորությունը և ընդունի՛ր նրա ձեռքի գործերը։

Ջարդի՛ր նրա վրա հարձակվող թշնամիների մեջքը,

որպեսզի նրան ատող մարդիկ ոտքի չկանգնեն»։

¹² Բենիամինի մասին ասաց.

«Տիրոջ սիրելին ապահով թող ապրի.

Աստված նրան հովանի թող լինի ամեն օր,

և Նա նրա ուսերին կհանգստանա»։

¹³ Հովսեփի մասին ասաց.

«Տերն օրհնել է նրա երկիրը,

ապահովել երկնքի անձրևով ու ցողով,

անդունդների ընդերքից բխող աղբյուրներով,

¹⁴ արեգակի փոփոխությունից կախված բերքով,

ամպերը միմյանց վրա կուտակելով,

¹⁵ հինավուրց լեռների գագաթներով,

մշտնջենական բլուրների կատարներով,

¹⁶ երկրի եղանակի համեմատ տրվող առատությամբ։

Մորենու մեջ երևացած Աստծու հաճությունը թող իջնի Հովսեփի գլխին՝

եղբայրների մեջ փառավորվածի գագաթին։

¹⁷ Նա գեղեցիկ է ցուլի առաջնածինի նման,

նրա եղջյուրները նման են միեղջերուի եղջյուրների։

Դրանցով նա թող պոզահարի բոլոր ազգերին

մինչև երկրի հեռավոր անկյունները։

Սրանք են Եփրեմի բյուրավորները,

և սրանք են Մանասեի հազարավորները»։

¹⁸ Զաբուղոնի մասին ասաց.

«Ուրախացի՛ր, Զաբուղո՛ն, երբ ելնում ես»։

Իսաքարի մասին ասաց.

¹⁹ «Իր բնակավայրում ազգեր պիտի կոտորվեն։

Այդտեղ կանչե՛ք ու արդարության զոհեր մատուցե՛ք,

որովհետև ծովի հարստությունն ու

ծովեզերքի մոտ բնակվող մարդկանց վաճառքի շահը

կարող են քեզ կերակրել»։

²⁰ Գադի մասին ասաց.

«Թող օրհնյալ լինի Նա, ով ընդարձակեց Գադի երկիրը։

Նա հանգստացավ առյուծի պես.

խորտակեց բազուկներ ու իշխաններ

²¹ և տեսավ իր իշխանությունը,

որովհետև այնտեղ բաժանվեց

Իսրայելի առաջնորդների հետ միացած իշխանների երկիրը,

և Տերն իր արդարությունն ու դատաստանը գործադրեց ի նպաստ Իսրայելի»։

²² Դանի մասին ասաց.

«Դանը առյուծի կորյուն է

և հարձակվելու է Բասանից»։

²³ Նեփթաղիմի մասին ասաց.

«Նեփթաղիմը հագեցած է բարիքներով։

Նա թող լցվի Տիրոջ օրհնություններով,

թող ժառանգի ծովն ու հարավը»։

²⁴ Ասերի մասին ասաց.

«Իր որդիներից ամենաօրհնվածը Ասերն է,

և ամենասիրվածը՝ իր եղբայրների կողմից,

իր ոտքը թող լողա յուղի մեջ։

²⁵ Նրա կոշիկները երկաթից ու պղնձից թող լինեն։

Քո զորությունը քո բոլոր օրերի չափ թող լինի։

²⁶ Քո սիրելի Աստծու նման այլ աստված չկա,

որը քայլում է երկնքում իբրև քեզ օգնական՝

երկնքի հաստատության ամենակալը։

²⁷ Աստծու իշխանությունն ու նրա բազուկների մշտնջենավոր զորությունը

քեզ հովանի թող լինեն։

Նա քո առջևից թող հալածի թշնամուն և ասի՝ կորի՛ր։

²⁸ Իսրայելը թող բնակվի ապահով ու առանձին,

Հակոբի աղբյուրը թող հոսի առանձին

դեպի ցորենի ու գինու երկիրը,

իսկ երկինքը նրա համար ցողի շտեմարան թող լինի։

²⁹ Երանի՜ քեզ, Իսրայե՛լ.

ո՞վ կարող է նմանվել քեզ,

ո՜վ Տիրոջ ընտրյալ ժողովուրդ։

Քեզ օգնողը թող պաշտպանի քեզ, իսկ քո սուրը քո պարծանքը թող լինի։

Թող գան քո թշնամիները, և դու բարձրանալու ես նրանց պարանոցին»։

34

Մովսեսի մահը

¹ Մովսեսը Մովաբի հովտից բարձրացավ Նաբավ լեռը՝ Փոգովրի գագաթը, որ գտնվում է Երիքովի դիմաց։ Տերը նրան ցույց տվեց Գաղաադի ամբողջ երկիրը մինչև Դան, ² Նեփթաղիմի ամբողջ երկիրը, Եփրեմի ու Մանասեի ամբողջ երկիրը, Հուդայի ամբողջ երկիրը մինչև հեռավոր ծովը, ³ անապատն ու շրջակայքը Երիքովի՝ Արմավենիների քաղաքի, մինչև Սեգովր։ ⁴ Եվ Տերն ասաց Մովսեսին. «Այս է այն երկիրը, որ երդվելով Աբրահամին, Իսահակին ու Հակոբին՝ ասել եմ. “Քո հետնորդներին եմ տալու դա”։ Այս երկիրը ցույց եմ տալիս քեզ, բայց դու այնտեղ չես մտնելու»։ ⁵ Եվ Տիրոջ ծառա Մովսեսը վախճանվեց Մովաբի երկրում, Տիրոջ խոսքի համաձայն։ ⁶ Նրան թաղեցին Գայիում, Փոգովրի տան մոտ, և ոչ ոք մինչև այսօր չգիտի, թե որտե՛ղ է նրա գերեզմանը։ ⁷ Մովսեսը հարյուր քսան տարեկան էր, երբ վախճանվեց։ Այդ տարիքում ո՛չ նրա տեսողությունն էր վատացել, ո՛չ էլ դեմքը խորշոմել։

⁸ Իսրայելի որդիները Մովաբի հովտում՝ Հորդանան գետի մոտ, Երիքովի դիմաց, երեսուն օր ողբացին։ Եվ վերջացան Մովսեսի սգո լացի օրերը։

⁹ Նավեի որդի Հեսուն լցվեց իմաստության հոգով, որովհետև Մովսեսն իր ձեռքը դրել էր նրա վրա։ Եվ Իսրայելի որդիները հնազանդվեցին նրան և արեցին այնպես, ինչպես Տերը պատվիրել էր Մովսեսին։

¹⁰ Իսրայելում այլևս Մովսեսի նման մարգարե չելավ, մարդ, որը տեսավ Տիրոջը՝ երես առ երես, ¹¹ որը կատարեց այն հրաշքներն ու նշանները, երբ Տերը նրան ուղարկեց՝ կատարելու եգիպտացիների երկրում փարավոնի ու նրա պաշտոնյաների վրա և նրա ողջ երկրում. ¹² այն մեծամեծ հրաշագործությունները, որ արեց Մովսեսն Իսրայելի որդիների առջև Տիրոջ հզոր ձեռքով և բարձր բազուկով։

ՀԵՍՈՒ

1

Հեսուն հաջորդում է Մովսեսին

¹ Մովսեսի՝ Տիրոջ ծառայի վախճանվելուց հետո Տերն ասաց Հեսուին՝ Նավեի որդուն, Մովսեսի օգնականին. ² «Մովսեսը՝ իմ ծառան, վախճանվեց, արդ, վե՛ր կաց և քո ամբողջ ժողովրդի հետ անցի՛ր Հորդանան գետը դեպի այն երկիրը, որ ես տալու եմ Իսրայելի որդիներին։ ³ Այն բոլոր տեղերը, ուր ձեր ոտքերը կկոխեն, ձեզ կտամ, ինչպես որ ասել եմ Մովսեսին. ⁴ անապատը և Անդրլիբանանը, մինչև մեծ գետը՝ Եփրատ գետը, քետացիների ամբողջ երկիրը մինչև արևմտյան ծովը ձեր սահմանները կլինեն։ ⁵ Ոչ ոք ձեր դեմ չի կանգնի քո կյանքի բոլոր օրերում։ Ինչպես Մովսեսի հետ էի, այդպես էլ կլինեմ քեզ հետ, և չեմ լքի քեզ և անտես չեմ անի քեզ։ ⁶ Զորացի՛ր և արիացի՛ր, որովհետև դո՛ւ պիտի բաժանես այս ժողովրդին այն երկիրը, որ քո հայրերին երդվեցի տալ իրենց։ ⁷ Արդ, զորացի՛ր և արիացիր մեծապես, որպեսզի պահես և կատարես այն բոլոր օրենքները, որ քեզ հաղորդեց Մովսեսը՝ իմ ծառան։ Դրանցից չշեղվես աջ կամ ձախ, որ խելամտորեն անես այն ամենը, ինչ որ պիտի անես։ ⁸ Օրենքների այս գիրքը ընթերցի՛ր հարատև և գիշեր-ցերեկ դրանց մասին մտածի՛ր, որպեսզի կարողանաս կատարել բոլոր դրա մեջ գրվածները. այն ժամանակ հաջողակ կլինես, ուղիղ ճանապարհով կընթանաս և խելամտորեն կգործես։ ⁹ Ահա պատվիրում եմ քեզ. զորացի՛ր և արիացի՛ր, մի՛ վախեցիր և մի՛ երկնչիր, որովհետև քեզ հետ է Տերը՝ քո Աստվածը, ամեն տեղ, ուր էլ որ գնաս»։

Հորդանան գետն անցնելու պատրաստություն

¹⁰ Եվ Հեսուն պատվիրեց ժողովրդի դպիրներին՝ ասելով. «Մտե՛ք ժողովրդի բանակի մեջ և հրաման տալով ժողովրդին՝ ասե՛ք. ¹¹ “Ձեզ համար պաշա՛ր պատրաստեք, որովհետև երեք օրից հետո դուք պիտի անցնեք Հորդանան գետը՝ մտնելու և տիրելու այն երկիրը, որ Տերը՝ ձեր հայրերի Աստվածը, տալու է ձեզ որպես ժառանգություն”»։

¹² Հեսուն խոսեց նաև Ռուբենի ցեղի, Գադի ցեղի և Մանասեի կես ցեղի հետ և ասաց. ¹³ «Հիշե՛ք Տիրոջ խոսքը, որ հաղորդեց ձեզ Մովսեսը՝ նրա ծառան՝ ասելով. “Տերը՝ ձեր Աստվածը, տեղավորեց ձեզ և տվեց ձեզ այս երկիրը։ ¹⁴ Ձեր կանայք, ձեր մանուկները և ձեր անասունները թող ապրեն այս երկրում, որը ձեզ տվեց Մովսեսը Հորդանան գետի այս կողմում։ Իսկ դուք զինված անցե՛ք ձեր եղբայրներից առաջ և ամբողջ զորությամբ մարտակի՛ց եղեք նրանց, ¹⁵ մինչև որ Տերը՝ ձեր Աստվածը, ձեր եղբայրներին էլ տեղավորի, ինչպես որ ձեզ տեղավորեց, և նրանք էլ ժառանգեն այն երկիրը, որ Տերը՝ մեր Աստվածը, տալու է նրանց։ Ապա յուրաքանչյուրդ հե՛տ կդառնաք ձեր ժառանգության երկիրը և կժառանգե՛ք այն, որը ձեզ տվեց Մովսեսը՝ Տիրոջ ծառան, Հորդանան գետի արևելյան կողմում”»։ ¹⁶ Պատասխան տալով՝ Հեսուին ասացին. «Ամեն ինչ, որ պատվիրում ես մեզ, կանենք և կգնանք այն բոլոր տեղերը, ուր ուղարկես մեզ, ¹⁷ և ամեն բանում ինչպես որ լսում էինք Մովսեսին, այդպես էլ կլսենք և քեզ, միայն թե Տերը՝ մեր Աստվածը, քեզ հետ լինի, ինչպես որ Մովսեսի հետ էր։ ¹⁸ Այն մարդը, որ անհնազանդ կլինի քեզ և չի լսի քո խոսքերը, և չի անսա քո հրամաններին, թող մեռնի. միայն թե դու զորացի՛ր և արիացի՛ր»։

2

Հեսուն հետախույզներ է ուղարկում Երիքով

¹ Եվ Հեսուն՝ Նավեի որդին, Սատիմից երկու երիտասարդ ուղարկեց երկիրը հետախուզելու համար և ասաց. «Գնացեք հետախուզե՛ք երկիրը և Երիքովը»։ Երկու երիտասարդները ճամփա ընկան, եկան Երիքով ու մտնելով Ռահաբ անունով մի պոռնիկ կնոջ տունը՝ օթևանեցին այնտեղ։ ² Երիքովի թագավորին լուր տվեցին և ասացին. «Այս գիշեր այստեղ Իսրայելի որդիներից մարդիկ են մտել երկիրը հետախուզելու»։ ³ Երիքովի թագավորը մարդ ուղարկեց, ու Ռահաբին ասացին. «Դո՛ւրս հանիր այն մարդկանց, որոնք եկել են քեզ մոտ և գիշերը մտել են քո տունը, որովհետև եկել են այս երկիրը հետախուզելու»։ ⁴ Կինը, որ մինչ այդ երկու մարդկանց առնելով՝ թաքցրել էր, նրանց ասաց. «Ինձ մոտ մարդիկ մտան, բայց ես չգիտեի, թե որտեղի՛ց են։ ⁵ Առավոտյան աղջամուղջին՝ դարպասը բացվելու ժամանակ, այդ մարդիկ դուրս եկան, և չգիտեմ, թե ո՛ւր գնացին։ Հետապնդե՛ք նրանց, գուցե հասնեք»։ ⁶ Նրանց հանել էր տանիքն ու թաքցրել այնտեղ դիզված վուշի խրձերի տակ։ ⁷ Թագավորի մարդիկ ընկան նրանց հետևից Հորդանան գետի անցումը տանող ճանապարհով, և դարպասը փակվեց։ Մինչ հետապնդողներն ընկել էին նրանց հետևից, ⁸ և մինչ նրանք կքնեին, կինը նրանց մոտ՝ տանիքը ելավ ⁹ և ասաց. «Գիտեմ, որ Տերն այս երկիրը ձեզ է տվել, որովհետև ձեր ահն ընկել է մեզ վրա, և ձեր պատճառով այս երկրի բոլոր բնակիչները հալումաշ են եղել, ¹⁰ քանի որ մենք լսել ենք, թե Տերն ինչպե՛ս Կարմիր ծովն ցամաքեցրեց ձեր առաջ, երբ դուրս էիք գալիս Եգիպտոսից, և թե ինչ արեցիք դուք ամորհացիների երկու թագավորներին՝ Սեհովնին և Օվգին, որոնք Հորդանան գետի այն կողմում էին, որոնց սպանեցիք։ ¹¹ Երբ մենք լսեցինք, զարհուրեցին մեր սրտերը, և մեզնից ոչ մեկի մեջ շունչ չի մնացել ձեր պատճառով, որովհետև Տերը՝ ձեր Աստվածը, Աստված է երկնքում՝ վերևում, և երկրի վրա՝ ներքևում։ ¹² Հիմա երդվե՛ք ինձ Տիրոջով՝ Աստծով, որ ինչպես ես եմ ձեզ ողորմություն անում, այդպես էլ դուք ողորմություն կանեք իմ հոր տան նկատմամբ։ Ինձ մի ճշմարիտ նշա՛ն տվեք, ¹³ որ ողջ կթողնեք իմ հոր տունը և իմ մորը, իմ եղբայրներին և իմ քույրերին ու այն ամենը, ինչ ունեն նրանք, և կփրկեք ինձ մահվանից»։ ¹⁴ Եվ նրանք ասացին նրան. «Երդվում ենք մեր կյանքով, միայն թե մեր գաղտնիքը չբացահայտես»։ Եվ նա ասաց. «Երբ Տերն այս քաղաքը ձեր ձեռքը հանձնի, ինձ ողորմությո՛ւն արեք և ինձ հետ արդա՛ր վարվեցեք»։ ¹⁵ Եվ պարանով նրանց կախեց-իջեցրեց պատուհանից, որովհետև նրա տունը պարսպի մեջ էր, և ինքը բնակվում էր պարսպի մեջ։ ¹⁶ Նա ասաց նրանց. «Գնացե՛ք լեռների վրայով, որպեսզի խուսափեք ձեզ փնտրողներից։ Երեք օր թաքնվե՛ք այնտեղ, մինչև որ ձեզ փնտրողները հետ դառնան, և հետո գնացե՛ք ձեր ճանապարհով»։ ¹⁷ Այդ մարդիկ նրան ասացին. «Մենք կկատարենք մեր երդումը, որով մեզ երդվեցրիր. ¹⁸ իսկ դու, երբ մենք մտնենք քաղաքը, այս կարմիր պարանը որպես նշան կդնես և կկապես այն պատուհանից, որից մեզ իջեցրիր, և քո հորը, քո մորը, քո եղբայրներին և քո հոր ամբողջ տունը կհավաքես քեզ մոտ՝ այս տանը։ ¹⁹ Ով որ քո տնից դուրս գա, ինքը թող իր համար պատասխանատու լինի. մենք ազատ կլինենք քեզ տված մեր երդումից։ Ով քեզ հետ քո տանը լինի, մենք պատասխանատու կլինենք, եթե մեկի ձեռքը դիպչի նրան։ ²⁰ Իսկ եթե մեկը վնասի մեզ, կամ հայտնես մեր այս գործը, մենք ազատ կլինենք քեզ տված մեր երդումից»։ ²¹ Եվ կինն ասաց. «Թող լինի ձեր ասածի պես, թող այդպես լինի»։ Ու արձակեց նրանց, և նրանք գնացին։ Եվ նա կարմիր նշանը կապեց պատուհանին։

²² Նրանք գնացին ու հասան լեռնակողմը և այնտեղ մնացին երեք օր, մինչև որ փնտրողները հետ դարձան։ Փնտրողները հետախուզեցին ամբողջ ճանապարհը, բայց չգտան նրանց։ ²³ Երկու երիտասարդները հետ դարձան, իջան լեռից, անցան գետը, հասան Հեսուի՝ Նավեի որդու մոտ և պատմեցին իրենց հետ պատահած բոլոր դեպքերը։ ²⁴ Նրանք ասացին Հեսուին. «Տերը՝ Աստված, այդ ամբողջ երկիրը հանձնել է մեր ձեռքը, և այդ երկրի բոլոր բնակիչները զարհուրած են մեզնից»։

3

Իսրայելացիներն անցնում են Հորդանան գետը

¹ Հեսուն առավոտյան վաղ վեր կացավ, և ինքն ու Իսրայելի բոլոր որդիները մեկնեցին Սատիմից, եկան մինչև Հորդանան գետը և գետանցումից առաջ բանակեցին այնտեղ։ ² Երեք օր հետո դպիրներն անցան բանակի միջով ³ և պատվիրեցին ժողովրդին՝ ասելով. «Երբ տեսնեք Տիրոջ՝ ձեր Աստծու Ուխտի տապանակը, և մեր քահանաներին ու ղևտացիներին, որ կրում են այն, դուք էլ ելե՛ք ձեր տեղերից և գնացե՛ք տապանակի հետևից, ⁴ որպեսզի իմանաք այն ճանապարհը, որով պիտի գնաք, որովհետև երբեք այդ ճանապարհով չեք անցել։ Բայց ձեր և նրանց միջև երկու հազար կանգունի չափ հեռավորություն պիտի լինի։ Կանգնե՛ք և մի՛ մոտեցեք տապանակին»։ ⁵ Հեսուն ասաց ժողովրդին. «Մաքրվե՛ք մինչև վաղը, որովհետև Տերը վաղը ձեր մեջ հրաշքներ է անելու»։ ⁶ Հեսուն խոսեց նաև քահանաների հետ ու ասաց. «Տիրոջ Ուխտի տապանակը վերցրե՛ք և գնացե՛ք ժողովրդի առջևից»։ Քահանաները վերցրին Տիրոջ Ուխտի տապանակը և գնացին ժողովրդի առջևից։

⁷ Եվ Տերն ասաց Հեսուին. «Այսօր կսկսեմ քեզ մեծարել Իսրայելի բոլոր որդիների առաջ, որպեսզի իմանան, թե ինչպես որ Մովսեսի հետ էի, այնպես էլ քեզ հետ կլինեմ։ ⁸ Արդ, պատվիրի՛ր Ուխտի տապանակը տանող քահանաներին և ասա՛. “Երբ որ մտնեք Հորդանան գետի ջրերը, կանգնե՛ք Հորդանան գետի մեջ”»։ ⁹ Եվ Հեսուն ասաց Իսրայելի որդիներին. «Մոտեցե՛ք այստեղ և լսե՛ք Տիրոջ՝ մեր Աստծու պատգամները։ ¹⁰ Նա ձեր առաջից իսպառ ոչնչացնելու է քանանացիներին, քետացիներին, խևացիներին, փերեզացիներին, գերգեսացիներին, ամորհացիներին և հեբուսացիներին, որով կիմանաք, որ Տերը կենդանի է ձեր մեջ։ ¹¹ Ահա ամբողջ երկրի Տիրոջ Ուխտի տապանակը ձեր առջևից պիտի անցնի Հորդանան գետը։ ¹² Այժմ դուք Իսրայելի որդիներից տասներկու ա՛յր ընտրեք, ամեն ցեղից մի այր։ ¹³ Երբ ամբողջ երկրի Տիրոջ Ուխտի տապանակը կրող քահանաների ոտքերը մտնեն Հորդանան գետի ջրի մեջ, վերևից իջնող ջուրը կցամաքի, կկանգնի, ինչպես քարակույտ»։ ¹⁴ Երբ ժողովուրդը հեռացավ իր վրաններից՝ Հորդանան գետն անցնելու համար, քահանաները տարան Տիրոջ Ուխտի տապանակը ողջ ժողովրդի առաջից։ ¹⁵ Երբ Ուխտի տապանակը կրող քահանաները մտան Հորդանան գետը, և տապանակը կրող քահանաների ոտքերը խրվեցին Հորդանան գետի ջրերի մեջ (իսկ Հորդանան գետը գալիս էր ափեափ լցված, ինչպես ցորենի հնձի օրերին), ¹⁶ վերևից իջնող ջրերը կանգնեցին՝ միաձույլ, անջրպետված, իրարից խիստ հեռացած՝ սկսած Ադամիտես քաղաքից, որը Կարիաթ-Յարիմի մասն է, իսկ ցած իջնող ջրերն իջան Արաբայի ծովը՝ Աղի ծովը, մինչև որ իսպառ կտրվեցին, և ժողովուրդը կանգնած էր Երիքովի դիմաց։ ¹⁷ Տիրոջ Ուխտի տապանակը կրող քահանաները կանգնեցին Հորդանան գետի մեջ՝ ցամաքի վրա։ Եվ Իսրայելի բոլոր որդիներն անցան ցամաքով, մինչև որ ամբողջ ժողովուրդն անցավ Հորդանան գետը։

4

Հիշատակության տասներկու քարերը

¹ Երբ ամբողջ ժողովուրդն անցավ Հորդանան գետը, Տերը խոսեց Հեսուի հետ և ասաց. ² «Դու ժողովրդից տասներկու ա՛յր վերցրու, ամեն ցեղից մի այր, ³ հրամա՛ն տուր նրանց ու ասա՛. “Այդտեղից՝ Հորդանան գետի միջից, քահանաների կանգնած ոտնատեղերից տասներկու մեծ քարե՛ր վերցրեք և տարե՛ք ձեզ հետ և դրե՛ք ձեր բանակատեղիում, որտեղ իջևանելու եք այս գիշեր”»։ ⁴ Հեսուն կանչեց Իսրայելի փառավոր որդիներից ընտրված տասներկու այրերի, յուրաքանչյուր ցեղից մեկ այր, ⁵ և նրանց ասաց. «Իմ աչքի առաջ մոտեցե՛ք Տիրոջը հանդիման՝ Հորդանան գետի մեջտեղում, և ամեն մեկդ այնտեղից Իսրայելի ցեղերի թվի համեմատ մի քա՛ր վերցրեք ձեր ուսերին, ⁶ որպեսզի դրանք ձեզ համար միշտ նշան լինեն։ Երբ վաղը քո որդին քեզ հարցնի և ասի. “Ի՞նչ են նշանակում այս քարերը ձեզ համար”, ⁷ դու կպատմես քո որդուն ու կասես. “Հորդանան գետի ջրերը ցամաքեցին ողջ երկրի Տիրոջ Ուխտի տապանակի առջև, երբ այն անցնում էր Հորդանան գետով”։ Եվ թող այս քարերը հավիտյան հիշատակ լինեն Իսրայելի որդիների մեջ»։ ⁸ Իսրայելի որդիներն արեցին այնպես, ինչպես Տերը պատվիրեց Հեսուին։ Իսրայելի որդիների անցնելուց հետո Հորդանան գետի միջից տասներկու քարեր վերցնելով՝ իրենց հետ տարան բանակատեղի և դրեցին այնտեղ։ ⁹ Հեսուն ուրիշ տասներկու քարեր կանգնեցրեց Հորդանան գետի մեջ, այնտեղ, ուր ոտք էին դրել Տիրոջ Ուխտի տապանակը տանող քահանաները, և մինչև այսօր դրանք այնտեղ են։ ¹⁰ Տիրոջ Ուխտի տապանակը տանող քահանաները կանգնեցին Հորդանան գետի մեջտեղում, մինչև որ Հեսուն ավարտեց հաղորդել այն ամենը, որ Տերը Հեսուին պատվիրել էր ժողովրդին ասելու, ճիշտ այնպես, ինչպես Մովսեսը պատվիրել էր Հեսուին։ Եվ ժողովուրդը շտապեց ու անցավ գետը։ ¹¹ Երբ ամբողջ ժողովուրդն անցավ, անցան նաև Տիրոջ Ուխտի տապանակն ու տասներկու քարերը և կանգնեցին ժողովրդի առաջ։ ¹² Իսրայելի որդիների առջևն անցան նաև Ռուբենի, Գադի և Մանասեի կես ցեղի որդիները, սպառազինված, ինչպես նրանց պատվիրել էր Մովսեսը։ ¹³ Կռվի պատրաստ քառասուն հազար սպառազինյալներ անցան Տիրոջ առջևով՝ պատերազմելու Երիքով քաղաքի դեմ։ ¹⁴ Այդ օրը Տերը մեծարեց Հեսուին Իսրայելի ամբողջ ազգի առաջ. նրանից վախենում էին, ինչպես որ վախենում էին Մովսեսից նրա կենդանության բոլոր օրերին։ ¹⁵ Տերը խոսեց Հեսուի հետ և ասաց. ¹⁶ «Հրամա՛ն տուր վկայության Ուխտի տապանակը տանող քահանաներին, որ դուրս գան Հորդանան գետից»։ ¹⁷ Եվ Հեսուն հրաման տվեց քահանաներին ու ասաց. «Դո՛ւրս եկեք Հորդանան գետից»։ ¹⁸ Երբ Տիրոջ Ուխտի տապանակը կրող քահանաները դուրս եկան Հորդանան գետից և ոտք դրեցին ցամաքի վրա, Հորդանան գետի ջուրը հետ իր տեղը դարձավ և հոսեց իր ամբողջ հունով, ինչպես երեկ և նախորդ օրը։

¹⁹ Ժողովուրդը Հորդանան գետից դուրս եկավ առաջին ամսի տասներորդ օրը։ Իսրայելի որդիները բանակեցին Գաղգաղայում՝ Երիքովի արևելյան կողմում։ ²⁰ Այն տասներկու քարերը, որ վերցրել էին Հորդանան գետից, Հեսուն կանգնեցրեց Գաղգաղայում։ ²¹ Նա ասաց Իսրայելի որդիներին. «Երբ վաղը ձեր որդիները հարցնեն և ասեն՝ “Այս ի՞նչ քարեր են”, ²² պատմե՛ք ձեր որդիներին, թե ինչպես Իսրայելը ցամաքով անցավ Հորդանան գետով, ²³ երբ Տերը՝ մեր Աստվածը, ցամաքեցրեց Հորդանան գետի ջուրը նրանց առաջ, մինչև որ անցան։ ²⁴ Այնպես, ինչպես որ արեց Տերը՝ մեր Աստվածը, Կարմիր ծովում, որը Տերը՝ մեր Աստվածը, ցամաքեցրեց մեր առաջ, մինչև որ անցանք, ²⁵ որպեսզի երկրի բոլոր ազգերն իմանան, որ մեծ է Տիրոջ զորությունը, և որպեսզի դուք միշտ պաշտեք Տիրոջը՝ մեր Աստծուն»։

5

Թլփատություն Գաղգաղայում

¹ Երբ ամորհացիների թագավորները, որոնք Հորդանան գետի այն կողմում էին, և փյունիկեցիների թագավորները, որոնք ծովեզերքին էին, լսեցին, որ Տերը՝ Աստված, Իսրայելի որդիների առաջ նրանց գետանցման ժամանակ ցամաքեցրել է Հորդանան գետը, սրտամաշ եղան, զարհուրեցին, և նրանց մեջ խոհականություն չմնաց Իսրայելի որդիների պատճառով։

² Այն ժամանակ Տերը Հեսուին ասաց. «Գայլախազ քարից դանա՛կ շինիր և նստի՛ր, թլփատի՛ր Իսրայելի որդիներին»։ ³ Հեսուն գայլախազ քարից դանակներ շինեց և թլփատեց Իսրայելի որդիներին այն վայրում, որ կոչեց Անթլփատների բլուր։ ⁴ Այդպես Հեսուն թլփատեց Իսրայելի այն որդիներին, որոնք ճանապարհին էին ծնվել և չէին թլփատվել Եգիպտոսից դուրս գալուց հետո. բոլորին էլ թլփատեց Հեսուն։ Ահա ա՛յս ժողովուրդն է, որոնց թլփատեց Հեսուն. Եգիպտոսից դուրս եկած ամբողջ ժողովրդի արու մանուկներին։ Որովհետև բոլոր պատերազմող մարդիկ մեռան անապատում՝ Եգիպտոսից իրենց դուրս գալու ճանապարհին։ ⁵ Դուրս եկած ամբողջ ժողովուրդը թլփատված էր, իսկ բոլոր նրանք, ովքեր Եգիպտոսից դուրս գալուց հետո ճանապարհին՝ անապատում էին ծնվել, չէին թլփատվել։ ⁶ Քանի որ իսրայելացիները քառասուներկու [*  քառասուն] տարի շրջեցին անապատում, Եգիպտոսից դուրս եկած պատերազմիկները, որոնք չէին հնազանդվել Աստծու պատվիրաններին, մահացել էին։ Նրանց համար Տերը որոշեց, որ նրանք չպիտի տեսնեն այն երկիրը, որ երդվել էր նրանց հայրերին, թե կտա նրանց, մի երկիր, որ կաթ և մեղր է բխեցնում։ ⁷ Եվ նրանց փոխարեն տարավ նրանց որդիներին, որոնց թլփատեց Հեսուն։ Սրանք անթլփատ էին, քանի որ ճանապարհին չէին թլփատվել։

⁸ Երբ ամբողջ ժողովուրդը թլփատվեց, հանգիստ առնելով մնացին բանակում, մինչև որ ապաքինվեցին։ ⁹ Եվ Տերն ասաց Հեսուին. «Այսօր ձեր վրայից վերացրեցի եգիպտացիների նախատինքը»։ Եվ այդ տեղի անունը կոչեց Գաղգաղա. այդպես է կոչվում մինչև այսօր։ ¹⁰ Այնտեղ իջևանեցին Իսրայելի որդիները։

Իսրայելի որդիները Երիքովի արևելյան կողմում գտնվող դաշտում ամսվա տասնչորսերորդ օրը՝ իրիկնադեմին, Զատիկ արեցին։ ¹¹ Եվ առավոտյան այդ երկրի ցորենից բաղարջ և նոր հասած բերք կերան։ ¹² Այդ օրը՝ այդ երկրի ցորենից ուտելուց հետո, մանանան դադարեց, և Իսրայելի որդիներն այլևս մանանա չգտան։ Եվ այդ տարի նրանք հավաքեցին փյունիկեցիների երկրի պտուղը։

Տիրոջ բանակի զորավարը

¹³ Երբ Հեսուն Երիքովում էր, բարձրացնելով իր աչքերը՝ տեսավ իր առաջ կանգնած մի մարդու, որի ձեռքին մերկացրած սուր կար։ Հեսուն մոտեցավ և ասաց նրան. «Մեզնի՞ց ես, թե՞ մեր թշնամիներից»։ ¹⁴ Նա ասաց. «Ես Տիրոջ զորքի զորավարն եմ և նոր եկա»։ Հեսուն երեսնիվայր գետնին ընկավ, երկրպագեց և ասաց նրան. «Տե՛ր, ի՞նչ հրաման կտաս քո ծառային»։ ¹⁵ Տիրոջ զորավարն ասաց Հեսուին. «Ոտքերիցդ հանի՛ր կոշիկները, որովհետև քո կանգնած տեղը սուրբ է»։ Եվ Հեսուն այդպես արեց։

6

Երիքովի գրավումը

¹ Երիքովն ամուր փակված և ամրացված էր Իսրայելի որդիների պատճառով. ոչ ոք դուրս չէր գալիս այնտեղից և ոչ ոք ներս չէր մտնում։ ² Տերը Հեսուին ասաց. «Ահա ես քո ձեռքն եմ տալիս Երիքովը, նրա մեջ գտնվող թագավորին և մարտիկներին։ ³ Դու բոլոր մարտիկներով շրջապատի՛ր քաղաքը սրբազան փողերով, և երբ լսեք եղջերափողի ձայնը և հնչեցնեք փողերը, շրջապատե՛ք քաղաքը և բոլոր պատերազմող մարդիկդ քաղաքի շուրջը պտո՛ւյտ տվեք մեկ անգամ։ Այսպես արե՛ք վեց օր։ ⁴ Տապանակի առջևից գնացող յոթ քահանա թող վերցնեն տոնական յոթնափող եղջերափողերը։ Յոթերորդ օրը քաղաքի շուրջը պտույտ տվե՛ք յոթ անգամ, և քահանաները թող հնչեցնեն եղջերափողերը, ⁵ և առհասարակ ամբողջ ժողովուրդը թող աղաղակի։ Երբ նրանք աղաղակեն, քաղաքի պարիսպներն իրենք իրենց հիմնահատակ կկործանվեն, ամբողջ ժողովուրդը կմտնի քաղաք՝ ամեն մեկն ընթանալով ուղիղ իր դիմացը»։

⁶ Նավեի որդի Հեսուն գնաց քահանաների մոտ և ասաց նրանց. «Վերցրե՛ք Ուխտի տապանակը, և յոթ քահանաներ յոթ տոնական եղջերափողեր առած՝ թող գնան Տիրոջ տապանակի առջևից»։ ⁷ Նա ասաց նրանց. «Կարգադրե՛ք ժողովրդին, որ գնան, շրջապատեն քաղաքը։ Մարտիկներն էլ զինված թող գնան Տիրոջ տապանակի առջևից։ ⁸ Եվ երբ պատվիրեց ժողովրդին, յոթ քահանաները, որ կրում էին յոթ սրբազան փողերը, նույնպես անցան Տիրոջ առաջ և ուժգին հնչեցրին փողերը։ Տիրոջ Ուխտի տապանակը գնում էր նրանց հետևից, ⁹ մարտիկներն ընթանում էին առջևից, իսկ քահանաները և եղջերափողերը հնչեցնողները՝ որպես վերջապահներ, գնում էին Տիրոջ տապանակի հետևից՝ հնչեցնելով եղջերափողերը»։ ¹⁰ Իսկ ժողովրդին Հեսուն պատվիրեց և ասաց. «Մի՛ աղաղակեք, թող ոչ ոք չլսի ձեր ձայնը, և ոչ մի խոսք դուրս չգա ձեր բերանից, մինչև այն օրը, երբ ես ինքս կազդարարեմ ձեզ աղաղակել, և ապա կաղաղակեք»։ ¹¹ Եվ Տիրոջ Ուխտի տապանակը, պտտվելով քաղաքի շուրջը, նորից գնաց բանակատեղի և իջևանեց այնտեղ։

¹² Երկրորդ օրը՝ առավոտյան, Հեսուն վեր կացավ, քահանաները վերցրին Տիրոջ տապանակը, ¹³ յոթ քահանաները վերցրին յոթ նվիրական փողերը և ընթացան Տիրոջ առջևից։ Քահանաները հնչեցրին փողերն ու մնացյալ ամբողջ բազմության հետ վերադարձան բանակատեղի. ապա Տիրոջ Ուխտի տապանակի հետևից անցան մարտիկներն ու մնացած ամբոխը. գնում և հնչեցնում էին եղջերափողերը։ ¹⁴ Երկրորդ օրն էլ մեկ անգամ մոտիկից պտտվեցին քաղաքի շուրջը և դարձյալ եկան բանակատեղի։ Այդպես արեցին վեց օր։ ¹⁵ Իսկ յոթերորդ օրը լուսաբացին վեր կացան և նույն ձևով քաղաքի շուրջը պտտվեցին յոթ անգամ։ ¹⁶ Յոթերորդ անգամ պտտվելիս քահանաները հնչեցրին փողերը, և Հեսուն ասաց Իսրայելի որդիներին. «Այժմ աղաղակե՛ք, որովհետև Տերն այս քաղաքը մեր ձեռքը հանձնեց։ ¹⁷ Քաղաքն ու նրա մեջ եղած ամեն ինչ նզովված պիտի լինի Զորությունների Տիրոջից։ Ազատե՛ք միայն պոռնիկ Ռահաբին և այն ամենը, ինչ նրա տանը կա, որովհետև նա թաքցրեց մեր ուղարկած հետախույզներին։ ¹⁸ Բայց դուք զգուշացե՛ք նզովվածից. չլինի թե ցանկանաք մի բան վերցնել այդ նզովվածից և Իսրայելի որդիների բանակը նզովքի ենթարկեք և կործանեք մեզ։ ¹⁹ Ամբողջ ոսկին, արծաթը, պղինձը և երկաթը Տիրոջն են պատկանելու և Տիրոջ գանձարանը պիտի մտնեն»։

²⁰ Ժողովուրդն աղաղակեց, ու քահանաները հնչեցրին փողերը։ Երբ ժողովուրդը լսեց փողի ձայնը, բոլորն աղաղակեցին մեծ և ուժգին աղաղակով, պարիսպն ընկավ շուրջանակի, և ժողովուրդը բարձրացավ մտավ քաղաք. ամեն մեկը գնում էր ուղիղ իր դիմացը. քաղաքը գրավեցին ²¹ և նզովեցին այն։ Ինչ որ կար քաղաքում՝ այր թե կին, երիտասարդ թե ծեր, արջառ, ոչխար և էշ, բոլորը սրի քաշեցին։

²² Երկիրը հետախուզող երկու երիտասարդներին Հեսուն ասաց. «Մտե՛ք այն պոռնիկ կնոջ տունը և, ինչպես որ երդվել եք, այնտեղից հանե՛ք նրան ու այնտեղ գտնվողներին և այն ամենը, ինչ որ նա ունի»։ ²³ Եվ երկու երիտասարդները, որոնք հետախուզել էին քաղաքը, մտան այն կնոջ տունը, հանեցին պոռնիկ Ռահաբին, ինչպես նաև նրա հորը, մորը, եղբայրներին, նրա ամբողջ ունեցվածքն ու նրա ամբողջ ազգատոհմին և նրանց կանգնեցրին Իսրայելի բանակից դուրս։ ²⁴ Քաղաքն ու նրա մեջ եղած ամեն ինչ այրվեց հրով, բացի ոսկուց, արծաթից, պղնձից և երկաթից, որ Տիրոջ գանձարանը մտցրին։ ²⁵ Պոռնիկ Ռահաբին, նրա հայրական տունը և նրա ամբողջ ունեցվածքը փրկեց Հեսուն։ Ռահաբը բնակվեց Իսրայելի մեջ մինչև այսօր, որովհետև թաքցրեց այն հետախույզներին, որոնց Հեսուն այն օրն ուղարկել էր Երիքովը հետախուզելու։

²⁶ Հեսուն այդ օրը նզովեց Երիքովը և ասաց.

«Տիրոջ առաջ անիծյալ լինի այն մարդը,

որ կվերականգնի Երիքով քաղաքը,

նրա հիմքերը իր անդրանիկ որդու վրա կդնի,

նրա պարիսպների դարպասները՝ իր կրտսեր որդու»։

Այդպես էլ արեց Ազան Բեթելացին. իր անդրանիկի՝ Աբիրոնի վրա դրեց նրա հիմքերը և իր փրկված կրտսերի վրա կանգնեցրեց նրա դարպասները։

²⁷ Տերը Հեսուի հետ էր, և նրա անունը տարածվեց ամբողջ երկրում։

7

Աքարի մեղքը և պատիժը

¹ Բայց Իսրայելի որդիները հանցանք գործեցին և գողացան նզովված բաներից։ Հուդայի ցեղից Աքարը, որը որդին էր Քարմիի, նա՝ որդին Զամբրիի, իսկ նա՝ որդին Զարայի, վերցրեց նզովված բաներից, և Տերը սաստիկ բարկացավ Իսրայելի որդիների վրա։

² Հեսուն Երիքովից մարդիկ ուղարկեց Գայի, որ Բեթ-Ավենի դիմացն է, և ասաց նրանց. «Հետախուզե՛ք Գային»։ Այդ մարդիկ գնացին, հետախուզեցին Գային, ³ վերադարձան Հեսուի մոտ ու ասացին. «Այս ամբողջ ժողովուրդը թող չգնա, այլ երկու կամ երեք հազարի չափ մարդիկ թող գնան և պաշարեն քաղաքը։ Ամբողջ ժողովրդին այնտեղ մի՛ տար, որովհետև նրանք քիչ են»։ ⁴ Եվ ժողովրդից մոտ երեք հազար մարդ գնացին այնտեղ, բայց փախան Գայիի մարդկանց առջևից։ ⁵ Գայիի մարդիկ նրանցից երեսունվեց մարդու կոտորեցին և նրանց հալածեցին դարպասի առաջից, վիրավորեցին զառիվայրի վրա, մինչև որ ջարդեցին նրանց։ Ժողովրդի սիրտը դողաց, և նրանք ասես ջուր դարձան։ ⁶ Հեսուն պատռեց իր զգեստները, երեսի վրա ընկավ գետնին՝ Տիրոջ տապանակի առաջ, և ինքն ու Իսրայելի ծերերը այդպես մնացին մինչև երեկո և իրենց գլխի վրա հող ցանեցին։ ⁷ Հեսուն ասաց. «Աղաչում եմ քեզ, Տե՛ր, Տե՛ր, ինչո՞ւ քո ծառան այս ժողովրդին անցկացրեց Հորդանան գետից, որ սրանց մատնես ամորհացիներին և կործանես մեզ։ Երանի թե այնտեղ՝ Հորդանան գետի եզերքին, մնացած ու բնակված լինեինք։ ⁸ Օ՜հ, Տե՛ր, հիմա ես ի՞նչ անեմ, երբ Իսրայելն իր վիզը ծռել է իր թշնամիների առաջ։ ⁹ Քանանացիներն ու երկրի բոլոր բնակիչները, այդ լսելով, կպաշարեն և կջնջեն մեզ երկրի երեսից։ Այն ժամանակ ի՞նչ պիտի անես քո մեծ անվան համար»։

¹⁰ Եվ Տերը Հեսուին ասաց. «Վե՛ր կաց, ինչո՞ւ ես ընկել երեսիդ վրա։ ¹¹ Ժողովուրդը մեղք գործեց, դրժեց իմ ուխտը, որ ուխտեցի նրանց, նրանք գողացան և վերցրին նզովված բաներից, ստեցին և դրեցին իրենց ամանների մեջ։ ¹² Իսրայելի որդիներն այլևս չեն կարող կանգնել իրենց թշնամիների դեմ, այլ թիկունք կդարձնեն իրենց թշնամիների առաջ, որովհետև նզովք դարձան։ Այլևս ձեզ հետ չեմ լինի, քանի դեռ այդ նզովվածը չեք վերացնի ձեր միջից։ ¹³ Վե՛ր կաց, սրբագործի՛ր ժողովրդին և ասա՛, որ վաղը պիտի սրբագործվեն։ Այսպես է ասում Տերը՝ Իսրայելի Աստվածը. “Իսրայե՛լ, նզովք կա ձեր մեջ, դուք չեք կարող կանգնել ձեր թշնամիների առաջ, մինչև որ նզովքը ձեր միջից չվերացնեք։ ¹⁴ Առավոտյան ամենքդ հավաքվե՛ք ըստ ձեր ցեղերի։ Այն ցեղը, որին ցույց կտա Տերը, մոտեցրե՛ք տոհմերով, այն տոհմը, որին ցույց կտա Տերը, մոտեցրե՛ք տներով, և այն տունը, որին ցույց կտա Տերը, մոտեցրե՛ք այրերով, ¹⁵ և ով որ ցույց տրվի նզովվածը գողանալու մեջ, թող հրով այրվի ինքը, իր ամբողջ տունը և այն ամենը, ինչ որ նա ունի, որովհետև նա դրժել է Տիրոջ ուխտը և անիրավություն է արել Իսրայելի մեջ”»։

¹⁶ Հեսուն առավոտյան կանուխ վեր կացավ, ներկայացրեց ժողովրդին ըստ իրենց ցեղերի, և հանդիմանվեց Հուդայի ցեղը։ ¹⁷ Հուդայի ցեղը ներկայացավ տոհմերով, և հանդիմանվեց Զարայի տոհմը։ Զարայի տոհմը ներկայացավ տներով, և հանդիմանվեց Զամբրիի տունը։ Նրա տունը ներկայացավ իր այրերով, և ¹⁸ հանդիմանվեց Աքարը, որը որդին էր Քարմիի, նա՝ որդին Զամբրիի, իսկ նա՝ որդին Զարայի՝ Հուդայի ցեղից։ ¹⁹ Հեսուն Աքարին ասաց. «Որդյա՛կ իմ, փա՛ռք տուր այսօր Տիրոջը՝ Իսրայելի Աստծուն, խոստովանի՛ր և պատմի՛ր ինձ, ինչ որ արեցիր, և մի՛ թաքցրու ինձնից»։ ²⁰ Աքարը պատասխան տվեց և ասաց Հեսուին. «Արդարև, ես մեղք գործեցի Տիրոջ՝ Իսրայելի Աստծու առաջ և այս բանն արեցի. ²¹ ավարի մեջ տեսա նկարազարդ մի գեղեցիկ վերարկու, երկու հարյուր երկդրամյա արծաթ և մի ոսկյա լեզվակ, որը հիսուն երկդրամյա էր, սաստիկ ցանկացա և վերցրի դրանք։ Ահա դրանք թաքցված են հողի տակ՝ իմ վրանում, իսկ արծաթը դրանց տակ է»։ ²² Հեսուն պատգամավորներ ուղարկեց, նրանք գնացին բանակատեղի՝ դեպի վրանը։ Դրանք պահված էին այնտեղ՝ նրա վրանում, իսկ արծաթը դրանց տակ էր։ ²³ Նրանք հանեցին դրանք վրանից, բերեցին Հեսուի և Իսրայելի ծերերի մոտ և դրեցին Տիրոջ առաջ։ ²⁴ Հեսուն, նրա հետ և ողջ Իսրայելը վերցրին Զարայի որդի Աքարին, նրա որդիներին և դուստրերին, նրա արջառներն ու էշերը, նրա բոլոր ոչխարները, նրա վրանը, նրա ամբողջ ունեցվածքը և բերեցին Աքովրի ձորը։ ²⁵ Հեսուն ասաց. «Ինչո՞ւ մեզ կործանեցիր. Տերն այսօր քեզ կկործանի»։ Եվ ողջ Իսրայելը քարկոծեց նրան քարերով ու նրանց այրեցին հրով, քարկոծեցին նրանց ²⁶ և դիզեցին նրանց վրա մեծ քարակույտ, որ կա մինչև այսօր։ Եվ Տիրոջ սաստիկ բարկությունն իջավ։ Այդ պատճառով նա այն տեղը կոչեց Աքովրի ձոր, և այդպես է կոչվում մինչև այսօր։

8

Գայիի գրավումը և կործանումը

¹ Եվ Տերը Հեսուին ասաց. «Մի՛ վախեցիր և մի՛ զարհուրիր, քեզ հետ վերցրո՛ւ բոլոր պատերազմող մարդկանց և վեր կաց գնա՛ դեպի Գայի։ Ահա ես քո ձեռքն եմ մատնում Գայիի թագավորին, նրա ժողովրդին, նրա քաղաքը և նրա երկիրը։ ² Գայիի և նրա թագավորի հետ վարվի՛ր այնպես, ինչպես վարվեցիր Երիքովի և նրա թագավորի հետ, սակայն ավարը և անասունները կպահես քեզ։ Քաղաքի հետևի կողմից դարանակալներ կարգի՛ր»։ ³ Հեսուն և ամբողջ պատերազմող ժողովուրդը վեր կացան, որ գնան Գայիի վրա։ Հեսուն երեսուն հազար զորավոր այրեր ընտրեց և նրանց ուղարկեց գիշերով։ ⁴ Պատվիրեց նրանց՝ ասելով. «Տեսե՛ք, դուք դարանամուտ պիտի լինեք քաղաքի հետևի կողմից։ Քաղաքից շատ մի՛ հեռացեք, և ամենքդ պատրա՛ստ եղեք։ ⁵ Ես և ինձ հետ եղող ամբողջ ժողովուրդը կմոտենանք քաղաքին, և երբ Գայիի բնակիչները մեր դեմ դուրս գան, ինչպես առաջին անգամ, կփախչենք նրանց առաջից։ ⁶ Երբ ելնեն մեր հետևից, կհեռացնենք նրանց այդ քաղաքից, և նրանք կասեն. “Փախան մեր առջևից, ինչպես առաջին անգամ”։ Երբ փախչենք նրանց առջևից, ⁷ դուք ելե՛ք դարանից, մտե՛ք քաղաք և հարվածե՛ք քաղաքին, և Տերը՝ Իսրայելի Աստվածը, նրանց մեր ձեռքը կհանձնի։ Եվ երբ գրավեք քաղաքը, այրեցե՛ք այն հրով։ ⁸ Կանեք այնպես, ինչպես ձեզ պատվիրեցի»։

⁹ Հեսուն նրանց ուղարկեց, և նրանք գնացին դեպի դարանը, մտան թաքնվեցին Բեթելի և Գայիի միջև՝ Գայիի ծովահայաց կողմից։ Այն գիշեր Հեսուն ժողովրդի մեջ մնաց։ ¹⁰ Առավոտը վաղ վեր կենալով՝ Հեսուն ժողովրդի զորահանդես արեց, և ինքն ու Իսրայելի ծերերը ժողովրդի առաջից դուրս ելան Գայիի դեմ։ ¹¹ Ամբողջ պատերազմող զորքը ելավ նրանց հետ։ Նրանք եկան քաղաքի դիմաց արևելյան կողմից (իսկ քաղաքի դարանակալները ծովի կողմում էին) և բանակ դրեցին Գայիի հյուսիսային կողմում։ Նրանց ու Գայիի միջև մի ձոր կար։ ¹² Հեսուն, առնելով հինգ հազար մարդ, նրանց դարան մտցրեց Բեթելի և Գայիի միջև՝ քաղաքի արևմտյան կողմից, ¹³ իսկ ժողովրդին ու ամբողջ բանակը տեղավորեց քաղաքի հյուսիսային կողմում։ Նրանց վերջապահ զորքը քաղաքի ծովահայաց կողմում էր։ Հեսուն այդ գիշերն անցկացրեց ձորում։

¹⁴ Երբ Գայիի թագավորն այս տեսավ, շտապ վեր կացավ և ելավ նրանց դեմ։ Քաղաքի մարդիկ, ինքը և ամբողջ ժողովուրդն այն ժամանակ գնացին նրանց դեմ Արաբայի հովտում պատերազմելու։ Բայց Գայիի թագավորը չգիտեր, որ քաղաքի հետևի կողմում դարան են պատրաստել։ ¹⁵ Երբ Հեսուն տեսավ նրանց, կրնկի վրա հետ դարձավ, և ողջ Իսրայելը նրանց առաջից փախավ անապատի ճանապարհով։ ¹⁶ Գայիի թագավորը երկրի ամբողջ ժողովրդին ստիպեց, որ հետապնդեն նրանց, և նրանք հետապնդելով գնացին Իսրայելի որդիների հետևից ու հեռացան քաղաքից։ ¹⁷ Գայիում ու Բեթելում մարդ չմնաց, որ Իսրայելին հետապնդելու գնացած չլիներ. քաղաքը թողեցին բաց և հարձակվեցին Իսրայելի վրա։

¹⁸ Եվ Տերը Հեսուին ասաց. «Ձեռքիդ գայիսոնը մեկնի՛ր դեպի քաղաքը, որովհետև քո ձեռքն եմ մատնել այն, և դարանակալները թող շտապ դուրս գան իրենց տեղից»։ Հեսուն իր ձեռքում եղած գայիսոնը մեկնեց դեպի քաղաքը։ ¹⁹ Դարանակալները վեր կացան իրենց տեղից, հենց որ նա ձեռքը մեկնեց։ Ելան, մտան քաղաքը, գրավեցին այն և քաղաքն անմիջապես այրեցին հրով։ ²⁰ Գայիի բնակիչները հետ նայելով տեսան, որ քաղաքից ծուխ էր ելնում մինչև երկինք։ Նրանք չէին կարող փախչել այս կամ այն կողմ, իսկ ժողովուրդը, որ թաքնված էր անապատում, հարձակվեց հետապնդողների վրա։ ²¹ Երբ Հեսուն և ամբողջ ժողովուրդը տեսան, որ դարանակալները գրավեցին քաղաքը, և քաղաքի ծուխը մինչև երկինք է հասնում, նորից կրնկի վրա հետ դարձան և հարվածեցին Գայիի մարդկանց։ ²² Մյուսները քաղաքից դուրս եկան նրանց ընդառաջ, և Գայիի մարդիկ մնացին բանակի մեջտեղում։ Նրանք այն կողմից, սրանք այս կողմից այնքան հարվածեցին, մինչև որ նրանցից ազատվող և փախչող չմնաց։ ²³ Իսկ Գայիի թագավորին ձերբակալեցին և կենդանի բերեցին Հեսուի մոտ։

²⁴ Երբ Իսրայելի որդիները դադարեցին բոլոր գայիցիներին կոտորելուց, ոմանց՝ դաշտերում, ոմանց՝ լեռներում՝ զառիվայրի վրա, մինչև այնտեղ, ուր հալածել էին նրանց, և ամենքը սրակոտոր եղան իսպառ, Հեսուն վերադարձավ Գայի և սրի քաշեց այն։ ²⁵ Այդ օրն ընկածները՝ տղամարդ և կին, տասներկու հազար էին՝ Գայիի բոլոր բնակիչները։ ²⁶ Հեսուն գայիսոն մեկնած ձեռքը հետ չքաշեց, մինչև որ չբնաջնջեց Գայիի բոլոր բնակիչներին, ²⁷ բացի անասուններից և քաղաքի ավարից, որ կողոպտեցին Իսրայելի որդիները Տիրոջ հրամանի համաձայն, որ տվել էր Հեսուին։ ²⁸ Հեսուն քաղաքը կրակով այրեց և այն դարձրեց հողաբլուր, որ հավիտյան անշեն մնաց մինչև այսօր։ ²⁹ Իսկ Գայիի թագավորին կախեց երկճյուղ ծառից, և նա ծառից կախված մնաց մինչև երեկո։ Արևը մայր մտնելու ժամանակ Հեսուն հրամայեց, և նրան իջեցրին ծառից, գցեցին մի փոսի մեջ՝ քաղաքի դարպասի մոտ, և նրա վրա քարերի կույտ դիզեցին, որ կա մինչև այսօր։

Օրենքի ընթերցումը Գեբաղ լեռան վրա

³⁰[29] Այն ժամանակ Հեսուն Տիրոջ՝ Իսրայելի Աստծու համար զոհասեղան շինեց Գեբաղ լեռան վրա, ³¹ ինչպես պատվիրել էր Տիրոջ ծառա Մովսեսն Իսրայելի որդիներին, ինչպես որ գրված է Մովսեսի օրենքի գրքում. զոհասեղան ամբողջական քարերից, որոնց երկաթ չէր դիպել, և այնտեղ Տիրոջ համար ողջակեզ և փրկության զոհ մատուցեց։ ³² Հեսուն այդ քարերի վրա գրեց Երկրորդ օրենքը՝ Մովսեսի օրենքները. Իսրայելի որդիների առաջ գրեց այն։ ³³ Ողջ Իսրայելը, նրանց ծերերը, նրանց դատավորները և դպիրները, թե՛ եկվորը և թե՛ բնիկը, գնում էին տապանակի առջևից՝ այս ու այն կողմից։ Ղևտացի քահանաները վերցրին Տիրոջ Ուխտի տապանակը։ Ուղեկցողների կեսը կանգնեց Գարիզին լեռան կողմը, կեսը՝ Գեբաղ լեռան կողմը, ինչպես առաջ պատվիրել էր Տիրոջ ծառա Մովսեսը, որ ժողովրդին օրհնեն, ինչպես նախկինում։ ³⁴ Ապա Հեսուն կարդաց այս օրենքի բոլոր խոսքերը, օրհնություններն ու անեծքները, ինչպես որ գրված է Մովսեսի օրենքի գրքում։ ³⁵ Այն բոլորից, որ Մովսեսը պատվիրել էր Հեսուին, չկար մի խոսք, որ Հեսուն չկարդար Իսրայելի ամբողջ ժողովրդի՝ տղամարդկանց, կանանց, մանուկների և Իսրայելի մեջ եղած օտարականների առաջ:

9

Դաշինք Իսրայելի և Գաբավոնի միջև

¹ Երբ Հորդանան գետի այն կողմի ամորհացիների բոլոր թագավորները՝ լեռնայինները, դաշտայինները, և՛ նրանք, որ մեծ ծովի ամբողջ եզերքին էին, և՛ նրանք, որ Լիբանանի մոտ էին, նաև քետացիները, ամորհացիները, գերգեսացիները, քանանացիները, փերեզացիները, խևացիները, հեբուսացիները լսեցին, ² ամենքը միասին եկան պատերազմ մղելու Հեսուի և Իսրայելի դեմ։

³ Բայց Գաբավոնի բնակիչները, լսելով, թե Հեսուն ի՛նչ է արել Երիքովին և Գայիին, ⁴ խորամանկություն արեցին. եկան պաշարով և պատրաստությամբ՝ իրենց ուսերի վրա առնելով հնացած քուրձեր, նաև մաշված, գինու պատառոտված և կարկատած տիկեր։ ⁵ Նրանց կոշիկների կարերը քանդված էին, նրանց ոտքերի հողաթափերը հնացած և կարկատած էին, նրանց վրայի զգեստները հնացած էին, և նրանց հացի պաշարը չորացած և բորբոսնած էր։

⁶ Նրանք եկան Հեսուի մոտ՝ Իսրայելի բանակատեղին, Գաղգաղա, և Հեսուին ու ողջ Իսրայելին ասացին. «Հեռու երկրից ենք եկել, արդ, մեզ հետ դաշի՛նք կնքեք»։ ⁷ Իսկ Իսրայելի որդիներն ասացին քոռեցիներին. «Գուցե մեզ մոտիկ եք բնակվում, ձեզ հետ ինչպե՞ս դաշինք կնքենք»։ ⁸ Նրանք ասացին Հեսուին. «Մենք քո ծառաներն ենք»։ Հեսուն նրանց ասաց. «Ո՞վ եք և որտեղի՞ց եք եկել»։ ⁹ Նրանք ասացին. «Շատ հեռու երկրից են եկել քո ծառաները հանուն Տիրոջ՝ քո Աստծու, որովհետև լսեցինք նրա անունը և այն, ինչ նա արել է Եգիպտոսում, ¹⁰ և այն, ինչ նա արել է Հորդանան գետի այն կողմի ամորհացիների երկու թագավորներին՝ Եսեբոնի Սեհովն թագավորին և Բասանի Օվգ թագավորին, որ բնակվում էր Աստարովթում և Եդրայինում։ ¹¹ Մեր ծերերը և մեր երկրի բոլոր բնակիչները խոսեցին մեզ հետ և ասացին. “Ձեզ համար ճանապարհի պաշա՛ր վերցրեք, նրանց ընդառա՛ջ գնացեք և ասե՛ք նրանց. “Մենք ձեր ծառաներն ենք, արդ, մեզ հետ դաշի՛նք կնքեք”։ ¹² Այն օրը, որ մենք ելանք մեր տներից և եկանք ձեզ մոտ, մեր այս հացի պաշարը դեռ տաք էր, իսկ հիմա չորացել և բորբոսնել է, ¹³ այս տիկերը, որ լցրինք գինիով, նոր էին, բայց պատռվեցին, մեր շորերը և կոշիկները մաշվեցին շատ երկար ճանապարհից»։

¹⁴ Իսրայելի իշխանները վերցրին նրանց պաշարը, բայց Տիրոջը չհարցրին։ ¹⁵ Հեսուն նրանց հետ խաղաղություն հաստատեց և ուխտեց, որ ողջ կպահի նրանց. ժողովրդի իշխաններն էլ երդվեցին նրանց։ ¹⁶ Նրանց հետ դաշինք կնքելուց երեք օր հետո լսեցին, որ նրանք դրացիներ են և իրենց մոտ են բնակվում։ ¹⁷ Իսրայելի որդիները ճանապարհ ընկան և երրորդ օրը հասան նրանց քաղաքները։ Նրանց քաղաքներն էին Գաբավոնը, Կեփիրոնը, Բերովթը և Հարիմի քաղաքները։ ¹⁸ Իսրայելի որդիները չպատերազմեցին նրանց դեմ, որովհետև ժողովրդի բոլոր իշխանները Տիրոջով՝ Իսրայելի Աստծով երդվել էին նրանց, և ամբողջ ժողովուրդը տրտնջաց իշխանների դեմ։ ¹⁹ Իշխաններն ասացին ողջ ժողովրդին. «Մենք Տիրոջով՝ Իսրայելի Աստծով երդվել ենք և չենք կարող ստել նրանց։ ²⁰ Հիմա այսպես անենք. ողջ թողնենք նրանց, պահպանենք, որ մեզ վրա բարկություն չգա այն երդման համար, որ տվեցինք նրանց»։ ²¹ Եվ իշխաններն ասացին նրանց. «Թող ապրեն և ամբողջ ժողովրդի համար լինեն փայտահատներ և ջրկիրներ»։ Եվ նրանք եղան փայտահատներ ու ջրկիրներ, ինչպես որ իշխաններն ասացին նրանց։

²² Հեսուն նրանց բոլորին կանչեց, խոսեց նրանց հետ և ասաց. «Ինչո՞ւ խաբեցիք ինձ և ասացիք՝ “Ձեզնից շատ հեռու ենք”, մինչդեռ դուք տեղացիներ եք՝ մեր մեջ բնակվողներից։ ²³ Հիմա դուք անիծված եք, և ինձ ու իմ Աստծու համար միշտ պիտի մնաք փայտահատ և ջրկիր ծառա»։ ²⁴ Նրանք պատասխան տվեցին և ասացին Հեսուին. «Մեզ լուր հասավ, որ Տերը՝ քո Աստվածը, իր ծառա Մովսեսին հրամայել է, որ այս երկիրը ձեզ տա և մեզ ու այս երկրի բոլոր բնակիչներին ձեր առաջ բնաջինջ անի, ուստի մենք խիստ վախեցանք ձեզնից և այդ բանն արեցինք։ ²⁵ Հիմա ձեր ձեռքի տակ ենք, վարվե՛ք այնպես, ինչպես հաճելի է ձեզ և ինչպես կամենում եք»։ ²⁶ Եվ նրանց հետ այսպես վարվեցին. այն օրը Հեսուն նրանց ազատեց Իսրայելի որդիների ձեռքից, և չկոտորեցին նրանց։ ²⁷ Նրանց փայտահատներ ու ջրկիրներ կարգեց ամբողջ ժողովրդի և Տիրոջ զոհասեղանի համար, այն վայրի համար, որ Տերը պիտի ընտրեր, և մինչև այսօր նրանք ծառայում են այդպես։

10

Հաղթանակ ամորհացիների հանդեպ

¹ Երբ Երուսաղեմի թագավոր Ադոնիբեզեկը լսեց, որ Հեսուն գրավել է Գային ու կործանել այն, և ինչպես Երիքովի ու նրա թագավորի հետ էր վարվել, այդպես էլ վարվել է Գայիի ու նրա թագավորի հետ, և թե Գաբավոնի բնակիչներն անձնատուր են եղել Հեսուին ու Իսրայելին և նրանց մեջ մնացել, ² նրանք խիստ զարհուրեցին, որովհետև գիտեին, որ Գաբավոնը մեծ քաղաք է, ինչպես որևէ թագավորանիստ մայրաքաղաք։ Դա Գայիից մեծ էր, և նրա բոլոր մարդիկ զորավոր էին։

³ Երուսաղեմի թագավոր Ադոնիբեզեկը մարդ ուղարկեց Քեբրոնի թագավոր Ելամի, Հերիմութի թագավոր Փերամի, Լաքիսի թագավոր Հեփիեի և Ոդողոմի թագավոր Դաբիրի մոտ ու ասաց. ⁴ «Ելեք եկե՛ք ինձ մոտ և օգնե՛ք ինձ, որ պատերազմենք Գաբավոնի դեմ, որովհետև անձնատուր են եղել Հեսուին և Իսրայելի որդիներին»։ ⁵ Եվ հեբուսացիների հինգ թագավորները՝ Երուսաղեմի թագավորը, Քեբրոնի թագավորը, Հերիմութի թագավորը, Լաքիսի թագավորը և Ոդողոմի թագավորն իրենց ամբողջ ժողովրդով հավաքվեցին եկան, բանակ դրեցին Գաբավոնի շուրջը և պաշարեցին այն։ ⁶ Գաբավոնի բնակիչները մարդ ուղարկեցին Հեսուի մոտ՝ Իսրայելի բանակատեղի, Գաղգաղա, և ասացին. «Մի՛ լքիր քո ծառաներին, շուտ մեզ մո՛տ եկ, մեզ ազատի՛ր և օգնի՛ր մեզ, որովհետև ամորհացիների բոլոր թագավորները, որ բնակվում են լեռնակողմում, հավաքվել են մեր դեմ»։ ⁷ Հեսուն իր ամբողջ պատերազմող զորքի ու բոլոր նրանց հետ, ովքեր զորավոր էին, ելավ Գաղգաղայից։ ⁸ Տերը Հեսուին ասաց. «Չվախենաս նրանցից, որովհետև նրանց քո ձեռքն եմ մատնելու, և նրանցից ոչ ոք չի փրկվի ձեզանից»։

⁹ Ամբողջ գիշերը Գաղգաղայից գալով՝ Հեսուն հանկարծակի հարձակվեց նրանց վրա։ ¹⁰ Տերն Իսրայելի ահը գցեց նրանց մեջ և Գաբավոնում մեծ ջարդ տվեց նրանց. նրանց հալածեցին Բեթորոնի զառիվայրի ճանապարհին և կոտորեցին նրանց մինչև Ազեկա և Մակեդա։ ¹¹ Երբ նրանք Բեթորոնի զառիվայրով փախչում էին Իսրայելի որդիների առաջից, Տերը նրանց վրա երկնքից կարկուտի քարեր թափեց մինչև Ազեկա։ Կարկուտի քարերից մեռածներն ավելի շատ էին, քան նրանք, որոնց Իսրայելի որդիները պատերազմում սրով կոտորեցին։

¹² Այն օրը, երբ Տերը՝ Աստված, ամորհացիներին մատնեց Իսրայելի որդիների ձեռքը, երբ նրանց կոտորեց Գաբավոնում, և նրանք ջախջախվեցին Իսրայելի առաջ, Հեսուն խնդրեց Տիրոջը.

«Թող արեգակը կանգնի Գաբավոնի դիմաց,

իսկ լուսինը՝ Ելովնի ձորի դիմաց»։

¹³ Եվ արեգակն ու լուսինը կանգնեցին անշարժ իրենց տեղերում, մինչև որ Աստված նրանց թշնամիներից վրեժն առավ։ Չէ՞ որ այս գրված է «Ուղղության գրքում[30]»։ Եվ արեգակը կանգնեց երկնքի մեջտեղում և մեկ ամբողջ օր չշարժվեց դեպի արևմուտք։ ¹⁴ Այսպիսի օր չէր եղել ո՛չ առաջ, ո՛չ հետո, որ Աստված լսեր մարդու ձայնը, որովհետև Տերն Իսրայելի հետ միասին պատերազմեց։

¹⁵ Ապա Հեսուն և նրա հետ ողջ Իսրայելը վերադարձան բանակատեղի՝ Գաղգաղա։

Հեսուն գերում է հինգ թագավորներին

¹⁶ Այն հինգ թագավորները փախան Մակեդա և թաքնվեցին քարայրի մեջ։ ¹⁷ Իմաց տվին Հեսուին և ասացին. «Հինգ թագավորները գտնվում են Մակեդայում, քարայրի մեջ թաքնված»։ ¹⁸ Հեսուն ասաց. «Քարայրի մուտքին մեծամեծ քարե՛ր գլորեք և նրանց վրա մարդի՛կ կարգեք, որ հսկեն նրանց։ ¹⁹ Բայց դուք մի՛ դադարեք ձեր թշնամիներին հետապնդելուց, հասե՛ք նրանց վերջնապահներին և թույլ մի՛ տվեք, որ մտնեն իրենց քաղաքները, որովհետև Տերը՝ Աստված, նրանց մատնեց մեր ձեռքը»։ ²⁰ Երբ Հեսուն և Իսրայելի բոլոր որդիները դադարեցին մեծ կոտորածով նրանց իսպառ բնաջնջելուց, և նրանցից ազատվածները մտան ամրացված քաղաքները, ²¹ ամբողջ ժողովուրդը ողջ-առողջ վերադարձավ բանակատեղի՝ Հեսուի մոտ, Մակեդա։ Եվ ոչ ոք չհանդգնեց խոսել Իսրայելի որդիների դեմ։ ²² Եվ Հեսուն ասաց. «Բացե՛ք քարայրը և այնտեղից հանե՛ք, բերե՛ք ինձ մոտ այն հինգ թագավորներին»։ ²³ Այդպես էլ արեցին. հինգ թագավորներին՝ Երուսաղեմի թագավորին, Քեբրոնի թագավորին, Հերիմութի թագավորին, Լաքիսի թագավորին և Ոդողոմի թագավորին, քարայրից հանեցին ու տարան նրա մոտ։ ²⁴ Երբ նրանց տարան Հեսուի մոտ, Հեսուն կանչեց ողջ Իսրայելին, իր հետ գնացած առաջամարտիկներին և ասաց նրանց. «Մոտեցե՛ք և ձեր ոտքերը դրե՛ք նրանց պարանոցների վրա»։ Նրանք մոտեցան և իրենց ոտքերը դրեցին նրանց պարանոցների վրա։ ²⁵ Հեսուն ասաց նրանց. «Մի՛ վախեցեք նրանցից և մի՛ զարհուրեք, արիացե՛ք և զորացե՛ք, որովհետև Տերն այսպես պիտի անի ձեր բոլոր թշնամիներին, որոնց հետ դուք պիտի մարտնչեք»։ ²⁶ Ապա Հեսուն նրանց սպանեց և նրանց հինգին էլ կախեց ծառերից, և նրանք մինչև երեկո ծառերից կախված մնացին։ ²⁷ Արևամուտին Հեսուն հրամայեց, և նրանց իջեցրին ծառերից, գցեցին այն քարայրի մեջ, որտեղ թաքնվել էին, և քարայրի մուտքին գլորեցին մեծամեծ քարեր, որոնք կան մինչև այսօր։

Հարավի քաղաքների գրավումը

²⁸ Այդ օրը գրավեցին նաև Մակեդան, սրի քաշեցին այն ու նրա թագավորին, բնաջնջեցին այն և նրա մեջ եղած բոլոր մարդկանց. ոչ մի ազատված կամ փախստական չմնաց նրանցից։ Մակեդայի թագավորի հետ էլ վարվեցին այնպես, ինչպես վարվել էին Երիքովի թագավորի հետ։

²⁹ Հեսուն, նրա հետ նաև ողջ Իսրայելը Մակեդայից գնացին Լեբնա և պաշարեցին Լեբնան։ ³⁰ Տերը մատնեց այն Իսրայելի ձեռքը, որը և նվաճեց այն ու նրա թագավորին, սրի քաշեց այն ու նրա մեջ եղած բոլոր մարդկանց. նրա մեջ ոչ մի ազատված և փախստական չմնաց։ Նրա թագավորի հետ վարվեց այնպես, ինչպես վարվել էր Երիքովի թագավորի հետ։

³¹ Հեսուն ողջ Իսրայելի հետ Լեբնայից գնաց Լաքիս, բանակատեղի դրեց նրա շուրջը և պաշարեց այն։ ³² Տերը Լաքիսն Իսրայելի ձեռքը մատնեց, որը երկրորդ օրը գրավեց այն, սրի քաշեց և բնաջնջեց այն, ինչպես որ Լեբնայի հետ էր վարվել։ ³³ Այն ժամանակ Գազերի Ելամ թագավորը ելավ օգնելու Լաքիսին, բայց Հեսուն սրի քաշեց նրան ու նրա զորքերին այնպես, որ նրանցից ոչ մի ազատված և փախստական չմնաց։

³⁴ Հեսուն ողջ Իսրայելի հետ Լաքիսից մեկնեց Ոդողոմ, բանակատեղի դրեց նրա շուրջը և պաշարեց այն։ ³⁵ Տերը Ոդողոմը մատնեց Իսրայելի ձեռքը, որը այն օրը գրավեց ու սրի քաշեց այն։ Նրա մեջ եղած բոլոր մարդկանց այն օրը կոտորեցին, ինչպես որ վարվել էին Լաքիսի հետ։

³⁶ Հեսուն ողջ Իսրայելի հետ Ոդողոմից գնաց Քեբրոն ու բանակ դրեց նրա շուրջը։ ³⁷ Գրավեցին ու սրակոտոր արեցին այն, նրա թագավորին և նրա մեջ եղած բոլոր մարդկանց. նրա մեջ ապրող ոչ մեկը չազատվեց։ Նրա հետ վարվեցին այնպես, ինչպես վարվել էին Ոդողոմի հետ. բոլոր բնակիչներին սպանեցին ու նրա մեջ եղած ամեն ինչ ոչնչացրին։

³⁸ Ապա Հեսուն և ողջ Իսրայելը շրջվեցին դեպի Դաբիր և շրջապատելով ³⁹ գրավեցին այն, գերեվարեցին նրա թագավորին և նրա ամբողջ զորքը, սրակոտոր արեցին ամբողջ քաղաքը, բնաջնջեցին այն և նրա մեջ եղած բոլոր մարդկանց. ոչ մեկին ողջ չթողեցին։ Ինչպես վարվել էին Քեբրոնի հետ և ինչպես վարվել էին Լեբնայի ու նրա թագավորի հետ, այդպես էլ վարվեցին Դաբիրի և նրա թագավորի հետ։

⁴⁰ Հեսուն գրավեց ողջ երկիրը՝ լեռնայինն ու Նագեբը [հարավային շրջանները], դաշտային շրջաններն ու Ասեդովթը [լեռնալանջերը]։ Ոչնչացրեց երկրի բոլոր թագավորներին, նրանցից ոչ մեկին ողջ չթողեց, բոլոր բնակիչներին սպանեց, ինչպես պատվիրել էր Տերը՝ Իսրայելի Աստվածը։ ⁴¹ Հեսուն կոտորեց նրանց՝ Կադեսբառնեայից մինչև Գազա, Գոսոմի ամբողջ երկիրը մինչև Գաբավոն։ ⁴² Նրանց բոլոր թագավորներին և նրանց երկիրը Հեսուն նվաճեց միաժամանակ, քանի որ Տերը՝ Իսրայելի Աստվածը, կռվում էր Իսրայելի հետ միասին։

Եվ Հեսուն ու ողջ Իսրայելը վերադարձան բանակատեղի՝ Գաղգաղա։

11

Մարովնի ճակատամարտը

¹ Երբ Ասովրի Հաբին թագավորն այս բաները լսեց, մարդ ուղարկեց Մարովնի թագավոր Հովբաբի, Սեմերոնի թագավորի, Աքիփի թագավորի ² և այն թագավորների մոտ, որոնք մեծ Սիդովնի լեռներում և Քեներեթի դիմաց գտնվող Ռաբաթում, դաշտերում և Նաբեթովրում էին, ³ քանանացիների արևելյան և արևմտյան երկրներում՝ ամորհացիների, քետացիների, փերեզացիների, հեբուսացիների, խևացիների և Ահերմոնի տակ Մասեփայի երկրում ապրողների մոտ։ ⁴ Նրանք իրենց թագավորների ու ծովափի ավազի չափ բազմաքանակ զորքերի հետ ճամփա ելան, չափազանց շատ ձիերով ու կառքերով։ ⁵ Հավաքվեցին այս բոլոր թագավորները, եկան միասին և մեկտեղ բանակ դրեցին Մարովնի ջրերի մոտ, որ պատերազմեն Իսրայելի դեմ։

⁶ Տերը Հեսուին ասաց. «Մի՛ վախեցիր նրանցից, քանի որ վաղը այս ժամին ես նրանց բոլորին փախուստի պիտի մատնեմ Իսրայելի որդիների առաջ. նրանց ձիերին ջղակտոր կանես, նրանց կառքերը հրով կայրես»։ ⁷ Հեսուն ու նրա հետ ամբողջ պատերազմող զորքը Մարովնի ջրերի մոտ հանկարծակի գնացին նրանց դեմ և լեռնակողմում ընկան նրանց վրա։ ⁸ Տերը նրանց Իսրայելի ձեռքը մատնեց, և կոտորելով նրանց՝ հալածեցին մինչև մեծ Սիդովն, մինչև Մասրեփովթմայիմ և մինչև Մասեփայի դաշտը՝ արևելքում։ Կոտորեցին նրանց, մինչև որ նրանցից ոչ մի ազատված մարդ չմնաց։ ⁹ Հեսուն նրանց հետ այնպես վարվեց, ինչպես որ Տերը պատվիրել էր նրան. նրանց ձիերը ջղակոտոր արեց և նրանց կառքերը հրով այրեց։

Ասովրի գրավումը

¹⁰ Այն ժամանակ Հեսուն վերադարձավ և գրավեց Ասովրը, գերեց նրա թագավորին և սպանեց նրան, որովհետև Ասովրն այն բոլոր թագավորությունների գլուխն էր։ ¹¹ Նրա մեջ եղած բոլոր մարդկանց սրակոտոր արեցին, բնաջնջեցին բոլորին. նրա մեջ ոչ մի շնչավոր էակ չմնաց։ Ասովրն էլ կրակով այրեցին։ ¹² Հեսուն գերեց այդ թագավորությունների բոլոր քաղաքներն ու նրանց թագավորներին, նրանց սրի քաշեց և բնաջնջեց, ինչպես որ իրենց հրամայել էր Տիրոջ ծառա Մովսեսը։ ¹³ Բայց Իսրայելը բլուրների վրա եղած բոլոր քաղաքները չայրեց, այլ միայն Ասովրը, որն այրեց Հեսուն։ ¹⁴ Ամբողջ ավարն ու անասուններն Իսրայելի որդիները կողոպտեցին, իսկ բոլոր մարդկանց սրի քաշեցին, մինչև որ բնաջնջեցին նրանց և ոչ մի շնչավոր էակ չթողեցին։ ¹⁵ Ինչպես Տերը հրամայել էր իր ծառա Մովսեսին, և ինչպես Մովսեսը պատվիրել էր Հեսուին, այդպես արեց Հեսուն և ոչ մի բան զանց չարեց այն ամենից, ինչ Մովսեսը պատվիրել էր նրան։

Հեսուի գրաված երկրները

¹⁶ Հեսուն նվաճեց այն ամբողջ երկիրը, լեռնակողմը և ամբողջ Նագեբ երկիրը, ամբողջ Գոսոմ երկիրը, դաշտային և արևմտյան կողմը, Իսրայելի լեռն ու նրա հովիտը, որ լեռան մոտ է, ¹⁷ Աքեղ սարից մինչև Սեիրի ելքը, մինչև Բաաղգադ և Լիբանանի դաշտավայրերը՝ Ահերմոնի ստորոտում, նրանց բոլոր թագավորներին նա բռնեց և կոտորեց։ ¹⁸ Այդ բոլոր թագավորների դեմ Հեսուն շատ օրեր պատերազմ մղեց, ¹⁹ և չկար մի քաղաք, որ Տերն Իսրայելի որդիների ձեռքը մատնած չլիներ, բացի Գաբավոնում բնակվող խևացիներից. բոլորին նվաճեց պատերազմով։ ²⁰ Որովհետև Տիրոջից էր, որ կարծրացան նրանց սրտերը, և նրանք պատերազմով դիմավորեցին Իսրայելին, որպեսզի մեռնեն, որպեսզի նրանց ողորմություն չտրվի, այլ բնաջնջվեն, ինչպես որ Տերն էր ասել Մովսեսին։ ²¹ Այն ժամանակ Հեսուն եկավ և կոտորեց Ենակի որդիներին, որ ապրում էին լեռներում, Քեբրոնում ու Դաբիրում, Անովբում և Իսրայելի ու Հուդայի բոլոր լեռնային շրջաններում։ Իրենց քաղաքներով հանդերձ Հեսուն կոտորեց նրանց, ²² և Իսրայելի որդիների ձեռքից Ենակի որդիներ չմնացին, բացի ոմանք Գազայում, Գեթում և Ասեդովթում։

²³ Հեսուն նվաճեց ամբողջ երկիրը, ինչպես որ Տերը պատվիրել էր Մովսեսին, և Հեսուն այն որպես ժառանգություն բաժիններով տվեց Իսրայելին, ըստ նրանց ցեղերի։ Եվ երկիրը դադարեց պատերազմելուց։

12

Մովսեսից պարտություն կրած թագավորները

¹ Սրանք են այն թագավորները, որոնց կոտորեցին Մովսեսն ու Իսրայելի որդիները և որոնց երկիրը ժառանգեցին Հորդանան գետից այն կողմ՝ դեպի արևելք, Առնովնի ձորից մինչև Ահերմոն լեռը և ամբողջ Արաբան՝ արևելյան կողմից. ² ամորհացիների թագավոր Սեհովնը, որը բնակվում էր Եսեբոնում և տիրում էր Արոյերից մինչև Առնովնի ձորը՝ ձորաբերանը, Գաղաադի կեսը, մինչև Հաբովկի հեղեղատը, որ ամովնացիների սահմանն է, ³ և Արաբան մինչև Քեներեթի ծովը՝ արևելքից և մինչև Աղի ծովը՝ արևելքից, Ասեմովթի ճանապարհը՝ Թեմանից, որ Ասեդովթ Փասգայի ստորոտում է։ ⁴ Բասանի Օվգ թագավորը, որը հսկաների ցեղից էր մնացել և որը բնակվում էր Աստարովթում և Եդրայինում, տիրում էր ⁵ Ահերմոն լեռանը, Սեղքային և ամբողջ Բասանին մինչև Գեսուրի սահմանները, Մաքաթիին և Գաղաադի կեսին, մինչև Եսեբոնի Սեհովն թագավորի սահմանները։ ⁶ Տիրոջ ծառա Մովսեսը և Իսրայելի որդիները ջարդեցին նրանց, և Տիրոջ ծառա Մովսեսը որպես ժառանգություն այն տվեց Ռուբենի և Գադի ցեղերին և Մանասեի կես ցեղին։

Հեսուից պարտություն կրած թագավորները

⁷ Սրանք են ամորհացիների թագավորները, որոնց կոտորեցին Հեսուն և Իսրայելի որդիները Հորդանան գետից այն կողմ՝ դեպի արևմուտք՝ Բաղգադի ծովեզրին, Լիբանանի դաշտում մինչև Աղովկ լեռը, որ բարձրանում է դեպի Սեիր։ Հեսուն Իսրայելի ցեղերին իրենց բաժինների համեմատ որպես ժառանգություն տվեց դրանք՝ ⁸ լեռան վրա, դաշտում, Արաբայում, Ասեդովթում, անապատում, Նագեբում բնակվող քետացիների, ամորհացիների, քանանացիների, փերեզացիների, խևացիների, գերգեսացիների, հեբուսացիների երկրները. ⁹ Երիքովի թագավորը, Բեթելի մոտ գտնվող Գայիի թագավորը, ¹⁰ Երուսաղեմի թագավորը, Քեբրոնի թագավորը, ¹¹ Հերիմութի թագավորը, Լաքիսի թագավորը, ¹² Եգղոնի թագավորը, Գազերի թագավորը, ¹³ Դաբիրի թագավորը, Գադերի թագավորը, ¹⁴ Հերմեի թագավորը, Ադերի թագավորը, ¹⁵ Լեբնայի թագավորը, Ոդողոմի թագավորը, ¹⁶ Մակեդայի թագավորը, ¹⁷ Թափուայի թագավորը, Ոփերի թագավորը, ¹⁸ Ափեկի թագավորը, ¹⁹ Ասովրի թագավորը, ²⁰ Սամրոնի թագավորը, Մարովնի թագավորը, Աքսափի թագավորը, ²¹ Թանաքի թագավորը, Մակեդդովի թագավորը, ²² Կեդեսի թագավորը, Քերմելի Հեկնոմի թագավորը, ²³ Նափեդովրի Դովրի թագավորը, Գեղգեղի Գեղիմի թագավորը և ²⁴ Թերսայի թագավորը։ Այս բոլոր թագավորների թիվը քսանինն է։

13

Դեռ չգրավված երկրներ

¹ Հեսուն ծերացել էր և տարիքն առել։ Տերն ասաց Հեսուին. «Դու ծերացել ես և օրերդ ապրել ես, բայց շատ երկրներ են մնացել ժառանգելու։ ² Մնացած երկրները սրանք են՝ փղշտացիների բոլոր սահմանները, Գեսուրը և Քանանը. ³ Եգիպտոսի դիմացի անշեն վայրից մինչև Ակկարոնի սահմանները աջ կողմում. քանանացիներին են պատկանում փղշտացիների հինգ թագավորությունները՝ գազացիներինը, ազովտացիներինը, ասկաղովնացիներինը, գեթացիներինը, ակկարոնացիներինը, ինչպես նաև խևացիներինը ⁴ Թեմանից։ Ինչպես նաև քանանացիների երկիրը՝ Գազան, Սիդովնից մինչև Ափեկ, մինչև ամորհացիների սահմանները, ⁵ և փղշտացիներից՝ ամբողջ Գաբա երկիրը և ամբողջ Լիբանանը՝ արևելքից, Ահերմոն լեռան ստորոտում գտնվող Գաղգաղայից մինչև Եմաթի մուտքը։ ⁶ Բոլոր լեռնաբնակներին, Լիբանանից մինչև Մասերեփթովթմայիմ և բոլոր սիդովնացիներին ես կկոտորեմ Իսրայելի որդիների առաջ։ Բայց դու դրանք որպես ժառանգություն բաժանի՛ր Իսրայելին, ինչպես որ քեզ պատվիրեցի»։

Հորդանան գետի արևելյան կողմի բաժանումը

⁷ Հիմա այս երկիրը որպես ժառանգություն բաժանի՛ր ինը ցեղերին և Մանասեի կես ցեղին. Հորդանան գետից մինչև Մեծ ծովը դեպի արևմուտք կտաս նրան, և Մեծ ծովը սահման կդառնա։ ⁸ Իսկ երկու ցեղերը՝ Ռուբենի և Գադի ցեղերը, Մանասեի կես ցեղի հետ ստացան իրենց ժառանգությունը, որ տվել էր Մովսեսը Հորդանան գետի այն կողմում՝ արևելքում. Տիրոջ ծառա Մովսեսը նրանց մեջ բաժանեց. ⁹ Արոյերից, որ գտնվում է Առնովնի հեղեղատի եզերքին, և ձորի մեջ գտնվող քաղաքը, ամբողջ Միսովրը, Մեդաբայից մինչև Դեբոն։ ¹⁰ Եսեբոնում թագավորող ամորհացիների արքա Սեհովնի բոլոր քաղաքները, մինչև ամովնացիների սահմանները, ¹¹ Գաղաադը և Գեսուրի ու Մաքաթիի սահմանները, ամբողջ Ահերմոն լեռը, ամբողջ Բասանը, մինչև Սեղքա, ¹² Օվգի ողջ թագավորությունը Բասանում, որ թագավորում էր Աստարովթում և Եդրայինում։ Հսկաների մնացորդներից միայն սա էր մնացել, և Մովսեսը հարվածեց ու սպանեց նրան։

¹³ Բայց իսրայելացիները չբնաջնջեցին գեսուրացիներին, մաքաթացիներին և քանանացիներին, և գեսուրացիների ու մաքաթացիների թագավորը բնակվում է Իսրայելում մինչև այսօր։ ¹⁴ Բայց Ղևիի ցեղին բաժին և ժառանգություն չտրվեց, որովհետև Տերը՝ Իսրայելի Աստվածն է նրանց ժառանգությունը, ինչպես նրանց ասել էր Տերը։

Սրանք են այն բաժինները, որ Մովսեսը բաժանեց Իսրայելի որդիներին Մովաբի Ռաբովթում՝ Հորդանան գետի այն կողմում, Երիքովի դիմաց։

Ռուբենին հատկացված երկիրը

¹⁵ Մովսեսը Ռուբենի ցեղին ժառանգություն տվեց ըստ նրանց տոհմերի, ¹⁶ և նրանց տվեց այն տարածքը, որ սկսվում է Արոյեր քաղաքից, Առնովն գետի ափերից, Առնովն գետի ձորում գտնվող քաղաքից ամբողջ Միսովրը [*  սարահարթ] մինչև Եսեբոն, Մադեբան և նրա շրջակա քաղաքները՝ ¹⁷ Դեբոնը, Բամովթ-բահաղը, Բաաղմովթի տունը, ¹⁸ Հասան, Կեդմովթը, Մեփայաթը, ¹⁹ Կարիաթեմը, Սեբաման, Սարթը և Սիովրը լեռան հարթավայրին, ²⁰ Բեթփագովրը, Ասեդովթ-փասգան, Բեթսիմովթը և Միսովրի մյուս քաղաքները, ²¹ ամբողջ թագավորությունն ամորհացիների Սեհովն թագավորի, որ թագավորում էր Եսեբոնում։ Մովսեսը ջարդեց նրան, ինչպես նաև Մադիամի իշխաններին՝ Եվիին, Րոկոմին, Սուրին, Ուրին, Ռովբեին, որոնք Սեհովնի վասալներն էին, և այդ երկրի բնակիչներին։ ²² Իսրայելի որդիները սրով սպանեցին նաև Բեովրի որդի Բաղաամ գուշակին։

²³ Ռուբենի սահմանը եղավ Հորդանան գետը։ Այս է Ռուբենի որդիների ժառանգությունն ըստ իրենց տոհմերի, սրանք են նրանց քաղաքներն ու ավանները։

Գադին հատկացված երկիրը

²⁴ Մովսեսը բաժին տվեց նաև Գադի որդիներին ըստ իրենց տոհմերի։ ²⁵ Նրանց սահմանները եղան Հազերը, Գաղաադի բոլոր քաղաքները, այսինքն՝ ամովնացիների երկրի կեսը, մինչև Արոյեր[31], որը Ռաբայի դիմացն է, ²⁶ Եսեբոնից մինչև Մասփայի Հռամոթը, Բոտանիմը, Մաանայիմը, մինչև Դաբիրի սահմանները, ²⁷ և Եմակում [*  հովտում] Բեթարամը, Բեթնամրան, Սոկքովթն ու Սափովնը՝ Եսեբոնի արքա Սեհովնի թագավորության մնացած մասը։ Սահմանը Հորդանան գետն է, մինչև Քեներեթի ծովեզերքը, Հորդանան գետի արևելյան կողմը։

²⁸ Այս է Գադի որդիների ժառանգությունն ըստ իրենց տոհմերի, նրանց քաղաքները և ագարակները։

Մանասեի կես ցեղին հատկացված երկիրը

²⁹ Մովսեսը բաժին տվեց նաև Մանասեի կես ցեղին, որը եղավ Մանասեի որդիների կես ցեղի կալվածքը ըստ իրենց տոհմերի։ ³⁰ Նրանց սահմանները եղան Մաանայիմից սկսած ամբողջ Բասանը՝ Բասանի արքա Օվգի ամբողջ թագավորությունը, Հայիրի բոլոր ավանները, որոնք Բասանում են. վաթսուն քաղաք։ ³¹ Գաղաադի կեսը Աստարովթով, Եդրայինը, Բասանում Օվգի թագավորության քաղաքները տրվեցին Մանասեի որդի Մաքիրի որդիներին՝ Մանասեի կես ցեղի որդիներին, ըստ իրենց տոհմերի։

³² Սրանք են այն տեղերը, որ Մովսեսը ժառանգություն տվեց Հորդանան գետի այն կողմում, Մովաբի հովտում, Երիքովի դիմաց՝ արևելքում։

³³ Ղևիի ցեղին Մովսեսը ժառանգություն չտվեց, որովհետև Տերը՝ Իսրայելի Աստվածն ինքն է նրանց ժառանգությունը, ինչպես ասել էր նրանց։

14

Հորդանան գետի արևմտյան կողմի բաժանումը

¹ Սրանք են այն տեղերը, որ քանանացիների երկրում Իսրայելի որդիներին ժառանգություն տվեցին Եղիազար քահանան, Նավեի որդի Հեսուն և Իսրայելի որդիների ցեղերի նահապետական իշխանները։ ² Վիճակով ժառանգությունը տվեցին այն ինը ցեղերին և Մանասեի կես ցեղին, ինչպես որ պատվիրել էր Տերը Հեսուի [*  Մովսեսի] միջոցով, ³ որովհետև Մովսեսը երկու ցեղերին և Մանասեի կես ցեղին ժառանգություն տվել էր Հորդանան գետի այն կողմում։ Բայց նրանց մեջ ղևտացիներին ժառանգություն չէր տվել։ ⁴ Հովսեփի որդիները երկու ցեղ էին՝ Մանասեն և Եփրեմը։ Ղևտացիներին երկրի մեջ բաժին չտրվեց, այլ միայն քաղաքներ՝ բնակվելու համար, և դրանց ագարակները՝ նրանց ոչխարների համար։ ⁵ Ինչպես Տերը պատվիրել էր Մովսեսին, այդպես արեցին Իսրայելի որդիները և բաժանեցին երկիրը։

Քեբրոնը տրվում է Քաղեբին

⁶ Հուդայի որդիները Գաղգաղայում մոտեցան Հեսուին, և կենեզացի Հեփոնեի որդի Քաղեբը նրան ասաց. «Դու ինքդ գիտես, թե Տերը Կադեսբառնեայում Աստծու մարդու՝ Մովսեսի հետ ի՛նչ խոսեց իմ և քո մասին։ ⁷ Ես քառասուն տարեկան էի, երբ Տիրոջ ծառա Մովսեսն ինձ Կադեսբառնեայից ուղարկեց երկիրը հետախուզելու, և նրան մենք լուր բերեցինք նրա ուզածի պես։ ⁸ Բայց ինձ հետ գնացող իմ եղբայրները ժողովրդի միտքը շեղեցին, իսկ ես շարունակեցի հետևել Տիրոջը՝ իմ Աստծուն։ ⁹ Այն օրը Մովսեսը երդվեց և ասաց. “Այն երկիրը, ուր դու հասար, հավիտյան քոնը և քո որդիներինը թող լինի որպես ժառանգություն, քանի որ ես շարունակեցի հետևել Տիրոջը՝ իմ Աստծուն”։ ¹⁰ Եվ արդ, Տերը պահպանեց իմ կյանքը, ինչպես որ ասել էր։ Սա քառասունհինգերորդ տարին է, ինչ Տերն ասել է այս խոսքը Մովսեսին, երբ Իսրայելի որդիները թափառում էին անապատում։ Այժմ ահավասիկ ես այսօր ութսունհինգ տարեկան եմ ¹¹ և կարող եմ այսօր, ինչպես այն ժամանակ, երբ Մովսեսն ինձ ուղարկեց։ Այժմ նույնպես կարող եմ պատերազմի մեջ մտնել և դուրս գալ։ ¹² Այժմ խնդրում եմ քեզնից ինձ տալ այն լեռը, ինչպես որ Տերն ասաց այն օրը։ Դու ինքդ այս բանը լսեցիր այն օրը։ Հիմա այնտեղ Ենակի որդիներն են, և նրանց քաղաքներն ամրացված են ու մեծ։ Արդ եթե Տերն ինձ հետ է, կբնաջնջեմ նրանց, ինչպես Տերն ինձ ասաց»։

¹³ Հեսուն օրհնեց նրան և Քեբրոնը որպես ժառանգություն տվեց Կենեզի որդի Հեփոնեի որդի Քաղեբին։ ¹⁴ Դրա համար Քեբրոնը եղավ կենեզացի Հեփոնեի որդի Քաղեբի ժառանգությունը, որովհետև նա հետևեց Տիրոջ՝ Իսրայելի Աստծու պատվիրաններին։

¹⁵ Քեբրոն քաղաքի անունն առաջ Արբոկ էր, նա Ենակի որդիների մայրաքաղաքն էր։ Եվ երկիրը հանգստացավ պատերազմից։

15

Հուդայի համար սահմանված երկիրը

¹ Հուդայի որդիների ցեղի սահմաններն ըստ իրենց տոհմերի եղան եդովմացիների սահմաններից՝ Սին անապատից մինչև Կադես, հարավային կողմում։ ² Հարավային կողմից նրանց սահմանները գնում են մինչև Աղի ծովի եզրը՝ նրա հարավակողմն իջնող բարձրավանդակից, ³ անցնում են մինչև Ակրաբիմի զառիվայրը, անցնում են Սինաքը, բարձրանում են հարավից դեպի Կադեսբառնեա, ելնում են Հովն, ձգվում Ադդարի մոտով և պտտվում Կադեսի արևմտյան կողմը, ⁴ գնում հասնում են մինչև Ասեմոնա և դուրս գալիս մինչև Եգիպտոսի ձորը։ Այս սահմանը վերջանում է ծովի կողմում։ Սրանք նրանց սահմաններն են հարավից։

⁵ Արևելքից սահմանն ամբողջ Աղի ծովն է, մինչև Հորդանան գետի եզերքը։ Նրանց հյուսիսային սահմանը ծովածոցից, Հորդանան գետի եզերքից ⁶ հասնում է Բեթագղա, անցնում հյուսիսով մինչև Բեթարաբա, բարձրանում է մինչև Ռուբենի որդիների Բեովն քարը։ ⁷ Ապա սահմանը բարձրանում է Աքովրի ձորի չորրորդ մասով, հարավային կողմից իջնում է Գաղգաղ, որը Ադոմիմի մուտքի դիմացն է, հարավային կողմում։ Սահմանը հասնում է Արեգ աղբյուրի ջրին և վերջանում է Ռովգեղի աղբյուրի մոտ։ ⁸ Ապա սահմանը բարձրանում է Ենովմի որդիների ձորը Հեբուսի հետևից, հարավային կողմից, այսինքն՝ Երուսաղեմ։ Ապա հասնում է այն լեռան գլուխը, որը ծովակողմից Ենովմի ձորի դիմացն է, և հյուսիսից Ռափայինների երկրի ծայրին է։ ⁹ Այս սահմանը լեռան գլխից հասնում է մինչև Նափթովի ջրի աղբյուրը, Գայիում հատում է Եփրեմի լեռը, հասնում է Բաաղ, այսինքն՝ Հարիմ քաղաքը։ ¹⁰ Ապա Բաաղից շրջվում է Ասարեսի ծովակողմը, դեպի Սեիր լեռը, հյուսիսից անցնում է Հարիմ քաղաքի հետևով, այսինքն՝ Քասղոնով, իջնում է Արեգ քաղաքն ու անցնում հարավ։ ¹¹ Այնուհետև սահմանն Ակկարոնի հետևից կտրում անցնում է դեպի հյուսիս, հասնում է Սարքայովն, անցնում Բաաղ երկրի լեռան մոտով և հասնում մինչև Աբնեղ. սահմանը վերջանում է ծովակողմում։

¹² Արևմուտքից նրանց սահմանը Մեծ ծովն է։ Սրանք Հուդայի որդիների սահմաններն են շուրջանակի՝ ըստ իրենց տոհմերի։

Քաղեբը գրավում է Քեբրոնը և Դաբիրը

(Դատ. 1.11-15)

¹³ Հեփոնեի որդի Քաղեբին բաժին տրվեց Հուդայի որդիների մեջ՝ Աստծու հրամանով։ Հեսուն նրան տվեց Արբոկ քաղաքը, որը Ենակի որդիների մայրաքաղաքն է, այսինքն՝ Քեբրոնը։ ¹⁴ Հեփոնեի որդի Քաղեբն այնտեղից բնաջնջեց Ենակի երեք որդիներին՝ Սուսիին, Թոլմայիին և Աքիմանին՝ Ենակի զավակներին։

¹⁵ Քաղեբն այնտեղից գնաց Դաբիրի բնակիչների դեմ. Դաբիրի անունն առաջ Նամակների քաղաք էր։ ¹⁶ Քաղեբն ասաց. «Ով գրավի Նամակների քաղաքը և տիրի նրան, իմ դուստր Աքսային նրան կնության կտամ»։ ¹⁷ Այն գրավեց Քաղեբի եղբայր Կենեզի կրտսեր որդի Գոդոնիելը, և Քաղեբն իր դուստր Աքսային նրան կնության տվեց։ ¹⁸ Երբ կինը գնում էր, խորհուրդ արեց Գոդոնիելի հետ և ասաց. «Իմ հորից ագարակ ուզեմ», և ձայն տվեց էշի վրայից։ Քաղեբն ասաց նրան. «Ի՞նչ եղավ քեզ»։ ¹⁹ Աղջիկն ասաց. «Ինձ օրհնությո՛ւն տուր։ Քանի որ ինձ տվեցիր Նագեբ երկիրը, տո՛ւր ինձ նաև Գոլաթմայիմը»։ Եվ Քաղեբը նրան տվեց Վերին Գոլաթն ու Ներքին Գոլաթը։

Հուդայի քաղաքները

²⁰ Այս է Հուդայի որդիների ցեղի ժառանգությունն ըստ իրենց տոհմերի։

²¹ Նրանց՝ Հուդայի որդիների ցեղի՝ Եդովմի սահմանների մոտ, անապատում առաջին քաղաքները եղան Կասբեեղը, Եդրայինը, Հագուրը, ²² Կինան, Դեմոնան, Ադադան, ²³ Կադեսը, Իթնանզիփը, ²⁴ Տեղեմը, Բաաղովթը, ²⁵ Ասեբոն քաղաքը, այսինքն՝ Ասովրը, ²⁶ Ամամը, Սամասը, Մովղադան, ²⁷ Ասերգադդան, Բեթփաղեթը, ²⁸ Ասարսուղան, Բերսաբեեն և նրանց ավաններն ու ագարակները, ²⁹ Բաաղան, Ավիմը, Ասեմը, ³⁰ Եղթուդադը, Քուղը, Երման, ³¹ Սիկեղեկը, Մադեբենան, Սանսաննան, ³² Ղամովթը, Սեղեմին, Ռեմոնը՝ քսանինը քաղաքներ և նրանց ավանները։

³³ Դաշտավայրերում՝ Եսթավուղը, Սարաան, Ասնան, ³⁴ Ռամոնը, Զանովը, Ադիաթեմը, Ենայիմը, ³⁵ Հերիմութը, Ոդողամը, Ներման, Սոկքովթը, Ազեկան, ³⁶ Սագարիմը, Գադերան և նրանց ագարակները՝ տասնչորս քաղաքներ և նրանց ավանները։ ³⁷ Սենանը, Ադասան, Մակդաղգադը, ³⁸ Դաղաանը, Մասփան, Հեքթրայեղը, ³⁹ Ղաքիսը, Բազկաթը, Ագղոնը, ⁴⁰ Քաբբան, Լամասը, Քասղոմը, ⁴¹ Գադերովթը, Բեթղագոնը, Նովման, Մակեդդան՝ տասնվեց քաղաքներ և նրանց ավանները։ ⁴² Լեբնան, Աթերը, ⁴³ Հեփթան, Ասեննան, Նեսիբը, ⁴⁴ Կեիլան, Աքեզիբը, Մարեսան, Եղեմովմը՝ ինը քաղաքներ և նրանց ավանները։ ⁴⁵ Ակկարոնը, նրա ավաններն ու ագարակները, ⁴⁶ Ակկարոնից մինչև Էմեն, Ասեդովթի բոլոր արվարձանները, նրանց ավաններն ու ագարակները, ⁴⁷ Գազան, նրա ավաններն ու ագարակները, մինչև Եգիպտոսի հեղեղատը և Մեծ ծովը, որը սահմանն է։

⁴⁸ Լեռնավայրերում՝ Սափիրը, Հեթերը, Սոկքովթը, ⁴⁹ Դեննան, Ահերմոն լեռը, Նամակաց քաղաքը, այսինքն՝ Դաբիրը, ⁵⁰ Անովբը, Եսթեմովը, Անիմը, ⁵¹ Գոսոմը, Քիղվոնը, Գեղոնը, տասնմեկ քաղաքներ և նրանց ավանները. ⁵² Երեբը, Եսանը, Երուման, ⁵³ Հանումը, Բեթթափուեն, Ափական, ⁵⁴ Քամմատան, Արբոկ քաղաքը, այսինքն՝ Քեբրոնը, Սիորը՝ ինը քաղաքներ և նրանց ավանները։ ⁵⁵ Մավոնը, Քերմելը, Զիփը, Հետտան, ⁵⁶ Հեզրայելը, Հեկտան, Զանովաեկիմը, ⁵⁷ Գաբաան, Թամնան՝ ինը քաղաքներ և նրանց ավանները։ ⁵⁸ Ալուլը, Բեթսուրը, Գեդովրը, ⁵⁹ Մարովթը, Բեթանովթը, Եղթեկեն՝ վեց քաղաքներ և նրանց ավանները։ ^59ա Թեկովը և Եփրաթան, այսինքն՝ Բեթղեսհեմը, Բագովրը, Ետամը, Կուղովնը, Տատամին, Սովրեսը, Կարեմը, Գաղղիմը, Բեթերը, Մանոքովը՝ տասնմեկ քաղաքներ և նրանց ավանները։ ⁶⁰ Կարիաթ-բաաղը, այսինքն՝ Հարիմ քաղաքը և Արաբան՝ երկու քաղաքներ, նրանց ավանները՝ իրենց ագարակներով հանդերձ, ⁶¹ Բեթբարգիսը, Բեթարաբան, Մադովնը, Սովքովան, ⁶² Նեբսանը, Աղահանքի քաղաքները, Ենգադիսը՝ յոթ քաղաքներ և նրանց ավանները։

⁶³ Հեբուսացիները բնակվում էին Երուսաղեմում, և Հուդայի որդիները չկարողացան մարտնչել նրանց դեմ, հեբուսացիները մինչև այսօր Երուսաղեմում բնակվում են Հուդայի որդիների հետ։

16

Եփրեմին և Մանասեին հատկացված երկիրը

¹ Հովսեփի որդիների սահմանները եղան Հորդանան գետից, Երիքովի դիմացից՝ Երիքովի դիմացի ջրի արևելյան կողմից դեպի անապատ։ Երիքովից սահմանները բարձրանում են անապատի լեռնակողմը՝ Բեթել-Լուզ, ² Բեթել-Լուզից բարձրանում և անցնում են Արքիատարովթի սահմանների մոտով, ³ դուրս են գալիս ծովի կողմը, Հեփաղթիի սահմանները, մինչև Ներքին Բեթորոնի սահմաններն ու մինչև Գազեր և վերջանում են ծովի կողմում։ ⁴ Սա ժառանգություն ստացան Հովսեփի որդիները՝ Եփրեմը և Մանասեն։

Եփրեմ

⁵ Եփրեմի որդիների սահմանները եղան ըստ իրենց տոհմերի, այսինքն՝ նրանց ժառանգության սահմանները եղան արևելքից Աստարովթը, Ադարը, մինչև Վերին Բեթորոնը և Գազերը. ⁶ սահմաններն անցնում են հյուսիսից դեպի ծովի կողմը՝ Մաքովթ, և պտտվում են արևելյան կողմից Թենաթսելով, անցնում են արևելքից Հանովի մոտով։ ⁷ Հանովից իջնում են Աստարովթ և Նաարաթա, նրանց ավանները, անցնում են Երիքովի մոտով ու հասնում Հորդանան գետը։ ⁸ Թափուայից սահմաններն անցնում են արևմուտք՝ Կանայի հեղեղատը և վերջանում են ծովակողմում։ Այս է Եփրեմի ցեղի ժառանգությունն ըստ իրենց տոհմերի։ ⁹ Եփրեմի որդիներին քաղաքներ տրվեցին նաև Մանասեի որդիների ժառանգության մեջ, առանձնացված, բոլոր քաղաքներն իրենց ավաններով։

¹⁰ Եփրեմյանները չվերացրեցին Գազերում բնակվող քանանացիներին, և քանանացիները բնակվեցին եփրեմյանների մեջ, մինչև որ եգիպտացիների փարավոն արքան ելավ գրավեց քաղաքը, այն հրով այրեց, ջարդեց Գազերում բնակվող քանանացիներին ու փերեզացիներին, այն օժիտ տվեց իր դստերը, և նրանք դարձան հարկատու ծառաներ։

17

Մանասե ցեղը

¹ Մանասեի՝ Հովսեփի անդրանիկ որդու ցեղի սահմանները սրանք են. Մանասեի անդրանիկին՝ Մաքիրին՝ Գաղաադի հորը, որովհետև պատերազմող մարդ էր, բաժին հասավ Գաղաադը և Բասանը։ ² Մանասեի մյուս որդիներին, Աբիեզերի որդիներին, Քեղեկի որդիներին, Եսրիելի որդիներին, Սյուքեմի որդիներին, Սեմիրայիի որդիներին, Ոփերի որդիներին բաժին հասավ ըստ իրենց տոհմերի։ Սրանք են Հովսեփի որդու՝ Մանասեի որդիները, արու զավակներն ըստ իրենց տոհմերի։ ³ Մանասեի որդու՝ Մաքիրի որդու՝ Գաղաադի որդու՝ Ոփերի որդի Սաղպաադն արու զավակ չուներ, այլ միայն դուստրեր։ Սաղպաադի դուստրերի անունները սրանք են՝ Մաաղա, Նուա, Էգղա, Մեղքա և Թերսա։ ⁴ Նրանք կանգնեցին Եղիազար քահանայի, Նավեի որդի Հեսուի և իշխանների առաջ ու ասացին. «Աստված Մովսեսի միջոցով պատվիրեց, որ մեզ ժառանգություն տրվի մեր եղբայրների մեջ»։ Եվ Տիրոջ հրամանով նրանց ժառանգություն տրվեց իրենց հոր եղբայրների մեջ։ ⁵ Մանասեին բաժին ընկան Ղաբեկի դաշտը և Գաղաադն ու Բասանը, որ Հորդանան գետի այն կողմում են։ ⁶ Քանի որ Մանասեի որդիների դուստրերը ժառանգություն ստացան իրենց եղբայրների մեջ, Գաղաադ երկիրը Մանասեի մյուս որդիներինը եղավ։

⁷ Մանասեի որդիների սահմանները գնում են Սյուքեմի դիմացը գտնվող Ասերմաքթովթից մինչև Համին և Ասեբ՝ Թափթովթայի աղբյուրը։ ⁸ Թափթովթայի երկիրը Մանասեինը եղավ, իսկ Մանասեի սահմանների վրա գտնվող Թափթովթա քաղաքը՝ Եփրեմի որդիներինը։ ⁹ Սահմանները հարավային կողմից իջնում են Կանայի ձորը, Հայիրի ձորի դիմաց, և Եփրեմի բևեկնի ծառն ընկնում է Մանասեի քաղաքի մեջ։ Մանասեի սահմանը հյուսիսից գնում է մինչև հեղեղատը և վերջանում է ծովում։ ¹⁰ Հարավային կողմը Եփրեմինն է, իսկ հյուսիսային կողմը՝ Մանասեինը, և նրանց սահմանը ծովն է։ Հյուսիսային կողմից նրանք հարում են Ասերին, իսկ արևելյան կողմից՝ Իսաքարին։

¹¹ Իսաքարի և Ասերի ժառանգությունների մեջ Մանասեն ստացավ Բեթսանն ու նրա ավանները, Ամբղանն ու նրա ավանները, Ենդովրի բնակիչներն ու նրա ավանները, Մակեդդովի բնակիչներն ու նրա ավանները, Տանաքի բնակիչներն ու նրա ավանները, Նափեթի երրորդ մասն ու նրա ավանները։

¹² Մանասեի որդիները չկարողացան բնաջնջել այս քաղաքները, և քանանացիները շարունակեցին բնակվել այդ երկրում։ ¹³ Երբ իսրայելացիները զորացան, նրանք հնազանդեցրին քանանացիներին, բայց ամբողջովին չբնաջնջեցին նրանց։

Հովսեփի որդիները մտնում են անտառները

¹⁴ Հովսեփի որդիներն ընդդիմացան Հեսուին և ասացին. «Ինչո՞ւ մեզ մեկ բաժին ժառանգություն և մեկ կալվածք տվեցիր։ Մենք բազմամարդ ենք, և Աստված մեզ օրհնել է»։ ¹⁵ Հեսուն նրանց ասաց. «Եթե դուք բազմամարդ եք, գնացե՛ք անտառ, ձեզ համար տե՛ղ մաքրեք փերեզացիների ու ռափայինների երկրում, եթե ձեզ համար նեղ է Եփրեմի լեռը»։ ¹⁶ Հովսեփի որդիներն ասացին. «Եփրեմի լեռը մեզ բավական չէ. այնտեղ՝ մեր երկրում՝ Բեթսանում, նրա ավաններում և Հեզրայելի ձորում մեզ հետ բնակվող բոլոր քանանացիներն ընտիր երիվարներ ու զենքեր ունեն»։ ¹⁷ Հեսուն խոսեց Հովսեփի որդիների՝ Եփրեմի և Մանասեի հետ ու ասաց. «Դուք բազմամարդ ժողովուրդ եք և մեծ զորություն ունեք, թող ձեզ մեկ կալվածք չլինի, ¹⁸ անտառը ձերը լինի։ Անտառ է, կմաքրեք այն, մինչև ծայրը այն ձերը կլինի, երբ բնաջնջեք քանանացիներին. թեպետ նրանք ընտիր երիվարներ ունեն և ձեզանից ուժեղ են, բայց դուք կհաղթեք նրանց»։

18

Երկրի մնացած մասի բաժանումը

¹ Իսրայելի ամբողջ ժողովուրդը հավաքվեց Սելովում, և այնտեղ կանգնեցրին Վկայության խորանը, քանի որ երկիրը նվաճվեց նրանց կողմից։ ² Իսրայելացիներից յոթ ցեղ էր մնացել, որ իր ժառանգությունը չէր ստացել։ ³ Հեսուն նրանց ասաց. «Մինչև ե՞րբ պետք է ծուլանաք և չմտնեք ու ժառանգեք այն երկիրը, որ ձեզ տվեց Տերը՝ մեր հայրերի Աստվածը։ ⁴ Ամեն ցեղից ինձ երեքական մա՛րդ տվեք, ես կուղարկեմ նրանց, որ վեր կենան անցնեն երկրով և չափագրեն այն իմ առաջ՝ պարզելով, թե ինչպե՛ս պետք է բաժանել այն»։ Նրանք եկան նրա մոտ, ⁵ ու նա երկիրը նրանց մեջ յոթ մասի բաժանեց։ Եվ ասաց. «Հուդայի ցեղը թող մնա հարավում, Հովսեփի որդիները՝ հյուսիսում, ⁶ իսկ դուք երկիրը բաժանե՛ք յոթ մասի և չափագրությունը բերեք ներկայացրե՛ք ինձ այստեղ. ես ձեզ համար այստեղ Աստծու առաջ վիճակ կգցեմ։ ⁷ Ղևիի որդիները ձեր մեջ բաժին չունեն, որովհետև նրանց բաժինը Տիրոջ համար արված քահանայությունն է. Գադը, Ռուբենը և Մանասեի կես ցեղը Հորդանան գետի այն կողմում՝ արևելքում, ստացան իրենց ժառանգությունը, որ Տիրոջ ծառա Մովսեսը տվել էր նրանց»։

⁸ Եվ մարդիկ վեր կացան գնացին։ Երկիրն աչքի անցկացնելու գնացած մարդկանց Հեսուն պատվիրեց և ասաց. «Անցեք գնացե՛ք, աչքի անցկացրե՛ք երկիրն ու վերադարձե՛ք ինձ մոտ, իսկ ես Սելովում Տիրոջ առաջ ձեզ համար վիճակ կգցեմ»։ ⁹ Մարդիկ գնացին, շրջեցին երկրում, հետազոտեցին ու տեսան երկիրը և այն ըստ նրա քաղաքների յոթ բաժին անելով՝ չափագրեցին մի գրքի մեջ և բերեցին Հեսուի մոտ՝ բանակատեղի, Սելով։ ¹⁰ Սելովում Հեսուն Տիրոջ առաջ նրանց համար վիճակ գցեց և այնտեղ երկիրը բաժանեց իսրայելացիներին՝ ըստ իրենց բաժինների։

Բենիամինին հատկացված երկիրը

¹¹ Առաջին վիճակն ընկավ Բենիամինի ցեղին՝ ըստ իրենց տոհմերի։ Նրանց բաժնի սահմանն ընկավ Հուդայի և Հովսեփի որդիների միջև։ ¹² Հյուսիսից նրանց սահմանները եղան Հորդանան գետը, Երիքովի հարավից բարձրանալով դեպի հյուսիս, ելնելով լեռան վրա դեպի ծովի կողմը և հասնելով մինչև Բեթ-Ավենի Մաբդարա բնակավայրը. ¹³ այնտեղից անցնում են Լուզի սահմանները հարավային կողմից, Լուզի հետևից, այսինքն՝ Բեթելից, և սահմաններն իջնում են Ադարի Աստարովթ բնակավայրը, դեպի լեռան կողմը, որը Ներքին Բեթորոնի հարավում է։ ¹⁴ Սահմաններն անցնում, պտույտ են տալիս հարավից ծովահայաց ափով, այն սարից, որ հարավում Բեթորոնի դիմացն է։ Նրա վերջը հասնում է Կարիաթ-բաաղ, այսինքն՝ Հուդայի որդիների Կարիաթ-Յարիմ քաղաքը։ Ծովի կողմում ծայրը այս է։ ¹⁵ Իսկ հարավային կողմում Կարիաթ-բաաղի ծայրից սահմաններն անցնում են Գայի և դուրս են գալիս դեպի Նափթովայի ջրերի աղբյուրը։ ¹⁶ Սահմաններն իջնում են Ենովմի որդիների հովտի դիմացի լեռան եզերքը, որ հյուսիսում Ենակի ռափայինների մասն է, և հարավից՝ Հեբուսի հետևից, իջնում են Ենովմի որդիների Գայի բնակավայրը և գնում Ռովգելի աղբյուրը։ ¹⁷ Հյուսիսից կտրում անցնում են Բեթսամյուսի աղբյուրը, գնում են Եդովմինի զառիվերի դիմացը գտնվող Գալիլովթ, իջնում են մինչև Ռուբենի որդու Բաան վեմը. ¹⁸ հյուսիսից անցնում են Բեթարաբայի թիկունքից և իջնում Արաբա։ ¹⁹ Ապա սահմաններն անցնում են Բեթագղայի հետևից, ծովի հյուսիսից և վերջանում են Աղի ծովի հյուսիսային ու Հորդանան գետի հարավային ծայրում։ Այս է նրանց սահմանը հարավից. ²⁰ իսկ արևելյան կողմի սահմանը Հորդանան գետն է։ Այս է Բենիամինի որդիների ժառանգությունը, և սրանք են նրանց սահմանները շուրջանակի՝ ըստ իրենց տոհմերի։

²¹ Բենիամինի որդիների ցեղի քաղաքներն ըստ իրենց տոհմերի սրանք են՝ Երիքով, Բեթագղա, Ամենգասիմ, ²² Բեթարաբա, Սեմարիմ, Բեթել, ²³ Ավիմ, Ափար, Արփա, ²⁴ Կարեմ, Քափերամին և Գաբաա՝ տասներկու քաղաքներ և նրանց ավանները, ²⁵ Գաբավոն, Ռամմա, Բերովթ, ²⁶ Մասփա, Կեփիրա, Ամուսա, ²⁷ Ռեկեմ, Հերփայել, Թարաղա, ²⁸ Սելալեփ, Հեբուս, այսինքն՝ Երուսաղեմ, Գաբաաթ և Արեմ քաղաքը՝ տասներեք քաղաքներ և նրանց ավանները։ Այս է Բենիամինի որդիների ժառանգությունը՝ ըստ իրենց տոհմերի։

19

Շմավոնին հատկացված երկիրը

¹ Երկրորդ վիճակն ընկավ Շմավոնին, Շմավոնի որդիների ցեղին՝ ըստ իրենց տոհմերի. նրանց ժառանգությունն ընկած էր Հուդայի որդիների ժառանգության մեջ։ ² Նրանց բաժինը եղան Բերսաբեեն, Սաբեեն, Մովղադան, ³ Ասերսուաղը, Բաթուղը, Բովղան, Ասոմը, ⁴ Եղթուղադը, Երման, ⁵ Սիկեղան, Բեթմարքաբովթը, Ասերսուսիմը, ⁶ Բեթղաբաթը և նրանց ագարակները՝ տասներեք քաղաքներ ու նրանց ավանները, ⁷ Այինը, Ռեմոնը, Եթերը և Ասանը՝ չորս քաղաքներ և նրանց ավանները, ⁸ այդ քաղաքների շուրջը եղած բոլոր ագարակները, մինչև Բաաղեթ-Բերամմովթ՝ հարավային Համաթայի մուտքի մոտ։ Այս է Շմավոնի որդիների ցեղի ժառանգությունն ըստ իրենց տոհմերի։ ⁹ Շմավոնի որդիների ցեղի ժառանգությունն ընկած էր Հուդայի որդիների բաժնի մեջ, որովհետև Հուդայի որդիների բաժինն ավելի մեծ էր, քան նրանցը։ Ուստի Շմավոնի որդիները ժառանգություն ստացան նրանց բաժնի մեջ։

Զաբուղոնին հատկացված երկիրը

¹⁰ Երրորդ վիճակը դուրս եկավ Զաբուղոնին՝ ըստ իրենց տոհմերի. նրանց ժառանգության սահմանները եղան մինչև Սարդիթ։ ¹¹ Նրանց սահմաններն են ծովը և Մարաղան, հասնում են մինչև Դաբասթե, հանդիպում Հեկնամի դիմացը գտնվող ձորին, ¹² Սարիդից հետ են դառնում Բեթսամեի արևելյան կողմը, դեպի Քասաղովթ Բոթորի սահմանները, անցնում Դաբարաթ և բարձրանում Հաբագայի մոտով. ¹³ այնտեղից անցնում են արևելք՝ ձգվելով դեպի Կատասիմ քաղաքը, անցնում են Ռեմմոն, Ամաթարիմ Աննուա, ¹⁴ շրջվում են հյուսիսային սահմաններով մինչև Եկանթով և վերջանում Գայիում՝ Եփթայեղում. ¹⁵ նաև՝ Կատտամաթը, Նաաղողը, Սեմրոնը, Հադեղան և Բեթղեհեմը՝ տասներկու քաղաքներ և նրանց ավանները։ ¹⁶ Այս է Զաբուղոնի որդիների ցեղի ժառանգությունն ըստ իրենց տոհմերի՝ նրանց քաղաքներով և ավաններով հանդերձ։

Իսաքարին հատկացված երկիրը

¹⁷ Չորրորդ վիճակը դուրս եկավ Իսաքարին, Իսաքարի որդիներին՝ ըստ իրենց տոհմերի։ ¹⁸ Նրանց սահմանները եղան Հեզրայելը, Աքասեղովթը, Սունամը, ¹⁹ Ափերեմը, Սիանը, Ռամաթը, Ենդանիմը, Ռենաթը, ²⁰ Անարեթը, Ռաբբովթը, Կեսիոնը, ²¹ Այեմեսը, Ռենաթը, Ենգադիսը, Ենգադդան և Բեթմասեմը։ ²² Այս սահմանները ծովային կողմից հարում են Թաբովթին և Կասիմին ու Բեթսամյուսին. նրանց սահմանները վերջանում են Հորդանան գետով՝ տասնվեց քաղաքներ ու նրանց ավանները։ ²³ Այս է Իսաքարի որդիների ցեղի ժառանգությունն ըստ իրենց տոհմերի՝ նրանց քաղաքներով ու ավաններով հանդերձ։

Ասերին հատկացված երկիրը

²⁴ Հինգերորդ վիճակը դուրս եկավ Ասերի որդիների ցեղին՝ ըստ իրենց տոհմերի։ ²⁵ Նրանց սահմանները եղան Քեղկաթը, Ոողին, Բատնեն, Աքսափը, ²⁶ Ամաթը և Մասաղը։ Ծովային կողմից սահմանները հարում են Կարմեղին, Սիորին և Բաղանայեին ²⁷ և արևելյան կողմից հետ են դառնում դեպի Բեթբագովս, հյուսիսից հարում են Զաբուղոնին, Գայիին, Եփթայիեղին, մտնում են Սափաթա Բեթամեկ, գնում են Անայելի սահմաններով և ձախ կողմից անցնում են Քաբովղ, ²⁸ Աքրան, Ռովբ, Ամովն և Կանայի, մինչև մեծ Սիդովն։ ²⁹ Ապա սահմանները հետ են դառնում Ռամա, մինչև ամրացված Տյուրոս քաղաքը, շրջվում են դեպի Սոսա և վերջանում են ծովում, Ակզիփի կալվածքում. ³⁰ ապա՝ Ամմա, Ափեկա և Ռավովբա՝ քսաներկու քաղաքներ ու նրանց ավանները։ ³¹ Այս է Ասերի որդիների ցեղի ժառանգությունն ըստ իրենց տոհմերի՝ նրանց քաղաքներով ու ավաններով հանդերձ։

Նեփթաղիմին հատկացված երկիրը

³² Վեցերորդ վիճակը դուրս եկավ Նեփթաղիմին, Նեփթաղիմի որդիներին՝ ըստ իրենց տոհմերի։ ³³ Նրանց սահմանները եղան Մեեղեփը, Մայեղովմը, Բերսանայիմը, Արսոեն, Նագեբը և Հաբնեղը մինչև Ղակու. սահմանները վերջանում են Հորդանան գետով։ ³⁴ Այս սահմանները հետ են դառնում դեպի Ազանովթ Թաբովրի ծովը, այնտեղից անցնում են Կովկ, հարավից հատում են Զաբուղոնը, ծովային կողմից՝ Ասերը, արևելյան կողմից՝ Հուդայի երկիրը և Հորդանան գետը. ³⁵ նաև տյուրոսցիների պարսպապատ քաղաքները՝ Տյուրոս, Ամաթ, Ռեկկաթ, Քեներեթ, ³⁶ Ադամի, Ռամմա, Ասովր, ³⁷ Կադես, Եդրային, Ասովրի աղբյուրը, ³⁸ Հարովն, Մակդաղիել, Ովրամ, Բեթանաթ և Թասմուս՝ տասնինը քաղաքներ և նրանց ավանները։ ³⁹ Այս է Նեփթաղիմի որդիների ցեղի ժառանգությունը՝ ըստ իրենց տոհմերի՝ նրանց քաղաքներով ու ավաններով հանդերձ։

Դանին հատկացված երկիրը

⁴⁰ Դանի որդիների ցեղին՝ ըստ իրենց տոհմերի, դուրս եկավ յոթերորդ վիճակը։ ⁴¹ Նրանց ժառանգության սահմանները եղան Սարաան, Եսթավուղը, ⁴² Սաղաբինը, Հեթղան, Թամնան, ⁴³ Եղթեկովը, Բաաղովթը, ⁴⁴ Բանեբարակը և Սամեսը, Հաաղոն, ⁴⁵ Եղոն, Ակկարոն, Գաբաթոն, Հութ և Գեթրեմոն քաղաքները, ⁴⁶ և Բազեների ծովից ու Բակրովնայից մինչև Հոպպեի մոտի սահմանը։ ⁴⁷ Դանի որդիները կորցրեցին իրենց սահմանները։ Այս է Դանի որդիների ցեղի ժառանգությունն ըստ իրենց տոհմերի՝ նրանց քաղաքներով և ավաններով հանդերձ։ ^47ա Դանի որդիները չբնաջնջեցին ամորհացիներին՝ լեռան վրայի իրենց նեղողներին, իսկ ամորհացիները նրանց չէին թողնում իջնել հովիտները և նրանցից խլում էին նրանց բաժնի սահմանները։ ⁴⁸ Դանի որդիները գնացին և պատերազմեցին Ղեսեմի դեմ, գրավեցին այն և սրի քաշեցին բնակիչներին, ժառանգեցին այն և բնակվեցին նրա մեջ ու իրենց հոր անունով Ղեսեմն անվանեցին Դան։ Այս է Դանի որդիների ցեղի ժառանգությունն ըստ իրենց տոհմերի՝ այս քաղաքներով և նրանց ավաններով հանդերձ։

Երկրի բաժանման ավարտը

Եվ վերջացրին երկրի բաժանումն իրենց սահմաններով։ ^48ա Ամորհացիները շարունակեցին ապրել Եղոմում և Սաղամիմում, բայց Եփրեմի ձեռքը ծանրացավ նրանց վրա, և նրանք Եփրեմին հարկատու դարձան։

⁴⁹ Եվ գնացին աչքի անցկացնելու երկիրն իր սահմաններով։ Իսրայելի որդիները Նավեի որդի Հեսուին ժառանգություն տվեցին իրենց տարածքի մեջ. ⁵⁰ Տիրոջ հրամանով նրան տվեցին նրա ուզած Թամնաթսարա քաղաքը, որ Եփրեմի լեռան վրա է, և նա շինեց քաղաքը և բնակվեց նրա մեջ։

⁵¹ Սրանք են այն հողաբաժինները, որ Եղիազար քահանան, Նավեի որդի Հեսուն և Իսրայելի ցեղերի նահապետները Սելովում՝ Տիրոջ առաջ, Վկայության խորանի դռանը, վիճակով բաժանեցին։ Եվ գնացին աչքի անցկացնելու երկիրը։

20

Ապաստանի քաղաքները

¹ Տերը խոսեց Հեսուի հետ և ասաց. ² «Խոսի՛ր Իսրայելի որդիների հետ և ասա՛. “Տվե՛ք ապաստանի քաղաքները, որոնց մասին Մովսեսի միջոցով ասել եմ ձեզ, ³ որպես ապաստան այն սպանողի համար, որ մարդ է սպանել ակամա, դիպվածաբար։ Դրանք ձեզ համար թող ապաստանի քաղաքներ լինեն, որպեսզի սպանողը սպանվածի արյունակցի կողմից չսպանվի, մինչև որ ժողովրդի առաջ ատյանում չկանգնի։ ⁴ Ակամա սպանողը թող փախչի այդ քաղաքներից մեկը, կանգնի քաղաքի դռան մոտ և այդ քաղաքի ծերերին ի լուր ասի իր խոսքը։ Ժողովուրդը թող նրան ընդունի իր մոտ, նրան տեղ տա, և նա բնակվի նրանց հետ։ ⁵ Եվ եթե սպանվածի արյունակիցը գնա նրա հետևից, սպանողին նրա ձեռքը թող չմատնեն, քանի որ նա իր ընկերոջը դիպվածաբար է սպանել և նրա դեմ նախկինում ատելություն չի ունեցել։ ⁶ Թող նա այդ քաղաքում բնակվի, մինչև որ ատյանում կանգնի ժողովրդի առաջ, մինչև որ այն օրերին եղող մեծ քահանան վախճանվի։ Հետո սպանողը թող վերադառնա և գա իր տեղը՝ իր տունը, այն քաղաքը, որտեղից փախել է”»։

⁷ Եվ առանձնացրին Կադեսը Գալիլեայում, Նեփթաղիմի լեռան վրա, Սյուքեմը՝ Եփրեմի լեռան վրա, և Արբոկ քաղաքը, այսինքն՝ Քեբրոնը՝ Հուդայի լեռան վրա. ⁸ Հորդանան գետի այն կողմում, Երիքովից արևելք Ռուբենի ցեղից առանձնացրին Բոսորը, որ անապատում մի հարթավայր էր, Գադի ցեղից՝ Ռամովթը Գաղաադում, Մանասեի ցեղից՝ Գովղանը Բասանում։ ⁹ Սրանք են Իսրայելի բոլոր որդիների և եկած, նրանց մեջ բնակվածների համար որոշված ապաստան քաղաքները, ուր կարող է փախչել ամեն ոք, որ ակամա մարդ է սպանել, որպեսզի չսպանվի սպանվածի արյունակցի ձեռքով, մինչև որ ատյանում չկանգնի ժողովրդի առաջ։

21

Ղևտացիների քաղաքները

¹ Ղևիի որդիների ավագները մոտեցան Եղիազար քահանային, Նավեի որդի Հեսուին և Իսրայելի որդիների ցեղերի տոհմերի ավագներին, ² խոսեցին նրանց հետ Սելովում՝ քանանացիների երկրում, և ասացին. «Տերը Մովսեսի միջոցով հրամայել է, որ մեզ բնակվելու համար քաղաքներ և մեր անասունների համար նրանց արոտավայրերը տրվեն»։ ³ Եվ Իսրայելի որդիները Տիրոջ հրամանով ղևտացիներին ժառանգություն տվեցին հետևյալ քաղաքներն ու դրանց արոտավայրերը։ ⁴ Առաջին վիճակն ընկավ Կահաթի տոհմին. Ահարոնի որդիներին՝ ղևտացի քահանաներին, վիճակով հասան Հուդայի ցեղից, Շմավոնի ցեղից և Բենիամինի ցեղից տասներեք քաղաքներ։ ⁵ Կահաթի մնացած մյուս որդիներին վիճակով հասան Եփրեմի ցեղից, Դանի ցեղից և Մանասեի կես ցեղից տասը քաղաքներ։ ⁶ Գեթսոնի որդիներին վիճակով հասան Իսաքարի ցեղից, Ասերի ցեղից, Նեփթաղիմի ցեղից և Բասանի մեջ եղող Մանասեի կես ցեղից տասներեք քաղաքներ։ ⁷ Մերարիի որդիներին, ըստ իրենց տոհմերի, վիճակով հասան Ռուբենի ցեղից, Գադի ցեղից և Զաբուղոնի ցեղից տասներկու քաղաքներ։

⁸ Իսրայելի որդիները վիճակով ղևտացիներին տվեցին այս քաղաքները և դրանց արոտավայրերը, ինչպես որ Տերը պատվիրել էր Մովսեսին։ ⁹ Հուդայի որդիների ցեղը, Շմավոնի որդիների ցեղը և Բենիամինի որդիների ցեղը հետևյալ քաղաքներն անվանապես տվեցին ¹⁰ Ահարոնի որդիներին՝ Ղևիի որդիներից՝ Կահաթի որդիներից, քանի որ առաջին վիճակը նրանց էր դուրս եկել, ¹¹ տվեցին Կարիաթարբոկը՝ Ենակի որդիների քաղաքամայրը, այսինքն՝ Քեբրոնը, Հուդայի լեռան վրա, և նրա շուրջը եղած արոտավայրերը։ ¹² Սակայն նրա ագարակները և ավանները Հեսուն որպես կալվածք տվեց Հեփոնիի որդի Քաղեբին։ ¹³ Ահարոնի որդիներին՝ քահանաներին, սպանողի համար ապաստանի քաղաք Քեբրոնից և նրա շրջակայքից բացի տվեցին նաև Լեբնան և նրա արվարձանները, ¹⁴ Հեթերը և նրա արվարձանները, Հեսթեմովը և նրա արվարձանները, ¹⁵ Աղոնը և նրա արվարձանները, Դաբիրը և նրա արվարձանները, ¹⁶ Այինը և նրա արվարձանները, Հետտան և նրա արվարձանները, Բեթսամյուսը և նրա արվարձանները՝ ինը քաղաքներ այդ երկու ցեղից։

¹⁷ Իսկ Բենիամինի ցեղից՝ Գաբավոնը և նրա արվարձանները, ¹⁸ Անաթովթը և նրա արվարձանները, Աղմոնը և նրա արվարձանները, Գաբաան և նրա արվարձանները՝ չորս քաղաքներ։ ¹⁹ Ահարոնի որդիների՝ քահանաների բոլոր քաղաքները տասներեքն էին իրենց արոտավայրերով։

²⁰ Կահաթի որդիների մնացած տոհմերի ղևտացիներին քաղաքներ բաժին հասան Եփրեմի ցեղից։ ²¹ Նրանց տվեցին սպանողի համար ապաստանի քաղաք Սյուքեմը և նրա արվարձանները Եփրեմի լեռան վրա, ինչպես նաև Գազերը և նրա արվարձանները, ²² Կաբսեմը և նրա արվարձանները, Վերին Բոթորոնը և նրա արվարձանները, ընդամենը չորս քաղաք։ ²³ Դանի ցեղից՝ Եղթեկովը և նրա արվարձանները, Գեբեթովնը և նրա արվարձանները, ²⁴ Հաղոնը և նրա արվարձանները, Գեթրեմոնը և նրա արվարձանները, ընդամենը չորս քաղաք։ ²⁵ Իսկ Մանասեի կես ցեղից՝ Թանաքը և նրա արվարձանները, Բեթսանը և նրա արվարձանները, ընդամենը երկու քաղաք։ ²⁶ Կահաթի որդիների մնացած տոհմերի բոլոր քաղաքներն իրենց արվարձաններով թվով տասն էին։

²⁷ Ղևտացիներից Գեթսոնի որդիներին Մանասեի կես ցեղից տվեցին սպանողի համար առանձնացված ապաստանի քաղաք Գովղանը Բասանում ու նրա արվարձանները, ինչպես նաև Բեեստարան ու նրա արվարձանները, ընդամենը երկու քաղաք։ ²⁸ Իսաքարի ցեղից՝ Կեսիոնը և նրա արվարձանները, Դաբրաթը և նրա արվարձանները, ²⁹ Երիմովթը և նրա արվարձանները, Նամակների աղբյուրը և նրա արվարձանները, ընդամենը չորս քաղաք։ ³⁰ Ասերի ցեղից՝ Մասաաղը և նրա արվարձանները, Աբդոնը և նրա արվարձանները, ³¹ Քեղկաթը և նրա արվարձանները, Ռովբը և նրա արվարձանները, ընդամենը չորս քաղաք։ ³² Նեփթաղիմի ցեղից՝ սպանողի համար առանձնացված ապաստանի քաղաք Կադեսը Գալիլեայում և նրա արվարձանները, ինչպես նաև Եմաթդովրը և նրա արվարձանները, Նոյեմոնը և նրա արվարձանները, ընդամենը երեք քաղաք։ ³³ Գեթսոնի բոլոր քաղաքները, ըստ իրենց տոհմերի, տասներեքն էին՝ իրենց արվարձաններով հանդերձ։

³⁴ Մերարիի որդիների տոհմերին, այսինքն՝ մնացած ղևտացիներին, տվեցին Զաբուղոնի որդիների ցեղից՝ Հեկնամը և նրա արոտավայրերը, Կադեսը և նրա արոտավայրերը, Կարթան և նրա արոտավայրերը, ³⁵ Դեմնան և նրա արոտավայրերը, Նաաղովղը և նրա արոտավայրերը, ընդամենը հինգ քաղաք։ ³⁶ Հորդանան գետի այն կողմում՝ Երիքովի դիմաց, Ռուբենի ցեղից տվեցին սպանողի համար ապաստանի քաղաք Բոսորը՝ Միսովրի անապատում, և նրա արոտավայրերը, ինչպես նաև Հազերը և նրա արոտավայրերը, ³⁷ Կեդսոնը և նրա արոտավայրերը, Մասփան և նրա արոտավայրերը, ընդամենը չորս քաղաք։ ³⁸ Գադի ցեղից տվեցին սպանողի համար ապաստանի քաղաք Ռամովթը Գաղաադում և նրա արոտավայրերը, ինչպես նաև Մաանայիմը և նրա արոտավայրերը, ³⁹ Եսեբոնը և նրա արոտավայրերը, Ազերը և նրա արոտավայրերը, ընդամենը չորս քաղաք։ ⁴⁰ Ղևիի ցեղից մնացած Մերարիի որդիների բոլոր քաղաքները, ըստ իրենց տոհմերի, եղան տասներկուսը։

⁴¹ Իսրայելի որդիների կալվածքների մեջ ղևտացիների բոլոր քաղաքներն ընդամենը քառասունութն էին՝ այդ քաղաքների շուրջը եղած իրենց արոտավայրերով հանդերձ։ ⁴² Այդ քաղաքներն իրենց շուրջն ունեին արոտավայրեր. այդպես էին այդ բոլոր քաղաքները։

^42ա Եվ Հեսուն ավարտեց երկրի բաժանումն իր սահմաններով։ ^42բ Իսկ Իսրայելի որդիները Տիրոջ հրամանի համաձայն Հեսուին բաժին տվեցին այն քաղաքը, որ նա խնդրեց՝ Թամնաթսարան Եփրեմի լեռան վրա։ ^42գ Հեսուն շինեց քաղաքը և բնակվեց նրա մեջ։ ^42դ Հեսուն վերցրեց այն քարե սրերը, որոնցով թլփատել էր անապատի ճանապարհին ծնված Իսրայելի որդիներին, որոնք չէին թլփատվել անապատում, և պահեց այն Թամնաթսարայում։

⁴³ Տերն Իսրայելի որդիներին տվեց այն ամբողջ երկիրը, որ նրանց հայրերին երդվել էր տալ, և նրանք ժառանգեցին այն ու բնակվեցին նրա մեջ։ ⁴⁴ Տերը նրանց հանգիստ տվեց երկրի բոլոր սահմաններում, ինչպես երդվել էր նրանց հայրերին, և նրանց թշնամիներից ոչ ոք դուրս չեկավ նրանց դեմ, որովհետև նրանց բոլոր թշնամիներին Տերը մատնել էր նրանց ձեռքը։ ⁴⁵ Ոչ մի բան պակաս չմնաց այն բոլոր բարի խոսքերից, որ ասել էր Տերն Իսրայելի որդիներին, այլ ամեն բան կատարվեց։

22

Հեսուն արևելքի ցեղերին ուղարկում է տուն

¹ Այն ժամանակ Հեսուն կանչեց Ռուբենի և Գադի որդիներին և Մանասեի կես ցեղին ² ու նրանց ասաց. «Դուք անսացիք այն ամենին, ինչ որ հրամայել էր ձեզ Տիրոջ ծառա Մովսեսը, և լսեցիք իմ խոսքն ամեն ինչում, որ պատվիրեցի ձեզ. ³ այսքան օրեր չլքեցիք ձեր եղբայրներին. դեռ ավելին, մինչև այսօր պահեցիք Տիրոջ՝ ձեր Աստծու պատվիրանները։ ⁴ Այժմ Տերը՝ մեր Աստվածը, տեղավորեց ձեր եղբայրներին, ինչպես որ նրանց ասել էր, ուստի հե՛տ դարձեք, գնացե՛ք ձեր տներն ու ձեր կալվածքների երկիրը, որ ձեզ տվել է Տիրոջ ծառա Մովսեսը Հորդանան գետի այն կողմում։ ⁵ Միայն թե շատ զգո՛ւյշ եղեք, որ կատարեք այն պատվիրաններն ու օրենքը, որ պատվիրել է մեզ Տիրոջ ծառա Մովսեսը. այն է՝ սիրել Տիրոջը՝ մեր Աստծուն, ընթանալ նրա բոլոր ճանապարհներով, պահել նրա պատվիրանները, հարել նրան և պաշտել նրան ձեր ամբողջ սրտով և ձեր ամբողջ հոգով»։ ⁶ Հեսուն օրհնեց նրանց ու արձակեց, և նրանք գնացին իրենց տները։

⁷ Մանասեի կես ցեղին Մովսեսը կալվածք էր տվել Բասանում, իսկ մյուս կեսին Հեսուն նրանց եղբայրների հետ կալվածք տվեց ծովեզերքին։ Երբ Հեսուն նրանց արձակեց իրենց տները, օրհնեց նրանց, խոսեց նրանց հետ և ասաց. ⁸ «Հարստությամբ գնացե՛ք ձեր տները. թշնամուց ավար առնված անասունը, արծաթը, ոսկին, պղինձը, երկաթը և զգեստները կիսե՛ք ձեր եղբայրների հետ»։ ⁹ Եվ գնացին։ Ռուբենի որդիները, Գադի որդիները և Մանասեի կես ցեղը քանանացիների երկրում գտնվող Սելովում բաժանվեցին Իսրայելի որդիներից, որպեսզի գնան Գաղաադի երկիրը՝ իրենց կալվածքի երկիրը, որ ժառանգել էին Մովսեսի միջոցով՝ Տիրոջ հրամանի համաձայն։

Հորդանան գետի եզերքին կառուցված զոհասեղանը

¹⁰ Ռուբենի որդիները, Գադի որդիները և Մանասեի կես ցեղը եկան Հորդանան գետի Գալիլովթ վայրը, որ քանանացիների երկրում է, և Հորդանան գետի եզերքին զոհասեղան շինեցին, վեհատեսիլ մի զոհասեղան։ ¹¹ Իսրայելի որդիները լսեցին և ասացին. «Ահա Ռուբենի որդիները, Գադի որդիները և Մանասեի կես ցեղը զոհասեղան են շինել քանանացիների երկրի սահմաններում՝ Հորդանան գետի Գալիլովթ վայրում, Իսրայելի որդիների սահմաններից այն կողմ»։ ¹² Երբ Իսրայելի որդիներն այս լսեցին, հավաքվեցին Սելովում, որ ելնեն պատերազմելու նրանց դեմ։ ¹³ Իսրայելի որդիները Ռուբենի որդիների, Գադի որդիների և Մանասեի կես ցեղի մոտ՝ Գաղաադ, ուղարկեցին Փենեեսին՝ Ահարոն քահանայի որդու՝ Եղիազարի որդուն ¹⁴ և նրա հետ իշխաններից տասը մարդ՝ Իսրայելի բոլոր ցեղերից մի-մի իշխան։ Նահապետական տների այդ իշխաններն Իսրայելի հազարապետներ էին։ ¹⁵ Նրանք եկան Գաղաադ՝ Ռուբենի որդիների, Գադի որդիների և Մանասեի կես ցեղի մոտ, խոսեցին նրանց հետ ու ասացին. ¹⁶ «Տիրոջ ամբողջ ժողովուրդն այսպես է ասում. “Այդ ի՞նչ հանցանք գործեցիք Տիրոջ՝ Իսրայելի Աստծու դեմ՝ խոտորվելով Տիրոջից, ձեզ համար զոհասեղան շինելով և Տիրոջ՝ մեր Աստծու դեմ ապստամբելով։ ¹⁷ Մի՞թե քիչ է մեզ համար Փոգովրի մեղքը, որից մինչև հիմա չենք մաքրվել, և որի համար Տիրոջ ժողովրդի վրա հարվածներ եկան։ ¹⁸ Դուք էլ այսօր խոտորվեցիք Տիրոջից։ Եթե դուք այսօր ապստամբեք Տիրոջ դեմ, վաղը բարկություն կթափվի ամբողջ Իսրայելի վրա։ ¹⁹ Եթե ձեր կալվածքի երկիրը փոքր է ձեզ համար, անցե՛ք Տիրոջ կալվածքի երկիրը, որտեղ կանգնած է Տիրոջ խորանը, և մեր մեջ կալվա՛ծք վերցրեք, բայց մի՛ ապստամբեք Տիրոջ դեմ և մեր դեմ էլ մի՛ ապստամբեք՝ Տիրոջ՝ մեր Աստծու զոհասեղանից զատ ձեզ համար զոհասեղան շինելով։ ²⁰ Չէ՞ որ Զարայի շառավիղ Աքարը հանցանք գործեց՝ նզովված իրերից վերցնելով, իսկ բարկությունն Իսրայելի ամբողջ ժողովրդի վրա թափվեց. նա միայնակ էր, բայց մի՞թե միայն ինքը մեռավ իր մեղքերի համար”»։

²¹ Ռուբենի որդիները, Գադի որդիները և Մանասեի կես ցեղը պատասխան տվեցին և խոսելով հազարապետների հետ՝ ասացին. ²² «Աստված, Աստված է Տերը և Աստված, Աստված ինքը գիտի, և Իսրայելն ինքն էլ թող իմանա. եթե ապստամբելով հանցանք գործեցինք Տիրոջ դեմ, թող մեզ այսօր չփրկի։ ²³ Եթե մեզ համար զոհասեղան շինեցինք, որպեսզի նրա վրա ողջակեզ մատուցելով կամ փրկության զոհ անելով, ապստամբենք Տիրոջ դեմ, Տերն ինքը թող վրեժխնդիր լինի։ ²⁴ Մենք բարեպաշտորեն արեցինք այս՝ ասելով, թե գուցե ձեր որդիները խոսեն մեր որդիների հետ և ասեն. “Ի՞նչ գործ ունեք դուք Տիրոջ՝ Իսրայելի Աստծու հետ, ²⁵ Ռուբենի՛ որդիներ և Գադի՛ որդիներ, Տերը մեր և ձեր միջև Հորդանան գետը սահման դրեց, և դուք Տիրոջից բաժին չունեք”։ Եվ ձեր որդիները մեր որդիներին հեռացնեն Տիրոջը պաշտելուց։ ²⁶ Ուստի ասացինք՝ այսպես անենք. շինենք այս զոհասեղանը ոչ թե ողջակեզների և զոհերի համար, ²⁷ այլ որպեսզի սա վկայություն լինի մեր և ձեր միջև, մեզանից հետո՝ նաև մեր որդիների միջև, որ մեր ընծաներով, մեր ողջակեզներով և մեր փրկության զոհերով Տիրոջը պաշտամունք մատուցենք, որ վաղը ձեր որդիները չասեն մեր որդիներին. “Դուք բաժին չունեք Տիրոջից”։ ²⁸ Մենք ասացինք. “Եթե վաղը մեզ կամ մեր սերունդներին այսպես ասելու լինեն, մեր սերունդները կասեն, թե՝ “Տեսե՛ք Տիրոջ զոհասեղանի օրինակով պատրաստված զոհասեղանը, որ մեր հայրերը շինեցին ոչ թե ողջակեզների և զոհերի համար, այլ որպես վկայություն մեր և ձեր միջև և մեր որդիների միջև”։ ²⁹ Քա՛վ լիցի, որ մենք այսօր ապստամբենք Տիրոջ դեմ և զոհի, ողջակեզի կամ փրկության զոհի համար զոհասեղան շինենք, բացի Տիրոջ՝ մեր Աստծու զոհասեղանից, որ նրա խորանի առաջ է”»։

³⁰ Փենեես քահանային և ժողովրդի բոլոր իշխաններին՝ Իսրայելի հազարապետներին, որ նրա հետ էին, հաճելի թվացին այս խոսքերը, որ ասացին Ռուբենի որդիները, Գադի որդիները և Մանասեի կես ցեղը։ ³¹ Տիրոջ քահանա Փենեեսը՝ Եղիազարի որդին, ասաց Ռուբենի որդիներին, Գադի որդիներին և Մանասեի կես ցեղին. «Այսօր իմացանք, որ Տերը մեզ հետ է, որովհետև դուք Տիրոջ առաջ հանցանք չգործեցիք և Իսրայելի որդիներին ազատեցիք Տիրոջ ձեռքից»։

³² Փենեես քահանան՝ Եղիազարի որդին, և տոհմերի իշխանները վերադարձան Ռուբենի որդիների, Գադի որդիների և Մանասեի կես ցեղի մոտից՝ Գաղաադ երկրից քանանացիների երկիրը՝ Իսրայելի որդիների մոտ, և նրանց տվեցին բացատրությունը։ ³³ Այս բանը հաճելի թվաց Իսրայելի որդիներին, որոնք օրհնեցին Իսրայելի որդիների Աստծուն, խոսեցին Իսրայելի որդիների հետ ու ասացին, որ այլևս պատերազմի դուրս չեն գա նրանց դեմ՝ կործանելու Ռուբենի որդիների, Գադի որդիների և Մանասեի կես ցեղի երկիրը, որտեղ նրանք բնակվում էին։ ³⁴ Հեսուն անուն դրեց Ռուբենի ցեղի, Գադի ցեղի և Մանասեի կես ցեղի զոհասեղանին և ասաց, որ դա Վկայություն է նրանց մեջ, թե Տերը նրանց Աստվածն է։

23

Հեսուի կտակը

¹ Շատ օրեր հետո, երբ Տերը հանգստացրել էր Իսրայելին նրա շրջակայքում եղած բոլոր թշնամիներից, և Հեսուն ծերացել ու տարիքն առել էր, ² Հեսուն կանչեց Իսրայելի բոլոր որդիներին, նրանց ծերակույտին, նրանց իշխաններին, նրանց դատավորներին, նրանց դպիրներին և ասաց նրանց. «Ես ծերացել եմ և տարիքս առել։ ³ Դուք ինքներդ տեսաք այն ամենը, ինչ Տերը՝ մեր Աստվածը, արեց այն բոլոր ազգերին, որոնց վերացրեց ձեր առջևից, որովհետև Տերը՝ Աստված, ինքն էր պատերազմում ձեզ հետ միասին։ ⁴ Արդ, տեսե՛ք, որպես ժառանգություն ըստ ձեր ցեղերի ձեզ թողեցի այս մնացած ազգերին, բոլոր ազգերին, որոնց ջարդեցի Հորդանան գետից մինչև Մեծ ծովը, դեպի արևմուտք։ ⁵ Արդ Տերը՝ մեր Աստվածն ինքը կկոտորի նրանց ձեր առաջ, մինչև ոչնչանան, նրանց դեմ վայրի գազաններ կուղարկի, մինչև ձեր առաջ բնաջնջի նրանց ու նրանց թագավորներին, և դուք ժառանգություն ստանաք նրանց երկիրը, ինչպես որ Տերը՝ մեր Աստվածը, ասել էր մեզ։ ⁶ Ուստի շա՛տ զորացեք և զգո՛ւյշ եղեք, որ կատարեք այն ամենը, ինչ գրված է Մովսեսի օրենքի գրքում, որ նրանից աջ կամ ձախ չխոտորվեք։ ⁷ Չլինի թե մտնեք այն մնացած ազգերի մեջ. թող նրանց աստվածների անունները չտրվեն ձեր մեջ, նրանցով չերդվեք, չպաշտեք նրանց և նրանց երկրպագություն չանեք, ⁸ այլ Տիրոջ՝ մեր Աստծու հետևից գնաք, ինչպես որ արել եք մինչև այսօր։ ⁹ Տերը ձեր առաջ կոտորեց նրանց՝ մեծամեծ և հզոր ազգերին, և ոչ ոք դեմ չկանգնեց ձեզ մինչև այսօր։ ¹⁰ Ձեզնից մեկը հազարներին հալածեց, որովհետև Տերը՝ Աստված, անձամբ պատերազմում էր ձեր հետ, ինչպես որ ասել էր ձեզ։ ¹¹ Շա՛տ զգույշ եղեք ձեր անձերի նկատմամբ, որ սիրեք Տիրոջը՝ ձեր Աստծուն։ ¹² Իսկ եթե հետ դառնաք, ձեր մեջ մնացած ազգերին հարեք, նրանց հետ խնամիություն անեք, խառնակվեք նրանց հետ, և նրանք էլ ձեզ հետ, ¹³ հաստատ իմացած եղեք, որ Տերն այլևս չի կոտորի այն ազգերին ձեր առաջ, և նրանք ձեզ համար որոգայթ և գայթակղություն կլինեն, փուշ՝ ձեր գարշապարների համար և նետեր՝ ձեր աչքերի համար, մինչև որ կորչեք այս բարեբեր երկրից, որ տվեց ձեզ Տերը՝ ձեր Աստվածը։ ¹⁴ Եվ ահա ես այսօր բռնում եմ այն ճանապարհը, որը երբևէ պիտի բռնի այս երկրի վրա եղող ամեն մարդ։ Իմացե՛ք ձեր ամբողջ սրտով և ձեր ամբողջ հոգով, որ այն բոլոր խոսքերից, որ ասաց Տերը՝ ձեր Աստվածը, ոչ մի բան անկատար չմնաց, այլ ամեն ինչ կատարվեց ձեզ համար. դրանցից ոչ մի խոսք սխալ դուրս չեկավ։ ¹⁵ Եվ ինչպես որ կատարվեցին այն բոլոր խոստումները, որ ասաց ձեզ համար Տերը, այդպես էլ Տերը ձեզ վրա կթափի ամեն տեսակ պատիժներ, մինչև որ բնաջնջի ձեզ այս բարի երկրից, որ տվել է ձեզ Տերը՝ ձեր Աստվածը։ ¹⁶ Եթե դրժեք Տիրոջ՝ ձեր Աստծու ուխտը, որ պատվիրել է ձեզ, և գնաք պաշտեք օտար աստվածների ու երկրպագեք նրանց, Տերը կբարկանա ձեզ վրա, և դուք անմիջապես կկորչեք այս բարեբեր երկրից, որ Տերը տվել է ձեզ»։

24

Իսրայելի որոշումը ծառայելու Տիրոջը

¹ Հեսուն Իսրայելի բոլոր ցեղերին հավաքեց Սելովում, կանչեց Իսրայելի բոլոր ծերերին, նրանց իշխաններին, նրանց դպիրներին ու նրանց դատավորներին, և կանգնեցին Տիրոջ առաջ։ ² Հեսուն խոսեց ամբողջ ժողովրդի հետ ու ասաց. «Այսպես է ասում Տերը՝ Իսրայելի Աստվածը. “Հնում գետի այն կողմում պանդխտեցին ձեր նախահայրերը, ինչպես օրինակ՝ Թարան՝ Աբրահամի և Նաքովրի հայրը, և պաշտեցին օտար աստվածների։ ³ Գետի [Եփրատի] այն կողմից ես վերցրի ձեր հայր Աբրահամին և նրան առաջնորդեցի քանանացիների ամբողջ երկրով, բազմացրի նրա սերունդը, նրան տվեցի Իսահակին, ⁴ Իսկ Իսահակին տվեցի Հակոբին և Եսավին, Եսավին որպես ժառանգություն տվեցի Սեիր լեռը։ Հակոբը և նրա որդիներն իջան Եգիպտոս և այնտեղ մեծ, բազմամարդ ու հզոր ազգ դարձան։ Եգիպտացիները նրանց չարչարեցին, ⁵ և Տերը հարվածեց եգիպտացիներին նրանց դեմ գործադրած նշաններով և զարմանահրաշ գործերով։ ⁶ Հետո Տերը ձեզ հանեց Եգիպիտոսից, դուք մտաք ծովը, և եգիպտացիները կառքերով ու ձիերով դեպի Կարմիր ծովը հետապնդեցին ձեր հայրերին։ ⁷ Մենք աղաղակեցինք Տիրոջը, և նա ամպ ու մեգ դրեց մեր և եգիպտացիների միջև, ծովը նրանց վրա լցրեց և ծածկեց նրանց։ Մեր աչքերը տեսան, թե ի՛նչ արեց Տերը եգիպտացիների երկրում։ Շատ օրեր մնացիք անապատում։ ⁸ Եվ նա ձեզ բերեց Հորդանան գետի այն կողմում բնակվող ամորհացիների երկիրը, և նրանք ձեր դեմ պատերազմեցին։ Տերը նրանց մատնեց ձեր ձեռքը, դուք ժառանգեցիք նրանց երկիրն ու կոտորեցիք նրանց ձեր առաջ։ ⁹ Մովաբի արքա Սեպփովրի որդի Բաղակը վեր կացավ և պատերազմ մղեց Իսրայելի դեմ. մարդ ուղարկեց, կանչեց Բեովրի որդի Բաղաամին, որ ձեզ նզովի։ ¹⁰ Բայց Տերը՝ ձեր Աստվածը, չկամեցավ ձեզ կորստյան մատնել, օրհնելով օրհնեց ձեզ, ազատեց ձեզ նրանց ձեռքից և նրանց մատնեց ձեր ձեռքը։ ¹¹ Դուք անցաք Հորդանան գետը և եկաք Երիքով։ Երիքովի բնակիչները, ինչպես նաև ամորհացիները, քանանացիները, փերեզացիները, խևացիները, հեբուսացիները, քետացիները և գերգեսացիները պատերազմեցին ձեր դեմ, և Տերը նրանց ձեր ձեռքը մատնեց։ ¹² Ձեզանից առաջ իշամեղուներ ուղարկեց և նրանց՝ ամորհացիների տասներկու թագավորներին քշեց ձեր առաջից։ Ո՛չ քո սրով և ո՛չ էլ քո աղեղով արվեց այդ։ ¹³ Տերը ձեզ տվեց այս երկիրը, որտեղ դուք չեք աշխատել, և բնակվում եք այն քաղաքներում, որ դուք չեք շինել, ուտում եք այն այգիներից և թզենիներից, որ դուք չեք տնկել”։ ¹⁴ Արդ, դուք վախեցե՛ք Տիրոջից, ծառայե՛ք նրան շիտակությամբ և արդարությամբ, հեռացրե՛ք օտար աստվածներին, որոնց պաշտեցին ձեր հայրերը գետի այն կողմում և Եգիպտոսում, և պաշտե՛ք Տիրոջը։ ¹⁵ Իսկ եթե ձեզ համար հաճելի չէ պաշտել Տիրոջը, ապա այսօր որոշե՛ք, թե ո՛ւմ եք պաշտելու. գետի այն կողմի ձեր հայրերի՞ աստվածներին, թե՞ ամորհացիների աստվածներին, որոնց երկրում դուք բնակվում եք։ Իսկ ես և իմ տունը Տիրոջն ենք պաշտում, որովհետև նա սուրբ է»։ ¹⁶ Ժողովուրդը պատասխան տվեց և ասաց. «Քա՛վ լիցի, որ մենք թողնենք Տիրոջը՝ մեր Աստծուն, և օտար աստվածներ պաշտենք, ¹⁷ որովհետև Տերն է մեր Աստվածը, նա հանեց մեզ և մեր հայրերին եգիպտացիների երկրից՝ ծառայության տնից, մեզ համար նա մեծամեծ նշաններ գործեց, պահպանեց մեզ մեր անցած ամբողջ ճանապարհին, պահպանեց բոլոր ազգերի մեջ, որոնց միջով մենք անցանք։ ¹⁸ Տերը մեր առաջից քշեց ամորհացիներին և այս երկրում բնակվող բոլոր ազգերին. ուրեմն մենք էլ Տիրոջն ենք պաշտելու, որովհետև նա է մեր Աստվածը»։

¹⁹ Հեսուն ասաց ժողովրդին. «Դուք չեք կարող Տիրոջը պաշտել, որովհետև նա սուրբ է. նա, նախանձախնդիր լինելով, չի ների ձեր մեղքերն ու անօրենությունները, ²⁰ երբ թողնեք Տիրոջը և օտար աստվածներին պաշտեք։ Նա կչարչարի և կոչնչացնի ձեզ այն բարիքների փոխարեն, որ արել է ձեզ համար»։ ²¹ Ժողովուրդն ասաց Հեսուին. «Այդպես չէ, մենք Տիրոջն ենք պաշտելու»։ ²² Հեսուն ասաց ժողովրդին. «Ահա դուք ինքներդ ձեր վկաներն եք, որ դո՛ւք Տիրոջն ընտրեցիք՝ նրան պաշտելու համար»։ Նրանք ասացին. «Վկա ենք»։ Նա ասաց. ²³ «Արդ, հեռացրե՛ք ձեզանից օտար աստվածներին և ձեր սիրտը Տիրոջը՝ Իսրայելի Աստծո՛ւն դարձրեք»։ ²⁴ Ժողովուրդը Հեսուին ասաց. «Տիրոջը՝ մեր Աստծուն պիտի պաշտենք և նրա ձայնին պիտի անսանք»։

²⁵ Այդ օրը Հեսուն ժողովրդի հետ ուխտ արեց և Սելովում, Իսրայելի Աստծու խորանի առաջ նրան օրենքներ և կանոններ տվեց։ ²⁶ Հեսուն դրանք գրեց Աստծու օրենքի գրքում, մի մեծ քար վերցրեց և այն կանգնեցրեց Տիրոջ առաջ Բևեկնի ծառի տակ։ ²⁷ Եվ Հեսուն ամբողջ ժողովրդին ասաց. «Ահա այս քարը ձեզ վկա թող լինի, որովհետև սա լսեց Տիրոջ բոլոր խոսքերը, որ նա այսօր ձեզ ասաց. սա թող վկա լինի ձեզ հետագա օրերին, եթե ուրանաք Տիրոջը՝ ձեր Աստծուն»։ ²⁸ Ապա Հեսուն արձակեց ժողովրդին, ու ամեն մեկը գնաց իր տեղը։ ²⁹ Եվ Իսրայելը պաշտեց Տիրոջը Հեսուի կենդանության բոլոր օրերին և այն ծերերի կենդանության բոլոր օրերին, որոնք ողջ մնացին Հեսուից հետո, և որոնք տեսան Տիրոջ բոլոր գործերը, որ նա արեց Իսրայելի համար։

Հեսուի և Եղիազարի մահը

³⁰ Սրանից հետո Նավեի որդի Հեսուն՝ Տիրոջ ծառան, հարյուր տասը տարեկանում մեռավ։ ³¹ Նրան թաղեցին իր ժառանգության սահմաններում՝ Թամնաթսարայում, Եփրեմի լեռան վրա, Գայաս լեռան հյուսիսային կողմում։ ^31ա Այնտեղ, որտեղ թաղեցին նրան, որպես հիշատակ նրա հետ դրեցին քարե այն դանակները, որոնցով նա Գաղգաղայում թլփատել էր Իսրայելի որդիներին, երբ նրանց հանեց Եգիպտոսից, ինչպես հրամայել էր Տերը. դրանք այնտեղ են մինչև այսօր։

³² Իսրայելի որդիները Եգիպտոսից հանեցին Հովսեփի ոսկորները և դրանք թաղեցին Սյուքեմում՝ ագարակի այն մասում, որ հարյուր գառով առել էր Հակոբը Սյուքեմում բնակվող ամորհացիներից և բաժին էր տվել Հովսեփին։

³³ Դրանից հետո վախճանվեց Եղիազար քահանան՝ Ահարոնի որդին, և թաղվեց իր որդի Փենեեսին պատկանող Գաբաաթում, որ տվել էին նրան Եփրեմի լեռան վրա։

^33ա Այդ օրերին Իսրայելի որդիները, վերցնելով Աստծու Ուխտի տապանակը, տանում էին իրենց հետ։ Եվ Փենեեսը քահանայացավ իր հոր՝ Եղիազարի փոխարեն, մինչև որ մահացավ և թաղվեց Գաբաաթի իր կալվածքում։

^33բ Իսրայելի որդիները գնացին ամեն մեկն իր տեղն ու իր քաղաքը։ Եվ Իսրայելի որդիները պաշտեցին Աստարտին և Աստարովթին և իրենց շրջակայքում եղած ազգերի աստվածներին։ Եվ Տերը նրանց մատնեց Մովաբի արքա Եգղոմի ձեռքը, որը տիրեց նրանց տասնութ տարի։

ԴԱՏԱՎՈՐՆԵՐ

1

Իսրայելացիները հաստատվում են քանանացիների երկրում

¹ Հեսուի վախճանվելուց հետո Իսրայելի որդիները հարցրին Տիրոջը՝ ասելով. «Մեզանից ո՞վ առաջինը պիտի դուրս գա պատերազմելու քանանացիների դեմ»։ ² Տերն ասաց. «Հուդան թող դուրս գա, քանի որ նրա ձեռքը հանձնեցի երկիրը»։ ³ Եվ Հուդան իր եղբայր Շմավոնին ասաց. «Վե՛ր կաց գնանք ինձ հետ իմ ժառանգությունը և քանանացիների դեմ պատերազմենք, ես էլ քեզ հետ կգամ քո ժառանգությունը ստանալու»։ Եվ Շմավոնը գնաց նրա հետ։ ⁴ Հուդան ելավ, և Տերը քանանացիներին և փերեզացիներին հանձնեց նրա ձեռքը, և նա Բեզեկում նրանցից տասը հազար մարդ կոտորեց։ ⁵ Բեզեկում գտան Ադոնիբեզեկին, նրա դեմ պատերազմեցին և հարվածեցին քանանացիներին և փերեզացիներին։ ⁶ Ադոնիբեզեկը փախավ, նրան հետապնդեցին, հասան նրան և կտրեցին նրա ձեռքերի ու ոտքերի ծայրերը։ ⁷ Եվ Ադոնիբեզեկն ասաց. «Յոթանասուն թագավորներ, որոնց ձեռքերի ու ոտքերի ծայրերը կտրված էին, հավաքում էին իմ սեղանի տակի փշրանքները։ Արդ, ինչպես ես էի արել, այդպես էլ Աստված ինձ հատուցեց»։ Նրան բերեցին Երուսաղեմ, և նա այնտեղ մեռավ։

Հուդայի ցեղը տիրում է Երուսաղեմին

⁸ Հուդայի որդիները պատերազմեցին Երուսաղեմի դեմ, գրավեցին այն, սրի քաշեցին բնակիչներին և քաղաքն այրեցին հրով։

Հուդայի ցեղը տիրում է Քեբրոնին

(Հես. 15.13-14)

⁹ Դրանից հետո Հուդայի որդիներն իջան պատերազմելու այն քանանացիների դեմ, որ բնակվում էին լեռնային մասում, հարավում և դաշտավայրում։ ¹⁰ Հուդան գնաց նաև Քեբրոնում բնակվող քանանացիների վրա, և Քեբրոնը դուրս եկավ նրա դեմ (Քեբրոնի անունն առաջ Կարիաթարբոկ Սեփեր էր)։ Ջարդեցին Սեսիին, Աքիմանին և Թոլմիին՝ Ենակի ժառանգներին։

Գոդոնիելը տիրում է Դաբիրին

(Հես. 15.15-19)

¹¹ Այնտեղից հարձակվեցին Դաբիրի բնակիչների վրա (Դաբիրի անունն առաջ Նամակների քաղաք էր)։ ¹² Եվ Քաղեբն ասաց. «Ով որ հարվածի Նամակների քաղաքին և գրավի այն, իմ դուստր Ասքային նրան կնության կտամ»։ ¹³ Եվ այն գրավեց Քաղեբի կրտսեր եղբայր Կենեզի որդի Գոդոնիելը, և Քաղեբն իր դուստր Ասքային նրան կնության տվեց։ ¹⁴ Երբ աղջիկը գնում էր նրա մոտ, Գոդոնիելը հորդորեց նրան, որ իր հորից մի ագարակ խնդրի։ Աղջիկը տրտնջաց, աղաղակեց էշի վրայից և ասաց. «Անապատային երկիր տվեցիր ինձ»։ Քաղեբը նրան ասաց. «Ի՞նչ եղավ քեզ»։ ¹⁵ Ասքան նրան ասաց. «Ինձ օրհնությո՛ւն տուր. քանի որ ինձ անապատային երկիր տվեցիր, տո՛ւր ինձ նաև ջրերի աղբյուրներ»։ Եվ Քաղեբը, ըստ նրա խնդրանքի, նրան տվեց վերին աղբյուրներն ու հովիտների աղբյուրները։

Հուդայի ու Բենիամինի ցեղերի հաղթանակները

¹⁶ Մովսեսի աներոջ՝ Հովբաբ Կինեցու որդիները, Արմավենիների քաղաքից[32] ելան և գնացին Հուդայի որդիների մոտ՝ Հուդայի անապատը, որը Հուդայի երկրի հարավում է՝ Արադ իջնող ճանապարհին. գնացին բնակվեցին այնտեղի ժողովրդի հետ։ ¹⁷ Հուդան իր հերթին գնաց իր եղբայր Շմավոնի հետ, և նրանք հարվածեցին Սեփաթում բնակվող քանանացիներին և նզովեցին ու կոտորեցին նրանց և այդ քաղաքի անունը դրեցին Սատակում։ ¹⁸ Հուդան չժառանգեց Գազան ու նրա սահմանները, Ասկաղոնն ու նրա սահմանները, Ակկարոնն ու նրա սահմանները, Ազովտոսն ու նրա անդաստանները։ ¹⁹ Տերը Հուդայի հետ էր, և նա ժառանգեց լեռնային շրրջաններ։ Հովիտների բնակիչների տարածքները, սակայն, չկարողացավ ժառանգել, որովհետև Ռեքաբը արգելք եղավ նրանց, և նրանք երկաթե կառքեր ունեին։ ²⁰ Քաղեբին տվեցին Քեբրոնը, ինչպես ասել էր Մովսեսը, և այնտեղից ժառանգեց Ենակի որդիների երեք քաղաքները և այնտեղից քշեց Ենակի երեք որդիներին։

²¹ Բենիամինի որդիները Երուսաղեմում բնակվող հեբուսացիներին չնվաճեցին, և հեբուսացիները բնակվում են այնտեղ Բենիամինի որդիների հետ մինչև այսօր։

Եփրեմի ու Մանասեի ցեղերը տիրում են Բեթելին

²² Հովսեփի որդիները իրենց հերթին ելան դեպի Բեթել, և Տերը նրանց հետ էր։ ²³ Իսրայելի տունը բանակեց Բեթելի դիմաց (այդ քաղաքի անունն առաջ Լուզա էր)։ ²⁴ Պահապանները մի մարդ տեսան, որ դուրս էր գալիս այդ քաղաքից, բռնեցին նրան և ասացին. «Ցո՛ւյց տուր մեզ քաղաքի մուտքը, և մենք կխնայենք քեզ»։ ²⁵ Նա նրանց ցույց տվեց քաղաքի մուտքը, և նրանք քաղաքը սրի քաշեցին, իսկ այն մարդուն և նրա ազգատոհմն արձակեցին։ ²⁶ Այդ մարդը գնաց Քետիմ երկիրը, այնտեղ քաղաք շինեց և նրա անունը Լուզա դրեց, և այդ է նրա անունը մինչև այսօր։

Ժողովուրդներ, որոնց իսրայելացիները չքշեցին

²⁷ Մանասեն չժառանգեց Բեթսանը, այսինքն՝ Սկյութուպոլիսը, ո՛չ նրա ավանները, և ո՛չ էլ նրա անդաստանները, ո՛չ էլ Թանաքը և նրա ավանները, ո՛չ Դովրի բնակիչներին և նրա շուրջը բնակվողներին, ո՛չ էլ նրա ավանները, ո՛չ Բաղակի բնակիչներին և նրա շուրջը բնակվողներին, ո՛չ էլ նրա ավանները, ո՛չ Հեբղամի բնակիչներին և նրա շուրջը բնակվողներին, ո՛չ էլ նրա ավանները։ Եվ քանանացիները շարունակեցին բնակվել այդ երկրում։ ²⁸ Երբ Իսրայելը հզորացավ, քանանացիներին հարկի տակ դրեց, բայց նրանց իսպառ չվերացրեց։

²⁹ Եփրեմն էլ չվերացրեց Գազերում բնակվող քանանացիներին, և քանանացիները բնակվեցին նրա մեջ՝ Գազերում, ու նրան հարկատու եղան։

³⁰ Զաբուղոնն էլ չվերացրեց Կեդրոնի բնակիչներին ու Նաալոլի բնակիչներին, և քանանացիները բնակվեցին նրա մեջ և նրան հարկատու եղան։

³¹ Ասերը չվերացրեց Ակքովի բնակիչներին, որոնք նրան հարկատու եղան, նաև Դովրի բնակիչներին, Սիդովնի բնակիչներին, Դալափի բնակիչներին, Աքազիփը, Ելփայը, Ափեկը և Ռոբը։ ³² Ասերի որդիները բնակվեցին այդ երկրում ապրող քանանացիների մեջ, որովհետև չկարողացան վերացնել նրանց։

³³ Նեփթաղիմը չվերացրեց Բեթսամյուսի բնակիչներին, ոչ էլ Բեթանաթի բնակիչներին։ Նեփթաղիմը բնակվեց այդ երկրում ապրող քանանացիների մեջ, իսկ Բեթսամյուսի և Բեթանաթի բնակիչները նրան հարկատու եղան։

³⁴ Ամորհացիները Դանի որդիներին նեղեցին դեպի լեռները, և նրանց թույլ չէին տալիս իջնել հովիտները։ ³⁵ Եվ ամորհացիներն սկսեցին բնակվել Մուրտաստանի լեռան վրա, որտեղ արջեր և աղվեսներ կային՝ Մուրտաստանում և Սաղապինում։ Հովսեփի ձեռքը ծանրացավ ամորհացիների վրա, և հարկատու եղան նրանց։ ³⁶ Ամորհացիներն Ակրաբիմի զառիվայրի վրա, Վեմից սկսած և դեպի վեր սահմանակից էին եդովմացիներին։

2

Տիրոջ մեղադրանքն իր ժողովրդին

¹ Եվ Տիրոջ հրեշտակը Գաղգաղայից ելավ Լացատեղ [*  Բոխիմ] և Բեթել և Իսրայելի տուն ու ասաց նրանց. «Այսպես է ասում Տերը. “Տերը ձեզ հանեց Եգիպտոսից և բերեց այն երկիրը, որի համար ձեր հայրերին երդվել էր, որ ձեզ կտա և ձեզ ասաց. “Ձեզ հետ դրած ուխտս հավիտյան չեմ դրժի, ² եթե այս երկրի բնակիչների հետ դաշինք չկնքեք, ոչ էլ՝ նրանց աստվածների հետ, չերկրպագեք նրանց, այլ խորտակե՛ք նրանց կուռքերը և կործանե՛ք նրանց զոհասեղանները”։ Բայց դուք իմ խոսքը չլսեցիք և այդ բանն արեցիք։ ³ Եվ ես ասացի. “Այլևս չեմ քշի այս ժողովրդին, որին սկսեցի կոտորել և նրան չեմ վերացնի ձեր առաջից։ Նրանք ձեզ համար փորձանք թող դառնան, և նրանց չաստվածները ձեզ համար գայթակղություն թող լինեն”»։ ⁴ Երբ Տիրոջ հրեշտակն այս խոսքերն ասաց Իսրայելի բոլոր որդիներին, ժողովուրդը ձայնը բարձրացրեց ու լաց եղավ։ ⁵ Դրա համար էլ այն տեղի անունը Լացատեղ դրեցին. և այնտեղ Տիրոջը զոհ մատուցեցին։

Հեսուի մահը

⁶ Հեսուն արձակեց ժողովրդին, և Իսրայելի որդիներից յուրաքանչյուրը գնաց իր տունը և իր ժառանգությունը՝ երկիրը ժառանգելու։ ⁷ Եվ ժողովուրդը Տիրոջը ծառայեց Հեսուի կենդանության բոլոր օրերում և այն ծերերի կենդանության բոլոր օրերում, որոնք երկար ապրեցին Հեսուից հետո և որոնք տեսել էին Տիրոջ բոլոր մեծամեծ գործերը, որ նա արեց Իսրայելի մեջ։ ⁸ Տիրոջ ծառա Հեսուն՝ Նավեի որդին, վախճանվեց հարյուր տասը տարեկան հասակում, ⁹ և նրան թաղեցին իր ժառանգության լեռան վրա՝ Թամնաթարեսում, Եփրեմի լեռան վրա, Գայաս լեռան հյուսիսային կողմում։ ¹⁰ Վախճանվեց նաև այդ ամբողջ սերունդը։ Դրանից հետո եկավ ուրիշ սերունդ, որ չէր ճանաչում ո՛չ Տիրոջը և ո՛չ էլ այն գործերը, որ նա արել էր Իսրայելի մեջ։

Իսրայելը լքում է Տիրոջը

¹¹ Իսրայելի որդիները Տիրոջ առաջ չարիք գործեցին և Բահաղի կուռքերին պաշտեցին. ¹² թողեցին Տիրոջը՝ իրենց հայրերի Աստծուն, որ նրանց հանել էր եգիպտացիների երկրից, գնացին օտար աստվածների՝ իրենց շուրջը եղած ազգերի աստվածների հետևից, երկրպագեցին նրանց և բարկացրին Տիրոջը, ¹³ լքեցին նրան և պաշտեցին Բահաղին ու Աստարտի կուռքերին։ ¹⁴ Տերը սաստիկ զայրացավ Իսրայելի վրա և նրան մատնեց ավարառուների ձեռքը, որոնք կողոպտեցին նրանց։ Տերը մատնեց նրանց շրջակա թշնամիների ձեռքը, և նրանք չկարողացան դեմ կանգնել իրենց բոլոր թշնամիներին, որոնց հետ պոռնկացել էին։ ¹⁵ Տիրոջ ձեռքը չարիք պատճառելու համար նրանց վրա էր, ինչպես ասել էր Տերը և ինչպես երդվել էր Տերը. և խիստ նեղեց նրանց։

¹⁶ Ապա Տերը նրանց համար դատավորներ հանեց և Տերը նրանց փրկեց ավարառուների ձեռքից։ Բայց նրանց էլ չլսեցին, ¹⁷ որովհետև օտար աստվածների հետևելով՝ պոռնկացան, երկրպագեցին նրանց և բարկացրին Տիրոջը։ Շուտով խոտորվեցին այն ճանապարհից, որով ընթանում էին նրանց հայրերը՝ Տիրոջ պատվիրանները լսելով։ Նրանք այդպես չարեցին։ ¹⁸ Եվ երբ Տերը նրանց համար դատավորներ վեր հանեց, Տերն այդ դատավորների հետ էր և նրանց փրկում էր թշնամիների ձեռքից դատավորների կենդանության բոլոր օրերին, որովհետև Տերը նրանց կարեկցում էր պաշարողների և չարչարողների երեսից նրանց կրած հեծության համար։ ¹⁹ Եվ երբ դատավորը մեռնում էր, նրանք դառնում, նորից անօրենություն էին անում իրենց հայրերից ավելի՝ գնալով օտար աստվածների հետևից, նրանց պաշտելով ու նրանց երկրպագելով։ Նրանք դեն չէին նետում իրենց սովորույթները և հետ չէին դառնում իրենց վատ ճանապարհներից։ ²⁰ Տերը սաստիկ բարկացավ Իսրայելի վրա ու ասաց. «Քանի որ այս ազգը զանց արեց իմ ուխտը, որը ես դրել էի նրանց հայրերի հետ, և չլսեց իմ ձայնը, ²¹ ես այլևս նրանց առաջից չեմ քշի ոչ մի մարդու այն ազգերից, որոնց թողեց Նավեի որդի Հեսուն։ Նա թողեց, ²² որ նրանցով փորձի Իսրայելին, թե արդյոք նրանք կզգուշանա՞ն և Տիրոջ ճանապարհով կգնա՞ն, ինչպես զգուշացան նրանց հայրերը, թե՞ ոչ»։ ²³ Եվ Տերը թողեց այդ ազգերին, անմիջապես չվերացրեց նրանց և չմատնեց նրանց Հեսուի ձեռքը։

3

Երկրում մնացած ազգերը

¹ Սրանք են այն ազգերը, որոնց թողեց Հեսուն, որպեսզի նրանցով փորձվի Իսրայելի այն մասը, որը չէր մասնակցել Քանանին տիրելու պատերազմներին. ² նաև որպեսզի պատերազմել սովորեն Իսրայելի որդիների սերունդները, որոնք պատերազմելու փորձ չունեին իրենց նախնիների նման. ³ նա թողեց այլազգիների[33] հինգ նախարարությունները, բոլոր քանանացիներին, սիդովնացիներին և Լիբանանում Բաղհերմոն սարից մինչև Լաբոեմաթ բնակվող խևացիներին, ⁴ որպեսզի նրանցով փորձվի Իսրայելը, և իմացվի, թե կլսե՞ն արդյոք Տիրոջ պատվիրանները, որ նա տվել էր նրանց հայրերին Մովսեսի միջոցով։

⁵ Այսպիսով Իսրայելի որդիները բնակվեցին քանանացիների, քետացիների, ամորհացիների, փերեզացիների, խևացիների, հեբուսացիների և գերգեսացիների մեջ։ ⁶ Նրանց դուստրերին իրենց համար կին առան և իրենց դուստրերին տվեցին նրանց տղաներին և պաշտեցին նրանց աստվածներին։

Գոդոնիել

⁷ Իսրայելի որդիները չարիք գործեցին Տիրոջ առաջ, մոռացան Տիրոջը՝ իրենց Աստծուն և պաշտեցին Բահաղին և Աստարտին։ ⁸ Տերը սաստիկ բարկացավ Իսրայելի վրա և նրան մատնեց Միջագետքի ասորեստանցիների արքա Քուսարսաթեմի ձեռքը. նրան ծառայեցին ութ տարի։

⁹ Եվ Իսրայելի որդիներն աղաղակ բարձրացրին Տիրոջ առաջ, Տերը Իսրայելի համար մի փրկիչ մեջտեղ հանեց. նրանց տվեց Գոդոնիելին՝ Կենեզի որդուն՝ Քաղեբի կրտսեր եղբորը, և լսում էին նրան։ ¹⁰ Տիրոջ հոգին նրա մեջ եղավ, և դատեց Իսրայելին։ Նա պատերազմի դուրս եկավ Քուսարսաթեմի դեմ, և Տերը նրա ձեռքը մատնեց ասորեստանցիների Քուսարսաթեմ արքային, և նրա ձեռքը զորացավ Քուսարսաթեմի վրա։ ¹¹ Երկիրը քառասուն տարի հանգստացավ։ Ապա Կենեզի որդի Գոդոնիելը մահացավ։

Ավոդ

¹² Իսրայելի որդիները շարունակեցին չարիք գործել Տիրոջ առաջ, և Տերը Մովաբի արքա Եգղոմին զորացրեց Իսրայելի վրա, քանի որ նրանք չարիք էին գործել Տիրոջ առաջ։ ¹³ Եվ հավաքեց նրանց դեմ Ամովնի որդիներին և Ամաղեկի որդիներին, գնաց հարվածեց Իսրայելին և տիրեց Արմավենիների քաղաքին։ ¹⁴ Տասնութ տարի Իսրայելի որդիները ծառայեցին Մովաբի արքա Եգղոմին։

¹⁵ Իսրայելի որդիներն աղաղակ բարձրացրին Տիրոջ առաջ, և Տերը նրանց համար մի փրկիչ մեջտեղ հանեց՝ Ավոդին՝ Եմենի որդի Գերայի որդուն, որը երկու ձեռքով էլ հաջող էր գործում։ Իսրայելի որդիները նրա ձեռքով Մովաբի Եգղոմ արքային ընծաներ ուղարկեցին։ ¹⁶ Ավոդն իր համար թզաչափ երկարությամբ երկսայրի սուր շինեց, այն կապեց իր աջ ազդրին թիկնոցի տակից և գնաց ¹⁷ ու ընծաները մատուցեց Մովաբի արքա Եգղոմին։ Եգղոմը շատ ծանրամարմին մարդ էր։ ¹⁸ Երբ Ավոդն իր ընծաները տվեց, արձակեց ընծաները բերողներին։

¹⁹ Երբ Եգղոմը վերադարձավ Գաղգաղայի կուռքերի մոտից, Ավոդն ասաց. «Ո՛վ արքա, քեզ ծածուկ ասելու խոսք ունեմ»։ Եգղոմն ասաց. «Լռի՛ր»։ Եվ ամենքին ասաց. «Դո՛ւրս ելեք»։ Եվ նրա մոտ եղողները դուրս եկան։ ²⁰ Նա միայնակ նստած էր իր ամառանոցի վերնատանը։ Ավոդն ասաց. «Ո՛վ արքա, ես քեզ համար Աստծու պատգամ ունեմ հաղորդելու»։ Եգղոմն աթոռից վեր կացավ գնաց նրա մոտ։ ²¹ Երբ նա վեր կացավ, Ավոդն իր ձախ ձեռքը մեկնեց, քաշեց սուրն իր աջ ազդրից և խրեց Եգղոմի կողը, ²² սրի կոթն էլ խրեց վերքի մեջ։ Ճարպը ծածկեց վերքի բերանը, որովհետև նա սուրը նրա կողից չհանեց։ ²³ Նրա դեմ ծածկեց վերնատան դռները, կողպեց, ելավ պատշգամբ, և դուրս գալով՝ գնաց։ ²⁴ Նրա ծառաները ներս մտան, տեսան, որ վերնատան դռները փակված են, և ասացին. «Գուցե սենյակում նստել է բնական կարիքի համար»։ ²⁵ Ամաչելով կանգնեցին ու սպասեցին, բայց ոչ ոք բաց չէր անում վերնատան դռները։ Ապա վերցրին բանալին, բաց արեցին և տեսան, որ ահա իրենց տերն ընկած-մեռած է գետնին։ ²⁶ Մինչ նրանք իրարանցման մեջ էին, Ավոդը փախավ Սիրովթա, և ոչ ոք ուշ չդարձրեց նրա վրա. նա անցավ կուռքերի մոտով և փախավ-ընկավ Սիրովթա։

²⁷ Երբ Ավոդը եկավ Իսրայելի երկիրը, փող փչեց Եփրեմի լեռան վրա։ Իսրայելի որդիները նրա հետ իջան լեռից, և ինքը նրանց առջևում էր։ ²⁸ Նա ասաց նրանց. «Իջե՛ք իմ հետևից, որովհետև Տերը՝ մեր Աստվածը, մեր թշնամի մովաբացիներին մեր ձեռքը մատնեց»։ Նրանք իջան նրա հետևից ու նախ գրավեցին դեպի Մովաբ տանող Հորդանան գետի անցումները և ոչ մի մարդու թույլ չտվեցին անցնել։ ²⁹ Այդ օրը մովաբացիներից կոտորեցին մոտ տասը հազար մարդու՝ նրանց բոլոր պատերազմողներին ու բոլոր զորավոր մարդկանց, և նրանցից ոչ մի մարդ չազատվեց։ ³⁰ Այդ օրը մովաբացիներն ընկճվեցին Իսրայելի ձեռքի տակ, և երկիրն ութսուն տարի հանգստացավ։ Ավոդը դատեց նրանց մինչև իր մահը։

Սամեգար

³¹ Ավոդից հետո մեջտեղ ելավ Անաթի որդի Սամեգարը, որն արորի մաճով այլազգիներից վեց հարյուր մարդ կոտորեց, ավար առավ չափազանց շատ արջառ և ոչխար՝ չհաշված կովերի հորթերը։ Եվ նա փրկեց Իսրայելը։

4

Դեբովրա և Բարակ

¹ Սամեգարը մեռավ։ Իսրայելի որդիները շարունակեցին չարիք գործել Տիրոջ առաջ։ ² Տերը նրանց մատնեց քանանացիների արքա Հաբինի ձեռքը, որը թագավորում էր Ասովրում։ Նրա զորագլուխը Սիսարան էր, որը բնակվում էր ազգերի[34] Արիսոթում։ ³ Իսրայելի որդիներն աղաղակ բարձրացրին Տիրոջ առաջ, որովհետև Հաբինը ինը հարյուր երկաթե կառքեր ուներ և քսան տարի սաստիկ նեղում էր Իսրայելին։

⁴ Այն ժամանակ Իսրայելին դատում էր մարգարեուհի Դեբովրան՝ Լաբիդովթի կինը։ ⁵ Նա բնակվում էր Դեբովրայի արմավենու տակ՝ Ռամայի և Բեթելի միջև, Եփրեմի լեռան վրա։ Իսրայելի որդիները նրա մոտ էին գնում դատերի համար։ ⁶ Դեբովրան մարդ ուղարկեց և Նեփթաղիմի Կադեսից կանչեց Բարակին՝ Աբինեեմի որդուն և նրան ասաց. «Չէ՞ որ Տերը՝ Իսրայելի Աստվածը, քեզ հրաման տվեց, որ գնաս Թաբոր լեռը, քեզ հետ վերցնես տասը հազար այր Նեփթաղիմի որդիներից և Զաբուղոնի որդիներից ⁷ և քեզ հետ տանես Կիսոնի հեղեղատ, Հաբինի զորագլուխ Սիսարայի, նրա զորքերի ու նրա կառքերի դեմ, և Տերը նրանց քո ձեռքը կմատնի»։ ⁸ Բարակը նրան ասաց. «Եթե ինձ հետ գաս, կգնամ, իսկ եթե ինձ հետ չգաս, չեմ գնա, որովհետև ես չգիտեմ այն օրը, երբ Տերն իր հրեշտակի միջոցով կաջակցի ինձ»։ ⁹ Դեբովրան նրան ասաց. «Անշուշտ կգամ քեզ հետ, բայց իմացի՛ր, որ այդ դեպքում քաջությունը քոնը չի լինի քո գնացած ճանապարհին, որովհետև Տերը կնոջ ձեռքը կմատնի Սիսարային»։ Դեբովրան վեր կացավ ու Բարակի հետ գնաց Կադես։ ¹⁰ Բարակը Զաբուղոնի որդիներին և Նեփթաղիմի որդիներին կանչեց Կադես։ Տասը հազար մարդ նրա հետևից գնացին. Դեբովրան նույնպես գնաց նրա հետ։ ¹¹ Կինեցի Քաբերը,[35] բաժանվելով Մովսեսի աներ Հովբաբի որդի Կինեի որդիներից, իր վրանը կանգնեցրեց Հանգստացողների կաղնու մերձակայքում՝ Կադեսի մոտ։

¹² Սիսարային իմաց տվեցին, որ Աբինեեմի որդի Բարակը ելել է Թաբոր լեռը։ ¹³ Սիսարան Կիսոնի հեղեղատ հավաքեց իր բոլոր կառքերը՝ ինը հարյուր երկաթե կառքեր և իր հետ եղող բոլոր զորքերը ազգերի Արիսոթից։

¹⁴ Դեբովրան ասաց Բարակին. «Վե՛ր կաց, որովհետև սա է այն օրը, որ Տերը Սիսարային քո ձեռքը մատնեց։ Ահա Տերն է քո առջևից ընթանում»։ Բարակն իջավ Թաբոր լեռից, նրա հետևից՝ տասը հազար այր։ ¹⁵ Տերը Բարակի սրի առաջ խուճապի մատնեց Սիսարային և նրա բոլոր կառքերն ու նրա ամբողջ բանակը։ Սիսարան իջավ իր կառքից և հետիոտն փախավ։ ¹⁶ Բարակը, կառքերն ու բանակը հետապնդելով, գնաց մինչև ազգերի անտառը։ Սիսարայի ամբողջ բանակն ընկավ սրի բերանով, և ոչ ոք չմնաց։

¹⁷ Սիսարան հետիոտն փախավ գնաց կինեցի Քաբերի կնոջ՝ Հայելի վրանը, որովհետև Ասովրի արքա Հաբինի և կինեցի Քաբերի տան միջև խաղաղություն էր կնքված։ ¹⁸ Հայելն ընդառաջ ելավ Սիսարային և ասաց նրան. «Արի՛, տե՛ր իմ, արի ինձ մոտ և մի՛ վախեցիր»։ Եվ նա գնաց վրանը՝ նրա մոտ, և նրան ծածկեց ծածկոցով։ ¹⁹ Սիսարան ասաց նրան. «Մի քիչ խմելու ջո՛ւր տուր ինձ, ծարավ եմ»։ Նա բաց արեց կաթի տիկը, խմեցրեց նրան և ծածկեց նրա երեսը։ ²⁰ Սիսարան նրան ասաց. «Դու կանգնի՛ր վրանի դռան մոտ, և եթե մեկը քեզ մոտ գա և քեզ հարցնի ու ասի, թե՝ այդտեղ մարդ կա՞, կասես՝ չկա»։ Եվ կինը ծածկեց նրան իր ծածկոցով։ ²¹ Ապա Քաբերի կին Հայելն առավ վրանի ցիցը, բռնեց մուրճն իր ձեռքին, կամացուկ մտավ նրա մոտ, ցիցը մխեց նրա ծնոտի մեջ և նրան գետնին գամեց։ Նա տապալվեց նրա ոտքերի առաջ և հոգին փչեց։ ²² Եվ ահա Բարակը հետապնդելով գալիս էր Սիսարայի հետևից։ Հայելը նրան ընդառաջ ելավ և ասաց նրան. «Ե՛կ այստեղ, քեզ ցույց տամ այն մարդուն, որին փնտրում ես»։ Նա մտավ նրա մոտ, և ահա Սիսարան ընկած մեռած էր՝ ցիցը նրա ծնոտի մեջ։

²³ Տերը՝ Աստված, այդ օրն Իսրայելի որդիների առաջ նվաստացրեց քանանացիների Հաբին թագավորին։ ²⁴ Եվ Իսրայելի որդիների ձեռքը գնալով զորանում էր քանանացիների Հաբին արքայի վրա, մինչև որ բնաջնջեցին նրանց։

5

Դեբովրայի և Բարակի երգը

¹ Այդ օրը Դեբովրան և Աբինեեմի որդի Բարակը օրհներգեցին ու ասացին.

² «Իսրայելի զորավարների առաջնորդության

Եվ ժողովրդի հոժարության համար

Օրհնեցե՛ք Տիրոջը։

³ Լսե՛ք, թագավորնե՛ր,

Ունկնդի՛ր եղեք, նախարարնե՛ր,

Ես Տիրոջն եմ երգում,

Սաղմոս եմ ասում Իսրայելի Աստծուն։

⁴ Տե՛ր, երբ դու դուրս եկար Սեիրից,

Երբ չվեցիր Եդովմի դաշտերից,

Երկիրը շարժվեց, և երկինքը խռովվեց,

Ամպերը ջուր ցողեցին։

⁵ Լեռները շարժվեցին ներկայությունից Տիրոջ՝ նրա որ Սինայից է,

Տիրոջ՝ Իսրայելի Աստծու երեսից։

⁶ Անաթի որդի Սամեգարի օրերին,

Հայելի օրերին

Պակասեցին թագավորները,

Գնացին շավիղներով, խոտոր ճանապարհներով գնացին։

⁷ Իսրայելի մեջ հզորներ չմնացին,

չմնացին, մինչև որ մեջտեղ ելավ Դեբովրան,

մինչև որ մեջտեղ ելավ Իսրայելի մայրը։

⁸ Գարու հացի նման փափագեցին օտար, սնոտի աստվածների.

Այն ժամանակ դեռևս անհայտ՝ նոր գեղարդներով

պատերազմեցին իշխանների քաղաքները՝

Քառասուն հազար մարդ՝ Իսրայելի մեջ։

⁹ Իմ սիրտը նվիրված է այն ամենին,

ինչ պատվիրել է Տերն Իսրայելին,

Ժողովրդի զորավորնե՛ր, օրհնեցե՛ք Տիրոջը։

¹⁰ Կեսօրին սպիտակ ձիեր հեծնողնե՛ր,

Դատավորների ատյան գնացողնե՛ր,

¹¹ Ձա՛յն տվեք նվագածուներին ցնծացողների մեջ.

Այնտեղ թող գովաբանեն արդարությունը Տիրոջ.

Նա զորացրեց արդարությունն Իսրայելի մեջ,

Այն ժամանակ Տիրոջ ժողովուրդն իջավ քաղաքները։

¹² Արթնացի՛ր, արթնացի՛ր, Դեբովրա՛,

Արթնացրո՛ւ բյուրավորներին ժողովրդի հետ.

Արթնացի՛ր, արթնացի՛ր, խոսի՛ր երգերով։

Զորացած՝ վե՛ր կաց, Բարա՛կ,

Գերի՛ր քո գերիներին, ո՜վ Աբինեեմի որդի։

¹³ Այնժամ մեծացավ նրա զորությունը,

Տերն ի՛նձ ենթարկեց ինձնից ուժեղներին։

¹⁴ Եփրեմի ժողովուրդը նրանց պատժեց հովիտներում.

Քո եղբայր Բենիամինը հետևեց քո ժողովրդին։

Իմ մոտից՝ Մաքիրից, խուզարկուներ իջան,

Իսկ Զաբուղոնից՝ պատմության դպրի գավազան ունեցող ղեկավարներ։

¹⁵ Իսաքարի զորավարները Դեբովրայի և Բարակի հետ էին,

Եվ Բարակն իր ոտքերը տարածեց հովիտների վրա։

Ռուբենի տոհմերում

Մեծամեծ հուզմունք կար։

¹⁶ Ինչո՞ւ են նստել փարախների մեջ

Եվ լսում են ոչխարների մայունը,

Որպեսզի անցնեն Ռուբենի կողմը։

Սրտերի մեծ հուզմունք է բարձրացել։

¹⁷ Գադը Հորդանան գետի այն կողմում բնակվեց.

Դա՛ն, ինչո՞ւ ես պանդուխտ մնացել նավերի մեջ։

Ասերը ծովի եզերքին է բնակվում

Եվ նրա ծոցերում է ապրում։

¹⁸ Զաբուղոնի ժողովուրդն իրեն դնում է մահվան վտանգի մեջ,

Եվ Նեփթաղիմի ժողովուրդը վտանգում է իրեն դաշտի բարձունքներում։

¹⁹ Թագավորներ եկան և պատերազմեցին,

Այն ժամանակ տագնապեցին քանանացիների թագավորները Թանաքի մեջ,

Մակեդդովի ջրերի վրա.

Ագահությամբ արծաթ չառա։

²⁰ Երկնքից պատերազմեցին աստղերն իրենց շրջաններից,

Պատերազմեցին Սիսարայի դեմ։

²¹ Կիսոնի հեղեղատը՝ այն հին հեղեղատը, քշեց նրանց.

Թող ես կոխոտեմ նրանց, թող իմ ոտքը զորանա։

²² Այն ժամանակ կտոր-կտոր եղան Մադդարոթի ձիերի գարշապարները։

Իմ գարշապարները գետնին հավասարեցրին նրանց ահարկու հպարտությունը։

²³ “Նզովե՛ք Մարովզ քաղաքը,- ասում է Տիրոջ հրեշտակը,-

Անիծելով անիծե՛ք նրա բնակիչներին,

Որովհետև Տիրոջն օգնության չեկան,

Չեկան մարտնչելու նրա թշնամիների դեմ”։

²⁴ Կանանց մեջ օրհնյալ լինի Հայելը՝

Կինեցի Քաբերի կինը,

Օրհնյալ լինի նա կանանց մեջ իր վրանում։

²⁵ Ջուր խնդրեց, իսկ նա կաթ տվեց,

Իշխանների ամանով կարագ մատուցեց։

²⁶ Իր ձախ ձեռքը ցցին մեկնեց,

Իր աջը՝ մուրճին՝ իսպառ ջախջախելու և ոչնչացնելու։

Հարվածեց Սիսարային,

Ջարդեց նրա ծնոտը,

ցիցը խրեց նրա գլխի մեջ և սպանեց։

²⁷ Նա ծանրացած ընկավ նրա ոտքերի,

Ընկավ նրա ծնկների միջև,

Այնտեղ կորացավ, մինչև որ գետնին փռվեց, ընկավ թշվառականը։

²⁸ Սիսարայի մայրը նայում էր վանդակավոր պատուհանից,

Տեսնում էր Սիսարայի մոտից եկողներին,

Իսկ նրա կառքն ուշանում էր գալու.

- Ինչո՞ւ են նրա կառքի անիվները դանդաղ շարժվում։

²⁹ Նրա իշխանների իմաստուն կանայք պատասխան էին տալիս նրան ու ասում,

Հենց ինքն էլ իր խոսքերին պատասխան էր տալիս ու ասում.

³⁰ “Ավար բաշխողները չե՞ն գտնի նրան,

Որ բարիք անեն բարեկամներին՝ ամեն մեկին բաժանելով իր ավարը,

Սիսարայից ստացված գույնզգույն ավարը,

Նկարազարդ, գույնզգույն երանգներով ավարը,

Գույնզգույն, նկարազարդ հյուսվածքներով նարոտը նրա պարանոցի վրա”։

³¹ Այսպես թող կորչեն քո բոլոր թշնամիները, Տե՛ր։

Քեզ սիրողները թող լինեն այնպես,

ինչպես արևը, որ ծագում է իր զորությամբ»։

Եվ երկիրը խաղաղվեց քառասուն տարի։

6

Գեդեոնը և մադիանացիները

¹ Իսրայելի որդիները Տիրոջ առաջ չարիք գործեցին, և Տերը նրանց յոթ տարի մադիանացիների ձեռքը մատնեց, ² և մադիանացիների ձեռքը զորացավ Իսրայելի վրա։ Իսրայելի որդիները մադիանացիների պատճառով իրենց համար գոմեր շինեցին լեռներում, քարայրներում և ամրոցներում։ ³ Երբ իսրայելացիները վարուցանք էին անում, մադիանացիները, ամաղեկացիները և արևելքի մյուս որդիները հարձակվում էին նրանց վրա, ⁴ բանակում էին նրանց մոտ և փչացնում հողի բերքը մինչև Գազայի սահմանները։ Իսրայելին հանգիստ չէին տալիս, չէին թողնում ո՛չ ոչխար, ո՛չ արջառ, ո՛չ էշ։ ⁵ Նրանք գալիս էին իրենց հոտերով, բերում էին իրենց վրանները և մորեխի պես բազմությամբ վրա էին հասնում։ Նրանց և նրանց ուղտերին թիվ չկար։ Հասնում էին Իսրայելի երկիրը և ապականում այն։ ⁶ Եվ Իսրայելը մադիանացիների պատճառով շատ աղքատացավ։ Իսրայելի որդիները աղաղակեցին Տիրոջը։

⁷ Երբ Իսրայելի որդիները մադիանացիների պատճառով աղաղակեցին Տիրոջը, ⁸ Տերն Իսրայելի որդիներին մի մարգարե ուղարկեց և ասաց նրանց. «Այսպես է ասում Տերը՝ Իսրայելի Աստվածը. “Ես եմ, որ հանեցի ձեզ Եգիպտոսի երկրից, ձեզ դուրս բերեցի ծառայության տնից, ⁹ փրկեցի ձեզ եգիպտացիների ձեռքից և բոլոր ձեզ նեղողների ձեռքից, քշեցի նրանց ձեր առաջից և նրանց երկիրը ձեզ տվեցի։ ¹⁰ Եվ ձեզ ասացի. “Ես եմ Տերը՝ ձեր Աստվածը, մի՛ վախեցեք ամորհացիների աստվածներից, որոնց երկրում դուք բնակվում եք նրանց մեջ”, բայց դուք չլսեցիք իմ խոսքը”»։

¹¹ Տիրոջ հրեշտակը եկավ ու նստեց այն կաղնու տակ, որ գտնվում էր Եփրայում և պատկանում էր Աբիեզերի տոհմից Հովասին։ Նրա որդի Գեդեոնը կալում ցորեն էր կալսում՝ վախենալով մադիանացիներից։ ¹² Տիրոջ հրեշտակը երևաց նրան և ասաց. «Տերը քեզ հետ է, ո՛վ հզորների հզոր»։ ¹³ Գեդեոնը նրան ասաց. «Ներողություն, Տե՛ր իմ, բայց եթե Տերը մեզ հետ է, ինչո՞ւ այս բոլոր չարիքները եկան մեզ վրա, ո՞ւր են նրա բոլոր զարմանահրաշ գործերը, որ պատմեցին մեզ մեր հայրերը՝ ասելով. “Չէ՞ որ Տերը մեզ հանեց Եգիպտոսից”, և հիմա ինչո՞ւ է նա մեզ լքել ու մադիանացիների ձեռքը մատնել»։ ¹⁴ Տիրոջ հրեշտակը նայեց նրան ու ասաց. «Գնա՛ քո այդ զորությամբ և կփրկես Իսրայելը մադիանացիների ձեռքից։ Չէ՞ որ ահա ես եմ ուղարկում քեզ»։ ¹⁵ Գեդեոնը նրան ասաց. «Ներողություն, Տե՛ր իմ, ինչո՞վ փրկեմ Իսրայելը. իմ տոհմը ամենից աղքատն է Մանասեի ցեղի մեջ, և ես իմ հոր տան կրտսերն եմ»։ ¹⁶ Տիրոջ հրեշտակը նրան ասաց. «Տերը քեզ հետ է, և դու մադիանացիներին կջարդես, ինչպես մեկ մարդու»։ ¹⁷ Գեդեոնն ասաց. «Եթե ես քո առաջ շնորհ եմ գտել, ինձ մի նշա՛ն ցույց տուր, որ դու ես ինձ հետ խոսում, ¹⁸ մի՛ գնա այստեղից, մինչև որ քեզ մոտ գամ և իմ զոհը բերեմ ու դնեմ քո առաջ»։ Նա ասաց. «Ես եմ, և կնստեմ այստեղ, մինչև որ հետ դառնաս ինձ մոտ»։ ¹⁹ Գեդեոնը ներս մտավ, այծերի հոտից մի ուլ մորթեց և մեկ արդու ալյուրից բաղարջ հաց պատրաստեց, միսը դրեց ափսեի վրա, արգանակը կճուճի մեջ լցրեց, դրեց նրա առաջ՝ կաղնու տակ, և երկրպագություն արեց։ ²⁰ Տիրոջ հրեշտակը նրան ասաց. «Վերցրո՛ւ այդ միսն ու բաղարջ հացը, դի՛ր այս քարի վրա, իսկ արգանակը վրա՛ն թափիր»։ Նա այդպես էլ արեց։ ²¹ Տիրոջ հրեշտակն իր ձեռքի գավազանի ծայրը մեկնեց և հասցրեց մսին ու բաղարջ հացին։ Քարից կրակ դուրս եկավ ու լափեց միսը և բաղարջ հացերը, և Տիրոջ հրեշտակը հեռացավ նրա աչքից։ ²² Գեդեոնը տեսավ, որ նա Տիրոջ հրեշտակն է, և ասաց. «Օ՜հ, օ՜հ, Տե՛ր, Տե՛ր, ես Տիրոջ հրեշտակին երես առ երես տեսա»։ ²³ Տերը նրան ասաց. «Խաղաղությո՜ւն քեզ, մի՛ վախեցիր, չես մեռնի»։

²⁴ Գեդեոնն այնտեղ Տիրոջը զոհասեղան շինեց, այն կոչեց «Տիրոջ խաղաղություն»։ Դա այնտեղ է մինչև այսօր՝ Աբիեզերի տոհմի Եփրայում։ ²⁵ Այդ գիշեր Տերը նրան ասաց. «Վերցրո՛ւ դու քո հոր պարարտ եզն ու յոթ տարեկան երկրորդ եզը և քանդի՛ր քո հորը պատկանող Բահաղի զոհասեղանը, ջարդի՛ր պաշտամունքային փայտե սյունը ²⁶ և զոհասեղա՛ն շինիր Տիրոջ՝ քո Աստծու համար, որը քեզ երևաց Մանովզ լեռան գլխին, պատերազմի տեղում. վերցրո՛ւ երկրորդ եզը և ողջակե՛զ արա քո ջարդած սյան կտորտանքով»։ ²⁷ Գեդեոնն իր ծառաներից տասներեք մարդ առավ և արեց այնպես, ինչպես նրան ասաց Տերը։ Եվ որովհետև իր հոր տնեցիներից ու քաղաքի մարդկանցից վախեցավ ցերեկն անելու այդ բանը, գիշերն արեց։

²⁸ Առավոտը կանուխ քաղաքի մարդիկ վեր կացան և տեսան, որ կործանված է Բահաղի զոհասեղանը, և պաշտամունքային սյունը՝ ջարդված, իսկ պարարտ եզը ողջակեզ է հանված շինված զոհասեղանի վրա։ ²⁹ Եվ իրար ասացին. «Ո՞վ արեց այս բանը»։ Պրպտեցին, քննեցին և ասացին, թե այդ բանը Հովասի որդի Գեդեոնն է արել։ ³⁰ Քաղաքի մարդիկ ասացին Հովասին. «Դո՛ւրս հանիր քո որդուն, նա պետք է մեռնի, որովհետև կործանել է Բահաղի զոհասեղանը և ջարդել է պաշտամունքային սյունը»։ ³¹ Հովասն իր դեմ ելած մարդկանց ասաց. «Այժմ դո՞ւք պետք է պաշտպանեք Բահաղի դատը, և կամ դո՞ւք պետք է փրկեք նրան։ Ով որ նրան վնասել է, կմեռնի մինչև առավոտ։ Եթե նա Աստված է, թող ինքը լուծի իր վրեժը, քանի որ կործանել են իր զոհասեղանը»։ ³² Եվ այդ օրը նրան անվանեց Հերոբոաղ, այսինքն՝ Բահաղի դատաստան, որովհետև քանդել էր նրա զոհասեղանը։

³³ Բոլոր մադիանացիները, ամաղեկացիները և արևելքի մյուս որդիները հավաքվեցին միասին և եկան, բանակեցին Հեզրայելի հովիտներում։ ³⁴ Տիրոջ հոգին զորացրեց Գեդեոնին, նա եղջերափող փչեց, և Աբիեզերի տոհմի մարդիկ խրախուսվելով գնացին նրա հետևից։ ³⁵ Պատգամավորներ ուղարկեց Ասերի, Զաբուղոնի և Նեփթաղիմի ցեղերին, և ընդառաջ ելան նրան։

³⁶ Գեդեոնն ասաց Աստծուն. «Որպեսզի իմանամ, թե փրկելու ես Իսրայելն իմ ձեռքով, ինչպես որ ասել ես, ³⁷ ահա ես կալի մեջ խուզած բուրդ կդնեմ. եթե միայն խուզած բրդի վրա անձրև լինի, իսկ ամբողջ գետինը՝ չոր, կիմանամ, որ Իսրայելը փրկելու ես իմ ձեռքով, ինչպես որ ասել ես»։ ³⁸ Այդպես էլ եղավ. հաջորդ օրն առավոտ կանուխ Գեդեոնը վեր կացավ, քամեց բուրդը, և բրդից մի կոնք լիքը ջուր թափվեց։ ³⁹ Գեդեոնն ասաց Աստծուն. «Թող քո բարկությունը չբորբոքվի ինձ վրա, մի անգամ ևս խոսեմ և մի անգամ էլ բրդով փորձեմ։ Այս անգամ թող միայն բրդի վրա չորություն լինի, իսկ ամբողջ գետնի վրա՝ անձրև»։ ⁴⁰ Եվ այն գիշերն Աստված այդպես արեց. միայն բրդի վրա չորություն եղավ, իսկ ամբողջ գետնի վրա՝ անձրև։

7

¹ Հերոբոաղը, այսինքն՝ Գեդեոնը, և նրա հետ եղած ամբողջ զորքը կանուխ վեր կացան և բանակեցին Արեդի աղբյուրի մոտ, իսկ Մադիամի և Ամաղեկի բանակը նրանց հյուսիսային կողմում՝ Գաբաաթամում էր, հովտի մեջ։ ² Տերն ասաց Գեդեոնին. «Քեզ հետ եղող զորքը շատ է, չեմ ուզում մադիանացիներին նրանց ձեռքը մատնել, որ չլինի թե Իսրայելն իմ առաջ պարծենա և ասի՝ “Իմ ձեռքը փրկեց ինձ”»։ ³ Տերը նրան ասաց. «Խոսի՛ր ի լուր ժողովրդի և ասա՛. “Ով վախկոտ է, թող հետ դառնա”»։ Եվ գնացին Գաղաադ սարից. զորքից քսաներկու հազար հոգի հետ դարձան, և մնացին տասը հազար։ ⁴ Տերն ասաց Գեդեոնին. «Զորքը տակավին շատ է, իջեցրո՛ւ նրանց ջրի մոտ, այնտեղ նրանց փորձության կենթարկեմ քեզ համար. ում մասին քեզ ասեմ՝ “Դա թող գնա քեզ հետ”, նա՛ թող գնա քեզ հետ, իսկ ում մասին ասեմ՝ “Դա թող չգնա քեզ հետ”, նա թող չգնա քեզ հետ»։ ⁵ Նա զորքն իջեցրեց ջրի մոտ, և Տերը Գեդեոնին ասաց. «Ովքեր շան նման լեզվով խմեն այդ ջրից, նրանց առանձին կկանգնեցնես, իսկ ովքեր խմելու համար իրենց ծնկների վրա կռանան, նրանց էլ առանձին կկանգնեցնես»։ ⁶ Ովքեր ձեռքով ու լեզվով խմեցին, նրանց բոլորի թիվը եղավ երեք հարյուր մարդ. մնացած ժողովուրդը ջուր խմելու համար կռացավ ծնկների վրա։ ⁷ Տերն ասաց Գեդեոնին. «Այն երեք հարյուր մարդկանցով, որոնք լափեցին ջուրը, ձեզ կփրկեմ և մադիանացիներին քո ձեռքը կմատնեմ, իսկ այն ամբողջ ժողովուրդը թող գնա ամեն մեկն իր տեղը»։ ⁸ Եվ նրանք ժողովրդի պաշարն ու նրանց եղջերափողերն իրենց ձեռքն առան, և Գեդեոնն Իսրայելի բոլոր մարդկանց իրենց բնակության տեղն արձակեց և միայն այն երեք հարյուր մարդկանց պահեց։ Մադիամի բանակը նրանից ներքև՝ հովտում էր։

⁹ Այդ գիշեր Տերը նրան ասաց. «Շտապ վե՛ր կաց և այստեղից իջի՛ր թշնամու բանակատեղի, որովհետև նրան քո ձեռքը մատնեցի. ¹⁰ իսկ եթե վախենում ես իջնել, իջի՛ր քո ծառա Փարայի հետ։ ¹¹ Կլսես, թե ինչ են խոսում, և այն ժամանակ կզորանան քո ձեռքերը, և կհարձակվես նրանց վրա»։ Եվ նա իր ծառայի հետ իջավ մինչև թշնամու բանակի առաջապահ զորքը, որը կազմված էր հիսուն հոգուց։ ¹² Մադիանացիները, ամաղեկացիները և արևելքի մյուս որդիները բանակ էին դրել ծործորների մեջ՝ մորեխների պես մեծ բազմությամբ։ Նրանց ուղտերին թիվ չկար, նրանք շատ էին, ինչպես ծովափի ավազը։ ¹³ Գեդեոնը բանակատեղի մտավ և լսեց, որ մի մարդ իր ընկերոջը երազ էր պատմում. «Երազ տեսա,- ասում է,- ահա գարե մի հաց գլորվում էր դեպի Մադիամի բանակները և եկավ մինչև Մադիամի վրանը, հարվածեց նրան ու կործանեց, և վրանը գլխիվայր ընկավ»։ ¹⁴ Նրա ընկերը պատասխան տվեց և ասաց. «Դա ուրիշ բան չէ, եթե ոչ իսրայելացի Հովասի որդի Գեդեոնի սուրը. Տերը նրա ձեռքն է մատնել մադիանացիներին և բոլոր բանակները»։

¹⁵ Երբ Գեդեոնը լսեց երազի պատմությունն ու նրա մեկնությունը, երկրպագեց Տիրոջը, վերադարձավ Իսրայելի բանակն ու ասաց. «Վե՛ր կացեք, որովհետև Տերը մադիանացիների բանակը մեր ձեռքն է մատնել»։ ¹⁶ Նա այդ երեք հարյուր մարդկանց երեք գնդի բաժանեց և ամենքի ձեռքը եղջերափողեր և սափորների մեջ դրված ջահեր տվեց։ ¹⁷ Եվ ասաց նրանց. «Ի՛նձ նայեք և նո՛ւյնն արեք. ահա ես մտնում եմ բանակի մեջ և ինչպես որ ես անեմ, այդպես էլ դո՛ւք արեք։ ¹⁸ Երբ ես և բոլոր ինձ հետ եղողները կփչենք եղջերափողերը, դուք էլ փչե՛ք եղջերափողերը ամբողջ բանակի շուրջը և ասացե՛ք. “Սուր՝ Տիրոջ և Գեդեոնի համար”»։

¹⁹ Գեդեոնը և նրա հետ հարյուր մարդ կեսգիշերվա սկզբին հասան բանակի ծայրը, երբ պահապանները զարթնեցնում էին փոխարինող հերթի պահապաններին, փչեցին եղջերափողերը և վայր գցեցին իրենց ձեռքի սափորները։ ²⁰ Ապա երեք գնդերն էլ փչեցին եղջերափողերը և կոտրատեցին սափորները։ Նրանք իրենց ձախ ձեռքով առան ջահերը, իսկ աջ ձեռքով եղջերափողերը բռնած՝ փչեցին, աղաղակեցին և ասացին. «Սուր՝ Տիրոջ և Գեդեոնի համար»։ ²¹ Ամեն մեկը կանգնեց իր տեղում բանակի շուրջը. ամբողջ բանակը վազեց, փող հնչեցրին և փախան։ ²² Երբ այն երեք հարյուր եղջերափողերը հնչեցին, Տերն այնպես արեց, որ ամբողջ բանակի մեջ ամեն մարդ սուրն իր ընկերոջ վրա դարձնի. և ամբողջ բանակը փախավ մինչև Բեթասետա, իսկ գնդերից մեկն էլ՝ մինչև Աբելմաուլայի բարձունքը և մինչև Տաբեթ։ ²³ Իսրայելի որդիներին կանչեցին Նեփթաղիմից, Ասերից և ամբողջ Մանասեից, ու հետապնդեցին մադիանացիներին։ ²⁴ Գեդեոնը պատգամավորներ ուղարկեց Եփրեմի սահմանները և ասաց. «Իջե՛ք մադիանացիներին ընդառաջ և գրավե՛ք ջրերի կիրճերը մինչև Բեթփարա ու Հորդանան գետը»։ Եփրեմի բոլոր մարդիկ իրար ձայն տվեցին և գրավեցին ջրերի եզերքը մինչև Բեթփարա ու Հորդանան գետը։ ²⁵ Բռնեցին մադիանացիների երկու իշխաններին՝ Օրեբին և Զեբին։ Օրեբին սպանեցին Սորորեբայում, իսկ Զեբին՝ Ակեբզեբայում, և մադիանացիներին հալածեցին, իսկ Օրեբի և Զեբի գլուխները Հորդանան գետի այն կողմից բերեցին Գեդեոնին։

8

Մադիանացիների վերջնական պարտությունը

¹ Եվ Եփրեմի այրերը Գեդեոնին ասացին. «Այս ի՞նչ բան է, որ արեցիր մեզ հետ. մեզ չկանչեցիր, երբ մադիանացիների դեմ պատերազմելու գնացիր»։ Եվ նրա հետ սաստիկ վիճեցին։ ² Նա նրանց ասաց. «Ես հիմա ի՞նչ եմ արել ձեր արածի համեմատ. մի՞թե Եփրեմի ճռաքաղը Աբիեզերի խաղողաքաղից լավ չէ. ³ Տերը ձեր ձեռքը մատնեց մադիանացիների իշխաններին՝ Օրեբին և Զեբին. ես ի՞նչ կարողացա անել ձեզ հետ համեմատած»։ Երբ նա այս խոսքն ասաց, նրանց հոգին հանգստացավ նրա նկատմամբ։

⁴ Գեդեոնը եկավ Հորդանան և իր հետ եղող երեք հարյուր մարդկանց հետ գետն անցավ ուժասպառված և քաղցած։ ⁵ Նա ասաց Սոքքոթի մարդկանց. «Ուտելու հա՛ց տվեք այս զորքին, որ ինձ հետ է, որովհետև նրանք քաղցած են, որպեսզի ես հետապնդեմ Զեբեեին ու Սաղմանային՝ մադիանացիների թագավորներին»։ ⁶ Սոքքոթի իշխաններն ասացին. «Մի՞թե Զեբեեն և Սաղմանան արդեն քո ձեռքում են, որ մենք քո զորքին հաց տանք»։ ⁷ Գեդեոնն ասաց. «Եթե այդպես չէ, ապա երբ Տերը Զեբեեին ու Սաղմանային իմ ձեռքը տա, ես ձեր մարմինները կծվատեմ անապատի փշերով և տատասկներով»։ ⁸ Այնտեղից նա գնաց Փանուել և նրանց հետ նույն ձևով խոսեց։ Փանուելի մարդիկ նրան պատասխան տվեցին այնպես, ինչպես պատասխանել էին Սոքքոթի մարդիկ։ ⁹ Գեդեոնը խոսեց Փանուելի մարդկանց հետ և ասաց. «Երբ ես նորից անփորձանք վերադառնամ, այդ աշտարակը պիտի քանդեմ»։

¹⁰ Զեբեեն և Սաղմանան գտնվում էին Կարկարում, և նրանց բանակը նրանց հետ էր. մոտ տասնհինգ հազար մարդ, որ մնացել էին Արևելքի որդիների ամբողջ բանակից, իսկ ընկածները հարյուր քսան հազար սրակոտոր եղած մարդիկ էին։ ¹¹ Գեդեոնը բարձրացավ վրանաբնակների ճանապարհով, Նաբաեի արևելյան կողմից, որ գտնվում է Նաբեիի դիմաց, ու հարվածեց բանակին, որովհետև բանակն անհոգության մեջ էր։ ¹² Զեբեեն և Սաղմանան փախան, իսկ նա հետապնդեց նրանց, ձերբակալեց մադիանացիների երկու թագավորներին՝ Զեբեեին ու Սաղմանային, և նրանց ամբողջ բանակը տակնուվրա արեց։

¹³ Հովասի որդի Գեդեոնը պատերազմից վերադարձավ Արեսի զառիվայրով։ ¹⁴ Սոքքոթի մարդկանցից նա մի պատանի բռնեց և հարցուփորձ արեց նրան։ Սա նրա համար գրավոր տվեց Սոքքոթի իշխանների ու ծերերի անունները՝ յոթանասունյոթ մարդու։ ¹⁵ Գեդեոնը եկավ Սոքքոթի իշխանների մոտ և ասաց նրանց. «Ահա Զեբեեն և Սաղմանան, որոնց համար ինձ նախատեցիք՝ ասելով. “Մի՞թե Զեբեեն և Սաղմանան քո ձեռքում են, որ մենք հաց տանք սովից սպառված քո մարդկանց”»։ ¹⁶ Նա առավ քաղաքի իշխաններին ու ծերերին և անապատից՝ փշեր ու տատասկներ և դրանցով ձաղկեց Սոքքոթի տղամարդկանց։ ¹⁷ Ապա կործանեց Փանուելի աշտարակը և կոտորեց քաղաքի տղամարդկանց։

¹⁸ Նա ասաց Զեբեեին և Սաղմանային. «Ինչպիսի՞ք էին այն մարդիկ, որոնց կոտորեցիք Թաբորում»։ Նրանք ասացին. «Ինչպիսին դու ես, նույնպիսին և նրանք էին՝ քեզ նման, և դու՝ նրանց նման։ Նրանց տեսքը թագավորի որդիների նման էր»։ ¹⁹ Գեդեոնն ասաց. «Նրանք իմ եղբայրները՝ իմ մոր որդիներն էին»։ Եվ երդվեց նրանց ու ասաց. «Կենդանի է Տերը. եթե դուք նրանց ողջ թողնեիք, ես ձեզ չէի սպանի»։ ²⁰ Եվ իր անդրանիկ որդուն՝ Եթերին, ասաց. «Վե՛ր կաց, սպանի՛ր դրանց»։ Բայց պատանին իր սուրը չհանեց, որովհետև վախեցավ, քանի որ մանուկ էր։ ²¹ Զեբեեն և Սաղմանան ասացին. «Վե՛ր կաց և դու ի՛նքդ զարկիր մեզ, որովհետև մարդու ուժն իրեն համեմատ կլինի»։ Գեդեոնը վեր կացավ, սպանեց Զեբեեին ու Սաղմանային և նրանց ուղտերի վզերից մանյակներն առավ։

²² Իսրայելի այրերը Գեդեոնին ասացին. «Իշխի՛ր մեզ վրա դու և քո որդին ու քո որդու որդին, որովհետև դու մեզ փրկեցիր մադիանացիների ձեռքից»։ ²³ Գեդեոնը նրանց ասաց. «Ես ձեզ վրա չեմ իշխի, և ոչ էլ իմ որդին կիշխի ձեզ վրա, Տե՛րը թող իշխի ձեզ վրա»։

²⁴ Ապա Գեդեոնը նրանց ասաց. «Ձեզանից մի բան եմ խնդրում. ամեն մարդ իր ավարից մի գինդ թող տա ինձ»։ Նրանց գինդերը ոսկի էին, քանի որ իսմայելացիներ էին։ ²⁵ Նրանք ասացին. «Սիրով կտանք»։ Եվ փռեցին նրա հանդերձները, ու ամեն մարդ իր ավարից ոսկի գինդեր գցեց այնտեղ։ ²⁶ Նրա խնդրած ոսկի գինդերի կշիռը հազար յոթ հարյուր սիկղ ոսկի եղավ, բացի մադիանացիների թագավորների վրայի մահիկներից, ապարանջաններից, պսակակալներից և ծիրանիներից, և նրանց ուղտերի վզերի ոսկի մանյակներից։ ²⁷ Գեդեոնը դրանցով եփուդ շինեց և այն դրեց իր Եփրա քաղաքում։ Ամբողջ Իսրայելը, նրան հետևելով, այդ պաշտեց, և դա Գեդեոնի ու նրա տան համար գայթակղություն եղավ։

²⁸ Այսպես մադիանացիները ենթարկվեցին Իսրայելի որդիներին և այլևս իրենց գլուխները չբարձրացրին։ Գեդեոնի օրոք երկիրը հանգստացավ քառասուն տարի։

²⁹ Հովասի որդի Հերոբոաղը գնաց բնակվեց իր տանը։ ³⁰ Գեդեոնը յոթանասուն որդի էր սերնդագործել, որովհետև շատ կանայք ուներ։ ³¹ Սյուքեմում նրա ունեցած հարճն էլ նրա համար մի որդի ծնեց, և նրա անունն Աբիմելեք դրեց։ ³² Հովասի որդի Գեդեոնը մեռավ խոր ծերության հասակում և թաղվեց իր հոր՝ Հովասի գերեզմանում, Եսրեի հորը պատկանող Եփրայում։

³³ Երբ Գեդեոնը մեռավ, Իսրայելի որդիները նորից պաշտեցին Բահաղի կուռքերին և Բահաղ Բերիթին իրենց աստվածը համարեցին։ ³⁴ Իսրայելի որդիները չհիշեցին Տիրոջը՝ իրենց Աստծուն, որ նրանց փրկեց իրենց շրջակայքի բոլոր թշնամիներից։ ³⁵ Նրանք Հերոբոաղի, այսինքն՝ Գեդեոնի տան հանդեպ երախտագետ չեղան այն բոլոր բարեգործությունների դիմաց, որ նա արել էր Իսրայելին։

9

Աբիմելեքը՝ թագավոր

¹ Հերոբոաղի որդի Աբիմելեքը գնաց Սյուքեմ՝ իր մոր եղբայրների մոտ, խոսեց նրանց հետ և իր մոր հայրական ամբողջ ազգատոհմի հետ ու ասաց. ² «Բոլոր սյուքեմացիներին ի լուր ասե՛ք. “Ո՞րն է լավ ձեզ համար՝ Հերոբոաղի բոլոր յոթանասո՞ւն որդիների իշխելը ձեզ վրա, թե՞ մեկ մարդու իշխելը. և հիշե՛ք, որ ես ձեր ոսկորից ու ձեր մարմնից եմ”»։ ³ Նրա մոր եղբայրները նրա այս բոլոր խոսքերը հասցրին Սյուքեմի բոլոր բնակիչների ականջին, և նրանց սիրտը հակվեց Աբիմելեքի կողմը, որովհետև ասացին՝ «Մեր եղբայրն է» ⁴ և նրան Բահաղ Բերիթի տնից յոթանասուն արծաթ տվեցին։ Դրանցով Աբիմելեքը սրիկա և ահարկու մարդիկ վարձեց, որոնք գնացին նրա հետևից։ ⁵ Նա գնաց Եփրա՝ իր հոր տունը, և մի քարի վրա կոտորեց իր եղբայրներին՝ Հերոբոաղի որդիներին՝ յոթանասուն մարդ։ Ողջ մնաց միայն Հովաթամը՝ Հերոբոաղի կրտսեր որդին, որովհետև թաքնվել էր։ ⁶ Սյուքեմի բոլոր մարդիկ և Մաաղոնի ամբողջ տունը հավաքվեցին, գնացին ու թագավոր կարգեցին Աբիմելեքին Կռվի կաղնու մոտ, որ Սյուքեմում է։

⁷ Երբ լուրը հասավ Հովաթամին, նա գնաց կանգնեց Գարիզին լեռան գլխին, ձայնը բարձրացրեց, լաց եղավ և ասաց նրանց. «Լսե՛ք ինձ, Սյուքեմի՛ մարդիկ, և Աստված ձեզ կլսի։ ⁸ Ծառերը ելան իրենց համար թագավոր օծելու և ասացին ձիթենուն. “Թագավորի՛ր մեզ վրա”։ ⁹ Ձիթենին նրանց ասաց. “Թողնեմ իմ պարարտությունը, որով փառավորում են ինձ Աստված և մարդիկ, և գնամ ծառերի վրա՞ իշխեմ”։ ¹⁰ Ծառերն ասացին թզենուն. “Եկ թագավորի՛ր մեզ վրա”։ ¹¹ Թզենին նրանց ասաց. “Իմ քաղցրությունն ու իմ լավ պտուղները թողած՝ գնամ ծառերի վրա՞ իշխեմ”։ ¹² Ծառերն ասացին որթատունկին. “Եկ թագավորի՛ր մեզ վրա”։ ¹³ Որթատունկը նրանց ասաց. “Իմ գինին՝ Աստծուն ու մարդկանց ուրախություն տվողին թողած՝ գնամ ծառերի վրա՞ իշխեմ”։ ¹⁴ Ծառերն ասացին փշին. “Եկ թագավորի՛ր մեզ վրա”։ ¹⁵ Փուշն ասաց ծառերին. “Եթե դուք իսկապես ինձ ձեզ վրա թագավոր եք օծում, եկեք ծածկվե՛ք իմ հովանու տակ, եթե ոչ՝ փշից կրակ դուրս կգա և կայրի Լիբանանի մայրիները”։ ¹⁶ Արդ, եթե ճշմարտությամբ և արդարությամբ վարվեցիք՝ Աբիմելեքին թագավոր դարձնելով, եթե լավ վարվեցիք Հերոբոաղի և նրա տան հետ, եթե նրա ձեռքի գործերի համեմատ հատուցեցիք նրան... ¹⁷ Իմ հայրը ձեր փոխարեն պատերազմեց, իր անձն առաջ գցեց և ձեզ ազատեց մադիանացիների ձեռքից։ ¹⁸ Իսկ դուք այսօր ելաք իմ հոր տան դեմ և կոտորեցիք նրա որդիներին՝ յոթանասուն մարդու մի քարի վրա, և նրա աղախնու որդուն՝ Աբիմելեքին,- քանի որ նա ձեր եղբայրն է,- սյուքեմացիների թագավոր կարգեցիք։ ¹⁹ Եթե այսօր Հերոբոաղի և նրա տան հետ ճշմարտությամբ և արդարությամբ վարվեցիք, օրհնված լինեք դուք և ուրախացե՛ք Աբիմելեքով, և նա էլ ձեզնով թող ուրախանա։ ²⁰ Իսկ եթե ոչ, թող Աբիմելեքից կրակ դուրս գա և այրի Սյուքեմի բնակիչներին ու Մաաղոնի տունը, կամ էլ թող կրակ դուրս գա Սյուքեմի բնակիչներից ու Մաաղոնի տնից և այրի Աբիմելեքին»։ ²¹ Հովաթամը փախավ ու ազատվեց, գնաց Բերայի ճանապարհով և բնակվեց այնտեղ՝ թաքնվելով իր եղբայր Աբիմելեքից։

²² Աբիմելեքն Իսրայելի վրա իշխեց երեք տարի։ ²³ Աստված չար ոգի ուղարկեց Աբիմելեքի մեջ և Սյուքեմի բնակիչների մեջ, և Սյուքեմի բնակիչներն արհամարհեցին Աբիմելեքի տունը, ²⁴ որպեսզի Հերոբոաղի յոթանասուն որդիներին հասած անիրավությունը նրա վրա գա, և նրանց արյունը հասնի իրենց եղբայր Աբիմելեքի վրա, որ նրանց կոտորեց, նաև Սյուքեմի բնակիչների վրա, որոնք զորացրել էին նրա ձեռքը, որ կոտորի իր եղբայրներին։ ²⁵ Սյուքեմի բնակիչները նրա համար դարան պատրաստեցին լեռների կատարներին և կողոպտում էին բոլորին, ովքեր անցնում էին նրանց մոտի ճանապարհով։ Լուրը հասավ Աբիմելեքին։ ²⁶ Աբեդդի որդի Գաաղը իր եղբայրների հետ եկավ Սյուքեմ, և Սյուքեմի բնակիչներն ապավինեցին նրան։ ²⁷ Նրանք դուրս եկան դաշտերը, քաղեցին իրենց այգիների խաղողը, տրորեցին հնձաններում, պար բռնեցին, մտան իրենց աստծու տունը, կերան, խմեցին և անիծեցին Աբիմելեքին։ ²⁸ Աբեդդի որդի Գաաղն ասաց. «Աբիմելեքն ո՞վ է և ի՞նչ գործ ունի Սյուքեմի որդիների հետ, որ մենք նրան ծառայենք. նա Հերոբոաղի որդիներից չէ՞, որ քաղաքը ղեկավարում է իր ծառա Զեբուղի միջոցով։ Սյուքեմի հայրը Եմովրն է։ Եվ ինչո՞ւ նրան ծառայենք։ ²⁹ Ո՞վ ինձ առաջնորդ կկարգի այս ժողովրդի վրա, որ ես հեռացնեմ Աբիմելեքին, ասեմ նրան. “Զորքերդ հավաքի՛ր և դո՛ւրս եկ իմ դեմ”»։

³⁰ Քաղաքի իշխան Զեբուղը լսեց Աբեդդի որդի Գաաղի խոսքերը և բարկությամբ լցվեց։ ³¹ Նա Աբիմելեքի մոտ պատգամավորներ ուղարկեց նվերներով և ասաց. «Ահա Աբեդդի որդի Գաաղն ու նրա եղբայրները եկել են Սյուքեմ և քաղաքը քո դեմ են հանում։ ³² Հիմա դու և քեզ հետ եղող զորքը գիշերը վե՛ր կացեք և դարանամո՛ւտ եղեք դաշտում։ ³³ Առավոտյան, հենց որ արեգակը ծագի, կանուխ վե՛ր կացեք և քաղաքի վրա հարձակվե՛ք։ Երբ նա և նրա հետ եղող զորքը դուրս գան քո դեմ, նրա հետ արա՛ այն, ինչ որ ձեռքիցդ կգա»։ ³⁴ Աբիմելեքը և նրա հետ եղող զորքը գիշերով վեր կացան և չորս գնդով դարան մտան Սյուքեմի մոտ։ ³⁵ Առավոտյան Աբեդդի որդի Գաաղը դուրս եկավ և կանգնեց քաղաքի դարպասի առաջ։ Աբիմելեքը և նրա հետ եղող ամբողջ զորքը դուրս եկան դարաններից։ ³⁶ Աբեդդի որդի Գաաղը, տեսնելով զորքը, Զեբուղին ասաց. «Ահա լեռների գագաթից զորք է իջնում»։ Զեբուղը նրան ասաց. «Դու լեռների ստվերն ես տեսնում և մարդկանց տեղ ես դնում»։ ³⁷ Գաաղը նորից խոսեց և ասաց. «Ահա զորք է իջնում երկրի պորտով դեպի ծովի կողմը, և մի գունդ էլ գալիս է Դիտանոցների կաղնու ճանապարհով»։ ³⁸ Զեբուղը նրան ասաց. «Հիմա որտե՞ղ է քո բերանը, որն ասում էր, թե ո՞վ է Աբեմելեքը, որ մենք ծառայենք նրան։ Չէ՞ որ սա այն զորքն է, որը դու արհամարհում էիր։ Հիմա վե՛ր կաց և նրա հետ պատերազմի՛ր»։ ³⁹ Գաաղը Սյուքեմի բնակիչների առաջն անցնելով դուրս եկավ և կռվեց Աբիմելեքի դեմ։ ⁴⁰ Աբիմելեքը նրան հալածեց, և նա փախավ նրա առաջից. շատ վիրավորներ ընկան մինչև քաղաքի դարպասները։ ⁴¹ Աբիմելեքը վերադարձավ Արիմ, իսկ Զեբուղը Գաաղին և նրա եղբայրներին քշեց, որ Սյուքեմում չբնակվեն։ ⁴² Հաջորդ օրը ժողովուրդը դաշտ դուրս եկավ. դա իմացավ Աբիմելեքը։ ⁴³ Նա առավ զորքը, երեք գնդի բաժանեց և դարանակալեց։ Երբ տեսավ, որ ժողովուրդը դուրս է գալիս քաղաքից, հարձակվեց նրա վրա և ջարդեց այն. ⁴⁴ Աբիմելեքը և նրա հետ եղող գունդը կանգնեցին քաղաքի դարպասի մոտ, իսկ մյուս երկու գնդերը հարձակվեցին դաշտում գտնվողների վրա և ջարդեցին նրանց։ ⁴⁵ Աբիմելեքն այդ ամբողջ օրը պատերազմեց քաղաքի դեմ. նրանք գրավեցին քաղաքը և նրա մեջ եղած ժողովրդին կոտորեցին, քաղաքը կործանեցին և ողջ տարածքում աղ ցանեցին։

⁴⁶ Երբ Սյուքեմի աշտարակի մարդիկ լսեցին այս մասին, հավաքվեցին Բահաղ Բերիթի տան ամրոցում։ ⁴⁷ Աբիմելեքին լուր հասավ, որ Սյուքեմի աշտարակի բոլոր մարդիկ հավաքվել են։ ⁴⁸ Աբիմելեքը և նրա հետ եղող ամբողջ զորքը բարձրացան Սելմոն լեռը։ Աբիմելեքը կացինն իր ձեռքն առավ, մի բեռ փայտ կտրեց, վերցրեց այն, դրեց իր ուսերի վրա և ասաց իր զորքին. «Տեսաք, թե ես ինչ արեցի. դուք էլ անմիջապես նույնը արեք»։ ⁴⁹ Նրանցից յուրաքանչյուրը մի բեռ փայտ կտրեց, վերցրեց ու գնաց Աբիմելեքի հետևից. փայտը լցրեցին ամրոցի մեջ և ամրոցը հրով այրեցին։ Սյուքեմի աշտարակի բոլոր մարդիկ՝ մոտ հազար տղամարդ և կին, մեռան։

⁵⁰ Աբիմելեքը գնաց Թեբես, պաշարեց և գրավեց այն։ ⁵¹ Քաղաքի մեջ մի ամուր աշտարակ կար, բոլոր տղամարդիկ և կանայք ու քաղաքի բոլոր գլխավորները փախան այնտեղ, դուռը ներսից փակեցին և բարձրացան աշտարակի կտուրը։ ⁵² Աբիմելեքը եկավ մինչև աշտարակը, հարձակվեց դրա վրա և մոտեցավ աշտարակի դռներին։ ⁵³ Մի կին երկանաքարի մի կտոր գցեց նրա գլխին և ջարդեց Աբիմելեքի գանգը։ ⁵⁴ Աբիմելեքն իսկույն ձայն տվեց իր կապարճակիր պատանուն և նրան ասաց. «Մերկացրո՛ւ քո սուրը և սպանի՛ր ինձ. չլինի թե ասեն, որ մի կին է սպանել նրան»։ Նրա պատանին խոցեց նրան, և Աբիմելեքը մեռավ։ ⁵⁵ Երբ Իսրայելի այրերը տեսան, որ Աբիմելեքը մեռավ, ամեն մեկը գնաց իր տեղը։

⁵⁶ Այսպես Աստված Աբիմելեքի գլխին թափեց նրա չարիքը, որ նա գործել էր իր հոր դեմ՝ կոտորելով իր յոթանասուն եղբայրներին։ ⁵⁷ Սյուքեմի մարդկանց բոլոր չարագործություններն Աստված նրանց գլխին թափեց, և Հերոբոաղի որդի Հովաթամի անեծքը նրանց գլխին եկավ։

10

Թովղա

¹ Աբիմելեքից հետո Իսրայելը փրկելու համար մեջտեղ ելավ նրա հորեղբոր որդին՝ Փուայի որդի Թովղան՝ Իսաքարի ցեղից։ Նա բնակվում էր Սամարիայում՝ Եփրեմի լեռան վրա։ ² Նա Իսրայելին դատեց քսաներեք տարի. մեռավ և թաղվեց Սամարիայում։

Հայիր

³ Նրանից հետո մեջտեղ ելավ գաղաադացի Հայիրը և Իսրայելին դատեց քսաներկու տարի։ ⁴ Նա ուներ երեսուներկու որդի, որոնք հեծնում էին երեսուներկու ավանակի վրա։ Նրանք ունեին երեսուներկու քաղաք։ Դրանք մինչև այսօր կոչվում են Հայիրի ավաններ և գտնվում են Գաղաադում։ ⁵ Հայիրը մեռավ և թաղվեց Կամովնում։

Ամովնացիների հարձակումը իսրայելացիների վրա

⁶ Իսրայելի որդիները շարունակեցին Տիրոջ առաջ չարիք գործել և պաշտեցին Բահաղի կուռքերին, Աստարովթին, Ասորիքի աստվածներին, Սիդովնի աստվածներին, Մովաբի աստվածներին, Ամովնի աստվածներին և այլազգիների աստվածներին։ Նրանք լքեցին Տիրոջը և չպաշտեցին նրան։ ⁷ Տերը բարկությամբ բորբոքվեց Իսրայելի վրա և նրանց մատնեց այլազգիների ձեռքն ու ամովնացիների ձեռքը։ ⁸ Նրանք այն ժամանակ տասնութ տարի ճնշեցին և ճզմեցին Իսրայելի որդիներին Հորդանան գետի այն կողմում՝ ամորհացիների երկրում, Գաղաադում։ ⁹ Ամովնացիներն անցան Հորդանան գետը՝ պատերազմելու Հուդայի դեմ, Բենիամինի դեմ և Եփրեմի տան դեմ։ Իսրայելի որդիները խիստ նեղության մեջ ընկան։ ¹⁰ Նրանք աղաղակեցին Տիրոջը և ասացին. «Մեղանչեցինք քո դեմ, որովհետև թողեցինք մեր Աստծուն և Բահաղի կուռքերին պաշտեցինք»։ ¹¹ Տերն ասաց Իսրայելի որդիներին. «Չէ՞ որ եգիպտացիները, ամորհացիները, Ամովնի որդիները, Մովաբի որդիները և այլազգիները, ¹² սիդովնացիները, ամաղեկացիները, քանանացիները նեղում էին ձեզ, և դուք ինձ աղաղակեցիք, ու ես ազատեցի ձեզ նրանց ձեռքից։ ¹³ Իսկ դուք թողեցիք ինձ և ծառայեցիք օտար աստվածների։ Դրա համար ձեզ այլևս չեմ փրկելու։ ¹⁴ Գնացե՛ք, աղաղակե՛ք այն աստվածներին, որ ձեզ համար ընտրեցիք, թող նրանք փրկեն ձեզ ձեր նեղության ժամանակ»։ ¹⁵ Իսրայելի որդիներն ասացին Տիրոջը. «Մեղանչեցինք, արա՛ դու մեզ այն, ինչ որ քեզ հաճելի է թվում, բայց միայն ազատի՛ր մեզ այսօր, Տե՛ր»։ ¹⁶ Եվ նրանք իրենց միջից հանեցին օտար աստվածներին և միայն Տիրոջը պաշտեցին։ Նա չհաշտվեց ժողովրդի հետ, բայց նրա սիրտը ցավեց Իսրայելի տառապանքի համար։ ¹⁷ Ամովնի որդիները վեր կացան և բանակեցին Գաղաադում. Իսրայելի որդիներն էլ վեր կացան և բանակեցին Դիտանոցում։ ¹⁸ Գաղաադում հաստատված ժողովրդի իշխաններն իրար ասացին. «Այն մարդը, որ սկսի պատերազմել ամովնացիների դեմ, նա՛ թող լինի Գաղաադի բոլոր բնակիչների առաջնորդը»։

11

Հեփթայեն

¹ Գաղաադացի Հեփթայեն հզոր և ուժեղ մարդ էր։ Նա որդին էր մի պոռնիկ կնոջ, որը Գաղաադի համար ծնեց Հեփթայեին։ ² Գաղաադի կինը նրա համար որդիներ ծնեց, որոնք երբ մեծացան, վռնդեցին Հեփթայեին՝ ասելով. «Դու մեր հոր տան մեջ ժառանգություն չունես, որովհետև պոռնիկ կնոջ որդի ես»։ ³ Հեփթայեն հեռացավ իր եղբայրներից և բնակվեց Տովբ երկրում։ Հեփթայեի մոտ հավաքվում էին ավազակաբարո մարդիկ և շրջում էին նրա հետ։

⁴ Որոշ ժամանակից հետո Ամովնի որդիները պատերազմեցին Իսրայելի դեմ։ ⁵ Երբ Ամովնի որդիները պատերազմում էին Իսրայելի դեմ, Գաղաադի ծերերը գնացին, որ Տովբ երկրից բերեն Հեփթայեին։ ⁶ Նրանք ասացին Հեփթայեին. «Ե՛կ և մեզ համար զորավա՛ր եղիր, և Ամովնի որդիների դեմ պատերազմ տանք»։ ⁷ Հեփթայեն Գաղաադի ծերերին ասաց. «Չէ՞ որ դուք ինձ ատեցիք, Տիրոջ առաջ հանեցիք իմ հոր տնից և ինձ հեռացրիք ձեզնից։ Հիմա, երբ նեղության մեջ եք, ինչո՞ւ եք եկել ինձ մոտ»։ ⁸ Գաղաադի ծերերն ասացին Հեփթայեին. «Այդպես չէ, մենք քեզ մոտ ենք եկել, որ մեզ հետ գաս, և պատերազմ տանք Ամովնի որդիների դեմ, և մեզ՝ Գաղաադի բոլոր բնակիչներիս առաջնորդ լինես»։ ⁹ Հեփթայեն ասաց Գաղաադի ծերերին. «Եթե դուք ինձ ետ վերադարձնեք Ամովնի որդիների դեմ պատերազմելու, և Տերը նրանց իմ ձեռքը մատնի, իրապե՞ս ես ձեր առաջնորդը կդառնամ»։ ¹⁰ Գաղաադի ծերերն ասացին Հեփթայեին. «Տերը թող մեր մեջ վկա լինի, որ մենք քո խոսքի համաձայն կանենք»։

¹¹ Հեփթայեն Գաղաադի ծերերի հետ գնաց, և ժողովուրդը նրան իր վրա իշխան և առաջնորդ կարգեց։ Հեփթայեն Տիրոջ առաջ Մասեփայում կրկնեց իր այս բոլոր խոսքերը։

¹² Հեփթայեն Ամովնի որդիների թագավորի մոտ պատգամավորներ ուղարկեց և ասաց. «Դու ինձ հետ ի՞նչ գործ ունես, որ եկել ես իմ վրա՝ պատերազմելու իմ երկրում»։ ¹³ Ամովնի որդիների թագավորը Հեփթայեի պատգամավորներին ասաց. «Եգիպտոսից դուրս գալու ժամանակ Իսրայելն ինչո՞ւ գրավեց իմ երկիրը՝ Առնովնից մինչև Հաբոկ և մինչև Հորդանան գետը։ Հիմա խաղաղությամբ այն վերադարձրո՛ւ ինձ, և ես կգնամ»։ Պատգամավորները վերադարձան Հեփթայեի մոտ։ ¹⁴ Հեփթայեն նորից պատգամավորներ ուղարկեց Ամովնի որդիների արքայի մոտ ¹⁵ և ասաց նրան. «Այսպես են ասում Իսրայելը և Հեփթայեն. “Եգիպտոսից դուրս գալիս Իսրայելը չգրավեց Մովաբի երկիրն ու Ամովնի որդիների երկիրը, ¹⁶ այլ Իսրայելն անապատով գնաց մինչև Կարմիր ծովը և եկավ մինչև Կադես։ ¹⁷ Իսրայելը պատգամավորներ ուղարկեց Եդովմի արքայի մոտ և ասաց. “Թող անցնեմ քո երկրով”, բայց Եդովմի արքան չլսեց։ Մովաբի արքայի մոտ էլ պատգամավորներ ուղարկեց, բայց նա էլ չկամեցավ։ Եվ Իսրայելը մնաց Կադեսում, ¹⁸ շրջեց անապատում, պտույտ տվեց Եդովմի երկրով և Մովաբի երկրով, եկավ Մովաբի երկրի արևելյան կողմով և բանակեց Առնովնի այն կողմում, բայց Մովաբի սահմանները չմտավ, որովհետև Մովաբի սահմանն Առնովնն էր։ ¹⁹ Իսրայելը պատգամավորներ ուղարկեց ամորհացիների Սեհովն արքայի մոտ, որ Եսեբոնի և ամորհացիների թագավորն էր, և Իսրայելը նրան ասաց. “Թող անցնեմ քո երկրով մինչև իմ տեղը”։ ²⁰ Եվ Սեհովնը չկամեցավ, որ Իսրայելն անցնի իր սահմաններով։ Սեհովնը հավաքեց իր ամբողջ ժողովրդին, բանակեց Յասսայում և պատերազմեց Իսրայելի դեմ։ ²¹ Եվ Տերը՝ Իսրայելի Աստվածը, Սեհովնին և նրա ամբողջ ժողովրդին մատնեց Իսրայելի ձեռքը, և ջարդեցին նրանց, և Իսրայելը ժառանգեց այդ երկրում ապրող ամորհացիների երկիրը, ²² և Իսրայելը ժառանգեց ամորհացիների բոլոր սահմանները Առնովնից մինչև Հաբոկ և անապատից մինչև Հորդանան գետը։ ²³ Արդ, Տերը՝ Իսրայելի Աստվածը, ամորհացիներին վերացրել է Իսրայելի՝ իր ժողովրդի առջևից, և դո՞ւ պիտի ժառանգես այն։ ²⁴ Չէ՞ որ դու պիտի ժառանգես քո աստծու՝ Քամոսի՝ քեզ ժառանգություն տվածը, մենք էլ պիտի ժառանգենք այն ամենը, ինչ Տերը՝ մեր Աստվածը, ժառանգություն տվեց մեզ։ ²⁵ Արդ, դու Սեպփովրի որդի Բաղակից՝ Մովաբի արքայից, լա՞վ ես. մի՞թե նա կռվեց Իսրայելի հետ կամ պատերազմե՞ց նրանց դեմ. ²⁶ Իսրայելը երեք հարյուր տարի ապրում է Եսեբոնում և նրա արվարձաններում, Արոյերում և նրա արվարձաններում ու Հորդանան գետի ափերի բոլոր քաղաքներում։ Դրանք այնքան ժամանակ ինչո՞ւ չազատեցիք։ ²⁷ Ես քո դեմ չեմ մեղանչել, իսկ դու իմ դեմ չարիք ես գործում՝ պատերազմելով իմ դեմ։ Իսրայելի և Ամովնի որդիների միջև դատավոր եղող Տերը թող այսօր դատաստան անի”»։ ²⁸ Բայց ամովնացիների արքան չանսաց Հեփթայեի հղած խոսքերին։

²⁹ Այն ժամանակ Տիրոջ հոգին իջավ Հեփթայեի վրա։ Նա անցավ Գաղաադով ու Մանասեի երկրով, հասավ Գաղաադի Դիտանոցը և այնտեղից ուղղվեց Ամովնի որդիների դեմ։ ³⁰ Հեփթայեն Տիրոջն ուխտ արեց և ասաց. «Եթե Ամովնի որդիներին իմ ձեռքը մատնես, ³¹ և ես խաղաղությամբ վերադառնամ Ամովնի որդիների մոտից, իմ տան դռնից ինձ ընդառաջ դուրս եկողին Տիրոջը ողջակեզ կմատուցեմ»։ ³² Հեփթայեն գնաց Ամովնի որդիների դեմ պատերազմելու, և Տերը նրանց մատնեց նրա ձեռքը։ ³³ Նա ջարդեց նրանց Արոյերից մինչև Սեմենիթի սահմանը, ջարդեց քսան քաղաք, մինչև Հաբելի այգեստանները՝ խիստ մեծ կոտորած տալով։ Ամովնի որդիները փախան Իսրայելի որդիների առաջից։

³⁴ Հեփթայեն եկավ Մասեփա, իր տունը, և ահա նրա դուստրը նրան ընդառաջ ելավ թմբուկներով և պարերով։ Նա նրա միակ և սիրելի զավակն էր, և նրանից բացի նա ուրիշ տղա կամ դուստր չուներ։ ³⁵ Երբ նրան տեսավ, պատառոտեց իր զգեստները և ասաց. «Վա՜յ ինձ, դո՛ւստր իմ, դու ինձ ընկճեցիր, խոչ եղար աչքիս մեջ, որովհետև քեզ համար պարտավորություն ստանձնեցի Տիրոջ առաջ և չեմ կարող հետ դարձնել»։ ³⁶ Աղջիկը նրան ասաց. «Եթե ինձ համար պարտավորություն ես ստանձնել Տիրոջ առաջ, արա՛ ինձ հետ այն, ինչ դուրս է եկել քո բերանից այն բանի փոխարեն, ինչ արեց Տերը քեզ համար՝ վրեժ լուծելով քո թշնամիներից՝ Ամովնի որդիներից»։ ³⁷ Եվ իր հորն ասաց. «Միայն այս բա՛նն արա ինձ համար. թո՛ւյլ տուր, որ ես երկու ամիս գնամ ման գամ լեռների վրա և իմ ընկերուհիների հետ ողբամ իմ կուսությունը»։ ³⁸ Եվ հայրն ասաց. «Գնա՛»։ Եվ արձակեց նրան երկու ամիս։ Աղջիկն իր ընկերուհիների հետ գնաց և լեռների վրա ողբաց իր կուսությունը։ ³⁹ Երբ լրացավ երկու ամիսը, վերադարձավ իր հոր մոտ, և հայրը կատարեց իր արած ուխտը. աղջիկը տղամարդ չէր ճանաչել։ Եվ Իսրայելի մեջ սովորություն դարձավ ողբալ Հեփթայեի աղջկան. ⁴⁰ սահմանված օրերին, տարվա մեջ չորս օր, Իսրայելի աղջիկները հավաքվում էին՝ ողբալու գաղաադացի Հեփթայեի աղջկան։

12

¹ Եփրեմի որդիները հավաքվեցին, եկան Սեփենա և ասացին Հեփթայեին. «Ինչո՞ւ Ամովնի որդիների դեմ պատերազմի ելար և մեզ չկանչեցիր, որ քեզ հետ գնայինք։ Հիմա մենք կրակով կայրենք քո տունը քեզ վրա»։ ² Հեփթայեն նրանց ասաց. «Ես և իմ ժողովուրդը զրկված մարդիկ էինք, և Ամովնի որդիները խիստ նեղում էին ինձ։ Ես բողոքով դիմեցի ձեզ, բայց դուք ինձ չազատեցիք նրանց ձեռքից։ ³ Տեսնելով, որ ոչ ոք չի ազատում ինձ, հույսս դրեցի ինձ վրա, գնացի Ամովնի որդիների դեմ, և Տերը նրանց իմ ձեռքը մատնեց։ Հիմա դուք ինչո՞ւ եք ելել այսօր իմ դեմ պատերազմելու»։ ⁴ Եվ Հեփթայեն հավաքեց Գաղաադի բոլոր այրերին ու պատերազմ մղեց Եփրեմի դեմ։ Գաղաադի մարդիկ ջարդեցին եփրեմյաններին։ Փրկված եփրեմյաններն ասել էին՝ «Դուք, գաղաադացինե՛ր, Եփրեմի և Մանասեի միջև եք»։ ⁵ Գաղաադացիները եփրեմյաններից գրավեցին Հորդանան գետի կիրճերը, և երբ եփրեմյանների փախստականներն ասում էին՝ «Թող անցնենք», Գաղաադի մարդիկ նրանց ասում էին. «Մի՞թե դուք էլ եփրեմյան եք»։ Նրանք ասում էին. «Նրանցից չենք»։ ⁶ Նրանց ասում էին. «Մեզ մի նշա՛ն տվեք, ասացե՛ք՝ հասկ, հասկ»։ Բայց նրանց չէր հաջողվում այդպես ասել, ուստի բռնում և կոտորում էին նրանց Հորդանան գետի անցումներում։ Այդ ժամանակ եփրեմյաններից քառասուներկու հազար մարդ զոհվեց։

⁷ Հեփթայեն վեց տարի դատեց Իսրայելին. գաղաադացի Հեփթայեն մեռավ և թաղվեց Գաղաադի իր քաղաքում։

Եսեբոնը

⁸ Նրանից հետո Իսրայելին դատեց բեթղեհեմացի Եսեբոնը։ ⁹ Նա երեսուն տղա ուներ և երեսուն դուստր։ Իր դուստրերին մարդու տվեց, իսկ տղաների համար երեսուն կին բերեց դրսից։ Նա Իսրայելին դատեց յոթ տարի։ ¹⁰ Եսեբոնը մեռավ և թաղվեց Բեթղեհեմում։

Ելովնը

¹¹ Նրանից հետո Իսրայելին տասը տարի դատեց զաբուղոնացի Ելովնը։ ¹² Զաբուղոնացի Ելովնը մեռավ և թաղվեց Եղիմում՝ Զաբուղոնի երկրում։

Աբդոնը

¹³ Նրանից հետո Իսրայելին դատեց փարաթոնացի Աբդոնը՝ Ելլեքի որդին։ ¹⁴ Նա քառասուն որդի և երեսուն թոռներ ուներ, որոնք հեծնում էին յոթանասուն ավանակներ։ Նա Իսրայելին դատեց ութ տարի։ ¹⁵ Փարաթոնացի Աբդոնը՝ Ելլեքի որդին, մեռավ և թաղվեց Փարաթոնում՝ Եփրեմի երկրում՝ Ամաղեկի լեռան վրա։

13

Սամփսոնի ծնունդը

¹ Իսրայելի որդիները շարունակեցին չարիք գործել Տիրոջ առաջ, և Տերը նրանց քառասուն տարի այլազգիների ձեռքը մատնեց։

² Սարաացի մի մարդ կար Դանի ցեղից, նրա անունը Մանովե էր։ Նրա կինը ամուլ էր և զավակ չէր ունենում։ ³ Տիրոջ հրեշտակը երևաց այս կնոջը և ասաց նրան. «Ահա դու ամուլ ես և երեխա չես ծնել, բայց կհղիանաս և որդի կծնես։ ⁴ Արդ, զգո՛ւյշ եղիր, գինի և օղի չխմես և ոչ մի անմաքուր բան չուտես, ⁵ որովհետև դու ահա պիտի հղիանաս և որդի պիտի ծնես։ Նրա գլխին ածելի չպիտի դիպչի, որովհետև մանուկն Աստծու ուխտավոր պիտի լինի հենց մոր արգանդից. նա պիտի սկսի փրկել Իսրայելը փղշտացիներից»։ ⁶ Կինը մտավ և ասաց իր ամուսնուն. «Աստծու այրը եկավ ինձ մոտ, նա Աստծու հրեշտակի նման վեհատեսիլ էր։ Ես նրան հարցրի, թե որտեղից է, բայց նա իր մասին ինձ ոչինչ չասաց։ ⁷ Նա ինձ ասաց. “Ահա պիտի հղիանաս և որդի պիտի ծնես, արդ գինի և օղի չխմես և ոչ մի անմաքուր բան չուտես, որովհետև մանուկն Աստծու ուխտավոր պիտի լինի հենց իր մոր արգանդից մինչև իր մահվան օրը”»։

⁸ Մանովեն Տիրոջն աղաչեց և ասաց. «Խնդրում եմ, Տե՛ր, Աստծու այն մարդը, որին դու ուղարկեցիր մեզ մոտ, թող դարձյալ գա մեզ մոտ և սովորեցնի, թե ի՛նչ անենք այն մանկանը, որ պիտի ծնվի»։ ⁹ Աստված լսեց Մանովեի ձայնը, և Աստծու հրեշտակը նորից եկավ նրա կնոջ մոտ, երբ նա նստել էր հանդում, իսկ նրա ամուսին Մանովեն նրա մոտ չէր։ ¹⁰ Կինն շտապ գնաց պատմեց իր ամուսնուն և ասաց նրան. «Ահա երևաց ինձ այն մարդը, որ այն օրը եկել էր ինձ մոտ»։ ¹¹ Մանովեն վեր կացավ, գնաց իր կնոջ հետ, եկավ այն մարդու մոտ և ասաց նրան. «Դո՞ւ ես այն մարդը, որ խոսել է այս կնոջ հետ»։ Հրեշտակն ասաց. «Ես եմ»։ ¹² Մանովեն ասաց. «Արդ, երբ քո խոսքերը կատարվեն, ինչպիսի՞ն պետք է լինեն մանկան կյանքի կանոններն ու գործերը»։ ¹³ Տիրոջ հրեշտակն ասաց Մանովեին. «Թող նա զգուշանա այն ամենից, որ ասացի այդ կնոջը. ¹⁴ որթատունկից ելած ոչ մի բան թող չուտի, գինի և օղի չխմի, ոչ մի անմաքուր բան չուտի, թող զգուշանա այն ամենից, որ պատվիրեցի»։

¹⁵ Մանովեն ասաց հրեշտակին. «Թող որ քեզ մի փոքր ժամանակ մեզ մոտ պահենք և մի ուլ պատրաստենք ու դնենք քո առաջ»։ ¹⁶ Տիրոջ հրեշտակը Մանովեին ասաց. «Եթե ինձ պահես էլ, քո հացից չեմ ուտի, իսկ եթե ուլը ողջակեզ պիտի անես, Տիրո՛ջը մատուցիր այն»։ Մանովեն չիմացավ, որ նա Տիրոջ հրեշտակն է։ ¹⁷ Մանովեն ասաց Տիրոջ հրեշտակին. «Ի՞նչ է քո անունը, ասա՛, որ երբ քո խոսքը կատարվի, փառավորենք քեզ»։ ¹⁸ Տիրոջ հրեշտակն ասաց նրան. «Ինչո՞ւ ես հարցնում իմ անունը, դա մի սքանչելի անուն է»։ ¹⁹ Մանովեն վերցրեց մի ուլ և անարյուն զոհ և քարի վրա մատուցեց սքանչելիք անող Տիրոջը։ Եվ մինչ Մանովեն և նրա կինը նայում էին, ²⁰ թե ինչպես է բոցը զոհասեղանից դեպի երկինք բարձրանում, տեսան Տիրոջ հրեշտակին՝ զոհասեղանի բոցի հետ երկինք բարձրանալիս։ Մանովեն ու նրա կինը երեսի վրա գետնին ընկան։ ²¹ Տիրոջ հրեշտակն այլևս չերևաց Մանովեին ու նրա կնոջը։ Այն ժամանակ Մանովեն հասկացավ, որ նա Տիրոջ հրեշտակն է։ ²² Մանովեն ասաց իր կնոջը. «Անպատճառ կմեռնենք, որովհետև տեսանք Աստծուն»։ ²³ Եվ նրա կինը նրան ասաց. «Եթե Տերը կամենար մեզ սպանել, մեր ձեռքից չէր ընդունի ողջակեզն ու անարյուն զոհը և մեզ չէր հայտնի այդ ամենն իր ժամանակին և այն մեզ լսելի չէր դարձնի»։ ²⁴ Կինը որդի ծնեց ու նրա անունը Սամփսոն դրեց։ Մանուկն աճեց, և Տերը նրան օրհնեց։ ²⁵ Նա Դանի բանակում էր, Սարաայի և Եսթավուղի միջև, երբ Տիրոջ հոգին սկսեց շրջել նրա հետ։

14

Սամփսոնը և թամնաթացի աղջիկը

¹ Սամփսոնն իջավ Թամնաթա և Թամնաթայում այլազգիների աղջիկների մեջ մի կին տեսավ, որը հաճելի թվաց նրան։ ² Նա գնաց պատմեց իր հորն ու մորը և ասաց. «Թամնաթայում այլազգիների աղջիկների մեջ մի կին տեսա. արդ, նրան ինձ համար կի՛ն առեք»։ ³ Նրա հայրն ու մայրն ասացին նրան. «Մի՞թե կին չկա քո ազգակիցների աղջիկների և իմ ամբողջ ժողովրդի մեջ, որ գնաս կին առնես անթլփատ այլազգիներից»։ Սամփսոնն ասաց իր հորը. «Նրան բե՛ր ինձ համար, որովհետև նա հաճելի է իմ աչքին»։ ⁴ Նրա հայրն ու մայրը չգիտեին, որ դա Տիրոջից է, որպեսզի նա վրեժ լուծի այլազգիներից։ Այն ժամանակ այլազգիներն իշխում էին Իսրայելի վրա։

⁵ Սամփսոնն իր հոր և մոր հետ իջավ Թամնաթա. Սամփսոնը ճանապարհը շեղեց Թամնաթայի այգեստանի մեջ և ահա առյուծի մի կորյուն մռնչաց նրա վրա։ ⁶ Տիրոջ հոգին աջակցեց նրան, և նա պատռեց առյուծին, ինչպես մի ուլի, թեպետ նրա ձեռքին զենք չկար։ Նա իր արածը չպատմեց իր հորն ու մորը։ ⁷ Նրանք եկան, խոսեցին կնոջ հետ, և կինը հաճելի թվաց Սամփսոնին։

⁸ Մի քանի օր հետո, երբ հետ դարձավ այդ աղջկան կնության առնելու, ճանապարհը շեղեց՝ առյուծի դիակը տեսնելու համար և տեսավ, որ առյուծի բերանի մեջ մեղուների մի պարս և մեղր կար։ ⁹ Նա առավ այն իր բերանը և ուտելով գնաց իր հոր և մոր մոտ, նրանց էլ տվեց, և նրանք կերան։ Բայց նրանց չասաց, որ մեղրն առյուծի բերանից է հանել։

¹⁰ Նրա հայրն իջավ այն կնոջ մոտ, և Սամփսոնն այնտեղ յոթ օր հարսանիք արեց, որովհետև երիտասարդներն այդպես էին անում։ ¹¹ Նրանք, երբ տեսան Սամփսոնին, նրան երեսուն ուղեկից կարգեցին, որոնք նրա մոտ մնացին։

¹² Սամփսոնը նրանց ասաց. «Հիմա ես ձեզ մի հանելուկ կասեմ. եթե խնջույքի այս յոթ օրվա ընթացքում այն լուծեք և գտնեք, ես ձեզ կտամ երեսուն սավան և երեսուն պատմուճան։ ¹³ Իսկ եթե չկարողանաք լուծել, դուք կտաք ինձ երեսուն սավան և երեսուն պատմուճան»։ Նրան ասացին. «Առաջարկի՛ր մեզ քո հանելուկը, և լսենք այն»։ ¹⁴ Եվ նրանց ասաց.

«Ուտողից կերակուր դուրս եկավ,

հզորից՝ քաղցրություն»։

Երեք օր չկարողացան նրա հանելուկը լուծել։ ¹⁵ Չորրորդ օրը Սամփսոնի կնոջն ասացին. «Խաբի՛ր քո մարդուն, որ հանելուկը քեզ բացատրի, թե չէ քեզ և քո հոր տունը կայրենք։ Մեզ կողոպտելո՞ւ համար կանչեցիր այստեղ»։ ¹⁶ Սամփսոնի կինը լաց եղավ ամուսնու մոտ և ասաց նրան. «Դու ատում ես ինձ և չես սիրում, որովհետև այն հանելուկը, որ առաջարկել ես իմ ժողովրդի որդիներին, ինձ չես հայտնել»։ Սամփսոնը նրան ասաց. «Իմ հորն ու մորը չեմ հայտնել, հիմա քե՞զ պիտի հայտնեմ»։ ¹⁷ Եվ խնջույքի յոթ օրերին կինը լաց եղավ նրա մոտ։ Յոթերորդ օրը Սամփսոնը հայտնեց նրան, որովհետև նա թախանձում էր։ Կինն էլ հայտնեց իր ժողովրդի որդիներին։ ¹⁸ Յոթերորդ օրը՝ արևամուտից առաջ, քաղաքի մարդիկ ասացին Սամփսոնին. «Ի՞նչն է մեղրից քաղցր և ի՞նչն է առյուծից հզոր»։ Սամփսոնը նրանց ասաց.

«Եթե դուք իմ երինջով չհերկեիք,

իմ հանելուկի պատասխանը չէիք գտնի»։

¹⁹ Տիրոջ հոգին աջակցեց Սամփսոնին. նա իջավ Ասկաղոն, այնտեղ երեսուն մարդ սպանեց և նրանց տոնական հանդերձներն առավ և տվեց հանելուկը լուծողներին։ Սամփսոնը սաստիկ բարկացավ և գնաց իր հոր տուն, ²⁰ իսկ Սամփսոնի կինն ամուսնացավ նրա ուղեկիցներից մեկի հետ, որ նրա ընկերն էր։

15

Սամփսոնի վրեժխնդրությունը

¹ Օրեր հետո՝ ցորենի հնձի ժամանակ, Սամփսոնը, մի ուլ վերցնելով, այցելեց իր կնոջը՝ ասելով. «Մտնեմ սենյակ կնոջս մոտ»։ Բայց կնոջ հայրը չթողեց, որ նրա մոտ մտնի։ ² Նրա հայրն ասաց. «Ես կարծեցի, թե դու ատեցիր նրան և նրան կնության տվեցի քո ընկերոջը։ Չէ՞ որ նրա կրտսեր քույրը նրանից գեղեցիկ է, թող սա քեզ կին լինի նրա փոխարեն»։ ³ Սամփսոնն ասաց. «Ես միանգամայն անմեղ կլինեմ այլազգիներիդ առաջ, եթե նրանց դեմ չարություն անեմ»։ ⁴ Եվ Սամփսոնը գնաց, երեք հարյուր աղվես բռնեց, ջահեր վերցրեց և աղվեսներին կապեց միմյանց՝ պոչ պոչի, ջահերը դրեց երկու պոչերի մեջտեղը և կապեց։ ⁵ Նա ջահերը վառեց կրակով և արձակեց այլազգիների հնձի մեջ, այրեց ցորենի շեղջերը, հնձված դեզերն ու չհնձված ցորենը, մինչև անգամ այգիներն ու ձիթենիները։ ⁶ Այլազգիներն ասացին. «Ո՞վ արեց այս բանը»։ Եվ ասացին. «Թամնացու փեսա Սամփսոնը, որովհետև կնոջ հայրը նրա կնոջն առավ և նրա ընկերոջը կնության տվեց»։ Այլազգիները վեր կացան, կրակով այրեցին նրա կնոջ հոր տունը, կնոջը և կնոջ հորը։ ⁷ Սամփսոնը նրանց ասաց. «Եթե մի այդքան էլ անեք, դարձյալ չեմ հաշտվի, այլ ձեր ամեն մեկից իմ վրեժը պիտի լուծեմ»։ ⁸ Մեծամեծ հարվածներով զարկեց նրանց սրունքներին ու մեջքին և իջավ բնակվեց Ետեմի հեղեղատի մոտ՝ մի քարայրում։

Սամփսոնը հաղթում է այլազգիներին

⁹ Այլազգիները վեր կացան, բանակեցին Հուդայում և տարածվեցին մինչև Եղքի։ ¹⁰ Հուդայի մարդիկ նրանց ասացին. «Ինչո՞ւ եք եկել մեզ վրա»։ Այլազգիներն ասացին. «Եկել ենք Սամփսոնին կապելու, որ նրա հետ վարվենք այնպես, ինչպես նա վարվեց մեզ հետ»։ ¹¹ Հուդայից երեք հազար մարդ իջան Ետեմի քարայրն ու ասացին Սամփսոնին. «Չգիտե՞ս, որ այլազգիներն իշխում են մեզ վրա, ինչո՞ւ արեցիր այդ բանը մեզ հետ»։ Սամփսոնը նրանց ասաց. «Ինչպես որ նրանք վարվեցին ինձ հետ, այդպես էլ ես վարվեցի նրանց հետ»։ ¹² Նրան ասացին. «Եկել ենք քեզ կապելու և այլազգիների ձեռքը մատնելու»։ Սամփսոնը նրանց ասաց. «Երդվե՛ք, որ չեք սպանի ինձ, տվե՛ք ինձ նրանց ձեռքը, և դուք երբեք մի՛ հանդիպեք ինձ»։ ¹³ Նրանք երդվեցին նրան և ասացին. «Ո՛չ, քեզ չենք սպանի, քեզ միայն կկապենք և կտանք նրանց ձեռքը»։ Եվ նրան կապեցին երեք նոր պարաններով ու դուրս հանեցին քարայրից։ ¹⁴ Եվ եկան մինչև Ծնոտ. այլազգիներն աղաղակեցին և ընթացան նրա դեմ։ Տիրոջ հոգին աջակից եղավ Սամփսոնին, նրա բազուկների վրայի պարանները դարձան կրակից այրված թելի նման, և կապանքները հալվեցին նրա բազուկներից։ ¹⁵ Նա էշի մի ծնոտ գտավ, երկարեց իր ձեռքը, վերցրեց այն և դրանով հազար մարդ սպանեց։ ¹⁶ Սամփսոնն ասաց. «Էշի ծնոտով կբնաջնջեմ նրանց, որովհետև էշի ծնոտով հազար մարդու կոտորեցի»։ ¹⁷ Եվ երբ իր խոսքը վերջացրեց, ծնոտը ձեռքից գցեց և այդ տեղն անվանեց Ծնոտի կոտորած։

¹⁸ Երբ խիստ ծարավեց, աղաղակեց Տիրոջն ու ասաց. «Դու քո ծառայի ձեռքով հաջողեցրիր այս մեծ փրկությունը, իսկ հիմա ծարավի՞ց պիտի մեռնեմ և անթլփատների ձե՞ռքն ընկնեմ»։ ¹⁹ Տերը Ծնոտում մի անցք բացեց, նրանից ջուր ելավ, նա խմեց, իր հոգին իրեն դարձավ, և զովացավ. այդ պատճառով դրա անունը դրեց «Ծնոտի աղբյուր», որը գոյություն ունի մինչև այսօր։ ²⁰ Սամփսոնը այլազգիների իշխանության օրոք քսան տարի դատեց Իսրայելին։

16

Սամփսոնը և Գազայի դարպասները

¹ Սամփսոնն այնտեղից գնաց Գազա, այնտեղ մի պոռնիկ կին տեսավ և մտավ նրա մոտ։ ² Լուրը հասավ գազացիներին, և նրանք ասացին. «Սամփսոնը եկել է այստեղ»։ Շրջապատեցին, ամբողջ գիշերը քաղաքի դարպասի մոտ դարանակալեցին նրան և ամբողջ գիշերը լուռ մնացին ու ասացին. «Այստեղ մնանք մինչև առավոտ և սպանենք նրան»։ ³ Սամփսոնը քնեց մինչև կեսգիշեր. կեսգիշերին վեր կացավ, պոկեց քաղաքի դարպասների փեղկերը և դրանք նիգերով մեկտեղ բարձրացրեց, դրեց իր ուսերի վրա, տարավ այն լեռան գլուխը, որը Քեբրոնի դիմացն է, և դրանք դրեց այնտեղ։

Սամփսոն և Դալիլա

⁴ Դրանից հետո նա սիրեց մի կնոջ, որ ապրում էր Ովրեկ հեղեղատի եզերքին. նրա անունը Դալիլա էր։ ⁵ Այդ կնոջ մոտ եկան այլազգիների նախարարները և ասացին. «Խաբի՛ր նրան և տե՛ս, թե ինչո՛ւմ է նրա մեծ զորությունը, և կամ ինչպե՛ս կարող ենք հնար գտնել ու կապել նրան, որ տկարացնենք նրան։ Իսկ մենք ամեն մեկս քեզ հազար հարյուր արծաթ կտանք»։ ⁶ Դալիլան ասաց Սամփսոնին. «Ասա՛ ինձ, թե ինչո՛ւմ է քո մեծ զորությունը, և քեզ տկարացնելու համար ինչո՛վ պետք է կապել քեզ»։ ⁷ Սամփսոնը նրան ասաց. «Եթե ինձ կապեն յոթ դալար ճյուղերով, կտկարանամ և կդառնամ սովորական մարդկանց նման»։ ⁸ Այլազգիների նախարարները յոթ դալար ճյուղեր բերեցին, և նա դրանցով կապեց նրան ⁹ ու շտեմարանում դարանակալ նստեց։ Կինը նրան ասաց. «Այլազգիները հարձակվել են քեզ վրա, Սամփսո՛ն»։ Նա ճյուղերը կտրտեց այնպես, ինչպես կկտրտվի կրակից այրված բարակ թելը թափ տալուց։ Եվ այդպես նրա զորության պատճառը չիմացվեց։ ¹⁰ Դալիլան ասաց Սամփսոնին. «Ահա խաբեցիր ինձ և սուտ խոսեցիր, գոնե հիմա ասա՛, թե ինչո՛վ կկապվես»։ ¹¹ Նա ասաց նրան. «Եթե ինձ կապեն յոթ նոր չվաններով, որոնք գործածված չլինեն, կտկարանամ և կլինեմ սովորական մարդկանց նման»։ ¹² Դալիլան վերցրեց նոր չվաններ, դրանցով կապեց նրան և ասաց. «Այլազգիները հարձակվել են քեզ վրա, Սամփսո՛ն»։ Դալիլան շտեմարանում դարանակալ նստել էր։ Իսկ Սամփսոնը ասեղի թելի նման կտրտեց և այն թափեց իր բազուկներից։ ¹³ Դալիլան ասաց Սամփսոնին. «Մինչև ե՞րբ պիտի խաբես ինձ և սուտ ասես ինձ։ Հիմա ասա՛ ինձ, թե ինչո՛վ կկապվես»։ Նա ասաց նրան. «Եթե իմ գլխի յոթ գիսակները հյուսես շղթայաձև հյուսքերով և ցցերով ամրացնես պատին, կտկարանամ սովորական մարդկանց նման»։ ¹⁴ Դալիլան քնեցրեց նրան, առավ նրա գլխի յոթ գիսակները շղթայաձև հյուսքերով, ցցերով ամրացրեց պատին և ասաց նրան. «Այլազգիները հարձակվել են քեզ վրա, Սամփսո՛ն»։ Նա զարթնեց քնից, պատից պոկեց ցցերը՝ ոստայնի և հյուսքերի հետ միասին, և չիմացվեց նրա զորության պատճառը։ ¹⁵ Դալիլան նրան ասաց. «Ինչպե՞ս ես ասում, թե քեզ սիրում եմ, մինչ քո սիրտը շիտակ չէ ինձ հետ. այս երեք անգամ խաբեցիր ինձ և չասացիր, թե ինչո՛ւմ է քո մեծ զորությունը»։ ¹⁶ Եվ երբ ամբողջ գիշերը նրան նեղեց խոսքերով, թախանձեց և հոգին հանեց սպանելու չափ, ¹⁷ նա ամեն ինչ սրտանց պատմեց նրան և ասաց նրան. «Ածելի չպիտի դիպչի իմ գլխին, որովհետև Աստծու ուխտավոր եմ ես իմ մոր արգանդից, իսկ եթե մազերս կտրեմ, իմ զորությունը կգնա ինձնից, ես կտկարանամ և կդառնամ բոլոր մարդկանց պես»։ ¹⁸ Երբ Դալիլան տեսավ, որ նա ամեն ինչ սրտանց պատմեց իրեն, մարդ ուղարկեց, կանչեց այլազգիների նախարարներին և ասաց. «Բոլորդ եկե՛ք, որովհետև ամեն ինչ սրտանց պատմեց ինձ»։ Այլազգիների բոլոր նախարարները եկան նրա մոտ և բերեցին արծաթը՝ իրենց ձեռքերին։ ¹⁹ Դալիլան քնեցրեց նրան իր ծնկների մեջ, վարսավիր կանչեց, որը կտրեց նրա գլխի յոթ գիսակները։ Նա սկսեց թոշնել, և նրանից գնաց նրա զորությունը։ ²⁰ Դալիլան ասաց. «Այլազգիները հարձակվել են քեզ վրա, Սամփսո՛ն»։ Նա զարթնեց քնից և ասաց. «Վեր կենամ և անեմ այնպես, ինչպես միշտ, և թափ տամ»։ Նա չգիտեր, որ Տերը հեռացել էր իրենից։ ²¹ Այլազգիները նրան բռնեցին, հանեցին նրա աչքերը, նրան իջեցրին Գազա, կապեցին երկաթե կապանքներով, և նա բանտում աղորիք էր պտտեցնում։

Սամփսոնի մահը

²² Նրա գլխի մազերը կտրելուց հետո սկսեցին աճել։ ²³ Այլազգիների նախարարները հավաքվեցին, որ մեծ զոհ մատուցեն իրենց աստծուն՝ Դագովնին, և ուրախանան։ Նրանք ասացին. «Մեր աստվածը մեր թշնամի Սամփսոնին մեր ձեռքը մատնեց»։ ²⁴ Ապա օրհնում էին իրենց աստվածներին՝ ասելով.

«Մեր աստվածը մեր ձեռքն է մատնել

մեր թշնամուն՝ Սամփսոնին,

նրան, ով ավերեց մեր երկիրը,

ով շատացրեց մեր վիրավորներին»։

²⁵ Երբ նրանց սրտերը զվարթացան, ասացին. «Բերե՛ք Սամփսոնին բանտից, թող մեր առաջ պար գա»։ Սամփսոնին բանտից բերեցին և ձեռ էին առնում նրան։ Նրան կանգնեցրին երկու սյուների մեջտեղում։ ²⁶ Սամփսոնն ասաց իր ձեռքից բռնած պատանուն. «Թո՛ւյլ տուր ինձ շոշափեմ սյուները, որոնց վրա հաստատված է այս տունը, և հենվեմ նրանց»։ ²⁷ Տունը լի էր տղամարդկանցով և կանանցով, այնտեղ էին այլազգիների բոլոր նախարարները, տանիքի վրա կային մոտ երեք հազար կանայք և տղամարդիկ, որոնք դիտում էին, թե ինչպե՛ս են ծաղրում Սամփսոնին։ ²⁸ Սամփսոնն աղաղակեց Տիրոջը և ասաց. «Տե՛ր, զորությունների՛ Տեր, հիշի՛ր ինձ և զորացրո՛ւ ինձ այս մի անգամ էլ, Աստվա՛ծ, որ իմ երկու աչքերի համար վրեժս լուծեմ այս այլազգիներից»։ ²⁹ Եվ Սամփսոնը բռնեց կենտրոնական երկու սյուներից, որոնց վրա հաստատված էր տունը, և հենվեց նրանց՝ մեկին աջ ձեռքով, մյուսին՝ ձախ՝ ³⁰ ասելով. «Թող ես մեռնեմ այս այլազգիների հետ»։ Եվ ուժեղ շարժեց։ Տունը փուլ եկավ բոլոր նախարարների և նրա մեջ եղած ամբողջ ժողովրդի վրա։ Եվ մեռածները, որոնց Սամփսոնն սպանեց իր մահվան պահին, ավելի էին, քան նրանք, որոնց սպանել էր իր կենդանության ժամանակ։ ³¹ Նրա եղբայրներն ու նրա հոր ամբողջ տունն իջան, հանեցին նրան և թաղեցին իր հոր՝ Մանովեի գերեզմանում՝ Սարաայի և Եսթավուղի միջև։ Նա Իսրայելի դատավոր եղավ քսան տարի։

17

Միքան և նրա սեփական պաշտամունքի վայրը

¹ Եփրեմի լեռնից Միքա անունով մի մարդ կար։ ² Նա իր մորն ասաց. «Այն հազար հարյուր արծաթը, որ գողացել էին, և որի համար անիծեցիր գողերին, ահա այն արծաթն ինձ մոտ է, ես եմ վերցրել այն»։ Նրա մայրն ասաց. «Որդյա՛կ իմ, օրհնյալ լինես Տիրոջից»։ ³ Եվ նա իր մորը վերադարձրեց հազար հարյուր արծաթը։ Նրա մայրն ասաց. «Այն արծաթը ես իմ ձեռքով նվիրել եմ Տիրոջը՝ առանձին ձուլածո կուռք շինելու համար։ Հիմա այն քեզ եմ վերադարձնում»։ ⁴ Իսկ Միքան այդ արծաթը մորը վերադարձրեց։ Մայրն առավ երկու հարյուր արծաթ, այն տվեց ձուլողին, նա էլ ձուլածո կուռք շինեց դրանից, որը տեղադրեցին Միքայի տանը։ ⁵ Այդպիսով Միքան իր տանը կռարան ունեցավ։ Նա եփուդ ու թերափ[36] պատրաստեց. նվիրագործեց իր որդիներից մեկին, որը նրա համար քահանա եղավ։ ⁶ Այդ օրերին Իսրայելում թագավոր չկար, և ամեն մարդ անում էր այն, ինչ հաճելի էր իր աչքին։

⁷ Հուդայի ազգատոհմից՝ Հուդայի Բեթղեհեմ քաղաքից, մի պատանի կար, որ ղևտացի էր և այնտեղ էր բնակվում։ ⁸ Այս մարդը Հուդայի Բեթղեհեմ քաղաքից գնաց պանդխտելու որևէ տեղ, ուր որ պատահի։ Նա ճանապարհորդելով եկավ մինչև Եփրեմի լեռը և մինչև Միքայի տունը։ ⁹ Միքան նրան ասաց. «Որտեղի՞ց ես գալիս»։ Նա ասաց. «Ես ղևտացի եմ, Հուդայի Բեթղեհեմ քաղաքից, գնում եմ պանդխտելու որևէ տեղ, ուր որ պատահի»։ ¹⁰ Միքան նրան ասաց. «Մնա՛ ինձ մոտ, ինձ համար հայր և քահանա՛ եղիր, և ես քեզ ամեն օր [*  տարի] տասը արծաթ, մի զույգ զգեստ և ռոճիկ կտամ, որով կապրես»։ ¹¹ Ղևտացին ապաստանեց այդ մարդու մոտ։ Այս պատանին նրա համար եղավ ինչպես իր որդիներից մեկը։ ¹² Միքան ղևտացուն նվիրագործեց, և պատանին նրա համար քահանա եղավ և ապրում էր Միքայի տանը։ ¹³ Միքան ասաց. «Հիմա գիտեմ, որ Տերն ինձ բարիք արեց, քանի որ ղևտացին ինձ համար քահանա եղավ»։ Այն օրերին Իսրայելում թագավոր չկար։

18

Միքան և Դանի ցեղը

¹ Այն օրերին Դանի ցեղն իր համար բնակվելու ժառանգություն էր փնտրում, որովհետև մինչև այդ օրերն Իսրայելի ցեղերի մեջ նրան ժառանգություն չէր հասել։ ² Դանի որդիներն իրենց տոհմերից հինգ մարդ ուղարկեցին, իրենց տոհմերի թվի համեմատ, զորավոր մարդիկ Սարաայից և Եսթավուղից, որ գնան հետախուզեն և հետազոտեն երկիրը։ Նրանց ասացին. «Գնացե՛ք, զննե՛ք այն երկիրը»։ Նրանք գնացին Եփրեմի լեռը, մինչև Միքայի տունը և իջևանեցին այնտեղ։ ³ Եվ մինչ նրանք Միքայի տանն էին, ճանաչեցին ղևտացի պատանու ձայնը, մտան նրա մոտ և ասացին նրան. «Քեզ ո՞վ բերեց այստեղ, ի՞նչ ես անում և ի՞նչ գործ ունես այստեղ»։ ⁴ Նա ասաց նրանց. «Միքան ինձ համար այս ու այս արեց, ինձ վարձակալեց, և ես նրա համար քահանա եղա»։ ⁵ Նրան ասացին. «Հապա հարցրո՛ւ Աստծուն, որ իմանանք, թե հաջո՞ղ կլինի մեր գնացած ճանապարհը»։ ⁶ Քահանան նրանց ասաց. «Գնացե՛ք խաղաղությամբ, Տիրոջ առաջն է ձեր գնացած ճանապարհը»։ ⁷ Այդ հինգ մարդիկ գնացին Լայիսա, տեսան այնտեղ եղած մարդկանց, որոնք սիդովնացիների նման անհոգ ու հանգիստ ապրում էին։ Այդ երկրում որևէ մեկը չէր իշխում մյուսին, խոսքով չէր վիրավորում մյուսին, չէր ճնշում մյուսին գանձ դիզելու համար, որովհետև Սիդովնից հեռու էին և ասորեստանցիների հետ գործ չունեին։ ⁸ Այդ հինգ մարդիկ վերադարձան Սարաա և Եսթավուղ՝ իրենց եղբայրների մոտ։ Նրանց եղբայրներն ասացին նրանց. «Ի՞նչ ունեք մեզ ասելու»։ ⁹ Նրանք ասացին. «Վե՛ր կացեք գնանք նրանց վրա, որովհետև մենք մտանք, շրջեցինք այն երկրում մինչև Լայիսա և տեսանք, որ ժողովուրդն այնտեղ բնակվում է անհոգ՝ սիդովնացիների նման. նրանք հեռու են Սիդովնից և ոչ մի գործ չունեն ասորեստանցիների հետ։ Վե՛ր կացեք գնանք նրանց վրա, որովհետև տեսանք այն երկիրը, որ շատ լավն է. իսկ դուք հանգիստ նստե՞լ եք։ Հիմա ինչո՞ւ եք հապաղում գնալ մտնելու և այն երկիրը ժառանգելու։ ¹⁰ Երբ որ գնաք, կտիրեք մի անհոգ ժողովրդի և ընդարձակ երկրի, որովհետև Աստված այն մատնել է մեր ձեռքը։ Դա մի այնպիսի տեղ է, որտեղ երկրի վրա եղած ոչ մի բանի պակասություն չկա»։

¹¹ Եվ այնտեղից՝ Սարաայից և Եսթավուղից, Դանի ազգատոհմից վեց հարյուր մարդիկ գնացին՝ զինված պատերազմական զենքերով։ ¹² Նրանք բանակեցին Հուդայի Կարիաթ-Յարիմ վայրում. այդ պատճառով այն տեղը մինչև այսօր կոչվում է Դանի բանակատեղի, որ Կարիաթ-Յարիմի հետևի կողմում է։ ¹³ Այնտեղից անցան, եկան մինչև Եփրեմի լեռը և հասան մինչև Միքայի տունը։ ¹⁴ Այդ հինգ մարդիկ, որ գնացել էին հետախուզելու Լայիսա երկիրը, ասացին իրենց եղբայրներին. «Գիտե՞ք, որ այս տանը եփուդ, թերափ և մի քանդակած ու ձուլածո կուռք կա։ Հիմա տեսե՛ք, թե ի՛նչ պիտի անեք»։ ¹⁵ Եվ նրանք շրջվեցին դեպի այդ տունը, մտան ղևտացի պատանու մոտ, որը Միքայի տանն էր, և նրա ողջությունը հարցրին։ ¹⁶ Իսկ Դանի որդիներից պատերազմական զենքով զինված այն վեց հարյուր մարդիկ անշարժ կանգնեցին դռան մուտքի մոտ։ ¹⁷ Իսկ այն հինգ մարդիկ, որոնք գնացել էին երկիրը հետախուզելու, առաջացան, վերցրին քանդակածը, եփուդը, թերափը և ձուլածոն։ Քահանան արձանացած կանգնել էր դռան մուտքին, և վեց հարյուր մարդիկ՝ պատերազմական զենքերով զինված։ ¹⁸ Երբ նրանք Միքայի տունը մտան և վերցրին քանդակածը, եփուդը, թերափը և ձուլածոն, քահանան նրանց ասաց. «Ի՞նչ եք անում»։ ¹⁹ Նրանք ասացին նրան. «Լռի՛ր, ձեռքդ բերանի՛դ դիր, ե՛կ մեզ հետ և մեզ համար հայր ու քահանա՛ եղիր. քեզ համար ավելի լավ է միայն մե՞կ մարդու տան քահանա լինել, թե՞ Իսրայելի մի ողջ ցեղի»։ ²⁰ Քահանայի սիրտը զվարթացավ, նա վերցրեց եփուդը, թերափը, քանդակված ու ձուլածո կուռքը և մտավ զորքի մեջ։ ²¹ Նրանք հետ դարձան և գնացին՝ իրենց առջևից կարգելով իրենց երեխաներին և ողջ ունեցվածքը։ ²² Երբ նրանք հեռացան Միքայի տնից, Միքան և նրա տանը եղած մարդիկ ելան Դանի որդիների հետևից գոռում-գոչյունով։ ²³ Դանի որդիները շուռ եկան և ասացին Միքային. «Ի՞նչ է եղել քեզ, ինչո՞ւ ես աղաղակում»։ ²⁴ Միքան ասաց. «Ինձ համար շինած իմ աստվածները և իմ քահանային առաք ու գնացիք, էլ ի՞նչ մնաց ինձ, և ինչո՞ւ եք ասում ինձ, թե՝ “Ինչու ես աղաղակում”»։ ²⁵ Դանի որդիներն ասացին նրան. «Քո ձայնը թող չլսվի մեր հետևից, թե չէ քեզ բարկացած սրտով մարդիկ կհանդիպեն և կկործանեն քեզ ու քո ընտանիքը»։ ²⁶ Եվ Դանի որդիները գնացին իրենց ճանապարհով։ Միքան տեսնելով, որ նրանք իրենից զորավոր են, վերադարձավ իր տունը։

²⁷ Իսկ նրանք վերցրին Միքայի շինածները, նրա քահանային և գնացին Լայիսա՝ հանգիստ և վստահ ու անհոգ ժողովրդի վրա, նրանց սրի քաշեցին և քաղաքն այրեցին։ ²⁸ Ոչ ոք չկար, որ փրկեր նրանց, որովհետև Սիդովնից հեռու էին և ոչ մի գործ չունեին որևէ մարդու հետ։ Այդ քաղաքը Ռովբի հովտի մեջ էր։ Քաղաքը շինեցին և այնտեղ բնակվեցին։ ²⁹ Քաղաքի անունն Իսրայելի որդու՝ իրենց հոր անունով Դան կոչեցին. իսկ նախապես քաղաքի անունը Լայիսա էր։ ³⁰ Դանի որդիներն իրենց համար կանգնեցրին Միքայի քանդակած կուռքը, իսկ Մանասեի որդի Գերսոնի որդի Հովնաթանը՝ ինքը և իր որդիները մինչև երկրի գերության օրը Դանի ցեղի քուրմերն էին։ ³¹ Նրանք Միքայի շինած կուռքն իրենց համար պահեցին այնքան ժամանակ, որքան որ Աստծու տունը Սելովում էր։

19

Ղևտացին և իր հարճը

¹ Այն օրերին, երբ Իսրայելում թագավոր չկար, Եփրեմի լեռան կողմերում մի ղևտացի պանդուխտ մարդ կար. այդ մարդը Հուդայի Բեթղեհեմ քաղաքից մի կնոջ իրեն հարճ առավ։ ² Հարճը նրանից խորշեց և գնաց իր հոր տունը՝ Հուդայի Բեթղեհեմ քաղաքը, և այնտեղ մնաց երեք ամիս։ ³ Մարդը վեր կացավ գնաց նրա հետևից, որ քաղցրությամբ խոսի, հաշտեցնի նրան իր հետ և նորից հետ բերի իր մոտ։ Նրա հետ էին իր ծառան և մի զույգ էշ։ Գնացին մինչև նրա հոր տունը։ Երբ աղջկա հայրը նրան տեսավ, նրան ընդառաջ ելավ։ ⁴ Նրա աները՝ աղջկա հայրը, ներս տարավ նրան, և նա նրա մոտ մնաց երեք օր։ Կերան, խմեցին և գիշերեցին այնտեղ։

⁵ Չորրորդ օրը, երբ առավոտը կանուխ վեր կացան, նրանք ոտքի ելան, որ գնան։ Աղջկա հայրն ասաց իր փեսային. «Սիրտդ պնդացրո՛ւ մի կտոր հացով, հետո կգնաք»։ ⁶ Նստեցին, կերան և խմեցին երկուսով։ Աղջկա հայրն ասաց իր փեսային. «Այս գիշեր էլ այստեղ մնա՛, և թող սիրտդ զվարթանա»։ ⁷ Մարդը վեր կացավ, որ գնա, բայց նրա աները ստիպեց նրան, և նա մնաց ու գիշերեց այնտեղ։ ⁸ Հինգերորդ օրը կանուխ վեր կացավ, որ գնա. աղջկա հայրն ասաց. «Սիրտդ պնդացրո՛ւ հացով և զբոսնի՛ր, մինչև օրը վերջանա»։ Եվ կերան ու խմեցին երկուսով։ ⁹ Մարդը վեր կացավ, որ իր հարճի և ծառայի հետ գնա։ Բայց աղջկա հայրն ասաց նրան. «Ահա օրը երեկո դարձավ, այստե՛ղ գիշերիր, թող սիրտդ զվարթանա, վաղը կանուխ ճանապարհ կընկնես և կգնաս քո տունը»։ ¹⁰ Բայց մարդը չկամեցավ այնտեղ գիշերել, վեր կացավ ու գնաց։ Եկավ հասավ մինչև Հեբուսի դիմաց (որ Երուսաղեմն է). նրա հետ էին մի զույգ համետած էշ և իր հարճը։

¹¹ Երբ նրանք Հեբուսի դիմացն էին, օրը տարաժամել էր։ Ծառան իր տիրոջն ասաց. «Ե՛կ թեքվենք դեպի հեբուսացիների քաղաքը և այնտեղ գիշերենք»։ ¹² Տերը նրան ասաց. «Ճանապարհը չշեղենք դեպի օտարազգիների քաղաքը, որտեղ Իսրայելի որդիներ չկան, այլ անցնենք մինչև Գաբաա»։ ¹³ Եվ իր ծառային ասաց. «Ե՛կ մոտենանք այդ տեղերից մեկին և գիշերենք այնտեղ՝ Գաբաայում կամ Հռամայում»։ Եվ անցան գնացին։ ¹⁴ Երբ մոտեցան Գաբաային, որ Բենիամինի երկրում է, արեգակը մայր մտավ։ ¹⁵ Ճանապարհը շեղեցին, որ մտնեն Գաբաա և գիշերեն այնտեղ։ Նա մտավ ու նստեց քաղաքի հրապարակում, բայց ոչ մի մարդ չկար, որ նրանց իր տունն առներ գիշերելու համար։ ¹⁶ Եվ ահա երեկոյան հանդից իր գործից մի ծեր մարդ էր գալիս։ Այդ մարդը Եփրեմի լեռից էր և պանդուխտ էր Գաբաայում, իսկ այնտեղի մարդիկ Բենիամինի որդիներ էին։ ¹⁷ Բարձրացնելով իր աչքերը՝ քաղաքի հրապարակում նա տեսավ ուղևոր մարդուն։ Ծեր մարդն ասաց. «Ո՞ւր ես գնում և որտեղի՞ց ես գալիս»։ ¹⁸ Նա ասաց նրան. «Մենք Հուդայի Բեթղեհեմ քաղաքից գնում ենք մինչև Եփրեմի լեռան կողմերը, որովհետև ես այնտեղացի եմ։ Ես գնացել էի մինչև Հուդայի Բեթղեհեմ քաղաքը, իսկ հիմա իմ հոր տունն եմ գնում, և չկա մի մարդ, որ մեզ իր տանն ընդունի։ ¹⁹ Մեր էշերի համար հարդ և խոտ, իսկ ինձ և այս աղջկա ու ծառայի համար հաց և գինի կա. քո ծառաները ոչ մի բանի պակասություն չեն ունենա»։ ²⁰ Ծեր մարդն ասաց. «Խաղաղությո՜ւն քեզ, քո ամեն պակասությունն ինձ վրա լինի, բայց դու այդ հրապարակում մի՛ գիշերիր»։ ²¹ Եվ նրան տարավ իր տունը, էշերին խոտ տվեց, նրանք լվացին իրենց ոտքերը, կերան և խմեցին։

²² Երբ նրանց սրտերը զվարթանում էին, քաղաքի բնակիչները՝ անօրեն մարդիկ, շրջապատեցին տունը, բախեցին դրսի դուռը և խոսելով այդ ծեր մարդու՝ տան տիրոջ հետ, ասացին. «Հանի՛ր քո տունը մտած այդ մարդուն, որ նրա հետ կենակցենք»։ ²³ Այն մարդը՝ տան տերը, գնաց նրանց մոտ և ասաց. «Ո՛չ, եղբայրնե՛ր, անզգամություն մի՛ արեք, այդ մարդու՝ իմ տունը մտնելուց հետո այդ անզգամությունը մի՛ արեք։ ²⁴ Ահա իմ կույս աղջիկը և այդ մարդու հարճը. նրանց դուրս հանեմ, լլկե՛ք նրանց, արե՛ք նրանց հետ այն, ինչ հաճելի է ձեզ, բայց այս մարդու հետ այդ անզգամությունը մի՛ արեք»։ ²⁵ Բայց մարդիկ չուզեցին լսել։ Այդ ժամանակ մարդն առավ իր հարճին ու դուրս հանեց։ Նրանք կենակցեցին նրա հետ և լլկեցին նրան ամբողջ գիշերը մինչև առավոտ և առավոտը բացվելիս բաց թողեցին նրան։ ²⁶ Առավոտյան կինը եկավ, ընկավ այն մարդու տան դռան շեմին, որտեղ իր տերն էր, և հոգին փչեց։ ²⁷ Առավոտյան նրա տերը վեր կացավ, բացեց տան դուռը, դուրս եկավ, որ գնա իր ճանապարհը և տեսավ, որ իր հարճն ընկած էր դռան մոտ՝ ձեռքերը շեմի վրա։ ²⁸ Եվ նրան ասաց. «Վե՛ր կաց գնանք»։ Նա պատասխան չտվեց, որովհետև մեռած էր։ Մարդը նրան վերցրեց դրեց էշի վրա, վեր կացավ և գնաց իր տեղը։ ²⁹ Երբ մտավ իր տունը, վերցրեց սուրը, բռնեց իր հարճին, ոսկորները կտրատելով՝ բաժանեց տասներկու մասի և դրանք ուղարկեց Իսրայելի բոլոր ցեղերին։ ³⁰ Բոլոր տեսնողներն ասում էին, թե այդպիսի բան ո՛չ եղել է և ո՛չ էլ տեսնվել Եգիպտոսից Իսրայելի որդիների դուրս գալու օրերից մինչև այսօր։ Հիմա դրա մասին խորհո՛ւրդ արեք և խոսե՛ք։

20

Իսրայելը պատրաստվում է պատերազմի

¹ Իսրայելի բոլոր որդիները ելան, և ժողովուրդը՝ Դանից մինչև Բերսաբեե և մինչև Գաղաադի երկիրը, մեկ մարդու պես հավաքվեց Տիրոջ առաջ՝ Մասեփայում։ ² Ամբողջ ժողովրդի իշխանները և Իսրայելի բոլոր ցեղերը՝ չորս հարյուր հազար սուսերակիր, ներկայացան Աստծու ժողովրդի հավաքին։ ³ Բենիամինի որդիները լսեցին, որ Իսրայելի որդիները եկել են Մասեփա։ Իսրայելի որդիներն ասացին. «Ասե՛ք, թե որտե՞ղ կատարվեց այս չարագործությունը»։ ⁴ Ղևտացի մարդը՝ սպանված կնոջ ամուսինը, պատասխան տվեց և ասաց. «Ես և իմ հարճը եկանք Բենիամինի երկրի Գաբաա վայրը, որ գիշերենք։ ⁵ Գաբաայի տղամարդիկ ելան իմ դեմ, գիշերով շրջապատեցին տունը և ուզում էին ինձ սպանել։ Իմ հարճին լլկեցին, խեղդեցին, և նա մեռավ։ ⁶ Ես էլ առա իմ հարճին, կտրատեցի նրան և ուղարկեցի Իսրայելի ժառանգության բոլոր սահմանները, որովհետև նրանք մեծ հանցանք և անզգամություն արեցին Իսրայելի մեջ։ ⁷ Ահա մենք ամենքս Իսրայելի որդիներ ենք, մեզ խո՛սք ասեք ու խորհո՛ւրդ տվեք»։ ⁸ Ամբողջ ժողովուրդը վեր կացավ մեկ մարդու նման և ասաց. «Մեզնից ոչ մի մարդ իր հարկի տակ չի մտնելու, և ոչ մի մարդ ճանապարհը չի թեքելու դեպի իր տուն։ ⁹ Ահա թե ինչ պիտի անենք Գաբաային. նրա վրա պիտի գնանք վիճակահանությամբ ընտրված մարդկանցով։ ¹⁰ Իսրայելի բոլոր ցեղերից վերցնենք հարյուրից տասը, հազարից հարյուր, տասը հազարից հազար մարդ, թող պաշար վերցնեն և կգնան Բենիամինի երկրի Գաբաայի դեմ, որ պատժեն նրան Իսրայելի մեջ նրա արած ամբողջ անզգամության համար»։ ¹¹ Եվ բոլոր իսրայելացիները մեկ մարդու նման քաղաքներից հավաքվեցին եկան։

¹² Իսրայելի ցեղերը Բենիամինի ցեղի մոտ մարդիկ ուղարկեցին և ասացին. «Այդ ի՞նչ չարագործություն է, որ եղավ ձեր մեջ։ ¹³ Հիմա տվե՛ք Գաբաայի այդ ամբարիշտ մարդկանց՝ Բելիարի որդիներին, որ սպանենք նրանց և չարիքը վերացնենք Իսրայելից»։ Բայց Բենիամինի որդիները չկամեցան լսել իրենց եղբայրների՝ Իսրայելի որդիների ձայնը։ ¹⁴ Եվ Բենիամինի որդիներն իրենց քաղաքներից հավաքվեցին Գաբաայի մեջ, որ Իսրայելի որդիների դեմ պատերազմի դուրս գան։ ¹⁵ Այն օրն իրենց քաղաքներից եկած Բենիամինի որդիները քսանհինգ հազար սուսերակիր էին, չհաշված Գաբաայի բնակիչներին, որոնք յոթ հարյուր մարդ էին՝ ընտիր երիտասարդներ ամբողջ ժողովրդից՝ ¹⁶ երկու ձեռքով էլ գործելու ընդունակ։ Նրանք բոլորն էլ պարսատիկավորներ էին, որ քարեր էին նետում և մազաչափ չէին վրիպում։ ¹⁷ Իսկ Իսրայելի որդիները, բացի Բենիամինի ցեղի որդիներից, չորս հարյուր հազար սուսերակիրներ էին, բոլորն էլ պատերազմող մարդիկ։

Պատերազմ Բենիամինի դեմ

¹⁸ Վեր կացան ելան Բեթել, և Իսրայելի որդիները հարցրին Աստծուն ու ասացին. «Բենիամինի որդիների հետ պատերազմելու համար ո՞վ պիտի լինի մեր առաջնորդը»։ Տերն ասաց. «Հուդան թող լինի առաջնորդը»։ ¹⁹ Եվ Իսրայելի որդիներն առավոտյան վեր կացան, բանակեցին Գաբաայի մոտ։ ²⁰ Իսրայելի մարդիկ ելան Բենիամինի դեմ պատերազմելու և Գաբաայի մոտ նրանց դեմ պատերազմելու համար ճակատ կազմեցին։ ²¹ Բենիամինի որդիները դուրս եկան քաղաքից, և այն օրը Իսրայելից քսաներկու հազար մարդ սպանեցին և գետնին փռեցին։ ²² Բայց Իսրայելի մարդիկ դարձյալ զորացան և նորից ճակատ կազմեցին՝ պատերազմելու համար այն տեղում, որտեղ ճակատել էին առաջին օրը։ ²³ Իսրայելի որդիները վեր կացան և մինչև երեկո լաց եղան Տիրոջ առաջ և Տիրոջը հարցրին ու ասացին. «Շարունակե՞նք պատերազմել մեր եղբոր՝ Բենիամինի դեմ»։ Տերն ասաց. «Դո՛ւրս եկեք նրանց վրա»։ ²⁴ Երկրորդ օրն Իսրայելի որդիները պատերազմի ելան Բենիամինի որդիների դեմ։ ²⁵ Բենիամինն էլ երկրորդ օրը ելավ նրանց դեմ պատերազմելու և ժողովրդից նորից ութ հազար մարդ սպանեց և գետնին փռեց։ Նրանք բոլորն էլ սուսերակիրներ էին։

²⁶ Իսրայելի բոլոր որդիները, ամբողջ ժողովուրդը վեր կացան-եկան Բեթել, նստեցին, լաց եղան Տիրոջ առաջ, ծոմ պահեցին այդ օրը և փրկության ողջակեզներ մատուցեցին Տիրոջ առաջ։ ²⁷ Որովհետև այդ օրերին այնտեղ էր Տիրոջ՝ Աստծու Ուխտի տապանակը։ ²⁸ Նրա առաջ այդ օրերին Ահարոնի որդի Եղիազարի որդի Փենեեսն էր կանգնում։ Իսրայելի որդիները հարցրին Տիրոջը և ասացին. «Նորից մեր եղբայր Բենիամինի որդիների դեմ պատերազմելու դուրս գա՞նք, թե՞ դադարեցնենք»։ Տերն ասաց. «Դո՛ւրս եկեք, վաղը նրանց կմատնեմ ձեր ձեռքը»։

²⁹ Իսրայելի որդիները դարանակալներ դրեցին Գաբաայի շուրջը։ ³⁰ Երրորդ օրն Իսրայելի որդիները դուրս եկան Բենիամինի դեմ, ճակատ կազմեցին Գաբաայի մոտ, ինչպես նախորդ անգամները։ ³¹ Բենիամինի որդիները դուրս եկան ժողովրդի դեմ, հեռացան այդ քաղաքից և սկսեցին նախորդ անգամների պես ժողովրդին ջարդել այն ճանապարհների վրա, որոնցից մեկը դուրս էր գալիս Բեթել, իսկ մյուսը՝ Գաբաա։ Նրանք այդ դաշտում Իսրայելից մոտ երեսուն մարդ կոտորեցին։ ³² Բենիամինի որդիներն ասացին. «Սրանք մեր առաջ կոտորվելու են, ինչպես նախորդ անգամ»։ Իսկ Իսրայելի որդիներն ասացին. «Փախչենք և հեռացնենք նրանց քաղաքից ու ճանապարհից»։ ³³ Եվ Իսրայելի բոլոր որդիները վեր կացան իրենց տեղից և վերադասավորվեցին Բաալթամարում։ Իսրայելի դարանակալները կռվում էին իրենց տեղից՝ Գաբաայի արևմտյան կողմից։ ³⁴ Ամբողջ Իսրայելից տասը հազար ընտիր մարդիկ հավաքվեցին Գաբաայի դիմաց։ Պատերազմը սաստկացավ, բայց Բենիամինի որդիները չգիտեին, որ իրենց վրա չարիք է հասել։ ³⁵ Տերը Բենիամինի ցեղին հարվածեց Իսրայելի որդիների առաջ, և Իսրայելի որդիներն այդ օրը Բենիամինի ցեղից քսանհինգ հազար հարյուր մարդ կոտորեցին։ Նրանք բոլորն էլ սուսերակիրներ էին։

³⁶ Բենիամինի որդիները տեսան, որ պարտության են մատնված։ Իսրայելացիները նահանջեցին, որովհետև հույսները դրել էին Գաբաայի շրջակայքում եղած դարանամուտների վրա։ ³⁷ Դարանամուտները հարձակվեցին և թափվեցին Գաբաայի վրա, մտան և ամբողջ քաղաքը սրի քաշեցին։ ³⁸ Իսրայելի մարդիկ պայմանավորվել էին դարանակալների հետ, որ կրակ վառեն և ծուխ հանեն քաղաքի վրա։ ³⁹ Այդ ազդանշանի վրա Իսրայելի մարդիկ պետք է հետ քաշվեին պատերազմից։ Բենիամինի ցեղի մարդիկ սկսեցին ջարդել Իսրայելի դարանակալներին, մոտ երեսուն վիրավոր մարդու կոտորեցին և ասացին, թե՝ «Կոտորվում են մեր առաջ այսօր, ինչպես նախորդ պատերազմում»։ ⁴⁰ Կրակե ազդանշանը ծավալվելով բարձրացավ քաղաքի վրա, ինչպես ծխի սյուն։ Բենիամինի մարդիկ հետ նայեցին և տեսան, որ քաղաքի հրդեհի բոցերը երկինք են բարձրանում։ ⁴¹ Իսրայելի այրերը նորից հետ դարձան. Բենիամինի մարդիկ տագնապեցին, որովհետև տեսան, որ չարիքը հասել է իրենց վրա։ ⁴² Նրանք Իսրայելի մարդկանցից փախան անապատի ճանապարհով, բայց պատերազմողները հասան նրանց, և քաղաքից դուրս եկող իսրայելացիներն սպանում էին նրանց՝ իրենց մեջ առնելով։ ⁴³ Բենիամինի մարդկանց նրանք ջարդեցին և հետապնդեցին Նուից մինչև Գաբաայի դիմացը՝ արևելյան կողմից։ ⁴⁴ Բենիամինից տասնութ հազար մարդ ընկավ. նրանք բոլորն էլ զորավոր մարդիկ էին։ ⁴⁵ Մնացածները, տեսնելով այդ, փախան դեպի անապատ՝ ապավինելով Ռեմոնի քարայրին։ Ճանապարհին Բենիամինից հինգ հազար մարդ կոտորեցին, հետապնդեցին նրանց մինչև Գաղաադ և նրանցից երկու հազար մարդ էլ կոտորեցին։ ⁴⁶ Այն օրը Բենիամինի ցեղից ընկածները քսանհինգ հազար հարյուր սուսերակիրներ էին, բոլորն էլ զորավոր մարդիկ։ ⁴⁷ Մնացածները՝ վեց հարյուր մարդ, խույս տալով փախան անապատ՝ ապավինելով Ռեմոնի քարայրին, և Ռեմոնի քարայրում մնացին չորս ամիս։ ⁴⁸ Իսկ Իսրայելի մարդիկ հետ դառնալով հարձակվեցին Բենիամինի որդիների վրա։ Նրանց հերթով սրի քաշեցին, մինչև իսկ անասուններին և ամեն բան, որ գտան յուրաքանչյուր քաղաքում։ Իսկ կոտորածից զերծ մնացած քաղաքները մարդիկ ուղարկեցին և այրեցին հրով։

21

Բենիամինի ցեղի վերածնունդը

¹ Իսրայելի մարդիկ երդվեցին Մասեփայում և ասացին. «Մեզանից ոչ մեկն իր դստերը Բենիամինին կնության թող չտա»։ ² Ամբողջ ժողովուրդը եկավ Մասեփա և Բեթել, մինչև երեկո նրանք նստեցին այնտեղ՝ Աստծու առաջ, բարձրացրին իրենց ձայնը, սաստիկ լաց եղան ³ և ասացին. «Տե՛ր, Աստվա՛ծ Իսրայելի, ինչո՞ւ այս բանը եղավ Իսրայելում, որ այսօր Իսրայելից մի ցեղ բնաջնջվեր»։ ⁴ Հաջորդ օրը ժողովուրդը կանուխ վեր կացավ. այնտեղ զոհասեղան շինեցին և փրկության ողջակեզներ մատուցեցին։

⁵ Իսրայելի որդիներն ասացին. «Իսրայելի բոլոր ցեղերից ո՞վ է, որ այս հավաքին Տիրոջ առաջ Մասեփա չի եկել»։ Արդարև, մեծ երդում էին տվել՝ ասելով. «Պիտի մեռնի՛ նա, ով չգա Մասեփա՝ հավաքի»։ ⁶ Իսրայելի որդիները ցավեցին իրենց եղբայր Բենիամինի համար և ասացին. «Այսօր Իսրայելից մի ցեղ վերացավ։ ⁷ Հիմա ի՞նչ անենք առանց կնոջ մնացածներին, քանի որ մենք երդվել ենք Տիրոջով, որ մեր աղջիկներից նրանց կնության չտանք»։ ⁸ Եվ ասացին. «Իսրայելի ցեղերից ո՞վ է, որ Տիրոջ առաջ չի եկել Մասեփա»։ Պարզվեց, որ Գաղաադի երկրի Հաբիս բնակավայրից ոչ ոք չէր եկել բանակատեղի՝ հավաքին։ ⁹ Եվ ժողովրդին հաշվառման ենթարկեցին։ Նրանց մեջ մարդ չկար Գաղաադի Հաբիս վայրի բնակիչներից։ ¹⁰ Ժողովուրդն այնտեղ ուղարկեց տասներկու հազար զորավոր մարդիկ, նրանց պատվիրեցին և ասացին. «Գնացե՛ք և Գաղաադի Հաբիս բնակավայրի բնակիչներին՝ և՛ կանանց, և՛ մանուկներին կոտորե՛ք սրով։ ¹¹ Ահա թե ինչ պիտի անեք. բոլոր արուներին և արուի հետ անկողին մտած կանանց կոտորե՛ք»։ ¹² Եվ Գաղաադի երկրի Հաբիս բնակավայրի բնակիչների մեջ նրանք գտան չորս հարյուր կույս աղջիկ, որոնք տղամարդու հետ անկողնում չէին պառկել։ Նրանց բերեցին բանակատեղի՝ Սելով, որ Քանանի երկրում է։ ¹³ Եվ ամբողջ ժողովուրդը մարդ ուղարկեց, որ խոսեն Բենիամինի որդիների հետ, որոնք Ռեմոնի քարայրում էին, և նրանց խաղաղության կոչեցին։ ¹⁴ Այն ժամանակ Բենիամինը վերադարձավ Իսրայելի որդիների մոտ։ Եվ նրանց կնության տվեցին Գաղաադի Հաբիս բնակավայրի աղջիկներին, և դա նրանց հաճելի թվաց։ ¹⁵ Ժողովուրդը ցավեց Բենիամինի ցեղի համար, որովհետև Տերն Իսրայելի ցեղերի մեջ ճեղք էր բաց արել։

¹⁶ Ժողովրդի ծերերն ասացին. «Ի՞նչ անենք առանց կնոջ մնացած մյուսների համար, քանի որ Բենիամինի ցեղի կանայք բնաջնջվեցին»։ ¹⁷ Եվ ասացին. «Բենիամինի ցեղի ժառանգությունը պետք է փրկել, թող Իսրայելից ցեղ չբնաջնջվի։ ¹⁸ Բայց մենք չենք կարող մեր աղջիկներից նրանց կնության տալ, որովհետև մենք՝ Իսրայելի որդիներս, երդվելով ասացինք. “Անիծված լինի նա, ով Բենիամինին կին կտա”»։ ¹⁹ Եվ ասացին. «Ամեն տարի Տիրոջ տոն է լինում Սելովում, որը Բեթելի հյուսիսում, Բեթելից Սյուքեմ տանող ճանապարհի արևելյան կողմում, Լիբանանից հարավ՝ Ելեբոնայում է գտնվում»։ ²⁰ Նրանք Բենիամինի որդիներին պատվիրեցին և ասացին. «Գնացե՛ք, դարա՛ն մտեք այգիներում։ ²¹ Երբ տեսնեք, որ Սելովի աղջիկները պար բռնած դուրս են գալիս, ելե՛ք այգիներից և թող ամեն այր մի կին առևանգի Սելովի աղջիկներից, և գնացե՛ք Բենիամինի երկիրը։ ²² Եթե նրանց հայրերը և եղբայրները գան ձեր դեմ բողոքելու, նրանց կասենք՝ “Ողորմե՛ք նրանց, որովհետև պատերազմի ժամանակ այդ մարդիկ իրենց համար կին չառան”. և քանի որ դո՛ւք չէ, որ աղջիկներին կնության տվեցիք նրանց, դա ձեզ համար մեղք չէ»։ ²³ Եվ Բենիամինի որդիներն այդպես արեցին. պարողներից իրենց թվի համեմատ առևանգելով՝ կանայք առան և գնացին։ Վերադարձան ամեն մեկն իր ժառանգությունը, քաղաքներ շինեցին և բնակվեցին դրանց մեջ։ ²⁴ Այն ժամանակ Իսրայելի որդիները գնացին ամեն մեկն իր ցեղի և ազգատոհմի մոտ, և ամեն մարդ գնաց իր ժառանգությունը։ ²⁵ Այն օրերին Իսրայելում թագավոր չկար, և ամեն մարդ անում էր այն, ինչ հաճելի էր իրեն։

1

Ելիմելեքի ընտանիքի դժբախտությունները

¹ Դատավորների կառավարման օրերին սով եղավ երկրում։ Հուդայի Բեթղեհեմ քաղաքից մի մարդ իր կնոջ և երկու որդիների հետ գնաց բնակվելու Մովաբի դաշտում։ ² Այդ մարդու անունը Ելիմելեք էր, նրա կնոջ անունը՝ Նոոմին, իսկ նրա երկու որդիների անունները՝ Մաալոն և Քելլոն։ Նրանք եփրաթացիներ էին, Հուդայի ցեղից։ Նրանք գնացին Մովաբի դաշտը և մնացին այնտեղ։ ³ Ելիմելեքը՝ Նոոմինի ամուսինը, մեռավ, և կինը մնաց իր երկու որդիների հետ։ ⁴ Նրանք մովաբացի կանայք առան. մեկի անունը Օրփա էր, մյուսինը՝ Հռութ։ Նրանք այնտեղ բնակվեցին մոտ տասը տարի։ ⁵ Մաալոնը և Քելլոնը՝ երկուսն էլ մեռան այնտեղ, և կինը մնաց միայնակ՝ զրկված իր ամուսնուց և որդիներից։

Նոոմինը և Հռութը վերադառնում են Բեթղեհեմ

⁶ Նա ու իր երկու հարսները վեր կացան, վերադարձան Մովաբի դաշտից, որովհետև լսել էին, որ Աստված այցի է եկել իր ժողովրդին՝ նրան հաց տալու։ ⁷ Նա իր երկու հարսների հետ դուրս եկավ այն տեղից, որտեղ ապրում էր, և նրանք ճանապարհ ընկան՝ Հուդայի երկիր վերադառնալու համար։ ⁸ Նոոմինն իր երկու հարսներին ասաց. «Գնացե՛ք, վերադարձե՛ք ամեն մեկդ ձեր հոր տունը. Տերը թող ձեզ ողորմություն անի, ինչպես որ դուք այն մեռածներին և ինձ եք արել։ ⁹ Աստված տա, որ ամեն մեկդ հանգիստ գտնեք ձեր հոր տանը»։ Եվ համբուրեց նրանց։ Նրանք բարձրացրին իրենց ձայնը, լաց եղան ¹⁰ և ասացին նրան. «Այդպես չի լինի, մենք քեզ հետ կվերադառնանք քո ժողովրդի մոտ»։ ¹¹ Նոոմինն ասաց. «Հե՛տ դարձեք, աղջիկնե՛րս, ինչո՞ւ գաք ինձ հետ, մի՞թե դարձյալ որդիներ կունենամ իմ որովայնում, որ ձեզ համար ամուսին լինեն։ ¹² Վերադարձե՛ք, աղջիկնե՛րս, և գնացե՛ք, որովհետև ես պառավել եմ, էլ մարդու չեմ գնալու. եթե ասեի էլ, թե հույս ունեմ և կամուսնանամ ու որդիներ կծնեմ, ¹³ դուք պիտի սպասեի՞ք նրանց, մինչև որ մեծանան, և նրանց համար ձեզ հետ պիտի պահեի՞ք ամուսնանալուց։ Ո՛չ, աղջիկնե՛րս, ես ձեզանից ավելի եմ դառնացած, որովհետև Տիրոջ ձեռքը ծանրացավ ինձ վրա»։ ¹⁴ Նրանք նորից բարձրացրին իրենց ձայնը և լաց եղան։ Օրփան համբուրեց իր սկեսրոջը և վերադարձավ իր ժողովրդի մոտ, բայց Հռութը գնաց սկեսրոջ հետևից։ ¹⁵ Նոոմինն ասաց Հռութին. «Ահա քո տագերակինը վերադարձավ իր ժողովրդի և իր աստվածների մոտ, դու էլ հե՛տ դարձիր քո տագերակնոջ հետևից»։ ¹⁶ Հռութն ասաց. «Ես չեմ թողնի քեզ և չեմ հեռանա քեզնից. ուր որ դու գնաս, ես էլ կգնամ, որտեղ որ մնաս, ես էլ կմնամ։ Քո ժողովուրդն իմ ժողովուրդն է, և քո Աստվածն իմ Աստվածն է։ ¹⁷ Որտեղ մեռնես, այնտեղ էլ ես կմեռնեմ և կթաղվեմ. թող Տերն այսպես և սրանից ավելին անի ինձ, միայն մահը կկարողանա բաժանել ինձ քեզանից»։ ¹⁸ Երբ Նոոմինը տեսավ, որ նա հաստատ որոշել է գնալ իր հետ, այդ մասին այլևս չխոսեց նրա հետ։

¹⁹ Նրանք երկուսով գնացին, մինչև որ հասան Բեթղեհեմ։ Երբ նրանք եկան Բեթղեհեմ, ամբողջ քաղաքն իրար անցավ նրանց պատճառով։ Ասում էին. «Սա՞ է Նոոմինը»։ ²⁰ Նա ասաց նրանց. «Ինձ Նոոմին մի՛ կոչեք, այլ կոչե՛ք Դառնացած, որովհետև Ամենակարողը խիստ դառնացրեց ինձ։ ²¹ Լիքը գնացի, բայց Տերը դատարկ վերադարձրեց ինձ. հիմա ինչո՞ւ եք ինձ Նոոմին կոչում։ Տերն ինձ նկուն դարձրեց, և Ամենակարողը չարչարեց ինձ»։ ²² Եվ Նոոմինն ու իր հարսը՝ մովաբացի Հռութը, վերադարձան, գնացին Մովաբի դաշտից և գարու հնձի սկզբին եկան Բեթղեհեմ։

2

Հռութն աշխատում է Բոոսի արտում

¹ Նոոմինի ամուսինն այնտեղ մի ազգական ուներ, մեծ կարողության տեր մի մարդ՝ Ելիմելեքի ազգից։ Նրա անունը Բոոս էր։ Նա Նոոմինին այրության տուն տվեց, որ բնակվի նրա մեջ։ ² Մովաբացի Հռութն ասաց Նոոմինին. «Գնամ արտը և ում մոտ բարեհաճություն գտնեմ, նրա հետևից հասկեր հավաքեմ»։ Նա ասաց նրան. «Գնա՛, աղջի՛կս»։ ³ Նա գնաց և մտնելով արտի մեջ՝ հասկ էր հավաքում հնձողների հետևից. և այնպես պատահեց, որ նա հայտնվեց արտի այն մասում, որը Ելիմելեքի ազգական Բոոսինն էր։

⁴ Եվ ահա Բոոսը եկավ Բեթղեհեմից և ասաց իր հնձվորներին. «Տերը ձեզ հետ»։ Նրանք ասացին. «Տերն օրհնի քեզ»։ ⁵ Եվ Բոոսը հնձվորների վրա նշանակված ծառային ասաց. «Ո՞ւմ աղջիկն է դա»։ ⁶ Հնձվորների վրա նշանակված ծառան պատասխանեց ու ասաց. «Մովաբացի աղջիկն է, որ Նոոմինի հետ վերադարձավ Մովաբի դաշտից։ ⁷ Նա ասաց. “Թող հնձվորների հետևից հասկաքաղ անեմ և խուրձերից ընկածները հավաքեմ”։ Եկել ու մնացել է այստեղ առավոտից մինչև այժմ, մի փոքր դադար էլ չտվեց այս արտում»։

⁸ Բոոսն ասաց Հռութին. «Լսի՛ր, աղջի՛կս, հասկ հավաքելու համար ուրիշ տեղ, ուրիշի արտը չգնաս, այստեղից ոչ մի տեղ չգնաս, այլ հենց այստեղ, ինձ ծառայող աղջիկների հե՛տ եղիր։ ⁹ Թող քո աչքերը լինեն այն արտի վրա, որտեղ հունձ են անում, և նրանց հետևից գնա։ Ահա ես պատվիրել եմ իմ պատանիներին, որ քեզ չդիպչեն։ Եթե ծարավես, գնա՛ ամանների մոտ և խմի՛ր այդ պատանիների հանած ջրից»։ ¹⁰ Աղջիկն ընկավ երեսի վրա և մինչև գետին խոնարհվելով՝ երկրպագություն արեց ու ասաց. «Ինչի՞ց է, որ քո բարեհաճությանն արժանացա, և դու ուշադրություն դարձրիր ինձ վրա, թեև ես մի օտար կին եմ»։ ¹¹ Բոոսը պատասխան տվեց և ասաց. «Ինձ պատմել են այն ամենը, ինչ ամուսնուդ մահվանից հետո արել ես դու քո սկեսրոջ համար. թե ինչպես թողել ես քո հորն ու մորը, քո ծննդավայրը և եկել ես այն ժողովրդի մոտ, որին առաջ չէիր ճանաչում։ ¹² Քո արածի համար Տերը թող հատուցի քեզ, Տերը՝ Իսրայելի Աստվածը, թող լիովին վարձատրի քեզ, որին դու դիմել ես՝ նրա թևերի տակ ապաստան գտնելու համար»։ ¹³ Հռութն ասաց. «Տե՛ր իմ, քո առաջ շնորհ գտա, քանի որ մխիթարեցիր ինձ և քո աղախնի սրտից խոսեցիր. ես էլ քո աղախիններից մեկը թող լինեմ»։ ¹⁴ Բոոսը նրան ասաց. «Ահա ճաշի ժամ է, մոտեցի՛ր այստեղ, կե՛ր հացից և պատառդ թաթախի՛ր քացախահյութի մեջ»։ Հռութը նստեց հնձվորների կողքին, Բոոսը նրա առջև փոխինձ դրեց, նա կերավ, հագեցավ և մնացորդ թողեց։ ¹⁵ Ապա վեր կացավ հասկ հավաքելու։ Բոոսն իր պատանիներին պատվիրեց և ասաց. «Թող խուրձերի միջից էլ հավաքի, մի՛ ամաչեցրեք նրան, ¹⁶ այլ տարե՛ք, կուտակված խրձերից էլ նրա առաջը գցե՛ք, թո՛ւյլ տվեք ուտի և հասկ հավաքի, մի՛ հանդիմանեք նրան»։ ¹⁷ Նա մինչև երեկո այդ արտի մեջ հավաքեց, հավաքածը ծեծեց, և դա մի արդու գարի եղավ։ ¹⁸ Նա վերցրեց այն և քաղաք մտավ, և սկեսուրը տեսավ նրա հավաքածը։ Ապա Հռութը հանեց, նրան տվեց այն, ինչ պահել էր կշտանալուց հետո։

¹⁹ Սկեսուրը նրան ասաց. «Այսօր որտե՞ղ հավաքեցիր և որտե՞ղ աշխատեցիր. օրհնյալ լինի նա, ով լավություն արեց քեզ»։ Եվ Հռութն իր սկեսրոջը պատմեց, թե որտե՛ղ է եղել, և ասաց. «Բոոս է այն մարդու անունը, որի մոտ աշխատեցի այսօր»։ ²⁰ Նոոմինն իր հարսին ասաց. «Օրհնյալ լինի նա Տիրոջից, որ իր գութը չպակասեցրեց ողջերից և մեռածներից»։ Նոոմինը նրան ասաց. «Նա մեզ մոտիկ մարդ է, նա մեր ազգականներից է»։ ²¹ Հռութն իր սկեսրոջն ասաց. «Ճիշտ է, նա ինձ ասաց՝ “Ինձ ծառայող աղջիկների հե՛տ եղիր, մինչև որ վերջացնեն իմ ողջ հունձը”»։ ²² Նոոմինն իր հարս Հռութին ասաց. «Լավ է, աղջի՛կս, որ նրան ծառայող աղջիկների հետ լինես, և չլինի, թե մի այլ արտում քեզ ուրիշը հանդիպի»։ ²³ Եվ Հռութը միացավ Բոոսին ծառայող աղջիկներին ու հասկ հավաքեց մինչև գարու և ցորենի հնձի վերջը, և ապրում էր իր սկեսրոջ հետ։

3

Հռութը ամուսին է գտնում

¹ Նրա սկեսուր Նոոմինն ասաց Հռութին. «Աղջի՛կս, քեզ համար ապաստան փնտրեմ, որ քեզ լավ լինի։ ² Արդ, չէ՞ որ Բոոսը, որին ծառայող աղջիկների հետ մնում էիր, մեր ազգականն է։ Ահա նա այս գիշեր գարի է կալսում։ ³ Դու լվացվի՛ր, օծանելի՛ք ցանվիր, հագուստներդ հագի՛ր և դո՛ւրս արի կալը, բայց այդ մարդուն մի՛ հայտնվիր, մինչև որ նա ուտելն ու խմելը վերջացնի։ ⁴ Երբ նա գնա քնելու, իմացի՛ր նրա քնելու տեղը, գնա՛, ոտքի կողմից բա՛ց արա ծածկոցը և պառկի՛ր։ Նա քեզ կասի, թե ի՛նչ պիտի անես»։ ⁵ Հռութը նրան ասաց. «Կանեմ այն ամենը, ինչ որ ասես ինձ»։

⁶ Նա իջավ կալը և ամեն ինչ արեց այնպես, ինչպես պատվիրել էր իր սկեսուրը։ ⁷ Բոոսը կերավ, խմեց, և նրա սիրտը զվարթացավ, գնաց պառկեց դեզի մոտ։ Հռութը թաքուն եկավ, նրա ոտքերի կողմից բացեց ծածկոցը և պառկեց։ ⁸ Կեսգիշերվա մոտ մարդը վախեցավ, շփոթվեց՝ տեսնելով, որ իր ոտքերի մոտ մի կին է պառկել։ ⁹ Ասաց. «Ո՞վ ես դու»։ Նա ասաց. «Ես քո աղախին Հռութն եմ։ Քո քղանցքը տարածի՛ր քո աղախնի վրա, որովհետև դու իմ ազգականն ես»։ ¹⁰ Բոոսն ասաց. «Օրհնեալ լինես դու Տիրոջից՝ Աստծուց, աղջի՛կս, որովհետև քո այս վերջին բարեգթությունն ավելին է, քան առաջինը, քանի որ չգնացիր երիտասարդների հետևից՝ աղքատ կամ հարուստ։ ¹¹ Հիմա, աղջի՛կս, մի՛ վախեցիր, ինչ որ ասես ինձ, բոլորը կանեմ քեզ համար, որովհետև իմ ժողովրդի ողջ տոհմը գիտի, որ դու առաքինի կին ես։ ¹² Ես, արդարև, քո ազգականն եմ, բայց ինձանից ավելի մոտ ուրիշ ազգական էլ կա։ ¹³ Այս գիշեր այստե՛ղ գիշերիր, իսկ առավոտյան այն ազգականը եթե տեր կանգնի քեզ, լավ է, իսկ եթե չկամենա քեզ տեր կանգնել, կենդանի է Տերը, ե՛ս քեզ տեր կկանգնեմ։ Պառկի՛ր այստեղ մինչև առավոտ»։

¹⁴ Նա մինչև առավոտ պառկեց նրա ոտքերի մոտ։ Հռութը վեր կացավ. այնքան մութ էր դեռ, որ մարդ մարդու չէր կարող ճանաչել։ Բոոսն ասաց. «Թող ոչ ոք չիմանա, որ կին է եկել ինձ մոտ կալը։ ¹⁵ Վրայիդ ծածկոցը բե՛ր և բռնի՛ր այստեղ»։ Հռութը բռնեց այն, և Բոոսը վեց չափ գարի չափեց, դրեց նրա շալակը, և Հռութը մտավ քաղաք։ ¹⁶ Նա գնաց իր սկեսրոջ մոտ, որը նրան ասաց. «Ի՞նչ եղավ, աղջի՛կս»։ Եվ նա պատմեց նրան այն ամենը, ինչ որ այդ մարդն արել էր իր համար, ¹⁷ և ասաց. «Այս վեց չափ գարին տվեց ինձ և ասաց. “Քո սկեսրոջ մոտ ձեռնունայն չգնաս”»։ ¹⁸ Նոոմինն ասաց. «Նստի՛ր, մինչև որ պարզ լինի մեզ, թե գործն ինչպես կվերջանա, որովհետև այն մարդը չի հանգստանա, մինչև որ այս գործն այսօր չվերջացնի»։

4

Բոոսն ամուսնանում է Հռութի հետ

¹ Բոոսը ելավ և նստեց քաղաքի դռների մոտ։ Եվ ահա նրա մոտով անցնում էր այն ազգականը, որի մասին ինքն ասել էր։ Բոոսը նրան ասաց. «Ե՛կ, այստե՛ղ նստիր և մնա՛ մի պահ»։ Նա գնաց նստեց։ ² Բոոսը քաղաքի ծերերից տասը մարդ վերցրեց և ասաց. «Նստե՛ք այստեղ»։ Եվ նրանք նստեցին։ ³ Բոոսն այն ազգականին ասաց. «Նոոմինը, որը վերադարձել է Մովաբի դաշտից, վաճառում է մեր եղբայր Ելիմելեքի արտի բաժինը։ ⁴ Ես ասացի, թե կհայտնեմ ի լուր քեզ։ Հիմա այս նստածների և իմ ժողովրդի ծերերի ներկայությամբ գնի՛ր։ Եթե ուզում ես ազգականի իրավունքով նրանից այն ծախու առնել, ա՛ռ, իսկ եթե չես ուզում առնել, ասա՛ ինձ, որ իմանամ, որովհետև քեզանից բացի ազգական չկա, քեզանից հետո ազգականը ես եմ»։ ⁵ Բոոսն ասաց. «Նոոմինից ագարակն առնելուդ օրը մովաբացի Հռութին՝ հանգուցյալի կնոջն էլ կնության պիտի առնես, որ վերակենդանացնես մեռածի անունն իր կալվածքում»։ ⁶ Ազգականն ասաց Բոոսին. «Ես չեմ կարող ազգականի իրավունքով այն առնել, որ չավերեմ իմ ժառանգությունը, դո՛ւ տեր կանգնիր իմ ազգականության իրավունքին, որովհետև ես չեմ կարող տեր կանգնել»։ ⁷ Առաջ Իսրայելում հետ գնելու և առնելու գործում ամեն բան հաստատելու համար այս սովորությունը կար. մարդն իր կոշիկը հանում տալիս էր իր ընկերոջը, որը պետք է սեփականացներ նրա ազգականության իրավունքը։ Եվ դա Իսրայելի մեջ դիտվում էր որպես վկայություն։ ⁸ Ազգականը Բոոսին ասաց. «Դո՛ւ ստացիր իմ ազգականության իրավունքը»։ Եվ հանեց իր կոշիկն ու տվեց նրան։

⁹ Բոոսն ասաց ծերերին և ամբողջ ժողովրդին. «Դուք այսօր վկա եք, որ ես Ելիմելեքի ամբողջ ունեցվածքը և Քելլոնի ու Մաալոնի ամբողջ ունեցածքը Նոոմինի ձեռքից գնում եմ։ ¹⁰ Նաև Մաալոնի կնոջը՝ մովաբացի Հռութին, ինձ կնության եմ առնում, որ մեռածի անունը պահեմ իր կալվածքում, և նրա անունը չվերանա իր եղբայրների միջից ու իր բնակավայրի ցեղից. դուք այսօր դրա վկաներն եք»։ ¹¹ Քաղաքի դռանը գտնվող ամբողջ ժողովուրդը պատասխան տվեց և ասաց. «Մենք վկա ենք»։ Ծերերն ասացին. «Տերը քո տունը մտնող կնոջը թող դարձնի Ռաքելի և Լիայի նման, որոնք երկուսով կառուցեցին Իսրայելի տունը։ Դու Եփրաթայում ո՛ւժ հավաքիր և Բեթղեհեմում անո՛ւն վաստակիր։ ¹² Այն զավակների շնորհիվ, որ Տերը քեզ կտա այդ աղջկանից, քո տունը թող դառնա Փարեսի տան նման, որին Թամարը ծնեց Հուդայի համար»։

Ովբեդի ծնունդը

¹³ Բոոսը կնության առավ Հռութին և մերձեցավ նրան. Տերը նրան հղիություն տվեց, և նա որդի ծնեց։ ¹⁴ Կանայք ասացին Նոոմինին. «Օրհնյա՜լ լինի Տերը. նա քեզ այսօր առանց ազգականի չթողեց, որ քո անունն Իսրայելի մեջ հիշվի. ¹⁵ նորածինը քեզ վերստին կյանք կտա և կկերակրի քո ծերության ժամանակ, որովհետև քեզ սիրող հարսը, որ քեզ համար յոթ որդուց էլ լավ է, որդի ծնեց»։ ¹⁶ Նոոմինը վերցրեց մանկանը, դրեց իր ծոցը և նրա համար դայակ եղավ։ ¹⁷ Դրացիները նրան անուն տվեցին և ասացին. «Նոոմինի համար որդի ծնվեց»։ Նրա անունը Ովբեդ դրեցին։ Նա Դավթի հոր՝ Հեսսեի հայրն է։

Դավթի տոհմաբանությունը

¹⁸ Փարեսի ազգատոհմն այս է. Փարեսը ծնեց Եսրովմին, ¹⁹ Եսրովմը ծնեց Արամին, Արամը ծնեց Ամինադաբին, ²⁰ Ամինադաբը ծնեց Նաասովնին, Նաասովնը ծնեց Սաղմոնին, ²¹ Սաղմոնը ծնեց Բոոսին, Բոոսը ծնեց Ովբեդին, ²² Ովբեդը ծնեց Հեսսեին, Հեսսեն ծնեց Դավթին։

Ա ԳԻՐՔ ԹԱԳԱՎՈՐՆԵՐԻ

[* Ա ԳԻՐՔ ՍԱՄՈՒԵԼԻ]

1

Սամուելի ծնունդը և ընծայումը Տիրոջը

¹ Արիմաթեմ-Սիփայից՝ Եփրեմի լեռից, Եղկանա անունով Եփրեմի Նասիբում մի մարդ էր ապրում։ Նա Թովկիի որդի Հեղիի որդի Հերեմիելի որդին էր։ ² Նա երկու կին ուներ. մեկի անունն էր Աննա, իսկ երկրորդինը՝ Փեննանա։ Փեննանան զավակներ ուներ, իսկ Աննան զավակ չուներ։ ³ Այդ մարդը տարեցտարի ելնում էր իր Արիմաթեմ քաղաքից, գնում էր Սելով՝ Տիրոջը՝ Զորությունների Աստծուն երկրպագելու և զոհ մատուցելու։ Այնտեղ Տիրոջ քահանաներն էին Հեղին և նրա երկու որդիները՝ Օփնին ու Փենեեսը։ ⁴ Երբ Եղկանան զոհ էր մատուցում, իր կին Փեննանային բաժիններ էր տալիս նրա որդիների ու դուստրերի թվով։ ⁵ Թեև Եղկանան Աննային առավել էր սիրում, քան Փեննանային, Աննային մեկ բաժին էր տալիս, քանի որ նա զավակ չուներ։ Տերը փակել էր նրա արգանդը։ ⁶ Աննան տառապանքի և տրտմության մեջ էր, որովհետև Տերն իրեն զավակ չէր պարգևել։ Հենց այդ պատճառով էր տրտմում, որ Տերը փակել էր իր արգանդը, որպեսզի զավակ չպարգևի իրեն։ ⁷ Նա ամեն տարի այդպես էր անում, երբ Տիրոջ տուն էր գալիս. տրտմում էր, լալիս և ոչինչ չէր ուտում։ ⁸ Նրա ամուսին Եղկանան ասաց նրան. «Աննա»։ Սա ասաց. «Այստեղ եմ, տե՛ր»։ Եղկանան ասաց նրան. «Ինչո՞ւ ես լալիս, ինչո՞ւ չես ուտում, և ինչո՞ւ է հոգիդ ալեկոծվում, մի՞թե ես քեզ համար տասը զավակից լավ չեմ»։

⁹ Երբ նրանք կերան, Աննան ելավ Սելով ու կանգնեց Տիրոջ առջև։ Հեղի քահանան նստել էր Տիրոջ տաճարի մուտքի մոտ դրված իր աթոռին։ ¹⁰ Նա վշտահար հոգով աղոթեց Տիրոջն ու դառնորեն լաց եղավ ¹¹ և ասաց. «Ադոնայի, Տեր, Ելովե Սաբավովթ, եթե կամենաս տեսնել քո աղախնի տառապանքները, ինձ հիշես ու արու զավակ տաս քո աղախնին, մինչև նրա մահվան օրը քեզ կնվիրեմ նրան, նա գինի չի խմի ու չի հարբի և նրա գլխին ածելի չի դիպչի»։

¹² Եվ երբ Տիրոջ առաջ նրա աղոթքը երկարեց, Հեղի քահանան հետևեց նրա շրթունքներին, և քանի որ ¹³ Աննան մտքում էր աղոթում, և շրթունքները չէին շարժվում, ձայնը լսելի չէր, բայց Տերը լսեց նրան, Հեղին կարծեց, թե նա հարբած է։ ¹⁴ Հեղիի սպասավորն Աննային ասաց. «Մինչև ե՞րբ ես հարբած վիճակում մնալու, սթափվի՛ր գինովությունից ու հեռացի՛ր Տիրոջ առջևից»։ ¹⁵ Պատասխան տալով՝ Աննան ասաց. «Ո՛չ, տե՛ր, այդպես չէ։ Ես վշտացած սրտով կին եմ։ Գինի չեմ խմել և հարբած չեմ։ Ես իմ սիրտն եմ բացել Տիրոջ առջև։ ¹⁶ Քո աղախնին անզգամ կին մի՛ համարիր, ես իմ բազում տրտմության և իմ տխրության պատճառով եմ կանգնել մինչև այժմ»։ ¹⁷ Հեղին պատասխան տվեց և ասաց. «Գնա՛ խաղաղությամբ, և Իսրայելի Աստվածը թող կատարի իրենից հայցած քո բոլոր խնդրանքները»։ ¹⁸ Աննան ասաց. «Թող քո աղախինը շնորհ գտնի քո առաջ»։ Եվ կինը գնաց իր ճանապարհով, մտավ իր վրանը, կերավ և խոսեց իր ամուսնու հետ, և տխրությունը վերացավ նրա երեսից։

¹⁹ Առավոտ կանուխ նրանք երկրպագեցին Տիրոջը և գնացին իրենց ճանապարհով։ Եղկանան մտավ Արիմաթեմում գտնվող իր տունն ու մերձեցավ իր կնոջը՝ Աննային։ Տերը հիշեց նրան, ²⁰ և նա հղիացավ։ Երբ ժամանակը հասավ, ծնեց որդի, որի անունը դրեց Սամուել՝ ասելով. «Տիրոջից՝ Զորությունների Աստծուց խնդրեցի սրան»։

²¹ Մյուս տարի Եղկանան ու իր ամբողջ ընտանիքը եկան Սելով՝ մատուցելու տարեկան զոհը և ուխտի զոհը, իր հետ վերցնելով նաև տասանորդը։ ²² Բայց Աննան չգնաց նրա հետ և իր ամուսնուն ասաց. «Մնամ այստեղ, մինչև մանկանը կրծքից կտրեմ, ապա կտանեմ նրան, որ ներկայանա Տիրոջ առջև և այնտեղ ծառայի ընդմիշտ»։ ²³ Նրա ամուսին Եղկանան նրան ասաց. «Արա՛ այնպես, ինչպես հարմար ես գտնում. նստի՛ր այստեղ, մինչև նրան կտրես կրծքից։ Թող Տերը իրականացնի այն, ինչ ելավ քո բերանից»։ Կինը նստեց և կերակրեց իր որդուն մինչև նրան կրծքից կտրելը։

²⁴ Հաջորդ տարի նրանք գնացին Սելով՝ իրենց հետ վերցնելով երեք տարեկան մի զվարակ, կլոր հացեր, մեկ արդու նաշիհ և մի սափոր գինի։ Նրանք մտան Սելովում գտնվող Տիրոջ տունը։ Մանուկը նրանց հետ էր։ ²⁵ Նրան բերեցին Տիրոջ առջև, նրա հայրը մորթեց տարեկան զոհը, որ ամեն տարի մատուցում էր Տիրոջը։ Նա մոտ բերեց մանկանը և մորթեց զվարակը՝ մանկան փրկության համար։ Աննան՝ մանկան մայրը, նրան տարավ Հեղիի մոտ՝ ասելով. ²⁶ «Աղաչում եմ, տե՛ր իմ, ինչպես ճիշտ է, որ դու կենդանի ես, այնպես էլ ճիշտ է, որ ես այն կինն եմ, որ կանգնել էի քո առջև և Տիրոջն էի աղոթում ²⁷ ահա այս մանկան համար։ Տերը կատարեց իրենից հայցած իմ խնդրանքը։ ²⁸ Արդ, իբրև հատուցում, նրան նվիրում եմ Տիրոջը. ինչքան որ ապրի, թող ծառայի Տիրոջը»։

Եվ նրանք այնտեղ երկրպագեցին Տիրոջը։

2

¹ Աննան աղոթքի կանգնեց ու ասաց.

«Սիրտս ամրացավ Տիրոջ շնորհիվ,

իմ ուժն ավելացավ Տիրոջ շնորհիվ,

բերանս լայն բացվեց իմ թշնամիների վրա,

լցվեցի ուրախությամբ, քանի որ փրկեցիր ինձ։

² Տիրոջ նման այլ սուրբ չկա,

ոչ էլ արդար՝ մեր Աստծու նման,

և քեզանից բացի սուրբ չկա։

³ Մի՛ պարծենաք ու մի՛ խոսեք ամբարտավանությամբ,

մեծախոսություն թող չլսվի ձեր բերանից,

քանի որ Տերը Աստվածն է, որ գիտի ամեն ինչ,

Աստվածը, որ նախապատրաստում է իր գործերը։

⁴ Հզորների աղեղները տկարացան,

իսկ տկարները զորություն ստացան։

⁵ Հացով կշտացածները զգացին նրա պակասը,

իսկ քաղցածները բնակվեցին երկրում,

ամուլը յոթ որդի ծնեց,

իսկ բազմածինը դադարեց որդի ունենալուց։

⁶ Տերն է սպանում և ապրեցնում,

գերեզման իջեցնում և հարություն տալիս։

⁷ Տերն է աղքատացնում ու հարստացնում,

ստորացնում ու բարձրացնում։

⁸ Գետնից բարձրացնում է տնանկին,

աղքատին հանում աղբանոցից,

որ նրանց նստեցնի ժողովրդի իշխանների հետ

ու փառքի գահին բազմեցնի նրանց։

⁹ Տալիս է նրան, ով ուխտ է անում,

բազմացնում է արդարների տարիները։

Ուժեղն իր շնորհքով չէ՛ որ հզորացել է։

¹⁰ Տերը տկարացնում է իր հակառակորդներին։

Տերը սուրբ է։

Ո՛չ իմաստունը թող պարծենա իր իմաստությամբ,

ո՛չ հզորն իր զորությամբ,

ո՛չ էլ մեծատունն իր հարստությամբ։

Պարծեցողը պետք է պարծենա նրանով,

որ իմանում ու ճանաչում է Տիրոջը,

և երկրում իրավունք և արդարություն է գործադրում։

Տերը երկինք ելավ ու որոտաց.

Նա է, որ արդար լինելով, դատելու է երկրի չորս ծագերը։

Մեր թագավորներին զորություն է տալու

և զորավիգ է լինելու իր օծյալին»։

¹¹ Եվ նրանք մանկանը թողնելով այնտեղ՝ Տիրոջ առջև, գնացին Արիմաթեմ, իրենց տունը։

Մանուկ Սամուելը Հեղի քահանայի մոտ Տիրոջն էր ծառայում։

Հեղիի որդիների չար ընթացքը, Սամուելը՝ մարգարե

¹² Հեղի քահանայի որդիներն անզգամ էին և չէին երկյուղում Տիրոջից։ ¹³ Զոհ մատուցելիս ժողովրդից քահանայի հասը հետևյալն էր. միսը եփվելիս քահանայի սպասավորը եռաժանի պատառաքաղը ձեռքին պիտի գար, ¹⁴ այն մտցներ տաշտի, պղնձե մեծ կաթսայի կամ պտուկի մեջ, և մեծ պատառաքաղն ինչ որ հաներ այնտեղից, պետք է պատկաներ քահանային։ Բայց ահա թե ինչպես էին վարվում ողջ Իսրայելի հետ, որոնք գալիս էին զոհեր մատուցելու Սելովում՝ Տիրոջ տանը։ ¹⁵ Նախքան ճարպն այրելը գալիս էր քահանայի սպասավորը և զոհ մատուցողին ասում. «Քահանային խորովելու մի՛ս տուր, և ես կաթսայում եփվող մսից չեմ առնի»։ ¹⁶ Զոհ մատուցողն ասում էր. «Թող նախ ճարպն այրվի, ինչպես օրենքն է, ապա վերցրո՛ւ այնքան, ինչքան սիրտդ ցանկանա»։ Իսկ նա ասում էր. «Ո՛չ, հիմա՛ տուր, ապա թե ոչ՝ բռնի կառնեմ»։ ¹⁷ Այդ երիտասարդների մեղքերը շատ էին Տիրոջ առաջ։

¹⁸ Մանուկ Սամուելը, եփուդ հագած, Տիրոջ առջև ծառայություն էր անում։ ¹⁹ Մայրն ամեն տարի կարճ վերարկու էր պատրաստում ու բերում նրան, երբ իր ամուսնու հետ բարձրանում էր ամենամյա զոհը մատուցելու։ ²⁰ Հեղին, օրհնելով Եղկանային ու նրա կնոջը, ասաց. «Տիրոջը նվիրած քո այս մանկան փոխարեն Տերն այդ կնոջից թող քեզ զավակներ պարգևի»։ Եվ Եղկանան գնաց իր բնակավայրը։ ²¹ Տերն այցելեց Աննային, սա հղիացավ ու ծնեց ևս երեք տղա ու երեք աղջիկ։

Մանուկ Սամուելն էլ մեծացավ Տիրոջ առաջ։

²² Հեղին շատ էր ծերացել։ Նա լսեց այն ամենի մասին, ինչ նրա որդիներն անում էին Իսրայելի որդիների նկատմամբ, և թե մերձենում էին Վկայության խորանի դռանը ծառայող կանանց։ ²³ Նա նրանց ասաց. «Ինչո՞ւ եք այնպիսի բաներ անում, որ ես այդ բաները լսեմ Տիրոջ ամբողջ ժողովրդի բերանից։ ²⁴ Մի՛ արեք, որդյակնե՛ր, իմ լսած լուրը բարի չէ, դուք Աստծու ժողովրդին չեք ծառայում։ ²⁵ Եթե մարդը մեղանչում է մարդու դեմ, ապա պետք է աղոթի Տիրոջը, իսկ եթե Տիրոջ դեմ է մեղանչում, ո՞վ պետք է նրա համար աղոթի»։ Սակայն նրանք չէին լսում իրենց հոր խոսքերը, որովհետև Տերն ուզում էր կործանել նրանց։

²⁶ Իսկ մանուկ Սամուելը շարունակում էր մեծանալ և հաճելի էր դառնում Տիրոջն ու մարդկանց։

²⁷ Աստծու հրեշտակը եկավ Հեղիի մոտ և ասաց. «Այսպես է ասում Տերը. “Երբ քո հոր նախնիները եգիպտացիների երկրում՝ փարավոնի տանը, ստրուկ էին, ²⁸ քո հոր տանը հայտնապես երևացի և Իսրայելի բոլոր ազգատոհմերի միջից ընտրեցի քո հոր տունը, որպեսզի նրանք ինձ համար քահանայագործեն, որ իմ զոհասեղանին բարձրանան, խունկ ծխեն, իմ առջև եփուդ հագնեն։ Ես քո հոր սերունդներին իբրև կերակուր տվել եմ Իսրայելի որդիների մատուցած ընծաներից։ ²⁹ Ինչո՞ւ ես ժպիրհ աչքով նայում իմ խնկերին ու զոհերին և ինձանից ավելի ես փառավորում քո որդիներին՝ թույլ տալով, որ նրանք ուտեն Իսրայելի մատուցած բոլոր զոհերի երախայրիքը”։ ³⁰ Այդ պատճառով այսպես է ասում Տերը՝ Իսրայելի Աստվածը. “Ասել եմ, թե քո տունը և քո հոր տունը իմ առջև պետք է ծառայեն հավիտյան”, սակայն հիմա Տերն ասում է. “Հիմա այդպես թող չլինի. քանի որ ես փառավորելու եմ ինձ փառավորողներին, իսկ ովքեր ինձ արհամարհում են, անարգելու եմ”։ ³¹ Ահա օրեր պիտի գան, երբ պիտի սպանեմ քո սերնդին և քո հոր տան սերնդին, ³² և ծեր չի լինի քո տան մեջ։ Ու ողբագին պիտի նայես այն բոլոր բարություններին, որ Տերը՝ Աստված, անելու է Իսրայելին, և քո տան մեջ բնավ ծեր չի լինելու։ ³³ Միայն մեկին պիտի թողնեմ իմ զոհասեղանի մոտ, որպեսզի նվաղեն նրա աչքերը, և հալումաշ լինի նրա սիրտը։ Քո տան բոլոր մնացյալ անդամներն ընկնելու են մարդկանց սրով։ ³⁴ Թող քեզ նշան լինի այս բանը, որ գալու է քո երկու որդիների՝ Օփնիի և Փենեեսի գլխին. նրանք երկուսն էլ նույն օրն են մեռնելու։ ³⁵ Ես ինձ համար հավատարիմ մի քահանա մեջտեղ պիտի հանեմ, որ կատարի այն ամենը, ինչ կա իմ մտքում և հոգում։ Նրա սերունդը հաստատուն պիտի պահեմ, որ միշտ իմ օծյալի առջև ծառայի։ ³⁶ Այնպես պիտի լինի, որ քո տնից ով կենդանի մնա, մի արծաթի չնչին կտորի և մի նկանակ հացի համար գա նրան երկրպագելու և ասի. “Աղաչում եմ, ինձ քահանայական մի պաշտո՛ն տուր, որ մի պատառ հաց ուտեմ”»։

3

¹ Պատանի Սամուելը Հեղի քահանայի հսկողությամբ ծառայում էր Տիրոջը։ Այդ օրերին Տերը հազվադեպ էր խոսում կամ երևում մարդկանց։ ² Պատահեց, որ այդ օրը Հեղին ննջում էր իր սենյակում. նրա աչքերն սկսել էին տկարանալ, ու նա չէր կարողանում տեսնել։ ³ Աստծու տաճարի ճրագը դեռ չէր հանգել, և Սամուելը ննջում էր Տիրոջ տաճարում, որտեղ գտնվում էր Աստծու տապանակը։ ⁴ Տերը կանչեց՝ ասելով. «Սամուե՛լ, Սամուե՛լ»։ Նա պատասխանեց. «Ահա այստեղ եմ»։ ⁵ Հեղիի մոտ վազելով՝ նա ասաց. «Ահա ես այստեղ եմ, ինձ ինչո՞ւ կանչեցիր»։ Նա ասաց. «Ես քեզ չեմ կանչել, վերադարձի՛ր ու քնի՛ր»։ Նա վերադարձավ ու քնեց։ ⁶ Տերը կրկին կանչեց. «Սամուե՛լ, Սամուե՛լ»։ Սամուելը վեր կացավ, երկրորդ անգամ գնաց Հեղիի մոտ ու ասաց. «Ահա այստեղ եմ, ինձ ինչո՞ւ կանչեցիր»։ Նա ասաց. «Ես քեզ չեմ կանչել, որդյա՛կ իմ, վերադարձի՛ր ու քնի՛ր»։ ⁷ Սամուելը դեռ չէր ճանաչում Տիրոջը, Տիրոջ խոսքը նրան դեռ չէր հայտնվել։ ⁸ Տերը նորից՝ երրորդ անգամ, կանչեց Սամուելին, որը վեր կացավ, գնաց Հեղիի մոտ և ասաց. «Ահա այստեղ եմ, ինձ ինչո՞ւ կանչեցիր»։ Հեղին հասկացավ, որ Տերն է կանչում պատանուն։ ⁹ Հեղին Սամուելին ասաց. «Վերադարձի՛ր, որդյա՛կ, ու ննջի՛ր։ Եվ եթե որևէ մեկը քեզ կանչի, կասես. “Խոսի՛ր, Տե՛ր, քո ծառան լսում է”»։ Սամուելը գնաց ու պառկեց իր տեղում։ ¹⁰ Տերը եկավ, կանգնեց և, ինչպես նախորդ անգամները, կանչեց նրան. «Սամուե՛լ, Սամուե՛լ»։ Սամուելն ասաց. «Խոսի՛ր, Տե՛ր, քո ծառան լսում է»։ ¹¹ Տերն ասաց Սամուելին. «Ահա ես Իսրայելի մեջ այնպիսի բաներ պիտի անեմ, որ, ով լսի դրանք, ականջները պիտի զնգան։ ¹² Այդ օրը Հեղիի նկատմամբ պիտի կատարեմ այն ամենը, ինչ նրա տան համար ասել եմ, սկզբից մինչև վախճանը։ ¹³ Ինչպես ասել եմ իրեն, իր որդիների գործած անօրենությունների համար մինչև վերջ իր սերնդից վրեժ պիտի լուծեմ, որովհետև իր որդիներն Աստծուն անարգում էին, իսկ նա նրանց չէր հանդիմանում։ ¹⁴ Ավելին. երդվել եմ Հեղիի տան վրա, որ նրա տան անօրենությունը խնկերով և զոհերով քավություն չի ստանալու հավիտյան»։

¹⁵ Սամուելը ննջեց մինչև առավոտ. վաղ առավոտյան զարթնեց ու բացեց Տիրոջ տան դռները։ Սամուելը վախեցավ տեսիլքը պատմել Հեղիին։ ¹⁶ Հեղին Սամուելին ասաց. «Սամուե՛լ, որդյա՛կ»։ Նա ասաց. «Ահա այստեղ եմ»։ ¹⁷ Նա ասաց. «Ինչ խոսքեր որ քեզ ասաց Տերը, մի՛ թաքցրու ինձանից։ Աստված քեզ թող առավել պատժի, եթե քո ականջին ասված խոսքերից որևէ բան թաքցնես ինձանից»։ ¹⁸ Սամուելն ամեն ինչ պատմեց նրան՝ ոչինչ չթաքցնելով նրանից։ Հեղին ասաց. «Տերը թող անի այն, ինչ բարի է իր համար»։

¹⁹ Սամուելը մեծացավ, Տերը նրա հետ էր, և Նրա ասած խոսքերից ոչ մեկը գետնին չմնաց։ ²⁰ Ամբողջ Իսրայելը՝ Դանից մինչև Բերսաբեե, իմացավ, որ Սամուելը դարձել է Տիրոջ մարգարե։ ²¹ Տերը կրկին երևաց Սելովում։ Տերը Սամուելին երևաց ըստ իր ասած խոսքի։ Սամուելը հավատարմությամբ դարձավ Տիրոջ մարգարեն ամբողջ Իսրայելի մեջ՝ երկրի մի ծայրից մյուսը։ Հեղին շատ էր ծերացել, իսկ որդիները շարունակում էին իրենց ընթացքը, և նրանց ճանապարհը չար էր։

4

Ուխտի տապանակի գերեվարումը

¹ Այդ օրերին այլազգիները հարձակվեցին Իսրայելի վրա։ Իսրայելը նրանց դեմ պատերազմի ելավ և Աբենեզերում բանակատեղի դրեց, իսկ այլազգիները բանակատեղի դրեցին Ափեկում։ ² Այլազգիները ճակատամարտ տվեցին Իսրայելի դեմ. մարտն սկսվեց, և Իսրայելը պարտվեց այլազգիներից։ ³ Ռազմի դաշտում չորս հազար զինվոր ընկավ։ Երբ զորքը վերադարձավ բանակատեղի, Իսրայելի ծերերն ասացին. «Ինչո՞ւ Տերն այսօր մեզ պարտության մատնեց այլազգիների առաջ։ Սելովից մեզ մոտ բերենք մեր Աստծու Ուխտի տապանակը, որ մեզ մոտ լինի ու մեզ փրկի մեր թշնամիների ձեռքից»։ ⁴ Ժողովուրդը մարդիկ ուղարկեց Սելով, որոնք այնտեղից բերեցին քերովբեների միջև նստած Զորությունների Տիրոջ Ուխտի տապանակը։ Հեղիի երկու որդիները՝ Օփնին ու Փենեեսը, Աստծու Ուխտի տապանակի հետ գնացին։ ⁵ Երբ Տիրոջ Ուխտի տապանակը բանակատեղի բերվեց, ամբողջ Իսրայելը մեծաձայն աղաղակեց, և երկիրը թնդաց։ ⁶ Լսելով աղաղակի ձայնը՝ այլազգիներն ասացին. «Այս ի՜նչ բարձրագոչ աղաղակ է եբրայեցիների բանակատեղիում»։ Նրանք իմացան, որ Տիրոջ տապանակն են բերել բանակատեղի։ ⁷ Այլազգիները վախեցան ու ասացին. «Նրանց աստվածները եկել են բանակատեղի։ Փրկի՛ր մեզ այսօր, Տե՛ր։ Վա՜յ մեզ, քանի որ այսպիսի բան չկար երեկ ու նախորդ օրը։ ⁸ Վա՜յ մեզ, մեզ ո՞վ կփրկի այդ հզոր աստվածների ձեռքից։ Սրանք այն աստվածներն են, որ Եգիպտոսին ամեն տեսակ հարվածներ հասցրին նաև ամբողջ անապատում։ ⁹ Գոտեպնդվե՛ք և տղամա՛րդ եղեք, ո՛վ այլազգիներ, չլինի թե ստրուկ դառնաք եբրայեցիներին, ինչպես որ նրանք ստրուկ եղան ձեզ։ Տղամա՛րդ եղեք և պատերազմե՛ք նրանց դեմ»։ ¹⁰ Այլազգիները պատերազմեցին նրանց դեմ, և Իսրայելի այրերը փախան դեպի իրենց վրանները։ Շատ մեծ կոտորած եղավ, և իսրայելացիներից երեսուն հազար հետևակ ընկավ։ ¹¹ Աստծու տապանակը գերեվարվեց, իսկ Հեղիի երկու որդիները՝ Օփնին ու Փենեեսը, սպանվեցին։

Հեղիի մահը

¹² Այդ օրը համինացի մի մարդ բանակատեղիից վազելով եկավ Սելով։ Նա պատառոտել էր իր զգեստները և գլխին հող լցրել։ ¹³ Երբ հասավ, Հեղին նստած էր տաճարի դռան աթոռին ու ճանապարհին էր նայում, քանի որ նրա սիրտը տագնապի մեջ էր Աստծու տապանակի համար։ Քաղաք մտնելով՝ այդ մարդը հաղորդեց գույժը, ու քաղաքն աղաղակեց։ ¹⁴ Հեղին, լսելով աղաղակը, ասաց. «Այդ ի՞նչ աղաղակ է»։ Մարդը շտապ եկավ, որ գույժը հաղորդի Հեղիին։ ¹⁵ Հեղին իննսունութ տարեկան էր, աչքերն այնքան էին տկարացել, որ չէր տեսնում։ Հեղին իրեն շրջապատող մարդկանց ասաց. «Այս ի՞նչ աղաղակ է»։ ¹⁶ Մարդը շուտափույթ մտավ Հեղիի մոտ և ասաց նրան. «Ես եկել եմ բանակատեղիից. ռազմադաշտից այսօր եմ փախել»։ Հեղին ասաց. «Ի՞նչ է պատահել, որդյա՛կ, պատմի՛ր ինձ»։ ¹⁷ Պատանին պատասխանեց. «Իսրայելի այրերն այլազգիների առջևից փախան, ժողովուրդը մեծ կոտորածի ենթարկվեց, քո երկու որդիները՝ Օփնին և Փենեեսը, սպանվեցին, իսկ Աստծու տապանակը գերվեց»։ ¹⁸ Եվ երբ նա հիշատակեց Աստծու տապանակը, Հեղին աթոռից հետ ընկավ դռան մոտ, նրա ողնաշարը ջարդվեց և մեռավ, քանի որ ծեր ու ծանրացած մարդ էր։ Նա Իսրայելի մեջ քսան տարի դատավորություն էր արել։

¹⁹ Հեղիի հարսը՝ Փենեեսի կինը, հղի էր, ծննդաբերելու օրերը մոտ էին, և երբ Աստծու տապանակի գերվելու և իր սկեսրայրի ու ամուսնու մահվան լուրը լսեց, լաց եղավ ու ծնեց, քանի որ երկունքի ցավերը պատել էին նրան։ ²⁰ Երբ նա մեռնում էր, նրան շրջապատող կանայք ասացին. «Մի՛ վախեցիր, քանի որ տղա ծնեցիր»։ Նա պատասխան չտվեց և ուշադրություն չդարձրեց։ ²¹ Աստծու տապանակի, նրա սկեսրայրի և ամուսնու պատճառով մանկանը կոչեցին «Վայ Քաբովթ» և ²² ասացին. «Իսրայելի փառքը վերացավ», որովհետև Տիրոջ տապանակը գերվեց, նրա սկեսրայրն ու ամուսինը մեռան։

5

Ուխտի տապանակը՝ այլազգիների ձեռքին

¹ Այլազգիները Աստծու տապանակը վերցրին ու այն Աբենեզերից տարան Ազովտոս։ ² Այլազգիները Տիրոջ տապանակը տարան Դագովնի տաճարը և դրեցին Դագովնի կողքին։ ³ Հաջորդ օրը՝ վաղ առավոտյան, ազովտացիները զարթնեցին, մտան Դագովնի տաճարը և տեսան, որ Դագովնը Տիրոջ տապանակի առջև երեսնիվայր ընկած է։ Նրանք բարձրացրին Դագովնը և դրեցին իր տեղը։ Տիրոջ ձեռքը բարձրացավ ազովտացիների վրա։ Նա չարչարեց նրանց և թութքով հարվածեց ողջ Ազովտոսն ու նրա սահմանները։ ⁴ Երբ հաջորդ առավոտ նորից կանուխ զարթնեցին, տեսան, որ Դագովնը Տիրոջ Ուխտի տապանակի առջև երեսնիվայր ընկած է, Դագովնի գլուխն ու ոտքի [*  չունի, Ο΄ ձեռքի] երկու թաթերը ջարդված են ու գետնին ցրված, ձեռքի երկու դաստակները ընկած են դռան սեմին. Դագովնի միայն իրանն էր մնացել։ ⁵ Այդ պատճառով է, որ Դագովնի քրմերն ու բոլոր նրանք, ովքեր մտնում են Դագովնի տաճարը, մինչև օրս Ազովտոսի Դագովնի տաճարի սեմին ոտք չեն դնում, այլ ցատկելով վրայից են անցնում։ ⁶ Եվ Տիրոջ ձեռքը ծանրացավ Ազովտոսի վրա. թութքով հիվանդացրեց նրանց, նրանց դաշտերում վխտալ տվեց մկներին, և քաղաքում մահ ու խառնակություն եղավ։ ⁷ Այս դեպքը տեսնելով՝ Ազովտոսի բնակիչներն ասացին. «Աստծու տապանակը թող չմնա մեզ մոտ, քանի որ Նրա ձեռքը բարձրացավ մեր և մեր աստծու՝ Դագովնի վրա»։ ⁸ Նրանք մարդ ուղարկեցին և այլազգիների բոլոր իշխաններին իրենց մոտ հավաքելով՝ ասացին. «Իսրայելի Աստծու տապանակն ի՞նչ անենք»։ Գեթացիներն ասացին. «Իսրայելի Աստծու տապանակը թող մեզ մոտ փոխադրվի»։ Եվ Աստծու տապանակը փոխադրվեց Գեթ։ ⁹ Երբ տապանակն այնտեղ փոխադրվեց, Տիրոջ ձեռքը բարձրացավ այդ քաղաքի վրա. շատ մեծ խռովություն բարձրացավ, Տերը քաղաքի մարդկանց՝ փոքրից մինչև մեծերը, չարչարեց, նրանց հարվածեց թութքով, և գեթացիները թութքով տառապեցին։

¹⁰ Աստծու տապանակը ուղարկեցին Ասկաղոն։ Երբ Աստծու տապանակը մտավ Ասկաղոն, ասկաղոնացիները բողոք բարձրացրին՝ ասելով. «Իսրայելի Աստծու տապանակն ինչո՞ւ մեզ մոտ բերեցիք, որ մեզ և մեր ժողովրդին սպանեք»։ ¹¹ Մարդ ուղարկեցին, հավաքեցին այլազգիների բոլոր իշխաններին ու ասացին. «Իսրայելի Աստծու տապանակը հե՛տ ուղարկեք, թող մնա իր տեղում, որ մեզ ու մեր ժողովրդին չկոտորի»։ Մի մահառիթ սոսկում էր պատել ամբողջ քաղաքն այն բանից հետո, երբ Իսրայելի Աստծու տապանակը այնտեղ էր մտել։ ¹² Մահից ազատվելով՝ կենդանի մնացած մարդիկ թութքով էին տառապում, և քաղաքի աղաղակը երկինք բարձրացավ։

6

Տապանակի վերադարձը

¹ Աստծու տապանակը յոթ ամիս այլազգիների երկրում էր, և նրանց երկիրը մկներով լցվեց։ ² Այլազգիները կանչեցին իրենց քրմերին, գուշակներին և իմաստուններին ու ասացին. «Ի՞նչ անենք Տիրոջ տապանակը, ասացե՛ք մեզ, թե այն ինչպե՛ս հետ ուղարկենք»։ ³ Նրանք ասացին. «Եթե Տիրոջ՝ Իսրայելի Աստծու Ուխտի տապանակը հետ ուղարկեք, այն սոսկ մի՛ ուղարկեք, այլ պատուհասի վերացման ընծայով, և կբուժվեք, ու կներվեն ձեր մեղքերը, այլապես նրա ձեռքը գուցե չվերանա ձեզանից»։ ⁴ Նրանք հարցրին. «Ի՞նչ տանք իբրև պատուհասի վերացման ընծա»։ Պատասխանեցին. «Պատրաստե՛ք հետույքի ոսկե հինգ քանդակներ, այսինքն՝ այնքան, որքան որ այլազգիների իշխանների թիվն է, և ոսկե հինգ մկներ, որովհետև այդ հարվածներն իջել են հավասարապես թե՛ ձեր, թե՛ ձեր իշխանների և թե՛ ժողովրդի վրա։ ⁵ Արդ, պատրաստե՛ք ձեր հետույքների, ինչպես նաև ձեր երկիրն ապականող մկների քանդակները, և փա՛ռք տվեք Տիրոջը, որպեսզի նա թեթևացնի իր ձեռքը ձեր, ձեր աստվածների ու ձեր երկրի վրա։ ⁶ Ինչո՞ւ եք ձեր սրտերը կարծրացնում այնպես, ինչպես Եգիպտոսն ու փարավոնն էին կարծրացրել իրենց սրտերը։ Արդյոք չարձակեցի՞ն նրանց և չգնացի՞ն, երբ պատժեց նրանց։ ⁷ Արդ, վերցրե՛ք և մի նոր սա՛յլ պատրաստեք, և անդրանկածին երկու երինջ, առանց ձագերի։ Երինջները սայլի՛ն լծեք, իսկ հետևից եկող հորթերին գոմում փակե՛ք։ ⁸ Վերցրե՛ք Տիրոջ տապանակը և դրե՛ք սայլի վրա, նրա կողքին դրե՛ք նաև ոսկե իրերը՝ պատուհասի վերացման ընծաները, քուրձե տոպրակի մեջ։ Ապա ընթա՛ցք տվեք սայլին և թողե՛ք, որ գնա։ ⁹ Հետևե՛ք և տեսե՛ք. եթե դեպի իր սահմանը՝ Բեթսամյուս է գնում, ուրեմն իմացե՛ք, որ նա է մեզ այս մեծամեծ չարիքները հասցրել, իսկ եթե՝ ոչ, ապա նրա ձեռքը չէ, որ մեզ պատուհասել է, այլ եղած պատիժները պատահական են»։

¹⁰ Այլազգիներն այդպես էլ արեցին։ Նրանք անդրանկածին երկու երինջ բերեցին, դրանք լծեցին սայլին, իսկ դրանց հորթերը պահեցին գոմում։ ¹¹ Տիրոջ տապանակը դրեցին սայլի վրա, ինչպես նաև մկների ու իրենց հետույքների ոսկե քանդակները՝ քուրձե տոպրակի մեջ։ ¹² Երինջները ուղղվեցին Բեթսամյուսի ճանապարհը. նրանք ուղիղ ընթանում էին մի շավիղով, առանց աջ ու ձախ խոտորվելու։ Այլազգիների նախարարները մինչև Բեթսամյուսի սահմանը գնում էին նրանց հետևից։ ¹³ Բեթսամյուսի բնակիչները հովիտներում ցորեն էին հնձում։ Իրենց աչքերը բարձրացնելով՝ նրանք տեսան Տիրոջ տապանակը և ուրախացած ընդառաջ գնացին նրան։ ¹⁴ Սայլը մտավ Բեթսամյուսում գտնվող Ովսիեի հանդը։ Սայլի կողքին մի մեծ քար կանգնեցրին, սայլի փայտերը կոտրեցին և երինջները Տիրոջը ողջակեզ մատուցեցին։ ¹⁵ Ղևտացիները վերցրին Տիրոջ տապանակը, քուրձե տոպրակն ու դրա միջի ոսկե անոթները և դրեցին մեծ քարի վրա։ Բեթսամյուսի այրերն այդ օրը Տիրոջը ողջակեզներ մատուցեցին ու զոհեր զոհեցին։ ¹⁶ Այլազգիների հինգ նախարարներն այս տեսնելուց հետո վերադարձան Ակկարոն։

¹⁷ Պատուհասի վերացման համար այլազգիների ընծայած ոսկե հետույքներից մեկը Ազովտի համար էր, մեկը՝ Գազայի, մեկը՝ Ասկաղոնի, մեկը՝ Գեթի, մեկն էլ՝ Ակկարոնի համար. ¹⁸ ոսկե մկները համապատասխանում էին այլազգիների հինգ նախարարների քաղաքների թվին, պարսպապատ քաղաքներից մինչև փերեզացիների ավանները, և մինչև այն քարը, որի վրա դրեցին Տիրոջ Ուխտի տապանակը, որը մինչև այսօր էլ կա բեթսամյուսացի Ովսիեի հանդում։ ¹⁹ Բեթսամյուսացիներից Հեքոնեի որդիները, սակայն, չուրախացան, որ տեսել են Տիրոջ Ուխտի տապանակը։ Տերը նրանցից հիսուն հազար յոթանասուն մարդ կոտորեց։ Ժողովուրդը սգաց, քանի որ Տերը ժողովրդին մեծամեծ հարվածներ հասցրեց։ ²⁰ Բեթսամյուսի այրերն ասացին. «Ո՞վ կարող է այս սրբության՝ Տիրոջ՝ Աստծու առջև շրջել, և մեզանից ո՞ւմ մոտ կգնա Տիրոջ տապանակը»։ ²¹ Եվ պատգամավորներ ուղարկեցին Կարիաթ-Յարիմի բնակիչների մոտ՝ ասելով. «Այլազգիները վերադարձրին Տիրոջ տապանակը, եկե՛ք և այն ձեզ մո՛տ տարեք»։

7

¹ Կարիաթ-Յարիմի այրերը եկան, այնտեղից վերցրին Տիրոջ Ուխտի տապանակը և տարան Ամինադաբի տունը, որը մի բլրի վրա էր։ Եվ նրա որդի Եղիազարին մաքրագործեցին, որ պահպանի Տիրոջ Ուխտի տապանակը։

Սամուելն ստանձնում է Իսրայելի որդիների ղեկավարումը

² Տապանակը Կարիաթ-Յարիմում դնելուց հետո բազում օրեր անցան, քսան տարի, և ամբողջ Իսրայելն իր հայացքը ուղղեց դեպի Տերը։ ³ Սամուելը իր խոսքն ուղղեց Իսրայելի ողջ տանը՝ ասելով. «Եթե դուք ձեր ամբողջ սրտով դարձել եք դեպի Տերը, ապա ձեր միջից վերացրե՛ք օտար աստվածներն ու Անտառները [*  Աշտարոտ], ձեր սրտերը պատրաստե՛ք Տիրոջ համար, միայն Նրա՛ն ծառայեք, և Նա կփրկի ձեզ այլազգիների ձեռքից»։ ⁴ Եվ Իսրայելի որդիները հրաժարվեցին Բահաղի կուռքերից ու Աստարովթի անտառներից և սկսեցին ծառայել միայն Տիրոջը։ ⁵ Եվ Սամուելն ասաց. «Ողջ Իսրայելին հավաքե՛ք Մասեփայում, և ես ձեզ համար աղոթելու եմ Տիրոջը»։ ⁶ Եվ հավաքվեցին Մասեփայում, ջուր հանեցին ու թափեցին Տիրոջ առջև՝ գետնին, այդ օրը ծոմ պահեցին և ասացին. «Մեղանչել ենք Տիրոջ առաջ»։ Եվ Սամուելը Մասեփայում դատեց Իսրայելի որդիների տարաձայնությունները։ ⁷ Եվ երբ այլազգիները լսեցին, որ Իսրայելի որդիները հավաքվել են Մասեփայում, այլազգիների նախարարները հարձակվեցին Իսրայելի վրա։ Իսրայելի որդիները, այդ լսելով, վախեցան այլազգիներից։ ⁸ Եվ Իսրայելի որդիներն ասացին Սամուելին. «Մի՛ դադարիր մեզ համար Տիրոջը՝ քո Աստծուն, աղաղակելուց, որ փրկի մեզ այլազգիների ձեռքից»։ ⁹ Սամուելն առավ մի ծծկեր գառնուկ և ողջ ժողովրդի հետ նրան ողջակեզ մատուցեց Տիրոջը, Իսրայելի համար կանչեց Տիրոջը՝ Աստծուն, և Տերը լսեց նրան։

¹⁰ Մինչ Սամուելը ողջակեզն էր մատուցում, այլազգիները մոտեցան, որ պատերազմեն Իսրայելի դեմ։ Այդ ժամանակ Տերը բարձր ձայնով որոտաց այլազգիների վրա, և նրանք շփոթվեցին ու պարտվեցին Իսրայելից։ ¹¹ Իսրայելի որդիները Մասեփայից ելան, հալածեցին այլազգիներին ու հարվածեցին նրանց մինչև Բեթքովրի ներքևը։ ¹² Սամուելը մի վեմ վերցրեց ու կանգնեցրեց Մասեփայի ու Սենի միջև և այն կոչեց Աբենեզեր, այսինքն՝ «օգնական վեմ»՝ ասելով. «Մինչև այստեղ Տերը օգնեց մեզ»։

¹³ Տերն այլազգիներին խեղճացրեց, և նրանք այլևս Իսրայելի սահմանների վրա չհարձակվեցին։ Սամուելի ապրած բոլոր օրերին Տիրոջ ձեռքը ծանրացած էր այլազգիների վրա։ ¹⁴ Այն քաղաքները, որ այլազգիները գրավել էին Իսրայելի որդիներից, Ասկաղոնից մինչև Գեթ, վերադարձրին ու տվեցին Իսրայելին, և Իսրայելի սահմաններն ազատվեցին այլազգիների ձեռքից։ Իսրայելի ու ամորհացիների միջև խաղաղություն տիրեց։

¹⁵ Եվ Սամուելը իբրև դատավոր իշխեց Իսրայելի որդիներին իր կյանքի բոլոր օրերին։ ¹⁶ Նա ամեն տարի գնում էր Բեթել, Գաղաադ և Մասեփա և դատում էր Իսրայելին բոլոր այս սրբագործված վայրերում։ ¹⁷ Եվ վերադառնալով Արիմաթեմ, որտեղ իր տունն էր, նա այնտեղից էր ղեկավարում Իսրայելին։ Եվ այնտեղ Տիրոջ համար զոհասեղան շինեց։

8

Իսրայելի որդիները թագավոր են ուզում

¹ Երբ Սամուելը ծերացավ, իր որդիներին Իսրայելի դատավորներ կարգեց։ ² Սրանք են նրա որդիների անունները. անդրանիկը՝ Հովել, երկրորդի անունը՝ Աբիա։ Սրանք դատավորներ եղան Բերսաբեեում։ ³ Սակայն նրա որդիները չգնացին իրենց հոր ճանապարհով, այլ ընչաքաղցության հետևից ընկնելով՝ կաշառք էին վերցնում և իրավունքն աղավաղում։ ⁴ Հավաքվեցին Իսրայելի բոլոր այրերը, եկան Սամուելի մոտ՝ Արիմաթեմ, ⁵ և ասացին նրան. «Ահա դու ծերացել ես, իսկ քո որդիները քո ճանապարհով չեն գնում։ Արդ, մեզ վրա մի թագավո՛ր կարգիր, որ մեզ դատի, ինչպես բոլոր ազգերի մոտ է»։ ⁶ Այս բանը Սամուելին դուր չեկավ, քանի որ ասել էին. «Մեզ թագավո՛ր տուր, որ մեզ դատի»։ Սամուելն աղոթքի կանգնեց Տիրոջ առջև, ⁷ և Տերն ասաց Սամուելին. «Լսի՛ր ժողովրդի ձայնը, ինչ էլ որ ասեն քեզ։ Նրանք ոչ թե քե՛զ անարգեցին, այլ չուզեցին, որ ե՛ս թագավորեմ իրենց վրա։ ⁸ Այն օրվանից, երբ նրանց հանեցի Եգիպտոսից, այդպես վարվեցին նրանք ինձ հետ մինչև այսօր. լքեցին ինձ ու ծառայեցին օտար աստվածների։ Նույնպես և քեզ հետ են վարվում։ ⁹ Արդ, լսի՛ր նրանց ձայնը, բայց նրանց տեղյա՛կ պահիր, բացատրի՛ր թագավորի իրավունքները, որ իշխելու է իրենց վրա»։

¹⁰ Սամուելը Տիրոջ բոլոր պատգամները հաղորդեց իրենից թագավոր խնդրող ժողովրդին։ ¹¹ Նա ասաց. «Սրանք են իրավունքները թագավորի, որ թագավորելու է ձեզ վրա. նա պիտի վերցնի ձեր որդիներին և նրանց կառապաններ, հեծյալներ ու իր մարտակառքերի առջևից վազող սուրհանդակներ դարձնի։ ¹² Նրանց իր հազարապետներն ու հարյուրապետները պիտի դարձնի, նրանք իր հունձը պիտի հնձեն, այգիները քաղեն, իր զենքերն ու մարտակառքերի մասերը պիտի պատրաստեն։ ¹³ Ձեր դուստրերին յուղագործներ, խոհարարներ ու հացթուխներ պիտի դարձնի։ ¹⁴ Ձեր անդաստանները, ձեր այգիներն ու ձեր ընտիր ձիթենիները վերցնելով՝ իր ծառաներին պիտի տա։ ¹⁵ Ձեր հանդերից ու ձեր այգիների բերքից նա տասանորդ պիտի ստանա և տա իր ներքինիներին և ծառաներին։ ¹⁶ Ձեր ծառաներն ու աղախինները, ձեր ընտիր անասուններն ու էշերը ձեզնից պիտի վերցվեն և իր համար տասանորդ լինեն։ ¹⁷ Ձեր հոտերից նա տասանորդ պիտի ստանա, և դուք նրա ծառաները պիտի դառնաք։ ¹⁸ Այն ժամանակ դուք բողոքելու եք ձեր ընտրած թագավորի դեմ, սակայն Տերը ձեզ չի լսելու այդ օրը, քանի որ դուք ինքներդ ձեզ համար թագավոր ընտրեցիք»։

¹⁹ Ժողովուրդը չուզեց լսել Սամուելին և նրան ասաց. «Ո՛չ, մեկը թող թագավորի մեզ։ ²⁰ Մենք ևս այլ ազգերի նման լինենք, մեր թագավորը թող մեզ դատի, մեզ առաջնորդի և պատերազմի մեր պատերազմը»։ ²¹ Սամուելը լսեց ժողովրդի բոլոր ասածները և դրանք հայտնեց Տիրոջը։ ²² Տերն ասաց Սամուելին. «Լսի՛ր նրանց և նրանց վրա թագավո՛ր կարգիր»։ Սամուելն Իսրայելի այրերին ասաց. «Թող ամեն ոք իր քաղաքը գնա»։

9

Սավուղը հանդիպում է Սամուելին

¹ Բենիամինի որդիներից մի մարդ կար՝ Կիս անունով, մի հզոր մարդ, որ որդին էր Աբիելի, նա՝ որդին Արեգի, նա՝ որդին Բեքովրաթի, նա՝ որդին Ափիայի, նա՝ որդին մի հեմինացի մարդու։ ² Նա Սավուղ անունով բարի ու թիկնեղ մի որդի ուներ։ Իսրայելի որդիների մեջ նրանից բարետես մարդ չկար, բոլոր մարդկանցից մեկ գլխով բարձր էր։ ³ Մի անգամ Սավուղի հոր ավանակները կորան։ Կիսն ասաց իր որդի Սավուղին. «Վերցրո՛ւ ծառաներից մեկին, և ելեք գնացե՛ք ավանակները փնտրելու»։ ⁴ Նրանք գնացին, անցան Եփրեմի լեռը, անցան Սարիսի լեռը, բայց չգտան ավանակները, անցան Սաղիմի երկիրը, չկային ավանակները, անցան հեմինացիների երկիրը, բայց չգտան։ ⁵ Երբ հասան Սիփ, Սավուղն ասաց իր հետ եկած ծառային. «Արի՛ վերադառնանք։ Կարող է հայրս, ավանակները մոռացած, մե՛զ համար անհանգստանա»։ ⁶ Ծառան ասաց նրան. «Այս քաղաքում է ապրում Աստծու մարդը։ Նա պատվավոր մարդ է և ինչ որ ասում է, անպայման կատարվում է։ Արի՛ գնանք նրա մոտ, թերևս մեզ ցույց տա այն ճանապարհը, որով պետք է գնանք»։ ⁷ Սավուղն ասաց իր հետ եկած ծառային. «Եթե գնանք, ի՞նչ տանենք Աստծու մարդուն. չէ՞ որ մեր ամաններից հացը պակասել է, և մի բան չունենք, որ տանենք Աստծու մարդուն»։ ⁸ Ծառան նորից պատասխան տվեց Սավուղին՝ ասելով. «Ես քառորդ սիկղ արծաթ ունեմ։ Այն կտաս Աստծու մարդուն, և նա ցույց կտա մեր ճանապարհը»։ ⁹ Հին ժամանակներում Իսրայելի մեջ այսպես էր ասում ամեն ոք, երբ գնում էր Աստծուց հարցում անելու. «Եկե՛ք գնանք տեսանողի մոտ», որովհետև հին ժամանակներում ժողովուրդը մարգարեին տեսանող էր անվանում։ ¹⁰ Սավուղն իր ծառային ասաց. «Ճիշտ ես ասում, արի՛ գնանք»։ Եվ նրանք գնացին այն քաղաքը, որտեղ գտնվում էր Աստծու մարդը:

¹¹ Մինչ նրանք բարձրանում էին դեպի քաղաք տանող զառիվերը, նրանց հանդիպեցին աղջիկներ, որոնք ջուր հանելու էին եկել. նրանց հարցրին. «Այստե՞ղ է ապրում տեսանողը»։ ¹² Աղջիկները պատասխան տալով՝ ասացին. «Այստեղ է, ահա ձեզանից քիչ առաջ անցավ, շտապե՛ք, նա միայն այսօրվա համար է եկել քաղաք, որովհետև ժողովուրդն այսօր Բամայում [*  Բարձրադիր վայր] է զոհ անում։ ¹³ Եթե հիմա մտնեք քաղաք, նրան կգտնեք այնտեղ, քանի դեռ չի գնացել Բամա՝ ուտելու, որովհետև ժողովուրդը չի ուտի, մինչև որ նա չգա, որովհետև նա է օրհնում զոհը, ու դրանից հետո հրավիրվածներն ուտում են։ Արդ, ելե՛ք, որովհետև միայն մի օր է նա այստեղ»։ ¹⁴ Նրանք գնացին քաղաք և երբ մտան քաղաքամեջ, Սամուելը Բամա բարձրանալիս հանդիպեց նրանց։

¹⁵ Սավուղի գնալուց մի օր առաջ Տերը Սամուելին հայտնել էր նրա մասին ու ասել. ¹⁶ «Վաղն այսինչ ժամին Բենիամինի երկրից մի մարդ պիտի ուղարկեմ քեզ մոտ, որ նրան Իսրայելի իմ ժողովրդի վրա իշխան օծես։ Նա իմ ժողովրդին պիտի փրկի այլազգիների ձեռքից, քանի որ տեսա ժողովրդիս տառապանքը, և նրա աղաղակն ինձ հասավ»։ ¹⁷ Սամուելը տեսավ Սավուղին, և Տերն ասաց նրան. «Ահավասիկ սա է այն մարդը, որի մասին ասել եմ քեզ, թե՝ “Նա է իշխելու իմ ժողովրդին”»։ ¹⁸ Սավուղը, քաղաքամիջում մոտենալով Սամուելին, հարցրեց. «Ասա՛ ինձ, ո՞րն է տեսանողի տունը»։ ¹⁹ Սամուելը պատասխան տվեց և Սավուղին ասաց. «Տեսանողը ես ինքս եմ։ Իմ առջևից գնալով բարձրացի՛ր Բամա։ Այսօր ինձ հետ կուտես, իսկ վաղը քեզ կարձակեմ, և ամեն ինչ, որ սրտումդ կա, կպատմեմ քեզ։ ²⁰ Երեք օր առաջ կորցրած քո ավանակների համար մի՛ մտածիր, քանի որ դրանք գտնվել են։ Եվ ո՞ւմ է պատկանում Իսրայելի փառքը, եթե ոչ քո տանը և քո հոր ողջ տանը»։ ²¹ Սավուղը պատասխան տվեց՝ ասելով. «Չէ՞ որ ես Իսրայելի ամենափոքր ազգատոհմին պատկանող մի հեմինացու որդի եմ, և Բենիամինի ցեղի մեջ իմ տոհմը ամենակրտսերն է։ Ինչո՞ւ ես ինձ այդ բաներն ասում»։

²² Սամուելը վերցրեց Սավուղին ու նրա ծառային, ներս տարավ սրահը և նրանց նստեցրեց շուրջ երեսուն հյուրերի ամենավերին շարքում։ ²³ Սամուելը խոհարարին ասաց. «Բե՛ր ինձ այն բաժինը, որ քեզ տվի ու պատվիրեցի, որ քեզ մոտ պահես»։ ²⁴ Խոհարարը եփեց իր մոտ եղած ազդրը և ինչ որ կար նրա հետ, և դրեց Սավուղի առջև։ Սամուելը Սավուղին ասաց. «Ահա քեզ համար էր պահված, առջևդ դի՛ր ու կե՛ր, որ դա քեզ համար վկայություն լինի ժողովրդի առաջ, և կե՛ր»։ Այդ օրը Սավուղը կերավ Սամուելի հետ։

²⁵ Նա Բամայից իջավ քաղաք։ Սավուղի համար տանիքի վրա անկողին գցեցին, ²⁶ ու նա քնեց։ Երբ առավոտյան նրանք զարթնեցին, Սամուելը, Սավուղին տանիքից կանչելով, ասաց. «Ե՛կ, արձակելու եմ քեզ»։ Սավուղն իջավ, և ինքն ու Սամուելը տնից դուրս եկան։ ²⁷ Երբ նրանք հասան քաղաքի եզրին, Սամուելը Սավուղին ասաց. «Ասա՛ քո ծառային, որ մեզանից առաջ անցնի»։ Եվ նա առաջ անցավ։ Սամուելը Սավուղին ասաց. «Դու այսօր այստեղ կմնաս և կլսես Տիրոջ պատգամները»։

10

Սամուելը Սավուղին թագավոր է օծում

¹ Սամուելն առավ յուղի սրվակն ու լցրեց նրա գլխին, համբուրեց նրան և ասաց. «Տերը չէ՞, որ քեզ իշխան օծեց իր ժառանգության՝ Իսրայելի ժողովրդի վրա։ Դու կիշխես Տիրոջ ժողովրդի վրա և կփրկես նրան իր շուրջը գտնվող թշնամիների ձեռքից։ Եվ թող սա նշան լինի, որ Տերն է քեզ օծողը. ² ինձնից հեռանալուց հետո երկու մարդ պիտի գտնես Ռաքելի գերեզմանի մոտ, Բենիամինի լեռան վրա, որոնք արագավազ պիտի գան ու քեզ ասեն. “Գտնվեցին այն էշերը, որ փնտրելու էիր գնում, իսկ հայրդ, էշերի հոգսը թողած, ձեր մասին է մտածում ու ասում. “Ի՞նչ անեմ իմ որդու համար”։ ³ Եվ երբ այնտեղից գնաս և հասնես Դեբովրայի կաղնու մոտ, այնտեղ երեք մարդու կհանդիպես, որոնք Աստծու մոտ են գնում՝ Բեթել։ Մեկը երեք ուլ է տանում, մյուսը՝ երեք աման հաց, իսկ երրորդը՝ մի տիկ գինի։ ⁴ Քո ողջությունը հարցնելով՝ նրանք քեզ երկու հաց կնվիրեն, և դու կառնես նրանց ձեռքից։ ⁵ Ապա կհասնես Աստծու բլուրը, որտեղ այլազգիների մի գունդ կա։ Երբ քաղաք մտնես, կհանդիպես Բամայից իջնող մարգարեների խմբին. նրանց առաջ սրինգ, թմբուկ, փող ու քնար նվագողներ կլինեն, իսկ իրենք մարգարեություն են անելու։ ⁶ Տիրոջ հոգին կիջնի քեզ վրա, և դու էլ կմարգարեանաս նրանց հետ և ուրիշ մարդ կդառնաս։ ⁷ Երբ այս նշանները քեզ հետ կատարվեն, ինչ որ մտածես, արա՛, քանզի Աստված քեզ հետ է։ ⁸ Ինձանից առաջ Գաղգաղա պետք է իջնես։ Այնտեղ ես կգամ քեզ մոտ, որպեսզի ողջակեզներ և խաղաղության զոհեր մատուցեմ։ Յոթ օր կսպասես, մինչև որ գամ քեզ մոտ և հաղորդեմ քեզ, թե ի՛նչ ես անելու»։ ⁹ Երբ նա շուռ եկավ, որ գնա Սամուելի մոտից, Աստված նրան ուրիշ սիրտ տվեց, և նույն օրը այդ բոլոր նշանները կատարվեցին։ ¹⁰ Երբ նա մոտեցավ բլրին, մարգարեների խումբը նրան ընդառաջ գնաց, նրա վրա Աստծու հոգին շարժվեց, և նա նրանց մեջ մարգարեացավ։ ¹¹ Երբ նրան ճանաչողները տեսան, թե ինչպես է նա մարգարեների մեջ մարգարեանում, մեկը մյուսին հարցրեց. «Ի՞նչ է պատահել Կիսի որդուն, մի՞թե Սավուղը ևս մարգարեների մեջ է»։ ¹² Նրանցից մեկը պատասխանեց և ասաց. «Ո՞վ է նրա հայրը, եթե ոչ՝ Կիսը»։ Այս առթիվ ասացվածք ստեղծվեց՝ «Սավո՞ւղն էլ մարգարեների մեջ է»։ ¹³ Մարգարեություն անելը վերջացնելուց հետո նա բարձրացավ բլուրը։ ¹⁴ Սավուղի ազգականը հարցրեց նրան ու նրա ծառային. «Ո՞ւր էիք գնացել»։ Նրանք պատասխանեցին. «Էշերը փնտրելու։ Բայց երբ տեսանք, որ չկան, մտանք Սամուելի մոտ»։ ¹⁵ Ազգականը Սավուղին ասաց. «Պատմի՛ր ինձ, Սամուելը քեզ ի՞նչ ասաց»։ ¹⁶ Սավուղն ասաց իր ազգականին. «Նա մեզ հայտնեց, որ էշերը գտնվել են»։ Սակայն թագավորության մասին Սամուելի ասածները նրան չհայտնեց։

¹⁷ Սամուելը ողջ ժողովրդին հավաքեց Տիրոջ առաջ Մասեփայում ¹⁸ և Իսրայելի որդիներին ասաց. «Այսպես խոսեց Տերը՝ Իսրայելի Աստվածը, և ասաց. “Ես եմ, որ Իսրայելի որդիներին հանեցի Եգիպտոսից, փրկեցի ձեզ եգիպտացիների արքա փարավոնի ու ձեզ ճնշող բոլոր թագավորների ձեռքից, ¹⁹ բայց դուք այսօր անարգեցիք Աստծուն, որ ձեզ փրկում է ձեր շուրջը գտնվողներից ու ձեզ նեղություն պատճառողներից։ Իսկ դուք ասացիք. “Ո՛չ, այդպես չէ, մեզ վրա թագավո՛ր կարգիր”։ Արդ, կանգնե՛ք Տիրոջ առջև, ըստ ձեր իշխանությունների, ըստ ձեր ցեղերի և ըստ ձեր հազարյակների»։ ²⁰ Սամուելն Իսրայելի բոլոր ցեղերին իրար մոտ բերեց, և վիճակն ընկավ Բենիամինի ցեղին։ ²¹ Նա մոտ բերեց Բենիամինի ցեղին ըստ ազգատոհմերի, և վիճակն ընկավ Մատտարիի ազգատոհմին։ Նա մոտ բերեց Մատտարիի ազգատոհմին, և վիճակն ընկավ Կիսի որդի Սավուղին։ Նա փնտրեց նրան, բայց չգտավ։ ²² Սամուելը կրկին հարցրեց Տիրոջը. «Արդյո՞ք այդ մարդը այստեղ կգա»։ Տերն ասաց. «Ահավասիկ նա թաքնված է կարասիների մեջ»։ ²³ Նա վազեց ու նրան այնտեղից առնելով՝ կանգնեցրեց ժողովրդի մեջ։ Նա բոլորից մի գլխով բարձր էր։ ²⁴ Սամուելն ասաց ողջ ժողովրդին. «Տեսա՞ք Տիրոջ ընտրած մարդուն, ամենքիդ մեջ նրա նմանը չկա»։ Ամբողջ ժողովուրդը ճանաչեց նրան՝ ասելով. «Կեցցե՜ արքան»։ ²⁵ Սամուելը ժողովրդին հայտնեց թագավորի բոլոր իրավունքները, գրեց մատյանում և դրեց Տիրոջ առաջ։ Սամուելն արձակեց ողջ ժողովրդին, և ամեն մարդ գնաց իր տեղը։ ²⁶ Սավուղը գնաց իր տունը, Գաբաա։ Նրա հետ գնացին զորեղ մարդիկ, որոնց սրտերին Տերը դիպել էր, որ լինեն Սավուղի հետ։ ²⁷ Բայց չար մարդիկ ասում էին. «Ո՞վ է սա, որ մեզ պիտի փրկի»։ Եվ նրանք քամահրեցին նրան ու ընծաներ չմատուցեցին։

11

Սավուղը հաղթում է ամովնացիներին

¹ Մեկ ամիս անց Նաաս Ամովնացին ելավ ու բանակեց Գաղաադի Հաբիս քաղաքի շուրջը։ Հաբիսի բոլոր բնակիչները Նաաս Ամովնացուն ասացին. «Մեզ հետ դաշի՛նք կնքիր, և մենք կծառայենք քեզ»։ ² Նաաս Ամովնացին նրանց ասաց. «Ձեզ հետ դաշինք կկնքեմ այն պայմանով, որ բոլորդ հանեք ձեր աջ աչքը։ Եվ ես դրանով ամբողջ Իսրայելի վրա նախատինք դրած կլինեմ»։ ³ Հաբիսի բնակիչները Նաասին ասացին. «Մեզ յոթ օր ժամանա՛կ տուր, որ պատգամավորներ ուղարկենք Իսրայելի բոլոր սահմանները, և եթե մեզ փրկող չլինի, քեզ անձնատուր կլինենք»։ ⁴ Պատգամավորները եկան Գաբաա, Սավուղի մոտ և այդ խոսքերը հաղորդեցին ժողովրդին։ Ժողովուրդն իր ձայնը բարձրացրեց ու լաց եղավ։ ⁵ Առավոտյան դաշտից գալով՝ Սավուղը հարցրեց. «Ի՞նչ է պատահել, որ ժողովուրդը լաց է լինում»։ Նրան հայտնեցին հաբիսեցիների ասածները։ ⁶ Երբ Սավուղը լսեց այս խոսքերը, Տիրոջ հոգին շարժվեց նրա վրա, և նրա բարկությունը սաստիկ բորբոքվեց։ ⁷ Նա երկու եզ առավ, կտոր-կտոր արեց դրանք ու պատգամավորների միջոցով Իսրայելի բոլոր սահմաններն ուղարկեց՝ ասելով. «Ով որ Սավուղի և Սամուելի հետևից չգա, այսպես կդառնան նրա եզները»։ Տիրոջ ահն ընկավ Իսրայելի ամբողջ ժողովրդի սիրտը, և նրանք մեկ մարդու պես գոչեցին։ ⁸ Սավուղը Բեզեկում նրանց զորահավաք արեց. Իսրայելի բոլոր մարդիկ վեց հարյուր հազար հոգի էին, իսկ Հուդայի մարդիկ՝ յոթանասուն հազար։ ⁹ Նա ասաց եկած պատգամավորներին. «Այսպե՛ս ասեք Գաղաադի Հաբիս քաղաքի բնակիչներին. “Վաղը, երբ արեգակը տաքացնի երկիրը, դուք կփրկվեք”»։ Պատգամավորները քաղաք եկան ու դա հաղորդեցին Հաբիսի բնակիչներին, որոնք ուրախացան։ ¹⁰ Հաբիսի բնակիչները Նաաս Ամովնացուն ասացին. «Վաղը ձեզ անձնատուր կլինենք, և մեզ հետ վարվեցեք այնպես, ինչպես հաճելի է ձեզ»։ ¹¹ Հետևյալ օրը Սավուղը զորքը բաժանեց երեք գնդի։ Առավոտյան նրանք մտան նրանց բանակի մեջ և ամովնացիներին կոտորեցին մինչև արևի ջերմացնելը։ Կենդանի մնացածները փախուստի դիմեցին այնպես, որ նրանցից երկու հոգու իրար մոտ չէիր գտնի։ ¹² Ժողովուրդը Սամուելին ասաց. «Այդ ո՞վ էր ասում, թե Սավուղը չի թագավորի մեզ վրա, մեզ հանձնի՛ր այդ մարդկանց, որ սպանենք նրանց»։ ¹³ Սամուելն ասաց. «Այսօր ոչ ոք չի սպանվելու, որովհետև Տերն այսօր փրկություն պարգևեց Իսրայելին»։

¹⁴ Խոսելով ժողովրդի հետ՝ Սամուելն ասաց. «Գնանք Գաղգաղա և թագադրության նավակատիք անենք»։ ¹⁵ Ամբողջ ժողովուրդը գնաց Գաղգաղա և այնտեղ՝ Գաղգաղայում, Տիրոջ առջև, Սամուելը Սավուղին թագավոր օծեց։ Խաղաղության զոհեր մատուցեցին Տիրոջ առաջ, և Սամուելն ու ամբողջ ժողովուրդը շատ ուրախացան։

12

Սամուելի հրաժեշտի պատգամը

¹ Սամուելը իսրայելացի բոլոր այրերին ասաց. «Ահա ես լսեցի այն ամենը, ինչ դուք ինձ ասացիք, և ես ձեզ վրա թագավոր կարգեցի։ ² Հիմա ձեզ թագավորն է առաջնորդում։ Ես ծերացել եմ, պետք է հանգստանամ, բայց իմ որդիները ահա ձեր մեջ են։ Իմ վաղ հասակից մինչև այսօր ես ձեզ ղեկավարեցի։ Ես ահա կանգնած եմ ձեր առաջ, ³ և դուք Տիրոջ ու նրա օծյալի ներկայությամբ մեղադրե՛ք ինձ, թե ես մեկի եզը խլե՞լ եմ կամ էշը տարե՞լ, ձեզանից ո՞ւմ եմ ճնշել կամ որևէ մեկին զրկե՞լ եմ, ո՞ւմ ձեռքից եմ կաշառք կամ ընծաներ վերցրել։ Պատասխա՛ն տվեք ինձ, որպեսզի ես հատուցեմ ձեզ»։ ⁴ Սամուելին ասացին. «Մեր դեմ չես մեղանչել, մեզ չես զրկել, մեզ չես նեղել ու որևէ մեկի ձեռքից ոչինչ չես խլել»։ ⁵ Սամուելը ժողովրդին ասաց. «Տերը և նրա օծյալը թող վկա լինեն այսօր իմ և ձեր միջև, որ իմ ձեռքում ոչինչ չեք գտել»։ Նրանք ասացին. «Թող վկա լինեն»։ ⁶ Սամուելը խոսեց ժողովրդի հետ և ասաց. «Թող վկա լինի Տերը, որ կարգեց Մովսեսին ու Ահարոնին և մեր հայրերին հանեց Եգիպտոսից։ ⁷ Արդ, առա՛ջ եկեք, որ ես ձեզ դատեմ Տիրոջ առաջ և պատմեմ ձեզ այն բոլոր բարերարությունները, որ Տերն արել է ձեզ ու ձեր հայրերին։ ⁸ Երբ Հակոբն ու նրա որդիները Եգիպտոս մտան, և Եգիպտոսը ճնշեց նրանց, մեր հայրերն աղաղակեցին Տիրոջը, և Տերն առաքեց Մովսեսին ու Ահարոնին, մեր հայրերին հանեց Եգիպտոսից ու բնակեցրեց այս վայրում։ ⁹ Սակայն նրանք մոռացան Տիրոջը՝ իրենց Աստծուն, և նա մատնեց նրանց Ասուրի արքա Հաբինի զորավար Սիսարայի ձեռքը, այլազգիների ձեռքը և Մովաբի թագավորի ձեռքը, որոնք պատերազմեցին նրանց դեմ։ ¹⁰ Եվ աղաղակեցին Տիրոջը՝ ասելով. “Մենք մեղանչել ենք, քանի որ Տիրոջը թողնելով՝ ծառայեցինք Բահաղի կուռքերին ու Անտառներին։ Արդ, փրկի՛ր մեզ մեր թշնամիների ձեռքից, և կծառայենք քեզ”։ ¹¹ Տերն առաքեց Հերոբովաղին, Բարակին, Հեփթայեին ու Սամփսոնին և ձեզ փրկեց շրջակա թշնամիների ձեռքից, ու դուք բնակվեցիք ապահովության մեջ։ ¹² Երբ տեսաք, թե Ամովնի որդիների Նաաս արքան հարձակվել է ձեզ վրա, ասացիք. “Այդպես չէ, այլ թագավոր պիտի իշխի մեզ վրա”։ Թեև մեր թագավորը Տերն է՝ մեր Աստվածը։ ¹³ Արդ, ահավասիկ այն թագավորը, որին խնդրեցիք ու ընտրեցիք. Տերը ձեզ թագավոր տվեց։ ¹⁴ Եթե երկնչեք Տիրոջից ու ծառայեք նրան, հնազանդվեք նրան, չհակառակվեք Տիրոջ ասածին, դուք ու ձեզ վրա իշխող թագավորը գնաք Տիրոջ հետևից, ապա Տիրոջ ձեռքը ձեր ու ձեր թագավորի դեմ չի լինի։ ¹⁵ Իսկ եթե չհնազանդվեք Տիրոջը, հակառակ գնաք Տիրոջ ասածին, ապա Տիրոջ ձեռքը ձեր և ձեր թագավորի դեմ կլինի։ ¹⁶ Արդ, սպասե՛ք և տեսե՛ք այն մեծագործությունները, որ Տերը ձեր աչքերի առջև պիտի անի։ ¹⁷ Չէ՞ որ այսօր ցորենի հնձի ժամանակ է. ես Տիրոջը պիտի աղաղակեմ, և նա ձեզ որոտ ու անձրև պիտի տա։ Դուք կիմանաք ու կտեսնեք, որ ձեզ համար թագավոր խնդրելով՝ մեծ չարություն գործեցիք ձեր Տիրոջ հանդեպ»։

¹⁸ Սամուելը Տիրոջն աղաղակեց, ու Տերը նույն օրը երկնքից որոտ և անձրև ուղարկեց։ Ողջ ժողովուրդը սաստիկ վախեցավ Տիրոջից ու Սամուելից։ ¹⁹ Բոլորն ասացին Սամուելին. «Աղոթի՛ր Տիրոջը՝ քո Աստծուն, քո ծառաների համար, որ չմեռնենք, քանի որ մեզ համար թագավոր ուզելով՝ մեր գործած բոլոր մեղքերի վրա այդ չարիքն էլ ենք ավելացրել»։ ²⁰ Սամուելն ասաց ժողովրդին. «Մի՛ վախեցեք, դուք թեև գործել եք այս բոլոր չարիքները, բայց Տիրոջից մի՛ խոտորվեք և Տիրոջը ծառայե՛ք ձեր ամբողջ սրտով։ ²¹ Մի՛ գնացեք սուտ աստվածների հետևից, որոնք ձեզ ոչ մի օգուտ չեն տա և չեն փրկի, քանի որ նրանք աստվածներ չեն։ ²² Տերն իր մեծ անվան համար իր ժողովրդին չի լքի, քանի որ Տերը բարեհաճությամբ է ձեզ իր ժողովուրդը դարձրել։ ²³ Քավ լիցի, որ ես մեղանչեմ Տիրոջ դեմ՝ հրաժարվելով ձեզ համար աղոթելուց։ Ծառայե՛ք Տիրոջը, և ձեզ ցույց կտամ բարի և ուղիղ ճանապարհը։ ²⁴ Իսկ դուք երկյո՛ւղ կրեք Տիրոջից և ձեր ամբողջ սրտով, ճշմարտությամբ ծառայե՛ք նրան, քանի որ տեսաք, թե մեզ համար ի՛նչ մեծ գործեր արեց, ²⁵ իսկ եթե չարությամբ գործեք, թե՛ դուք, թե՛ ձեր թագավորը կորստյան կմատնվեք»։

13

Պատերազմ այլազգիների դեմ

¹ Սավուղը մեկ կամ երկու տարի Իսրայելի վրա թագավորելուց հետո ² Իսրայելի այրերից երեք հազար մարդ ընտրեց, որոնցից երկու հազարն իր հետ Մաքմասում էին, Բեթել լեռան վրա, իսկ հազարը՝ Հովնաթանի հետ, Բենիամինի Գաբաայում։ Մնացած ժողովրդին արձակեց, որ ամեն մեկը գնա իր բնակության վայրը։

³ Հովնաթանը սպանեց Նասիբ այլազգուն, որ բլրի վրա էր, և այլազգիներն այդ իմացան։ Սավուղը շեփոր հնչեցրեց ամբողջ երկրում և ասաց. «Ծառաներն ապստամբեցին»։ ⁴ Ողջ Իսրայելը լսեց, թե Սավուղը սպանեց Նասիբ այլազգուն, իսկ Իսրայելն ամոթահար արեց այլազգիներին։ Եվ ժողովուրդը Սավուղի հետևից ելավ Գաղգաղա։ ⁵ Այլազգիները հավաքվեցին՝ պատերազմելու Իսրայելի դեմ, և Իսրայելի վրա ելան երեսուն հազար կառք, վեց հազար հեծյալներ, իսկ զորքն իր բազմությամբ նման էր ծովեզրի ավազին։ Սրանք եկան ու բանակեցին Մաքմասում՝ Բեթ-Ավենի դիմաց, դեպի հարավ։ ⁶ Իսրայելացիները տեսնելով, որ նեղվում են, թաքնվեցին քարայրներում, գոմերում, ժայռերի ծերպերում, խորխորատներում ու ջրհորներում։ ⁷ Ով որ կարող էր, անցավ Հորդանան գետն ու գնաց Գադի և Գաղաադի երկիրը։

Սավուղը դեռ Գաղգաղայում էր, և ողջ ժողովուրդը հեռացավ նրանից։ ⁸ Նա յոթ օր սպասեց, ինչպես որ Սամուելն էր հրամայել, սակայն Սամուելը Գաղգաղա չեկավ, և մարդիկ սկսեցին ցրվել։ ⁹ Սավուղն ասաց. «Մո՛տ եկեք, որ ողջակեզի ու խաղաղության զոհեր մատուցեմ»։ Եվ ողջակեզը ինքը մատուցեց։ ¹⁰ Երբ ողջակեզ մատուցելը վերջացրեց, Սամուելը եկավ։ Սավուղն ընդառաջ գնաց՝ նրան դիմավորելու և ողջունելու։ ¹¹ Սամուելն ասաց. «Այդ ի՞նչ ես արել»։ Սավուղն ասաց. «Երբ տեսա, որ իմ ժողովուրդն սկսեց ինձ լքել, և դու չեկար քո նշանակած օրը, իսկ այլազգիները հավաքվեցին Մաքմասում, ¹² մտածեցի, թե այլազգիները հիմա կգան իմ դեմ, Գաղգաղա, իսկ ես Տիրոջ առջև դեռ չէի աղերսել, դրա համար էլ համարձակվեցի և ողջակեզ մատուցեցի»։ ¹³ Սամուելն ասաց Սավուղին. «Զուր ես արել, քանի որ չես պահել իմ պատվիրանը, որ Տերն էր պատվիրել։ Տերը քեզ Իսրայելի վրա ցմահ թագավոր պիտի դարձներ, ¹⁴ բայց հիմա քո թագավորությունը այլևս չի շարունակվելու։ Տերն իր սրտին հաճելի մարդ պիտի փնտրի, որ նրան իշխան դարձնի իր ժողովրդի վրա, քանի որ դու չկատարեցիր այն, ինչ Տերը պատվիրել էր քեզ»։

¹⁵ Սամուելը վեր կացավ և Գաղգաղայից գնաց իր ճանապարհով։ Մնացած զորքը միացավ Սավուղին, որ դիմադրի իրենց վրա հարձակվողներին։ Երբ նրանք Գաղգաղայից ելան ու հասան Բենիամինի երկրի Գաբաա քաղաքը, Սավուղը հաշվեց իր հետ գտնվող զինվորներին և տեսավ, որ ինքն ունի մոտավորապես վեց հարյուր զինվոր։ ¹⁶ Սավուղը, նրա որդի Հովնաթանն ու նրա հետ եղած զորքը հաստատվեցին Բենիամինի երկրի Գաբաա քաղաքում, իսկ այլազգիները բանակել էին Մաքմասում։

¹⁷ Այլազգիների բանակից դուրս եկան երեք գնդեր, որ ավերածություն գործեն։ Մի գունդը դիմեց դեպի Ոփեր տանող ճանապարհը, դեպի Սոգովղի աղբյուրը, ¹⁸ մյուս գունդը՝ դեպի Բեթորոն տանող ճանապարհը, իսկ երրորդ գունդը՝ Գաբաայից դեպի Սաբայի անապատի Գայի տանող ճանապարհը։

¹⁹ Ամբողջ Իսրայելի երկրում մի դարբին չկար, քանի որ այլազգիներն ասել էին. «Այնպես անենք, որ եբրայեցիները սուր կամ գեղարդ չշինեն»։ ²⁰ Բոլոր իսրայելացիներն իրենց գերանդին, գործիքները, կացինը և մանգաղը նորոգելու համար գնում էին այլազգիների երկիրը։ ²¹ Այգեկութի ժամանակ էր, և ամեն մի գործիքի արժեքը երեք սիկղ էր։ Խոփի, կացնի և մանգաղի գինը նույնն էր։ ²² Այնպես պատահեց, որ Մաքմասում պատերազմի օրերին Սավուղի և նրա որդի Հովնաթանի հետ եղած մարդկանց ձեռքին սուր կամ գեղարդ չկար։ Զենք կար միայն Սավուղի ու նրա որդի Հովնաթանի մոտ։

²³ Այլազգիների բանակը դուրս ելավ Մաքմասի մյուս կողմը։

14

Հովնաթանի հարձակումը այլազգիների վրա

¹ Մի օր Սավուղի որդի Հովնաթանն իր կապարճակիր պատանուն ասաց. «Ե՛կ անցնենք այլազգիների կիրճից այն կողմ»։ Այդ մասին նա իր հորը իմաց չտվեց։ ² Սավուղը բանակել էր բլրի գլխին, Մագդովղի նռնենու տակ։ Նրա հետ ժողովրդից վեց հարյուր հոգի կար։ ³ Սելովում Աստծու քահանան Աքիա անունով մեկն էր, որը եփուդ էր կրում։ Նա Ղևիի որդու Փենեեսի որդու Քաբիելի եղբայր Աքիտովբի որդին էր։ Ժողովուրդը չգիտեր, որ Հովնաթանը կիրճ է գնացել։ ⁴ Հովնաթանն ուզում էր անցնել այլազգիների ճամբարը, որ գտնվում էր կիրճի մեջ, բայց այդտեղ տանող ճանապարհի այս ու այն կողմում քարաժայռեր էին բարձրանում, որոնցից մեկը կոչվում էր Բազես, իսկ մյուսը՝ Սենարա։ ⁵ Այս քարաժայռերից հյուսիսի կողմինը դեպի Մաքմաս էր ուղղված, իսկ հարավայինը՝ Գաբայե։ ⁶ Հովնաթանն իր կապարճակիր պատանուն ասաց. «Ե՛կ անցնենք այս անթլփատների կիրճը, թերևս Տերը մեզ համար ինչ-որ բան անի, քանի որ Տիրոջ համար մեկ է փրկություն պարգևել շատ մարդկանցով, թե քչով»։ ⁷ Կապարճակիրը նրան ասաց. «Արա՛ այն, ինչ սիրտդ է ուզում։ Ահա ես քեզ հետ եմ. ինչ քո սիրտն է ուզում, նույնն էլ՝ իմ սիրտը»։ ⁸ Հովնաթանն ասաց. «Ահավասիկ մենք ուղղվում ենք այդ մարդկանց կողմը. մագլցելով կգնանք նրանց մոտ։ ⁹ Եթե մեզ ասեն. “Այնտեղ կա՛նգ առեք, մինչև ձեզ ասենք”, ապա տեղում կկանգնենք և նրանց այլևս չենք մոտենա։ ¹⁰ Բայց եթե ասեն. “Մոտեցե՛ք մեզ”, այն ժամանակ կելնենք կգնանք, քանի որ պարզ կլինի, որ Տերը նրանց մեր ձեռքն է մատնել։ Դա մեզ համար թող նշան լինի»։

¹¹ Նրանք երկուսով մտան այլազգիների կիրճը։ Այլազգիներն ասացին. «Ահա եբրայեցիները ելնում են իրենց ծակերից, որտեղ թաքնվել էին»։ ¹² Կիրճերի պահապաններն ասացին Հովնաթանին ու կապարճակրին. «Մոտեցե՛ք մեզ, որ մենք ձեզ մի բան հայտնենք»։ Հովնաթանն ասաց իր կապարճակրին. «Ե՛կ իմ հետևից, քանի որ Տերը նրանց Իսրայելի ձեռքն է մատնել»։ ¹³ Հովնաթանը մագլցելով գնաց, կապարճակիրն էլ՝ նրա հետ։ Այլազգիները հարձակվեցին Հովնաթանի վրա, իսկ Հովնաթանը սպանեց նրանց, կապարճակիրն էլ նրա հետևից էր հարվածում նրանց։ ¹⁴ Այս առաջին կոտորածի ժամանակ Հովնաթանն ու նրա կապարճակիրը մոտավորապես քսան հոգու սպանեցին նետերով ու ձեռքով նետված դաշտերի քարերով։ ¹⁵ Դաշտում, բանակում ու կիրճում եղած ամբողջ ժողովրդի մեջ սոսկում ընկավ, հարվածող գունդը զարհուրեց և չէր ուզում շարժվել. երկիրը դղրդաց, և Տիրոջ ահն ընկավ թշնամու սիրտը։

Այլազգիների պարտությունը

¹⁶ Սավուղի դետերը Բենիամինի երկրի Գաբաա քաղաքից տեսան, որ բանակը, իրեն կորցրած, այս ու այն կողմ է գնում։ ¹⁷ Սավուղն իր հետ եղած զորքին ասաց. «Ստուգե՛ք ու տեսե՛ք, մեզանից ո՞վ է հեռացել»։ Ստուգեցին և տեսան, որ Հովնաթանն ու նրա կապարճակիրը չկան։ ¹⁸ Սավուղն ասաց Աքիային. «Բե՛ր եփուդը» (քանի որ այդ նա՛ էր եփուդը կրում Իսրայելի առաջ)։ ¹⁹ Մինչ Սավուղը քահանայի հետ էր խոսում, այլազգիների բանակատեղիում աղաղակը գնալով ավելանում էր։ Սավուղը քահանային ասաց. «Ձեռքերդ իջեցրո՛ւ[37]»։ ²⁰ Սավուղն ու նրա հետ նաև ամբողջ ժողովուրդը գնացին, հասան պատերազմի դաշտը։ Մարդիկ իրենց սրերն ուղղեցին իրար դեմ, և մեծ իրարանցում առաջացավ։ ²¹ Եվ նրանք, ովքեր երեկ և նախորդ օրն միացել էին այլազգիներին, շուռ եկան և միացան Իսրայելին, Սավուղին և Հովնաթանին։ ²² Եվ ողջ Իսրայելը, որ թաքնված էին Եփրեմի լեռան վրա, լսելով այլազգիների փախուստի մասին, խմբվեցին, ու իրենք ևս նրանց դեմ պատերազմի մեջ մտան։ ²³ Այդ օրը Տերը փրկեց Իսրայելին, և պատերազմը հասավ մինչև Բեթ-Ավեն։

Անօգտակար ծոմը վերացնում է ժողովրդին

Սավուղի հետ եղած ամբողջ ժողովուրդը մոտավորապես տասը հազար էր։ Պատերազմը տարածվել էր Եփրեմի լեռան բոլոր քաղաքներում։ ²⁴ Այդ օրը Սավուղն անհեռատեսորեն նզովեց ժողովրդին՝ ասելով. «Անիծյալ լինի այն մարդը, որ մինչև երեկո, նախքան ես իմ թշնամիներից վրեժ լուծեմ, հաց կուտի»։ Եվ ժողովուրդը հաց չկերավ, ²⁵ թեև ամբողջ երկիրը ճաշում էր։ Այնտեղ՝ դաշտի դիմաց, անտառ կար, որտեղ մեղու էին պահում։ ²⁶ Ժողովուրդը մտավ մեղվանոցը։ Մարդիկ քրթմնջալով անցնում էին, բայց ոչ ոք ձեռքն իր բերանը չէր տանում, քանի որ ժողովուրդը վախենում էր Տիրոջը տրված երդումից։

²⁷ Հովնաթանը չիմանալով, որ իր հայրը երդվել էր տվել ժողովրդին՝ իր ձեռքի գավազանի ծայրը երկարեց, խրեց մեղրի խորիսխի մեջ, իր ձեռքով մեղրը տարավ բերանը, և նրա աչքերը պայծառացան։ ²⁸ Զինվորներից մեկը նրան ասաց. «Քո հայրը խստագույնս երդվեցրեց ժողովրդին՝ ասելով. “Անիծյալ լինի այն մարդը, որ մինչև երեկո հաց կուտի”»։ Դրա համար էլ ժողովուրդը թուլացած էր։ ²⁹ Երբ Հովնաթանն այդ իմացավ, ասաց. «Հայրս երկիրը կորստյան է մատնել. տեսե՛ք, թե իմ աչքերն ինչպե՛ս լույս ստացան, որովհետև մի քիչ ճաշակեցի այդ մեղրից։ ³⁰ Եթե ժողովուրդն այսօր կերած լիներ իր թշնամուց վերցրած ավարից, այլազգիներին մեծամեծ հարվածներ կհասցներ»։

³¹ Այդ օրը նա Մաքմասում կոտորեց այլազգիներին, իսկ ժողովուրդը սաստիկ հոգնել էր։ ³² Մարդիկ ընկան ավարի վրա, առան ոչխարները, արջառներն ու հորթերը, գետնի վրա մորթեցին ու կերան արնաշաղախ միսը։ ³³ Սավուղին հայտնեցին՝ ասելով. «Ժողովուրդը Տիրոջ դեմ մեղանչեց, քանի որ արնաշաղախ միս կերավ»։ Սավուղն ասաց. «Մեղանչեցիք, արդ, Գեթթամից այստեղ գլորելով մի մեծ քա՛ր բերեք»։ ³⁴ Սավուղն ավելացրեց. «Ժողովրդի մեջ ցրվե՛ք և նրան ասե՛ք, որ ամեն մեկն իր արջառն ու ոչխարն այստեղ բերի, սրա վրա մորթե՛ք ու կերե՛ք և մի՛ մեղանչեք Տիրոջ դեմ արնաշաղախ միս ուտելով»։ Մարդիկ այն գիշեր իրենց մոտ եղածը բերեցին և այնտեղ մորթեցին։ ³⁵ Սավուղն այդտեղ Տիրոջ համար զոհասեղան շինեց։ Սա առաջին զոհասեղանն էր, որ նա շինեց Տիրոջ համար։

³⁶ Սավուղն ասաց. «Գիշերը հետապնդենք այլազգիներին, մինչև լույսը բացվելը կողոպտենք նրանց և նրանցից ոչ մի մարդ կենդանի չթողնենք»։ Նրան ասացին. «Արա՛ այն, ինչ հաճելի է քեզ»։ Քահանան ասաց. «Այստեղ մոտենանք Աստծուն»։ ³⁷ Սավուղն Աստծուն հարցրեց. «Այլազգիներին հետապնդե՞նք, նրանց Իսրայելի ձեռքը կմատնե՞ս»։ ³⁸ Տերն այդ օրը պատասխան չտվեց նրան։ Սավուղն ասաց. «Այստե՛ղ հավաքեք Իսրայելի ողջ ազգը, որ իմանանք ու տեսնենք, թե այսօր ո՛ւմ մեղքով է հանցանք կատարվել։ ³⁹ Կենդանի է Տերը՝ Իսրայելին փրկողը, եթե իմ որդի Հովնաթանն էլ մեղանչած լինի, մահապատժի կենթարկվի»։ Ամբողջ ժողովրդից ոչ ոք չպատասխանեց։ ⁴⁰ Այն ժամանակ նա ասաց Իսրայելի բոլոր մարդկանց. «Դուք մի կո՛ղմ կանգնեք, իսկ ես և իմ որդի Հովնաթանը մյուս կողմը կկանգնենք»։ Ժողովուրդն ասաց Սավուղին. «Արա՛ այն, ինչ հաճելի է քեզ»։ ⁴¹ Սավուղն ասաց. «Տե՛ր, Աստվա՛ծ Իսրայելի, ինչո՞ւ այսօր քո ծառային պատասխան չտվեցիր. եթե անօրենությունն այսօր կատարել եմ ես կամ կատարել է իմ Հովնաթան որդին, Հայտնությո՛ւն տուր, իսկ եթե անօրենությունը կատարվել է Իսրայելի քո ժողովրդի մեջ, նրան քավությո՛ւն պարգևիր»։ Վիճակը ցույց տվեց Հովնաթանին ու Սավուղին, և ժողովուրդն անպարտ դուրս եկավ։ ⁴² Սավուղն ասաց. «Վիճա՛կ գցեք իմ ու իմ Հովնաթան որդու վրա, և ում վրա որ Տերը վիճակ հանի, մահապատժի թող ենթարկվի»։ Ժողովուրդն ասաց Սավուղին. «Թող քո ասածը չլինի»։ Սավուղն ստիպեց ժողովրդին, և նրա ու նրա որդի Հովնաթանի վրա վիճակ գցեցին։ Վիճակն ընկավ Հովնաթանի վրա։ ⁴³ Սավուղն ասաց Հովնաթանին. «Ասա՛ ինձ, ի՞նչ ես արել»։ Հովնաթանը պատմեց նրան՝ ասելով. «Իմ ձեռքի գավազանի ծայրով մի քիչ մեղր կերա և հիմա պիտի մեռնե՞մ»։ ⁴⁴ Սավուղն ասաց նրան. «Աստված թող պատժի ինձ, եթե դու այսօր մահապատժի չենթարկվես»։ ⁴⁵ Ժողովուրդն ասաց Սավուղին. «Քավ լիցի, այսօր մահապատժի թող չենթարկվի նա, ով Իսրայելին այս մեծ փրկությունը պարգևեց։ Կենդանի է Տերը, նրա գլխի մեկ մազն անգամ գետնին չի ընկնելու, քանի որ Աստծու ժողովուրդը գործեց այս մեղքերը»։ Եվ այդ օրը ժողովուրդը Հովնաթանի համար աղոթքով դիմեց Տիրոջը, և նա մահապատժի չենթարկվեց։ ⁴⁶ Սավուղը դադարեց այլազգիներին հետապնդելուց, և այլազգիներն իրենց տեղը գնացին։

Սավուղի հաղթանակները. նրա ընտանիքը

⁴⁷ Այն օրվանից երբ Սավուղն սկսեց թագավորել Իսրայելի վրա, պատերազմեց իր շուրջը գտնվող բոլոր թշնամիների՝ Մովաբի, Ամովնի որդիների, Եդովմի որդիների, Բեթորի, Սուբայի թագավորի և այլազգիների դեմ։ Որ կողմը որ դարձավ, հաղթեց։ Նա մեծ քաջագործություններ արեց, ⁴⁸ հարվածեց Ամաղեկին և Իսրայելը փրկեց այն ոտնակոխ անողների ձեռքից։

⁴⁹ Սավուղի որդիներն էին Հովնաթանը, Հեսսուրը և Մեղքիսավեն, իսկ նրա երկու դուստրերի անուններն էին. մեծինը՝ Մերոբ, իսկ երկրորդի անունը՝ Մեղքող։ ⁵⁰ Նրա կինը Աքիմասի դուստր Աքինոամն էր։ Նրա զորավարը Ների որդի Աբեններն էր, որը Սավուղի ազգականի որդին էր։ ⁵¹ Կիսը՝ Սավուղի հայրը, և Ները՝ Աբենների հայրը, Աբիելի որդի Համինի որդիներն էին։ Նրանք բոլորը երեսունութ հոգի էին։

⁵² Սավուղի ամբողջ իշխանության ընթացքում սաստիկ պատերազմ տեղի ունեցավ այլազգիների դեմ, և Սավուղն իր տեսած բոլոր զորավոր ու քաջ մարդկանց իր մոտ հավաքեց։

15

Պատերազմ ամաղեկացիների դեմ

¹ Սամուելը Սավուղին ասաց. «Ինձ Տերն առաքեց, որ քեզ թագավոր օծեմ իմ ժողովրդի՝ Իսրայելի վրա։ Արդ, լսի՛ր Տիրոջ պատգամները։ ² Այսպես է ասում Զորությունների Տերը. “Հիմա Իսրայելի դեմ Ամաղեկի արածների համար վրեժ եմ լուծելու։ Ինչո՞ւ փակեց Իսրայելի ճանապարհը Եգիպտոսից ելքի ժամանակ։ ³ Արդ, գնա՛ և հարվածի՛ր Ամաղեկին ու Հարիմին և ոչնչացրո՛ւ այն ամենը, ինչ նրանց է պատկանում։ Նրանցից ոչ ոք չպետք է փրկվի։ Կկոտորես նրանց ու կոչնչացնես բոլորին՝ տղամարդ թե կին, երեխա թե կաթնակեր մանուկ, արջառ ու ոչխար, ուղտ ու էշ”»։ ⁴ Սավուղը հրաման տվեց ժողովրդին և հաշվառում անցկացրեց Աղիմում։ Չորս հարյուր հազարանոց հետևակ զորք կար, երեսուն հազարանոց հետևակ զորք էլ՝ Հուդայից։ ⁵ Սավուղը եկավ մինչև Ամաղեկի քաղաքները, և բանակը դարանամուտ եղավ հեղեղատում։ ⁶ Սավուղն ասաց կինեցիներին. «Խո՛ւյս տվեք, հեռացե՛ք ամաղեկացիներից, որ ձեզ էլ նրանց հետ չկոտորեմ, քանի որ Եգիպտոսից ելնելու ժամանակ բարյացակամ եք եղել Իսրայելի որդիների հանդեպ»։ Եվ կինեցիները Ամաղեկի զորքից հեռացան։ ⁷ Սավուղը Ամաղեկի զորքին ջախջախեց Եվիլատից մինչև Սուր, որը գտնվում է Եգիպտոսի դիմաց։ ⁸ Նա կենդանի բռնեց Ամաղեկի թագավոր Ագագին, իսկ Հարիմի ամբողջ ազգը սրի քաշեցին։ ⁹ Սավուղը և ողջ ժողովուրդը կենդանի թողեցին Ագագին, խնայեցին ընտիր ոչխարների ու արջառների հոտերը, պտղատու և խաղողի այգիները, ամեն տեսակ բարիքները, չուզեցին ոչնչացնել դրանք, իսկ ինչ որ անարժեք ու անպետք էր, բնաջնջեցին։

Սավուղը մերժվում է թագավորական աստիճանից

¹⁰ Տերը խոսքն ուղղեց Սամուելին՝ ասելով. ¹¹ «Զղջացել եմ, որ թագավոր դարձրի Սավուղին, քանի որ ինձնից շուռ եկավ և իմ խոսքերը չպահեց»։ Սամուելը տրտմեց և ամբողջ գիշերն աղոթեց Տիրոջը։ ¹² Սամուելն առավոտ կանուխ գնաց՝ հանդիպելու Իսրայելին։ Սամուելին հայտնեցին՝ ասելով. «Սավուղը եկել է Կարմելոս, իր համար հուշարձան կանգնեցրել և մարտակառքերը հետ դարձնելով՝ իջել է Գաղգաղա»։

¹³ Սամուելը եկավ Սավուղի մոտ, երբ նա Տիրոջը ողջակեզներ էր մատուցում Ամաղեկից բերած ավարի լավագույն մասից։ Երբ Սամուելը եկավ Սավուղի մոտ, Սավուղն ասաց նրան. «Ո՜վ Տիրոջ օրհնյալ, կատարեցի այն, ինչ Տերն ասել է»։ ¹⁴ Սամուելն ասաց. «Հապա ի՞նչ է ոչխարների այս ձայնը, որ իմ ականջին է հասնում, և արջառների ձայնը, որ լսում եմ»։ ¹⁵ Սավուղն ասաց. «Ամաղեկի երկրից բերեցի, քանի որ ժողովուրդն ընտիր ոչխարներն ու արջառները ողջ պահեց, որ զոհ մատուցեն Տիրոջը՝ քո Աստծուն, իսկ մյուսները կոտորեցի»։ ¹⁶ Սամուելը Սավուղին ասաց. «Լսի՛ր, քեզ հայտնեմ այն, ինչ այս գիշեր Տերն ասաց ինձ»։ Նա ասաց. «Խոսի՛ր»։ ¹⁷ Եվ Սամուելն ասաց Սավուղին. «Չէ՞ որ դու փոքր էիր, երբ Իսրայելի ազգատոհմերի զորավար դարձար, և Տերը քեզ Իսրայելի վրա թագավոր օծեց։ ¹⁸ Տերը քեզ ճանապարհ դրեց՝ ասելով. “Գնա՛ և իմ դեմ մեղանչած Ամաղեկի ժողովրդին կոտորի՛ր, պատերա՛զմ մղիր, մինչև որ բնաջնջես նրանց”։ ¹⁹ Ինչո՞ւ չլսեցիր Տիրոջ ձայնը և ավարը գերադասելով՝ չարիք գործեցիր Տիրոջ առջև»։ ²⁰ Սավուղը Սամուելին ասաց. «Ես անսացի ժողովրդի ձայնին և գնացի այն ճանապարհով, որով Տերն էր առաքել ինձ. Ամաղեկի թագավոր Ագագին գերեցի, իսկ Ամաղեկի ժողովրդին կոտորեցի։ ²¹ Ժողովուրդն այդ ավարից առավ ընտիր ոչխարների հոտեր ու արջառներ, որպեսզի Գաղգաղայում մորթելով՝ Տիրոջ՝ Աստծու համար զոհեր մատուցի»։ ²² Սամուելն ասաց. «Մի՞թե Տիրոջ համար ավելի հաճելի են ողջակեզներն ու զոհերը, քան Տիրոջ ձայնին անսալը։ Հնազանդությունն ավելի լավ է, քան ընտիր զոհը, և անսալն ավելի լավ է, քան խոյերի ճարպը։ ²³ Անհնազանդությունը կախարդության նման մեղք է, և ինքնավստահությունը՝ կռապաշտության նման։ Քանի որ արհամարհեցիր Տիրոջ խոսքը, Տերն էլ քեզ կմերժի իբրև Իսրայելի թագավորի»։

²⁴ Սավուղը Սամուելին ասաց. «Մեղանչեցի՝ զանց անելով Տիրոջ և քո խոսքերը, որովհետև վախեցա ժողովրդից և նրա ձայնին անսացի։ ²⁵ Արդ, ների՛ր իմ մեղքը, ինձ հե՛տ եղիր, և կերկրպագեմ Տիրոջը՝ քո Աստծուն»։ ²⁶ Սամուելը Սավուղին ասաց. «Ես քեզ հետ չեմ լինի, քանի որ արհամարհեցիր Տիրոջ խոսքը, և Տերը քեզ մերժելու է իբրև Իսրայելի թագավորի»։ ²⁷ Սամուելը երեսը դարձրեց, որ գնա, բայց Սավուղը բռնեց նրա թիկնոցի ծայրից ու պատռեց այն։ ²⁸ Սամուելն ասաց նրան. «Տերն այսօր քո վրայից վերցրեց Իսրայելի թագավորությունը և այն տալու է քեզանից լավ մեկին։ ²⁹ Իսրայելը երկու մասի է բաժանվելու, և Տերն իր խոսքից հետ չի դառնալու ու չի զղջալու, քանի որ նա մարդ չէ, որ զղջա։ Նա սպառնացող է»։ ³⁰ Սավուղն ասաց. «Մեղանչել եմ, սակայն հիմա ժողովրդի ծերերի ու Իսրայելի առաջ ինձ պատվի՛ր, եղի՛ր ինձ հետ, և ես կերկրպագեմ Տիրոջը՝ քո Աստծուն»։ ³¹ Սամուելը Սավուղի հետ վերադարձավ, և Սավուղը Տիրոջը երկրպագություն արեց։

³² Սամուելն ասաց. «Ինձ մո՛տ բերեք Ամաղեկի թագավոր Ագագին»։ Ագագը դողալով մոտեցավ և ասաց. «Մի՞թե այսպես դառն է մահը»։ ³³ Սամուելն ասաց Ագագին. «Ինչպես որ քո սուրը կանանց որդեկորույս դարձրեց, նույն ձևով էլ որդեկորույս կլինի քո մայրը կանանց մեջ»։ Եվ Սամուելն Ագագին սպանեց Տիրոջ առջև՝ Գաղգաղայում։

³⁴ Սամուելը գնաց Արիմաթեմ, իսկ Սավուղը ելավ գնաց իր տունը՝ Գաբաա։ ³⁵ Սամուելը մինչև իր մահվան օրը այլևս չտեսավ Սավուղին, քանի որ Սամուելը Սավուղի համար սուգ էր անում։ Եվ Տերը զղջացել էր, որ Սավուղին թագավոր էր դարձրել Իսրայելի վրա։

16

Դավիթը՝ թագավոր

¹ Տերը Սամուելին ասաց. «Մինչև ե՞րբ պետք է սգաս Սավուղին, ես նրան զրկել եմ Իսրայելի վրա թագավորելուց։ Քո եղջյուրը ձիթայուղո՛վ լցրու, ե՛կ քեզ առաքեմ Բեթղեհեմ՝ Հեսսեի մոտ, քանի որ նրա որդիներից մեկին եմ թագավոր ընտրել»։ ² Սամուելն ասաց. «Ինչպե՞ս գնամ։ Սավուղը կլսի և ինձ կսպանի»։ Տերն ասաց. «Դու քեզ հետ մի երի՛նջ վերցրու և ասա՛, թե Տիրոջը զոհելու համար ես եկել։ ³ Եվ Հեսսեին հրավիրի՛ր զոհաբերությանը, ու ես քեզ ցույց կտամ, թե ի՛նչ պետք է անես, և կօծես նրան, որին քեզ կասեմ»։ ⁴ Սամուելն արեց այն, ինչ Տերն ասել էր, ու եկավ Բեթղեհեմ։ Քաղաքի ծերերը զարհուրած դիմավորեցին նրան՝ ասելով. «Քո մուտքը խաղաղությա՞մբ է, ո՜վ տեսանող»։ ⁵ Նա ասաց. «Խաղաղությամբ է, Տիրոջը զոհ մատուցելու եմ եկել։ Մաքրվե՛ք ու ինձ հետ ուրա՛խ եղեք այսօր»։ Նա Հեսսեին ու նրա որդիներին մաքրեց և զոհաբերության հրավիրեց նրանց։ ⁶ Երբ նրանք մտնում էին, տեսավ Եղիաբին ու ասաց. «Տիրոջ առջև է իր օծյալը»։ ⁷ Տերն ասաց Սամուելին. «Նրա տեսքին մի՛ նայիր և ոչ էլ հասակի բարձրությանը, քանի որ ես նրան չեմ ընտրել։ Աստված այնպես չի նկատում, ինչպես նկատում են մարդիկ. մարդիկ երեսին են նայում, իսկ Աստված՝ սրտին»։ ⁸ Հեսսեն կանչեց Ամինադաբին ու նրան անցկացրեց Սամուելի առջևից։ Սամուելն ասաց. «Ոչ էլ սրան է Տերն ընտրել»։ ⁹ Հեսսեն Սամուելի առջևից անցկացրեց Սամաային, և Սամուելն ասաց. «Ոչ էլ սրան է ընտրել Տերը»։ ¹⁰ Հեսսեն Սամուելի առջևից անցկացրեց իր յոթ որդիներին էլ, բայց Սամուելն ասաց Հեսսեին. «Տերը դրանցից որևէ մեկին չի ընտրել»։ ¹¹ Սամուելը Հեսսեին ասաց. «Այսքա՞ն են քո որդիները»։ Հեսսեն ասաց. «Մի փոքրիկ տղա էլ ունեմ, որ ոչխարներն է արածեցնում»։ Սամուելն ասաց Հեսսեին. «Մա՛րդ ուղարկիր ու բերե՛լ տուր նրան, մենք սեղան չենք նստի, մինչև նա այստեղ չգա»։ ¹² Հեսսեն մարդ ուղարկեց ու բերել տվեց նրան։ Նա խարտյաշ էր, սիրուն աչքերով ու Տիրոջ համար գեղանի տեսքով։ Տերը Սամուելին ասաց. «Վե՛ր կաց, օծի՛ր Դավթին, քանի որ նա է լավը»։ ¹³ Սամուելը ձիթայուղով լի եղջյուրն առավ և իր եղբայրների մեջ օծեց նրան։ Այդ օրվանից ի վեր Տիրոջ հոգին շարժվեց Դավթի վրա։ Սամուելը վեր կացավ ու գնաց Արիմաթեմ։

Դավիթը քնար է նվագում Սավուղի պալատում

¹⁴ Տիրոջ հոգին վերացավ Սավուղից, և Տիրոջ կողմից առաքված մի չար ոգի նեղում էր նրան։ ¹⁵ Ծառաները նրան ասացին. «Ահա Տիրոջ կողմից առաքված չար ոգին խեղդում է քեզ։ ¹⁶ Թող քո առաջ կանգնած ծառաներդ խոսեն և խնդրեն մեր Տիրոջը, որ գտնեն մի մարդու, որ նվագել գիտի, և հենց որ Աստծուց ուղարկված չար ոգին քեզ վրա հասնի, նա քնար նվագելով երգի. դա քեզ հաճելի կլինի և կհանգստացնի քեզ»։ ¹⁷ Սավուղն իր ծառաներին ասաց. «Գտե՛ք մի մարդու, որ լավ է երգում, և նրան բերե՛ք ինձ մոտ»։ ¹⁸ Ծառաներից մեկն ասաց. «Ես տեսել եմ բեթղեհեմացի Հեսսեի տղային, որ գիտի սաղմոսել, շնորհալի մարդ է ու պատերազմիկ, իմաստուն ու ճարտասան, գեղեցիկ տեսքով։ Եվ Տերը նրա հետ է»։ ¹⁹ Սավուղը պատգամավորներ ուղարկելով Հեսսեի մոտ՝ ասաց. «Ինձ մո՛տ ուղարկիր քո որդի Դավթին՝ քո հոտի պահապանին»։ ²⁰ Հեսսեն առավ մի արդու հաց, մի տիկ գինի ու մի ուլ այծերից և իր որդի Դավթի հետ ուղարկեց Սավուղին։ ²¹ Դավիթը եկավ Սավուղի մոտ և սպասարկում էր նրան։ Սավուղը նրան շատ սիրեց, և նա նրա կապարճակիրը դարձավ։ ²² Սավուղը Հեսսեին լուր ուղարկեց՝ ասելով. «Դավիթը թող ինձ մոտ մնա, քանի որ իմ առաջ շնորհ գտավ»։ ²³ Եվ երբ չար ոգին իջնում էր Սավուղի վրա, Դավիթն առնում էր քնարը և նվագում իր ձեռքով, հանգստացնում էր Սավուղին։ Սավուղը հանգստանում էր, և չար ոգին նրանից հեռանում էր։

17

Դավիթը հաղթում է Գողիաթին

¹ Այլազգիներն իրենց զորքը հավաքեցին, որ պատերազմեն։ Նրանք հավաքվեցին Հուդայի երկրի Սոկքով վայրում և բանակեցին Սոկքովի ու Ափեսդոմի Ազեկա բնակավայրի միջև։ ² Սավուղն ու Իսրայելի այրերը նույնպես համախմբվեցին հովիտներում և ռազմի ճակատ կազմեցին այլազգիների դեմ։ ³ Այլազգիները լեռան այն կողմում էին, իսկ Իսրայելը լեռան այս կողմում էր. նրանց միջև հովիտ կար։ ⁴ Այլազգիների ճակատից գեթացի մի հսկա մարդ դուրս եկավ, որի անունն էր Գողիաթ։ Նրա հասակի բարձրությունը վեց կանգուն և մեկ թիզ էր, ⁵ գլխին սաղավարտ կար, հագել էր պղնձե և երկաթե շղթայագործ մի զրահ, որի քաշը հինգ հազար սիկղ էր։ ⁶ Նրա ազդրերին պղնձե սռնապաններ կային, իսկ թիկունքին՝ պղնձե վահան։ ⁷ Նրա գեղարդի բունը նման էր ոստայնանկների գլանի, իսկ նրա երկաթե տեգը վեց հարյուր սիկղ էր կշռում։ Նրա զինակիրն իր առջևից էր ընթանում։ ⁸ Նա եկավ կանգնեց, ձայն տվեց Իսրայելի բանակին՝ ասելով. «Ինչո՞ւ եք մեր դեմ ելել պատերազմելու։ Չէ՞ որ ես այլազգի եմ, իսկ դուք՝ եբրայեցիներդ, Սավուղի ծառաները։ Ձեր միջից մի մա՛րդ ընտրեք, որ իմ դեմ ելնի։ ⁹ Եթե նա կարողանա կռվել իմ դեմ և ինձ հարվածել, մենք ձեզ ծառա կլինենք, իսկ եթե ես հաղթեմ ու հարվածեմ նրան, դո՛ւք մեզ ծառա կլինեք ու մեզ կծառայեք»։ ¹⁰ Այլազգին ավելացրեց. «Ահավասիկ ես այսօր Իսրայելի զորքը խայտառակելու եմ։ Մի մա՛րդ տվեք, և ես ու նա երկուսով մենամարտենք»։ ¹¹ Երբ Սավուղն ու ողջ Իսրայելը լսեցին այլազգու խոսքերը, ահաբեկվեցին, շատ վախեցան։

¹² Հուդայի երկրի Բեթղեհեմ քաղաքից եփրաթացի մի մարդու որդի կար Հեսսե անունով։ Հեսսեն ութ որդի ուներ։ Սավուղի օրոք նա ծերության հասած մարդ էր։ ¹³ Հեսսեի երեք ավագ որդիները Սավուղի հետ պատերազմի էին գնացել։ Պատերազմի գնացած որդիների անուններն էին. անդրանիկ որդունը՝ Եղիաբ, երկրորդինը՝ Ամինադաբ և երրորդինը՝ Սամաա։ ¹⁴ Դավիթը կրտսերն էր, իսկ երեք ավագ որդիները գնացել էին Սավուղի հետ։ ¹⁵ Դավիթը Սավուղի մոտից վերադարձավ, որ Բեթղեհեմում իր հոր ոչխարներն արածեցնի։

¹⁶ Այն այլազգին առավոտ կանուխ գալիս արձանացած կանգնում էր ու երեկոյան հետ գնում։ Եվ այսպես քառասուն օր։

¹⁷ Հեսսեն ասաց իր որդի Դավթին. «Վերցրո՛ւ այս մեկ արդու խարկած ցորենը և տասը նկանակն ու շտապի՛ր բանակ, տո՛ւր քո եղբայրներին։ ¹⁸ Այս տասը գլուխ պանիրը տո՛ւր հազարապետին։ Նաև իմացի՛ր, թե եղբայրներդ ողջ-առո՞ղջ են, և հարցրո՛ւ, թե որևէ բանի պետք ունե՞ն»։ ¹⁹ Սավուղը և Իսրայելի բոլոր այրերը Կաղնու հովտում էին հավաքվել, որ այլազգիների դեմ պատերազմեն։

²⁰ Դավիթը վաղ առավոտյան վեր կացավ և ոչխարները թողնելով հովիվներին՝ այդ բաներն առավ ու գնաց, ինչպես Հեսսեն էր հրամայել իրեն։ Երբ հասավ տափարակ տեղը, զորքերն արդեն շարվել էին՝ ճակատ կազմելու, և պատերազմի աղաղակներ էին արձակում։ ²¹ Իսրայելացիները և այլազգիները միմյանց դեմ էին կանգնել ճակատ առ ճակատ։ ²² Դավիթն իր բերածները հանձնեց բանակի մթերապահին և վազեց դեպի զորքն ու հետաքրքրվեց իր եղբայրների առողջությամբ։ ²³ Մինչ նա խոսում էր, այլազգիների ճակատից դուրս եկավ գեթացի այն փղշտացին, որի անունն էր Գողիաթ։ Նա կրկնեց նույն խոսքերը, և Դավիթը լսեց դրանք։ ²⁴ Եվ ողջ Իսրայելը, այդ մարդուն տեսնելով, նրա առաջից փախավ՝ սաստիկ վախենալով։ ²⁵ Եվ մի իսրայելացի ասաց. «Տեսա՞ք այս մարդուն, որն Իսրայելին խայտառակելու է դուրս եկել։ Ով սպանի նրան, արքան մեծ հարստությամբ կլիացնի նրան, իր աղջկան նրան կնության կտա և նրա հոր տունն Իսրայելի մեջ ազատ կդարձնի»։ ²⁶ Դավիթն իրեն շրջապատող մարդկանց ասաց. «Ի՞նչ կանեն այն մարդուն, որ այլազգուն սպանի և Իսրայելի նախատինքը վերացնի։ Ո՞վ է այդ անթլփատ այլազգին, որը կենդանի Աստծու զորքին վիրավորանք է հասցնում»։ ²⁷ Եվ ժողովուրդը, նույն խոսքերը կրկնելով, նրան ասաց. «Այսպես ու այսպես կլինի այն մարդը, որ կսպանի նրան»։

²⁸ Երբ նրա ավագ եղբայր Եղիաբը լսեց նրա զրույցը այդ մարդկանց հետ, Դավթի վրա խիստ բարկանալով՝ ասաց. «Դու ինչո՞ւ ես եկել այստեղ, անապատում ո՞ւմ ես հանձնել այն փոքրաթիվ ոչխարները։ Ես գիտեմ քո մեծամտությունը և սրտի չարությունը, դու պատերազմը դիտելու համար ես եկել»։ ²⁹ Դավիթն ասաց. «Ի՞նչ եմ արել, բան էր՝ ասացինք»։ ³⁰ Եվ նրանից հեռանալով՝ նույն հարցը տվեց, և մարդիկ նույն խոսքերով պատասխան տվեցին։

³¹ Դավթի խոսակցությունը հայտնի դարձավ, և երբ այդ մասին պատմեցին Սավուղին, նա կանչեց իր մոտ նրան։ ³² Դավիթն ասաց Սավուղին. «Գողիաթի պատճառով իմ տիրոջ սիրտը թող չկոտրվի։ ³³ Քո ծառան կգնա ու կմենամարտի այդ այլազգու դեմ»։ Սավուղը Դավթին ասաց. «Գուցե չկարողանաս կռվել այլազգու դեմ, քանի որ պատանի ես, իսկ նա մանկությունից ի վեր պատրաստվել է պատերազմող մարդ լինելու»։ ³⁴ Դավիթը Սավուղին ասաց. «Քո ծառան իր հոր ոչխարներն էր արածեցնում, և երբ առյուծ կամ արջ էր գալիս և հոտից ոչխար էր տանում, ³⁵ ես նրան հետապնդում էի, զարկում և նրա երախից կորզում ոչխարը։ Իսկ եթե ինձ վրա էր հարձակվում, բռնում էի նրա կոկորդից, հարվածում ու սպանում նրան։ ³⁶ Քո ծառան առյուծ էլ է սատկեցրել, արջ էլ։ Նույն կերպ կվարվեմ ես այդ անթլփատ այլազգու հետ։ Արդ, ինչո՞ւ չգնամ, չսպանեմ նրան և այսօր ևեթ վերացնեմ Իսրայելի նախատինքը։ Ո՞վ է այդ անթլփատը, որ կենդանի Աստծու զորքին նախատեց»։ ³⁷ Դավիթն ասաց. «Եթե Տերը ինձ փրկել է առյուծի ու արջի ճանկերից, ինձ կփրկի նաև այդ անթլփատ այլազգու ձեռքից»։ Սավուղն ասաց. «Գնա՛, Տերը քեզ հետ թող լինի»։ ³⁸ Սավուղը Դավթի ուսերին գցեց իր թիկնոցը, գլխին դրեց պղնձե սաղավարտը և հագցրեց իր զրահները։ ³⁹ Դավիթը նրա սուրը կապեց թիկնոցի վրայից և քայլելիս մեկ-երկու անգամ սայթաքեց։ Դավիթը Սավուղին ասաց. «Սրանցով չեմ կարող քայլել, որովհետև սովոր չեմ», և զրահը նրա վրայից հանեցին։ ⁴⁰ Նա ձեռքն առավ ցուպը և հեղեղատից հինգ ողորկ քարեր ընտրելով՝ դրեց իր հովվական տոպրակի մեջ, որի մեջ սովոր էր քարեր հավաքել և պարսատիկն իր ձեռքն առնելով՝ գնաց դեպի այլազգին։ ⁴¹ Այլազգին նույնպես եկավ ու մոտեցավ Դավթին։ Նրա վահանակիրն իր առջևից էր գնում։ ⁴² Երբ այլազգին նայեց ու տեսավ Դավթին, արհամարհեց նրան, քանի որ նա մի պատանյակ էր՝ խարտյաշ ու գեղեցիկ աչքերով։ ⁴³ Այլազգին ասաց Դավթին. «Ինչպես թե, մի՞թե ես շուն եմ, որ ցուպով ու քարերով ես գալիս ինձ վրա»։ Դավիթն ասաց. «Դու շնից էլ վատթար ես»։ Եվ այլազգին իր աստվածներով նզովեց Դավթին ⁴⁴ և ասաց նրան. «Ե՛կ ինձ մոտ, և ես քո մարմինը կտամ երկնքի թռչուններին ու երկրի գազաններին»։ ⁴⁵ Դավիթն ասաց այլազգուն. «Դու ինձ վրա ես հարձակվում սրով, գեղարդով և վահանով, իսկ ես քեզ վրա եմ հարձակվում Իսրայելի զորքի Զորությունների Տիրոջ անունով, Իսրայելի, որին դու այսօր նախատեցիր։ ⁴⁶ Տերը քեզ այսօր իմ ձեռքը կմատնի, ես կսպանեմ քեզ, քո գլուխը կկտրեմ, քո լեշն ու այլազգիների բանակի դիակներն այսօր երկնքի թռչուններին ու երկրի գազաններին կտամ։ Ամբողջ երկիրը կիմանա, որ Աստված գոյություն ունի Իսրայելի մեջ, ⁴⁷ այս ամբողջ բազմությունը կիմանա, որ Տերը սրով ու գեղարդով չի փրկում, քանի որ սա Տիրոջ պատերազմն է, և Տերը ձեզ մեր ձեռքը պիտի մատնի»։

⁴⁸ Այլազգին ելավ ու մոտեցավ Դավթին, իսկ Դավիթը շտապեց և այլազգու դեմ ճակատելու գնաց։ ⁴⁹ Դավիթը ձեռքը մտցրեց տոպրակի մեջ, այնտեղից մի քար առավ ու այն պարսատիկով նետելով՝ հարվածեց այլազգու ճակատին։ Քարը, սաղավարտը ծակելով, մտավ ճակատի մեջ, և Գողիաթը երեսնիվայր ընկավ գետնին։ ⁵⁰ Այսպես Դավիթը պարսատիկով ու քարով հաղթեց այլազգուն, հարվածեց ու սպանեց նրան։ Սակայն Դավթի ձեռքին սուր չկար։ ⁵¹ Դավիթը վազեց, կանգնեց այլազգու վրա, բռնեց նրա սուրը, քաշեց հանեց պատյանից, սպանեց ու գլխատեց նրան։ Երբ այլազգիները տեսան, թե իրենց հզոր մարդը մեռավ, փախան։ ⁵² Իսրայելի ու Հուդայի մարդիկ վեր կացան, աղաղակեցին, հարձակվեցին ու հետապնդեցին նրանց մինչև Գեթի մուտքը և Ասկաղոնի դարպասները։ Վիրավոր այլազգիներն ընկան ճանապարհների վրա մինչև Գեթի ու Ակկարոնի դարպասները։ ⁵³ Իսրայելի այրերը այլազգիներին հալածելուց հետո վերադարձան ու կողոպտեցին նրանց բանակատեղին։ ⁵⁴ Դավիթը վերցրեց այլազգու գլուխը և այն բերեց Երուսաղեմ, իսկ նրա զենքերը դրեց իր վրանում։

Դավիթը և Հովնաթանը

⁵⁵ Երբ Սավուղը տեսավ այլազգու դեմ ելած Դավթին, ասաց զորքի հրամանատար Աբեններին. «Աբեննե՛ր, ո՞ւմ որդին է այս պատանյակը»։ ⁵⁶ Աբեններն ասաց. «Կենդանի է քո անձը, արքա՛, չգիտեմ»։ Արքան ասաց. «Հարցրո՛ւ և իմացի՛ր, թե ո՛ւմ որդին է այդ պատանյակը»։ ⁵⁷ Երբ Դավիթը վերադարձավ այլազգուն սպանելուց հետո, Աբենները նրան տարավ Սավուղի մոտ։ Այլազգու գլուխը Դավթի ձեռքին էր։ ⁵⁸ Սավուղը նրան հարցրեց. «Ո՞ւմ որդին ես դու, պատանի՛»։ Դավիթն ասաց. «Քո ծառա Հեսսե Բեթղեհեմացու որդին եմ»։

18

¹ Երբ Դավիթը Սավուղի հետ խոսակցությունը վերջացրեց, Հովնաթանը հոգով կապվեց Դավթին։ Հովնաթանը նրան իր անձի պես սիրեց։ ² Նույն օրը Սավուղն իր մոտ վերցրեց նրան ու չթողեց, որ նա վերադառնա իր հոր տունը։ ³ Հովնաթանը Դավթին ուխտեց նրան իր անձի պես սիրել։ ⁴ Հովնաթանն իր թիկնոցը հանեց ու տվեց Դավթին, նաև իր զինվորական համազգեստը, նույնիսկ իր սուրը, աղեղն ու գոտին։ ⁵ Դավիթը գնում էր ամեն տեղ, ուր Սավուղն ուղարկում էր նրան, և նա իմաստնանում էր։ Սավուղը նրան պատերազմիկների առաջնորդ կարգեց, և դա ամբողջ ժողովրդի, ինչպես նաև Սավուղի ծառաների աչքին հաճելի եղավ։

Սավուղը խանդում է Դավթին

⁶ Երբ նրանք պատերազմից գալիս էին, և Դավիթը այլազգուն սպանելուց հետո վերադառնում էր, Իսրայելի բոլոր քաղաքներից պարողները երգերով ու պարերով դիմավորում էին Դավթին, թմբուկներով, ուրախության բացականչություններով ու ծնծղաներով, Սավուղ արքայի ներկայությամբ։ ⁷ Պարող կանայք երգելով ասում էին.

«Սավուղը հազար մարդ սպանեց,

իսկ Դավիթը բյուր մարդկանց սպանեց»։

⁸ Սավուղը զայրացավ այդ խոսքերի համար և ասաց. «Բյուրը Դավթին վերագրեցին, իսկ ինձ՝ հազարը։ Արդ, նրան ի՞նչ է պակասում, բացի թագավորությունից»։ ⁹ Այն օրից Սավուղը ծուռ աչքով էր նայում Դավթին։

¹⁰ Հետևյալ օրը Աստծուց ուղարկված չար ոգին պատեց Սավուղին, և նա սկսեց մարգարեանալ իր տան մեջ։ Դավիթը, ինչպես միշտ, իր ձեռքով քնար էր նվագում, իսկ Սավուղի ձեռքին գեղարդ կար։ ¹¹ Նա իր մտքում ասաց. «Գեղարդով հարվածեմ ու Դավթին պատին գամեմ»։ Սավուղը նետեց գեղարդը, բայց Դավիթը երկու անգամ նրանից խույս տվեց։ ¹² Սավուղը Դավթի ներկայությունից վախենում էր, որովհետև Տերը նրա հետ էր, իսկ Սավուղից հեռացել էր։ ¹³ Սավուղը, նրան հազարապետ կարգելով, իր մոտից հեռացրեց, և Դավիթը ժողովրդի մեջ ելումուտ էր անում։ ¹⁴ Դավիթն ամեն գործում խելամիտ էր, և Տերը նրա հետ էր։ ¹⁵ Սավուղը տեսնելով, որ նա չափազանց իմաստուն է, երկյուղ էր կրում նրանից։ ¹⁶ Ողջ Իսրայելն ու Հուդան սիրում էին Դավթին, քանի որ նա էր նրանց մոտ ելումուտ անողը։

¹⁷ Սավուղը Դավթին ասաց. «Ահա իմ մեծ աղջկան՝ Մերոբին, քեզ կնության եմ տալու, միայն թե դու ինձ քաջաբար ծառայի՛ր ու Տիրոջ պատերազմները վարի՛ր»։ Սավուղը մտածում էր. «Թող իմ ձեռքը նրա դեմ չլինի, այլ թող այլազգիների ձեռքը նրան հարվածի»։ ¹⁸ Դավիթը Սավուղին ասաց. «Ո՞վ եմ ես, ի՞նչ է իմ ապրուստը, և ի՞նչ է իմ հոր ազգատոհմն Իսրայելի մեջ, որ արքային փեսա դառնամ»։ ¹⁹ Եվ այդ ժամանակ, երբ Սավուղի դուստր Մերոբը կնության պիտի տրվեր Դավթին, մոլաթացի Եդրիելին կնության տրվեց։

Դավիթն ամուսնանում է Սավուղի աղջկա հետ

²⁰ Սավուղի դուստր Մեղքողը սիրեց Դավթին, ու երբ այդ մասին հայտնեցին Սավուղին, դա նրան հաճելի թվաց։ ²¹ Սավուղը մտածեց. «Նրան կնության տամ, որ նրա համար որոգայթ դառնա»։ Եվ այլազգիների ձեռքը Սավուղի վրա էր։ Այդպիսով Սավուղը երկրորդ անգամ ասաց Դավթին. «Այսօր դու ինձ փեսա կդառնաս»։ ²² Սավուղն իր ծառաներին պատվիրեց՝ ասելով. «Դավթի հետ ծածուկ խոսելով՝ ասացե՛ք. “Արքան քեզ հավանել է, և նրա բոլոր մարդիկ սիրում են քեզ, ուստի փեսա՛ դարձիր արքային”»։ ²³ Սավուղի ծառաներն այս խոսքերը Դավթի ականջին հասցրին։ Դավիթն ասաց. «Ձեզ թվում է հե՞շտ բան է արքային փեսա դառնալը։ Ես մի խեղճ ու աննշան մարդ եմ»։ ²⁴ Սավուղի ծառաները հաղորդեցին նրան Դավթի պատասխանը։ Սավուղն ասաց. «Այսպե՛ս ասեք Դավթին. ²⁵ “Արքան գլխագին չի ուզում, այլ միայն այլազգիների հարյուր անթլփատություն, որպեսզի արքայի թշնամիներից վրեժ լուծի”»։ Սավուղը մտածում էր Դավթին այլազգիների ձեռքը մատնել։ ²⁶ Սավուղի ծառաներն այս խոսքերը հաղորդեցին Դավթին, ու Դավթին հաճելի թվաց արքային փեսա դառնալը։ ²⁷ Պայմանավորված ժամկետը դեռ չէր լրացել, որ Դավիթն իր մարդկանցով վեր կացավ և այլազգիներից հարյուր մարդ սպանեց, բերեց նրանց չթլփատված անդամները, լցրեց արքայի առջև և արքային փեսա դարձավ. Սավուղն իր դուստր Մեղքողին նրան կնության տվեց։ ²⁸ Սակայն երբ Սավուղը տեսավ ու հասկացավ, որ Տերը Դավթի հետ է, և ամբողջ Իսրայելը սիրում է նրան, ²⁹ սկսեց առավել ևս վախենալ Դավթից։ Եվ Սավուղը միշտ թշնամությամբ էր վերաբերվում Դավթին։

³⁰ Այլազգիների իշխանները ոտքի ելան. նրանք բազում անգամներ հարձակվեցին, բայց ամեն անգամ Դավիթն ավելի խորագետ էր գործում, քան Սավուղի բոլոր ծառաները, ուստի նրա անունը գնալով ավելի էր փառավորվում։

19

Հովնաթանը ստանձնում է Դավթի պաշտպանությունը

¹ Սավուղը խոսեց իր Հովնաթան որդու և իր բոլոր ծառաների հետ՝ Դավթին սպանելու համար։ Սավուղի որդի Հովնաթանը շատ էր սիրում Դավթին ² և այս բանը հաղորդեց նրան՝ ասելով. «Իմ հայրը մտադիր է քեզ սպանել, ուստի վաղն առավոտյան զգո՛ւյշ եղիր, թաքնվի՛ր ու նստի՛ր թաքստոցում։ ³ Ես դուրս կգամ ու կկանգնեմ հորս մոտ, այն դաշտում, որտեղ դու կլինես։ Ես իմ հոր հետ կխոսեմ քո մասին, կտեսնեմ, թե ի՛նչ կասի և կհայտնեմ քեզ»։ ⁴ Հովնաթանը, Դավթի մասին նպաստավոր խոսքեր ասելով իր հորը՝ Սավուղին, ավելացրեց. «Թող արքան իր ծառա Դավթի դեմ մեղք չգործի, քանի որ նա ոչ մի մեղք չի գործել քո դեմ։ Նա քո նկատմամբ բարի շատ գործեր է կատարել։ ⁵ Նա, իր անձը վտանգի ենթարկելով, սպանեց այլազգուն՝ Գողիաթին, Տերը մեծ փրկություն շնորհեց, և այդ տեսնելով՝ ամբողջ Իսրայելն ուրախացավ։ Ինչո՞ւ Դավթին իզուր սպանելով անմեղ արյան մեղքի տակ մտնես»։ ⁶ Սավուղն անսաց Հովնաթանի խոսքին ու երդվեց՝ ասելով. «Կենդանի է Տերը. նա չպիտի մեռնի»։ ⁷ Հովնաթանը կանչեց Դավթին և հաղորդեց նրան այս բոլոր խոսքերը։ Հովնաթանը Դավթին տարավ Սավուղի մոտ, և նա Դավթին վերաբերվեց այնպես, ինչպես նախկինում։

⁸ Դարձյալ պատերազմ եղավ, ու Դավիթը դուրս եկավ այլազգիների դեմ պատերազմի։ Նա շատ մեծ ջարդ տվեց նրանց, և նրանք փախան նրա առջևից։ ⁹ Տիրոջ չար ոգին իջավ Սավուղի վրա. նա, գեղարդը ձեռքին, իր տանը նստած էր, իսկ Դավիթը քնար էր նվագում։ ¹⁰ Սավուղը փորձեց Դավթին գեղարդով պատին գամել, սակայն նա Սավուղի հարվածից խույս տվեց. գեղարդը պատին խրվեց, իսկ Դավիթը փախչելով ազատվեց։

¹¹ Այդ գիշեր Սավուղը մարդ ուղարկեց Դավթի տուն, որ հետևեն և առավոտյան սպանեն նրան։ Դավթի կին Մեղքողը, այդ մասին նրան հայտնելով, ասաց. «Եթե այս գիշեր ինքդ քեզ չփրկես, վաղը կմեռնես»։ ¹² Մեղքողը Դավթին պատուհանից իջեցրեց, և նա փախչելով փրկվեց։ ¹³ Մեղքողը մի խրտվիլակ բերեց ու դրեց մահճի վրա, նաև այծի լյարդ ու սնարին՝ մազի կծիկ և ծածկոցով ծածկեց։ ¹⁴ Սավուղը մարդ ուղարկեց Դավթին բռնելու. եկան Սավուղին ասացին, թե նա հիվանդ է։ ¹⁵ Դարձյալ մարդ ուղարկեց Դավթի հետևից՝ ասելով. «Մահիճով հանդերձ նրան ինձ մո՛տ բերեք, որ սպանեմ»։ ¹⁶ Մարդիկ եկան և տեսան, որ մահճի մեջ խրտվիլակ էր դրված, այծի լյարդ և սնարին՝ մազի կծիկ։ ¹⁷ Սավուղը Մեղքողին ասաց. «Ինչո՞ւ ինձ այսպես խաբեցիր, իմ թշնամուն բաց թողեցիր, և նա փրկվեց»։ Մեղքողը Սավուղին ասաց. «Նա ասաց. “Արձակի՛ր ինձ, ապա թե ոչ, քեզ կսպանեմ”»։

¹⁸ Դավիթը փախչելով փրկվեց, եկավ Արիմաթեմ՝ Սամուելի մոտ, նրան պատմեց ամեն ինչ, որ Սավուղն արել էր իր նկատմամբ։ Սամուելն ու Դավիթը գնացին ու բնակվեցին Ռամայի Նավաթ բնակավայրում։ ¹⁹ Սավուղին իմաց տվեցին, թե՝ «Ահա Դավիթը Ռամայի Նավաթում է»։ ²⁰ Սավուղը մարդիկ ուղարկեց, որ բռնեն Դավթին, բայց երբ նրանք տեսան մարգարեություն անող մարգարեների ժողովն ու նրանց ղեկավարող Սամուելին, Աստծու հոգին Սավուղի մարդկանց վրա իջավ, և նրանք էլ մարգարեացան։ ²¹ Սավուղին պատմեցին եղելությունը, նա այլ մարդկանց ուղարկեց, և սրանք ևս մարգարեացան։ Սավուղը կրկին ուրիշ մարդկանց ուղարկեց, սրանք էլ մարգարեացան։ ²² Սավուղը խիստ բարկացավ, ինքը գնաց Արիմաթեմ ու հասնելով մինչև Սոկքովի մեծ ջրհորը՝ հարցրեց. «Որտե՞ղ են Սամուելն ու Դավիթը»։ Նրան ասացին. «Ռամայի Նավաթում»։ ²³ Նա այնտեղից գնաց Ռամայի Նավաթ բնակավայրը։ Աստծու հոգին իջավ նրա վրա, և ճանապարհը շարունակելով՝ նա մինչև Ռամայի Նավաթ բնակավայրը հասնելը մարգարեություն էր անում։ ²⁴ Նա հանեց իր զգեստներն ու նրանց առջև մարգարեանում էր։ Ամբողջ գիշեր ու ցերեկ նա մերկ ընկած էր գետնին։ Դրա համար էին ասում. «Սավո՞ւղն էլ է մարգարեների մեջ»։

20

Հովնաթանը կրկին օգնում է Դավթին

¹ Դավիթը Ռամայի Նավաթ բնակավայրից փախավ եկավ Հովնաթանի մոտ ու նրան ասաց. «Ի՞նչ եմ արել, ո՞րն է հանցանքս, ի՞նչ մեղք եմ գործել քո հոր դեմ, որ մտադրվել է ինձ սպանել»։ ² Հովնաթանը նրան ասաց. «Բնավ, դու չպիտի մեռնես։ Հայրս ոչ մի մեծ կամ փոքր գործ չի բռնում առանց ինձ հայտնելու, և ինչպե՞ս կարող է հայրս այդ բանն ինձնից թաքցնել։ Այդպիսի բան չկա»։ ³ Դավիթը Հովնաթանին պատասխան տվեց՝ ասելով. «Քո հայրը լավ գիտի, որ ես շնորհ եմ գտել քո աչքում, և դրա համար էլ կմտածի, որ Հովնաթանն այդ մասին թող չիմանա, թե չէ չի կամենա։ Բայց վկա է Տերը, և վկա ես դու, որ, ինչպես ասացի, ինձ մի քայլ է բաժանում հորդ նյութած մահից»։ ⁴ Հովնաթանն ասաց Դավթին. «Դու ինչ որ կամենաս, ես կանեմ քեզ համար»։ ⁵ Դավիթն ասաց Հովնաթանին. «Ահա վաղը նորալուսին է, ես արքայի հետ չեմ նստի հաց ուտելու, սակայն ինձ թո՛ղ, որ մինչև երրորդ օրվա երեկոն դաշտում թաքնվեմ։ ⁶ Եթե հայրդ իմ մասին հարցնի, կասես. “Դավիթն իր քաղաքը՝ Բեթղեհեմ գնալու արտոնություն խնդրեց ինձանից, քանի որ այնտեղ ամբողջ ազգատոհմի զոհաբերության օրն է”։ ⁷ Եթե ասի՝ “Լավ է”, ապա քո ծառայի համար խաղաղություն է, իսկ եթե խիստ պատասխան տա, իմացի՛ր, որ նա չար գործ է նյութել։ ⁸ Դու ողորմի՛ր քո ծառային, քանի որ ինձ հետ Տիրոջն ուխտ ես դրել, և եթե քո ծառան որևէ հանցանք ունի, դու ինքդ սպանի՛ր ինձ. ինչո՞ւ անպայման ինձ հանձնես քո հոր ձեռքը»։ ⁹ Հովնաթանն ասաց. «Քա՛վ լիցի, եթե ես իմանամ, որ հայրս քո դեմ չարիք է նյութել, քո քաղաքում իսկ քեզ կհայտնեմ»։ ¹⁰ Դավիթն ասաց Հովնաթանին. «Ո՞վ պետք է ինձ հայտնի, թե քո հայրը խստությամբ է պատասխանել»։ ¹¹ Հովնաթանը Դավթին ասաց. «Գնա՛ ու սպասի՛ր դաշտում»։ Եվ երկուսով դաշտ գնացին։

¹² Հովնաթանը Դավթին ասաց. «Տերը՝ Իսրայելի Աստվածը, գիտի, որ երբ իմ հորը երեք անգամ քննելով տեսնեմ, թե նա արդյոք բարի՞ է Դավթի նկատմամբ, թե՞ չար, դաշտ՝ քեզ մոտ, մարդ կուղարկեմ։ ¹³ Տերը Հովնաթանին այսպես և սրանից ավելին թող անի, եթե չբացահայտեմ հորս չարությունը քո հանդեպ և քեզ չհայտնեմ։ Այդ դեպքում քեզ կարձակեմ, որ գնաս խաղաղությամբ, և Տերը քեզ հետ լինի, ինչպես իմ հոր հետ էր։ ¹⁴ Եվ քանի դեռ ես կենդանի եմ, դու ինձ գթասրտությո՛ւն ցույց տուր. եթե մեռնեմ, ¹⁵ քո գթասրտությունը իմ տնից չկտրես հավիտյան։ Նույնիսկ այն ժամանակ, երբ Տերը Դավթի թշնամիներին երկրի երեսից ջնջի, ¹⁶ Հովնաթանի անունը համարում պետք է ունենա Դավթի տանը, եթե նույնիսկ Տերը Դավթի թշնամիներից վրեժ առնի»։

¹⁷ Հովնաթանը Դավթին կրկին երդվեցրեց իր սիրով, քանի որ նրան իր անձի պես էր սիրում։ ¹⁸ Հովնաթանը նրան ասաց. «Վաղը նորալուսին է։ Քեզ պիտի փնտրեն։ Քո տեղը դատարկ տեսնելով՝ քո մասին պիտի հարցնեն։ ¹⁹ Երեք օր կմնաս, ապա կգաս այն վայրը, որտեղ թաքնվել էիր գործի օրը։ Կնստես Երգաբ կոչվող քարի մոտ։ ²⁰ Ես երեք նետ կարձակեմ, իբր նպատակակետի վրա, ²¹ ու կուղարկեմ պատանյակին՝ ասելով. “Գնա՛, նետերը գտի՛ր”։ Եթե ասեմ պատանյակին՝ “Քեզանից այս կողմ է նետը, այս կողմո՛ւմ փնտրիր”, կգաս. նշանակում է խաղաղություն է քեզ համար, և ոչ մի վտանգ չկա, վկա է Տերը։ ²² Իսկ եթե ասեմ պատանյակին՝ “Քեզանից այն կողմ է նետը”, գնա՛, քանի որ Տերն է քեզ արձակել։ ²³ Իմ ու քո ասածների համար Տերը վկա է իմ ու քո միջև հավիտյան»։

²⁴ Դավիթը թաքնվեց դաշտում։ Նորալուսին եղավ, և արքան սենյակ մտավ՝ հաց ուտելու։ ²⁵ Արքան, ըստ սովորության, նստեց պատի մոտ դրված աթոռին։ Հովնաթանը նստեց դիմացը։ Աբենները նստել էր Սավուղի մոտ, իսկ Դավթի տեղը դատարկ էր։ ²⁶ Այդ օրը Սավուղը ոչինչ չասաց, որովհետև մտածեց, թե նրան մի բան է պատահել, երևի մաքուր չէ կամ չի մաքրվել։ ²⁷ Հետևյալ օրը՝ նորալուսնի երկրորդ օրն էլ Դավթի տեղը դատարկ էր։ Սավուղն ասաց իր որդի Հովնաթանին. «Հեսսեի որդին ինչո՞ւ երեկ և այսօր սեղան նստելու չեկավ»։ ²⁸ Հովնաթանը Սավուղին պատասխանեց և ասաց. «Նա ինձնից արտոնություն խնդրեց ու գնաց իր քաղաքը՝ Բեթղեհեմ։ ²⁹ Նա ասաց. “Արձակի՛ր ինձ, քանի որ այդ քաղաքում մեր ազգատոհմը զոհ է մատուցելու։ Եղբայրներս ինձ կանչել են, և եթե հիմա քո աչքին շնորհ եմ գտել, գնամ տեսնեմ իմ եղբայրներին”։ Այս պատճառով նա արքայի սեղանին չի եկել»։

³⁰ Սավուղը բարկացավ Հովնաթանի վրա և ասաց նրան. «Պոռնկորդի՛, մատնի՛չ, մի՞թե չգիտեմ, որ դու դաշնակից ես Հեսսեի որդուն։ Դա ամոթ ու խայտառակություն է քեզ և քո մոր մերկության համար։ ³¹ Ինչքան ժամանակ որ Հեսսեի որդին կենդանի է, քո թագավորությունը հաստատուն չի լինի։ Հիմա մա՛րդ ուղարկիր ու պատանի Դավթին բերե՛լ տուր, քանի որ նա մահապարտ է»։ ³² Հովնաթանը պատասխան տվեց իր հայր Սավուղին՝ ասելով. «Ինչո՞ւ պետք է մեռնի, ի՞նչ է արել նա»։ ³³ Եվ Սավուղը Հովնաթանի վրա բարձրացրեց գեղարդը, որ նրան սպանի։ Հովնաթանը, իմանալով, որ հայրը Դավթին սպանելու չար որոշում է կայացրել, ³⁴ խիստ զայրանալով, սեղանից վեր կացավ և նորալուսնի երկրորդ օրը հաց չկերավ։ Նա տխրեց Դավթի համար, քանի որ հայրը Դավթին անարգել էր։

³⁵ Առավոտյան Հովնաթանը դաշտ գնաց, ինչպես որ պայմանավորվել էին ինքն ու Դավիթը։ Նրա հետ մի փոքրիկ պատանի կար։ ³⁶ Նա ասաց պատանյակին. «Վազիր գտի՛ր այն նետերը, որ ես պիտի արձակեմ»։ Նա նետեր արձակեց, և պատանին վազեց, որ դրանք բերի։ ³⁷ Երբ պատանյակը գնաց մինչև այն տեղը, ուր Հովնաթանը նետեր էր արձակել, ³⁸ Հովնաթանը կանչեց պատանյակի հետևից՝ ասելով. «Նետը քեզնից այն կողմ է»։ Ապա Հովնաթանը պատանյակի հետևից կանչեց. «Շտա՛պ արի, մի՛ կանգնիր»։ Հովնաթանի պատանին նետերը հավաքեց ու բերեց իր տիրոջը։ ³⁹ Պատանյակը ոչինչ չգիտեր, և միայն Հովնաթանն ու Դավիթը գիտեին այդ բանը։ ⁴⁰ Հովնաթանն իր զենքերը տվեց պատանյակին՝ ասելով նրան. «Գնա մտի՛ր քաղաք»։ ⁴¹ Տղան գնաց, իսկ Դավիթը Երգաբ կոչվող քարից դուրս եկավ, երեսի վրա ընկավ գետնին և նրան երեք անգամ երկրպագություն արեց։ Նրանք իրար համբուրեցին, և ամեն մեկն իր ընկերոջ համար երկար ժամանակ լաց եղավ։ ⁴² Հովնաթանը Դավթին ասաց. «Գնա՛ խաղաղությամբ, ինչպես որ մենք Տիրոջ անվամբ երդվեցինք՝ ասելով, որ Տերը հավիտյան վկա լինի իմ ու քո միջև և իմ զավակի ու քո զավակի միջև»։

21

Դավիթը փախչում է Սավուղից

¹ Դավիթը վեր կացավ ու գնաց, իսկ Հովնաթանը մտավ քաղաք։ ² Դավիթը եկավ Նոմբա՝ Աքիմելեք քահանայի մոտ։ Նրան տեսնելով՝ Աքիմելեքը զարհուրեց ու ասաց. «Ինչո՞ւ ես մենակ, ինչո՞ւ ոչ ոք չկա քեզ հետ»։ ³ Դավիթը Աքիմելեք քահանային ասաց. «Արքան այսօր ինձ մի գործ է հանձնարարել և ասել է ինձ. “Ոչ ոք չիմանա, թե ինչո՛ւ եմ քեզ ուղարկում և թե ի՛նչ եմ պատվիրել քեզ”։ Ես իմ ծառաներին հանձնարարել եմ մնալ այն տեղում, որ կոչվում է Փելմոնի Ելմոնի, այսինքն՝ Աստծու հավատարմություն։ ⁴ Արդ, եթե հինգ նկանակ ունես քո ձեռքի տակ, տո՛ւր ինձ, կամ էլ ինչքան որ կա»։ ⁵ Պատասխան տալով՝ Աստծու քահանան Դավթին ասաց. «Ես անմաքուր հաց չունեմ, ունեմ սուրբ հաց։ Եթե քո ծառաները կանանց չեն մերձեցել, թող ուտեն»։ ⁶ Դավիթը պատասխանեց քահանային՝ ասելով. «Կանանցից հեռու ենք մնացել երեկվանից ու նախորդ օրվանից։ Ճանապարհ ընկնելու ժամանակ իմ ծառաները մաքրվել են, բայց այս ճանապարհը պիղծ է, այդ պատճառով այսօր դա պիտի մաքրվի իմ գործով»։ ⁷ Աքիմելեք քահանան նրան տվեց Առաջավորության հացից, քանի որ այնտեղ սովորական հաց չկար, այլ միայն Առաջավորության հաց, որ վերցրել էին Տիրոջ առաջից՝ այդ օրը դրանց փոխարեն տաք հաց դնելու համար։ ⁸ Այն օրն այդտեղ էր գտնվում Սավուղի ծառաներից մեկը, որը Տիրոջ առջև բռնված[38] էր։ Նրա անունն էր Դովեկ Ասորի։ Նա Սավուղի ջորիներն էր արածեցնում։ ⁹ Դավիթն ասաց Աքիմելեքին. «Այստեղ ձեռքիդ տակ գեղարդ կամ սուր կա՞։ Իմ սուրը և զենքն ու զրահը հետս չեմ վերցրել, քանի որ արքայի գործը շտապ էր»։ ¹⁰ Քահանան ասաց. «Ահա այլազգի փղշտացի Գողիաթի սուրը, որին սպանեցիր Ելա հովտում։ Դա շորով փաթաթված ու դրված է վակասի հետևում։ Եթե ուզում ես, վերցրո՛ւ, քանի որ, բացի դրանից, այստեղ ոչինչ չկա»։ Դավիթն ասաց. «Դրա նմանը չկա, տո՛ւր ինձ այն»։ ¹¹ Եվ նա դա տվեց նրան։ Դավիթն այդ օրը ելավ ու փախավ Սավուղի առաջից։ ¹² Դավիթը եկավ Գեթի արքա Անքուսի մոտ։ Անքուսի ծառաները նրան ասացին. «Սա Դավիթը չէ՞, այն երկրի թագավորը։ Սրա համար չէ՞, որ պար բռնող կանայք երգում էին ու ասում. “Սավուղը հազար սպանեց, իսկ Դավիթը՝ բյուր”»։ ¹³ Դավիթն այս խոսքերը պահեց իր սրտում և սաստիկ վախեցավ Գեթի արքա Անքուսից։ ¹⁴ Նա իր դեմքն այլակերպեց, այդ օրը նրանց առջև խելագար ձևացավ։ Նա նվագում, պարում էր քաղաքի դռների մոտ, լորձունքը ծորում էր մորուքի վրա, գլուխկոնծի էր տալիս։ ¹⁵ Անքուսն ասաց իր ծառաներին. «Դուք տեսնում եք, որ այս մարդը դիվահար է։ Ինչո՞ւ եք նրան ինձ մոտ բերել։ ¹⁶ Մի՞թե ես դիվահարներին կարոտ եմ, որ նրան բերել եք ինձ մոտ, որպեսզի դիվահարություն անի։ Նա թող իմ տուն չմտնի»։

22

Դավիթը զորագլուխ

¹ Դավիթն այնտեղից գնաց և ապաստանեց Ոդողոմի քարայրում։ Նրա եղբայրներն ու նրա հոր ամբողջ տունը լսեցին և եկան այնտեղ՝ նրա մոտ։ ² Նրա մոտ հավաքվեցին բոլոր տառապյալները, բոլոր պարտապաններն ու դժգոհները, և նա նրանց առաջնորդը դարձավ։ Նրա մոտ չորս հարյուրի չափ մարդ հավաքվեց։ ³ Այնտեղից Դավիթը գնաց Մովաբի Մասեփա քաղաքը և Մովաբի արքային ասաց. «Թող իմ հայրն ու մայրը քեզ մոտ մնան, մինչև իմանամ, թե Աստված ինձ ինչ պիտի անի»։ ⁴ Նա աղաչեց Մովաբի արքային, և նրանք նրա մոտ բնակվեցին այնքան ժամանակ, քանի դեռ Դավիթը քարանձավում էր։ ⁵ Գադ մարգարեն Դավթին ասաց. «Մի՛ մնա քարանձավում, այլ վեր կաց գնա՛ Հուդայի երկիրը»։ Դավիթը գնաց և հաստատվեց Սարիթ քաղաքում։

Նոմբայի քահանաների կոտորածը

⁶ Սավուղն իմացավ, որ Դավիթն իր մարդկանցով հայտնվել է։ Սավուղը Բամայի ներքին դաշտի բլրին էր նստել։ Գեղարդը նրա ձեռքին էր, և բոլոր ծառաները նրա շուրջն էին։ ⁷ Խոսելով իրեն շրջապատող ծառաների հետ՝ Սավուղն ասաց. «Լսե՛ք, Բենիամինի՛ որդիներ, արդյոք Հեսսեի որդին ձեզ ամենքիդ արտեր, այգեստաններ կտա՞ և կամ ձեզ ամենքիդ հազարապետներ ու հարյուրապետներ կդարձնի՞։ ⁸ Ինչո՞ւ ամենքդ իմ դեմ եք միաբանվել, և ոչ ոք ինձ չհայտնեց, որ իմ որդին դաշինք է կնքել Հեսսեի որդու հետ։ Ձեր մեջ ինձ համար ցավող չկա, որ ինձ հայտներ, թե իմ որդին իմ դեմ է հանել իմ ծառային՝ որպես թշնամու, ինչպես այսօր է»։ ⁹ Պատասխան տվեց Դովեկ Ասորին, որը Սավուղի ջորիներն էր արածեցնում, և ասաց. «Ես տեսա Հեսսեի որդուն, որ եկել էր Նոմբա՝ Աքիտովբի որդի Աքիմելեք քահանայի մոտ։ ¹⁰ Նա հարցրեց Տիրոջը նրա մասին, նրան պաշար տվեց, ինչպես նաև այլազգի Գողիաթի սուրը»։

¹¹ Արքան մարդ ուղարկեց ու կանչել տվեց Աքիտովբի որդի Աքիմելեք քահանային ու իր հոր բոլոր որդիներին՝ Նոմբայում գտնվող քահանաներին։ Ամենքն էլ եկան արքայի մոտ։ ¹² Սավուղն ասաց. «Լսի՛ր, Աքիտովբի՛ որդի»։ Նա ասաց. «Լսում եմ, խոսի՛ր, տե՛ր»։ ¹³ Սավուղն ասաց նրան. «Դու և Հեսսեի որդին ինչո՞ւ եք միաբանվել իմ դեմ, դու նրան հաց ու սուր ես տվել, նրա համար Աստծուն խնդրել, նրան ինձ հետ թշնամացրել, ինչպես այսօր է»։ ¹⁴ Աքիմելեքը պատասխանեց արքային՝ ասելով. «Քո ծառաների մեջ Դավթի պես հավատարիմ ո՞վ կա։ Նա քո՝ արքայիդ փեսան է և քո բոլոր հրամանները գործադրողը, քո տան մեջ փառավորը։ ¹⁵ Մի՞թե ես այսօր եմ սկսել նրա համար Աստծուն խնդրել։ Քա՛վ լիցի, որ արքան իր ծառայի վրա կամ իմ հոր տան վրա այդպիսի մեղք բարդի, քանի որ քո ծառան այդ ամենից շատ կամ քիչ բան չգիտի»։ ¹⁶ Սավուղն ասաց. «Դու մահապատժի կենթարկվես, Աքիմելե՛ք, դու և քո հոր ամբողջ տունը»։ ¹⁷ Արքան իրեն շրջապատող թիկնապահներին ասաց. «Գնացե՛ք ու Տիրոջ քահանաներին սպանե՛ք, քանի որ նրանք հովանավորում են Դավթին։ Նրանք գիտեին, որ նա փախչում է, բայց ինձ չհայտնեցին»։ Արքայի ծառաները չուզեցին իրենց ձեռքը բարձրացնել ու սպանել Տիրոջ քահանաներին։ ¹⁸ Արքան Դովեկին ասաց. «Դու գնա՛ ու սպանի՛ր Աստծու քահանաներին»։ Դովեկ Ասորին գնաց ու կոտորեց Տիրոջ քահանաներին։ Այդ օրը երեք հարյուր հինգ մարդ սպանվեց, բոլորն էլ՝ քահանաներ։ ¹⁹ Քահանաների քաղաք Նոմբան սրի քաշվեց. սրախողխող եղան տղամարդ թե կին, երեխա թե կաթնակեր մանուկ, արջառ թե էշ և ոչխար։

²⁰ Աքիտոբի որդի Աքիմելեքի մի որդին փրկվեց։ Նրա անունն էր Աբիաթար։ Նա փախավ Դավթի մոտ։ ²¹ Աբիաթարը Դավթին հայտնեց, որ Սավուղը կոտորել է Տիրոջ բոլոր քահանաներին։ ²² Դավիթը Աբիաթարին ասաց. «Այն օրը գիտեի, որ Դովեկ Ասորին անպայման կհայտնի Սավուղին։ Քո հոր տան բոլոր զոհված մարդկանց համար ես եմ մեղավոր։ ²³ Նստի՛ր ինձ մոտ և մի՛ վախեցիր, քանի որ որտեղ ինձ համար տեղ փնտրեմ, քեզ համար էլ կփնտրեմ, և դու ինձ մոտ ապահով կլինես»։

23

Դավիթն ազատում է Կեիլա քաղաքը

¹ Դավթին հայտնեցին՝ ասելով. «Այլազգիները պատերազմում են Կեիլայի դեմ և կողոպտում են կալերը»։ ² Դավիթը Տիրոջը հարցրեց՝ ասելով. «Գնա՞մ ջարդեմ այդ այլազգիներին»։ Տերը Դավթին ասաց. «Գնա՛, ջարդի՛ր այլազգիներին ու փրկի՛ր Կեիլան»։ ³ Դավթի մարդիկ նրան ասացին. «Մենք այստեղ՝ Հուդայի երկրի մեջ, վախենում ենք։ Ի՞նչ կլինի մեր վիճակը, եթե գնանք Կեիլա ու այլազգիներին գերի դառնանք»։ ⁴ Դավիթը երկրորդ անգամ հարցրեց Տիրոջը, և Տերը նրան պատասխան տվեց՝ ասելով. «Վեր կաց գնա՛ Կեիլա, քանի որ ես այլազգիներին քո ձեռքն եմ մատնելու»։ ⁵ Դավիթն իր մարդկանցով գնաց Կեիլա և մարտնչեց այլազգիների դեմ, որոնք նրա առջևից փախան։ Նա մեծ հարվածներ հասցրեց նրանց, վերցրեց նրանց անասունները և փրկեց Կեիլայի բնակիչներին։ ⁶ Աքիմելեքի որդի Աբիաթարը, որ Դավթի մոտ էր փախել, Դավթի հետ իջավ Կեիլա՝ իր ձեռքին ունենալով եփուդը։ ⁷ Սավուղին հայտնեցին, թե Դավիթը եկել է Կեիլա։ Սավուղն ասաց. «Աստված նրան իմ ձեռքն է մատնել, քանի որ քաղաք մտնելով՝ փակվել է դռների ու նիգերի հետևում»։ ⁸ Սավուղն ամբողջ ժողովրդին հրամայեց գնալ Կեիլա և բռնել Դավթին ու նրա մարդկանց։ ⁹ Դավիթը Սավուղի մասին իմացավ, որ նա չարությունից չի հրաժարվել։ Դավիթը Աբիաթար քահանային ասաց. «Բե՛ր Տիրոջ եփուդը»։ ¹⁰ Դավիթն ասաց. «Ո՛վ Տեր՝ Աստված Իսրայելի, քո ծառան լսեց, որ Սավուղն ուզում է հարձակվել Կեիլայի վրա և իմ պատճառով կործանել քաղաքը։ ¹¹ Ինչպես քո ծառան լսել է, արդյոք Սավուղը հիմա կիջնի՞ այստեղ, կպաշարի՞։ Հայտնի՛ր քո ծառային, Տե՛ր՝ Աստվա՛ծ Իսրայելի»։ Տերն ասաց. «Կպաշարի»։ ¹² Դավիթն ասաց. «Արդյոք կեիլացիներն ինձ և իմ մարդկանց Սավուղի ձեռքը կմատնե՞ն»։ Տերն ասաց. «Կմատնեն»։ ¹³ Դավիթն ու նրա հետ եղող մարդիկ, մոտավորապես չորս հարյուր մարդ վեր կացան, ելան Կեիլայից ու գնացին, ուր կարող էին գնալ։ Երբ Սավուղին հայտնեցին, թե Դավիթը փախել է Կեիլայից, նա հրաժարվեց քաղաքի վրա հարձակվելուց։

Դավիթը թաքնվում է լեռներում

¹⁴ Դավիթը բնակվեց անապատի մեջ, Մասերեթի կիրճերում. մնում էր Զիփ անապատի միգապատ լեռան վրա, մթին երկրում։ Սավուղն անընդհատ նրան էր որոնում, սակայն Տերը նրա ձեռքը չմատնեց Դավթին։ ¹⁵ Երբ Դավիթը տեսավ, որ Սավուղը դուրս է եկել իրեն որոնելու, մնաց անապատում, Նորում՝ Զիփի միգապատ լեռան վրա։

¹⁶ Սավուղի որդի Հովնաթանը վեր կացավ ու գնաց Նոր՝ Դավթի մոտ, և նրան ուժ տվեց Տիրոջ անունով։ ¹⁷ Հովնաթանը նրան ասաց. «Մի՛ վախեցիր, որովհետև իմ հայր Սավուղի ձեռքը քեզ չի գտնի, և դու կթագավորես Իսրայելի վրա, իսկ ես քո երկրորդը կլինեմ։ Իմ հայր Սավուղն էլ գիտի, որ դա այդպես է»։ ¹⁸ Նրանք երկուսով ուխտ արեցին Տիրոջ առջև։ Դավիթը մնաց Նորում, իսկ Հովնաթանը գնաց իր տունը։

¹⁹ Զիփացիներն իրենց մռայլ երկրից ելան գնացին բլուրը՝ Սավուղի մոտ, և ասացին. «Չէ՞ որ Դավիթն ահա մեզ մոտ է թաքնված, Մասերայում, Նորի կիրճերում, Եքեղատի բլրի վրա, Հեսեմոնի աջ կողմը։ ²⁰ Արդ, ո՛վ արքա, քանի որ դու շատ ես ցանկանում, անպայման արի՛ մեզ մոտ, որ նրան շրջափակենք ու քո՝ արքայիդ ձեռքը հանձնենք»։ ²¹ Սավուղը նրանց ասաց. «Օրհնյալ եք դուք Տիրոջից, քանի որ ցավակից եք ինձ։ ²² Արդ, գնացե՛ք, ավելի լա՛վ պատրաստվեք, դիտե՛ք ու հայտնաբերե՛ք, թե նա որտեղ ոտք կդնի։ Շո՛ւտ հասեք այն տեղը, որտեղ ասում եք, թե նա գտնվում է։ Չլինի, թե նա խորամանկություն անի։ ²³ Քննե՛ք ու տեսե՛ք ամեն տեղ, որտեղ թաքնված է, և վերադարձե՛ք ինձ մոտ ստույգ տեղեկություններով, որ ձեզ հետ գնանք։ Եթե նա այդ երկրում է, Հուդայի հազարավոր որդիների մեջ էլ կգտնեմ նրան»։ ²⁴ Եվ զիփացիները վեր կացան ու գնացին Սավուղի մոտից։ Դավիթը և նրա մարդիկ երեկոյան Մաոնի անապատում էին՝ Հեսեմոնի աջ կողմում։ ²⁵ Սավուղն ու նրա մարդիկ գնացին Դավթին փնտրելու։ Երբ Դավթին իմաց տվեցին, նա իջավ Մաոնի անապատում գտնվող քարի մոտ։ Այդ լսելով՝ Սավուղը Դավթին հետապնդեց Մաոնի անապատում։ ²⁶ Սավուղն ու իր մարդիկ գնում էին լեռան այս կողմով, իսկ Դավիթն իր մարդկանցով՝ լեռան այն կողմով։ Դավիթը Սավուղից թաքուն էր գնում, սակայն Սավուղն ու իր մարդիկ Դավթին ու նրա մարդկանց շրջապատեցին, որ բռնեն։ ²⁷ Եվ ահա մի լրաբեր եկավ Սավուղի մոտ և ասաց. «Շտապ արի՛ այստեղ, որովհետև այլազգիները արշավել են երկրի վրա»։ ²⁸ Սավուղը դադարեց Դավթին հետապնդելուց, որ գնա այլազգիների դեմ։ Այդ պատճառով այս վայրը կոչվեց Բաժանված վեմ։

24

Դավիթը խնայում է Սավուղի կյանքը

¹ Այնտեղից գնալով՝ Դավիթը բնակվեց Գադդայի կիրճերում։ ² Երբ Սավուղը վերադարձավ այլազգիներին հետապնդելուց, նրան լուր բերեցին՝ ասելով. «Ահավասիկ Դավիթը Գադդայի անապատում է»։ ³ Իր հետ վերցնելով ողջ Իսրայելից հավաքված երեք հազար ընտիր մարդկանց՝ Սավուղը գնաց փնտրելու Դավթին ու նրա մարդկանց եղջերուների որսատեղիի Ելիմ կոչվող վայրի դիմաց։ ⁴ Նա ոչխարների փարախների հանդիպեց ճանապարհին։ Այնտեղ մի քարայր կար։ Սավուղը մտավ այնտեղ հանգստանալու։ Դավիթն ու նրա մարդիկ քարայրի ներսի մասում էին։ ⁵ Դավթի մարդիկ նրան ասացին. «Ահա սա այն օրն է, որի համար Տերը քեզ ասել է. “Քո թշնամիներին քո ձեռքը պիտի մատնեմ”։ Նրա հետ վարվի՛ր այնպես, ինչպես հաճելի է քո աչքին»։ Դավիթը ելավ ու Սավուղի թիկնոցի մի ծայրը զգուշությամբ կտրեց։ ⁶ Դրանից հետո Դավիթը խղճի խայթ զգաց, որ նրա թիկնոցի մի ծայրը կտրել է։ ⁷ Դավիթն իր մարդկանց ասաց. «Երդվում եմ Տիրոջ անունով, որ այդ բանը չեմ անի իմ տիրոջ՝ Տիրոջ կողմից օծյալ մարդու նկատմամբ, իմ ձեռքը չեմ բարձրացնի նրա վրա, որովհետև նա Տիրոջ օծյալն է»։ ⁸ Դավիթն այս խոսքերով համոզեց իր մարդկանց ու թույլ չտվեց, որ Սավուղի վրա հարձակվեն ու սպանեն։ Սավուղը դուրս եկավ այդ քարայրից ու գնաց իր ճանապարհով։ ⁹ Դավիթը նրանից հետո վեր կացավ, դուրս եկավ քարայրից և աղաղակեց նրա հետևից՝ ասելով. «Իմ տե՛ր արքա»։ Սավուղը հետ նայեց. Դավիթը երեսնիվայր գետնին ընկավ ու երկրպագեց։ ¹⁰ Դավիթը Սավուղին ասաց. «Ինչո՞ւ ես մարդկանց խոսքին հավատում, որ ասում են, թե՝ “Դավիթն ուզում է սպանել քեզ”։ ¹¹ Ահա այսօր քո աչքերը տեսան, որ այս քարայրի մեջ Տերն ինչպե՛ս էր քեզ իմ ձեռքը մատնել, բայց ես չուզեցի քեզ սպանել, խնայեցի քեզ՝ ասելով. “Իմ ձեռքը իմ տիրոջ վրա չեմ բարձրացնի, որովհետև նա Տիրոջ օծյալն է”։ ¹² Տե՛ս, հա՛յր իմ, ահա քո թիկնոցի մի ծայրն իմ ձեռքին է. ես կտրեցի քո հանդերձի ծայրը, բայց չսպանեցի քեզ։ Իմացի՛ր ու տե՛ս այսօր, որ իմ վարմունքի մեջ չարություն, անօրենություն ու ամբարշտություն չկա, քո դեմ ոչ մի հանցանք չեմ գործել, իսկ դու ուզում ես հետապնդելով իմ կյանքը խլել։ ¹³ Թող Տերը դատ անի իմ ու քո միջև և իմ վրեժը քեզնից առնի, բայց իմ ձեռքը քեզ վրա չի բարձրանա։ ¹⁴ Ինչպես հին առակն է ասում՝ “Անօրեն ձեռքից է գալիս վնասը”, բայց իմ ձեռքը քեզ վրա չի բարձրանա։ ¹⁵ Արդ, ո՞ւմ հետևից ես ընկել, ո՜վ Իսրայելի արքա, և ո՞ւմ ես հալածում. սատկած շան կամ մի լուի հետևի՞ց ես ընկել։ ¹⁶ Թող Տերը դատավոր ու իրավարար լինի իմ և քո միջև։ Թող Տերը տեսնի ու դատի և ինձ արդարություն անի»։

¹⁷ Երբ Դավիթն ավարտեց Սավուղին ուղղված այս խոսքերը, Սավուղն ասաց. «Այդ քո՞ ձայնն է, որդյա՛կ իմ Դավիթ»։ Եվ Սավուղը, իր ձայնը բարձրացնելով, լաց եղավ։ ¹⁸ Սավուղը Դավթին ասաց. «Դու ավելի արդար մարդ ես, քան ես, քանի որ դու ինձ բարիք հատուցեցիր, իսկ ես քեզ չարիք հատուցեցի։ ¹⁹ Դու այսօր ինձ պատմեցիր, որ բարիք ես արել, թե ինչպես Տերն այսօր ինձ քո ձեռքն էր մատնել, իսկ դու ինձ չսպանեցիր։ ²⁰ Եթե մեկն իր թշնամուն նեղության մեջ բռնելով՝ նրան ազատ է արձակում, որ բարով գնա իր ճանապարհը, ինչպես դու արեցիր այսօր իմ նկատմամբ, ապա Տերը նրան բարությամբ է հատուցում։ ²¹ Արդ, ես գիտեմ, որ դու անպայման կթագավորես, և Իսրայելի թագավորությունը քո ձեռքում հաստատ կմնա։ ²² Ուրեմն, երդվի՛ր ինձ Տիրոջ անունով, որ ինձնից հետո իմ սերունդը չես ոչնչացնի և իմ անունը չես վերացնի իմ հոր տնից»։ ²³ Եվ Դավիթը երդվեց Սավուղին։ Սավուղը գնաց իր տեղը, իսկ Դավիթն ու իր մարդիկ եկան Մասարայի կիրճերը։

25

Սամուելի մահը

¹ Սամուելը մեռավ, և ամբողջ Իսրայելը հավաքվեց ու ողբաց նրան։ Նրան թաղեցին Արիմաթեմի իր տանը։ Դավիթը վեր կացավ ու գնաց Մաոնի անապատը։

Դավիթն ու Աբիգեան

² Մաոնում մի մարդ կար, որի հոտերը Կարմելոսում էին։ Նա շատ հարուստ էր. ուներ երեք հազար ոչխար, հազար այծ։ Իր հոտերը Կարմելոսում էին խուզում։ ³ Նրա անունը Նաբաղ էր, իսկ կնոջ անունը՝ Աբիգեա։ Կինը լի էր իմաստությամբ և շատ բարետես էր, իսկ ամուսինը դաժան էր, չարամիտ ու շնաբարո։

⁴ Այդ օրերին Դավիթը լսեց, որ Նաբաղ կարմեղացին խուզում է իր հոտերը։ ⁵ Դավիթը տասը ծառաների ուղարկեց՝ նրանց ասելով. «Բարձրացե՛ք Կարմելոս, գնացե՛ք Նաբաղի մոտ և իմ անունից նրա ողջությունը հարցնելուց հետո ⁶ այսպե՛ս ասեք. “Այս օրերին ողջ լինես դու ու քո տունը, և ինչ գործ որ բռնես, հաջող լինի։ ⁷ Լսել եմ, որ խուզում ես քո հոտերը։ Քո հովիվները մեզ հետ էին այստեղ՝ անապատում, և մեզ հետ որքան մնացել են Կարմելոսում, նրանց արգելք չհանդիսացանք և ոչ մի բանի ձեռք չտվեցինք։ ⁸ Հարցրո՛ւ քո ծառաներին, և նրանք կասեն քեզ։ Այս ծառաները թող շնորհ գտնեն քո առաջ, քանի որ բարի օրում եկան. ինչ որ ձեռքիցդ կգա, տո՛ւր քո ծառաներին և քո Դավիթ որդուն”»։ ⁹ Դավթի ծառաները եկան և այդ խոսքերը Դավթի անունից ասացին Նաբաղին։ ¹⁰ Նա ըմբոստացավ և Դավթի ծառաներին պատասխան տվեց՝ ասելով. «Ո՞վ է Դավիթը, կամ Հեսսեի որդին ո՞վ է։ Այս օրերին շատացել են իրենց տերերից փախած թափառական ծառաները։ ¹¹ Ուրեմն առնեմ իմ հացը, գինին և խուզողների համար մորթված անասուններս ու տամ այս մարդկանց, որոնց որտեղից լինելը չգիտեմ»։ ¹² Դավթի ծառաները վերադարձան իրենց ճանապարհով, եկան և այդ խոսքերը հաղորդեցին Դավթին։ ¹³ Դավիթն իր մարդկանց ասաց. «Ամեն մեկն իր սուրը թող կապի մեջքին»։ Բոլորն իրենց սրերը կապեցին իրենց մեջքին։ Դավիթը նույնպես իր սուրը կապեց մեջքին. Դավթի հետևից չորս հարյուր մարդ ելավ, երկու հարյուր մարդ էլ մնաց կահ-կարասու մոտ։

¹⁴ Ծառաներից մեկը Նաբաղի կնոջը՝ Աբիգեային, պատմեց՝ ասելով. «Դավիթն անապատից պատգամաբերներ ուղարկեց՝ մեր տիրոջը ողջունելու, իսկ նա երես դարձրեց նրանցից։ ¹⁵ Այդ մարդիկ մեր նկատմամբ շատ բարյացակամ էին. որքան նրանց հետ բաց դաշտում էինք, մեզ վնաս չտվեցին, և մեզանից ոչ մի բան չի պակասել։ ¹⁶ Ինչքան նրանց հետ էինք և արածեցնում էինք ոչխարները, նրանք մեզ համար պարիսպ եղան գիշեր ու ցերեկ։ ¹⁷ Արդ, տե՛ս ու իմացի՛ր, թե ի՛նչ ես անելու, քանի որ մեր տիրոջ ու իր ամբողջ տան վրա չարիք է հասել. նա այնպիսի դաժան մարդ է, որ նրա հետ խոսել չի լինի»։

¹⁸ Աբիգեան շտապեց, առավ երկու հարյուր նկանակ, երկու տիկ գինի, հինգ եփած ոչխար, հինգ արդու բոված ցորեն, մեկ զամբյուղ չամիչ, երկու հարյուր շարոց չոր թուզ ու դրանք դրեց էշերի վրա։ ¹⁹ Նա ծառաներին ասաց. «Առա՛ջ անցեք ինձնից, ես կգամ ձեր հետևից»։ Նա այդ մասին իր ամուսին Նաբաղին չհայտնեց։ ²⁰ Երբ նա, էշին հեծած, լեռան ծածուկ տեղերով իջնում էր, Դավիթն ու նրա մարդիկ ընդառաջ գնացին նրան. Աբիգեան հանդիպեց նրանց։ ²¹ Դավիթն ասաց. «Ուրեմն իզուր էր, որ Նաբաղի ամեն ինչը պահպանեցի այնտեղ՝ անապատում։ Նրա ունեցվածքից ոչինչ չառա, բայց նա իմ երախտիքի փոխարեն չարություն է հատուցում։ ²² Աստված թող այսպես ու այսպես անի ինձ, եթե մինչև վաղն առավոտ Նաբաղի ամբողջ տնից պատին միզող մեկ արու թողնեմ»։

²³ Երբ Աբիգեան Դավթին տեսավ, էշից շտապ իջնելով՝ Դավթի առաջ ընկավ, երկրպագեց նրան մինչև գետին ²⁴ և նրա ոտքերն ընկնելով՝ ասաց. «Մեղքն ինձ վրա լինի, տե՛ր, բայց թող քո աղախինը խոսի քեզ հետ, և դու լսի՛ր քո աղախնի խոսքերը։ ²⁵ Իմ տերը այդ դաժան Նաբաղի արարքն իր սրտին մոտ թող չընդունի, քանի որ ինչպես իր անունն է, այնպես էլ ինքն է։ Նրա անունը Նաբաղ է, ուրեմն անզգամությունն իր հետ է։ Ես՝ քո աղախինը, քո ուղարկած ծառաներին չեմ տեսել։ ²⁶ Արդ, կենդանի է Տերը, և կենդանի ես դու. Տերն է քեզ արգելել անպարտ արյուն թափելը և այդ բանից քո ձեռքը հեռու է պահել։ Քո թշնամիներն ու իմ տիրոջը չարիք կամեցողները Նաբաղի պես թող լինեն։ ²⁷ Հիմա ընդունի՛ր այս ընծան, որ քո աղախինն իր տիրոջն է բերում, այն տո՛ւր իմ տիրոջ հետ գտնվող ծառաներին և ²⁸ ների՛ր քո աղախնի հանցանքը, քանի որ Տերն իմ տիրոջը հավատարիմ տուն պիտի դարձնի, քանի որ իմ տիրոջ պատերազմները Տերն է վարում։ Քո մեջ երբեք չարություն թող չլինի։ ²⁹ Եթե որևէ մեկը քո դեմ դուրս գա քեզ հալածելու և քո կյանքն ուզենա խլել, իմ տիրոջ հոգին թող Տիրոջ՝ Աստծու կենաց ծրարի մեջ ծրարվի, իսկ քո թշնամիների հոգիները որպես պարսաքարեր արձակվեն։ ³⁰ Եվ երբ Տերն իմ տիրոջ համար խոստացած այս բոլոր բարիքները կատարի և քեզ, ըստ իր պատգամի, Իսրայելի առաջնորդ հաստատի, ³¹ իմ տիրոջ սրտում վատություն ու գայթակղություն թող չլինի, որ իզուր արդար արյուն թափի։ Թող իմ տիրոջ ձեռքն ուրիշի վրա չբարձրանա, և Տերը թող բարին անի իմ տիրոջը, որ հիշես քո աղախնին ու բարիք գործես նրա հանդեպ»։

³² Դավիթն Աբիգեային ասաց. «Օրհնյա՜լ է Տերը՝ Իսրայելի Աստվածը, որ քեզ այսօր ինձ ընդառաջ ուղարկեց։ ³³ Օրհնյալ լինի քո խոհեմությունը, և օրհնյալ լինես դու, որ արգելք հանդիսացար ինձ այսօր, և ես չգնացի արյուն թափելու ու իմ ձեռքն ուրիշի վրա բարձրացնելու։ ³⁴ Բայց կենդանի է Տերը՝ Իսրայելի Աստվածը, որ այսօր ինձ արգելք հանդիսացավ չարիք գործելու քո հանդեպ, քանի որ եթե շտապ չգայիր և իմ առջև չելնեիր, ինչպես ասել էի, մինչև առավոտ Նաբաղը կզրկվեր պատին միզողներից»։ ³⁵ Դավիթը նրա ձեռքից առավ այն ամենը, ինչ բերել էր, և նրան ասաց. «Գնա՛ քո տունը խաղաղությամբ։ Տե՛ս, քո խոսքը լսեցի ու քո խնդրանքը կատարեցի»։

³⁶ Աբիգեան գնաց Նաբաղի մոտ։ Նրա տանը թագավորական խնջույքի պես խրախճանք էր, Նաբաղը զվարթացել էր և շատ հարբել։ Կինը մինչև առավոտ նրան ոչ մի բան չպատմեց։ ³⁷ Առավոտյան, երբ Նաբաղը գինուց սթափվեց, կինն այդ բաները պատմեց, Նաբաղի սիրտը մահացու հարված ստացավ, և նա կարծես քար կտրեց։ ³⁸ Տասը օր անց Տերը հարվածեց Նաբաղին, և նա մեռավ։

Դավիթն ամուսնանում է Աբիգեայի հետ

³⁹ Երբ Դավիթը լսեց Նաբաղի մահը, ասաց. «Օրհնյա՜լ է Տերը՝ Աստված, որ Նաբաղից կրած իմ նախատինքի դատաստանն ինքը տեսավ, իր ծառային չար ձեռքից փրկեց։ Տերը Նաբաղի չարությունը նրա գլխին թափեց»։ Դավիթը մարդ ուղարկեց Աբիգեային համոզելու, որ իր կինը դառնա։ ⁴⁰ Դավթի ծառաները եկան Կարմելոս՝ Աբիգեայի մոտ, խոսեցին նրա հետ՝ ասելով. «Դավիթը մեզ ուղարկեց քեզ մոտ, որ քեզ իրեն կնության առնի»։ ⁴¹ Նա վեր կացավ ու գլուխը մինչև գետին խոնարհելով՝ ասաց. «Քո աղախինը պատրաստ է ստրկուհի լինել և իր տիրոջ ծառաների ոտքերը լվանալ»։ ⁴² Աբիգեան անմիջապես վեր կացավ, հեծավ էշը և իր հետ հինգ ծառայող աղջիկներ վերցնելով՝ գնաց Դավթի ծառաների հետևից։ Եվ Աբիգեան դարձավ Դավթի կինը։

⁴³ Դավիթը կին առավ նաև Եզրայելից Աքինովամին. այս երկուսն էլ դարձան նրա կանայք, ⁴⁴ իսկ Սավուղն իր Մեղքող դստերը, որը Դավթի կինն էր, կնության տվեց ռովմացի Հեմեսսայի որդի Փաղտիելին։

26

Դավիթը դարձյալ խնայում է Սավուղի կյանքը

¹ Զիփացիները միգապատ լեռից գնացին դեպի բլուրը՝ Սավուղի մոտ, և նրան ասացին. «Դավիթը թաքնվել է մեզ մոտ՝ Եքեղատի բլրի վրա, Հեսեմոնի դիմաց»։ ² Սավուղը վեր կացավ և իսրայելացի երեք հազար ընտիր մարդկանցով իջավ՝ Զիփ անապատում Դավթին որոնելու։ ³ Սավուղը բանակատեղի դրեց Եքեղատի բլրի վրա՝ Հեսեմոնի դիմաց, ճանապարհի վրա։ Դավիթը նստել էր անապատում և երբ տեսավ, որ Սավուղն իր հետևից անապատ է գալիս, ⁴ լրտեսներ ուղարկեց և իմացավ, որ Սավուղը կազմ ու պատրաստ եկել է Կեիլա։ ⁵ Դավիթը վեր կացավ, գաղտագողի եկավ այն տեղը, որտեղ մնում էր Սավուղը, և գտավ նրա քնած տեղը։ Այնտեղ էր Ների որդի Աբենները՝ նրա զորապետը։ Սավուղը ննջում էր գահավորակի վրա, իսկ նրա շուրջբոլորը նրա զորքն էր։ ⁶ Խոսելով Աքիմելեք քետացու և Հովաբի եղբայր Շարուհու որդի Աբեսսայի հետ՝ Դավիթն ասաց. «Ո՞վ ինձ հետ բանակատեղի կմտնի Սավուղի մոտ»։ Աբեսսան ասաց. «Ես քեզ հետ կմտնեմ»։ ⁷ Եվ Դավիթն ու Աբեսսան գիշերը մտան զորքի մեջ։ Սավուղը ննջում էր գահավորակի վրա, գեղարդը սնարի մոտ գետնին էր ցցված, իսկ Աբեններն ու զինվորները նրա շուրջը ննջել էին։ ⁸ Աբեսսան Դավթին ասաց. «Տերն այսօր քո թշնամուն ձեռքդ մատնեց. արդ, գեղարդով մեկ անգամից գետնին գամեմ սրան և էլ հարվածս չկրկնեմ»։ ⁹ Դավիթն Աբեսսային ասաց. «Մի՛ սպանիր նրան, քանի որ ո՞վ կարող է ձեռք բարձրացնել Տիրոջ օծյալի վրա և թողություն ստանալ»։ ¹⁰ Դավիթն ասաց. «Կենդանի է Տերը։ Միայն Տերը կարող է պատժել նրան. կա՛մ նրա օրհասը կգա, ու ինքը կմեռնի, կա՛մ թե պատերազմի մեջ կմտնի ու կսպանվի։ ¹¹ Քա՛վ լիցի, որ ես իմ ձեռքը բարձրացնեմ Տիրոջ օծյալի վրա։ Միայն թե վերցրո՛ւ նրա սնարի մոտ դրված այդ գեղարդն ու ջրի այդ կուժը, և գնանք մեզ մոտ»։ ¹² Դավիթն առավ նրա սնարի մոտ դրված գեղարդն ու ջրի կուժը, և գնացին։ Ոչ ոք ոչինչ չտեսավ, ոչ ոք չիմացավ և ոչ ոք չզարթնեց, քանի որ նրանց վրա թմրություն էր իջել Տիրոջ կողմից, և բոլորը քնի մեջ էին։

¹³ Դավիթն այն կողմ անցավ, բարձրացավ լեռան գագաթը և կանգնեց հեռվում. իր ու Սավուղի զորքի միջև երկար տարածություն կար։ ¹⁴ Դավիթը դիմելով զորքին՝ Աբեններին ասաց. «Պատասխան չե՞ս տալիս, Աբեննե՛ր»։ Նա ասաց. «Ո՞վ ես դու, որ արքայի մոտ ինձ ես դիմում»։ ¹⁵ Դավիթն ասաց Աբեններին. «Չէ՞ որ դու քաջ մարդ ես։ Իսրայելում ո՞վ կա քեզ նման։ Քո տեր արքային ինչո՞ւ չես պահպանում. չէ՞ որ զորքից մարդ էր մտել քո տեր արքայի մոտ, որ նրան սպաներ։ ¹⁶ Լավ բան չես անում։ Կենդանի է Տերը։ Դուք՝ Տիրոջ օծյալ ձեր արքային պահպանողներդ, մահվան եք արժանի։ Արդ, ո՞ւր են արքայի սնարի մոտ դրված գեղարդն ու ջրի կուժը»։ ¹⁷ Սավուղը ճանաչեց Դավթի ձայնը և ասաց. «Այդ քո՞ ձայնն է, որդյա՛կ իմ Դավիթ»։ Դավիթն ասաց. «Քո ծառան եմ, տե՛ր իմ արքա»։ ¹⁸ Եվ ավելացրեց. «Ինչո՞ւ է իմ տերն ընկել իր ծառայի հետևից։ Ինչո՞վ եմ մեղանչել և ի՞նչ վնաս եմ հասցրել։ ¹⁹ Արդ, իմ տեր արքան թող լսի իր ծառայի խոսքերը. “Եթե Աստված է քեզ շարժել իմ դեմ, թող քո ճենճերացող զոհը լինեմ, իսկ եթե մարդկանց որդիներն են արել, Տիրոջ առջև անիծյալ լինեն նրանք, քանի որ նրանք ինձ այսօր մեկուսացրել են, որ բաժին չստանամ Տիրոջ ժառանգությունից”։ Նրանք ինձ ասացին. “Գնա ծառայի՛ր օտար աստվածների”։ ²⁰ Արդ, իմ արյունը Տիրոջ առջև գետնին թող չթափվի, քանի որ Իսրայելի թագավորը ելել է իմ կյանքը խլելու, ինչպես որ ագռավն է թևածում լեռների վրա»։

²¹ Սավուղն ասաց. «Մեղք եմ գործել։ Վերադարձի՛ր, որդյա՛կ իմ Դավիթ։ Քեզ չար բան չեմ անի այն բանի համար, որ իմ անձն այսօր էլ քո աչքին պատվական է։ Ես անզգամ եմ եղել և խիստ հանցավոր»։ ²² Դավիթը պատասխան տվեց՝ ասելով. «Ահավասիկ արքայի գեղարդը։ Թող ծառաներից մեկը գա և վերցնի սա։ ²³ Թող Տերն ամեն մեկին ըստ իր արդարության և հավատարմության հատուցի։ Տերն այսօր քեզ իմ ձեռքը մատնեց, բայց ես չկամեցա իմ ձեռքը բարձրացնել Տիրոջ օծյալի վրա։ ²⁴ Եվ ահա, ինչպես քո անձն այսօր իմ աչքին պատվական երևաց, իմ անձն էլ Տիրոջ առջև այնպես պատվական թող երևա, ինձ զորացնի ու փրկի ամեն տեսակ նեղությունից»։ ²⁵ Սավուղն ասաց Դավթին. «Օրհնյալ ես դու, որդյա՛կ իմ Դավիթ, դու հաջողություն ես գտնելու և զորանալով զորանալու ես»։

Դավիթը գնաց իր ճանապարհով, իսկ Սավուղը վերադարձավ իր տեղը։

27

Դավիթն ապաստանում է այլազգիների մոտ

¹ Դավիթն իր մտքում ասաց. «Ի վերջո մի օր Սավուղի ձեռքն եմ ընկնելու։ Ավելի լավ է գնամ այլազգիների երկիրը։ Եթե պատահի, որ Սավուղն ինձ փնտրի Իսրայելի բոլոր սահմաններում, դարձյալ նրա ձեռքից կազատվեմ»։ ² Դավիթը վեր կացավ, և ինքն ու իր հետ եղող վեց հարյուր մարդիկ անցան գնացին Գեթի արքա Մովաքի որդի Անքուսի մոտ։ ³ Ինքը՝ Դավիթն ու իր մարդիկ, ամեն մեկն իր ընտանիքով, Դավիթն էլ իր երկու կանանց՝ Աքինովամ Հեզրայելացու և Նաբաղ Կարմեղացու կին Աբիգեայի հետ բնակվեցին Գեթում՝ Անքուսի մոտ։ ⁴ Երբ Սավուղին տեղեկացրին, թե Դավիթը փախել է Գեթ, նա այլևս չհետապնդեց նրան։ ⁵ Դավիթն Անքուսին ասաց. «Եթե քո ծառան քո առաջ շնորհ է գտել, ինձ տե՛ղ տուր երկրի քաղաքներից մեկում, որ այնտեղ մնամ. ինչո՞ւ քո ծառան քեզ հետ նստի թագավորանիստ քաղաքում»։ ⁶ Այն ժամանակ Անքուսը նրան տվեց Սիկելակը. այդ պատճառով էլ Սիկելակը Հուդայի երկրի արքաներին է պատկանում մինչև օրս։ ⁷ Դավիթը այլազգիների երկրում բնակվեց չորս ամիս։ ⁸ Դավիթն ու նրա մարդիկ ելնում ու հարձակվում էին գեսերացիների, գիզերացիների ու ամաղեկացիների վրա, որոնք բնակվում էին Գեղամսուրի պարսպապատ ապահով քաղաքներից մինչև Եգիպտոս։ ⁹ Դավիթը հարվածեց այդ երկիրը և ողջ չթողեց ո՛չ տղամարդ և ո՛չ կին։ Նա ավար էր առնում ոչխարների հոտեր, արջառներ, ավանակներ, ուղտեր և հագուստ ու վերադառնում Անքուսի մոտ։ ¹⁰ Անքուսը Դավթին հարցրեց. «Ո՞ր կողմն արշավեցիք այսօր»։ Դավիթը Անքուսին պատասխանեց. «Հուդայի հարավը, Հերամելի հարավն ու Կենեզի հարավը։ ¹¹ Տղամարդ ու կին ողջ չթողեցի, որ Գեթ բերեմ»։ Այսպես էր ասում, որ հանկարծ Գեթ գալով՝ չասեն. «Այս բոլորը Դավիթն է արել»։ Եվ այս էր Դավթի սովորությունը, քանի դեռ նա բնակվում էր այլազգիների երկրում։ ¹² Անքուսը Դավթին շատ էր վստահում՝ ասելով. «Այս մարդը Իսրայելի իր ժողովրդի մոտ իրեն վարկաբեկել է, և ինձ մոտ մինչև վերջ ծառա կլինի»։

28

¹ Այդ օրերին այլազգիները, իրենց զորքերը հավաքելով, պատերազմի ելան Իսրայելի դեմ։ Անքուսը Դավթին ասաց. «Լա՛վ իմացիր, որ դու և քո մարդիկ ինձ հետ պատերազմի եք դուրս գալու»։ ² Դավիթն Անքուսին ասաց. «Այդպես թող լինի։ Հիմա դու կիմանաս, թե քո ծառան ի՛նչ է անելու»։ Անքուսը Դավթին ասաց. «Այդպես թող լինի, որովհետև քեզ ընդմիշտ իմ թիկնապահների պետ եմ դարձնելու»։

Սավուղը խորհրդակցում է վհուկի հետ

³ Սամուելը մահացել էր, նրան ողբացել էր ամբողջ Իսրայելը ու նրան թաղել իր քաղաք Արիմաթեմում։ Սավուղը երկրից վերացրել էր ոգեհարցներին ու գուշակներին։ ⁴ Այլազգիները հավաքվեցին ու եկան, բանակատեղի դրեցին Սոմանում։ Սավուղն էլ հավաքեց Իսրայելի բոլոր այրերին ու բանակատեղի դրեց Գեղբուեում։ ⁵ Երբ Սավուղը տեսավ այլազգիների բանակը, վախեցավ, նրա սիրտը մեծ ահ ընկավ։ ⁶ Սավուղը Տիրոջը հարց տվեց, սակայն Տերը նրան պատասխան չտվեց ո՛չ երազով, ո՛չ Հայտնությամբ [*  Ուրիմ], ո՛չ էլ մարգարեության միջոցով։ ⁷ Սավուղն իր ծառաներին ասաց. «Մի ոգեհարց կի՛ն գտեք, որ գնամ նրա մոտ ու հարց տամ նրան»։ Ծառաները նրան ասացին. «Ահա մի ոգեհարց կին կա Այենդորում»։ ⁸ Սավուղը ծպտվեց, ուրիշ զգեստներ հագավ ու գնաց երկու մարդկանց հետ։ Նրանք գիշերը հասան կնոջ մոտ։ Սավուղը նրան ասաց. «Դյութությո՛ւն արա և կանչի՛ր նրան, ում որ քեզ կասեմ»։ ⁹ Կինն ասաց. «Դու ինքդ գիտես, թե ի՛նչ էր արել Սավուղը. թե ոգեհարցներին ու գուշակներին ինչպե՛ս վերացրեց երկրից։ Արդ, ինչո՞ւ ես ինձ սպանելու համար իմ անձի դեմ որոգայթ լարում»։ ¹⁰ Սավուղը նրան Տիրոջ անունով երդվեց՝ ասելով. «Կենդանի է Տերը. այս բանից քեզ ոչ մի վնաս չի հասնի»։ ¹¹ Կինն ասաց. «Ո՞ւմ ոգին կանչեմ»։ Նա ասաց. «Սամուելի՛ ոգին կանչիր»։

¹² Կինը տեսավ Սամուելին, բարձր ձայնով աղաղակեց ու ասաց Սավուղին. «Ինչո՞ւ ինձ խաբեցիր. չէ՞ որ դու հենց Սավուղն ես»։ ¹³ Արքան նրան ասաց. «Մի՛ վախեցիր, ասա՛, ո՞ւմ տեսար»։ Կինն ասաց նրան. «Գետնից դուրս եկող աստվածներ եմ տեսնում»։ ¹⁴ Սավուղը նրան ասաց. «Ի՞նչ նկատեցիր»։ Նա ասաց. «Մի կանգնած մարդ երկրից ելնում էր, և նրա վրա թիկնոց կար»։ Սավուղն իմացավ, որ դա Սամուելն է, և երեսնիվայր ընկավ գետնին ու երկրպագեց նրան։ ¹⁵ Սամուելն ասաց Սավուղին. «Ինչո՞ւ ինձ կանչելով նեղություն տվեցիր ինձ»։ Սավուղն ասաց. «Սաստիկ նեղ վիճակում եմ, այլազգիներն իմ դեմ պատերազմի են ելել, Աստված ինձնից հեռացել է, ինձ չի պատասխանում ո՛չ մարգարեության, ո՛չ էլ երազների միջոցով։ Արդ, քեզ կանչեցի, որ ինձ ցույց տաս, թե ի՛նչ անեմ»։ ¹⁶ Սամուելն ասաց. «Ինչո՞ւ ես ինձ հարցնում։ Տերը քեզնից հեռացավ և քո ընկերոջ հետ եղավ։ ¹⁷ Տերը քեզ հետ վարվեց այնպես, ինչպես իմ միջոցով հայտնել էր։ Տերը քո ձեռքից խլելու է թագավորությունդ և տալու է քո ընկերոջը՝ Դավթին, ¹⁸ որովհետև չլսեցիր Տիրոջ ձայնը և նրա սաստիկ բարկությունն Ամաղեկի վրա ի գործ չդրեցիր։ Այդ պատճառով էլ Տերն այսօր քեզ հետ այդպես է վարվում։ ¹⁹ Տերը Իսրայելին քեզ հետ միասին մատնելու է այլազգիների ձեռքը, վաղը դու և քո որդիները պիտի ընկնեք, և Տերն Իսրայելի բանակը այլազգիների ձեռքը պիտի մատնի»։

²⁰ Սավուղն անմիջապես ամբողջ հասակով վայր ընկավ գետնին, խիստ զարհուրեց Սամուելի խոսքերից, ու իր մեջ այլևս ուժ չմնաց, որովհետև մի ամբողջ օր ու գիշեր հաց չէր կերել։ ²¹ Կինը մտավ Սավուղի մոտ ու տեսնելով, որ նա մեծ տագնապի մեջ է, ասաց նրան. «Ես՝ քո աղախինը, հնազանդվել եմ քեզ, կյանքս վտանգի ենթարկելով՝ անսացել եմ խոսքերիդ։ ²² Հիմա էլ դո՛ւ լսիր քո աղախնի խոսքերը։ Քո առջև մի պատառ հաց դնեմ, կե՛ր և ուժ կստանաս, որ քո ճանապարհը գնաս»։ ²³ Նա չուզեց ուտել, սակայն իր ծառաներն ու կինը ստիպեցին նրան, և տեղի տալով՝ Սավուղը գետնից վեր կացավ ու նստեց աթոռին։ ²⁴ Կինը տանը մի պարարտ հորթ ուներ, անմիջապես մորթեց դա։ Ալյուր առնելով՝ շաղեց, բաղարջ հաց թխեց ²⁵ և տվեց Սավուղին ու նրա ծառաներին։ Նրանք կերան, վեր կացան ու նույն գիշերը գնացին։

29

Այլազգիները ճամփում են Դավթին

¹ Այլազգիներն իրենց բոլոր բանակները հավաքեցին Ափեկում, իսկ Իսրայելը բանակեց Հեզրայելի Այենդովրում։ ² Այլազգիների նախարարները հարյուրներով ու հազարներով առաջ էին շարժվում, Դավիթն ու իր մարդիկ էլ գնում էին Անքուսի հետևից։ ³ Այլազգիների նախարարներն ասացին. «Ովքե՞ր են դրանք, որ անցնում են»։ Անքուսն իր նախարարներին ասաց. «Չէ՞ որ դա Իսրայելի Սավուղ արքայի ծառա Դավիթն է։ Ահա երկու տարի է, ինչ մեզ մոտ է, և մեր կողմն անցած օրից մինչև այսօր նրա մեջ ոչ մի վատ բան չեմ նկատել»։ ⁴ Այլազգիների նախարարները, խոժոռ նայելով Դավթին, ասացին Անքուսին. «Հե՛տ դարձրու այդ մարդուն, թող գնա այնտեղ, ուր նշանակել ես նրան, մեզ հետ պատերազմի թող չգա, միգուցե նա դավաճանի մեր բանակին։ Նա ինչո՞վ պիտի հաշտվի իր տիրոջ հետ, եթե ոչ այս մարդկանց գլուխներով։ ⁵ Սա այն Դավիթը չէ՞, որի համար պար բռնելով երգում էին. “Սավուղը հազար կոտորեց, իսկ Դավիթը՝ բյուր”»։ ⁶ Անքուսը կանչեց Դավթին ու ասաց նրան. «Կենդանի է Տերը. դու իմ աչքին շիտակ և բարի մարդ ես, հաճելի է ինձ հետ բանակ մտնելդ ու ելնելդ, քանի որ ինձ մոտ եկած օրիցդ մինչև այսօր քո մեջ չարություն չեմ նկատել։ ⁷ Բայց դու իշխանների աչքին լավ չես երևում։ Արդ, դարձի՛ր ու գնա՛ խաղաղությամբ և մի՛ արա այն, ինչ իշխանների աչքին վատ է երևում»։ ⁸ Դավիթն Անքուսին ասաց. «Ի՞նչ եմ արել քեզ. քեզ մոտ ապրելու օրից մինչև այսօր ծառայիդ մեջ ի՞նչ վատ բան ես նկատել, որ ես չգամ իմ տեր արքայի թշնամիների դեմ պատերազմելու»։ ⁹ Անքուսը Դավթին պատասխան տվեց՝ ասելով. «Գիտեմ, որ դու իմ աչքին Աստծու հրեշտակի պես բարի ես, բայց այլազգիների իշխաններն ասում են. “Թող մեզ հետ պատերազմի չգա”։ ¹⁰ Արդ, դու և քո տիրոջ ծառաները, որոնք քեզ հետ են եկել, առավոտ կանուխ վե՛ր կացեք, գնացե՛ք այնտեղ, ուր ձեզ նշանակել եմ։ Ոչ մի վատ բան մի՛ մտածիր, քանի որ դու ինձ հաճելի մարդ ես։ Առավոտ կանուխ վե՛ր կացեք ու լուսածագին գնացե՛ք»։

¹¹ Դավիթն ու նրա մարդիկ առավոտյան կանուխ վեր կացան, որ գնան, այլազգիների երկիրը պահպանեն, իսկ այլազգիները դուրս եկան՝ պատերազմելու Իսրայելի դեմ։

30

Պատերազմ ամաղեկացիների դեմ

¹ Երբ Դավիթն ու նրա մարդիկ երրորդ օրը մտան Սիկելակ, ամաղեկացիներն ասպատակել էին հարավակողմը և Սիկելակը, հարվածել էին Սիկելակին ու հրի մատնել այն, ² գերեվարել էին կանանց և երկրում գտնվող բոլոր մարդկանց՝ փոքրից մինչև մեծը, չէին սպանել տղամարդկանց և կանանց, այլ գերել էին ու գնացել իրենց ճանապարհով։ ³ Դավիթն ու իր մարդիկ երբ մտան քաղաք, տեսան, որ այն հրկիզված է, իսկ իրենց կանայք, տղաներն ու աղջիկները՝ գերված։ ⁴ Դավիթը և իր մարդիկ իրենց ձայնը բարձրացրին ու լաց եղան այնքան, որ նրանց մեջ լալու ուժ այլևս չմնաց։ ⁵ Գերվել էին նաև Դավթի երկու կանայք՝ Աքինովամ Հեզրայելացին ու Կարմեղացի Նաբաղի կինը՝ Աբիգեան։ ⁶ Դավիթը մեծ տագնապի մեջ էր. ժողովուրդն ուզում էր նրան քարկոծել, որովհետև ամեն մեկի սիրտը կսկծում էր իր տղաների ու աղջիկների համար։ ⁷ Դավիթը զորացավ իր Տիրոջով և ասաց Աքիմելեքի որդի Աբիաթար քահանային. «Մոտեցրո՛ւ եփուդը»։ Աբիաթարն այն մոտեցրեց Դավթին։ ⁸ Դավիթը հարցրեց Տիրոջը և ասաց. «Հետապնդե՞մ այդ ելուզակներին, կհասնե՞մ նրանց»։ Տերն ասաց. «Հետապնդի՛ր և անպայման կհասնես ու բոլոր գերիներին կփրկես»։ ⁹ Իր հետ վերցնելով չորս հարյուր մարդ՝ Դավիթը եկավ մինչև Բոսորի հեղեղատը, իսկ ուժասպառ եղածները մնացին տեղում։ ¹⁰ Դավիթն այդ չորս հարյուր մարդկանցով հետապնդեց թշնամուն, իսկ երկու հարյուր մարդ էլ մնաց նստած Բոսորի հեղեղատի այն կողմը։ ¹¹ Նրանք դաշտում մի եգիպտացու գտան, բռնեցին ու բերեցին դաշտ՝ Դավթի մոտ։ Նրան հաց տվեցին, ու նա կերավ, ջուր խմեցրին, տվեցին նրան մի կտոր չոր թուզ և երկու ողկույզ չամիչ։ ¹² Նա կերավ և ուժ առավ, քանի որ երեք օր ու երեք գիշեր ո՛չ հաց էր կերել, ո՛չ ջուր խմել։ ¹³ Դավիթն ասաց. «Ո՞վ ես, որտեղի՞ց ես»։ Պատանյակն ասաց. «Ես եգիպտացի եմ, մի ամաղեկացու ծառա։ Տերս ինձ լքեց, քանի որ երրորդ օրն է, ինչ հիվանդ եմ։ ¹⁴ Մենք ասպատակեցինք Քերեթի հարավային կողմերը, Հուդայի երկրի կողմերը և Քաղեբի հարավակողմը, իսկ Սիկելակը հրի մատնեցինք»։ ¹⁵ Դավիթը նրան ասաց. «Ինձ այդ ելուզակների մոտ կառաջնորդե՞ս»։ Եգիպտացին նրան ասաց. «Երդվի՛ր, որ ինձ չես սպանի, չես հանձնի իմ տիրոջ ձեռքը, և քեզ ելուզակների մոտ կառաջնորդեմ»։ Նա երդվեց նրան։

¹⁶ Եգիպտացին նրան այնտեղ տարավ։ Եվ ահա նրանք ցրված էին ամբողջ դաշտում, ուտում ու խմում էին և այլազգիների ու Հուդայի երկրից վերցրած մեծամեծ ավարով ուրախանում։ ¹⁷ Դավիթը նրանց վրա հարձակվեց և Արուսյակի երևալուց մինչև երեկո ու մյուս օրը կոտորեց նրանց այնպես, որ ոչ մի տղամարդ չփրկվեց։ Միայն չորս հարյուր երիտասարդներ, ուղտերը հեծած, փախան։

¹⁸ Դավիթն ազատեց այն բոլորին, որոնց գերեվարել էին ամաղեկացիները։ Նա փրկեց նաև իր երկու կանանց։ ¹⁹ Նրանց ունեցածից ոչ մի բան չէր պակասել. փոքրից մինչև մեծը, տղաներին և աղջիկներին և այն ամենը, ինչ առել էին նրանցից, Դավիթը հետ բերեց։ ²⁰ Դավիթն առավ բոլոր հոտերն ու արջառները և տարավ ավարի առջևից։ Ավարի համար ասում էին. «Սա Դավթի ավարն է»։

²¹ Դավիթը եկավ ուժասպառ եղած երկու հարյուր զինվորների մոտ, որոնք չէին կարողացել Դավթի հետևից գնալ և մնացել էին Բոսորի հեղեղատում։ Նրանք ընդառաջ գնացին Դավթին ու նրա հետ եղած զորքին։ Դավիթը մոտեցավ այդ երկու հարյուր զինվորներին, հարցուփորձ արեց նրանց ողջության մասին։ ²² Դավթի հետ պատերազմի գնացած դաժան ու անզգամ մարդիկ ասացին. «Քանի որ սրանք մեզ հետ չեկան, ուստի մենք էլ մեր փրկած ավարից նրանց բաժին չենք հանի։ Միայն ամեն մեկը թող առնի իր կնոջն ու որդիներին և գնա, հեռանա»։ ²³ Դավիթն ասաց. «Եթե Տերը թշնամուն հանձնել է մեր ձեռքը և մեզ պահել է, ուրեմն այդ բանը մի՛ արեք, եղբայրնե՛ր։ Չէ՞ որ Տերը մեր ձեռքն է մատնել մեզ վրա հարձակված ելուզակներին։ ²⁴ Ո՞վ կլսի ձեր խոսքերը, չէ՞ որ նրանք ձեզնից թույլ չեն։ Պահապանների բաժինը հավասար պետք է լինի պատերազմի գնացողների բաժնին։ ²⁵ Ավարը հավասարապես պետք է բաժանվի»։ Եվ այդ օրվանից մինչև այսօր դա իբրև օրենք ու իրավունք կիրառվում է Իսրայելի մեջ։

²⁶ Դավիթը եկավ Սիկելակ և ավարից ուղարկեց Հուդայի երկրի ծերերին ու իր ընկերներին՝ ասելով. ²⁷ «Ահա ձեզ Տիրոջ թշնամիների ավարից բաժին եմ հանում, ո՛վ Բեթելի ու հարավային Ռամաթի, ²⁸ Եթերի ու Արոյերի, Եփթամոթի, Եսթամայի, ²⁹ Երաքելի և հերեմելացիների ու կինեցիների քաղաքների, Ռամայի, ³⁰ Բորասանի ու Աթաքի, Քեբրոնի ու բոլոր այն վայրերի բնակիչներ, ³¹ որտեղով Դավիթն ու իր մարդիկ անցել են»։

31

Սավուղի և իր որդիների մահը

(Ա Մն. 10.1-12)

¹ Այլազգիները պատերազմ մղեցին Իսրայելի դեմ, և Իսրայելի այրերը, այլազգիների առաջ փախուստի դիմելով, վիրավոր ընկան Գեղբուա լեռան վրա։ ² Այլազգիները, հետապնդելով Սավուղին ու նրա որդիներին, սպանեցին Սավուղի որդիներին՝ Հովնաթանին, Ամինադաբին ու Մեղքիսավեին։ ³ Պատերազմը Սավուղի դեմ սաստկացավ, կորովի աղեղնավորները գտան նրան, և նա վիրավորվեց կողոսկրից ներքև։ ⁴ Սավուղն իր կապարճակրին ասաց. «Սուրդ մերկացրո՛ւ և դրանով ինձ մահացու խոցի՛ր։ Չլինի թե անթլփատները գան, ինձ խոցոտեն և ծաղրուծանակի ենթարկեն»։ Կապարճակիրը չուզեց այդ անել, քանի որ սաստիկ վախեցել էր։ ⁵ Սավուղն առավ իր սուրը և իրեն նետեց դրա վրա։ Երբ կապարճակիրը տեսավ, որ Սավուղը մեռավ, ինքը ևս իրեն նետեց սրի վրա ու նրա հետ մեռավ։ ⁶ Մեռան Սավուղը, իր երեք որդիներն ու իր կապարճակիրը. նրա բոլոր մարդիկ նույն օրը միասին մեռան։ ⁷ Երբ հովտի այն կողմում ու Հորդանան գետի այն կողմում գտնվող Իսրայելի այրերը տեսան, որ Իսրայելի այրերը փախան, և մեռան Սավուղն ու իր որդիները, թողեցին իրենց քաղաքներն ու փախուստի դիմեցին։ Այլազգիները եկան ու բնակվեցին դրանց մեջ։ ⁸ Հետևյալ օրը այլազգիները եկան դիակները կողոպտելու։ Նրանք գտան Գեղբուա լեռան վրա ընկած Սավուղին ու նրա երեք որդիներին։ ⁹ Նրան շուռ տվեցին, վերցրին զենքերը և կտրեցին գլուխը։ Նրանք բանբերներ ուղարկեցին այլազգիների երկրի չորս կողմը՝ հայտնելու այս մասին իրենց կռատներին ու ժողովրդին։ ¹⁰ Սավուղի զենքերը դրեցին Աստարտի տանը և նրանց մարմինները կախեցին Բեթսանի պարսպից։

¹¹ Երբ գաղաադացիների Հաբիս բնակավայրի բնակիչները լսեցին այն մասին, թե այլազգիները Սավուղին ի՛նչ էին արել, ¹² բոլոր զորեղ մարդիկ վեր կացան, ամբողջ գիշեր գնացին, Բեթսանի պարսպից վերցրին Սավուղի ու նրա որդի Հովնաթանի մարմինները, դրանք բերեցին Հաբիս և այնտեղ այրեցին։ ¹³ Այնուհետև նրանց ոսկորներն առնելով՝ թաղեցին Հաբիսի դաշտում և յոթ օր ծոմ պահեցին։

Բ ԳԻՐՔ ԹԱԳԱՎՈՐՆԵՐԻ

1

[* Բ ԳԻՐՔ ՍԱՄՈՒԵԼԻ]

Դավիթն իմանում է Սավուղի մահվան մասին

¹ Սավուղի մահից և ամաղեկացիներին կոտորելուց հետո Դավիթը վերադարձավ ու երկու օր մնաց Սիկելակում։ ² Երրորդ օրը Սավուղի զորքի բանակատեղիից մարդ եկավ, որի հագուստները պատառոտված էին, իսկ գլխին՝ հող։ Երբ նա Դավթի մոտ մտավ, գետնին ընկավ ու խոնարհվեց նրա առաջ։ ³ Դավիթը հարցրեց նրան. «Որտեղի՞ց ես գալիս»։ Նա պատասխանեց. «Փախել եմ Իսրայելի բանակատեղիից»։ ⁴ Դավիթն ասաց նրան. «Ի՞նչ է պատահել, պատմի՛ր ինձ»։ Մարդն ասաց. «Ժողովուրդը պատերազմի դաշտից փախավ, շատերը վիրավոր ընկան ու մեռան։ Մեռան նաև Սավուղն ու Հովնաթանը»։ ⁵ Դավիթն իրեն լուր բերող երիտասարդին հարցրեց. «Ինչպե՞ս գիտես, որ Սավուղն ու նրա որդի Հովնաթանը մեռան»։ ⁶ Լուր բերող երիտասարդն ասաց. «Դիպվածով Գեղբուա լեռան վրա էի գտնվում և տեսա, որ ահա Սավուղն ընկել էր իր նիզակի վրա, և թշնամու մարտակառքերն ու հեծյալները հասել էին նրան։ ⁷ Նա հետ նայեց և ինձ տեսնելով՝ իր մոտ կանչեց։ Ասացի. “Ահա այստեղ եմ”։ ⁸ Նա ասաց ինձ. “Ո՞վ ես դու”։ Ասացի՝ “Ամաղեկացի եմ”։ ⁹ Նա ասաց ինձ. “Խոցի՛ր ու սպանի՛ր ինձ։ Թեև անհուն մութը պատել է ինձ, բայց շունչս դեռ վրաս է”։ ¹⁰ Խոցեցի ու սպանեցի նրան, որովհետև գիտեի, որ նիզակի վրա ընկնելուց հետո չէր ապրելու։ Առա նրա գլխից թագը, ապարանջանները՝ նրա բազկից և դրանք բերեցի այստեղ՝ իմ տիրոջը»։ ¹¹ Դավիթն իր հագուստները բռնելով՝ պատառոտեց։ Իրենց հագուստները պատառոտեցին նաև նրա մոտ գտնվող մարդիկ։ ¹² Նրանք ողբացին, լաց եղան ու մինչև երեկո ծոմ պահեցին Սավուղի, նրա որդի Հովնաթանի, Հուդայի ժողովրդի ու Իսրայելի տան համար, որ ընկան սրով։

¹³ Դավիթն իրեն լուր բերող երիտասարդին ասաց. «Դու որտեղի՞ց ես»։ Մարդն ասաց. «Մի պանդուխտ ամաղեկացու որդի եմ ես»։ ¹⁴ Դավիթն ասաց նրան. «Ինչպե՞ս չվախեցար ձեռք բարձրացնել ու սպանել Տիրոջ օծյալին»։ ¹⁵ Իր ծառաներից մեկին կանչելով՝ Դավիթն ասաց. «Մոտեցի՛ր ու սպանի՛ր սրան»։ Նա հարվածեց, ու մարդը մեռավ։ ¹⁶ Դավիթն ասաց նրան. «Քո արյունը թող քո գլխին լինի, քանզի քո բերանը քո մասին վկայություն տվեց՝ ասելով. “Ես սպանեցի Տիրոջ օծյալին”»։

Դավթի ողբը Սավուղի և Հովնաթանի համար

¹⁷ Դավիթը Սավուղի ու նրա որդի Հովնաթանի վրա այս ողբը հորինեց ¹⁸ և պատվիրեց այն, որ Աղեղնավորության երգ է կոչվում, ուսուցանել Հուդայի որդիներին։ Այն գրված է Ուղղության գրքում։

¹⁹ Քարացի՛ր, ո՜վ Իսրայել.

բարձունքներում բլուրներ կազմեցին

քո սպանվածների դիերը.

ինչպե՞ս ընկան հզորները։

²⁰ Մի՛ հայտնեք Գեթում և մի՛ ավետեք Ասկաղոնի ելքերում,

որ այլազգիների դուստրերը չուրախանան,

և անթլփատների դուստրերը չցնծան։

²¹ Ո՜վ Գեղբուայի լեռներ, թող ձեզ վրա ցող չիջնի,

անձրև չգա ձեզ վրա,

և ոչ էլ պտղատու այգիներ լինեն։

Քանզի այստեղ է, որ անպիտան գտնվեցին

հզորների վահանները և Սավուղի վահանը,

կարծես չէին օծվել յուղով։

²² Հովնաթանի աղեղը վիրավորների արյունից ու հզորների ճարպից պարապ հետ չքաշվեց,

իսկ Սավուղի սուրը դատարկ պատյան չդրվեց։

²³ Սավուղն ու Հովնաթանը միմյանց սիրելի էին, գեղեցիկ ու վայելուչ,

իրենց կենդանության ժամանակ անբաժան էին միմյանցից,

իրենց մահվան ժամանակ էլ իրարից չբաժանվեցին։

Արծիվներից ավելի թեթևաշարժ էին,

առյուծներից ավելի զորեղ։

²⁴ Իսրայելի՜ դուստրեր, լա՛ց եղեք Սավուղի վրա,

լա՛ց եղեք նրա վրա, ով ձեզ զարդարուն կարմիր զգեստներ էր հագցնում,

ձեր հագուստների վրա ոսկե զարդեր էր գցում։

²⁵ Հզորներն ինչպե՞ս ընկան պատերազմի մեջ։

Հովնաթա՜ն, քո բարձունքների վրա խոցվեցիր։

²⁶ Ցավում եմ քեզ համար, եղբա՜յր իմ Հովնաթան։

Ինձ շատ սիրելի էիր, քո սերը կանանց սիրուց բարձր էր ինձ համար։

²⁷ Ինչպե՞ս ընկան հզորները, և կորչեցին պատերազմի զենքերը։

2

Դավիթը Հուդայի երկրի թագավոր

¹ Դրանից հետո Դավիթը, հարց տալով Տիրոջը, ասաց. «Արդյոք գնա՞մ Հուդայի քաղաքներից որևէ մեկը»։ Տերն ասաց նրան. «Գնա՛»։ Դավիթն ասաց. «Ո՞ւր գնամ»։ Տերն ասաց՝ Քեբրոն։ ² Դավիթն իր երկու կանանց՝ հեզրայելացի Աքինովամի և կարմեղացի Նաբաղի կին Աբիգեայի հետ եկավ Քեբրոն։ ³ Դավիթը իր հետ վերցրեց իր մարդկանց, ամեն մեկին իր ընտանիքով, և նրանք բնակվեցին Քեբրոն քաղաքում։ ⁴ Եկան Հուդայի երկրի մարդիկ և այնտեղ Դավթին Հուդայի տան վրա թագավոր օծեցին։ Դավթին հայտնեցին, որ Գաղաադի Հաբիս բնակավայրի մարդիկ թաղել են Սավուղին։ ⁵ Դավիթը Գաղաադի Հաբիս բնակավայրի առաջնորդների մոտ պատգամավորներ ուղարկեց և ասաց նրանց. «Օրհնյալ լինեք Տիրոջից, որ ձեր տիրոջ՝ Տիրոջից օծյալ Սավուղի նկատմամբ բարյացակամ եք եղել. թաղել եք նրան ու իր որդի Հովնաթանին։ ⁶ Արդ, Տերը ձեր նկատմամբ ողորմություն և արդարություն թող անի, իսկ ես այդ բարի գործի համար հատուցելու եմ ձեզ։ ⁷ Թող ձեր ձեռքերը զորանան, ու դուք քաջասիրտ լինեք։ Մեռավ ձեր տերը՝ Սավուղը, և Հուդայի տունն ինձ իր վրա թագավոր է օծել»։

Հեբուսթեն Իսրայելի թագավոր

⁸ Սավուղի զորավար Աբենները՝ Ների որդին, վերցրեց Սավուղի որդի Հեբուսթեին ու տարավ Մաանայիմ ⁹ և նրան թագավոր դարձրեց Գաղաադի, Թասիրի, Հեզրայելի, Եփրեմի ու Բենիամինի երկրների և ողջ Իսրայելի վրա։ ¹⁰ Սավուղի որդի Հեբուսթեն քառասուն տարեկան էր, երբ թագավոր դարձավ Իսրայելի վրա և թագավորեց երկու տարի. Հուդայի տնից բացի, որ Դավթի հետ էր։

¹¹ Քեբրոնում Հուդայի երկրի վրա Դավիթը թագավորեց յոթ տարի վեց ամիս։

Պատերազմ Հուդայի երկրի և Իսրայելի միջև

¹² Ների որդի Աբենները և Սավուղի որդի Հեբուսթեի ծառաները Մաանայիմից եկան Գաբավոն։ ¹³ Շարուհիի որդի Հովաբը և Դավթի ծառաները ելան Քեբրոնից և նրանց հանդիպեցին Գաբավոնի աղբյուրի մոտ։ Սրանք աղբյուրի այն կողմը նստեցին, իսկ նրանք՝ այս կողմը։ ¹⁴ Աբեններն ասաց Հովաբին. «Թող կտրիճները ելնեն ու մրցեն մեր առջև»։ Հովաբն ասաց. «Թող մրցեն»։ ¹⁵ Բենիամինի ու Սավուղի որդի Հեբուսթեի կողմից ելան տասներկու երիտասարդներ. Դավթի կողմից էլ տասներկու երիտասարդներ ելան։ ¹⁶ Ամեն մեկը ձեռքով բռնեց իր մրցակցի գլխից ու սուրը խրեց մրցակցի կողը։ Բոլորն այնտեղ ընկան ու մեռան։ Եվ այդ տեղի անունը դրեցին Դավաճանների դաշտ, որը Գաբավոնում է գտնվում։

¹⁷ Այդ օրը սաստիկ պատերազմ եղավ, և Աբեններն ու Իսրայելի այրերը պարտվեցին Դավթի զինվորներից։ ¹⁸ Այնտեղ էին Շարուհիի երեք որդիները՝ Հովաբը, Աբեսսան և Ասայելը։ Ասայելը դաշտի այծյամի պես թեթևաքայլ էր։ ¹⁹ Ասայելը հետապնդեց Աբեններին և նրան հալածելիս աջ ու ձախ չխոտորվեց։ ²⁰ Աբենները հետ նայեց և ասաց. «Դո՞ւ ես, Ասայե՜լ»։ Նա ասաց. «Ես եմ»։ ²¹ Աբեններն ասաց. «Թեքվի՛ր աջ կամ ձախ, բռնի՛ր կտրիճներից մեկին ու վերցրո՛ւ նրա զենքերը»։ Սակայն Ասայելը չուզեց նրան հետապնդելուց հրաժարվել։ ²² Աբենները մի անգամ ևս ասաց Ասայելին. «Հեռո՛ւ մնա ինձանից, որ քեզ գետնին չխփեմ, թե չէ ի՞նչ երեսով պիտի ներկայանամ Հովաբին, և ինչի՞ նման կլինի դա։ Վերադարձի՛ր քո եղբայր Հովաբի մոտ»։ ²³ Ասայելը չուզեց հետ կանգնել։ Աբենները նիզակով հարվածեց նրա կողին, և նիզակը զիստից դուրս եկավ։ Նա ընկավ այնտեղ ու մեռավ տեղում։ Ով Ասայելի ընկած ու մեռած տեղն էր գալիս, կանգ էր առնում։ ²⁴ Հովաբն ու Աբեսսան Աբենների հետևից ընկած հետապնդում էին նրան, և երբ Գայի դիմաց, Գաբավոնի անապատի ճանապարհի վրա գտնվող Ամովնի բլուրը հասան, արևը մայր մտավ։

²⁵ Բենիամինի որդիները, հավաքվելով Աբենների շուրջը, մի բլրի վրա կանգ առան։ ²⁶ Աբենները ձայն տվեց Հովաբին. «Մի՞թե սուրն անդադար բնաջնջելու է, կամ մի՞թե չգիտես, որ սրա վերջը դառնություն կլինի։ Ե՞րբ ես հրամայելու ժողովրդին, որ իրենց եղբայրներին հալածելուց հրաժարվեն»։ ²⁷ Հովաբն ասաց. «Կենդանի է Տերը։ Եթե դու խոսած չլինեիր, ժողովուրդն այգաբացին վեր էր կենալու, և ամեն մեկը հալածելու էր իր եղբորը»։

²⁸ Հովաբը փող հնչեցրեց, ամբողջ ժողովուրդը կանգ առավ, այլևս չհալածեց Իսրայելին, և պատերազմը դադարեց։ ²⁹ Աբեններն ու նրա մարդիկ ամբողջ գիշերը շարժվեցին դեպի արևելք, անցան Հորդանան գետը, ճեղքեցին ձորերն ու եկան Մաանայիմ։ ³⁰ Հովաբն Աբեններին հալածելուց հրաժարվեց, հավաքեց ամբողջ ժողովրդին, աշխարհագիր արեց ու տեսավ, որ Դավթի մարդկանցից կոտորվել էին տասնինը մարդ և Ասայելը, ³¹ իսկ Դավթի զինվորները Բենիամինի որդիներից ու Աբենների մարդկանցից կոտորել էին երեք հարյուր վաթսուն մարդ։ ³² Վերցրին Ասայելին ու նրան թաղեցին Բեթղեհեմում՝ իր հոր գերեզմանի մեջ։ Հովաբն ու իր մարդիկ գնացին և արշալույսին հասան Քեբրոն։

3

¹ Սավուղի տան ու Դավթի տան միջև սաստիկ պատերազմ եղավ։ Դավթի տունը գնալով հզորանում էր, իսկ Սավուղի տունը գնալով տկարանում էր։

Դավթի որդիները

² Քեբրոնում Դավիթը որդիներ ունեցավ։ Նրա անդրանիկը հեզրայելացի Աքինոոմից ծնված Ամովնն էր, ³ երկրորդը կարմեղացի Աբիգեայից ծնված Դավիան էր, երրորդը Գեսուրի արքա Թողմիի դուստր Մաաքայից ծնված Աբեսաղոմն էր, ⁴ չորրորդը Ագգիթի որդի Ադոնիան էր, հինգերորդը Ամիտաղի որդի Սափատիան էր, ⁵ վեցերորդը Դավթի Եգղաթա կնոջից ծնված Հեթրամն էր։ Դավիթն այս որդիներին ունեցավ Քեբրոնում։

⁶ Երբ Սավուղի տան և Դավթի տան միջև պատերազմ էր տեղի ունենում, Աբենները Սավուղի տունն էր կառավարում։ ⁷ Սավուղն ուներ մի հարճ, որի անունը Ռեսփա էր։ Նա Հուղի դուստրն էր։ Սավուղի որդի Հեբուսթեն Աբեններին ասաց. «Ինչո՞ւ ես պառկում իմ հոր հարճի հետ»։

Աբենները գժտվում է Հեբուսթեի հետ

⁸ Աբենները, խիստ բարկանալով Հեբուսթեի խոսքի համար, նրան ասաց. «Մի՞թե ես շան գլուխ եմ։ Քո հոր տան, նրա եղբայրների ու բարեկամների հանդեպ այսօր ողորմություն գործեցի և չլքեցի ձեզ ու Դավթի տան կողմը չանցա։ Իսկ դու այսօր մի կնոջ համար ինձանից վրեժ ես լուծում։ ⁹ Աստված Աբեններին այսպես ու սրանից ավելին թող անի, եթե Դավթին չանեմ այն, ինչ Տերը երդվեց նրան՝ ասելով. ¹⁰ “Թագավորությունը վերցնելու եմ Սավուղից և Դավթի թագավորությունն եմ հաստատելու Իսրայելի ու Հուդայի երկրի վրա Դանից մինչև Բերսաբեե”»։ ¹¹ Հեբուսթեն վախից այլևս չկարողացավ պատասխան տալ Աբեններին։

Աբենները՝ Դավթի դաշնակից

¹² Աբենները, անմիջապես պատգամավորներ ուղարկելով Թեսաղմի երկիր՝ Դավթի մոտ, ասաց. «Ինձ հետ քո ո՛ւխտը կնքիր, և ես քեզ կօգնեմ ամբողջ Իսրայելը քո կողմը դարձնելու համար»։ ¹³ Դավիթն ասաց. «Բարի, ես քեզ հետ ուխտ կկնքեմ, բայց քեզանից մի բան եմ խնդրում. ինձ չներկայանաս, եթե ինձ տեսնելու գալիս հետդ չբերես Սավուղի դուստր Մեղքողին»։ ¹⁴ Դավիթը Սավուղի որդի Հեբուսթեի մոտ պատգամավորներ ուղարկեց՝ ասելով. «Ի՛նձ տուր իմ կին Մեղքողին, որին ես ստացել եմ հարյուր փղշտացիների թլփատելու դիմաց»։ ¹⁵ Հեբուսթեն մարդ ուղարկեց ու Մեղքողին առավ իր ամուսնուց՝ Սելլայի որդի Փաղտիելից։ ¹⁶ Նրա ամուսինը լալով գնաց նրա հետևից մինչև Բարակիմ։ Աբենները նրան ասաց. «Հե՛տ դարձիր»։ Եվ նա հետ դարձավ։

¹⁷ Աբենները, խոսելով Իսրայելի ծերերի հետ, ասաց. «Երկար ժամանակ խնդրում էիք, որ Դավիթը թագավորի ձեզ վրա։ ¹⁸ Հիմա իրագործե՛ք, քանզի Տերը, խոսելով Դավթի մասին, ասել է. “Իմ ծառա Դավթի ձեռքով եմ փրկելու Իսրայելը այլազգիների ձեռքից և նրա բոլոր թշնամիների ձեռքից”»։ ¹⁹ Աբեններն այս բանն ասաց Բենիամինի որդիներին։ Աբենները գնաց Քեբրոն՝ Դավթին հայտնելու այն, ինչ հաճելի էր թվացել Իսրայելին և Բենիամինի ամբողջ տանը։ ²⁰ Աբենները քսան մարդկանցով եկավ Քեբրոն՝ Դավթի մոտ, և Դավիթն Աբենների ու նրա հետ եկած մարդկանց համար խրախճանք կազմակերպեց։ ²¹ Աբեններն ասաց Դավթին. «Գնամ և ամբողջ Իսրայելին հավաքեմ իմ տեր արքայի շուրջը, քեզ հետ ուխտ կապեմ, և դու թագավորես բոլոր նրանց վրա, որոնց ցանկանա քո անձը»։

Աբենների սպանությունը

Դավիթն Աբեններին հետ ուղարկեց, և նա գնաց խաղաղությամբ։ ²² Դավթի մարդիկ և Հովաբը եկան ասպատակությունից՝ իրենց հետ բազում ավար բերելով։ Հովաբը Քեբրոնում՝ Դավթի մոտ չէր, երբ Աբեններին արձակել էր, և նա գնացել էր խաղաղությամբ։ ²³ Հովաբն ու նրա ամբողջ զորքը եկան։ Հովաբին հայտնեցին, թե Ների որդի Աբենները եկել է Դավթի մոտ, որն արձակել է նրան, և նա գնացել է խաղաղությամբ։ ²⁴ Հովաբը, մտնելով Դավիթ արքայի մոտ, ասաց. «Այդ ի՞նչ ես արել. Աբենները եկել է քեզ մոտ, և դու ինչո՞ւ նրան խաղաղությամբ արձակեցիր։ ²⁵ Մի՞թե չգիտես Ների որդի Աբենների չարությունը։ Նա եկել է քեզ խաբելու, իմանալու քո ելումուտը և տեղեկանալու այն ամենին, ինչ դու անում ես»։ ²⁶ Հովաբը դուրս եկավ Դավթի մոտից, պատգամավորներ ուղարկեց Աբենների հետևից, որոնք նրան վերադարձրին Սեիրմի ջրհորից։ Դավիթն այդ մասին չգիտեր։ ²⁷ Հովաբն Աբեններին բերեց Քեբրոն, դարպասից ներս տարավ իբր թե նրա հետ գաղտնի խոսելու նպատակով և իր եղբայր Ասայելի արյան վրեժը լուծելու համար խոցեց նրա կողը, և նա մեռավ։

²⁸ Դրանից հետո Դավիթը, իմանալով այդ մասին, ասաց. «Ես և իմ թագավորությունը Տիրոջ առաջ հավիտյան անպարտ ենք Ների որդի Աբենների արյան համար։ ²⁹ Թող Հովաբի և նրա հոր ամբողջ տան վրա ընկնի մեղքը, և Հովաբի տնից անպակաս լինեն սերմնածորողը, բորոտը, ցուպով շրջող մուրացիկը, սրից ընկնողն ու սովամահ լինողը»։ ³⁰ Հովաբն ու նրա եղբայր Աբեսսան հարմար պահի էին սպասում՝ սպանելու Աբեններին այն բանի համար, որ նա պատերազմի ժամանակ Գաբավոնում սպանել էր իրենց եղբորը՝ Ասայելին։

Աբենների թաղումը

³¹ Դավիթը Հովաբին ու նրա հետ եղած ամբողջ ժողովրդին ասաց. «Պատառոտե՛ք ձեր հագուստները, քո՛ւրձ հագեք ու ողբացե՛ք Աբենների վրա»։ Դավիթ արքան գնում էր դագաղի հետևից։ ³² Աբեններին թաղեցին Քեբրոնում։ Արքան բարձրաձայն լաց եղավ նրա գերեզմանի վրա։ Աբենների համար լաց էր լինում նաև ամբողջ ժողովուրդը։ ³³ Արքան, Աբեններին ողբալով, ասում էր.

«Մի՞թե Աբենները պիտի մեռներ այնպես,

ինչպես անմիտն է մեռնում։

³⁴ Քո ձեռքերը կապված չէին,

քո ոտքերը շղթայված չէին։

Քեզ չբերեցին, ինչպես Նաբաղին էին բերել,

այլ ընկար, ինչպես մեկն է ընկնում անիրավ մարդկանց առջև»։

Ամբողջ ժողովուրդը հավաքվեց նրան ողբալու։ ³⁵ Քանի դեռ ցերեկ էր, ամբողջ ժողովուրդը եկավ Դավթի մոտ, որ նա ճաշի, սակայն Դավիթը երդվելով ասաց. «Աստված ինձ այսպես և այսպես ու ավելին անի, եթե արեգակը մայր մտնելուց առաջ հաց կամ որևէ բան ուտեմ»։ ³⁶ Ամբողջ ժողովուրդն իմացավ այդ, նրան հաճելի թվաց այն ամբողջ բարությունը, որ արքան գործել էր ժողովրդի համար։ ³⁷ Եվ ողջ Իսրայելն այդ օրն իմացավ, որ արքայի հրամանով չի եղել Ների որդի Աբենների սպանությունը։ ³⁸ Արքան ասաց իր ծառաներին. «Չգիտե՞ք, որ այսօր Իսրայելի մի մեծ առաջնորդ ընկավ, ³⁹ որ այսօր ինձ արյունակից էր և արքայի կողմից էր նշանակված։ Իսկ այս մարդիկ՝ Շարուհիի որդիները, ինձնից ավելի դաժան են։ Տերը չարին թող նրա չարության համեմատ հատուցի»։

4

Հեբուսթեի սպանությունը

¹ Երբ Սավուղի որդի Հեբուսթեն լսեց, որ Աբենները մահացել է Քեբրոնում, նրա ձեռքերը թուլացան, և Իսրայելի բոլոր այրերը վհատվեցին։ ² Սավուղի որդի Հեբուսթեն ուներ գնդերի երկու զորապետներ, որոնցից մեկի անունն էր Բաանա, իսկ մյուսինը՝ Ռեքաբ, Բենիամինի ցեղից բերովթացի Ռեմոնի որդիները։ Բերովթը Բենիամինի երկրի մասն էր կազմում։ ³ Բերովթացիները Գեթթայիմ փախան և իբրև պանդուխտ՝ այնտեղ են ապրում մինչև այսօր։ ⁴ Սավուղի որդի Հովնաթանը հինգ տարեկան, ոտքից հաշմանդամ որդի ուներ. Սավուղի և նրա որդի Հովնաթանի մահվան գույժը Հեզրայելից հասնելուց հետո մանկան դայակը, նրան վերցնելով, փախել էր։ Եվ ահա երբ նրանք շտապ փախչում էին, մանուկն ընկել էր ու ոտքը վնասել։ Նրա անունը Մեմփիբոսթե էր։ ⁵ Բերովթացի Ռեմոնի որդիները՝ Ռեքաբն ու Բաանան, գնացին և օրվա տոթ ժամին մտան Հեբուսթեի տունը։ Նա կեսօրին ննջում էր անկողնում։ ⁶ Տան դռնապանը ցորեն մաքրելիս նիրհել էր ու քուն մտել։ Ռեքաբ և Բաանա եղբայրները գաղտագողի ⁷ տուն մտան։ Հեբուսթեն սենյակում ննջում էր իր անկողնում։ Հարվածեցին նրան, սպանեցին, կտրեցին նրա գլուխը և այն վերցնելով՝ ամբողջ գիշերը գնացին արևելյան ճանապարհով։ ⁸ Հեբուսթեի գլուխը բերեցին Քեբրոն՝ Դավթի մոտ, և ասացին արքային. «Ահա քո թշնամու՝ Սավուղի որդի Հեբուսթեի գլուխը, որը քո մահն էր նյութում։ Տերը մեր տեր արքայի համար վրեժխնդիր եղավ նրա թշնամիներից, ինչպես այսօր վրեժխնդիր եղավ քո թշնամի Սավուղից և նրա սերնդից»։ ⁹ Դավիթը Բերովթացի Ռեմոնի որդիներ Ռեքաբին ու նրա եղբայր Բաանային պատասխանեց՝ ասելով. «Վկա է Տերը, որ ինձ փրկեց ամեն նեղությունից։ ¹⁰ Նա, ով պատմել էր ինձ, թե Սավուղը մեռավ, նրան թվում էր՝ ինձ ավետիս էր տալիս, իսկ ես բռնեցի նրան Սիկելակում ու սպանեցի, մինչդեռ պետք է աչքալուսանք տայի։ ¹¹ Արդ, դուք՝ չա՛ր մարդիկ, իր տանը՝ անկողնում, սպանել եք արդար մարդու։ Հիմա ես նրա արյունը պետք է պահանջեմ ձեզանից, ձեզ պիտի վերացնեմ երկրից»։ ¹² Դավիթը հրաման տվեց իր զինվորներին, որոնք սպանեցին նրանց, կտրեցին նրանց ձեռքերն ու ոտքերը և դրանք կախեցին Քեբրոնի աղբյուրի վրա, իսկ Հեբուսթեի գլուխը թաղեցին Քեբրոնում, Ների որդի Աբենների գերեզմանում։

5

Դավիթն Իսրայելի թագավոր է օծվում

(Ա Մն. 11.1-9, 14.1-7)

¹ Իսրայելի բոլոր ցեղերը եկան Քեբրոն՝ Դավթի մոտ, ու խոսելով նրա հետ՝ ասացին. «Մենք քո ոսկորները և քո մարմիններն ենք։ ² Անցյալում, երբ Սավուղը մեր թագավորն էր, դու էիր Իսրայելին առաջնորդողը և ի մի հավաքողը։ Տերը քեզ ասաց. “Դու պիտի հովվես Իսրայելին՝ իմ ժողովրդին, դու ես լինելու Իսրայելի առաջնորդը”»։ ³ Իսրայելի բոլոր ծերերը եկան Քեբրոն՝ արքայի մոտ, և Դավիթ արքան նրանց հետ ուխտ դրեց Քեբրոնում՝ Տիրոջ առջև։ Նրանք Դավթին թագավոր օծեցին ամբողջ Իսրայելի վրա։

⁴ Դավիթը երեսուն տարեկան էր, երբ թագավոր դարձավ, և քառասուն տարի թագավորեց. ⁵ յոթ տարի վեց ամիս Հուդայի վրա թագավորեց Քեբրոնում և երեսուներեք տարի ողջ Իսրայելի ու Հուդայի վրա՝ Երուսաղեմում։

⁶ Դավիթն իր զորքով գնաց Երուսաղեմ, այդ երկրում բնակվող հեբուսացիների դեմ։ Դավթին ասացին. «Դու այստեղ չես մտնի, նույնիսկ կույրերն ու կաղերը քեզ դեմ են կանգնել և ասում են. “Դավիթն այստեղ թող չմտնի”»։ ⁷ Դավիթը գրավեց Սիոնն ու նրա ամրոցը, որ Դավթի քաղաքն է։ ⁸ Այդ օրը Դավիթն ասաց. «Ով որ ուզում է կոտորել հեբուսացիներին, թող սրով հարձակվի։ Կաղերին և կույրերին ես ատում եմ»։ Դրա համար են ասում. «Կույրերն ու կաղերը չպետք է մտնեն Տիրոջ տունը»։ ⁹ Դավիթն ապրեց ամրոցում, և այն կոչվեց Դավթի քաղաք։ Նա շուրջանակի՝ ծայրից ծայր քաղաք շինեց և իր համար էլ՝ տուն։ ¹⁰ Դավիթը գնալով հզորանում էր, և Ամենակալ Տերը նրա հետ էր։

¹¹ Տյուրոսի արքա Քիրամը դեսպաններ ուղարկեց Դավթի մոտ, նաև եղևնափայտ, փայտի հյուսներ ու քարի վարպետներ, որոնք Դավթի համար տուն շինեցին։ ¹² Դավիթը համոզվեց, որ Տերն է իրեն Իսրայելի վրա թագավոր հաստատել և իր թագավորությունը բարձրացրել իր ժողովրդի՝ Իսրայելի համար։

¹³ Դավիթը Քեբրոնից Երուսաղեմ գալուց հետո ուրիշ կանայք ու հարճեր ևս առավ։ Դավիթն ուրիշ տղաներ և աղջիկներ էլ ունեցավ։ ¹⁴ Երուսաղեմում նրա ունեցած որդիների անունները սրանք են՝ Սամաաթ, Հեսիբաթ, Նաթան, Գաղամաան, ¹⁵ Հեբաար, Թեմեսուս, Ելփալատ, Նագեդ, Նափեկ, Հեննաթա, ¹⁶ Եղիսամիս, Բաղիգադ և Եղիփալետ։

Դավթի հաղթանակներն այլազգիների դեմ

(Ա Մն. 14.8-17)

¹⁷ Երբ այլազգիները լսեցին, որ Դավիթը Իսրայելի թագավոր է օծվել, բոլորը ելան Դավթի վրա հարձակվելու։ Երբ Դավիթն այդ իմացավ, իջավ ամրոցը։ ¹⁸ Այլազգիները եկան ու հավաքվեցին Տիտանների հովիտներում։ ¹⁹ Դավիթը հարցրեց Տիրոջը՝ ասելով. «Հարձակվե՞մ այլազգիների վրա, նրանց իմ ձեռքը կմատնե՞ս»։ Տերը Դավթին ասաց. «Հարձակվի՛ր, քանի որ անպայման քո ձեռքն եմ մատնելու այլազգիներին»։ ²⁰ Դավիթը եկավ Խրամատների վրայից և այնտեղ կոտորեց այլազգիներին։ Դավիթն ասաց. «Տերն իմ թշնամիներին կոտորեց այնպես, ինչպես ջրերն են բաժան-բաժան լինում»։ Դրա համար այդ տեղը կոչվեց Խրամատների վրա։ ²¹ Նրանք այնտեղ թողեցին իրենց աստվածներին, և Դավիթն ու իրեն ընկերակցող մարդիկ վերցրին դրանք։

²² Այլազգիները կրկին ոտքի ելան ու հավաքվեցին Տիտանների հովիտներում։ ²³ Դավիթը հարցրեց Տիրոջը՝ ասելով. «Հարձակվե՞մ այլազգիների վրա, նրանց իմ ձեռքը կմատնե՞ս»։ Տերն ասաց. «Մի՛ հարձակվիր նրանց վրա, շրջանցի՛ր նրանց ու նրանց թիկունքից գնա՛ դեպի Լացի անտառը։ ²⁴ Երբ Լացի անտառից շարժման ձայն լսես, այն ժամանակ հարձակվի՛ր նրանց վրա, որովհետև այն ժամանակ է Տերը դուրս գալու քո առաջ, որ պատերազմում կոտորի այլազգիներին»։ ²⁵ Դավիթն արեց այնպես, ինչպես Տերն էր հրամայել նրան։ Եվ նա կոտորեց այլազգիներին Գաբավոնից մինչև Գազերա։

6

Ուխտի տապանակը Երուսաղեմում

(Ա Մն. 13.1-14, 15.25-29, 16.6-43)

¹ Դավիթը կրկին հավաքեց Իսրայելի բոլոր երիտասարդներին, մոտավորապես յոթանասուն հազար հոգի։ ² Դավիթը, նրա հետ եղած ամբողջ ժողովուրդն ու Հուդայի երկրի իշխաններից ոմանք ելան գնացին այն զառիվերով, որով բարձրացվել էր Աստծու տապանակը, որին տրված էր Աստծու՝ Զորությունների Տիրոջ անունը, և որի վրա նստած է նա քերովբեների միջև։ ³ Դավիթը Տիրոջ տապանակը դրեց նոր սայլի վրա՝ վերցնելով այն Ամինադաբ Բլրացու տնից։ Ամինադաբի որդիները՝ Օզան ու նրա եղբայրներն էին քշում տապանակը կրող սայլը, ⁴ իսկ մյուս եղբայրները գնում էին տապանակի առջևից։ ⁵ Դավիթն ու Իսրայելի որդիները Տիրոջ առաջ տավիղներ, հնչեղ նվագարաններ, քնարներ, սրինգներ էին նվագում, թմբուկներ, ծնծղաներ զարկում ու փողեր էին հնչեցնում ու երգում։

⁶ Երբ եկան Ամինադաբի կալը, Օզան իր ձեռքը գցեց Աստծու տապանակին, որ այն բռնի։ Նա այն բռնեց, որովհետև լծկան զվարակն այն շարժել էր իր տեղից։ ⁷ Տերը բարկացավ Օզայի վրա և նրա հանդգնության համար հարվածեց նրան այնտեղ, ու նա մեռավ այնտեղ՝ Տիրոջ տապանակի մոտ, Աստծու առջև։ ⁸ Դավիթը տրտմեց, որ Տերը մահացու հարվածեց Օզային նրա մեծ հանդգնության համար։ Այդ տեղը մինչև այսօր Օզայի Հարված է կոչվում։ ⁹ Այդ օրը Դավիթը վախեցավ Տիրոջից և ասաց. «Տիրոջ տապանակը ինչպե՞ս մտնի ինձ մոտ»։ ¹⁰ Դավիթը չուզեց Տիրոջ Ուխտի տապանակը տանել իր մոտ՝ Դավթի քաղաքը, և Դավիթը, շեղելով ճանապարհը, այն տարավ գեթացի Աբեդդարի տունը։ ¹¹ Տիրոջ տապանակը երեք ամիս մնաց գեթացի Աբեդդարի տանը։ Տերն օրհնեց Աբեդդարին ու նրա ամբողջ տունը։

¹² Այդ մասին հայտնեցին Դավթին՝ ասելով. «Տերն Աստծու տապանակի համար օրհնել է Աբեդդարի տունն ու նրա ունեցած ամեն ինչը»։ Դավիթը գնաց, Տիրոջ տապանակը հանեց Աբեդդարի տնից և ուրախությամբ բերեց Դավթի քաղաքը։ ¹³ Տապանակը տանողների հետ գնում էին պարողների յոթ խմբեր, զվարակ ու գառներ էին զոհ մատուցում։ ¹⁴ Դավիթը Տիրոջ առաջ տավիղ էր նվագում։ Նա պատմուճան էր հագել։ ¹⁵ Դավիթն ու Իսրայելի ամբողջ տունը Տիրոջ տապանակը հանեցին՝ ուրախության աղաղակ արձակելով ու փող հնչեցնելով։ ¹⁶ Երբ տապանակը Դավթի քաղաքին մոտեցավ, Սավուղի դուստր Մեղքողը նայում էր պատուհանից և տեսնելով, որ Դավիթ արքան Տիրոջ առաջ պարում էր ու նվագարաններ նվագում, արհամարհեց իր հոգում նրան։ ¹⁷ Տիրոջ տապանակը բերեցին ու դրեցին իր տեղը՝ վրանի մեջ, որ Դավիթը դրա համար էր կանգնեցրել։ ¹⁸ Դավիթը Տիրոջ առջև ողջակեզներ ու խաղաղության զոհեր մատուցեց։ Երբ Դավիթն ավարտեց ողջակեզներ ու խաղաղության զոհեր մատուցելը, Զորությունների Տիրոջ անունից օրհնեց ժողովրդին։ ¹⁹ Նա Իսրայելի բոլոր բնակիչներին՝ Դանից մինչև Բերսաբեե, տղամարդկանց թե կանանց, ամեն մեկին բաշխեց հացի մի բլիթ, կասկարայի վրա թխված հաց և տապակի մեջ պատրաստված կարկանդակ։ Ամբողջ ժողովուրդը գնաց, յուրաքանչյուր ոք՝ իր տունը։

²⁰ Երբ Դավիթը հետ դարձավ իր ընտանիքին ողջունելու, նրան ընդառաջ ելավ Մեղքողը՝ Սավուղի դուստրը, ողջունեց և ասաց. «Վայե՞լ էր Իսրայելի արքային, որ այսօր իր աղախինների ու ծառաների առաջ մերկացավ, ինչպես մերկանում են պարողները»։ ²¹ Դավիթն ասաց Մեղքողին. «Ես պիտի պարեմ Տիրոջ առջև։ Օրհնյալ է Տերը՝ Աստված, որն ինձ ընտրեց և ոչ թե քո հորն ու նրա ամբողջ տունը։ Նա ինձ Իսրայելի՝ իր ժողովրդի վրա առաջնորդ կարգեց։ Ահա այդ Տիրոջ առաջ ես պիտի երգեմ ու պարեմ։ ²² Եվ դեռ էլ ավելի պիտի մերկանամ, քո աչքին անարգ պիտի երևամ ու դրանով էլ քո ասած այդ աղախինների առաջ փառավորվեմ»։

²³ Եվ Սավուղի դուստր Մեղքողը մինչև իր մահվան օրը զավակ չունեցավ։

7

Նաթանի պատգամը Դավթին

(Ա Մն. 17.1-15)

¹ Երբ Դավիթը բնակվեց իր տանը, և Տերը նրան ազատեց շրջապատի իր թշնամիներից, ² արքան Նաթան մարգարեին ասաց. «Ահավասիկ ես բնակվում եմ եղևնափայտից պատրաստված տան մեջ, բայց Աստծու տապանակը վրանի մեջ է դրված»։ ³ Նաթանն ասաց արքային. «Ամեն ինչ, որ մտքիդ կա, գնա՛ և արա՛, քանի որ Տերը քեզ հետ է»։

⁴ Նույն գիշերը Տերը խոսեց Նաթանի հետ և ասաց. ⁵ «Գնա՛ և ասա՛ իմ ծառա Դավթին. “Այսպես է ասում Տերը. “Դու ինձ համար բնակվելու տուն չպետք է շինես, ⁶ որովհետև տան մեջ չեմ բնակվել այն օրից, երբ Իսրայելի որդիներին հանեցի Եգիպտոսից։ Ես շրջում եմ՝ իջևանելով վրաններում։ ⁷ Ամենուրեք, որ շրջել եմ Իսրայելի մեջ, մի՞թե երբևիցե Իսրայելի ազգատոհմերից որևէ մեկին, ում որ հրամայել եմ հովվել Իսրայելին՝ իմ ժողովրդին, ասել եմ. Ինչո՞ւ ինձ համար եղևնափայտե տուն չշինեցիք”։ ⁸ Արդ, այսպե՛ս ասա իմ ծառա Դավթին. այսպես է ասում Ամենակալ Տերը. “Ես քեզ վերցրել եմ ոչխարների փարախից, որ Իսրայելի՝ իմ ժողովրդի առաջնորդ լինես։ ⁹ Ես քեզ հետ էի ամենուրեք, ուր գնում էիր, քո առջևից քո բոլոր թշնամիներին ոչնչացրի և քեզ անվանի դարձրի երկրի վրա եղած մեծամեծների անվանը հավասար։ ¹⁰ Իսրայելի՝ իմ ժողովրդի համար տեղ պիտի որոշեմ ու ամրացնեմ նրան այնտեղ, որ նա առանձին բնակվի և այլևս հոգս չունենա, որպեսզի անօրեն մարդիկ առաջվա պես չնվաստացնեն նրան, ¹¹ ինչպես եղել է այն օրերից ի վեր, երբ Իսրայելի՝ իմ ժողովրդի վրա դատավորներ կարգեցի։ Քեզ պիտի ազատեմ քո բոլոր թշնամիներից։ Քեզ մեծ տուն պիտի դարձնեմ։ ¹² Եվ երբ քո կյանքի օրերը լրանան և քո նախնիների գիրկը գնաս, քեզանից հետո քո զավակին, որ քո որովայնից է, պիտի բարձրացնեմ և քո թագավորությունը նրա համար պատրաստեմ։ ¹³ Նա է իմ անվան համար տուն շինելու, և ես նրա աթոռը կանգուն պիտի պահեմ հավիտյան։ ¹⁴ Հայր պիտի լինեմ նրան, և նա ինձ որդի պիտի լինի, և եթե նա անիրավություն գործի, պիտի հանդիմանեմ նրան ու խրատեմ մարդկանց գործածած գավազանով և մարդկային տանջանքներով։ ¹⁵ Բայց նրան ողորմություն չեմ զլանա, ինչպես զլացա նրանց, որոնց իմ առաջից վանեցի։ ¹⁶ Հավիտյան հաստատուն պիտի լինեն նրա անունն ու թագավորությունն իմ առաջ, նրա աթոռը հավիտյան կանգուն պիտի մնա իմ առաջ”»։ ¹⁷ Այս բոլոր խոսքերն ու ամբողջ տեսիլքը նույն ձևով Նաթանը հաղորդեց Դավթին։

Դավթի աղոթքը

(Ա Մն. 17.16-27)

¹⁸ Դավիթ արքան գնաց ու նստելով Տիրոջ առաջ՝ ասաց. «Ո՞վ եմ ես, Տե՛ր իմ, Տե՛ր, և ի՞նչ է իմ տունը, որ ինձ այսքան սիրեցիր։ ¹⁹ Տե՛ր իմ, Տե՛ր, դույզն իսկ չնվաստացա քո առաջ։ Դու խոսեցիր քո ծառայի տան մասին երկար ժամանակի համար։ Մի՞թե այս է մարդկային օրենքը, Տե՛ր իմ, Տե՛ր։ ²⁰ Դավիթն էլ ի՞նչ ասի քեզ, քանզի դու, Տե՛ր իմ, Տե՛ր, ճանաչում ես քո ծառային։ ²¹ Քո ծառայի համար և ըստ քո սրտի ինձ հասցրիր այս փառքին, որպեսզի քո ծառային իմացնես, ²² որ ինձ պետք է բարձրացնես, Տե՛ր իմ, Տե՛ր։ Ըստ մեր ականջներով լսածի՝ քեզ նման մեկը չկա, և քեզանից բացի ուրիշ Աստված չկա։ ²³ Եվ երկրի վրա ո՞ր ազգն է Իսրայելի՝ քո ժողովրդի պես, որին Աստված ինքը առաջնորդեց՝ փրկելու իր ժողովրդին, որպեսզի անվանի դարձնի քեզ և հռչակի քո մեծությունն ու հայտնությունը, որ Եգիպտոսից փրկված ժողովրդիդ առջևից ազգեր ու նրանց բնակավայրերը տապալեցիր։ ²⁴ Քո Իսրայել ժողովրդին հավիտյան քեզ ժողովուրդ հաստատեցիր քեզ համար, և դու, ո՜վ Տեր, նրանց համար Աստված եղար։ ²⁵ Արդ, Տե՜ր իմ, քո ծառայի ու նրա տան համար ասած խոսքդ հավիտյան հաստատի՛ր և ասածիդ պես արա՛, որ քո անունը հավիտյան փառավորվի։ Տե՜ր ամենակալ, ամբո՛ղջ Իսրայելի Աստված, քո ծառա Դավթի տունը թող կանգուն մնա քո առջև, որովհետև դու՝ Տերդ, Իսրայելի ամենակալ Աստվածն ես։ ²⁶ Թող քո անունը հավիտյան փառավորվի, ²⁷ դու քո ծառայի ականջին հայտնեցիր և ասացիր՝ “Քեզ տուն եմ շինելու”, ուստի քո ծառան հանդգնեց քո առջև այս աղոթքը անելու։ ²⁸ Եվ արդ, Տե՜ր իմ, Տե՛ր, դու ես Աստված, քո խոսքերը ճշմարիտ են, այս բոլոր օրհնությունները դու խոստացար քո ծառային։ ²⁹ Եվ հիմա թող քո օրհնությունը լցնի քո ծառայի տունը, որ հավիտյան քո առջև լինի, Տե՜ր իմ, Տե՛ր, քո օրհնությամբ քո ծառայի տունը հավիտյան օրհնված թող մնա»։

8

Դավթի ռազմական հաղթանակները

(Ա Մն. 18.1-17)

¹ Դրանից հետո Դավիթը հարձակվեց այլազգիների վրա, փախուստի մատնեց նրանց՝ ետ վերցնելով նրանց գրաված տարածքները։

² Դավիթը հարվածեց Մովաբին, նրանց գետնին պառկեցրեց և չափեց նրանց պարանով. երկու պարանի չափ սպանելով և ամեն երկու պարան՝ կենդանի թողնելով։ Մովաբացիները Դավթի հարկատու հպատակները դարձան։

³ Երբ Դավիթը գնում էր իր իշխանությունը Եփրատի վրա հաստատելու, հարձակվեց Սուբայի արքայի՝ Ռաաբի որդի Ադրաազարի վրա։ ⁴ Դավիթը նրանից հազար մարտակառք, յոթ հազար հեծյալ ու քսան հազար հետևակ գերի վերցրեց։ Դավիթը բոլոր մարտակառքերը քանդեց՝ իր համար միայն հարյուր մարտակառք թողնելով։ ⁵ Դամասկոսից եկան ասորիները, որ օգնեն Սուբայի արքա Ադրաազարին, բայց Դավիթը ասորիներից քսաներկու հազար մարդ կոտորեց։ ⁶ Դավիթը Ասորիքում՝ Դամասկոսի մոտ, բերդապահ զորքեր դրեց, և ասորիները Դավթի հարկատու ծառաները դարձան։ Տերը հովանավորում էր Դավթին ամենուրեք, ուր էլ որ նա գնում էր։ ⁷ Դավիթն առավ Սուբայի արքա Ադրաազարի ծառաների ոսկե ապարանջանները և բերեց Երուսաղեմ։ Եգիպտոսի արքա Սավսակիմը դրանք վերցրեց, երբ նա Սողոմոնի որդի Ռոբովամի օրոք հարձակվեց Երուսաղեմի վրա։ ⁸ Դավիթ արքան Մասբակից և Ադրաազարի հռչակավոր քաղաքներից վերցրեց պղինձ, որով Սողոմոն արքան պղնձե ավազան, սյուներ, լվացարաններ և ամեն տեսակ իրեր պատրաստեց։

⁹ Եմաթի արքա Թովուն, լսելով, որ Դավիթը ջախջախել է Ադրաազարի բոլոր զորքերին, ¹⁰ իր որդի Եդդուրային ուղարկեց Դավիթ արքայի մոտ՝ նրա ողջությունը հարցնելու, և շնորհավորեց նրան այն բանի համար, որ ջախջախել էր Ադրաազարին, քանի որ նա Թովուի թշնամին լինելով՝ նրա դեմ բուռն պատերազմներ էր մղել։ Եդդուրան Դավթին նվիրեց ոսկե, արծաթե և պղնձե անոթներ։ ¹¹ Դավիթ արքան այս ամենը Տիրոջը նվիրաբերեց, ինչպես նվիրաբերել էր իր հաղթած բոլոր ազգերից՝ ¹² եդովմացիներից, մովաբացիներից, ամովնացիներից, այլազգիներից, ամաղեկացիներից և Սուբայի արքայի՝ Ռաաբի որդի Ադրաազարից գրաված արծաթն ու ոսկին։ ¹³ Դավիթն անվանի դարձավ. երբ նա վերադառնում էր ասորիների դեմ մարտից, Գաբեղեմում տասնութ հազար մարդ կոտորեց։

¹⁴ Նա Եդովմի մեջ՝ եդովմացիների երկրի բոլոր տեղերում, բերդապահ զորքեր դրեց, և բոլոր եդովմացիները դարձան արքայի հպատակները։ Տերը հովանավորում էր Դավթին ամենուրեք, ուր էլ որ նա գնում էր։

¹⁵ Աստված Դավթին ամբողջ Իսրայելի վրա թագավոր կարգեց, և Դավիթն իրավունք ու արդարություն էր գործադրում իր ամբողջ ժողովրդի հանդեպ։ ¹⁶ Շարուհիի որդի Հովաբը զորքի հրամանատարն էր, Աքիի որդի Հովսափատը դիվանապետ էր, ¹⁷ Աքիտոբի որդի Սադովկը և Աբիաթարի որդի Աքիմելեքը քահանաներ էին, Ասան քարտուղար էր, ¹⁸ Հովիդայի որդի Բանեան քերեթիների ու փելեթիների[39] ղեկավարն էր։ Դավթի որդիները արքունի իշխաններ [*  քահանաներ] էին։

9

Դավթի բարությունը Հովնաթանի որդի Մեմփիբոսթեի հանդեպ

¹ Դավիթն ասաց. «Սավուղի տնից մնացած մարդ կա՞, որ Հովնաթանի համար նրան բարերարություն անեմ»։ ² Սավուղի տնից Սիբա անունով մի ծառա կար։ Կանչեցին նրան Դավթի մոտ, և արքան հարցրեց նրան. «Դո՞ւ ես Սիբան»։ Նա պատասխանեց. «Ես եմ, քո ծառան»։ ³ Արքան հարցրեց. «Սավուղի տնից մնացած մարդ կա՞, որ նրան Աստծու բարերարությունը ցույց տամ»։ Սիբան ասաց արքային. «Հովնաթանն ունի ոտքերից հաշմված մի որդի»։ ⁴ Արքան ասաց. «Նա որտե՞ղ է»։ Սիբան պատասխանեց արքային. «Նա լադաբարացի Ամիելի որդի Մաքիրի տանն է»։ ⁵ Դավիթ արքան մարդ ուղարկեց և նրան վերցրեց լադաբարացի Ամիելի որդու՝ Մաքիրի տնից։ ⁶ Սավուղի որդի Հովնաթանի որդի Մեմփիբոսթեն եկավ Դավիթ արքայի մոտ, ընկավ երեսնիվայր և երկրպագություն արեց նրան։ Դավիթն ասաց նրան. «Մեմփիբոսթե՛»։ Նա ասաց. «Ահավասիկ ես քո ծառան եմ»։ ⁷ Դավիթը նրան ասաց. «Մի՛ վախեցիր, որովհետև քո հայր Հովնաթանի համար քեզ բարերարություն պիտի անեմ. քո հոր հայր Սավուղի բոլոր արտերը քեզ պիտի վերադարձնեմ, և դու միշտ իմ սեղանից հաց պիտի ուտես»։ ⁸ Մեմփիբոսթեն մինչև գետին խոնարհվեց և ասաց. «Քո ծառան ո՞վ է, որ մի մեռյալ շան վրա, ինչպիսին ես եմ, ուշադրություն ես դարձնում»։ ⁹ Արքան կանչեց Սավուղի ծառա Սիբային և ասաց նրան. «Այն ամենը, ինչ պատկանում էր Սավուղին ու նրա ամբողջ տանը, տալիս եմ քո տիրոջ որդուն։ ¹⁰ Դու, քո որդիներն ու քո ծառաները կմշակեք նրա հողը, հացը կբերեք քո տիրոջ տունը, որ ուտեն։ Քո տիրոջ որդի Մեմփիբոսթեն միշտ իմ սեղանից պիտի հաց ուտի»։ Սիբան ուներ տասնհինգ որդի և քսան ծառա։ ¹¹ Սիբան ասաց արքային. «Ըստ ամենայնի, ինչ որ իմ տեր արքան հրամայեց իր ծառային, այնպես էլ կանի քո ծառան»։ Եվ Մեմփիբոսթեն Դավթի սեղանից էր հաց ուտում, որպես արքայի որդիներից մեկը։ ¹² Մեմփիբոսթեն ուներ մի փոքրիկ որդի, որի անունը Միքա էր։ Սիբայի տան բոլոր բնակիչները Մեմփիբոսթեի ծառաներն էին։ ¹³ Մեմփիբոսթեն բնակվում էր Երուսաղեմում, քանի որ միշտ արքայի սեղանից էր ուտում։ Նա երկու ոտքից կաղ էր։

10

Դավթի իշխանները՝ անարգված

(Ա Մն. 19.1-5)

¹ Դրանից հետո մեռավ ամովնացիների արքան, և նրա որդի Անոնը թագավորեց նրա փոխարեն։ ² Դավիթն ասաց. «Բարի լինենք Նաասի որդի Անոնի նկատմամբ, որովհետև նրա հայրն էլ իմ նկատմամբ է բարի եղել»։ Դավիթն իր ծառաներին ուղարկեց նրա մոտ, որ նրանց միջոցով ցավակցի հոր համար։ Դավթի ծառաները գնացին ամովնացիների երկիրը։ ³ Ամովնացիների իշխաններն ասացին իրենց տեր Անոնին. «Մի՞թե Դավիթը հորդ մեծարելու համար է քեզ մխիթարողներ ուղարկել։ Ո՛չ, Դավիթն իր իշխաններին ուղարկել է, որ զննեն, հետախուզեն քո քաղաքները։ Դավիթն իր իշխաններին քեզ մոտ է ուղարկել լրտեսելու համար»։ ⁴ Եվ նա Դավթի ծառաներին բռնեց, նրանց մորուքները ածիլեց և նրանց հագուստները մեջտեղից մինչև ծայրը պատռելով՝ արձակեց նրանց։ ⁵ Այս մարդկանց հետ պատահածի մասին պատմեցին Դավթին, նա նրանց ընդառաջ մարդ ուղարկեց, քանի որ այդ մարդիկ խիստ անարգված էին։ Արքան ասաց. «Մնացե՛ք Երիքովում, մինչև որ ձեր մորուքները աճեն, և ապա կվերադառնաք»։

Պատերազմ ամովնացիների և ասորիների դեմ

(Ա Մն. 19.6-19)

⁶ Երբ ամովնացիները տեսան, որ ատելի են դարձել Դավթին և Իսրայելի ժողովրդին, մարդ ուղարկեցին և Ռոբի ու Սուբայի ասորիներից վարձեցին քսան հազար հետևակ, Մաաքայի արքայից հազար ու Իստովբի արքայից տասներկու հազար զինվոր։

⁷ Այդ լսելով՝ Դավիթ արքան Հովաբին ընտիր զորքով ուղարկեց նրանց դեմ։ ⁸ Ամովնացիները պատերազմելու համար ճակատ կազմեցին ասորիների Սուբա քաղաքի դարպասի մոտ, իսկ ռոբացիները, ստոբացիներն ու ամաղեկացիները առանձին էին կանգնել դաշտում։ ⁹ Հովաբը, տեսնելով, որ իր վրա հարձակվում են առջևից ու հետևից, Իսրայելից ընտրեց երիտասարդներ և ասորիների դեմ ճակատ կազմեց։ ¹⁰ Զորքի մնացած մասը նա հանձնեց իր եղբորը՝ Աբեսսային։ Նրանք ճակատ կազմեցին ամովնացիների դեմ։ ¹¹ Նա ասաց. «Եթե ասորիներն ինձ նեղեն, դուք ինձ օգնության կհասնեք, իսկ եթե ամովնացիները քեզ նեղեն, մենք օգնության կհասնենք։ ¹² Կորովի՛ եղիր, զորավիգ լինենք մեր ժողովրդին ու մեր Աստծու քաղաքներին, և Տերը կանի իր աչքին հաճելի եղածը»։ ¹³ Հովաբն իր զորքով պատերազմի ելավ ասորիների դեմ, և ասորիները փախան նրա առաջից։ ¹⁴ Երբ ամովնացիները տեսան, որ ասորիները փախչում են, իրենք ևս փախուստի դիմեցին Աբեսսայի առաջից և մտան քաղաք։ Հովաբը ամովնացիների մոտից վերադարձավ ու եկավ Երուսաղեմ։

¹⁵ Երբ ասորիները տեսան, որ պարտվեցին Իսրայելից, մեկտեղ հավաքվեցին։ ¹⁶ Ադրաազարը մարդ ուղարկեց և գետի այն կողմի ասորիներին հավաքեց Քաղամակում։ Նրանք եկան հասան Եղամ, և Սովբակը Ադրաազարի զորքի գլուխն անցավ։ ¹⁷ Դավթին հայտնեցին այդ մասին։ Նա հավաքեց ողջ Իսրայելին, անցավ Հորդանան գետը և հասավ Քաղամակ։ Ասորիները Դավթի դիմաց գնդեր հանեցին ու պատերազմեցին նրա դեմ։ ¹⁸ Ասորիները փախան Իսրայելի առաջից. Դավիթը ասորիներից յոթ հարյուր մարտակառք ու քառասուն հազար հեծյալներ ոչնչացրեց, զորքի հրամանատար Սովբակին հարվածեց, որն այնտեղ մեռավ։ ¹⁹ Ադրաազարին հպատակ բոլոր թագավորները երբ տեսան, որ իրենք Իսրայելից պարտություն են կրել, անձնատուր եղան, Իսրայելի հետ հաշտության ուխտ կնքեցին և նրա հպատակները դարձան, իսկ ասորիները վախեցան այնուհետև ամովնացիներին օգնել։

11

Դավիթը և Բերսաբեեն

¹ Հետևյալ տարին, երբ թագավորները արշավի էին ելնելու, Դավիթը Հովաբին իր ծառաների ու բոլոր իսրայելացիների հետ ուղարկեց, որ կոտորեն ամովնացիներին և պաշարեն Ռաբաթը, իսկ ինքը մնաց Երուսաղեմում։

² Երեկոյան կողմ, երբ Դավիթն իր անկողնուց ելել և ման էր գալիս թագավորական պալատի տանիքի վրա, տեսավ, որ մի կին լողանում էր տանիքի վրա։ Այդ կինը արտաքինով շատ գեղեցիկ էր։ ³ Դավիթը մարդ ուղարկեց ու հարցուփորձ արեց այդ կնոջ մասին։ Նրան ասացին. «Չէ՞ որ դա քետացի Ուրիայի կինն է, Եղիաբի դուստր Բերսաբեեն»։ ⁴ Դավիթը պատգամավորներ ուղարկեց, բերել տվեց նրան և մտավ նրա ծոցը։ Նա դաշտանից մաքրվել էր։ Կինը վերադարձավ իր տունը ⁵ և հղիացավ։ Նա մարդ ուղարկեց Դավթի մոտ և ասաց. «Ես հղի եմ»։ ⁶ Դավիթը մարդ ուղարկեց Հովաբի մոտ՝ ասելով. «Ինձ մո՛տ ուղարկիր քետացի Ուրիային»։ Հովաբը Ուրիային ուղարկեց Դավթի մոտ։ ⁷ Եկավ Ուրիան, ներկայացավ Դավթին։ Դավիթը հարցրեց Հովաբի ողջության, զինվորների առողջության ու պատերազմի վիճակի մասին։ Ուրիան ասաց. «Ամեն ինչ բարեհաջող է»։ ⁸ Դավիթն ասաց Ուրիային. «Ելի՛ր, գնա՛ քո տունը և լվա՛ ոտքերդ»։ Ուրիան դուրս եկավ արքայի տնից, և նրա հետևից արքան պարգև ուղարկեց։ ⁹ Սակայն Ուրիան քնեց արքայի տան դռանը՝ նրա ծառաների հետ, և իր տուն չգնաց։ ¹⁰ Դավթին պատմեցին՝ ասելով, թե Ուրիան իր տուն չի գնացել։ Դավիթն ասաց Ուրիային. «Չէ՞ որ ճանապարհից ես եկել, ինչո՞ւ քո տունը չգնացիր»։ ¹¹ Ուրիան ասաց Դավթին. «Աստծու Ուխտի տապանակը, Իսրայելի ու Հուդայի բանակները վրաններում են բնակվում, իմ տեր Հովաբն ու իմ տիրոջ ծառաները բաց դաշտում են բնակվում, ես իմ տո՞ւնը գնամ ուտելու, ըմպելու և իմ կնոջ հետ քնելու համար։ Այդ ինչպե՞ս կարող է պատահել։ Երդվում եմ քո կյանքով, որ ես այդ բանը չեմ անի»։ ¹² Դավիթն ասաց Ուրիային. «Այսօր էլ այստեղ մնա՛, և վաղը քեզ կարձակեմ»։ Այդ օրը Ուրիան մնաց Երուսաղեմում։ Հաջորդ օրը ¹³ Դավիթը կանչեց նրան։ Ուրիան կերավ նրա մոտ, խմեց ու հարբեց և երեկոյան քնեց իր տիրոջ ծառաների հետ իր անկողնում և իր տուն չգնաց։

¹⁴ Առավոտյան Դավիթը նամակ գրեց Հովաբին և Ուրիայի միջոցով ուղարկեց նրան։ ¹⁵ Նամակում գրված էր. «Ուրիային ուղարկի՛ր պատերազմի թեժ տեղերը, իսկ դուք հե՛տ քաշվեք նրանից, որ նա վիրավորվի ու մեռնի»։ ¹⁶ Երբ Հովաբը քաղաքը պաշարել էր, Ուրիային ուղարկեց այնտեղ, ուր գիտեր, որ զորավոր մարդիկ կան։ ¹⁷ Քաղաքի մարդիկ պատերազմի ելան Հովաբի դեմ։ Դավթի զորքից մարդիկ ընկան և մեռան։ Մեռավ նաև քետացի Ուրիան։ ¹⁸ Հովաբը մարդ ուղարկեց և արքային պատմեց ամեն ինչ, որ պատահել էր պատերազմում։ ¹⁹ Նա պատգամաբերին պատվիրեց՝ ասելով. «Հենց որ պատերազմի բոլոր դեպքերն արքային պատմես ու վերջացնես ²⁰ և տեսնես, որ արքան զայրանալով կասի քեզ. “Ինչո՞ւ եք քաղաքին մոտեցել պատերազմելու, չգիտեի՞ք, որ պարսպի վրայից նետեր կարձակեն։ ²¹ Չե՞ք հիշում, թե ով սպանեց Ների որդի Հերոբովաղի որդի Աբիմելեքին։ Չէ՞ որ մի կին նրա վրա պարսպի վրայից երկանաքարի մի բեկոր նետեց, և նա մեռավ Թամասում։ Ինչո՞ւ եք մոտեցել պարսպին”, այն ժամանակ կասես. “Քո ծառա քետացի Ուրիան էլ մեռավ”»։ ²² Հովաբի պատգամաբերը գնաց Երուսաղեմ, արքայի մոտ, հասավ ու հաղորդեց Դավթին ամեն ինչ՝ պատերազմի բոլոր դեպքերը, ինչպես պատվիրել էր Հովաբը։ Դավիթը բարկանացավ Հովաբի վրա և ասաց պատգամաբերին. «Ինչո՞ւ քաղաքին մոտեցաք պատերազմելու, չգիտեի՞ք, որ պարսպից ձեզ հարվածելու են։ Չե՞ք հիշում, թե ով սպանեց Հերոբովաղի որդի Աբիմելեքին։ Չէ՞ որ մի կին պարսպից նրա վրա երկանաքարի մի բեկոր նետեց, և նա մեռավ Թամասում։ Ինչո՞ւ էիք մոտեցել պարսպին»։ ²³ Պատգամաբերն ասաց Դավթին. «Նրանք հարձակվեցին մեզ վրա և դուրս եկան մեր դեմ, մենք նրանց հալածեցինք մինչև քաղաքի դարպասը, ²⁴ բայց աղեղնավորները պարսպի վրայից նետեր տեղացրին քո ծառաների վրա։ Արքայի ծառաներից ոմանք մեռան, մեռավ նաև քո ծառա քետացի Ուրիան»։ ²⁵ Դավիթն ասաց պատգամաբերին. «Այսպես կասես Հովաբին. “Եղածի համար մի՛ անհանգստացիր, որովհետև սուրը երբեմն այսպես է հարվածում, երբեմն՝ այնպես։ Սաստկացրո՛ւ պատերազմը քաղաքի դեմ ու կործանի՛ր այն”։ Եվ դու գոտեպնդի՛ր նրան»։

²⁶ Երբ Ուրիայի կինը լսեց, որ իր ամուսինը՝ Ուրիան սպանվել է, ողբաց իր մարդու մահը։ ²⁷ Երբ սուգն անցավ, Դավիթը մարդ ուղարկեց, նրան իր տունը բերեց. սա դարձավ նրա կինը և նրա համար որդի ծնեց։ Դավթի այս արածը չար երևաց Տիրոջ աչքին։

12

Նաթանի մեղադրանքը և Դավթի զղջումը

¹ Տերը Նաթան մարգարեին ուղարկեց Դավթի մոտ։ Սա եկավ նրա մոտ և ասաց. «Մի քաղաքում երկու մարդ կար. մեկը հարուստ էր, մյուսը՝ աղքատ։ ² Հարուստն ուներ շատ ու շատ հոտեր ու նախիրներ, ³ իսկ աղքատը ոչինչ չուներ, բացի մի փոքրիկ էգ գառնուկից, որը ձեռք էր բերել, խնամում ու պահում էր։ Գառնուկը մեծացավ նրա ու նրա որդիների հետ։ Նա ուտում էր նրա հացից, նրա բաժակից խմում, նրա ծոցում էր քնում. կարծես նրա դուստրն էր։ ⁴ Այդ հարուստ մարդու մոտ մի անցորդ եկավ։ Հարուստը չուզեց իր հոտերից ու արջառներից մի անասուն մորթել, որ հյուրասիրի իր մոտ եկած անցորդին, վերցրեց աղքատի գառնուկը և կերակուր պատրաստեց իր մոտ եկած մարդու համար»։

⁵ Դավիթը խիստ բարկանացավ այդ մարդու վրա և ասաց Նաթանին. «Կենդանի է Տերը. այդ բանն անող մարդն արժանի է մահվան։ ⁶ Նա այդ գառնուկի համար յոթնապատիկ պետք է հատուցի այն բանի փոխարեն, որ արեց. այսինքն՝ մորթեց ուրիշի միակ գառը»։ ⁷ Նաթանն ասաց Դավթին. «Դո՛ւ ես այն մարդը, որ արել է այդ բանը։ Այսպես է ասում Տերը՝ Իսրայելի Աստվածը. “Ես եմ, որ քեզ թագավոր օծեցի ամբողջ Իսրայելի վրա, ես եմ, որ քեզ փրկեցի Սավուղի ձեռքից, ⁸ քեզ հանձնեցի քո տիրոջ՝ Սավուղի տունը, քո տիրոջ կանայք քո գրկում են, քեզ տվեցի Իսրայելն ու Հուդայի երկիրը, և եթե դրանք քիչ ես համարում, կարող էի ավելին անել”։ ⁹ Ինչո՞ւ Տիրոջ խոսքն անարգեցիր՝ նրա աչքի առաջ չարիք գործելով։ Դու սրով սպանեցիր քետացի Ուրիային և նրա կնոջը քեզ կնության առար. նրան սպանեցիր ամովնացիների սրով։ ¹⁰ Արդ, սուրը հավիտյանս թող չհեռանա քո տնից այն բանի փոխարեն, որ ինձ անարգեցիր և քետացի Ուրիայի կնոջը քեզ կնության առար։ ¹¹ Այսպես է ասում Տերը. “Ահա ես քո տնից քո դեմ չարիք կհարուցեմ. աչքերիդ առաջ քո կանանց պիտի վերցնեմ և տամ քո ընկերոջը, նա օրը ցերեկով պառկելու է քո կանանց հետ։ ¹² Դու այդ բանը ծածուկ արեցիր, իսկ ես այն անելու եմ ամբողջ Իսրայելի աչքի առաջ, օրը ցերեկով”»։ ¹³ Դավիթն ասաց Նաթանին. «Մեղանչել եմ Տիրոջ դեմ»։ Նաթանն ասաց Դավթին. «Տերը ներեց քո մեղքը, և դու չես մեռնի, ¹⁴ բայց քանի որ դրանով թշնամիներին առիթ տվեցիր Տիրոջը հայհոյելու, քեզանից ծնվելիք որդիդ պետք է մեռնի»։

Դավթի որդու մահը

¹⁵ Նաթանը գնաց իր տուն, և Տերը հարվածեց Դավթի համար Ուրիայի կնոջ ծնած մանկանը, որը հիվանդացավ։ ¹⁶ Դավիթը մանկան համար աղաչեց Աստծուն. Դավիթը ծոմ պահեց ու գիշերը գետնին քնեց։ ¹⁷ Պալատականները ելան գնացին նրա մոտ, որ նրան գետնից բարձրացնեն, բայց նա չուզեց գետնից վեր կենալ և նրանց հետ հաց չկերավ։ ¹⁸ Երբ յոթերորդ օրը մանուկը մեռավ, ծառաները վախենում էին Դավթին հայտնել, որ մանուկը մեռավ, քանի որ ասում էին. «Մանուկը քանի դեռ կենդանի էր, խոսեցինք նրա հետ, բայց նա մեր ասածը չլսեց։ Հիմա ինչպե՞ս ասենք, թե մանուկը մեռավ։ Նա չարիք կգործի»։ ¹⁹ Դավիթը տեսավ, որ ծառաները փսփսում են, հասկացավ, որ մանուկը մահացել է, և ասաց ծառաներին. «Մի՞թե մանուկը մեռավ»։ Նրանք ասացին՝ «Մեռավ»։ ²⁰ Դավիթը, գետնից վեր կացավ, լվացվեց ու օծվեց, փոխեց իր զգեստները, մտավ Աստծու տունն ու երկրպագեց նրան։ Ապա նա իր տուն մտավ, ուզեց հաց ուտել։ Նրա առաջ հաց դրեցին, ու նա կերավ։ ²¹ Ծառաները նրան ասացին. «Այս ի՞նչ արեցիր մանկան համար. քանի նա կենդանի էր, ծոմ էիր պահում, լալիս ու տանջվում, իսկ երբ մանուկը մեռավ, վեր կացար, կերար ու խմեցիր»։ ²² Դավիթն ասաց. «Քանի մանուկը կենդանի էր, ծոմ էի պահում ու լալիս, որովհետև մտածում էի. “Ո՞վ գիտի, գուցե Տերը ողորմի, և մանուկն ապրի”։ ²³ Հիմա որ մանուկը մեռավ, ես ինչո՞ւ ծոմ պահեմ, մի՞թե կարող եմ նրան վերադարձնել։ Ես եմ նրա մոտ գնալու, իսկ նա ինձ մոտ չի վերադառնա»։

Սողոմոնի ծնունդը

²⁴ Դավիթը մխիթարեց իր կնոջը՝ Բերսաբեեին։ Դավիթը գնաց նրա մոտ, պառկեց նրա հետ, կինը հղիացավ ու ծնեց որդի։ Դավիթը նրա անունը Սողոմոն դրեց։ Տերը սիրեց նրան, ²⁵ Նաթան մարգարեի միջոցով պատգամ հղեց, և նա մանկան անունը ի սեր Տիրոջ Հեդեդի դրեց։

Դավիթը գրավում է Ռաբաթը

(Ա Մն. 20.1-3)

²⁶ Հովաբը Ռաբաթում պատերազմում էր ամովնացիների դեմ և գրեթե գրավել էր թագավորանիստ քաղաքը։ ²⁷ Հովաբը պատգամաբերներ ուղարկեց Դավթին և ասաց. «Ռաբաթի դեմ պատերազմել եմ և գրեթե գրավել ջրերի քաղաքը։ ²⁸ Արդ, հավաքի՛ր մնացած ժողովրդին, քաղաքի դիմաց բանա՛կ դիր ու գրավի՛ր այն, որպեսզի ե՛ս գրաված չլինեմ քաղաքը, և իմ անունը չկապվի դրա հետ»։ ²⁹ Դավիթը հավաքեց ամբողջ ժողովրդին, գնաց Ռաբաթ ու պատերազմելով գրավեց այն։ ³⁰ Նա նրանց թագավոր Մեղքոմի գլխից վերցրեց թագը, որի քաշը մի տաղանդ ոսկի էր և զարդարված էր թանկարժեք քարերով։ Դավիթն այն իր գլխին դրեց։ Նա քաղաքից խիստ շատ ավար տարավ։ ³¹ Դուրս հանեց այդտեղի ժողովրդին, նրանց լծեց սղոցի ու երկաթե կացինների աշխատանքների, գործի դրեց աղյուսի փռում։ Նա այսպես վարվեց նաև ամովնացիների բոլոր քաղաքներում։ Դավիթն ու ամբողջ ժողովուրդը դրանից հետո վերադարձան Երուսաղեմ։

13

Ամովնն ու Թամարը

¹ Դավթի որդի Աբեսաղոմը շատ գեղեցիկ մի քույր ուներ, որի անունն էր Թամար։ Դավթի որդի Ամովնը սիրեց նրան։ ² Ամովնը նեղվում էր այն աստիճան, որ հիվանդացավ իր քույր Թամարի պատճառով։ Թամարը կույս էր, և Ամովնի համար դժվար էր նրան մերձենալու որևէ փորձ անել։ ³ Ամովնն ուներ Հովնադաբ անունով մի ընկեր, որը Դավթի եղբայր Սամաայի որդին էր։ Հովնադաբը շատ խորագետ մարդ էր։ ⁴ Նա ասաց Ամովնին. «Ինչո՞ւ ես դու այդպես օրեցօր հյուծվում, ո՜վ արքայորդի, և ինձ չես պատմում»։ Ամովնը նրան ասաց. «Իմ եղբայր Աբեսաղոմի քրոջը՝ Թամարին եմ սիրում»։ ⁵ Հովնադաբն ասաց նրան. «Պառկի՛ր քո անկողնում, հիվա՛նդ ձևացիր, ու երբ հայրդ գա քեզ տեսնելու, կասես նրան. “Թող իմ քույր Թամարը գա, իմ աչքերի առաջ ուտելիք պատրաստի, ինձ խավիծ տա, որպեսզի տեսնեմ և ուտեմ նրա ձեռքից”»։ ⁶ Ամովնը պառկեց ու հիվանդ ձևացավ։

Արքան եկավ նրան տեսնելու։ Ամովնն ասաց արքային. «Թող իմ քույր Թամարը գա ինձ մոտ, իմ աչքի առաջ ուտելու համար բլիթներ պատրաստի, որ ես ուտեմ նրա ձեռքից»։ ⁷ Դավիթը մարդ ուղարկեց Թամարի մոտ, և ասաց. «Գնա՛ քո եղբայր Ամովնի տուն և նրա համար կերակո՛ւր պատրաստիր»։ ⁸ Թամարը գնաց իր եղբայր Ամովնի տուն, որտեղ նա պառկած էր, վերցրեց ալյուրը, խմոր շաղեց, նրա աչքի առաջ բլիթներ պատրաստեց ու եփեց դրանք։ ⁹ Թամարն առավ տապակը և դատարկեց նրա առաջ, սակայն նա չուզեց ուտել։ Ամովնն ասաց. «Ինձ մոտ գտնվող բոլոր մարդկանց դո՛ւրս հանեք»։ Բոլորին դուրս հանեցին իր մոտից։ ¹⁰ Ամովնն ասաց Թամարին. «Կերակուրը մո՛տ բեր, որ քո ձեռքից ուտեմ»։ Թամարն առավ իր պատրաստած բլիթները, տարավ իր եղբայր Ամովնի սենյակը ¹¹ ու մոտեցրեց նրան, որ ուտի։ Նա բռնեց նրան և ասաց. «Եկ պառկի՛ր ինձ հետ, քո՛ւյր իմ»։ ¹² Թամարն ասաց նրան. «Ո՛չ, եղբա՛յր, ինձ մի՛ նվաստացրու, քանի որ Իսրայելում այդպիսի բան չի արվում։ Դու էլ մի՛ արա այդ անզգամությունը։ ¹³ Ես ինչպե՞ս տանեմ իմ նախատինքը։ Դու անզգամներից մեկը կլինես Իսրայելում։ Արդ, խոսի՛ր արքայի հետ, և նա չի հրաժարվի ինձ քեզ տալուց»։ ¹⁴ Ամովնը չուզեց լսել նրան ու ձեռքը գցելով բռնություն գործադրեց և պառկելով նրա հետ՝ բռնաբարեց նրան։ ¹⁵ Ամովնը դրանից հետո շատ մեծ ատելությամբ լցվեց Թամարի դեմ, այնպես որ ավելի մեծ էր ատելությունը, որով ատեց նրան, քան նախկին սերը, որով սիրել էր։ Ամովնն ասաց նրան. «Վե՛ր կաց, գնա՛»։ ¹⁶ Թամարը նրան ասաց. «Դուրս քշելով ինձ՝ ավելի մեծ չարիք ես գործում, քան այն, որ արեցիր ինձ հետ»։ Սակայն Ամովնը չուզեց լսել նրան. ¹⁷ կանչեց իր տան վերակացու սպասավորին և ասաց նրան. «Դո՛ւրս հանիր սրան իմ մոտից և դուռը փակի՛ր նրա հետևից»։ ¹⁸ Թամարի վրա գունագեղ կոճակներով ասեղնագործ պարեգոտ կար. այդպիսի զգեստներ էին հագնում թագավորների կույս դուստրերը։ Սպասավորը նրան դուրս հանեց ու դռները փակեց նրա հետևից։ ¹⁹ Թամարը մոխիր վերցրեց և լցրեց իր գլխին, պատառոտեց կոճակներով զարդարուն պարեգոտը, որ հագել էր, ձեռքը դրեց իր գլխին և լաց լինելով գնաց։ ²⁰ Նրա եղբայր Աբեսաղոմը հարցրեց նրան. «Մի՞թե քո եղբայր Ամովնը քեզ հետ պառկեց։ Արդ, քո՛ւյր իմ, լո՛ւռ մնա, որովհետև նա քո եղբայրն է։ Մտքիցդ մի՛ անցկացրու այդ բանը պատմել»։ Եվ Թամարը, որպես այրի, բնակվեց իր եղբայր Աբեսաղոմի տանը։ ²¹ Արքան լսեց այս բաները և խիստ բարկացավ, սակայն չվրդովեց իր որդի Ամովնի հոգին, որովհետև սիրում էր նրան, քանի որ նա իր անդրանիկ որդին էր։

²² Աբեսաղոմը Ամովնի մասին վատ կամ լավ բան չասաց, բայց Աբեսաղոմն ատում էր Ամովնին այն բանի համար, որ նա բռնաբարել էր իր քրոջը՝ Թամարին։

Աբեսաղոմը սպանել է տալիս Ամովնին

²³ Երեք տարի անց, երբ Աբեսաղոմը Եփրեմի երկրին մերձակա Բեթմարոն բնակավայրում պետք է խուզեր իր ոչխարները, իր մոտ հրավիրեց արքայի բոլոր որդիներին։ ²⁴ Աբեսաղոմը եկավ արքայի մոտ և ասաց նրան. «Ահավասիկ քո ծառայի ոչխարները խուզելու ժամանակն է։ Արքան ու նրա ծառաները քո ծառայի հետ թող գնան Բեթմարոն»։ ²⁵ Արքան ասաց Աբեսաղոմին. «Ո՛չ, որդյա՛կ իմ, ամենքս թող չգնանք ու չծանրաբեռնենք քեզ»։ Նա պնդեց, սակայն արքան չուզեց գնալ և օրհնեց նրան։ ²⁶ Աբեսաղոմն ասաց. «Այդ դեպքում գոնե ինձ հետ թող գա իմ եղբայր Ամովնը»։ Արքան ասաց. «Ինչո՞ւ նա գա քեզ հետ»։ ²⁷ Աբեսաղոմը պնդեց, և արքան նրա հետ ուղարկեց Ամովնին ու իր բոլոր որդիներին։ Աբեսաղոմը թագավորավայել խրախճանք սարքեց։ ²⁸ Նա պատվիրեց իր ծառաներին՝ ասելով. «Տեսե՛ք, երբ որ Ամովնը հարբի գինուց, և ես ձեզ ասեմ՝ “Խփե՛ք Ամովնին և սպանե՛ք նրան”, մի՛ վախեցեք. չէ՞ որ ես եմ ձեզ հրամայում։ Քաջասի՛րտ եղեք ու զորացե՛ք»։ ²⁹ Եվ Աբեսաղոմի զինվորներն Ամովնին արեցին այն, ինչ հրամայել էր Աբեսաղոմը։ Արքայի բոլոր որդիները ելան, և ամեն մեկն իր ջորին հեծնելով՝ փախավ։ ³⁰ Մինչ նրանք ճանապարհին էին, գույժ հասավ Դավթին, թե Աբեսաղոմը կոտորել է արքայի բոլոր որդիներին և նրանցից ոչ ոքի կենդանի չի թողել։ ³¹ Ելավ արքան, իր հագուստները պատառոտեց ու ընկավ գետնին։ Բոլոր ծառաները, որ նրա շուրջն էին, նույնպես պատառոտեցին իրենց հագուստները։ ³² Դավթի եղբայր Սամաայի որդի Հովնադաբն ասաց. «Մի՛ ասա, իմ տե՛ր արքա, թե՝ “Արքայի բոլոր որդիները մեռան”, քանի որ միայն Ամո՛նը մեռավ։ Աբեսաղոմն այդպես էր որոշել այն օրվանից, երբ Ամովնը բռնաբարել էր իր քրոջը՝ Թամարին։ ³³ Արդ, թող իմ արքան այդ բանն իր սրտին մոտիկ չընդունի և չասի. “Արքայի բոլոր որդիները մեռան”։ Միայն Ամո՛նը մեռավ»։ ³⁴ Եվ Աբեսաղոմը փախավ։ Դիտանոցի երիտասարդ պահակն իր աչքերը բարձրացրեց ու տեսավ, որ մի խումբ մարդիկ են գալիս լեռան լանջի զառիվայր ճանապարհով։ Նա եկավ ու պատմեց արքային՝ ասելով. «Որոնիմի ճանապարհին՝ լեռան լանջին, մարդկանց տեսա»։ ³⁵ Հովնադաբն ասաց արքային. «Ահա արքայի որդիներն են գալիս։ Ինչ որ ասաց քո ծառան, այդպես էլ եղավ»։ ³⁶ Երբ նա խոսքը վերջացրեց, ահա եկան արքայի որդիները և իրենց ձայնը բարձրացնելով՝ լաց եղան։ Արքան էլ, իր բոլոր ծառաների հետ հեկեկալով, լաց եղավ։

³⁷ Աբեսաղոմը փախավ ու գնաց Գեսուրի արքա Եմիուդի որդի Թոլմելեմի մոտ, Մաքուլի երկիրը։ Դավիթն ամբողջ ժամանակ սուգ էր անում իր որդու համար, ³⁸ իսկ Աբեսաղոմը փախել ու գնացել էր Գեսուր, որտեղ մնաց երեք տարի։ ³⁹ Դավիթ արքայի զայրույթը Աբեսաղոմի դեմ հանդարտվեց, որովհետև նա մխիթարվել էր մեռած Ամովնի համար։

14

Աբեսաղոմի վերադարձը Երուսաղեմ

¹ Շարուհիի որդի Հովաբն իմացել էր, որ արքայի սիրտը վերստին տաքացել է Աբեսաղոմի հանդեպ։ ² Հովաբը մարդ ուղարկեց Թեկուե և այնտեղից մի ճարպիկ կին բերեց ու նրան ասաց. «Սգավո՛ր ձևացիր՝ սգո հագուստներ հագի՛ր, յուղով մի՛ օծվիր և դարձի՛ր այնպիսի մի կին, որ երկար ժամանակ մեռյալի վրա է սգում։ ³ Կգաս արքայի մոտ և նրա հետ այսպես կխոսես»։ Եվ Հովաբը նրան հայտնեց այն, ինչ պետք է ասեր։ ⁴ Թեկուացի կինը մտավ արքայի մոտ, երեսնիվայր գետնին խոնարհվեց և ասաց. «Փրկի՛ր ինձ, արքա՛, փրկի՛ր»։ ⁵ Արքան ասաց նրան. «Ի՞նչ է եղել քեզ»։ Նա ասաց. «Ես մեծ տագնապի մեջ եմ։ Մի այրի կին եմ ես, ամուսինս մահացել է։ ⁶ Քո աղախինը երկու որդի ուներ։ Երկուսը դաշտում կռվեցին, ու ոչ ոք չբաժանեց նրանց, և եղբայրներից մեկը մյուսին խփեց ու սպանեց։ ⁷ Ամբողջ ազգատոհմը վեր է կացել քո աղախնի դեմ՝ ասելով. “Իր եղբորը սպանողին հանձնի՛ր, որ նրան սպանենք իր եղբոր արյան փոխարեն և քո ժառանգորդին վերացնենք”։ Նրանք ուզում են հանգցնել իմ հույսի մնացած կայծը՝ իմ մարդու համար չթողնելով ո՛չ հետնորդ, ո՛չ էլ անուն երկրի երեսին»։ ⁸ Արքան ասաց. «Ողջությամբ գնա՛ քո տունը, և ես կկարգադրեմ քո հարցը»։ ⁹ Թեկուացի կինն ասաց. «Թող ինձ վրա, արքա՛, և իմ տան վրա լինի մեղքը, իսկ արքան ու նրա աթոռն անպարտ թող լինեն»։ ¹⁰ Արքան ասաց. «Ո՞վ է քեզ հետ խոսելու։ Նրան ինձ մո՛տ բեր, և նա այլևս քեզ չի մոտենա»։ ¹¹ Կինն ասաց. «Թող արքան հիշի Տիրոջը՝ իր Աստծուն, որ չշատանան վրեժի համար արյուն թափողները և իմ որդուն չսպանեն»։ Դավիթն ասաց. «Կենդանի է Տերը. քո որդու գլխից մի մազ անգամ գետնին չի ընկնի»։

¹² Կինն ասաց. «Թո՛ւյլ տուր, որ քո աղախինը մի խոսք ասի իր տեր արքային»։ Արքան ասաց. «Խոսի՛ր»։ ¹³ Կինն ասաց. «Ինչո՞ւ այդպիսի բան ես մտածում Աստծու ժողովրդի մասին, կամ թե արքայի՞ բերանից ելավ այն վնասաբեր խոսքը, որ արքան չվերադարձնի իրենից հեռացվածին, ¹⁴ որ նա մեռնի և, ինչպես գետնին թափված ջուրը, այլևս չհավաքվի, Աստված նրա հոգին չառնի, և որևէ մեկը չմտածի իրենից հեռացնել հեռացվածին։ ¹⁵ Արդ, եկել եմ իմ տեր արքային ասելու այս խոսքերը, որպեսզի, երբ ժողովուրդն ինձ տեսնի, ասի. “Քո աղախինը խոսել է արքայի հետ, թերևս արքան իր աղախնի խոսքը կատարի”։ ¹⁶ Քանզի արքան պետք է լսի ու ինձ փրկի այն մարդու ձեռքից, որն ուզում է ինձ ու իմ որդուն Աստծու ժառանգությունից զրկել»։ ¹⁷ Եվ կինն ասաց. «Թող իմ տեր արքայի խոսքը բարով կատարվի, քանի որ իմ տեր արքան նման է Աստծու հրեշտակի, որը պատրաստ է լսելու բարին ու չարը, և թող Տերը՝ քո Աստվածը, քեզ հետ լինի»։ ¹⁸ Արքան պատասխանեց և ասաց կնոջը. «Ինձանից մի՛ թաքցրու այն, ինչ քեզանից հարցնելու եմ»։ Կինն ասաց. «Ասա՛, տե՛ր իմ արքա»։ ¹⁹ Արքան ասաց. «Քո ասած այս բոլոր խոսքերի մեջ արդյո՞ք Հովաբի մատը չկա»։ Կինն ասաց արքային. «Երդվում եմ քո անձով, տե՛ր իմ արքա, որ ոչ ոք աջ կամ ձախ չի խոտորվի այն ամենից, որ ասաց իմ տեր արքան. քո ծառա Հովաբն ինքն է ինձ պատվիրել և նա է քո աղախնի բերանը դրել այս խոսքերը, որ ասում եմ։ ²⁰ Այս խոսքի ձևը փոխելու նպատակով է քո ծառա Հովաբն արել այս բանը։ Իմ տեր արքան իմաստուն է Աստծու հրեշտակի պես և գիտի երկրի վրա եղած ամեն բան»։

²¹ Արքան գնաց և ասաց Հովաբին. «Ահավասիկ անում եմ ըստ քո ասածի. գնա հե՛տ դարձրու, բե՛ր պատանի Աբեսաղոմին»։ ²² Հովաբը երեսնիվայր գետնին ընկնելով՝ երկրպագեց արքային, օրհնեց նրան։ Հովաբն ասաց. «Այսօր քո ծառան իմացավ, որ շնորհ է գտել քո աչքում, տե՛ր իմ արքա, քանի որ իմ տեր արքան իր ծառայի ասածը կատարեց»։ ²³ Հովաբը ելավ գնաց Գեսուր և Աբեսաղոմին բերեց Երուսաղեմ։ ²⁴ Արքան ասաց. «Թող իր տուն վերադառնա և իմ երեսը չտեսնի»։ Աբեսաղոմն իր տուն վերադարձավ և արքայի աչքին չերևաց։

Աբեսաղոմը հաշտվում է թագավորի հետ

²⁵ Ամբողջ Իսրայելի մեջ Աբեսաղոմի պես գեղեցիկ ու գովելի տղամարդ չկար։ Ոտքի ծայրից մինչև գլուխը նա ոչ մի արատ չուներ։ ²⁶ Երբ իր գլխի մազերը կտրում էր,- իսկ նա ամեն տարվա սկզբին էր կտրում, քանի որ մազերը խիստ ծանրանում էին նրա վրա,- այդ կտրած մազերը կշռում էին երկու հարյուր սիկղ՝ ըստ արքունական կշռի։ ²⁷ Աբեսաղոմն ունեցավ երեք տղա և մեկ աղջիկ, որի անունը Թամար դրեց։ Նա տեսքով շատ գեղեցիկ կին էր և դառնալով Սողոմոնի որդի Ռոբովամի կինը՝ նրա համար ծնեց Աբիային։

²⁸ Աբեսաղոմը երկու ամիս [*  և Ο΄ տարի] մնաց Երուսաղեմում, բայց արքայի աչքին չերևաց։ ²⁹ Աբեսաղոմը մարդ ուղարկեց Հովաբի մոտ, որ նրան արքայի մոտ ուղարկի, բայց Հովաբը չուզեց նրա մոտ գնալ։ Երկրորդ անգամ Աբեսաղոմը լուր ուղարկեց, և նա դարձյալ չուզեց գնալ։ ³⁰ Աբեսաղոմն իր ծառաներին ասաց. «Տեսե՛ք, իմ արտի մոտ գտնվող Հովաբի արտը լի է գարիով, գնացե՛ք և հրկիզե՛ք այն»։ Աբեսաղոմի ծառաներն այրեցին Հովաբի արտը։ Հովաբի ծառաները եկան նրա մոտ պատառոտված հագուստներով և ասացին. «Աբեսաղոմի ծառաները քո արտն այրեցին»։ ³¹ Հովաբը ելավ եկավ Աբեսաղոմի տունը և ասաց նրան. «Ինչո՞ւ են քո ծառաները հրկիզել իմ արտը»։ ³² Աբեսաղոմն ասաց Հովաբին. «Ես քեզ մոտ մարդ էի ուղարկել, թե՝ “Ե՛կ այստեղ, որ քեզ ուղարկեմ արքայի մոտ՝ ասելու համար, թե ես ինչո՞ւ եկա Գեսուրից, քանի որ ավելի լավ էր, որ դեռ այնտեղ մնայի, քան թե արքայի երեսը չտեսնեի։ Եթե որևէ հանցանք ունեմ, սպանի՛ր ինձ”»։ ³³ Հովաբը մտավ արքայի մոտ և նրան հաղորդեց նրա ասածը։ Արքան կանչեց Աբեսաղոմին, որը մտավ արքայի մոտ, երեսնիվայր գետնին ընկավ արքայի առաջ ու երկրպագեց նրան, և արքան համբուրեց Աբեսաղոմին։

15

Աբեսաղոմը ձգտում է իշխանության

¹ Դրանից հետո Աբեսաղոմը մարտակառքեր, երիվարներ և առջևից վազող հիսուն հոգի սուրհանդակ հավաքեց։ ² Աբեսաղոմը կանուխ վեր էր կենում ու կանգնում դարպասի ճանապարհին։ Ով գալիս էր արքայի դատաստանին դատ ներկայացնելու, Աբեսաղոմը նրան հարցնում էր. «Դու ո՞ր քաղաքից ես»։ Երբ մարդը պատասխանում էր նրան, թե՝ «Քո ծառան Իսրայելի այսինչ ցեղից է», ³ Աբեսաղոմը նրան ասում էր. «Քո գործերն արդար են ու դյուրին, բայց արքայի մոտ քեզ ոչ ոք ունկնդիր չի լինի»։ ⁴ Աբեսաղոմը մտածում էր. «Եթե որևէ մեկն ինձ դատավոր նշանակեր այս երկրի վրա, և ամեն ոք, որ վեճ կամ դատ ունենար, ինձ մոտ գար, ես արդարությամբ կդատեի նրան»։ ⁵ Երբ որևէ մեկը նրան էր մոտենում գլուխ տալու, նա երկարում էր ձեռքը, մարդուն դեպի իրեն էր քաշում ու համբուրում նրան։ ⁶ Աբեսաղոմն այսպես էր վարվում ողջ Իսրայելի նկատմամբ, ովքեր դատի համար գալիս էին արքայի մոտ։ Աբեսաղոմը շահում էր Իսրայելի բոլոր մարդկանց սրտերը։

⁷ Չորս տարի լրանալուց հետո Աբեսաղոմն ասաց իր հորը. «Գնամ ու Քեբրոնում կատարեմ Տիրոջը խոստացած իմ ուխտը, ⁸ քանի որ Ասորիքի Գեսուր քաղաքում բնակվելիս ծառադ ուխտեց Տիրոջը՝ ասելով. “Եթե Տերն ինձ վերադարձնի Երուսաղեմ, ես Տիրոջը զոհ եմ մատուցելու”»։ ⁹ Արքան նրան ասաց. «Գնա՛ խաղաղությամբ»։ ¹⁰ Նա վեր կացավ ու գնաց Քեբրոն։ Աբեսաղոմը պատգամավորներ ուղարկեց Իսրայելի բոլոր ցեղերին և ասաց. «Երբ եղջերափողի ձայն լսեք, աղաղակե՛ք. “Աբեսաղոմը թագավորեց Քեբրոնում”»։ ¹¹ Աբեսաղոմի հետ գնացին իր կողմից հրավիրված երկու հարյուր անձինք, որոնք ամենևին տեղյակ չէին անցուդարձին։ ¹² Աբեսաղոմը զոհերը մատուցելու ժամանակ մարդ ուղարկեց ու իր Գոլա քաղաքից կանչեց Դավթի խորհրդական թեկուացի Աքիտոփելին։ Շատ մարդ հավաքվեց, և մեծ բազմություն էր հետևում Աբեսաղոմին։ ¹³ Գուժկան հասավ Դավթին, թե Իսրայելի մարդիկ անցել են Աբեսաղոմի կողմը։

Դավիթը փախչում է Երուսաղեմից

¹⁴ Դավիթն ասաց Երուսաղեմում իր հետ եղող բոլոր ծառաներին. «Ելե՛ք փախչենք, որովհետև մեզ փրկություն չկա Աբեսաղոմի ձեռքից։ Շտապ գնացե՛ք, որ արագ չհասնի մեզ և չարիք չբերի մեր գլխին, քաղաքները սրի չքաշի»։ ¹⁵ Արքայի ծառաներն ասացին նրան. «Ամեն ինչ, որ մեր տեր արքան կամենա, ծառաներս պատրաստ ենք կատարելու»։

¹⁶ Թագավորը ելավ, և նրա ամբողջ տունը ոտքով գնաց նրա հետևից։ Արքան իր հարճերից տասը կին թողեց, որ տունը պահպանեն։ ¹⁷ Արքան դուրս ելավ, և նրա բոլոր ծառաները ոտքով գնացին ու կանգ առան անապատում գտնվող ձիթենու մոտ։ ¹⁸ Նրա բոլոր ծառաները մեկ առ մեկ անցնում էին նրա մոտով. բոլոր քերեթիները, փելեթիներն ու բոլոր գեթացիները՝ վեց հարյուր մարդ, որ ոտքով եկել էին Գեթից, անցան Դավթի առջևից։ ¹⁹ Արքան ասաց գեթացի Եթթիին. «Դո՞ւ էլ ես գալիս մեզ հետ, հե՛տ դարձիր ու մնա՛ եկող արքայի մոտ, քանի որ օտար մարդ ես դու, որ քո տեղից՝ Գեթից դուրս գալով՝ եկել ես։ ²⁰ Ինձ հետ երկար չես եղել, որ գաս մեզ հետ, երբ ինքս էլ չգիտեմ, թե ո՛ւր եմ գնում և ո՛ւր պիտի գնամ։ Դու հե՛տ դարձիր, քո եղբայրներին էլ հե՛տ դարձրու քեզ հետ, և Տերը քեզ ողորմություն ու արդարություն կանի»։ ²¹ Եթթին պատասխան տվեց արքային՝ ասելով. «Կենդանի է Տերը, և կենդանի է իմ տեր արքան. որտեղ լինի իմ տեր արքան, մեռած թե կենդանի, այնտեղ կլինեմ և ես՝ քո ծառան»։ ²² Արքան ասաց Եթթիին. «Արի՛ ինձ հետ»։ Եվ գեթացի Եթթին գնաց իր հետ եղած բոլոր ծառաներով ու ամբողջ բազմությամբ հանդերձ։ ²³ Ամբողջ երկիրը բարձրաձայն լալիս էր, ամբողջ զորքը անցնում էր Կեդրոնի հեղեղատով. արքան նույնպես անցավ Կեդրոնի հեղեղատով։ Ամբողջ զորքն ու արքան գնում էին անապատ տանող ճանապարհով։

²⁴ Սադովկն ու նրա հետ բոլոր ղևտացիները Տիրոջ Ուխտի տապանակը հանեցին Բեթարից։ Նրանք կանգնեցրին Աստծու տապանակը և այն չտարան Բեթարից, մինչև որ ամբողջ ժողովուրդն այդ քաղաքից դուրս չեկավ։ ²⁵ Արքան Սադովկին ասաց. «Աստծու տապանակը հե՛տ տար քաղաք և դի՛ր իր տեղը։ Եթե Աստծու առաջ շնորհ գտնեմ, նա ինձ հետ կդարձնի և ինձ տեսնել կտա այն և նրա վայելչությունը։ ²⁶ Բայց եթե ասի՝ “Դու ինձ հաճելի չես”, թող ինձ անի այն, ինչ նրա աչքին հաճելի է»։ ²⁷ Արքան Սադովկ քահանային ասաց. «Այնպե՛ս արեք, որ դու խաղաղությամբ քաղաք վերադառնաս, և քո որդի Աքիմաասն ու Աբիաթարի որդի Հովնաթանը՝ ձեր երկու որդիները, ձեզ հետ լինեն։ ²⁸ Ես բանակատեղի եմ դնելու անապատի հովտում և կմնամ, մինչև որ ձեզանից լուր ստանամ»։ ²⁹ Սադովկն ու Աբիաթարը տապանակը հետ դարձրին Երուսաղեմ, և այն մնաց այնտեղ։

³⁰ Դավիթը բարձրանում էր Ձիթենյաց զառիվերով, բարձրանում էր ու լալիս։ Նա ծածկել էր գլուխը, բոկոտն էր գնում, և ամբողջ ժողովուրդը նրա հետ էր՝ գլուխները շորով ծածկած։ Բոլորը լաց լինելով բարձրանում էին։ ³¹ Դավթին հայտնեցին՝ ասելով. «Աքիտոփելն էլ ապստամբների հետ է, Աբեսաղոմի մոտ»։ Դավիթն ասաց. «Տե՜ր Աստված իմ, խափանի՛ր Աքիտոփելի խորհուրդը»։ ³² Դավիթը հասավ Հռովս, որտեղ երկրպագեց Աստծուն։

Եվ ահա նրան ընդառաջ եկավ արաքացի Քուսին՝ Դավթի բարեկամը՝ իր պատմուճանը պատառոտած ու գլխին հող լցրած։ ³³ Դավիթը նրան ասաց. «Եթե ինձ հետ գաս, ինձ վրա բեռ կլինես, ³⁴ իսկ եթե հետ դառնաս քաղաք և Աբեսաղոմին ասես՝ “Քո եղբայրներն անցան, հայրդ՝ արքան էլ հուզված անցավ ինձանից հետո, և արդ, քո ծառան եմ, արքա՛, թող ողջ մնամ քո առաջ. մի ժամանակ քո հոր ծառան էի, իսկ հիմա քո ծառան եմ ես, արքա՛”,- այդ ժամանակ կկարողանաս խափանել Աքիտոփելի խորհուրդները։ ³⁵ Ահա քեզ հետ կլինեն Սադովկ և Աբիաթար քահանաները, և եթե որևէ բան լսես արքայի տնից, հայտնի՛ր Սադովկ ու Աբիաթար քահանաներին։ ³⁶ Ահա նրանց հետ են իրենց երկու որդիները՝ Սադովկի որդի Աքիմաասն ու Աբիաթարի որդի Հովնաթանը։ Նրանց միջոցով ինձ հայտնե՛ք ամեն ինչ, որ կլսեք»։ ³⁷ Դավթի բարեկամ Քուսին եկավ քաղաք, և Աբեսաղոմը մտավ Երուսաղեմ։

16

Դավիթը և Սիբան

¹ Դավիթը հազիվ էր հեռացել Հռովսից, երբ Մեմփիբոսթեի ծառա Սիբան նրան ընդառաջ եկավ բեռնավորված երկու էշերով։ Դրանց վրա կային երկու հարյուր նկանակ, հարյուր ողկույզ չամիչ, հարյուր շարոց արմավ և մի սափոր գինի։ ² Արքան Սիբային ասաց. «Այդ ի՞նչ է»։ Սիբան ասաց. «Էշերն արքայի համար են, որ նստի, հացն ու արմավը՝ ծառաների համար, որ ուտեն, իսկ գինին՝ այստեղ՝ անապատում մնացած մարդկանց համար, որ խմեն»։ ³ Արքան հարցրեց. «Քո տիրոջ որդին որտե՞ղ է»։ Սիբան արքային պատասխանեց. «Նա մնացել է Երուսաղեմում, քանի որ ասել է. “Իսրայելի տունն այսօր ինձ կվերադարձնի իմ հոր թագավորությունը”»։ ⁴ Արքան Սիբային ասաց. «Թող քո՛նը լինի ամեն ինչ, որ Մեմփիբոսթեին է պատկանում»։ Սիբան, գլուխը խոնարհելով, ասաց. «Շնորհ գտա քո առաջ, տե՛ր իմ արքա»։

Սեմեին անիծում է Դավթին

⁵ Դավիթ արքան եկավ մինչև Բավուրիմ, և ահա այնտեղից Սավուղի տան ազգականներից մի մարդ մեջտեղ ելավ։ Դա Գերայի որդի Սեմեին էր։ Նա դուրս եկավ՝ անիծելով ⁶ և քարեր շպրտելով Դավթի ու ամենքի վրա, ովքեր Դավթի հետ էին։ Ամբողջ ժողովուրդն ու բոլոր քաջարիները կանգնած էին արքայի աջ ու ձախ կողմում։ ⁷ Սեմեին, նրան անիծելով, այսպես էր ասում. «Դո՛ւրս եկ, դո՛ւրս եկ, արյունարբո՛ւ և անօրե՛ն մարդ։ ⁸ Տերը Սավուղի տան թափած ամբողջ արյունը քո դեմ դարձրեց, քանի որ նրա փոխարեն դու թագավորեցիր։ Տերը քո թագավորությունը հանձնեց քո որդի Աբեսաղոմի ձեռքը։ Նա քեզ է վերադարձնում քո չարիքը, քանի որ դու արյունարբու ես»։ ⁹ Շարուհիի որդի Աբեսսան Դավթին ասաց. «Ինչո՞ւ է մի սատկած շուն այսպես անիծում իմ տեր արքային։ Թող գնամ ու կտրեմ նրա գլուխը»։ ¹⁰ Արքան ասաց. «Դուք ինձ հետ ի՞նչ գործ ունեք, Շարուհիի՛ որդիներ։ Թողե՛ք նա այդպես անիծի, քանզի Տերն է ասել նրան, որ անիծի Դավթին։ Ո՞վ կարող է նրան ասել՝ “Ինչո՞ւ ես այդպես վարվում”»։ ¹¹ Դավիթն Աբեսսային ու իր բոլոր ծառաներին ասաց. «Եթե ինձնից սերված իմ որդին իմ մահն է ուզում, որչա՜փ առավել կուզի Հեմինի որդին։ Թո՛ւյլ տվեք նրան, որ անիծի, քանզի Տերն է այդ ասել նրան։ ¹² Տերը, տեսնելով իմ տառապանքները, թերևս ինձ բարիք հատուցի այսօրվա նրա անեծքի փոխարեն»։ ¹³ Դավիթը և իր հետ եղած մարդիկ գնացին իրենց ճանապարհով, իսկ Սեմեին գնում էր լեռան կողքով՝ նրան մոտիկ, գնում էր ու անիծում, նրա կողմը քարեր նետում, նրա վրա հող շաղ տալիս։ ¹⁴ Արքան ու նրան ընկերակցող ամբողջ տանջված զորքը եկան ու հանգստացան այնտեղ։

Աբեսաղոմը Երուսաղեմում

¹⁵ Աբեսաղոմը և ողջ Իսրայելը մտան Երուսաղեմ։ Նրանց հետ էր նաև Աքիտոփելը։ ¹⁶ Երբ Դավթի բարեկամ արաքացի Քուսին եկավ Աբեսաղոմի մոտ, Քուսին Աբեսաղոմին ասաց. «Կեցցե՜ արքան»։

¹⁷ Աբեսաղոմը Քուսիին ասաց. «Ա՞յդ է բարեկամիդ նկատմամբ ունեցած քո սերը, ինչո՞ւ չես գնացել քո բարեկամի հետ»։ ¹⁸ Քուսին ասաց Աբեսաղոմին. «Այդպես չէ. այլ ում որ ընտրի Տերը, այս ժողովուրդն ու Իսրայելի բոլոր այրերը, կգնամ նրա հետ, նրանը կլինեմ ու նրա հետ կմնամ։ ¹⁹ Բացի այդ, ես ո՞ւմ պիտի ծառայեմ, եթե ոչ նրա որդուն։ Ինչպես որ ծառայել եմ քո հորը, այդպես էլ կծառայեմ քեզ»։

²⁰ Աբեսաղոմն Աքիտոփելին ասաց. «Խորհո՛ւրդ տվեք, թե ի՞նչ պետք է անենք»։ ²¹ Աքիտոփելն Աբեսաղոմին ասաց. «Մտի՛ր քո հոր հարճերի ծոցը, որոնց նա թողել էր իր տունը պահպանելու համար, և ամբողջ Իսրայելը թող իմանա, որ խայտառակել ես հորդ, և բոլոր քեզ հետ եղողները կքաջալերվեն»։ ²² Աբեսաղոմի համար վրան խփեցին տանիքի վրա, և ողջ Իսրայելի առաջ Աբեսաղոմը մտավ իր հոր հարճերի ծոցը։ ²³ Այն ժամանակ Աքիտոփելի խորհուրդները, որ նա տալիս էր այդ օրերին, համարվում էին Աստծուց տրված։ Այդպիսին էր Աքիտոփելի ամեն մի խորհուրդը ինչպես Դավթի, այնպես էլ Աբեսաղոմի համար։

17

Քուսին մոլորեցնում է Աբեսաղոմին

¹ Աքիտոփելն ասաց Աբեսաղոմին. «Թող տասներկու հազար մարդ ընտրեմ, այս գիշեր գնամ ու հետապնդեմ Դավթին և գիշերով նրա դեմ ելնեմ։ ² Նա հոգնած է ու ձեռքերը թուլացած։ Նրան խուճապի կմատնեմ, նրա հետ եղած զորքը կփախչի, ու կսպանեմ միայն արքային։ ³ Ամբողջ զորքը քեզ մոտ կբերեմ, ինչպես հարսն է իր ամուսնու մոտ գալիս, և միայն մեկ մարդու կյանքին վերջ կտամ, իսկ ամբողջ զորքը խաղաղության մեջ կլինի»։ ⁴ Այս խոսքը ճշմարիտ թվաց Աբեսաղոմին և Իսրայելի բոլոր ծերերին։

⁵ Աբեսաղոմն ասաց. «Կանչե՛ք արաքացի Քուսիին, և լսենք, թե նա ի՛նչ կասի»։ ⁶ Քուսին եկավ Աբեսաղոմի մոտ, և Աբեսաղոմը նրան հաղորդեց այն խոսքերը, որ ասել էր Աքիտոփելը։ Նա ավելացրեց. «Հետևե՞նք նրա ասածին, ապա թե ոչ, դու ի՛նքդ խորհուրդ տուր»։ ⁷ Քուսին ասաց Աբեսաղոմին. «Աքիտոփելի այս անգամ տված խորհուրդը լավ չէ»։ ⁸ Քուսին ավելացրեց. «Դու ինքդ ճանաչում ես հորդ և նրա մարդկանց, որ նրանք շատ զորեղ են և դառնացած սրտով, որովհետև նրանք նման են դաշտում ձագերը կորցրած ու զայրացած արջի։ Քո հայրը պատերազմի մարդ է և զորքին հանգիստ չի տա։ ⁹ Նա հիմա թաքնված է բլուրներից մեկում կամ այլ տեղում, և եթե հարձակվենք նրա վրա, առաջինն ինքը կգրոհի, և այն ժամանակ լսողները կասեն՝ “Կոտորվել է Աբեսաղոմին հետևող ժողովուրդը”։ ¹⁰ Նա հզոր մարդ է, և նույնիսկ նա, ով առյուծի սիրտ ունի, նրա առաջ կթուլանա, որովհետև ամբողջ Իսրայելը գիտի, թե ուժեղ է քո հայրը, և նրա հետ եղողներն էլ ուժեղ են։ ¹¹ Ուստի ես քեզ այսպիսի խորհուրդ կտամ. հավաքի՛ր ողջ Իսրայելին՝ Դանից մինչև Բերսաբեե, ծովեզրի ավազի չափ, և դու անձամբ առաջնորդի՛ր նրանց։ ¹² Այն ժամանակ նրա վրա կհասնենք այն տեղերից մեկում, որտեղ նրան կգտնենք. կշրջապատենք նրան, ինչպես ցողն է իջնում երկրի վրա, և նրա մարդկանցից ոչ ոքի կենդանի չենք թողնի։ ¹³ Իսկ եթե նա քաղաք մտնի, այն ժամանակ ամբողջ Իսրայելը, այդ քաղաքը պարաններ տանելով, նրա մարդկանց քարշ կտա մինչև հեղեղատը, այնպես որ այնտեղ մի քար էլ չի մնա»։ ¹⁴ Աբեսաղոմն ու Իսրայելի բոլոր այրերն ասացին. «Արաքացի Քուսիի խորհուրդն ավելի լավ է, քան Աքիտոփելի խորհուրդը»։ Տերը վճիռ էր տվել, որ Աքիտոփելի լավ խորհուրդը չկատարվի, որպեսզի Տերն Աբեսաղոմի գլխին թափի բոլոր չարիքները։

Դավիթն անցնում է Հորդանան գետը

¹⁵ Արաքացի Քուսին ասաց Սադովկ ու Աբիաթար քահանաներին. «Աքիտոփելն այսպես և այսպես խորհուրդ տվեց Աբեսաղոմին ու Իսրայելի ծերերին, իսկ ես այսպիսի խորհուրդ տվեցի։ ¹⁶ Արդ, շուտափույթ կերպով մա՛րդ ուղարկեք ու իմա՛ց տվեք Դավթին՝ ասելով. “Այս գիշեր անապատի հովտում մի՛ մնա, այլ անցիր գնա՛. չլինի թե արքան և ամբողջ ժողովուրդը կորստյան մատնվեն”»։ ¹⁷ Հովնաթանն ու Աքիմաասը Ռովգելի աղբյուրների մոտ էին, և մի աղախին գնաց ու նրանց պատմեց, որ գնան ու հայտնեն Դավիթ արքային, որովհետև իրենք չէին կարող քաղաք մտնել ու երևալ այնտեղ։ ¹⁸ Սակայն մի պատանի տեսավ նրանց ու հայտնեց Աբեսաղոմին։ Նրանք երկուսով գնացին Բավուրիմ ու մտան մի մարդու տուն, որտեղ գուբ կար, և այնտեղ իջան։ ¹⁹ Կինը խուփն առավ ու փակեց գուբը, դրա վրա թուզ փռեց իբր չորացնելու համար, ու ոչինչ չիմացվեց։ ²⁰ Աբեսաղոմի ծառաները եկան այդ կնոջ մոտ՝ նրա տուն, և հարցրին. «Աքիմաասն ու Հովնաթանը որտե՞ղ են»։ Կինը նրանց պատասխանեց. «Գետից այն կողմ անցան»։ Նրանք փնտրեցին նրանց և չգտնելով՝ վերադարձան Երուսաղեմ։ ²¹ Նրանց գնալուց հետո գբից դուրս եկան և գնացին Դավիթ արքայի մոտ ու պատմեցին՝ ասելով. «Ելե՛ք ու անցե՛ք գետը, քանի որ Աքիտոփելն այսպես ու այսպես է խորհուրդ տվել ձեր մասին»։ ²² Դավիթն ու նրա հետ եղող ամբողջ ժողովուրդն առավոտյան՝ նախքան լուսանալը, ելան ու անցան Հորդանան գետը։ Ոչ ոք չմնաց, որ անցած չլիներ Հորդանան գետը։ ²³ Աքիտոփելը, երբ տեսավ, որ իր խորհուրդն ի դերև ելավ, համետեց իր էշը, ելավ գնաց քաղաք՝ իր տունը, և իր տանը կարգադրություններ անելուց հետո կախվեց։ Նա մեռավ և թաղվեց իր հոր գերեզմանում։

²⁴ Դավիթը հասավ Մաանայիմ, իսկ Աբեսաղոմն ինքը և նրա հետ ամբողջ Իսրայելն անցան Հորդանան գետը։ ²⁵ Աբեսաղոմը Հովաբի փոխարեն իր զորքի հրամանատար կարգեց Ամեսայիին։ Ամեսային որդին էր հեզրայելացի մի մարդու, որի անունն էր Հոթոր։ Նա ամուսնացել էր Հովաբի մայր, Շարուհիի քույր և Հեսսեի դուստր Աբիգեայի հետ։ ²⁶ Աբեսաղոմը և ամբողջ Իսրայելը բանակատեղի դրեցին Գաղաադի երկրում։ ²⁷ Երբ Դավիթը Մաանայիմ հասավ, Նաասի որդի Վեսբին՝ Ամովնի որդիներից՝ Ռաբաթից, Ամիելի որդի Մաքիրը՝ Լադաբարից և գաղաադացի Բերզելին՝ Ռոգելիմից, ²⁸ բերեցին տասն անկողիններ, ծածկոցներ, տասը կաթսաներ, բրուտի անոթներ, ցորեն, գարի, ալյուր, փոխինդ, ոլոռ, ոսպ, ²⁹ մեղր, կարագ, ոչխարներ ու կաթնակեր հորթեր և մատուցեցին Դավթին ու նրա հետ եղած զորքին, որ ուտեն, քանի որ զորքն անապատում լինելով՝ քաղցած էր ու ծարավ։

18

Աբեսաղոմի զորքի պարտությունը

¹ Դավիթն իր հետ եղած զորքի հաշվառում անցկացրեց և նրանց վրա հազարապետներ ու հարյուրապետներ կարգեց։ ² Դավիթը զորքի մեկ երրորդ մասը հանձնեց Հովաբի, մեկ երրորդ մասը Շարուհիի որդու՝ Հովաբի եղբայր Աբեսսայի և մեկ երրորդ մասն էլ՝ գեթացի Եթթիի հրամանատարությանը։ Դավիթն ասաց զորքին. «Ես էլ պետք է ձեզ հետ դուրս գամ»։ ³ Նրանք ասացին. «Դու չպետք է դուրս գաս, որովհետև եթե փախչենք, նրանք մեզ կարևորություն չեն տա։ Կարևորություն չեն տա, եթե անգամ մեր կեսն էլ կոտորվի։ Դու մեր տասը հազար մարդու արժեքն ունես։ Արդ, լավ է, որ դու քաղաքում մնաս և մեզ օգնության հասնես»։ ⁴ Արքան նրանց ասաց. «Ինչ որ ձեզ համար հաճելի է, ես այն կանեմ»։ Եվ արքան մնաց դարպասի մոտ, իսկ ամբողջ ժողովուրդը հարյուրներով ու հազարներով դուրս էր գալիս քաղաքից։ ⁵ Արքան պատվեր տվեց Հովաբին, Աբեսսային ու Եթթիին՝ ասելով. «Խնայե՛ք իմ պատանյակ Աբեսաղոմին»։ Եվ ամբողջ զորքը լսեց, որ արքան Աբեսաղոմի համար բոլոր զորավարներին պատվեր էր տալիս։

⁶ Ամբողջ զորքը դուրս եկավ անտառ, Իսրայելի դեմ, և կռիվ եղավ Եփրեմի անտառում։ ⁷ Իսրայելի զորքը պարտվեց Դավթի ծառաներից. այդ օրը մեծ կոտորած եղավ. քսան հազար հոգի ընկավ։ ⁸ Պատերազմն այստեղից տարածվեց ամբողջ երկրի վրա։ Այդ օրն անտառն ավելի շատ զինվոր կլանեց, քան սուրը կոտորեց։

Աբեսաղոմի մահը

⁹ Աբեսաղոմը Դավթի ծառաների դեմ դուրս եկավ։ Աբեսաղոմն իր ջորին էր հեծել, և ջորին մի մեծ կաղնու թավ ճյուղերի տակը մտավ։ Նրա գլուխը կաղնու ճյուղերի մեջ խճճվեց, ու ինքը կախ ընկավ երկնքի ու երկրի միջև, իսկ ջորին նրա տակից անցավ գնաց։ ¹⁰ Մի մարդ տեսավ ու պատմեց Հովաբին՝ «Ահա տեսա Աբեսաղոմին՝ կաղնու ծառից կախված»։ ¹¹ Հովաբն իրեն լուր տվող մարդուն ասաց. «Տեսել ես, բայց ինչո՞ւ նրան գետնին չտապալեցիր։ Ես այսօր քեզ հիսուն սիկղ արծաթ և մի սուր կտայի»։ ¹² Մարդն ասաց Հովաբին. «Եթե քո ձեռքից նույնիսկ հազար սիկղ արծաթ ստանայի, իմ ձեռքն արքայի որդու վրա չէի բարձրացնի, որովհետև լսեցինք, որ արքան քեզ, Աբեսսային ու Եթթիին պատվիրեց՝ ասելով. “Խնայե՛ք Աբեսաղոմ պատանյակին, ¹³ նրան ոչ մի վնաս թող չհասնի”։ Արքայի համար ոչ մի բան թաքուն չէր մնա, և դու ինքդ հեռու կմնայիր»։ ¹⁴ Հովաբն ասաց. «Քեզ հետ կորցնելու ժամանակ չունեմ»։ Եվ Հովաբը երեք նետ վերցրեց և դրանցով խոցեց Աբեսաղոմի սիրտը, մինչ նա կենդանի էր կաղնու վրա։ ¹⁵ Հովաբի զինակիրներից տասը երիտասարդներ շրջապատեցին և խփեցին Աբեսաղոմին և սպանեցին նրան։

¹⁶ Հովաբը եղջերափող հնչեցրեց, և զորքը նրա հետ վերադարձավ, որպեսզի չհետապնդեն Իսրայելին, որովհետև Հովաբը խնայում էր զորքին։ ¹⁷ Հովաբը վերցրեց Աբեսաղոմի դիակն ու այն նետեց անտառում մի մեծ, շատ խորունկ վիհի մեջ։ Ողջ Իսրայելը փախավ՝ ամեն մեկն իր բնակավայրը։

¹⁸ Աբեսաղոմը կենդանի եղած ժամանակ իր համար կոթող էր կանգնեցրել։ Նա կոթող էր կանգնեցրել նաև Հաբինում՝ Թագավորների հովտում։ Նա ասում էր, թե ինքը որդի չունի, որ պահի իր հիշատակը։ Եվ նա կոթողը կոչել էր իր անվամբ, ու այն մինչև օրս կոչվում է Աբեսաղոմի ձեռակերտ։

Դավթին տեղեկացնում են Աբեսաղոմի մահվան մասին

¹⁹ Սադովկի որդի Աքիմաասն ասաց. «Գնամ, ավետիս տանեմ արքային, քանզի Տերն արդար գործ արեց՝ նրան ազատելով իր թշնամիների ձեռքից»։ ²⁰ Հովաբն ասաց նրան. «Դու այսօր ավետիս տանող մարդ չես, մի ուրիշ օր ավետիս կտանես։ Այսօր պետք չէ ավետիս տանել, քանի որ արքայի որդին մեռավ»։ ²¹ Նա ասաց Քուսիին. «Գնա հայտնի՛ր արքային, ինչ որ տեսար»։ Քուսին խոնարհ գլուխ տվեց Հովաբին ու դուրս եկավ։ ²² Սադովկի որդի Աքիմաասը դարձյալ ասաց Հովաբին. «Ի՞նչ կլինի, եթե ես էլ վազեմ Քուսիի հետևից»։ Հովաբն ասաց. «Դու ինչո՞ւ պետք է վազես, որդյա՛կ իմ, այստե՛ղ արի։ Դա այնպիսի ավետիս չէ, որ օգուտ բերի»։ ²³ Աքիմաասն ասաց. «Ի՞նչ կլինի, եթե վազեմ»։ Հովաբն ասաց նրան. «Վազի՛ր»։ Աքիմաասը վազեց Կեքարի ճանապարհով և Քուսիից առաջ անցավ։ ²⁴ Դավիթը նստել էր երկու դարպասների միջև։ Պահակակետի դիտորդը դարպասի տանիքի վրայով գնաց դեպի պարիսպը և իր հայացքը բարձրացնելով՝ տեսավ, որ մի մարդ մենակ վազում է իր կողմը։ ²⁵ Նա աղաղակելով այդ մասին հայտնեց արքային։ Արքան ասաց. «Եթե մենակ է, ավետիս է բերում»։ Նա գալիս, մոտենում էր։ ²⁶ Դիտորդը վազող մի ուրիշ մարդ էլ տեսավ և դարպասի կողմն աղաղակելով՝ ասաց. «Ահա մի մարդ ևս մենակ վազում է»։ Արքան ասաց. «Նա էլ ավետաբեր է»։ ²⁷ Դիտորդն ասաց. «Տեսնում եմ, որ առաջինի վազքը նման է Սադովկի որդի Աքիմաասի վազքին»։ Արքան ասաց. «Նա բարի մարդ է և բարի լուրով կգա»։ ²⁸ Աքիմաասն աղաղակելով ու երեսնիվայր գետնին ընկնելով՝ ասաց արքային. «Ողջո՛ւյն։ Օրհնյալ է Տերը՝ քո Աստվածը, որ ոչնչացրեց քեզ ատելի մարդկանց, որոնք իրենց ձեռքը մեր տեր արքայի վրա էին բարձրացրել»։ ²⁹ Արքան ասաց. «Ո՞ղջ է իմ երիտասարդ Աբեսաղոմը»։ Աքիմաասն ասաց. «Ո՜վ արքա, երբ քո ծառա Հովաբն ինձ՝ քո ծառային, ուղարկում էր, ես միայն մեծ բազմություն տեսա։ Ես չիմացա, թե ի՛նչ կար այնտեղ»։ ³⁰ Արքան ասաց. «Մի կո՛ղմ քաշվիր»։ Նա մի կողմ քաշվեց ու կանգնեց։ ³¹ Հասավ Քուսին և ասաց արքային. «Իմ տե՛ր արքա, ավետիս եմ բերել, Տերն այսօր քեզ պաշտպանեց քեզ վրա բոլոր ձեռք բարձրացնողներից»։ ³² Արքան հարցրեց Քուսիին. «Ո՞ղջ է իմ երիտասարդ Աբեսաղոմը»։ Քուսին ասաց. «Այդ երիտասարդի նման դառնան իմ արքայի թշնամիները և չար նպատակով քո դեմ բոլոր ելնողները»։

19

Դավթի վիշտը

¹ Արքան խռովվեց, բարձրացավ դարպասի վերնատունը և ողբալով այս էր ասում. «Որդի՜ս, Աբեսաղո՜մ, Աբեսաղո՜մ, որդյա՜կ իմ, երանի՜ ես մեռնեի քո փոխարեն, ես մեռնեի քո փոխարեն։ Աբեսաղո՜մ, որդյա՜կ իմ, որդյա՜կ իմ Աբեսաղոմ»։

² Հովաբին հայտնեցին, որ արքան լալով ողբում էր Աբեսաղոմի մահը։ ³ Այդ օրը հաղթանակը սուգի վերածվեց ամբողջ զորքի համար, քանի որ զորքն այդ օրը լսել էր, որ արքան տխրել է իր որդու համար։ ⁴ Այդ օրը զորքը գաղտագողի էր քաղաք մտնում, ինչպես ամոթահար զորքն է փախչում պատերազմից։ ⁵ Արքան իր երեսը ծածկեց և բարձրաձայն ողբալով՝ ասում էր. «Որդյա՜կ իմ Աբեսաղոմ, Աբեսաղո՜մ, որդյա՜կ իմ»։

⁶ Հովաբը, մտնելով պալատ՝ արքայի մոտ, ասաց. «Դու այսօր ամոթով ես թողնում քո բոլոր ծառաներին, որոնք փրկեցին քեզ, քո տղաներին ու աղջիկներին, քո կանանց ու հարճերին։ ⁷ Սիրում ես քեզ ատողներին և ատում՝ քեզ սիրողներին։ Դու այսօր ցույց տվեցիր, որ քեզ համար ոչինչ են քո իշխաններն ու ծառաները։ Ես հաստատ գիտեմ, որ եթե Աբեսաղոմը կենդանի լիներ, մենք ամենքս այսօր մեռած կլինեինք, և դա քեզ հաճելի կլիներ։ ⁸ Արդ, վե՛ր կաց և սի՛րտ տուր քո ծառաներին, քանզի երդվում եմ Տիրոջ անունով, որ եթե այսօր դուրս չգաս, այս գիշեր քեզ մոտ մարդ չի մնա։ Գիտցի՛ր, որ դա քեզ համար շատ ավելի վատ կլինի, քան այն բոլոր չարիքները, որ հասել են քեզ մանկությունից սկսած մինչև այժմ»։ ⁹ Արքան ելավ ու նստեց դարպասի մոտ։ Ամբողջ զորքին հայտնեցին՝ ասելով. «Ահա արքան նստել է դարպասի մոտ»։ Ամբողջ զորքը եկավ արքայի առաջ, իսկ Իսրայելը փախավ իր բնակության վայրերը։

Դավիթը վերադառնում է Երուսաղեմ

¹⁰ Ամբողջ ժողովուրդն Իսրայելի բոլոր ցեղերի մեջ վիճում էր՝ ասելով. «Դավիթ արքան մեզ փրկեց մեր բոլոր թշնամիներից, նա մեզ ազատեց այլազգիների ձեռքից, իսկ հիմա Աբեսաղոմի պատճառով փախստական է դարձել իր երկրից ու թագավորությունից։ ¹¹ Աբեսաղոմը, որին մեզ թագավոր օծեցինք, մեռել է պատերազմում։ Հիմա ինչո՞ւ չեք խոսում արքային հետ դարձնելու մասին»։ Ողջ Իսրայելի ասած այդ խոսքերը հասան արքային, ¹² և Դավիթ արքան մարդ ուղարկեց Սադովկ և Աբիաթար քահանաների մոտ՝ ասելով. «Խոսե՛ք Հուդայի ծերերի հետ և ասե՛ք. “Ինչո՞ւ վերջինը դառնանք արքային իր տունը հետ բերողների մեջ”, որովհետև ողջ Իսրայելի ասած խոսքը հասավ արքային»։ Դավիթն ասաց Հուդայի ցեղին. ¹³ «Դուք իմ ոսկորն ու մարմինն եք, ինչո՞ւ եք վերջինը մնում արքային իր տունը հետ բերողների մեջ։ ¹⁴ Ամեսայիին ասե՛ք. “Դու իմ ոսկորն ու մարմինը չե՞ս։ Աստված ինձ այսպես ու ավելին անի, եթե դու ամեն ժամանակ իմ զորքի հրամանատար չլինես Հովաբի փոխարեն”»։ ¹⁵ Դավիթը Հուդայի բոլոր մարդկանց սրտերը մեկ մարդու սրտի պես դեպի իրեն դարձրեց. նրանք պատգամավորներ ուղարկեցին արքայի մոտ՝ ասելով. «Հե՛տ դարձեք դու և քո բոլոր ծառաները»։ ¹⁶ Արքան վերադարձավ ու եկավ մինչև Հորդանան գետը։ Հուդայի մարդիկ եկան Գաղգաղա՝ արքային դիմավորելու և Հորդանան գետն անցկացնելու համար։

¹⁷ Հեմինայի որդի Գերայի որդի բավուրիմացի Սեմեին շտապեց ու Հուդայի մարդկանց հետ, իր հետ ունենալով Բենիամինի երկրից հազար մարդ, եկավ դիմավորելու Դավիթ արքային։ ¹⁸ Սավուղի տան ծառա Սիբան իր տասնհինգ որդիների և քսան ծառաների հետ եկավ, որ կազմակերպի արքայի անցումը Հորդանան գետից։ ¹⁹ Նրանք արքային գետն անցկացնելու ծառայությունն արեցին. անցան գետը, որ արքայի ընտանիքը փոխադրեն և նրա աչքի առաջ բարին գործեն։

Թագավորը խնայում է Սեմեիին

Մինչ արքան Հորդանան գետն էր անցնում, Գերայի որդի Սեմեին երեսնիվայր ընկավ արքայի առաջ։ ²⁰ Նա ասաց արքային. «Թող իմ տեր արքան մոռանա իմ անօրենությունը, չհիշի, որ իր ծառան հանցանք է գործել այն օրը, երբ իմ տերը դուրս էր եկել Երուսաղեմից։ Թագավորը դա թող մոռանա, ²¹ քանի որ քո ծառան գիտի, որ մեղք է գործել, և այսօր ահավասիկ Հովսեփի ամբողջ տնից ես եմ առաջինը եկել՝ դիմավորելու իմ տեր արքային»։ ²² Շարուհիի որդի Աբեսսան պատասխան տվեց՝ ասելով. «Մի՞թե Սեմեին չի մեռնելու այն բանի փոխարեն, որ անիծեց Տիրոջ օծյալին»։ ²³ Դավիթն ասաց. «Ի՞նչ եմ արել ես ձեզ, Շարուհիի՛ որդիներ, որ այսօր իմ դեմ եք ելնում։ Այսօր Իսրայելից ոչ ոք չի մեռնելու։ Մի՞թե ես չգիտեմ, որ այսօր ես եմ թագավորում Իսրայելի վրա»։ ²⁴ Եվ արքան ասաց Սեմեիին. «Դու պիտի չմեռնես»։ Եվ արքան երդվեց նրան։

Դավիթը ներում է Մեմփիբոսթեին

²⁵ Սավուղի որդի Հովնաթանի որդի Մեմփիբոսթեն ընդառաջ եկավ արքային։ Նա արքայի գնալու օրվանից մինչև նրա խաղաղությամբ վերադառնալը ո՛չ իր ոտքերն էր խնամել, ո՛չ եղունգներն էր կտրել, ո՛չ մորուքը տեսքի բերել, ո՛չ բեղերը շտկել և ո՛չ էլ հագուստներն էր լվացել։ ²⁶ Երբ նա մտավ Երուսաղեմ և ընդառաջ ելավ արքային, արքան ասաց նրան. «Ինչո՞ւ ինձ հետ չեկար, Մեմփիբոսթե՛»։ ²⁷ Մեմփիբոսթեն նրան ասաց. «Տե՛ր իմ արքա, ծառաս ինձ խաբեց, քանի որ քո ծառան նրան ասաց՝ “Համետի՛ր էշը, որ հեծնեմ ու գնամ արքայի մոտ”, քանի որ քո ծառան կաղ է։ ²⁸ Իսկ նա՝ քո ծառան, տե՛ր իմ արքա, քեզ մոտ ինձ զրպարտել է։ Տե՛ր իմ արքա, որպես Աստծու հրեշտակ, բարի գործեր ես արել։ Արդ, արա՛, ինչ քո աչքին բարի է. ²⁹ թեև իմ հոր ամբողջ տունն իմ տեր արքայի առաջ մահվան արժանի մարդիկ են, բայց դու քո ծառային դրեցիր այն մարդկանց շարքը, որոնք արքայի սեղանից են ուտում։ Արդ, այսուհետև էլ ի՞նչ իրավունք ունեմ արքային բողոքելու»։ ³⁰ Արքան նրան ասաց. «Ինչո՞ւ ես ասում այդ խոսքերը։ Ասել եմ, որ դու և Սիբան բաժանեք ագարակը»։ ³¹ Մեմփիբոսթեն արքային ասաց. «Նա նույնիսկ ամբողջը թող վերցնի, քանի որ արքան խաղաղությամբ իր տուն է վերադարձել»։

Դավիթը հատուցում է Բերզելիին

³² Գաղաադացի Բերզելին եկավ Ռոգելիմից և արքային անցկացրեց Հորդանան գետով՝ նրան ընկերակցելով մինչև Հորդանան գետի մյուս կողմը։ ³³ Բերզելին շատ ծեր մարդ էր, ութսուն տարեկան։ Նա էր արքային կերակրել, երբ վերջինս բնակվում էր Մաանայիմում, քանի որ նա շատ հարուստ մարդ էր։ ³⁴ Արքան ասաց Բերզելիին. «Դու ե՛կ ինձ հետ, և ես քո ծերության օրերին քեզ կկերակրեմ Երուսաղեմում»։ ³⁵ Բերզելին ասաց արքային. «Ինչքա՞ն են իմ կյանքի օրերը, որ արքայի հետ գնամ Երուսաղեմ։ ³⁶ Այսօր ես ութսուն տարեկան եմ։ Մի՞թե կարող եմ լավը վատից տարբերել, կամ թե ծառադ արդյոք կերածի ու խմածի համը կառնի՞, կամ թե տակավին կլսե՞մ գուսանների ու վարձակների ձայնը։ Ծառադ ինչո՞ւ բեռ լինի իր տեր արքային։ ³⁷ Քո ծառան արքայի հետ հազիվ անցնի Հորդանան գետը։ Արքան ինձ ինչո՞ւ է այդ հատուցումը տալիս։ ³⁸ Քո ծառան թող ապրի ու մեռնի իր քաղաքում, իր հոր ու մոր գերեզմանի մոտ։ Քո ծառա Քամաա՛մը թող անցնի իմ տեր արքայի հետ, և նրա՛ն արա այն, ինչ բարի է քո աչքին»։ ³⁹ Արքան ասաց. «Թող Քամաա՛մն անցնի ինձ հետ, և ես նրան կանեմ այն, ինչ բարի է իմ աչքին։ Ամեն ինչ, որ դու ինձանից կակնկալես, կանեմ քեզ համար»։

⁴⁰ Ամբողջ ժողովուրդն անցավ Հորդանան գետը. անցավ և արքան։ Արքան համբուրեց Բերզելիին, օրհնեց նրան, և նա իր տեղը վերադարձավ։ ⁴¹ Արքան գնաց Գաղգաղա, Քամաամն էլ անցավ գնաց նրա հետ։ Հուդայի երկրի ամբողջ ժողովուրդը և Իսրայելի ժողովրդի կեսը գնացին արքայի հետ։

⁴² Եվ ահա Իսրայելի բոլոր այրերը եկան ու ասացին արքային. «Ինչո՞ւ մեր եղբայրները՝ Հուդայի մարդիկ, քեզ փախցրին և արքային ու նրա տունն անցկացրին Հորդանան գետով»։ ⁴³ Հուդան պատասխանեց Իսրայելին՝ ասելով. «Որովհետև արքան մեզ ավելի հարազատ է։ Եվ ինչո՞ւ եք դժգոհ այդ բանի համար։ Մի՞թե արքան մեզ կերակրել է կամ մեզ պարգևնե՞ր է տվել և կամ մեր բե՞ռն է կրել»։ ⁴⁴ Իսրայելի մարդիկ Հուդայի մարդկանց պատասխանեցին՝ ասելով. «Մենք արքայի մոտ տասը բաժին ունենք։ Անդրանիկը մենք ենք և ոչ թե դուք։ Դավթի նկատմամբ էլ մենք ավելի շատ իրավունք ունենք, քան դուք։ Ինչո՞ւ մեզ անարգեցիք և մեր խորհուրդը չհարցրիք նախքան արքային մեզ մոտ վերադարձնելը»։ Եվ Հուդայի մարդիկ ավելի խիստ էին խոսում, քան Իսրայելի մարդիկ։

20

Սաբեեի ապստամբությունը Դավթի դեմ

¹ Բոքորիի որդի հեմինացի Սաբեե անունով անօրեն մի մարդ հոխորտաց։ Նա, եղջերափող հնչեցնելով, ասաց. «Մենք ո՛չ Դավթի մոտ բաժին ունենք, ո՛չ էլ ժառանգություն՝ Հեսսեի որդու մոտ։ Ո՜վ Իսրայել, թող ամեն մարդ իր բնակավայրը գնա»։ ² Ամբողջ Իսրայելը, Դավթից բաժանվելով, Բոքորիի որդի Սաբեեին հետևեց, իսկ Հուդայի երկրի մարդիկ իրենց թագավորի հետ Հորդանան գետի ափից գնացին մինչև Երուսաղեմ։

³ Դավիթը եկավ Երուսաղեմ՝ իր տուն։ Թագավորն այն տասը հարճերին, որոնց թողել էր տունը պահպանելու համար, առավ և նրանց պահել տվեց մի տան մեջ, կերակրեց նրանց, բայց նրանց չմերձեցավ։ Հարճերը մինչև իրենց մահվան օրն իբրև այրի առանձնացված ապրեցին։ ⁴ Արքան ասաց Ամեսայիին. «Երեք օրվա ընթացքում ինձ մոտ կհավաքես Հուդայի երկրի մարդկանց, և դու էլ այստեղ կգաս»։ ⁵ Ամեսային գնաց Հուդայի երկրի մարդկանց կանչելու, սակայն արքայի նշանակած ժամանակին չհասցրեց։ ⁶ Դավիթն ասաց Աբեսսային. «Հիմա Բոքորիի որդի Սաբեեն ավելի մեծ չարիք կգործի, քան Աբեսաղոմը։ Վերցրո՛ւ քո տիրոջ ծառաներին ու հետապնդի՛ր նրան, չլինի թե ամրացված քաղաքներ գտնի և մեր աչքից կորչի»։ ⁷ Նրան հետապնդելու ելան Աբեսսան ու Հովաբի մարդիկ, քերեթիները, փելեթիներն ու բոլոր ուժեղ մարդիկ։ Նրանք դուրս եկան Երուսաղեմից, որպեսզի հետապնդեն Բոքորիի որդի Սաբեեին։

⁸ Երբ նրանք Գաբավոնի մեծ քարի մոտ էին, նրանց դիմաց ելավ Ամեսային։ Հովաբը հագել էր իր զրահավոր թիկնոցը, դրա վրա մեջքին կապել էր պատենավոր սուրը, որը մի քիչ դուրս էր ցցված։ ⁹ Հովաբն ասաց Ամեսայիին. «Ինչպե՞ս ես, եղբա՛յր»։ Եվ Հովաբն աջ ձեռքով բռնեց Ամեսայիի մորուքը, որ նրան համբուրի։ ¹⁰ Ամեսային չզգուշացավ Հովաբի ձեռքի սրից, և Հովաբը, դա խրելով նրա որովայնը, փորոտիքը գետնին թափեց։ Հովաբը հարվածը չկրկնեց, և Ամեսային մեռավ։ Հովաբը և նրա եղբայր Աբեսսան գնացին Բոքորիի որդի Սաբեեին հետապնդելու։ ¹¹ Հովաբի զինվորներից մեկը եկավ ու կանգնելով Ամեսայիի մոտ՝ ասաց. «Ով սիրում է Հովաբին կամ Դավթին, թող գնա Հովաբի ու Աբեսսայի հետևից»։ ¹² Ամեսայիի դիակն արնաշաղախ ընկած էր ճանապարհի մեջտեղը։ Երբ այդ մարդը տեսավ, որ մարդիկ տեղում մնացել են կանգնած, Ամեսայիի դիակը ճանապարհից դեպի դաշտը գլորեց ու մի շորով ծածկեց այն, որովհետև տեսավ, որ ամեն ոք, ով գալիս էր, նրա առաջ կանգ էր առնում։ ¹³ Երբ դիակը ճանապարհից հեռացրեց, Իսրայելի բոլոր այրերը հետևեցին Հովաբին, որ հետապնդեն Բոքորիի որդի Սաբեեին։

¹⁴ Սաբեեն անցավ Իսրայելի բոլոր ցեղերի մարդկանց միջով մինչև Աբել ու Բեթմաքա, և բոլոր ընտիր զինվորները հավաքվեցին ու հետևեցին նրան։ ¹⁵ Նրան բռնելու համար Հովաբի մարդիկ պաշարեցին Աբելն ու Բեթմաքան և քաղաքի դիմաց հողաբլուր կուտակեցին։ Այն նրանց իբրև պատվար ծառայեց։ Հովաբի ամբողջ զորքը քանդում-կործանում էր պարիսպը։

¹⁶ Մի իմաստուն կին պարսպից ձայն տվեց՝ ասելով. «Լսեցե՛ք, լսեցե՛ք, Հովաբին ասե՛ք, որ մոտ գա, ես նրա հետ պիտի խոսեմ»։ ¹⁷ Հովաբը մոտեցավ նրան, ու կինն ասաց. «Դո՞ւ ես Հովաբը»։ Նա ասաց. «Ես եմ»։ Կինն ասաց նրան. «Լսի՛ր քո աղախնի խոսքերը»։ Հովաբն ասաց. «Ես եկել եմ լսելու»։ ¹⁸ Կինն ասաց. «Նախկինում այսպիսի խոսքեր էին ասում. “Թող գնան Աբելին ու Դանին հարցնեն, թե Իսրայելին հավատարիմ մարդկանց ձեռնարկած գործերը հաջող ավարտ կունենա՞ն”։ Անպայման պետք է Աբելին հարցնեին և այդպես էլ անում էին։ ¹⁹ Ես Իսրայելի հավատարիմ խաղաղարարներից եմ, իսկ դու ուզում ես կործանե՞լ Իսրայելի այս քաղաքը։ Ինչո՞ւ ես բնաջնջում Տիրոջ ժառանգությունը»։ ²⁰ Հովաբը պատասխան տվեց՝ ասելով. «Քա՛վ լիցի ինձ, քա՛վ լիցի, թե բնաջնջեմ ու կոտորեմ։ ²¹ Հարցը դա չէ։ Եփրեմի լեռից Սաբեե անունով մի մարդ կա՝ Բոքորիի որդին, որ ձեռք է բարձրացրել Դավիթ արքայի վրա։ Ինձ տվե՛ք միայն նրան, և ես կհեռանամ այս քաղաքից»։ Կինն ասաց Հովաբին. «Նրա գլուխը պարսպի վրայից հիմա քեզ մոտ կընկնի»։ ²² Կինը գնաց ժողովրդի մոտ, իր իմաստնությունը գործադրելով՝ համոզեց բոլոր քաղաքացիներին, որ կտրեն Բոքորիի որդի Սաբեեի գլուխը։ Նրանք կտրեցին նրա գլուխն ու նետեցին Հովաբի առաջ։ Եղջերափող հնչեց, և այդ քաղաքում ամեն մարդ իր բնակավայրը քաշվեց, իսկ Հովաբը հետ դարձավ Երուսաղեմ՝ արքայի մոտ։

Դավթի զորավարները

²³ Հովաբն Իսրայելի ամբողջ զորքի հրամանատարն էր, Հովիդայի որդի Բանեան հրամանատարն էր քերեթիների ու փելեթիների, ²⁴ Ադոնիրամը հարկերի վերակացուն էր, Աքիլոթի որդի Հովսափատը դիվանապետ էր, ²⁵ Սուդայեն՝ քարտուղար, Սադովկն ու Աբիաթարը քահանաներ էին, ²⁶ իսկ Հարիմի որդի Իրասը Դավթի քահանան էր։

21

Մեծ սովը. Սավուղի սերնդի ոչնչացումը

¹ Դավթի օրոք երեք տարի իրար հետևից սով եղավ, և Դավիթը դիմեց Տիրոջը։ Տերն ասաց. «Սավուղի և նրա տան արյունահեղության պատճառով է այս պատուհասը, որովհետև նա կոտորել է գաբավոնացիներին»։ ² Դավիթ արքան կանչեց գաբավոնացիներին ու խոսեց նրանց հետ։ Գաբավոնացիներն Իսրայելի որդիներ չէին, այլ ամորհացու արյունից էին, և Իսրայելի որդիները երդումով էին կապված նրանց հետ, բայց Սավուղը ուզեց կոտորել նրանց, որպեսզի վրեժ լուծի Իսրայելի ու Հուդայի որդիների համար։ ³ Դավիթը գաբավոնացիներին ասաց. «Ի՞նչ անեմ ձեզ, ինչո՞վ քավություն անեմ, որ օրհնեք Տիրոջ ժառանգությունը»։ ⁴ Գաբավոնացիներն ասացին նրան. «Մենք արծաթ ու ոսկի չենք ուզում Սավուղից ու նրա ցեղից, ոչ էլ Իսրայելի այրերից մեկի մահն ենք ուզում»։ Արքան ասաց. «Հապա ի՞նչ եք ուզում, որ անեմ ձեզ համար»։ ⁵ Նրանք արքային ասացին. «Թող մեռնի նա, ով մեզ կոտորեց ու հալածեց, ով վճռել էր մեզ ոչնչացնել։ Որպեսզի նրանք վերանան Իսրայելի բոլոր սահմաններից, ⁶ մե՛զ հանձնեք նրա որդիներից յոթ հոգի՝ Տիրոջ համար ընտրված, որ նրանց կախենք Տիրոջ առաջ՝ Սավուղ արքայի Գաբաա քաղաքում»։ Արքան ասաց. «Ես ձեզ կտա՛մ նրանց»։ ⁷ Արքան խնայեց Սավուղի որդի Հովնաթանի որդի Մեմփիբոսթեին այն երդումի համար, որ Դավիթն ու Սավուղի որդի Հովնաթանը տվել էին իրար Տիրոջ առաջ։ ⁸ Դավիթը վերցրեց Այիայի դուստր Ռեսփայի երկու որդիներին՝ Երմոնթիին ու Հեբուսթեին, որոնց նա ծնել էր Սավուղի համար, Սավուղի դուստր Մերոբի հինգ որդիներին, որ սերվել էին մոլաթացի Բերզելիի որդի Եսդրիելից, ⁹ և նրանց հանձնեց գաբավոնացիների ձեռքը, որոնք նրանց կախեցին լեռան վրա՝ Տիրոջ առաջ։ Նրանք յոթն էլ միասին զոհվեցին։ Նրանք մեռան հնձի առաջին օրերին, գարու հնձի սկզբում։

¹⁰ Այիայի դուստր Ռեսփան գարու հնձի սկզբում քուրձ վերցրեց ու գցեց ապառաժի վրա գտնվող նրանց դիակների վրա, մինչև որ երկնքից անձրև տեղաց նրանց վրա։ Նա չէր թողնում, որ ցերեկը երկնքի թռչունները մոտենան նրանց, ոչ էլ գիշերը՝ անապատի գազանները։ ¹¹ Դավթին հայտնեցին, թե ի՛նչ է արել Այիայի դուստր Ռեսփան՝ Սավուղի հարճը։ Նրանց դիակները փտեցին, և Հովասի որդի Դանը՝ հսկաների ցեղից, հասավ նրանց վրա։ ¹² Դավիթը գնաց և Սավուղի ու նրա որդի Հովնաթանի ոսկորները վերցրեց Գաղաադի Հաբիս բնակավայրի բնակիչներից, որոնք թաքուն դրանք հավաքել էին Բեթսանի հրապարակից։ Այլազգիները Գեղբուեում նրանց կախել էին այն օրը, երբ հաղթել էին նրանց։ ¹³ Նա այնտեղից հանեց Սավուղի ու նրա որդի Հովնաթանի ոսկորները, հավաքեց նաև Բենիամինի երկրում կախվածների ոսկորները ¹⁴ և թաղեց նրանց հայր Կիսին պատկանող գերեզմանում։ Նրանք արեցին այն ամենը, ինչ արքան հրամայել էր, և Աստված դրանից հետո լսեց երկրից եկող ձայնը։

Պատերազմ այլազգիների դեմ

(Ա Մն. 20.4-8)

¹⁵ Դարձյալ պատերազմ եղավ այլազգիների և Իսրայելի միջև։ Դավիթն ու նրա մարդիկ պատերազմեցին այլազգիների դեմ։ Դավիթը հոգնեց։ ¹⁶ Հեսբեացի Աբեսսան, որը Ռափայի որդիներից էր, և որի նիզակը երեք հարյուր սիկղ կշիռ ունեցող պղնձից էր, ու ինքն էլ մեջքին թուր ուներ, ուզում էր սպանել Դավթին։ ¹⁷ Սակայն Շարուհիի որդի Աբեսսան, օգնության եկավ Դավթին և հարվածելով այլազգուն՝ սպանեց նրան։ Այն ժամանակ Դավթի մարդիկ երդվեցին՝ ասելով. «Դու այլևս մեզ հետ պատերազմի չպետք է դուրս գաս, որ Իսրայելի ճրագը չհանգի»։

¹⁸ Դրանից հետո Գեթում կրկին պատերազմ եղավ այլազգիների դեմ։ Այն ժամանակ օսացի Սոբաքը սպանեց Սեփտոնին, որը Ռափայի որդիներից էր։

¹⁹ Ռովբում դարձյալ պատերազմ եղավ այլազգիների դեմ, և բեթղեհեմացի Արիոգիմի որդի Եղեանան սպանեց գեթացի Գողիաթին, որի նիզակի բռնակը ոստայնանկների գլան էր հիշեցնում։

²⁰ Գեթում դարձյալ պատերազմ եղավ։ Այդ ժամանակ Մաով անունով մի մարդ կար, որի ձեռքերի ու ոտքերի մատները վեց-վեց հատ էին՝ ընդամենը քսանչորս մատ։ Նա ծնվել էր Ռափայից ²¹ և նախատում էր Իսրայելին։ Նրան սպանեց Դավթի եղբայր Սամաայի որդի Հովնաթանը։ ²² Այս չորսը ծնվել էին Ռափայի տանը՝ Գեթում, և ընկան Դավթի ու նրա մարդկանց ձեռքով։

22

Դավթի հաղթանակի երգը

(Սաղ. 18)

¹ Այն օրը, երբ Տերը Դավթին փրկել էր իր բոլոր թշնամիներից ու Սավուղի ձեռքից, Դավիթը Տիրոջն ուղղեց օրհնության հետևյալ խոսքերը.

² «Տերն իմ վեմն է, ամրությունն ու փրկիչը։

³ Թող Աստված ինձ պահապան լինի. ես նրան եմ ապավինել։

Նա է իմ հովանավորը, իմ փրկության եղջյուրը,

իմ պաշտպանն ու իմ փրկության ապավենը։

Անիրավ մարդկանցից փրկի՛ր ինձ, Տե՜ր։

⁴ Օրհնյալ Տիրոջն եմ աղերսում, որ ազատվեմ իմ թշնամիներից։

⁵ Ինձ պաշարեցին մահվան կործանումները,

ինձ խռովեցրին անօրենության հեղեղները։

⁶ Մահվան երկունքն ինձ պատեց,

մահվան որոգայթներն ինձ հասան։

⁷ Իմ նեղության մեջ Տիրոջը պիտի դիմեմ,

իմ Աստծուն աղաղակեմ,

և նա իր սուրբ տաճարից կլսի իմ ձայնը,

իմ աղաղակը նրա ականջին կհասնի։

⁸ Երկիրը նայեց, ալեկոծվեց ու ցնցվեց,

երկնքի հիմքերը դղրդացին ու տապալվեցին,

քանի որ Տերը բարկացել էր դրանց վրա։

⁹ Նրա բարկությունից ծուխ ելավ,

ու նրա բերանից՝ լափող հուր։

Նրանից կայծակներ արձակվեցին,

¹⁰ նա խոնարհեցրեց երկինքն ու իջավ։

Մառախուղ կար նրա ոտքերի տակ։

¹¹ Նա նստեց քերովբեների վրա ու թռավ,

և երևաց հողմերի թևերի վրա։

¹² Նա իրեն խավարով պատեց, խավարով ծածկեց իր խորանը

ու ջրերի խավարով թանձրացրեց երկնի ամպերը։

¹³ Նրա առաջ եղած լույսի ցոլքից հրե կայծակներ բորբոքվեցին։

¹⁴ Տերը երկնքից որոտաց, ու Բարձրյալը ձայն տվեց։

¹⁵ Նա իր նետերն արձակեց ու ցրեց դրանք,

փայլատակումներ փայլատակեցրեց ու զարհուրեցրեց նրանց։

¹⁶ Ծովի խորխորատները բացվեցին,

և երևան եկան հիմքերը տիեզերքի՝

Տիրոջ սաստից ու նրա բարկության շնչից։

¹⁷ Բարձունքներից ուղարկեց

և ինձ դուրս բերեց հորդառատ ջրերից։

¹⁸ Նա ինձ կորզեց իմ թշնամիների

և ինձ ատողների բռնությունից,

քանզի նրանք ինձանից ավելի զորավոր եղան։

¹⁹ Նեղ օրեր հասան ինձ վրա,

սակայն Տերն ինձ նեցուկ եղավ։

²⁰ Նա ինձ դուրս բերեց անդորրություն ու փրկեց ինձ,

քանզի սիրեց ինձ։

²¹ Տերն ինձ հատուցեց ըստ իմ արդարության,

Տերն ըստ իմ ձեռքերի մաքրության պիտի հատուցի ինձ։

²² Ես պահել եմ Տիրոջ ճանապարհները

և իմ Աստծու դեմ ամբարշտություն չեմ գործել։

²³ Նրա բոլոր օրենքներն իմ առաջ են,

և ես նրա պատգամներից չեմ շեղվել։

²⁴ Նրա առաջ անբիծ եմ եղել

և նախօրոք հեռու մնացել անօրենությունից։

²⁵ Տերն ինձ թող հատուցի ըստ իմ արդարության

ու Տիրոջ աչքի առաջ ըստ իմ ձեռքերի մաքրության։

²⁶ Սրբի հետ սուրբ կլինես,

կատարյալ մարդու հետ՝ կատարյալ։

²⁷ Ընտրյալի հետ ընտրյալ կլինես,

իսկ ծուռի հետ՝ ծուռ։

²⁸ Դու կփրկես տնանկ ժողովրդին,

իսկ ամբարտավանների աչքերը կխոնարհեցնես։

²⁹ Դո՛ւ ես իմ ճրագը, Տե՜ր,

դո՛ւ ես լուսավորելու իմ խավարը։

³⁰ Որովհետև քո օգնությամբ պիտի սլանամ, ինչպես թեթև զինված մարտիկ

և իմ Աստծու շնորհիվ պիտի ցատկեմ պարսպի վրայով։

³¹ Իմ հզո՜ր Աստված, քո ճանապարհն անարատ է։

Հզոր է Տիրոջ խոսքը, փորձված.

նա հովանավոր է բոլոր իրեն ապավինողներին։

³² Ո՞վ է հզոր, բացի քեզանից, Տե՜ր,

և ո՞վ է արարիչ, բացի մեր Աստծուց։

³³ Հզոր է Տերը, որն ինձ հզորացնում է զորությամբ,

իմ ճանապարհներն անարատ դարձնում։

³⁴ Իմ ոտքերը եղջերուների ոտքերի նման է անում,

և ինձ բարձունքների վրա է կանգնեցնում։

³⁵ Նա իմ ձեռքը պատերազմի է սովորեցնում

և պղնձե աղեղը հաստատում իմ բազուկներում։

³⁶ Դու ես ինձ տվել իմ փրկության վահանը,

և իմ հնազանդությունը մեծացրեց ինձ։

³⁷ Դու իմ ճամփան ընդարձակ կդարձնես,

իմ սրունքները չսասանվեցին։

³⁸ Ես պիտի հալածեմ իմ թշնամիներին,

նրանց պիտի կոտորեմ ու հետ չպիտի դառնամ,

մինչև իսպառ չոչնչացնեմ նրանց։

³⁹ Ես խորտակելու եմ նրանց, ու ոտքի չեն կանգնելու։

Նրանք պիտի ընկնեն իմ ոտքերի տակ։

⁴⁰ Դու ինձ զորությամբ կգոտեպնդես, որ պատերազմեմ,

և դու իմ դեմ ելնողներին իմ ձեռքը կհանձնես։

⁴¹ Դու իմ թշնամիներին ինձանից հեռու վանեցիր

ու իմ ատելիներին կոտորեցիր։

⁴² Նրանք պիտի աղաղակեն, բայց ոչ ոք նրանց չպիտի օգնի։

Նրանք Տիրոջը դիմեցին, բայց նա չլսեց նրանց։

⁴³ Ես նրանց պիտի մանրացնեմ գետնի հողի պես

և պիտի տրորեմ փողոցի ցեխի պես։

⁴⁴ Դու ինձ կփրկես ժողովուրդների կռվից

և ինձ կկանգնեցնես ազգերի գլխին։

Ինձ անծանոթ ժողովուրդը ծառայեց ինձ,

⁴⁵ Օտարների որդիները երբ իմ մասին լսեցին,

սուտ կերպով հավատարմություն հայտնեցին ինձ։

⁴⁶ Օտարների որդիները պիտի դուրս նետվեն,

պիտի դուրս ընկնեն իրենց թաքստոցներից։

⁴⁷ Կենդանի է Տերը, և օրհնյալ է իմ պահապանը։

Բարձրանալու է Տերը՝ իմ փրկության պահապանը։

⁴⁸ Հզոր է Տերը, նա վրեժխնդիր է,

ժողովուրդներին հպատակ է դարձնում ինձ։

⁴⁹ Նա ինձ կփրկի իմ թշնամիներից

և ինձ վրա հարձակվողներից ավելի վեր կդասի ինձ,

անիրավ մարդուց կփրկի ինձ։

⁵⁰ Այս բանի համար ազգերի մեջ պիտի գոհանամ քեզանից, Տե՜ր,

և քո անունը պիտի գովերգեմ իմ սաղմոսներում։

⁵¹ Նա թագավորի փրկությունն ապահովում է

և ողորմություն է անում իր օծյալին՝ Դավթին,

ու նրա սերնդին մինչև հավիտյան»։

23

Դավթի վերջին խոսքերը

¹ Ահա Դավթի վերջին խոսքերը.

«Հավատարիմ է Հեսսեի որդի Դավիթը,

հավատարիմ է նա, որին Տերը բարձրացրեց

իբրև Աստծու օծյալ՝ Հակոբի վրա։

Վայելուչ են Իսրայելի երգերը։

² Տիրոջ հոգին իմ մեջ խոսեց,

նրա խոսքն իմ լեզվի վրա է։

³ Իսրայելի Աստվածն ասաց,

ինձ հետ խոսեց Իսրայելի պահապանը.

ես այլաբանությամբ ասացի մարդկանց.

“Ո՞վ կարող է դիմանալ Տիրոջ և Աստծու երկյուղին,

⁴ ինչպես առավոտյան լույսին”։

Արեգակն առավոտյան ծագում է,

և նրա լույսը չի պակասում,

ինչպես անձրևից հետո կանաչն է բարձրանում երկրի վրա։

⁵ Մի՞թե այդպիսին չէ իմ տունը հզոր Աստծու մոտ։

Նա ինձ հետ հավիտենական ուխտ է դրել,

որը բոլոր ժամանակներում պետք է պահվի։

Իմ ամբողջ փրկությունն ու իմ ամբողջ կամքը Տերն է։

Անօրենները թող չբողբոջեն.

⁶ նրանք նման են մերժված փշերի,

որոնք ձեռքով չեն բռնվում,

⁷ և մարդ նրանց մեջ պիտի տքնի

և զինված երկաթով ու նիզակի փայտով՝

դրանք պիտի այրի կրակով,

և նրանք պիտի բորբոքվեն իրենց ամոթից»։

Դավթի պատերազմիկները

(Ա Մն. 11.10-46)

⁸ Սրանք են Դավթի զորավարների անունները. քանանացի Հեբուսթե՝ նույն ինքը՝ Ադինո ասոնացին, մեկ երրորդի հրամանատարը։ Նա միանգամից ութ հարյուր զինվոր սպանեց։ ⁹ Նրանից հետո գալիս է Եղեանանը՝ նրա հորեղբորորդին, սոսացու որդին, որը Դավթի երեք զորավարներից մեկն էր։ Երբ Ռեմայում նա հրահրեց այլազգիներին, սրանք պատերազմի հավաքվեցին, և նա խրախուսեց Իսրայելի մարդկանց։ ¹⁰ Նա վեր կացավ ու այլազգիներին այնքան հարվածեց, որ ձեռքը կպած էր մնացել սրի կոթին։ Տերն այդ օրը մեծ փրկություն պարգևեց։ Զորքը մնաց, բայց միայն դիակապտության համար։

¹¹ Նրանից հետո գալիս է արուկացի Սիսի որդին՝ Սամաան։ Այլազգիները հավաքվել էին Ծնոտ կոչվող վայրում։ Այնտեղ կար մի դաշտ, որտեղ առատ ոսպ էր ցանված։ Զորքը փախավ այլազգիների առաջից, ¹² իսկ նա դաշտում ամուր կանգնեց ու փրկեց այն, հարվածեց այլազգիներին, ու Տերը մեծ փրկություն պարգևեց։

¹³ Երեսուն զորավարներից երեքը գնացին Կասովա՝ Ոդողոմի քարայրը, Դավթի մոտ։ Այլազգիների գնդերը բանակատեղի էին դրել Ռափայինների հովտում։ ¹⁴ Դավիթն այն ժամանակ ամրոցում էր։ Իսկ այլազգիների բանակատեղին Բեթղեհեմում էր։ ¹⁵ Դավիթը ջուր խմելու ցանկություն ունեցավ և ասաց. «Ո՞վ ինձ Բեթղեհեմի դարպասի մոտ գտնվող ջրհորից ջուր կբերի, որ խմեմ»։ Այլազգիների գնդերը Բեթղեհեմում էին։ ¹⁶ Երեք զորավարները ճեղքեցին այլազգիների բանակը, ջուր հանեցին Բեթղեհեմի դարպասի մոտ գտնվող ջրհորից, առան ու եկան Դավթի մոտ։ Սակայն նա չուզեց խմել այն, այլ նվիրեց Տիրոջը՝ ¹⁷ ասելով. «Քա՛վ լիցի ինձ, ո՜վ Տեր, որ այդ բանն անեմ։ Մի՞թե ես կխմեմ իրենց կյանքը վտանգող մարդկանց արյունը»։ Եվ նա չուզեց խմել այն։ Ահա այս բանն արեցին այս երեք զորավարները։

¹⁸ Աբեսսան՝ Հովաբի եղբայրը՝ Շարուհիի որդին, երեքի գլխավորն էր։ Նա իր նիզակով երեք հարյուր հակառակորդ էր սպանել։ ¹⁹ Նա անվանի էր երեքի մեջ, նրանցից ավելի փառավորված, նրանց գլխավորը, բայց նա այն երեքի աստիճանին չհասավ։

²⁰ Բազում գործեր կատարած կաբեեղացի մի զորավոր մարդու՝ Հովիդայեի որդի Բանեան սպանել էր մովաբացի Արիելի երկու որդիներին։ Նա, ձյունոտ մի օր փոսի մեջ իջնելով, առյուծ էր սպանել։ ²¹ Նա էր սպանել եգիպտացի հաղթանդամ մի մարդու։ Այդ եգիպտացու ձեռքին կար կամրջի գերան հիշեցնող մի նիզակ։ Նա նիզակով հարձակվելով այդ մարդու վրա՝ նիզակը խլել էր եգիպտացու ձեռքից և նրա նիզակով էլ սպանել նրան։ ²² Այս բանն արել էր Հովիդայեի որդին՝ Բանեան։ Նա անվանի էր երեք զորավարների մեջ։ ²³ Նա երեքից ամենից փառավորն էր, սակայն առաջին երեքին չէր հասնի։ Դավիթը նրան իր շտեմարանների վերակացու էր նշանակել։

²⁴ Սրանք են Դավիթ արքայի զորավարների անունները. Հովաբի եղբայր Ասայել, որը երեսուն զորավարներից մեկն էր։ Բեթղեհեմում ապրող նրա հորեղբոր՝ Ելիուդի որդի Եղեանան, ²⁵ ռուդացի Սամաա, կեղոթացի Սեղղոմ, ²⁶ փեղղատացի Աղղաս, թեկուացի Եսկաթի որդի Իրաս, ²⁷ ասոթացու որդիներից անաթոթացի Աբիեզեր, ²⁸ աղիոյացի Եղղոն, նետոփատացի Նոերե, ²⁹ Փամփանի որդի Աղափ, նեփղաթացի Անաովե, եփրաթացի Բենիամինի որդիների Գաբաեթի բնակավայրից՝ Ռիբայի որդի Եթթի, Գովասի ձորից՝ Ադդայի, ³⁰ Աբիեղբոն՝ դաշտավայրերից, Ադդայի Նաքաղացի, ³¹ ղադաբարացի Գասբիե, բարասամացի Ասմոն, ³² սաղաբոնացի Եղիաս, Ասանի որդիները, Հովնաթան, ³³ արոդացի Սամնան, արաթիրացի Արեդի որդի Եղիա, ³⁴ ասիբացիներից Ամաքի որդի Աղիփաղեթ, գաղամովնացի Աքիտոփելի որդի Եղիաբ, ³⁵ կարմեղացի Ասարե, երքացի Տուուր, ³⁶ Նաթանի որդի Գաղա, որը մեծ ուժի տեր գաղաադացու որդի էր, ³⁷ ամովնացի Եղիե, Շարուհիի որդի Հովաբի կապարճակիր բեքրոթացի Գեղորե, ³⁸ հեթերացի Իրաս, բեթանացի Գարեի, ³⁹ քետացի Ուրիա։ Ընդամենը՝ երեսունյոթ հոգի։

24

Դավթի մեղքը՝ մարդահամար անցկացնելը

(Ա Մն. 21.1-6)

¹ Տիրոջ բարկությունը դարձյալ բորբոքվեց Իսրայելի վրա։ Նա Դավթին գրգռեց նրանց դեմ՝ ասելով. «Գնա հաշվառո՛ւմ կատարիր Իսրայելում և Հուդայի երկրում»։ ² Արքան իր մոտ գտնվող զորքի հրամանատար Հովաբին ասաց. «Շրջի՛ր Իսրայելի բոլոր ցեղերի մեջ՝ Դանից մինչև Բերսաբեե, ժողովրդի հաշվառո՛ւմ կատարիր, որ գիտենամ նրանց թիվը»։ ³ Հովաբն արքային ասաց. «Տերը թող ժողովրդին հարյուրապատիկ ավելացնի, ու դա թող տեսնեն իմ տեր արքայի աչքերը, բայց իմ տեր արքան ինչո՞ւ է այդ բանն ուզում»։ ⁴ Արքան իր ասածը պարտադրեց Հովաբին ու զորքի հրամանատարներին։ Հովաբն ու զորքի բոլոր հրամանատարները ելան արքայի մոտից, որ Իսրայելի ժողովրդի հաշվառում անցկացնեն։ ⁵ Նրանք անցան Հորդանան գետը և կանգ առան Արոյեր քաղաքի աջ կողմը, որը Գադի ու Եղիազարի ձորի միջև է։ ⁶ Եկան Գաղաադ, Թաբասոն, Եսթոն ու Ադասե, հասան Դան ու Սիդովնի շրջակայքը։ ⁷ Նրանք անցան Տյուրոսի Մափսար բնակավայրը և քանանացիների ու խևացիների բոլոր քաղաքները, հարավի կողմից եկան Հուդայի երկիր ու Բերսաբեե։ ⁸ Ամբողջ երկիրը շրջեցին և ինն ամիս քսան օր լրանալուց հետո եկան հասան Երուսաղեմ։ ⁹ Հովաբը մարդահամարի տվյալները հանձնեց արքային. Իսրայելն ուներ ութ հարյուր հազար սուսերակիր զինվոր, իսկ Հուդայի երկիրը՝ հինգ հարյուր հազար մարտիկ։

Աստծու պատիժը

(Ա Մն. 21.7-17)

¹⁰ Դավթի սիրտը ցավեց մարդկանց հաշվառումից հետո։ Դավիթն ասաց Տիրոջը. «Մեծ մեղք գործեցի արվածի համար։ Արդ, ո՜վ Տեր, ների՛ր քո ծառայի մեղքը, քանի որ մեծ հիմարություն արեցի»։ ¹¹ Երբ Դավիթն առավոտյան զարթնեց, Տերը Դավթին ուղղված խոսք ասաց տեսանող մարգարե Գադի միջոցով։ Տերն ասաց. ¹² «Գնա խոսի՛ր Դավթի հետ և նրան ասա՛. “Այսպես է ասում Տերը. երեք բան եմ առաջարկում քեզ, ընտրի՛ր նրանցից մեկը, և դա էլ կկատարեմ”»։ ¹³ Գադը եկավ Դավթի մոտ, պատմեց ու ասաց. «Ընտրի՛ր, որն ուզում ես. կա՛մ քո երկրում երեք տարի սով պիտի լինի, կա՛մ երեք ամիս դու պիտի փախչես քո թշնամիների առաջից, ու քեզ պիտի հալածեն, կա՛մ էլ երեք օր մահ պիտի լինի քո երկրում։ Արդ, մտածի՛ր ու ասա՛, թե ի՛նչ պատասխան տանեմ ինձ ուղարկողին»։ ¹⁴ Դավիթն ասաց Գադին. «Բոլոր կողմերից ես խիստ ծանր կացության մեջ եմ։ Քանի որ շատ ու շատ են Տիրոջ ողորմությունները, ավելի լավ է ընկնեմ Տիրոջ ձեռքը, քան մարդկանց ձեռքը»։ Եվ Դավիթն ընտրեց մահը։ ¹⁵ Ցորենը հնձելու օրերն էին։ Եվ Տերն Իսրայելին մահ ուղարկեց առավոտից մինչև ճաշի ժամ։ Մահ սկսվեց ժողովրդի մեջ. Դանից մինչև Բերսաբեե յոթանասուն հազար մարդ մեռավ։ ¹⁶ Աստծու հրեշտակն իր ձեռքը մեկնեց Երուսաղեմի վրա, որ ոչնչացնի այն, սակայն Տերն այդ պատուհասները բավարար համարեց և ասաց ժողովրդին ոչնչացնող հրեշտակին. «Բավական է, ձեռքդ հե՛տ քաշիր»։ Տիրոջ հրեշտակը հեբուսացի Ոռնայի կալի մոտ էր։ ¹⁷ Երբ Դավիթը տեսավ ժողովրդին կոտորող հրեշտակին, ասաց Տիրոջը. «Ահավասիկ ես. ես եմ մեղավոր, ես՝ հովիվս եմ հանցավոր, այս ոչխարներն ի՞նչ են արել։ Թող քո ձեռքը բարձրանա իմ ու իմ հոր տան վրա»։

Դավիթը զոհասեղան է կանգնեցնում

(Ա Մն. 21.18-27)

¹⁸ Այդ օրը Գադ մարգարեն, Դավթի մոտ գալով, ասաց նրան. «Վե՛ր կաց ու հեբուսացի Ոռնայի կալում Տիրոջ համար զոհասեղա՛ն կանգնեցրու»։ ¹⁹ Գադի խոսքերին անսալով՝ Դավիթը գնաց, ինչպես Տերն էր պատվիրել։ ²⁰ Երբ Ոռնան տեսավ իր մոտ եկող արքային ու նրա ծառաներին, ընդառաջ գնաց նրանց և երկրպագեց տիրոջը՝ երեսնիվայր գետնին ընկնելով։ ²¹ Ոռնան ասաց. «Իմ տեր արքան ինչո՞ւ է եկել իր ծառայի մոտ»։ Դավիթն ասաց. «Կալը քեզանից գնելու, որ Տիրոջ համար զոհասեղան շինեմ, և դադարի ժողովրդի կոտորածը»։ ²² Ոռնան Դավթին ասաց. «Թող իմ տեր արքան առնի ու Տիրոջը զոհ մատուցի այն, ինչ հաճելի է նրա աչքին։ Ահավասիկ եզներ ողջակեզի համար և անիվներ ու եզների լծասարք՝ փայտի փոխարեն»։ ²³ Ոռնան, ամեն ինչ տալով արքային, նրան ասաց. «Թող Տերը՝ քո Աստվածը, քեզ օրհնի»։ ²⁴ Արքան Ոռնային ասաց. «Ո՛չ, այդպես չէ։ Պետք է քեզանից փողով գնեմ, իմ Տիրոջը՝ Աստծուն, ձրի ողջակեզ չեմ մատուցի»։ Դավիթը կալն ու եզները գնեց հիսուն սիկղ արծաթով։ ²⁵ Դավիթն այնտեղ Տիրոջ՝ Աստծու համար զոհասեղան շինեց և նրա վրա ողջակեզներ ու հաշտության զոհեր մատուցեց։ Հետագայում Սողոմոնը զոհասեղանն ընդարձակեց, որովհետև նախկինը փոքր էր։ Տերը լսեց երկրի համար արված աղոթքը, և Իսրայելից կոտորածը դադարեց։

Գ ԳԻՐՔ ԹԱԳԱՎՈՐՆԵՐԻ

1

[* Ա ԳԻՐՔ ԹԱԳԱՎՈՐՆԵՐԻ]

Դավիթը՝ ծերացած

¹ Դավիթ արքան տարիքն առել, ծերացել էր. նրան հագուստներով ծածկում էին, բայց նա չէր տաքանում։ ² Նրա սպասավորներն ասացին. «Մեր տիրոջ՝ արքայի համար մի կույս աղջիկ գտնենք, որ սպասավորի և հոգ տանի նրան, նրա հետ քնի, ու մեր տերը՝ արքան, տաքանա»։ ³ Եվ Իսրայելի ողջ տարածքում գեղեցիկ մի աղջիկ որոնեցին ու գտան սունամցի Աբիսակին ու նրան բերեցին արքայի մոտ։ ⁴ Աղջիկը շատ գեղեցիկ էր, տաքացնում էր արքային ու ծառայում նրան, բայց արքան չմերձեցավ նրան։

Ադոնիան ուզում է թագավորել

⁵ Ադոնիան՝ Ագիթի որդին, մեծամտանալով ասաց. «Ես պետք է թագավորեմ»։ Եվ նա կառքեր պատրաստեց ու հեծյալներ ձեռք բերեց, ինչպես նաև իր առջևից վազող հիսուն պահապաններ։ ⁶ Հայրը նրան երբեք որևէ բան չէր արգելել՝ ասելով՝ «Ինչո՞ւ այդ արեցիր»։ Նա գեղեցկատես էր ու ծնվել էր Աբեսաղոմից հետո։ ⁷ Նա խորհրդակցեց Շարուհիի որդի Հովաբի և Աբիաթար քահանայի հետ, ու նրանք համախոհ եղան Ադոնիային։ ⁸ Սադովկ քահանան, սակայն, Բանեան՝ Հովիդայեի որդին, Նաթան մարգարեն, Սեմեին, Ռեին և Դավթի թիկնապահները Ադոնիայի հետ չէին։ ⁹ Մի օր Ադոնիան ոչխարներ, եզներ ու գառներ մորթեց Զոողեթի Քարի մոտ, որը Ռովգելի երկրի մոտ է։ Նա կանչեց իր բոլոր եղբայրներին՝ արքայի որդիներին, և Հուդայի երկրի բոլոր երևելիներին՝ արքայի ծառաներին, ¹⁰ բայց Նաթան մարգարեին, Բանեաին, թիկնապահներին ու Սողոմոնին՝ իր եղբորը, չկանչեց։

Նաթանը և Բերսաբեեն՝ Սողոմոնի կողմնակից

¹¹ Նաթան մարգարեն, խոսելով Սողոմոնի մոր՝ Բերսաբեեի հետ, ասաց. «Չե՞ս լսել, որ Ադոնիան՝ Ագիթի որդին, թագավոր է դարձել, և մեր տերը՝ Դավիթ արքան, այդ չգիտի։ ¹² Արդ, ե՛կ քեզ մի խորհուրդ տամ, որ փրկես քո և Սողոմոն որդուդ կյանքը։ ¹³ Գնա մտի՛ր Դավիթ արքայի մոտ, խոսի՛ր նրա հետ և ասա՛. “Չէ՞ որ դու ինքդ, տե՛ր իմ արքա, երդվելով քո աղախնին, ասացիր՝ “Քո որդի Սողոմոնն է թագավորելու ինձնից հետո, նա է նստելու իմ աթոռին”։ Ուրեմն ինչո՞ւ է Ադոնիան թագավորել”։ ¹⁴ Երբ կսկսես խոսել արքայի հետ, ես կմտնեմ ու կհաստատեմ քո խոսքերը»։

¹⁵ Բերսաբեեն մտավ սենյակ, արքայի մոտ։ Արքան շատ էր ծերացել, և սոմնացի Աբիսակն սպասարկում էր արքային։ ¹⁶ Բերսաբեեն խոնարհվեց ու երկրպագեց արքային։ Արքան հարցրեց. «Ի՞նչ է խնդրանքդ»։ ¹⁷ Նա պատասխանեց. «Իմ տե՛ր արքա, դու Տիրոջով՝ քո Աստծով երդվեցիր քո աղախնին ու ասացիր՝ “Քո որդի Սողոմոնն է թագավորելու ինձնից հետո, նա է նստելու իմ աթոռին”, ¹⁸ բայց ահա Ադոնիան է թագավորել, և դու, տե՛ր իմ արքա, այդ չգիտես։ ¹⁹ Նա շատ արջառներ, ոչխարներ ու գառներ է մորթել, կանչել է արքայի բոլոր որդիներին, Աբիաթար քահանային ու զորքի հրամանատար Հովաբին, իսկ քո ծառա Սողոմոնին չի կանչել։ ²⁰ Տե՛ր իմ արքա, ողջ Իսրայելն սպասում է քո խոսքին, որ հայտնես նրանց, թե քեզանից հետո ո՛վ պիտի նստի իմ տեր արքայի աթոռին։ ²¹ Այլապես եթե իմ տեր արքան գնա իր նախնիների մոտ, ես ու իմ որդի Սողոմոնը կդատապարտվենք»։

²² Մինչ նա խոսում էր արքայի հետ, եկավ Նաթան մարգարեն։ ²³ Արքային հայտնեցին. «Ահավասիկ եկել է Նաթան մարգարեն»։ Նա մտավ արքայի մոտ ու մինչև գետին երեսնիվայր գլուխ տվեց նրան։ ²⁴ Նաթանն ասաց. «Տե՛ր իմ արքա, դո՞ւ ես ասել՝ “Ադոնիան է թագավորելու ինձնից հետո և նստելու իմ աթոռին”։ ²⁵ Այսօր նա իջել է, մորթել բազում արջառներ, ոչխարներ ու գառներ, կանչել արքայի բոլոր որդիներին, զորքի հրամանատարներին ու Աբիաթար քահանային։ Նրանք ահա ուտում ու խմում են նրա մոտ՝ ասելով. “Կեցցե՛ Ադոնիա արքան”, ²⁶ իսկ ինձ՝ քո ծառային, Սադովկ քահանային, Հովիդայեի որդի Բանեային և քո Սողոմոն ծառային չի կանչել։ ²⁷ Արդյո՞ք այս բանն իմ տեր արքայի հրամանով է կատարվել։ Սակայն դու քո ծառային չես հայտնել, թե իրենից հետո ո՛վ պիտի նստի իմ տեր արքայի աթոռին»։

²⁸ Դավիթ արքան պատասխան տվեց՝ ասելով. «Ինձ մո՛տ կանչեք Բերսաբեեին»։ Նա մտավ նրա մոտ ու կանգնեց նրա դիմաց։ ²⁹ Արքան երդվեց՝ ասելով. «Կենդանի է Տերը, որ փրկել է իմ կյանքն ամեն նեղությունից։ ³⁰ Ինչպես երդվելով Տիրոջով՝ Իսրայելի Աստծով, ասել եմ՝ “Քո Սողոմոն որդին է թագավորելու ինձնից հետո, և իմ փոխարեն նա է նստելու իմ աթոռին”, այդպես էլ անելու եմ հենց այսօր»։ ³¹ Բերսաբեեն երեսնիվայր մինչև գետին խոնարհվեց ու գլուխ տալով արքային՝ ասաց. «Հավիտյան կեցցե՛ իմ տերը՝ Դավիթ արքան»։

³² Դավիթ արքան ասաց. «Ինձ մո՛տ կանչեք Սադովկ քահանային, Նաթան մարգարեին ու Հովիդայեի որդի Բանեային»։ Նրանք եկան արքայի մոտ։ ³³ Արքան ասաց նրանց. «Ձեզ հետ վերցրե՛ք ձեր տիրոջ ծառաներին, իմ որդի Սողոմոնին իմ ջորու վրա նստեցրե՛ք և իջեցրե՛ք Գեհովն։ ³⁴ Սադովկ քահանան ու Նաթան մարգարեն այնտեղ նրան Իսրայելի թագավոր թող օծեն։ Եղջերափողե՛ր հնչեցրեք և բացականչե՛ք. “Կեցցե՜ Սողոմոն արքան”։ Ապա նրա հետևից գնալով՝ քաղա՛ք բարձրացեք, ³⁵ և նա թող գա, նստի իմ աթոռին ու թագավորի իմ փոխարեն, քանզի ես եմ հրամայել, որ նա լինի Իսրայելի ու Հուդայի երկրի առաջնորդը»։ ³⁶ Հովիդայեի որդի Բանեան, պատասխան տալով արքային, ասաց. «Թող այդպես լինի, թող Տերը՝ Աստված, իմ տեր արքայի խոսքը հաստատի։ ³⁷ Ինչպես Տերն իմ արքա տիրոջ հետ էր, նույնպես թող լինի նաև Սողոմոնի հետ, թող բարձրացնի նրա աթոռն առավել, քան իմ տեր արքա Դավթի աթոռը»։ ³⁸ Սադովկ քահանան, Նաթան մարգարեն, Հովիդայեի որդի Բանեան, քերեթիներն ու փելեթիները եկան և Սողոմոնին նստեցրին Դավիթ արքայի ջորու վրա և նրան տարան Գեհովն։ ³⁹ Սադովկ քահանան յուղով լի եղջյուրն առավ խորանից և օծեց Սողոմոնին, եղջերափող հնչեցրեց, և ամբողջ ժողովուրդը բացականչեց. «Կեցցե՜ Սողոմոն արքան»։ ⁴⁰ Բոլոր մարդիկ եկան նրա հետևից, պարեր պարելով՝ մեծ ուրախություն արեցին, և երկիրը դղրդաց նրանց ձայնից։

⁴¹ Երբ Ադոնիան ու նրա բոլոր հյուրերն ավարտեցին ուտելը, լսեցին ուրախության աղմուկ-աղաղակը։ Հովաբը, լսելով եղջերափողի ձայնը, ասաց. «Այս ի՞նչ աղմուկ է բարձրացել քաղաքում»։ ⁴² Մինչ նա խոսում էր, եկավ Աբիաթար քահանայի որդի Հովնաթանը։ Ադոնիան նրան ասաց. «Նե՛րս մտիր, քանի որ դու նշանավոր մարդ ես և բարի լուր ես տալու»։ ⁴³ Հովնաթանը պատասխան տվեց Ադոնիային՝ ասելով. «Հիրավի, մեր տերը՝ Դավիթ արքան, թագավոր դարձրեց Սողոմոնին։ ⁴⁴ Նա Սադովկ քահանային, Նաթան մարգարեին, Հովիդայեի որդի Բանեային, քերեթիներին ու փելեթիներին ուղարկեց նրա հետ, նրան նստեցրին արքայի ջորու վրա, ⁴⁵ և Սադովկ քահանան ու Նաթան մարգարեն նրան թագավոր օծեցին Գեհովնում։ Ապա այնտեղից ուրախությամբ եկան, ու քաղաքը դղրդաց։ Ահա այդ ձայնն է, որ լսում եք։ ⁴⁶ Սողոմոնը նստեց արքայական գահին։ ⁴⁷ Արքայի ծառաները մտան, որ շնորհավորեն մեր տեր Դավիթ արքային։ Նրանք ասացին. “Թող Աստված քո Սողոմոն որդու անունը առավել մեծացնի, քան քո անունը, և նրա աթոռն առավել բարձրացնի, քան քո աթոռը”։ Արքան իր անկողնի մեջ գլուխ խոնարհեց՝ ⁴⁸ ասելով. “Օրհնյալ է Տերը՝ Իսրայելի Աստվածը, որն այսօր իմ զավակին արժանացրեց իմ աթոռին, և իմ աչքերը դա տեսնում են”»։ ⁴⁹ Ադոնիայի բոլոր հյուրերը զարհուրեցին ու վեր կացան, և ամեն մեկը գնաց իր ճանապարհով։

⁵⁰ Ադոնիան, վախենալով Սողոմոնից, ելավ գնաց ու զոհասեղանի եղջյուրներից բռնեց։ ⁵¹ Սողոմոնին հայտնեցին՝ ասելով. «Ահա Ադոնիան վախեցավ Սողոմոն արքայից։ Նա բռնել է զոհասեղանի եղջյուրները և ասում է. “Թող Սողոմոն արքան այսօր ինձ երդվի, որ իր ծառային սրով չի սպանի”»։ ⁵² Սողոմոնն ասաց. «Եթե նա առաքինի մարդ լինի, նրանից ոչ մի մազ չի պակասի ու գետնին չի ընկնի, իսկ եթե ուզենա չար գործ կատարել, կմեռնի»։ ⁵³ Սողոմոն արքան մարդ ուղարկեց, և Ադոնիային իջեցրին զոհասեղանից։ Ադոնիան եկավ, խոնարհվեց Սողոմոն արքայի առաջ, իսկ Սողոմոնը նրան ասաց. «Գնա՛ քո տունը»։

2

Դավթի վերջին հրահանգները Սողոմոնին

¹ Երբ մոտեցան Դավթի մահվան օրերը, նա, դիմելով իր որդի Սողոմոնին, ասաց. ² «Ես բռնում եմ այն ճանապարհը, որ սպասում է բոլորին, դու զորացի՛ր, վարվի՛ր իբրև տղամարդ, ³ պահի՛ր Տիրոջ՝ քո Աստծու հրամանները, գնա՛ նրա ճանապարհով, պահի՛ր նրա պատվիրանները, նրա օրենքները, նրա վճիռները, որոնք գրված են Մովսեսի օրենքում, և ինչ որ անես, հիշի՛ր այն ամենը, որ պատվիրել եմ քեզ։ ⁴ Որպեսզի Տերը պահի իր խոստումը, որ ասաց իմ մասին՝ “Եթե քո որդիները հաստատ պահեն իրենց ընթացքը և իրենց ամբողջ սրտով ու հոգով հավատարմությամբ գնան իմ առջևից, ապա քեզանից մարդ չի պակասի Իսրայելի գահի վրայից”։ ⁵ Դու ինքդ գիտես, թե Շարուհիի որդի Հովաբն ի՛նչ է արել ինձ, ի՛նչ է արել Իսրայելի երկու զորապետներին՝ Ներեի որդի Աբեններին և Հեթերի որդի Ամեսայիին։ Նա սպանեց նրանց, խաղաղ ժամանակ պատերազմի ժամանակվա պես արյուն թափեց, իր կյանքում անպարտ արյուն թափեց՝ ներկելով իր մեջքն ու կոշիկները։ ⁶ Գործի՛ր իմաստնությամբ և մի՛ թող, որ նրա ալևոր մազերը խաղաղությամբ գերեզման իջնեն։ ⁷ Գաղաադացի Բերզելիի որդիներին ողորմությո՛ւն արա, նրանք թող քո սեղանից ուտողների մեջ լինեն, որովհետև նրանք ինձ աջակից եղան, երբ ես փախչում էի քո եղբայր Աբեսաղոմից։ ⁸ Ահա քեզ հետ է բավուրիմացի Հեմինի որդի Գերայի որդի Սեմեին։ Նա ծանր անեծքներով անիծել է ինձ այն օրը, երբ գնում էի Մաանայիմ։ Նա Հորդանան գետի ափին ինձ ընդառաջ եկավ, և ես, Տիրոջ անունով երդվելով, նրան ասացի. “Քեզ սրով չեմ սպանի”։ ⁹ Նրան անպարտ մի՛ համարիր, քանզի դու իմաստուն մարդ ես, գիտես, թե ի՛նչ պետք է անես նրա ալևոր մազերն արյամբ գերեզման իջեցնելու համար»։

Դավթի մահը

(Ա Մն. 29.26-30)

¹⁰ Եվ Դավիթը գնաց իր նախնիների մոտ։ Նա թաղվեց Դավթի քաղաքում։ ¹¹ Դավիթն Իսրայելի վրա թագավորեց քառասուն տարի. Քեբրոնում թագավորել էր յոթ տարի, իսկ Երուսաղեմում՝ երեսուներեք տարի։

¹² Սողոմոնը նստեց իր հոր՝ Դավթի գահին, երբ տասներկու տարեկան էր։ Նրա թագավորությունն արդեն հաստատուն էր։

Ադոնիայի մահը

¹³ Ագիթի որդի Ադոնիան, Սողոմոնի մայր Բերսաբեեի մոտ գալով, խոնարհվեց նրա առաջ։ Բերսաբեեն հարցրեց. «Բարի՞ նպատակով ես գալիս մոտս»։ Ադոնիան ասաց. «Բարի նպատակով»։ Եվ ավելացրեց. ¹⁴ «Ես խոսքեր ունեմ քեզ ասելու»։ Բերսաբեեն ասաց. «Խոսի՛ր»։ ¹⁵ Ադոնիան ասաց նրան. «Դու ինքդ էլ գիտես, որ իմն էր թագավորությունը, և ամբողջ Իսրայելն իր հայացքն ինձ էր ուղղել որպես թագավորի, սակայն ոչ թե ես արժանացա թագավորության, այլ իմ եղբայրը, քանզի Աստծուց տրվեց նրան։ ¹⁶ Արդ, մի բան եմ խնդրելու քեզնից, և դու չպետք է մերժես ինձ»։ Բերսաբեեն ասաց. «Հայտնի՛ր խնդրանքդ»։ ¹⁷ Ադոնիան ասաց. «Ասա՛ Սողոմոն արքային (և նա քեզ չի մերժի), որ ինձ կնության տա սոմնացի Աբիսակին»։ ¹⁸ Բերսաբեեն ասաց. «Բարի, ես այդ մասին կխոսեմ արքայի հետ»։

¹⁹ Բերսաբեեն գնաց Սողոմոն արքայի մոտ, որպեսզի նրա հետ խոսի Ադոնիայի մասին։ Արքան ոտքի կանգնեց նրա առջև, համբուրեց նրան և նստեց իր գահին։ Արքայի մոր համար էլ աթոռ բերվեց, և մայրը նստեց նրա աջ կողմում։ ²⁰ Բերսաբեեն նրան ասաց. «Մի փոքրիկ խնդրանք ունեմ քեզնից, ինձ մի՛ մերժիր»։ Արքան ասաց. «Խնդրի՛ր, մա՛յր իմ, ես քեզ չեմ մերժի»։ ²¹ Բերսաբեեն ասաց. «Սունամցի Աբիսակը թող քո եղբորը՝ Ադոնիային, կնության տրվի»։ ²² Սողոմոն արքան պատասխան տվեց և ասաց իր մորը. «Իսկ ինչո՞ւ ես Ադոնիայի համար սունամցի Աբիսակին խնդրում, այդ դեպքում նրա համար թագավորությո՛ւնս էլ խնդրիր. չէ՞ որ նա իմ ավագ եղբայրն է, և Աբիաթար քահանան ու Շարուհիի որդի Հովաբը նրա սպարապետն ու բարեկամներն են»։ ²³ Սողոմոն արքան երդվեց Տիրոջ անունով՝ ասելով. «Աստված թող պատժի ինձ, եթե այդ խնդրանքի համար Ադոնիան իր իսկ կյանքով չհատուցի։ ²⁴ Արդ, կենդանի է Տերը, որ ինձ հաստատեց ու նստեցրեց իմ հայր Դավթի գահին, ինձ համար տուն շինեց, ինչպես խոստացել էր Տերը։ Ադոնիան այսօր իսկ պիտի մեռնի»։ ²⁵ Եվ Սողոմոն արքան ուղարկեց Հովիդայեի որդի Բանեային, որը սպանեց նրան։ Եվ այդ օրը Ադոնիան մեռավ։

Աբիաթարի մահը և Հովաբի մահը

²⁶ Արքան Աբիաթար քահանային ասաց. «Գնա՛ քո ագարակը՝ Անաթովթ։ Այսօր դու մահվան ես արժանի, սակայն քեզ չեմ սպանի, քանզի իմ հոր առջև կրել ես Տիրոջ Ուխտի տապանակը, և դու էլ չարչարվել ես այնտեղ, որտեղ չարչարվել է իմ հայրը»։ ²⁷ Եվ Սողոմոնը Աբիաթարին զրկեց Տիրոջ քահանայությունից, որպեսզի կատարվի Տիրոջ այն խոսքը, որ Սելովում ասել էր Հեղիի տան վերաբերյալ։ ²⁸ Լուրը հասավ Հովաբին, որը Ադոնիայի համակիրն էր և չէր հետևել Սողոմոնին։ Հովաբը փախավ մտավ Տիրոջ խորանը և բռնեց զոհասեղանի եղջյուրներից։ ²⁹ Սողոմոնին հայտնեցին, որ Հովաբը փախել մտել է Տիրոջ խորանը և բռնել զոհասեղանի եղջյուրներից։ Սողոմոնը լուր ուղարկեց Հովաբին՝ ասելով. «Քեզ ի՞նչ եղավ, որ փախար զոհասեղանի մոտ»։ Հովաբն ասաց. «Վախեցա քեզնից ու փախա Տիրոջ մոտ»։ Սողոմոն արքան Հովիդայեի որդի Բանեային ասաց. «Գնա սպանի՛ր Հովաբին ու թաղի՛ր նրան»։ ³⁰ Հովիդայեի որդի Բանեան գնաց Տիրոջ խորանը՝ Հովաբի մոտ, և ասաց նրան. «Այսպես է կարգադրել արքան. ելի՛ր այդտեղից»։ Հովաբն ասաց. «Չեմ ելնի, քանզի այստեղ էլ պիտի մեռնեմ»։ Հովիդայեի որդի Բանեան վերադարձավ ու արքային հայտնեց, թե ի՛նչ է ասել Հովաբը և ի՛նչ պատասխան է տվել իրեն։ ³¹ Արքան նրան ասաց. «Գնա՛ և արա՛ նրան այն, ինչ ինքը ցանկացել է. սպանի՛ր նրան ու թաղի՛ր և այսօր ինձնից ու իմ հոր տնից վերացրո՛ւ այն անմեղ արյունը, որ թափել էր Հովաբը։ ³² Տերը նրա հեղած անմեղ արյունը նրա գլխին դարձրեց, որովհետև նա սրով սպանել է իրենից ավելի արդար և քաջ երկու մարդկանց, և հայրս նրանց այդ սպանության մասին չգիտեր։ Դրանք էին՝ Ներեի որդի Աբենները, որն Իսրայելի սպարապետն էր, և Հեթերի որդի Ամեսային, որը Հուդայի սպարապետն էր։ ³³ Նրանց արյունը թող հավիտյան դառնա նրա ու նրա զավակների գլխին, իսկ Տերը հավիտենական խաղաղություն թող պարգևի Դավթին, նրա զավակին, նրա տանն ու գահին»։ ³⁴ Հովիդայեի որդի Բանեան վերադարձավ Հովաբի մոտ, սպանեց նրան ու թաղեց անապատի մոտ գտնվող նրա տան մեջ։ ³⁵ Արքան Հովիդայեի որդի Բանեային նրա փոխարեն զորավար կարգեց, թագավորությունը փոխադրեց Երուսաղեմ և Սադովկ քահանային Աբիաթարի փոխարեն քահանա կարգեց Տիրոջ առաջ։

^35ա Տերը Սողոմոնին տվեց խելք ու մեծ իմաստնություն և սրտի լայնություն՝ ծովեզրի ավազի նման։ ^35բ Սողոմոնն ավելի իմաստուն դարձավ, քան իր նախնիների բոլոր որդիները և եգիպտացի իմաստունները։ ^35գ Նա կին առավ փարավոնի դստերը և նախքան իր պալատը կառուցելը նրան բերեց Դավթի քաղաքը։ Նա նախ յոթ տարի կառուցեց և ավարտեց Տիրոջ տունն ու Երուսաղեմի շուրջանակի պարիսպը։ ^35դ Սողոմոն արքան ուներ յոթանասուն հազար բեռնակիր և ութսուն հազար քարհատ լեռներում։ ^35ե Սողոմոնը շինեց ձուլածո ավազանը, մույթերը, մեծամեծ ավազանները և սյուները, բակի աղբյուրն ու պղնձե ավազանը։ ^35զ Նա շինեց միջնաբերդը և Դավթի քաղաքն անջրպետեց խրամատով։ Դրանից հետո փարավոնի դուստրը ելավ Դավթի քաղաքից և եկավ իր տունը, որ Սողոմոնը շինել էր իր համար։ Ապա շինեց միջնաբերդը։ ^35է Սողոմոնը տարեկան երեք անգամ ողջակեզ և խաղաղության զոհեր էր մատուցում այն զոհասեղանի վրա, որ կառուցել էր Տիրոջ համար, խունկ էր ծխում Տիրոջ առջև։ Նա ավարտեց տան կառուցումը։

^35ը Անձինք, որոնք ղեկավարում էին Սողոմոնի շինարարական գործերը և հսկում աշխատող մարդկանց, երեք հազար վեց հարյուր հոգի էին։ ^35թ Նա կառուցեց Ասուրը, Մակդովը, Ազերը, Վերին Բեթորոնը և Բալաաթը, ^35ժ բայց Տիրոջ տունը և Երուսաղեմի շուրջանակի պարիսպը շինելուց հետո կառուցեց այդ քաղաքները։

^35ժա Դավիթը կենդանի եղած ժամանակ պատվիրել էր Սողոմոնին՝ ասելով. «Ահա քեզ հետ է քեբրոնցի Հեմինի որդի Գերիի որդի Սեմեին։ ^35ժբ Նա ծանր անեծքներով անիծեց ինձ այն օրը, երբ գնում էի դեպի իմ բանակը։ ^35ժգ Սա Հորդանան գետի ափին ընդառաջ եկավ ինձ, և ես Տիրոջ անունով երդվեցի նրան՝ “Քեզ սրով չեմ սպանի”։ ^35ժդ Արդ, նրան անպարտ մի՛ համարիր, քանզի դու իմաստուն մարդ ես և գիտես, թե ի՛նչ պետք է անես նրան՝ նրա ալևոր մազերն արյամբ գերեզման իջեցնելու համար»։

Սեմեիի մահը

³⁶ Արքան լուր ուղարկեց, կանչեց Սեմեիին և ասաց նրան. «Քեզ համար տո՛ւն շինիր Երուսաղեմում, այնտեղ ապրի՛ր և այնտեղից դուրս չգաս։ ³⁷ Այն օրը, որ ելնես և Կեդրոնի հեղեղատն անցնես, լա՛վ իմացիր, որ կմեռնես, և քո արյունը քո գլխին կլինի»։ Արքան այդ օրը երդվել տվեց նրան։ ³⁸ Սեմեին ասաց արքային. «Բարի է այն, որ ասացիր, իմ տե՛ր արքա, քո ծառան այդպես էլ կանի»։ Սեմեին Երուսաղեմում բնակվեց երեք տարի։

³⁹ Երեք տարի անց Սեմեիի երկու ծառաները փախան Գեթի արքա Մաաքի որդի Անքուսի մոտ։ Սեմեիին հայտնեցին՝ «Ահա քո երկու ծառաները Գեթում են»։ ⁴⁰ Վեր կացավ Սեմեին, համետեց իր էշն ու գնաց Անքուսի մոտ՝ իր ծառաներին որոնելու։ Սեմեին գնաց ու իր ծառաներին բերեց Գեթից։ ⁴¹ Սողոմոնին հայտնեցին, որ Սեմեին Երուսաղեմից գնացել է Գեթ և վերադարձրել իր ծառաներին։ ⁴² Արքան մարդ ուղարկեց, կանչեց Սեմեիին և նրան ասաց. «Չէ՞ որ քեզ երդվեցրի Տիրոջ անունով ու վկայություն տվեցի՝ ասելով՝ “Այն օրը, որ ելնես Երուսաղեմից ու գնաս աջ կամ ձախ, լա՛վ իմացիր, որ կմեռնես”, իսկ դու ասացիր ինձ՝ “Բարի են խոսքերդ, որ լսեցի”։ ⁴³ Արդ, ինչպե՞ս է, որ չպահեցիր Տիրոջը տված երդումն ու քեզ տված իմ պատվերը»։ ⁴⁴ Արքան ասաց Սեմեիին. «Դու ինքդ գիտես քո սրտի չարությունը, որ արել ես իմ հայր Դավթի նկատմամբ։ ⁴⁵ Տերը քո չարիքները քո գլխին է թափելու, իսկ Սողոմոն արքան օրհնյալ է, և Դավթի աթոռը Տիրոջ առաջ թող հավիտյան հաստատ մնա»։ ⁴⁶ Եվ Սողոմոն արքան հրաման տվեց Հովիդայեի որդի Բանեային, որը եկավ ու սպանեց Սեմեիին, և նա մեռավ։

3

Սողոմոնի ամուսնությունը փարավոնի աղջկա հետ

¹ Երբ Սողոմոնի թագավորությունն ամրապնդվեց, նախքան իր տան, Տիրոջ տան ու Երուսաղեմի շուրջանակի պարսպի շինարարության ավարտը նա խնամիություն հաստատեց փարավոնի՝ Եգիպտոսի արքայի հետ, առավ նրա դստերն ու բերեց Դավթի քաղաքը։

Սողոմոնն իմաստնություն է խնդրում Տիրոջից

(Բ Մն. 1.3-13)

² Սակայն ժողովուրդը խունկ էր ծխում բարձունքների վրա, քանի որ մինչ այդ դեռ չէր շինվել Տիրոջ տունը։ ³ Սողոմոնը, հնազանդվելով իր հայր Դավթի հորդորներին, սիրեց Տիրոջը, բայց ինքն էլ էր բարձունքներում զոհեր մատուցում ու խունկ ծխում։

⁴ Արքան ելավ գնաց Գաբավոն՝ այնտեղ զոհ մատուցելու, քանի որ այն ավելի բարձր էր ու մեծ։ Սողոմոնը Գաբավոնում գտնվող այդ զոհասեղանի վրա հազար ողջակեզ մատուցեց։

⁵ Տերը Սողոմոնին երևաց գիշերվա քնի մեջ։ Տերն ասաց Սողոմոնին. «Որևէ բա՛ն խնդրիր քեզ համար»։ ⁶ Սողոմոնն ասաց. «Դու մեծ ողորմություն արեցիր իմ հայր Դավթին, և նա քո առջև ընթացավ ճշմարտությամբ, արդարությամբ ու սրտի մաքրությամբ, և դու պահեցիր նրա համար այս մեծ ողորմությունը. նրա որդուն նստեցրիր նրա գահին, ինչպես որ այսօր է։ ⁷ Արդ, Տե՛ր իմ Աստված, դու քո ծառային հաստատեցիր իմ հայր Դավթի փոխարեն, իսկ ես դեռ մանուկ եմ և չգիտեմ իմ ելն ու մուտը։ ⁸ Քո ծառան քո ընտրած ժողովրդի մեջ է, մի ժողովուրդ, որը բազմամարդ է, անթիվ ու անհամար։ ⁹ Քո ծառային այնպիսի մի՛տք տուր, որ նա կարողանա արդարությամբ լսել ու դատել քո ժողովրդին, խելամտություն ունենա տարբերելու բարին ու չարը, որովհետև ո՞վ կարող է ղեկավարել քո այս բազմամարդ ժողովրդին»։ ¹⁰ Տիրոջը հաճելի եղավ Սողոմոնի այս խնդրանքը, ¹¹ և Տերն ասաց նրան. «Քանի որ դու այդ բանը խնդրեցիր ինձնից, ոչ թե կյանքի երկար օրեր խնդրեցիր, հարստություն կամ քո թշնամիների մահը, այլ խնդրեցիր խելամտություն՝ դատ անելու, ¹² ուստի քո ասածի համաձայն եմ վարվելու. քեզ տալիս եմ իմաստուն ու հանճարեղ միտք, այնպես որ ո՛չ քեզնից առաջ է քո նմանը եղել, և ո՛չ էլ քեզնից հետո քո նմանը կհայտնվի։ ¹³ Քեզ տալիս եմ նաև այն, ինչ դու չխնդրեցիր՝ հարստություն ու փառք, այնպես որ քո ապրած կյանքի օրերին թագավորներից ոչ ոք քեզ նման չի լինելու։ ¹⁴ Եվ եթե ընթանաս իմ ճանապարհով, կատարես իմ հրամաններն ու պատվիրանները, ինչպես ընթացել էր քո հայր Դավիթը, ապա քո կյանքի օրերը կերկարեցնեմ»։ ¹⁵ Սողոմոնը զարթնեց և տեսավ, որ երազ էր։ Նա եկավ Երուսաղեմ, կանգնեց Սիոնում գտնվող Տիրոջ Ուխտի տապանակի դեմ հանդիման, զոհասեղանի առջև, ողջակեզներ ու խաղաղության զոհեր մատուցեց և մեծ խրախճանք սարքեց իր և իր բոլոր ծառաների համար։

Սողոմոնյան արդարադատություն

¹⁶ Այդ ժամանակ երկու անառակ կանայք եկան ու կանգնեցին արքայի առջև։ ¹⁷ Կանանցից մեկն ասաց. «Լսի՛ր ինձ, տե՛ր իմ, ես և այս կինը մի տան մեջ էինք։ Ես ծննդաբերեցի այդ տանը։ ¹⁸ Այնպես պատահեց, որ երրորդ օրն այս կինն էլ ծնեց։ Մենք էինք միայն տանը, մեր երկուսից բացի ուրիշ ոչ ոք չկար։ ¹⁹ Գիշերը սրա որդին մեռավ, որովհետև նա իր երեխայի վրա էր պառկել։ ²⁰ Սա գիշերվա կեսին զարթնել է, իմ գրկից վերցրել իմ մանկանը, երբ ես՝ քո աղախինը, քնած եմ եղել, պառկեցրել է իր ծոցում, իսկ իր մեռած որդուն դրել է իմ ծոցը։ ²¹ Առավոտյան վեր կացա, որ կուրծք տամ իմ որդուն, բայց տեսա, որ մեռած է։ Ցերեկը մի լավ դիտեցի նրան և տեսա, որ դա իմ ծնած երեխան չէ»։ ²² Մյուս կինն ասաց. «Ո՛չ, մեռածը քո որդին է, իմ որդին կենդանին է»։ Առաջին կինն ասում էր. «Ո՛չ, կենդանին իմ որդին է, իսկ քո որդին մեռածն է»։ ²³ Այսպես վիճեցին արքայի առջև։ Արքան նրանց ասաց. «Դու ասում ես՝ “Այս կենդանին է իմ որդին, մեռածը՝ նրա որդին է”, իսկ դու էլ ասում ես՝ “Ո՛չ, մեռածը քո որդին է, կենդանին իմ որդին է”»։ ²⁴ Արքան ասաց. «Սուրն ի՛նձ բերեք»։ Սուրը բերեցին թագավորի մոտ։ ²⁵ Արքան ասաց. «Կտրե՛ք, երկու կե՛ս արեք այս կենդանի ծծկեր մանկանը, նրա մի կեսը տվե՛ք սրան ու մյուս կեսը՝ նրան»։ ²⁶ Այն կինը, որի որդին կենդանի էր, ցավից գալարվեց իր որդու համար։ Նա ասաց արքային. «Լսի՛ր ինձ, տե՛ր, կենդանի մանկանը տվե՛ք նրան, միայն թե մի՛ սպանեք մանկանը»։ Մյուս կինն ասաց. «Ո՛չ իմը թող լինի, ո՛չ նրանը, մեջտեղից կիսե՛ք նրան»։ ²⁷ Պատասխան տվեց արքան՝ ասելով. «Նրա՛ն տվեք կենդանի մանկանը, ով ասաց՝ “Դրա՛ն տվեք, միայն թե մի՛ սպանեք երեխային”։ Նա է դրա մայրը»։ ²⁸ Եվ ամբողջ Իսրայելը, լսելով արքայի վճռած դատաստանը, երկնչեց արքայից, քանզի տեսավ, որ նրա մեջ դատաստան վարելու Աստծու իմաստնությունը կար։

4

Սողոմոնի բարձրաստիճան պաշտոնյաները

¹ Սողոմոն արքան թագավորում էր Իսրայելի վրա, ² ու սրանք էին նրա իշխանները. Ազարիան՝ Սադովկ քահանայի որդին, ³ Սիսայի որդիներ Ելիարեփն ու Աքիան՝ քարտուղարներ, Աքիլիդի որդի Հովսափատը՝ ժամանակագիր, ⁴ Հովիդայեի որդի Բանեան՝ սպարապետ, Սադովկն ու Աբիաթարը՝ քահանաներ, ⁵ Նաթանի որդի Ազարիան՝ գործավարների վերակացու, Նաթանի որդի Զաբութը՝ քահանա և արքայի խորհրդատու, ⁶ Աքիսարը՝ ընդհանուր կալվածքների վերակացու, Ելիակը՝ պալատի տնտես, Սափի որդի Ելիափը՝ արքունապետ և Աբդովի որդի Ադոնիրամը՝ հարկերի վերատեսուչ։ ⁷ Սողոմոնն ամբողջ Իսրայելում ուներ տասներկու գործակալներ, որոնցից ամեն մեկը տարվա մեջ մեկ ամիս ուտեստեղեն էր մատակարարում արքային ու նրա ընտանիքին։ ⁸ Ահա նրանց անունները. Ովրի որդի Բեինը՝ Եփրեմի լեռան վրա, ⁹ Դակարի մի որդին՝ Մաքմասում, Սալաբիմում, Բեթսամյուսում ու Այիլոմում մինչև Բեթանան, ¹⁰ Եսդի որդին՝ Արաբովթում։ Նրան էին պատկանում Սոկքովթն ու ամբողջ Ոփերի երկիրը։ ¹¹ Ամինադաբի որդին՝ ամբողջ Նեփադորում։ Սողոմոնի դուստր Տափաթը նրա կինն էր։ ¹² Այելովթի որդի Բաանան՝ Թանաքում, Մաքդովում և Սանի ամբողջ տանը, որը Ելսարթանի մոտ է՝ Հեզրայելից ներքև, և տարածվում է Բեթսանից մինչև Աբելմաուլա և Մամբրալա։ ¹³ Գաբերի որդի Եկմաալը՝ Ռամոթ Գաղաադում։ Նրան էին պատկանում Մանասեի որդի Հայիրի ավանները Գաղաադում, Երգաբի գավառը՝ Բասանում, վաթսուն պարսպապատ, պղնձե նիգերով ամրացված մեծ քաղաքներ։ ¹⁴ Ադդովի որդի Այինադաբը՝ Մաանայիմում, ¹⁵ Աքիմասը՝ Նեփթաղիմում։ Նա Սողոմոնի դուստր Մասմեաթին կնության էր առել։ ¹⁶ Քուսիի որդի Բաանասը՝ Ասերում և Բաալոթում։ ¹⁷ Ելի որդի Սեմեին՝ Բենիամինում։ ¹⁸ Ադայի որդի Գաբերը՝ Գաղաադի երկրում, ամորհացիների թագավոր Սեհովնի ու Բասանի թագավոր Օվգի երկրում։ Նաբիփը՝ Հուդայի երկրում։ ¹⁹ Փարուայի որդի Հովսափատը՝ Իսաքարում։

5

Սողոմոնի բարգավաճ իշխանությունը

¹ Իսրայելը ծովեզերքի ավազի չափ շատ բնակիչներ ուներ, որոնք ուտում էին, խմում և ուրախանում։

Սողոմոնն իշխում էր այն բոլոր թագավորների վրա, որոնք գտնվում էին այլազգիների երկրի գետից [Եփրատ] մինչև Եգիպտոսի սահմանները։ Նրանք բերում էին ընծաներ ու ծառայում նրան մինչև նրա կյանքի վերջը։

² Սողոմոնն օրական սպառում էր երեսուն քոռ նաշիհ, քառասուն քոռ ճերմակ մանր ալյուր, ³ տասն ընտիր եզներ, արոտավայրում կերակրված քսան կով և հարյուր ոչխար, չհաշված եղջերուները, այծյամներն ու տեսակ-տեսակ ընտիր պարարտ թռչուններ, ⁴ քանզի նա իշխում էր գետից այն կողմ գտնվող բոլոր երկրների վրա՝ Թափսայից մինչև Գազա, գետի այն կողմում եղած բոլոր թագավորությունների վրա։ Խաղաղություն էր տիրում նրա երկրում ու շրջակա բոլոր կողմերում։ ²⁵ Սողոմոնի իշխանության օրոք Հուդայում և Իսրայելում, Դանից մինչև Բերսաբեե, մարդիկ իրենց որթատունկերի ու թզենիների տակ ապահով կյանք էին վարում, ուտում ու խմում։

²⁶ Սողոմոնն ուներ քառասուն հազար լծկան մատակ ձիեր և տասներկու հազար երիվարներ։ ²⁷ Գործակալները Սողոմոն արքային ամեն ամիս պարեն էին մատակարարում. արքայի սեղանից ոչ մի բան չէր պակասում։ ²⁸ Որտեղ գտնվում էր արքան, ըստ յուրաքանչյուրի վրա դրված հարկի՝ այնտեղ էին բերում նաև գարի ու հարդ՝ նժույգների և լծկան ձիերի համար։

⁹ Տերը Սողոմոնին տվեց իմաստնություն, մեծ հանճար, ծովեզերքի ավազի չափ առատ միտք։ ¹⁰ Սողոմոնի իմաստնութունը շատ ավելի մեծ էր, քան բոլոր նախորդ մարդկանց ու Եգիպտոսի իմաստունների հանճարը։ ¹¹ Նա բոլոր մարդկանցից առավել իմաստուն դարձավ, ավելի իմաստուն, քան զարաացի Գեթանը, Եմանը և Մավուլի որդիներ Քաղքաղն ու Դարդանը։ Նրա համբավը տարածվել էր շրջակա բոլոր ազգերի մեջ։ ¹² Սողոմոնը երեք հազար առակ է հորինել, իսկ նրա օրհներգությունների թիվը հինգ հազար է։ ¹³ Նա խոսել է ծառերի մասին՝ Լիբանանի մայրուց մինչև պատն ի վեր մագլցող զոպան, պատմել է անասունների, թռչունների ու ձկների մասին։ ¹⁴ Բոլոր ազգերը, նրա իմաստնության համբավը լսելով, երկրի բոլոր թագավորների մոտից գալիս էին լսելու Սողոմոնի իմաստնությունը։

Տաճարի շինությունը

(Բ Մն. 2.1-18, 3.1-14)

¹⁵ Տյուրոսի Քիրամ արքան իր ծառաներին ուղարկեց Սողոմոնի մոտ, որովհետև լսել էր, որ նրան թագավոր են օծել իր հայր Դավթի փոխարեն. Քիրամը միշտ սիրել էր Դավթին։ ¹⁶ Սողոմոնը լուր ուղարկեց Քիրամին՝ ասելով. ¹⁷ «Դու ինքդ գիտես, որ իմ հայր Դավիթը շրջակա երկրների պարտադրած պատերազմների պատճառով չկարողացավ Տիրոջ՝ իմ Աստծու տունը շինել, մինչև որ Տերը թշնամիներին հնազանդեցրեց նրա ոտքերի առաջ։ ¹⁸ Արդ, Տերը՝ իմ Աստվածն ինձ հանգիստ է տվել, և շրջապատում չկա ո՛չ դավադիր, ո՛չ չար պատահար։ ¹⁹ Ես որոշել եմ Տիրոջ՝ իմ Աստծու տունը շինել, ինչպես Տերը՝ Աստված, պատվիրել է իմ հայր Դավթին՝ ասելով. “Իմ տունը շինելու է քո որդին, որին քո փոխարեն նստեցնելու եմ քո աթոռին”։ ²⁰ Արդ, հրամա՛ն տուր, որ ինձ համար Լիբանանից փայտ կտրեն, և իմ ծառաների հետ լինեն նաև քո ծառաները։ Ես քեզ կտամ քո ծառաների վարձատրությունն այնքան, որքան դու կասես, որովհետև դու ինքդ գիտես, որ մենք չունենք մի մարդ, որ գիտենա սիդովնացիների նման փայտ կտրել»։

²¹ Երբ Քիրամը լսեց Սողոմոնի խոսքերը, շատ ուրախացավ և ասաց. «Օրհնյա՜լ է այսօր Տերը՝ Աստված, որ Դավթին իմաստուն որդի է տվել, որպեսզի նա ղեկավարի մի բազմամարդ ժողովրդի»։ ²² Քիրամը Սողոմոնին լուր ուղարկեց՝ ասելով. «Լսեցի այն ամենը, ինչ ինձ հայտնեցին քո ուղարկած մարդիկ։ Ես կկատարեմ քո ամբողջ կամքը. ²³ իմ ստրուկները Լիբանանից եղևնափայտ ու մայրի կիջեցնեն ծով, ես դրանցից լաստեր կպատրաստեմ ծովի վրա, դրանք բերել կտամ մինչև այն տեղը, որ դու ինձ ցույց կտաս, ես ծովափ կհանեմ դրանք, և դու կվերցնես։ Դրա փոխարեն դու կկատարես իմ կամքը. հաց կմատակարարես իմ տանը»։ ²⁴ Քիրամը Սողոմոնին եղևնափայտ ու մայրի էր տալիս այնքան, ինչքան նա ուզում էր, ²⁵ իսկ Սողոմոնը Քիրամին տալիս էր քսան հազար քոռ ցորեն ու քսան հազար սափոր զտված ձիթայուղ, որ Սողոմոնն ամեն տարի ուղարկում էր Քիրամին։ ²⁶ Տերը Սողոմոնին իմաստնություն տվեց, ինչպես խոստացել էր նրան։ Խաղաղություն էր տիրում Քիրամի ու Սողոմոնի միջև, և նրանք իրար հետ դաշինք կնքեցին։

²⁷ Սողոմոնը գլխահարկ դրեց ամբողջ Իսրայելում։ Հարկ էր դրված երեսուն հազար մարդու վրա, ²⁸ որոնցից տասը հազարին ամեն ամիս ուղարկում էր Լիբանան։ Սրանք մեկ ամիս մնում էին Լիբանանում և երկու ամիս՝ իրենց տներում։ Այդ գլխահարկի վերակացու էր Ադոնիրամը։ ²⁹ Սողոմոնը լեռներում ուներ յոթանասուն հազար բեռնակիր և ութսուն հազար քարհատ, ³⁰ բացի երեք հազար հինգ հարյուր գործակալ ղեկավարներից, որ Սողոմոնը նշանակել էր գործավորների վրա։ Արքայի հրամանով տաճարի հիմքի համար բերեցին մեծ ու ընտիր ապառաժ քարեր, անտաշ քարեր։ ³² Սողոմոնի մարդիկ, Քիրամի մարդիկ ու Բիբլոսի բնակիչները տաշեցին, երեք տարի փայտ ու քար պատրաստեցին Աստծու տան շինության համար։

6

¹ Իսրայելացիների՝ Եգիպտոսից դուրս գալու չորս հարյուր քառասուներորդ տարում և Սողոմոն արքայի՝ Իսրայելի վրա թագավորելու չորրորդ տարվա երկրորդ ամսում Սողոմոնն սկսեց կառուցել Տիրոջ տունը։

² Սողոմոն արքայի՝ Տիրոջ համար շինած տան երկարությունն էր վաթսուն կանգուն, լայնությունը՝ քսան կանգուն, բարձրությունը՝ քսան կանգուն։ ³ Տաճարի առջևի կամարակապ գավթի լայնությունը քսան կանգուն էր, ինչքան տաճարի լայնությունն էր, իսկ գավթի խորությունը՝ տասը կանգուն։ Նա կառուցեց և ամբողջացրեց տաճարը։ ⁴ Եվ կառուցեց գաղտնի դիտելու պատուհաններ։ ⁵ Նա տաճարի և սրբարանի արտաքին պատերին կից չորս կողմից պատվարներ կառուցեց և շուրջանակի սենյակներ շինեց։ ⁶ Ներքին հարկը հինգ կանգուն լայնություն ուներ, միջինը՝ վեց կանգուն լայնություն, իսկ երրորդը՝ յոթ կանգուն լայնություն։ Նա տաճարի շուրջը տարածություն թողեց, որպեսզի տաճարի պատերին չդիպչեն։ ⁷ Տաճարը շինվեց ապառաժ ու անմշակ քարերով, և մուրճի կամ երկաթե որևէ գործիքի ձայն չլսվեց դրա շինության ժամանակ։ ⁸ Ներքևի հարկի դուռը աջ կողմում էր. այստեղից ոլորապտույտ սանդուղքներով ելնում էին միջին հարկը, իսկ միջինից՝ երրորդը։ ⁹ Տաճարը կառուցեց-վերջացրեց, այն ծածկեց եղևնափայտյա քանդակազարդ գերաններով ու տախտակներով։ ¹⁰ Ամբողջ տաճարի շուրջը հինգ կանգուն բարձրությամբ թևեր շինեց և թևերը պատեց եղևնափայտով։

¹¹ Տերը, խոսքն ուղղելով Սողոմոնին, ասաց. ¹² «Ահա տուն ես շինում։ Եթե ըստ իմ հրամանների ընթանաս, իմ օրենքներն ի գործ դնես, պահես իմ բոլոր պատվիրաններն ու դրանցով առաջնորդվես, ապա կկատարեմ քո նկատմամբ այն խոստումը, որ տվել էի քո հորը՝ Դավթին. ¹³ կբնակվեմ Իսրայելի ժողովրդի մեջ և չեմ լքի իմ ժողովրդին՝ Իսրայելին»։

¹⁴ Սողոմոնը կառուցեց և ամբողջացրեց տաճարը։ ¹⁵ Նրա պատերը ներսից երեսապատեց եղևնափայտով. հատակից մինչև պատերն ու գերանները ներսից շուրջանակի փայտով երեսապատեց։ Տան ներքին մասը դրվագեց մայրի փայտով, ¹⁶ տան հետնամասում քսան կանգուն երկարությամբ կողքի պատերի միջև հատակից մինչև առաստաղ բարձրացող մի պատ շինեց, դրա ներսում շինեց սրբարանը՝ որպես Սրբություն սրբոց։ ¹⁷ Տունը՝ ներքին տաճարը, քառասուն կանգուն էր։ ¹⁸ Տան ներսից կամարները և թևերը երեսապատեց քանդակազարդ եղևնափայտով։ Ամեն ինչ եղևնափայտով էր ծածկված այնպես, որ քար չէր երևում։

Սրբարանը

¹⁹ Սրբարանը տան մեջ էր, ներսում։ Այն շինվել էր, որպեսզի այնտեղ դրվի Տիրոջ Ուխտի տապանակը։ ²⁰ Սրբարանը քսան կանգուն երկարություն, քսան կանգուն լայնություն և քսան կանգուն բարձրություն ուներ։ Այն դրվագել տվեց մաքուր ոսկով։ Սողոմոնը եղևնափայտե սեղան պատրաստեց։ ²¹ Նա տունը ներսից մաքուր ոսկով պատեց և սեղանը ոսկե բևեռներով հաստատեց սրբարանի դիմաց և այն պատեց ոսկով։ ²² Նա ամբողջ տունը ոսկով պատեց։ Սրբարանի ամբողջ ներքնամասը երեսապատեց ոսկե թիթեղներով։

²³ Սրբարանի ներսում դրեց նոճու փայտից պատրաստված երկու քերովբեներ։ Մեկի բարձրությունը տասը կանգուն էր։ ²⁴ Նրա մի թևը հինգ կանգուն էր, մյուսը թևը՝ նույնպես հինգ կանգուն. մի թևի ծայրից մյուս թևի ծայրը տասը կանգուն էր։ ²⁵ Երկրորդ քերովբեն նույն չափն ու նույն ձևն ուներ։ ²⁶ Մի քերովբեի բարձրությունը տասը կանգուն էր, նույնը և երկրորդ քերովբեինը։ ²⁷ Երկու քերովբեները դրեց ներսի սենյակում և նրանց թևերը տարածեց. մի քերովբեի մեկ թևը հասնում էր մի պատին, իսկ երկրորդ քերովբեի մեկ թևը՝ մյուս պատին։ Նրանց մյուս թևերը սենյակում գալիս միանում էին իրար։ ²⁸ Նա քերովբեները ոսկով պատեց։

²⁹ Տան բոլոր պատերի վրա շուրջանակի ներսից ու դրսից քերովբեներ, արմավենիներ ու զարդեր քանդակեց, փորագրեց։ ³⁰ Նա տան ներքին ու արտաքին հատակը ոսկով երեսապատեց։

³¹ Նա գիհի փայտից շինեց սրբարանի մուտքի դուռը՝ հնգակողմ դրանդիներով։ ³² Մայրու փայտից շինված երկու փեղկերի վրա քերովբեներ, արմավենիներ ու թռչող թերթեր փորագրեց և դրանք ոսկով երեսապատեց. քերովբեների ու արմավենիների վրա ոսկի շաղ տվեց։

³³ Նույնպես արեց նաև Տաճարի մուտքի դռները, որոնց դրանդիները գիհու քառակուսի փայտերից էին։ ³⁴ Երկու դռները մայրու փայտից էին, ամեն մի դուռը երկփեղկ էր, իսկ փեղկերը բացվում-փակվում էին ծխնիներով։ ³⁵ Երկրորդ դռան վրա դրվագված էին քերովբեներ, արմավենիներ և թռչող թերթեր. այդ դրվագները պատված էին ոսկով, որ իջնում էր հորինվածքի վրա։

³⁶ Նա ներքին սրահը շինեց երեք շարք անտաշ քարով և պարիսպ կառուցեց եղևնափայտով։

³⁷ Տիրոջ տան հիմքը դրվեց Սողոմոնի թագավորության չորրորդ տարվա Զի, այսինքն՝ երկրորդ ամսին, ³⁸ և տաճարի կառուցումն ավարտվեց տասնմեկերորդ տարվա Բուլ, այսինքն՝ յոթերորդ ամսին, իրեն անհրաժեշտ ամեն ինչով ու ամեն հորինվածքով։ Սողոմոնը տաճարը կառուցեց յոթ տարում։

7

Սողոմոնի պալատը

¹[40] Սողոմոնն իր պալատը կառուցեց տասներեք տարում և ամբողջովին ավարտեց այն:

² Տունը շինեց Լիբանանի անտառի փայտով։ Տունն ուներ հարյուր կանգուն երկարություն, հիսուն կանգուն լայնություն և երեսուն կանգուն բարձրություն. այն կառուցվել էր երեք շարք եղևնափայտե սյուներով, որոնց վրա դրված էին եղևնափայտե հեծաններ։ ³ Նաև կառուցեց մի հարկ սյուների վրա։ Կառույցը քառասունհինգ սյուն ուներ. ամեն մի շարքի վրա՝ տասնհինգ սյուն։ ⁴ Երեք պատվարներն ու երեք միջնորմները կանգնած էին իրար դեմ առ դեմ։ ⁵ Բոլոր դռներն ու միջնորմները քառակուսի էին, պատվարով։ Դռները երեք շարքով իրար դիմաց էին։

⁶ Նա հիսուն կանգուն երկարությամբ ու երեսուն կանգուն լայնությամբ սյունազարդ կամարակապ դահլիճ կառուցեց։ Իրար միացված կամարները տեղավորված էին միմյանց դիմաց, իսկ սյուներն ու խարիսխները դրված էին կամարների դիմաց։ ⁷ Նա կառուցեց նաև կամարակապ գահասրահ և դատաստան էր անում այդ կամարակապ ատյանում։ Այդ հարկը հատակից մինչև ձեղուն երեսապատված էր եղևնափայտով։

⁸ Նրա տան մեջ, որտեղ բնակվում էր, նույն ձևով կառուցված կամարակապ մի սրահ կար։ Փարավոնի դստեր համար, որը Սողոմոնի կինն էր, նույն ձևով կամարակապ սրահ պատրաստեց։ ⁹ Ամեն ինչ շինված էր ընտիր քարերից. անտաշ քարերը հիմքից մինչև առաստաղ ներսից ու դրսից իրար էին ագուցված ըստ իրենց չափերի։ ¹⁰ Մեծ սրահի պատի հիմքը նա կառուցել էր մեծ-մեծ քարերով, որոնք ունեին տասը և ութ կանգուն երկարություն, ¹¹ իսկ վերևի մասը կառուցել էր նույն չափի անտաշ ու ընտիր քարերով։ Պատերը երեսապատված էին եղևնափայտով։ ¹² Մեծ գավիթը շուրջանակի երեք կարգ անտաշ քարերից էր և երեսապատված էր եղևնափայտով։

Տիրոջ տան գավիթը՝ Տիրոջ տան ներքին կամարակապ գավիթը, շինեց տաճարի դիմաց։

Քիրամին վստահված աշխատանքները

¹³[41] Սողոմոն արքան մարդ ուղարկեց ու Քիրամ անունով մի մարդու բերել տվեց Տյուրոսից։ ¹⁴ Սա Նեփթաղիմի ցեղից մի այրի կնոջ որդի էր։ Նրա հայրը տյուրոսցի էր, պղնձի վարպետ։ Նա պղնձի ամեն տեսակ գործերի մեջ մեծ հմտություն, վարպետություն ու գիտելիքներ ուներ։ Նա եկավ Սողոմոն արքայի մոտ ու նրա բոլոր գործերը կատարեց. ¹⁵ պատրաստեց տաճարի գավթի ձուլածո երկու սյուները՝ սյունի բարձրությունը տասնութ կանգուն, տրամագիծը տասնչորս կանգուն էր և չորս մատ լայնությամբ ակոսներ ուներ։ Նույն ձևով կերտեց նաև երկրորդ սյունը։ ¹⁶ Նա պղնձաձույլ երկու խոյակ պատրաստեց, որոնք պետք է դրվեին սյուների գլխին։ Մի խոյակի բարձրությունը հինգ կանգուն էր, երկրորդ խոյակի բարձրությունը նույնպես հինգ կանգուն էր։ ¹⁷ Նա պատրաստեց վանդակակերպ երկու ցանց՝ խոյակը ծածկելու համար:

¹⁸ Վանդակաձև երկու ցանց էլ պատրաստեց՝ երկրորդ խոյակը ծածկելու համար։ Նա երկու սյուների համար պատրաստեց նռնաձև զարդեր, որպեսզի դրանք շարք-շարք կախվեն վանդակացանցի վրա։ ¹⁹ Սյան գլխին գտնվող երկրորդ խոյակի վրա՝ կամարի մոտ, դրեց մի պսակ, որն ուներ չորս կանգուն երկարություն, և վրան շուշանաձև քանդակներ կային։ ²⁰ Երկու սյուների վրա դրեց գերանների դուրս եկած ծայրերը, խոյակների վրա կողքերից նույնպես գերանների դուրս եկած ծայրերը դրեց, իսկ երկրորդ խոյակի շուրջը՝ կարգով շարված երկու հարյուր նռնաձև զարդեր։ ²¹ Նա կանգնեցրեց տաճարի գավիթի սյուները։ Մի սյունը կանգնեցրեց ու այն անվանեց Հաքում [Աստված ապավեն]. երկրորդ սյունը կանգնեցրեց ու անունը դրեց Բոոզ [Աստծու մեջ է ուժը]։ ²² Սյուների գլխին շուշանաձև զարդեր քանդակեց, և սյուների գործն ավարտվեց։

Պղնձե ավազանը

(Բ Մն. 4.2-5)

²³[42] Նա պատրաստեց նաև ձուլածո մի ավազան, որի երկարությունը մի շուրթից մինչև մյուս շուրթը տասը կանգուն էր։ Այն կլոր էր։ Դրա բարձրությունը հինգ կանգուն էր և շուրջանակի ամփոփված էր երեսուներեք կանգուն երկարությամբ գոտով։ ²⁴ Դրա եզրերից ներքև տասը կանգուն շուրջանակի հենարաններ կային, և երկու շարք մույթեր ձուլված-ամրացված էին դրա հետ։ ²⁵ Ձուլածո ավազանը դրված էր տասներկու եզների վրա. երեքը դեպի հյուսիս էին նայում, երեքը՝ դեպի արևմուտք, երեքը՝ դեպի հարավ, երեքը՝ դեպի արևելք։ Ավազանը դրանց վրա էր ամրացված։ Բոլոր եզների գավակները դեպի ներս էին ուղղված։ ²⁶ Ավազանի պղնձի հաստությունը մի թիզ էր. դրա շուրթը բաժակի շուրթի նման էր. դրա վրա ծաղկած շուշան էր քանդակված։ Ավազանը մոտավորապես երկու հազար մար էր տանում:

Պղնձե խարսխաձև պատվանդաններ

²⁷ Նա պղնձե տասը պատվանդաններ շինեց. մեկ պատվանդանի երկարությունը հինգ կանգուն էր, լայնությունը՝ չորս կանգուն, բարձրությունը՝ վեց կանգուն։ ²⁸ Պատվանդաններն այսպիսի կառուցվածք ունեին. վրայից փոսիկներ կային, նաև՝ փոսիկներ ելուստների միջև։ ²⁹ Ելուստների միջև գտնվող փոսիկների վրա պատկերված էին առյուծներ, եզներ ու քերովբեներ, ելուստների վրա՝ ևս. պատկերված առյուծներից և եզներից վերև ու ներքև զարդեր էին կախված։ ³⁰ Ամեն մի պատվանդան պղնձե չորս անիվ ու պղնձե սռնի ուներ, և չորս անկյուններին՝ ավազանի տակ, դրան կպած՝ մարդու ուսի նմանություն ունեցող ձուլածո ելուստներ կային։ ³¹ Դրա շուրթը ներքին խոյակից մինչև վեր մեկ կանգուն էր. այդ շուրթը կլոր էր և մեկուկես կանգուն լայնություն ուներ։ Դրա եզրերի վրա քանդակներ կային, իսկ հեծանները ոչ թե կլոր, այլ քառակուսի էին։ ³² Սռնիով իրար միացված չորս անիվները հեծանների տակ էին դրված և ամրացված էին պատվանդանին։ Ամեն մի անվի բարձրությունը մեկուկես կանգուն էր։ ³³ Անիվները սարքված էին կառքի անիվների նման. դրանց սռնիները, շրջանակները, ճաղերը և ամեն ինչը ձուլածո էին։ ³⁴ Ամեն մի պատվանդանի չորս անկյուններն ունեին ուսանման չորս ելուստներ, և ելուստները պատվանդանի հետ միաձույլ էին։ ³⁵ Պատվանդանի վերևում կես կանգուն բարձրությամբ բոլորակ մի պսակ կար, և դրա սռնիների ծայրն ու խորշերը պատվանդանի հետ միաձույլ էին։ ³⁶ Դրա սռնիների ու խորշերի վրա ներսի կողմից քանդակեց շուրջանակի միմյանց դիմաց կանգնած քերովբեներ, առյուծներ ու արմավենիներ։ ³⁷ Այս նույն օրինակով սարքեց բոլոր տասը պատվանդանները. բոլորը նույն կարգը, նույն չափն ու նույն օրինակն ունեին։

³⁸ Նա պղնձե տասը տաշտեր պատրաստեց. ամեն մի տաշտ քառասուն սափոր էր տանում և չորս կանգուն բարձրություն ուներ։ Ամեն մի տաշտ դրվեց այդ տասը պատվանդաններից մեկի վրա։ ³⁹ Հինգ պատվանդանները տեղադրեց տաճարի աջ կողմում, մյուս հինգը՝ ձախ կողմում, իսկ ծովը տեղադրեց տաճարի աջ կողմում՝ դեպի հարավ-արևելք։

⁴⁰ Քիրամը շինեց կաթսաներ, տաք ջրի ամաններ ու կոնքեր։ Քիրամն ավարտեց բոլոր այն գործերը, որ արել էր Տիրոջ տաճարի մեջ Սողոմոն արքայի համար. դրանք են՝ ⁴¹ երկու սյուն ու սյուների գլխին՝ շուրջանակի քանդակազարդ խոյակներ, երկու ցանց, որոնցով պետք է ծածկեին սյուների շուրջանակի քանդակված երկու խոյակները, ⁴² երկու ցանցերի չորս հարյուր նռնաձև զարդերը, երկու շարք նռնաձև քանդակներ ամեն մի վանդակացանցին, որոնցով պետք է ծածկեին երկու սյուների վրա եղած երկու խոյակները։ ⁴³ Նաև տասը պատվանդաններ ու պատվանդանների վրա դրված տասը տաշտեր, ⁴⁴ մեկ ավազան ու ավազանի տակ ամրացված տասներկու եզներ, ⁴⁵ կաթսաներ, տաք ջրի անոթներ, կոնքեր և ամբողջ կահկարասին, որ Քիրամն արել էր Սողոմոն արքայի պատվերով Տիրոջ տան մեջ։ Արքայի տան ու Տիրոջ տան քառասունութ սյուներն ու արքայի բոլոր պատվերները Քիրամը ամբողջապես պղնձից պատրաստեց։ Իսկ թե որքան պղինձ օգտագործեց այդ ամբողջ գործերն անելու համար, հնարավոր չէ ասել, քանի որ դրանց չափ ու սահման չկար։ Անգամ հնարավոր չէ ասել, թե որքան փայլուն պղինձ օգտագործվեց։ ⁴⁶ Արքան դրանք ձուլել էր տվել թանձր հողի մեջ, Սոկքոթի ու Սիրարթամի միջև ընկած Հորդանան գետի ափին։ ⁴⁷ Դրանք թվով չափազանց շատ էին, և օգտագործված պղնձին չափ ու սահման չկար։ ⁴⁸ Սողոմոն արքան պատրաստել տվեց Տիրոջ տան ամբողջ սպասքը, ոսկե զոհարանն ու ոսկե սեղանը, որի վրա մատուցվում էր Առաջավորաց հացը, ⁴⁹ մաքուր ոսկուց պատրաստված աշտանակները, որոնցից հինգը դրված էր սրբարանի դիմաց՝ աջ կողմում, և հինգը՝ ձախ կողմում, ոսկե մոմակալները, ճրագակալները, մոմ կտրելու մկրատները, ⁵⁰ նաև դրանդիները, լծակները, տաշտերը, ափսեներն ու տուփերը՝ մաքուր ոսկուց։ Ոսկուց էին ներքնատան՝ Սրբություն սրբոցի դռներն ու տաճարի տան դռները։ ⁵¹ Այսպես ավարտվեցին Տիրոջ տունը կառուցելու համար Սողոմոն արքայի ձեռնարկած բոլոր գործերը։ Եվ Սողոմոն արքան տարավ իր հայր Դավթի նվերները և իր՝ Սողոմոնի բոլոր նվերները՝ արծաթը, ոսկին ու սպասքը, և դրեց Տիրոջ տան գանձարանում։

8

Ուխտի տապանակը տաճարի մեջ է տեղադրվում

(Բ Մն. 5.2–6.2)

¹ Այն ժամանակ Սողոմոն արքան Իսրայելի բոլոր ծերերին, Իսրայելի որդիների ցեղերի բոլոր առաջնորդներով հանդերձ, ժողովեց իր մոտ՝ Սիոնում, որպեսզի Տիրոջ Ուխտի տապանակը հանեն Դավթի քաղաքից, այսինքն՝ Սիոնից։ Իսրայելի բոլոր մարդիկ Սողոմոն արքայի մոտ հավաքվեցին ² Անթանիմ, այսինքն՝ յոթերորդ ամսի տոնին։ ³ Երբ եկան Իսրայելի բոլոր ծերերը, քահանաները վերցրին Տիրոջ տապանակը և փոխադրեցին տաճար։ ⁴ Ղևտացիների օգնությամբ փոխադրեցին նաև Վկայության խորանը և Վկայության խորանի մեջ եղած ամբողջ սուրբ սպասքը։ ⁵ Սողոմոն արքան ու նրա մոտ հավաքված Իսրայելի ողջ ժողովուրդը գնում էին տապանակի առջևից և անթիվ-անհամար արջառ ու ոչխար էին զոհաբերում։ ⁶ Քահանաները Տիրոջ Ուխտի տապանակը տարան ներսի մասը, իր տեղը՝ Սրբություն սրբոց, և տեղադրեցին քերովբեների թևերի ներքո։ ⁷ Քերովբեները թևերը տարածել էին տապանակի վրա, և նրանք վերևից ծածկում էին տապանակն ու դրա սրբությունները։ ⁸ Լծակները դուրս էին մնացել և դրանց գլուխները երևում էին սրբությունից, սրբարանի դիմաց, բայց դրսից չէին երևում։ Դրանք այնտեղ են մնում մինչև այսօր։ ⁹ Տապանակի մեջ ոչինչ չկար, բացի քարե երկու տախտակներից՝ ուխտի տախտակներից, որոնք Մովսեսն էր այնտեղ դրել Քորեբում, երբ Տերն ուխտ դրեց Իսրայելի որդիների հետ Եգիպտոսից նրանց դուրս գալուց հետո։

¹⁰ Երբ քահանաները ելան սրբարանից, մի ամպ լցրեց Տիրոջ տունը, ¹¹ այնպես որ քահանաներն ամպի պատճառով չկարողացան սպասավորություն անել, քանզի Տիրոջ փառքը լցրել էր տաճարը։

¹² Այդ ժամանակ Սողոմոնն ասաց. «Տերն ասել է՝ “Ես հովանի պիտի լինեմ մեգով”։ ¹³ Ես քեզ համար բնակության տուն շինեցի, որպեսզի քո աթոռը հաստատ լինի հավիտյան»։

Սողոմոնի ճառը տաճարի օծման առթիվ

(Բ Մն. 6.3-11)

¹⁴ Արքան երեսը դարձրեց ու օրհնեց ողջ Իսրայելին, և Իսրայելի ողջ ժողովուրդն այնտեղ էր։ ¹⁵ Նա ասաց. «Օրհնյա՜լ է Տերը՝ Իսրայելի Աստվածն այսօր, որն իր բերանով խոսեց իմ հայր Դավթի մասին և իր ձեռքով կատարեց իր խոստումը՝ ասելով. ¹⁶ “Այն օրից, որ իմ ժողովրդին՝ Իսրայելին, Եգիպտոսից դուրս բերեցի, Իսրայելի ցեղերին պատկանող ոչ մի վայր չընտրեցի տուն շինելու համար, որ իմ անվամբ լինի, այլ ընտրեցի Դավթին, որ ղեկավարի իմ ժողովրդին՝ Իսրայելին”։ ¹⁷ Իմ հայր Դավթի սրտում առաջացավ Տիրոջ՝ Իսրայելի Աստծու անունով տուն շինելու ցանկությունը, ¹⁸ և Տերն ասաց իմ հայր Դավթին. “Քանի որ մտքումդ դրել ես իմ անունով տուն շինել, լավ ես արել, որ այն դրել ես մտքումդ, ¹⁹ բայց դո՛ւ չես շինելու տունը, այլ քո որդին, որ սերվելու է քեզնից. նա է շինելու իմ անունով տունը”։ ²⁰ Եվ Տերը կատարեց իր ասած խոսքը, ու ես փոխարինեցի իմ հորը՝ Դավթին, նստեցի Իսրայելի աթոռին, ինչպես ասել էր Տերը, և Տիրոջ՝ Իսրայելի Աստծու անունով տուն շինեցի, ²¹ այնտեղ տապանակի համար տեղ պատրաստեցի, որտեղ դրված է Տիրոջ ուխտը, որ նա ուխտել էր մեր հայրերի հետ, երբ նրանց դուրս բերեց եգիպտացիների երկրից»։

Սողոմոնի աղոթքը

(Բ Մն. 6.12-42)

²² Սողոմոնը ողջ Իսրայելի ժողովրդի ներկայությամբ կանգնեց Տիրոջ զոհասեղանի առջև, ձեռքերը երկինք տարածեց ²³ և ասաց. «Տե՛ր, Աստվա՛ծ Իսրայելի, չկա քեզ նման Աստված վերևում՝ երկնքում, ու ներքևում՝ երկրի վրա. դու պահում ես ուխտը և ողորմածություն ցուցաբերում քո ծառայի նկատմամբ, որը սրտանց գնում է քո առջևից։ ²⁴ Դու պահեցիր քո ծառային՝ իմ հայր Դավթին տված խոստումդ. ինչ որ քո բերանով ասել էիր, քո ձեռքով էլ կատարեցիր, ինչպես այսօր։ ²⁵ Արդ, Տե՛ր, Աստվա՛ծ Իսրայելի, կատարի՛ր քո Դավիթ ծառային՝ իմ հորը տված քո խոստումը, թե՝ “Քեզնից մարդ չի պակասելու իմ առջև, որ նստի Իսրայելի գահին, միայն թե քո որդիները զգուշանան իրենց ճանապարհին՝ ընթանալու իմ առջևից, ինչպես դու ես ընթանում իմ առջևից”։

²⁶ Արդ, Տե՛ր, Աստվա՛ծ Իսրայելի, թող իրագործվեն քո ծառային՝ իմ հայր Դավթին քո ասած խոսքերը։ ²⁷ Մի՞թե Աստված բնակվելու է մարդկանց հետ երկրի վրա։ Եթե երկինքն ու երկնքի անսահմանությունները քեզ բավական չեն, ապա ինչպե՞ս կարող է բավականացնել իմ շինած այս տունը։ ²⁸ Արդ, լսի՛ր քո ծառայի աղոթքներն ու իմ խնդրանքները, Տե՛ր, Աստվա՛ծ Իսրայելի, լսի՛ր քո ծառայի պաղատագին աղոթքները, որ նա քո առջև մատուցում է քեզ։ ²⁹ Քո աչքերը գիշեր-ցերեկ թող բաց լինեն այն տեղի վրա, որի համար ասացիր, թե քո անունն այնտեղ պետք է լինի. լսի՛ր այն աղերսանքը, որ քո ծառան գիշեր-ցերեկ առաքում է քեզ այստեղ։ Լսի՛ր քո ծառայի ու քո ժողովրդի՝ Իսրայելի ձայնը, որոնք աղոթքի կկանգնեն այստեղ. ³⁰ լսի՛ր քո բնակության վայրում՝ երկնքում, ու ների՛ր նրան, ³¹ ով կմեղանչի իր մերձավորի դեմ։ Եթե մեկը ընկերոջ կողմից մեղադրվի մեղքի մեջ և հարկադրաբար երդվի, հետո գա ու այս տանը՝ քո զոհասեղանի առաջ, երդվի իր անմեղության համար, ³² ապա լսի՛ր նրան երկնքում ու քավությո՛ւն արա նրան։ Դատի՛ր քո ժողովրդին՝ Իսրայելին, դատապարտի՛ր անօրենին ու նրանից պահանջի՛ր նրա կատարած մեղքի հատուցումը, իսկ արդարին արդարացրո՛ւ՝ հատուցելով նրան ըստ իր արդարության։

³³ Եթե քո դեմ մեղանչելու պատճառով քո ժողովուրդը՝ Իսրայելը, պարտվի թշնամիներից, բայց դառնա դեպի քեզ, քո անունը խոստովանի, աղոթի ու աղաչի քեզ այս տանը, ³⁴ ապա լսի՛ր նրան երկնքում, ների՛ր քո ժողովրդի՝ Իսրայելի մեղքերը և վերադարձրո՛ւ նրանց այն երկիրը, որ տվել ես նրանց հայրերին։

³⁵ Եթե քո դեմ մեղանչելու պատճառով երկինքը փակվի, ու անձրև չլինի, իսկ նրանք աղոթք անեն այս վայրում, քո անունը խոստովանեն և զղջան իրենց մեղքերի համար, երբ խոնարհեցնես նրանց, ³⁶ լսի՛ր երկնքում և ների՛ր քո ծառաների ու քո ժողովրդի՝ Իսրայելի մեղքերը, որպեսզի ցույց տաս նրանց բարի ճանապարհը, որով պետք է ընթանան, և անձրև տաս քո երկրին, որը տվել ես քո ժողովրդին՝ իբրև ժառանգություն։ ³⁷ Եթե երկրի վրա սով լինի, մահ, հրդեհ, դեղնախտ, մորեխ կամ բույսերի ժանգ, և թշնամին նեղի նրան իր քաղաքներից մեկում, կամ ամեն տեսակ պատահար ու ցավ լինի, ³⁸ և եթե քո ողջ ժողովրդից՝ Իսրայելից, որևէ մեկը մի աղոթք կամ մի աղերսանք անի, և մարդիկ, իրենց սրտի ցավը գիտենալով, ձեռքները տարածեն այս տան մեջ, ³⁹ ապա լսի՛ր երկնքում՝ քո բնակության տեղում, ների՛ր նրանց, կատարի՛ր նրանց խնդրանքը, ամեն մեկի հոգին ճանաչելով՝ հատուցի՛ր ըստ նրանց ընթացած ճանապարհի, քանզի միայն դու ես ճանաչում բոլոր մարդկանց հոգիները։ ⁴⁰ Թող մարդիկ երկյուղ կրեն քեզնից իրենց կյանքի բոլոր օրերում, որչափ որ ապրեն այն երկրի երեսին, որ տվել ես մեր հայրերին։

⁴¹ Եթե քո ժողովրդին՝ Իսրայելին չպատկանող մի օտարական գա հեռու երկրից, ⁴² որտեղ լսած լինի քո մեծ անվան, հզոր ձեռքի ու օգնության պատրաստ բազկի մասին, գա և աղոթք անի այս տեղում, ⁴³ ապա նրան և՛ս լսիր երկնքում՝ քո բնակության տեղում, և ըստ ամենայնի կատարի՛ր քեզնից այդ օտարականի խնդրածը, որպեսզի երկրի բոլոր ազգերը ճանաչեն քո անունը, երկյուղ կրեն քեզնից, ինչպես քո ժողովուրդը՝ Իսրայելը, և իմանան, որ քո անվամբ է կոչվել իմ կառուցած այս տունը։

⁴⁴ Եթե քո ժողովուրդը պատերազմի ելնի իր թշնամիների դեմ այն ճանապարհին, որից դու հետ կդարձնես նրանց, և եթե նրանք աղոթքի կանգնեն Տիրոջ անունով քո ընտրած քաղաքի ճանապարհին կամ քո անունով իմ կառուցած տանը, ⁴⁵ ապա երկնքից լսի՛ր նրանց աղոթքն ու խնդրանքը, իրավադա՛տ եղիր նրանց նկատմամբ։ ⁴⁶ Եթե մեղանչեն քո դեմ (քանի որ չկա մարդ, որ չմեղանչի), և նրանց վրա բարկանաս ու նրանց մատնես թշնամիների ձեռքը, և գերեվարողները նրանց գերեվարեն դեպի թշնամու հեռավոր կամ մոտիկ երկիրը, ⁴⁷ և եթե գերի տարված երկրում զղջան իրենց հոգում, դառնան դեպի քեզ, աղաչեն քեզ գերության երկրում և ասեն՝ “Մեղանչեցինք, անօրենություն ու անիրավություն գործեցինք”, ⁴⁸ և ապա իրենց թշնամիների երկրում, ուր տարել ես նրանց, քեզ դառնան իրենց ամբողջ սրտով և ամբողջ հոգով, քեզ աղոթք անեն՝ դառնալով դեպի իրենց հայրերին տրված երկիրը, քո ընտրած քաղաքն ու քո անունով իմ կառուցած տունը, ⁴⁹ ապա լսի՛ր երկնքում՝ քո բնակության վայրում, նրանց աղոթքներն ու խնդրանքները, իրավադա՛տ եղիր նրանց նկատմամբ, ⁵⁰ ների՛ր քո դեմ գործած նրանց անիրավությունները, քո հանդեպ թույլ տված բոլոր անարգանքները, գո՛ւթ տուր նրանց գերեվարողներին, գթա՛ նրանց, ⁵¹ քանզի նրանք քո ժողովուրդն են և քո ժառանգությունը, որոնց դուրս բերեցիր Եգիպտոսից՝ երկաթի հնոցի միջից։ ⁵² Թող քո աչքերն ու ականջները բաց լինեն քո ծառայի ու քո ժողովրդի՝ Իսրայելի աղերսանքների հանդեպ, որ լսես նրանց բոլոր աղաղակները, որ առաքում են քեզ, ⁵³ քանզի դու ես նրանց քեզ համար ժառանգորդ ընտրել բոլոր ազգերից, ինչպես ասել ես քո ծառա Մովսեսի միջոցով, երբ մեր հայրերին դուրս էիր բերում Եգիպտոսից, Տե՜ր, Տե՜ր»։

Սողոմոնը հայցում է Տիրոջ օրհնությունը

^53ա Երբ Սողոմոնն ավարտեց տան կառուցումը, իր կառուցած տան մասին ասաց.

«Տերը երկնքում ճանաչեց արեգակը.

ասաց, որ բնակվում է մեգի մեջ։

(Ինձ ասաց). “Կառուցի՛ր իմ տունը, վայելուչ տուն,

որպեսզի բնակվեմ այդ նոր տաճարում”։

Ահա այս չէ՞ գրված Երգերի գրքում»։

⁵⁴ Երբ Տիրոջ զոհասեղանի առաջ ծնկաչոք ու ձեռքերը դեպի երկինք տարածած Սողոմոնն ավարտեց Տիրոջն ուղղված այս բոլոր աղոթքներն ու աղերսանքները, ⁵⁵ կանգնեց ու բարձրաձայն օրհնեց Իսրայելի ողջ ժողովրդին՝ ասելով. ⁵⁶ «Օրհնյա՜լ է Տերն այսօր, որն իր խոստման համաձայն հանգիստ տվեց իր ժողովրդին՝ Իսրայելին։ Իր ծառայի՝ Մովսեսի միջոցով խոստացած բոլոր բարի խոսքերից ոչ մի բան պակաս չի մնացել։ ⁵⁷ Տերը՝ մեր Աստվածը, թող մեզ հետ լինի, ինչպես մեր հայրերի հետ էր, մեզ թող չլքի, ⁵⁸ այլ այնպես առաջնորդի, որ մեր սրտերը նրանից չխոտորվեն, ընթանանք նրա նշած ճանապարհով, պահենք մեր հայրերին տված նրա բոլոր պատվիրանները, նրա հրամանները, նրա օրենքները։ ⁵⁹ Տիրոջ՝ Աստծու առջև մատուցած այս պաղատանքի խոսքերս ցերեկ ու գիշեր թող հասնեն Տիրոջը՝ մեր Աստծուն, որպեսզի իր ծառային ու իր ժողովրդին՝ Իսրայելին, ամեն օր արդար դատի, ⁶⁰ որպեսզի երկրի բոլոր ժողովուրդները ճանաչեն, որ Տերն Աստված է, և ուրիշ աստված չկա։ ⁶¹ Մեր սրտերը կատարյալ թող լինեն Տիրոջ՝ մեր Աստծու նկատմամբ, որպեսզի մենք մաքուր սրտով ընթանանք ըստ նրա հրամանների և պահենք նրա պատվիրանները, ինչպես այսօր»։

Տաճարին արված ընծայաբերումները

(Բ Մն. 7.4-10)

⁶² Արքան ու նրա հետ Իսրայելի բոլոր որդիները Տիրոջ առջև զոհեր մատուցեցին։ ⁶³ Սողոմոն արքան Տիրոջը մատուցեց քսաներկու հազար արջառ, հարյուր քսան հազար ոչխար՝ իբրև խաղաղության զոհեր։ Արքան ու Իսրայելի բոլոր որդիները կատարեցին Տիրոջ տան նավակատիքը։ ⁶⁴ Այդ օրը արքան սրբագործեց Տիրոջ տան դիմացի գավթի կենտրոնը. այնտեղ արեց ողջակեզները, պատարագները, զոհերն ու խաղաղության ճարպերը, քանի որ Տիրոջ առաջ գտնվող պղնձե զոհասեղանը փոքր էր և չէր կարող տեղավորել բոլոր ողջակեզները, անարյուն զոհերն ու խաղաղության զոհերը։

⁶⁵ Սողոմոնն ու նրա հետ նաև Իսրայելի ողջ ժողովուրդը մեծ բազմությամբ, որ եկել էին Եմաթի արևմուտքից մինչև Եգիպտոսի գետը ընկած տարածքից, այդ օրը Տիրոջ առջև, նրա համար շինված տանը տոն արեցին յոթ օր ու դարձյալ յոթ օր, այսինքն՝ տասնչորս օր կերան, խմեցին և ուրախացան։ ⁶⁶ Ութերորդ օրը Սողոմոնն արձակեց ժողովրդին, նրանք օրհնեցին արքային, և ամեն մեկը ուրախ ու զվարթ գնաց իր բնակության վայրը, որովհետև Տերը՝ Աստված, իր Դավիթ ծառային և իր ժողովրդին՝ Իսրայելին, բարիք էր պարգևել։

9

Աստված կրկին երևում է Սողոմոնին

(Բ Մն. 7.11-22)

¹ Երբ Սողոմոնն ավարտեց Տիրոջ տան և արքունի տան շինությունը, ինչպես նաև այն բոլոր շինությունները, որ նա կամենում էր կատարել, ² Տերը երկրորդ անգամ երևաց նրան, ինչպես երևացել էր նրան Գաբավոնում։ ³ Տերը նրան ասաց. «Լսեցի իմ առջև արած աղոթքի ձայնդ ու պաղատանքներդ և արեցի այն ամենը, ինչ դու խնդրում էիր քո աղոթքներում. սրբագործեցի քո կառուցած տաճարը, որպեսզի իմ անունը հավիտյան այնտեղ դրվի, իմ աչքն ու սիրտը ընդմիշտ այնտեղ լինեն։ ⁴ Եթե դու քո հայր Դավթի նման մաքուր սրտով, ուղիղ ճանապարհով ընթանաս իմ առջև, կատարես այն ամենը, ինչ պատվիրեցի նրան, պահես իմ հրամաններն ու պատվիրանները, ⁵ ապա քո թագավորության աթոռն Իսրայելի վրա հավիտյան կանգուն կպահեմ, ինչպես խոստացել եմ քո հայր Դավթին՝ ասելով՝ “Քո տոհմից առաջնորդ չի պակասելու Իսրայելի գահի վրա”։ ⁶ Իսկ եթե դուք և ձեր որդիները ինձնից խոտորվեք, չպահեք իմ պատվիրաններն ու հրամանները, որ Մովսեսը տվեց ձեզ, գնաք ու ծառայեք օտար աստվածներին, նրանց երկրպագեք, ⁷ ապա ձեզ կջնջեմ այն երկրի երեսից, որ տվել եմ ձեզ։ Իմ անվան համար սրբագործված այս տունը աչքից կգցեմ, և Իսրայելը բոլոր ժողովուրդների մոտ խայտառակ ու ծաղրի առարկա կլինի։ ⁸ Եվ եթե այս բարձր տան կողքից ամեն անցնող զարհուրելով ու զարմանքով հարց տա, թե՝ “Ինչո՞ւ է Տերն այսպես արել այս երկիրն ու այս տունը”, ⁹ ապա նրան պիտի պատասխանեն. “Քանի որ նրանք լքեցին իրենց Տիրոջը՝ Աստծուն, որը նրանց հայրերին դուրս էր բերել Եգիպտոսից՝ ստրկության տնից, իսկ իրենք հարեցին օտար աստվածներին, երկրպագեցին ու ծառայեցին նրանց, այդ պատճառով էլ Տերը նրանց վրա թափեց այս ամբողջ չարիքը”»։

^9ա Այն ժամանակ Սողոմոնը փարավոնի դստերը հանեց Դավթի քաղաքից ու բերեց իր կառուցած տունը։

Սողոմոնի համաձայնությունը Քիրամի հետ

(Բ Մն. 8.1-2)

¹⁰ Քսան տարվա ընթացքում, երբ Սողոմոնը կառուցում էր երկու տները՝ Տիրոջ տունն ու արքայի տունը, ¹¹ Տյուրոսի Քիրամ արքան Սողոմոնին մատակարարել էր եղևնափայտ, մայրի փայտ, ոսկի և այն ամենը, ինչ Սողոմոնն ուզել էր։ Այն ժամանակ Սողոմոն արքան Քիրամին Գալիլեայում քսան քաղաք նվիրեց։ ¹² Քիրամը եկավ Տյուրոսից ու գնաց Գալիլեա, որպեսզի տեսնի Սողոմոնի՝ իրեն նվիրած քաղաքները, սակայն դրանք նրան դուր չեկան։ ¹³ Նա ասաց. «Եղբա՛յր, դու այս ի՞նչ քաղաքներ ես ինձ նվիրել»։ Եվ նա դրանց անունը Սահմաններ [*  Կավուլ] դրեց։ Դրանք մինչև այսօր էլ այդպես են կոչվում։ ¹⁴ Եվ Քիրամը Սողոմոնին հարյուր քսան տաղանդ ոսկի բերեց։

Սողոմոնի մյուս նվաճումները

(Բ Մն. 8.3-18)

¹⁵ Սողոմոն արքայի սահմանած մարդահարկի նպատակն այն էր, որ կառուցի Տիրոջ տունը և արքայի տունը, Մելոնը և բարձրավանդակները, լցնի Դավթի քաղաքի խրամատները, կառուցի Ասուրը, Մայդանը և Երուսաղեմի պարիսպը, Եսերը, Մակեդդովն ու Գազերը, ¹⁶ որոնք Եգիպտոսի փարավոն արքայի իշխանության տակ էին։ Փարավոնը գնացել, նվաճել ու հրով այրել էր Գազերը, սպանել քանանացիներին, որոնք ապրում էին այդ քաղաքում, և այն օժիտ էր տվել իր դստերը՝ Սողոմոնի կնոջը։ ¹⁷ Սողոմոնը վերակառուցեց Գազերը, ներքին Բեթերոնը, ¹⁸ Բալաթն ու Թերմոթը այդ երկրի անապատում, ¹⁹ իրեն պատկանող բոլոր բնակելի քաղաքները, ռազմակառքերի, բոլոր երիվարների համար սահմանված քաղաքները և այն ամենը, որ Սողոմոնն ուզեց շինել Երուսաղեմում, Լիբանանում և ամբողջ երկրում։ ²⁰ Որպեսզի գլուխ չբարձրացնեն Իսրայելի ցեղին չպատկանող և ամորհացիներից, քետացիներից, փերեզացիներից, խևացիներից, քանանացիներից, հեբուսացիներից ու գերգեսացիներից երկրում կենդանի մնացած մարդիկ, որոնց իսրայելացիները չէին կարողացել կոտորել, ²¹ Սողոմոնը նրանց հարկատու ծառայության ենթարկեց, ինչպես որ մինչև այսօր են։ ²² Սողոմոնը իսրայելացիներին ծանր աշխատանքի չլծեց, քանի որ նրանք պատերազմողներ էին, իր ծառաները, իր իշխանները, իր սպառազեն զինվորները, իր հեծյալները։ ²³ Սողոմոնի գործերի վերակացուները հինգ հարյուր հիսուն իշխաններ էին, որոնք հսկում էին գործավոր ժողովրդին։

²⁴ Փարավոնի դուստրը, Դավթի քաղաքից դուրս գալով, եկավ այն տունը, որ Սողոմոնը կառուցել էր իր համար։ Այդ ժամանակ էր, որ Սողոմոնը կառուցեց Մելոնը։ ²⁵ Սողոմոնը տարեկան երեք անգամ ողջակեզներ ու խաղաղության զոհեր էր մատուցում այն զոհասեղանի վրա, որը Տիրոջ համար էր կառուցել, և Տիրոջ առջև խունկ էր ծխում։ Նա ավարտեց տան կառուցումը։

²⁶ Եվ Սողոմոն արքան նավ կառուցեց Գասիոն Գաբերում, որ Ելաթի մոտ է գտնվում, Կարմիր ծովի եզրին՝ Եդովմի երկրում։ ²⁷ Քիրամը ծովի նավարկության հմուտ նավորդներ ուղարկեց. սրանք, Սողոմոնի ծառաների հետ այդ նավերով ²⁸ եկան Սովփերա և այնտեղից չորս հարյուր քսան տաղանդ ոսկի բերեցին Սողոմոն արքային։

10

Սաբայի թագուհու այցելությունը

(Բ Մն. 9.1-12)

¹ Սաբայի թագուհին, լսելով Սողոմոնի համբավի, Տիրոջ անվան ու Սողոմոնի իմաստնության մասին, եկավ նրան փորձելու հանելուկներով։ ² Նա եկավ Երուսաղեմ շատ մեծ շքախմբով, խնկեր, շատ առատ ոսկի ու թանկարժեք ակնեղեն բարձած ուղտերով։ Նա մտավ Սողոմոնի մոտ և խոսեց այն ամենի մասին, ինչ որ կար իր սրտում։ ³ Սողոմոնը մեկնում էր նրա բոլոր խոսքերը. չկար այնպիսի մի բան, որ արքան սխալվեր կամ չմեկներ։ ⁴ Կինը, տեսնելով Սողոմոնի իմաստնությունը, կառուցած տները, ⁵ նրա խորտիկները, նրա պաշտոնյաների նստելն ու սպասավորների կեցվածքը, նրա հանդերձանքը, նրա մատռվակներին ու Տիրոջը մատուցվող ողջակեզները, ապշեց։ ⁶ Նա ասաց Սողոմոն արքային. «Ինչ որ իմ երկրում լսել էի քո խոսքերի ու իմաստնության մասին, ճիշտ է։ ⁷ Ես չէի հավատում ինձ ասված խոսքերին, մինչև որ անձամբ չեկա և աչքերովս չտեսա։ Քո իմաստնության և քո բարության համբավի կեսն անգամ չեն պատմել ինձ իմ երկրում։ ⁸ Երանելի են քո կանայք ու ծառաները, որ քո առջև կանգնած՝ ամեն օր լսում են քո ամբողջ իմաստնությունը։ ⁹ Օրհնյա՜լ լինի Տերը՝ քո Աստվածը, որ բարեհաճել է քեզ տալ Իսրայելի աթոռը։ Տերն Իսրայելը հավիտյան սիրելու համար քեզ է հաստատել ու քեզ արքա դարձրել նրա վրա, որ արդարամտությամբ դատաստան անես նրանց ատյաններում»։ ¹⁰ Նա Սողոմոնին նվիրեց հարյուր քսան տաղանդ ոսկի, շատ առատ խունկ և թանկագին քարեր։ Ոչ մի անգամ այդքան շատ և անուշահոտ խունկ չէր ստացվել, ինչքան որ Սաբայի թագուհին նվիրեց Սողոմոն արքային։

¹¹ Քիրամի նավը, որ Սոփերից ոսկի էր բերում, Սոփերից բերեց նաև չափազանց շատ անտառանյութ և թանկագին քարեր։ ¹² Արքան անտառանյութից Տիրոջ տան և արքունի տան համար մույթեր պատրաստեց, իսկ երաժիշտների համար՝ քնարներ ու տավիղներ։ Այդպիսի քանակությամբ անտառանյութ այդ երկիրը չէր ստացել, և մինչև օրս էլ այդպիսի փայտեր չեն երևացել։

¹³ Սողոմոն արքան Սաբայի թագուհուն տվեց ամեն ինչ, որ նա ուզեց ու խնդրեց, չհաշված այն ամենը, որ Սողոմոն արքան իր կամքով էր նվիրել։ Սաբայի թագուհին և նրա բոլոր ծառաները վերադարձան իրենց երկիրը։

Սողոմոն թագավորի հարստությունը

(Բ Մն. 9.13-28, 1.14-17)

¹⁴ Մեկ տարվա ընթացքում Սողոմոնի ստացած ոսկին կշռում էր վեց հարյուր վաթսունվեց տաղանդ, ¹⁵ չհաշված հպատակներից, վաճառականների հասույթից և գետի այն կողմում գտնվող բոլոր թագավորներից ու երկրի կառավարիչներից ստացված հարկերը։

¹⁶ Սողոմոն արքան երեք հարյուր նիզակ պատրաստել տվեց կռածո ոսկուց՝ երեք հարյուր դահեկան կշիռով ամեն մեկը, ¹⁷ և երեք հարյուր զենք՝ կռածո ոսկուց՝ երեք մնաս ոսկի ծախսելով ամեն մի զենքի վրա։ Արքան դրանք զետեղեց Լիբանանի անտառ կոչված տանը։

¹⁸ Արքան փղոսկրե մեծ գահ պատրաստել տվեց և այն պատեց մաքուր ոսկով։ ¹⁹ Գահը վեց աստիճան ուներ, գահի թիկունքին եզան գլուխներ էին քանդակված։ Գահի երկու կողմերին երկու հենաթև կար, և հենաթևերի այս ու այն կողմից երկու առյուծներ կային։ ²⁰ Վեց աստիճանների այս ու այն կողմերում տասներկու առյուծներ կային։ Այսպիսի գահ չէր եղել ոչ մի թագավորության մեջ։

²¹ Սողոմոն արքայի ամբողջ սպասքը ոսկուց էր։ Ոսկի էին նաև լվացարանները, իսկ Լիբանանի անտառի տան ամբողջ ամանեղենը ոսկեպատ էր։ Արծաթե ոչինչ չկար, քանզի Սողոմոնի օրոք արծաթը հարգի չէր։ ²² Սողոմոն արքան ծովում մինչև Թարսիս[43] հասնելու կարող նավ ուներ Քիրամի նավերի հետ, և երեք տարին մեկ Թարսիսից մի նավ էր գալիս՝ բեռնված ոսկով, արծաթով, փղոսկրով, կապիկներով ու սիրամարգերով։

²³ Սողոմոնն իր հարստությամբ ու իմաստնությամբ գերազանցեց աշխարհի բոլոր թագավորներին, ²⁴ և աշխարհի բոլոր թագավորները փափագում էին տեսնել նրա երեսը, լսել նրա իմաստնությունը, որը Տերն էր դրել նրա սրտում։ ²⁵ Նրանցից յուրաքանչյուրն ամեն տարի բերում էր իր ընծան՝ արծաթե, ոսկե անոթներ, հանդերձներ, զմուռս ու խնկեր, ձիեր ու ջորիներ։

²⁶ Սողոմոնը հավաքեց ռազմակառքեր ու հեծյալներ։ Նա ուներ քառասուն հազար մատակ ձիեր, տասներկու հազար երիվարներ, որոնց տեղավորեց ռազմակառքերի համար սահմանված քաղաքներում, իսկ նրանք, որ արքայի համար էին սահմանված՝ Երուսաղեմում։ ^26ա Նա գետից մինչև այլազգիների և եգիպտացիների սահմաններն իշխում էր բոլոր թագավորների վրա։ ²⁷ Արքան արծաթն ու ոսկին Երուսաղեմում հասարակ քարի նման բան դարձրեց, իսկ եղևնափայտը՝ դաշտի մոլաթզենիների նման առատ։ ²⁸ Սողոմոնի երիվարները բերվում էին Եգիպտոսից և Թեկուայից, որտեղից դրանք գնում էին նրա վաճառականները։ ²⁹ Արծաթ վճարելով՝ ռազմակառքեր էին բերում Եգիպտոսից։ Ամեն մի ձի հարյուր հիսուն արծաթ արժեր։ Այդ ապրանքները վերավաճառում էին Քետտիմի թագավորներին և Ասորիքի թագավորներին՝ ծովային ճանապարհով։

11

Սողոմոնի անհավատարմությունն Աստծուն

¹ Սողոմոն արքան կնամոլ էր. նա կնության առավ շատ օտար կանանց. փարավոնի աղջկան, մովաբացի, ամովնացի, եդովմացի, ասորի, քետացի, ամորհացի ² ազգերից, որոնց մասին Տերն ասել էր Իսրայելի որդիներին. «Չխառնվեք նրանց հետ, նրանք էլ թող չխառնվեն ձեզ հետ, որպեսզի չլինի, թե ձեր սրտերը մոլորեցնեն՝ իրենց կուռքերին դարձնելով»։ Սողոմոնը հարեց այդ ազգերին՝ այդ կանանց նկատմամբ սեր տածելով։ ³ Նա յոթ հարյուր կին և երեք հարյուր հարճ ուներ, և նրա կանայք խոտորեցրին նրա սիրտը։

⁴ Սողոմոնի ծերության օրերին կանայք նրա սիրտը խոտորեցրին օտար աստվածների կողմը, և նա ամբողջ հոգով չկապվեց Տիրոջը՝ իր Աստծուն, ինչպես իր հոր՝ Դավթի սիրտն էր կապված։ ⁵[44] Սողոմոնը պաշտեց սիդովնացիների գարշելի կուռք Աստարտին ու ամովնացիների գարշելի կուռք Մեղքոմին։ ⁶ Սողոմոնը չարություն գործեց Աստծու առաջ և չընթացավ Տիրոջ ճանապարհով, ինչպես որ ընթացել էր իր հայր Դավիթը։ ⁷ Այն ժամանակ Սողոմոնը Երուսաղեմի դիմաց՝ լեռան վրա, մի մեհյան կառուցեց մովաբացիների կուռք Քամոսի համար, ինչպես և ամովնացիների Մեղքոմ կուռքի և սիդովնացիների գարշելի կուռք Աստարտի համար։ ⁸ Նույն բանն արեց նաև իր բոլոր օտարազգի կանանց համար. նրա կանայք խունկ էին ծխում և զոհ մատուցում իրենց կուռքերին:

⁹ Տերը բարկացավ Սողոմոնի վրա, որովհետև նրա սիրտը խոտորվել էր Տիրոջից՝ Իսրայելի Աստծուց, որը երկու անգամ երևացել ¹⁰ ու պատվիրել էր նրան, որ օտար աստվածների հետևից ամենևին չգնա, այլ պահի և կատարի այն, ինչ Տերը՝ Աստված, պատվիրել էր նրան։ ¹¹ Տերն ասաց Սողոմոնին. «Քանի որ այդպես վարվեցիր՝ չպահեցիր իմ հրամաններն ու պատվիրանները, որ պատգամել էի քեզ, ես քո ձեռքից անպայման կխլեմ թագավորությունը և այն կտամ քո ծառային։ ¹² Բայց հանուն քո հայր Դավթի քո կենդանության ժամանակ չեմ անի դա, այլ որդո՛ւդ ձեռքից կխլեմ թագավորությունը։ ¹³ Ամբողջ թագավորությունը չեմ խլի, այլ հանուն իմ ծառա Դավթի և իմ ընտրած Երուսաղեմ քաղաքի՝ մեկ ցեղ կթողնեմ քո որդուն»։

Սողոմոնի թշնամիները

¹⁴ Եվ Տերը մի թշնամի հարուցեց Սողոմոնի դեմ՝ եդովմացիների թագավորական սերնդից եդովմացի Ադերին։ ¹⁵ Երբ Դավիթը կոտորում էր Եդովմը, զորագլուխ Հովաբը գնացել էր սպանվածներին թաղելու և կոտորելու Եդովմի բոլոր արուներին։ ¹⁶ Հովաբը և ողջ Իսրայելը վեց ամիս մնացին Եդովմում, մինչև որ կոտորեցին եդովմացի բոլոր արուներին։ ¹⁷ Այդ ժամանակ Ադերն ինքը և իր հոր բոլոր ծառաները փախել-գնացել էին Եգիպտոս։ Ադերն այդ ժամանակ մանուկ էր։ ¹⁸ Նրանք Մադիամ քաղաքից եկել էին Փարան, Փարանից իրենց հետ վերցրել մարդկանց ու եկել Եգիպտոս՝ եգիպտացիների արքա փարավոնի մոտ։ Ադերը եկել էր փարավոնի մոտ, որը նրան տուն էր տվել, ուտելիք հատկացրել ու հող տրամադրել։ ¹⁹ Ադերը փարավոնի առաջ մեծ շնորհ էր գտել, և փարավոնը նրան կնության էր տվել իր «Մեծ տիկնոջ»՝ Թեկեմինայի քրոջը։ ²⁰ Թեկեմինայի քույրը Ադերի համար ծնել էր մի որդի՝ Գանեբաթին։ Թեկեմինան նրան մեծացրել էր փարավոնի որդիների հետ և այսպես Գանեբաթը փարավոնի տան մեջ, նրա որդիների հետ էր դաստիարակվել։ ²¹ Երբ Ադերը Եգիպտոսում լսեց, որ Դավիթը վախճանվել է, և զորագլուխ Հովաբը մահացել է, ասաց փարավոնին. «Արձակի՛ր ինձ, որ վերադառնամ իմ երկիրը»։ ²² Փարավոնն Ադերին ասաց. «Ի՞նչդ է պակաս ինձ մոտ, որ ուզում ես գնալ քո երկիրը»։ Ադերը նրան ասաց. «Անպայման արձակի՛ր ինձ»։ Եվ Ադերը վերադարձավ իր երկիրը։

²³ Տերը Սողոմոնի դեմ հանեց նաև Եղիադայի որդի Ռազոնին, որը փախել էր իր տիրոջից՝ Սուբայի արքա Ադրաազարից։ ²⁴ Երբ Դավիթը նրանց կոտորում էր, Ռազոնի մոտ մարդիկ էին հավաքվել, և նա գնդի հրամանատար էր եղել։ Նրանք գնացին Դամասկոս և հաստատվեցին այնտեղ։ Նա թագավորեց Դամասկոսում և Իսրայելի թշնամին դարձավ Սողոմոնի թագավորության ամբողջ ընթացքում։

²⁵ Այս է նրա գործած չարությունը։ Ադերը սաստիկ ցասումով էր լցված Իսրայելի դեմ։ Նա թագավորում էր Եդովմի երկրում։

Հերոբովամի ապստամբությունը

²⁶ Իր արքայի դեմ ձեռք բարձրացրեց նաև Սարիրա քաղաքից Եփրեմի ցեղից Նաբատի որդի Հերոբովամը՝ Սողոմոնի մի ծառայի այրի կնոջ որդին. նրա մոր անունը Սարուա էր՝ մի այրի կին։ ²⁷ Ահա թե ինչ պատճառով նա ձեռք բարձրացրեց Սողոմոն արքայի դեմ։ Սողոմոն արքան կառուցեց միջնաբերդը և լցրեց իր հոր՝ Դավթի քաղաքի խրամատը։ ²⁸ Հերոբովամը մի քաջարի մարդ էր, և երբ Սողոմոնը տեսավ, որ նա գործունյա երիտասարդ է, նրան նշանակեց Հովսեփի տան բեռնակիրների վերակացու։ ²⁹ Այդ ժամանակ Հերոբովամը ելավ Երուսաղեմից, և ճանապարհին նրան հանդիպեց սիլովնացի Աքիա մարգարեն ու ճանապարհից մի կողմ քաշեց նրան։ Աքիան նոր հագուստ էր հագել, և դաշտում նրանք երկուսով էին։ ³⁰ Աքիան իր նոր հագուստը բռնեց ու պատառոտեց՝ տասներկու կտոր անելով։ ³¹ Նա ասաց Հերոբովամին. «Ա՛ռ քեզ տասը կտոր, քանի որ Տերը՝ Իսրայելի Աստվածը, այսպես է ասում. “Ահա ես Սողոմոնի թագավորությունը պիտի պատառոտեմ և քեզ պիտի հանձնեմ տասը ցեղ, ³² իսկ երկու ցեղը թող նրան մնա հանուն իմ ծառա Դավթի և հանուն Երուսաղեմ քաղաքի, որն ընտրեցի Իսրայելի բոլոր ցեղերին պատկանող քաղաքների միջից։ Եվ սա այն բանի փոխարեն, ³³ որ նա ինձ լքեց և երկրպագեց սիդովնացիների գարշելի կուռք Աստարտին, Մովաբի կուռք Քամոսին և ամովնացիների զազրելի կուռք Մեղքոմին ու չընթացավ իմ ճանապարհով, չարեց այն, ինչ հաճելի է ինձ, չկատարեց իմ ճշմարիտ օրենքներն ու պատվիրանները, ինչպես արել էր իր հայր Դավիթը։ ³⁴ Բայց ես թագավորությունը չխլեցի նրա ձեռքից, այլ թույլ տվեցի, որ նա թագավորի իր կյանքի բոլոր օրերում հանուն իմ ծառա Դավթի, որին ընտրեցի, և որը պահեց իմ պատվիրաններն ու իմ օրենքները։ ³⁵ Թագավորությունը խլելու եմ նրա ձեռքից և քեզ եմ հանձնելու տասը ցեղ, ³⁶ իսկ նրա որդուն պիտի տամ երկու ցեղ, որպեսզի իմ ծառա Դավթի ճրագը միշտ վառ մնա իմ առջև՝ իմ Երուսաղեմ քաղաքում, որն ընտրել եմ, որպեսզի իմ անունն այնտեղ պաշտվի։ ³⁷ Ես քեզ եմ ընտրում, դու կթագավորես, ինչպես որ քո սիրտը կկամենա. թագավոր կլինես Իսրայելի վրա։ ³⁸ Եվ եթե պահես այն ամենը, ինչ քեզ պատվիրելու եմ, ընթանաս իմ ճանապարհով ու գործես այն, ինչ հաճելի է ինձ, հետևես իմ պատվիրաններին ու հրամաններին, ինչպես արեց իմ ծառա Դավիթը, ապա կլինեմ քեզ հետ և քեզ համար հաստատուն տուն կշինեմ, ինչպես Դավթի համար շինեցի, ³⁹ և քեզ կհանձնեմ Իսրայելը։ Այս պատճառով պիտի տանջեմ Դավթի սերունդը, բայց ոչ ընդմիշտ”»։

⁴⁰ Սողոմոնը ուզում էր սպանել Հերոբովամին, բայց Հերոբովամը փախավ-գնաց Եգիպտոս՝ եգիպտացիների Սավսակիմ արքայի մոտ, և մնաց Եգիպտոսում մինչև Սողոմոնի մահը։

Սողոմոնի մահը

(Բ Մն. 9.29-31)

⁴¹ Սողոմոնի մնացած գործերը և ամեն ինչ, որ նա արել է, նրա իմաստնությունները գրի են առնված Սողոմոնի գործերի գրքում։ ⁴² Սողոմոնը Երուսաղեմի և ամբողջ Իսրայելի վրա թագավորեց քառասուն տարի։

⁴³ Սողոմոնը ննջեց իր նախնիների հետ և նրան թաղեցին իր հայր Դավթի քաղաքում, ու նրա փոխարեն թագավորեց նրա որդի Ռոբովամը։

12

Հյուսիսային ցեղերի ապստամբությունը

(Բ Մն. 10.1-19)

¹ Ռոբովամ արքան գնաց Սյուքեմ, որովհետև ողջ Իսրայելը եկել էր Սյուքեմ՝ նրան թագավոր հռչակելու։ ² Երբ դա լսեց Նաբատի որդի Հերոբովամը, որը դեռ Եգիպտոսում էր Սողոմոն արքայից փախչելուց ի վեր, Եգիպտոսից վերադարձավ Երուսաղեմ։ Մարդ ուղարկեցին ու կանչեցին նրան։ ³ Հերոբովամը և հավաքված ողջ Իսրայելը եկան ու խոսեցին Ռոբովամ արքայի հետ՝ ասելով. ⁴ «Քո հայրը ծանր լուծ էր դրել մեզ վրա։ Արդ, դու թեթևացրո՛ւ քո հոր սահմանած խիստ ծառայությունն ու մեզ վրա դրած ծանր լուծը, որ մենք ծառայենք քեզ»։ ⁵ Ռոբովամն ասաց նրանց. «Գնացե՛ք և երեք օրից դարձյալ եկե՛ք ինձ մոտ»։ Նրանք գնացին։

⁶ Ռոբովամ արքան խորհրդակցեց ծերերի հետ, որոնք շրջապատում էին իր հայր Սողոմոնին նրա կենդանության օրոք, և ասաց. «Ի՞նչ խորհուրդ եք տալիս, որ պատասխան տանք այս ժողովրդին»։ ⁷ Նրան ասացին. «Եթե դու այսօր ժողովրդին ծառայություն մատուցես, զիջող լինես, ընդառաջես և բարի խոսքեր ասես, նրանք ընդմիշտ կծառայեն քեզ»։ ⁸ Սակայն Ռոբովամը մերժեց ծերերի տված խորհուրդը և խորհրդակցեց իր սննդակից ու իր առաջ կանգնած երիտասարդների հետ՝ ⁹ ասելով. «Ի՞նչ խորհուրդ եք տալիս, որ պատասխան տանք այս ժողովրդին, որ խոսեց ինձ հետ ու ասաց. “Թեթևացրո՛ւ այն լուծը, որ քո հայրը դրել էր մեզ վրա”»։ ¹⁰ Իր սննդակից ու իր առաջ կանգնած երիտասարդներն ասացին. «Այսպես կասես այն մարդկանց, որ քեզ հետ խոսելով ասել են. “Քո հայրը ծանրացրեց մեր լուծը, իսկ դու թեթևացրո՛ւ այն մեր վրայից”։ Այսպես ասա՛ նրանց. “Իմ ճկույթը հորս մեջքից հաստ է։ ¹¹ Արդ, եթե իմ հայրը ձեզ վրա ծանր լուծ էր դրել, ապա ես կավելացնեմ ձեր լուծը. իմ հայրը ձեզ խրատում էր ծեծով, իսկ ես կարիճներով կխրատեմ ձեզ”»։

¹² Երրորդ օրը ողջ Իսրայելը եկավ Ռոբովամ արքայի մոտ, ինչպես արքան ասել էր նրանց. «Վերադարձե՛ք ինձ մոտ երրորդ օրը»։ ¹³ Արքան խստությամբ պատասխան տվեց ժողովրդին և մերժելով ծերերի տված խորհուրդը՝ ¹⁴ Ռոբովամը նրանց հետ խոսեց ըստ երիտասարդների տված խորհրդի՝ ասելով. «Եթե իմ հայրը ծանր լուծ էր դրել ձեզ վրա, ապա ես կավելացնեմ ձեր լուծը։ Իմ հայրը ձեզ ծեծով էր խրատում, իսկ ես կարիճներով եմ խրատելու ձեզ»։ ¹⁵ Թագավորը չլսեց ժողովրդին, որովհետև Տերն էր խոտորել նրան, որպեսզի Տերը հաստատեր իր այն խոսքը, որ սիլոնացի Աքիայի միջոցով ասել էր Նաբատի որդի Հերոբովամի վերաբերյալ։

¹⁶ Երբ ողջ Իսրայելը տեսավ, որ արքան չլսեց իրեն, ժողովուրդը պատասխան տվեց արքային՝ ասելով.

«Մենք կիսելու ի՞նչ ունենք Դավթի հետ։

Մենք Հեսսեի որդու հետ այլևս ժառանգություն չունենք։

Գնա՛, Իսրայե՛լ, քո տները,

Իսկ դու հովվի՛ր Դավթի տունը»։

¹⁷ Իսրայելը գնաց իր տները, իսկ Հուդայի քաղաքներում բնակվող Իսրայելի որդիների վրա թագավորեց Ռոբովամը։

¹⁸ Եվ Ռոբովամ արքան ուղարկեց Ադոնիրամին, որը հարկերի վերակացուն էր, բայց ողջ Իսրայելը քարկոծելով սպանեց նրան, իսկ Ռոբովամ արքան շտապեց կառք բարձրանալ ու փախչել Երուսաղեմ։ ¹⁹ Իսրայելը ապստամբեց Դավթի տան դեմ, և այդպես է մինչև այսօր։

²⁰ Երբ ողջ Իսրայելը լսեց, որ Հերոբովամը վերադարձել է, մարդ ուղարկեցին, կանչեցին նրան ու թագավոր օծեցին Իսրայելի վրա։ Ոչ ոք չհարեց Դավթի տանը, բացի Հուդայի ու Բենիամինի ցեղերից։ ²¹ Ռոբովամը մտավ Երուսաղեմ և զորահավաք արեց Հուդայի տնից ու Բենիամինի ցեղից։ Հարյուր ութսուն հազար երիտասարդ պատերազմողներ ելան Իսրայելի տան դեմ, որպեսզի թագավորությունը վերադարձնեն Սողոմոնի որդի Ռոբովամին։

Սամեայի մարգարեությունը

(Բ Մն. 11.1-4)

²² Տերը խոսեց Աստծու մարդ Սամեայի հետ՝ ասելով. ²³ «Խոսի՛ր Հուդայի երկրի արքա Սողոմոնի որդի Ռոբովամի և Հուդայի տան ու Բենիամինի տան մնացած մարդկանց հետ ու նրանց ասա՛. ²⁴ “Այսպես է ասում Տերը. մի՛ ելեք ու մի՛ պատերազմեք ձեր եղբայրների՝ Իսրայելի որդիների դեմ, և թող յուրաքանչյուրը վերադառնա իր տունը, քանզի ինձնից եղավ այդ բանը”»։ Նրանք լսեցին Տիրոջ խոսքը և անսալով Տիրոջը՝ հետ դարձան։

Հերոբովամը հեռանում է Աստծուց

²⁵ Հերոբովամը Եփրեմի լեռան վրա կառուցեց Սյուքեմը և այնտեղ էր բնակվում։ Այնուհետև այնտեղից ելավ ու շինեց Փանուելը։ ²⁶ Հերոբովամն իր սրտում ասաց. «Իմ թագավորությունը նորից կվերադառնա Դավթի տանը, ²⁷ եթե այս մարդիկ գնան ու զոհ մատուցեն Երուսաղեմում՝ Տիրոջ տանը։ Այն ժամանակ այս մարդկանց միտքը կհակվի դեպի Տերն ու իրենց տերը՝ Հուդայի երկրի արքա Ռոբովամը, ինձ կսպանեն ու կանցնեն Հուդայի երկրի արքա Ռոբովամի կողմը»։ ²⁸ Արքան խորհեց ու ոսկե երկու հորթ պատրաստելով՝ ասաց ժողովրդին. «Բավական է մինչև Երուսաղեմ գնաք։ Ահա քո աստվածները, ո՜վ Իսրայել, որոնք քեզ դուրս բերեցին եգիպտացիների երկրից»։ ²⁹ Նա կուռքերից մեկը դրեց Դանում, իսկ մյուսը՝ Բեթելում։ ³⁰ Եվ այսպես մեղք գործվեց, որովհետև ժողովուրդը գնում էր մինչև Դան՝ հորթերից մեկին երկրպագելու։ ³¹ Նա բարձունքների վրա կառուցեց նաև մեհյաններ և Ղևիի ցեղին չպատկանող մարդկանց քրմեր դարձրեց։

Բեթելի պաշտամունքը դատապարտվում է

³² Հերոբովամը տոն կատարեց, ութերորդ ամսի տասնհինգերորդ օրը տոնական օր սահմանեց, ինչպես Հուդայի երկրում էր, և ելավ՝ Բեթելում պատրաստած զոհասեղանին երինջներ զոհելու։ Նա Բեթելում կառուցած մեհյանում քրմեր նշանակեց։ ³³ Ութերորդ ամսի տասնհինգերորդ օրը՝ տոնին, որ ինքն իրենից էր սահմանել, նա ելավ այն զոհասեղանը, որ կառուցել էր Բեթելում. տոնախմբություն սահմանեց Իսրայելի որդիների համար և զոհասեղան բարձրացավ, որպեսզի զոհեր մատուցի։

13

¹ Եվ Աստծու մարդը Տիրոջ թելադրանքով Հուդայից եկավ Բեթել, այն պահին, երբ Հերոբովամը զոհ էր մատուցում զոհասեղանին։ ² Տիրոջ խոսքն ուղղելով զոհասեղանին՝ նա ասաց. «Սեղա՛ն, ո՜վ սեղան, այսպես է ասում Տերը. “Դավթի տանը Հովսիա անունով մի որդի կծնվի, նա քեզ վրա կզոհաբերի մեհյանների քրմերին, որոնք քեզ վրա զոհ են մատուցում, և մարդկանց ոսկորները կայրի քեզ վրա”»։ ³ Իր ասածը հաստատելու համար նշան տվեց՝ ասելով. «Այս է նշանը, որ Տերն է ասել. “Հիմա զոհասեղանը կպատռվի, իսկ դրա վրայինը կթափվի”»։ ⁴ Երբ Հերոբովամ արքան լսեց Աստծու մարդու՝ Բեթելում գտնվող զոհասեղանին ուղղված խոսքերը, իր ձեռքը մեկնեց զոհասեղանի վրայից՝ ասելով. «Բռնե՛ք դրան», բայց դեպի նա մեկնված նրա ձեռքը գոսացավ, և չկարողացավ այն հետ քաշել իրեն, ⁵ զոհասեղանը պատռվեց, և զոհասեղանի վրայինը թափվեց, ըստ այն նշանի, որ տվել էր Աստծու մարդը Տիրոջ թելադրանքով։ ⁶ Հերոբովամ արքան ասաց Աստծու մարդուն. «Աղաչի՛ր Տիրոջը՝ քո Աստծուն, աղոթի՛ր ինձ համար, որ ձեռքս դեպի ինձ դառնա»։ Աստծու մարդն աղաչեց Տիրոջ առաջ, և արքայի ձեռքն առաջվա պես դեպի ինքը եկավ։ ⁷ Արքան, խոսելով Աստծու մարդու հետ, ասաց. «Ինձ հետ տո՛ւն մտիր, ճաշի՛ր, և ես քեզ պարգև կտամ»։ ⁸ Աստծու մարդն արքային ասաց. «Եթե քո տան կեսն էլ ինձ տաս, չեմ մտնի քո տունը, ոչ էլ հաց կուտեմ և ջուր կխմեմ այստեղ, ⁹ քանզի Տերն ինձ այսպիսի պատվեր է տվել. “Հաց չուտես այդտեղ, ջուր չխմես և չվերադառնաս այն ճանապարհով, որով գնացել ես”»։ ¹⁰ Այդպիսով նա այլ ճանապարհով գնաց Բեթելից և չվերադարձավ այն ճանապարհով, որով եկել էր Բեթել։

Բեթելի ծեր մարգարեն

¹¹ Մի ծեր մարգարե էր բնակվում Բեթելում։ Նրա որդիները եկան ու նրան պատմեցին այն բոլոր դեպքերը, որ այդ օրը կատարել էր Աստծու մարդը Բեթելում, ինչպես նաև այն խոսքերը, որ նա ասել էր արքային։ ¹² Հայրը հարցրեց նրանց. «Ո՞ր ճանապարհով գնաց նա»։ Որդիները ցույց տվեցին նրան այն ճանապարհը, որով գնացել էր Հուդայից եկած Աստծու մարդը։ ¹³ Նա ասաց որդիներին. «Էշը թամբե՛ք»։ Էշը թամբեցին, և նա նստեց էշի վրա, ¹⁴ գնաց Աստծու մարդու հետևից և նրան գտավ կաղնու տակ նստած։ Ծերը հարցրեց. «Դո՞ւ ես Հուդայից եկած Աստծու մարդը»։ Նա ասաց. «Ես եմ»։ ¹⁵ Ծերն ասաց նրան. «Ե՛կ ինձ հետ տուն և հա՛ց կեր»։ ¹⁶ Նա ասաց. «Չեմ կարող քեզ հետ վերադառնալ և քեզ մոտ գալ, հաց ուտել ու ջուր խմել այնտեղ, ¹⁷ քանի որ Տերն ինձ այսպիսի հրաման է տվել. “Հաց չուտես այդտեղ, ջուր չխմես և չվերադառնաս այն ճանապարհով, որով գնացել ես”»։ ¹⁸ Նա ասաց նրան. «Ես էլ եմ մարգարե քեզ պես. Տիրոջ հրեշտակը խոսեց ինձ հետ՝ ասելով. “Նրան քեզ մոտ՝ քո տո՛ւն տար, թող հաց ուտի ու ջուր խմի”»։

¹⁹ Խաբելով նրան տարավ իր հետ. նա հաց կերավ ու ջուր խմեց։ ²⁰ Եվ մինչ սեղան էին նստել, Տերը խոսեց այն մարգարեի հետ, որ Աստծու մարդուն իր տունն էր բերել։ ²¹ Իսկ սա, խոսելով Հուդայից եկած Աստծու մարդու հետ, ասաց. «Այսպես է ասում Տերը. “Քանի որ դու չհնազանդվեցիր Տիրոջ խոսքին, չպահեցիր այն հրամանը, որ Տերը՝ քո Աստվածն էր տվել քեզ, ²² վերադարձար, հաց կերար ու ջուր խմեցիր այնտեղ, որի մասին Տերն ասել էր քեզ. “Հաց չուտես և ջուր չխմես”, քո դիակը քո հայրերի գերեզմանը չի մտնելու”»։

²³ Հաց ուտելուց ու ջուր խմելուց հետո ծեր մարգարեն թամբեց նրա էշը, ու նա գնաց։ ²⁴ Ճանապարհին նրան հանդիպեց մի առյուծ, որը հոշոտեց նրան։ Նրա դիակն ընկած էր ճանապարհին, էշը նրա կողքին էր կանգնած, իսկ առյուծը՝ դիակի մոտ։ ²⁵ Եկան անցորդներ, տեսան ճանապարհին ընկած դիակն ու դիակի մոտ կանգնած առյուծին, մտան այն քաղաքը, որտեղ այդ ծերունի մարգարեն էր բնակվում, և պատմեցին իրենց տեսածը։ ²⁶ Երբ այս բանը լսեց Աստծու մարդուն ճանապարհից հետ դարձրած մարգարեն, ասաց. «Դա Աստծու մարդն է, որը Տիրոջ խոսքը չլսեց, Տերը նրան առյուծին հանձնեց, և սա բզկտելով սպանեց նրան, ինչպես որ Տերն ասել էր նրան»։ ²⁷ Նա խոսեց իր որդիների հետ՝ ասելով. «Էշը համետե՛ք»։ Նրանք համետեցին։ ²⁸ Նա գնաց ու գտավ ճանապարհին ընկած նրա դիակը, իսկ էշն ու առյուծը կանգնած էին դիակի մոտ։ Առյուծը չէր կերել Աստծու մարդու դիակը, ոչ էլ հոշոտել էր էշին։ ²⁹ Մարգարեն առավ Աստծու մարդու դիակը, դրեց իր էշի վրա և բերեց քաղաք, որ ողբան նրա վրա ու թաղեն։ Մարգարեն նրա դիակը թաղեց ³⁰ իր գերեզմանում։ Նրա վրա լաց եղան և ասացին. «Վա՜յ, եղբա՛յր»։ ³¹ Նրա վրա ողբալուց հետո ծերն ասաց իր որդիներին. «Երբ մեռնեմ, ինձ կթաղեք այն գերեզմանում, որտեղ թաղվեց Աստծու մարդը. նրա ոսկորների կողքի՛ն դրեք ինձ, որպեսզի իմ ոսկորները պահպանվեն նրա ոսկորների հետ, ³² որովհետև անպայման կկատարվի Տիրոջ այն խոսքը, որ ասվեց Բեթելում գտնվող զոհասեղանի ու Սամարիայի բարձրադիր կռատների մասին»։

Հերոբովամի ճակատագրական մեղքը

³³ Այս բաներից հետո էլ Հերոբովամը չհրաժարվեց իր չարիքներից. նա ժողովրդի մի մասին մեհյանների քրմեր էր դարձնում. ով ուզում էր, նրան ձեռնադրում էր, և նա դառնում էր մեհյանների քուրմ։ ³⁴ Այսպես Հերոբովամի տունը մեղք գործեց, և դրա համար էլ նա բնաջնջվեց ու վերացավ երկրի երեսից։

14

Հերոբովամի որդու մահը

¹ Այն ժամանակ հիվանդացավ Հերոբովամի որդի Աբիան, ² և Հերոբովամն իր կնոջն ասաց. «Վե՛ր կաց, կերպարանափոխվի՛ր, որ չիմանան՝ դու Հերոբովամի կինն ես, և գնա՛ Սելով։ Այնտեղ է ապրում Աքիա մարգարեն։ Նա գուշակել է, որ ես պիտի թագավորեմ այս ժողովրդի վրա։ ³ Հա՛ց վերցրու Աստծու մարդու համար, նրա որդիների համար՝ բլիթներ, չամիչ ու մի սափոր մեղր, գնա՛ նրա մոտ, և նա քեզ կհայտնի, թե ի՛նչ կպատահի մանկանը»։ ⁴ Հերոբովամի կինն այդպես էլ արեց. նա վեր կացավ գնաց Սելով, մտավ Աքիայի տունը, սակայն Աքիայի տեսողությունը վատացել էր. ծերության պատճառով աչքերը չէին տեսնում։ ⁵ Տերն ասաց Աքիային. «Հերոբովամի կինը եկել է քեզնից բան հարցնելու իր հիվանդ որդու մասին, իսկ դու այսպես և այսպես կասես նրան»։ ⁶ Երբ կինը ներս մտավ, արդեն կերպարանափոխված էր։ Երբ դռան բացվելուց և ներս մտնելուց հետո Աքիան լսեց նրա ոտնաձայնը, ասաց. «Մտի՛ր, Հերոբովամի՛ կին, ինչո՞ւ ես կերպարանափոխվել։ Ես պատվեր ունեմ քեզ դաժան բան ասելու։ ⁷ Գնա՛ և ասա՛ Հերոբովամին. այսպես է ասում Տերը՝ Իսրայելի Աստվածը. “Ես քեզ բարձրացրի ժողովրդի միջից, քեզ Իսրայելի իմ ժողովրդի վրա առաջնորդ դրեցի, ⁸ ես թագավորությունը խլեցի Դավթի տնից ու քեզ հանձնեցի, սակայն դու չեղար իմ ծառա Դավթի նման, որը պահում էր իմ պատվիրանները և իր ամբողջ սրտով հետևում էր ինձ, որպեսզի իմ աչքին հաճելի երևացածն անի։ ⁹ Դու ավելի շատ չարություն գործեցիր, քան քո բոլոր նախորդները. դու օտար աստվածներ ու ձուլածո կուռքեր պատրաստել տվեցիր, որպեսզի ինձ բարկացնես, և ինձ մոռացության մատնեցիր։ ¹⁰ Դրա համար Հերոբովամի տան վրա չարիք պիտի բերեմ, Հերոբովամի տնից մինչև վերջ պիտի բնաջնջեմ բոլոր արուներին, Իսրայելի մեջ ապրող ստրուկ ու ազատ մարդկանց, Հերոբովամի տունը պիտի ավլեմ այնպես, ինչպես աղբն են ավլում, մինչև որ իսպառ ոչնչացնեմ այն։ ¹¹ Հերոբովամի տնից ով քաղաքում մեռնի, շները պիտի ուտեն նրան, իսկ ով դաշտում մեռնի, երկնքի թռչունները պիտի կտցեն”։ Ահա Տերն է այսպես ասել։ ¹² Իսկ դու վեր կաց գնա՛ քո տունը. երբ քո ոտքերը քաղաք մտնեն, երեխան կմեռնի, ¹³ և ամբողջ Իսրայելը կողբա ու կթաղի նրան։ Հերոբովամի մարդկանցից միայն նրա որդին կմտնի գերեզման, քանի որ Տերը՝ Իսրայելի Աստվածը, Հերոբովամի տանը միայն նրա մեջ մի բարի բան տեսավ։ ¹⁴ Տերն իր համար մի թագավոր կհանի Իսրայելի վրա, որն այսօր իսկ բնաջինջ կանի Հերոբովամի տունը։ ¹⁵ Եվ արդ, ի՞նչ մնաց։ Տերը կհարվածի Իսրայելին, և նա կնմանվի ջրի մեջ շարժվող եղեգի։ Նա Իսրայելին կհեռացնի այս լավ երկրից, որ տվել էր նրանց հայրերին։ Նրանց գետի մյուս կողմը կքշի ի դիմաց այն բանի, որ նրանք իրենց համար պաշտամունքային փայտե սյուներ շինեցին, որպեսզի բարկացնեն Տիրոջը։ ¹⁶ Տերը կորստյան կմատնի Իսրայելին Հերոբովամի մեղքերի համար, որը մեղանչեց և Իսրայելին էլ մեղանչել տվեց»։ ¹⁷ Հերոբովամի կինը վեր կացավ ու գնաց Սարիրա։ Նա հազիվ էր տան դռնից ներս մտել, որ երեխան մեռավ, ¹⁸ և ամբողջ Իսրայելը ողբաց նրան ու թաղեց, ինչպես որ Տերն էր նախօրոք հայտնել իր ծառա Աքիա մարգարեի միջոցով։

Հերոբովամի մահը

¹⁹ Հերոբովամի մնացած գործերի մասին, թե նա ի՛նչ պատերազմներ մղեց, որքա՛ն ժամանակ թագավորեց, գրված է Իսրայելի թագավորների ժամանակագրության մեջ։ ²⁰ Հերոբովամը թագավորեց քսաներկու տարի և գնաց իր նախնիների մոտ։ Նրա փոխարեն թագավորեց իր որդի Նաբատը։

Հուդայի երկրի Ռոբովամ թագավորը

(Բ Մն. 11.5–12.15)

²¹ Սողոմոնի որդի Ռոբովամը թագավորեց Հուդայի երկրի վրա։ Ռոբովամը քառասունմեկ տարեկան էր, երբ թագավոր օծվեց և տասնյոթ տարի թագավորեց Երուսաղեմ քաղաքում, որը Տերն ընտրել էր Իսրայելի բոլոր ցեղերին պատկանող վայրերի միջից, որպեսզի այնտեղ պաշտվի իր անունը։ Նրա ամովնացի մոր անունն էր Նաամա։ ²² Ռոբովամը չար գործեր արեց Տիրոջ առաջ. նա նմանվեց իր նախնիներին և ընթացավ նրանց գործած մեղքերի ճանապարհով։ ²³ Նրանք իրենց համար պաշտամունքային քարե և փայտե սյուներ շինեցին ամեն բարձր բլրի վրա և տերևաշատ ամեն ծառի տակ։ ²⁴ Իրենց սոդոմական մեղքի տվեցին երկրում և գործեցին այն բոլոր գարշելի բաներն այդ ազգերի, որոնց քշել էր Տերն Իսրայելի որդիների առջևից։

Եգիպտոսի Սավսակիմ արքայի հարձակումը Հուդայի վրա

(Բ Մն. 12.1-12)

²⁵ Այն տարում, երբ Ռոբովամը թագավոր օծվեց, Եգիպտոսի արքա Սավսակիմը հարձակվեց Երուսաղեմի վրա, ²⁶ վերցրեց Տիրոջ տան, ինչպես նաև արքայի տան բոլոր գանձերը, ոսկե նիզակները, որոնք Դավիթն ավար էր վերցրել Սուբայի արքա Ադրաազարի ձեռքից ու տարել Երուսաղեմ։ Ավար վերցրեց նաև ոսկե զենքերը, որ պատրաստել էր Սողոմոնը։ ²⁷ Ռոբովամ արքան դրանց փոխարեն պղնձե զենքեր շինեց և հանձնեց պահակազորի զորագլուխներին, որոնք պահպանում էին արքայի տունը։ ²⁸ Երբ արքան մտնում էր Տիրոջ տունը, պահակազորը օգտագործում էր դրանք ու հետո կախում զինարանում։ ²⁹ Ռոբովամի մնացած գործերը և այն ամենը, ինչ արել է նա, նկարագրված են Հուդայի երկրի թագավորների ժամանակագրության մեջ։

³⁰ Ռոբովամն ու Հերոբովամը միշտ պատերազմի մեջ էին։ ³¹ Ռոբովամը գնաց իր նախնիների գիրկը և թաղվեց իր նախնիների մոտ, Դավթի քաղաքում։ Նրա ամովնացի մոր անունը Նաամա էր։ Նրա փոխարեն թագավորեց իր որդի Աբիուն։

15

Հուդայի երկրի Աբիու թագավորը

(Բ Մն. 13.1–14.1)

¹ Նաբատի որդի Հերոբովամի թագավորության տասնութերորդ տարում Հուդայի վրա թագավորեց Ռոբովամի որդի Աբիուն։ ² Նա երեք տարի թագավորեց Երուսաղեմում։ Նրա մայրն Աբեսաղոմի դուստր Մաաքան էր։ ³ Նա գնաց Տիրոջ առաջ իր հոր գործած բոլոր մեղքերի ճանապարհով, նրա սիրտն ուղիղ չէր Տիրոջ՝ իր Աստծու առջև, ինչպես մաքուր էր իր հայր Դավթի սիրտը։ ⁴ Սակայն Տերը՝ Աստված, հանուն Դավթի նկատմամբ ունեցած իր սիրո, Երուսաղեմում թողել էր մի ժառանգ, որպեսզի նրանից հետո նրա որդիները գոյատևեն նրա միջոցով, ու կանգուն պահի Երուսաղեմը, ⁵ քանի որ Դավիթն իր ամբողջ կյանքի ընթացքում ուղիղ էր ընթացել Տիրոջ առջև, չէր շեղվել այն ուղուց, որ պատվիրել էր իրեն, բացի քետացի Ուրիայի հետ կատարված դեպքից։ ⁶ Իրենց կենդանության բոլոր օրերում Աբիուն ու Հերոբովամը իրար դեմ պատերազմ էին մղում։ ⁷ Աբիուի մնացած գործերն ու նրա արարքները նկարագրված են Հուդայի երկրի թագավորների ժամանակագրության մեջ։ Պատերազմ էր մղվում Աբիուի ու Հերոբովամի միջև։

⁸ Աբիուն գնաց իր նախնիների գիրկը և թաղվեց Դավթի քաղաքում։ Նրա փոխարեն թագավորեց իր որդի Ասան։

Հուդայի երկրի Ասա թագավորը

(Բ Մն. 15.16–16.6)

⁹ Իսրայելի արքա Հերոբովամի թագավորության քսաներորդ տարում Ասան թագավորեց Հուդայի վրա։ ¹⁰ Նա քառասունմեկ տարի իշխեց Երուսաղեմում։ Նրա մայրը Աբեսաղոմի դուստր Մաաքան էր։ ¹¹ Ասան իր նախնի Դավթի նման ուղիղ ընթացք ունեցավ Տիրոջ առջև, ¹² երկրից վերացրեց սոդոմական մեղք գործողներին, ջնջեց ամեն տեսակ մոլորությունները, որ գործել էին իր նախորդները։ ¹³ Նա իր մայր Մաաքային զրկեց «Մեծ տիկին» կոչումից, քանզի նա Աստարտի կուռքեր պատրաստեց։ Ասան կործանեց նրա կուռքերը և հրով այրեց Կեդրոնի հեղեղատում։ ¹⁴ Թեև բարձունքների մեհյանները չվերացրեց, սակայն իր ամբողջ կյանքում նրա սիրտն ամբողջովին ուղիղ էր Տիրոջ նկատմամբ։ ¹⁵ Նա բերեց իր հոր սյուները [*  նվիրաբերած իրերը], նաև իրեն պատկանող արծաթե ու ոսկե սյուներն ու անոթները և դրեց Տիրոջ տանը։

Ասայի պատերազմը Իսրայելի դեմ

(Բ Մն. 16.1-6, 11–14)

¹⁶ Իրենց կենդանության բոլոր օրերում Ասան ու Իսրայելի արքա Բաասան իրար դեմ պատերազմ էին մղում։ ¹⁷ Իսրայելի արքա Բաասան հարձակվեց Հուդայի վրա և կառուցեց Ռաման, որ որևէ մեկը ելումուտ չունենա Հուդայի արքա Ասայի մոտ։ ¹⁸ Ասան վերցրեց Տիրոջ տան գանձարանում և թագավորի տան գանձարանում եղած ամբողջ արծաթն ու ոսկին, տվեց իր ծառաների ձեռքը, որ դրանք տանեն Դամասկոսում բնակվող ասորիների արքա Ազայելի որդի Աբենրայիմի որդի Ադերի որդուն՝ ասելով. ¹⁹ «Դաշինք թող կնքվի իմ ու քո միջև, ինչպես որ եղել է իմ հոր ու քո հոր միջև։ Ահավասիկ քեզ ընծա եմ ուղարկում արծաթ ու ոսկի, որպեսզի քանդես քո և Իսրայելի արքա Բաասայի միջև եղած դաշինքը, և նա հեռանա ինձնից»։ ²⁰ Ադերի որդին լսեց Ասա արքային, իր իշխաններին ուղարկեց Իսրայելի քաղաքների դեմ, հարվածեց Այինը, Դանը, Աբել Բեթմաաքան և ամբողջ Քեներեթը, մինչև Նեփթաղիմի ամբողջ երկիրը։ ²¹ Երբ Բաասան լսեց այդ, ընդհատեց Ռամայի շինությունը և վերադարձավ Թերսա։ ²² Ասա արքան Հուդայի բոլոր մարդկանց, որոնք Ենակի որդիների երկրում էին, հրամայեց, որ հանեն բերեն Ռամայի քարերն ու փայտերը, որ Բաասան օգտագործում էր շինության համար։ Ասա արքան դրանցով կառուցապատեց Բենիամինի ամբողջ բլուրը և դիտանոցը։ ²³ Ասայի մնացած գործերը, նրա զորությունը և այն ամենը, ինչ նա արել է, նաև իր կառուցած քաղաքը նկարագրված են Հուդայի երկրի թագավորների ժամանակագրության մեջ, բացի նրանից, որ ծերության օրերին նրա ոտքերը ցավեցին։

²⁴ Ասան գնաց իր նախնիների գիրկը և թաղվեց իր նախնիների մոտ՝ Դավթի քաղաքում։ Նրա փոխարեն թագավորեց իր որդին՝ Հովսափատը։

Նաբատը Իսրայելի թագավոր

²⁵ Հերոբովամի որդի Նաբատը Իսրայելում թագավորեց Հուդայի արքա Ասայի թագավորության երկրորդ տարում։ Նա Իսրայելում թագավորեց երկու տարի։ ²⁶ Նա չար գործեր արեց Տիրոջ առաջ, ընթացավ իր հոր գործած մեղքերի ճանապարհով և դրանցով էլ Իսրայելին մեղքի մեջ գցեց։ ²⁷ Նրա դեմ դավ նյութեց Աքիայի որդի Բաասան, որն Իսաքարի տան վրա էր իշխում։ Բաասան նրան սպանեց այլազգիների Գաբաթոն քաղաքում, երբ Նաբատն ու ամբողջ Իսրայելը պաշարել էին Գաբաթոնը։ ²⁸ Բաասան նրան սպանեց Հուդայի երկրի Ասա արքայի թագավորության երկրորդ տարում և նրա փոխարեն ինքը թագավորեց։ ²⁹ Երբ թագավոր դարձավ, կոտորեց Հերոբովամի ամբողջ տունը և Հերոբովամի տնից ոչ մի մարդու կենդանի չթողեց, բոլորին բնաջնջեց, ինչպես Տերն էր ասել իր ծառա սիլոնացի Աքիայի միջոցով, ³⁰ որովհետև Հերոբովամն ինքը շատ մեղքեր էր գործել և Իսրայելին էլ մեղքերի մեջ էր գցել ու դրանով զայրացրել Տիրոջը՝ Իսրայելի Աստծուն։

³¹ Նաբատի մնացած գործերն ու այն ամենը, ինչ արել է նա, նկարագրված են Իսրայելի թագավորների ժամանակագրության մեջ։ ³² Իրենց կենդանության բոլոր օրերում Ասան ու Իսրայելի արքա Նաբատն իրար դեմ պատերազմ էին մղում։

Իսրայելի Բաասա թագավորը

³³ Հուդայի երկրի արքա Ասայի թագավորության երրորդ տարում Իսրայելի վրա թագավորեց Աքիայի որդի Բաասան։ Նա քսանչորս տարի թագավորեց Թերսայում։ ³⁴ Նա չար գործեր արեց Տիրոջ առաջ, գնաց Նաբատի որդի Հերոբովամի գործած մեղքերի ճանապարհով և դրանցով Իսրայելին էլ մեղքերի մեջ գցեց։

16

¹ Տերը Անանիայի որդի Հեուի միջոցով խոսքն ուղղելով Բաասային՝ ասաց. ² «Թեև ես քեզ երկրի փոշուց բարձրացրի և Իսրայելին՝ իմ ժողովրդին, առաջնորդ դարձրի, սակայն դու գնացիր Հերոբովամի ճանապարհով և Իսրայելին՝ իմ ժողովրդին, մեղանչել տվեցիր, որ նրանց կուռքերով ինձ բարկացնես։ ³ Դրա համար ես թշնամի եմ հարուցելու քո և քո տան դեմ և քո տունը Նաբատի որդի Հերոբովամի տան նման եմ դարձնելու։ ⁴ Բաասայի տնից ով քաղաքում մեռնի, շները կուտեն նրան, իսկ ով դաշտում մեռնի, երկնքի թռչունները կկտցեն»։ ⁵ Բաասայի մնացած գործերը, նրա քաջագործություններն ու այն ամենը, ինչ նա արել է, նկարագրված են Իսրայելի թագավորների ժամանակագրության մեջ։ ⁶ Բաասան գնաց իր նախնիների գիրկը և թաղվեց Թերսայում։

Նրա փոխարեն թագավորեց իր որդի Ելան Ասա արքայի թագավորության քսաներորդ տարում։ ⁷ Արդեն ասել ենք, որ Տերն Անանիայի որդի Հեու մարգարեի միջոցով խոսել էր Բաասայի, նրա տան և այն բոլոր չարիքների մասին, որ նա գործել էր Տիրոջ նկատմամբ, թե ինչպես իր կատարած գործերով նա բարկացրել էր նրան, և Տերը պատուհասել էր նրան այնպես, ինչպես Հերոբովամին։

Իսրայելի Ելա թագավորը

⁸ Հուդայի երկրի արքա Ասայի թագավորության քսանվեցերորդ տարում Թերսայում Իսրայելի վրա երկու տարի թագավորեց Բաասայի որդի Ելան։ ⁹ Նրա ծառա Զամբրին՝ հեծելազորի կես մասի հրամանատարը, ըմբոստացավ նրա դեմ, երբ նա Թերսայում հանդերձապետ Արսայի տանը խմել հարբել էր։ ¹⁰ Զամբրին Հուդայի Ասա արքայի թագավորության քսանյոթերորդ տարում խփեց սպանեց նրան և նրա փոխարեն թագավոր դարձավ։ ¹¹ Երբ նա թագավորեց ու նստեց գահին, կոտորեց Բաասայի ամբողջ տոհմը՝ նրա մերձավորներին ու բարեկամներին, կենդանի չթողեց ոչ մի արու։ Զամբրին Բաասայի ամբողջ տոհմը բնաջնջեց, ¹² ինչպես որ Տերը Հեու մարգարեի միջոցով հայտնել էր Բաասայի տան մասին։ ¹³ Այս բոլորը եղան Բաասայի բոլոր մեղքերի, նրա որդի Ելայի մեղքերի պատճառով, քանի որ նրանք մեղանչել էին տվել Իսրայելին՝ իրենց կուռքերով բարկացնելով Տիրոջը՝ Իսրայելի Աստծուն։

¹⁴ Ելայի մնացած գործերը և այն ամենը, ինչ նա արել է, նկարագրված են Իսրայելի թագավորների ժամանակագրության մեջ։

Իսրայելի Զամբրի թագավորը

¹⁵ Հուդայի երկրի արքա Ասայի թագավորության քսանյոթերորդ տարում Զամբրին Թերսայում թագավորեց յոթ օր։ Այդ ժամանակ Իսրայելի զորքը բանակատեղի էր դրել այլազգիների Գաբաթոն բնակավայրում։ ¹⁶ Երբ բանակատեղիում գտնվող ժողովուրդը լսեց, որ Զամբրին զորք է հավաքել ու սպանել արքային, նույն օրը զորահրամանատար Ամրիին բանակատեղիում թագավոր դարձրեց Իսրայելի վրա։ ¹⁷ Ամրին ողջ Իսրայելի հետ ելավ Գաբաթոնից ու եկավ պաշարեց Թերսան։ ¹⁸ Երբ Զամբրին տեսավ, որ քաղաքը շուտով գրավելու են, մտավ արքունի սենյակներից մեկը և արքունի տունը հրի մատնեց։ Նա մեռավ ¹⁹ Տիրոջ առաջ իր գործած մեղքերի պատճառով, քանի որ գնացել էր Նաբատի որդի Հերոբովամի գործած մեղքերի ճանապարհով և դրանցով էլ Իսրայելին մեղքի մեջ գցել։

²⁰ Զամբրիի մնացած գործերն ու նյութած դավադրությունները նկարագրված են Իսրայելի թագավորների ժամանակագրության մեջ։

Իսրայելի Ամրի թագավորը

²¹ Այն ժամանակ Իսրայելի ժողովուրդը երկուսի բաժանվեց. ժողովրդի կեսը հարեց Գոնաթի որդի Թամնիին, որպեսզի նրան թագավոր դարձնի, իսկ ժողովրդի մյուս կեսը հարեց Ամրիին։ ²² Հաղթեցին Ամրիի հետևորդները, իսկ Գոնաթի որդի Թամնիին հարող ժողովուրդը պարտություն կրեց։ Այն ժամանակ մեռան Թամնին ու նրա եղբայր Հովրամը, և Թամնիից հետո թագավորեց Ամրին։ ²³ Հուդայի Ասա արքայի թագավորության երեսունմեկերորդ տարում Ամրին թագավորեց Իսրայելի վրա և իշխեց տասներկու տարի։ Նա Թերսայում թագավորեց վեց տարի։ ²⁴ Ամրին Սեմերոն լեռը նրա տիրոջից՝ Սամերից, գնեց երկու տաղանդ արծաթով, լեռը շենացրեց և շենացրած այդ լեռը նախկին տիրոջ՝ Սամերի անունով կոչեց Սեմերոն։

²⁵ Ամրին Տիրոջ առջև չարիք գործեց, բոլոր իրենից առաջ եղածներից ավելի չարություն գործեց, ²⁶ գնաց Նաբատի որդի Հերոբովամի ընթացած բոլոր ճանապարհներով, գործեց այն մեղքերը, որով մեղանչել տվեց Իսրայելին և իր կուռքերով բարկացրեց Տիրոջը՝ Իսրայելի Աստծուն։ ²⁷ Ամրիի մնացած գործերը, այն ամենը, ինչ նա արել է, նրա քաջագործությունները նկարագրված են Իսրայելի թագավորների ժամանակագրության մեջ։

²⁸ Ամրին գնաց իր նախնիների գիրկն ու թաղվեց Սամարիայում, և նրա փոխարեն թագավորեց իր որդին՝ Աքաաբը։

Իսրայելի Աքաաբ թագավորը

²⁹ Ամրիի որդի Աքաաբը թագավորեց Իսրայելի վրա։ Հուդայի երկրի արքա Ասայի թագավորության երեսունութերորդ տարում Ամրիի որդի Աքաաբը թագավորեց Իսրայելի վրա։ Նա քսաներկու տարի թագավորեց Սամարիայում։ ³⁰ Ամրիի որդի Աքաաբը Տիրոջ առջև առավել չար գտնվեց, քան իր բոլոր նախորդները։ ³¹ Բացի այն, որ նա գործում էր Նաբատի որդի Հերոբովամի նույն մեղքերը, նա կին առավ սիդովնացիների արքա Հոբաղի դուստր Հեզաբելին և գնաց ու պաշտեց Բահաղին, երկրպագեց նրան ³² և Սամարիայում կառուցած գարշելի կուռքերի տանը Բահաղի համար զոհասեղան կանգնեցրեց։ ³³ Աքաաբը պաշտամունքային սյուն կանգնեցրեց և իր գործերով առավել բարկացրեց Աստծուն, քան իրենից առաջ եղած Իսրայելի բոլոր թագավորները։ ³⁴ Նրա օրոք բեթելացի Աքիելը կառուցեց Երիքովը, իր անդրանիկ որդի Աբիրոնի հետ դրա հիմքերը դրեց, իսկ կրտսեր որդի Սեգուբի հետ դրա դարպասները կանգնեցրեց, համաձայն Տիրոջ խոսքի, որ ասվեց Նավեի որդի Հեսուի բերանով։

17

Եղիա մարգարեն և երաշտը

¹ Գաղաադի Թեզբե գյուղից սերած Եղիա մարգարեն ասաց Աքաաբին. «Կենդանի է Տերը՝ Զորությունների Աստվածը, Իսրայելի Աստվածը, որին ծառայում եմ. այս տարիներին ցող չի իջնի կամ անձրև չի գա, մինչև որ ես չասեմ»։ ² Տերն ասաց Եղիային. ³ «Գնա՛ այստեղից դեպի արևելք ու թաքնվի՛ր Քոռաթի հեղեղատի մոտ՝ Հորդանանի դիմաց։ ⁴ Այնտեղ ջուր կխմես հեղեղատից, իսկ ես հրաման կտամ ագռավներին, որ քեզ այնտեղ կերակրեն»։ ⁵ Եղիան գնաց և արեց Տիրոջ ասածի համաձայն. նա գնաց ու նստեց Քոռաթի հեղեղատի մոտ՝ Հորդանանի դիմաց։ ⁶ Ամեն առավոտ և երեկո ագռավները հաց ու միս էին բերում նրան, իսկ ջուրը նա հեղեղատից էր խմում։ ⁷ Որոշ ժամանակ անց հեղեղատը ցամաքեց, որովհետև անձրև չէր տեղում երկրի վրա։

Եղիան այրի կնոջ մոտ՝ Սարեփթայում

⁸ Տերն ասաց Եղիային. ⁹ «Վե՛ր կաց և գնա՛ սիդովնացիների Սարեփթա քաղաքը և այնտե՛ղ մնա։ Ես մի այրի կնոջ պատվիրել եմ, որ քեզ այնտեղ կերակրի»։ ¹⁰ Եղիան գնաց Սարեփթա ու հասավ քաղաքի դարպասը։ Մի կին այնտեղ փայտ էր հավաքում։ Եղիան, ձայն տալով նրա ետևից, ասաց. «Ինձ համար ամանով մի քիչ ջո՛ւր բեր, որ խմեմ»։ ¹¹ Կինը գնաց բերելու։ Եղիան, նրա հետևից ձայն տալով, ասաց. «Ինձ համար մի պատառ հա՛ց բեր»։ ¹² Կինն ասաց. «Կենդանի է Տերը՝ քո Աստվածը. ես մի նկանակ էլ չունեմ, բացի սափորում եղած մի բուռ ալյուրից և կուժի մեջ եղած մի քիչ յուղից։ Ահա մի երկու փայտի կտոր եմ հավաքում, որ գնամ ու հաց պատրաստեմ ինձ և երեխաներիս համար. այն կուտենք ու հետո կմեռնենք»։ ¹³ Եղիան ասաց նրան. «Քաջալերվի՛ր, գնա՛ և արա՛ այնպես, ինչպես ասացիր, սակայն նախ ինձ համար մի փոքրիկ նկանա՛կ պատրաստիր ու բե՛ր և ապա պատրաստի՛ր քեզ ու երեխաներիդ համար։ ¹⁴ Այսպես է ասում Տերը՝ Իսրայելի Աստվածը. “Ալյուրը չի պակասելու սափորում, և կուժի յուղը չի նվազելու մինչև այն օրը, երբ Տերն անձրև կտեղացնի երկրի վրա”»։ ¹⁵ Կինը գնաց և արեց այնպես, ինչպես ասել էր Եղիան։ Եղիան, կինն ու նրա որդիները կերան։ ¹⁶ Այդ օրվանից սափորում ալյուրը չպակասեց, և կուժի մեջ յուղը չնվազեց, ինչպես որ Եղիայի միջոցով ասել էր Տերը։

Եղիան վերակենդանացնում է այրի կնոջ որդուն

¹⁷ Այս դեպքերից հետո այնպես պատահեց, որ տանտիկնոջ որդին հիվանդացավ։ Հիվանդությունն այնքան ծանր էր, որ տղան մահացավ։ ¹⁸ Այրին ասաց Եղիային. «Ի՞նչ գործ ունես ինձ հետ, ո՜վ Աստծու մարդ, եկել ես ինձ մոտ, որ մեղքե՞րս հիշեցնես ու որդո՞ւս սպանես»։ ¹⁹ Եղիան ասաց կնոջը. «Տո՛ւր ինձ քո որդուն»։ Նա երեխային վերցրեց նրա գրկից, տարավ վերնատուն, որտեղ ինքն էր բնակվում, և նրան պառկեցրեց իր անկողնի վրա։ ²⁰ Եղիան աղաղակելով ասաց. «Ո՜վ Տեր, ահա տեսնում ես այս այրի կնոջը, որի մոտ ես բնակվում եմ։ Դու չարչարեցիր նրա որդուն և թողեցիր, որ մահանա»։ ²¹ Նա երեք անգամ փչեց մանկան վրա և աղաղակեց Տիրոջը՝ ասելով. «Տե՜ր իմ Աստված, այս երեխայի շունչն իրե՛ն թող վերադառնա»։ ²² Այդպես էլ եղավ. նա աղաղակեց, և Տերը լսեց Եղիայի ձայնը. երեխայի շունչը վերադարձավ նրա մարմնի մեջ, ու նա կենդանացավ։ ²³ Եղիան առավ մանկանը, վերնատնից տուն իջեցրեց նրան, տվեց իր մորը՝ ասելով. «Տե՛ս, որ կենդանի է քո որդին»։ ²⁴ Կինն ասաց Եղիային. «Հիմա համոզվեցի, որ դու Աստծու մարդն ես, և Տիրոջ ճշմարիտ խոսքն է քո բերանում»։

18

Եղիան հայտնում է երաշտի վերջը

¹ Շատ օրեր անցնելուց հետո՝ երրորդ տարում, Տերը խոսեց Եղիայի հետ և ասաց. «Գնա՛ ու երևա՛ Աքաաբին, և ես անձրև կտամ երկրին»։ ² Եղիան գնաց Աքաաբին ներկայանալու, իսկ Սամարիայում սաստիկ սով էր։ ³ Աքաաբը կանչեց իր հազարապետ Աբդիուին։ Աբդիուն սաստիկ երկյուղ էր կրում Տիրոջից. ⁴ երբ Հեզաբելը կոտորում էր Տիրոջ մարգարեներին, Աբդիուն հարյուր մարգարեի տարավ և նրանց հիսուն-հիսուն թաքցրեց այրերում և կերակրեց նրանց հացով ու ջրով։ ⁵ Արքան ասաց Աբդիուին. «Ե՛կ շրջենք այս երկրում, փնտրենք ու գտնենք բոլոր աղբյուրներն ու հեղեղատները, թերևս խոտ գտնենք ու կերակրենք ձիերին ու ջորիներին, որպեսզի անասունները չսատկեն»։ ⁶ Նրանք իրենց միջև բաժանեցին շրջելու ենթակա տեղերը։ Աքաաբն առանձին մի ճանապարհով գնաց, իսկ Աբդիուն առանձին՝ մի այլ ճանապարհով։

⁷ Երբ Աբդիուն ճանապարհին էր, Եղիան միայնակ ընդառաջ ելավ նրան։ Աբդիուն անմիջապես ընկավ երեսի վրա ու ասաց. «Մի՞թե դու ես, տե՛ր իմ Եղիա»։ ⁸ Եղիան ասաց. «Ես եմ։ Գնա ասա՛ քո տիրոջը. “Ահա Եղիան”»։ ⁹ Աբդիուն ասաց. «Ի՞նչ մեղք եմ գործել, որ քո ծառային մատնում ես Աքաաբի ձեռքը, որպեսզի սպանի ինձ։ ¹⁰ Կենդանի է Տերը՝ քո Աստվածը. չկա ազգ կամ թագավորություն, ուր իմ տերը մարդ ուղարկած չլինի քեզ որոնելու, սակայն երբ ասում էին՝ “Չկա”, նա այրել էր տալիս այն թագավորությունը կամ այն երկիրը, որտեղ քեզ չէր գտնում։ ¹¹ Արդ, ինձ ասում ես՝ “Գնա՛ ու պատմի՛ր քո տիրոջը, թե՝ “Ահա այստեղ է Եղիան”։ ¹² Եթե ես քո մոտից գնամ, և Տիրոջ հոգին քեզ վերցնի տանի մի երկիր, որը չգիտեմ, իսկ ես գնամ հայտնեմ Աքաաբին, և նա չգտնի քեզ, ապա ինձ կսպանի։ ¹³ Չէ՞ որ քո ծառան մանկությունից ի վեր երկյուղ է կրում Տիրոջից։ Մի՞թե չեն պատմել իմ տիրոջը, որ երբ Հեզաբելը կոտորում էր Տիրոջ մարգարեներին, ես Տիրոջ մարգարեներից հարյուր հոգի՝ հիսուն-հիսուն թաքցրել եմ տարբեր այրերում, նրանց կերակրել հացով ու ջրով։ ¹⁴ Եվ հիմա ասում ես ինձ՝ “Գնա ասա՛ քո տիրոջը՝ “Ահա այստեղ է Եղիան”, որ նա էլ ինձ սպանի»։ ¹⁵ Սակայն Եղիան ասաց. «Կենդանի է Զորությունների Տերը, որին ծառայում եմ. ես այսօր երևալու եմ Աքաաբին»։

Եղիան Աքաաբի առաջ

¹⁶ Աբդիուն գնաց Աքաաբի մոտ ու նրան պատմեց կատարվածը։ Աքաաբը վեր կացավ ու գնաց Եղիային դիմավորելու։ ¹⁷ Երբ Աքաաբը տեսավ Եղիային, ասաց. «Այդ դո՞ւ ես Իսրայելը տակնուվրա անողը»։ ¹⁸ Եղիան ասաց. «Ես չեմ Իսրայելը տակնուվրա անողը, այլ դու և քո հոր տունը, որ, լքելով Տիրոջը՝ ձեր Աստծուն, գնացել եք Բահաղի կուռքերին հարողների հետևից։ ¹⁹ Արդ, մա՛րդ ուղարկիր և ինձ մոտ՝ Կարմելոս լեռան վրա, հավաքի՛ր ողջ Իսրայելին, Ամոթի[45] [*  Բաալի] չորս հարյուր հիսուն մարգարեներին և Աստարտի չորս հարյուր մարգարեներին, որոնք սնվում են Հեզաբել թագուհու սեղանից»։

Եղիան և Բահաղի մարգարեները Կարմելոս լեռան վրա

²⁰ Աքաաբը մարդ ուղարկեց Իսրայելի չորս կողմերը և մարգարեներին հավաքեց Կարմելոս լեռան վրա։ ²¹ Եղիան, մոտենալով ամբողջ ժողովրդին, ասաց. «Մինչև ե՞րբ պիտի կաղաք երկու ոտքով։ Եթե Տերն է Աստված, գնացե՛ք նրա հետևից, և եթե Բահաղն է, նրա՛ հետևից գնացեք»։ Ժողովուրդը նրան պատասխան չտվեց։ ²² Եղիան ասաց ժողովրդին. «Միայն ես եմ մնացել Տիրոջ մարգարե, Բահաղի մարգարեները չորս հարյուր հիսուն հոգի են, մեհյանների կռապաշտ մարգարեները՝ չորս հարյուր։ ²³ Արդ, թող մեզ երկու եզ տան, նրանք թող իրենց համար ընտրեն մեկին, կտրատեն այն ու դնեն փայտերի վրա, սակայն կրակ թող չվառեն։ Ես էլ նույնն անեմ մյուս եզանը. դնեմ փայտերի վրա և կրակ չվառեմ։ ²⁴ Դրանից հետո դուք դիմե՛ք ձեր աստվածներին, իսկ ես՝ Տիրոջը՝ իմ Աստծուն։ Այն աստվածը, որ հրով կպատասխանի, նա՛ է Աստվածը»։ Ամբողջ ժողովուրդը պատասխանեց՝ ասելով. «Ճիշտ խոսք ասացիր»։ ²⁵ Եղիան ասաց Ամոթի [*  Բաալի] մարգարեներին. «Ձեզ համար մի զվարա՛կ ընտրեք և առաջինը դո՛ւք սկսեք, քանի որ բազմամարդ եք։ Տվե՛ք ձեր աստվածների անունը, սակայն կրակ մի՛ վառեք»։ ²⁶ Նրանք առան իրենց տրված զվարակը և այդպես արեցին. նրանք առավոտից մինչև կեսօր դիմելով Բահաղին՝ ասում էին. «Լսի՛ր մեզ, Բահա՜ղ, լսի՛ր մեզ»։ Բայց ո՛չ ձայն կար, ո՛չ պատասխան։ Նրանք ցատկոտում էին իրենց կառուցած զոհասեղանի շուրջը։ ²⁷ Երբ կեսօր եղավ, թեզբացի Եղիան ծաղրեց նրանց՝ ասելով. «Բարձրաձա՛յն կանչեք, չէ՞ որ աստված է, թերևս զբաղված է կամ գործ է կատարում, կամ գուցե քնած է և զարթնի»։ ²⁸ Նրանք բարձրաձայն կանչում էին և ըստ իրենց օրենքի՝ սրերով ու գեղարդներով իրենք իրենց կտրատում էին, մինչև որ արյուն հոսեց նրանց մարմնից։ ²⁹ Երբ երեկոն մոտենում էր, նրանք դեռ ոգեկոչում էին մինչև զոհ մատուցելու ժամանակը, սակայն ոչ մի ձայն չկար։ Այն ժամանակ թեզբացի Եղիան խոսեց Գարշելիքի մարգարեների հետ՝ ասելով. «Հեռո՛ւ կանգնեք, հիմա ես եմ իմ ողջակեզն անելու»։ Նրանք գնացին հեռացան։

³⁰ Եղիան ասաց ժողովրդին. «Մոտեցե՛ք ինձ»։ Ամբողջ ժողովուրդը մոտեցավ նրան։ Նա նորոգեց Տիրոջ կործանված զոհասեղանը, ³¹ առավ տասներկու քար, ըստ Իսրայելի ցեղերի թվի, ինչպես Տերն էր ասել նրան՝ «Իսրայե՛լ թող լինի քո անունը»։ ³² Նա քարերից Տիրոջ անունով զոհասեղան շինեց, նրա շուրջը փոս փորեց, որ կարող էր երկու գրիվ սերմ տանել, ³³ ապա փայտ դիզեց զոհասեղանի վրա, կտրատեց զվարակը և դասավորեց զոհասեղանին դրված փայտերի վրա։ ³⁴ Նա ասաց. «Չորս սափոր ջո՛ւր բերեք և թափե՛ք ողջակեզի ու ջարդված փայտերի վրա»։ Ապա ասաց. «Դարձյա՛լ արեք»։ Նրանք նույն բանը կրկին արեցին։ Եղիան ասաց. «Երրորդ անգամ էլ արե՛ք»։ Նրանք երրորդ անգամ էլ արեցին։ ³⁵ Ջուրը հոսում էր զոհասեղանի շուրջը, և փոսը լցվեց ջրով։

³⁶ Անարյուն զոհի մատուցման ժամին Եղիան, երկինք աղաղակելով, ասաց. «Տե՛ր, Աստվա՛ծ Աբրահամի, Իսահակի ու Իսրայելի, թող այսօր համոզվեն, որ դու՝ Տերը, Իսրայելի Աստվածն ես, և ես քո ծառան եմ, և ես արեցի այս գործերը։ ³⁷ Լսի՛ր ինձ, Տե՜ր, պատասխանի՛ր ինձ հրով, որ այս ժողովուրդը գիտենա, որ դու՝ Տերդ, Աստվածն ես, և դու հետ դարձրիր այս ժողովրդի սիրտը»։ ³⁸ Եվ երկնքից կրակ ընկավ Տիրոջից, լափեց ողջակեզն ու փայտերը, կլանեց փոսի հողն ու ջուրը։ ³⁹ Երբ ամբողջ ժողովուրդը տեսավ դա, ընկավ երեսնիվայր և ասաց. «Արդարև, Տերն Աստված է, Տերն Աստված է»։ ⁴⁰ Եղիան ասաց ժողովրդին. «Բռնե՛ք Բահաղի մարգարեներին, որ նրանցից ոչ ոք չփախչի»։ Նրանց բռնեցին։ Եղիան ամենքին իջեցրեց Կիսոնի հեղեղատն ու այնտեղ կոտորեց նրանց։

Անձրև տեղաց

⁴¹ Եղիան ասաց Աքաաբին. «Ելի՛ր, կե՛ր ու խմի՛ր, որովհետև անձրևի ձայն է լսվում»։ ⁴² Աքաաբը ելավ, որ ուտի և խմի, իսկ Եղիան բարձրացավ Կարմելոս լեռան գագաթը։ Նա մինչև գետին խոնարհվեց, երեսն առավ ծնկների մեջ ⁴³ ու ասաց իր ծառային. «Ելի՛ր ու նայի՛ր ծով տանող ճանապարհի կողմը»։ Ծառան ելավ, նայեց ու ասաց. «Ոչինչ չկա»։ Եղիան ասաց. «Դու յոթ անգա՛մ արա դա»։ ⁴⁴ Ծառան յոթ անգամ գնաց և այնպես պատահեց, որ յոթերորդ անգամը հազիվ լրացած, մարդու ձեռքի չափ մի փոքրիկ ամպ ջուր էր կաթեցնում։ Եղիան ասաց. «Գնա՛ ու ասա՛ Աքաաբին՝ “Լծի՛ր քո կառքերը և հեռացի՛ր, որ անձրևի չբռնվես”»։ ⁴⁵ Երբ սա այս ու այն կողմ էր դառնում, երկինքը մթնեց ամպերով ու հողմով, և սաստիկ անձրև սկսեց տեղալ։ Աքաաբը լալով գնաց Հեզրայել։ ⁴⁶ Տիրոջ ձեռքը Եղիայի վրա էր, որն իր մեջքը պինդ կապելով՝ վազեց և Աքաաբից առաջ հասավ Հեզրայելի մուտքի մոտ։

19

Եղիան Սինա լեռան վրա

¹ Աքաաբը իր կնոջը՝ Հեզաբելին, պատմեց այն ամենը, ինչ Եղիան արել էր, և թե ինչպես նա բոլոր մարգարեներին սրակոտոր էր արել։ ² Հեզաբելը սուրհանդակ ուղարկեց Եղիայի մոտ՝ ասելով. «Եթե դու Եղիան ես, իսկ ես՝ Հեզաբելը, ապա թող աստվածներն ինձ այսպես ու այսպես անեն և դեռ ավելին, եթե վաղը այս ժամին քեզ չանեմ այն, ինչ մարգարեներից յուրաքանչյուրին արեցիր դու»։ ³ Եղիան վախեցավ, ելավ գնաց այդտեղից, եկավ Հուդայի Բերսաբեե քաղաքը։ Այնտեղ թողնելով իր ծառային՝ ⁴ ինքը մեկ օրվա ճանապարհ գնաց դեպի անապատ և նստեց բևեկնի մի ծառի տակ։ Նա իր մահը ցանկացավ՝ ասելով. «Բավական է, Տե՛ր, ա՛ռ իմ հոգին ինձնից, քանզի ես իմ հայրերից ավելի լավ չեմ»։ ⁵ Նա քուն մտավ, ննջեց ծառի տակ։ Եվ ահա մեկը մոտեցավ նրան և ասաց. «Ելի՛ր ու կե՛ր»։ ⁶ Եղիան նայեց և տեսավ իր սնարից կախված հաճարի նկանակ և ջրի կուժ։ Նա ելավ, կերավ, խմեց և դարձյալ ննջեց։ ⁷ Տիրոջ հրեշտակը երկրորդ անգամ մոտեցավ նրան և ասաց. «Ելի՛ր, կե՛ր, որովհետև երկար ճանապարհ ես գնալու»։ ⁸ Նա վեր կացավ, կերավ ու խմեց և այդ կերակրի զորությամբ քառասուն օր ու քառասուն գիշեր քայլեց մինչև Աստծու լեռը՝ Քորեբ։

⁹ Նա մտավ քարայրն ու այնտեղ օթևանեց։ Եվ ահա նրան հասավ Տիրոջ խոսքը, որն ասում էր. «Ինչո՞ւ ես այստեղ, Եղիա՛»։ ¹⁰ Եղիան ասաց. «Նախանձախնդրություն ունեցա ամենակալ Տիրոջ համար, քանզի Իսրայելի որդիները լքեցին քեզ, քո զոհասեղանները կործանեցին և քո մարգարեներին սրակոտոր արեցին։ Միայն ես եմ մնացել, և ինձ էլ փնտրում են, որ սպանեն»։ ¹¹ Տերն ասաց. «Վաղն առավոտյան կելնես ու կկանգնես լեռան վրա՝ Տիրոջ առջև։ Տերը կանցնի, մի սաստիկ հողմ կբարձրանա, Տիրոջ առաջ կխորտակի լեռները, փուլ կտա ժայռերը, սակայն Տերն այն հողմի մեջ չի լինի։ Հողմից հետո երկրաշարժ կլինի, սակայն Տերը երկրաշարժի մեջ չի լինի։ ¹² Երկրաշարժից հետո կրակ կթափվի, սակայն Տերը կրակի մեջ չի լինի։ Կրակից հետո մեղմ օդի ձայն կլինի. Տերն այնտեղ կլինի»։ ¹³ Երբ Եղիան լսեց Աստծու ասածը, իր կաշվե վերարկուով ծածկեց երեսը, եկավ ու կանգնեց քարայրի տակ։ Եվ ահա մի ձայն ասաց նրան. «Ինչո՞ւ ես այստեղ, Եղիա՛»։ ¹⁴ Եղիան ասաց. «Նախանձախնդրություն ունեցա ամենակալ Տիրոջ համար, քանի որ Իսրայելի որդիներն անտեսեցին քո ուխտը, քո զոհասեղանները կործանեցին և քո մարգարեներին սրակոտոր արեցին։ Միայն ես եմ մնացել, և ինձ էլ փնտրում են, որ սպանեն»։ ¹⁵ Տերն ասաց նրան. «Վերադարձի՛ր քո ճանապարհով, գնա՛ Դամասկոսի անապատով, և երբ հասնես, Ազայելին ասորիների թագավոր կօծես, ¹⁶ Ամեսսեի որդի Հեուին՝ Իսրայելի թագավոր, իսկ աբելմաուլացի Սափատի որդի Եղիսեեին քո փոխարեն մարգարե կօծես։ ¹⁷ Այնպես կլինի, որ Ազայելի սրից ազատվածին Հեուն կսպանի, իսկ Հեուի սրից ազատվածին՝ Եղիսեեն։ ¹⁸ Իսրայելում կթողնես յոթ հազար տղամարդ՝ այնպիսի մարդիկ, որ չեն ծնրադրել Բահաղին և շրթունքներով նրան չեն համբուրել»։

Եղիսեեի կոչումը

¹⁹ Նա գնաց այնտեղից ու գտավ Սափատի որդի Եղիսեեին, որը տասներկու եզով վար էր անում, և եզները զույգ-զույգ նրա առաջ էին, իսկ ինքը տասներկուերորդ զույգն էր քշում։ Եղիան մոտեցավ և իր կաշվե վերարկուն նետեց Եղիսեեի վրա։ ²⁰ Եղիսեեն թողեց եզներն ու վազեց Եղիայի հետևից՝ ասելով. «Թող նախ համբուրեմ հորս ու մորս, ապա հետևեմ քեզ»։ Եղիան ասաց. «Գնա՛ ու վերադարձի՛ր, քեզ ի՞նչ եմ արել»։ ²¹ Վերադառնալով՝ նա մի զույգ եզ վերցրեց, մորթեց և հերկելու գործիքներով խորովեց դրանց միսը, բաժանեց ժողովրդին։ Մարդիկ կերան, իսկ ինքը գնաց Եղիայի հետևից ու ծառայեց նրան։

20

Սամարիայի պաշարումը

¹ Ադերի որդին՝ Ասորիքի արքան, հավաքեց իր ամբողջ զորքը և ելավ ու պաշարեց Սամարիան, իրեն հետ էին ևս երեսուներկու թագավորներ։ Բոլորը երիվարներով ու մարտակառքերով ելան պատերազմի ու պաշարեցին Սամարիան։ ² Նա սուրհանդակներ ուղարկեց քաղաք՝ Իսրայելի արքա Աքաաբի մոտ, ³ և ասաց նրան. «Այսպես է ասում Ադերի որդին. “Քո արծաթն ու ոսկին իմն են, քո կանայք ու գեղեցիկ որդիները իմն են”»։ ⁴ Իսրայելի արքան պատասխան տվեց՝ ասելով. «Քո ասածի պես, տե՛ր իմ արքա, քոնն եմ ես, և քոնն է իմ ամեն ինչը»։ ⁵ Սուրհանդակները նորից եկան ու ասացին. «Այսպես է ասում Ադերի որդին. “Ես լուր էի ուղարկել, որ քո արծաթն ու ոսկին, քո կանայք ու որդիներն ինձ տաս։ ⁶ Արդ, վաղն այս ժամին կուղարկեմ իմ ծառաներին, որոնք խուզարկելու են քո և քո ծառաների տները և ինչ որ իրենց աչքերին ցանկալի թվա, ինչի էլ որ իրենց ձեռքերը մեկնեն, պիտի առնեն”»։ ⁷ Իսրայելի արքան կանչեց երկրի բոլոր ծերերին և ասաց. «Իմացե՛ք ու տեսե՛ք, որ նա չարիք է ուզում, քանզի ինձ մոտ մարդ էր ուղարկել՝ պահանջելով իմ տղաներին ու աղջիկներին, իմ արծաթն ու ոսկին, բայց ես չմերժեցի նրան»։ ⁸ Ծերերն ու ամբողջ ժողովուրդը նրան ասացին. «Մի՛ լսիր նրան ու հանձնառու մի՛ եղիր»։ ⁹ Եվ նա Ադերի սուրհանդակներին ասաց. «Ձեր տեր արքային ասե՛ք. “Ինչի համար որ առաջին անգամ մարդ էիր ուղարկել քո ծառային, կանեմ, իսկ այս բանը չեմ կարող անել”»։ Մարդիկ գնացին ու պատասխանը հաղորդեցին նրան։

¹⁰ Ադերի որդին նրա մոտ մարդ ուղարկեց և ասաց. «Այսպես և այսպես թող անեն ինձ աստվածները և ավելին թող անեն, եթե Սամարիայի հողը բավի իմ հետևակի բոլոր զինվորներին մեկ բռաչափով»։ ¹¹ Իսրայելի արքան պատասխան տվեց ու ասաց. «Շա՜տ եղավ, թող կուզիկը չպարծենա ուղիղ կանգնողի նման»։ ¹² Ադերի որդին այս պատասխան խոսքերը լսեց, երբ որ բոլոր թագավորների հետ վրաններում գինարբուքի մեջ էր։ Նա ասաց իր ծառաներին. «Պաշարե՛ք»։ Եվ քաղաքը պաշարեցին։

Իսրայելացիները հաղթական

¹³ Եվ ահա մի մարգարե մոտեցավ Իսրայելի Աքաաբ արքային ու ասաց. «Այսպես է ասում Տերը. “Տեսնո՞ւմ ես այս մեծ ամբոխը. ահա նրան այսօր քո ձեռքն եմ մատնելու, որպեսզի համոզվես, որ ես եմ Տերը”»։ ¹⁴ Աքաաբը հարցրեց. «Ո՞ւմ միջոցով»։ Մարգարեն ասաց. «Այսպես է ասում Տերը. “Գավառների իշխաններին ծառայողների միջոցով”»։ Աքաաբը հարցրեց. «Ո՞վ պետք է սկսի պատերազմը»։ Մարգարեն ասաց. «Դո՛ւ»։ ¹⁵ Աքաաբը հաշվեց գավառների իշխանների ծառաներին ու տեսավ, որ նրանք երկու հարյուր երեսուն հոգի են։ Ապա հաշվեց ամբողջ ժողովրդին, զորքի բոլոր անդամներին և տեսավ, որ յոթ հազար մարդ կար։ ¹⁶ Կեսօրին նա հարձակման անցավ։ Ադերի որդին և նրա երեսուներկու դաշնակից թագավորները գինարբուքի մեջ էին վրաններում։ ¹⁷ Նախ հարձակում գործեցին գավառների իշխանների ծառաները։ Լուր ուղարկեցին Ադերի որդուն, պատմեցին նրան ու ասացին. «Սամարիայից մարդիկ են դուրս եկել»։ ¹⁸ Ադերի որդին նրանց ասաց. «Եթե խաղաղության համար են դուրս եկել, կենդանի՛ բռնեք նրանց, եթե պատերազմի համար են եկել, դարձյա՛լ կենդանի բռնեք»։ ¹⁹ Քաղաքից դուրս եկան գավառների իշխանների ծառաները, նրանց հետևից՝ նաև զորքը, ²⁰ և ամեն մեկն սպանեց նրան, ով հանդիպեց իրեն։ Ասորիները փախան, և Իսրայելը հալածեց նրանց։ Ասորիքի արքան՝ Ադերի որդին, ձի հեծած, հազիվ փրկվեց երեք ձիավորների հետ։ ²¹ Իսրայելի արքան առաջ շարժվեց, վերցրեց երիվարներն ու մարտակառքերը և ասորիներին մեծ հարվածներ հասցրեց։

²² Մարգարեն մոտեցավ Իսրայելի արքային ու ասաց նրան. «Զորացի՛ր ու իմացի՛ր, տե՛ս, թե ի՛նչ ես անելու, քանի որ հաջորդ տարի Ադերի որդին՝ ասորիների արքան, հարձակվելու է քեզ վրա»։

Նոր հաղթանակներ

²³ Ասորիքի արքայի ծառաներն ասացին նրան. «Իսրայելի Աստվածը լեռների Աստված է և ոչ թե դաշտերի Աստված, այդ պատճառով էլ նրանք հաղթեցին մեզ։ Եթե նրանց դեմ պատերազմենք հարթ վայրում, կհաղթենք նրանց։ ²⁴ Այս բա՛նն արա. թագավորներին գահընկե՛ց արա և նրանց փոխարեն նախարարնե՛ր նշանակիր։ ²⁵ Քո կորցրած զորքերի փոխարեն զորքեր կտանք, երիվարների փոխարեն՝ երիվարներ, մարտակառքերի փոխարեն՝ մարտակառքեր. նրանց դեմ պատերազմենք հարթ վայրում ու հաղթենք»։ Նա անսաց նրանց խոսքերին և այդպես էլ արեց։

²⁶ Հետևյալ տարին Ադերի որդին աշխարհագիր անցկացրեց Ասորիքում, ելավ գնաց Ափեկա, որ պատերազմի Իսրայելի դեմ։ ²⁷ Իսրայելի որդիները նույնպես աշխարհագիր անցկացրին և երկու գնդի բաժանվելով՝ եկան կանգնեցին նրանց առջև։ Իսրայելի որդիները ասորիների դեմ ճակատ կազմեցին այծերի երկու հոտերի պես, մինչդեռ ասորիները ծածկել էին երկիրը։

²⁸ Աստծու մարդը մոտեցավ Իսրայելի արքային և ասաց. «Այսպես է ասում Տերը. “Քանի որ ասորիներն ասացին՝ Տերը լեռների Աստված է և ոչ թե դաշտերի Աստված, նա այդ մեծ զորքը քո ձեռքն է հանձնելու, որպեսզի համոզվեն, որ ես եմ Տերը”»։ ²⁹ Նրանք, ճակատ կազմած, յոթ օր իրար դեմ դիմաց էին, իսկ յոթերորդ օրը պատերազմը բորբոքվեց։ Իսրայելը մեկ օրում հարյուր հազար ասորի հետևակ կոտորեց, ³⁰ իսկ մնացածները փախան իրենց քաղաքը՝ Ափեկա, և պարիսպը փուլ եկավ մնացած քսանյոթ հազար ասորիների վրա։ Ադերի որդին փախավ ու իր պալատում մի սենյակից մյուս սենյակն էր վազում։

³¹ Նրա ծառաներն ասացին. «Մենք լսել ենք, որ Իսրայելի տան թագավորները գթասիրտ են։ Մեր մեջքերին քուրձեր կապենք, մեր գլուխներին՝ չվաններ, գնանք Իսրայելի թագավորի մոտ, թերևս մեր կյանքը խնայի»։ ³² Նրանք իրենց մեջքերին քուրձեր ու գլուխներին չվաններ կապեցին և ասացին Իսրայելի թագավորին. «Քո ծառան՝ Ադերի որդին, ասում է. “Խնայի՛ր կյանքս”»։ Իսկ նա ասաց. «Եթե նա դեռ կենդանի է, իմ եղբայրն է»։ ³³ Նրա մարդիկ, դյութելով արքային, նվերներ տվեցին նրան և այս խոսքերը նրա բերանից առնելով՝ ասացին. «Քո եղբայրը՝ Ադերի որդին, այստեղ է»։ Ասաց. «Գնացե՛ք ու բերե՛ք նրան»։ Ադերի որդին եկավ Աքաաբի մոտ, և նրան մարտակառք նստեցրին թագավորի կողքին։ ³⁴ Ադերի որդին ասաց. «Այն քաղաքները, որ իմ հայրը գրավել էր քո հորից, քեզ եմ վերադարձնում։ Դու հարկեր կվերցնես Դամասկոսից, ինչպես իմ հայրը վերցնում էր Սամարիայից»։ Աքաաբն ասաց. «Ես էլ դաշինք կնքելով՝ քեզ կարձակեմ»։ Նա դաշինք կնքեց նրա հետ և արձակեց նրան։

Մարգարեն դատապարտում է Աքաաբի վարմունքը

³⁵ Մարգարեների որդիներից մեկը, Տիրոջ խոսքին անսալով, ասաց իր ընկերոջը. «Հարվածի՛ր ինձ»։ Սակայն մարդը չուզեց հարվածել նրան։ ³⁶ Նա ասաց նրան. «Քանի որ Տիրոջ ձայնին չհնազանդվեցիր, հենց որ ինձնից հեռանաս, մի առյուծ քեզ կբզկտի»։ Երբ սա հեռացավ նրանից, մի առյուծ հանդիպեց նրան ու հոշոտեց։ ³⁷ Նա, մի ուրիշ մարդու հանդիպելով, ասաց. «Հարվածի՛ր ինձ»։ Այս մարդը հարվածեց ու վիրավորեց նրան։ ³⁸ Մարգարեն եկավ և կանգնելով ճանապարհին՝ սպասեց թագավորին ու չճանաչվելու համար շորով կապեց իր աչքը։ ³⁹ Երբ արքան անցնում էր այնտեղից, նա ասաց արքային. «Երբ ես՝ քո ծառան, զորքի հետ պատերազմ էի գնացել, մի մարդ, ինձ մոտ բերելով մեկին, ասաց. “Այս մարդուն պահի՛ր, իսկ եթե ձեռքիցդ փախչի, քո կյանքը կկորչի նրա կյանքի փոխարեն, կամ մի տաղանդ արծաթ կտաս ինձ”։ ⁴⁰ Եվ մինչ քո ծառան այս ու այն կողմ էր նայում, նա արդեն չկար»։ Իսրայելի արքան նրան ասաց. «Իմ ըմբռնումով դա դավ է, ուրեմն սպանե՞լ ես նրան»։ ⁴¹ Նա շորն անմիջապես հեռացրեց աչքերից, և Իսրայելի արքան ճանաչեց նրան. նա այնտեղի մարգարեներից էր։ ⁴² Մարգարեն ասաց նրան. «Այսպես է ասում Տերը. “Քանի որ դու վտանգավոր մարդուն ազատեցիր իմ ձեռքից, ուստի դու քո կյանքով կհատուցես նրա կյանքի փոխարեն, իսկ քո ժողովուրդը՝ նրա ժողովրդի փոխարեն”»։ ⁴³ Իսրայելի արքան գնաց իր տունը՝ Սամարիա, տխուր ու հուսահատ։

21

Նաբոթի այգին

¹ Այս դեպքերից հետո այսպիսի մի բան պատահեց. հեզրայելացի Նաբոթը մի այգի ուներ Սամարիայի Աքաաբ արքայի կալի մոտ։ ² Արքան Նաբոթին ասաց. «Ի՛նձ տուր քո այգին, որ ինձ համար բանջարանոց դառնա, որովհետև այն իմ տան մոտ է։ Դրա փոխարեն դրանից ավելի լավ այգի կտամ քեզ, և եթե կամենաս, այգու արժեքը արծաթով կվճարեմ, և սա ինձ համար բանջարանոց կլինի»։ ³ Նաբոթն ասաց արքային. «Աստված մի՛ արասցե, որ իմ հայրերի ժառանգությունը քեզ տամ»։

⁴ Աքաաբն իր տուն եկավ խռոված և անտրամադիր այն խոսքերի պատճառով, որ հեզրայելացի Նաբոթն ասել էր՝ «Իմ հայրերի ժառանգությունը քեզ չեմ տա»։ Նա ննջեց իր մահճում, երեսը ծածկեց և հաց չկերավ։ ⁵ Նրա մոտ եկավ կինը՝ Հեզաբելը, խոսեց նրա հետ և ասաց. «Ինչո՞ւ է հոգիդ խռովված, և հաց չես ուտում»։ ⁶ Աքաաբն ասաց. «Հեզրայելացի Նաբոթին ասացի. “Ի՛նձ տուր քո այգին արծաթի դիմաց և եթե չուզենաս, դրա փոխարեն քեզ ուրիշ այգի կտամ”, իսկ նա ասաց՝ “Իմ հայրերի ժառանգությունը քեզ չեմ տա”»։ ⁷ Նրա կին Հեզաբելն ասաց. «Դու այդպե՞ս ես թագավորություն անում Իսրայելի վրա։ Վե՛ր կաց, հա՛ց կեր ու սթափվի՛ր, և ես քեզ կհանձնեմ հեզրայելացի Նաբոթի այգին»։

Նաբոթի սպանությունը

⁸ Նա հրովարտակ գրեց Աքաաբի անունով, կնքեց նրա մատանիով և հրովարտակն ուղարկեց ծերերին ու նրա քաղաքի ազատներին, որոնք Նաբոթի հետ էին ապրում։ ⁹ Հրովարտակում այսպես էր գրված. «Ծո՛մ պահեք և Նաբոթին ժողովրդի մեջ գլխավոր տեղո՛ւմ նստեցրեք, ¹⁰ իսկ նրա դիմաց թող նստեն երկու անօրեն մարդիկ, որ վկայեն նրա մասին ու ասեն՝ “Դու հայհոյեցիր Աստծուն ու արքային”, և թող դուրս հանեն Նաբոթին ու քարկոծեն, մինչև որ մեռնի»։

¹¹ Այդ քաղաքում բնակվող ծերերն ու ազատները արեցին այնպես, ինչպես որ գրված էր Հեզաբելի՝ նրանց ուղարկած նամակներում։ ¹² Ծոմապահություն նշանակեցին, Նաբոթին նստեցրին ժողովրդի մեջ գլխավոր տեղում, ¹³ եկան երկու անօրեններ, նստեցին նրա դիմաց և վկայեցին ամբողջ ժողովրդի առաջ Նաբոթի ապստամբության մասին ու ասացին. «Նաբոթն հայհոյեց Աստծուն և արքային»։ Դրանից հետո նրան քաղաքից դուրս հանեցին և քարկոծելով սպանեցին։ ¹⁴ Լուր ուղարկեցին Հեզաբելին, թե՝ «Նաբոթը քարկոծվելով մեռավ»։

¹⁵ Երբ Հեզաբելը լսեց, որ Նաբոթը քարկոծվել ու մահացել է, ասաց Աքաաբին. «Գնա ժառանգի՛ր հեզրայելացի Նաբոթի այգին, որը չէր ուզում քեզ արծաթով ծախել, քանի որ Նաբոթը կենդանի չէ. նա մեռել է»։ ¹⁶ Երբ Աքաաբը լսեց, որ հեզրայելացի Նաբոթը մեռել է, իր հագուստները պատառոտեց ու քուրձ հագավ։ Դրանից հետո Աքաաբը եկավ ու ժառանգեց հեզրայելացի Նաբոթի այգին։

¹⁷ Տերը, խոսելով թեզբացի Եղիայի հետ, ասաց. ¹⁸ «Վեր կաց գնա՛ Իսրայելի Աքաաբ արքայի մոտ՝ Սամարիա։ Նա գնացել է Նաբոթի այգին ժառանգելու։ ¹⁹ Կխոսես նրա հետ ու կասես. այսպես է ասում Տերը. “Քանի որ սպանեցիր ու ժառանգեցիր նրա ունեցվածքը, ապա դրա համար այսպես է ասում Տերը. “Այն տեղում, որտեղ շներն ու խոզերը լափեցին Նաբոթի արյունը, նույն տեղում լափելու են նաև քո արյունը, և բոզերը լողանալու են քո արյան մեջ”»։ ²⁰ Աքաաբն ասաց Եղիային. «Ո՜վ իմ թշնամի, գտա՞ր ինձ»։ Եղիան ասաց. «Գտա, քանի որ իզուր հպարտացար՝ չարիք գործելով Տիրոջ առջև ու բարկացնելով նրան։ ²¹ Ահա ես քեզ պիտի պատուհասեմ, քեզ վրա կրակ պիտի թափեմ, Աքաաբի տոհմից պիտի կոտորեմ և Իսրայելից պիտի վերացնեմ բոլոր արուներին՝ ծառա թե ազատ։ ²² Քո տունը դարձնելու եմ Նաբատի որդի Հերոբովամի տան նման և Աքիայի որդի Բաասի տան նման, որովհետև դու բարկացրիր ինձ և Իսրայելին մեղանչել տվեցիր։ ²³ Տերը Հեզաբելի մասին ասաց. “Շները պիտի ուտեն նրան Հեզրայելի պարսպի մոտ”։ ²⁴ Աքաաբ թագավորի մարդկանցից քաղաքում մեռածներին շներն են ուտելու, իսկ դաշտում մեռածների դիակները երկնքի թռչուններն են կտցելու»։

²⁵ Իզուր ամբարտավանացավ Աքաաբը՝ չարիք գործելով Տիրոջ առջև։ Նրան իր կինը՝ Հեզաբելը, հիմարացրեց։ ²⁶ Նա, կուռքեր պաշտելով, գարշելի դարձավ, արեց այն ամենը, որ ամորհացին էր արել, որին Տերը վերացրել էր Իսրայելի որդիների առջևից։

Աքաաբը զղջում է իր վարմունքի համար

²⁷ Այս խոսքերը լսելով՝ արքան զղջաց Տիրոջ առջև, լալով գնաց, պատառոտեց իր պատմուճանը, քուրձ հագավ իր մարմնի վրա և ծոմ պահեց. նա քուրձ հագավ այն օրը, երբ սպանվեց հեզրայելացի Նաբոթը։ Նա գլխիկոր էր ման գալիս։ ²⁸ Տերը Աքաաբի մասին ասաց իր ծառա Եղիային. ²⁹ «Տեսա՞ր, որ զղջաց իմ առջև։ Եվ քանի որ իմ առջև ընդունեց իր մեղքերը, նրան չարիք չեմ պատճառի իր կենդանության օրոք, այլ նրա որդո՛ւ օրոք չարիք կթափեմ նրա տան վրա»։

22

Աքաաբն ուզում է վերագրավել Ռամաթը

(Բ Մն. 18.2-27)

¹ Երեք տարի պատերազմ չեղավ Ասորիքի ու Իսրայելի միջև։ ² Երրորդ տարում Հուդայի արքա Հովսափատը եկավ Իսրայելի արքայի մոտ։ ³ Իսրայելի արքան ասաց իր ծառաներին. «Գիտե՞ք, որ Գաղաադ երկրի Ռամաթ քաղաքը մերն է, իսկ մենք լռել ենք, այն չենք գրավում ասորիների արքայից»։ ⁴ Իսրայելի արքան ասաց Հովսափատին. «Մեզ հետ կհարձակվե՞ս Գաղաադի Ռամաթ քաղաքի վրա»։ Հովսափատն ասաց Իսրայելի արքային. «Մի ենք ես և դու, մի են իմ զորքն ու քո զորքը, մի են իմ երիվարներն ու քո երիվարները»։

⁵ Հուդայի երկրի արքա Հովսափատն ասաց Իսրայելի արքային. «Տիրոջ կամքը հարցրո՛ւ այսօր»։ ⁶ Իսրայելի արքան հավաքեց բոլոր մարգարեներին, մոտավորապես չորս հարյուր մարդ, և հարցրեց նրանց. «Գաղաադի Ռամաթ քաղաքի վրա պատերազմի գնա՞մ, թե՞ մնամ տեղում»։ Նրանք ասացին. «Գնա՛, Տերն այն անպայման արքայի ձեռքն է հանձնելու»։ ⁷ Հովսափատն ասաց Իսրայելի արքային. «Այստեղ արդյոք Տիրոջ մարգարե կա՞, թե՞ ոչ, որ նրա՛ միջոցով Տիրոջը հարցնենք»։ ⁸ Իսրայելի արքան ասաց Հովսափատին. «Այստեղ կա մի մարդ, որի միջոցով կարելի է հարցնել Տիրոջը, սակայն ես ատում եմ նրան, որովհետև ինձ համար բարի բան չի գուշակում, այլ չար։ Դա Հեմլեի որդի Միքիան է»։ Հուդայի երկրի արքա Հովսափատն ասաց. «Արքան թող այդպիսի բան չասի»։

⁹ Իսրայելի արքան, մի ներքինի կանչելով, ասաց. «Անմիջապես այստե՛ղ բեր Հեմլեի որդի Միքիային»։ ¹⁰ Իսրայելի արքան և Հուդայի երկրի արքա Հովսափատը զինավառ նստել էին ամեն մեկն իր աթոռին, Սամարիայի դարպասների մոտ, և բոլոր մարգարեները մարգարեություն էին անում նրանց առջև։ ¹¹ Քենաանայի որդի Սեդեկիան, որը երկաթե եղջյուրներ էր սարքել տվել, ասաց. «Այսպես է ասում Տերը. “Սրանցո՛վ ես հարվածելու ասորիներին, մինչև որ բնաջնջվեն”»։ ¹² Բոլոր մարգարեները նույնպես մարգարեանում էին՝ ասելով. «Գնա՛ Գաղաադի Ռամաթ քաղաքը և հաջողություն կունենաս. Տերը քո ձեռքը կհանձնի ասորիների արքային»։

Միքիա մարգարեն կանխատեսում է պարտությունը

¹³ Սուրհանդակը, որ գնացել էր Միքիային կանչելու, նրան ասաց. «Ահավասիկ բոլոր մարգարեները միաբերան բարի բան են գուշակում արքայի համար։ Արդ, քո խոսքն էլ թող նրանց ասածին համահունչ լինի, դո՛ւ էլ բարի բան գուշակիր»։ ¹⁴ Միքիան ասաց. «Կենդանի է Տերը. ինչ որ Տերն ինձ ասի, ա՛յն կհաղորդեմ»։

¹⁵ Նա եկավ արքայի մոտ, և արքան հարցրեց նրան. «Միքիա՛, Գաղաադի Ռամաթ քաղաքի դեմ պատերազմելու գնա՞մ, թե՞ տեղում մնամ»։ Միքիան ասաց. «Գնա՛, արքա՛, և հաջողություն կգտնես, և Տերը քաղաքը քո ձեռքը կհանձնի»։ ¹⁶ Արքան ասաց նրան. «Քեզ կրկին եմ երդվեցնում, որ ինձ ճշմարտությունն ասես հանուն Տիրոջ»։ ¹⁷ Միքիան ասաց. «Ո՛չ, այդ չէ ճշմարտությունը։ Ես տեսա, թե ինչպես ողջ Իսրայելը ցրված է լեռների վրա իբրև ոչխարների հոտ, որ չունի հովիվ։ Եվ Տերն ասաց. “Դրանք տերեր չունեն, թող ամեն մեկն իր տունը դառնա խաղաղությամբ”»։ ¹⁸ Իսրայելի արքան ասաց Հուդայի արքա Հովսափատին. «Ես քեզ չասացի՞, թե նա ինձ համար բարի բան չի մարգարեանա, այլ միայն չար բան»։ ¹⁹ Միքիան ասաց. «Այդպես չէ, ոչ թե իմ, այլ Տիրո՛ջ պատգամը լսիր։ Ես տեսա Տիրոջը՝ Իսրայելի Աստծուն՝ նստած իր աթոռին, և երկնքի բոլոր զորքերը աջից ու ձախից կանգնած էին նրա շուրջը։ ²⁰ Տերն ասաց. “Ո՞վ կխաբի Իսրայելի արքա Աքաաբին, որ ելնի հարձակվի Գաղաադի Ռամաթ քաղաքի վրա և սպանվի”։ Մեկն այսպես ու մյուսն այնպես էր ասում։ ²¹ Եվ ահա մի ոգի ելավ ու կանգնելով Տիրոջ առջև՝ ասաց. “Ես կխաբեմ նրան”։ Տերը նրան ասաց. “Ի՞նչ միջոցով”։ ²² Նա պատասխանեց. “Կելնեմ ու սուտ ոգի կդառնամ նրա բոլոր մարգարեների բերանում”։ Տերն ասաց. “Դու իրոք կխաբես, դու այդ կարող ես, գնա՛ և այդպե՛ս արա”։ ²³ Եվ ահա Տերը սուտ ոգի դրեց քո այդ բոլոր մարգարեների բերանում, և Տերը չարիք է որոշել քեզ համար»։

²⁴ Քանանի որդի Սեդեկիան մոտեցավ ու խփելով Միքիայի ծնոտին՝ ասաց. «Տիրոջ ո՞ր ոգին է, որ ինձնից դուրս գալով՝ խոսեց քո մեջ»։ ²⁵ Միքիան ասաց. «Դու ինքդ կտեսնես այն օրը, երբ սենյակից սենյակ կվազես թաքնվելու համար»։

²⁶ Իսրայելի արքան ասաց. «Բռնե՛ք Միքիային և հանձնելով Ամովն քաղաքապետին ու արքայորդի Հովասին՝ ²⁷ ասե՛ք. “Այսպես է հրամայում արքան. “Բանտարկե՛ք սրան, և թող մի կտոր հաց ուտի ու մի կում ջուր խմի, մինչև որ ողջ և առողջ վերադառնամ պատերազմից”»։ ²⁸ Միքիան ասաց. «Եթե դու ողջ և առողջ վերադառնաս, ուրեմն Տերը չէ, որ խոսել է իմ բերանով»։ Ապա ավելացրեց. «Լսե՛ք, զորքե՛ր, ամենքդ լսե՛ք»։

Աքաաբի մահը պատերազմում

(Բ Մն. 18.28-34)

²⁹ Իսրայելի արքան Հուդայի արքա Հովսափատի հետ շարժվեց դեպի Գաղաադի Ռամաթ քաղաքը։ ³⁰ Իսրայելի արքան ասաց Հուդայի արքա Հովսափատին. «Ես կկերպարանափոխվեմ և այդպես կմտնեմ պատերազմ, իսկ դու հագի՛ր իմ հագուստները»։ Իսրայելի արքան կերպարանափոխվեց և մտավ պատերազմի մեջ։ ³¹ Ասորիների արքան պատվեր էր տվել իր մարտակառքերի պետերին՝ ասելով. «Մի՛ մարտնչեք մեծի կամ փոքրի դեմ, այլ միայն Իսրայելի արքայի դեմ»։ ³² Երբ մարտակառքերի պետերը տեսան Հուդայի արքա Հովսափատին, ասացին միմյանց. «Թվում է, թե սա է Իսրայելի թագավորը»։ Նրանք մոտեցան, որ կռվեն նրա դեմ, բայց Հովսափատն աղաղակեց։ ³³ Երբ մարտակառքերի պետերը տեսան, որ նա չէ Իսրայելի արքան, հետ դարձան։ ³⁴ Մեկն ուժգին ձգեց իր աղեղը և ճեղքելով Իսրայելի արքայի զրահը՝ խոցեց նրա թոքը։ Նա ասաց իր մարտակառքի պետին՝ «Շո՛ւռ արի, ինձ հանի՛ր ռազմադաշտից, քանզի վիրավոր եմ»։ ³⁵ Սակայն այդ օրը պատերազմը սաստկացավ, և արքան այգաբացից մինչև երեկո մնաց իր մարտակառքում, ասորիների դեմ։ Արյունը հոսում էր վերքից ու լցվում մարտակառքի մեջ։ Երբ երեկո եղավ, նա մեռավ։ ³⁶ Արեգակի մայր մտնելու ժամանակ մունետիկը հայտնեց զորքին. «Ամեն ոք իր քաղաքը, իր երկիրը թող գնա, ³⁷ որովհետև արքան մեռել է»։ Արքային բերեցին Սամարիա և Սամարիայում էլ թաղեցին։ ³⁸ Սամարիայի ջրավազաններում լվացին մարտակառքերը, խոզերն ու շները լիզեցին նրա արյունը, իսկ բոզերը լողացան նրա արյան մեջ, ինչպես կանխատեսել էր Տերը։

³⁹ Աքաաբի մնացած գործերը, նրա բոլոր արարքները, նրա կառուցած փղոսկրյա տունը, կառուցած բոլոր քաղաքները՝ այս ամենը նկարագրված են Իսրայելի թագավորների ժամանակագրության մեջ։ ⁴⁰ Աքաաբը գնաց իր նախնիների մոտ, և նրա փոխարեն թագավորեց իր որդին՝ Օքոզիան, իսկ Հուդայի երկրի վրա թագավորում էր Ասայի որդի Հովսափատը։

Հուդայի Հովսափատ թագավորը

(Բ Մն. 20.31–21.1)

⁴¹ Իսրայելի թագավոր Աքաաբի թագավորության չորրորդ տարում թագավորեց Հովսափատը։ ⁴² Նա երեսունհինգ տարեկան էր, երբ թագավոր դարձավ, ու քսանհինգ տարի թագավորեց Երուսաղեմում։ Նրա մայրը Սալալի դուստր Ասուբան էր։ ⁴³ Նա իր հոր՝ Ասայի ճանապարհով գնաց, չխոտորվեց, արեց այն, ինչ ուղիղ էր Տիրոջ առջև։ ⁴⁴ Նա պաշտամունքի բարձունքները չվերացրեց, որովհետև ժողովուրդը տակավին զոհ էր մատուցում և խունկ ծխում մեհյաններում։ ⁴⁵ Հովսափատը խաղաղության դաշինքի մեջ էր Իսրայելի արքայի հետ։

⁴⁶ Հովսափատի մնացած գործերը, կատարած քաջագործություններն ու պատերազմները նկարագրված են Հուդայի թագավորների ժամանակագրության մեջ։ ⁴⁷ Նա երկրից մաքրեց սոդոմական մեղք գործողներին, որոնք մնացել էին իր հոր օրերից։

⁴⁸ Այդ ժամանակ Եդովմում թագավոր չկար։

⁴⁹ Հովսափատ արքան Թարսիս հասնելու կարող նավեր պատրաստեց, որ գնան Օփիր՝ ոսկի ձեռք բերելու, սակայն նավերը տեղ չկարողացան հասնել, որովհետև Ասիոնգաբերում նավաբեկության ենթարկվեցին։ ⁵⁰ Այդ ժամանակ Աքաաբի որդի Օքոզիան ասաց Հովսափատին. «Թող քո ծառաները գնան իմ ծառաների հետ, և քո նավերը՝ իմ նավերի հետ»։ Սակայն Հովսափատը չհամաձայնեց։ ⁵¹ Հովսափատը գնաց իր նախնիների մոտ և թաղվեց իր հայրերի մոտ՝ իր նախահայր Դավթի քաղաքում։ Նրա փոխարեն թագավորեց նրա որդին՝ Հովրամը։

Իսրայելի թագավոր Օքոզիան

⁵² Աքաաբի որդի Օքոզիան Սամարիայում Իսրայելի վրա թագավորեց Հուդայի արքա Հովսափատի թագավորության տասնյոթերորդ տարում։ Նա Իսրայելում թագավորեց երկու տարի։ ⁵³ Նա չար գործեր արեց Տիրոջ առջև, գնաց իր հայր Աքաաբի ու իր մայր Հեզաբելի, Իսրայելին մեղանչել տվող Նաբատի որդի Հերոբովամի մեղսալից ճանապարհով։ ⁵⁴ Նա ծառայեց Բահաղի կուռքերին, երկրպագեց նրանց և դրանով իսկ բարկացրեց Տիրոջը՝ Իսրայելի Աստծուն՝ ըստ ամենայնի կրկնելով իր նախորդների կատարածը։

Դ ԳԻՐՔ ԹԱԳԱՎՈՐՆԵՐԻ

1

[* Բ ԳԻՐՔ ԹԱԳԱՎՈՐՆԵՐԻ]

Աստված դատապարտում է Օքոզիա թագավորի ընթացքը

¹ Աքաաբի մահվանից հետո մովաբացիներն ապստամբեցին Իսրայելի դեմ։ ² Օքոզիան Սամարիայում ընկավ իր վերնատան վանդակապատից ու ծանր վնասվածք ստացավ։ Նա պատգամավորներ ուղարկեց՝ ասելով նրանց. «Գնացե՛ք և Ակկարոնի Բահաղ-Ճանճիկ [*  Բաալ Զեվուվ] աստծուն հարցրե՛ք, թե ես կառողջանա՞մ»։ Եվ գնացին հարցնելու նրան։ ³ Սակայն Տիրոջ հրեշտակը կանչեց թեզբացի Եղիային և ասաց. «Ելիր գնա՛ Սամարիայի Օքոզիա արքայի պատգամավորներին ընդառաջ և նրանց ասա՛. “Իսրայելի մեջ Աստված չլինելո՞ւ պատճառով եք գնում Ակկարոնի Բահաղ-Ճանճիկ աստծուն հարցում անելու”։ ⁴ Ուրեմն այժմ Տերն այսպես է ասում. “Այդ մահիճից, որի մեջ պառկել ես, չես իջնելու և դրա մեջ էլ մեռնելու ես”»։ Եղիան գնաց ու հայտնեց նրանց այդ խոսքերը։

⁵ Պատգամավորները վերադարձան արքայի մոտ, և նա հարցրեց. «Ինչո՞ւ եք հետ դարձել»։ ⁶ Նրան ասացին. «Մի մարդ մեր առաջ ելավ ու ասաց մեզ. “Վերադարձե՛ք ձեզ ուղարկող արքայի մոտ և ասե՛ք նրան. այսպես է ասում Տերը. “Իսրայելի մեջ Աստված չլինելո՞ւ պատճառով եք գնում Ակկարոնի Բահաղ-Ճանճիկ աստծուն հարցնելու։ Ուրեմն այն մահճից, որի մեջ պառկել ես, ցած չես իջնելու, մեռնելու ես”»։ ⁷ Օքոզիան հարցրեց. «Ի՞նչ նշաններ ուներ այն մարդը, որ ձեր առաջ ելավ և այդ բաներն ասաց ձեզ»։ ⁸ Նրանք ասացին. «Մազոտ մարդ էր և մեջքին կաշվե գոտի էր կապել»։ Նա ասաց. «Դա թեզբացի Եղիան է»։

⁹ Նա մի հիսնապետ հրամանատար ուղարկեց Եղիա մարգարեի մոտ իր հիսուն զինվորներով։ Հիսնապետը եկավ նրա մոտ։ Եղիան նստած էր լեռան գագաթին։ Հիսնապետն ասաց նրան. «Ո՜վ Աստծու մարդ, արքան քեզ կանչում է, իջի՛ր այդտեղից»։ ¹⁰ Եղիան, պատասխան տալով, հիսնապետին ասաց. «Եթե ես Աստծու մարդ եմ, թող երկնքից կրակ իջնի և լափի քեզ ու քո հիսուն զինվորներին»։ Կրակ իջավ երկնքից և լափեց նրան ու նրա հիսուն զինվորներին։

¹¹ Արքան նորից մի այլ հիսնապետ ուղարկեց նրա մոտ իր հիսուն զինվորներով։ Հիսնապետը եկավ ու ասաց նրան. «Ո՜վ Աստծու մարդ, արքան այսպես է ասում. “Անմիջապես ցա՛ծ իջիր այդտեղից”»։ ¹² Եղիան, պատասխան տալով, նրան ասաց. «Եթե ես Աստծու մարդ եմ, թող երկնքից կրակ իջնի և լափի քեզ ու քո հիսուն զինվորներին»։ Աստծու կրակն իջավ երկնքից ու լափեց նրան ու նրա հիսուն զինվորներին։

¹³ Արքան երրորդ անգամ հիսնապետ ուղարկեց հիսուն հոգով։ Երրորդ հիսնապետը եկավ, Եղիայի առջև ծնկի իջավ և աղաչելով ասաց նրան. «Ո՜վ Աստծու մարդ, բարի՛ աչքով նայիր ինձ ու քո այս հիսուն ծառաներին, ¹⁴ քանզի տեսանք, որ կրակ ընկավ երկնքից ու լափեց նախորդ երկու հիսնապետներին ու նրանց հիսունական զինվորներին։ Արդ, բարի՛ աչքով նայիր քո ծառաներին»։

¹⁵ Տիրոջ հրեշտակը, խոսելով Եղիայի հետ, ասաց. «Գնա՛ նրա հետ, նրանցից երկյուղ մի՛ ունեցիր»։ Եղիան վեր կացավ, նրա հետ գնաց արքայի մոտ ¹⁶ և ասաց նրան. «Քանի որ պատգամավորներ ես ուղարկել Ակկարոնի Բահաղ-Ճանճիկ աստծու մոտ՝ բան հարցնելու, կարծես թե Իսրայելի մեջ չկար Աստված, որ նրանից հարցնեիր, ուրեմն այն մահճից, որի մեջ պառկել ես, չես իջնելու, այլ մեռնելու ես»։ ¹⁷ Եվ նա մեռավ, ինչպես որ Տերն էր ասել Եղիային։

Քանի որ Օքոզիան որդի չուներ, նրան հաջորդեց իր եղբայր Հովրամը, որը թագավորեց Իսրայելում Հովսափատի որդի Հուդայի արքա Հովրամի թագավորության երկրորդ տարում։

¹⁸ Օքոզիայի մնացած գործերը և այն ամենը, ինչ արել է նա, նկարագրված են Իսրայելի թագավորների ժամանակագրության մեջ։

^18ա Աքաաբի որդի Հովրամը Հուդայի արքա Հովսափատի թագավորության տասնութերորդ տարում Սամարիայում տասներկու տարի թագավորեց Իսրայելի վրա։ ^18բ Նա չարիք գործեց Տիրոջ առջև, բայց ոչ իր եղբայրների և իր մոր նման։ ^18գ Նա հանեց ու ոչնչացրեց իր հոր պատրաստած Բահաղի արձանները, բայց գործեց Հերոբովամի տան այն մեղքերը, որոնցով նա մեղանչել էր տվել Իսրայելին, դրանցից չհրաժարվեց։ ^18դ Եվ Տերը խիստ զայրացավ Աքաաբի տան վրա։

2

Եղիան երկինք է համբարձվում, նրան հաջորդում է Եղիսեեն

¹ Երբ Տերը Եղիային պտտահողմով երկինք էր բարձրացնելու, Եղիան ու Եղիսեեն գնացին Գաղգաղայից։ ² Եղիան ասաց Եղիսեեին. «Դու այստե՛ղ նստիր, քանզի Տերն ինձ Բեթել է ուղարկում»։ Եղիսեեն ասաց. «Կենդանի է Տերը, և կենդանի ես դու. ես քեզ չեմ լքի»։ Նրանք եկան Բեթել։ ³ Բեթելում գտնվող մարգարեների որդիները եկան Եղիսեեի մոտ և ասացին նրան. «Գիտե՞ս, որ Տերն այսօր առնելու տանելու է քո մոտից քո տիրոջը»։ Նա ասաց. «Գիտեմ, լո՛ւռ մնացեք»։ ⁴ Եղիան ասաց Եղիսեեին. «Դու այստե՛ղ նստիր, քանզի Տերն ինձ Երիքով է ուղարկում»։ Եղիսեեն ասաց. «Կենդանի է Տերը, և կենդանի ես դու. ես քեզ չեմ լքի»։ Նրանք եկան Երիքով։ ⁵ Երիքովում գտնվող մարգարեների որդիները մոտեցան Եղիսեեին և ասացին նրան. «Գիտե՞ս, որ այսօր Տերը քո տիրոջը առնելու տանելու է քո մոտից»։ Նա ասաց. «Գիտեմ, լո՛ւռ մնացեք»։ ⁶ Եղիան ասաց նրան. «Դու այստե՛ղ նստիր, քանի որ Տերն ինձ Հորդանան գետի ափն է ուղարկում»։ Եղիսեեն ասաց. «Կենդանի է Տերը, և կենդանի ես դու. ես քեզ չեմ լքի»։ Եվ նրանք երկուսով գնացին։ ⁷ Մարգարեների որդիներից հիսուն հոգի գնացին ու կանգնեցին հեռվում՝ Եղիայի ու Եղիսեեի դիմաց, իսկ սրանք երկուսով կանգնել էին Հորդանան գետի եզերքին։ ⁸ Եղիան առավ իր մորթե վերարկուն, ծալեց ու խփեց ջրերին։ Ջրերն իրարից այս ու այն կողմ հեռացան, և նրանք երկուսով անցան ցամաքած տեղով։

⁹ Երբ նրանք անցան, Եղիան ասաց Եղիսեեին. «Խնդրի՛ր, ի՞նչ անեմ քեզ, քանի դեռ Տերն ինձ քո մոտից չի վերացրել»։ Եղիսեեն ասաց. «Թող քո ոգին կրկնապատիկ չափով ինձ վրա լինի»։ ¹⁰ Եղիան ասաց. «Դժվար բան խնդրեցիր, բայց եթե քեզնից իմ երկինք բարձրանալու ժամանակ ինձ տեսնես, այդպես թող լինի, ապա թե ոչ՝ թող չլինի»։

¹¹ Մինչ նրանք քայլում էին, մի հրեղեն կառք ու հրեղեն երիվարներ երևացին, նրանց միմյանցից բաժանեցին, և Եղիան պտտահողմի մեջ դեպի երկինք վերացավ։ ¹² Եղիսեեն նայեց ու աղաղակեց. «Հա՜յր իմ, հա՜յր իմ, Իսրայելի կառքը և նրա հեծյալը»։ Եվ այլևս չտեսավ նրան։ Եղիսեեն իր հագուստները բռնեց ու պատռելով երկու կես արեց։ ¹³ Նա ձեռքն առավ Եղիայի մորթե վերարկուն, որ գցել էր իր վրա։ Եղիսեեն վերադարձավ, գնաց կանգնեց Հորդանան գետի եզերքին, ¹⁴ վերցրեց Եղիայի մորթե վերարկուն, որ գցել էր իր վրա, խփեց ջրերին՝ ասելով. «Տե՛ր, Եղիայի Աստված, հիմա որտե՞ղ ես»։ Նա խփեց ջրերին, ջրերն իրարից հեռացան այս ու այն կողմ, և Եղիսեեն անցավ։

¹⁵ Երբ Երիքովի մարգարեների որդիները դիմացից տեսան նրան, ասացին. «Եղիայի հոգին իջել է Եղիսեեի վրա»։ Նրանք եկան դիմավորեցին, երկրպագեցին նրան ¹⁶ ու ասացին նրան. «Ահա մեզ՝ քո ծառաների հետ հիսուն զորեղ մարդիկ կան, թող գնան ու փնտրեն քո տիրոջը, գուցե Տիրոջ հոգին նրան վերցրել ու նետել է Հորդանան գետի եզերքը կամ մի լեռան և կամ մի բլրի վրա»։ Եղիսեեն ասաց. «Մի՛ ուղարկեք»։ ¹⁷ Սակայն նրանք այնքան պնդեցին, որ նա ամաչեց ու ասաց. «Ուղարկե՛ք»։ Հիսուն հոգու ուղարկեցին, որոնք երեք օր փնտրեցին ու չգտան նրան։ ¹⁸ Վերադարձան նրա մոտ, իսկ նա Երիքովում էր։ Նա ասաց նրանց. «Չէ՞ որ ասացի՝ “Մի՛ գնացեք”»։

Եղիսեեի զարմանահրաշ գործերը

¹⁹ Քաղաքի մարդիկ ասացին Եղիսեեին. «Մեր քաղաքում բնակվելը լավ է, ինչպես որ տեսնում ես, տե՛ր իմ, բայց ջրերը վատ են, իսկ հողը՝ անբերրի»։ ²⁰ Եղիսեեն ասաց. «Ինձ մի նոր կո՛ւժ բերեք ու այդտե՛ղ դրեք»։ Բերեցին նրա ուզածը, ²¹ Եղիսեեն գնաց ջրերի ակունքը և այնտեղ աղ գցելով՝ ասաց. «Այսպես է ասում Տերը. “Ես մաքրեցի այս ջրերը, որ դրանցից մահ և անբերրիություն չառաջանան”»։ ²² Այդ ջրերը մաքուր դարձան, ու այդպես է մինչև այսօր, ինչպես որ ասել էր Եղիսեեն։

²³ Նա այնտեղից բարձրացավ Բեթել և մինչ իր ճանապարհն էր գնում, քաղաքից դուրս եկան փոքրիկ երեխաներ ու ծաղրելով նրան՝ ասում էին. «Բարձրացի՛ր, ճաղա՛տ, բարձրացի՛ր, ճաղա՛տ»։ ²⁴ Երբ նա հետ դարձավ ու տեսավ նրանց, Տիրոջ անունով անիծեց նրանց՝ նրանց անվանելով հանցանքի և ունայնության որդիներ։ Եվ ահա անտառից երկու արջեր ելան ու այդ մանուկներից քառասուներկու հոգու պատառոտեցին։ ²⁵ Եղիսեեն այնտեղից գնաց Կարմելոս լեռը և այնտեղից վերադարձավ Սամարիա։

3

Հովրամը՝ Իսրայելի թագավոր

¹ Աքաաբի որդի Հովրամը Հուդայի Հովսափատ արքայի թագավորության տասնյոթերորդ տարում դարձավ Իսրայելի թագավոր և տասներկու տարի թագավորեց Սամարիայում։ ² Նա չարիք գործեց Տիրոջ առջև, բայց ո՛չ իր հոր, ո՛չ էլ իր մոր նման. ընդհակառակը, նա կործանեց այն արձանները, որ իր հայրն էր կանգնեցրել։ ³ Սակայն նա միացավ Նաբատի որդի Հերոբովամի գործած մեղքերին, որն Իսրայելին մեղանչել էր տվել, և դրանցից չհրաժարվեց։

Պատերազմ մովաբացիների երկրի դեմ

⁴ Մովաբի Մոսա արքան ոչխարի հոտերի տեր էր և Իսրայելի արքային հարկ էր տալիս հարյուր հազար մաքի ու հարյուր հազար նրբագեղմ խոյ։

⁵ Աքաաբի մեռնելուց հետո Մովաբի երկրի արքան ըմբոստացավ Իսրայելի արքայի դեմ։ ⁶ Այդ ժամանակ Հովրամ արքան ելավ Սամարիայից և Իսրայելի մարդահամար անցկացրեց ու գնաց։ ⁷ Նա Հուդայի Հովսափատ արքայի մոտ մարդ ուղարկեց՝ ասելով. «Մովաբացիների արքան ըմբոստացել է իմ դեմ, կգա՞ս ինձ հետ մովաբացիների դեմ պատերազմելու»։ Նա ասաց. «Կելնեմ, քանզի մի ենք ես ու դու, մի են իմ ու քո զորքը, և մի են իմ ու քո երիվարները»։ ⁸ Հարցրեց. «Ո՞ր ճանապարհով գնանք»։ Նա պատասխանեց. «Եդովմի անապատի ճանապարհով»։ ⁹ Իսրայելի արքան, Հուդայի արքան և Եդովմի արքան գնացին, յոթ օրվա ճանապարհ կտրեցին, սակայն ջուր չկար ո՛չ բանակի, ո՛չ էլ իրենց հետ եղող անասունների համար։

¹⁰ Իսրայելի արքան ասաց. «Ավա՜ղ, Տերը պաշարել է իրար մոտ հավաքված երեք թագավորներիս, որ նրանց մովաբացիների ձեռքը հանձնի»։ ¹¹ Հովսափատն ասաց. «Մի՞թե այստեղ Տիրոջ մի մարգարե չկա, որ նրա միջոցով Տիրոջը հարցնենք»։ Իսրայելի արքայի ծառաներից մեկն ասաց. «Այստեղ է Սափատի որդի Եղիսեեն, որը Եղիայի ձեռքին ջուր էր լցնում»։ ¹² Հովսափատն ասաց. «Տիրոջ խոսքը նրա հետ է»։ Իսրայելի արքան, Հուդայի Հովսափատ արքան և Եդովմի արքան եկան նրա մոտ։ ¹³ Եղիսեեն ասաց Իսրայելի արքային. «Ի՞նչ գործ ունես ինձ հետ, գնա՛ քո հոր ու քո մոր մարգարեների մոտ»։ Իսրայելի արքան նրան ասաց. «Մի՞թե Տերը երեք թագավորներիս կանչեց, որ մեզ հանձնի մովաբացիների ձեռքը»։ ¹⁴ Եղիսեեն ասաց. «Կենդանի է Զորությունների Տերը, որին ծառայում եմ. եթե Հուդայի երկրի Հովսափատ արքայի նկատմամբ ակնածանք չունենայի, քո երեսին իսկ չպիտի նայեի։ ¹⁵ Բայց արդ, բերե՛ք ինձ մի քնարահարի»։ Երբ քնարահարն սկսեց նվագել, Տիրոջ ձեռքը իջավ Եղիսեեի վրա։ ¹⁶ Նա ասաց. «Այսպես է ասում Տերը. “Այս հեղեղատը փոսերի՛ վերածեք”։ ¹⁷ Այսպես է ասում Տերը. “Ո՛չ հողմ եք տեսնելու, ո՛չ էլ անձրև, սակայն այս հեղեղատը ջրով պիտի լցվի, և դուք, ձեր անասուններն ու ձեր գրաստները պիտի խմեք այդտեղից”։ ¹⁸ Այս բոլորը դեռ չնչին բան է Տիրոջ համար։ Նա մովաբացիներին ձեր ձեռքն է մատնելու, ¹⁹ դուք ավերելու եք բոլոր պարսպապատ քաղաքները, բոլոր ընտիր քաղաքները, ջարդելու եք պտղատու ծառերը, խցանելու եք ջրի աղբյուրները և քարեր լցնելով՝ անպետք եք դարձնելու բարեբեր դաշտերը»։

²⁰ Առավոտյան զոհաբերության ժամին Եդովմի կողմից ջրեր հոսեցին, և շրջակա տարածքը լցվեց ջրով։ ²¹ Երբ ամբողջ Մովաբի երկիրը լսեց, որ թագավորները եկել են իրենց դեմ պատերազմելու, զենք կրելու ի վիճակի եղող և նրանցից ավելի տարիքավոր մարդիկ առավոտ կանուխ զարթնեցին ու կանգնեցին սահմանագլխին։ ²² Երբ արևը բարձրացավ ջրերի վրա, ջրերի դիմաց կանգնած մովաբացիներին թվաց, թե այդ ջրերն արյան պես կարմիր են։ ²³ Նրանք ասացին. «Դա սրի թափած արյուն է, թագավորներն իրար հետ կռվել են, ամեն մեկն իր ընկերոջն է սպանել։ Հիմա, ո՜վ մովաբացիներ, գնանք ավարի»։ ²⁴ Նրանք մտան Իսրայելի բանակատեղին, իսկ իսրայելացիները ելան, հարվածեցին ու հալածեցին Մովաբին, ²⁵ կործանեցին քաղաքները, ամեն մեկը մի քար նետեց և լցրեց բարեբեր դաշտերը, նրանք խցանեցին ջրի բոլոր աղբյուրները, ջարդեցին բոլոր պտղատու ծառերը։ Այնտեղ մնացին միայն քանդած պատերի քարերը, որովհետև պարսավորները պաշարել էին այն ու քանդել։ ²⁶ Երբ Մովաբի երկրի արքան տեսավ, որ պատերազմը տանուլ է տալիս, իր հետ վերցրեց յոթ հարյուր սուսերակիրների, որպեսզի ճեղքելով հասնի Եդովմի արքային, սակայն չկարողացավ։ ²⁷ Նա իր անդրանիկ որդուն, որն իր փոխարեն պետք է թագավորեր, տարավ և ողջակիզեց պարսպի վրա։ Դա մեծ ափսոսանք պատճառեց Իսրայելին, և նրանք, երես դարձնելով նրանցից, գնացին իրենց երկիրը։

4

Եղիսեեն օգնում է խեղճ որբևայրուն

¹ Մարգարեների որդիների կանանցից մեկն աղաղակում էր Եղիսեեին և ասում. «Իմ ամուսինը՝ քո ծառան, մեռավ։ Դու գիտես, որ նա Տիրոջ երկյուղած ծառան էր, և ահա պարտատերը եկել է, որ իմ երկու որդիներին որպես ստրուկ տանի իր մոտ»։ ² Եղիսեեն նրան ասաց. «Ի՞նչ անեմ քեզ։ Ասա՛ ինձ, թե ի՛նչ կա քո տանը»։ Նա ասաց. «Քո աղախնի տանը ոչինչ չկա, բացի ձիթայուղից, որով օծվում եմ»։ ³ Եղիսեեն ասաց. «Գնա՛ և քո բոլոր դրացիներից դատարկ ամաննե՛ր խնդրիր, և թող քիչ չլինեն։ ⁴ Ապա մտի՛ր տունդ, դռները փակի՛ր քո և քո որդիների վրա, իսկ քո ունեցած յուղը լցրո՛ւ բոլոր ամանների մեջ ու լցվածը մի կո՛ղմ դիր»։ ⁵ Նա հեռացավ նրա մոտից, դուռը փակեց իր և իր որդիների վրա։ Սրանք ամաններն էին մատուցում, իսկ նա լցնում էր, ⁶ մինչև որ բոլոր ամանները լցվեցին։ Նա ասաց իր որդիներին. «Մի աման և՛ս բերեք»։ Նրանք ասացին. «Այլևս աման չկա»։ Եվ յուղը դադարեց հոսելուց։ ⁷ Նա գնաց ու դա պատմեց Աստծու մարդուն։ Եղիսեեն ասաց. «Գնա յուղը վաճառի՛ր, վճարի՛ր քո պարտքը, և դու ու քո որդիները մնացած յուղով ապրե՛ք»։

Եղիսեեն և սոմնացի հարուստ կինը

⁸ Մի օր, երբ Եղիսեեն անցնում էր Սոմնայից, մի հարուստ կին նրան կանչեց հաց ուտելու։ Եղիսեեն շատ հաճախ այնտեղից անցնելիս մտնում էր այդ տունը՝ ուտելու և խմելու։ ⁹ Կինն ասաց իր ամուսնուն. «Գիտեմ, որ Աստծու մարդը սուրբ է, և նրա ճանապարհը մեր կողմով է անցնում։ ¹⁰ Ե՛կ մի փոքրիկ վերնատուն շինենք նրա համար, այնտեղ մահիճ, սեղան, աթոռ և աշտանակ դնենք, և երբ որ մեզ մոտ գա, թող այնտեղ ապրի»։ ¹¹ Եվ ահա մի օր, երբ նա եկել ու մտել էր վերնատուն ու այդտեղ քնել, ¹² ասաց իր սպասավոր Գեեզիին. «Ինձ մո՛տ կանչիր սոմնացի այդ կնոջը»։ Նա կանչեց կնոջը, որը եկավ կանգնեց նրա առջև։ ¹³ Եղիսեեն ասաց սպասավորին. «Ասա՛ նրան. “Ահա այս ամենը դու պատրաստել ես մեզ համար։ Ի՞նչ պետք է անել քեզ համար. գուցե արքայի կամ զորքի հրամանատարի մոտ պետք է բարեխոսե՞լ քո մասին”»։ Կինն ասաց. «Ես իմ ժողովրդի մեջ եմ բնակվում»։ ¹⁴ Եղիսեեն ասաց. «Նրան ի՞նչ կարող ենք անել»։ Իր սպասավոր Գեեզին ասաց. «Շատ լավ, չէ՞ որ նա որդի չունի, և նրա ամուսինը ծեր չէ» [*  և Ο΄ ծեր է]։ ¹⁵ Եղիսեեն ասաց. «Կանչի՛ր նրան»։ Գեեզին կանչեց նրան, և սա կանգնեց դռան առաջ։ ¹⁶ Եղիսեեն ասաց նրան. «Մյուս տարի այս ժամանակ, այս օրերին գրկումդ մի մանուկ կունենաս»։ Կինն ասաց. «Ո՛չ, տե՛ր, Աստծո՛ւ մարդ, մի՛ խաբիր քո աղախնին»։ ¹⁷ Կինը հղիացավ ու հետևյալ տարին՝ այդ նույն ժամանակ, որդի ծնեց, որը ողջ-առողջ էր, ինչպես նրան ասել էր Եղիսեեն։ ¹⁸ Մանուկը մեծացավ։

Մի օր տղան գնաց իր հոր, հնձողների մոտ ու ասաց իր հորը. «Գլո՜ւխս, գլո՜ւխս»։ ¹⁹ Հայրն ասաց իր ծառային. «Սրան տա՛ր իր մոր մոտ»։ ²⁰ Տարավ նրան իր մոր մոտ. երեխան մոր ծնկներին քնեց մինչև կեսօր ու մեռավ։ ²¹ Կինը վերցրեց նրան ու պառկեցնելով Աստծու մարդու անկողնում՝ դուռը փակեց նրա վրա։ ²² Նա գնաց կանչեց իր ամուսնուն և ասաց. «Ինձ մո՛տ ուղարկիր քո ծառաներից մեկին ու մի էշ, որպեսզի շտապ հասնեմ Աստծու մարդու մոտ և վերադառնամ»։ ²³ Ամուսինն ասաց. «Ինչո՞ւ ես դու այսօր գնում նրա մոտ. ո՛չ նորալուսին է, ո՛չ էլ շաբաթ»։ Նա ասաց. «Հանգստացի՛ր»։ ²⁴ Կինը համետեց էշը և ասաց իր ծառային. «Քշի՛ր ու գնա՛, մինչև որ ասեմ՝ “Կանգնի՛ր”։ Բայց եթե քեզ ասեմ՝ “Այստե՛ղ արի”, կգաս։ ²⁵ Կքշես ու կգնաս Աստծու մարդու մոտ, Կարմելոս լեռը»։ Երբ Եղիսեեն տեսավ, որ կինը գալիս է իր մոտ, ասաց իր սպասավոր Գեեզիին. «Ահա նա այն սոմնացի կինն է։ ²⁶ Ընդառա՛ջ գնա և հարցրո՛ւ. “Ողջ-առո՞ղջ ես, ողջ-առո՞ղջ է ամուսինդ, ողջ-առո՞ղջ է երեխադ”»։ Նա ասաց. «Ողջ-առողջ ենք»։ ²⁷ Ապա եկավ Եղիսեեի մոտ՝ լեռը, և գրկեց նրա ոտքերը։ Գեեզին մոտեցավ, որ նրան հետ քաշի, բայց Եղիսեեն ասաց. «Թո՛ւյլ տուր նրան, որովհետև նրա սիրտը վշտահար է, և Տերն ինձնից դա թաքցրել է, չի հայտնել ինձ»։ ²⁸ Կինն ասաց. «Մի՞թե ես իմ տիրոջից որդի խնդրեցի, չասացի՞, թե՝ “Մի՛ խաբիր ինձ”»։ ²⁹ Եղիսեեն ասաց Գեեզիին. «Գոտի՛ կապիր մեջքիդ, իմ ցուպը ձե՛ռքդ վերցրու և գնա՛։ Եթե որևէ մեկին հանդիպես, բարև մի՛ տուր, եթե որևէ մեկը քեզ բարև տա, մի՛ պատասխանիր, իմ ցուպը դի՛ր երեխայի երեսին»։ ³⁰ Երեխայի մայրն ասաց. «Կենդանի է Տերը, և կենդանի ես դու. ես քեզ չեմ լքի»։ Եղիսեեն ելավ ու գնաց կնոջ հետևից։ ³¹ Գեեզին նրանցից առաջ անցավ և ցուպը դրեց երեխայի երեսին, սակայն երեխան ո՛չ խոսում էր, ո՛չ լսում։ Նա վերադարձավ Եղիսեեի մոտ ու ասաց. «Երեխան վեր չի կենում»։ ³² Եղիսեեն մտավ տուն և տեսավ, որ մեռած երեխան պառկած է իր մահճում։ ³³ Եղիսեեն տուն մտավ, դուռը փակեց իրենց երկուսի վրա, աղոթեց Տիրոջը, ³⁴ եկավ ընկավ երեխայի վրա, իր բերանը դրեց նրա բերանին, իր աչքերը՝ նրա աչքերին, իր ձեռքերը՝ նրա ձեռքերին, ապա կծկվեց նրա վրա, ու երեխայի մարմինը ջերմացավ։ ³⁵ Նա տան մեջ այս ու այն կողմ շրջեց, բարձրացավ երեխայի վրա, յոթ անգամ երեխային ծածկեց իր մարմնով, և երեխան բացեց իր աչքերը։ ³⁶ Եղիսեեն աղաղակեց ու ասաց Գեեզիին. «Այստե՛ղ կանչիր սոմնացի կնոջը»։ Նա կանչեց նրան, և կինը ներս մտավ։ Եղիսեեն ասաց. ³⁷ «Ա՛ռ քո որդուն»։ Կինը մտավ, ընկավ նրա ոտքերին և մինչև գետին խոնարհվեց նրա առաջ։ Նա վերցրեց իր որդուն ու գնաց, ³⁸ իսկ Եղիսեեն վերադարձավ Գաղգաղա։

Թունավորված կաթսան

Երկրում սով էր. մարգարեները նստած էին Եղիսեեի առջև։ Եղիսեեն իր սպասավորին ասաց. «Մեծ կաթսան կրակի՛ն դիր և ապո՛ւր եփիր մարգարեների համար»։ ³⁹ Նա գնաց դաշտ՝ արիովթ[46] քաղելու, գտավ մի վայրի որթ և դրանից մի շալակ լիքը ազոխ քաղեց ու բերեց լցրեց ապուրի կաթսայի մեջ, բայց նա չէր իմանում, թե դա ինչ բույս է։ ⁴⁰ Երբ ճաշը պատրաստ էր, դրեց նրանց առաջ, որ ուտեն։ Երբ նրանք սկսեցին ապուրն ուտել, աղմուկ բարձրացնելով՝ ասացին. «Մահ կա կաթսայի մեջ, ո՜վ Աստծու մարդ»։ Եվ նրանք չկարողացան ուտել։ ⁴¹ Եղիսեեն ասաց. «Ալյո՛ւր վերցրեք ու լցրե՛ք այդ կաթսայի մեջ»։ Նա ասաց իր սպասավոր Գեեզիին. «Դի՛ր ժողովրդի առջև, որ ուտեն»։ Եվ կաթսայի այդ ճաշը ոչ ոքի չվնասեց։

Եղիսեեն կերակրում է հարյուր մարդու

⁴² Բեթսարիսայից մի մարդ եկավ և Աստծու մարդու համար առաջնեկ արմտիքից պատրաստված գարե նկանակներ ու չոր թուզ բերեց իր կաշվե տոպրակով։ Եղիսեեն ասաց. «Տվե՛ք ժողովրդին, թող ուտեն»։ ⁴³ Նրա սպասավորն ասաց. «Ի՞նչ ես տալիս, որ հարյուր մարդու առջև դնեմ»։ Նա ասաց. «Տո՛ւր ժողովրդին, որ ուտեն, քանի որ այսպես է ասում Տերը. “Պիտի ուտեն, և պիտի ավելանա”»։ Ծառան դրեց նրանց առջև, ⁴⁴ նրանք կերան, և Տիրոջ ասածի նման մի բան էլ դեռ ավելացավ։

5

Բորոտ Նեեմանի բուժումը

¹ Ասորիների զորքի հրամանատար Նեեմանը գեղեցկադեմ էր և հարգելի մարդ էր իր տիրոջ առջև, քանի որ նրա միջոցով էր Տերը փրկություն տվել ասորիներին։ Այս մարդը հզոր էր, սակայն բորոտ։ ² Ասորի զինված կողոպտիչները հարձակվել էին և Իսրայելից գերի վերցրել մի փոքրիկ աղջկա, որը մնում էր Նեեմանի կնոջ մոտ։ ³ Աղջիկն ասաց իր տիկնոջը. «Երանի թե իմ տերը գնար Աստծու մարգարեի մոտ, որը Սամարիայում է, նա նրան կբուժեր բորոտությունից»։ ⁴ Կինը գնաց և ասաց իր տիրոջը. «Այսպես է խոսում իսրայելացի աղջիկը»։ ⁵ Ասորիների արքան Նեեմանին ասաց. «Գնա՛, ես էլ նամակ կուղարկեմ Իսրայելի արքային»։ Նա գնաց՝ իր ձեռքին ունենալով տասը տաղանդ արծաթ, վեց հազար դահեկան և տասը ձեռք պատմուճան։ ⁶ Նա տարավ Իսրայելի արքային ուղղված նամակը, որտեղ գրված էր. «Երբ քեզ հասնի այս նամակը, գիտցի՛ր, որ քեզ մոտ եմ ուղարկում իմ ծառա Նեեմանին, որպեսզի նրան բուժես բորոտությունից»։ ⁷ Երբ Իսրայելի արքան ընթերցեց նամակը, իր հագուստները պատառոտելով՝ ասաց. «Մի՞թե ես Աստված եմ, որ սպանեմ կամ կենդանացնեմ. ինձ մոտ մարդ է ուղարկել բորոտությունից բուժելու համար։ Իմացե՛ք և տեսե՛ք, որ սա պատրվակ է»։

⁸ Երբ Աստծու մարդ Եղիսեեն լսեց, որ Իսրայելի արքան իր հագուստներն է պատառոտել, լուր ուղարկեց նրան՝ ասելով. «Ինչո՞ւ ես պատառոտել քո հագուստները, թող Նեեմանն ինձ մոտ գա և իմանա, որ Իսրայելում մարգարե կա»։

⁹ Նեեմանը եկավ երիվարներով ու մարտակառքերով և կանգնեց Եղիսեեի տան դռանը։ ¹⁰ Եղիսեեն մարդ ուղարկեց նրա մոտ և ասաց. «Գնա՛ յոթ անգամ լվացվի՛ր Հորդանան գետում, քո մարմինը կբուժվի, և դու կմաքրվես»։ ¹¹ Նեեմանը բարկացավ և գնաց՝ ասելով. «Ես էլ կարծում էի, թե գուցե դուրս կգա, կկանգնի ինձ մոտ, Տիրոջ՝ իր Աստծու անունը կտա, իր ձեռքը կդնի հիվանդ տեղի վրա և կբուժի իմ բորոտությունը։ ¹² Մի՞թե Դամասկոսի Նաբանա և Փարփարա գետերն Իսրայելի բոլոր ջրերից ավելի լավ չեն, ինչո՞ւ չգնամ, չլվացվեմ դրանց մեջ և մաքրվեմ»։ Եվ վերադառնալով՝ գնաց զայրացած։ ¹³ Ծառաները մոտեցան նրան ու ասացին. «Հա՛յր, եթե մարգարեն դժվար բան խնդրեր, չպե՞տք է կատարեիր։ Նա միայն ասաց՝ “Լվացվի՛ր ու կմաքրվես”»։ ¹⁴ Նեեմանն իջավ ու յոթ անգամ թաթախվեց Հորդանան գետի մեջ, ինչպես Եղիսեեն էր ասել, և նրա մարմինը դարձավ մատղաշ երեխայի մարմնի նման. նա մաքրվեց։

¹⁵ Դրանից հետո նա իր ամբողջ բանակով վերադարձավ Եղիսեեի մոտ ու կանգնելով նրա առջև՝ ասաց. «Հիմա համոզվեցի, որ չկա Աստված ամբողջ աշխարհում, այլ միայն՝ Իսրայելում։ Արդ, ընծա՛ ընդունիր քո ծառայից»։ ¹⁶ Եղիսեեն ասաց. «Կենդանի է Տերը, որին ես ծառայում եմ, ոչինչ չեմ ընդունի»։ Նա ստիպեց վերցնել, սակայն Եղիսեեն չհամաձայնվեց։ ¹⁷ Նեեմանն ասաց. «Քանի որ մերժում ես, թող քո ծառային երկու ջորու բեռ հող տան այս երկրից, որպեսզի քո ծառան այլևս օտար աստվածներին ողջակեզ և զոհ չմատուցի, այլ միայն Տիրոջը։ ¹⁸ Տերը թող ների քո ծառային հետևյալի համար. երբ իմ տեր արքան մտնի Ռեմանի տունը՝ նրան երկրպագելու, ես էլ ստիպված նրա հետ պիտի երկրպագեմ Ռեմանին, քանի որ արքան հենված է լինում իմ ձեռքին։ Թող Տերը ների քո ծառային այս բանի համար»։ ¹⁹ Եղիսեեն ասաց Նեեմանին. «Գնա՛ խաղաղությամբ»։ Եվ նա գնաց նրա մոտից, Իսրայելի երկրից։

Գեեզիի սխալը

²⁰ Սպասավոր Գեեզին ասաց Եղիսեեին. «Իմ տերը հրաժարվեց վերցնել ասորի Նեեմանի բերած նվերները։ Կենդանի է Տերը. ես նրա հետևից կվազեմ ու մի բան կվերցնեմ»։ ²¹ Գեեզին վազեց Նեեմանի հետևից, և երբ Նեեմանը տեսավ, որ նա իր հետևից է գալիս, մարտակառքից իջավ և նրան ընդառաջ գնալով՝ ²² ասաց. «Բարի՞ գործով է»։ Գեեզին ասաց. «Բարի գործով է։ Իմ տերն ինձ քեզ մոտ ուղարկեց՝ ասելով. “Ահա Եփրեմի լեռից ինձ մոտ եկան երկու երիտասարդ մարգարեներ։ Նրանց համար տո՛ւր մի տաղանդ արծաթ և երկու ձեռք պատմուճան”»։ ²³ Նեեմանն ասաց. «Եթե այդպես է, ա՛ռ երեք տաղանդ արծաթ»։ Նեեմանն ստիպեց և երկու պարկի մեջ երեք տաղանդ արծաթ ու երկու ձեռք պատմուճան դնելով՝ տվեց իր երկու ծառաներին, որ տանեն նրա առջևից։ ²⁴ Երբ մի մութ տեղ հասան, նա բեռն առավ նրանց ձեռքից ու տան մեջ դրեց, իսկ այդ մարդկանց ճանապարհ դրեց։ Նրանք վերադարձան։ ²⁵ Գեեզին եկավ կանգնեց իր տիրոջ առջև։ Եղիսեեն հարցրեց նրան. «Որտեղի՞ց ես գալիս, Գեեզի՛»։ Գեեզին ասաց. «Քո ծառան ոչ մի տեղ չէր գնացել»։ ²⁶ Եղիսեեն նրան ասաց. «Մի՞թե իմ սիրտը քեզ հետ չէր, երբ այդ մարդն իր մարտակառքից իջավ քեզ դիմավորելու։ Արդարև, արծաթ ու հագուստներ վերցրիր՝ ձիթենիներ ու այգիներ, արջառ ու ոչխար գնելու և ծառաներ ու աղախիններ ունենալու համար։ ²⁷ Թող Նեեմանի բորոտությունը քեզ ու քո սերնդին կպչի հավիտյան»։ Եվ Գեեզին դուրս եկավ նրա մոտից ձյան նման սպիտակած բորոտ մարմնով։

6

Կորած և գտնված կացինը

¹ Մարգարեները Եղիսեեին ասացին. «Այս տեղը, որտեղ մենք բնակվում ենք, մեզ համար նեղ է, ² գնանք մինչև Հորդանան գետը և այնտեղ ամեն մեկս մի գերան վերցնի և մեզ համար բնակության տեղ պատրաստենք»։ Եղիսեեն ասաց. «Գնացե՛ք»։ ³ Նրանցից մեկն ասաց. «Դու ևս քո ծառաներով ե՛կ մեզ հետ»։ Նա պատասխանեց. «Կգամ»։ ⁴ Եվ գնաց նրանց հետ։ Հասան Հորդանան գետի եզերքը։ Այնտեղ ծառ էին կտրում։ ⁵ Եվ ահա երբ նրանցից մեկը գերան էր կտրում, կացինը ջուրն ընկավ։ Նա բացականչելով ասաց. «Օ՜, Տե՛ր, ես այն փոխ էի առել»։ ⁶ Աստծու մարդը հարցրեց. «Ո՞ւր ընկավ»։ Նա ցույց տվեց տեղը, և Եղիսեեն, մի փայտ կտրելով, այնտեղ գցեց, ու երկաթը ջրի երեսը լողաց։ ⁷ Եղիսեեն ասաց. «Վերցրո՛ւ»։ Նա ձեռքը մեկնեց ու վերցրեց կացինը։

Եղիսեեն գերեվարում է ասորի զինվորների

⁸ Ասորիների արքան պատերազմի մեջ էր Իսրայելի դեմ։ Նա, խորհրդակցելով իր ծառաների հետ, ասաց. «Որոշակի տեղում թող բանակը դարան մտնի»։ ⁹ Եղիսեեն, լուր ուղարկելով Իսրայելի արքային, ասաց. «Զգո՛ւյշ եղիր, չլինի թե անցնես այսինչ տեղով, քանի որ ասորիները դարան են մտել այնտեղ»։ ¹⁰ Իսրայելի արքան մարդ ուղարկեց Եղիսեեի նշած վայրը և դարանից զգուշացավ ոչ միայն մեկ, այլ երկու և ավելի անգամ։ ¹¹ Այս բանի համար ասորիների արքան վրդովվեց, կանչեց իր ծառաներին և ասաց. «Ինձ չե՞ք ասի, թե ո՛վ է իմ գաղտնիքները հայտնում Իսրայելի արքային»։ ¹² Ծառաներից մեկն ասաց. «Ո՛չ ոք, տե՛ր իմ արքա, Իսրայելում գտնվող Եղիսեե մարգարեն է Իսրայելի արքային հայտնում նույնիսկ այն բոլոր խոսքերը, որ դու քո ննջասենյակում ես խոսում»։ ¹³ Արքան ասաց. «Գնացե՛ք ու տեսե՛ք, թե որտե՛ղ է նա, որ մարդ ուղարկեմ ու բռնեմ նրան»։ Նրան հայտնեցին, որ Եղիսեեն Դովթայիմում է։

¹⁴ Նա մարտակառքեր, երիվարներ և մեծաքանակ զորք ուղարկեց։ Սրանք եկան ու գիշերը պաշարեցին քաղաքը։ ¹⁵ Առավոտ կանուխ Եղիսեեն զարթնեց և դուրս եկավ, որ պաշտամունք կատարի։ Նա տեսավ, որ զորքը երիվարներով ու մարտակառքերով պաշարել է քաղաքը։ Սպասավորը նրան ասաց. «Տե՜ր, ի՞նչ պիտի անենք»։ ¹⁶ Եղիսեեն ասաց. «Մի՛ վախեցիր, քանի որ մեզ հետ եղողները նրանց հետ եղողներից շատ են»։ ¹⁷ Եղիսեեն աղոթք անելով ասաց. «Տե՜ր, բա՛ց սպասավորիս աչքերը, որ տեսնի»։ Տերը բացեց նրա աչքերը, և նա տեսավ, որ Եղիսեեի շուրջը լեռը լի էր ձիերով ու հրեղեն մարտակառքերով, ¹⁸ որոնք եկան նրա մոտ։ Եղիսեեն սկսեց աղոթել Տիրոջը՝ ասելով. «Հարվածի՛ր այս ազգին, որ կուրանան»։ Եվ Տերը, ինչպես ասել էր Եղիսեեն, հարվածեց նրանց ու կույր դարձրեց։ ¹⁹ Եղիսեեն ասաց թշնամու զորքին. «Այս չէ ճանապարհը, և այս չէ քաղաքը, եկե՛ք իմ հետևից, և ես ձեզ կտանեմ այն մարդու մոտ, որին փնտրում եք»։ Տարավ նրանց Սամարիա ²⁰ և երբ մտավ Սամարիա, Եղիսեեն ասաց. «Տե՜ր, բա՛ց նրանց աչքերը, որ տեսնեն»։ Եվ Տերը բացեց նրանց աչքերը, ու տեսան, որ իրենք Սամարիայի մեջ են։

²¹ Երբ Իսրայելի արքան տեսավ նրանց, ասաց Եղիսեեին. «Սպանե՞մ սրանց, հա՛յր իմ»։ ²² Եղիսեեն ասաց. «Մի՛ սպանիր։ Սպանել կարող ես նրանց, որոնց քո սրով ու աղեղով ես գերի վերցրել։ Նրանց առջև հաց ու ջո՛ւր դիր. թող ուտեն ու խմեն և վերադառնան իրենց տիրոջ մոտ»։ ²³ Նրանց առաջ առատ ուտելիք դրեց։ Նրանք կերան ու խմեցին։ Արքան նրանց արձակեց, և նրանք գնացին իրենց տիրոջ մոտ։ Ասորիների կողոպտիչ զորքը դադարեց Իսրայելի երկրի վրա հարձակվել։

Սամարիայի պաշարումը

²⁴ Ժամանակ անց Ադերի որդին՝ ասորիների արքան, հավաքեց իր ամբողջ բանակը և եկավ պաշարեց Սամարիան։ ²⁵ Սամարիայում մեծ սով եղավ, իսկ ասորիները պաշարած պահում էին քաղաքը։ Մի էշի գլուխը հիսուն սիկղ արծաթով էր ծախվում, իսկ աղավնու կեղտի մեկ քառորդ կապիճը՝ հիսունհինգ արծաթով։ ²⁶ Իսրայելի արքան շրջում էր պարսպի վրա։ Մի կին աղաղակելով ասաց նրան. «Փրկի՛ր ինձ, տե՜ր արքա»։ ²⁷ Արքան ասաց. «Եթե Տերը չի փրկում, ինչո՞վ կարող եմ ես փրկել քեզ, կալո՞վ, թե՞ հնձանով»։ ²⁸ Արքան հարցրեց. «Քեզ ի՞նչ է պատահել»։ Նա ասաց. «Այս կինն ինձ ասաց. “Տո՛ւր քո որդուն, որ այսօր ուտենք նրան, իսկ իմ որդուն վաղը կուտենք”։ ²⁹ Եփեցինք իմ որդուն ու կերանք։ Հաջորդ օրն ասացի նրան. “Տո՛ւր քո որդուն, որ ուտենք”, սակայն նա թաքցրեց իր որդուն»։ ³⁰ Երբ արքան կնոջ այս խոսքերը լսեց, պատառոտեց իր հագուստները, և քանի որ նա դեռ շրջում էր պարսպի վրա, ժողովուրդը տեսավ, որ նա իր հագուստի տակից մարմնի վրա քուրձ էր հագել։ ³¹ Արքան ասաց. «Թող Աստված այսպես ու այսպես և ավելին անի ինձ, եթե Սափատի որդի Եղիսեեի գլուխն իր վրա մնա այսօր»։ ³² Եղիսեեն ծերերի հետ նստել էր իր տանը։ Արքան մարդ ուղարկեց նրա մոտ, և երբ պատգամավորը նրա մոտ դեռ չէր հասել, Եղիսեեն ասաց ծերերին. «Տեսնո՞ւմ եք, մարդասպանի որդին մարդ է ուղարկել, որ իմ գլուխը կտրի։ Հենց որ հասնի պատգամավորը, դռների մոտ բռնե՛ք նրան։ Չէ՞ որ նրա հետևից լսվում է նրա տիրոջ ոտնաձայնը»։ ³³ Մինչ Եղիսեեն խոսում էր նրանց հետ, պատգամավորը եկավ նրանց մոտ և ասաց. «Ահա այս չարիքը Տիրոջից է. Տիրոջ վրա էլ ի՞նչ հույս դնեմ»։

7

¹ Եղիսեեն ասաց. «Տիրոջ խո՛սքը լսեք։ Այսպես է ասում Տերը. “Վաղն այս ժամին Սամարիայի դարպասների մոտ մեկ գրիվ ճերմակ ալյուրը մեկ սիկղ, և երկու գրիվ գարին մեկ սիկղ պետք է արժենա”»։ ² Այն զորապետը, որի ձեռքին հենվում էր արքան, ասաց Եղիսեեին. «Եթե Տերն անգամ երկնքի սահանքները բացի, մի՞թե այդպիսի բան կարող է լինել»։ Եղիսեեն ասաց. «Քո աչքերով պիտի տեսնես դա, սակայն դու դրանցից չպիտի ուտես»։

Ասորական բանակը հեռանում է

³ Քաղաքի դարպասի մոտ կային չորս բորոտ մարդիկ։ Նրանք իրար ասացին. «Ինչո՞ւ այստեղ նստենք մինչև մեր մահը։ ⁴ Եթե ասենք՝ “Մտնենք քաղաք”, քաղաքում էլ սով է, այնտեղ էլ կմեռնենք. եթե այստեղ նստած մնանք, էլի կմեռնենք։ Արի՛ գնանք ասորիների բանակը։ Եթե մեզ ողջ թողնեն, կապրենք, իսկ եթե սպանեն մեզ, թող մեռնենք»։ ⁵ Նրանք մթնշաղին վեր կացան, որպեսզի ասորիների բանակը մտնեն։ Նրանք հասան ասորիների բանակատեղին, սակայն այստեղ մարդ չկար։ ⁶ Տերն ասորիների բանակատեղիում մարտակառքերի աղմուկ և մեծ զորքի աղաղակ հնչեցրեց, և նրանք իրար ասացին. «Իսրայելի արքան վարձել է քետացիների ու եգիպտացիների թագավորներին, որպեսզի մեզ վրա հարձակվեն»։ ⁷ Եվ նրանք ելան ու մթության մեջ փախան՝ թողնելով իրենց բանակի վրանները, ձիերն ու էշերը, ինչպես որ կային։ Նրանք մազապուրծ փախան։ ⁸ Բորոտները հասան մինչև բանակատեղիի եզրը, մի վրան մտան, կերան ու խմեցին, արծաթ, ոսկի ու հագուստներ վերցրին, գնացին և տարան թաքցրին դրանք։ Մեկ այլ վրան մտան և այնտեղից էլ վերցրին ու տարան թաքցրին։ ⁹ Նրանք ասացին իրար. «Ճիշտ չէ մեր արածը, այսօր ավետյաց օր է, իսկ մենք լռո՞ւմ ենք։ Մինչև առավո՞տ սպասենք, որ մեր անօրենության պատիժը կրենք։ Եկե՛ք գնանք թագավորի մոտ և այս ամենը հայտնենք նրան»։ ¹⁰ Նրանք գնացին, ձայն տվեցին քաղաքի դարպասի պահապաններին, պատմեցին նրանց՝ ասելով. «Մտանք ասորիների բանակատեղին, այնտեղ ոչ ոք չկար, մարդու ձայն չէր լսվում, միայն ձիեր ու էշեր էին կապված, իսկ վրանները մնում էին, ինչպես որ կային»։ ¹¹ Դռան պահապանները ձայն տվեցին և այդ լուրը հասցրին թագավորի տուն։

¹² Արքան գիշերով ելավ և ասաց իր ծառաներին. «Հիմա ասեմ ձեզ, թե ասորիները մեզ ինչ են արել։ Գիտենալով, որ սոված ենք, ելել են բանակատեղիից և թաքնվել բաց դաշտում՝ մտածելով, որ թերևս քաղաքից դուրս կգանք, մեզ կենդանի կբռնեն և կմտնեն քաղաքը»։ ¹³ Նրա ծառաներից մեկն ասաց. «Թող մարդիկ Իսրայելի մեջ փոքր քանակով մնացած ձիերից հինգը վերցնեն, գնանք ու հետախուզենք»։ ¹⁴ Արքան երկու ձիավոր ուղարկեց ասորիների արքայի հետևից՝ ասելով. «Գնացե՛ք ու հետախուզե՛ք»։ ¹⁵ Սրանք նրանց հետքերով գնացին մինչև Հորդանան գետը և տեսան, որ ամբողջ ճանապարհը լի է հագուստներով և իրերով, որ խուճապահար փախչելիս նետել էին ասորիները։ Հետախույզները վերադարձան ու պատմեցին արքային։

¹⁶ Ժողովուրդը եկավ և կողոպտեց ասորիների բանակատեղին։ Մեկ գրիվ ճերմակ ալյուրն արժեցավ մեկ սիկղ, իսկ երկու գրիվ գարին՝ մեկ սիկղ, ինչպես ասել էր Տերը։ ¹⁷ Արքան դռան առջև հսկիչ կարգեց այն զորապետին, որի ձեռքին հենվում էր ինքը։ Խռնված ժողովուրդը դռան մոտ այնքան կոխոտեց նրան, որ նա մեռավ, ինչպես ասել էր Աստծու մարդը, երբ որ պատգամավորը նրա մոտ էր եկել։ ¹⁸ Եղավ այնպես, ինչպես Եղիսեեն ասել էր արքային. «Վաղն այս ժամին Սամարիայի դարպասների մոտ երկու գրիվ գարին մի սիկղ կլինի, և մեկ գրիվ նաշիհը՝ մի սիկղ»։ ¹⁹ Իսկ զորապետը պատասխանել էր Եղիսեեին. «Տերը եթե անգամ երկնքի սահանքները բացի, մի՞թե այդպիսի բան կարող է լինել»։ Այդ ժամանակ Եղիսեեն ասել էր. «Քո աչքերով պիտի տեսնես դա, սակայն դու դրանցից չպիտի ուտես»։ ²⁰ Այդպես էլ եղավ. և խուռն ամբոխը դռան առաջ կոխոտեց նրան, ու նա մեռավ։

8

Սոմնացի կնոջ պատմության ավարտը

¹ Եղիսեեն, խոսելով այն կնոջ հետ, որի որդուն կենդանացրել էր, ասաց. «Վե՛ր կացեք ու գնացե՛ք դու և քո տնեցիները, պանդո՛ւխտ եղեք այնտեղ, որտեղ կարող եք ապրել, քանզի Տերը սով է ուղարկելու երկրի վրա. դա արդեն եկել է և յոթ տարի է տևելու երկրի վրա»։ ² Կինը վեր կացավ և արեց այնպես, ինչպես Եղիսեեն էր ասել. ինքն ու տնեցիները գնացին և յոթ տարի պանդուխտ մնացին այլազգիների երկրում։

³ Յոթ տարին լրանալուց հետո կինը վերադարձավ այլազգիների երկրից և իր տան ու արտերի համար բողոքի գնաց արքայի մոտ։

⁴ Թագավորը, խոսելով Աստծու մարդ Եղիսեեի սպասավոր Գեեզիի հետ, ասաց. «Պատմի՛ր ինձ Եղիսեեի կատարած բոլոր մեծամեծ գործերը»։ ⁵ Երբ նա պատմում էր արքային, թե Եղիսեեն ինչպես էր կենդանացրել մեռյալ որդուն, առաջ եկավ այդ կինը, որի որդուն կենդանացրել էր Եղիսեեն, և արքային ասաց իր տան և արտերի մասին։ Գեեզին ասաց. «Տե՜ր արքա, սա է այդ կինը, և սա էլ՝ նրա որդին, որին Եղիսեեն կենդանացրեց»։ ⁶ Արքան հարցեր տվեց կնոջը, և նա պատմեց նրան։ Թագավորը նրան մի ներքինի տվեց և ասաց. «Վերադարձրո՛ւ նրան նրա ամբողջ ունեցվածքը և արտերի այն ամբողջ բերքը, որ ստացվել է նրա պանդխտության առաջին օրից մինչև այսօր»։

Եղիսեեն և Ազայելը

⁷ Եղիսեեն եկավ Դամասկոս։ Ասորիների արքան՝ Ադերի որդին, հիվանդացել էր։ Նրան այդ մասին հայտնելով՝ ասացին. «Աստծու մարդն այստեղ է եկել»։ ⁸ Արքան ասաց Ազայելին. «Մի ընծա՛ վերցրու, ընդառա՛ջ գնա Աստծու մարդուն, նրա միջոցով Տիրոջը հարցրո՛ւ, թե կբուժվե՞մ արդյոք իմ այս հիվանդությունից»։ ⁹ Ազայելը վերցրեց ընծան և Դամասկոսի բոլոր բարիքները քառասուն ուղտի վրա բարձելով՝ նրան ընդառաջ գնաց։ Կանգնելով նրա առջև՝ նա ասաց. «Ո՜վ հայր Եղիսեե, քո որդին՝ ասորիների արքա Ադերի որդին, ինձ քեզ մոտ է ուղարկել՝ ասելով. “Արդյոք կբուժվե՞մ իմ այս հիվանդությունից”»։ ¹⁰ Եղիսեեն ասաց նրան. «Գնա ասա՛, որ կապրի, թեև Տերն ինձ ցույց է տվել, որ կմեռնի»։ ¹¹ Պատկառելով կանգնեց նրա առջև, և Աստծու մարդը լաց եղավ։ ¹² Ազայելը հարցրեց. «Ինչո՞ւ ես լալիս, տե՛ր իմ»։ Եղիսեեն ասաց. «Գիտեմ, որ իսրայելացիների դեմ ինչ չարիքներ ես գործելու. նրանց ամրոցները հրով պիտի այրես, քաջ մարդկանց սրով կոտորես, նրանց տղաներին պիտի ոչնչացնես, հղիների փորը պիտի պատռես»։ ¹³ Ազայելն ասաց. «Քո ծառան ի՞նչ շուն է, որ այդ բաներն անի»։ Եղիսեեն ասաց. «Տերն ինձ հայտնեց, որ դո՛ւ պիտի թագավորես ասորիների վրա»։ ¹⁴ Ազայելը գնաց Եղիսեեի մոտից և մտավ իր տիրոջ մոտ ու հարցրեց նրան. «Ի՞նչ ասաց Եղիսեեն»։ Նա պատասխանեց. «Ինձ ասաց՝ “Անպայման կապրես”»։ ¹⁵ Հետևյալ օրը նա մի սավան վերցրեց, ջրով թրջեց, փռեց իր երեսին ու մեռավ։

Նրա փոխարեն թագավորեց Ազայելը։

Հովրամը Հուդայի երկրի թագավոր

(Բ Մն. 21.1ա-20)

¹⁶ Իսրայելի արքա Աքաաբի որդի Հովրամի թագավորության հինգերորդ տարում Հուդայի թագավոր եղավ Հովսափատ արքայի որդի Հովրամը։ ¹⁷ Երբ նա գահ բարձրացավ, երեսուներկու տարեկան էր և ութ տարի թագավորեց Երուսաղեմում։ ¹⁸ Նա ընթացավ Իսրայելի թագավորների ճանապարհով, ինչպես արել էր Աքաաբի տոհմը, քանի որ Աքաաբի դուստրը նրա կինն էր։ Նա չարիք գործեց Տիրոջ առջև, ¹⁹ սակայն Տերը չկամեցավ ոչնչացնել Հուդայի երկիրն իր ծառա Դավթի սիրուն, որովհետև նրան և նրա սերնդին խոստացել էր ճրագ տալ միշտ։

²⁰ Նրա օրոք Եդովմն ապստամբեց Հուդայի դեմ և իր համար առանձին մի թագավոր օծեց։ ²¹ Հովրամն իր բոլոր մարտակառքերով եկավ Սիովր, բայց շրջապատվեց եդովմացիների կողմից։ Առավոտյան՝ լույսը չբացված, կարողացավ մարտակառքերի զորավարների հետ ճեղքել պաշարումը։ Այսպիսով նրանք վերադարձան իրենց վրանները։ ²² Եդովմն անջատ մնաց Հուդայի երկրից։ Եվ այդպես է մինչև այսօր։ Այդ ժամանակ ապստամբեց նաև Լեբնան։ ²³ Հովրամի մնացած գործերը և այն ամենը, ինչ արել է նա, նկարագրված են Հուդայի թագավորների ժամանակագրության մեջ։

²⁴ Հովրամը գնաց իր նախնիների գիրկը և թաղվեց իր հայրերի մոտ՝ իր նախնի Դավթի քաղաքում, և նրա փոխարեն թագավորեց նրա որդին՝ Օքոզիան։

Հուդայի Օքոզիա թագավորը

(Բ Մն. 22.1-6)

²⁵ Իսրայելի արքա Աքաաբի որդի Հովրամի թագավորության տասներկուերորդ տարում Հուդայի վրա թագավորեց Հուդայի արքա Հովրամի որդի Օքոզիան։ ²⁶ Երբ Օքոզիան թագավոր դարձավ, քսաներկու տարեկան էր։ Նա մեկ տարի թագավորեց Երուսաղեմում։ Նրա մայրը Իսրայելի Ամրի արքայի դուստր Գոթողիան էր։ ²⁷ Նա ընթացավ Աքաաբի տոհմի ճանապարհով, չարիք գործեց Տիրոջ առջև, ինչպես Աքաաբի տունն էր արել, որովհետև նա Աքաաբի տան փեսան էր։ ²⁸ Նա Աքաաբի որդի Հովրամի հետ գնաց Գաղաադի Ռամաթ քաղաքը՝ ասորիների արքա Ազայելի դեմ պատերազմելու, սակայն ասորիները խոցեցին Հովրամին։ ²⁹ Հովրամ արքան վերադարձավ, որպեսզի Հեզրայելում բուժվի այն վերքերից, որ ասորիները հասցրել էին Ռամաթում ասորիների արքա Ազայելի դեմ պատերազմելու ժամանակ։ Հուդայի արքա Հովրամի որդի Օքոզիան եկավ Հեզրայել՝ Աքաաբի որդի Հովրամին տեսության, որովհետև նա հիվանդացել էր։

9

Հեուն Իսրայելի թագավոր

¹ Եղիսեե մարգարեն, կանչելով մի մարգարեի, ասաց նրան. «Գոտի՛ կապիր մեջքիդ, յուղի այս սրվակը ձե՛ռքդ վերցրու, գնա մտի՛ր Գաղաադի Ռամաթ քաղաքը։ ² Երբ տեսնես Ամեսիի որդի Հովսափատի որդի Հեուին, նրան կանչի՛ր իր եղբայրների միջից, մի ներքնասենյա՛կ տար նրան ³ և այս սրվակի յուղը նրա գլխին թափելով՝ ասա՛. “Այսպես է ասում Տերը. քեզ Իսրայելի թագավոր օծեցի”։ Ապա դուռը բա՛ց արա, էլ մի՛ սպասիր, փախի՛ր»։ ⁴ Երիտասարդ մարգարեն գնաց մտավ Գաղաադի Ռամաթ քաղաքը ⁵ և տեսավ, որ զորքի իշխանները նստած են։ Նա ասաց. «Ո՜վ իշխան, խոսք ունեմ քեզ ասելու»։ Հեուն ասաց. «Մեզնից ո՞ւմ»։ Մարգարեն ասաց. «Քե՛զ, ո՜վ իշխան»։ ⁶ Հեուն եկավ ու մտավ սենյակը։ Յուղը թափելով նրա գլխին՝ նա ասաց. «Այսպես է ասում Տերը՝ Իսրայելի Աստվածը. “Քեզ Տիրոջ ժողովրդի՝ Իսրայելի թագավոր օծեցի, ⁷ որպեսզի վերացնես քո տիրոջ՝ Աքաաբի տունը և իմ ծառա մարգարեների ու Տիրոջ բոլոր ծառաների արյան վրեժը լուծես Հեզաբելից ու նրա ամբողջ տնից, ⁸ Աքաաբի տնից ոչնչացնես բոլոր արուներին, Իսրայելից՝ նրա բոլոր ժառանգներին՝ գերի թե ազատ, ⁹ որպեսզի ես Աքաաբի տունը Նաբատի որդի Հերոբովամի տան և Աքիայի որդի Բաասայի տան նման դարձնեմ։ ¹⁰ Հեզաբելին Հեզրայելի դաշտերի մեջ շները պիտի ուտեն, և մարդ չպիտի գտնվի, որ թաղի նրան”»։

Ապա նա դուռը բացեց ու փախավ։ ¹¹ Հեուն եկավ իր տիրոջ ծառաների մոտ, որոնք հարցրին նրան. «Բարի՞ լուր է. այս անմիտն ինչո՞ւ էր եկել քեզ մոտ»։ Նա ասաց նրանց. «Դուք արդեն գիտեք այդ մարդուն և նրա բարբաջանքները»։ ¹² Նրանք ասացին. «Ճիշտ չէ, պատմի՛ր մեզ»։ Հեուն նրանց ասաց. «Այսպես ու այսպես ասաց ինձ. “Այսպես է ասում Տերը. քեզ Իսրայելի թագավոր օծեցի”»։ ¹³ Երբ այդ լսեցին, ամեն մեկն շտապեց իր բաճկոնը վերցնել և աստիճանների գլխին, որտեղ նստում էին, դրեց նրա տակը։ Եղջերափող հնչեցնելով՝ նրանք ասացին. «Հեուն թագավոր դարձավ»։

Հեուն դավադրություն է պատրաստում Հովրամ թագավորի դեմ

¹⁴ Ամեսսիայի որդի Հովսափատի որդի Հեուն գլուխ բարձրացրեց Հովրամի դեմ, իսկ Հովրամը ասորիների արքա Ազայելի պատճառով ողջ Իսրայելի հետ պաշտպանում էր Գաղաադի Ռամաթ քաղաքը։ ¹⁵ Հովրամ արքան ասորիների արքա Ազայելի դեմ պատերազմելու ընթացքում ասորիների հասցրած վերքերից բուժվելու համար եկել էր Հեզրայել։ Հեուն ասաց. «Եթե հոգով դուք ինձ հետ եք, ապա թող ոչ ոք գաղտնի դուրս չգա քաղաքից, որ գնա այս բանը հայտնի Հեզրայելում»։ ¹⁶ Հեուն ձի հեծավ ու գնաց Հեզրայել, որտեղ Իսրայելի Հովրամ արքան բուժվում էր նետերի վերքերից, որ ստացել էր Ռամաթում ասորիների արքա Ազայելի դեմ պատերազմելիս։ Նա զորավոր և հզոր մարդ էր և այնտեղ էր պառկել։ Հուդայի երկրի արքա Օքոզիան եկել էր տեսնելու Հովրամին։ ¹⁷ Հեզրայելում մի պահակ աշտարակի վրա ելավ ու փոշի տեսավ, որ Հեուի գալուց էր բարձրանում։ Նա ասաց. «Ես փոշի եմ տեսնում»։ Հովրամն ասաց. «Մի հեծյա՛լ վերցրու, նրան ընդառա՛ջ ուղարկիր, և նա թող հարցնի, թե խաղա՞ղ նպատակով է գալիս»։ ¹⁸ Հեծյալը նրան ընդառաջ գնաց և ասաց. «Արքան այսպես է ասում. “Արդյոք խաղա՞ղ նպատակով ես գալիս”»։ Հեուն նրան ասաց. «Քո ինչի՞ն է պետք խաղաղությունը, հետևի՛ր ինձ»։ Աշտարակի պահակը, այդ բանը հաղորդելով, ասաց. «Սուրհանդակը հասել է նրանց, բայց չի վերադառնում»։ ¹⁹ Արքան երկրորդ հեծյալին ուղարկեց, որն ասաց. «Այսպես է հարցնում արքան՝ “Արդյոք խաղա՞ղ նպատակով ես գալիս”»։ Հեուն ասաց. «Քո ինչի՞ն է պետք խաղաղությունը, հետևի՛ր ինձ»։ ²⁰ Աշտարակի պահակը, այդ բանը հաղորդելով, ասաց. «Սուրհանդակը հասել է նրանց մոտ, բայց չի վերադառնում։ Նրա ձի վարելը նման է Ամեսսիայի որդի Հեուի ձի վարելուն, որովհետև կատաղորեն է քշում»։ ²¹ Հովրամն ասաց. «Կառքը լծի՛ր»։ Մարտակառքերը լծեցին, և Իսրայելի արքա Հովրամն ու Հուդայի արքա Օքոզիան՝ ամեն մեկն իր մարտակառքը նստած, Հեուին ընդառաջ գնացին և նրան հասան Նաբոթ Հեզրայելացու կալվածքում։

Իսրայելի Հովրամ արքայի մահը

²² Երբ Հովրամը տեսավ Հեուին, ասաց. «Խաղա՞ղ նպատակով ես գալիս, Հեո՛ւ»։ Հեուն ասաց. «Ի՞նչ խաղաղություն, երբ քո մայր Հեզաբելի պոռնկություններն ու կախարդությունները շատանում են»։ ²³ Հովրամը, սանձերը շուռ տալով, փախավ և ասաց Օքոզիային. «Դավադրություն է, Օքոզիա՛»։ ²⁴ Հեուն քաշեց աղեղը, հարվածեց Հովրամի թիկունքի մեջտեղը. նետը մտավ նրա սիրտը, և նա ընկավ ծնկների վրա։ ²⁵ Հեուն ասաց իր զինակիր Բադեկարին. «Սրան գցի՛ր Նաբոթ Հեզրայելացու արտը, քանի որ հիշում եմ, որ երբ ես ու դու դրա հայր Աքաաբի հետևից ձի հեծած կողք կողքի գնում էինք, Տերը նրա նկատմամբ այս վճիռը տվեց. ²⁶ “Ես,- ասաց Տերը,- երեկ տեսա Նաբոթի ու նրա որդիների արյունը. դրա համար ես քեզ պիտի հատուցեմ այս ագարակում”։ Արդ, վերցրո՛ւ նրան ու նետի՛ր այդ արտը, ինչպես ասել է Տերը»։

Հուդայի երկրի Օքոզիա թագավորի մահը

²⁷ Հուդայի արքա Օքոզիան, տեսնելով այդ, փախավ Բեթանգան տանող ճանապարհով, բայց Հեուն հետապնդեց նրան և ասաց. «Ապա, դրա՛ն էլ սպանիր»։ Եվ նա խոցեց նրան մարտակառքում, երբ սա բարձրանում էր Բերայի, այսինքն՝ Հեբլաամի զառիվերը։ Նա փախավ Մակեդդով և այնտեղ մեռավ։ ²⁸ Ծառաները նրան տարան Երուսաղեմ և այնտեղ թաղեցին իր նախնիների մոտ՝ Դավթի քաղաքում։

²⁹ Օքոզիան Իսրայելի արքա Հովրամի թագավորության տասնմեկերորդ տարում թագավորեց Հուդայի վրա։

Հեզաբել թագուհու մահը

³⁰ Հեուն եկավ Հեզրայել։

Հեզաբելը, երբ այդ լսեց, իր աչքերին ծարիր քսեց, իր գլուխը զարդարեց ու նայեց պատուհանից դուրս։ ³¹ Երբ Հեուն քաղաք էր մտնում, նա ասաց. «Մի՞թե տիրասպան Զամբրին խաղաղությամբ է գալիս»։ ³² Հեուն, գլուխը բարձրացնելով դեպի պատուհանը, ասաց. «Ո՞վ ես դու, իջի՛ր ինձ մոտ»։ Երկու ներքինիներ կռացան ու ցած նայեցին, ³³ և Հեուն ասաց նրանց. «Ցա՛ծ գցեք դրան»։ Ցած նետեցին այդ կնոջը. նրա արյունը պատերի ու ձիերի վրա ցայտեց, և ձիերը ոտքի կոխան արեցին նրան։ ³⁴ Հեուն մտավ ներս և ուտելուց ու խմելուց հետո ասաց. «Վերցրե՛ք այդ անիծյալին ու թաղե՛ք նրան, քանզի թագավորի դուստր է»։ ³⁵ Գնացին նրան թաղելու, սակայն նրանից ոչինչ չգտան, բացի գանգից, ոտքերից ու ձեռքերից, ³⁶ և վերադարձան և այդ մասին հայտնեցին Հեուին։ Նա ասաց. «Իրականացավ Տիրոջ այն խոսքը, որ ասվել էր Եղիա Թեզբացու բերանով՝ “Հեզրայելի կալվածքում շներն ուտելու են Հեզաբելի մարմինը, ³⁷ Հեզաբելի դիակն այդ կալվածքի հողի երեսին լինելու է իբրև աղբ, այնպես որ ոչ ոք չկարողանա ասել՝ “Սա է Հեզաբելը”»։

10

Աքաաբի սերնդի կոտորածը

¹ Աքաաբը Սամարիայում յոթանասուն որդի ուներ։ Հեուն նամակ գրեց և ուղարկեց Սամարիա նրա իշխաններին, ծերերին և Աքաաբի որդիների դաստիարակներին։ Այդտեղ ասված էր. ² «Երբ ձեզ հասնի այս նամակը, քանի որ ձեզ մոտ են ձեր տիրոջ որդիները, և դուք ունեք մարտակառքեր ու երիվարներ, ամրապատ քաղաքներ ու զենքեր, ³ ձեր տիրոջ որդիներից, որին արժանի ու հարմար տեսնեք, նստեցրե՛ք իր հոր գահին և պատերազմե՛ք ձեր տիրոջ տան համար»։ ⁴ Նրանք շատ վախեցան ու ասացին. «Երկու թագավոր չկարողացան նրա դեմ կանգնել, մենք ինչպե՞ս դեմ կանգնենք»։ ⁵ Թագավորական տան ու քաղաքի վերակացուները, ծերերն ու դաստիարակները մարդ ուղարկեցին Հեուի մոտ՝ ասելով. «Մենք քո ծառաներն ենք, և մեզ ինչ որ հրամայես, կանենք, ոչ ոքի թագավոր չենք նստեցնի, և ինչ որ լավ է քեզ համար, այն կանենք»։

⁶ Նա երկրորդ նամակը գրեց նրանց՝ ասելով. «Եթե դուք ինձ եք պատկանում և իմ ձայնին հնազանդ եք, ապա ձեր տիրոջ որդիների գլուխները կտրե՛ք և վաղն այս ժամին բերե՛ք ինձ մոտ՝ Հեզրայել»։ Արքայի որդիները յոթանասուն հոգի էին, և քաղաքի ազդեցիկ մարդիկ էին նրանց դաստիարակում։ ⁷ Երբ նամակը նրանց հասավ, բռնեցին արքայի որդիներին, յոթանասունին էլ սպանեցին և նրանց գլուխները կողովների մեջ դնելով՝ ուղարկեցին նրա մոտ՝ Հեզրայել։ ⁸ Սուրհանդակը եկավ ու Հեուին ասաց. «Արքայի որդիների գլուխները բերել են»։ Նա ասաց. «Դրանք երկու կույտ անելով՝ դրե՛ք քաղաքից դուրս մինչև առավոտ»։ ⁹ Առավոտյան նա ելավ կանգնեց և ասաց ողջ ժողովրդին. «Դուք մեղավոր չեք, ես եմ գլուխ բարձրացրել իմ տիրոջ դեմ, և ես եմ սպանել նրան, բայց տեսե՛ք, սրանց հիմա ո՞վ է կոտորել։ ¹⁰ Որպեսզի Աքաաբի մասին Տիրոջ ասած խոսքն իրականանա, Տերը կատարեց այն, ինչ ասել էր իր ծառա Եղիայի միջոցով»։ ¹¹ Եվ Հեուն կոտորեց Հեզրայելում Աքաաբի տնից մնացած բոլոր մարդկանց, նրա բոլոր մեծամեծներին, հարազատներին, քրմերին, այնպես որ նրանցից ոչ մեկին կենդանի չթողեց։

Օքոզիայի ազգականների կոտորածը

¹² Դրանից հետո Հեուն ելավ գնաց Սամարիա։ Երբ ճանապարհին նա հասավ հովիվների կացարանին, ¹³ Հեուն հանդիպեց Հուդայի Օքոզիա արքայի եղբայրներին, որոնց ասաց. «Ովքե՞ր եք դուք»։ Նրանք ասացին. «Մենք Օքոզիայի եղբայրներն ենք, եկել ենք արքայի ու թագուհու որդիներին ողջունելու»։ ¹⁴ Հեուն ասաց. «Սրանց կենդանի՛ բռնեք»։ Նրանց կենդանի բռնեցին ու հովիվների կացարանի մոտ կոտորեցին այդ քառասուներկու հոգուն, և նրանցից ոչ ոք կենդանի չմնաց։

¹⁵ Հեուն գնաց այնտեղից և հանդիպեց իրեն ընդառաջ եկող Ռեքաբի որդի Հովնադաբին։ Նա բարևեց նրան ու ասաց. «Արդյոք քո սիրտը հավատարի՞մ է, ինչպես իմ սիրտն է հավատարիմ քո հանդեպ»։ Հովնադաբն ասաց. «Հավատարիմ է»։ Հեուն ասաց. «Եթե այդպես է, ձեռքդ ի՛նձ տուր»։ Սա տվեց իր ձեռքը, և նա իր մոտ՝ մարտակառքի վրա, բարձրացրեց նրան։ ¹⁶ Նա ասաց նրան. «Արի՛ ինձ հետ ու Տիրոջ հանդեպ ունեցած նախանձախնդրությունս տե՛ս»։ Եվ նա իր մարտակառքը նստեցրեց նրան։ ¹⁷ Նա մտավ Սամարիա և այնտեղ Աքաաբի տան մնացած բոլոր մարդկանց կոտորեց, մինչև որ նրանց բնաջնջեց, ինչպես Տերն ասել էր Եղիային։

Հեուն վերացնում է Բահաղի պաշտամունքը

¹⁸ Հեուն հավաքեց ողջ ժողովրդին և նրանց ասաց. «Աքաաբը Բահաղին քիչ ծառայություն մատուցեց, իսկ Հեուն շատ ծառայություններ պիտի մատուցի։ ¹⁹ Արդ, Բահաղի բոլոր մարգարեներին, նրա ծառաներին ու քրմերին ինձ մո՛տ կանչեք. թող ոչ ոք չբացակայի, քանի որ Բահաղին մեծ զոհ եմ մատուցելու։ Ով բացակայի, իմ ձեռքից չի փրկվի»։ Հեուն խաբեություն արեց, որպեսզի Բահաղի ծառաներին կորստյան մատնի։ ²⁰ Հեուն ասաց. «Բահաղի համար սրբազան զոհաբերությո՛ւն պատրաստեք»։ Այդ բանը հաղորդեցին բոլորին։ ²¹ Հեուն Իսրայելի բոլոր կողմերը մարդ ուղարկեց, Բահաղին պաշտող բոլոր մարդիկ եկան, չներկայացող մարդ չմնաց։ Սրանք մտան Բահաղի մեհյանը, և մեհյանը բերնեբերան լցվեց։ ²² Հեուն ասաց հանդերձապետներին. «Հանե՛ք Բահաղին ծառայողների պատմուճանները»։ Եվ նրանք հանեցին նրանց պատմուճանները։ ²³ Հեուն և Ռեքաբի որդի Հովնադաբը մտան Բահաղի մեհյանը։ Նրանք ասացին Բահաղին պաշտողներին. «Որոնե՛ք և տեսե՛ք, թե արդյոք այստեղ ձեզ հետ չկա՞ն Տիրոջը պաշտողներ, այստեղ միայն Բահաղին ծառայողներ պետք է լինեն»։ ²⁴ Հեուն մտավ խունկ ծխելու և ողջակեզներ մատուցելու, իսկ դրսում երեք հարյուր ութսուն մարդ կանգնեցրեց և ասաց նրանց. «Եթե ձեզնից որևէ մեկը կենդանի թողնի նրան, ում ես կհանձնեմ ձեր ձեռքը, իր կյանքով կհատուցի այդ մարդու փոխարեն»։ ²⁵ Երբ Հեուն ողջակեզները կատարեց վերջացրեց, ասաց հետևակ ու սպառազեն զինվորներին. «Մտեք կոտորե՛ք նրանց, նրանցից ոչ ոք թող դուրս չգա»։ Հետևակ ու սպառազեն զինվորները նրանց սրակոտոր արեցին, նրանց մարմինները դուրս շպրտեցին, ապա մտան ներքին սենյակը, որտեղ գտնվում էր Բահաղի արձանը, ²⁶ դուրս հանեցին այն և այրեցին։ ²⁷ Նրանք կործանեցին Բահաղի արձանները, քանդեցին Բահաղի մեհյանը և այն արտաքնոց դարձրին, ինչպես որ է մինչև այսօր։ ²⁸ Այսպես Հեուն Բահաղ աստծուն վերացրեց Իսրայելից։ ²⁹ Սակայն Հեուն Իսրայելին մեղանչել տվող Նաբատի որդի Հերոբովամի մեղքերից, այսինքն՝ Բեթելի ու Դանի ոսկե երինջներից չհրաժարվեց։ ³⁰ Տերն ասաց Հեուին. «Քանի որ քաջություն ունեցար Աքաաբի որդիների նկատմամբ անելու այն, ինչ իմ սրտում էր, ուստի քո հետնորդները մինչև չորրորդ սերունդ նստելու են Իսրայելի գահին»։ ³¹ Սակայն Հեուն ամբողջ հոգով Տիրոջ՝ Իսրայելի Աստծու օրենքով ընթանալու ջանադիր չեղավ և Իսրայելին մեղանչել տվող Հերոբովամի մեղքերից զերծ չմնաց։

Հեուի մահը

³² Այդ օրերին Տերն սկսեց կոտորել Իսրայելի բոլոր սահմաններում, Ազայելը սկսեց հարվածել նրանց Իսրայելի բոլոր սահմաններում, ³³ Հորդանան գետից արևելք գտնվող ամբողջ Գաղաադի, Գադի, Ռուբենի ու Մանասեի երկրներում, Առնովնի ձորի եզրին գտնվող Արոյերից մինչև Գաղաադ ու Բասան։

³⁴ Հեուի մնացած գործերը, այն ամենը, ինչ նա արել է, նրա բոլոր քաջագործությունները, մղած պատերազմները նկարագրված են Իսրայելի թագավորների ժամանակագրության մեջ։ ³⁵ Հեուն գնաց իր նախնիների գիրկը, և նրան թաղեցին Սամարիայում։ Նրա փոխարեն թագավորեց նրա որդի Հովաքազը։ ³⁶ Հեուն Սամարիայում Իսրայելի վրա թագավորեց քսանութ տարի։

11

Հուդայի երկրի Գոթողիա թագուհին

(Բ Մն. 22.10-12)

¹ Օքոզիայի մայր Գոթողիան երբ տեսավ իր որդիների մահը, կոտորեց ամբողջ թագավորական սերունդը, ² բայց Հովրամ արքայի դուստրը՝ Օքոզիայի քույր Հոսաբեեն, Օքոզիայի որդի Հովասին վերցրեց արքայի սպանված որդիների միջից, նրան ու նրա դայակին Գոթողիայից փախցրեց և թաքցրեց ննջասենյակում։ Հովասը փրկվեց։ ³ Նա վեց տարի նրա հետ Տիրոջ տանը թաքնվեց, երբ Գոթողիան թագավորում էր երկրում։

Ապստամբություն Գոթողիայի դեմ

(Բ Մն. 23.1-15)

⁴ Յոթերորդ տարում Հովիդայե քահանան Տիրոջ տուն կանչեց հարյուրապետներին, թիկնապահներին ու սուրհանդակ զինվորներին, ու նրանց Տիրոջ անունով երդվեցնելով՝ նրանց ցույց տվեց արքայի որդուն։ ⁵ Նա պատվիրելով նրանց՝ ասաց. «Ձեր անելիքն այս է. ձեր մեկ երրորդ մասը եկող շաբաթ օրն ստանձնելու է արքունի տան դռան պահպանությունը, ⁶ մյուս մեկ երրորդ մասը՝ ճանապարհների դռան, իսկ մյուս մեկ երրորդ մասը՝ պահապան զինվորների հետևի դռան պահպանությունը։ Պիտի պահպանեք տան ապահովությունը։ ⁷ Մյուս երկու խմբերը, որոնք եկող շաբաթ օրը ծառայության մեջ չեն, թող գան և պահպանեն Տիրոջ տունը, որտեղ գտնվում է թագավորը, ⁸ և արքայի շուրջը պահպանություն կանեք՝ ձեռքում ունենալով ձեր զենքերը, և ով շարքերին մոտենա, թող մեռնի»։ Եվ ինքը թագավորի հետ էր մտնելիս և ելնելիս։

⁹ Հարյուրապետներն արեցին այն, ինչ Հովիդայեն՝ իմաստունը, պատվիրել էր. ամեն մեկն առավ իր մարդկանց՝ թե՛ նրանց, որոնք շաբաթ օրը պահպանություն անելու էին կոչված և թե՛ նրանց, որոնք այդ օրը վերջացրել էին իրենց ծառայությունը, և եկավ Հովիդայե քահանայի մոտ։ ¹⁰ Քահանան Դավիթ արքայի՝ Տիրոջ տանը գտնվող գեղարդներն ու զենքերը տվեց հարյուրապետներին։ ¹¹ Հետևակ զինվորները եկան ու իրենց զենքերը ձեռքներին կանգնեցին տան աջ անկյունից մինչև ձախ անկյունը, զոհասեղանի ու արքունի տան շուրջը։ ¹² Հովիդայեն բերել տվեց արքայի որդուն, նրա գլխին դրեց թագը, նրան հանձնեց Օրենքի գիրքը, նրան օծելով՝ թագավոր դարձրեց և ծափ զարկեց ու ասաց. «Կեցցե՛ արքան»։

¹³ Գոթողիան, լսելով շարժման մեջ եղող մարդկանց աղմուկը, եկավ նրանց մոտ, մտավ Տիրոջ տունը ¹⁴ և տեսավ, որ արքան, ինչպես կարգն է, կանգնել է սյան մոտ, իսկ երգիչներն ու փողհարները՝ նրա շուրջը։ Երկրի ամբողջ ժողովուրդը ուրախանում էր և փող հնչեցնում։ Գոթողիան պատառոտեց իր հագուստները և աղաղակեց՝ ասելով. «Դա՜վ է, դա՜վ»։ ¹⁵ Հովիդայե քահանան պատվիրեց զորքի հարյուրապետներին՝ ասելով. «Դո՛ւրս բերեք նրան շարքերից, և ով որ գնա նրա հետևից, թող սրով սպանվի»։ Քահանան չէր ուզում, որ նա Տիրոջ տանը սպանվի։ ¹⁶ Նրան բռնեցին, և երբ իրենք արքունի տուն տանող երիվարների ճանապարհով ընթանում էին, սպանեցին նրան։

Հովիդայեի բարեկարգությունները

(Բ Մն. 23.16-21)

¹⁷ Հովիդայեն Տիրոջ և արքայի, ինչպես և արքայի ու ժողովրդի միջև ուխտ դրեց, որ իրենք կլինեն Տիրոջ ժողովուրդը։ ¹⁸ Երկրի բոլոր մարդիկ գնացին Բահաղի մեհյանը, կործանեցին այն, ջարդուփշուր արեցին նրա զոհասեղանները, նրա արձանները, Բահաղի քուրմ Մաթանին սպանեցին զոհասեղանի դիմաց։ Քահանան հսկիչ ոստիկաններ նշանակեց Տիրոջ տան վրա։ ¹⁹ Նա հարյուրապետներին, թիկնապահներին, սուրհանդակ զինվորներին ու երկրի ամբողջ ժողովրդին վերցնելով արքային դուրս բերեց Տիրոջ տնից, սուրհանդակների դռան ճանապարհով բերեց արքունի տուն և նրան թագավորական գահին նստեցրեց։ ²⁰ Երկրի ամբողջ ժողովուրդն ուրախացավ, քաղաքը հանդարտվեց։ Գոթողիային արքունի տան մոտ սպանել էին սրով։

12

Հուդայի Հովաս թագավորը

(Բ Մն. 24.1-16)

¹ Երբ Հովասը թագավոր օծվեց, յոթ տարեկան էր։ ² Հեուի թագավորության յոթերորդ տարում թագավոր դարձավ Հովասը, որը քառասուն տարի թագավորեց Երուսաղեմում։ Նրա մոր անունը Սաբիա էր, Բերսաբեե քաղաքից։ ³ Հովասն արդար գտնվեց Տիրոջ առջև այնքան ժամանակ, որ Հովիդայեն դաստիարակում էր նրան։ ⁴ Սակայն մարդիկ բարձունքներից չհրաժարվեցին, և ժողովուրդը տակավին զոհեր էր մատուցում և խունկ ծխում բարձունքներում։

⁵ Եվ Հովասն ասաց քահանաներին. «Ողջ սուրբ արծաթը, որ նվիրվում է Տիրոջ տանը, լինի հաշվառման ենթարկված մարդկանց տուրքը կամ թե սրտի ցանկության նվեր, ⁶ քահանաները թող իրենց վերցնեն ամեն մեկն իր ծառայության եկամուտը, որպեսզի, որտեղ Տիրոջ տան քանդված մասեր լինեն, նորոգվեն»։

⁷ Մինչև Հովաս արքայի թագավորության քսաներկուերորդ տարին քահանաները Տիրոջ տան քանդված մասերը դեռ չէին նորոգել, ⁸ ուստի Հովաս արքան կանչեց Հովիդայե քահանային ու մյուս քահանաներին և ասաց նրանց. «Ինչո՞ւ չեք նորոգել Տիրոջ տան քանդված մասերը։ Ձեր ծառայություններից ստացված արծաթը ձեզ մի՛ վերցրեք, այլ Տիրոջ տան քանդված մասերի նորոգմա՛նը հատկացրեք»։ ⁹ Քահանաները համաձայնության եկան ժողովրդից արծաթ չվերցնել և ոչ էլ տան քանդված մասերը նորոգել։ ¹⁰ Հովիդայե քահանան մի արկղ վերցրեց, վրան անցք բացեց և դրեց Տիրոջ զոհասեղանի կողքին։ Տիրոջ տունը պահպանող քահանաները Տիրոջ տանը գտնված ամբողջ արծաթը լցրին այնտեղ։ ¹¹ Երբ տեսնում էին, որ արկղի մեջ արծաթը շատացել է, կանչում էին արքունի քարտուղարների պետին ու քահանայապետին, որոնք գալիս էին, Տիրոջ տանը գտնված արծաթը ծրարում ¹² և պատրաստ գումարը տալիս էին Տիրոջ տան գործավարներին, որ բաշխեն Տիրոջ տան ատաղձագործներին, ¹³ շինարարներին, նկարիչներին, ճարտար որմնադիրներին, քարգործներին, որպեսզի Տիրոջ տան քանդված մասերը նորոգելու համար փայտ ու տաշած քարեր գնեն և անեն այն ամենը, ինչ անհրաժեշտ էր Տիրոջ տունը նորոգելու համար։ ¹⁴ Սակայն Տիրոջ տուն բերված արծաթով Տիրոջ տան համար արծաթե դռներ, սեպեր, տաշտեր, փողեր և ամեն տեսակ ոսկե ու արծաթե անոթներ չպետք է սարքեին, ¹⁵ այլ այդ գումարը գործավորներին պետք է տային, որպեսզի նրանք Տիրոջ տունը նորոգեն։ ¹⁶ Հաշիվ չէին պահանջում այն մարդկանցից, որոնց ձեռքն էին հանձնում գործավորներին տրվելիք արծաթը, որովհետև նրանք վստահելի էին, ¹⁷ իսկ մեղքի ու հանցանքի քավության համար ընծայաբերված արծաթը Տիրոջ տուն չէր մտնում, այլ քահանաներին էր տրվում։

Հովասի թագավորության վախճանը

¹⁸ Այն ժամանակ ասորիների արքա Ազայելը հարձակվեց Գեթի վրա և գրավեց այն։ Ապա Ազայելն իր երեսը դարձրեց դեպի Երուսաղեմ, որ նրա վրա արշավի։ ¹⁹ Հուդայի արքա Հովասը իր հայրերի, Հուդայի արքաներ Հովսափատի, Հովրամի ու Օքոզիայի արած բոլոր նվիրատվություններն ու իր նվիրատվությունները, Տիրոջ տան ու թագավորի տան գանձարաններում գտնվող ամբողջ արծաթն ուղարկեց ասորիների արքային, իսկ ինքը մեկնեց Երուսաղեմից։

²⁰ Հովասի մնացած գործերը և այն ամենը, ինչ նա արեց, նկարագրված են Հուդայի թագավորների ժամանակագրության մեջ։ ²¹ Նրա ծառաները նրա դեմ ելան, դավաճանեցին նրան և Գաղաադում բնակվող Մաալոնի տանը սպանեցին Հովասին։ ²² Նրան սպանեցին նրա ծառաները՝ Հեմավութի որդի Հովազաքարը և Սոմերի որդի Հեզեբութը. խփեցին ու սպանեցին նրան և թաղեցին իր նախնիների մոտ՝ Դավթի քաղաքում։ Նրա փոխարեն թագավորեց նրա որդին՝ Ամեսսիան։

13

Իսրայելի Հովաքազ թագավորը

¹ Հուդայի արքա Օքոզիայի որդի Հովասի թագավորության քսաներկուերորդ տարում Իսրայելի վրա Սամարիայում թագավորեց Հեուի որդի Հովաքազը։ Նա թագավորեց տասնյոթ տարի։ ² Նա Տիրոջ առջև չարիք գործեց, ընթացավ Իսրայելին մեղանչել տվող Նաբատի որդի Հերոբովամի մեղքերի հետքերով։ Նա դրանցից չհրաժարվեց։ ³ Տիրոջ բարկությունը բորբոքվեց Իսրայելի դեմ, և Տերը նրանց շարունակ մատնեց ասորիների Ազայել արքայի և Ազայելի որդի Ադերի ձեռքը։

⁴ Հովաքազն աղոթեց Տիրոջը, և Տերը լսեց նրան, որովհետև տեսավ Իսրայելի նեղությունները, որ պատճառում էր նրան ասորիների արքան։ ⁵ Տերն Իսրայելին փրկիչ տվեց. Իսրայելն ազատվեց ասորիների ձեռքից, և Իսրայելի որդիներն ապրեցին իրենց բնակավայրերում, ինչպես և նախկինում։ ⁶ Սակայն չհրաժարվեցին Իսրայելին մեղանչել տվող Նաբատի որդի Հերոբովամի մեղքերից, այլ դրանց մեջ ընթացան, փայտե սյունն էլ շարունակում էր պաշտամունքի առարկա մնալ Սամարիայում։ ⁷ Հովաքազի մոտ մնացել էին միայն հիսուն հեծյալ, տասը մարտակառք ու տասը հազար հետևակ. մնացածներին ասորիների արքան բնաջնջել էր և նրանց հողի պես ոտքի կոխան էր դարձրել։

⁸ Հովաքազի մնացած գործերը, այն ամենը, ինչ նա արել է, նրա քաջագործությունները նկարագրված են Իսրայելի թագավորների ժամանակագրության մեջ։ ⁹ Հովաքազը գնաց իր նախնիների գիրկը, նրան թաղեցին Սամարիայում՝ իր նախնիների մոտ։

Իսրայելի Հովաս թագավորը

Նրա փոխարեն թագավորեց իր որդին՝ Հովասը։ ¹⁰ Հուդայի արքա Հովասի թագավորության երեսունյոթերորդ տարում Իսրայելի վրա թագավորեց Հովաքազի որդի Հովասը։ Նա Սամարիայում թագավորեց տասներկու տարի։ ¹¹ Նա չարիք գործեց Տիրոջ առջև, չհրաժարվեց Իսրայելին մեղանչել տվող Նաբատի որդի Հերոբովամի մեղքերից, թաղվեց դրանց մեջ։

¹² Հովասի մնացած պատմությունը, այն ամենը, ինչ նա արել է, Հուդայի արքայի հետ կռվելու ժամանակ նրա ցուցաբերած քաջագործությունները նկարագրված են Իսրայելի թագավորների ժամանակագրության մեջ։ ¹³ Հովասը գնաց իր նախնիների գիրկը, և նրա գահին նստեց Հերոբովամը։ Հովասը թաղվեց Սամարիայում՝ Իսրայելի թագավորների մոտ։

Եղիսեեն կանխատեսում է ասորիների դեմ հաղթանակը

¹⁴ Եղիսեեն ծանր հիվանդացավ, որից և մեռավ։ Իսրայելի արքա Հովասը մինչ այդ եկել էր նրա մոտ, լաց եղել նրա առջև՝ ասելով. «Հա՜յր, հա՜յր, դու Իսրայելի մարտակառքն էիր և նրա հեծելազորը»։ ¹⁵ Եղիսեեն նրան ասել էր. «Ա՛ռ քո աղեղն ու նետերը»։ Հովասը վերցրել էր աղեղն ու նետերը, ¹⁶ և Եղիսեեն Իսրայելի արքային ասել էր. «Աղեղը ձեռքո՛վդ լարիր», և նա իր ձեռքով լարել էր աղեղը։ Եղիսեեն իր ձեռքը դրել էր արքայի ձեռքին ¹⁷ և ասել. «Բա՛ց արևելյան կողմի պատուհանը»։ Նա բացել էր, և Եղիսեեն ասել էր. «Արձակի՛ր»։ Երբ նա արձակել էր, Եղիսեեն ասել էր. «Սա Տիրոջ փրկության նետն է, ասորիների դեմ փրկության նետը։ Դու ասորիներին պիտի հարվածես Ափեկում, մինչև որ իսպառ բնաջնջես նրանց»։ ¹⁸ Եղիսեեն ավելացրել էր. «Նետե՛ր վերցրու»։ Երբ Հովասը նետերը վերցրել էր, Եղիսեեն ասել էր Իսրայելի արքային. «Արձակի՛ր և խփի՛ր գետնին»։ Արքան երեք նետ էր խփել գետնին ու կանգ առել։ ¹⁹ Աստծու մարդը բարկացել էր նրա վրա՝ ասելով. «Եթե հինգ կամ վեց անգամ հարվածեիր, ասորիներին իսպառ ոչնչացրած կլինեիր։ Արդ, միայն երեք անգամ կհարվածես ասորիներին»։

²⁰ Եղիսեեն մեռավ, և նրան թաղեցին։ Հետևյալ տարին Մովաբի կողոպտիչ զորքը հարձակվեց երկրի վրա։ ²¹ Այդ ժամանակ մի մարդու էին թաղում։ Երբ թաղողները տեսան Մովաբի կողոպտիչ զորքին, այդ մեռած մարդուն շտապ գցեցին գերեզմանը։ Այդ մեռած մարդու դիակը Եղիսեեի ոսկորներին դիպչելուն պես հանգուցյալը կենդանացավ ու կանգնեց իր ոտքերի վրա։

Պատերազմ Իսրայելի և ասորիների միջև

²² Ասորիների արքա Ազայելը Հովաքազի իշխանության բոլոր օրերին նեղում էր Իսրայելին, ²³ բայց Տերը հանուն Աբրահամի, Իսահակի ու Հակոբի հետ դրած ուխտի ողորմեց, գթաց ու հայացքը դարձրեց նրանց, չկամեցավ կործանել նրանց և իր երեսը նրանցից շուռ չտվեց։

²⁴ Ասորիների արքա Ազայելը մեռավ, և նրա փոխարեն թագավորեց նրա որդի Ադերի որդին։ ²⁵ Հովաքազի որդի Հովասը ելավ և Ազայելի որդի Ադերի որդուց գրավեց այն քաղաքները, որ նրա հայրը պատերազմով խլել էր իր հոր՝ Հովաքազի ձեռքից։ Հովասը նրան երեք անգամ հաղթեց և վերագրավեց Իսրայելի քաղաքները։

14

Հուդայի Ամասիա թագավորը

(Բ Մն. 25.1-10)

¹ Իսրայելի արքա Հովաքազի որդի Հովասի թագավորության երրորդ տարում թագավորեց Հուդայի արքա Հովասի որդի Ամասիան։ ² Քսանհինգ տարեկան էր նա, երբ թագավոր դարձավ, և քսանինը տարի թագավորեց Երուսաղեմում։ Նրա մոր անունն էր Հովադին, որը Երուսաղեմից էր։ ³ Ամասիան արդար գտնվեց Տիրոջ առջև, բայց ոչ իր նախնի Դավթի նման։ Ըստ ամենայնի նա արեց այն, ինչ իր հայր Հովասն էր արել, ⁴ սակայն բարձունքների մեհյանները չվերացրեց, և ժողովուրդը տակավին զոհեր էր մատուցում և խունկ ծխում բարձունքներում։ ⁵ Երբ թագավորությունն իր ձեռքն անցավ, նա սպանեց իր այն պալատական պաշտոնյաներին, որոնք սպանել էին իր հորը, ⁶ սակայն սպանողների որդիներին չսպանեց, որովհետև, ինչպես գրված է Մովսեսի օրենքի գրքում, Տերը պատվիրել է՝ ասելով. «Թող հայրերը չմեռնեն որդիների պատճառով, ոչ էլ որդիները մեռնեն հայրերի պատճառով, այլ ամեն ոք իր մեղքի համար թող մեռնի»։

Պատերազմ եդովմացիների դեմ

(Բ Մն. 25.11-16)

⁷ Նա տասը հազար եդովմացիների սպանեց Մայիլում, պատերազմով գրավեց Վեմը և այն կոչեց Հեկթովել, ինչպես և կոչվում է մինչև այսօր։

Պատերազմ Իսրայելի դեմ

(Բ Մն. 25.17-24)

⁸ Այդ ժամանակ Ամասիան Իսրայելի արքա Հեուի որդի Հովաքազի որդի Հովասի մոտ բանագնաց ուղարկեց՝ ասելով. «Ե՛կ երես երեսի հանդիպենք միմյանց»։ ⁹ Իսրայելի արքա Հովասը մարդ ուղարկեց Հուդայի արքա Ամասիայի մոտ և ասաց. «Լիբանանում բուսնող ակքան փուշը լուր ուղարկեց Լիբանանի եղևնուն՝ ասելով. “Քո դստերը կնությա՛ն տուր իմ որդուն”։ Սակայն Լիբանանի անապատի գազաններն անցան ու կոխոտեցին ակքան փուշը։ ¹⁰ Եդովմացիներին կոտորեցիր և մտքումդ հպարտացար։ Գոհացի՛ր քո փառքով ու նստի՛ր քո տանը։ Ինչո՞ւ է քո չարությունը քեզ գրգռում. չէ՞ որ կընկնես դու, և քեզ հետ էլ՝ Հուդայի երկիրը»։ ¹¹ Ամասիան չանսաց նրան։ Իսրայելի արքա Հովասը պատերազմի ելավ, և Հուդայի երկրի Բեթսամյուս բնակավայրում դեմ դիմաց իրար հանդիպեցին ինքը և Հուդայի արքա Ամասիան։ ¹² Հուդայի զորքը պարտվեց Իսրայելից, և Հուդայի բոլոր զորքերն իրենց վրանները փախան։ ¹³ Իսրայելի արքա Հովաքազի որդի Հովասը Բեթսամյուսում բռնեց Հովաքազի որդի Հովասի որդի Ամասիային՝ Հուդայի թագավորին, եկավ Երուսաղեմ և Եփրեմի դարպասից մինչև Անկյունների դարպասը՝ չորս հարյուր կանգուն, քանդեց Երուսաղեմի պարիսպը։ ¹⁴ Նա Տիրոջ տան ու թագավորի տան գանձարանում եղած ոսկին ու արծաթը, բոլոր անոթները և ազնվատոհմ պատանդներին վերցնելով՝ վերադարձավ Սամարիա։

¹⁵ Հովասի մնացած գործերը, նրա կատարած քաջագործություններն ու Հուդայի երկրի արքա Ամասիայի դեմ մղած պատերազմը նկարագրված են Իսրայելի թագավորների ժամանակագրության մեջ։ ¹⁶ Հովասը գնաց իր նախնիների գիրկը և թաղվեց Սամարիայում՝ Իսրայելի թագավորների հետ։ Նրա փոխարեն թագավորեց իր որդին՝ Հերոբովամը։

Ամասիա թագավորի մահը

(Բ Մն. 25.25-28)

¹⁷ Հուդայի երկրի արքա Հովասի որդի Ամասիան Իսրայելի թագավոր Հովաքազի որդի Հովասի մահվանից հետո ապրեց տասնհինգ տարի։ ¹⁸ Ամասիայի մնացած գործերը և այն ամենը, ինչ նա արել է, նկարագրված են Հուդայի երկրի թագավորների ժամանակագրության մեջ։ ¹⁹ Նրա դեմ Երուսաղեմում դավադրություն կազմակերպեցին, և նա փախավ Լաքիս։ Նրա հետևից մարդ ուղարկեցին Լաքիս ու նրան այնտեղ սպանեցին։ ²⁰ Նրան բերեցին ձիերի վրա ու թաղեցին Երուսաղեմում՝ Դավթի քաղաքում, իր հայրերի մոտ։

Հուդայի Ազարիա թագավորը

(Բ Մն. 26.1-23)

²¹ Հուդայի ամբողջ ժողովուրդը վերցրեց տասնվեցամյա Ազարիային և թագավոր նստեցրեց նրա հայր Ամասիայի փոխարեն։ ²² Ազարիան արքայի մեռնելուց հետո Հուդայի երկրին միացրեց Ելաթն ու բարեկարգեց այն։

Իսրայելի Հերոբովամ թագավորը

²³ Հուդայի արքա Հովասի որդի Ամասիայի թագավորության տասնհինգերորդ տարում Իսրայելի վրա թագավորեց Իսրայելի արքա Հովասի որդի Հերոբովամը։ Նա քառասունմեկ տարի թագավորեց Սամարիայում։ ²⁴ Նա Տիրոջ առջև չարիք գործեց, չհրաժարվեց Իսրայելին մեղանչել տվող Նաբատի որդի Հերոբովամի բոլոր մեղքերից։ ²⁵ Նա Իսրայելի սահմանները՝ Եմաթի մուտքից մինչև Արաբա ծովը վերականգնեց, ինչպես ասել էր Տերը՝ Աստված, իր ծառա գեթաքոբերացի Ամաթ մարգարեի որդի Հովնանի միջոցով, ²⁶ քանզի Տերը տեսել էր սակավամարդ, նեղված, տկար ու լքված Իսրայելի չափազանց դառն տառապանքը. ոչ ոք չկար, որ օգներ Իսրայելին։ ²⁷ Տերը չէր ուզում, որ Իսրայելի զավակները բնաջնջվեն երկնքի ներքո, ուստի Հովասի որդի Հերոբովամի ձեռքով փրկեց նրանց։

²⁸ Հերոբովամի մնացած գործերը, այն ամենը, ինչ նա արել է, պատերազմում նրա կատարած քաջագործությունները և թե ինչպես է Դամասկոսն ու Եմաթը Հուդայի երկրից վերադարձրել Իսրայելին, նկարագրված են Իսրայելի թագավորների ժամանակագրության մեջ։

²⁹ Հերոբովամը գնաց իր նախնիների՝ Իսրայելի թագավորների գիրկը, և նրա փոխարեն թագավորեց իր որդին՝ Զաքարիան։

15

¹ Իսրայելի Հերոբովամ արքայի թագավորության քսանյոթերորդ տարում թագավորեց Հուդայի Ամասիա արքայի որդի Ազարիան։ ² Նա տասնվեց տարեկան էր, երբ թագավոր դարձավ, և հիսուներկու տարի թագավորեց Երուսաղեմում։ Նրա մոր անունը Հեքեղիա էր, նա Երուսաղեմից էր։ ³ Ազարիան իր հայր Ամասիայի նման ըստ ամենայնի բարի գործեր կատարեց Տիրոջ առջև, ⁴ բայց բարձունքների մեհյանները չվերացրեց, իսկ ժողովուրդը տակավին զոհեր էր մատուցում և խունկ ծխում բարձունքներում։ ⁵ Տերը պատուհասեց թագավորին, և նա բորոտ դարձավ մինչև իր կյանքի վերջը։ Նա առանձին տան մեջ էր բնակվում։ Արքունի տան վրա իշխում և երկրի ժողովրդին դատում էր արքայի որդին՝ Հովաթամը։

⁶ Ազարիայի մնացած գործերը և այն ամենը, ինչ նա արել է, նկարագրված են Հուդայի թագավորների ժամանակագրության մեջ։ ⁷ Ազարիան գնաց իր նախնիների գիրկը, և նրան թաղեցին Դավթի քաղաքում՝ իր նախնիների մոտ։ Նրա փոխարեն թագավորեց իր որդին՝ Հովաթամը։

Իսրայելի Զաքարիա թագավորը

⁸ Հուդայի արքա Ազարիայի թագավորության երեսունյոթերորդ տարում Իսրայելի վրա թագավորեց Հերոբովամի որդի Զաքարիան։ Նա վեց ամիս թագավորեց Սամարիայում։ ⁹ Նա իր նախնիների նման չարիք գործեց Տիրոջ առջև, չհրաժարվեց Իսրայելին մեղանչել տվող Նաբատի որդի Հերոբովամի մեղքերից։ ¹⁰ Նրա դեմ գլուխ բարձրացրին Հաբիսի որդի Սեղղումն ու Կեբդաամը. նրանք ժողովրդի ներկայությամբ հարվածեցին նրան ու սպանեցին։ Նրա փոխարեն թագավորեց Սեղղումը։

¹¹ Զաքարիայի մնացած գործերը նկարագրված են Իսրայելի թագավորների ժամանակագրության մեջ։ ¹² Այս է այն խոսքը, որ Տերն ասել էր Հեուին. «Քո որդիներից միայն մինչև չորրորդ սերունդը պիտի նստի Իսրայելի գահին»։ Եվ այդպես էլ եղավ։

Իսրայելի Սեղղում թագավորը

¹³ Հաբիսի որդի Սեղղումը թագավորեց Հուդայի երկրի արքա Ազարիայի թագավորության երեսունութերորդ տարում։ Սեղղումը Սամարիայում թագավորեց մեկ ամիս։ ¹⁴ Գադդիի որդի Մանայեմը դուրս եկավ Թերսայից, մտավ Սամարիա, Սամարիայում հաղթեց Հաբիսի որդի Սեղղումին, սպանեց նրան ու փոխարենը թագավոր նստեց։

¹⁵ Սեղղումի մնացած գործերը, նրա կազմակերպած դավադրությունները նկարագրված են Իսրայելի թագավորների ժամանակագրության մեջ։

Իսրայելի Մանայեմ թագավորը

¹⁶ Այն ժամանակ Մանայեմը հարձակվեց Թերսայի վրա և այնտեղ, սկսած Թերսայից, նրա սահմաններում գտնվող բոլորին սպանեց, հղի կանանց արգանդը պատռեց, որովհետև նրա առաջ չէին բացել քաղաքի դարպասները։

¹⁷ Հուդայի արքա Ազարիայի թագավորության երեսունիններորդ տարում Իսրայելի վրա թագավորեց Գադդիի որդի Մանայեմը։ Նա տասը տարի թագավորեց Սամարիայում։ ¹⁸ Նա չարիք գործեց Տիրոջ առջև, չհրաժարվեց Իսրայելին մեղանչել տվող Նաբատի որդի Հերոբովամի մեղքերից։

¹⁹ Ասորեստանի արքա Փուան հարձակվեց Իսրայելի վրա։ Մանայեմը Փուային հազար տաղանդ արծաթ տվեց, որպեսզի նա իրեն աջակից լինի, և Մանայեմն իր թագավորությունն իր ձեռքում պահի։ ²⁰ Այս արծաթն Ասորեստանի արքային տալու համար Մանայեմն Իսրայելի բոլոր հարուստների վրա հարկ դրեց, ամեն մեկից հիսունական սիկղ արծաթ վերցրեց։ Ասորեստանի թագավորը հետ դարձավ. չմնաց երկրում։

²¹ Մանայեմի մնացած գործերը և այն ամենը, ինչ նա արել է, նկարագրված են Իսրայելի թագավորների ժամանակագրության մեջ։ ²² Մանայեմը գնաց իր նախնիների գիրկը։

Նրա փոխարեն թագավորեց իր որդին՝ Փակեիան։ ²³ Հուդայի երկրի արքա Ազարիայի թագավորության հիսուներորդ տարում Փակեիան թագավորեց Իսրայելի վրա։ Նա տասը տարի թագավորեց Սամարիայում։ ²⁴ Նա չարիք գործեց Տիրոջ առջև, չհրաժարվեց Իսրայելին մեղանչել տվող Նաբատի որդի Հերոբովամի մեղքերից։ ²⁵ Նրա դեմ գլուխ բարձրացրեց Ռոմելիայի որդի Փակեեն՝ իր զորապետը։ Նա հարվածեց նրան Սամարիայում՝ արքունի տան առաջ։ Նրա հետ էին Արգոբը և Արիեն, ինչպես նաև չորսհարյուրյակի միջից հիսուն հոգի։ Սպանեց նրան և նրա փոխարեն ինքը թագավորեց։

²⁶ Փակեիայի մնացած գործերը և այն ամենը, ինչ նա արել է, նկարագրված են Իսրայելի թագավորների ժամանակագրության մեջ։

Իսրայելի Փակեե թագավորը

²⁷ Հուդայի արքա Ազարիայի թագավորության հիսուներկուերորդ տարում թագավորեց Ռոմելիայի որդի Փակեեն։ Նա Սամարիայում Իսրայելի վրա թագավորեց քսան տարի։ ²⁸ Նա Տիրոջ առջև չարություն գործեց, չհրաժարվեց Իսրայելին մեղանչել տվող Նաբատի որդի Հերոբովամի մեղքերից։ ²⁹ Իսրայելի արքա Փակեեի օրոք եկավ Ասորեստանի Թագղաթփաղասար արքան, գրավեց Այինը, Կաբեելը, Բեթմաաքան, Հանոքը, Կենեզը, Ասորը, Գաղաադը, Գալիլեան ու Նեփթաղիմի ամբողջ երկիրը և նրանց բնակիչներին քշեց Ասորեստան։ ³⁰ Եղայի որդի Օվսեեն դավադրություն կազմակերպեց Ռոմելիայի որդի Փակեեի դեմ, խփեց ու սպանեց նրան, և նրա փոխարեն ինքը թագավորեց Ոզիայի որդի Հովաթամի թագավորության քսաներորդ տարում։

³¹ Փակեեի մնացած գործերը և այն ամենը, ինչ նա արել է, նկարագրված են Իսրայելի թագավորների ժամանակագրության մեջ։

Հուդայի Հովաթամ թագավորը

(Բ Մն. 27.1-9)

³² Իսրայելի թագավոր Ռոմելիայի որդի Փակեեի թագավորության երկրորդ տարում թագավորեց Հուդայի արքա Ոզիայի որդի Հովաթամը։ ³³ Նա քսանհինգ տարեկան էր, երբ թագավոր դարձավ և տասնվեց տարի իշխեց Երուսաղեմում։ Նրա մոր անունը Հերուսա էր, նա Սադովկի դուստրն էր։ ³⁴ Հովաթամը ըստ ամենայնի արդար գտնվեց Տիրոջ առջև, այնպես, ինչպես իր հայր Ոզիան, ³⁵ միայն թե նա բարձունքների մեհյանները չվերացրեց, և ժողովուրդը տակավին զոհեր էր մատուցում և խունկ ծխում բարձունքներում։ Նա շինեց Տիրոջ տան վերին դուռը։

³⁶ Հովաթամի մնացած գործերը և այն ամենը, ինչ նա արել է, նկարագրված են Հուդայի երկրի թագավորների ժամանակագրության մեջ։

³⁷ Այդ օրերին Տերը Հուդայի դեմ սկսեց ուղարկել ասորիների արքա Ռասոնին և Ռոմելիայի որդի Փակեեին։

³⁸ Հովաթամը գնաց իր նախնիների գիրկը և թաղվեց իր նախնի Դավթի քաղաքում՝ իր նախնիների մոտ, և նրա փոխարեն թագավորեց իր որդին՝ Աքազը։

16

Հուդայի Աքազ թագավորը

(Բ Մն. 28.1-27)

¹ Ռոմելիայի որդի Փակեեի թագավորության տասնյոթերորդ տարում Հուդայի արքա եղավ Աքազը՝ Հովաթամի որդին։ ² Աքազը քսան տարեկան էր, երբ թագավորեց, և տասնվեց տարի իշխեց Երուսաղեմում։ Նա հավատարիմ չգտնվեց Տիրոջ՝ Աստծու առջև, ինչպես հավատարիմ էր եղել իր նախնի Դավիթը, ³ այլ գնաց Իսրայելի արքա Նաբատի որդի Հերոբովամի ճանապարհով։ Նա իր որդիներին կրակի միջով անցկացրեց ըստ այն ազգերի գարշելի սովորության, որոնց Տերն Իսրայելի որդիների առջևից հալածել էր։ ⁴ Նա զոհեր էր մատուցում և խունկ ծխում բարձունքներում, բլուրների վրա ու անտառների ծառերի տակ։

⁵ Այն ժամանակ ասորիների արքա Ռասոնը և Ռոմելիայի որդի Իսրայելի թագավոր Փակեեն պատերազմի ելան Աքազի դեմ ու պաշարեցին Երուսաղեմը, սակայն չկարողացան պատերազմել։ ⁶ Այդ ժամանակ ասորիների Ռասոն արքան ասորիներին վերադարձրեց Ելաթը, իսկ հրեաներին հանեց Ելաթից։ Եդովմացիները եկան Ելաթ և այնտեղ են բնակվում մինչև այսօր։ ⁷ Աքազը դեսպաններ ուղարկեց Ասորեստանի Թագղաթփաղասար արքային՝ ասելով. «Ես քո ծառան ու քո որդին եմ։ Արի՛ և փրկի՛ր ինձ ասորիների արքայի ու Իսրայելի արքայի ձեռքից, որոնք ինձ վրա են հարձակվել»։ ⁸ Աքազը Տիրոջ տանն ու թագավորի տան գանձարանում գտնվող արծաթն ու ոսկին վերցրեց և որպես պարգև ուղարկեց Ասորեստանի արքային։ ⁹ Ասորեստանի արքան անսաց նրան, ելավ Դամասկոսի դեմ ու գրավեց այն, բնակիչներին գերեվարեց Կյուրեն, իսկ Ռասոնին սպանեց։

¹⁰ Աքազ արքան գնաց Դամասկոս՝ Ասորեստանի Թագղաթփաղասար արքային հանդիպելու։ Նա տեսավ Դամասկոսում եղած զոհասեղանը, այդ զոհասեղանի օրինակն ու ձևերը բոլոր մանրամասներով ուղարկեց Ուրիա քահանային։ ¹¹ Ուրիա քահանան զոհասեղանը կառուցեց ըստ այն օրինակի, որ Աքազ արքան ուղարկել էր Դամասկոսից։ Մինչև Աքազ արքայի Դամասկոսից վերադառնալը Ուրիա քահանան պատրաստեց դա։ ¹² Երբ արքան տեսավ զոհասեղանը, մոտեցավ դրան, ¹³ զոհեր մատուցեց նրա վրա, իր ողջակեզներն այրեց, իր ընծաները նվիրեց, զոհասեղանի վրա թափեց խաղաղության զոհերի արյունը։ ¹⁴ Տիրոջ առջև գտնվող պղնձե զոհասեղանը նա տեղափոխեց իր տեղից՝ Տիրոջ տան առջևից, ու դրեց նոր զոհասեղանից հյուսիս։ ¹⁵ Աքազ արքան պատվեր տվեց Ուրիա քահանային՝ ասելով. «Այս մեծ զոհասեղանի վրա պետք է մատուցես առավոտյան ողջակեզը և երեկոյան զոհաբերությունը, արքայի ողջակեզն ու նրա զոհաբերությունները, երկրի ժողովրդի ողջակեզները, զոհաբերություններն ու ընծաները։ Բոլոր ողջակեզների ու զոհաբերությունների արյունը նրա վրա պետք է թափես, իսկ պղնձե զոհասեղանն իմ տրամադրության տակ պետք է լինի առավոտյան»։ ¹⁶ Ուրիա քահանան ամեն ինչ արեց այնպես, ինչպես նրան պատվիրել էր Աքազ արքան։ ¹⁷ Աքազ արքան կոտրեց խարիսխների կապերը, փոխադրեց լվացարանները, ձուլածո ավազանն իջեցրեց իր տակ գտնվող տասներկու պղնձե ցուլերից ու դրեց քարե պատվանդանի վրա։ ¹⁸ Նա Տիրոջ տան մեջ գահի համար մի պատվանդան դրեց և տաճար տանող թագավորական արտաքին մուտքն ուրիշ կողմ դարձրեց Ասորեստանի արքայի պատճառով։

¹⁹ Աքազի կատարած մնացած գործերը նկարագրված են Հուդայի երկրի թագավորների ժամանակագրության մեջ։ ²⁰ Աքազը գնաց իր նախնիների գիրկը և թաղվեց Դավթի քաղաքում՝ իր նախնիների մոտ։ Նրա փոխարեն թագավորեց իր որդին՝ Եզեկիան։

17

Իսրայելի Օվսեե թագավորը և Սամարիայի գրավումը

¹ Հուդայի արքա Աքազի թագավորության տասներկուերորդ տարում Իսրայելի վրա Սամարիայում ինը տարի թագավորեց Ելայի որդի Օվսեեն։ ² Նա Տիրոջ առջև մեղք գործեց, բայց ոչ իրենից առաջվա Իսրայելի թագավորների նման։ ³ Նրա վրա հարձակվեց Ասորեստանի Սաղմանասար արքան, և Օվսեեն նրան ենթակա դարձավ, ու սկսեց նրան հարկ տալ։ ⁴ Սակայն Ասորեստանի արքան տեսավ, որ Օվսեեի մեջ նենգություն կա, որովհետև պատգամավորներ էր ուղարկել Եգիպտոսի թագավոր Սովային և այդ տարի հարկ չէր վճարել Ասորեստանի արքային։ Ասորեստանի արքան ձերբակալեց նրան ու բանտարկեց։ ⁵ Ասորեստանի արքան հարձակվեց ամբողջ երկրի վրա, ելավ Սամարիայի դեմ և այն պաշարեց երեք տարի։

⁶ Օվսեեի թագավորության իններորդ տարում Ասորեստանի արքան գրավեց Սամարիան և Իսրայելին գերության տարավ Ասորեստան, նրանց բնակեցրեց Ալաթում և Աբովրում, Գովզան գետի շրջակայքում ու Մարերի լեռներում։

⁷ Այս եղավ, որովհետև Իսրայելի որդիները մեղանչեցին Տիրոջ՝ իրենց Աստծու նկատմամբ, որն իրենց հանել էր եգիպտացիների երկրից և ազատել եգիպտացիների արքայի՝ փարավոնի ձեռքից։ Սակայն նրանք սկսեցին պաշտել օտար աստվածների, ⁸ հետևել այն ազգերի կրոնին, որոնց Տերը քշել էր Իսրայելի որդիների առջևից։ Իսրայելի թագավորները այնպիսի բաներ արեցին, ⁹ և Իսրայելի որդիները հնարեցին բաներ, որ չպետք է անեին իրենց Աստծու դեմ. իրենց բոլոր բնակավայրերում պաշտամունքի տեղեր ստեղծեցին, սկսած պահապանների աշտարակներից մինչև պարսպապատ քաղաքները, ¹⁰ բարձունքներում և սաղարթախիտ ծառերի ներքո իրենց համար պաշտամունքային քարե և փայտե սյուներ կանգնեցրին, ¹¹ բոլոր բարձունքների վրա խունկ էին ծխում այն բոլոր ազգերի նման, որոնց Տերը վտարել էր նրանց առջևից։ Նրանք վատ ընկերակիցներ ունեցան և վատ հավաքույթներ կազմակերպեցին՝ բարկացնելով Տիրոջը։ ¹² Նրանք պաշտեցին կուռքեր, որոնց մասին Տերն իրենց ասել էր. «Այդ բանը մի՛ արեք Տիրոջ հանդեպ»։

¹³ Տերը բոլոր մարգարեների ու տեսանողների միջոցով Իսրայելին ու Հուդային զգուշացրեց՝ ասելով. «Դարձե՛ք ձեր չար ճանապարհներից, պահե՛ք իմ պատվիրանները, իմ կանոններն ու օրենքները, որ պատվիրեցի ձեր հայրերին, և որոնք ձեզ հաղորդեցի իմ ծառա մարգարեների միջոցով»։ ¹⁴ Նրանք չլսեցին, ավելի ըմբոստացան, քան իրենց հայրերը, չհավատացին Տիրոջը՝ իրենց Աստծուն։ ¹⁵ Նրանց հայրերի հետ Աստծու կնքած ուխտերը, դաշինքներն ու վկայությունները նրանք չպահեցին, գնացին սնոտի աստվածների հետևից, և իրենք էլ իրենց շրջապատող ազգերի նման սնոտի աստվածներ պաշտողներ դարձան։ Մինչդեռ Տերը պատվիրել էր, որ չնմանվեն նրանց։ ¹⁶ Նրանք անտեսեցին Տիրոջ՝ իրենց Աստծու բոլոր պատվիրանները, իրենց համար ձուլածո երկու երինջներ պատրաստեցին, երկնքի զորություններին երկրպագեցին, պաշտեցին Բահաղին, ¹⁷ իրենց տղաներին և աղջիկներին ողջակեզ արեցին, կախարդություն ու հմայություն արեցին, համարձակվեցին Տիրոջ առջև չարություն գործել և զայրացրին նրան։ ¹⁸ Տերն Իսրայելի վրա խիստ բարկացավ, մերժեց նրանց իր ներկայությունից, այնպես որ միայն Հուդայի ցեղը մնաց։

¹⁹ Սակայն Հուդայի ցեղի մարդիկ էլ չպահեցին Տիրոջ՝ իրենց Աստծու պատվիրանները և ընթացան Իսրայելի երկրում ընդունված սովորույթներով։ ²⁰ Իսրայելի ամբողջ սերունդը մերժեց Տիրոջը։ Տերը նրանց չարչարեց և ավարառուների ձեռքը մատնեց, մինչև որ նրանց իր երեսից հեռու վանեց։

²¹ Թեև Դավթի տունը գոյություն ուներ, նրանք Իսրայելի թագավոր նստեցրին Նաբատի որդի Հերոբովամին, և Հերոբովամը Իսրայելին արգելեց ընթանալ Տիրոջ ճանապարհով, նրանց մեծ մեղքեր գործել տվեց։ ²² Իսրայելի որդիներն ընթացան Հերոբովամի գործած բոլոր մեղքերի ճանապարհով, չհրաժարվեցին դրանցից։ ²³ Տերն իր երեսը թեքեց Իսրայելից, ինչպես որ մարգարեների միջոցով ասել էր իր բոլոր ծառաներին։ Իսրայելը իր երկրից գերեվարվեց Ասորեստան, որտեղ գտնվում է մինչև այսօր։

Ասորեստանցիները հաստատվում են Իսրայելում

²⁴ Ասորեստանի արքան Բաբելոնից, Քութից, Այայից, Եմաթից ու Սեփփարուիմից մարդկանց բերել տվեց և Իսրայելի որդիների փոխարեն բնակեցրեց Սամարիայի քաղաքներում։ Նրանք ժառանգեցին Սամարիան ու բնակվեցին նրա քաղաքներում։ ²⁵ Իրենց բնակության սկզբնական շրջանում նրանք չվախեցան Տիրոջից, և Տերն առյուծներ ուղարկեց, որոնք հոշոտեցին շատերին։ ²⁶ Եվ ասացին Ասորեստանի արքային. «Այն ազգերը, որոնց փոխադրեցիր և Սամարիայի քաղաքներում բնակեցրիր, չգիտեն այդ երկրի Աստծու կրոնը, և Տերը նրանց վրա առյուծներ ուղարկեց, որոնք ահա հոշոտում են նրանց, որովհետև չգիտեն այդ երկրի Աստծու կրոնը»։ ²⁷ Եվ Ասորեստանի արքան հրաման արձակեց ու ասաց. «Այնտե՛ղ տարեք ձեր գերեվարած քահանաներից մեկին, որ գնա այնտեղ բնակվի, սովորեցնի Տիրոջ կրոնը և լուսավորի նրանց այդ երկրի Աստծու օրենքներով»։ ²⁸ Սամարիայից գերված քահանաներից մեկին տարան, բնակեցրին Բեթելում։ Քահանան լուսավորում էր նրանց և սովորեցնում երկյուղ կրել Տիրոջից։ ²⁹ Ամեն ազգ իր ապրած քաղաքում իր համար տարբեր աստվածներ պատրաստեց և դրեց բարձունքների մեհյաններում, որ սամարացիներն էին շինել։ ³⁰ Բաբելոնի մարդիկ շինեցին Սոքքովթ-Բանովթը, քութացիները շինեցին Անգեղը, եմաթացիները՝ Ասիմաթը, ³¹ այիացիները՝ Աբլազերը, Նեբասը, Թարթակն ու Սեփփարուիմը, որտեղ այրում էին իրենց որդիներին Սեփփարուիմի աստվածներ Ադրամելեքի ու Ամելեքի համար։ ³² Նրանք նաև Տիրոջից էին երկնչում, սակայն իրենց գարշելի կուռքերը հաստատել էին բարձունքների վրա գտնվող մեհյաններում, որ ամեն ազգ շինել էր Սամարիայում, այնտեղ, որտեղ նրանք բնակվում էին։ Թեև Տիրոջից երկնչում էին, բայց բարձունքների վրա քրմեր էին նշանակել. ³³ թեև երկնչում էին Տիրոջից, պաշտում էին իրենց աստվածներին ըստ այն ազգերի կրոնների, որոնց Աստված մերժել էր։

³⁴ Մինչև օրս նրանք առաջնորդվում են իրենց սովորույթներով. թեև երկնչում են Տիրոջից, բայց վարվում են ըստ իրենց սովորույթների ու կանոնների, նաև ըստ այն պատվիրանի և օրենքների, որ Տերը պատվիրել էր Հակոբի որդիներին, ում անունը դրել էր Իսրայել։ ³⁵ Տերը նրանց հետ ուխտ էր դրել, պատվիրել ու ասել. «Մի՛ վախեցեք օտար աստվածներից, մի՛ երկրպագեք նրանց, մի՛ պաշտեք նրանց, զոհեր մի՛ մատուցեք նրանց, ³⁶ այլ վախեցե՛ք Տիրոջից՝ Աստծուց, որը մեծ զորությամբ ու բարձր բազկով ձեզ դուրս բերեց Եգիպտոսից։ Նրանի՛ց վախեցեք, նրա՛ն երկրպագեք ու նրա՛ն զոհեր մատուցեք։ ³⁷ Ձեզ համար գրված կանոնները, դատաստանները, օրենքներն ու պատվիրանները զգուշությա՛մբ գործադրեք։ Մի՛ վախեցեք օտար աստվածներից, ³⁸ մի՛ մոռացեք այն ուխտը, որ Տերը դրել է ձեզ հետ, մի՛ վախեցեք օտար աստվածներից, ³⁹ այլ Տիրոջից՝ ձեր Աստծուց երկնչեք։ Նա ձեզ կփրկի ձեր բոլոր թշնամիներից։ ⁴⁰ Մի՛ հավատացեք նրանց կրոնին, որին նրանք հետևում են»։ ⁴¹ Այդ ազգերը թեպետ Տիրոջից վախենում էին, բայց իրենց քանդակած կուռքերին էին ծառայում։ Նրանց որդիներն ու որդիների որդիները մինչև այսօր վարվում են այնպես, ինչպես իրենց նախնիները։

18

Հուդայի երկրի Եզեկիա թագավորը

(Բ Մն. 29.1-2, 31.1)

¹ Իսրայելի արքա Եղայի որդի Օվսեեի թագավորության երրորդ տարում թագավորեց Հուդայի Աքազ արքայի որդի Եզեկիան։ ² Նա քսանհինգ տարեկան էր, երբ թագավորեց, և Երուսաղեմում քսանինը տարի թագավորեց։ Նրա մոր անունը Աբութ էր, որը Զաքարիայի դուստրն էր։ ³ Նա իր նախնի Դավթի նման ըստ ամենայնի ուղիղ ընթացավ Տիրոջ առջև։ ⁴ Նա վերացրեց պաշտամունքի վայրերը, խորտակեց քարե սյուները, ջարդուփշուր արեց փայտե սյուները, Մովսեսի շինած պղնձե օձը, քանի որ մինչև այդ օրը Իսրայելի որդիները զոհ էին մատուցում նրան և այն կոչում էին Նեեսթան [Օձի պղնձե կուռք]։ ⁵ Նա իր հույսը կապեց Տիրոջ՝ Իսրայելի Աստծու հետ, և նրա նմանը չեղավ Հուդայի ո՛չ հաջորդ, ո՛չ էլ նախորդ բոլոր թագավորների մեջ։ ⁶ Նա Տիրոջն ապավինեց, նրա ճանապարհից չխոտորվեց, պահեց Մովսեսին պատգամված պատվիրանները, ⁷ և Տերը նրա հետ էր, և Եզեկիան ինչ որ անում էր, խելամտորեն էր անում։ Նա ապստամբեց Ասորեստանի արքայի դեմ, չծառայեց նրան, ⁸ այլազգիներին քշեց մինչև Գազա և նրա սահմանները, պահապանների աշտարակներից մինչև պարսպապատ քաղաքները։

⁹ Եզեկիա արքայի թագավորության չորրորդ տարում, այսինքն՝ Իսրայելի Եղա արքայի որդի Օվսեեի թագավորության յոթերորդ տարում, Ասորեստանի արքա Սաղմանասարը ելավ Սամարիայի դեմ, պաշարեց այն և երեք տարի անց քաղաքը գրավեց։ ¹⁰ Եզեկիայի թագավորության վեցերորդ տարում, այսինքն՝ Իսրայելի արքա Օվսեեի թագավորության իններորդ տարում, Ասորեստանի արքան գրավեց Սամարիան ¹¹ և սամարացիներին քշեց Ասորեստան, նրանց տեղավորեց Ալաթում և Աբովրում՝ Գովզան գետի և Մարաց լեռների մոտ, ¹² որովհետև նրանք Տիրոջը՝ իրենց Աստծուն չէին անսացել, նրա ուխտը չէին պահել և այն, ինչ նրանց պատվիրել էր Տիրոջ ծառա Մովսեսը, չէին լսել ու չէին կատարել։

Սենեքերիմի ներխուժումը Հուդա

(Բ Մն. 32.1-19, Ես. 36.1-22)

¹³ Եզեկիա արքայի թագավորության տասնչորսերորդ տարում Ասորեստանի Սենեքերիմ արքան հարձակվեց Հուդայի պարսպապատ քաղաքների վրա և գրավեց դրանք։ ¹⁴ Հուդայի արքա Եզեկիան Ասորեստանի արքայի մոտ՝ Լաքիս, դեսպաններ ուղարկեց և ասաց. «Մեղանչել եմ, հե՛տ դարձիր իմ երկրից, և ինչ տուգանք որ ինձ վրա դնես, կհատուցեմ»։ Ասորեստանի արքան Հուդայի արքա Եզեկիայի վրա երեք հարյուր տաղանդ արծաթ և երեսուն տաղանդ ոսկի տուգանք դրեց, ¹⁵ և Եզեկիան Տիրոջ տանը և թագավորի գանձատանը ինչ որ գտավ, տվեց։ ¹⁶ Այդ ժամանակ Եզեկիան պոկեց Տիրոջ տաճարի դռների և դրանդիների վրա եղած ոսկին, որ ինքը՝ Հուդայի արքա Եզեկիան էր պատել, ու տվեց Ասորեստանի արքային։

¹⁷ Ասորեստանի արքան Թարաթային, Ռաբսարիսին ու Ռափսակին մեծ զորքով Լաքիսից ուղարկեց Երուսաղեմ, Եզեկիա արքայի մոտ։ Սրանք ելան ու եկան Երուսաղեմ և կանգնելով թափիչի ագարակի ճանապարհին գտնվող վերին ավազանի ջրմուղի վրա՝ ¹⁸ կանչեցին Եզեկիային։ Նրանց մոտ եկան Քեղկիայի որդի Եղիակիմը՝ թագավորական տան վերակացուն, Սոմնաս դպրապետը և Ասափի որդի Հովաքը, որ հիշատակելի դեպքերն արձանագրողն էր։

¹⁹ Ռափսակը նրանց ասաց. «Ասե՛ք Եզեկիային, որ այսպես է ասում մեծ արքան՝ Ասորեստանի արքան. “Ի՞նչ է քո հույսը, որին դու ապավինել ես։ ²⁰ Մի՞թե կարծում ես, որ դատարկ խոսքերով ու խորհրդով կարելի է պատերազմել. զորություն է անհրաժեշտ պատերազմի համար։ Արդ, ո՞ւմ ապավինելով ապստամբեցիր իմ դեմ։ ²¹ Դու ապավինել ես այդ ջախջախված եղեգի՞ն՝ Եգիպտոսի՞ն, որին եթե մարդ հենվի, ձեռքը կծակի, ու նա կխոցվի դրանից։ Այդպիսին է փարավոնը՝ Եգիպտոսի արքան, բոլոր նրանց համար, ովքեր իրենց հույսը դնում են նրա վրա”։ ²² Ինձ ասացիր, թե՝ “Տիրոջը՝ Աստծուն ենք ապավինում”։ Դա նա չէ՞, որի բարձունքներն ու զոհասեղանները Եզեկիան ոչնչացրեց և Հուդային ու Երուսաղեմին ասաց. “Միայն Երուսաղեմի զոհասեղանի առջև՛ երկրպագեք”։ ²³ Արդ, իմ տիրոջ՝ Ասորեստանի արքայի հետ հաշտվե՛ք, և նա քեզ երկու հազար երիվար կտա, եթե դու կարող ես այդքան հեծյալներ գտնել դրանց համար։ ²⁴ Ինչպե՞ս կարող ես դիմադրել իմ տիրոջ հետին ծառաներից որևէ զորականի, երբ մարտակառքեր ու երիվարներ ստանալու համար ապավինում ես Եգիպտոսին։ ²⁵ Կամ առանց Տիրոջ հրամանի՞ եմ ես հարձակվել այս երկրի վրա, որ բնաջնջեմ այն։ Տերն է ինձ ասել. “Հարձակվի՛ր այդ երկրի վրա և բնաջնջի՛ր այն”»։

²⁶ Քեղկիայի որդի Եղիակիմը, Սոմնասն ու Ասափի որդի Հովաքն ասացին Ռափսակին. «Մեզ՝ քո ծառաների հետ ասորերե՛ն խոսիր, որովհետև մենք հասկանում ենք այդ լեզուն, պարսպի վրա կանգնած ժողովրդի ներկայությամբ եբրայերեն մի՛ խոսիր»։ ²⁷ Բայց Ռափսակը նրանց ասաց. «Մի՞թե իմ տերն այս խոսքերը քո տիրո՛ջն ու քե՛զ ասելու համար ուղարկեց ինձ, ո՛չ միայն, այլ նաև պարսպի վրա կանգնած մարդկանց համար, որոնք շուտով ստիպված կլինեն ձեզ հետ միասին ուտելու իրենց կեղտը և խմելու իրենց մեզը»։

²⁸ Ռափսակը ելավ, բարձր ձայնով բղավելով՝ եբրայերեն ասաց. «Լսե՛ք մեծ արքայի՝ Ասորեստանի արքայի պատգամը։ ²⁹ Այսպես է ասում արքան. “Թող Եզեկիան չմոլորեցնի ձեզ, քանզի նա չի կարող ձեզ իմ ձեռքից փրկել։ ³⁰ Եզեկիան ձեզ թող Տիրոջով չհուսադրի՝ ասելով, թե “Տերը մեզ անպայման կփրկի և այս քաղաքը չի մատնի Ասորեստանի արքայի ձեռքը”։ ³¹ Մի՛ լսեք Եզեկիային, որովհետև այսպես է ասում Ասորեստանի արքան. “Ինձ հետ հաշտությո՛ւն կնքեք, եկե՛ք ինձ մոտ, և ամեն մարդ իր խաղողի այգուց ու թզենուց կուտի, իր ջրհորից ջուր կխմի, ³² մինչև որ գամ, ձեզ վերցնեմ ու տանեմ մի երկիր, որ ձեր երկրի նման է՝ ցորենի ու գինու երկիր, այգիների ու հացի երկիր, ձիթենիների, յուղի ու մեղրի երկիր։ Դուք այնտեղ կապրեք ու չեք մեռնի։ Մի՛ լսեք Եզեկիային, որովհետև խաբում է ձեզ՝ ասելով՝ “Տերը մեզ կփրկի”։ ³³ Ազգերի աստվածներից ո՞վ իրենց երկիրը փրկեց Ասորեստանի արքայի ձեռքից։ ³⁴ Որտե՞ղ է Եմաթի ու Արփաթի աստվածը, որտե՞ղ է Սեփփարուիմ քաղաքի աստվածը, Անայի ու Ավայի աստվածը։ Մի՞թե նրանք Սամարիան փրկեցին իմ ձեռքից։ ³⁵ Երկրի բոլոր աստվածներից ո՞ր մեկը կարողացավ իր երկիրն իմ ձեռքից փրկել, որ Տերը Երուսաղեմը փրկի իմ ձեռքից”»։

³⁶ Մարդիկ լռեցին և պատասխան չտվեցին, որովհետև արքան հրաման էր տվել՝ «Նրան մի՛ պատասխանեք»։

³⁷ Քեղկիայի որդի Եղիակիմ հազարապետը, Սոմնաս դպրապետը և Ասափի որդի ժամանակագիր Հովաքը հանդերձները պատառոտելով եկան Եզեկիայի մոտ ու նրան հաղորդեցին Ռափսակի ասածները։

19

Եզեկիան խորհրդակցում է Եսայի մարգարեի հետ

(Ես. 37.1-7)

¹ Երբ Եզեկիա արքան լսեց այս, պատառոտեց իր հանդերձները, քուրձ հագավ ու մտավ Տիրոջ տունը։ ² Նա Եղիակիմ հազարապետին, Սոմնաս դպրապետին և քահանաներից ծերերին քուրձ հագած ուղարկեց Ամովսի որդի Եսայի մարգարեի մոտ, ³ որոնք նրան ասացին. «Այսպես է ասում Եզեկիան. “Այս օրը նեղության, կշտամբանքների ու բարկության օր է, որովհետև երեխաները մոտ են ծնվելու, սակայն մայրերն ուժ չունեն ծննդաբերելու։ ⁴ Թերևս Տերը՝ քո Աստվածը, լսեց Ռափսակի խոսքերը, որին իր տերը՝ Ասորեստանի արքան է ուղարկել, որպեսզի անարգի Կենդանի Աստծուն և խոսքերով հայհոյի։ Այդ բոլորը լսելով՝ Տերը՝ քո Աստվածը, կպատժի՞ նրան։ Դու աղոթի՛ր կենդանի մնացողներիս համար”»։ ⁵ Եզեկիա արքայի ծառաները եկան Եսայի մարգարեի մոտ. ⁶ Եսային նրանց ասաց. «Այսպե՛ս ասեք ձեր տիրոջը. այս է ասում Տերը. “Մի՛ վախեցիր քո լսած այն խոսքերից, որոնցով Ասորեստանի արքայի ծառաները հայհոյեցին ինձ։ ⁷ Ես նրան այնպիսի մի ոգի կներշնչեմ, որ նա, մի գույժ լսելով, իր երկիրը կվերադառնա, և ես սրով նրան կոչնչացնեմ իր երկրում”»։

Սենեքերիմի նոր սպառնալիքները

(Ես. 37.7-20)

⁸ Ռափսակը լսեց, որ Ասորեստանի արքան վերադարձել է Լաքիսից և Ղոբնայի դեմ պատերազմի մեջ է, և գնաց այնտեղ նրան հանդիպելու։ ⁹ Իրապես արքան լսել էր, որ եթովպացիների արքա Թարական ելել էր իր դեմ պատերազմելու։ Նա դարձյալ դեսպաններ ուղարկեց Եզեկիային՝ ասելով. «Այսպե՛ս ասեք Հուդայի արքա Եզեկիային. ¹⁰ “Թող քո Աստվածը, որին ապավինել ես, քեզ չամբարտավանացնի՝ մտածելով, թե Երուսաղեմն Ասորեստանի արքայի ձեռքը չի մատնվի։ ¹¹ Դու ինքդ լսել ես, թե ինչպես Ասորեստանի արքաները կործանել են բազմաթիվ երկրներ, իսկ դու պիտի փրկվե՞ս։ ¹² Մի՞թե ազգերի աստվածները փրկեցին Գոզանի, Քառանի, Ռափաթի մարդկանց, ծովեզերքի մոտ բնակվող Եդեմի որդիներին, որոնց ոչնչացրին իմ նախնիները։ ¹³ Որտե՞ղ են Եմաթի արքան, Արփաթի արքան, Սեփփարուիմ քաղաքի, Անայի ու Ավայի արքան”»։

¹⁴ Եզեկիան հրովարտակները վերցրեց դեսպանների ձեռքից, ընթերցեց դրանք, ապա գնաց Տիրոջ տուն և դրանք բաց վիճակում ցույց տվեց Տիրոջը։ ¹⁵ Եզեկիան, Տիրոջն աղոթելով, ասաց. «Տե՛ր, Աստվա՛ծ Իսրայելի, դու, որ նստած ես քերովբեների վրա, աշխարհի բոլոր թագավորությունների մեջ միայն դո՛ւ ես Աստված, դո՛ւ ես ստեղծել երկինքն ու երկիրը։ ¹⁶ Տե՛ր, ակա՛նջ դիր ու լսի՛ր, բա՛ց աչքերդ ու տե՛ս, լսի՛ր Սենեքերիմի խոսքերը, որ մարդ էր ուղարկել՝ նախատելու Կենդանի Աստծուն։ ¹⁷ Արդարև, Տե՛ր, Ասորեստանի թագավորներն ազգեր ու երկրներ ոչնչացրին, ¹⁸ հրի մատնեցին նրանց աստվածներին, որոնք աստվածներ չէին, այլ իրեր, որ փայտից ու քարից պատրաստված էին մարդկանց ձեռքով, և ոչնչացրին դրանց։ ¹⁹ Արդ, Տե՛ր Աստված մեր, փրկի՛ր մեզ նրանց ձեռքից, թող աշխարհի բոլոր թագավորություններն իմանան, որ դո՛ւ՝ Տերդ ես միակ Աստվածը»։

Եսայու պատգամը թագավորին

(Ես. 37.21-38)

²⁰ Ամոզի որդի Եսային մարդ ուղարկեց Եզեկիայի մոտ և ասաց. «Այսպես է ասում Զորությունների Տերը՝ Իսրայելի Աստվածը. “Ասորեստանի Սենեքերիմ արքայի մասին ինձ ուղղած աղոթքդ լսեցի։

²¹ Նրան ուղղված Տիրոջ խոսքն այս է.

Արհամարհեց, անգոսնեց քեզ կույսը՝ Սիոնի դուստրը,

Երուսաղեմի դուստրը ծաղրեց քեզ՝ շարժելով իր գլուխը։

²² Ո՞ւմ նախատեցիր ու հայհոյեցիր,

ո՞ւմ վրա նախատալից ձայնդ բարձրացրիր,

և հայացքդ հառեցիր։ Իսրայելի սուրբի՞ վրա։

²³ Դեսպաններիդ միջոցով Տիրոջը կշտամբեցիր՝ ասելով.

“Իմ բազմաթիվ կառքերով ես ելա լեռների բարձունքները,

մինչև Լիբանանի ծայրամասերը,

տապալեցի նրա ամենաբարձր եղևնիներն ու ընտիր նոճիները,

հասա եզրը Կարմելոսի անտառի,

²⁴ պահպանեցի և խմեցի օտար ջրեր,

իմ ոտքի թաթով ցամաքեցրի ջրառատ գետեր”։

²⁵ Մի՞թե չես լսել հեռվից այն, ինչ արել եմ հին ժամանակներից,

ձևավորեցի այն ու իրականացրի,

և ամուր քաղաքները պատերազմելով

գերեվարողների համար հպարտություն եղան։

²⁶ Այնտեղ բնակվող մարդիկ տկարացան ու զարհուրեցին,

ամաչեցին ու դարձան վայրի խոտի նման,

դալար բանջարի, տանիքին բուսած խոտի

և ամեն հասնողի ոտքի կոխան։

²⁷ Արդ ես գիտեմ, թե դու երբ ես նստում,

երբ ես վեր կենում,

երբ ես մտնում ու ելնում.

²⁸ գիտեմ նաև քո զայրույթն իմ դեմ։

Քո խռովքը հասել է ականջիս։

Ես կարթ կգցեմ քո քթին,

սանձ կդնեմ քո կզակին,

քեզ հետ կուղարկեմ այն ճանապարհով, որով եկել ես։

²⁹ Սա է քեզ համար նշան լինելու.

այս տարի կուտես ինքնաբույս ցորենը,

երկրորդ տարին կուտես, ինչ որ նույնից կբուսնի։

Երրորդ տարին կցանեք ու կհնձեք,

խաղողի այգիներ կտնկեք

և դրանց բերքը կուտեք։

³⁰ Հուդայի երկրում կենդանի մնացածները բազմանալու են,

ներքևից արմատ են արձակելու,

վերևից պտուղ են տալու,

³¹ քանզի Երուսաղեմից են ելնելու կենդանի մնացածները,

և Սիոն լեռից՝ փրկվածները։

Զորությունների Տիրոջ նախանձախնդրությունն է դա ի կատար ածելու։

³² Դրա համար այսպես է ասում Տերն Ասորեստանի արքային.

“Չի մտնի այս քաղաքը,

այնտեղ նետեր չի արձակի,

քաղաքը չի պաշարի վահաններով,

նրա շուրջ հողաթումբ չի կանգնեցնի,

³³ հետ կգնա այն ճանապարհով, որով եկել էր,

և այս քաղաքը չի մտնի”։

Այսպես է ասում Տերը.

³⁴ “Այս քաղաքը պիտի հովանավորեմ,

որպեսզի այն ազատեմ հանուն ինձ ու իմ ծառա Դավթի”»։

Ասորեստանցիների նահանջը և Սենեքերիմի մահը

³⁵ Երբ որ գիշերը վրա հասավ, Տիրոջ հրեշտակը եկավ և Ասորեստանի բանակից հարյուր ութսունհինգ հազար մարդ սպանեց։ Երբ առավոտ կանուխ վերապրողները ելան, տեսան, որ բոլորը մեռել են։ ³⁶ Ասորեստանի Սենեքերիմ արքան ելավ գնաց, բնակվեց Նինվեում։ ³⁷ Եվ մինչ նա երկրպագում էր իր Նեսրաք աստծու տանը, նրա որդիներ Ադրամելեքն ու Սարասարը նրան սրով հարվածեցին և Արարատի երկիրը փախան։ Նրա փոխարեն թագավորեց իր որդին՝ Ասորդանը։

20

Եզեկիայի հիվանդությունը և բուժումը

(Ես. 38.1-8, 21-22, Բ Մն. 32.24-26)

¹ Այդ օրերին Եզեկիան մերձիմահ հիվանդացավ։ Նրա մոտ եկավ Ամովսի որդի Եսայի մարգարեն և ասաց նրան. «Այսպես է ասում Տերը. “Քո տան գործերը կարգի՛ դիր, քանզի դու չես առողջանալու, մեռնելու ես”»։ ² Եզեկիան երեսը պատի կողմը դարձրեց և աղոթեց Տիրոջը՝ ասելով. ³ «Ո՜վ Տեր, հիշի՛ր, թե ես ինչպե՛ս եմ քո առջև ճշմարտությամբ ու հավատարիմ սրտով ընթացել, քո առջև բարին եմ կատարել»։ Եվ Եզեկիան դառնորեն արտասվեց։ ⁴ Եսային դեռ դուրս չէր եկել գավթից, երբ նրան հասավ Տիրոջ խոսքը, որ ասում էր. ⁵ «Հե՛տ դարձիր և իմ ժողովրդի առաջնորդ Եզեկիային ասա՛. “Այսպես է ասում Տերը՝ քո նախնի Դավթի Աստվածը. “Լսեցի քո աղոթքը և տեսա քո արտասուքը։ Ես ահա պիտի բժշկեմ քեզ, երրորդ օրը պիտի գաս Տիրոջ տունը, ⁶ քո կյանքը տասնհինգ տարով պիտի երկարեցնեմ, Ասորեստանի արքայի ձեռքից պիտի փրկեմ քեզ ու քո քաղաքը, պաշտպան պիտի կանգնեմ քո քաղաքին հանուն ինձ և իմ ծառա Դավթի”»։ ⁷ Եսային ասաց. «Չոր թզե՛ր բերեք»։ Բերեցին, վերքի վրա դրեցին, ու նա առողջացավ։

⁸ Նախքան առողջանալը Եզեկիան ասաց Եսայուն. «Ի՞նչը նշան կլինի այն բանի, որ Տերն ինձ կբժշկի, և երրորդ օրը Տիրոջ տունը կգնամ»։ ⁹ Եսային ասաց. «Սա է նշանը Տիրոջ կողմից, որ Տերն իր խոսքը կկատարի. արևի ստվերը տասն աստիճան առաջ պիտի շարժվի»։ ¹⁰ Եզեկիան ասաց. «Ստվերի տասը աստիճան առաջ շարժվելը բնական բան է։ Ո՛չ, այդպես թող չլինի, ստվերը թող տասն աստիճան հետ դառնա»։ ¹¹ Եսայի մարգարեն դիմեց Տիրոջը, և ստվերը տասն աստիճան հետ դարձավ Աքազի արևի ժամացույցի աստիճաններով։

Եզեկիան ընդունում է Բաբելոնի պատգամավորներին

(Ես. 39.1-8)

¹² Այդ ժամանակ Բաբելոնի արքան՝ Բաղդանի որդի Մարոդաք Բաղդանը, հրովարտակներ ու ընծաներ ուղարկեց Եզեկիային, որովհետև լսել էր, որ Եզեկիան հիվանդացել է։ ¹³ Եզեկիան ուրախացավ դրանց համար և նրա դեսպաններին ցույց տվեց գանձատունը, արծաթը, ոսկին, խնկերը, անուշահոտ յուղերը, զինանոցը և այն ամենը, ինչ կար իր գանձարանում։ Եզեկիան իր տանը և ամբողջ իշխանության մեջ տեղ չթողեց, որ ցույց չտար նրանց։

¹⁴ Եսայի մարգարեն եկավ Եզեկիա արքայի մոտ ու ասաց նրան. «Ի՞նչ խոսեցին այդ մարդիկ և որտեղի՞ց էին եկել քեզ մոտ»։ Եզեկիան ասաց. «Հեռու երկրից՝ Բաբելոնից էին եկել ինձ մոտ»։ ¹⁵ Եսային ասաց. «Ի՞նչ տեսան քո տանը»։ Եզեկիան ասաց. «Ինչ որ կար իմ տանը, տեսան. ոչ մի բան չկա իմ տան մեջ և իմ գանձարանում, որ նրանց ցույց տված չլինեմ»։ ¹⁶ Եսային ասաց Եզեկիային. «Լսի՛ր Տիրոջ խոսքը. ¹⁷ “Ահա կգան օրեր, և քո տան մեջ ինչ որ կա, և ինչ որ կուտակել են քո հայրերը մինչև այսօր, կտարվեն Բաբելոն. ոչինչ չի մնա”։ Այս է Տիրոջ ասած խոսքը. ¹⁸ “Քո որդիները, որոնք քեզնից են ծնվելու, գերի պիտի ընկնեն ու ներքինիներ դառնան Բաբելոնի արքայի տանը”»։ ¹⁹ Եզեկիան ասաց Եսայուն. «Բարի է Տիրոջ ասած խոսքը»։ Եվ ասաց. «Խաղաղություն ու ապահովություն թող լինի իմ օրերում»։

Եզեկիայի թագավորության վերջը

(Բ Մն. 32.32-33)

²⁰ Եզեկիայի մնացած գործերը, նրա քաջագործությունները, նրա ջրամբարների, ջրմուղի և քաղաք հասնող ջրատարի շինարարությունը նկարագրված են Հուդայի թագավորների ժամանակագրության մեջ։ ²¹ Եզեկիան գնաց իր նախնիների գիրկը, և նրա փոխարեն թագավորեց իր որդին՝ Մանասեն։

21

Հուդայի Մանասե թագավորը

(Բ Մն. 33.1-20)

¹ Մանասեն տասներկու տարեկան էր, երբ թագավոր դարձավ, և հիսունինը տարի թագավորեց Երուսաղեմում։ Նրա մոր անունը Եփսիբա էր։ ² Նա չար ընթացք ունեցավ Տիրոջ առջև, հետևեց այն ազգերի գարշությանը, որոնց Տերը վռնդել էր Իսրայելի որդիների առջևից։ ³ Նա վերականգնեց իր հայր Եզեկիայի կործանած պաշտամունքի վայրերը, վերակառուցեց Բահաղի զոհասեղանը, վերականգնեց փայտե սյան պաշտամունքը, ինչպես արել էր Իսրայելի Աքաաբ արքան, երկրպագեց երկնքի բոլոր զորություններին ու պաշտեց դրանք։ ⁴ Նա Տիրոջ տանը հեթանոսական զոհասեղան դրեց, որի մասին Տերն ասել էր. «Երուսաղեմում եմ դնելու իմ աթոռը»։ ⁵ Տիրոջ տան բոլոր սրահներում նա երկնքի բոլոր զորությունների համար զոհասեղաններ պատրաստեց, ⁶ իր որդիներին ողջակեզ արեց, հմայություն արեց, թռչուններին նայելով գուշակություններ արեց, վհուկներ ու նշանագետներ պահեց։ Տիրոջ առջև շատ չարիքներ գործելով՝ բարկացրեց նրան։ ⁷ Նա պաշտամունքային փայտե սյուն կանգնեցրեց Տիրոջ տանը, որի համար Տերն ասել էր Դավթին ու նրա որդի Սողոմոնին՝ «Իմ անունը հավիտյան դնելու եմ այս տան մեջ, Իսրայելի բոլոր ցեղերի միջից իմ ընտրած Երուսաղեմի մեջ։ ⁸ Իսրայելի ոտքը դուրս չի գա այս երկրից, որը նրա հայրերին եմ տվել, եթե նրանք իմ բոլոր պատվիրաններն ու իմ ծառա Մովսեսի պատվիրած բոլոր օրենքներն զգուշությամբ կատարեն»։ ⁹ Սակայն նրանք չլսեցին. Մանասեն մոլորեցրեց նրանց, և նրանք չարիք գործեցին Տիրոջ առաջ շատ ավելի, քան այն ազգերը, որոնց վերացրել էր Տերն Իսրայելի որդիների առջևից։

¹⁰ Տերը, խոսելով իր ծառա մարգարեների միջոցով, ասաց. ¹¹ «Քանի որ Հուդայի արքա Մանասեն այս գարշություններն արեց իմ առջև, առավել չարիք գործեց, քան ամորհացիներն էին արել իմ առջև, իր կուռքերով Հուդայի երկրին մեղանչել տվեց, ¹² ապա այդ պատճառով այսպես է ասում Տերը՝ Իսրայելի Աստվածը. “Ահա ես այնպիսի չարիք պիտի բերեմ Երուսաղեմի ու Հուդայի երկրի վրա, որ ամեն ոք երբ լսի, նրա երկու ականջները խշշան։ ¹³ Երուսաղեմը Սամարիայի և Աքաաբի տան օրը պիտի գցեմ։ Երուսաղեմը պիտի այնպես մաքրեմ իր բնակիչներից, ինչպես մի դյուրաբեկ անոթ, որ մաքրում ու երեսի վրա շուռ են տալիս։ ¹⁴ Իմ ժողովրդի մնացորդներին իսկ պիտի լքեմ ու նրանց իրենց թշնամիների ձեռքը պիտի մատնեմ, որպեսզի նրանք ավար ու հափշտակություն դառնան իրենց բոլոր թշնամիների համար։ ¹⁵ Այսպես պիտի վարվեմ, քանի որ իմ առջև չարություն գործեցին և Եգիպտոսից իրենց դուրս բերելու օրից մինչև այսօր ինձ բարկացնում են։ ¹⁶ Մանավանդ Մանասեն չափազանց շատ անմեղ արյուն թափեց, այնպես որ Երուսաղեմը ծայրեծայր արյամբ լցրեց, բացի այն մեղքերից, որոնցով Տիրոջ առջև Հուդայի երկրին մեղանչել ու չարիք գործել տվեց”»։

¹⁷ Մանասեի մնացած գործերը, բոլոր արարքները և գործած մեղքերը նկարագրված են Հուդայի թագավորների ժամանակագրության մեջ։

¹⁸ Մանասեն գնաց իր նախնիների գիրկը և թաղվեց իր տան պարտեզում՝ Օզայի պարտեզում։ Նրա փոխարեն թագավորեց իր որդին՝ Ամովնը։

Հուդայի երկրի Ամովն թագավորը

(Բ Մն. 33.21-25)

¹⁹ Ամովնը քսաներկու տարեկան էր, երբ թագավոր դարձավ։ Նա տասներկու տարի թագավորեց Երուսաղեմում։ Նրա մոր անունը Մեսոլոմիթ էր, նա հետեբալցի Արուսի դուստրն էր։ ²⁰ Նա իր հայր Մանասեի նման չար ընթացք ունեցավ Տիրոջ առջև, ²¹ գնաց իր հոր ընթացած բոլոր ճանապարհներով, պաշտեց իր հոր պաշտած կուռքերը, երկրպագեց նրանց, ²² լքեց Տիրոջը՝ իր հայրերի Աստծուն, չգնաց Տիրոջ ճանապարհներով։

²³ Ամովնի ծառաները նրա դեմ դավ նյութեցին ու արքային սպանեցին իր տան մեջ։ ²⁴ Բայց ժողովուրդը կոտորեց Ամովն արքային սպանողներին և նրա փոխարեն թագավոր նստեցրեց նրա որդուն՝ Հովսիային։

²⁵ Ամովնի մնացած գործերը նկարագրված են Հուդայի թագավորների ժամանակագրության մեջ։ ²⁶ Ամովնը գնաց իր նախնիների գիրկը, և նրան թաղեցին իր գերեզմանում՝ Օզայի պարտեզում։ Նրա փոխարեն թագավորեց իր որդին՝ Հովսիան։

22

Հուդայի երկրի Հովսիա թագավորը

(Բ Մն. 34.1-2)

¹ Հովսիան ութ տարեկան էր, երբ թագավոր դարձավ, և երեսունմեկ տարի թագավորեց Երուսաղեմում։ Նրա մոր անունը Հեդիդա էր, նա բասուրովթացի Հեդիդայի դուստրն էր։ ² Նա հավատարիմ գտնվեց Տիրոջ առջև, գնաց իր նախնի Դավթի ընթացած բոլոր ճանապարհներով, աջ կամ ձախ չխոտորվեց։

Օրենքի գրքի հայտնաբերումը

(Բ Մն. 34.8-28)

³ Հուդայի արքա Հովսիայի թագավորության տասնութերորդ տարվա յոթերորդ ամսում արքան, Մեսողոմի որդի Եսելիայի որդի Սափանին՝ տան քարտուղարին ուղարկելով, ասաց. ⁴ «Գնա՛ Քեղկիա քահանայապետի մոտ և նրան ասա՛, որ նա պահապանների՝ ժողովրդից կշռով հավաքած և Տիրոջ տունը բերված արծաթը հաշվի ⁵ ու հանձնի Տիրոջ տան գործի վրա նշանակված գործավորներին՝ Տիրոջ տան վերակացուներին»։ Տիրոջ տան քայքայված մասերը վերականգնելու համար վճարեցին Տիրոջ տան վրա աշխատող բանվորներին՝ ⁶ հյուսներին, շինարարներին, ճարտար որմնադիրներին, որպեսզի Տիրոջ տան փլված մասերը նորոգելու համար ատաղձ ու տաշած քարեր գնեն։ ⁷ Նրանց տրված արծաթի հաշիվը չէին պահանջում, որովհետև նրանք ազնվորեն էին աշխատում։ ⁸ Քեղկիա քահանայապետն ասաց Սափան քարտուղարին. «Տիրոջ տանը օրենքի գիրք եմ գտել»։ Քեղկիան գիրքը տվեց Սափանին, որն ընթերցեց այն։ ⁹ Նա արքային լուր տարավ՝ ասելով. «Քո ծառաները Տիրոջ տանը եղած արծաթը հավաքեցին և Տիրոջ տան վրա աշխատող բանվորներին հանձնեցին»։ ¹⁰ Սափան քարտուղարը խոսեց արքայի հետ՝ ասելով. «Քեղկիա քահանան ինձ մի մատյան է տվել»։ Սափանն այն ընթերցեց արքայի առջև։ ¹¹ Երբ արքան լսեց Օրենքի գրքի խոսքերը, իր հանդերձները պատառոտեց։ ¹² Արքան պատվեր տվեց Քեղկիա քահանային, Սափանի որդի Աքիկամին, Միքեի որդի Աքոբորին, Սափան քարտուղարին և արքայի ծառա Հասայիային. ¹³ «Գնացե՛ք և ինձ համար, ամբողջ ժողովրդի համար և Հուդայի ամբողջ երկրի համար հարցրե՛ք Տիրոջն այս գտնված գրքի խոսքերի մասին, որովհետև մեզ վրա Տիրոջ մեծ բարկությունն է բորբոքվել այն բանի համար, որ մեր հայրերը այս գրքի խոսքերին չեն հնազանդվել, չեն գործադրել այդտեղ գրված բոլոր պատգամները»։

¹⁴ Քեղկիա քահանան, Աքիկամը, Աքոբորը, Սափանը և Հասայիան գնացին հանդերձապետ Արասի որդի Թեկուայի որդի Սեղղոմի կնոջ՝ Օղդա մարգարեի մոտ։ Նա Երուսաղեմի մերձակա Մասենայում էր բնակվում։ Նրանք խոսեցին նրա հետ։ ¹⁵ Օղդան ասաց. «Այսպես է ասում Տերը՝ Իսրայելի Աստվածը. “Ասե՛ք այն մարդուն, որը ձեզ ուղարկել է ինձ մոտ. ¹⁶ “Այսպես է ասում Տերը. “Ահա չարիք պիտի բերեմ այդ տեղի և բնակիչների վրա, ինչպես գրված է Հուդայի երկրի արքայի կարդացած մատյանում։ ¹⁷ Այս ամենը նրա համար, որ ինձ լքեցին, խունկ ծխեցին օտար աստվածներին, որպեսզի իրենց ձեռքի գործերով ինձ բարկացնեն, և բորբոքվի իմ բարկությունն այդ տեղի վրա և չմեղմանա”։ ¹⁸ Տիրոջը հարց տալու համար ձեզ ուղարկած Հուդայի արքային ա՛յս ասեք. “Այսպես է ասում Տերը՝ Իսրայելի Աստվածը. “Քո լսած խոսքերի իմաստն այս է. ¹⁹ քանի որ քո սիրտը փափկեց, դու խոնարհ գտնվեցիր Տիրոջ առջև, երբ լսեցիր, թե ի՛նչ է ասվել Երուսաղեմի և նրա բնակիչների մասին, թե լինելու է ավերածություն ու անեծք, և պատառոտեցիր քո հանդերձները, լաց եղար իմ առջև, իսկ ես լսեցի այդ,- ասում է Տերը,- ²⁰ դրա համար ես քեզ պիտի տանեմ քո նախնիների գիրկը. դու թաղվելու ես քո տեղում՝ Երուսաղեմում, և քո աչքերը չեն տեսնելու այն բոլոր չարիքները, որ ես բերելու եմ այդ տեղի՝ Երուսաղեմի վրա”»։

23

Հովսիան վերանորոգում է դաշինքն Աստծու հետ

(Բ Մն. 34.3-7, 29-33)

¹ Երբ արքայի ուղարկած մարդիկ այս պատասխանը հաղորդեցին արքային, նա իր մոտ հավաքեց Հուդայի ու Երուսաղեմի բոլոր ծերերին։ ² Արքան գնաց Տիրոջ տուն։ Հուդայի երկրի բոլոր մարդիկ ու Երուսաղեմի բոլոր բնակիչները, քահանաներն ու մարգարեները՝ ամբողջ ժողովուրդը, փոքրից մինչև մեծը, նրա հետ էին։ Նրանց առաջ նա ընթերցեց Տիրոջ տան մեջ գտնված ուխտի մատյանի բոլոր խոսքերը։ ³ Արքան կանգնեց սյան մոտ և Տիրոջ առջև ուխտ դրեց, որ կընթանա Տիրոջ ճանապարհով, ամբողջ սրտով ու հոգով կպահի նրա պատվիրանները, վկայություններն ու կանոնները, կկատարի այդ մատյանում գրված ուխտի պատգամները։ Եվ ամբողջ ժողովուրդն ուխտ արեց։

Կրոնական բարեփոխումներ Հուդայում

⁴ Արքան հրամայեց Քեղկիա քահանայապետին, երկրորդ աստիճանի քահանաներին ու դռան պահապաններին, որ Տիրոջ տաճարից դուրս բերեն Բահաղի, Աստարտի և երկնքի զորությունների կուռքերը։ Դրանք այրեց Երուսաղեմից դուրս գտնվող Կեդրոնի դաշտում և դրանց մոխիրը տարավ Բեթել։ ⁵ Նա այրեց քրմերին, որոնց հաստատել էին Հուդայի արքաները, և որոնք բարձունքներում, Հուդայի բոլոր քաղաքներում ու Երուսաղեմի շուրջը խունկ էին ծխում, ինչպես նաև արեգակին, լուսնին, աստղերին ու երկնքի ողջ զորություններին խնկարկողներին։ ⁶ Տիրոջ տնից հանեց Աստարտի կուռքը և Երուսաղեմից դուրս բերելով՝ Կեդրոնի հեղեղատում այրեց, փոշու վերածեց այն և նրա մոխիրը ժողովրդի որդիների գերեզմանների վրա ցանեց։ ⁷ Քանդեց Տիրոջ տան մոտ գտնվող կադեսականների տունը, որտեղ կանայք Աստարտի կուռքերի համար ծածկոցներ էին գործում։ ⁸ Նա բոլոր քրմերին հանեց Հուդայի քաղաքներից, Գաբաայից մինչև Բերսաբեե քարուքանդ արեց բարձունքները, որտեղ քրմերը խունկ էին ծխում, քանդեց քաղաքի իշխան Հեսովի տան դռան կողքին, քաղաքի դարպասի ձախ կողմը գտնվող տունը։ ⁹ Բարձունքների քրմերն այլևս Երուսաղեմում գտնվող Տիրոջ զոհասեղանին չէին մոտենում, այլ բաղարջ հաց էին ուտում իրենց եղբայրների շրջանում։ ¹⁰ Նա քարուքանդ արեց Ենովմի որդիների ձորում գտնվող Թոփոթը, որպեսզի ոչ ոք իր որդուն կամ դստերը Մեղքոմի բոցի միջով չանցկացնի։ ¹¹ Արքայի ներքինի Նաթանի գանձարանի մոտ՝ Փարուիմում այրեցին Տիրոջ տան մուտքի մոտ գտնվող այն ձիերը, որ Հուդայի արքան նվիրել էր արեգակին. արեգակին նվիրված մարտակառքերը հրի մատնեցին։ ¹² Վերնատների տանիքների վրա Հուդայի երկրի թագավորների կառուցած զոհասեղանները, Տիրոջ տան երկու սրահներում Մանասեի կառուցած զոհասեղանները արքան քանդեց, ջարդուփշուր արեց և նրանց փոշին Կեդրոնի հեղեղատը թափեց։ ¹³ Երուսաղեմի դիմաց՝ Մոսաթի լեռան աջ կողմում գտնվող պաշտամունքի վայրը, որ Սողոմոն արքան էր հաստատել ի պատիվ սիդովնացիների գարշելի Աստարտի, Մովաբի զազրելի Քամոսի և ամովնացիների գարշելի Մեղքոմի, արքան քարուքանդ արեց։ ¹⁴ Նա խորտակեց արձանները, ջարդուփշուր արեց պաշտամունքային փայտե սյուները և նրանց տեղը մարդկանց ոսկորներով ծածկեց։

¹⁵ Բեթելի բարձունքում գտնվող զոհասեղանը, որ պատրաստել էր Իսրայելին մեղանչել տվող Նաբատի որդի Հերոբովամը, այս բարձր զոհասեղանը ևս կործանեց. նրա քարերը ջարդուփշուր անելով՝ փոշու վերածեց, իսկ պաշտամունքի սյունը այրեց։ ¹⁶ Հովսիան հայացքը շուռ տվեց ու տեսավ քաղաքում եղած գերեզմանները, մարդ ուղարկեց, գերեզմաններից ոսկորները հանեց ու զոհասեղանի վրա այրելով՝ պղծեց դրանք, ըստ Տիրոջ խոսքի, որ ասել էր Աստծու մարդը, երբ Հերոբովամը տոնի ժամանակ կանգնած էր զոհասեղանի մոտ։ Նա աչքերը հառեց Աստծու մարդու գերեզմանին, որը խոսել էր այս բաների մասին, ¹⁷ և ասաց. «Այս ի՞նչ կոթող է, որ տեսնում եմ»։ Քաղաքի մարդիկ ասացին. «Աստծու մարդու գերեզմանն է, որ եկավ Հուդայի երկրից և Բեթելի այս զոհասեղանի մասին ասաց այն, ինչ դու արեցիր»։ ¹⁸ Հովսիան ասաց. «Ձեռք մի՛ տվեք, ոչ ոք թող տեղահան չանի նրա ոսկորները»։ Նրա ոսկորները Սամարիայից եկած մարգարեի ոսկորների հետ էին թաղված։ ¹⁹ Բարձունքները, որոնք Իսրայելի թագավորները Սամարիայի քաղաքներում կառուցելով բարկացրել էին Տիրոջը, Իսրայելի արքա Հովսիան քանդեց և ամեն ինչ արեց այնպես, ինչպես Բեթելում էր արել։ ²⁰ Նա կենդանի-կենդանի այրեց բարձունքների բոլոր քրմերին, որոնք գտնվում էին զոհասեղանների մոտ, դրանց վրա էլ այրեց մարդկանց ոսկորները և դրանից հետո վերադարձավ Երուսաղեմ։

Զատկի տոնակատարություն

(Բ Մն. 35.1-19)

²¹ Արքան պատվիրեց ամբողջ ժողովրդին՝ ասելով. «Կատարե՛ք Տիրոջ՝ մեր Աստծու զատիկը, ինչպես որ գրված է այս ուխտի մատյանում»։ ²² Իսրայելը ղեկավարող դատավորների օրերից սկսած՝ Իսրայելի ու Հուդայի երկրի թագավորների օրոք նման Զատիկ չէր եղել։ ²³ Հովսիա արքայի թագավորության տասնութերորդ տարում Երուսաղեմում կատարեցին Տիրոջ այդ զատիկը։

Հովսիայի կրոնական բարեփոխումները

²⁴ Հովսիան վերացրեց վհուկներին, նշանագետներին, մեռելահարցուկներին, կուռքերը և Հուդայի երկրում ու Երուսաղեմում եղած ամեն տեսակ գարշությունները, որպեսզի հաստատի Օրենքի գրքի այն խոսքերը, որ Տիրոջ տանը Քեղկիա քահանայի գտած մատյանում էին գրված։ ²⁵ Նրանից առաջ նման թագավոր չէր եղել, որ իր ամբողջ սրտով, ամբողջ հոգով ու զորությամբ, ըստ Մովսեսի բոլոր օրենքների, հակվեր դեպի Տերը։ Ոչ էլ նրանից հետո եղավ նրա նմանը։ ²⁶ Սակայն Մանասեի կատարած չար գործերի պատճառով Հուդայի երկրի հանդեպ Տիրոջ մեջ բորբոքված սաստիկ զայրույթը չմեղմացավ։ ²⁷ Ուստի Տերն ասաց. «Հուդայի երկիրն էլ իմ առջևից պիտի մերժեմ, ինչպես մերժեցի Իսրայելը, պիտի մերժեմ այդ քաղաքը՝ իմ ընտրած Երուսաղեմը, և այդ տունը, որի համար ասել եմ՝ “Իմ անունը նրա վրա պիտի լինի”»։

Հովսիայի թագավորության վախճանը

(Բ Մն. 35.20-27)

²⁸ Հովսիայի մնացած գործերը և այն ամենը, ինչ նա արել է, նկարագրված են Հուդայի թագավորների ժամանակագրության մեջ։

²⁹ Այդ օրերին Եգիպտոսի արքա Նեքավով փարավոնը Եփրատ գետի մոտ հարձակվեց Ասորեստանի արքայի վրա։ Հովսիա արքան նրան դեմ գնաց, և երբ Նեքավովը տեսավ նրան, Մակեդովում սպանեց նրան։ ³⁰ Ծառաները նրա մարմինը տարան Մակեդովից, բերեցին Երուսաղեմ և թաղեցին իր գերեզմանում։

Հուդայի երկրի Հովաքազ թագավորը

(Բ Մն. 36.1-3)

Երկրի ժողովուրդը բերեց Հովսիայի որդի Հովաքազին և օծեց նրան ու նրա հոր փոխարեն թագավոր նստեցրեց։ ³¹ Քսաներեք տարեկան էր Հովաքազը, երբ թագավոր դարձավ։ Նա երեք ամիս թագավորեց Երուսաղեմում։ Նրա մոր անունը Ամիտալ էր։ Նա լեբնացի Երեմիայի դուստրն էր։ ³² Հովաքազը չար ընթացք ունեցավ Տիրոջ առջև՝ կրկնելով իր հայրերի ամեն տեսակ վատ արարքները։ ³³ Նեքավով փարավոնը գերեվարեց նրան և փոխադրեց Դեբղաթա, Եմաթի երկիրը՝ վերջ դնելով նրա թագավորությանը։ Նեքավով փարավոնը հարյուր տաղանդ արծաթ ու տասը տաղանդ ոսկի հարկ դրեց երկրի վրա։

Հուդայի երկրի Հովակիմ թագավորը

(Բ Մն. 36.4-8)

³⁴ Նեքավով փարավոնը նրանց վրա թագավոր նստեցրեց Հուդայի երկրի արքա Հովսիայի որդի Եղիակիմին իր հոր՝ Հովսիայի փոխարեն. նրա անունը փոխեց և Հովակիմ դրեց, իսկ Հովաքազին առավ տարավ Եգիպտոս, որտեղ և նա մեռավ։ ³⁵ Հովակիմն արծաթն ու ոսկին տալիս էր փարավոնին, սակայն փարավոնի պահանջածի չափով արծաթ վճարելու համար երկրի վրա հարկ դրեց։ Ամեն մեկն իր համար սահմանված հարկի համեմատ արծաթ ու ոսկի էր տալիս՝ Նեքավով փարավոնին տալու համար։

³⁶ Հովակիմը քսանհինգ տարեկան էր, երբ թագավոր դարձավ, և տասնմեկ տարի թագավորեց Երուսաղեմում։ Նրա մոր անունը Ելդափ էր։ Նա ռոմայեցի Հեդդելայի դուստրն էր։ ³⁷ Տիրոջ առջև նա գործեց իր նախնիների բոլոր չար արարքները։

24

¹ Հովակիմի օրոք Բաբելոնի Նաբուքոդոնոսոր արքան ելավ կռվի։ Հովակիմը երեք տարի նրան հպատակ եղավ, բայց հետո ապստամբեց նրա դեմ։ ² Տերը Հովակիմի դեմ ուղարկեց քաղդեացիների, ասորիների, մովաբացիների և ամովնացիների կողոպտիչ զորքը։ Նա նրանց Հուդայի երկրի դեմ ուղարկեց, որպեսզի սպանեն նրա բնակիչներին, ինչպես ասել էր Տերն իր մարգարեների միջոցով։ ³ Տերը բարկացել էր Հուդայի երկրի վրա, նրան իրենից հեռու վանել Մանասեի կատարած մեղքերի պատճառով, այն անմեղ արյան համար, որ նա թափել էր ⁴ ու Երուսաղեմը լցրել այդ անմեղ արյամբ։ Տերը չուզեց ներել նրան։

⁵ Հովակիմի մնացած գործերը և այն ամենը, ինչ նա արել է, նկարագրված են Հուդայի թագավորների ժամանակագրության մեջ։

⁶ Հովակիմը գնաց իր նախնիների գիրկը, և իր փոխարեն թագավորեց իր որդին՝ Հովաքինը։

⁷ Եգիպտոսի փարավոնն այլևս իր երկրից դուրս չեկավ, որովհետև Բաբելոնի արքան գրավել էր Եգիպտոսի հեղեղատից մինչև Եփրատ գետը, այն ամենը, ինչ պատկանում էր Եգիպտոսի արքային։

Հուդայի երկրի Հովաքին թագավորը

(Բ Մն. 36.9-10)

⁸ Հովաքինը տասնութ տարեկան էր, երբ թագավոր դարձավ, և երեք ամիս թագավորեց Երուսաղեմում։ Նրա մոր անունը Նեսթա էր, նա երուսաղեմացի Ելամաթի դուստրն էր։ ⁹ Հովաքինը չարիք գործեց Տիրոջ առջև՝ կրկնելով իր հոր բոլոր արարքները։

Առաջին տեղահանությունը

¹⁰ Այդ ժամանակ Երուսաղեմի դեմ ելավ Բաբելոնի Նաբուքոդոնոսոր արքան, եկավ ու պաշարեց քաղաքը։ ¹¹ Բաբելոնի արքան մտավ Երուսաղեմ քաղաքը, երբ նրա զորականները պաշարված էին պահում այն։ ¹² Այն ժամանակ Հուդայի երկրի արքա Հովաքինը, իր զորականները, մայրը, իշխանները, ներքինիները գնացին բաբելացիների արքայի մոտ, և բաբելացիների արքան իր թագավորության ութերորդ տարում գերեվարեց նրանց։ ¹³ Նա հանեց Տիրոջ տան բոլոր գանձերը, թագավորի տան գանձերը, ջարդեց այն բոլոր ոսկե անոթները, որ Իսրայելի Սողոմոն արքան պատրաստել էր տվել Տիրոջ տաճարի համար, ինչպես ասել էր Տերը։ ¹⁴ Ամբողջ Երուսաղեմը, բոլոր իշխաններին ու քաջամարտիկներին՝ տասը հազար հոգի, գերեվարեց, բոլոր հյուսներին ու դարբիններին տարավ։ Երկրի աղքատներից բացի ոչ ոք չմնաց։ ¹⁵ Նա Հովաքինին, թագավորի մորը, նրա կանանց ու ներքինիներին, երկրի զորավոր մարդկանց Երուսաղեմից գերության տարավ Բաբելոն։ ¹⁶ Բաբելոնի արքան գերեվարեց նաև յոթ հազար պատերազմողների, հազար հյուսների ու դարբինների՝ ամենքն էլ քաջ պատերազմիկներ, և գերության տարավ Բաբելոն։ ¹⁷ Բաբելոնի արքան նրա փոխարեն թագավոր նստեցրեց նրա որդուն՝ Մեթթանիային, և նրա անունը դրեց Սեդեկիա։

Հուդայի երկրի Սեդեկիա թագավորը

(Բ Մն. 36.11-12, Երմ. 52.1-3)

¹⁸ Սեդեկիան քսանմեկ տարեկան էր, երբ դարձավ թագավոր, և տասնմեկ տարի թագավորեց Երուսաղեմում։ Նրա մոր անունը Ամատել էր։ Նա լեբնացի Երեմիայի դուստրն էր։ ¹⁹ Սեդեկիան Տիրոջ առջև չարիք գործեց, ինչպես արել էր Հովաքինը։ ²⁰ Տերը բարկացել էր Երուսաղեմի ու Հուդայի երկրի վրա այն աստիճան, որ Տերը նրանցից երես թեքեց։ Սեդեկիան ապստամբեց բաբելացիների արքայի դեմ։

25

Երուսաղեմի անկումը

(Բ Մն. 36.13-21, Երմ. 52.3-11)

¹ Նրա թագավորության իններորդ տարվա տասներորդ ամսի տասներորդ օրը Բաբելոնի Նաբուքոդոնոսոր արքան իր ամբողջ զորքով եկավ Երուսաղեմի դեմ, նրա շուրջը բանակ դրեց և շուրջանակի պատնեշ կառուցեց։ ² Քաղաքը պաշարվեց մինչև Սեդեկիա արքայի թագավորության տասնմեկերորդ տարվա ³ իններորդ ամիսը։ Քաղաքում սովը սաստկացավ, և երկրի ժողովուրդը հաց չուներ։ ⁴ Քաղաքի պարսպի մեջ ճեղք բացվեց, և բոլոր պատերազմողները գիշերը փախան պարիսպների միջև գտնվող դարպասը տանող ճանապարհով, որը արքունի պարտեզի մոտ էր։ Քաղդեացիները քաղաքը շրջապատել էին։ Թագավորը գնաց Արաբա տանող ճանապարհով։ ⁵ Քաղդեացիների զորքը հետապնդեց թագավորին և նրան հասավ Երիքովի Արաբովթ վայրում։ Նրա ամբողջ զորքը նրանից հեռացավ։ ⁶ Բռնեցին թագավորին ու բերեցին Բաբելոնի արքայի մոտ՝ Ռեբղաթա, և արքան նրա դատաստանն արեց։ ⁷ Սեդեկիայի որդիներին նրա աչքի առաջ սպանեց, Սեդեկիայի աչքերը կուրացրեց և շղթայակապ տարավ Բաբելոն։

Տաճարի կործանումը

(Երմ. 52.12-33)

⁸ Բաբելացիների Նաբուքոդոնոսոր արքայի տասնիններորդ տարվա հինգերորդ ամսի յոթերորդ օրը Բաբելոնի արքայի ծառա Նաբուզարդան դահճապետը եկավ Երուսաղեմ, ⁹ այրեց Տիրոջ տունը, թագավորի տունը, Երուսաղեմի բոլոր տները և ամեն ինչ կրակի մատնեց։ ¹⁰ Դահճապետի հետ եկած քաղդեացիների բոլոր զինվորները Երուսաղեմի պարիսպը շուրջանակի քանդեցին։ ¹¹ Քաղաքում մնացած մարդկանց, Բաբելոնի արքային հանձնվելիք փախստականներին և մնացած խառնիճաղանջ ամբոխին Նաբուզարդան դահճապետը քշեց տարավ։ ¹² Երկրի աղքատ մարդկանցից ոմանց նա թողեց, որպեսզի զբաղվեն այգեգործությամբ ու երկրագործությամբ։

¹³ Քաղդեացիները Տիրոջ տան երկու պղնձե սյուները, պատվանդաններն ու պղնձե ավազանը, որը Տիրոջ տան մեջ էր, քանդեցին ու նրա պղինձը տարան Բաբելոն։ ¹⁴ Ամաններն ու կաթսաները, տաշտերն ու խնկամանները և պղնձե բոլոր անոթները, որոնցով սպասավորություն էին անում, տարան։ ¹⁵ Դահճապետը վերցրեց արծաթե ու ոսկե բուրվառները և ափսեները, ¹⁶ ինչպես նաև երկու սյուները և մի ավազանն ու պատվանդանները, որ Սողոմոնն էր պատրաստել Տիրոջ տան համար։ Պղնձե բոլոր անոթներին կշիռ չկար։ ¹⁷ Մի սյունը տասնութ կանգուն բարձրություն ուներ, վրան պղնձե խոյակ կար, և մի խոյակի բարձրությունը երեք կանգուն էր։ Վանդակ ու նռնաձև զարդեր կային խոյակի վրա՝ շուրջանակի, ամբողջովին պղնձե։ Նույնօրինակ վանդակազարդեր կային նաև երկրորդ սյան վրա։

Հուդայի երկրի բնակիչները Բաբելոն են տարվում

(Երմ. 52.24-27)

¹⁸ Դահճապետն առավ Սարայա քահանայապետին, նրա օգնական Սոփոնիա քահանային, դռան երեք պահապաններին, ¹⁹ քաղաքից վերցրեց մի ներքինու, որը պատերազմող մարդկանց զորագլուխն էր, արքայի առջև կանգնող խորհրդականներից հինգ հոգու, որոնք քաղաքում էին գտնվում, զորքի քարտուղար իշխանին, որը զինվորագրում էր երկրի ժողովրդին, և երկրի ժողովրդից յոթ այլ մարդկանց, որոնք քաղաքում էին գտնվում։ ²⁰ Նաբուզարդան դահճապետը նրանց առավ տարավ Ռեբղաթա՝ Բաբելոնի արքայի մոտ։ ²¹ Բաբելոնի արքան Եմաթ երկրի Ռեբղաթա վայրում հարվածեց ու սպանեց նրանց։ Այսպիսով Հուդայի բնակիչներն իրենց երկրից գերեվարվեցին։

²² Հուդայի երկրում մնացած ժողովրդին Բաբելոնի արքա Նաբուքոդոնոսորը թողեց և նրանց վրա կառավարիչ կարգեց Սափանի որդի Աքիկամի որդի Գոդողիային։

Գոդողիան Հուդայի երկրի կառավարիչ

(Երմ. 40.7-9, 41.1-3)

²³ Երբ զորքի բոլոր իշխաններն ու նրանց մարդիկ լսեցին, որ Բաբելոնի արքան Գոդողիային կառավարիչ է նշանակել, Գոդողիայի մոտ՝ Մասեփա, եկան Նաթանիայի որդի Իսմայելը, Կարեի որդի Հովնանը, սոփաթացի Թանայեմի որդի Սարայիան, Մաքաթի որդի Հեզոնիան։ Եկան թե՛ իրենք, թե՛ իրենց մարդիկ։ ²⁴ Գոդողիան երդվեց նրանց ու նրանց մարդկանց և ասաց. «Մի՛ վախեցեք քաղդեացի ասպատակներից, նստե՛ք ձեր երկրում, ծառայե՛ք Բաբելոնի արքային, և ձեզ համար լավ կլինի»։

²⁵ Այնպես պատահեց, որ յոթերորդ ամսին Եղիսամայի որդի Նաթանիայի որդի Իսմայելը, որը թագավորական ընտանիքից էր, տասը մարդով եկավ, խփեց Գոդողիային, և նա մեռավ։ Նա սպանեց նաև Մասեփայում նրա մոտ գտնվող հրեաներին ու քաղդեացիներին։ ²⁶ Ամբողջ ժողովուրդը՝ փոքրից մինչև մեծը, նաև զորքի իշխանները ելան ու գնացին Եգիպտոս, որովհետև վախենում էին քաղդեացիներից։

Հովաքինի վերադարձը գերությունից

(Երմ. 52.31-34)

²⁷ Հուդայի արքա Հովաքինի գերության երեսունյոթերորդ տարվա տասներկուերորդ ամսի քսանյոթերորդ օրը Բաբելոնի Եվիլմարոդաք արքան իր թագավորության առաջին տարում շնորհ արեց Հուդայի Հովաքին արքային, նրան հանեց իր բանտից, ²⁸ քաղցրությամբ խոսեց նրա հետ, նրա աթոռը Բաբելոնում իր մոտ գտնվող այլ թագավորների աթոռից վերև դրեց։ ²⁹ Նրա բանտային հագուստները փոխեց, և Հովաքինը միշտ նրա հետ էր հաց ուտում։ ³⁰ Հովաքինի ապրուստի միջոցները, որպես հանապազօրյա ապրուստի միջոցներ, նրան տրվում էին արքայական տնից ամեն օր մինչև նրա կյանքի վերջը։

ԱՌԱՋԻՆ ՄՆԱՑՈՐԴԱՑ

1

Ադամից մինչև Աբրահամ

(Ծնն. 5.1-32, 10.1-32, 11.10-26)

¹ Ադամ, Սեթ, Ենովս, ² Կայնան, Մաղաղայել, Հարեդ, ³ Ենովք, Մաթուսաղա, Ղամեք, Նոյ։ ⁴ Նոյի որդիները՝ Սեմ, Քամ, Հաբեթ։

⁵ Հաբեթի որդիները՝ Գամեր, Մագովգ, Մադայի, Հովիդան, Եղիսան, Թոբել, Մոսոք և Թիրաս։ ⁶ Գամերի որդիները՝ Ասքանազ, Հռիփաթ և Թորգոմա։ ⁷ Հովիդանի որդիները՝ Ելիսա և Թարսիս, կիտացիները և հռոդացիները։ ⁸ Քամի որդիները՝ Քուս և Մեստրեմ, Փուդ և Քանան։ ⁹ Քուսի որդիները՝ Սաբա, Եվիլա, Սաբաթա, Հռեգմա և Սաբակաթա։ Հռեգմայի որդիները՝ Սաբա և Դեդան։ ¹⁰ Քուսը ծնեց Նեմրովթին. սա սկսեց հզոր որսորդ դառնալ երկրի վրա։ ¹¹ Մեստրեմը ծնեց լուդիմացիներին, ղաբիինացիներին, անաիմացիներին, նեփթաղիմացիներին, ¹² պատրոսիիմացիներին, քասղոնիիմացիներին, որոնցից առաջացան փղշտացիները, և կափթորիմացիներին։ ¹³ Քանանը ծնեց Սիդովնին՝ իր անդրանիկ որդուն, քանանացիներին, ¹⁴ հեբուսացիներին, ամորհացիներին, գերգեսացիներին, ¹⁵ խևացիներին, արուկեցիներին, արսենացիներին, ¹⁶ արադացիներին, սամարացիներին և ամաթացիներին։

¹⁷ Սեմի որդիները՝ Եղամ, Ասսուր, Արփաքսադ, Ղուդ և Արամ։ Արամի որդիները՝ Հուս, Եմովլ, Գաթեր և Մոսոք։ ¹⁸ Արփաքսադը ծնեց Կայնանին, Կայնանը ծնեց Սաղային, Սաղան ծնեց Եբերին։ ¹⁹ Եբերն ունեցավ երկու որդի. մեկի անունը Փաղեկ էր, քանզի նրա օրոք երկիրը բաժանվեց, իսկ նրա եղբոր անունը՝ Հեկտան։ ²⁰ Հեկտանը ծնեց Ելմովդադին, Սաղափին, Արամովթին, ²¹ Կեդրուրանին, Եզելին, Դեկլանին, ²² Կամաանին, Աբիմեելին, Սաբային, ²³ Սուփիրին, Եվիին և Ովրամին։ Սրանք բոլորը Հեկտանի որդիներն են։ ²⁴ Սեմի որդիները՝ Ելամ, Ասսուր, Արփաքսադ, Կայնան, Սաղա, ²⁵ Եբեր, Փաղեկ, Ռագավ, ²⁶ Սերուք, Նաքովր, Թառա և ²⁷ Աբրամ, նույն ինքը՝ Աբրահամ։

²⁸ Աբրահամի որդիները՝ Իսահակ և Իսմայել։

Իսմայելի սերունդը

(Ծնն. 25.12-16)

²⁹ Սրանք են Իսմայելի որդիները՝ Նաբեովթ, Կեդար, Աբդեէլ, Մաբսամ, ³⁰ Մասմա, Իդումա, Մասե, Քոդադ, Թեման, ³¹ Հետուր, Նափես և Կեդմա։ Սրանք են Իսմայելի որդիները։

Աբրահամի սերունդը Քետուրայից

(Ծնն. 25.1-4)

³² Աբրահամի հարճի՝ Քետուրայի որդիները. նա նրա համար ծնեց Զեմրանին, Հեկսանին, Մադանին, Մադիանին, Հեսբոկին և Սովիվեին։ Հեկսանի որդիները՝ Սաբա և Դեդան։ Դեդանի որդիները՝ Ռագուել, Նաբդեել, Ասուրիիմ, Լատուսիիմ և Լոովմին։ ³³ Մադիանի որդիները՝ Գեփար, Ոփեր, Ենոք, Աբիդա և Ելդա։ Սրանք բոլորը Քետուրայի որդիներն են։

³⁴ Աբրահամը ծնեց Իսահակին։ Իսահակի որդիները՝ Եսավ և Հակոբ։

Եսավի սերունդը

(Ծնն. 36.1-19)

³⁵ Եսավի որդիները՝ Եղիփազ, Հռագուել, Հեուլ, Եգղոմ և Կորե։ ³⁶ Եղիփազի որդիները՝ Թեման, Օվմար, Սոփար, Գոթոմ և Կենեզ։ Եղիազարի հարճ Թամարը նրա համար ծնեց Ամաղեկին։ ³⁷ Հռագուելի որդիները՝ Նաքեթ, Զարեհ, Սոմե և Մոզե։

Եդովմի երկրի նախկին բնակիչները

(Ծնն. 36.20-30)

³⁸ Սեիրի որդիները՝ Ղովտան, Սովբաղ, Սեբեգոն, Անա, Դեսոն, Ասար և Հռիսոն։ ³⁹ Ղովտանի որդիները՝ Քոռի և Էման։ Ղովտանի քույրը՝ Թամնա։ ⁴⁰ Սովբաղի որդիները՝ Գովղամ, Մանաքաթ, Գեբել, Սովփար և Հովնան։ Սեբեգոնի որդիները՝ Այիա և Ովնան։ Անայի որդին՝ Դեսոն, իսկ Անայի դուստրը՝ Ելիբամա։ ⁴¹ Դեսոնի որդիները՝ Ադամա, Եսեբամ, Հեթրան և Քառան։ ⁴² Ասարի որդիները՝ Բաղտան, Ազուկամ, Հովիկամ և Ուկամ։ Հռիսոնի որդիները՝ Օվս և Առան։

Եդովմի երկրի թագավորները

(Ծնն. 36.31-43)

⁴³ Սրանք են այն թագավորները, որոնք թագավորեցին Եդովմում՝ նախքան Իսրայելի որդիների թագավոր ունենալը. Սեփովրի որդի Բաղակ, և նրա քաղաքի անունը Դենաբա էր։ ⁴⁴ Մեռավ Բաղակը, և նրա փոխարեն թագավորեց Հովբաբը՝ բոսորացի Զարեհի որդին։ ⁴⁵ Մեռավ Հովբաբը, և նրա փոխարեն թագավորեց թեմնացի Ասոմը։ ⁴⁶ Մեռավ Ասոմը, և նրա փոխարեն թագավորեց Ադադը՝ Բարադի որդին, որը Մովաբի դաշտում կոտորեց մադիանացիներին։ Նրա քաղաքի անունը Գեթեմ էր։ ⁴⁷ Մեռավ Ադադը, և նրա փոխարեն թագավորեց մասեկացի Սամաան։ ⁴⁸ Մեռավ Սամաան, և նրա փոխարեն թագավորեց Սավուղը, որը գետեզերքի մոտ գտնվող Ռովբոթ բնակավայրից էր։ ⁴⁹ Մեռավ Սավուղը, և նրա փոխարեն թագավորեց Աքոբովրի որդի Բաղաենոնը։ ⁵⁰ Մեռավ Աքոբովրի որդի Բաղաենոնը, և նրա փոխարեն թագավորեց Ադադը։ Նրա քաղաքի անունը Փոգովր էր, իսկ նրա կնոջ անունը՝ Մետաբեել, որը Մատրադի դուստրն էր։ ⁵¹ Մեռավ նաև Ադադը։

Եդովմի իշխանները սրանք են՝ իշխան Թամանա, իշխան Գովլա, իշխան Հեթեր, ⁵² իշխան Եղիսակամաս, իշխան Եղաս, իշխան Փինոն, ⁵³ իշխան Կենեզ, իշխան Թեման, իշխան Սարսար, ⁵⁴ իշխան Մագեդիել, իշխան Զափովսիիմ։ Սրանք են Եդովմի իշխանները։

2

Իսրայելի սերունդները

(Ծնն. 35.22բ-26)

¹ Սրանք են Իսրայելի որդիների անունները՝ Ռուբեն, Շմավոն, Ղևի, Հուդա, Իսաքար, Զաբուղոն, ² Դան, Հովսեփ, Բենիամին, Նեփթաղիմ, Գադ, Ասեր։

³ Հուդայի որդիները՝ Էր, Օնան և Սելովմ. այս երեքին Հուդայի համար ծնեց Շավայի դուստրը, որ քանանացի էր։ Հուդայի անդրանիկ որդին՝ Էրը, չար էր Տիրոջ աչքին, ուստի Աստված սպանեց նրան։ ⁴ Նրա հարս Թամարը նրա համար ծնեց Փարեսին ու Զարային։ Հուդայի բոլոր որդիները թվով հինգն էին։

⁵ Փարեսի որդիները՝ Եսրոմ ու Հեմուել։ ⁶ Զարայի որդիները՝ Զամրի, Եթան, Եման, Քաղքաղ և Դարա, ընդամենը՝ հինգ հոգի։ ⁷ Զամրիի որդին էր Աքարը՝ Իսրայելին դժբախտություն պատճառողը, որ անտեսեց անեծքը։

Դավթի ծագումնաբանությունը

⁸ Եթանի որդին էր Ազարիան։ ⁹ Եսրոմի համար ծնված որդիներն էին՝ Հերամել, Հռամ (Արամ) և Ոքոբել։ ¹⁰ Հռամը ծնեց Ամինադաբին, Ամինադաբը ծնեց Հուդայի տան իշխան Նաասովնին։ ¹¹ Նաասովնը ծնեց Սաղմանին, Սաղմանը ծնեց Բոոսին, ¹² Բոոսը ծնեց Ովբեդին, Ովբեդը ծնեց Հեսսեին։ ¹³ Հեսսեն ծնեց իր անդրանիկին՝ Եղիաբին, Ամինադաբին՝ երկրորդին, Սամաային՝ երրորդին, ¹⁴ Նաթանայելին՝ չորրորդին, Հռադային՝ հինգերորդին, ¹⁵ Ասոմին՝ վեցերորդին, և Դավթին՝ յոթերորդին։ ¹⁶ Նրանց քույրերն էին Սարուիան և Աբիգեան։ Սարուիան ունեցավ երեք որդի՝ Աբեսսա, Հովաբ և Ասայել։ ¹⁷ Աբիգեան ծնեց Ամեսային, իսկ Ամեսայի հայրն էր իսմայելացի Հեթրին։

Եսրոմի սերունդը

¹⁸ Եսրոմի որդի Քաղեբը կին առավ Գազուբային, որից ծնվեց Երիմովթը։ Սրանք են նրա որդիները՝ Հովասար, Սովբաբ և Օռնա։ ¹⁹ Մեռավ Գազուբան, և Քաղեբը կին առավ Եփրաթին, որը նրա համար ծնեց Ովրին։ ²⁰ Ովրը ծնեց Օվրիին։ Օվրին ծնեց Բեսելիելին։

²¹ Դրանից հետո Եսրոմը պառկեց Գաղաադի հոր՝ Մաքիրի դստեր հետ և նրան կնության առավ, երբ ինքը վաթսուն տարեկան էր։ Նա նրա համար ծնեց Սեգուբին, ²² Սեգուբը ծնեց Հայիրին, որը Գաղաադում քսաներեք քաղաք ուներ։ ²³ Բայց Գեսուրն ու Արամը նրանցից գրավեցին Հայիրի գյուղերը, Կանաթն ու նրա ավանները՝ վաթսուն քաղաք. այս ամենը Գաղաադի հոր՝ Մաքիրի որդիներին էր պատկանում։ ²⁴ Եսրոմի մեռնելուց հետո Քաղեբը եկավ Եփրաթա, և Եսրոմի կին Աբիան նրա համար ծնեց Ասդոմին՝ Թեկուայի հորը։

Հերեմիելի սերունդը

²⁵ Եսրոմի անդրանիկ որդու՝ Հերեմիելի որդիներն էին՝ անդրանիկ որդին՝ Հռամը (Արամը), Բաանը, Առանը և սրա եղբայր Ասոմը։ ²⁶ Հերեմիելն ուրիշ կին էլ ուներ, որի անունն էր Ատարա։ Նա Ունոմի մայրն էր։ ²⁷ Հերեմիելի անդրանիկ որդու՝ Հռամի (Արամի) որդիներն էին՝ Մաաս, Հաբին և Ակոր։ ²⁸ Ունոմի որդիներն էին՝ Սամայի և Հադայի։ Սամայիի որդիներն էին՝ Նադաբ և Աբիսուր։ ²⁹ Աբիսուրի կնոջ անունն էր Աբիսեա, որը նրա համար ծնեց Ազաբարին և Մովլիդին։ ³⁰ Նադաբի որդիներն էին՝ Սաղադ և Ափփեմ։ Սաղադը մեռավ անորդի։ ³¹ Ափփեմի որդին Հեսսին էր։ Հեսսիի որդին էր Սոսանը։ Սոսանի որդին էր Ադային։ ³² Ադայիի որդիներն էին՝ Աքիսամա, Հեթեր և Հովնաթան։ Հեթերը մեռավ առանց որդի ունենալու։ ³³ Հովնաթանի որդիներն են Փաղեթը և Օզազան։ Սրանք են Հերեմիելի որդիները։

³⁴ Սոսանը չուներ որդիներ, այլ միայն դուստրեր։ Սոսանն ուներ մի եգիպտացի ծառա, որի անունն էր Հովքել։ ³⁵ Սոսանն իր դստերը կնության տվեց իր ծառա Հովքելին, որը նրա համար ծնեց Եթթիին։ ³⁶ Եթթին ծնեց Նաթանին, Նաթանը ծնեց Զաբեդին, ³⁷ Զաբեդը ծնեց Օփղաղին, Օփղաղը ծնեց Ովբեդին, ³⁸ Ովբեդը ծնեց Հեուին, Հեուն ծնեց Ազարիային, ³⁹ Ազարիան ծնեց Քեղղեսին, Քեղղեսը ծնեց Եղեասային, ⁴⁰ Եղեասան ծնեց Սոսոմեին, Սոսոմեն ծնեց Սաղղումին, ⁴¹ Սաղղումը ծնեց Հեքոնիային, Հեքոնիան ծնեց Եղիսամային։

Քաղեբի սերունդը

⁴² Հերեմիելի եղբայր Քաղեբի որդիներն էին. Մաեսան՝ նրա անդրանիկ որդին, որը Զիփի հայրն էր, որը Մարիսայի հայրն էր, որը Քեբրոնի հայրն էր։

⁴³ Քեբրոնի որդիները՝ Կորխ, Թափփսի, Հռոկոմ և Սեմաա։ ⁴⁴ Սեմաան ծնեց Հռաամին՝ Հերակայի հորը։ Հերական ծնեց Սաղամային, ⁴⁵ որի որդին էր Մաովնը՝ Բեթսուրի հայրը։ ⁴⁶ Քաղեբի հարճ Գեփան ծնեց Առանին, Հովսային ու Գեզուեին։ ⁴⁷ Ադայի որդիներն էին. Հռագեմը, Օվթամը, Գերսոմը, Փաղետը, Գեփան և Սագափը։ ⁴⁸ Քաղեբի հարճ Մովքան ծնեց Սեբերին և Թաքնային։ ⁴⁹ Նա ծնեց նաև Սագափին՝ Մադենայի հորը, Սավուղին՝ Մաքամենայի ու Բաղայի հորը։ Քաղեբի դուստրը Ասքան էր։ ⁵⁰ Սրանք են Քաղեբի որդիները։ Եփրաթայի անդրանիկ որդի Ովրի որդիներն էին. Սովբաղը՝ Կարիաթ-Յարիմի հայրը, ⁵¹ Սաղոմոնը՝ Բեթղամոնի հայրը, այն է՝ Բեթղեհեմի հայրը, և Արին՝ Բեթեգովրի հայրը։ ⁵² Կարիաթ-Յարիմի հայր Սովբաղի որդիներն էին՝ ⁵³ Արան, Եսին, Ամանիթ, Ումասփայե, Հռիաթիավր, Եթաղիմ, Եփիթին, Սամաթին, Հեմասարին։ Սրանցից են առաջացել սարաթացիները և եսթավուղացիները։ ⁵⁴ Սաղոմոնի որդիներն էին՝ Բեթղեհեմ, Նետոփաթի, Ատարովթ, Հովաբի ցեղը, մանաթացիների կես ցեղը և Եսարային։ ⁵⁵ Գաբեսում բնակվող դպիրների տոհմերն էին ագաթացիները, սամաթացիները և սովկաթացիները։ Սրանք են Հռեքաբի ցեղի հայր Եմաթից առաջացած ցեղերը։

3

Դավիթ թագավորի որդիները

¹ Սրանք են Դավթի որդիները, որ նրա համար ծնվեցին Քեբրոնում. անդրանիկ որդին՝ Ամովն՝ ծնված հեզրայելացի Աքինովամից, երկրորդը՝ Դաղուիա՝ ծնված կարմելացի Աբիգեայից, ² երրորդը՝ Աբեսաղոմ՝ Գեսուրի թագավոր Թողմայի դուստր Մովքայի որդին, չորրորդը՝ Ադոնիա՝ Ագիթի որդին, ³ հինգերորդը՝ Սափատիաս՝ ծնված Աբիտաղից, վեցերորդը՝ Հեթրամ՝ ծնված իր Ագղա կնոջից։ ⁴ Սրանք նրա համար ծնվեցին Քեբրոնում։ Նա այնտեղ թագավորեց յոթ տարի և վեց ամիս, իսկ երեսուներեք տարի թագավորեց Երուսաղեմում։

⁵ Սրանք էլ նրա համար ծնվեցին Երուսաղեմում՝ Սամաա, Սովբաբ, Նաթան և Սողոմոն. այս չորսը Ամիելի դուստր Բերսաբեեից էին ծնվել։ ⁶ Նաև Հեբաարը, Եղիսաման, ⁷ Եղիփալետը, Նագեբը, Նափեկը, Նափիին, ⁸ Եղիսաման, Եղիադան և Եղիթադան՝ ինը հոգի։ Սրանք բոլորը Դավթի որդիներն են՝ ⁹ չհաշված նրա հարճերից ծնված որդիները։ Եվ Թամարը նրանց քույրն էր։

Սողոմոն թագավորի սերունդը

¹⁰ Սողոմոնի որդին՝ Հռոբովամ, նրա որդին՝ Աբիա, նրա որդին՝ Ասա, նրա որդին՝ Հովսափատ, ¹¹ նրա որդին՝ Հովրամ, նրա որդին՝ Օքոզիա, նրա որդին՝ Հովաս, ¹² նրա որդին՝ Ամասիա, նրա որդին՝ Ազարիա, նրա որդին՝ Հովաթամ, ¹³ նրա որդին՝ Աքազ, նրա որդին՝ Եզեկիա, նրա որդին՝ Մանասե, ¹⁴ նրա որդին՝ Ամովս, նրա որդին՝ Հովսիա։ ¹⁵ Հովսիայի որդիները. անդրանիկը՝ Հովաքազ, երկրորդը՝ Հովակիմ, երրորդը՝ Սեդեկիա, չորրորդը՝ Աղում։ ¹⁶ Հովակիմի որդիները. նրա որդի Հեքոնիա և նրա որդի Սեդեկիա։ ¹⁷ Հեքոնիայի որդին՝ Ասիր, նրա որդի Սաղաթիել, ¹⁸ Մեղքիրամ, Փադայիա, Ովսամով, Նաբատիա, Սանեսար և Հեքոնիա։ ¹⁹ Սաղաթիելի որդիները՝ Զորաբաբել և Սեմեի։ Զորաբաբելի որդիները՝ Մասողամոս, Անանիա և նրանց քույր Սաղովմե։ ²⁰ Նաև՝ Ասեբա, Օող, Բարաքիա, Ասադիա և Ասոբասեդ՝ ութ հոգի։ ²¹ Անանիայի որդին՝ Փալետիա, նրա որդին՝ Հեսիա, նրա որդին՝ Հռափայիա, նրա որդին՝ Օռնա, նրա որդին՝ Աբդիա, նրա որդին՝ Սեքենիա։ ²² Սեքենիայի որդին՝ Սամայիա, Սամայիայի որդիները՝ Քետտուս, Հովել, Բերիա, Նովադիա, Սափատ և Սափեք՝ վեց հոգի։ ²³ Նովադիայի որդիները՝ Եղիոնե, Եզեկիա, Եսրիկամ՝ երեք հոգի։ ²⁴ Եղիոնեի որդիները՝ Օդուիա, Եղիասիբ, Փադայիա, Ակկուբ, Հովնան, Դաղայիա և Անանիա՝ յոթ հոգի։

4

Հուդայի սերունդը

¹ Հուդայի որդիները՝ Փարես, Եսրոմ, Քարմի, Ովր, Սուբաղ, ² իսկ նրա որդին՝ Րիա։ Սուբաղը ծնեց Հեթին, Հեթը ծնեց Աքիսայիին ու Ղադային։ Սրանք Սարաթիայի սերունդն են։ ³ Սրանք են Ետամի որդիները՝ Հեսրայել, Հեսմա և Գաբես, իսկ նրանց քրոջ անունն էր Եսեղեփոն։ ⁴ Գեդուրի հայրը Փանուելն էր, իսկ Օվսանի հայրը՝ Եզերը։ Սրանք են Բեթղեհեմի հայր Եփրաթայի անդրանիկ որդի Ովրի որդիները։

⁵ Թեկուայի հայր Ասքուրը երկու կին ուներ՝ Աաղա ու Նոոբա։ ⁶ Նոոբան նրա համար ծնեց Օքոզամին, Նեփադին, Թեմանին և Ասթերանին։ Սրանք բոլորը Նոոբայի որդիներն են։ ⁷ Աաղայի որդիները՝ Նարեթ, Ասաար և Եթնադի։ ⁸ Եվ Կովսը ծնեց Եգովբին և Սոբեբային։ Սրանք են Հարիմի որդու՝ Հռեքաբի եղբոր սերունդները։

⁹ Գաբեսն առավել հայտնի էր, քան իր եղբայրները, և մայրը նրա անունն Իգաբես դրեց՝ ասելով. «Ծնեցի նրան Գաբեսի նման»։ ¹⁰ Իգաբեսը դիմեց Իսրայելի Աստծուն՝ ասելով. «Օրհնի՛ր ինձ, ընդարձակի՛ր իմ սահմանները, ձեռքդ ինձ վրա թող լինի, և իմաստությո՛ւն տուր, որ չնսեմանամ»։ Եվ Աստված նրան տվեց այն ամենը, ինչ նա խնդրել էր։

Այլ ընտանիքների սերնդաբանությունը

¹¹ Եսքասի հայր Քաղեբը ծնեց Մաքիրին, որն Ասաբոնի հայրն էր։ ¹² Ասաբոնը ծնեց Հատրոփային, Փեսեին, Թանային՝ Նաասա քաղաքի հորը՝ կենեզացի Եսեղոնի եղբորը։ Սրանք Հռեփի բնակիչներն են։ ¹³ Կենեզի որդիները՝ Գոթոնիել և Սարայիա, իսկ Գոթոնիելի որդին՝ Աթաթ։ ¹⁴ Մանաթին ծնեց Գոփորային, իսկ Սարայիան ծնեց Գերսասիմի հայր Հաբաբին։ Սրանք հյուսներ էին։ ¹⁵ Հեփոնեի որդի Քաղեբի որդիները՝ Եռա, Աղա և Նաամ, իսկ Աղայի որդին՝ Կենեզ։ ¹⁶ Հայելի որդիները՝ Ղեզիփաղի, Զեփա, Թիրա և Եսրայել։ ¹⁷ Եսրիելի որդիները՝ Հեթեր, Մովրադ, Գափեր և Աղոն։ Հեթերը ծնեց, Մարովնին, Հեսմային, Այիսբային՝ Սեթեմոնի հորը։ ¹⁸ Նրա կինը ծնեց Հարեդին՝ Գեդովրի հորը, Հաբարին՝ Սաքովնի հորը, և Հեքթիելին՝ Զովնանի հորը։ Սրանք Մորեդի կնոջ՝ փարավոնի դուստր Բեթթիայի ծնած որդիներն են։ ¹⁹ Օվդիայի կնոջ՝ Նաքիմի քրոջ որդիներն են Կեսիայի հայր Դանան և Հովմամի հայր Սիմեոնը, իսկ Կեիլայի հայր Նայեմի որդիները՝ Օտարմին, Հեսթեմոնը և Մաքաթին։ ²⁰ Սիմեոնի որդիները՝ Ամնոն, Անանի որդի Հռաննոն և Թիղոն։ Հեսեի որդին՝ Զովքաթ, և Զովքաթի որդիները։

Սեղումի սերունդը

²¹ Հուդայի որդի Սեղումի որդիները. Ղեքադի հայրը՝ Էր, Մարեսի հայրը՝ Ղադաա, Եսոբայի տան կտավագործների սերունդները, Հովակիմ, ²² Քուզեբի բնակիչները, Հովաս, Սարափ, որոնք բնակվեցին Մովաբում, և Աբեթարը նրանց վերադարձրեց Նաթուկիմ։ ²³ Սրանք բրուտներ էին, որոնք բնակվում էին Անատիմում ու Սադերայում թագավորի հետ, նրա թագավորության մեջ։ Սրանք զորացան և բնակվեցին այնտեղ։

Շմավոնի սերունդը

²⁴ Շմավոնի որդիները՝ Նաբուել, Համին, Հարիբ, Զարեհ, Սավուղ։ ²⁵ Սավուղի որդին՝ Սաղեմ, նրա որդին՝ Բասան, նրա որդին՝ Ասեման, նրա որդին՝ Մազբա, ²⁶ նրա որդին՝ Ամուել, նրա որդին՝ Սաբուդ, նրա որդին՝ Զաքուր, նրա որդին՝ Սեմեի։ ²⁷ Սեմեին ուներ վեց որդիներ ու տասը դուստրեր, բայց նրա եղբայրները շատ որդիներ չունեին, և նրանց ամբողջ տոհմը Հուդայի որդիների նման չբազմացավ։ ²⁸ Նրանք բնակվեցին Բերսաբինում, Սամաայում, Մովղադայում, Սերսուղայում, ²⁹ Բաաղայում, Քոասոմում, Թուղադայում, ³⁰ Բաթուղում, Երմայում, Սիկիղակում, ³¹ Բեթմարքաբորում, Սեովսիմի կեսում և Բարուսեովրիմի տանը։ Սրանք էին նրանց քաղաքներն ու գյուղերը մինչև Դավիթ արքան։ ³² Նաև Երամը, Երեմոնը, Թոքանը, Եսանը, Թեկենը՝ հինգ քաղաք, ³³ և այդ բոլոր քաղաքների շուրջը՝ մինչև Բաաղ սփռված նրանց գյուղերը. սրանք են նրանց կալվածքներն ու նրանց սերնդաբանությունը։

³⁴ Մոսոբաբ, Ամաղեկ, Ամասիայի որդի Հովսիա, ³⁵ Հովել, Ասիելի որդի Սարիայի որդի Սաբիայի որդի Հեու, ³⁶ Եղիոնե, Հեկեբա, Հասթե, Հասուիա, Ասայիա, Եդիել, Իսմայել, Բանեա, ³⁷ Սամուեայի որդի Սամարիայի որդի Հեդիայի որդի Աղովնի որդի Սեփերի որդի Զուզա։ ³⁸ Այս անուն առ անուն հիշվածները իրենց տոհմերի իշխաններն էին, որոնց հայրերի տոհմերը շատ էին բազմացել։ ³⁹ Սրանք գնացին, մինչև որ հասան Գերարա, մինչև Գայի արևելյան կողմը, որ իրենց հոտերի համար արոտավայր որոնեն։ ⁴⁰ Նրանք բազմաթիվ ու լավ արոտավայրեր գտան, մի ընդարձակ երկիր իրենց առաջ, որտեղ խաղաղություն ու հանդարտություն էր տիրում, որովհետև նախկինում Քամի որդիներն էին այստեղ բնակվել։ ⁴¹ Անուն առ անուն հիշատակված այս մարդիկ Հուդայի Եզեկիա արքայի օրոք եկան և հարվածեցին նրա բնակիչներին ու մինեցիներին, որոնց գտան այնտեղ, բնաջնջեցին նրանց մինչև այսօր և բնակվեցին նրանց փոխարեն, որովհետև իրենց հոտերի համար այնտեղ արոտավայրեր էին գտել։ ⁴² Նրանցից ոմանք՝ Շմավոնի որդիներից հինգ հարյուր մարդ, գնաց Սեիր լեռը, իսկ Հեթեսիայի որդիներ Փաղատիան, Նովադիան, Հռափայիան ու Օզիելը դարձան նրանց իշխանները։ ⁴³ Նրանք կոտորեցին Ամաղեկից մնացած վերապրածներին և այստեղ բնակվեցին մինչև այսօր։

5

Ռուբենի սերունդը

¹ Իսրայելի անդրանիկի՝ Ռուբենի որդիները։ Թեև նա էր անդրանիկը, սակայն, իր հոր անկողինը պղծելու պատճառով, հայրը՝ Իսրայելը, իր օրհնությունը տվեց իր որդի Հովսեփին։ Ռուբենը ազգահամարի մեջ իբրև անդրանիկ չգրվեց։ ² Թեև Հուդան զորավոր էր իր եղբայրների մեջ և նրանց իշխանը, բայց օրհնությունը Հովսեփին տրվեց։ ³ Իսրայելի անդրանիկի՝ Ռուբենի որդիներն են՝ Ենոք, Փաղղուս, Եսրովմ և Քարմի։ ⁴ Հովելի որդիները. Սեմեի, նրա որդի Բեբենա, Սեմեիի որդի ⁵ Գուգի որդիները՝ Բաաղ ⁶ և նրա որդի Բեեղա, որին գերեց Ասորեստանի Թագղաթփաղասար արքան։ Նա էր Ռուբենի ցեղի իշխանը։ ⁷ Նրա եղբայրներն էին իրենց տոհմերով, ըստ իրենց ազգահամարի՝ իշխան Հովելը, Զաքարիան ⁸ և Հովելի որդի Ամայի որդի Օզուզի որդի Իբաղեին, որ բնակվեց Արոյերում, Նաբավում ու Բելմաոնում։ ⁹ Նա բնակվեց արևելքում՝ Եփրատ գետից մինչև անապատ, որովհետև Գաղաադում նա շատ անասուններ ուներ։ ¹⁰ Սավուղի օրոք նրանք պատերազմեցին երկրի բնակիչների դեմ, և Գաղաադի արևելյան ողջ շրջանի վրանաբնակները նրանց ձեռքը գերի ընկան։

Գադի սերունդը

¹¹ Գադի որդիները բնակվեցին նրանց դիմաց՝ Բասանից մինչև Մեղքե։ ¹² Դրանք են. անդրանիկը՝ Հովել, երկրորդը՝ Սափա, ապա Անայի, որ գրագիր էր Բասանում։ ¹³ Նրանց եղբայրները բնակվեցին ըստ իրենց տոհմական տների։ Դրանք են՝ Միքայել, Մոսողաամ, Սոբայե, Հովրե, Հաքան, Ազիա և Ովբեդ։ ¹⁴ Այս յոթը Աբիքայիի որդիներն էին, որն Ուրիի որդին էր, իսկ նա՝ Ադայի որդին, նա՝ Գաղաադի որդին, նա՝ Միքայելի որդին, նա՝ Հեսսայի որդին, նա՝ Հեգդադի որդին, նա՝ Աքիբուզի որդին, ¹⁵ նա՝ Աբդիելի որդին, նա՝ Գունի որդին։ Աբիքային իշխանն էր նրանց տոհմերի, ¹⁶ որոնք բնակվում էին Գաղաադում, Բասանում և նրանց ավաններում, Սարոնի շրջակա բոլոր գավառներում, մինչև նրանց սահմանները։ ¹⁷ Նրանք բոլորն ազգահամարի մեջ մտան Հուդայի արքա Հովաթամի և Իսրայելի արքա Հերոբովամի օրոք։

Արևելյան ցեղերի բնակավայրերը

¹⁸ Ռուբենի ու Գադի որդիների և Մանասեի կես ցեղի զորավոր մարդիկ, որոնք սովոր էին պատերազմի, վահաններ ու սրեր ունեին և աղեղներ էին լարում. քառասունչորս հազար յոթ հարյուր վաթսուն՝ պատերազմի պատրաստ մարտիկներ էին։ ¹⁹ Նրանք պատերազմի ելան հագարացիների, տուրեցիների, նափեսացիների, նաբեդոնացիների և նաբիմացիների դեմ։ ²⁰ Նրանք ավելի զորավոր էին նրանցից. հագարացիները հանձնվեցին նրանց իրենց վրաններով հանդերձ, որովհետև պատերազմի ժամանակ իսրայելացիներն Աստծուն էին դիմել, և նա լսել էր նրանց, քանի որ իր վրա էին հույս դրել։ ²¹ Նրանք ավար առան հագարացիների ունեցվածքը. հինգ հազար ուղտ, երկու հարյուր հիսուն հազար ոչխար, երկու հազար էշ, նաև գերեցին հարյուր հազար մարդ։ ²² Շատերն սպանվեցին, որովհետև պատերազմն Աստծուց եղավ։ Իսրայելացիները բնակվեցին նրանց բնակավայրերում մինչև իրենց գերեվարումը։

Մանասեի կես ցեղն Անդրհորդանանում

²³ Մանասեի կես ցեղը բնակվեց երկրում՝ Բասանից մինչև Բաաղերմոն, Սանիր և Հերմոնի լեռը. Լիբանանում նրանք բազմացան։ ²⁴ Սրանք են նրանց գերդաստանների իշխանները՝ Ոփեր, Հեսսի, Ելիել, Եզիել, Հերեմիա, Հովդիա և Իգիել, որոնք զորեղ մարդիկ էին, իրենց գերդաստանների անվանի իշխաններ։

²⁵ Սակայն նրանք ուխտադրուժ եղան իրենց հայրերի Աստծու հանդեպ, պոռնկացան՝ գնալով այն օտար երկրների աստվածների հետևից, որոնց Աստված ոչնչացրել էր նրանց առջևից։ ²⁶ Եվ Աստված Իսրայելի դեմ գրգռեց Ասորեստանի արքա Փանովքի հոգին ու Սուբի արքա Թագղաթփաղասարի հոգին, որոնք գերեցին Ռուբենի ցեղին, Գադդիի ցեղին և Մանասեի կես ցեղին, տարան նրանց Քաղա ու Քաբովր, Գովզան գետի եզերքը, որտեղ մնում են մինչև այսօր։

6

Ղևիի սերունդը. քահանայապետներ

¹ Ղևիի որդիները՝ Գեդսոն, Կահաթ և Մերարի։ ² Կահաթի որդիները՝ Ամրամ, Իսահառ, Քեբրոն և Օզիել։ ³ Ամրամի որդիները՝ Ահարոն, Մովսես և Մարիամ։ Ահարոնի որդիները՝ Նադաբ և Աբիուդ, Եղիազար և Իթամար։ ⁴ Եղիազարը ծնեց Փենեեսին, Փենեեսը ծնեց Աբեսսուին, ⁵ Աբեսսուն ծնեց Բորքիին, Բորքին ծնեց Ոզիային, ⁶ Ոզիան ծնեց Զարեային, Զարեան ծնեց Մարեովթին, ⁷ Մարեովթը ծնեց Ամարիային, Ամարիան ծնեց Աքիտովբին, ⁸ Աքիտովբը ծնեց Սադովկին, Սադովկը ծնեց Աքիմաասին, ⁹ Աքիմաասը ծնեց Ազարիային, Ազարիան ծնեց Հովնասին, ¹⁰ Հովնասը ծնեց Ազարիային։ Սա քահանա էր Աստծու այն տանը, որ Երուսաղեմում կառուցեց Սողոմոնը։ ¹¹ Ազարիան ծնեց Ամարիային, Ամարիան ծնեց Աքիտովբին, ¹² Աքիտովբը ծնեց Սադովկին, Սադովկը ծնեց Սելլումին, ¹³ Սելլումը ծնեց Քեղկիային, Քեղկիան ծնեց Ազարիային, ¹⁴ Ազարիան ծնեց Սարեային, Սարեան ծնեց Հովսեդեկին։ ¹⁵ Հովսեդեկը Նաբուքոդոնոսորի ձեռքով գերության տարվեց Հուդայի ու Երուսաղեմի հետ։

¹⁶ Ղևիի որդիները՝ Գեդսոն, Կահաթ և Մերարի։ ¹⁷ Գեդսոնի որդիների անուններն են Ղոբենի և Սեմեի։ ¹⁸ Կահաթի որդիները՝ Ամրամ, Իսահառ, Քեբրոն և Օզիել։ ¹⁹ Մերարիի որդիները՝ Մոողի և Մուսի։

Սրանք են Ղևիի տոհմերը՝ ըստ իրենց ընտանիքների. ²⁰ Գեդսոնի որդի Ղոբենիից սերվեցին նրա որդի Հեթթին, ²¹ նրա որդի Հովաքը, նրա որդի Աբդիուն, նրա որդի Զարան և նրա որդի Հաթրին։ ²² Կահաթի որդիները՝ Իսահառ, նրա որդի Կորխ, նրա որդի Ասիր, ²³ նրա որդի Եղկանա, նրա որդի Աբիսափ, նրա որդի Ասիր, նրա որդի Ոզիաս, ²⁴ նրա որդի Աթ, սրա որդի Ուրիել, նրա որդի Սավուղ։ ²⁵ Եղկանայի որդիները՝ Ամաս, Աքիմովթ, ²⁶ նրա որդի Եղկանա, նրա որդի Սուփի, նրա որդի Կանաթ, ²⁷ նրա որդի Եղիաթ, նրա որդի Հերոամ, նրա որդի Եղկանա։ ²⁸ Սամուելի որդիները. նրա անդրանիկը՝ Հովել, երկրորդը՝ Աբիա։ ²⁹ Մերարիի որդիները՝ Մոոլի, Նաբար, նրա որդի Ղոբենի, նրա որդի Սեմեի, նրա որդի Օզա, ³⁰ նրա որդի Սամաա, նրա որդի Անգիա, նրա որդի Ասիա։

Տաճարի երաժիշտները

³¹ Սրանք են, որոնց Դավիթը կարգեց Աստծու տան սաղմոսերգուների վրա, երբ Ուխտի տապանակը հաստատվեց այնտեղ։ ³² Նրանք Վկայության խորանի առջև նվագարաններով սաղմոսերգության պաշտոն էին կատարում, մինչև որ Սողոմոնը Երուսաղեմում կառուցեց Տիրոջ տունը, և նրանք մնացին իրենց սպասավորության մեջ՝ ըստ իրենց կարգի։ ³³ Ահա սպասավորության կոչվածներն ու նրանց որդիները. Կահաթի ցեղից՝ սաղմոսերգու Էմանը, որը որդին էր Հովելի, և նա՝ Սամուելի, ³⁴ նա՝ Եղկանայի, նա՝ Հերեմիելի, նա՝ Ելիեղի, նա՝ Թովկիի, ³⁵ նա՝ Սուփիի, նա՝ Եղկանայի, նա՝ Մաաթի, նա՝ Ամասիի, ³⁶ նա՝ Եղկանայի, նա՝ Հովելի, նա Ազարիայի, նա՝ Սափանի, ³⁷ նա՝ Թաաթի, նա՝ Ասիրի, նա՝ Բիասափի, նա՝ Կորխի, ³⁸ նա՝ Հեսարի, նա՝ Կահաթի, նա՝ Ղևիի, նա՝ Իսրայելի, ³⁹ և նրա եղբայր Ասափը, որը նրա աջ կողմում էր կանգնում։ Ասափը որդին էր Բարաքիի, և նա՝ Սամաայի, ⁴⁰ նա՝ Միքայելի, նա՝ Բաասիայի, նա՝ Մեքիայի, ⁴¹ նա՝ Աթանիի, նա՝ Ազարիայի, նա՝ Հադիայի, ⁴² նա՝ Ուրիի, նա՝ Զամմայի, նա՝ Սեմեիի, ⁴³ նա՝ Հեթթիի, նա՝ Գեդսոնի, և նա՝ Ղևիի։ ⁴⁴ Նաև Մերարիի որդիները՝ նրանց եղբայրները, որոնք կանգնում էին ձախ կողմում։ Դրանք են. Էթանը՝ Կիսանի որդին, նա՝ Աբդիի որդին, նա՝ Մաղովտի, ⁴⁵ նա՝ Ասեբիի, նա՝ Ամեսսիայի, նա՝ Քեղկիայի, ⁴⁶ նա՝ Ամասիայի, նա՝ Բաանի, նա՝ Սեմերի, ⁴⁷ նա՝ Ամոողի, նա՝ Մուսիի, նա՝ Մերարիի, և նա՝ Ղևիի։ ⁴⁸ Եվ նրանց եղբայրները՝ ղևտացիները, ըստ իրենց գերդաստանների, նշանակված էին Աստծու տան խորանի սպասավորության ողջ գործին։

Ղևտացիների բնակավայրերը

⁴⁹ Ահարոնը և իր որդիները խունկ էին ծխում ողջակեզների զոհասեղանին ու խնկերի զոհասեղանին և կատարում Սրբություն սրբոցի բոլոր գործերը՝ Իսրայելին քավություն անելու համար, ճիշտ այնպես, ինչպես պատվիրել էր Աստծու ծառա Մովսեսը։ ⁵⁰ Սրանք են Ահարոնի որդիները՝ Եղիազար, նրա որդին՝ Փենեես, նրա որդին՝ Աբիսու, ⁵¹ նրա որդին՝ Բովկա, նրա որդին՝ Ոզիա, նրա որդին՝ Զարա, ⁵² նրա որդին՝ Մերաովթ, նրա որդին՝ Ամարիաթ, նրա որդին՝ Աքիտովբ, նրա որդին՝ Սադովկ, ⁵³ նրա որդին՝ Աքիմաս։

⁵⁴ Սրանք են Կահաթի տոհմից սերված Ահարոնի որդիների բնակավայրերն իրենց գյուղերում ու իրենց սահմաններում, որովհետև դրանք էին նրանց բաժին ընկել։ ⁵⁵ Նրանց տվեցին Հուդայի երկրում գտնվող Քեբրոնն իր շրջակա արվարձաններով, ⁵⁶ իսկ քաղաքի դաշտերն ու գյուղերը տվեցին Հեփոնեի որդի Քաղեբին։ ⁵⁷ Ահարոնի որդիներին տվեցին նաև ապաստանի քաղաքները՝ Քեբրոնն ու Ղոբնան՝ իրենց արվարձաններով, Եղոնը՝ իր արվարձաններով, Եսթամովը՝ իր արվարձաններով, ⁵⁸ Հեսթերը՝ իր արվարձաններով, Դաբիրը՝ իր արվարձաններով, ⁵⁹ Ասանը՝ իր արվարձաններով, Բեթսամյուսը՝ իր արվարձաններով և Բեթերը՝ իր արվարձաններով։ ⁶⁰ Բենիամինի ցեղից տվեցին Գաբեեն՝ իր արվարձաններով, Գաղեմեթը՝ իր արվարձաններով, Ղաբեեն՝ իր արվարձաններով, Անաթովթը՝ իր արվարձաններով, Անքովսը՝ իր արվարձաններով։ Այդ տոհմերի բոլոր քաղաքների թիվը տասնչորս էր։

⁶¹ Կահաթի մնացած որդիներին, ըստ իրենց տոհմերի, վիճակահանությամբ տասը քաղաք տրվեց Մանասեի կես ցեղից, ⁶² իսկ Գերսոնի որդիներին, ըստ իրենց տոհմերի՝ Իսաքարի ցեղից, Ասերի ցեղից, Նեփթաղիմի ցեղից և Բասանում բնակվող Մանասեի ցեղից տասնչորս քաղաք։

⁶³ Մերարիի որդիներին, ըստ իրենց տոհմերի, Ռուբենի ցեղից, Գադի ցեղից և Զաբուղոնի ցեղից վիճակահանությամբ տրվեց տասներկու քաղաք։

⁶⁴ Այսպիսով իսրայելացիները ղևտացիներին տվեցին այս քաղաքներն իրենց շրջակա արվարձաններով։ ⁶⁵ Հուդայի ցեղից, Շմավոնի ցեղից ու Բենիամինի ցեղից վիճակահանությամբ բաժին հանեցին այս քաղաքները, որ նշված են անուններով։

⁶⁶ Կահաթի տոհմի որոշ ընտանիքների քաղաքներ տրվեցին նաև Եփրեմի ցեղից։ ⁶⁷ Նրանց տվեցին ապաստանի քաղաքները՝ Եփրեմի լեռան վրա գտնվող Սյուքեմը՝ իր արվարձաններով, Գազերը՝ իր արվարձաններով, ⁶⁸ Հեկնամը՝ իր արվարձաններով, Բեթորոնը՝ իր արվարձաններով, ⁶⁹ Ելովթը՝ իր արվարձաններով և Գեթրեմոնը՝ իր արվարձաններով։ ⁷⁰ Մանասեի կես ցեղից Եները՝ իր արվարձաններով և Իբղաաման՝ իր արվարձաններով տրվեցին Կահաթի մնացած որդիներին՝ ըստ տոհմերի։

⁷¹ Գեդսոնի որդիներին, ըստ իրենց տոհմերի, Մանասեի կես ցեղից տվեցին Բասանի Գողան բնակավայրը՝ իր շրջակա արվարձաններով և Հռոմովթը՝ իր արվարձաններով։ ⁷² Իսաքարի ցեղից տվեցին Կեդեսը՝ իր արվարձաններով, Կադիրը՝ իր արվարձաններով, ⁷³ Ամովսը՝ իր արվարձաններով և Անամը՝ իր արվարձաններով։ ⁷⁴ Ասերի ցեղից տվեցին Մասաղը՝ իր արվարձաններով, Ավդոնը՝ իր արվարձաններով, ⁷⁵ Հակակը՝ իր արվարձաններով և Հռովթը՝ իր արվարձաններով։ ⁷⁶ Նեփթաղիմի ցեղից տվեցին Գալիլեայում գտնվող Կեդեսը՝ իր արվարձաններով, Քամովը՝ իր արվարձաններով և Կարիաթ-Յարիմը՝ իր արվարձաններով։

⁷⁷ Մերարիի մնացած որդիներին Զաբուղոնի ցեղից տվեցին Հեկոմանը՝ իր արվարձաններով, Կադեսը՝ իր արվարձաններով, Հռեմոնը՝ իր արվարձաններով, Բաթովրը՝ իր արվարձաններով։ ⁷⁸ Նաև Հորդանան գետի այն կողմում, Երիքովի դիմաց, Հորդանան գետից արևմուտք Ռուբենի ցեղից տվեցին անապատում գտնվող Բոսորը՝ իր արվարձաններով, Հասան՝ իր արվարձաններով, ⁷⁹ Կադեթովթը՝ իր արվարձաններով և Մոփասաթը՝ իր արվարձաններով։ ⁸⁰ Գադի ցեղից տվեցին Գաղաադում գտնվող Ռամովթը՝ իր արվարձաններով, Մաանայիմը՝ իր արվարձաններով, ⁸¹ Հեսեբոնը՝ իր արվարձաններով և Հազերը՝ իր արվարձաններով։

7

Իսաքարի սերունդը

¹ Սրանք են Իսաքարի որդիները՝ Թովղա, Փուա, Յասուբ և Սամրամ՝ չորս հոգի։ ² Թովղայի որդիները՝ Օզի, Հռափայիա, Հերիել, Հեմու, Հեբամ և Սամուել, որոնք իրենց գերդաստանների իշխաններն էին։ Թուղն ու Անանը իրենց տոհմի մեջ զորավոր էին։ Նրանց գունդը Դավթի օրոք բաղկացած էր քսաներկու հազար վեց հարյուր հոգուց։ ³ Օզիի որդին էր Հեզեբիան, Հեզեբիայի որդիները՝ Միքայել, Աբդիա, Հովել և Հիսիաս, որոնք բոլորն էլ իշխաններ էին։ ⁴ Նրանց հետ, ըստ իրենց ազգատոհմի, ըստ իրենց գերդաստանների, պատերազմի համար պատրաստ կային երեսունվեց հազար զորավոր մարդիկ, որովհետև նրանց կանայք ու որդիները բազմացել էին։ ⁵ Նրանց եղբայրներն Իսաքարի բոլոր տոհմերի մեջ զորավոր էին։ Նրանց ընդհանուր թիվը կազմում էր ութսունյոթ հազար հոգի։

Բենիամինի և Դանի սերունդը

⁶ Բենիամինի որդիները՝ Բաղեե, Բոքոր, Ադիել՝ երեք հոգի։ ⁷ Սրանք են Բաղեեի որդիները՝ Ասեբոն, Օզի, Օզիել, Երեմովթ, Ուրի՝ հինգ հոգի, որոնք իրենց գերդաստանների քաջազուն իշխաններն էին։ Նրանց թիվը քսաներկու հազար երեսունչորս էր։ ⁸ Բոքորի որդիները՝ Զամարիաս, Հովաս, Ելիեզեր, Ելիոլե, Նավ, Ամարիա, Երիմովթ, Աբիու, Անաթովթ և Ելմեթեմ. սրանք բոլորը Բոքորի որդիներն էին, ⁹ իրենց գերդաստանների քաջազուն իշխանները, և նրանց թիվը քսան հազար երկու հարյուր էր։ ¹⁰ Աբդիելի որդին էր Բաղաանը, Բաղաանի որդիները՝ Հեուս, Բենիամին, Աովդ, Քանաան, Եդան, Թարսիս և Աքիսաար։ ¹¹ Սրանք բոլորն Աբդիելի որդիներն էին, իրենց գերդաստանների քաջազուն իշխանները, որոնք քաջությամբ պատերազմի էին ելնում, և որոնց թիվը տասնյոթը հազար երկու հարյուր էր։ ¹² Նաև Սափիմ ու Աբիմ։ Սորայի որդին էր Սոբուն, նրա որդին՝ Հաթերը։

¹³ Նեփթաղիմի որդիները՝ Հասիել, Գովնի, Սահառ, Սելլում՝ Բալլայի որդիները։

Մանասեի սերունդը

¹⁴ Մանասեի որդին էր Եսրիելը, որին ծնեց Մանասեի ասորի հարճը, և որը ծնեց նաև Գաղաադի հորը՝ Մաքիրին։ ¹⁵ Մաքիրը կին առավ Հափինի, նաև Սեփոնի համար։ Մաքիրի քրոջ անունն էր Մոոքա։ Երկրորդի անունը Սափաադ էր։ Սափաադը ծնեց միայն դուստրեր։ ¹⁶ Մաքիրի կին Մոոքան որդի ծնեց և անունը դրեց Փարես։ Սրա եղբոր անունն էր Սորոմ, իսկ նրա որդու անունը՝ Ուղամ։ ¹⁷ Ուղամի որդին էր Բադիմը։ Սրանք են Մանասեի որդի Մաքիրի որդի Գաղաադի որդիները։ ¹⁸ Նրա քույր Մալեքեթը ծնեց Էսուդին, Աբիեզերին և Մոողային։ ¹⁹ Սեմիրի որդիներն էին Այինը, Սյուքեմը, Ղակեիան և Անիամը։

Եփրեմի սերունդը

²⁰ Եփրեմի որդին՝ Մեսթաղա, նրա որդին՝ Բարադ, նրա որդին՝ Թաաթ, նրա որդին՝ Եղիադ, նրա որդին՝ Նոմեե, նրա որդին՝ Զաբեդ, ²¹ նրա որդին՝ Սովթել, նրա որդին՝ Եզեր, նրա որդին՝ Եղեադ։ Սրանց սպանեցին այդ երկրում ծնված գեթացիները, քանի որ սրանք եկել էին իրենց անասունները խլելու։ ²² Նրանց հայր Եփրեմը բազում օրեր սուգ արեց։ Նրա եղբայրները նրան մխիթարելու եկան։ ²³ Նա մերձեցավ իր կնոջը, որը հղիացավ ու ծնեց որդի, որի անունը դրեց Բարիա, որովհետև ասում էր. «Չար ժամանակ ծնվեց իմ տանը»։ ²⁴ Եփրեմի դուստրն էր Սառան։ Նա այն մնացածների հետ շինեց ներքին և վերին Բեթորոնը։ Օզանի որդիներն էին Սեերան ²⁵ և Հռափայեն, նրա որդիները՝ Հռասեթ և Թաղե, նրա որդին՝ Զոոդա, նրա որդին՝ Թաան, ²⁶ նրա որդին՝ Ամիուդ, նրա որդին՝ Եղիսամա, ²⁷ նրա որդին՝ Նուն, և նրա որդին՝ Հեսու։ ²⁸ Սրանք են նրանց կալվածքներն ու բնակավայրերը. Բեթելը և նրա գյուղերը՝ արևելյան մասում, Գազերն ու իր գյուղերը, Սյուքեմն ու իր գյուղերը մինչև Գազա ու դրա գյուղերը, ²⁹ մինչև Մանասեի որդիների սահմանները, Բեթսանն ու իր գյուղերը, Թանաքն ու իր գյուղերը, Գաղաադն ու իր գյուղերը, Մակեդդոն ու իր գյուղերը և Դովրն ու իր գյուղերը։ Այնտեղ բնակվեցին Իսրայելի որդի Հովսեփի որդիները։

Ասերի սերունդը

³⁰ Ասերի որդիները՝ Հեսնա, Հասուր, Հեսովա, Հեսու, Բարիա և նրանց քույր Սարա։ ³¹ Բարիայի որդիները՝ Քեբեր և Մելքիել. նա Զեբեթի հայրն է։ ³² Քաբերը ծնեց Հափաղետին, Սոմերին, Քովթամին և սրանց քույր Սովղամին։ ³³ Հափաղետի որդիները՝ Բեսեքի, Բամայել և Ասիթ։ Սրանք են Հափաղետի որդիները։ ³⁴ Սոմերի որդիները՝ Աքիու, Հռաադա, Օբա և Արամ։ ³⁵ Սոփարի եղբայր Ելամի որդիները՝ Համանա, Սեղես և Ամաաղ։ ³⁶ Սոփարի որդիները՝ Առնափար, Սուաղ, Բարի, Հեմրա, ³⁷ Բասար, Օվդ, Սեմա, Սաղիսա, Հեթեր և Բեերա։ ³⁸ Հեթերի որդիները՝ Հափինա, Փասփա և Արա։ ³⁹ Օվղի որդիները՝ Օրեք, Անիել և Հռայիել։ ⁴⁰ Սրանք բոլորն Ասերի որդիներն են, բոլորը տոհմերի իշխաններ ու պետեր, ընտիր քաջեր, իշխաններ և առաջնորդներ։ Պատերազմի պատրաստ նրանց մարդկանց թիվը քսանվեց հազար էր։

8

Բենիամինի սերունդը

¹ Բենիամինը ծնեց իր անդրանիկ որդուն՝ Բաղեին, երկրորդը՝ Ասբեղին, երրորդը՝ Արային, ² չորրորդը՝ Նովային, հինգերորդը՝ Հռափային։ ³ Բաղեի որդիներն էին՝ Արեդը, Գերան, Աբիուդը, ⁴ Աբիսուեն, Նաամանը, Գերան, ⁵ Սովփանը, Աքիրանը և Սովիմը։ ⁶ Սրանք են Օվդի որդիները, և սրանք են Գաբեսում բնակվող տոհմերի իշխանները։ Նրանց գերեվարեցին Մանաքաթ։ ⁷ Նաև՝ Նոոման, Աքիան և Գերան՝ նույն ինքը Եգղամը, որը ծնեց Ազային ու Աքիադին։ ⁸ Եվ Սաարիմը որդիներ ունեցավ Մովաբում իր կանանց՝ Օսիմին ու Բաարային, արձակելուց հետո։ ⁹ Նրա կին Ադան նրա համար ծնեց Հովբաբին, Սաբիային, Մոսային, Մեղքամին, ¹⁰ Հեուսին, Սեբիային և Մարմային։ Սրանք տոհմերի իշխաններ էին։ ¹¹ Հովսիմից ունեցավ Աբիտովբին և Աղփաղային։ ¹² Աղփաղայի որդիները՝ Օվեդ, Միսայել, Սեմեր (նա կառուցեց Օվնովն ու Ղովդը և նրա գյուղերը), ¹³ Բարիգա ու Սամա։ Սրանք են Եղամում բնակվող տոհմերի իշխանները, որ դուրս քշեցին Գեթի բնակիչներին։ ¹⁴ Նրանց եղբայրները՝ Մովսեք, Հարիմաթ, ¹⁵ Զաբադիա, Արովդ, Օդեր, ¹⁶ Միքայել, Հեսփաք, Հովաքա և Հեզիա՝ Բարիագայի որդիները։ ¹⁷ Զաբադիա, Մոքողամ, Ազակի, Աբար, ¹⁸ Հեսամարի, Եսիեղա և Հովբաբ՝ Եղփաղի որդիները։ ¹⁹ Հակիմ, Զեքրի, Զաբդի, ²⁰ Եղիովնե, Սաղթի, Ելիել, ²¹ Ադաիա, Բերիգա, Բարեա և Սամարիամ՝ Ամարիայի որդիները։ ²² Հեսփան, Ովբեդ, Ելիել, ²³ Աբդոն, Մեքրի, Անան, ²⁴ Անանիա, Ամբրի, Աեղամ, Անաթովթիա, ²⁵ Աթին, Հեփադիա և Փանուել՝ Սովսեկի որդիները։ ²⁶ Սամերիա, Սարայիա, Գոթողիա, ²⁷ Արասիա, Եղիա, Զեքրի՝ Երոմի որդիները։ ²⁸ Սրանք տոհմերի իշխաններ են, ըստ իրենց սերնդի՝ առաջնորդներ. սրանք բնակվեցին Երուսաղեմում։

²⁹ Գաբավոնի հայրը բնակվեց Գաբավոնում։ Նրա կնոջ անունն էր Մաաքա։ ³⁰ Նրա որդիներն էին. անդրանիկը՝ Սաբդոն, ապա՝ Հեսուր, Կիս, Բաղաամ, Ներ, Նադաբ ³¹ և Գեդուր. նրա եղբայրներն էին Զաքուրն ³² ու Մաղողովթը, որը ծնեց Սամաային։ Սրանք բնակվեցին Երուսաղեմում, իրենց եղբայրների դեմ դիմաց, իրենց եղբայրների հետ։

Սավուղ թագավորի ընտանիքը

³³ Ները ծնեց Կիսին, Կիսը ծնեց Սավուղին, Սավուղը ծնեց Հովնաթանին, Մեղքիսավեին, Ամինադաբին և Իսմայելին։ ³⁴ Հովնաթանը ծնեց Մեմփիբաաղին. Մեմփիբաաղը ծնեց Միքային։ ³⁵ Միքայի որդիներն են՝ Փիդովն, Մաղոք, Թարե և Աքաազ։ ³⁶ Աքաազը ծնեց Հովիդային, Հովիդան ծնեց Գաղեմաթին, Ազովթին, Զամարիային։ Զամարիան ծնեց Մեսսային, ³⁷ Մեսսան ծնեց Բաանային։ Նրա որդին է Հռափեան, նրա որդին՝ Եղեասը, նրա որդին՝ Եսելը։ ³⁸ Եսելը վեց որդի ուներ, որոնց անուններն են. անդրանիկինը՝ Եզրիկամ, ապա՝ Իսմայել, Սարաիա, Աբդիա և Անան։ Սրանք բոլորը Եսելի որդիներն էին։ ³⁹ Նրա եղբայր Եսեղկանի որդիներն են. անդրանիկը՝ Եղամ, երկրորդը՝ Ավաս, երրորդը՝ Եղիփաղետ։ ⁴⁰ Եղամի որդիները զորավոր ու ուժեղ այրեր էին, աղեղնավոր, որոնք բազմաթիվ որդիներ ու որդիների որդիներ ունեցան։ Նրանց թիվը հասավ հարյուր իննսուն հոգու։ Սրանք բոլորը Բենիամինի ցեղից էին։

9

Երուսաղեմը՝ իսրայելացիների քաղաք և սուրբ քաղաք

¹ Ամբողջ Իսրայելը մարդահամարի ենթարկվեց. իրենց մեղքերի համար Բաբելոն տարաբնակեցվածներով հանդերձ սրանք գրանցվեցին Իսրայելի ու Հուդայի երկրի թագավորների գրքերում։

² Քաղաքներում՝ իրենց կալվածքներում, առաջինը բնակվեցին իսրայելացիների մի մասը, քահանաները, ղևտացիները և տաճարի սպասավորները։ ³ Երուսաղեմում բնակվեց Հուդայի որդիների, Բենիամինի որդիների և Եփրեմի ու Մանասեի որդիների մի մասը։ ⁴ Նաև Հուդայի որդի Փարեսի որդի Ամարիի որդի Ամիութի որդի Գոթին։ ⁵ Սեղոմի որդիներից՝ նրա անդրանիկ որդի Ասեան ու սրա որդիները, ⁶ Զարայի որդիներից՝ Հեիելը և նրա եղբայրները՝ վեց հարյուր իննսուն հոգի։ ⁷ Բենիամինի որդիներից՝ Ասանուի որդի Դովիայի որդի Մոսոմի որդի Սաղովմը, ⁸ Հերեմի որդի Հեբնան, Մոքորի որդի Ոզիայի որդի Եղամը, Հաբնեայի որդի Ռագուելի որդի Սափատի որդի Մասաղամը ⁹ և նրանց եղբայրները, ըստ իրենց ցեղերի՝ ինը հարյուր հիսունվեց մարդ։ Սրանք բոլորն էլ տոհմերի առաջնորդներ էին՝ ըստ իրենց գերդաստանների։

Երուսաղեմում բնակվող քահանաները

¹⁰ Քահանաներից Հովիդայեն, Հովաբիբը, Աքինը, ¹¹ Աստծու տան առաջնորդ Աքիտովբի որդի Մարիովթի որդի Սադովկի որդի Մոսողոմի որդի Քեղկիայի որդի Ազարիան, ¹² Մեղքիայի որդի Փասուրի որդի Հերեմի որդի Օբդիասը, Մոսողոմի որդի Եզրի որդի Ադիելի որդի Մասեն, Ասերի որդի Ղաամովթը ¹³ և նրանց եղբայրները՝ թվով հազար յոթ հարյուր իննսուն հոգի, գերդաստանների իշխաններ և Աստծու տան սպասավորության գործում քաջահմուտ մարդիկ։

¹⁴ Ղևտացիներից Մերարիի թոռ Ասաբիայի որդի Եզրիկամի որդի Ասովբի որդի Սամաան, ¹⁵ Բագբագը, Արեսը, Գողեղը և Ասափի որդի Զեքրիի որդի Միքայի որդի Մաթանիան, ¹⁶ Իդիթովնի որդի Գողաղի որդի Սամեայի որդի Օբդիասը և նետոփատացիների գյուղերում բնակվող Եղկանայի որդի Ասայի որդի Բարաքիան։

¹⁷ Երուսաղեմում բնակվող դռնապաններն էին Սալլոմը, Ակուբը, Տեղմանը, Եմանը և նրանց եղբայրները, ընդ որում Սալլոմը նրանց գլխավորն էր։ ¹⁸ Նրանք մինչև այսօր պահպանում են Թագավորի դուռը արևելյան կողմից. սրանք Ղևիի որդիների գնդերի դռնապաններն էին։ ¹⁹ Կորխի որդի Աբիսափի որդի Կովրեի որդի Սաղովմն ու նրա հայրական տան եղբայրները՝ կորխացիները ևս սպասավորության գործի վրա էին՝ կատարելով վրանի պահպանությունը. նրանք և իրենց հայրերը Տիրոջ բանակատեղիի մուտքի պահապաններն էին։ ²⁰ Եղիազարի որդի Փենեեսը նրանց գլխավորն էր Տիրոջ առջև, և նրանք նրա հետ էին։ ²¹ Մոսողոմի որդի Զաքարիան Վկայության խորանի դռան պահապանն էր։ ²² Դռան պահպանության համար ընտրվածները երկու հարյուր տասներկու հոգի էին։ Սրանք գրանցված էին իրենց բնակության վայրերի մարդահամարի ցուցակներում։ Դավիթն ու տեսանող Սամուելը նրանց նշանակել էին իրենց հավատարմության համար։ ²³ Սրանք և իրենց որդիները նշանակվել էին Տիրոջ տան՝ խորանի տան դռների վրա, որ պահպանեն։ ²⁴ Դռները չորս կողմից էին՝ արևելքից, ծովի կողմից, հյուսիսից ու հարավից։ ²⁵ Նրանց եղբայրները, որ մնում էին իրենց բնակավայրերում, ամեն յոթ օրը մեկ, ըստ սահմանված ժամանակի, գալիս էին նրանց միանալու, ²⁶ քանզի դռների պահպանությունը հավատարմությամբ կատարում էին չորս զորեղ մարդիկ, որ ղևտացիներ էին և նշանակված էին նաև շտեմարանների և Աստծու տան գանձերի վրա։ ²⁷ Նրանք բանակում էին Տիրոջ տան շուրջը, որովհետև նրանց էր հանձնարարված պահպանությունը և նրանց էին վստահված բանալիները, որպեսզի ամեն առավոտ բաց անեն տաճարի դռները։ ²⁸ Նրանցից ոմանք նշանակված էին պաշտամունքի սպասքի վերակացուներ, որ հաշվով բերեն սպասքը ու հաշվով էլ տանեն։ ²⁹ Ոմանց էլ հանձնված էր սրբազան կահկարասու, նաշիհի, գինու, յուղի, կնդրուկի և այլ խնկերի հսկողությունը։ ³⁰ Քահանաների որդիներից ոմանք էլ անուշահոտ յուղ եփողներ և խունկ պատրաստողներ էին։ ³¹ Ղևտացիներից Մատաթիան, որը կորխացի Սաղովմի անդրանիկ որդին էր, հավատարմությամբ կատարում էր զոհաբերության և քահանայապետի տապակի հսկողությունը։ ³² Կահաթացի Բանեան իր եղբայրների միջից առաջավորաց հացի վերակացու էր կարգված՝ ամեն շաբաթ այն պատրաստելու համար։ ³³ Սրանք սաղմոսերգուներ էին, ղևտացիների տոհմերի իշխաններ, որոնց հանձնարարված էր օրվա սպասավորությունը։ Սրանք օր ու գիշեր գործի մեջ էին։ ³⁴ Սրանք ղևտացիների տոհմերի իշխաններ էին, ամեն մեկն իր ցեղի իշխանը։ Սրանք բնակվեցին Երուսաղեմում։

Սավուղ թագավորի նախահայրերն ու հաջորդները

(Ա Մն. 8.29-38)

³⁵ Գաբավոնի հայրը՝ Հեելը, բնակվեց Գաբավոնում։ Նրա կնոջ անունն էր Մոոքա։ ³⁶ Նրա անդրանիկ որդին էր Աբդոնը, իսկ մյուսների անուններն էին՝ Հասիր, Կիս, Բաաղ, Ներ, Նադաբ, ³⁷ Գեդուր, Այիոն, Զաքարիա և Մակեղովթ։ ³⁸ Մակեղոթը ծնեց Սամաային, և սրանք իրենց եղբայրների մեջ ու իրենց եղբայրների հետ բնակվեցին Երուսաղեմում։

³⁹ Ները ծնեց Կիսին, Կիսը ծնեց Սավուղին, Սավուղը ծնեց Հովնաթանին, Մեղքիսավեին, Ամինադաբին ու Բաաղին։ ⁴⁰ Հովնաթանի որդի Մեմփիբաաղը ծնեց Միքային։ ⁴¹ Միքայի որդիներն էին Փիոնը, Մաղոքն ու Թարան։ ⁴² Բաաղը ծնեց Հովադային, Հովադան ծնեց Գաղեմոթին ու Ազեմովթին Զամրիին, Զամրին ծնեց Մասային, ⁴³ Մասան ծնեց Բանարին։ Սրա որդին էր Ափան, նրա որդին՝ Եղեասարը, և նրա որդին՝ Եսսելը։ ⁴⁴ Եսսելն ունեցավ վեց որդիներ։ Ահա նրանց անունները՝ անդրանիկը՝ Եզրիկամ, ապա՝ Իսմայել, Սարիա, Աբդիա, Ամարիա և Անան։ Սրանք են Եսսելի որդիները։

10

Սավուղի մահը

(Ա Թագ. 31.1-13)

¹ Այլազգիները պատերազմեցին իսրայելացիների դեմ. նրանք փախան այլազգիների առջևից և սպանված ընկան Գեղբուա լեռան վրա։ ² Այլազգիները հետապնդեցին Սավուղին ու նրա որդիներին։ Այլազգիները սպանեցին Հովնաթանին, Ամինադաբին և Մեղքիսավեին՝ Սավուղի որդիներին։ ³ Սավուղի շուրջ պատերազմը սաստկացավ. նետաձիգները նետերով խոցեցին նրան, և նա ցավագին վիրավորվեց։ ⁴ Սավուղն ասաց իր կապարճակրին. «Հանի՛ր սուրդ և դրանով սպանի՛ր ինձ։ Այդ անթլփատները չգան ու անարգանքի ենթարկեն ինձ»։ Կապարճակիրը չուզեց այդ անել, քանի որ շատ էր վախեցել։ Այն ժամանակ Սավուղն առավ սուրը և ընկավ դրա վրա։ ⁵ Երբ նրա կապարճակիրը տեսավ, որ Սավուղը մեռավ, ինքն էլ իր սրի վրա նետվեց ու մեռավ։ ⁶ Այդ օրը մեռան Սավուղն ու իր երեք որդիները. նրա ամբողջ ընտանիքը միաժամանակ մեռավ։ ⁷ Երբ հովտում գտնվող բոլոր իսրայելացիները տեսան, որ Սավուղն ու նրա որդիներն սպանվել, և Իսրայելի մարտիկները փախել են, թողեցին իրենց քաղաքները և փախան, իսկ այլազգիները եկան ու բնակվեցին նրանց քաղաքներում։

⁸ Հետևյալ օրը, երբ այլազգիները եկան, որպեսզի կողոպտեն սպանվածներին, Սավուղին ու նրա որդիներին գտան Գեղբուա լեռան վրա ընկած։ ⁹ Նրանք մերկացրին նրան, վերցրին գլուխն ու զենքերը և ուղարկեցին այլազգիների երկիրը, որպեսզի բոլոր կողմերում ավետիս տան իրենց կուռքերին ու ժողովրդին։ ¹⁰ Նրա զենքերը դրեցին իրենց աստծու տանը, իսկ գլուխը՝ Դագովնի տանը։

¹¹ Երբ Գաղաադում բնակվող բոլոր մարդիկ լսեցին, թե ի՛նչ էին արել այլազգիները Սավուղի և Իսրայելի նկատմամբ, ¹² բոլոր քաջարի մարդիկ ելան Գաղաադից և վերցնելով Սավուղի ու նրա որդիների մարմինները՝ բերեցին Հաբիս ու նրանց ոսկորները թաղեցին Հաբիսում գտնվող կաղնու տակ ու յոթ օր ծոմ պահեցին։

¹³ Այսպիսով Սավուղը, համաձայն Տիրոջ խոսքի, մեռավ իր այն անօրենությունների պատճառով, որ գործել էր Տիրոջ դեմ, որովհետև Տիրոջ խոսքը չպահելով՝ վհուկներից խորհուրդ հարցրեց։ Սամուել մարգարեն պատասխան տվեց նրան, ¹⁴ սակայն նա Տիրոջը չխնդրեց, և Տերն սպանեց նրան ու թագավորությունը տվեց Հեսսեի որդի Դավթին։

11

Դավիթը՝ Իսրայելի և Հուդայի թագավոր

(Բ Թագ. 5.1-10)

¹ Ողջ Իսրայելը, Դավթի մոտ՝ Քեբրոն գալով, ասացին. «Ահավասիկ, մենք քո ոսկորն ու քո մարմինն ենք։ ² Անցյալում, մինչ Սավուղն արքա էր, դու էիր հովվություն անում Իսրայելին։ Եվ Տերը՝ քո Աստվածը, քեզ ասաց. “Դու պիտի հովվես Իսրայելի իմ ժողովրդին, դու պիտի լինես Իսրայելի առաջնորդը”»։ ³ Իսրայելի բոլոր ծերերը եկան արքայի մոտ՝ Քեբրոն, ու Դավիթ արքան Տիրոջ առջև Քեբրոնում նրանց հետ ուխտ դրեց։ Նրանք Դավթին Իսրայելի թագավոր օծեցին՝ ըստ Տիրոջ այն խոսքերի, որ նա Սամուելի միջոցով ասել էր։

Երուսաղեմի գրավումը

⁴ Արքան ու նրա մարդիկ գնացին Երուսաղեմ, որ Հեբուսն է։ Այնտեղ հեբուսացիներն էին՝ այդ երկրի բնակիչները։ ⁵ Հեբուսի բնակիչներն ասացին Դավթին. «Դու այստեղ չպիտի մտնես»։ Իսկ նա գրավեց Սիոնի ամրոցը, այսինքն՝ Դավթի քաղաքը։ ⁶ Դավիթն ասաց. «Ով առաջինը հարվածի հեբուսացիներին, նա էլ իշխան ու զորավար կլինի»։ Սարուիայի որդի Հովաբն առաջինը ելավ նրանց դեմ ու դարձավ իշխան։ ⁷ Դավիթը նստեց ամրոցում, այդ պատճառով այն կոչեց Դավթի քաղաք։ ⁸ Նա շուրջանակի շինեց քաղաքը, որ պատերազմելով էր գրավել։ ⁹ Դավիթը գնալով հզորանում էր, որովհետև Ամենակալ Տերը նրա հետ էր։

Դավթի հռչակավոր զորավարները

(Բ Թագ. 23.8-39)

¹⁰ Սրանք են Դավթի զորքի այն հրամանատարները, որոնք ամբողջ Իսրայելի հետ զորակցում էին նրան նրա թագավորության մեջ, որպեսզի Տիրոջ ասածի համաձայն նրան թագավորեցնեն Իսրայելի վրա։ ¹¹ Ահա Դավթի հզոր մարդկանց թիվը.

Աքամանի որդի Իզբաամը՝ երեք զորավարներից առաջինը։ Մի անգամ նա իր սուրը բարձրացրեց երեք հարյուր հոգու վրա և միաժամանակ սպանեց նրանց։

¹² Նրանից հետո գալիս է աքուքացի Դովդայի որդի Եղիազարը։ Նա երեք հզորներից էր ¹³ և Փասասոդոմում Դավթի հետ էր։ Այլազգիներն այստեղ հավաքվեցին պատերազմի։ Դաշտի մի մաս լի էր գարիով. ժողովուրդը փախավ այլազգիների առջևից։ ¹⁴ Նա կանգնեց և պաշտպանեց դաշտի գարիով մասը։ Նրանք հարվածեցին այլազգիներին, և Տերը մեծ փրկություն պարգևեց։ ¹⁵ Երեսուն իշխաններից երեքն իջան Դավթի մոտ, Ոդողոմի քարայրի մոտերքում գտնվող ժայռի մոտ, իսկ այլազգիները բանակ դրեցին Հսկաների հովտում։ ¹⁶ Դավիթն այդ ժամանակ ամրոցում էր, իսկ այլազգիների զորքը՝ Բեթղեհեմում։ ¹⁷ Դավիթը ցանկություն հայտնեց ու ասաց. «Ո՞վ ինձ խմելու ջուր կբերեր Բեթղեհեմի ջրհորից, որը դարպասի մոտ է»։ ¹⁸ Եվ այդ երեք զորավարները, այլազգիների բանակը ճեղքելով, ջուր հանեցին դարպասի մոտ գտնվող Բեթղեհեմի ջրհորից և բերեցին Դավթին, բայց Դավիթը չուզեց խմել այն. նա այն Տիրոջը նվիրեց՝ ասելով. ¹⁹ «Աստված մի՛ արասցե, որ այդ բանն անեմ. դա պիտի նշանակեր խմել այդ մարդկանց արյունը, քանի որ իրենց կյանքի գնով բերեցին այն»։ Եվ նա չուզեց խմել այդ ջուրը։ Այս բանն արեցին այդ երեք զորավարները։

²⁰ Հովաբի եղբայր Աբեսսան երեքի գլխավորն էր։ Նա սուր բարձրացրեց վեց հարյուր հոգու վրա և միաժամանակ սպանեց նրանց։ ²¹ Նա անվանի էր երեսունի մեջ, ավելի նշանավոր էր, քան մյուսները։ Նրանց գլխավորն էր, սակայն այն երեքին չէր հասնում։

²² Հովիդայեի որդի Բանեասը հզոր մարդու որդի էր։ Նա բազում գործեր արեց Կասբեելում։ Նա սպանեց Արիել Բանիայի երկու որդիներին։ Նա էր նաև, որ մի ձյունոտ օր իջավ և փոսի մեջ սպանեց առյուծին։ ²³ Նա սպանեց նաև հինգ կանգուն հասակ ունեցող մի աժդահա եգիպտացի մարդու, որ զինված էր ոստայնանկի գլանի չափ մեծ նիզակով։ Բանեասը գավազանով հարձակվեց նրա վրա, եգիպտացու ձեռքից խլեց նիզակը և նրա նիզակով էլ սպանեց նրան։ ²⁴ Այս բանն արեց Հովիդայեի որդի Բանեասը, որի անունն այդ երեք հզոր մարդկանց մեջ էր։ ²⁵ Նա երեսունի մեջ ավելի նշանավոր էր, սակայն այն երեքին չէր հասնում։ Դավիթը նրան իր տոհմի վերակացու կարգեց։

²⁶ Սրանք էին զորքի հզոր մարդիկ՝ Հովաբի եղբայր Ասայելը, բեթղեհեմացի Դովդայի որդի Եղեանան, ²⁷ արորացի Սամովթը, փաղովնացի Աքիգեղեսը, ²⁸ թեկուացու որդի Օվրեն, անաթովթացի Աբիեզերը, ²⁹ ասովթացի Սոբաքը, աքովնացի Եղին, ³⁰ նետոփաթացի Մովարեն, նետոփաթացի Բաանի որդի Եղեադը, ³¹ Բենիամինի բլրից Հռեփայի որդի Եթային, փարաթոնացի Բանեասը, ³² Նեքեղ Գաասից՝ Ուրին, սարափթացի Աբիելը, ³³ բարսամացի Ազամովթը, սաղաբոնացի Եղիաբան, ³⁴ գոթնացի Ասամի որդին, արարացի Մադեի որդի Հովնաթանը, ³⁵ արարացի Աքարի որդի Աքիաբը, Ուրի որդի Եղիբաաղը, ³⁶ քուրաթացի Փերովմեն, փելոնացի Աքիան, ³⁷ կարմելացի Ասարան, Ասբիայի որդի Նոարեն, ³⁸ Նաթանի եղբայր Հովելը, Ագարի որդի Մաբարը, ³⁹ ամովնացի Սեղեկովը, բերովթացի Նաարը՝ Սարուիայի որդի Հովաբի կապարճակիրը, ⁴⁰ ուրեթացի Իրասը, հեթերացի Գաբերը, ⁴¹ քետացի Ուրիասը, Սեղքայի որդի Սոողի որդի Զաբադը, ⁴² որը Ռուբենի ցեղից էր՝ երեսուն իշխանների գլխավորը, ⁴³ Մաաքայի որդի Անանը, մատթանացի Հովսափատը, ⁴⁴ աստարովթացի Ոզիաս, քովթանացու որդիներ Սամաան և Հևեղը, որոնք արարացիներ էին, ⁴⁵ Սամարիի որդի Հեդիելն ու նրա եղբայր Հովազան, որոնք աթովսացիներ էին, ⁴⁶ մաովնացի Հեղիելը, Այիրաբն ու նրա որդին՝ Հովսեն, որոնք եղնամացիներ էին, մովաբացի Հեթեման, Աղիելը, Ովբեդը և Հասիելը, որոնք մովսաթացիներ էին։

12

Դավթին առաջին հարողները

¹ Սրանք են, որ եկան Դավթի մոտ՝ Սիկելակ, երբ նրան դեռ նեղում էր Կիսի որդի Սավուղը, և սրանք այն հզորների մեջ էին, որոնք պատերազմում օգնում էին նրան։ ² Նրանք աղեղնավորներ ու պարսատիկավորներ էին, որ կարողանում էին թե՛ աջ, թե՛ ձախ ձեռքով քարեր ու նետեր արձակել։ Բենիամինից սերած Սավուղի եղբայրներից՝ ³ իշխան Աքիեզերը, սաբամովթացի Սամայի որդի Հովասը, Ազմովթի որդիներ Հեելն ու Ափաղետը, Բարաքիա և Հեուլ անաթացիները, ⁴ գաբավոնացի Սամեասը, որը հզոր էր այն երեսունի մեջ և երեսունի գլխավորն էր, Հերեմիասը, Եզեկիելը, Հովնանը և Զաբադը Գադերոնից, ⁵ Եղիազան, Հարիմութը, Բաաղիան, Սամարիան, Սափատիան Արիփեղից, ⁶ Եղկանան, Հեսիան, Ելիելը, Հովզարան, Հեզբաման, որոնք կորացիներ էին, ⁷ Հովելն ու Զաբադիան՝ գեդովրացի Հերոմի որդիները։

Գադի ցեղից Դավթին հարողները

⁸ Գաղաադից հեռանալով՝ անապատից Դավթի մոտ եկան քաջազուն մարդիկ, որոնք ռազմիկներ լինելով՝ զինված էին վահաններով ու տեգերով։ Նրանց դեմքը նման էր առյուծի դեմքի, իսկ արագաշարժությամբ նման էին լեռնային այծյամների։ ⁹ Եզերը իշխանն էր, Աբդիասը՝ երկրորդը, Եղիաբը՝ երրորդը, ¹⁰ Մասմանը՝ չորրորդը, Հերեմիան՝ հինգերորդը, ¹¹ Եթթին՝ վեցերորդը, Ելիելը՝ յոթերորդը, ¹² Հովնանը՝ ութերորդը, Եղզաբաթը՝ իններորդը, ¹³ Հերեմիասը՝ տասներորդը, Մաքաբանան՝ տասնմեկերորդը։ ¹⁴ Սրանք Գադի որդիներից սերած զորահրամանատարներն էին. ամենափոքրը մի հարյուրյակ ուներ ձեռքի տակ, իսկ ամենամեծը՝ հազարյակ։ ¹⁵ Սրանք են, որ անցան Հորդանան գետն առաջին ամսում, երբ այն հորդառատ էր, և հալածեցին հովիտների բոլոր բնակիչներին արևելքից մինչև արևմուտք։

Բենիամինի և Հուդայի ցեղից Դավթին հարողները

¹⁶ Դավթին օգնության եկան նաև Բենիամինի ու Հուդայի ցեղից։ ¹⁷ Դավիթը, ընդառաջ գնալով նրանց, ասաց. «Եթե խաղաղությամբ եք եկել ինձ մոտ, իմ սիրտը ձեզ հետ կլինի, իսկ եթե եկել եք, որ անհավատարմորեն ինձ մատնեք իմ թշնամիների ձեռքը, թող մեր հայրերի Աստված տեսնի ու դատապարտի ձեզ»։ ¹⁸ Եվ երեսնյակի հրամանատար Ամեսսան Հոգուց ներշնչվելով՝ ասաց.

«Հեսսեի որդի Դավի՛թ,

գնացե՛ք դու և քո զորքը,

խաղաղությո՜ւն քեզ

և խաղաղությո՜ւն քո օգնականներին,

քանի որ քո Աստվածն օգնեց քեզ»։

Դավիթն ընդունեց նրանց ու նրանց զորքի հրամանատարներ կարգեց։

Մանասեի ցեղից Դավթին հարողները

¹⁹ Մանասեի ցեղից էլ անցան Դավթի կողմը, երբ այլազգիները Սավուղի դեմ պատերազմի էին ելել։ Սակայն Դավիթն այլազգիներին չօգնեց, քանզի նրանց զորագլուխները խորհրդակցելով ասացին. «Նա այս մարդկանց գլուխների գնով կանցնի իր տիրոջ՝ Սավուղի կողմը»։ ²⁰ Երբ նա Սիկելակ էր գնում, նրա կողմն անցան Մանասեի ցեղից Եդնան, Հովզաբադը, Եղիուն և Սաղթին, որոնք Մանասեի ցեղի հազարապետներ էին։ ²¹ Նրանք Դավթի հետ պատերազմի ելան ելուզակների դեմ, որովհետև զորավոր ու ուժեղ էին, և բոլորն էլ զորքի հրամանատարներ էին։ ²² Այսպես օր օրի Դավթի մոտ էին գալիս նոր ուժեր, մինչև որ Դավթի բանակն Աստծու բանակի պես հզոր դարձավ։

Դավթի զորքը

²³ Սրանք են զորքի այն հրամանատարների անունները, որոնք եկան Դավթի մոտ՝ Քեբրոն, որպեսզի Սավուղի թագավորությունը փոխանցեն նրան՝ ըստ Աստծու խոսքի. ²⁴ Հուդայի ցեղից՝ վեց հազար ութ հարյուր վահանակիր ու տեգավոր կորովի պատերազմողներ։ ²⁵ Շմավոնի ցեղից՝ յոթ հազար հարյուր քաջարի պատերազմողներ, ²⁶ Ղևիի ցեղից՝ չորս հազար վեց հարյուր հոգի։ ²⁷ Եկավ նաև Հուդասը՝ Ահարոնի ցեղի առաջնորդը, որի հետ կար երեք հազար յոթ հարյուր հոգի։ ²⁸ Նաև երիտասարդ ու քաջարի Սադովկը՝ իր հոր տնից՝ քսաներկու հրամանատարներով։ ²⁹ Բենիամինի ցեղից՝ Սավուղի եղբայրներից կար երեք հազար հոգի։ Նրանցից շատերը Սավուղի տան վերակացուներ էին։ ³⁰ Եփրեմի ցեղից՝ քսան հազար ութ հարյուր քաջազուն կտրիճներ, անվանի մարդիկ, ըստ իրենց գերդաստանների։ ³¹ Մանասեի կես ցեղից՝ տասնութ հազար հոգի, որոնք անվանապես նշանակված էին, որ Դավթին թագավոր դարձնեն։ ³² Իսաքարի ցեղից, որոնք ժամանակները հասկանալու իմաստնությունն ունեին և գիտեին, թե ի՛նչ պետք է անի Իսրայելը իշխանության հարցերում, եկան երկու հարյուր հոգի. նաև նրանց բոլոր եղբայրները նրանց հետ։ ³³ Զաբուղոնի ցեղից, որոնք ամեն տեսակ ռազմի զենքերով պատերազմի գնացողներ էին, եկան հիսուն հազար հոգի՝ օգնելու Դավթին, և ոչ մեկը ձեռնունայն չէր։ ³⁴ Նեփթաղիմի ցեղից՝ հազար հրամանատարներ, որոնց հետ կային երեսուն հազար վահանավորներ և տեգավորներ, ³⁵ Դանի ցեղից՝ պատերազմի պատրաստ քսանութ հազար ութ հարյուր հոգի։ ³⁶ Ասերի ցեղից՝ պատերազմում օգնության ելնելու համար քառասուն հազար հոգի։ ³⁷ Հորդանան գետի այն կողմում գտնվող Ռուբենի ցեղից, Գադի ցեղից և Մանասեի կես ցեղից՝ ամեն տեսակ ռազմի զենքերով զինված հարյուր քսան հազար հոգի։

³⁸ Այս բոլոր մարդիկ՝ մարտի պատրաստ ռազմիկները, խաղաղությամբ եկան Քեբրոն, որ Դավթին Իսրայելի թագավոր դարձնեն։ Մնացած իսրայելացիներն էլ միահամուռ համաձայն էին, որ Դավիթը դառնա թագավոր։ ³⁹ Նրանք այնտեղ մնացին երեք օր, կերան ու խմեցին, որովհետև իրենց իսրայելացի եղբայրները պատրաստություն էին տեսել նրանց համար։ ⁴⁰ Նրանց սահմանակիցները, մինչև Իսաքար, Զաբուղոն և Նեփթաղիմ, ուղտերով, էշերով, ջորիներով ու եզներով ուտելիք՝ ալյուր, թուզ, չամիչ, գինի, ձեթ, շատ զվարակներ ու ոչխարներ էին բերում, որովհետև ուրախություն էր Իսրայելում։

13

Ուխտի տապանակը Կարիաթ-Յարիմից փոխադրվում է Երուսաղեմ

(Բ Թագ. 6.1-11)

¹ Դավիթը խորհրդակցեց հազարապետների ու հարյուրապետների և բոլոր իշխանների հետ։ ² Դավիթն ասաց հավաքված բոլոր իսրայելացիներին. «Եթե ձեզ բարի է թվում, և Տերը՝ մեր Աստված էլ հաջողություն է պարգևել, մարդ ուղարկենք Իսրայելի բոլոր կողմերում մնացած մեր եղբայրների, ինչպես նաև իրենց քաղաքներում ու կալվածքներում ապրող քահանաների ու ղևտացիների մոտ, որպեսզի մեզ մոտ ժողովվեն, ³ և մեր Աստծու տապանակը մեզ մոտ բերենք, քանի որ Սավուղի ժամանակներից ի վեր դրանով չզբաղվեցին»։ ⁴ Բոլոր հավաքվածները համաձայնվեցին այդպես անել, որովհետև ողջ ժողովուրդն այս խոսքերը ճիշտ համարեց։ ⁵ Դավիթը հավաքեց բոլոր իսրայելացիներին՝ Եգիպտոսի սահմաններից սկսած մինչև Եմաթ, որպեսզի Աստծու տապանակը տանեն Կարիաթ-Յարիմից։ ⁶ Դավիթը հանել տվեց այն, և ամբողջ Իսրայելը բարձրացավ Հուդայում գտնվող Դավթի քաղաքը, որ այնտեղից բերեն Տիրոջը՝ Աստծուն նվիրված տապանակը. Նրա աթոռը տապանակի վրայի քերովբեների վրա է։ ⁷ Աստծու տապանակը դրեցին Ամինադաբի տնից բերված մի նոր սայլի վրա, և Օզան ու նրա եղբայրները քշում էին սայլը։ ⁸ Դավիթն ու բոլոր իսրայելացիները եռանդագին պարում էին Աստծու առջև՝ սաղմոսներ երգելով, տավիղներով, քնարներով, թմբուկներով, ծնծղաներով ու փողերով։

⁹ Նրանք եկան մինչև Քելովնի կալը, և Օզան ձեռքը մեկնեց, որ բռնի տապանակը, որովհետև եզը տեղից շարժել էր այն։ ¹⁰ Տերը խիստ զայրացավ Օզայի վրա ու այնտեղ սպանեց նրան, որովհետև համարձակվել էր իր ձեռքը մեկնել տապանակին։ Նա տեղնուտեղը մեռավ Աստծու առաջ։ ¹¹ Դավիթը տրտմեց, քանզի Տերը պատուհասով հարվածել էր Օզային։ Այդ վայրը մինչև այսօր կոչվում է Օզայի հարված։ ¹² Այդ օրը Դավիթը վախեցավ Աստծուց և ասաց. «Ես ինչպե՞ս Աստծու տապանակն ինձ մոտ տանեմ»։ ¹³ Եվ Դավիթը տապանակը չփոխադրեց իր մոտ՝ Դավթի քաղաքը, այլ ճանապարհը շեղեց ու տարավ քետացի Աբեդդարի տունը։ ¹⁴ Աստծու տապանակը երեք ամիս մնաց Աբեդդարի տանը, և Աստված օրհնեց Աբեդդարին և այն ամենը, ինչ նա ուներ։

14

Դավիթը Երուսաղեմում

(Բ Թագ. 5.11-16)

¹ Տյուրոսի արքա Քիրամը Դավթի մոտ դեսպաններ ուղարկեց, ինչպես նաև մայրի փայտ, որմնադիրներ ու ատաղձագործներ, որ տուն շինեն նրա համար։ ² Դավիթը հասկացավ, որ Տերն է իրեն պատրաստել Իսրայելի վրա իշխելու համար, քանի որ հզորացել էր նրա թագավորությունը Իսրայելի իր ժողովրդի համար։

³ Դավիթն այլ կանայք ևս առավ Երուսաղեմում, որոնք նրա համար ուրիշ տղաներ ու աղջիկներ էլ ծնեցին։ ⁴ Ահա անունները նրանց, որոնք ծնվեցին նրա համար Երուսաղեմում՝ Սամաա, Սոբաբ, Նաթան, Սողոմոն, ⁵ Հեբաար, Եղիսավ, Եղիփաղետ, ⁶ Նագեթ, Նափատ, Հափիե, ⁷ Ելիսամա, Բաղիադա և Եղիփաղատ։

Հաղթանակներ այլազգիների դեմ

(Բ Թագ. 5.17-25)

⁸ Երբ այլազգիները լսեցին, որ Դավիթը թագավոր է օծվել ամբողջ Իսրայելի վրա, ելան Դավթին բռնելու։ Դավիթը, այդ լսելով, նրանց դեմ ելավ։ ⁹ Եկան նաև այլազգիները, և նրանք միմյանց հանդիպեցին Հսկաների հովտում։ ¹⁰ Դավիթն Աստծուն հարցրեց՝ ասելով. «Հարձակվե՞մ այլազգիների վրա, դու նրանց իմ ձեռքը կմատնե՞ս»։ Տերը նրան ասաց. «Հարձակվի՛ր, և ես նրանց քո ձեռքը կմատնեմ»։ ¹¹ Դավիթը ելավ Բաաղփարասին և կոտորեց նրանց։ Դավիթն ասաց. «Աստված իմ թշնամիներին հարվածեց իմ ձեռքով, ինչպես հեղեղն է հարվածում»։ Սրա համար այդ տեղը կոչվեց Բաաղփարասին, այն է՝ Փարասինի հարված։ ¹² Նրանք իրենց աստվածներին այնտեղ թողեցին, և Դավիթը պատվիրեց դրանք հրով այրել։

¹³ Այլազգիները կրկին հարձակվեցին, և նրանք իրար հանդիպեցին Հսկաների հովտում։ ¹⁴ Դավիթը դարձյալ հարցրեց Աստծուն, և Աստված նրան ասաց. «Մի՛ գնա նրանց հետևից, այլ շրջվի՛ր և նրանց մոտեցի՛ր տանձենիների մոտ։ ¹⁵ Երբ տանձենիների կատարների շարժման ձայն լսես, այն ժամանակ ելի՛ր պատերազմի, քանզի Աստված, քո առջևից գնալով, կոտորելու է այլազգիների բանակը»։ ¹⁶ Դավիթն արեց այնպես, ինչպես Աստված պատվիրել էր նրան, և նա կոտորեց այլազգիների բանակը Գաբաթովնից մինչև Գազերա։ ¹⁷ Դավթի անունն ամբողջ երկրում հռչակվեց, և Տերը նրա երկյուղը տարածեց բոլոր ազգերի վրա։

15

Ուխտի տապանակը փոխադրելու պատրաստություն

¹ Դավիթն իր համար տներ կառուցեց Դավթի քաղաքում, իսկ Աստծու տապանակի համար տեղ պատրաստեց և դրա համար վրան կանգնեցրեց։

² Այն ժամանակ Դավիթն ասաց. «Ոչ ոք իրավունք չունի վերցնելու Աստծու տապանակը, բացի ղևտացիներից, որովհետև նրանց է Տերն ընտրել իր տապանակը կրելու և նրա առաջ հավիտյան ծառայելու համար»։ ³ Ապա Դավիթը բոլոր իսրայելացիներին հավաքեց Երուսաղեմում, որ Տիրոջ տապանակը բերեն նրա համար պատրաստված տեղը։ ⁴ Դավիթը հավաքեց Ահարոնի որդիներին ու ղևտացիներին. ⁵ Կահաթի որդիներից՝ Ուրիել իշխանին և նրա եղբայրներին՝ հարյուր քսան հոգի, ⁶ Մերարիի որդիներից՝ Սայիաս իշխանին և նրա եղբայրներին՝ երկու հարյուր հիսուն հոգի, ⁷ Գերսոնի որդիներից՝ Հովել իշխանին և նրա եղբայրներին՝ հարյուր երեսուն հոգի, ⁸ Ելիսափանի որդիներից՝ Սամայիաս իշխանին և նրա եղբայրներին՝ երկու հարյուր հոգի, ⁹ Քեբրոնի որդիներից՝ Ելիել իշխանին և նրա եղբայրներին՝ ութսուն հոգի, ¹⁰ Օզիելի որդիներից՝ Ամինադաբ իշխանին և նրա եղբայրներին՝ հարյուր տասներկու հոգի։

¹¹ Դավիթը կանչեց Սադովկ ու Աբիաթար քահանաներին և ղևտացիներին՝ Ուրիելին, Ասայիային, Հովելին, Սամայիային, Ելիելին, Ամինադաբին, ¹² և ասաց նրանց. «Դուք ղևտացիների տոհմերի իշխաններն եք, մաքրվե՛ք դուք ու ձեր եղբայրները և Աստծու տապանակը բերե՛ք այն տեղը, որ նրա համար պատրաստել եմ։ ¹³ Չէ՞ որ առաջին անգամ Աստված մեզ մահացու հարված հասցրեց այն պատճառով, որ դուք այնտեղ չէիք։ Հիրավի, մենք տապանակի հետ չէինք վարվել, ինչպես կարգն է»։ ¹⁴ Քահանաներն ու ղևտացիները մաքրվեցին, որ բերեն Իսրայելի Աստծու տապանակը։ ¹⁵ Ղևտացիների որդիները վերցրին Աստծու տապանակը՝ բռնակները դնելով իրենց ուսերին, ինչպես Մովսեսն էր գրավոր պատվիրել ըստ Աստծու խոսքի։

¹⁶ Դավիթն ասաց ղևտացիների իշխաններին. «Կարգե՛ք ձեր եղբայրներից՝ սաղմոսներ երգելու նվագարաններով, քնարներով, սրինգներով ու ծնծղաներով, որ ուրախության ձայներ առաքեն դեպի վեր»։ ¹⁷ Եվ ղևտացիները նշանակեցին Հովելի որդի Նամանին, նրա եղբայրներից Բարաքիայի որդի Ասափին ու Մերարիի որդիներից՝ նրա եղբայրներից Կիսի որդի Եթանին։ ¹⁸ Ապա իբրև երկրորդ կարգի ծառայություն՝ դռնապաններ կարգեցին իրենց եղբայրներ Զաքարիային, Հովելին, Սեմիրամովթին, Եելին, Անանիային, Եղիաբին, Բանեային, Մասեային, Մատաթիային, Եղիփաղային, Մակենիային, Աբեդդոմին, Հեելին և Ոզիասին։ ¹⁹ Ամովն, Ասափ և Եթան սաղմոսերգուները առավել լսելի էին դարձնում ձայնը պղնձե տավիղներով։ ²⁰ Զաքարիան, Օզիելը, Սամիրամովթը, Ելիելը, Անանիան, Եղիաբը, Մասեան և Նաթայիան նվագում էին քնարով՝ ըստ Աղեմովթի [Բարձր տոնայնությամբ]։ ²¹ Մատաթիան, Եղիփաղատը, Մակենիան, Աբեդդոմը, Հեելը և Ոզիասը սրինգ էին նվագում ըստ Սենեթիասի [Ցածր տոնայնությամբ]։ ²² Ղևտացիների իշխան Քոնենիան երգեցողությունն էր ղեկավարում, քանզի քաջահմուտ էր։ ²³ Բարաքիան ու Եղկանան տապանակի առջևից էին գնում՝ պահպանելով այն։ ²⁴ Սովբենիա, Հովսափատ, Նաթանիել, Ամովն, Զաքարիա, Բանաիա և Եղիեզեր քահանաները, Աստծու տապանակի առջևից գնալով, շեփորներ էին հնչեցնում, իսկ Աբեդդոմը և Հեիան Աստծու տապանակի պահապաններն էին հետևից։

Ուխտի տապանակի ժամանումը Երուսաղեմ

(Բ Թագ. 6.12-22)

²⁵ Դավիթը, Իսրայելի ծերերն ու հազարապետները գնացին, որ Տիրոջ Ուխտի տապանակը ուրախությամբ հանեն Աբեդդարի տնից։ ²⁶ Երբ Աստված ուժ տվեց իշխաններին, որ կրում էին Տիրոջ Ուխտի տապանակը, յոթ զվարակ և յոթ խոյ զոհաբերեցին։ ²⁷ Դավիթը բեհեզե պատմուճան էր հագել, ինչպես նաև բոլոր ղևտացիները, որ տանում էին Տիրոջ Ուխտի տապանակը, ու սաղմոսերգուները և Քոնենիան, որ սաղմոսերգուների երգեցողությունն էր ղեկավարում։ Դավիթը բեհեզե պատմուճան էր հագել։ ²⁸ Ամբողջ Իսրայելը Տիրոջ Ուխտի տապանակը տարավ տոնական աղաղակներով, շեփորով ու ծնծղաներով, քնարներ ու տավիղներ նվագելով։ ²⁹ Երբ Աստծու տապանակը հասավ Դավթի քաղաքը, Սավուղի դուստր Մեղքողը պատուհանից դուրս նայեց ու տեսնելով, որ Դավիթ արքան երգում է ու պարում, իր հոգում արհամարհեց նրան։

16

¹ Աստծու տապանակը ներս տարան ու դրեցին այն վրանի մեջ, որ Դավիթն էր պատրաստել նրա համար, և ողջակեզներ ու խաղաղության զոհեր մատուցեցին Աստծու առաջ։ ² Դավիթը, վերջացնելով ողջակեզներ ու խաղաղության զոհեր մատուցելը, Տիրոջ անունով օրհնեց ժողովրդին։ ³ Բոլոր իսրայելացիներին՝ թե՛ տղամարդկանց և թե՛ կանանց, ամեն մեկին փռից մեկ հաց տվեց և մեկ պատառ միս՝ կասկարայից։

Ղևտացիների օրհներգությունն առ Աստված

⁴ Դավիթը Տիրոջ Ուխտի տապանակի առջև երգելու, փառք տալու և Տիրոջը՝ Իսրայելի Աստծուն օրհնելու համար ղևտացիներից սպասավորներ նշանակեց։ ⁵ Գլխավորն էր Ասափը, նրա օգնականը՝ Զաքարիան։ Հեելը, Սեմիրամովթը, Հայելը, Մատաթիան, Եղիաբը, Բանեան, Աբեդդովմն ու Եսիելը նվագում էին տավիղներով ու քնարներով։ Ասափը ծնծղաներ էր հնչեցնում, ⁶ իսկ Բանեա ու Օզիել քահանաները փողերով շարունակ նվագում էին Աստծու Ուխտի տապանակի առաջ։

⁷ Այդ օրն էր, որ Դավիթն առաջին անգամ Տիրոջն օրհնաբանելու հանձնարարություն տվեց Ասափին ու նրա եղբայրներին։

Փառաբանության երգ

(Սաղ. 104.1-15, 95.1-13, 105.47-48)

⁸ Օրհներգ։

Գոհությո՛ւն մատուցեք Տիրոջը և կանչե՛ք նրա անունը,

պատմե՛ք ժողովուրդներին նրա գործերը,

⁹ օրհներգե՛ք նրան ու օրհնաբանե՛ք նրան,

պատմե՛ք բոլորին Տիրոջ սքանչելագործությունները։

¹⁰ Օրհնե՛ք նրա սուրբ անունը,

թող ուրախ լինի նրան փնտրողների սիրտը։

¹¹ Տիրո՛ջը փնտրեք ու հզոր կլինեք,

միշտ նրա ներկայությո՛ւնը փնտրեք։

¹² Հիշե՛ք նրա կատարած սքանչելագործությունները,

նշաններն ու բերանի դատաստանները։

¹³ Ո՜վ Իսրայելի զավակներ, նրա ծառանե՛ր,

Հակոբի՛ որդիներ և նրա ընտրյալնե՛ր,

¹⁴ Նա է Տերը՝ մեր Աստվածը,

նրա դատաստանները բովանդակ երկրի վրա են։

¹⁵ Հավիտյան թող հիշեն նրա ուխտը,

պատվիրած խոսքերը մինչև հազար սերունդ,

¹⁶ այն ուխտը, որ նա դրեց Աբրահամի հետ,

և իր երդումը՝ Իսահակի հետ։

¹⁷ Նա այն հաստատեց Հակոբի համար որպես օրենք,

իսկ Իսրայելի համար՝ որպես հավիտենական ուխտ՝

¹⁸ Ասելով. «Քեզ եմ տալու Քանանի երկիրը,

որպես ձեր ժառանգության բաժին»։

¹⁹ Որովհետև նրանք սակավաթիվ և պանդուխտ էին այնտեղ։

²⁰ Մի ազգից մյուս ազգի մոտ գնացին նրանք,

մի թագավորությունից անցան այլ ժողովրդի մոտ։

²¹ Տերը չթողեց, որ որևէ մեկը կեղեքի նրանց

և հանուն նրանց սաստեց թագավորների՝ ասելով.

²² «Իմ օծյալներին մի՛ մոտեցեք

և իմ մարգարեների հանդեպ չար մի՛ եղեք»։

²³ Օրհնաբանի՛ր Տիրոջը, երկի՛ր բովանդակ,

օրըստօրե պատմե՛ք նրա կատարած փրկագործությունը։

²⁴ Պատմե՛ք նրա փառքը հեթանոսներին

և բոլոր ժողովուրդներին՝ նրա սքանչելիքները,

²⁵ Քանզի մեծ է Տերը, հույժ օրհնյալ

և բոլոր աստվածներից ավելի ահավոր,

²⁶ Քանի որ ազգերի բոլոր աստվածները կուռքեր են,

իսկ Աստված երկինքն է արարչագործել։

²⁷ Փա՜ռք և գովությո՜ւն նրա առաջ,

զորությո՜ւն ու պարծա՜նք նրա բնակության տեղին։

²⁸ Ո՜վ ազգերի տոհմեր, փա՛ռք տվեք Տիրոջը,

փա՛ռք և զորություն տվեք Տիրոջը.

²⁹ Տիրո՛ջը տվեք իր անվան փառքը,

ընծանե՛ր բերեք ու մատուցե՛ք նրա առաջ,

երկրպագե՛ք Տիրոջը նրա սուրբ սրահում։

³⁰ Թող ամբողջ երկիրը վախենա նրանից,

թող երկիրը հաստատուն մնա և չսասանվի։

³¹ Երկինքը թող ուրախ լինի, և երկիրը ցնծա,

թող հեթանոսներին ասեն՝ «Տերը թագավորեց»։

³² Ծովն իր պարունակությամբ թող որոտա,

ծառերն անտառի և դրա մեջ եղած ամեն ինչ։

³³ Այնժամ ուրախ կլինեն բոլոր ծառերն անտառի,

քանզի Տերը եկել է՝ դատելու երկիրը։

³⁴ Գոհությո՛ւն մատուցեք Տիրոջը, քանզի բարի է նա,

և հավերժ է նրա ողորմածությունը։

³⁵ Եվ աղաղակե՛ք. «Փրկի՛ր մեզ, ո՜վ մեր փրկության Աստված,

փրկի՛ր մեզ մեր թշնամիներից,

որ օրհնենք քո սուրբ անունը

և պարծենանք քո օրհնություններով։

³⁶ Օրհնյա՜լ լինի Տերը՝ Իսրայելի Աստվածը, հավիտյանս հավիտենից»։

Ողջ ժողովուրդն ասաց՝ Ամեն։ Եվ նրանք օրհնաբանեցին Տիրոջը։

Պաշտամունք Երուսաղեմում և Գաբավոնում

³⁷ Դավիթն այնտեղ՝ Տիրոջ Ուխտի տապանակի առջև, թողեց Ասափին ու նրա եղբայրներին, որ ամենօրյա ծառայությունը շարունակ կատարեն տապանակի առջև։ ³⁸ Աբդոդոմն ու նրա եղբայրները վաթսունութ հոգի էին։ Իդիթովնի որդի Աբդոդոմը և Օսեեն դռնապաններ էին։ ³⁹ Սադովկ քահանային ու նրա քահանա եղբայրներին նա թողեց Տիրոջ վրանի առջև՝ Գաբավոնում գտնվող Բամայում, ⁴⁰ որպեսզի մշտապես՝ առավոտ և երեկո, Տիրոջը ողջակեզներ մատուցեն ողջակեզների զոհասեղանի վրա այն ամենի համաձայն, ինչ գրված է Տիրոջ օրենքում և Աստծու ծառա Մովսեսի միջոցով պատվիրվեց իսրայելացիներին։ ⁴¹ Սադովկի հետ էին Եմանն ու Իդիթովնը, ինչպես նաև անվանապես ընտրված մյուսները, որ օրհնեն Տիրոջը, քանզի հավիտենական է նրա ողորմածությունը։ ⁴² Նրանք ունեին շեփորներ, ծնծղաներ ու քնարներ, որ դրանցով Աստծուն փառաբանեն, իսկ Իդիթովնի որդիները դռան պահապաններն էին։

⁴³ Ամբողջ ժողովուրդը ցրվեց. ամեն մեկը գնաց իր տունը, Դավիթն էլ եկավ, որ օրհնի իր տունը։

17

Տիրոջ խոստումը Դավթին և նրա սերնդին

(Բ Թագ. 7.1-17)

¹ Երբ Դավիթը բնակվեց իր տանը, Նաթան մարգարեին ասաց. «Ահա ես բնակվում եմ մայրի փայտից կառուցված իմ տանը, իսկ Տիրոջ Ուխտի տապանակը վրանի տակ է»։ ² Նաթանն ասաց Դավթին. «Ինչ որ կա սրտումդ, արա՛, քանզի Աստված քեզ հետ է»։ ³ Եվ այդ գիշեր Տերը, խոսքն ուղղելով Նաթանին, ասաց. ⁴ «Գնա՛ և ասա՛ իմ ծառա Դավթին. “Տերն այսպես է ասում. “Դու ինձ համար բնակվելու տուն չպիտի շինես, ⁵ քանզի իսրայելացիներին Եգիպտոսից հանելուց մինչև այսօր երբեք տան մեջ չեմ բնակվել, այլ տաղավարի ու վրանի տակ եմ եղել։ ⁶ Ամենուրեք, որ իսրայելացիների հետ եմ եղել, մի՞թե Իսրայելի ցեղերից որևէ մեկին կամ նրա դատավորներին, որոնց պատվիրել էի հովվել իմ ժողովրդին, որևէ բան եմ ասել, թե՝ ինչո՞ւ ինձ համար մայրի փայտից տուն չեք շինում”։ ⁷ Արդ, հետևյա՛լն ասա իմ ծառա Դավթին. “Այսպես է ասում Ամենակալ Տերը. “Ես քեզ վերցրի արոտավայրից, ուր ոչխարների հովիվ էիր, որ Իսրայելի իմ ժողովրդին առաջնորդ լինես։ ⁸ Ուր որ գնում էիր, ամենուրեք քեզ հետ էի. ոչնչացրի քո բոլոր թշնամիներին քո առաջից ու երկրի վրա եղած մեծամեծերի անվան պես դարձրի քո անունը։ ⁹ Արդ, Իսրայելի իմ ժողովրդի համար տեղ պիտի որոշեմ, դու նրան պիտի հաստատես այնտեղ, և նա առանձին պիտի բնակվի, ոչ մի հոգս այլևս չպիտի ունենա, և ոչ մի անիրավություն նրան այլևս չպիտի ընկճի, ինչպես նախկինում էր՝ ¹⁰ այն օրերից, երբ Իսրայելի իմ ժողովրդի վրա դատավորներ էի կարգել։ Ես խոնարհեցրի քո բոլոր թշնամիներին և պիտի բազմացնեմ քեզ ու ես՝ Տերս, քեզ համար տուն պիտի կառուցեմ։ ¹¹ Եվ երբ քո օրերը լրանան, դու կննջես քո նախնիների հետ։ Քեզնից հետո քեզնից ծնված քո զավակին պիտի բարձրացնեմ և պիտի պատրաստեմ նրա թագավորությունը։ ¹² Նա ինձ համար տուն պիտի շինի, իսկ ես նրա գահը հավիտենական պիտի դարձնեմ։ ¹³ Ես նրան հայր պիտի լինեմ, իսկ նա ինձ որդի պիտի լինի։ Իմ ողորմածությունը նրանից չեմ պակասեցնելու, ինչպես մերժեցի նրանց, որ քեզնից առաջ էին։ ¹⁴ Նա հավատարիմ պիտի լինի իմ տան նկատմամբ, և նրա թագավորությունը հավիտենական պիտի լինի, նրա գահը՝ հաստատուն մինչև հավիտյան”»։ ¹⁵ Եվ Նաթանն այս բոլոր խոսքերը և այս ամբողջ տեսիլքը նույնությամբ պատմեց Դավթին։

Դավթի աղոթքը

(Բ Թագ. 7.18-29)

¹⁶ Եկավ Դավիթ արքան ու նստելով Տիրոջ առջև՝ ասաց. «Ո՞վ եմ ես, Տե՛ր, Աստվա՛ծ, և կամ ի՞նչ է իմ տունը, որ ինձ սիրեցիր հավիտյան։ ¹⁷ Կարծես այս բաները քիչ երևացին քո աչքին, Աստվա՛ծ, հիմա էլ խոսեցիր քո ծառայի տան մասին երկար ժամանակի համար, վերաբերվեցիր ինձ հետ, ինչպես երևելի մի մարդու։ Դու բարձրացրիր ինձ, Տե՛ր, Աստվա՛ծ։ ¹⁸ Ի՞նչ խոսք ավելացնի Դավիթը քեզ փառավորելու համար. ինքդ ճանաչում ես քո ծառային ¹⁹ և ըստ քո սրտի արեցիր այս ամբողջ մեծությունը, Տե՛ր։ ²⁰ Քեզ նման ոչ ոք չկա, և քեզնից բացի այլ Աստված չկա՝ դատելով այն ամենից, որ լսել ենք մեր ականջներով։ ²¹ Երկրի վրա չկա այնպիսի ազգ, ինչպիսին Իսրայելի քո ժողովուրդն է, որին Աստված առաջնորդեց՝ փրկելու որպես իր ժողովրդին, որպեսզի իր համար մեծ ու երևելի անուն ստեղծի՝ ազգեր քշելով քո ժողովրդի առջևից, որին ազատեցիր Եգիպտոսից։ ²² Քո իսրայելացի ժողովրդին հավիտենապես ժողովուրդ դարձրիր քեզ, և դու նրանց համար Աստված եղար։ ²³ Արդ, Տե՛ր, այն խոսքը, որ ասացիր քո ծառայի և նրա տան մասին, թող հաստատ լինի հավիտյան, ²⁴ որպեսզի ասեն, թե Տերը՝ Ամենակալ Տերն է Իսրայելի Աստվածը, և թող քո ծառա Դավթի տունը կանգուն մնա քո առջև։ ²⁵ Քանի որ դու, Տե՛ր, քո ծառայի ականջին հայտնեցիր, թե նրա համար տուն ես կառուցելու, դրա համար էլ քո ծառան համարձակություն գտավ քո առջև աղոթելու։ ²⁶ Արդ, Տե՛ր, դու ես Աստված, և դու ասացիր այդ բարի խոսքերը քո ծառայի մասին։ ²⁷ Սկսի՛ր այսուհետև օրհնել քո ծառայի տունը, որպեսզի հավիտյան քո առջև լինի։ Քանի որ դու օրհնեցիր, Տե՛ր, օրհնի՛ր հավիտյան»։

18

Դավթի հաղթանակները հարևան ժողովուրդների դեմ

(Բ Թագ. 8.1-18)

¹ Դրանից հետո Դավիթը հարվածեց այլազգիներին, վանեց նրանց և այլազգիների ձեռքից գրավեց Գեթն ու նրա գյուղերը։ ² Նա հարվածեց Մովաբին, և մովաբացիները դարձան Դավթի հարկատու ծառաները։ ³ Դավիթը Եմաթում հարվածեց Սուբայի արքա Ադրաազարին, երբ նա գնում էր իր իշխանությունը հաստատելու Եփրատ գետի վրա։ ⁴ Նրանից վերցրեց հազար մարտակառք, յոթ հազար ձիավոր ու քսան հազար հետևակ։ Դավիթը ջարդեց բոլոր մարտակառքերը՝ թողնելով միայն հարյուր մարտակառք։ ⁵ Ասորիները Դամասկոսից եկան, որպեսզի օգնեն Սուբայի արքա Ադրաազարին, բայց Դավիթն ասորիներից քսաներկու հազար մարդ սպանեց։ ⁶ Նա Ասորիքում՝ Դամասկոսի մոտ, բերդապահ զորք դրեց, և ասորիները Դավթի հարկատու ծառաները դարձան։ Տերը փրկեց Դավթին ամենուրեք, ուր էլ գնում էր։ ⁷ Դավիթը վերցրեց այն ոսկե մանյակները, որ Ադրաազարի թիկնապահների վրա էին, և բերեց Երուսաղեմ։ ⁸ Դավիթը Մատեբեթից և Ադրաազարի բարգավաճ քաղաքներից չափազանց շատ պղինձ վերցրեց։ Դրանով Սողոմոնը պատրաստեց պղնձե ավազանը, պղնձե սյուներն ու անոթները։

⁹ Երբ Եմաթի արքա Թովուն լսեց, որ Դավիթը հարվածել է Սուբայի արքա Ադրաազարի ամբողջ զորքին, ¹⁰ իր որդի Ադուրամին ուղարկեց Դավիթ արքայի մոտ՝ նրանից խաղաղություն խնդրելու և շնորհավորելու նրան, քանի որ պատերազմել էր Ադրաազարի դեմ և հաղթել նրան, որովհետև Թովուն թշնամի էր Ադրաազարին։ Նա իր որդու միջոցով ուղարկեց նաև ամեն տեսակ ոսկե ու արծաթե անոթներ։ ¹¹ Դավիթը բոլոր ազգերից՝ եդովմացիներից, մովաբացիներից, ամովնացիներից, այլազգիներից և ամաղեկացիներից գրաված արծաթի ու ոսկու հետ դրանք ևս նվիրեց Տիրոջը։

¹² Շարուհիի որդի Աբեսսան Ալոնի հովտում հարվածեց տասնութ հազար եդովմացիների։ ¹³ Նա հովտում բերդապահ զորք դրեց, և եդովմացիները Դավթի ծառաները դարձան։ Տերը փրկեց Դավթին ամենուրեք, ուր էլ գնում էր։

¹⁴ Դավիթը թագավորեց ամբողջ Իսրայելի վրա, և իրավունք ու արդարություն էր գործադրում իր ամբողջ ժողովրդի հանդեպ։ ¹⁵ Շարուհիի որդի Հովաբը զորքի հրամանատար էր, Աքիլուդի որդի Հովսափատը՝ դիվանապետ, ¹⁶ Աքիտովբի որդի Սադովկը և Աբիաթարի որդի Աբիմելեքը՝ քահանաներ, Սուսան՝ գլխավոր քարտուղար, ¹⁷ Հովիդայեի որդի Բանեասը՝ քերեթիների ու փելեթիների վերակացու, իսկ Դավթի որդիները՝ արքայի առաջին փոխանորդները։

19

Դավթի անարգված նախարարները

(Բ Թագ. 10.1-5)

¹ Դրանից հետո մեռավ ամովնացիների Նաաս արքան, և նրա փոխարեն թագավորեց նրա որդին՝ Անանը։ ² Դավիթն ասաց. «Բարի լինենք Նաասի որդի Անանի նկատմամբ, ինչպես որ նրա հայրն իմ նկատմամբ բարի եղավ»։ Եվ Դավիթը դեսպաններ ուղարկեց, որ մխիթարեն նրան հոր համար։ Դավթի ծառաները եկան ամովնացիների երկիրը, որ մխիթարեն Անանին։ ³ Ամովնի իշխաններն ասացին Անանին. «Քո հոր հիշատակը մեծարելո՞ւ համար է Դավիթը մխիթարողներ ուղարկել քեզ մոտ. չէ՞ որ նրա ծառաները քեզ մոտ են եկել, որ հետախուզեն քաղաքները և ծանոթանան երկրին»։ ⁴ Եվ Անանը բռնեց Դավթի ծառաներին, ածիլեց նրանց, նրանց պատմուճանները պատռեց մեջտեղից մինչև վեր ու արձակեց նրանց։ ⁵ Եկան ու Դավթին պատմեցին այդ մասին։ Նա մարդ ուղարկեց, որ դիմավորեն նրանց, և քանի որ նրանք խիստ անարգված էին, արքան ասաց. «Մնացե՛ք Երիքովում, մինչև որ ձեր մորուքներն աճեն, ապա կվերադառնաք»։

Պատերազմ ամովնացիների և ասորիների դեմ

⁶ Երբ Անանը և ամովնացիները տեսան, որ ատելի են դարձել Դավթին և նրա ժողովրդին, հազար տաղանդ արծաթ ուղարկեցին և իրենց համար Վերին Միջագետքի Մաաքայից և Սուբայի ասորիներից մարտակառքեր ու հեծյալներ վարձեցին։ ⁷ Նրանք վարձեցին երեսուներկու հազար մարտակառք, ինչպես նաև Մաաքայի զորքը, նրա արքայի ղեկավարությամբ, որ եկան և բանակ դրեցին Մեդաբայի դիմաց։ Ամովնացիներն էլ հավաքվեցին իրենց քաղաքներից ու եկան պատերազմելու։ ⁸ Երբ Դավիթը լսեց, ուղարկեց Հովաբին ու քաջերի գունդը։ ⁹ Ամովնացիները դուրս եկան և պատերազմի ճակատ կազմեցին քաղաքի դարպասի մոտ, իսկ այն եկած թագավորները դաշտում առանձին բանակեցին։ ¹⁰ Երբ Հովաբը տեսավ, որ նրանք պատերազմի են դուրս եկել իր դեմ թե՛ առջևից, թե՛ հետևից, ընտրեց բոլոր երիտասարդ իսրայելացիներին և նրանց դասավորեց ասորիների դիմաց, ¹¹ իսկ զորքի մնացած մասը հանձնեց իր եղբայր Աբեսսային և շարեց ամովնացիների դիմաց։ ¹² Նա ասաց. «Եթե ասորիները մեր նկատմամբ գերակշռություն ունենան, դու մեզ օգնության կհասնես, իսկ եթե ամովնացիները քո նկատմամբ գերակշռություն ունենան, օգնության կհասնեմ քեզ։ ¹³ Քաջասի՛րտ եղիր և թող զորանանք հանուն մեր ժողովրդի և մեր Աստծու քաղաքների։ Տերը թող անի այն, ինչ նրա աչքին բարի է թվում»։ ¹⁴ Հովաբն իր հետ եղած զորքով ասորիների դեմ պատերազմի ելավ, և նրանք փախուստի դիմեցին նրանից։ ¹⁵ Երբ ամովնացիները տեսան, որ ասորիները փախան, իրենք ևս փախուստի դիմեցին Հովաբի և նրա եղբայր Աբեսսայի առջևից ու մտան քաղաք։ Հովաբը եկավ Երուսաղեմ։

¹⁶ Երբ ասորիները տեսան, որ իսրայելացիները հաղթեցին իրենց, պատգամավորներ ուղարկեցին և պատերազմի հանեցին Եփրատ գետի այն կողմի ասորիներին։ Ադրաազարի զորքի հրամանատար Սովփաքն էր նրանց առաջնորդում։ ¹⁷ Երբ Դավթին պատմեցին այդ մասին, նա հավաքեց բոլոր իսրայելացիներին, անցավ Հորդանան գետը, եկավ նրանց վրա և ճակատ կազմեց նրանց դեմ։ Նա իր զորքը շարեց ասորիների դիմաց, և նրանք պատերազմեցին նրա դեմ։ ¹⁸ Ասորիները փախան Դավթի առջևից։ Դավիթն ասորիներից յոթ հազար մարտակառքի հեծյալներ ու քառասուն հազար հետևակ կոտորեց և սպանեց զորքի հրամանատար Սովփաքին։ ¹⁹ Երբ Ադրաազարի ծառաները տեսան, որ պարտվեցին Իսրայելից, Դավթի հետ հաշտություն կնքեցին և նրա իշխանության տակ մտան։ Ասորիներն այլևս չփորձեցին օգնել ամովնացիներին։

20

Դավիթը գրավում է Ռաբաթը

(Բ Թագ. 12.26-31)

¹ Հաջորդ տարի, երբ թագավորները պատերազմի են ելնում, Հովաբը հավաքեց բոլոր զորագնդերը և ասպատակեց ամովնացիների ամբողջ երկիրը։ Նա եկավ և պաշարեց Ռաբաթը, իսկ Դավիթը մնաց Երուսաղեմում։ ² Հովաբը գրավեց Ռաբաթը և կործանեց այն։ Դավիթը նրանց Մեղքոմ թագավորի գլխից վերցրեց թագը։ Պարզվեց, որ դրա ոսկին մի տաղանդ քաշ ունի. նրա վրա թանկարժեք քարեր կային։ Այն դրեցին Դավթի գլխին։ Նա նաև չափազանց շատ ավար վերցրեց։ ³ Ապա դուրս հանեց այնտեղի ժողովրդին և նրանց դրեց սղոցի ու երկաթե կացինի աշխատանքների։ Դավիթն այսպես վարվեց ամովնացիների բոլոր քաղաքների հետ և իր ամբողջ զորքով վերադարձավ Երուսաղեմ։

Պատերազմ այլազգիների դեմ

(Բ Թագ. 21.15-22)

⁴ Դրանից հետո Գազերում կրկին պատերազմ եղավ այլազգիների դեմ։ Այն ժամանակ ուսթացի Սուբաքեն սպանեց հսկաների որդիներից Սեպփիային և ընկճեց նրանց։ ⁵ Դարձյալ պատերազմ եղավ այլազգիների դեմ, և Հայիրի որդի Եղեանան սպանեց գեթացի Գողիադի եղբայր Ղեեմիին, որի նիզակի փայտը ոստայնանկների գլանի չափ էր։ ⁶ Դարձյալ պատերազմ եղավ Գեթում։ Այնտեղ կար չափազանց մեծ մի մարդ, որը յուրաքանչյուր ձեռքին և ոտքին վեցական մատ ուներ, այսինքն՝ քսանչորս մատ։ Նա հսկաների ցեղից էր։ ⁷ Նա ծաղրում էր Իսրայելին, բայց Դավթի եղբորորդի Հովնադաբը՝ Սամաայի որդին, սպանեց նրան։ ⁸ Նրանք ծնվել էին Հռափայից Գեթ քաղաքում։ Բոլորն էլ հսկա մարդիկ էին և ընկան Դավթի ու նրա զորականների ձեռքով։

21

Դավթի մեղքը՝ մարդահամար անցկացնելը

(Բ Թագ. 24.1-9)

¹ Սատանան կանգնեց Իսրայելի դեմ ու դրդեց Դավթին մարդահամարի ենթարկելու Իսրայելը։ ² Դավիթն ասաց Հովաբին և իր զորքի հրամանատարներին. «Գնացեք հաշվառմա՛ն ենթարկեք Իսրայելին Բերսաբեեից մինչև Դան և տվյալնե՛ր բերեք ինձ, որ գիտենամ նրանց թիվը»։ ³ Հովաբն ասաց. «Տերը հարյուրապատիկ թող ավելացնի իր ժողովրդին, ու իմ տիրոջ աչքը տեսնի, որ բոլորը ծառայում են իմ տիրոջը։ Ինչո՞ւ է իմ տերն այս բանը պահանջում, ինչո՞ւ Իսրայելը մեղքի մեջ ընկնի»։ ⁴ Սակայն երբ արքան իր ասածը պարտադրեց Հովաբին, նա ելավ, անցավ Իսրայելի բոլոր շրջաններով ու եկավ Երուսաղեմ։ ⁵ Հովաբը Իսրայելի ժողովրդի մարդահամարի տվյալները հանձնեց Դավթին։ Ամբողջ Իսրայելում սուր գործածելու ունակ մեկ միլիոն հարյուր հազար մարդ կար, իսկ Հուդայում՝ չորս հարյուր հիսուն հազար մարդ։ ⁶ Ղևիի ու Բենիամինի ցեղերին նրանց մեջ չհաշվառեց, քանի որ արքայի հրամանը տհաճ էր Հովաբի համար։

Աստված պատժում է ժողովրդին

(Բ Թագ. 24.10-17)

⁷ Այս ամբողջ կատարվածը չար երևաց Տիրոջ աչքին, և նա հարվածեց Իսրայելին։ ⁸ Դավիթն ասաց Աստծուն. «Շատ մեղանչեցի՝ այս բաներն անելով, ուստի ների՛ր քո ծառայի չար արարքը, քանզի շատ հիմարացա»։ ⁹ Տերը, խոսելով Դավթի տեսանող Գադի հետ, ասաց. ¹⁰ «Գնա՛, խոսի՛ր Դավթի հետ և ասա՛. “Այսպես է ասում Տերը. “Երեք բան եմ դնում քո առջև, դրանցից մեկն ընտրի՛ր, և այն քեզ կանեմ”»։ ¹¹ Գադը եկավ Դավթի մոտ և ասաց նրան. «Այսպես է ասում Տերը. “Ընտրությո՛ւն կատարիր. ¹² կա՛մ երեք տարի սով կլինի, կա՛մ երեք ամիս հալածական կլինես քո թշնամիներից, և քո թշնամիների սուրը քեզ կսպանի, և կա՛մ երեք օր Տիրոջ սուրը մահ կսփռի քո երկրում, ու Տիրոջ հրեշտակը կոտորած կանի Իսրայելի ամբողջ տարածքում։ Արդ, տե՛ս, թե ես ի՛նչ պատասխան եմ տալու նրան, որ ինձ ուղարկել է”»։ ¹³ Դավիթն ասաց Գադին. «Այս երեքն էլ ինձ համար չափազանց դժվար են, բայց ավելի լավ է ես Տիրոջ ձեռքն ընկնեմ, որովհետև շատ մեծ է նրա ողորմածությունը, քան ընկնեմ մարդկանց ձեռքը»։ ¹⁴ Տերը մահ սփռեց Իսրայելում, և իսրայելացիներից յոթանասուն հազար մարդ մեռավ։ ¹⁵ Աստված հրեշտակին առաքեց Երուսաղեմ, որ ոչնչացնի այն։ Հազիվ էր նա սկսել կոտորածը, որ Տերը տեսավ ու զղջաց չարիքի համար։ Նա ասաց ոչնչացնող հրեշտակին. «Բավական է, հե՛տ քաշիր ձեռքդ»։ Այդ պահին Տիրոջ հրեշտակը գտնվում էր հեբուսացի Ոռնայի կալի մոտ։ ¹⁶ Դավիթն աչքերը բարձրացրեց ու տեսավ Տիրոջ հրեշտակին, որ կանգնած էր երկնքի ու երկրի միջև և ձեռքի մերկացրած սուրը մեկնել էր Երուսաղեմի վրա։ Դավիթն ու ծերունիները, քուրձ հագած, երեսնիվայր գետնին ընկան։ ¹⁷ Դավիթն ասաց Աստծուն. «Չէ՞ որ ես եմ հրամայել մարդահամար անել, ես եմ մեղանչել, ես եմ չարիք գործել, այս անմեղ հոտն ի՞նչ է արել։ Տե՛ր, Աստված, թող քո ձեռքն իմ և իմ հոր տան դեմ լինի և ոչ թե քո ժողովրդի դեմ՝ կոտորելու նրան, Տե՜ր»։

Դավիթը զոհասեղան է կանգնեցնում

(Բ Թագ. 24.18-25)

¹⁸ Տիրոջ հրեշտակն ասաց Գադ մարգարեին. «Ասա՛ Դավթին, որ ելնի ու Տիրոջ համար զոհասեղան կանգնեցնի հեբուսացի Ոռնայի կալում»։ ¹⁹ Եվ Դավիթը գնաց Գադի խոսքի համաձայն, որ ասել էր Տիրոջ անունով։ ²⁰ Ոռնան շրջվեց և տեսավ արքային. նա և նրա չորս որդիները, որ նրա հետ էին, թաքնվեցին։ Այդ ժամանակ Ոռնան կալում ցորեն էր կալսում։ ²¹ Երբ Դավիթը եկավ Ոռնայի մոտ, Ոռնան կալից դուրս ելավ ու երեսնիվայր գետնին ընկավ և երկրպագեց Դավթին։ ²² Դավիթն ասաց Ոռնային. «Քո այդ կալատեղն ի՛նձ տուր, որ ես այնտեղ Տիրոջ համար զոհասեղան շինեմ, որպեսզի ժողովրդի կոտորածը դադարի։ Ինչքան արծաթ արժե, այդքանով դա տո՛ւր ինձ»։ ²³ Ոռնան ասաց Դավթին. «Քե՛զ վերցրու այն, և իմ արքան թող անի այն, ինչ իրեն հաճելի է թվում։ Ահա իմ եզներն էլ տալիս եմ ողջակեզի համար, սայլերը՝ կրակի փայտի և ցորենը՝ անարյուն զոհաբերության համար։ Ամեն ինչ տալիս եմ քեզ»։ ²⁴ Դավիթ արքան ասաց Ոռնային. «Այդպես չէ. պետք է այն գնեմ այնքան արծաթով, ինչքան արժե։ Ես չեմ առնի այն, ինչ քոնն է, որպեսզի Տիրոջը ձրի ողջակեզ մատուցեմ»։ ²⁵ Եվ Դավիթն այդ տեղի համար կշռով վեց հարյուր սիկղ արծաթ տվեց Ոռնային։ ²⁶ Դավիթը Տիրոջ համար զոհասեղան շինեց այնտեղ, ողջակեզներ և խաղաղության զոհեր մատուցեց։ Նա Տիրոջը կանչեց, և Տերը լսեց ու պատասխան տվեց նրան՝ երկնքից ողջակեզի զոհասեղանին կրակ իջեցնելով և ողջակեզներն այրելով։ ²⁷ Տերն ասաց հրեշտակին. «Քո սուրը պատյա՛նը դիր»։ ²⁸ Երբ Դավիթը տեսավ, որ Տերը լսեց ու պատասխանեց նրան հեբուսացի Ոռնայի կալում, այնտեղ զոհեր մատուցեց. ²⁹ Տիրոջ խորանը, որ Մովսեսը պատրաստել էր անապատում, և ողջակեզների զոհասեղանը այն ժամանակ գտնվում էին Գաբավոնի Բամայում, ³⁰ և Դավիթը չէր կարող գնալ նրա առաջ Աստծուն հարցում անելու համար, որովհետև վախենում էր Տիրոջ հրեշտակի սրից։

22

¹ Դավիթն ասաց. «Այս է Տիրոջ՝ Աստծու տունը, և այս է ողջակեզների զոհասեղանը Իսրայելի համար»։

Տաճարի շինության պատրաստություններ

² Դավիթը հրամայեց հավաքել Իսրայելի երկրում բնակվող բոլոր եկվորներին և նրանց քարհատներ նշանակեց, որ քարեր հատեն ու շինեն Աստծու տունը։ ³ Դավիթը շատ երկաթ հավաքեց դռների ու դարպասների բևեռների և ծխնիների համար, ինչպես նաև չափազանց շատ պղինձ, որի կշիռը հաշիվ չուներ, ⁴ մայրի փայտեր, որոնց թիվ ու սահման չկար, քանի որ սիդովնացիներն ու տյուրոսցիները առատորեն մայրի փայտ էին բերում Դավթին։

⁵ Դավիթն ասաց. «Սողոմոն որդիս փոքր մանուկ է, իսկ տունը, որ պետք է կառուցվի Տիրոջ համար, պետք է լինի մեծ և հռչակավոր, ամբողջ աշխարհում փառավոր. շինանյութ պիտի պատրաստեմ դրա համար»։ Դավիթն իր մահվանից առաջ մեծ պատրաստություն տեսավ։ ⁶ Նա կանչեց իր որդի Սողոմոնին և պատվիրեց նրան Տիրոջ՝ Իսրայելի Աստծու անունով տուն շինել։ ⁷ Դավիթն ասաց Սողոմոնին. «Որդյա՛կ իմ, մտքումս կար Տիրոջ՝ Աստծու անունով տուն շինել, ⁸ բայց Աստծու խոսքն ինձ հասավ, թե՝ “Շատ արյուն ես թափել և մեծամեծ պատերազմներ ես մղել, ուստի դու իմ անվան տուն չես շինելու, քանի որ շատ արյուն ես թափել երկրի վրա իմ առաջ։ ⁹ Ահա դու մի որդի կունենաս, որը հանգիստ մարդ կլինի։ Ես նրան հանգստություն եմ տալու շրջակա բոլոր թշնամիներից, նրա անունը Սողոմոն կլինի, և ես խաղաղություն ու հանգստություն եմ տալու Իսրայելին նրա օրերում։ ¹⁰ Նա է իմ անունով տուն կառուցելու։ Նա ինձ որդի է լինելու, ես նրան՝ հայր, և նրա թագավորության աթոռը Երուսաղեմում հաստատելու եմ հավիտյան”։ ¹¹ Արդ, որդյա՛կ իմ, Տերը քեզ հետ թող լինի ու հաջողություն տա քեզ, որ շինես Տիրոջ՝ քո Աստծու տունը, ինչպես որ նա ասել է քո մասին։ ¹² Թող Տերը քեզ հանճար և իմաստնություն տա ու զորացնի քեզ Իսրայելի վրա, որ պահպանես ու գործադրես Տիրոջ՝ քո Աստծու օրենքները։ ¹³ Դու հաջողություն կունենաս, եթե պահպանես այն պատվիրաններն ու օրենքները, որ Տերը Մովսեսին պատգամել էր Իսրայելի համար։ Քա՛ջ եղիր ու հզորացի՛ր, մի՛ վախեցիր ու մի՛ զարհուրիր։ ¹⁴ Ահա ես իմ աղքատության մեջ Տիրոջ տան համար պատրաստել եմ հարյուր հազար տաղանդ ոսկի, մեկ միլիոն տաղանդ արծաթ, իսկ պղնձին ու երկաթին թիվ չկա, որովհետև չափազանց շատ են։ Հավաքել եմ նաև փայտ ու քար, ¹⁵ բայց դո՛ւ էլ ավելացրու եղածներին։ Քեզ հետ ունես նաև բազմաթիվ գործավորներ՝ արհեստավորներ, որմնադիրներ, հյուսներ և ամեն տեսակ գործի մեջ հմուտ մարդիկ։ ¹⁶ Անհաշիվ ոսկի, արծաթ, պղինձ ու երկաթ կա. արդ, վե՛ր կաց ու գործի՛ր, քանի որ Տերը քեզ հետ է»։

¹⁷ Դավիթը Իսրայելի բոլոր իշխաններին պատվիրեց օգնել իր որդի Սողոմոնին՝ ասելով. ¹⁸ «Չէ՞ որ Տերը ձեզ հետ է և ձեզ հանգիստ է տվել ամեն կողմից, քանզի նա ձեր ձեռքն է հանձնել այս երկրի բնակիչներին, և այս երկիրը հնազանդվել է Տիրոջն ու նրա ժողովրդին։ ¹⁹ Արդ, ձեր սրտերն ու հոգիները թող փնտրեն Տիրոջը՝ մեր Աստծուն. ելե՛ք և շինե՛ք Տիրոջ՝ մեր Աստծու սրբարանը, որպեսզի Տիրոջ Ուխտի տապանակը և Աստծու սուրբ սպասքը տանեք այն տունը, որ կառուցելու եք Տիրոջ անունով»։

23

Ղևտացիների խմբերի դասակարգումը

¹ Դավիթը տարիքն առել, ծերացել էր, ուստի նրա փոխարեն Իսրայելի վրա թագավորեց իր որդի Սողոմոնը։ ² Դավիթը հավաքեց Իսրայելի բոլոր իշխաններին, քահանաներին և ղևտացիներին։

³ Հաշվառման ենթարկվեցին երեսուն տարեկանից բարձր տարիք ունեցող ղևտացիները, և նրանց թիվը եղավ երեսունութ հազար։ ⁴ Նրանցից քսանչորս հազարը Տիրոջ տան գործերի վերակացուներ էին, վեց հազարը՝ դպիրներ և դատավորներ, ⁵ չորս հազարը՝ դռնապաններ և չորս հազարը՝ Տիրոջն օրհնելու համար պատրաստված նվագարաններ ունեցող օրհներգուներ։ ⁶ Դավիթը նրանց ամենօրյա պաշտամունքի խմբերի բաժանեց՝ ըստ Ղևիի որդիների՝ Գեթսոնի, Կահաթի ու Մերարիի։

⁷ Գեթսոնի որդիներն էին Ելեադանն ու Սեմեին։ ⁸ Ելեադանի որդիներն էին իշխան Եթոմն ու Հովելը։ ⁹ Սեմեիի որդիներն էին Սալովմիթը, Ազիելն ու Արանը՝ երեք հոգի։ Սրանք Ելեադանի տոհմերի իշխաններ էին։ ¹⁰ Սեմեիի որդիներն էին նաև Հեթը, Զիզան, Հովասն ու Բերիան։ Սրանք Սեմեիի որդիներն էին՝ չորս հոգի։ ¹¹ Հեթը գլխավորն էր, իսկ Զիզան՝ երկրորդը։ Հովասն ու Բերիան շատ որդիներ չունեցան և մարդահամարի մեջ գրանցվեցին որպես մեկ տոհմ։

¹² Կահաթի որդիներն էին Ամրամը, Իսահառը, Քեբրոնն ու Ոզիելը՝ չորս հոգի։ ¹³ Ամրամի որդիներն էին Ահարոնն ու Մովսեսը։ Ահարոնն առանձնացվեց, որպեսզի ինքը և իր որդիները հավիտյան Սրբություն սրբոցում Տիրոջ առջև խունկ ծխեն, պաշտամունք մատուցեն նրան և նրա անունով աղոթեն մշտապես։ ¹⁴ Իսկ Մովսեսը՝ Աստծու մարդը, և նրա որդիները հաշվառվեցին Ղևիի ցեղի մեջ։ ¹⁵ Մովսեսի որդիներն էին Գերսամն ու Եղիազարը։ ¹⁶ Գերսամի որդին էր իշխան Սուբայելը։ ¹⁷ Եղիազարի որդին էր իշխան Ռաբիան։ Եղիազարն ուրիշ որդի չունեցավ, բայց Ռաբիան շատ որդիներ ունեցավ։ ¹⁸ Իսահառի որդիներն էին իշխաններ Սավուղն ու Մովեն։ ¹⁹ Քեբրոնի որդիներն էին Հերիան՝ գլխավորը, Ամարիան՝ երկրորդը, Ոզիելը՝ երրորդը, և Հեկեմիան՝ չորրորդը։ ²⁰ Ոզիելի որդիներն էին Միքիան՝ գլխավորը, և Հեսիան՝ երկրորդը։

²¹ Մերարիի որդիներն էին Մոողին ու Մուսին։ Մոողիի որդիներն էին Եղիազարն ու Կիսը։ ²² Եղիազարը մեռավ՝ չունենալով որդիներ։ Նա միայն դուստրեր ուներ, որոնց հետ ամուսնացան Կիսի որդիները՝ նրանց զարմիկները։ ²³ Մուսիի որդիներն էին Մողին, Եդերն ու Արիմովթը՝ երեք հոգի։

²⁴ Սրանք են Ղևիի քսան տարեկան և ավելի բարձր տարիք ունեցող որդիները՝ ըստ իրենց ազգատոհմերի, իրենց տոհմերի իշխանները՝ համաձայն իրենց մարդահամարի, անունների թվի և անձերի, որոնք սպասավորության գործն էին կատարում Տիրոջ տանը։ ²⁵ Դավիթն ասել էր, որ Տերը՝ Աստված, հանգստություն է տվել Իսրայելի իր ժողովրդին և բնակեցրել Իսրայելում հավիտյան։ ²⁶ Ուստի ղևտացիները այլևս չէին կրելու խորանն ու սպասավորության նրա բոլոր անոթները։ ²⁷ Դավթի վերջին հրամաններից էր Ղևիի քսան տարեկան և ավելի բարձր տարիք ունեցող որդիների հաշվառումը։ ²⁸ Դավիթը նրանց նշանակեց Ահարոնի որդիների օգնականներ, որպեսզի սպասավորեն Տիրոջ տանը և հոգան բակերի, սրահների, բոլոր սրբությունների մաքրությունը և Տիրոջ տան սպասավորության գործերը, ²⁹ առաջավորության հացի, անարյուն զոհաբերության նաշիհի, անթթխմոր բլիթների, տապակում եփվածի, յուղով հունցվածի և չափերի ու քանակների մասին։ ³⁰ Նաև ամեն առավոտ վեր կենալով օրհնեն ու փառավորեն Տիրոջը և նույն բանը կատարեն երեկոյան։ ³¹ Շաբաթ օրերին, ամսագլուխներին և տոներին Տիրոջը մատուցեն բոլոր ողջակեզները, ըստ նշված քանակի ու իրենց տրված հրամանի՝ մշտապես լինելով Տիրոջ առջև։ ³² Նրանք պետք է պահպանեին Վկայության խորանը և օգնեին իրենց եղբայրներին՝ Ահարոնի որդիներին, Տիրոջ տանը սպասավորություն անելիս։

24

Քահանաների դասը

¹ Ահարոնի որդիների դասակարգումը։ Ահարոնի որդիներն են Նադաբը, Աբիուդը, Եղիազարն ու Իթամարը։ ² Նադաբն ու Աբիուդը իրենց հորից շուտ մեռան և որդիներ չունեին, ուստի Ահարոնի որդիներ Եղիազարն ու Իթամարը քահանա դարձան։ ³ Դավիթը խմբերի բաժանեց նրանց. Եղիազարի որդիներից՝ Սադովկին և Իթամարի որդիներից՝ Աքիմելեքին, ըստ իրենց թվահամարի, պաշտոնի ու ազգատոհմերի։ ⁴ Եղիազարի որդիների մեջ գտնվեցին ավելի շատ զորավոր իշխաններ, քան Իթամարի որդիների մեջ։ Ուստի Եղիազարի որդիներին բաժանեց տասնվեց ազգատոհմերի իշխանների, իսկ Իթամարի որդիներին՝ ութ ազգատոհմերի։ ⁵ Նրանց բաժանեց ըստ միանման վիճակահանության, քանի որ սրբությունների վերակացուներ և Տիրոջ տան առաջնորդներ կային թե՛ Եղիազարի որդիների մեջ և թե՛ Իթամարի որդիների մեջ։ ⁶ Ղևտացիներից Նաթանայելի որդի Սամեաս գրագիրը նրանց գրանցեց արքայի, իշխանների, Սադովկ քահանայի և Աբիաթարի որդի Աքիմելեքի և ղևտական ու քահանայական ընտանիքների իշխանների ներկայությամբ։ Վիճակ էին հանում մեկ Եղիազարի երկու տոհմերի համար, և Իթամարի մեկ տոհմի համար։

⁷ Առաջին վիճակն ընկավ Հարիբին, երկրորդը՝ Հադինային, ⁸ երրորդը՝ Քարեմին, չորրորդը՝ Սեովրինին, ⁹ հինգերորդը՝ Մեղքիային, վեցերորդը՝ Մերիային, ¹⁰ յոթերորդը՝ Ակկուսին, ութերորդը՝ Աբիային, ¹¹ իններորդը՝ Հեսուին, տասներորդը՝ Սեքենիային, ¹² տասնմեկերորդը՝ Ելիասիբին, տասներկուերորդը՝ Սաղակիմին, ¹³ տասներեքերորդը՝ Ոփփային, տասնչորսերորդը՝ Իզբայելին, ¹⁴ տասնհինգերորդը՝ Բելգային, տասնվեցերորդը՝ Եմմերին, ¹⁵ տասնյոթերորդը՝ Եզիրին, տասնութերորդը՝ Ափեսեին, ¹⁶ տասնիններորդը՝ Ոփեթիային, քսաներորդը՝ Եզեկիելին, ¹⁷ քսանմեկերորդը՝ Հաքինին, քսաներկուերորդը՝ Գամուելին, ¹⁸ քսաներեքերորդը՝ Դալայիային և քսանչորսերորդը՝ Մոզիային։ ¹⁹ Այս է նրանց դասակարգումը՝ համաձայն իրենց սպասավորության, որպեսզի Տիրոջ տունը մտնեն՝ ըստ իրենց իրավունքի, որ հաստատել էր իրենց նախահայր Ահարոնը, ինչպես որ պատվիրել էր Տերը՝ Իսրայելի Աստվածը։

Ղևտացիների լրացուցիչ ցանկը

²⁰ Ղևիի ազգատոհմի մնացած որդիներն էին. Ամրամի որդիներից՝ Սուբայել, Հուդայիա, Աբադիա։ ²¹ Աբիայի որդիներից՝ իշխան Հեսիա, ²² Սարայիսի որդիներից՝ Ալամովթ, Սալովնի որդիներից՝ Հանաթ, ²³ Քեդրոնի որդիներից՝ առաջինը՝ Հեդիու, երկրորդը՝ Ամասիա, երրորդը՝ Հեզիել, չորրորդը՝ Հեկիմա։ ²⁴ Ոզիելի որդիներից՝ առաջինը՝ Միքիա, երկրորդը՝ Հուսա, Միքայի որդին՝ Սամեր, ²⁵ և Միքայի եղբայրը՝ Հեսիե, Հեսիեի որդին՝ Զաքարիա։

²⁶ Մերարիի որդիները՝ Մոողի ու Մուսի, և նրա որդին՝ Ոզիա, նրա որդին՝ ²⁷ Բոնիա, Մերարիի որդիները՝ Զակքուր ու Օբդիա, ²⁸ Մոողի որդին՝ Եղիազար, նրա որդին՝ Կիս, ²⁹ Կիսի որդին՝ Իսմայել։ ³⁰ Մուսիի որդիները՝ Մոողի, Հեդեր ու Հերիմովթ։ Սրանք ղևտացիների որդիներն են ըստ իրենց ազգատոհմերի։ ³¹ Նրանք ևս՝ թե՛ առաջնորդները և թե՛ կրտսերագույնները, իրենց եղբայրների՝ Ահարոնի որդիների նման վիճակ գցեցին Դավիթ արքայի, Սադովկի, Աքիմելեքի և քահանայական ու ղևտական ընտանիքների իշխանների ներկայությամբ։

25

Տաճարի երաժիշտները

¹ Դավիթ արքան և զորքի հրամանատարները ծառայության համար նշանակեցին Ասափի, Եմանի ու Իդիթումի որդիներին, որոնք երգում էին տավիղների, քնարների ու ծնծղաների նվագակցությամբ։ Եվ այս գործը կատարողներն ըստ իրենց պաշտոնի էին.

² Ասափի որդիները՝ Զակքուր, Հովսեփ, Նաթանիա և Հեսիել։ Ասափի որդիները գործում էին թագավորի հրահանգով։

³ Իդիթումի որդիները՝ Գոդողիա, Եզրի, Եսայի, Սեմեի, Ասաբիա և Մատաթիա։ Այս վեցն իրենց հայր Իդիթումի հետ քնարի նվագակցությամբ գոհություն և փառաբանություն էին մատուցում Տիրոջը։

⁴ Եմանի որդիներն էին՝ Բոկքիա, Մատթանիա, Ոզիել, Սուբայել, Հերիմովթ, Անանիա, Անանի, Ելիաթա, Գեդդելթի, Ռովմեթիեզեր, Եզբակատան, Մելեթի, Հովթիրի և Մազիովթ։ ⁵ Սրանք բոլորը արքայի երաժիշտ Եմանի որդիներն էին, որին Աստված խոստացել էր փառավորել՝ Եմանին տալով տասնհինգ որդի և երեք դուստր։ ⁶ Նրանք բոլորն իրենց հոր հետ օրհներգեր էին երգում Տիրոջ տանը ծնծղաների, տավիղների ու քնարների նվագակցությամբ արքայի, Ասափի, Իդիթումի ու Եմանի մոտ։ ⁷ Նրանք և նրանց եղբայրները, որոնք ուսանել էին Տիրոջն օրհներգել՝ բոլորն էլ հմուտ մարդիկ, երկու հարյուր ութսունութ հոգի էին։

⁸ Ամենօրյա սպասավորությունը հաստատվեց վիճակով. տարբերություն չդրվեց փոքրի ու մեծի, փորձառուի և սկսնակի միջև։ ⁹ Նախ վիճակով հաստատվեց Ասափի, նրա որդիներին ու եղբայրների ծառայության կարգը. առաջինը՝ Հովսեփին, երկրորդը՝ Գոդողիային, իր որդիներին ու եղբայրներին՝ տասներկու հոգի, ¹⁰ երրորդը՝ Զակքուրին, իր որդիներին ու եղբայրներին՝ տասներկու հոգի, ¹¹ չորրորդը՝ Եզրիին, իր որդիներին ու եղբայրներին՝ տասներկու հոգի, ¹² հինգերորդը՝ Նաթանիային, իր որդիներին ու եղբայրներին՝ տասներկու հոգի, ¹³ վեցերորդը՝ Բոկքիային, իր որդիներին ու եղբայրներին՝ տասներկու հոգի, ¹⁴ յոթերորդը՝ Հեսիելին, իր որդիներին ու եղբայրներին՝ տասներկու հոգի, ¹⁵ ութերորդը՝ Եսայիին, իր որդիներին ու եղբայրներին՝ տասներկու հոգի, ¹⁶ իններորդը՝ Մատթանիային, իր որդիներին ու եղբայրներին՝ տասներկու հոգի, ¹⁷ տասներորդը՝ Սեմեիին, իր որդիներին ու եղբայրներին՝ տասներկու հոգի, ¹⁸ տասնմեկերորդը՝ Ոզիելին, իր որդիներին ու եղբայրներին՝ տասներկու հոգի, ¹⁹ տասներկուերորդը՝ Ասաբիային, իր որդիներին ու եղբայրներին՝ տասներկու հոգի, ²⁰ տասներեքերորդը՝ Սուբայելին, իր որդիներին ու եղբայրներին՝ տասներկու հոգի, ²¹ տասնչորսերորդը՝ Մատաթիային, իր որդիներին ու եղբայրներին՝ տասներկու հոգի, ²² տասնհինգերորդը՝ Հերիմովթին, իր որդիներին ու եղբայրներին՝ տասներկու հոգի, ²³ տասնվեցերորդը՝ Անանիային, իր որդիներին ու եղբայրներին՝ տասներկու հոգի, ²⁴ տասնյոթերորդը՝ Եզբակատանին, իր որդիներին ու եղբայրներին՝ տասներկու հոգի, ²⁵ տասնութերորդը՝ Անանիին, իր որդիներին ու եղբայրներին՝ տասներկու հոգի, ²⁶ տասնիններորդը՝ Մելեթիին, իր որդիներին ու եղբայրներին՝ տասներկու հոգի, ²⁷ քսաներորդը՝ Ելիաթան, իր որդիներին ու եղբայրներին՝ տասներկու հոգի, ²⁸ քսանմեկերորդը՝ Հովթիրիին, իր որդիներին ու եղբայրներին՝ տասներկու հոգի, ²⁹ քսաներկուերորդը՝ Գեդդելթիին, իր որդիներին ու եղբայրներին՝ տասներկու հոգի, ³⁰ քսաներեքերորդը՝ Մազիովթին, իր որդիներին ու եղբայրներին՝ տասներկու հոգի և ³¹ քսանչորսերորդը՝ Ռովմեթիեզերին, իր որդիներին ու եղբայրներին՝ տասներկու հոգի։

26

Տաճարի դռնապանները

¹ Ահա և դռնապանների դասակարգումները. Կորխի սերնդից՝ Ասափի որդիներից Կորիսի որդի Մոսողամ։ ² Մոսողամի որդիները. անդրանիկը՝ Զաքարիա, երկրորդը՝ Հադիել, երրորդը՝ Զաբադիա, չորրորդը՝ Նաթանա, ³ հինգերորդը՝ Ովլամ, վեցերորդը՝ Հովնաթան, յոթերորդը՝ Ելիովնե։ ⁴ Աբդեդոմի որդիները՝ անդրանիկը՝ Սամեա, երկրորդը՝ Հովզաբադ, երրորդը՝ Հովադա, չորրորդը՝ Սաքար, հինգերորդը՝ Նաթանայել, ⁵ վեցերորդը՝ Ամիել, յոթերորդը՝ Իսաքար, ութերորդը՝ Փելաթի։

Արդարև, Աստված օրհնել էր Իդիթոմին։ ⁶ Նրա անդրանիկ որդի Սամեան ծնեց որդիներ, որոնք իրենց հոր տան գլխավորներն էին, քանզի հզոր էին։ ⁷ Սամեայի որդիները՝ Գոթնի, Ռափայել, Հովբեդ, Ելզաբեթ, Աքիու և իր եղբայրները, որոնք զորեղ մարդիկ էին, Ելիու, Սամաքիա և Իզբակոս։

⁸ Սրանք բոլորը Աբդեդոմի որդիներն էին. իրենք, իրենց որդիներն ու եղբայրները հզոր մարդիկ էին ու վարժ սպասավորություն էին կատարում։ Աբդեդոմի որդիները վաթսուներկու հոգի էին։

⁹ Մոսողամի որդիներն ու եղբայրները տասնութ քաջ մարդիկ էին։

¹⁰ Մերարիի որդիներից Ովսան ուներ որդիներ. Շամարին գլխավորն էր (թեև նա անդրանիկը չէր, սակայն հայրը նրան առաջնորդ կարգեց), ¹¹ երկրորդը Քեղկիան էր, երրորդը՝ Նաաբելը, չորրորդը՝ Զաքարիան։ Սրանք բոլորը Ովսայի որդիներն ու եղբայրներն էին՝ տասնչորս հոգի։ ¹² Սրանց բաժին ընկավ դռների պահպանությունը. նրանք իրենց եղբայրների նման, ըստ իրենց առաջնորդների, պաշտոն ունեին՝ սպասավորելու Տիրոջ տանը։ ¹³ Նրանք՝ մեծ թե փոքր, ըստ իրենց ազգատոհմի տների, վիճակ գցեցին յուրաքանչյուր դռան համար։ ¹⁴ Արևելյան դռան վիճակն ընկավ Սեմեիին ու նրա որդի Զաքարիային։ Խորհրդական Հովադի համար վիճակ գցեցին, և նրան բաժին ընկավ հյուսիսային կողմը։ ¹⁵ Աբդեդոմին բաժին ընկավ հարավային կողմը, իսկ նրա որդիներին՝ գանձատունը։ ¹⁶ Ովսային բաժին ընկավ արևմտյան կողմը՝ զառիվերի վրա գտնվող ներքին սենյակի դռնով հանդերձ։ Դռնապանները կանգնում էին. ¹⁷ արևելյան կողմում՝ օրական վեց ղևտացի, հյուսիսային կողմում՝ չորս, հարավային կողմում՝ ևս չորս, գանձատան մոտ՝ երկուական՝ իրար փոխարինելու համար, ¹⁸ արևմտյան կողմում՝ չորս, իսկ ճանապարհի վրա՝ երկուական՝ իրար փոխարինելու համար։ ¹⁹ Այս է Կորխի որդիների և Մերարիի որդիների դռնապանների դասակարգումը։

Ղևտացիներին վստահված հատուկ պարտականություններ

²⁰ Ղևտացիներն իրենց եղբայրներով հանդերձ Տիրոջ տան գանձերն ու սրբազան գանձերն էին հսկում։ ²¹ Գերսովնի որդի Լադանի որդիները. Գերսովնի որդի Լադանի ազգատոհմի իշխաններն էին Հեիելը, ²² նրա որդիներն էին Զեթամ և Հովել եղբայրները, որոնք Տիրոջ տան գանձերի վերակացուներն էին։ ²³ Ամրիմից ու Իսահառից էին սերել Քեբրոնն ու Ոզիելը։ ²⁴ Մովսեսի որդի Գերսամի որդի Սեբիելը գանձերի ավագ վերակացուն էր։ ²⁵ Նրա եղբայրներն էին. Եղիազարի որդի Աբիան, նրա որդի Հուսեեն, սրա որդի Հովրամը, նրա որդի Զեքրին, նրա որդի Սալոմոթը։ ²⁶ Այս Սալոմոթն ու իր եղբայրները վերակացու էին այն բոլոր սրբազան գանձերի վրա, որ նվիրել էին Դավիթը, տոհմերի իշխանները, հարյուրապետները, հազարապետները և զորքի հրամանատարները։ ²⁷ Դրանք ավար էին վերցված քաղաքներից, և դրանց մի մասը հատկացված էր, որ Աստծու տան շինության աշխատանքները չնվազեն։ ²⁸ Այն ամենը, ինչ նվիրել էին Սամուել մարգարեն, Կիսի որդի Սավուղը, Ների որդի Աբեններն ու Շարուհիի որդի Հովաբը, Սալոմոթի ու նրա եղբայրների ձեռքում էին։

Մյուս ղևտացիների պարտականությունները

²⁹ Հեսսարի սերնդից Քոնոնիան և նրա որդիները Իսրայելի արտաքին գործերն էին տնօրինում, որ գրագրություն ու դատ անեն։ ³⁰ Քեբրոնի սերնդից Ասաբիան ու իր եղբայրները՝ հազար յոթ հարյուր զորավոր մարդիկ, վերակացու էին Իսրայելի վրա Հորդանան գետից այն կողմ՝ արևմտյան մասում, Տիրոջ պաշտամունքի բոլոր հարցերով և արքունի գործերով։ ³¹ Քեբրոնի սերնդից՝ Քեբրոնի ազգատոհմի իշխան Ուրիան։ Դավթի թագավորության քառասուներորդ տարում նրանք ըստ իրենց ազգատոհմերի մարդահամարի ենթարկվեցին, և նրանց մեջ գտնվեցին հզոր մարդիկ գաղաադացիների Հազեր բնակավայրում։ ³² Նրա եղբայրները՝ երկու հազար յոթ հարյուր հզոր մարդիկ, տոհմերի իշխաններ էին։ Դավիթ արքան նրանց Ռուբենի ու Գադի ցեղերի և Մանասեի կես ցեղի գնդի վերակացու նշանակեց Աստծու և արքայի բոլոր գործերի համար։

27

Թագավորության զինվորական կազմակերպությունը

¹ Ահա Իսրայելի որդիները՝ իրենց թվերով. տոհմերի առաջնորդներ, հազարապետներ, հարյուրապետներ ու հաշվառում կատարող գրագիրներ, որոնք ամիս առ ամիս տարվա բոլոր ամիսներին ծառայում էին ժողովրդին արքունի բոլոր հարցերում և ելումուտի ամեն մի գործում։ Ամեն մի դասի թիվը քսանչորս հազար էր։ ² Առաջին ամսվա առաջին դասի գլխավորը Զաբդեելի որդի Հեզբաալն էր։ Այդ դասի մեջ կար քսանչորս հազար հոգի։ ³ Առաջին ամսվա զորքի բոլոր հրամանատարների գլխավորը Փարեսի որդիներից մեկն էր։ ⁴ Երկրորդ ամսվա դասի գլխավորն Աքոթի որդի Դովդային էր, իսկ Մագալավոթն առաջնորդն էր. նրա դասի մեջ կային քսանչորս հազար զորավոր մարդիկ։ ⁵ Երրորդը երրորդ ամսվա համար քահանայապետ Հովդաեի որդի Բանեան էր, որի դասում կար քսանչորս հազար հոգի։ ⁶ Ինքը՝ Բանեան, երեսնյակի մեջ ամենահզորն էր և երեսնյակի գլխավորը։ Նրա դասի առաջնորդն էր նրա որդի Ամիզաբաթը։ ⁷ Չորրորդը չորրորդ ամսվա համար Հովաբի եղբայր Ասայելն էր, նաև նրա որդի Զաբդեան և նրանից հետո՝ նրա եղբայրները։ Նրա դասում կար քսանչորս հազար հոգի։ ⁸ Հինգերորդ գլխավորը հինգերորդ ամսվա համար Իզրայի որդի Սաթիովթն էր, որի դասում կար քսանչորս հազար հոգի։ ⁹ Վեցերորդ գլխավորը վեցերորդ ամսվա համար թեկուացի Եկգեսի որդի Եկեսն էր, որի դասում կար քսանչորս հազար հոգի։ ¹⁰ Յոթերորդ գլխավորը յոթերորդ ամսվա համար Եփրեմի որդիներից փալոմցի Քելն էր, որի դասում կար քսանչորս հազար հոգի։ ¹¹ Ութերորդը ութերորդ ամսվա համար Զարայիի ընտանիքից Եսաթիի որդի Ուսաքն էր, որի դասում կար քսանչորս հազար հոգի։ ¹² Իններորդը իններորդ ամսվա համար Բենիամինի երկրից անաթոթացի Աբիեզերն էր, որի դասում կար քսանչորս հազար հոգի։ ¹³ Տասներորդը տասներորդ ամսվա համար Զարայիի ընտանիքից նետոպաթցի Մաարին էր, որի դասում կար քսանչորս հազար հոգի։ ¹⁴ Տասնմեկերորդը տասնմեկերորդ ամսվա համար Եփրեմի որդիներից փարաթոնցի Բանաիան էր, որի դասում կար քսանչորս հազար հոգի։ ¹⁵ Տասներկուերորդը տասներկուերորդ ամսվա համար Գոթոնիելի տոհմից նետոպաթցի Քալդային էր, որի դասում կար քսանչորս հազար հոգի։

Թագավորության քաղաքացիական կազմակերպությունը

¹⁶ Իսրայելի ցեղերից Ռուբենի ցեղի իշխանը Զեքրիի որդի Եղիազարն էր, Շմավոնինը՝ Մակքայի որդի Սափատիան, ¹⁷ Ղևիինը՝ Կամուելի որդի Ասաբիան, Ահարոնինը՝ Սադովկը, ¹⁸ Հուդայինը՝ Դավթի եղբայրներից Եղիաբը, Իսաքարինը՝ Միքայելի որդի Ամարիան, ¹⁹ Զաբուղոնինը՝ Աբդիայի որդի Սամեան, Նեփթաղիմինը՝ Ոզիելի որդի Հարիմովթը, ²⁰ Եփրեմինը՝ Ոզիայի որդի Ովսերը, Մանասեի կես ցեղինը՝ Փալդիայի որդի Հովելը, ²¹ Գաղաադում գտնվող Մանասեի կես ցեղինը՝ Զաբդիայի որդի Հադային, Բենիամինի որդիներինը՝ Աբենների որդի Ասիելը, ²² Դանինը՝ Հովրամի որդի Եզրիելը։ Սրանք են Իսրայելի ցեղերի նահապետները։ ²³ Դավիթը հաշվառման չենթարկեց սրանցից քսան տարեկան և ավելի ցածր տարիք ունեցողներին, քանզի Տերն ասել էր. «Իսրայելացիներին պիտի բազմացնեմ երկնքի աստղերի չափ»։ ²⁴ Շարուհիի որդի Հովաբն սկսեց հաշվառման ենթարկել ժողովրդին, սակայն չավարտեց։ Այդ պատճառով Տերը բարկացավ Իսրայելի վրա, և նրանց թիվը չարձանագրվեց Դավիթ արքայի ժամանակագրության մեջ։

Արքայական կալվածքների վարչությունը

²⁵ Արքայի գանձերի վերակացուն Ովդիելի որդի Ազմովթն էր, իսկ անդաստանների, գյուղերի, քաղաքների ու բերդերի հարստության վերակացուն՝ Ոզիայի որդի Հովնաթանը։ ²⁶ Հողը մշակող երկրագործների վերակացուն Քելուբի որդի Եզրասն էր, ²⁷ ագարակներինը՝ արիմաթացի Սեմեին, գյուղերում գինու շտեմարաններինը՝ Սեփինի որդի Զաբդին, ²⁸ դաշտերի ձիթենիներինն ու վայրի թզենիներինը՝ Գեդեոնի որդի Բալդանան, ձեթի շտեմարաններինը՝ Հովասը։ ²⁹ Հովիտներում արածող արջառների վերակացուն էր Ադայիայի որդի Սովփատը, ³⁰ ուղտերինը՝ իսմայելացի Ովբիան, ավանակներինը՝ մարաթովնացի Հադիան, ³¹ հոտերինը՝ հագարացի Հովազը։ Սրանք բոլորը Դավիթ արքայի ունեցվածքի վերակացուներն էին։

Դավթի խորհրդականները

³² Դավթի հորեղբայր Հովնաթանը՝ իմաստուն մի մարդ, խորհրդական էր՝ միևնույն ժամանակ լինելով ատենադպիր։ Աքիմենի որդի Հեիելը արքայի որդիների դաստիարակն էր։ ³³ Աքիտոփելը արքայի խորհրդականն էր, ³⁴ իսկ Քուսին՝ արքայի մտերիմ բարեկամը։ Աքիտոփելից հետո, մերձավոր լինելու տեսակետից, գալիս էին Բանեայի որդի Հովիդայիան և Աբիաթարը։ Արքայի զորքերի հրամանատարն էր Հովաբը։

28

Տաճարի վերաբերյալ Դավթի հրահանգները

¹ Դավիթն Իսրայելի բոլոր իշխաններին, գլխավոր դատավորներին, արքային հերթով սպասարկող թիկնապահների բոլոր գլխավորներին, հազարապետներին, հարյուրապետներին, գանձապահներին, իր ստացվածքների վերակացուներին, հզոր մարդկանց ու զորքի քաջամարտիկներին հավաքեց Երուսաղեմում։ ² Դավիթը կանգնեց հավաքվածների մեջ և ասաց. «Լսե՛ք ինձ, իմ եղբայրնե՛ր և իմ ժողովո՛ւրդ։ Սրտումս նպատակ էի դրել Տիրոջ Ուխտի տապանակի համար հանգստի տուն կառուցել և մեր Տիրոջ ոտքերի համար՝ կանգնելու տեղ։ Պատրաստել էի նաև շինության համար անհրաժեշտ նյութերը՝ մեծ քանակությամբ ոսկի, արծաթ, պղինձ, արույր, երկաթ և փայտ։ ³ Սակայն Աստված ինձ ասաց. “Դու ինձ համար իմ անունը կրող տուն չպիտի շինես, քանի որ դու պատերազմող մարդ ես և շատ արյուն ես թափել”։ ⁴ Աստված բոլոր ազգերից ընտրեց Իսրայելին և իր թագավորությունը հավիտյանս հաստատելու համար ամբողջ Իսրայելից ընտրեց Հուդայի ցեղին։ Հուդայի տնից ընտրեց իմ հոր տունը և ուզեց, որ իմ հոր որդիներից ե՛ս լինեմ թագավոր ամբողջ Իսրայելի վրա։ ⁵ Եվ իմ բոլոր որդիներից (որովհետև Տերն ինձ բազում որդիներ տվեց) ընտրեց իմ Սողոմոն որդուն, որ նա Իսրայելում նստի Տիրոջ թագավորության գահին։ ⁶ Աստված ասաց ինձ. “Քո որդի Սողոմոնն է շինելու իմ տունն ու իմ գավիթը, քանի որ նրան եմ ընտրել, որ ինձ որդի լինի, և ես նրան հայր լինեմ։ ⁷ Նրա թագավորությունը հավիտյան հաստատուն կդարձնեմ, եթե շարունակի պահել իմ պատվիրաններն ու օրենքները, ինչպես որ այսօր է”։ ⁸ Արդ, ես Տիրոջ ամբողջ ժողովրդի առջև և ի լուր մեր Աստծու պարտավորեցնում եմ ձեզ պահպանել ու հետամուտ լինել Տիրոջ՝ մեր Աստծու բոլոր պատվիրաններին, որպեսզի ժառանգեք լավ երկիրը և ձեզնից հետո իբրև ժառանգություն հավիտենապես հանձնեք ձեր որդիներին։

⁹ Եվ դու, որդի՛ իմ Սողոմոն, ճանաչի՛ր քո հայրերի Աստծուն, ծառայի՛ր նրան ամբողջ սրտով ու հոժար մտքով, քանզի Տերը քննում է ամեն սիրտ և գիտի բոլոր մտածումները. եթե փնտրես նրան, նա կգտնվի քեզ համար, իսկ եթե թողնես նրան, քեզ իսպառ կլքի։ ¹⁰ Այժմ տե՛ս, Տերը քեզ է ընտրել, որ իր համար տուն կառուցես որպես սրբավայր։ Ուրեմն զորացի՛ր և իրագործի՛ր»։

¹¹ Դավիթն իր որդի Սողոմոնին տվեց տաճարի, նրա սենյակների, գանձարանների, վերնատների, ներքին շտեմարանների և քավության սենյակի հատակագիծը ¹² և դրա այն օրինակը, որ ուներ իր մտքում Տիրոջ տան գավիթների, շուրջը գտնվող շտեմարանների, Տիրոջ տան մթերանոցների ու սրբությունների պահեստի համար։ ¹³ Նա տվեց Տիրոջ տան սպասավորության բոլոր գործերը կատարող քահանաների ու ղևտացիների խմբերի կացարանների և Տիրոջ տան սպասավորության անոթների պահեստի նախագիծը։ ¹⁴ Նրան տվեց նաև ոսկե ու արծաթե անոթների, ¹⁵ աշտանակների ու ճրագների, ¹⁶ Առաջավորության հացի սեղանի՝ յուրաքանչյուր ոսկե սեղանի, ինչպես նաև արծաթե սեղանների համար, ¹⁷ նաև մեծ պատառաքաղներից, գավաթներից, ոսկե տաշտերից և ոսկե ու արծաթե խնկամաններից յուրաքանչյուրի կշռաչափը։ ¹⁸ Նրան հայտնեց նաև խնկերի զոհասեղանի մաքուր ոսկու կշռաչափը և նմուշն այն քերովբեների, որոնք իրենց թևերը տարածելով՝ պետք է հովանի անեին Տիրոջ Ուխտի տապանակի վրա։ ¹⁹ Դավիթը Տիրոջ թելադրանքով գրված ամեն ինչ տվեց Սողոմոնին ըստ այն իմաստության և ծրագրի, որ տրվել էր իրեն։

²⁰ Դավիթն ասաց իր որդի Սողոմոնին. «Զորացի՛ր ու քա՛ջ եղիր, գործի՛ր և մի՛ վախեցիր ու մի՛ զարհուրիր, քանզի Տերը՝ իմ Աստվածը, քեզ հետ է, նա քեզ չի թողնի ու չի լքի, մինչև ավարտես Տիրոջ տան սպասավորության բոլոր գործերը։ Ահա տաճարի, նրա սենյակների, նրա գավիթների, նրա վերնատների, ներքին շտեմարանների և քավության սենյակի նախագիծը. այդ է Տիրոջ տաճարի օրինակը։ ²¹ Ահա նաև քահանաների ու ղևտացիների խմբերը՝ Աստծու տան ողջ սպասավորության համար։ Բոլոր գործերում քեզ հետ կլինեն նաև բոլոր այն կամավորները, որոնք հմուտ են ամեն տեսակ արհեստի մեջ, իշխաններն ու համայն ժողովուրդը՝ պատրաստ քո հրամաններին»։

29

Նվերներ տաճարի շինության համար

¹ Դավիթ արքան ասաց բոլոր հավաքվածներին. «Իմ որդի Սողոմոնը, որին Տերն ընտրեց իր համար, փոքր է, իսկ գործը՝ մեծ, քանզի ոչ թե մարդու համար է այս շինվածքը, այլ Տիրոջ՝ Աստծու։ ² Ըստ իմ ողջ կարողության՝ իմ Աստծու տան համար շինանյութ պատրաստեցի՝ ոսկի, արծաթ, պղինձ, երկաթ, փայտ, անկյունների ու կամարների քարեր, թանկարժեք ու պատվական քարեր և բազում այլ նյութեր։ ³ Եվ իմ Աստծու տան հանդեպ իմ ունեցած սիրուց մղված, բացի սրբությունների տան համար իմ նվիրած ոսկուց ու արծաթից, տվեցի նաև ⁴ Սոփերից բերված երեք հազար տաղանդ ոսկի և յոթ հազար տաղանդ ընտիր արծաթ, որպեսզի վարպետները դրանցով պատեն տաճարի որմերը։ ⁵ Եվ այսօր ո՞վ հոժարաբար կնվիրաբերի Տիրոջը»։

⁶ Տոհմերի պետերը, իսրայելացիների իշխանները, հազարապետները, հարյուրապետները, գործերի վերակացուները և արքունի գավառապետները կամավորապես ⁷ Տիրոջ տան շինության համար տվեցին հինգ հազար տաղանդ ոսկի, տասը հազար դահեկան, տասը հազար տաղանդ արծաթ, տասնութ հազար տաղանդ պղինձ և հարյուր հազար տաղանդ երկաթ։ ⁸ Ով թանկարժեք քար ուներ, տվեց Տիրոջ տան գանձարանին՝ այն հանձնելով Եսրովմի որդի Հերիելին։ ⁹ Ժողովուրդն ուրախացավ կամավոր նվիրաբերելու համար, քանի որ լի սրտով էին նվերներ մատուցում Տիրոջը։

Դավթի օրհնաբանությունը Աստծուն

Դավիթ արքան մեծապես ուրախացավ ¹⁰ ու հավաքվածների առջև օրհնեց Տիրոջը՝ ասելով. «Հավիտյանս հավիտենից օրհնյալ ես, Տե՛ր, Իսրայելի՝ մեր հայրերի Աստված։ ¹¹ Քոնն են, Տե՜ր, մեծությունը, զորությունը, փառքը, հաղթությունն ու հզորությունը, քանզի դու ես տիրում երկնքում ու երկրի վրա գտնվող ամեն ինչի վրա։ Բոլոր թագավորներն ու ազգերը դողում են քո առջև, ¹² քեզանից են բխում մեծությունն ու փառքը, դու ես իշխում ամեն ինչի վրա, Տե՛ր, բոլոր իշխանությունների իշխան, քո ձեռքում են զորությունն ու ուժը, քո ամենակալ ձեռքում է հզորացնել բոլորին։ ¹³ Արդ, Տե՜ր, փառաբանում ենք քեզ և օրհներգում քո փառավոր անունը։ ¹⁴ Ո՞վ եմ ես, և ո՞վ է քո ժողովուրդը, որ կարողանայինք հոժարությամբ նվիրաբերել այս ամենը։ Չէ՞ որ քոնն է ամեն ինչ, և քեզնից ստացածն ենք տալիս քեզ։ ¹⁵ Մենք պանդուխտ ենք քո առջև և օտարական, ինչպես մեր բոլոր հայրերը։ Մեր օրերը երկրի վրա ստվերի են նման, և մնայուն ոչ մի բան չունենք։ ¹⁶ Տե՜ր, մեր Աստվա՛ծ, այս ամենը, որ ես պատրաստել եմ քո սուրբ անվան տունը կառուցելու համար, քեզնից է գալիս, և ամեն ինչ քոնն է։ ¹⁷ Գիտեմ, Տե՜ր, որ դու ես քննում սրտերը և սիրում ես արդարությունը։ Մենք պարզ սրտով և հոժարությամբ ենք այս ամենն ընծայում, և ես տեսա, որ այստեղ գտնվող քո ժողովուրդը ուրախությամբ ու կամավոր կերպով քեզ ընծաներ մատուցեց։ ¹⁸ Ո՜վ Տեր, մեր հայրերի՝ Աբրահամի, Իսահակի և Իսրայելի՛ Աստված, հավիտյան պահի՛ր այս քո ժողովրդի սրտում ու մտքում և նրանց սրտերը դեպի քե՛զ ուղղիր։ ¹⁹ Իմ Սողոմոն որդուն բարի սի՛րտ տուր, որ պահի քո պատվիրանները, քո վկայություններն ու քո օրենքները և ավարտին հասցնի քո տան կառուցումը»։

²⁰ Դավիթն ասաց բոլոր հավաքվածներին. «Օրհնեցե՛ք Տիրոջը՝ ձեր Աստծուն»։ Եվ բոլոր հավաքվածներն օրհնեցին Տիրոջը՝ իրենց հայրերի Աստծուն, և ծնկի իջնելով՝ երկրպագեցին Տիրոջն ու արքային։ ²¹ Հաջորդ օրը Դավիթը զոհեր ու ողջակեզներ մատուցեց Տիրոջը՝ հազար զվարակ, հազար խոյ ու հազար գառ և դրանց հեղման ընծաները, և առատ զոհեր՝ ամբողջ Իսրայելի համար։ ²² Այն օրը ուրախությամբ կերան ու խմեցին Տիրոջ առջև, երկրորդ անգամ գահ բարձրացրին Դավթի որդի Սողոմոնին, Տիրոջ առջև նրան թագավոր օծեցին, իսկ Սադովկին՝ քահանա։ ²³ Սողոմոնը նստեց իր հոր՝ Դավթի գահին ու հաջողությունների հասավ, և նրան հնազանդվեց ամբողջ Իսրայելը։ ²⁴ Իշխանները, հզոր մարդիկ և իր հայր Դավիթ արքայի բոլոր որդիները հնազանդվեցին նրան։ ²⁵ Տերն ի վերուստ բարձրացրեց Սողոմոնին բոլոր իսրայելացիների առաջ, նրան թագավորական այնպիսի փառք տվեց, որ նրանից առաջ ոչ մի թագավոր չէր ունեցել։

Դավթի թագավորության վախճանը

(Գ Թագ. 2.10-12)

²⁶ Հեսսեի որդի Դավիթն Իսրայելի վրա թագավորեց քառասուն տարի. ²⁷ Քեբրոնում՝ յոթ տարի և Երուսաղեմում՝ երեսուներեք տարի։ ²⁸ Նա վախճանվեց խոր ծերության մեջ, առաջացած տարիքում, հարստության մեջ ու փառքով։ Նրա Սողոմոն որդին թագավորեց նրա փոխարեն։ ²⁹ Դավիթ արքայի մնացած գործերը՝ առաջիններն ու վերջինները, նկարագրված են Սամուել տեսանողի գրքում, Նաթան մարգարեի գրքում և Գադ տեսանողի գրքում, ³⁰ նրա ամբողջ թագավորության ու զորության մասին, ինչ որ կատարվել էր նրա ժամանակ թե՛ Իսրայելում և թե՛ երկրի մյուս թագավորություններում։

ԵՐԿՐՈՐԴ ՄՆԱՑՈՐԴԱՑ

1

¹ Դավթի որդի Սողոմոնը հզորացավ իր թագավորության մեջ, Տերը՝ իր Աստվածը, նրա հետ էր ու նրան շատ բարձրացրեց։

Սողոմոնը իմաստնություն է խնդրում Աստծուց

(Գ Թագ. 3.2-15)

² Սողոմոնը հրավիրեց իսրայելացիների բոլոր հազարապետներին, հարյուրապետներին, դատավորներին ու տոհմերի բոլոր իշխաններին ³ և նրանց հետ գնաց Գաբավոնի բարձրավանդակը, որտեղ դրված էր Աստծու Վկայության խորանը, որ անապատում պատրաստել էր Տիրոջ ծառա Մովսեսը։ ⁴ Բայց Դավիթը Տիրոջ տապանակը հանել էր Կարիաթ-Յարիմ քաղաքից և դրա համար վրան էր պատրաստել Երուսաղեմում։

⁵ Պղնձե զոհասեղանը, որ պատրաստել էր Հովրի որդի Ուրիի որդի Բեսելիելը, այնտեղ էր՝ Տիրոջ խորանի առջև։ Սողոմոնն ու նրա ուղեկիցները խոնարհվեցին դրա առջև։ ⁶ Ապա Սողոմոնը խորանի առջևում գտնվող պղնձե զոհասեղանի վրա Տիրոջ առջև զոհեր հանեց և այնտեղ հազար ողջակեզ մատուցեց։

⁷ Այն գիշեր Տերը, երևալով Սողոմոնին, ասաց նրան. «Խնդրի՛ր, ի՞նչ տամ քեզ»։ ⁸ Սողոմոնն ասաց Աստծուն. «Դու իմ հորը մեծ ողորմածություն ես արել և ինձ գահ ես բարձրացրել նրա փոխարեն։ ⁹ Արդ, Տե՛ր, Աստվա՛ծ, քո անունը թող հաստատուն մնա իմ հայր Դավթի տան վրա, քանզի ինձ գահ ես բարձրացրել բազմամարդ մի ժողովրդի վրա, որը երկրի հողի չափ շատ է։ ¹⁰ Ինձ իմաստնություն ու իմացությո՛ւն տուր, որ կարողանամ ղեկավարել քո այս ժողովրդին, այլապես ո՞վ պիտի ղեկավարի քո այս մեծ ժողովրդին»։ ¹¹ Աստված ասաց Սողոմոնին. «Քանի որ դա է քո սրտում, չխնդրեցիր ո՛չ մեծ հարստություն, ո՛չ փառք, ո՛չ քո հակառակորդների մահը, ո՛չ էլ երկար կյանք, այլ իմաստնություն ու իմացություն խնդրեցիր, որ կարողանաս ղեկավարել իմ ժողովրդին, որի թագավորն եմ դարձրել քեզ, ¹² քեզ կտամ իմաստնություն և իմացություն, ինչպես նաև հարստություն, գանձեր ու փառք, որպիսին քեզանից առաջ եղած ոչ մի թագավոր չի ունեցել, և ոչ էլ քեզանից հետո եկողներն են ունենալու»։

¹³ Սողոմոնը Գաբավոնի բարձրավանդակից, Վկայության խորանի առջևից եկավ Երուսաղեմ և թագավորեց Իսրայելի վրա։

Սողոմոնի զորությունն ու հարստությունը

(Գ Թագ. 10.26-29)

¹⁴ Սողոմոնը մարտակառքեր ու հեծյալներ հավաքեց. նա հազար չորս հարյուր մարտակառք ու տասներկու հազար հեծյալ ունեցավ։ Նա դրանք թողեց հեծյալների համար սահմանված քաղաքներում, իսկ ժողովուրդը արքայի հետ մնաց Երուսաղեմում։ ¹⁵ Արքան ոսկին ու արծաթը քարի պես առատ դարձրեց Երուսաղեմում, իսկ մայրիները դաշտում աճող մոլաթզենիների չափ շատացրեց Հուդայի երկրում։ ¹⁶ Սողոմոնի ձիերը Եգիպտոսից էին բերվում։ Արքային վաճառականների սահմանած գինն այս էր. ¹⁷ Եգիպտոսից բերված մեկ մարտակառքը վաճառում էին վեց հարյուր արծաթով, իսկ ձին՝ հարյուր հիսուն։ Այդ ձևով նրանք բերում էին նաև բոլոր քետացի թագավորների և ասորի թագավորների համար։

2

Տաճարի շինության պատրաստությունը

(Գ Թագ. 5.15-32)

¹ Սողոմոնը որոշեց տաճար կառուցել Տիրոջ անվան համար և թագավորական պալատ՝ իր համար։ ² Նա հավաքեց յոթանասուն հազար բեռնակիրներ, լեռներում աշխատող ութսուն հազար քարհատներ և նրանց վրա վերակացուներ՝ երեք հազար վեց հարյուր մարդ։

³ Սողոմոնը Տյուրոսի արքա Քիրամի մոտ մարդ ուղարկեց՝ ասելով. «Դու իմ հայր Դավթին օգնել ես. մայրի փայտ ես տվել բնակության տուն շինելու համար։ ⁴ Արդ, ես ևս՝ նրա որդին, Տիրոջ՝ իմ Աստծու անունով տուն եմ շինում, որ այն նվիրաբերեմ նրան, նրա առջև խունկ ծխեմ, շարունակ Առաջավորության հաց ու ողջակեզներ մատուցեմ ամեն առավոտ ու երեկո, ամեն շաբաթ օրերին, ամսամուտներին և մեր Աստծու տոներին. սա պետք է հավիտյան կատարվի Իսրայելում։ ⁵ Այն տունը, որ կառուցելու եմ, մեծ է լինելու, քանզի Տերը՝ մեր Աստվածը, ավելի մեծ է, քան բոլոր աստվածները։ ⁶ Բայց ո՞վ կարող է նրա համար տուն կառուցել, որովհետև երկինքն ու երկինքների երկինքն անգամ անկարող են պարփակել նրա փառքը։ Ես ո՞վ եմ, որ նրա համար տուն կառուցեմ, այլ միայն մի տեղ, որտեղ խունկ կծխեն նրա առաջ։ ⁷ Արդ, ինձ մոտ ճարտար մա՛րդ ուղարկիր, որ գիտենա մշակել իմ հայր Դավթի հավաքած ոսկին, արծաթը, պղինձը, երկաթը, հմուտ լինի ծիրանի, կարմիր, կապուտակ կտորներ ու բեհեզ գործածելու մեջ և քանդակել իմանա, որպեսզի միանա Հուդայի երկրում ու Երուսաղեմում գտնվող իմ վարպետներին։ ⁸ Ինձ Լիբանանից մայրու, սարդենու և թեղենու փա՛յտ ուղարկիր, որովհետև գիտեմ, որ ոչ ոք քո ծառաների նման Լիբանանից փայտ կտրել չգիտի։ Արդ, քո ծառաները թող գնան իմ ծառաների հետ, ⁹ որ ինձ համար մեծ քանակությամբ փայտ պատրաստեն, որովհետև այն տունը, որ կառուցելու եմ, մեծ ու փառավոր է լինելու։ ¹⁰ Քո ծառաներին՝ փայտ կտրող գործավորներին, իբրև ռոճիկ կտամ քսան հազար քոռ ցորեն, քսան հազար քոռ գարի, քսան հազար չափ գինի և քսան հազար չափ ձեթ»։

¹¹ Տյուրոսի Քիրամ արքան պատասխանեց նամակով և ուղարկեց Սողոմոնին. «Քանի որ Տերը սիրեց իր ժողովրդին, դրա համար քեզ նրանց վրա թագավոր կարգեց»։ ¹² Քիրամը նաև ասում էր. «Օրհնյալ է Տերը՝ Իսրայելի Աստվածը, որն ստեղծել է երկինքն ու երկիրը և Դավիթ արքային տվել է խելամտությամբ ու իմացությամբ օժտված իմաստուն որդի, որ տուն կառուցի Տիրոջ համար և թագավորական պալատ՝ իր համար։ ¹³ Ահա քեզ մոտ եմ ուղարկում մի խելոք ու հմուտ մարդու՝ իմ ծառա Քիրամին, ¹⁴ որի մայրը Դանի դուստրերից է, իսկ նրա հայրը տյուրոսցի է։ Նա գիտի մշակել ոսկին, արծաթը, պղինձը, երկաթը, քարերն ու փայտերը, հյուսել ծիրանի ու կապուտակ, բեհեզ ու կարմիր կտորներ և քանդակներ անել։ Նա, աշխատելով քո վարպետների ու քո հոր՝ իմ Տեր Դավթի վարպետների հետ, կկարողանա անել այն բոլոր գործերը, որ կհանձնարարես իրեն։ ¹⁵ Արդ, ցորենը, գարին, ձեթն ու գինին, որ հիշատակել է իմ Տերը, թող ուղարկի իր ծառաներին, ¹⁶ իսկ մենք Լիբանանից փայտ կկտրենք ըստ քո կարիքների և ծովի վրայով լաստերով կբերենք Հոպպե, և դու կկուտակես Երուսաղեմում»։

¹⁷ Սողոմոնը հավաքեց Երուսաղեմում գտնվող բոլոր պանդուխտներին՝ ըստ իր հայր Դավթի կատարած մարդահամարի։ Նրանք հարյուր հիսուներեք հազար վեց հարյուր հոգի էին։ ¹⁸ Նա նրանցից յոթանասուն հազարին բեռնակիրներ կարգեց, ութսուն հազարին՝ քարհատներ, իսկ երեք հազար վեց հարյուրին նրանց վրա գործավարներ նշանակեց։

3

Տաճարի շինությունը

(Գ Թագ. 6.1-38)

¹ Սողոմոնը Երուսաղեմում՝ Մորիա լեռան վրա, որտեղ Տերը երևացել էր նրա հորը՝ Դավթին, սկսեց կառուցել Տիրոջ տունը այն տեղում, որ Դավիթը պատրաստել էր Ոռնա Հեբուսացու կալում։ ² Նա կառուցումն սկսեց իր թագավորության չորրորդ տարվա երկրորդ ամսին։ ³ Այսպիսով Սողոմոնն սկսեց շինել Աստծու տունը։ Դրա երկարությունը, ըստ հին չափման միավորի, վաթսուն կանգուն էր, իսկ լայնությունը՝ քսան կանգուն։ ⁴ Տան առջևի արտաքին գավթի երկարությունը քսան կանգուն էր, ինչքան որ տան լայնությունն էր, բարձրությունը ևս քսան կանգուն էր։ Այն ներսից պատեց մաքուր ոսկով։ ⁵ Մեծ սրահը երեսապատեց մայրու փայտով ու պատեց մաքուր ոսկով, վրան քանդակեց արմավենիներ ու շղթայաձև զարդեր։ ⁶ Շքեղության համար տունը զարդարեց թանկարժեք քարերով ու Սեփարուիմից բերված մաքուր ոսկով. ⁷ տունը, պատերը, դռները, ձեղունն ու դրանդիները պատեց ոսկով, իսկ պատերին քերովբեներ քանդակեց։

⁸ Շինեց նաև Սրբություն սրբոցի սրահը, որի երկարությունը քսան կանգուն էր, ինչքան որ տան լայնությունն էր. լայնությունը ևս քսան կանգուն էր։ Նա սրահը պատեց մաքուր ոսկով և քերովբեներով՝ ծախսելով վեց հարյուր տաղանդ ոսկի։ ⁹ Ամեն մի մեխի կշիռը հիսուն սիկղ ոսկի էր։ Վերնատունը նույնպես պատեց ոսկով։ ¹⁰ Սրբություն սրբոցի սրահում երկու քերովբեներ պատրաստեց փայտից և դրանք պատեց ոսկով։ ¹¹ Քերովբեների թևերի երկարությունը քսան կանգուն էր. ամեն մի թևը՝ հինգ կանգուն, կպած սրահի պատին, և մյուս թևը՝ հինգ կանգուն, կպած մյուս քերովբեի թևին։ ¹² Մյուս քերովբեի թևը նույնպես հինգ կանգուն էր, կպած սրահի պատին, և մյուս թևը՝ հինգ կանգուն, կպած մյուս քերովբեի թևին։ ¹³ Երկու քերովբեների թևերը տարածված վիճակում քսան կանգուն էին։ Նրանք կանգնած էին իրենց ոտքերի վրա, իսկ նրանց դեմքերը նայում էին տան կողմը։

¹⁴ Նա վարագույրները պատրաստեց կապուտակ, ծիրանի, կարմիր կտորներից ու բեհեզից և նրա վրա քերովբեներ գործեց։

Պղնձե երկու սյուները

(Գ Թագ. 7.15-22)

¹⁵ Տան առաջ երեսունհինգ կանգուն բարձրությամբ երկու սյուներ կանգնեցրեց և նրանց վրա՝ խոյակներ, որոնք հինգ կանգուն էին։ ¹⁶ Նա սրբարանում եղած շղթայաձև զարդերի նման զարդեր պատրաստեց ու դրեց սյուների գլուխներին։ Նռնաձև հարյուր զարդ սարքեց ու դրեց շղթայաձև զարդերի վրա։ ¹⁷ Նա սյուները կանգնեցրեց տաճարի առաջ, մեկը՝ աջից, մյուսը՝ ձախից։ Աջ կողմինը կոչեց Ուղղություն[47], իսկ ձախ կողմինը՝ Զորություն[48]։

4

¹ Պղնձե զոհասեղան պատրաստեց քսան կանգուն երկարությամբ, քսան կանգուն լայնությամբ ու տասը կանգուն բարձրությամբ։

Պղնձե մեծ ավազանը

(Գ Թագ. 7.23-26)

² Ձուլածո մեծ ավազանը շինեց տասը կանգուն տրամագծով, շրջանաձև, հինգ կանգուն բարձրությամբ և երեսուն կանգուն շրջագծով։ ³ Դրա տակ շուրջանակի կային ձուլածո եզներ, որոնք տասը կանգուն տրամագծով շրջապատել էին այն։ Եզները միաձույլ էին։ ⁴ Դրանք տասներկու հատ էին. երեքը նայում էին հյուսիս, երեքը նայում էին արևմուտք, երեքը նայում էին հարավ, երեքը նայում էին արևելք։ Ավազանը տեղադրված էր դրանց վրա, և դրանց գավակներն ուղղված էին դեպի ներս։ ⁵ Մեծ ավազանի հաստությունը մեկ թիզ էր, նրա շուրթը բաժակի շրթի նման էր, վրան շուշան ծաղիկներ էին քանդակված, և երեք հազար չափ տարողություն ուներ։ Նա այս ամենն ավարտեց։

⁶ Տասը ավազան էլ պատրաստեց. հինգը դրեց աջ կողմը, հինգը՝ ձախ կողմը, որ նրանց մեջ լվանան ողջակեզի համար մատուցվող կենդանիներին, իսկ մեծ ավազանը նրա համար էր, որ քահանաները լվացվեն դրա մեջ։

⁷ Պատրաստեց տասը ոսկե աշտանակներ ըստ պատվիրված օրինակի և դրանք դրեց տաճարում. հինգը՝ աջ կողմը, հինգը՝ ձախ։

⁸ Տասը սեղաններ էլ պատրաստեց ու դրեց տաճարի մեջ. հինգը՝ աջ կողմը, հինգը՝ ձախ։ Պատրաստեց նաև հարյուր ոսկե տաշտեր։

⁹ Պատրաստեց նաև քահանաների սրահը, մեծ սրահը և սրահի դռները. նա դրանց դռները պատեց պղնձով։ ¹⁰ Մեծ ավազանը զետեղեց տաճարի աջ անկյունը՝ ուղղված դեպի արևելք։ ¹¹ Քիրամը պատրաստեց զոհասեղանի մեծ պատառաքաղները, կաթսաները, կասկարաներն ու զոհասեղանի ամբողջ սպասքը։ Նա վերջացրեց այն բոլոր գործերը, որ Սողոմոն արքան հրամայել էր պատրաստել Աստծու տան մեջ։ ¹² Քիրամը պատրաստեց երկու սյուներն ու նրանց վրայի խոյակները, սյուների խոյակների վրայի երկու վերնախարիսխները, երկու վանդակապատ ցանցերը, որ ծածկում էին վերնախարիսխների խոյակները, և որոնք սյուների գլխին էին։ ¹³ Նա պատրաստեց նաև չորս հարյուր ոսկե զանգակներ երկու վանդակապատ ցանցերի համար և նռնաձև զարդերի երկու շարքեր ամեն մի վանդակապատ ցանցի համար, որպեսզի դրանցով ծածկեն սյուների վրա դրված երկու խոյակները։ ¹⁴ Նա պատրաստեց տասը խարիսխներն ու խարիսխների վրա դրված ավազանները, ¹⁵ մեկ ավազանն ու դրա տակ դրված տասներկու զվարակները, ¹⁶ կասկարաները, վերցնելու ձողերը, կաթսաները, մեծ պատառաքաղներն ու դրանց ամբողջ սպասքը. Քիրամը պատրաստեց մաքուր պղնձից և տարավ Սողոմոնի մոտ՝ Տիրոջ տունը։ ¹⁷ Այդ բոլորն արքան ձուլել տվեց Հորդանան գետի ընդարձակ հովտում՝ Սոկքովթթի տան և Սարեթ բնակավայրի միջև, թանձր հողի մեջ։ ¹⁸ Սողոմոնն այս ամբողջ սպասքը մեծ քանակությամբ պատրաստեց, քանի որ պղինձը չափ ու սահման չուներ։ ¹⁹ Սողոմոնը պատրաստեց Տիրոջ տան ամբողջ սպասքը, ոսկե զոհասեղանն ու Առաջավորության հացի սեղանը, ²⁰ աշտանակները և ճրագները, որոնք մաքուր ոսկուց էին պատրաստված և պետք է վառվեին սրբարանի դիմաց, ինչպես որ պատվիրված էր, ²¹ կանթեղները, ճրագի ունելիները, ²² տաշտերը, խնկամաններն ու բուրվառները, որոնք նույնպես մաքուր ոսկուց էին։ Ոսկուց պատրաստեց նաև Սրբություն սրբոց տանող ներսի դուռն ու տաճարի գլխավոր սրահի դռները։

5

¹ Այսպիսով ավարտվեց այն ամբողջ գործը, որ Սողոմոնն արեց Տիրոջ տան համար։ Ապա Սողոմոնը ներս տարավ իր հայր Դավթի սրբությունները, արծաթը, ոսկին ու սպասքը և դրեց Տիրոջ տան գանձարանը։

Ուխտի տապանակը բերվում է տաճար

(Գ Թագ. 8.1-13)

² Այն ժամանակ Սողոմոնը Երուսաղեմում հավաքեց Իսրայելի բոլոր ծերերին, ցեղերի իշխաններին ու իսրայելացիների տոհմերի առաջնորդներին, որ Տիրոջ Ուխտի տապանակը հանեն Դավթի քաղաքից, այսինքն՝ Սիոնից։ ³ Տոնին, այսինքն՝ յոթերորդ ամսին, արքայի մոտ հավաքվեցին Իսրայելի բոլոր տղամարդիկ։ ⁴ Եկան Իսրայելի բոլոր ծերերը։ Բոլոր ղևտացիները վերցրին տապանակը, Վկայության խորանն ու խորանում եղած ամբողջ սուրբ սպասքը, ⁵ և քահանաներն ու ղևտացիները տարան դրանք։ ⁶ Սողոմոն արքան, բոլոր իսրայելացիները, աստվածավախ և տապանակի առջև հավաքված մարդիկ զվարակներ ու ոչխարներ մորթեցին, որոնց թիվն անհնար էր հաշվել շատության պատճառով։ ⁷ Ղևտացիները Տիրոջ Ուխտի տապանակը տարան ներս ու դրեցին իր տեղը՝ տաճարի սրբարանում, այն է՝ Սրբություն սրբոցի մեջ, քերովբեների թևերի տակ։ ⁸ Քերովբեները, իրենց թևերը տարածելով տապանակի վրա, վերևից ծածկում էին տապանակն ու այն վերցնելու ձողերը։ ⁹ Ձողերն այնքան երկար էին, որ դրանց ծայրերը երևում էին Սրբություն սրբոցից։ Դրանք մինչև այսօր էլ այնտեղ են։ ¹⁰ Տապանակի մեջ ոչինչ չկար, բացի այն երկու տախտակներից, որ Մովսեսն էր դրել այնտեղ Քորեբում։ Դրանցով Տերն ուխտ էր դրել իսրայելացիների հետ, երբ նրանք դուրս էին գալիս Եգիպտոսից։

Աստված տեր է դառնում իր տաճարին

¹¹ Երբ քահանաները սրբարանից դուրս եկան (քանի որ այնտեղ գտնվող բոլոր քահանաներն էլ սրբագործվել էին, բայց դեռ չէին դասակարգվել ըստ իրենց ամենօրյա սպասավորության), ¹² սաղմոսերգու բոլոր ղևտացիները՝ Ասափի, Եմանի և Իդիթունի որդիները, նրանց որդիներն ու նրանց եղբայրները, բեհեզե պատմուճաններ հագած, տավիղներով, քնարներով, սրինգներով զոհասեղանի արևելյան կողմը կանգնեցին։ ¹³ Նրանց հետ կային հարյուր քսան քահանաներ, որոնք փող էին հնչեցնում։ Փող հնչեցնողները, սաղմոսերգուները, միաբերան իրենց ձայնը բարձրացնելով, ասացին. «Գովերգե՛ք և օրհնե՛ք Տիրոջը»։ Եվ երբ նրանք փողերի, ծնծղաների ու նվագարանների նվագակցությամբ իրենց ձայնը բարձրացրին և ասացին. «Գովերգե՛ք Տիրոջը, քանզի նա բարի է, և հավիտյան է նրա ողորմածությունը», տաճարը լցվեց Տիրոջ փառքի ամպով, ¹⁴ և քահանաները չէին կարողանում պաշտամունք կատարել ամպի պատճառով, որովհետև Տիրոջ փառքը լցրել էր Աստծու տունը։

6

¹ Այն ժամանակ Սողոմոնն ասաց. «Տե՛ր, դու բնակվում ես մառախուղի մեջ, ² բայց ես տուն շինեցի քո անունով՝ իբրև սրբություն քեզ, պատրաստեցի, որ այնտեղ բնակվես հավիտյան»։

Սողոմոնի խոսքը տաճարի օծման առիթով

(Գ Թագ. 8.14-21)

³ Արքան երեսը դարձրեց դեպի ժողովուրդը, օրհնեց ժողովված բոլոր իսրայելացիներին, մինչդեռ նրանք իր շուրջն էին կանգնած, և ասաց. ⁴ «Օրհնյա՜լ է Տերը՝ Իսրայելի Աստվածը, որն ինչ որ ասել էր իր բերանով իմ հայր Դավթին, այն էլ կատարեց իր ձեռքով։ ⁵ Նա ասել էր. “Այն օրվանից, ինչ իմ ժողովրդին հանեցի Եգիպտոսի երկրից, Իսրայելի բոլոր ցեղերից ոչ մի քաղաք չընտրեցի, որ ինձ համար այնտեղ տուն շինվի, որ իմ անունն այնտեղ լինի, ոչ էլ որևէ մեկին ընտրեցի, որ Իսրայելի իմ ժողովրդի առաջնորդը լինի։ ⁶ Հիմա Երուսաղեմն ընտրեցի, որ իմ անունն այնտեղ լինի, և Դավթին ընտրեցի, որ Իսրայելի իմ ժողովրդի վրա լինի”։ ⁷ Իմ հայր Դավիթը ցանկություն ուներ Տիրոջ՝ Իսրայելի Աստծու անունով տուն շինել, ⁸ բայց Տերն ասաց իմ հայր Դավթին. “Ցանկանում ես իմ անունով տուն կառուցել. լավ է, որ այդ բանը սրտումդ կա։ ⁹ Սակայն դու չէ, որ ինձ համար տուն պիտի շինես, այլ որդիդ, որ քեզնից է ծնվելու, նա է, որ իմ անունով տուն է շինելու”։ ¹⁰ Աստված իր ասած խոսքը կատարեց, և ես ահա հորս փոխարինեցի՝ նստեցի Իսրայելի աթոռին, ինչպես Տերն էր ասել, շինեցի Տիրոջ՝ Իսրայելի Աստծու անունով այս տունը և ¹¹ այնտեղ դրեցի տապանակն այն ուխտի, որ Տերը կնքեց իսրայելացիների հետ»։

Սողոմոնի աղոթքը

(Գ Թագ. 8.22-53)

¹² Սողոմոնը Իսրայելի բոլոր ժողովականների ներկայությամբ կանգնեց Տիրոջ զոհասեղանի առջև և տարածեց իր ձեռքերը։ ¹³ Սողոմոնը պղնձե պատվանդան էր պատրաստել ու դրել տաճարի բակի մեջտեղում։ Նրա երկարությունը հինգ կանգուն էր, լայնությունը՝ հինգ կանգուն, իսկ բարձրությունը՝ երեք կանգուն։ Դրա վրա կանգնելով՝ նա Իսրայելի բոլոր ժողովականների առջև ծնրադրեց և ձեռքերը դեպի երկինք տարածելով՝ ¹⁴ ասաց. «Տե՛ր, Իսրայելի՛ Աստված, չկա քեզ նման աստված երկնքում ու երկրի վրա. դու պահում ես ուխտն ու ողորմածությունը բոլոր նրանց հանդեպ, որոնք ամբողջ սրտով ընթանում են քո առջևից։ ¹⁵ Դու քո ծառային՝ իմ հայր Դավթին տված խոստումդ կատարեցիր. ինչ որ քո բերանով ասել էիր, այսօր քո ձեռքով կատարեցիր։ ¹⁶ Արդ, Տե՜ր, Իսրայելի՛ Աստված, կատարի՛ր այն, ինչ խոստացել էիր իմ հորը՝ քո ծառա Դավթին՝ ասելով. “Իմ առջև երբեք մարդ չի պակասելու քեզ համար, որ նստի Իսրայելի գահին, միայն թե քո որդիները չշեղեն իրենց ճանապարհները և ընթանան իմ առջևից, ինչպես դու ես ընթացել իմ առջևից”։ ¹⁷ Արդ, Տե՜ր, Իսրայելի՛ Աստված, Դավթին ասած խոսքդ թող հաստատվի:

¹⁸ Բայց մի՞թե Աստված իրոք բնակվելու է մարդկանց հետ երկրի վրա։ Եթե երկինքն ու երկինքների երկինքը բավական չեն քեզ տեղավորելու համար, ապա ի՞նչ է իմ շինած այս տունը։ ¹⁹ Արդ, Տե՜ր, Աստվա՜ծ, ուշադրությո՛ւն դարձրու քո ծառայի աղոթքին ու խնդրանքին, լսի՛ր քո ծառայի՝ քո առջև այսօր արած աղաչանքներն ու աղոթքները, ²⁰ որպեսզի քո աչքն ու միտքը օր ու գիշեր լինեն այս տան վրա՝ այն տեղի վրա, որի համար ասացիր, թե քո անունն ես հաստատելու դրա մեջ, որպեսզի լսես քո ծառայի աղոթքը, որ կանի այս տեղում։ ²¹ Արդ, լսի՛ր քո ծառայի և Իսրայելի քո ժողովրդի խնդրանքը, ինչ էլ որ խնդրեն այս տեղում. լսի՛ր երկնքում՝ քո բնակության վայրում, լսի՛ր ու ողորմա՛ծ եղիր։

²² Եթե մի մարդ մեղանչի իր մերձավորի հանդեպ, ու նրանից պահանջեն, որ նա երդում տա, և նա գա կանգնի քո զոհասեղանի առջև՝ այս տան մեջ, ²³ ապա դու երկնքում լսելով՝ կատարի՛ր քո ծառաների դատը, արժանի՛ն հատուցիր անօրենին՝ նրա գլխին թափելով իր արածը, և արդարացրո՛ւ արդարին ու ամեն մեկին հատուցի՛ր ըստ իր արդարության չափի։

²⁴ Եթե Իսրայելը՝ քո ժողովուրդը, քո դեմ մեղանչելու պատճառով թշնամիներից հալածվի, ապա դառնա ու քո անվանը փառք տա, աղոթքի կանգնի ու պաղատի քո առջև այս տան մեջ, ²⁵ դու լսի՛ր երկնքից, քավի՛ր Իսրայելի՝ քո ժողովրդի մեղքերը, վերադարձրո՛ւ նրանց այն երկիրը, որ նրանց ու նրանց հայրերին ես տվել։

²⁶ Եթե նրանք մեղանչեն քո դեմ, և այդ պատճառով երկինքը փակվի, ու անձրև չգա, բայց այս տեղում քեզ աղոթք անեն, փառաբանեն քո անունը և դարձի գան իրենց մեղքերից, քանի որ խոնարհեցրիր նրանց, ²⁷ դու լսի՛ր նրանց երկնքից, քավի՛ր քո ծառաների և Իսրայելի՝ քո ժողովրդի մեղքերը, նրանց ցո՛ւյց տուր բարի ճանապարհը, որով պետք է ընթանան, և քո ժողովրդին որպես ժառանգություն տվածդ երկրին անձրև՛ պարգևիր։

²⁸ Երբ սով կամ մահ լինի երկրի վրա, երաշտ, դեղնախտ, մորեխ կամ թրթուր, և երբ թշնամին նրանց նեղի իրենց իսկ քաղաքների շրջակայքում, եթե որևէ համաճարակ կամ հիվանդություն լինի, ²⁹ երբ որևէ մեկը կամ Իսրայելի քո ողջ ժողովուրդը աղոթք կամ պաղատանք անի և իմանալով իր բորոտությունը կամ հիվանդությունը՝ իր ձեռքերը երկարի դեպի այս տունը, ³⁰ ապա դու երկնքում՝ քո բնակության վայրում, լսի՛ր ու բժշկի՛ր և ամեն մեկին տո՛ւր ըստ իր սրտի, ինչպես որ դու ես ճանաչում նրա սիրտը, քանի որ միայն դու գիտես մարդկանց սրտերը, ³¹ որպեսզի նրանք վախենան քեզնից ու քո ճանապարհներով ընթանան բոլոր այն օրերին, որ կապրեն իրենց հայրերին տրված երկրում։

³² Երբ մի օտարական, որ Իսրայելի քո ժողովրդից չէ, բայց քո մեծ անվան, քո զորեղ ձեռքի, քո հզոր բազկի համար եկել է հեռու տեղից ու աղոթքի կանգնել այս վայրում, ³³ դու լսի՛ր երկնքից՝ քո բնակության վայրից, և արա՛ այն ամենը, ինչ օտարականը կխնդրի քեզնից, որպեսզի աշխարհի բոլոր ժողովուրդները ճանաչեն քո անունը, վախենան քեզնից այնպես, ինչպես Իսրայելը՝ քո ժողովուրդը, և գիտենան, որ քո անունով է կոչվել իմ շինած այս տունը։

³⁴ Երբ քո ժողովուրդը պատերազմի ելնի իր թշնամիների դեմ այն ճանապարհով, որով դու կուղարկես նրանց, և երբ նրանք աղոթեն քեզ՝ իրենց հայացքն ուղղելով դեպի քո այս ընտրած քաղաքն ու դեպի այս տունը, որ շինել եմ քո անվան համար, ³⁵ երկնքից լսի՛ր նրանց պաղատանքներն ու աղոթքները և պաշտպանի՛ր նրանց իրավունքը։

³⁶ Երբ քո դեմ մեղանչեն (քանի որ մարդ չկա, որ մեղք չգործի), և դու հարվածես նրանց ու թշնամիների ձեռքը մատնես և գերեվարվելով տարվեն թշնամիների հեռավոր կամ մոտիկ երկիրը, ³⁷ և եթե գերության տարված երկրում զղջան, դարձի գան ու քեզ աղաչեն իրենց գերության մեջ՝ ասելով. “Մեղք և անօրենություն ենք գործել”, ³⁸ իրենց ամբողջ սրտով ու հոգով դառնան դեպի քեզ իրենց գերության երկրում և մեր հայրերին տված քո երկրի, քո ընտրած քաղաքի ու քո անվան համար իմ շինած տան կողմը նայելով՝ աղոթեն, ³⁹ երկնքից՝ քո բնակության վայրից, լսի՛ր նրանց աղոթքներն ու պաղատանքները, պաշտպանի՛ր նրանց իրավունքը և ների՛ր քո դեմ մեղանչած ժողովրդին։ ⁴⁰ Արդ, Տե՛ր, թող քո աչքերը բաց լինեն և քո ականջները՝ սուր, որ լսես այստեղ արված պաղատանքները։

⁴¹ Արդ, Տե՛ր, Աստվա՛ծ, դու և քո սրբության տապանակը ելեք եկե՛ք ձեր հանգստության վայրը. քո քահանաները, Տե՛ր, Աստվա՛ծ, քո օգնությունը թող հագնեն, և քո որդիները ցնծան բարության մեջ։

⁴² Տե՛ր, Աստվա՛ծ, երես մի՛ դարձրու քո օծյալից, քո ողորմությամբ հիշի՛ր քո ծառա Դավթին»։

7

¹ Երբ Սողոմոնը վերջացրեց աղոթքը, երկնքից կրակ իջավ և լափեց ողջակեզներն ու զոհերը, և Տիրոջ փառքը լցրեց տաճարը։ ² Քահանաներն այդ ժամանակ չէին կարողանում մտնել Տիրոջ տունը, քանզի Տիրոջ փառքը լցրել էր տաճարը։ ³ Բոլոր իսրայելացիները տեսան իջնող կրակն ու Տիրոջ փառքը տաճարի վրա։ Նրանք երեսնիվայր ընկան գետնին՝ սալահատակի վրա, երկրպագեցին և օրհնեցին Տիրոջը, քանզի նա բարի է, իսկ նրա ողորմությունը՝ հավիտյան։

Նվիրաբերումներ Տիրոջը

(Գ Թագ. 8.62-66)

⁴ Արքան և ամբողջ ժողովուրդը Տիրոջ առջև զոհեր մատուցեցին։ ⁵ Սողոմոնը քսաներկու հազար զվարակ և հարյուր քսան հազար արոտի ոչխար զոհ մատուցեց։ Արքան և ամբողջ ժողովուրդը տաճարի նավակատիքն արեցին։ ⁶ Քահանաներն ըստ իրենց սպասավորության պաշտոնի էին կանգնած, իսկ ղևտացիները Դավիթ արքայի՝ Տիրոջն օրհնաբանելու համար ստեղծած նվագարաններով փառաբանում էին Տիրոջը, քանզի Նրա ողորմությունը հավիտյան է։ Նրանք կատարում էին Դավթի հորինած օրհնաբանությունները, իսկ քահանաները նրանց դիմաց փողեր էին հնչեցնում։ Ամբողջ Իսրայելը ոտքի վրա էր։

⁷ Սողոմոնը սրբագործեց Տիրոջ տան բակի կենտրոնը։ Այնտեղ մատուցեց ողջակեզներն ու խաղաղության զոհերի ճարպերը. Սողոմոնի պատրաստած պղնձե զոհասեղանը չէր կարող տեղավորել ողջակեզները, ընծաներն ու ճարպերը։ ⁸ Այդ ժամանակ Սողոմոնը յոթ օր տոն կատարեց։ Բոլոր իսրայելացիները՝ Եմաթի մուտքից մինչև Եգիպտոսի հեղեղատը, շատ մեծ բազմությամբ նրա հետ էին։ ⁹ Ութերորդ օրը հանդիսավոր ժողով արեցին, քանզի զոհասեղանի նավակատիքը յոթ օր տոնեցին, ¹⁰ իսկ յոթերորդ ամսի քսաներեքին նա ժողովրդին ուրախությամբ և բարի սրտով արձակեց իրենց վրանները, որովհետև Տերը բարիք էր գործել Դավթի, Սողոմոնի ու Իսրայելի իր ժողովրդի համար։

Աստծու երկրորդ հայտնությունը Սողոմոնին

(Գ Թագ. 9.1-9)

¹¹ Սողոմոնն ավարտեց Տիրոջ տան և արքունի տան կառուցումը, և ամեն ինչ, որ Սողոմոնի սիրտը կամեցել էր Տիրոջ տան և իր տան համար կատարել, հաջողվեց։

¹² Այդ նույն գիշեր Աստված երևաց Սողոմոնին և ասաց նրան. «Լսեցի քո աղոթքը և այդ տեղն ինձ համար ընտրեցի որպես զոհաբերությունների տուն։ ¹³ Եթե երկինքը փակեմ, ու անձրև չլինի, եթե հրամայեմ, որ մորեխն ուտի ծառերը, եթե մահ առաքեմ իմ ժողովրդին, ¹⁴ և եթե իմ ժողովուրդը, որի վրա իմ անունն է դրված, զղջա, աղոթի և իմ երեսը փնտրի ու հետ դառնա իր չար ճանապարհներից, ես էլ երկնքից կլսեմ, կներեմ նրանց և կբուժեմ նրանց երկիրը։ ¹⁵ Այժմ իմ աչքերը բաց կլինեն, և իմ ականջները՝ սուր, որ լսեմ այս տեղում կատարվող աղոթքը։ ¹⁶ Ահա ընտրեցի և սրբագործեցի այս տունը, որպեսզի իմ անունը հավիտյան այստեղ լինի, և իմ աչքերն ու սիրտն ընդմիշտ այստեղ լինեն։ ¹⁷ Եթե դու իմ առջևից ընթանաս քո հայր Դավթի նման և կատարես այն ամենը, ինչ պատգամել եմ քեզ՝ պահես իմ հրամաններն ու օրենքները, ¹⁸ քո թագավորության աթոռը հաստատուն կպահեմ, ինչպես ուխտ էի դրել քո հայր Դավթի հետ՝ ասելով. “Քեզնից Իսրայելի վրա իշխող մարդ չի պակասելու”։ ¹⁹ Իսկ եթե դուք հետ դառնաք ու մոռանաք իմ հրամաններն ու պատվիրանները, որ ձեր առաջ եմ դրել, գնաք օտար աստվածների պաշտեք ու նրանց երկրպագեք, ²⁰ ես ձեզ կվերացնեմ այն երկրից, որը տվել եմ ձեզ, և այս տունը, որ սրբագործել եմ իմ անվան համար, կմերժեմ իմ ներկայությունից և այն խայտառակ կանեմ բոլոր ազգերի մեջ։ ²¹ Եվ ով անցնի այս բարձրաշեն տան կողքով, կզարմանա ու կասի. “Ինչո՞ւ Տերն այս բանն արեց այս երկրին ու այս տանը”։ ²² Իսկ մարդիկ կպատասխանեն. “Քանի որ նրանք լքեցին Տիրոջը՝ իրենց հայրերի Աստծուն, որը նրանց հանել էր եգիպտացիների երկրից, օտար աստվածներ ընդունեցին և նրանց երկրպագեցին ու ծառայեցին, դրա համար էլ նրանց վրա բերեց այդ բոլոր չարիքները”»։

8

Սողոմոնի շինությունները

(Գ Թագ. 9.10-14)

¹ Քսան տարի հետո (այդ ընթացքում Սողոմոնը կառուցեց Տիրոջ տունն ու իր պալատը) ² Սողոմոնը վերակառուցեց այն քաղաքները, որ Քիրամը տվել էր իրեն, և այնտեղ բնակեցրեց իսրայելացիներին։

Սողոմոնի նվաճումները

(Գ Թագ. 9.15-26)

³ Սողոմոնը եկավ Եմաթ Սովբա բնակավայրը և ամրացրեց այն, ⁴ անապատում կառուցեց Թեդմորը և Եմաթում շինեց ամրություններով քաղաքներ։ ⁵ Նա կառուցեց Վերին Բեթորոնն ու Ներքին Բեթորոնը՝ պարիսպներով, դռներով ու նիգերով ամրացված քաղաքներ, ⁶ նաև Բաալաթն ու իրեն պատկանող բոլոր ամրացված քաղաքները, մարտակառքերի ու հեծյալների բոլոր քաղաքները և այն ամենը, որ Սողոմոնը կամեցավ ըստ իր ցանկության շինել Երուսաղեմում, Լիբանանում և իր ամբողջ թագավորության մեջ։

⁷ Ոչ իսրայելացի բոլոր մարդկանց, որոնք մնացել էին քետացիներից, ամորհացիներից, փերեզացիներից, խևացիներից և հեբուսացիներից, ⁸ Իսրայելի կազմակերպած կոտորածից հետո երկրում վերապրած նրանց որդիներին Սողոմոնը հարկատու դարձրեց, և այդպես է մինչև այսօր։ ⁹ Սողոմոնն իսրայելացիներից իր թագավորության համար ծառաներ չվերցրեց, որովհետև նրանք պատերազմողներ, հզոր իշխաններ, մարտակառքերի ու հեծյալների հրամանատարներ էին։ ¹⁰ Սրանք՝ թվով երկու հարյուր հիսուն հոգի, Սողոմոն թագավորի գլխավոր իշխաններն էին, որ ղեկավարում էին ժողովրդին։

¹¹ Սողոմոնը, փարավոնի դստերը հանելով Դավթի քաղաքից, բերեց այն տունը, որ կառուցել էր նրա համար, քանի որ ասաց. «Իմ կինը չպետք է բնակվի Իսրայելի արքա Դավթի քաղաքում, որովհետև սուրբ է այն վայրը, որտեղ Տիրոջ տապանակն է մտել»։

¹² Այն ժամանակ Սողոմոնը Տիրոջը ողջակեզներ մատուցեց տաճարի դիմաց իր շինած զոհասեղանի վրա, ¹³ որի վրա, ամենօրյա կարգի համաձայն, ըստ Մովսեսի պատվիրանների, ողջակեզ պիտի մատուցվեր շաբաթ օրերին, ամսվա սկզբին ու տարեկան երեք տոներին՝ Բաղարջակերաց տոնին, Շաբաթների տոնին և Տաղավարահարաց տոնին։ ¹⁴ Դավթի կարգադրության համաձայն՝ նա հաստատեց քահանաների դասերը՝ ըստ իրենց սպասավորության. ղևտացիները նշանակվեցին իրենց պարտականությունների վրա, որ օրհներգեն ու ծառայեն քահանաների առջև ըստ յուրաքանչյուր օրվա կարգի։ Ըստ իրենց դասերի՝ դռնապաններ կարգվեցին յուրաքանչյուր դռան վրա, քանզի այդպես էր Աստծու մարդու՝ Դավթի ցուցումը։ ¹⁵ Նրանք զանց չարեցին արքայի այն ցուցումները, որ տրվել էին քահանաների, ղևտացիների, գանձարանի և ամեն ինչի վերաբերյալ։ ¹⁶ Այսպես սկզբից մինչև վերջ ավարտվեց Տիրոջ համար տուն կառուցելու Սողոմոնի ամբողջ գործը։

¹⁷ Այն ժամանակ Սողոմոնը գնաց Գասիոնգաբեր և Ելամ, որը Եդովմի ծովեզերքին էր։ ¹⁸ Քիրամն իր ծառաների միջոցով նավեր ուղարկեց ու մարդիկ, որ ծովի վրա նավարկել գիտեին։ Նրանք Սողոմոնի ծառաների հետ գնացին Սովփերա, այնտեղից չորս հարյուր հիսուն տաղանդ ոսկի բերեցին ու եկան Սողոմոն արքայի մոտ։

9

Սաբայի թագուհու այցելությունը Սողոմոնին

(Գ Թագ. 10.1-13)

¹ Սաբայի թագուհին, լսելով Սողոմոնի համբավը, շատ մեծ շքախմբով և խնկեր, բազում ոսկի ու թանկարժեք քարեր բարձած ուղտերով եկավ Երուսաղեմ, որ Սողոմոնին փորձի հանելուկներով։ Նա եկավ Սողոմոնի մոտ և նրա հետ խոսեց այն ամենի մասին, որ մտքում ուներ։ ² Սողոմոնը պատասխանեց նրա բոլոր հարցերին. և չգտնվեց մի հարց, որին Սողոմոնը չպատասխաներ։ ³ Սաբայի թագուհին, տեսնելով Սողոմոնի իմաստնությունը, նրա կառուցած տունը, ⁴ սեղանների վրա դրված ուտելիքները, նրա պաշտոնյաների նստելը, սպասավորների կեցվածքն ու նրանց հանդերձանքը, նրա մատռվակներին ու նրանց զգեստները և այն ողջակեզները, որ նա մատուցում էր Տիրոջ տանը, ապշեց ⁵ և ասաց արքային. «Ճշմարիտ էր այն, ինչ լսել էի իմ երկրում քո խոսքերի ու քո իմաստնության մասին։ ⁶ Չէի հավատում ասված խոսքերին, մինչև որ չեկա, և աչքերս տեսան, որ ինձ չեն պատմել քո իմաստնության մեծության նույնիսկ կեսի մասին։ Դու ավելի իմաստուն ես, քան լսել էի։ ⁷ Երանելի են քո մարդիկ, երանելի են քո կանայք և այդ ծառաները, որ միշտ քո առաջ կանգնած են ու լսում են քո իմաստնությունը։ ⁸ Օրհնյա՜լ լինի Տերը՝ քո Աստվածը, որ քեզ հավանելով՝ քեզ է դրել իր թագավորության գահին, որպեսզի կառավարես քո ժողովրդին։ Որովհետև Տերը՝ քո Աստվածը, Իսրայելին սիրելու պատճառով ու նրան հավիտյան հաստատելու համար քեզ է նրանց վրա թագավոր դրել, որ իրավունք ու արդարություն գործադրես»։ ⁹ Սաբայի թագուհին արքային հարյուր քսան տաղանդ ոսկի, չափազանց շատ խունկ և թանկարժեք քարեր տվեց։ Սաբայի տիկնոջ՝ Սողոմոն արքային տված խնկի նման խունկ չկար։

¹⁰ Սողոմոնի ծառաներն ու Քիրամի ծառաները Սովփերից Սողոմոնին ոսկի, նոճու փայտ և թանկարժեք քարեր բերեցին։ ¹¹ Արքան նոճու փայտից Տիրոջ տան ու արքայի տան համար աստիճաններ սարքեց, իսկ երգիչների համար՝ քնարներ ու տավիղներ, որոնց նմանը դրանից առաջ Հուդայի երկրում չէր եղել։

¹² Սողոմոն արքան Սաբայի տիկնոջը տվեց ամեն ինչ, որ նա ցանկացավ ու խնդրեց, շատ ավելի, քան այն, ինչ թագուհին տվել էր Սողոմոն արքային։ Եվ թագուհին վերադարձավ իր երկիրը։

Սողոմոն արքայի հարստությունը

(Գ Թագ. 10.14-29)

¹³ Մեկ տարում Սողոմոնի համար բերված ոսկու կշիռը վեց հարյուր վաթսունվեց տաղանդ էր՝ ¹⁴ չհաշված հպատակների ու վաճառականների բերածները։ Սողոմոն արքային ոսկի ու արծաթ էին բերում նաև Արաբիայի բոլոր թագավորները և երկրի կառավարիչները։

¹⁵ Սողոմոն արքան ոսկուց երեք հարյուր կռածո վահան պատրաստեց՝ ամեն մի վահանի համար օգտագործելով վեց հարյուր դահեկան մաքուր ոսկի։ ¹⁶ Ոսկուց պատրաստեց նաև երեք հարյուր կռածո նիզակ՝ յուրաքանչյուր նիզակի համար օգտագործելով երեք հարյուր դահեկան։ Արքան դրանք դրեց Լիբանանի անտառ կոչված տան մեջ։

¹⁷ Արքան փղոսկրից մի մեծ գահ պատրաստեց և այն պատեց մաքուր ոսկով։ ¹⁸ Գահն ուներ ոսկով ծածկված վեց աստիճան։ Գահի նստատեղն այս և այն կողմից ուներ հենաթևեր, իսկ հենաթևերի ծայրին կային երկու առյուծներ։ ¹⁹ Վեց աստիճանների այս և այն կողմերում կային տասներկու առյուծներ։ Այսպիսի գահ երբեք չէր եղել ոչ մի թագավորության մեջ։

²⁰ Սողոմոն արքայի ամբողջ սպասքը ոսկուց էր, իսկ Լիբանանի անտառի տան ամբողջ սպասքը ոսկու շերտով էր պատված։ Սողոմոնի օրոք արծաթը ոչինչ էր համարվում, ²¹ քանի որ Սողոմոն արքայի Թարսիս նավախումբը Քիրամի ծառաների անձնակազմով երկար ճամփորդություններ էր անում։ Երեք տարին մեկ արքայական Թարսիս նավախումբը վերադառնում էր՝ լի ոսկով, արծաթով, փղոսկրով, կապիկներով ու սիրամարգերով։

²² Սողոմոնը բոլոր թագավորներին գերազանցեց ունեցվածքով և իմաստնությամբ։ ²³ Աշխարհի բոլոր թագավորները փափագում էին տեսնել Սողոմոնի երեսը, լսել նրա իմաստնությունը, որն Աստված էր դրել նրա սրտում։ ²⁴ Նրանցից յուրաքանչյուրն ամեն տարի նրա համար ընծաներ էր բերում՝ արծաթե անոթներ, ոսկե անոթներ, պատմուճաններ, զմուռս, խնկեր, ձիեր ու ջորիներ։

²⁵ Սողոմոնն ուներ քառասուն հազար մատակ ձիեր մարտակառքերի համար և տասներկու հազար երիվարներ։ Նա դրանք տեղավորեց մարտակառքերի համար սահմանված քաղաքներում, իսկ մի մասն էլ պահեց իր մոտ՝ Երուսաղեմում։ ²⁶ Նա իշխում էր բոլոր թագավորների վրա՝ Եփրատ գետից մինչև փղշտացիների երկիրն ու մինչև Եգիպտոսի սահմանները։ ²⁷ Արքան ոսկին ու արծաթը հասարակ քարի պես դարձրեց Երուսաղեմում, իսկ մայրի փայտը՝ դաշտի մոլաթզենիների չափ առատ։ ²⁸ Սողոմոնի ձիերը բերվում էին Եգիպտոսից և բոլոր երկրներից։

Սողոմոնի մահը

(Գ Թագ. 11.41-43)

²⁹ Սողոմոնի պատմության մնացած մասերը՝ սկզբից մինչև վերջը, գրված են Նաթան մարգարեի գրվածքներում, սիլոնացի Աքիայի գրվածքներում, Հովել տեսանողի՝ Նաբաթի որդի Հերոբովամին վերաբերող տեսիլքում։ ³⁰ Սողոմոն արքան ամբողջ Իսրայելի վրա թագավորեց քառասուն տարի։ ³¹ Սողոմոնը մեռավ, և նրան թաղեցին իր հոր՝ Դավթի քաղաքում։ Նրա փոխարեն թագավորեց նրա որդին՝ Ռոբովամը։

10

Հյուսիսային ցեղերի ապստամբությունը

(Գ Թագ. 12.1-21)

¹ Ռոբովամը եկավ Սյուքեմ, որովհետև բոլոր իսրայելացիները եկել էին Սյուքեմ՝ նրան թագավոր դարձնելու։ ² Երբ Նաբատի որդի Հերոբովամը, որը Սողոմոն արքայից Եգիպտոս էր փախել ու բնակվել Եգիպտոսում, լսեց այս բանը, վերադարձավ Եգիպտոսից։ ³ Մարդ ուղարկեցին ու կանչեցին նրան։ Հերոբովամը և ողջ Իսրայելը եկան Ռոբովամ արքայի մոտ և ասացին. ⁴ «Քո հայրը ծանրացրել էր մեր լուծը։ Արդ, թեթևացրո՛ւ հորդ նշանակած տաժանակիր աշխատանքն ու մեզ վրա դրված ծանր լուծը, որ քեզ ծառայենք»։ ⁵ Նա նրանց ասաց. «Գնացե՛ք և երեք օրից եկե՛ք ինձ մոտ»։ Ժողովուրդը գնաց։

⁶ Ռոբովամ արքան հավաքեց ծերերին, որոնք իր հոր՝ Սողոմոնի կենդանության օրոք կանգնում էին նրա առաջ, և ասաց. «Ի՞նչ եք կարծում, ի՞նչ խորհուրդ եք տալիս, որ պատասխանեմ այս ժողովրդին»։ ⁷ Նրանք ասացին նրան. «Եթե այսօր այդ ժողովրդի նկատմամբ բարյացակամ լինես, հաճելի լինես և լավ խոսքեր ասես նրանց, քեզ միշտ ծառա կլինեն»։ ⁸ Սակայն նա անտեսեց այն խորհուրդը, որ ծերերը տվել էին իրեն, և խորհուրդ հարցրեց իր հետ մեծացած տարեկից ընկերներից, որոնք իր առջև էին կանգնում։ ⁹ Ասաց նրանց. «Ի՞նչ եք կարծում, ի՞նչ պատասխան տամ այս ժողովրդին, որ ինձ հետ խոսեց՝ ասելով. “Թեթևացրո՛ւ այն լուծը, որ քո հայրը դրեց մեզ վրա”»։ ¹⁰ Նրա հետ մեծացած ընկերները նրան ասացին. «Այսպես կխոսես այն ժողովրդի հետ, որ քեզ ասել է, թե՝ “Քո հայրը ծանրացրեց մեր լուծը, իսկ դու այն թեթևացրո՛ւ մեր վրայից”։ Նրանց այսպես կասես. “Իմ ճկույթն ավելի հաստ է, քան հորս մեջքը։ ¹¹ Արդ, եթե իմ հայրը ձեզ խրատել է ծանր լծով, ապա ես կավելացնեմ ձեր լուծը։ Եթե իմ հայրը խրատել է ձեզ գավազաններով, ապա ես ձեզ կխրատեմ կարիճներով”»։

¹² Հերոբովամը և ամբողջ ժողովուրդը երրորդ օրը եկան Ռոբովամի մոտ, ինչպես որ արքան էր ասել. «Ինձ մո՛տ վերադարձեք երրորդ օրը»։ ¹³ Արքան խստությամբ պատասխանեց՝ անտեսելով ծերերի խորհուրդը. ¹⁴ նրանց հետ խոսեց ըստ երիտասարդների խորհրդի՝ ասելով. «Իմ հայրը ծանրացրեց ձեր լուծը, իսկ ես ավելացնելու եմ այն։ Իմ հայրը գավազաններով էր ձեզ խրատում, իսկ ես ձեզ խրատելու եմ կարիճներով»։ ¹⁵ Արքան չլսեց ժողովրդին, որովհետև կործանումն Աստծուց էր սահմանված, որպեսզի Տերը հաստատի սիլովնացի Աքիայի բերանով իր ասած խոսքերը Նաբատի որդի Հերոբովամի մասին։

¹⁶ Երբ ամբողջ Իսրայելը տեսավ, որ արքան չլսեց իրենց, ժողովուրդը պատասխանեց արքային՝ ասելով.

«Ի՞նչ բաժին ունենք Դավթի հետ,

ի՞նչ ժառանգություն՝ Հեսսեի որդու հետ։

Գնա՛ քո վրանները, ո՜վ Իսրայել,

իսկ դու քո տա՛ն մասին հոգա, ո՛վ Դավիթ»։

Եվ բոլոր իսրայելացիները գնացին իրենց բնակավայրերը։ ¹⁷ Իսկ Հուդայի քաղաքներում ապրող մյուս իսրայելացիները Ռոբովամին դարձրին իրենց թագավոր։ ¹⁸ Ռոբովամ արքան հարկերի վերակացու Ադոնիրամին ուղարկեց իսրայելացիների մոտ, բայց իսրայելացիները քարկոծեցին նրան, ու նա մեռավ։ Ռոբովամ արքան հազիվ կարողացավ իր մարտակառքը բարձրանալ ու փախչել Երուսաղեմ։ ¹⁹ Եվ իսրայելացիները երես դարձրին Դավթի տնից մինչև այսօր։

11

Սամեայի մարգարեությունը

(Գ Թագ. 12.22-24)

¹ Ռոբովամը եկավ Երուսաղեմ, Հուդայի ու Բենիամինի տներից հավաքեց պատերազմելու ընդունակ հարյուր ութսուն հազար երիտասարդներ և պատերազմեց Իսրայելի դեմ, որ թագավորությունն իրեն վերադարձնի։ ² Տերը խոսեց Աստծու մարդ Սամեայի հետ՝ ասելով. ³ «Խոսի՛ր Սողոմոնի որդի Ռոբովամի և Հուդայի ու Բենիամինի բոլոր մարդկանց հետ և ասա՛. ⁴ “Այսպես է ասում Տերը. “Մի՛ ելեք ու մի՛ պատերազմեք ձեր եղբայրների դեմ, ամեն ոք թող վերադառնա իր տունը, որովհետև այս բանն ինձնից եղավ”»։ Նրանք լսեցին Տիրոջ խոսքը և հրաժարվեցին Հերոբովամի վրա արշավելուց։

Ռոբովամն ամրացնում է քաղաքները

(Գ Թագ. 14.21-24)

⁵ Ռոբովամը բնակվեց Երուսաղեմում և պարսպապատ քաղաքներ կառուցեց Հուդայում։ ⁶ Նա շինեց Բեթղեհեմը, Ետամը, Թեքովեն, ⁷ Բեթսուրը, Սոկքովը, Օդողամը, ⁸ Գեթը, Մարիսան, Զիփը, ⁹ Ադովրայիմը, Լաքիսը, Ազեկան, ¹⁰ Սարաան, Եաղոնը և Քեբրոնը՝ պարսպապատ քաղաքներ Հուդայում ու Բենիամինի երկրում։ ¹¹ Նա պարիսպներով ամրացրեց դրանք, հրամանատարներ կարգեց դրանց վրա, ուտելիքի, ձեթի ու գինու ամբարներ շինեց, ¹² բոլոր քաղաքներում վահաններ ու նիզակներ դրեց և չափազանց ամրացրեց դրանք։ Հուդան և Բենիամինը նրանն էին։

Քահանաները և ղևտացիները հարում են Ռոբովամին

¹³ Ամբողջ Իսրայելի մեջ գտնվող քահանաներն ու ղևտացիները երկրի բոլոր ծայրերից նրա մոտ հավաքվեցին։ Ղևտացիները լքեցին իրենց բնակավայրերն ու կալվածքները և գնացին Հուդայի երկիրը՝ Երուսաղեմ, ¹⁴ որովհետև Հերոբովամն ու նրա որդիները նրանց արգելել էին Տիրոջն սպասավորել։ ¹⁵ Հերոբովամն իր պատրաստած պաշտամունքի բարձունքների, կուռքերի, աստվածների ու երինջների վրա քրմեր նշանակեց։ ¹⁶ Նա Իսրայելի ցեղերից հեռացրեց բոլոր նրանց, ովքեր իրենց սիրտը տվել էին Տիրոջը՝ Իսրայելի Աստծուն փնտրելուն։ Նրանք եկան Երուսաղեմ, որ զոհ մատուցեն Տիրոջը՝ իրենց հայրերի Աստծուն, ¹⁷ և զորացրին Հուդայի թագավորությունը։ Սողոմոնի որդի Ռոբովամը երեք տարի հզորացավ, որովհետև նա երեք տարի ընթացավ Դավթի ու Սողոմոնի ճանապարհներով։

Ռոբովամի ընտանիքը

¹⁸ Ռոբովամը կին առավ Դավթի որդի Հերիմութի դուստր Մոլաթին ու Հեսսեի որդի Եղիաբի դուստր Աբիադին։ ¹⁹ Սա Ռոբովամի համար ծնեց երեք որդիներ՝ Հերումին, Սամարիային ու Ալովին։ ²⁰ Դրանից հետո նա ամուսնացավ Աբեսաղոմի դուստր Մաաքայի հետ, որը նրա համար ծնեց Աբիային, Եթթիին, Զիզային և Սալեմովթին։ ²¹ Ռոբովամն իր բոլոր կանանց ու հարճերի մեջ ամենից շատ սիրեց Աբեսաղոմի դուստր Մաաքային։ Նա ուներ տասնութ կին ու վաթսուն հարճ, որոնք նրա համար ծնեցին քսանութ տղաներ ու վաթսուն աղջիկներ։ ²² Ռոբովամը Մաաքայից ծնված Աբիային իշխան կարգեց նրա եղբայրների վրա, քանի որ նպատակ ուներ նրան թագավոր դարձնել։ ²³ Հուդայի ու Բենիամինի երկրների բոլոր սահմաններում և ամրացված քաղաքներում Ռոբովամն ավելի հզոր եղավ, քան իր բոլոր որդիները։ Նա նրանց ուտելիքի խիստ առատ պաշար տվեց և նրանց համար բազում կանայք փնտրեց։

12

Եգիպտոսի Սավսակիմ արքայի հարձակումը Հուդայի վրա

(Գ Թագ. 14.25-28)

¹ Երբ Ռոբովամի թագավորությունը հաստատուն դարձավ ու հզորացավ, նա և նրա հետ նաև բոլոր իսրայելացիներն անտեսեցին Տիրոջ պատվիրանները։ ² Եվ քանի որ մեղանչել էին Տիրոջ դեմ, Ռոբովամի թագավորության հինգերորդ տարում Եգիպտոսի արքա Սավսակիմը հարձակվեց Երուսաղեմի վրա ³ հազար երկու հարյուր մարտակառքերով ու վաթսուն հազար հեծյալներով։ Անթիվ էր Եգիպտոսից նրա հետ եկած բազմությունը՝ լիբիացիներ, տրոգլոդացիներ, եթովպացիներ, ⁴ որոնք տիրեցին Հուդայի ամրակուռ քաղաքներին։ Սավսակիմը եկավ Երուսաղեմ։ ⁵ Սամեա մարգարեն եկավ Ռոբովամի և Հուդայի իշխանների մոտ, որոնք Սավսակիմի ահից հավաքվել էին Երուսաղեմում, և ասաց նրանց. «Այսպես է ասում Տերը. “Դուք ինձ լքեցիք, ուրեմն ես էլ ձեզ մատնելու եմ Սավսակիմի ձեռքը”»։ ⁶ Իսրայելի իշխաններն ու արքան ամաչեցին և ասացին. «Արդար է Տերը»։ ⁷ Երբ Տերը տեսավ, որ զղջացին, ասաց Սամեային. «Նրանք զղջացին, ուրեմն նրանց չեմ կործանի, կարճ ժամանակով նրանց հանգիստ կթողնեմ և իմ զայրույթը Երուսաղեմի վրա չեմ թափի։ ⁸ Այսպիսով նրանք իմ ծառայության տակ կմտնեն և կիմանան, թե ո՛րն է ինձ ծառայելու և երկրային թագավորություններին ծառայելու տարբերությունը»։

⁹ Եգիպտոսի արքա Սավսակիմը եկավ, վերցրեց Տիրոջ տան գանձերն ու արքայի տան գանձերը. բոլորը տարավ։ Նա վերցրեց նաև Սողոմոնի պատրաստած ոսկե վահանները։ ¹⁰ Ռոբովամը դրանց փոխարեն պղնձե վահաններ պատրաստեց և դրանք հանձնեց պահակազորքի զորագլուխներին, որոնք պահպանում էին արքայի դուռը։ ¹¹ Երբ արքան մտնում էր Տիրոջ տունը, մտնում էր նաև պահակազորը՝ վահանները վերցրած, ապա դրանք վերադարձնում էին պահակազորի սենյակ։ ¹² Քանի որ Ռոբովամը զղջաց, Տիրոջ բարկությունը նրանից վերացավ, և նա իսպառ չկործանվեց, որովհետև Հուդայում բարի գործեր էլ կային։

Ռոբովամի թագավորության վախճանը

¹³ Ռոբովամը հզորացավ Երուսաղեմում ու թագավորեց։ Ռոբովամը քառասունմեկ տարեկան էր, երբ գահ բարձրացավ։ Նա տասնյոթ տարի թագավորեց Երուսաղեմում՝ այն քաղաքում, որ Տերն ընտրել էր Իսրայելի բոլոր ցեղերից, որպեսզի իր անունը դնի դրա վրա։ Ռոբովամի ամովնացի մոր անունը Նոոմա էր։ ¹⁴ Ռոբովամը չարիք գործեց, որովհետև նրա սիրտը հակված չէր Տիրոջը փնտրելուն։

¹⁵ Ռոբովամի առաջին և վերջին խոսքերն ու գործերը գրված են Սամեաս մարգարեի ու Ադդով տեսանողի գրքերում։ Ռոբովամի ու Հերոբովամի միջև հարատև պատերազմ էր։ ¹⁶ Ռոբովամը մեռավ ու թաղվեց իր նախնիների մոտ՝ Դավթի քաղաքում, և նրա փոխարեն թագավորեց իր որդին՝ Աբիան։

13

Աբիայի թագավորությունը

(Գ Թագ. 15.1-8)

¹ Հերոբովամի թագավորության տասնութերորդ տարում Հուդայի վրա թագավորեց Աբիան։ ² Նա Երուսաղեմում թագավորեց երեք տարի։ Նրա մայրը Աբեսաղոմի դուստրն էր, անունը՝ Մաաքա։ Աբիայի ու Հերոբովամի միջև պատերազմ էր։ ³ Աբիան պատերազմի պատրաստվեց հզոր մարտիկներով՝ չորս հարյուր հազար զորեղ մարդկանցով։ Հերոբովամը նրա դեմ պատերազմի ելավ ութ հարյուր հազար հզոր, քաջազուն ռազմիկներով։ ⁴ Աբիան վեր բարձրացավ Սոմորոնի լեռից, որը Եփրեմի լեռներից մեկն էր, և ասաց. «Լսե՛ք, Հերոբովա՛մ և բոլո՛ր իսրայելացիներ, ⁵ մի՞թե ձեզ հայտնի չէ, թե Տերը՝ Իսրայելի Աստվածը, Իսրայելի թագավորությունը անբեկանելի ուխտով հավիտյան տվել է Դավթին ու նրա որդիներին։ ⁶ Բայց Նաբատի որդի Հերոբովամը՝ Դավթի որդի Սողոմոնի ծառան, վեր կացավ և ապստամբեց իր տիրոջ դեմ։ ⁷ Նրա մոտ հավաքվեցին չար և անօրեն մարդիկ և ընդդիմացան Սողոմոնի որդի Ռոբովամին։ Ռոբովամը դեռ երիտասարդ էր, երկչոտ սիրտ ուներ և նրա դեմ չելավ։ ⁸ Արդ, դուք կարծում եք, որ դե՞մ կկանգնեք Տիրոջ թագավորությանը, որը Դավթի որդիների ձեռքին է, որովհետև չափազանց շատ զորք ունեք, և ձեզ հետ են ոսկե երինջները, որոնց Հերոբովամը ձեզ համար աստվածներ դարձրեց։ ⁹ Մի՞թե դուք չվռնդեցիք Տիրոջ քահանաներին՝ Ահարոնի որդիներին, ու ղևտացիներին, և ձեզ համար քրմեր ընտրեցիք այդ երկրի ժողովրդի միջից։ Բոլոր նրանք, որ սրբագործվելու համար գալիս էին զվարակներով և յոթ խոյով, դառնում էին չաստվածների քուրմ։ ¹⁰ Մենք Տիրոջը՝ մեր Աստծուն չլքեցինք. նրա քահանաները՝ Ահարոնի որդիները, և ղևտացիները ծառայում են Տիրոջը, ըստ իրենց ամենօրյա սպասավորության կարգի։ ¹¹ Առավոտյան ու երեկոյան Տիրոջը ողջակեզներ են մատուցում, անուշաբույր խնկեր ծխում, սուրբ սեղանի վրա Առաջավորության հաց են դնում, հոգ են տանում ոսկե աշտանակին ու վառում դրա ճրագները, որ երեկոները լուսավորեն։ Մենք պահում ենք Տիրոջ՝ մեր հայրերի Աստծու սպասավորությունը, իսկ դուք լքել եք նրան։ ¹² Ահավասիկ մեզ հետ են Տերը՝ որպես մեր իշխան, նրա քահանաներն ու ազդարարող փողերը՝ պատրաստ ձեր դեմ մարտի հրավեր տալու։ Ո՜վ իսրայելացիներ, մի՞թե կմարտնչեք Տիրոջ՝ մեր հայրերի Աստծու դեմ. հաջողություն չեք ունենա»։

¹³ Հերոբովամը դարանակալներ էր դրել, որ Աբիայի զորքի հետևն անցնեն։ Ինքը կանգնեց Հուդայի մարդկանց առաջ, իսկ դարանակալներն անցան նրանց թիկունքը։ ¹⁴ Հուդայի մարդիկ հետ նայեցին ու տեսան, որ թշնամին կանգնած է իրենց և՛ առջևը, և՛ հետևը։ Նրանք աղաղակեցին Տիրոջը, իսկ քահանաները փողեր հնչեցրին։ ¹⁵ Հուդայի մարդիկ աղաղակ բարձրացրին։ Եվ երբ գոչեցին, Տերն Աբիայի ու Հուդայի առջև կոտորեց Հերոբովամին ու իսրայելացիներին։ ¹⁶ Իսրայելացիները փախան Հուդայի առջևից, և Տերը սրանց մատնեց նրանց ձեռքը։ ¹⁷ Աբիան ու նրա զորքը ծանր հարվածներ հասցրին նրանց։ Իսրայելացիներից հինգ հազար զորավոր մարդ կոտորվեց։ ¹⁸ Այդ օրը իսրայելացիներն ընկճվեցին, իսկ Հուդայի մարդիկ զորացան, քանզի ապավինել էին Տիրոջը՝ իրենց հայրերի Աստծուն։ ¹⁹ Աբիան հալածեց Հերոբովամին ու նրանից գրավեց քաղաքներ՝ Բեթելն ու նրա գյուղերը, Անան ու նրա գյուղերը, Եփրոնն ու նրա գյուղերը, Բեան ու նրա գյուղերը։ ²⁰ Աբիայի օրոք Հերոբովամն այլևս չկարողացավ զորանալ։ Տերը հարվածեց նրան, և նա մեռավ։

²¹ Աբիան հզորացավ. նա տասնչորս կին առավ։ Նա ունեցավ քսաներկու տղա և տասնվեց աղջիկ։ ²² Աբիայի մնացած արարքները, գործերն ու խոսքերը գրված են Ադդով մարգարեի գրքում։

14

¹ Աբիան գնաց իր նախնիների գիրկը. նրան թաղեցին Դավթի քաղաքում։

Ասայի թագավորության սկիզբը

(Գ Թագ. 15.9-24)

Նրա փոխարեն թագավորեց իր որդի Ասան, որի օրոք Հուդայի երկիրը տասը տարի հանգիստ մնաց։ ² Նա բարի և արդար գործեր կատարեց Տիրոջ՝ իր Աստծու առջև։ ³ Նա վերացրեց օտար աստվածների զոհասեղանները, բարձադիր մեհյանները, խորտակեց արձանները և այրեց պաշտամունքային փայտե սյուները։ ⁴ Նա Հուդայի բնակիչներին հրամայեց պաշտել Տիրոջը՝ իրենց հայրերի Աստծուն և կատարել օրենքներն ու պատվիրանները։ ⁵ Նա Հուդայի բոլոր քաղաքներից վերացրեց զոհասեղաններն ու կուռքերը։ Եվ Հուդայի երկրում պարսպապատ քաղաքները խաղաղվեցին, ⁶ քանզի երկիրը խաղաղվել էր, և այն տարիներին պատերազմ չկար նրա դեմ, որովհետև Տերը նրան հանգստություն էր պարգևել։ ⁷ Նա ասաց Հուդայի երկրի մարդկանց. «Եկե՛ք վերակառուցենք այս քաղաքները, պարիսպներ, աշտարակներ, դարպասներ ու նիգեր դնենք, որ տիրենք երկրին, քանզի, ինչպես մենք Տիրոջը՝ մեր Աստծուն, փնտրեցինք, այնպես էլ նա մեզ փնտրեց և բոլոր կողմերից հանգստություն պարգևեց ու հաջողություն տվեց մեզ»։ ⁸ Ասան Հուդայի երկրում վահաններ ու նիզակներ կրող զորք ունեցավ, երեք հարյուր հազար, իսկ Բենիամինի երկրում՝ երկու հարյուր վաթսուն հազար ասպարավորներ ու աղեղնավորներ։ Նրանք բոլորը հզոր պատերազմողներ էին։

Զարեհի ներխուժումը

⁹ Նրանց դեմ ելավ Զարեհ Եթովպացին հազար անգամ հազար զինվորներով ու երեք հարյուր մարտակառքերով և հասավ մինչև Մարիսա։ ¹⁰ Ասան դուրս եկավ նրա դեմ և պատերազմի ճակատ կազմեց Մարիսայի հյուսիսում գտնվող ձորում։ ¹¹ Ասան դիմեց Տիրոջը՝ իր Աստծուն՝ ասելով. «Տե՜ր, քեզ համար դժվար չէ փրկել շատին կամ քչին։ Զորացրո՛ւ մեզ, Տե՜ր, Աստվա՜ծ մեր, որովհետև քեզ ենք ապավինել և քո անունով ենք ելել այս բազմության դեմ։ Ո՜վ Տեր, Աստվա՜ծ մեր, թող մարդը քո դեմ հաղթանակ չտանի»։ ¹² Եվ Տերը Հուդայի առջև հարվածեց եթովպացիներին, ու եթովպացիները փախան։ ¹³ Ասան և իր զորքը հալածեցին նրանց մինչև Գեդովր, և եթովպացիներն այնպես կոտորվեցին, որ նրանցից ոչ մեկը ողջ չմնաց, քանի որ կոտորվեցին Տիրոջ ու նրա զորության առջև։ Հուդայի մարդիկ շատ ավար վերցրին ¹⁴ և կործանեցին Գեդովրի շուրջը գտնվող նրանց գյուղերը, քանզի Տիրոջից հասած արհավիրքն էր պատել նրանց։ Նրանք ավարառության ենթարկեցին նրանց բոլոր քաղաքները, քանի որ հարուստ ավար կար դրանց մեջ։ ¹⁵ Նրանք նաև ավարառության ենթարկեցին նրանց հոտերի վրանները, կոտորեցին ամազոնուհիներին, վերցրին բազում ոչխարներ ու ուղտեր և վերադարձան Երուսաղեմ։

15

Ասայի բարեկարգությունները

¹ Տիրոջ հոգին իջավ Ադադի որդի Ազարիայի վրա։ ² Նա, կանգնելով Ասայի և ամբողջ Հուդայի ու Բենիամինի ժողովրդի առջև, ասաց. «Լսե՛ք ինձ, ո՛վ Ասա և ամբողջ Հուդայի ու Բենիամինի մարդի՛կ։ Տերը ձեզ հետ է, քանի որ դուք նրա հետ եք։ Արդ, եթե դուք նրան փնտրեք, նա կհայտնվի ձեզ, և եթե լքեք նրան, նա էլ ձեզ կլքի։ ³ Երկար ժամանակ Իսրայելը եղել է առանց ճշմարիտ Աստծու, առանց քահանայի, որ ուսուցաներ, և առանց օրենքի, ⁴ բայց երբ դարձավ դեպի Տերը՝ Իսրայելի Աստվածը, Տերը հայտնվեց նրանց։ ⁵ Այդ ժամանակներում ապահովություն չկար դուրս եկողի ու ներս մտնողի համար, քանզի Տիրոջ սարսափն էր ընկել գավառների բոլոր բնակիչների վրա։ ⁶ Ազգը ազգի դեմ էր պատերազմում, և քաղաքը՝ քաղաքի, քանի որ Աստված ամեն տեսակ նեղություններով զարհուրեցրել էր նրանց։ ⁷ Արդ, դուք զորացե՛ք, ու ձեր ձեռքերը թող չթուլանան, քանզի ձեր գործերը վարձ են ունենալու»։

⁸ Երբ Ասան լսեց այս խոսքերը և Ազարիա մարգարեի մարգարեությունը, զորացավ և Հուդայի ու Բենիամինի երկրներից և այն քաղաքներից, որ գրավել էր Եփրեմի լեռան վրա, դուրս նետեց բոլոր կուռքերը։ Նա կատարեց նաև Տիրոջ տաճարի առջևում գտնվող Տիրոջ զոհասեղանի նավակատիքը։ ⁹ Նա ժողովեց Հուդայի ու Բենիամինի մարդկանց, ինչպես նաև Եփրեմի, Մանասեի և Շմավոնի ցեղերից նրանց մոտ գտնվող պանդուխտներին, քանզի շատերը, տեսնելով որ Տերը՝ նրանց Աստվածը, նրա հետ է, Իսրայելից անցել էին նրա կողմը։ ¹⁰ Ասայի թագավորության տասնհինգերորդ տարվա երրորդ ամսին նրանք հավաքվեցին Երուսաղեմում։ ¹¹ Այդ օրը նա բերված ավարից Տիրոջ համար յոթ հարյուր զվարակ ու յոթ հազար ոչխար զոհաբերեց։ ¹² Նա ուխտ դրեց, որ Տիրոջը՝ իրենց Աստծուն, պետք է պաշտեն ամբողջ սրտով և ամբողջ հոգով։ ¹³ Իսկ ով չէր պաշտի Տիրոջը՝ Իսրայելի Աստծուն, պետք է մեռներ՝ երիտասարդ թե ծեր, տղամարդ թե կին։ ¹⁴ Նրանք բարձր ձայնով ու եղջերափող հնչեցնելով երդվեցին Տիրոջը։ ¹⁵ Ամբողջ Հուդան ուրախացավ երդման համար, քանզի իրենց ամբողջ սրտով երդվեցին և հոժարակամ փնտրեցին Նրան, ու հայտնվեց նրանց, և Տերը համատարած հանգստություն պարգևեց նրանց։ ¹⁶ Ասան իր մորը՝ Մաաքային, հեռացրեց, քանի որ Աստարտի քրմուհի էր, ու խորտակելով կուռքը՝ այրեց Կեդրոնի հեղեղատում։ ¹⁷ Սակայն պաշտամունքի բարձունքները չվերացվեցին. դրանք տակավին կային Հուդայում ու Իսրայելում, թեև Ասայի սիրտն իր կյանքի բոլոր օրերին ուղիղ էր։ ¹⁸ Նա տաճար տարավ իր նախահայր Դավթի սրբությունները և Տիրոջ՝ Աստծու սրբությունները՝ արծաթ, ոսկի ու սպասք։ ¹⁹ Պատերազմ չեղավ մինչև Ասայի թագավորության երեսունհինգերորդ տարին։

16

Ասայի պատերազմը Իսրայելի Բաաս արքայի դեմ

(Գ Թագ. 15.16-22)

¹ Ասայի թագավորության երեսունութերորդ տարում Իսրայելի Բաաս արքան հարձակվեց Հուդայի վրա։ Նա կառուցեց Հռաման, որ փակի Հուդայի արքա Ասայի ելումուտը։ ² Ասան, ոսկի ու արծաթ վերցնելով Տիրոջ տան և թագավորական տան գանձերից, ուղարկեց ասորիների արքային՝ Ադերի որդուն, որ բնակվում էր Դամասկոսում, և ասաց. ³ «Դաշի՛նք կնքիր իմ ու քո միջև, ինչպես որ կար իմ հոր ու քո հոր միջև։ Ահավասիկ ես քեզ արծաթ ու ոսկի եմ ուղարկում, որ հետ դարձնես Իսրայելի Բաաս արքային, որպեսզի նա ինձնից հեռանա»։ ⁴ Ասորիների արքան՝ Ադերի որդին, լսեց նրան և իր զորքի իշխաններին ուղարկեց Իսրայելի քաղաքների դեմ, որոնք հարված հասցրին Ավոնին, Դանին, Աբելմայինին և Նեփթաղիմ գավառի շրջակա բոլոր բնակավայրերին։ ⁵ Երբ Բաասը լսեց այդ մասին, հրաժարվեց Հռաման կառուցելուց, և նրա այդ գործը կանգ առավ։ ⁶ Ասա արքան բերեց Հուդայի բոլոր մարդկանց և տանելով Բաասի կառուցած Հռամայի քարերն ու փայտը՝ դրանցով կառուցեց Գաբաան ու Մասփան։

Անանիա մարգարեն

⁷ Այն ժամանակ Հուդայի Ասա արքայի մոտ եկավ Անանիա մարգարեն և ասաց նրան. «Քանի որ ապավինեցիր ասորիների արքային և ոչ թե Տիրոջը՝ քո Աստծուն, այդ պատճառով Իսրայելի արքայի զորքը փրկվեց քո ձեռքից։ ⁸ Մի՞թե եթովպացիներն ու լիբիացիները մեծաթիվ զորք չունեին և համարձակությամբ չհարձակվեցին չափազանց շատ հեծյալներով։ Եվ որովհետև դու ապավինել էիր Տիրոջը, Տերը նրանց քո ձեռքը մատնեց, ⁹ քանի որ Տիրոջ աչքերը նայում են ամբողջ երկրին՝ զորացնելու բոլոր նրանց, որոնց սրտերն ուղիղ են իր հանդեպ։ Արդ, քանի որ դու այդ բանն անտեսեցիր, սրանից հետո պատերազմներ ես ունենալու»։ ¹⁰ Ասան զայրացավ մարգարեի վրա և նրան բանտարկեց, որովհետև այդ բանի համար բարկացել էր։ Այդ ժամանակ Ասան նաև սկսեց դաժան վերաբերվել ժողովրդին։

Ասայի թագավորության վախճանը

(Գ Թագ. 15.9-15)

¹¹ Ասայի առաջին և վերջին գործերը գրի են առնված Հուդայի ու Իսրայելի թագավորների գրքում։ ¹² Ասայի ոտքերը թուլացան իր թագավորության երեսունիններորդ տարում. նա ծանր հիվանդացավ։ Իր հիվանդության ժամանակ նա Տիրոջը չապավինեց, այլ բժիշկներին։ ¹³ Ասան վախճանվեց իր թագավորության քառասունմեկերորդ տարում և գնաց իր նախնիների գիրկը։ ¹⁴ Նրան թաղեցին այն գերեզմանում, որ իր համար փորել էր տվել Դավթի քաղաքում։ Նրան գահավորակի վրա դրեցին, առատ խնկերով ու զանազան յուղերով օծեցին ու շատ մեծ հուղարկավորությամբ թաղեցին։

17

Հովսափատը թագավոր. նրա հավատարմությունը Տիրոջ հանդեպ

¹ Ասայի փոխարեն թագավորեց իր որդին՝ Հովսափատը։ Հովսափատն իր իշխանությունը զորացրեց Իսրայելի դեմ։ ² Նա զորքեր դրեց Հուդայի բոլոր ամրացված քաղաքներում և հրամանատարներ նշանակեց Եփրեմի բոլոր քաղաքներում, որոնք իր հայր Ասան էր գրավել։ ³ Տերը Հովսափատի հետ էր, քանզի նա ընթացավ իր հոր այն ճանապարհներով, որ նա որդեգրել էր իր իշխանության սկզբում. կուռքեր չպաշտեց, ⁴ այլ Տիրոջը՝ իր հոր Աստծուն պաշտեց, իր հոր պատվիրաններով առաջնորդվեց և ոչ թե Իսրայելի թագավորության նման վարվեց։ ⁵ Նրա թագավորությունը բարգավաճեց նրա ձեռքում. ամբողջ Հուդան Հովսափատին ընծաներ էր տալիս, և նա մեծ հարստություն ու փառք ձեռք բերեց։ ⁶ Նրա սիրտը հզորացավ Տիրոջ ճանապարհներին, և նա Հուդայի երկրից պաշտամունքի բարձունքներն ու պաշտամունքային փայտե սյուներն էլ վերացրեց։

⁷ Իր թագավորության երրորդ տարում նա իր իշխաններին ու զորականներին՝ Աբդիային, Զաքարիային, Նաթանայելին ու Միքեային ուղարկեց ուսուցանելու Հուդայի քաղաքներում։ ⁸ Նրանց հետ էին ղևտացիներ Սամուիան, Նաթանիան, Զաբդիան, Ասիելը, Սեմիրամովթը, Հովնաթանը, Ադոնիան և Տաբադոնիան, բոլորն էլ ղևտացիներ։ Նրանց հետ էին նաև Եղիսամա ու Հովրամ քահանաները։ ⁹ Նրանք ուսուցանում էին Հուդայում՝ իրենց հետ ունենալով Տիրոջ օրենքների գիրքը։ Նրանք անցնում էին Հուդայի քաղաքներով և ուսուցանում ժողովրդին։

Հովսափատի հզորությունը

¹⁰ Տիրոջ սարսափն էր պատել Հուդայի շուրջը գտնվող երկրների թագավորներին, ու նրանք ոչ մի պատերազմ չէին մղում Հովսափատի դեմ։ ¹¹ Այլազգիները Հովսափատին բերում էին ընծաներ՝ ոսկի, արծաթ ու այլ նվերներ, իսկ արաբները նրան բերում էին յոթ հազար յոթ հարյուր խոյ և յոթ հազար յոթ հարյուր նոխազ։ ¹² Հովսափատը գնալով ավելի էր հզորանում։ Նա Հուդայում տներ ու ամրացված քաղաքներ շինեց։ ¹³ Նա բազում գործեր կատարեց Հուդայում։ Հզոր պատերազմողներ կային Երուսաղեմում։ ¹⁴ Նրանց թիվը, ըստ նրանց գերդաստանների, այս էր. Հուդայի ցեղի հազարապետներն էին Եդնա իշխանը, որն ուներ երեք հարյուր հազար ուժեղ զինվոր։ ¹⁵ Նրանից հետո Հովնան իշխանն էր, որն ուներ երկու հարյուր ութսուն հազար զինվոր։ ¹⁶ Նրանից հետո Զաքարիայի որդի Ամասիան էր, որը Տիրոջ նվիրյալն էր։ Նա ուներ երկու հարյուր հազար ուժեղ զինվոր։ ¹⁷ Բենիամինի ցեղից էր հզոր Եղիադան, որն ուներ երկու հարյուր հազար աղեղնավորներ ու պարսավորներ։ ¹⁸ Նրանից հետո Հովզաբադն էր, որն ուներ հարյուր ութսուն հազար հզոր պատերազմողներ։ ¹⁹ Սրանք էին արքային ծառայողները՝ չհաշված նրանց, որոնց արքան կարգել էր ամբողջ Հուդայի ամրացված քաղաքներում։

18

Հովսափատի դաշինքը Աքաաբի հետ

(Գ Թագ. 22.1-28)

¹ Հովսափատն է՛լ ավելի շատ հարստություն ու մեծ փառք ունեցավ և խնամություն արեց Աքաաբի տան հետ։ ² Տարեվերջին նա գնաց Աքաաբի մոտ՝ Սամարիա, և Աքաաբը նրա ու նրա հետ եկած զորքի համար շատ ոչխար ու զվարակ մորթեց և փորձեց նրան համոզել, որ միասին հարձակվեն Գաղաադի Ռամովթ քաղաքի վրա։ ³ Իսրայելի արքա Աքաաբն ասաց Հուդայի արքա Հովսափատին. «Ինձ հետ Գաղաադի Ռամովթ քաղաքի վրա կհարձակվե՞ս»։ Նա ասաց. «Ես ու դու նույնն ենք. և ինչպես քո զորքն է, այդպես էլ իմ զորքը կլինի քեզ հետ պատերազմում»։

Մարգարեները հաջողություն են կանխատեսում

⁴ Հովսափատն ասաց Իսրայելի արքային. «Այսօր հարցնենք Տիրոջը»։ ⁵ Իսրայելի արքան հավաքեց Իսրայելի մարգարեներին՝ չորս հարյուր մարդ, և հարցրեց նրանց. «Գաղաադի Ռամովթ քաղաքի դեմ պատերազմի գնա՞մ, թե՞ հետ կանգնեմ»։ Նրանք ասացին. «Գնա՛, և Աստված այն արքայի ձեռքը կմատնի»։ ⁶ Հովսափատն ասաց. «Այստեղ Տիրոջ ուրիշ մարգարե չկա՞, որ նրան էլ հարցնենք»։ ⁷ Իսրայելի արքան ասաց Հովսափատին. «Մի ուրիշ մարդ էլ կա, որի միջոցով կարելի է Տիրոջը հարցնել, բայց ես ատում եմ նրան, որովհետև նա ինձ համար լավ բան չի մարգարեանում, և նրա բոլոր օրերը չարությամբ են լցված։ Դա Հեմլայի որդի Միքիան է»։ Հովսափատն ասաց. «Թող արքան այդպես չխոսի»։

⁸ Եվ Իսրայելի արքան մի ներքինի կանչեց ու ասաց. «Շտապ այստե՛ղ բեր Հեմլայի որդի Միքիային»։ ⁹ Իսրայելի արքան և Հուդայի Հովսափատ արքան, պատմուճանները հագած, ամեն մեկը նստել էր իր գահին։ Նրանք նստել էին Սամարիայի դարպասի առջև՝ մի ընդարձակ տեղ, և բոլոր մարգարեները նրանց առջև մարգարեանում էին։ ¹⁰ Քանանի որդի Սեդեկիան, որ երկաթե եղջյուրներ էր պատրաստել, ասաց. «Այսպես է ասում Տերը. “Սրանցով պիտի հարվածես ասորիներին, մինչև բնաջնջես նրանց”»։ ¹¹ Բոլոր մարգարեները նույնն էին մարգարեանում՝ ասելով. «Հարձակվի՛ր Գաղաադի Ռամովթ քաղաքի վրա, հաջողություն կունենաս, և Տերն այն արքայի ձեռքը կհանձնի»։

¹² Սուրհանդակը, որ գնացել էր Միքիային կանչելու, խոսեց նրա հետ և ասաց. «Ահա մարգարեները միաբերան բարին գուշակեցին արքայի համար. դու էլ նրանց ասածի պես մի բա՛ն ասա, լավ բա՛ն գուշակիր»։ ¹³ Միքիան ասաց. «Կենդանի է Տերը. ինչ որ Աստված ինձ ասի, այն էլ կասեմ»։

¹⁴ Նա եկավ արքայի մոտ, և արքան նրան ասաց. «Միքիա՛, Գաղաադի Ռամովթ քաղաքի վրա հարձակվե՞մ, թե՞ հետ կանգնեմ»։ Նա ասաց. «Հարձակվի՛ր և հաջողություն կգտնես, նրանք ձեր ձեռքը կմատնվեն»։ ¹⁵ Սակայն արքան նրան ասաց. «Քանի անգամ եմ քեզ երդվել տվել, որ Տիրոջ անունով ճշմարտությունից բացի ինձ այլ բան չասես»։ ¹⁶ Միքիան ասաց. «Տեսա, որ իսրայելացիները ցրված են լեռների վրա հովիվ չունեցող ոչխարների պես, և Տերն ասաց. “Սրանք առաջնորդ չունեն, թող ամեն մարդ իր տունը վերադառնա խաղաղությամբ”»։ ¹⁷ Իսրայելի արքան ասաց Հովսափատին. «Քեզ չասացի՞, որ նա ինձ համար բարի գուշակություն չի անի, այլ չար»։ ¹⁸ Իսկ Միքիան ասաց. «Այդպես չէ։ Լսե՛ք Տիրոջ խոսքը։ Ես տեսա Տիրոջը, որ նստած էր իր աթոռին, և երկնքի բոլոր զորքերը կանգնած էին նրա աջ ու ձախ կողմերում։ ¹⁹ Տերն ասաց. “Ո՞վ կխաբի Իսրայելի արքա Աքաաբին, որ վեր կենա ու հարձակվի Գաղաադի Ռամովթ քաղաքի վրա”։ Մեկն այսպես խոսեց, մյուսը՝ այնպես։ ²⁰ Մի ոգի ելավ ու կանգնելով Տիրոջ առջև՝ ասաց. “Ես կխաբեմ նրան”։ Տերն ասաց. “Ինչպե՞ս”։ ²¹ Նա ասաց. “Ես կգնամ ու սուտ ոգի կլինեմ նրա բոլոր մարգարեների բերանում”։ Տերն ասաց. “Դու կխաբես նրան, դու կարող ես, ուրեմն գնա՛ և այդպե՛ս արա”։ ²² Ահա Տերը սուտ ոգի է դրել քո այդ մարգարեների բերանում. Տերը քեզ համար վատ բան է գուշակել»։

²³ Այն ժամանակ Քանանի որդի Սեդեկիան, մոտենալով Միքիային, հարվածեց նրա ծնոտին ու ասաց. «Ո՞ր ճանապարհով Տիրոջ ոգին անցավ իմ մոտով և խոսեց քեզ հետ»։ ²⁴ Միքիան ասաց. «Ահա դու կտեսնես այն օրը, երբ թաքնվելու համար սենյակից սենյակ պիտի մտնես»։

²⁵ Իսրայելի արքան ասաց. «Բռնե՛ք Միքիային, հե՛տ տարեք քաղաքագլուխ Սեմերի ու արքայորդի իշխան Հովասի մոտ ²⁶ և ասացե՛ք. “Այսպես է ասում արքան. “Սրան բա՛նտ դրեք, և նա թող մի կտոր հացով ու մի կում ջրով սնվի, մինչև որ ես խաղաղությամբ վերադառնամ”»։ ²⁷ Միքիան ասաց. «Եթե իրոք խաղաղությամբ վերադառնաս, ուրեմն Տերը ինձ հետ չի խոսել։ Ո՜վ ժողովուրդ, բոլորդ լսե՛ք»։

Ռազմի դաշտում

(Գ Թագ. 22.29-35)

²⁸ Իսրայելի արքան ու Հուդայի արքա Հովսափատը հարձակվեցին Գաղաադի Ռամովթ քաղաքի վրա։ ²⁹ Իսրայելի արքան ասաց Հովսափատին. «Ծպտի՛ր ինձ, որ այդպես մտնեմ պատերազմի մեջ, իսկ դու հագի՛ր իմ պատմուճանը»։ Իսրայելի արքան ծպտվեց և մտավ պատերազմի մեջ։ ³⁰ Ասորիների արքան իր մարտակառքերի հրամանատարներին, որոնք իր հետ էին, ասաց. «Մի՛ կռվեք ո՛չ շարքայինի, ո՛չ էլ նրանց մեծավորների դեմ, այլ միայն Իսրայելի արքայի դեմ»։ ³¹ Երբ մարտակառքերի հրամանատարները տեսան Հովսափատին, ասացին. «Սա է Իսրայելի արքան», և շրջապատեցին նրան, որ կռվեն նրա դեմ։ Սակայն Հովսափատն աղաղակեց, ու Տերը փրկեց նրան։ Աստված նրանց հեռացրեց նրանից։ ³² Երբ մարտակառքերի հրամանատարները տեսան, որ նա Իսրայելի արքան չէ, նրան հետապնդելուց դադարեցին։ ³³ Մի մարդ ամբողջ ուժով լարեց աղեղը և լանջապանակի միջով խոցեց Իսրայելի արքայի թոքերը։ Նա ասաց իր ներքինուն. «Կառքը հե՛տ դարձրու և ինձ հանի՛ր պատերազմի դաշտից, որովհետև վիրավոր եմ»։ ³⁴ Այդ օրը պատերազմը սաստկացավ, և Իսրայելի արքան մինչև երեկո մնաց իր մարտակառքի վրա՝ ասորիների դիմաց, և արեգակի մայր մտնելու ժամանակ մեռավ։

19

Հովսափատը Հուդայում դատավորներ է նշանակում

¹ Հուդայի արքա Հովսափատը խաղաղությամբ վերադարձավ իր տունը՝ Երուսաղեմ։ ² Նրան ընդառաջ եկավ Անանիա մարգարեի որդի Հեուն և ասաց Հովսափատ արքային. «Պե՞տք էր, որ մեղավորին օգնեիր կամ Տիրոջ ատելի մարդուն բարեկամ լինեիր։ Այդ պատճառով քեզ վրա իջավ Տիրոջ բարկությունը, ³ բայց քանի որ դու բարի գործեր էլ էիր կատարել՝ Հուդայից վերացրել էիր սրբազան անտառները և քո սիրտն ուղղել էիր Տիրոջը փնտրելուն, Տերը քեզ փրկեց»։

⁴ Հովսափատը բնակվեց Երուսաղեմում։ Նա կրկին դուրս եկավ ժողովրդի մեջ Բերսաբեեից մինչև Եփրեմի լեռը և մարդկանց վերստին դարձրեց դեպի Տերը՝ իրենց հայրերի Աստվածը։ ⁵ Նա Հուդայի բոլոր ամրացված քաղաքներում, քաղաք առ քաղաք դատավորներ կարգեց։ ⁶ Նա ասաց դատավորներին. «Զգո՛ւյշ եղեք, թե ի՛նչ եք անում, որովհետև ոչ թե մարդկային օրենքով եք դատում, այլ Տիրոջ։ Արդարություն պետք է ունենաք։ ⁷ Արդ, Տիրոջ երկյուղը թող ձեզ վրա լինի. պահե՛ք Օրենքը և գործադրե՛ք, քանզի Տերը՝ մեր Աստվածը, անիրավություն և կողմնակալություն չի անում և չի կաշառվում»։

⁸ Հովսափատը քահանաներից, ղևտացիներից և Իսրայելի տոհմապետերից դատավորներ կարգեց նաև Երուսաղեմում, որ կատարեն Տիրոջ դատաստանը՝ դատելու Երուսաղեմի բնակիչներին։ ⁹ Նա նրանց պատվիրեց՝ ասելով. «Տիրոջ երկյուղով, ճշմարտությամբ ու կատարյալ սրտով այսպես կվարվեք. ¹⁰ եթե իրենց քաղաքներում բնակվող ձեր եղբայրներից որևէ մեկը արյան դիմաց արյան, օրենքին ու պատվիրանին, իրավունքներին ու դատաստաններին վերաբերող գործով դիմի ձեզ, ապա բացատրե՛ք նրանց, որ չմեղանչեն Աստծու դեմ, և ո՛չ ձեր, ո՛չ էլ ձեր եղբայրների վրա բարկություն չիջնի։ Այսպես արե՛ք և չեք մեղանչի։ ¹¹ Եվ ահա Ամարիա քահանան Տիրոջ բոլոր գործերում ձեր առաջնորդն է, Իսմայելի որդի Զաբդիան Հուդայի տան առաջնորդն է արքայի բոլոր գործերում, իսկ դպիրներն ու ղևտացիները ձեր կողքին են. զորացե՛ք ու գործե՛ք, և Տերը բարուն աջակից պիտի լինի»։

20

Հարձակում Հուդայի վրա. Հովսափատի աղոթքը

¹ Դրանից հետո ամովնացիներն ու մովաբացիները, նրանց հետ նաև մինեցիներից ոմանք եկան Հովսափատի դեմ պատերազմելու։ ² Եկան ու այդ բանը հայտնեցին Հովսափատին՝ ասելով. «Քեզ վրա մեծ բազմություն է հարձակվում ծովի այն կողմից՝ Ասորիքից, և ահա նրանք Ասասան-Թամարում են, այսինքն՝ Ենգադդիում»։ ³ Հովսափատը վախեցավ, երեսն ուղղելով դեպի Տերը՝ աղոթեց և ամբողջ Հուդայում ծոմ հայտարարեց։ ⁴ Հուդայի բնակիչները հավաքվեցին, որ դիմեն Տիրոջը. Հուդայի բոլոր քաղաքներից եկան Տիրոջը դիմելու։ ⁵ Հովսափատը Երուսաղեմում՝ Տիրոջ տանը, դրա նոր գավթի դիմաց կանգնեց Հուդայի ժողովականների մեջ ⁶ ու աղոթեց. «Ո՜վ Տեր, մեր հայրերի՛ Աստված, չէ՞ որ դու ես Աստված երկնքում, որ տիրում ես հեթանոս ազգերի բոլոր թագավորությունների վրա. քո ձեռքում է իշխանության ուժը, և ոչ ոք չի կարող քեզ դեմ կանգնել։ ⁷ Չէ՞ որ դու ես, Տե՜ր, որ Իսրայելի քո ժողովրդի առաջ ոչնչացրիր այս երկրի բնակիչներին և երկիրը հավիտյան տվեցիր քո սիրելի Աբրահամի հետնորդներին։ ⁸ Նրանք բնակվեցին այստեղ և այստեղ էլ շինելով քեզ նվիրված սրբարանը՝ ասացին. ⁹ “Եթե մեզ վրա գան չարիք, սուր, դատաստան, մահ ու սով, կկանգնենք այս տան առջև և քո առջև, քանզի քո անունը այս տան վրա է, քեզ կդիմենք մեր նեղության մեջ, և դու կլսես ու կփրկես մեզ”։ ¹⁰ Եվ արդ, ահա ամովնացիները, մովաբացիները և Սեիր լեռան բնակիչները, որոնց երկրով թույլ չտվեցիր անցնել, երբ իսրայելացիները Եգիպտոսից դուրս եկան և շեղեցին իրենց ճանապարհը նրանցից, որ չկոտորեն նրանց, ¹¹ ահավասիկ նրանք հանդգնել են մեզ վրա հարձակվել ու մեզ հանել ժառանգություն ստացած մեր երկրից, որը դու ես տվել մեզ։ ¹² Ո՜վ Տեր, մեր Աստվա՛ծ, մի՞թե նրանց դատաստանը չես տեսնելու։ Չէ՞ որ մենք զորություն չունենք այս մեծ բազմության դեմ կանգնելու և չգիտենք, թե ի՛նչ անենք նրանց դեմ։ Մեր աչքերը քեզ են ուղղված»։ ¹³ Հուդայի ողջ բնակչությունը, նաև երեխաներն ու կանայք կանգնած էին Տիրոջ առջև։

Տերը հաղթանակ է տալիս իսրայելացիներին

¹⁴ Տիրոջ հոգին հավաքված ժողովրդի մեջ իջավ Ասափի որդիներից ղևտացի Մաթանիայի որդի Եղիելի որդի Բանիայի որդի Զաքարիայի որդի Օզիելի վրա, ¹⁵ և նա ասաց. «Լսե՛ք, Հուդայի՛ մարդիկ, Երուսաղեմի՛ բնակիչներ և Հովսափա՛տ արքա, Տերը ձեզ այսպես է ասում. “Մի՛ վախեցեք ու մի՛ զարհուրեք այս մեծ բազմության պատճառով, քանզի պատերազմը ձերը չէ, այլ Աստծունը”։ ¹⁶ Վաղը ևեթ հարձակվե՛ք նրանց վրա։ Ահա նրանք իջնում են Ասերի զառիվայրով, և դուք նրանց կգտնեք Հերիելի անապատում գտնվող գետի եզերքին։ ¹⁷ Դուք չէ, որ այնտեղ պիտի պատերազմեք. իմացե՛ք ու կտեսնեք ձեզ հետ եղող Տիրոջ փրկությունը։ Հուդա՛ և Երուսաղե՛մ, մի՛ վախեցեք ու մի՛ զարհուրեք՝ վաղը նրանց դեմ ելնելու, քանի որ Տերը ձեզ հետ է»։ ¹⁸ Հովսափատը, ամբողջ Հուդան ու Երուսաղեմի բնակիչները երեսնիվայր խոնարհվելով՝ ընկան Տիրոջ առջև ու երկրպագեցին Տիրոջը։ ¹⁹ Եվ Կահաթի տոհմից ու Կորխի տոհմից ղևտացիները վեր կացան ու բարձր ձայնով օրհնեցին Տիրոջը՝ Աստծուն։

²⁰ Նրանք, առավոտյան կանուխ արթնանալով, գնացին Թեկովայի անապատը։ Երբ նրանք ճանապարհ էին ընկնում, Հովսափատը կանգնեց ու աղաղակելով ասաց. «Ի՛նձ լսեք, Հուդայի և Երուսաղեմի բնակիչնե՛ր, հավատացե՛ք Տիրոջը՝ մեր Աստծուն, և նա էլ ձեզ կհավատա, հավատացե՛ք նրա մարգարեներին ու հաջողություն կունենաք»։ ²¹ Նա խորհուրդ արեց ժողովրդի հետ և սաղմոսերգուներ ու օրհներգուներ կարգեց, որ զորքի առջևից ընթանալիս փառք տան ու օրհնաբանեն սրբությունները։ Նրանք ասում էին. «Փառաբանենք Տիրոջը, քանզի նրա ողորմությունը հավիտյան է»։

²² Երբ նրանք սկսեցին օրհնաբանել ու փառաբանել Տիրոջը, Տերը իրար դեմ հանեց ամովնացիներին, մովաբացիներին ու Սեիր լեռան բնակիչներին, որոնք եկել էին Հուդայի վրա հարձակվելու։ ²³ Ամովնացիներն ու մովաբացիները հարձակվեցին Սեիր լեռան բնակիչների վրա, որ կոտորեն ու ոչնչացնեն նրանց։ Երբ Սեիրի բնակիչներին իսպառ բնաջնջեցին, այս անգամ էլ իրար վրա հարձակվեցին ու կոտորեցին միմյանց։ ²⁴ Հուդայի մարդիկ եկան անապատի դիտանոցը, նայեցին ու տեսան, որ բոլորն սպանված ու ընկած են գետնին. ոչ ոք չէր փրկվել։ ²⁵ Հովսափատն ու զորքը եկան կողոպտելու նրանց ավարը։ Նրանք գտան մեծ թվով անասուններ, հանդերձանք, ավար ու թանկարժեք առարկաներ և այս ամենը թալանեցին։ Նրանք երեք օր շարունակ հավաքում էին ավարը, որովհետև չափազանց շատ էր։

²⁶ Չորրորդ օրը նրանք հավաքվեցին Օրհնության հովտում, որովհետև այնտեղ էին օրհնել Տիրոջը, որի համար էլ այդ տեղը կոչեցին Օրհնության հովիտ մինչև այսօր։ ²⁷ Հուդայի բոլոր տղամարդիկ և նրանց առաջնորդ Հովսափատը մեծ ուրախությամբ վերադարձան Երուսաղեմ, քանզի Տերը նրանց ուրախություն էր տվել՝ ազատելով նրանց իրենց թշնամիներից։ ²⁸ Նրանք քնարներով, տավիղներով ու փողերով մտան Երուսաղեմ՝ Տիրոջ տունը։ ²⁹ Երբ երկրի բոլոր թագավորությունները լսեցին, որ Տերն է պատերազմել Իսրայելի թշնամիների դեմ, Տիրոջ վախն ընկավ նրանց վրա։ ³⁰ Հովսափատի թագավորությունը խաղաղվեց, և նրա Աստվածը ամեն կողմից հանգստացրեց նրան։

Հովսափատի թագավորության վախճանը

(Գ Թագ. 22.41-51)

³¹ Հովսափատը թագավորեց Հուդայի վրա։ Նա երեսուն տարեկան էր, երբ թագավոր դարձավ, և քսանհինգ տարի թագավորեց Երուսաղեմում։ Նրա մոր անունը Ազուբա էր, որը Սալիի դուստրն էր։ ³² Հովսափատն ընթացավ իր հոր՝ Ասայի ճանապարհներով և Տիրոջ առջև ճշմարիտը գործելուց չխոտորվեց։ ³³ Սակայն տակավին պաշտամունքի բարձունքներ կային, և ժողովուրդն իր սիրտը չէր ուղղել Տիրոջը՝ իր հայրերի Աստծուն։ ³⁴ Հովսափատի մնացած գործերը՝ առաջինից մինչև վերջինը, գրված են Անանի որդի Հեուի պատմության մեջ. նա է գրել Իսրայելի թագավորների գիրքը։

³⁵ Սրանից հետո Հուդայի արքա Հովսափատը բարեկամացավ Իսրայելի արքա Օքոզիայի հետ, որ անօրենություն էր գործում։ ³⁶ Հովսափատը վեր կացավ ու գնաց Օքոզիայի մոտ, որ նավ պատրաստի ու գնա Թարսիս։ Նա նավ պատրաստեց Գասիոնգաբերում։ ³⁷ Մարեսացի Օվդիայի որդի Եղիազարը, Հովսափատի մասին մարգարեանալով, ասաց. «Քանի որ Օքոզիայի հետ բարեկամացար, Տերը պիտի ոչնչացնի քո գործը»։ Նրա նավը խորտակվեց, և նա չկարողացավ Թարսիս գնալ։

21

¹ Հովսափատը գնաց իր նախնիների գիրկը և թաղվեց Դավթի քաղաքում՝ իր նախնիների մոտ։

Հովրամը Հուդայի թագավոր

(Դ Թագ. 8.16-24)

Նրա փոխարեն թագավորեց իր որդին՝ Հովրամը։ ² Նրա եղբայրները՝ Հովսափատի որդիները, վեցն էին՝ Եզրիա, Եել, Զաքարիա, Միսայել, Սափատիա և Ազարիա։ Սրանք բոլորը Հուդայի արքա Հովսափատի որդիներն էին։ ³ Հայրը նրանց տվել էր բազում պարգևներ՝ արծաթ, ոսկի, զենքեր, ինչպես նաև պարսպապատ քաղաքներ Հուդայում, իսկ թագավորությունը հանձնել էր Հովրամին, քանի որ նա էր անդրանիկը։ ⁴ Հովրամը, ստանձնելով թագավորությունը, հզորացավ ու սրակոտոր արեց իր բոլոր եղբայրներին, նաև Իսրայելի մի շարք իշխանների։ ⁵ Նա երեսուներկու տարեկան էր, երբ թագավոր դարձավ, և ութ տարի թագավորեց Երուսաղեմում. ⁶ նա ընթացավ Իսրայելի թագավորների ճանապարհներով. արեց այնպես, ինչպես Աքաաբի տունն էր արել, քանի որ նրա կինը Աքաաբի դուստրն էր։ Նա չարիք գործեց Տիրոջ առջև, ⁷ սակայն Տերը չուզեց կործանել Դավթի տունը այն ուխտի համար, որ դրել էր Դավթի հետ, և ինչպես խոստացել էր նրան՝ միշտ մի ճրագ տալ նրան ու նրա որդիներին։

⁸ Այդ օրերին եդովմացիներն ապստամբեցին Հուդայի դեմ և իրենց համար թագավոր ընտրեցին։ ⁹ Հովրամը գնաց իր իշխաններով ու հեծյալներով հանդերձ և գիշերը վեր կենալով՝ հարձակվեց եդովմացիների ու նրանց մարտակառքերի հրամանատարների վրա, որոնք պաշարել էին իրեն։ Եդովմացիների զորքը փախավ դեպի իրենց վրանները։ ¹⁰ Այնուամենայնիվ Եդովմն ազատվեց Հուդայի գերիշխանությունից մինչև այսօր։ Այդ ժամանակ Լեբնան ևս ապստամբեց Հովրամի իշխանության դեմ, քանի որ Հովրամը լքել էր Տիրոջը՝ իր հայրերի Աստծուն, ¹¹ պաշտամունքի բարձունքներ էր կառուցել տվել Հուդայի քաղաքներում, Երուսաղեմի բնակիչներին Աստծու հանդեպ անհավատարմության մղել ու մոլորեցրել Հուդայի երկրին։ ¹² Եղիա մարգարեից նրան գրություն եկավ, որի մեջ ասված էր. «Այսպես է ասում Տերը՝ քո նախահայր Դավթի Աստվածը. “Քանի որ չընթացար քո հոր՝ Հովսափատի ուղիով և ոչ էլ Հուդայի արքա Ասայի ուղիով, ¹³ այլ ընթացար Իսրայելի թագավորի ուղիով, Աստծու հանդեպ անհավատարմության մղեցիր Հուդային ու Երուսաղեմի բնակիչներին, ինչպես որ արել էր Աքաաբի տունը, և քո հոր որդիներին՝ քո եղբայրներին, որոնք քեզնից լավ էին, սպանեցիր, ¹⁴ ահա Տերը քեզ, քո ժողովրդին, քո որդիներին, քո կանանց և քո ամբողջ ունեցվածքին մեծ հարվածներ է հասցնելու։ ¹⁵ Դու ծանր հիվանդությամբ ու որովայնի ախտով պիտի մաշվես, մինչև որ քո ախտահարված փորոտիքը օրեցօր դուրս թափվի”»։

¹⁶ Եվ Տերը Հովրամի դեմ հանեց այլազգիներին և եթովպացիների հարևան արաբներին։ ¹⁷ Նրանք հարձակվեցին Հուդայի վրա, կողոպտեցին այն և տարան արքայի տան ամբողջ հարստությունը, նրա տղաներին ու աղջիկներին, և նա զրկվեց իր բոլոր որդիներից, բացի ամենակրտսեր որդուց՝ Օքոզիայից։

¹⁸ Այս ամենից հետո Տերը նրան որովայնի անբուժելի հիվանդությամբ հարվածեց։ ¹⁹ Որոշ ժամանակ անց, երբ հասավ նրա վախճանը, ամբողջ երկու օր նրա ախտահարված փորոտիքը դուրս թափվեց, և նա մեռավ այդ ծանր հիվանդությունից։ Ժողովուրդը նրան հուղարկավորություն չարեց, ինչպես որ արել էր նրա նախնիներին։ ²⁰ Նա երեսուներկու տարեկան էր, երբ թագավոր դարձավ. ութ տարի թագավորեց Երուսաղեմում և մեռավ առանց դրվատանքի խոսքի և թաղվեց Դավթի քաղաքում, բայց ոչ թագավորների գերեզմանոցում։

22

Հուդայի Օքոզիա թագավորը

(Դ Թագ. 8.25-29, 9.27-29)

¹ Երուսաղեմի բնակիչները Հովրամի փոխարեն գահ բարձրացրին նրա ամենակրտսեր որդուն՝ Օքոզիային, քանի որ նրա բոլոր ավագ եղբայրներին սպանել էին նրանց վրա հարձակված գնդերը, որոնք արաբների և ալիմազոնացիների մոտ էին ապաստանել։ Եվ թագավոր դարձավ Հուդայի արքա Հովրամի որդի Օքոզիան։ ² Օքոզիան թագավոր դարձավ, երբ քսաներկու տարեկան էր։ Նա մեկ տարի թագավորեց Երուսաղեմում։ Նրա մայրը Ամրիի դուստրն էր, անունը Գոթողիա։ ³ Օքոզիան ընթացավ Աքաաբի տան ճանապարհով, քանի որ նրա մայրը մեղանչելու գործում նրա խորհրդականն էր։ ⁴ Օքոզիան չարիք գործեց Տիրոջ առջև, ինչպես Աքաաբի տունն էր արել, քանի որ իր հոր մահից հետո նրանք էին դարձել իր խորհրդականները՝ իրեն կործանելու համար։ ⁵ Նա առաջնորդվեց նրանց խորհուրդներով. Աքաաբի որդի Հովրամի հետ գնաց Գաղաադի Ռամաթ քաղաքը՝ Ասորիքի արքա Ազայելի դեմ պատերազմելու։ Աղեղնավորները վիրավորեցին Հովրամին, ⁶ և նա վերադարձավ, որպեսզի Հեզրայելում բուժվի այն վերքերից, որ ասորիները պատճառել էին իրեն Ռամաթում, երբ նա պատերազմում էր Ասորիքի արքա Ազայելի դեմ։ Հուդայի արքա Հովրամի որդի Օքոզիան եկավ Հեզրայել՝ Աքաաբի որդի Հովրամին տեսակցության, որովհետև նա հիվանդ էր։

⁷ Տիրոջից էր, որ Հովրամի մոտ գնալը Օքոզիայի կործանումը լինի։ Երբ նա եկավ, ելավ Նամեսսիի որդի, Տիրոջից օծյալ Հեուին հանդիպելու։ ⁸ Երբ Հեուն վրեժխնդիր էր լինում Աքաաբի տան հանդեպ, գտավ նաև Հուդայի իշխաններին ու Օքոզիային ծառայող նրա եղբորորդիներին և կոտորեց նրանց։ ⁹ Նա հրամայեց փնտրել գտնել Օքոզիային։ Նրան բռնեցին, մինչ բուժվում էր Սամարիայում։ Նրան բերեցին Հեուի մոտ, որը սպանեց նրան։ Նրան թաղեցին այնտեղ, քանզի ասացին. «Հովսափատի որդին է, որն իր ամբողջ սրտով Տիրոջն էր փնտրում»։ Եվ Օքոզիայի տան մեջ չգտնվեց մեկը, որ ձեռքն առներ թագավորական իշխանությունը։

Գոթողիան տիրանում է իշխանությանը

(Դ Թագ. 11.1-3)

¹⁰ Օքոզիայի մայրը՝ Գոթողիան, երբ տեսավ, որ որդին մեռել է, վեր կացավ ու կոտորեց Հուդայի տան ամբողջ թագավորական սերունդը։ ¹¹ Սակայն արքայադուստր Հովսաբեթը արքայի կոտորվող որդիների միջից գողացավ Օքոզիայի որդի Հովասին և նրան ու նրա դայակին տեղավորեց անկողինների սենյակում։ Հովսաբեթը, որը Հովրամ արքայի դուստրն էր, Օքոզիայի քույրը և Հովիդայե քահանայի կինը, նրան թաքցրեց Գոթողիայից, որը չկարողացավ սպանել նրան։ ¹² Նա վեց տարի նրա հետ թաքնված մնաց Աստծու տանը, մինչ Գոթողիան թագավորում էր երկրում։

23

Ապստամբություն Գոթողիայի դեմ. Հովասը՝ թագավոր

(Դ Թագ. 11.4-16)

¹ Յոթերորդ տարում Հովիդայեն զորացավ և վերցնելով հարյուրապետներին՝ Հովրամի որդի Ազարիային, Հովնանի որդի Իսմայելին, Հովբադի որդի Ազարիային, Ադայիայի որդի Մասիային, Զաքարիայի որդի Եղիսափատին, տարավ Տիրոջ տունը։ ² Նրանք շրջեցին Հուդայում, Հուդայի բոլոր քաղաքներից հավաքեցին ղևտացիներին ու Իսրայելի տոհմերի իշխաններին և եկան Երուսաղեմ։ ³ Նրանք Հուդայի բոլոր ժողովականների և արքայի հետ դաշինք կնքեցին Տիրոջ տանը։ Հովիդայեն, նրանց ցույց տալով արքայորդուն, ասաց. «Ահավասիկ Հուդայի արքայորդին. սա՛ պետք է թագավորի, ինչպես Տերն ասել է Դավթի տան մասին։ ⁴ Արդ, պետք է անեք հետևյալը. ձեր մեկ երրորդ մասը՝ քահանաներից ու ղևտացիներից, որ շաբաթ օրը սպասավորության պիտի մտնի, պետք է պահպանի դռների մուտքը, ⁵ մեկ երրորդ մասը պետք է լինի արքայի պալատում, իսկ մյուս մեկ երրորդ մասը պետք է լինի Հիմքի դռան մոտ։ Ամբողջ ժողովուրդը պետք է լինի Տիրոջ տան գավթում։ ⁶ Ոչ ոք չպետք է մտնի Տիրոջ տունը, բացի քահանաներից, ղևտացիներից ու սպասավորության կոչված ղևտացիներից։ Նրանք պետք է մտնեն, քանզի սուրբ են, իսկ ամբողջ ժողովուրդը պետք է Տիրոջ հրամանները կատարի։ ⁷ Ղևտացիները, ամեն մեկն իր ձեռքին զենք ունենալով, պետք է շրջապատեն արքային։ Ով տուն մտնի, կսպանվի։ Նրանք պետք է ուղեկցեն արքային ելումուտ անելիս»։

⁸ Ղևտացիները և Հուդայի բոլոր բնակիչներն ըստ ամենայնի կատարեցին այն, ինչ Հովիդայե քահանան պատվիրեց. ամեն մեկը վերցրեց իր մարդկանց, թե՛ նրանց, որ սկսում էին շաբաթ օրվա իրենց պաշտամունքը և թե՛ նրանց, որ այդ օրն ավարտում էին այն, քանի որ Հովիդայեն ամենօրյա պաշտամունք կատարող խմբերին չէր արձակել։ ⁹ Հովիդայեն նրանց տվեց Դավիթ արքայի սուսերները, վահաններն ու զենքերը, որ պահվում էին Աստծու տանը։ ¹⁰ Նա ամբողջ ժողովրդին, ամեն մեկին իր զենքով, կանգնեցրեց տան աջ կողմից մինչև զոհասեղանի և տաճարի ձախ կողմը՝ թագավորի շուրջը։ ¹¹ Դուրս բերելով արքայորդուն՝ նրա վրա դրեց թագն ու Վկայությունը։ Հովիդայեն ու իր որդիները նրան թագավոր դարձրին և օծեցին՝ գոչելով. «Կեցցե՜ արքան»։

¹² Երբ Գոթողիան լսեց վազող, արքային փառաբանող ու օրհնող ժողովրդի ձայնը, մտավ արքայի մոտ՝ Տիրոջ տունը, ¹³ ու տեսավ, որ թագավորն իր տեղում է, իսկ զորապետները, փողհարները և իշխանները կանգնած են արքայի շուրջը՝ ճանապարհի մուտքի մոտ։ Ամբողջ ժողովուրդը ցնծում էր, փողեր էր հնչեցնում, նվագարաններով երգեր էր երգում և օրհներգում։ Գոթողիան զգեստները պատառոտեց ու գոչեց՝ ասելով. «Դուք դավադրությամբ խարդախ խաղ խաղացիք»։ ¹⁴ Հովիդայե քահանան ելավ և պատվիրեց հարյուրապետներին ու զորքի հրամանատարներին և ասաց նրանց. «Սրան Աստծու տնից դո՛ւրս հանեք, հետևե՛ք նրան ու սրով սպանե՛ք»։ Քանի որ քահանան ասաց. «Նա Տիրոջ տան մեջ թող չմեռնի»։ ¹⁵ Թույլ տվեցին, որ նա դուրս գնա, և երբ անցավ արքայի տան Հեծյալների դռնով, նրան այնտեղ սպանեցին։

Հովիդայեի բարեկարգությունները

(Դ Թագ. 11.17-20)

¹⁶ Հովիդայեն ուխտ դրեց իր, ժողովրդի ու արքայի միջև, որ իրենք Տիրոջ ժողովուրդը կլինեն։ ¹⁷ Երկրի ամբողջ ժողովուրդը մտավ Բահաղի տունը, ջարդուփշուր արեց նրա կուռքերն ու նրա զոհասեղանները, փշրեց նրա կուռքերը, իսկ Բահաղի Մաթան քուրմին սպանեց նրա զոհասեղանի առջև։ ¹⁸ Հովիդայե քահանան Տիրոջ տան գործը հանձնեց քահանաներին ու ղևտացիներին, վերականգնեց քահանաների ու ղևտացիների մշտական սպասավորությունը, որ Դավիթն էր հաստատել Տիրոջ տանը կատարվելու համար, Տիրոջը ողջակեզներ մատուցեց, ինչպես որ գրված է Մովսեսի օրենքների մեջ՝ ուրախությամբ ու երգերով, ըստ Դավթի սահմանած կարգի։ ¹⁹ Պահապաններ կանգնեցին Տիրոջ տան դռների մոտ, և որևէ բանում անմաքուր եղողն այնտեղ չէր մտնում։ ²⁰ Նա կանչեց տոհմերի պետերին, զորապետներին, ժողովրդի իշխաններին ու երկրի ամբողջ ժողովրդին, և նրանք, արքային հանելով Տիրոջ տնից, ներքին դռնով մտան թագավորական տունը և արքային նստեցրին թագավորական գահին։ ²¹ Երկրի ամբողջ ժողովուրդն ուրախացավ, քաղաքը հանդարտվեց։ Իսկ Գոթողիային սպանեցին սրով։

24

Հովասը՝ Հուդայի թագավոր

(Դ Թագ. 12.1-17)

¹ Հովասը յոթ տարեկան էր, երբ թագավոր դարձավ։ Նա քառասուն տարի թագավորեց Երուսաղեմում։ Նրա բերսաբեեցի մոր անունը Աբիա էր։ ² Հովիդայե քահանայի բոլոր օրերին Հովասն արեց այն, ինչ ուղիղ էր Տիրոջ առջև։ ³ Հովասը երկու կին առավ, որոնք ծնեցին տղաներ ու աղջիկներ։

⁴ Այս դեպքերից հետո Հովասն ուզեց Տիրոջ տունը նորոգել։ ⁵ Նա հավաքեց քահանաներին ու ղևտացիներին և ասաց նրանց. «Ելեք գնացե՛ք Հուդայի քաղաքները և ամբողջ Իսրայելից արծա՛թ հավաքեք Տիրոջ տունը տարեցտարի նորոգելու համար։ Շտապե՛ք կատարել»։ Սակայն ղևտացիները չշտապեցին։ ⁶ Հովաս արքան կանչեց Հովիդայե իշխանին և ասաց նրան. «Ինչո՞ւ դու չես հետևել, որ ղևտացիները Հուդայից ու Երուսաղեմից բերեն այն, ինչ սահմանվել էր Աստծու մարդու՝ Մովսեսի կողմից, երբ իսրայելացիներին հավաքել էր Վկայության խորանի մոտ։ ⁷ Չէ՞ որ Գոթողիան անօրեն էր, և նրա որդիները կործանել էին Աստծու տունը, իսկ Աստծու տան սրբությունները նվիրել Բահաղին»։ ⁸ Արքան ասաց. «Թող մի գանձանակ պատրաստեն ու դնեն Տիրոջ տան դռան դրսի կողմը, ⁹ և հայտարարեն Հուդայում ու Երուսաղեմում, որ արծաթ բերեն Տիրոջը, ինչպես Աստծու ծառա Մովսեսն ասել էր անապատում»։ ¹⁰ Եվ ամենքը՝ իշխաններն ու ամբողջ ժողովուրդը, արծաթ բերելով, գցեցին արկղի մեջ, մինչև այն լցվեց։ ¹¹ Երբ ղևտացիները արկղը ներս բերեցին արքայի վերակացուների մոտ, տեսան, որ չափազանց շատ արծաթ է հավաքվել. եկավ արքայի քարտուղարը. ավագ քահանայի վերակացուի հետ արկղը դատարկելով՝ տարան, իր տեղը դրեցին։ Այսպես արեցին ամեն օր։ Շատ արծաթ հավաքվեց։ ¹² Արքան ու Հովիդայե քահանան այն տվեցին նրանց, ովքեր Տիրոջ տան վերանորոգման գործով էին զբաղվում։ Նրանք էլ քարհատներ ու հյուսներ վարձեցին, որ նորոգեն Տիրոջ տունը։ Նրանք աշխատում էին, ¹³ և գործը նրանց շնորհիվ հաջողությամբ առաջ էր ընթանում։ Նրանք Տիրոջ տունը իր նախկին տեսքին բերեցին և ամրացրին այն։ ¹⁴ Երբ ավարտեցին, արքայի ու Հովիդայեի մոտ բերեցին ավելացած արծաթը, որով Տիրոջ տան համար սպասք, ողջակեզների համար անոթներ և ոսկե ու արծաթե խնկամաններ պատրաստեցին։ Հովիդայեի օրոք միշտ ողջակեզներ էին մատուցում Տիրոջ տանը։

¹⁵ Հովիդայեն հասավ խոր ծերության և վախճանվեց հարյուր երեսուն տարեկան հասակում։ ¹⁶ Երբ վախճանվեց, նրան թաղեցին Դավթի քաղաքում՝ թագավորների մոտ, քանզի նա բարիք էր գործել Իսրայելի, Աստծու և նրա տան համար։

Հովասի անհավատարմությունը Աստծուն և նրա պատիժը

¹⁷ Հովիդայեի վախճանվելուց հետո Հուդայի իշխանները մտան արքայի մոտ, խոնարհություն արեցին նրան, Հովասի միտքը հեղաշրջեցին, և արքան լսեց նրանց։ ¹⁸ Նրանք լքեցին Տիրոջը՝ իրենց հայրերի Աստծուն, և ծառայեցին պաշտամունքային քարե սյուներին և Աստարտի կուռքերին։ Այդ ժամանակ Աստծու բարկությունն իջավ Հուդայի ու Երուսաղեմի վրա։ ¹⁹ Նա մարգարեներ առաքեց նրանց մոտ, որ դեպի Տերը դարձնեն նրանց, սակայն նրանք չլսեցին։ Նրանց վկայություններ տվեց, սակայն նրանք չանսացին։

²⁰ Աստծու հոգին պատեց Հովիդայե քահանայի որդի Ազարիային, որը, կանգնելով ամբողջ ժողովրդի մեջ, ասաց. «Այսպես է ասում Տերը. “Ինչո՞ւ խոտորվեցիք Տիրոջ պատվիրաններից, որ այլևս հաջողություն չունենաք։ Քանի որ լքեցիք Տիրոջը, նա էլ ձեզ է լքելու”»։ ²¹ Հովաս արքայի հրամանով Տիրոջ տան գավթում մարդիկ հարձակվեցին նրա վրա ու քարկոծեցին նրան։ ²² Հովասը չհիշեց այն բարեգթությունը, որ նրա հայր Հովիդայեն ցուցաբերել էր իր նկատմամբ, և սպանեց նրա որդուն։ Իր մահվան ժամանակ Ազարիան ասաց. «Տե՛րը թող տեսնի ու դատի»։

Հովաս թագավորի վախճանը

²³ Այդ տարվա վերջին նրա դեմ ելավ Ասորիքի զորքը. հարձակվեց Հուդայի ու Երուսաղեմի վրա, կոտորեց բանակի մեջ եղած ժողովրդի բոլոր իշխաններին, և նրանց ամբողջ ավարն ուղարկեցին Դամասկոսի արքային։ ²⁴ Թեև Ասորիքի զորքը սակավամարդ էր, բայց Աստված նրանց ձեռքը չափազանց շատ զորք մատնեց, քանի որ իսրայելացիները լքել էին Տիրոջը՝ իրենց հայրերի Աստծուն։ Այդպես Հովասի նկատմամբ դատաստան տեսավ։ ²⁵ Երբ Ասորիքի զորքը հեռացավ նրանից՝ ծանր հիվանդությունների մեջ թողնելով նրան, նրա վրա հարձակվեցին իր ծառաները, որ լուծեն Հովիդայե քահանայի որդու արյան վրեժը։ Հովասին սպանեցին իր անկողնում, և նա մեռավ։ Նրան թաղեցին Դավթի քաղաքում, բայց ոչ թագավորների գերեզմանոցում։ ²⁶ Նրա վրա հարձակվողներն էին ամովնացի Սամեթի որդի Զաբդեան, մովաբացի Սամարիթի որդի Հովսաբեթը։ ²⁷ Ինչ վերաբերում է նրա որդիներին, նրա դեմ եղած մարգարեություններին և Աստծու տան նորոգությանը, դրանք գրված են թագավորների գրքերում։

Նրա որդի Ամասիան թագավորեց նրա փոխարեն։

25

Հուդայի Ամասիա թագավորը

(Դ Թագ. 14.1-6)

¹ Ամասիան քսանհինգ տարեկան էր, երբ թագավոր դարձավ, և քսանինը տարի թագավորեց Երուսաղեմում։ Նրա երուսաղեմացի մոր անունը Հովադին էր։ ² Ամասիան արեց այն, ինչ ուղիղ էր Տիրոջ առջև, բայց ոչ լիակատար սրտով։

³ Հենց որ թագավորությունն ամրապնդվեց իր ձեռքում, նա սպանեց իր այն ծառաներին, որոնք սպանել էին իր արքա հորը։ ⁴ Բայց նրանց որդիներին չսպանեց, ինչպես գրված է Տիրոջ օրենքների ուխտի մեջ, և ինչպես պատվիրել է Տերը՝ ասելով. «Հայրերը չպետք է մեռնեն որդիների փոխարեն, և որդիները չպետք է մեռնեն հայրերի փոխարեն, այլ ամեն ոք պետք է իր մեղքերի համար մեռնի»։

⁵ Ամասիան հավաքեց Հուդայի տան մարդկանց և նրանց ազգատոհմերի համեմատ հազարապետներ ու հարյուրապետներ նշանակեց Հուդայի ամբողջ երկրում ու Երուսաղեմում։ Նա քսան և ավելի բարձր տարիք ունեցող մարդկանց հաշվառում կատարեց և տեսավ, որ նրանք նիզակ ու ասպար բռնելու ընդունակ երեք հարյուր հազար զորավոր պատերազմողներ են։ ⁶ Բացի այդ, Իսրայելից նա հարյուր տաղանդ արծաթով հարյուր հազար ուժեղ մարդ վարձեց։ ⁷ Նրա մոտ Աստծու մի մարդ եկավ և ասաց. «Արքա՛, թող Իսրայելի զորքերը քեզ հետ չգնան, որովհետև Տերն Իսրայելի՝ Եփրեմի որդիների հետ չէ։ ⁸ Եթե դու կարծում ես, թե այդ զորքով ես հզորանալու, ապա Տերը քեզ պարտության կմատնի քո թշնամիների առջև, քանի որ Տերն է թե՛ հաղթանակ պարգևողը և թե՛ պարտության մատնողը»։ ⁹ Ամասիան ասաց Աստծու մարդուն. «Հապա ի՞նչ անեմ այն հարյուր տաղանդը, որ տվել եմ Իսրայելի զորքի համար»։ Աստծու մարդն ասաց նրան. «Տերը քեզ դրանից ավելին կտա»։ ¹⁰ Ամասիան առանձնացրեց Եփրեմից իր մոտ եկած զորքը, որպեսզի իր տեղը վերադառնա։ Նրանք շատ զայրացան Հուդայի վրա և բարկությամբ ու ցասումով վերադարձան իրենց տեղը։

Պատերազմ Սեիրի դեմ

(Դ Թագ. 14.7)

¹¹ Ամասիան հզորացավ, վերցրեց իր զորքն ու գնաց Աղի հովիտը և Սեիրի որդիներից տասը հազար մարդ կոտորեց։ ¹² Հուդայի մարդիկ տասը հազար էլ գերի բռնեցին ու տարան քարաժայռի գլուխը և բարձունքի եզրից նրանց գահավեժ անելով՝ բոլորին սպանեցին։

¹³ Այն գնդերի մարդիկ, որոնց Ամասիան հետ էր դարձրել, որ իր հետ պատերազմի չգնան, հարձակվեցին Հուդայի քաղաքների վրա Սամարիայից մինչև Բեթորոն, երեք հազար մարդ կոտորեցին նրանցից և բազում ավար տարան։

¹⁴ Երբ Ամասիան եդովմացիներին ջարդելուց հետո վերադարձավ, իր հետ բերեց Սեիրի որդիների աստվածներին և նրանց դարձրեց իր աստվածները, երկրպագեց նրանց, և հենց ինքն էլ նրանց զոհեր էր մատուցում։ ¹⁵ Տիրոջ բարկությունը բորբոքվեց Ամասիայի դեմ. Նա մարգարեներ առաքեց նրա մոտ ու ասաց նրան. «Դու ինչո՞ւ հարեցիր այդ ժողովրդի աստվածներին, որոնք իրենց ժողովրդին քո ձեռքից չփրկեցին»։ ¹⁶ Երբ նա խոսում էր, արքան ասաց նրան. «Մի՞թե քեզ արքայի խորհրդական եմ նշանակել, զգո՛ւյշ եղիր, թե չէ տանջանքի կենթարկվես»։ Մարգարեն նախ լռեց, ապա ասաց. «Գիտեմ, որ Տերը որոշել է քեզ կործանել, որովհետև դու այս բանն արեցիր և չանսացիր իմ խրատներին»։

Պատերազմ Իսրայելի դեմ

(Դ Թագ. 14.8-16)

¹⁷ Ամասիան խորհուրդ արեց և Իսրայելի արքա Հեուի որդի Հովաքազի որդի Հովասի մոտ մարդ ուղարկելով՝ ասաց. «Ե՛կ երես առ երես հանդիպենք»։ ¹⁸ Իսրայելի արքա Հովասը, Հուդայի արքա Ամասիայի մոտ մարդ ուղարկելով, ասաց. «Լիբանանի փուշը լուր ուղարկեց Լիբանանի մայրի ծառին՝ ասելով. “Քո դստերն իմ որդուն կնությա՛ն տուր”։ Բայց ահա անցան Լիբանանի անապատի գազանները և կոխոտեցին փուշը։ ¹⁹ Դու ահա կոտորեցիր եդովմացիներին, և քո սիրտը լցվել է սնապարծությամբ։ Այսուհետև տա՛նդ նստիր, ինչո՞ւ ես չարիք գրգռում, որ և՛ դու ընկնես, և՛ քեզ հետ նաև Հուդայի երկիրը»։ ²⁰ Ամասիան չլսեց նրան, որովհետև Տերը որոշել էր նրան մատնել Հովասի ձեռքն այն բանի համար, որ հարել էր եդովմացիների աստվածներին։ ²¹ Իսրայելի արքա Հովասը պատերազմի ելավ. նա ու Հուդայի արքա Ամասիան միմյանց հանդիպեցին Հուդային պատկանող Բեթսամյուսում։ ²² Հուդայի երկիրը պարտվեց Իսրայելից, և ամեն մարդ իր վրանը փախավ։ ²³ Իսրայելի արքա Հովասը Բեթսամյուսում գերի բռնեց Հուդայի արքա Հովասի որդի Ամասիային ու տարավ Երուսաղեմ։ Նա քանդեց Երուսաղեմի պարսպի մի մասը՝ Եփրեմի դռնից մինչև Անկյան դուռը՝ շուրջ երեք հարյուր կանգուն։ ²⁴ Նա վերցրեց Տիրոջ տան ամբողջ ոսկին, արծաթն ու սպասքը, որ գտնվում էր Աբդեդոմի հսկողության տակ, նաև թագավորի տան գանձերը, պատանդներ, և վերադարձավ Սամարիա։

Ամասիայի թագավորության վախճանը

(Դ Թագ. 14.17-20)

²⁵ Հուդայի արքա Հովասի որդի Ամասիան Իսրայելի արքա Հովաքազի որդի Հովասի մեռնելուց հետո ապրեց տասնհինգ տարի։ ²⁶ Ամասիայի մնացյալ գործերը՝ սկզբից մինչև վերջինը, գրված են Իսրայելի ու Հուդայի թագավորների գրքում։ ²⁷ Այն ժամանակ, երբ Ամասիան հեռացել էր Տիրոջից, զորքը Երուսաղեմում ապստամբեց նրա դեմ, և նա փախավ Լաքիս։ Նրա հետևից մարդ ուղարկեցին Լաքիս և այնտեղ սպանեցին նրան։ ²⁸ Նրա դին դրեցին ձիերի վրա, բերեցին ու թաղեցին իր նախնիների մոտ՝ Դավթի քաղաքում։

26

Հուդայի Ոզիաս թագավորը

(Դ Թագ. 14.21-22, 15.1-7)

¹ Հուդայի երկրի ամբողջ ժողովուրդը վերցրեց տասնվեցամյա Ոզիասին և թագավոր դարձրեց նրան իր հայր Ամասիայի փոխարեն։ ² Նա վերակառուցեց Ելաթը և այն վերադարձրեց Հուդային, երբ արքան արդեն գնացել էր իր նախնիների գիրկը։ ³ Ոզիասը թագավոր դարձավ տասնվեց տարեկան հասակում և հիսուներկու տարի թագավորեց Երուսաղեմում։ Նրա երուսաղեմացի մոր անունը Հեքեղիա էր։ ⁴ Նա արեց այն, ինչ ուղիղ էր Տիրոջ առջև այն ամենի համաձայն, որ իր հայր Ամասիան էր արել։ ⁵ Զաքարիա իմաստունի կենդանության օրոք Ոզիասը Տիրոջ երկյուղով Տիրոջն էր հարել։ Նրա օրերին նա Տիրոջն էր ձգտում, և Տերը նրան հաջողություն էր պարգևում։ ⁶ Նա ելավ ու պատերազմեց այլազգիների դեմ, քանդեց Գեթի պարիսպը, Հաբիսի պարիսպը, Ազովտի պարիսպը և Ազովտում ու այլազգիների այլ տարածքներում քաղաքներ կառուցեց։ ⁷ Տերը նրան զորացրեց այլազգիների, քարայրաբնակ արաբների և մինեցիների դեմ։ ⁸ Մինեցիները հարկ էին տալիս Ոզիասին։ Նրա անունը տարածվեց մինչև Եգիպտոս, որովհետև նա շատ հզորացավ։ ⁹ Ոզիասը Երուսաղեմում Ձորի դռան ու Անկյան դռան մոտ աշտարակներ կառուցեց և ամրացրեց դրանք։ ¹⁰ Նա աշտարակներ կառուցեց նաև անապատում և բազում ջրհորներ փորեց, որովհետև շատ անասուններ ուներ Սեփելայում ու ցածրադիր դաշտավայրում և այգեգործներ՝ լեռներում և Կարմելոսում. նա սիրում էր երկրագործությունը։ ¹¹ Ոզիասը պատերազմի պատրաստ զորք ուներ, որ գնդերով մարտի էր ելնում։ Նրանց հաշիվն արվում էր Հեել գրագրի և Մասեա դատավորի կողմից՝ արքայի փոխանորդ Անանիայի վերատեսչությամբ։ ¹² Քաջ պատերազմողների մեջ տոհմապետների ամբողջ թիվը երկու հազար վեց հարյուր էր։ ¹³ Նրանց հետ կար երեք հարյուր յոթ հազար հինգ հարյուր հոգուց բաղկացած պատերազմող զորք։ Սրանք էին, որ մեծ զորությամբ պատերազմելով՝ օգնում էին արքային թշնամիների դեմ։ ¹⁴ Ոզիասն ամբողջ զորքի համար պատրաստել տվեց վահաններ, նիզակներ, սաղավարտներ, զրահներ, աղեղներ և քարանետ պարսատիկներ։ ¹⁵ Երուսաղեմում նա մեծ վարպետությամբ սարքված մեքենաներ պատրաստել տվեց, որպեսզի պարիսպների ու անկյունների վրա դրվելով՝ նետեր ու հսկա քարեր արձակեն։ Նրա ռազմական պատրաստության մասին լսեցին հեռավոր տեղերում, որովհետև նա սքանչելիորեն օգնություն գտավ, մինչև որ հզորացավ։

Ոզիասը պատժվում է իր գոռոզության համար

¹⁶ Երբ Ոզիասը հզորացավ, այնքան մեծամտացավ, որ անխուսափելի դարձավ նրա կործանումը։ Նա անիրավություն գործեց Տիրոջ՝ իր Աստծու դեմ. մտավ Տիրոջ տաճարը և խունկ ծխեց խնկի սեղանի վրա։ ¹⁷ Նրա հետևից մտավ Ազարիա քահանան, Ազարիայի հետ՝ Տիրոջ ութսուն քահանաներ՝ հզոր մարդիկ, ¹⁸ որոնք, կանգնելով Ոզիաս արքայի դիմաց, ասացին նրան. «Ոզիա՛ս, դու Տիրոջը խունկ ծխելու իրավունք չունես, այլ միայն քահանաները՝ Ահարոնի որդիները, որոնք սրբագործված են խունկ ծխելու համար։ Սրբարանից դո՛ւրս ելիր, քանի որ ապստամբեցիր Տիրոջ դեմ, և սա քեզ համար փառք չի լինելու Տիրոջ՝ Աստծու կողմից»։ ¹⁹ Ոզիասը զայրացավ։ Իր ձեռքում էր տաճարում խունկ ծխելու բուրվառը։ Եվ երբ բարկացավ քահանաների վրա, բորոտություն երևաց նրա ճակատին քահանաների առջև՝ Տիրոջ տանը, խնկի սեղանի մոտ։ ²⁰ Առաջին քահանան և մյուս քահանաները նրա կողմը դարձան և տեսան, որ նրա ճակատը բորոտությամբ է պատված, ուստի նրան անմիջապես դուրս հանեցին։ Ինքն էլ փութաց դուրս գալ, քանի որ Տերը պատժել էր նրան։

Ոզիասի թագավորության վախճանը

²¹ Ոզիաս արքան բորոտ մնաց մինչև իր մահվան օրը։ Նա, բորոտ լինելով, ապրում էր առանձին տան մեջ, որովհետև արտաքսված էր Տիրոջ տնից։ Նրա որդի Հովաթամը, ստանձնելով թագավորական տան վերակացությունը, ղեկավարում էր երկրի ժողովրդին։

²² Ոզիասի մնացյալ գործերը՝ սկզբից մինչև վերջինը, գրի է առել Ամովսի որդի Եսայի մարգարեն։ ²³ Ոզիասը գնաց իր նախնիների գիրկը, և նրան թաղեցին իր նախնիների մոտ՝ թագավորների գերեզմանների դաշտում, որովհետև ասացին. «Նա բորոտ է»։

Նրա փոխարեն թագավորեց իր որդի Հովաթամը։

27

Հուդայի Հովաթամ թագավորը

(Դ Թագ. 15.32-38)

¹ Հովաթամը քսանհինգ տարեկան էր, երբ թագավոր դարձավ, և տասնվեց տարի թագավորեց Երուսաղեմում։ Նրա մայրը Սադովկի դուստրն էր, անունը Հերուա։ ² Հովաթամն արեց այն, ինչ ուղիղ էր Տիրոջ առաջ այն ամենի համաձայն, ինչ իր հայր Ոզիասն էր արել։ Բայց Տիրոջ տաճարը չմտավ։ Իսկ ժողովուրդը դեռ շարունակում էր մեղքեր գործել։ ³ Նա շինեց Տիրոջ տան Վերին դուռը և Օփեղի պարսպի վրա շատ բաներ կառուցեց։ ⁴ Հուդայի լեռներում ու անտառներում նա քաղաքներ, բնակավայրեր և աշտարակներ կառուցեց։ ⁵ Նա կռվեց ամովնացիների արքայի դեմ և հաղթեց նրան. ամովնացիները նրան տարեկան հարյուր տաղանդ արծաթ, տասը հազար քոռ ցորեն ու տասը հազար քոռ գարի էին տալիս։ Այս ամենը Ամովնի արքան բերում էր ամեն տարի՝ թե՛ առաջին, թե՛ երկրորդ, թե՛ երրորդ տարում։ ⁶ Հովաթամը զորացավ, որովհետև ուղիղ ճանապարհով էր ընթանում Տիրոջ՝ իր Աստծու առաջ։

⁷ Հովաթամի մնացյալ գործերը, նրա պատերազմներն ու մարտերը գրի են առնված Հուդայի և Իսրայելի թագավորների գրքում։ ⁸ Նա քսանհինգ տարեկան էր, երբ թագավոր դարձավ, և տասնվեց տարի թագավորեց Երուսաղեմում։ ⁹ Հովաթամը գնաց իր նախնիների գիրկը և թաղվեց Դավթի քաղաքում։

Նրա փոխարեն թագավորեց իր որդի Աքազը։

28

Հուդայի Աքազ թագավորը

(Դ Թագ. 16.1-4)

¹ Երբ Աքազը թագավոր դարձավ, քսան տարեկան էր։ Նա տասնվեց տարի թագավորեց Երուսաղեմում։ Նա իր նախահայր Դավթի նման ուղիղ ընթացք չունեցավ Տիրոջ առաջ։ ² Այլ ընթացավ Իսրայելի թագավորների ճանապարհներով և կուռքերի քանդակներ պատրաստեց. ³ Բենեմի երկրում նրանց կուռքերին զոհեր մատուցեց, իր որդիներին ողջակեզ արեց՝ այն ազգերի գարշելի սովորության համաձայն, որոնց Տերը քշել էր իսրայելացիների առջևից։ ⁴ Նա խունկ էր ծխում պաշտամունքի բարձունքներում, տանիքների վրա և ամեն մի սաղարթավոր ծառի տակ։

Պատերազմ Ասորիքի և Իսրայելի դեմ

(Դ Թագ. 16.5)

⁵ Տերը Աքազ թագավորին մատնեց Ասորիքի արքայի ձեռքը, որը հարվածեց նրան և նրանցից մեծ թվով գերիներ վերցնելով՝ տարավ Դամասկոս։ Նաև մատնեց նրան Իսրայելի թագավորի ձեռքը, որը մեծամեծ հարվածներ հասցրեց նրան։ ⁶ Իսրայելի արքա Ռոմելայի որդի Փակեեն մի օրում հարյուր քսան հազար զորավոր մարդկանց կոտորեց Հուդայում, որովհետև նրանք լքել էին Տիրոջը՝ իրենց հայրերի Աստծուն։ ⁷ Եփրեմի սերնդից մի հզոր մարդ՝ Զեքրին, սպանեց արքայի որդի Մաասիային, նրա տան իշխան Եզրիկամին և արքայի փոխանորդ Եղկանային։ ⁸ Իսրայելացիները Հուդայի երկրի իրենց եղբայրներից գերեվարեցին երեք հարյուր հազար կին, տղաներ ու աղջիկներ և բազում ավար առնելով նրանցից՝ տարան Սամարիա։

Օվդեդ մարգարեն

⁹ Այնտեղ կար Տիրոջ մի մարգարե, որի անունն էր Օվդեդ։ Նա, ընդառաջ ելնելով Սամարիա եկող զորքին, ասաց նրանց. «Ահա Տիրոջ՝ ձեր հայրերի Աստծու բարկությունն իջավ Հուդայի վրա, և Աստված նրանց ձեր ձեռքը մատնեց. դուք նրանց կոտորեցիք այնպիսի կատաղությամբ, որը մինչև երկինք հասավ։ ¹⁰ Արդ, դուք ուզում եք Հուդայի և Երուսաղեմի մարդկանց ստրուկներ և ստրկուհիներ դարձնել։ Բայց չէ՞ որ ես ահա ձեզ հետ եմ որպես Տիրոջ՝ ձեր Աստծու վկա։ ¹¹ Հիմա լսե՛ք ինձ և ազա՛տ արձակեք այս գերիներին, որ գերել եք ձեր եղբայրներից, թե չէ Տիրոջ կատաղի բարկությունը կիջնի ձեզ վրա»։

¹² Եփրեմի իշխանները՝ Հովնանի որդի Ազարիան, Մոսոլամովթի որդի Բարաքիան, Սելեմի որդի Եզեկիան և Քադլիի որդի Ամասիան ելան պատերազմից եկողների դեմ և ասացին նրանց. ¹³ «Այդ գերիներին մեզ մոտ մի՛ բերեք, որովհետև Տիրոջ դեմ մեզ մեղանչել եք տալիս և ավելացնում եք մեր մեղքերն ու հանցանքները։ Բազում են ձեր այդ մեղքերը, և Տիրոջ կատաղի զայրույթն Իսրայելի վրա է»։ ¹⁴ Պատերազմողները գերիներին և ավարը թողեցին իշխանների և բոլոր ժողովականների առջև։ ¹⁵ Ապա վեր կացան անվանապես նշանակված բոլոր մարդիկ և սկսեցին խնամել գերիներին։ Բոլոր մերկերին հագցրին ավարի մեջ եղած հագուստներից, կոշիկներ տվեցին, կերցրին, յուղով օծեցին, բոլոր տկարներին գրաստ տվեցին ու տարան Երիքով՝ Արմավենիների քաղաքը, իրենց եղբայրների մոտ, իսկ իրենք վերադարձան Սամարիա։

Աքազն օգնություն է խնդրում Ասորեստանից

(Դ Թագ. 16.7-9)

¹⁶ Այդ ժամանակ Աքազը լուր ուղարկեց Ասորեստանի արքային, որ օգնի իրեն, ¹⁷ քանի որ եդովմացիները հարձակվել էին Հուդայի վրա, հարվածել ու գերիներ տարել։ ¹⁸ Այլազգիներն էլ հարձակվել էին Հուդայի դաշտավայրային ու հարավային քաղաքների վրա, գրավել Բեթսամյուսը, Այելոնը, Գադերովթը, Սոկքովն ու նրա գյուղերը, Թամնան ու նրա գյուղերը, Գամեզերն ու նրա գյուղերը և բնակվել այնտեղ։ ¹⁹ Տերը Հուդային ընկճել էր Հուդայի արքա Աքազի պատճառով, որն ապստամբելով հեռացել էր Տիրոջից։ ²⁰ Ասորեստանի արքա Թագղաթփաղասարն էլ հարձակվեց նրա վրա և հարվածեց նրան։ ²¹ Աքազը, վերցնելով Տիրոջ տանը և թագավորի ու իշխանների տանը եղած ամեն ինչը, հանձնեց Ասորեստանի արքային, բայց նա օգնելու փոխարեն շարունակեց նեղել նրանց։

Աքազի սխալները

²² Արքան, է՛լ ավելի հեռանալով Տիրոջից, ²³ ասաց. «Ես պիտի հարեմ Դամասկոսի աստվածներին», թեև պարտվել էր նրանցից։ Ապա ավելացրեց. «Քանի որ Ասորիքի թագավորի աստվածներն են զորացնում նրանց, այսուհետև նրա՛նց զոհեր կմատուցեմ, և նրանք ինձ կօգնեն»։ Սակայն այդ աստվածները նրա ու ամբողջ Իսրայելի համար խոչընդոտ դարձան։

²⁴ Աքազը հեռացրեց Տիրոջ տան սպասքը, կտոր-կտոր արեց դրանք, Տիրոջ տան դռները փակեց և իր համար զոհասեղաններ շինեց Երուսաղեմի ամեն մի անկյունում։ ²⁵ Հուդայի բոլոր քաղաքներում պաշտամունքի բարձունքներ կառուցեցին, որպեսզի խունկ ծխեն օտար աստվածներին, և զայրացրին Տիրոջը՝ իրենց հայրերի Աստծուն։

²⁶ Աքազի մնացյալ գործերը՝ սկզբից մինչև վերջինը, գրի են առնված Հուդայի և Իսրայելի թագավորների գրքում։ ²⁷ Աքազը գնաց իր նախնիների գիրկը և թաղվեց Դավթի քաղաքում, քանի որ նրան թագավորների գերեզմանոցում չթաղեցին։

Նրա փոխարեն թագավորեց Եզեկիան։

29

Հուդայի Եզեկիա թագավորը

(Դ Թագ. 18.1-3)

¹ Եզեկիան քսանհինգ տարեկան էր, երբ թագավոր դարձավ։ Նա քսանինը տարի թագավորեց Երուսաղեմում։ Նրա մայրը Զաքարիայի դուստրն էր, անունը Աբաութ։ ² Եզեկիան արեց այն, ինչ ուղիղ էր Տիրոջ առաջ, ինչպես որ իր նախահայր Դավիթն էր արել։

Տաճարի մաքրությունը

³ Երբ Եզեկիան հաստատվեց իր թագավորության մեջ, առաջին ամսին բացեց Տիրոջ տան դռները և նորոգեց դրանք։ ⁴ Նա ներս տարավ քահանաներին ու ղևտացիներին և նրանց կանգնեցրեց արևելյան կողմում։ ⁵ Նա ասաց նրանց. «Լսե՛ք, ղևտացինե՛ր, այսուհետև սրբվե՛ք ու սրբե՛ք Տիրոջ՝ ձեր հայրերի Աստծու տունը և պղծությունները դո՛ւրս հանեք սրբարաններից։ ⁶ Մեր հայրերն անհավատարիմ եղան ու չարիք գործեցին Տիրոջ առջև, լքեցին նրան և իրենց երեսները շուռ տվեցին Տիրոջ խորանից, ⁷ ընդվզեցին ու փակեցին տաճարի դռները, հանգցրին ճրագները, խունկ չծխեցին և զոհեր չմատուցեցին Իսրայելի սուրբ Աստծուն։ ⁸ Տերը խիստ զայրացավ Հուդայի ու Երուսաղեմի վրա և նրանց մատնեց հիմարության, կորստյան ու խայտառակության, ինչպես դուք տեսնում եք ձեր աչքերով։ ⁹ Ահա մեր հայրերը սրակոտոր եղան, իսկ ձեր տղաներն ու աղջիկները և կանայք գերության մեջ են մի երկրում, որ իրենցը չէ, որտեղ էլ գտնվում են այժմ։ ¹⁰ Եկե՛ք այսուհետ սրտանց ուխտ դնենք Տիրոջ՝ Իսրայելի Աստծու հետ, որ նա իր բարկությունը վերացնի մեզնից։ ¹¹ Արդ, այսուհետև անհոգություն մի՛ արեք, քանզի Տերը ձեզ է ընտրել, որ կանգնեք նրա առջև, պաշտեք նրան, սպասավորեք ու խունկ ծխեք»։

¹² Ոտքի ելան ղևտացիները. Կահաթի տոհմից՝ Ամասիի որդի Մայեթը և Զաքարիայի որդի Հովելը, Մերարիի տոհմից՝ Աբդիի որդի Կիսը և Հելելի որդի Ազարիան, Գեթսոնի տոհմից՝ Զեմաթի որդի Հովան և Հովաքայի որդի Հովադան, ¹³ Եղիսափանի տոհմից՝ Սամարին և Հեիելը, Ասափի տոհմից՝ Զաքարիան և Մատթանիան, ¹⁴ Եմանի տոհմից՝ Հեիելը և Սեմեին, Իդիթունի տոհմից՝ Սամիան և Օզիելը։ ¹⁵ Նրանք հավաքեցին իրենց եղբայրներին և ըստ թագավորի պատվիրանի ու Տիրոջ հրամանի՝ սրբվեցին, որ սրբեն Տիրոջ տունը։ ¹⁶ Քահանաները մտան Տիրոջ տունը, որ սրբեն այն, և դուրս հանեցին այն ամեն տեսակ աղտեղությունները, որ գտան Տիրոջ տանն ու Տիրոջ տան գավթում։ Ղևտացիները դուրս հանեցին դրանք և առան տարան Կեդրոնի հեղեղատը։ ¹⁷ Նրանք առաջին ամսի առաջին օրը սկսեցին սրբել այն և ամսի ութերորդ օրը մտան Տիրոջ տաճարը։ Նրանք ութ օր մաքրեցին Տիրոջ տունը և առաջին ամսի տասնվեցերորդ օրը ավարտեցին աշխատանքը։

Տաճարի վերընծայումը

¹⁸ Նրանք մտան Եզեկիա արքայի մոտ և ասացին. «Սրբեցինք Տիրոջ տան մեջ եղած ամեն ինչ՝ ողջակեզների զոհասեղանն ու նրա սպասքը, Առաջավորության հացի սեղանն ու նրա սպասքը։ ¹⁹ Եվ այն բոլոր անոթները, որ Աքազ արքան պղծել էր իր թագավորության ու Տիրոջ հանդեպ իր անհավատարմության ժամանակ, պատրաստել ենք և մաքրել. ահա դրանք Տիրոջ զոհասեղանի առջև են»։

²⁰ Եզեկիա արքան առավոտ կանուխ վեր կացավ և հավաքելով քաղաքի իշխաններին՝ գնաց Տիրոջ տունը։ ²¹ Նա յոթ զվարակ, յոթ խոյ, յոթ գառ և մեղքերի քավության համար յոթ նոխազ բերեց թագավորության, սրբությունների ու Իսրայելի համար, և ասաց քահանաներին՝ Ահարոնի որդիներին. «Մոտեցե՛ք Տիրոջ զոհասեղանին» ²² Մորթեցին զվարակները և քահանաները վերցրին զոհերի արյունն ու ցանեցին զոհասեղանի վրա, մորթեցին խոյերը և արյունը ցանեցին զոհասեղանի վրա, մորթեցին գառները և արյունը ցանեցին զոհասեղանի վրա։ ²³ Այնուհետև մեղքերի քավության նոխազները բերեցին արքայի ու ժողովրդի առջև և նրանք իրենց ձեռքերը դրեցին դրանց վրա։ ²⁴ Քահանաները դրանք ևս մորթեցին և արյունը քավության համար զոհասեղանի վրա ցանեցին ու քավություն արեցին ամբողջ Իսրայելի համար, քանզի արքան ասել էր, որ ողջակեզները և մեղքերի քավության զոհաբերությունն ամբողջ Իսրայելի համար անեն։ ²⁵ Ղևտացիներին տեղավորեցին Տիրոջ տանը ծնծղաներով, տավիղներով ու քնարներով, ինչպես պատվիրել էին Դավիթ արքան, թագավորի տեսանող Գադն ու Նաթան մարգարեն, քանի որ այդ հրամանը Տերն էր տվել իր մարգարեների միջոցով։ ²⁶ Ղևտացիները կանգնեցին Դավիթ արքայի պատրաստած նվագարաններով, իսկ քահանաները՝ շեփորներով։ ²⁷ Եզեկիան կարգադրեց, որ ողջակեզները դնեն զոհասեղանի վրա։ Երբ սկսեցին ողջակեզները մատուցել, սկսեցին Տիրոջն օրհներգել շեփորներով ու Իսրայելի Դավիթ արքայի պատրաստած նվագարաններով։ ²⁸ Բոլոր հավաքվածները երկրպագում էին, սաղմոսերգուները երգում էին, շեփորները հնչում էին մինչև ողջակեզների մատուցման ավարտը։ ²⁹ Երբ ողջակեզների մատուցումը վերջացրին, թագավորն ու բոլոր քահանաները խոնարհվեցին և երկրպագություն արեցին։ ³⁰ Եզեկիա արքան ու իշխանները ղևտացիներին հրամայեցին, որ Տիրոջն օրհնաբանեն Դավթի ու Ասափ մարգարեի խոսքերով։ Նրանք օրհնաբանեցին ուրախությամբ և երեսնիվայր ընկնելով երկրպագեցին։ ³¹ Եզեկիա արքան այն ժամանակ ասաց. «Այժմ դուք ձեզ նվիրեցիք Տիրոջը, մոտեցե՛ք և ընծանե՛ր բերեք»։ Եվ հավաքվածները զոհեր ու գոհության ընծաներ բերեցին Տիրոջ տուն, իսկ ովքեր սրտով հոժար էին, ողջակեզներ մատուցեցին։ ³² Հավաքվածների մատուցած ողջակեզների թիվն այս էր. յոթանասուն զվարակ, հարյուր խոյ, երկու հարյուր գառ. սրանք բոլորն իբրև ողջակեզ մատուցվեցին Տիրոջը։ ³³ Նվիրաբերված զվարակները վեց հարյուր էին, ոչխարները՝ երեք հազար։ ³⁴ Քահանաները սակավաթիվ էին և չէին կարողանում հասցնել մորթել ողջակեզները։ Ուստի մինչ մնացած քահանաները կմաքրվեին, իրենց ղևտացի եղբայրներն էին օգնում նրանց, մինչև որ գործն ավարտվեց, քանի որ ղևտացիներն ավելի հոժարությամբ սրբվեցին, քան քահանաները։ ³⁵ Ողջակեզներն առատ էին խաղաղության համար մատուցվող ճարպերով ու ողջակեզների հեղման ընծաներով։ Այսպես Տիրոջ տանը կարգի դրվեց սպասավորության գործը։ ³⁶ Եզեկիան ու ամբողջ ժողովուրդն ուրախացան, որ Աստված այս բանն արել էր ժողովրդի համար, որովհետև այն անսպասելի արագ էր եղել։

30

Զատկի պատրաստություն

¹ Եզեկիան Իսրայելի և Հուդայի երկրներ մարդ ուղարկեց և նամակ գրեց Եփրեմի ու Մանասեի երկրներին, որ գան Տիրոջ տունը, Երուսաղեմ՝ Իսրայելի Աստծու զատիկը կատարելու։ ² Արքան, իշխաններն ու բոլոր ժողովականները, որ գտնվում էին Երուսաղեմում, որոշեցին Զատիկը տոնել երկրորդ ամսին, ³ որովհետև չէին կարողացել ժամանակին կատարել այն, քանի որ բավական թվով քահանաներ դեռ չէին մաքրվել, և ժողովուրդը չէր հավաքվել Երուսաղեմում։ ⁴ Սա ընդունելի թվաց արքային ու հավաքվածներին, ⁵ և նրանք որոշեցին, որ լուր ուղարկեն ամբողջ Իսրայելին՝ Բերսաբեեից մինչև Դան, որպեսզի գան և Տիրոջ՝ Իսրայելի Աստծու զատիկը տոնեն Երուսաղեմում, քանի որ քիչ մարդ էր հավաքվել՝ հակառակ գրվածի։

⁶ Սուրհանդակները, ըստ թագավորի հրամանի, թագավորի ու իշխանների նամակներով գնացին ամբողջ Իսրայելի ու Հուդայի բնակիչների մոտ և ասացին. «Իսրայելացինե՛ր, դարձե՛ք դեպի Տերը՝ Աբրահամի, Իսահակի և Հակոբի Աստվածը, որ նա էլ դառնա դեպի փրկվածներդ ու Ասորեստանի արքայի ձեռքից ազատվածներդ։ ⁷ Մի՛ նմանվեք ձեր եղբայրներին ու հայրերին, որոնք ընդվզեցին Տիրոջ՝ իրենց հայրերի Աստծու դեմ, և նա կործանման մատնեց նրանց, ինչպես դուք տեսնում եք։ ⁸ Արդ, կամակորություն մի՛ արեք, փա՛ռք տվեք Աստծուն, մտե՛ք նրա սրբարանը, որը նա սրբացրել է հավիտյան, ծառայե՛ք Տիրոջը՝ ձեր Աստծուն, որ նա ձեզնից հեռացնի իր սաստիկ բարկությունը։ ⁹ Եթե դառնաք դեպի Տերը, ձեր եղբայրներն ու որդիները գթության կարժանանան իրենց բոլոր գերեվարողներից, և Տերը՝ մեր Աստվածը, նրանց կվերադարձնի այս երկիրը։ Քանի որ ողորմած ու գթառատ լինելով՝ մեզնից երես չի թեքի, եթե դառնանք դեպի նա»։

¹⁰ Սուրհանդակները գնում էին քաղաքից քաղաք, Եփրեմի ու Մանասեի լեռները՝ մինչև Զաբուղոն, բայց նրանց ծաղրում ու արհամարհում էին։ ¹¹ Սակայն Ասերի, Մանասեի և Զաբուղոնի բնակիչներից ոմանք խոնարհ գտնվեցին և եկան Երուսաղեմ։ ¹² Տիրոջ ձեռքը Հուդայի վրա էր նրանց միասիրտ դարձնելու համար, որպեսզի գան ու կատարեն այն, ինչ պատվիրել էին արքան ու իշխաններն ըստ Տիրոջ խոսքի։

Զատկի տոնակատարությունը

¹³ Երուսաղեմում մեծ բազմություն հավաքվեց, որ երկրորդ ամսում կատարեն Բաղարջակերաց տոնը։ ¹⁴ Նրանք վեր կացան ու քանդեցին բոլոր զոհասեղանները, որ կային Երուսաղեմում և բոլոր այն սեղանները, որոնց վրա խունկ էին ծխում սուտ աստվածներին, քանդեցին ու գցեցին Կեդրոնի հեղեղատը։ ¹⁵ Նրանք զատկի գառը մորթեցին երկրորդ ամսի տասնչորսին. քահանաներն ու ղևտացիներն ամաչում էին, որ անմաքուր են, և մաքրվեցին և ապա ողջակեզներ մատուցեցին Տիրոջ տանը։ ¹⁶ Նրանք ըստ իրենց կանոնի կանգնեցին իրենց տեղում, ինչպես պատվիրել էր Աստծու մարդ Մովսեսը, և քահանաները զոհի արյունն ընդունում էին ղևտացիների ձեռքից։ ¹⁷ Քանի որ հավաքվածներից շատերը դեռ մաքրված չէին, ղևտացիները պետք է մորթեին զատկանան զոհը բոլոր նրանց համար, ովքեր չէին կարողացել սրբել իրենց Տիրոջ համար։ ¹⁸ Թեև Եփրեմի, Մանասեի, Իսաքարի, Զաբուղոնի մարդկանցից շատերը մաքրված չէին, բայց կերան զատիկը՝ հակառակ գրվածի։ Եզեկիան, նրանց համար աղոթելով, ասաց. «Բարերա՛ր Տեր, ողորմի՛ր ¹⁹ բոլոր նրանց, ովքեր իրենց սիրտն ուղղել են Տիրոջը՝ իրենց հայրերի Աստծուն փնտրելուն, թեև ըստ սրբարանի օրենքի՝ մաքրված չեն»։ ²⁰ Տերը լսեց Եզեկիային ու ներեց ժողովրդին։

²¹ Երուսաղեմում գտնվող իսրայելացիները Բաղարջակերաց տոնը յոթ օր տոնեցին մեծ ուրախությամբ՝ ամեն օր օրհնաբանելով Տիրոջը, իսկ քահանաներն ու ղևտացիները նվագակցում էին Տիրոջ փառաբանությանը հատկացված նվագարաններով։ ²² Եզեկիան գովասանքի խոսքեր ասաց բոլոր ղևտացիներին և մյուս իմաստուններին, որոնց ծանոթ էր Տիրոջ բարի հանճարը։ Յոթ օր կատարեցին Բաղարջակերաց տոնը՝ փրկության զոհեր մատուցելով ու գոհաբանելով Տիրոջը՝ իրենց հայրերի Աստծուն։

²³ Հավաքվածները միահամուռ առաջարկեցին յոթ օր ևս տոն անել. և յոթ օր ևս ուրախություն արեցին։ ²⁴ Եզեկիան Հուդայից եկածներին տվեց հազար զվարակ ու յոթ հազար ոչխար, իսկ իշխանները ժողովրդին տվեցին հազար զվարակ և տասը հազար ոչխար։ Քահանաներից շատ-շատերը մաքրվեցին, ²⁵ և բոլոր հավաքվածները՝ քահանաներն ու ղևտացիները, ինչպես նաև Հուդայի ամբողջ ժողովուրդը, Իսրայելից այնտեղ ներկա գտնվողները և Իսրայելից տեղափոխված ու Հուդայում բնակություն հաստատածները, ուրախացան։ ²⁶ Երուսաղեմում մեծ ուրախություն եղավ. Իսրայելի արքա Դավթի որդի Սողոմոնի օրերից սկսած այսպիսի տոն չէր եղել Երուսաղեմում։

²⁷ Այնուհետև քահանաներն ու ղևտացիները ոտքի ելան և օրհնեցին ժողովրդին. նրանց ձայնը լսելի եղավ, ու նրանց աղոթքը հասավ երկինք՝ Տիրոջ սուրբ բնակարանը։

31

Եզեկիան կազմակերպում է տաճարի պաշտամունքը

¹ Երբ այս ամենն ավարտվեց, ներկա գտնվող իսրայելացիները ոտքի ելան և ամբողջ Հուդայում, Բենիամինի, Եփրեմի ու Մանասեի երկրներում իսպառ փշրեցին պաշտամունքային սյուները և կործանեցին պաշտամունքի բարձունքներն ու բագինները։ Ապա բոլոր իսրայելացիներն իրենց քաղաքները վերադարձան՝ յուրաքանչյուրն իր կալվածքը։

² Եզեկիան կարգեց քահանաների ու ղևտացիների դասերը, քահանաներից ու ղևտացիներից յուրաքանչյուրի դասը՝ ըստ իր սպասավորության, որպեսզի ողջակեզներ ու փրկության զոհեր մատուցեն, օրհնաբանեն, գոհաբանեն և ծառայեն Տիրոջ տան սրահների դռների մոտ։ ³ Թագավորն իր ունեցվածքից բաժին հանեց առավոտյան և երեկոյան ողջակեզների, շաբաթ օրերի, ամսամուտների և Տիրոջ օրենքում նշված տոների ողջակեզների համար։ ⁴ Նա Երուսաղեմում բնակվող ժողովրդին կարգադրեց, որ տան քահանաների ու ղևտացիների բաժինը, որպեսզի կարողանան կատարել Տիրոջ տան սպասավորությունը։ ⁵ Երբ այս բանը հրամայեց, իսրայելացիները առատորեն բերեցին ցորենի, գինու, ձեթի, մեղրի և դաշտերի բոլոր բերքերի երախայրիքը։ Իսրայելացիներն ու Հուդայի բնակիչները առատորեն բերեցին նաև ամեն ինչի տասանորդը։ ⁶ Հուդայի քաղաքներում բնակվող Իսրայելի և Հուդայի որդիներն էլ բերեցին զվարակների ու ոչխարների տասանորդները, բերեցին և կիտեցին կույտ-կույտ։ ⁷ Կույտերն սկսեցին դիզվել երրորդ ամսին և ավարտի հասան յոթերորդ ամսին։ ⁸ Եզեկիան ու իշխանները եկան տեսան կույտերը և օրհնեցին Տիրոջն ու նրա ժողովրդին՝ Իսրայելին։ ⁹ Եզեկիան քահանաներին ու ղևտացիներին հարցրեց կույտերի մասին, ¹⁰ և Ազարիա քահանան՝ Սադովկի տան իշխանը, ասաց նրան. «Այն բանից հետո, երբ սկսեցին երախայրիքները բերել Տիրոջ տունը, մենք կերանք, խմեցինք և թողեցինք այդ մնացորդը։ Քանի որ Ամենակալ Տերն օրհնեց իր այդ ժողովրդին, ահա այսքան շատ մնացորդ է ավելացել»։

¹¹ Եզեկիան ասաց. «Ուրիշ շտեմարաններ և՛ս պատրաստեք Տիրոջ տանը»։ ¹² Պատրաստեցին և հավատարմությամբ այնտեղ բերեցին երախայրիքներն ու տասանորդները։ Դրանց վերակացուն ղևտացի Քոնենիան էր, իսկ նրա եղբայր Սեմեին իր փոխանորդն էր։ ¹³ Հեիելը, Ոզիասը, Նաթանը, Ասայելը, Հերիմովթը, Հովզաբադը, Ելիելը, Սամաքիան, Մաաթը, Բանեան ու նրա որդիներն օգնում էին Քոնենիային ու նրա եղբայր Սեմեիին, ինչպես հրամայել էր Եզեկիա արքան ու Տիրոջ տան ղեկավար Ազարիան։ ¹⁴ Ղևտացի Հեմնայի որդի Կորեն՝ արևելյան կողմի դռան պահապանը, նշանակված էր ընծաների վրա՝ Տիրոջը նվիրաբերված երախայրիքներն ու ամենասուրբ նվերները բաժանելու համար։ ¹⁵ Օդոմը, Բենիամինը, Հեսուն, Սեմեին, Ամարիան ու Սեքինիան հավատարմորեն օգնում էին նրան քահանաների քաղաքներում[49]՝ իրենց դասերի համաձայն բաժիններ հատկացնելու իրենց եղբայրներին՝ թե՛ մեծերին և թե՛ փոքրերին, ¹⁶ բացի երեք և ավելի բարձր տարիք ունեցող արական սեռի մարդկանցից, նաև բոլոր նրանց, ովքեր յուրաքանչյուր օրվա կարգի համաձայն մտնում էին Տիրոջ տունը՝ ըստ իրենց դասերի և պաշտոնի սպասավորություն կատարելու։ ¹⁷ Քահանաները հաշվառված էին ըստ իրենց ազգատոհմերի, իսկ քսան տարեկան և ավելի բարձր տարիք ունեցող ղևտացիները՝ ըստ իրենց դասերի և պաշտոնի։ ¹⁸ Մարդահամարի մեջ արձանագրված էին նաև նրանց տղաներն ու աղջիկները՝ ամբողջ բազմությամբ, քանի որ սրանք հավատարմորեն սրբագործեցին սրբարանը։ ¹⁹ Քաղաքի շուրջը բնակվող Ահարոնի որդիների՝ քահանաների համար յուրաքանչյուր քաղաքում անվանապես մարդիկ նշանակվեցին, որպեսզի բաժին տան քահանաների բոլոր արուներին ու ղևտացիների ցուցակի մեջ արձանագրված բոլոր մարդկանց։

²⁰ Եզեկիան այսպես արեց ամբողջ Հուդայում. նա արեց այն, ինչ բարի և ուղիղ էր Տիրոջ՝ իր Աստծու առաջ։ ²¹ Ամեն գործի մեջ, որ ձեռնարկեց թե՛ Տիրոջ տանը ծառայելիս, թե՛ Տիրոջ օրենքն ու պատվիրանը կատարելիս, իր ամբողջ սրտով փնտրեց Աստծուն, կատարեց և հաջողություն ունեցավ։

32

Սենեքերիմի հարձակումը Հուդայի վրա

(Դ Թագ. 18.13-37, 19.14-19, 35-37, Ես. 36.1-22, 37.8-38)

¹ Այս բաներից և հավատարմության գործերից հետո Ասորեստանի արքա Սենեքերիմը հարձակվեց Հուդայի վրա և բանակատեղի դրեց պարսպապատ քաղաքների շուրջը։ Նա ասում էր, որ կգրավի դրանք։ ² Երբ Եզեկիան տեսավ, որ Սենեքերիմն իր դեմ է եկել՝ պատերազմելու Երուսաղեմի դեմ, ³ խորհուրդ արեց ծերերի ու զինվորականների հետ՝ փակելու քաղաքից դուրս գտնվող աղբյուրների ջրերը։ Եվ փակեցին դրանք։ ⁴ Նա մեծ թվով մարդկանց հավաքեց, որոնք փակեցին աղբյուրների ջրերն ու գետի ճանապարհը, որ բաժանում էր քաղաքը՝ անցնելով նրա միջով։ Նրանք ասացին. «Չլինի թե Ասորեստանի արքան գալով առատ ջուր գտնի և հզորանա»։ ⁵ Եզեկիան զորացավ և վերաշինեց բոլոր կործանված պարիսպներն ու աշտարակները, ինչպես նաև կառուցեց արտաքին մի ուրիշ պարիսպ։ Նա ամրացրեց Դավթի քաղաքի պատնեշները և շատ զենք պատրաստեց։ ⁶ Նա զորքերի վրա հրամանատարներ նշանակեց, որոնք հավաքվեցին նրա մոտ՝ Ձորի դարպասի հրապարակում։ Նա սրտապնդեց նրանց՝ ասելով. ⁷ «Զորացե՛ք ու քա՛ջ եղեք, մի՛ վախեցեք Ասորեստանի թագավորից և այն ազգերից, որոնք նրա հետ են, որովհետև մեզ հետ եղածներն ավելի շատ են, քան նրանց հետ եղածները։ ⁸ Նրա հետ մարմնավոր բազուկներ են, իսկ մեզ հետ Տերն է՝ մեր Աստվածը, որպեսզի փրկի մեզ ու մեր պատերազմը մղի»։ Ժողովուրդը քաջալերվեց Հուդայի արքա Եզեկիայի խոսքերից։

Սենեքերիմի ուղերձը Երուսաղեմի բնակիչներին

⁹ Դրանից հետո Ասորեստանի արքա Սենեքերիմը, մինչ իր ամբողջ զորքով Լաքիսում էր, իր պաշտոնյաներին ուղարկեց Երուսաղեմ՝ Հուդայի արքա Եզեկիայի մոտ՝ ասելով. ¹⁰ «Այսպես է ասում Ասորեստանի արքա Սենեքերիմը. “Ո՞ւմ ապավինելով եք դուք նստել Երուսաղեմի ամրոցում։ ¹¹ Չէ՞ որ Եզեկիան ձեզ խաբում է, որ ձեզ մատնի մահվան, սովի ու ծարավի՝ ասելով. “Տերը՝ ձեր Աստվածը, կփրկի ձեզ Ասորեստանի արքայի ձեռքից”։ ¹² Դա այն Եզեկիան չէ՞, որ քանդեց նրա զոհասեղանները, պաշտամունքի բարձունքները և ասաց Հուդայի ու Երուսաղեմի բնակիչներին. “Միայն այս զոհասեղանի առջև պետք է երկրպագեք և այս զոհասեղանի վրա պիտի զոհ մատուցեք”։ ¹³ Դուք չգիտե՞ք, թե ի՛նչ ենք արել ես և իմ հայրերը բոլոր ժողովուրդներին ու երկրներին։ Մի՞թե բոլոր այդ երկրների ազգերի աստվածները կարողացան փրկել իրենց ժողովրդին իմ ձեռքից։ ¹⁴ Իմ հայրերի կոտորած այդ ազգերի բոլոր աստվածներից ո՞ր մեկը կարողացավ փրկել իր ժողովրդին իմ ձեռքից, որ ձեր Աստվածը կարողանա ձեզ փրկել իմ ձեռքից։ ¹⁵ Արդ, Եզեկիան թող ձեզ չխաբի, թող ձեզ դրանով չհուսադրի։ Մի՛ հավատացեք նրան, քանի որ բոլոր ազգերի ու թագավորությունների աստվածները չկարողացան իրենց ժողովուրդներին փրկել իմ և իմ նախնիների ձեռքից. ձեր Աստվածն էլ ձեզ չի փրկի իմ ձեռքից”»։ ¹⁶ Եվ ավելին էլ խոսեցին նրա պաշտոնյաները Տիրոջ՝ Աստծու և նրա ծառա Եզեկիայի դեմ։

Սենեքերիմը հայհոյում է Աստծուն

¹⁷ Սենեքերիմը նաև նամակ էր գրել՝ Տիրոջը՝ Իսրայելի Աստծուն անարգելու համար, և նրա մասին ասում էր. «Ինչպես որ երկրի ուրիշ ազգերի աստվածներն իրենց ժողովուրդներին չփրկեցին իմ ձեռքից, այդպես էլ Եզեկիայի Աստվածն իր ժողովրդին չի փրկի իմ ձեռքից»։ ¹⁸ Սենեքերիմի պաշտոնյաները եբրայերեն բարձրաձայն դիմեցին Երուսաղեմի պարսպի վրա եղած ժողովրդին՝ նրանց վախեցնելու և ընկճելու համար, որպեսզի շուտափույթ գրավեն քաղաքը։ ¹⁹ Երուսաղեմի Աստծու մասին նա այնպես խոսեց, ինչպես կխոսեր երկրի ժողովուրդների՝ մարդու ձեռքով կերտված աստվածների մասին։

Ասորեստանցիների փախուստը և Սենեքերիմի մահը

²⁰ Եզեկիա արքան և Ամովսի որդի Եսայի մարգարեն աղոթք արեցին այս բանի համար և դեպի երկինք աղաղակեցին։ ²¹ Տերը հրեշտակ ուղարկեց և բնաջնջեց Ասորեստանի արքայի բանակում գտնվող բոլոր հզոր պատերազմողներին, իշխաններին ու զորագլուխներին։ Սենեքերիմը ամոթապարտ վերադարձավ իր երկիրը, գնաց իր աստծու տունը, և իր հարազատ որդիներն այնտեղ սրով սպանեցին նրան։ ²² Տերը Եզեկիային ու Երուսաղեմի բնակիչներին փրկեց Ասորեստանի Սենեքերիմ արքայի ու ամենքի ձեռքից և նրանց բոլոր կողմերից խաղաղություն պարգևեց։ ²³ Շատերը Տիրոջը զոհեր էին բերում Երուսաղեմ և ընծաներ՝ Հուդայի արքա Եզեկիային։ Եզեկիան դրանից հետո բարձրացավ բոլոր ազգերի աչքին։

Եզեկիայի հիվանդությունը և մեծամտությունը

(Դ Թագ. 20.1-3, 12-19, Ես. 28.1-3, 39.1-8)

²⁴ Այդ օրերին Եզեկիան մերձիմահ հիվանդացավ։ Նա աղոթք արեց Տիրոջը, որը լսեց նրան ու մի նշան ցույց տվեց, ²⁵ բայց Եզեկիան իր նկատմամբ ցույց տրված բարերարության համեմատ չհատուցեց, այլ մեծամտացավ, ուստի բարկություն իջավ նրա, Հուդայի ու Երուսաղեմի վրա։ ²⁶ Եզեկիան հրաժարվեց իր մեծամտությունից, ինչպես և Երուսաղեմի բնակիչները, և Եզեկիայի թագավորության օրոք Տիրոջ բարկությունն այլևս չիջավ նրանց վրա։

Եզեկիայի հարստությունն ու փառքը

²⁷ Եզեկիան շատ մեծ հարստության և փառքի տիրացավ։ Նա իր համար ոսկու, արծաթի, պատվական քարերի, խնկի, զենքի ու թանկարժեք իրերի գանձարաններ շինեց։ ²⁸ Նա ցորենի, գինու և ձեթի բերքի համար շտեմարաններ կառուցել տվեց, ամեն տեսակ անասունների համար՝ ախոռներ, հոտերի համար՝ գոմեր։ ²⁹ Նա նաև քաղաքներ կառուցեց իր համար և մեծ թվով ոչխարներ ու արջառներ ունեցավ, որովհետև Տերը նրան չափազանց շատ ունեցվածք էր տվել։ ³⁰ Նույն այս Եզեկիան փակեց Վերին Գեհոնի ջրի ելքը և այն ուղղեց ցած՝ դեպի Դավթի քաղաքի արևմտյան կողմը։ Եզեկիան իր բոլոր գործերում հաջողություն ունեցավ։

³¹ Երբ Բաբելոնից իշխանները դեսպաններ ուղարկեցին նրա մոտ՝ հարցնելու նրան իր երկրում եղած զարմանահրաշ գործերի մասին, Տերը ազատ թողեց նրան՝ փորձելու և գիտենալու համար, թե ի՛նչ կա նրա սրտում։

Եզեկիայի թագավորության վախճանը

(Դ Թագ. 20.20-21)

³² Եզեկիայի մնացած գործերը և նրա բարեպաշտությունը գրի են առնված Ամովսի որդի Եսայի մարգարեի մարգարեության մեջ և Հուդայի ու Իսրայելի թագավորների գրքում։ ³³ Եզեկիան գնաց իր նախնիների գիրկը, և նրան թաղեցին Դավթի հետնորդների գերեզմանների բարձր տեղում։ Ամբողջ Հուդան և Երուսաղեմի բնակիչները նրան փառք ու պատվի արժանացրին իր մահվան ժամանակ։

Նրա փոխարեն թագավորեց իր որդի Մանասեն։

33

Հուդայի Մանասե թագավորը

(Դ Թագ. 21.1-9)

¹ Մանասեն տասներկու տարեկան էր, երբ թագավոր դարձավ, և հիսունհինգ տարի թագավորեց Երուսաղեմում։ ² Նա չարիք գործեց Տիրոջ առաջ՝ նմանությամբ այն ազգերի գարշելի գործերի, որոնց Տերը բնաջնջել էր իսրայելացիների առջևից։ ³ Նա վերականգնեց այն պաշտամունքի բարձունքները, որ իր հայրը՝ Եզեկիան, քանդել էր, Բահաղի կուռքերի արձաններ կանգնեցրեց և սրբազան անտառներ հիմնեց։ Նա երկրպագեց երկնքի բոլոր զորություններին ու ծառայեց նրանց։ ⁴ Նա զոհասեղաններ պատրաստեց Տիրոջ տան մեջ, որի մասին Տերն ասել էր. «Իմ անունը հավիտյան Երուսաղեմում պիտի լինի»։ ⁵ Նա այստեղ՝ Տիրոջ տան երկու գավիթներում, զոհասեղաններ շինեց երկնքի բոլոր զորությունների համար։ ⁶ Նա իր ձեռքով իր որդիներին ողջակեզ արեց Բեննոմի երկրում և հմայություն, գուշակություն ու դյութություն էր անում։ Նա ուներ վհուկներ ու կախարդներ։ Շատացրեց իր չար գործերը Տիրոջ առջև և բարկացրեց նրան։ ⁷ Նա ձուլածո քանդակված կուռքը դրեց Տիրոջ տան մեջ, որի մասին Աստված ասել էր Դավթին ու նրա որդի Սողոմոնին. «Այս տան մեջ և Երուսաղեմում, որ ես ընտրել եմ Իսրայելի բոլոր ցեղերի միջից, իմ անունը պիտի դնեմ հավիտյան ⁸ և Իսրայելի ոտքը այլևս չեմ շարժելու այս երկրից, որը նրանց հայրերին տվեցի, միայն թե պահեն այն ամենը, որ պատվիրել եմ նրանց ըստ Մովսեսի միջոցով տրված բոլոր օրենքների, պատվիրանների ու կանոնների»։ ⁹ Բայց Մանասեն մոլորեցրեց Հուդայի ու Երուսաղեմի բնակիչներին, որ չարիք գործեն առավել, քան այն բոլոր ազգերը, որոնց վերացրել էր Տերը իսրայելացիների առջևից։ ¹⁰ Տերը խոսեց Մանասեի ու նրա ժողովրդի հետ, սակայն նրանք չլսեցին։

Մանասեի զղջումը

¹¹ Տերը նրա դեմ հանեց Ասորեստանի արքայի զորքի հրամանատարներին, որոնք բռնեցին Մանասեին, կապանքներով կապեցին ու տարան Բաբելոն։ ¹² Բայց երբ նեղության մեջ ընկավ, Տիրոջ՝ իր Աստծու ներկայությունը փնտրեց և իրեն չափազանց խոնարհեցրեց իր հայրերի Աստծու առջև։ ¹³ Նա աղոթեց Աստծուն. Աստված լսեց նրա աղաչանքը ու նրան վերադարձրեց Երուսաղեմ, իր թագավորությանը։ Եվ Մանասեն հասկացավ, որ Տերն ինքն է Աստվածը։

¹⁴ Դրանից հետո նա պարիսպ շինեց Դավթի քաղաքից դուրս՝ Գեհոնի արևմուտքում, հեղեղատում, որ ձգվում էր մինչև դարպասի մուտքը և շրջապատում Օփելը. նա շատ բարձրացրեց այն։ Նաև զորքի հրամանատարներ նշանակեց Հուդայի բոլոր պարսպապատ քաղաքներում։ ¹⁵ Նա Տիրոջ տնից վերացրեց օտար աստվածներին ու քանդակված կուռքը, նաև այն զոհասեղանները, որ պատրաստել էր Տիրոջ տան բարձունքի վրա և Երուսաղեմում, ու դրանք քաղաքից դուրս թափեց։ ¹⁶ Նա նորոգեց Տիրոջ զոհասեղանը և նրա վրա փրկության ու գոհաբանության զոհեր մատուցեց։ Նա Հուդայի բնակիչներին պատվիրեց, որ Տիրոջը՝ Իսրայելի Աստծուն, պաշտեն։ ¹⁷ Սակայն ժողովուրդը տակավին հաճախում էր պաշտամունքի բարձունքները, բայց միայն Տիրոջը՝ իրենց Աստծուն զոհեր մատուցելու։

Մանասեի թագավորության վախճանը

(Դ Թագ. 21.17-18)

¹⁸ Մանասեի մնացած գործերը, առ Աստված նրա աղոթքը և տեսանողների խոսքերը, որ Տիրոջ՝ Իսրայելի Աստծու անունով հաղորդել էին նրան, ահա գրի են առնված Իսրայելի թագավորների գրքում։ ¹⁹ Նրա աղոթքի խոսքերը, և թե ինչպե՛ս Տերը լսեց նրան, ինչպես նաև նրա բոլոր մեղքերն ու նրա անհավատարմությունը Տիրոջ հանդեպ և այն տեղերը, ուր պաշտամունքի բարձունքներ շինեց, պաշտամունքային փայտե սյուներ կանգնեցրեց ու կուռքեր պատրաստեց նախքան իր դարձի գալը, ահա գրի են առնված տեսանողների գրքերում։ ²⁰ Մանասեն գնաց իր նախնիների գիրկը, և նրան թաղեցին իր տան պարտեզում։

Հուդայի Ամովն թագավորը

(Դ Թագ. 21.19-26)

²¹ Մանասեի փոխարեն թագավորեց իր որդի Ամովնը։ Ամովնը քսաներկու տարեկան էր, երբ թագավոր դարձավ, և տասներկու տարի թագավորեց Երուսաղեմում։ ²² Նա չարիք գործեց Տիրոջ առաջ, ինչպես արել էր իր հայրը՝ Մանասեն. իր հոր՝ Մանասեի պատրաստած բոլոր կուռքերին Ամովնը զոհեր մատուցեց և պաշտեց դրանք։ ²³ Նա չխոնարհվեց Տիրոջ առջև, ինչպես որ արել էր իր հայրը՝ Մանասեն, այլ նրա որդին՝ Ամովնը, ավելի ու ավելի շատ մեղքեր գործեց։ ²⁴ Նրա դեմ ելան իր պալատականները և նրան սպանեցին իր տան մեջ։ ²⁵ Իսկ երկրի ժողովուրդը սպանեց նրանց, որոնք հարձակվել էին թագավորի վրա։

Երկրի ժողովուրդը նրա փոխարեն գահ բարձրացրեց նրա որդուն՝ Հովսիային։

34

Հուդայի Հովսիա թագավորը

(Դ Թագ. 22.1-2)

¹ Հովսիան ութ տարեկան էր, երբ թագավոր դարձավ, և երեսունմեկ տարի թագավորեց Երուսաղեմում։ ² Նա արեց այն, ինչ ուղիղ էր Տիրոջ առջև. գնաց իր նախահայր Դավթի ճանապարհներով՝ չխոտորվելով ո՛չ աջ, ո՛չ ձախ։

Կրոնական բարեփոխություններ

³ Իր թագավորության ութերորդ տարում, երբ Հովսիան տակավին երիտասարդ էր, սկսեց փնտրել Տիրոջը՝ իր նախնի Դավթի Աստծուն, իսկ իր թագավորության տասներկուերորդ տարում սկսեց Հուդան ու Երուսաղեմը մաքրել պաշտամունքի բարձունքներից, պաշտամունքային փայտե սյուներից ու ձուլածո կուռքերից։ ⁴ Իր ներկայությամբ կործանել տվեց Բահաղի կուռքերի զոհասեղանները և սրանց վերևի մասում գտնվող բարձրադիր պաշտամունքի տեղերը։ Նա ջարդեց պաշտամունքային փայտե սյուները, քանդակված ու ձուլածո կուռքերը, փշրեց, փոշիացրեց դրանք և շպրտեց դրանց զոհ մատուցողների շիրիմների վրա։ ⁵ Նա զոհասեղանների վրա այրեց քրմերի ոսկորները և մաքրեց Հուդայի երկիրն ու Երուսաղեմը։ ⁶ Եփրեմի, Մանասեի, Շմավոնի և Նեփթաղիմի քաղաքներում ու դրանց շրջակա վայրերում ⁷ ևս վերացրեց պաշտամունքային փայտե սյուները, մանր փշրեց բագիններն ու կուռքերը, Իսրայելի ամբողջ երկրից վերացրեց բոլոր պաշտամունքի բարձունքները և վերադարձավ Երուսաղեմ։

Տաճարի վերանորոգությունը

(Դ Թագ. 22.3-20)

⁸ Իր թագավորության տասնութերորդ տարում, երբ վերջացրել էր երկիրն ու թագավորական տունը մաքրելը, Սելիի որդի Սափանին, քաղաքի իշխան Մասիային ու Հովաքազի որդի Հովսիային՝ իր դիվանապետին, ուղարկեց, որ նորոգեն Տիրոջ՝ իր Աստծու տունը։ ⁹ Սրանք եկան մեծ քահանա Քեղկիայի մոտ, և նա տվեց Տիրոջ տուն բերված արծաթ դրամը, որը ղևտացի դռանապանները հավաքել էին Մանասեի, Եփրեմի երկրներից, իշխաններից և Իսրայելի մնացած բոլոր վայրերից, Հուդայի, Բենիամինի երկրների և Երուսաղեմի բնակիչներից։ ¹⁰ Նրանք այն տվեցին Տիրոջ տանը գտնվող գործավորներին՝ այն նորոգելու և ամրացնելու համար։ ¹¹ Նրանք արծաթը տվեցին հյուսներին և շինարարներին, որ քառանկյուն խոշոր քարեր ու գերանների համար փայտ գնեն, որպեսզի ծածկեն այն շենքերը, որ Հուդայի թագավորներն էին քանդել։ ¹² Այդ մարդիկ հավատարմորեն կատարեցին գործը։ Նրանց հսկելու համար վերակացուներ էին կարգված Մերարիի որդիներից ղևտացիներ Հեթն ու Աբդիան և Կահաթի որդիներից Զաքարիան ու Մեսոլամը։ Մյուս բոլոր ղևտացիները, որոնք բոլորն էլ նվագարանների հմուտ նվագողներ էին, ¹³ վերակացու էին բեռնակիրների ու ամեն տեսակ գործեր կատարողների վրա։ Ղևտացիներից ոմանք էլ քարտուղարներ, դատավորներ ու դռների պահապաններ էին։

Օրենքի գրքի հայտնաբերումը

¹⁴ Երբ դուրս էին հանում Տիրոջ տուն բերված արծաթը, Քեղկիա քահանան գտավ Մովսեսի ձեռքով գրված Տիրոջ օրենքի գիրքը։ ¹⁵ Քեղկիան Սափան քարտուղարին ասաց. «Օրենքի գիրք եմ գտել Տիրոջ տանը»։ Քեղկիան գիրքը տվեց Սափանին։ ¹⁶ Սափանն այդ գիրքը բերեց արքային, ինչպես նաև զեկուցեց. «Տրված ամբողջ արծաթը գտնվում է քո ծառաների՝ գործավորների ձեռքում։ ¹⁷ Հավաքեցին Տիրոջ տանը գտնված արծաթը և այն տվեցին վերակացուներին ու գործավորներին»։ ¹⁸ Սափան քարտուղարը պատմեց արքային՝ ասելով. «Քեղկիա քահանան ինձ Օրենքի մի գիրք տվեց»։ Սափանն այն ընթերցեց թագավորի առջև։ ¹⁹ Երբ արքան լսեց Օրենքի գրքի խոսքերը, պատառոտեց իր պատմուճանը։ ²⁰ Արքան պատվիրեց Քեղկիային, Սափանի որդի Աքիկամին, Միքեայի որդի Աբդիին, Սափան քարտուղարին և արքայի ծառա Ասայիային՝ ասելով. ²¹ «Գնացե՛ք և այդ գտնված գրքում գրվածի վերաբերյալ Տիրոջը հարցրե՛ք ինձ համար և Իսրայելում ու Հուդայում մնացած բոլորի համար, քանզի Տիրոջ սաստիկ բարկությունը բորբոքված է մեզ վրա, որովհետև մեր նախնիները չանսացին Տիրոջ խոսքերին՝ կատարելու այն ամենը, ինչ գրված է այս գրքի մեջ»։

Մարգարեուհու պատգամը

²² Քեղկիան և նրանք, որոնց արքան ուղարկել էր, գնացին Օղդան մարգարեուհու՝ Եսերի որդի Թակուաթի որդի Սելեմի կնոջ մոտ, որը պահում էր պատվիրանները [*  և Ο΄ հանդերձները]։ Նա ապրում էր Երուսաղեմի Մասենա թաղամասում։ Նրան պատմեցին այդ խոսքերը։ ²³ Նա ասաց նրանց. «Այսպես է ասում Տերը՝ Իսրայելի Աստվածը. “Ասացե՛ք այն մարդուն, որ ձեզ ինձ մոտ է ուղարկել, ²⁴ թե այսպես է ասում Տերը. “Ահա ես այդ տեղի վրա չարիք պիտի բերեմ, այն ամենը, ինչ գրված է Հուդայի արքայի առջև ընթերցված այդ գրքում։ ²⁵ Քանի որ ինձ լքելով զոհեր մատուցեցին օտար աստվածների, որպեսզի ինձ բարկացնեն իրենց ձեռքի գործերով, իմ բորբոքված բարկությունն է իջնելու այդ տեղի վրա և չի մարելու”։ ²⁶ Իսկ Հուդայի թագավորին, որ ձեզ ուղարկել է Տիրոջը հարցնելու, այսպե՛ս ասացեք. “Այսպես է ասում Տերը՝ Իսրայելի Աստվածը. “Քո լսած խոսքերը ²⁷ պատկառանքով լցրեցին քո սիրտը, և դու խոնարհվեցիր իմ առջև, երբ լսեցիր այդ տեղի ու նրա բնակիչների դեմ ասված իմ խոսքերը։ Դու խոնարհվեցիր իմ առջև, պատառոտեցիր քո պատմուճանը ու լաց եղար իմ դիմաց, և ես լսեցի,- ասում է Տերը։ ²⁸ Ահա քեզ քո նախնիների գիրկը կտանեմ, և քեզ քո շիրիմի մեջ կդնեն խաղաղությամբ, ու քո աչքերը չեն տեսնի այն բոլոր չարիքները, որ ես բերելու եմ այդ տեղի ու դրա բնակիչների վրա”»։ Այս խոսքերը հաղորդեցին թագավորին։

Ուխտի վերանորոգում

(Դ Թագ. 23.1-20)

²⁹ Արքան մարդ ուղարկեց ու հավաքեց Հուդայի և Երուսաղեմի ծերերին։ ³⁰ Հուդայի արքան և Հուդայի ու Երուսաղեմի բոլոր բնակիչները, քահանաներն ու ղևտացիները և ամբողջ ժողովուրդը՝ մեծից մինչև փոքրը, եկան Տիրոջ տունը, և արքան նրանց առաջ ընթերցեց Տիրոջ տանը գտնված ուխտի բոլոր խոսքերը։ ³¹ Հովսիա թագավորը վեր կացավ, կանգնեց սյան մոտ և ուխտեց Տիրոջ առջև՝ Տիրոջը հետևել, ամբողջ սրտով ու ամբողջ հոգով պահել նրա պատվիրանները, նրա օրենքներն ու հրամանները և այդ գրքում գրված ուխտի խոսքերը։ ³² Նա հորդորեց Երուսաղեմում ու Բենիամինի երկրում գտնվող բոլոր մարդկանց, և Երուսաղեմի բնակիչները ուխտ արեցին իրենց հայրերի Աստծու տանը։ ³³ Հովսիան իսրայելացիների ամբողջ երկրից վերացրեց բոլոր պղծությունները և Երուսաղեմում ու Իսրայելում գտնվող բոլոր մարդկանց համոզեց ծառայել Տիրոջը՝ իրենց Աստծուն։ Իր բոլոր օրերին նա չխոտորվեց Տիրոջ՝ իր նախնիների Աստծու ուղուց։

35

Հովսիան տոնում է Զատիկը

(Դ Թագ. 23.21-23)

¹ Հովսիան կատարեց Տիրոջ՝ իր Աստծու զատիկը. զատկի գառը մորթեցին առաջին ամսի տասնչորսերորդ օրը։ ² Նա քահանաներին կարգեց իրենց պաշտոնի վրա և հորդորեց նրանց՝ կատարելու Տիրոջ տան սպասավորությունը։ ³ Նա ասաց ղևտացիներին՝ ամբողջ Իսրայելի վերակացուներին, որ պետք է իրենց նվիրեն Տիրոջը և սուրբ տապանակը դնեն այն տանը, որը շինել էր Իսրայելի արքա Դավթի որդի Սողոմոնը։ Արքան ասաց. «Դուք ոչ մի բան չպետք է կրեք ձեր ուսերի վրա։ Արդ, ծառայե՛ք Տիրոջը՝ ձեր Աստծուն, և նրա ժողովրդին՝ իսրայելացիներին։ ⁴ Պատրա՛ստ եղեք ըստ ձեր ազգատոհմերի և ըստ ձեր առօրյա պաշտամունքի, ըստ Իսրայելի արքա Դավթի և նրա որդի Սողոմոն թագավորի գրածի։ ⁵ Տաճարում կանգնե՛ք ըստ ձեր եղբայրների՝ ձեր ժողովրդի որդիների ազգատոհմերի բաժանումների և ղևտացիների ազգատոհմի բաժանումի համեմատ։ ⁶ Մորթե՛ք զատկի գառը և պատրաստե՛ք սրբությունները ձեր եղբայրների համար՝ գործելով ըստ Մովսեսի միջոցով տրված Տիրոջ խոսքի»։ ⁷ Եվ Հովսիան սկսեց ժողովրդի որդիներին և ամենքին, որ այնտեղ էին գտնվում, խոյեր, գառներ և մատաղ այծերի նոխազներ տալ՝ բոլորն էլ զատկի համար։ Այդ բոլորը թվով երեսուն հազար էին. նաև երեք հազար զվարակ։ Սրանք թագավորի ունեցվածքից էին։ ⁸ Նրա իշխանները նույնպես սկսեցին ընծաներ տալ ժողովրդին, քահանաներին ու ղևտացիներին։ Քեղկիան, Զաքարիան և Հեիելը՝ Աստծու տան առաջնորդները, զատկի համար քահանաներին տվեցին երկու հազար վեց հարյուր խոյ, գառ, նոխազ և երեք հարյուր զվարակ։ ⁹ Քոնենիան, Բանեան, Սամեան և նրա եղբայր Նաթանայելը, Ասաբիան, Հեիելը և Հովզաբադը՝ ղևտացիների իշխանները, զատկի համար ղևտացիներին տվեցին հինգ հազար խոյ և հինգ հարյուր զվարակ։

¹⁰ Պաշտամունքը կազմակերպվեց. քահանաները կանգնեցին իրենց տեղերում, իսկ ղևտացիները՝ իրենց դասերում՝ ըստ արքայի հրամանի։ ¹¹ Ղևտացիները մորթում և մաշկում էին զատկի գառը, իսկ քահանաները ցողում էին նրանց ձեռքից ստացած արյունը։ ¹² Պատրաստեցին ողջակեզները, որ դրանք տան ժողովրդի որդիներից յուրաքանչյուրին ըստ ազգատոհմերի բաժանումների, որպեսզի մատուցեն Տիրոջը, ինչպես որ գրված է Մովսեսի օրենքի գրքում։ Այսպես արեցին մինչև առավոտ։ ¹³ Զատկի գառը, ըստ օրենքի, խորովեցին կրակով, իսկ սուրբ ընծաները եփեցին կաթսաների ու սաների մեջ։ Տոնը հաջող ընթացավ, և զոհը բաժանեցին ժողովրդի բոլոր որդիներին։ ¹⁴ Հետո զատիկ պատրաստեցին իրենց ու քահանաների համար, քանի որ քահանաները մինչև գիշեր զբաղված էին ճարպերն ու ողջակեզները մատուցելով։ Այդպիսով ղևտացիները զատիկը պատրաստեցին իրենց ու իրենց եղբայրների՝ Ահարոնի որդիների համար։ ¹⁵ Ասափի սաղմոսերգու որդիները, ըստ Դավթի և նրա տեսանողներ Ասափի, Եմանի և Իդիթունի հաստատած կարգի, կանգնած էին իրենց տեղերում։ Դռնապաններն էլ կանգնած էին յուրաքանչյուր դռան առջև. նրանք չպետք է ընդհատեին սրբությունների սպասավորությունը, քանի որ նրանց եղբայրները՝ ղևտացիները, նրանց համար էլ էին զատիկը պատրաստել։ ¹⁶ Այդ օրը Տիրոջ ամբողջ պաշտամունքը պատրաստվեց ու կատարվեց, որպեսզի, ըստ Հովսիա արքայի հրամանի, տոնեն Զատիկը և ողջակեզներ մատուցեն Տիրոջ սեղանի վրա։ ¹⁷ Զատիկից հետո այնտեղ գտնվող իսրայելացիները յոթ օր կատարեցին Բաղարջակերաց տոնը։ ¹⁸ Սամուել մարգարեի օրերից ի վեր սրա նման Զատիկ երբեք չէր եղել Իսրայելում, և Իսրայելի բոլոր թագավորներն այսպիսի Զատիկ չէին արել, ինչպես արեց Հովսիան. քահանաներն ու ղևտացիները, ամբողջ Հուդան ու այնտեղ գտնվող Իսրայելը և Երուսաղեմի բնակիչները։ ¹⁹ Տիրոջ տոնը կատարեցին Հովսիայի թագավորության տասնութերորդ տարում։ Հովսիա արքան Հուդայի երկրում և Երուսաղեմում գտնվող վհուկներին, գուշակներին, մոգերին, կախարդներին և կուռքերին վերացրեց ու հրով այրեց, որպեսզի հաստատի Օրենքի այն խոսքերը, որ գրված էին Քեղկիա քահանայի՝ Տիրոջ տանը գտած գրքում։ Հովսիայի նմանը չէր եղել նրանից առաջ, որ ըստ Մովսեսի բոլոր օրենքների՝ իր ամբողջ սրտով, իր ամբողջ հոգով և իր ամբողջ զորությամբ դառնար դեպի Տերը՝ Աստված։ Նրանից հետո էլ նրա նմանը չհայտնվեց։ Սակայն Տերը չհանդարտվեց իր խիստ մեծ բարկությունից, որով բարկացել էր Հուդայի վրա Մանասեի բորբոքած բարկության պատճառով։ Տերն ասաց. «Ես Հուդան էլ եմ մերժելու իմ ներկայությունից, ինչպես մերժել եմ Իսրայելը, և վանելու եմ Երուսաղեմը՝ այն քաղաքը, որ ընտրել էի, և այն տունը, որի համար ասել էի. “Իմ անունը պետք է այնտեղ լինի”»։

Հովսիայի թագավորության վախճանը

(Դ Թագ. 23.28-30)

²⁰ Եգիպտոսի արքա Նեքավով փարավոնը հարձակվեց Ասորեստանի արքայի վրա Եփրատ գետի ուղղությամբ։ Հովսիա արքան գնաց նրա դեմ, ²¹ իսկ սա պատգամավորներ ուղարկեց նրա մոտ՝ ասելով. «Ի՞նչ թշնամություն ունենք ես ու դու, Հուդայի՛ արքա, այսօր քո դեմ պատերազմելու չեմ եկել։ Աստված ինձ ասաց, որ շտապեմ։ Զգուշացի՛ր ինձ հետ եղող Աստծուց, գուցե նա քեզ կործանի»։ ²² Սակայն Հովսիան իր երեսը նրանից չշրջեց, այլ հաստատակամ նրա դեմ պատերազմի ելավ։ Նա չանսաց Նեքավովի խոսքերին, որ Տիրոջ բերանից էին, և եկավ պատերազմելու Մակեդդովի դաշտում։ ²³ Աղեղնավորները հարվածեցին Հովսիային, և արքան ասաց իր ծառաներին. «Ինձ այստեղից դո՛ւրս հանեք, որովհետև ծանր վիրավորվել եմ»։ ²⁴ Նրա ծառաները հանեցին նրան իր մարտակառքից ու դրեցին նրա երկրորդ մարտակառքի մեջ ու տարան Երուսաղեմ։ Նա մեռավ ու թաղվեց իր նախնիների մոտ, և ամբողջ Հուդան ու Երուսաղեմը սուգ արեցին Հովսիայի վրա։ ²⁵ Երեմիան ողբեր ասաց Հովսիայի մասին, և բոլոր երգիչները՝ տղամարդ թե կին, Հովսիայի մասին ողբեր հորինեցին, որոնք հիշվում են մինչև այսօր։ Դրանք Իսրայելի մեջ կանոնական դարձան և ահա գրի են առնված ողբերի գրքում։

²⁶ Հովսիայի գործերն ու նրա հավատարմությունը Տիրոջ օրենքում գրվածի համաձայն էին։ ²⁷ Նրա մնացած գործերը՝ սկզբից մինչև վերջինը, գրի են առնված Իսրայելի ու Հուդայի թագավորների գրքում։

36

Հուդայի Հովաքազ թագավորը

(Դ Թագ. 23.30-33)

¹ Երկրի ժողովուրդը վերցրեց Հովսիայի որդի Հովաքազին, օծեց նրան ու իր հոր փոխարեն թագավոր դարձրեց Երուսաղեմում։ ² Հովաքազը քսաներեք տարեկան էր, երբ թագավոր դարձավ, և երեք ամիս թագավորեց Երուսաղեմում։ Նրա մոր անունը Ամիտալ էր, լոբնացի Երեմիայի դուստրը։ Հովաքազը չարիք գործեց Տիրոջ առջև, այն բոլոր չարիքները, որ գործել էին նրա նախնիները։ ³ Նեքավով փարավոնը նրան ձերբակալեց Դեբլաթայում՝ Եմաթի երկրում, և նա այլևս չկարողացավ թագավորել Երուսաղեմում։ Փարավոնը նրան տարավ Եգիպտոս և երկրի վրա հարյուր տաղանդ արծաթ և մեկ տաղանդ ոսկի հարկ դրեց։

Հուդայի Հովակիմ թագավորը

(Դ Թագ. 23.34–24.7)

⁴ Նեքավով փարավոնը Հուդայի արքա Հովսիայի որդի Եղիակիմին նշանակեց նրա հոր՝ Հովսիայի փոխարեն և նրա անունը փոխեց ու դրեց Հովակիմ, իսկ նրա եղբայր Հովաքազին Նեքավով փարավոնը վերցրեց և տարավ Եգիպտոս, որտեղ նա մեռավ։ Արծաթն ու ոսկին հարկ էին տալիս փարավոնին։ Դրանից հետո երկիրն սկսեց հարկեր վճարել, և արծաթը տալիս էին ըստ փարավոնի ասածի։ Երկրի ժողովրդից արծաթ ու ոսկի էին պահանջում ըստ յուրաքանչյուրի կարողության, որպեսզի դրանք հանձնեն Նեքավով փարավոնին։

⁵ Հովակիմը քսանհինգ տարեկան էր, երբ թագավոր դարձավ, և տասնմեկ տարի թագավորեց Երուսաղեմում։ Նրա մոր անունը Զեկքովրա էր, որը ռամացի Ներիայի դուստրն էր։ Նա Տիրոջ առջև գործեց այն բոլոր չարիքները, որ արել էին նրա նախնիները։ Նրա օրոք Բաբելոնի Նաբուքոդոնոսոր արքան մտավ Հուդայի երկիրը։ Հովակիմը երեք տարի ծառայեց նրան, բայց հետո ապստամբեց նրա դեմ։ Տերը նրանց դեմ ուղարկեց քաղդեացիներին, Ասորիքի, մովաբացիների, ամովնացիների ու սամարացիների ավազակներին։ Այս բաներից հետո նրանք զղջացին՝ անսալով Տիրոջ խոսքին, որ ասել էր իր ծառա մարգարեների միջոցով։ Սակայն Տիրոջ զայրույթը դեռ Հուդայի վրա էր, որպեսզի մերժի նրան իր ներկայությունից Մանասեի գործած բոլոր մեղքերի և այն անմեղ արյան պատճառով, որ թափեց Մանասեն և Երուսաղեմը լցրեց անմեղ արյամբ։ Տերը չկամեցավ ոչնչացնել նրանց։

⁶ Հովակիմի վրա հարձակվեց Բաբելոնի արքա Նաբուքոդոնոսորը և նրան կապեց պղնձե շղթաներով ու տարավ Բաբելոն։ ⁷ Նա Տիրոջ տան սպասքի մի մասը տարավ Բաբելոն ու դրեց Բաբելոնում գտնվող իր տաճարում։ ⁸ Հովակիմի մնացած գործերը և ամեն ինչ, որ նա արել էր, գրված են Հուդայի թագավորների ժամանակագրության մեջ։ Հովակիմը գնաց իր նախնիների գիրկն ու թաղվեց Գանոզայում՝ իր նախնիների մոտ։

Հուդայի Հեքոնիա թագավորը

(Դ Թագ. 24.8-17)

Հովակիմի փոխարեն թագավորեց իր որդի Հեքոնիան։ ⁹ Հեքոնիան տասնութ տարեկան էր, երբ թագավոր դարձավ, և երեք ամիս ու տասն օր թագավորեց Երուսաղեմում։ Նա չարիք գործեց Տիրոջ առջև։ ¹⁰ Երբ տարին բոլորեց, Նաբուքոդոնոսոր արքան զորք ուղարկեց ու Տիրոջ տան թանկարժեք սպասքով հանդերձ նրան տարավ Բաբելոն։ Նա Հուդայի ու Երուսաղեմի վրա թագավոր դրեց նրա հորեղբորը՝ Սեդեկիային։

Հուդայի Սեդեկիա թագավորը

(Դ Թագ. 24.18-20, Երմ. 52.1-3)

¹¹ Սեդեկիան քսանմեկ տարեկան էր, երբ թագավոր դարձավ, և տասնմեկ տարի թագավորեց Երուսաղեմում։ ¹² Նա չարիք գործեց Տիրոջ՝ իր Աստծու առաջ, չպատկառեց ո՛չ Երեմիա մարգարեից, ո՛չ էլ Տիրոջ խոսքերից։

Երուսաղեմի գրավումը

(Դ Թագ. 25.1-21, Երմ. 52.3-11)

¹³ Սեդեկիան ապստամբեց Նաբուքոդոնոսոր արքայի դեմ՝ դրժելով այն երդումը, որ Նաբուքոդոնոսորը նրան երդվել էր տվել Աստծու անունով, դարձավ կամակոր, կարծրացրեց իր սիրտը, որպեսզի չվերադառնա դեպի Տերը՝ Իսրայելի Աստվածը։ ¹⁴ Հուդայի բոլոր մեծամեծները, քահանաներն ու երկրի ժողովուրդը բազմապատկեցին հեթանոս ազգերի գարշելի անօրենությունները և պղծեցին Երուսաղեմում գտնվող Տիրոջ տունը։ ¹⁵ Տերը՝ նրանց հայրերի Աստվածը, մարգարեների միջոցով զգուշացրեց նրանց, կանխավ առաքեց իր պատգամախոսներին, որովհետև խնայում էր իր ժողովրդին և իր սրբավայրը։ ¹⁶ Բայց մարդիկ արհամարհեցին նրա պատգամախոսներին, անտեսեցին նրա խոսքերն ու ծաղրեցին նրա մարգարեներին, մինչև որ Տիրոջ բարկությունը բորբոքվեց ժողովրդի վրա, որից հետո նրանք փրկություն չունեցան։ ¹⁷ Տերը նրանց վրա ուղարկեց քաղդեացիների թագավորին և սրակոտոր արեց նրանց երիտասարդներին իր սրբության տան մեջ, չխնայեց նաև Սեդեկիային, չողորմեց նրանց կույս աղջիկներին և նրանց ծերերին. բոլորին մատնեց թշնամիների ձեռքը։ ¹⁸ Նաբուքոդոնոսորն Աստծու տան ամբողջ մեծ ու փոքր սպասքը և արքայի ու մեծամեծների բոլոր գանձերը՝ ամեն ինչ տարավ Բաբելոն, ¹⁹ այրեց Տիրոջ տունը, կործանեց Երուսաղեմի պարիսպը և նրա մեջ եղած ապարանքները հրո ճարակ դարձրեց, ոչնչացրեց ամեն մի գեղեցիկ անոթ։ ²⁰ Մնացածներին գերեվարեց Բաբելոն։ Այնտեղ նրանք դարձան նրա ու նրա սերնդի ծառաները մինչև մարերի թագավորության հաստատումը, ²¹ մինչև որ երկիրը կվայելեր իր շաբաթները, որպեսզի կատարվի Տիրոջ խոսքը՝ ասված Երեմիայի բերանով։ Երկիրն իր ամայության ողջ ընթացքում հանգստացավ, մինչև որ յոթանասուն տարին լրացավ։

Կյուրոսը հրեաներին արտոնում է վերադառնալ

(Բ Եզր. 1.1-4)

²² Պարսից արքա Կյուրոսի թագավորության առաջին տարում՝ Երեմիայի բերանով ասված Տիրոջ խոսքի կատարվելուց հետո, Տերը զարթնեցրեց Պարսից Կյուրոս արքայի հոգին, և նա պատվիրեց իր ամբողջ թագավորության մեջ գրավոր հրովարտակ ծանուցել՝ ասելով. ²³ «Այսպես է ասում Պարսից Կյուրոս արքան. “Տերը՝ երկնքի Աստվածը, ինձ է տվել աշխարհի բոլոր թագավորությունները։ Նա ինձ պատվիրել է Հուդայի երկրում՝ Երուսաղեմում, իր համար տուն կառուցել։ Ձեզնից ով նրա ժողովրդին է պատկանում, թող ելնի գնա, և թող Տերը՝ իր Աստվածը, նրա հետ լինի”»։

ԵՍԹԵՐԻ ԳԻՐՔԸ

11

¹[50] Արտաշես մեծ արքայի թագավորության երկրորդ տարում՝ Նիսան՝ հայկական Արեգ ամսվա առաջին օրը, Մուրթքեն՝ Բենիամինի ցեղից Կիսեի որդի Սեմեիի որդի Հայիրի որդին, երազ տեսավ։ ² Նա մի հրեա մարդ էր, որ բնակվում էր Սիսիս քաղաքում, նշանավոր մի անձ, որ հավատարմորեն ծառայում էր թագավորի պալատում։ ³ Նա այն գերիների սերնդից էր, որոնց Հուդայի երկրի Հեքոնիա արքայի հետ Երուսաղեմից գերեվարեց բաբելացիների արքա Նաբուքոդոնոսորը։ ⁴ Նրա տեսած երազն այս է. լսվում էին խռովությունների, որոտման և երկրաշարժի ձայներ, երկրի վրա մեծ խռովություն էր։ ⁵ Եվ ահա երկու շատ մեծ վիշապներ՝ պատրաստ կռվի ելնելու միմյանց դեմ։ ⁶ Նրանք ահավոր ձայն հանեցին, ու նրանց ձայնի աղմուկը պատերազմի հանեց բոլոր ազգերին, որպեսզի կռվեն արդար ազգի դեմ։ ⁷ Օրը խավարամած ու մթին էր, տառապանքների ու նեղությունների օր, երկրի վրա մեծ խռովություն էր։ ⁸ Ողջ արդար ազգը խռովվեց իրեն սպառնացող չարիքի պատճառով ու պատրաստվեց կորստի։ Նրանք աղաղակեցին առ Աստված, ⁹ և նրանց ձայնից փոքրիկ աղբյուրը մեծ ու վճիտ գետ դարձավ։ ¹⁰ Ծագեց արեգակը, և խոնարհները ոտքի ելան ու հաղթեցին փառավորներին:

¹¹ Մուրթքեն զարթնեց այս երազից, որ Աստված մտադրվել էր կատարել, և այն նա մտքից չէր հանում ու բուռն ցանկությամբ կամենում էր իմանալ, թե ինչ էր նշանակում այն գիշեր իր տեսած երազը։

12

Երկու ներքինիների դավադրությունը

¹²  Մի օր Մուրթքեն ապարանքում հանգստանում էր թագավորի երկու ներքինիներ Գաբաթի և Թառայի հետ, որոնք թագավորի ապարանքի պահապաններն էին։ ¹³  Եվ երբ Մուրթքեն տեղեկացավ ներքինիների մտադրության և նրանց սրտի ցանկության մասին, թե պատրաստվել են ձեռք բարձրացրել Արտաշես թագավորի վրա, նրանց ցանկության մասին հայտնեց արքային։ ¹⁴  Թագավորը հարցաքննեց երկու ներքինիներին. նրանք խոստովանեցին, և հրամայեց ձերբակալել նրանց։ ¹⁵  Ապա թագավորն այս ամենն արձանագրեց հիշատակարաններում, Մուրթքեն նույնպես գրեց այդ բաների մասին։ ¹⁶  Այնուհետև թագավորը հրամայեց Մուրթքեին ավելի մեծ զգուշությամբ հոգ տանել արքունիքին և նրան պարգևներ տվեց։ ¹⁷  Իսկ Ամադովթի որդի Համան Բովկեցին, որ մեծ փառք էր վայելում արքայի առաջ, ցանկացավ երկու ներքինիների պատճառով չարչարել Մուրթքեին և նրա ժողովրդին։

1

Արտաշես թագավորի խնջույքը

¹ Այս բաներից հետո Արտաշեսի [եբր. Ախաշվերոշ] թագավորության օրոք (Արտաշեսն իշխում էր Հնդկաստանից մինչև Եթովպիա հարյուր քսանյոթ երկրների վրա)՝ ² Սիսիս [եբր. Շուշան=Շոշ=Սուզ] քաղաքում իր գահը հաստատելու օրը, ³ իր թագավորության երրորդ տարում Արտաշես արքան խնջույքի հրավիրեց իր սիրելիներին, Պարսկաստանի, Մարաստանի և մյուս ազգերի մեծամեծներին, նախարարությունների բոլոր իշխաններին։ ⁴ Եվ հարյուր ութսուն օր ցույց տվեց իր թագավորության մեծությունն ու իր հարստության հրճվալից փառքը։ ⁵ Երբ ավարտվեցին խնջույքի օրերը, հրամայեց այս անգամ վեցօրյա [եբր. յոթնօրյա] խնջույքի կանչել իր ռամիկ քաղաքացիներին արքունի տան գավթում, ⁶ որը զարդարված էր բեհեզներով ու կերպասներով, որոնք ծիրանե և բեհեզյա պարաններով կարգավորված ու կապված էին ոսկե խոյակներին և թանկագին սյուների ու ոսկեղեն խարիսխների վրայի ծիրանիներին, այստեղ կային նաև ոսկե և արծաթե բազմաթիվ գահույքներ՝ ընդելուզված մարգարիտներով և պատվական քարերով, պատված գույնզգույն նկարազարդ պաստառներով և պատվական հանդերձներով, դրված վարդահատակ գավթում։ ⁷ Այնտեղ կային թագավորի ոսկե և արծաթե գավաթներն ու բաժակները, որոնք երեք բյուր քանքար արժեին, և առատ գինի, որից արքան ինքն էր ըմպում։ ⁸ Իսկ խնջույքը եղավ ոչ ընդունված կարգով, որովհետև թագավորն այդպես էր կամեցել ու հրամայել իր սպասավորներին։ ⁹ Իսկ թագավորի կին Ասթինեն [եբր. Վաշտի] կանանց կոչունքի հրավիրեց Արտաշես թագավորի ապարանքում։

Ասթինե թագուհու շնորհազրկումը

¹⁰ Յոթերորդ օրը թագավորը, զվարթացած լինելով, հրամայեց իր յոթ ներքինի պաշտոնյաներին՝ Ամովնին, Բազանին, Թառային, Բուրազեին, Զաթոլթային, Աբատազային և Թառաբբային՝ ¹¹ կնոջն արքունիք կանչել՝ նրան թագավորեցնելու և բոլոր իշխաններին ու ներկաներին նրա գեղեցկությունը ցույց տալու համար, քանի որ շատ գեղեցիկ էր։ ¹² Սակայն Ասթինեն չհնազադվեց նրան և ներքինիների հետ չգնաց թագավորի մոտ։ Թագավորը տրտմեց ու շատ բարկացավ ¹³ և Ասթինեի արարքը պատմեց իր սիրելիներին. «Արդ,- ասաց թագավորը,- օրենքի համաձայն դատաստա՛ն տեսեք»։ ¹⁴ Թագավորի առաջ եկան պարսից և մարաց իշխաններ Արքինսեոսը, Առնաթևը և Մալիսեարը, որոնք նրա մերձավորներն ու աթոռակիցներն էին, ¹⁵ և հիշեցրին, թե ըստ օրենքի ինչպե՛ս պետք է վարվել թագավորի կնոջ՝ Ասթինեի հետ, որը չկատարեց ներքինիների միջոցով իրեն տրված արքայական հրամանը։

¹⁶ Մուքեն ասաց արքային ու իշխաններին. «Ասթինե տիկնանց տիկինը ոչ միայն արքային ընդդիմացավ, այլ նաև արքայի բոլոր իշխաններին ու կուսակալներին։ ¹⁷ Այսպես նաև պարսից և մարաց իշխանների բոլոր կանայք անհնազանդ կդառնան, ¹⁸ երբ լսեն թագավորի կնոջ այս արհամարհանքի մասին, և կհամարձակվեն անարգել իրենց ամուսիններին։ ¹⁹ Արդ, եթե արքան կամենա և նրան հաճելի լինի, թող նա այլևս չմտնի արքայի մոտ և թող նրա տիկնությունը տրվի մի կնոջ, որ նրանից լավն է։ ²⁰ Երբ քո թագավորության մեջ լսվի քո արձակած այդ օրենքը, կանայք՝ աղքատից մինչև մեծամեծ, մեծ պատվով կհարգեն իրենց տղամարդկանց»։

²¹ Այդ խորհուրդը հաճելի թվաց արքային ու նրա բոլոր իշխաններին, և թագավորը կատարեց Մուքեի թելադրանքը։

²² Կանանց վերաբերյալ այդ հրամանը տարածեց իր ողջ թագավորության մեջ՝ բոլոր գավառներում։

2

Եսթերը դառնում է թագուհի

¹ Այս դեպքերից հետո թագավորի բարկությունն անցավ, բայց նա այլևս չէր ուզում Ասթինեի անունը տալ, որովհետև չէր մոռանում նրա խոսքերը։ Իսկ կինը, այսպես մերժվելով, զրկվեց փառքից։ ² Հետո սպասավորներն ասացին թագավորին. «Թագավորի համար գեղեցիկ արտաքինով կույս աղջիկներ թող փնտրեն։ ³ Թագավորը թող հրամայի պաշտոնյաներ նշանակել իր թագավորության բոլոր երկրներում, որոնք, կույս աղջիկներ ընտրելով, ուղարկեն Սիսիս քաղաքի կանանոցը՝ հանձնելով նրանց արքունի կանանց պահապան ներքինուն, և թող արքան հրամայի նրանց տալ յուղ, օճառ և բոլոր պիտույքները։ ⁴ Այն կինը, որ հաճելի կլինի թագավորին, թող թագավորի Ասթինեի փոխարեն»։ Այս ամենը հաճելի թվաց արքային, և այդպես էլ արեց։

⁵ Սիսիս քաղաքում մի հրեա մարդ կար՝ Մուրթքե [եբր. Մորդեխայ] անունով, որը Բենիամինի ցեղից էր, Կիսեի որդի Սեմեիի որդի Հայիրի որդին։ ⁶ Նա բաբելացիների արքա Նաբուքոդոնոսորի կողմից Երուսաղեմից բերված[51] գերիների սերնդից էր։ ⁷ Նա խնամում էր իր հորեղբոր՝ Ամինադաբի դստերը, որի անունը Եսթեր[52] էր, և որին վերցնելով հորից ու մորից՝ ցանկանում էր կնության առնել։ Աղջիկը շատ գեղեցիկ էր։ ⁸ Երբ թագավորի հրամանը տարածվեց, Սիսիս քաղաքում Օվգեի ձեռքի տակ բազմաթիվ աղջիկներ հավաքվեցին։ Եսթերին նույնպես տարան կանանց վերակացու Օվգե ներքինու մոտ։ ⁹ Աղջիկը նրան հաճելի թվաց ու շնորհ գտավ նրա առջև։ Օվգեն շտապեց նրան տալ իր բաժին օճառն ու այլ պարագաները, ինչպես նաև յոթ նաժիշտ աղջիկներ՝ արքունիքից։ Եսթերին ու նրա նաժիշտներին մյուսներից ավելի էր հոգ տանում։ ¹⁰ Եսթերը չհայտնեց իր ազգությունը և հայրենիքը, քանի որ Մուրթքեն նրան պատվիրել էր այդ մասին լռել։ ¹¹ Իսկ Մուրթքեն ամեն օր շրջում էր կանանց տան շուրջը՝ ցանկանալով նորություններ իմանալ Եսթերի մասին։ ¹² Որովհետև լրանում էին տասներկու ամիսները, և մոտ էր այն ժամանակը, երբ աղջիկը մտնելու էր թագավորի մոտ։ Իսկ խնամքի օրերն այսպես էին ընթանում. վեց ամիս օծում էին անուշահոտ յուղերով, վեց ամիս էլ կանանց լողացնում էին անուշահոտ խունկերով ու օճառներով։ ¹³ Հետո նոր մտնում էին արքայի մոտ։ Եվ ով ինչ ցանկանար, տրվում էր նրան՝ նրանցով թագավորի մոտ՝ սենյակը մտնելու համար։ ¹⁴ Երեկոյան մտնում էր թագավորի մոտ և ցերեկը վերադառնում իր ընկերների և Օվգե ներքինու՝ կանանց պահապանի մոտ և այնտեղ էր մնում, մինչև որ նրան անունով կրկին չկանչեին թագավորի սենյակը։

¹⁵ Երբ լրացավ Եսթերի՝ Մուրթքեի հորեղբայր Ամինադաբի դստեր՝ արքայի մոտ մտնելու ժամանակը, նա ամեն ինչ արեց այնպես, ինչպես պատվիրել էր իրեն կանանց պահապան ներքինին. Եսթերն արժանանում էր բոլոր նրանց բարեհաճությանը, ովքեր թեկուզ մեկ անգամ տեսնում էին նրան։ ¹⁶ Եսթերն արքայի մոտ մտավ նրա թագավորության յոթերորդ տարվա տասներկուերորդ՝ Ադար ամսին (որ հայկական Արեգն է)։ ¹⁷ Եսթերը շատ հաճելի թվաց արքային, բոլոր կանանցից ավելի շնորհի արժանացավ, և արքան նրա գլխին դրեց թագուհու թագը։

¹⁸ Թագավորը յոթնօրյա խնջույք արեց իր բոլոր սիրելիների և զորականների համար, փառավոր կատարեց Եսթերի հարսանիքը և հրամայեց թողություն շնորհել բոլոր նրանց, ովքեր իր թագավորության տակ էին։ ¹⁹ Իսկ Մուրթքեն խնամում և ծառայում էր թագավորի տանը։

²⁰ Եսթերը չհայտնեց իր հայրենիքը, որովհետև Մուրթքեն այդպես էր պատվիրել նրան։ Նա երկնչում էր Աստծուց և նրա պատվիրանները կատարում այնպես, ինչպես նախկինում նրա մոտ. Եսթերը չփոխեց իր կենցաղավարությունը։

²¹ Իսկ թագավորի երկու ներքինիները[53], որ արքունիքի գլխավոր պահապանապետներն էին, տրտմեցին՝ նախանձելով Մուրթքեին, որ իրենցից ավելի պատիվների է արժանանում թագավորից, և ցանկանում էին սպանել Արտաշես արքային։ ²² Մուրթքեն, իմանալով այդ, հայտնեց Եսթերին, իսկ Եսթերը մահափորձի մասին զգուշացրեց արքային։ ²³ Արքան պատժեց երկու ներքինիներին և նրանց կախաղան բարձրացրեց։ Ապա հրամայեց ճշգրտությամբ արձանագրել այդ դեպքերը՝ թե ինչպես Մուրթքեն հավատարիմ եղավ իրեն։

3

Համանի և Մուրթքեի բախումը

¹ Այս ամենից հետո Արտաշես արքան փառքի արժանացրեց Համանին՝ Ամադաթի որդուն, և նրան իր բոլոր սիրելիներից ավելի վեր՝ առաջին աթոռին, բարցրացրեց։ ² Թագավորի տան բոլոր անդամները երկրպագում էին նրան, որովհետև այդպես էր հրամայել թագավորը։ Սակայն Մուրթքեն նրան չէր երկրպագում։ ³ Արքունիքի մեծամեծերը խոսեցին Մուրթքեի հետ և ասացին. «Մուրթքե՛, ինչո՞ւ չես երկրպագում Համանին՝ համաձայն թագավորի հրամանի»։ ⁴ Ամեն օր խոսում էին նրա հետ, իսկ նա չէր լսում նրանց։ Եվ Համանի առաջ ամբաստանեցին Մուրթքեին, թե չի հնազանդվում արքայի հրամանին, որովհետև հրեա է։ ⁵ Համանը, իմանալով, որ Մուրթքեն չի երկրպագում իրեն, շատ բարկացավ։ ⁶ Եվ մտածեց ոչնչացնել Արտաշես արքայի թագավորության տակ եղող հրեաներին։

Համանի ծրագիրը հրեաներին բնաջնջելու մասին

⁷ Արտաշեսի թագավորության տասներկուերորդ տարում որոշում կայացրին և վիճակ գցեցին՝ գտնելու օրերից այն օրը և ամիսներից այն ամիսը, երբ մեկ օրում պիտի ոչնչացնեին Մուրթքեի ազգը. վիճակն ընկավ Ադար ամսի տասնչորսին։ ⁸ Այնուհետև Համանը խոսեց արքայի հետ ու ասաց. «Քո թագավորության բոլոր ազգերի մեջ տարածված մի ազգ կա, որն ապիրատ ու խորամանկ է բոլոր ազգերից. նրանք չեն հնազանդվում թագավորական օրենքներին, և եթե արքան նրանց հանդուրժի, ոչ մի օգուտ չի ստանա։ ⁹ Արդ, եթե արքան կամենա, թող հրաման տա ոչնչացնելու նրանց, իսկ ես արքունի գանձարանը կմուծեմ տասը հազար արծաթե քանքար»։ ¹⁰ Թագավորը հանեց իր մատանին և տվեց Համանին՝ հրեաներին ոչնչացնելու մասին հրաման գրելու և կնքելու համար։

¹¹ Թագավորը Համանին ասաց. «Արծաթը քե՛զ պահիր, իսկ այդ ազգի հետ վարվի՛ր, ինչպես որ ցանկանաս»։

¹² Եվ առաջին ամսի տասներեքին կանչեցին արքունի դպիրներին, որոնք Համանի հրամանի համաձայն Արտաշես արքայի անունից հրովարտակներ գրեցին Հնդկաստանից մինչև Եթովպիա հարյուր քսանյոթ երկրների զորապետերին ու նախարարներին և բոլոր ազգերի իշխաններին՝ յուրաքանչյուրին իր լեզվով։ ¹³ Եվ հրովարտակները սուրհանդակների միջոցով առաքվեցին Արտաշեսի ողջ իշխանության մեջ, որպեսզի տասներկուերորդ՝ Ադար ամսին, մի օրում ոչնչացնեն հրեաների ազգը և հափշտակեն նրանց ողջ ունեցվածքը։

¹⁴ Հրովարտակի բովանդակությունն այս էր.

13

Արտաշես արքայի հրովարտակը

¹ «Արտաշես մեծ արքան, ձեզ՝ իր հպատակ իշխաններին ու պետերին Հնդկաստանից մինչև Եթովպիայի սահմանները, գրում է այս. ² Կամենալով ոչ թե իմ իշխանության ահով հպարտանալ, այլ կառավարել քաղցրությամբ և խոնարհությամբ, որպեսզի նրանք, որ իմ իշխանության տակ են, ապահով կյանք ունենան, և թագավորությունը մինչև երկրի ծայրամասերը մնա խաղաղությամբ, ցանկացա վերահաստատել բոլոր մարդկանց համար ցանկալի խաղաղությունը։ ³ Դիմելով իմ խորհրդակիցներին, թե ինչպես կարող ենք հասնել այդ ամենին, Համանը, որ հայտնի է իր իմաստությամբ և մեր նկատմամբ ցուցաբերող հաստատուն հավատարմությամբ ու անփոփոխ հոգածությամբ, որով և արժանացել է մեր երկրորդ աթոռին, ⁴ մեզ հայտնեց, որ տիեզերքի բոլոր ազգերին մի դժնդակ, օրինազանց ժողովուրդ է խառնվել, որն ընդդիմանում է թագավորներին և նրանց չլսելով՝ մերժում է նրանց հրամանները և այն ամենը, ինչ ընդունված և հաստատված է մեր իշխանության մեջ։ ⁵ Արդ, հասկանում ենք, որ միայն այս ազգն է հակադրվում մյուս բոլոր ազգերին, առաջնորդվում է օտար օրենքներով ու կարգերով, չարակամ է և մեր գործերին հակառակ, նրանց ձեռքով բազմաթիվ չարիքներ են կատարվում. նրանք մեր թագավորության թշնամիներն են։ ⁶ Այժմ հրամայում ենք և այդ մասին ձեզ ազդարարում մեր և մեր գործերի կառավարիչ ու մեր թագավորության երկրորդ հայր Համանի գրով՝ այս տարվա տասներկուերորդ ամսի՝ Ադարի տասնչորսին առանց գթալու և խնայելու թշնամու սրով արմատապես ոչնչացնել բոլոր հրեաներին իրենց կանանց և զավակների հետ։ ⁷ Թող մի օրում չարաչար մահով դժոխք իջնեն, որ հետո կարողանանք խաղաղությամբ կատարել մեր գործերը»։

⁸ Հրովարտակի պատճենները սփռվեցին դեպի բոլոր գավառները։ Եվ երբ հրապարակվեց այդ հրամանը, բոլորը սկսեցին պատրաստվել այդ օրվան։ Հրովարտակն արագ հասավ նաև Սիսիս քաղաք։ Մինչ թագավորն ու Համանը զվարճանում էին, ողջ քաղաքը վրդովմունքի մեջ էր։

4

Մուրթքեի տագնապը

¹ Մուրթքեն, երբ լսեց այս ամենը, պատռեց իր պատմուճանը, քուրձ հագավ, իր գլխին մոխիր ցանեց և դուրս գալով քաղաքի հրապարակը՝ աղաղակում էր ու ասում. «Ինչո՞ւ եք անմեղ տեղը վերացնում իմ պանդուխտ ազգը, որը ոչ մի չարիք չի գործել»։ ² Նա եկավ մինչև արքունիքի դուռը ու կանգնեց, քանի որ նույնիսկ արքունիքի գավիթը մտնելու արժանի չէր, որովհետև քուրձ էր հագել և մոխիր ցանել։ ³ Եվ բոլոր նահանգներում, որտեղ կարդում էին հրովարտակը, հրեաները մեծ սուգ, աղաղակ ու լացուկոծ էին անում, քուրձ էին հագնում և մոխիր ցանում իրենց վրա։

⁴ Տիկնանց տիկնոջ ներքինիներն ու նաժիշտները, մտնելով Եսթերի մոտ, պատմեցին այս ամենի մասին։ Նա շատ վրդովվեց՝ լսելով թագավորի հրամանի մասին. մարդ ուղարկեց, որպեսզի Մուրթքեի վրայից հանեն քուրձը և հագցնեն նրան, սակայն նա չհամաձայնվեց։ ⁵ Եսթերը կանչեց իր Առնաթև ներքինուն, որը միշտ իր մոտ էր լինում, և ուղարկեց, որպեսզի Մուրթքեից ստուգի, թե իրոք այդպես է։ ⁷ Մուրթքեն նրան իրազեկ դարձրեց կատարվածին և այն խոստումին, որ Համանը տվեց արքային՝ տասը հազար քանքար գանձ վճարել, որ ոչնչացնի հրեաներին։ ⁸ Եվ հրեաներին ոչնչացնելու մասին Սիսիս քաղաքում կարդացված հրովարտակի պատճենը տվեց ներքինուն՝ Եսթերին ցույց տալու համար։

15

Մուրթքեի պատվերը Եսթերին

¹ Եվ ասաց նրան, որ Եսթերին այսպես պատվիրի. «Մտի՛ր և խնդրի՛ր արքային ու աղաչի՛ր մեր ժողովրդի համար։

² Հիշի՛ր քո տառապանքի օրերը և թե ինչպես ես սնվել իմ ձեռքերով, որովհետև փոխարքան՝ Համանը, մեզ մահվան է դատապարտել։ ³ Արդ, աղաչի՛ր Տիրոջը՝ Աստծուն, խնդրանքներով և խոսի՛ր թագավորի հետ մեր մասին, որ մեզ փրկես մահվանից։ ⁴ Առնաթևը մտավ Եսթերի մոտ և այս ամենը հաղորդեց նրան։ ⁵ Իսկ նա ասաց Առնաթևին. «Գնա՛ Մուրթքեի մոտ և ասա՛ նրան. ⁶ “Մեր թագավորության բոլոր ազգերը գիտեն, որ եթե որևէ այր կամ կին առանց կանչվելու մտնի թագավորի մոտ՝ ներքին սենյակը, չի փրկվի, բացի նրանից, ում արքան իր ոսկե գավազանը երկարի։ Իսկ ես կանչված չեմ արքայի մոտ մտնելու, և ահա արդեն երեսուն օր է”»։

4

Եսթերի խոստումը

¹²  Առնաթևը Եսթերի բոլոր խոսքերը հաղորդեց Մուրթքեին, ¹³  իսկ Մուրթքեն ասաց Առնաթևին. «Գնա՛ և նրան ասա՛. “Եսթե՛ր, մի՛ ասա ինքդ քեզ, թե՝ միայն ես կփրկվեմ թագավորության բոլոր հրեաներից։ ¹⁴  Որովհետև եթե այժմ անտեսես, ուրիշ տեղից կգա հրեաների փրկությունն ու օգնությունը, իսկ դու և քո հոր ընտանիքը կկորչեք։ Եվ ո՞վ գիտի, որ դու այսպիսի ժամանակի համար չես թագավորության եկել”»։

¹⁵  Եսթերն Առնաթևին մի անգամ ևս ուղարկեց Մուրթքեի մոտ՝ ասելով. ¹⁶  «Գնա՛ և հավաքի՛ր Սիսիս քաղաքում ապրող հրեաներին. ինձ համար ծո՛մ պահեք. մի՛ կերեք, և մի՛ խմեք երեք օր՝ ո՛չ գիշերը, ո՛չ էլ ցերեկը։ Ես և իմ նաժիշտները նույնպես ծոմ կպահենք։ Ապա կմտնեմ արքայի մոտ և, չնայած այդ անելը դեմ է թագավորական օրենքին, կանեմ այդ, և եթե ինձ մահ վիճակվի, չեմ հապաղի»։

¹⁷  Մուրթքեն գնաց և արեց այնպես, ինչպես պատվիրել էր Եսթերը։

13

Մուրթքեի աղոթքը

⁸  Մուրթքեն թախանձանքով աղաչեց Տիրոջը՝ մտաբերելով և հիշելով նրա մեծամեծ գործերը, և ասաց. ⁹  «Տե՛ր, Աստվա՛ծ, թագավո՛ր ամենակալ, քո հրամանին է սպասում ամեն ոք, ոչ ոք չի կարող քեզ ընդդիմանալ, երբ ցանկանաս փրկել Իսրայելին՝ քո ժողովրդին։ ¹⁰  Որովհետև դու, Տե՛ր, ստեղծեցիր երկինքն ու երկիրը և բոլոր սքանչելիքները։ ¹¹  Դու տիրում ես ամեն ինչի վրա, և ոչ ոք չի կարող քո տերությանը հակառակվել։ ¹²  Դու գիտես ամեն ինչ։ Գիտես, որ ոչ թե հպարտությունից, ամբարտավանությունից կամ թշնամանքից ելնելով չերկրպագեցի ամբարտավան Համանին, ¹³  այլ Իսրայելի տան փրկության համար հաճույքով կցանկանայի նույնիսկ նրա ոտքի գարշապարը համբուրել։ ¹⁴  Սակայն այդպես վարվեցի, որպեսզի փառք չտամ որևէ մարդու, այլ միայն քեզ՝ ճշմարիտ Աստծուդ, և բացի քեզանից՝ իմ Տիրոջից, չերկրպագեմ որևէ մեկին. դա ամբարտավանությամբ չարեցի։ ¹⁵  Արդ, Տե՛ր, Աստվա՛ծ Աբրահամի, խնայի՛ր քո ժողովրդին, որովհետև ապականիչները ելել են մեր դեմ և ցանկանում են ոչնչացնել ի սկզբանե հաստատված քո ժառանգությունը։ ¹⁶  Մի՛ անտեսիր քո բաժինը, որ քեզ համար փրկեցիր եգիպտացիների երկրից։ ¹⁷  Լսի՛ր, Տե՛ր, իմ աղոթքի ձայնը և ողորմի՛ր քո ժառանգությանը, մեր սուգը ուրախությա՛ն փոխիր, որպեսզի մենք՝ ապրողներս, օրհնենք քո մեծ անունը, Տե՛ր. մի՛ ոչնչացրու այն բերանը, որ քեզ է օրհնում»։

¹⁸  Եվ ամբողջ Իսրայելն իր ողջ կարողությամբ դիմեց Տիրոջը, քանի որ մահը նրանց աչքերի առջև էր։

14

Եսթերի աղոթքը

¹ Եսթեր տիկինը մեծ տագնապի մեջ ապավինեց Տիրոջը։ ² Իր վրայից հանեց թագավորական փառքի զգեստները և նեղության ու սգի քուրձ հագավ. զանազան թանկագին յուղերի ու խնկերի փոխարեն մոխիր և աղբ ցանեց իր գլխի վրա, իր մարմինը բազում նեղությունների ենթարկեց և իր մարմնի այն բոլոր մասերը, որ ցնծությամբ զարդարում էր, ծածկեց իր մազերով։ ³ Եվ բազմաթիվ խնդրանքներով ու աղոթքներով դիմեց Տիրոջը՝ Իսրայելի Աստծուն, և ասաց. «Իմ Տերը և մեր թագավորը դու ես միայն, օգնի՛ր ինձ՝ միայնակիս, որ քեզնից բացի ոչ մեկին չունեմ ինձ օգնական, ⁴ որովհետև իմ առջև մեծ վտանգ կա։ ⁵ Իմ ծննդից ի վեր լսել եմ իմ հայրենի ազգից, թե դու, Տե՛ր, քեզ համար իբրև հավիտենական ժառանգություն Իսրայելին ընտրեցիր բոլոր ազգերի միջից և մեր հայրերին՝ իրենց ազգատոհմից, և նրանց համար արեցիր այն ամենը, ինչ խոստացար»։ Եվ դարձյալ աղոթելով՝ այսպես էր ասում.

«Աստվա՛ծ Աբրահամի, Աստվա՛ծ Իսահակի և Աստվա՛ծ Հակոբի, օրհնյա՜լ ես դու հավիտյան։ Ես լսել եմ հայրենի գրքերից, թե դու, Տե՛ր, երկրից երկինք՝ ապաշխարությունից դեպի հավիտենական կյանք, փոխեցիր Ենովքին։ Ես լսել եմ հայրենի գրքերից, Տե՛ր, որ դու Նոյին փրկեցիր ջրհեղեղից։ Ես լսել եմ հայրենի գրքերից, Տե՛ր, թե իր մարդկանց առաջ, թագավորների մեջ փառավորեցիր Աբրահամին։ Ես լսել եմ հայրենի գրքերից, Տե՛ր, որ դու Հովնանին կետ ձկան մեջ կենդանի պահեցիր։ Ես լսել եմ իմ հայրենի գրքերից, Տե՛ր, որ դու երեք մանուկներին հնոցի հրից փրկեցիր և Դանիելին առյուծների գուբից ազատեցիր։ Ես լսել եմ իմ հայրենի գրքերից, Տե՛ր, որ դու փրկեցիր մահվան դատապարտված Հուդայի երկրի արքա Եզեկիային և ողորմեցիր նրան, երբ աղոթքի կանգնեց իր կյանքի համար, և շնորհեցիր ու նրա կյանքին ավելացրիր ևս տասնհինգ տարի։ Ես լսել եմ իմ հայրենի գրքերից, Տե՛ր, որ դու, լսելով Աննայի աղոթքներն ու խնդրանքները, նրան զավակ շնորհեցիր՝ մեծ Սամուելին։ ⁶ Եվ արդ, Տե՛ր, այժմ մենք մեղանչեցինք քո առաջ, և մեզ մատնեցիր մեր թշնամիների ձեռքը ⁷ այն բանի համար, որ մենք փառավորեցինք նրանց աստվածներին. արդար ես դու, Տե՛ր։ ⁸ Բայց նրանք չբավարարվեցին մեր ծառայությամբ, այլ իրենց ձեռքերը դրեցին իրենց կուռքերի վրա՝ ⁹ և երդվեցին ոչնչացնել այն ամենը, ինչ սահմանել էր քո բերանը, եղծել քո ժառանգությունը, փակել այն բերանները, որ օրհնում են քեզ, մարել քո տան և քո սուրբ սեղանի փառքը ¹⁰ և բացել հեթանոսների բերանները՝ իրենց չաստվածներին ու մարմնավոր թագավորներին առհավետ փառավորելու համար։ ¹¹ Եվ արդ, Տե՛ր, Աստվա՛ծ, քո ժառանգությունը մի՛ մատնիր նրանց ձեռքը, որոնք ոչինչ են, որպեսզի մեր կործանման վրա ուրախությամբ չցնծան, այլ նրանց չար խորհուրդն իրենց դե՛մ շրջիր և խայտառակի՛ր նրան, ով մեզ վրա է հարձակվել։ ¹² Հիշի՛ր, Տե՛ր, և մի՛ անտեսիր մեզ մեր նեղության ժամանակ։ Դու, որ բոլոր թագավորների Թագավորն ես և տերերի Տերը, համարձակությո՛ւն տուր ինձ ¹³ և համոզիչ խոսքեր՝ իմ շուրթերին, որ կարողանամ շնորհ գտնել թագավորի առաջ, և նրա սիրտը ատելությա՛մբ լցրու մեր թշնամու դեմ՝ նրա և նրա կամակիցների կործանման համար։ ¹⁴ Իսկ մեզ փրկի՛ր քո բարձր բազկով, և օգնի՛ր ինձ՝ միայնակիս, որը բացի քեզանից ուրիշ օգնական չունի, Տե՛ր։ ¹⁵ Տե՛ր, դու, որ գիտես և ճանաչում ես բոլորի սրտերը, գիտես, որ ատեցի անօրենների փառքը և գարշում եմ անթլփատների անկողնուց և ամեն մի օտար ունեցվածքից։ ¹⁶ Դու գիտես, Տե՛ր, իմ կարիքները, որովհետև ինձ համար գարշելի է այս թագը, որ իմ գլխին է. գարշում եմ սրանից, ինչպես կանանց դաշտանի լաթից, և այն չեմ կրում, երբ միայնակ եմ։ ¹⁷ Քո աղախինը չկերավ Ամովնի սեղանից և չփառավորեցի թագավորի գինարբուքները և չխմեցի նրանց ծեսերի գինին։ ¹⁸ Քո աղախինը թագավորի մոտ մտնելու օրից մինչև հիմա միայն քեզնով է ուրախացել, Տե՛ր, Տե՛ր, Աստվա՛ծ Աբրահամի։ ¹⁹ Ամենահզո՛ր Աստված, լսի՛ր անհույսներիս ձայնը և փրկի՛ր մեզ չարչարողների ձեռքից, ազատի՛ր ինձ իմ երկյուղից և պահպանի՛ր քո ժողովրդին՝ Իսրայելին»։

15

Եսթերի այցը թագավորին

⁴ Երրորդ օրը, երբ ավարտեց իր աղոթքը, հանեց իր վրայից սգի հանդերձները, հագավ իր ծիրանիները ու շատ հմայիչ դարձավ։ ⁵ Եվ կրկին աղոթելով իր տեսչին՝ Աստծուն և բոլորի փրկչին, վերցրեց իր սիրելի երկու նաժիշտներին, ⁶ որոնցից մեկը նրա զգեստի քղանցքներն էր վեր պահում, ⁷ իսկ մյուսին թևանցուկ էր արել։ ⁸ Նա երկչոտությամբ շիկնել էր իր երիտասարդական ողջ գեղեցկությամբ. նրա տեսքը զվարթուն էր ու հաճելի, սակայն նրա սիրտը սոսկում էր վախից։ ⁹ Նա անցավ ապարանքի բոլոր դռներով և կանգնեց թագավորի առաջ։ Թագավորը նստել էր իր արքայական աթոռի վրա, հագել իր փառավոր պատմուճանը, որ ընդելուզված էր ոսկով, մարգարիտներով և այլ թանկագին քարերով, ու շատ ահարկու էր։ ¹⁰ Թագավորը բարձրացրեց իր երեսը, որ ճառագայթում էր փառքից, և նայեց։ Թագուհին ընկճվեց, փոխեց իր գույնը, թալկացավ և ընկավ իրեն ուղեկցող նաժիշտի վրա։ ¹¹ Աստված թագավորի հոգին հեզ դարձրեց, և նա մեծ երկյուղով արագորեն իջավ իր գահից, տիկնոջը վերցրեց իր գիրկը, սթափեցրեց նրան և աղաչում ու մխիթարում էր խաղաղ խոսքերով։ Ապա ասաց նրան. ¹² «Ի՞նչ է պատահել, քեզ, Եսթե՛ր տիկին, ես քո եղբայրն եմ, համարձա՛կ եղիր, ¹³ չես մեռնի, որովհետև իմ և քո հրամանները նույնն են։ Մոտեցի՛ր»։ ¹⁴ Եվ ոսկե գավազանը բարձրացնելով՝ դրեց նրա պարանոցին, ապա համբուրեց նրան ու ¹⁵ ասաց. «Խոսի՛ր ինձ հետ»։ ¹⁶ Եսթերը նրան ասաց. «Քեզ տեսա, տե՛ր, իբրև Աստծու հրեշտակի, և քո փառքի ահից խռովվեց իմ սիրտը։ ¹⁷ Որովհետև սքանչելի ես, տե՛ր իմ, և քո երեսը լի է բարությամբ»։ ¹⁸ Եվ մինչ խոսում էր նրա հետ, նորից ընկրկեց թագավորի ահից։ ¹⁹ Թագավորը շատ էր խռովվել, իսկ նրա ծառաներն ու սպասավորները հանդարտեցնում էին տիկնոջը։ Թագավորն ասաց. «Ի՞նչ ես ցանկանում, Եսթե՛ր, և ի՞նչ է քո խնդրանքը։ Արդարև, խոստանում եմ քեզ, որ եթե մինչև իսկ իմ թագավորության կեսը խնդրես, կտամ քեզ»։

5

Համանի մտադրությունը Մուրթքեին կախելու մասին

⁴ Եսթերն ասաց. «Այսօր ինձ համար նշանավոր օր է։ Արքա՛, եթե կամենում եք, Համանի հետ եկե՛ք իմ խնջույքին, որ տալու եմ այսօր»։ ⁵ Թագավորն ասաց. «Շտապ կանչե՛ք Համանին, որպեսզի կատարենք Եսթերի խնդրանքը»։ Եվ նրանք երկուսով եկան Եսթերի ասած խնջույքին։ ⁶ Մինչ գինի էին խմում, արքան ասաց Եսթերին. «Ի՞նչ ես ցանկանում, Եսթե՛ր տիկին, ինչ էլ խնդրես, քեզ կտամ»։ ⁷ Եսթերն ասաց. «Իմ աղաչանքն ու իմ խնդրանքը այս է. ⁸ եթե ես արքայի առաջ շնորհ գտա, թող արքան և Համանը վաղը կրկին գան ինձ մոտ խնջույքի»։

⁹ Համանն արքայից բաժանվեց մեծ ուրախությամբ և զվարթությամբ։ Սակայն երբ Համանը թագավորի տանը տեսավ հրեա Մուրթքեին, շատ բարկացավ։ ¹⁰ Ապա մտավ իր տունը, կանչեց իր սիրելիներին ու իր կին Զովսարային ¹¹ և պատմեց նրանց իր մեծության ու փառքի մասին, որով թագավորն իրեն շրջապատել էր, և թե ինչպես իրեն իր թագավորության առաջինն էր դարձրել։ ¹² Համանն ասաց. «Եսթեր տիկինը ինձանից բացի ոչ ոքի չհրավիրեց արքայի հետ խնջույքի, և վաղը կրկին ինձ հրավիրեց։ ¹³ Սակայն ինձ հաճելի չէ, երբ հրեա Մուրթքեին տեսնում եմ թագավորի տանը»։ ¹⁴ Նրա կին Զովսարան և նրա սիրելիները նրան ասացին. «Հրամայի՛ր հիսուն կանգուն երկարությամբ մի փայտ կտրել. առավոտյան արքային կասես, որ Մուրթքեն կախվի այդ փայտից, ապա արքայի հետ կմտնես խնջույքի և կզվարճանաս նրա հետ»։ Այդ խոսքերը հաճելի եղան Համանին, և փայտը պատրաստվեց։

6

Թագավորը մեծարում է Մուրթքեին

¹ Տերը՝ Աստված, այն գիշեր խափանեց արքայի քունը, և արքան հրամայեց դպրապետին իր առաջ բերել հիշատակությունների մատյանը և կարդալ։ ² Գտավ Մուրթքեի մասին գրված հիշատակությունները, թե ինչպե՛ս սա հայտնեց երկու ներքինիների մասին, որոնք հսկում էին թագավորի ապարանքը և ցանկանում էին սպանել Արտաշես արքային։ ³ Թագավորն ասաց. «Իսկ ի՞նչ շնորհ կամ փառք տվեցինք Մուրթքեին»։ Արքայի սպասավորներն ասացին. «Երբ հայտնի դարձավ քո նկատմամբ նրա ունեցած հավատարմությունը, ոչինչ չարեցիր նրա համար»։

⁴ Առավոտյան եկան թագավորի գավիթը, և արքան ասաց. «Ո՞վ է գավթում»։ Համանը եկել էր թագավորից հրաման առնելու, որպեսզի Մուրթքեին կախեր այն փայտից, որ պատրաստել էր։ ⁵ Սպասավորներն արքային ասացին. «Ահա Համանը դրսում է»։ Արքան ասաց. «Նե՛րս հրավիրեք»։ ⁶ Թագավորը դիմեց Համանին. «Ի՞նչ անեմ այն մարդու համար, որին ցանկանում եմ փառավորել»։ Համանը խորհեց և ասաց իր մտքում. «Ո՞ւմ է ցանկանում արքան փառավորել, եթե ոչ ինձ»։ ⁷ Ապա ասաց արքային. «Այն մարդու համար, որին արքան ցանկանում է փառավորել, ⁸ թող բերեն արքայական պատմուճանը և այն ձին, որի վրա արքան է հեծնում, և դրանք թող տրվեն արքայի սիրելիներից և փառավորներից մեկին, ⁹ որպեսզի պատմուճանը հագցնեն այն մարդուն, որին արքան սիրում է, և նրան նստեցնեն արքայական երիվարին։ Եվ թող քաղաքի հրապարակներով հայտարարվի ու ասվի. «Այսպես կլինի այն մարդու հետ, ում արքան փառավորի»։ ¹⁰ Այն ժամանակ արքան ասաց Համանին. «Շատ լավ ասացիր. այդ բանը կանես Մուրթքեի՝ հրեա մարդու, իմ տան խնամակալի համար, և թող ոչինչ չվրիպի քո ասածներից»։ ¹¹ Համանը վերցրեց արքայական պատմուճանն ու երիվարը, հագցրեց Մուրթքեին և նրան նստեցրեց երիվարի վրա, անցկացրեց քաղաքի փողոցներով. նա հայտարարեց ու ասաց. «Այսպես կլինի ամեն մի մարդու հետ, որին արքան փառավորի»։

¹² Մուրթքեն վերադարձավ արքայական ապարանք, իսկ Համանը գլխահակ, տրտմությամբ լի՝ գնաց իր տունը։ ¹³ Նա իր Զովսարա կնոջն ու սիրելիներին պատմեց, թե ի՛նչ պատահեց իր հետ։ Համանի սիրելիներն ու կինը նրան ասացին. «Եթե Մուրթքեն հրեա ազգից էր և իշխան դարձավ, հնազանդվի՛ր նրան, որովհետև չես կարող դու նրան չարիք հասցնել, քանզի Տերը՝ Աստված, նրա հետ է, և ինքն է փառավորել նրան»։

¹⁴ Եվ մինչ նրանք խոսում էին, եկան երկու ներքինիները, որպեսզի Համանին տիկնոջ խնջույքին հրավիրեն։

7

Համանի մահապատիժը

¹ Թագավորն ու Համանը գնացին տիկնոջ գինարբուքին։ ² Եվ երկրորդ օրը, մինչ գինի էին խմում, արքան ասաց Եսթերին. «Ի՞նչ է պատահել քեզ, Եսթե՛ր տիկին, ի՞նչ է քո խնդրանքն ու աղաչանքը. թող թագավորությանս կեսը քեզ լինի»։ ³ Եսթերը պատասխանեց և ասաց. «Եթե քո առաջ շնորհ գտա, արքա՛, թող իմ խնդրանքին մի անձ տրվի, և թող իմ աղաչանքի խոսքերն ընդունելի լինեն։ ⁴ Ես և իմ ժողովուրդը, մենք և մեր որդիները մատնվեցինք կորստյան, ստրկության և հափշտակության, սակայն ես չհավատացի։ Արդ, բանսարկու մարդն արժանի չէ թագավորի տանը լինելու»։ ⁵ Թագավորն ասաց. «Ո՞վ է նա, որ համարձակվեց այդ բանն անել»։ ⁶ Իսկ Եսթերն ասաց. «Այդ թշնամի մարդը Համանն է, որը չար մարդ է, նա արեց»։ Իսկ Համանն ահաբեկվեց ու խիստ վախեցավ արքայից և տիկնոջից։

⁷ Թագավորը վեր կացավ ճաշից և մտավ արքունի ծաղկանոցը, իսկ Համանը ցանկանում էր ներողություն խնդրել տիկնոջից, որովհետև մեծ երկյուղի մեջ էր։ ⁸ Երբ թագավորը վերադարձավ ծաղկանոցից, տեսավ, որ Համանը, ընկած տիկնոջ գահույքի առաջ, նրան աղաչում էր իր փրկության համար։ Թագավորն ասաց. «Արդ, այդ աստիճանի հասար, որ ցանկանում ես իմ տան մեջ իմ կնո՞ջը բռնաբարել»։ Համանը երբ լսեց, վախեցած ու ամոթահար ընկավ երեսի վրա։ ⁹ Իսկ ներքինիներից մեկը՝ Բուգաթան, հայտնեց արքային. «Ահա Համանը հիսուն կանգուն երկարությամբ մի փայտ է պատրաստել Մուրթքեի՝ արքայի սիրելիի համար և կանգնեցրել է իր բակում»։ Թագավորն ասաց. «Թող կախվի նրա վրա»։ ¹⁰ Եվ Համանին կախեցին այն փայտից, որ պատրաստել էր Մուրթքեի համար։ Դրանից հետո թագավորի բարկությունն իջավ։

8

Արքայական հրովարտակը

¹ Այն օրը թագավորը Եսթերին նվիրեց քսու Համանի ունեցվածքը։ Իսկ Մուրթքեն հրավիրվեց թագավորի մոտ, քանի որ Եսթերը նրան պատմել էր, որ իր ազգականն է։ ² Թագավորը վերցրեց այն մատանին, որ հանել էր Համանի ձեռքից, և տվեց Մուրթքեին։ Իսկ Եսթերը Մուրթքեին վերակացու կարգեց Համանի ամբողջ ունեցվածքի վրա։ ³ Այնուհետև Եսթերը կրկին խոսեց թագավորի հետ, ընկավ նրա ոտքերը և աղաչեց, որ չիրագործվի այն պատուհասը, որ Համանը ծրագրել էր հրեաների համար։ ⁴ Արքան ոսկե գավազանը երկարեց Եսթերին, և Եսթերը վեր կացավ՝ գնալու արքայի սենյակը։ ⁵ Եսթերն ասաց. «Եթե կամենում ես, և շնորհ եմ գտել քո առաջ, սուրհանդակնե՛ր ուղարկիր, արքա՛, և անվավե՛ր համարիր այն հրովարտակները, որոնք գրվեցին Համանի կողմից՝ քո թագավորության մեջ եղող հրեաներին ոչնչացնելու համար։ ⁶ Ես ինչպե՞ս կարող եմ տեսնել իմ ժողովրդի չարչարանքը, ինչպե՞ս կարող եմ միայն ես փրկվել իմ հայրենի երկրի բնակիչներից»։ ⁷ Թագավորը Եսթերին ասաց. «Արդ, Համանի ողջ ունեցվածքը քեզ շնորհեցի և նրան կախեցի այն բանի համար, որ ձեռք բարձրացրեց հրեաների վրա. ուրիշ էլ ի՞նչ ես ցանկանում։ ⁸ Արդ, գրի՛ր դու իմ խոսքով ու հրամանով, ինչպես ցանկանում ես, և կնքի՛ր իմ մատանիով. ինչ որ գրես, իմ արքայական հրամանը կլինի, որպեսզի ոչ ոք այդ հրամաններին չընդդիմանա»։

⁹ Եվ նույն տարվա առաջին՝ Նիսան (այսինքն՝ Արեգ) ամսվա քսաներեքին կանչեցին դպիրներին, և ինչպես որ հրամայված էր, հրովարտակներ գրվեցին տեղական կառավարիչներին, բոլոր նահանգների իշխաններին ու կուսակալներին, նախարարներին ու սատրապներին՝ Հնդկաստանից մինչև Եթովպիա հարյուր քսանյոթ կուսակալներին, յուրաքանչյուր երկրին՝ իր լեզվով։ ¹⁰ Գրվեցին թագավորի հրամանով և կնքվեցին նրա մատանիով։ Հրովարտակներն ուղարկեցին սուրհանդակների ձեռքով, ¹¹ որպեսզի հրեաները ողջ և անարատ մնան իրենց օրենքներով բոլոր քաղաքներում, օգնական ու թիկունք լինեն միմյանց՝ հատուցելու իրենց թշնամիներին, ինչպես որ կամենան, ¹² մեկ օրվա ընթացքում՝ Ադար ամսի տասներեքին, ողջ թագավորության մեջ։

Սա է թագավորի մատանիով կնքված հրովարտակի պատճենը.

16

¹ «Ես՝ մեծ թագավոր Արտաշեսը, ողջունում եմ ձեզ, որ Հնդկաստանից մինչև Եթովպիայի կողմերում եք, հարյուր քսանյոթ գավառների նախարարներիդ և իշխաններիդ, ձեզ, որ հավատարիմ եք մեզ։ ² Շատերը, բազում անգամ իրենց բարերարների քաղցր վերաբերմունքի շնորհիվ հաճախակի պատիվների արժանանալով, չափից ավելի մեծամտացան իրենց խորհուրդներով։ ³ Նրանք ոչ միայն ջանում են մեր հպատակներին չարչարել, այլև չկարողանալով դիմանալ փառքի մեծությանը՝ հանդգնությամբ մեքենայություններ են նյութում իրենց բարերարների դեմ։ ⁴ Նրանք ոչ միայն մարդկանցից վերացնում են երախտագիտությունը, այլև ոգևորվելով բարությանն անծանոթ մարդկանց պարծենկոտություններով՝ կարծում են, թե կխուսափեն հավիտյանս ամենատես Աստծու չարատյաց դատաստանից։ ⁵ Շատ անգամ շատերը, որ իշխանության են նշանակված, և որոնց վստահված է ընկերների գործերը կառավարել, դրդվելով անմեղ արյան թափվելու պատճառ են դառնում և դաժան պատուհասների կրում։ ⁶ Նրանք նենգ խաբեությամբ չարաշահում են իշխանավորների պարզ բարյացակամությունը։ ⁷ Եվ դա կարելի է տեսնել ոչ այնքան հին պատմություններից, որ մենք փոխանցում ենք, որքան ներկա դեպքերից՝ ուսումնասիրելով անարժանաբար իշխողների մահաբեր կեցվածքի պատճառով անպարկեշտորեն կատարվածները։ ⁸ Պետք է ուշադիր լինել ապագայի համար, որպեսզի թագավորությունը անխռով և խաղաղությամբ պահենք բոլոր մարդկանց համար՝ ⁹ որդեգրելով փոփոխություններ և մեր ուշադրությանը ներկայացված դեպքերը միշտ ավելի մեղմ մոտեցումով դատելով։

¹⁰ Ինչպես օրինակ Ամադոթի որդի Համան Մակեդոնացին, որը, իրականում օտար լինելով պարսից զարմին և շատ հեռու լինելով մեր բարությունից, ¹¹ հյուրընկալվեց մեր կողմից ու բոլոր ազգերի հանդեպ մեր ունեցած մարդասիրությանն արժանացավ այն աստիճան, որ մեր աթոռակիցը կոչվեց։ Նրան երկրպագում էին մեր իշխանության տակ գտնվող բոլոր մարդիկ, և նրան պատվեցինք՝ մեր երկրորդ աթոռին նստեցնելով։ ¹² Բայց նա չզսպեց իր ամբարտավանությունը և ջանաց մեքենայություն նյութել՝ զրկելու մեզ իշխանությունից և կյանքից։ ¹³ Մեր փրկիչ ու երախտավոր Մուրթքեին և ինձ թագավորակից չքնաղ ու անարատ Եսթեր տիկնանց տիկնոջը, իրենց ամբողջ ազգով հանդերձ, բազում զուր և դատարկ մեղքեր վերագրելով՝ նա ցանկացավ առանց պատճառի կործանել։ ¹⁴ Այս եղանակով նա մտածում էր պարսկական թագավորությունն ամայացնել և այն մակեդոնացիներին վերադարձնել։ ¹⁵ Իսկ մենք տեսնում ենք, որ բազմահնար այդ սատակիչի կողմից ոչնչացման մատնված հրեաների մեջ չարության որևէ գործ չկա, և նրանք արդար օրենքներով են ապրում։ ¹⁶ Նրանք որդիներն են բարձրյալ, մեծ ու կենդանի Աստծու, որ մեր և մեր ազգի թագավորությունը վարում է իր բարեսեր առատությամբ։ ¹⁷ Արդ, լավ կանեք, որ Համանից ձեզ ուղարկված հրովարտակի հրամանի համաձայն ոչինչ չձեռնարկեք, ¹⁸ որովհետև ինքնագլուխ այս բանն անողը Սիսիս քաղաքի դարպասների մոտ իր ամբողջ ընտանիքով կախաղան է հանվել՝ արժանի դատաստան ընդունելով Ամենակալ Աստծուց, որ հատուցեց արագորեն։

¹⁹ Այս հրովարտակի պատճենը դրե՛ք տեսանելի տեղերում և տարածե՛ք ամենայն հոգածությամբ, որպեսզի հրեաները կարողանան գործադրել իրենց օրենքները։ ²⁰ Արդ, թող նրանք քաջալերվեն, որովհետև ինչպես նեղության ժամանակ նրանց չարչարում էին, այդպես էլ նրանք Ադարի՝ տասներկուերորդ ամսի տասներեքին՝ նույն օրը, թող հատուցեն իրենց թշնամիներին։ ²¹ Քանի որ Ամենազոր Աստված այդ իսկ օրը ընտրյալ ազգի կործանման փոխարեն դարձրեց նրանց ուրախության օր։

²² Եվ դուք այժմ ձեր տարեկան տոների շարքում ուրախությամբ տոնախմբե՛ք այս օրը՝ որպես նշանավոր տոն, ²³ որպեսզի ինչպես հիմա, այնպես էլ սրանից հետո այն փրկության օր լինի մեզ և պարսիկներիս բարեկամների համար, իսկ մեզ համար մահ նյութողների համար՝ կորստյան հիշատակ։

²⁴ Բոլոր այն քաղաքներն ու գավառները, որոնք չեն գործի ըստ մեր այս խոսքերի, բարկությամբ սրով ու հրով պիտի կոտորվեն և ոչ միայն ամայանան մարդկանցից, այլև երկրի գազաններից ու թռչուններից էլ հավիտյան պիտի մերժվեն ու լքվեն։

8

¹³  Հրովարտակի պատճենները թող ցուցադրվեն բոլորի աչքի առաջ և կարդացվեն իմ թագավորության մեջ, և նրանք, որ պատրաստվել էին ոչնչացնելու հրեաներիդ, այդ օրը թող ոչնչացվեն ձեր թշնամիները։ Ո՛ղջ եղեք»։

¹⁴  Սուրհանդակները շտապ ելան՝ կատարելու թագավորի կողմից հանձնարարվածը։ Հրամանը գրվեց և հրապարակվեց նաև Սիսիս քաղաքում։ ¹⁵  Եվ այն օրերին, երբ այս եղավ, Մուրթքեն դուրս եկավ՝ արքայական պատմուճանը հագած, ոսկե պսակ և բեհեզյա ու ծիրանե թագ դրած։ Սիսիս քաղաքում եղածները տեսան և շատ ուրախացան։ ¹⁶  Հրեաների համար մեծ լույս ծագեց և չափազանց ուրախություն։ ¹⁷  Բոլոր քաղաքներում և երկրներում, որտեղ ընթերցում էին արքայական հրամանը, խնդություն և ուրախություն էր նրանց համար։ Հեթանոսությունից շատերը հրեության էին դառնում և հրեաների ահից թլփատվում էին։

9

¹ Որովհետև Ադար՝ տասներկուերորդ ամսի տասներեքին տեղ հասավ արքունիքից ուղարկված հրովարտակը, ² նույն օրն անհետացան հրեաների հակառակորդները, և ոչ ոք նրանց ամենևին չէր ընդդիմանում, որովհետև ահաբեկվեցին նրանցից։ ³ Եվ սատրապությունների իշխանները, կուսակալներն ու արքունի դպրապետները պատվում էին հրեաներին, որովհետև Մուրթքեի ահը նրանց գլխին էր կախված, ⁴ և թագավորական հրովարտակով նրա անունը հռչակվում էր ողջ թագավորության մեջ։

⁶ Հրեաները Սիսիս քաղաքում կոտորեցին հինգ հարյուր մարդու, ⁷ ինչպես նաև Փարակին, Նեստեին, Դովփոնին, Փազգային, ⁸ Փարդաթային, Բարեային, Սարաբաքային, ⁹ Մարմասիսին, Արուփեսին, Արսեսին, և Զարբութեթանին, ¹⁰ որոնք Բերգեի որդի Ամադովթի որդու՝ հրեաների թշնամի Համանի որդիներն էին, ¹¹ և հափշտակեցին [եբր. բայց չհափշտակեցին] նրանց ունեցվածքը։ Նույն օրը Սիսիս քաղաքում սպանվածների թիվը հայտնեցին արքային։ ¹² Արքան ասաց Եսթերին. «Հրեաները Սիսիս քաղաքում հինգ հարյուր մարդու ոչնչացրին, իսկ քաղաքի շրջակայքում՝ էլ ավելի։ Արդ, ուրիշ ի՞նչ ես ցանկանում, որ քեզ համար անեմ»։ ¹³ Եսթերն արքային ասաց. «Թող արքան հրամայի, որ հրեաները նույն կերպ վարվեն նաև վաղը և կախեն Համանի որդիներին»։ ¹⁴ Նա հրամայեց այդպես անել։ Համանի որդիների մարմինները հանձնեց քաղաքի հրեաներին՝ փայտից կախելու համար։ ¹⁵ Ադարի տասնչորսին հրեաները հավաքվեցին Սիսիսում և կոտորեցին երեք հարյուր մարդու, սակայն ոչինչ չհափշտակեցին։ ¹⁶ Եվ նրա թագավորության մեջ ապրող մյուս հրեաներն էլ հավաքվեցին և միմյանց զորավիգ եղան։ Այսպիսով հանգստացան և ապահով եղան նրանցից, որոնք պատերազմում էին իրենց դեմ, որովհետև Ադար ամսի տասներեքին նրանցից կոտորեցին հինգ հազար [եբր. յոթանասունհինգ հազար] հոգու, սակայն ոչինչ չհափշտակեցին։ ¹⁷ Եվ նույն ամսի տասնչորսին նրանք հանգստացան և այդ օրը հանգստյան օր կարգեցին՝ խնդությամբ և ուրախությամբ։ ¹⁸ Սիսիս քաղաքի հրեաները ևս հավաքվեցին ամսի տասնչորսին, սակայն չհանգստացան և տասնհինգերորդ օրը կարգեցին ցնծության և ուրախության օր։ ¹⁹ Այդ իսկ պատճառով ողջ թագավորության գավառների հրեաներն Ադար ամսի տասնչորսին էին ուրախության տոն անում, ուրախության բարի օր, և միմյանց նվերներ ուղարկում, իսկ մայրաքաղաքի բնակիչներն Ադարի տասնհինգին էին բարի և ուրախության օր տոնում։

²⁰ Մուրթքեն այս ամենը գրեց մատյանում և Արտաշես արքայի իշխանությանը ենթակա հրեաներին՝ մերձավորներին ու հեռավորներին, ²¹ հրաման ուղարկեց Ադարի տասնչորսին և տասնհինգին ուրախության տոն հաստատելու մասին։ ²² Որովհետև այս երկու օրերին հրեաները հանգիստ գտան իրենց թշնամիներից և այդ ամսին էր (այսինքն՝ Ադար), որ նրանց սուգն ուրախության վերածվեց, և վիշտը խնդության փոխվեց։ Ուստի այդ օրերը պետք է տոնեն, ինչպես հարսանեկան խնդության օրեր։

²³ Հրեաներն ընդունեցին այն, ինչպես որ իրենց գրել էր Մուրթքեն։ ²⁴ Նա պատմել էր, թե ինչպե՛ս Ամադովթի որդի Համան Մակեդոնացին պայքարել էր իրենց դեմ և ինչպե՛ս էր վիճակ գցել ու որոշել կորստյան մատնել իրենց ²⁵ և կամ ինչպե՛ս էր մտել թագավորի մոտ ու խնդրել կախել Մուրթքեին։ Սակայն ինչքան չարիք որ ջանում էր հրեաների վրա բերել, հավաքվեցին ու իր գլխին թափվեցին, և նա ու իր որդիները կախաղան հանվեցին։

²⁶ Դրա համար էլ այդ օրերը «վիճակ» բառի պատճառով Փուրիմ անվանվեցին (որովհետև իրենց բարբառով վիճակը փուրիմ է կոչվում)։ Այս հրովարտակի խոսքերի և նրանց կրած նեղության ու նրանց հետ պատահածի պատճառով Մուրթքեն հաստատեց այդ տոնը։ ²⁷ Հրեաներն այն ընդունեցին և հանձն առան. սովորեցնում էին նաև իրենց զավակներին ու իրենց հարողներին, որպեսզի այլ կերպ չվարվեն, ²⁸ այլ այս օրերը սերնդեսերունդ հիշատակ լինեն քաղաքներում ու գավառներում, որպեսզի պատվեն Փուրիմի այդ օրերը և դրանց հիշատակը սերնդեսերունդ չպակասի։

²⁹ Ամինադաբի դուստր Եսթերն ու հրեա Մուրթքեն գրեցին և հաստատեցին այս հրովարտակը։ ³¹ Մուրթքեն և Եսթերը հաստատեցին այս կարգը նաև իրենց համար, ուխտ արեցին և կատարեցին իրենց խորհուրդը։ ³² Եսթերը երդմամբ այն հաստատեց հավիտենական ժամանակների համար, և դա գրվեց հիշատակությունների մատյաններում։

10

Հիշատակի օրվա տոնի հաստատումը

¹ Թագավորը հարկ դրեց իր թագավորության թե՛ ցամաքային, թե՛ ծովային երկրների վրա։ ² Նրա զորությունը, նրա քաջությունը, հարստությունն ու նրա թագավորության փառքն ահավասիկ նկարագրված են պարսիկների ու մարերի հիշատակությունների գրքերում։

³ Մուրթքեն Արտաշեսից իշխանություն էր ստացել, մեծ էր նրա թագավորության մեջ, հրեաներից փառավորված ու սիրված և կատարված դեպքերը պատմում էր իր ամբողջ ազգատոհմին։[54] ⁴ Նա ասում էր. «Աստծուց եղավ այս բանը։ ⁵ Որովհետև հիշեցի այն երազը, որ տեսել էի այս դեպքերի մասին, քանի որ դրանից մի բան անգամ զանց չեղավ։ ⁶ Փոքրիկ աղբյուրը, որ մեծ գետ դարձավ և միաժամանակ լույս, արև ու շատ ջուր եղավ, Եսթերն է, որի հետ ամուսնացավ թագավորը և նրան թագուհի դարձրեց։ ⁷ Իսկ երկու վիշապները ես եմ և Համանը։ ⁸ Ազգերը նրանք են, որ ժողովվեցին՝ կորստյան մատնելու հրեաների անունը, որ Իսրայել է։ ⁹ Նրանք կանչեցին Աստծուն ու փրկվեցին. Տերը փրկեց իր ժողովրդին։ Տերը մեզ փրկեց մեր բոլոր չարիքներից։ Աստված նշաններ ու մեծամեծ հրաշքներ գործեց, որպիսիք երբեք չեն եղել հեթանոսների մեջ։ ¹⁰ Դրա համար Աստված ստեղծեց երկու վիճակ՝ մեկն իր ժողովրդի, մյուսը՝ բոլոր հեթանոսների համար։ ¹¹ Այս երկու վիճակներն էլ իրենց ժամին ու ժամանակին, դատաստանի օրը եկան Աստծու առջև՝ բոլոր հեթանոսների մեջ։ ¹² Աստված հիշեց իր ժողովրդին և արդարացրեց իր ժառանգությունը։ ¹³ Ադար ամսի այս օրերը՝ տասնչորսերորդ օրը և նույն ամսի տասնհինգերորդ օրը, թող տոն լինեն նրանց համար, թող հավաքվեն, ցնծան և ուրախանան Աստծու առջև հավիտյանս սերնդեսերունդ, Իսրայելի ժողովրդի մեջ»։

11

¹ Պտղոմեոսի և Կլեոպատրայի թագավորության չորրորդ տարում ղևտացի քահանա Դոսիթեոսը և նրա որդի Պտղոմեոսը բերեցին Փուրիմի տոնի վերաբերյալ գրված նամակը, որն ըստ նրանց՝ իսկականն է և թարգմանվել է Պտղոմեոսի որդի Լուսիմաքոսի կողմից, որ բնակվել է Երուսաղեմում։

ԵԶՐԱՍԻ ԵՐԿՐՈՐԴ ԳԻՐՔԸ

Ա. Վերադարձ Զորաբաբելի ղեկավարությամբ

(1.1–6.22)

1

Կյուրոսի հրովարտակը հրեաների՝ գերությունից վերադարձի մասին

(Բ Մն. 36.22-23)

¹ Պարսից Կյուրոս արքայի թագավորության առաջին տարում, որպեսզի կատարվի Երեմիա մարգարեի բերանով ասված Տիրոջ խոսքը, Տերն արթնացրեց պարսից Կյուրոս թագավորի հոգին, և նա հրովարտակ արձակեց իր ողջ թագավորության մեջ և բոլորին հետևյալը գրեց. ² «Այսպես է ասում պարսից Կյուրոս թագավորը. Տերը՝ երկնքի Աստվածն ինձ տվեց երկրի բոլոր թագավորությունները. նա հրամայեց ինձ իր համար տաճար կառուցել Հուդայի երկրի Երուսաղեմ քաղաքում։

³ Ձեզանից ով Տիրոջ ժողովրդից է, և որի հետ է իր Աստվածը, թող ելնի Հուդայի Երուսաղեմ և կառուցի Տիրոջ՝ Իսրայելի Աստծու տունը, և Աստված ինքը, որ բնակվում է Երուսաղեմում, նրա հետ թող լինի։

⁴ Իր ողջ հարստությունը թող վերցնի իր հետ և տանի այնտեղ, որտեղ բնակություն կհաստատի. թող իր հետ վերցնի իր ողջ ունեցվածքը, ինչ որ լինի՝ արծաթեղեն և ոսկեղեն, կահ-կարասի կամ անասուն, և իր ընկերների հետ թող տանեն իրենց հետ՝ մասնակցելու Երուսաղեմում Տիրոջ՝ Աստծու տաճարի պատրաստության համար»։

Վերադարձ Երուսաղեմ

⁵ Եվ ոտքի ելան Հուդայի ու Բենիամինի նահապետական տների իշխանները, քահանաներն ու ղևտացիները, բոլոր նրանք, որոնց հոգիներն արթնացրեց Տերը՝ Աստված, ելնելու և կառուցելու Տիրոջ՝ Աստծու տաճարը Երուսաղեմում։ ⁶ Բոլոր նրանք, որ նրանց շրջակայքում էին բնակվում, օգնում և զորացնում էին նրանց ձեռքերը՝ տալով արծաթ, ոսկի, կահ-կարասի ու անասուն. ընծաներով ու նվերներով լիացնում էին նրանց։

⁷ Կյուրոս թագավորն էլ բերել տվեց Տիրոջ տաճարի ողջ սպասքն ու կահքը, որ Նաբուքոդոնոսորը վերցրել էր Երուսաղեմից և ի պահ հանձնել իր աստվածների տանը։

⁸ Այդ ամենը պարսից Կյուրոս թագավորը բերել տվեց Միթրիդատ գանձապահի ձեռքով և հաշվելով հանձնեց Հուդայի իշխան Սամանասարին։

⁹ Այս է դրանց թիվը. երեսուն ոսկեղեն կոնք, հազար քսանինը արծաթե կոնք. ¹⁰ Երեսուն ոսկե սկավառակներ և արծաթեղեն այլևայլ՝ հազար։

¹¹ Ոսկեղեն և արծաթեղեն ողջ սպասքը հինգ հազար չորս հարյուր կտոր էր, որ Սամանասարի և Բաբելոնի գերությունից Երուսաղեմ վերադարձողների հետ էին։

2

Գերությունից վերադարձած հրեաների թիվը

(Ա Եզր. 5.7-45, Նեմ. 4.7-13)

Առաջնորդները

¹ Իսրայելի որդիները՝ ըստ յուրաքանչյուր վայրի, որ վերադարձան Բաբելոնի գերությունից, ուր նրանց գերեվարել էր բաբելացիների Նաբուքոդոնոսոր թագավորը, և որոնց Կյուրոսը Բաբելոնից արձակեց դեպի Երուսաղեմ և Հուդայի երկիր՝ յուրաքանչյուրին իր քաղաքը, սրանք են. ² Զորաբաբելի հետ վերադարձան Հեսուն, Նեեմիան, Սարեասը, Հռեիլիասը, Մարդոքեոսը, Բալասանը, Մասփարը, Բագուարը, Հռեումը և Բաանան։

Ընտանիքները

Այս է Իսրայելի որդիների մարդահաշիվը. ³ Փորոսի որդիները երկու հազար հարյուր յոթանասուներկու հոգի էին, ⁴ Սափատի որդիները՝ չորս հարյուր յոթանասուներկու, ⁵ Արեսի որդիները՝ յոթ հարյուր յոթանասունվեց, ⁶ Նեփթաղիմ Մովաբացու ժառանգները՝ Հեսուի և Հռովաբի որդիները՝ երկու հազար ութ հարյուր տասներկու, ⁷ Հելամի ժառանգները՝ երկու հազար երկու հարյուր հիսունչորս, ⁸ Զատոնի որդիները՝ ինը հարյուր քառասունհինգ, ⁹ Քորբի որդիները՝ յոթ հարյուր հիսուն, ¹⁰ Բանեի որդիները՝ հազար քառասունութ, ¹¹ Բիբեի որդիները՝ ութ հարյուր քսաներեք, ¹² Արգեի որդիները՝ երեք հազար երեք հարյուր քսաներկու, ¹³ Ադոնիկամի որդիները՝ ութ հարյուր յոթանասունյոթ, ¹⁴ Բոսերի որդիները՝ երկու հազար ութ հարյուր վեց, ¹⁵ Ադդինեի որդիները՝ չորս հարյուր հիսունչորս, ¹⁶ Եզեկիայի որդի Ազերի որդիները՝ իննսունվեց, ¹⁷ Բեսսեի որդիները՝ երեք հարյուր քսաներեք, ¹⁸ Հարովի որդիները՝ հարյուր տասներկու, ¹⁹ Ասումի որդիները՝ երկու հարյուր քսաներեք, ²⁰ Գաբերի որդիները՝ իննսունհինգ։

Քաղաքները

²¹ Բեթղեհեմի որդիները՝ հարյուր քսաներեք, ²² Նետոփի որդիները՝ հիսունվեց, ²³ Անաթովթի որդիները՝ հարյուր քսանութ, ²⁴ Ասմովթի որդիները՝ քառասուներկու, ²⁵ Կարիաթ-Յարիմի, Քափիրի և Բերովթի որդիները՝ յոթ հարյուր քառասուներեք, ²⁶ Հռասամի և Գայեբի որդիները՝ հազար քսանմեկ, ²⁷ Մաքմասի որդիները՝ հարյուր քսաներկու, ²⁸ Բեթելեի և Հեգեի որդիները՝ չորս հարյուր քսաներեք, ²⁹ Նաբոթի որդիները՝ հիսուներկու, ³⁰ Մակեբիսի որդիները՝ հարյուր հիսունվեց, ³¹ Ելամարի որդիները՝ հազար երկու հարյուր հիսունչորս ³² Երամի որդիները՝ երեք հարյուր քսան, ³³ Լիդոնի, Լովդադի և Ոնայի որդիները՝ յոթ հարյուր քսանհինգ, ³⁴ Եերիքովի որդիները՝ երեք հարյուր քառասունհինգ, ³⁵ Սեննի որդիները՝ երեք հազար վեց հարյուր երեսուն։

Քահանաները, ղևտացիները, տաճարի սպասավորները, Սողոմոնի ծառաների որդիները

³⁶ Քահանաները. Հովսեդեկի որդի Հեսուի տոհմից Հեդուայի որդիներն ինը հարյուր յոթանասուներեք հոգի էին, ³⁷ Եմերի որդիները՝ հազար հիսուներկու, ³⁸ Փասուրի որդիները՝ հազար երկու հարյուր քառասունհինգ, ³⁹ Երեմի որդիները՝ հազար յոթ հարյուր։

⁴⁰ Ղևտացիները. Սեդուիի սերնդից Հեսուի և Կադմիելի որդիները յոթանասունչորս հոգի էին։

⁴¹ Սաղմոսասացներն ու երգիչները. Ասափի որդիները հարյուր քսանութ հոգի էին։

⁴² Դռնապանների որդիները. Սեղումի որդիները, Ատտերի որդիները, Տեղմոնի որդիները, Ակուբբի որդիները, Ատիտայի որդիները, Սուբայի որդիները, բոլորը միասին հարյուր երեսունինը հոգի էին։

⁴³ Տաճարի սպասավորները. Առաղի որդիները, Ասուփի որդիները, Տաբովթի որդիները, ⁴⁴ Կերավսի որդիները, Սիայի որդիները, Փագովնի որդիները, ⁴⁵ Ղաբանի որդիները, Ագաբի որդիները, Ակուբի որդիները. ⁴⁶ Ագաբի որդիները, Սաղամեի որդիները, Անանի որդիները, ⁴⁷ Գեդդելի որդիները, Գաարի որդիները, Հռագիայի որդիները, ⁴⁸ Հռասովնի որդիները, Նեկովդանի որդիները, Գազամի որդիները, ⁴⁹ Գազի որդիները, Փասեի որդիները, Բասի որդիները, ⁵⁰ Ասենի որդիները, Մովանիմի որդիները, Նեփուսիմի որդիները, ⁵¹ Բակութի որդիները, Ակուփի որդիները, Արուրի որդիները, ⁵² Բավաղովթի որդիները, Միդայի որդիները, Արսայի որդիները, ⁵³ Բարկոսի որդիները, Սիսարայի որդիները, Թամայի որդիները, ⁵⁴ Նեսուայի որդիները և Ատուփայի որդիները։

⁵⁵ Սողոմոնի ծառաների որդիները. Սոտեի որդիները, Ասոփերաթի որդիները, Փակդուրայի որդիները, ⁵⁶ Հեղայի որդիները, Կերդովնի որդիները, Կերդիելի որդիները, ⁵⁷ Սափատիայի որդիները, Ատտիղի որդիները, Փաքերովթի որդիները, Ասաբումի որդիները և Եմեիի որդիները։

⁵⁸ Տաճարի բոլոր սպասավորներն ու Սողոմոնի ծառաների որդիները երեք հարյուր իննսուներկու հոգի էին։

⁵⁹ Թեղմեղեքից, Թեղարեսայից, Քերուբից, Եդարից, Եմերից ելած ոմանք չկարողացան ցույց տալ իրենց տոհմը և իրենց՝ Իսրայելի զավակ լինելը, սրանք են. ⁶⁰ Դաղավայի որդիները, Տուբիուի որդիները, Նեկովդայի որդիները՝ վեց հարյուր հիսուներկու։

⁶¹ Նույնպես քահանաների որդիներից Աբաիայի որդիները, Ակուսի որդիները և Բերզեղայի որդիները։ Այս վերջինը կոչվեց այսպես, երբ իր համար կնության առավ Բերզեղա Գաղադացու դուստրերից։

⁶² Նրանց անունները փնտրվեցին ազգահամարի գրքում, բայց չգտնվեցին, ու նրանց զատորոշեցին քահանաներից։ ⁶³ Կառավարիչը նրանց ասաց. «Դուք արժանի չեք ուտելու սրբություն սրբոցից, մինչև որ գա մի քահանայապետ, որ Հայտնությամբ և Ճշմարտությամբ հարցում անի»։

⁶⁴ Ողջ եկեղեցին՝ հավաքվածները, քառասուներկու հազար երեք հարյուր վաթսուն հոգի էին, ⁶⁵ չհաշված նրանց ծառաներին, աղախիններին և նրանց կրտսերներին, որոնք յոթ հազար երեք հարյուր երեսունհինգ հոգի էին։ Նրանց սաղմոսասաց երգիչները՝ այր և կին, երկու հարյուր հոգի էին։

⁶⁶ Նրանց ձիերը յոթ հարյուր երեսունվեց հատ էին, ջորիները՝ երկու հարյուր քառասունյոթ, ⁶⁷ ուղտերը՝ չորս հարյուր երեսունհինգ, էշերը՝ վեց հազար յոթ հարյուր քսան։

⁶⁸ Տոհմերի իշխանները, որոնք եկան Երուսաղեմում գտնվող Տիրոջ տունը, նվերներ տվեցին Աստծու տանը՝ տաճարի շինության համար։

⁶⁹ Տվեցին ինչքան որ կարողացան. գործավորության գանձանակին տվեցին վաթսունմեկ հազար ոսկե դիդրախմի և հարյուր քահանայական պատմուճան։

⁷⁰ Այսպիսով, քահանաներն ու ղևտացիները, ժողովրդի մի մասը, սաղմոսասացները, դռնապաններն ու տաճարի սպասավորները հաստատվեցին իրենց քաղաքներում, իսկ ողջ Իսրայելը՝ յուրաքանչյուրն իր քաղաքում։

3

Ողջակիզման զոհասեղանի վերականգնումը

(Ա Եզր. 5.46-52)

¹ Երբ յոթերորդ ամիսը եկավ, Իսրայելի որդիները, որ արդեն հաստատվել էին յուրաքանչյուրն իր քաղաքում, մի մարդու պես հավաքվեցին Երուսաղեմում։

² Այն ժամանակ Հովսեդեկի որդի Հեսուն ու նրա քահանա եղբայրները և Սաղաթիելի որդի Զորաբաբելն ու նրա վեց եղբայրները մեջտեղ եկան և Տիրոջ՝ Իսրայելի Աստծու համար զոհասեղան շինեցին, որպեսզի Աստծու այր Մովսեսի օրենքի մեջ գրվածի համաձայն նրա վրա ողջակեզներ մատուցեն։

³ Նրանք զոհասեղանը պատրաստեցին իր նախկին տեղում, թեև անհանգստանում էին երկրի ազգերից։ Դրա վրա ողջակեզներ մատուցեցին Տիրոջը՝ իրենց Աստծուն, մեկը՝ առավոտյան, իսկ մյուսը՝ երեկոյան։

⁴ Եվ կատարեցին Տաղավարահարաց տոնը՝ ըստ գրվածի և ամեն օր ողջակեզ մատուցեցին այն թվով, որքան պատվիրված էր իրենց։

⁵ Ողջակեզներ էին մատուցում նաև ամսագլուխներին, շաբաթ օրերին, Տերունական տարեկան բոլոր սուրբ տոներին և Տիրոջ առջև ակամա գործած բոլոր մեղքերի համար։

⁶ Յոթերորդ ամսվա առաջին օրն սկսեցին ողջակեզ մատուցել Տիրոջը՝ Աստծուն, մինչ Տիրոջ տան հիմքը դեռ չէր գցվել։

⁷ Նրանք արծաթ տվեցին քարահատներին ու հյուսներին։ Սիդովնացիներին ու տյուրացիներին տվեցին կերակուր, ըմպելիք ու ձեթ, որպեսզի Լիբանանից ծովով մինչև Հոպպե մայրի փայտ բերեն, ինչպես որ հրամայել էր նրանց պարսից Կյուրոս թագավորը։

Տիրոջ տաճարի կառուցման սկիզբը

(Ա Եզր. 5.53-62)

⁸ Նրանց՝ Երուսաղեմ՝ Տիրոջ տաճարը գալու երկրորդ տարվա երկրորդ ամսին Սաղաթիելի որդի Զորաբաբելը, Հովսեդեկի որդի Հեսուն և նրանց եղբայրները, քահանաները, ղևտացիներն ու բոլոր նրանք, ովքեր գերությունից Երուսաղեմ էին վերադարձել, գործի անցան և քսան տարեկանից բարձր ղևտացիներին Տիրոջ տան գործերի վրա վերակացուներ կարգեցին։

⁹ Հեսուն, նրա որդիներն ու եղբայրները, Կադմիելը և նրա որդիները, Հուդայի որդիները, ինչպես նաև Ենադադի որդիներն ու նրա ղևտացի եղբայրները վերակացուներ եղան Տիրոջ տան գործերի վրա։

¹⁰ Երբ հիմքը գցեցին ու սկսեցին շինել Տիրոջ տունը, քահանաները, պատմուճանները հագած, հնչեցնում էին իրենց փողերը, իսկ Ասափի որդիները՝ ղևտացիները, ծնծղաներով օրհնում էին Տիրոջը՝ Աստծուն, ինչպես կարգել էր Իսրայելի Դավիթ թագավորը։

¹¹ Ամեն մեկն ասում էր իր ընկերոջը. «Խոստովանենք և գոհանանք Տիրոջից, որովհետև քաղցր է, որովհետև հավիտյան է նրա ողորմությունն Իսրայելի հանդեպ»։ Ողջ ժողովուրդը բարձրաձայն օրհնում էր Տիրոջը՝ Իսրայելի Աստծուն, որովհետև գցվեցին Տիրոջ տան հիմքերը։

¹² Քահանաներից, ղևտացիներից, նահապետական տների իշխաններից ու ծերերից շատերը, որոնք տեսել էին Տիրոջ տաճարը, այժմ իրենց աչքով տեսնում էին հիմնարկեքը, բարձրաձայն լաց էին լինում, իսկ մնացած ժողովուրդը ուրախությունից աղաղակում էր բարձր ձայնով։

¹³ Ժողովրդից ոչ ոք չէր կարող զանազանել ուրախության ձայնը լացի ձայնից, քանի որ ժողովուրդն այնքան բարձրաձայն էր աղաղակում, որ ձայնը լսելի էր լինում հեռավոր վայրերից։

4

Տիրոջ տաճարի շինարարության արգելումը

(Ա Եզր. 5.63-71)

¹ Հուդայի և Բենիամինի թշնամիները, լսելով, որ գերությունից վերադարձած Իսրայելի որդիները Իսրայելի Աստծու տունն են շինում, ² մոտեցան Զորաբաբելին և տոհմերի իշխաններին ու նրանց ասացին. «Մենք էլ կառուցենք ձեզ հետ, քանի որ մենք էլ ենք պաշտում ձեր Աստծուն, և մենք էլ ենք նրան զոհեր մատուցում այն օրից, երբ Ասորեստանի Ասորդան թագավորը մեզ այստեղ բերեց»։

³ Զորաբաբելը և Հովսեդեկի որդի Հեսուն և Իսրայելի տոհմերի մնացած իշխանները նրանց ասացին. «Մեզ վայել չէ ձեզ հետ միասին շինել Տիրոջ՝ մեր Աստծու տունը. մենք ինքներս կկառուցենք Տիրոջ՝ Իսրայելի Աստծու տունը, ինչպես որ մեզ հրամայել է պարսից Կյուրոս թագավորը»։

⁴ Այն ժամանակ երկրի ժողովուրդներն սկսեցին խանգարել հրեա ժողովրդին ու խոչընդոտել նրանց՝ շինելու տաճարը։

⁵ Վարձկաններ բռնելով՝ փորձում էին խափանել նրանց գործը։ Այդպես էին վարվում պարսից Կյուրոսի թագավորության օրերից մինչև պարսից Դարեհ արքայի օրերը։

Արտաշես թագավորին ուղղված ամբաստանագիրը հրեաների դեմ

⁶ Պարսից Արտաշեսի թագավորության օրոք՝ նրա թագավորության սկզբում, նրանք Հուդայի երկրում և Երուսաղեմում բնակվողների դեմ նամակ գրեցին։

⁷ Նամակը Արտաշեսի օրոք գրեցին Միթրիդատը, Տաբեեղը և նրա մյուս հարկահան ծառայակիցները ասորերեն, և որը թարգմանեց ⁸ Հռեում կառավարիչը։ Եվ այս են այն նամակի խոսքերը, որ ուղարկեցին նրանք Արտաշես թագավորին. «Քո ծառաները, որ բնակվում ենք գետի այս կողմը, ⁹ Հռեում կառավարիչը և Սամսա գրիչը և մեր մյուս ծառայակիցները, դեենացիները, ափարսաթաքացիները, տարփալացիները, ափերսացիները, արքուեցիները, բաբելացիները, Սիսիսի բնակիչները, դավեացիները ¹⁰ և մյուս ազգերը, որոնց մեծ և պատվական Ասենափարը բնակեցրեց Սոմարոմում, այսինքն՝ Սամարիայի քաղաքներում, գետի այս կողմը, ¹³ խաղաղություն են մաղթում Արտաշես թագավորիդ։ Այժմ թող հայտնի լինի քեզ, թագավո՛ր, որ եթե այս քաղաքը շինվի, և նրա պարիսպները կանգնեցվեն, քեզ ոչ ոք հարկ չի տա։

¹⁴ Այլև թագավորներին ընդդիմադիր կլինեն։ Իսկ մենք չենք ցանկանում թագավորների հանդեպ այսպիսի հանդգնություն տեսնել և այդ պատճառով էլ գրում ենք քեզ, թագավո՛ր, ¹⁵ որպեսզի փնտրվի քո հայրերի ժամանակագրությունների մատյաններում և հայտնի դառնա, որ այս քաղաքն ապստամբողների քաղաք է. միշտ դեմ է կանգնել թագավորներին և բոլոր ժամանակներում ապաստարան է եղել փախստականների համար, և հենց այդ պատճառով էլ այդ քաղաքն ավերվեց։

¹⁶ Արդ մենք քեզ տեղեկացրինք, թագավո՛ր, որ եթե այս քաղաքը շինվի և սրա պարիսպները կանգնեցվեն, դու խաղաղություն չես ունենա»։

Արտաշես թագավորի պատասխանը

¹⁷ Ապա թագավորը պատասխան ուղարկեց Հռեում կառավարչին ու Սամսա գրչին, Սամարիայում բնակվող նրանց մյուս ծառայակիցներին ու մնացածներին, որ բնակվում էին գետի այն կողմում, և ասաց. «Խաղաղությո՜ւն ձեզ։ ¹⁸ Երբ ձեր կողմից ինձ մոտ ուղարկված հարկահանը, իմ առջև գալով, տեղեկացրեց ինձ ամեն ինչ, ¹⁹ վերահասու եղա և գտա, որ այդ քաղաքը բոլոր ժամանակներում ապստամբ է եղել ²⁰ և թագավորների դեմ ելել, Երուսաղեմում էլ հզոր և բռնավոր թագավորներ են նստել, որոնք բռնանալով իշխել են Եփրատ գետի այն՝ արևմտյան կողմում։ Արդ, դրանց վրա հարկեր ու տուրքե՛ր դրեք, որպեսզի այլևս չցանկանան բռնանալ։ ²¹ Արդ այժմ հայտնում եմ ձեզ, որ գնաք, արգելեք և խափանեք նրանց գործը, որպեսզի քաղաքը չշինվի։

²² Ներողամիտ և թույլատու մի՛ եղեք, այլ փութաջանությամբ պահանջե՛ք բոլոր հարկերն ու տուրքերը, որպեսզի երբեք չբազմանա չարիքը, և հզորանալով թագավորներին դեմ չկանգնեն»։

²³ Երբ Արսասես թագավորի, այսինքն՝ Արտաշեսի հարկահանը բերելով կարդաց այս գիրը Հռեումի և Սամսա գրչի և նրա ծառայակիցների առջև, նրանք մեծ զորությամբ ու այրուձիով շուտափույթ Երուսաղեմ և Հուդայի երկիր գնալով՝ հրեաներին արգելեցին կառուցել և խափանեցին գործը։

²⁴ Այն ժամանակ Երուսաղեմում Տիրոջ տաճարի շինությունը խափանվելով դադարեց և այդպես մնաց մինչև պարսից Դարեհ արքայի երկրորդ տարին։

5

Դարեհի հրամանը տաճարի կառուցման մասին

(Ա Եզր. 6.1-21)

¹ Անգեաս մարգարեն ու Ադդովի որդի Զաքարիասը Տիրոջ՝ Իսրայելի Աստծու կողմից մարգարեանում էին Հուդայի երկրի և Երուսաղեմի մասին։ ² Այն ժամանակ Սաղաթելի որդի Զորաբաբելն ու Հովսեդեկի որդի Հեսուն ոտքի ելան և սկսեցին շինել Տիրոջ՝ Իսրայելի Աստծու տունը։ Աստծու մարգարեները, նրանց հետ միաբանելով, օգնում էին նրանց։

³ Այդ ժամանակ նրանց մոտ եկան Եփրատ գետի այն կողմերի իշխան Թաթանան ու Սաթրաբուզանը և նրանց ծառայակիցներն ու նրանց ասացին. «Ձեզ ո՞վ հրամայեց շինել այս տունը, և կամ ո՞ւմ թույլտվությամբ եք կանգնեցնում դրա աշտարակները, ⁴ և կամ ովքե՞ր են այս քաղաքի շինության առաջնորդները»։ ⁵ Բայց Տիրոջ՝ Աստծու աչքը գերությունից դարձած հրեաների վրա էր, և չխափանեցին նրանց գործը, մինչև որ տեղեկացնեին Դարեհ արքային։ Նրանք հարկահան ուղարկեցին, որպեսզի Դարեհին գրով տեղեկացնեն այս մասին։

⁶ Նամակը այս է. «Գետի այն կողմերի իշխան Թաթանան ու Սաթրաբուզանը և նրանց ծառայակիցները՝ գետի այն կողմի պաշտոնյաները, ⁷ ամենայն խաղաղություն են մաղթում Դարեհ թագավորիդ։ ⁸ Թող հայտնի լինի թագավորիդ, որ մենք, գնալով Հուդայի երկիրը՝ Երուսաղեմ քաղաքը, տեսանք, որ ընտիր քարերով շինում էին Տիրոջ՝ մեծ Աստծու տաճարը, փայտե գերաններ էին դնում պատերի մեջ, և նրանց ձեռքում գործը հաջողությամբ առաջ էր գնում։ ⁹ Այն ժամանակ հարցրինք նրանց ծերերին և ասացինք. “Ո՞վ հրամայեց ձեզ շինել այս տունը, և կամ ո՞ւմ թույլտվությամբ եք կատարում այդ”։ ¹⁰ Հարցրինք առաջնորդների անունները, որ տեղեկություն տանք քեզ և գրենք նրանց իշխանների անունները։ ¹¹ Հրեաները, պատասխան տալով, մեզ այսպես ասացին. “Մենք Տիրոջ՝ երկնքի և երկրի Աստծու ծառաներն ենք և շինում ենք այս տունը, ինչպես շինված էր շատ տարիներ առաջ Իսրայելի մեծն Սողոմոն թագավորի կողմից, և նույն օրինակով էլ մենք կառուցում ենք այն։ ¹² Քանի որ մեր հայրերը բարկացրին երկնքի և երկրի Աստծուն, նրանց հանձնեց բաբելացիների և քաղդեացիների Նաբուքոդոնոսոր արքայի ձեռքը, որը քանդեց այս տունը և ժողովրդին գերեվարեց Բաբելոն։ ¹³ Սակայն բաբելացիների Կյուրոս թագավորի առաջին տարում Կյուրոս թագավորը հրամայեց շինել Տիրոջ՝ Աստծու այս տունը։ ¹⁴ Եվ այս տան արծաթեղեն ու ոսկեղեն սպասքը, որ Նաբուքոդոնոսորը, Երուսաղեմից վերցնելով, տարել էր իր աստվածների տունը, Կյուրոս թագավորը, վերցնելով արքունի տաճարից, տվեց Սամանասար գանձապահին ¹⁵ և ասաց նրան. “Այս ողջ սպասքը և հարստությունը վերցրո՛ւ և գնա՛ Երուսաղեմ՝ Տիրոջ տունը, որ այնտեղ է, և այդ հարստությունը տա՛ր և դի՛ր իր տեղը”։ ¹⁶ Այն ժամանակ Սամանասարը եկավ և Տիրոջ՝ Աստծու տաճարի հիմքը գցեց Երուսաղեմում. այն օրվանից շինում ենք, ու դեռ չի ավարտվել”։ ¹⁷ Արդ, եթե հաճելի է թվում քեզ, թագավո՛ր, թող փնտրվի բաբելացիների թագավորների ժամանակագրությունների մատյանների պահոցում, որպեսզի իմանաս, որ իսկապես Կյուրոս թագավո՞րն է հրամայել շինել Տիրոջ տունը Հուդայի Երուսաղեմ քաղաքում։ Այդ մասին տեղեկանալով, ո՛վ թագավոր, լո՛ւր ուղարկիր մեզ»։

6

Դարեհը գտնում է Կյուրոսի հրամանագիրը

(Ա Եզր. 6.22-32)

¹ Այն ժամանակ Դարեհ թագավորը հրամայեց, և փնտրեցին Բաբելոնի թագավորական հիշատակագրությունների մատյանների պահոցում։ ² Մարաստանի Եկբատան քաղաքում մի հիշատակարան գտնվեց, որի մեջ այս էր գրված. ³ «Կյուրոսի առաջին տարում Կյուրոս թագավորը հրաման տվեց Երուսաղեմում գտնվող Տիրոջ տան վերաբերյալ և պատվիրեց, որ շինվի Տիրոջ տաճարը և այն վայրը, որտեղ զոհեր են մատուցում Տիրոջը։ Հրամայեց, որ դրա և՛ բարձրության, և՛ լայնության չափը վաթսուն կանգուն լինի, ⁴ կառուցվի երեք շարք ամուր քարերով և մի շարք փայտով. այսպես շինվի ու ծածկվի ողջ տաճարը։ ⁵ Եվ Տիրոջ տան հարստությունը՝ արծաթեղեն և ոսկեղեն, որ Նաբուքոդոնոսորը բերել էր Երուսաղեմից՝ Տիրոջ տնից, և դրել Բաբելոնում, հրամայեց դուրս հանել, որպեսզի տանեն Երուսաղեմ՝ Տիրոջ տաճարը, ու դնեն իր տեղում՝ Աստծու տանը, որտեղ էր նախօրոք»։

⁶ Այն ժամանակ Դարեհը գետի այն կողմերի իշխաններին այս հրամանագիրն ուղարկեց. «Սաթրաբուզանին և գետի այն կողմերի, ինչպես նաև ավելի հեռավոր վայրերի նրա ծառայակիցներին։ ⁷ Այսուհետ հրեաների իշխաններին և Իսրայելի ծերերին թո՛ւյլ տվեք շինել Աստծու տունը, և թող Աստծու տունը շինեն իր տեղում։ ⁸ Ես հրամայում եմ, որ ոչ ոք չարգելի Իսրայելի ծերերին՝ Տիրոջ՝ իրենց Աստծու տունը շինելու, այլև իմ թագավորության հարստությունից՝ գետի այն կողմերից հավաքված հարկերից, թող ամենայն ուշադրությամբ տրվեն այդ մարդկանց ծախսերը, որպեսզի գործը չխափանվի։ ⁹ Տիրոջը՝ երկնքի Աստծուն ողջակեզ մատուցելու համար անխափան կերպով ցուլ, խոյ, գառ, ցորեն, աղ, գինի և ձեթ թող տրվի նրանց օրըստօրե՝ ըստ Երուսաղեմում եղող քահանաների պահանջի, ինչ որ խնդրեն։ ¹⁰ Եվ թող անուշահոտ պատարագ մատուցեն Տիրոջը՝ երկնքի Աստծուն և աղոթեն թագավորի ու նրա որդիների կյանքի համար։ ¹¹ Այս հրամանն ինձանից ելավ, և եթե որևէ մեկը հակառակվի իմ հրամանին, ապա կքանդվի նրա տունը և նրա տնից գերան վերցնելով՝ կխաչեն նրան, ով կընդդիմանա իմ հրամանին. դա հավիտենական նախատինք պիտի լինի նրա համար։ ¹² Թող Աստված, որի անունը բնակվում է այնտեղ, ելնի և ավերի այն թագավորությունն ու այն ժողովրդին, որ կհանդգնի ձեռք երկարել՝ արգելելու կամ կործանելու Աստծու տունը, որ գտնվում է Երուսաղեմում։ Ես՝ Դարեհ թագավորս, տվեցի այս հրամանը, և ոչ ոք թող չհամարձակվի անտեսել այն»։

Տաճարի շինության ավարտ

(Ա Եզր. 7.1-9)

¹³ Այն ժամանակ գետի այն կողմերի իշխանը և Սաթրաբուզանն ու նրա ծառայակիցները, որոնց Դարեհ թագավորն ուղարկեց իր նամակը, շտապ կատարեցին նրա հրամանը։

¹⁴ Եվ հրեաների ծերերն ու ղևտացիները շինում էին Անգեի և Ադդովի որդի Զաքարիայի մարգարեության ժամանակներում։ Այսպիսով պարսից Արտաշես թագավորի օրոք շինեցին և ավարտեցին ըստ Տիրոջ՝ Իսրայելի Աստծու հրամանի, ինչպես կարգադրել էին Կյուրոս թագավորն ու Դարեհը։ ¹⁵ Տաճարի կառուցումն ավարտվեց Դարեհ արքայի վեցերորդ տարում՝ Ադար ամսի երեքին։ ¹⁶ Իսրայելի որդիները՝ քահանաները, ղևտացիներն ու բոլոր նրանք, որ վերադարձել էին գերությունից, մեծ ցնծությամբ կատարեցին Տիրոջ տան նավակատիքը։ ¹⁷ Նրանք Տիրոջ տան նավակատիքին զոհ մատուցեցին հարյուր զվարակ, երկու հարյուր խոյ, չորս հարյուր գառ, ինչպես նաև ողջ Իսրայելի մեղքերի համար, Իսրայելի ցեղերի թվին համապատասխան՝ տասներկու ուլ։ ¹⁸ Եվ կարգեցին քահանաներին՝ ըստ իրենց դասերի և ղևտացիներին՝ ըստ իրենց բաժանման՝ Երուսաղեմում Տիրոջը՝ Աստծուն սպասավորելու համար, ինչպես գրված է Մովսեսի գրքում։ Նրանք երկու հազար երկու հարյուր հոգի էին։

Հրեաները տոնում են Զատիկը

(Ա Եզր. 7.10-15)

¹⁹ Առաջին ամսի տասնչորսին գերությունից վերադարձած Իսրայելի որդիները կատարեցին Տիրոջ զատիկը։ ²⁰ Քանի որ քահանաներն ու ղևտացիները սրբվեցին, և բոլորը սրբված էին, մորթեցին Տիրոջ զատիկը գերությունից բոլոր վերադարձածների, իրենց քահանա եղբայրների ու իրենց համար։ ²¹ Եվ Իսրայելի որդիները՝ բոլոր նրանք, որ զատվել էին երկրի ժողովուրդների պղծությունից և եկել էին փնտրելու Տիրոջը՝ Իսրայելի Աստծուն, կերան զատիկը։ ²² Յոթ օր էլ կատարեցին Բաղարջակերաց տոնը և ուրախացան Երուսաղեմում, որովհետև Տերը՝ Իսրայելի Աստվածը, ուրախացրեց նրանց և Ասորեստանի թագավորի սիրտը դարձրեց դեպի նրանք, որպեսզի օգնի և զորացնի իրենց Տիրոջ՝ Իսրայելի Աստծու տաճարի կառուցման գործում։

7

Բ. Վերադարձ Եզրասի ղեկավարությամբ

(7.1–10.44)

Եզրասը Բաբելոնից վերադառնում է Երուսաղեմ

(Ա Եզր. 8.1-7)

¹ Այս դեպքերից հետո պարսից Արտաշես արքայի թագավորության օրոք մեջտեղ ելավ Եզրասը՝ Սարուի որդին, որը Ազարիայի որդին էր, նա՝ որդին Քեղկիայի, ² որդին Սեղումի, որդին Սադովկի, որդին Աքիտովբի, ³ որդին Սամարիայի, որդին Եզրայի, որդին Մարովթսի, ⁴ որդին Զարեայի, որդին Ոզիայի, որդին Բովկի, ⁵ որդին Աբիսուայի, որդին Փանեեսի, որդին Եղիազարի, որն էլ առաջին քահանա Ահարոնի որդին էր։ ⁶ Այս Եզրասը, որ վերադարձավ Բաբելոնից, Տիրոջ՝ Իսրայելի Աստծու կողմից Մովսեսին տրված Օրենքի հմուտ գիտակ էր։ Թագավորը նրան տվեց այն ամենը, ինչ նա խնդրեց, որովհետև Աստծու ձեռքը նրա հետ էր։ ⁷ Արտաշես թագավորի յոթերորդ տարում շատերն Իսրայելի որդիներից, քահանաներից, ղևտացիներից, սաղմոսասացներից, դռնապաններից ու տաճարի սպասավորներից նրա հետ Երուսաղեմ վերադարձան։ ⁸ Նրանք Երուսաղեմ եկան թագավորի յոթերորդ տարվա հինգերորդ ամսին։ ⁹ Եզրասը Երուսաղեմ հասավ հինգերորդ ամսվա ամսամուտին, որովհետև Տիրոջ ձեռքը բարությամբ նրանց հետ էր։ ¹⁰ Եզրասն իր սրտում որոշել էր ուսումնասիրել Տիրոջ օրենքը, կյանքի կոչել այն՝ Իսրայելին ուսուցանելով պատվիրաններն ու օրենքները։

Արտաշես թագավորի հրամանը Եզրաս քահանային

(Ա Եզր. 8.8-24)

¹¹ Այս է այն հրամանագիրը, որ Արտաշես թագավորը տվեց Եզրաս քահանային և Տիրոջ օրենքի ու Իսրայելին տրված պատվիրանների գրքի դպրին. ¹² «Թագավորների թագավոր Արտաշեսը՝ Եզրասին՝ Տիրոջ՝ երկնքի Աստծու օրենքի դպրին։ ¹³ Հաստատ որոշումով հրաման տվեցի, որ իմ թագավորության տակ գտնվող Իսրայելի ժողովրդից, քահանաներից և ղևտացիներից բոլոր նրանք, ովքեր կկամենան, թող քեզ հետ վերադառնան Երուսաղեմ։ ¹⁴ Այս գիրն ուղարկվում է թագավորի և նրա յոթ խորհրդականների անունից, որպեսզի Եզրասը, որի ձեռքում է Աստծու օրենքը, այցելի հրեաներին և երուսաղեմացիներին ¹⁵ և Տիրոջ տուն տանի այն ոսկին ու արծաթը, որ թագավորն ու նրա խորհրդակաները կամովին նվիրել են Երուսաղեմում բնակվող Իսրայելի Աստծուն։ ¹⁶ Նաև այն բոլոր հրեաները, որոնք պանդուխտ են Բաբելոնում՝ ժողովուրդ թե քահանաներ, որոնք արծաթ և ոսկի ունեն, թող իրենց հետ վերցնեն և տանեն Երուսաղեմում գտնվող Տիրոջ տունը, ¹⁷ որպեսզի տեղ հասնելուն պես, ինչպես գրել ենք, դրանով զվարակ, խոյ, գառ և անարյուն զոհեր ու հեղման ընծաներ գնեն և մատուցեն Երուսաղեմում գտնվող Տիրոջ՝ իրենց Աստծու զոհասեղանի վրա։ ¹⁸ Բացի այդ, ինչ որ հաճելի լինի քեզ և քո եղբայրներին, արե՛ք մնացած արծաթով և ոսկով, ինչպես վայել է ձեր Աստծուն։ ¹⁹ Քեզ հե՛տ վերցրու և Երուսաղե՛մ տար Տիրոջ տան սպասավորության համար քեզ տրված սպասքը, ²⁰ իսկ, եթե ուրիշ բան անհրաժեշտ լինի, կտրվի թագավորական տան գանձարանից։

²¹ Ես՝ Արտաշես թագավորս, հրամայում եմ Եփրատ գետի այն կողմի բոլոր գանձապահներին. ինչ որ ցանկանա Եզրաս քահանան և Տիրոջ՝ երկնքի Աստծու օրենքի դպիրը, պատրաստակամորեն տվե՛ք Տիրոջ՝ նրա Աստծու տանը. ²² մինչև հարյուր տաղանդ արծաթ, հարյուր քոռ ցորեն, այդքան գինի և նույնչափ ձեթ։ Ոչ ոք թող թագավորի հրամաններին դեմ չկանգնի։ ²³ Այն ամենը, ինչ հրամայեցի Տիրոջ՝ երկնքի և երկրի Աստծու տան վերաբերյալ, թող կատարվի. ոչ ոք թող չփորձի դեմ կանգնել Տիրոջ՝ Իսրայելի Աստծու տանը, որպեսզի Տիրոջ՝ Աստծու բարկությունը իմ և իմ որդու թագավորության վրա չգա։ ²⁴ Թող հայտնի լինի նաև, որ բոլոր նրանք, որ քահանաներից են, ղևտացիներից, սաղմոսերգուներից, դռնապաններից, տաճարի՝ Աստծու տան սպասավորներից, թող հարկ չտան, և ոչ ոք թող չհամարձակվի ծառայեցնել նրանց։

²⁵ Եվ դու, Եզրա՛ս, որ Աստծու իմաստությունը քո ձեռքում ունես, դպիրներ և դատավորնե՛ր կարգիր, որպեսզի դատեն գետի այն կողմի ողջ ժողովրդին՝ բոլոր նրանց, որոնք գիտեն քո Աստծու օրենքը, իսկ չիմացողին ուսուցանե՛ք։ ²⁶ Բոլոր նրանք, որ չեն վարվի ըստ Տիրոջ օրենքի և համաձայն թագավորի օրենքի, իրենց գործերի համապատասխան դատաստանի պիտի ենթարկվեն՝ կա՛մ մահվան, կա՛մ տանջանքի, կա՛մ տուգանքի և կա՛մ կապանքի»։

Եզրասը գոհություն է հայտնում Տիրոջը

(Ա Եզր. 8.25-27)

²⁷ Օրհնյա՜լ է Տերը՝ մեր հայրերի Աստվածը, որ այս դրեց թագավորի սրտում, որպեսզի փառավորի Երուսաղեմում գտնվող Տիրոջ՝ մեր Աստծու անունը։ ²⁸ Եվ ինձ ողորմություն արեց և պատվեց թագավորի ու նրա խորհրդակիցների և թագավորի բոլոր իշխանների առաջ։ Եվ ես հզորացա, որովհետև Տիրոջ ձեռքը ողջ բարությամբ ինձ հետ էր. հավաքեցի Իսրայելի բոլոր իշխաններին, որ ինձ հետ վերադառնան։

8

Եզրասի անվանի ուղեկիցները

(Ա Եզր. 8.28-40)

¹ Սրանք են այն տոհմերի իշխանները, որ ինձ հետ վերադարձան Բաբելոնի թագավոր Արտաշեսի թագավորության օրոք. ² Փանեեսի որդիներից՝ Գերսոնը, Իթամարի որդիներից՝ Դանիելը, Դավթի որդիներից՝ Ատտուսը, ³ Նաաքայի որդիներից՝ Նիան, Փորոսի որդիներից՝ Զաքարիան և նրա հետ՝ հարյուր հիսուն այր, ⁴ Փաաթմովաբի սերնդից՝ Զարայի որդի Եղիանան և նրա հետ՝ երկու հարյուր այր, ⁵ Զատուելի սերնդից՝ Ազիելի որդի Սեքենիան և նրա հետ՝ երեք հարյուր այր, ⁶ Ադինի սերնդից՝ Հովնաթանի որդի Աբենը և նրա հետ՝ հիսուն այր, ⁷ Եղամի սերնդից՝ Աթաղիայի որդի Իսաիասը և նրա հետ՝ յոթանասուն այր, ⁸ Սափատիայի սերնդից՝ Միքայելի որդի Զամբդիան և նրա հետ՝ յոթանասուն այր, ⁹ Հովաբի սերնդից՝ Հևելի որդի Բադիան և նրա հետ՝ երկու հարյուր տասնութ այր, ¹⁰ Բաանի սերնդից՝ Հովսեփի որդի Սեղիմութը և նրա հետ՝ հարյուր վաթսուն այր, ¹¹ Բաբեի սերնդից՝ Բաբիի որդի Զաքարիասը և նրա հետ՝ քսանութ այր, ¹² Ադոնիկամի և Ազգադի սերնդից՝ Սակատանի որդի Հովնանը և նրա հետ՝ հարյուր տասը այր, ¹³ Ադոնիկամի ժառանգներից՝ Եղիփաղաթը, Հեիեղը և Սաման և նրանց հետ՝ վաթսուն այր, ¹⁴ Բագուի սերնդից՝ Ութային և Զաբութը և նրանց հետ՝ յոթանասուն այր։

Եզրասը հավաքագրում է ղևտացիների և տաճարի սպասավորների

(Ա Եզր. 8.41-48)

¹⁵ Նրանց հավաքեցի այն գետի ափին, որ հոսում է Եվիով, և երեք օր օթևանեցինք այնտեղ։ Փնտրեցի ժողովրդի բազմության մեջ, բայց քահանաների որդիներից և ղևտացիների որդիներից ոչ ոքի չգտա։ ¹⁶ Այն ժամանակ մարդ ուղարկեցի Եղիազարի, Արիելի, Սեմեայի, Առնաամի, Արիբի, Եղնաթանի, Նաթանի, Զաքարիայի, Մեսողաամի, Հովարիբի և Հեղմաթամի մոտ, որոնք իմաստուն մարդիկ էին, ¹⁷ և նրանց առաքեցի Գանձավորներ կոչված վայրի իշխանների մոտ՝ նրանց բերանը դնելով այն խոսքերը, որ պիտի խոսեին Գանձավորներ կոչված վայրի տաճարի սպասավոր եղբայրների հետ, որպեսզի մեր Աստծու տան համար սաղմոսերգուներ բերեին մեզ։ ¹⁸ Եվ քանի որ Աստծու բարերար ձեռքը մեզ հետ էր, մեզ մոտ եկան Իսրայելի որդի Ղևիի որդիներից. առաջինը եկան նրա որդիները և եղբայրները՝ տասնութ հոգի, ¹⁹ Ասեբիան և Մերարիի որդիներից Հեսեան, նրա եղբայրներն ու նրանց որդիները՝ քսան այր, ²⁰ նաթանայիմներից, որոնց Դավիթը և իշխանները տվեցին՝ ղևտացիներին ծառայելու համար, երկու հարյուր քսան նաթանայիմ. բոլորը հավաքվեցին անվանապես։

Նախապատրաստություն վերադարձի

(Ա Եզր. 8.49-59)

²¹ Եվ այնտեղ՝ Առիս գետի ափին, պահեցողություն հռչակեցի, և աղոթք մատուցեցինք Տիրոջ՝ մեր Աստծու առաջ՝ նրանից ապահով ճանապարհ խնդրելով մեզ, մեր որդիների և բոլոր նրանց համար, որ մեզ հետ էին, ²² քանի որ ամաչեցի թագավորից հեծյալներ խնդրել՝ ճանապարհին թշնամիներից մեզ փրկելու համար, որովհետև թագավորին ասել էի, թե մեր Տիրոջ ձեռքը բարությամբ օգնում է բոլոր նրանց, ովքեր փնտրում են նրան, իսկ նրա զորությունն ու բարկությունը նրանց դեմ է, ովքեր լքում են նրան։ ²³ Պահք պահեցինք և խնդրեցինք մեր Աստծուն այս ամենի համար, և Տերը լսեց։

²⁴ Ապա քահանաներից ընտրեցի տասներկու իշխաններ՝ Սարաբիային, Ասաբիային և նրանց տասը եղբայրներին. ²⁵ կշռեցինք ու նրանց հանձնեցինք այն արծաթը, ոսկին և մեր Աստծու տանը նվիրված սպասքը, որ տրվել էր մեզ թագավորի, նրա խորհրդակիցների, նրա իշխանների և այնտեղ գտնվող ողջ Իսրայելի կողմից։ ²⁶ Կշռելով նրանց տվեցի վեց հարյուր հիսուն տաղանդ արծաթ, հարյուր արծաթե սպասք, հարյուր տաղանդ ոսկի ²⁷ և քսաներեք ոսկե սպասք, ինչպես նաև պղնձե ոսկեզօծ փայլուն և ընտիր անոթներ։ ²⁸ Եվ ասացի նրանց. «Դուք սուրբ եք Տիրոջ՝ Աստծու համար, Տիրոջ համար սուրբ է նաև ողջ սպասքը. ոսկեղենն ու արծաթեղենը կամավոր ընծաներ են Տիրոջը՝ մեր հայրերի Աստծուն։ ²⁹ Արթո՛ւն մնացեք և պահպանե՛ք դրանք, մինչև որ կշռեք Երուսաղեմում գտնվող քահանաների առաջնորդների, ղևտացիների և Իսրայելի տոհմերի իշխանների առջև՝ Տիրոջ տան սրահներում»։ ³⁰ Եվ քահանաներն ու ղևտացիները հաշվով վերցրին ոսկին, արծաթը և մնացած սպասքը՝ տանելու Երուսաղեմ՝ մեր Աստծու տունը։

Ժամանում Երուսաղեմ

(Ա Եզր. 8.60-64)

³¹ Առաջին ամսի տասներկուսին մեկնեցինք Էոս գետից և եկանք հասանք Երուսաղեմ. Տիրոջ՝ մեր Աստծու ձեռքը մեզ հետ էր, և մեզ փրկեց մեր թշնամիներից և ճանապարհի դարանակալներից։ ³² Եկանք Երուսաղեմ և այնտեղ երեք օր հանգստացանք։ ³³ Չորրորդ օրը Տիրոջ՝ մեր Աստծու տանը կշռելով արծաթը, ոսկին և մնացած սպասքը՝ տվեցինք Ոնիա քահանայի որդի Մարեմովթի ձեռքը, որին օգնում էին Փենեեսի որդի Եղիազարը, Հեսուի որդի Հովաբաթը, Բանեայի որդի Նովադիան և այլ ղևտացիներ։ ³⁴ Ամեն ինչ թվով և հաշվով էր, և ամեն ինչի կշիռն ամբողջությամբ արձանագրվեց։

³⁵ Այն ժամանակ պանդխտության որդիները, որ վերադարձել էին գերությունից, Տիրոջը՝ Իսրայելի Աստծուն, ողջակեզներ մատուցեցին. տասներկու զվարակ՝ ողջ Իսրայելի համար, իննսունվեց խոյ, յոթանասունյոթ գառ և տասներկու այծ՝ մեղքերի համար։ Այս բոլորը ողջակեզ մատուցեցին Տիրոջը՝ Աստծուն։ ³⁶ Նրանք թագավորի հրովարտակը տվեցին Եփրատ գետի այն կողմերի իշխաններին, որոնք պատվեցին ժողովրդին և Աստծու տաճարը։

9

Եզրասը մերժում է խառն ամուսնությունը

(Ա Եզր. 8.65-87)

¹ Այս ամենից հետո իշխանները մոտեցան ինձ և ասացին. «Իսրայելի ժողովուրդը, քահանաներն ու ղևտացիները չզատվեցին երկրի ժողովուրդներից ու նրանց գարշություններից՝ քանանացիներից, քետացիներից, փերեզացիներից, հեբուսացիներից, ամովնացիներից, մովաբացիներից, եգիպտացիներից և ամորհացիներից։ ² Որովհետև նրանց դուստրերից կանայք առան իրենց և իրենց որդիների համար և նրանց սուրբ սերմը, խառնակվելով այդ երկրի ժողովուրդների հետ, պղծվեց. այս անօրենության սկիզբը իշխանները դրեցին»։ ³ Երբ ես լսեցի այս խոսքերը, պատռեցի իմ հագուստները, փետեցի իմ մազերն ու մորուքը և նստեցի սգավոր։ ⁴ Ինձ մոտ հավաքվեցին բոլոր նրանք, որ երկյուղում էին Իսրայելի Աստծուց պանդխտությունից վերադարձածների անհավատարմության համար, և ես այդպես սգավոր նստեցի մինչև երեկոյան զոհի ժամը։

⁵ Երեկոյան զոհի ժամին վեր կացա իմ տառապանքից, իմ պատառոտված հագուստներով ծնկաչոք խոնարհվեցի և ձեռքերս տարածելով՝ վեր բարձրացրի դեպի Տերը՝ Աստված, ⁶ ու ասացի. «Տե՛ր, իմ Աստվա՛ծ, ամաչում և զարհուրում եմ քեզանից, բարձրացրո՛ւ, Տե՛ր, իմ Աստվա՛ծ, իմ երեսը դեպի քեզ, որովհետև մեր անօրենությունները մեր գլուխներից էլ վեր բարձրացան, իսկ մեր մեղքերը մեծացան և մինչև երկինք հասան։ ⁷ Մեր հայրերի տարիներից ու ժամանակներից մինչև այսօր մեծամեծ մեղքերի մեջ ենք եղել, և մեր մեղքերի պատճառով մեզ և մեր թագավորներին ու մեր որդիներին կոտորածի, գերության և հափշտակության մատնեցիր հեթանոս թագավորների ձեռքը, և ամոթահար եղանք մինչև այսօր։ ⁸ Այժմ, Տե՛ր, Աստվա՛ծ մեր, քո գթությունը տարածվեց մեզ վրա, և մեզ փրկություն շնորհեցիր ու հաստատեցիր քո սուրբ վայրում։ Այսօր լուսավորեցիր մեր աչքը, Տե՛ր, Աստվա՛ծ մեր, և փոքրիշատե կենդանություն պարգևեցիր մեզ մեր ստրկության մեջ։ ⁹ Որովհետև ստրուկ եղանք, բայց մեր ստրկության ժամանակ չլքեցիր մեզ, Տե՛ր, Աստված մեր, և պարսից թագավորի առաջ քո ողորմությունն իջավ մեզ վրա՝ մեզ կենդանություն տալու, որպեսզի կանգնեցնենք մեր Աստծու տունը, վերականգնենք և շինենք այս անապատը, ցանկապատ և ամուր պարիսպ գցենք Հուդայի և Երուսաղեմի համար։ ¹⁰ Արդ, այս ամենի համար ի՞նչ պատասխան տանք քեզ, Տե՛ր, որովհետև անտեսեցինք քո օրենքն ու պատվիրանները, ¹¹ որ տվեցիր մեզ քո ծառա մարգարեների միջոցով՝ այսպես ասելով. “Այն երկիրը, ուր մտնելու ես՝ ժառանգելու այն, պղծված է այդ երկրի ազգերի պղծությամբ, իրենց աղտեղություններով լի է այն։ ¹² Հետևաբար նրանց դուստրերից քո որդիներին կին չառնես և քո դուստրերին կնության չտաս նրանց որդիներին և հավիտյանս չցանկանաս նրանց հետ խաղաղություն կնքել, որպեսզի հզոր լինես՝ երկրի բարիքներն ուտելու համար, և քո որդիները հավիտյան ժառանգեն այդ երկիրը”։ ¹³ Մեր չար գործերի ու մեր մեծ մեղքերի պատճառով մեր գլխով անցած դեպքերից հետո դու, Տե՛ր, բազում անգամ թողեցիր մեր մեղքերը և մեզ այսպիսի զավակ և արմատ տվեցիր։ ¹⁴ Իսկ մենք, անտեսելով քո օրենքները, դարձյալ խոտորվեցինք և խառնակվեցինք երկրի հեթանոսների աղտեղությունների հետ, սակայն դու չբարկացար և չոչնչացրիր մեզ այն աստիճան, որ ոչ մի զավակ կամ արմատ չմնար։ ¹⁵ Տե՛ր, Աստվա՛ծ Իսրայելի, դու արդար ես և ճշմարիտ, որովհետև չոչնչացրիր մեր զավակին, այլ մեր զավակն ու արմատը մնացին մինչև այսօր, և արդ մենք մեր անօրենություններով կանգնած ենք քո առաջ և չենք կարողանում բարձրացնել մեր գլուխները և կանգնել քո առջև, որովհետև բազմացան մեր անօրենությունները, և մեր չարիքները մեր գլուխներից ավելի վեր բարձրացան»։

10

Հրեաները հեռացնում են իրենց այլազգի կանանց

(Ա Եզր. 8.88–9.17)

¹ Մինչ Եզրասը, երեսնիվայր ընկած գետնին՝ Տիրոջ առջև, աղոթում էր այս խոստովանություններով և մեծամեծ ողբերով, նրա մոտ հավաքվեց բազում ժողովուրդ, ամեն ոք, որ Երուսաղեմում էր՝ այր և կին, երիտասարդ ու կույս, և ժողովուրդը ողբաց ու բարձրացրեց իր լացի ձայնը։ ² Եղամի որդի Եղեայի որդի Հեքոնիան պատասխան տվեց և ասաց Եզրասին. «Մենք մեղանչեցինք Տիրոջ՝ մեր Աստծու առաջ և այս երկրի այլազգիներից կին առանք, և այսօր այս անօրենություններն Իսրայելի մեջ են։ ³ Արդ, եկեք Տիրոջ՝ մեր Աստծու առջև ուխտենք հեռացնել մեզանից բոլոր այլազգի կանանց և նրանց զավակներին, ինչպես որ դու ես կամենում։ Վե՛ր կաց և փրկի՛ր սրանց Տիրոջ՝ Աստծու պատվիրաններով, և թող լինի, ինչպես օրենքն է հրամայում։ ⁴ Վե՛ր կաց, և ինչ լսենք քո բերանից, համաձայն կլինենք։ Զորացի՛ր և արա՛ այնպես, ինչպես որ հրամայված է Տիրոջ՝ Աստծու կողմից»։

⁵ Եզրասը, վեր կենալով, երդվեցրեց քահանաների և ղևտացիների ցեղերի առաջնորդներին և ողջ Իսրայելին, որ կվարվեն այս երդումի համաձայն։ ⁶ Ապա Եզրասը, ելնելով Աստծու տնից, գնաց գանձատուն՝ Եղիսուբի որդի Հոհանի մոտ. հաց չկերավ և ջուր չխմեց, այլ ողբում էր բազմության անօրենությունների և մեծամեծ մեղքերի վրա։

⁷ Ողջ Հուդայի երկրում ու Երուսաղեմում հայտարարում էին. ⁸ «Ամեն ոք, որ երեք օրվա ընթացքում Երուսաղեմ չգա, ըստ իշխանների ու ծերերի հրամանի, նրա ողջ ունեցվածքը կառգրավվի, իսկ ինքը կհեռացվի Իսրայելի ժողովրդի համայնքից»։

⁹ Երեք օրվա ընթացքում Հուդայի և Բենիամինի բոլոր այրերը հավաքվեցին Երուսաղեմ իններորդ ամսվա քսանին և նստեցին Տիրոջ տան հրապարակում՝ դողալով նրա խոսքերից և ձմռան ցուրտից։ ¹⁰ Եզրասը ոտքի կանգնելով նրանց ասաց. «Դուք մեղանչեցիք և այլազգիների դուստրերին կնության առաք՝ մեղքեր և անօրենություններ ավելացնելով Իսրայելի վրա։ ¹¹ Արդ, օրհնությո՛ւն մատուցեք Տիրոջը՝ մեր հայրերի Աստծուն, և հաճելի՛ն կատարեք նրա առջև. բաժանվե՛ք երկրի բոլոր հեթանոսներից և այլազգի այն կանանցից, որ առել եք»։

¹² Ողջ համայնքը պատասխան տվեց և ասաց. «Շատ մեծ է այն պահանջը, որ դու դնում ես մեզ վրա։ ¹³ Մենք շատ ենք, իսկ եղանակը ձմեռային է, ուստի չենք կարող դրսում կանգնել, իսկ այդ մեկ կամ երկու օրվա գործ չէ, որովհետև այս հարցում ծանր ենք մեղանչել։ ¹⁴ Թող բոլոր վայրերում և քաղաքներում իշխաններ նշանակվեն և նրանք, որ օտար կին ունեն, թող գան այն ժամանակ, երբ յուրաքանչյուր քաղաքում ծերերն ու տոհմապետերը կնշանակեն, որպեսզի դատելով քավեն մեզանից այդ մեղքը և մեզանից հեռացնեն այս բանի պատճառով մեզ վրա եկած Աստծու բարկությունը»։ ¹⁶ Գերությունից վերադարձողներն այսպես վարվեցին. Եզրասն ընտրեց անվանի մարդիկ՝ տոհմերի իշխաններ ըստ նահապետական տների, որոնք տասներորդ ամսի ամսամուտին հավաքվեցին հարցը քննելու ¹⁷ և մինչև առաջին ամսի սկիզբը զատեցին բոլոր այն այրերին, որ այլազգի կին ունեին։

Այլազգի կին ունեցողների ցանկը

(Ա Եզր. 9.18-36)

¹⁸ Եվ գտան քահանաների որդիներից, որ այլազգի կին ունեին. Հովսեդեկի որդի Հեսուի որդիներից և նրա եղբայրներից՝ Մանասեն, Եղիազարը, Հարիբը և Գադաղիան։ ¹⁹ Նրանք սկսեցին արձակել իրենցից այլազգի կանանց, և յուրաքանչյուրը մի խոյ մատուցեց անգիտակից մեղքի թողության համար։ ²⁰ Եմմերի որդիներից Անանին և Զաբդիան։ ²¹ Երամի որդիներից այլազգի կին ունեին Մասիսը, Եղիան, Սամարիան, Հեիլն ու Ոզիան։ ²² Փասուրի որդիներից՝ Եղիանասը, Մասիելը, Իսմայելը, Նաթանայելը, Հովզաբաթը և Եղասան։

²³ Եվ ղևտացիների որդիներից՝ Հևզաբաթը, Սամութը, Կովղիան, այսինքն՝ Կովղիտոսը, Ափեթիասը, Հուդասը և Եղիազարը։

²⁴ Եվ սաղմոսերգուներից՝ Եղիսափը։ Եվ դռնապաններից՝ Կողեմը, Էտեղեսը և Ուրին։

²⁵ Եվ Իսրայելից. Փորոսի որդիներից՝ Հռամայիան, Հավիան, Մեղքիան, Էակիմը, Եղիազարը, Ասաբիան, Նիբանիան։ ²⁶ Եղամի որդիներից՝ Մատտաթանիան, Զաքարիան, Հավեղը, Աբդիան, Երիմովթը և Եղիան։ ²⁷ Զաթուայի որդիներից՝ Եղիոնեն, Եղիսաբը, Մատթանան, Հարմովթը, Զաբադը, Զազիան։ ²⁸ Բաբեի որդիներից՝ Հոհանը, Անանին, Զաբուն և Աթաղին։ ²⁹ Բանի որդիներից՝ Մոսողամը, Մաղաքը, Ադիասը, Իասուբը, Սաաղը և Հռեմովթը։ ³⁰ Փաաթ Մովաբի որդիներից՝ Ադնեն, Քաղելը, Բանայիան, Մասեան, Մատթան, Բեսեելը և Մանասեն։ ³¹ Երամի որդիներից՝ Եղիեզին, Եսիան, Մեղքիան, Սամեասը, Սիմեոնը, ³² Բենիամինը, Մաղուքը և Սամարիան։ ³³ Ասեմի որդիներից՝ Մատթանիան, Մատաթիան, Զարաթը, Եղիփաղեթը, Հերեմին, Մանասեն և Սամեին։ ³⁴ Բանի որդիներից՝ Մովադիան, Ամրամը, Ուելը, ³⁵ Բանեան, Բադաիան, Քեղիան, ³⁶ Ուանիան, Մարիովթը, Եղիասիբը, ³⁷ Մաթանիան և Մաթանան։ Նույնը արեցին նաև ³⁸ Բանի որդիներն ու Սեմեիի որդիները՝ ³⁹ Սեղեմիասը, Նաթանը, Ադազիասը, ⁴⁰ Մաքնադաբուն, Սեսեն, Սարուն, ⁴¹ Եզրիելը, Սաղամիասը, Սամարիասը, ⁴² Սեղումը, Ատարիասը և Հովսեփը։ ⁴³ Աբուրեի որդիներից՝ Իեուելը, Մատաթիասը, Զաբաթը, Զեբիննասը, Հադային, Հադեն, Հովեդը և Բանայիան։ ⁴⁴ Սրանք էին այն բոլորը, որ այլազգի կին ունեին, և նրանցից ուստրեր ու դուստրեր ունեցան։

ՆԵԵՄԻԱ

ԱՔԱԼԻԱՅԻ ՈՐԴԻ ՆԵԵՄԻԱՅԻ ԽՈՍՔԵՐԸ

1(11)

Նեեմիայի աղոթքը և օգնության խնդրանքն Աստծուց

¹ Արտաշես արքայի քսաներորդ տարվա Քաղսև ամսին ես մայրաքաղաք Շոշում էի։ ² Ինձ մոտ եկան իմ եղբայրներից, նաև Հուդայի մարդիկ, և նրանց հարցրի փրկվածների մասին, որոնք ազատվել և վերադարձել էին գերությունից, ինչպես նաև Երուսաղեմի մասին։ ³ Եվ ինձ ասացին. «Գերությունից փրկվածներն այնտեղ՝ իրենց երկրում, մեծ նեղության և նախատինքի մեջ են, իսկ Երուսաղեմի պարիսպները դեռ քանդված և ավերված են, նրա դարպասներն՝ հրկիզված»։

⁴ Երբ այս ամենը լսեցի, նստեցի և լաց եղա, մի քանի օր սուգ արեցի ու պահք պահեցի, աղոթքի կանգնեցի Տիրոջ՝ երկնքի Աստծու առջև ⁵ և ասացի. «Երկնքի և երկրի Տե՛ր, Աստվա՛ծ, դու, որ հզոր ես, մեծ և ահազդու, որ պահում ես քո ուխտն ու ողորմությունը նրանց համար, ովքեր սիրում են քեզ և ովքեր կատարում են քո հրամանները, ⁶ թող քո ականջները լսեն, և քո աչքերը տեսնեն։ Լսի՛ր և տե՛ս քո ծառայի աղոթքը, որ ես այսօր մատուցում եմ քո առաջ Իսրայելի որդիների՝ քո ծառաների համար, որոնք նեղության մատնվեցին մեր գործած մեղքերի պատճառով. մեղանչեցինք ես և իմ հոր տունը։ ⁷ Քանի որ շատ ծանր կերպով հանցանքների մեջ ընկանք և չպահեցինք քո օրենքը, հրամաններն ու պատվիրանները, որ պատվիրեցիր մեզ քո ծառա Մովսեսի միջոցով։ ⁸ Հիշի՛ր, Տե՛ր, այն խոսքը, որ պատվիրեցիր քո ծառա Մովսեսին՝ ասելով. “Եթե դուք չպահեք իմ օրենքը, ես ձեզ կցրեմ հեթանոսների մեջ, ⁹ իսկ եթե ինձ վերադառնաք և պահեք իմ օրենքներն ու կատարեք դրանք, եթե նույնիսկ ցրված լինեք մինչև երկրի ծայրերը, այնտեղից կհավաքեմ ձեզ և կբերեմ այն վայրը, որ ընտրեցի, և որտեղ բնակվում է իմ անունը”։ ¹⁰ Եվ արդ, սրանք քո ծառաներն ու քո ժողովուրդն են, որոնց փրկեցիր քո մեծ զորությամբ և բարձր բազկով։ ¹¹ Մի՛ լքիր, այլ քո ականջները թող լսեն քո ծառաների աղոթքները և անսան նրանց խնդրանքներին, որոնք երկնչում են քո անունից. իրագործի՛ր այսօր քո ծառայի խնդրանքը, արա՛ այնպես, որ ես գթություն գտնեմ այս մարդու առաջ»։

Այդ ժամանակ ես թագավորի մատռվակն էի։

2(12)

Նեեմիայի վերադարձը Երուսաղեմ

¹ Այնպես պատահեց, որ Արտաշես արքայի քսաներորդ տարվա Նիսան ամսին թագավորն ինձանից գինի ուզեց։ Ես, գինին վերցնելով, տվեցի նրան. թագավորը մենակ էր։ ² Երբ գինին խմեց, ինձ ասաց. «Ինչո՞ւ է քո դեմքը տխուր ու տրտում. դրա պատճառը ոչ այլ ինչ է, եթե ոչ քո սրտի չարությունը»։ Ես սաստիկ վախեցա ³ և թագավորին ասացի. «Արքա՛, դու ապրի՛ր հավիտյան. իմ դեմքն ինչպե՞ս տխուր ու տրտում չլինի, երբ իմ քաղաքն ու իմ հոր տունը անապատ է, իսկ դարպասները՝ հրից ոչնչացած»։ ⁴ Թագավորն ինձ ասաց. «Ինչի՞ մասին է քո խնդրանքը»։ Եվ ես, աղոթքի կանգնած և իմ միտքը դեպի երկնքի Աստված ամբարձած, ⁵ ասացի թագավորին. «Թող բարություն լինի քո թագավորության վրա. եթե քո ծառան շնորհ գտավ քո առաջ, և եթե կամենում ես, ինձ ուղարկի՛ր Հուդայի երկիր՝ իմ հայրերի գերեզմանների քաղաքը, և ես քո հրամանի խոսքով կկառուցեմ այն»։ ⁶ Թագավորն ու նրա հարճը, որ նստած էր նրա մոտ, ինձ ասացին. «Ե՞րբ կժամանես և ե՞րբ կվերադառնաս»։ Թագավորը բարություն արեց ինձ և արձակեց ինձ, ես նրան ասացի իմ վերադառնալու ժամանակը։ ⁷ Ապա թագավորին ասացի. «Եթե քո առջև շնորհներ գտա, գետի այն կողմերի իշխաններին ուղղված թո՛ւղթ տուր ինձ, և թող ինձ ուղեկցեն մինչև Հուդայի երկիր։ ⁸ Մի թուղթ էլ՝ ուղղված Ասափին, որ արքունի անտառի պահապանն է, որ ինձ փայտ տա քաղաքի դարպասների և պարիսպի շինության և այն տան համար, ուր ես պիտի մտնեմ»։ Թագավորը տվեց, որովհետև իմ Աստծու ձեռքը բարությամբ էր վարվում ինձ հետ։

⁹ Եկա գետի այն կողմի իշխանների մոտ և նրանց տվեցի թագավորի թղթերը. թագավորն ինձ հետ հզոր առաջնորդներ և ձիեր էր ուղարկել։ ¹⁰ Երբ Սանաբաղատ իշխանն ու Ամովնի ծառա Տուբիան լսեցին, որ Իսրայելի բարությանը և պետքերին հետամուտ մարդ է եկել, նեղվեցին։

¹¹ Ես եկա Երուսաղեմ ու երեք օր օթևանեցի այնտեղ։ ¹² Գիշերը վեր կացա. ինձ հետ էին նաև սակավաթիվ մարդիկ։ Որևէ մարդու չէի պատմել թե Աստված ի՛նչ է դրել իմ սիրտը՝ Իսրայելի համար անելու։ Բացի այն գրաստից, որի վրա ես նստում էի, ինձ հետ ուրիշ գրաստ չկար։ ¹³ Ես Հեղեղատի դարպասով դուրս ելա ու անցնելով Թզենիների աղբյուրի բերանով՝ հասա Աղբերի դարպասը. ճնշվում էի Երուսաղեմի պարիսպների տխուր վիճակից, որոնք փլված էին, իսկ դրա դարպասները՝ կրակից ոչնչացած։ ¹⁴ Անցա Աղբյուրի դարպասով ու Թագավորի ջրավազանի մոտով, բայց տեղ չկար, որ իմ գրաստը, որին հեծել էի, անցներ։ ¹⁵ Այսպես գիշերով հեղեղատով ելա պարիսպն ի վեր՝ սրտնեղությունից ճնշվելով պարսպի վիճակից, և հասնելով Հեղեղատի դարպասին՝ վերադարձա։ ¹⁶ Պահապանները չիմացան, թե ո՛ւր գնացի և ի՛նչ էի անում. մինչև այն ժամանակը ոչինչ չէի հաղորդել նաև հրեաներին, քահանաներին, ազնվականներին ու զորագլուխներին և մյուսներին, որոնք կատարում էին գործերը։

¹⁷ Նրանց ասացի. «Դուք տեսնում եք այն չարիքը, որի մեջ ենք այժմ, և թե ինչպես Երուսաղեմն անապատ է, իսկ նրա դարպասները՝ հրկիզված։ Եկեք շինե՛նք Երուսաղեմի պարիսպները և դուրս գանք նախատինքից»։ ¹⁸ Եվ նրանց պատմեցի, թե ինչպես Տիրոջ ձեռքը բարությամբ ինձ հետ էր եղել, նաև թագավորի այն խոսքերը, որ ինձ ասել էր, և նրանց ասացի. «Արդ, եկե՛ք գործի անցնենք և շինենք»։ Այպիսով նրանց ձեռքերը զորացան բարի գործի համար։

¹⁹ Երբ Սանաբաղատը, ամովնացի Տուբիա ծառան և արաբացի Գեսամը լսեցին, ծաղրեցին մեզ և մեզ մոտ գալով՝ ասացին. «Ի՞նչ է այդ, որ անում եք, ցանկանում եք ապստամբե՞լ թագավորի դեմ»։ ²⁰ Ես պատասխան տվեցի նրանց և ասացի. «Երկնքի և երկրի Աստվածը հաջողություն տվեց մեզ, մենք նրա սուրբ ծառաներն ենք և շինում ենք այս քաղաքը, իսկ դուք Երուսաղեմում բաժին, հիշատակ և իրավունք չունեք»։

3(13)

Երուսաղեմի պարիսպների նորոգումը

¹ Եղիասիբ մեծ քահանան և նրա քահանա եղբայրները ոտքի ելան և շինեցին Ջրմուղի ավազանի դարպասը, սրբագործեցին այն և կանգնեցրին նրա դռները և կառուցեցին այն մինչև Անամայելի աշտարակը։ ² Նրանց կողքին էին Երիքովի մարդկանց որդիները, իսկ սրանց կողքին՝ Ամարի որդի Զաքուրի որդիները։ ³ Ձկան դարպասը շինեցին Ասանի որդիները։ Սրանք ծածկեցին այն, դրեցին դռները, փականներն ու նիգերը։ ⁴ Նրանց կողքին աշխատում էին Մասիզեբելի որդի Բարաքի որդի Մոսոլամը, իսկ սրանց կողքին՝ Բաանի որդի Սադովկը։ ⁵ Նրանց կողքին իրենց տեղն էին գրավել թեկուացիները, բայց քաղաքի ազնվականներն իրենց մասնակցությունը չբերեցին նրանց աշխատանքին։ ⁶ Փասեկի որդի Հուդան և Բասոդիայի որդի Մեսողամը նորոգեցին Հին դարպասը. սրանք ծածկեցին այն, կանգնեցրին նրա դռները, փականներն ու նիգերը։ ⁸ Նրանց կողքին, ըստ կարգի, աշխատում էր Հռոսեկեիմի որդի Անանիան, որը Երուսաղեմը նորոգեց մինչև Լայն պարիսպը։ ⁹ Նրանցից հետո նորոգում էր Հռափիան՝ Երուսաղեմի շրջակայքի կես մասի իշխանը։ ¹⁰ Նրա կողքին՝ Հերոմաքի որդի Հերադիան՝ իր տան դիմաց, նրա կողքին՝ Ասբանիայի որդի Ատտուսը։ ¹¹ Երամի որդի Ելքիասը և Փաադմովաբի որդի Ասուբը նորոգեցին մեկ այլ հատված՝ մինչև Թանուրիմ աշտարակը։ ¹² Նրա կողքին նորոգում էին Ալոհեմի որդի Սալումը՝ Երուսաղեմի շրջակայքի կեսի իշխանը, և իր դուստրերը։ ¹³ Հեղեղատի դարպասը նորոգեցին Անուն և Զանուի բնակիչները. նրանք շինեցին այն, կանգնեցրին նրա դռները, փականներն ու նիգերը, հազար կանգուն էլ պարսպից շինեցին, մինչև Մոխրի դարպասը։ ¹⁴ Իսկ Մոխրի դարպասի վերակառուցումը ստանձնեց Հռեքաբի որդի Մելքիան՝ Բեթաքարմի շրջակայքի իշխանը, ինքը և իր որդիները, և վերականգնեցին այն, կանգնեցրին նրա դռները, փականներն ու նիգերը։ ¹⁵ Ջրաբուխ ավազանի պարիսպը մինչև Դավթի քաղաքից իջնող աստիճանները ստանձնեց Ադիոնը՝ թագավորի իշխանը։ ¹⁶ Նրանից հետո մինչև Դավթի գերեզմանի պարտեզը, մինչև արհեստական ջրաբուխը և մինչև Բեթագաբարին նորոգեց Ազբուքի որդի Նեեմիան՝ Բեթսուրի շրջակայքի իշխանը։ ¹⁷ Նրա կողքին նորոգում էին ղևտացիները, Բանեի որդի Հռայումը, նրա կողքին՝ Ասաբիան՝ Կեիլայի շրջակայքի կեսի իշխանը, ¹⁸ իսկ նրա կողքին՝ նրա եղբայրները՝ Ադադի որդի Բենային՝ Կելիայի շրջակայքի մյուս կեսի իշխանը։ ¹⁹ Նրանից հետո Հեսուի որդի Ազուրը՝ Մասփեի իշխանը, նորոգեց զառիվերի աշտարակի մեկ այլ հատված, որ միանում էր անկյունին։ ²⁰ Նրա կողքին մեկ այլ հատված՝ անկյունից մինչև Բեթելիասուբի դուռը, որտեղ մնում էր մեծ քահանան, ստանձնեց Զաբուի որդի Բարուքը։ ²¹ Նրա կողքին մեկ այլ հատված՝ Բեթելիասուբի դռնից մինչև նրա ավարտը, ստանձնեց Ակովմի որդի Ուրիայի որդի Մերամովթը։ ²² Նրանից հետո նորոգում էին քահանաները՝ Աքեքարի մարդիկ։ ²³ Նրանցից հետո իրենց տների դիմացն ստանձնեցին Բենիամինն ու Ասուբը, նրանցից հետո էլ՝ Անանիայի որդի Մասուի որդի Ազարիան՝ իր տան մոտ։ ²⁴ Նրանից հետո մեկ այլ բաժին՝ Բեթազարիայից մինչև անկյունը և մինչև շրջադարձը, ստանձնեց Ենգադի որդի Բանին։ ²⁵ Իսկ Ուզիայի որդի Փալաքը նորոգեց անկյան դիմացը և այն աշտարակը, որ թագավորի ապարանքից դուրս, բանտի գավթից ավելի վեր էր գտնվում։ Նրանից հետո գալիս էր Փորոնի որդի Փաթավան։ ²⁶ Տաճարի սպասավորները, որ բնակվում էին Ոփալում, նորոգեցին մինչև Ջրերի դարպասի պարտեզը՝ արևելյան կողմում, և արտաքին կողմի աշտարակը։ ²⁷ Նրանց կողքին մեկ այլ հատված՝ արտաքին մեծ աշտարակի դիմացից մինչև Սոփելի պարիսպը, ստանձնեցին թեկուացիները։ ²⁸ Ձիերի դռնից վերև նորոգեցին քահանաները, յուրաքանչյուրը՝ իր տան դիմաց։ ²⁹ Նրանցից հետո նորոգեց Եմերի որդի Սադովկը՝ իր տան դիմաց, իսկ նրանից հետո ստանձնեց Սեքենիայի որդի Սամեիան, որ արևելյան դարպասի պահապանն էր։ ³⁰ Նրանից հետո նորոգեց Սելեմիայի որդի Անանիան, մեկ այլ հատված էլ՝ Սելեփի որդի Անոնը։ Նրանից հետո ստանձնեց Բարաքայի որդի Մեսոլամը՝ իր գանձատան դիմաց։ ³¹ Նրանից հետո Սարեփի որդի Մելքիան նորոգեց մինչև Բթանաթան, իսկ քաղաքի այլ մեծատուններ՝ Մափկաթ դարպասի դիմացից մինչև շրջադարձի զառիվերը։ ³² Այդտեղից մինչև Ջրաբուխի դարպասն էլ նորոգեցին պղնձագործներն ու քաղաքի մեծատունները։

Թշնամիներն ուզում են խափանել վերակառուցման աշխատանքները

³³ Երբ Սանաբաղատը լսեց, որ շինում ենք պարիսպները և կանգնեցնում նրա աշտարակները, չարացավ և սաստիկ զայրանալով՝ ծաղրում էր հրեաներին։ ³⁴ Նա ասում էր իր եղբայրների առաջ. «Ա՞յս է ձեր զորությունը, ո՜վ սամարացիներ, որ հրեաները շինում և ամրացնում են իրենց քաղաքը»։ ³⁵ Տուբիա Ամովնացին, մեջտեղ գալով, ասաց նրանց. «Չեն կարողանա շինել և զոհեր մատուցել կամ էլ ուտել դրանք իրենց տեղում. մի՞թե հիմա աղվեսները չեն ելնի ու քանդի այդ պարսպի քարերը»։

³⁶ Իսկ մենք ասացինք. «Լսի՛ր մեզ, Տե՛ր, մեր Աստվա՛ծ, որովհետև մենք արհամարհանքի և թշնամանքի արժանացանք. իրենց նախատինքն իրենց գլուխների՛ն շուռ տուր, նրանց իրենց գերեվարողների թշնամանքի՛ն մատնիր, ³⁷ և թող չծածկվեն նրանց անօրենությունները»։

4(14)

¹ Բայց երբ Սանաբաղատը, Տուբիան, արաբացիներն ու ամովնացիները լսեցին, թե Երուսաղեմի պարսպի շինությունը լավ ընթացքի մեջ է, և զանազան վայրերում արդեն գործը տեսանելի է դառնում, չարությամբ ընդունեցին այդ։ ² Եվ բոլորը միասին հավաքվեցին՝ գալու և պատերազմելու Երուսաղեմի դեմ։ ³ Իսկ մենք աղոթքի կանգնեցինք Տիրոջ՝ մեր Աստծու առաջ և թշնամիների ահից գիշեր-ցերեկ մեզ վրա պահակներ կարգեցինք։

⁴ Հուդայի երկրի մարդիկ ասացին. «Չենք կարող այսպես միաժամանակ թե՛ պատերազմել և թե՛ շինել։ Թող ոմանք զինված պատրաստ կանգնեն, իսկ մյուսները՝ շինեն»։ ⁵ Իսկ նրանք, որ մեզ նեղում էին, ասացին. «Այնպես կանենք, որ չիմանան և չտեսնեն մեզ, մինչև որ տարբեր տեղերից ելնելով մտնենք նրանց մեջ, սպանենք նրանց ու խափանենք նրանց գործը»։

⁶ Այնպես եղավ, որ մեզ մոտ եկան տարբեր վայրերում բնակվող հրեաներ և ասացին, որ թշնամիները բոլոր տեղերից հանկարծակի գալիս են մեզ վրա։ ⁷ Ուստի ցածր տեղերում, պարսպի հետևում թաքստոցում մարդիկ կարգեցի՝ իրենց զենքերով, գեղարդներով ու աղեղներով հանդերձ։ ⁸ Ապա ելնելով՝ այդ մարդկանց, որ կազմ ու պատրաստ էին, նրանց զորագլուխներին և տարբեր վայրերի պահապաններին ասացի. «Մի՛ երկնչեք նրանցից, հիշե՛ք մեր մեծ և ահազդու Աստծուն և պատերազմե՛ք ձեր եղբայրների, ձեր կանանց ու որդիների, ձեր դուստրերի և տների համար»։

⁹ Երբ մեր թշնամիները լսեցին, թե իմացել և պատրաստվել ենք, Աստված ցրեց նրանց մտադրությունը, և մենք բոլորս վերադարձանք՝ շինելու պարիսպը՝ յուրաքանչյուրն իր գործին։ ¹⁰ Այն օրվանից կեսը կարգված էր գործի, իսկ մյուս կեսը զինված էր թշնամու դեմ՝ գեղարդը, ասպարը և աղեղը իրենց ձեռքին, ամեն մեկը պատրաստ կանգնած էր իր եղբոր հետևում, ¹¹ որ շինում էր պարիսպը։ Հաճախ էլ օգնում էր եղբորը՝ մի ձեռքում կրելով զենքը, իսկ մյուս ձեռքով եղբորը խիճ կամ շաղախ տալով։ ¹² Շինողներն էլ իրենց մեջքին սուսեր ունեին, բարձի վրա՝ միասայրի, և այդպես շինում էին Երուսաղեմի պարիսպը։ Նրանց մոտ կանգնած էր նաև եղջերյա փող հնչեցնողը։ ¹³ Նրանց, որ զինված և պատրաստված էին, և նրանց իշխաններին ասացի. «Մեր գործը մեծ է և ծավալուն, իսկ մենք ցրված ենք պարսպի շինության վրա՝ ամեն մեկն իր եղբորից հեռու։ ¹⁴ Արդ, ամեն տեղ շեփորահարներ կարգենք, և երբ մեկը եղջերափողի ձայնը լսի, թող բոլորը հավաքվեն այնտեղ, և մեր Աստված մեզ համար կպատերազմի մեր թշնամիների դեմ»։

¹⁵ Այսպես, արշալույսի բացվելուց մինչև աստղերի ելնելը կեսն աշխատում էր, կեսն էլ՝ զինված հսկում։ ¹⁶ Այն ժամանակ ժողովրդին ասացի. «Եկեք բնակվենք Երուսաղեմ քաղաքում, մինչև արշալույս պահպանենք մեր շրջապատը, իսկ ցերեկը՝ աշխատենք»։ ¹⁷ Եվ ես ու մարդիկ, որ իմ շուրջն էին և պահպանում էին ինձ, երբեք չհանեցինք մեր հագուստները և մեզանից չհեռացրինք մեր զենքերը։

5(15)

Նեեմիան մեծ ժողով է հրավիրում

¹ Ժողովրդի և նրանց կանանց կողմից իրենց եղբայրների դեմ մեծ աղաղակ բարձրացավ։ ² Ոմանք ասում էին. «Մեր որդիների և մեր դուստրերի համար, որոնց կերակուրը չի բավարարում, գնանք և ցորեն գնենք, որպեսզի ապրենք»։ ³ Ուրիշներն էլ ասում էին. «Մեր անդաստաններն ու այգիները գրավ դնենք և ցորեն առնենք ու ուտենք»։ ⁴ Կային նաև, որ ասում էին. «Մեր ունեցածը փոխանակեցինք ոսկու և արծաթի հետ և թագավորի հարկը վճարեցինք։ ⁵ Այժմ մեր մարմինները նույնն են, ինչ որ մեր եղբայրներինը, և մեր որդիները՝ ինչպես նրանց որդիները. ստիպված ենք մեր որդիներին տալ ծառայության, իսկ մեր դուստրերը բռնության են մատնված և մեր ձեռքում նրանց փրկելու ոչ մի հնարավորություն չկա»։

⁶ Ես մեծապես տրտմեցի, երբ լսեցի այս աղաղակն ու նրանց խոսքերը։ ⁷ Խորհեցի իմ մտքում և ապա հանդիմանեցի ազնվականներին ու իշխաններին՝ ասելով. «Դո՞ւք եք, որ հարկ եք վերցնում ձեր եղբայրներից»։ Ապա հրամայեցի մեծ ժողով գումարել ⁸ և ասացի նրանց. «Մենք փրկում ենք մեր հրեա եղբայրներին, որ վաճառվել են հեթանոսներին, և այժմ դուք, առանց մեր գիտության, վաճառո՞ւմ եք նրանց»։ Լռեցին և ոչինչ չկարողացան պատասխանել։ ⁹ Ես շարունակեցի. «Ճիշտ չէ ձեր արածը, որովհետև չեք երկնչում Աստծուց և այդ պատճառով էլ զերծ չմնացինք հեթանոսների և մեր թշնամիների նախատինքներից»։ ¹⁰ Ապա իմ եղբայրներին և ծանոթներին ես ասացի. «Ե՛վ ես, և՛ դուք, արծաթ և հարստություն տանք այն ամենի դիմաց, որ պահանջում են հարկահանները, ¹¹ և այսօր վերադարձնենք դրանց անդաստանները, այգիները, ձիթենիներն ու տները և թող մեր արծաթով ցորեն, գինի ու ձեթ գնվի և տրվի դրանց»։ ¹² Այն ժամանակ իշխաններն ու այլ մեծամեծներ ասացին. «Կվերադարձնենք և դրանցից ոչինչ չենք պահանջի և կանենք այնպես, ինչպես հրամայում ես»։ Ապա կանչեցի քահանաներին և նրանց այս խնդրի համար երդվեցնելով՝ ¹³ ուժգին թոթափեցի իմ վերարկուն և ասացի. «Աստված թող այսպես թոթափի ամեն մեկին, որ չկատարի այս խոսքերը, իր տնից ու իր վաստակից և թող այսպես ունայնացած ու թոթափված լինի իր ունեցվածքից»։ Բոլոր ժողովականներն ասացին՝ ամեն։ Ապա օրհնեցին Տիրոջը, ու ողջ ժողովուրդը կատարեց այս խնդիրքը։

¹⁴ Այն օրից, երբ ես Հուդայի իշխան նշանակվեցի, Արտաշես արքայի քսաներորդ տարվանից մինչև երեսուներկուերորդ տարին՝ տասներկու տարի, ես և իմ եղբայրները, իշխաններ լինելով, ոչ ոքից բռնի չկերանք և չխմեցինք։ ¹⁵ Իսկ նախկինում բռնություն գործադրածներին նեղեցի և նրանցից հաց, գինի և ուրիշ շատ բաներ վերցրի, նաև քառասուն դիդրախմի արծաթ և վերադարձրի իրենց տերերին, և նրանց հեռացրի ժողովրդի իշխանությունից. ես Աստծու երկյուղի պատճառով նրանց նման չեղա։

¹⁶ Իսկ պարսպի գործը հաջողությամբ առաջ էր ընթանում. ոչ ոքի չբռնացա՝ անդաստան կամ այգի գրավելու համար։ Եվ ամեն ոք անխափան աշխատում էր պարսպի վրա։ ¹⁷ Բացի այդ, ամեն օր իմ սեղանին մասնակցում էին հարյուր հրեաներ և ուրիշներ, որ մեզ մոտ էին գալիս մեզ շրջապատող հեթանոսներից։ ¹⁸ Ամեն օր իմ ծախսն էր՝ մի զվարակ, վեց ընտիր ոչխար և մի այծ, իսկ տասը օրը մեկ բոլորին առանց խնայելու գինի էի տալիս. ոչ ոքից հաց չխլեցի, որովհետև գիտեի, որ ժողովրդի գործերը դժվար էին։ ¹⁹ Աստված թող բարությամբ հիշի ինձ այն ամենի համար, որ արեցի ողջ ժողովրդի նկատմամբ։

6(16)

Պարսպի շինության ավարտը

¹ Երբ Սանաբաղատը, Տուբիան և Գեսամ Արաբացին և մեր թշնամիներից շատ ուրիշները լսեցին, որ պարիսպը շինեցի, ահ ու դողի մեջ ընկան. մինչ այդ դռները դեռ չէին կանգնեցվել։ ² Սանաբաղատը և Գեսամը լուր ուղարկեցին ինձ՝ ասելով. «Արի միասին հանդիպենք Ովնոյի դաշտի մի գյուղում»։ Նրանք մտադիր էին չարիք գործել իմ նկատմամբ։ ³ Ես նրանց մոտ սուրհանդակ ուղարկեցի և ասացի. «Այն գործը, որ անում եմ, շատ մեծ է և չեմ կարող ձեզ մոտ գալ, որպեսզի գործը չխափանվի. երբ ավարտեմ այն, ապա կիջնեմ ձեզ մոտ»։ ⁴ Բազում անգամ լուր ուղարկեցին ինձ, բայց ես նույն պատասխանը տվեցի նրանց։ ⁵ Այն ժամանակ Սանաբաղատն ինձ մոտ ուղարկեց իր ծառային, որ ձեռքին մի բաց նամակ ուներ, ⁶ որի մեջ այս էր գրված. «Բոլոր հեթանոսների մեջ լուր է տարածվել, թե դու և բոլոր հրեաները ցանկանում եք ապստամբել թագավորի դեմ. դրա համար ես դու շինում այդ պարիսպը և ամրացնում դրա աշտարակները, որովհետև ցանկանում ես դու թագավորել։ ⁷ Այդ նպատակով նաև քեզ համար մարգարեներ ես կարգել, որովհետև ցանկանում ես նստել Երուսաղեմում և թագավորել Հուդայի երկրի վրա։ Արդ, գուցե այս բաները պատմեն թագավորին։ Արի՛, այս բաների մասին միասին խորհենք»։ ⁸ Պատասխան ուղարկեցի նրան և ասացի. «Այդ ամենը, որ խոսում ես, իրական չեն, այլ բխում են քեզանից և քո սրտից»։ ⁹ Այսպես բոլորը մեզ վախեցնում էին՝ մտածելով, թե մեր ձեռքերը կթուլանան, և մեր գործը չի ավարտվի։ Բայց, արդ, ես զորացրի իմ ձեռքերը, մինչև որ գործը գլուխ գա։

¹⁰ Ես մտա Մետաբելի որդի Դալայիայի որդի Սիմայի տունը. նա փակվել էր իր տան մեջ։ Նա ինձ ասաց. «Հավաքվենք Տիրոջ տան մեջ, ամրանանք այնտեղ և փակենք նրա դռները, որպեսզի թշնամին, գիշերը գալով, չսպանի մեզ»։ ¹¹ Ես ասացի. «Ո՞վ է այն մարդը, որից ես փախչեմ և կամ ո՞վ է այն մարդը, որ մտնի Աստծու տունը և կարողանա փրկվել»։ ¹² Ապա իմացա, որ նա Աստծուց չէր ուղարկված, և նրա մարգարությունն իմ դեմ էր։ ¹³ Որովհետև Տուբիան և Սանաբաղատը մեծ ամբոխ էին վարձել իմ դեմ, որ վախենամ և Տիրոջ տունը մտնելով՝ մեղանչեմ, և չար անուն դնեն ինձ վրա։ ¹⁴ Աստված թող հիշի Տուբիայի և Սանաբաղատի նենգությունը, որ չարիք նյութեցին իմ նկատմամբ և ստիպեցին սուտ մարգարեանալ, որպեսզի զարհուրեցնեն և վախեցնեն ինձ։

¹⁵ Պարսպի շինությունն ավարտվեց Իլուլ ամսի քսանհինգին, հիսուներկու օրվա ընթացքում։ ¹⁶ Երբ մեր բոլոր թշնամիները լսեցին, մեզ շրջապատող բոլոր հեթանոսները վախեցան, և նրանց վրա մեծ ահ ու երկյուղ ընկավ. հասկացան, որ մեր գործի հաջողությունն Աստծուց էր։

¹⁷ Այն օրերին Հուդայի ազնվականների կողմից շատ նամակներ էին ուղարկվում Տոբիային, Տոբիան էլ նրանց էր ուղարկում։ ¹⁸ Քանի որ նրանց միջև մոտիկ ազգակցություն կար, որովհետև նա Երայի որդի Սեքենիայի փեսան էր, իսկ նրա որդի Հովնաթանը կնության էր առել Բարաքիայի որդի Մեսոլոմի դստերը։ ¹⁹ Նրա խոսքերը բերում էին ինձ, իսկ իմ խոսքերը տանում նրան. նա շատ նամակներ էր ուղարկում՝ ինձ վախեցնելու համար։

7(17)

Գերությունից վերադարձած իսրայելացիների ազգահամարը

¹ Երբ պարսպի շինությունն ավարտվեց և նրա դռները կանգնեցրի, կարգվեցին դռնապանները, երգիչները, սաղմոսասացներն ու ղևտացիները։ ² Իմ եղբայր Անանին և պալատի իշխան Անանիային, նշանակեցի Երուսաղեմի վրա, որովհետև նա ճշմարիտ այր էր և շատերից ավելի երկյուղած էր Աստծու նկատմամբ։ ³ Նրանց ասացի. «Մինչև արևի ծագելը դարպասները մի՛ բացեք, և մինչ բոլորն արթուն կհսկեն, դռները թող փակվեն և սողնակները գցվելով ամրացվեն։ Դռների պահապանները թող Երուսաղեմի բնակիչներից կարգվեն, յուրաքանչյուրը՝ իր դիտակետում, յուրաքանչյուրը՝ իր տան դիմաց։ ⁴ Որովհետև քաղաքը մեծ է և ընդարձակ, իսկ ժողովուրդը՝ սակավաթիվ, և բոլոր տները դեռ չեն կառուցվել»։

⁵ Աստված ինձ թելադրեց, և ժողովի կանչեցի ազնվականներին, իշխաններին ու ժողովրդին և գտա ազգահամարի գիրը, որի մեջ արձանագրվել էին գերությունից առաջին վերադարձողները։ Այնտեղ այսպես էր գրված. ⁶ «Սրանք են Իսրայելի այն որդիների անունները, որոնք վերադարձան բաբելացիների Նաբուքոդոնոսոր թագավորի տարած գերությունից և եկան Երուսաղեմ ու Հուդայի երկիր՝ յուրաքանչյուրն իր քաղաքը։ ⁷ Նրանք եկան Զորաբաբելի, Հեսուի, Նեեմիայի, Ազարիայի, Դայելմիայի, Նայեմանիի, Մարտեքուի, Բելմանի, Մատատփարաթի, Եզրասի, Բագուիի, Նավումի, Բարանայի և Մոփրայի հետ։

Իսրայելի ժողովրդի տղամարդիկ էին. ⁸ Փորոսի որդիները՝ երկու հազար հարյուր յոթանասուներկու, ⁹ Սափատիայի որդիները՝ երեք հարյուր յոթանասուներկու, ¹⁰ Արեսի որդիները՝ վեց հարյուր հիսունվեց, ¹¹ Փաաթմովաբի ժառանգներից Հեսուի և Հովաբի որդիները՝ երկու հազար երկու հարյուր տասնութ, ¹² Ելամի որդիները՝ հազար երկու հարյուր հիսունչորս, ¹³ Զաթուայի որդիները՝ ութ հարյուր քառասունհինգ, ¹⁴ Զաքուի որդիները՝ յոթ հարյուր վաթսուն, ¹⁵ Բանուիի որդիները՝ վեց հարյուր քառասունութ, ¹⁶ Բիբեի որդիները՝ վեց հարյուր քառասունութ, ¹⁷ Ազիայի որդիները՝ երկու հազար երեք հարյուր քսաներկու, ¹⁸ Ադոնիկամի որդիները՝ վեց հարյուր հիսունյոթ, ¹⁹ Բագուեի որդիները՝ երկու հազար վաթսունյոթ, ²⁰ Ադինի որդիները՝ վեց հարյուր հիսունչորս, ²¹ Ատտերի ժառանգներից Եզեկիայի որդիները՝ իննսունութ, ²³ Բեսիի որդիները՝ երեք հարյուր քսանչորս, ²⁴ Արիբի որդիները՝ հարյուր տասներկու, ²⁶ Բեթլահեմի որդիները՝ հարյուր քսաներեք, Նետոփայի որդիները՝ հիսունվեց, ²⁷ Անաթովթի որդիները՝ հարյուր քսանութ, ²⁸ Բեթազմայի որդիները՝ քառասուներկու, ²⁹ Կարիաթ-Յարիմի, Կեփիրայի և Բերովթի որդիները՝ յոթ հարյուր քառասուներեք, ³⁰ Արամայի և Գաբաայի որդիները՝ վեց հարյուր քսանմեկ, ³¹ Մաքեմասի որդիները՝ հարյուր քսաներկու, ³² Բեթելի և Աիայի որդիները՝ հարյուր քսաներեք, ³³ Նաբիայի որդիները՝ հարյուր հիսուներկու, Մակեբոսի որդիները՝ հարյուր հիսունվեց, ³⁴ Ելամայի որդիները՝ հազար հիսունչորս, ³⁵ Երամի որդիները՝ երեք հարյուր քսան, ³⁶ Երիքովի որդիները՝ երեք հարյուր քառասունհինգ, ³⁷ Լոդի, Ադիդի և Անովնի որդիները՝ յոթ հարյուր քսաներեք, ³⁸ Սենանայի որդիները՝ երեք հազար հարյուր երեսուն։

³⁹ Քահանաները. Հեսուի տնից Հովիդեայի որդիները՝ ինը հարյուր յոթանասուներեք, ⁴⁰ Եմերի որդիները՝ հազար հիսուներկու, ⁴¹ Փասեուրի որդիները՝ հազար երկու հարյուր քառասուն ⁴² Երամի որդիները՝ հազար տասնյոթ։

⁴³ Ղևտացիները. Ուդայիդի ժառանգներից Հեսուի որդի Կադմիելի որդիները՝ յոթանասուներեք։

⁴⁴ Սաղմոսերգուները. Ասափի որդիները՝ հարյուր քառասունութ։

⁴⁵ Դռնապանները. Ելումի որդիները, Ատտերի որդիները, Տեմիովնի որդիները, Ակուբի որդիները, Ատիտայի որդիները, Սաբեի որդիները՝ հարյուր երեսունութ։

⁴⁶ Տաճարի սպասավորները. Սիլայի որդիները, Ասիփայի որդիները, Տաբովթի որդիները, ⁴⁷ Սարիասի որդիները, Սիայի որդիները, Փադովնի որդիները, ⁴⁸ Լաբանի որդիները, Ագաբայի որդիները, Ակուդի որդիները, Ուտայի որդիները, Կետարի որդիները, Ագաբի որդիները, Սելեմի որդիները, ⁴⁹ Անանի որդիները, Գադելի որդիները, Գաարի որդիները, ⁵⁰ Հռեայի որդիները, Հռասոնի որդիները, Նեկոդայի որդիները, ⁵¹ Գեելամի որդիները, Ոզիի որդիները, Փեսեի որդիները, ⁵² Բեսեի որդիները, Մեինոսի որդիները, Նեփովայիսի որդիները, ⁵³ Բաբովկի որդիները, Աքիբայի որդիները, Արուրի որդիները, ⁵⁴ Բասալովթի որդիները, Մեիդայի որդիները, Ադասանի որդիները, ⁵⁵ Բարկուսի որդիները, Սիսարայի որդիները, Թեմայի որդիները, ⁵⁶ Նեսիայի որդիները և Սարիփայի որդիները։

⁵⁷ Սողոմոնի ծառաների որդիները. Սուտիի որդիները, Սափարաթի որդիները, Փարեդայի որդիները, ⁵⁸ Հեալեի որդիները, Դարկովնի որդիները, Գադելի որդիները, ⁵⁹ Սափատիայի որդիները, Ետեմի որդիները, Փաքարաթի որդիները, Սաբայիմի որդիները և Հեմիմի որդիները։

⁶⁰ Բոլոր նաթանայիմները և Սողոմոնի ծառաների որդիները երեք հարյուր իննսուներկու հոգի էին»։

⁶¹ Եվ նրանք, որ վերադարձան Թեմելիքից, Թելորսայից, Քերուբից, Երոնից և Եմերից, սակայն չկարողացան հաստատել իրենց հայրերի ծագումը և ապացուցել, որ իրենք Իսրայելի տոհմերից են, սրանք են. ⁶² Դալաայի որդիները, Բուայի որդիները, Տուբիայի որդիները և Նեկովդայի որդիները՝ վեց հարյուր քառասուներկու հոգի։

⁶³ Քահանաներից՝ Եբերայի որդիները, Ակովմի որդիները և Ելիսայի որդիները, որը կնության էր առել Բերզելե Գաղաադացու դուստրերից և կոչվել նրա անունով։⁶⁴ Սրանք ազգահամարի գրի մեջ փնտրեցին իրենց անունները, բայց չգտնվեց։ Ուստի մերժվեցին քահանայությունից։ ⁶⁵ Աթարսաթան ասաց, որ չուտեն սրբություն սրբոցից մինչև որ մեջտեղ չգա մի քահանա, որ Ուրիմով ու Թումիմով հարցում անի։

⁶⁶ Ողջ այս ժողովրդի թիվը քառասուն հազար երկու հարյուր վաթսուն էր, ⁶⁷ չհաշված նրանց ծառաներին և աղախիններին, որոնք յոթ հազար երեք հարյուր երեսունյոթ հոգի էին։ Սաղմոսերգուները՝ տղամարդիկ և կանայք, երկու հարյուր քառասունհինգ հոգի էին։ ⁶⁸ Ձիերը յոթ հարյուր երեսունվեց հատ էին, ջորիները՝ երկու հարյուր քառասունհինգ, ⁶⁹ ուղտերը՝ չորս հարյուր երեսունհինգ, էշերը՝ վեց հազար քսանյոթ։

⁷⁰ Տոհմերի իշխանները նվիրատվություններ արեցին գործի համար. կառավարիչը գանձարանին տվեց հիսուն ոսկե սկավառակ և երեսուն քահանայական պատմուճան։ ⁷¹ Տոհմերի իշխանները գործի գանձարանին տվեցին քսան հազար ոսկի և երկու հազար երկու հարյուր արծաթ մնաս։ ⁷² Իսկ մնացած ժողովուրդը տվեց քսան հազար դահեկան, երկու հազար արծաթե սպասներ և վաթսունյոթ քահանայական պատմուճան։

⁷³ Քահանաները, ղևտացիները, դռնապանները, սաղմոսերգուները, ժողովրդից ոմանք, նաթանայիմները և ողջ Իսրայելը հաստատվեցին իրենց քաղաքներում։ Երբ յոթերորդ ամիսը հասավ, Իսրայելի որդիներն արդեն իրենց քաղաքներում էին։

8(18)

Եզրասն Օրենքը կարդում է ժողովրդի առաջ

¹ Այն ժամանակ ողջ ժողովուրդը մի մարդու նման հավաքվեց Ջրերի դարպասի առջևի հրապարակում, և Տիրոջ օրենքի դպիր Եզրասին ասացին, որ բերի Մովսեսի օրենքի գիրքը, որ Տերը տվել էր Իսրայելին։ ² Եզրաս քահանան յոթերորդ ամսվա ամսամուտին Օրենքը բերեց ժողովի առջև, որտեղ հավաքված էին տղամարդիկ ու կանայք և բոլոր նրանք, որ ցանկանում էին լսել։ ³ Առավոտից, երբ ծագում էր արեգակը, մինչև կեսօր այն կարդաց տղամարդկանց և կանանց առջև. բոլորը հասկանում էին, և ողջ ժողովուրդն ունկնդիր էր՝ լսելու օրենքի ողջ գրվածքը։ ⁴ Եզրաս քահանան և դպիրը կանգնած էր փայտե բեմի վրա, իսկ նրա կողքին՝ աջ կողմում, կանգնած էին Մատաթիասը, Սամեասը, Անանիասը, Ուրիան, Քեղկիան և Մասիան, իսկ ձախ կողմում՝ Փադիասը, Միսայելը, Մելքիասը, Ասամը, Սաբդանան, Զաքարիան և Մոսոլամը։ ⁵ Եզրասը գիրքը բացեց ողջ ժողովրդի առաջ, որովհետև նա էր ողջ ժողովրդի վերակացուն։ Երբ նա գիրքը բացեց, ժողովուրդը ոտքի կանգնեց։ ⁶ Եզրասն օրհնեց Տիրոջը՝ մեծ Աստծուն, և ողջ ժողովուրդն ասաց՝ ամեն։ Ապա վեր բարձրացրին իրենց ձեռքերը և խոնարհելով երկրպագեցին Տիրոջը՝ Աստծուն, երեսները դեպի գետին դարձրած։ ⁷ Հեսուն, Բանեասն ու Սարաբիասը ժողովրդին բացատրում էին Օրենքը, իսկ ժողովուրդը կանգնած էր իր տեղում։

⁹ Նեեմիան՝ կառավարիչը, Եզրաս քահանան ու դպիրը և ղևտացիները, որ ուսուցանում էին ժողովրդին, ողջ ժողովրդին ասացին. «Այս օրը Տիրոջ՝ մեր Աստծու համար սուրբ օր է. մի՛ սգացեք և մի՛ լացեք»։ Որովհետև ժողովուրդը լալիս էր՝ լսելով Օրենքի խոսքերը։ ¹⁰ Ապա նրանց ասացին. «Գնացե՛ք, կերե՛ք ճոխ ուտեստներ և ըմպե՛ք քաղցր խմիչքներ, բաժի՛ն ուղարկեք նաև նրանց, ովքեր չունեն, որովհետև այս օրը սուրբ է Տիրոջ՝ մեր Աստծու համար. արդ, զորացե՛ք և այն տխրության մի՛ վերածեք»։ ¹¹ Այսպես ղևտացիները լռեցնում էին ժողովրդին և ասում. «Լո՛ւռ եղեք և մի՛ տրտմեք, որովհետև այսօր սուրբ օր է»։ ¹² Ժողովուրդը գնաց ուտելու և ըմպելու, բաժին ուղարկեցին նաև նրանց, ովքեր չունեին, և մեծ ուրախություն արեցին, որովհետև հասկացան Օրենքի խոսքերը, որ կարդաց իրենց։

¹³ Երկրորդ օրը ողջ ժողովրդի տոհմերի իշխանները և քահանաներն ու ղևտացիները հավաքվեցին Օրենքի դպիր Եզրասի մոտ, որպեսզի նրանից տեղեկանան և ուսանեն Օրենքի ամեն մի խոսք։ ¹⁴ Եվ Տիրոջ կողմից Մովսեսին պատվիրված Օրենքում գրված գտան, թե Իսրայելի որդիները պետք է յոթերորդ ամսի տոնին բնակվեն տաղավարներում, ¹⁵ և որ այդ տոնը փողերով ազդարարվի իրենց բոլոր քաղաքներում և Երուսաղեմում։ Եզրասն ասաց. «Բարձրացե՛ք լեռը և ձիթենու, սոսու, խնկաբեր մրտենու, արմավենու և ստվարախիտ ծառերի ճյուղե՛ր բերեք ու գրվածի համաձայն ձեզ համար տաղավարնե՛ր պատրաստեք»։ ¹⁶ Ժողովուրդը ելավ ու բերեց, և յուրաքանչյուրն իր տանիքին, իր բակում, Աստծու տան բակում և քաղաքի հրապարակներում, մինչև Եփրեմի դարպասը տաղավարներ պատրաստեցին։ ¹⁷ Գերությունից վերադարձածների ողջ բազմությունը տաղավարներ պատրաստեց և բնակվեց տաղավարներում, քանի որ Նավեի որդի Հեսուի օրերից մինչև այն օրը Իսրայելի որդիները երբեք այդպես չէին արել, և շատ մեծ ուրախություն եղավ։ ¹⁸ Եվ առաջին օրից մինչև յոթերորդ օրը ամեն օր կարդացվում էր Օրենքի գիրքը։ Այսպես յոթ օր տոն արեցին, իսկ ութերորդ օրը կատարվեց տոնի ավարտը, ըստ օրենքի։

9(19)

Մեղքերի խոստովանության արարողությունը

¹ Նույն ամսի քսանչորսին Իսրայելի որդիները հավաքվեցին, սկսեցին պահք պահել, քուրձ հագան և մոխիր ցանեցին իրենց գլուխներին։ ² Իսրայելի որդիները բաժանվեցին այլազգիների որդիներից, խոստովանեցին իրենց մեղքերն ու իրենց հայրերի մեղքերը ³ և կանգնեցին իրենց տեղերում։ Եզրասը կարդում էր Տիրոջ՝ Աստծու օրենքի գիրքը, իսկ ողջ ժողովուրդը երկրպագում էր Տիրոջը՝ իրենց Աստծուն։ ⁴ Եզրասը, Հովսեդեկի որդի Հեսուն, Կադմելի որդիները, Սարեբիայի որդի Սաքանիան և Անանիայի որդիները կանգնեցին ղևտացիների ամբիոնում և բարձրաձայն գոչեցին Տիրոջը՝ իրենց Աստծուն։ ⁵ Ղևտացիներ Հեսուն և Կադմիելն ասացին. «Եղբայրնե՛ր, հավիտյանս հավիտենից օրհնեցե՛ք Տիրոջը՝ մեր Աստծուն, և թող օրհնյալ լինի Տիրոջ փառքը, ավելի բարձր, քան ամեն մի օրհնություն և գոհություն»։

Եզրասն սկսեց օրհնել Տիրոջը՝ Աստծուն, ⁶ և ասաց. «Դու ես միակ Տերը, դու ստեղծեցիր երկինքն ու երկինքների երկինքը՝ իր ողջ կարգով, երկիրը՝ իր ողջ կարգով, և ամեն ինչ որ նրանում է, ծովը և ամեն ինչ որ նրա մեջ է, դու կենդանություն ես տալիս բոլորին, և քեզ երկրպագում են երկնքի զորքերն ու քեզ փառավորում երկինքների երկինքը, ⁷ որովհետև դու ես մեր միակ Տերը՝ Աստված։ Դու ընտրեցիր Աբրամին և հանելով նրան քաղդեացիների երկրից՝ նրան վերանվանեցիր Աբրահամ։ ⁸ Նրա սիրտը հավատարիմ գտար քո առաջ և ուխտ դրեցիր նրա հետ՝ հավիտյանս նրան և նրա զավակին տալու քանանացիների, քետացիների, ամորհացիների, փերեզացիների, հեբուսացիների և գերգեսացիների երկիրը, և կատարեցիր քո խոսքը, որովհետև արդար ես։ ⁹ Տեսար նաև մեր հայրերի նեղությունը Եգիպտոսում ու լսեցիր նրանց աղաղակը Կարմիր ծովի վրա։ ¹⁰ Հրաշքներ գործեցիր Եգիպտոսում փարավոնի, նրա բոլոր ծառաների և նրա երկրի ողջ ժողովրդի վրա, որովհետև իմացար, որ հպարտացավ քո ժողովրդի վրա, և փառավորեցիր քո անունը մինչև այսօր։ ¹¹ Կարմիր ծովը ճեղքեցիր նրանց առաջ, և ծովի միջով անցան ինչպես ցամաքով, իսկ նրանց հալածողներին քարերի նման ընկղմեցիր բազում ջրերի մեջ։ ¹² Ցերեկը նրանց առաջնորդեցիր ամպի սյունով, իսկ գիշերը՝ հրի սյունով՝ լուսավորելով նրանց ճանապարհը, որով գնում էին։ ¹³ Իջար Սինա լեռան վրա և երկնքից խոսեցիր նրանց հետ ու նրանց տվեցիր ուղիղ դատաստաններ և ճշմարիտ օրենքներ, բարի հրամաններ և պատվիրաններ, ¹⁴ նրանց ծանուցեցիր քո սուրբ շաբաթը և քո ծառա Մովսեսի ձեռքով նրանց պատվիրաններ, հրամաններ և օրենքներ տվեցիր։ ¹⁵ Երկնքից ուտելու հաց տվեցիր նրանց, և վեմից ջուր բխեցրիր ու խմեցրիր նրանց և պատվիրեցիր նրանց մտնելու ու ժառանգելու այն երկիրը, որի վրա բարձրացրիր քո ձեռքը՝ նրանց տալու համար։ ¹⁶ Բայց իրենք իսկ՝ մեր հայրերը, հպարտացան և անօրինացան, խստացրին իրենց պարանոցները և չլսեցին քո պատվիրանները, ¹⁷ շեղվեցին քո Օրենքից և մոռացան այն հրաշքները, որ դու արել էիր նրանց հետ, խստացրին իրենց պարանոցները և իրենց թիկունքները շրջեցին ու կամեցան վերադառնալ Եգիպտոսի ծառայությանը։ Սակայն դու, Տե՛ր, Աստվա՛ծ մեր, լինելով գթած և ողորմած, երկայնամիտ և բազումողորմ, չլքեցիր նրանց։ ¹⁸ Դեռ ավելին, երբ իրենց համար ձուլածո հորթ պատրաստեցին և ասացին՝ “Սրանք են այն աստվածները, որ մեզ Եգիպտոսից հանեցին” և մեծամեծ անպատվություններ արեցին, ¹⁹ դու քո բազում գթության և ողորմության պատճառով չլքեցիր և չցրեցիր նրանց անապատում և նրանցից չհեռացրիր ամպի սյունը, որ առաջնորդում էր նրանց ցերեկը, և ոչ էլ հրի սյունը, որ գիշերը լուսավորում էր նրանց ճանապարհը, որով գնում էին։ ²⁰ Նրանց տվեցիր քո բարերար սուրբ հոգին՝ իմանալու Օրենքը. մանանան չհեռացրիր նրանց բերանից և նրանց ջուր տվեցիր վեմից՝ ծարավը հագեցնելու համար։ ²¹ Քառասուն տարի շրջել տվեցիր նրանց անապատում, սակայն նրանց հագուստները չմաշվեցին, և նրանց կոշիկները չհնացան։ ²² Նրանց առջև հարվածեցիր թագավորների ու ժողովուրդների, և բաժանեցին ու ժառանգեցին Եսեբոնի թագավոր Սեհովնի երկիրն ու Բասանի թագավոր Օվգի երկիրը։ ²³ Նրանց որդիներին բազմացրիր երկնքի աստղերի չափ և բերեցիր նրանց այն երկիրը, որ խոստացել էիր իրենց հայրերին, և ժառանգեցին այն։ ²⁴ Նրանց առջև կոտորեցիր Քանանի երկրի բնակիչներին և նրանց երկիրը տվեցիր նրանց ձեռքը, ոչնչացրիր երկրի թագավորներին և ժողովուրդներին, ինչպես որ ցանկալի էր նրանց։ ²⁵ Գրավեցին բարձրաբերձ քաղաքներ ու պարիսպներ և ժառանգեցին բոլոր բարիքներով լեցուն տներ, փորված և պատրաստված ջրհորներ, այգիներ, ձիթենիներ և ամեն տեսակի պտղատու ծառեր իրենց կերակուրի առատության համար։ Կերան և հագեցան, գիրացան և զեխացան այն մեծ բարության շնորհիվ, որ տվեցիր նրանց, ²⁶ և հեռացան ու մերժեցին քեզ, երես դարձրին քո օրենքներից, կոտորեցին քո մարգարեներին, որոնք քարոզում էին նրանց՝ քեզ վերադառնալ, և քո առջև մեծ անօրենություններ գործեցին։ ²⁷ Դու էլ նրանց մատնեցիր իրենց թշնամիների ձեռքը, և նեղեցին նրանց։ Ապա իրենց նեղության ժամանակ աղաղակեցին քեզ, և դու երկնքից լսեցիր նրանց և բազում գթությամբ ու ողորմությամբ փրկեցիր նրանց և ազատեցիր նրանց իրենց նեղողների ձեռքից։

²⁸ Բայց երբ հանգստացան, դարձյալ չարիքներ գործեցին քո առաջ, և դու թողեցիր նրանց իրենց թշնամիների ձեռքը, որոնք չարչարեցին նրանց, և նրանք դարձյալ աղաղակեցին քեզ, և դու երկնքից լսեցիր նրանց ու փրկեցիր նրանց քո բազում ողորմությամբ։ ²⁹ Եվ դարձյալ զգուշացրիր նրանց՝ դառնալու քո Օրենքին, իսկ նրանք հիմարությամբ անմտանալով չանսացին քո օրենքներին և մեղանչեցին քո հրամանների և պատվիրանների դեմ, որ դու ասել և հրամայել էիր, որպեսզի մարդկանցից ով կատարի քո պատվիրանների խոսքերը, ապրի նրանցով։ Իսկ նրանք դարձրին իրենց թիկունքները, խստապարանոց դարձան և չլսեցին քո խոսքը։ ³⁰ Դու երկայնամիտ եղար նրանց նկատմամբ և ուղարկեցիր մարգարեներին՝ զգուշացնելու քո սուրբ հոգով։ Բայց և այնպես չլսեցին, և մատնեցիր նրանց երկրի օտար ժողովուրդների ձեռքը, որոնք մեծապես տառապեցրին նրանց։ ³¹ Սակայն դու քո բազում գթության և ողորմության պատճառով իսպառ չլքեցիր նրանց և նրանց մերժելով չհեռացրիր քեզանից, որովհետև դու հզոր ես, գթած և ողորմած, երկայնամիտ և բազումողորմ։ ³² Եվ այժմ, Տե՛ր, Աստվա՛ծ մեր, հզոր և մեծ, ամենակալ և ահազդու, արդար և ճշմարիտ, պահի՛ր քո ուխտն ու ողորմությունը, նայի՛ր մեր տառապանքներին և նեղություններին, որով Ասորեստանի թագավորները տառապեցրին մեր թագավորներին ու իշխաններին, մեր քահանաներին ու մարգարեներին և մեր բոլոր հայրերին ու քո ժողովրդին և բռնացան մեզ վրա մինչև այսօր։ ³³ Դու արդար ես այն ամենի մեջ, որ մեր մեղքերի պատճառով մեր գլխին բերեցիր, որովհետև ճշմարտությամբ գործեցիր. ³⁴ մեղանչեցինք մենք և մեր թագավորները, իշխանները, քահանաներն ու մեր հայրերը և չկատարեցինք քո պատվիրանները, չհետևեցինք քո օրենքներին և այն վկայություններին, որ տվեցիր մեզ։

³⁵ Չգնահատեցինք քո գթությունն ու բազում բարությունը, որ շնորհեցիր մեզ, և այս լայն, ընդարձակ և բարեբեր երկրում, որ տվեցիր մեզ, չծառայեցինք քեզ, այլ մեր սրտերը շրջեցինք քո օրենքներից և գերության մատնվեցինք մեր մեղքերի պատճառով։ ³⁶ Եվ ահա այսօր մենք ստրկության մեջ ենք, նաև այն երկիրը, որ տվեցիր մեր հայրերին՝ ազատորեն ուտելու նրա պտուղներն ու բարիքները։ ³⁷ Մեր մեղքերի պատճառով այսօր օտար թագավորներ են տիրում մեզ վրա և վայելում այս երկիրը։ Ստրկության մեջ ընկնելով՝ հարկեր ենք տալիս, և մեզ ու մեր անասունների հետ վարվում են այնպես, ինչպես որ ցանկանում են. մեր մեղքերի պատճառով այսօր մեծ նեղության ու վշտերի մեջ ենք»։

10(20)

¹ Արդ, այս ամենը նկատի ունենալով՝ մենք ուխտ ենք անում և հավատարմություն խոստանում՝ հավատալու քո օրենքներին և կատարելու դրանք ու այն ամենը, ինչ գրված է դրանց մեջ։ Այս խոսքերը գրով հաստատում ենք, և մեր բոլոր իշխանները, ղևտացիներն ու քահանաները կնքում են այն։ 

Ժողովուրդն ուխտում է պահել Օրենքը

² Քո նկատմամբ հավատարմության այս գիրը կնքում են Աքալիայի և Սեդեկիայի որդի Նեեմիան, ³ Սարեիայի որդի Ազարիան, Երեմիան, ⁴ Փասուրը, Ամարիան, Մելքիան, ⁵ Ատտուսը, Սաբանիան, Մաղուքը, ⁶ Եմաթը, Մերամովթը, Աբդիան, ⁷ Դանիելը, Կանաթոնը, Բարուքը, ⁸ Մեսուղամը, Աբիան, Միամինը, ⁹ Մազիան, Բելգեեն և Սեմեին. այս բոլորը քահանաներն են։

¹⁰ Ղևտացիներն են՝ Ազանիայի որդի Հեսուսը, Ենադադի որդի Բանիան, Կադմիելը ¹¹ և նրա եղբայրները, Սեբանիան, Ոդուիան, Կալիտան, Փելիան Անանը, ¹² Միքան, Հռովբան, Սեբին, ¹³ Զաքուրը, Սարաբիան, Սատանիան և ¹⁴ Բանունեի որդիները։

¹⁵ Ժողովրդի իշխաններն են՝ Փորխը, Փարադմովաբը, Ելամը, Զատթուիան, ¹⁶ Բանեի որդիները, Ազարութը, Բերային, ¹⁷ Ադոնիան, Բագուն, Եդինը, ¹⁸ Ատերը, Եզեկիան, Ազուրը, ¹⁹ Ոդուիան, Ասամը, Բեսեին, ²⁰ Արիփը, Անաթովթը, Նովբան, ²¹ Մոգափեսը, Մեսուղամը, Եզրը, ²² Մեսոզաբեելը, Զադուկը, Եդովքը, ²³ Փալիտան, Անանը, Անիան, ²⁴ Ասեեն, Անանիասը, ²⁵ Ալոիսը, Փալաին, Սովեկը, ²⁶ Հռայումը, Էսաբանանը, Մայալուան, ²⁷ Այիան, Էնանը, Օնանը, ²⁸ Մալուսը և Հռեումը։

²⁹ Իսկ մնացած քահանաները, ղևտացիները, դռնապանները, սաղմոսերգուները, նաթանացիները և ողջ ժողովուրդը, որ լսում ենք մեր Աստծու օրենքը, տղամարդիկ և կանայք՝ մեր որդիներով ու դուստրերով հանդերձ, այսօր վկայություն ենք դնում քո առաջ ³⁰ և երդվելով հաստատում քո առջև, որ նզովքների և անեծքների կարժանանա նա, ով երբևէ օրինազանց կլինի և չի պահի այն Օրենքը, որ տրվեց քո ծառա Մովսեսի ձեռքով։ Մեր ողջ կամքով կպահենք և կկատարենք Աստծու բոլոր պատվիրանները, վճիռներն ու հրամանները։ ³¹ Մեր դուստրերին չենք տա օտար ժողովուրդների որդիներին և հեթանոսների դուստրերին չենք առնի մեր որդիների համար։ ³² Այս երկրի ժողովուրդները շաբաթ օրը մեզ մոտ վաճառքի բան չեն բերի, և շաբաթ օրը նրանցից ոչինչ չենք գնի, որովհետև սուրբ օր է. յոթերորդ օրը սուրբ կպահենք։ ³³ Աստծու տանը ամեն տարի հարկ կտանք մեկ երրորդ դիդրախմի՝ ³⁴ առաջավորաց հացի, ամենօրյա զոհերի և բոլոր տոների, տարեմուտների, շաբաթ օրերի, ամսամուտների, նավակատիքների ու սրբազան օրերի ողջակեզների համար, ինչպես նաև Իսրայելին քավություն անելու համար մատուցվող մեղքերի զոհերի և մեր Աստծու տաճարի գործերի համար։

³⁵ Նաև վիճակ կգցենք փայտ հայթայթելու կարգի համար, որպեսզի քահանաները, ղևտացիներն ու ժողովուրդը, ըստ իրենց նահապետական տների, ամեն տարի սահմանված ժամանակներին բերեն մեր Աստծու տունը՝ այրելու Տիրոջ՝ մեր Աստծու զոհասեղանի վրա, ինչպես գրված է Մովսեսի օրենքում։ ³⁶ Մեր հողի առաջին պտուղները և մեր ծառերի առաջին պտուղները ևս ամեն տարի կտանք մեր Աստծու տանը։ ³⁷ Մեր որդիների անդրանիկների փրկագին դիդրախմին և մեր անասունների առաջնածինները, ինչպես որ գրված է Մովսեսի օրենքում, և մեր արջառների ու հոտերի առաջնածինները կբերենք մեր Աստծու տունը և կհանձնենք քահանաներին և ղևտացիներին, որոնք սպասավորում են Տիրոջ տանը։ ³⁸ Ցորենի երախայրիքը և ծառերի բերքը, ինչպես նաև գինին ու ձեթը կբերենք քահանաներին՝ Աստծու տան գանձարան։ Ղևտացիներն էլ թող շրջեն և հավաքեն մեր երկրի ողջ տասանորդը։ ³⁹ Իսկ քահանան՝ Ահարոնի ժառանգը, թող լինի տասանորդ հավաքող ղևտացիների հետ, և ղևտացիները թող մեր տասանորդից տասանորդ տան մեծ քահանային՝ մեր Աստծու տանը՝ Տիրոջ տաճարում գտնվող գանձատանը, ⁴⁰ որպեսզի ղևտացիների որդիների և սպասավորների կողմից ամբարվեն այնտեղ, որտեղ սրբազան սպասքն է պահվում։ Թող այդ լինի քահանաներինը, ղևտացիներինը, դռնապաններինը և սաղմոսերգուներինը. մեր Աստծու տանից նրանց տրվող ռոճիկը երբեք թող չպակասի, որպեսզի նրանք Տիրոջ սպասավորությունը չխափանեն։

11(21)

Երուսաղեմում վերաբնակված հրեաների ցուցակը

¹ Ժողովրդի իշխանները նստեցին Երուսաղեմում ու վիճակ գցեցին, որ տասից մեկը, ում էլ ընկնի վիճակը, մնա սուրբ քաղաք Երուսաղեմում, իսկ մնացյալ ինը գնան մյուս քաղաքները։ ² Ժողովուրդն օրհնեց այն մարդկանց, որ ընտրվեցին՝ բնակվելու Երուսաղեմում։

³ Սրանք են երկրի իշխանները, քահանաները, ղևտացիները, նաթանացիները և Սողոմոնի ծառաների որդիները, որոնք բնակվեցին Երուսաղեմում։ ⁴ Երուսաղեմում բնակվողները Հուդայի և Բենիամինի ցեղից էին։ Հուդայի որդիներից սրանք են. Մալեելի որդի Սափատիայի որդի Սամարիայի որդի Զաքարիայի որդի Ոզիայի որդի Աթեեն և Փարեսի որդիներից՝ ⁵ Ելովնի որդի Զաքարիայի որդի Հովարիբի որդի Ադիայի որդի Ոզիայի որդի Ալազի որդի Բարուքի որդի Մալասիան։ ⁶ Փարեսի բոլոր որդիները, որոնք բնակվեցին Երուսաղեմում, չորս հարյուր վաթսունութ զորավոր այրեր էին։

⁷ Սրանք են Բենիամինի որդիները. Հեսուի որդի Աթիելի որդի Մաասայի որդի Կովլիի որդի Փադայի որդի Հովադի որդի Մեսելոմի որդի Սելոնը ⁸ և նրա հետ՝ Գեբեին ու Սելեին. բոլորը՝ ինը հարյուր քառասունութ մարդ։ ⁹ Զեքրիի որդի Հովեսը առաջնորդ և վերակացու էր նրանց վրա, իսկ Ասանի որդի Հուդան երկրորդն էր քաղաքի կառավարման մեջ։

¹⁰ Քահանաներից՝ Հովարիբի որդի Ագդիդը, Իաքինը և ¹¹ Ետոբի որդի Մարավոթի որդի Սադովկի որդի Մեսուղամի որդի Ելքիայի որդի Սարիան։ Նրանց տները Տիրոջ տաճարի մոտ էին։ ¹² Ինչպես նաև նրանց եղբայրները, որ կատարում էին Տիրոջ տան սպասավորության գործը. բոլորը՝ ութ հարյուր քսաներկու մարդ։ Նաև Մելքիայի որդի Փասեուրի որդի Զաքարիայի որդի Ամասիայի որդի Փալայիայի որդի Երովմի որդի Ադային ¹³ և նրա եղբայրները՝ տոհմերի իշխանները. բոլորը՝ երկու հարյուր քառասուներկու մարդ։ Նաև Եզրիելի որդի Ամասիան ¹⁴ և ամեն ինչում զորավոր նրա եղբայրները՝ քսանութ հոգի։ Նրանց առաջնորդն ու վերակացուն էր Զեբդիելը, որ մեծ իշխաններից էր։

¹⁵ Ղևտացիներից՝ Եզրոմի որդի Ասուբի որդի Սամեիան, ¹⁷ Միքայի որդի Մաթանիան և Սամուիի որդի Հորեբը՝ երկու հարյուր յոթանասունչորս մարդ։

¹⁹ Դռնապաններից՝ Ակուբը, Տելամին և նրա եղբայրները՝ հարյուր յոթանասուներկու մարդ։

²² Երուսաղեմում ղևտացիների առաջնորդն ու վերակացուն Միքայի որդի Մատթանի որդի Ասաբիայի որդի Բանիի որդի Ոզան էր։ Նա Ասափի ժառանգներից էր, որոնք սաղմոսերգուներ էին Տիրոջ տանը, ²³ որովհետև թագավորը հրաման էր տվել նրանց այնտեղ լինել և անխափան սպասավորել։ ²⁴ Իսկ Մեսիզաբյուլի որդի Փաթավան, որը Հուդայի որդի Զարեհի ժառանգներից էր, թագավորի մոտ ժողովրդի ներկայացուցիչն էր ²⁵ և բնակվում էր իր ագարակում։

Հուդայի որդիներից բնակվեցին Կարիաթարբայում, Հեսուում, Բերսաբեում և դրանց գյուղերում, ³⁰ Ղաքիսում ու դրա ագարակներում և հաստատվեցին Բերսաբեեի շրջակայքում։ ³¹ Բենիամինի որդիները հաստատվեցին Գաբայից մինչև Մաքմաս։ ³⁶ Ղևտացիների բաժինը Հուդայի և Բենիամինի գավառներում էր։

12(22)

Քահանաների և ղևտացիների ցուցակը

¹ [55] Սրանք են այն քահանաներն ու ղևտացիները, որոնք եկան Սաղաթիելի որդի Զորաբաբելի և Հովսեդեկի որդի Հեսուի հետ. Սարայիան, Երեմիան, Եզրասը, ² Ամարիան, Մաղուքը, Ատտուսը և Սեքենիան։ ³ Հեսուի օրերին սրանք էին քահանաների և նրանց եղբայրների առաջնորդները։

⁸ Ղևտացիներն էին Հեսուն, Բանուին, Կադմիելը, Սարաբիան, Հուդան, Մաթանիան և նրանց եղբայրները, ⁹ որոնք սպասավորության էին կարգված ըստ օրերի։

¹⁰ Հովակիմը ծնեց Եղիասիբին, Եղիասիբը՝ Հովադեին, ¹¹ Հովադեն՝ Հովնաթանին և Հովնաթանը՝ Հատդուսին։

¹² Հովակիմի օրերին իր եղբայրներից քահանայական տոհմերի առաջնորդներ էին. Սարիայի տոհմից՝ Եմարիան, Երեմիայի տոհմից՝ Անանիան, ¹³ Եզրասի տոհմից՝ Մեսուղամը, Ամարիայի տոհմից՝ Հովնանը ¹⁴ և Մաղուքի տոհմից՝ Հովնաթանը։

²² Եղիասիբի օրերին ղևտացիներից, որպես տոհմերի առաջնորդներ, գրանցված էին Հովդան, Հովան, Հովնանը և Իդուան։ Այս բոլորը քահանաներ էին Դարեհի թագավորության ժամանակ։ ²³ Ղևիի որդիները, որոնք տոհմերի առաջնորդներ էին, մինչև Եղիասիբի որդի Հովնանի օրերն արձանագրված էին ժամանակագրությունների մատյանում։ ²⁴ Ղևտացիների առաջնորդներն էին Ասաբիան, Սարաբիա, Հեսուն, Կադմիելի որդիները և նրա եղբայրները, որ կանգնում էին նրանց դիմաց՝ դաս առ դաս փոխնիփոխ օրհներգելու և սաղմոս ասելու, ինչպես հրամայել էր Աստծու մարդ Դավիթը։ ²⁵ Իսկ Մաթանիան, Բակբուկիան, Ոբադիան, Մեսուղամը, Տալմոնը և Ակուբը դռնապաններ էին, որոնք հսկում էին դռների մոտ գտնվող պահեստները։ ²⁶ Սրանք բոլորը սպասավորություն էին անում Հովսեդեկի որդի Հեսուի որդի Հովակիմի և Նեեմիայի ու Եզրաս քահանայի՝ Տիրոջ օրենքի դպրի օրերին։

Պարսպի նավակատիքը

²⁷ Երուսաղեմի պարսպի նավակատիքի ժամանակ ղևտացիներին փնտրեցին իրենց բնակության վայրերում, որպեսզի նրանց Երուսաղեմ բերեն և ուրախությամբ ու գոհությամբ, երգերով ու նվագարաններով, ծնծղաներով ու թմբուկներով, սաղմոսարաններով ու եղջերափողի ձայնով կատարեն նավակատիքը։ ²⁸ Բոլոր երգիչներն ու սաղմոսասացները Երուսաղեմի շրջակա բոլոր կողմերից՝ ²⁹ քաղաքներից, գյուղերից և իրենց բնակության վայրերից, հավաքվեցին՝ Երուսաղեմ գալու և պաշտամունքին սպասավորելու համար։ ³⁰ Բոլոր քահանաներն ու ղևտացիները մաքրվեցին, ապա մաքրեցին ժողովրդին ու մեծ պարսպի դարպասների դռնապաններին։

³¹ Պարսպի վրա բարձրացրին Հուդայի իշխաններին։ Նրանց հետևից երգերով ու նվագարաններով երկշարք գնում էին ³² Հովսիան և Ոզիան, Հուդայի իշխանների կեսը, ³³ Ազարիասը, Եզրասը, Մեսուղամը, ³⁴ Հուդան, Բենիամինը, Սամեասը և Երեմիասը։ ³⁵ Քահանաների որդիներից փողերով գնում էին Ասափի որդի Զաքուրի որդի Միքայի որդի Մաթանիայի որդի Սամայի որդի Հովնանի որդի Զաքարիասը ³⁶ և նրա եղբայրներ Սամեիան ու Եզրիելը՝ երգելով Աստծու մարդ Դավթի նվագած օրհներգերն ու սաղմոսները։ Իսկ Եզրաս դպիրը Աղբյուրի դարպասի վրայով գնում էր նրանց առջևից։ ³⁷ Մյուս խմբին ընդառաջ՝ Դավթի քաղաքի աստիճաններով, պարսպի զառիվերով նրանք բարձրացան Դավթի ապարանքից վեր, մինչև Եփրեմի Ջրի դարպասը՝ արևելյան կողմում, ³⁹ ապա դեպի Եքթիերան դարպասը և Անամայելի աշտարակով մինչև Ջրավազանի դարպասը։ Երգերի ձայնը լսվում էր ամենուր, որովհետև Եզրասը հրամայել էր կանգնել պարսպի բոլոր դարպասների վրա և երգել։ ⁴³ Այն օրը մեծամեծ զոհեր մատուցեցին և չափազանց ուրախացան, որովհետև Աստված նրանց մեծ խնդություն էր տվել։ Ուրախացան նաև նրանց կանայք ու նրանց որդիները, և նրանց ուրախությունը լսելի եղավ Երուսաղեմից մինչև հեռավոր տեղեր։

⁴⁴ Այդ օրը գանձատան վրա մարդիկ նշանակվեցին գանձերի, բերքի երախայրիքի և տասանորդների համար, որպեսզի քաղաքների դաշտերից այնտեղ հավաքեն քահանաների և ղևտացիների բաժինը, ինչպես հրամայված էր Մովսեսի օրենքով, որովհետև Հուդայի երկրում մեծապես ուրախացել էին քահանաների ու ղևտացիների համար, ⁴⁵ որոնք սաղմոսերգուների և դռնապանների հետ միասին կատարում էին Աստծու սպասավորությունը և մաքրման կարգը, ինչպես սահմանել էին Դավիթն ու նրա որդի Սողոմոնը, ⁴⁶ քանի որ այս մարդիկ Դավթի օրերից, երբ երգիչների իշխանն ու առաջնորդն էր Ասափը, սաղմոսներ էին երգում, նվագում և փառաբանում Աստծուն։

⁴⁷ Զորաբաբելի ու Նեեմիայի օրերին ամբողջ Իսրայելը, ըստ սահմանված կարգի, ամենօրյա մաս և բաժին էր տալիս երգիչներին և դռնապաններին։ Ղևտացիներին ևս սուրբ ընծաներ էին տալիս, իսկ ղևտացիներն էլ՝ Ահարոնի որդիներին։

13(23)

Նեեմիայի կատարած բարեկարգությունները

¹ Այն օրերին Մովսեսի գիրքը կարդացին ի լուր ժողովրդի։ Նրա մեջ այսպես էր գրված. «Թող ամովնացին և մովաբացին հավիտյան չմտնեն Աստծու ժողովարան, ² որովհետև նրանք հացով և ջրով ընդառաջ չելան իսրայելացիներին, այլ վարձեցին Բաղաամ գուշակին՝ նրանց անիծելու համար, իսկ մեր Աստվածն անեծքը դարձրեց օրհնություն»։ ³ Երբ լսեցին այս օրենքը, Իսրայելից հեռացրին բոլոր խառնակվածներին։

⁴ Սրանից առաջ Եղիասիբ քահանան էր նշանակված մեր Աստծու տան գանձատան վրա։ Նա Տուբիային տեղ տվեց ⁵ և այնտեղ նրա համար մեծ գանձատուն շինեց։ Դա նախկինում այն տունն էր, որտեղ դնում էին ընծաները, կնդրուկն ու սրբարանի սպասքը և ղևտացիների, երգիչների ու դռնապանների համար սահմանված ցորենի, գինու, ձեթի ու յուղի տասանորդները, ինչպես նաև առաջին բերքի այն բաժինը, որ քահանաների համար էր։

⁶ Երբ այս ամենն արվել էր, ես Երուսաղեմում չէի, քանի որ Բաբելոնի Արտաշես թագավորի երեսուներկուերորդ տարում գնացել էի թագավորի մոտ։ Շատ օրեր անց ես թագավորից խնդրեցի ⁷ ու վերադարձա Երուսաղեմ։ Ես իմացա այն բոլոր չարությունները, որ Եղիասիբն արել էր Տուբիայի պատճառով, որովհետև նրա համար գանձատուն էր շինել Տիրոջ տաճարի գավթում։ ⁸ Այդ բանն ինձ խիստ վրդովեց։ Ես Տուբիայի ամբողջ գույքը դուրս նետեցի գանձատնից ⁹ և հրամայեցի մաքրել Տիրոջ գանձատունը, այնտեղ վերադարձրի Տիրոջ տան կայքն ու սպասքը, ընծաներն ու կնդրուկը։

¹⁰ Իմացա նաև ու վերահասու եղա, որ ղևտացիների բաժինն իրենց չէր տրվել, և նրանք գնացել էին իրենց ագարակները. ղևտացիներն ու երգիչները այնտեղ մշակություն էին անում։ ¹¹ Ես կռվեցի իշխանավորների հետ ու ասացի. «Տիրոջ տնից ինչո՞ւ պակասեց սպասավորների բաժինը»։ Ես հավաքեցի տաճարի բոլոր սպասավորներին ու նրանց կարգեցի իրենց տեղերում։ ¹² Դրանից հետո բոլոր հրեաները Տիրոջ տաճարի գանձատուն էին բերում ցորենի, գինու և ձեթի տասանորդները։ ¹³ Ես հրամայեցի դրանք տալ Սեղղիմ քահանային, Սադովկ դպրին և ղևտացիներից Փադայիային. նրանց օգնում էր Մաթանիայի որդի Զաքուրի որդի Անանը, որովհետև նրանք վստահելի էին մթերքները բաժանելու և իրենց եղբայրներին տալու գործում։ ¹⁴ Թող Աստված ինձ հիշի այս ամենի համար և ինձնից չհեռացնի իր ողորմությունը, որովհետև ես այս բոլորն արեցի իմ Աստծու տան համար։

¹⁵ Այն օրերին տեսա, որ Հուդայի երկրում շաբաթ օրով հնձաններ էին տրորում, հնձած խրձեր էին բերում Երուսաղեմի դարպասներով, գրաստներին բարձել էին գինու, խաղողի և թզի բեռներ և շաբաթ օրով բեռները բերում էին Երուսաղեմ։ Ես վկաներ բռնեցի, որ նրանք շաբաթ օրը վաճառք են անում։ ¹⁶ Ձուկ և ամեն տեսակ ապրանք բերողները նստում էին վաճառքի տեղերում, և հրեաները շաբաթ օրը Երուսաղեմի մեջ գնումներ էին կատարում։ ¹⁷ Ես նախատեցի Երուսաղեմում եղած հրեաներին ու Հուդայի իշխանավորներին և ասացի նրանց. «Դուք այս ի՞նչ անօրենություն եք գործում. պղծում եք սուրբ շաբաթի օրերը։ ¹⁸ Մի՞թե այսպես չարեցին ձեր հայրերը, և Աստված նրանց և այս քաղաքի վրա բերեց այս բոլոր չարիքները։ Արդ, դուք ինչո՞ւ եք ավելացնում Տիրոջ բարկությունն Իսրայելի վրա և պղծում սուրբ շաբաթի օրը»։

¹⁹ Երբ ես կանգնեցրի Երուսաղեմի դարպասները, շաբաթ օրից առաջ հրամայում էի փակել դրանք և թույլ չէի տալիս բացել, մինչև որ անցներ շաբաթ օրը։ Նաև պահապան զինվորներ նշանակեցի, որպեսզի շաբաթ օրը որևէ մեկը չկարողանա բեռով մտնել Երուսաղեմի դռներով։ ²⁰ Մեկ-երկու անգամ բոլոր վաճառականները գիշերեցին Երուսաղեմից դուրս։ ²¹ Ես նրանց ասացի. «Դուք ինչո՞ւ եք քնում պարսպից դուրս. եթե էլի տեսնեմ այդ անօրենությունը, հրաման կտամ, որ դուք չգաք մեր շաբաթներին և չմտնեք այս քաղաքը»։ ²² Ղևտացիներին, որոնք մաքրված էին, ասացի, որ գան ու պահպանեն դարպասները և սրբագործեն շաբաթ օրը։ Դրանից հետո շաբաթ օրերը չպղծեցին։ Այս բոլորի համար թող Աստված հիշի ինձ և ըստ իր մեծ ողորմության խնայի ինձ։

²³ Այդ օրերին էր դարձյալ, որ ես տեսա հրեաների, որոնք ազովտացի, ամովնացի և մովաբացի կանայք էին առել։ ²⁴ Նրանց որդիներն ու կանանցից ոմանք խոսում էին ազովտերեն, իսկ հրեերեն խոսել չգիտեին։ ²⁵ Ես նրանց նախատեցի, նզովեցի ու նրանցից շատերին ծեծեցի։ Աստծու անունով նրանց երդվեցրի, որ իրենց դուստրերին կնության չտան նրանց որդիներին և նրանց դուստրերին էլ չբերեն իրենց որդիների համար։ Նրանց ասացի. ²⁶ «Մի՞թե այդ ամենով չէր, որ մեղանչեց Սողոմոն թագավորը։ Մեր բոլոր թագավորներից ո՞վ էր նրա նման իմաստուն. նա սիրելի էր Աստծուն, և Աստված նրան թագավոր կարգեց ամբողջ Իսրայելի վրա։ Բայց Աստծուն սիրելի և իմաստուն այսպիսի մեծ թագավորին այլազգի կանայք խոտորեցրին ու գցեցին մեղքի մեջ։ ²⁷ Արդ, չլսե՛մ, թե ձեզանից մեկն այսպիսի մեծ չարիք գործի՝ Աստծու առջև մեղանչի և այլազգի կին առնի»։

²⁸ Լսեցի, որ Եղիասիբ մեծ քահանայի որդի Հովիդիայի որդիներից մեկի կինը Սանաբաղատի դուստրն է, և նրան հալածելով՝ հեռացրի ինձանից։ ²⁹ Թող Աստված հիշի նրանց իրենց ժառանգության և քահանայության ու ղևտացիների ուխտի մեջ։

³⁰ Ես նրանց մաքրեցի բոլոր օտարոտի բաներից և քահանաների ու ղևտացիների համար ծառայության ամենօրյա կարգ հաստատեցի՝ յուրաքանչյուրին իր գործին։ ³¹ Նաև կարգադրեցի, որ սահմանված ժամանակին պատրաստ բերեն ողջակեզների ամբողջ փայտը և առաջին բերքի իրենց բաժինը։

Թող մեր Աստված՝ նա, որ օրհնյալ է հավիտյան, ինձ հիշի արդարությամբ արած իմ բոլոր բարի գործերի համար։ Ամեն։

ՀՈԲԻ ԳԻՐՔԸ

1

Հոբի առաջին փորձությունը

 ¹ Ավսիտ աշխարհում Հոբ անունով մի մարդ կար։ Նա ճշմարիտ էր ու անարատ, արդար էր ու աստվածապաշտ, հեռու ամեն տեսակի չար գործերից։ ² Նա յոթ տղա ու երեք դուստր ունեցավ։ ³ Նա ուներ յոթ հազար ոչխար ու այծ, երեք հազար ուղտ, հինգ հարյուր լուծ եզ և դաշտում արածող հինգ հարյուր մատակ էշ. ուներ նաև բազմաթիվ ծառաներ։ Նա երկրի վրա մեծամեծ գործեր էր անում, ազնվագույնն էր արևելաբնակներից։

⁴ Նրա որդիները հաճախ էին հավաքվում միասին, իրենց հետ վերցնելով նաև իրենց երեք քույրերին՝ խրախճանքներ էին սարքում, ուտում և խմում։ ⁵ Եվ երբ ավարտվում էին խրախճանքի օրերը, Հոբը կանչում էր նրանց և առավոտյան վեր կենալով՝ մաքրագործում նրանց՝ ըստ նրանց թվի զոհեր մատուցելով, ինչպես նաև մի զվարակ էր զոհում նրանց մեղքերի համար։ Հոբը մտածում էր. «Գուցե իմ զավակներն իրենց մտքում չար բան մտածեցին Աստծու մասին»։ Հոբը մշտապես այսպես էր անում։

⁶ Եվ մի օր Աստծու հրեշտակները [*  Աստծու որդիները] եկան կանգնեցին Տիրոջ առաջ. նրանց հետ եկավ նաև սատանան՝ երկրի երեսին ման գալուց և շրջելուց հետո։ ⁷ Տերն ասաց սատանային. «Դու որտեղի՞ց ես գալիս»։ Պատասխան տվեց սատանան Տիրոջն ու ասաց. «Երկրի երեսին շրջելով ու երկնքի տակ ման գալով եմ եկել»։ ⁸ Տերն ասաց նրան. «Ուշադրություն դարձրի՞ր իմ ծառա Հոբին, որի նման անարատ, ճշմարիտ, աստվածապաշտ, ամեն տեսակի չար գործերից հեռու մնացող մարդ չկա երկրի վրա»։ ⁹ Սատանան, ընդդիմանալով Տիրոջը, պատասխան տվեց. «Մի՞թե Հոբը ձրի է պաշտում Տիրոջը. ¹⁰ չէ՞ որ դու ես պաշտպանել նրան ու նրա տունը՝ դրսից և ներսից, և ամեն ինչ, որ կա նրա շուրջը. օրհնել ես նրա ձեռքի գործերը, երկրի վրա բազմացրել նրա անասունները։ ¹¹ Բայց դե փորձի՛ր մեկնել ձեռքդ ու դիպչել նրա ունեցվածքին ու կտեսնես, որ նա քո ներկայությամբ անգամ չի օրհնի քեզ»։ ¹² Այն ժամանակ Տերն ասաց սատանային. «Ահա նրա ամբողջ ունեցվածքը քո ձեռքն եմ տալիս՝ պայմանով, որ նրա անձին ձեռք չտաս»։ Եվ սատանան հեռացավ Տիրոջ առջևից։

Հոբի զավակները և հարստությունը կործանվում են

¹³ Եվ մի օր, երբ Հոբի տղաներն ու դուստրերը իրենց ավագ եղբոր տանը ուտում ու գինի էին խմում, ¹⁴ մի գուժկան եկավ Հոբի մոտ ու ասաց նրան. «Լծկան եզները վար էին անում, մատակ էշերն էլ՝ արածում նրանց մոտերքը. ¹⁵ գերեվարողները եկան ու ավար առան նրանց, իսկ քո ծառաներին սրով կոտորեցին։ Միայն ես փրկվեցի և եկա քեզ պատմելու»։ ¹⁶ Եվ մինչ նա խոսում էր, մի ուրիշ գուժկան եկավ ու Հոբին ասաց. «Երկնքից կրակ թափվեց ու այրեց հոտերը, հովիվներին էլ նույն ձևով ճարակեց։ Միայն ես փրկվեցի ու եկա քեզ պատմելու»։ ¹⁷ Եվ մինչ նա խոսում էր, մի ուրիշ գուժկան եկավ ու Հոբին ասաց. «Ասպատակներ ասպատակեցին մեզ երեք խմբերով, շրջապատեցին ուղտերն ու տարան դրանք, իսկ քո ծառաներին սրով կոտորեցին։ Միայն ես փրկվելով եկա քեզ պատմելու»։ ¹⁸ Եվ մինչ նա խոսում էր, մի ուրիշ գուժկան եկավ ու Հոբին ասաց. «Մինչ քո տղաներն ու դուստրերն իրենց ավագ եղբոր մոտ ուտում-խմում էին, ¹⁹ անապատից հանկարծակի սաստիկ հողմ փչեց ու խփեց տան չորս անկյուններին. տունը փլվեց քո զավակների վրա, ու նրանք վախճանվեցին։ Միայն ես փրկվելով եկա քեզ պատմելու»։

²⁰ Հոբը, լսելով այս, վեր կացավ, պատառոտեց իր հագուստները, խուզեց իր գլխի մազերը և գետնին ընկնելով՝ երկրպագեց Տիրոջն ու ասաց. ²¹ «Իմ մոր որովայնից ես մերկ դուրս եկա, մերկ էլ կվերադառնամ։ Տերը տվեց, Տերն էլ առավ։ Ինչպես որ հաճելի էր Տիրոջը, այնպես էլ եղավ։ Թող օրհնյալ լինի Տիրոջ անունը»։ ²² Եվ նրան պատահած այս բոլոր դեպքերի ժամանակ Հոբը չմեղանչեց Տիրոջ առաջ, ոչ էլ անզգամություն հանդես բերեց Աստծու հանդեպ։

2

Հոբի երկրորդ փորձությունը

¹ Մի օր Աստծու հրեշտակները եկան կանգնեցին Աստծու առաջ. նրանց հետ Տիրոջ առաջ եկավ կանգնեց նաև սատանան։ ² Տերն ասաց սատանային. «Դու որտեղի՞ց ես գալիս»։ Այն ժամանակ սատանան Տիրոջն ասաց. «Երկնքի ներքո անցնելով և շրջելով ամեն տեղ, եկել եմ ու ներկա եմ»։ ³ Տերն ասաց սատանային. «Տեսա՞ր արդյոք իմ ծառա Հոբին, որի նման ճշմարիտ, անարատ, աստվածապաշտ, ամեն չար գործից հեռու մնացող մարդ չկա երկրի վրա. դեռ հաստատուն էլ մնում է նա իր անմեղության մեջ։ Իսկ դու իզուր էիր ասում, որ կորստյան մատնեմ նրա ունեցվածքը»։ ⁴ Պատասխան տվեց սատանան ու ասաց Տիրոջը. «Մարդն ինչ որ ունի, կտա իր կաշվի դիմաց։ ⁵ Մեկնի՛ր ձեռքդ, դիպչի՛ր նրա ոսկորներին ու մարմնին և կտեսնես, թե նա քո ներկայությամբ կօրհնի՞ քեզ»։ ⁶ Տերն ասաց սատանային. «Ահա նրան քո ձեռքն եմ մատնում՝ պայմանով, որ նրա կյանքը պահես»։

⁷ Սատանան հեռացավ Տիրոջ առջևից և չար վերքերով ոտից գլուխ հարվածեց Հոբին։ ⁸ Եվ Հոբը նստեց քաղաքից դուրս՝ աղբանոցում, խեցու մի կտոր առած՝ քերում էր թարախը։

⁹ Ու երբ այս դեպքից շատ ժամանակ անցավ, կինն ասաց նրան. «Մինչև ե՞րբ պիտի ասելով համբերես. ^9ա “Մի քիչ էլ համբերեմ՝ փրկության հույս ակնկալելով”։ Ահա ջնջված է հիշատակդ երկրի երեսից, չկան տղաներդ ու դուստրերդ՝ իմ որովայնի ցավերի ու տանջանքի արդյունքները, որոնց ես իզուր վաստակեցի տառապանքով։ Դու ինքդ էլ, զազրելի որդերի մեջ նստած, գիշերում ես բացօթյա, իսկ ես, մոլորված, ծառայի պես տնից տուն, տեղից տեղ ընկած՝ սպասում եմ, թե ե՛րբ է արեգակը մայր մտնելու, որ հանգստանամ տառապանքներից ու ցավերից, որոնք այժմ պատել են ինձ։ Արդ, մի խո՛սք ասա Տիրոջն ու մեռի՛ր»։ ¹⁰ Եվ Հոբը, նրան նայելով, ասաց. «Խոսեցիր անզգամ կնոջ պես. եթե Տիրոջ ձեռքից բարիքներն ընդունեցինք, չարիքներին չհամբերե՞նք»։ Եվ իր հետ պատահած այս բոլոր դեպքերի ժամանակ Հոբն իր շրթունքներով չմեղանչեց Տիրոջ առաջ, ոչ էլ անզգամություն հանդես բերեց Աստծու հանդեպ։

Երեք բարեկամների գալուստը

¹¹ Երեք բարեկամներ՝ թեմնացիների արքա Եղիփազը, սոքեցիների բռնակալ Բաղդատը և մինեցիների արքա Սովփարը, լսելով այն բոլոր չարիքների մասին, որ հասել էին Հոբի վրա, յուրաքանչյուրն իր աշխարհից եկան նրա մոտ՝ մխիթարելու և ամոքելու նրան։ ¹² Նրան հեռվից տեսնելով՝ չճանաչեցին. բարձրաղաղակ լաց եղան. յուրաքանչյուրն իր պատմուճանը պատառոտեց և հող ցանեց իր գլխին։ ¹³ Յոթ օր ու յոթ գիշեր նստեցին նրա շուրջը. նրանցից ոչ ոք մի բան չխոսեց հետը, որովհետև տեսնում էին նրան հասած սաստիկ մեծ հարվածները։

3

Հոբն անիծում է իր ծնված օրը

¹ Ի վերջո Հոբը բացեց իր բերանը և անիծեց իր ծնված օրը՝ ² ասելով.

³ «Կորչի այն օրը, երբ ես ծնվեցի,

և այն գիշերը, երբ ասացին՝ “Արու է”։

⁴ Թող խավարի այն գիշերը,

և Տերը վերևում չհիշի այն,

ու նրա վրա է՛լ լույսը չծագի.

⁵ թող պատեն նրան խավարն ու մահվան ստվերները,

ու մեգը իջնի նրա վրա։

⁶ Անիծյալ լինեն այն օրն ու այն գիշերը.

խավարը թող կուլ տա նրան։

Տարվա օրերում թող չլինի,

ու չթվարկվի այն ամիսների օրերում։

⁷ Գիշերն այն թող ցավերի մեջ լինի,

և ուրախություն ու խնդություն թող չլինի։

⁸ Այլ կնզովի նրան, ով նզովելու է այն օրը,

Նա, որ ծովահրեշին կարող է հնազանդեցնել.

⁹ Թող այն գիշերվա աստղերը խավարեն,

գիշերը սպասի, բայց լույս չտեսնի,

ու չտեսնի թող ծագելն Արուսյակի.

¹⁰ քանի որ չփակեց իմ մոր արգանդի դռները,

որով գուցե և իմ աչքերը ցավ չտեսնեին։

¹¹ Ինչո՞ւ չմեռա ես որովայնում,

այլ դուրս եկա արգանդից՝

փոխանակ անմիջապես կորչելու։

¹² Ինչո՞ւ ծունկերի վրա առան ինձ,

կամ ինչո՞ւ ծծեցի ստինքներն իմ մոր։

¹³ Այժմ ես ննջած կլինեի, քուն մտած կհանգչեի

¹⁴ թագավորների և երկրի մեծամեծների հետ,

որոնք հոխորտում էին սրերով իրենց,

¹⁵ կամ իշխանների հետ, որոնք բազում ոսկի ունեին

և որոնք լցրել էին իրենց տներն արծաթով,

¹⁶ կամ իբրև վիժվածք, որ դուրս է ընկնում արգանդից իր մոր,

կամ իբրև մանուկներ, որոնք չտեսան լույսը։

¹⁷ Այնտեղ ամբարիշտներն այլևս չարիք չեն գործում։

Այնտեղ նրանց հետ հանգչում են նաև մարմնով հոգնածները։

¹⁸ Այնտեղ իրենց հանգիստն են գտնում շղթայվածները,

ովքեր այլևս չեն լսում հարկահանի ձայնը։

¹⁹ Այնտեղ միասին են նշանավորն ու աննշանը,

և ծառան այլևս վախ չունի տիրոջից։

²⁰ Ինչո՞ւ է դառնացածներին լույս տրվում,

և ցավագնած հոգիներին՝ կյանք։

²¹ Ովքեր մահ են տենչում, չեն հասնում դրան,

փնտրում են այն, ինչպես գանձ են փորում,

²² և ուրախանում են, երբ գտնում են այն։

²³ Մահը մարդու հանգիստն է, որից հետո ճանապարհ չկա,

որովհետև Աստված փակել է այն։

²⁴ Կերակուրիցս առաջ հեծությունը հասավ.

արցունքներով ու ահով ընկճված եմ,

²⁵ քանզի ինչ բանի երկյուղն ունեի, հասավ ինձ վրա.

ինչից որ վախ կար, հենց ի՛նձ պատահեց։

²⁶ Չխաղաղվեցի, դադար չառա ես, ոչ էլ հանգստացա,

քանի որ վրաս բարկությունն իջավ»։

4

Եղիփազ. վստահություն Աստծու նկատմամբ

¹ Այն ժամանակ Եղիփազ Թեմնացին պատասխանեց և ասաց.

² «Մի՞թե շատ անգամներ է քո խոսքը զազրալից եղել

քո խոսքերի զորությանն ո՞վ կդիմանա։

³ Դու շատերին ես խրատել,

տկարի ձեռքը հզորացրել,

⁴ խոսքովդ տկարին ոտքի ես հանել,

հոգնած ծնկներին եղել քաջալեր,

⁵ Եվ հիմա, երբ ցավերը քեզ վրա են հասել

դու սարսափո՞ւմ ես։

⁶ Չէ՞ որ քո երկյուղը անզգամություն է,

քո անչար ճանապարհը քեզ հույս չի՞ տալիս։

⁷ Արդյոք հիշո՞ւմ ես մի արդարի, որ կորել է,

կամ էլ մի ճշմարիտ մարդու, որ վերացել է։

⁸ Ես նկատել եմ անօրեն բաներ հերկողների.

ովքեր անարդարություն ու տառապանք են սերմանում,

անարդարություն ու տառապանք էլ կհնձեն։

⁹ Կորչելու են Տիրոջ հրամանով,

Նրա բարկության շնչից՝ ոչնչանալու։

¹⁰ Նրանց առյուծանման զորությունը,

էգ առյուծի նման գոչյունները

և վիշապանման պերճությունը վերացել են։

¹¹ Ինչպես սատկում է առյուծը, երբ կեր չի լինում.

և նրա կորյունները ցրվում են։

¹² Եթե քո խոսքերում դեռ ճշմարիտ բան գոյություն ունենար,

այդպիսի չար բաներից ոչ մեկը քեզ չէր պատահի։

Ուրեմն ականջն իմ չի՞ ընդունելու հրաշակերտ բաներ նրանից։

¹³ Գիշերային արհավիրքներն ու դղրդյունները

ահ են գցել մարդկանց սրտում.

¹⁴ դողումն ու սոսկումն են պատել ինձ

և սաստիկ ցնցել ոսկորներն իմ։

¹⁵ Մի հողմ դիպավ իմ երեսին.

փշաքաղվեցին մազերս ու մարմինն իմ։

¹⁶ Կանգնեց իմ առաջ, բայց չճանաչեցի.

տեսա, բայց կերպարանք չկար աչքերիս առաջ,

միայն սոսափյուն ու ձայն էի լսում։

¹⁷ Մի՞թե մահկանացուն սուրբ է Տիրոջ առաջ,

կամ մարդն իր գործերով անարա՞տ է նրա առաջ,

¹⁸ Երբ Աստված նույնիսկ իր ծառաներին չի հավատում,

իր հրեշտակների վրա խոտոր բաներ է նկատում։

¹⁹ Ուրեմն ի՞նչ ասենք կավե տան մեջ բնակվածների մասին

(մենք էլ նույն կավից ենք).

կհարվածի նրանց՝ իբրև ցեցի,

²⁰ և առավոտից մինչև երեկո չեն դիմանա։

Քանի որ իրենք իրենց չէին կարող օգնել, կորան։

²¹ Փչեց նրանց վրա, ու չորացան,

ոչնչացան նրանք, որովհետև իմաստություն չունեին։

5

¹ Այժմ գոռա՛, տեսնենք քեզ ո՞վ է ձայն տալու,

կամ թե տեսնելո՞ւ ես սուրբ հրեշտակներից որևէ մեկին։

² Հիրավի, բարկությունն անզգամին սպանում է,

նախանձը՝ մեռցնում մոլորյալին։

³ Անշուշտ տեսել եմ անզգամների՝ արմատ գցած,

բայց հանկարծակի խորտակվել են տները նրանց։

⁴ Նրանց զավակները հեռու են փրկությունից,

մաշվելու են վատթարների դռներին,

և չի գտնվելու մեկը, որ փրկվի։

⁵ Նրանք ինչ որ ժողովել են, արդարներն են ուտելու,

և իրենք չեն ազատվելու պատուհասներից.

քամվելու է զորությունը նրանց։

⁶ Արդարև, հողից չի ելնում տառապանքը,

ոչ էլ լեռներից են բուսնում ցավերը։

⁷ Այլ մարդը տանջանքով է ծնվում.

արծիվների ձագերը բարձունքներում են ճախրում։

⁸ Սակայն ես Տիրոջից եմ խնդրելու,

Տիրոջը՝ բոլորի իշխանին եմ ձայն տալու,

⁹ որ կատարում է մեծ ու անքննելի,

փառավոր ու հրաշակերտ գործեր, որոնք թիվ ու հաշիվ չունեն,

¹⁰ որ անձրև է տալիս երկրի վրա,

ջրեր ուղարկում երկնքի ներքո,

¹¹ որ բարձրացնում է խոնարհներին

և ոտքի է կանգնեցնում կորուսյալներին,

¹² որ չեզոքացնում է խորամանկների մտադրությունները,

և նրանց գործերը մղում ձախողման,

¹³ որ հասու է լինում իմաստունների բարդ մտքերին,

խափանում բազմադավների մտադրությունները։

¹⁴ Ցերեկը խավարն է նրանց վրա հասնելու,

իսկ կեսօրին խարխափելու են, ինչպես գիշեր ժամանակ։

¹⁵ Պատերազմով են ոչնչանալու, և թույլն ազատվելու է հզորի ձեռքից։

¹⁶ Հույս է ունենալու տկարը,

և փակվելու է անիրավի բերանը։

¹⁷ Երանելի է այն մարդը, որին Տերը խրատում է երկրի վրա.

Ամենակալի խրատից մի՛ հրաժարվիր։

¹⁸ Որովհետև նա ցավ է պատճառում,

բայց հետո նորից ամոքում է,

հարվածում է, ապա նրա ձեռքը բժշկում է։

¹⁹ Վեց անգամ փրկելու է քեզ վշտերից,

և յոթերորդին չարը քեզ չի մոտենալու։

²⁰ Սովի ժամանակ քեզ մահից է փրկելու,

պատերազմի ժամանակ կապանքներից է ազատելու քեզ։

²¹ Պահելու է քեզ լեզվի հասցրած տառապանքներից,

ու չես սարսափելու քեզ վրա եկած չարիքներից։

²² Արհամարհելու ես անիրավներին ու անօրեններին

և երկյուղ չես կրելու վայրի գազաններից,

դաշտի քարերը մարտնչելու են քո կողքին,

²³ վայրի գազանների հետ խաղաղության մեջ ես լինելու։

²⁴ Ապա իմանալու ես, որ խաղաղություն կա քո տան մեջ,

և քո հարկի տակ բան չի պակասելու։

²⁵ Իմանալու ես, որ բազում են քո սերունդները,

և քո որդիները դաշտի խոտի պես են լինելու։

²⁶ Գերեզման ես իջնելու ժամանակին հնձված հասուն ցորենի պես,

կամ ինչպես ժամանակին մեկտեղված կալի շեղջը։

²⁷ Ահա սա այսպես քննեցինք,

սա է, ինչ որ լսեցինք.

բայց դու ինքդ իմացի՛ր, թե ի՛նչ ես արել»։

6

Ընկճված մարդն է սոսկ իմանում իր թշվառությունը

¹ Հոբը պատասխանեց ու ասաց.

² «Եթե մեկը լավ կշռեր իմ սրտմտությունը,

ցավերս էլ բարձեր կշեռքի նժարին,

³ ծովի ավազներից էլ ծանր կլինեին դրանք։

Այդ պատճառով էլ խոսքերս անզգամություն են։

⁴ Տիրոջ նետերն իմ մարմնի մեջ են,

Նրա զայրույթը արյունս է ծծում.

բերանս բացելիս կտտում են ինձ։

⁵ Արդ, մի՞թե զուր է ցիռը զռում,

եթե իր համար կեր չի խնդրում։

Կամ թե եզը մսուրում կգոռա՞,

եթե կերակուր ունենա։

⁶ Կամ առանց աղի հաց կուտվի՞։

Կամ համ կլինի՞ դատարկ խոսքերում։

⁷ Չի կարող հանդարտվել իմ հոգին,

գարշահոտ է իմ կերակուրը,

ինչպես հոտն առյուծի։

⁸ Երանի ինձ տրվի և կատարվի խնդիրքն իմ,

և հույսս լիացնի Տերը։

⁹ Տերն սկսեց խոցոտել ինձ,

սակայն թող չսպանի ինձ իսպառ։

¹⁰ Գերեզմանս թող լինի քաղաքն իմ,

որի պարսպի վրա ճեմում էի.

բայց հանգիստ եմ,

որ իմ սուրբ Աստծու խոսքերը չեմ անտեսել։

¹¹ Ի՞նչ զորություն ունեմ, որ իմ կյանքը տևի.

ի՞նչ ժամանակ ունեմ, որ իմ հոգին հարատևի։

¹² Մի՞թե ուժս քարից զորեղ է.

մարմինս մի՞թե պղնձից է։

¹³ Կամ չէի՞ ապավինում դրան,

որ զրկվեցի ամեն մի օգնությունից.

¹⁴ Արդ ողորմությունը հեռացավ ինձնից.

Տիրոջ այցն անտեսեց ինձ լրիվ։

¹⁵ Իմ մերձավորները վրաս չնայեցին.

նվազած առվի պես,

ալիքի պես անցան իմ կողքով։

¹⁶ Ովքեր դողում էին ինձանից,

այժմ ահա ելել են ինձ վրա։

Ինչպես ձյունը կամ ինչպես քարացած սառույցը,

¹⁷ որ իսկույն հալվում է ջերմության գալուց,

չի ճանաչվում, թե ի՛նչ էր առաջ,

¹⁸ Այդպես լքվեցի նաև ես բոլորից,

կորստյան մատնվեցի ու դարձա տնանկ։

¹⁹ Եվ դուք, որ նայում եք Սաբայի շավիղին,

տեսե՛ք և ճամփաները թեմնացիների.

²⁰ ամոթով կմնան,

ովքեր որ հույս դրեցին այս քաղաքի և նրա ինչքերի վրա։

²¹ Դե ահա դուք նույնպես անողորմ ելել եք ինձ վրա.

գեթ վերքերիս նայեք և երկյուղ կրեք։

²² Ես ձեզնից բան խնդրեցի՞,

կամ ձեր զորության կարիքն ունե՞մ՝

²³ փրկվելու թշնամու ձեռքից,

կամ ազատվելու բռնակալներից։

²⁴ Ուսուցե՛ք ինձ, և ես կլռեմ։

Իսկ եթե մոլորված եմ, ինձ խելքի՛ բերեք։

²⁵ Բայց կարծեք իզուր են ճշմարիտ խոսքերը.

չէ՞ որ ես ձեզանից զորություն չեմ խնդրում։

²⁶ Ոչ էլ ձեր կշտամբանքի բառերը կարող են ինձ լռեցնել.

պիտի չանսամ նաև ձեր բարբառած խոսքերին։

²⁷ Բայց քանի ելել եք ինձ վրա՝ իբրև մի որբուկի,

շարժվել եք ձեր բարեկամի վրա,

²⁸ էլի ես նայելով ձեր դեմքին՝

երբեք չպիտի ստեմ։

²⁹ Նստե՛ք. դատի մեջ անիրավ բան թող չլինի.

և դարձյալ արդարի՛ն հետևեք,

³⁰ քանի որ իմ լեզվին անիրավ բան չկա,

կամ իմ կոկորդը իմաստություն չի՞ խոկում»։

7

Հոբը գանգատվում է Աստծուց

¹ «Արդյոք մարդու կյանքը փորձություն չէ՞ երկրի վրա.

նրա կյանքը վարձկանի օրական վարձի նման չէ՞։

² Ինչպես որ ծառան է վախենում տիրոջից

ու պահվում ստվերում,

կամ ինչպես վարձկանն է սպասում իր վարձին,

³ այնպես էլ ես ամիսներ շարունակ անիմաստ սպասեցի։

Ցավագին գիշերներ են բաժին ընկել ինձ.

⁴ թե քնեմ, ասում եմ. “Ե՞րբ ցերեկ կլինի”,

արթնանամ՝ դարձյալ թե՝ “Ե՞րբ երեկո կլինի”։

Ցավով եմ լեցուն ես երեկոյից առավոտ։

⁵ Ծածկված է մարմինս զազրելի որդերով.

հողակոշտեր եմ մաշել ես՝

թարախոտ վերքերն իմ քերելով։

⁶ Եվ կյանքս խոսքից էլ թեթև է.

կորել է նա ունայն հույսերում։

⁷ Հիշի՛ր, որ մի շնչի չափ է իմ կյանքը.

աչքերս է՛լ բարի բան չեն տեսնի.

⁸ Ինձ նայող աչքերն այլևս ինձ չեն տեսնի։

Աչքերդ ինձ վրա ես հառնելու.

բայց ես չեմ լինի՝

⁹ երկնքից ջնջված ամպի պես։

Որովհետև եթե մարդ գերեզման իջնի,

չի ելնի այլևս,

¹⁰ չի վերադառնա իր տունը.

իր տեղն էլ նրան չի ճանաչի։

¹¹ Այսուհետ ես բերանս չպիտի զսպեմ.

պիտի խոսեմ, քանի դեռ վիշտ ունեմ,

տագնապով պիտի բացեմ դառնությունն իմ հոգու։

¹² Մի՞թե ծով եմ ես կամ վիշապ,

որ վրաս պահակ ես կարգել։

¹³ Երբ մտածում եմ, թե մահիճս ինձ կամոքի,

և անկողինս ինձ կհանգստացնի,

¹⁴ դու երազով վախեցնում, տեսիլքով սարսափեցնում ես ինձ։

¹⁵ Ինձնից հանում ես իմ հոգին,

մարմնիցս՝ շունչը իմ,

մահվանից՝ կյանքը իմ։

¹⁶ Քանի որ հավիտյան չեմ ապրի,

թող որ ես համբերող միշտ լինեմ։

Հեռո՛ւ կաց ինձնից,

քանի որ իզուր է կյանքը իմ։

¹⁷ Եվ ի՞նչ է մարդը, որ դու այդքան մեծարում ես նրան,

ու այդքան ուշադրություն դարձնում նրա վրա,

¹⁸ Ամեն առավոտ այցելո՞ւմ ես նրան,

հանգստի ժամին փորձո՞ւմ ես նրան։

¹⁹ Դու ինձ մինչև ե՞րբ չես թողնելու,

չես արձակելու ինձ, մինչև որ ցավերով կուլ տամ թուքս։

²⁰ Թե ես մեղք գործեցի,

ի՞նչ կարող եմ քեզ անել,

որ կարդում ես մարդկանց մտքերը։

Ինչո՞ւ ես ինձ քեզ թշնամի դարձրել,

բե՞ռ եմ քեզ համար։

²¹ Ինչո՞ւ չես մոռանում իմ հանցանքները,

թողություն չե՞ս տալու իմ մեղքերին։

Այժմ ահա հողին եմ դառնում ես,

վաղն այլևս չեմ լինի»։

8

Սխալները հատուցվում են վաղ թե ուշ

¹ Բաղդատ Սավքեցին պատասխանեց ու ասաց.

² «Մինչև ե՞րբ ես այդպես խոսելու։

Շաղակրատության շունչ կա քո բերանում։

³ Տերը մի՞թե անիրավ է դատում,

կամ նա, որ ամեն ինչ ստեղծեց, իրավունքը կաղավաղի՞։

⁴ Եթե քո զավակները մեղանչեցին նրա առաջ,

Նա էլ պատժեց նրանց անօրենությունների համար։

⁵ Բայց դու աղոթքներով վաղ առավոտյան դիմի՛ր Ամենակալ Տիրոջը.

⁶ եթե սուրբ ու ճշմարիտ լինես, քո աղոթքներին ականջ կդնի,

կվերականգնի արդարության քո հարկը։

⁷ Քո առաջինները քիչ կլինեն,

քո վերջինները՝ անբավ։

⁸ Հարցրո՛ւ նախկին սերունդներին

քննի՛ր քո նախնիների փորձը։

⁹ Մենք երեկվան ենք պատկանում

և բան չենք իմանում.

մեր կյանքը ստվեր է երկրի վրա։

¹⁰ Մի՞թե նրանք քեզ չեն ուսուցանի ու պատմի,

իրենց սրտից չե՞ն բխեցնի իրենց խոսքերը։

¹¹ Մի՞թե պապիրուսը կկանաչի առանց ջրի,

կամ եղեգը առանց ջրվելու կբարձրանա՞։

¹² Չի՞ հնձվելու այն, մինչ իր արմատների վրա է.

եթե ամեն խոտ մինչև հագեցում չոռոգվի, չի՞ չորանա։

¹³ Արդ, բոլորի վախճանն այնպիսին կլինի,

որ կմոռանան Տիրոջը,

որովհետև ամբարիշտի հույսը կկորչի։

¹⁴ Շեն չի լինի նրա տունը.

սարդոստայնի պես կանհետանա նրա հարկը։

¹⁵ Թեկուզ և հաստատի իր տունը,

այն կանգուն չի մնա.

այն մի հպումից իսկ չի դիմանա։

¹⁶ Արեգակից հեռու տեղում է խոնավությունը,

և նրա նեխվածքից է դուրս գալու իր շիվը։

¹⁷ Քարակարկառի վրա է ննջելու

ու մանրախիճ քարերի վրա ապրելու.

¹⁸ իսկ եթե արմատախիլ արվի իր տեղից,

նրա տեղն էլ ուրանալու է նրան։

Այսպիսի բան չե՞ս տեսել միթե.

¹⁹ ամբարիշտի կործանումն այսպիսին է լինելու,

իսկ հողից ուրիշն է բուսնելու։

²⁰ Տերը չի մերժում անմեղին.

ամբարիշտի ամեն ընծա ընդունելի չի լինելու։

²¹ Ճշմարիտ մարդկանց բերանները ծիծաղով են լցվելու,

նրանց շրթունքները՝ գոհությամբ։

²² Նրանց թշնամիներն ամոթ են հագնելու.

ամբարիշտի բնակարաններն այլևս չեն մնալու»։

9

Աստված շատ հզոր է

¹ Հոբը պատասխանեց ու ասաց.

² «Ճշմարտապես գիտեմ, որ դա այդպես է.

ինչպե՞ս կարող է մարդ արդար լինել Տիրոջ առաջ։

³ Եթե մեկը փորձի նրա հետ դատաստանի մեջ մտնել,

նա չի լսի նրան, որովհետև նրա մի խոսքը

հազարից մեկին չի կարող պատասխանել։

⁴ Աստված մտքով իմաստուն է, զորավոր ու մեծ.

այդ ո՞վ է նրա դեմ համառել ու հաջողություն գտել։

⁵ Նա մաշեցնում է լեռները, և չեն իմանում, որ

բարկությամբ կտապալի դրանք։

⁶ Նա երկնքի ներքո ամեն ինչ շարժում է հիմքերից,

և դողում են դրանց սյուները։

⁷ Նա հրամայում է արեգակին, ու չի ծագում,

աստղերի առաջն է փակում։

⁸ Նա միայնակ տարածել է երկինքը

և ծովի վրա այնպես է շրջում, ինչպես ցամաքի։

⁹ Նա է ստեղծել Բազմաստղն ու Գիշերաստղը, Սայլն ու հարավի աստղախումբը։

¹⁰ Նա է արարել մեծամեծ ու անքննելի, փառավոր ու հրաշակերտ բաները,

որոնց թիվ ու հաշիվ չկա։

¹¹ Եթե ինձանից վեր բարձրանա, չեմ տեսնի,

իսկ եթե կողքովս անցնի, այդպես էլ չեմ իմանա։

¹² Եթե ոչնչացնի, ո՞վ հետ կպահի նրան,

կամ ո՞վ նրան կասի՝ ի՞նչ արեցիր։

¹³ Նա իր բարկությունը չի շրջի,

և նրանից սարսեցին կետերը, որ երկնքի ներքո են։

¹⁴ Երանի՜ լսի ինձ և իրավացի համարի իմ խոսքերը։

¹⁵ Եթե արդար լինեմ, ու ինձ չլսի,

նրա դատաստանն եմ աղերսելու։

¹⁶ Իսկ եթե աղաղակեմ իրեն, ու լսի,

կարո՞ղ եմ հավատալ, որ լսել է ինձ։

¹⁷ Փոթորիկով չի՞ ոչնչացնելու ինձ.

բազում են հարվածները, որ զուր տեղը հասցրել է ինձ.

¹⁸ ինձ հանգիստ էլ չի տալիս,

դառնությամբ է լցրել ինձ.

¹⁹ քանի որ հզոր է, բռնանում է։

Եվ ո՞վ է նա, որ նրա դատաստանին հակառակ կանգնի։

²⁰ Եթե արդար էլ լինեմ,

բերանս ամբարիշտ կդառնա,

անարատ լինեմ, կամակոր կդիտվեմ։

²¹ Իսկ եթե հոգով ամբարշտացել եմ, չգիտեմ.

գիտեմ միայն, որ կյանքս խլում են ինձանից։

²² Դրա համար եմ ասել. “Բարկությունը կործանում է մեծին ու հզորին”։

²³ Չարերը սաստիկ մահով են կորչելու.

արդարներն էլ ծաղրի են ենթարկվում,

²⁴ քանի որ մատնվում են ամբարիշտի ձեռքը։

Նա փակել է դատավորների աչքերը.

եթե նա չէ այդ անողը, ապա ո՞վ է։

²⁵ Սակայն սուրհանդակից էլ արագ անցավ իմ կյանքը.

փախավ այն ու չերևաց։

²⁶ Կգտնվի՞ հետքը նավերի ճանապարհի,

կամ թռչող՝ կեր փնտրող արծվի։

²⁷ Եթե ասեմ, որ պիտի խոսեմ, կմոռանամ,

երեսս գետին խոնարհած՝ պիտի հեծեծեմ։

²⁸ Դողում եմ մարմնիս բոլոր անդամներով,

քանզի գիտեմ, որ ինձ անմեղ չես համարելու։

²⁹ Եթե ամբարշտություն էի անում, ինչո՞ւ չմեռա։

³⁰ Եթե ձյունով իսկ լվացվեի ու ձեռքերս էլ մաքուր սրբեի,

³¹ դարձյալ սաստիկ աղտեղությամբ կներկեիր ինձ՝

պատմուճանս իմ աչքերին զազրելի դարձնելով.

³² քանզի դու մարդ չես ինձ նման, որի հետ ես դատ անեի,

և որպես հավասար դատաստանի գայինք։

³³ Ո՜ւր է թե մի միջնորդ լիներ,

հանդիմաներ ու լսեր մեր երկուսին։

³⁴ Նա ինձանից անպայման կհեռացներ գավազանը,

և դրա ահն ինձ չէր սարսափեցնի.

³⁵ էլ չէի վախենա, այլ կխոսեի.

բայց գիտեմ, որ այդպես չէ.

որ ինքս մենակ եմ տանջվում»։

10

Աստված մարդուն ստեղծել է կործանելո՞ւ համար

¹ «Հեծեծելով նրան կհասցնեմ իմ խոսքերը.

կխոսեմ թախծած իմ հոգու դառնությամբ։

² Ու կասեմ. “Տե՛ր, մի՛ սովորեցրու ինձ, որ ամբարիշտ լինեմ”.

և ինչո՞ւ դատեցիր այսպես ինձ։

³ Բարվո՞ք է քեզ թվում անիրավված լինելս.

մերժել ես քո ձեռքի գործերը,

ու նայել ամբարիշտների խորհրդին։

⁴ Մի՞թե դու նայում ես, ինչպես մարդն է նայում,

կամ տեսնում, ինչպես մահկանացուն է տեսնում։

⁵ Տարիներդ մի՞թե մարդու տարիներ են,

⁶ որ կրկին փնտրում ես հանցանքներս

ու քննում մեղքերս։

⁷ Գիտես, որ երբեք չեմ ամբարշտացել,

բայց ո՞վ ինձ կազատի քո ձեռքից։

⁸ Քո ձեռքն է արարել ու ստեղծել ինձ,

բայց հետո դարձել ու զարկել ես ինձ։

⁹ Հիշի՛ր, որ կավից ես ստեղծել.

վերստին հո՞ղ ես դարձնում ինձ։

¹⁰ Մի՞թե կաթի պես չես կթել ինձ,

պանրի պես մակարդել։

¹¹ Մորթ ու միս հագցրել,

ոսկրերով, ջիլերով հյուսել։

¹² Կյանք ու ողորմություն ես դրել ինձ վրա.

հոգատարությամբ ես պահել ինձ։

¹³ Եվ քանի որ դու այս բոլորն ունես

գիտեմ, որ ամեն բան կարող ես.

քեզ համար անհնարին ոչ մի բան չկա։

¹⁴ Եթե մեղանչեմ, թեկուզ և չես ների իմ անօրենությունը,

բայց ինձ կպահես։

¹⁵ Եթե ամբարշտանամ, օ՜, վա՜յ ինձ.

իսկ եթե արդար իսկ լինեմ,

չեմ կարող հայացքս բարձրացնել,

քանի որ մեջս անարգանք կա լեցուն։

¹⁶ Որսված եմ իբրև առյուծ,

որին պիտի սպանեն։

Ինձ դարձյալ չարաչար ջնջում ես,

¹⁷ նորոգում հարվածներն ինձ վրա։

Բարկությամբ ես ձեռքդ իջեցրել ինձ վրա,

հրոսակներ ես հանել իմ դեմ։

¹⁸ Ինձ ինչո՞ւ հանեցիր որովայնից,

ու տեղում չմեռա։

Ոչ մի աչք չէր տեսնի ինձ այնժամ,

¹⁹ ու իբրև չեղած կլինեի։

Եվ ինչո՞ւ արգանդից ուղղակի գերեզման չիջա,

²⁰ կամ մի՞թե շատ կարճ չէ ժամանակն իմ կյանքի։

Թո՛ւյլ տուր ինձ, որ փոքր-ինչ հանգստանամ,

²¹ մինչև այնտեղ գնամ, որտեղից երբեք չեմ դառնալու՝

երկիրն այն խավարչտին ու մթին,

²² երկիրն հավիտենական աղջամուղջի, որտեղ լույս չկա,

ու ոչ ոք չի կարող մարդկային կյանք տեսնել»։

11

¹ Սովփար Մինեցին պատասխանեց ու ասաց.

² «Ով շատ է խոսում, պարտավոր է նույն ձևով էլ լսել. 

կամ ով խոսի, կարո՞ղ է խոսելով արդարանալ։

Օրհնյալ է սակավակյաց կանանց ծնունդը։

³ Շատ մի՛ շաղակրատիր, որովհետև մեկը չկա, որ քեզ պատասխան տա։

⁴ Մի՛ ասա. «Գործերովս մաքուր ու անարատ եմ Տիրոջ առաջ»։

⁵ Այլ մտածի՛ր, թե Տերն ինչպե՛ս է խոսելու քեզ,

բաց անելու շրթունքները քեզ հետ։

⁶ Քեզ կպատմի իմաստության զորությունը,

որ կլինի կրկնակի, քան քոնը։

Ապա կիմանաս, որ ինչ գլխիդ բերել է Տերը,

արժանի էր քո գործած մեղքերին։

⁷ Կգտնե՞ս Տիրոջ հետքերը,

կամ Ամենակալի հաստատած սահմաններին կարո՞ղ ես վերահասու լինել։

⁸ Բարձր է երկինքը. ի՞նչ կարող ես անել։

Խորն է դժոխքը. ի՞նչ կիմանաս։

⁹ Երկար են երկրի չափերը. լայն է ծովը։

¹⁰ Եվ եթե Աստված կործանի այդ բոլորը,

ո՞վ կասի նրան՝ «Այդ ի՞նչ արեցիր»։

¹¹ Ինքը գիտի անօրենների գործերը.

անարժան բաներ տեսնելով՝ անտես չի առնի։

¹² Դատարկաբան մարդը խոսքերի մեջ է թաքնվում։

Կնոջից ծնված մարդը նման է անապատի վայրի էշի։

¹³ Իսկ եթե դու մաքուր ես պահել քո սիրտը,

ձեռքդ մեկնի՛ր դեպի Աստված։

¹⁴ Եվ եթե քո ձեռքում անօրենություն կա,

հեռո՛ւ վանիր այն քեզանից,

և անօրենությունը քո հարկի տակ թող չիջևանի։

¹⁵ Եվ ահա քո դեմքը կփայլի վճիտ ջրի պես,

կմերկանաս աղտեղությունից ու երկյուղ չես կրի,

¹⁶ կմոռանաս նեղություններդ, ինչպես անցած ալիքը, ու չես զարհուրի։

¹⁷ Քո աղոթքը՝ որպես Արուսյակը.

կեսօրին կծագի կյանքը քո,

¹⁸ ու վստահ կլինես, որ հույս ունես.

հոգսերի ու վարանումների միջից խաղաղությունը կերևա քեզ։

¹⁹ Անդորր կգտնես, և ոչ ոք չի պատերազմի քեզ հետ։

Շատերը շուռ կգան ու քո հաճությունը կփնտրեն.

²⁰ փրկությունը կվրիպի նրանցից,

որովհետև նրանց հույսն իրենց կորուստն է։

Ամբարիշտների տեսողությունը կսպառվի»։

12

¹ Հոբը նորից պատասխանեց ու ասաց.

² «Արդ դուք էլ մա՞րդ եք.

կամ իմաստությունը ձեզանո՞վ է ավարտվելու։

³ Ես նույնպես ձեզ նման սիրտ ունեմ։

⁴ Արդար ու անարատ մի մարդ է ենթարկվել ծաղրանքի։

⁵ Սահմանված ժամանակ պատրաստվեց

իր տների կործանումն օտարից,

ավերումն անօրենների ձեռքով։

⁶ Բայց ով որ չար լինի,

թող երբեք չհուսա, թե անպարտ կլինի։

Եվ ով բարկացնի Տիրոջը,

նրանց համար մի՞թե քննություն չի լինի։

⁷ Բայց ե՛կ ու հարցրո՛ւ չորքոտանիներին,

և կսովորեցնեն քեզ,

երկնքի թռչուններին,

և կասեն քեզ.

⁸ երկրի հե՛տ խոսիր,

և քեզ դաս կտա,

և ծովի ձկները քեզ կպատմեն։

⁹ Եվ սրանցից ո՞վ չգիտի,

թե Տիրոջ ձեռքն է ստեղծել ամեն ինչ։

¹⁰ Եվ մի՞թե նրա ձեռքին չէ բոլոր կենդանիների շունչը

ու հոգին ամեն մի մարդու։

¹¹ Որովհետև միտքն է քննում խոսքը,

ու քիմքն է համտեսում կերակուրը։

¹² Ժամանակի երկարության մեջ կա իմաստություն,

և կյանքի երկարության մեջ՝ հնարագիտություն։

¹³ Նրանի՛ց են գալիս ուժը, իմաստությունը,

Նրա՛նն են խորհուրդներն ու հանճարը։

¹⁴ Թե նա կործանի,

ո՞վ կշինի,

թե նա փակ դնի մարդկանց առաջ,

ո՞վ բաց կանի։

¹⁵ Թե նա արգելք դնի ջրերի առաջ,

կչորանա հողը,

իսկ եթե արձակի,

կործանելով կանհետացնի երկիրը։

¹⁶ Նրանի՛ց են գալիս ուժն ու զորությունը,

Նրա՛նն են հանճարն ու իմաստությունը։

¹⁷ Գերի է քշում խորհրդականներին,

հիմարացնում է երկրի դատավորներին,

¹⁸ գահերին է նստեցնում արքաների

և գոտի կապում նրանց մեջքին։

¹⁹ Գերության է ուղարկում քահանաներին

ու կործանում է երկրի հզորներին։

²⁰ Լռեցնում է խոսքը հավատարիմների,

ծերունիների խելամտությունն է ընդունում։

²¹ Անարգանք է թափում իշխանի գլխին,

իսկ խոնարհներին բժշկում է։

²² Հայտնի է դարձնում խավարի խորքերը

և մահվան ստվերը հանում դեպի լույս։

²³ Մոլորեցնում է ազգերին և կործանում նրանց.

սփռում է ազգերին և առաջնորդում նրանց։

²⁴ Երկրի իշխանների սիրտն է շուռ տալիս,

մոլորեցնում է ճանապարհներին, որոնց ծանոթ չեն։

²⁵ Շոշափելու են խավարը և ոչ թե լույսը,

մոլորվելու են հարբածի նման։

13

Ազատ երկխոսություն Տիրոջ հետ

¹ Ահա այս ամենը տեսել է իմ աչքը,

 և լսել իմ ականջը։

 ² Ինչքան որ դուք գիտեք,

 այնքան էլ ես գիտեմ,

 և ձեզնից ավելի անմիտ չեմ։

 ³ Սակայն ես պետք է Տիրոջ հետ խոսեմ,

 նրա առջև փորձեմ արդարանալ, եթե կամենա։

 ⁴ Բայց դուք բոլորդ անարդար բժիշկներ եք

 և ողջացնում եք չարիքներ միայն։

 ⁵ Երանի լռեք.

 այդ ժամանակ գուցե ձեզ իմաստունի տեղ դնեն։

 ⁶ Լսե՛ք իմ բերանի փաստարկները

 և ակա՛նջ դրեք շրթունքներիս դատաստանին։

 ⁷ Չէ՞ որ Տիրոջ առաջ եք խոսում,

 նրա դեմ նենգ բաներ բարբառում։

 ⁸ Պիտի ակնածե՞ք։

 Դուք ինքներդ ձեզ դատավո՛ր եղեք։

 ⁹ Լավ կլիներ, եթե ձեզ քններ։

Եթե ամեն արված իրեն վերագրեք,

¹⁰ Նա էլ ձեզ պակաս չի կշտամբելու.

եթե նույնիսկ ծածուկ՝ աչառու լինեք,

¹¹ Իր արհավիրքը ձեզ չի՞ ահաբեկում,

Իր երկյուղը ձեզ չի՞ ցնցում։

¹² Պերճանքը ձեր մոխրի պես կլինի,

մարմինը՝ կավի։

¹³ Լռե՛ք, որ ես էլ խոսեմ,

և անդորր գտնեմ իմ տանջվելուց։

¹⁴ Մարմինս առնեմ ատամներիս մեջ,

հոգիս ամփոփեմ ձեռքերի մեջ իմ։

¹⁵ Ամենազորը ձեռքը թե իջեցնի ինձ վրա

(սկսել էլ է),

չե՞մ խոսելու ես նրա առաջ և արդարանալու փորձեր անելու։

¹⁶ Կդառնա դա ինձ իբրև փրկություն,

որովհետև նրա առաջ նենգ բան չի կանգնի։

¹⁷ Լսե՛ք, անսացե՛ք խոսքերիս.

ի լուր ամենքիդ եմ ասում սա։

¹⁸ Մոտ եմ ահա իմ դատաստանին.

գիտեմ, արդար եմ երևալու։

¹⁹ Ո՞վ է ոսոխն իմ, որ դեմ կանգնի ինձ.

որ կաշկանդվեմ և կամ էլ մեռնեմ։

²⁰ Երկու բաներ են լոկ անհրաժեշտ ինձ,

և ես քո առջևից չեմ թաքնվի։

²¹ Հե՛տ քաշիր ինձնից ձեռքդ.

և ահդ թող ինձ չսարսափեցնի։

²² Եվ եթե կանչես ինձ, կլսեմ քեզ,

թե խոսես ինձ հետ, պատասխան կտամ։

²³ Որքա՞ն մեղք ունեմ, անօրենություն,

հասկացրո՛ւ ինձ՝ որքա՞ն են դրանք։

²⁴ Ինչո՞ւ ես պահում դրանք ինձանից։

Ինձ քեզ թշնամի՞ ես համարում,

²⁵ թե՞ քամուց շարժվող տերևից ես վախենում,

կամ թե հակառա՞կ ես կանգնում ինձ՝

հողմավար խոտիս։

²⁶ Իմ դեմ չար վճիռներ գրեցիր

ու վրաս գցեցիր մանկության մեղքերս։

²⁷ Ոտքերս դրեցիր ոտնակոճղի մեջ,

հսկեցիր իմ գործերին,

քննեցիր նույնիսկ ոտնահետքերս,

²⁸ մինչդեռ մարմինս է հին տիկի պես,

կամ էլ ցեցակեր՝ ձորձի պես»։

14

Մարդկային տխուր պայման

¹ «Կանանցածին մարդը սակավակյաց է ու լի բարկությամբ։

² Ով որպես ծաղիկ էր ծաղկել, թափվեց ու ընկավ,

փախավ իբրև ստվեր. հաստատ չի մնա։

³ Մի՞թե դու, որ հետևում ես այդ ամենին,

ինձ կանգնեցնելու ես քո դատաստանի առաջ։

⁴ Իսկ այն ո՞վ է, որ մաքուր է աղտից. ոչ ոք.

⁵ թեկուզ և կյանքը երկրի վրա մեկօրյա լինի։

Արդ, հաշվված են նրա ամիսները. ժամ ես դրել, խույս չի տա երբեք։

⁶ Հեռո՛ւ նրանից, որ հանգստանա մի քիչ,

հաճույք ստանա իր կյանքից գեթ իբրև մի վարձկան։

⁷ Ծառի համար իսկ հույս կա.

թեև կտրում են, նորից է ծաղկում,

և նրա ճյուղերը չեն պակասում։

⁸ Անգամ արմատը թե որ ծերանա խորքի մեջ հողի,

բունն էլ խեղդվի քարերի մեջ,

⁹ ջրի հոտից իսկ կծաղկի իսկույն,

նորատունկի պես պտուղներ կտա։

¹⁰ Բայց վախճանված մարդը՝ ընկածը, գնաց և այլևս գոյություն չունի։

¹¹ Ծանծաղում է ծովն իր ժամանակին.

սպառած գետերը ցամաքում են.

¹² նույնպես մարդիկ թե ննջեն, վեր չեն կենա.

մինչև երկինքը իսպառ չլուծվի, չեն զարթնի իրենց քնից։

¹³ Ու երանի թե դժոխքում պահեիր և թաքցնեիր ինձ,

մինչև որ անցներ բարկությունը քո,

և ժամանակ ինձ նշանակեիր, հիշեիր ինձ։

¹⁴ Մարդը թե մեռնի, կապրի՞ նա դարձյալ՝

ամբողջացնելով օրերն իր կյանքի.

պիտի սպասեմ, մինչև որ կրկին գոյություն առնեմ։

¹⁵ Ձայն կտաս ինձ, կպատասխանեմ.

Մի՛ մերժիր գործը քո ձեռքերի։

¹⁶ Արձանագրել ես իմ վարքը.

և իմ մեղքերից ոչ մեկը չի վրիպել քեզանից։

¹⁷ Անօրինություններս կնքել ես քսակի մեջ.

նշել, թե ի՛նչ հանցանք եմ գործել ակամա։

¹⁸ Փլվելու ենթակա լեռը պետք է փլվի.

և վեմն էլ պիտի շարժվի իր տեղից։

¹⁹ Եվ ինչպես ջրերն են քարերը ողորկում,

հեղեղում դաշտերը կոշտ հողի,

այնպես էլ մարդու հույսերն ես չքացրել։

²⁰ Մերժել ես նրան իսպառ. նա անցել գնացել է.

նրան դեմ ես դարձել ու այդպես արձակել։

²¹ Թեպետև նա բազում որդիներ ունենա,

նա այդ չի իմանա, իսկ եթե սակավ էլ լինեն, չի ճանաչի։

²² Բայց մարմինն իր նվաղած է,

իսկ հոգին նրա սգում է իր մեջ»։

15

Չարը պատժից չի խուսափի

¹ Եղիփազ Թեմնացին պատասխանեց ու ասաց.

² «Հոգով հանճարեղն իմաստությամբ պատասխան չի՞ տա արդյոք.

մի՞թե կանցկացնի իր որովայնի ցավը,

³ եթե հանդիմանի արտահայտություններով,

որոնք արժանի չեն, և խոսքերով, որոնցից օգուտ չկա։

⁴ Դրանց երկյուղը դու էլ մերժեցիր

ու Տիրոջ առաջ դիզեցիր այսպիսի խոսքեր։

⁵ Հանցավոր եղար բերանիդ խոսքերով,

իսկ հզորների խոսքերը չքննեցիր։

⁶ Քո բերանն է կշտամբելու քեզ, ոչ թե ես.

շրթունքներդ քո դեմ վկայություն են տալու։

⁷ Ի՛նչ է, բոլոր մարդկանցից առա՞ջ ես ծնվել,

թե՞ բոլոր բլուրներից վաղ ես հաստատվել։

⁸ Դո՞ւ ես լսել Տիրոջ հրամանը,

թե՞ քեզ է օժտել նա իմաստությամբ։

⁹ Այն ի՞նչ է, որ դու գիտես, իսկ մենք՝ ոչ,

կամ ի՞նչն է, որ դու կիմանաս, իսկ մենք՝ ոչ։

¹⁰ Մեր մեջ էլ կան ծերեր, ալեհեր մարդիկ,

տարիքով շատ ավելի մեծեր, քան քո հայրը։

¹¹ Մեղքերիդ համեմատ շատ քիչ տանջանքներ ես կրել

ու ավելի շատ ես մեծախոսել։

¹² Ինչո՞ւ հանդուգն դարձավ քո սիրտը,

ինչո՞ւ լկտի նայեցին քո աչքերը.

¹³ սրտմտությունդ դուրս թափեցիր Տիրոջ առաջ

և այդպիսի բառեր հանեցիր քո բերանից։

¹⁴ Այն ո՞ր մահկանացուն է անարատ եղել,

կամ այն ո՞ր կանանցածինն է արդար լինելու։

¹⁵ Եթե անգամ իր սրբերին չի հավատում,

ու երկինքը նրա համար անարատ չէ,

¹⁶ առավել ևս գարշելի ու պիղծ է այն մարդը,

որ անօրենություններն ըմպելիքի նման է խմում։

¹⁷ Պատմելու եմ քեզ, Հո՛բ, լսի՛ր ինձ.

ինչ որ տեսել եմ, պատմելու եմ քեզ

¹⁸ ինչ որ իմաստուններն են ասում,

ինչ որ չեն թաքցրել նրանց հայրերը։

¹⁹ Նրանց է միայն տրվել երկիրը,

և ոչ մի օտարածին նրանց մեջ չի մտել։

²⁰ Ամբարիշտի ամբողջ կյանքը հոգսերով է անցնում,

տարիները բռնակալ մարդուն հաշվով են տրված։

²¹ Նրա ահի ձայնն իր ականջում է։

Երբ նա կարծի, թե խաղաղության մեջ է,

նրա վրա կործանումն է գալու։

²² Թող չհավատա, թե կվերադառնա խավարից,

որովհետև արդեն սրի է դատապարտված։

²³ Սահմանված է իբրև անգղերին կեր.

իր մտքում ինքն էլ գիտի, որ հաստատ կործանվելու է։

Մթին օրը զարհուրեցնելու է նրան.

²⁴ անձկությունն ու նեղությունն են նրա վրա հասնելու.

կործանվելու է իբրև առաջին գծի զորավար,

²⁵ որովհետև Տիրոջ դեմ ձեռք է բարձրացրել

ու ընդվզել Ամենակալ Տիրոջ դեմ։

²⁶ Ամբարտավանությամբ է դուրս եկել նրա դեմ

իր վահանի ամրությամբ։

²⁷ Երեսը ծածկել է իր ճարպով

ու երկսայրի սուր դրել ազդրին։

²⁸ Ավերակ քաղաքներում է բնակվելու

և անմարդաբնակ տներ մտնելու.

ինչ որ իրենք պատրաստել էին, ուրիշներն են տանելու։

²⁹ Չի հարստանալու, ունեցվածքը չի մնալու,

երկրի վրա ստվեր չի գցելու,

³⁰ խավարից էլ չի փրկվելու։ 

Նրա բողբոջը հողմն է թառամեցնելու.

թափվելու է ծաղիկը նրա։

³¹ Թող չհավատա, որ հանգիստ է գտնելու.

սնոտի բաներ են իրեն հանդիպելու։

³² Վաղաժամ են կտրվելու նրա ճյուղերը,

և նրա շիվերն էլ չեն ծաղկելու։

³³ Խակ պտուղի պես վաղաժամ է քաղվելու.

ձիթենու ծաղկի պես ցած է թափվելու,

³⁴ քանզի մահն է ամբարիշտի վկան.

հուրն է այրելու կաշառակերների տները։

³⁵ Իր մեջ ցավեր է սաղմնավորելու.

սնոտի բաներ են իրեն հանդիպելու.

նրա արգանդը նենգություն է ծնելու»։

16

Մարդկանց անարդարությունից դեպի Աստծու արդարությունը

¹ Հոբը նորից խոսեց ու ասաց.

² «Շատ եմ լսել ես այդպիսի բաներ.

բոլորդ էլ չար մխիթարիչներ եք։

³ Բայց հիմա ի՞նչ ժամանակն է դատարկ խոսքերի,

կամ մեկը խնդրո՞ւմ է քեզ, որ պատասխանես։

⁴ Ես էլ ձեզ պես կարող էի խոսել,

եթե դուք իմ տեղը լինեիք, և ես՝ ձեր տեղը։

Ձեզ պես ես էլ կարող էի գլուխս շարժել,

ձեզ կսկիծ պատճառել խոսքերով։

⁵ Գուցե իմ բերանում ուժ ունենայի

ու շրթունքներս չխնայեմ շարժելու,

⁶ քանզի եթե խոսեմ, չի փարատվելու ցավը վերքերիս,

իսկ եթե լռեմ, ավելի քի՞չ եմ խոցոտվելու ես։

⁷ Արդ, դարձրել է ինձ ջարդված,

փտած ու ընդարմացած։

⁸ Ձեռքը գցել է ահա ինձ վրա։

Դեմս է կանգնեցրել իմ ստությունը,

երեսովս տվել պատասխաններս։

⁹ Բարկությամբ մղված՝ կործանել է ինձ,

ատամ կրճտացրել իմ անձի վրա։

Նրա հակառակորդների նետերն են վրաս տեղացել,

¹⁰ աչքերի տեգով շարժվել ինձ վրա։

Իրար հետևից խփել է ծնկիս.

բոլորը մեկտեղ խուժել են վրաս։

¹¹ Տերն ինձ մատնել է ձեռքն անիրավի,

ամբարիշտների մեջ է գցել ինձ։

¹² Մինչ խաղաղ էի, քայքայել է ինձ,

քաշել մազերիցս ու փետել դրանք,

Թիրախ կանգնեցրել,

¹³ տեգեր են պատել։

Երիկամներս են խոցել անխնա,

և իմ մաղձը գետնին է թափվում.

¹⁴ ինձ կործանել են՝ հարված հարվածի վրա իջեցնելով։

Վրաս են հարձակվել զորավորները,

¹⁵ և քուրձ են կարել իմ մորթի վրա։

Հանգել է գետնին իմ զորությունը.

¹⁶ լալուց խաշվել են իմ աղիքները.

մահվան ստվերն է իջել կոպերիս։

¹⁷ Անիրավություն չկար իմ ձեռքին,

և անարատ էր աղոթքն իմ հոգու։

¹⁸ Երկի՛ր, մի՛ ծածկիր արյունն իմ մարմնի.

և տեղ չգտնվի իմ աղաղակի համար։

¹⁹ Եվ ահա հիմա վկաս՝ երկնքում,

դատապաշտպանս՝ բարձունքում։

²⁰ Խնդիրքս թող որ Տիրոջը հասնի,

ու նրա առաջ աչքերս արտասվեն։

²¹ Երանի մեկը պաշտպան կանգնի ինձ Տիրոջ հանդիման,

ինչպես որ մարդը՝ իր ընկերոջը։

²² Իմ տարիները հաշվված են արդ.

բռնել եմ արդեն անդարձի ուղին»։

17

Անհուսություն

¹ «Կորչում եմ հողմավար.

կարոտ եմ շիրիմի, բայց դրան չեմ հասնում։

² Նեղվում, տանջվում եմ. ի՞նչ եմ անելու։

³ Օտարները գողացան իմ ունեցվածքը։

Այն ո՞վ է, որ իր ձեռքն իմ ձեռքի մեջ դնի։

⁴ Քանի որ իրենց սրտերը հեռու պահեցին իմաստությունից,

ուստի չի բարձրացնի նրանց։

⁵ Չարիք չարիքի վրա են պատմելու.

Աչքերս որդիներիս համար հալվեցին։

⁶ Սերունդների չարախոսության ենթարկեցիր ինձ.

նրանց ծաղրանքի առարկան դարձա։

⁷ Բարկությունից մթնեցին իմ աչքերը.

խիստ պաշարված եմ բոլորի կողմից։

⁸ Ճշմարիտ մարդիկ զարմացած են այս ամենի վրա.

արդարը հիմա վեր է կենալու անիրավի դեմ։

⁹ Հավատարիմը թող հաստատ մնա իր ճանապարհին,

իր մաքուր ձեռքով քաջալերություն թող ստանա։

¹⁰ Բայց դուք էլ, ամենքդ, վե՛ր կացեք, եկե՛ք.

ձեր մեջ ես ճշմարտություն չեմ գտնում։

¹¹ Իմ օրերը գարշահոտության մեջ անցան.

սրտիս երակներն ամեն պայթեցին։

¹² Գիշերը ցերեկվա տեղ դրեցին նրանք.

լույսը մերժվեց մութի երեսից։

¹³ Թե համբերեմ ես, դժոխքը կդառնա իմ տունը

և խավարի մեջ՝ փռված մահիճս։

¹⁴ Մահվանը ինձ հայր կոչեցի,

փտությունը՝ ինձ մայր և քույր։

¹⁵ Ո՞ւր է հույսն իմ, կամ բարիքներս պիտի տեսնե՞մ։

¹⁶ Թե՞ այդ բոլորը պիտի գերեզման իջեցնեմ հետս.

կամ թե միասին հո՞ղն ենք իջնելու»։

18

Որոգայթ չարի համար

¹ Բաղդատ Սավքեցին նորից խոսեց ու ասաց.

² «Մինչև ե՞րբ դադար չես առնելու.

հանդարտվի՛ր, որ մենք էլ խոսենք։

³ Ինչո՞ւ ենք մենք չորքոտանիների պես լռել քո առաջ,

⁴ իսկ դու բարկությամբ ես շիկացել։

Հիմա եթե դու մեռնես, երկնքի ներքո ամայությո՞ւն է տիրելու,

թե՞ լեռներն են հիմնահատակ կործանվելու։

⁵ Ամբարիշտների լույսը հանգչելու է.

նրանց բոցը վեր չի բարձրանա։

⁶ Նրա լույսը խավարելու է իր հարկի տակ,

և ճրագը հանգչելու է նրա վրա։

⁷ Հետին մարդիկ հափշտակելու են նրա ունեցվածքը.

սխալ են դուրս եկել նրա խորհուրդները։

⁸ Ոտքը ծուղակն է ընկնելու,

և նա թպրտալու է ուռկանում։

⁹ Դարաններ են վրան թափվելու.

ծարավիներին զորացնելու է նրա դեմ։

¹⁰ Նրա համար հողում թակարդ է թաքցված,

իսկ ճանապարհին՝ որոգայթներ։

¹¹ Ցավերը բոլոր կողմերից ոչնչացնելու են նրան.

շատերը նրա ոտքերին են փարվելու սովի նեղության ժամանակ։

¹² Նրա համար ահավոր կործանում է պատրաստված.

¹³ ոտքի ներբանները մաշվելու են։

Տարաժամ մահը ուտելու է նրա գեղեցկությունը.

¹⁴ առողջությունը դուրս է քշվելու նրա հարկից։

Տագնապով նրան է հասնելու արքունի պատուհասը։

¹⁵ Գիշերը նա բնակվելու է նրա հարկի տակ.

նրա վայելչությունը ծծումբի բոցով է փչանալու։

¹⁶ Ներքևում նրա արմատները չորանալու են,

վերևում հունձն է փչանալու։

¹⁷ Նրա հիշատակը կորչելու է երկրի երեսից,

նրա անունը չի հիշվելու հրապարակներում։

¹⁸ Լույսից խավար են քշելու նրան,

¹⁹ և իր ժողովրդի մեջ ծանոթ չի ունենալու։

Երկնքի ներքո նրա տունը չի փրկվելու,

այլ այնտեղ օտարներ են բնակություն հաստատելու։

²⁰ Նրա վրա հեծեծելու են հետին մարդիկ միայն,

առաջինները զարմանքով են համակվելու,

²¹ թե սրա՞նք են անիրավների տները,

սրա՞նք են այն մարդկանց տեղերը, ովքեր Տիրոջը չճանաչեցին»։

19

Վերջում իմ պաշտպանը պիտի միջամտի

¹ Հոբը նորից խոսեց ու ասաց.

² «Մինչև ե՞րբ պիտի տանջեք իմ հոգին,

խոսքերով ընկճեք ինձ։

³ Իմացե՛ք, որ Տերն այսպես վարվեց ինձ հետ։

Բամբասում եք ինձ,

ու չեք ամաչում՝ ինձ վրա հարձակվելով։

⁴ Այո՛, արդարև ես մոլորվեցի.

մոլորությունս իմ ներսում է հանգուցվել՝

^4ա ասելով բաներ, որոնք արժան չեն։

Խոսքերս ևս մոլորվել են ու չեն պատշաճում մեր ժամանակին։

⁵ Մի կողմ թողնենք այն, որ դուք ինձ վրա մեծ-մեծ խոսում եք,

հարձակվում վրաս նախատինքներով։

⁶ Արդ, իմացե՛ք. Տերն է ինձ խռովեցնողը.

իմ առջև իր պատվարն է բարձրացրել։

⁷ Ահա ծաղրվում եմ նախատինքներով և բերան չեմ բացում.

աղաղակեմ էլ՝ ոչ մի տեղից դատաստան չկա։

⁸ Շրջապատված եմ, չեմ կարող խույս տալ.

խավար է դրել ինձ վրա։

⁹ Մերկացրել է ինձ բոլոր փառքերից,

հանել իմ գլխից պսակը նաև։

¹⁰ Պաշարել է ինձ բոլոր կողմերից.

կործանված եմ. հույսս կտրել է հավետ՝ ծառի պես։

¹¹ Սաստիկ բարկությամբ է վարվել ինձ հետ

ու իր թշնամին է համարել ինձ։

¹² Գնդերը նրա, բոլորը մեկտեղ, հասել են վրաս.

դարանակալները կտրել են բոլոր ճանապարհներս։

¹³ Ինձնից հեռացել են եղբայրներս.

ինձնից առավել՝ օտարներին են ճանաչում նրանք։

Բարեկամներս անողորմ են դարձել,

¹⁴ արհամարհեցին ինձ մերձավորներս,

իսկ ծանոթներս անունս են մոռացել։

¹⁵ Իմ տան դրացիները

և աղախիններն իմ ինձ լիովին օտար համարեցին.

մի այլազգի եմ ես թվում նրանց։

¹⁶ Կանչեցի իմ ծառային, բայց նա բանի տեղ չդրեց.

ես իմ բերանով աղաչում էի,

¹⁷ աղերսում էի իմ կնոջը, պաղատանքներով կանչում էի ես իմ հարճերի որդիներին,

¹⁸ բայց նրանք հավետ ուրացել են ինձ.

երբ ոտքի եմ կանգնում, բամբասում են ինձ։

¹⁹ Զզվել են ինձնից իմ ծանոթները.

ում սիրում էի, իմ դեմ են ելել։

²⁰ Իմ այս մորթի տակ մսերս են փտել.

ատամներիս մեջ իմ ոսկորներն եմ պահում։

²¹ Ո՛վ բարեկամներ, ողորմե՛ք ինձ, ողորմե՛ք ինձ,

քանի որ Տիրոջ ձեռքն է բարձրացել վրաս։

²² Տիրոջ պես ինչո՞ւ եք ինձ հալածում.

մի՞թե իմ մարմնով չեք հագեցել։

²³ Ի՜նչ կլիներ, որ կարողանայի գրել խոսքերս,

մի մատյանի մեջ գրանցել դրանք հավիտյան՝

²⁴ երկաթե գրչով կապարի կամ թե վեմերի վրա փորագրելով,

²⁵ քանի որ գիտեմ՝ հավերժական է

նա, ով երկրի վրա եղծում է ինձ՝

²⁶ բժշկելով մաշկս, որ այս բոլորը կրեց։

Տիրոջ կողմից են պատահել ինձ այս ամենը,

²⁷ որ ինքս անձամբ քաջ գիտակցում եմ,

ինչ որ տեսել եմ իմ աչքերով, ոչ թե ուրիշը։

Այդպես ամեն ինչ իմ ծոցում հանգավ։

²⁸ Իսկ թե հարցնեք՝ «Ինչի՞ մասին մենք խոսենք իր առաջ,

ինչպե՞ս գտնենք մենք արմատը խոսքի»,-

²⁹ դո՛ւք էլ վախեցեք մթին գործերից։

Քանի որ բարկությունն է անօրենների վրա հասնելու.

ապա կիմանան, թե որտե՛ղ է իրենց բուն էությունը»։

20

Արդարության օրենքը բացառություն չունի

¹ Սովփար Մինեցին նորից խոսեց ու ասաց.

² «Չէի կարծում, թե դու մեր դիմաց այդպես կխոսես։

Մի՞թե դու ինձնից ավելի իմաստուն ես։

³ Ունկնդրելու եմ իմ ակնածալից խրատը,

և իմ բանականության ոգին է պատասխան տալու ինձ։

⁴ Մի՞թե դա հիմա ես իմացել,

թե՞ այն ժամանակվանից, երբ երկրի վրա մարդն է դրվել։

⁵ Ամբարիշտների ուրախությունը մեծ անկում պիտի ապրի,

անօրենների խնդությունը կորստյան կմատնվի։

⁶ Եթե անգամ երկինք բարձրանան նրա ընծաները,

ողջակեզներն էլ ամպերին հասնեն,

⁷ երբ թվա, թե հաստատված է,

այն ժամանակ իսպառ կորչելու է.

իսկ ովքեր նրան ճանաչում էին, ասելու են՝ ո՞ւր է։

⁸ Երազի պես է թռչելու և չի գտնվելու.

գիշերային տեսիլքի պես է թռչելու նա։

⁹ Այն աչքը, որ նայել է նրան, այլևս չի տեսնելու,

ոչ էլ նրա բնակավայրն է նրան ճանաչելու։

¹⁰ Նրա որդիներին վատ մարդիկ են սպանելու.

ձեռքերը ախտերից են բորբոքվելու։

¹¹ Ոսկորներն իր, որ երիտասարդական ուժով էին հագեցած,

իր հետ էլ ուղղվում են դեպի հող՝ ննջելու։

¹² Եթե անգամ քաղցրանա չարությունը նրա բերանում,

թաքցնի այն իր լեզվի տակ,

¹³ չի խնայելու նրան, թողություն չի շնորհելու։

Այն կուտակելու է իր կոկորդում,

¹⁴ ու ինքն էլ չի կարողանալու իրեն օգնության հասնել.

իժի թույն կա նրա փորում։

¹⁵ Անիրավությամբ հավաքված նրա հարստությունը դուրս է փսխվելու.

հրեշտակը նրան քաշել-հանելու է տնից։

¹⁶ Վիշապների զայրույթն է նա ծծելու,

նրան օձի լեզուն է սպանելու։

¹⁷ Չի տեսնելու նա արածող կենդանիների կիթը,

ոչ էլ մեղրի ու կարագի պաշարներ։

¹⁸ Զուր ու պարապ տեղն է նա հարստություն վաստակել,

քանի որ չի վայելելու այն ու չի կարողանալու կուլ տալ,

ինչպես չծամվող ու չկտրտվող կարծր բան,

¹⁹ որովհետև շատ տկարների տներ է խորտակել,

բնակարաններ խլել, բայց չի կառուցել։

²⁰ Նրա ունեցվածքին փրկություն չկա.

իր ցանկությամբ չի ազատվելու։

²¹ Ուտելու մթերք չի ունենալու։

Դրա համար նրա բողբոջները չեն ծաղկելու։

²² Երբ իրեն թվա, թե ահա առատության մեջ է, նեղություն է կրելու.

ամեն տեսակ տագնապներ կգան նրա վրա,

²³ թե ինչպե՛ս է լցվելու իր որովայնը։

Աստված նրա վրա է ուղարկելու իր սրտմտությունն ու զայրույթը,

վրան ցավեր է թափելու,

²⁴ և նա սրի ձեռքից չի ազատվելու։

Պղնձե աղեղն է խոցոտելու նրան.

²⁵ նետն է անցնելու նրա մարմնով։

Նրա հարկի տակ աստղեր են շուռ գալու,

և արհավիրքներ են թափվելու գլխին։

²⁶ Համակ խավարն է սպասում նրան,

և անշեջ հուրն է նրան ճարակելու։

Եկվորն է չարչարելու նրա ընտանիքը։

²⁷ Երկինքը մեջտեղ է հանելու նրա անօրենությունները,

և աշխարհն է վեր կենալու նրա դեմ։

²⁸ Կործանումն է իսպառ քանդելու նրա տունը.

նրա վրա հասնելու է ցասման օրը։

²⁹ Տիրոջից այս է բաժին հասնելու ամբարիշտ մարդուն,

և այս է նրա սահմանված ունեցվածքն Այցելուից»։

21

Եղելությունների հերքումը

¹ Հոբը նորից խոսեց ու ասաց.

² «Ակա՛նջ դրեք, ակա՛նջ դրեք խոսքերիս։

Երանի չլիներ ձեզանից եկած մխիթարանքը։

³ Թո՛ւյլ տվեք դուք ինձ, ու ես կխոսեմ.

գուցե չայպանեք խոսքերիս համար։

⁴ Իմ կշտամբանքը մարդկա՞նց կողմից է.

և ինչո՞ւ չպետք է բարկանամ։

⁵ Զարմանում եք՝ նայելով վրաս,

ձեռքներդ ծնոտներիդ դրած։

⁶ Հենց որ հիշում եմ, տագնապում եմ,

քանզի ցավերն են պատել մարմինս։

⁷ Այդ ինչո՞ւ են ամբարիշտներն ապրում,

ծերանում, բայց հարուստ են մնում։

⁸ Նրանց սերունդն ըստ ցանկության է,

և զավակները՝ աչքների առաջ։

⁹ Նրանց տները հաջողված են, բարգավաճ,

և ոչ մի տեղից՝ դույզն-ինչ երկյուղ։

Տիրոջից տանջանք չի հասնում նրանց։

¹⁰ Նրանց կովերը հաստատ ծնում են,

հղիությունը երբեք չի վիժում.

¹¹ նրանց ձագերն իրենց առջև են մշտապես։

Նրանց երեխաները խաղում են՝

¹² ձեռքներն առած քնար ու սաղմոսարան,

և ուրախանում երգերի ձայնից։

¹³ Ամբարիշտները կյանքները բարիքների մեջ են ավարտել,

և գերեզմաններում հանգիստ ննջում են։

¹⁴ Եվ Տիրոջն ասում են. «Հեռո՛ւ ինձանից.

քո ուղիները չեմ կամենում ես ճանաչել հիմա։

¹⁵ Ի՞նչ շահ ունենք, որ ծառայենք նրան,

ի՞նչ օգուտ կա, որ նրան մոտենանք»։

¹⁶ Սրանց ձեռքին են բարիքները.

չի նայում ամբարիշտների արարքներին։

¹⁷ Սակայն ամբարիշտների ճրագը կմարի.

նրանց կհասնի կործանումը.

զայրույթից վրեժի երկունքը կբռնի նրանց։

¹⁸ Ու կլինեն իբրև հարդ՝ հողմի բերանին,

կամ թե չէ իբրև փոշի՝ մրրիկից քշվող։

¹⁹ Իր ունեցվածքը մի օր վերջ կտա իր որդիներին.

Տերը կհատուցի և ճանաչել կտա իրեն։

²⁰ Նրա աչքերը կտեսնեն իր սպանվելը,

ու Տիրոջ ձեռքից չի ազատվի։

²¹ Որովհետև իր տան մեջ ապրում է իր կամքի համաձայն.

նրա ամիսների թիվը կպակասի։

²² Չէ՞ որ Տերն է, որ ուսուցանում է հանճար, գիտություն,

քանի որ ինքն է քննում իմաստուններին։

²³ Նույնիսկ ամենաբարեկեցիկն ու հաջողակը,

այնպիսին անգամ կմեռնի՝ սաստիկ անզգամ լինելով։

²⁴ Իր որովայնը ճարպակալած է.

ու իր ուղնուծուծը քամվելու է։

²⁵ Հոգու դառնությունը կսպանի նրան, ու չի ճաշակի իր բարիքներից։

²⁶ Բոլորը մեկտեղ կննջեն երկրի ընդերքում.

և ապականությունը կծածկի նրանց։

²⁷ Եվ հիմա գիտեմ, որ հանդգնությամբ հասել եք վրաս։

²⁸ Հիմա դուք կասեք. «Իշխանի տունը որտե՞ղ է.

ո՞ր հարկի տակ են ամբարիշտները բնակվում»։

²⁹ Հարցրե՛ք ճանապարհի անցորդներին.

և նրանց ցուցումները մի՛ արհամարհեք։

³⁰ Չարը շտապում է դեպի անդարձ կորստյան այն օրը.

քշվում է դեպի օրը հատուցման։

³¹ Ո՞վ է պատմելու նրա առաջ իր վարքի մասին,

արածի համար ո՞վ պիտի հատուցի նրան։

³² Եվ ինքը դեպի գերեզման ուղղվեց.

անքուն անցկացրեց-մնաց տապանում.

³³ ձորի խիճերը քաղցր թվացին։

Նրա հետևից կգնան բոլորը,

իսկ առջևից էլ՝ մարդիկ բյուրավոր։

³⁴ Եվ ինչո՞ւ եք զուր տեղը ջանում մխիթարել ինձ.

ձեր կողմից ինձ հանգստացնելն անիմաստ է»։

22

Աստված պատժում է միայն հանուն արդարության

¹ Եղիփազ Թեմնացին նորից խոսեց ու ասաց.

² «Չէ՞ որ Տերն է, որ ուսուցանում է իմաստություն և գիտություն։

³ Արդ, Տիրոջն ի՞նչ փույթ,

թե դու անարատ էիր քո գործերով,

կամ ի՞նչ օգուտ, որ դու ուղղես ճանապարհդ։

⁴ Կամ բանի տեղ դնելով՝ կհանդիմանի՞ քեզ,

քեզ հետ դատաստանի՞ կնստի։

⁵ Չէ՞ որ քո չար արարքները բազմաթիվ են,

մեղքերդ՝ անթիվ։

⁶ Անօրինապես քո եղբայրներից գրավ ես վերցրել,

մերկերի զգեստները հափշտակել։

⁷ Ծարավածներին ջուր չես խմեցրել,

նաև քաղցածների հացն ես կտրել։

⁸ Ոմանցով զմայլվեցիր ու նրանց բնակեցրիր երկրի վրա։

⁹ Այրիներին ձեռնունայն ես արձակել

և որբերին չարչարել։

¹⁰ Հիմա քո շուրջը որոգայթներ են դրված,

և սաստիկ պատերազմն է քեզ տագնապի մեջ գցել։

¹¹ Քո լույսը քեզ համար խավար դարձավ.

քնի մեջ քեզ ջրերը ծածկեցին։

¹² Մի՞թե նա, ով բարձունքում է ու նայում է, չի տեսնելու.

նա չէ՞ր, որ ահա ամբարտավանությամբ զգեստավորվածներին խոնարհեցրեց։

¹³ Եվ ասացիր. «Ի՞նչ իմացավ Հզորը»,

կամ թե՝ «Մշուշի մե՞ջ է դատ անելու»։

¹⁴ Ամպն է նրա ծածկույթը, և չի երևա,

և կշրջի երկնի ծիրի մեջ։

¹⁵ Չե՞ս պահելու այն հավիտենական շավիղները,

որոնց վրա կոխեցին արդար այրերը,

¹⁶ ովքեր տարաժամ հափշտակվեցին։

Նրանց հիմքերը հորդաբուխ գետ են։

¹⁷ Նրանք ասում էին. «Տերը մեզ ի՞նչ կանի»,

կամ՝ «Ամենակալն ի՞նչ կթափի մեր գլխին»։

¹⁸ Նա սրանց տները բարիքներով լցրեց։

Բայց ամբարիշտների մտադրությունը հեռու է նրանից։

¹⁹ Արդարները տեսան ամբարիշտների կործանումը ու ծիծաղեցին.

անարատն էլ տեսավ ու արհամարհեց՝ ասելով.

²⁰ «Արդարև, նա չքանդե՞ց դրանց նեցուկը։

Դրանց ունեցվածքների մնացորդները հուրն է ճարակելու»։

²¹ Բայց եկ խստակյա՛ց եղիր, թե կարող ես համբերել.

և այդժամ քո պտուղը կփթթի։

²² Ուսմո՛ւնք ընդունիր նրա բերանից,

նրա խոսքերը սրտիդ մե՛ջ առ։

²³ Եվ եթե դարձի գաս

ու քո անձը խոնարհեցնես Տիրոջ առաջ,

անիրավությունը հեռացրած կլինես քո հարկից։

²⁴ Կբազմես ամուր վեմի վրա,

ինչպես Սովփերի ձորի ժայռի վրա։

²⁵ Եվ Ամենակալը քեզ օգնական կլինի թշնամիներիդ դեմ

ու հայտնապես կվարձատրի քեզ, ինչպես զտած արծաթ։

²⁶ Ապա համարձակ կլինես Տիրոջ առաջ

ու զվարթ կնայես դեպի երկինք։

²⁷ Երբ նրան աղերսես, կլսի քեզ

ու քեզ կատարել կտա քո ուխտը։

²⁸ Քեզ կվերադարձնի արդար բնակարանդ,

և քո ճանապարհներին լույս կլինի,

²⁹ որովհետև ինքդ քեզ խոնարհ պահած կլինես

ու կասես, թե ամբարտավանություն ես արել։

Կապրեցնի նրանց, ում աչքերը խոնարհ են.

³⁰ կփրկի անարատին։

Քո մաքուր ձեռքերով կազատես քեզ»։

23

Աստված հեռու է, և չարը հաղթանակում է

¹ Հոբը նորից խոսեց ու ասաց.

² «Ես էլ գիտեմ, որ ինձ ուղղված հանդիմանությունն ինձնից վեր է,

ու նրա ձեռքը ծանրացել է իմ հեծության վրա։

³ Իսկ ո՞վ կիմացնի՝ կգտնե՞մ նրան,

և ես վերջապես կհասնե՞մ նրան։

⁴ Նրա առաջ կներկայացնեմ իմ իրավունքը

ու կլցնեմ իմ բերանը իմ հանդիմանությամբ։

⁵ Ու կիմանամ ես բուժիչ խոսքերը, որ ինձ կասի նա.

ու լավ կհասկանամ, ինչ որ ինձ խոսի։

⁶ Թեկուզ մեծ ուժով գա նա ինձ վրա՝

իր պատուհասներն ի գործ չի դնի։

⁷ Ճշմարտությունն էլ, հանդիմանանքն էլ գալիս են նույնից,

ուստի վերջապես իրավունքներս մեջտեղ կհանի։

⁸ Թե առաջ գնամ ու չլինեմ՝

ինչպե՞ս կիմանամ դեպքերը վերջին։

⁹ Իր ձախ ձեռքը, որ ստեղծեց նրան, ես չբռնեցի։

Թե աջն էլ իջեցնի ինձ վրա, միևնույնն է, չեմ տեսնի,

¹⁰ քանի որ ինքը գիտի իմ ճանապարհը,

քննել-կշռել է ոսկու պես։

¹¹ Կըմբռնեմ նրա պատվիրանները,

կընթանամ նրա ճանապարհներով ու էլ չեմ շեղվի։

¹² Պատվիրաններից դուրս չեմ գա բնավ, որ չմեռնեմ։

Խոսքերը նրա ծոցումս կպահեմ։

¹³ Հապա եթե նա այսպես դատ անի,

էլ ո՞վ կլինի, որ դիմադարձի,

որովհետև նա ինչ որ կամեցել, այն էլ արել է։

¹⁴ Ահա թե ինչու կփութամ մոտը ու խրատվելով՝

կմտմտամ միայն իր մասին։

¹⁵ Այս ամենով նրա առջև պիտի տագնապեմ,

անդրադառնալով ավելի պիտի զարհուրեմ նրանից։

¹⁶ Տերը հիվանդացրեց սիրտս, Ամենակալը տագնապեցրեց ինձ։

¹⁷ Չէի իմանում, որ խավարն իջնելու էր վրաս.

թանձր մեգով է ծածկվել դիմացս»։

24

Աստված թույլ է տալիս, որ չարերը գործեն

¹ «Ամբարտավաններն ինչո՞ւ մոռացան Տիրոջը.

² ամբարիշտները սահմանն անցան։

Հոտը հովվի հետ հափշտակեցին,

³ որբուկի էշը քշեցին տարան ու այրու եզն անգամ վերցրին։

⁴ Խեղճին շեղեցին ուղիղ շավիղից.

երկրի հեզերին, բոլորին մեկտեղ թաքցրեցին նրանք,

⁵ ու սրանք դարձան ինչպես վայրի էշ՝ դաշտերում։

Վատնեցին իրենց գործերն ինձ համար.

քաղցր եղավ նրանց հացը լկտիների հետ։

⁶ Չհասած արտը, որ իրենցը չէր, հնձեցին նրանք.

խեղճերը մշակեցին ամբարիշտների այգին, բայց հաց ու վարձ չստացան։

⁷ Նրանք բազում մերկերի քնեցրին առանց հագուստի,

զգեստը հանեցին նրանց վրայից։

⁸ Նրանք թրջվում են լեռների ցողից.

քանի որ բնակվելու տեղ չունեն.

ժայռերի տակ են ապաստան գտնում։

⁹ Հափշտակեցին ստինքից որբին

և թշվառին տառապեցրին։

¹⁰ Իզուր քնեցրին մերկին անհագուստ,

սովահարների հացը կտրեցին։

¹¹ Դարան սարքեցին կիրճերում իզուր.

ճանապարհն ուղիղ՝ չիմացան երբեք։

¹² Մարդիկ զրկվեցին քաղաքից, տնից.

հոգիները մանուկների խիստ հեծեծեցին,

և նա ինչո՞ւ չի այցելում սրանց։

¹³ Երկրում ապրեցին, սակայն չիմացան.

արդարության ճանապարհը չճանաչեցին.

նրա շավիղով երբեք չընթացան։

¹⁴ Տեղեկանալով նրանց գործերին՝ խավարի մատնեց նրանց,

ու կնմանվեն գիշերվա գողի։

¹⁵ Շնացողն աչքը խավարին է սևեռում։

Եվ կասի՝ «Թող ոչ մեկի աչքը չտեսնի ինձ.

քող է գցել իր երեսին»։

¹⁶ Մութի մեջ է փորել իր տունը.

ցերեկը փակել են իրենց

ու չեն իմացել՝ ի՛նչ է լույսը։

¹⁷ Առավոտը նրանց բոլորի համար մահվան ստվեր է,

և ըմբռնում են տագնապը մահվան ստվերի։

¹⁸ Աննշան է ջրերի երեսին,

թող կործանվի նրանց ունեցվածքը երկրի վրա.

¹⁹ և նրանց տունկերը լինեն ցամաքած հողի վրա.

որբից խլեցին խուրձը ցորենի.

²⁰ նրանց մեղքերը երեսով տվեցին,

ցողի մշուշի նման անհայտ էլ կմնա։

Եվ թող նրան հատուցվի իր արածի համեմատ.

անիրավ ամեն մարդ թող ջարդվի քայքայված ծառի պես,

²¹ քանի որ ամուլ կնոջը բարի բան չի արել,

որբևայրուն չի ողորմել,

²² տկարին կործանել է բարկությամբ։

Ու անգամ թե ոտքի կանգնի՝

վստահ չի լինի իր կյանքի հանդեպ։

²³ Հիվանդանալիս չի ակնկալի, որ կառողջանա,

այլ կընկնի նա հիվանդությունից.

²⁴ իր հոխորտանքով շատերին է տառապեցրել։

Կթառամի տոթ եղանակին,

ինչպես խոտը կամ ինչպես հասկը՝ ընկած ցողունից։

²⁵ Թե լինի մեկը, որ ասի, թե ստեր եմ խոսում,

թող բանի տեղ չդնի իմ ասածները»։

25

Աստծու տիեզերական զորությունը

¹ Բաղդատ Սովքեցին նորից խոսեց ու ասաց.

² «Արդ, մի՞թե նրանը չեն ահն ու իշխանությունը,

ով բարձունքներում հաստատում է ամեն ինչ։

³ Ոչ ոք թող չկարծի, թե նրա գնդերը կհապաղեն պատժել.

ո՞ւմ վրա չի իջնի նրա որոգայթը։

⁴ Մահկանացուն ինչպե՞ս արդար կլինի Տիրոջ առաջ,

կամ կնոջից ծնվածներից ո՞վ կմաքրի իր հոգին,

⁵ որովհետև եթե լուսնին հրամայի, չի ծագի։

Աստղերն իսկ մաքուր չեն նրա առաջ,

⁶ ուր մնաց մարդը, որ ապականություն է,

և մարդու որդին, որ որդ է»։

26

¹ Հոբը նորից խոսեց ու ասաց.

² «Ո՞ւմ ես մերձենում կամ ո՞ւմ օգնականն ես լինելու.

արդյոք ո՞չ նրա, ում ուժն այնքան մեծ է, ու բազուկը՝ հզոր։

³ Ո՞ւմ խորհրդակից ես լինելու.

արդյոք ո՞չ նրան, ով ամբողջապես իմաստություն է։

Ո՞ւմ հետևից ես արդ գնալու.

արդյոք ո՞չ նրա, որի զորությունը այնքա՜ն մեծ է։

⁴ Ո՞ւմ ես բան ասել, և կամ ո՞ւմ շունչն է դուրս եկել քեզնից։

⁵ Մի՞թե երբևէ ջրի խորքից հսկաներ կծնվեն,

կամ էլ այնտեղի բնակիչներից։

⁶ Մերկ է դժոխքը նրա առաջ,

և կործանումը վրան քող չունի։

⁷ Ոչնչի շուրջը փռեց հյուսիսը,

երկիրը կախեց ոչնչի վրա։

⁸ Իր մշուշի մեջ ջուրն է ծրարում,

և չի պատռվի ամպը նրանց տակ։

⁹ Նա, ով պահում է երեսն իր գահի,

փռում է վրան իր մառախուղը։

¹⁰ Իր հրամանով սահման է քաշել ջրի երեսին,

մինչև վախճանը լույսի ու մութի։

¹¹ Երկնի սյուները սարսել են

ու զարհուրել նրա սաստումից։

¹² Հանդարտեցրել է ծովն իր զորությամբ,

և օվկիանոսն է իր իմաստությամբ տարածվել։

¹³ Սարսել են նրանից երկնքի փականքները.

իր հրամանով սպանել է ապստամբ վիշապին։

¹⁴ Ահա այս է մասն իր ճանապարհի,

և նրանով դեռ պիտի լսենք նրա խոսքի շիթերը,

Եվ ո՞վ կիմանա նրա որոտման մեծ զորությունը, երբ այն արձակվի»։

27

Մեղավորը կարո՞ղ է դիմել Աստծուն

¹ Հոբը շարունակեց իր իմաստուն խոսքերն ու ասաց.

² «Կենդանի է Տերը, որ ինձ հետ այսպես դատաստան տեսավ,

Ամենակալը, որ դառնացրեց իմ հոգին։

³ Եթե տակավին իմ մեջ է իմ շունչը,

և աստվածային շունչն ապրում է իմ ռունգերի մեջ,

⁴ իմ շրթունքները անօրենություն չեն արտասանի,

և ոչ էլ հոգիս անիրավության մասին կխորհի։

⁵ Մինչև մեռնելս էլ չեմ ասի, որ դուք իրավունք ունեք,

որովհետև չեմ հրաժարվի իմ անմեղությունից։

⁶ Եվ արդարության ձայնին անսալով՝ չեմ հրաժարվի,

քանզի չգիտեմ, որ ինքս անպատեհ բան արած լինեմ։

⁷ Առավել ևս՝ թող թշնամիներս լինեն կործանվող ամբարիշտները,

իմ դեմ դուրս եկած, կորստի մատնված անօրենները։

⁸ Եվ ի՞նչ հույս ունի ամբարիշտը, որ հաստատ կմնա.

գուցե Տիրոջը ապավինելով կարողանա փրկվե՞լ,

⁹ կամ թե Տերը ականջ կդնի՞ նրա խնդրանքներին։

Եթե մի տագնապ հասնի իր վրա,

¹⁰ նա չի ունենա համարձակություն նրա առաջ։

Դիմի էլ նրան՝ ունկն կդնի՞ արդյոք նա իրեն։

¹¹ Ես ձեզ կծանուցեմ, ինչ որ կա Տիրոջ ձեռքում,

Չպիտի ստեմ Ամենակալի մոտ եղած բաների մասին։

¹² Ահա բոլորդ իսկ գիտեք,

որ ունայն բաներին ունայնություն եք ավելացնում։

¹³ Այս է Տիրոջից ամբարիշտ մարդու բաժինը.

Ամենակալի կամքով հզորների ունեցվածքն իրենց դեմ պիտի ելնի։

¹⁴ Ու եթե անգամ բազում զավակներ ունենան նրանք, պիտի սպանվեն,

իսկ թե պատահի՝ չափահաս դառնան, մուրացկանությամբ պիտի դեգերեն։

¹⁵ Իսկ ովքեր մնան, մահը կգտնեն.

նրանց այրիներին մեկը չի գթա։

¹⁶ Ու եթե անգամ հողի պես արծաթ հավաքեն

կամ կավի նման ոսկի պատրաստեն,

¹⁷ դրանք բոլորը արդարներին բաժին կդառնան,

ու արդար մարդիկ կտիրեն նրանց ունեցվածքներին։ 

¹⁸ Նրա տունը եղավ իբրև ցեց և իբրև սարդոստայն։ 

¹⁹ Քնեց հարուստը, բայց այլևս չի արթնանա,

աչքերը բացեց, և այլևս չկա։

²⁰ Ցավեր պիտի գան վրան՝ ջրի պես,

գիշերվա խավարը պիտի ծածկի նրան։

²¹ Խորշակը պիտի խլի նրան ու գնա,

պիտի քշի նրան իր տեղից,

²² և շպրտի նրան ու չխնայի։

Փախչելով պիտի փախչի խորշակից։

²³ Պիտի ծանակի նրան

և քարշ պիտի տա իր տեղից»։

28

Իմաստության խորհուրդը

¹ «Հայտնի է տեղը արծաթի, որտեղից այն հանվում է,

և տեղը ոսկու, որտեղ այն զտվում է։

² Երկաթը հողից է դուրս գալիս,

պղինձն էլ քարի պես տաշվում է։

³ Կարգ է սահմանել խավարի համար.

ինքն է ճշգրտում բոլոր ծիրերը՝

քարի, խավարի, մահվան ստվերի,

⁴ ինչպես փոշուց է կտրում խրամը հեղեղատի։

Ով մոռանում է ճամփան ճշմարիտ,

մարդկանցից կտկարանա։

⁵ Երկիր. նրանից է ելնում հացը.

իսկ իր ընդերքը տակնուվրա է արված, ինչպես կրակից։

⁶ Նրա քարերը շափյուղա ունեն, իսկ հողը՝ ոսկի։

⁷ Շավիղ կա, երբեք ծանոթ չէ թռչնին,

և ոչ էլ անգղի աչքն է այն տեսել,

⁸ ուր ոտք չեն դրել ամբարտավանների որդիները,

որտեղով առյուծ չի անցել անգամ։

⁹ Ապառաժին ձգեց իր ձեռքը,

հիմքից տապալեց լեռները։

¹⁰ Գետի հորձանքներ է պատռել։

Բոլոր պատվական այս բաներն իր աչքով է տեսել։

¹¹ Գետերի խորքն է երևան հանել,

իր զորությունը ցույց տվել լույսին։

¹² Այդ որտեղի՞ց է իմաստությունը,

և ո՞րն է տեղը հանճարի։

¹³ Բայց մահկանացուն չգիտի նրա ճանապարհը,

չգտնվեց էլ այն մարդկանց մեջ։

¹⁴ Անդունդն ասաց. «Ինձ մոտ դա չկա»,

և ծովն ասաց. «Իմ խորքում չէ դա»։

¹⁵ Դրա փոխարեն գրավ չի դրվում,

ու դրա գնով որևէ արծաթ չի կշռվում։

¹⁶ Սովփերի ոսկու հետ չի դրվի այն նժարի վրա,

ոչ էլ պատվական եղնգաքարի ու շափյուղայի։

¹⁷ Չեն համեմատվի նրա հետ ոսկի, ոչ էլ բյուրեղապակի,

ու չեն փոխանակվի նրա հետ անոթներ ոսկեղեն։

¹⁸ Բարձրություններ և խորություններ չեն կարող նրա հետ մրցել.

Իմաստությունն ավելի՛ կարևորիր, քան ամենաթաքնված բաները։

¹⁹ Չի չափվի հետը և տոպազը եթովպացիների,

ընտիր ոսկիների հետ չի դրվի երբեք նժարի վրա։

²⁰ Այդ որտեղի՞ց է իմաստությունը,

և ո՞րն է տեղը հանճարի։

²¹ Թաքնված է այն մարդկանցից,

ծածկված՝ երկնի թռչունից։

²² Կորուստը, մահը ասացին. «Լսել ենք նրա փառքի մասին»։

²³ Տերը հեշտությամբ ցույց տվեց նրա ճանապարհները,

քանզի նրա տեղն ինքը գիտի.

²⁴ ինքն ամեն բան երկնքի ներքո տեսնում է անձամբ։

Քանի որ գիտի ամեն ինչ,

որ արարել է աշխարհի վրա՝

²⁵ կշիռը հողմի, չափը ջրերի, որ ինքն է կարգել։

²⁶ Նա կարգ է սահմանել անձրևի համար,

Եվ ճանապարհ՝ ամպրոպի ու որոտի համար։

²⁷ Այն ժամանակ էլ տեսել է նրան ու նրա մասին պատմել,

պատրաստել, քննել

²⁸ ու ասել մարդուն. «Աստվածպաշտությունն իմաստություն է,

ու չարիքներից հեռու մնալը՝ հանճար»։

29

Ո՜վ անցյալի քաղցր օրեր

¹ Հոբը շարունակեց իր իմաստուն խոսքերն ու ասաց.

² «Ո՞վ ինձ կդարձներ նախկին օրերիս, ամիսներին,

երբ պաշտպանում էր ինձ Աստված,

³ երբ լուսավոր էր նրա ճրագն իմ գլխի վերև,

երբ նրա լույսով էի ընթանում խավարի միջով,

⁴ երբ զվարճանում էի ճանապարհներին,

երբ Տերն այցի էր գալիս իմ տունը,

⁵ երբ պարուրված էի հարստությամբ,

շուրջս՝ ծառաներ,

⁶ երբ կարագով էր ճամփաս ողողված,

լեռներս կաթով էին ոռոգվում,

⁷ երբ առավոտյան քաղաք դուրս գալիս

հրապարակում էր աթոռս դրվում։

⁸ Տեսնում էին ինձ երիտասարդներ և քաշվում էին,

ու ծերերը ոտքի էին կանգնում։

⁹ Ընդհատում էին իրենց խոսքն անգամ մեծատունները,

մատները դնում իրենց բերանին։

¹⁰ Ովքեր իմ մասին լսում էին, երանի էին տալիս,

ու նրանց լեզուն քիմքին էր կպչում։

¹¹ Ականջը, որ ունկնդրում էր ինձ, երնեկ էր տալիս,

ինձ տեսնող աչքն ակնածում էր ինձնից։

¹² Որովհետև ես աղքատին հզորի ձեռքից էի ազատել

ու օժանդակել անօգնական որբուկին։

¹³ Կորսված մարդու օրհնությունը թող ինձ վրա գա,

այրու բերանը թող օրհնի ինձ։

¹⁴ Արդարությամբ էի զգեստավորվել և իրավունքը թիկնոցի նման գցել ինձ վրա։

¹⁵ Կույրին աչք էի և կաղ մարդուն՝ ոտք

¹⁶ ու խեղճերին՝ հայր։

Դատ էի անում նրան, ում բնավ չէի ճանաչում։

¹⁷ Անիրավների ծնոտը ջարդում,

հափշտակվածը խլում էի ես նրանց ժանիքից։

¹⁸ Ասում էի, թե գուցե տարիքս ծերության հասնի,

արմավենու պես երկար ժամանակ կարենամ ապրել։

¹⁹ Ջրերի վրա իմ արմատները լայն տարածվեին,

ու ցողն էլ հանգչեր իմ հնձի վրա։

²⁰ Աղեղն իմ ինձ հետ պիտի առնեմ,

և այն կնորոգվի իմ ձեռքում։

²¹ Մարդիկ ինձ լսում ու անսում էին,

խորհուրդներս ստանալիս միշտ լռում էին,

²² խոսքերիս բան չէին ավելացնում։

Հրճվում էին, երբ որ հետները խոսում էի.

²³ սպասում էին նրանք իմ խոսքին, ինչպես ծարավ հողն՝ անձրևի գալուն։

²⁴ Երբ ես նրանց հետ ծիծաղում էի, չէին հավատում,

և չէր նվազում լույսը իմ դեմքից։

²⁵ Ինքս էի ընտրում բոլորի ուղին, որպես իշխան էի նստում,

զորականների մեջ բազմում իբրև թագավոր»։

30

¹ «Ես, որ գրգանքով ամոքում էի,

արդ հետին մարդիկ քամահրում են ինձ։

Խրատում են ինձ բոլորը մեկտեղ,

որոնց հայրերին նախատում էի,

որոնց հավասար չէի համարի շներին իմ հովվական։

² Իմ ինչի՞ն է պետք նրանց ձեռքերի զորությունը։

Նրանց լիությունը վերացավ,

³ ընկան կարիքի ու սովամահության մեջ, անծնունդ։

Նրանք, որ երեկ անձկությունից ու թշվառությունից փախչում էին անջրդի վայրեր։

⁴ Նաև նրանք, որ խշխշան բանջարով էին փաթաթվում,

որոնց կերակուրն հենց այդ բանջարն էր։

Անարգներ ու արհամարհվածներ,

կարոտ մնացած ամեն բարիքի,

որոնք սովից ծառի արմատներ էին ծամծմում։

⁵ Գողերը հարձակվեցին ինձ վրա,

⁶ որոնց տները քարանձավներն էին,

⁷ որոնք աղմկում էին բարեհնչունության մեջ

և թաքնվում մացառներում։

⁸ Զավակներն էին անզգամների և վարկաբեկվածների,

որոնց փառքը մարել է երկրում։

⁹ Հիմա քնար եմ դարձել ձեռքներին,

և իմ մասին են նրանք բամբասում։

¹⁰ Հեռու մնացին՝ զզվելով ինձնից,

և չքաշվեցին դեմքիս թքելուց,

¹¹ քանի որ Տերը, կապարճը բացելով, խոցոտեց ինձ,

և դեմքիս սանձ ուղարկեց։

¹² Վեր են կացել արդ ողջ սերունդներով,

ոտքերն են պարզել ու ճամփա ելել՝ հարձակվելու վրաս։

¹³ Նրանց կորստյան կածաններին իմ կածանները հարեցին։

Մերկացրեց Տերն ինձ իմ պատմուճանից,

¹⁴ խոցոտեց իր նետերով՝

վարվելով ինձ հետ, ինչպես կամեցավ։

Ախտերով եմ վարակված.

¹⁵ ցավերս հետ են դարձել։

Քամու պես անցավ հույսը ինձանից,

և մշուշի պես՝ իմ փրկությունը։

¹⁶ Հոգիս շուրջբոլորս պիտի թափվի։

Ինձ համակել են ցավալից օրեր։

¹⁷ Գիշերը ոսկորներս են խաշվում.

ջղերս են քայքայվել։

¹⁸ Տերն իր զորությամբ ձեռքը գցել է իմ պատմուճանին

ու պատմուճանիս ժապավենի պես պատել է շուրջս։

¹⁹ Կավի տեղ է ընդունում նա ինձ.

հողն ու մոխիրն են բաժինս դարձել։

²⁰ Աղաղակեցի քեզ, բայց չլսեցիր ինձ.

կանգնեցին նրանք ու դիտեցին ինձ։

²¹ Իմ նկատմամբ դու անողորմ եղար.

Հզոր ձեռքովդ հարվածեցիր ինձ։

²² Ցավի մեջ դրեցիր ինձ,

զրկեցիր փրկության միջոցից։

²³ Գիտեմ, որ մահը պիտի ջնջի ինձ,

քանզի երկիրն է տունը ամենայն մահկանացուի։

²⁴ Ու երանի թե կարողանայի ինքս ինձ կրթել

և կամ ուրիշին խնդրել, աղաչել, որ նույնը աներ։

²⁵ Ես ամեն աղքատի կարեկցում էի և հեծեծում,

երբ մարդուն վշտի մեջ էի տեսնում։

²⁶ Բարություն էի անում,

մինչդեռ ահա չար օրեր են ինձ պատահել։

²⁷ Իմ որովայնը եռում է ու չի հանդարտվում.

թշվառության օրերն են հասել ինձ վրա։

²⁸ Պիտի շրջեմ նեղացած սրտով, անսանձ բերանով.

ու հավաքույթի մեջտեղում կանգնած՝ ձայնս բարձրացնեմ։

²⁹ Համբարուների եղբայր եմ դարձել, ջայլամներին՝ ընկեր։

³⁰ Սաստիկ սևացել է մորթս հիմա,

ու ոսկորներս այրվել են տոթից։

³¹ Քնարս սուգի է շրջվել,

սիրտս և երգս՝ լացուկոծի մեջ»։

31

Հոբը ճակատը բաց է ներկայանում Աստծուն

¹ «Դաշինք կնքեցի աչքերիս հետ ես,

ու նրանք չնայեցին կույսի։

² Աստված բաժին է հանել ինձ վերուստ

և բավականին մեծ ժառանգություն՝ բարձունքից։

³ Անիրավ մարդու բաժինը կործանումը չէ՞,

կամ անօրենություն գործողների բաժինը վտարումը չէ՞։

⁴ Ինքը չէ՞ միթե, որ պարզ տեսնում է իմ ճանապարհը

ու հաշվի առնում քայլերս բոլոր։

⁵ Թե ծաղրողի հետ գնացած լինեմ,

թե իմ ոտքերը նենգության ճամփով շտապած լինեն,

⁶ բայց կշռվել եմ արդար կշեռքով,

և Տերը գիտի իմ անմեղությունը,

⁷ թե շեղված լինի ոտքս ճիշտ ուղուց,

սիրտս՝ ընթացած աչքիս հետևից,

թե իմ ձեռքով կպած լինեմ կաշառքի,

⁸ ապա թող ես սերմանեմ, ուրիշներն ուտեն,

ու անարմատ լինեմ երկրի վրա։

⁹ Թե գնացել է սիրտս ուրիշի կնոջ հետևից,

թե դարանակալ եմ եղել իր տան դարպասների մոտ,

¹⁰ ապա թող կինս նույնպես հաճելի լինի ուրիշի,

ու թող տառապեն իմ մանուկները.

¹¹ քանզի այլ մարդու կնոջ պղծելը

անզուսպ բարկության է լոկ արժանի.

¹² կրակ կվառվի իր մարմնի բոլոր անդամների մեջ.

որ կողմն էլ հասնի, հիմքից կջնջի։

¹³ Իրավունքն արդար թե անտեսել եմ

ես իմ ծառայի կամ իմ աղախնի,

որ իր խնդրով եկել է ինձ մոտ.

¹⁴ ի՞նչ եմ անելու, եթե Տերը հարցուփորձ անի ինձ,

կամ ի՞նչ պատասխան եմ տալու, եթե դատ անի։

¹⁵ Չէ՞ որ ինչպես ես եղա արգանդում, այնպես էլ նրանք,

նույն որովայնում եղան։

¹⁶ Իսկ այն խեղճին, որ կարիքի մեջ էր,

արդյոք երբևէ օգնության չեկա՞։

Թողեցի՞ արդյոք, որ այրու աչքերը ողբալուց մաշվեն։

¹⁷ Կամ թե պատառս մենա՞կ կերա ես

ու չհանեցի՞ բաժին որբերին։

¹⁸ Իմ երիտասարդ օրերից հոր պես սնունդ տվեցի,

մորս արգանդից չծնված՝ ուղի ցույց տվեցի։

¹⁹ Կորած մերկերին անտեսեցի՞ ես ու չհագցրի՞։

²⁰ Չքավորներն ինձ չօրհնեցի՞ն միթե,

նրանց թիկունքը խաշներիս խուզած բրդով չտաքացա՞վ։

²¹ Թե որբի վրա ձեռք եմ բարձրացրել՝

հաշվելով, թե շատ են օգնականներս,

²² ապա թող ուսս թափվի ուսոսկրից,

իսկ բազուկս էլ պոկվի արմունկից.

²³ քանզի ինձ Տիրոջ սարսափն է պատել,

ու նրա առաջ չեմ կարող հանգիստ կանգնել։

²⁴ Եթե հողիս մեջ ոսկի պահեցի,

հույս դրեցի թանկ քարերի վրա,

²⁵ թե ուրախացա հարստությանս վրա անսահման,

թե անթիվ գանձի վրա դրեցի ձեռքն իմ,

²⁶ չե՞նք տեսնում միթե, որ լուսավորող արեգակն անգամ հյուծվում է մի օր,

լուսինը՝ մաշվում. այդ նրանցից չէ,

²⁷ եթե գաղտնաբար սիրտս հրապուրվեց,

թե ձեռքս դրած բերանիս վրա՝ ես համբուրեցի,

²⁸ թող այն մեծ անօրենություն դիտվի ինձ համար,

որ սուտ եմ եղել Բարձրյալ Տիրոջ առջև։

Ուժ, կարողություն, խելք, իմաստություն Նրանից են լոկ։

²⁹ Թե ուրախացա գետնին թավալվող թշնամուս վրա,

և “վա՜շ” ասացի իմ սրտում,

³⁰ թող ականջներս լսեն անեծքն իմ,

թող արհամարհվեմ ու քամահրվեմ իմ ժողովրդից։

³¹ Եթե իմ մասին աղախիններս բազում անգամ ասեն՝

“Երանի՜ նրա մարմնից հագենանք”,

քանզի քաղցր էի ես նրանց համար.

³² օտարը դրսում չէր օթևանում.

իմ դուռը բաց էր ամեն եկվորի առաջ,

³³ թե թաքցրի ակամա գործած իմ մեղքերը.

³⁴ չէի ամաչում ես բազմությունից,

որ նրա առաջ չասեի դրանք,

եթե աղքատին ես դատարկ փեշով դուրս արեցի դռնից.

³⁵ երնե՜կ Տիրոջ ձեռքը հատուցեր ինձ,

կամ եթե մեկից առած մուրհակը,

³⁶ իբրև մի պսակ ուսերիս դրած՝ կարդալով

³⁷ պատառ-պատառ չարեցի, հետ չդարձրի այն՝ ոչինչ չառնելով իմ պարտապանից,

³⁸ թե իմ պատճառով հեծեծեց հողը,

թե ակոսները նրա լաց եղան,

³⁹ եթե կերա ես արդյունքը նրա առանց վճարի,

կամ թե վշտացրի հոգին երկրի Տիրոջ,

⁴⁰ ապա ցորենի փոխարեն եղինջ թող բուսնի այնտեղ,

գարու փոխարեն՝ մորենի»։

Եվ Հոբը դադարեց խոսելուց։

32

Եղիուսի խոսքը

¹ Նրա երեք բարեկամներն էլ լռեցին ու այնուհետև չխոսեցին Հոբի դեմ, որովհետև Հոբն արդար էր նրանց աչքին։ ² Բարաքիելի որդի Եղիուս Բուզացին՝ ավսիտացիների աշխարհից, Հռամի արյունակիցներից. սաստիկ զայրացավ Հոբի վրա, քանի որ նա իրեն արդար էր ցույց տալիս Տիրոջ առաջ։ ³ Նա սաստիկ բարկացավ նաև նրա երեք բարեկամների վրա, քանի որ Հոբին պատասխան չէին կարողացել տալ, նրա ամբարիշտ լինելը ցույց չէին տվել։ ⁴ Սակայն Եղիուսը հապաղեց Հոբի պատասխանը տալու, քանի որ մյուսներն իրենից ավելի տարեց էին։ ⁵ Եղիուսը տեսավ, որ այն երեք մարդկանց բերանում պատասխան չկա, ու նրա բարկությունը բորբոքվեց։

⁶ Բարաքիելի որդի Եղիուս Բուզացին նորից խոսեց ու ասաց.

«Ես երիտասարդ եմ տարիքով, իսկ դուք՝ ավելի երեց։

Դրա համար ես լուռ եմ մնացել՝ վախենալով ձեզ իմ իմաստությունը հայտնել։

⁷ Ասացի, թե խոսողները տարեց մարդիկ են

ու տարիներից ի վեր ճանաչել են իմաստությունը։

⁸ Սակայն այդպես էլ չէ. մարդիկ հոգի ունեն,

Ամենակալի շունչն է, որ ուսուցանում է դրանք։

⁹ Միայն տարեց մարդիկ չէ, որ իմաստուն են,

ոչ էլ ծերերն են միայն, որ ճշմարիտը գիտեն։

¹⁰ Դրա համար էլ ասացի. «Լսե՛ք ինձ, ու ես կհայտնեմ ձեզ, ինչ որ գիտեմ,

¹¹ ակա՛նջ դրեք իմ խոսքերին.

կասեմ ի լուր ամենքիդ, մինչև որ քննեք խոսքերս,

¹² թե ձեր չափ բան գիտեմ»։

Ահա ձեր մեջ ոչ ոք չկար, որ հանդիմաներ Հոբին,

նրա խոսքերի պատասխանը տար։

¹³ Չլինի թե ասեք՝ Տիրոջ իմաստությանը բան ենք ավելացրել։

¹⁴ Դուք եք մի մարդու թույլատրել այսպիսի խոսքեր ասելու։

¹⁵ Զարհուրեցին ու պատասխան չտվեցին այլևս.

բառերը պակասեցին նրանց։

¹⁶ Համբերեցին ու չխոսեցին, որովհետև մնացին առանց պատասխանի։

¹⁷ Եղիուսը նորից խոսեց ու ասաց.

¹⁸ «Դարձյալ խոսելու եմ, որովհետև լեցուն եմ խոսքերով,

որովհետև շունչս իմ ներսում ինձ սպանում է,

¹⁹ որովայնս տիկի մեջ դրված ու կապված նոր գինու պես եռում է,

կամ դարբինների փուքսի պես ուռել է։

²⁰ Շրթներս բաց անելով՝ խոսելու եմ, որ հանգստանամ.

²¹ ոչ մեկից չեմ ամաչելու, մարդկանցից էլ չեմ պատկառելու,

²² քանզի երեսպաշտություն անել չգիտեմ, այլապես ցեցն ինձ կուտի»։

33

Աստված զգուշացնում է մարդուն

¹ «Բայց դու, Հո՛բ, լսի՛ր, թե ի՛նչ եմ ասում, ակա՛նջ դիր իմ խոսքերին։

² Ահա բացեցի բերանս, ու խոսեց լեզուս։

³ Սուրբ է սիրտն իմ խոսքերով,

և իմ շուրթերի իմաստությունը հստակորեն կիմացվի։

⁴ Աստվածային հոգին է, որ ստեղծել է ինձ,

և Ամենակալի շունչն է, որ ուսուցանում է ինձ։

⁵ Եթե կարող ես, այս մասին տո՛ւր քո պատասխանը,

ապա թե ոչ համբերո՛ղ եղիր,

դու իմ դիմա՛ց կանգնիր, ես էլ՝ քո։

⁶ Դու էլ ինձ պես կավից ես ստեղծված.

նույն նյութից ենք ստեղծված։

⁷ Արդ, թող իմ ահը չհամակի քեզ,

ոչ էլ ձեռքս ծանրանա քեզ վրա։

⁸ Սակայն դու խոսեցիր իմ ականջին,

ու քո խոսքի ձայնը լսեցի ես։

⁹ Ասացիր. “Մաքուր եմ ու չեմ մեղանչել,

անարատ եմ, որովհետև անօրենություն չեմ արել։

¹⁰ Մեղադրանքներ է բարդել ինձ վրա Աստված ու ինձ հակառակորդ համարել։

¹¹ Կոճղի մեջ է դրել ոտքերս ու կապել բոլոր ճանապարհներս”։

¹² Ինչպե՞ս ես ասում, թե արդար ես, ու Տերը չի լսել քեզ։

Մինչդեռ հավիտենական է նա, որ մարդկանց վերևում է։

¹³ Նաև ասում ես, թե ինչո՛ւ իր ատյանում դեռ ականջ չի դրել քո բոլոր խոսքերին։

¹⁴ Տերը խոսում է մի անգամ,

և երկրորդ անգամ՝ երազի միջոցով

¹⁵ և կամ գիշերային այցելությամբ,

երբ սաստիկ արհավիրքներ են ընկնում մարդկանց վրա՝ անկողնում նիրհելիս,

¹⁶ այն ժամանակ մարդկանց միտքն է բացահայտում։

Այդպիսի ահավոր տեսիլքով ահա

զարհուրեցրեց նրանց՝

¹⁷ մարդուն անիրավությունից հետ կանգնեցնելու

և նրա մարմինը կործանումից փրկելու համար։

¹⁸ Այդպիսով նրան զերծ է պահում մահվանից,

որպեսզի նա պատերազմում չընկնի։

¹⁹ Դարձյալ կշտամբեց նրան անկողնային հիվանդությամբ,

ընդարմացում բերեց նրա բազմակույտ ոսկորներին։

²⁰ Թեև հոգին կերակուր պիտի տենչա,

բայց ինքը պիտի չկարողանա ուտելու սնունդ ակնկալել,

²¹ մինչև որ մաշվեն նրա մսերը, ու սոսկ ոսկորները երևան։

²² Նրա մարմինը մոտեցել է մահվան,

կյանքը՝ գերեզմանին։

²³ Եթե մահաբեր հազար հրեշտակներ էլ լինեն,

նրանցից ոչ մեկը նրան չի խոցի,

թե որ գիտակցի ու իր սրտով դառնա դեպի Տերը,

խոստովանի մարդն իր մեղքերը, ցույց տա իր անմտությունը,

²⁴ այն ժամանակ Տերը կպաշտպանի նրան, որ մահվան գիրկը չընկնի։

Կնորոգի նրա մարմինը, ինչպես ծեփը պատի,

ու նրա ոսկորները ծուծով կլցվեն։

²⁵ Կփափկացնի նրա մարմինը, ինչպես մարմինը մանկան,

ու մարդկանց մեջ կհաստատի նրան՝ երիտասարդացած։

²⁶ Երբ Տիրոջն աղերսի, կընդունվի նրա կողմից,

զվարթ դեմքով կմտնի խոստովանության,

քանի որ Աստված արդարության համար կհատուցի մարդկանց։

²⁷ Ապա կմեղադրի մարդն ինքն իրեն ու կասի.

“Այդ ինչե՜ր էի անում ես,

և իմ մեղանչումների համեմատ ըստ արժանվույն չպատժեց ինձ։

²⁸ Փրկեց հոգիս, որպեսզի այն ապականության մեջ չմտնի,

և որպեսզի կյանքս լույսը տեսնի”։

²⁹ Այս ամենն ահա կատարում է մարդու նկատմամբ Ամենազորը՝ երեք ճանապարհներով։

³⁰ Հոգիս փրկել է մահից, և կյանքս լույսի մեջ օրհնելու է նրան։

³¹ Ակա՛նջ դիր, Հո՛բ, լսի՛ր ինձ, կտրի՛ր ձայնդ, ու ես կխոսեմ։

³² Եթե բան ունես, պատասխա՛ն տուր ինձ,

քանի որ ուզում եմ, որ արդարանաս։

³³ Ապա թե ոչ, դու ինձ լսի՛ր, կտրի՛ր ձայնդ, և քեզ իմաստությունը կուսուցանեմ»։

34

Եղիուսը մեղադրում է Հոբին

¹ Եղիուսը նորից խոսեց ու ասաց.

² «Ո՛վ իմաստուններ, լսե՛ք ինձ,

և դուք՝ հանճարեղնե՛ր, ակա՛նջ դրեք.

³ քանզի ականջն է քննում խոսքերը,

իսկ կոկորդը կերակուրներն է ճաշակում։

⁴ Արդ, մենք մեզ համար ատյան ընտրենք

ու մեր մեջ իմանանք, թե ի՛նչն է բարի։

⁵ Քանի որ Հոբն ասաց. «Արդար եմ ես,

բայց Տերը մի կողմ է նետել իմ իրավունքները,

⁶ արդար դատաստան չի արել իմ հանդեպ.

նրա նետը մահացու է, թեև անիրավություն չեմ գործել»։

⁷ Արդ, կա՞ մարդ, որ Հոբի պես արհամարհանքն իբրև ջուր խմի՝

⁸ չմեղանչելով, ամբարշտություն չանելով,

անօրենություն անող մարդկանց գործերին չմասնակցելով,

չընթանալով ամբարիշտների հետ։

⁹ Չասես. «Ոչ մեկին պատիժ վրա չի հասնի,

մինչդեռ այցը Տիրոջ կողմից է լինելու»։

¹⁰ Դրա համար էլ, սրտո՛վ հանճարեղներ, ի՛նձ լսեք։

Այնպես թող չլինի, որ ես ամբարշտություն անեմ Տիրոջ հանդեպ

ու Ամենակալի առաջ աղմկեմ, թե արդար եմ։

¹¹ Յուրաքանչյուր մարդու, ըստ նրա արարքների, կհատուցի,

ըստ նրա վարքի կփոխադարձի նրան։

¹² Գուցե Տիրոջ մասին մտածում ես, որ կարող է անկարգ բանե՞ր անել,

կամ կաղավաղի՞ իրավունքն Ամենակալը։

¹³ Ո՞վ է ստեղծել երկիրը։

Ո՞վ է, որ ստեղծել է երկնքի ներքո ու միջոցի մեջ եղած ամեն բան:

¹⁴ Եթե կամենար սահմանափակել և հոգին իր մեջ պահել,

¹⁵ առհասարակ ամեն մարմին վերջ կգտներ,

ամեն մարմին կդառնար հող, որից ստեղծվել էր:

¹⁶ Իսկ եթե չես խրատվել, սա՛ էլ լսիր, ակա՛նջ դիր խոսքիս ու բառերիս:

¹⁷ Չե՞ս մտածում, որ նա, ով ատել է անիրավությունը,

խորտակել է նաև չարերին՝ լինելով հավիտենապես արդար:

¹⁸ Ամբարիշտ է նա, ով թագավորին ասում է. «Անիրավ ես դու»,

իսկ իշխաններին՝ է՛լ ավելի ամբարիշտ:

¹⁹ Նա չի պատկառել մեծապատիվ մարդկանցից,

ոչ էլ պատիվ է ընծայել երևելի մարդկանց կամ մեծարել։

²⁰ Իզուր կլինի ուրիշներին ձայն տալն ու աղերսելը,

որովհետև անօրենությամբ են շարժվել, խեղճերին խոտորեցրել.

²¹ քանզի նա տեսնում է մարդկանց գործերը,

որ սրանք են արել. նրանից ոչինչ ծածուկ չի մնում:

²² Եվ թաքնվելու տեղ չեն ունենա նրանք, ովքեր անօրենություն են գործում,

²³ որովհետև մարդու վրա ոչինչ չի դնելու բացի իրավունքից,

որովհետև Տերը տեսնում է ամեն ինչ,

²⁴ վերահասու է լինում անքննելի, փառավոր ու հրաշակերտ բաների,

որ թիվ ու հաշիվ չունեն:

²⁵ Ինքն է, որ ճանաչում է նրանց գործերը և գիշերվա կվերածի նրանց, ու խորտակվելու են:

²⁶ Խավարեցրել է ամբարիշտներին, և սրանք նշավակ եղան իրենց թշնամիների առաջ:

²⁷ Արդարև, նրանք շեղվել են Աստծու օրենքից,

նրա կարգ ու կանոնը չեն ճանաչել։

²⁸ Չեն հասցրել նրան աղաղակը տնանկի, բայց աղքատի բողոքը նա լսելու է:

²⁹ Թե ինքը լռություն պահի, ո՞վ է դատապարտելու,

թե դեմքը ծածկի, ո՞վ է նրան տեսնելու:

ժողովրդի խստասրտության պատճառով ազգերի ու մարդկանց վրա

³⁰ կեղծավորին է թագավոր կարգելու:

³¹ Եթե մեկն ասի Ամենազորին. «Պատժվել եմ, այլևս մեղք չեմ գործի.

³² Սխալներս, որ ես չեմ տեսնում, ցո՛ւյց տուր ինձ,

իսկ եթե անօրենություն եմ արել, այլևս չեմ անի»:

³³ Մի՞թե մեկը քեզնից դա պահանջելու է, որ մերժում ես:

Դու ես ընտրել, ոչ թե ես, իսկ եթե մի բան գիտես, ասա՛:

³⁴ Սրտով իմաստունները լսեցին այս, խելացի մարդը լսեց այս.

³⁵  «Բայց Հոբն իմաստությամբ չխոսեց, և նրա խոսքերը խելացի չեն»:

³⁶ Բայց հաշվի՛ առ, Հո՛բ,

և անզգամի պես մի՛ պատասխանիր դեռ,

³⁷ որպեսզի ձեր մեղքերը չավելացնեք.

Տիրոջ առաջ շատ բան խոսելն անօրենություն է համարվելու ձեզ համար»

35

Աստված անտարբեր չէ մարդու գործերի հանդեպ

¹ Եղիուսը նորից խոսեց ու ասաց.

² «Այդ ի՞նչն ես իրավունք համարել,

ո՞վ ես դու, որ ասում ես. «Արդար եմ Տիրոջ առաջ»,

³ կամ՝ «Մեղանչեցի, ի՞նչ անեմ»։

⁴ Կպատասխանեմ քեզ ու երեք բարեկամներիդ.

⁵ երկնքի՛ն նայիր ու տե՛ս,

նկատի՛ր ամպերը. որքա՜ն բարձր են քեզանից։

⁶ Եթե մեղք ես գործել, ի՞նչ ես անելու,

ու եթե բազում անիրավություններ ես արել, ի՞նչ կարող ես անել։

⁷ Արդ, եթե արդար ես, ի՞նչ ես տալու նրան,

կամ ինքն ի՞նչ է ստանալու քո ձեռքից։

⁸ Ամբարշտությունդ՝ քեզ նման մարդկանց,

արդարությունդ էլ մարդու որդիների համար օգուտ չունեն։

⁹ Շատերի կողմից զրպարտվածները կաղաղակեն,

աղաղակ կբարձրացնեն շատերի բազուկի պատճառով։

¹⁰ Սակայն մեկը չի ասել. «Ո՞ւր է Աստված, որ այս ամենն ստեղծել է

որ կարգում է գիշերային պահակության ժամերը,

¹¹ որ ինձ զատում է երկրի չորքոտանիներից

ու երկնքի թռչուններից»։

¹² Այն ժամանակ ձայն կտան, բայց չես լսի,

որովհետև ինչ որ պատահում է, տեղի է ունենում չարերի ամբարտավանությունից։

¹³ Տերը չի ուզում անկարգություններ տեսնել,

որովհետև Ամենակալն ինքը տեսնում է բոլորին,

¹⁴ ովքեր անօրենություն են գործում. և ինձ կփրկի։

Խնդիրքդ ներկայացրո՛ւ նրան,

եթե կարող ես գովել նրան այնպես, ինչպես Է։

¹⁵ Եվ արդ, քանի որ չկա մեկը, որ կրել է նրա բարկությունը,

մեկը, որ գիտակցել է իր ծանր հանցանքները,

¹⁶ ապա ուրեմն Հոբն էլ զուր է բացում բերանը

և իր անգիտությամբ ծանրացնում խոսքերը»։

36

Թե ինչպես է Աստված դաստիարակում մարդկանց

¹ Եղիուսը նորից խոսեց ու ասաց.

² «Ինձ դեռ մի փոքր բան է մնում,

որ քեզ սովորեցնեմ այն, ինչ դու չգիտես,

քանի որ մեջս դեռ ունեմ խոսքեր,

³ որ միտքս ընկալել է հեռու հեռվից։

Արդարությամբ ասելու եմ ⁴ ճշմարիտ բաներ

և ոչ թե լսված անիրական ու դատարկ խոսքեր։

⁵ Իմացի՛ր, որ Տերը չի մերժում անմեղին.

հզոր է իր զորությամբ.

⁶ ամբարիշտի կյանքը չի խնայելու

և պաշտպանելու է աղքատի իրավունքը։

⁷ Իր աչքը չի կտրի արդարից,

և ով որ իր առաջ լինի, թագավորների հետ գահին է բազմելու.

նրանց հաղթական է դարձնելու և բարձրացնելու։

⁸ Իսկ չարերը, ձեռնակապերով կաշկանդված,

թշվառության պարաններով են կապկպվելու։

⁹ Նրանց հայտնելու է իրենց արարքները,

նաև հանցանքները, որ սաստկացել են։

¹⁰ Լսելու է արդարին,

ու ասելու է, որ հետ կանգնեն անիրավությունից։

¹¹ Եթե լսեն ու իրեն ծառայեն,

իրենց օրերը բարիքների մեջ են ավարտելու,

տարիները՝ շքեղության մեջ։

¹² Բայց ամբարիշտներին չի ապրեցնելու,

որովհետև նրանք չուզեցին Տիրոջը ճանաչել,

որովհետև խրատվել էին, բայց չէին հնազանդվել։

¹³ Սրտով կեղծավորներն իրենց հանդեպ զայրույթ են գրգռելու,

ճիչ ու աղաղակ չեն բարձրացնելու,

որովհետև Տերը կապել է նրանց։

¹⁴ Նրանք երիտասարդ տարիքում են մեռնելու,

նրանց կյանքը խոցոտվելու է հրեշտակների կողմից

¹⁵ այն բանի համար, որ խեղճին ու անզորին են նեղել։

Տերը բարձրացնելու է հեզերի իրավունքները.

¹⁶ քեզ էլ փրկեց թշնամու երախից։

Իր տակ գտնվող անդունդներից ազատեց քեզ

ու առաջդ ճոխությամբ լի սեղան դրեց։

¹⁷ Չի պակասելու արդարների ուղիղ դատաստանը,

¹⁸ բայց զայրույթ է իջնելու ամբարիշտների վրա

անօրեն կաշառքի համար, որ ընդունում էին անիրավությամբ։

¹⁹ Թող քո միտքը կամովին երես չդարձնի խնդրանքներից,

երբ տկարները ցավի մեջ են։

Զորությամբ բոլոր օժտվածներին

²⁰ առաջ չտանես գիշերը,

որպեսզի ժողովուրդը նրանց փոխարեն դուրս չգա։

²¹ Այլ զգո՛ւյշ եղիր, գուցե անպատեհ բաներ անես,

որովհետև նրան փրկել ես աղքատությունից։

²² Ահա Ամենազորը կզորացնի իր զորությամբ,

որովհետև այն ո՞վ է, որ նրա պես ուժեղ է,

²³ կամ այն ո՞վ է, որ քննում է նրա գործերը,

կամ այն ո՞վ է, որ կասի. «Ինչ որ արել է, անիրավությամբ է արել»։

²⁴ Հիշի՛ր, շա՜տ մեծ են նրա գործերը,

որ հանձնված են արդար մարդկանց։

²⁵ Ամեն մարդ անձամբ է տեսել,

թե մարդիկ որքա՛ն են խոցոտված։

²⁶ Ահա, Ամենազորը շատ մեծ է,

բայց մենք չենք իմանա.

նրա տարիների թիվն անսպառ է։

²⁷ Նա հաշվել է անձրևի շիթերը,

և սրանք անձրևի տեսքով կլցվեն ամպերի մեջ։

²⁸ Երկինքը կհորդա.

ամպերին հովանի դարձրեց անթիվ մարդկանց վրա,

մեգ են դարձել մարդկանց վրա։

^28ա Ժամանակ է սահմանել անասունների համար,

և դրանք գիտեն ծնելու կարգը։

Այս բոլորի վրա զարմացած չէ՞ քո միտքը,

սիրտդ չի՞ դողում կրծքիդ տակ,

քանի որ նա կատարել է մեծ-մեծ բաներ, որ մենք չգիտեինք։

Ձյանը հրամայում է. «Իջի՛ր լեռան վրա»,

նաև ձմեռային անձրևներին,

որ ցույց տան իրենց զորությունը։

Ամեն մարդու միջոցով է վկայում այս բոլորը,

որպեսզի յուրաքանչյուր ոք իմանա իր թույլ լինելը։

²⁹ Իսկ դու կիմանա՞ս ամպերի սփռվելը

կամ նրա վրանի չափերը։

³⁰ Ահա իր լույսը գցում է նրա վրա

և ծովի խորքերն է ծածկել,

³¹ որպեսզի դրանցով դատի ժողովուրդներին,

կերակուր պարգևի զորացածին։

³² Ձեռքերով լույսն է ծածկել ու հրահանգ տվել,

թե դա ե՛րբ պետք է լինի։

³³ Իր բարեկամներին կպատմի դրա,

ինչպես նաև ինչքերի ու անիրավության մասին»։

37

¹ «Ու դրա վրա խռովվել է սիրտս,

շարժվել իր տեղից։

² Լսի՛ր Տիրոջ սրտմտության ու զայրույթի լուրը.

նրա բերանից խորհուրդ է դուրս գալու։

³ Երկնքի տակ ամեն ինչ նրա իշխանության տակ է,

իսկ նրա լույսը՝ երկրի ծագերի վրա։

⁴ Նրա հետևից մի ձայն է գոչելու,

որոտալու է իր ձայնի բարձրությամբ

և դրանք ուրիշներով չի փոխանակելու, որ լսելի դարձնի ի՛ր ձայնը։

⁵ Ամենազորը որոտալու է իր սքանչելի ձայնով,

քանի որ կատարել է մեծամեծ բաներ, որ մենք չգիտենք։

⁶ Ձյանը հրամայում է. «Իջի՛ր երկրի վրա»,

նաև ձմեռային անձրևներին, որ ցույց տան իրենց զորությունը։

⁷ Խափանում է ամեն մարդու ձեռքի գործը,

որպեսզի յուրաքանչյուր ոք իմանա իր թույլ լինելը։

⁸ Գազաններն իրենց որջերն են մտել,

խշտիների մեջ ծածկվել։

⁹ Անապատից փչում է պտտահողմը,

բարձրավանդակից՝ ցուրտը,

¹⁰ և Ամենազորի շնչից սառնամանիք է սփռվելու։

Ուղղություն է տալիս ջրերին, ինչպես կամենա,

¹¹ խիտ ամպերը ցիրուցան է անելու։

Մեգը ցրելու է նրա լույսը,

¹² իսկ ինքը դարձնելու է շրջանակները։

Ուր կամեցել, տնօրինել է դրանց գործը

և այն ամենը, ինչ կհրամայի նրանց։

Սրանք երկրի վրա կարգված են իր կողմից՝

¹³ խրատի համար կամ ողորմության.

բոլորը կգտնեն նրան։

¹⁴ Ակա՛նջ դիր սրանց, Հո՛բ, եկ զգուշացի՛ր Տիրոջ զորությունից։

¹⁵ Գիտենք, որ Աստված հաստատել է իր գործերը.

լույսն է ստեղծել խավարի մեջ։

¹⁶ Գիտե ամպերի էությունը։

Չարագործների հանցանքներն արհավիրք են։

¹⁷ Պատմուճանդ ինչո՞ւ է տաքանում,

երբ երկիրը հանգստանում է հարավային հողմից։

¹⁸ Կարո՞ղ ես նրա հետ մինչև ամպերը հասնել,

եղյամի նման զորացնել դրանք։

¹⁹ Բայց հենց ինչո՞ւ, դե հասկացրո՛ւ ինձ, ի՞նչ ենք ասելու նրան,

ու ապա դադարենք շատ բաների մասին խոսելուց։

²⁰ Մի՞թե մոտս մատյան կա, կամ դպի՞ր է կանգնած,

որ մարդկանց գրածը լռեցնեմ։

²¹ Ամեն մարդու չէ, որ լույսը տեսանելի է.

փայլածուն երկնքում է,

ինչպես որ լույսը՝ ամպերի վերևում։

²² Հյուսիսից ոսկեճաճանչ ամպերն են.

սրանց համեմատությամբ մեծ են Ամենակալի փառքն ու պատիվը։

²³ Չգիտենք նրա զորությանը նմանվող ուրիշ ոչ ոքի,

որ արդար դատելիս լինի, և դու չպե՞տք է լսես նրան։

²⁴ Դրա համար են մարդիկ նրանից երկյուղ կրում.

նրանից վախենում են նաև սրտով իմաստունները»։

38

Աստված անկենդան աշխարհի Տերն է

¹ Երբ Եղիուսը դադարեց խոսելուց,

Տերն ասաց Հոբին փոթորկի ու ամպի միջից.

² «Այդ ո՞վ է, որ իր խորհուրդները թաքցնում է ինձնից,

խոսքերը հավաքելով իր սրտում՝

կարծում է, թե ինձնից պահում է դրանք։

³ Տղամարդու պես պնդացրո՛ւ մեջքդ.

հարցեր եմ տալու քեզ, ու պատասխա՛ն տուր ինձ։

⁴ Որտե՞ղ էիր, երբ ես երկրի հիմքերն էի գցում։

Ասա՛ ինձ, եթե խելամիտ ես և իմաստուն։

⁵ Ո՞վ է սահմանել դրա չափը, եթե գիտես,

կամ ո՞վ է լար գցել դրա վրա։

⁶ Ինչի՞ վրա են հաստատվել դրա օղակները,

ո՞վ է անկյունաքարը դրել դրա վրա։

⁷ Երբ աստղերը ծնվեցին,

աստղերի բոլոր հրեշտակները մեծաձայն օրհնեցին ինձ,

իմ բոլոր հրեշտակներն էլ գովեցին։

⁸ Ծովը փակեցի դարպասներով,

երբ այն իր մոր որովայնից ծնվեց ու ելավ։

⁹ Մեգը նրան իբրև հանդերձ սահմանեցի,

մառախուղը՝ իբրև խանձարուր։

¹⁰ Սահմաններ դրեցի նրա համար՝ փականքներ ու դարպասներ,

¹¹ և ասացի. «Մինչև այդ վայրը կգաս ու առաջ չես անցնի.

այդտեղ՝ քո մեջ կխորտակվեն ալիքները քո»։

¹² Թե քո՞ կողքին կարգեցի լույսն առավոտի։

Արուսյակը տեսավ իր համար սահմանվածը՝

¹³ հասնել երկրի թևերի վրա,

թափ տալ ամբարիշտներին դրա վրայից։

¹⁴ Կամ թե դո՞ւ կավն առնելով ստեղծեցիր կենդանի և խոսուն արարածին

և զետեղեցիր երկրի վրա։

¹⁵ Մերժեցի՞ր լույսն ամբարիշտներին,

խորտակեցի՞ր բազուկներն ամբարտավանների։

¹⁶ Հասա՞ր ծովի ակունքին,

շրջեցի՞ր հետքերն անդունդների։

¹⁷ Քո առաջ ահով բացվելո՞ւ են դռները մահվան.

դժոխքի դռնապանները սարսելո՞ւ են քեզ տեսնելով։

¹⁸ Վերահասու լինելո՞ւ ես երկնքի ներքո եղած տարածությանը.

ասա՛ ինձ տեսնեմ՝ որքա՞ն է այն։

¹⁹ Ո՞րն է այն երկիրը, որտեղ լույսն է օթևանում,

կամ ո՞րն է տեղը խավարի։

²⁰ Տանելո՞ւ ես ինձ նրա սահմաններին,

եթե գիտես դրանց ճանապարհները։

²¹ Գուցե գիտե՞ս կամ ա՞յն ժամանակներում ես ծնվել.

քո օրերը բազո՞ւմ են։

²² Գնացե՞լ ես շտեմարանները ձյան,

կամ տեսե՞լ ես պահեստները կարկուտի։

²³ Կուտակե՞լ ես դրանցից՝ քո թշնամիների վրա հասնելու,

մարտի ու պատերազմի օրվա համար։

²⁴ Որտեղի՞ց է դուրս գալիս եղյամը,

կամ տարածվում հարավային հողմը երկնքի ներքո։

²⁵ Ո՞վ է պատրաստել սաստիկ անձրևների հոսանքները

և ճանապարհներն ամպրոպների,

²⁶ որ տեղան երկրի վրա,

ուր անմարդաբնակ անապատում ոչ ոք չկա,

²⁷ որ հագեցնի անկոխ ու ամայի հողը,

այնտեղ բխեցնի բույսը դալար։

²⁸ Ո՞վ է հայրն անձրևի,

և ո՞վ է, որ ծնել է ցողի շաղերին։

²⁹ Ո՞ւմ արգանդից է դուրս գալիս սառույցը,

և ո՞վ է երկնքում եղյամ ծնել,

³⁰ որ ջրի պես հոսելով իջնում է.

ո՞վ է հալեցնում երկնքի երեսը։

³¹ Վերահասու եղե՞լ ես Բազմաստեղյանի կարգին,

բացե՞լ ես քողը Հայկ [* և Ο΄ Օրիոն] համաստեղության։

³² Կամ Մազարովթը կարո՞ղ ես բացել իր ժամանակին,

Գիշերավարին իր վարսերից բռնելով տարե՞լ ես նրանց հետ։

³³ Կիմանա՞ս երկնքի բովանդակությունը

կամ առհասարակ երկնքի ներքո տեղի ունեցածները։

³⁴ Ձայնովդ կկանչե՞ս մեգը.

նա էլ, սարսուռով համակված, ջրի հորդությամբ կլսի՞ քեզ։

³⁵ Շանթեր կարձակե՞ս, ու կսլանա՞ն դրանք.

և կասե՞ն քեզ, թե ի՛նչ է սա։

³⁶ Ո՞վ է կանանց տվել ոստայնանկության հմտություն

ու երփներանգ գործվածքներ ստեղծելու շնորհ։

³⁷ Ամպերն ո՞վ է հաշվում իմաստությամբ։

Երկինքն ո՞վ է խոնարհեցրել երկրի վրա,

³⁸ հողը փոշու պես թափել։ Ես եմ կպցրել դա, ինչպես խորանարդ քարերը՝ իրար։

³⁹ Կերակուր կորսա՞ս առյուծների համար,

վիշապների մարմինը կկշտացնե՞ս,

⁴⁰ Սարսելու են իրենց որջերում

ու դարանակալ նստելու մայրիների անտառում։

⁴¹ Ո՞վ է ագռավների համար կեր պատրաստել,

որ նրանց ձագերը Տիրոջն աղաղակեն,

մոլորված՝ ուտելիք խնդրեն։

39

¹ Գիտե՞ս քարայծների ծննդաբերության ժամանակը

կամ լավ հետևե՞լ ես եղնիկների երկունքին։

² Կարո՞ղ ես լրիվ թվել նրանց ծնելու ամիսները,

կարո՞ղ ես մեղմացնել երկունքը նրանց։

³ Առանց երկյուղի կարո՞ղ ես կերակրել նրանց ձագերին,

նրանց զերծ պահել երկունքի ցավերից։

⁴ Կփախչե՞ն նրանց ձագերը,

ծնելով կբազմանա՞ն,

դուրս կգան ու այլևս չեն վերադառնա։

⁵ Ո՞վ է վայրի էշին բաց թողել ազատ,

ո՞վ է արձակել կապանքները նրա։

⁶ Նրան իբրև կայան սահմանել եմ առապարները,

իբրև բնակավայր՝ աղուտները։

⁷ Ծաղրում է նա քաղաքների խաժամուժին

ու չի լսում մեղադրանքները հարկահանների։

⁸ Դիտում է իր լեռնոտ արոտավայրերը

ու շրջում է՝ ամեն դալարիք փնտրելու։

⁹ Միեղջերուն հոժար կլինի՞ ծառայելու քեզ

կամ հանգստանալու քո մսուրի մեջ։

¹⁰ Չվանով նրան լուծ կկապե՞ս,

կամ նա ակոս կքաշի՞ քո դաշտում։

¹¹ Հույսդ կդնե՞ս նրա վրա,

քանի որ նրա զորությունը մեծ է,

նրան կթողնե՞ս գործերդ քո բոլոր։

¹² Կհավատա՞ս, որ սերմանվելիքներդ փոխհատուցելու է

ու հավաքելու քո կալում։

¹³ Թռչող սիրամարգերի թևե՜րը.

մի՞թե արագիլն ու ջայլամը չեն բեղմնավորվի.

¹⁴ որովհետև ջայլամն իր ձուն ածում է երկրի վրա,

հողով տաքացնում

¹⁵ ու մոռանում, թե ո՛ւր է ցրել,

և անապատի գազանները կոխոտում են այն։

¹⁶ Նա հեռանում է իր ձագերից,

կարծես իրենը չլինեն դրանք.

իր վաստակի կորստյան վախը չունի նա,

¹⁷ որովհետև Աստված նրանից վերցրել է իմաստությունը

և խելքի բաժին չի տվել նրան։

¹⁸ Բայց երբ դեպի վեր ու բարձունքներ բարձրանա,

կծիծաղի երիվարի ու նրա հեծյալի վրա։

¹⁹ Մի՞թե դու ես ձիուն օժտել զորությամբ,

պարանոցին զրահ հագցրել,

²⁰ վրան սպառազինություն գցել,

նրա լանջը փառավորել խիզախությամբ։

²¹ Որոտում է դաշտում ու դոփում,

զորությամբ դուրս է գալիս դաշտ։

²² Երբ նետերի է հանդիպում, արհամարհում է,

թրի առաջ էլ չի նահանջում։

²³ Նրա վերևում շողշողում են աղեղն ու սուրը,

շարժվում վահանն ու նիզակը։

²⁴ Իսկ ինքը բարկությամբ ապականում է երկիրը։

Չի հավատում, մինչև փողը չհնչի։

²⁵ Իսկ երբ հնչում է փողը, «վաշ-վա՜շ» է կանչում։

Հեռվից է առնում պատերազմի հոտը՝

սուրալով ու փնչացնելով։

²⁶ Քո խելքի՞ց է բազեն թևերը տարածելով կանգնած մնում օդում՝

անշարժ դիտելով հարավի կողմը,

²⁷ կամ քո՞ հրամանով է արծիվը բարձրանում,

իսկ անգղը նստում հանգստանում է իր բույնի վրա,

²⁸ քարանձավներում ու ծածուկ տեղերում։

²⁹ Այնտեղ է մնում ու կեր է փնտրում։

Նրա աչքերը դիտում են հեռվից,

³⁰ իսկ նրա ձագերն արյան մեջ են թաթախված։

Ուր որ դիակ գտնեն, իսկույն այնտեղ են հայտնվում»։

40

¹ Եվ Տերը՝ Աստված, խոսեց ու Հոբին ասաց.

² «Մի՞թե մեկը պիտի կարողանա իմ դատաստանը թյուրել,

պիտի հանդիմանի՞ Աստծուն ու նրա առաջ պատասխա՞ն պիտի տա»։

³ Հոբը նորից խոսեց ու Տիրոջն ասաց.

⁴ «Էլ ինչո՞ւ դեռ դատվել՝ կշտամբված ու հանդիմանված.

Տիրոջից եմ լսում այդ բաները ես։

Ոչնչություն եմ, ի՞նչ պատասխան պիտի տամ ես այդ մասին.

միայն պիտի ափիբերան լինեմ։

⁵ Բերանս բացեցի մի անգամ,

էլ երկրորդ անգամ բան չեմ ավելացնի»։

⁶ Տերը ամպերի միջից նորից խոսեց ու ասաց Հոբին.

⁷ «Այդպես չէ. տղամարդու պես պնդացրո՛ւ մեջքդ.

հարցեր եմ տալու քեզ, ու պատասխա՛ն տուր ինձ։

⁸ Մի կողմ մի՛ նետիր իմ դատաստանը

ու մի՛ մտածիր, թե ես քեզ այլ հայտնություն չեմ տվել,

քան այն, որ դու արդար լինես։

⁹ Թե՞ կարծում ես, որ Տիրոջ հետ նույն բազուկն ունես

կամ նրա հետ նույն ձայնով ես որոտում։

¹⁰ Դե ուրեմն բարձր կեցվա՛ծք ընդունիր,

զորություն, փառք ու պատի՛վ առ վրադ։

¹¹ Սուրհանդակնե՛ր ուղարկիր բարկությամբ,

խոնարհեցրո՛ւ բոլոր գոռոզներին,

խոնարհեցրո՛ւ և սառեցրո՛ւ ամբարտավաններին։

¹² Անմիջապես խորտակի՛ր ամբարիշտներին,

¹³ առհասարակ բոլորին հողի մեջ ծածկի՛ր իսպառ,

նրանց երեսներն անարգանքո՛վ ողողիր։

¹⁴ Ընդունե՞մ արդյոք, որ աջդ կարող է փրկել։

¹⁵ Իսկ ահա քո առաջն է,

որովհետև գազաններն արջառի պես խոտ են ճարակում։

¹⁶ Ահա նրա ուժը մեջքին է,

զորությունը՝ որովայնի պորտի շուրջը։

¹⁷ Իր պոչը նոճու պես տնկել է,

¹⁸ ջլերն իրար են հյուսված,

կողերը պղնձից են, ողնաշարը՝ ձույլ երկաթից։

¹⁹ Տիրոջ արարածների սկիզբը նա է՝

խաղալիք դարձած հրեշտակների ձեռքին։

²⁰ Ապառաժ լերան վրա հասնելով՝

տարտարոսում չորքոտանիների խրախճանք է սարքել։

²¹ Տեսակ-տեսակ ծառերի տակ է քուն մտնում,

շամբի, եղեգի ու կնյունի տակ։

²² Նրա գլխավերևում հովանի են դառնում մեծամեծ ծառեր՝

անտառով մեկ, և բարդու սյուները։

²³ Հեղեղ էլ լինի, նա չի զգա։

Անձնապաստան է. եթե Հորդանան գետն էլ դեպի իր բերանը դիմի,

²⁴ իր ակնակապիճների մեջ կառնի այն,

երբ նա խուսափի, կծակե՞ս նրա ռունգերը։

²⁵ Կարո՞ղ ես կարթով բարձրացնել վիշապին,

նրա դնչին պախուրց կդնե՞ս։

²⁶ Փականք կդնե՞ս նրա քթին։

Սանձ կանցկացնե՞ս նրա բերանին։

²⁷ Քեզ հետ կխոսի՞ հեզությամբ և քաղցր լեզվով։

²⁸ Հետդ ուխտ կդնի՞։

Նրան քեզ իբրև հավիտենական ծառա կնվաճե՞ս։

²⁹ Նրա հետ կխաղա՞ս, ինչպես թռչնի հետ, կամ ձագի պես թելով կկապե՞ս նրան։

³⁰ Ազգեր կկերակրվեն նրանով,

և փյունիկեցիների տոհմերը նրան իրենց մեջ կբաժանեն։

³¹ Բոլոր նավաստիները, մեկ տեղում հավաքվելով, նրա պոչից մի թեփ անգամ չեն պոկի.

նրա գանգը ձկնորսների նավերում անգամ չի դրվի։

³² Դու ձեռքդ նրա վրա կդնես՝ հիշելով պատերազմը՝

նրա մարմնի պատճառով հարուցվելիք, որ էլ երբեք չկրկնվի։

41

¹ Չես տեսել դու նրան, ոչ էլ կզարմանաս իմ ասած այս խոսքերի վրա։

² Չես երկնչի, որովհետև ես եմ այդ բոլորը պատրաստել։

Բայց ո՞վ է, որ ինձ պիտի հակառակվի,

³ կամ ո՞վ է, որ ինձ պիտի դիմադարձի ու դիմանա,

երբ այն ամենը, ինչ որ կա երկնքի ներքո, իմն է։

⁴ Հանուն նրա ես չեմ լռելու։

Հզորի խոսքը ողորմած պիտի լինի իր հավասարի նկատմամբ։

⁵ Ո՞վ կպատռի նրա դիմակը,

և ո՞վ կմտնի նրա փակ պատյանից ներս։

⁶ Ահն է իշխում նրա ատամների շուրջբոլորը.

⁷ փորը պղնձե վահան է,

հոդերը՝ սուր քարեր,

⁸ մեկը մյուսի հետևից կպած են,

նրա միջով օդ չի անցնի։

⁹ Ասես եղբայրն իր եղբոր հետ գնա.

իրարից կբռնեն ու չեն բաժանվի։

¹⁰ Նրա փռնչոցից փայլակներ են դուրս թռչում.

նրա աչքերն Արուսյակի տեսք ունեն։

¹¹ Նրա բերանից վառված լապտերներ են դուրս ժայթքում,

և հրեղեն շանթեր են արձակվում։

¹² Նրա ռունգերից, ինչպես հնոցի կրակից, ծուխ է ելնում։

¹³ Ինքը կայծակ է,

և բերանից բոց է դուրս գալիս։

¹⁴ Նրա պարանոցում զորությունն է հաստատված.

նրա առջևից կործանումն է ընթանում։

¹⁵ Նրա մարմնի անդամները ամուր կպած են իրար.

եթե մեկը վրան ընկնի, նա չի էլ խլրտա,

¹⁶ որովհետև նրա սիրտն ապառաժ քար է կտրել

և դարբնի սալի նման անշարժ, հաստատուն է։

¹⁷ Երբ խլրտա, ահը կհամակի երկրի գազաններին, չորքոտանիներին ու զեռուններին։

¹⁸ Թե նրան տեգեր, զենքեր ու նիզակներ հանդիպեն, վնաս չեն հասցնի,

¹⁹ որովհետև նա երկաթը հարդ է համարում, պղինձը՝ փտած փայտ։

²⁰ Նրան չի խոցում պղնձե աղեղը։

Ռմբաքարը նա խոտի տեղ է ընդունում,

²¹ լախտը՝ եղեգի։

Ծիծաղում է նա հրալից շարժման վրա։

²² Սուր տեգերը նրա համար նման են անկողնի։

Ծովի ամբողջ ոսկին նրա տակ՝ իբրև անհամար կավ։

²³ Անդունդները կաթսայի պես է եռացնում։

Ծովը ոչնչություն է համարում,

²⁴ անդնդային տարտարոսը՝ մի գերի, անդունդները՝ զբոսավայր։

²⁵ Երկրի վրա չկա բան, որ նման լինի նրան։

Նա ստեղծվել է իբրև խաղալիք իմ հրեշտակների համար։

²⁶ Տեսնում է ամեն բարձունք,

և ջրերում եղած ամեն ինչի թագավորն ինքն է»։

42

Հոբը խոստովանում է իր անկարողությունը

¹ Հոբը նորից խոսեց ու Տիրոջն ասաց.

² «Գիտեմ, որ ամենակարող ես,

և անհնարին ոչինչ չկա քեզ համար։

³ Քեզնից ո՞վ կծածկի իր միտքը,

խոսք կխնայի ու կկարծի, թե կարող է թաքցնել քեզանից։

Ո՞վ կասի ինձ, ինչ որ չգիտեմ,

մեծ ու զարմանալի բաներ, որոնց ես հասու չէի։

⁴ Արդ, լսի՛ր ինձ, Տե՛ր. թող ես էլ խոսեմ, հարցնեմ քեզ և սովորեցրո՛ւ ինձ։

⁵ Սրանից առաջ ես ականջներովս էի լսել քո մասին,

բայց հիմա աչքերս տեսան քեզ։

⁶ Այդ պատճառով արհամարհեցի անձս և մաշվեցի.

Ինքս ինձ հող ու մոխիր եմ համարում»։

Տերը կշտամբում է երեք իմաստուններին

⁷ Տերը Հոբին այս բաները ասելուց հետո դարձավ Եղիփազ Թեմնացուն. «Մեղանչեցիր դու, նաև քո երկու բարեկամները, քանի որ իմ առաջ ճշմարիտ բան չասացիք, ինչպես իմ ծառա Հոբը։ ⁸ Բայց հիմա յոթ զվարակ առե՛ք ու յոթ խոյ, գնացե՛ք իմ ծառա Հոբի մոտ, ու թող նա ողջակեզ անի ձեզ համար, իմ ծառա Հոբը թող նաև աղոթի ձեզ համար, քանի որ, եթե ես նկատի ունեցած չլինեի նրան, ու նրա համար չլիներ այս, ես արդարև կորստի մատնած կլինեի ձեզ, որովհետև իմ ծառա Հոբի մասին ճշմարիտ բաներ չասացիք»։

⁹ Եղիփազ Թեմնացին, Բաղդատ Սավքեցին ու Սովփար Մինեցին գնացին ու արեցին այնպես, ինչպես Տերն էր հրամայել նրանց։ Եվ թողություն շնորհեց նրանց մեղքերին՝ Հոբի համար։

Տերը վերականգնում է Հոբին

¹⁰ Ու Տերը ճոխացրեց Հոբին, և երբ նա աղոթեց իր բարեկամների համար, Տերը թողություն շնորհեց նրանց մեղքերին։ Տերը կրկնակի ավելի շատ տվեց, քան այն հարստությունը, որ առաջ Հոբն ուներ։ ¹¹ Նրա բոլոր եղբայրներն ու քույրերը լսեցին այն բոլոր դեպքերի մասին, որ պատահել էին նրան, եկան մոտը, եկան նաև բոլոր նրանք, ովքեր առաջ ճանաչում էին նրան։ Կերան և խմեցին նրա մոտ, մխիթարեցին նրան ու զարմացան այն բոլոր բաների վրա, որ նրա գլխին բերել էր Տերը։ Յուրաքանչյուրը նրան մի գառ տվեց ու չորսդրամյա անդրոշմ ոսկի։ ¹² Տերը Հոբի կյանքի վերջին շրջանն ավելի օրհնեց, քան առաջին շրջանը. նրա հոտի մեջ եղան տասնչորս հազար ոչխար ու այծ, վեց հազար ուղտ, հազար լուծ եզ, հազար մատակ էշ։ ¹³ Նա ունեցավ յոթ տղա և երեք դուստր։ ¹⁴ Առաջին դստերը Տիվ կոչեց, երկրորդին՝ Կասիա, իսկ երրորդին՝ Ամաղթեղջյուր։ ¹⁵ Եվ երկնքի ներքո Հոբի դուստրերի պես ու նրանցից ավելի գեղեցիկներ չգտնվեցին։ Հոբն իր դուստրերին ժառագության բաժին տվեց իրենց եղբայրների նման։

¹⁶ Հոբն այն հարվածներից հետո ապրեց հարյուր յոթանասուն տարի. նա ապրեց երկու հարյուր քառասունութ տարի։ Հոբը տեսավ իր զավակներին, զավակների զավակներին, մինչև չորրորդ սերունդը։ ¹⁷ Ու վախճանվեց Հոբն իր օրերը ապրած, խոր ծերության մեջ։[56]

^17ա Նաև գրված է, որ նա էլ հարություն է առնելու նրանց հետ, ում Տերը հարություն պիտի տա։

Սա թարգմանված է ասորերենից։ Հոբը բնակվում էր Ավստա երկրում, եդովմացիների ու արաբների սահմաններում։ Առաջ նրա անունը Հովբաբ էր։ Արաբ կին առնելով՝ որդի ունեցավ, որի անունն էր Եննով։ Նրա հայրը Զարեհն էր՝ Եսավի որդու որդին։ Նրա մայրը բոսորացի էր։ Այնպես որ նա Աբրահամից սկսած՝ հինգերորդ սերունդն էր։

Սրանք են այն թագավորները, որ թագավորեցին Եդովմում. առաջինը՝ Բեովրի Բաղակը, սրա քաղաքի անունն էր Դենաբա, Բաղակից հետո՝ Հովբաբը, որ Հոբ կոչվեց, սրանից հետո՝ Ասովմը, որ թեմնացիների երկրի զորավարն էր, սրանից հետո՝ Բարադի որդի Ադադը, որ Մադիամին ջարդեց Մովաբի դաշտում. նրա քաղաքի անունն էր Գեթեմ։ Իսկ այն բարեկամները, որ նրա մոտ եկան, սրանք էին՝ Եղիփազը՝ թեմնացիների արքան՝ Եսավի որդիներից, սավքեցիների բռնակալ Բաղդատը, մինեցիների արքա Սովփարը։

Ավարտվեց Հոբի գիրքը։

ՍԱՂՄՈՍՆԵՐ

1

¹ Երանելի է այն մարդը,

Որ չհետևեց ամբարիշտների խորհրդին

Եվ չգնաց մեղավորների ճանապարհով

Եվ չնստեց չարակամների աթոռին։

² Այլ նրա կամքը Տիրոջ օրենքների համաձայն է,

Եվ նրա օրենքների մասին է խորհում գիշեր ու ցերեկ։

³ Նա ջրի հոսանքի վրա տնկված ծառի է նման,

Որն իր պտուղը ժամանակին կտա.

Նրա տերևը չի թափվի,

Եվ ամեն ինչ, որ կատարի,

Կհաջողվի նրան։

⁴ Բայց այդպես չեն ամբարիշտները,

Ո՛չ, այլ նման են քամուց քշված

Եվ երկրի երեսից սրբված հողմափոշու։

⁵ Դրա համար ամբարիշտները

Հարություն չեն առնի դատաստանի համար,

Ոչ էլ մեղավորները արդարների ժողովում կլինեն։

⁶ Որովհետև Տերը ճանաչում է

Արդարների ճանապարհը,

Մինչդեռ ամբարիշտների ճանապարհները կկորչեն։

2

¹ Հեթանոսներն ինչո՞ւ խռովվեցին,

Եվ ժողովուրդները դատարկ բաներ խորհեցին,

² Երկրի թագավորները ոտքի ելան,

Եվ իշխանները հավաքվեցին ժողովի

Տիրոջ և նրա Օծյալի դեմ.

³ «Փշրե՛նք նրանց կապանքները

Եվ մեզնից թոթափե՛նք նրանց լուծը»։

⁴ Բայց երկնքում բնակվողը ծիծաղելու է նրանց վրա,

Տերն արհամարհելու է նրանց։

⁵ Այն ժամանակ նա խոսելու է նրանց հետ

Իր բարկությամբ

Եվ խռովեցնելու է նրանց իր զայրույթով.

⁶ «Ես Սիոնում իմ թագավորին կարգեցի

Սուրբ լեռան վրա»։

⁷ Հռչակում եմ այն, որ Տերն ասաց ինձ.

«Դու ես իմ որդին,

Եվ ես այսօր ծնեցի քեզ։

⁸ Խնդրի՛ր ինձանից,

Եվ հեթանոսներին քեզ կտամ իբրև ժառանգություն,

Եվ իշխանություն՝ երկրի բոլոր ծագերում։

⁹ Պիտի հովվես նրանց երկաթյա գավազանով,

Որպես բրուտի անոթ՝ պիտի փշրես նրանց»։

¹⁰ Արդ, ո՜վ թագավորներ, դա՛ս առեք,

Եվ դուք, երկրի դատավորնե՛ր, խրատվե՛ք,

¹¹ Երկյուղով ծառայե՛ք Տիրոջը

Եվ դողալով ցնծացե՛ք նրա առաջ,

¹² Ընդունե՛ք նրա խրատը,

Որպեսզի Տերը չբարկանա,

Եվ դուք չկորչեք արդարության ճանապարհներից։

Այնժամ, երբ նրա բարկությունը բորբոքվի,

¹³ Երանի՜ նրանց, ովքեր իրենց հույսը

Տիրոջ վրա դրած կլինեն։

3

Առավոտյան աղոթք

¹ Սաղմոս Դավթի, երբ նա փախել էր իր որդու՝ Աբիսողոմի երեսից

² Տե՜ր, որքա՜ն շատացան ինձ նեղողները,

Եվ շատերն իմ դեմ ելան։

³ Շատերն իմ մասին ասում էին.

«Սրա համար իր Աստծով չկա՛ փրկություն»։

⁴ Բայց դու, ո՜վ Տեր, իմ օգնականն ես,

Իմ փառքն ես և գլուխս բարձր պահողը։

⁵ Ես ամբողջ ձայնով Տիրոջն աղոթեցի,

Եվ նա լսեց ինձ իր սուրբ լեռից։

⁶ Պառկեմ քնեմ, թե արթնանամ,

Տերն իմ պահապանն է։

⁷ Ես չեմ վախենա նրանց բյուրավոր զորքերից,

Որոնք, շուրջս բոլորած, պաշարել են ինձ։

⁸ Վե՛ր կաց, Տե՜ր, և փրկի՛ր ինձ, ո՜վ իմ Աստված,

Որովհետև դու հարվածեցիր բոլորին,

Ովքեր թշնամի էին ինձ առանց պատճառի,

Եվ մեղավորների ատամները կփշրես։

⁹ Տիրոջից է փրկությունը.

Քո օրհնությունը թող քո ժողովրդի վրա լինի։

4

Երեկոյան աղոթք

¹ Դպրապետին՝ քնարով։ Սաղմոս Դավթի

² Երբ քեզ դիմեցի, դու ինձ լսեցիր

Ըստ արդարության, ո՜վ իմ Աստված.

Նեղությանս մեջ ինձ խաղաղեցրիր,

Ողորմի՛ր ինձ, լսի՛ր իմ աղոթքը։

³ Մարդկա՛նց որդիներ,

Մինչև ե՞րբ պիտի խստասիրտ մնաք,

Ինչո՞ւ եք սիրում նանրությունը

Եվ սուտը փնտրում։

⁴ Իմացե՛ք, որ Տերը հրաշքներ գործեց

Իր սրբի համար,

Եվ երբ Տիրոջը դիմեմ, նա ինձ կլսի։

⁵ Բարկանալիս մի՛ մեղանչեք,

Ինչ որ ձեր սրտերում խորհեք,

Զղջացե՛ք ձեր անկողիններում։

⁶ Արդարության զոհե՛ր մատուցեք

Եվ ձեր հույսը Տիրոջ վրա՛ դրեք։

⁷ Շա՜տ են ասողները,

Թե ո՛վ մեզ բարություն պիտի ցույց տա։

Քո դեմքի լույսը մեզ վրա բացվեց,

⁸ Եվ ուրախություն տվեցիր մեր սրտերին։

Նրանց հագեցրիր ցորենի, գինու և ձիթենու արդյունքով։

⁹ Խաղաղությամբ ու վստահությամ

Պիտի ննջենք և արթնանանք.

¹⁰ Ո՜վ Տեր, միայն դու ես

Ապահովության մեջ պահում մեզ։

5

Առավոտյան աղոթք

¹ Դպրապետին՝ ժառանգորդների համար։ Սաղմոս Դավթի

² Ո՛ւնկն դիր, Տե՜ր, իմ խոսքերին

Եվ նկատի՛ առ իմ աղաղակը։

³ Հոգածո՛ւ եղիր աղոթքիս ձայնին,

Թագավո՛ր իմ, Աստվա՜ծ իմ։

Աղաչում եմ քեզ, Տե՜ր,

⁴ Առավոտ վաղ լսի՛ր ձայնս.

Առավոտ վաղ պատրաստ կլինեմ

Քո առաջ կանգնելու։

⁵ Դու անօրենություն չես կամենում,

Չարերը քեզ մոտ չեն բնակվում,

⁶ Եվ անօրենները չեն բնակվելու քո աչքերի առջև։

Անօրենություն գործողներին ատում ես դու,

⁷ Կորստի ես մատնում ստախոսներին։

Արյունահեղ և նենգավոր մարդը, Տե՜ր,

Պիղծ է քեզ համար,

⁸ Բայց ես քո առատ ողորմության շնորհիվ

Տունդ կմտնեմ,

Կերկրպագեմ քո երկյուղով

Քո սուրբ տաճարում։

⁹ Տե՜ր, առաջնորդի՛ր ինձ քո արդարությամբ,

Որպեսզի իմ թշնամիները զղջան,

Ուղի՛ղ արա իմ ճանապարհները քո առաջ։

¹⁰ Նրանց բերանների մեջ

Ճշմարտություն չկա,

Եվ նրանց սրտերը նանրացած են,

Նրանց կոկորդները բաց են գերեզմանի պես,

Նրանք նենգավոր եղան իրենց լեզուներով։

¹¹ Դատի՛ր նրանց, ո՜վ Աստված,

Թող նրանց խորհուրդները կործանվեն։

Իրենց ամբարշտությունների պատճառով

Մերժի՛ր նրանց,

Որովհետև քեզ դառնացրին։

¹² Ուրախ պիտի լինեն քեզ հուսացողները

Եվ հավիտյան ցնծան,

Եվ դու նրանց մեջ պիտի բնակվես։

Քո անունը սիրողները բոլորն էլ

Պիտի հպարտանան քեզանով,

¹³ Որովհետև դու պիտի օրհնես արդարին,

Ո՜վ Տեր, քո հաճության զրահով պսակեցիր մեզ։

6

Ապաշխարության աղոթք

¹ Դպրապետին՝ քնարով, ութ տոն ցածր՝ թավ եղանակով։ Սաղմոս Դավթի

² Տե՛ր, երբ սրտմտես, ինձ մի՛ հանդիմանիր,

Եվ երբ բարկանաս, ինձ մի՛ պատժիր։

³ Ողորմի՛ր ինձ, Տե՜ր, որովհետև հիվանդ եմ ես,

Բժշկի՛ր ինձ, որովհետև ցնցվեցին ոսկորներս,

⁴ Իմ հոգին խռովվեց հույժ, իսկ դու, Տե՛ր, մինչև ե՞րբ...

⁵ Դարձի՛ր, Տե՜ր, և փրկի՛ր ինձ,

Ապրեցրո՛ւ ինձ, Տե՜ր, քո ողորմությամբ,

⁶ Որովհետև մահվան մեջ կամ մեռյալների աշխարհում չկա մեկը,

Որ հիշի ու խոստովանի քեզ։

⁷ Ես հոգնեցի իմ հեծության մեջ,

Ամեն գիշեր լվացի մահիճս,

Իմ արցունքներով թրջեցի անկողինս։

⁸ Սրտմտությունից աչքս խռովվեց,

Եվ ես մաշվեցի

Իմ բոլոր թշնամիների պատճառով։

⁹ Հեռացե՛ք ինձանից բոլորդ,

Որ անօրենություն եք գործում,

¹⁰ Որովհետև Տերը լսեց հեկեկանքս,

Լսեց աղաչանքս և աղոթքս ընդունեց։

¹¹ Թող ամաչեն ու սարսափի մատնվեն

Իմ բոլոր թշնամիները,

Թող պարտված նահանջեն և ամոթով մնան շուտով։

7

¹ Սաղմոս Դավթի, որ Տիրոջն ասաց Հերմինի որդի Քուսի խոսքերի առիթով

² Տե՛ր, Աստվա՛ծ իմ, հույսս քեզ վրա դրեցի,

Փրկի՛ր ինձ և ազատի՛ր իմ բոլոր հալածիչներից։

³ Գուցե և առյուծի նման հափշտակեն անձն իմ,

Ու չգտնվի մեկը, որ փրկի ինձ և պահպանի։

⁴ Տե՛ր, Աստվա՛ծ իմ, եթե արել եմ այս բանը.

Եթե իմ ձեռքերով անօրենություններ եմ գործել,

⁵ Եթե իմ հանդեպ չարիք չգործածին երբևէ չարությամբ եմ հատուցել,

Թող ես էլ կորչեմ իմ թշնամիների հետ։

⁶ Ուրեմն ինձ թող հալածի թշնամին,

Հասնի և կորստի մատնի կյանքն իմ,

Իսկ փառքս հողին հավասար դարձնի։

⁷ Ելի՛ր, Տե՛ր, բարկությամբ քո

Եվ բարձրացի՛ր՝ վերացնելու իմ թշնամիներին։

Արթնացի՛ր, Տե՛ր, Աստվա՛ծ իմ,

Հանուն քո պատվիրած հրամանների։

⁸ Եվ ժողովուրդների բազմությունները շուրջդ կհավաքվեն,

Դրա համար, ո՜վ Տեր, բազմի՛ր բարձունքներում,

⁹ Որովհետև Տերն է դատում իր ժողովրդին։

Ո՜վ Տեր, ինձ դատի՛ր ըստ իմ արդարության

Եվ ըստ իմ մեջ եղած անբծության։

¹⁰ Թող մեղավորների չարիքները վերջ գտնեն,

Իսկ արդարին հաջողությո՛ւն տուր։

Դու քննում ես սրտերն ու երիկամները,

Ո՜վ արդար Աստված։

¹¹ Հիրավի ինձ օգնողն Աստված է,

Որ փրկում է նրանց, ովքեր ուղիղ են սրտով։

¹² Դատավոր է Աստված՝ հզոր, արդար և երկայնամիտ,

Որն իր զայրույթը չի թափում անտեղի։

¹³ Իսկ եթե նրան չդառնանք,

Սրված է սուրն իր, աղեղն իր՝ լարված։

¹⁴ Նա պատրաստել է գործիքը մահվան,

Իսկ իր նետերը կրակ են արձակում։

¹⁵ Ահավասիկ անօրենություն երկնեց,

Ցավ հղացավ և անիրավություն ծնեց։

¹⁶ Գուբ փորեց և խորացրեց,

Բայց ինքը պիտի ընկնի այն խորխորատի մեջ,

Որ ինքը պատրաստեց։

¹⁷ Նրա գլխին կդառնան իր ցավերը,

Նրա գագաթին կիջնեն իր անօրենությունները։

¹⁸ Պիտի գովաբանեմ Տիրոջը

Ըստ նրա արդարության,

Սաղմոս պիտի ասեմ Բարձրյալ Տիրոջ անվանը։

8

¹ Դպրապետին՝ նվագարանով։ Սաղմոս Դավթի

² Տե՛ր, Տե՜ր մեր, ի՜նչ սքանչելի է քո անունը

Ամբողջ աշխարհում։

Բարձրացավ քո մեծ վայելչությունը երկնքից էլ վեր։

³ Մանկահասակ և կաթնակեր մանուկների բերանից

Թող օրհներգություն ելնի ընդդեմ քո թշնամիների,

Որ կործանվեն հակառակորդն ու թշնամին։

⁴ Երկինքը տեսնեմ՝ գործը մատներիդ,

Աստղերն ու լուսինը, որ դո՛ւ հաստատեցիր։

⁵ Ո՞վ է մարդը, որ հիշում ես նրան,

Կամ մարդու որդին, որ այցի գաս նրան։

⁶ Քո հրեշտակներից փոքր-ինչ խոնարհ ստեղծեցիր նրան,

Փառքով ու պատվով պսակեցիր նրան

⁷ Եվ կանգնեցրիր նրան քո բոլոր ձեռակերտների վրա։

Ամեն ինչ հնազանդ դարձրիր նրա ոտքերի տակ՝

⁸ Ոչխար, արջառ և ամեն տեսակի վայրի անասուն,

⁹ Երկնի թռչուններ ու ծովի ձկներ, որ շրջում են ուղիներում ծովի։

¹⁰ Տե՜ր, Տե՜ր մեր, ի՜նչ սքանչելի է

Քո անունը երկրի վրա։

9

¹ Դպրապետին՝ որդու գաղտնիքների մասին։ Սաղմոս Դավթի

² Ո՜վ Տեր, իմ ամբողջ սրտով քեզ գոհություն կմատուցեմ

Եվ կպատմեմ քո բոլոր սքանչելիքների մասին։

³ Քեզանով կցնծամ ու կուրախանամ,

Սաղմոս կասեմ Բարձրյալ Տիրոջ անվան համար։

⁴ Թշնամիներս հետ դառնալով կթուլանան

Ու կկործանվեն քո առջև։

⁵ Իրավունքս ու դատաստանս դու տեսար,

Որպես արդարության դատավոր՝ աթոռին նստեցիր։

⁶ Սաստեցիր հեթանոսներին, և կորավ ամբարիշտը,

Նրանց անունները ջնջեցիր հավիտյանս հավիտենից,

⁷ Եվ թշնամու զենքն իսպառ վերացավ։ 

Ավերեցիր քաղաքները, և կորավ նրանց

Հիշատակն աղաղակով։

⁸ Կա Աստված և կմնա հավիտյան.

Պատրաստեց իր աթոռը դատաստանի համար։

⁹ Ինքն է դատում աշխարհն արդարությամբ

Եվ ժողովրդին՝ ուղղամտությամբ։

¹⁰ Տերը տնանկին ապավեն եղավ

Եվ օգնական՝ նեղության պահին։

¹¹ Քեզ կհուսան բոլոր նրանք, ովքեր գիտեն անունը քո,

Քանզի դու չես լքի նրանց, ովքեր փնտրում են քեզ, Տե՜ր։

¹² Սաղմո՛ս երգեք Տիրոջը, որ բնակվում է Սիոնում,

Նրա գործերի մասին պատմե՛ք հեթանոսների մեջ։

¹³ Աղքատների արյան համար վրեժխնդիր լինելիս

Տերը հիշեց և չմոռացավ նրանց աղոթքները։

¹⁴ Ողորմի՛ր ինձ, Տե՛ր,

Եվ տե՛ս իմ նվաստացումն իմ թշնամիներից։

¹⁵ Դու բարձրացրիր ինձ մահվան դռներից,

Որ պատմեմ ողջ օրհնությունդ Սիոնի դստեր դռներին

Եվ ցնծամ քո փրկագործությամբ։

¹⁶ Հեթանոսներն ընկղմվեցին իրենց գործած ապականության մեջ,

Եվ թակարդը, որ լարեցին, կբռնի նրանց ոտքը։

¹⁷ Տերը ճանաչված է իր արած դատաստաններով,

Եվ մեղավորները կպատժվեն ըստ իրենց ձեռքի գործերի։

¹⁸ Մեղավորները կրկին մեռյալների աշխարհ կընկնեն,

Ինչպես նաև Աստծուն մոռացած բոլոր հեթանոսները։

¹⁹ Տերը աղքատին երբեք չի մոռանա,

Եվ տնանկների համբերությունը չի կորչի երբեք։

²⁰ Հասի՛ր, Տե՛ր, որպեսզի մարդը չտիրի,

Թող հեթանոսները դատվեն քո առաջ։

²¹ Նրանց մեջ վա՛խ դիր, Տե՛ր,

Որպեսզի հեթանոսները հասկանան,

Որ լոկ մարդ են։

²²[57] [10] ⁽¹⁾ Ինչո՞ւ, Տե՛ր, հեռու կանգնեցիր.

Անտարբեր եղար նեղության ժամանակ։

²³⁽²⁾  Ամբարիշտը ամբարտավանանալով նեղում է աղքատին.

Թող խափանվեն այն հնարները, որ նրանք խորհեցին։

²⁴⁽³⁾  Որովհետև մեղավորն ինքն իրեն գովում է իր ցանկությունների համար,

Գովաբանվում է և նա, ով զրկում է։

²⁵⁽⁴⁾  Իսկ մեղավորը բազում դառնությամբ բարկացրեց Աստծուն՝

Մտածելով, թե դրա համար չի հատուցվի։

Նրա համար չկա Աստված.

²⁶⁽⁵⁾ Մշտապես պիղծ են նրա ճանապարհները։

Նրա մտքից վերացել է իրավունքը,

Նա հոխորտում է իր հակառակորդների վրա։

²⁷⁽⁶⁾  Ասաց իր սրտում. «Չեմ սասանվելու,

Սերնդեսերունդ փորձանքի չեմ ենթարկվի»։

²⁸⁽⁷⁾  Նրա բերանը լի է անեծքով,

Դառնությամբ ու նենգությամբ,

Իսկ լեզվի տակ ցավ է ու տառապանք։

²⁹⁽⁸⁾  Դարան է մտնում մեծամեծների հետ,

Որ անմեղին գաղտնաբար սպանի։

Նրա աչքն աղքատի վրա է.

³⁰⁽⁹⁾ Դարանակալում է, ինչպես առյուծը մորենու մեջ,

Դարանակալում է՝ հափշտակելու աղքատին,

Հափշտակելու աղքատին և ճանկելու նրան։

³¹⁽¹⁰⁾  Իր որոգայթը կգցի նրան,

Բայց տիրելով աղքատներին՝ կխոնարհվի ու կընկնի։

³²⁽¹¹⁾  Քանզի ասաց իր սրտում. «Աստված մոռացել է,

Շրջել է իր երեսը՝ բնավ չտեսնելու համար»։

³³⁽¹²⁾  Ելի՛ր, Տե՛ր, Աստվա՛ծ իմ,

Թող բարձրանա քո ձեռքը,

Եվ մի՛ մոռացիր տնանկներին։

³⁴⁽¹³⁾  Իսկ ինչո՜ւ ամբարիշտը բարկացրեց Աստծուն՝

Ասելով իր սրտում, թե չի քննվի։

³⁵⁽¹⁴⁾  Տեսնում ես դու ցավն ու տրտմությունը,

Քո ձե՛ռքը մատնիր նրան.

Քեզ է թողնվել աղքատը, և դու ես որբի օգնականը։

³⁶⁽¹⁵⁾  Թող խորտակվի մեղավորի և չարի բազուկը,

Պատժի՛ր նրա անարդարությունը,

Որ այլևս չլինի։

³⁷⁽¹⁶⁾  Տերը թագավոր է հավիտյանս հավիտենից։

Հեթանոսները թող կորչեն նրա երկրից։

³⁸⁽¹⁷⁾  Տե՛ր, լսեցիր աղքատների ցանկությունը,

Քո ականջը հասավ նրանց սրտի պատրաստությանը՝

³⁹⁽¹⁸⁾  Տեսնելու որբի և տնանկի դատաստանը,

Որ հողեղեն մարդը չկարողանա նրանց ճնշել երկրի երեսին։

10

¹ Դպրապետին։ Սաղմոս Դավթի

Տիրոջը հուսացի.

Ինչո՞ւ եք ասում ինձ, որ ճնճղուկի պես լեռները թռչեմ։

² Մեղավորներն ահա լարել են իրենց աղեղները

Եվ պատրաստել են իրենց նետերը կապարճների մեջ,

Որ մութն ընկնելիս ուղղամիտների վրա արձակեն։

³ Ինչ դու շինեցիր, նրանք ավերեցին.

Արդարն ի՞նչ կարող էր անել։

⁴ Տերն իր սուրբ տաճարում է,

Տիրոջ գահը՝ երկնքում։

Նրա աչքերը տնանկներին են նայում,

Իսկ արտևանունքները քննում են մարդկանց որդիներին։

⁵ Տերն է քննում արդարին և ամբարիշտին։

Ով մեղքն է սիրում, ատում է ինքն իրեն։

⁶ Մեղավորների վրա որոգայթ, հուր և ծծումբ կտեղա.

Այս մրրիկն է նրանց բաժակի բաժինը։

⁷ Արդար է Տերը և արդարություն է սիրում.

Ճշմարտությանն է նայում երեսը նրա։

11(12)

¹ Դպրապետին՝ ութ տոն ցածր՝ թավ եղանակով։ Սաղմոս Դավթի

² Փրկի՛ր ինձ, Տե՜ր, քանզի աստվածավախ չմնաց,

Նվազեց ճշմարտությունը մարդկանց որդիներից։

³ Մարդն իր ընկերոջ հետ նանրությամբ խոսեց,

Նենգ շրթունքներով շողոքորթություններ խոսեց։

⁴ Տերը թող կործանի նենգավոր շրթունքները

Եվ մեծախոս լեզուները, որոնք ասացին.

⁵ «Լեզուներս երկարացնենք, մերն են մեր շրթունքները,

Արդ, ո՞վ է մեր տերը»։

⁶ «Աղքատի տառապանքի և տնանկի հեծության համար

Այժմ ես կելնեմ,- ասում է Տերը,-

Կբերեմ իմ փրկությունը և կապահովեմ նրանց

Եվ համարձակորեն կխոսեմ նրանց հետ»։

⁷ Տիրոջ խոսքերը սուրբ խոսքեր են,

Ինչպես ընտիր ու փորձված արծաթ՝

Յոթնապատիկ սրբված և զտված հողից։

⁸ Դու, Տե՛ր, պահեցիր մեզ և փրկեցիր

Այս սերնդից մինչև հավիտենություն։

⁹ Շուրջանակի ամբարիշտներ են շրջում.

Ըստ քո բարձրության՝ մեծությո՛ւն շնորհիր

Մարդկանց որդիներին։

12(13)

¹ Դպրապետին։ Սաղմոս Դավթի

² Տե՛ր, մինչև ե՞րբ պիտի իսպառ մոռանաս ինձ,

Մինչև ե՞րբ երեսդ պիտի դարձնես ինձանից,

³ Մինչև ե՞րբ պիտի չարչարվեմ իմ հոգսերով

Եվ ցավերն իմ սրտում՝ օրերով,

Մինչև ե՞րբ թշնամին ինձ վրա պիտի հարձակվի։

⁴ Նայի՛ր և լսի՛ր ինձ, Տե՛ր, Աստվա՜ծ իմ։

Տե՜ր, լո՛ւյս տուր աչքերիս,

Որ երբեք չննջեմ մահվամբ,

⁵ Որ թշնամին չասի. «Հաղթեցի նրան»,

Կամ ինձ նեղողները ցնծան, որ ես սասանվեցի։

⁶ Ես քո ողորմության վրա եմ հույսս դնում, Տե՜ր.

Սիրտս ցնծաց քո տված փրկությամբ։

Պիտի օրհնեմ Տիրոջը՝ իմ բարերարին,

Սաղմոս պիտի ասեմ Բարձրյալ Տիրոջ անվանը։

13(14)

¹ Դպրապետին։ Սաղմոս Դավթի

Անզգամն ասաց իր սրտում. «Աստված չկա»։

Ապականվեցին և պղծվեցին իրենց անօրենությունների մեջ,

Եվ չկա մեկը, որ բարություն գործի։

² Տերը երկնքից նայեց մարդկանց բոլոր որդիներին՝

Տեսնելու, թե կա՞ Աստծուն փնտրող մի իմաստուն մարդ։

³ Ամենքը միասին խոտորվեցին և անպիտան դարձան,

Չկա բարություն անող, մինչև իսկ մեկ հոգի չկա։

⁴ Ինչպե՞ս է, որ նրանք չեն գիտակցում,

Որ անօրենություն են գործում.

Ովքեր ուտում են իմ ժողովրդին որպես հացի կերակուր

Եվ չեն դիմում Տիրոջը։

⁵ Այնտե՛ղ կսարսռան երկյուղից, որտեղ երկյուղ չկա,

Որովհետև Տերն արդարների ազգի մեջ է։

⁶ Անարգեցիք աղքատի խորհուրդը,

Բայց Տերն է նրա հույսը։

⁷ Սիոնից ո՞վ կտա փրկությունն Իսրայելի։

Երբ Տերն իր ժողովրդին վերադարձնի գերությունից,

Հակոբը կցնծա, և Իսրայելը ուրախ կլինի։

14(15)

¹ Դպրապետին։ Սաղմոս Դավթի

Ո՛վ Տեր, ո՞վ պիտի ապրի քո վրանում,

Կամ ո՞վ պիտի բնակվի քո սուրբ լեռան վրա։

² Ում ընթացքն անբիծ է, արդար գործ է կատարում

Եվ իր սրտում ճշմարտությունն է խոսում։

³ Ով չի նենգել իր լեզվով

Եվ չարիք չի արել իր ընկերոջը,

⁴ Մերձավորներից նախատինք չի ստանում.

Արհամարհված է չարագործը նրա առջև։

Նա փառավորում է Տիրոջից երկյուղ կրողներին,

Երդվում է իր ընկերոջը և չի ստում։

⁵ Իր արծաթը վարձու չի տալիս,

Կաշառք չի առնում իրավունքի դեմ։

Ով այս անում է, չի սասանվի հավիտյան։

15(16)

¹ Սաղմոս Դավթի, արձանագիր

Պահպանի՛ր ինձ, ո՜վ Աստված,

Քանզի ես քեզ միշտ հուսացի։

² Տիրոջն ասացի. «Դու ես Տերն իմ,

Քեզանից են բարիքներն իմ»։

³ Սրբերի, որ երկրի վրա են,

Եվ երևելիների հանդեպ է իմ ողջ փափագը։

⁴ Բազմացան նրանց հիվանդությունները,

Հետո կրկին շատ շատացան։

Չպիտի մասնակցեմ նրանց արյունոտ ժողովներին,

Ոչ էլ նրանց անունները պիտի հիշեմ իմ շուրթերով։

⁵ Իմ բաժակի, ժառանգության բաժին, ո՛վ Տեր,

Դու ես կրկին ինձ դարձնելու բաժինն իմ։

⁶ Ինձ վիճակ ընկավ ընտրյալների մեջ լինելու,

Եվ ինձ բաժին ընկածը հաճելի եղավ ինձ։

⁷ Պիտի օրհներգեմ Տիրոջը,

Որ իմաստուն դարձրեց ինձ.

Գիշերվա մեջ անգամ

Երիկամներս էին ինձ խրատ կարդում։

⁸ Տիրոջն եմ ընտրել մշտապես իմ առաջ,

Որովհետև իմ աջ կողմում էր,

Որպեսզի չսասանվեմ։

⁹ Դրա համար ուրախ եղավ և սիրտը իմ,

Լեզուս ցնծաց,

Եվ մարմինս հույսով կառնի դադարն իր,

¹⁰ Զի անձն իմ չես թողնի մեռյալների աշխարհում,

Արդարին էլ չես թողնի, որ ապականվի։

¹¹ Ցույց տվեցիր ինձ կյանքի ճամփան,

Քո երեսի ուրախությամբ հագեցրիր ինձ,

Նաև քո աջի քաղցրությամբ

Եվ մշտական վայելչությամբ։

16(17)

¹ Աղոթք Դավթի

Ո՜վ Տեր, լսի՛ր արդարին

Եվ նայի՛ր իմ խնդրանքներին,

Լսի՛ր աղոթքս,

Որ նենգավոր շուրթերով չէ։

² Քո կողմից թող գա դատաստանս,

Եվ աչքերն իմ տեսնեն ուղղությունը։

³ Փորձեցիր սիրտն իմ և քննեցիր գիշերով,

Փորձեցիր ինձ,

Եվ անիրավություն չգտնվեց իմ մեջ։

⁴ Բերանն իմ չի պատմի

Մարդկանց որդիների գործերից,

Քո շուրթերի խոսքերի շնորհիվ

Ես դժվար ճանապարհները կպահեմ։

⁵ Հաստատի՛ր քայլերն իմ քո ճանապարհին,

Որ ընթացքս չխոտորվի։

⁶ Ես ձայն տվեցի քեզ, Տե՛ր,

Քանի որ միայն դու կլսես ինձ, Աստվա՛ծ.

Դեպի ի՛նձ խոնարհեցրու ունկդ

Եվ լսի՛ր իմ խոսքերը։

⁷ Սքանչելի դարձրիր քո ողորմությունը,

Դու, որ քո աջի հակառակորդներից

Փրկում ես քեզ հուսացողներին,

⁸ Ինձ պահպանի՛ր աչքի բիբի պես,

Քո թևերի հովանու տա՛կ առ ինձ

⁹ Ամբարիշտների երեսից,

Որոնք տառապեցրին ինձ։

Թշնամիները պաշարեցին ինձ,

¹⁰ Իրենց ճարպով պարարտացան,

Եվ նրանց բերանը ամբարտավանություն խոսեց։

¹¹ Մերժեցին ինձ

Եվ այժմ, դարձյալ շուրջս պտտվելով,

Ուշիուշով խորհեցին ինձ գետին տապալել։

¹² Ինձ թվացին իբրև առյուծ,

Որ որսի է պատրաստ,

Եվ իբրև առյուծի կորյուն՝ դարանակալ։

¹³ Արի՛, Տե՜ր, հասի՛ր և դիմակայի՛ր նրանց,

Փրկի՛ր ինձ ամբարիշտների սրից

Եվ թշնամու ձեռքից։

¹⁴ Կորցրո՛ւ նրանց երկրի երեսից,

Ցրի՛ր և պատժի՛ր նրանց ըստ արժանվույն.

Նրանց որովայնները լցվեցին քո գաղտնի պահված գանձերից,

Հագեցան կերակուրներով

Եվ մնացյալը թողեցին իրենց երեխաներին։

¹⁵ Ես արդարությամբ կերևամ քո առջև,

Կհագենամ քո փառքի երևալով։

17(18)

¹ Դպրապետին։ Տիրոջ ծառա քաջամարտիկ Դավիթն այս օրհներգությունը Տիրոջն ուղղեց այն օրը, երբ Տերը փրկեց նրան բոլոր թշնամիների ու Սավուղի ձեռքից

² Պիտի սիրեմ քեզ, Տե՛ր, իմ զորությո՛ւն։

³ Տերն իմ հաստատիչն է,

Իմ ապավենն ու իմ փրկիչը։

Աստված իմ օգնականն է,

Եվ ես հույսս նրա վրա եմ դրել.

Իմ ապավենն է,

Իմ փրկության եղջյուրն ու ինձ ընդունողը։

⁴ Օրհներգելով պիտի աղոթեմ Տիրոջը

Եվ իմ թշնամիներից կազատվեմ։

⁵ Ես շրջապատվեցի մահվան երկունքով,

Եվ անօրենության հեղեղներն ինձ վրդովեցրին,

⁶ Դժոխքի ցավերն ինձ պաշարեցին,

Եվ մահվան որոգայթներն ինձ հասան։

⁷ Նեղությանս մեջ Տիրոջն աղոթեցի

Եվ առ Աստված աղաղակս բարձրացրի։

Իմ աղոթքի ձայնն իր սուրբ տաճարից լսեց,

Եվ նրան ուղղված իմ աղաղակը

Հասնելու է նրա ականջին։

⁸ Ցնցվեց ու դողաց երկիրը,

Լեռների հիմքերը սասանվեցին ու խախտվեցին,

Քանզի Աստված բարկացավ նրանց վրա։

⁹ Ծուխ ելավ նրա բարկությունից,

Հուր բորբոքվեց նրա երեսից,

Եվ կայծակներ ելան նրանից։

¹⁰ Խոնարհեցրեց երկինքը և իջավ,

Եվ մառախուղ էր նրա ոտքերի տակ։

¹¹ Ելավ քերովբեների վրա ու թռավ,

Սլացավ հողմի թևերով,

¹² Ծածկույթ դարձրեց խավարն իր համար, որ պարուրում է իրեն,

Եռամութ ջրերը և խիտ ամպերը՝ տաղավար իր համար։

¹³ Երբ փայլատակեց նա նրանց առջև,

Ամպերը կարկուտ և հրեղեն կայծակներ արձակեցին։

¹⁴ Տերը որոտաց երկնքից,

Եվ Բարձրյալն արձակեց իր ձայնը

Կարկուտով և հուր կայծակներով։

¹⁵ Առաքեց նետերը և ցրեց նրանց,

Բազմապատկեց իր փայլակները

Եվ խռովքի մատնեց նրանց։

¹⁶ Երևացին ջրի ակունքներ,

Եվ հայտնվեցին աշխարհի հիմքերը

Քո սաստումից, Տե՛ր,

Եվ քո բարկության հողմի փչելուց։

¹⁷ Փութալով վերից՝ նա ինձ վերցրեց

Եվ դուրս հանեց ինձ բազում ջրերից։

¹⁸ Տերն ինձ կփրկի իմ հզոր թշնամիներից

Եվ ինձ ատողներից,

Որ ինձնից ավելի հզոր դարձան։

¹⁹ Ինձ վրա հասան իմ չարչարանքների օրերին,

Բայց Տերն ինձ ուժ տվեց

²⁰ Եվ հանեց ինձ անդորրության մեջ։

Տերը կփրկի ինձ, քանզի ինձ ընդունեց։

²¹ Տերն ինձ կհատուցի ըստ իմ արդարության,

Ըստ իմ ձեռքերի անբծության կհատուցի ինձ։

²² Կպահեմ Տիրոջ ճանապարհը

Եվ իմ Աստծու դեմ չեմ ամբարշտանա։

²³ Իմ առջև են նրա բոլոր իրավունքները,

Իր արդարությունը չվանեց ինձնից։

²⁴ Եվ ես անբիծ կլինեմ նրա հանդեպ,

Կզգուշանամ իմ անօրենությունից։

²⁵ Տերն ինձ կհատուցի ըստ իմ արդարության, 

Ըստ իմ ձեռքերի սրբության,

Որ նրա աչքի առջև է։

²⁶ Սրբի հետ սուրբ կլինես,

Անբիծ մարդու հետ՝ անբիծ,

²⁷ Ընտրյալների հետ ընտրյալ կլինես

Եվ խոտորվածին կկործանես։

²⁸ Դու փրկում ես խոնարհ ժողովրդին,

Իսկ ամբարտավանների աչքերը՝ խոնարհեցնում։

²⁹ Դու լույս ես տալիս իմ ճրագին,

Աստվա՛ծ իմ, լուսավորի՛ր ինձ խավարում։

³⁰ Քեզնով կփրկվեմ ես փորձությունից,

Իմ Աստծով պարիսպներով էլ կանցնեմ։

³¹ Աստվա՛ծ իմ, անբիծ են քո ճանապարհները։

Ընտիր են Տիրոջ խոսքերը,

Իրեն հուսացողների ապավենն է նա։

³² Որովհետև ո՞վ է Աստված, բացի Տիրոջից,

Կամ մեր Աստծուց բացի ո՞վ է Աստված։

³³ Աստվա՛ծ, դու ինձ զորություն պարգևեցիր

Եվ իմ ճանապարհն անբիծ դարձրիր։

³⁴ Իմ ոտքերը եղջերուի ոտքերի նման դարձրիր

Եվ բարձունքներում ինձ կանգնեցրիր։

³⁵ Ձեռքերս վարժեցրիր պատերազմի

Եվ իմ բազուկը դարձրիր ինչպես հաստ աղեղ՝

³⁶ Տալով քո փրկարար պաշտպանությունը։

Քո աջն ինձ օգնեց,

Իսկ խրատդ միշտ կանգուն պահեց,

Եվ քո խրատն ինձ կուսուցանի։

³⁷ Ընդարձակեցիր ուղիներս իմ ոտքերի տակ,

Եվ չտկարացան իմ շավիղները։

³⁸ Հալածելով թշնամիներիս՝

Ես կհասնեմ նրանց

Եվ հետ չեմ դառնա,

Մինչև իսպառ չկործանեմ նրանց։

³⁹ Կնեղեմ նրանց, որ չկարողանան այլևս կանգնել,

Եվ նրանք կընկնեն իմ ոտքերի տակ։

⁴⁰ Դու ինձ պատերազմելու զորություն տվեցիր,

Վրաս հարձակվողներին ոտքերիս տակ գցեցիր,

⁴¹ Թշնամիներիս հալածեցիր և ինձ ատողներին ոչնչացրիր։

⁴² Աղաղակում էին, և ոչ ոք չկար, որ նրանց փրկեր,

Ձայն էին տալիս Տիրոջը, բայց նա չէր լսում նրանց։

⁴³ Ես նրանց կմանրեմ հողմացրիվ փոշու նման,

Փողոցի ցեխի պես կտրորեմ նրանց։

⁴⁴ Տերն ինձ կփրկի ժողովրդի հակառակությունից

Եվ ինձ հեթանոսների գլուխ կկարգի։

Իմ չճանաչած ժողովուրդն ինձ ծառայեց

⁴⁵ Եվ միայն ականջի լսածով ինձ հնազանդվեց։

Օտարների որդիները ստեցին ինձ,

⁴⁶ Օտարների որդիները մաշվեցին

Ու կաղացին իրենց շավիղներից։

⁴⁷ Կենդանի է Տերը, և օրհնյալ է Աստվածն իմ.

Թող բարձր լինի իմ փրկության Աստվածը,

⁴⁸ Աստված, որ իմ վրեժն է լուծում

Եվ ինձ է հնազանդեցնում ժողովուրդներին,

⁴⁹ Որ փրկում է ինձ զանազան թշնամիներից։

Դու ինձ բարձր դասեցիր ինձ վրա հարձակվողներից

Եվ անիրավ մարդուց ինձ ազատեցիր։

⁵⁰ Դրա համար գոհություն պիտի մատուցեմ քեզ

Հեթանոսների մեջ

Եվ սաղմոսերգեմ քո անունը։

⁵¹ Տերը մեծ հաղթանակներ է տալիս իր թագավորին

Եվ ողորմում իր օծյալին՝

Դավթին ու նրա զավակներին

Հավիտյանս հավիտենից։

18(19)

¹ Դպրապետին։ Սաղմոս Դավթի

² Երկինքը պատմում է Աստծու փառքի մասին,

Երկնքի հաստատությունը

Պատմում է նրա ձեռքերի գործերի մասին։

³ Օրն օրվան փոխանցում է այս ամենը,

Գիշերը գիշերվան փոխանցում է այս գիտելիքը։

⁴ Չկան բառեր, և խոսքեր չկան,

Որոնց միջից չլսվեն ձայները նրանց։

⁵ Նրանց բարբառը լսելի եղավ ամբողջ աշխարհին,

Եվ նրանց խոսքերը հասան մինչև ծագերն աշխարհի։

Երկնքում արևը հաստատեց

⁶ Եվ ասես փեսա լինի, որ ելնում է առագաստից։

Ցնծում է նա որպես մարզիկ,

Որ վազում է իր ճանապարհով։

⁷ Երկնքի մի ծագում է նրա ծագումը,

Եվ մյուս ծագն է հասնում նրա անիվը,

Եվ չկա մեկը, որ թաքնվի նրա տապից։

⁸ Տիրոջ օրենքներն անբիծ են

Եվ դարձի են բերում հոգիները,

Տիրոջ վկայությունը ճշմարիտ է

Եվ իմաստուն է դարձնում մանուկներին։

⁹ Տիրոջ արդարությունն ուղիղ է

Եվ ուրախացնում է սրտերը,

Տիրոջ պատվիրանները լույս են

Եվ լույս են տալիս աչքերին։

¹⁰ Տիրոջից երկյուղը սուրբ է

Եվ մնում է հավիտյան։

Տիրոջ դատաստանները ճշմարիտ են,

Միևնույն ժամանակ՝ արդար։

¹¹ Ավելի ցանկալի են ոսկուց

Եվ թանկագին քարերի բազմությունից,

Քաղցր են մեղրի խորիսխից։

¹² Քանի որ քո ծառան պահպանում է դրանք,

Պահպանելու վարձն էլ մեծ կլինի։

¹³ Ո՞վ կարող է իր հանցանքները մտապահել.

Իմ գաղտնի մտքերից մաքրի՛ր ինձ, Տե՜ր,

¹⁴ Եվ օտար հարձակումներից պահպանի՛ր քո ծառային.

Ապա թե ինձ չտիրեն,

Այնժամ ես անբիծ կլինեմ

Եվ մաքուր կլինեմ մեծ մեղքերից։

¹⁵ Բերանիս խոսքերը թող հաճելի լինեն քեզ,

Եվ սրտիս խորհուրդներն ամեն ժամ քո առջև լինեն, Տե՜ր,

Օգնակա՛ն իմ և փրկի՛չ իմ։

19(20)

¹ Դպրապետին։ Սաղմոս Դավթի

² Անձկության օրը Տերը թող լսի քեզ,

Հակոբի Աստծու անունը օգնական թող լինի քեզ։

³ Իր սրբավայր Սիոնից

Քեզ օգնություն թող ուղարկի

Եվ ընդունի քեզ։

⁴ Թող հիշի Տերը քո բոլոր զոհերը

Եվ ուխտերդ ընդունելի անի։

⁵ Տերը թող քեզ տա սրտիդ համաձայն

Եվ քո բոլոր ցանկությունները կատարի։

⁶ Մենք էլ կցնծանք քո տված փրկությամբ,

Հանուն մեր Աստծու կմեծարվենք։ 

Տերը կատարի քո բոլոր խնդրանքները։

⁷ Այժմ հասկացանք,

Որ Տերը փրկեց իր օծյալին.

Լսեց նրան երկնքի իր սրբավայրից

Իր փրկարար աջի զորությամբ։

⁸ Ոմանք՝ կառքերով, ուրիշները երիվարներով են պարծենում,

Իսկ մենք մեր Աստծու անունն ենք գովաբանում։

⁹ Սրանք կործանվեցին և ընկան,

Մենք բարձրացանք և ուղղվեցինք։

¹⁰ Տե՛ր, պահպանի՛ր թագավորին

Եվ լսի՛ր մեզ այն օրը, երբ աղոթենք քեզ։

20(21)

¹ Դպրապետին։ Սաղմոս Դավթի

² Ո՜վ Տեր, քո զորությամբ

Պիտի ուրախանա թագավորը

Եվ քո տված փրկությամբ պիտի հույժ ցնծա։

³ Նրա սրտի ուզածը տվեցիր նրան

Եվ նրա շրթունքների ցանկությունը չմերժեցիր նրան։

⁴ Քո քաղցր օրհնությամբ այցելեցիր նրան

Եվ նրա գլխին թանկագին քարերից պատրաստված պսակ դրեցիր։

⁵ Քեզնից կյանք խնդրեց, և երկար օրեր տվեցիր նրան, 

Հավիտյանս հավիտենից։

⁶ Քո տված փրկությամբ մեծ եղավ նրա փառքը.

Նրան տվեցիր փառք և պարծանք։

⁷ Հավիտյանս հավիտենից նրան օգնություն կտաս,

Քո երեսի խնդությամբ կուրախացնես նրան։

⁸ Թագավորը հույսը Տիրոջ վրա դրեց,

Բարձրյալի ողորմությամբ նա չի սասանվի։

⁹ Քո ձեռքը կգտնի թշնամիներիդ,

Եվ քո աջը՝ բոլոր քեզ ատողներին։

¹⁰ Երբ դու երևաս, հրաբորբոք կայրես նրանց,

Եվ հուրը կլափի նրանց։

¹¹ Նրանց պտուղը կկորչի երկրի երեսից,

Եվ նրանց զավակները՝ մարդկանց որդիներից։

¹² Չարությամբ քեզանից խոտորվեցին,

Խորհեցին խորհուրդ, որը չեն կարող իրագործել։

¹³ Դու նրանց հալածական կդարձնես

Եվ նրանց երեսը կուղղես քո հավատարիմների կողմը։

¹⁴ Բա՛րձր եղիր, Տե՜ր, քո զորությամբ.

Պիտի օրհնենք և սաղմոս ասենք քո զորությանը։

21(22)

¹ Դպրապետին՝ լուսածագին։ Սաղմոս Դավթի

² Աստվա՜ծ, Աստվա՜ծ իմ, նայի՛ր ինձ,

Ինչո՞ւ լքեցիր ինձ.

Հանցավոր խոսքերիս պատճառով

Ուշացավ փրկությունն իմ։

³ Աստվա՜ծ իմ, ցերեկով քեզ աղոթեցի,

Բայց ինձ չլսեցիր,

Եվ գիշերվա մեջ, բայց ինձ չանսացիր։

⁴ Սրբերի մեջ ես ապրում դու

Եվ գովերգվում Իսրայելում։

⁵ Քե՛զ հուսացին մեր հայրերը,

Քեզ հուսացին, և փրկեցիր նրանց։

⁶ Դեպի քեզ իրենց ձայնը բարձրացրին և ապրեցին,

Քեզ հուսացին և չամաչեցին։

⁷ Ես որդ եմ և ոչ թե մարդ,

Մարդու կապկանք,

Ժողովրդի կապկանք։

⁸ Բոլոր ինձ տեսնողներն արհամարհում էին ինձ՝

Շարժելով շուրթերը և օրորելով գլուխներն իրենց.

⁹ «Հուսաց Տիրոջը,

Ուրեմն թող ազատի և փրկի նրան,

Եթե նա հաճելի է Տիրոջը»։

¹⁰ Դու ես, որ հանեցիր ինձ արգանդից,

Մորս ստինքներից իմ հույսը դարձար.

¹¹ Քե՜զ հանձնվեցի ես արգանդից,

Մորս որովայնից դու ես իմ Աստվածը։

¹² Մի՛ հեռացիր ինձանից,

Քանզի վտանգները մոտ են,

Եվ չկա մեկը, որ օգնի ինձ։

¹³ Բազում եզներ շրջապատեցին ինձ,

Եվ գեր ցուլերը, պաշարելով ինձ,

¹⁴ Ինձ վրա բացեցին բերաններն իրենց՝

Մռնչացող և հափշտակող առյուծի նման։

¹⁵ Ես հեղվեցի ջրի նման.

Իմ բոլոր ոսկորները խախտվեցին,

Եվ սիրտս հալած մոմ դարձավ որովայնիս մեջ։

¹⁶ Խեցու նման չորացավ իմ զորությունը,

Լեզուս քիմքիս կպավ,

Եվ ինձ իջեցրին մահվան հողի մեջ։

¹⁷ Շուրջս բազում շներ հավաքվեցին,

Եվ չարագործների խմբերն ինձ պաշարեցին։

Ձեռքերս ու ոտքերս ծակեցին

¹⁸ Եվ հաշվեցին բոլոր ոսկորներս.

Նրանք ուշիուշով նայեցին ու տեսան ինձ։

¹⁹ Իրար մեջ բաժանեցին իմ հագուստները

Եվ պատմուճանիս վրա վիճակ գցեցին։

²⁰ Դու, Տե՜ր, օգնությունդ մի՛ հեռացրու ինձանից

Եվ ինձ օգնելո՛ւ շտապիր, Տե՜ր։

²¹ Փրկի՛ր ինձ սրից

Եվ շների ձեռքերից՝ միամորիկիս։

²² Ազատի՛ր ինձ առյուծի բերանից

Եվ խոնարհությունն իմ՝ ռնգեղջյուրից։

²³ Պիտի հռչակեմ քո անունն իմ եղբայրներին

Եվ օրհնեմ քեզ հավաքի մեջ։

²⁴ Տիրոջ երկյուղածնե՛ր, օրհնե՛ք Տիրոջը,

Եվ Հակոբի ամեն զավակ թող փառաբանի նրան։

Իսրայելի սերնդի ամեն զավակ թող երկյուղի Տիրոջից,

²⁵ Քանզի Տերը չարհամարհեց,

Չանարգեց աղքատիս աղոթքը

Եվ ինձնից երես չդարձրեց,

Այլ երբ աղոթեցի, ինձ լսեց։

²⁶ Քեզանից եմ սկսում օրհներգությունս մեծ հավաքներում։

Ուխտս պիտի կատարեմ

Նրա բոլոր երկյուղածների առջև։

²⁷ Անտունները պիտի ուտեն ու հագենան,

Տիրոջը փնտրողները պիտի օրհնեն նրան.

Նրանց սրտերը պիտի ապրեն հավիտյանս հավիտենից։

²⁸ Երկրի բոլոր ծագերը կհիշեն և դեպի Տերը կդառնան,

Բոլոր ազգատոհմերը կերկրպագեն նրան,

²⁹ Որովհետև Տիրոջն է արքայությունը,

Եվ նա է տիրում բոլոր հեթանոսների վրա։

³⁰ Կերան և երկրպագեցին նրան

Երկրի բոլոր կշտացածները.

Բոլոր հող իջնողները

Նրա առջև պիտի ընկնեն։

Նրանով է հոգիս ապրում,

³¹ Եվ նրան պիտի ծառայի իմ զավակը։

Գալիք սերունդներին պիտի պատմեն Տիրոջ մասին,

³² Դեռ ծնվելիք ժողովրդին, որին Տերն ստեղծեց,

Պիտի պատմեն արդարության մասին։

22(23)

¹ Դպրապետին։ Սաղմոս Դավթի

Տերն է իմ հովիվը,

Եվ ինձ ոչինչ չի պակասելու։

² Ինձ բնակեցրեց դալարագեղ վայրում

Եվ հանգստավետ ջրերի մոտ ինձ սնուցեց։

³ Ինձ վերադարձրեց իմ հոգին

Եվ իր անվան համար

Ինձ առաջնորդեց

Արդարության ճանապարհներով։

⁴ Թեկուզ գնամ մահվան ստվերների միջով,

Չարից չպիտի վախենամ.

Քանզի դու, Տե՜ր, ինձ հետ ես։

Քո ցուպն ու գավազանը կմխիթարեն ինձ։

⁵ Իմ առջև սեղան պատրաստեցիր

Ինձ հալածողների աչքերի առաջ։

Գլուխն իմ օծեցիր յուղով,

Քո բաժակը՝ իբրև անապակ գինի,

Արբեցրեց ինձ։

⁶ Քո ողորմությունը, Տե՜ր,

Ինձ հետ կլինի կյանքիս բոլոր օրերին,

Եվ Տիրոջ տան մեջ կբնակվեմ հավիտյան։

23(24)

¹ Կիրակնօրյա սաղմոս Դավթի

Տիրոջն է երկիրն իր ամբողջությամբ,

Աշխարհը և նրա բոլոր բնակիչները։

² Նա ինքը ծովի վրա գցեց հիմքերը երկրի

Եվ այն հաստատեց գետերի վրա։

³ Ո՞վ կբարձրանա Տիրոջ լեռը,

Կամ ո՞վ կկանգնի նրա սրբավայրում։

⁴ Ով մաքուր ձեռքեր և անբիծ սիրտ ունի,

Ով հանձն չի առել ունայնություն

Եվ նենգությամբ չի երդվել ընկերոջը,

⁵ Նա օրհնություն կստանա Տիրոջից

Եվ ողորմություն՝ իր փրկիչ Աստծուց։

⁶ Այս է այն ազգը, որ փնտրում է Տիրոջը,

Որ ուզում է տեսնել Հակոբի Աստծու երեսը։

⁷ - Իշխաննե՛ր, վե՛ր բարձրացրեք հավիտենական դռները.

Թող բացվեն դարպասները,

Եվ ներս մտնի փառքի Թագավորը։

⁸ - Ո՞վ է փառքի այս Թագավորը.

Իր զորությամբ հզոր Տերը,

Պատերազմի մեջ հզոր Տերը։

⁹ - Իշխաննե՛ր, վե՛ր բարձրացրեք հավիտենական դռները.

Թող բացվեն դարպասները,

Եվ ներս մտնի փառքի Թագավորը։

¹⁰ - Ո՞վ է փառքի այս Թագավորը.

Զորությունների Տերը.

- Սա ինքն է փառքի Թագավորը։

24(25)

¹ Դպրապետին։ Սաղմոս Դավթի

² Դեպի քեզ, Տե՜ր, բարձրացրի իմ հոգին,

Աստվա՛ծ իմ, քեզ վրա հույս դրեցի. թող չամաչեմ,

Եվ թշնամիներս չծիծաղեն ինձ վրա։

³ Քեզնով համբերողները պիտի չամաչեն,

Այլ անօրենները պիտի ամաչեն իրենց ունայնության համար։

⁴ Ո՜վ Տեր, ցո՛ւյց տուր ինձ քո ճանապարհները

Եվ քո շավիղները սովորեցրո՛ւ ինձ։

⁵ Ինձ քո ճշմարտությա՛մբ առաջնորդիր

Եվ ուսուցի՛ր ինձ, քանզի դու ես իմ փրկիչ Աստվածը,

Եվ ես հանապազ քեզ եմ սպասում։

⁶ Հիշի՛ր, Տե՜ր, քո գթություններն ու ողորմությունները,

Որոնք հավիտենական են։

⁷ Մի՛ հիշիր իմ մանկության և անգիտության մեղքերը,

Այլ հիշի՛ր ինձ, Տե՜ր, ըստ քո քաղցր ողորմության։

⁸ Քանի որ դու քաղցր և ուղիղ ես, Տե՜ր,

Մեղավորներին ճանապարհ ես ցույց տալիս,

⁹ Հեզերին առաջնորդում ես ճիշտ որոշման

Եվ սովորեցնում ես քո ճանապարհները։

¹⁰ Տիրոջ բոլոր ճանապարհները գթառատ ու ճշմարիտ են

Նրանց համար, ովքեր պահում են նրա ուխտն ու վկայությունը։

¹¹ Քո անվան համար, Տե՜ր, քավի՛ր իմ մեղքերը, քանզի շատացան։

¹² Այն մարդը, որ երկնչում է Տիրոջից,

Նրանից է սովորում՝ ինչ ճանապարհ ընտրի։

¹³ Նրա անձը բարության մեջ կհանգչի,

Եվ նրա զավակը երկիրը կժառանգի։

¹⁴ Տերն իրենից երկյուղածների զորությունն է

Եվ իր ուխտն է սովորեցնում նրանց։

¹⁵ Իմ աչքերը մշտապես Տիրոջն են ուղղված,

Եվ նա է ոտքերս հանում որոգայթից։

¹⁶ Նայի՛ր և ողորմի՛ր ինձ, քանզի միամորիկ և աղքատ եմ ես։

¹⁷ Սրտիս նեղությունները խիստ շատացան. ազատի՛ր ինձ իմ վշտերից։

¹⁸ Տե՛ս իմ խոնարհությունն ու իմ վաստակը

Եվ թողությո՛ւն տուր իմ բոլոր մեղքերին։

¹⁹ Տե՛ս, թշնամիներս որքա՜ն շատացան

Եվ նանիր ատելությամբ ինձ ատեցին։

²⁰ Պահի՛ր իմ անձը և ազատի՛ր ինձ,

Մի՛ թող, որ ամաչեմ, որովհետև քեզ վրա հույս դրեցի։

²¹ Անբիծ և ուղիղ մարդիկ ինձ միացան,

Եվ ես սպասեցի քեզ, Տե՜ր։

²² Փրկի՛ր Իսրայելին, Աստվա՜ծ, իր բոլոր նեղություններից։

25(26)

¹ Դպրապետին։ Սաղմոս Դավթի

Դա՛տ արա ինձ, Տե՜ր, որովհետև ես անբծությամբ ապրեցի.

Քեզ հուսացի և չեմ սասանվելու։

² Փորձի՛ր ինձ, Տե՜ր, և քննի՛ր ինձ.

Փորձի՛ր երիկամներս և սիրտս։

³ Քո ողորմությունն աչքիս առջև է,

Եվ քո ճշմարտությամբ եմ ընթանում։

⁴ Նանիր մարդկանց աթոռին ես չեմ նստի

Եվ չեմ մտնի անօրենների մոտ։

⁵ Ես ատեցի չարերի ժողովը

Եվ չնստեցի ամբարիշտների հետ։

⁶ Սրբությամբ կլվամ ձեռքերն իմ

Եվ սեղանիդ շուրջը կնստեմ, Տե՜ր։

⁷ Թող լսեմ քո օրհնության ձայնը

Եվ պատմեմ քո բոլոր սքանչելիքները։

⁸ Սիրեցի քո տան վայելչությունը, Տե՜ր,

Եվ քո փառքի բնակության վայրը։

⁹ Իմ անձն ամբարիշտների հետ կորստյան մի՛ մատնիր

Եվ կյանքն իմ՝ արյունահեղ մարդկանց հետ,

¹⁰ Որոնց ձեռքերն անօրենության մեջ են,

Եվ նրանց աջը լի է կաշառքով։

¹¹ Ես ապրեցի անբծությամբ.

Փրկի՛ր ինձ, Տե՜ր, և ողորմի՛ր ինձ։

¹² Թող ուղղամտության մեջ լինի ոտքն իմ.

Մեծ հավաքներում պիտի օրհնեմ քեզ։

26(27)

¹ Սաղմոս Դավթի, երբ դեռ օծված չէր

Տերն իմ լույսն է և իմ կյանքը. ես ումի՞ց պիտի վախենամ։

Տերն իմ կյանքի ապավենն է. ես ումի՞ց պիտի դողամ։

² Երբ չարերը մերձեցան՝ ուտելու իմ մարմինը,

Ինձ նեղողներն ու թշնամիները թուլացան և ընկան։

³ Թե իմ դեմ պատերազմ պատրաստվի, սիրտս չի երկնչի,

Թե ճակատամարտ սկսվի իմ դեմ,

Միևնույն է, Տե՜ր, ես քեզ պիտի հուսամ։

⁴ Մի բան խնդրեցի Տիրոջից և նույնն եմ աղաչում.

Տիրոջ տան մեջ բնակվեմ կյանքիս բոլոր օրերին,

Տիրոջ վայելչությունը տեսնեմ

Եվ մշտապես լինեմ նրա տաճարում։

⁵ Վատ օրերին ինձ թաքցրեց իր խորանում,

Ինձ պատսպարեց իր խորանի ծածկի տակ։

⁶ Ժայռից ավելի բարձրացրեց ինձ.

Այժմ էլ գլո՛ւխն իմ բարձրացրու թշնամիներիս վրա։

Պիտի շրջեմ և օրհնության պատարագ մատուցեմ

Նրա խորանում,

Օրհնություն և սաղմոս պիտի ասեմ Տիրոջը։

⁷ Լսի՛ր, Տե՜ր, իմ ձայնը, որովհետև քեզ դիմեցի,

Ողորմի՛ր և լսի՛ր ինձ, ⁸ քանզի սիրտս քեզ կանչեց,

Հայացքս քո դեմքը փնտրեց, Տե՜ր։

⁹ Երեսդ մի՛ դարձրու ինձանից

Եվ բարկությամբ մի՛ շրջվիր քո ծառայից։

Իմ օգնակա՛նը եղիր. մի՛ անարգիր ինձ

Եվ մի՛ լքիր ինձ, Աստվա՛ծ, փրկի՛չ իմ։

¹⁰ Իմ հայրն ու մայրը թողեցին ինձ, բայց Տերն ինձ ընդունեց։

¹¹ Ուսուցանի՛ր ինձ, Տե՜ր, քո ճանապարհը

Եվ առաջնորդի՛ր ինձ քո ուղիղ շավիղներով։

¹² Իմ թշնամիների պատճառով մի՛ մատնիր ինձ նեղիչներիս ձեռքը։

Իմ դեմ ելան կեղծ վկաներ և սուտ խոսեցին իրենց անօրենությամբ։

¹³ Հավատում եմ, որ կտեսնեմ Տիրոջ բարությունը

Ապրողների երկրում.

¹⁴ Սպասի՛ր Տիրոջը և քաջալերվի՛ր,

Թող սիրտդ զորանա. սպասի՛ր Տիրոջը։

27(28)

¹ Սաղմոս Դավթի

Քեզ աղոթեցի, Տե՛ր, Աստվա՛ծ իմ,

Անարձագանք մի՛ թող ինձ։

Եթե երբևէ լուռ մնաս,

Կնմանվեմ նրանց, ովքեր փոսն են իջնում։

² Լսի՜ր, Տե՜ր, խնդրանքներիս ձայնը, երբ աղաչեմ քեզ,

Երբ ձեռքերս քո սուրբ տաճարում բարձրացնեմ։

³ Անձն իմ ամբարիշտների հետ մի՛ դասիր,

Ինձ մի՛ կործանիր անօրենություն գործողների հետ,

Որոնք իրենց ընկերների հետ խաղաղության մասին են խոսում,

Բայց սրտներում չարություն է։

⁴ Վարձատրի՛ր նրանց, Տե՜ր, ըստ իրենց գործերի,

Ըստ իրենց անօրեն ընթացքի հատուցի՛ր նրանց,

Հատուցի՛ր նրանց ըստ իրենց ձեռքերի գործերի.

Նրանց տո՛ւր իրենց հատուցումը։

⁵ Նրանք չճանաչեցին Տիրոջ գործերը,

Ոչ էլ նրա ձեռքի գործերին նայեցին։

Դու նրանց կկործանես, և այլևս ոտքի չեն կանգնի։

⁶ Օրհնյա՜լ է Տերը, քանզի լսեց աղոթքիս ձայնը։

⁷ Տերն է իմ օգնականն ու պաշտպանը.

Նրան հուսաց իմ սիրտը,

Մարմինս օգտվեց ու զվարճացավ,

Եվ ես բոլորանվեր փառք պիտի տամ նրան։

⁸ Տերն է իր ժողովրդի զորությունը,

Իր օծյալի փրկության ապավենը։

⁹ Փրկի՛ր քո ժողովրդին և օրհնի՛ր քո ժառանգությունը,

Հովվի՛ր և բարձրացրո՛ւ նրանց հավիտյան։

28(29)

¹ Սաղմոս Դավթի. տաճարի նավակատիքի օրհնություն

Աստծու որդինե՛ր, մատուցե՛ք Տիրոջը,

Նորածին խոյե՛ր մատուցեք Տիրոջը,

Փառք ու պատի՛վ մատուցեք Տիրոջը,

² Նրա անվանը վայել փա՛ռք մատուցեք Տիրոջը,

Երկրպագե՛ք Տիրոջը նրա սրբության սրահում։

³ Ջրերի վրա է Տիրոջ ձայնը.

Փառքի Աստվածը որոտաց,

Եվ Տերն ինքն է անսպառ ջրերի վրա։

⁴ Զորությամբ է Տիրոջ ձայնը

Եվ մեծ վայելչությամբ.

⁵ Տիրոջ ձայնը փշրում է մայրիները,

Տերը կոտրատում է մայրիները Լիբանանի։

⁶ Լիբանանի մատաղ տունկերի պես կմանրի նրանց,

Որ սիրելի են, ինչպես ռնգեղջյուրի ձագը։

⁷ Տիրոջ ձայնը հատում է կրակի բոցը,

⁸ Տիրոջ ձայնը ցնցում է անապատը,

Տերը ցնցում է Կադեսի անապատը։

⁹ Տիրոջ ձայնը ծնում է եղջերուներին,

Մերկացնում է անտառները։

Նրա տաճարում են բոլոր նրանք, ովքեր գովերգում են նրա փառքը։

¹⁰ Տերը իշխում է ջրհեղեղների վրա.

Տերը հավիտյան պիտի թագավորի։

¹¹ Տերն իր ժողովրդին զորություն պիտի տա

Եվ օրհնի իր ժողովրդին խաղաղությամբ։

29(30)

¹ Սաղմոս Դավթի. տաճարի նավակատիքի օրհնություն

² Գովաբանում եմ քեզ, Տե՜ր, որովհետև ընդունեցիր ինձ

Եվ չթողեցիր, որ թշնամիներս ուրախանան վրաս։

³ Տե՛ր, Աստվա՛ծ իմ,

Աղոթեցի քեզ, և բժշկեցիր ինձ։

⁴ Տե՛ր, դժոխքից հանեցիր հոգիս

Եվ փոսն իջնողների միջից փրկեցիր ինձ։

⁵ Սաղմո՛ս ասացեք Տիրոջը, ո՛վ նրա սրբեր,

Նրան գոհությո՛ւն մատուցեք իբրև հիշատակ նրա սրբությանը։

⁶ Նրա բարկության մեջ սրտմտություն կա,

Իսկ նրա կամքի մեջ՝ կյանք։

Երեկոյան լացը կմարի, առավոտյան ուրախություն կլինի։

⁷ Ես ասացի իմ բարօրության մեջ,

Թե չեմ սասանվի երբեք։

⁸ Տե՛ր, քո կամքով զորություն տվեցիր վայելչությանս,

Երբ դարձրիր երեսդ, խռովահույզ եղա։

⁹ Քեզ աղոթեցի, Տե՜ր, աղաչեցի իմ Աստծուն։

¹⁰ Ի՞նչ օգուտ կա քեզ իմ արյունից,

Եթե ապականության մեջ իջնեմ.

Մի՞թե հողը կգովաբանի քեզ

Կամ կպատմի քո ճշմարտությունը։

¹¹ Տերն ինձ լսեց և ողորմեց,

Տերն ինձ օգնական եղավ.

¹² Սուգս ուրախության փոխեց. հանեց իմ քուրձը

Եվ ինձ ուրախություն հագցրեց։

¹³ Ինչպե՜ս իմ փառքը սաղմոս պիտի երգի քեզ.

Այլևս չպիտի զղջամ, Տե՛ր, Աստվա՛ծ իմ,

Գոհություն պիտի մատուցեմ քեզ հավիտյան։

30(31)

¹ Դպրապետին։ Սաղմոս Դավթի

² Քեզ վրա հույս դրեցի, Տե՜ր, թող չամաչեմ հավիտյան.

Քո արդարությամբ փրկի՛ր և ապրեցրո՛ւ ինձ։

³ Ի՛նձ խոնարհիր քո ականջը, փութա՛ ինձ փրկելու.

Իմ պահապա՛նը եղիր, Աստվա՜ծ, և իմ փրկության ապաստանը,

⁴ Քանզի դու ես իմ ուժն ու ապավենը։

Քո անվան համար ինձ առաջնորդեցիր և սնեցիր։

⁵ Եվ ինձ կհանես այն որոգայթից, որն իմ դեմ լարեցին։

Դու ես իմ պաշտպանը, Տե՜ր,

⁶ Եվ քո ձեռքն եմ հանձնում իմ հոգին։

Փրկեցիր ինձ, Տե՛ր, Աստվա՛ծ, քո ճշմարտությամբ։

⁷ Ատեցիր նրանց, ովքեր սնոտիաբար են երկյուղում։

Ես Տիրոջ վրա հույս դրեցի. ⁸ պիտի ցնծամ և ուրախանամ քո տված փրկությամբ։

Նայեցիր իմ խոնարհությանը և փրկեցիր ինձ վշտերից,

⁹ Ինձ չմատնեցիր նեղիչներիս ձեռքը

Եվ ամրացրիր ոտքերս խաղաղության մեջ։

¹⁰ Ողորմի՛ր ինձ, Տե՜ր, քանզի ճնշված եմ ես.

Սրտմտությունից աչքն իմ խռովվեց,

Նաև փորս ու հոգիս։

¹¹ Կյանքս նվազեց ցավերի պատճառով,

Իսկ տարիներս՝ հեկեկոցներից։

Իմ զորությունը տկարությունից աղքատացավ,

Եվ ոսկորներս փտեցին։

¹² Իմ բոլոր թշնամիներից ավելի

Ես եղա նախատինք դրացիներիս համար,

Իսկ ծանոթներիս՝ մեծ ահ ու երկյուղ։

Բոլոր ինձ տեսնողները հեռու էին փախչում ինձանից,

¹³ Մոռացվեցի ես, ինչպես մեռյալն է իսպառ մոռացվում սրտից,

Դարձա իբրև կորսված անոթ։

¹⁴ Քանզի իմ շուրջը գտնվող շատերից բամբասանք լսեցի.

Իրար մոտ հավաքված՝ ուզում էին հոգիս առնել։

¹⁵ Բայց ես, ո՜վ Տեր, քեզ հուսացի՝ ասելով.

«Դու ես իմ Աստվածը,

¹⁶ Եվ քո ձեռքում են իմ տարիները»։

Փրկի՛ր ինձ իմ թշնամիների ձեռքից և իմ հալածիչներից։

¹⁷ Ցո՛ւյց տուր քո երեսը քո ծառային.

Ապրեցրո՛ւ ինձ, Տե՜ր, ըստ քո ողորմության։

¹⁸ Տե՜ր, թող չամաչեմ, որ քեզ դիմեցի.

Թող ամաչեն ամբարիշտները և իջնեն դժոխք։

¹⁹ Թող համրանան նենգ շրթունքները,

Որոնք ամբարտավանությամբ և արհամարհանքով

Չարախոսում էին արդարին։

²⁰ Ո՜վ Տեր, որքա՜ն շատ է քաղցր ողորմածությունդ,

Որ պահեցիր երկյուղածներիդ համար,

Եվ բոլորը տեսան, թե ինչպես քո ողորմությունը շնորհեցիր քեզ հուսացողներին։

Քո երեսի ծածկույթով պաշտպանեցիր նրանց

²¹ Մարդկանց խռովությունից,

Քո խորանում թաքցրիր նրանց լեզուների հակառակությունից։

²² Օրհնյա՜լ է Տերը, քանզի նրա ողորմությունը

Հրաշքներ գործեց ամուր քաղաքում։

²³ Ապշահար եղած ասացի, որ այլևս կտրվեցի քո աչքից,

Դրա համար իմ աղոթքի ձայնը լսեցիր, երբ քեզ դիմեցի։

²⁴ Սիրեցե՛ք Տիրոջը, նրա բոլո՛ր սրբեր,

Որովհետև Տերը ստուգություն է փնտրում

Եվ հատուցում նրանց, ովքեր առավել

Ամբարտավանություն են գործում։

²⁵ Քաջալերվե՛ք, և ձեր սրտերը թող զորանան,

Բոլո՛րդ, որ հույս եք դրել Տիրոջ վրա։

31(32)

Ապաշխարության աղոթք

¹ Դավթի՝ սաղմոս իմաստության

Երանի՜ նրանց, ում մեղքերին թողություն տրվեց,

Եվ նրանց, ում բոլոր հանցանքները ներվեցին։

² Երանի՜ այն մարդուն, որին Տերը մեղավոր չի համարում,

Եվ որի բերանում նենգություն չկա։

³ Լռեցի ես, և իմ բոլոր ոսկորները մաշվեցին

Մշտապես՝ գիշերուզօր Տիրոջն աղաղակելուց։

⁴ Քո ձեռքը ծանրացավ ինձ վրա. դեպի թշվառություն դարձա,

Որովհետև փշերն ինձ ծակծկեցին։

⁵ Մեղքերս քեզ ցույց կտամ

Եվ անօրենություններս չեմ ծածկի քեզանից։

Ասացի. «Ես ինքս կպատմեմ մեղքերս Տիրոջը»,

Եվ դու թողություն կտաս

Իմ բոլոր մեղքերի ամբարշտությանը։ Հանգիստ

⁶ Դրա համար բոլոր սրբերը անհրաժեշտ ժամին

Աղոթքի կկանգնեն քո առջև.

Առատ հեղեղներից ու ջրերից ոչինչ չի մոտենա նրանց։

⁷ Դու ես իմ ապավենն այն նեղության մեջ,

Որ շուրջս պատեց։

Ո՛վ իմ ցնծություն, փրկի՛ր ինձ նրանցից,

Ովքեր պաշարեցին ինձ։

⁸ «Քեզ իմաստուն կդարձնեմ և խելամուտ՝ այն ճանապարհին,

Որով պիտի ընթանաս, և աչքերս վրադ կպահեմ»։

⁹ Մի՛ եղեք ձիերի և ջորիների նման, որոնք ըմբռնում չունեն.

Նրանց կզակը սանձով և պախուրցով պետք է ճմլել,

Որ քեզ չմոտենան։

¹⁰ Բազում են մեղավորների տանջանքները,

Բայց Տիրոջը հուսացողներին

Տիրոջ ողորմությունը կպարուրի։

¹¹ Ուրա՛խ եղեք և ցնծացե՛ք Տիրոջով, ո՜վ արդարներ,

Պարծեցե՛ք բոլորդ, որ ուղիղ եք սրտով։

32(33)

¹ Սաղմոս Դավթի

Արդարնե՛ր, ցնծացե՛ք Տիրոջով.

Ուղղամիտներին է վայելում օրհնությունը։

² Օրհներգե՛ք Տիրոջը օրհնությամբ,

Տասնալար սաղմոսարանով սաղմո՛ս ասացեք նրան։

³ Օրհնեցե՛ք Տիրոջը նոր օրհնությամբ, որ բարի է.

Սաղմո՛ս ասացեք նրան օրհնությամբ։

⁴ Ուղիղ են Տիրոջ պատգամները,

Եվ նրա բոլոր գործերը՝ հուսալի.

⁵ Տերը սիրում է ողորմություն և իրավունք։

Տիրոջ ողորմությամբ երկիրն իր լրումին հասավ,

⁶ Եվ Տիրոջ խոսքով հաստատվեց երկինքը,

Նրա բերանի շնչով՝ նրա բոլոր զորությունները։

⁷ Ծովի ջրերը հավաքեց կարծես տիկի մեջ

Եվ իր գանձերը դրեց խորքերում։

⁸ Ամբողջ երկիրը թող սոսկա Տիրոջից,

Եվ նրանից թող դողան աշխարհի բոլոր բնակիչները։

⁹ Քանզի նա ասաց, և գոյացան, հրամայեց, և հաստատվեցին։

¹⁰ Տերը ցրում է հեթանոսների ժողովները,

Տերն անարգում է ժողովուրդների խորհուրդները,

Տերն արհամարհում է իշխանների մտքերը։

¹¹ Տիրոջ խորհուրդը կմնա հավիտյան,

Նրա սրտի խորհուրդը՝ սերնդեսերունդ։

¹² Երանի՜ այն ազգին, որի օգնականը Տերն է՝ Աստված,

Այն ժողովրդին, որին ընտրեց իբրև իրեն ժառանգություն։

¹³ Տերը երկնքից նայեց մարդկանց բոլոր որդիներին.

¹⁴ Իր պատրաստած բնակությունից

Նայեց աշխարհի բոլոր բնակիչներին։

¹⁵ Նա, որ ստեղծեց նրանցից յուրաքանչյուրի սիրտը

Եվ գիտի նրանց բոլոր գործերը։

¹⁶ Թագավորն իր զորքի բազմությամբ չի փրկվի,

Եվ ոչ էլ հսկան՝ իր մեծ զորությամբ։

¹⁷ Ձին չի կարող փրկություն ապահովել,

Իր ողջ կարողությամբ չի կարող փրկել հեծյալին։

¹⁸ Տիրոջ աչքն իրենից երկյուղածների վրա է,

Եվ նրա ողորմությունը իրեն հուսացողների վրա է՝

¹⁹ Նրանց փրկելու մահվանից

Եվ սովի ժամանակ նրանց կերակրելու։

²⁰ Մեր հոգիներն սպասում են Տիրոջը,

Որովհետև մեր օգնականն է ու մեր պաշտպանը։

²¹ Նրանով թող ուրախանան մեր սրտերը,

Եվ նրա սուրբ անվանը հուսանք։

²² Թող քո ողորմությունը մեզ վրա լինի,

Ո՜վ Տեր, ինչպես որ քեզ հուսացինք։

33(34)

¹ Սաղմոս Դավթի, երբ նա կերպարանափոխեց իր դեմքն Աբիմելեքի առջև, որն էլ հետո Դավթին բաց թողեց, որ գնա

² Ամեն ժամ պիտի Տիրոջն օրհնաբանեմ,

Ամեն ժամ նրա օրհնությունը բերանիս մեջ թող լինի։

³ Անձս Տիրոջով պիտի պարծենա.

Թող լսեն հեզերը և ուրախանան։

⁴ Մեծարե՛ք Տիրոջն ինձ հետ,

Միասին պանծացնենք նրա անունը։

⁵ Խնդրեցի Տիրոջը, և լսեց ինձ.

Իմ բոլոր նեղություններից փրկեց ինձ։

⁶ Մոտեցե՛ք Տիրոջը և առե՛ք լույսը,

Եվ ձեր երեսը թող չամաչի։

⁷ Այս աղքատը Տիրոջն աղոթեց, և Տերը լսեց նրան,

Նրա բոլոր նեղություններից փրկեց նրան։

⁸ Տիրոջ հրեշտակների բանակն

Իրենից երկյուղածների շուրջն է

Եվ պահում է նրանց։

⁹ Ճաշակե՛ք և տեսե՛ք, որ քաղցր է Տերը։

Երանելի է այն մարդը, որ նրան է հուսացել։

¹⁰ Երկյուղե՛ք Տիրոջից, նրա բոլո՛ր սրբեր,

Քանզի ոչինչ չի պակասի նրանից երկյուղածներից։

¹¹ Մեծամեծերն աղքատացան և քաղցեցին,

Բայց ովքեր Տիրոջն են փնտրում,

Նրանցից չի պակասի ոչ մի բարիք։

¹² Եկե՛ք, իմ որդինե՛ր, և լսե՛ք ինձ.

Տիրոջ երկյուղը ձեզ կուսուցանեմ։

¹³ Այն մարդը, որ ցանկանում է կյանքը,

Սիրում է տեսնել իր օրերը բարության մեջ.

¹⁴ Լռեցրո՛ւ լեզուդ չարությունից,

Շրթունքներդ թող նենգություն չխոսեն։

¹⁵ Չարից զգուշացի՛ր և բարի՛ք գործիր,

Խնդրի՛ր խաղաղություն և հետևի՛ր նրան։

¹⁶ Տիրոջ աչքն արդարների վրա է,

Նրա ականջները՝ նրանց աղոթքներին։

¹⁷ Տերը հատուցում է չարագործներին՝

Նրանց հիշատակը երկրի երեսից ջնջելու։

¹⁸ Տիրոջն աղոթեցին արդարները, և Տերը լսեց նրանց.

Իրենց բոլոր նեղություններից փրկեց նրանց։

¹⁹ Տերը մոտ է նրանց, ովքեր սրտամաշ են,

Եվ հոգով խոնարհներին փրկում է։

²⁰ Բազում են արդարների նեղությունները,

Բայց ամեն ինչից Տերը փրկում է նրանց

²¹ Եվ պահպանում է նրանց բոլոր ոսկորները,

Որպեսզի ոչ մեկը չփշրվի։

²² Մեղավորին չարությունը կսպանի,

Արդարին ատողը կպատժվի։

²³ Տերը փրկում է իր ծառաների հոգիները,

Եվ բոլոր նրան հուսացողները չեն զղջա։

34(35)

¹ Դպրապետին։ Սաղմոս Դավթի

Տե՛ր, դատի՛ր նրանց, ովքեր դատում են ինձ,

Մարտնչի՛ր նրանց դեմ, ովքեր մարտնչում են իմ դեմ։

² Ա՛ռ քո զենքն ու զրահը և հասի՛ր օգնության,

³ Հանի՛ր սուրդ ընդդեմ ինձ հալածողների,

Վանի՛ր նրանց և ասա՛ ինձ.

«Քո փրկությունը ես եմ»։

⁴ Ինձ հետապնդողները թող ամաչեն և անարգվեն,

Թող նահանջեն և ամաչեն իմ մասին չար բան խորհողները.

⁵ Նրանք հողմից քշված փոշի թող լինեն,

Եվ Տիրոջ հրեշտակը թող չարչարի նրանց։

⁶ Նրանց ճամփաները խավար և գայթակղությամբ լի թող լինեն,

Եվ Աստծու հրեշտակը թող հալածի նրանց։

⁷ Իրենց ապականության որոգայթը իզո՜ւր իմ դեմ լարեցին

Եվ իզո՜ւր անձս նախատեցին։

⁸ Նրանց վրա որոգայթ կհասնի, որի մասին չեն էլ մտածում.

Եվ որը լարեցին, կբռնի նրանց իսկ ոտքերը,

Եվ նույն որոգայթի մեջ կընկնեն։

⁹ Իսկ ես կցնծամ Տիրոջով,

Կուրախանամ նրա տված փրկությամբ.

¹⁰ Իմ բոլոր ոսկորները կասեն. «Տե՛ր, ո՞վ կա քեզ նման»։

Որովհետև աղքատին փրկեց հզորի ձեռքից,

Աղքատ և անտունին՝ նրան հափշտակողներից։

¹¹ Ինձ վրա հարձակվեցին չարի վկաները.

Հարցնում էին իմ չիմացածից։

¹² Բարու փոխարեն ինձ չար հատուցեցին,

Որոշեցին ինձ անժառանգ թողնել մարդկանց մեջ։

¹³ Նրանց հալածանքի ժամանակ քուրձ էի հագնում,

Պահքով խոնարհեցնում էի անձս,

Եվ աղոթքներս իմ ծոցը դարձան։

¹⁴ Սիրալիր էի եղբոր և ընկերոջ պես,

Խոնարհ՝ սգավորի և տրտումի պես։

¹⁵ Հավաքվեցին և ուրախացան ինձ վրա,

Շուրջս տանջանքներ կուտակվեցին,

Բայց ես չհասկացա,

Ցրվեցին, բայց չզղջացին։

¹⁶ Փորձեցին ինձ և արհամարհեցին,

Իրենց ատամներն արհամարհանքով կրճտացրին իմ դեմ։

¹⁷ Տե՛ր, ե՞րբ պիտի տեսնես։

Հոգիս հեռո՛ւ պահիր նրանց խորամանկությունից

Եվ միամորությունս՝ առյուծներից։

¹⁸ Գոհություն պիտի մատուցեմ քեզ, Տե՜ր,

Մեծ հավաքներում

Եվ պիտի օրհնաբանեմ քեզ բազմամարդ ժողովներում։

¹⁹ Թող ինձ վրա չխնդան թշնամիներս,

Որոնք առանց պատճառի ատում էին ինձ,

Թող վերջ գտնեն աչքերով արվող նրանց նշանները։

²⁰ Ինձ հետ խաղաղության մասին էին խոսում,

Բայց իրենց բարկությամբ՝ նենգություն խորհում։

²¹ Ինձ վրա բացեցին իրենց բերաններն ու ասացին.

«Այո՛, այո՛, մեր աչքերը տեսան»։

²² Ո՜վ Տեր, տեսար. մի՛ լռիր.

Տե՛ր, մի՛ հեռացիր ինձանից։

²³ Զարթնի՛ր և նայի՛ր, Տե՛ր, իմ իրավունքին ու դատաստանին,

Աստվա՛ծ իմ և Տե՛ր իմ։

²⁴ Քո արդարությամբ իմ դատաստա՛նը տես,

Ո՛վ Տեր, Աստվա՛ծ իմ։

Թող ինձ չծաղրեն իմ թշնամիները

²⁵ Եվ թող չասեն իրենց սրտերում.

«Երնե՜կ, երնե՜կ մեր անձերին, քանզի կործանեցինք նրան»։

²⁶ Թող խայտառակվեն և ամաչեն

Իմ դժբախտությամբ ուրախացողները,

Թող ամոթ և անարգանք հագնեն

Իմ դեմ մեծախոսողները։

²⁷ Թող ցնծան և ուրախանան քեզնով բոլոր նրանք,

Ովքեր իմ արդարությունն են կամենում։

Ամեն ժամ թող ասեն. «Աստված մեծ է»,

Ովքեր քո ծառային խաղաղություն են կամենում։

²⁸ Լեզուս թող խոսի քո արդարության մասին

Եվ հանապազ քեզ գովաբանի։

35(36)

¹ Դպրապետին։ Տիրոջ ծառա Դավթի սաղմոսը

² Մեղանչելիս անօրենն ասում է ինքն իրեն,

Թե իր աչքերի առջև Աստծու երկյուղը չկա.

³ Խորամանկեց նրա առջև՝ թաքցնելով իր նյութած անօրենությունը և չատելով այն։

⁴ Նրա բերանի խոսքերն անօրենություն ու նենգություն են։

Նա չուզեց իմանալ բարին.

⁵ Անօրենություն խորհեց իր անկողնում,

Կանգնեց այն ամեն ճանապարհի վրա, որ բարի չէ,

Եվ չարից չձանձրացավ։

⁶ Տե՛ր, երկնքում է քո ողորմությունը,

Իսկ ճշմարտությունդ մինչև ամպերն է հասնում։

⁷ Աստվա՛ծ, արդարությունդ լեռների պես է,

Իրավունքդ՝ բազում խորությունների նման։

Տե՜ր, դու փրկում ես մարդկանց և անասուններին։

⁸ Որքա՜ն առատացրիր քո ողորմությունը, ո՛վ Աստված,

Ուստի մարդկանց որդիները թևերիդ հովանուն պիտի հուսան,

⁹ Քո տան առատությունից պիտի արբենան,

Եվ նրանց պիտի ըմպել տաս քո փափկության ակունքներից։

¹⁰ Կյանքի աղբյուրը քեզանից է, Տե՜ր,

Եվ երեսիդ լույսով ենք տեսնում լույսը։

¹¹ Ողորմությունդ ծագեցրո՛ւ քեզ ճանաչողներին

Եվ արդարությունդ՝ սրտով ուղիղներին։

¹² Թող մեզ չհասնի ամբարտավանի ոտքը,

Եվ մեղավորների ձեռքերը դող չպատճառեն մեզ։

¹³ Այնտեղ պիտի ընկնեն

Բոլոր անօրենություն գործողները,

Պիտի մերժվեն,

Որ այլևս չկարողանան ոտքի կանգնել։

36(37)

¹ Սաղմոս Դավթի

Մի՛ նախանձիր չարերին, ոչ էլ նրանց,

Ովքեր անօրենություն են գործում։

² Քանզի խոտի նման կչորանան շուտով,

Դալար խոտի պես արագ կանցնեն։

³ Տիրո՛ջը հուսա և բարությո՛ւն արա։

Բնակվի՛ր երկրում և հովվի՛ր նրա մեծության մեջ։

⁴ Պաղատի՛ր Տիրոջը, և կտա քեզ սրտիդ խնդրածը,

⁵ Տիրոջը հայտնի՛ր քո ճանապարհները և նրա՛ն հուսա։

⁶ Նա այնպես կանի, որ արդարությունդ լույսի պես երևա,

Եվ իրավունքդ՝ կեսօրվա նման։

⁷ Հնազա՛նդ եղիր Տիրոջը և ծառայի՛ր նրան

Եվ մի՛ նախանձիր նրանց, որոնց ճանապարհներն ամոթալի են,

Կամ մարդուն, որ չարիք է գործում։

⁸ Հանդարտվի՛ր բարկությունից, վե՛րջ տուր սրտնեղությանը

Եվ մի՛ նախանձիր չարերին,

⁹ Քանզի նրանք շուտով կսատակեն,

Իսկ Տիրոջն սպասողները կժառանգեն երկիրը։

¹⁰ Եվս մի քիչ, և ամբարիշտն այլևս չի լինի.

Կփնտրես նրա տեղը և չես գտնի։

¹¹ Իսկ ովքեր հեզ են, կժառանգեն երկիրը

Եվ կզվարճանան իրենց երկարատև խաղաղության մեջ։

¹² Մեղավորը սպասում է արդարին

Եվ իր ատամներն է կրճտացնում նրա վրա։

¹³ Սակայն Տերը կծիծաղի մեղավորի վրա,

Քանզի սկզբից էլ գիտի, որ հասել է նրա օրը։

¹⁴ Մեղավորները սուր հանեցին

Եվ իրենց աղեղները լարեցին՝

Հարվածելու աղքատին ու անտունին,

Սպանելու սրտով խոնարհին։

¹⁵ Նրանց սրերը կմտնեն իրենց սրտերը,

Եվ նրանց աղեղները կփշրվեն։

¹⁶ Նախընտրելի է արդարի քիչը,

Քան մեղավորների մեծ հարստությունը։

¹⁷ Ամբարիշտների բազուկները կխորտակվեն,

Տերն արդարներին հաստատ կպահի։

¹⁸ Գիտի անմեղների ճանապարհները.

Նրանց ժառանգությունը հավիտյան կլինի։

¹⁹ Չարության ժամանակ նրանք չեն ամաչի,

Իսկ սովի օրերին կհագենան։

²⁰ Ահա մեղավորները կկորչեն,

Իսկ Տիրոջ թշնամիներն

Իրենց փառքի ու վերելքի ժամին կսպառվեն,

Ինչպես ծուխն է սպառվում։

²¹ Մեղավորը փոխ է առնում և չի հատուցում,

Այնինչ աղքատը խղճում է և տալիս։

²² Տիրոջն օրհնողները կժառանգեն երկիրը,

Իսկ ովքեր անիծում են, կոչնչացվեն նրանից։

²³ Տիրոջից է ուղղվում մարդու ընթացքը,

Եվ այդպիսով հույժ ցանկանում է նրա ճանապարհը.

²⁴ Թեպետև գայթակղվի, նա չի կործանվի,

Քանզի Տերն է բռնել նրա ձեռքը։

²⁵ Ես մանուկ էի, բայց ծերացա

Եվ չտեսա արդարին արհամարհված,

Ոչ էլ նրա զավակին՝ հաց մուրալիս։

²⁶ Ամեն օր ողորմում է և փոխ տալիս.

Նրա զավակը հավիտյան թող օրհնյալ լինի։

²⁷ Չարից խուսափի՛ր, բարությո՛ւն արա

Եվ դրա մեջ կապրես հավիտյանս հավիտենից։

²⁸ Տերը սիրում է իրավունքը և իր սրբերին վայր չի գցում,

Այլ հավիտյան պահում է նրանց։

Անօրենները կհալածվեն միասին,

Եվ ամբարիշտների սերունդը կկորչի։

²⁹ Սակայն արդարները կժառանգեն երկիրը

Եվ հավիտյանս հավիտենից կբնակվեն այնտեղ։

³⁰ Արդարի բերանն իմաստություն է պատմում,

Իսկ լեզուն՝ իրավունք խոսում։

³¹ Աստծու օրենքն իր սրտի մեջ է պահում.

Նրա ընթացքը չի գայթակղվի։

³² Նայում է մեղավորն արդարին

Եվ փորձում է սպանել նրան,

³³ Բայց Տերը նրա ձեռքը չի հանձնի նրան

Եվ դատի ժամանակ չի թողնի նրան։

³⁴ Սպասի՛ր Տիրոջը և պահի՛ր նրա ճանապարհը,

Եվ կբարձրացնի քեզ՝ երկիրը ժառանգելու,

Եվ կտեսնես մեղավորի կորուստը։

³⁵ Տեսա ամբարիշտին խոյացած-բարձրացած՝

Լիբանանի մայրիների պես։

³⁶ Անցա, և չկար, փնտրեցի, և նրա հետքը չերևաց։

³⁷ Պահի՛ր անբծությունը և տե՛ս ուղղությունը,

Որովհետև խաղաղարար մարդն ստացվածք կունենա։

³⁸ Անօրենները կհալածվեն միասին,

Եվ ամբարիշտների սերունդը կկորչի։

³⁹ Տիրոջից է արդարների փրկությունը.

Նրանց վերակացուն է նեղության ժամանակ։

⁴⁰ Տերը կօգնի և կփրկի նրանց,

Կազատի մեղավորներից ու կպահպանի նրանց,

Քանզի իր վրա հույս դրեցին։

37(38)

Ապաշխարության աղոթք

¹ Սաղմոս Դավթի՝ շաբաթօրյա զոհաբերության

² Տե՜ր, քո սրտմտությամբ մի՛ հանդիմանիր ինձ

Եվ մի՛ խրատիր ինձ քո բարկությամբ։

³ Քանզի նետերդ խոցեցին ինձ, և ձեռքդ ծանրացավ վրաս։

⁴ Մարմնիս համար բժշկություն չկա քո բարկության պատճառով։

Ոսկորներս խաղաղություն չունեն իմ մեղքերի պատճառով։

⁵ Անօրենություններս գլխիցս էլ վեր բարձրացան

Եվ ծանր բեռի պես ծանրացան վրաս։

⁶ Անզգամությանս պատճառով նեխեցին և փտեցին վերքերն իմ։

⁷ Տառապեցի և հույժ խոնարհ դարձա,

Ամբողջ օրը տրտում շրջեցի,

⁸ Քանզի հոգիս լցվեց չարչարանքներով,

Եվ մարմնիս համար բժշկություն չկա։

⁹ Չարչարվեցի և չափազանց խոնարհ դարձա,

Մռնչացի սրտիս հեծությունից։

¹⁰ Ո՜վ Տեր, իմ ողջ ցանկությունը քո առջև է,

Եվ հեծեծանքս չծածկվեց քեզանից։

¹¹ Սիրտս իմ ներսում խռովվեց, և ուժս լքեց ինձ.

Ինձ լքեց նույնիսկ լույսն աչքերիս։

¹² Իմ բարեկամներն ու մերձավորները

Մոտեցան ու կանգնեցին իմ դեմ.

Եվ մերձավորներս ինձանից հեռու մնացին։

¹³ Իմ մասին չար մտածողները բռնադատում էին ինձ

Եվ հոգիս էին ուզում.

Անօրենություն խոսեցին

Եվ զօրհանապազ նենգություն մտածեցին։

¹⁴ Իսկ ես խուլի պես էի, որ չի լսում,

Համրի պես, որ բերանը չի բացում.

¹⁵ Ես եղա այն մարդու պես, որ չի լսում

Եվ խոսքեր չունի իր բերանում։

¹⁶ Ես քեզ վրա հույս դրեցի, Տե՜ր, և դու կլսես ինձ, Տե՜ր, Աստվա՛ծ իմ։

¹⁷ Ասացի. «Թող թշնամիներս չծիծաղեն ինձ վրա,

Քանզի երբ ոտքս սայթաքեց, նրանք մեծ-մեծ խոսեցին իմ դեմ»։

¹⁸ Ես պատրաստ եմ տանջանքների,

Եվ ցավերս իմ առջև են ամեն ժամ։

¹⁹ Ուստի կպատմեմ իմ անօրենությունները

Եվ կհոգամ մեղքերիս համար։

²⁰ Իսկ արդ իմ թշնամիները կենդանի են և ավելի հզոր, քան ես.

Բազում են ինձ հանիրավի ատողները,

²¹ Ովքեր ինձ բարու փոխարեն չար հատուցեցին,

Չարախոսեցին իմ մասին,

Քանզի արդարության հետևից էի ընթանում։

²² Մի՛ լքիր ինձ, Տե՜ր, Աստվա՛ծ իմ, մի՛ հեռացիր ինձանից,

²³ Նայի՛ր, որ ինձ օգնես, ո՜վ իմ փրկիչ, Տե՜ր։

38(39)

¹ Դպրապետին՝ Իդիթոմին։ Օրհներգ Դավթի

² Ասացի, թե պիտի պահեմ իմ ճանապարհները,

Որպեսզի չմեղանչեմ լեզվով.

Բերանս զսպեցի,

Երբ մեղավորն ինձ հակառակվեց։

³ Խուլ եղա և խոնարհվեցի, հանուն բարության լռեցի,

Բայց ցավերս նորոգվեցին մեջս։

⁴ Սիրտս եռաց փորիս մեջ,

Եվ հուր վառվեց իմ մտածումների մեջ։

⁵ Խոսեցի իմ լեզվով և ասացի.

«Ցո՛ւյց տուր ինձ, Տե՜ր, վախճանս,

Եվ թե որքա՞ն է թիվն օրերիս, որպեսզի իմանամ,

Թե ինչքա՛ն է պակասել ինձանից։

⁶ Ահա սահման դրիր իմ օրերին,

Եվ կարողությանս ուժը ոչինչ է իմ առջև,

Որով բոլորովին ունայն է ամեն մսեղեն մարդ։

⁷ Իրապես, մարդ շրջում է ստվերի նման,

Սակայն իզո՜ւր է խռովվում.

Գանձ է դիզում՝ չիմանալով՝ ո՛ւմ համար։

⁸ Իսկ արդ ո՞վ է իմ համբերությունը, եթե ոչ դու, Տե՜ր,

Կամ ումի՞ց է իմ ուժն ու կարողությունը, եթե ոչ քեզանից։

⁹ Ինձ փրկեցիր իմ բոլոր անօրենություններից

Եվ անզգամներին նախատինք դարձրիր ինձ։

¹⁰ Խուլ եղա և չբացեցի բերանս, որովհետև դու արեցիր։

¹¹ Ինձանից հեռացրո՛ւ իմ տանջանքները,

Որովհետև քո ձեռքի զորությունից ես նվաղեցի։

¹² Կշտամբելով մեղքերի համար՝ խրատեցիր մարդուն,

Սարդոստայնի պես մաշեցիր նրա անձը,

Սակայն ունայն է ամեն մարդ։ Հանգիստ

¹³ Լսի՛ր, Տե՜ր, իմ աղոթքը, ակա՛նջ դիր խնդրանքներիս,

Գոնե արտասուքներս անպատասխան մի՛ թող։

Պանդուխտ եմ ես քո առաջ, օտարական ու անցավոր,

Ինչպես իմ բոլոր հայրերը։

¹⁴ Թո՛ւյլ տուր, որ հանգչեմ մինչև գնալս,

Քանի որ էլ չեմ լինի։

39(40)

¹ Դպրապետին։ Սաղմոս Դավթի

² Համբերությամբ սպասեցի Տիրոջը,

Եվ նայեց ինձ ու լսեց աղոթքս։

³ Ինձ հանեց տառապանքի հորից, կավի ու տիղմի միջից,

Ժայռի վրա հաստատեց ոտքերս

Եվ ուղղեց իմ ընթացքը։

⁴ Մի նոր օրհներգ դրեց բերանս՝ մեր Տիրոջ՝ Աստծու օրհներգը։

Շատերը պիտի տեսնեն ու վախենան և հուսան Տիրոջը։

⁵ Երանելի է այն մարդը, որի հույսը Տիրոջ անունն է.

Նա չնայեց ունայնության և սուտ մոլորության։

⁶ Բազում են քո սքանչելիքները, Տե՛ր, Աստվա՛ծ իմ,

Ոչ ոք նման չէ քեզ քո խորհուրդներում։

Պատմեցի ու խոսեցի որևէ թվից ավելի։

⁷ Զոհեր և պատարագներ չուզեցիր. լսողություն տվեցիր.

Ողջակեզ և մեղքի համար զոհ չուզեցիր։

⁸ Այնժամ ասացի. «Ահավասիկ գալիս եմ.

Գրքի մեջ գրված է իմ մասին»։

⁹ Կամքդ կատարել ուզեցի, Աստվա՛ծ իմ,

Եվ օրենքներդ՝ իմ ներսում։

¹⁰ Ես կավետարանեմ քո արդարությունը մեծ հավաքներում.

Ահա շրթունքներս չեմ կտրում քեզնից։

Ո՜վ Տեր, դու գիտես, ¹¹ որ քո արդարությունը

Չեմ ծածկել իմ սրտում,

Նաև քո ճշմարտությունն ու քեզնով փրկությունը։

Ասացի և չթաքցրի քո ողորմությունն

Ու քո ճշմարտությունը մեծ ժողովից։

¹² Իսկ դու, Տե՜ր, քո գթությունն ինձնից հեռու մի՛ պահիր,

Քո ողորմությունն ու ճշմարտությունը թող միշտ օգնեն ինձ։

¹³ Ինձ պաշարեցին չարերը, որոնց թիվ չկար,

Իմ անօրենությունները հասան ինձ, և ես չկարողացա տեսնել։

Գլխիս մազերից ավելի շատացան, և սիրտս լքեց ինձ։

¹⁴ Տե՛ր, կամեցի՛ր փրկել ինձ և նայի՛ր, որ օգնես ինձ, Տե՜ր։

¹⁵ Թող ամաչեն և ամոթահար լինեն նրանք,

Ովքեր ուզում էին հոգիս կործանել.

Թող հետ դառնան և ամաչեն ինձ չար կամեցողները։

¹⁶ Թող անմիջապես ամոթի մատնվեն նրանք,

Ովքեր ինձ ասում էին. «Վա՜յ, վա՜յ»։

¹⁷ Թող ցնծան և ուրախանան քեզանով

Բոլորը, ովքեր փնտրում են քեզ, Տե՜ր։

Թող ասեն ամեն ժամ. «Աստված մեծ է»,

Նրանք, ովքեր սիրում են քո տված փրկությունը։

¹⁸ Աղքատ և անտուն եմ ես, Աստվա՛ծ,

Խորհի՛ր իմ մասին.

Դու ես իմ օգնականն ու պաշտպանը,

Եվ դու, Աստվա՛ծ իմ, մի՛ ուշացիր։

40(41)

¹ Դպրապետին։ Սաղմոս Դավթի

² Երանի՜ նրան, ով մտածում է աղքատի և տնանկի մասին.

Վատ օրերին Տերը կփրկի նրան։

³ Տերը կփրկի և կպահպանի նրան,

Երանելի կդարձնի նրան երկրի վրա

Եվ չի մատնի նրան իր թշնամիների ձեռքը։

⁴ Տերը կօգնի նրան ցավերի անկողնու մեջ,

Նրա անկողինն ամբողջովին կմաքրի հիվանդությունից։

⁵ Ես ասացի. «Տե՜ր, ողորմի՛ր ինձ, բժշկի՛ր անձս.

Ես մեղանչեցի քո դեմ»։

⁶ Թշնամիներս չարությամբ ասացին. «Նա ե՞րբ պիտի մեռնի,

Եվ նրա անունը կորչի»։

⁷ Ասողներից մեկը մտնում էր տեսնելու ունայնությունը,

Խոսում էր իր սրտում և հոգու մեջ անօրենություն կուտակում.

Դուրս էր գալիս և նույնը խոսում։

⁸ Բոլոր թշնամիներս շշնջացին իմ դեմ

Եվ չարիք խորհեցին իմ դեմ՝

⁹ Անօրենության խոսք վերագրելով ինձ.

«Ով ննջում է, մի՞թե այլևս

Հարություն չի առնելու»,

¹⁰ Քանզի խաղաղության մարդը,

Որին ես վստահում էի, և որն ուտում էր իմ հացը,

Իմ դեմ հաճախակի խաբեություն գործեց։

¹¹ Բայց դու, ո՜վ Տեր, ողորմի՛ր ինձ, ոտքի՛ հանիր ինձ,

Որ հատուցեմ նրանց։

¹² Սրանից ես կիմանամ, որ սիրում ես ինձ,

Երբ թշնամիներս չուրախանան ինձ վրա։

¹³ Դու իմ անբծության համար ընդունեցիր ինձ

Եվ հավիտյան հաստատեցիր քո առջև։

¹⁴ Օրհնյա՜լ է Տերը՝ Իսրայելի Աստվածը,

Հավիտյանս հավիտենից. եղիցի՜, եղիցի՜։

41(42)

¹ Դպրապետին՝ Կորխի որդիների՝ սաղմոս իմաստության

² Ինչպես եղջերուն աղբյուրների ջրին է փափագում,

Այնպես էլ իմ հոգին՝ քեզ, ո՜վ Աստված։

³ Հոգիս ծարավ է քեզ, Աստվա՛ծ հզոր և կենդանի.

Ե՞րբ պիտի գամ և երևամ, Աստվա՛ծ, քո առաջ։

⁴ Արցունքներս կերակուր եղան ինձ համար գիշեր ու ցերեկ,

Քանզի ամեն օր ինձ ասում էին. «Ո՞ւր է քո Աստվածը»։

⁵ Այս հիշելիս հոգիս տառապում էր իմ ներսում։

Բայց քաջալերվում էի,

Քանի որ Աստծու տան սքանչելի հարկի տակ պիտի մտնեմ

Ցնծության և օրհնության ձայնով

Եվ ձայնով տոնակատարության։

⁶ Արդ, ինչո՞ւ ես տրտում, հոգի՛ս,

Կամ ինչո՞ւ ես ինձ խռովեցնում.

Հույսդ Աստծու վրա՛ դիր։

Նորից փառաբանի՛ր նրան՝

Իմ էության Փրկչին և իմ Աստծուն։

⁷ Հոգիս հույժ խռովվեց ինքն իր մեջ,

Դրա համար քեզ հիշեցի Հորդանանի երկրից

Եվ Հերմոնի փոքր լեռից։

⁸ Խորությունները խորքից ձայնեցին քեզ

Քո սահանքների ձայնով։

Քո բոլոր կոհակներն ու ալիքներն անցան իմ վրայով։

⁹ Տերն իր ողորմությունը ցերեկով հաստատեց,

Գիշերով՝ նոր օրհնությունը,

Եվ աղոթքն իմ առ Աստված՝ իմ կյանքի համար։

¹⁰ Ասացի Աստծուն. «Իմ օգնականը դու ես,

Ինչո՞ւ մերժեցիր ինձ, ինչո՞ւ տխուր-տրտում գնամ

Թշնամուս հալածանքի ժամանակ»։

¹¹ Երբ ոսկորներս փշրվեցին,

Իմ թշնամիներն ինձ նախատեցին՝

Ամեն օր ասելով. «Քո Աստվածն ո՞ւր է»։

¹² Արդ ինչո՞ւ ես տրտում, հոգի՛ իմ,

Կամ ինչո՞ւ ես ինձ խռովեցնում. հուսա՛ Աստծուն,

Խոստովանի՛ր նրան, քանի որ իմ երեսի փրկիչ Աստվածն է։

42(43)

¹ Սաղմոս Դավթի

Դատի՛ր ինձ, Աստվա՛ծ,

Եվ իմ դատաստանի մեջ ինձ արդարացրո՛ւ։

Փրկի՛ր ինձ նենգավոր և մեղավոր մարդուց

Եվ անսուրբ ազգից։

² Դու ես ինձ հզորացնող Աստվածը.

Ինչո՞ւ մոռացար ինձ,

Ինչո՞ւ տրտում գնամ իմ թշնամուց նեղվելիս։

³ Ուղարկի՛ր, Տե՜ր, քո լույսն ու ճշմարտությունը,

Որ առաջնորդեն ինձ և հանեն

Դեպի քո սուրբ լեռը և քո բնակության հարկերը։

⁴ Պիտի մտնեմ Աստծու սեղանի առջև՝

Աստծու մոտ,

Որ ուրախալի է դարձնում իմ երիտասարդությունը։

Օրհներգելու եմ քեզ օրհնությամբ, Աստվա՛ծ, Աստվա՜ծ իմ։

⁵ Արդ ինչո՞ւ ես տրտում, հոգի՛ս,

Կամ ինչո՞ւ ես ինձ խռովեցնում.

Հույսդ Աստծու վրա՛ դիր.

Նորից փառաբանի՛ր նրան՝

Իմ էության Փրկչին և իմ Աստծուն։

43(44)

¹ Դպրապետին՝ Կորխի որդիների՝ սաղմոս իմաստության

² Ո՛վ Աստված, մեր ականջներով լսեցինք,

Ինչ որ մեր հայրերը պատմեցին մեզ.

Այն գործը, որ կատարեցիր նրանց օրերում, առաջին օրերում։

³ Քո ձեռքը վերացրեց հեթանոսներին

Եվ նրանց փոխարեն հաստատեց մեր հայրերին։

Չարչարեցիր ժողովուրդներին և դուրս հանեցիր նրանց.

⁴ Ո՛չ իրենց սրով ժառանգեցին երկիրը,

Ո՛չ էլ իրենց բազուկը փրկեց իրենց,

Այլ քո աջը, քո բազուկն ու քո երեսի լույսը,

Քանզի սիրեցիր նրանց։

⁵ Դու ինքդ ես իմ թագավորը և իմ Աստվածը,

Որ տնօրինեցիր Հակոբի փրկությունները։

⁶ Քեզնով պիտի հարվածենք մեր թշնամիներին

Եվ քո անվամբ պիտի արհամարհենք մեր դեմ ելնողներին։

⁷ Ո՛չ աղեղիս վրա եմ հույս դրել,

Եվ ո՛չ էլ սուրս պիտի փրկի ինձ,

⁸ Այլ դու ես մեր թշնամիներից մեզ փրկողը

Եվ մեզ ատողներին ամոթահար անողը։

⁹ Ամեն օր Աստծով պարծենանք

Եվ նրա անվանը խոստովանենք հավիտյան։ Հանգիստ

¹⁰ Բայց արդ մերժեցիր և անարգեցիր մեզ

Եվ չելար մեր զորքի հետ, ո՛վ Աստված։

¹¹ Մեզ թիկունք դարձնել տվեցիր մեր թշնամիների առաջ,

Եվ մեզ ատողները հափշտակեցին մեզ։

¹² Մեզ ոչխարի պես տվեցիր մորթվելու

Եվ մեզ հեթանոսների մեջ ցրեցիր։

¹³ Առանց գնի վաճառեցիր քո ժողովրդին,

Եվ մեր աղաղակն այժմ թիվ-համար չունի։

¹⁴ Մեզ մեր հարևանների նախատինքը դարձրիր

Եվ մեր դրացիների ծաղր ու ծանակը։

¹⁵ Մեզ հեթանոսների մեջ ասելիք դարձրիր,

Եվ ժողովուրդները մեր մասին լսելիս գլուխներն էին շարժում։

¹⁶ Ամեն օր նախատինքներս իմ առջև են,

Եվ երեսիս ամոթը պատել է ինձ

¹⁷ Նախատողի ու չարախոսի ձայնից,

Թշնամու և հալածողի երեսից։

¹⁸ Այս ամենը մեր գլխով անցավ,

Բայց մենք քեզ չմոռացանք

Ու չդրժեցինք քո Ուխտը,

¹⁹ Եվ մեր սրտերը չփոխվեցին։

Մեր շավիղները շեղեցիր քո ճանապարհներից,

²⁰ Մեզ խոնարհեցրիր չարչարանքի տեղերում,

Եվ մեզ պատեցին ստվերները մահվան։

²¹ Մի՞թե մոռացանք մեր Աստծու անունը

Կամ ձեռք մեկնեցինք օտար աստվածներին։

²² Սակայն Աստված այդ կիմանա,

Որովհետև նա է քննում մեր սրտի գաղտնիքները։

²³ Քանզի ամեն օր մեռնում ենք քեզ համար,

Համարվեցինք իբրև զոհաբերության նախատեսված ոչխարներ։

²⁴ Զարթնի՛ր, Տե՜ր, ինչո՞ւ ես ննջում.

Ելի՛ր և մի՛ մերժիր մեզ ընդմիշտ։

²⁵ Երեսդ ինչո՞ւ ես շրջում մեզնից,

Մեր նեղություններն ու աղքատությունը մոռանում։

²⁶ Մեր անձերը մինչև գետին խոնարհվեցին,

Իսկ մեր մեջքերը հողին հավասարվեցին.

²⁷ Ելի՛ր, Տե՜ր, օգնի՛ր մեզ

Եվ փրկի՛ր մեզ հանուն քո անվան։

44(45)

¹ Դպրապետին՝ Կորխի որդիների՝ սաղմոս իմաստության. օրհնություն սիրելիի համար

² Քո բարի պտուղները թող իմ սիրտը բխեցնի,

Եվ թող պատմեմ թագավորի գործերի մասին։

Լեզուս նման է արագագիր դպրի գրչին։

³ Գեղեցկատեսիլ ես մարդկանց բոլոր որդիներից,

Քո շուրթերից շնորհք է թափվում,

Դրա համար Աստված օրհնեց քեզ հավիտյան։

⁴ Ո՜վ հզոր, սուրը դի՛ր մեջքիդ,

Ո՜վ գեղեցիկդ ու վայելուչդ.

⁵ Քո փայլուն մարտե՛րը մղիր,

Թագավորի՛ր հանուն ճշմարտության

Եվ հեզերի արդարության,

Եվ քո աջը ահ կտարածի։

⁶ Ո՜վ հզոր, քո նետերը սրված են,

Եվ ժողովուրդները պիտի ենթարկվեն քեզ,

Նետերդ պիտի մխրճվեն թագավորի թշնամիների սրտի մեջ։

⁷ Հավիտյանս հավիտենից է քո Աթոռը, ո՜վ Աստված.

Քո արքայության գավազանը ողորմության գավազան է։

⁸ Սիրեցիր արդարությունը և ատեցիր անօրենությունը։

Դրա համար Աստված, քո Աստվածն օծեց քեզ

Ուրախության յուղով ավելի, քան քո ընկերներին։

⁹ Քո զգեստներից ու փղոսկրյա տաճարներից

Զմուռս, ստաշխ և կասիա է բուրում,

¹⁰ Որով և ուրախացան ու պատվեցին քեզ արքայադուստրերը։

Թագուհին կանգնած է քո աջին՝

Զարդարված և պաճուճված ոսկեհուռ հանդերձներով։

¹¹ Լսի՛ր, դո՛ւստր, տե՛ս, խոնարհեցրո՛ւ քո ականջը.

Մոռացի՛ր քո ժողովրդին և քո հոր տունը,

¹² Որովհետև թագավորը ցանկացավ քո գեղեցկությունը։

Նա ինքն է քո տերը. ¹³ պիտի երկրպագես նրան,

Նրան պիտի երկրպագի և դուստրը Ծուրի [* և Ο΄ Տյուրոս],

Եվ ժողովրդի մեծամեծները

Պիտի պաշտեն նրան ընծաներով։

¹⁴ Արքայադստեր ամբողջ փառքը պալատի ներսում է՝

Զարդարված և պաճուճված ոսկեհուռ զգեստով։

¹⁵ Նրա հետ կույսեր պիտի տարվեն թագավորի մոտ,

Եվ նրա ընկերները պիտի տարվեն նրա մոտ։

¹⁶ Ցնծությամբ և ուրախությամբ պիտի բերվեն

Ու տարվեն թագավորի պալատ։

¹⁷ Եվ քո հայրերի փոխարեն քո որդիները պիտի լինեն.

Նրանց իշխաններ պիտի կարգես ողջ երկրի վրա։

¹⁸ Քո անունը պիտի հիշվի սերնդեսերունդ։

Դրա համար ժողովուրդները քեզ պիտի խոստովանեն հավիտյանս հավիտենից։

45(46)

¹ Դպրապետին՝ Կորխի որդիների գաղտնիքների մասին

² Աստված մեր ապավենն է և զորությունը

Եվ օգնականը խիստ նեղությունների մեջ։

³ Դրա համար չենք վախենա, երբ երկիրը խռովվի,

Եվ լեռները դեպի ծովի խորքը փոխվեն։

⁴ Շաչեցին և խռովվեցին ծովերի ջրերը,

Եվ նրա զորությունից լեռները սասանվեցին։ Հանգիստ

⁵ Գետերի հոսանքներն ուրախացնում են Աստծու քաղաքը,

Եվ Բարձրյալը սրբացրեց իր բնակության վայրը։

⁶ Աստված նրանց մեջ է, և նրանք չեն սասանվի,

Նրանց կօգնի Աստված վաղորդայնից վաղորդայն։

⁷ Խռովվեցին հեթանոսները, և թագավորությունները խոնարհվեցին.

Բարձրյալը ձայնեց, և երկիրը դողաց։

⁸ Մեզ հետ է Զորությունների Տերը.

Հակոբի Աստվածը մեր ապավենն է։

⁹ Եկե՛ք և տեսե՛ք Աստծու գործերը,

Որ հրաշքներ և նշաններ գործեց երկրի վրա.

¹⁰ Պատերազմ մղեց երկրի մի ծայրից մինչև մյուսը,

Փշրեց աղեղները, խորտակեց զենքերը

Եվ հրով այրեց վահանները։

¹¹ Փութացե՛ք և իմացե՛ք, որ ես եմ Աստված.

Պիտի բարձրանամ հեթանոսների մեջ

Եվ երկրի երեսին։

¹² Մեզ հետ է Զորությունների Տերը.

Հակոբի Աստվածը մեր ապավենն է։

46(47)

¹ Դպրապետին՝ սաղմոս Կորխի որդիների

² Բոլոր հեթանոսնե՛ր, ծափահարե՛ք,

Ցնծության ձայնով դիմե՛ք Աստծուն,

³ Տերը բարձրյալ է, Տերն ահարկու.

Մեծ թագավոր՝ ողջ երկրի վրա։

⁴ Մեզ հնազանդեցրեց ժողովուրդներին

Եվ հեթանոսներին մեր ոտքերի տակ դրեց։

⁵ Մեզ իրեն որպես ժառանգություն ընտրեց,

Հակոբի գեղեցկությունները, որ և սիրեց։

⁶ Աստված համբարձվեց օրհնությամբ,

Մեր Տերը՝ փողի ձայնով։

⁷ Սաղմո՛ս երգեցեք մեր Աստծուն,

Սաղմո՛ս երգեցեք մեր թագավորին, սաղմո՛ս երգեցեք։

⁸ Ողջ երկրի վրա մեծ թագավորն Աստված է.

Նրան սաղմո՛ս երգեցեք իմաստությամբ։

⁹ Թագավորեց Աստված հեթանոսների վրա,

Աստված նստեց իր սրբության Աթոռի վրա։

¹⁰ Ժողովուրդների իշխանները հավաքվեցին

Աբրահամի Աստծու մոտ,

Քանզի Աստծու զորությունները

Երկրից շատ ավելի բարձրացան։

47(48)

¹ Սաղմոս Կորխի որդիների՝ երկուշաբթի օրվա

² Մեծ է Տերը և հույժ օրհնյալ մեր Աստծու քաղաքում,

Իր սուրբ լեռան վրա։

³ Ողջ երկիրը ամուր հաստատված ցնծում է.

Սիոնի գագաթների հյուսիսային կողմերը,

Մեծ թագավորի քաղաքը։

⁴ Աստված հայտնվում է իր տաճարում,

Երբ օգնական է լինում նրանց։

⁵ Ահավասիկ երկրի թագավորությունները հավաքվեցին

Եվ անցան միասին։

⁶ Նրանք այսպես տեսան և զարմացան,

Խռովվեցին, սասանվեցին, և դողը բռնեց նրանց։

⁷ Այնտեղ ծննդաբերության երկունքի նման

⁸ Սաստիկ հողմով պիտի փշրի Թարսիս գնալու ընդունակ նավերը։

⁹ Ինչպես լսեցինք, այնպես էլ տեսանք

Զորությունների Տիրոջ քաղաքում՝

Մեր Աստծու քաղաքում։

Աստված նրա հիմքերը գցեց հավիտյան։ Հանգիստ

¹⁰ Ստացանք ողորմությունդ, Աստվա՛ծ, քո ժողովրդի մեջ։ Հանգիստ

¹¹ Ինչպես քո անունն է, նույնպես և օրհնությունդ է ողջ տիեզերքում,

Եվ քո աջը լի է արդարությամբ։

¹² Ուրախ պիտի լինի Սիոն լեռը,

Եվ պիտի ցնծան դուստրերը Հուդայի

Քո դատաստանների համար, ո՛վ Տեր։

¹³ Շրջե՛ք Սիոնի շուրջը, շուրջկալե՛ք այն

Եվ շինե՛ք նրա աշտարակները։

¹⁴ Ձեր սրտերը նրա զորությա՛մբ լցրեք.

Կառուցե՛ք նրա ամրոցները,

Որպեսզի հնարավոր լինի պատմել այլ սերունդների։

¹⁵ Սա է Աստվածը, մեր Աստվածը

Հավիտյանս հավիտենից,

Եվ նա պիտի մեզ հովվի մինչև հավիտյան։

48(49)

¹ Դպրապետին՝ սաղմոս Կորխի որդիների

² Լսե՛ք այս, բոլո՛ր ազգեր,

Ունկնդրե՛ք բոլորդ, որ բնակվում եք աշխարհում։

³ Երկրի ծնունդնե՛ր և մարդկանց որդինե՛ր,

Բոլորդ մեկտեղ՝ մեծամեծնե՛ր և անտուննե՛ր։

⁴ Բերանս իմաստություն պիտի խոսի,

Եվ սրտիս խորհուրդները՝ հանճար։

⁵ Ականջ պիտի դնեմ առակ խոսելուն,

Պիտի բացեմ օրհնության առակներն ի սկզբանե։

⁶ Ինչո՞ւ վախենամ տառապանքի օրերից,

Ինձ հալածողների անօրենություններից

⁷ Եվ նրանցից, ովքեր իրենց զորության վրա են հույս դնում,

Իրենց մեծ հարստությամբ են պարծենում։

⁸ Ոչ ոք չի կարող ուրիշի պարտքը վճարել

Եվ ոչ էլ իր պարտքը՝ Աստծուն։

⁹ Նրանց կյանքի փրկագինը շատ թանկ է և երբեք չի կարող վճարվել,

¹⁰ Որպեսզի ապրեն մինչև վերջ

Եվ երբեք իրենց գերեզմանը չտեսնեն։

Երբ տեսնես, որ իմաստունները մեռնում են,

¹¹ Նրանց հետ կկորչեն նաև անզգամներն ու անմիտները՝

Օտարներին թողնելով իրենց հարստությունը։

¹² Գերեզմանները նրանց տները պիտի լինեն հավիտյան

Եվ նրանց հարկերը՝ սերնդից սերունդ,

Նրանց անունները կկարդացվեն իրենց գերեզմանաթմբերի վրա։

¹³ Մարդը պատվի մեջ էր և չհասկացավ.

Հավասարվեց անբան անասուններին

Եվ նմանվեց նրանց։

¹⁴ Այս է ճանապարհը նրանց գայթակղության,

Որից հետո իրենց բերաններով պիտի հաճոյանան։

¹⁵ Դժոխքի պիտի մատնվեն ոչխարների պես,

Եվ մահը պիտի հովվի նրանց,

Եվ արդարներն առավոտյան պիտի տիրեն նրանց։

Նրանց օգնությունները պիտի սպառվեն դժոխքում,

Եվ պիտի զրկվեն իրենց փառքից։

¹⁶ Բայց Աստված պիտի դժոխքի ձեռքից փրկի իմ անձը,

Երբ ինձ ընդունելու լինեն։

¹⁷ Մի՛ վախենա, երբ մարդը հարստանում է,

Երբ մեծանում է նրա տան փառքը։

¹⁸ Որովհետև մեռնելիս հետը ոչինչ չի տանի,

Եվ նրա տան փառքն իր հետ գերեզման չի իջնի։

¹⁹ Այլ նրա անձը կօրհնվի իր կենդանության ժամանակ,

Եվ քեզ շնորհակալ կլինի, երբ դու բարիք անես նրան։

²⁰ Նա կհասնի մինչև իր հոր սերունդը

Եվ հավիտյան լույս չի տեսնի։

²¹ Մարդը պատվի մեջ էր և չհասկացավ.

Հավասարվեց անբան անասուններին

Եվ նմանվեց նրանց։

49(50)

¹ Սաղմոս Ասափի

Աստվածների Աստված Տերը խոսեց.

Ձայն տվեց երկրին արևելքից մինչև արևմուտք։

² Սիոնից է նրա մեծ վայելչությունն

Ու փրկության գեղեցկությունը։

³ Մեր Աստված գալու է հայտնապես,

Եվ մեր Աստվածը չի լռելու։

Նրա առջև հուր պիտի բորբոքվի,

Եվ նրա շուրջը՝ սաստիկ մրրիկ։

⁴ Նա վերևից պիտի կանչի երկինքը և երկիրը՝

Դատելու իր ժողովրդին։

⁵ Իր մոտ է հավաքելու իր սրբերին

Եվ նրանց, ովքեր ուխտի զոհեր են դնում

Իր սեղանի վրա։

⁶ Երկինքը պիտի պատմի նրա արդարությունը,

Որովհետև Աստված դատավոր է։ Հանգիստ

⁷ «Լսի՛ր, իմ ժողովո՛ւրդ, և ես քեզ կասեմ,

Եվ դու, Իսրայե՛լ, քո դեմ կվկայեմ.

Ես եմ Աստվածը՝ քո Աստվածը։

⁸ Ինձ զոհաբերություններ ես անում,

Այդ մասին չէ, որ կշտամբում եմ քեզ.

Քո ողջակեզները միշտ իմ առջև են։

⁹ Բայց քո տնից արջառ չեմ ընդունի,

Ոչ էլ կարիք ունեմ նոխազների քո հոտից։

¹⁰ Քանզի իմն են անտառի բոլոր գազանները,

Լեռների երեներն ու բոլոր անասունները։

¹¹ Ճանաչում եմ երկնքի բոլոր թռչուններին,

Եվ դաշտի վայրի գեղեցկությունն ինձ մոտ է։

¹² Եթե քաղցեմ, քեզ ոչինչ չեմ ասի,

Քանզի իմն է աշխարհն իր ամբողջությամբ։

¹³ Ես չեմ ուտում քո արջառների միսը,

Ես չեմ ըմպում քո նոխազների արյունը։

¹⁴ Ինձ՝ Աստծուն, ավելի շուտ օրհնությո՛ւն մատուցիր.

Ուխտդ կատարի՛ր Բարձրյալի առջև։

¹⁵ Քո նեղության օրը կկանչես դու ինձ,

Եվ ես քեզ կփրկեմ, և դու ինձ կփառաբանես»։ Հանգիստ

¹⁶ Սակայն մեղավորին Աստված ասում է.

«Իսկ դու ինչո՞ւ ես պատմում իմ արդարությունը

Կամ ուխտս քո բերանն ես առնում։

¹⁷ Դու, որ ատեցիր իմ խրատը, մերժեցիր

Եվ հետ նետեցիր բերանիս բոլոր խոսքերը։

¹⁸ Երբ գողեր էիր տեսնում, ընթանում էիր նրանց հետ,

Շնացողների հետ բաժնեկից լինում։

¹⁹ Բերանդ չարություն էր բազմացնում,

Եվ լեզուդ՝ նենգություն նյութում։

²⁰ Նստած չարախոսում էիր եղբորիցդ

Եվ քո մոր որդու վրա գայթակղություն էիր բարդում։

²¹ Այս բոլորն արեցիր, ու ես լռեցի, ո՛վ անօրեն.

Քո մտքում կարծեցիր, թե ես քեզ կնմանվեմ։

Արդ, պիտի հանդիմանեմ և այս ամենը քո առջև դնեմ։

²² Իմացե՛ք բոլորդ, որ մոռացել եք Աստծուն.

Գուցե երբևէ հարձակման ենթարկվեք,

Եվ չգտնվի մեկը, որ ազատի ձեզ։

²³ Օրհնությո՛ւնը ինձ կփառավորի.

Ով իր ճանապարհը ուղիղ կգծի,

Նրան ցույց կտամ Աստծու տված փրկությունը»։

50(51)

Ապաշխարության աղոթք

¹ Դպրապետին։ Սաղմոս Դավթի, ² երբ նրա մոտ եկավ Նաթան մարգարեն, երբ ինքը մերձեցել էր Բերսաբեեին

³ Ողորմի՛ր ինձ, Աստվա՛ծ, քո մեծ ողորմությամբ

Եվ անօրենություններս քավի՛ր քո առատ գթությամբ։

⁴ Ամբողջովին լվա՛ ինձ իմ անօրենություններից

Եվ սրբի՛ր ինձ իմ մեղքերից։

⁵ Իմ անօրենությունները ես անձամբ գիտեմ,

Եվ իմ մեղքերն իմ առջև են միշտ։

⁶ Տե՜ր, միայն քո դեմ մեղանչեցի և քո առջև չարիք գործեցի,

Հետևաբար արդար ես խոսքիդ մեջ և հաղթող՝ դատաստանիդ մեջ։

⁷ Անօրենությամբ հղացավ և մեղքի մեջ մայրս ծնեց ինձ։

⁸ Դու, ո՜վ Տեր, ճշմարտությունը սիրեցիր

Եվ քո իմաստությամբ ինձ հայտնեցիր

Անհայտներն ու ծածկվածները։

⁹ Ինձ ցողի՛ր մշտիկով, որ սրբանամ,

Լվա՛, որ ես ձյունից ավելի սպիտակ լինեմ։

¹⁰ Ինձ լսելի՛ դարձրու ցնծությունը և ուրախությունը,

Եվ թող ցնծան իմ տառապած ոսկորները։

¹¹ Քո երեսը դարձրո՛ւ իմ մեղքերից

Եվ բոլոր անօրենություններիս քավությո՛ւն տուր։

¹² Սուրբ սի՛րտ հաստատիր իմ մեջ, ո՜վ Աստված,

Եվ ուղիղ հոգի՛ նորոգիր իմ ներսում։

¹³ Ինձ մի՛ անտեսիր, Տե՜ր,

Եվ քո սուրբ հոգին մի՛ հեռացրու ինձնից։

¹⁴ Քեզնով փրկության ցնծությո՛ւնը տուր ինձ

Եվ ամրացրո՛ւ ինձ քո հոգու իշխանությամբ։

¹⁵ Անօրեններին պիտի սովորեցնեմ քո ճամփաները,

Եվ ամբարիշտները պիտի վերադառնան դեպի քեզ։

¹⁶ Փրկի՛ր ինձ արյունից, Աստվա՛ծ, իմ փրկությա՜ն Աստված,

Եվ թող լեզուս ցնծա քո արդարությամբ։

¹⁷ Ո՜վ Տեր, եթե բացես շրթունքներս,

Իմ բերանը պիտի երգի քո օրհնությունները։

¹⁸ Եթե զոհեր ուզեիր, կտայինք,

Բայց դու ողջակեզներն անգամ չհաճեցիր ընդունել։

¹⁹ Աստծու պատարագը խոնարհ հոգին է.

Մաքուր սիրտը և խոնարհ հոգին

Աստված չի արհամարհում։

²⁰ Ո՜վ Տեր, քո կամեցողությամբ բարի՛ք արա Սիոնին,

Եվ թող շինվեն պարիսպները Երուսաղեմի։

²¹ Այդ ժամանակ հաճելի կլինեն քեզ արդարության զոհերը, ողջակեզները և ընծաները,

Այդ ժամանակ արջառները կզոհեն քո զոհասեղանին։

51(52)

¹ Դպրապետին։ Դավթի՝ սաղմոս իմաստության, ² երբ Դովեկ Եդովմացին Սավուղին պատմեց, թե ահա Դավիթն Աբիմելեքի տանն է:

³ Ինչո՞ւ է հզորը պարծենում չարության անօրենությամբ։

⁴ Իր լեզվով զօրհանապազ անիրավություն խորհեց,

Սուր ածելիի պես սրեց իր նենգությունը,

⁵ Բարությունից ավելի չարություն սիրեց

Եվ արդար խոսքերից ավելի՝ անօրենություն։ Հանգիստ

⁶ Նա ամեն տեսակ կործանարար խոսքեր

Եվ նենգավոր լեզուներ սիրեց։

⁷ Դրա համար Աստված կկործանի նրան իսպառ,

Կխլի և կհանի նրան իր բնակավայրից

Եվ նրա արմատները՝ կենդանի երկրից։

⁸ Կտեսնեն արդարներն ու կերկյուղեն,

Կծաղրեն նրան և կասեն.

⁹ «Սա այն մարդն է, որ Աստծուն իրեն օգնական չարեց,

Այլ իր հույսն իր մեծ հարստության վրա դրեց

Եվ զորացավ իր նանրությամբ»։

¹⁰ Իսկ ես նման եմ Աստծու տան պտղալից ձիթենու.

Հուսացի Աստծու ողորմությանը հավիտյան

Եվ հավիտյանս հավիտենից։

¹¹ Քեզ հավիտյան գոհություն պիտի մատուցեմ արածիդ համար

Եվ սպասեմ քո անվանը,

Որովհետև քաղցր ես քո սրբերի առջև։

52(53)

¹ Դպրապետին՝ ողբագին։ Դավթի՝ սաղմոս իմաստության

² Անզգամն ասաց իր սրտում. «Աստված չկա»։

Ապականվեցին և պղծվեցին իրենց անօրենությունների մեջ.

Բարություն անող ոչ ոք չմնաց։

³ Աստված երկնքից նայեց մարդկանց որդիներին՝

Տեսնելու, թե կա՞ մի իմաստուն, որ փնտրում է Աստծուն։

⁴ Բոլորը միասին խոտորվեցին և անպիտան դարձան։

Բարիք գործող չկա, ոչ իսկ մեկ հոգի։

⁵ Մի՞թե չեն իմանում անօրենություն գործողները,

Որ ուտում են իմ ժողովրդին հացի կերակրի պես

Եվ չեն աղոթում Աստծուն։

⁶ Այնտեղ պիտի երկյուղի մատնվեն, որտեղ վախ չկա,

Որովհետև Աստված պիտի ցրի մարդահաճոների ոսկորները։

Պիտի ամաչեն և մատնվեն ամոթի,

Որովհետև Աստված անարգեց նրանց։

⁷ Սիոնից ո՞վ պիտի տա Իսրայելի փրկությունը.

Երբ տերը իր ժողովրդին գերությունից վերադարձնի,

Հակոբը պիտի ցնծա, և Իսրայելն ուրախ պիտի լինի։

53(54)

¹ Դպրապետին՝ քնարով։ Դավթի՝ սաղմոս իմաստության, ² երբ զիփացիները եկան և Սավուղին ասացին. «Ահա Դավիթը թաքնվել է մեզ մոտ»

³ Ո՜վ Աստված, քո անունով փրկի՛ր ինձ

Եվ քո զորությամբ արդարացրո՛ւ ինձ։

⁴ Ո՜վ Աստված, լսի՛ր աղոթքս,

Ակա՛նջ դիր իմ խոսքերին։

⁵ Օտարները հարձակվեցին ինձ վրա,

Հզորները կյանքս խլել ուզեցին

Եվ քեզ, Աստվա՛ծ, իբրև իմ օգնական չհամարեցին։

⁶ Ահա Տերն է իմ օգնականը,

Եվ Տերը՝ իմ հոգու պահապանը։

⁷ Դարձնելով չարը թշնամիներիս վրա՝

Կորցրո՛ւ նրանց քո ճշմարտությամբ։

⁸ Ես իմ կամքով քեզ զոհեր պիտի մատուցեմ

Եվ պիտի խոստովանեմ քո անունը, Տե՛ր,

Որովհետև բարի է։

⁹ Իմ բոլոր նեղություններից փրկեցիր ինձ,

Եվ իմ աչքը տեսավ թշնամիներիս կործանումը։

54(55)

¹ Դպրապետին՝ քնարով։ Դավթի՝ սաղմոս իմաստության

² Ո՛վ Աստված, ակա՛նջ դիր իմ աղոթքներին

Եվ մի՛ անտեսիր իմ խնդրանքները.

³ Նայի՛ր ու լսի՛ր ինձ,

Քանզի ձանձրության մեջ տրտմեցի

⁴ Եվ խռովվեցի թշնամու ձայնից

Եվ մեղավորի պատճառած նեղությունից։

Անիրավությամբ սխալվեցին իմ մասին

Եվ բարկությամբ ոխ պահեցին իմ դեմ։

⁵ Սիրտս խռովվեց իմ մեջ, և մահվան երկյուղ եկավ վրաս։

⁶ Ահ ու դող եկավ ինձ վրա, և խավարը ծածկեց ինձ։

⁷ Ասում էի. «Մեկը լիներ, աղավնու պես թևեր տար ինձ,

Որ թռչելով բարձրանայի,

⁸ Հեռանալով հանգստանայի անապատում»։

⁹ Ակնկալում էի Աստծուց, որ փրկեր ինձ

Զայրույթի կարճմտությունից,

Փոթորկվող նեղսրտությունից։

¹⁰ Խառնակի՛ր, Տե՜ր, և բաժանի՛ր նրանց լեզուները,

Քանզի անօրենություն և հակառակություն տեսա քաղաքի մեջ։

¹¹ Նրա պարիսպների շուրջը գիշեր-ցերեկ անօրենություն է,

Չարիք և մեղք կա նրանց մեջ,

¹² Եվ նրանց հրապարակներից չպակասեցին

Վաշխառությունն ու նենգությունը։

¹³ Քանզի եթե թշնամին լիներ նախատողը, գուցե համբերեի,

Կամ եթե ատելին լիներ իմ մասին դատարկ բաներ խոսողը,

Գուցե թաքնվեի նրանից։

¹⁴ Իսկ դո՛ւ, ո՜վ մարդ, ինձ հավասար ես,

Իմ առաջնորդն ես և իմ ծանոթը.

¹⁵ Իմ ու քո կերակուրը քո ներկայությամբ դու էիր քաղցրացնում,

Քանզի միաբանությամբ գնում էինք Աստծու տունը։

¹⁶ Մահը պիտի գա նրանց վրա, և կենդանի-կենդանի դժոխք պիտի իջնեն,

Քանզի չարություն կա նրանց բնակավայրերում

Եվ նրանց մեջ։

¹⁷ Ես աղոթեցի Աստծուն, և Տերն ինձ լսեց։

¹⁸ Երեկոյան, առավոտյան և կեսօրին

Պատմեցի ու ասացի, և նա իմ ձայնը կլսի.

¹⁹ Խաղաղությամբ կփրկի հոգիս մերձավորներիցս,

Քանզի ուժգին հարձակվեցին վրաս։

²⁰ Աստված կլսի և կխոնարհեցնի նրանց,

Աստված, որ ժամանակներից առաջ է,

Քանզի չեն փոխվում նրանք և Աստծուց չեն վախենում.

²¹ Մեկնեց իր ձեռքը՝ նրանց պատժելու,

Իսկ նրանք պղծեցին նրա օրենքները։

²² Նրա երեսի սրտմտությունից բաժանվեցին,

Բայց նա հասավ նրանց սրտերին։

Ձեթից ավելի փափուկ էին նրանց խոսքերը,

Բայց իրենք սլաքի էին նման։

²³ Քո հոգսերը Տիրո՛ջը հանձնիր, և նա քեզ կկերակրի

Եվ արդարին հավիտյան սասանում չի տա։

²⁴ Դու, Աստվա՛ծ, կիջեցնես նրանց ապականության վիհը.

Արյունահեղ և նենգավոր մարդիկ

Իրենց օրերի կեսին էլ չեն հասնի,

Իսկ ես, Տե՛ր, քեզ կհուսամ։

55(56)

¹ Դպրապետին՝ ժողովրդի մասին, որը հեռացել էր սրբերից։ Արձանագիր սաղմոս Դավթի, երբ այլազգիները նրան բռնել էին Գեթում

² Ողորմի՛ր ինձ, Աստվա՛ծ,

Որովհետև մարդն ինձ կոխոտեց.

Պատերազմները հանապազ նեղեցին ինձ։

³ Իմ թշնամիներն ամեն օր կոխոտեցին ինձ,

Եվ շատերը բարձունքից մարտնչեցին իմ դեմ։

⁴ Ցերեկով թերևս կերկյուղեմ, բայց հույսս Տիրոջ վրա կդնեմ,

⁵ Աստծով պիտի կատարեմ իմ գովաբանությունը

Ամբողջ ցերեկվա ընթացքում.

Աստծուն հուսացի ու չեմ վախենալու.

Մարդն ի՜նչ կարող է անել ինձ։

⁶ Ամեն օր իմ խոսքերն անարգեցին.

Նրանց չար խորհուրդներն իմ մասին էին։

⁷ Նրանք թող պանդուխտներ լինեն և գաղտագողի շրջեն.

Գաղտնի հետապնդում էին ինձ,

Ինչպես հետապնդում էին հոգիս։

⁸ Իբրև ոչնչություն պիտի մերժես նրանց,

Բարկությամբ պիտի հնազանդեցնես ժողովուրդներին։

⁹ Ո՛վ Աստված, կյանքս կպատմեմ քեզ,

Քո առջև կդնեմ իմ արցունքները,

Ինչպես խոստացար դու ինձ։

¹⁰ Իմ թշնամիները թիկունք դարձրած պիտի փախչեն

Այն օրը, երբ աղոթեմ քեզ։

Ահա ճանաչեցի, որ դու իմ Աստվածն ես։

¹¹ Աստծուն պիտի օրհնեմ իմ բերանով,

Տիրոջը գովեմ իմ խոսքերով.

¹² Աստծուն հուսացի ու չեմ վախենալու.

Մարդն ի՜նչ կարող է անել ինձ։

¹³ Ինձնից են, ո՜վ Աստված, ուխտերն իմ,

Որ քեզ պիտի մատուցեմ օրհնությամբ,

¹⁴ Փրկեցիր իմ անձը մահվանից,

Աչքերս՝ արտասուքներից,

Ոտքերս՝ գայթակղությունից.

Հաճելի կլինեմ Տիրոջ առաջ ողջերի երկրում։

56(57)

¹ Դպրապետին՝ ինչպես «Մի՛ ապականիր»-ը։ Սաղմոս Դավթի, արձանագիր, երբ նա Սավուղի երեսից փախել թաքնվել էր քարայրում

² Ողորմի՛ր ինձ, Աստվա՛ծ, ողորմի՛ր ինձ,

Որովհետև քեզ հուսացի։

Քո թևերի հովանուն պիտի հուսամ,

Մինչև անօրենությունն անցնի։

³ Աղաղակեցի Բարձրյալ Աստծուն,

Իմ բարերար Աստծուն։

⁴ Ուղարկեց երկնքից և ապրեցրեց ինձ,

Նախատեց ինձ կոխոտողներին։ Հանգիստ

Ուղարկեց Աստված իր ողորմությունն

Ու ճշմարտությունը

⁵ Եվ գազանների միջից հոգիս ազատեց,

Քանզի ննջում էի ես խռովված։

Քանզի զենք և նետ են մարդկանց որդիների համար իրենց ատամները,

Իսկ նրանց լեզուները՝ սուր սուսեր։

⁶ Բարձր ես երկինքների մեջ, Աստվա՛ծ,

Եվ ողջ երկիրն է բռնել քո փառքը։

⁷ Որոգայթ պատրաստեցին ոտքերիս,

Խոնարհեցրին հոգիս, իմ առջև խորխորատ փորեցին,

Բայց իրենք ընկան նրա մեջ։ Հանգիստ

⁸ Պատրաստ է սիրտս, Աստվա՛ծ,

Պատրաստ է սիրտս օրհնելու

Եվ սաղմոսելու քեզ փառաբանությամբ։

⁹ Արթնացի՛ր, փա՛ռք իմ, արթնացի՛ր

Սաղմոսերգությամբ և օրհնությամբ,

Եվ ես կարթնանամ առավոտյան.

¹⁰ Պիտի վկայեմ քեզ, Տե՛ր, ժողովուրդների մեջ

Եվ պիտի սաղմոս երգեմ քեզ ազգերի մեջ։

¹¹ Մեծ եղավ ողորմությունդ մինչև երկինք,

Քո ճշմարտությունը՝ մինչև ամպերը։

¹² Բարձր ես երկնքում, Աստվա՛ծ,

Եվ ողջ երկիրն է բռնել քո փառքը։

57(58)

¹ Դպրապետին՝ ինչպես «Մի՛ ապականիր»-ը։ Սաղմոս Դավթի, արձանագիր

² Արդարև, արդարությա՞մբ էիք խոսում

Եվ ուղի՞ղ էիք դատում, մարդկա՛նց որդիներ։

³ Քանզի այժմ իսկ ձեր սրտերում

Անօրենություն եք գործում երկրում,

Եվ ձեր ձեռքերը անիրավություն են նյութում։

⁴ Օտար եղան մեղավորներն իրենց մոր արգանդից սկսած,

Մոլորվեցին արգանդից և սուտ խոսեցին։

⁵ Նրանց սրտմտությունը նման է օձի.

Իժի, որ խցել է իր ականջները,

⁶ Որպեսզի չլսի ճարտար թովչի ձայնը

Եվ դեղ չառնի իմաստուն դեղատուից։

⁷ Աստված պիտի փշրի նրանց ատամներն

Իրենց բերաններում.

Տե՛րը խորտակեց առյուծների ժանիքները։

⁸ Թող նրանք անարգվեն հեղվող ջրի պես,

Նրա աղեղի լարման ժամանակ

⁹ Թող տկարանան հալվող մոմի նման և սպառվեն։

Հուր ընկավ, և արև չտեսան,

¹⁰ Դեռ իրենց փշերը չզգացած՝

Դժնիկի պես կենդանի կայրվեն բարկացած։

¹¹ Ուրախ կլինի արդարը՝ տեսնելով հատուցումը,

Եվ իր ձեռքերը կլվանա մեղավորի արյունով։

¹² Եվ մարդը կասի, թե իսկապես արդարին վարձատրություն կա,

Եվ կա Աստված, որ դատում է նրանց երկրի վրա։

58(59)

¹ Դպրապետին՝ ինչպես «Մի՛ ապականիր»-ը։ Սաղմոս Դավթի, արձանագիր, երբ Սավուղը զորք ուղարկեց պաշարելու նրա տունը և սպանելու նրան

² Աստվա՛ծ, փրկի՛ր ինձ իմ թշնամիներից,

Ապրեցրո՛ւ ինձ նրանցից, ովքեր իմ դեմ են ելել։

³ Փրկի՛ր ինձ անօրենություն գործողներից,

Ապրեցրո՛ւ ինձ արյունահեղ մարդկանցից։

⁴ Ցանկացան որսալ ինձ,

Եվ հզորներն ինձ վրա հարձակվեցին։

Ո՛չ մեղք ունեմ և ո՛չ հանցանք,

⁵ Առանց մեղքի ընթացա և ուղիղ մնացի.

Ե՛լ իմ առջև և տե՛ս,

⁶ Տե՛ր Զորությունների, Աստվա՛ծ Իսրայելի։

Նայի՛ր և պատժի՛ր բոլոր հեթանոսներին

Եվ մի՛ ողորմիր անօրենություն գործողներին։ Հանգիստ

⁷ Նրանք երեկոյան վերադառնալիս

Սոված կմնան շների պես

Եվ կթափառեն քաղաքի շուրջը։

⁸ Նրանք կհաչեն իրենց բերաններով՝

Սուր դրած իրենց շուրթերին։

Բայց ո՞վ պիտի լսի այս,

⁹ Քանի որ դու, Տե՛ր,

Կծիծաղես նրանց վրա

Եվ կարհամարհես բոլոր հեթանոսներին։

¹⁰ Ո՜վ իմ զորություն, քեզ կապավինեմ,

Քանզի դու ես իմ օգնական Աստվածը։

¹¹ Իմ Աստծու ողորմությունը կհասնի ինձ,

Եվ իմ Աստվածն ինձ ցույց կտա իմ թշնամիների տանջանքները։

¹² Մի՛ սպանիր նրանց, որ չմոռանան քո ժողովրդին։

Ցրի՛ր նրանց քո զորությամբ

Եվ ընկճի՛ր նրանց,

Որովհետև դու իմ պաշտպանն ես, Տե՛ր։

¹³ Իրենց բերանի մեղքերի և շուրթերի խոսքերի համար

Թող ընկղմվեն իրենց ամբարտավանության մեջ,

Անեծքի և ստության մատնվեն։

¹⁴ Բարկության հետևանքով թող սպառվեն և կորչեն,

Թող իմանան, որ Աստված տիրում է Հակոբին

Եվ երկրի բոլոր ծագերին։

¹⁵ Նրանք երեկոյան վերադառնալիս

Սոված կլինեն շների նման

Եվ կդառնան քաղաքի շուրջը.

¹⁶ Նրանք կսփռվեն ուտելու համար,

Եվ երբ չկշտանան, կտրտնջան։

¹⁷ Իսկ ես պիտի երգեմ Տիրոջ օրհնությունը.

Պիտի ցնծամ առավոտյան քո ողորմությամբ,

Քանզի դու եղար իմ պաշտպանն ու ապաստանը։

Իմ նեղության օրերի

¹⁸ Օգնակա՛ն իմ, քեզ սաղմոս պիտի երգեմ,

Իմ ապավե՛ն Աստված,

Իմ ողորմությա՛ն Աստված։

59(60)

¹ Դպրապետին՝ ինչպես «անցած ժամանակների մասին»-ը։ Սաղմոս Դավթի, արձանագիր, ուսանելու համար, ² երբ նա հրի մատնեց Միջագետքի ու Սոբայի ասորիներին, իսկ հետ դառնալիս Հովաբն Աղի ձորում տասներկու հազար մարդ կոտորեց

³ Աստվա՛ծ, մերժեցիր և ավերեցիր մեզ,

Բարկացար, բայց պիտի գթաս մեզ։

⁴ Շարժեցիր երկիրն ու խռովեցրիր այն,

Բուժի՛ր նրա հարվածները, որովհետև սասանվեց։

⁵ Քո ժողովրդին խստություն ցույց տվեցիր

Եվ մեզ հիմարության գինի խմեցրիր։

⁶ Երկյուղածներիդ նշան տվեցիր,

Որ կարողանան ապրել աղեղի երեսից։

⁷ Ինչպես սիրելիներդ փրկվեցին,

Այնպես պահպանի՛ր քո աջով և լսի՛ր մեզ։

⁸ Աստված խոսեց իր սրբարանից.

«Պիտի ցնծամ, պիտի բաժանեմ Սյուքեմը

Եվ վրանների հովիտը չափեմ։

⁹ Իմն է Գաղաադը, և իմն է Մանասեն,

Եփրեմն է իմ գլխի սաղավարտը։

Հուդան իմ թագավորն է,

¹⁰ Մովաբը՝ հույսիս ավազանը,

Եդովմի վրա պիտի ուղղեմ իմ քայլերը.

Այլազգիները ինձ հնազանդվեցին»։

¹¹ Ո՞վ ինձ կտանի բերդաքաղաք,

Կամ ո՞վ ինձ կառաջնորդի մինչև Եդովմ,

¹² Եթե ոչ դու, Աստվա՛ծ, որ մերժեցիր մեզ

Եվ մեր զորքերի մեջ չեղար, Աստվա՛ծ։

¹³ Նեղության մեջ մեզ օգնությո՛ւն տուր,

Որովհետև ունայն է մարդու փրկությունը։

¹⁴ Աստծով արիություն կգործենք,

Եվ նա կարհամարհի մեզ նեղողներին։

60(61)

¹ Դպրապետին՝ քնարով։ Սաղմոս Դավթի

² Լսի՛ր, Աստվա՛ծ, իմ աղոթքները

Եվ ուշադի՛ր եղիր, Տե՛ր, իմ աղոթքին։

³ Երկրի ծագերից աղոթեցի քեզ այնքան, որ սիրտս նվաղեց։

Ժայռից ավելի բարձրացրիր ինձ,

⁴ Առաջնորդեցիր, հույսս եղար,

Հզոր աշտարակ եղար ինձ համար՝ ընդդեմ թշնամու։

⁵ Քո հարկում պիտի բնակվեմ ես հավիտյան

Եվ պիտի պատսպարվեմ քո թևերի հովանու տակ։ Հանգիստ

⁶ Քանզի դու, Աստվա՛ծ, լսեցիր իմ աղոթքները

Եվ քո անունից երկնչողներին ժառանգություն տվեցիր,

⁷ Օրեր ավելացրիր թագավորի տարիներին,

Օրեր՝ սերնդեսերունդ։

⁸ Կան և կմնան հավիտյան Աստծու առջև

Ողորմությունն ու ճշմարտությունը նրանց համար,

Ովքեր կխնդրեն նրանից։

⁹ Այսպես պիտի սաղմոս երգեմ քո անվանը

Հավիտյանս հավիտենից

Եվ քեզ աղոթքներս պիտի մատուցեմ օրըստօրե։

61(62)

¹ Դպրապետին՝ ինչպես «Իդիթոմը»։ Սաղմոս Դավթի

² Ա՛նձ իմ, միայն Աստծո՛ւն ապավինիր,

Որովհետև նրանից է իմ փրկությունը։

³ Նա է իմ Աստվածն ու իմ փրկիչը,

Իմ ապավենը, որ այլևս չսասանվեմ։

⁴ Մինչև ե՞րբ բոլորդ պիտի հարձակվեք մարդու վրա՝

Սպանելու ծռած պատի և կոտրած ցանկապատի պես։

⁵ Բայց նրանք խորհեցին միայն պատիվս նսեմացնել

Եվ ցանկացան իրենց ծարավին հագուրդ տալ։

Իրենց բերաններով օրհնում էին,

Իսկ սրտերում՝ անիծում։ Հանգիստ

⁶ Ա՛նձ իմ, միայն Աստծո՛ւն ապավինիր,

Որովհետև նրանից է իմ համբերությունը։

⁷ Նա է իմ Աստվածն ու իմ փրկիչը,

Իմ ապավենը, որ այլևս չսասանվեմ.

⁸ Աստծուց են իմ զորությունն ու իմ փառքը,

Աստված է օգնականս,

Եվ հույսս Աստծու վրա է։

⁹ Նրա՛ն հուսացեք, ժողովուրդների բոլոր ժողովնե՛ր,

Նրա առջև՛ սփռեք ձեր սրտերը,

Քանզի Աստված մեր օգնականն է

Հավիտյանս հավիտենից։ Հանգիստ

¹⁰ Սակայն ունայն ու սուտ են մարդկանց որդիները,

Մեղանչում են իրենց կշիռներով

Եվ ունայնության մեջ են միասին։

¹¹ Մի՛ հուսացեք անիրավությանը

Եվ հափշտակություն մի՛ ցանկացեք։

Եթե հարստություն գա առատությամբ,

Ձեր սրտերը թող չհոժարեն։

¹² Աստված մի անգամ խոսեց,

Եվ երկու բան լսեցինք.

¹³ Աստծունն է զորությունը,

Եվ որ դու ես հատուցում յուրաքանչյուրին

Ըստ իր գործերի։

62(63)

¹ Սաղմոս Դավթի, մինչ նա գտնվում էր Հուդայի երկրի անապատում

² Աստվա՛ծ, Աստվա՛ծ իմ,

Քեզ եմ աղոթում առավոտյան,

Հոգիս ծարավ է քեզ, առավել ևս՝ մարմինն իմ։

Ինչպես անջուր, չոր և անապատ երկիր,

Որտեղ չկա ճանապարհ,

³ Այնպես պիտի քո սրբարանում երևամ՝

Տեսնելու քո զորությունն ու փառքը,

⁴ Քանզի քո ողորմությունն ինձ համար ավելի լավ է,

Քան իմ կյանքը,

Եվ իմ շրթունքները պիտի գովեն քեզ։

⁵ Այսպես իմ կյանքում քեզ պիտի օրհնեմ

Եվ հանուն քեզ ձեռքերս վեր բարձրացնեմ։

⁶ Ասես ճարպի պարարտությունից պիտի հագենամ,

Բերանս ցնծալի շրթունքներով քեզ պիտի օրհնի։

⁷ Երբ հիշում էի քեզ անկողնուս մեջ,

Առավոտ շատ վաղ խոսում էի քեզ հետ,

⁸ Որովհետև իմ օգնականը եղար.

Քո թևերի հովանու ներքո պիտի ցնծամ։

⁹ Քեզ հետևեց անձն իմ, և քո աջն ընդունեց ինձ։

¹⁰ Նրանք իզուր հետապնդեցին ինձ.

Թող երկրի անդունդների խորքը մտնեն,

¹¹ Թող սրի մատնվեն

Եվ աղվեսների բաժին դառնան։

¹² Թագավորը հույսը Տիրոջ վրա կդնի.

Բոլոր նրանով երդվողները թող պարծենան,

Թող խցվեն նրանց բերանները,

Ովքեր խոսում են անիրավություն։

63(64)

¹ Դպրապետին։ Սաղմոս Դավթի

² Երբ քեզ աղաչեմ, լսի՛ր աղոթքներս, Աստվա՛ծ,

Թշնամու վախից ազատի՛ր հոգիս։

³ Թաքցրո՛ւ ինձ չարերի ամբոխներից

Եվ անօրենություն գործողների բազմությունից,

⁴ Որոնք սուսերի պես սրեցին իրենց լեզուները

Եվ իրենց աղեղները լարեցին դառը գործերի համար,

⁵ Որ սրտով ուղիղներին նետահարեն գաղտագողի,

Հանկարծակի նետահարեն նրանց՝ առանց երկյուղի։

⁶ Որոնք իրենց հոգիների մեջ զորացրին չարության խոսքերը,

Խորհեցին իմ դեմ որոգայթ լարել

Եվ ասացին. «Տերը չի տեսնում այս»։

⁷ Անօրենություն ծրագրեցին,

Պատրաստ եղան գործելու։

Մարդու սիրտը անքննելի է, նրա միտքը՝ նույնպես։

⁸ Բայց Աստված նրանց վրա տեղաց իր նետերը,

Եվ նրանք վիրավորվեցին։

⁹ Թույլ տվեց, որ նրանք կործանվեն

Իրենց լեզուների պատճառով։

Եվ բոլոր նրանց տեսնողները ցնցվեցին։

¹⁰ Բոլոր մարդիկ վախեցան

Եվ պատմեցին Աստծու գործերը

Եվ հիշեցին նրա արարածներին։

¹¹ Արդարը պիտի ուրախանա Տիրոջով՝

Հույսը դնելով նրա վրա։

Բոլոր սրտով ուղիղները պիտի պարծենան նրանով։

64(65)

¹ Դպրապետին։ Սաղմոս Դավթի[58]

² Քեզ վայել է օրհնություն Սիոնում, Աստվա՛ծ,

Եվ քեզ աղոթք պիտի մատուցվի Երուսաղեմում։

³ Լսի՛ր աղոթքներս, որովհետև ամեն մարմին քեզ մոտ է գալու.

⁴ Անօրենների խոսքերն ուժեղացան մեզ վրա,

Դու պիտի քավես մեր ամբարշտությունները։

⁵ Երանի՜ նրանց, որոնց ընտրեցիր և ընդունեցիր,

Քանի որ քո գավիթներում պիտի բնակվեն։

Մենք պիտի հագենանք քո տան բարիքներից,

Սուրբ է քո տաճարը,

սքանչելի՝ արդարությամբ։

⁶ Լսի՛ր մեզ, Աստվա՛ծ, փրկի՛չ մեր՝

Հույսը երկրի բոլոր ծագերի

Եվ հեռավոր ծովերի։

⁷ Նա, որ իր զորությամբ լեռներ է հաստատում

Եվ զորություն է հագել։

⁸ Նա, որ խռովեցնում է ծովի անդունդները

Եվ ցածրացնում նրա ալիքների ձայնը։

Հեթանոսները պիտի խռովվեն,

⁹ Եվ երկրի բնակիչները պիտի վախենան քո նշաններից

Ու պիտի զվարճանան արշալույսին և երեկոյան։

¹⁰ Նայեցիր երկրին ու արբեցրիր այն

Եվ բազմացրիր նրա հարստությունը։

Աստծու գետը լի եղավ ջրով.

Դու պատրաստեցիր նրա կերակուրը,

¹¹ Ոռոգեցիր նրա ակոսը

Եվ բազմացրիր նրա արմտիքը։

Ցողվելիս պիտի զվարթանա նրա բույսը,

¹² Քո քաղցրությամբ թող օրհնվի տարվա պսակը։

Դաշտերդ պարարտությամբ պիտի լցվեն,

¹³ Անապատի գեղեցկությունները պիտի պարարտանան,

Բլուրները ցնծությամբ պիտի զգեստավորվեն։

¹⁴ Մաքիների խոյերը պիտի զուգվեն,

Հովիտներն առատ ցորեն պիտի տան,

Պիտի ցնծան ու օրհներգեն։

65(66)

¹ Դպրապետին։ Սաղմոս Դավթի. հարության

Աղաղակե՛ք Աստծուն, ամենա՛յն երկիր,

² Սաղմո՛ս երգեք նրա անվանը

Եվ փառաբանե՛ք նրա օրհնությունը։

³ Ասացե՛ք Աստծուն. «Որքա՜ն ահեղ են քո գործերը,

Քո մեծ զորության պատճառով քո թշնամիները ստեցին քեզ։

⁴ Ողջ երկիրը պիտի երկրպագի քեզ,

Սաղմոս պիտի երգեն քեզ և քո անվանը»։ Հանգիստ

⁵ Եկե՛ք և տեսե՛ք գործերն Աստծու,

Թե որքան ահեղ են խորհրդով,

Մարդկանց բոլոր որդիներից ավելի։

⁶ Նա ծովը ցամաք դարձրեց,

Եվ ոտքով ժողովուրդն անցավ գետերի միջով։

Այնտեղ մենք ուրախ պիտի լինենք նրանով,

⁷ Որ հավետ տիրում է իր զորությամբ։

Նրա աչքերը նայում են հեթանոսներին,

Որոնք դառնացրին նրան.

Թող չպարծենան իրենց հոգիներում։ Հանգիստ

⁸ Օրհնեցե՛ք մեր Աստծուն, հեթանոսնե՛ր,

Լսելի՛ դարձրեք նրա օրհնության ձայնը։

⁹ Նա, որ իմ հոգուն կյանք պարգևեց

Եվ թույլ չտվեց, որ ոտքերս դողան։

¹⁰ Փորձեցիր մեզ, Աստվա՛ծ,

Քննեցիր, ինչպես արծաթն է քննվում։

¹¹ Մեզ իջեցրիր որոգայթի մեջ,

Նեղություն դրեցիր մեր թիկունքներին

¹² Եվ մարդկանց անցկացրիր մեր գլխի վրայով։

Մենք անցանք հրի և ջրի միջով,

Բայց մեզ խաղաղությամբ դուրս հանեցիր։

¹³ Պիտի քո տունը մտնեմ զոհաբերության ընծաներով,

Պիտի տամ քեզ իմ ուխտերը,

¹⁴ Որ խոստացան քեզ իմ շրթունքները,

Եվ ինչ որ բերանս խոսեց նեղության ժամանակ։

¹⁵ Յուղալի ողջակեզներ պիտի մատուցեմ քեզ

Խոյերով ու խնկերով,

Քեզ արջառներ և նոխազներ պիտի մատուցեմ։ Հանգիստ

¹⁶ Ամենքդ, որ երկյուղում եք Աստծուց,

Եկե՛ք և լսե՛ք ինձ, և ձեզ պիտի պատմեմ,

Թե ինչ արեց նա ինձ համար։

¹⁷ Իմ բերանով նրան դիմեցի

Եվ իմ լեզվով մեծարեցի նրան։

¹⁸ Թե սրտումս մեղք տեսնեի, Տերը չէր լսի ինձ։

¹⁹ Դրա համար Աստված լսեց ինձ

Եվ նայեց իմ խնդրանքների ձայնին։

²⁰ Օրհնյա՜լ է Աստված, որ չմերժեց աղոթքն իմ,

Ոչ էլ իր ողորմությունը՝ ինձանից։

66(67)

¹ Դպրապետին՝ քնարով։ Սաղմոս Դավթի

² Աստվա՛ծ, ողորմի՛ր մեզ և օրհնի՛ր մեզ,

Ցո՛ւյց տուր երեսդ մեզ և ողորմի՛ր մեզ։ Հանգիստ

³ Որպեսզի ճանաչեն քո ճանապարհները երկրում

Եվ փրկությունդ՝ բոլոր ազգերում։

⁴ Ժողովուրդները քեզ պիտի խոստովանեն, Աստվա՛ծ,

Բոլոր ժողովուրդները պիտի խոստովանեն քեզ։

⁵ Պիտի ուրախանան և ցնծան ազգերը,

Որովհետև դու արդարությամբ ես դատում ժողովուրդներին,

Եվ երկրի ազգերին դու ես առաջնորդում։ Հանգիստ

⁶ Թող խոստովանեն քեզ ժողովուրդները, Աստվա՛ծ,

Թող գոհություն մատուցեն քեզ բոլոր ժողովուրդները։

⁷ Երկիրը տվեց իր պտուղը, և Աստված,

Մե՛ր Աստված օրհնեց մեզ.

⁸ Մեր Աստվածը պիտի օրհնի մեզ,

Եվ երկրի բոլոր ծագերը պիտի վախենան նրանից։

67(68)

¹ Դպրապետին։ Սաղմոս Դավթի

² Թող Աստված ելնի, և նրա բոլոր թշնամիները թող ցրվեն,

Եվ նրան ատողները թող փախչեն նրա երեսից։

³ Թող պակասեն, ինչպես ծուխն է պակասում,

Ինչպես մոմն է հալվում կրակի դեմ,

Այնպես էլ թող կորչեն մեղավորները Աստծու երեսից։

⁴ Արդարները թող ուրախանան ու ցնծան նրա առաջ

Եվ զվարճանան իրենց ուրախությամբ։

⁵ Օրհնեցե՛ք Աստծուն և սաղմո՛ս ասացեք նրա անվանը,

Ճամփա՛ բացեք նրան, ով նստում է արևմուտքում,

Եվ նրա անունը Տեր է։

Թող ցնծան նրա առջև և խռովվեն նրա երեսից,

⁶ Նա, որ հայրն է որբերի և դատավորն այրիների,

Աստված՝ իր սրբավայրում։

⁷ Աստված բնակեցնում է տնանկներին տան մեջ

Եվ իր քաջությամբ ազատում բանտվածներին,

Ինչպես նաև դառնացողներին,

Որ բնակվում են գերեզմաններում։

⁸ Աստվա՛ծ, երբ դու ընթացար քո ժողովրդի առջևից,

Երբ անցար անապատով, Հանգիստ

⁹ Երկիրը ցնցվեց, և երկինքը ցողեց Աստծու երեսից Սինայում՝

Իսրայելի Աստծու առջև։

¹⁰ Շնորհաբեր անձրև պատրաստեցիր

Քո ժառանգության համար,

Որը թեև հիվանդացավ, բայց դու կազդուրեցիր նրան,

¹¹ Եվ քո գազանները պիտի բնակվեն այնտեղ։

Քո քաղցրությամբ, Աստվա՛ծ,

Պատրաստություն տեսար աղքատի համար։

¹² Տերը պատգամ պիտի տա նրանց,

Ովքեր մեծ զորությամբ բարի լուրն են տալիս.

¹³ Զորությունների սիրելի՛ թագավոր,

Քո տան գեղեցկությունը մատնվեց ավարի։

¹⁴ Թեկուզ և ննջեք վիճակների մեջ,

Աղավնու թևերն արծաթապատ են,

Եվ նրա թիկնամեջքը՝ ոսկեգույն։ Հանգիստ

¹⁵ Երկնավորը թագավորներին ցրեց երկրի վրա

Սեղմովնի՝ ձյունով ծածկվելու պես։

¹⁶ Աստծու լեռը պարարտ լեռ է,

Հաստատուն և պարարտ լեռ.

¹⁷ Եվ ի՞նչ եք կարծում, հպարտացա՛ծ լեռներ։

Ահավասիկ լեռը, որտեղ բարեհաճեց բնակվել Աստված.

Տերն իսկ բնակվելու է այնտեղ հավիտյան։

¹⁸ Աստծու կառքերը բյուրապատիկ են՝

Հազարավոր կառապաններով,

Նրանց մեջ է Տերը՝ Սինայի իր սրբարանից։

¹⁹ Ելավ բարձունքները և գերիներ առավ, ավար առավ,

Պարգևներ բաշխեց և տվեց մարդկանց որդիներին,

Որ նույնիսկ թերահավատներն այնտեղ բնակվեն։

²⁰ Օրհնյա՜լ է Աստված,

Օրհնյա՜լ է Տերը զօրհանապազ,

Մեր փրկիչ Աստվածը պիտի առաջնորդի մեզ։ Հանգիստ

²¹ Մեր Աստվածը կենարար Աստված է,

Տիրոջն են մահվան ելքերը։

²² Սակայն Աստված պիտի փշրի մեր թշնամիների գլուխները

Եվ պսակահեր գլուխները նրանց,

Ովքեր շարժվում են անօրենությամբ։

²³ Տերն ասաց. «Անդունդների խորքերից պիտի հանեմ

Եվ ժանիքների միջից դուրս պիտի կորզեմ նրան»։

²⁴ Որ ոտքդ արյան մեջ թրջվի, և քո շների լեզուները՝

Թշնամիներիդ արյունով։

²⁵ Աստվա՛ծ, քո ընթացքները երևացին.

Աստծու՝ մեր սուրբ թագավորի ընթացքները։

²⁶ Իշխաններն առաջ անցան՝ օրհնություն մատուցելու

Գուսանների և գովերգուների մեջ։

²⁷ Հավաքներում օրհնեցե՛ք Աստծուն,

Օրհնեցե՛ք Տիրոջը, որ Իսրայելի աղբյուրներից եք։

²⁸ Այնտեղ են հրաշամանուկ Բենիամինը,

Հուդայի առաջնորդ իշխանները,

Զաբուղոնի և Նեփթաղիմի իշխանները։

²⁹ Հրամայի՛ր քո զորությամբ, Աստվա՛ծ,

Զորացրո՛ւ այն, ինչը հաստատեցիր մեր մեջ.

³⁰ Երուսաղեմի քո սուրբ տաճարում թագավորները

Թող ընծաներ մատուցեն քեզ։

³¹ Սաստի՛ր եղեգների գազանին,

Արջառների և ցուլերի հոտերին։

Պիտի մերժվեն նրանք, որ արծաթով են ընտրված,

Ցրի՛ր հեթանոսներին ու պատերազմ կամեցողներին։

³² Եգիպտոսից պատգամավորներ պիտի գան,

Հնդիկները շուտով ձեռք կպարզեն Աստծուն։

³³ Երկրի թագավորություննե՛ր, օրհնեցե՛ք Աստծուն

Եվ սաղմո՛ս ասացեք Տիրոջը։ Հանգիստ

³⁴ Ճանապա՛րհ բացեք նրան, ով նստում է

Երկինքների երկնքում, արևելքում։

Ահա իր ձայնը պիտի տա, ձայնը զորության։

³⁵ Փա՛ռք տվեք Աստծուն։

Իսրայելի վրա է նրա մեծ վայելչությունը,

Իսկ նրա զորությունը մինչև երկնքի ամպերն է հասնում։

³⁶ Սքանչելի է Աստված իր սրբերի վրա,

Աստվածն Իսրայելի։

Նա զորություն պիտի տա

Եվ հաստատություն իր ժողովրդին.

Օրհնյա՜լ է Աստված։

68(69)

¹ Դպրապետին՝ ինչպես «Մի՛ ապականիր»-ը։ Սաղմոս Դավթի

² Փրկի՛ր ինձ, Աստվա՛ծ, քանզի ջրերը հասան իմ անձին,

³ Ընկղմվեցի անդունդների խորքերի մեջ,

Որտեղ ինձ համար հանգիստ չկա։ 

Հասա մինչև խորքերը ծովի,

Եվ հորձանքներն ինձ ընկղմեցին։

⁴ Հոգնեցի ես աղաղակելուց, և կոկորդս իսպառ չորացավ։

Աչքերս նվաղեցին իմ Աստծուն հուսալուց։

⁵ Գլխիս մազերից ավելի շատացան ինձ իզուր ատողները։

Ինձնից ավելի զորացան իմ թշնամիներն ու ինձ նանրությամբ ատողները,

Չհափշտակված բաների համար վճարեցի նրանց։

⁶ Աստվա՛ծ, դու ճանաչեցիր իմ անզգամությունը,

Եվ իմ հանցանքները քեզնից չծածկվեցին։

⁷ Թող քեզ սպասողները չամաչեն իմ պատճառով,

Տե՛ր, Զորությունների՛ Տեր,

Թող իմ պատճառով ամոթով չմնան նրանք,

Ովքեր փնտրում են քեզ, Աստվա՛ծ Իսրայելի։

⁸ Քեզ համար համբերեցի նախատինքներին,

Եվ ամոթը ծածկեց իմ երեսը։

⁹ Օտար եղա ես իմ եղբայրներին

Եվ հյուր՝ իմ մոր որդիների համար։

¹⁰ Քո տան նախանձը կերավ ինձ,

Եվ քո նախանձողների նախատինքը

Ընկավ ինձ վրա։

¹¹ Խոնարհեցրի հոգիս պահքով,

Եվ սա նախատինք եղավ ինձ,

¹² Իմ հագուստը քուրձ դարձրի

Եվ նրանց աչքին ծաղրանք դարձա։

¹³ Ինձ չարախոսում էին տան շեմին նստողները,

Ինձ այպանում էին գինի խմողները։

¹⁴ Ընդունված ժամին ես աղոթում էի քեզ, Տե՛ր։

Լսի՛ր ինձ, Աստվա՛ծ, քո առատ ողորմությամբ,

Քո՝ փրկության ճշմարտությամբ։

¹⁵ Ազատի՛ր ինձ ցեխից, որ չխորտակվեմ

Եվ փրկվեմ իմ ատելիներից

Ու բազում ջրերի խորություններից։

¹⁶ Ջրերի պտույտների հորձանքները թող ինձ չընկղմեն,

Ջրհորն իր բերանը թող չփակի ինձ վրա։

¹⁷ Լսի՛ր ինձ, Տե՜ր, որովհետև քաղցր է քո ողորմությունը,

Նայի՛ր ինձ ըստ քո մեծ գթառատության

¹⁸ Եվ երեսդ մի՛ շրջիր քո ծառայից,

Որովհետև նեղության մեջ եմ ես. լսի՛ր ինձ շուտով։

¹⁹ Նայի՛ր հոգուս և արձակի՛ր ինձ

Եվ ապրեցրո՛ւ ինձ իմ թշնամիներից։

²⁰ Որովհետև դու գիտես իմ նախատինքը,

Իմ ամոթն ու իմ պատկառանքը։

²¹ Իմ անձի բոլոր նեղիչները քո առջև են,

Սիրտս համբերեց նախատինքների և թշվառության։

Ուզում էի տեսնել, թե ո՛վ պիտի տրտմեր ինձ հետ,

Բայց ոչ ոք չկար, և ինձ մխիթարիչ չգտնվեց։

²² Ինձ լեղի տվեցին կերակուրի փոխարեն,

Ծարավիս պահին քացախ խմեցրին ինձ։

²³ Թող նրանց սեղանները որոգայթ դառնան իրենց առջև՝

Իբրև պատիժ և գայթակղություն։

²⁴ Թող նրանց աչքերը խավարեն, որ չտեսնեն,

Եվ նրանց թիկունքները կորցրո՛ւ հանապազ։

²⁵ Քո զայրույթը նրանց վրա թող թափվի։

Քո բարկության սրտմտությունը

Թող նրանց վրա հասնի։

²⁶ Թող ավերակ դառնան նրանց բնակավայրերը,

Եվ նրանց հարկերում ոչ ոք թող չապրի։

²⁷ Որովհետև ում դու հարվածեցիր, նրանք հալածեցին,

Իմ վերքերին ցավեր ավելացրին։

²⁸ Նրանց մեղքերին մեղքե՛ր գումարիր,

Որ չմտնեն քո արդարության մեջ։

²⁹ Թող նրանք ջնջվեն քո կյանքի գրքից

Եվ չգրվեն քո արդարների հետ։

³⁰ Ես աղքատ ու վշտացած եմ.

Քո պարգևած փրկությունը, Աստվա՛ծ, թող վիճակվի ինձ։

³¹ Աստծու անունը պիտի օրհնեմ օրհնությամբ

Եվ պիտի փառաբանեմ նրան գովերգով։

³² Հաճելի կլինի Աստծուն, քան մատաղ հորթը,

Որ ունի եղջյուրներ և կճղակներ։

³³ Աղքատները կտեսնեն և կուրախանան.

Փնտրե՛ք Աստծուն, և ձեր հոգիները կապրեն։

³⁴ Քանզի Տերը լսեց անտուններին

Եվ չարհամարհեց իր բանտարկյալներին։

³⁵ Թող օրհնեն նրան երկինքն ու երկիրը,

Ծովերը և նրանց մեջ բոլոր լողացողները։

³⁶ Աստված կփրկի Սիոնը,

Եվ կկառուցվեն քաղաքները Հուդայի երկրի,

Կկառուցեն, կբնակեցնեն ու կժառանգեն այն։

³⁷ Այնտեղ կհաստատվի քո ծառայի զավակը,

Եվ քո անունը սիրողները կբնակվեն այնտեղ։

69(70)

¹ Դպրապետին։ Սաղմոս Դավթի ի հիշատակ այն բանի, որ Տերը փրկեց նրան

² Աստվա՛ծ, ինձ օգնելո՛ւ նայիր,

Տե՛ր, փութա՛ ինձ փրկելու։

³ Թող ամաչեն և ամոթահար լինեն

Հոգիս հետապնդողները,

Թող հետ դառնան և ամաչեն

Իմ դեմ չար խորհողները։

⁴ Թող ամաչած դառնան,

Ովքեր ինձ «վա՜յ, վա՜յ» էին ասում։

⁵ Թող ցնծան և քեզնով ուրախանան բոլոր նրանք,

Ովքեր փնտրում են քեզ, Տե՛ր։

Քո տված փրկությունը սիրողները

Թող միշտ ասեն. «Աստված մեծ է»։

⁶ Ես աղքատ և անտուն եմ, Աստվա՛ծ, օգնի՛ր ինձ,

Իմ փրկիչն ու իմ օգնականն ես.

Տե՛ր իմ, մի՛ ուշացիր։

70(71)

¹ Դպրապետին։ Սաղմոս Դավթի։ Հովնադաբի որդիների և առաջին գերեվարվածների կողմից կատարվող

² Տե՛ր, քեզ հուսացի, չեմ ամաչի հավիտյան։

Փրկի՛ր ինձ ու ապրեցրո՛ւ քո արդարությամբ,

Քո ականջը խոնարհեցրո՛ւ ինձ և փրկի՛ր ինձ։

³ Ապավե՛ն եղիր ինձ համար և ամրապես հաստատի՛ր ինձ, Աստվա՛ծ,

Որովհետև իմ հույսն ու ապավենը դու ես։

⁴ Աստվա՛ծ իմ, փրկի՛ր ինձ մեղավորի ձեռքերից,

Անօրենի և անիրավի ձեռքերից։

⁵ Քանզի դու ես իմ համբերությունը, Տե՛ր,

Տե՛ր, իմ հույսն ես մանկությունիցս ի վեր։

⁶ Քեզ վստահեցի ես արգանդից,

Դու ես իմ ապավենը մորս որովայնից,

Քեզնից է իմ օգնությունը հանապազ։

⁷ Ես ինչպե՜ս շատերի ծաղրանքը դարձա,

Իսկ դու իմ օգնականն ու զորացնողը եղար։

⁸ Թող գովաբանությամբ լցվի բերանս,

Որպեսզի շարունակ օրհնեմ քո փառքը

Եվ մեծ վայելչությունը։

⁹ Ինձ մի՛ լքիր ծերության ժամանակ, Տե՛ր,

Ուժս պակասելու ժամանակ մի՛ թող ինձ։

¹⁰ Իմ թշնամիները և նրանք, որ պաշարեցին հոգիս,

Խորհելով մեկտեղ, ¹¹ ասացին.

«Աստված լքեց նրան, հալածենք և բռնենք նրան,

Քանզի նրան փրկող չկա»։

¹² Աստվա՛ծ իմ, մի՛ հեռացիր ինձանից

Եվ ինձ օգնությա՛ն հասիր, Աստվա՜ծ։

¹³ Թող ամաչեն ու ձախողվեն անձիս չարախոսողները,

Թող ամոթ ու պարսավանք կրեն ինձ չար կամեցողները։

¹⁴ Ես մշտապես պիտի հուսամ

Եվ ամեն բանի մեջ բազմացնեմ քո օրհնությունը։

¹⁵ Բերանս պիտի պատմի քո արդարությունը

Եվ ամեն օր՝ քո գովքը։

Ես մարդկային ճարտար դպրություն չգիտեմ.

¹⁶ Ես պիտի մտնեմ Տիրոջ զորության ներքո

Եվ քո արդարությունը, Տե՜ր, միայն հիշեմ։

¹⁷ Աստվա՛ծ իմ, ինձ կրթեցիր իմ մանկությունից ի վեր,

Եվ հիմա էլ քո արդարությունը պիտի պատմեմ։

¹⁸ Մինչև ճերմակելն ու ծերանալը մի՛ լքիր ինձ, Աստվա՛ծ.

Մինչև ամեն եկող սերնդի պատմվեն գործերը բազկիդ։

Մինչև բարձունքներ են հասնում քո զորությունն ու արդարությունը,

¹⁹ Նաև մեծագործություններդ.

Աստվա՛ծ, ո՞վ է քեզ նման։

²⁰ Թեպետ բազում նեղություն

Եվ չարչարանքներ ցույց տվեցիր ինձ,

Դարձյալ մխիթարեցիր ինձ

Եվ երկրի խոր անդունդներից հանեցիր ինձ։

²¹ Հաճախ ցույց տվեցիր քո զորությունը.

Դարձյալ մխիթարեցիր ինձ

Եվ դարձյալ հանեցիր ինձ

Երկրի խոր անդունդներից։

²² Եվ արդ, ես պիտի վկայեմ քո մասին

Սաղմոսների պատրաստությամբ,

Ճշմարի՛տ Աստված,

Սաղմոս պիտի երգեմ քեզ օրհնությամբ,

Սո՛ւրբդ Իսրայելի։

²³ Երբ սաղմոս երգեմ քեզ, շրթունքներն իմ պիտի ցնծան

Եվ հոգիս, որ դու փրկեցիր։

²⁴ Լեզուս ևս պիտի միշտ խոսի քո արդարությունից։

Ժամանակին պիտի խայտառակվեն

Եվ ամոթահար լինեն իմ դեմ չար խորհողները։

71(72)

¹ Սաղմոս Սողոմոնի

Իրավունքդ արքայի՛ն տուր, Աստվա՛ծ,

Արդարությունդ՝ արքայորդուն,

² Որ արդարությամբ դատի քո ժողովրդին

Եվ իրավունքով՝ քո աղքատներին։

³ Թող լեռները քո ժողովրդին խաղաղություն բերեն,

Եվ բլուրները՝ արդարություն։

⁴ Նա դատաստանով կարդարացնի ժողովրդի աղքատներին,

Կփրկի անտունների որդիներին

Եվ կխոնարհեցնի ամբարտավաններին։

⁵ Կապրի ու կմնա արևի պես հավերժ,

Լուսնից առաջ՝ սերնդեսերունդ։

⁶ Կիջնի անձրևի պես գեղմի վրա

Եվ ինչպես ցող երկիրը կցողի։

⁷ Նրա օրոք կծագի արդարությունը,

Խաղաղությունը կտիրի մինչև վախճանը լուսնի։

⁸ Կտիրի նա ծովից ծով, գետերից մինչև ծայրն աշխարհի։

⁹ Նրա առջև նախ եթովպացիները ծնկի կգան,

Եվ նրա թշնամիները հող կուտեն։

¹⁰ Թարսիսի և կղզիների թագավորները

Ընծաներ կմատուցեն նրան,

Սաբայի և Արաբիայի թագավորները

Նվերներ կբերեն նրան։

¹¹ Երկրի բոլոր թագավորները կերկրպագեն նրան,

Եվ բոլոր ազգերը կծառայեն։

¹² Որովհետև աղքատին փրկեց հզորի ձեռքից,

Աղքատին և անտունին, որոնք օգնական չունեն։

¹³ Նա կգթա աղքատին և անտունին

Եվ անտունների հոգիները կփրկի։

¹⁴ Չարերի վաշխառությունից կփրկի նրանց հոգիները։

Նրա անունը պատվական է նրանց առջև,

¹⁵ Կապրի, և արաբների ոսկին նրան կմատուցվի։

Նրա առջև աղոթքի կկանգնեն ամեն ժամ

Եվ ամեն օր կօրհնեն նրան։

¹⁶ Թող հաստատություն լինի ողջ երկրում

Եվ լեռների կատարներին։

Նրա պտուղը Լիբանանից բարձր կլինի,

Երկրի խոտի պես կծաղկի Տիրոջ քաղաքում։

¹⁷ Տիրոջ անունը պիտի օրհնվի հավիտյան,

Քանզի արևից ավելի հին է անունը նրա։

Երկրի բոլոր ազգերը կօրհնվեն նրանով,

Եվ բոլոր ժողովուրդները նրան երանի կտան։

¹⁸ Օրհնյա՜լ է Տերը՝ Իսրայելի Աստվածը,

Որ միայն հրաշքներ է գործում,

¹⁹ Եվ օրհնյալ է հավիտյան

Նրա փառքի սուրբ անունը,

Թող նրա փառքով ողջ երկիրը լցվի.

Եղիցի՜, եղիցի՜։

72(73)

¹ Սաղմոս Ասափի

Որքա՜ն բարի է Աստված Իսրայելի

Սրտով ուղիղների համար։

² Գալով ինձ՝ մի փոքր ևս, և իմ ոտքերը կսասանվեին,

Եվս մի քիչ, և քայլերս պիտի մոլորվեին։

³ Նախանձեցի անօրենների հետ մեղավորների խաղաղությանը,

⁴ Երբ տեսնում էի, որ նրանք մահվան տագնապ չունեն,

Նրանք ամուր էին տանջանքների մեջ։

⁵ Մարդկանց տքնությունները չեն կրում նրանք

Եվ մարդկանց պես չեն տանջվում։

⁶ Դրա համար ամբարտավանությունը պատեց նրանց,

Եվ համակվեցին իրենց ամբարտավանությամբ ու անիրավությամբ։

⁷ Նրանց անիրավությունը պիտի բխի անզգայությունից,

Պիտի երևան նրանց սրտերի մեղավոր ցանկությունները։

⁸ Խորհեցին ու խոսեցին չարությամբ

Եվ բարձրագոչ ապիրատություն խոսեցին։

⁹ Իրենց բերանները երկնքին բացեցին

Եվ լեզուները քարշ տվեցին երկրում։

¹⁰ Դրա համար իմ ժողովուրդը պիտի վերադառնա այստեղ,

Եվ օրերս իրենց լրումին պիտի հասնեն նրանց հետ։

¹¹ Ասացին. «Աստված ինչպե՞ս կիմանա»,

Կամ՝ «Արդյո՞ք գիտություն կա Բարձրյալի մոտ»։

¹² Ահա մեղավոր են, բայց հաջողակ,

Կան և ունեն աշխարհի հարստությունը։ 

¹³ Ասացի. «Ուրեմն իզուր արդար պահեցի սիրտն իմ,

Ձեռքերս սրբությամբ լվացի,

¹⁴ Ամեն օր խոշտանգվեցի

Եվ առավոտները կշտամբանք կրեցի»։

¹⁵ Թեպետ և ասում էի. «Եթե այսպես պատմեմ,

Դիմացդ պիտի գտնեմ քո որդիների սերնդին,

Որոնց և ուխտեցի»։

¹⁶ Սակայն հասկացա, որ սա դժվար է ինձ համար,

¹⁷ Մինչև մտնեմ Աստծու սրբարանը

Եվ իմանամ նրանց վախճանը։

¹⁸ Բայց իրենց նենգության համար տարագիր կանես նրանց,

Կկործանես նրանց իրենց ամբարտավանության մեջ։

¹⁹ Իսկ ինչպե՞ս հանկարծակի ավերակ դարձան,

Կործանվեցին, պակասեցին,

Կորան իրենց անօրենության պատճառով

²⁰ Եվ եղան արթնացողի երազների պես։

Տե՛ր, դու պիտի անարգես նրանց պատկերը քո քաղաքում.

²¹ Որովհետև հուր բորբոքվեց իմ սրտի մեջ,

Եվ երիկամներս այլագունեցին։

²² Ես արհամարհված եղա և չիմացա,

Քո առջև անասուն համարվեցի.

²³ Բայց ես ամեն ժամ քեզ հետ եմ։

Բռնեցիր իմ աջ ձեռքից,

²⁴ Ինձ առաջնորդեցիր քո խորհուրդներով

Եվ փառքով ընդունեցիր ինձ։

²⁵ Ի՞նչ կա երկնքում, իրոք, ինձ համար,

Կամ քեզնից բացի ի՜նչ փնտրեմ երկրում։

²⁶ Սիրտս ու մարմինս նվաղեցին, իմ սրտի՛ Աստված,

Իմ հավիտենական բաժի՛ն Աստված։

²⁷ Ահավասիկ, ովքեր հեռացրին իրենց հոգիները քեզանից,

Պիտի կորչեն, պիտի կործանես բոլորին,

Ովքեր ապստամբեցին քո դեմ։

²⁸ Բարի է ինձ համար Աստծուն մոտենալը

Եվ Տիրոջ վրա հույս դնելը,

Քո ողջ օրհնությունը հռչակել

Սիոնի դստեր դռների առջև։

73(74)

¹ Ասափի՝ իմաստության երգ

Աստվա՛ծ, ինչո՞ւ մերժեցիր ընդմիշտ.

Քո սրտմտությունը սաստկացավ քո արոտի ոչխարների վրա։

² Հիշի՛ր քո ժողովրդին, որին ստեղծեցիր ի սկզբանե

Եվ փրկեցիր քեզ վիճակված քո ժառանգությունը։

Լեռն այս, որտեղ բնակվեցիր դու, Սիոնն է։

³ Ձեռքդ ընդմիշտ բարձրացրո՛ւ նրանց ամբարտավանության վրա.

Թշնամին անիրավություն գործեց քո սրբավայրում,

⁴ Քեզ ատողները պարծեցան իրենց բարեկեցության մեջ,

Իրենց նշաններն իբրև զինանշաններ դրեցին

Եվ չհասկացան, ⁵ որ ելքն ի վերուստ է։

⁶ Ինչպես անտառում կացիններով կոտրատեցին նրա դռները,

Կացիններով ու մուրճերով միասին կործանեցին այն.

⁷ Քո սրբարանը հրի մատնեցին և հողին հավասարեցրին,

Պղծեցին քո անվան խորանը։

⁸ Նրանց ողջ ազգը միասին իր սրտում ասաց.

«Եկե՛ք լռեցնենք Աստծու բոլոր տոները երկրից։

⁹ Մենք հրաշքներ չտեսանք, ոչ էլ այսուհետև մարգարե կլինի,

Եվ մեզ ոչ ոք չի ճանաչում»։

¹⁰ Աստվա՛ծ, թշնամին մինչև ե՞րբ պիտի նախատի,

Եվ հակառակորդն անարգի քո սուրբ անունը։

¹¹ Ինչո՞ւ ես դարձնում քո ձեռքը, և աջդ ծոցիդ մեջ է միշտ։

¹² Աստված մեր թագավորն է ժամանակներից առաջ,

Որ փրկություն բերեց երկրի վրա։

¹³ Դու հաստատեցիր ծովը քո զորությամբ,

Դու խորտակեցիր վիշապների գլուխները ջրերի վրա։

¹⁴ Դու փշրեցիր վիշապի գլուխը

Եվ որպես կերակուր տվեցիր եթովպացիների զորքերին։

¹⁵ Դու բխեցրիր աղբյուրներն ու վտակները,

Դու ցամաքեցրիր հորդառատ գետերը,

¹⁶ Քոնն է ցերեկը, և քոնն է գիշերը,

Դու ստեղծեցիր լույսն ու արևը,

¹⁷ Դու ստեղծեցիր երկրի բոլոր սահմանները,

Դու ստեղծեցիր գարունն ու ամառը։

¹⁸ Թող սա քեզ հուշ լինի, որ թշնամին նախատեց Տիրոջը,

Անզգամ ժողովուրդը բարկացրեց քո սուրբ անունը։

¹⁹ Քեզ խոստովանողի անձը մի՛ մատնիր գազաններին

Եվ մի՛ մոռացիր երբեք քո անտունների հոգիները։

²⁰ Նայի՛ր քո Ուխտին, որովհետև խավար տները

Երկրի վրա լցվեցին անիրավությամբ։

²¹ Անտունն ամոթով թող չվերադառնա,

Այլ անտունն ու աղքատը թող օրհնեն քո սուրբ անունը։

²² Ելի՛ր և արա՛ դատաստանդ, Աստվա՛ծ.

Հիշի՛ր անզգամի ամենօրյա նախատինքը։

²³ Մի՛ մոռացիր պաշտոնյաներիդ ձայնը.

Քեզ ատողների ամբարտավանությունը

Թող անհետանա ընդմիշտ։

74(75)

¹ Դպրապետին՝ ինչպես «Մի՛ ապականիր»-ը։ Ասափի օրհներգության սաղմոսը

² Գոհություն պիտի մատուցենք քեզ, Աստվա՛ծ,

Գոհություն պիտի մատուցենք և աղոթենք քո անվանը։

³ Ես պիտի հռչակեմ քո բոլոր սքանչելիքները։

Երբ հասնի ժամը, ես պիտի դատեմ ուղղությամբ։

⁴ Մաշվեցին երկիրն ու նրա բոլոր բնակիչները.

Ես հաստատեցի նրա սյուները։

⁵ Ասացի անօրեններին. «Անօրենություն մի՛ գործեք»,

Մեղավորներին. «Վեր մի՛ բարձրացրեք ձեր եղջյուրները»։

⁶ Ձեր եղջյուրները վեր մի՛ բարձրացրեք

Եվ մի՛ խոսեք անիրավություն Աստծուց։

⁷ Որովհետև արդար դատաստանը

Ո՛չ արևելքից է գալու և ո՛չ արևմուտքից,

Ո՛չ անապատից և ո՛չ լեռներից,

⁸ Այլ Աստված է դատավորը,

Որ խոնարհեցնում է մեկին

Եվ բարձրացնում մյուսին։

⁹ Քանզի Տիրոջ ձեռքի բաժակը լի է անապակ գինով,

Որ տալիս է սրան ու նրան։

Սակայն նրա մրուրը չի պակասի,

Եվ երկրի բոլոր մեղավորները կխմեն այն։

¹⁰ Իսկ ես հավիտյան պիտի ցնծամ,

Սաղմոս երգեմ Հակոբի Աստծուն։

¹¹ Մեղավորների բոլոր եղջյուրները պիտի փշրես,

Եվ արդարի եղջյուրը պիտի բարձրանա։

75(76)

¹ Դպրապետին՝ Ասափի օրհներգության սաղմոսը։ Երգ ասորեստանցիների մասին

² Հայտնի է Աստված Հուդայի երկրում,

Եվ մեծ է նրա անունն Իսրայելում։

³ Խաղաղության մեջ հաստատվեց նրա տեղը,

Եվ բնակությունը՝ Սիոնում։

⁴ Տերն այնտեղ խորտակեց աղեղի զորությունը,

Զենքը, սուրը և ճակատամարտը։

⁵ Դու սքանչելի լուսատուն ես հավերժական լեռների։

⁶ Պիտի խռովվեն բոլորը, որ սրտով անմիտ են,

Ննջեցին իրենց քնի մեջ և ոչինչ չգտան.

Բոլոր մարդիկ, որոնց ձեռքում հարստություն կար,

⁷ Նաև նրանք, որ ձի էին հեծել,

Քո սաստից ննջեցին, ո՛վ Հակոբի Աստված։

⁸ Ահեղ ես դու. քո բարկության պատճառով ո՞վ կարող է քեզ ընդդիմանալ։

⁹ Երբ երևացիր երկնքից, քո բարկությունը հայտնվեց։

Երկիրը վախեցավ և սարսեց, ¹⁰ երբ Աստված եկավ դատելու,

Ապրեցնելու երկրի բոլոր հեզերին։ Հանգիստ

¹¹ Քանզի մարդկանց խորհուրդները պիտի խոստովանեն քեզ,

Եվ իմաստությամբ ծածկվածները

Պիտի օրհնեն քեզ։

¹² Ուխտե՛ք և կատարե՛ք Տիրոջ՝ մեր Աստծու համար

Բոլորդ, որ նրա շուրջն եք։

Զոհե՛ր մատուցեք ¹³ Ահեղին,

Որ առնում է իշխանների հոգիները,

Եվ որից սարսում են

Երկրի բոլոր թագավորները։

76(77)

¹ Դպրապետին՝ ինչպես «Իդիթոմը»։ Սաղմոս Ասափի

² Իմ ձայնով ես Տիրոջն աղոթեցի,

Իմ ձայնով՝ Աստծուն, և նա նայեց ինձ։

³ Իմ նեղության օրերին Աստծուն փնտրեցի՝

Գիշերով ձեռքերս պարզած նրա առջև, և չխաբվեցի։

Չէր ուզում մխիթարվել հոգիս,

⁴ Հիշում էի Աստծուն և ուրախանում,

Հոգնությունից իմ ներսում նվաղում էր հոգիս։ Հանգիստ

⁵ Քուն չտվեցիր իմ աչքերին, խռովվեցի ու չխոսեցի։

⁶ Հին օրերի մասին խորհեցի

Եվ հին տարիները հիշեցի։

⁷ Գիշերը սրտիս հետ խոսեցի.

Հոգնությունից իմ ներսում

Տառապեց հոգիս։

⁸ Մի՞թե հավերժ մերժելու է ինձ Տերը

Եվ այլևս չի շարունակելու բարեհաճել։

⁹ Կամ իսպառ զրկելո՞ւ է ինձ իր ողորմությունից,

Կամ վե՞րջ է դնելու իր խոսքին սերնդեսերունդ։

¹⁰ Կամ այլևս մոռանալո՞ւ է գթալ ինձ Աստված,

Կամ իր բարկությամբ արգելելո՞ւ է իր գթությունը։ Հանգիստ

¹¹ Ասացի. «Այժմ սկսեցի.

Այս է փոփոխությունը Բարձրյալի աջի»։

¹² Հիշեցի Տիրոջ գործերն ի սկզբանե,

Հիշեցի նրա սքանչելիքները։

¹³ Խոսեցի քո բոլոր գործերի մասին,

Խորհեցի քո ձեռքի գործերի մասին։

¹⁴ Աստվա՛ծ, քո ճանապարհները սրբության մեջ են.

Ո՞վ է ավելի մեծ Աստված, քան մեր Աստվածը,

¹⁵ Դու սքանչելագործ Աստված ես։

Քո զորությունը ցույց տվեցիր քո ժողովրդին.

¹⁶ Քո բազուկով փրկեցիր քո ժողովրդին՝

Հակոբի և Հովսեփի որդիներին։ Հանգիստ

¹⁷ Ջրերը տեսան քեզ, Աստվա՛ծ,

Ջրերը տեսան քեզ և վախեցան,

Եվ անդունդները խռովվեցին բազում ջրերի ձայնից։

¹⁸ Ամպերը ձայն տվեցին, և նետերը սլացան

¹⁹ Քո անիվի որոտման ձայնից։

Տիեզերքում երևացին քո փայլատակումները.

Երկիրը խռովվեց և դողաց։

²⁰ Ծովում են քո ճանապարհները,

Քո շավիղները՝ հորդառատ ջրերում,

Եվ քո հետքերը չեն երևում։

²¹ Իբրև հոտ առաջնորդեցիր քո ժողովրդին

Մովսեսի և Ահարոնի ձեռքով։

77(78)

¹ Ասափի՝ իմաստության երգ

Ժողովուրդնե՛ր, ո՛ւշ դրեք իմ օրենքներին,

Ակա՛նջ արեք իմ բերանի խոսքերին։

² Բերանս պիտի առակներով բացեմ,

Ի սկզբանե առակներ պիտի խոսեմ այնպես,

³ Ինչպես լսեցինք ու ճանաչեցինք դրանք,

Եվ ինչպես մեր հայրերը պատմեցին մեզ։

⁴ Ոչինչ չթաքցվեց նրանց որդիներից՝

Մյուս սերնդին պատմելով Տիրոջ օրհնությունները,

Իր զորությունն ու սքանչելիքները, որ գործեց։

⁵ Հակոբի վրա հաստատեց իր վկայությունը

Եվ օրենքներ դրեց Իսրայելի վրա։

Մեկընդմիշտ պատվիրեց մեր հայրերին

Դրանք ցույց տալ իրենց որդիներին,

⁶ Որ հաջորդ սերունդն էլ ճանաչի։

Որդիները, որ ծնվելու են, պիտի ելնեն

Եվ պատմեն այդ իրենց զավակներին,

⁷ Որ իրենց հույսն Աստծու վրա դնեն

Եվ չմոռանան գործերն Աստծու։

Հետևելով պիտի հետևեն նրա պատվիրաններին

⁸ Եվ չպիտի լինեն իրենց հայրերի նման՝

Չար և դառնացող ազգ, մի ազգ, որ չուղղեց սիրտն իր

Եվ իր հոգին չհիմնեց Աստծու վրա։

⁹ Եփրեմի որդիները զինված և քաջ նետաձիգներ են,

Բայց պատերազմի ժամանակ հետ դարձրին կապարճները։

¹⁰ Նրանք Տիրոջ ուխտի մեջ չմնացին

Եվ չուզեցին գնալ նրա օրենքների համաձայն։

¹¹ Մոռացան նրա երախտիքները և սքանչելիքները,

Որ ցույց տվեց նրանց.

¹² Սքանչելիքները, որ գործեց նրանց հայրերի առջև՝

Եգիպտացիների երկրում և Տայանի դաշտի վրա։

¹³ Ճեղքեց ծովը և անցկացրեց նրանց՝

Ջրերն ամբարտակների պես կանգնեցնելով։

¹⁴ Ցերեկն ամպով առաջնորդեց նրանց

Եվ գիշերն ամբողջ՝ հրեղեն լույսով։

¹⁵ Ճեղքեց վեմը անապատում

Եվ նրանց ջուր տվեց ըմպելու խորախոր անդունդից։

¹⁶ Ժայռից ջրեր բխեցրեց և գետերի պես հոսեցրեց ջրերը։

¹⁷ Սակայն նրանք շարունակեցին մեղանչել

Եվ է՛լ ավելի բարկացրին Բարձրյալին անջրդի վայրում։

¹⁸ Իրենց սրտերում փորձեցին Աստծուն՝

Կերակուր խնդրելով իրենց անձերի համար։

¹⁹ Տրտնջացին Աստծուց և ասացին. «Մի՞թե կարող է

Աստված սեղան պատրաստել անապատի մեջ։

²⁰ Որովհետև հարվածեց ժայռին, և հոսեցին ջրեր,

Ու վտակներ հորդեցին նրանից։

Բայց կարո՞ղ է նաև հաց տալ մեզ

Կամ սեղան պատրաստել իր ժողովրդի համար»։

²¹ Դրա համար Տերը լսեց այս և անպատվված զգաց։

Հուր բորբոքվեց Հակոբի դեմ,

Եվ բարկությունը սաստկացավ Իսրայելի վրա,

²² Քանզի չհավատացին Աստծուն և չհուսացին նրա փրկությանը։

²³ Հրամայեց ամպերին վերին և երկնքի դռները բացեց,

²⁴ Եվ որպես կերակուր՝ մանանա տեղաց նրանց վրա։

Երկնային հացը տվեց նրանց,

²⁵ Հրեշտակների հացը մարդիկ կերան,

Եվ նա լիուլի կերակուր իջեցրեց նրանց համար։

²⁶ Հանեց հարավային հողմը

Եվ իր զորությամբ բերեց հյուսիսայինը։

²⁷ Նրանց վրա միս տեղաց հողմափոշու պես.

Ծովի ավազի պես՝ թևավոր թռչուններ

²⁸ Լցրեց նրանց բանակի մեջ և նրանց վրանների շուրջը։

²⁹ Կերան և լավ հագեցան. նրանց ցանկությունն իրենց տվեց,

³⁰ Եվ իրենց ցանկությունից ոչնչով կարոտ չմնացին։

Մինչ ուտելիքը նրանց բերանում էր,

³¹ Աստծու բարկությունն

Իջավ նրանց վրա.

Նրանցից շատերին սպանեց

Եվ կործանեց Իսրայելի ընտրագույններին։

³² Այս ամենից հետո նորից մեղանչեցին

Եվ չհավատացին նրա սքանչելիքներին։

³³ Նրանց օրերն սպառվեցին ունայնությամբ,

Եվ նրանց տարիներն անցան շատ արագ։

³⁴ Երբ սպանում էր նրանց, փնտրում էին նրան,

Դառնում էին և խմբվում Աստծու շուրջը։

³⁵ Եվ հանկարծ հիշեցին, որ Աստված իրենց օգնականն է.

Բարձրյալ Աստված իրենց փրկիչն է։

³⁶ Իրենց բերաններով սիրեցին նրան, բայց իրենց լեզուներով ստեցին,

³⁷ Նրանց սրտերն ուղիղ չէին նրա հանդեպ, և չհավատացին նրա ուխտին։

³⁸ Բայց նա գթած էր, քավում էր նրանց մեղքերը

Եվ չէր ապականում։

Հաճախ զսպում էր իր բարկությունը

Եվ չէր բորբոքում իր ողջ սրտմտությունը։

³⁹ Հիշում էր, որ նրանք մարմին են, հոգի,

Որ դուրս է ելնում և այլևս չի վերադառնում։

⁴⁰ Քանի՜ անգամներ դառնացրին նրան անապատում,

Բարկացրին Բարձրյալին անջրդի վայրում։

⁴¹ Դարձան և փորձեցին Աստծուն և Իսրայելի Սրբին զայրացրին.

⁴² Չհիշեցին նրա ձեռքն այն օրը, երբ փրկեց նրանց իրենց նեղիչների ձեռքերից,

⁴³ Երբ նշաններ և հրաշքներ գործեց եգիպտացիների երկրում ու Տայանի դաշտում։

⁴⁴ Եգիպտացիների գետերն ու անձրևները արյան փոխեց,

Որ չկարողանան ըմպել։

⁴⁵ Նրանց վրա շնաճանճեր ուղարկեց, և նրանց կերան,

Եվ նրանց գորտերով ապականեց։

⁴⁶ Նրանց պտուղը նեխացրեց և նրանց վաստակը մարախին մատնեց։

⁴⁷ Նրանց այգիները կարկտահարեց

Եվ թզենիները եղյամով պատեց։

⁴⁸ Նրանց անասունները կարկտի մատնեց

Եվ նրանց ունեցվածքը հրո ճարակ դարձրեց։

⁴⁹ Նրանց վրա ուղարկեց իր բարկությունն ու զայրույթը,

Զայրույթը, բարկությունը և նեղությունը։

Չար հրեշտակի ձեռքով նրանց վրա տանջանքներ ուղարկեց,

⁵⁰ Իր բարկությունն ու զայրույթը նրանց ուղղեց։

Նրանց հոգիները չպաշտպանեց մահվանից

Եվ նրանց անասունները մահվան մատնեց։

⁵¹ Հարվածեց Եգիպտոսի բոլոր առաջնեկներին՝

Նրանց ողջ վաստակի երախայրիքը՝

Քամի վրանների տակ։ Հանգիստ

⁵² Հոտի պես հովվեց իր ժողովրդին

Եվ հոտի պես նրանց անապատ հանեց։

⁵³ Նրանց հույսով առաջնորդեց, և չվախեցան,

Եվ ծովը ծածկեց նրանց թշնամիներին։

⁵⁴ Նրանց իր սուրբ լեռը հանեց, լեռն այն,

Որ իր աջով էր կերտել։

⁵⁵ Նրանց առջևից մաքրեց հեթանոսներին,

Երկիրն իբրև ժառանգություն բաժանեց նրանց

Եվ Իսրայելի ազգը բնակեցրեց նրանց վրանների մեջ։

⁵⁶ Փորձեցին, դառնացրին Բարձրյալ Աստծուն

Եվ չպահեցին նրա վկայությունը։

⁵⁷ Վերստին խոտորվեցին, ինչպես իրենց հայրերը.

Դարձյալ եղան թյուր աղեղի նման։

⁵⁸ Նրան դարձյալ բարկացրին իրենց բագիններով

Եվ շարժեցին նրա նախանձն իրենց կռածո կուռքերով։

⁵⁹ Աստված լսեց և արհամարհեց նրանց

Եվ խիստ անարգեց Իսրայելին։

⁶⁰ Մերժեց խորանը Սելովի. խորանը,

Որ հաստատել էր մարդկանց մեջ։

⁶¹ Նրանց զորությունը մատնեց գերության

Եվ նրանց գեղեցկությունը՝ իրենց թշնամիների ձեռքը։

⁶² Սրի անցկացրեց իր ժողովրդին

Եվ անտեսեց իր ժառանգությունը։

⁶³ Նրանց երիտասարդներին հուրը ճարակեց,

Եվ նրանց կույսերի համար ոչ ոք չսգաց,

⁶⁴ Նրանց քահանաները սրահար եղան,

Եվ նրանց այրիներին ոչ ոք չողբաց։

⁶⁵ Կարծես թե Տերը քնից արթնացավ,

Ինչպես հսկան է սթափվում գինուց։

⁶⁶ Իր թշնամիներին հետ շպրտեց՝

Հավիտենական նախատինք տալով նրանց։

⁶⁷ Նա մերժեց Հովսեփի խորանը և չընտրեց ազգը Եփրեմի,

⁶⁸ Այլ ընտրեց Հուդայի ազգը, Սիոն լեռը, որ և սիրեց։

⁶⁹ Նրա սրբարանը ռնգեղջուրի պես շինեց.

Երկրում հաստատեց նրան հավիտյան։

⁷⁰ Ընտրեց Դավթին՝ իր ծառային,

Եվ նրան զատեց ոչխարների հոտից.

⁷¹ Կրտսերների միջից ընդունեց նրան,

Որ հովվի իր ծառա Հակոբին

Եվ իր ժառանգությունը՝ Իսրայելը.

⁷² Հովվում էր նրանց իր սրտի իմաստությամբ

Եվ առաջնորդում էր նրանց

Իր ձեռքերի անմեղությամբ։

78(79)

¹ Սաղմոս Ասափի

Աստվա՛ծ, հեթանոսները մտան քո ժառանգության մեջ

Եվ քո սուրբ տաճարը պղծեցին.

Երուսաղեմը մրգապահի հյուղակ դարձրին։

² Քո ծառաների դիակները նետեցին որպես կեր երկնի թռչուններին

Եվ սրբերի մարմինները՝ երկրի գազաններին։

³ Նրանց արյունը ջրի նման թափեցին Երուսաղեմի շուրջը,

Եվ չկար մեկը, որ թաղեր նրանց։

⁴ Մեր հարևանների և մեր դրացիների համար

Նախատինք ու ծաղրուծանակ դարձանք մենք։

⁵ Մինչև ե՞րբ, Տե՛ր, դու պիտի բարկանաս անվերջ,

Եվ քո նախանձը բորբոքվի հրի նման։

⁶ Թափի՛ր բարկությունդ այն ազգերի վրա, որ չեն ճանաչում քեզ,

Այն թագավորների վրա, որոնք չեն կանչում քո անունը,

⁷ Որովհետև կերան Հակոբին և ավերեցին նրա բնակավայրը։

⁸ Մեր հին մեղքերը մի՛ հիշիր,

Թող շուտով մեզ հասնի ողորմությունդ, Տե՛ր,

Որովհետև շատ աղքատացանք։

⁹ Օգնի՛ր մեզ, Աստվա՛ծ, փրկի՛չ մեր, քո անվան փառքի համար։

¹⁰ Տե՛ր, փրկի՛ր մեզ և քավի՛ր մեր մեղքերը քո անվան համար։

Թող հեթանոսները երբեք չասեն. «Ո՞ւր է նրանց Աստվածը»,

Այլ մեր աչքի առջև թող հայտնի լինի հեթանոսներին

Քո ծառաների արյան վրեժը, որ հեղվեց։

¹¹ Գերեվարվածների հեծեծանքը թող հասնի քեզ,

Քո բազկի զորությամբ պահպանի՛ր սպանվածների որդիներին։

¹² Յոթնապատիկ հատուցի՛ր մեր հարևաններին այն նախատինքի փոխարեն,

Որով նախատեցին քեզ, Տե՛ր։

¹³ Մենք՝ քո ժողովուրդն ու քո արոտի ոչխարները,

Հավիտյան քեզ գոհություն պիտի տանք,

Քո օրհնությունը պիտի հռչակենք սերնդեսերունդ։

79(80)

¹ Դպրապետին՝ ինչպես «անցած ժամանակների մասին»-ը։ Ասափի վկայությունը։ Սաղմոս եթովպացիների մասին

² Դու, որ հովվում ես Իսրայելը, լսի՛ր,

Որ հոտի պես առաջնորդում ես Հովսեփին,

Որ նստում ես քերովբեների վրա, հայտնվի՛ր

³ Եփրեմի, Բենիամինի և Մանասեի առջև։

Արթնացրո՛ւ քո զորությունը և արի՛ մեզ փրկելու։

⁴ Աստվա՛ծ զորությունների, դեպի մե՛զ վերադարձիր,

Ցո՛ւյց տուր մեզ երեսդ, և մենք կփրկվենք։

⁵ Տե՛ր, Աստվա՛ծ զորությունների, մինչև ե՞րբ պիտի բարկանաս

Քո ծառաների աղոթքների վրա։

⁶ Արտասուքների հացով մեզ սնեցիր

Եվ բավական արցունք խմեցրիր մեզ։

⁷ Մեր հարևանների նախատինքը դարձրիր մեզ,

Ծաղրուծանակը՝ մեր թշնամիների։

⁸ Աստվա՛ծ զորությունների, դեպի մե՛զ վերադարձիր,

Ցո՛ւյց տուր մեզ երեսդ, և մենք կփրկվենք։ Հանգիստ

⁹ Եգիպտոսից այգի փոխադրեցիր, հանեցիր հեթանոսներին

Եվ նրանց փոխարեն տնկեցիր ¹⁰ ու առաջնորդեցիր նրան։

Ամրացան նրա արմատները, և այն լցրեց երկիրը,

¹¹ Նրա ստվերը լեռները ծածկեց,

Եվ նրա բարունակը Աստծու մայրին է։

¹² Մինչև ծով տարածեց իր որթը,

Իսկ շառավիղները մինչև գետերն են։

¹³ Ինչո՞ւ քանդեցիր նրա ցանկապատը,

Որ ճանապարհի անցորդներն էլ պոկոտեն այն։

¹⁴ Անտառի խոզն ապականեց այն,

Վայրի կենդանին արածեց նրա մեջ։

¹⁵ Աստվա՛ծ զորությունների, դարձի՛ր,

Նայի՛ր երկնքից և տե՛ս, այցելի՛ր այս այգին,

¹⁶ Եվ խնա՛մք տար սրան, որին քո աջը տնկեց,

Մարդու որդուն, որին զորացրիր քեզնով,

¹⁷ Հրով այրված և ավերված, ահա պիտի կորչի քո սաստումից։

¹⁸ Քո ձեռքը թող լինի այն մարդու վրա,

Եվ քո աջը՝ այն մարդու որդու,

Որին զորացրիր քեզնով։

¹⁹ Մենք այլևս չենք հեռանա քեզնից.

Դու պիտի փրկես մեզ,

Եվ մենք պիտի հռչակենք քո անունը, Տե՜ր։

²⁰ Աստվա՛ծ զորությունների, դեպի մե՛զ դարձիր,

Ցո՛ւյց տուր մեզ երեսդ, և մենք կփրկվենք։

80(81)

¹ Դպրապետին՝ նվագարանով։ Սաղմոս Ասափի՝ հինգշաբթի օրվա

² Ցնծացե՛ք Աստծով, որ մեր օգնականն է,

Աղաղակե՛ք Հակոբի Աստծուն,

³ Սաղմո՛ս առեք և օրհնությո՛ւն տվեք,

Նրան քաղցրաձայն սաղմո՛ս երգեք։

⁴ Փո՛ղ հարեք ամսագլուխներին և տարեմուտի տոներին.

⁵ Այս է օրենքն Իսրայելի և պատվերը Հակոբի Աստծու։

⁶ Ուխտն է, որ կնքեց Հովսեփի հետ,

Երբ նա դուրս էր ելնում եգիպտացիների երկրից.

Լսեց մի լեզու, որը չգիտեր։

⁷ Նրանց թիկունքներն ազատեց իր բեռներից

Եվ նրանց ձեռքերը՝ հարդի ծառայությունից։

⁸ «Նեղությանս մեջ աղոթեցիր ինձ, և փրկեցի քեզ,

Լսեցի քեզ մրրիկի ծածկույթից

Եվ փորձեցի քեզ Հակառակության ջրերի [* Մե-Մերիվա] վրա։

⁹ Լսի՛ր, իմ ժողովո՛ւրդ, և ես կվկայեմ քեզ.

Եվ Իսրայե՛լ, թե լսես ինձ,

¹⁰ Այլևս անցավոր աստվածներ թող չլինեն քեզ,

Եվ օտար աստծու պիտի չերկրպագես.

¹¹ Ես եմ Տերը՝ քո Աստվածը, որ քեզ հանեցի եգիպտացիների երկրից,

Բերանդ բա՛ց, և ես կլցնեմ այն։

¹² Իմ ժողովուրդը ձայնս չլսեց, և Իսրայելը չնայեց ինձ։

¹³ Թույլ տվեցի նրանց, որ գնան իրենց սրտի կամքով,

Որովհետև նրանք գնացին իրենց հոգիների կամքով։

¹⁴ Եթե իմ ժողովուրդը լսեր ինձ,

Կամ իմ ճանապարհներով ընթանար Իսրայելը,

¹⁵ Կխոնարհեցնեի նրա թշնամիներին

Եվ ձեռքս կիջեցնեի նրա նեղիչների վրա»։

¹⁶ Նրան ատեցին Տիրոջ թշնամիները,

Նրանց ժամանակները աշխարհում կվերջանան։

¹⁷ Նրանց ցորենի պարարտությամբ կերակրեց

Եվ ժայռի մեղրով հագեցրեց նրանց։

81(82)

¹ Սաղմոս Ասափի

Աստված կանգնեց աստվածների ժողովի մեջ

Եվ նրանց մեջ դատ արեց.

² Մինչև ե՞րբ պիտի դատեք անիրավությամբ

Եվ մեղավորների կողմը բռնեք։

³ Որբի և այրու դա՛տը տեսեք,

Խոնարհի և անտունի իրավո՛ւնքը տեսեք։

⁴ Ապրեցրե՛ք աղքատին և տնանկին.

Մեղավորի ձեռքերից փրկե՛ք նրանց։

⁵ Չիմացան և չհասկացան, խավարի մեջ ընթացան,

Եվ երկրի բոլոր հիմքերը շարժվեցին։

⁶ Ես ասացի. «Աստվածներ եք դուք,

Կամ բոլորդ՝ Բարձրյալի որդիներ։

⁷ Ահավասիկ դուք մեռնում եք մարդկանց նման

Եվ ընկնում եք, ինչպես մեկն իշխաններից։

⁸ Ելի՛ր, Աստվա՛ծ, և դատի՛ր երկիրը, որովհետև

Դու ես ժառանգելու բոլոր հեթանոսներին»։

82(83)

¹ Սաղմոս Ասափի՝ օրհներգ

² Աստվա՛ծ, ո՞վ է քեզ նման.

Մի՛ լռիր ու մի՛ դադարիր, Աստվա՛ծ։

³ Ահա թշնամիներդ գոչեցին,

Եվ ատելիներդ իրենց գլուխները բարձրացրին։

⁴ Քո ժողովրդի դեմ խորամանկություն մտածեցին.

Խորհեցին քո խնամարկյալների դեմ ⁵ և ասացին.

«Եկե՛ք վերացնենք նրանց ազգերի միջից,

Որ այլևս չհիշվի անունը Իսրայելի»։

⁶ Մեկտեղ միաբանությամբ խորհեցին,

Դաշինք կնքեցին քո դեմ.

⁷ Եդովմացիների բանակներն ու իսմայելացիները,

Մովաբն ու հագարացիները,

⁸ Գեբաղը, Ամովնը, Ամաղեկը

Եվ բոլոր այլազգիները՝ Ծուրի բնակիչներով հանդերձ։

⁹ Նաև Ասուրն էր եկել նրանց հետ. սրանք բոլորը

Զորավիգ էին Ղովտի որդիներին։

¹⁰ Սրանց Մադիամի ու Սիսարի նմա՛ն արա,

Հաբինի նման՝ Կիսոնի ձորերի մեջ։

¹¹ Կոտորվեցին նրանք Դովրի ակունքներում

Եվ եղան երկրի աղբի պես։

¹² Նրանց իշխաններին արա՛ Որեբի, Էբի, Զեբեի,

Սաղմանայի պես. նրանց բոլոր իշխաններին,

¹³ Որոնք ասացին. «Ժառանգենք Աստծու սրբությունը մեզ համար»։

¹⁴ Աստվա՛ծ իմ, նրանց արա՛ անիվի պես,

Ինչպես եղեգ՝ հողմի դիմաց,

¹⁵ Ինչպես հուր, որ անտառն է այրում,

Ինչպես բոց, որ լեռներն է կիզում։

¹⁶ Քո մրրիկով այսպես պիտի հալածես նրանց

Եվ քո բարկությամբ խռովեցնես նրանց։

¹⁷ Անարգանքո՛վ լցրու նրանց երեսները,

Որ քո անունը ցանկան, Տե՜ր,

¹⁸ Թող ամաչեն ու խռովվեն

Հավիտյանս հավիտենից.

Եվ կորչեն ամոթահար։

¹⁹ Թող իմանան, որ Տեր է քո անունը,

Եվ դու ես միակ Բարձրյալը ողջ երկրի վրա։

83(84)

¹ Դպրապետին՝ նվագարանով։ Սաղմոս Կորխի որդիների

² Որքա՜ն սիրելի են քո հարկերը, Զորությունների՛ Տեր,

Հոգիս ցանկանում և փափագում է քո գավիթները.

³ Սիրտս ու մարմինս ցնծում են կենդանի Աստծու առջև։

⁴ Քանզի ճնճղուկն իր բույնը գտավ, տատրակը՝ իր բույնը,

Որտեղ իր ձագերը պիտի դնի։

Քո սեղանը, Տե՛ր զորությունների,

Թագավո՛ր իմ և Աստվա՛ծ իմ։

⁵ Երանի՜ բոլորին, որ բնակվում են Տիրոջ տանը.

Նրանք պիտի օրհնեն քեզ հավիտյանս հավիտենից։

⁶ Երանի՜ մարդուն, որի օգնությունը քեզանից է,

Եվ միտք դրեց ելնել տրտմության հովտից

⁷ Դեպի այն վայրը, որտեղ ուխտեց։

Օրենսդիրը օրհնություն պիտի ստանա,

⁸ Զորությունից զորություն պիտի ընթանա,

Եվ հրեշտակների Աստվածը պիտի երևա Սիոնում։

⁹ Տե՛ր, Աստվա՛ծ զորությունների, լսի՛ր աղոթքներս,

Ակա՛նջ արա, Հակոբի՛ Աստված։

¹⁰ Հաճելի ես դու մեզ, տե՛ս, Աստվա՛ծ, և նայի՛ր քո օծյալի երեսին։

¹¹ Որովհետև մեկ օրը քո գավիթների մեջ

Ինձ համար ավելի լավ է, քան հազարները։

Ես նախընտրեցի Աստծու տան շեմին մնալ,

Քան մեղավորների հարկերում բնակվել։

¹² Տերը՝ մեր Աստված, ողորմություն և ճշմարտություն է սիրում։

Նա շնորհք և փառք պիտի տա։

Տերն իր ողորմությունը չի պակասեցնի նրանցից,

Ովքեր անբծությամբ են ընթանում։

¹³ Տե՛ր Աստված զորությունների,

Երանի՜ մարդուն, որ վստահում է քեզ։

84(85)

¹ Դպրապետին։ Սաղմոս Կորխի որդիների

² Սիրեցիր, Տե՛ր, քո երկիրը

Եվ վերադարձրիր Հակոբի գերությունը.

³ Ներեցիր ժողովրդիդ անիրավությունը,

Ծածկեցիր նրանց բոլոր մեղքերը։

⁴ Լռեցրիր քո ամբողջ բարկությունը,

Հրաժարվեցիր քո սաստիկ բարկությունից։

⁵ Դարձի՛ր մեզ, Աստվա՛ծ, փրկի՛չ մեր,

Եվ բարկությունդ հեռացրո՛ւ մեզանից։

⁶ Մի՛ բարկացիր մեզ վրա հավիտյան

Եվ բարկությունդ մի՛ տարածիր սերնդեսերունդ։

⁷ Աստվա՛ծ, մեզ դառնալով՝ դու պիտի ապրեցնես մեզ,

Քո ժողովուրդը քեզանով պիտի ուրախանա։

⁸ Տե՛ր, քո ողորմությո՛ւնը ցույց տուր մեզ

Եվ տո՛ւր մեզ քո փրկությունը։

⁹ Լսեցինք, թե ի՛նչ պիտի խոսի Տերը՝ Աստված.

Խաղաղություն պիտի խոսի իր ժողովրդին,

Իր սրբերին և նրանց, ովքեր նրան են դարձել սրտերով։

¹⁰ Մոտ է նրա փրկությունը իրենից երկյուղածներին,

Նրա փառքը պիտի բնակվի մեր երկրում։

¹¹ Ողորմությունն ու ճշմարտությունը պիտի հանդիպեն,

Արդարությունն ու խաղաղությունը պիտի համբուրվեն։

¹² Ճշմարտությունը երկրից բուսեց,

Արդարությունը երկնքից երևաց։

¹³ Տերը քաղցրություն պիտի տա,

Եվ մեր երկիրը՝ իր պտուղը։

¹⁴ Արդարությունը պիտի ընթանա նրա առջևից՝

Ճանապարհ տալով նրա քայլերին։

85(86)

¹ Աղոթք Դավթի

Տե՛ր, խոնարհի՛ր ականջդ և լսի՛ր ինձ,

Որովհետև աղքատ և անտուն եմ ես։

² Սո՛ւրբ պահիր հոգիս, Տե՛ր, փրկի՛ր, Աստվա՛ծ, քո ծառային,

Որ քեզ հուսաց։

³ Ողորմի՛ր ինձ, Տե՜ր, որովհետև ամեն օր քեզ աղաղակեցի,

⁴ Ուրախացրո՛ւ ծառայիդ հոգին, որովհետև, Տե՛ր,

Հոգիս քեզ բարձրացրի։

⁵ Քանզի դու, Տե՛ր, քաղցր և ուղիղ ես,

Բազումողորմ նրանց հանդեպ, ովքեր աղոթում են քեզ։

⁶ Ունկնդրի՛ր աղոթքներս, Տե՛ր, և նայի՛ր խնդրանքներիս ձայնին։

⁷ Նեղությանս օրը քեզ աղոթեցի, և դու լսեցիր ինձ։

⁸ Աստվածների մեջ ոչ ոք նման չէ քեզ, Տե՛ր,

Եվ ոչինչ չկա քո գործերի պես։

⁹ Բոլոր ազգերը, որոնց ստեղծեցիր,

Պիտի գան և երկրպագեն քո առաջ

Եվ քո անունը հավիտյան փառավորեն։

¹⁰ Մեծ ես դու, Տե՛ր, և սքանչելիքներ ես գործում,

Եվ միայն դո՛ւ ես Աստված։

¹¹ Ինձ առաջնորդի՛ր քո ճանապարհով, որ գնամ քո ճշմարտությամբ,

Եվ սիրտս ուրախ թող լինի՝ ակնածելով քո անունից։

¹² Գոհություն պիտի մատուցեմ քեզ, Տե՛ր, Աստվա՛ծ իմ,

Իմ համակ սրտով և պիտի փառավորեմ

Հավիտյան քո անունը։

¹³ Մեծ եղավ քո ողորմությունն ինձ վրա.

Փրկեցիր հոգիս դժոխքի խորքից։

¹⁴ Անօրենները հարձակվեցին վրաս, Աստվա՛ծ,

Հզորների ամբոխներն իմ անձը փնտրեցին

Եվ քեզ Աստված չհամարեցին իրենց առջև։

¹⁵ Բայց դու, Տե՛ր, Աստվա՛ծ իմ, գթած և ողորմած ես,

Համբերատար, բազումողորմ և ճշմարիտ։

¹⁶ Նայի՛ր և ողորմի՛ր ինձ.

Զորությո՛ւն տուր քո ծառային,

Պահպանի՛ր քո աղախնի որդուն

¹⁷ Եվ բարության նշա՛ն ցույց տուր ինձ։

Ինձ ատողները պիտի տեսնեն և ամաչեն,

Որովհետև դու, Տե՛ր, օգնեցիր ինձ և մխիթարեցիր։

86(87)

¹ Սաղմոս Կորխի որդիների՝ օրհներգ

Նրա հիմքերը սուրբ լեռան վրա են.

² Տերը Սիոնի դռներն ավելի է սիրում,

Քան Հակոբի բոլոր վրանները։

³ Քո մասին խոսեց փառավորյալը,

Քաղա՛քդ Աստծու։

⁴ Հիշեցի Ռահաբն ու Բաբելոնը,

Որ ճանաչում են ինձ,

Ահա և այլազգիներն ու Ծուրը

Եվ հնդիկ ժողովուրդները. սրանք ծնվեցին այնտեղ։

⁵ «Մա՛յր Սիոն»,- ասաց մարդը,

Եվ մարդը ծնվեց նրա մեջ։

Եվ նրա հիմքերը Բարձրյալն ինքը գցեց։

⁶ Տերը գրքերով պիտի պատմի այն ժողովուրդների

Եվ իշխանների մասին, որոնք այնտեղ ծնվեցին։

⁷ Քեզանով որքա՜ն պիտի ուրախանան բոլոր նրանք,

Որոնց բնակությունը քեզանից է։

87(88)

¹ Դպրապետին՝ ողբագին։ Կորխի որդիներից Եման Իսրայելացու սաղմոս իմաստության

² Տե՜ր, իմ փրկությա՜ն Աստված, գիշեր-ցերեկ քեզ աղոթեցի.

³ Թող աղոթքներս քեզ հասնեն,

Եվ թող խոնարհվի ականջդ իմ խնդրանքներին,

⁴ Որովհետև հոգիս լցվեց չարչարանքով,

Եվ կյանքս մոտեցավ գերեզմանին։

⁵ Ինձ մահացածի տեղ ես դնում.

Նման եմ ուժասպառ մարդու՝

Թողնված մեռելների մեջ,

⁶ Ինչպես գերեզման իջնողները,

Որոնց այլևս չես հիշում, և նրանք մերժված են քո ձեռքից։

⁷ Ինձ խոր փոսի մեջ դրեցիր,

Խավարի մեջ և մահվան ստվերի մեջ։

⁸ Բարկությունդ ծանրացավ իմ մեջ.

Քո ողջ հորձանքները լցրեցիր ինձ վրա։

⁹ Իմ ծանոթներին ինձնից հեռացրիր,

Եվ նրանք ինձ իրենց թիրախը դարձրին.

Մատնված էի և դուրս չէի գալիս։

¹⁰ Աչքերս տկարացան աղքատությունից.

Ամեն օր Տիրոջն աղոթեցի և ձեռքերս դեպի քեզ պարզեցի։

¹¹ Մի՞թե մեռելների համար սքանչելիքներ պիտի գործես,

Կամ բժիշկները հարություն պիտի տան նրանց,

Եվ նրանք գոհություն պիտի մատուցեն քեզ։

¹² Մի՞թե որևէ մեկը գերեզմանում երբևէ պիտի պատմի

Քո ողորմությունը կամ քո ճշմարտությունը՝ կորստյան մեջ։

¹³ Մի՞թե քո սքանչելիքները պիտի ճանաչվեն խավարի մեջ,

Կամ քո արդարությունը՝ մոռացված երկրում։

¹⁴ Ես քեզ աղաղակեցի, Տե՛ր,

Առավոտյան աղոթքս քեզ կհասնի։

¹⁵ Ինչո՞ւ ես, Տե՛ր, մերժում հոգիս

Կամ հետ դարձնում երեսդ ինձանից։

¹⁶ Մանկությունից ի վեր անտուն եմ և աշխատավոր,

Բարձրությունից ընկա և ապշեցի։

¹⁷ Բարկությունդ ծանրացավ իմ մեջ,

Արհավիրքներդ խռովեցրին ինձ,

¹⁸ Ջրի պես պաշարեցին ինձ,

Միասին պաշարեցին ամբողջ օրը։

¹⁹ Իմ թշվառության պատճառով

Իմ բարեկամներին և ծանոթներին

Հեռացրիր ինձանից։

88(89)

¹ Եման Իսրայելացու՝ իմաստության

² Տե՛ր, քո ողորմությունները պիտի օրհնեմ հավիտյան,

Սերնդեսերունդ իմ բերանով

Պիտի պատմեմ քո ճշմարտությունը։

³ Ասացիր՝ իմ ողորմությունը պիտի հաստատվի հավիտյան.

Քո ճշմարտությունը պատրաստ պիտի լինի երկնքի մեջ։

⁴ Ուխտ կնքեցի ընտրյալներիս հետ,

Երդվեցի Դավթին՝ իմ ծառային.

⁵ Քո զավակը պիտի հաստատեմ հավիտյան,

Եվ քո աթոռը պիտի շինեմ սերնդեսերունդ։

⁶ Երկինքը պիտի խոստովանի քո հրաշագործությունը, Տե՛ր,

Եվ քո ճշմարտությունը՝ սրբերի ժողովում։

⁷ Ո՞վ է քեզ հավասար ամպերի մեջ,

Կամ Աստծու որդիների մեջ ո՞վ է նման Տիրոջը։

⁸ Փառավորված է Աստված իր սրբերի խորհրդում,

Մեծ և ահավոր է իր շուրջը եղողների վրա։

⁹ Տե՛ր, Աստվա՛ծ զորությունների, ո՞վ է քեզ նման,

Հզոր ես դու, Տե՛ր, և ճշմարտությունը շուրջդ է։

¹⁰ Դու տիրում ես ծովի զորություններին,

Եվ նրա ալիքների խռովությունը դու ես հանդարտեցնում։

¹¹ Վիրավորների նման խոնարհեցրիր ամբարտավաններին,

Քո բազկի զորությամբ ցրեցիր քո թշնամիներին։

¹² Երկինքը քոնն է, և քոնն է երկիրը.

Աշխարհն ամբողջությամբ դու հաստատեցիր,

¹³ Դու ստեղծեցիր հյուսիսն ու հարավը,

Թաբորն ու Հերմոնը պիտի ցնծան քո անվամբ։

¹⁴ Քոնն է բազուկը, և քոնն է զորությունը.

Քո աջը թող զորանա,

Եվ քո ձեռքը բարձր թող լինի։

¹⁵ Քո աթոռը հաստատված է

Արդարության և իրավունքի վրա.

Ողորմությունն ու ճշմարտությունը

Քո երեսի առջևից պիտի ընթանան։

¹⁶ Երանի՜ այն ժողովրդին, որ գիտի քո օրհնությունները, Տե՛ր,

Քո երեսի լույսով պիտի ընթանա,

¹⁷ Քո անվամբ պիտի ցնծա ամբողջ օրը

Եվ քո արդարությամբ բարձր պիտի լինի։

¹⁸ Դու ես պարծանքը մեր զորության,

Եվ քո կամքով մեր եղջյուրը բարձր պիտի լինի։

¹⁹ Տիրոջից է Իսրայելի սրբի՝ մեր թագավորի օգնությունը։

²⁰ Այն ժամանակ տեսիլքով խոսեցիր որդիներիդ հետ

Եվ ասացիր. «Օգնություն ցույց կտամ հզորին

Եվ կբարձրացնեմ ժողովրդիս ընտրյալին։

²¹ Ես գտա իմ ծառա Դավթին, իմ սուրբ յուղով օծեցի նրան.

²² Ձեռքս կընդունի նրան, իսկ բազուկս կզորացնի նրան։

²³ Թշնամին չի վնասի նրան,

Եվ անօրենության որդին նրան չի չարչարի։

²⁴ Նրա թշնամիներին կհարվածեմ նրա առջև

Եվ նրա ատելիներին պարտության կմատնեմ։

²⁵ Իմ ճշմարտությունն ու ողորմությունը նրա հետ են,

Եվ նրա եղջյուրը իմ անվամբ բարձր կլինի։

²⁶ Նրա ձեռքը ծովին կդնեմ, նրա աջը՝ գետերի վրա։

²⁷ Նա կկանչի ինձ. «Իմ Հայրն ես դու, Աստվա՛ծ,

Իմ փրկության ցանկացողը»։

²⁸ Ես նրան առաջնեկ կդարձնեմ և բարձր՝

Երկրի բոլոր թագավորներից ավելի։

²⁹ Նրան կպահեմ հավիտյան իմ ողորմությունը

Եվ ուխտս՝ հավատարիմ նրա հետ։

³⁰ Նրա զավակին կհաստատեմ հավիտյանս հավիտենից

Եվ նրա աթոռը՝ երկնքի օրերի պես։

³¹ Եթե նրա որդիները թողնեն իմ օրենքները

Եվ չկամենան շարժվել իմ իրավունքով,

³² Եթե անարգեն իմ արդարությունը

Եվ չպահեն իմ պատվիրանները,

³³ Գավազանով կհարվածեմ նրանց անօրենություններին

Եվ տանջանքներով՝ նրանց անիրավություններին։

³⁴ Բայց իմ ողորմությունը չեմ զրկի նրանցից

Եվ ճշմարտությանս չեմ դավաճանի,

³⁵ Ոչ էլ իմ ուխտը կանարգեմ,

Եվ ինչ որ ելնի իմ շուրթերից, չեմ արհամարհի։

³⁶ Մեկընդմիշտ երդվեցի իմ սրբությամբ,

Որ չեմ խաբի Դավթին։

³⁷ Նրա զավակը հավիտյան կմնա,

Եվ նրա աթոռը, ինչպես արեգակ, իմ առջև է,

³⁸ Ինչպես լուսին, որ հաստատված է

Որպես հավատարիմ վկա երկնքում։

³⁹ Իսկ արդ, դու մերժեցիր և անարգեցիր

Ու գետին տապալեցիր քո օծյալին։

⁴⁰ Հրաժարվեցիր քո ծառայի ուխտից

Եվ երկրի վրա պղծեցիր նրա սրբությունը,

⁴¹ Քանդեցիր նրա բոլոր պարիսպները

Եվ նրա ամրոցները սարսափի մեջ դրեցիր։

⁴² Ճանապարհի անցորդները կողոպտեցին նրան,

Եվ նա իր հարևանների նախատինքը դարձավ։

⁴³ Նրա նեղիչների աջը բարձրացրիր

Եվ ուրախացրիր նրա բոլոր թշնամիներին։

⁴⁴ Օգնությունը հեռացրիր նրա սրից

Եվ պատերազմի մեջ նրան զորավիգ չեղար։

⁴⁵ Անարգեցիր նրա սրբությունը

Եվ նրա աթոռը տապալեցիր գետնին։

⁴⁶ Նրա կյանքի օրերը նվազեցրիր

Եվ նրան ամոթով ծածկեցիր։

⁴⁷ Երեսդ մինչև ե՞րբ պիտի շրջես ընդմիշտ.

Բարկությունդ հրի պես պիտի բորբոքվի։

⁴⁸ Իսկ արդ, հիշի՛ր և տե՛ս՝ ո՞վ է իմ էությունը.

Մի՞թե իզուր ստեղծեցիր մարդկանց բոլոր որդիներին։

⁴⁹ Ո՞վ է այն մարդը, որ պիտի ապրի ու մահ չտեսնի,

Կամ իր հոգին պիտի փրկի մահվան ձեռքից։

⁵⁰ Ո՞ւր են քո նախկին ողորմությունները, Տե՛ր,

Որոնք խոստացար Դավթին քո ճշմարտությամբ։

⁵¹ Հիշի՛ր ծառայիդ նախատինքները,

Որ ստացա ծոցիս մեջ բազում ազգերից,

⁵² Որով նախատեցին քո թշնամիները, Տե՛ր,

Նախատեցին քո օծյալին։

⁵³ Օրհնյա՜լ է Տերը հավիտյանս հավիտենից։

Եղիցի՜, եղիցի՜։

89(90)

¹ Աստծու մարդու՝ Մովսեսի աղոթքը

Տե՛ր, մեր ապավենը եղար սերնդեսերունդ։

² Երբ դեռ լեռները չէին հաստատվել,

Երբ դեռ երկիրն ու ողջ տիեզերքը չէին ստեղծվել,

Հավիտենից մինչև հավիտյան դու ես։

³ Մարդուն մի՛ վերադարձրու տառապանքի։

Եվ ասացիր. «Ինձ մո՛տ դարձեք, մարդկա՛նց որդիներ»։

⁴ Հազար տարին Տիրոջ աչքին նման է երեկվա օրվան,

Որ անցավ գիշերվա պահի պես,

⁵ Եվ նրանց տարիները ունայն պիտի լինեն։

Առավոտյան խոտի պես պիտի բուսնեն,

⁶ Առավոտյան խոտի պես պիտի ծաղկեն և զվարճանան,

Երեկոյան պիտի թառամեն, չորանան և ընկնեն։

⁷ Մենք նվաղեցինք քո բարկությունից

Եվ քո զայրույթից խռովվեցինք։

⁸ Մեր մեղքերը քո առջև դրեցիր

Եվ մեր կյանքը՝ քո դեմքի լույսի տակ։

⁹ Մեր բոլոր օրերը նվաղեցին,

Եվ քո բարկությունից խռովվեցինք։

Մեր տարիների ժամանակը նմանվեց սարդի ոստայնի,

¹⁰ Եվ մեր տարիների օրերի թիվը նրանց մեջ՝ յոթանասուն տարի,

Առավելագույնը՝ ութսուն տարի,

Նրանից ավելին՝ ցավ ու հեծություն։

Մեզ վրա հեծություն իջավ, և մենք խրատվեցինք,

¹¹ Իսկ ո՞վ գիտի քո բարկության զորությունը.

Կամ քո ահից ո՞վ կչափի քո զայրույթը։

¹² Այսպես ցո՛ւյց տուր ինձ քո աջը

Եվ սրտով խոնարհներին՝ իմաստությունդ։

¹³ Դարձի՛ր, Տե՛ր, մինչև ե՞րբ...

Մխիթարի՛ր քո ծառաներին։

¹⁴ Առավոտյան լիացանք քո ողորմությամբ,

Ցնծացինք և ուրախացանք մեր կյանքի բոլոր օրերին։

¹⁵ Ուրախ եղանք այն օրերի փոխարեն,

Երբ խեղճացրին մեզ, և այն տարիների,

Երբ չարչարանքներ տեսանք։

¹⁶ Տե՛ր, նայի՛ր քո ծառաներին ու քո ձեռքերի գործերին

Եվ առաջնորդի՛ր նրանց որդիներին։

¹⁷ Տիրոջ՝ Աստծու լույսը թող լինի մեզ վրա։

Տե՛ր, ուղղի՛ր մեր ձեռքերի գործերը,

Մեր ձեռքերի գործերը հաջողեցրո՛ւ մեզ։

90(91)

¹ Գովաբանական օրհներգ Դավթի

Ով ապրում է Բարձրյալի օգնությամբ,

Երկնքում կհանգչի Աստծու հովանու տակ։

² Տիրոջը կասի. «Ինձ ընդունողն ես,

Իմ ապավե՛ն Աստված, և ես նրան կհուսամ»։

³ Նա ինձ կփրկի որսացողի որոգայթից

Եվ խռովեցուցիչ խոսքերից։

⁴ Քեզ կընդունի իր ուսերի տակ,

Եվ կապաստանես նրա թևերի հովանու տակ։

Նրա ճշմարտությունը որպես զենք կպատի քո շուրջը։

⁵ Դու չես վախենա գիշերվա երկյուղից

Եվ ոչ էլ ցերեկվա թռչող նետից,

⁶ Խավարում շրջող իրից

Եվ դևի կեսօրվա գայթակղությունից։

⁷ Քո կողքին հազարներ կընկնեն,

Եվ բյուրավորներ՝ քո աջում,

Սակայն քեզ ոչինչ չի մերձենա։

⁸ Բայց դու միայն քո աչքերով կնայես

Եվ մեղավորների հատուցումը կտեսնես,

⁹ Որովհետև, Տե՛ր, դու իմ հույսն ես։

Բարձրյալին քեզ ապավեն դարձրիր,

¹⁰ Չարիքները քեզ չեն հասնի,

Եվ տանջանքները չեն մերձենա քո հարկերին։

¹¹ Նրա հրեշտակներին պատվիրված է քո մասին,

Որ քեզ պահպանեն քո բոլոր ճանապարհներին։

¹² Իրենց բազուկների վրա պիտի վերցնեն քեզ,

Որ երբեք ոտքդ քարին չխփես։

¹³ Դու կքայլես իժերի և քարբերի վրայով,

Ոտքով կկոխես առյուծին ու վիշապին։

¹⁴ Քանզի ինձ հուսաց, և ես կփրկեմ նրան,

Հովանի կդառնամ նրան, որովհետև անունս ճանաչեց։

¹⁵ Ինձ կաղոթի, և ես կլսեմ նրան

Ու նրա հետ կլինեմ նեղության պահին.

Կփրկեմ և կփառավորեմ նրան,

¹⁶ Բազում օրերով կլիացնեմ նրան

Եվ ցույց կտամ նրան իմ փրկությունը։

91(92)

¹ Սաղմոս՝ օրհներգ շաբաթ օրվա

² Բարի է խոստովանել Տիրոջը,

Սաղմոս երգել քո անվանը, Բարձրյա՜լ,

³ Առավոտյան պատմել քո ողորմությունը

Եվ գիշերը՝ քո ճշմարտությունը

⁴ Տասնալար քնարով,

Օրհնության ձայնով գովաբանել։

⁵ Ուրախացրի՛ր ինձ, Տե՜ր, քո արարածներով,

Եվ պիտի ցնծամ քո ձեռքերի գործերով։

⁶ Որչա՜փ մեծ են քո գործերը, Տե՜ր,

Եվ չափազանց խոր են քո խորհուրդները։

⁷ Անզգամ մարդը չի ճանաչի այս,

Եվ անմիտը չի ըմբռնի։

⁸ Մեղավորները՝ խոտի պես բուսնելով,

Եվ անօրենություն գործողները՝ ծաղկելով,

Կկործանվեն հավիտյանս հավիտենից,

⁹ Եվ դու Բարձրյալ ես հավիտյանս, Տե՜ր։

¹⁰ Եվ ահա քո թշնամիները, Տե՜ր,

Եվ ահա քո թշնամիները կկորչեն,

Կցրվեն բոլորը, ովքեր անօրենություն են գործում։

¹¹ Ռնգեղջյուրի պես բարձր կլինի իմ եղջյուրը,

Իսկ ծերությունս՝ առատ ձեթի պես։

¹² Աչքս տեսավ իմ թշնամիներին,

Որոնք չարությամբ ելել են իմ դեմ.

Ականջս կլսի նրանց։

¹³ Արդարներն արմավենու պես կծաղկեն,

Լիբանանի մայրիների պես բազում կլինեն։

¹⁴ Տնկված կլինեն Տիրոջ տան մեջ,

Մեր Աստծու գավիթներում կծաղկեն,

¹⁵ Նաև շատ կլինեն ծերության մեջ,

Թարմ և փափուկ, ¹⁶ որպեսզի ավետեն.

«Ուղիղ է Տերը՝ իմ Աստված,

Եվ նրա մեջ անիրավություն չկա»։

92(93)

¹ Շաբաթ օրվա նախօրեին, երբ բնակեցվեց երկիրը. գոհաբանական օրհներգ Դավթի

Տերը թագավորեց, վայելչություն հագավ,

Զորություն հագավ Տերը և գոտևորվեց,

Աշխարհը հաստատեց, որ չսասանվի։

² Վաղուց է պատրաստ քո աթոռը,

Եվ հավերժ ես դու։

³ Գետերը բարձրացան, Տե՛ր,

Եվ գետերը բարձրացրին իրենց ձայները,

Գետերը պիտի հորդեն իրենց հոսքերում։

⁴ Ծովի ալիքները սքանչելի եղան

Բազում ջրերի ձայնից։

Սքանչելի ես դու բարձունքներում, Տե՛ր,

⁵ Մենք հույժ հավատացինք քո վկայություններին,

Քո տանը սրբությունն է վայելում երկար օրեր։

93(94)

¹ Սաղմոս Դավթի՝ չորեքշաբթի օրվա

Աստվա՛ծ վրեժխնդիր, Տե՛ր, Աստվա՛ծ վրեժխնդիր, հայտնվեցիր։

² Բա՛րձր եղիր, որ դատես երկիրը,

Հատուցո՛ւմ տուր ամբարտավաններին։

³ Մինչև ե՞րբ մեղավորները, Տե՛ր,

Մինչև ե՞րբ մեղավորները պիտի պարծենան,

⁴ Մեծաբարբառ անիրավություն խոսեն,

Բոլորը խոսեն, ովքեր անօրենություն են գործում։

⁵ Քո ժողովրդին, Տե՛ր, խոնարհ դարձրին

Եվ չարչարեցին քո ժառանգությունը։

⁶ Պանդուխտին և այրուն սպանեցին, որբերին կոտորեցին

⁷ Եվ ասացին. «Տերն այս չի տեսնում,

Հակոբի Աստվածն ուշ չի դարձնում»։

⁸ Սթափվե՛ք, ժողովրդի անզգամնե՛ր և անմիտնե՛ր,

Մինչև ե՞րբ պիտի չհասկանաք։

⁹ Մի՞թե ականջ ստեղծողն ինքը չի լսի,

Կամ աչք ստեղծողը ինքը չի տեսնի։

¹⁰ Ազգերին խրատողն ու մարդուն գիտություն ուսուցանողը

Մի՞թե չի հանդիմանի։

¹¹ Տերը գիտի, որ ունայն են մարդկանց խորհուրդները։

¹² Երանի՜ այն մարդուն, որին խրատում ես դու, Տե՛ր,

Եվ քո օրենքները նրան ես սովորեցնում։

¹³ Հանդարտեցնում ես նրան չարության օրերին,

Մինչև հոր փորվի մեղավորի համար։

¹⁴ Տերն իր ժողովրդին չի մերժի

Եվ չի անտեսի իր ժառանգությունը,

¹⁵ Մինչև որ իրավունքներն արդար դառնան,

Եվ բոլոր սրտով ուղիղներն ընդունեն այն։

¹⁶ Ո՞վ պիտի ելնի ինձ հետ ընդդեմ չարերի,

Կամ ո՞վ պիտի միանա ընդդեմ նրանց,

Ովքեր անօրենություն են գործում։

¹⁷ Եթե Տերը ինձ չօգներ,

Մի փոքր ևս, և հոգիս կբնակվեր գերեզմանում։

¹⁸ Երբ ասում էի. «Ահա ոտքերս սասանվեցին»,

Քո ողորմությունը, Տե՛ր, օգնում էր ինձ։

¹⁹ Իմ սրտի բազում ցավերի մեջ

Քո մխիթարությունը ուրախացնում էր հոգիս։

²⁰ Թող քեզ չհավասարվի անօրենության աթոռը,

Որ վնաս է պատճառում ընդդեմ հրամանի։

²¹ Որսացին արդարի հոգին

Եվ անմեղ արյունն էին դատապարտում։

²² Տերն իմ ապավենը եղավ,

Աստված՝ իմ հույսի օգնականը։

²³ Տերը պիտի հատուցի նրանց՝

Ըստ իրենց անօրենության,

Տերը՝ մեր Աստվածը, պիտի կործանի նրանց՝

Ըստ իրենց չարության։

94(95)

¹ Գոհաբանական սաղմոս Դավթի

Եկե՛ք ցնծանք Տիրոջ առջև,

Աղաղակենք մեր փրկիչ Աստծուն,

² Փութանք նրա առջև խոստովանությամբ,

Սաղմոսներով աղաղակենք նրան։

³ Տերը մեծ Աստված է, մեծ թագավոր ողջ երկրում։

⁴ Նրա ձեռքերում են երկրի բոլոր եզերքները,

Նրանն են լեռների բարձունքները։

⁵ Նրանն է ծովը. նա արարեց այն,

Եվ ցամաքը նրա ձեռքերն ստեղծեցին։

⁶ Եկե՛ք երկրպագենք նրան, խոնարհվենք

Եվ արտասվենք մեր արարչի՝ Տիրոջ առջև։

⁷ Նա ինքն է մեր Աստվածը,

Մենք՝ նրա ձեռքի ժողովուրդը

Եվ նրա արոտի հոտը։

Այսօր, երբ նրա ձայնը լսեք,

⁸ Ձեր սրտերը մի՛ խստացրեք դառնությամբ,

Ինչպես փորձության օրն անապատում,

⁹ Ուր ձեր հայրերը փորձեցին ինձ,

Քննեցին ինձ և տեսան իմ գործերը։

¹⁰ Քառասուն տարի ջանացի այդ ազգի համար և ասացի.

«Միշտ մոլորված են սրտով

Ու ճանապարհներս չճանաչեցին»։

¹¹ Ուստի երդվեցի բարկությանս մեջ,

Որ իմ հանգստի մեջ նրանք չեն մտնի։

95(96)

¹ Սաղմոս Դավթի, այն ժամանակ, երբ տաճարը շինվեց

Նոր օրհնությո՛ւն երգեք Տիրոջը,

Օրհնեցե՛ք Տիրոջը, երկի՛ր համայն,

² Օրհնեցե՛ք Տիրոջը և օրհնեցե՛ք նրա անունը,

Օրըստօրե ավետարանե՛ք նրա փրկությունը,

³ Հեթանոսներին պատմե՛ք նրա փառքը

Եվ բոլոր ժողովուրդներին՝ նրա սքանչելիքները։

⁴ Մեծ է Տերը և հույժ օրհնյալ,

Ահարկու է նա բոլոր կուռքերի վրա։

⁵ Հեթանոսների բոլոր կուռքերը դևեր են,

Եվ Տերը ստեղծեց երկինքը։

⁶ Խոստովանությունն ու վայելչությունը նրա առջև են,

Սրբությունն ու մեծ վայելչությունը՝ նրա սրբարանում։

⁷ Մատուցե՛ք Տիրոջը, ազգատոհմե՛ր,

Մատուցե՛ք Տիրոջը փառք ու պատիվ։

⁸ Մատուցե՛ք Տիրոջը փառքն իր անվան։

Առե՛ք ընծաներ և նրա սրահնե՛րը մտեք,

⁹ Երկրպագե՛ք Տիրոջը նրա սրբության գավիթներում.

Ամբողջ երկիրը պիտի խռովի նրա երեսից։

¹⁰ Հեթանոսների մեջ ասացե՛ք. «Տերը թագավորեց,

Հաստատեց աշխարհը, որ չսասանվի,

Եվ իր ժողովրդին կդատի ուղղությամբ»։

¹¹ Թող երկինքն ուրախանա, և երկիրը ցնծա,

Թող զվարճանա ծովն իր լիությամբ։

¹² Թող ցնծան դաշտերը և ամեն ինչ, որ կա նրանցում։

Այնժամ թող ցնծան անտառի բոլոր ծառերը

¹³ Տիրոջ առջև, որ գալիս է.

Գալիս է դատելու երկիրը։

Տիեզերքն արդարությամբ պիտի դատի

Եվ բոլոր ժողովուրդներին՝

Իր ճշմարտությամբ։

96(97)

¹ Սաղմոս Դավթի, այն ժամանակ, երբ երկիրը հանդարտվեց

Տերը թագավորեց. երկիրը թող ցնծա,

Թող ուրախ լինեն բազում կղզիները։

² Նրա շուրջն ամպ և մեգ է,

Նրա Աթոռը հիմնված է իրավունքի և արդարության վրա։

³ Նրա առջևից հուր կընթանա

Եվ կայրի իր շուրջը եղող թշնամիներին։

⁴ Նրա փայլատակումները երևացին տիեզերքին.

Երկիրը տեսավ և սասանվեց։

⁵ Մոմի պես կհալվեն լեռները Տիրոջ երեսից,

Ամբողջը երկիրը՝ Տիրոջ երեսից։

⁶ Երկինքը կպատմի նրա արդարությունը,

Նրա փառքը տեսան բոլոր ժողովուրդները։

⁷ Թող ամաչեն բոլոր նրանք, ովքեր կուռքերին են երկրպագում,

Եվ ովքեր պարծենում են իրենց պատկերներով։

Նրա բոլոր հրեշտակները պիտի երկրպագեն իրեն.

⁸ Լսեց և ուրախ եղավ Սիոնը,

Եվ պիտի ցնծան Հուդայի դուստրերը քո իրավունքների համար, Տե՛ր,

⁹ Որովհետև դու ես Բարձրյալը ողջ երկրի վրա.

Անչափ վեր եղար բոլոր կուռքերից։

¹⁰ Տիրոջը սիրողնե՛ր, ատե՛ք չարությունը.

Տերը պահում է իր սրբերի հոգիները,

Մեղավորի ձեռքերից փրկում է նրանց։

¹¹ Լույս ծագեց արդարների համար,

Եվ ուրախություն՝ սրտով ուղիղների համար։

¹² Արդարնե՛ր, ուրա՛խ եղեք Տիրոջով,

Գոհությո՛ւն մատուցեք՝ հիշելով նրա սրբությունը։

97(98)

¹ Սաղմոս Դավթի

Նոր օրհնությո՛ւն երգեք Տիրոջը,

Որովհետև սքանչելիքներ գործեց։

Փրկեց նրան իր աջը և իր սուրբ բազուկը։

² Տերը ցույց տվեց իր փրկությունը,

Իր արդարությունը հայտնեց ազգերի առջև,

³ Հիշեց Հակոբին իր ողորմությամբ,

Իր ճշմարտությամբ՝ տունն Իսրայելի։

Եվ երկրի բոլոր ծագերը տեսան մեր Աստծու փրկությունը։

⁴ Աղաղակե՛ք Տիրոջը, ո՛ղջ երկիր,

Օրհնեցե՛ք, ցնծացե՛ք և սաղմո՛ս երգեք։

⁵ Սաղմո՛ս երգեք մեր Աստծուն օրհնությամբ,

Օրհնությամբ և սաղմոսի ձայնով։

⁶ Կռածո փողերի օրհնության ձայնով,

Օրհնությամբ, ցնծությամբ և եղջերափողի ձայնով

Աղաղակե՛ք Տեր թագավորի առջև։

⁷ Թող խռովվի ծովն իր լիությամբ,

Տիեզերքը և իր բոլոր բնակիչները,

⁸ Եվ գետերը թող ծափահարեն միասին։

Լեռները թող ցնծան Տիրոջ առջև, որ եկել է,

⁹ Եվ հասել է Տերը՝ երկիրը դատելու։

Պիտի դատի երկիրն արդարությամբ

Եվ իր ժողովուրդներին՝ ուղղությամբ։

98(99)

¹ Սաղմոս Դավթի

Տերը թագավորում է, ժողովուրդները՝ դողում։

Նա նստում է քերովբեների վրա. երկիրը սասանվեց։

² Տերը մեծ է Սիոնի մեջ և բարձր է բոլոր ժողովուրդներից.

³ Գոհություն մատուցենք քո մեծ անվանը,

Որովհետև ահավոր և սուրբ է։

⁴ Եվ թագավորի պատիվն իրավունք է սիրում։

Դո՛ւ պատրաստեցիր ուղղությունը.

Իրավունքն ու արդարությունը դո՛ւ տվեցիր Հակոբին։

⁵ Փառաբանե՛ք Տիրոջը՝ մեր Աստծուն,

Երկրպագե՛ք նրա ոտքի պատվանդանին,

Որովհետև սուրբ է։

⁶ Մովսեսն ու Ահարոնը՝ նրա քահանաները,

Սամուելը՝ նրանց հետ, որոնք աղոթում են նրա անվանը,

Աղոթում էին Տիրոջը. նա լսում էր նրանց

⁷ Եվ ամպի սյունով խոսում էր նրանց հետ։

Պահում էին նրա վկայությունը

Եվ հրամանները, որ տվեց նրանց։

⁸ Տե՛ր, Աստվա՛ծ մեր, դու լսում էիր նրանց,

Աստվա՛ծ, դու քավիչ և վրեժխնդիր էիր լինում

Նրանց բոլոր գործերի համար։

⁹ Փառաբանե՛ք Տիրոջը՝ մեր Աստծուն,

Երկրպագե՛ք նրա սուրբ լեռանը,

Որովհետև Սուրբ է Տերը՝ մեր Աստվածը։

99(100)

¹ Սաղմոս Դավթի՝ խոստովանության

Աղաղակե՛ք Տիրոջը, բոլո՛ր երկրներ,

² Եվ ծառայե՛ք Տիրոջն ուրախությամբ.

Նրա դիմաց ցնծությա՛մբ մտեք,

³ Ճանաչե՛ք, որ Տերը մեր Աստվածն է։

Նա ստեղծեց մեզ, և ոչ թե մենք եղանք.

Մենք նրա ժողովուրդը

Եվ նրա արոտի ոչխարներն ենք։

⁴ Նրա դռներից մտե՛ք խոստովանությամբ,

Նրա սրահները՝ օրհնությամբ։

Խոստովանե՛ք Տիրոջը

Եվ օրհնե՛ք նրա անունը։

⁵ Քաղցր է Տերը,

Հավիտյան է նրա ողորմությունը,

Նրա ճշմարտությունը՝ սերնդեսերունդ։

100(101)

¹ Սաղմոս Դավթի

Ես պիտի օրհնեմ քեզ, Տե՜ր,

Քո ողորմության և իրավունքի համար,

² Սաղմոս պիտի երգեմ և իմաստուն լինեմ

Անբիծ ճանապարհին, մինչև գա ինձ մոտ,

Որովհետև իմ տան մեջ ես ընթացա սրտիս անբծությամբ։

³ Աչքերիս առջև որևէ անիրավ բան չդրեցի

Եվ ատեցի ուրացություն անողներին։

⁴ Թյուր սիրտ ունեցողն ինձ չմերձեցավ,

Անիրավն ինձնից հեռացավ, բայց կարևորություն չտվեցի։

⁵ Նա, որ ծածուկ խոսեց իր ընկերոջ մասին,

Նրան հայտնապես հալածեցի,

Նա, որ ամբարտավան էր աչքով և ագահ սրտով,

Նրա հետ հաց չկերա։

⁶ Աչքերս դեպի երկրի հավատացյալներն էին,

Որպեսզի նրանք ինձ հետ նստեն.

Ով գնում էր անբիծ ճանապարհով,

Նա էր ինձ ծառայում։

⁷ Ամբարտավանություն անողն իմ տան մեջ չէր բնակվում,

Անիրավություն խոսողն աչքերիս առջև

Հաջողություն չուներ։

⁸ Ամեն առավոտ սպանում էի

Երկրի բոլոր մեղավորներին.

Պիտի վերացնեմ Տիրոջ քաղաքից

Բոլոր նրանց, ովքեր

Անօրենություն են գործում։

101(102)

Ապաշխարության աղոթք

¹ Բորոտի աղոթքը, երբ նա իր անձկության մեջ Տիրոջ առաջ դրեց իր խնդրանքները

² Տե՛ր, լսի՛ր աղոթքներս, թող քեզ հասնի աղաղակս,

³ Երեսդ մի՛ դարձրու ինձանից.

Նեղությանս օրը ինձ խոնարհեցրո՛ւ քո ականջը,

Այն օրը, երբ քեզ աղոթեմ, անմիջապես լսի՛ր ինձ։

⁴ Իմ օրերը ծխի նման սպառվեցին,

Եվ ոսկորներս խռիվի պես չորացան։

⁵ Սիրտս խոցվեց և ցամաքեց խոտի նման,

Իմ հեծության ձայնից մոռացա հացս ուտել։

⁶ Ոսկորս մարմնիս կցվեց.

Ես նմանվեցի անապատի հավալուսնի,

⁷ Ես ավերակի բուի նման եղա,

⁸ Տքնեցի ու եղա

Ինչպես միայնակ ճնճղուկ տանիքում։

⁹ Թշնամիներս ամեն օր նախատեցին ինձ,

Ինձ գովողներն ինձնով երդվեցին։

¹⁰ Իբրև հաց՝ մոխիրը կերա

Եվ ըմպելիքս արտասուքով խառնեցի

¹¹ Քո բարկության ու զայրույթի երեսից,

Որովհետև դու ինձ բարձրացրիր և խոնարհեցրիր։

¹² Օրերս անցան ստվերի նման,

Եվ ես խոտի նման ցամաքեցի։

¹³ Դու, Տե՛ր, հավիտյան կաս,

Եվ քո հիշատակը՝ սերնդեսերունդ։

¹⁴ Դու պիտի ելնես և գթաս Սիոնին.

Հասել է ժամը, ժամանակն է նրան գթալու։

¹⁵ Քո ծառաները հավանեցին նրա քարերը

Ու գթացին նրա հողին։

¹⁶ Հեթանոսները կերկյուղեն քո անունից,

Եվ երկրի բոլոր թագավորները՝ քո փառքից։

¹⁷ Տերը Սիոնը կշենացնի

Եվ իր փառքով կերևա այնտեղ։

¹⁸ Նայեց խոնարհների աղոթքին

Եվ չարհամարհեց նրանց խնդրանքները։

¹⁹ Պիտի գրվի այս գալիք սերնդի համար.

Ժողովուրդը, որ ստացավ այն, օրհնելու է Տիրոջը։

²⁰ Նայեց նա իր սրբարանի բարձունքից.

Տերը նայեց երկնքից երկիր՝

²¹ Լսելու կապվածների հեծությունը

Եվ արձակելու մահապարտների որդիներին,

²² Հռչակելու Տիրոջ անունը Սիոնում

Եվ նրա օրհնությունները՝ Երուսաղեմում,

²³ Միասին հավաքելու ժողովուրդներին,

Եվ թագավորներին՝ Տիրոջը ծառայելու։

²⁴ Նա տկարացրեց իմ զորությունը, մինչ ընթանում էի,

Նվազեցրեց իմ օրերը, և ես ասացի.

²⁵ «Ինձ մի՛ հանիր իմ օրերի կեսին,

Քանզի հավերժ են քո տարիները»։

²⁶ Սկզբից, Տե՜ր, երկրի հիմքերը հաստատեցիր,

Երկինքն էլ քո ձեռքերի գործն է։

²⁷ Նրանք կանցնեն, բայց դու կաս և կմնաս հավիտյան։

Ամեն ինչ քուրջի նման կմաշվի,

Վերարկուի նման կփոխես նրանց,

Ու կփոխվեն, ²⁸ բայց դու նույնն ես,

Եվ քո տարիները չեն անցնի։

²⁹ Քո ծառաների որդիները կբնակվեն այնտեղ,

Եվ նրանց սերնդին հավիտյան կհատուցվի։

102(103)

¹ Սաղմոս Դավթի

Օրհնի՛ր Տիրոջը, հոգի՛ իմ,

Եվ իմ ողջ ոսկորները՝ նրա սուրբ անունը.

² Օրհնի՛ր Տիրոջը, հոգի՛ իմ,

Եվ մի՛ մոռացիր նրա բոլոր պարգևները։

³ Նա, որ քավում է քո բոլոր մեղքերը,

Բժշկում քո բոլոր հիվանդությունները,

⁴ Նա, որ քո կյանքը փրկում է ապականությունից,

Քեզ ողորմությամբ և գթությամբ պսակում,

⁵ Նա, որ քեզ տալիս է քո ցանկացած բարիքը

Եվ քո մանկությունը նորոգում արծվի նման։

⁶ Տերը ողորմություն և իրավունք է շնորհում բոլոր զրկվածներին.

⁷ Տերն իր ճանապարհները ցույց տվեց Մովսեսին

Եվ իր կամքը՝ Իսրայելի որդիներին։

⁸ Գթած, ողորմած, համբերատար և բազումողորմ է Տերը։

⁹ Տերն իսպառ չի բարկանում և ոխ չի պահում հավիտյան։

¹⁰ Չվարվեց մեզ հետ ըստ մեր մեղքերի

Եվ մեզ չհատուցեց ըստ մեր անօրենության։

¹¹ Այլ որքան բարձր է երկինքը երկրից,

Այնքան զորացրեց Տերն իր ողորմությունն

Իրենից երկյուղածների հանդեպ։

¹² Որքան հեռու է արևելքն արևմուտքից,

Այնքան հեռացրեց մեր անօրենությունները մեզնից։

¹³ Ինչպես հայրն է գթում իր զավակներին,

Այնպես Տերը գթաց իրենից երկյուղածներին,

¹⁴ Քանզի իմացավ մեր կազմվածքները և հիշեց, որ հող ենք մենք,

¹⁵ Մարդու օրերը խոտի են նման։

Ծաղկում է վայրի ծաղկի պես.

¹⁶ Երբ հողմը փչի նրա վրա, նա էլ չի լինի,

Եվ նրա տեղը նույնիսկ չի երևա։

¹⁷ Բայց Տիրոջ ողորմությունը հավիտյանս հավիտենից

Իրենից երկյուղածների վրա է,

Եվ նրա արդարությունը՝ որդուց որդի։

¹⁸ Ովքեր նրա ուխտն են պահում,

Հիշում են նրա պատվիրաններն ու կատարում։

¹⁹ Տերն իր Աթոռը երկնքում հաստատեց,

Նրա արքայությունը բոլորին է տիրում։

²⁰ Տիրո՛ջն օրհնեցեք, նրա բոլո՛ր հրեշտակներ,

Որ հզոր եք զորությամբ,

Որ կատարում եք նրա խոսքը

Եվ նրա պատգամների ձայնը լսում։

²¹ Տիրո՛ջն օրհնեցեք, նրա բոլո՛ր զորություններ,

Պաշտոնյանե՛ր և նրա կամքը կատարողնե՛ր։

²² Տիրո՛ջն օրհնեցեք, նրա բոլո՛ր զորություններ,

Նրա տերությունն ամեն տեղ է.

Օրհնի՛ր Տիրոջը, հոգի՛ իմ։

103(104)

¹ Սաղմոս Դավթի

Օրհնի՛ր Տիրոջը, հոգի՛ իմ, Տե՛ր,

Աստվա՛ծ իմ, չափազանց մեծ ես դու.

Գովասանք և մեծ վայելչություն հագար,

² Լույսը կրեցիր որպես ծածկոց,

Երկինքը ձգեցիր վարագույրի պես

³ Եվ ջրերի վրա դրեցիր նրա վերնահարկը։

Նա, որ ամպերի մեջ է ընթանում

Եվ շրջում հողմի թևերի վրա։

⁴ Նա, որ շունչ դարձրեց իր հրեշտակներին

Եվ իր պաշտոնյաներին՝ կիզիչ հուր։

⁵ Երկիրը հաստատեց իր հիմքերի վրա,

Որպեսզի բնավ չսասանվի.

⁶ Խորքերը վերարկուի նման զգեստ են նրան,

Եվ ջրերը մնում են լեռների վրա։

⁷ Քո սաստումից կփախչեն և քո ձայնի որոտումից կսարսեն,

⁸ Լեռները կբարձրանան և դաշտերը կիջնեն,

Այնտեղ, որտեղ հաստատեցիր նրանց։

⁹ Սահման դրեցիր, որպեսզի չանցնեն

Եվ չվերադառնան՝ երկիրը ծածկելու։

¹⁰ Աղբյուրները դեպի ձորերն ուղղեցիր,

Որ ջրերը հոսեն լեռների միջով՝

¹¹ Հագեցնելու վայրի բոլոր գազաններին,

Որ ցիռերն իրենց ծարավը հագեցնեն։

¹² Այնտեղ երկնի թռչունները բույն պիտի դնեն

Եվ ժայռերի մեջ ձայն պիտի տան։

¹³ Իր շտեմարաններից պիտի արբեցնի լեռներին,

Իր գործի բերքով կլցնի երկիրը։

¹⁴ Լեռներում խոտ բուսեցրիր և կանաչություն՝

Մարդկանց կարիքների համար։

Հաց հանեցիր հողից։

¹⁵ Գինին ուրախացնում է մարդու սիրտը,

Յուղը՝ զվարթացնում երեսը,

Իսկ հացն ամրացնում է մարդու սիրտը։

¹⁶ Թող հագենան Տիրոջ ծառերը

Եվ Լիբանանի մայրիները, որ դու տնկեցիր.

¹⁷ Այնտեղ երկնի թռչունները ձագեր կհանեն,

Եվ արագիլի բույնը ապաստան կլինի նրանց։

¹⁸ Բարձր լեռները ապավեն են եղջերուներին,

Իսկ ժայռերը՝ նապաստակներին։

¹⁹ Ժամանակի համար ստեղծեցիր լուսինը,

Արևն իմացավ ժամն իր մտնելու։

²⁰ Խավարն ստեղծեցիր, և եղավ գիշեր,

Որի ժամանակ շրջում են անտառի բոլոր գազանները։

²¹ Կորյունները մռնչում են ու հափշտակում

Եվ Աստծուց են խնդրում իրենց կերակուրը։

²² Արևածագին հավաքվում և հանգստանում են իրենց որջերում։

²³ Մարդը գնում է իր գործին,

Իր ձեռքի վաստակին՝ մինչև երեկո։

²⁴ Որչա՜փ մեծ են քո գործերը, Տե՜ր,

Ամեն ինչ իմաստությամբ ստեղծեցիր,

Եվ երկիրը լցվեց քո արարածներով։

²⁵ Ահա մեծ և խաղաղ ծովը, որում անթիվ զեռուններ կան,

Մեծ և փոքր գազաններ.

²⁶ Նրա վրա նավեր են գնում,

Եվ վիշապը, որին ստեղծեցիր նրա մեջ խաղալու համար։

²⁷ Բոլորը քեզ են սպասում, և դու ես նրանց

Կերակուր տալիս ժամանակին։

²⁸ Տալիս ես նրանց, և կերակրվում են։

Բացում ես ձեռքդ և քո կամքով

Կերակրում բոլորին։

²⁹ Երբ երեսդ շրջում ես նրանցից, խռովվում են,

Երբ նրանցից հանում ես շունչը,

Սպառվում և հող են դառնում։

³⁰ Քո շունչն ես ուղարկում նրանց և արարում

Եվ նորոգում ես երկրի երեսը։

³¹ Թող Տիրոջ փառքը հավիտյան լինի,

Եվ Տերն ուրախանա իր արարածներով։

³² Նայում է երկրին և դողացնում նրան,

Մոտենում է լեռներին, և նրանք ծուխ են արձակում։

³³ Պիտի օրհնեմ Տիրոջն իմ կյանքում,

Քանի կամ, սաղմոս պիտի երգեմ իմ Աստծուն։

³⁴ Իմ օրհնությունը հաճելի կլինի նրան,

Եվ ես Տիրոջով ուրախ կլինեմ։

³⁵ Թող պակասեն մեղավորները երկրից,

Եվ այնտեղ ամբարիշտներ չգտնվեն այլևս.

Օրհնի՛ր Տիրոջը, հոգի՛ իմ։

104(105)

¹ Գոհությո՛ւն մատուցեք Տիրոջը,

Փառաբանե՛ք նրա անունը,

Հեթանոսներին պատմե՛ք նրա գործերը։

² Օրհնե՛ք և սաղմո՛ս երգեք նրան.

Պատմե՛ք նրա բոլոր սքանչելիքները

³ Եվ պարծեցե՛ք նրա սուրբ անունով։

Թող ուրախ լինեն սրտերը նրանց,

Ովքեր Տիրոջն են փնտրում։

⁴ Փնտրե՛ք Տիրոջը և հզո՛ր եղեք,

Ամեն ժամ նրա երե՛սը փնտրեք։

⁵ Հիշե՛ք նրա ստեղծած սքանչելիքները,

Հրաշքներն ու իր բերանի իրավունքները։

⁶ Աբրահամի՛ սերունդ, ծառաներն եք նրա,

Հակոբի՛ որդիներ, ընտրյալներն եք նրա։

⁷ Նա ինքն է Տերը՝ մեր Աստվածը.

Նրա իրավունքները ողջ երկրում են։

⁸ Հիշեց իր հավիտենական ուխտը

Եվ իր խոսքը, որ պատվիրեց մինչև հազար տարի։

⁹ Ուխտը, որ կնքեց Աբրահամի հետ

Եվ իր երդումը՝ Իսահակի հետ։

¹⁰ Իր հրամանը հաստատեց Հակոբի համար

Եվ իր հավիտենական ուխտը՝ Իսրայելի համար։

¹¹ Ասաց. «Ձեզ կտամ Քանանի երկիրը՝

Իբրև բաժին ձեր ժառանգության»։

¹² Երբ քիչ էին նրանք թվով, նվազ և պանդուխտ այնտեղ,

¹³ Անցնում էին մի ցեղից մյուս ցեղի մոտ,

Մի թագավորությունից՝ մեկ այլ ժողովրդի մոտ։

¹⁴ Չթողեց մարդկանց, որ ճնշեն նրանց,

Թագավորներին կշտամբեց նրանց համար.

¹⁵ Ասաց. «Մի՛ մոտեցեք իմ օծյալներին

Եվ մի՛ մեղանչեք մարգարեներիս դեմ»։

¹⁶ Նրանց երկիրը սովի մատնեց

Եվ սպառեց հացի ողջ պաշարը։

¹⁷ Մարդ ուղարկեց նրանց առջևից.

Հովսեփը ստրկության վաճառվեց։

¹⁸ Նրա ոտքերը կապանքներով նեղեցին

Եվ նրա անձը երկաթով պնդեցին,

¹⁹ Մինչև նրա խոսքը կատարվեց,

Եվ Տիրոջ խոսքը փորձեց նրան։

²⁰ Թագավորը մարդ ուղարկեց և արձակեց նրան.

Ժողովրդի իշխանը ազատեց նրան,

²¹ Իր տան վրա տեր կարգեց նրան,

Իշխան՝ իր ամբողջ ունեցվածքի վրա՝

²² Խրատելու նրանց իշխաններին ըստ իր կամքի

Եվ նրանց ծերերին իմաստություն ուսուցանելու։

²³ Իսրայելը մտավ Եգիպտոս.

Հակոբը պանդուխտ եղավ Քամի երկրում։

²⁴ Չափազանց աճեցրեց իր ժողովրդին

Եվ նրան իր թշնամիներից ավելի զորացրեց։

²⁵ Նրանց սիրտը շրջեց, որ իր ժողովրդին ատեն

Եվ իր ծառաների դեմ նենգությամբ վարվեն։

²⁶ Ուղարկեց իր ծառա Մովսեսին

Եվ իր ընտրյալ Ահարոնին՝

²⁷ Նրանց տալով իր նշանների

Եվ հրաշքների խոսքը Քամի երկրում։

²⁸ Ուղարկեց խավար և խավարեցրեց նրանց,

Որովհետև դառնացրին իր խոսքը։

²⁹ Արյուն դարձրեց նրանց գետերը

Եվ սպանեց նրանց բոլոր ձկները։

³⁰ Գորտերը եռացին նրանց երկրում,

Նաև նրանց թագավորների շտեմարանների մեջ։

³¹ Հրամայեց, և շնաճանճեր ու մժեղներ եկան

Նրանց ողջ սահմաններին։

³² Նրանց անձրևները փոխեց կարկուտի,

Եվ նրանց երկրում հուր բորբոքվեց։

³³ Հարվածեց նրանց այգիներին ու թզենիներին

Եվ փշրեց նրանց սահմանների բոլոր ծառերը։

³⁴ Հրամայեց, և եկան

Անհամար մորեխներ և խառնիճներ։

³⁵ Կերավ նրանց երկրի ողջ խոտը,

Սպառվեց նրանց դաշտերի ողջ պտուղը։

³⁶ Հարվածեց եգիպտացիների բոլոր առաջնեկներին՝

Նրանց ողջ վաստակի երախայրիքը։

³⁷ Նրանց հանեց ոսկով և արծաթով,

Եվ նրանց ազգի մեջ հիվանդ չկար։

³⁸ Ուրախացավ Եգիպտոսը նրանց դուրս գալուց,

Որովհետև Տիրոջ ահն ընկել էր նրանց վրա։

³⁹ Հովանու համար ամպ սփռեց ցերեկը,

Իսկ գիշերը հրով լույս տվեց նրանց։

⁴⁰ Խնդրեցին, և լորամարգիներ եկան,

Եվ հագեցրեց նրանց երկնքի հացով,

⁴¹ Հարվածեց ժայռին, և ջրեր բխեցին,

Ու գետեր հոսեցին անապատի մեջ։

⁴² Հիշեց իր սուրբ խոսքը, որ տվել էր իր ծառա Աբրահամին։

⁴³ Իր ժողովրդին ցնծությամբ հանեց

Եվ ուրախությամբ՝ իր ընտրյալներին.

⁴⁴ Նրանց տվեց հեթանոսների գավառները

Եվ ժողովուրդների վաստակի ժառանգ դարձրեց,

⁴⁵ Որպեսզի պահեն նրա վկայությունները

Եվ գործադրեն նրա օրենքները։

105(106)

¹ Գոհությո՛ւն մատուցեք Տիրոջը, որովհետև բարի է,

Որովհետև հավիտենական է նրա ողորմությունը։

² Ո՞վ պիտի պատմի Տիրոջ զորությունները,

Լսելի դարձնի նրա ողջ օրհնությունները։

³ Երանի՜ նրանց, ովքեր պահում են իրավունքը

Եվ ամեն ժամ արդարություն են գործում։

⁴ Հիշի՛ր մեզ, Տե՜ր, քո ժողովրդին հաճությամբ

Եվ այցելի՛ր մեզ քո փրկությամբ։

⁵ Տեսնենք քո ընտրյալների քաղցրությունը,

Ուրախանանք քո ազգի ուրախությամբ

Ու փառավորվենք քո ժառանգությամբ։

⁶ Մենք մեր հայրերի հետ մեղանչեցինք,

Անօրենություն և հանցանք գործեցինք։

⁷ Մեր հայրերը Եգիպտոսի մեջ չհասկացան քո սքանչելիքները

Եվ չհիշեցին քո անհուն ողորմությունը։

Քեզ բարկացրին Կարմիր ծովն անցնելիս։

⁸ Իր անվան համար փրկեց նրանց,

Որպեսզի ճանաչեն զորությունը նրա։

⁹ Սաստեց Կարմիր ծովին, և այն ցամաքեց,

Առաջնորդեց նրանց անդունդի միջով,

Ինչպես անապատով։

¹⁰ Նրանց ազատեց իրենց ատողների ձեռքերից

Եվ փրկեց նրանց իրենց թշնամիների ձեռքերից։

¹¹ Ծովը ծածկեց նրանց նեղիչներին,

Եվ նրանցից ոչ ոք չապրեց։

¹² Հավատացին նրա խոսքին

Եվ օրհնություններ երգեցին նրան։

¹³ Սակայն շուտով մոռացան նրա գործերը

Եվ չանսացին նրա խորհրդին։

¹⁴ Ցանկություններ ունեցան անապատի մեջ

Եվ Աստծուն փորձեցին անջրդի վայրում։

¹⁵ Նրանց տվեց իրենց խնդրածը

Եվ լիություն ուղարկեց նրանց անձանց։

¹⁶ Բանակատեղիում բարկացրին Մովսեսին

Եվ Ահարոնին՝ Տիրոջ նվիրյալին։

¹⁷ Գետինը բացվեց ու կլանեց Դադանին

Եվ ծածկեց Աբիրոնի համախոհներին։

¹⁸ Հուր բորբոքվեց նրանց հավաքատեղիում,

Եվ բոցն այրեց մեղավորներին։

¹⁹ Հորթ շինեցին Քորեբում

Եվ երկրպագեցին կուռքին.

²⁰ Իրենց փառքը փոխանակեցին խոտակեր հորթի պատկերով։

²¹ Մոռացան իրենց կենարար Աստծուն,

Որ մեծ գործեր կատարեց Եգիպտոսում.

²² Իր սքանչելիքները՝ Քամի երկրում,

Եվ իր ահը՝ Կարմիր ծովի վրա։

²³ Եվ կկործաներ նրանց, եթե ընտրյալ Մովսեսը

Նրանց առջև չլիներ։

Դարձավ Տիրոջը և անցկացրեց նրա բարկությունը,

Որ նրանք չկոտորվեն։

²⁴ Անարգեցին ցանկալի երկիրը

Եվ նրա խոսքին չհավատացին,

²⁵ Տրտնջացին իրենց բանակատեղիներում

Եվ Տիրոջ ձայնը չլսեցին։

²⁶ Իր ձեռքը բարձրացրեց նրանց վրա՝

Հարվածելու նրանց անապատում,

²⁷ Որ ցրվի նրանց սերունդը հեթանոսների մեջ,

Որ ցրվի նրանց սերունդը գավառներում։

²⁸ Նրանք պղծվեցին Բելփեգովրի հետ

Եվ կերան մեռելների զոհերից։

²⁹ Բարկացրին նրան իրենց գործերով,

Կործանումը շատացավ նրանց վրա։

³⁰ Ապա Փենեեսը մեջտեղ եկավ,

Սրբեց, և դադարեց մահը։

³¹ Նրան արդարություն համարվեց սերնդեսերունդ,

Մինչև հավիտյան։

³² Բարկացրին նրան Հակառակության ջրերի [* Մե-Մերիվա] մոտ.

Մովսեսը տանջվեց նրանց համար,

³³ Որովհետև դառնացրին նրա հոգին.

Հրամայեց իր շրթունքներով։

³⁴ Չկոտորվեցին ազգերը,

Որոնց մասին ասել էր Տերը։

³⁵ Խառնվեցին հեթանոսների հետ և սովորեցին նրանց գործերը,

³⁶ Նրանց կուռքերին ծառայեցին,

Որ գայթակղություն եղավ նրանց։

³⁷ Իրենց որդիներին և դուստրերին զոհեցին դևերին

³⁸ Եվ անբիծ արյուն հեղեցին՝

Արյունն իրենց որդիների և դուստրերի,

Որ զոհեցին Քանանի կուռքերին։

³⁹ Երկիրը շաղախվեց նրանց արյունով

Եվ պղծվեց նրանց գործերով,

Որովհետև պոռնկացան իրենց ընթացքով։

⁴⁰ Տերը սրտմտությամբ բարկացավ իր ժողովրդի վրա

Եվ հույժ գարշեց իր ժառանգությունից։

⁴¹ Նրանց հեթանոսների ձեռքը մատնեց,

Եվ իրենց ատողները տիրեցին նրանց,

⁴² Եվ իրենց թշնամիները նեղեցին նրանց,

Եվ խեղճացան նրանց ձեռքերի ներքո։

⁴³ Շատ անգամ փրկեց նրանց,

Բայց նրանք դառնացրին նրան իրենց խորհուրդներով

Եվ ընկճվեցին իրենց անօրենության մեջ։

⁴⁴ Տերը նայեց նրանց նեղություններին,

Երբ լսեց ձայնը նրանց աղոթքի.

⁴⁵ Հիշեց ուխտն իր և զղջաց իր մեծ ողորմությամբ,

⁴⁶ Նրանց գթության արժանացրեց

Նրանց բոլոր գերիչների առջև։

⁴⁷ Փրկի՛ր մեզ, Տե՛ր Աստված մեր,

Եվ մեզ հավաքի՛ր հեթանոսների միջից,

Որ գոհություն մատուցենք քո սուրբ անվանը

Եվ պարծենանք քո օրհնություններով։

⁴⁸ Օրհնյա՜լ է Տերը՝ Իսրայելի Աստվածը,

Հավիտյանս հավիտենից։

Եվ ողջ ժողովուրդը թող ասի.

«Եղիցի՜, եղիցի՜»։

106(107)

¹ Ալելուիա

Գոհությո՛ւն մատուցեք Տիրոջը,

Որովհետև բարի, հավիտենական է նրա ողորմությունը.

² Թող ասեն Տիրոջ փրկյալները,

Որոնց ազատեց թշնամու ձեռքերից։

³ Բոլոր գավառներից հավաքեց նրանց՝

Արևելքից և արևմուտքից, հյուսիսից և ծովից։

⁴ Մոլորվեցին նրանք անապատում,

Անջրդի ճանապարհին

Եվ բնակության քաղաք չգտան։

⁵ Քաղցեցին և ծարավեցին,

Եվ նրանց հոգիները նվաղեցին իրենց ներսում։

⁶ Իրենց նեղության մեջ Տիրոջն աղաղակեցին,

Եվ փրկեց նրանց իրենց վշտերից։

⁷ Ուղիղ ճանապարհով նրանց առաջնորդեց,

Որ գնան իրենց բնակության քաղաքը։

⁸ Թող գոհություն մատուցեն նրա ողորմության

Եվ սքանչելիքների համար մարդկանց որդիները,

⁹ Որովհետև հագեցրեց քաղցած հոգիները

Եվ բարությամբ լիացրեց կարոտյալ հոգիները։

¹⁰ Ոմանք նստած էին խավարի և մահվան ստվերների մեջ,

Կապված էին աղքատությանը, ինչպես երկաթին։

¹¹ Որովհետև դառնացրին խոսքն Աստծու

Եվ բարկացրին Բարձրյալի խորհուրդները։

¹² Նրանց սրտերը ցավից սեղմվեցին, տկարացան,

Եվ չկար մեկը, որ օգներ նրանց։

¹³ Իրենց նեղության մեջ Տիրոջն աղաղակեցին,

Եվ հանեց նրանց իրենց վշտերից։

¹⁴ Նրանց փրկեց խավարից և մահվան ստվերներից

Եվ խորտակեց նրանց կապանքները։

¹⁵ Թող մարդկանց որդիները գոհություն մատուցեն

Նրա ողորմության և սքանչելիքների համար,

¹⁶ Որովհետև փշրեց պղնձյա դռները

Եվ երկաթյա նիգերը։

¹⁷ Օգնեց նրանց իրենց անօրենության ճանապարհին,

Որովհետև իրենց մեղքերի պատճառով հույժ տկարացան։

¹⁸ Նրանց սրտերը գարշում էին ամեն տեսակ կերակուրից։

Նրանք մոտեցան մահվան դռներին։

¹⁹ Իրենց նեղության մեջ Տիրոջն աղաղակեցին,

Եվ ապրեցրեց նրանց իրենց վշտերից։

²⁰ Ուղարկեց իր խոսքն ու բուժեց նրանց

Եվ փրկեց նրանց իրենց ապականությունից։

²¹ Թող գոհություն մատուցեն նրա ողորմության

Եվ սքանչելիքների համար մարդկանց որդիները։

²² Թող նրան օրհնության զոհ մատուցեն

Եվ պատմեն նրա գործերը ցնծությամբ։

²³ Ովքեր ծով էին իջնում նավերով

Եվ բազում ջրերում գործեր կատարում,

²⁴ Նրանք տեսան Տիրոջ գործերն ու սքանչելիքները

Անդունդի խորքերում.

²⁵ Ասաց, և հողմ ու մրրիկ ելան,

Եվ բարձրացան նրա ալիքները։

²⁶ Ելան երկինք և իջան անդունդ,

Եվ նրանց հոգիները մաշվեցին իրենց ներսում։

²⁷ Խռովվեցին, սասանվեցին, ինչպես հարբածներ,

Եվ նրանց ողջ իմաստությունը վերացավ։

²⁸ Իրենց նեղության մեջ Տիրոջն աղաղակեցին,

Եվ փրկեց նրանց իրենց վշտերից։

²⁹ Մրրիկը օդի վերածվեց, և դադարեցին նրա ալիքները,

³⁰ Ուրախացան, որ հանդարտվեցին,

Եվ առաջնորդեց նրանց իրենց կամեցած նավահանգիստը։

³¹ Թող մարդկանց որդիները գոհություն մատուցեն

Նրա ողորմության և սքանչելիքների համար։

³² Թող պանծացնեն նրան ժողովուրդների հավաքույթներում,

Եվ ծերերի ատյաններում օրհնեն նրան։

³³ Որովհետև գետերը ցամաքի փոխեց

Եվ ջրերի ընթացքը՝ ծարավոտ երկրի։

³⁴ Պտղաբեր երկիրը դարձրեց աղուտ

Նրա բնակիչների չարության համար։

³⁵ Անապատը փոխեց ճահճի

Եվ ծարավի երկիրը՝ ջրի հոսանքների։

³⁶ Քաղցյալներին այնտեղ բնակեցրեց,

Եվ բնակության քաղաք շինեցին։

³⁷ Արտեր վարեցին, այգիներ տնկեցին

Եվ բերքի պտուղներ հասցրին։

³⁸ Օրհնեց նրանց, և շատ բազմացան,

Եվ նրանց անասունները չպակասեցին։

³⁹ Նվազեցին նրանք և չարչարվեցին

Չարիքների նեղությունից և վշտերից։

⁴⁰ Անարգանք եկավ նրանց իշխանների վրա,

Մոլորեցրեց նրանց անապատում անճանապարհ։

⁴¹ Աղքատության մեջ օգնեց անտունին,

Նրանց ազգը առաջնորդեց հոտի պես։

⁴² Թող ուղիղները տեսնեն և ուրախ լինեն,

Եվ ամեն անօրեն բերանն իր փակի։

⁴³ Ո՞վ է իմաստունը, որ պիտի պահի այս

Եվ հասկանա Տիրոջ ողորմությունը։

107(108)

¹ Սաղմոս Դավթի՝ օրհներգ

² Սիրտս պատրաստ է, Աստվա՛ծ, սիրտս պատրաստ է

Օրհնելու և սաղմոսելու քեզ իմ փառքով։

³ Զարթնի՛ր, փա՛ռք իմ, զարթնի՛ր սաղմոսով և օրհնությամբ,

Եվ ես կարթնանամ առավոտյան։

⁴ Գոհություն կմատուցեմ քեզ, Տե՛ր, ժողովուրդների մեջ

Եվ սաղմոս կերգեմ քեզ ազգերի մեջ։

⁵ Քո ողորմությունը մեծ եղավ մինչև երկինք,

Քո ճշմարտությունը՝ մինչև ամպերը։

⁶ Դու երկինք ես բարձրացել, Աստվա՛ծ,

Քո փառքը ամբողջ երկրում է։

⁷ Որպեսզի սիրելիներդ փրկվեն,

Պահպանի՛ր քո աջով և լսի՛ր մեզ։

⁸ Աստված խոսեց իր սրբարանից.

«Բարձրանալով պիտի բաժանեմ Սյուքեմը

Եվ Վրանների հովիտը պիտի չափեմ։

⁹ Իմն է Գաղաադը, և իմն է Մանասեն.

Եփրեմը՝ իմ գլխի սաղավարտը,

Հուդան՝ իմ թագավորը,

¹⁰ Մովաբը՝ հույսիս ավազանը։

Պիտի ուղղեմ երթն իմ Եդովմ,

Եվ այլազգիներն ինձ հնազանդվեցին»։

¹¹ Ո՞վ ինձ կտանի բերդաքաղաք,

Կամ ո՞վ ինձ կառաջնորդի մինչև Եդովմ,

¹² Եթե ոչ դու, Աստվա՛ծ, որ մեզ մերժեցիր

Եվ մեր զորքերի հետ չեղար, Աստվա՛ծ,

¹³ Նեղության մեջ տո՛ւր մեզ օգնություն,

Որովհետև ունայն է մարդու փրկությունը։

¹⁴ Աստծով զորություն կստեղծենք,

Եվ նա մեր թշնամիներին ամոթահար կանի։

108(109)

¹ Դպրապետին։ Սաղմոս Դավթի

Իմ օրհնությանը մի՛ լռիր, Աստվա՛ծ,

² Որովհետև մեղավորի բերանը,

Բերանը նենգավորի ինձ վրա բացվեց.

Իմ դեմ խոսեցին նենգամիտ լեզվով

³ Եվ ատելության խոսքերով պաշարեցին ինձ։

Առանց պատճառի հարձակվեցին վրաս,

⁴ Սիրուս փոխարեն մատնեցին ինձ,

Բայց ես աղոթքի կանգնեցի։

⁵ Բարու փոխարեն ինձ չարը հատուցեցին,

Սիրուս փոխարեն՝ ատելություն։

⁶ Նրան մեղավո՛ր համարիր,

Եվ սատանան թող կանգնի նրա աջ կողմում։

⁷ Իր դատաստանից թող դատապարտյալ դուրս գա,

Եվ նրա աղոթքները թող մեղք համարվեն։

⁸ Թող նրա օրերը նվազեն,

Նրա պաշտոնը թող ուրիշն առնի։

⁹ Թող որբ դառնան նրա որդիները,

Եվ նրա կինը՝ այրի։

¹⁰ Նրա որդիները թող թափառական և մուրացկան լինեն

Եվ հեռանան իրենց բնակավայրից։

¹¹ Պարտատերը թող պահանջի նրա ողջ ունեցվածքը,

Օտարները թող հափշտակեն նրա վաստակը։

¹² Նրան օգնական թող չգտնվի,

Եվ նրա որբերին ոչ ոք չգթա։

¹³ Թող կոտորվեն նրա որդիները,

Նրա անունը թող ջնջվի ազգից։

¹⁴ Թող Տիրոջ առջև հիշվեն նրա հոր մեղքերը,

Եվ նրա մոր մեղքերը չջնջվեն,

¹⁵ Եվ թող ամեն ժամ Տիրոջ առջև լինեն։

Երկրից թող վերանա նրա հիշատակը,

¹⁶ Որովհետև չուզեց ողորմություն անել,

Հալածեց աղքատ և անտուն մարդուն,

Որպեսզի կործանի նրան, ով խոնարհ է սրտով։

¹⁷ Անեծքը սիրեց, թող թափվի գլխին,

Չուզեց օրհնություն, թող հեռու լինի նրանից։

¹⁸ Անեծքը հագավ որպես հանդերձ,

Թող ջրի պես փորը լցվի

Եվ ձեթի պես՝ ոսկորների մեջ։

¹⁹ Թող հագնելու զգեստ լինի նրա համար

Եվ ինչպես գոտի՝ մեջքին մշտապես կապելու։

²⁰ Այս է նրանց բաժինը,

Ովքեր բամբասում էին իմ մասին Տիրոջ մոտ,

Եվ ովքեր չարախոսում էին անձիս մասին։

²¹ Բայց դու, Տե՛ր, Տե՛ր, վարվի՛ր ինձ հետ ըստ քո անվան,

Որովհետև քաղցր է քո ողորմությունը,

²² Եվ փրկի՛ր ինձ, որովհետև աղքատ և անտուն եմ ես։

Սիրտս խռովվեց իմ ներսում,

²³ Եվ ես ստվերի պես երկարելով պակասեցի

Եվ թոթափվեցի մարախի պես։

²⁴ Պահեցողությունից ծնկներս տկարացան,

Եվ մարմինս այլագունեց յուղի պակասից։

²⁵ Ես նրանց նախատինքը եղա.

Տեսան ինձ և շարժեցին իրենց գլուխները։

²⁶ Օգնի՛ր ինձ, Տե՛ր, Աստվա՛ծ իմ,

Եվ փրկի՛ր ինձ քո ողորմությամբ։

²⁷ Թող ճանաչեն, որ քո ձեռքը այս է,

Եվ դու, Տե՛ր, արեցիր այս։

²⁸ Նրանք անիծում են, բայց դու կօրհնես,

Ինձ վրա հարձակվողները թող ամոթ կրեն,

Բայց քո ծառան քեզնով թող ուրախանա։

²⁹ Թող ամոթ հագնեն անձս չարախոսողները

Եվ իրենց ամոթը իրենց վրա կրեն թիկնոցի պես։

³⁰ Բայց ես մեծ գոհություն պիտի մատուցեմ Տիրոջն իմ բերանով,

Շատերի մեջ քե՛զ պիտի օրհնեմ,

³¹ Որովհետև նա կանգնեց անտունիս աջ կողմում՝

Փրկելու ինձ նրանցից, ովքեր հալածում են հոգիս։

109(110)

¹ Դպրապետին։ Սաղմոս Դավթի

Տերն ասաց իմ Տիրոջը. «Նստի՛ր իմ աջ կողմում,

Մինչև քո թշնամիներին ոտքերիդ պատվանդան դարձնեմ»։

² Տերը քեզ զորության գավազան կուղարկի Սիոնից,

Եվ դու կտիրես քո թշնամիների մեջ։

³ Քեզ հետ է իմ զորության օրերի սկիզբը,

Քո սրբերի վայելչության մեջ։

Արուսյակից առաջ ծնեցի քեզ արգանդից։

⁴ Երդվեց Տերը և չի զղջա.

Դու ես քահանա հավիտյան՝

Մելքիսեդեկի կարգի համաձայն,

⁵ Եվ Տերը քո աջ կողմում է։

Բարկության օրը կխորտակի թագավորներին,

⁶ Կդատի հեթանոսներին,

Կբազմացնի հարվածները

Եվ կխորտակի շատերի գլուխները երկրում։

⁷ Ճանապարհին կխմեցնի առվակներից,

Դրա համար էլ բարձր կպահի գլուխները։

110(111)

¹ Ալելուիա

Իմ ամբողջ սրտով

Գոհություն պիտի մատուցեմ քեզ, Տե՜ր,

Ողջամիտների ժողովներում։

² Մեծ են Տիրոջ գործերը,

Եվ քննված է նրա կամքը ամեն ինչում։

³ Շնորհալի և վայելուչ են նրա գործերը,

Նրա արդարությունը կմնա հավիտյանս հավիտենից։

⁴ Ողջամիտներին հիշատակ թողեց իր սքանչելիքները.

Ողորմած և գթած է Տերը.

⁵ Իրենից երկյուղածներին կերակուր է տալիս։

Հավիտյան հիշեց իր ուխտը,

⁶ Իր գործերի զորությունը հայտնեց իր ժողովրդին՝

Նրանց տալով հեթանոսների ժառանգությունը։

⁷ Եվ նրա ձեռքերի գործերն արդար ու իրավացի են.

Հավատարիմ են նրա բոլոր պատվիրանները,

⁸ Հաստատված են հավիտյանս հավիտենից,

Ստեղծված են ճշմարտությամբ և ուղղությամբ։

⁹ Տերն իր ժողովրդին փրկություն ուղարկեց.

Հավիտյանս պատվիրեց իր ուխտը.

Սուրբ և ահեղ է նրա անունը։

¹⁰ Զգոնության սկիզբը Տիրոջ երկյուղն է.

Բոլորի բարի իմաստությունը,

Ովքեր կատարում են դա,

Եվ նրա օրհնությունը կմնա հավիտյանս հավիտենից։

111(112)

¹ Ալելուիա

Երանի՜ այն մարդուն, որ վախենում է Տիրոջից

Եվ խիստ կամենում նրա պատվիրանները։

² Նրա սերունդը հզոր կլինի երկրի վրա,

Եվ ուղղամիտ ազգը կօրհնվի։

³ Փառք և հարստություն կան նրա տան մեջ.

Նրա արդարությունը կմնա դարեդար։

⁴ Ուղղամիտներին լույս ծագեց խավարի մեջ.

Ողորմած, գթած և արդար է Տերը։

⁵ Բարի մարդը ողորմում և փոխ է տալիս,

Իր գործերը վարում ուղղամտությամբ.

⁶ Նա հավիտյան չի սասանվի։

Արդարի հիշատակը հավետ կմնա,

⁷ Չարի համբավից նա չի վախենա։

Նրա սիրտը պատրաստ է Աստծուն հուսալու.

⁸ Նրա սիրտը հաստատուն է, և չի սոսկա,

Մինչև աչքով չտեսնի իր թշնամիներին։

⁹ Սփռեց և տվեց աղքատներին.

Նրա արդարությունը կմնա դարեդար,

Եվ նրա եղջյուրը կբարձրանա փառքով։

¹⁰ Մեղավորը կտեսնի և կբարկանա,

Կկրճտացնի իր ատամներն ու կհալվի,

Եվ մեղավորների ցանկությունը կկորչի։

112(113)

¹ Ալելուիա

Մանուկնե՛ր, օրհնեցե՛ք Տիրոջը

Եվ օրհնեցե՛ք անունը Տիրոջ.

² Թող օրհնյալ լինի անունը Տիրոջ

Այսուհետև մինչև հավիտյան։

³ Արևելքից մինչև արևմուտք

Օրհնյա՜լ է Տիրոջ անունը։

⁴ Բարձր է Տերը բոլոր ազգերից,

Եվ երկնքում է նրա փառքը։

⁵ Ո՞վ է նման Տիրոջը՝ մեր Աստծուն,

Որ բնակվում է բարձունքներում

⁶ Եվ տեսնում է խոնարհներին երկնքում և երկրում.

⁷ Աղքատներին բարձրացնում է գետնից

Եվ տառապյալներին հանում աղբանոցից։

⁸ Իր ժողովրդի իշխանների կողքին

Իշխաններ է կարգում նրանց։

⁹ Ամուլին բնակեցնում է ցնծալի տան մեջ,

Ինչպես իր զավակներով բերկրող մայրը։

113Ա(114)

¹ Ալելուիա

Երբ Իսրայելը դուրս եկավ Եգիպտոսից,

Հակոբի տունը՝ օտար ժողովրդից,

² Նրա սրբությունը Հուդայի երկիրը եղավ,

Եվ Իսրայելը՝ նրա իշխանությունը։

³ Ծովը տեսավ ու փախավ,

Եվ Հորդանանը հետ դարձավ։

⁴ Լեռները ցնծացին խոյերի նման,

Բլուրները՝ մաքիների գառների պես։

⁵ Ի՞նչ եղավ քեզ, ծո՛վ, ո՞ւմ տեսար ու փախար,

Կամ դու, Հորդանա՛ն, ինչո՞ւ հետ դարձար։

⁶ Լեռնե՛ր, ցնծացիք խոյերի նման,

Բլուրները՝ մաքիի գառների պես։

⁷ Տիրոջ երեսից երկիրը սարսեց,

Հակոբի Աստծու երեսից,

⁸ Որ ժայռը ջրի վտակ դարձրեց

Եվ ապառաժը՝ աղբյուրի ակունք։

113Ա(114)

⁹ Ոչ թե մեզ, Տե՛ր, ոչ թե մեզ,

Այլ քո անվա՛նը փառք տուր

Քո ողորմության և ճշմարտության համար։

¹⁰ Թող երբեք չասեն հեթանոսների մեջ,

Թե՝ «Ո՞ւր է նրանց Աստվածը»։

¹¹ Մեր Աստվածը երկնքում և երկրում է.

Այն, ինչ կամեցավ, կատարեց։

¹² Հեթանոսների կուռքերը ոսկի և արծաթ են,

Ձեռագործերն են մարդկանց որդիների։

¹³ Բերան ունեն, բայց չեն խոսում,

Աչքեր ունեն, բայց չեն տեսնում։

¹⁴ Ականջներ ունեն, բայց չեն լսում,

Քիթ ունեն, բայց չեն հոտոտում։

¹⁵ Ձեռքեր ունեն, բայց չեն շոշափում,

Ոտքեր ունեն, բայց չեն քայլում,

Եվ նրանց կոկորդում ձայն չկա։

¹⁶ Նրանց նման կլինեն նրանք, ովքեր ստեղծեցին նրանց,

Եվ բոլոր նրանց հուսացողները։

¹⁷ Իսրայելի տունը Տիրոջը հուսաց.

Օգնական և ապավեն է նրանց։

¹⁸ Ահարոնի տունը Տիրոջը հուսաց.

Օգնական և ընկերակից է նրանց։

¹⁹ Տիրոջից երկյուղածները հուսացին Տիրոջը.

Օգնական և փրկիչ է նրանց։

²⁰ Տերը հիշեց մեզ և օրհնեց մեզ,

Տերն օրհնեց Իսրայելի տունը,

Տերն օրհնեց Ահարոնի տունը։

²¹ Տերն օրհնեց իրենից երկյուղածներին,

Փոքրերին ու մեծերին.

²² Տերը պիտի ավելացնի ձեզ,

Ձեզ և ձեր որդիներին։

²³ Օրհնված եք դուք Տիրոջից,

Որ երկինքն ու երկիրը ստեղծեց։

²⁴ Տիրոջն է երկինքների երկինքը,

Եվ երկիրը տվեց մարդկանց որդիներին։

²⁵ Ոչ թե մեռելները պիտի օրհնեն քեզ,

Եվ ոչ էլ բոլոր դժոխք իջնողները,

²⁶ Այլ ողջերս պիտի օրհնենք Տիրոջը

Այսուհետև մինչև հավիտյան։

114(116Ա)

¹ Ալելուիա

Սիրեցի Տիրոջը, որովհետև լսեց ձայնն իմ աղոթքի,

² Դեպի ինձ խոնարհեցրեց իր ականջը,

Եվ ես իմ օրերում նրան աղոթեցի։

³ Մահվան երկյուղն իմ շուրջը պատեց,

Եվ դժոխքի վշտերը գտան ինձ։

Նեղություն և անձկություն գտա

⁴ Եվ Տիրոջ անվանն աղոթեցի.

Ո՜վ Տեր, փրկի՛ր հոգիս։

⁵ Ողորմած է Տերը և արդար,

և մեր Աստված ողորմում է։

⁶ Տերը պահպանում է հասարակ մարդկանց.

Ես ընկա, և Տերը փրկեց ինձ։

⁷ Դարձի՛ր, հոգի՛ իմ, քո հանգստին,

Որովհետև Տերն օգնեց քեզ։

⁸ Փրկեց հոգիս մահվանից,

Աչքերս՝ արտասուքից,

Ոտքերս՝ գայթակղությունից.

⁹ Թող հաճելի լինեմ Տիրոջ առջև՝

Ողջերի երկրում։

115(116Բ)

¹ Ալելուիա

Հավատացի, ինչ որ խոսեցի,

Եվ հույժ խոնարհ եղա։

² Զարմանքիս մեջ ասացի.

«Ամեն մարդ սուտ է»։

³ Ի՞նչ հատուցում պիտի տամ Տիրոջը

Այն ամենի համար, որ ինձ տվեց։

⁴ Պիտի բարձրացնեմ բաժակը փրկության

Եվ պիտի կանչեմ անունը Տիրոջ։

⁵ Աղոթքս Տիրոջը պիտի ընծայեմ

Իր ողջ ժողովրդի առջև։

⁶ Տիրոջ աչքին պատվական է

Մահն իր սրբերի։

⁷ Ո՜վ Տեր, ես քո ծառան եմ,

Ծառան և քո աղախնի որդին.

Դո՛ւ կտրեցիր կապանքներս,

⁸ Քեզ օրհնության զոհ

Պիտի մատուցեմ

⁹ Եվ կանչեմ անունը Տիրոջ։

Աղոթքս Տիրոջը պիտի ընծայեմ

Իր ողջ ժողովրդի առջև.

¹⁰ Տիրոջ տան գավիթներում

Եվ քո մեջ, Երուսաղե՜մ։

116(117)

¹ Ալելուիա

Տիրո՛ջն օրհնեցեք, բոլո՛ր ազգեր,

Գովե՛ք նրան, ո՛ղջ ժողովուրդներ։

² Թող մեզ վրա հաստատվի

Ողորմությունը նրա,

Ճշմարտությունը Տիրոջ

Թող հավիտյան մնա։

117(118)

¹ Ալելուիա

Գոհությո՛ւն մատուցեք Տիրոջը,

Որովհետև բարի է,

Որովհետև հավերժ է նրա ողորմությունը։

² Իսրայելի տունը թող ասի, որ բարի է,

Որովհետև հավերժ է նրա ողորմությունը,

³ Ահարոնի տունը թող ասի,

Որ հավերժ է նրա ողորմությունը։

⁴ Տիրոջից երկյուղածները թող ասեն, որ բարի է,

Որ հավերժ է նրա ողորմությունը։

⁵ Նեղությանս մեջ Տիրոջն աղոթեցի,

Եվ հանդարտությամբ լսեց ինձ։

⁶ Տերն է իմ օգնականը, և ես չեմ վախենա.

Մարդն ինձ ի՞նչ կանի։

⁷ Տերն է իմ օգնականը,

Եվ ես կտեսնեմ վերջը թշնամիներիս։

⁸ Լավ է Տիրոջը հուսալ, քան մարդկանց,

⁹ Լավ է Տիրոջը հուսալ, քան իշխաններին։

¹⁰ Բոլոր ազգերն ինձ շրջապատեցին,

Եվ Տիրոջ անվամբ հաղթեցի նրանց,

¹¹ Շուրջս շրջեցին և միասին ինձ պաշարեցին,

Եվ Տիրոջ անվամբ վանեցի նրանց։

¹² Մեղուների պես իմ շուրջը դարձան,

Վառվեցին, բորբոքվեցին հրո ճարակ փշերի պես,

Եվ Տիրոջ անվամբ մերժեցի նրանց։

¹³ Մերժելուց դրդվեցի և մոտ էի գլորվելու,

Եվ Տերն ինձ ընդունեց։

¹⁴ Տերն իմ զորությունն ու օգնությունն է

Եվ իմ փրկությունը եղավ։

¹⁵ Ցնծության և փրկության ձայն կա

Արդարների հարկերում։

Տիրոջ աջը զորություն գործեց,

¹⁶ Տիրոջ աջը բարձրացրեց ինձ,

Եվ Տիրոջ աջը զորություն գործեց։

¹⁷ Պիտի չմեռնեմ, այլ պիտի ապրեմ

Եվ պիտի պատմեմ գործերը Տիրոջ։

¹⁸ Խրատելով խրատեց Տերն ինձ

Եվ չմատնեց մահվան։

¹⁹ Արդարության դռները բացե՛ք ինձ,

Որ մտնեմ նրանցից ներս

Եվ գոհություն մատուցեմ Տիրոջը։

²⁰ Այս դուռը Տիրոջն է,

Եվ արդարները կմտնեն սրանով։

²¹ Գոհություն պիտի մատուցեմ քեզ, Տե՜ր,

Որովհետև լսեցիր ինձ,

Իմ փրկությունը եղար։

²² Վեմը, որ շինողներն անարգեցին,

Անկյան գլուխը եղավ։

²³ Տիրոջից եղավ այս

Եվ սքանչելի է մեր աչքերին։

²⁴ Այսօր է, որ ստեղծեց Տերը.

Եկեք ցնծանք և ուրախանանք այսօր։

²⁵ Ո՜վ Տեր, փրկի՛ր, ո՜վ Տեր, առաջնորդի՛ր,

²⁶ Օրհնյա՜լ է Տիրոջ անվամբ եկողը,

Եվ օրհնեցինք քեզ Տիրոջ տնից։

²⁷ Տերը՝ մեր Աստվածը, երևաց մեզ.

Կատարե՛ք ուրախության տոներ

Մուտքից մինչև սեղանի անկյունները։

²⁸ Դու իմ Աստվածն ես.

Գոհություն պիտի մատուցեմ քեզ։

Դու իմ Աստվածն ես.

Պիտի մեծարեմ քեզ։

Գոհություն պիտի մատուցեմ քեզ, Տե՛ր,

Որովհետև լսեցիր ինձ

Եվ իմ փրկությունը եղար։

²⁹ Գոհությո՛ւն մատուցեք Տիրոջը,

Որովհետև բարի է,

Որովհետև հավերժ է նրա ողորմությունը։

118(119)

¹ Ալելուիա

Ալեֆ Երանելի են անբիծներն իրենց ընթացքով,

Եվ ովքեր շարժվում են Տիրոջ օրենքներով։

² Երանի՜ նրանց, ովքեր պահում են նրա վկայությունը,

Իրենց ամբողջ սրտով փնտրում են նրան։

³ Անօրենություն գործողները չէ,

Որ պիտի նրա ճանապարհով ընթանան։

⁴ Դու պատվիրեցիր, որ քո պատվիրանները խստորեն պահեմ։

⁵ Իմ ճանապարհները հաջող կլինեին,

Եթե քո պատվիրաններին հետևեի։

⁶ Այն ժամանակ ես չէի ամաչում,

Երբ զգույշ էի քո պատվիրանների հանդեպ։

⁷ Տե՜ր, գոհություն կմատուցեմ քեզ ուղիղ սրտով՝

Սովորելով քո արդարության իրավունքները։

⁸ Քո օրենքները ես պահեցի.

Մի՛ լքիր ինձ վերջնականապես։

Բեթ ⁹ Երիտասարդն իր ճամփաները ինչո՞վ պիտի ուղղի,

Եթե ոչ քո խոսքերը պահելով։

¹⁰ Ողջ սրտով քեզ խնդրեցի.

Մի՛ մերժիր ինձ քո պատվիրաններից։

¹¹ Քո խոսքերը սրտումս թաքցրի,

Որ չմեղանչեմ քո դեմ։

¹² Օրհնյա՜լ ես դու, Տե՛ր,

Սովորեցրո՛ւ ինձ քո արդարությունը։

¹³ Իմ շրթունքներով կպատմեմ

Քո բերանի ողջ իրավունքները։

¹⁴ Ուրախացա քո վկայությունների ճանապարհներով,

Ինչպես ամեն տեսակ հարստությամբ,

¹⁵ Հոգացի քո պատվիրաններին

Եվ զգուշացա քո ճանապարհին,

¹⁶ Քո իրավունքների մասին խոսեցի

Եվ չմոռացա քո խոսքերը։

Գիմել ¹⁷ Հատուցի՛ր քո ծառային,

Որ ապրեմ և պահեմ քո խոսքերը։

¹⁸ Արթնացրո՛ւ աչքերս,

Որ տեսնեմ քո օրենքի սքանչելիքները։

¹⁹ Պանդուխտ եմ ես երկրում.

Մի՛ թաքցրու պատվիրաններդ ինձնից։

²⁰ Հոգիս փափագեց ամեն ժամ ցանկանալու քո իրավունքները։

²¹ Սաստեցիր ամբարտավաններին.

Անիծված են նրանք,

Ովքեր խոտորվեցին քո պատվիրաններից։

²² Ինձնից հեռացրո՛ւ նախատինքն ու արհամարհանքը,

Որովհետև քո վկայությունները փնտրեցի։

²³ Որովհետև իշխանները նստած չարախոսում էին ինձնից,

Բայց քո ծառան խորհում էր քո իրավունքների մասին։

²⁴ Քանզի քո վկայությունները հաճելի էին ինձ,

Եվ քո արդարությունից էին իմ խորհուրդները։

Դալեթ ²⁵ Հողին մերձեցա, Տե՜ր,

Ըստ քո խոսքի պահի՛ր ինձ։

²⁶ Ճանապարհներս պատմեցի քեզ, և ինձ լսեցիր.

Ուսուցանի՛ր ինձ քո արդարությունները։

²⁷ Սովորեցրո՛ւ ինձ քո արդարությունների ճանապարհները,

Որ քննեմ քո սքանչելիքները։

²⁸ Ձանձրանալուց հոգիս տքնեց.

Հաստատի՛ր ինձ քո խոսքով։

²⁹ Մեղքի ճանապարհները հեռացրո՛ւ ինձնից

Եվ քո օրենքով ողորմի՛ր ինձ։

³⁰ Քո ճշմարտության ճանապարհներն ընտրեցի

Եվ իրավունքներդ ես չմոռացա։

³¹ Ես մոտեցա քո վկայություններին, Տե՛ր,

Ինձ մի՛ ամաչեցրու։

³² Քո պատվիրանների ճանապարհներով ընթացա,

Որովհետև խաղաղություն տվեցիր իմ սրտին։

Հեյ ³³ Օրենսգե՛տ դարձրու ինձ, Տե՛ր,

Քո իրավունքների ճանապարհներին,

Որ ամեն ժամ փնտրեմ դրանք։

³⁴ Իմաստո՛ւն դարձրու ինձ, որ քննեմ քո օրենքները

Եվ ողջ սրտով պահեմ դրանք։

³⁵ Ինձ առաջնորդի՛ր քո պատվիրանների շավիղներով,

Որովհետև հաճելի համարեցի դրանք։

³⁶ Սիրտս խոնարհեցրո՛ւ քո վկայություններին,

Եվ ոչ թե ագահության։

³⁷ Դարձրո՛ւ աչքերս, որ ունայնությունը չտեսնեմ,

Քո ճանապարհի՛ն կանգնեցրու ինձ։

³⁸ Քո ծառայի համար հաստատի՛ր քո խոսքը,

Որ երկյուղիդ մեջ մնամ։

³⁹ Ինձնից հանի՛ր նախատինքները,

Որոնցից սոսկացի, որովհետև

Քաղցր են քո դատաստանները։

⁴⁰ Ահա ցանկացա քո պատվիրանները.

Պահպանի՛ր ինձ քո արդարությամբ։

Վավ ⁴¹ Ողորմությունդ թող գա ինձ վրա, Տե՜ր,

Եվ փրկությունդ՝ ըստ քո խոսքի։

⁴² Ինձ նախատողներին խոսքերով պատասխան կտամ,

Որովհետև քո խոսքերին հուսացի։

⁴³ Մի՛ հեռացրու երբեք ճշմարտության խոսքն իմ բերանից,

Որովհետև քո իրավունքներին հուսացի։

⁴⁴ Ամեն ժամ քո օրենքները պահեցի,

Հավիտյան և հավիտյանս հավիտենից։

⁴⁵ Անդորրության մեջ ընթացա,

Որովհետև քո պատվիրանները փնտրեցի։

⁴⁶ Թագավորների առաջ

Քո վկայությունների մասին խոսեցի և չամաչեցի։

⁴⁷ Խորհեցի քո պատվիրանների մասին,

Որոնք սիրեցի։

⁴⁸ Ձեռքերս բարձրացրի դեպի քո պատվիրանները,

Որոնք սիրեցի,

Եվ խորհեցի քո արդարության մասին։

Զայն ⁴⁹ Հիշի՛ր խոսքը քո ծառայի,

Որով հույս տվեցիր ինձ։

⁵⁰ Սա պիտի մխիթարի ինձ խոնարհությանս մեջ,

Որովհետև քո խոսքն ինձ պահպանեց։

⁵¹ Ամբարտավանները հույժ անիրավություն գործեցին իմ դեմ,

Բայց ես քո օրենքից չհեռացա։

⁵² Հիշեցի քո իրավունքները հավերժական, Տե՛ր,

Եվ մխիթարվեցի։

⁵³ Մեղավորների տրտմությունը կլանեց ինձ

Եվ նրանց, ովքեր լքեցին քո օրենքները։

⁵⁴ Քո օրենքներն իմ օրհներգություններն են

Իմ պանդխտության մեջ։

⁵⁵ Գիշերը հիշեցի քո անունը, Տե՜ր,

Եվ քո օրենքները պահեցի։

⁵⁶ Այս եղավ ինձ կյանքի ճամփա,

Որովհետև քո արդարությունները խնդրեցի։

Խեթ ⁵⁷ Իմ բաժինն ես դու, Տե՜ր, ասացի, որ

Քո օրենքը պիտի պահեմ,

⁵⁸ Իմ ողջ սրտով քո երեսը խնդրեցի.

Ողորմի՛ր ինձ ըստ քո խոսքի։

⁵⁹ Խորհեցի իմ ճանապարհի մասին

Եվ ոտքերս դեպի քո վկայությունները դարձրի։

⁶⁰ Պատրաստվեցի և չխռովվեցի,

Որ պահեմ քո պատվիրանները։

⁶¹ Մեղքի ուռկանները պատեցին ինձ,

Բայց քո օրենքները ես չմոռացա.

⁶² Կեսգիշերին ելնում էի գոհություն մատուցելու քեզ, Տե՜ր,

Քո արդարության և իրավունքների համար։

⁶³ Հաղորդության մեջ էի քո բոլոր երկյուղածների հետ,

Որոնք պահում են քո պատվիրանները։

⁶⁴ Տե՛ր, քո ողորմությամբ լցվեց երկիրը,

Սովորեցրո՛ւ ինձ քո արդարությունները։

Տեթ ⁶⁵ Քաղցրությամբ վարվեցիր քո ծառայի հետ, Տե՜ր,

Ըստ քո խոսքի։

⁶⁶ Քաղցրություն, խրատ և գիտությո՛ւն սովորեցրու ինձ,

Որովհետև քո պատվիրաններին հավատացի։

⁶⁷ Երբ դեռ չէի խոնարհվել, մեղանչեցի,

Դրա համար քո խոսքերը խստորեն պահեցի։

⁶⁸ Քաղցր ես դու, Տե՜ր, և քո քաղցրությամբ

Սովորեցրո՛ւ ինձ քո արդարությունները։

⁶⁹ Ամբարտավանների անիրավություններն իմ դեմ բազմացան,

Բայց ես ողջ սրտով քո պատվիրանները քննեցի։

⁷⁰ Կաթի պես թանձրացան նրանց սրտերը,

Բայց ես խոսեցի քո օրենքներով։

⁷¹ Լավ է, որ խոնարհ դարձրիր ինձ,

Որպեսզի սովորեմ քո արդարությունը։

⁷² Ինձ համար լավ են քո բերանի օրենքները,

Քան հազարներով արծաթն ու ոսկին։

Յոդ ⁷³ Քո ձեռքերն արարեցին և ստեղծեցին ինձ.

Իմաստո՛ւն դարձրու ինձ,

Որ պատվիրաններդ սովորեմ։

⁷⁴ Քեզնից երկյուղածները պիտի տեսնեն ինձ և ուրախ լինեն,

Որովհետև քո խոսքերին հուսացի։

⁷⁵ Ճանաչեցի, Տե՜ր,

Որովհետև քո դատաստանն արդարությամբ է.

Իրավացիորեն ինձ խոնարհեցրիր։

⁷⁶ Քո ողորմությունը մխիթարություն թող լինի ինձ՝

Ըստ ծառայիդ տրված քո խոսքի։

⁷⁷ Թող ինձ գան քո գթությունները,

Եվ պիտի ապրեմ,

Որովհետև քո օրենքներն իմ խոսքերն էին։

⁷⁸ Ամբարտավանները պիտի ամաչեն,

Որ իզուր անիրավություն գործեցին իմ դեմ,

Բայց ես միշտ պահեցի քո պատվիրանները։

⁷⁹ Քեզնից երկյուղածները թող խրատեն ինձ,

Եվ նրանք, ովքեր ճանաչում են քո վկայությունները։

⁸⁰ Թող սիրտս անբիծ լինի քո արդարության մեջ,

Որ ես չամաչեմ։

Կաֆ ⁸¹ Հոգիս կարոտեց քո փրկությանը,

Որովհետև ես քո խոսքին հուսացի.

⁸² Աչքերս սպասեցին քո խոսքին,

Ասացի. «Ինձ ե՞րբ պիտի մխիթարես»։

⁸³ Քանզի դարձա կարծրացած տիկի պես,

Սակայն չմոռացա քո արդարությունը։

⁸⁴ Որքա՞ն են օրերը քո ծառայի,

Ե՞րբ պիտի դատաստանը տեսնես

Ինձ հալածողների։

⁸⁵ Անօրենները խորհուրդներ պատմեցին ինձ,

Բայց ոչ քո օրենքների պես։

⁸⁶ Ճշմարիտ են քո բոլոր պատվիրանները,

Իզո՜ւր հալածեցին ինձ, օգնի՛ր ինձ։

⁸⁷ Եվս մի փոքր, և ինձ կորստյան կմատնեին երկրի վրա,

Սակայն ես չլքեցի քո պատվիրանները։

⁸⁸ Ըստ քո ողորմության պահի՛ր ինձ,

Եվ ես կպահպանեմ քո բերանի վկայությունները։

Լամեդ ⁸⁹ Քո խոսքը, Տե՛ր, հավիտյան է երկնքում,

⁹⁰ Սերնդեսերունդ է քո ճշմարտությունը։

Դու հաստատեցիր երկիրը, որը կա և կմնա։

⁹¹ Քո հրամանով է մնում ցերեկը,

Որովհետև բոլորը ծառա են քեզ։

⁹² Եթե քո օրենքը չլիներ իմ խոսքը,

Ես վաղուց կորած կլինեի թշվառությանս մեջ։

⁹³ Հավետ չպիտի մոռանամ քո արդարությունները,

Քանզի նրանցով պահպանեցիր ինձ։

⁹⁴ Ես քոնն եմ, փրկի՛ր ինձ, քանզի

Քո արդարությունները փնտրեցի։

⁹⁵ Մեղավորները փորձեցին ինձ կործանել,

Որովհետև մտքումս պահեցի

Քո վկայությունները։

⁹⁶ Տեսա վախճանն ամեն կատարելության,

Քո պատվիրաններն անդորր էին ինձ համար։

Մեմ ⁹⁷ Որքա՜ն սիրեցի քո օրենքները.

Ամեն ժամ իմ խոսքերն էին դրանք։

⁹⁸ Թշնամիներիցս ավելի իմաստուն դարձրիր ինձ

Քո պատվիրաններով, որովհետև միշտ իմն էին։

⁹⁹ Բոլոր ուսուցիչներիցս ավելի իմաստուն եղա,

Որովհետև քո վկայություններն իմ խոսքերն էին։

¹⁰⁰ Իմ երեցներից ավելի իմաստուն եղա,

Որովհետև քո պատվիրանները պահեցի։

¹⁰¹ Ոտքերս արգելեցի չարիքի բոլոր ճանապարհներից,

Որ պահեմ խոսքերը քո։

¹⁰² Ես չխոտորվեցի քո իրավունքից,

Որովհետև դու ինձ օրենսգետ դարձրիր։

¹⁰³ Քո խոսքերը որքա՜ն քաղցր են քիմքիս,

Ավելի քաղցր, քան մեղրն իմ բերանին։

¹⁰⁴ Քո պատվիրաններով իմաստնացած՝

Ատեցի չարի բոլոր ճանապարհները,

Որովհետև դու ինձ օրենսգետ դարձրիր։

Նուն ¹⁰⁵ Քո խոսքը ճրագն է իմ ոտքերի

Եվ լուսավորում է իմ շավիղները։

¹⁰⁶ Երդվեցի և որոշեցի,

Որ պիտի պահեմ քո արդարադատության բոլոր իրավունքները։

¹⁰⁷ Հույժ խոնարհ եղա, Տե՛ր, փրկի՛ր ինձ ըստ քո խոսքի։

¹⁰⁸ Իմ բերանի ցանկությունը, Տե՜ր, թող քեզ հաճելի լինի,

Եվ քո իրավունքնե՛րը սովորեցրու ինձ։

¹⁰⁹ Հոգիս քո ձեռքերում է ամեն ժամ,

Եվ քո օրենքները ես չմոռացա։

¹¹⁰ Մեղավորները որոգայթ լարեցին իմ դեմ,

Քո պատվիրաններից ես չմոլորվեցի։

¹¹¹ Քո վկայությունները ժառանգեցի հավիտյան.

Նրանք իմ սրտի ցնծությունն են։

¹¹² Սիրտս խոնարհեցրի՝ առնելու քո արդարությունները

հավիտյան հատուցման համար։

Սամեխ ¹¹³ Անօրեններին ատեցի և քո օրենքը սիրեցի։

¹¹⁴ Դու իմ օգնականն ու փրկիչն ես,

Եվ ես քո խոսքին հուսացի։

¹¹⁵ Հեռացե՛ք ինձնից, չարե՛ր,

Որ ես իմ Աստծու պատվիրանները պահեմ։

¹¹⁶ Օգնի՛ր ինձ ըստ քո խոսքի և փրկի՛ր ինձ

Եվ մի՛ ամաչեցրու ինձ իմ հույսի պատճառով։

¹¹⁷ Օգնի՛ր ինձ և փրկի՛ր ինձ,

Որ ամեն ժամ քո իրավունքների մասին խորհեմ։

¹¹⁸ Անարգեցիր բոլոր նրանց, ովքեր ապստամբեցին

Քո արդարության դեմ, որովհետև

Անիրավ էին նրանց խորհուրդները։

¹¹⁹ Հանցավոր համարեցի երկրի բոլոր մեղավորներին,

Դրա համար սիրեցի քո պատվիրանները։

¹²⁰ Մարմինն իմ բևեռի՛ր քո երկյուղի տակ,

Որովհետև հույժ սոսկացի քո դատաստաններից։

Այն ¹²¹ Իրավունք և արդարություն գործեցի.

Մի՛ մատնիր ինձ իմ նեղիչների ձեռքը։

¹²² Ծառայիդ ընդունի՛ր բարությամբ,

Որ ամբարտավաններն ինձ չչարչարեն։

¹²³ Աչքերս սպասեցին քո փրկությանը, Տե՜ր,

Եվ քո արդարության խոսքին։

¹²⁴ Ըստ քո ողորմությա՛ն վարվիր ծառայիդ հետ,

Քո արդարությո՛ւնն ինձ սովորեցրու։

¹²⁵ Քո ծառան եմ ես, իմաստո՛ւն դարձրու ինձ,

Որ ճանաչեմ քո վկայությունները։

¹²⁶ Ժամն է, որ Տերը գործի,

Քանզի խափանեցին քո օրենքները։

¹²⁷ Դրա համար սիրեցի քո պատվիրանները

Ամեն ոսկուց և տոպազից ավելի։

¹²⁸ Քո բոլոր պատվիրաններին հետևեցի,

Որովհետև ատեցի չարի ճանապարհները։

Պե ¹²⁹ Սքանչելի են քո վկայությունները,

Դրա համար հոգիս սիրեց դրանք։

¹³⁰ Քո խոսքերի հայտնությունը

Լուսավորում և իմաստնացնում է պարզամիտներին։

¹³¹ Բացեցի բերանս և շունչ առա,

քանզի հոգիս փափագեց քո պատվիրանները։

¹³² Նայի՛ր և ողորմի՛ր ինձ

Ըստ քո անունը սիրողների իրավունքի։

¹³³ Իմ ճանապարհներն ուղղի՛ր ըստ քո խոսքի,

Որ ինձ զանազան մեղքեր չտիրեն։

¹³⁴ Փրկի՛ր ինձ մարդկանց զրպարտությունից,

Եվ ես կպահեմ քո պատվիրանները։

¹³⁵ Երևեցրո՛ւ երեսդ քո ծառային

Եվ քո արդարությո՛ւնը սովորեցրու ինձ։

¹³⁶ Ջրի վտակներ իջան իմ աչքերից,

Որովհետև չպահեցին քո օրենքները։

Ցադե ¹³⁷ Արդար ես դու, Տե՜ր,

Եվ ուղիղ են քո դատաստանները։

¹³⁸ Քո վկայությունների արդարությունը պատվիրեցիր,

Որ հույժ ճշմարիտ են։

¹³⁹ Քո տան հանդեպ նախանձախնդրությունը մաշեց ինձ,

Որովհետև իմ թշնամիները մոռացան քո խոսքերը։

¹⁴⁰ Հույժ ընտիր են քո խոսքերը,

Եվ քո ծառան սիրեց դրանք։

¹⁴¹ Մանուկ եմ ես և արհամարհված,

Բայց քո արդարությունը ես չմոռացա։

¹⁴² Քո արդարությունը հավերժական արդարություն է,

Եվ քո օրենքները՝ ճշմարիտ։

¹⁴³ Նեղություն և վշտեր պատեցին ինձ,

Բայց քո պատվիրաններն իմ խոսքերն էին։

¹⁴⁴ Քո վկայություններն արդար են հավետ,

Իմաստնացրո՛ւ և պահպանի՛ր ինձ։

Քոֆ ¹⁴⁵ Իմ ողջ սրտով աղոթեցի քեզ, լսի՛ր ինձ, Տե՛ր,

Որովհետև քո արդարությունը խնդրեցի։

¹⁴⁶ Աղաղակեցի քեզ, փրկի՛ր ինձ,

Եվ կպահեմ քո վկայությունները։

¹⁴⁷ Շտապ աղաղակեցի վաղաժամ,

Եվ ես քո խոսքերի վրա հույս դրեցի։

¹⁴⁸ Աչքերս մինչև առավոտ չփակեցի՝

Խոսելու քո խոսքերը։

¹⁴⁹ Ըստ քո ողորմության լսի՛ր իմ ձայնը, Տե՜ր,

Քո իրավունքով պահպանի՛ր ինձ.

¹⁵⁰ Անօրենությունը մերձեցրին ինձ հալածիչներս,

Որովհետև հեռու եղան քո օրենքներից։

¹⁵¹ Մոտ ես դու, Տե՜ր, և քո բոլոր

Պատվիրանները ճշմարիտ են։

¹⁵² Քո վկայությունները սկզբից ևեթ ճանաչեցի,

Քանզի հավիտյան հաստատեցիր դրանք։

Ռեշ ¹⁵³ Տե՛ս իմ խոնարհությունը և փրկի՛ր ինձ,

Որովհետև քո օրենքները ես չմոռացա։

¹⁵⁴ Իմ դա՛տը տես և փրկի՛ր ինձ.

Ըստ քո խոսքի պահպանի՛ր ինձ։

¹⁵⁵ Փրկությունը հեռու է մեղավորներից,

Որովհետև քո իրավունքները չպահեցին։

¹⁵⁶ Շա՜տ են քո գթությունները, Տե՜ր,

Եվ ըստ քո իրավունքի պահպանի՛ր ինձ։

¹⁵⁷ Ինձ հալածողներն ու նեղողները շատ են,

Բայց քո վկայություններից ես չխոտորվեցի։

¹⁵⁸ Ես տեսա ուրացողներին և մաշվեցի,

Որովհետև քո պատվիրանները չպահեցին։

¹⁵⁹ Տե՛ս, որքա՜ն սիրեցի քո պատվիրանները, Տե՜ր,

Քո ողորմությամբ պահպանի՛ր ինձ։

¹⁶⁰ Քո խոսքերի սկիզբը ճշմարտությունն է,

Հավիտյան են քո արդարության բոլոր իրավունքները։

Շին ¹⁶¹ Իշխաններն իզուր ինձ հալածեցին,

Եվ քո խոսքերից սիրտս երկյուղեց։

¹⁶² Ցնծացի քո խոսքերով, ինչպես նա,

Որ մեծ ավար է գտնում։

¹⁶³ Ատեցի և անարգեցի մեղքը

Եվ քո օրենքները սիրեցի։

¹⁶⁴ Օրը յոթ անգամ քեզ պիտի օրհնեմ

Քո արդարության և իրավունքի համար։

¹⁶⁵ Խաղաղությունը մեծ է նրանց համար,

Ովքեր սիրում են քո օրենքները,

Եվ նրանց մեջ գայթակղություն չկա։

¹⁶⁶ Սպասեցի քո փրկությանը, Տե՜ր,

Եվ քո պատվիրանները սիրեցի։

¹⁶⁷ Հոգիս պահեց քո վկայությունները

Եվ շատ սիրեց դրանք։

¹⁶⁸ Քո վկայություններն ու պատվիրանները պահեցի,

Որովհետև իմ բոլոր ճանապարհները քո առջև են։

Տավ ¹⁶⁹ Իմ խնդրանքները թող մոտենան քեզ, Տե՜ր,

Ըստ քո խոսքի իմաստնացրո՛ւ ինձ։

¹⁷⁰ Իմ աղոթքները թող հասնեն քեզ, Տե՜ր,

Եվ քո խոսքով փրկի՛ր ինձ։

¹⁷¹ Իմ շրթունքները թող բխեցնեն քո օրհնությունները,

Երբ ինձ ուսուցանես քո արդարությունները։

¹⁷² Լեզուս թող արտաբերի քո խոսքերը,

Որովհետև քո բոլոր պատվիրաններն արդար են։

¹⁷³ Քո ձեռքը թող պահպանի ինձ,

Որովհետև ընտրեցի քո պատվիրանները։

¹⁷⁴ Քո փրկությունը ցանկացա, Տե՜ր,

Եվ քո օրենքներն իմ խոսքերը եղան։

¹⁷⁵ Հոգիս թող ապրի և օրհնի քեզ,

Եվ քո իրավունքներն ինձ թող օգնեն։

¹⁷⁶ Մոլորվեցի կորած ոչխարի պես.

Փնտրի՛ր ծառայիդ,

Որովհետև քո պատվիրանները ես չմոռացա։

119(120)

¹ Օրհներգություն տաճար բարձրացող ուխտավորների համար

Իմ նեղության մեջ

Ես աղոթեցի Տիրոջը,

Եվ Տերը լսեց ինձ։

² Ազատի՛ր ինձ, Տե՜ր,

Նենգավոր շուրթերից

Եվ չար լեզվից։

³ Ի՞նչ պիտի տրվի քեզ,

Կամ ի՞նչ պիտի ավելանա,

Ո՜վ նենգ լեզու.

⁴ Դրանք Հզորի նետերն են,

Քանզի կայծակներով մխրճված են կաղնու մեջ։

⁵ Վա՛յ ինձ, որովհետև

Երկարաձգվեց պանդխտությունս,

Եվ ես բնակվեցի Կեդարի վրանների տակ։

⁶ Շատ անգամներ

Ես բնակվեցի նրանց հետ,

Ովքեր ատում են խաղաղությունը։

⁷ Ես խաղաղարար էի.

Երբ խոսում էի,

Մարտնչում էին իմ դեմ։

120(121)

¹ Օրհներգություն տաճար բարձրացող ուխտավորների համար

Աչքերս դեպի լեռներն ուղղեցի,

Որտեղից ինձ օգնություն պիտի գա։

² Օգնությունն ինձ Տիրոջից պիտի գա,

Որ ստեղծեց երկինքն ու երկիրը։

³ Թող քո ոտքը չսասանվի,

Թող չննջի քո պահապանը,

⁴ Ինչպես պահապանը Իսրայելի,

Որ ո՛չ ննջում է և ո՛չ էլ քնում։

⁵ Տերը կպահպանի քեզ,

Եվ Տերը կընդունի քեզ իր աջ ձեռքով։

⁶ Ցերեկվա արևը քեզ չի այրի,

Ոչ էլ լուսինը՝ գիշեր ժամանակ։

⁷ Տերն ամեն չարից քեզ կպահի.

Տերը կպահպանի անձդ։

⁸ Քո ելքն ու մուտքը Տերը կպահի

Այսուհետև մինչև հավիտյան։

121(122)

¹ Օրհներգություն տաճար բարձրացող ուխտավորների համար

Ես ուրախանում էի, երբ ինձ ասում էին.

«Տիրոջ տուն ենք գնալու»։

² Մեր ոտքերը հասել էին քո դռներին, Երուսաղե՜մ։

³ Երուսաղեմը կառուցված է իբրև քաղաք,

Եվ բնակչությունը՝ նրա շուրջ։

⁴ Ազգերը այնտեղ ելան, ազգերը Տիրոջ,

Իբրև վկայություն Իսրայելի՝

Խոստովանելու Տիրոջ անունը։

⁵ Քանզի այնտեղ են դրված աթոռները դատաստանի,

Աթոռներ՝ դրված Դավթի տան մեջ։

⁶ Հարցրե՛ք Երուսաղեմի խաղաղության

Ու շենության մասին, դուք, որ սիրում եք նրան։

⁷ Թող խաղաղություն լինի քո զորության մեջ,

Եվ քո ամրոցների աշտարակներում՝ շենություն։

⁸ Իմ եղբայրների և ընկերների համար

Քեզ խաղաղություն մաղթեցի,

⁹ Քեզ և Տիրոջ՝ մեր Աստծու տան համար

Քեզ բարություն ցանկացանք։

122(123)

¹ Օրհներգություն տաճար բարձրացող ուխտավորների համար

Ո՜վ Տեր,

Դեպի քեզ բարձրացրի իմ աչքերը,

Որ երկնքում ես բնակվում։

² Ինչպես ծառաների աչքերն են

Իրենց տիրոջ ձեռքերին,

Եվ ինչպես աղախնի աչքերն են

Իր տիկնոջ ձեռքին,

Այնպես էլ մեր աչքերն են

Դեպի քեզ, Տե՜ր, Աստվա՛ծ մեր,

Մինչև որ ողորմես մեզ։

³ Ողորմի՛ր մեզ, Տե՜ր,

Ողորմի՛ր մեզ,

Որովհետև լցվեցինք արհամարհանքով։

⁴ Առավել ևս մեր հոգիները

Լցվեցին մեզ նախատողների նախատինքներով

Եվ արհամարհանքներով ամբարտավանների։

123(124)

¹ Օրհներգություն տաճար բարձրացող ուխտավորների համար

Եթե Տերը մեզ հետ չլիներ,- թող ասի Իսրայելը,-

² Եթե Տերը մեզ հետ չլիներ,

Երբ մարդիկ հարձակվեցին մեզ վրա,

³ Ողջ-ողջ կկամենային կուլ տալ մեզ,

Երբ նրանց զայրույթը բորբոքված էր մեզ վրա։

⁴ Ապա և ջրերն անգամ մեզ կընկղմեին։

Մեր անձերն անցան հեղեղներով,

⁵ Մեր անձերն անցան անդադար հորձանքներով։

⁶ Օրհնյա՜լ է Տերը, որ մեզ

Նրանց ատամների որսը չդարձրեց։

⁷ Մեր անձերն ազատվեցին,

Ինչպես ճնճղուկը՝ որսորդների թակարդից։

Նրանց թակարդները փշրվեցին,

Եվ մենք ազատվեցինք։

⁸ Մեր օգնությունը Տիրոջ անունից է.

Նա ստեղծեց երկինքն ու երկիրը։

124(125)

¹ Օրհներգություն տաճար բարձրացող ուխտավորների համար

Ով Տիրոջը հուսա,

Սիոն լեռան պես չի սասանվի հավիտյան՝

Բնակվելով Երուսաղեմում։

² Լեռները նրա շուրջն են,

Իսկ Տերն իր ժողովրդի շուրջն է

Այսուհետև մինչև հավիտյան։

³ Տերը չի թողնի մեղավորների գավազանը

Արդարների ժառանգության վրա,

Որ արդարներն իրենց ձեռքերը

Չերկարեն անօրենության։

⁴ Տերը բարիք է անում բարիներին

Եվ նրանց, ովքեր ուղիղ են սրտով։

⁵ Հափշտակությամբ մոլորվածներին

Տերը կմերժի անօրենություն գործողների հետ։

Խաղաղություն թող լինի Իսրայելի վրա։

125(126)

¹ Օրհներգություն տաճար բարձրացող ուխտավորների համար

Երբ Տերը գերությունից Սիոն վերադարձրեց,

Մենք մխիթարվեցինք։

² Այնժամ մեր բերանները լցվեցին խնդությամբ,

Եվ լեզուները մեր՝ ցնծությամբ։

Այնժամ ասացին հեթանոսների մեջ.

«Տերը մեծ բաներ գործեց նրանց համար»։

³ Մեծ բաներ գործեց Տերը մեզ համար,

Եվ մենք բերկրեցինք։

⁴ Դարձրո՛ւ մեզ գերությունից, Տե՜ր,

Հարավի հեղեղների պես։

⁵ Արտասուքով ցանողները

Ցնծությամբ պիտի հնձեն։

⁶ Ովքեր գնալով գնում էին և լալիս,

Ովքեր տանում էին բարձած սերմերն իրենց,

Հետ պիտի գան ցնծալով

Եվ առած պիտի բերեն իրենց խրձերը։

126(127)

¹ Օրհներգություն տաճար բարձրացող ուխտավորների համար

Եթե Տերը չի կառուցում տունը,

Իզուր են հոգնում այն շինողները։

Եթե Տերը չի պահում քաղաքը,

Իզուր են տքնում նրա պահապանները։

² Իզո՜ւր է ձեր վաղ արթնանալը,

Ուշ պառկելը ննջելու

Եվ տառապանքով վաստակած հացը ուտելը։

Տերն այդ ամենը տալիս է նրանց, որոնց սիրում է,

Մինչ նրանք քնած են։

³ Մարդու ժառանգությունը որդիներն են,

Որոնք իր վարձն են,

Եվ այն է պտուղն իր որովայնի։

⁴ Ինչպես նետերը հզորի ձեռքերում,

Այնպես են որդիները անկյալների։

⁵ Երանի՜ նրան, ով իր ցանկությունը նրանցով լցրեց.

Չեն ամաչելու, երբ դռան մոտ խոսեն

Նրանց թշնամիներն իրենց հետ։

127(128)

¹ Օրհներգություն տաճար բարձրացող ուխտավորների համար

Երանի՜ բոլոր նրանց, ովքեր երկնչում են Տիրոջից

Եվ գնում նրա ճանապարհներով։

² Դու քո ձեռքերի վաստակը պիտի ուտես,

Երանի՜ քեզ, և բարի պիտի լինես։

³ Քո կինը վայելուչ այգու պես է քո տան անկյունում,

Քո որդիները՝ նորատունկ ձիթենիների պես՝ քո սեղանի շուրջը։

⁴ Այսպես պիտի օրհնվի Տիրոջից երկնչող ամեն մարդ.

⁵ Տերը Սիոնից պիտի օրհնի քեզ,

Եվ պիտի տեսնես բարությունը Երուսաղեմի

Քո կյանքի բոլոր օրերին։

⁶ Դու պիտի տեսնես քո որդիների որդիներին.

Խաղաղություն թող լինի Իսրայելի վրա։

128(129)

¹ Օրհներգություն տաճար բարձրացող ուխտավորների համար

«Բազում անգամ մարտնչեցին իմ դեմ

Իմ մանկությունից,- թող ասի Իսրայելը,-

² Բազում անգամ մարտնչեցին իմ դեմ

Իմ մանկությունից, սակայն չհաղթեցին ինձ։

³ Մեղավորները հարվածեցին թիկունքներիս,

Երկարացրին իրենց անօրենությունները»։

⁴ Արդար է Տերը, մեղավորների լուծը նա կխորտակի։

⁵ Կամաչեն և կընկրկեն

Բոլոր նրանք, ովքեր ատում են Սիոնը։

⁶ Նրանք կլինեն տանիքի խոտի նման,

Որ չորանում է հնձվելուց առաջ։

⁷ Դրանով հնձվորն իր բուռը չի լցնի,

Ոչ էլ խուրձ կապողը՝ իր գիրկը։

⁸ Նրանց կողքից անցնողները չեն ասի.

«Տիրոջ օրհնությունը ձեզ հետ լինի,

Եվ օրհնյալ լինեք Տիրոջ անունով»։

129(130)

Ապաշխարության աղոթք

¹ Օրհներգություն տաճար բարձրացող ուխտավորների համար

Խոր անդունդներից աղոթեցի քեզ, Տե՛ր,

² Տե՛ր, լսի՛ր իմ ձայնը,

Թող ականջներդ լսեն աղոթքիս ձայնը։

³ Եթե անօրենություններս քննես, Տե՜ր,

Տե՜ր, ո՞վ կարող է կանգնել քո առջև,

⁴ Քանզի քեզանից է քավությունը։

⁵ Հանուն քո անվան համբերեցի, Տե՛ր,

Հոգիս քո խոսքին սպասեց,

⁶ Հոգիս Տիրոջը հուսաց։

Առավոտյան պահից մինչև երեկո,

Առավոտյան պահից

Իսրայելը Տիրոջը հուսաց։

⁷ Տիրոջից է առատ ողորմությունը,

Նրանից է ողջ փրկությունը,

⁸ Եվ նա պիտի փրկի Իսրայելին իր բոլոր նեղություններից։

130(131)

¹ Օրհներգություն տաճար բարձրացող ուխտավորների համար

Տե՛ր, սիրտս չհպարտացավ,

Եվ աչքերս չխրոխտացան.

Մեծամեծների հետ ես չքայլեցի,

Ոչ էլ նրանց հետ, ովքեր գերազանց էին ինձնից։

² Այլ խոնարհվեցի մոր ստինքից կտրված

Մանուկի նման, որի ցանկությունը

Նույն տեղը դառնալն է։

Իսկ եթե հպարտացրի անձս,

Թող այսպես լինի հատուցումը հոգուս.

³ Տիրոջը հուսաց Իսրայելը

Այսուհետև մինչև հավիտյան։

131(132)

¹ Օրհներգություն տաճար բարձրացող ուխտավորների համար

Տե՛ր, հիշի՛ր Դավթին և նրա ողջ հեզությունը,

² Թե ինչպե՛ս երդվեց Տիրոջը և ուխտեց Հակոբի Աստծուն.

³ «Չպիտի մտնեմ իմ տան հարկերը և չպիտի բարձրանամ

Իմ մահիճների անկողինները։

⁴ Քուն չպիտի տամ իմ աչքերին,

Կամ նինջ՝ իմ արտևանունքներին,

Կամ հանգիստ՝ մարմնիս,

⁵ Մինչև Տիրոջ համար վայր չգտնեմ,

Հակոբի Աստծու համար՝ բնակավայր»։

⁶ Ահա լսեցինք նրա մասին Եփրաթայում

Եվ գտանք նրան մայրիների դաշտերում։

⁷ Մտնենք նրա հարկերը, երկրպագենք այն տեղը,

Որտեղ նրա ոտքերն են կանգնած։

⁸ Ելի՛ր, Տե՛ր, քո հանգստավայրը,

Դու և քո սրբության տապանակը։

⁹ Քո երեցները թող արդարություն հագնեն,

Եվ քո սրբերը ցնծալով ցնծան։

¹⁰ Հանուն քո սիրելի Դավթի երես մի՛ դարձրու քո օծյալից։

¹¹ Տերը ճշմարտությամբ երդվեց Դավթին

Եվ նրան չի անիրավի.

«Քո որովայնի պտղից պիտի նստեցնեմ քո աթոռին.

¹² Եթե որդիներդ պահեն իմ օրենքները

Եվ իմ վկայությունները, որ նրանց պիտի սովորեցնեմ,

Նրանց որդիները կնստեն քո աթոռին հավիտյանս հավիտենից»։

¹³ Տերն իր բարեհաճությունը Սիոնին տվեց

Եվ նախընտրեց բնակվել այնտեղ։

¹⁴ Ասաց. «Այս է հանգիստն իմ հավիտյանս հավիտենից։

Այստեղ պիտի բնակվեմ, որովհետև հավանեցի սա։

¹⁵ Սրա բերքը պիտի շարունակ օրհնեմ

Եվ սրա աղքատներին պիտի լիացնեմ հացով։

¹⁶ Սրա քահանաներին պիտի հագցնեմ փրկություն,

Եվ սրա սրբերը ցնծալով պիտի ցնծան։

¹⁷ Այնտեղ Դավթի համար եղջյուր պիտի ծագեցնեմ,

Իմ օծյալի ճրագը պիտի պատրաստեմ։

¹⁸ Նրա թշնամիներին ամոթ պիտի հագցնեմ,

Իսկ նրա վրա պիտի ծաղկի իմ սրբությունը»։

132(133)

¹ Օրհներգություն տաճար բարձրացող ուխտավորների համար

Որքա՜ն բարի և որքա՜ն վայելուչ է,

Որ եղբայրները բնակվում են միասին։

² Ինչպես յուղ, որ իջնում է

Ահարոնի գլխին ու մորուքին

Եվ մորուքից ծորում նրա զգեստի քղանցքներին.

³ Ինչպես ցող, որ ցողվում է Հերմոնից

Սիոն լեռան վրա։

Տերն այնտեղ պատրաստեց օրհնությունը

Եվ կյանքը հավիտենական։

133(134)

¹ Օրհներգություն տաճար բարձրացող ուխտավորների համար

Այստե՛ղ օրհնեցեք Տիրոջը,

Տիրոջ բոլո՛ր ծառաներ,

Որ գտնվում եք Տիրոջ տան մեջ

Եվ մեր Աստծու գավիթներում։

² Գիշերը բարձրացրե՛ք ձեր ձեռքերը

Դեպի սրբարան

Եվ օրհնեցե՛ք Տիրոջը։

³ Թող Սիոնից մեզ օրհնի Տերը, նա,

Որ ստեղծեց երկիրն ու երկինքը։

134(135)

¹ Ալելուիա

Օրհնեցե՛ք Տիրոջ անունը,

Տիրոջ ծառանե՛ր, օրհնեցե՛ք Տիրոջը,

² Որ գտնվում եք Տիրոջ տանը,

Մեր Աստծու տան գավիթներում։

³ Օրհնեցե՛ք Տիրոջը, որովհետև բարի է,

Սաղմո՛ս ասացեք նրա անվանը,

Որովհետև քաղցր է։

⁴ Իր համար Տերը Հակոբին ընտրեց

Եվ Իսրայելը՝ իրեն ժառանգություն։

⁵ Ես ճանաչեցի, որ մեծ է Տերը,

Եվ Տերը մեծ է բոլոր կուռքերից։

⁶ Ինչ որ կամեցավ Տերը, կատարեց

Երկնքի մեջ և երկրում, ծովում և բոլոր անդունդներում։

⁷ Հանեց ամպեր երկրի ծագերից,

Իր փայլատակումներն անձրևի փոխեց

Եվ իր պահեստարաններից հողմեր հանեց։

⁸ Հարվածեց եգիպտացիների

Բոլոր առաջնեկներին՝ մարդուց մինչև անասուն,

⁹ Նշաններ և հրաշքներ ուղարկեց քո մեջ, Եգիպտո՛ս,

Փարավոնին և նրա բոլոր ծառաներին։

¹⁰ Հարվածեց բազում ազգերի

Եվ սպանեց հզոր թագավորների՝

¹¹ Ամորհացիների թագավոր Սեհովնին,

Բասանի թագավոր Օվգին

Եվ քանանացիների բոլոր թագավորներին։

¹² Նրանց երկիրը ժառանգություն տվեց,

Ժառանգություն իր ժողովրդին՝ Իսրայելին։

¹³ Տե՛ր, հավերժ է քո անունը, Տե՛ր, քո հիշատակը՝ սերնդեսերունդ։

¹⁴ Տերը դատում է իր ժողովրդին և մխիթարվում իր ծառաներով։

¹⁵ Արծաթ և ոսկի են կուռքերը հեթանոսների,

Մարդկանց որդիների ձեռագործերն են։

¹⁶ Բերան ունեն, բայց չեն խոսում,

Աչքեր ունեն, բայց չեն տեսնում,

¹⁷ Ականջներ ունեն, բայց չեն լսում,

Եվ շունչ չկա նրանց բերանում։

¹⁸ Նրանց նման կլինեն դրանք շինողները

Եվ բոլոր նրանց հուսացողները։

¹⁹ Տո՛ւն Իսրայելի, օրհնեցե՛ք Տիրոջը,

Տո՛ւն Ահարոնի, օրհնեցե՛ք Տիրոջը,

²⁰ Տո՛ւն Ղևիի, օրհնեցե՛ք Տիրոջը,

Տիրոջ երկյուղածնե՛ր, օրհնեցե՛ք Տիրոջը.

²¹ Օրհնյա՜լ է Տերը Սիոնից. նա,

Որ բնակվում է Երուսաղեմում։

135(136)

¹ Ալելուիա

Խոստովանե՛ք Տիրոջը,

Որովհետև բարի և հավերժ է նրա ողորմությունը։

² Խոստովանե՛ք աստվածների Աստծուն,

Որովհետև հավերժ է նրա ողորմությունը։

³ Խոստովանե՛ք տերերի Տիրոջը,

Որովհետև հավերժ է նրա ողորմությունը։

⁴ Միայնակ մեծամեծ սքանչելիքներ գործեց,

Որովհետև հավերժ է նրա ողորմությունը։

⁵ Իր իմաստությամբ ստեղծեց երկինքը,

Որովհետև հավերժ է նրա ողորմությունը։

⁶ Հաստատեց երկիրը ջրերի վրա,

Որովհետև հավերժ է նրա ողորմությունը։

⁷ Միայնակ ստեղծեց մեծ լուսատուները,

Որովհետև հավերժ է նրա ողորմությունը։

⁸ Արեգակին ստեղծեց՝ իբրև ցերեկվա իշխան,

Որովհետև հավերժ է նրա ողորմությունը։

⁹ Լուսինն ու աստղերը՝ իբրև գիշերվա իշխաններ,

Որովհետև հավերժ է նրա ողորմությունը։

¹⁰ Հարվածեց եգիպտացիների երկիրը՝ իր առաջնեկներով հանդերձ,

Որովհետև հավերժ է նրա ողորմությունը։

¹¹ Եվ Իսրայելին նրա միջից հանեց,

Որովհետև հավերժ է նրա ողորմությունը։

¹² Ձեռքով բարձր և բազուկով հզոր,

Որովհետև հավերժ է նրա ողորմությունը,

¹³ Ճեղքեց մեծ ծովը և բաժանեց երկու մասի,

Որովհետև հավերժ է նրա ողորմությունը։

¹⁴ Եվ Իսրայելին անցկացրեց նրա միջով,

Որովհետև հավերժ է նրա ողորմությունը։

¹⁵ Փարավոնին իր զորքով ընկղմեց Կարմիր ծովում,

Որովհետև հավերժ է նրա ողորմությունը։

¹⁶ Եվ հանեց իր ժողովրդին դեպի անապատ,

Որովհետև հավերժ է նրա ողորմությունը։

Ժայռի միջից ջուր բխեցրեց,

Որովհետև հավերժ է նրա ողորմությունը։

¹⁷ Հարվածեց մեծամեծ ազգերի,

Որովհետև հավերժ է նրա ողորմությունը։

¹⁸ Եվ սպանեց հզոր թագավորներին,

Որովհետև հավերժ է նրա ողորմությունը.

¹⁹ Ամորհացիների Սեհովն թագավորին,

Որովհետև հավերժ է նրա ողորմությունը,

²⁰ Բասանի Օվգ թագավորին,

Որովհետև հավերժ է նրա ողորմությունը։

²¹ Երկիրը նրանց տվեց իբրև ժառանգություն,

Որովհետև հավերժ է նրա ողորմությունը,

²² Ժառանգություն Իսրայելին՝ իր ծառային,

Որովհետև հավերժ է նրա ողորմությունը։

²³ Տերը հիշեց մեզ մեր թշվառության մեջ,

Որովհետև հավերժ է նրա ողորմությունը։

²⁴ Եվ փրկեց մեզ մեր թշնամիների ձեռքերից,

Որովհետև հավերժ է նրա ողորմությունը։

²⁵ Նա կերակուր է տալիս բոլոր ապրողներին,

Որովհետև հավերժ է նրա ողորմությունը։

²⁶ Խոստովանե՛ք երկնավոր Աստծուն,

Որովհետև հավերժ է նրա ողորմությունը։

Խոստովանե՛ք տերերի Տիրոջը,

Որովհետև հավերժ է նրա ողորմությունը։

136(137)

¹ Սաղմոս Երեմիայի

Այնտեղ՝ բաբելացիների գետերի մոտ,

Նստում էինք ու լաց լինում Սիոնը հիշելիս։

² Նրանց ուռիներից էինք կախել մեր քնարները։

Այնտեղ մեզ գերողներն օրհնության խոսքեր էին ուզում,

³ Մեզ գերեվարողները ստիպում էին մեզ և ասում.

«Մեզ երգե՛ր ասեք օրհնությունից Սիոնի»։

⁴ Բայց ինչպե՞ս երգենք օտար երկրում

Օրհնությունները Տիրոջ։

⁵ Եթե մոռանամ ես քեզ, Երուսաղե՛մ,

Թող իմ աջը մոռանա ինձ,

Թե չհիշեմ քեզ,

⁶ Թող լեզուս կցվի քիմքիս,

Եթե քո նվագը նախ չնվագեմ, ո՜վ Երուսաղեմ,

Սկի՛զբն իմ ուրախության։

⁷ Տե՛ր, հիշի՛ր Եդովմի որդիներին,

Որ Երուսաղեմի անկմանը ասում էին.

«Քանդե՛ք, քանդե՛ք,

Հիմնահատակ քանդե՛ք»։

⁸ Ո՜վ թշվառական՝ դո՛ւստր բաբելացիների,

Երանի՜ նրան, որ կհատուցի քեզ,

Ինչպես դու հատուցեցիր մեզ։

⁹ Երանի՜ նրան, որ կառնի քո մանուկներին

Եվ քարին կհարվածի։

137(138)

¹ Սաղմոս Դավթի

Տե՜ր, քեզ պիտի խոստովանեմ իմ ողջ սրտով,

Սաղմոս պիտի երգեմ քեզ հրեշտակների առջև,

Որովհետև լսեցիր բերանիս խոսքերը։

² Պիտի երկրպագեմ քո սուրբ տաճարում

Եվ խոստովանեմ անունդ

Քո ողորմության և ճշմարտության համար.

Ամեն ինչում մեծարեցիր քո սուրբ անունը։

³ Որ օրը քեզ աղոթեմ, լսի՛ր ինձ շուտով

Եվ բազմացրո՛ւ հոգուս զորությունները։

⁴ Աշխարհի բոլոր թագավորները

Քեզ պիտի խոստովանեն,

Որովհետև լսեցին քո բերանի խոսքերը

⁵ Եվ պիտի օրհնեն քո ճամփաները։

Քանզի մեծ է փառքը Տիրոջ,

⁶ Քանզի բարձր է Տերը,

Տեսնում է խոնարհներին,

Հպարտներին՝ հեռվից ճանաչում։

⁷ Եթե ընթանամ նեղությունների միջով,

Կփրկես ինձ թշնամու բարկությունից.

Ձեռքդ կպարզես, և քո աջը կփրկի ինձ,

⁸ Եվ իմ փոխարեն Տերը կհատուցի։

Քո ողորմությունը հավերժ է, Տե՜ր,

Մի՛ անտեսիր ձեռքիդ գործերը։

138(139)

¹ Դպրապետին։ Սաղմոս Դավթի

Տե՛ր, փորձեցիր ինձ և ճանաչեցիր,

² Դու ճանաչեցիր իմ նիստուկացը.

Շատ ու շատ առաջ հասկացար իմ խորհուրդները։

³ Դու քննեցիր իմ շավիղներն ու անկողինս

Եվ բոլոր ճանապարհներս նախապես տեսար,

⁴ Եվ թե նենգություն չկա լեզվիս տակ։

⁵ Ահա դու, Տե՜ր, ճանաչեցիր իմ անցյալն ու ապագան։

Դու ստեղծեցիր ինձ և ձեռքդ դրեցիր ինձ վրա։

⁶ Սքանչելի եղավ քո գիտությունն ինձնից,

Զորեղ, որ չեմ կարող հասնել նրան։

⁷ Ո՞ւր գնամ ես քո շնչից,

Կամ քո երեսից ես ո՞ւր փախչեմ։

⁸ Եթե ելնեմ երկինք, դու այնտեղ ես,

Եթե իջնեմ դժոխք, դարձյալ մոտ ես դու։

⁹ Եթե առավոտյան թևեր առնեմ

Եվ բնակվեմ ծովի եզերքում,

¹⁰ Սակայն այնտեղ էլ քո ձեռքն ինձ կառաջնորդի,

Եվ քո աջն ինձ կընդունի։

¹¹ Ասացի՝ գուցե խավարն ինձ ծածկի,

Կամ գիշերը՝ իմ փափկության լույսի փոխարեն.

¹² Խավարը քեզ համար խավար չի դառնա,

Գիշերը լուսավոր ցերեկ կդառնա,

Եվ նրա խավարը լույսի պես կլինի։

¹³ Դու ստեղծեցիր իմ երիկամները

Եվ ընդունեցիր ինձ մորս որովայնից։

¹⁴ Պիտի խոստովանեմ քեզ, Տե՜ր,

Որովհետև ահեղ և սքանչելի ես.

Սքանչելի են քո գործերը,

Որոնք հույժ սիրեց անձս։

¹⁵ Իմ ոսկորը չթաքնվեց քեզանից,

Որ ստեղծեցիր թաքուն,

Եվ իմ բնությունը՝ երկրի խորքերում։

¹⁶ Իմ անգործությունը տեսան քո աչքերը,

Եվ բոլորը գրվեցին քո գրքում.

Ցերեկը մոլորվեցին, և չկար մեկը,

Որ առաջնորդեր նրանց։

¹⁷ Ինձ հույժ մեծարեցին քո բարեկամները, Աստվա՜ծ,

Եվ չափազանց զորացան նրանց իշխանները։

¹⁸ Հաշվեցի, նրանք ավազից ավելի բազմացան,

Արթնացա, և ահա քեզ հետ եմ։

¹⁹ Միայն թե սպանեիր մեղավորներին, Աստվա՜ծ.

Արյունահե՛ղ մարդիկ, հեռացե՛ք ինձնից։

²⁰ Քանզի հակառակությամբ և նախանձով

Իզուր պիտի առնեն քո քաղաքները.

²¹ Քեզ ատողներին ատեցի, Տե՛ր,

Եվ քո թշնամիներից մաշվեցի։

²² Կատարյալ ատելությամբ ատեցի նրանց,

Եվ ինձ թշնամի դարձան։

²³ Փորձի՛ր ինձ, Աստվա՛ծ, և ճանաչի՛ր իմ սիրտը,

Քննի՛ր ինձ և ճանաչի՛ր իմ շավիղները

²⁴ Եվ տե՛ս, եթե իմ ճանապարհին

Անօրենություններ կան,

Ինձ առաջնորդի՛ր քո հավիտենական ճանապարհով։

139(140)

¹ Դպրապետին։ Սաղմոս Դավթի

² Ազատի՛ր ինձ, Տե՜ր, չար մարդուց,

Փրկի՛ր ինձ անիրավ մարդուց։

³ Իրենց սրտերում անօրենություն խորհեցին,

Օր ու գիշեր պատրաստվեցին պատերազմի։

⁴ Օձի պես սրեցին իրենց լեզուները.

Իժի թույն կա նրանց շուրթերի տակ։

⁵ Պահի՛ր ինձ, Տե՜ր, մեղավորի ձեռքից

Եվ չար մարդուց փրկի՛ր ինձ։

Նրանք խորհեցին խափանել ընթացքս,

⁶ Ամբարտավաններն իրենց որոգայթը թաքցրին ինձնից,

Թակարդի լարեր ձգեցին ոտքերիս առջև

Եվ շավիղներիս շուրջը գայթակղություն դրեցին։ Հանգիստ

⁷ Ասացի. «Դու ես Տերը՝ իմ Աստվածը,

Ակա՛նջ դիր, Տե՜ր, աղոթքիս ձայնին»։

⁸ Տե՛ր, Տե՛ր, իմ փրկությա՛ն զորություն,

Պատերազմի ժամանակ գլխիս հովանի՛,

⁹ Մի՛ մատնիր ինձ, Տե՜ր, մեղավորների ցանկությանը,

Որոնք խորհեցին իմ մասին. ինձ վայր մի՛ նետիր,

Որպեսզի նրանք երբեք չբարձրանան,

Եվ նրանց խորհուրդները չկատարվեն։ Հանգիստ

¹⁰ Նրանց վերջն ու վախճանը,

Նրանց շրթունքների վաստակը թող ծածկի իրենց։

¹¹ Հրի կայծակնե՛ր թափիր նրանց վրա

Եվ կործանի՛ր նրանց,

Որ տառապանքից չփրկվեն։

¹² Լեզվանի մարդը չի հաջողելու երկրի վրա,

Մեղավոր մարդու չարիքները

Կորստյան կմատնեն իրեն։

¹³ Ես գիտեմ, Տե՜ր, որ դու ես տեսնում

Աղքատի դատաստանը և տնանկի իրավունքը։

¹⁴ Արդարները պիտի գոհություն մատուցեն քո անվանը,

Ուղղամիտները քո դիմաց պիտի բնակվեն։

140(141)

Երեկոյան աղոթք

¹ Սաղմոս Դավթի

Տե՜ր, ես քեզ աղոթեցի, լսի՛ր ինձ.

Լսի՛ր աղոթքիս ձայնը քեզ աղոթելիս։

² Թող աղոթքս քո առաջ խունկի պես ուղիղ լինի, Տե՜ր,

Ձեռքերիս բարձրացումն էլ՝ որպես երեկոյան ընծա։

³ Իմ բերանին, Տե՜ր, պահապա՛ն դիր

Եվ ամուր դուռ՝ իմ շուրթերին,

⁴ Որ սիրտս չխոտորվի չարության խոսքերով՝

Մեղքի պատճառ դառնալով մարդկանց հետ,

Որոնք անօրենություն են գործում.

Ես նրանց ընտրյալներին կցորդ չեմ դառնա։

⁵ Թող արդարը ողորմությամբ խրատի ինձ և հանդիմանի,

Մեղավորի յուղը թող գլուխս չօծի,

Եվ աղոթքս նրա կամքով չլինի։

⁶ Նրանց դատավորները գահավիժեցին ժայռի մոտ,

Թող լսեն իմ խոսքերը, որ քաղցր են.

⁷ «Ինչպես հողի թանձրությունը, որ սփռված է

Երկրի վրա, այնպես պիտի ցրվեն

Նրանց ոսկորները դժոխքի մոտ»։

⁸ Տե՜ր, Տե՜ր, դեպի քեզ են աչքերս ուղղված, քեզ հուսացի,

Հոգիս մի՛ հանիր ինձնից։

⁹ Պահի՛ր ինձ իմ դեմ լարված որոգայթից

Եվ անօրենություն գործողների գայթակղությունից։

¹⁰ Մեղավորները թող ընկնեն նրա ցանցերի մեջ,

Մինչև ես անցնեմ։

141(142)

¹ Աղոթք Դավթի՝ իմաստության, երբ նա քարայրում էր

² Իմ ձայնով ես Տիրոջն աղոթեցի,

Իմ ձայնով Տիրոջն աղաչեցի,

³ Տիրոջ առջև պիտի սփռեմ իմ աղոթքները,

Նրա առջև պիտի պատմեմ նեղություններս։

⁴ Երբ հոգիս նվաղեց իմ մեջ, դու, Տե՜ր,

Ճանաչեցիր իմ շավիղները.

Ճանապարհին, որով գնում էի, որոգայթ լարեցին։

⁵ Նայում էի աջ ու տեսնում, որ չկար մեկը, որ ինձ ճանաչեր,

Փախուստս էլ անօգուտ եղավ,

Եվ չկար մեկը, որ փնտրեր հոգիս։

⁶ Աղաղակեցի քեզ, Տե՜ր, և ասացի.

«Դու ես իմ հույսը և իմ բաժինը ողջերի աշխարհում»։

⁷ Լսի՛ր, Տե՜ր, իմ աղոթքը,

Որովհետև ես հույժ տկարացա.

Փրկի՛ր ինձ իմ հալածիչներից,

Որովհետև ինձանից հզոր եղան։

⁸ Տե՜ր, հանի՛ր ինձ բանտից,

Որ գոհություն մատուցեմ քո անվանը

Արդարների հավաքին,

Քանի որ օգնեցիր ինձ։

142(143)

Ապաշխարության աղոթք

¹ Սաղմոս Դավթի, երբ նրան հալածեց իր որդի Աբիսողոմը

Տե՜ր, լսի՛ր աղոթքս,

Քո ճշմարտությամբ ակա՛նջ դիր իմ խնդրանքներին։

Լսի՛ր ինձ քո արդարությամբ

² Եվ ծառայիդ հետ մի՛ թշնամացիր,

Որովհետև ո՛չ մի կենդանի էակ չի արդարանա քո առջև։

³ Թշնամին հալածեց հոգիս, կյանքս հողին խոնարհեցրեց

Եվ ինձ նստեցրեց խավարում՝ որպես հավերժական մեռյալ։

⁴ Հոգիս ձանձրացավ իմ ներսում, և սիրտս խռովվեց իմ մեջ։

⁵ Ես հիշեցի օրերը հին, հիշեցի քո բոլոր գործերը,

Խորհեցի քո ստեղծածների մասին

⁶ Եվ դեպի քեզ բարձրացրի ձեռքերս։

Հոգիս երկրի հողի պես ծարավի է քեզ։ Հանգիստ

⁷ Լսի՛ր ինձ շուտով, Տե՜ր, որովհետև հոգիս նվաղեց իմ ներսում։

Երեսդ մի՛ դարձրու ինձնից,

Որ չնմանվեմ գուբի մեջ իջնողներին։

⁸ Լսելի՛ դարձրու ինձ քո առավոտյան ողորմությունը,

Որովհետև, Տե՜ր, ես քեզ հուսացի։

Ցո՛ւյց տուր ինձ ճանապարհը, որով պիտի գնամ,

Որովհետև, Տե՜ր, դեպի քեզ բարձրացրի հոգիս։

⁹ Փրկի՛ր ինձ, Տե՜ր, իմ թշնամիներից,

Որովհետև քեզ ապավեն դարձրի ինձ։

¹⁰ Սովորեցրո՛ւ ինձ քո կամքը կատարել,

Որովհետև դու ես իմ Աստվածը։

Քո բարի հոգին ինձ պիտի առաջնորդի ուղիղ ճանապարհով։

¹¹ Հանուն քո անվան քո արդարությամբ կենդանացրո՛ւ ինձ, Տե՜ր,

Հանի՛ր անձս նեղությունից։

¹² Քո ողորմությամբ կործանի՛ր իմ թշնամիներին,

Կորստի՛ մատնիր անձիս բոլոր նեղիչներին,

Որովհետև ես քո ծառան եմ։

143(144)

¹ Սաղմոս Դավթի՝ Գողիաթի մասին

Օրհնյա՜լ է Տերը՝ իմ Աստվածը,

Որ ձեռքս վարժեցրեց պատերազմի

Եվ մատներս՝ ճակատամարտի։

² Նա է իմ ողորմությունն ու ապավենը,

Իմ օգնականն ու իմ փրկիչը,

Իմ ապավենը, և ես նրան հուսացի։

Նա է ժողովուրդներին հնազանդեցնում։

³ Տե՛ր, ո՞վ է մարդը, որ հայտնվեցիր նրան,

Կամ մարդու որդին, որ հաշվի ես առնում նրան։

⁴ Մարդը նմանվեց ունայնության,

Եվ նրա օրերը ստվերի պես են անցնում։

⁵ Տե՛ր, ցածրացրո՛ւ երկինքը և իջի՛ր,

Մոտեցի՛ր լեռներին, և թող ծխան։

Փայլատակի՛ր քո շանթերը և խռովեցրո՛ւ նրանց,

⁶ Արձակի՛ր քո նետերը և ցրի՛ր նրանց։

⁷ Ձեռքդ երկարի՛ր վերից ու փրկի՛ր ինձ բազում ջրերից

Եվ օտարների որդիների ձեռքերից,

⁸ Որոնց բերաններն ունայնություն են խոսում,

Եվ նրանց աջը մեղքերի աջ է։

⁹ Աստվա՛ծ, քեզ պիտի օրհնեմ նոր օրհնությամբ,

Սաղմոս պիտի երգեմ քեզ տասնալար նվագարանով։

¹⁰ Նա ազատություն պիտի տա մեր թագավորներին

Եվ պիտի փրկի իր Դավիթ ծառային չար սրից։

¹¹ Փրկի՛ր ինձ և ապրեցրո՛ւ օտարների որդիների ձեռքից,

Որոնց բերանները նանրություն են խոսում,

Եվ նրանց աջը մեղքերի աջ է։

¹² Նրանց որդիները նորատունկի պես հաստատուն են

Իրենց մանկությունից, իսկ նրանց դուստրերը

Զարդարված ու պճնված են տաճարի նման։

¹³ Նրանց շտեմարանները լիքն են

Եվ առատաբուխ,

Բազմածին են նրանց ոչխարների հոտերը

Եվ բազմանում են իրենց ճամփաներին,

¹⁴ Եվ նրանց արտերը պարարտ են։

Նրանց ցանկապատերը խրամատ չունեն,

Եվ նրանց հրապարակներում աղաղակ չկա։

¹⁵ Երանի՜ այն ժողովրդին, որն այսպես է,

Երանի՜ այն ժողովրդին, որի Տերն Աստված է։

144(145)

¹ Օրհնություն Դավթի

Ալեֆ Պիտի փառաբանեմ քեզ, Աստվա՛ծ իմ և թագավո՛ր իմ,

Եվ քո անունն օրհնեմ հավիտյան և հավիտյանս հավիտենից։

Բեթ ² Զօրհանապազ պիտի օրհնեմ քեզ և պիտի գովեմ քո անունը

Հավիտյանս հավիտենից։

Գիմել ³ Մեծ է Տերը և հույժ օրհնյալ,

Եվ նրա մեծությանը չափ չկա։

Դալեթ ⁴ Սերնդեսերունդ պիտի գովեն քո գործերը

Եվ պատմեն քո զորությունները։

Հեյ ⁵ Պիտի խոսեն քո սրբության փառքի մեծ վայելչությունից

Եվ քո հրաշագործությունները պատմեն։

Վավ ⁶ Եվ պիտի պատմեն քո ահի զորությունը

Եվ քո մեծությունը։

Զայն ⁷ Քո մեծ բարության հիշատակը պիտի ավետեն

Եվ ցնծան քո արդարությամբ։

Խեթ ⁸ Գթած և ողորմած է Տերը, համբերատար և բազումողորմ։

Տեթ ⁹ Քաղցր է Տերը բոլորի հանդեպ, և նրա գթությունը

Բոլոր արարածների վրա է։

Յոդ ¹⁰ Քո բոլոր գործերը, Տե՜ր, քեզ պիտի խոստովանեն,

Եվ քո սրբերը պիտի օրհնեն քեզ։

Կաֆ ¹¹ Քո արքայության փառքը պիտի ասեն

Եվ պատմեն քո զորության մասին։

Լամեդ ¹² Որ մարդկանց որդիները ճանաչեն քո զորությունը,

Քո արքայական մեծ վայելչության փառքերը։

Մեմ ¹³ Քո արքայությունը ողջ հավիտենականության

Արքայությունն է,

Եվ տերությունդ՝ սերնդեսերունդ։

Նուն ^13ա Տերը հավատարիմ է իր բոլոր խոստումներում

Եվ արդար՝ իր բոլոր գործերում։

Սամեխ ¹⁴ Տերը հաստատում է բոլոր սայթաքողներին,

Ոտքի կանգնեցնում բոլոր գլորվածներին։

Այն ¹⁵ Բոլոր աչքերը քեզ են վստահում,

Եվ դու ես ժամանակին կերակուր տալիս նրանց.

Տալիս ես նրանց, և նրանք սնվում են։

Պե ¹⁶ Բացում ես ձեռքդ և հագեցնում բոլորին

Քո կամքի քաղցրությամբ։

Ցադե ¹⁷ Արդար է Տերն իր բոլոր ճանապարհներին

Եվ սուրբ՝ իր բոլոր գործերում։

Քոֆ ¹⁸ Տերը մոտ է բոլոր նրանց, ովքեր աղոթում են իրեն,

Բոլոր նրանց, ովքեր ճշմարտությամբ են աղոթում։

Ռեշ ¹⁹ Տերը կատարում է իրենից երկյուղածների կամքը,

Լսում է նրանց աղոթքները և փրկում նրանց։

Շին ²⁰ Տերը պահում է բոլոր նրանց, ովքեր սիրում են իրեն,

Բոլոր մեղավորներին կործանում է Տերը։

Տավ ²¹ Բերանս Տիրոջ օրհնությունները պիտի խոսի.

Ամեն շնչավոր պիտի օրհնի նրա սուրբ անունը

Հավիտյան և հավիտյանս հավիտենից։

145(146)

¹ Ալելուիա՝ Անգեոսի և Զաքարիայի

Օրհնի՛ր Տիրոջը, հոգի՛ս.

² Պիտի օրհնեմ Տիրոջն իմ կյանքում,

Սաղմոս պիտի երգեմ իմ Աստծուն, քանի կամ։

³ Հույս մի՛ դրեք իշխանների՝ մարդկանց որդիների վրա,

Որովհետև նրանք չեն կարող փրկել։

⁴ Նրանց հոգին դուրս պիտի գա, և նրանք կրկին հող պիտի դառնան,

Եվ այդ օրը նրանց բոլոր խորհուրդները կանհետանան։

⁵ Երանի՜ նրան, ում օգնականը Հակոբի Աստվածն է,

Եվ նրա հույսը Տիրոջ՝ Աստծու վրա է,

⁶ Որ ստեղծեց երկինքն ու երկիրը,

Ծովը և նրա մեջ եղած ամեն ինչը։

Նա, ով պահպանում է ճշմարտությունը հավիտյան

⁷ Եվ տեսնում է զրկվածների արդար դատը։

Տերը հաց է տալիս քաղցածներին

Եվ կապյալներին արձակում։

⁸ Տերը բացում է կույրերի աչքերը,

Իմաստություն է տալիս նրանց,

Ոտքի է կանգնեցնում գլորվածներին։

Տերը սիրում է արդարներին,

⁹ Տերը պահպանում է պանդուխտներին,

Տերն ընդունում է որբերին ու այրիներին

Եվ կործանում ամբարիշտների ճանապարհները։

¹⁰ Տերը պիտի թագավորի հավիտյան,

Քո Աստվածը, ո՛վ Սիոն, սերնդեսերունդ։

146(147)

¹ Ալելուիա՝ Անգեոսի և Զաքարիայի

Օրհնեցե՛ք Տիրոջը,

Որովհետև բարի են սաղմոսները.

Օրհնությունը հաճելի է մեր Աստծուն։

² Տերը կառուցում է Երուսաղեմը

Եվ հավաքում Իսրայելի ցրվածներին,

³ Բժշկում է բեկյալ սրտերը

Եվ կապում է նրանց վերքերը բոլոր։

⁴ Հաշվում է աստղերի բազմությունը

Եվ բոլորին կոչում է իրենց անուններով։

⁵ Մեծ է մեր Տերը, և մեծ է նրա զորությունը.

Նրա իմաստությունը սահման չունի։

⁶ Տերն ընդունում է հեզերին

Եվ ամբարտավաններին խոնարհեցնում մինչև գետին։

⁷ Օրհնեցե՛ք Տիրոջը խոստովանությամբ,

Սաղմո՛ս երգեք նրան օրհնությամբ։

⁸ Նա ամպերով պարուրեց երկինքը

Եվ անձրև պատրաստեց երկրի համար,

Խոտ բուսեցրեց լեռների վրա,

Կանաչություն՝ մարդկանց ծառայելու համար։

⁹ Նա, որ կերակուր է տալիս անասուններին,

Ագռավի ձագերին, որ կանչում են նրան։

¹⁰ Ոչ թե ձիու զորությունը կամեցավ Տերը,

Ոչ էլ հսկա մարդու իրանը հաճելի գտավ։

¹¹ Այլ Տերն իրենից երկյուղածներին է հավանում

Եվ նրանց, ովքեր իր ողորմությունն են հայցում։

147(148)

¹ Ալելուիա՝ Անգեոսի և Զաքարիայի

Գովի՛ր Տիրոջը, Երուսաղե՛մ,

Եվ օրհնի՛ր քո Աստծուն, Սիո՛ն,

² Որովհետև նա զորացրեց դռներիդ նիգերը

Եվ օրհնեց քո ներսում գտնվող որդիներիդ։

³ Նա, որ խաղաղության մեջ պահեց քո սահմանները,

Ցորենի առատությամբ լիացրեց քեզ։

⁴ Նա, որ երկիր է ուղարկում իր խոսքը,

Եվ արագ սլանում են պատգամները նրա։

⁵ Ձյուն է տեղացնում ճերմակ բրդի պես

Եվ մեգ ցանում փոշու նման։

⁶ Սառույց է նետում պատառ-պատառ.

Ո՞վ կարող է դիմանալ նրա ցրտին։

⁷ Ուղարկում է իր խոսքը և հալեցնում նրանց.

Շաչում են հողմերը, և հոսում են ջրերը։

⁸ Նա, որ իր խոսքն է պատմում Հակոբին,

Արդարությունն ու իրավունքը՝ Իսրայելին։

⁹ Տերն այսպես չարեց բոլոր ազգերին

Եվ իր դատաստանը նրանց չհայտնեց։

148(149)

¹ Ալելուիա՝ Անգեոսի և Զաքարիայի

Օրհնեցե՛ք Տիրոջը երկնքից,

Օրհնեցե՛ք նրան բարձունքներից,

² Օրհնեցե՛ք նրան, նրա բոլո՛ր հրեշտակներ,

Օրհնեցե՛ք նրան, նրա բոլո՛ր զորություններ.

³ Օրհնեցե՛ք նրան, արեգա՛կ և լուսի՛ն,

Օրհնեցե՛ք նրան, ողջ աստղե՛ր և լո՛ւյս.

⁴ Օրհնեցե՛ք նրան, երկինքների՛ երկինքներ,

Ջրե՛ր, որ վեր եք երկնից,

⁵ Օրհնեցե՛ք Տիրոջ անունը։

Որովհետև նա ասաց, և եղան,

Հրամայեց, և հաստատվեցին։

⁶ Հաստատեց նրանց հավիտյանս հավիտենից.

Սահման դրեց, որը չի խախտվի։

⁷ Օրհնեցե՛ք Տիրոջը երկրից,

Վիշապնե՛ր և բոլո՛ր անդունդներ,

⁸ Հո՛ւր և կարկո՛ւտ, ձյո՛ւն և սառո՛ւյց,

Հո՛ղմ և մրրի՛կ, որ նրա խոսքն եք կատարում։

⁹ Լեռնե՛ր և բոլո՛ր բլուրներ,

Պտղաբե՛ր ծառեր և բոլո՛ր մայրիներ,

¹⁰ Գազաննե՛ր և բոլոր անասուննե՛ր,

Սողուննե՛ր և բոլոր թևավո՛ր թռչուններ,

¹¹ Երկրի թագավորնե՛ր՝ զորքերով մեկտեղ,

Իշխաննե՛ր և երկրի բոլո՛ր դատավորներ,

¹² Երիտասարդնե՛ր և կույսե՛ր,

Ծերե՛ր և մանուկնե՛ր, ¹³ օրհնեցե՛ք Տիրոջ անունը։

Միայն նրա անունը բարձր եղավ.

Նրան խոստովանությունը՝ երկնքում և երկրում։

¹⁴ Տերը բարձրացնում է իր ժողովրդի զորությունը.

Օրհնությո՜ւն նրա բոլոր սրբերին.

Որդիներին Իսրայելի,

Ժողովրդին, որ մոտ է Տիրոջը։

149(150)

¹ Ալելուիա՝ Անգեոսի և Զաքարիայի

Օրհնեցե՜ք Տիրոջը նո՛ր օրհնությամբ.

Նրա օրհնությունը սրբերի ժողովում է։

² Իսրայելն ուրախացավ իր Արարչով,

Սիոնի որդիները թող ցնծան իրենց Թագավորով։

³ Թող օրհնեն նրա անունը օրհնությամբ,

Նվագարանով և օրհնությամբ թող սաղմոսեն նրան։

⁴ Տերը սիրում է իր սուրբ ժողովրդին

Եվ հեզերին փառավորում փրկությամբ։

⁵ Սրբերը թող պարծենան փառքով

Եվ ցնծան իրենց հանգստի մեջ

⁶ Եվ փառաբանեն Աստծուն իրենց բերաններով։

Երկսայրի սրեր կան նրանց ձեռքերում,

⁷ Որ վրեժ լուծեն հեթանոսներից՝

Ի հանդիմանություն բոլոր ժողովուրդների.

⁸ Որ նրանց թագավորներին կապեն շղթաներով,

Նրանց զորավարներին՝ երկաթյա ձեռնակապերով,

⁹ Որ իրագործեն նրանց գրված դատավճիռը.

Այս է փառքը նրա բոլոր սրբերի։

150(151)

¹ Ալելուիա

Օրհնեցե՛ք Աստծուն իր սրբարանում,

Օրհնեցե՛ք նրան իր զորության հաստատության մեջ։

² Օրհնեցե՛ք նրան իր զորության մեջ,

Օրհնեցե՛ք նրան իր բազում մեծության մեջ։

³ Օրհնեցե՛ք նրան օրհնության ձայնով,

Օրհնեցե՛ք նրան սաղմոսներով և օրհնությամբ։

⁴ Օրհնեցե՛ք նրան թմբուկով և պարով,

Գովեցե՛ք նրան ուրախությամբ։

⁵ Օրհնեցե՛ք նրան քաղցր խոսքերով,

Օրհնեցե՛ք նրան լսելի բարբառով,

Օրհնեցե՛ք նրան գոհության ձայնով։

⁶ Բոլո՛ր հոգիներ, Տիրո՛ջն օրհնեցեք։

151(152)

¹ Հաշվից դուրս այս սաղմոսը Դավթի ինքնագիրն է, երբ նա մարտնչելու ելավ Գողիաթի դեմ, Սավուղի առջև

Փոքրն էի ես իմ եղբայրների մեջ

Եվ կրտսերը իմ հոր տանը.

Իմ հոր ոչխարներն էի արածեցնում։

² Ձեռքերն իմ նվագարան ստեղծեցին,

Եվ մատներս օրհներգության գործիք պատրաստեցին։

³ Արդ, սա ո՞վ պիտի պատմի իմ Տիրոջը.

Ամեն ինչի մասին Տերն ինքը կլսի։

⁴ Նա ուղարկեց իր հրեշտակին,

Ինձ վերցրեց իմ հոր ոչխարների հոտից

Եվ օծեց ինձ իր յուղի օծումով։

⁵ Մեծ և գեղեցիկ էին իմ եղբայրները,

Բայց Տերը նրանց չհավանեց։

⁶ Ելա ես այլազգու դեմ

Եվ նզովեցի կուռքերը նրա։

⁷ Ես նրանից առա սուրը

Եվ կտրեցի նրա գլուխը

Եվ վերացրի նախատինքը

Իսրայելի որդիներից։

ԱՌԱԿՆԵՐ

1

¹ Երուսաղեմում Իսրայելի թագավոր Սողոմոնի՝ Դավթի որդու առակները՝ ² ճանաչելու իմաստությունն ու խրատը, հասկանալու խոսքերը հանճարեղ, ³ ընկալելու խոսքի դարձվածքները, ուսանելու ճշմարիտ արդարությունը և ուղղվելու դեպի իրավունքը, ⁴ անուսումներին տալու խորագիտություն, երիտասարդներին՝ գիտելիք և կողմնորոշում։ ⁵ Քանզի դրանք լսելով՝ իմաստունն ավելի կիմաստնանա, կրթյալը կստանա կյանքի ուղեցույց։ ⁶ Սրանով մարդ կհասկանա իմաստունների խոսքերը՝ նրանց իմաստուն խոսքերը, նրանց առակները, նրանց այլաբանություններն ու հանելուկները։

⁷ Իմաստության սկիզբը երկյուղն է Տիրոջից,

Իմաստությունը բարիք է նրանով առաջնորդվողների համար։

Բարեպաշտությունն առ Աստված սկիզբն է զգոնության,

Իսկ ամբարիշտները մերժում են իմաստությունն ու խրատը։

Ճառ Ա

⁸ Լսի՛ր, որդյա՛կ, հորդ խրատը, և մի՛ մերժիր մորդ պատվիրանները, ⁹ որ քո գլխին շնորհների պսակ կրես և ոսկի մանյակ՝ քո պարանոցին։ ¹⁰ Որդյա՛կ, ամբարիշտ մարդիկ թող քեզ չխաբեն, և մի՛ ախորժիր, եթե ձայնեն ու ասեն. ¹¹ «Արի՛ մեզ հետ ու մեղսակի՛ց դարձիր արյան, հողով ծածկենք արդար մարդուն, ¹² գերեզմանի պես ողջ-ողջ կուլ տանք նրան և երկրից ջնջենք նրա հիշատակը, ¹³ յուրացնենք նրա այլազան ունեցվածքը և մեր տները լցնենք ավարով։ ¹⁴ Բաժնեկից ու բախտակի՛ց դարձիր մեզ. սարքենք ընդհանուր մի քսակ, մեկտեղ լինի գանձարանը մեր»։

¹⁵ Որդյա՛կ, նրանց հետ ճամփա մի՛ գնա, հեռացրո՛ւ ոտքդ նրանց շավիղներից, ¹⁶ քանզի նրանց ոտքերը չարին են գնում և չեն երկմտում արյուն հեղելիս։ ¹⁷ Իզուր չէ, որ թակարդ են լարում թռչունների դեմ. ¹⁸ նրանք, որ հաղորդ են սպանությանը, իրենց անձերի համար չարիք են գանձում. անօրեն մարդկանց վախճանը չար է։ ¹⁹ Ահա թե ինչպիսին են ճանապարհները բոլոր նրանց, ովքեր անօրինություն են գործում, որովհետև ամբարշտությամբ իրենց սեփական անձերն են սպանում։

Օրհներգ Ա

²⁰ Իմաստությունը գոչում է ճանապարհներին,

և հրապարակներ ելնում համարձակությամբ,

²¹ պարիսպների գլխին քարոզում,

և իշխանների դռներն է հաճախում,

քաղաքների դարպասների մոտ համարձակ խոսում։

²² Այնքան ժամանակ, քանի դեռ անմեղները

արդարության կապված կլինեն, չեն ամաչելու։

Իսկ անմիտները, որ թշնամություն են ցանկանում,

և ամբարշտությամբ ատեցին իմաստությունը,

պիտի դատապարտվեն հանդիմանության։

²³ Ահա ձեր առջև բացելու եմ հոգուս պատգամները.

և իմ խոսքերն եմ ուսուցանելու ձեզ.

²⁴ քանզի կանչում էի, բայց չէիք լսում,

թախանձում էի, բայց չէիք հնազանդվում,

²⁵ այլ անտեսում էիք իմ խորհուրդները

և չէիք անսում իմ հանդիմանություններին։

²⁶ Այդ պատճառով պիտի խնդամ ձեր կորստյամբ,

և հրճվեմ, երբ ձեզ պատի տագնապը.

²⁷ և երբ հանկարծակի խռովությունը ձեզ պատի,

և կործանումը մրրիկի պես գա,

կամ երբ ձեր վախճանը հասնի,

²⁸ գուցե դուք աղոթեք ինձ, բայց ձեզ չեմ լսելու։

Չարերը փնտրելու են ինձ, բայց չեն գտնելու,

²⁹ որովհետև ատեցին իմաստությունը,

և չփնտրեցին Տիրոջից երկյուղը,

³⁰ և չկամեցան անսալ իմ խորհուրդներին

և արհամարհեցին իմ հորդորները։

³¹ Այդ պատճառով նրանք կուտեն

իրենց ճանապարհի պտուղները

և իրենց ամբարշտությամբ կհագենան։

³² Մանուկներին զրկելու պատճառով պիտի կործանվեն,

և կշտամբանքը պիտի սպանի ամբարիշտներին։

³³ Իսկ ով ինձ լսի, նա կապրի ապահովությամբ

և անվախ կհանդարտվի ամենայն չարիքից։

2

Ճառ Բ 

¹ Որդյա՛կ, եթե ընդունես իմ պատգամներն ու պատվիրանները և պահես քո մեջ, ² քո ականջը կլսի իմաստությունը, սիրտդ էլ իմաստության կխոնարհեցնես, և դու այն իբրև խրատ կավանդես որդուդ։ ³ Իսկ եթե իմաստությունը վերակոչես և հանճարին դառնաս ձայնակից, ⁴ և եթե փնտրես այն իբրև ընտիր արծաթ և իբրև գանձ փնտրես այն, ⁵ այդժամ կհասկանաս երկյուղը Տիրոջից և կգտնես Աստծու գիտությունը. ⁶ քանզի Տերն է տալիս իմաստությունը, և նրա երեսից են ճառագում գիտությունն ու հանճարը, ⁷ նա է ուղղամիտների փրկությունը, վերակացու է լինում նրանց ընթացքին, ⁸ նա է պահպանում արդարների ճանապարհը և ամրացնում իր երկյուղածների ճանապարհները։ ⁹ Այն ժամանակ կհասկանաս արդարությունն ու իրավունքը և բոլոր շավիղները կուղղես դեպի բարություն, ¹⁰ և երբ իմաստությունը գա մտքիդ մեջ, և գիտությունը քո անձին բարի համարես, ¹¹ բարի խոհերը կզգուշացնեն քեզ և մաքուր մտքերը քեզ կպահպանեն, ¹² որպեսզի փրկվես չար ճանապարհից և անհավատարիմ մարդուց։ ¹³ Վա՜յ նրանց, որ թողած ճանապարհը ուղիղ՝ խավարի ճանապարհով կգնան, ¹⁴ որ կուրախանան չար գործերով և կխնդան՝ չարի կողմը խոտորվելով։ ¹⁵ Շեղ են լինելու նրանց ճանապարհները, իսկ շավիղները՝ զիգզագ, ¹⁶ փորձելու են քեզ հեռացնել ուղիղ ճանապարհից և օտարացնել արդար կարծիքից։

¹⁷ Որդյա՛կ իմ, թող քեզ չբռնի չար մտածումը, որ մանկության ժամանակ թողել է ուսումը և Աստծու ուխտը մոռացել։ ¹⁸ Նա իր տունը դրեց մահվան մոտ, իր շավիղները՝ դժոխքի մոտ, երկրածինների հետ։ ¹⁹ Նրա հետ գնացողներից ոչ ոք հետ չի դառնալու, չի էլ զղջալու, և չի հասնելու ուղիղ ճանապարհի ու չի ապրելու կյանքի տարիներն իր։ ²⁰ Իսկ եթե գնացած լինեին բարի ճամփաներով, հեշտությամբ կգտնեին արդարության շավիղները։ ²¹ Հեզաբարո մարդիկ կբնակվեն երկրում, անմեղները կմնան այնտեղ։ Այո՛, ուղիղնե՛րը կբնակվեն երկրում, և անարատները կմնան այնտեղ։ ²² Ամբարիշտների ճանապարհները կջնջվեն երկրից, և անօրենները կմերժվեն նրանից։

3

Ճառ Գ

¹ Որդյա՛կ, իմ օրենքները մի՛ մոռացիր, և իմ խոսքերը քո սրտո՛ւմ պահիր, ² որ երկարեն կյանքիդ օրերը և տարիները քո կենդանության և քեզ խաղաղություն ավելացնեն։ ³ Ողորմությունն ու հավատքը թող քեզանից չպակասեն, կախի՛ր դրանք քո պարանոցից և գրի՛ր դրանք սրտիդ երկայնքով և դու շնորհ կգտնես։ ⁴ Եվ բարի՛ն խորհիր Տիրոջ ու մարդկանց առջև, ⁵ Տիրո՛ջը հուսա բովանդակ սրտով և մի՛ հպարտացիր քո իմաստությամբ. ⁶ ճանաչի՛ր նրան քո բոլոր ճանապարհներին, որ նա ուղղի քո ճանապարհները և քո ոտքը չսայթաքի։ ⁷ Իմաստուն մի՛ եղիր դու քո աչքին, այլ երկյուղի՛ր Տիրոջից և խոտորի՛ր ամեն չարից։ ⁸ Այդժամ քո մարմնին բժշկություն կլինի դա և դարման՝ քո ոսկորներին։ ⁹ Քո արդար վաստակից Տիրոջը պատվի՛ր և քո արդար արմտիքից պտո՛ւղ հանիր նրան, ¹⁰ Որ քո շտեմարանները լցվեն ցորենի առատությամբ, և քո հնձաններն ավելիով գինի հորդեն։

¹¹ Որդյա՛կ, մի՛ հրաժարվիր Տիրոջ խրատից և մի՛ տրտմիր նրա հանդիմանությունից, ¹² քանզի Տերն ում սիրում, խրատում է նրան, և պատժում է որդուն, որին նախընտրում է։

Օրհներգ Բ

¹³ Երանելի է այն մարդը, որ իմաստություն է գտել,

և մահկանացուն, որ հանճար է ձեռք բերել։

¹⁴ Քանզի այն ավելի թանկ արժե,

քան ոսկու և արծաթի գանձերը։

¹⁵ Առավել հարգի է, քան անգին քարերը,

և չկա չար ոչինչ, որ հակառակ կանգնի նրան։

Հայտնի է բոլորին, ով մերձեցել է նրան,

հարգի համարվող ամեն բան չունի արժեքը նրա։

¹⁶ Որովհետև նրա աջ ձեռքում երկար օրեր և կյանքի տարիներ կան,

իսկ ձախ ձեռքում՝ փառք և մեծություն։

^16ա Նրա բերանից արդարություն է բխում,

իսկ օրենքներն ու ողորմությունը կրում է իր լեզվի վրա։

¹⁷ Բարու ճանապարհներ են նրա ճանապարհները

և նրա բոլոր շավիղները՝ խաղաղության։

¹⁸ Կյանքի ծառ է բոլոր նրանց համար,

ովքեր պատսպարվում են նրանով

և հենվում նրա վրա,

ինչպես Տիրոջ վրա հաստատությամբ։

Օրհներգ Գ

¹⁹ Աստված իմաստությամբ դրեց հիմքերը երկրի

և խորամտությամբ հաստատեց երկինքը,

²⁰ իր հանճարով պատռեց անդունդները,

և ամպերն անձրևներ հոսեցրին։

Ճառ Դ

²¹ Որդյա՛կ, պահի՛ր իմ խորհուրդներն ու իմաստությունը. ²² որպեսզի ապրի քո անձը, և շնորհները լինեն քո պարանոցի վրա, ^22ա բժշկություն լինի մարմնիդ համար, և դարման՝ ոսկորներիդ համար։ ²³ Եվ դու կանցնես խաղաղության հույսով քո բոլոր ճանապարհները, և քո ոտքը չի սայթաքի։ ²⁴ Եթե նստես, աներկյուղ կլինես, եթե քնես, քունդ քաղցր կլինի, ²⁵ և չես երկնչի վերահաս զարհուրանքներից, ոչ էլ ամբարիշտների եկող արշավանքներից։ ²⁶ Քանզի Տերը կլինի քո բոլոր ճանապարհներին, և ոտքդ կամրացնի, որ չսայթաքես։ ²⁷ Մի՛ դանդաղիր կարոտյալին բարիք անել, երբ կարողանաս նրան օգնել։ ²⁸ Մի՛ ասա, թե «Գնա՛, արի՛, վաղը կտամ», մինչդեռ կարող ես բարություն անել, քանզի չգիտես՝ վաղն ի՛նչ կբերի։ ²⁹ Չարիք մի՛ նյութիր բարեկամիդ դեմ, որ վստահել, հույս է դրել քեզ վրա։ ³⁰ Զուր տեղը մի՛ թշնամացիր մարդու հետ, որ քեզ չարիք չպատճառի. ³¹ Մի՛ ստացիր նախատինքները չարագործ մարդկանց և մի՛ նախանձիր նրանց ճանապարհներին։ ³² Քանզի ամեն անօրեն պիղծ է Տիրոջ առջև և չի հաղորդվում արդարների հետ։ ³³ Տիրոջ անեծքն ամբարիշտների տներում է, իսկ արդարների հարկերն օրհնվում են։ ³⁴ Տերը հակառակ է ամբարտավաններին, իսկ շնորհ է տալիս խոնարհներին։ ³⁵ Փառքն իմաստունները պիտի ժառանգեն, իսկ անմիտները պիտի փառաբանեն անարգանքները:

4

Ճառ Ե

¹ Մանուկնե՛ր, լսե՛ք ձեր հոր խրատը և անսացե՛ք ճանաչելու իմաստություն, ² քանզի ձեզ բարի պարգևներ պիտի պարգևեմ։ Մի՛ թողեք իմ օրենքները, ³ որովհետև ես ևս հնազանդ որդի եմ եղել հորս համար և սիրելի՝ մորս աչքին, ⁴ որոնք ուսուցանում էին ինձ և ասում. «Մեր խոսքը թող հաստատվի քո սրտում, պահի՛ր մեր պատվիրանները և ապրի՛ր, ⁵ իմաստությո՛ւն ստացիր, հանճա՛ր ստացիր և մի՛ մոռացիր, և մի՛ արհամարհիր իմ բերանի պատգամները, և մի՛ խոտորիր իմ շուրթերի խոսքերից։ ⁶ Մի՛ թող այդ, և նա կպատսպարի քեզ, սիրի՛ր այն, և նա կպահի քեզ»։ ⁷ Առաջինը իմաստությունն է։ Ձե՛ռք բեր այն, և ամեն ինչից առաջ ձե՛ռք բեր զգոնություն։ ⁸ Պարփակվի՛ր նրանով, և նա կբարձրացնի քեզ, մեծարի՛ր այն, և նա քեզ իր գիրկը կառնի, ⁹ շնորհի պսակը կդնի գլխիդ և վայելուչ պսակով վերակացու կլինի քեզ։

Ճառ Զ

¹⁰ Լսի՛ր, որդյա՛կ, և ընդունի՛ր իմ խոսքերը, և քո կյանքի տարիները կբազմանան, և կավելանան քո կյանքի ճանապարհները։ ¹¹ Իմաստության ճանապարհներն եմ քեզ ուսուցանում և խելամուտ դարձնում ուղիղ շավիղներին, ¹² որպեսզի եթե գնաս, ընթացքդ չխափանվի, եթե վազես, ապա չհոգնես։ ¹³ Ամո՛ւր պահիր իմ խրատը և բաց մի՛ թող, այլ պահի՛ր այն ինքդ քեզ համար կյանքիդ ընթացքին, ¹⁴ ամբարիշտների ճանապարհով մի՛ գնա, և մի՛ նախանձիր անօրենների ճանապարհներին, ¹⁵ և մի՛ անցիր այն տեղով, որտեղ նրանք են բնակվում։ ¹⁶ Հեռացի՛ր նրանցից և խորշի՛ր այնտեղից, քանզի չեն ննջում, եթե չարիք չեն գործում։ Նրանց քունը փախել է, և չեն ննջում, ¹⁷ ովքեր ամբարշտության կերակուր են ուտում և հարբում անօրենության գինով։ ¹⁸ Արդարների ճանապարհները ծագող լույսի են նման, որ առաջնորդում են և լուսավորում, մինչև օրը լուսավոր դառնա։ ¹⁹ Խավար են ճանապարհներն ամբարիշտների, և չգիտեն՝ ինչպե՜ս են գայթակղվում։

Ճառ Է

²⁰ Որդյա՛կ, անսա՛ իմ իմաստությանը և ակա՛նջ դիր իմ խոսքերին, ²¹ և քո աղբյուրները չեն ցամաքի։ Քո սրտի մե՛ջ պահիր դրանք, ²² քանզի կյանք են գտնողների, և բժշկություն՝ ամբողջ մարմնի համար։ ²³ Ողջ խնամքով պահի՛ր քո սիրտը, որովհետև դրանից է բխում կյանքի աղբյուրը։ ²⁴ Հեռո՛ւ վանիր քեզանից կամակոր բերանը և անիրավ շրթունքները մերժի՛ր քեզանից։ ²⁵ Թող քո աչքերն ուղիղ նայեն, և քո թարթիչները արդարությամբ թարթեն։ ²⁶ Ոտքիդ շավիղներն ուղի՛ղ դարձրու, և ուղղի՛ր ճանապարհները քո։ ²⁷ Մի՛ խոտորիր ո՛չ աջ, ո՛չ ձախ, չար ճանապարհից ոտքդ հեռացրո՛ւ։ ^27ա Դեպի աջ տանող ճանապարհները ճանաչում է Աստված, և թյուր են դեպի ձախ տանող ճանապարհները։ Աստված ուղիղ կանի քո շավիղները և քո ճանապարհը խաղաղությամբ կառաջնորդի։

5

Ճառ Ը

¹ Որդյա՛կ, անսա՛ իմ իմաստությանը և ակա՛նջ դիր իմ խոսքերին, ² որպեսզի բարի խորհուրդները պահես։ Քեզ եմ պատվիրում իմ շուրթերի իմաստությունը։ ³ Մի՛ նայիր չար կնոջը, որովհետև մեղր է ծորում պոռնիկի շուրթերից, որ առժամանակ քաղցրացնում է քիմքդ, ⁴ բայց հետո զգում ես, որ ավելի դառն է, քան լեղին, և ավելի կտրող, քան սուրը երկսայրի, ⁵ որովհետև նրա ոտքերը դեպի մահ են տանում, նրա քայլերը՝ դեպի դժոխք, հաստատուն չեն նրա հետքերը, ⁶ որովհետև կյանքի ճանապարհներով չի գնում, զեխ և անհայտ է նրա ընթացքը։ ⁷ Արդ, որդյա՛կ, լսի՛ր ինձ, և մի՛ արհամարհիր իմ խոսքերը, ⁸ քո ճանապարհները հեռացրո՛ւ նրանից, և մի՛ մոտեցիր նրանց տան դռներին, ⁹ որ քո կյանքը օտարներին չմատնես և քո ունեցվածքը՝ անողորմներին։ ¹⁰ Քո ուժով թող չզորանան օտարները, և քո վաստակը ուրիշների տունը չմտնի։ ¹¹ Որ հետո զղջաս, երբ քո մարմնի անդամները մաշվեն, ¹² ու ասես. «Ինչո՞ւ ատեցի խրատը, և հանդիմանությունից սիրտս խոտորվեց»։ ¹³ Ո՛չ իմ խրատատուի ձայնն էի լսում, ո՛չ էլ ականջ էի դնում իմ ուսուցչի խոսքերին. ¹⁴ քիչ էր մնացել, որ խորհրդի և ժողովրդի մեջ մասնակից դառնայի ամեն չարիքի։

Չորս նախազգուշացումներ

¹⁵ Ջուրը քո ամանի՛ց խմիր և քո ջրհորի ջրից։ ¹⁶ Թող քո ջրերը բխեն քո աղբյուրից, և քո հրապարակը թող հոսեն քո ջրերը։ ¹⁷ Դրանք միայն քոնը թող լինեն, և ո՛չ մի օտար չբաժանի քեզ հետ։ ¹⁸ Քո ջրի աղբյուրը թող առանձի՛ն լինի, և ուրա՛խ եղիր քո երիտասարդ օրերի կնոջ հետ, ¹⁹ եղնիկի պես սիրով և այծյամի պես շնորհագեղ լինի նա, հաճելի լինի քո իմաստությանը և քեզ հետ լինի ամեն ժամ, և եթե նրա սիրով գնաս, բազմապատիկ կլինես։ ²⁰ Մի՛ այցելիր օտարներին և մի՛ փարվիր այն կրծքին, որ քոնը չէ. ²¹ քանզի Աստծու աչքի առջև են տղամարդու ճանապարհները, և նա գիտի նրա բոլոր շավիղները։ ²² Անօրենությունները որսում են չարագործին. և յուրաքանչյուրը կապվում է իր մեղքերի թելերով, ²³ չխրատվելու պատճառով նա մեռավ անխրատների հետ և զրկվեց իր կյանքի երկարությունից ու կորավ անզգամության պատճառով։

6

¹ Որդյա՛կ, եթե քո բարեկամի համար երաշխավոր լինես, քո անձը կմատնես թշնամուն. ² որովհետև մարդու շրթունքները բուռն որոգայթ են իր համար, և բռնվում է իր բերանի խոսքով։ ³ Արդ, որդյա՛կ, արա՛, ինչ որ պատվիրում եմ քեզ, և կփրկվես, որովհետև չար մարդկանց ձեռքն ընկար բարեկամիդ համար։ Արդ, գոտեպնդվի՛ր և մի՛ հուսալքվիր և նույնը հորդորի՛ր քո բարեկամին, որին երաշխավորեցիր։ ⁴ Աչքերիդ քուն մի՛ տուր և թարթիչներիդ՝ նինջ, ⁵ որպեսզի փրկվես, ինչպես այծյամը դարանից և թռչունը՝ ծուղակից։

⁶ Մրջյունի մո՛տ գնա, ո՛վ ծույլ, քննի՛ր նրա ընթացքը և նրանից ավելի իմաստո՛ւն եղիր. ⁷ որովհետև նա հողագործ չէ և ոչ էլ հարկադիր և տեր չունի, ⁸ բայց ամռանը կերակուր է պատրաստում և հունձի ժամանակ ամբարում է առատ պաշարը։ ^8ա Կամ գնա՛ մեղվի մոտ, և սովորի՛ր, թե ի՜նչ գործունյա է, և թե ինչ պարկեշտությամբ է գործում, որի վաստակը մատուցում են թագավորներին և անտուններին՝ բժշկության համար։ Սիրելի է և մեծարելի է բոլորի համար, թեպետ տկար է զորությամբ, քանզի պատվեց իմաստությունը և հարգվեց։ ⁹ Ո՛վ ծույլ, մինչև ե՞րբ պիտի պառկած մնաս կամ ե՞րբ պիտի արթնանաս։ ¹⁰ Մի քիչ ննջես, մի քիչ նստես, մի քիչ նիրհես, մի քիչ ձեռքերդ կրծքիդ ծալես, ¹¹ Այնուհետև չար ուղևորի պես աղքատությունը կհասնի քո վրա, և կարիքը՝ ժիր սուրհանդակի պես։ ^11ա Իսկ եթե ժիր լինես, քո հունձքը կհասնի աղբյուրի նման, և կարիքը չար մարդու նման ինքնահալած կլինի։

¹² Անօրեն և անզգամ մարդը թյուր ճանապարհներով է գնում, ¹³ որովհետև ինքն է աչքերը թարթում, և ցույց տալիս ոտքերով և ուսուցանում մատների նշաններով։ ¹⁴ Խոտորված սիրտը չարիքներ է նյութում և ընդմիշտ խռովություն ստեղծում քաղաքում։ ¹⁵ Այդ իսկ պատճառով նրա կործանումը հանկարծակի կգա. կհաշմվի ու կմաշվի առանց բժշկության։

Աստծուն ատելի բաներ

¹⁶ Ուրախանում է այն ամենով, ինչ ատում է Տերը,

և կկործանվի իր անձի պղծության համար։

¹⁷ Կկործանվեն թշնամացող աչքերը,

անիրավ լեզուն,

արդար արյուն հեղող ձեռքերը,

¹⁸ չար խորհուրդ նյութող սիրտը,

և այն ոտքերը, որոնք շտապում են չարիքներ գործել,

¹⁹ անիրավ վկան բորբոքում է ստությունը

և գրգռություն գցում եղբայրների մեջ։

Ճառ Թ

²⁰ Որդյա՛կ, պահի՛ր հորդ օրենքները և մի՛ մերժիր մորդ խրատը։ ²¹ Ընդունի՛ր դրանք հոգուդ մեջ, և մտքումդ պահի՛ր ընդմիշտ. որպես մանյակ՝ պարանոցիցդ կախի՛ր։ ²² Երբ ճամփորդես, հե՛տդ վերցրու, քեզ հետ թող լինի. երբ ննջես, քեզ կպահպանի, երբ արթնանաս, քեզ զրուցակից կլինի։ ²³ Օրենքի պատվիրանը ճրագ է, խրատն ու հանդիմանությունը՝ կյանքի ճանապարհ և լույս։ ²⁴ Հեռու կպահի քեզ ամուսնացած կնոջից և օտար լեզվի չարախոսությունից։ ²⁵ Որդյա՛կ, թող քեզ չհաղթի ցանկությունը գեղեցկության, քո աչքերը թող չկապվեն նրանով, և մի՛ հրապուրվիր նրա թարթիչներով, ²⁶ քանզի պոռնիկ կնոջ գինը մի նկանակ հացի չափ է, որովհետև չար կինը պատվական մարդկանց հոգիներն է որսում։ ²⁷ Ո՞վ կարող է հուրը ծրարել իր գոգի մեջ, որ հանդերձը չայրի, ²⁸ կամ ո՞վ կարող է գնալ հրի կայծերի միջով առանց ոտքերն այրելու, ²⁹ այդպես էլ ով մտնի ամուսնացած կնոջ մոտ. առանց պատժի չի մնա, և ոչ ոք չի արդարանա, ով մերձենա նրան։ ³⁰ Զարմանքի ոչինչ չկա, եթե մեկը գողության մեջ բռնվի. գողանում է, որ հագեցնի անձն իր քաղցյալ, ³¹ իսկ եթե բռնվի, յոթնապատիկ կտուժի և իր անձը փրկելու համար իր ողջ ունեցվածքը պիտի տա։ ³² Իսկ եթե շնանա մտքի պակասության պատճառով, կորստի է մատնում իր անձը, ³³ ցավ և անարգանք պիտի կրի, և երբեք չի կորչելու նրա նախատինքը։ ³⁴ Նրա ամուսինը լի է նախանձով և սրտմտությամբ և չի խնայելու դատաստանի օրը, ³⁵ իր թշնամությունը չի փոխանակելու ոչ մի փրկագնով, նույնիսկ առատ կաշառքով։

7

Ճառ Ժ

¹ Որդյա՛կ, պահի՛ր իմ խոսքերը և իմ պատվիրանները պահի՛ր քո մեջ։ ^1ա Որդյա՛կ, պատվի՛ր Տիրոջը ու զորացի՛ր, և բացի նրանից ուրիշ ոչ մեկից մի՛ երկնչիր։ ² Որդյա՛կ, պահի՛ր իմ պատվիրանները և կապրես, նաև իմ խոսքերը, ինչպես աչքի բիբը։ ³ Կապի՛ր նրանք քո մատներին և գրի՛ր սրտիդ ամբողջ երկայնքով։ ⁴ Ասա՛ իմաստությանը քեզ քույր լինի, և հանճարը քեզ մտերի՛մ դարձրու, ⁵ որպեսզի քեզ պաշտպանեն օտար և չար կնոջից, երբ խոսքերի պատրանքներով նա քեզ հրապուրի։

⁶ Իր տան պատուհանից աչքը հառած հրապարակին՝ ⁷ նայում է անմիտ պատանիներին և ընտրում մի երիտասարդի, ⁸ որ անցում է հրապարակով, նրա տան անկյան մոտով։ ⁹ Երբ իջնում է երեկոյան խավարը, երբ մտնում է գիշերը, և դադարում շարժումը, ¹⁰ այդ կինը ընդառաջ է ելնում նրան պոռնկի կերպարանքով, ¹¹ որ խելքահան անի հրայրքով ու պագշոտությամբ։ Նա տանը չի մնում, ¹² թափառում է մերթ դրսում, մերթ դարանակալ լինում հրապարակի անկյուններում։ ¹³ Ապա տենչանքով համբուրում է մեկին և լրբենի տեսքով ասում նրան. ¹⁴ «Ես խաղաղության ուխտ էի արել, այսօր աղոթքս կատարեցի, ¹⁵ դրա համար ընդառաջ ելա քեզ. ցանկացա երեսդ տեսնել, և ահա գտա քեզ։ ¹⁶ Գահավորակս պատել եմ ծածկոցներով, եգիպտական պաստառներով զարդարել, ¹⁷ անկողինս կրոկոս ծաղիկով պատրաստել, և բնակարանս կինամոնով խնկել։ ¹⁸ Արի՛ մինչև առավոտ սիրով վայելենք և ցանկությանը տրվենք. ¹⁹ քանի որ ամուսինս տանը չէ, այլ հեռու ճանապարհ է գնացել, ²⁰ փողի քսակն իր ձեռքն է առել և շատ օրեր անց թերևս տուն գա»։ ²¹ Եվ մոլորեցնելով նրան բազում խոսքերով, խեղդող շուրթերով գայթակղելով նրան, ²² և նա հիմարացած գնալով կնոջ հետևից, ինչպես արջառը՝ կառափնարան, կամ ինչպես շունը՝ թոկը վզին, ²³ կամ ինչպես եղջերուն՝ լյարդից նետահարված, և թռչնի նման շտապում է դեպի ծուղակը ու չի գիտակցում, որ կորստի է մատնում իր հոգին։ ²⁴ Արդ, որդյա՛կ, լսի՛ր ինձ, և անսա՛ իմ բերանի խոսքերին։ ²⁵ Մի՛ շեղիր սիրտդ դեպի նրա ճանապարհները և մի՛ մոլորվիր նրա շավիղներում, ²⁶ որովհետև շատերին խոցոտելով՝ տապալել է, և բազում են նրա կողմից սպանվածները։ ²⁷ Նրա տունը դժոխքի ճանապարհներ են, որոնք իջեցնում են մահվան շտեմարանները։

8

Օրհներգ Դ

¹ Դրա համար դու քարոզի՛ր իմաստությունը,

որ հանճարը արձագանքի քեզ։

² Որովհետև լեռների կատարին է գտնվում և շավիղների վրա է հասել,

³ հզորների դռան առջև է գտնվում,

և երգում է նրանց մուտքերին։

⁴ «Աղաչում եմ ձեզ, ո՛վ մարդիկ,

և իմ ձայնը բաշխում մարդու որդիներին։

⁵ Պարզամիտնե՛ր, իմացե՛ք խորագիտություն,

ո՛վ անխրատներ, խրա՛տ դրեք ձեր սրտերում,

⁶ ունկնդրե՛ք ինձ. պարկեշտ խոսքեր պիտի բարբառեմ,

և իմ շուրթերից ուղիղ խոսքեր պիտի բխեցնեմ,

⁷ Որովհետև իմ կոկորդը ճշմարտություն է կոփում,

և պիղծ են իմ առջև սուտ շուրթերը։

⁸ Արդար են իմ բերանի բոլոր խոսքերը,

և նրանց մեջ ոչինչ չկա ծուռ և թյուր,

⁹ ամեն ինչ ուղիղ է իմաստունների համար,

և արդար նրանց համար, որ ձգտում են գիտության»։

¹⁰ Խրա՛տ ձեռք բերեք և ոչ թե արծաթ,

գիտություն և ոչ թե ընտիր ոսկի։

¹¹ Իմաստությունը թանկագին քարերից լավ է,

և ոչ մի թանկարժեք բան չարժե նրան։

¹² Ես՝ իմաստությունս, բնակվեցի խորագիտության մեջ,

խորհուրդները ու գիտությունը կանչեցի։

¹³ Տիրոջից երկյուղը անիրավություն ատելն է,

Ինչպես նաև ատելը թշնամությունը, հպարտությունը և չարի ճանապարհները։

¹⁴ Իմն են խորհուրդն ու զգուշությունը,

իմն են հանճարն ու զորությունը։

¹⁵ Ինձնով են թագավորները թագավորում,

և հզորները՝ արդարություն սահմանում։

¹⁶ Ինձնով մեծամեծները բարձրանում են,

և բռնակալները՝ տիրում երկրին։

¹⁷ Ես սիրում եմ ինձ սիրողներին.

ով փնտրում է ինձ, շնորհ կգտնի։

¹⁸ Իմն են հարստությունն ու փառքը,

շատ ստացվածքն ու արդարությունը։

¹⁹ Լավ է ի՛նձ ստանալ, քան ոսկի և անգին քարեր,

և ի՛մ արդյունքը, քան ոսկի և ընտիր արծաթ։

²⁰ Ես գնում եմ արդարության ճանապարհներով

և շրջում արդարության շավիղներով,

²¹ որ սիրելիներիս հարստություն բաշխեմ

և նրանց գանձարանները բարությամբ լցնեմ։

^21ա Որպեսզի պատմեմ ձեզ,

թե ի՛նչ է լինելու ամեն օր,

և հիշեցնեմ,

թե ի՛նչ է եղել ի սկզբանե։

²² Տերն ինձ ստեղծեց իր ճանապարհի սկզբին՝ իր գործերի համար.

²³ հավիտենությունից էլ առաջ հաստատեց ինձ։

Ինձ ծնեց հենց սկզբից,

²⁴ երկիրն ստեղծելուց առաջ,

և նախքան անդունդներ կբացեր,

և աղբյուրների ջրեր կբխեցներ,

²⁵ նախքան կհաստատեր լեռներն ու բոլոր բլուրները։

²⁶ Տերն ստեղծեց շեն և անշեն

և բնակելի ծայրամասերը երկնքի ներքո։

²⁷ Ես նրա հետ էի, երբ պատրաստում էր երկինքը,

երբ իր աթոռն էր հաստատում հողմերի վրա,

²⁸ երբ զորացնում էր վերին ամպերը,

երբ աղբյուրներ էր հաստատում երկնքի ներքո։

²⁹ Երբ նա դնում էր ծովի հաստատությունը,

որպեսզի ջրերը չանցնեն նրա ափերը,

երբ նա դնում էր երկրի ամուր հիմքերը,

³⁰ ես նրա մոտ էի որպես սպասավոր։

Ինձնով էր Տերն ուրախանում մշտապես,

և ես ցնծում էի նրա առջև ամեն ժամ

³¹ հրճվում էի տիեզերքով բովանդակ

և ուրախ էի մարդկանց որդիների մեջ։

³² Արդ, որդյա՛կ, լսի՛ր ինձ.

երանելի են նրանք, որ պահում են իմ ճանապարհները։

³³ Լսե՛ք իմաստությունը

և իմաստուն կլինեք.

ու մի՛ շեղվեք։

³⁴ Երանելի է այն մարդը, որ կլսի ինձ,

և այն մարդը, որ կպահի իմ ճանապարհները,

իմ դռների մոտ հարատև կտքնի

և կպահպանի իմ դռների մուտքերը։

³⁵ Իմ ուղիները կյանքի ուղիներ են.

Տերն է սահմանել իմ կամքը։

³⁶ Ովքեր մեղանչում են իմ դեմ,

ամբարշտանում են իրենց հոգիներում,

և ովքեր ատում են ինձ,

մահն են սիրում։

9

Օրհներգ Ե

¹ Իմաստությունը իր տունը շինեց և յոթ սյուներ կանգնեցրեց,

² մորթեց իր անասունները, հանեց իր գինին

և պատրաստեց իր սեղանը։

³ Առաքեց իր ծառաներին՝

կանչելու բարձր ձայնով իր հացկերույթին, և ասաց.

⁴ «Ով անզգամ է, թող գա ինձ մոտ»։

Իսկ պակասամիտներին ասաց.

⁵ «Եկեք կերե՛ք իմ հացից և խմե՛ք իմ գինուց,

որ հանեցի ձեզ համար։

⁶ Թողե՛ք անզգամությունը, և դուք կապրեք,

իմաստությո՛ւն փնտրեք, և դուք կփրկվեք,

գիտությա՛մբ ուղղեք հանճարը

և ճի՛շտ ըմբռնեք խրատը»։

⁷ Ով խրատում է չարերին,

անարգում է իր անձը,

ով հանդիմանում է ամբարիշտներին,

ատում է իր անձը։

⁸ Մի՛ հանդիմանիր չարերին, որ քեզ չատեն,

հանդիմանի՛ր իմաստունին, և կսիրի քեզ,

հիմարին, և նա ավելի կատի քեզ։

⁹ Իմաստունին ասա՛ պատճառը,

և նա ավելի իմաստուն կդառնա,

տեղեկացրո՛ւ արդարին,

և նա կավելացնի ընկալումը։

¹⁰ Իմաստության սկիզբը երկյուղն է Տիրոջից,

սրբերի խորհուրդը՝ հանճար,

^10ա օրենքի իմացությունը մտքի հարստություն է։

¹¹ Այս օրինակով դու երկար կապրես,

և կավելանան քո կյանքի տարիները։

¹² Որդյա՛կ, եթե իմաստուն լինես,

պիտի լինես քեզ համար և քո ընկերների.

եթե անզգամ լինես, միայն չարիք պիտի գտնես։

^12ա Ով ստի վրա է հաստատվում,

նա հողմեր է արածեցնում

կամ թևավոր թռչուններ է փորձում բռնել.

քանզի թողած իր այգու ճանապարհները՝

մոլորվում է իր արտի շավիղներում,

գնում է անջրդի դաշտ ու անապատ

և ծարավուտ հողից իր ձեռքով ոչ մի պտուղ չի հավաքում։

¹³ Անզգամ և հանդուգն կինը հացի կարոտ պիտի մնա,

ու նաև նա, ով ամոթ չի զգում։

¹⁴ Աթոռով նստում է իր տան դռանը,

քաղաքի հրապարակներում

¹⁵ և կպչում իրենց ուղիղ ճանապարհներով

գնացող անցորդներին.

¹⁶ «Ով ձեր մեջ առավել հիմար է,

ինձ մոտ թող գա»,

իսկ պակասամիտներիդ հրամայում եմ և ասում.

¹⁷ «Թաքուն կերած հացը համով է,

գողացված ջուրը քաղցր է խմվում»։

¹⁸ Եվ չգիտի, որ երկրածինները պիտի կորչեն իր մոտ,

և դժոխքի խորքերը պիտի հասնեն։

^18ա Իսկ դու թռի՛ր հեռու և մի՛ մնա նրա մոտ,

և աչքդ մի՛ դիր նրա վրա,

որ այդպես անցնես օտար ջրից,

և անցնես օտար գետից,

հեռու մնաս օտար ջրից

և ջուր չխմես օտար աղբյուրից.

որպեսզի երկար ապրես,

և ավելանան կյանքիդ տարիները։

10

Սողոմոնի իմաստուն խոսքերի առաջին ժողովածուն

¹ Իմաստուն որդին ուրախացնում է հորը, անմիտ որդին տրտմություն է մոր համար։

² Անօրեններին գանձերը չեն օգնի, իսկ արդարությունը փրկում է մահից։

³ Տերն արդարին սովամահ չի անում, իսկ ամբարիշտների կյանքը պիտի կործանի։

⁴ Ծույլ ձեռքերը աղքատություն են բերում, ժրաջանների ձեռքերը՝ հարստություն։

^{4ա Կրթված որդին իմաստուն կլինի, իսկ անմիտը ծառայության կտրվի:}

⁵ Իմաստուն որդին կազատվի խորշակից, իսկ տգետը հունձի ժամանակ կդառնա որդի անօրեն։

⁶ Տիրոջ օրհնությունն արդարների գլխին է, ամբարիշտների բերանը կփակվի տարաժամ սուգով։

⁷ Արդարների հիշատակը պիտի ներբողվի, իսկ ամբարիշտների անունը պիտի ջնջվի։

⁸ Իմաստունի սիրտն ընդունում է խորհուրդներ, իսկ անտունը, գայթակղելով շուրթերով, պիտի կործանվի։

⁹ Ողջմտությամբ գնացողը գնում է վստահությամբ, իսկ ճանապարհից շեղվողը, աննկատ չի մնա։

¹⁰ Ով ակնարկում է նենգ աչքով, մարդկանցից տրտմություն պիտի կրի, ով հանդիմանում է համարձակությամբ, խաղաղություն է բերում։

¹¹ Կյանքի աղբյուրն արդարի ձեռքում է, կորուստը կփակի ամբարիշտի բերանը։

¹² Ատելություն է գրգռում հակառակությունը, բայց սերը պարուրում է նրանց, ովքեր չեն հակառակվում։

¹³ Ում շուրթերից իմաստություն է բխում, գավազանի նման հարվածում է անմիտին։

¹⁴ Իմաստունները իմաստություն են գանձում, հանդուգնի բերանը մոտ է կործանման։

¹⁵ Մեծատունների հարստությունն ամուր պահպանում է իրեն, իսկ աղքատությունը կործանում է աղքատներին։

¹⁶ Արդարների գործերը կյանք են պարգևում, ամբարիշտների պտուղները՝ մեղքեր։

¹⁷ Կյանքի ճանապարհները Տերն է պահպանում։ Խրատն առանց հանդիմանության սխալ է։

¹⁸ Արդար շուրթերը ծածկում են թշնամությունը, իսկ բամբասանք նյութողներն անմիտներ են։

¹⁹ Շատախոսությամբ մեղքի մեջ կընկնես. եթե շուրթերդ զսպես, իմաստուն կլինես։

²⁰ Արդարի լեզուն ընտիր արծաթ է, ամբարիշտի սիրտը պիտի նվաղի։

²¹ Արդարների շուրթերը ճանաչում են բարձրերին, իսկ անմիտները պիտի կործանվեն կարիքից։

²² Արդարների գլխին է Տիրոջ օրհնությունը, որ հարստացնում է նրանց և չի ավելացնում նրանց սրտի տրտմությունը։

²³ Անմիտը ծիծաղելով չարիք է գործում, իսկ մարդու իմաստությունը՝ հանճար գոյացնում։

²⁴ Ամբարիշտը շրջում է կորստի մեջ, իսկ արդարի ցանկությունը ընդունելի է։

²⁵ Ինչպես որ մրրիկն է անցնում, այնպես էլ ամբարիշտը կկորչի, իսկ արդարը հավիտյան հաստատուն կմնա։

²⁶ Ինչպես ազոխը վնասակար է ատամներին, և ծուխը՝ աչքերին, այդպես էլ անօրենությունը՝ դրանով առաջնորդվողներին։

²⁷ Տիրոջից երկյուղն ավելացնում է կյանքի օրերը. ամբարիշտների տարիները պիտի կրճատվեն։

²⁸ Արդարների ուրախությունը պիտի երկարի, ամբարիշտների հույսը պիտի կորչի։

²⁹ Տիրոջից երկյուղն ամրոց է սրբերի համար, և բեկում՝ չարիք գործողների համար։

³⁰ Արդարը երբեք չպիտի դողա, ամբարիշտները չպիտի բնակվեն երկրի վրա։

³¹ Արդարի բերանից իմաստություն է բխում. անիրավի լեզուն պիտի կործանվի։

³² Արդար մարդկանց շուրթերը պիտի շնորհներ բխեցնեն, ամբարիշտների բերանը պիտի կործանվի։

11

¹ Կեղծ կշեռքը պիղծ է Տիրոջ առջև, իսկ արդար կշեռքն ընդունելի է նրան։

² Ուր թշնամանք է մտնում, այնտեղ է նաև անարգանքը։ Խոնարհների բերանը իմաստություն է խորհում։

³ Ուղիղների կատարելությունը առաջնորդելու է իրենց, իսկ արհամարհողների գայթակղությունը կործանելու է իրենց։

⁴ Ունեցվածքը չի օգնի դատաստանի օրը, այլ արդարությունը կփրկի մահից։ Արդարը մեռնելով մեծ ափսոսանք է թողնում, ամբարիշտների կորուստը բիրտ ու անարգ կլինի։

⁵ Մաքուր մարդու արդարությունն ուղղում է ճանապարհները, իսկ անիրավը մատնվում է ամբարշտության։

⁶ Ուղղամիտների արդարությունը փրկում է իրենց, իսկ անօրենները պիտի կորչեն անմտությամբ։

⁷ Արդար մարդու վախճանումով նրա հույսը չի կորչում, բայց ամբարիշտների պարծանքը պիտի կորչի։

⁸ Արդարը որսացողներից պիտի ազատվի, նրա փոխարեն ամբարիշտը պիտի բռնվի։

⁹ Անօրենների բերանը որոգայթ է ընկերներին, իսկ արդարների իմաստությունը հաջողություն է։

¹⁰ Արդարների բարությամբ կառուցվում է քաղաքը, իսկ ամբարիշտների կորստյամբ ուրախություն է լինում։

¹¹ Ուղղամիտների օրհնությամբ բարձրանում է քաղաքը, բայց կկործանվի ամբարիշտների բերանով։

¹² Պակասամիտն արհամարհում է ընկերներին, իմաստուն մարդը լռություն է սիրում։

¹³ Երկերեսանի մարդը գաղտնիքը հայտնում է ատյանում, իսկ վստահելի մարդը ծածկում է իրողությունը։

¹⁴ Առաջնորդ չունեցողները կթափվեն տերևների նման, բազում խորհուրդներով փրկություն կգտնվի։

¹⁵ Անզգամը չարիք է գործում, երբ խառնվում է արդարներին և ատում է զգուշության ձայնը։

¹⁶ Շնորհալի կինը բարձրացնում է ամուսնու փառքը, իսկ իրավունքն ատող կինը անարգանքի աթոռ է։ Ծույլերը կարոտ պիտի մնան հարստությանը, իսկ ժրաջանները կհաստատվեն հարստության մեջ։

¹⁷ Ողորմած մարդը բարիք է գործում իր հոգուն, իսկ անողորմը կործանում է իր մարմինը։

¹⁸ Ամբարիշտն անիրավ գործեր է անում, իսկ արդարների զավակը ճշմարտության վարձն է։

¹⁹ Արդար որդին կյանքի համար է ծնվում, իսկ ամբարիշտը հալածում է մահը։

²⁰ Աստծու համար պիղծ են թյուր ճանապարհները, և նրան ընդունելի են ուղիղ ճանապարհով ընթացողները։

²¹ Անիրավ մարդուն երաշխիք կանգնողը անպատիժ չի մնա։ Իսկ ով արդարություն է սերմանում, արժանի վարձ կստանա։

²² Ինչպես ոսկե գինդը խոզի քթին, այնպես է գեղեցկությունը չարաբարո կնոջ համար։

²³ Արդարների ցանկությունն ամբողջովին բարի է, իսկ ամբարիշտի հույսը պիտի կորչի։

²⁴ Կան, որ բաշխում են իրենց ունեցածը և ստանում են բազմապատիկ, և կան, որ անհագ հավաքում են, բայց մնում են կարոտյալ։

²⁵ Ամեն անկեղծ անձ օրհնված է, իսկ բարկացող մարդը տգեղ է կերպարանքով։

²⁶ Ով ցորենը խնայի, պիտի թողնի օտարներին. ով կուտակի, հրապարակավ պիտի անիծվի, իսկ ով բաշխի առատորեն, կօրհնվի։

²⁷ Ով բարիք է անում, բարության շնորհ կգտնի, իսկ ով չարիք է անում, չարիքը կհասնի նրան։

²⁸ Ով հույսը դնում է հարստության վրա, պիտի կործանվի, իսկ ով օգնում է արդարներին, պիտի պայծառանա։

²⁹ Ով չի հոգում իր տան մասին, հողմի բաժին է դառնալու, և անմիտը ծառայելու է իմաստունին։

³⁰ Արդարության պտղից է բուսնում կյանքի ծառը, անօրեն անձինք տարաժամ պիտի վերանան։

³¹ Եթե արդարը հազիվ է փրկվում, ի՞նչ կլինի ապա մեղավորի և ամբարիշտի վերջը։

12

¹ Ով խրատ է սիրում, նաև իմաստություն է սիրում. և ով ատում է հանդիմանությունը, անմիտ է։

² Լավ է նրա համար, ով Տիրոջից շնորհ է գտնում, իսկ անօրեն մարդը պիտի կարկամի։

³ Մարդ անօրենությամբ հաջողության չի հասնի. արդարների արմատները չպիտի կտրվեն։

⁴ Առաքինի կինը պսակն է իր ամուսնու. ինչպես որդն է վնասակար փայտի համար, այնպես էլ չարագործ կինը կորստյան կմատնի իր ամուսնուն։

⁵ Արդարների խորհուրդները ճիշտ վճիռներ են, իսկ ամբարիշտները առաջնորդներն են նենգությունների։

⁶ Նենգավոր են ամբարիշտների բերանները. ուղղամիտների բերանն իրենց կփրկի։

⁷ Որ կողմ էլ դառնա ամբարիշտը, պիտի կործանվի, արդարների տները պիտի հարատևեն։

⁸ Մարդկանցից պիտի գովվի իմաստունի բերանը, իսկ ծուռ սիրտ ունեցողը պիտի արհամարհվի։

⁹ Մարդու համար լավ է խոնարհությամբ ապրել, քան իր անձը մեծարել, բայց հացի կարոտ մնալ։

¹⁰ Արդարը կարեկցում է իր անասունին, իսկ ամբարիշտների աղիները անողորմ են։

¹¹ Ով մշակում է իր հողը, պիտի հագենա հացով, իսկ ով նանրության հետևից է գնում, պակասամիտ է։

^11ա Ով գինարբուքի վայրերում է դեգերում, անարգանք է թողնելու իր ընտանիքին։

¹² Ամբարիշտների ցանկությունները չար են, իսկ բարեպաշտների արմատները՝ հաստատուն։

¹³ Մեղսալիցը շրթունքներով կընկնի մեղքի որոգայթի մեջ, իսկ արդարը կխուսափի դրանից։

^13ա Բարեսեր մարդը գթություն է գտնում, դռների մեջ զազրախոսը նեղություն է պատճառում մարդկանց։

¹⁴ Իր բերանի պտղի բարիքով մարդ պիտի լցվի, և իր շուրթերի տվածի համեմատ՝ հատուցում ստանա։

¹⁵ Անմիտներին իրենց ճանապարհներն ուղիղ են թվում։ Իմաստունն ունկնդիր է լինում խրատին,

¹⁶ իսկ անմիտը նույն պահին հայտնի է դարձնում իր բարկությունը։ Խորագետ մարդը թաքցնում է իր անարգանքը.

¹⁷ արդարը ծանուցում է ճշմարտությունը հայտնի կերպով. անօրենի վկայությունը նենգամիտ է։

¹⁸ Կան մարդիկ, որ իրենց խոսքով խոցում են սրի պես, բայց իմաստունների լեզուները բուժում են։

¹⁹ Ճշմարիտ շուրթերը հաստատում են վկայությունը, իսկ ստախոս լեզուն վայրկյանի կյանք ունի։

²⁰ Չար նյութողի սրտում նենգություն կա, իսկ ովքեր խաղաղություն են ուզում, պիտի ուրախանան։

²¹ Ոչ մի անիրավ բան չի դիպչի արդարին, իսկ ամբարիշտներին ծածկելու են տանջանքները։

²² Տիրոջ առջև պիղծ են ստախոս շուրթերը, իսկ հավատարիմ մարդը ընդունելի է նրան։

²³ Իմաստուն մարդը խորագիտության գահն է, անզգամների սիրտը նզովքի պիտի ենթարկվի։

²⁴ Ընտրյալների ձեռքը դյուրին պիտի հաղթի, նենգավորները պիտի հափշտակվեն։

²⁵ Ահեղ խոսքը խռովում է արդարի սիրտը, բարի խոսքը ուրախացնում է նրան։

²⁶ Իրավախոհ արդարը սիրում է իր անձը, ամբարիշտների խորհուրդները կեղծ են։ Չարիքները հալածում են մեղավորներին, բարիքները պիտի հասնեն արդարներին։ Ամբարիշտների ճանապարհները մոլորեցնում են նրանց.

²⁷ որսը չի պատահում նենգավորին։ Սուրբ մարդու ունեցվածքը պատվական է և առատ։

²⁸ Արդարության ճանապարհը դեպի կյանք է տանում, ոխակալների ճանապարհը՝ դեպի մահ։

13

¹ Խելացի որդին հնազանդ է հորը, անհնազանդ որդին կորստյան պիտի մատնվի։

² Բարի մարդը առատորեն պիտի ուտի արդարության պտղից, իսկ անօրեն անձինք տարաժամ պիտի կործանվեն։

³ Իր բերանը փակողը պիտի պահպանի իր անձը, իսկ ով հանդուգն է շուրթերով, պիտի խռովի իր հոգին։

⁴ Ծույլը միշտ կարիքի մեջ պիտի մնա, իսկ ժրաջան ձեռքը լուծում կգտնի։

⁵ Արդարն ատում է անիրավ խոսքը, իսկ ամբարիշտը պիտի ամաչի և վստահություն չգտնի։

⁶ Արդարությունն անմեղներին պահում է ճանապարհներին, մեղքերն անզգամ են դարձնում ամբարիշտներին։

⁷ Կան, որ իրենց հարուստ են ցույց տալիս, բայց ոչինչ չունեն, կան, որ իրենց խոնարհ են պահում, բայց լի են մեծ հարստությամբ։

⁸ Մարդու հարստությունը իր անձի փրկագինն է, իսկ աղքատը չի հանդարտվում պատուհասներից։

⁹ Արդարների լույսը մշտատև է, ամբարիշտների լույսը պիտի մարի։

^9ա Նենգավոր անձինք պիտի մոլորվեն մեղքերի մեջ, իսկ արդարները ողորմություն և գթություն պիտի գտնեն։

¹⁰ Անզգամը ամբարտավանությամբ չարիք է գործում, իսկ իրավախոհները իմաստուն են։

¹¹ Անիրավությամբ կուտակված հարստությունը պիտի պակասի, իսկ աստվածապաշտությամբ հավաքվածը պիտի բազմանա։

¹² Լավ է ի սկզբանե օգնել սրտով, քան խոստանալ և հույսով անել։ Արդարը ողորմում և փոխ է տալիս. բարի ցանկությունը կյանքի ծառ է։

¹³ Ով ինչ արհամարհի, դրանով էլ պիտի արհամարհվի. ով երկնչում է պատվիրանից, լավ պիտի լինի։

^13ա Նենգավոր որդին բարիք չի գտնի, իմաստուն ծառայի գործերը պիտի հաջողվեն, և ուղիղ պիտի ընթանան նրա ճանապարհները։

¹⁴ Իմաստունի համար օրենքը կյանքի աղբյուր է, իսկ անմիտը որոգայթի մեջ պիտի մեռնի։

¹⁵ Բարի իմաստությունը շնորհ է տալիս, իսկ օրենքի ճանաչումը մտքի բարիք է. արհամարհողների ճանապարհը կորստյան է տանում։

¹⁶ Ամեն խորագետ իմաստությամբ է գործում, իսկ անմիտը իր անձով չարիք է տարածում։

¹⁷ Հանդուգն թագավորը չարիքի մեջ պիտի ընկնի, բայց հավատարիմ պատգամաբերը կփրկի նրան։

¹⁸ Խրատը հեռու է վանում աղքատությունն ու անարգանքը, իսկ հանդիմանություն լսողը պիտի փառավորվի։

¹⁹ Բարեպաշտների ցանկությունները քաղցրացնում են հոգին. ամբարիշտների գործերը հեռու են ճանաչողությունից։

²⁰ Իմաստունների հետ ընթացողը իմաստուն կլինի, անզգամներին ընկերացողը հայտնի կդառնա։

²¹ Չարիքները հալածում են մեղավորներին, իսկ բարիքները պիտի հասնեն արդարներին։

²² Անարատը ժառանգություն պիտի թողնի թոռներին, ամբարիշտների հարստությունը արդարները պիտի գանձեն։

²³ Արդարները երկար տարիներ պիտի վայելեն հարստությունը, անիրավները արագորեն պիտի կորչեն։

²⁴ Ով խնայում է իր գավազանը, ատում է իր որդուն. իսկ ով սիրում է որդուն, խնամքով է խրատում։

²⁵ Արդարն ուտելիս հագեցնում է իր հոգին, ամբարիշտների հոգիները անկուշտ են միշտ։

14

¹ Իմաստուն կանայք կառուցում են իրենց տները, իսկ անզգամները կործանում իրենց ձեռքերով։

² Ուղիղ ընթացողը երկնչում է Տիրոջից, իսկ ով կամակորում է իր ճանապարհին, պիտի անարգվի։

³ Անզգամների բերանները թշնամանքի գավազաններ են, իմաստունների շուրթերը պահպանում են նրանց։

⁴ Որտեղ եզներ չկան, մաքուր են մսուրները, որտեղ առատ հունձք կա, հայտնի է եզան զորությունը։

⁵ Հավատարիմ վկան չի ստում, անիրավ վկան ստություն է բորբոքում։

⁶ Եթե չարերի մոտ իմաստություն փնտրես, չես գտնի, իսկ իմաստունների մոտ հանճար դյուրին կգտնես։

⁷ Ամեն ինչի հակառակ է անզգամը, իմաստուն շուրթերը հանճարի զենքն են։

⁸ Խորագետների իմաստությունը հայտնի է նրանց ճանապարհից, իսկ անզգամների անմտությունը՝ մոլորությունից։

⁹ Անօրենների տները մաքրվելու կարիք ունեն, իսկ արդարների տներն ընդունելի են։

¹⁰ Զգայուն մարդու սիրտը զգում է իր հոգու տանջանքը, իսկ ուրախության պահին չի ամբարտավանանում։

¹¹ Ամբարիշտների տները պիտի կործանվեն, արդարների վրանները՝ օրհնվեն։

¹² Կան ճանապարհներ, որ ուղիղ են թվում մարդկանց, բայց նրանց վերջը դժոխքի հատակն է հասնում։

¹³ Ուրախությանը տրտմություն չի խառնվում, բայց ուրախությունը կարող է փոխվել սգի։

¹⁴ Անգութը պիտի հագենա իր ճանապարհներից, իսկ բարի մարդը ուղղվելու է իր խոհերի շնորհիվ։

¹⁵ Անմեղը հավատում է ամեն խոսքի, իսկ խորամանկը պիտի զղջա։

¹⁶ Իմաստունը զարհուրելով խոտորում է չարից, իսկ անզգամն ինքնավստահ խառնվում է անօրենի հետ։

¹⁷ Բարկասիրտ մարդը գործում է առանց խորհելու, իսկ իմաստունը չափազանց համբերատար է։

¹⁸ Ամբարիշտների բաժինը չարիքները պիտի լինեն, իսկ խորագետները պիտի զորանան իմաստությամբ։

¹⁹ Չարերը պիտի գայթակղվեն բարիների առջև, ամբարիշտները պիտի ծառայեն արդարների դռների մոտ։

²⁰ Մարդիկ ատում են իրենց աղքատ ընկերներին, իսկ հարուստների ընկերները շատ են։

²¹ Ով անարգում է աղքատին, մեղք է գործում, իսկ ով ողորմում է աղքատին, երանելի է։

²² Մոլորյալները չարիքներ են նյութում, բարիները՝ ողորմություն և ճշմարտություն։ Չարիքներ նյութողները չեն ճանաչում ողորմությունն ու հավատը, իսկ բարիքներ ծրագրողները ձեռք կբերեն հարգանք, վստահություն։

²³ Ով աշխատում և մի բան է ավելացնում, իմաստություն է, իսկ անհոգը կարիքի մեջ պիտի ընկնի։

²⁴ Իմաստունների պսակը խորագիտությունն է, իսկ անմիտների ուղին՝ չարությունը։

²⁵ Հավատարիմ վկան հոգի է փրկում չարից, իսկ նենգավորը բորբոքվում է ստությամբ։

²⁶ Տիրոջից երկյուղի մեջ զորեղ հույս կա և իր որդիներին խաղաղության ապավեն է։

²⁷ Տիրոջ հրամանը կյանքի աղբյուր է, որը խուսափել է տալիս մահվան որոգայթից։

²⁸ Թագավորի փառքն իր բազում զորքերի մեջ է, իշխանների կործանումը՝ իրենց ժողովրդի պակասելու։

²⁹ Երկայնամիտ մարդը լի է իմաստությամբ, իսկ կարճամիտը՝ հույժ անմիտ է։

³⁰ Հեզ մարդը իր սրտի բժիշկն է, հոգսատար սիրտը՝ ցեց ոսկորներին։

³¹ Աղքատին զրպարտողը բարկացնում է նրա Արարչին, իսկ ով պատվում է նրան, ողորմում է աղքատին։

³² Ամբարիշտը պիտի մերժվի իր չարիքի պատճառով, իսկ իր հոգու սրբության ձգտողն արդար կլինի։

³³ Իմաստությունը բարի մարդու սրտում է հանգչում, իսկ անմիտների սիրտը չի ճանաչում այն։

³⁴ Արդարությունը բարձրացնում է ազգը, իսկ մեղքը ազգեր է նվաստացնում։

³⁵ Իմաստուն սպասավորը հաճելի է թագավորին. և իր փութկոտությամբ թոթափում է անարգանքը։

15

¹ Բարկությունը կործանում է իմաստուններին։ Քաղցր պատասխանը մեղմացնում է սրտմտությունը, իսկ խիստ խոսքը բարկություն է բարձրացնում։

² Իմաստունների լեզուն գիտի բարին, անզգամների բերանը պատմում է չարիքներ։

³ Տիրոջ աչքն ամեն տեղ դիտում է չարերին և բարիներին։

⁴ Լեզվի հոգածությունը կյանքի ծառ է. ով հսկում է այն, իր հոգին պիտի լցվի։

⁵ Անզգամն անարգում է հոր խրատը, իսկ ով ընդունում է հանդիմանությունը, խորագետ է։

⁶ Արդարության բազմացումով շատանում է զորությունը, իսկ ամբարիշտները արմատախիլ լինելով պիտի կորչեն երկրից։ Արդարների տները պիտի մնան մեծ զորությամբ, իսկ ամբարիշտների պտուղները պիտի կորչեն։

⁷ Իմաստունների շուրթերը շաղ են տալիս իմաստություն, իսկ անմիտների սրտերը չեն կարող հաստատ լինել։

⁸ Ամբարիշտների զոհերը պիղծ են Տիրոջ առջև, ուղղամիտների աղոթքն ընդունելի է նրան։

⁹ Ամբարիշտների ճանապարհները պիղծ են Տիրոջ առջև, իսկ ով արդարությանն է հետևում, Տերը սիրում է նրան։

¹⁰ Անմեղի խրատն ընդունելի է մերձավորներին, իսկ ով ատում է հանդիմանությունը, պիտի վախճանվի անարգանքով։

¹¹ Դժոխքն ու կործանումը հայտնի են Տիրոջ առջև, ինչո՞ւ ոչ՝ նաև մարդկանց սրտերը։

¹² Անուղղելին չի սիրում իրեն հանդիմանողին և չի խոսում իմաստունների հետ։

¹³ Սրտի բերկրանքից ծաղկում է դեմքը, իսկ տրտում հոգին՝ թախծալի շրջում։

¹⁴ Ուղիղ սիրտը փնտրում է իմաստությունը, անխրատ մարդկանց բերանը չարիքի է հանդիպելու։

¹⁵ Չարի աչքերը ամեն ժամ սպասում են չարիքների, իսկ բարիները պիտի հանդարտվեն ամեն ժամ։

¹⁶ Լավ է քիչը՝ Տիրոջ հանդեպ երկյուղով, քան թե մեծ գանձը՝ աներկյուղածությամբ։

¹⁷ Լավ է բանջարեղենի ճաշը՝ սիրով ու շնորհով, քան թե պարարտ արջառի միսը՝ թշնամությամբ։

¹⁸ Բարկացող մարդը կռիվ է հարուցում, իսկ երկայնամիտը խաղաղեցնում է եկող կռիվը։

^18ա Երկայնամիտ մարդը մեղմում է դատաստանը, իսկ ամբարիշտը ավելի է գրգռում։

¹⁹ Ծույլերի ճանապարհները ծածկված են փշերով, իսկ ժիրերինը՝ բաց են։

²⁰ Իմաստուն որդին ուրախացնում է հորը, անմիտ որդին արհամարհում է մորը։

²¹ Անմիտի սիրտը կարոտ է իմաստության, իմաստուն մարդն ընթանում է ուղիղ ճանապարհով։

²² Նրանք ուշացնում են իրենց խորհուրդները, չեն պատվում իրենց խորհրդակիցներին։ Խորհուրդը խոհական սրտում է հաստատ մնում։

²³ Անզգամը նրան չի հնազանդվում և չի ասում պատշաճ բան, որ բարի լինի բոլորի համար։

²⁴ Իմաստունի խորհուրդը կյանքի ճանապարհ է, որովհետև խորշելով դժոխքից՝ կփրկվի։

²⁵ Տերը կործանում է ոխակալների տները և հաստատ է պահում սահմանը որբերի և այրիների։

²⁶ Անիրավ խորհուրդը պիղծ է Տիրոջ առջև, սրբերի խոսքերը պարկեշտ են։

²⁷ Կաշառք վերցնողը սպանում է իր հոգին, իսկ ով ատում է կաշառքը, պիտի փրկվի։

^27ա Ողորմությամբ ու հավատքով սրբվում է մեղքը, Տիրոջից երկյուղով յուրաքանչյուրը խորշում է չարից։

²⁸ Արդարների սրտերը խոկում են հավատքի մասին, իսկ ամբարիշտի բերանը չարիք է պատասխանում։

^28ա Արդար մարդկանց ճանապարհները հաճելի են Տիրոջ առջև. նրանց շնորհիվ թշնամիները դառնում են բարեկամներ։

²⁹ Ամբարիշտներից հեռու է Աստված և լսում է արդարների աղոթքը։

^29ա Լավ է քիչ շահելն արդարությամբ, քան թե շատ արդյունքը՝ աներկյուղածությամբ։

³⁰ Մարդու սիրտը պիտի խորհի իրավունքի մասին, որպեսզի Աստված ուղղի նրա ընթացքը։

³¹ Բարին տեսնող աչքը ուրախացնում է սիրտը, բարի համբավը զորացնում է ոսկորները։

³² Խրատ մերժողն ատում է իր անձը, ով ընդունում է հանդիմանություն, խոհեմություն պիտի ստանա։

³³ Տիրոջից երկյուղը խրատ է և իմաստություն, և փառքի սկիզբը պատշաճում է նրան։

16

¹ Մարդ ինչ դրել է սրտում, իրեն է վերաբերում, և Տիրոջից է նրա լեզվի պատասխանը։

² Խոնարհի բոլոր գործերը հայտնի են Տիրոջ առջև, և Տերն է դատում հոգիները։

³ Տիրո՛ջը հանձնիր քո գործերը, և քո խորհուրդները կկատարվեն։ Ի՜նչ մեծության էլ հասնես, խոնա՛րհ պահիր անձդ. և Տիրոջ առջև շնորհ կգտնես։

⁴ Տերն ամեն ինչ արել է նպատակի համար. իսկ ամբարիշտները չար օրը պիտի կորչեն։

⁵ Ամեն մեծամիտ պիղծ է Տիրոջ առջև. ով ձեռնամուխ է լինում անիրավ գործերի, պիտի դատապարտվի։ Բարու ճանապարհի սկիզբը արդարություն գործելն է, Աստծուն ավելի ընդունելի է աղոթքը, քան զոհ մատուցելը։

⁶ Ով փնտրում է Տիրոջը, գիտություն և արդարություն կգտնի, ուղիղ սրտով նրան փնտրողները խաղաղություն կգտնեն։

⁷ Որովհետև Աստծու բոլոր գործերը արդարությամբ են, ամբարիշտը պահվում է չար օրվա համար։

⁸ Լավ է քիչ շահելը Տիրոջից երկյուղով, քան մեծ գանձերը՝ ամբարշտությամբ։

⁹ Մարդու սիրտը պիտի խորհի իրավունքի մասին, որ Աստված ուղղի ընթացքը նրա։

¹⁰ Մարգարեական պատգամ կա թագավորի շուրթերին, և նրա բերանը չի սխալվի դատաստանի պահին։

¹¹ Կշռաքարի արդարությունը Տիրոջից է. և նրա գործերը՝ արդար կշիռներ։

¹² Ով չարիք է գործում, գարշելի է թագավորի համար, քանզի նրա իշխանության աթոռը հաստատուն է արդարությամբ։

¹³ Արդար շուրթերը հաճելի են թագավորին. Տերը սիրում է ուղիղ խոսքերը։

¹⁴ Թագավորի սրտմտությունը մահվան հրեշտակ է, բայց իմաստունը մեղմում է այն։

¹⁵ Թագավորի որդին կյանքի լույսի մեջ է, և նրա բարեհաճությունը սպասվող անձրևաբեր ամպի է նման։

¹⁶ Իմաստությունը ավելի ցանկալի է, քան ոսկին, Զգոնությունը ավելի ցանկալի է, քան արծաթը։

¹⁷ Կյանքի շավիղները խոտորվում են չարիքներից, կյանքի երկարությունը արդարության ճանապարհներին է։ Ով ընդունում է խրատը, բարիքի մեջ կլինի, հանդիմանությունը պահողը կիմաստնանա։ Տիրոջ ճանապարհով զգույշ գնացողը պահում է իր հոգին. ով սիրում է կյանքը, զսպում է իր բերանը։

¹⁸ Կործանումից առաջ թշնամանքն է, անկումից առաջ՝ չարակամությունը։

¹⁹ Լավ է խոնարհների հետ հանդարտասիրտ լինել, քան ամբարտավանների հետ ավար բաժանել։

²⁰ Ով խելացի է գործի մեջ, բարիքներ կգտնի, և ով Տիրոջ վրա է հույսը դնում՝ երանելի է։

²¹ Իմաստուններին և հանճարեղներին անմիտ են կոչում, իսկ ովքեր խոսքերով հրապուրող են, նրանց ավելի են լսում։

²² Միտքը կյանքի աղբյուր է ունեցողի համար, իսկ անմիտների խրատը չար է։

²³ Իմաստունի սիրտը գիտե իր բերանի խոսքը, և իր շուրթերով խոհեմություն է խորհում.

²⁴ Բարի խոսքը մեղրի խորիսխ է, իսկ նրա քաղցրությունը՝ բժշկություն հոգու։

²⁵ Կան ճանապարհներ, որ մարդուն ուղիղ են թվում, բայց նրանց վերջը նայում է դժոխքի հատակին։

²⁶ Մարդը տքնանքով վաստակում է իր անձի համար՝ Հեռու վանելով կորուստն իրենից, իսկ անմիտը կորուստը կրում է իր բերանի մեջ։

²⁷ Անզգամ մարդն իր հոգու մեջ չարիքներ է փորում և հուր է կուտակում իր շուրթերի վրա։

²⁸ Խաբեբա մարդը չարիքներ է նյութում, չարությամբ նենգության լապտերներ է բորբոքում և բարեկամներին բաժանում է իրարից։

²⁹ Անօրեն մարդը փորձության է մատնում իր բարեկամներին և նրանց տանում չար ճանապարհներով։

³⁰ Ով իր աչքերը սևեռում ու վատ բաներ է խորհում, և գոց շուրթերով ամեն տեսակ չարիք մտորում՝ այդպիսին չարի հնոց է։

³¹ Պարծանքի պսակ է ծերությունը, որ մարդը գտնում է արդարության ճանապարհին։

³² Համբերատար մարդը լավ է հզորից, և իմաստուն մարդը՝ ընդարձակ արտեր ունեցողից, բարկությունը զսպողը՝ հզոր քաղաք գրավողից։

³³ Անիրավների ամեն ինչը նորից իրենց ծոցն է դառնալու, որովհետև Տիրոջից է բոլորի իրավունքը։

17

¹ Լավ է համով մի պատառը խաղաղությամբ, քան պիղծ միսը ու բարիքով լի տունը՝ թշնամությամբ։

² Իմաստուն ծառան պիտի տիրի անմիտ տերերի վրա և ժառանգությունը բաժանի եղբայրների միջև։

³ Ինչպես արծաթը և ոսկին են փորձվում քուրայի մեջ, այնպես էլ Աստված է սրտերն ընտրում։

⁴ Չարագործը հնազանդվում է անօրենի լեզվին, իսկ արդարը չի նայում ստախոս շուրթերին։ Հավատացյալների համար ողջ աշխարհը լի է ինչքով, իսկ անհավատը մեկն իսկ չունի։

⁵ Ով ծաղրում է աղքատին, նա բարկացնում է նրա Արարչին, ով հարվածում է ընկածին, անպատիժ չի մնա, իսկ ով գթում է, ողորմություն պիտի գտնի։

⁶ Ծերերի պսակն իրենց թոռներն են, որդիների պարծանքը՝ իրենց հայրերը։

⁷ Անմիտներին վայել չեն հավատարիմ շուրթերը, և ոչ էլ արդարներին՝ ստախոս շուրթերը։

⁸ Խրատը պահողի համար շնորհի վարձ է, քանզի ուր էլ դառնա, հաջողություն պիտի գտնի։

⁹ Ով բարեկամություն է փնտրում, սխալներն անտեսում է, իսկ երբ դրանք քննում է, բարեկամությունը վնասվում է։

¹⁰ Սպառնալիքները փշրում են իմաստունների սրտերը, իսկ անմիտը, թեպետ բազում հարվածներ ստանա, չի զգում։

¹¹ Չարակամը հակառակություն է առաջ բերում, իսկ Տերն անողորմ հրեշտակ է արձակում նրա վրա։

¹² Հոգսն իմաստունի սիրտն է ընկնում, իսկ անմիտները խորհում են չարիքի մասին։

¹³ Ով բարու փոխարեն չարն է հատուցում, չարը նրա տնից չի պակասի։

¹⁴ Խոսքի իշխանությունն արդարության սկիզբն է, իսկ հակառակությունն ու կռիվը առաջնորդում են չքավորության։

¹⁵ Ովքեր անիրավին համարում են արդար և արդարին՝ անիրավ, պիղծ ու գարշելի են Տիրոջ առջև։

¹⁶ Ինչպե՞ս է անմիտն ունեցվածք գտնում, քանի որ հասու չէ, թե ի՛նչ է իմաստությունը։

^16ա Մեղսասերը խնդում է գժտություններով,

Ով խուսափում է ուսումից, չարիքի մեջ պիտի ընկնի։

¹⁷ Ամեն ժամ բարեկամներ կարող ես ունենալ, բայց վշտիդ մեջ եղբայրներդ պետքական կլինեն քեզ, քանզի դրա համար էլ ծնվել են նրանք։

¹⁸ Անմիտ մարդը ծափ է տալիս և ցնծում,

երբ բարեկամներին երաշխավոր է լինում, և մեղավորը խնդում է կռվի ժամանակ։

¹⁹ Մեղսասերը խնդում է գժտություններով,

²⁰ Խստասիրտը բարիքի չի հանդիպի։ Հեղհեղուկ լեզվով մարդը չարիքի մեջ պիտի ընկնի։

²¹ Անմիտի սիրտը ցավ է իր մարմնի անդամներին։ Անխրատ որդու համար հայրը չի կարող ուրախ լինել, իսկ իմաստուն որդին ուրախացնում է իր մորը։

²² Ուրախ սիրտը լավ դեղ է. հոգսաշատ մարդու ոսկորները ցամաքում են։

²³ Կաշառքի համար գրկաբացը հաջողություն չի գտնի իր ճանապարհին, ամբարիշտը խոտորվում է արդարության ճանապարհներից։

²⁴ Խոհուն մարդու դեմքն իմաստուն է, անմիտ մարդու աչքերն աշխարհի ծայրերին են։

²⁵ Անմիտ որդին հոր բարկությունն է և ցավ է իր ծնողների համար։

²⁶ Արդար մարդու տուժելը բարի չէ, ոչ էլ իշխանի նենգելը իրավունքի մեջ՝ արդարի հանդեպ։

²⁷ Խիստ խոսքը զսպողն իմաստուն է, համբերատար մարդը՝ խոհուն։

²⁸ Անմիտին հարցրին, թե ի՛նչ է իմաստությունը, և ճանաչո՞ւմ է այն. պապանձվեց նա, և կարծեցին, թե իմաստուն է։

18

¹ Ով ցանկանում է բարեկամներից հրաժարվել, պատճառներ է փնտրում. նմանը ամեն ժամ նախատինք պիտի կրի։

² Պակասամիտին իմաստությունը ոչ մի բանի պետք չէ, քանզի նա առավել անզգամությամբ կվարվի։

³ Երբ ամբարիշտը հասնում է չարիքների խորքերը, արհամարհում է, բայց իր վրա անարգանք և նախատինք են հասնում։

⁴ Մարդու սրտում խորհուրդը խոր ջուր է, բխող գետ է և կյանքի աղբյուր։

⁵ Դատաստանի ժամանակ ամբարիշտը չպետք է արդարացվի, ոչ էլ արդարի իրավունքը մերժվի։

⁶ Անզգամի շուրթերը չարիքներ են հասցնում նրան, և նրա հանդուգն բերանը հրավիրում է մահն իր վրա։

⁷ Անզգամի բերանը կործանում է իր համար, և նրա շուրթերը որոգայթ են իր հոգուն։

⁸ Երկյուղը կործանում է ծույլին, կանացի տղամարդիկ քաղցի պիտի մատնվեն։

⁹ Ով իրեն չի բժշկում գործով, իր անձը փչացնողի եղբայրն է։

¹⁰ Տիրոջ անունը հայտնի է զորության մեծությունից, նրան փութացող արդարները բարձրանում են։

¹¹ Հարուստի ստացվածքն ամուր քաղաք է, և նրա փառքն ամուր հովանի ունի։

¹² Կործանումից առաջ մարդու սիրտը հպարտանում է և փառքից առաջ՝ խոնարհվում։

¹³ Ով պատասխանում է առանց խոսքը լսելու, անզգամություն և նախատինք է անում։

¹⁴ Իմաստուն ծառան հանդարտեցնում է մարդու ցասումը, իսկ ո՞վ կարող է հանդուրժել մարդու նեղսրտությունը։

¹⁵ Իմաստունի սիրտը ձեռք է բերում իմաստություն, իմաստունների ականջները խորհուրդներ են փնտրում։

¹⁶ Շնորհներն ընդարձակում են մարդու կարողությունը և նրան բազմեցնում իշխանների հետ։

¹⁷ Իր խոսքի սկզբում արդարը ինքն իրեն մեղադրում է, երբ հանդիմանվում է ոսոխի կողմից։

¹⁸ Լռությունը մեղմացնում է հակառակությունը և զորեղների միջև վճռում է հարցը։

¹⁹ Եղբորից օգնություն ստացած եղբայրն ամուր քաղաքի պես է. հզոր ու բարձր է հաստատուն թագավորության պես։

²⁰ Մարդ իր բերանի պտղով պիտի հագեցնի իր որովայնը և իր շուրթերի պտղով պիտի հագենա։

²¹ Մահն ու կյանքը լեզվի զորության վրա են. ով նվաճի այն, պիտի ճաշակի նրա պտուղը։

²² Ով բարի կին է գտել, շնորհ է գտել և ուրախություն ստացել Աստծուց։

^22ա Ով վանում է բարի կնոջը, վանում է բարիքը, իսկ ով շնացող կին պահի, անմիտ է և ամբարիշտ։

²³ Աղքատն աղաչում է թախանձագին, իսկ հարուստը՝ պատասխանում անզուսպ։

²⁴ Մարդը լկտիությամբ բոզանոց է գնում։ Մոտիկ բարեկամը լավ է հեռավոր եղբորից։

19

¹ Լավ է տգետը, որ գնում է իր միամտությամբ, քան անզգամը, որ շաղակրատ է։

² Բայց տգիտությունը բարվոք չէ հոգուն, և ով ստիպում է ոտքերին շտապել, սխալներ է գործում։

³ Մարդու անմտությունն ապականում է նրա ճանապարհը, և իր սրտում մեղքը Աստծուն է վերագրում։

⁴ Հարստությունը բազում բարեկամներ է ավելացնում, իսկ աղքատը լքվում է նույնիսկ բուն բարեկամից։

⁵ Սուտ վկան առանց պատժի չի մնա, ով իզուր է մեղադրում, անմեղ չի համարվի։

⁶ Շատերն են հաճոյանում թագավորի դիմաց, և ամեն մի չարակամ նախատինք պիտի լինի մարդկանց։

⁷ Ով ատում է իր աղքատ եղբորը, նրա սիրուց հեռու պիտի մնա։ Բարի խորհուրդը մոտեցնում է նրանց, որոնք ճանաչում են այն, և իմաստուն մարդը կգտնի այն։ Ով շատ չար բան է անում, նա չարիքի վարպետ է դառնում, և ով վեճեր է գրգռում, անմեղ չի համարվի, մանավանդ որ այնպիսի բան է անում, որ իրեն չի վերաբերում։

⁸ Իմաստունը սիրում է իր հոգին, իմաստություն պահողը բարիք է գտնում։

⁹ Սուտ վկան առանց պատժի չի մնա, և ով բորբոքում է ընկերների չարությունը, ով չարություն է գրգռում, պիտի կործանվի։

¹⁰ Անզգամին վայել չէ փափկակեցությունը, ոչ էլ ծառային, երբ նա սկսի հպարտությամբ տիրել։

¹¹ Ողորմած մարդը համբերատար կլինի, և նրա պարծանքը անզգամներից բարձր լինելն է։

¹² Թագավորի սպառնալիքը նման է առյուծի մռնչյունի, իսկ նրա զվարթությունը՝ խոտի վրա կաթած ցողի։

¹³ Անմիտ որդին հոր ամոթն է։ Ընդունելի չէ պոռնիկի վարձով կատարված ուխտը։

¹⁴ Տներն ու հարստությունը հայրերը բաժանում են որդիներին, իսկ կինը մարդուն կարգվում է Տիրոջից։

¹⁵ Ծուլությունը հատուկ է կանացի տղամարդուն, ծույլ մարդը քաղցած կմնա։

¹⁶ Պատվիրաններ պահողը պահում է իր հոգին, իսկ նա, ով արհամարհում է իր ճանապարհը, պիտի կործանվի։

¹⁷ Ով ողորմություն է տալիս տնանկին, փոխ է տալիս Աստծուն, ըստ տվածի՝ Աստված նրան պիտի հատուցի։

¹⁸ Խրատի՛ր որդուդ, քանզի այդպես քեզ բարի հույս կլինի, հոգուդ մեջ մի՛ առ նրա հակառակությունը. եթե նրան գավազանով հարվածես, չի մեռնի, բայց նրա հոգին կփրկես մահից։

¹⁹ Անմիտ մարդը շա՜տ է տուժելու, եթե ավելի անզգամ դառնա, իր հոգին էլ կտա։

²⁰ Լսի՛ր, որդյա՛կ, հորդ խրատը, որ իմաստուն լինես քո վերջին օրերին։

²¹ Մարդու սրտում բազում խորհուրդներ կան, բայց Աստծու խորհուրդը հավիտյան է մնում։

²² Մարդու նպաստը իր ողորմածությունն է, լավ է արդար աղքատը, քան ստախոս հարուստը։

²³ Տիրոջից երկյուղը կենդանություն է մարդուն. իսկ աներկյուղը մոլորյալ շրջում է դռներին, ապրում է տեղերում, որտեղ երբեք այցելու չի ունենա։

²⁴ Ով պարապ ձեռքերը ծոցում է թաքցնում, ձեռքը նույնիսկ իր բերանը թող չտանի։

²⁵ Անմիտին չարչարելով՝ անմեղն ավելի իմաստուն է դառնում, իսկ եթե իմաստունին հանդիմանես, նա ավելի հանճարեղ կդառնա։

²⁶ Որդին, որ անարգում է հորը և մերժում մորը, ամոթ և նախատինք պիտի կրի։

²⁷ Հոր խրատը չպահող որդին չար մտքեր է խորհում։

²⁸ Անմիտ երիտասարդին երաշխավորողը ծաղրում է արդարությունը. ամբարիշտների բերանը կուլ է տալիս դատաստանը։

²⁹ Տանջանքներն անխելքների համար են պատրաստված, նույնպես և պատիժները՝ հիմարների։

20

¹ Գինին անառակության է տանում, հարբեցողությունը՝ թշնամության, դրանց տրվողը իմաստուն չէ։

² Թագավորի սպառնալիքը պակաս չէ առյուծի ցասումից, և ով բարկացնում է նրան, իր անձին է վնասում։

³ Հայհոյությունից հեռանալը փառք է մարդուն, միայն անխելքներն են դրանից կախվում։

⁴ Ծույլը թեև նախատվում է, բայց չի ամաչում, ինչպես նա, ով ցորեն է փոխ առնում ամռանը։

⁵ Մարդու սրտի խորհուրդը նման է խոր ջրի, իմաստուն մարդը քամում է այն։

⁶ Մեծ և պատվական այր է ողորմած մարդը, բայց հավատարիմ մարդ դժվար է գտնել։

⁷ Ով անարատ շրջում է արդարության մեջ, իր հետևից երանելի որդիներ պիտի թողնի։

⁸ Երբ արդար թագավոր նստի գահին, ոչ մի չարագործ նրա աչքից չի վրիպի։

⁹ Ո՞վ կարող է պարծենալ, թե անարատ սիրտ ունի, կամ ո՞վ կհամարձակվի ասել, թե անարատ է մեղքերից։

¹⁰ Մեծ, կամ փոքր ծուռ կշեռքը և երկակի չափը, երկուսն էլ պիղծ են Տիրոջ առջև.

¹¹ պիտի կործանվեն և՛ դրանք և՛ գործածողները. պիտի խափանվի նույն կերպ ընթացող մարդը։ Երիտասարդը երբ բարեպաշտ է, ուղիղ են նրա ճանապարհները։

¹² Ականջը լսում, աչքը տեսնում է. երկուսն էլ Տիրոջ գործերն են։

¹³ Մի՛ սիրիր չար խոսել, որպեսզի չկործանվես. բա՛ց աչքերդ և հագեցի՛ր հացով։

¹⁴ Գնորդն ասում է. «Վա՜տ է, վա՜տ է», բայց հեռանալիս պարծենում է իր գնումով։

¹⁵ Կա ոսկի և բազում արտեր, բայց իմաստուն շուրթերն են պատվական անոթ։

¹⁶ Հանի՛ր նրա հանդերձը, ով երաշխավորեց օտարին և հյուրընկալեց նրան։

¹⁷ Խաբեության հացը քաղցր է թվում մարդուն, նրա բերանը խիճով պիտի լցվի։

¹⁸ Ծրագիրը հաստատվում է մտքով. պատերազմը մղվում է իմաստությամբ։

¹⁹ Ով հայտնում է գաղտնիքը, նենգությամբ է վարվում. մի՛ հաղորդակցվիր շուրթերով խաբողին։

²⁰ Ով հայհոյում է հորն ու մորը, նրա լույսը պիտի մարի. նրա աչքերի բիբերը խավար պիտի հագնեն։

²¹ Սկզբից ձեռք բերված բաժինը, վերջում չի կարող օրհնված լինել։

²² Մի՛ ասա, թե թշնամուց պիտի վրեժ առնեմ, այլ համբերի՛ր Տիրոջ հանդեպ, որ քեզ օգնական լինի։

²³ Սխալ չափը պիղծ է Տիրոջ առջև, և նենգ կշեռքն ընդունելի չէ Տիրոջ առջև։

²⁴ Մարդու քայլերը Տերն է ուղղում, և մահկանացուն ինչպե՞ս խելամուտ լինի իր ճամփաներին։

²⁵ Որոգայթ է մարդու համար շտապելը և իր ինչքից նվիրելը, ուխտից հետո՝ զղջալը։

²⁶ Իմաստուն թագավորը ցրում է ամբարիշտներին և նրանց անվահար անում։

²⁷ Մարդու շունչը Տիրոջ լույսն է, որ քննում է սրտի խորքերը։

²⁸ Ողորմությունն ու ճշմարտությունը պահպանում են թագավորին, և արդարությամբ շրջապատում նրա գահը։

²⁹ Երիտասարդների զարդը իմաստությունն է, ծերերի փառքը՝ ալեհերությունը։

³⁰ Վերքերն ու հարվածները չարերին են պատահում և տանջանքները՝ որովայնի խորքերում։

21

¹ Ինչպես ջրի սահանքը, այնպես էլ թագավորի սիրտը Աստծու ձեռքին է. որ կողմ կամենա, այն կողմն էլ կդարձնի այն։

² Ամեն մարդ իր աչքին արդար է թվում, բայց Տերն է ուղղում սրտերը։

³ Արդարություն գործելը և ճշմարտություն խոսելն ավելի հաճելի է Տիրոջ առջև, քան զոհերի արյունը։

⁴ Խստասիրտ մարդը մեծամիտ է իր թշնամանքի մեջ. ամբարիշտների լապտերը մեղքն է։

⁵ Կարճ խորհուրդը կարող է առատություն բերել, իսկ փութկոտությունը՝ կարոտություն։

⁶ Ով լեզվի ստությամբ գանձ է կուտակում, սնոտի բաների հետևից է գնում և մահվան որոգայթներին պիտի հասնի։

⁷ Ամբարիշտները պիտի կործանվեն, քանզի չեն ուզում կատարել իրավունքները։

⁸ Խոտորնակին խոտոր ճանապարհ է տալիս Աստված, քանզի սուրբ և ուղիղ են Տիրոջ գործերը։

⁹ Լավ է օդի ներքո մի անկյունում բնակվել, քան անիրավությամբ ծեփված և խառնակ տան մեջ։

¹⁰ Ամբարիշտի հոգին չարիքներ է ցանկանում, և ողորմություն չի գտնի ոչ մեկից։

¹¹ Անխրատի պատժից անմեղն ավելի խորագետ է դառնում, իմաստունը խոհեմությամբ ընդունում է գիտությունը։

¹² Արդարը մտաբերում է ամբարիշտների սիրտը, և չարիքներն ապականում են ամբարիշտներին։

¹³ Ով իր ականջը խցկում է թույլերին չլսելու համար, երբ աղոթի Տիրոջը, պատասխան չի լսի։

¹⁴ Գաղտնի պարգևը մեղմում է բարկությունը, իսկ ով խնայում է պարգևը, մեծ բարկություն է առաջ բերում։

¹⁵ Արդարների ուրախությունը իրավունքի գործադրումն է, և սուրբ գործը պիղծ է թվում չարագործներին։

¹⁶ Արդարության ճանապարհից շեղված մարդը դևերի ժողովում է տեղ գտնում։

¹⁷ Ուրախություն սիրողը կարիքի մեջ կընկնի, ով գինի ու ձեթ է սիրում, կհարստանա։

¹⁸ Արդարի համար անօրենը փրկանք պիտի լինի, ուղղամիտների համար՝ երդմնադրուժը։

¹⁹ Լավ է բնակվել անապատում, քան բարկացող, լեզվանի և անզգամ կնոջ հետ։

²⁰ Իմաստունների բերանում ցանկալի գանձ է հանգչում, տգետները կուլ են տալիս այն։

²¹ Ով հետևում է արդարության և ողորմածության ճանապարհին, կյանք, արդարություն և փառք պիտի գտնի։

²² Իմաստությունը հասավ ամուր քաղաքների վրա, քանդեց այն ամրոցները, որոնց վրա հույս էին դրել ամբարիշտները։

²³ Ով զսպում է իր բերանն ու լեզուն, իր անձը պահպանում է նեղությունից։

²⁴ Խիստը, հանդուգնը և հպարտը ժանտ են կոչվում, իսկ ով ոխ է պահում, անօրեն է։

²⁵ Ցանկությունները սպանում են վատին, քանզի նրա ձեռքերը հոժար չեն որևէ բան գործելու։

²⁶ Ամբարիշտն ամեն օր չարիքների ցանկության է տենչում, իսկ արդարը ողորմում է և տալիս առանց խնայելու։

²⁷ Ամբարիշտների զոհերը պիղծ են Տիրոջ առջև, քանզի անօրենությամբ են մատուցում նրանք։

²⁸ Սուտ վկան պիտի կործանվի. հեզ մարդը զգուշությամբ է խոսում։

²⁹ Ամբարիշտ մարդը հանդգնությամբ դեմ է ելնում, իսկ արդարը ինքնին գիտի իր ճանապարհը։

³⁰ Աստծու առաջ մարդ ո՛չ իմաստություն ունի, ո՛չ արիություն և ո՛չ էլ խորհուրդ։

³¹ Երիվարը պատրաստվում է պատերազմի օրվան, բայց Տիրոջից է հաղթանակը։

22

¹ Բարի անունը մեծ հարստությունից լավ է, բարի շնորհը՝ արծաթից և ոսկուց։

² Հարուստն ու աղքատը նման են իրար. Տերը երկուսին էլ այցելում է։

³ Չարագործին տեսնելով պատժված՝ իմաստունը հաստատությամբ է խրատում իր անձը, իսկ անմիտները, նրանց մոտով անցնելով, ավելի են վնասվում։

⁴ Տիրոջից երկյուղն իմաստության սկիզբն է. նաև հարստության, փառքի և կյանքի։

⁵ Անիրավների ճանապարհին տատասկ և որոգայթ կա, իսկ ով զգույշ է իր անձի համար, հեռանում է նրանցից։

⁶ Երիտասարդը կրթվում է ըստ իր ճանապարհների, նույնիսկ ծերությանը չի հեռանում նրանցից։

⁷ Աղքատները պիտի տիրեն հարուստներին, և ծառաներն իրենց տերերին փոխ պիտի տան։

⁸ Ով անզգամություն է սերմանում, չարիք է հնձելու և ըստ իր գործերի պատիժ է կրելու։

^8ա Աստված սիրում է զվարթ և առատաձեռն մարդուն.

⁹ ով աղքատին ողորմի, ինքը կկերակրվի, քանզի անտունին իր հացից է տվել։

^9ա Ընծա տվողը հաղթություն և պատիվ է ստանում, բայց այն սպանում է առնողների հոգին։

¹⁰ Ժանտին ատյանից հանի՛ր, և հակառակությունը դուրս կգա նրա հետ, քանզի երբ նստում է ատյանում, անարգում է բոլորին։

¹¹ Տերը սիրում է մաքուր սիրտը. բոլոր անարատներն ընդունելի են նրան։ Թագավորը առաջնորդվում է շուրթերով,

¹² Տիրոջ աչքերը պահում են խոհեմությունը, Տերն արհամարհում է անօրեն խոսքերը։

¹³ Վատը պատճառաբանում և ասում է. «Առյուծ կա ճանապարհին, հրապարակի անցքերում՝ սպանողներ»։

¹⁴ Անօրենի բերանը խոր փոս է, Տիրոջից ատվողը նրա մեջ պիտի ընկնի։

^14ա Չար ճանապարհներ կան մարդու առջև, և չի ուզում դառնալ նրանցից, բայց պետք է դառնալ թյուր և չար ճանապարհից։

¹⁵ Անմտությունը բորբոքված է երիտասարդի սրտում. գավազանն ու խրատը հեռու են նրանից։ ¹⁶ Աղքատին կեղեքողը բազմապատկում է իր չարիքները.

ով տալիս է հարուստին,

կարոտության մեջ կմնա։

Երեսուն իմաստուն խոսքեր

¹⁷ Ականջդ մոտեցրո՛ւ իմաստունների խոսքերին. իմ խոսքերը լսի՛ր ու հաստատիր քո սրտում և կհասկանաս, որ բարի են նրանք։ ¹⁸ Եվ եթե դրանք պահես քո սրտում, և մնան շուրթերիդ վրա, ուրախ կլինես, ¹⁹ և քո հույսը Տիրոջ վրա լինի և ցույց կտա քեզ իր ճանապարհները։ ²⁰ Եվ դու երիցս գրի՛ր դրանք քո հոգում, խորհրդի գիտության և խոհեմության մեջ։ ²¹ Ահավասիկ սովորեցնում եմ քեզ ճշմարիտ խոսքեր և գիտություն, որ քեզ դիմողներին հոժարությամբ ճշմարտության խոսքերով պատասխանես։

- 1 -

²² Մի՛ բռնացիր անտունի վրա, քանզի աղքատ է նա, և մի՛ անարգիր անտունին դատարանի մեջ, ²³ քանզի Տերն է նրա դատը անելու, և անկորուստ պիտի փրկի քո հոգին։

- 2 -

²⁴ Բարկացկոտին ընկեր մի՛ դարձիր և զայրացող բարեկամի հետ մի՛ բնակվիր, ²⁵ որ չսովորես նրա ճանապարհները և անձդ խեղդամահ անես։

- 3 -

²⁶ Անձդ երաշխավոր մի՛ դարձրու մեկից ակնածելով, ²⁷ զի եթե չունես, որտեղի՞ց վճարես. անկողի՞նդ առնեն-տանեն, որի վրա կողերդ են հանգչում։

- 4 -

²⁸ Մի՛ փոփոխիր հավիտենական սահմանները, որ քո հայրերը դրեցին։

- 5 -

²⁹ Իր գործի մեջ զգույշ և փութկոտ մարդուն պետք է թագավորների առջև կանգնեցնել և ոչ թե անպիտան մարդկանց։

23

- 6 -

¹ Երբ հզորների հետ ընթրիքի սեղան նստես, նախ լավ իմացի՛ր, թե ի՛նչ են դրել քո առաջ, ² և նոր միայն ձեռքդ պարզի՛ր։ Նաև իմացի՛ր, որ դու ևս պարտավոր ես նույնը պատրաստել։ ³ Իսկ եթե ագահ լինես, մի՛ ցանկացիր նրա խորտիկները, քանզի դրանք էլ սուտ կյանքի հետ կանցնեն։

- 7 -

⁴ Եթե աղքատ ես, մի՛ ձգտիր հարուստին, այլ քո իմաստությամբ հեռացի՛ր նրանից։ ⁵ Եթե աչքդ դնես մի բանի վրա, իսկույն կչքվի. հարստությունն արծվի թևերի պես է, վերադառնում է իր նախնիների տունը։

- 8 -

⁶ Հաց մի՛ կեր չար աչք ունեցող մարդու հետ և մի՛ ցանկացիր նրա կերակուրը, ⁷ քանզի նա մազ կուլ տվողի պես է ուտում և խմում։ ⁸ Մի՛ ընդունիր նրան քեզ մոտ և քո հացը մի՛ կեր նրա հետ, քանի որ նա նողկանք կպատճառի քեզ և կապականի քո բարի խոսքերը։

- 9 -

⁹ Անզգամի ականջին բնավ մի՛ խոսիր, որպեսզի քո իմաստուն խոսքերը չանարգի։

- 10 -

¹⁰ Մի՛ փոփոխիր հավիտենական սահմանները. և մի՛ մտիր որբերի ունեցվածքի մեջ, ¹¹ որովհետև հզոր է նրանց Փրկիչը՝ Տերը, և նրանց դատը կպաշտպանի քո դեմ։

- 11 -

¹² Սիրտդ խրատի՛ն տուր, և քո ականջները պատրա՛ստ պահիր իմաստության խոսքերին։

- 12 -

¹³ Քո խրատը մի՛ խնայիր երեխային, քանզի եթե գավազանով հարվածես նրան, չի մեռնի, ¹⁴ նրան գավազանով կհարվածես, բայց նրա անձը կփրկես մահից։

- 13 -

¹⁵ Որդյա՛կ, եթե իմաստուն լինի քո սիրտը, կուրախացնես և իմ սիրտը։ ¹⁶ Իմ շուրթերը պիտի ձուլվեն քո շուրթերին, միայն թե դու ուղիղ լինես։

- 14 -

¹⁷ Քո սիրտը թող չնախանձի մեղավորներին, այլ Տիրոջ երկյո՛ւղն ունեցիր ամեն օր։ ¹⁸ Եվ եթե պահես, զավակ կունենաս, և քո հույսը չի մերժվի։

- 15 -

¹⁹ Լսի՛ր, որդյա՛կ, և իմաստո՛ւն եղիր և ուղղի՛ր սրտիդ խորհուրդները։ ²⁰ Հարբեցող մի՛ եղիր և մի՛ նախանձիր մսով պարարտացողներին, ²¹ քանզի շվայտն ու ցոփը պիտի աղքատանան, և քնկոտը քուրձ պիտի հագնի։

- 16 -

²² Լսի՛ր, որդյա՛կ, քեզ ծնող հորը և մի՛ արհամարհիր քո մոր ծերությունը։ ²³ Ճշմարտությո՛ւնը ստացիր և չթողնես իմաստությունը, խրատը և խոհեմությունը։ ²⁴ Արդար հայրը բարությամբ է կրթում, և նրա սիրտը պիտի ուրախ լինի իմաստուն որդու վրա։ ²⁵ Քո հայրն ու մայրը թող ուրախ լինեն քեզ համար, և թող խնդա, ով ծնել է քեզ։

- 17 -

²⁶ Տո՛ւր ինձ քո սիրտը, որդյա՛կ, և քո աչքերն իմ ճանապարհին թող սպասեն։ ²⁷ Ծակ կարաս է օտար տունը, իսկ օտար ջրհորը՝ նեղ։ ²⁸ Այդպիսին շուտով պիտի կործանվի, և ամեն անօրեն պիտի ոչնչանա։

- 18 -

²⁹ Ո՞ւմ համար է վայը, ո՞ւմ համար է խռովությունը, ո՞ւմ համար են դատաստանները, ո՞ւմ համար են դժնդակություններն ու վարանումները, ո՞ւմ համար են իզուր հարվածները, ո՞ւմն են կապտած աչքերը. ³⁰ Ո՞չ նրանցը, ովքեր գինով են տարվում, նայում են, թե որտեղ գինարբուք կա։ ³¹ Մի՛ հարբեք գինով, այլ խոսե՛ք արդար մարդկանց հետ, և խոսե՛ք միմյանց հետ հրապարակներում։ Իսկ եթե աչքդ գցես թաս ու բաժակին, հետո պիտի սանդի կոթի պես մերկ շրջես, ³² և օձից խայթվածի պես պիտի փռվես քո վախճանին, և ինչպես իժի թույն՝ գինին կտարածվի քո մեջ։ ³³ Եթե աչքերդ օտար կին տեսնեն, բերանդ թյուր պիտի խոսի, ³⁴ պիտի ծփաս ծովի սրտի մեջ, ինչպես նավավարը սաստիկ մրրիկի մեջ։ ³⁵ Եվ պիտի ասես. «Ինձ ծաղրում էին, բայց ես ցավ չէի զգում, ինձ այպանում էին, բայց ես չէի հասկանում, ե՞րբ է բացվելու առավոտը, որ ելնեմ, գտնեմ, թե ում հետ պիտի շրջեմ»։

24

- 19 -

¹ Որդյա՛կ իմ, մի՛ նախանձիր չարերին, և մի՛ ցանկացիր նրանց մեջ լինել, ² քանզի նրանց սիրտը ստություն է խորհում, և նրանց շուրթերը ցավ են պատճառում։

- 20 -

³ Տունը շինվում է իմաստությամբ, և հաստատվում խոհեմությամբ, ⁴ և գիտությամբ շտեմարանները լցվում են ամեն տեսակ հարստությամբ և պատվական բարիքներով։

- 21 -

⁵ Իմաստունը լավ է հզորից, և հանճարեղը՝ մեծամեծ դաստակերտներ ունեցողից։ ⁶ Պատերազմը մղվում է ռազմարվեստով, հաղթանակը գալիս է ճիշտ խորհուրդներով։

- 22 -

⁷ Իմաստությունն ու բարի խորհուրդները իմաստունների դռներին են։

- 23 -

⁸ Իմաստունները չեն խոտորվում Տիրոջ խոսքից, այլ խորհում են իրենց ժողովներում։ ⁹ Անխրատը հանդիպում է մահվանը, անզգամը՝ մեռնում մեղքերի մեջ։

- 24 -

¹⁰ Ժանտագործ մարդուն աղտոտում է պղծությունը չար օրը և նեղ օրը, քանի դեռ չի մեռել։

- 25 -

¹¹ Փրկի՛ր նրանց, ում մահվան են տանում, փրկագնի՛ր մահապարտներին և մի՛ խնայիր։ ¹² Իսկ եթե ասես, թե՝ «Ես նրան չեմ ճանաչում, ոչ էլ նա՝ ինձ», իմացի՛ր, որ Տերը ճանաչում է բոլորի սրտերը. և որ շունչ տվեց բոլորին, գիտի բոլորին և յուրաքանչյուրին հատուցելու է ըստ իր գործերի։

- 26 -

¹³ Մե՛ղր կեր, որդյա՛կ, քանզի հաճելի է, և խորիսխ, որ կոկորդդ քաղցրանա։ ¹⁴ Այդպես էլ իմաստության խոհեմությունը կլինի քո հոգու համար, և եթե այն գտնես, քո վախճանը բարի է լինելու, և հույսդ չի կտրվելու։

- 27 -

¹⁵ Ամբարիշտին մի՛ մոտեցրու արդարների արոտին, և մի՛ խաբվիր նրա որովայնի լիությամբ։ ¹⁶ Եվ եթե արդարը յոթ անգամ էլ ընկնի, պիտի կանգնի, իսկ ամբարիշտները պիտի տկարանան չարիքների մեջ։

- 28 -

¹⁷ Եթե թշնամիդ ցած գլորվի, մի՛ տրորիր, երբ նա սայթաքի, մի՛ ուրախացիր, ¹⁸ Տերը կտեսնի և հաճո չի լինի նրան, և իր բարկությունը կհեռացնի նրանից։

- 29 -

¹⁹ Մի՛ խնդա չարագործների հետ և մի՛ նախանձիր մեղավորներին, ²⁰ քանզի չարերը զավակ չեն ունենա, և ամբարիշտների ճրագը պիտի մարի։

- 30 -

²¹ Որդյա՛կ, վախեցի՛ր Աստծուց և թագավորից, և մի՛ ապստամբիր նրանցից ոչ մեկի դեմ, ²² քանզի հանկարծակի է լինելու վախճանը ամբարիշտների, և ո՞վ է ճանաչելու պատուհասը թե՛ մեկի և թե՛ մյուսի։

Իմաստուն խոսքերի շարունակություն

²³ Ձեզ՝ իմաստուններիդ, այս էլ ասեմ. «Մի՛ ամաչեք խելամուտ լինել իրավունքի մեջ, լավ չէ դատաստանի ժամանակ աչառու լինել»։ ²⁴ Ամբարիշտին արդար ասողը ժողովուրդների անեծքին պիտի արժանանա և ազգերի կողմից ատելի պիտի լինի։ ²⁵ Իսկ հանդիմանողները լավ պիտի երևան, և նրանց վրա բարի օրհնություն պիտի գա։

²⁶ Շուրթերը բարի խոսքերի պատասխաններ են սիրում, իսկ ով դիմադրությամբ է պատասխանում, իր վրա հեռացումի խոսքեր է հրավիրում։

²⁷ Ապահովի՛ր դրսի գործերդ, պատրաստի՛ր դաստակերտիդ մեջ, ապա արի՛ իմ հետևից և վերստին շինի՛ր քո տունը։

²⁸ Քո ընկերոջ համար սուտ վկա մի՛ դարձիր, և քո շուրթերով մի՛ խաբիր։ ²⁹ Մի՛ ասա, թե՝ «Ինչպես նա ինձ հետ վարվեց, այնպես էլ ես եմ վարվելու նրա հետ։ Պիտի հատուցեմ նրան այնպես, ինչպես ինքն ինձ զրկեց»։

³⁰ Անզգամ մարդը նման է արտի, պակասամիտը՝ այգու, ³¹ և եթե թողնես այն, խոպան կդառնա, ամենուր մոլախոտ կաճի, կմնա լքված, գետնին կթափվեն նրա պատի քարերը, ³² հետո կասի, թե՝ «Զղջացի, տեսա և խրատը ընտրեցի»։ ³³ Մինչև ե՞րբ պիտի պառկես, ո՜վ վատ, ե՞րբ պիտի քնից արթնանաս։ Մի քիչ ննջես, մի քիչ նիրհես, մի քիչ հանգստանաս, մի քիչ էլ ձեռքերդ դնես կրծքիդ։ ³⁴ Եթե այդպես անես, ապա պիտի գա քո աղքատությունը իբրև ճամփորդ, և կարիքը՝ իբրև արագավազ սուրհանդակ։

¹ Որդին, որ զգուշանում է խոսքից, կորստյան չի մատնվի, քանզի նա խնամքով է ընդունում այն։ ² Թագավորի լեզվից ոչ մի սուտ խոսք թող դուրս չգա. ո՛չ իսկ խաբեություն։ ³ Թագավորի լեզուն սուր սուսեր է, ոչ թե մարմնեղեն, ով որ նրան մատնվի, կխորտակվի։ ⁴ Եթե նրա բարկությունը բորբոքվի, մարդկանց կկործանի հոդերով հանդերձ, կփշրի մարդկանց ոսկորները և իբրև բոց կայրի, և արծիվների բույների մեջ լեշի պես կլինեն։ ⁵ Երկնչի՛ր իմ խոսքերից, որդյա՛կ, և երբ դրանք ընդունես, զգույշ կլինես։

25

Սողոմոնի իմաստուն խոսքերի երկրորդ ժողովածուն

¹ Սողոմոնի առակներից, որոնք օրինակել են Հուդայի արքա Եզեկիայի բարեկամները։

² Աստծու փառքը ծածկում է խոսքերը, թագավորի փառքը հրամանները պատվելն է։

³ Անքննելի են երկնքի բարձունքները, երկրի խորությունները, թագավորի սիրտը։

⁴ Չփորձված արծաթը մաքրի՛ր կրակով, և կմաքրվի այն միանգամից։ ⁵ Ամբարիշտներին կորցրո՛ւ թագավորի երեսից, և նրա աթոռը կհաստատվի արդարությամբ։

⁶ Մի՛ հպարտացիր թագավորի առջև, և մի՛ մոտեցիր մեծամեծերի տեղերին, ⁷ քանզի լավ է, որ մեկը ասի քեզ. «Վե՛ր բարձրացիր ինձ մոտ», քան թե խոնարհվես հզորի առջև։

Խոսի՛ր աչքովդ տեսածի մասին. ⁸ հանդուգն կերպով կռվի մեջ մի՛ մտիր, որ հետո չզղջաս։ Երբ քո բարեկամը քեզ նախատի, ⁹ խո՛ւյս տուր նրանից և մի՛ արհամարհիր։

¹⁰ Գուցե նախատի քեզ բարեկամդ, և քո թշնամությունն ու մարտը չվերջանա, այլ մահվան պես քեզ լինի։ ^10ա Շնորհն ու բարեկամությունը ազատ են. քո մեջ հաստատի՛ր դրանք ու չես նախատվի, և խաղաղ կանցնի քո ժամանակը։

¹¹ Իմաստուն խոսքերը նման են սարդիոնով շարված ոսկի խնձորի։

¹² Իմաստուն խոսքերը լսող ականջների համար շարված ոսկե գինդ և պայծառ սարդիոն են։

¹³ Ինչպես ամռան ձյունն է օգնություն տոթից կիզվողի համար, այնպես էլ հավատարիմ պատգամաբերը՝ իրեն ուղարկողների համար, որոնք հույսը կապել են նրա հետ։

¹⁴ Նրանք, ովքեր սուտ խոստումներով են պարծենում, նման են սաստիկ հողմերի, ամպերի և անձրևների։

¹⁵ Երկայնամտությունից հաջողություն է գտնում թագավորը, անսանձ լեզուն փշրում է ոսկորները։

¹⁶ Որդյա՛կ, երբ մեղր գտնես, չափո՛վ կեր. որ չհագենաս և չփսխես։ ¹⁷ Քո ոտքով քի՛չ հաճախիր բարեկամիդ, որ չձանձրանա քեզնից և չատի քեզ։

¹⁸ Սրած սուր նետի և սուսերի պես է իր բարեկամի մասին սուտ վկայություն տվողը։

¹⁹ Չարի ճանապարհները և անօրենի ոտքերը պիտի կորչեն չարի օրը։

²⁰ Ինչպես քացախն է անօգուտ վերքին, այնպես էլ մարմնի ցավերից տրտմում է սիրտը։ ^20ա Ինչպես ցեցը հագուստին, որդը՝ փայտին, այնպես էլ տրտմությունը վնաս է մարդու սրտին։

²¹ Եթե քաղցած է թշնամիդ, կերակրի՛ր նրան, եթե ծարավ է, խմելու ջո՛ւր տուր։ ²² Եթե այդ անես, նրա գլխին կրակի կայծեր կկուտակես, և Տերը քեզ բարություն կհատուցի։

²³ Հյուսիսի քամին ամպեր է բերում, լիրբ երեսը գրգռում է լեզուն։

²⁴ Լավ է ապրել տանիքի տակ՝ մի անկյունում, քան նույն տան մեջ՝ բամբասող կնոջ հետ։

²⁵ Ինչպես պաղ ջուրն է ծարավ մարդուն հաճելի, այնպես էլ հեռվից եկած բարի լուրը։

²⁶ Ինչպես մեկը խցանում է աղբյուրի ակը և ապականում ջրերի հոսանքը, այնպես էլ տգեղ է արդարի կորանալը ամբարիշտի առջև։

²⁷ Շատ մեղր ուտելը լավ չէ, բայց հարկավոր է հարգել պատվական խոսքերը։

²⁸ Առանց խորհրդի գործ անող մարդը նման է պարիսպները կործանված քաղաքի։

26

¹ Ինչպես ցողը՝ ամռանը, և անձրևը՝ հունձի ժամանակ, այնպես էլ հարգի չէ պատիվը անզգամին։

² Ինչպես թռչուններն ու ճնճղուկներն են թռչում, այնպես էլ ոչ մեկը զուր անեծքներ չի տալիս։

³ Ինչպես մտրակը՝ ձիու և խթանը՝ էշի համար է, այնպես էլ գավազանն է անմիտ ազգի համար։

⁴ Անզգամին մի՛ պատասխանիր ըստ նրա անզգամության, որ նրան նմանվող չլինես։

⁵ Այլ արժանի պատասխա՛ն տուր նրան, որ ինքն իրեն իմաստուն չձևացնի։

⁶ Իր ճանապարհի համար նախատինք պիտի ստանա նա, ով անմիտ պատգամատարի հետ լուր կուղարկի։

⁷ Խափանի՛ր անմիտի ոտքի ընթացքը և նրա բերանի առակը։

⁸ Ով պատիվ է տալիս անմիտին, նման է մարդու, որ քար է դնում պարսատիկի մեջ։

⁹ Հարբեցողի ձեռքերը լի են փշով, իսկ ծառայությունը անմիտի ձեռքերում է։

¹⁰ Բոլոր անմիտների մարմինները պիտի ալեկոծվեն, որ խորտակվեն նրանց հիմարությունները։

¹¹ Ինչպես շունն է դառնում ատելի, երբ դառնում է իր փսխածին, այնպես էլ անմիտն է իր չարությամբ, երբ դառնում է դեպի իր մեղքերը։ ^11ա Ամոթ կա, որ մեղքերի մեջ է գցում, ամոթ էլ կա, որ փառք ու շնորհ է պարգևում։

¹² Տեսել եմ մարդ, որ պարծեցել է իր իմաստնությամբ, բայց անմիտից ավելի հույս կա, քան նրանից։

¹³ Երբ ծույլին ուզում ես տեղ ուղարկել, ասում է. «Առյուծ կա ճանապարհին, հրապարակում՝ սպանողներ»։

¹⁴ Ինչպես դռներն են շրջվում ծխնիի մեջ, այնպես էլ ծույլն է իր մահճի մեջ։

¹⁵ Ծույլն իր ձեռքերը թաքցնում է ծոցում և ծուլանում իր բերանը տանել։

¹⁶ Ծույլն իր աչքին ավելի իմաստուն է թվում, քան նա, ով հարստության ավետիս է բերում։

¹⁷ Ուրիշի դատին խառնվողը նման է շան պոչին ձեռքը գցողին։

¹⁸ Կան փորձիչներ, որ առարկում են մարդկանց, իսկ երբ մեկը շտապում է կանխել, հակադրվելով ընկճվում են։ ¹⁹ Այդպես էլ վարվում են այն բոլոր մարդիկ, որ դարանակալ են լինում իրենց բարեկամներին, և երբ կշտամբվում են, ասում են՝ «Կատակում էինք»։

²⁰ Շատ փայտից բորբոքվում է հուրը, որտեղ չկա երկմիտ, դադարում է կռիվը։

²¹ Ածխափայտից շիկանում է վառարանը, փայտը բորբոքում է կրակը, բանսարկուն էլ կռիվ է հրահրում։

²² Շողոքորթների խոսքերը փաղաքշող են, բայց կռվի պատճառ են դառնում։

²³ Ով արծաթը նենգությամբ է տալիս, նման է խեցու. ողորկ շուրթերը ծածկում են տրտմագին սրտերը։

²⁴ Ով կոծում է թշնամու վրա, շուրթերով բացահայտում է ամեն ինչ, և իր սրտում նենգություն է նյութում։ ²⁵ Եթե թշնամիդ քեզ աղաչի և բարձրաձայն աղերսի, մի՛ հավատա նրան, քանզի յոթ չարիք կա նրա սրտում։ ²⁶ Ով թաքցնում է թշնամությունը, հայտնի է դարձնում նենգությունը. խորագետն ատյանում թաքցնում է իր վնասը։

²⁷ Ընկերոջ փոս փորողն ինքն է ընկնելու մեջը. ուրիշի վրա քար գլորողն իր վրա է գլորում։

²⁸ Սուտ լեզուն ատում է ճշմարտությունը. շատախոս բերանը խռովություն է պատճառում։

27

¹ Վաղվա օրով մի՛ պարծեցիր, քանզի չգիտես, վաղն ինչ կլինի քեզ հետ։

² Թող ընկերդ քեզ գովի, ոչ թե քո բերանը, օտա՛րը և ոչ թե շուրթերդ։

³ Քարը ծանր է, ավազը դժվար է բարձրացնել, իսկ անզգամի բարկությունը երկուսից էլ ծանր է։

⁴ Ցասումն անողորմ է, բարկությունը՝ սաստիկ, իսկ նախանձը պակաս չէ ոչ մեկից։

⁵ Լավ է բաց հանդիմանությունը, քան ծածուկ բարեկամությունը։

⁶ Լավ են բարեկամի ապտակները, քան թշնամու կեղծ համբույրը։

⁷ Հագեցած մարդն արհամարհում է մեղրն ու խորիսխը, բայց քաղցածին դառն էլ քաղցր է թվում։

⁸ Իր տեղից օտար տեղ գնացած մարդն իրեն ստրուկ է զգում բույնը լքած թռչունի պես։

⁹ Սիրտը զվարճանում է յուղով, խնկով և գինով, և հոգին թոթափվում է տրտմությունից։

¹⁰ Մի՛ լքիր քո բարեկամին և քո հոր բարեկամին, և մի՛ մտիր եղբորդ տունը քո տառապանքի ժամանակ. մոտիկ հարևանը հեռու եղբորից լավ է։

¹¹ Որդյա՛կ, իմաստո՛ւն եղիր, որ սիրտդ ուրախ լինի, և վանի՛ր քեզնից նախատինքի խոսքերը։

¹² Խորագետը խուսափում է գալիք չարից, իսկ անզգամներն ընդառաջ են ելնում և տուժում։

¹³ Հանի՛ր նրա հանդերձանքը, ով չափից անց է թշնամանք տածում, քանզի նա ուրիշին էլ է ապականում։

¹⁴ Ով առավոտյան բարձրաձայն գովում է բարեկամին, ոչնչով առավել չէ, քան նրան անիծողը։

¹⁵ Ինչպես ձմեռային կաթոցն է մարդուն հանում իր տնից, այնպես էլ անզգամ կինն է իր մարդուն հանում իր տնից։ ¹⁶ Խիստ է հյուսիսի քամին, բայց հաջողության անունն է կրում։

¹⁷ Երկաթը երկաթ է խարտում, մարդն էլ՝ երեսն ընկերոջ։

¹⁸ Ով թզենի է տնկում, պիտի նրա պտուղն ուտի, ով իր տիրոջն է պահում, պիտի պատվվի։

¹⁹ Ինչպես մարդկանց դեմքերը նման չեն իրար, այնպես էլ մարդկանց սրտերն իրար նման չեն։

²⁰ Ինչպես դժոխքն ու կորուստն են անհագ, այնպես էլ աչքերն ագահ մարդու։ ^20ա Խրատ չլսող, ցոփ լեզու ունեցող մարդիկ պիղծ են Տիրոջ առջև հանդուգն աչքերով։

²¹ Արծաթն ու ոսկին ձուլարանն է փորձում, իսկ մարդուն՝ գովաբանողների բերանը։ ^21ա Անօրենի սիրտը չարիքներ է փնտրում, իսկ ուղիղ սիրտը՝ գիտություն:

²² Կարող ես անզգամին հարվածել և անարգել ատյանում, սակայն նրա անզգամությունը չես հեռացնի նրանից։

²³ Քո հոտի նկատմամբ խոհեմությամբ հոգատա՛ր եղիր, և կարեկից՝ քո երամակների հանդեպ, ²⁴ քանզի մարդու ուժը, զորությունն ու իշխանությունը հավերժ չեն և չեն տրվում նրան սերնդեսերունդ։ ²⁵ Խնամքո՛վ վարվիր դաշտի կանաչի հետ, որ խոտ հնձես, և դալար խո՛տ հավաքիր, ²⁶ որ ոչխարներդ բրդաբեր լինեն, խնամի՛ր դաշտերը, որ գառներ ունենաս։ ²⁷ Որդյա՛կ, ինձնից սովորի՛ր զորավոր պատգամներ՝ քո տան ապրուստի և քո բարեկամների ապրուստի համար։

28

¹ Փախչում է ամբարիշտը՝ առանց մեկից հալածվելու, իսկ արդարն առյուծի նման աներկյուղ է։

² Ամբարիշտների մեղքերի պատճառով հուզվում են դատարանները, իսկ խորագետը հանգցնում է դրանք։

³ Հզորն ամբարշտությամբ կեղեքում է աղքատին։ Ինչպես սաստիկ և անշահ անձրևը,

⁴ նրանք էլ մերժում են օրենքները և գովում ամբարշտությունը. իսկ նրանք, որ սիրում են օրենքը, իրենց պարսպով են շրջապատում։

⁵ Չարերը չեն մտաբերում իրավունքը, իսկ Տիրոջը փնտրողները խելամուտ են ամեն ինչում։

⁶ Ավելի լավ է ճշմարտությամբ ընթացող աղքատը, քան սուտ մեծատունը։

⁷ Իմաստուն որդին պահում է օրենքը, իսկ որկրամոլներին միացողն անարգում է իր հորը։

⁸ Ով իր տունը տոկոսներով և վաշխով է լցնում, հավաքում է նրա համար, ով ողորմում է աղքատին։

⁹ Ով շեղում է իր ականջը, որ օրենքը չլսի, պղծում է իր ուխտը։

¹⁰ Ով չար ճանապարհով մոլորեցնում է ուղղամիտներին, ապականության մեջ է ընկնելու։ Անբիծները պիտի բաժանեն բարիքները, անօրենները պիտի անցնեն բարիքների կողքով և չեն մտնելու նրանց մեջ։

¹¹ Մեծահարուստն իր աչքին իմաստուն է թվում, իսկ հանճարեղ աղքատը դատապարտում է նրան։

¹² Արդարներին օգնական լինելուց փառքը մեծ է լինելու, իսկ ամբարիշտների տեղերում կոտորվում են մարդիկ։

¹³ Ով ծածկում է ամբարշտությունը, հաջողություն չի ունենա, իսկ ով վեր հանի և դատապարտի, սիրո կարժանանա։

¹⁴ Երանելի է այն մարդը, որ արհամարհում է ամեն ինչ երկյուղածության պատճառով, իսկ խստասիրտը կընկնի չարիքների մեջ։

¹⁵ Ով աղքատ է, քաղցած առյուծի և ծարաված գայլի պես դաժան կլինի խեղճ ժողովրդի համար։

¹⁶ Մտքից զուրկ թագավորը մեծ կեղեքող է, իսկ անիրավություն ատողը երկարակյաց կլինի։

¹⁷ Մահապարտին երաշխավորողը փախստական է դառնում և չի դադարում։

^17ա Խրատի՛ր որդուդ, և քեզ կհանգստացնի. զարդ կլինի անձիդ համար և չի հնազանդվի անօրեն ազգի։

¹⁸ Ով գնում է արդարությամբ, օգնություն է գտնելու, իսկ ով թյուր ճանապարհ է բռնում, նրանով կխճճվի։

¹⁹ Ով մշակում է իր հողը, կհագենա հացով, իսկ ով դատարկաբանների հետևից է գնում, անտուն կմնա։

²⁰ Հավատարիմ մարդը մեծ օրհնություն պիտի գտնի, իսկ չարագործը պատուհասից չի փրկվելու։

²¹ Ով չի պատկառում արդարներից, արժանի չէ գովասանքի։ Ով կեղծորեն խուսափում է անօրեններին հանդիմանելուց, բարի չէ. այդպիսին մարդ կվաճառի մի կտոր հացով։

²² Չարաչք մարդը շտապում է հարստանալ և չգիտի, որ ողորմածը պիտի հաղթի իրեն։

²³ Ով հանդիմանում է մարդուն նրա ճանապարհի համար, ավելի շնորհ պիտի գտնի, քան լեզվով շողոքորթողը։

²⁴ Ով մերժում է իր հորը կամ մորը և դա մեղանչել չի համարում, նա կցորդ է ամբարիշտ մարդկանց։

²⁵ Ագահ մարդը հակառակություն է բորբոքում, բայց Տիրոջը հուսացողն հոգածություն կգտնի։

²⁶ Իր սրտի հանդգնությանն հուսացողը անզգամ է, իսկ իմաստությամբ գնացողը կփրկվի։

²⁷ Աղքատներին տվողը չի՛ աղքատանա, իսկ ով իր աչքը շրջում է նրանցից, շատ բանի կարոտ կմնա։

²⁸ Ամբարիշտների բարձրանալուց հեծում են արդարները, բայց նրանց կորստյամբ բազմանում են արդարները։

29

¹ Լավ է հանդիմանող մարդը, քան համառողը, քանզի եթե կրակը սրան շեշտակի հարվածի, բուժում չի լինի։

² Արդարների գովասանքից ուրախանում են ժողովուրդները. ամբարիշտների իշխանության տակ հեծում են արդարները։

³ Իմաստություն սիրողը ուրախացնում է իր հորը, իսկ բոզարածը կործանում է նրա հարստությունը։

⁴ Արդար թագավորը զորացնում է իր երկիրը, իսկ անօրենը կործանում է այն։

⁵ Ով կռիվ է փնտրում բարեկամի դեմ, ծուղակ է լարում իր ոտքերի համար։

⁶ Մեղավոր մարդու համար սաստիկ որոգայթ կլարվի, իսկ արդարը ուրախության և խնդության մեջ պիտի լինի։

⁷ Արդարը գիտե աղքատների դատը տեսնել, իսկ ամբարիշտը խելամուտ չի լինում իմանալու, աղքատն էլ իրավախոհ միտք չունի։

⁸ Անօրեն մարդիկ քաղաքը մատնում են հրո ճարակի, իսկ իմաստունները վանում են բարկությունը։

⁹ Իմաստունը դատում է ազգերին, իսկ անզգամը ծաղրելի է դառնում իր բարկության մեջ և չի ակնածում։

¹⁰ Արյունռուշտ մարդիկ ատում են արդարին, իսկ ուղղամիտները համակրում են նրա հոգին։

¹¹ Անզգամն իր ողջ բարկությունը միանգամից է թափում, իսկ իմաստունը համբերում է հեզությամբ։

¹² Թագավորը և նրա հետ բոլոր եղողները, որ ունկնդիր են անիրավ խոսքերի, անօրեններ են։

¹³ Փոխ տվողն ու փոխ առնողը նույն տեղն են հասնելու, Տերը երկուսին էլ առերեսելու է։

¹⁴ Աղքատներին ճշմարտությամբ դատող թագավորի աթոռը միշտ հաստատուն պիտի մնա։

¹⁵ Ծեծն ու կշտամբանքն իմաստություն են տալիս. մոլորված երեխան ամոթով է թողնելու իր ծնողներին։

¹⁶ Ամբարիշտների բազմանալուց շատանում են մեղքերը, իսկ արդարները պիտի ապրեն, որ տեսնեն նրանց կործանումը։

¹⁷ Խրատի՛ր որդուդ, և քեզ հանգիստ կպարգևի և քո հոգուն զարդ պիտի դառնա։

¹⁸ Անօրեն ազգն առաջնորդ չի գտնի, իսկ ով պահում է օրենքը, երանելի է։

¹⁹ Վատ ծառան խոսքով չի խրատվում, թեև հասկանում, բայց չի ընդունում։

²⁰ Երբ հանդուգն խոսող մարդ գտնես, իմացի՛ր, որ ավելի հույս կա անզգամի, քան նրա համար։

²¹ Ով մանկությունից փափկասուն է լինում, ծառա պիտի դառնա, ապա մորմոքի իր մեջ։

²² Անզգամ մարդը հակառակություն է փորում. հեզ մարդը դադարեցնում է մեղքերը, իսկ բարկասիրտ մարդը խորացնում է մեղքերը։

²³ Ամբարտավանությունը մարդուն նկուն պիտի դարձնի, իսկ խոնարհներին Տերը պիտի փառավորի։

²⁴ Ով բաժնեկից է դառնում գողերին, ատում է իր հոգին. երդում են տալիս, որ լսածի մասին չպատմեն,

²⁵ Բայց մարդկանցից վախի և ամոթի պատճառով պիտի հայտնվեն և կործանվեն. իսկ Տիրոջը հուսացողը ուրախ պիտի լինի։ Ամբարշտությունը մարդուն տանում է գայթակղության, իսկ ով Տիրոջն է ապավինում, պիտի փրկվի։

²⁶ Շատերն են շողոքորթում իշխաններին, բայց մարդու իրավունքը Տիրոջից է գալիս։

²⁷ Անօրեն մարդը պիղծ է արդարի համար, և անօրենի համար պիղծ է ճանապարհն ուղիղ։

30

Առակներ

¹ Մարդն Աստծու հավատացյալներին այս պիտի ասի. ² «Լավ է լռեմ, քանի որ բոլոր մարդկանցից ավելի անմիտ եմ, և իմ մեջ չկա՛ մարդկային իմաստություն։ ³ Աստված ինձ իմաստություն սովորեցրեց, և ես սրբերի գիտությանը խելամուտ եղա ու սրբությունները ճանաչեցի.

⁴ ո՞վ երկինք ելավ և իջավ,

ո՞վ հավաքեց հողմերն իր գոգի մեջ,

ո՞վ ամփոփեց ջրերն իր հանդերձի մեջ,

ո՞վ հաստատեց երկրի ծագերը։

Ի՞նչ է նրա անունը, կամ ի՞նչ է նրա որդու անունը։

⁵ Հաստա՛տ իմացիր, որ Աստծու բոլոր խոսքերն ընտիր են,

և նա իր երկյուղածների վերակացուն է։

⁶ Նրա խոսքերին ոչինչ մի՛ ավելացրու,

որ նա քեզ չհանդիմանի, և դու ստախոս չլինես»։

⁷ Երկու բան եմ խնդրում քեզնից. մինչ մեռնելս շնորհներդ ինձնից մի՛ հանիր։ ⁸ Սուտ և զուր խոսքը հեռո՛ւ տար ինձնից։ Հարստություն և աղքատություն մի՛ տուր ինձ, այլ կշռի՛ր ինձ արժանին բավականությամբ։ ⁹ Չլինի թե հարստանամ և ստեմ ու ասեմ. «Ո՞վ է ինձ տեսնում». կամ աղքատանամ ու գողանամ և երդվեմ իմ Աստծով։

¹⁰ Ծառային մի՛ մատնիր իր տիրոջ ձեռքը, որ բնավ չանիծի քեզ, և դու չապականվես։

¹¹ Չար ծնունդն անիծում է իր հորը և չի օրհնում իր մորը։

¹² Չար ծնունդն արդար է երևում իր աչքին, բայց չի լվացել կեղտն իր անձի։

¹³ Չար ծնունդն ամբարտավան աչքեր ունի, և հպարտ են նրա թարթիչները։

¹⁴ Չար ծնունդի ատամները սուսեր են, ժանիքները՝ դանակներ՝ երկրի խոնարհներին և խեղճ մարդկանց մաշելու և ուտելու համար։

¹⁵ Տզրուկը երեք դուստր ուներ շատ սիրելի, երեքն էլ չկշտացրին նրան, չորրորդն էլ չկարողացավ կշտացնել, որ նա ասեր. «Բավական է»։

¹⁶ Դխոժքն ու մահը, տարտարոսն ու կանանց սերը, երկիրը,

որ չի հագենում ջրով, ջուրը և հուրը չեն ասում երբեք. «Բավական է»։

¹⁷ Աչքը, որ արհամարհում է հորը և անարգում մոր ծերությունը, ձորերի ագռավները պիտի հանեն, և արծիվների ձագերը պիտի հոշոտեն։

¹⁸ Երեք բան կա, որ անհնար է ինձ իմանալ, և չորրորդը, որ չեմ ճանաչում.

¹⁹ թռչող արծվի ուղին՝ օդում, օձի ճամփան՝ քարի վրա,

ծովով անցնող նավի ճամփան և երիտասարդի ճանապարհները։

²⁰ Այդպես է նաև շնացող կնոջ ճանապարհը. երբ որևէ բան է անում, լվացվում է և ասում. «Ոչինչ չեմ արել»։

²¹ Երեք բանից է դողում երկիրը և չորրորդից չի հանդարտվում.

²² Ծառան, որ թագավոր է դառնում,

անմիտը, որ կշտանում է հացով,

²³ աղախինը, որ դուրս է հանում իր տիրուհուն,

և ատելի կինը, որ հանդիպում է բարի մարդու հետ։

²⁴ Չորս բան կա, որ փոքր են երկրի վրա, և դրանք իմաստուններից իմաստուն են.

²⁵ մրջյունը, որ զորություն չունի, իր կերակուրը ամռանն է պատրաստում,

²⁶ Ճագարը, որ անզոր տեսակից է և իր բույնը քարերի մեջ է շինում,

²⁷ մորեխը, որ թագավոր չունի, կարծես մեկի հրամանով

հավաքվում է զորաժողովի,

²⁸ և սարդը՝ ճանկերով պատից կպչող, որին հեշտ է որսալ,

բնակվում է թագավորների հարկի տակ։

²⁹ Երեք բան կա, որ շրջում են վեհապանծ, և չորրորդը, որ ճեմում է գեղեցիկ.

³⁰ առյուծի կորյունը, որ հզոր է բոլոր անասուններից,

չի վախենում և թիկունք չի դարձնում անասուններին,

³¹ աքաղաղը, որ սիգալով շրջում է հավերի մեջ,

նոխազը, որ հոտն է առաջնորդում,

և թագավորը, որ խոսում է հրապարակավ ազգերի մեջ։

³² Եթե անձդ հաճույքի մատնես և ձեռքդ կռվով երկարես, պիտի անարգվես։ ³³ Կթի՛ր կաթը, և յուղ կդառնա, իսկ եթե պտուկներն ուժեղ ճմլես, արյուն կգա։ Իսկ եթե ձգձգես խոսքը, դատաստան ու կռիվ դուրս կգա։

31

¹ Իմ խոսքերն Աստծու կողմից են ասված՝ նման թագավորի խրատի, որ նրան ուսուցանել է իր մայրը։ ² Օ՜, որդյա՛կ, Աստծու խոսքերն են, առաջնեկդ, քեզ եմ ասում, որդյա՛կ. Օ՜, որդյա՛կ, որովայնիս պտուղ. Օ՜, որդյա՛կ, իմ ուխտերի զավակ։ ³ Մի՛ տուր կանանց հարստությունդ, ոչ էլ քո կյանքդ ու միտքդ՝ հետին խորհուրդների. ⁴ խոհեմությա՛մբ գործիր ամեն բան, խոհեմությա՛մբ գինի խմիր։ Մեծամեծերը բարկասիրտ են, թող գինի չխմեն, ⁵ որ չհարբեն և չմոռանան իմաստությունը և չկարողանան ուղիղ դատել թույլին։ ⁶ Տրտմածներին խմի՛չք տվեք, և գինի՛ տվեք տառապյալներին, ⁷ Որ խմեն և մոռանան իրենց թշվառությունը և չհիշեն իրենց ցավերը։ ⁸ Աստծու խոսքո՛վ բաց քո բերանը և ողջամտությա՛մբ դատիր բոլորին, ⁹ ընտրի՛ր և զատի՛ր աղքատին ու թույլին։

¹⁰ Եթե առաքինի կին գտնվի, բոլոր պատվական քարերից թանկագին կլինի։ ¹¹ Ամուսնու սիրտը վստահ է նրա վրա, և նա երբեք ավարի կարոտ չի լինի։ ¹² Ողջ կյանքում գործակից է դառնում իր ամուսնուն բարիքի և ոչ թե չարիքի մեջ։

¹³ Բուրդ և կտավ գտնելով՝ պիտանի հանդերձներ է պատրաստում իր ձեռքերով։ ¹⁴ Եվ եղավ շահավետ նավի նման. հեռվից գանձեր է հավաքում։

¹⁵ Արթնանում արշալույսին, կերակուր է տալիս տնեցիներին և գործ՝ նաժիշտներին։ ¹⁶ Գեղեցիկ արտ տեսնելիս՝ գնում է այն և իր ձեռքի աշխատանքով մշակում է իր հողը։

¹⁷ Մեջքին պինդ գոտի կապած՝ բազուկները գործի մեջ է դնում ¹⁸ ու ճաշակում գործի քաղցրությունը, և ողջ գիշեր չի մարում նրա ճրագը։ ¹⁹ Ձեռքը օգուտին մեկնած՝ անձանձրույթ մատներով իլիկ է պտտում։

²⁰ Ձեռքը բաց է աղքատներին, և բաժին է տալիս խեղճերին։ ²¹ Եթե ամուսինը ուշանա էլ, չի մտահոգվում տան համար, քանզի բոլորին, ովքեր նրա հետ են, կրկնակի հագուստ է հագցրել։

²² Ամուսնու համար բեհեզ և ծիրանի է գործել իսկ իր համար՝ ծածկոցներ։ ²³ Երևելի է նրա ամուսինը դրսում, երբ նստում է ժողովրդի մեջ՝ երկրի բնակիչների ու ծերերի խորհրդի մեջ։

²⁴ Կինը կտավ է պատրաստում և վաճառում և ծածկոցներ՝ քանանացիներին։ ²⁵ Չափով և իմաստությամբ է բացում բերանը և սահման դնում իր լեզվին։

²⁶ Ուժ և վայելչություն հագած՝ ուրախ պիտի լինի իր վերջին օրերին։ ²⁷ Նրա տան ճանապարհները պարկեշտ են, և նա պարապության հաց չի կերել։

²⁸ Նրա ողորմածությունները իր որդիներին ոտքի են կանգնեցնում և մեծարում։ Նրա ամուսինը գովում է նրան՝ ասելով. ²⁹ «Բազում դուստրեր հարստություն ստացան, շատերը սխրանք գործեցին, բայց դու գերազանց եղար և բոլորից անցար։

³⁰ Կեղծ հաճություն և սին գեղեցկություն չկա քո մեջ»։ Քանզի իմաստուն և բարեպաշտ կինը պիտի օրհնվի։ Նա պատիվ է տալիս Աստծուց երկյուղածներին, ³¹ դուք էլ պատի՛վ տվեք նրան նրա շուրթերի պտղից, և թող նրա ամուսինը գովվի դրսում. քանզի մարդու ճանապարհներն իր հայացքի առջև են ընթանում, և նա հաջողություն պիտի գտնի հավիտյանս հավիտենից։

ԺՈՂՈՎՈՂ

1

Կյանքն անիմաստ է

¹ Դավթի որդու՝ Երուսաղեմում Իսրայելի թագավոր Ժողովողի խոսքերը ² Ունայնություն ունայնությանց,- ասաց Ժողովողը,- ունայնություն ունայնությանց. ամեն ինչ ունայն է։ ³ Ի՞նչ օգուտ ունի մարդ իր ողջ չարչարանքից, որով նա տանջվում է արեգակի ներքո։ ⁴ Սերունդ է գնում, սերունդ է գալիս, բայց երկիրը մնում է հավիտյան։ ⁵ Արեգակը ծագում, մայր է մտնում և վերադառնում իր տեղը։ ⁶ Ելնում է նա դեպի հարավ և դառնում դեպի հյուսիս. պտտվելով պտտվում, փչում է հողմը և վերադառնում իր շրջապտույտին։ ⁷ Բոլոր գետերն էլ հոսում են դեպի ծով, բայց այն չի լցվում, և վերադառնում են գետերն այնտեղ, որտեղով հոսել են՝ կրկին հոսելու համար։ ⁸ Ամեն ինչ ջանքով է լինում, և մարդը չի կարող դա բացատրել. աչքը տեսնելով չի հագենում, և ականջը լսելով չի լցվում։ ⁹ Ի՞նչ է անցյալը. այն, ինչ որ պիտի լինի, և ի՞նչ արեցինք. այն, ինչ անելու ենք միշտ։ Եվ ոչ մի նոր բան չկա արեգակի ներքո։ ¹⁰ Ո՞վ կարող է ասել՝ «Ահա սա նոր է»։ Բայց դա եղել է վաղուց, հավիտենապես՝ մեզնից առաջ եղածների մեջ։ ¹¹ Նախկինների հիշատակը չկա, չի լինելու նաև դրանցից հետո գալիքների հիշատակը՝ ամենավերջում ծնվողների մեջ։

Փիլիսոփայի փորձառությունը

¹² Ես՝ Ժողովողս, թագավորեցի Իսրայելի վրա Երուսաղեմում ¹³ և սիրտս տվեցի իմաստությամբ քննելու և խորհելու այն ամենի մասին, ինչ եղել է երկնքի ներքո։ Քանզի Աստված չար զբաղմունք է տվել մարդու որդիներին՝ արեգակի ներքո չարչարվելու։ ¹⁴ Ես տեսա այն բոլոր գործերը, որ կատարվել են արեգակի ներքո, և ահա ամեն ինչ ունայնություն է, քամուն բռնելու նման։ ¹⁵ Ուղիղ ձևից շեղվածին նույն ճանապարհին դարձնել չի լինի, և պակասող բանը՝ հաշվել։ ¹⁶ Սրտիս մեջ ինքս ինձ ասացի. «Ահա ես ավելի մեծ եղա և ավելի իմաստնացա, քան բոլոր նրանք, որ ինձնից առաջ եղել էին Երուսաղեմում»։ Եվ իմ սիրտը ճանաչեց իմաստությունն ու գիտությունը։ ¹⁷ Իմ սիրտը ճանաչեց բազում իմաստություն և գիտություն, ես հասկացա առակներն ու խորհուրդները։ Սակայն դա նույնպես քամուն բռնելու նման է։ ¹⁸ Քանզի շատ իմաստության մեջ շատ գիտություն կա, և իր գիտությունն ավելացնողն իր ցավն է ավելացնում։

2

¹ Սրտիս մեջ ասացի. «Արի՛ քեզ փորձեմ վայելքների մեջ. տե՛ս, թերևս այստեղ է երջանկությունը»։ Բայց ահա դա էլ է ունայնություն։ ² Զգացի, որ ծիծաղն անմտություն է, իսկ ուրախությունը՝ անօգուտ բան։ ³ Եվ ես խորհեցի սիրտս զվարթացնելու մասին, ինչպես գինին է զվարթացնում մարմինս։ Սիրտս, սակայն, իմաստությամբ առաջնորդեց ինձ՝ զորանալու ուրախության մեջ, մինչև որ տեսնեմ, թե ո՛րն է բարին մարդկանց որդիների համար, որ իրենց կյանքի բոլոր օրերին գործում են արեգակի ներքո։ ⁴ Մեծամեծ գործերի ձեռնամուխ եղա, ինձ համար ապարանքներ շինեցի ու այգիներ տնկեցի, ⁵ ինձ համար պարտեզներ և ծաղկանոցներ շինեցի և ամեն տեսակ պտղաբեր ծառեր տնկեցի նրանց մեջ։ ⁶ Ջրավազաններ փորեցի ինձ համար անտառիս մայրիները ոռոգելու համար։ ⁷ Ծառաներ և աղախիններ գնեցի, և ընդոծիններ ունեցա, և ավելի շատ հանդեր ու հոտեր ձեռք բերեցի, քան բոլոր նրանք, որ ինձնից առաջ եղել են Երուսաղեմում։ ⁸ Ինձ համար արծաթ, ոսկի և թագավորական գանձեր կուտակեցի ինձ ենթակա գավառներից։ Գուսաններ, երգիչներ ու երգչուհիներ ունեցա և մարդու որդու համար՝ ամեն մեղկություն։ Տղամարդ և կին տակառապետներ բերեցի ինձ համար՝ բաժակներս լցնելու համար։ ⁹ Ես ավելի մեծ եղա, քան բոլոր նրանք, որ ինձնից առաջ եղել են Երուսաղեմում, և իմ իմաստությունն ինձնից չպակասեց։ ¹⁰ Ինչ աչքս ուզեց, ինձ չզրկեցի դրանից, և ոչ մի ուրախության համար սրտիս վրա արգելք չդրեցի։ Քանզի իմ սիրտն ուրախ եղավ, որովհետև վայելեց իմ աշխատանքի պտուղները, և դա էլ իմ բաժինը եղավ իմ բոլոր աշխատանքներից։ ¹¹ Աչք նետեցի իմ ձեռքերի կատարած բոլոր գործերին և դրանք անելու համար իմ կրած հոգնություններին, և ահա ամեն ինչ ունայնություն է, քամուն բռնելու նման, և ոչ մի օգուտ չկա արեգակի ներքո։

¹² Ես դարձա՝ տեսնելու իմաստությունը, նաև անխոհեմությունն ու անմտությունը, քանզի ո՞վ է այն մարդը, որ իր գործն անելիս միշտ հետևում է արած խորհուրդներին։ ¹³ Եվ տեսա, որ իմաստությունն ավելի օգտակար է անմտությունից, ինչպես լույսը՝ խավարից։

¹⁴ Իմաստունի աչքերն իր գլխի մեջ են, իսկ անմիտը գնում է խավարի միջով։ Բայց ես հասկացա, որ նրանց բոլորին էլ նույն վախճանն է սպասում։ ¹⁵ Եվ սրտիս մեջ ասացի. «Եթե նույն վախճանն է սպասում և՛ ինձ և՛ անզգամին, ես էլ ինչո՞ւ իմաստություն ձեռք բերեցի»։ Եվ մեկ անգամ ևս ասացի սրտիս մեջ, թե սա նույնպես ունայնություն է, քանի որ անմիտն էլ է ավելորդ տեղը խոսում, ¹⁶ որովհետև թե՛ հիմարի և թե՛ իմաստունի համար հավիտենական հիշատակ չկա։ Արդարև, գալիք օրերին մոռացվելու է ամեն բան։ Արդ, ինչպե՞ս կարող է իմաստունը հիմարի պես մեռնել։ ¹⁷ Ես ատեցի իմ կյանքը, որովհետև ինձ համար չար էին արեգակի ներքո կատարած իմ գործերը, քանի որ ամեն ինչ ունայնություն է և քամու ընտրություն։ ¹⁸ Ես ատեցի իմ ամբողջ աշխատանքը, որ կատարել էի արեգակի ներքո, քանի որ ես այն թողնելու եմ ինձնից հետո եկող մի մարդու։

¹⁹ Եվ ո՞վ գիտե, իմաստո՞ւն է լինելու նա, թե՞ հիմար, կամ կարողանալո՞ւ է տիրել արդյոք իմ բոլոր վաստակին, որի համար ես չարչարվեցի և որի շնորհիվ էլ իմաստուն դարձա արեգակի ներքո։ Սակայն սա ևս ունայնություն է։ ²⁰ Իմ ամբողջ սրտով ես հրաժարվեցի իմ բոլոր արդյունքներից, որ վաստակեցի արեգակի ներքո, ²¹ որովհետև մարդ կա, որի վաստակն իմաստությամբ, գիտությամբ և արիությամբ է լինում, մարդ էլ կա, որ դրանից բոլորովին անմասն է. մի՞թե այդ վաստակը նրան բաժին չի ընկնելու։ Սակայն սա ևս ունայնություն է և մեծ չարիք։ ²² Ուստի ի՞նչ է մնում մարդուս իր բոլոր չարչարանքից և սրտի զուր հոգնությունից, որի համար ջանք է թափել արեգակի ներքո, ²³ որովհետև նրա բոլոր օրերը ցավերով են լի և զբաղումները՝ տրտմությամբ, և նույնիսկ գիշերը նրա սիրտը չի ննջում։ Սակայն սա ևս ունայնություն է։

²⁴ Մարդուս համար ուտելուց, խմելուց և սեփական վաստակով ինքն իրեն հաճույք պատճառելուց ավելի լավ բան չկա։ Բայց ես տեսա, որ այդ ևս Աստծուց է լինում, ²⁵ քանզի ո՞վ կարող է ուտել և խմել առանց նրա։ ²⁶ Աստված իմաստությունը, գիտությունը և ուրախությունը տալիս է այն մարդուն, որը հաճելի է իր առջև, իսկ մեղավորին տալիս է հավաքելու և դիզելու հոգս, որպեսզի նա ձեռք բերածը տա այն մարդուն, որը հաճելի է Աստծու առջև։ Բայց սա ևս ունայնություն է, քամուն բռնելու նման։

3

Ամեն բան իր ժամանակն ունի

¹ Ամեն բանի ժամանակ կա, և երկնքի ներքո ամեն գործ ունի իր ժամանակը՝ ² ծնվելու ժամանակը և մեռնելու ժամանակը, տնկելու ժամանակը և տնկածը հանելու ժամանակը, ³ սպանելու ժամանակը և բժշկելու ժամանակը, քանդելու ժամանակը և շինելու ժամանակը, ⁴ լալու ժամանակը և ծիծաղելու ժամանակը, ողբալու ժամանակը և պարելու ժամանակը, ⁵ քարեր նետելու ժամանակը և քարերը հավաքելու ժամանակը, գրկելու ժամանակը և գրկից հեռանալու ժամանակը, ⁶ փնտրելու ժամանակը և կորցնելու ժամանակը, պահելու ժամանակը և դուրս նետելու ժամանակը, ⁷ պատռելու ժամանակը և կարկատելու ժամանակը, լռելու ժամանակը և խոսելու ժամանակը, ⁸ սիրելու ժամանակը և ատելու ժամանակը, պատերազմի ժամանակը և խաղաղության ժամանակը։ ⁹ Արդ, ի՞նչ օգուտ կա մարդուն իր աշխատանքից, որի համար նա ջանք է թափում։

¹⁰ Ես տեսա այն բոլոր զբաղմունքները, որ Աստված տվել է մարդու որդիներին, որ չարչարվեն դրա վրա։ ¹¹ Նրա ստեղծած ամեն բան բարի է իր ժամանակի մեջ. ահա մարդկանց սրտերում մի ամբողջ հավիտենություն է հաստատել Աստված, որպեսզի սկզբից մինչև վերջ մարդն այդպես էլ չկարողանա հասկանալ Աստծու ստեղծագործությունը։ ¹² Ես հասկացա, որ մարդկանց մեջ ավելի լավ բան չկա, քան ուրախանալ և բարիք գործել այս կյանքում, ¹³ քանզի ամեն մարդ, որ ուտում-խմում է և վայելում իր աշխատանքի բարի պտուղը, դա՛ է Աստծու պարգևը։ ¹⁴ Ես հասկացա, որ Աստծու ստեղծած ամեն բան պիտի մնա հավիտյան, որ ոչինչ հնարավոր չէ ավելացնել դրանց վրա կամ էլ պակասեցնել դրանցից։ Եվ Աստված ստեղծել է, որպեսզի երկյուղեն իրենից։ ¹⁵ Ինչ եղել է, հիմա էլ կա, և ինչ պիտի լիներ, եղել է արդեն, և Աստված փնտրելու է հալածյալին։

Ամեն ինչ վերջ է գտնում մահով

¹⁶ Արեգակի ներքո ես տեսա դարձյալ, որ որտեղ դատ ու դատաստան կար, ամբարիշտն այնտեղ էր, և որտեղ արդարություն կար, այնտեղ էր բարեպաշտը։ ¹⁷ Եվ սրտիս մեջ ասացի. «Աստված պիտի դատի արդարին և ամբարիշտին, քանի որ ամեն բանի ժամանակ կա, և բոլոր արարածների վրա ժամ ու ժամանակ կա դրված»։ ¹⁸ Եվ սրտիս մեջ մարդու որդիների խոսքերի վերաբերյալ ասացի, որ Աստված պիտի դատի նրանց, որպեսզի ցույց տա, թե իրենք էլ ի վերջո անասուն են։ ¹⁹ Քանզի նույն դիպվածն է պահված թե՛ մարդու որդիների և թե՛ անասունների համար, նույն պատահարն է լինելու նրանց բոլորի համար։ Ինչպես որ մեկի մահն է, նույնպես և մյուսի մահը, և երկուսն էլ նույն շունչն ունեն. էլ ի՞նչ առավելություն ունի մարդն անասունից. ոչ մի, քանի որ ամեն ինչ ունայնություն է։ ²⁰ Ամեն բան նույն տեղն է գնում. ամեն ինչ հողից է առաջացել և ամեն ինչ հող է դառնում։ ²¹ Եվ ո՞վ գիտե, թե մարդու որդիների հոգին ելնում է վեր, իսկ անասունների շունչն իջնում է ցած՝ հողի մեջ։ ²² Տեսա նաև, որ մարդուս համար չկա ուրիշ ավելի լավ բան, քան ուրախ լինել իր վաստակով, որովհետև դա է նրա բաժինը, քանի որ ո՞վ պիտի նրան նորից բերի, որ նա տեսնի, թե ի՛նչ է լինելու իրենից հետո։

4

Անարդարություններ

¹ Ես դարձա ու տեսա այն բոլոր զրկանքները, որ լինում են արեգակի ներքո. ահա զրկվածներն արցունքների մեջ, և ոչ ոք չկար, որ մխիթարեր նրանց, և ուժը նրանց զրկողների ձեռքին էր։ ² Եվ ես երանի տվեցի բոլոր նրանց, որոնք արդեն մահացել են, քան կենդանի մարդկանց, որ ապրում են մինչև այժմ։ ³ Բայց այդ երկուսից էլ ավելի լավ է նա, ով բնավ չի եղել և չի տեսել այն ամբողջ չար գործը, որ կատարվում է արեգակի ներքո։ ⁴ Ես տեսա նաև բոլոր հաջողություններն ու արարածների ամեն չարություն. դրա պատճառը մարդուս նախանձն է մերձավորի նկատմամբ, սակայն սա ևս ունայնություն է և քամուն բռնելու նման։ ⁵ Հիմարը ձեռքերը ծալած նստում և ինքն իրեն է ուտում։ ⁶ Լավ է հանգիստ վաստակած մի բուռը, քան չարչարանքով ու քամու ընտրությամբ՝ երկու բուռը։

⁷ Դարձա և մի այլ ունայնություն էլ տեսա արեգակի ներքո։ ⁸ Դա կողակից չունեցող մարդն է, որ ոչ ոք չունի՝ ո՛չ որդի, ո՛չ էլ եղբայր, բայց նրա աշխատանքը վերջ չունի, և աչքն էլ չի կշտանում հարստությամբ։ Նա չի ասում. «Ո՞ւմ համար եմ ջանք թափում և ինչո՞ւ եմ հոգիս զրկում բարիքից»։ Սա ևս ունայնություն է և ժանտ զբաղմունք։ ⁹ Երկու հոգով ավելի լավ է, քան մենակ, որովհետև ավելի վարձ կա նրանց վաստակի համար, ¹⁰ քանի որ եթե մեկն ընկնի, իր ընկերը կկանգնեցնի նրան, բայց վա՛յ մենակին, որ ընկնի, և մեկը չկա, որ բարձրացնի նրան։ ¹¹ Եվ եթե երկուսը միասին քնեն, կտաքացնեն միմյանց, բայց միայնակ մարդն ինչպե՞ս պիտի տաքանա։ ¹² Եվ եթե մեկի վրա բռնանան, երկուսը դեմ կկանգնեն. չէ՞ որ երեքտակ թելն էլ հեշտ չի կտրվում։

¹³ Լավ է աղքատ և իմաստուն տղան, քան թե ծեր և անմիտ թագավորը, որ այլևս չի կարող շրջահայաց լինել, ¹⁴ որովհետև տղան կարող է բանտից դուրս գալ և թագավորել, հակառակ որ իր ապագա թագավորության մեջ աղքատ էր ծնվել։ ¹⁵ Ես տեսա, որ արեգակի ներքո բոլոր ապրողները գնում են այն տղայի՝ այն երկրորդի հետ, որ պիտի փոխարինի նրան։ ¹⁶ Վերջ չկար ամբողջ ժողովրդին, բոլորին, որ եղել էին նրանցից առաջ, բայց հետո եկողներն էլ պիտի չուրախանան նոր թագավորով։ Բայց դա ևս ունայնություն է և քամուն բռնելու նման։

¹⁷ Զգո՛ւյշ եղիր ոտքերիդ համար, որոնցով Աստծու տուն ես գնում, ¹⁸ և մոտեցի՛ր լսելու համար, որովհետև քո զոհն ավելի հարգի է, քան ընծաներն անզգամների, որոնք բարիք գործել չգիտեն։

5

Անխոհեմ խոստումներ չանել

¹ Բերանովդ մի՛ շտապիր, և սիրտդ ավելորդ տեղը թող չփութա Աստծու առաջ խոսք ասելու. որովհետև Աստված երկնքում է, իսկ դու՝ երկրի վրա. դրա համար էլ քո խոսքերը թող սակավ լինեն։ ² Երազը շատ փորձությունից է առաջ գալիս, իսկ անզգամի ձայնը՝ շատախոսությունից։ ³ Ինչպես որ ասվում է՝ «Ուխտ ես արել Աստծուն, ուրեմն մի՛ դանդաղիր այն կատարելու», քանզի անզգամները բարի կամեցողություն չունեն։ Ուրեմն եթե ուխտ անես, կատարի՛ր այն, ⁴ քանի որ լավ է ուխտ չանես, քան թե ուխտես և չկատարես։ ⁵ Թույլ մի՛ տուր, որ բերանդ մարմնիդ դրդի մեղքեր գործելու, և Աստծու առջև մի՛ ասա, թե «Անգիտությունից էր», որպեսզի Աստված ասածիդ վրա չբարկանա և չավերի ձեռքիդ գործերը։ ⁶ Քանզի երազների առատության մեջ և՛ խոսքերի շատություն կա, և՛ ունայնություն։ Բայց դու քո հերթին վախեցի՛ր Աստծուց։

⁷ Եթե երկրի վրա տնանկի զրպարտություն տեսնես և իրավունքի ու արդարության հափշտակություն, չզարմանաս, որովհետև բարձր դիրքի մի պաշտոնյա պաշտպանված է մեկ այլ բարձր դիրքի պաշտոնյայի կողմից, իսկ դրանցից էլ վեր ավելի բարձր պաշտոնյաներ կան։ ⁸ Բայց հողի բարիքը հավասար է բոլորի համար, և ամենքի վրա իշխող թագավորն օգտվում է մշակված հողից։

Հարստությունն անօգուտ է

⁹ Արծաթ սիրողը չի կշտանա արծաթից, ոչ էլ արդյունք սիրողն ինքն իրենով կլիանա. ուստի դա ևս ունայնություն է։ ¹⁰ Արդար բարիքները բազմանալու հետ շատանում են նաև դրանք ուտողները։ Եվ ունեցվածքի տիրոջ ինչի՞ն է պետք քաջությունը, բացի միայն թերևս իր իսկ աչքերով այդ ամենը տեսնելուց։ ¹¹ Քաղցր է ստրուկի քունը. քիչ ուտի նա, թե շատ։ Իսկ հարուստը չի կարողանում հանգիստ քուն մտնել։

¹² Մի վատ բան էլ տեսա արեգակի ներքո. դա այն թաքցվող հարստությունն է, որ չարիք է բերելու իր իսկ պահողին։ ¹³ Այս հարուստը չարաչար կորչելու է և իր ծնած որդու ձեռքին ոչինչ չի թողնելու։ ¹⁴ Ինչպես որ իր մոր որովայնից նա մերկ է ելել, մերկ էլ հետ կդառնա, ինչպես եկել է, այնպես էլ կգնա, և երբ գնա, ոչինչ չի վերցնելու իր վաստակից, որպեսզի տանի իր հետ։ ¹⁵ Սա էլ մի ծանր ցավ է, ինչպես որ եկել է, այնպես էլ կգնա։ Էլ ի՞նչ օգուտ ունի մարդն իր վաստակից, որ քամուն տալու համար է ձեռք բերում։ ¹⁶ Եվ հետո նրա բոլոր օրերը խավար են ու սուգ և անցնում են շատ հոգսերի, հիվանդությունների և բարկության մեջ։

¹⁷ Ահավասիկ և այն լավը, որ ես տեսա. դա ուտելն ու խմելը և բարիք տեսնելն է իր ամբողջ վաստակից, որի համար նա ջանք է թափել արեգակի ներքո՝ Աստծու կողմից նրան տրված իր կյանքի բոլոր օրերին, որովհետև դա է նրա բաժինը։ ¹⁸ Աստված ամեն մարդու հարստություն և ունեցվածք ու դրանից ուտելու, իր բաժինը վերցնելու և իր աշխատանքից ուրախ լինելու իշխանություն է տվել։ Դա ևս Աստծու պարգևն է։ ¹⁹ Նա չի նեղվի, որ իր կյանքի օրերը կարճ են, երբ Աստված դրանք լցնի ուրախությամբ։

6

¹ Մի չարիք էլ տեսա արեգակի ներքո, որ շատ հաճախ է պատահում մարդուն։ ² Մարդ կա, որին Աստված թե՛ հարստություն և թե՛ ունեցվածք ու փառք է տվել, և ինչ ցանկանա նրա հոգին, ոչ մի բանի պակաս չի զգում, բայց Աստված դրանցից ուտելու իշխանություն չի տվել նրան, այլ օտար մեկն է վայելելու դրանք։ Սա ևս ունայնություն է ու ծանր ցավ։ ³ Եթե մի մարդ հարյուր զավակ էլ ծնի և բազում տարիներ էլ ապրի, և կամ էլ ավելի ու ավելի շատանան նրա կյանքի օրերը, բայց եթե նրա հոգին չի կշտացել բարիքներից, և մի գերեզման իսկ չի գտնվել նրա համար, ապա ես կասեմ, որ վիժածն ավելի լավ է նրանից, ⁴ որովհետև ունայնությամբ է լույս աշխարհ եկել և քայլում է խավարի միջով, և խավարում էլ կծածկվի նրա անունը, ⁵ որովհետև նա ո՛չ արև տեսավ և ո՛չ էլ իմացավ, թե ի՛նչ է հանգիստը մեկ ուրիշից ավելի։ ⁶ Անգամ եթե ապրել է հազար տարի, բայց ոչ մի բարիք չի վայելել, մի՞թե նույն տեղը չի գնալու։ ⁷ Մարդու բոլոր աշխատանքներն իր բերանի համար են, բայց նրա հոգին չի հագենում։ ⁸ Ո՞րն է իմաստունի առավելությունը հիմարից, որ տնանկը գիտե կյանքին ընդառաջ գնալ։ ⁹ Լավ է աչքով տեսնել, քան հոգով ցանկալ։ Սակայն սա ևս ունայնություն է և քամուն բռնելու նման։

¹⁰ Ինչ որ գոյություն ունի, արդեն անուն է դրված վրան, և սկզբից արդեն հայտնի է, թե ինչպիսի՛ն է մարդը, և որ նա երբեք չի կարող չափվել իրենից Հզորի հետ, ¹¹ որովհետև շատ բաներ կան, որ բազմապատկում են ունայնությունը։

¹² Ի՞նչ է մարդու առավելությունը, և ո՞վ գիտե, թե ի՞նչն է լավ նրա ունայն կյանքի օրերին, որ անցնում են ստվերի նման։ Որովհետև ո՞վ պիտի պատմի մարդուն, թե ի՛նչ է լինելու նրանից հետո արեգակի ներքո։

7

Իմաստուն խորհուրդներ

¹ Բարի անունը լավ է հոտավետ յուղից, և մահվան օրը՝ ծննդյան օրից։

² Խնջույքի տուն գնալուց լավ է սգո տուն գնալը, որովհետև դա է ամեն մարդու վախճանը, և դա է բարություն տալիս ողջ մնացած մարդու սրտին։ ³ Սրտմտությունը լավ է ծիծաղից, որովհետև դեմքի վշտալի տեսքից կզվարթանա սիրտը։ ⁴ Իմաստունի սիրտը սգո տանն է, իսկ անմիտի սիրտը՝ ուրախության տանը։

⁵ Մարդու համար ավելի լավ է իմաստունի հանդիմանությունը լսել, քան անմիտների երգը։ ⁶ Արդարև, հիմարի ծիծաղը նման է կաթսայի տակ կրակի մեջ ճարճատող փշերի ձայնին։ Բայց սա ևս ունայնություն է։ ⁷ Զրպարտությունը խռովում է իմաստուններին և կործանում նրանց ազնիվ սրտերը։ ⁸ Խոսքի վերջաբանը նախընտրելի է առաջաբանից, համբերատար հոգին՝ գոռոզամիտ հոգուց։ ⁹ Մի՛ շտապիր հոգուդ մեջ բարկանալ, որովհետև բարկությունը հանգչում է անզգամների ծոցում։

¹⁰ Մի՛ ասա, թե ի՛նչ կատարվեց, թե ինչո՛ւ անցյալը լավ է ներկայից, որովհետև իմաստությամբ չէ, որ հարցնում ես այդ մասին։ ¹¹ Իմաստությունը ժառանգության հետ լավ է և առավելություն՝ արեգակը տեսնողների համար։ ¹² Քանզի արեգակի հովանու ներքո իմաստությունը նման է արծաթի ստվերին, բայց իմաստուն գիտության օգուտն այն է, որ նա ապրեցնում է իմաստություն ստացողին։ ¹³ Նայի՛ր Աստծու գործերին. ո՞վ կարող է ուղղել այն, ինչ խախտել է Աստված։ ¹⁴ Քո առատության օրերին բարիքի մե՛ջ ապրիր և վատ օ՛րն էլ նկատիր։ Եվ տե՛ս, որ Աստված դրանք միահյուսեց իրար, և մարդ չգիտի, թե ի՛նչ է լինելու։

¹⁵ Ես իմ ունայնության օրերին տեսա ամեն ինչ. արդար կա, որ իր արդարության մեջ կորչում է, ամբարիշտ էլ կա, որ ապրում է իր չարությամբ։ ¹⁶ Չափազանց արդար մի՛ եղիր և ոչ էլ շատ ճարտար, որ չսխալվես։ ¹⁷ Շատ ամբարիշտ մի՛ եղիր և մի՛ եղիր խստաբարո, որ տարաժամ չմեռնես։ ¹⁸ Լավ է, որ մեկը բռնես և մյուսի մեջ էլ ձեռքդ չպղծես, որովհետև ով երկնչում է Աստծուց, նա կազատվի ամեն բանից։

¹⁹ Իմաստությունն ավելի շատ է օգնում իմաստունին, քան քաղաքում գտնվող տասը իշխան։ ²⁰ Երկրի վրա չկա արդար մի մարդ, որ բարի գործ անի և չմեղանչի։ ²¹ Բայց դու ամբարիշտների ասած ամեն խոսք սրտիդ շատ մոտ մի՛ ընդունիր, որ ծառայիդ անեծքը չլսես, երբ նա քեզ անիծի։ ²² Քանզի ծառան շատ անգամ քեզ կարող է վատություն անել և շատ անգամ սրտիդ տանջանք պատճառել, սակայն դու էլ ուրիշներին չանիծես։

²³ Այս ամենը փորձեցի իմաստությամբ և ասացի. «Ահա իմաստուն դարձա»։ Բայց իմաստությունը հեռացավ ինձնից, ավելի հեռու, քան մինչ այդ էր։ ²⁴ Եվ արդ ո՞վ կարող է չափել խորխորատը։ ²⁵ Ես և իմ սիրտը շրջեցինք ամեն տեղ, որ իմանանք, քննենք և որոնենք իմաստությունն ու հանճարը, հասկանանք ամբարիշտների ուրախությունը, նրանց խռովքներն ու հուզմունքները։ ²⁶ Եվ ես գտա այն ու պիտի ասեմ, որ մահից ավելի դառն է այն կինը, որի սրտում որոգայթ ու թակարդ կա, իսկ ձեռքերի մեջ՝ կապանքներ։ Ով հաճելի է Աստծու առաջ, նա պիտի ազատվի այդ կնոջից, իսկ ով մեղավոր է, նրանից բռնված պիտի լինի։ ²⁷ Ահա այս բոլորը գտա,- ասում է Ժողովողը,- մեկ առ մեկ հաշվելով՝ հասկանալու այդ ամենի պատճառը, ²⁸ որը փնտրեց հոգիս, բայց ես չգտա. հազարի մեջ մի տղամարդ գտա, բայց կին ամենևին չգտա։

²⁹ Բայց ահա գտա նաև, որ Աստված մարդուն ուղղամիտ է ստեղծել, բայց մարդիկ չար խորհուրդներ փնտրեցին։

8

¹ Ո՞վ է ճանաչում իմաստուններին, և ո՞վ կարող է այս հարցերի մեկնությունը տալ։ Մարդու իմաստությունը լույս է տալիս նրա երեսին, բայց անամոթի երեսը ատելի է լինում։

Մի՛ հարատևիր չար գործի մեջ

² Զգուշացի՛ր թագավորի բերանից և մի՛ շտապիր Աստծուն երդում տալիս։ ³ Ինչքան կարող ես, հեռո՛ւ մնա նրա աչքից և ոչ էլ հարատևիր չար գործի մեջ, որովհետև նա ինչ որ կամենա, կարող է անել։ ⁴ Որպես թագավոր՝ նա իշխանությամբ է խոսում, և ո՞վ կարող է նրան ասել «Ի՞նչ արեցիր»։ ⁵ Պատվիրան պահող մարդը չար խոսքի չի հանդիպի. իմաստունի սիրտը գիտի դատելու պատեհ ժամանակը։ ⁶ Ամեն բան իր ժամանակն ու իրավունքն ունի, բայց մարդու գիտությունը շատ բազմաբնույթ է, ⁷ որովհետև չգիտե, թե ի՛նչ է լինելու, և ինչ էլ որ լինի, ո՞վ պիտի պատմի նրան։ ⁸ Մարդ իշխանություն չունի իր հոգու վրա. երբ պատերազմ լինի, փրկություն չկա, պատերազմի ժամանակ միջնորդություն չկա։

Ամբարիշտը և արդարը

⁹ Ես տեսա այս բոլորը և սրտով քննեցի այն բոլոր գործերը, որ կատարվել են արեգակի ներքո, և այն, որ մարդն իշխում է մարդու վրա ու չարչարում է նրան։ ¹⁰ Ապա տեսա, որ ամբարիշտներին թաղեցին գերեզմանների մեջ, գնացին սուրբ տեղից, և նրանց համար սուգ արեցին քաղաքում, որովհետև այսպես արեցին։ ¹¹ Չարի դատաստանն անմիջապես չի կատարվում, այդ պատճառով էլ մարդկանց որդիների սրտերը համարձակվում են չարիք գործել։ ¹² Ով մեղք է գործում, չարիք է գործում ավելի առաջ թե հետո, որովհետև գիտեմ, թե ամեն բան բարի պիտի լինի նրանց, ովքեր երկյուղ են կրում Աստծուց։ ¹³ Բայց ամբարշտին բարություն պիտի չլինի. նա իր օրերը չպիտի երկարեցնի, այլ դրանք ստվերի նման պիտի լինեն, քանի որ երկյուղ չի կրում Աստծու ներկայությունից։

¹⁴ Մի ունայնություն էլ կա երկրի վրա. արդարներ կան, որոնց պատահում են գործեր, որ արժանի են ամբարիշտներին, և ամբարիշտներ կան, որոնց պատահում է այն, ինչ արժանի է արդարներին։ Եվ ես ասացի. «Սակայն դա ևս ունայնություն է»։ ¹⁵ Եվ ես գովեցի ուրախությունը, որովհետև արեգակի ներքո մարդու համար ուտելուց, խմելուց և ուրախ լինելուց բացի ուրիշ ավելի լավ բան չկա, քանի որ նրա ողջ կյանքում, որ Աստված տվել է նրան արեգակի ներքո, դա է մնալու միայն նրա վաստակից։

¹⁶ Երբ սիրտս տվեցի ճանաչելու իմաստությունը և տեսնելու այն զբաղմունքները, որ կատարվում են երկրի վրա (որովհետև մարդ կա, որի աչքին գիշեր թե ցերեկ քուն չի գալիս), ¹⁷ տեսա Աստծու բոլոր գործերը. մարդը չի կարող գտնել այն գործը, որ կատարվել է արեգակի ներքո։ Որքան էլ մարդ աշխատի որոնել այն, չի գտնելու, և մինչև իսկ իմաստունն ինչքան էլ ասի, թե գիտի, դարձյալ չի կարող գտնել։

9

¹ Այս ամենը սրտիս մեջ դրեցի, և սիրտս տեսավ այս ամենը. թե ինչպես և՛ արդարները, և՛ իմաստունները, և թե՛ նրանց գործերն Աստծու ձեռքում են, քանզի մարդ չի ճանաչում ո՛չ սերը և ո՛չ էլ ատելությունը։ Այս ամենը մարդու առաջ է, ² և ունայնություն կա այդ ամենի մեջ։ Նույն դիպվածն է վերապահված արդարի ու ամբարիշտի, բարու և չարի, մաքուրի և անմաքուրի, զոհ մատուցողի ու չմատուցողի, ինչպես բարեգործի, այնպես էլ մեղսագործի, ինչպես երդում տվողի, այնպես էլ երդումից վախեցողի համար։ ³ Բայց արեգակի տակ եղած բոլոր բաների մեջ ամենավատն այն է, որ բոլորին էլ նույն դիպվածն է վիճակված։ Քանզի մարդկանց որդիների սրտերը լցվել են չարությամբ, և նրանց ամբողջ կյանքի ընթացքում հոգսն է նրանց սրտերում, որից հետո արդեն իրենք էլ պիտի մեռնեն։ ⁴ Նրանցից ո՞վ կարող է հաղորդակցվել ողջերի հետ, հույս կա՞ արդյոք, քանզի կենդանի շունը լավ է, քան սատկած առյուծը։ ⁵ Նրանք, որ կենդանի են, գիտեն, թե մեռնելու են, իսկ մեռածները ոչինչ էլ չգիտեն, և այլևս վարձ չկա նրանց համար, որովհետև մոռացվել է նրանց հիշատակը, ⁶ և կորսվել են։ Ահա թե՛ նրանց սերն ու թշնամանքը և թե՛ նախանձը, և նրանք հավիտյանս բաժին չունեն այն բոլորի մեջ, ինչ ստեղծվել է արեգակի ներքո։

⁷ Արի՛, ուրախությամբ կե՛ր քո հացը և զվարթ սրտով խմի՛ր քո գինին, քանզի Աստված արդեն իսկ հավանել է քո արած գործերը։ ⁸ Թո՛ղ հագուստներդ միշտ սպիտակ լինեն, և օծման յուղը չպակասի գլխիցդ։ ⁹ Կյանքդ վայելի՛ր քո կնոջ հետ, որին սիրեցիր քո ունայն կյանքի այն բոլոր օրերին, որոնք արեգակի ներքո տրված են քեզ մինչև քո օրերի վախճանը, որովհետև դա է քո բաժինը քո կյանքի և քո վաստակի մեջ, որ ձեռք ես բերել արեգակի ներքո։ ¹⁰ Այն ամենը, ինչ ձեռքիցդ կգա անելու, արա՛ կարողությանդ չափով, որովհետև դժոխքի մեջ, ուր պիտի գնաս, ո՛չ գործ կա, ո՛չ խորհուրդ, ո՛չ գիտություն, ո՛չ էլ իմաստություն։

¹¹ Դարձյալ տեսա արեգակի ներքո, որ ասպարեզը մարզիկներինը չէ, ոչ էլ պատերազմը՝ քաջերինը, ոչ էլ հացը՝ իմաստուններինը, ոչ էլ հարստությունը՝ հանճարներինը և ոչ էլ շնորհը՝ գիտուններինը, որովհետև կգա ժամանակ, երբ բոլորին էլ կպատահի նույն դիպվածը։ ¹² Քանի որ մարդն իր ժամանակն անգամ չգիտի, և ինչպես ձկները, որ որսվում են չար ուռկաններով, և թռչունները, որ բռնվում են թակարդների մեջ, այնպես էլ մարդկանց որդիներն են ընկնում չար ժամանակի որոգայթների մեջ, երբ այն հանկարծակի հասնում է նրանց։

Մտածումներ իմաստության և հիմարության մասին

¹³ Այս մի իմաստությունն էլ տեսա արեգակի ներքո, որ մեծ է թվում ինձ։ ¹⁴ Ահա փոքրիկ մի քաղաք, նրա մեջ՝ սակավաթիվ մարդիկ, և մեծազոր մի թագավոր հարձակվում է դրա վրա, պաշարում այն ու մեծամեծ պատնեշներ շինում նրա դեմ։ ¹⁵ Իսկ այնտեղ անտուն և իմաստուն մի մարդ է գտնվում ու իր իմաստությամբ փրկում քաղաքը, բայց հետո էլ ոչ ոք չի հիշում այդ անտուն մարդուն։ ¹⁶ Արդ, ես ինքս ինձ ասացի. «Իմաստությունը լավ է ուժից, բայց արհամարհված է աղքատի իմաստությունը և չլսված՝ նրա խոսքերը»։ ¹⁷ Իմաստունների խոսքերը մեղմությամբ են ընկալվում, քան անզգամությամբ իշխողների աղաղակը։ ¹⁸ Իմաստությունը լավ է պատերազմի սարքերից, իսկ մեկ մեղավորը շատ բարիքներ կարող է կորստյան մատնել։

10

¹ Սատկած ճանճերն ապականում են անուշահոտ յուղերը։ Սակավ իմաստությունն ավելի հարգի է, քան մեծ, բայց անմիտ փառքը։ ² Իմաստունի սիրտը նրա աջ կողմում է, իսկ հիմարինը՝ ձախ կողմում։ ³ Նույնիսկ ճանապարհ գնալիս հիմարի սիրտը պիտի նվաղի, և ինչի մասին էլ նա մտածի, ամբողջն անմտություն է։ ⁴ Եթե իշխանավորը զայրանա քեզ վրա, տեղիցդ չշարժվես, քանի որ քաղցր աղաչանքը կարող է կանխել ծանր սխալները։

⁵ Մի չարիք էլ տեսա արեգակի ներքո, որն ակամայից է տեղի ունենում իշխանի երեսից։ ⁶ Հիմարին բարձր դիրք է տրվում, իսկ հարուստներին ցածր տեղ են նստեցնում։ ⁷ Տեսա ձի հեծած ծառաների ու ծառաների նման երկրի վրա քայլող իշխանների։

⁸ Փոս փորողն ինքը փոսի մեջ կընկնի, իսկ ցանկապատ քանդողին կխայթի օձը։ ⁹ Քար հանողը քարով էլ կտանջվի, փայտ ճեղքողին փայտից վտանգ կգա։ ¹⁰ Եթե կացինը բթանա, նրա բերանն էլ է բթանում, և պակասում է նրա զորությունը, իսկ իմաստությունն առավելություն է մարդու համար։

¹¹ Եթե հմայելիս օձը պիտի խայթի, դա առավելություն չէ հմայողի համար։ ¹² Իմաստունի բերանից ելած խոսքերը շնորհ են, իսկ հիմարի շուրթերը կործանում են նրան։ ¹³ Նրա խոսքերի սկիզբը հիմարությունն է, իսկ նրա խոսքի վախճանը՝ կատարյալ չարություն։

¹⁴ Հիմարը միայն խոսքերն է շատացնում։ Մարդը չգիտե, թե ի՛նչ է եղել և ոչ էլ իմանալու է, թե ի՛նչ է լինելու, քանի որ նրանից հետո ո՞վ կպատմի նրան։ ¹⁵ Հիմարի աշխատանքը տանջանք պիտի դառնա նրա համար, ինչպես քաղաքի ճամփան՝ այն չիմացողի համար։ ¹⁶ Վա՛յ քեզ, քաղա՛ք, որ թագավորդ մանուկ է, իշխաններդ էլ գիշեր-ցերեկ կերուխում են անում։ ¹⁷ Երանի՜ քեզ, երկի՛ր, որ թագավորդ ազնվական ցեղից է, իշխաններդ էլ ուտում են ժամանակին՝ ուժ հավաքելու համար, ու չեն ամաչում։

¹⁸ Ծուլության պատճառով են խոնարհվում ծածկի գերանները, և ձեռքերի պարապությունից է տունը կաթում։ ¹⁹ Հացը պատրաստում են խնդության համար, գինին ուրախացնում է ապրողներին, բայց ամեն բան արծաթին է հնազանդվում։ ²⁰ Սակայն քո մտքում անգամ թագավորին և քո ննջարանում էլ մեծավորին մի՛ անիծիր, որովհետև երկնքի թռչուններն այն ձայնի միջոցով տեղ կհասցնեն, և թևավորները կհայտնեն քո խոսքը։

11

Ի՞նչ է անում իմաստունը

¹ Հացդ ջրի՛ն տուր՝ թող տանի, շատ օրեր անց պիտի նորից գտնես այն։ ² Բաժի՛ն տուր յոթին էլ, ութին էլ, որովհետև ի՞նչ իմանաս, թե ի՛նչ չարիք պիտի լինի երկրի վրա։ ³ Երբ ամպերը լցվում են անձրևով, այն թափում են երկրի վրա։ Երբ ծառն ընկնում է դեպի հարավ կամ դեպի հյուսիս, ուր էլ ընկնի, այնտեղ էլ մնում է։ ⁴ Քամուն նայողը սերմ չի ցանի, ամպին նայողը հունձ չի անի, ⁵ որովհետև անհնար է իմանալ, թե ո՛րն է քամու ճանապարհը։ Ինչպես որ հղի կնոջ արգանդում գոյացող ոսկորները, այնպես էլ Աստծու բոլոր գործերը, որոնք նա արել է և դեռ պիտի անի, ծածկված են քեզանից։ ⁶ Առավոտյան քո սերմը կցանես, բայց երեկոյան էլ ձեռքդ պարապ չթողնես, որովհետև չգիտես, թե որը հաջող կլինի՝ սա՞, թե՞ նա, կամ գուցե երկուսն էլ լավ լինեն միասին։ ⁷ Քաղցր է լույսը, և աչքի համար հաճելի է նայել արեգակին, ⁸ որովհետև եթե մարդ բազում տարիներ ապրի և այդ բոլոր տարիներին էլ ուրախ լինի, պիտի հիշի նաև խավարի այն օրերը, որոնք խիստ շատ են լինելու, քանզի ամեն եկող բան ունայնություն է։

Խրատ երիտասարդին

⁹ Ուրախացի՛ր, երիտասա՛րդ, քո երիտասարդությամբ, սիրտդ թող զվարճացնի քեզ երիտասարդությանդ օրերին։ Գնա՛ քո սրտի անարատ ճանապարհով և քո աչքերի տեսածի համաձայն, բայց և իմացի՛ր, որ այս բոլորի համար Աստված քեզ դատաստանի պիտի ենթարկի։ ¹⁰ Եվ քո սրտից հեռո՛ւ վանիր տրտմությունը և չարությունը հանի՛ր քո մարմնից, որովհետև թե՛ երիտասարդությունը և թե՛ հիմարությունն ունայնություն են։

12

¹ Հիշի՛ր քեզ Ստեղծողին քո երիտասարդության օրերին, քանի դեռ չեն եկել չարության օրերը, և չեն հասել այն տարիները, որոնց մասին պիտի ասես. «Կյանքից այլևս հաճույք չեմ զգում», ² քանի դեռ չեն խավարել արեգակն ու լույսը, լուսինն ու աստղերը, քանի դեռ ամպերը չեն վերադարձել անձրևներից հետո։ ³ Այդ օրը քո տան պահապանները պիտի երերան, պիտի կքեն զորավոր այրերը, պիտի պակասեն և դատարկվեն աղորիքները, պիտի խավարեն անցքերից նայողները, ⁴ ու երբ աղորիքի ձայնը տկարանա, պիտի փակվեն փողոցների դռները, պիտի զարթնեն աքլորականչին, և պիտի նվաղի երգող աղջիկների ձայնը, ⁵ պիտի նայեն բարձունքներին և սարսափեն ճանապարհից։ Պիտի ծաղկի նշենին, մորեխը պիտի բազմանա, և փշոտ թուփը տարածվի, որովհետև մարդը գնաց իր հավիտենական տունը. հրապարակներում լացուկոծ անողնե՛րը պիտի շրջապատեն նրան, ⁶ քանի դեռ արծաթի լարը չի խզվել, և չի քանդվել ոսկի մանյակը, մինչ սափորը չի փշրվել աղբյուրի մոտ, և չի կոտրվել ջրհորի անիվը։ ⁷ Եվ փոշին, ինչպես որ էր, նորից հող պիտի դառնա, և հոգին, որ Աստված էր տվել, վերստին նրա մոտ պիտի գնա։ 

⁸ Ունայնություն ունայնությանց,- ասաց Ժողովողը,- ամեն ինչ ունայն է։

Վերջաբան

⁹ Եվ այսպիսով, քանի որ Ժողովողը մյուսներից ավելի իմաստուն դարձավ, սկսեց գիտություն սովորեցնել ժողովրդին, ուսումնասիրեց ու մշակեց բազմաթիվ առակներ։ ¹⁰ Ժողովողը շատ որոնեց, որ ցանկալի խոսքեր գտնի ու գրի ճշմարիտ և ուղղամիտ խոսքերով գրություններ։

¹¹ Իմաստունների խոսքերը նման են եզների խթանի ու ամուր խփված մեխերի, որոնք հավաքվել ու տրվել են նույն հովվի կողմից, և դրանցից միայն օգուտ կարելի է ստանալ։ ¹² Մի խոսք ևս, որդյա՛կ իմ. զգուշացի՛ր շատ գրքեր ունենալուց, որովհետև դրան վերջ չկա, իսկ շատ կարդալն էլ մարմնի համար հոգնություն է։ ¹³ Եվ ահա լսի՛ր իմ բոլոր խոսքերի վերջաբանը. վախեցի՛ր Աստծուց և պահի՛ր նրա պատվիրանները, որովհետև այս է մարդն իր ամբողջությամբ։ ¹⁴ Որովհետև Աստված պիտի բոլոր արարածների դատաստանն անի նրանց բոլոր թաքուն գործերի համար, չար թե բարի։

ԵՐԳ ԵՐԳՈՑ

1

Կամ օրհնությունների օրհնություն ասված Իսրայելի արքա Սողոմոնի կողմից

Հարսն ասում է.

¹ Թող համբուրի ինձ իր բերանի համբույրներով,

քանզի քո ստինքները լավ են գինուց,

և հոտը յուղերի քո՝ բոլոր խունկերից։

² Քո անունը հեղված յուղ է անուշ,

դրա համար օրիորդները սիրեցին քեզ

և դեպի իրենց ձգեցին քեզ։

³ Քո յուղերի հոտի հետևից կընթանանք և մենք։

Հարսը պատմում է օրիորդներին փեսայի մասին, թե ի՛նչ է շնորհել իրեն.

Արքան տարավ ինձ Իր սենյակը։

Հարսը պատմում է օրիորդներին, և նրանք ասում են.

Ցնծանք և ուրախ լինենք քեզանով

և սիրենք քո ստինքները գինուց ավելի։

Օրիորդները հարսին ասում են փեսայի անունը.

Ուղղությունը սիրեց քեզ։

Հարսն ասում է.

⁴ Սև եմ ես և գեղեցիկ, դուստրե՛ր Երուսաղեմի,

Կեդարի վրանների և Սողոմոնի խորանի պես։

⁵ Մի՛ նայեք ինձ, որ սևացել-թխացել եմ,

արեգակն է ինձ թխացրել։

Իմ մոր որդիներն ինձ հետ դաժան վարվեցին

և ինձ այգեստանի պահապան դրեցին,

Սակայն իմ այգին չկարողացա պահել։

Հարսն ասում է փեսային.

⁶ Պատմի՛ր ինձ, իմ հոգո՛ւ սիրելի,

որտե՞ղ ես հովվում քո հոտը,

որտե՞ղ ես հանգչում միջօրեին.

միգուցե մոլորվեմ քո ընկերների երամակների մեջ։

Փեսան ասում է հարսին.

⁷ Եթե դու ինքդ չգիտես, գեղեցի՛կդ կանանց մեջ,

հետևի՛ր դու հոտերի ոտնահետքերին

և արածեցրո՛ւ քո ուլերին հովիվների վրանների մոտ։

⁸ Մերձավո՛ր իմ, քեզ նմանեցրի փարավոնի կառքերին լծված իմ երիվարներին։

Օրիորդներն ասում են.

⁹ Քանզի գեղեցկացան քո ծնոտները տատրակի նման

և քո պարանոցը՝ մանյակների պես։

¹⁰ Ոսկե զարդի պես դարձնենք քեզ՝

արծաթե կիտվածքներով հանդերձ,

¹¹ մինչև արքան քեզ իր գիրկն ընդունի։

Հարսն ասում է ինքն իրեն և փեսային.

¹² Իմ նարդոսն արձակեց իր հոտը,

ստաշխի ծրար է ինձ համար իմ եղբորորդին,

որը պիտի հանգստանա իմ ստինքների մեջ։

¹³ Նոճու ողկույզ է ինձ համար իմ եղբորորդին՝

Ենգադդի այգեստանների մեջ։

Փեսան ասում է հարսին.

¹⁴ Ահավասիկ գեղեցիկ ես, մերձավո՛ր իմ,

ահավասիկ գեղեցիկ ես.

քո աչքերն աղավնիներ են։

Հարսն ասում է փեսային.

¹⁵ Ահա բարետես ես, սիրեցյա՛լ իմ,

նաև գեղեցիկ մեր հանգստարանի հովանու ներքո։

¹⁶ Մեր տան գերանները մայրիներ են,

մեր ծածկերը՝ նոճիներ։

2

Փեսան ասում է ինքն իրեն և հարսին.

¹ Ես դաշտերի ծաղիկ եմ, հովիտների շուշան։

² Ինչպես շուշանը՝ փշերի մեջ,

այնպես և իմ քույրը՝ աղջիկների մեջ։

Հարսն ասում է փեսային.

³ Ինչպես խնձորենին՝ անտառի ծառերի մեջ,

այնպես է իմ եղբորորդին [* սիրելին]՝ տղաների մեջ։

Նրա հովանու տակ նստել ցանկացա և նստեցի.

և նրա պտուղը քաղցր է իմ կոկորդում։

Հարսն ասում է օրիորդներին.

⁴ Գինետո՛ւն տարեք ինձ և սե՛րն իմ վրա կարգեք։

⁵ Զորացրե՛ք ինձ յուղով, խնձո՛ր լցրեք վրաս,

քանզի լի եմ խանդակաթ սիրով։

⁶ Նրա ձախ ձեռքը գլխիս տակ է,

և նրա աջը թող գրկի ինձ։

Հարսն ասում է օրիորդներին.

⁷ Երդվեցնում եմ ձեզ, դուստրե՛ր Երուսաղեմի,

անդաստանի զորություններով և ուժերով,

եթե վեր կենաք, չարթնացնե՛ք նրան, մինչև որ նա կամենա։

Փեսայի ձայնը լսելով՝ հարսն ասում է.

⁸ Իմ եղբորորդու ձայնն է.

ահա նա գալիս է,

վազում լեռների վրայով՝ ոստոստելով բլուրների վրա։

⁹ Եղբորորդիս նման է այծյամի կամ եղնիկների հորթերի՝

Բեթելի լեռների վրա։

Հարսն օրիորդներին նշան է անում փեսայից

Կանգնած է նա ահա մեր տան դրսում,

ձգվել է դեպի պատուհանները,

նայում է նա վանդակապատի միջով։

¹⁰ Իմ եղբորորդին պատասխանում է ինձ և ասում.

«Վե՛ր կաց, ե՛կ, մերձավո՛ր իմ, գեղեցի՛կ իմ, աղավնի՛ իմ։

¹¹ Քանզի ահա անցավ ձմեռը,

Անձրևներն անցան, գնացին-հեռացան։

¹² Ծաղիկներ երևացին մեր երկրում,

էտելու ժամանակը հասավ,

տատրակի ձայնը լսվեց մեր երկրում։

¹³ Իր բողբոջն ընձյուղեց թզենին,

ծաղկած որթերն իրենց հոտը բուրեցին։

Վե՛ր կաց, ե՛կ, մերձավո՛ր իմ, գեղեցի՛կ իմ, աղավնի՛ իմ։

¹⁴ Ե՛կ դու, աղավնյա՛կ իմ,

վեմի հովանու տակ՝ պարսպի պատվարի մոտ։

Ցո՛ւյց տուր ինձ երեսը քո,

լսելի՛ արա ինձ ձայնը քո, քանզի քաղցր է ձայնը քո,

և գեղեցիկ՝ դեմքը քո»։

Փեսան այսպես է ասում օրիորդներին.

¹⁵ Բռնե՛ք մեզ համար փոքրիկ աղվեսներին՝

այգիների ապականիչներին,

և մեր որթերը կծաղկեն։

Հարսն այսպես է ասում.

¹⁶ Իմ եղբորորդին իմն է, և ես՝ նրանը.

նա, որ հովվում է շուշանների մեջ։

Մինչ լույսն սկսի բացվել, և ստվերները ցրվեն.

¹⁷ վերադարձի՛ր, եղբորորդի՛ իմ,

նմանվի՛ր այծյամի կամ եղնիկների ձագերի՝

խնկաբեր լեռների վրա։

3

¹ Գիշերն անկողնուս մեջ փնտրեցի իմ հոգու սիրելիին,

փնտրեցի նրան և չգտա,

կանչեցի, բայց ձայն չտվեց ինձ։

² Վեր կենամ ու շրջեմ քաղաքով,

փողոցներով ու հրապարակներով

և փնտրեմ իմ հոգու սիրելիին։

Փնտրեցի նրան, բայց չգտա,

կանչեցի նրան, բայց ձայն չտվեց ինձ։

³ Քաղաքում շրջող պահապանները հանդիպեցին ինձ։

Հարսն ասում է պահապաններին.

Արդյոք չե՞ք տեսել իմ հոգու սիրելիին։

⁴ Երբ նրանցից փոքր-ինչ անցա, գտա իմ հոգու սիրելիին։

Փեսային գտնելով՝ ասում է.

Բռնեցի նրան և բաց չթողեցի,

մինչև չտարա նրան իմ մոր տունը

և ինձ ծնողի սենյակը։

Հարսը երկրորդ անգամ է երդվեցնում օրիորդներին.

⁵ Երդվեցնում եմ ձեզ, դուստրե՛ր Երուսաղեմի,

ագարակի զորություններով և ուժերով,

եթե վեր կենաք, չարթնացնե՛ք նրան,

մինչև որ նա չկամենա։

Փեսան ասում է հարսի մասին.

⁶ Ո՞վ է սա, որ ելնում գալիս է անապատից՝

ինչպես ծառացած-բարձրացած ծուխ,

ինչպես զմուռս և կնդրուկ՝

յուղագործների ամեն տեսակ փոշուց պատրաստված։

Օրիորդներն այսպես ասացին.

⁷ Ահա Սողոմոնի գահավորակը,

նրա շուրջը վաթսուն սպառազեն մարդիկ են Իսրայելի քաջերից։

⁸ Բոլորն էլ՝ պատերազմի հմուտ սուսերավորներ,

յուրաքանչյուր այր՝ սուրն ազդրին՝

ընդդեմ գիշերվա արհավիրքների։

⁹ Սողոմոն արքան գահավորակ պատրաստեց իրեն

Լիբանանի փայտից։

¹⁰ Նրա սյուները շինեց արծաթից,

կոնքերը՝ ոսկուց,

ձեղունը՝ ծիրանիից,

մեջը՝ ակնազարդ՝

տարածված Երուսաղեմի դուստրերի սիրով։

¹¹ Դուստրե՛ր Սիոնի, ելե՛ք և նայե՛ք

Սողոմոն արքային՝ այն պսակով,

որով նրան պսակեց նրա մայրը նրա փեսայության

և նրա սրտի ուրախության օրը։

4

Փեսան ասում է հարսին.

¹ Ահավասիկ գեղեցիկ ես, մերձավո՛ր իմ,

գեղեցիկ ես ահա,

քո աչքերն աղավնիներ են

քողի հետևում։

Քո վարսերը նման են այծերի հոտերի,

որ երևացին Գաղաադից։

² Ատամները քո նման են խուզված ոչխարների հոտերի՝

ավազանից ելած, բոլորն էլ զույգ,

և ոչ մի ամուլ չկա նրանց մեջ։

³ Շուրթերը քո նման են որդան կարմիր թելի,

Գեղեցիկ են խոսքերը քո։

Քո այտերը նման են նռան կեղևի՝ քո քողի հետևում։

⁴ Պարանոցը քո նման է Թալպիովթում շինված Դավթի աշտարակին,

նրանից կախված են վահաններ հազարավոր

և սպառազեն մարդկանց նետերը բոլոր։

⁵ Քո երկու ստինքները նման են այծյամի երկվորյակ ձագերի,

որ արածում են շուշանների մեջ։

⁶ Մինչ կծագի լույսը, և կշարժվեն ստվերները,

ես ի՛նքս կգնամ դեպի լեռը զմուռսի և բլուրը կնդրուկի։

⁷ Ամբողջովին գեղեցիկ ես, մերձավո՛ր իմ,

առանց որևէ արատի։

⁸ Ե՛կ Լիբանանից, ո՜վ հարս,

այստե՛ղ արի Լիբանանից։

Ե՛կ և անցի՛ր Ուխտի լեռան գագաթով,

Սանիրի և Հերմոնի կատարներով,

առյուծների բներով և ինձերի լեռներով։

Օրիորդներն ասում են հարսին.

⁹ Մեր սիրտը գրավեցիր, քո՛ւյր մեր հարս,

մեր սիրտը գրավեցիր քո մի հայացքով

և քո պարանոցի քառամանյակով։

Փեսան ասում է հարսին.

¹⁰ Քանզի գեղեցկացան ստինքները քո, քո՛ւյր իմ հարս,

գինուց ավելի,

և հոտը քո հանդերձների՝ բոլոր խունկերից առավել։

¹¹ Շրթունքները քո մեղր են կաթեցնում, քո՛ւյր իմ հարս,

քո լեզվի տակ մեղր է ու կաթ,

հոտը քո հանդերձների նման է կնդրուկի հոտի։

¹² Փակված պարտեզ ես և աղբյուր կնքված, քո՛ւյր իմ հարս։

¹³ Տնկիները քո՝ դրախտ նռնենիների՝

մրգատու ծառերի պտուղներով հանդերձ,

¹⁴ Նարդոս և քրքում,

խնկեղեգ և կինամոն՝

Լիբանանի բոլոր ծառերով հանդերձ,

զմուռս ու հալվե՝

բոլոր ընտիր խնկերով հանդերձ։

¹⁵ Պարտեզների աղբյուր

և կենդանի ջրի ակունք,

որ բխում է Լիբանանից։

Հարսն ասում է.

¹⁶ Վե՛ր կաց, հյուսիսայի՛ն քամի,

և ե՛կ, հարավայի՛ն քամի,

փչի՛ր իմ պարտեզի մեջ,

և թող բուրեն իմ խնկերը։

5

Հարսն աղաչում է, որ իր Փեսան ցած իջնի

¹ Թող իմ եղբորորդի՛ն իջնի իր պարտեզը

և իր ծառերի պտուղներն ուտի։

Փեսան ասում է հարսին.

Մտա իմ պարտեզը, քո՛ւյր իմ հարս,

հավաքեցի զմուռսն իմ՝ խնկերով հանդերձ,

կերա հացն իմ մեղրով,

խմեցի գինին իմ կաթով։

Կերե՛ք, մերձավորնե՛ր իմ,

խմե՛ք և հարբե՛ք, եղբորորդինե՛ր իմ։

² Ննջում եմ ես, բայց արթուն է սիրտն իմ։

Հարսն զգում է, որ փեսան բախում է դուռը.

Իմ եղբորորդու ձայնն է. դուռն է բախում։

Փեսան ասում է.

Բա՛ց ինձ, քո՛ւյր իմ, մերձավո՛ր իմ,

աղավնի՛ իմ, կատարյա՛լ իմ,

քանզի գլուխս պատվել է ցողով,

և վարսերս՝ գիշերվա շաղով։

Հարսն այսպես է ասում.

³ Հանեցի իմ պատմուճանը.

ինչպե՞ս հագնեմ այն,

լվացի ոտքերս.

ինչպե՞ս աղտոտեմ դրանք։

⁴ Իմ եղբորորդին մեկնեց իր ձեռքը պատուհանից,

դրանից որովայնս խռովվեց։

⁵ Ես վեր կացա՝ բացելու դուռն իմ եղբորորդու առաջ.

իմ ձեռքերը զմուռս կաթեցրին,

և իմ մատներից զմուռս լցվեց դռան բռնակի վրա։

⁶ Ես բացեցի դուռն իմ եղբորորդու առաջ,

իմ եղբորորդին անցավ,

և իմ հոգին ելավ նրա խոսքի հետ։

Փնտրեցի նրան և չգտա,

կանչեցի նրան, և ձայն չտվեց ինձ։

⁷ Ինձ հանդիպեցին քաղաքում շրջող պահապանները,

խփեցին և վիրավորեցին ինձ.

պարիսպների պահապանները ամառային հագուստս հանեցին իմ վրայից։

⁸ Երդվեցնում եմ ձեզ, դուստրե՛ր Երուսաղեմի,

ագարակի զորություններով և ուժերով.

եթե գտնեք իմ եղբորորդուն,

պատմե՛ք նրան, որ ես լի եմ նրա խանդակաթ սիրով։

Երուսաղեմի դուստրերը և պարիսպների պահապանները հարցնում են հարսին.

⁹ Ինչո՞վ է առավել քո եղբորորդին մյուս եղբորորդիներից,

գեղեցի՛կդ կանանց մեջ,

ինչո՞վ է նա առավել մյուս եղբորորդիներից,

որ այդպես երդվեցնում ես մեզ։

Հարսը նկարագրում է իր եղբորորդուն, թե ինչպիսին էր.

¹⁰ Եղբորորդին իմ սպիտակ է ու բոսոր՝

ընտրված բյուրավորներից,

¹¹ Նրա գլուխը պատվական ոսկի է,

վարսերը՝ գանգուր ու ագռավի նման սև։

¹² Աչքերը՝ իբրև աղավնիներ առատ ջրերի վրա,

կաթով լվացված ու նստած առատ ջրերի վրա։

¹³ Խնկամանների պես նրա ծնոտները

բուրում են անուշահոտությունը օծման յուղերի,

շուշաններ են շուրթերը նրա,

որ առատ զմուռս են բուրում։

¹⁴ Ոսկյա ճախարակներ են ձեռքերը նրա՝

զարդարված ակներով Թարսիսի.

փղոսկրյա տախտակ է որովայնը նրա՝

ընդելուզված ակներով շափյուղա։

¹⁵ Ոսկյա խարիսխների վրա հաստատված

մարմարյա սյուներ են սրունքները նրա։

Տեսքը նրա նման է Լիբանանի ընտիր եղևնափայտի,

¹⁶ Քացրությամբ է լի

ու ամբողջովին ցանկալի է կոկորդը նրա։

Այսպիսին է եղբորորդին իմ,

այսպիսին է մերձավորն իմ,

դուստրե՛ր Երուսաղեմի։

Երուսաղեմի դուստրերը հարցնում են, թե ո՛ւր գնաց հարսի եղբորորդին։

¹⁷ Ո՞ւր գնաց քո եղբորորդին,

գեղեցի՛կդ կանանց մեջ,

ո՞ր կողմը գնաց քո եղբորորդին,

որ մենք էլ քեզ հետ փնտրենք նրան։

6

Հարսը պատասխան է տալիս և ասում.

¹ Իմ եղբորորդին իջավ իր պարտեզը՝

խնկածաղիկների մեջ՝

բուրաստաններում հովվելու

և շուշաններ հավաքելու։

² Ես իմ եղբորորդունն եմ,

և իմ եղբորորդին՝ իմը.

Նա, որ հովվում է շուշանների մեջ։

Փեսան ասում է հարսին.

³ Անուշահոտության պես բարետես ես, մերձավո՛ր իմ,

գեղեցիկ, ինչպես Երուսաղեմը,

ապշեցուցիչ գեղեցկությամբ հորինված։

⁴ Աչքերդ դարձրո՛ւ ինձանից,

քանզի դրանք վրդովեցին ինձ,

վարսերդ նման են այծերի հոտերի,

որ երևացին Գաղաադից։

⁵ Ատամներդ նման են խուզված ոչխարների հոտերի,

որ դուրս են գալիս ջրավազանից.

բոլորն էլ՝ զույգ գառնուկներով,

և ամուլ չկա նրանց մեջ։

⁶ Շուրթերդ նման են կարմիր թելի,

և գեղեցիկ են խոսքերը քո։

Այտերդ՝ իբրև նռան կեղև՝

թաքնված քողիդ հետևում։

⁷ Վաթսուն թագուհի և ութսուն հարճ,

և օրիորդներ, որոնց թիվ չկա։

⁸ Իմ աղավնին միակն է, իմ կատարյալը,

իր մոր միամորիկը, ընտրյալն իր ծնողի։

Տեսան նրան դուստրերն ու երանի տվեցին,

գովեցին նրան հարճերն ու թագուհիները։

Դուստրերը և թագուհիները տեսան հարսին և երանի տվեցին նրան.

⁹ Ո՞վ է սա, որ երևում է ինչպես առավոտ,

գեղեցիկ է, ինչպես լուսինը,

ընտիր, ինչպես արեգակը՝

զարմանալի հորինված։

Փեսան ասում է հարսին.

¹⁰ Իջա ընկուզենիների պարտեզ՝

նայելու ճյուղերի արդյունքին,

տեսնելու, թե ծաղկե՞լ է որթը,

ծաղկե՞լ է նոճին,

ծաղկե՞լ են նռնենիները։

Հարսն ասում է փեսային.

¹¹ Այնտեղ կտամ քեզ իմ ստինքները,

իմ հոգին ոչինչ չիմացավ,

ինձ Ամինադաբի կառքերին նմանեցրեց։

Դուստրերը և թագուհիներն ասում են հարսին.

¹² Վերադարձի՛ր, վերադարձի՛ր, ո՛վ սուլամացի,

վերադարձի՛ր, վերադարձի՛ր, որ մենք տեսնենք քեզ։

7

Փեսան այսպես է ասում դուստրերին և թագուհիներին.

¹ Ի՞նչ եք տեսնում սուլամացու վրա,

որ դեպի մեզ է գալիս բանակների գնդերի պես։

Ինչպե՜ս կոշիկներով գեղեցկացավ քայլվածքը քո,

դո՛ւստր Ամինադաբի։

Քո ազդրերը նման են

ճարտար վարպետի ընդելուզած ուլունքների։

² Պորտը քո սափոր է վարպետորեն կատարված՝

անպակաս խառնուրդի գինուց։

Որովայնդ նման է շուշանով ծածկած ցորենի դեզի,

³ Ստինքներդ նման են այծյամի երկվորյակ ձագերի։

⁴ Պարանոցդ՝ փղոսկրյա աշտարակի,

աչքերդ՝ Եսեբոնի ծովակներին՝

Բաթ-Րաբիմի դարպասների մոտ։

Ռունգերդ նման են

Դամասկոս նայող Լիբանանի աշտարակին։

⁵ Գլուխդ քեզ վրա է, ինչպես Կարմելոսը,

իսկ գլխիդ հյուսքերը՝ ծիրանիի նման,

թագակիր թագավորի պես ասպարեզներում։

⁶ Որքա՜ն գեղեցկացար և որքա՜ն քաղցրացար,

և ի՜նչ հեշտալի դարձավ, օ սե՜ր իմ, քո փափկության մեջ։

⁷ Հասակդ՝ արմավենու պես,

իսկ ստինքներդ էլ՝ իբրև ողկույզներ։

⁸ Ասացի՝ ելնեմ արմավենու վրա,

մինչև գագաթ հասնեմ,

և քո ստինքները խաղողի ողկույզի պես կլինեն,

Ռունգերիդ շունչը՝ խնձորի բույրի պես,

իսկ քո բերանը՝ իբրև ազնիվ գինի։

Հարսը դուստրերի և թագուհիների առաջ ասում է.

⁹ Ուղղությունը թող եղբորորդուս հետևից գնա,

բավականանա թող իմ շուրթերով ու ատամներով։

¹⁰ Ես եղբորորդունս եմ, և դեպի ինձ է դառնալու նա։

¹¹ Արի՛, եղբորորդի՛ իմ, ելնենք ագարակները,

գիշերենք գյուղերում ու պարտեզներում։

¹² Առավոտ կանուխ ելնենք այգիները,

տեսնենք, թե ծաղկե՞լ է որթը,

ծաղկե՞լ է նոճին, ծաղկե՞լ նռնենին։

Այնտե՛ղ կտամ քեզ իմ ստինքները։

¹³ Մանրագորներն իրենց հոտն արձակեցին։

Մեր դռների մոտ ամեն տեսակ մրգատու ծառեր կան՝

նորը հնի կողքին, որ մայրս տվեց ինձ.

այն քե՛զ համար պահեցի, եղբորորդի՛ իմ։

8

¹ Ո՞վ կտար քեզ, եղբորորդի՛ իմ,

ուտել իմ մոր ստինքներից։

Երբ հանդիպեմ քեզ դրսում, կհամբուրեմ,

և չեն արհամարհի ինձ։

² Վերցնեմ, տանեմ քեզ իմ մոր տունը

և ինձ հղացողի սենյակը,

հարբեցնեմ քեզ յուղագործների գինիով,

իմ նռնենիների օշարակով։

³ Նրա ձախ ձեռքը գլխիս տակ է,

և նրա աջը թող գրկի ինձ։

⁴ Երդվեցնում եմ ձեզ, դուստրե՛ր Երուսաղեմի,

ագարակի զորություններով և ուժերով,

եթե վեր կենաք, չարթնացնե՛ք նրան,

մինչև որ նա չկամենա։

Դուստրերը և թագուհիներն ասում են.

⁵ Ո՞վ է սա, որ ելել գալիս է սպիտակացած [* անապատից],

գալիս է՝ հենված իր եղբորորդուն։

Փեսան ասում է հարսին.

Քեզ խնձորենու տակ արթնացրի.

այնտե՛ղ քո մայրը երկնեց քեզ,

այնտե՛ղ քո ծնողը ծնեց քեզ։

⁶ Ինձ որպես կնիք դի՛ր քո սրտի վրա,

որպես մատանի՝ քո աջ ձեռքին,

քանզի սերը հզոր է մահվան պես,

և նախանձը խիստ՝ դժոխքի նման.

նրա թռիչքը, ինչպես հրի թռիչքը բոցե։

⁷ Առատ ջրերը չեն կարողանա սերը մարել,

և գետերը չեն արգելի այն։

Եթե մարդ իր ամբողջ ունեցվածքը տա

սեր ստանալու ակնկալիքով,

արհամարհելով կարհամարհվի։

Օրիորդներն ասում են.

⁸ Մեր քույրը փոքրիկ է

և դեռ ստինքներ չունի.

ի՞նչ անենք մեր քրոջն այն օրը,

երբ կպատմվի նրա մասին։

⁹ Եթե պարիսպ է նա,

արծաթե մարտկոց շինենք նրա վրա,

եթե դուռ է,

եղևնափայտյա տախտակներ ամրացնենք նրա վրա։

Հարսը համարձակվում է և ասում.

¹⁰ Պարիսպ եմ ես,

և իմ ստինքները նման են աշտարակների.

նրա աչքին ես խաղաղությունը գտածի նման էի։

¹¹ Սողոմոնը Բելմավոնում մի այգի ուներ,

իր այգին նա տվեց պահապաններին։

Յուրաքանչյուր այր նրա պտղի համար

հազար արծաթ պիտի բերի։

¹² Իմ այգին իմ առաջ է.

հազարներ՝ Սողոմոնին

և երկու հարյուր՝ պահապաններին,

որ պահում են պտուղը նրա։

Հարսն ասում է.

¹³ Դո՛ւ, որ նստած ես պարտեզում,

և ուրիշները լսում են քեզ,

լսելի՛ արա ինձ ձայնը քո։

¹⁴ Փախի՛ր, եղբորորդի՛ իմ,

և նմանվի՛ր այծյամի կամ եղնիկների ձագերի՝

խնկաբեր լեռների վրա։

ԵՍԱՅՈՒ ՄԱՐԳԱՐԵՈՒԹՅՈՒՆԸ

1

¹ Ամոզի որդի Եսայու տեսիլքը Հուդայի և Երուսաղեմի վերաբերյալ, երբ Հուդայում թագավորում էին Ոզիան, Հովաթամը, Աքազը և Եզեկիան։

Աստված հանդիմանում է իր ժողովրդին

² Լսի՛ր, երկի՛նք, և ակա՛նջ դիր, երկի՛ր,

քանզի Տերը խոսեց.

«Զավակներ ունեցա և մեծացրի,

իսկ նրանք ինձ անարգեցին։

³ Եզն իր տիրոջն է ճանաչում, և էշը՝ իր տիրոջ մսուրը,

բայց Իսրայելն ինձ չճանաչեց,

իմ ժողովուրդն ինձ չհասկացավ»։

⁴ Վա՜յ մեղավոր ազգին.

մեղքերով լի ժողովուրդ,

չարագործ սերունդ,

անօրեն որդիներ,

լքեցին Տիրոջը,

բարկացրին Իսրայելի Սրբին,

օտարացան ու հետ քաշվեցին։

⁵ Ինչո՞ւ եք նոր վերքեր հասցնում՝ ավելացնելով անօրենությունները։

Ամեն գլուխ ցավի մեջ է, ամեն սիրտ՝ տրտմության։

⁶ Ոտքից մինչև գլուխ նրա վրա առողջ տեղ չկա.

վերքերի, այտուցների և թարախոտ խոցերի վրա դնելու ո՛չ սպեղանի կա,

ո՛չ ձեթ և ո՛չ էլ վիրակապ։

⁷ Ձեր երկիրն ավերակ է, ձեր քաղաքները՝ հրո ճարակ.

թշնամի ազգերից ավերված ու ամայացած ձեր հողի բարիքները

ձեր իսկ աչքի առաջ օտարները պիտի ուտեն։

⁸ Սիոնի դուստրը լքված պիտի մնա,

ինչպես տաղավարը՝ այգում, մրգապահների հյուղակը՝ սեխի պարտեզում,

ինչպես պաշարման մեջ գտնվող քաղաքը։

⁹ Եթե Զորությունների Տերը մեզ ժառանգ թողած չլիներ,

կդառնայինք Սոդոմի պես, կնմանվեինք Գոմորին։

¹⁰ Լսե՛ք Տիրոջ խոսքը, ո՛վ Սոդոմի իշխաններ,

ակա՛նջ դրեք Աստծու օրենքներին, ո՛վ Գոմորի մարդիկ։

¹¹ «Իմ ինչի՞ն են պետք ձեր բազմաթիվ զոհերը,- ասում է Տերը,-

ես կշտացել եմ ձեր խոյերի ողջակեզներից.

ձեր գառների ճարպը, ցլերի ու նոխազների արյունը չեմ ուզում,

¹² և ոչ էլ այն, որ դրանցով գաք ու կանգնեք իմ առաջ։

Քանզի ո՞վ խնդրեց դա ձեզնից,

որ գաք ու կոխոտեք իմ գավիթները։

¹³ Եթե ազնիվ ալյուրի հաց մատուցեք ինձ, զուր է լինելու.

ձեր խնկերն էլ պիղծ են ինձ համար.

ձեր ամսամուտները, շաբաթները և տոնական մեծ օրերը ևս անընդունելի են ինձ.

ձեր պահեցողությունն ու հանգիստը,

¹⁴ ձեր ամսամուտներն ու տոներն ատեց իմ հոգին։

Կշտացել եմ ձեզնից,

այլևս չեմ ների ձեր մեղքերը։

¹⁵ Երբ դեպի ինձ բարձրացնեք ձեր ձեռքերը,

երես եմ դարձնելու ձեզնից,

և եթե բազմապատկեք ձեր աղոթքները, չեմ լսելու ձեզ,

որովհետև ձեր ձեռքերը լի են արյունով։

¹⁶ Լվացվե՛ք, մաքրվե՛ք,

իմ աչքի առաջ ձեր չար արարքները թոթափե՛ք ձեզնից,

վե՛րջ տվեք ձեր չարագործություններին։

¹⁷ Սովորեք բարի՛ք գործել,

արդարությո՛ւն փնտրեք,

փրկեք զրկվածի՛ն,

արդարադա՛տ եղեք որբի հանդեպ,

իրավո՛ւնք տվեք այրուն։

¹⁸ Եկե՛ք իրար հետ քննենք,-

ասում է Տերը.-

եթե ձեր մեղքերը կրկնակի կարմիր են,

ապա ես ձյան պես ճերմակ կդարձնեմ,

եթե որդան կարմիր լինեն, կսպիտակեցնեմ բրդի պես։

¹⁹ Եվ եթե հոժար լինեք ու լսեք ինձ, կճաշակեք երկրի բարիքները.

²⁰ իսկ եթե չկամենաք ինձ լսել,

սո՛ւրը պիտի ուտի ձեզ»։

Տիրոջ բերանը խոսեց այս։

Ապականված Երուսաղեմը

²¹ Ինչպե՜ս պոռնիկ դարձավ հավատարիմ Սիոն քաղաքը,

որը լի էր ողջամտությամբ,

որտեղ արդարությունն էր բնակվում,

իսկ այժմ՝ մարդասպանները։

²² Ձեր արծաթը փորձված չէ,

ձեր պանդոկապանները գինուն ջուր են խառնում,

²³ ձեր իշխաններն ուխտադրուժ են և գողերին հանցակից,

կաշառք սիրող են և վրեժխնդիր,

որբերի իրավունքը չեն պաշտպանում

և ուշադրություն չեն դարձնում այրիների դատին։

²⁴ Դրա համար էլ այսպես է ասում Տերը՝ Զորությունների Տերը,

Իսրայելի Հզորը.

«Վա՜յ ձեզ, Իսրայելի հզորնե՛ր,

բարկությունն իմ այլևս չի դադարելու իմ հակառակորդների հանդեպ,

դատ ու դատաստանով պիտի պատժեմ իմ թշնամիներին։

²⁵ Ձեռքս պիտի ձգեմ քեզ վրա,

մաքրելու համար քեզ պիտի այրեմ քուրայում,

կորստյան պիտի մատնեմ ապստամբներիդ,

քո միջից պիտի վերացնեմ բոլոր անօրեններին,

բոլոր ամբարտավաններին պիտի խոնարհեցնեմ։

²⁶ Քեզ վրա, ինչպես առաջ,

դատավորներ պիտի կարգեմ ու խորհրդականներ, ինչպես նախկինում,

և այն ժամանակ դու կկոչվես Քաղաք արդարության,

քաղաքների մայր հավատարիմ Սիոն»։

²⁷ Արդարև, նա գերությունից պիտի փրկվի իրավունքով,

արդարությամբ և ողորմածությամբ։

²⁸ Բայց անօրեններն ու մեղավորները պիտի խորտակվեն միասին,

և նրանք, որ լքեցին Տիրոջը, պիտի բնաջնջվեն միասին։

²⁹ Նրանք ամաչելու են այն կուռքերի համար,

որոնց հանդեպ սեր էին տածում,

ամոթահար են լինելու այն դիվապատկերների համար,

որ իրենք կերտեցին,

խայտառակվելու են այն պարտեզների համար,

որոնց պաշտում էին։

³⁰ Տերևաթափ բևեկնու նման են լինելու,

նմանվելու են այգու, որը ջուր չունի։

³¹ Նրանց զորությունը վերածվելու է ծեծված վուշի խռիվի,

իսկ նրանց գործերը՝ կրակի կայծերի,

և անօրեններն ու մեղավորները այրվելու են միասին,

և չի լինելու ոչ ոք, որ հանգցնի կրակը։

2

Հավիտենական խաղաղությունը

¹ Պատգամ, որ ստացավ Ամոզի որդի Եսային Հուդայի և Երուսաղեմի մասին։

² Վերջին օրերին Տիրոջ լեռը պիտի ակներև դառնա,

Աստծու տունը լեռների գագաթներին պիտի լինի ու

պիտի բարձրանա բլուրների վրա,

և բոլոր ազգերը պիտի գան դեպի նա։

³ Գալու են բազում ժողովուրդներ՝ ասելով.

«Եկե՛ք ելնենք Տիրոջ լեռն ու Հակոբի Աստծու տունը։

Նա մեզ կհայտնի իր ճանապարհները, որոնցով և կգնանք»։

Որովհետև օրենքները Սիոնից են դուրս գալիս,

Տիրոջ խոսքը՝ Երուսաղեմից։

⁴ Նա դատաստան պիտի տեսնի հեթանոսների մեջ

և պիտի հանդիմանի բազում ժողովուրդների։

Իրենց սուսերներից խոփեր պիտի ձուլեն

և իրենց սվիններից՝ մանգաղներ.

ազգ ազգի վրա սուր չպիտի բարձրացնի,

և նրանք այլևս պատերազմել չեն սովորելու։

⁵ Արդ, Հակոբի՛ ժառանգնե՛ր, եկե՛ք քայլենք Տիրոջ լույսի մեջ։

Տիրոջ օրը

⁶ Նա երես դարձրեց իր ժողովրդից՝ Հակոբի տնից,

որովհետև նրանց երկիրը, ինչպես այլազգիներինը,

առաջվա պես լցվեց կախարդներով,

և նրանք բազում այլազգի որդիներ ունեցան։

⁷ Նրանց երկիրը լցվեց ոսկով ու արծաթով,

նրանց գանձերին թիվ չկար.

նրանց երկիրը լցվեց երիվարներով,

նրանց կառքերին թիվ չկար։

⁸ Նրանց երկիրը լցվեց իրենց ձեռքերով կերտված գարշելի կուռքերով,

և նրանք երկրպագեցին նրանց, որ իրենց մատներն էին ստեղծել։

⁹ Ստորացավ մարդը,

մինչև գետին խոնարհվեց տղամարդը,

Նրանց մի՛ ներիր, Տե՜ր։

¹⁰ Արդ, Տիրոջ սարսափից ու նրա զորության փառքից

գնացեք քարերի տա՛կ մտեք,

հողի մե՛ջ թաքնվեք,

երբ նա կհառնի՝ երկիրը պատուհասելու։

¹¹ Տերը նայում է բարձունքից,

իսկ մարդը խեղճ ու ողորմելի է.

մարդկանց ամբարտավանությունը պիտի խոնարհվի,

ու այդ օրը միայն Տերը պիտի բարձրանա,

¹² քանզի Զորությունների Տիրոջ օրը

բոլոր հպարտների ու ամբարտավանների դեմ է,

բոլոր մեծամիտների ու գոռոզների դեմ, որոնք պիտի խոնարհվեն,

¹³ նաև Լիբանանի բոլոր բարձր ու սլացիկ մայրիների դեմ

և Բասանի բոլոր կաղնի ծառերի դեմ,

¹⁴ բոլոր բարձր լեռների և բարձրացած բլուրների դեմ,

¹⁵ բոլոր վերասլաց աշտարակների և բարձր պարիսպների դեմ,

¹⁶ ծովի բոլոր նավերի դեմ,

բոլոր վեհաշուք նավերի դեմ։

¹⁷ Ամեն մարդ պիտի խոնարհվի,

մարդկանց հպարտությունը պիտի իջնի,

և միայն Տերը պիտի բարձրանա այդ օրը։

¹⁸ Նրանք իրենց բոլոր ձեռակերտ կուռքերը պիտի տանեն

¹⁹ թաքցնեն այրերում, ժայռերի ծերպերում ու գետնի խոռոչներում՝

սարսափած Տիրոջից ու նրա զորության փառքից,

երբ նա կհառնի՝ երկիրը պատուհասելու։

²⁰ Այն օրը մարդ իր արծաթե ու ոսկե գարշելի կուռքերը, որ պատրաստել էր սնոտի բաներին ու չղջիկներին երկրպագելու համար, պիտի մերժի՝ ²¹ Տիրոջ սարսափից և նրա զորության փառքից մտնելով ամրակուռ ապառաժների խոռոչներն ու ծերպերը, երբ Տերը կհառնի՝ երկիրը պատուհասելու։

²² Դադարե՛ք հույս դնել այն մարդու վրա,

որի շունչը ռունգերի մեջ է,

որովհետև ի՞նչ արժեք պիտի ունենա նա։

3

Երուսաղեմում՝ անիշխանություն

¹ Ահավասիկ Տերը՝ Զորությունների Տերը,

Հուդայից և Երուսաղեմից պիտի վերացնի

հզոր տղամարդուն և զորավոր կնոջը,

հացի զորությունը և ջրի զորությունը,

² հսկային, զորեղին և պատերազմող մարդուն,

դատավորին, մարգարեին, տեսանողին և ծերին,

³ հիսնապետին և սքանչելի խորհրդականին,

իմաստուն ճարտարապետին և խելամիտ ունկնդիրին։

⁴ Նրանց վրա իշխան պիտի կարգի մանուկներին,

խաբեբաները պիտի տիրեն նրանց։

⁵ Ժողովուրդն իրար պիտի անցնի,

տղամարդը տղամարդու դեմ պիտի ելնի,

ընկերը՝ ընկերոջ դեմ,

մանուկը ծերի հետ պիտի ընդհարվի,

անարժանը՝ արժանավորի հետ։

⁶ Ու մարդ պիտի բռնի իր եղբորը կամ իր հոր ընտանիքից մեկին և ասի.

«Դու հագուստ ունես, մեզ իշխա՛ն դարձիր,

թող մեր կերակուրը քո հրամանով լինի»։

⁷ Այն ժամանակ պատասխան է տալու՝ ասելով.

«Իշխան չեմ լինի, որովհետև իմ տանը ո՛չ հաց կա, ո՛չ էլ հագուստ.

ես այս ժողովրդի վրա իշխան չեմ դառնա»։

⁸ Եվ այսպես, Երուսաղեմը լքվեց, Հուդան կործանվեց,

և նրանց լեզուները անօրենությամբ ապստամբեցին Տիրոջ դեմ։

Ահա թե ինչու նրանց փառքը նսեմացավ, ⁹ նրանց երեսի

ամոթը ծածկեց նրանց և նրանք, սոդոմացիների նման, իրենց մեղքերը չծածկեցին։

Վա՜յ նրանց հոգիներին,

որովհետև իրենք իրենց համար չար խորհուրդներ խորհեցին

¹⁰ և ասացին. «Կապենք արդարին, քանի որ նա անպիտան է»։

Այսուհետև նրանք իրենց գործերի պտուղները պիտի ուտեն։

¹¹ Վա՜յ անօրենին,

չարիքներ պիտի գան նրա վրա՝ ըստ իր կատարած չար գործերի։

¹² Ո՛վ իմ ժողովուրդ, ձեր հարկահանները ձեզ ճռաքաղ են անում,

ճնշողները տիրում են ձեզ.

ո՛վ իմ ժողովուրդ, նրանք, ովքեր երանի են տալիս ձեզ,

խաբում են ձեզ և խոտորում ձեր շավիղները։

Տերը դատելու է իր ժողովրդին

¹³ Բայց ահա գալու է Տերը, որ դատաստան անի,

և իր ժողովրդին կանգնեցնելու է ատյանում։

¹⁴ Տերն ինքն է իր ժողովրդի ծերերի և նրանց իշխանների հետ դատի նստելու.

«Դուք ինչո՞ւ հրկիզեցիք իմ այգին.

տնանկից հափշտակվածը ձեր տներում է։

¹⁵ Դուք ինչո՞ւ եք զրկում իմ ժողովրդին և ամոթահար անում տնանկներին»,-

ասում է Տերը՝ Զորությունների Տերը։

Սիոնի պճնազարդ դուստրերի դեմ

¹⁶ Այսպես է ասում Տերը.

«Մի՛ նայեք Սիոնի դուստրերին, թե ինչպես հպարտացան,

քայլում են բարձրապարանոց,

աչքով-ունքով անում,

քայլում են նազանքով ու ոտքերով կաքավում»։

¹⁷ Դրա համար էլ Աստված պիտի խոնարհեցնի Սիոնի իշխանական դուստրերին,

այն օրը Տերը պիտի մերկացնի նրանց զարդարանքը։

¹⁸ Տերը պիտի զրկի նրանց վայելուչ զգեստներից և պատմուճաններից,

վերացնի նրանց հյուսերն ու

նրանց ծամակալները,

նրանց պսակակալներն ու ¹⁹ մահիկաձև վզնոցները,

նրանց դեմքի քողազարդերն ²⁰ ու վայելուչ պաճուճազարդերը,

ոտնապարանջաններն ու ապարանջանները,

մեհևանդներն ու գինդերը,

նրանց մատանիներն ու ոսկեշար մանյակները,

դիպակներն ու թելավոր զարդերը,

²¹ եզրածիրանին ու միջնածիրանին,

²² առտնին հագուստն ու պերճաշուք մետաքսեղենը,

²³ բեհեզն ու երկնագույնը,

կարմիր շղարշաքողը,

բանված, ոսկեճամուկ ու ոսկեծոպ զգեստներն ու գոտիները։

²⁴ Քո գործերի պատճառով անուշահոտությունների փոխարեն փոշի պիտի լինի,

մեջքի նուրբ գոտու փոխարեն՝ պարանե գոտի,

ոսկյա գլխազարդի փոխարեն՝ ճաղատություն,

իսկ ոսկեհյուս դիպակի փոխարեն քուրձ պիտի հագնես։

²⁵ Քո գեղեցիկ զավակը, որին դու սիրում ես, սրով պիտի մեռնի,

ձեր իշխանները ևս սրով պիտի ընկնեն։

²⁶ Ձեր զարդատուփերը դատարկ պիտի մնան,

սգի պիտի մատնվեն,

իսկ դու պիտի մնաս մեն-մենակ ու տապալվես գետնին։

4

¹ Յոթ կին պիտի բռնեն մի տղամարդու և ասեն.

«Մեր հացը կուտենք և մեր զգեստը կհագնենք,

միայն թե քո անունը լինի մեզ վրա.

մեր նախատինքը վերացրո՛ւ մեզնից»։

Երուսաղեմը պիտի վերականգնվի

² Կգա այն օրը, երբ Աստված իր խորհրդով ու փառքով կճառագի երկրի վրա՝ բարձրացնելու և փառավորելու Իսրայելի մնացորդներին։ ³ Թե՛ Սիոնից մնացածները և թե՛ Երուսաղեմից մնացածները սուրբ պիտի կոչվեն, բոլոր նրանք, ովքեր գրվել են Երուսաղեմում ապրելու համար, ⁴ քանզի Տերը Սիոնի և Երուսաղեմի տղաների ու աղջիկների աղտեղությունը պիտի լվանա, դատաստանի հոգով և այրման հոգով արյունը նրանց միջից պիտի սրբի։ ⁵ Տերը պիտի գա, և Սիոն լեռան բոլոր տեղերը ու նրա շուրջը եղած ամեն ինչ ցերեկն ամպհովանի պիտի ունենան, իսկ գիշերը պիտի ծածկվեն ողջ փառավորությամբ, բորբոքված կրակի լույսի ու ծխի նման։ ⁶ Հովանի պիտի լինի տոթի դեմ, և ապաստարան ու ծածկ՝ սաստկաշունչ եղանակի ու անձրևի դեմ։

5

Այգու առակը

¹ Իմ սիրելի այգու համար պիտի երգեմ նրա սիրեցյալի երգը.

«Մի անկյունում՝ արգավանդ մի տեղում, այգի ուներ իմ սիրելին։

² Ցանկապատեցի, բարձր ձողեր կանգնեցրի

և ընտիր որթատունկ տնկեցի։

Աշտարակ շինեցի նրա մեջ,

նաև հնձան փորեցի այնտեղ

և սպասեցի, որ խաղող բերի,

բայց փուշ բերեց։

³ Այժմ, Հուդայի այրե՛ր և Երուսաղեմի բնակիչնե՛ր,

իմ ու իմ այգու դա՛տն արեք.

⁴ էլ ի՞նչ պիտի անեի իմ այգու համար, որ չարեցի։

Սպասեցի, որ խաղող բերի, բայց փուշ բերեց։

⁵ Հիմա ես ինքս կասեմ, թե ինչպե՛ս եմ վարվելու իմ այգու հետ.

կքանդեմ նրա ցանկապատը,

և թող հափշտակության ենթարկվի այն.

կկործանեմ նրա պարիսպները,

և թող ոտքի կոխան լինի այն։

⁶ Կլքեմ իմ այգին. թող չէտվի ու չփորվի,

թող նրա մեջ փուշ բուսնի, ինչպես խոպան տեղում,

և կպատվիրեմ իմ ամպերին, որ չանձրևեն իմ այգու վրա։

⁷ Զորությունների Տիրոջ այգին Իսրայելի տունն է,

Հուդայի այրը՝ նրա սիրած դալար որթատունկը։

Սպասեցի, որ նա իրավունքը կատարի,

բայց նա անիրավություն արեց

և ոչ արդարություն, այլ աղաղակ»։

⁸ Վա՜յ նրանց, ովքեր տանը տուն են կցում

և ագարակին ագարակ միացնում,

որպեսզի ընկերոջն արտաքսեն.

բայց մի՞թե երկրի վրա մենակ դուք եք ապրելու։

⁹ Ահավասիկ այդ ամենը հասավ Զորությունների Տիրոջ ականջին։

Եվ թեկուզ տները բազմաթիվ լինեն,

նրանք ավերակ են դառնալու,

եթե մեծ ու գեղեցիկ էլ լինեն, ոչ ոք չի լինելու, որ բնակվի նրանց մեջ։

¹⁰ Տասը լուծ եզան վարատեղը տալու է մեկ սափոր արդյունք,

վեց արդու սերմանողը երեք գրիվ է հավաքելու։

¹¹ Վա՜յ նրանց, ովքեր, առավոտյան վեր կենալով, ընկնում են ցքիի հետևից

և օրն անցկացնում դրանով,

որովհետև գինին նրանց շուտով պիտի այրի։

¹² Փողով ու թմբուկով, քնարով ու երգով գինին խմում,

բայց չեն նայում Տիրոջ գործերին,

նրա ձեռքի գործերին ուշադրություն չեն դարձնում։

¹³ Իմ ժողովուրդն այսուհետև գերության է մատնվելու այն պատճառով,

որ չի ճանաչում Տիրոջը.

հացի սովից և ջրի ծարավից բազմանալու են նրանց դիակները։

¹⁴ Դժոխքն ինքն իրեն լայնացել և բացել է իր երախները,

որպեսզի դադար չունենան,

և նրա մեջ իջնեն փառավորվածները, մեծամեծներն ու հարուստները,

չարագործներն ու զվարճամոլները։

¹⁵ Մարդը պիտի ստորացվի,

տղամարդը պիտի անարգվի,

ամբարտավան աչքերը պիտի խոնարհվեն,

¹⁶ Զորությունների Տերն արդարությամբ պիտի բարձրանա,

և Սուրբն արդարությամբ պիտի փառավորվի։

¹⁷ Հափշտակվածները պիտի արածեն ցլերի նման,

և մնացածների ավերակների վրա գառները պիտի ճարակեն։

¹⁸ Վա՜յ նրանց, ովքեր երկար պարանի նման ձգում են իրենց մեղքերը

և ասես երինջների լծափոկով՝ անօրենությունները։

¹⁹ Նրանք ասում են. «Այն, ինչ որ կատարելու է,

թող շուտ վրա հասնի, որ տեսնենք.

թող ժամանի Իսրայելի Սրբի խորհուրդը, որ իմանանք»։

²⁰ Վա՜յ նրանց, ովքեր չարը բարի կանվանեն և բարին՝ չար,

ովքեր լույսը խավար կհամարեն և խավարը՝ լույս,

ովքեր դառը քաղցր կհամարեն և քաղցրը՝ դառը։

²¹ Վա՜յ նրանց, ովքեր իրենց իմաստունի տեղ կդնեն,

իրենք իրենց աչքին խորագետ կերևան։

²² Վա՜յ ձեր այդ հզորներին, ովքեր գինի են ըմպում,

և ձեր իշխաններին, ովքեր խառնված թունդ ցքի են խմում,

²³ ովքեր կաշառքի համար արդարացնում են ամբարիշտին

և արդարի իրավունքն են գողանում։

²⁴ Դրա համար էլ, ինչպես եղեգն է վառվում կրակի կայծերից,

այնպես էլ նրանք են այրվելու բորբոքված բոցից,

նրանց արմատը մղեղի նման է դառնալու,

նրանց ծաղիկը փոշու պես վեր է ելնելու,

որովհետև նրանք մերժեցին Զորությունների Տիրոջ օրենքը,

առավել ևս անարգեցին Իսրայելի Սրբի խոսքը։

Տիրոջ զայրույթն իր ժողովրդի դեմ

²⁵ Եվ սաստկացավ Զորությունների Տիրոջ զայրույթն իր ժողովրդի դեմ։

Նա ձեռքը ձգեց նրանց վրա և ոչնչացրեց նրանց։ Բարկացավ լեռների վրա,

և նրանց դիակները՝ իբրև աղբ, թափվեցին ճանապարհին։

Բայց այս բոլորով հանդերձ՝ նրա բարկությունը չիջավ.

տակավին նրա ձեռքը մնում է բարձրացած։

²⁶ Այսուհետև ազդանշան կտա հեռավոր ազգերին

ու նրանց կբերի երկրի ծայրերից,

և ահա նրանք առանց հապաղելու արագ կընթանան և թեթևորեն տեղ կհասնեն։

²⁷ Ո՛չ քաղց են զգալու և ո՛չ էլ հոգնելու,

ո՛չ նիրհելու են և ո՛չ էլ ննջելու,

ո՛չ իրենց մեջքի գոտիներն են արձակելու,

ո՛չ էլ իրենց կոշիկների կապերն են քանդվելու։

²⁸ Նրանց նետերը սուր են, աղեղները՝ լարված,

նրանց երիվարների սմբակները կարծր ապառաժի նման են,

մարտակառքերի անիվները՝ մրրիկի պես։

²⁹ Նրանք հարձակվելու են առյուծների պես,

վրա են հասնելու առյուծի կորյունների պես.

աղաղակելու են, հարձակվելու են և գազանաբար կոտորելու,

և ոչ ոք չի լինելու, որ փրկի նրանց։

³⁰ Այն օրը աղաղակ պիտի բարձրացնեն նրանց վրա,

ինչպես ալեծուփ ծովի ձայնը։

Պիտի նայեն դեպի վեր՝ երկնքին,

և դեպի վար՝ երկրին,

բայց ահա նրանց տագնապին ի պատասխան դաժան խավար է լինելու։

6

Եսայու կոչումը

¹ Այն տարին, երբ մեռավ Ոզիա արքան, տեսա Տիրոջը, որ նստած էր բարձր ու վերամբարձ աթոռին, և տաճարը լի էր նրա փառքով։ ² Նրա շուրջը սերովբեներ կային, որոնցից յուրաքանչյուրը վեց թև ուներ. երկուսով իրենց երեսներն էին ծածկում, երկուսով՝ իրենց ոտքերը և երկուսով էլ թռչում էին։ ³ Ձայնակցում էին իրար և ասում.

«Սո՛ւրբ, սո՛ւրբ, սո՛ւրբ է Զորությունների Տերը,

և ամբողջ երկիրը լի է նրա փառքով»։

⁴ Կանչողների ձայնից դռան դրանդիները ցնցվեցին, ու տունը լցվեց ծխով։ ⁵ Եվ ես ասացի. «Վա՜յ ինձ. ես մի տառապած մարդ եմ, ինչո՞ւ եմ ապշած կանգնել մնացել. չէ՞ որ ես մարդ եմ, պիղծ շուրթեր ունեմ և պղծաշուրթ ժողովրդի մեջ եմ ապրում, բայց ահա իմ աչքերով տեսա Զորությունների Տիրոջը»։

⁶ Եվ ահա ինձ մոտ ուղարկվեց սերովբեներից մեկը՝ ձեռքին այրվող ածուխ բռնած, որ ունելիով վերցրել էր զոհասեղանից։ ⁷ Բերեց դիպցրեց իմ բերանին և ասաց.

«Ահա այդ դիպավ քո շուրթերին. դա կհանի քո անօրենությունները,

և քո մեղքերը կսրբի քեզնից»։

⁸ Եվ լսեցի Տիրոջ ձայնը, որն ասում էր.

«Ո՞ւմ ուղարկեմ, և կամ ո՞վ կգնա այդ ժողովրդի մոտ»։

Եվ ես ասացի. «Ահավասիկ ես, ի՛նձ ուղարկիր»։

⁹ Նա ասաց. «Գնա՛ և ասա՛ այդ ժողովրդին.

“Ինչքան էլ լսեք, չեք հասկանա,

ինչքան էլ տեսնեք, չեք ընկալի”։

¹⁰ Քանի որ այդ ժողովրդի սիրտը թանձրացել է,

ծանր են լսում իրենց ականջներով,

իրենց աչքերը փակել են.

այդ պատճառով աչքերով չեն տեսնում,

ականջներով չեն լսում,

սրտով չեն հասկանում,

որով և դարձի չեն գա, որ նրանց բժշկեմ»։

¹¹ Եվ ես ասացի. «Մինչև ե՞րբ, Տե՛ր»։

Իսկ նա ասաց. «Մինչև որ քաղաքներն ավերվեն բնակիչ չլինելու

և տները՝ մարդ չլինելու պատճառով,

և այդ երկիրը մնա ամայի։

¹² Դրանից հետո Աստված կհեռացնի մարդկանց,

և կենդանի մնացածները կբազմանան երկրի վրա։

¹³ Սակայն սրանցից էլ եթե մեկ տասներորդը պահպանվի,

նորից կենթարկվեն գերության ու հափշտակության,

և ինչպես իրենց պատյանը թոթափած բևեկնին ու կաղնին,

սուրբ սերունդը նորից կհաստատվի»։

7

Պատգամ Ոզիա թագավորին

¹ Այնպես պատահեց, որ Հուդայի թագավոր Ոզիայի որդի Հովաթամի որդու՝ Աքազի օրոք Ասորիքի արքա Ռասիմը և Իսրայելի արքա Ռոմելայի որդի Փակեեն հարձակվեցին Երուսաղեմի վրա, որպեսզի պատերազմեն նրա դեմ, բայց չկարողացան պաշարել այն։ ² Դավթի տանը լուր հասավ, թե Ասորիքը դաշնակցել է Եփրեմի երկրի հետ, ու դողն ընկավ նրա սիրտը, նրա ժողովրդի սիրտը. կարծես անտառում ծառը շարժվեր հողմից։

³ Տերն ասաց Եսայուն. «Դու քո որդի Յասուբի հետ Կտավ սպիտակեցնողի ագարակի վերին ճանապարհի վրա՝ ջրավազանի դիմաց, ընդառա՛ջ ել Աքազին ⁴ և ասա՛ նրան.

“Զգո՛ւյշ եղիր և հանդարտվի՛ր.

մի՛ վախեցիր, և թող քո անձը չզարհուրի ծխացող այդ երկու կիսախանձ փայտերից,

քանի որ երբ վրա հասնեն իմ բարկությունն ու զայրույթը,

ձեզ դարձյալ պիտի բժշկեմ։

⁵ Արամի որդին, Եփրեմից Ռոմելայի որդին

քո դեմ չար խորհուրդ խորհեցին՝ ասելով.

⁶ «Գնանք Հուդայի վրա,

խոսենք նրանց հետ, նրանց մեզ ենթարկենք

և նրանց վրա թագավոր կարգենք Տաբելի որդուն»։

⁷ Այսպես է ասում Զորությունների Տերը.

«Այդ խորհուրդը չի մնա և չի լինի.

⁸ քանի որ Ասորիքի գլուխը Դամասկոսն է,

իսկ Դամասկոսի գլուխը՝ Ռասիմը։

Ե՛վս վաթսունհինգ տարի,

և Եփրեմի թագավորությունն իբրև ժողովուրդ պիտի դադարի»։

⁹ Եփրեմի գլուխը Սամարիան է,

իսկ Սամարիայի գլուխը՝ Ռոմելայի որդին,

եթե չհավատաք, չեք հասկանա”»։

Էմմանուելը պիտի տարբերի չարն ու բարին

¹⁰ Տերը շարունակեց խոսել Աքազի հետ՝ ասելով.

¹¹ «Խորխորատում լինի թե բարձունքում՝ քեզ համար նշա՛ն խնդրիր Տիրոջից՝ քո Աստծուց»։ ¹² Աքազը պատասխանեց. «Չեմ խնդրի և Տիրոջը չեմ փորձի»։ ¹³ Եվ նա ասաց. «Արդ, լսե՛ք դուք, որ Դավթի տնից եք. ձեզ թեթև՞ բան է թվում մարդկանց նեղություն պատճառելը, ինչո՞ւ եք ուզում Տիրոջը ևս նեղացնել։ ¹⁴ Դրա համար էլ Տերն ինքը ձեզ նշան է տալու։ Ահա կույսը պիտի հղիանա ու որդի ծնի, և նրան Էմմանուել պիտի կոչեն. ¹⁵ յուղ ու մեղր պիտի ուտի նա. նախքան չարը ճանաչելը կամ այն ցանկանալը նա պիտի ընտրի բարին։ ¹⁶ Դրա համար մանուկը բարին կամ չարը ճանաչելուց առաջ պիտի անարգի չարը և ընտրի բարին, երկու թագավորների երկրները, որոնցից դու վախենում ես, պիտի լքվեն։ ¹⁷ Բայց Աստված քեզ վրա, քո ժողովրդի և քո հոր տան վրա այնպիսի դժբախտ օրեր պիտի բերի, որ չեն եղել այն ժամանակից ի վեր, երբ Եփրեմը բաժանվեց Հուդայից։ Դա լինելու է Ասորեստանի արքայի միջոցով։

¹⁸ Այդ օրը Տերը պիտի կանչի թշնամիներին, և ճանճերի նման պիտի թափվեն

Եգիպտոսի գետի մյուս կողմից,

և բոռերի նման՝ Ասորեստանի երկրից։

¹⁹ Պիտի գան ու հաստատվեն քո երկրի ձորերում,

ժայռերի ծերպերում ու այրերում,

բոլոր փապարներում ու ամեն ծառի վրա։

²⁰ Այդ օրը Տերը մեծ և արյունով արբած սրով

գետի այն կողմում եղած Ասորեստանի թագավորի ձեռքով

պիտի սափրի նրանց գլուխն ու ոտքի մազերը,

խուզի նրանց մորուքները։

²¹ Եվ այդ օրն այնպես պիտի լինի,

որ ամեն մարդ, մի երինջ և երկու ոչխար պահելով,

²² կաթի առատությունից յուղ պիտի ուտի.

յուղ ու մեղր պիտի ուտի ամեն ոք,

ով կենդանի կմնա այդ երկրում։

²³ Այդ օրն այնպես պիտի լինի,

որ ամեն տեղ, ուր հազար որթատունկ էր աճում՝ հազար սիկղ արծաթի արժեքով,

խոպան պիտի դառնա և փշով լցվի։

²⁴ Նետաձիգներ և աղեղնավորներ պիտի մտնեն այնտեղ։

Ողջ երկիրը խոպան պիտի դառնա ու փուշ բերի։

²⁵ Ամեն վարվող սարալանջ չի՛ ակոսվելու։

Երկյուղից ոչ ոք չի հասնելու այնտեղ,

որովհետև խոպան ու փշոտ վայրեր պիտի դառնան, հոտերի արոտավայր

և եզան ոտքի կոխան պիտի լինեն։

8

Եսայու մարգարեությունն իր որդու մասին

¹ Տերն ինձ ասաց. «Քեզ համար մի նոր մեծադիր մատյա՛ն վերցրու. նրա մեջ ճարտար մարդու գրչով գրի՛ր՝ “Արագորեն ավարառությա՛ն ենթարկել, շուտափույթ կողոպո՛ւտ կուտակել, քանզի ժամը հասել է”։ ² Ինձ համար վկաներ կկարգես հավատարիմ մարդկանց՝ Ուրիա քահանային և Բարաքիայի որդի Զաքարիային»։ ³ Ես մերձեցա իմ մարգարե կնոջը, նա հղիացավ ու մի որդի ծնեց։ Տերն ինձ ասաց. «Նրա անունը դի՛ր “Արագ-արագ կողոպտի՛ր և շուտ-շուտ ավա՛ր առ”, ⁴ քանի որ մինչ մանուկը կսովորի “հայր” կամ “մայր” ասել, Դամասկոսի հարստությունը և Սամարիայի ավարը կբերվեն Ասորեստանի թագավորի առաջ»։

Ասորեստանի թագավորի հարձակումը

⁵ Ապա Տերը նորից խոսեց ինձ հետ և ասաց.

⁶ «Քանի որ այդ ժողովուրդն արհամարհեց Սիլովամի հանդարտահոս ջուրը

և ուզեց իր համար թագավորներ ընտրել Ռասիմին և Ռոմելայի որդուն,

⁷ դրա համար էլ Տերը ձեզ վրա պիտի թափի հորդ ու հզոր գետի ջուրը՝

Ասորեստանի արքային ու նրա զորությունը։

Նա կգա հասնի ձեր բոլոր ձորերը

և կճեմի ձեր պարիսպների վրայով.

⁸ այն մարդուն, որ ի վիճակի կլինի բարձրացնել իր գլուխը,

և այն զորավորին, որ ունակ կլինի որևէ բան անելու,

կվերացնի Հուդայի երկրից.

նրա բանակը կլցվի ձեր լայնարձակ երկիրը»։

Աստված մեզ հետ է,

⁹ իմացե՛ք, հեթանոսնե՛ր,

պիտի պարտվեք. լուրը հասցրե՛ք աշխարհի չորս կողմերը.

դուք, որ հզորացել եք, պիտի պարտվեք։

Թեև դուք դարձյալ ուժեղանալու եք,

բայց էլի պարտության եք մատնվելու։

¹⁰ Ինչ խորհուրդ էլ անեք,

Տերը խափանելու է այն,

և ինչ էլ ասելու լինեք, չի հաստատվելու,

քանզի Տերը՝ Աստված, մեզ հետ է։

¹¹ Այսպես է ասում Տերը նրանց, ովքեր ընդդիմանում են նրա բազկի զորությանը՝ հետևելով այս ժողովրդի ճանապարհին.

¹² «Ասում են, թե երբեք խիստ չեն խոսում.

բայց չէ՞ որ ինչ խոսում է այդ ժողովուրդը, խիստ է։

Մի՛ սարսափեք այն բանից, ինչից նրանք են վախենում,

և մի՛ անհանգստացեք։

¹³ Իրեն՝ Զորությունների Տիրո՛ջը, սրբացրե՛ք,

թող ձեր վախը նա՛ լինի։

¹⁴ Եթե հույսդ նրա վրա դնես,

նա քեզ համար սրբություն կլինի,

և քո ոտքը քարի չի դիպչի, դու չես սայթաքի։

Բայց Հակոբի տունը որոգայթի, և Երուսաղեմի բնակիչները ծործորների մեջ են։

¹⁵ Դրա համար էլ այնտեղ շատերը պիտի տկարանան,

ընկնեն ու խորտակվեն.

մարդիկ, որոնք ապահովության մեջ էին,

պաշարման պիտի ենթարկվեն»։

Զգուշանալ վհուկներից և հետևել Աստծուն

¹⁶ Այն ժամանակ պիտի հայտնվեն նրանք, ովքեր փակի տակ են դնելու օրենքները, որպեսզի որևէ մեկը չկարողանա սովորել ¹⁷ և ասել. «Կմնամ ու կսպասեմ Աստծուն, որն իր երեսը դարձրեց Հակոբի տնից, հույս կդնեմ նրա վրա»։ ¹⁸ Ահավասիկ ես և իմ զավակները, որ Աստված ինձ պարգևեց, Իսրայելի տան մեջ նշաններն ու վկաները պիտի լինեն Զորությունների Տիրոջ կողմից, որ բնակվում է Սիոն լեռան վրա։ ¹⁹ Եվ եթե ձեզ ասեն՝ «Հարցրե՛ք վհուկներին ու մեռելահարցուկներին, նանրախոսներին ու որովայնախոսներին», այն ժամանակ ասացե՛ք. «Մի՞թե որևէ ազգ իր Աստծուն չպիտի դիմի, ողջերի համար մեռածների՞ն պիտի հարցնեն։ ²⁰ Չէ՞ որ օրենքը տվեց օգնության համար, որպեսզի ասեն, թե սրանք այն խոսքերը չեն, որոնց համար կարելի է կաշառք տալ»։

Նեղության ժամանակներ

²¹ Սոսկալի սովը պիտի սպառնա ձեզ,

և երբ քաղցած լինեք, պիտի վշտանաք,

հայհոյանք թափեք իշխանի ու աշխարհի հասցեին։

Իրենց աչքերը պիտի ուղղեն դեպի վեր՝ երկնքին,

²² պիտի նայեն դեպի ներքև՝ երկրին,

և ահա կարիք, տառապանք, խավար,

նեղություն, անձկություն ու մթություն, այնպես

որ ոչ ոք չկարողանա տեսնել։

²³ Եվ նա, ով նեղության մեջ լինի,

չի տկարանալու, մինչև որ գա ժամանակը, որ շուտ է գալու,

ո՜վ Զաբուղոնի՛ երկիր, երկի՛ր Նեփթաղիմի, ճանապա՛րհ ծովի,

նաև մյուսներդ, որ բնակվում եք ծովեզերքին

և Հորդանան գետի այն կողմում,

հեթանոսների՛ Գալիլեա և Հուդայի՛ կողմեր։

9

Ժողովուրդը պիտի տեսնի մեծ լույսը

¹ Այն ժողովուրդը, որն ընթանում էր խավարի միջով,

մեծ լույս տեսավ.

ձեզ համար էլ, որ բնակվում եք աշխարհում և մահվան ստվերների մեջ,

լույս պիտի ծագի։

² Ժողովրդի մեծ մասը, որին մասնակից դարձրիր քո ուրախությանը,

ուրախանալու է քո առաջ,

ինչպես հնձի ժամանակ են ուրախանում և կամ ավարը բաժանելիս,

³ որովհետև վերացավ լուծը,

որ նրանց վրա էր դրված,

և գավազանը, որ նրանց պարանոցին էր։

Ինչպես այն օրերին, երբ Տերը վերացրեց

Մադիամի վրա կախված բռնակալների գավազանը։

⁴ Ամեն մի պատմուճան և հանդերձ, որ նենգությամբ է հավաքել,

հրով պիտի այրվի,

⁵ քանզի մեզ համար մանուկ ծնվեց,

մի որդի տրվեց մեզ,

որի իշխանությունն իր ուսերի վրա է.

նա Մեծ խորհրդի պատգամաբեր պիտի կոչվի,

Սքանչելի խորհրդական,

Աստված հզոր, Իշխան,

Հայր հավիտենական։

Ես խաղաղություն կբերեմ նրա իշխաններին,

իսկ իրեն՝ առողջություն։

⁶ Մեծ է նրա իշխանությունը,

և նրա խաղաղությունը սահման չունի։

Նա պիտի նստի Դավթի աթոռին,

նրա թագավորությունը պիտի զորանա և հաջողվի

իրավունքով ու արդարությամբ

այսուհետև և հավիտյանս հավիտենից։

Զորությունների Տիրոջ նախանձախնդրությունը պիտի կատարի այդ։

Աստծու սպառնալի ձեռքը

⁷ Տերը Հակոբի տան վրա մահ ուղարկեց,

բայց այն եկավ հասավ Իսրայելի վրա։

⁸ Թող Եփրեմի ողջ ժողովուրդը և Սամարիայում ապրողներն իմանան,

որ հպարտությամբ և ամբարտավան սրտով խոսեցին՝ ասելով.

⁹ «Աղյուսները թափվեցին,

բայց եկեք քար տաշենք,

մայրիներ ու եղևնու ծառեր կտրենք

և մեզ համար աշտարակ կառուցենք»։

¹⁰ Աստված պիտի կործանի Սիոնի լեռան վրա հարձակվողներին

և ցիրուցան պիտի անի Հուդայի երկրի թշնամիներին,

¹¹ արևելքից՝ ասորեստանցիներին և արևմուտքից՝ հույներին,

որոնք լիաբերան կերան Իսրայելին։

Այնուամենայնիվ, նրա բարկությունը տեղի չտվեց,

տակավին նրա ձեռքը բարձրացած է։

¹² Ժողովուրդը դարձի չեկավ, մինչև հարվածի չենթարկվեց։

Զորությունների Տիրոջը փնտրող չգտնվեց։

¹³ Եվ Տերը մեկ օրում վերացրեց Իսրայելի գլուխն ու պոչը,

մեծին ու փոքրին։

¹⁴ Խորհրդատուն և տեղապահները գլուխն են,

իսկ մարգարեն, որ անօրենություն էր ուսուցանում, պոչն է։

¹⁵ Եվ այնպես պիտի լինի, որ կեղծավորաբար այս ժողովրդին երանի տվող

մոլորյալները պիտի մոլորեցնեն նրան,

որպեսզի կուլ տան։

¹⁶ Դրա համար էլ Աստված չի ուրախանալու նրանց երիտասարդներով,

նրանց որբերին ու այրիներին չի գթալու,

որովհետև նրանք ամենքն էլ անօրեն են ու չար,

ամեն բերան անարդարություն է խոսում։

Այս ամենով հանդերձ Տիրոջ զայրույթը չի իջել.

նրա ձեռքը տակավին բարձրացած է մնում։

¹⁷ Անօրենությունը պիտի վառվի կրակի պես,

չորացած սիզախոտի պես պիտի այրվի կրակից,

պիտի վառվի մայրիների անտառում,

և ամեն ինչ, որ գտնվում է նրանց բոլոր բլուրների շուրջը,

հուրը պիտի այրի։

¹⁸ Տիրոջ զայրույթի ու բարկության հետևանքով

համայն երկիրը կրակի պիտի մատնվի,

ժողովուրդն էլ հրով կիզվածի պես պիտի լինի։

Մարդ իր եղբորը չի խղճալու,

¹⁹ քաղցից նա պիտի շրջվի դեպի աջ,

պիտի շրջվի դեպի ձախ,

որ ուտի, բայց պիտի չհագենա՝

մինչև իսկ իր բազուկների միսն ուտելով։

²⁰ Մանասեն Եփրեմին պիտի ուտի,

և Եփրեմը՝ Մանասեին,

ապա միասին պիտի պաշարեն Հուդայի երկիրը։

Այս ամենով հանդերձ Տիրոջ զայրույթը չի իջել,

նրա ձեռքը տակավին բարձրացած է մնում։

10

Վա՜յ անիրավ իշխանավորներին

¹ Վա՜յ նրանց, ովքեր անարդար օրենքներ են հաստատում,

չար գործեր են արձանագրում,

և նրանց, ովքեր ճնշող որոշումներ են ընդունում,

² խեղաթյուրում են աղքատների դատն ու դատաստանը,

խլում իմ ժողովրդի տնանկների իրավունքը,

որպեսզի որբևայրին հափշտակության ենթարկվի, որբը՝ ավարի։

³ Բայց նրանք ի՞նչ պիտի անեն դատաստանի օրը։

Ձեր նեղությունը հեռուներից պիտի գա.

ո՞ւմ մոտ պիտի փախչեք օգնության համար,

որտե՞ղ պիտի թողնեք ձեր հարստությունը։

⁴ Գերության չմատնվելու համար նրանք սպանվածների տակ պիտի թաքնվեն։

Այս ամենով հանդերձ Տիրոջ զայրույթը չի իջել,

նրա ձեռքը տակավին բարձրացած է մնում։

Վա՜յ ասորեստանցիներին

⁵ Վա՜յ ասորեստանցիներին,

որոնց ձեռքին է իմ բարկության ու զայրույթի գավազանը.

⁶ քանզի իմ բարկությունն անօրեն ազգի վրա պիտի արձակեմ,

պիտի կարգադրեմ, որ իմ ժողովրդին ենթարկեն ավարի ու հափշտակության,

ոտքի կոխան անեն նրանց քաղաքները և նրանց փոշու տակ թաղեն։

⁷ Իսկ նա այդպես չմտածեց,

ինքն իր մտքում այդպես չխորհեց,

այլ մտադրվեց բնաջնջել ոչ քիչ ազգերի։

⁸ Եվ եթե նրան ասեն՝ «Միայն դո՞ւ ես լինելու իշխան»,

⁹ կպատասխանի. «Մի՞թե ես չնվաճեցի այն աշխարհը,

որ բարձր է Բաբելոնից,

և Քաղանեն, որտեղ աշտարակը կառուցվեց։

Ես գրավեցի նաև Արաբիան,

Դամասկոսն ու Սամարիան։

¹⁰ Ինչպես որ դրանք իմ ձեռքով գրավեցի,

այնպես էլ պիտի նվաճեմ բոլոր իշխանությունները»։

Ողբացե՛ք, ո՛վ կուռքեր, որ Երուսաղեմում և Սամարիայում եք,

¹¹ քանի որ ինչպես որ վարվեցի Սամարիայի և նրա ձեռակերտների հետ,

նույն կերպ էլ վարվելու եմ Երուսաղեմի և նրա կուռքերի հետ։

¹² Այնպես պիտի լինի, որ, երբ Տերը վերջացնի ամեն ինչ, որ կատարելու է Սիոնի լեռան վրա և Երուսաղեմում, իր բարկությունը պիտի թափի նաև մեծամտացողի վրա՝ Ասորեստանի իշխանի և գոռոզությամբ փայլող նրա աչքերի վրա։

¹³ Արդարև, նա ասաց.

«Իմ զորությամբ կկատարեմ

և իմ իմաստությամբ ու խելքով կվերացնեմ ազգերի սահմանները,

կհափշտակեմ նրանց հարստությունը,

կցնցեմ շեն քաղաքները,

¹⁴ իմ բազկով կհարձակվեմ բոլոր երկրների վրա,

ինչպես բնի վրա,

և թռչնի լքված ձվերի պես բոլորին ձեռքս կառնեմ.

ոչ ոք իմ ձեռքից չի փրկվի,

ոչ ոք ինձ չի ընդդիմանա,

բերանը չի բացի և ծպտուն չի հանի»։

Այսպես ասաց Տերը.

¹⁵ «Մի՞թե կացինն առանց փայտահատի կբարձրանա,

կամ սղոցը վերև կելնի՞ առանց մեկի ձգելու.

այնպես էլ՝ գավազանը կամ ցուպը,

եթե մեկը չբռնի այն։ ¹⁶ Այդպես չի կարող լինել»։

Զորությունների Տերը քո պատվի վրա անարգանք է ուղարկելու,

և քո փառքի վրա բոցավառ հուրն է բորբոքվելու։

¹⁷ Իսրայելի լույսը հուր ու բոց պիտի դառնա և նրանց սրբացնի բորբոքուն հրով,

խոտի պես պիտի լափի անտառը։

¹⁸ Լեռները, բլուրներն ու անտառները պիտի մոխրանան,

կրակը պիտի լափի հոգուց մինչև մարմինը,

և փրկվողը նման պիտի լինի բորբոքված բոցից ազատվածի։

¹⁹ Կենդանի մնացածները թվով այնքան պիտի լինեն,

որ մանուկ երեխան էլ կարողանա հաշվել նրանց։

Իսրայելի վերապրողները

²⁰ Այն օրն Իսրայելից մնացածները՝ Հակոբի տնից փրկվածները, այլևս չեն ապավինելու իրենց զրկողներին, այլ իրապես կապավինեն Աստծուն՝ Իսրայելի Սրբին։ ²¹ Հակոբի տնից մնացածները պիտի դառնան դեպի զորավոր Աստված։ ²² Եվ եթե Իսրայելի ժողովուրդը ծովի ավազի չափ էլ լինի, նրանից սակավաթիվ մնացորդ է մնալու։ Կործանումը վճռված է և պիտի կատարվի արդարությամբ, ²³ այդ վճիռը Զորությունների Տերը պիտի իրագործի ամբողջ երկրում։

Չվախենալ Ասորեստանից

²⁴ Դրա համար էլ այսպես է ասում Տերը՝ Զորությունների Տերը. «Ո՛վ իմ ժողովուրդ, որ բնակվում ես Սիոնում, մի՛ վախեցիր ասորեստանցիներից, նույնիսկ երբ նրանք քեզ հարվածեն գավազանով, քանզի այդ հարվածները ես եմ բերում քեզ վրա, որպեսզի հիշես Եգիպտոսի ճանապարհը։ ²⁵ Բայց փոքր-ինչ անց իմ բարկությունը պիտի իջնի, և իմ զայրույթը պիտի ուղղվի նրանց դեմ»։ ²⁶ Տերը հարվածներ պիտի հարուցի նրանց դեմ, նման այն հարվածներին, որոնք հասան Մադիամին չարչարանքների տեղում. նրա զայրույթը պիտի լինի, ինչպես Եգիպտոսից դուրս գալու ժամանակ՝ ծովի ճանապարհին։

²⁷ Այն օրը քո ուսերից պիտի վերանա Ասորեստանի բեռը,

և քո պարանոցից՝ նրա լուծը։

Թշնամին հարձակվում է Երուսաղեմի վրա

²⁸ Նա պիտի գա հասնի Անգե քաղաքը,

անցնի Մակեդդովով և բանակ դնի Մաքմասում։

²⁹ Պիտի անցնի ձորերով,

հարձակվի գաբավոնացիների վրա,

ահաբեկի Ռաման՝ Սավուղի քաղաքը.

Գալիմի դուստրը պիտի փախչի։

³⁰ Խրխի՛նջ բարձրացրու քո ձայնով.

թող լուրը հասնի Լաիս,

թող լուրը հասնի Անաթովթ.

³¹ թող զարհուրի Մադեբենան,

նաև նրանք, որ բնակվում են Գեբիմում։

³² Նա պիտի մխիթարվի այսօր՝ իջևանելով ճանապարհին,

ձեռքով պիտի մխիթարի Սիոնի դստեր լեռանը

և այն բլուրներին, որոնք Երուսաղեմում են։

³³ Ահավասիկ Տերը՝ Զորությունների Տերը,

իր ուժով ահուսարսափի պիտի մատնի փառավորվածներին,

և ամբարտավանությամբ բարձրացածները պիտի խորտակվեն։

³⁴ Բարձունքները սրով պիտի ընկնեն,

և Լիբանանն իր բարձունքներով պիտի կործանվի։

11

Գայլն ու գառը միասին

¹ Հեսսեի արմատից գավազան պիտի ընձյուղվի,

ծաղիկ պիտի բուսնի այդ արմատից։

² Նրա վրա պիտի իջնի Աստծու հոգին,

իմաստության և խոհեմության հոգին,

խորհրդի ու զորության հոգին,

գիտության և աստվածպաշտության հոգին.

³ Աստծու երկյուղի հոգին պիտի լցնի այն։

Ո՛չ ըստ երևացածի պիտի դատի նա և ո՛չ էլ ըստ խոսքերի հանդիմանի։

⁴ Այլ պիտի պաշտպանի տնանկին,

և պիտի հանդիմանի երկրի խոնարհներին.

իր բերանի խոսքով հարվածի երկրին

և իր շուրթերի շնչով ոչնչացնի ամբարիշտներին։

⁵ Արդարությամբ պիտի գոտևորի իր մեջքը

և ճշմարտությամբ կապի իր կողերը։

⁶ Գայլն ու գառը միասին պիտի ճարակեն,

ընձառյուծն ուլի հետ պիտի մակաղի,

հորթը, ցուլն ու առյուծը միասին պիտի ճարակեն,

և մատաղատի մանուկը պիտի հովվի նրանց։

⁷ Եզն ու արջը միասին պիտի ճարակեն,

նրանց ձագերը միասին պիտի շրջեն,

և առյուծը, ինչպես եզը, հարդ պիտի ուտի։

⁸ Մատաղ մանուկն իր ձեռքը պիտի մտցնի իժերի բույնը և իժերի ձագերի բույնը,

⁹ ու նրանք ոչ ոքի չպիտի կարողանան վնասել և խայթել իմ սուրբ լեռան վրա,

քանի որ ամբողջ երկիրը լցվելու է Տիրոջ գիտությամբ,

նման առատ ջրերին, որոնք ծածկում են ծովերը։

Աքսորված ժողովուրդը պիտի վերադառնա

¹⁰ Այն օրը հեթանոսներն իրենց հույսը դնելու են Հեսսեի արմատի վրա,

որն իշխան է լինելու հեթանոսներին,

և նրա հանգիստը փառահեղ է լինելու։

¹¹ Այն օրը Տերը նորից պիտի ցույց տա իր ձեռքը՝

ազատելու իր ժողովրդի մնացորդներին,

որոնք փրկվելու են Ասորեստանից և Եգիպտոսից,

Բաբելոնից և Եթովպիայից,

Էլամից և Արևելքից,

Արաբիայից և ծովեզրյա երկրներից։

¹² Ազգերին դրոշ պիտի պարզի և հավաքի Իսրայելի կորուսյալներին,

Հուդայի ցրվածներին պիտի հավաքի աշխարհի չորս անկյուններից։

¹³ Եփրեմի նախանձը պիտի վերանա,

և Հուդայի թշնամիները կորստյան պիտի մատնվեն.

Եփրեմը չպիտի նախանձի Հուդային,

և Հուդան էլ չպիտի նախանձի Եփրեմին։

¹⁴ Այլազգիների նավերը պիտի չվեն,

միանգամից ավարի պիտի ենթարկեն ծովակողմը,

թե՛ արևելցիներին և թե՛ եդովմացիներին.

իրենց ձեռքը պիտի բարձրացնեն նախ Մովաբի վրա,

և ամենից առաջ ամովնացիներն են հնազանդվելու։

¹⁵ Տերն անապատ պիտի դարձնի Եգիպտոսի ծովը

և սպառնալիքով իր ձեռքը պիտի երկարի Եփրատի վրա

և ուժեղ փչելով՝ այն յոթ առուների պիտի վերածի,

որպեսզի կոշիկով համարձակ կարողանան անցնել այն։

¹⁶ Այն ժամանակ մի անցուղի պիտի բացվի

Ասորեստանում պահպանված իմ ժողովրդի համար,

ինչպես այն ճանապարհը, երբ իսրայելացիները հեռանում էին եգիպտացիների երկրից։

12

Գովք փրկիչ Աստծուն

¹ Այն օրը պիտի ասես.

«Շնորհակալ եմ քեզ, Տե՜ր,

բարկացար ինձ վրա,

բայց քո զայրույթը հեռացրիր ինձնից և ողորմեցիր ինձ։

² Ահա Աստված իմ՝ իմ փրկիչ Տերը.

ես հույսս նրա վրա պիտի դնեմ

և երկյուղ չեմ կրելու,

քանզի Տերն է իմ փառքն ու իմ օրհնությունը,

և փրկություն եղավ ինձ համար»։

³ Ուրախությամբ ջո՛ւր առեք փրկության աղբյուրներից։

⁴ Եվ այն օրը պիտի ասես.

«Օրհներգե՛ք Տիրոջը,

հնչեցրե՛ք նրա անունը,

նրա փառքը տարածե՛ք ազգերի մեջ,

հիշե՛ք, որ բարձր է նրա անունը։

⁵ Օրհներգե՛ք Տիրոջ անունը, քանզի նա մեծամեծ գործեր կատարեց,

ծանուցե՛ք այդ ամբողջ աշխարհին։

⁶ Ցնծացե՛ք և ուրա՛խ եղեք, Սիոնի՛ բնակիչներ,

քանզի Իսրայելի Սուրբը բարձրացավ նրա մեջ»։

13

Բաբելոնի վախճանը

¹ Ամոզի որդի Եսայու տեսիլքը բաբելացիների մասին։

² Հարթ լեռան վրա դրո՛շ կանգնեցրեք,

ձեր ձայնը բարձրացրե՛ք նրանց վրա,

մի՛ վախեցեք, ձեռքով նշա՛ն արեք,

բացե՛ք, իշխաննե՛ր,

³ և ես հրաման կտամ։ Իմ նվիրյալներն են նրանք, որոնց ես եմ բերել.

ելել գալիս են հսկաները,

որպեսզի գոհացում տան իմ բարկությանը.

միահամուռ գալիս են խինդով ու նախատինք թափում։

⁴ Լեռների վրա բազում ցեղերի ձայնն է հնչում,

կարծես անհամար ժողովուրդներ լինեն.

միահամուռ հավաքված թագավորների ու ցեղերի ձայնն է հնչում։

Զորությունների Տերը հրաման է արձակել սպառազեն ազգերին,

⁵ որ գան հեռու երկրից,

երկնային հաստատության ծայրերից։

Հասել է Տերն իր սպառազեններով՝

բնաջնջելու ամբողջ աշխարհը։

⁶ Ողբացե՛ք, քանի որ մոտ է Տիրոջ օրը,

և հասել է Աստծու պատուհասը։

⁷ Ահա թե ինչու բոլոր ձեռքերը պիտի թուլանան,

ամեն մարդու սիրտ պիտի դողա։

⁸ Պատգամախոսները տագնապի մեջ պիտի ընկնեն,

պիտի տանջվեն,

ինչպես երկունքի ցավով բռնված ծննդաբերող կանայք։

Փռնչալով մեկը մյուսին պիտի նայի,

պիտի զայրանան, և զայրույթից պիտի կարմրեն նրանց դեմքերը,

⁹ քանզի ահավասիկ հասել է Տիրոջ օրը՝

լի անսահման բարկությամբ,

ոխակալությամբ ու զայրույթով,

որպեսզի երկիրն անապատ դարձնի

և մեղավորներին այնտեղից վերացնի։

¹⁰ Արդարև, երկնքի աստղերը

Հայկի [* և Ο΄ Օրիոնի] համաստեղության և երկնային բոլոր լուսատուների հետ միասին

լույս չեն տալու,

արեգակն իր ծագման պահին պիտի խավարի,

լուսինն էլ իր լույսը չպիտի տա։

¹¹ Չարիքի համար, ամբարիշտների մեղքերի համար

վճիռ պիտի արձակեմ համայն աշխարհին,

պիտի կործանեմ անիրավների հպարտությունը,

պիտի խոնարհեցնեմ ամբարտավանների մեծամտությունը։

¹² Իսկ մնացածներն ավելի հարգի պիտի լինեն, քան մաքուր ոսկին,

մարդն ավելի արժեք պիտի ունենա, քան Սոփերի թանկագին քարերը։

¹³ Այն օրը, երբ Զորությունների Տիրոջ բարկությունը վրա հասնի,

նրա զայրույթից ու ցասումից երկինքը պիտի մոլեգնի,

և երկիրն իր հիմքերից պիտի սասանվի։

¹⁴ Կենդանի մնացածները պիտի լինեն

սարսափից փախած այծյամի և մոլորյալ ոչխարի պես,

նրանց հավաքող չի լինելու.

ամեն մարդ իր ժողովրդի մոտ պիտի վերադառնա,

յուրաքանչյուր մարդ իր երկիրը պիտի փախչի։

¹⁵ Ով բռնվի, պարտության պիտի մատնվի,

իսկ մի տեղ հավաքվածները սրով պիտի ընկնեն։

¹⁶ Նրանց որդիներին նրանց աչքերի առաջ պիտի սպանեն,

նրանց տները պիտի կողոպտեն,

իսկ նրանց կանանց պիտի խայտառակեն։

¹⁷ Ահա ձեզ վրա պիտի հանեմ մարերին,

որոնք արհամարհում են արծաթն ու ոսկին։

¹⁸ Նրանք երիտասարդների աղեղները պիտի ջարդեն,

ձեր որդիներին չեն գթալու,

նրանց աչքը չի խնայելու ձեր մանուկներին։

¹⁹ Եվ Բաբելոնը, որ քաղդեացի թագավորի կողմից «փառապանծ» է կոչվում,

պիտի դառնա այնպես, ինչպես Աստծու կողմից կործանված Սոդոմն ու Գոմորը։

²⁰ Այնտեղ հավիտյանս հավիտենից բնակվող չպիտի լինի,

բազմաթիվ ցեղեր այլևս այնտեղ մուտք չպիտի գործեն,

արաբացիներն այլևս այնտեղով չպիտի անցնեն,

հովիվներն այնտեղ այլևս հանգիստ չպիտի առնեն։

²¹ Այնտեղ բույն են դնելու վայրի գազանները,

նրանց տները լցվելու են աղաղակով,

այնտեղ են հանգիստ առնելու համբարուները,

դևերն են պարելու այնտեղ,

²² հուշկապարիկներն են բնակվելու նրա մեջ,

ոզնիներն են ձագ հանելու նրա ապարանքներում։

Պիտի գա ժամանակը, շտապ հասնի, չի հապաղելու,

օրերը երկար սպասել չեն տալու։

14

Վերադարձ գերությունից

¹ Տերը գթալու է Հակոբին, Իսրայելին դարձյալ իր ընտրյալն է դարձնելու։

Նրանք հանգիստ են գտնելու իրենց երկրում, և պանդուխտներն ավելանալու են Հակոբի տանը։

² Նրանց ընդունելու են հեթանոսները և բերելու են իրենց տեղերը, որ ժառանգեն և բազմանան Աստծու երկրում՝ ծառաներով ու աղախիններով։ Նրանց գերեվարողները գերիներ են դառնալու, ծառայության տակ են ընկնելու նրանց տիրողները։

Բաբելոնի անկման հաղթական երգը

³ Այն օրը Տերը հանգստացնելու է քեզ քո ցավերից ու նեղություններից և այն դաժան ծառայությունից, որ նրանց համար կատարեցիր։ ⁴ Ու այս ողբը պիտի երգես Բաբելոնի թագավորի վրա և ասես այն օրը.

«Ինչպե՜ս ընկավ բռնակալը,

և լռեց ահաբեկողը։

⁵ Տերը խորտակեց մեղավորների լուծը, իշխանների լուծը,

⁶ զայրույթով, սոսկալի հարվածներով

ու անողոք բարկությամբ ոչնչացրեց նրանց ազգերին։

⁷ Ողջ երկիրը հույսով խաղաղվեց

և կանչում է ցնծությամբ։

⁸ Անգամ Լիբանանի ծառերը ցնծում են քեզ համար,

Լիբանանի մայրիներն ասում են.

“Այն օրից, երբ դու ընկար,

անտառահատները մեզ չեն դիպել”։

⁹ Դժոխքն անհանգստացավ քեզ ընդունելիս,

միանգամից ոտքի ելան մահացած բոլոր հսկաները,

որոնք երկրի իշխաններն էին,

իրենց գահերից վեր ելան

հեթանոսների բոլոր թագավորները։

¹⁰ Ամենքը քեզ ասացին.

“Դու էլ մեզ նման ընկար և մեզ պես դարձար”։

¹¹ Քո փառքը, քո մեծ ուրախությունը դժոխք իջան.

քո տան տակը պիտի նեխի,

իսկ վրադ որդը պիտի պատի։

¹² Արդ, ինչպե՞ս երկնքից ընկավ Արուսյակը,

որ ծագում էր առավոտյան.

նա, որ տիրում էր բոլոր ազգերին,

ընկավ գետնին ու խորտակվեց։

¹³ Մտքիդ մեջ ասում էիր.

“Երկինք կբարձրանամ,

իմ գահը կդնեմ երկնային աստղերից ավելի վեր,

կնստեմ բարձր լեռան վրա,

հյուսիսի բարձր լեռների վրա.

¹⁴ կբարձրանամ ամպերից էլ վեր,

կնմանվեմ Բարձրյալին”։

¹⁵ Բայց ահավասիկ դժոխք ես իջնելու և երկրի խորքերը։

¹⁶ Ովքեր տեսնեն քեզ,

պիտի զարմանան քեզ վրա և ասեն.

“Սա այն մարդն է, որ ահաբեկում էր երկիրը,

ցնցում թագավորներին,

¹⁷ ավերակ էր դարձնում ողջ աշխարհը,

քանդում նրա քաղաքները,

գերիներին ազատ չէր թողնում”։

¹⁸ Ազգերի բոլոր թագավորները պատվով ննջեցին՝

յուրաքանչյուրն իր շիրիմում,

¹⁹ իսկ դու իբրև գարշելի մեռել՝ լեռան վրայից պիտի նետվես

սրակոտոր բազում դիակների մեջ,

որոնք դժոխք են իջնելու։

Ինչպես արնաթաթախ, անմաքուր ձորձը,

²⁰ այնպես էլ դու չպիտի մաքրվես, որովհետև ոչնչացրիր իմ երկիրը

և կոտորեցիր իմ ժողովրդին.

հավիտյանս հավիտենից չպիտի մնաս, չա՛ր զավակ։

²¹ Քո որդիներին պատրաստի՛ր

իրենց հայրերի մեղքերի պատճառով սպանվելու համար,

որպեսզի ոտքի չելնեն նրանք,

չնվաճեն երկիրը

և այն չլցնեն պատերազմներով»։

Աստված կործանելու է Բաբելոնը

²² «Պիտի ելնեմ նրանց դեմ,-

ասում է Զորությունների Տերը,-

պիտի կորցնեմ նրանց անունը,

նրանց զարմն ու զավակը»։

Այսպես է ասում Զորությունների Տերը.

²³ «Բաբելոնն ավերակ պիտի դարձնեմ,

որ այնտեղ ոզնիները բնակվեն,

և նա ոչնչության վերածվի.

այն տիղմի խորխորատ պիտի դարձնեմ, որ կորչի»։

Աստված կործանելու է Ասորեստանը

²⁴ Այսպես է ասում Զորությունների Տերը.

«Ինչպես ասացի, այնպես պիտի լինի,

և ինչպես մտածել եմ, այնպես պիտի կատարվի.

²⁵ ասորեստանցիներին իմ երկրի մեջ և իմ լեռների վրա պիտի կոտորեմ.

թող նրանք ոտքի կոխան լինեն,

և նրանց լուծն ընկնի ձեր վրայից,

նրանց բռնությունը վերանա ձեր պարանոցից»։

²⁶ Այս է այն խորհուրդը, որ խորհեց Տերը համայն աշխարհի մասին,

և այս ձեռքն է բարձրացել բոլոր ազգերի վրա։

²⁷ Արդարև, այն, ինչ սուրբ Աստված խորհեց,

ո՞վ կարող է խափանել,

և ո՞վ կարող է նրա բարձրացած ձեռքը կասեցնել։

Աստված կործանելու է այլազգիներին

²⁸ Այլազգիներին ուղղված այս պատգամը եղավ այն տարում, երբ մեռավ Աքազ արքան.

²⁹ «Մի՛ ուրախացեք, ո՛վ այլազգիներ բոլոր,

ձեզ հարվածողների լուծը խորտակվեց,

որովհետև օձի զարմից դուրս են գալիս իժի ծնունդներ,

իսկ սրանց ծնունդներից՝ թևավոր օձեր։

³⁰ Աղքատները պիտի լիանան,

տկար մարդիկ պիտի ապրեն խաղաղության մեջ,

իսկ քո զավակին քաղցով պիտի սպանի,

քո մնացորդներին պիտի կոտորի։

³¹ Ողբացե՛ք, քաղաքների՛ դարպասներ,

ձա՛յն բարձրացրեք, տագնապա՛ծ քաղաքներ և բոլո՛ր այլազգիներ,

ծուխ ելավ հյուսիսից,

և այլևս ոչ ոք չի լինի։

³² Իսկ ի՞նչ պատասխան են տալու ազգերի թագավորները,

քանի որ Տերը հաստատեց Սիոնի հիմքերը,

և նրա շնորհիվ պիտի փրկվեն ժողովրդի աղքատները»։

15

Աստված կործանելու է Մովաբը

¹ Պատգամ մովաբացիների մասին.

գիշերով պիտի կոտորվի մովաբացին,

գիշերով պիտի կործանվի Մովաբի պարիսպը։

² Սգացե՛ք ձեզ, որովհետև կործանվեց Գեդեբոնը՝

ձեր մեհյանի տեղը։

Այնտեղ պիտի բարձրանաք՝

մովաբացիների Նաբավի վրա լաց լինելու։

Ողբացե՛ք, որ ամեն ոք ածիլել է իր գլուխը

և խուզել իր մորուքը։

³ Նրա հրապարակներում քո՛ւրձ հագեք,

նրա տանիքների վրա լաց ու կո՛ծ արեք

և նրա փողոցներում ամենքդ ողբացե՛ք ու լացե՛ք։

⁴ Եսեբոնն ու Ելեիլան գույժ բարձրացրին,

նրանց ձայները մինչև Հասսա լսելի եղան,

ահա թե ինչու մովաբացին ճչում է,

և նրա հոգին գիտակցում է։

⁵ Մովաբացու սիրտն իր մեջ գոչում է մինչև Սեգովր,

որովհետև նա երեքամյա երինջ է։

Լվիթի զառիվերով նրանք լաց լինելով

պիտի բարձրանան քեզ մոտ,

Արոնիիմի ճանապարհին

պիտի գոչի. «Կործանում և երկրաշարժ»։

⁶ Նեմերիմի ջուրը պիտի պակասի ու ցամաքի,

նրա խոտը պիտի չորանա,

և այնտեղ դալար բույս չի լինելու.

⁷ մի՞թե այդպես պիտի փրկվի։

Նրա ձորերի վրա պիտի բերեմ արաբացիներին, որ գրավեն,

⁸ քանզի մովաբացու սահմանների

բողոքը միացավ գալիմացու բողոքին,

նրա ողբը, նրա հեծեծանքը հասավ մինչև Ելիմի ջրհորը։

⁹ Եվ Ռեմոնի ջուրը պիտի լցվի արյամբ,

քանի որ Ռեմոնի վրա պիտի բերեմ արաբացիներին

ու վերացնեմ Մովաբի զավակին,

Արիելին և Ադեմի մնացորդին էլ։

16

Մովաբը օգնություն է խնդրում Երուսաղեմից

¹ Սողունների պես պիտի ուղարկեմ երկրի վրա։

Մի՞թե Սիոնի դստեր լեռը ավերակ ապառաժ է լինելու։

² Մովաբացիների դո՛ւստր,

դու պիտի լինես բնից քշված թռչնի պես։

Սակայն դու, Առնո՛վն,

³ փոքր-ինչ երկա՛ր մտածիր՝

նրանց համար սգո տներ կառուցելու,

որոնք, կարծես խավարի մեջ, միջօրեի ժամին հանապազ փախչում են։

⁴ Նրանք զարհուրած են,

բայց դու մի՛ վանիր նրանց։

Մովաբի փախստականները քեզ մոտ են պանդխտելու,

ձեզ համար ապաստան են լինելու ձեզ հալածողից,

քանզի ընկավ քո մարտակից ընկերը,

կորավ իշխանը, որ ոտքի տակ էր տալիս երկիրը։

⁵ Ողորմածությամբ գահ պիտի հաստատվի,

ու նրա վրա՝ Դավթի խորանի մեջ,

ճշմարտությամբ պիտի բազմի մեկը,

ով դատելիս իրավունքին հետամուտ պիտի լինի,

պիտի ջանա արդարություն անել։

⁶ Լսեցինք Մովաբի ամբարտավանության մասին,

քանզի նա խիստ հպարտացել էր,

գոռոզացել ու ոխակալ դարձել.

քո ամբարտավանությունը ես վերացրի քեզնից,

բայց ոչ այնպես, ինչպես քո կախարդությունը,

⁷ և ոչ էլ այնպես, ինչպես որ Մովաբի մեջ ողբն են անում։

Մովաբի մեջ պիտի ողբան բոլոր նրանք, ովքեր բնակվում են Դեսեթում.

պիտի մրմնջան ու չամաչեն։

⁸ Եսեբոնի դաշտերն ու Սեբիմայի այգիները,

որ կուլ էին տալիս ազգերին, պիտի սգան։

Ոտքի տա՛կ տվեք նրանց այգիները մինչև Հազեր,

բայց չպիտի հասնեք։ Մոլորվե՛ք անապատում.

նրա առաքվածները լքվեցին, քանի որ անցան ծովի այն կողմը։

⁹ Դրա համար էլ Հազերի ողբը պիտի լացեմ Սեբիմայի այգիների վրա։

Ո՛վ Եսեբոն և Ելեիլա,

ձեր ծառերը կոտորվեցին,

որպեսզի ձեր հունձն ու այգեկութը վերանան,

և ամեն ինչ կործանվի։

¹⁰ Ուրախությունն ու ցնծությունը պիտի վերանան այգիներից,

քո այգեստանում ուրախություն չի լինելու,

քո հնձաններում գինի չեն քամելու,

որովհետև էլ այգեկութ չի լինի։

¹¹ Ահա թե ինչու իմ որովայնը քնարի նման պիտի հնչի Մովաբի համար,

իսկ իմ փորն իբրև պարիսպ նորոգեցիր։

¹² Եվ դա քեզ համար ամոթանք պիտի լինի,

որովհետև Մովաբը տանջվեց իր մեհյաններում

և ուխտավորի նման պիտի մտնի իր կռատները,

որոնք չպիտի կարողանան փրկել նրան։

¹³ Սա է այն խոսքը, որ Տերը մի ժամանակ ասաց Մովաբի մասին ¹⁴ և այժմ նորից խոսեց՝ ասելով. «Երեք տարվա ընթացքում, վարձկանի տարիների պես, պիտի անարգվի Մովաբի փառքը՝ իր ողջ անսահման մեծությամբ, և նա պիտի դառնա սակավամարդ ու աննշան»։

17

Աստված պատժելու է Դամասկոսն ու Իսրայելը

¹ Պատգամ Դամասկոսի մասին։

«Դամասկոսն ահավասիկ պիտի վերանա քաղաքների միջից,

պիտի կործանվի,

² հավիտյան լքված՝ պիտի դառնա հոտերի մակաղատեղի

և նախիրների հանգրվան,

և ոչ ոք չի լինելու, որ քշի նրանց։

³ Եփրեմի համար այն այլևս ամուր ապաստան չի լինելու,

այլևս թագավորություն չի մնալու Դամասկոսում,

և ոչ էլ ասորիներից մնացորդ է մնալու,

որովհետև դու ավելի լավ չես,

քան Իսրայելի որդիներն ու նրանց փառքը»,-

այսպես է ասում Զորությունների Տերը։

⁴ «Այն օրը Հակոբի փառքը պիտի նսեմանա,

նրա փառքի մեծությունը պիտի սասանվի։

⁵ Այնպես պիտի լինի, ինչպես եթե մեկը կանգուն ցորենը հավաքի իր գիրկը,

ապա նրա հետևից ընթանա հասկաքաղը,

կամ եթե մեկը Հաստատության հովտում հասկ քաղի,

⁶ ապա այնտեղ մնա խոզանը.

կամ էլ նմանվելու է այն ձիթենուն,

որի բարձր ճյուղերին մնացել է երկու-երեք պտուղ,

չորս-հինգ հատ էլ՝ նրա ոստերին»,-

այսպես է ասում Տերը՝ Իսրայելի Աստվածը։

⁷ Այն օրը մարդն իր հույսը դնելու է իր Արարչի վրա, և նրա աչքերը պիտի նայեն Իսրայելի Սրբին։ ⁸ Այլևս չպիտի ապավինեն մեհյաններին և ոչ էլ իրենց ձեռակերտ կուռքերին, որ իրենց մատները պատրաստեցին, այլ ապավինելու են Իսրայելի Սրբին. ո՛չ իրենց պաշտամունքային փայտե սյուներին են նայելու, ո՛չ էլ իրենց բագիններին։ ⁹ Այն օրը քո քաղաքները պիտի լքվեն ու ավերակ դառնան, ինչպես որ Իսրայելի որդիների երեսից անհետացան ամորհացիներն ու խևացիները։

¹⁰ Քանի որ դու թողեցիր քո փրկիչ Աստծուն

և չհիշեցիր Տիրոջը՝ քո օգնականին,

դրա համար էլ անհավատ տունկ

և անհավատ սերմ պիտի տնկես։

¹¹ Այն օրը, երբ տնկես, պիտի մոլորվես։

Եթե անգամ կանուխ սերմանես, պիտի ծաղկի ամռանը, այն օրը,

երբ կտակելու ես,

ինչպես հայրն է ժառանգություն թողնում իր որդիներին։

Աստված հանդիմանում է ազգերին

¹² Վա՜յ ձեզ, ազգերի բազմություննե՛ր, որ գոչում եք

այնպես, ինչպես ալեկուտակ ծովը.

որ աղմկում եք ծովի ալիքների նման։

¹³ Բյուրավոր ազգերը նման են հորդառատ ջրերի,

առատաբուխ ջրերի բուռն հոսանքների,

բայց Տերը նրանց պիտի խեղճացնի և հալածի հեռո՜ւ, հեռո՜ւ։

Հարդի մղեղի պես նրանք պիտի քշվեն քամուց,

անվի փոշու նման փոթորկից հողմացրիվ պիտի արվեն։

¹⁴ Երեկոյան դեմ սուգ պիտի անեն,

առավոտը չբացված՝ այլևս գոյություն չեն ունենալու։

Այս է ձեր ավարառուների և ձեր ունեցվածքը

կողոպտողների բաժինն ու ժառանգությունը։

18

Վա՜յ եթովպացի սուրհանդակներին

¹ Վա՜յ եթովպացիներին՝ գետի այն կողմում

առագաստանավերին ապավինած երկրին,

² որ ընծաներ էր ուղարկում ծովով

և մագաղաթյա հրովարտակներ՝ ջրերի կոհակների վրայով,

որպեսզի արագընթաց սուրհանդակները գնան գոռոզացած ազգի մոտ,

ազգ, որ օտար է ու չար,

և դրանից ավելին ոչ ոք չի կարող լինել,

ազգ, որ անհույս է ու ոտքի տակ տրված։

Եվ այժմ ամբողջ երկրի գետերն ³ աշխարհի պես բնակեցված են.

պիտի բնակեցվի նրանց երկիրը,

երբ նշանը լեռան վրայից վերանա,

և լսելի լինի փողի ձայնի նման,

⁴ քանզի այսպես ասաց ինձ Տերը.

«Ապահովություն պիտի լինի իմ քաղաքում,

ինչպես միջօրեի տոթագին լույսը

և ամառային օրերի զով ամպը»։

⁵ Նախքան հունձը, երբ ծաղիկը բողբոջելու լինի,

երբ խաղողի ծաղիկը բացվի ու ազոխ դառնա,

մանր-մունր ողկույզները պիտի կտրեն մանգաղով,

ճյուղերը պիտի հատեն ու դեն նետեն։

⁶ Ամեն ինչ պիտի թողնի երկնքի թռչուններին

և երկրի գազաններին.

նրանց վրա պիտի հավաքվեն երկնքի թռչունները,

երկրի բոլոր գազանները պիտի հասնեն նրանց վրա։

⁷ Այն ժամանակ Զորությունների Տիրոջն ընծաներ պիտի մատուցվեն տանջված ու խոնարհ ժողովրդի կողմից, այդ օրերից հետո և հավիտենական ժամանակներում՝ մեծ ժողովրդի կողմից, մի ազգից, որ ոտնատակ է տրվել, բայց հույսով է մնացել և ապրում է իր երկրում՝ գետի այն կողմում, այն տեղում, որտեղ կոչվեց Զորությունների Տիրոջ անունը Սիոն լեռան վրա։

19

Աստված պատժելու է Եգիպտոսը

Տեսիլք եգիպտացիների վրա։

¹ Ահավասիկ Տերը, բազմած թեթև ամպի վրա,

գալու է Եգիպտոս.

եգիպտացիների կուռքերը նրա ահից պիտի դողան,

նրանց սրտերը պիտի հուսալքվեն։

² Եգիպտացիները ելնելու են եգիպտացիների դեմ,

պատերազմելու են եղբայրը եղբոր,

ընկերը՝ ընկերոջ,

քաղաքը՝ քաղաքի,

նահանգը՝ նահանգի դեմ։

³ «Եգիպտացիների հոգիները պիտի խռովվեն,

նրանց խորհուրդը պիտի ցրեմ,

և նրանք հարցում պիտի անեն իրենց աստվածներին ու կուռքերին,

իրենց մեռելահարցուկներին ու վհուկներին։

⁴ Եգիպտացիներին պիտի մատնեմ խստասիրտ մարդկանց ու տերերի ձեռքը,

դաժան թագավորները պիտի տիրեն նրանց»,-

այսպես է ասում Զորությունների Տերը։

⁵ Եգիպտացիները ծովափնյա ջրակույտերից են խմելու,

որովհետև գետը նվազելու և ցամաքելու է։

⁶ Գետերն ու գետերի ջրադարձները քաշվելու են,

հավաքված բոլոր ջրերը ցամաքելու են,

և բոլոր մարգագետինները,

եղեգի ու կնյունի բոլոր խիտ թավուտներն ու լոռամարգերը,

⁷ գետի եզերքներին եղած ողջ կանաչը

և բոլոր հերկերը, որոնք գետի ջրով են ոռոգվում,

խորշակահար չորանալու են։

⁸ Ձկնորսները տրտմելու են,

գետի մեջ բոլոր կարթ գցողները հոգոց են հանելու,

ցանց և ուռկան գցողները սուգ են անելու։

⁹ Ամաչելու են նաև բարակ կտավ մանող կտավագործները,

և նրանք, որ բեհեզ են գործում։

¹⁰ Բոլոր արհեստավորները տրտմությամբ են համակվելու,

բոլոր տարազագործները տխրելու են,

և նրանց սրտերը ցավելու են։

¹¹ Տայանի իշխանները՝ թագավորի իմաստուն խորհրդականները,

հիմարանալու են,

նրանց խորհուրդներն անմիտ են դառնալու։

Էլ ինչպե՞ս կասեք արքային.

«Իմաստունների զավակներ ենք մենք,

նախկին թագավորների զավակներ»։

¹² Արդ, ո՞ւր են քո իմաստունները,

թող պատմեն քեզ և ասեն,

թե ի՞նչ խորհուրդ խորհեց Զորությունների Տերը Եգիպտոսի մասին։

¹³ Տայանի իշխանները հիմարացան,

մեմփացիների իշխանները մեծամտացան,

որոնք մոլորեցնելու են եգիպտացիներին՝

իրենց բոլոր ցեղերով։

¹⁴ Տերը մոլորության ոգի խառնեց նրանց,

և նրանք Եգիպտոսն ամեն բանի մեջ մոլորեցրին այնպես,

ինչպես մոլորվում է այն հարբածը,

որ փսխում է։

¹⁵ Եվ թող եգիպտացիներն այլևս գործ չունենան

ո՛չ հետո և ո՛չ էլ առաջ, ո՛չ սկզբում և ո՛չ էլ վերջում։

Եգիպտոսը պաշտելու է Տիրոջը

¹⁶ Այն օրը եգիպտացիները պիտի դառնան կանանց նման՝ դողալով և զարհուրելով Զորությունների Տիրոջ ձեռքից, որ երկարելու է նրանց վրա։ ¹⁷ Իսկ Հուդայի երկիրը պիտի ահի մատնի եգիպտացիներին, և ամենքն էլ, ովքեր այդ երկրի անունը տալու լինեն նրանց մոտ, պիտի սարսափեն այն խորհրդից, որ Զորությունների Տերը խորհեց նրա մասին։ ¹⁸ Այն ժամանակ եգիպտացիների երկրում պիտի լինի հինգ քաղաք, որտեղ մարդիկ խոսելու են քանանացիների լեզվով և երդվելու են Զորությունների Տիրոջ անունով։ Մի քաղաքը կոչվելու է Ասեդեկ քաղաք։ ¹⁹ Այն օրը Տիրոջ զոհասեղանը լինելու է եգիպտացիների երկրում, նրանց սահմաններում Տիրոջ պատվին կանգնեցվելու է հուշակոթող, ²⁰ որը եգիպտացիների երկրում Տիրոջ համար հավիտենական նշան է լինելու։ Իրենց նեղությունների պատճառով նրանք պիտի աղաղակեն Տիրոջը, և Տերը նրանց մոտ պիտի ուղարկի մի մարդու, որը պիտի փրկի նրանց. դատաստանով է փրկելու նրանց։ ²¹ Տերը հայտնի պիտի դառնա եգիպտացիներին, և այն օրը եգիպտացիները պիտի ճանաչեն Տիրոջը, զոհեր ու ընծաներ մատուցեն, ուխտ պիտի դնեն Տիրոջը և կատարեն այն։

²² Տերը մեծամեծ հարվածներ պիտի հասցնի եգիպտացիներին, բայց և անպայման պիտի բժշկի նրանց, ու նրանք պիտի դառնան դեպի Տերը, որը պիտի լսի ու բժշկի նրանց։ ²³ Այն օրը Եգիպտոսից դեպի Ասորեստան ճանապարհ պիտի լինի, ասորեստանցիները պիտի մտնեն Եգիպտոս, եգիպտացիներն էլ պիտի գնան ասորեստանցիների մոտ. եգիպտացիները պիտի ծառայեն ասորեստանցիներին։ ²⁴ Այն օրն Իսրայելը եգիպտացիների ու ասորեստանցիների շարքում երրորդը պիտի լինի՝ օրհնության արժանանալով այն երկրում, ²⁵ որն օրհնելու է Զորությունների Տերը՝ ասելով. «Օրհնյա՜լ լինի իմ ժողովուրդը, որը Եգիպտոսում է և Ասորեստանում, օրհնյա՜լ լինի իմ ժառանգությունը՝ Իսրայելը»։

20

Եսային շրջում է մերկ ու բոկոտն

¹ Այն տարի, երբ Տանաթանը, Ասորեստանի Առան արքայի կողմից ուղարկվելով, եկավ Ազովտոս, պատերազմ մղեց Ազովտոսի դեմ և գրավեց այն, ² ահա այդ ժամանակ Տերը խոսեց Ամոզի որդի Եսայու հետ և ասաց. «Գնա՛ ու քուրձդ հանի՛ր քո մեջքից և հողաթափերդ արձակի՛ր քո ոտքերից»։ Այդպես էլ արեց՝ քայլելով մերկ ու բոկոտն։ ³ Եվ Տերն ասաց. «Ինչպես որ իմ ծառա Եսային քայլեց մերկ ու բոկոտն, այդպես երեք տարի եգիպտացիների և եթովպացիների համար հրաշքներ ու նշաններ պիտի լինեն։ ⁴ Թող հասկանան, որ այդպես Ասորեստանի արքան գերի է տանելու եգիպտացիներին ու եթովպացիներին, երիտասարդներին ու ծերերին՝ մերկ ու բոկոտն՝ բացելով եգիպտացիների ամոթույքը։ ⁵ Պարտության մատնված եգիպտացիները պիտի ամաչեն եթովպացիների պատճառով, որոնց վրա հույս էին դրել, և որոնք նրանց համար փառք էին»։ ⁶ Այն օրը այդ կղզու բնակիչները պիտի ասեն. «Ահավասիկ մենք մեր հույսը դրել էինք սրանց վրա, ապավինել սրանց օգնությանը, բայց սրանք իրենց անձն անգամ չկարողացան փրկել Ասորեստանի արքայից. մենք ինչպե՞ս պիտի փրկվենք»։

21

Մարգարեություն Բաբելոնի անկման մասին

¹ Ծովափնյա անապատի տեսիլք։

Ինչպես անապատով անցնող մրրիկ,

նա եկավ անապատային երկրից։

² Ինձ մի ահավոր և խիստ տեսիլք հայտնվեց։

Անարգողն անարգում է,

անիրավը՝ անիրավություն գործում։

Ինձ վրա հարձակվեցին էլամացիները,

ինձ վրա եկան պարսից պատգամավորները։

Հեծեծում եմ ու ինքս ինձ քաջալերում։

³ Ահա թե ինչու մեջքս սարսուռով լցվեց,

ցավերը բռնեցին ինձ, ինչպես ծննդկան կնոջը։

Համառեցի, որպեսզի չլսեմ,

շտապեցի, որպեսզի չտեսնեմ։

⁴ Սիրտս մոլորվեց,

հանցանքի զգացումը պատեց ինձ,

մարմինս դող ընկավ։

Նայի՛ր, թե ի՛նչ դիտավորություն ունես.

⁵ սեղա՛ն պատրաստիր, կե՛ր, խմի՛ր։

Եկե՜ք, իշխաննե՛ր, պատրաստե՛ք ձեր վահանները,

⁶ քանզի այսպես ասաց ինձ Տերը.

«Ինքդ անձամբ գնա՛, հսկի՛չ եղիր,

ինչ որ տեսնես, կպատմես»։

⁷ Եվ ես տեսա երկու հեծյալ,

մի հեծյալը՝ էշի վրա, մյուս հեծյալը՝ ուղտի։

Մեծ ուշադրությամբ ականջ դրեցի։

«Ուրիային կանչի՛ր քո դիտանոցը»,-

ասաց Տերը։

⁸ Ամբողջ ցերեկը և ողջ գիշերը հետևեցի բանակին

⁹ ու տեսա, որ գալիս է նույն հեծյալը՝ երկձի կառքով,

ձայն տալով և ասելով.

«Ընկավ, կործանվեց Բաբելոնը,

նրա բոլոր արձաններն ու կուռքերը գետնին տապալվեցին»։

¹⁰ Լսե՛ք, կենդանի մնացածնե՛ր և տանջվածնե՛ր,

լսե՛ք այն, ինչ ես լսեցի Զորությունների Տիրոջից,

ինչ մեզ պատմեց Իսրայելի Աստվածը։

Պատգամ Եդովմի մասին

¹¹ Տեսիլք եդովմացիների վրա։

Մի ձայն ինձ կանչում է Սեիր լեռան վրայից.

«Պահպանե՛ք աշտարակները»։

¹² Ես կպահպանեմ առավոտ ու գիշեր։

Եթե դու ինձ հարցնես, հարցրո՛ւ և եկ ինձ մո՛տ բնակվիր»։

¹³ Պատգամ արաբացիների մասին։

Գիշերները կննջես անտառում՝

Դովդանիմի ճանապարհին։

¹⁴ Ընդառա՛ջ եկեք և ջո՛ւր բերեք ծարավածներին,

ո՛վ Թեմանի բնակիչներ,

հացո՛վ ընդառաջ ելեք փախստականներին,

¹⁵ որովհետև անթիվ են սպանվածները

և բազում՝ մոլորյալները,

անթիվ են սրերը

և բազում՝ լարված աղեղները,

որովհետև բազմաթիվ են պատերազմում ընկածները։

¹⁶ Այսպես ասաց ինձ Տերը. «Եվս մի տարի՝ նման վարձկանի տարվան, և կվերանա Կեդարի որդիների փառքը։ ¹⁷ Կեդարի աղեղնավոր ու զորավոր որդիներից մնացածները ևս սակավաթիվ կլինեն»,- քանզի Տերը՝ Իսրայելի Աստվա՛ծը, խոսեց։

22

Պաշարողները մոտենում են

¹ Պատգամ Սիոնի հովտի մասին։

Ի՞նչ եղար, ի՞նչ պատահեց քեզ,

այժմ դուք բոլորդ ինչո՞ւ իզուր տանիք բարձրացաք։

² Ձեր քաղաքը լցվեց գուժկաններով։

Ո՛վ պերճացյալ քաղաք,

քո վիրավորները սուսերով վիրավորվածներ չեն,

և քո դիակները պատերազմում ընկած դիակներ չեն։

³ Բոլոր իշխաններդ փախստական են դարձել, գերյալներդ խստորեն կալանավորված են,

քո հզորները, որոնք հեռու էին փախել,

անխտիր կապանքների մեջ են։

⁴ Դրա համար էլ ասացի.

«Թո՛ւյլ տվեք ինձ՝ դառնորեն լաց լինեմ,

մի՛ աշխատեք ինձ մխիթարել

իմ ժողովրդի դստեր կործանման առիթով»։

⁵ Արդարև, Զորությունների Տիրոջ կողմից խռովության,

ոտնատակ տալու և շփոթության օր է Սիոնի հովտում.

մեծ ու փոքր, առհասարակ մոլորված,

թափառում են լեռների վրա։

⁶ Իսկ էլամացիները, կապարճներ առած,

ձի հեծած և հարձակվող գնդերով պիտի գան,

⁷ և քո ընտիր-ընտիր հովիտները պիտի լցվեն կառքերով,

հեծյալները երիվարներով պիտի խցանեն քո դարպասները։

⁸ Նրանք պիտի կործանեն Հուդայի դարպասները

և այն ժամանակ պիտի տեսնեն քաղաքի ընտիր-ընտիր ապարանքները,

⁹ ի հայտ պիտի բերեն Դավթի բարձր ապարանքի գաղտնի անցքերը։

Եվ պիտի տեսնեն, որ դրանք շատ են։

Հին ջրմուղը պիտի շուռ տան դեպի քաղաք,

¹⁰ պիտի քանդեն Երուսաղեմի ապարանքները՝

քաղաքի պարիսպներն ամրացնելու նպատակով։

¹¹ Իսկ դուք երկու պարիսպների մեջտեղը՝

հին ջրմուղից ավելի ներս,

ջուր պիտի հանեք ձեզ համար՝

առանց ձեր հայացքն ուղղելու նրան,

որ սկզբից շինել էր այն՝

առանց նրա հիմնադրողին հեռվից հեռու ճանաչելու։

¹² Այն օրը Զորությունների Տերը կանչեց լաց ու կոծ անելու,

ողբալու, մազերը պոկոտելու և քուրձ հագնելու։

¹³ Իսկ նրանք ուրախություն ու ցնծություն արեցին.

արջառներ էին սպանում,

ոչխարներ էին մորթում,

որպեսզի միս ուտեն, գինի խմեն և ասեն.

«Ուտենք ու խմենք,

որովհետև վաղը մեռնելու ենք»։

¹⁴ Բայց դա հասել է Զորությունների Տիրոջ ականջին։

«Եվ ձեր այդ մեղքերին մինչև ձեր մահը թողություն չի տրվելու»,-

ասում է Զորությունների Տերը։

Մարգարեություն Սոմնասի մասին

¹⁵ Այսպես է ասում Տերը, Զորությունների Տերը. «Դու գնա՛, մտի՛ր դիվան՝ Սոմնաս գանձապետի մոտ, և ասա՛ նրան.

¹⁶ “Ինչո՞ւ ես եկել այստեղ,

ի՞նչն է քեզ բերել այստեղ.

դու քեզ համար գերեզման ես փորել այստեղ,

ժայռի մեջ քեզ համար օթևան ես շինել”»։

¹⁷ Ահավասիկ Զորությունների Տերը դուրս պիտի հանի

ու սպանի քեզ, ո՛վ մարդ,

պիտի մերկացնի քեզ քո պատմուճանից ¹⁸ և փառապսակից։

Քեզ պիտի նետի մեծ ու անսահման երկիրը,

և այնտեղ դու պիտի մեռնես.

քո շքեղ կառքերը անարգանքի առարկա պիտի դարձնի,

քո իշխանական տունը ոտնատակ պիտի տա։

¹⁹ Քո դիրքից ու աստիճանից պիտի զրկվես։

²⁰ Այն օրը պիտի կանչեմ իմ ծառա Եղիակիմին՝ Քեղկիայի որդուն,

²¹ նրան պիտի հագցնեմ քո պատմուճանը,

նրան պիտի տամ քո պսակն իր ճոխությամբ,

քո հազարապետությունը նրա ձեռքը պիտի տամ,

և նա հայր թող դառնա Երուսաղեմի ու Հուդայի բնակիչների համար։

²² Դավթի բանալիները պիտի տամ նրան.

նա պիտի իշխի,

և ոչ ոք չի կարողանալու նրան հակառակ կանգնել։

²³ Նրան իշխան պիտի կարգեմ հաստատուն մի տեղ,

և թող նա բազմի իր հոր տան փառքի աթոռին։

²⁴ Նրան պիտի ապավինեն իր հոր տան բոլոր պատվավոր մարդիկ՝ փոքրերից մինչև մեծամեծները։ Բոլոր անոթները՝ մանր թե մեծ, մինչև կարասները, նա պիտի բացի, և ոչ ոք չի կարողանալու փակել, պիտի փակի, և ոչ ոք չի կարողանալու բացել։ Այն ժամանակ ամեն ինչ կախված է լինելու նրանից։ ²⁵ Այսպես է ասում Զորությունների Տերը. «Աներեր մարդը պիտի շարժվի իր հաստատուն տեղից, պիտի ընկնի ու կործանվի, և նրա փառքը պիտի վերանա նրանից»,- քանզի Տե՛րը խոսեց։

23

Տյուրոսի կործանումը

¹ Մարգարեություն Տյուրոսի մասին։

Ողբացե՛ք, Կարքեդոնի՛ նավեր,

քանզի կարքեդոնացիները կործանվեցին

և այլևս չեն վերադառնա կիտացիների երկրից[59],

ուր գերության քշվեցին։

² Ո՞ւմ են նման այդ կղզու բնակիչները.

նման են փյունիկեցի վաճառականներին,

որոնք անցնում են ծովով ու ³ մեծ ջրերով.

վաճառականների սերունդ են.

ինչպես ամռանը հունձն է հավաքվում,

ազգերի համար այդպես են այդ վաճառականները։

⁴ «Ամաչի՛ր, Սիդո՛ն»,- ասում է ծովը։

Ծովի զորությունն էլ ասում է.

«Մի՞թե ես երկունքի ցավով չեմ բռնվել, չե՞մ ծնել,

երիտասարդներ չե՞մ սնել,

կույսեր չե՞մ մեծացրել»։

⁵ Երբ լուրը Եգիպտոսի երկիրը հասնի,

վիշտը պիտի պատի նրան Տյուրոսի համար։

⁶ Գնացե՛ք Կարքեդոն,

դուք, որ այդ կղզու բնակիչներն եք, ողբացե՛ք։

⁷ Արդյոք սկզբից իսկ ձեր այդ ամբարտավանությունը չէ՞ր,

որ նրա մատնության պատճառ դարձավ.

նա իր ոտքերով հեռավոր պանդխտության պիտի քշվի։

⁸ Իսկ այդ բանն ո՞վ մտածեց Տյուրոսի մասին.

մի՞թե նա հետին մեկն էր կամ տկար մեկը։

Նա, նրա վաճառականները քանանացիների պատվավոր մարդիկ էին,

նրա առևտրականները երկրի իշխաններն էին։

⁹ Զորությունների Տերը մտածեց վերջ տալ

ականավոր մարդկանց ողջ ամբարտավանությանը

և երկրի երեսին անարգանքի ենթարկել բոլոր պատվավորներին։

¹⁰ Քո հո՛ղը մշակիր,

որովհետև այսուհետև նավերը չեն գալու Կարքեդոնից,

¹¹ քո ձեռքի զորությունը այլևս չի երևալու ծովի վրա,

դու, որ սարսեցնում էիր թագավորներին։

Զորությունների Տերը Քանանի մասին հրամայեց

կործանել նրա հզորությունը։

¹² Պիտի ասեն. «Էլ չշարունակենք թշնամանքը

և չզրկենք Սիոնի կույս դստերը»։

Ոտքի՛ կանգնիր և ծովո՛վ անցիր։

Սակայն թեկուզև դիմես դեպի Կիտիս,

այնտեղ էլ քեզ համար հանգիստ չի լինելու։

¹³ Եթե քաղդեացիների երկիրը գնաս,

որը, սակայն, նույնպես ավերված է ասորեստանցիներից,

այնտեղ ևս քեզ համար շունչ քաշել ու դադար չի լինելու։

Սիհիմը նրա հիմքը գցեց,

կանգնեցրեց նրա աշտարակները,

բարձրացրեց նրա աշտարակները,

բայց ահա նրա պարիսպը տապալվեց ու կործանվեց։

¹⁴ Ողբացե՛ք, Կարքեդոնի՛ նավեր,

քանզի կործանվեց ձեր ամրությունը։

¹⁵ Եվ պիտի գա մի օր, երբ Տյուրոսը յոթանասուն տարի լքված պիտի լինի, այնքան, որքան մի թագավորի իշխանության ժամանակն է լինում, որքան մի մարդու կյանքի ժամանակը։ Յոթանասուն տարի հետո Տյուրոսը պիտի դառնա այնպիսին, ինչպես պոռնիկի երգն է ասում.

¹⁶ «Քնա՛ր վերցրու, շրջի՛ր ու կոծի՛ր,

պոռնկության լքվա՛ծ քաղաք,

լա՛վ նվագիր, նորից ու նորի՛ց երգիր,

որ քո հիշատակը մնա»։

¹⁷ Յոթանասուն տարի հետո Տերը պիտի այցելի Տյուրոսին, որը նորից նույն կարգով պիտի վերահաստատվի, ինչպես առաջ էր, և այնտեղ պիտի կատարվի աշխարհի երեսին գոյություն ունեցող երկրագնդի բոլոր թագավորների առևտուրը։ ¹⁸ Նրա վաճառքի շահը Տիրոջը պիտի նվիրաբերվի. ոչ թե իրենց անձերի համար պիտի հավաքեն, այլ նրա վաճառքի շահը պիտի պատկանի Տիրոջ առջև բնակվողներին, որպեսզի ուտեն, խմեն և ի նշան Տիրոջ հանդեպ իրենց ծառայության՝ ուրախ լինեն։

24

Ամբարտավան ժողովուրդը պիտի խոնարհվի

¹ Տերը կործանելու է աշխարհը,

ավերելու և ամայացնելու է այն

ու ցանուցիր է անելու նրա բնակիչներին։

² Նույն բախտին պիտի արժանանան ժողովուրդը և քահանան,

ծառան և տերը,

աղախինը և տիրուհին,

գնողն ու վաճառողը,

փոխատուն և փոխառուն,

պարտապանը և պարտատերը։

³ Ամբողջովին պիտի ավերվի երկիրն ու

պիտի կողոպտվի,

քանի որ Տերն իր բերանով ասաց.

⁴ «Սո՛ւգ արա, որովհետև երկիրը կործանվեց,

երկրագունդն ավերվեց ու ամայացավ,

երկրի բարձունքները սուգ առան»։

⁵ Երկիրն իր բնակիչներով մեղանչեց,

քանզի զանց առան Տիրոջ օրենքները,

խեղաթյուրեցին նրա պատվիրանները

և դրժեցին հավիտենական ուխտը։

⁶ Այդ պատճառով նզովքը պիտի ուտի երկիրը,

որովհետև նրա բնակիչները մեղք գործեցին։

Դրա համար էլ նրա բնակիչները տնանկ պիտի դառնան,

և սակավաթիվ մարդիկ են կենդանի մնալու։

Անմխիթար քաղաքը

⁷ Պիտի սգա գինին,

պիտի սգա այգին,

խրախճանքով տարվածները բոլորը հոգոց պիտի հանեն։

⁸ Թմբուկների ցնծությունը դադարեց,

ամբարիշտների հպարտությունն ու մեծությունը տեղի տվեցին,

քնարների ձայները լռեցին։

⁹ Գինին խմելով՝ չեն երգում այլևս,

ցքին դառնության փոխվեց նրանց համար։

¹⁰ Բոլոր քաղաքներն ավերակ դարձան,

ապարանքների դռները փակ մնացին,

որովհետև ներս մտնող չկար։

¹¹ Ամեն, ամեն տեղ գինու վրա ողբացե՛ք.

ամեն ուրախություն լռեց,

վերացավ ողջ երկրի ցնծությունը։

¹² Ավերակ քաղաքները պիտի լքվեն,

կանգուն մնացած ապարանքները պիտի կործանվեն։

¹³ Այս ամենը պիտի կատարվի երկրի վրա, հեթանոսների մեջ։

Ինչպես ճռաքաղ են անում ձիթենին,

այդպես ճռաքաղ պիտի անեն և նրանց։

Եվ երբ այգեկութը դադարի,

¹⁴ նրանք բարձրաձայն պիտի աղաղակեն։

Տիրոջ փառքի երգը

Իսկ երկրի վրա կենդանի մնացածները

միահամուռ պիտի ուրախանան Տիրոջ փառքով,

և ծովի ջրերը պիտի հուզվեն։

¹⁵ Դրա համար էլ Տիրոջ փառքը պիտի պարուրի ծովի կղզիները,

և Տիրոջ անունը պիտի փառավորվի։

Ո՛վ Տեր, Աստվա՛ծ Իսրայելի,

¹⁶ երկրի ծայրերից հրաշալի բաներ լսեցինք.

«Հո՛ւյս բարեպաշտին».

և թող ասեն.

«Ինձ համար է իմ խորհուրդը,

իմ խորհուրդն ինձ և յուրայիններիս համար է»։

Վա՜յ նրանց, որոնք արհամարհում են,

արհամարհելով արհամարհում են օրենքները։

¹⁷ Ահը, գուբը և որոգայթը ձեզ վրա,

ո՛վ երկրի բնակիչներ։

¹⁸ Ով ահից փախչի, թող ընկնի գուբը,

և ով ելնի գբից, թող բռնվի որոգայթի մեջ։

Ահա բացվեցին երկնքի պատուհանները,

և երկրի հիմքերը ցնցվեցին։

¹⁹ Երկիրը շփոթի ու խռովության մեջ պիտի ընկնի,

երկիրը պիտի տագնապի,

տարակուսի և խոնարհվի։

²⁰ Երկիրը պիտի շարժվի ու ցնցվի

այգու պահապանի տնակի պես,

հարբածի ու երերվողի պես պիտի գլորվի

և չպիտի կարողանա ոտքի կանգնել,

որովհետև նրա վրա ծանրացել է անօրենությունը։

Կայսրությունների վախճանը և Աստծու թագավորության սկիզբը

²¹ Այն օրը Աստված իր ձեռքը պիտի տարածի երկնային լուսատուների վրա, իսկ երկրում՝ երկրի թագավորների վրա։ ²² Եվ պիտի հավաքեն նրա ժողովրդին ու դնեն կապանքների մեջ, պիտի արգելափակեն ամրոցների մեջ և շատ սերունդներ անց պիտի հիշեն նրանց։

²³ Ու պիտի հալվի աղյուսը,

կործանվի պարիսպը,

որովհետև Սիոնի լեռան վրա և Երուսաղեմում

Տերն է թագավորելու և փառավորվելու ծերերի առաջ։

25

Փառաբանության երգ

¹ Տե՛ր, Աստվա՛ծ իմ,

ես պիտի փառաբանեմ քեզ,

պիտի օրհնեմ քո անունը,

քանզի սքանչելի բաներ կատարեցիր՝

առաջին խորհուրդը ճշմարիտ։

Այո՛, Տե՛ր, ² քաղաքները վերածեցիր հողաբլուրների,

բերդաքաղաքներն իրենց հիմքերից կործանեցիր.

թող ամբարիշտների քաղաքը հավիտենապես չվերաշինվի։

³ Դրա համար էլ աղքատ ժողովուրդը պիտի օրհնի քեզ,

զրկված մարդկանց քաղաքները պիտի օրհնեն քեզ,

⁴ որովհետև բոլոր խոնարհ քաղաքներին օգնական դարձար,

իսկ թշվառությունից տանջվածին՝ ապավինության հարկ՝

չար մարդկանցից փրկելով նրանց։

⁵ Դու ծարավածների համար ապավեն ես

և զրկված մարդկանց համար՝ ոգի։

Նմանվեցինք տկարացած մարդկանց՝ ծարաված Սիոնում,

ամբարիշտ մարդկանց պատճառով, որոնց ձեռքը մատնեցիր մեզ։

Տերը սրբում է արցունքները

⁶ Զորությունների Տերն այնպես պիտի անի,

որ բոլոր հեթանոսներն այս լեռան վրա ուրախություն վայելեն,

գինի խմեն,

օծվեն մրուրից մաքրված յուղով

⁷ և ընկղմվեն այս լեռան մեջ։

Պատմի՛ր սա բոլոր հեթանոսներին,

քանզի բոլոր ազգերի համար Տերն այս խորհուրդն ունի։

⁸ Մահը զորացավ և կուլ տվեց,

բայց Աստված բոլորի երեսից արցունքն իսպառ կտրեց,

ժողովրդի նախատինքը վերացրեց ամբողջ աշխարհից,

քանի որ սա Տիրոջ բերանը խոսեց.

ինչպես ամպի հովանին հաղթահարում է տապը,

այնպես էլ նա պիտի թուլացնի հզորների բազուկները։

⁹ Ու այն օրը պիտի ասեն.

«Ահա մեր Աստվածը, որի վրա հույս էինք դրել մենք,

նա պիտի փրկի մեզ, քանզի նա է Տերը, որին սպասում էինք.

ցնծանք և ուրախանանք մեր փրկությամբ»։

Աստված պատժում է Մովաբին

¹⁰ Աստված մեզ հանգիստ է պարգևելու այս լեռան վրա,

իսկ մովաբացին ոտքի կոխան պիտի լինի,

ինչպես որ կալն է ճզմվում կամնասայլի տակ։

¹¹ Տերն իր ձեռքերը պիտի երկարի այնտեղ

և այդպես նրան պիտի թշվառացնի ու կործանի,

հողին պիտի հավասարեցնի նրա հպարտությունը՝

նրա վրա տարածելով իր ձեռքերը։

¹² Քո ապաստանի պարիսպների բարձրությունը պիտի խոնարհեցնի՝

գետնին հավասարեցնելով այն։

26

Տիրոջն ապավինած քաղաքի երգը

¹ Այն օրը Հուդայի երկրում այս երգն են երգելու.

«Ահա մեր զորավոր քաղաքը և մեր փրկությունը,

որ կանգնելու է ինչպես պարիսպ ու պատվար։

² Բացե՛ք ձեր դռները.

թող մտնի ժողովուրդը,

որ պահպանում է արդարությունը,

պահպանում ճշմարտությունը,

³ որ հոգում է ճշմարտության մասին

և ապահովում խաղաղությունը,

խաղաղություն, որովհետև ⁴ քեզ հույսով ապավինեցինք հավիտենապես, ո՛վ Տեր։

⁵ Դու, որ խոնարհեցրիր և ներքև իջեցրիր բարձունքների բնակիչներին,

հզոր քաղաքներն ես կործանում

և գետնին հավասարեցնում դրանք։

⁶ Հեզ ու խոնարհ մարդիկ կկոխոտեն,

և աղքատները ոտքի տակ կտան դրանք»։

⁷ Բարեպաշտների ճանապարհներն ուղիղ են,

հարթ ու դյուրին են աստվածապաշտների ճանապարհները,

⁸ որովհետև Տիրոջ ճանապարհներն արդար են։

Քո անվանն ենք ապավինել մենք և քո հիշատակին,

⁹ որին տենչում է մեր հոգին։

Գիշերով իմ հոգին դեպի քեզ է շտապում, Աստվա՛ծ,

քանի որ քո հրամանները լույս են երկրի վրա։

Արդարությո՛ւն սովորեք, ո՛վ երկրի բնակիչներ,

¹⁰ որովհետև ամբարիշտը պապանձվեց։

Ով երկրի վրա արդարություն չի ուսանում,

նա ճշմարիտ բան չի կատարի։

Թող կորչի ամբարիշտը,

որպեսզի չտեսնի փառքը Տիրոջ։

¹¹ Տե՛ր, բարձր է քո բազուկը,

բայց նրանք դա չճանաչեցին.

պիտի ճանաչեն ու ամաչեն,

նախանձախնդրությունդ պիտի կլանի չխրատվող ժողովրդին,

և այժմ էլ թող կրակը լափի հակառակորդներին։

¹² Տե՛ր, Աստվա՛ծ մեր, տո՛ւր մեզ խաղաղություն,

դու, որ ամեն ինչով վարձատրել ես մեզ։

¹³ Տե՛ր, Աստվա՛ծ մեր, թող քոնը լինենք մենք.

քեզնից բացի ուրիշ ոչ ոքի չգիտենք, ո՛վ Տեր,

և քո անունն ենք տալիս։

¹⁴ Իսկ մեռածները կյանքը չեն տեսնելու.

բժիշկները հարություն չեն կարող տալ։

Դրա համար էլ ոչնչացրիր ու կորստյան մատնեցիր նրանց բոլոր արուներին.

¹⁵ Նրանց գլխին չարիք կուտակեցիր, ո՛վ Տեր,

չարիք ավելացրիր երկրի փառավորվածների վրա,

տարածեցիր աշխարհի բոլոր կողմերում։

¹⁶ Տե՛ր, նեղության մեջ հիշեցինք քեզ,

որովհետև քո տված փոքր նեղությունը խրատ է մեզ համար։

¹⁷ Ինչպես որ երկունքի մեջ գտնվողը, որ մոտ է ծննդաբերելու,

ճչում է իր ցավերից,

այդպես եղանք նաև մենք քո երկյուղից, Տե՛ր,

քեզ սիրելի եղողի համար.

¹⁸ հղիացանք, երկունքով բռնվեցինք,

ծնեցինք ու երկրի վրա ստեղծեցինք փրկության քո հոգին։

Մենք այլևս չենք կործանվի,

կկործանվեն աշխարհի բնակիչները։

¹⁹ Պիտի հառնեն ու կանգնեն մեռածները,

որոնք գերեզմաններում են,

և ուրախանալու են երկրի վրա,

որովհետև այն ցողը, որ քեզնից է,

բժշկություն է նրանց համար,

իսկ ամբարիշտների երկիրը պիտի կործանվի։

²⁰ Գնա՛, ո՛վ իմ ժողովուրդ, մտի՛ր քո շտեմարանները, փակի՛ր քո դռները, թաքնվի՛ր միառժամանակ, մինչև որ անցնի Տիրոջ բարկությունը, ²¹ քանզի Տերն ահավասիկ իր սրբարանից բարկություն է բերում երկրի բնակիչների վրա, իսկ երկիրը պիտի ցույց տա իր արյունը և չպիտի թաքցնի սպանվածներին։

27

Տիրոջ այգին

¹ Այն օրը Տերը սուրբ, մեծ ու հզոր սուրը պիտի քաշի փախչող վիշապ օձի վրա, գալարվող վիշապ օձի վրա՝ ծովի մեջ սպանելով վիշապին։

² Այն ժամանակ մի սքանչելի այգի է լինելու, որին տիրանալը ցանկալի պիտի լինի։

³ «Ես մի անառիկ քաղաք եմ,

քաղաք, որին պաշարելը զուր է։

Ես պիտի հարբեցնեմ նրան, որ գիշերը գրավվի,

իսկ ցերեկը խորտակվի նրա պարիսպը։

⁴ Չեղավ մեկը, որ ձեռք չտար նրան։

Ո՞վ ինձ կդնի ագարակի մեջ՝ պահպանելու արտի ցողունը։

Նրա այս թշնամանքի համար այսուհետև պիտի անարգեմ նրան։

Ահա թե ինչու Տերը կատարեց այն ամենը,

ինչ որ կարգադրեց։

“Այրվեցինք”,- ⁵ ասում են ու բողոքում նրա բնակիչները.-

եկե՛ք նրա հետ խաղաղություն անենք»։

⁶ Հակոբի հավաքված որդիները նոր տունկի նման պիտի ընձյուղներ տան.

Պիտի ծաղկի Իսրայելը,

և աշխարհը պիտի լցվի նրա պտղով։

⁷ Մի՞թե սա այնպես չպիտի վիրավորվի,

ինչպես որ հարվածեց նրան,

կամ այնպես չպիտի սպանվի,

ինչպես որ սպանեց նրան։

⁸ Նա պատերազմով ու նախատինքով է արձակելու նրանց.

«Դու չէի՞ր արդյոք, որ խստասրտորեն

և բարկացած հոգով մտածում էիր սպանել նրանց»։

⁹ Ուստի Հակոբի անօրենությունը պետք է վերանա,

և այս է լինելու նրա օրհնությունը,

երբ ազատեմ նրան իր մեղքերից։

Այն ժամանակ քո մեհյանների բոլոր քարերը մանր փոշու պես պիտի փշրես.

այլևս չեն պահպանվելու նրանց պաշտամունքի կուռքերը,

այլ կտոր-կտոր պիտի արվեն,

ինչպես մայրի ծառը՝ փայտահատի ձեռքով։

¹⁰ Եթե մի շեն վայր մնա,

ապա պիտի վերածվի այնպիսի տեղի,

որտեղ հոտն է մակաղելու, կամ որտեղ լքված ոչխարներ են լինելու,

երկար ժամանակ անասունների արոտավայր է դառնալու այն,

որտեղ էլ նրանք հանգրվանելու են։

¹¹ Երկար ժամանակ անց այնտեղ դալար բույս չի գտնվելու,

որովհետև այդ տեղը չորացած պիտի լինի։

Ո՛վ կանայք, որ ահա գալիս եք հանդեսից,

առա՛ջ եկեք,

դուք այն ժողովուրդը չեք, որի մեջ իմաստություն կա։

Ահա թե ինչու ձեզ չի գթալու Աստված,

նա, որ ստեղծել է ձեզ։

Ձեր Արարիչը ձեզ չի ողորմելու։

Իսրայելացիները պիտի հավաքվեն

¹² Այն օրը Տերն արգելք պիտի դնի

գետի փոսից մինչև Ռինոկորուրի կողմերը,

բայց դուք մեկ առ մեկ հավաքե՛ք իսրայելացիներին։

¹³ Այն օրը պիտի հնչեցնեն մեծ փողը,

և նրանք, ովքեր ցրված են Ասորեստանի երկրում

և կորած՝ Եգիպտոսի երկրում,

պիտի վերադառնան

ու Երուսաղեմի սուրբ լեռան վրա երկրպագեն Տիրոջը։

28

Ուրվական Սամարիայի վրա

¹ Վա՜յ Եփրեմի վարձկաններիդ հպարտության պսակին,

փառքից թառամած մի ծաղիկ՝ փարթամ լեռան գագաթին.

դուք հարբած եք, բայց ոչ գինուց։

² Ահավասիկ Տիրոջ ահավոր ու խիստ բարկությունը,

որ թափվում է կարկուտի պես,

և ապաստանելու ոչ մի տեղ չկա.

նա նման է բուռն հեղեղներին ու հորդառատ ջրերին,

որ ողողում են երկիրը,

և երկրին հանգստություն է բերելու ձեռքերով։

³ Եփրեմի վարձկաններիդ հպարտության պսակը ոտքի կոխան պիտի լինի,

⁴ և բարձր լեռան գագաթին հույսի ծաղիկը փառքից պիտի թառամի

վաղահաս թզի պես, որ երբ որևէ մեկը նկատում է,

դեռ ձեռքը չառած՝ ուզում է կուլ տալ։

⁵ Այն օրը Զորությունների Տերը հույսի պսակ պիտի դառնա՝ պատրաստված ի փառս ժողովրդի մնացորդի, ⁶ որպեսզի նրանք լինեն հոգով արդար՝ դատաստանի համար ու զորեղ՝ հետ մղելու հարձակումը։

⁷ Արդարև, նրանք մոլորված են գինիով,

նրանք իրենց կորցրին ցքիի համար.

քահանան ու մարգարեն ցքիի պատճառով հիմարացան,

գինու պատճառով ապականվեցին.

օղով հարբած՝ նրանք բարբաջեցին ու մոլորվեցին,

որովհետև դա ինքնին ցնորք է։

⁸ Թող այդ մոլությունն անեծքի բաժին դառնա,

որովհետև այդ մոլությունը ագահությունից է։

⁹ Ո՞ւմ պատմենք չարիքների մասին,

ո՞ւմ գուժենք այդ,

կաթից բաժանվածների՞ն,

կրծքից կտրվածների՞ն։

¹⁰ Ընդունի՛ր նեղություններ նեղությունների վրա.

ընդունի՛ր կասկածներ կասկածների վրա։

Մի քիչ էլ, մի քի՛չ էլ ընդունիր շրթունքներիդ անզգամության համար.

¹¹ այդ ժողովրդի հետ խորթ լեզվով պիտի խոսեն

¹² և ասեն դրանց, թե քաղցածի հանգիստը դա է,

և դա է աղետը.

բայց նրանք չկամեցան լսել։

¹³ Հետևապես նրանց է ուղղված Տիրոջ խոսքը. «Ընդունի՛ր նեղություններ նեղությունների վրա. ընդունի՛ր կասկածներ կասկածների վրա։ Մի քիչ էլ, մի քի՛չ էլ ընդունիր, մինչև որ գնան, թիկունքի վրա տապալվեն, խորտակվեն, տանջվեն ու մեռնեն»։

Ընտիր անկյունաքար Սիոնի համար

¹⁴ Ուրեմն լսե՛ք Տիրոջ խոսքը,

ո՛վ նեղված մարդիկ և այդ ժողովրդի իշխաննե՛ր Երուսաղեմում։

¹⁵ Դուք ասացիք.

«Ուխտ կնքեցինք դժոխքի հետ

և դաշինք կռեցինք մահվան հետ.

եթե փոթորկվող մրրիկ էլ բարձրանա,

մեզ վրա չի գա,

քանզի սուտը մեզ համար հույս դարձրինք,

ուրեմն ստությամբ էլ կպաշտպանվենք»։

¹⁶ Դրա համար էլ այսպես է ասում Տերը՝ Աստված.

«Ահա ես Սիոնի հիմքում մեծագին քար եմ դնում,

պատվական ու ազնիվ անկյունաքար՝ նրա հիմքում,

և ով հավատա նրան, չի ամաչելու։

¹⁷ Հույսով պիտի հաստատեմ իմ իրավունքը

և կշեռքով՝ իմ ողորմությունը,

և նրանք, որ իրենց հույսն իզուր դրել են ստության վրա՝

ասելով՝ “Մեզ չի հասնի մրրիկը,

¹⁸ չի վերացնի մահվան հետ կնքած մեր ուխտը”»։

Ձեր հույսը, որ դժոխքի վրա է, չի հաստատվելու,

որովհետև եթե փոթորկվող մրրիկը սպառնա,

ոտքի տակ պիտի գնաք։

¹⁹ Որովհետև երբ անցնի, պիտի վերցնի ձեզ,

առավոտից առավոտ պիտի անցնի օրը ցերեկով,

իսկ գիշերը չար տարակուսանք պիտի լինի։

Ո՛վ դուք, նեղյալնե՛ր, սովորե՛ք լսել։

²⁰ Մարտնչել ևս չենք կարող,

որովհետև երբ հավաքվեցինք,

²¹ տկարացանք, ինչպես ամբարիշտների լեռը։

Տերը, բարկությամբ լի, հառնելու է Գաբավոնացիների հովտում

և կատարելու է իր գործը, դառը գործը,

քանզի նրա բարկությունն օտարի պես է դատելու,

և օտարի պես է վրա հասնելու նրա դառնությունը։

²² Իսկ դուք մի՛ ցնծացեք, որ չամրանան ձեր կապանքները, քանի որ Տիրոջից՝ Զորությունների Տիրոջից, լսեցի այնպիսի հաստատուն ու կտրուկ բաներ, որ նա կատարելու է ողջ երկրի վրա։

Աստծու իմաստությունը

²³ Ունկնդի՛ր եղեք և անսացե՛ք իմ ձայնին,

ո՛ւշ դրեք և լսե՛ք իմ խոսքերը։

²⁴ Մի՞թե հերկվորն ամբողջ օրը կհերկի

կամ մի՞թե սերմը նախապես կցանի,

քանի դեռ հողը չի հերկել։

²⁵ Մի՞թե նախ նրա երեսը չի հարթեցնի,

հետո մի փոքր արջնդեղ և չաման չի՞ ցանի,

ապա սահմանված տեղում ցորեն ու գարի,

կորեկ ու հաճար չի՞ սերմանի։

²⁶ Իսկ դու պիտի սովորես դա քո Աստծու արդարությամբ,

որով և ուրախ ես լինելու։

²⁷ Արջնդեղը կալսելով չի մաքրվի,

և կամնասայլի անիվը չամանի վրա չեն պտտեցնի.

արջնդեղը թակիչով է ծեծվում-անջատվում,

իսկ չամանը հացով է ուտվում։

²⁸ Բայց ես ձեզ վրա հավիտյան չպիտի բարկանամ,

և ոչ էլ իմ դառնության ձայնն է ձեզ ճնշելու։

²⁹ Այս իմաստուն գործերը եղան Զորությունների Տիրոջից։

Արդ, մտածե՛ք, վերացրե՛ք ձեզնից ձեր ունայն մխիթարությունը։

29

Երուսաղեմի ճակատագիրը

¹ Վա՜յ քեզ, Արիե՛լ քաղաք,

Արիել, որը Դավիթը պաշարեց,

քանզի տոներդ խախտվեցին։

Արմտի՛ք հավաքեք և տարեցտարի կերե՛ք,

կերե՛ք Մովաբի հետ միասին։

² Ես նեղը պիտի գցեմ Արիելին,

որ նրա զորությունն ու մեծությունն իմը լինեն։

³ Ես Դավթի պես պիտի պաշարեմ քեզ,

պատնեշեմ քեզ շուրջանակի և քո շուրջբոլորը

աշտարակներ պիտի կանգնեցնեմ։

⁴ Եվ քո խոսքերը դեպի հողը պիտի խոնարհվեն,

քո պատգամները գետնի մեջ մտնեն,

քո ձայնը պիտի հնչի գետնի տակից խոսողի նման,

և հողի ընդերքում քո ձայնը պիտի մարի։

⁵ Ամբարիշտների հարստությունը պիտի դառնա անվի փոշու նման,

քեզ զրկողների բազմությունը՝ մաղված մղեղի պես։

⁶ Եվ մի ակնթարթում այցելության պիտի գա Զորությունների Տերը՝ թնդյունով,

որոտումով ու բարձրաձայն կանչով,

փոթորկված մրրիկով և լափող կրակի բոցով։

⁷ Ինչպես գիշերվա երազի մեջ հայտնված տեսիլք,

պիտի անհետանա Երուսաղեմի վրա հարձակվածների

ու նրա դեմ հավաքվածների զորությունը, որ նեղում են նրան։

⁸ Բայց ինչպես որ երազի մեջ քաղց են զգում և ուտում

ու արթնանալով տեսնում, որ դա սին երազ էր,

կամ ինչպես մեկը, որ երազում ծարավում է և խմում

ու արթնանալով նորից ծարավ է մնում,

և իզուր է անցնում հոգու այդ ցանկությունը.

այդպես պիտի լինի նաև բոլոր հեթանոսների զորությունը,

որոնք զորքով հավաքվեցին և ելան

ընդդեմ Երուսաղեմի և Սիոն լեռան։

Անընթեռնելի պատգամ

⁹ Ապշահար եղաք, հիմարացաք,

թմրեցիք, է՛լ ավելի թմրեցիք,

հարբեցիք, բայց ո՛չ գինուց և ո՛չ էլ ցքիից.

¹⁰ քանի որ Տերը ձեզ հիմարության ոգի խմեցրեց

և խցանեց ձեր, ձեր մարգարեների, ձեր իշխանների

ու ձեր ծածկատեսների աչքերը։

¹¹ Թող այս բոլոր պատգամները ձեզ համար լինեն կնքված նամակի խոսքերի պես, որը երբ տան որևէ գրագետ մարդու և ասեն նրան՝ ընթերցի՛ր այդ, պիտի ասի. «Չեմ կարող ընթերցել, որովհետև կնքված է»։ ¹² Եվ նույն գիրը պիտի տան մի մարդու ձեռքը, որը տառեր չի ճանաչում, ու ասեն նրան՝ ընթերցի՛ր այդ, նա պիտի պատասխանի՝ կարդալ չգիտեմ։

¹³ Տերն ասում է.

«Այս ժողովուրդը մոտ է ինձ իր բերանով,

իր շրթունքներով մեծարում է ինձ,

բայց սրտով հեռացել ու մեկուսացել է ինձնից.

զուր է ինձ պաշտում,

մարդկանց պատվիրաններն ու վարդապետություններն է ուսուցանում։

¹⁴ Դրա համար էլ ես

պիտի տեղափոխեմ այդ ժողովրդին. և կտեղափոխեմ նրան,

պիտի կորցնեմ իմաստունների իմաստությունը

և արհամարհեմ խորհրդականների խորհուրդները»։

Ստեղծողն իմաստուն է իր ստեղծածից

¹⁵ Վա՜յ նրանց, ովքեր խորին խորհուրդներ են խորհում, բայց առանց Տիրոջ.

վա՜յ նրանց, ովքեր թաքուն խորհուրդներ են խորհում,

ու նրանց գործերը խավարի հետ են։ Նրանք ասում են.

«Ո՞վ կտեսնի մեզ, ո՞վ պիտի իմանա, թե ի՛նչ ենք անում»։

¹⁶ Բայց չէ՞ որ դուք բրուտի կավի եք նման.

մի՞թե ստեղծվածն իր ստեղծողին կասի.

«Դո՛ւ չես ինձ ստեղծել»,

կամ արարածն՝ Արարչին.

«Իմաստությամբ չես արարել ինձ»։

¹⁷ Ոչ քիչ ժամանակ անց

Լիբանանը կդառնա ինչպես Քերմել լեռը,

իսկ Քերմելն անտառ կհամարվի։

¹⁸ Այն օրը խուլերը պիտի լսեն այդ գրվածքի խոսքերը,

և խավարի ու մեգի մեջ գտնվող կույրերի աչքերը պիտի տեսնեն.

¹⁹ աղքատներն ուրախությամբ պիտի ցնծան Տիրոջով,

և հույսը կորցրած մարդիկ պիտի լցվեն խնդությամբ։

²⁰ Անօրենը վերացավ,

ամբարտավանը անհետ կորավ,

անիրավները ոչնչացան չարիքների մեջ,

²¹ նրանց հետ նաև նրանք,

ովքեր խոսքով ստիպում էին մարդկանց մեղանչել,

իրենց հանդիմանողներին արգելք էին լինում

և անարդարությամբ շեղում իրավունքը։

²² Ուստի և Տերն այսպես է ասում Հակոբի տան մասին,

որ նա ընտրեց Աբրահամից.

«Հիմա Հակոբը չի ամաչելու,

և հիմա Իսրայելի երեսը չի այլակերպվելու,

²³ բայց երբ նրանց որդիները տեսնեն իմ գործերը,

պիտի սրբացնեն իմ անունը,

պիտի սրբացնեն Հակոբի սրբին

ու պիտի երկնչեն Իսրայելի Աստծուց։

²⁴ Հոգով մոլորվածները պիտի ճանաչեն իմաստությունը,

տրտնջացողները պիտի սովորեն հնազանդվել,

թոթովախոսները պիտի սովորեն խաղաղություն խոսել»։

30

Ամոթալի դաշինք Եգիպտոսի հետ

¹ Այսպես է ասում Տերը.

«Վա՜յ ձեզ, ապստա՛մբ որդիներ,

քանի որ խորհուրդ եք անում,

բայց ոչ իմ կամքով,

դաշինք եք կռում,

բայց ոչ իմ Հոգով,

մեղքերի վրա մեղքեր եք բարդում։

² Առանց ինձ հարցնելու գնում իջնում էիք եգիպտացիների երկիրը՝

փարավոնից օգնություն գտնելու և եգիպտացիներին ձեզ թիկունք դարձնելու։

³ Բայց փարավոնի պաշտպանությունը ձեզ համար ամոթ է լինելու,

իսկ եգիպտացիներին ապավինածներին՝ նախատինք.

⁴ որովհետև Տայանի երկրում իշխանները չար պատգամաբերներ են.

զուր տեղը ջանք կթափե՞ն ⁵ մի ժողովրդի համար,

որից ո՛չ շահ և ո՛չ էլ օժանդակություն ու օգուտ է լինելու իրենց,

այլ ամոթ ու նախատինք»։

⁶ Տեսիլք անապատում նեղության և տառապանքի մեջ գտնվող չորքոտանիների մասին։

Առյուծն ու առյուծի կորյունը

և իժերն ու թռչող իժերի ձագերը,

իրենց գանձերը էշերին բարձած և իրենց հարստությունը ուղտերի վրա դրած,

գնում են մի ազգի մոտ,

որից իրենց օգուտ ու օժանդակություն չի լինելու,

այլ ամոթ ու նախատինք։

⁷ Եգիպտացիներին, որոնք իզուր և ապարդյուն են օգնում ձեզ, հայտնի՛ր.

«Զուր է ձեր այդ մխիթարությունը»։

Անհնազանդ ժողովուրդը

⁸ Արդ, նստի՛ր ու գրի՛ր տախտակի վրա և գրքի մեջ,

որպեսզի դա պահպանվի իր ժամանակի համար և հավիտյանս հավիտենից,

⁹ քանզի ժողովուրդն անհավատ է, որդիները՝ սուտ,

որոնք չկամեցան հետևել Աստծու օրենքին։

¹⁰ Նրանք մարգարեներին ասում էին.

«Մի՛ ահազանգեք, այլ խոսե՛ք մեզ հետ

ու մեզ պատմե՛ք մեկ այլ մոլորության մասին.

¹¹ մեզ հե՛տ դարձրեք այդ ճանապարհից,

հեռացրե՛ք մեզ այդ շավղից,

մեր միջից հանե՛ք Իսրայելի Աստծու օրենքները»։

¹² Դրա համար էլ այսպես է ասում Տերը՝ Իսրայելի Սուրբը.

«Որովհետև դուք անարգեցիք այդ խոսքերը

և ապավինեցիք սնոտի ստին,

տրտնջացիք և հույս դրեցիք դրա վրա,

¹³ այդ պատճառով էլ ձեր մեղքերը ձեզ համար պիտի դառնան այն անառիկ քաղաքի՝

իսկույն խորտակված պարսպի պես,

որը գրավված է,

և որին հանկարծակի կործանում է հասել։

¹⁴ Նրա կործանումը նման է լինելու բրուտի խեցե անոթի ջարդվելուն,

այնքան մանր փշրված,

որ որևէ մեկը դրանից մի կտոր էլ չգտնի,

որպեսզի դրանով կրակ վերցնի

և կամ կարողանա մի քիչ ջուր առնել»։

Խուճապահար փախուստ

¹⁵ Այսպես է ասում Տերը՝ Իսրայելի սուրբ Աստվածը.

«Երբ դարձի գաս և հոգոց հանես,

այն ժամանակ կապրես և կիմանաս,

թե որտե՛ղ ես գտնվում»։ Որովհետև հույսդ դրել էիր սնոտի բաների վրա,

դրա համար էլ սնոտի դարձավ և ձեր զորությունը։

Դուք չէիք կամենում լսել,

¹⁶ այլ ասում էիք.

«Մենք կփախչենք մեր երիվարներով»։

Դրա համար էլ փախստական պիտի դառնաք։

Ասում էիք. «Մենք կփախչենք մեր արագընթաց երիվարներով»։

Դրա համար առավել արագընթաց պիտի լինեն նրանք,

ովքեր ձեզ հալածելու են.

¹⁷ քանի որ մեկի աղաղակից հազարը պիտի փախչի,

հինգի աղաղակից՝ շատերը,

մինչև որ մնաք լեռան վրա ցցված ձողի նման

և կամ բլրի վրա կանգնեցված քարակոթողի պես։

¹⁸ Սակայն շուտով Աստված նորից գթալու է ձեզ,

դրա համար էլ բարձրանալու է, որպեսզի ողորմի ձեզ։

Տերը՝ Աստված, մեր դատավորն է։

Երանի՜ բոլոր նրանց, ովքեր սպասում են նրան,

¹⁹ որովհետև սուրբ ժողովուրդը պիտի բնակվի Սիոնում։

Երուսաղեմը լացով պաղատեց,

թե՝ ողորմի՛ր ինձ։

Պիտի ողորմի քեզ,

պիտի գթա քո ձայնին ու աղաղակին,

հենց որ տեսնի ու լսի քեզ։

²⁰ Տերը նեղության հաց

և կարոտության ջուր պիտի տա քեզ.

էլ քեզ չեն մոտենալու նրանք, ովքեր մոլորեցնում էին քեզ,

որովհետև աչքերդ տեսնելու են քեզ մոլորեցնողներին,

²¹ և ականջներդ քեզ մոլորեցնողների հետևից լսելու են նրանց ասած խոսքերը՝

«Սա է ճանապարհը, այստեղով գնանք» և կամ՝

«Դեպի ա՛ջ» կամ «Դեպի ձա՛խ»։

²² Դու պիտի պղծես արծաթապատ և ոսկեպատ կուռքերը,

պիտի փշրես դրանք և թափես դաշտանի ջրի նման,

պիտի հեռացնես դրանք աղբի նման։

²³ Այն ժամանակ քո հողի սերմերի համար անձրև պիտի լինի,

քո հողի հացն ու բերքը առատ ու հուռթի պիտի լինեն,

և այն օրը քո հոտերը պարարտ ու ընդարձակ վայրում պիտի արածեն։

²⁴ Ձեր արջառներն ու եզները, որոնք հողն են վարում,

հարդ պիտի ուտեն՝ կամնված գարու հետ։

²⁵ Այն օրը բոլոր բարձր լեռների

և բոլոր բարձրաբերձ բլուրների վրա ջուր պիտի բխի,

երբ ոչնչանան շատերը, և կործանվեն աշտարակները։

²⁶ Լուսնի լույսն արեգակի լույսի պես պիտի լինի,

իսկ արեգակի լույսը յոթնապատիկ շատ պիտի լինի,

պիտի դառնա յոթ օրվա լույսի չափ,

այն օրը Տերը պիտի բուժի իր ժողովրդի կրած հարվածը,

պիտի բուժի քո վերքերի ցավերը։

Աստված պատժելու է Ասորեստանին

²⁷ Ահավասիկ, երկար տարիներ ու բազում ժամանակներ անց

պիտի գա Տիրոջ անունը՝

բարկությամբ վառված և փառքով լի.

բարկությամբ լի են լինելու նրա շուրթերի ու բերանի խոսքերը։

Նրա բարկությունն ու ցասումը կրակի պես պիտի լափեն,

²⁸ իսկ նրա հոգին ձորը լցվող հորդահոս հեղեղի պես

պիտի հասնի մինչև պարանոցը։

Եվ պիտի բաժանի ու խռովության մատնի ազգերին՝

իրենց սնոտի մոլորության համար, մոլորությունը

պիտի հալածի նրանց

և նրանց դեմ հանդիման հանի։

²⁹ Մի՞թե դուք հանապազ ուրախությամբ պիտի մտնեք իմ սրբությունները,

մի՞թե ամեն ժամ տոնախմբություններով,

ցնծությամբ ու փողերով պիտի մուտք գործեք Տիրոջ լեռը՝

Իսրայելի սուրբ Աստծու մոտ։

³⁰ Տերը լսելի պիտի դարձնի իր փառավոր ձայնը,

ցույց պիտի տա իր բազկի զայրույթը՝

սրտմտությամբ ու ցասման ամենակուլ բոցով,

կրակ սփռող իր ահավոր բարկությամբ,

ինչպես և ջրհեղեղով ու սաստկատարափ կարկուտով։

³¹ Ասորեստանցիները պիտի ընկճվեն Տիրոջ ձայնից

և այն հարվածներից, որ նա է հասցնելու նրանց։

³² Եվ իրենց օգնականները, որոնց վրա հույս էին դրել, ամեն կողմից շրջապատման մեջ են առնելու նրան. փողերով ու թմբուկով նրանք շատ անգամ փոխնիփոխ պիտի կռվեն նրանց դեմ ու ոչ թե վաղօրոք, այլ հենց ժամանակին վրեժխնդիր պիտի լինեն նրանցից։

³³ Եվ արդ, մի՞թե ձեզ համար ևս նախատեսված է թագավորել։

Խոր ձորի մեջ փայտ է դիզված,

մեծ փայտակույտն է բորբոքվել հրով.

Տիրոջ զայրույթն է բորբոքված ծծմբով լի ձորի պես։

31

Աստված պաշտպանելու է Երուսաղեմը

¹ Վա՜յ նրանց,

ովքեր օգնության համար են իջնում Եգիպտոս,

ովքեր հեծյալներին ու մարտակառքերին են ապավինում, թե շատ են,

և ձիերի մեծ բազմությանը.

նրանք Իսրայելի Սրբի վրա հույս չէին դնում,

Աստծուն չէին փնտրում։

² Բայց Տերն իմաստուն էր

և նրանց վրա չարիք բերեց.

նրա խոսքը չի անարգվի.

նա կկանգնի չար մարդկանց տների,

նրանց սնոտի հույսի վրա։

³ Եգիպտացի մարդուն են ապավինում և ոչ թե Աստծուն,

ձիերի մարմիններին.

բայց օգնություն չի լինի.

Տերն իր ձեռքը կերկարի նրանց վրա,

և օգնողները տանջանքի կենթարկվեն,

իսկ նրանցից օգնություն սպասողները կկործանվեն,

ամենքն անխտիր կոչնչանան։

⁴ Այսպես ասաց ինձ Տերը.

«Ինչպես որ առյուծը կամ առյուծի կորյունը մռնչում է այն որսի վրա,

որի վրա հարձակվել է, ոռնում է և լեռները լցնում իր ձայնով,

այնպես որ նրանք պարտության մատնվեն,

նրա բարկության սաստկությունից հալվեն,

այդպես էլ իջնելու է Զորությունների Տերը Սիոն լեռան

և նրա բլուրների վրա»։

⁵ Ինչպես թևածող թռչունները,

այդպես էլ Զորությունների Տերը հովանի պիտի լինի Երուսաղեմին,

նրա թիկունքին կանգնի,

օգնի, փրկի և ապրեցնի։

⁶ Դարձե՛ք, ո՛վ Իսրայելի որդիներ,

որ գաղտնի ու չար ծրագրեր եք խորհում.

⁷ քանի որ այն օրը մարդիկ պիտի վերացնեն

իրենց արծաթե և ոսկե կուռքերը՝

իրենց ձեռքերի գործած մեղքերը։

⁸ Ասորեստանցին պիտի ընկնի,

բայց ոչ մարդու սրով.

մարդու սուրը չի ուտելու նրան,

նա փախուստի պիտի մատնվի,

բայց ոչ սուսերի պատճառով.

նրա երիտասարդները ևս պարտության պիտի մատնվեն։

⁹ Նրանք, ովքեր բանտարկվածների պես թաքնված են լինելու ժայռերի մեջ,

նույնպես պարտության են մատնվելու.

փախչողն էլ պիտի բռնվի։

Այսպես է ասում Տերը.

«Երանի՜ նրան, ով զավակ ունի Սիոնում,

և ում տանեցիները Երուսաղեմում են»։

32

Արդարադատ թագավորը

¹ Ահա մի արդար թագավոր պիտի թագավորի,

և իշխաններ, որոնք իրավունքով պիտի իշխեն։

² Եվ այն մարդը, որն իր մտքերն է թաքցնում,

պիտի թաքնվի,

ինչպես հորդառատ ջրերից։

Իսկ Սիոնը նմանվելու է մի փառավոր գետի,

որ հորդել է տոչորված երկրում։

³ Այլևս հույս չեն դնելու մարդկանց վրա,

այլ իրենց ականջները պահելու են լսելու համար.

⁴ տկարների սրտերը պիտի անսան ու հնազանդվեն,

թոթով լեզուներն արագորեն պիտի սովորեն խաղաղություն խոսել։

⁵ Էլ չեն ասի հիմարին,

որ իրենց իշխան լինի,

և ոչ էլ քո սպասավորներն են ասելու,

թե՝ լո՛ւռ մնա.

⁶ քանզի հիմարը հիմարություն դուրս կտա

և իր սրտում փուչ բաներ կմտածի՝

անօրենություն անելով,

Աստծու դեմ հայհոյություն խոսելով,

ցրելով քաղցած հոգիներին

և ծարաված մարդկանց դատարկ արձակելով։

⁷ Չարագործերն անօրեն ծրագրերն են խորհում՝

անիրավ խոսքերով կործանելով խեղճերին

և դատի ժամանակ անտեսելով աղքատների խոսքը.

⁸ իսկ արդարները իմաստուն բաներ են խորհում,

և այդ խորհուրդը կա ու կմնա։

Զգուշացում Երուսաղեմի կանանց

⁹ Ո՛վ բարեկեցիկ կանայք,

եկեք ակա՛նջ դրեք իմ ձայնին,

և դուք, դուստրե՛ր,

երկյուղով լսե՛ք իմ խոսքերը։

¹⁰ Հիշե՛ք, որ ցավով ու տագնապով պիտի լինեն տարվա օրերը,

քանի որ այգեկութը նվազեց, ցանքսը դադարեց,

և այլևս հետ չեն գալու։

¹¹ Զարհուրե՛ք, բարեկեցիկնե՛ր,

տրտմե՛ք, ինքնավստահնե՛ր, մերկացե՛ք,

հանվե՛ք, քո՛ւրձ հագեք,

¹² լա՛ց եղեք և կո՛ւրծք ծեծեք սիրելի հանդերի համար

և այգիների բերքի համար։

¹³ Իմ ժողովրդի հողում փուշ ու մոլախոտ պիտի բուսնի,

և բոլոր ապարանքների միջից ուրախությունը պիտի վերանա.

փարթամ քաղաքի ապարանքները պիտի լքվեն։

¹⁴ Պիտի լքեն այդ քաղաքի հարստությունը և ցանկալի տները,

քո ավանները հավիտենապես քարանձավների պիտի վերածվեն,

վայրի էշերը պիտի զվարճանան այնտեղ,

և հոտերը պիտի արածեն,

¹⁵ մինչև որ բարձրից ձեզ վրա գա Հոգին,

և Քերմելն անապատ դառնա,

Քերմելն անտառ համարվի,

¹⁶ և իրավունքը հանգրվանի անապատում,

արդարությունը բնակվի Քերմելում։

¹⁷ Արդարության գործերը խաղաղությամբ պիտի կատարվեն,

արդարությունն անդորրություն պիտի հաստատի,

հույս ունեցողները հավիտյան պիտի մնան։

¹⁸ Եվ իմ ժողովուրդը պիտի բնակվի խաղաղության քաղաքում,

պիտի բնակվի հույսով և պիտի հանգստանան հարստության մեջ։

¹⁹ Եթե կարկուտ էլ թափվի,

ձեզ վրա չի գալու։

Անտառում բնակվողները նույնպես պիտի լինեն այնպես ապահով,

ինչպես նրանք, որոնք դաշտում են։

²⁰ Երանի՜ նրանց, ովքեր սերմ են ցանում այն բոլոր ջրերի մոտ,

ուր ոտք են դնում եզն ու էշը։

33

Վա՜յ կողոպտողներին

¹ Վա՜յ նրանց, ովքեր թշվառացնում են ձեզ։

Սակայն ձեզ ոչ ոք չի կարող թշվառության մատնել.

ով արհամարհում է,

ձե՛զ չի արհամարհում,

քանզի ձեզ արհամարհողները պարտության պիտի մատնվեն.

ինչպես որ ձորձերի վրայի ցեցը,

այնպես էլ նրանք պարտության պիտի մատնվեն։

² Տե՜ր, ողորմի՛ր մեզ,

քանզի մենք մեր հույսը դրել ենք քեզ վրա։

Անհավատների սերունդը կործանվեց,

իսկ մեր փրկությունը նեղության ժամին քեզնից է գալու։

³ Քո ձայնի ահից ժողովուրդները հիմարացան,

և քո երկյուղից հեթանոսները ցրվեցին։

⁴ Ահա ձեր մեծ ու փոքրի կողոպուտը պիտի հավաքվի այնպես,

ինչպես մեկը, որ մորեխ է հավաքում փոսից.

այդպես էլ ծաղրելու են ձեզ։

⁵ Սուրբ է մեր Աստված,

որ բարձունքներում է բնակվում,

որի շնորհիվ Սիոնն իրավունքով ու արդարությամբ է լցվել։

⁶ Նրանք իրավացիորեն պարտության մատնվեցին,

իսկ մեր փրկությունը պիտի լինի մեր գանձերի շնորհիվ։

Մեզ հասան Տիրոջ իմաստությունը, հանճարը և աստվածպաշտությունը.

ահա դրանք են արդարության գանձերը։

⁷ Ահավասիկ նրանք սարսափում են ձեր ահից.

ումից որ վախենում էիք,

իրե՛նք են ձեզնից վախենում.

պատգամաբերներ են ուղարկում,

որպեսզի դառնորեն լաց լինելով՝

խաղաղություն աղերսեն։

⁸ Նրանց ճանապարհներն ամայացան,

հեթանոսների ահը հանդարտվեց,

և վերացավ նրանց հետ կնքված ուխտը.

այլևս նրանց մարդ մի՛ համարեք։

⁹ Սուգ արեց և տկարացավ երկիրը,

Լիբանանն ամոթահար եղավ,

Սարոնը մարգագետնի դաշտի վերածվեց,

Գալիլեան և Կարմելոսը մերկացան։

Արդարները պիտի ապրեն բարձունքներում

¹⁰ «Այժմ ելնելու եմ ես,- ասում է Տերը,- այժմ փառավորվելու եմ,

այժմ բարձրանալու եմ։

¹¹ Ահա պիտի տեսնեք,

ահա ամոթահար պիտի լինեք,

զուր պիտի լինի ձեր հոգու զորությունը,

և կրակը ձեզ պիտի այրի։

¹² Հեթանոսները ագարակի մեջ խանձված փշի նման պիտի դառնան՝ այրված ու լքված։

¹³ Թող հեռվում գտնվողները լսեն, ինչ որ արեցի,

և մոտ եղողները ճանաչեն իմ զորությունը»։

¹⁴ Անօրեններն արտաքսվեցին Սիոնից.

դողն է բռնել ամբարիշտներին։

Եվ արդ, ո՞վ պիտի պատմի ձեզ,

որ կրակը բորբոքվել է,

կամ ո՞վ պիտի հայտնի ձեզ հավիտենական կայանի մասին։

¹⁵ Ով արդարությամբ է ընթանում,

խոսում ճշմարիտ ուղու մասին,

ատում անօրենությունն ու անիրավությունը,

իր ձեռքերը թոթափում կաշառքից,

ծանրացնում ականջները,

որպեսզի չլսի արյան վրիժառության մասին,

փակում աչքերը,

որպեսզի անարդարությունը չտեսնի,

¹⁶ նա հաստատուն ապառաժի բարձր անձավի մեջ է բնակվելու.

հաց պիտի տրվի նրան,

և ջրով ապահովված պիտի լինի նա։

Ազատագրված Երուսաղեմը

¹⁷ Դուք տեսնելու եք թագավորին իր փառքի մեջ,

ձեր աչքերը հեռվից տեսնելու են երկիրը,

¹⁸ ու ձեր հոգին խորհելու է Աստծու երկյուղի մասին։

Որտե՞ղ են գրագիրները,

որտե՞ղ են խրատատուները,

որտե՞ղ է նա, որի ձեռքին է ժողովրդի մեծ ու փոքրին սնուցողների հաշիվը.

¹⁹ նա խորհրդի չնստեց ժողովրդի հետ,

որն անտեղյակ էր ու ծանրալեզու,

որովհետև չէր լսում.

վատթարացած մի ժողովուրդ,

որ լսածի մասին չէր ուզում մտածել։

²⁰ Ահա մեր փրկության քաղաք Սիոնը.

ձեր աչքերը պիտի տեսնեն Երուսաղեմ քաղաքը՝ մեծացած,

այնպիսի վրաններով, որոնք չեն տեղաշարժվելու,

հավիտյանս հավիտենից չեն շարժվելու նրա վրանների ցցերը,

և չեն խզվելու դրանց պարանները,

²¹ քանի որ ձեզ համար մեծ է Տիրոջ անունը։

Ձերն է լինելու այն երկիրը,

որտեղ գետերը և ջրանցքները լայնահուն են ու ջրառատ.

այն ճանապարհով դու այլևս չես գնալու,

չեն գնալու և քո թիավար նավերը,

որովհետև մեծ է իմ Աստվածը

և ինձ չի անտեսի։

²² Տերն է մեր հայրը,

Տերն է մեր դատավորը,

Տերն է մեր իշխանը,

Տերն է մեր թագավորը,

Տերն է մեր փրկիչը.

նա է փրկելու մեզ։

²³ Կտրվեցին քո պարանները,

որովհետև չդիմացան,

կայմն էլ թեքվեց, չի բացելու առագաստը

և չի պարզելու դրոշը, մինչև որ կորստյան մատնվի։

Այնուհետև բազում կաղեր ավարառություն պիտի կատարեն։

²⁴ Ժողովուրդը, որ բնակվում է դրանց մեջ,

չպիտի ասի, թե տանջվեցինք,

որովհետև նրա մեղքերին թողություն եղավ։

34

Եդովմի դատաստանը

¹ Մո՛տ եկեք ու լսե՛ք, ո՛վ ազգեր,

ակա՛նջ դրեք, ո՛վ իշխաններ.

թող լսի երկիրն իր մեջ գտնվողների հետ,

երկրագունդը և նրանում ապրող ժողովուրդը։

² Տիրոջ զայրույթը բոլոր ազգերին է ուղղված,

բարկությունը նրանց բոլոր բազմությունների դեմ է,

որպեսզի ոչնչացնի նրանց՝ մատնելով սպանության.

³ իսկ նրանց վիրավորները պիտի ընկնեն մեռելի պես,

նրանցից նեխահոտ պիտի փչի,

լեռները պիտի թրջվեն նրանց արյամբ։

⁴ Երկնային բոլոր զորությունները պիտի հալվեն,

երկինքը մագաղաթի պես պիտի գալարվի,

բոլոր աստղերը ցած պիտի թափվեն որթատունկի տերևի նման

կամ թզենուց վայր ընկնող տերևի պես։

⁵ Սուրն իմ, որ արբեցել է երկնքում,

այժմ իջնելու է եդովմացիների վրա

և կորստյան դատապարտված ժողովրդի վրա՝

դատաստանի համար։

Եդովմի կոտորածը

⁶ Տիրոջ սուրը հագեցել է արյամբ,

գիրացել է գառների, ցուլերի ու խոյերի ճարպով,

քանզի Տիրոջ համար Բոսորում՝ զոհաբերություն,

իսկ եդովմացիների երկրում մեծ սպանդ է լինելու։

⁷ Նրանց հետ պիտի ճզմվեն մեծամեծները,

նաև խոյերն ու ցուլերը.

երկիրը պիտի հարբի նրանց արյամբ,

և նրանց հողը նրանց ճարպով պիտի լցվի։

⁸ Արդարև, Տիրոջ դատաստանի օրն է,

Սիոնի դատաստանի հատուցման տարին.

⁹ նրա ձորերը ձյութ պիտի դառնան,

իսկ նրա հողը՝ ծծումբ.

նրա հողը ձյութի պես պիտի վառվի

¹⁰ զօր ու գիշեր

և հավիտենապես չի հանգչելու։

Նրա ծուխը վեր պիտի բարձրանա,

և նա սերնդից սերունդ պիտի ավերվի,

շատ ու շատ ժամանակներ պիտի ավերվի,

և չի լինելու ոչ ոք, որ անցնի այնտեղով։

¹¹ Այնտեղ բնակություն պիտի հաստատեն թռչուններն ու ոզնիները,

ցիներն ու ագռավները,

նրա մեջ պիտի ջնջվեն ու ավերակ դառնան չափված հողակտորները,

հուշկապարիկները պիտի բնակվեն այնտեղ։

¹² Նրա իշխանները պիտի դադարեն գոյություն ունենալուց,

նրա թագավորներն ու մեծամեծները պիտի կորստյան մատնվեն։

¹³ Նրա քաղաքներում և ամրոցներում փշաբեր ծառեր պիտի բուսնեն։

Համբարուների բնակատեղի և ջայլամների հանգրվան պիտի դառնա նա,

¹⁴ որտեղ դևերն ու հուշկապարիկներն են հանդիպելու

և միմյանց ձայն տալու։

Այնտեղ պիտի հանգրվանեն հուշկապարիկները,

որովհետև իրենց համար հանգիստ են գտել։

¹⁵ Այնտեղ ոզնին ձագեր հանեց,

և երկիրը զգուշությամբ սնուցեց նրա ձագերին։

Այնտեղ միմյանց հանդիպեցին եղջերուները և իրար երես տեսան.

¹⁶ նրանք հաշվվեցին, և

նրանցից մեկն անգամ չպակասեց,

ընկերն ընկերոջը չփնտրեց,

քանի որ Տերն այդպես հրամայեց նրանց,

Նրա Հոգին հավաքեց նրանց։

¹⁷ Նա նրանց համար վիճակ գցեց,

նրա ձեռքն է նրանց լիացրել՝

հավիտյանս հավիտենից։

Նրանք պիտի ժառանգեն սերնդից սերունդ

և հանգրվան գտնեն այնտեղ։

35

Ծաղկած անապատը

¹ Ուրա՛խ եղիր, ծարավա՛ծ անապատ,

թող ցնծա անապատն ու ծաղկի շուշանի պես։

² Թող ծաղկի ու ցնծա Հորդանանի անապատը.

նրան պիտի տրվի և՛ փառքը Լիբանանի,

և՛ պատիվը Կարմելոսի.

իմ ժողովուրդը պիտի տեսնի փառքը Տիրոջ

ու վեհությունը մեր Աստծու։

³ Ո՛ւժ առեք, լքվա՛ծ ձեռքեր ու տկարացա՛ծ ծնկներ,

⁴ մխիթարվե՛ք, թուլասի՛րտ մարդիկ,

գոտեպնդվե՛ք և մի՛ երկնչեք։

Ահավասիկ մեր Աստվածը դատաստանով պիտի հատուցի և վրեժխնդիր լինի,

նա ինքը պիտի գա ու փրկի մեզ։

⁵ Այն ժամանակ կույրերի աչքերը պիտի բացվեն,

և խուլերի ականջները լսեն։

⁶ Այն ժամանակ կաղը եղջերուի պես պիտի վազի,

և ծանրախոսների լեզուն պարզ պիտի դառնա,

քանզի ջուր բխեց անապատում,

և գետ՝ ծարաված երկրում։

⁷ Ջրազուրկ տեղերը լճակների պիտի վերածվեն,

և տոչորված երկրում աղբյուրի ջրեր պիտի բխեն։

Այնտեղ թռչուններն ուրախ պիտի ճռվողեն,

հոտերը մակաղատեղ պիտի գտնեն,

այնտեղ մարգագետիններ են լինելու և ճահճուտներ։

⁸ Այնտեղ մաքուր ճանապարհ պիտի լինի,

և ճանապարհը սուրբ պիտի կոչվի.

այդ տեղով պիղծը չպիտի անցնի,

պիղծ մարդկանց համար այնտեղ ճանապարհ չի լինելու,

ցրվածներն անգամ, այդ տեղով ընթանալով,

չպիտի մոլորվեն։

⁹ Այնտեղ առյուծ չի լինելու,

ու չար գազաններից ոչ մեկն այնտեղով չի անցնելու

և այնտեղ ամենևին չի լինելու.

այդ տեղով պիտի գնան փրկվածները

և Տիրոջ համար հավաքվածները։

¹⁰ Պիտի վերադառնան ու ցնծությամբ գան Սիոն,

և նրանց գլխի վրա հավիտենական ուրախություն պիտի լինի,

օրհնություն ու ցնծություն պիտի լինի նրանց գլխի վրա,

ուրախությունը պիտի պատի նրանց,

ցավը, տրտմությունն ու հեծությունը պիտի չքանան։

36

Ասորեստանը սպառնում է Երուսաղեմին

¹ Եզեկիայի թագավորության տասնչորսերորդ տարում Ասորեստանի Սենեքերիմ արքան հարձակվեց Հուդայի երկրի ամուր քաղաքների վրա և գրավեց դրանք։ ² Ասորեստանի արքան Լաքիսից մեծ զորքով Երուսաղեմ՝ Եզեկիա արքայի մոտ ուղարկեց Ռափսակին, որը եկավ կանգ առավ Կտավ սպիտակեցնողների ագարակի ճանապարհի վերևի ավազանի ջրմուղի մոտ։ ³ Նրան ներկայացան Քեղկիայի որդի Եղիակիմը, որը տնտեսն էր, գրագիր Սոմնասը և Ասափի որդի ժամանակագիր Հովաքը։ ⁴ Ռափսակը նրանց ասաց. «Գնացեք հայտնե՛ք Եզեկիային, որ այսպես է ասում Ասորեստանի մեծ արքան. “Ո՞ւմ վրա ես հույս դրել. ⁵ մի՞թե խորհրդով կամ բերանի խոսքերով պատերազմ կշահվի. իսկ հիմա ո՞ւմ վրա ես հույս դրել, որ չես հնազանդվում ինձ։ ⁶ Ահա հույսդ դրել ես ջախջախված եղեգնյա ցուպի՝ եգիպտացու վրա, որին եթե որևէ մեկը հենվի, պիտի խորտակվի և նրա ձեռքը ծակի. ահա այդպիսին է Եգիպտոսի փարավոն արքան և բոլոր նրանք, որ ապավինել են նրան”։ ⁷ Իսկ եթե ասեք, թե՝ Տիրոջը՝ մեր Աստծուն ենք ապավինել, ապա մի՞թե դա նա չէ, որի պաշտամունքի բարձունքներն ու զոհասեղանները Եզեկիան քանդեց և Հուդայի երկրին ու Երուսաղեմին հրաման տվեց, որ միայն իր առջև գտնվող զոհասեղանին երկրպագություն մատուցեն։ ⁸ Դե ուրեմն եկեք միացե՛ք իմ տիրոջը՝ Ասորեստանի արքային, և ես ձեզ երկու հազար երիվար կտամ, եթե դուք կարողանաք դրանց համար հեծյալներ տալ։ ⁹ Եվ դուք, որ հույս եք դրել Եգիպտոսի վրա, նրանց հեծյալների ու երիվարների վրա, ինչպե՞ս պիտի կարողանաք կռվել իմ տիրոջ աշխարհակալ զորապետներից որևէ մեկի հետ։ ¹⁰ Արդ, ի՛նչ է, առանց Տիրոջ հրամանի՞ ենք եկել այս երկիրը՝ նրա դեմ պատերազմելու համար։ Տե՛րն ինձ ասաց. “Գնա՛ այդ երկիրը և ավերի՛ր այն”»։

¹¹ Ապա Եղիակիմը, Սոմնասը և Հովաքն ասացին նրան. «Մեզ՝ քո ծառաների հետ խոսի՛ր ասորերեն, որովհետև մենք այն հասկանում ենք, մեզ հետ հրեերեն մի՛ խոսիր. ինչո՞ւ ես այդպես խոսում, որ հասնի այն մարդկանց ականջին, որոնք պարիսպների վրա են»։

¹² Ռափսակը նրանց ասաց. «Մի՞թե միայն ձեր տիրոջ մոտ կամ ձեզ մոտ է ուղարկել ինձ իմ տերը, որ խոսեմ այս բաները, և ո՞չ արդյոք այն մարդկանց մոտ, որոնք նստում են այդ պարսպի վրա, որպեսզի ձեզ հետ միասին չուտեն իրենց աղբը և չխմեն իրենց մեզը»։

¹³ Ռափսակը ոտքի ելավ և բարձր ձայնով հրեերեն կանչեց՝ ասելով. «Լսե՜ք Ասորեստանի մեծ արքայի թագավորական պատգամները։ ¹⁴ Այսպես է ասում արքան. “Թող Եզեկիան ձեզ չմոլորեցնի այնպիսի խոսքերով, որոնցով չի կարող փրկել ձեզ։ ¹⁵ Եվ թող չխաբի ձեզ Եզեկիան, թե Աստված փրկելու է ձեզ, և այս քաղաքն Ասորեստանի թագավորի ձեռքը չի մատնվելու։ ¹⁶ Մի՛ լսեք Եզեկիային”։ Այսպես է ասում Ասորեստանի արքան. “Եթե դուք ձեր բարին եք կամենում, ինձ մո՛տ եկեք, և յուրաքանչյուրդ կուտեք ձեր այգու և թզենու պտուղը ու կխմեք ձեր ջրհորի ջուրը, ¹⁷ մինչև որ գամ և տանեմ ձեզ մի երկիր, որ նման է ձեր երկրին, երկիր ցորենի ու գինու, հացառատ ու այգեշատ։ ¹⁸ Թող ձեզ չխաբի Եզեկիան՝ ասելով՝ “Աստված պիտի փրկի ձեզ”. արդյոք ազգերի աստվածները կարողացա՞ն Ասորեստանի արքայի ձեռքից փրկել իրենց այս կամ այն երկիրը։ ¹⁹ Ո՞ւր են Եմաթի ու Արփաթի աստվածները, ո՞ւր է Սեփարիմ քաղաքի աստվածը. մի՞թե իմ ձեռքից կարողացան փրկել Սամարիան։ ²⁰ Այդ բոլոր ազգերի աստվածներից արդյոք ո՞ր մեկը կարողացավ իմ ձեռքից փրկել իր երկիրը, որ ձեր Աստվածն էլ կարողանա իմ ձեռքից փրկել Երուսաղեմը”»։

²¹ Լուռ մնացին նրանք և ոչ մի պատասխան չտվեցին, որովհետև թագավորը հրամայել էր պատասխան չտալ։ ²² Ապա Քեղկիայի որդի Եղիակիմը, որը տնտեսն էր, գրագիր Սոմնասը, Ասափի որդի ժամանակագիր Հովաքը, օձիքները պատռելով, վերադարձան Եզեկիայի մոտ և նրան հաղորդեցին Ռափսակի խոսքերը։

37

Եզեկիան դիմում է մարգարեի խորհրդին

¹ Եզեկիա արքան, լսելով այս խոսքերը, պատռեց իր պատմուճանը, քուրձ հագավ և մտավ Տիրոջ տունը։ ² Այնուհետև տնտես Եղիակիմին, գրագիր Սոմնասին և երեց քահանաներին, որոնք քուրձ էին հագել, ուղարկեց Ամովսի որդու՝ Եսայի մարգարեի մոտ, ³ որ ասեն նրան. «Այսպես է ասում Եզեկիան. “Այսօր նեղության ու նախատինքի, կշտամբանքի ու բարկության օր է, մի օր, երբ ծննդկանի երկունքի ժամն է հասել, բայց նա չի կարողանում ծննդաբերել։ ⁴ Թող Տերը՝ քո Աստվածը, լսի Ռափսակի խոսքերը, որին ուղարկեց իր տերը՝ Ասորեստանի արքան, որպեսզի նա նախատի կենդանի Աստծուն, նախատի այնպիսի խոսքերով, որոնք լսեց Տերը՝ քո Աստվածը։ Արդ, աղերսի՛ր Տիրոջը՝ քո Աստծուն, մնացածներիս համար”»։

⁵ Եզեկիա արքայի պաշտոնյաները ներկայացան Եսայուն։ ⁶ Եսային ասաց նրանց. «Այս բանը կհաղորդեք ձեր տիրոջը։ Այսպես է ասում Տերը. “Չվախենաս այն խոսքերից, որ լսեցիր, և որոնցով նախատեցին ինձ Ասորեստանի արքայի պատգամաբերները։ ⁷ Ահա ես արքայի մեջ խռովության ոգի կսերմանեմ. լուր առնելով՝ նա կվերադառնա իր աշխարհը և իր երկրում սրի բաժին կդառնա”»։

Ռափսակի նամակը Եզեկիա արքային

⁸ Ռափսակը, իմանալով, որ Ասորեստանի արքան հեռացել է Լաքիսից, քանի որ պաշարել է Լեբնան, վերադարձավ ու հասավ Ասորեստանի արքայի մոտ։ ⁹ Եթովպացիների Թարակ արքան դուրս եկավ սրան պաշարելու։ Նա հետ եկավ այնտեղից և պատգամաբերներ ուղարկեց Եզեկիայի մոտ՝ հայտնելով. ¹⁰ «Այսպե՛ս ասացեք Հուդայի երկրի Եզեկիա արքային. “Թող քեզ չմոլորեցնի Աստված, որին դու ապավինել ես՝ ասելով, թե Երուսաղեմը չի մատնվի Ասորեստանի արքայի ձեռքը։ ¹¹ Բայց մի՞թե դու չես լսել, թե Ասորեստանի թագավորներն ի՛նչ օրը գցեցին բոլոր երկրներին, ինչպե՛ս կործանեցին նրանց։ Իսկ ի՛նչ է, դու փրկվելո՞ւ ես։ ¹² Մի՞թե աստվածները փրկեցին այն ազգերին, որոնց իմ հայրերը կորստյան մատնեցին՝ Գոզանը, Խառանը, Ռափեթը, որոնք գտնվում են Եմաթի երկրում։ ¹³ Ո՞ւր են Եմաթի և Արփաթի թագավորները, ո՞ւր են Սեփարիմ քաղաքի, Անայի և Գավայի թագավորները”»։

Եզեկիայի աղոթքը

¹⁴ Եզեկիան, պատգամաբերների ձեռքից վերցնելով հրովարտակը, կարդաց, մտավ Տիրոջ տունն ու այն փռեց Տիրոջ առաջ։ ¹⁵ Եզեկիան աղոթքի կանգնեց Տիրոջ առաջ և ասաց. ¹⁶ «Զորությունների՛ Տեր, Աստվա՛ծ Իսրայելի, որ բազմում ես քերովբեների վրա, դու ես աշխարհի բոլոր թագավորությունների միա՛կ Աստվածը, դո՛ւ արարեցիր երկինքն ու երկիրը։ ¹⁷ Խոնարհի՛ր քո ականջը, ո՛վ Տեր, և լսի՛ր. Տե՛ր, բա՛ց քո աչքերը և նայի՛ր, ո՛վ Տեր. լսի՛ր, Տե՛ր, և իմացի՛ր այն պատգամները, որ ուղարկեց Ասորեստանի Սենեքերիմ արքան՝ նախատելու կենդանի Աստծուն։ ¹⁸ Արդարև, Ասորեստանի թագավորներն ավերեցին համայն աշխարհը՝ իր երկրներով, ¹⁹ հրո ճարակ դարձրին նրանց կուռքերը և կործանեցին, քանի որ նրանք աստվածներ չէին, այլ մարդու ձեռքով կերտված փայտե ու քարե կուռքեր։ ²⁰ Բայց արդ, Տե՛ր, Աստվա՛ծ մեր, ազատի՛ր մեզ նրանց ձեռքից, որպեսզի աշխարհի բոլոր թագավորություններն իմանան, որ դու ես միակ Աստվածը»։

Եսայու պատգամը թագավորին

²¹ Ապա Ամոզի որդի Եսային ուղարկվեց Եզեկիայի մոտ ու ասաց նրան. «Այսպես է ասում Տերը՝ Իսրայելի Աստվածը. “Լսեցի այն աղոթքները, որոնցով պաղատեցիր ինձ ընդդեմ Ասորեստանի Սենեքերիմ արքայի”»։

²² Ահա այս է այն պատգամը, որ հայտնեց Աստված նրա մասին.

«Ծաղրեց ու արհամարհեց քեզ Սիոնի կույս դուստրը,

քո հետևից գլուխ շարժեց Երուսաղեմի դուստրը։

²³ Ո՞ւմ նախատեցիր և գրգռեցիր,

ո՞ւմ վրա բարձրացրիր ձայնդ,

հայացքդ ինչո՞ւ չես հառում բարձունքին՝ դեպի Իսրայելի Սուրբը։

²⁴ Ինչո՞ւ պատգամաբերների միջոցով նախատինք հասցրիր Տիրոջը։

Դու ասում էիր՝

“Իմ կառքերի բազմությամբ լեռների բարձունքը,

Լիբանանի ծայրերը ելա,

կոտորեցի նրա բարձր մայրիները,

նրա գեղեցիկ նոճիները և մտա նրա անտառի ամենաբարձր կողմերը,

²⁵ կամուրջ գցեցի և ցամաքեցրի ջրերն ու բոլոր ջրավազանները”։

²⁶ Մի՞թե դու չես լսել, որ ավելի առաջ՝ հին ժամանակ, ինչ եմ արել ես.

կանխատեսել եմ և այժմ էլ հայտնում եմ,

որ կործանելու եմ հեթանոսներին իրենց ամրոցների մեջ,

²⁷ նաև բոլոր բերդաքաղաքների բնակիչներին։

Ձեռքից բաց թողեցի,

և նրանք չորացան, դարձան տանիքի վրա խանձված խոտի պես,

չորացած սեզի պես։

²⁸ Արդ, ես գիտեմ քո հանգստության վայրը,

գիտեմ, թե որ ճամփով ես գնում ու գալիս։

²⁹ Քո զայրույթն ու բարկությունը,

քո մաղձոտությունն ինձ համար ակներև են,

դրա համար էլ դնչկալ պիտի հագցնեմ քո մռութին ու սանձ՝ քո կզակին

և հետ պիտի վերադարձնեմ քեզ նույն ճանապարհով, որով եկար։

³⁰ Իսկ քեզ համար, Եզեկիա՛, թող սա նշան լինի. այս տարի պիտի ուտես սերմանվածը, մյուս տարին պիտի ուտես մնացորդները, իսկ երրորդ տարին պիտի ցանեք ու հնձեք, այգիներ տնկեք և ուտեք նրանց պտուղը։ ³¹ Հուդայի երկրում մնացածներն արմատներ պիտի արձակեն դեպի ներքև և պտուղ պիտի տան վերևում, ³² որովհետև Երուսաղեմից պիտի ելնեն մնացորդները, և փրկվածները՝ Սիոն լեռից. Զորությունների Տիրոջ նախանձախանդրությամբ է այդպես լինելու»։

³³ Դրա համար էլ Տերն այսպես է ասում Ասորեստանի թագավորի մասին. «Նա չպիտի մտնի այդ քաղաքը, նետեր չպիտի արձակի դրա վրա, դա չպիտի փակի վահաններով և ոչ էլ պատնեշներով պիտի շրջապատի դա, ³⁴ այլ պիտի վերադառնա այն նույն ճանապարհով, որով եկել է, և չպիտի մտնի այդ քաղաքը»։ Այսպես է ասում Տերը. ³⁵ «Պիտի պահպանեմ այդ քաղաքը, որպեսզի փրկեմ դա՝ ինձ և իմ ծառա Դավթի համար»։

³⁶ Ապա Տիրոջ հրեշտակը ելավ և Ասորեստանի բանակից հարյուր ութսունհինգ հազարին սպանեց։ Առավոտյան վեր կացան և գտան բոլորի անշունչ դիակները։ ³⁷ Եվ Ասորեստանի Սենեքերիմ արքան վերադարձավ, գնաց ու բնակվեց Նինվեում։ ³⁸ Եվ մինչ նա իր Նասրաք աստծու տաճարի մեջ երկրպագում էր իր կուռքին, նրա որդիները՝ Ադրամելեքը և Սարասարը, սրով սպանեցին նրան, և իրենք փախստական գնացին Հայք [*  Արարատի երկիր]։ Իսկ նրա փոխարեն թագավորեց նրա որդին՝ Ասորդանը։

38

Եզեկիայի հիվանդությունը և ապաքինումը

¹ Այն ժամանակ Եզեկիան մահացու հիվանդացավ. Ամոզի որդի Եսային եկավ նրա մոտ ու ասաց. «Այսպես է ասում Տերը. “Պատվե՛ր տուր տանդ համար, որովհետև մեռնելու ես, չես ապրելու”»։

² Եզեկիան երեսը շրջեց դեպի պատը, աղոթք արեց ³ ու ասաց. «Ո՛վ Տեր, հիշի՛ր ինձ, Տե՜ր, քանզի քո առաջ արդարությամբ ու ճշմարիտ սրտով ընթացա և քո առջև հաճելի գործերը կատարեցի»։ Ապա դառնապես լաց եղավ Եզեկիան։

⁴ Տերը, խոսքն ուղղելով Եսայուն, ասաց. ⁵ «Գնա՛ և ասա՛ Եզեկիային, թե այսպես է ասում Տերը՝ քո հայր Դավթի Աստվածը. “Լսեցի քո աղոթքի ձայնը և տեսա քո արցունքները. ահավասիկ քո կյանքի ժամանակի վրա ավելացնում եմ տասնհինգ տարի. ⁶ Ասորեստանի արքայի ձեռքից պիտի փրկեմ քեզ ու այդ քաղաքը, պիտի պահապան լինեմ այդ քաղաքին”։ ⁷ Եվ Տիրոջ կողմից թող սա նշան լինի քեզ, որ Աստված կատարելու է այն խոսքը, որ ասաց. ⁸ “Ահավասիկ ես հետ եմ դարձնելու քո աստիճաններին ընկած ստվերը. քո տան տասը աստիճաններով ներքև իջած շողքը ես տասը աստիճանով հետ եմ շրջելու”»։ Եվ շողքը բարձրացավ տասը աստիճան, հասավ այնտեղ, ուր ստվերն էր իջել։

⁹ Հուդայի երկրի արքա Եզեկիայի աղոթքն այն ժամանակ, երբ նա հիվանդացավ և ապաքինվեց հիվանդությունից։

¹⁰ «Ես ասացի, որ երբ իմ օրերն սպառվեն,

մնացած տարիներս թողած՝ ընկնելու եմ գերեզմանի դռները։

¹¹ Ասացի, որ երկրի վրա այլևս չեմ տեսնի Աստծու փրկությունը,

ոչ էլ՝ այնտեղ բնակվողներից որևէ մեկին։

¹² Զրկվեցի իմ ազգատոհմից,

թողեցի իմ մնացած կյանքը,

որը ելավ ու հեռացավ ինձնից,

ինչպես նա, որ քանդում է կանգուն տաղավարը։

Իմ հոգին ինձնից ահա ուր որ է պիտի անջատվի,

ինչպես ջուլհակի ոստայնը, որ մոտ է կտրվելու։

¹³ Այն օրը ես հանձնվեցի մինչև առավոտ.

ասես առյուծը ջարդել էր իմ բոլոր ոսկորները.

ցերեկից գիշեր հանձնված մնացի։

¹⁴ Ճչում էի ծիծեռնակի պես

և աղավնու նման մնչում,

որովհետև աչքերս տկարացան նայելուց դեպի երկնքի բարձունքը՝

դեպի Տերը, որը փրկեց ինձ,

փարատեց իմ հոգու ցավերը,

¹⁵ և ինքն էլ սահմանեց իմ բոլոր տարիները՝ ի դառնություն իմ անձի։

¹⁶ Այդ մասին քեզ պատմվեց, Տե՛ր,

և դու արթնացրիր իմ հոգին,

ես մխիթարվեցի և ապրեցի։

¹⁷ Ահավասիկ խաղաղության փոխվեց իմ դառնությունը.

դու փրկեցիր իմ հոգին, որ չկործանվեմ,

ինձնից հետ վանեցիր իմ բոլոր մեղքերը։

¹⁸ Դժոխքում գտնվողները քեզ չեն փառաբանելու,

մեռածները չեն օրհնելու քեզ,

և ոչ էլ քո ողորմությանն են հուսալու

գերեզման իջածները։

¹⁹ Այլ ապրողները պիտի օրհնեն քեզ, ինչպես ես այժմ։

Այսուհետև մանուկներ պիտի ծնեմ,

որ պատմեն քո արդարության մասին,

²⁰ ո՛վ փրկիչ իմ Տեր։

Եվ իմ կյանքի բոլոր օրերին

քո աստվածային տաճարի առաջ

չեմ դադարելու սաղմոսարանով օրհներգելու քեզ»։

²¹ Ապա Եսային Եզեկիային ասաց.

«Թզի չի՛ր վերցրու, մանրի՛ր և դի՛ր վերքիդ վրա, և կառողջանաս»։

²² Իսկ նա պատասխանեց. «Դա նշան է, որ Աստծու տաճարը պիտի մտնեմ»։

39

Բաբելոնի պատգամաբերները Եզեկիայի մոտ

¹ Այն ժամանակ Բաբելոնի արքան Մարոդաք Բաղդանը՝ Բաղդանի որդին, պատգամաբերներ ուղարկեց Եզեկիայի մոտ՝ հրովարտակներով ու նվերներով, որովհետև լսել էր, որ նա հիվանդացել է մերձիմահ և առողջացել։ ² Նրանք ուրախություն պատճառեցին Եզեկիային, որը ցույց տվեց նրանց իր գանձերի տները, խնկերի ու օծանելիքների, ոսկու և արծաթի, զենքերի բոլոր պահեստները, ամեն բան, ինչ կար իր գանձարաններում։ Իր տանը, իր ամբողջ տերության սահմաններում բան չմնաց, որ Եզեկիան նրանց ցույց չտար։

³ Եվ ահա Եսայի մարգարեն ներկայացավ Եզեկիա արքային և ասաց նրան. «Ի՞նչ են ասում այդ մարդիկ, ո՞ր կողմերից են եկել մոտդ»։ Եզեկիան պատասխանեց. «Հեռավոր աշխարհից են եկել մոտս, Բաբելոնից»։ ⁴ Եսային ասաց. «Ի՞նչ տեսան քո տան մեջ»։ Եզեկիան պատասխանեց. «Ամեն բան, ինչ որ կա իմ տանը, տեսան։ Բան չկա իմ տան մեջ, որ չտեսնեին, տեսան նաև իմ գանձերը»։ ⁵ Եսային ասաց նրան. «Հիմա դու լսի՛ր Զորությունների Տիրոջ պատգամները. ⁶ “Ահա գալու են օրեր, երբ պիտի խլեն ամեն բան, ինչ որ կա քո տան մեջ, ինչ որ հավաքել են քո հայրերը մինչև այսօր։ Դրանք Բաբելոն պիտի տարվեն. ոչ մի բան չեն թողնելու”։ Աստված ասաց, ⁷ որ պիտի տարվեն նաև քո որդիներից շատերը, որոնք քեզնից են լինելու, որոնց դու ես ծնելու, տանելու և ներքինիներ են դարձնելու Բաբելոնի թագավորի պալատում»։ ⁸ Եզեկիան ասաց Եսայուն. «Տիրոջ այդ խոսքը, որ դու հայտնեցիր, բարի է. թող արդարություն ու խաղաղություն լինի իմ օրերում»։

40

Մխիթարություն Երուսաղեմի համար

¹ «Մխիթարե՛ք, մխիթարե՛ք իմ ժողովրդին,-

ասում է Աստված,-

² դուք՝ քահանաներդ, Երուսաղեմի սրտո՛վ խոսեք

և մխիթարե՛ք նրան,

որովհետև նա լի է տառապանքով»։

Թող նրա մեղքերին թողություն լինի,

քանի որ իր մեղքերի համար

նա Տիրոջ կողմից կրկնակի հատուցում ստացավ։

³ Անապատում կանչողի ձայնն է.

«Պատրաստե՛ք Տիրոջ ճանապարհը

և հարթե՛ք մեր Աստծու շավիղները։

⁴ Բոլոր ձորերը պիտի լցվեն,

և բոլոր լեռներն ու բլուրները պիտի խոնարհվեն,

անհարթ տեղերը պիտի հարթանան,

և առապարները դաշտերի վերածվեն։

⁵ Պիտի հայտնվի Տիրոջ փառքը,

և ամեն մի մարմնավոր պիտի տեսնի Աստծու փրկությունը,

քանզի Տե՛րը խոսեց»։

⁶ Մի ձայն ասում է՝ կանչի՛ր։

Ասում եմ՝ ի՞նչ կանչեմ։

«Գոչի՛ր, ամեն մարմին նման է խոտի,

և մարդու ամբողջ փառքը նման է խոտածաղկի։

⁷ Խոտը չորանում է,

նրա ծաղիկը թափվում է,

որովհետև նրա վրա փչում է Տիրոջ շունչը։

Արդարև, իմ այս ժողովուրդը նման է խոտի։

Խոտը չորանում է, ծաղիկը թափվում,

⁸ բայց Տիրոջ խոսքը մնում է հավիտյան»։

⁹ Ե՛լ այդ բարձր լեռան վրա,

ո՛վ ավետաբեր Սիոնի,

ո՛ւժ տուր քո ձայնին,

ո՛վ ավետաբեր Երուսաղեմի,

ո՛ւժ տուր, մի՛ վախեցիր և հայտնի՛ր

Հուդայի քաղաքներին.

«Ահավասիկ ձեր Աստվածը։

¹⁰ Ահա Տերը՝ Աստված, որ գալիս է զորությամբ

և իր բազկի իշխանությամբ.

ահավասիկ իր վարձն իր հետ է,

ու գործերն էլ իր առջև են։

¹¹ Հովվի նման հովվելու է իր հոտերը,

իր բազկով հավաքելու է գառներին,

նրանց կրելու է իր ծոցում,

մխիթարիչ է լինելու հղիներին»։

Իսրայելի անզուգական Աստվածը

¹² Ո՞վ իր ափով չափեց ջրերը,

թզով՝ երկինքը և քիլով՝ համայն երկիրը.

ո՞վ կարողացավ լեռները կշռել կշեռքով և դաշտերը՝ նժարով։

¹³ Ո՞վ իմացավ Տիրոջ մտքերը,

ո՞վ խորհրդատու դարձավ նրան՝

նրան իբր խելամիտ դարձնելու համար։

¹⁴ Կամ թե ո՞ւմ հետ խորհրդակցեց նա, որ իրեն խելամիտ դարձնի,

և կամ ո՞վ նրան ցույց տվեց արդարադատությունն ու իմաստության ճանապարհը,

կամ անցյալում ո՞վ փոխ տվեց իրեն, որ հատուցի նրան։

¹⁵ Բոլոր ազգերը նման են մի կաթիլի՝

դույլի մեջ և մի փոշեհատիկի՝ կշեռքի վրա

և կամ բերանից ցայտող շիթերի։

¹⁶ Այրելու համար Լիբանանը բավական չէ,

բոլոր չորքոտանիները ողջակեզի համար բավական չեն,

¹⁷ և բոլոր հեթանոսները նրա համար ոչինչ են,

ոչնչություն են համարվում։

¹⁸ Արդ, ո՞ւմ նմանեցրիք Տիրոջը,

ո՞ւմ նման համարեցիք նրան։

¹⁹ Մի՞թե կուռք է նա, որին կերտել է հյուսնը,

և կամ ոսկերիչը, ձուլելով ոսկին, պատել է նրան ոսկով՝

պատկերի նմանությամբ կերպարանք տալով նրան։

²⁰ Հյուսնն էլ անփուտ փայտն է ընտրել

և խելք ու հնարքի դիմել,

թե ինչպես կանգնեցնի այն, որ չշարժվի։

²¹ Մի՞թե չլսեցիք ու չիմացաք,

ի սկզբանե ձեզ չպատմվե՞ց,

չհասկացա՞ք, թե ո՛վ հաստատեց երկրի հիմքերը։

²² Նա է, որ տիրում է երկրի շրջածիրին,

և բնակիչները նրան մորեխի չափ են երևում։

Նա է կանգնեցրել երկինքը կամարի պես,

ձգել վրանի պես

և հիմնել երկիրը՝ նրա մեջ բնակվելու համար։

²³ Նա է իշխաններին անիշխանության դատապարտում

և երկիրն ամայացնում,

²⁴ որպեսզի չսերմանեն ու տունկեր չտնկեն,

և նրանց արմատը հողի մեջ չհաստատվի։

Նա կփչի նրանց վրա, և կչորանան,

ու փոթորիկը կքշի դրանք՝ իբրև խռիվ։

²⁵ «Արդ, ո՞ւմ կուզենայիք նմանեցնել ինձ,

որին հավասար լինեի»,-

ասում է Իսրայելի Սուրբը։

²⁶ Ձեր աչքերը դեպի վեր բարձրացրեք և տեսե՛ք՝

ո՞վ հաստատեց այս ամենը, ստեղծեց

մեծ փառքով ու ահեղ զորությամբ և բոլոր երկնային զարդերին անուններ տվեց.

ոչ մի բան ծածուկ չի մնում քեզանից։

²⁷ Ինչո՞ւ ես ասում, Հակո՛բ, կամ՝ ի՞նչ ես խոսում, Իսրայե՛լ, թե՝

«Իմ ճանապարհները գաղտնի մնացին Աստծուց,

և իմ Աստվածը վերացրեց իմ իրավունքներն ու հեռացավ»։

²⁸ Արդ, չիմացա՞ր, չլսեցի՞ր,

որ հավիտենական Աստվածը,

երկրի սահմանները հաստատող Աստվածը

ո՛չ քաղց է զգում և ո՛չ էլ հոգնում.

նրա իմաստությունն անքննելի է։

²⁹ Նա քաղցածներին ուժ է տալիս,

իսկ ցավ չունեցողներին՝ տրտմություն։

³⁰ Երիտասարդները քաղց պիտի զգան,

մանուկները պիտի հոգնեն,

ընտիր քաջերն անզոր պիտի դառնան,

³¹ իսկ նրանք, որոնք Տիրոջն են սպասում,

նոր ուժ պիտի ստանան

և նոր փետուրներով զարդարվեն արծիվների պես,

պիտի վազեն, բայց չպիտի հոգնեն,

պիտի գնան, բայց քաղց չպիտի զգան։

41

Աստված բարձրացնում է արդարին

¹ Նորոգվե՛ք իմ առաջ, ո՛վ կղզիներ,

քանի որ իշխանները նորոգվելու են զորությամբ,

մոտենալու են ու միասին խոսելու և հայտարարելու են արդար դատաստանի մասին։

² Արևելքից ո՞վ արթնացրեց արդարությունը և կանչեց նրան իր հետևից.

նա գնալու է և ազգերի հանդիման հատուցում է տալու,

սարսափահար է անելու թագավորներին,

հողին է հանձնելու նրանց սրերը,

խռիվի պես վանելու է նրանց նետերը,

³ նրանց փախստական է դարձնելու

և խաղաղությամբ անցնելու է այն ճանապարհները,

որոնք իր ոտքերի համար են։

Արդ, կասե՞ք, թե չի գալու.

⁴ ո՞վ արեց ու կատարեց այս ամենը,

ո՞վ կանչեց նրան, որ կանչում էր առաջին սերունդերից ի վեր։

Ես եմ Տերն առաջին,

նույնն եմ լինելու և հավիտյան։

⁵ Տեսան ինձ ազգերը և վախեցան,

երկրի բոլոր ծագերը սարսափեցին.

իրար մոտեցան և միասին եկան։

⁶ Ամեն մեկը մտքում դրեց

ընկերոջն ու եղբորն օգնական լինել՝ ասելով.

⁷ «Թող հյուսնը քաջալերի դարբնին՝

կռելու, կոփելու և մուրճով հարվածելու, և ասի՝

ինձ համար լավ օգնություն եղավ»։

Գամերով գամում են կուռքերը,

դնում գետնի վրա, որպեսզի չշարժվեն։

⁸ Բայց դու, ո՛վ իմ ծառա Իսրայել,

ո՛վ Հակոբ, որին ընտրեցի,

ո՛վ դու Աբրահամի զավակ, որին սիրեցի,

⁹ որին օգնական եղա՝

երկրի ծայրերից ու նրա դիտակետերից կանչեցի քեզ՝ ասելով.

«Դու իմ ծառան ես, քեզ ընտրեցի ես և չեմ լքի քեզ»։

¹⁰ Մի՛ վախեցիր, քանզի քեզ հետ եմ,

մի՛ խաբվիր, քանզի ես եմ քո Աստվածը,

ես, որ զորացրի քեզ,

օգնեցի քեզ ու պահպանեցի քեզ իմ արդար աջով։

¹¹ Ահա պիտի ամաչեն ու պատկառեն քո բոլոր հակառակորդները,

չեղածի նման պիտի լինեն նրանք,

և բոլոր հակառակորդներդ պիտի կորչեն։

¹² Եթե փնտրես, չես գտնելու այն մարդկանց,

որոնք քո դեմ թշնամություն էին անում.

քեզ հետ պատերազմողներն ի չիք պիտի դառնան։

¹³ Արդարև, ես եմ Տերը՝ քո Աստվածը,

որ բռնել եմ քո աջ ձեռքից,

որ ասում եմ քեզ.

«Մի՛ վախեցիր, ես կօգնեմ քեզ»։

«Չվախենաս, ¹⁴ Հակո՛բ, որ որդ ես հիմա,

և դու, Իսրայե՛լ, որ սակավամարդ ես այժմ,

ես օգնեցի քեզ,-

ասում է Աստված՝ Իսրայելի Սուրբը, որը փրկելու է քեզ։-

¹⁵ Ահա քեզ դարձրի սղոցատամ կամնասայլի նոր անիվների պես.

լեռները պիտի կալսես,

բլուրները պիտի մանրես,

փոշու պիտի վերածես դրանք։

¹⁶ Քամուն պիտի տաս, և հողմերը պիտի տանեն դրանք,

և մրրիկները պիտի ցրեն։

Բայց դու ուրախ պիտի լինես Տիրոջով՝ Իսրայելի Սրբով։

¹⁷ Պիտի ցնծան տնանկներն ու չքավորները,

որոնք ջուր էին փնտրում ու չէին գտնում,

և նրանց լեզուները ծարավից ցամաքում էին։

Ես՝ Տերը՝ Աստված, կլսեմ նրանց,

Ես՝ Իսրայելի Աստվածը, չեմ լքի նրանց։

¹⁸ Այլ գետեր կբխեցնեմ լեռների վրա

և դաշտերի մեջ՝ աղբյուրներ,

անապատը կվերածեմ ջրերի լճակների

և տոչորված երկիրը՝ վտակների։

¹⁹ Անջրդի հողում մայրի ու տոսախ,

մրտենի ու նոճի, սոսի ու դափնի,

սոճի ու կաղամախի,

գիհի ու ձիթենի կաճեցնեմ,

²⁰ որպեսզի տեսնեն ու հասկանան,

ճանաչեն ու իմանան բոլորը,

թե Տիրո՛ջ ձեռքը կատարեց այդ ամենը,

և Իսրայելի Սո՛ւրբը հաստատեց»։

Մարտահրավեր կուռքերին

²¹ «Մոտեցել է ձեր արդար դատաստանը,-

ասում է Տերը՝ Աստված.-

Մոտեցել է ձեր արդար դատաստանը»,-

ասում է Հակոբի Թագավորը։

²² Թող մոտենան ու պատմեն ձեզ,

թե ի՛նչ դեպքեր են կատարվելու։

Եվ կամ առաջներում կատարվածները թող պատմեն,

որպեսզի մեր մտքերում պահենք և գիտենանք,

թե ի՛նչ եղավ առաջ,

և ի՛նչ է լինելու հետո։

Ասացե՛ք, ²³ պատմե՛ք մեզ, թե վերջում ի՛նչ է լինելու, որ իմանանք.

եթե աստվածներ եք՝ բարի՛ն կատարեք,

չա՛րը կատարեք,

որպեսզի տեղնուտեղը տեսնենք ու զարմանանք,

²⁴ թե որտեղի՛ց եք դուք,

և որտեղի՛ց է գալիս ձեր արածը,

որովհետև ձեզ ընտրեցին հողից որպես պղծություն։

²⁵ Բայց ես պիտի արթնացնեմ հյուսիսային մարդուն և արևելյանին,

նրանք պիտի կանչվեն իմ անունից.

պիտի գան իշխանները,

և բրուտի կավի նման պիտի տրորվեք այնպես,

ինչպես բրուտն է տրորում։

²⁶ Ո՞վ կպատմի սկզբում եղածի մասին, որ հասկանանք,

և կամ ավելի առաջ կատարվածի մասին,

որ ասենք, թե ճշմարիտ է.

ո՛չ առաջներում եղածի մասին պատմող կա,

և ո՛չ էլ մեկը, որ լսի ձեր խոսքերը։

²⁷ Սիոնից պիտի սկսեմ և պիտի մխիթարեմ Երուսաղեմին՝ գերությունից վերադարձին։

²⁸ Ահավասիկ ոչ մի հեթանոս չկա,

չկա նաև նրանց կուռքերից ոչ մեկը, որ պատմի,

և եթե անգամ հարցնեմ նրանց, թե՝ որտեղի՞ց եք,

ինձ պատասխան չեն տա։

²⁹ Ունայն են նրանք, որ կերտել են ձեզ,

սնոտի են նրանք, որ ստեղծել են ձեզ։

42

Տիրոջ ծառան

¹ Հակոբն իմ ծառան է.

օգնական պիտի լինեմ նրան։

Իմ ընտրյալն Իսրայելն է,

որին ընդունեց իմ հոգուն։

Իմ շունչը կտարածեմ նրա վրա,

և նա հեթանոսների դատաստանը կտեսնի։

² Նա չի աղաղակելու և չի վիճելու,

ոչ ոք դրսում նրա ձայնը չի լսելու,

³ անգամ ջախջախված եղեգը նա չի ջարդելու

և առկայծող պատրույգը չի մարելու,

այլ արդարությամբ դատաստան է տեսնելու։

⁴ Նա պիտի ծագի և չպիտի խորտակվի,

քանի դեռ երկրի վրա չի հաստատել դատաստանը.

և ազգերն իրենց հույսը պիտի դնեն նրա անվան վրա։

⁵ Այսպես է ասում Տերը՝ Աստված,

որ ստեղծեց երկինքը և կանգնեցրեց այն,

հաստատեց երկիրն ու ամեն բան, ինչ կա նրա վրա,

շունչ տվեց այնտեղ գտնվող մարդկանց,

հոգի՝ բոլոր նրանց, ովքեր ոտք են դնում երկրի վրա.

⁶ «Ես՝ Տերը՝ Աստված,

արդարությամբ կանչեցի քեզ,

բռնեցի քո աջ ձեռքից և զորացրի քեզ,

իբրև ուխտ տվեցի քեզ ժողովրդին

և իբրև լույս՝ ազգերին,

⁷ որպեսզի կույրերի աչքերը բացես

և խավարի մեջ նստած կալանավորներին հանես բանտից ու զնդանից։

⁸ Ես եմ Տերը՝ Աստված. սա է իմ անունը,

իմ փառքը ուրիշին չեմ տա,

ոչ էլ իմ առաքինությունը՝ կուռքերին»։

⁹ Ինչ որ կանխատեսվել էր,

այն կատարվեց,

իսկ նոր բաները, որ

ես կպատմեմ ձեզ,

մինչև լինելը ցույց տրվեց ձեզ։

Օրհնության երգ

¹⁰ Օրհնեցե՛ք Տիրոջը նոր օրհներգությամբ,

քանզի նրա իշխանությունը բարձունքներում է փառաբանվում,

և նրա անունը՝ երկրի ծագերից,

ծովերում նավարկողներից,

կղզիներից ու նրանց բնակիչներից։

¹¹ Թող ուրախ լինեն անապատն ու նրա ավանները,

Կեդարի բանակատեղիներն ու բնակիչները,

թող ուրախանան Վեմի բնակիչները,

լեռների գագաթներից կանչեն,

¹² փառք տան Աստծուն,

իսկ կղզիները պատմեն նրա առաքինության մասին։

¹³ Տերը՝ Զորությունների Աստվածը, պիտի գա ու պատերազմ մղի,

նախանձախնդրություն պիտի հարուցի

և բարձրաձայն գոչի իր թշնամիների վրա։

Տերը պիտի օգնի իր ժողովրդին

¹⁴ Սկզբից իսկ լուռ եմ եղել.

մի՞թե միշտ լուռ պիտի մնամ ու հանդուրժեմ.

դիմացա ծննդկանի նման,

հիմա պիտի սարսափեցնեմ ու միանգամից ցամաքեցնեմ։

¹⁵ Լեռներն ու բլուրները պիտի հարթեցնեմ

և նրանց ամբողջ խոտը չորացնեմ,

գետերը պիտի վերածեմ կղզիների

և ճահճուտները ցամաքեցնեմ։

¹⁶ Կույրերին պիտի առաջնորդեմ մի ճանապարհով, որ նրանք չգիտեն,

պիտի քայլել տամ այնպիսի շավիղներով, որոնք ծանոթ չեն նրանց.

խավարը լույս պիտի դարձնեմ նրանց համար

և դժվարը՝ դյուրին։

Այս բաները պիտի անեմ նրանց համար և չեմ լքելու նրանց։

¹⁷ Բայց նրանք երես դարձրին ինձնից։

Ամոթ ու պատկառա՛նք ունեցեք դուք, որ ապավինել եք կուռքերին

և ձուլածոներին ասում եք.

«Մեր աստվածներն եք դուք»։

Կույր և խուլ ժողովուրդ

¹⁸ Խուլե՛ր, լսե՛ք, կույրե՛ր, նայե՛ք, որ տեսնեք.

¹⁹ ո՞վ է կույրը, եթե ոչ իմ ծառան,

ովքե՞ր են խուլերը, եթե ոչ այն մարդիկ, որ տիրում են նրանց։

Ո՞վ է կույրը, եթե ոչ հեռացածը։

Կուրացան Աստծու ծառաները։

²⁰ Շատ անգամ տեսաք, բայց չզգուշացաք,

բաց էին ձեր ականջները, բայց չլսեցիք։

²¹ Տերը՝ Աստված, կամենում էր, որ իր արդարությունը հաստատվի

և օրհնություն մատուցվի,

բայց տեսա, ²² որ ժողովուրդը կողոպտվեց ու ավարի մատնվեց.

բոլոր շտեմարաններում,

միաժամանակ նաև բոլոր ապարանքներում,

որտեղ և թաքցրին նրանց,

որոգայթներ կային.

նրանք հափշտակության մատնվեցին,

և ոչ ոք չկար, որ նրանց փրկեր,

ավարառության ենթարկվեցին,

և չգտնվեց մեկը, որ ասեր. «Հե՛տ տուր»։

²³ Ձեզնից ո՞վ է նա, որ ականջ կդնի այս ամենին

և կմտածի այն մասին, թե ի՛նչ է կատարվելու հետագայում։

²⁴ Ո՞վ մատնեց Հակոբին հափշտակության,

Իսրայելին՝ ավարառուների ձեռքը.

ո՞չ արդյոք Աստված, որի հանդեպ մեղք գործեցին,

չկամեցան ընթանալ նրա ճանապարհներով

և չլսեցին նրա օրենքները։

²⁵ Նա նրանց վրա թափեց իր զայրույթն ու բարկությունը,

պատերազմի դատապարտեց նրանց,

բոլոր կողմերից կրակի մեջ առավ նրանց,

բայց նրանցից ոչ մեկը չգիտակցեց և ուշադրություն չդարձրեց։

43

Տերը խոստանում է փրկել իր ժողովրդին

¹ Արդ, այսպես է ասում Տերը՝ Աստված, որ արարեց քեզ, Հակո՛բ, և ստեղծեց քեզ, Իսրայե՛լ.

«Մի՛ վախեցիր,

որովհետև փրկեցի քեզ և քեզ կոչեցի քո անունով, որ իմն ես։

² Եթե ջրերի միջով անցնես, քեզ հետ կլինեմ,

և գետերը քեզ չեն խեղդի.

եթե կրակի միջով անցնես, չես այրվի,

և նրա բոցը քեզ չի կիզի.

³ որովհետև ես եմ Տերը՝ քո Աստվածը՝

Իսրայելի Սուրբը, քեզ փրկողը։

Եգիպտոսն ու Եթովպիան որպես փրկագին տվեցի քեզ համար

և Սուհենը քեզ հետ փոխանակեցի։

⁴ Ուստի թանկ եղար ինձ համար,

իմ առաջ փառավորվեցիր, ու ես սիրեցի քեզ.

մարդիկ կտամ քո փոխարեն, իշխաններ՝ քո գլխի դիմաց։

⁵ Մի՛ վախեցիր, որովհետև քեզ հետ եմ.

արևելքից կբերեմ քո սերունդը

և արևմուտքից կհավաքեմ քեզ։

⁶ Հյուսիսին կասեմ՝ բե՛ր,

և հարավին՝ մի՛ արգելիր.

իմ որդիներին բերե՛ք հեռավոր երկրից

և իմ դուստրերին՝ երկրի ծագերից,

⁷ բոլորին, որոնք երբևէ կոչվել են իմ անունով.

որովհետև իմ փառքով հաստատեցի նրան,

ստեղծեցի և արարեցի նրան։

⁸ Ազատեցի կույր ժողովրդին.

և թեպետ աչքեր ունեն, սակայն կուրացած են նրանք,

և խցանված են նրանց ականջները։

⁹ Բոլոր ազգերը հավաքվեցին միասին,

նրանցից իշխաններ պիտի հավաքվեն.

ո՞վ պիտի պատմի այս,

և կամ ո՞վ պիտի հայտարարի ձեզ.

թող բերեն իրենց վկաներին և արդարանան,

թող լսեն և ասեն ճշմարտությունը։

¹⁰ Եղե՛ք ինձ վկաներ,

ես էլ՝ ձեզ վկա,-

ասում է Տերը՝ Աստված.-

և իմ ծառան, որին ընտրեցի, որպեսզի իմանաք ու հավատաք ինձ

և գիտակցեք, որ ես եմ։

Ինձնից առաջ ուրիշ Աստված չի եղել,

ինձնից հետո ևս չի լինի։

¹¹ Ե՛ս եմ Աստված,

ինձնից բացի չկա մեկը, որ փրկություն տա։

¹² Հայտնեցի և փրկեցի.

նախատեցի, ու ձեր մեջ օտար աստված չկար.

դուք ինքներդ կարող եք դրան վկա լինել։

Ես եմ Տերը՝ Աստված, ¹³ ի սկզբանե և միշտ.

չկա մեկը, որ իմ ձեռքից կարողանա ազատվել.

ինչ որ ես անեմ, ոչ ոք չի կարող հակառակն անել»։

Մի նոր ճանապարհ անապատում

¹⁴ Այսպես է ասում Տերը՝ Աստված, Իսրայելի Սուրբը, որ փրկելու է ձեզ.

«Ձեզ համար Բաբելոն կուղարկեմ,

բոլորին տեղահան կանեմ ու փախստական կդարձնեմ,

և քաղդեացիները նավերով պաշարման մեջ կառնվեն։

¹⁵ Ես եմ Տերը՝ Աստված,

ձեր Սուրբը, որ ցույց տվեցի ձեզ Իսրայելի թագավորին»։

¹⁶ Այսպես է ասում Տերը, որ ճանապարհ է բացում ծովում

և շավիղներ՝ հորդահոս ջրերի մեջ,

¹⁷ Նա, որ կառքեր ու նժույգներ է հանում և բազմահամար զորքեր.

բայց նրանք քնեցին ու չեն արթնանալու,

մարեցին, ինչպես հանգած պատրույգ։

¹⁸ «Առաջվա բաները մի՛ հիշեք,

հինը մտքներդ մի՛ բերեք,

¹⁹ քանզի ես նորն եմ անում, որ հիմա հայտնվելու է,

և դուք պիտի ճանաչեք.

ճամփա պիտի բացեմ անապատով

և անջրդի հողում գետեր պիտի բխեցնեմ։

²⁰ Ինձ պիտի օրհնեն անապատի գազանները,

համբարուներն ու ջայլամների ձագերը,

որովհետև ես ջուր եմ տալու անապատին

և անջրդի երկրին՝ գետեր իմ ընտրյալ ազգին խմեցնելու համար։

²¹ Եվ իմ ժողովուրդը, որին ստացա,

պիտի պատմի իմ սխրանքների մասին»։

Տերը հանդիմանում է Հակոբին

²² «Հիմա չէ, որ կանչեցի քեզ, Հակո՛բ,

և ոչ էլ չարչարեցի քեզ, Իսրայե՛լ։

²³ Ողջակեզների ոչխարներ չմատուցեցիր ինձ

և ոչ էլ քո զոհերով փառավորեցիր ինձ.

քո ընծաներով չծառայեցիր ինձ,

և ոչ էլ ես նեղություն պատճառեցի քեզ՝

ծախսել տալով քո կնդրուկները։

²⁴ Ինձ համար արծաթով խունկ չգնեցիր,

և ոչ էլ քո զոհերի ճարպին ես ցանկացող եղա,

բայց քո մեղքերի ու անօրենությունների մեջ ուղղելու եմ քեզ։

²⁵ Ես եմ, ես եմ այն նույնը,

որ ջնջում եմ իմ հանդեպ կատարած քո անօրենությունները

և քո մեղքերն այլևս չեմ հիշելու։

²⁶ Բայց դու հիշի՛ր, որ իրար հետ դատ ենք ունենալու.

նախ դու խոստովանի՛ր քո անօրենությունները, որ արդարացվես։

²⁷ Նախ ձեր հայրերը մեղք գործեցին,

և ձեր իշխաններն օրինազանց եղան իմ հանդեպ։

²⁸ Իշխանները պղծեցին իմ սրբությունները,

ուստի Հակոբին կորստյան մատնեցի և Իսրայելը՝ նախատինքի»։

44

Տերն օրհնում է Հակոբի սերնդին

¹ «Իսկ այժմ լսի՛ր, ո՛վ իմ ծառա Հակոբ,

և դու, Իսրայե՛լ, որին ընտրել եմ։

² Այսպես է ասում Տերը՝ Աստված,

որ արարեց քեզ,

ստեղծեց քեզ որովայնից,

և տակավին օգնություն պիտի գտնես։

Մի՛ վախեցիր, ծառա՛ իմ Հակոբ,

և դու, սիրեցյա՛լ իմ Իսրայել, որին ընտրել եմ։

³ Ես ջուր պիտի տամ ծարավածներին,

որոնք ընթանում են անջրդի տեղերով.

իմ հոգին պիտի դնեմ քո զավակի վրա

և իմ օրհնանքները՝ քո որդիների վրա։

⁴ Նրանք պիտի ծլեն ու ծաղկեն ինչպես ջրարբի խոտը,

ինչպես ուռենին՝ հոսող ջրերի մոտ։

⁵ Մեկը պիտի ասի՝ Աստծունն եմ ես,

մեկ ուրիշը խրախույս պիտի բարձրացնի հանուն Հակոբի Աստծու,

իսկ մյուսը գիր պիտի գրի իր ձեռքով՝

“Ես Աստծուն եմ պատկանում”,

և հանուն Իսրայելի քաջալերության կոչ պիտի անի»։

⁶ Այսպես է ասում Աստված՝

Իսրայելի թագավորը և նրա փրկիչ Զորությունների Տերը.

«Ես եմ առաջինը և ես եմ վերջինը,

ինձնից բացի ուրիշ Աստված չկա։

⁷ Ո՞վ է ինձ նման, թող առաջ գա,

ձայն հանի, պատմի ու ամեն ինչ ներկայացնի ինձ այն ժամանակից սկսած,

երբ ես արարեցի մարդուն,

նաև այն, ինչ գալու է.

մինչև գալը թող պատմեն ձեզ։

⁸ Մի՛ զարմացեք և մի՛ շփոթվեք.

չէ՞ որ դուք սկզբից լսեցիք,

և ես ձեզ ասացի, որ դուք ինքներդ անգամ կարող եք վկա լինել ինձ համար,

թե կա՞ այլ Աստված, բացի ինձնից»։

Մարտահրավեր սնոտի աստվածներին

⁹ Բոլոր նրանք, ովքեր ստեղծում ու կերտում էին սնոտի աստվածներ,

այն ժամանակ իսկ ոչնչություն էին։

Նրանք այդ անում էին՝ ըստ իրենց ցանկության,

սակայն դրանք չեն օգնելու նրանց,

քանզի ո՛չ տեսնում են, ո՛չ էլ ըմբռնում,

և դուք եք դրանց վկաները։

Թող ամաչի նա, ¹⁰ ով ստեղծում է ստեղծվածը

և անօգուտ կերպով կուռք է ձուլում,

¹¹ նաև բոլոր նրանք, ովքեր հաղորդակից են դառնում նրան։

Բայց ամոթահար պիտի լինեն բոլոր նրանք, ովքեր կուռքեր են ստեղծում

և կերտում անօգուտ բաներ,

որոնք, ինչից էլ պատրաստված լինեն,

բոլորովին պիտի չորանան և անտեսվեն մարդկանցից։

Պիտի հավաքվեն ամենքը,

դեմառդեմ կանգնեն միասին,

պիտի ամաչեն և առհասարակ ամոթահար լինեն։

¹² Հյուսնն իր համար գործիք կռեց,

ուրագը սրեց և տաշեց նրանով,

դուրը գործի դրեց ու հղկեց

և իր բազկի ուժով կանգնեցրեց այն։

Իսկ ինքը քաղց է զգալու,

տկարանալու, անգամ ջուր չի խմելու։

¹³ Հյուսնը փայտ ընտրեց,

չափեց այն ու գծեց,

պատկերի ձև ու նմանություն տվեց,

դուրով հղկեց այն, սոսնձապատեց,

նրան տվեց տղամարդու կերպարանք,

մարդու դեմքի ձև ու գեղեցկություն

և կանգնեցրեց իր տան մեջ։

¹⁴ Այն փայտը, որ կտրեց՝

սոճին կամ սոսին,

կաղնին կամ թեղոշը,

որոնք տնկեց Տերը,

և անձրևն աճեցրեց,

¹⁵ որպեսզի մարդու համար վառելիք լինեն,

ահա դրանից վերցրեց,

վառեց ու տաքացավ,

մի կեսի վրա եփեց,

իսկ մի կեսն էլ արձան շինեց և երկրպագեց նրան.

հենց իր շինած արձանի առջև ընկած՝ երկրպագեց նրան։

¹⁶ Նրա կեսն այրեց խարույկի մեջ,

որի կրակով հաց թխեց և միս խորովեց,

կերավ, կշտացավ ու տաքացավ՝

ասելով. «Երանի՜ ինձ, որ տաքացա և կրակը տեսա»։

¹⁷ Իսկ կեսից քանդակված աստված շինեց

և խոնարհվելով երկրպագեց նրան,

աղոթեց նրա առաջ և ասաց.

«Փրկի՛ր ինձ, քանզի դու իմ աստվածն ես»։

¹⁸ Նրանք անկարող եղան մտածել և իմանալ,

որովհետև նրանց աչքերը՝ տեսնելու համար

և նրանց սրտերը՝ հասկանալու համար բթացան։

¹⁹ Նրանք չմտածեցին,

չգիտակցեցին ու չհասկացան,

որ փայտի կեսը կրակի մեջ այրեցին

և նրա կրակի վրա հաց թխեցին,

միս խորովեցին ու կերան,

իսկ նրա կեսից կուռք պատրաստեցին

և երկրպագում են նրան։

²⁰ Իմացի՛ր, նրանց սիրտը մոխիր է,

և նրանք մոլորված են,

նրանցից ոչ ոք չի կարող փրկել նրանց հոգիները.

տեսնում եք, բայց չեք ասում, թե՝ «Խաբեություն է մեր ձեռքերի մեջ»։

Տերը փրկում է Հակոբին

²¹ «Հիշի՛ր դա, Հակո՛բ,

նաև դու, Իսրայե՛լ,

քանզի իմ ծառան ես դու.

քեզ ստեղծեցի ինձ ծառայելու համար,

և դու, Իսրայե՛լ, մի՛ մոռացիր ինձ։

²² Ահավասիկ ջնջեցի քո անօրենություններն ամպի պես

և քո մեղքերը՝ մեգի պես.

ինձ մո՛տ դարձիր, որպեսզի փրկեմ քեզ»։

²³ Ուրախացի՛ր, երկի՛նք,

քանզի Աստված ողորմեց Իսրայելին,

փո՛ղ փչեք, երկրի հիմքե՛ր,

ուրախության կանչե՛ր արձակեք,

լեռնե՛ր, բլուրնե՛ր և նրանց վրա գտնվող բոլո՛ր ծառեր,

որովհետև Աստված փրկեց Հակոբին,

և Իսրայելը պիտի փառավորվի։

²⁴ Տերը, որ փրկեց քեզ,

ստեղծեց քեզ որովայնից,

այսպես է ասում. «Ես եմ Տերը,

որ անում, կատարում եմ ամեն ինչ,

միայնակ տարածեցի երկինքը և հաստատեցի երկիրը։

²⁵ Ո՞վ է, որ վերացրեց վհուկների կախարդությունները

և դյութությունները՝ սրտերից,

ո՞վ է, որ իմաստուններին հետ է դարձնում

և նրանց խորհուրդները հիմարության վերածում,

²⁶ իր ծառաների խոսքերն է հաստատում

և արդարացնում իր պատգամաբերների խորհուրդները։

Ես եմ, որ Երուսաղեմին ասում եմ. “Բնակելի՛ դարձիր”,

և Հուդայի երկրի քաղաքներին՝ “Վերստի՛ն կառուցվեք”։

Եվ ես պիտի վերականգնեմ նրա ավերակները։

²⁷ Ես ասում եմ անդունդին՝ ավերվի՛ր.

և ես պիտի ցամաքեցնեմ նրա գետերը։

²⁸ Ես ասում եմ Կյուրոսին՝ “Իմաստնացի՛ր,

որ կատարես իմ ողջ կամքը”։

Ես ասում եմ Երուսաղեմին՝ կառուցվի՛ր,

և ես պիտի հաստատեմ իմ սուրբ տաճարը»։

45

Տերը պատրաստում է Կյուրոսի ճանապարհը

¹ Այսպես է ասում Տերը՝ Աստված, իր օծյալ Կյուրոսին.

«Ես բռնեցի քո աջ ձեռքը,

որպեսզի ազգերին հնազանդեցնեմ քեզ,

խորտակեմ թագավորների զորությունը,

քո առաջ բացեմ դռները,

և քաղաքները չփակվեն։

² Ես կընթանամ քո առջևից,

կհարթեցնեմ լեռները,

կխորտակեմ պղնձե դռները

և կփշրեմ երկաթե նիգերը։

³ Ես քեզ կտամ խավարի մեջ պահվող գանձերը

և քեզ համար կբացեմ աներևույթ հարստությունները,

որպեսզի իմանաս, որ ես եմ Տերը՝ Աստված։

Քեզ կանչում եմ քո անունով, ո՜վ Իսրայելի Աստված։

⁴ Իմ ծառա Հակոբի համար և իմ ընտրյալ Իսրայելի համար

ես քո անունով կանչեցի քեզ և ընդունեցի,

բայց դու ինձ չճանաչեցիր,

⁵ որ ես եմ Տերը՝ Աստված,

և չկա մեկ ուրիշը։

⁶ Թող իմանան արևելքից ու արևմուտքից,

որ ինձնից բացի մեկ ուրիշը չկա։

⁷ Ես եմ, որ հաստատեցի լույսը և ստեղծեցի խավարը,

ես եմ, որ խաղաղություն եմ անում և հաստատում չարը,

ես եմ Տերը՝ Աստված, որ անում եմ այս ամենը։

⁸ Երկինքը թող ուրախ լինի բարձրից,

և ամպերն արդարություն ցողեն,

երկիրը ողորմություն թող բխեցնի, լիովին արդարություն թող բխեցնի։

Ես եմ Տերը, որ հաստատեցի քեզ որպես մի լավ բան»։

Կավը և բրուտը

⁹ Ստեղծեցի քեզ իբրև բրուտի կավ։

Մի՞թե նա, որ հողն է հերկում, ողջ օրը հերկ կանի.

մի՞թե կավը բրուտին կարող է ասել՝ «Ի՞նչ ես անում,

ինչո՞ւ չես աշխատում, ձեռքեր չունե՞ս».

մի՞թե ստեղծվածն իր ստեղծողին կարող է ասել՝

«Ինչո՞ւ այսպես ստեղծեցիր ինձ»։

¹⁰ Վա՜յ նրան, որ իր հորը կասի՝ «Ինչո՞ւ ծնեցիր ինձ»,

և մորը՝ «Ինչո՞ւ ծննդաբերեցիր ինձ»,

¹¹ որովհետև այսպես է ասում Տերը՝ Աստված, Իսրայելի Սուրբը,

որ արարեց նրանց, ովքեր հետո են գալու.

«Դուք ինձ հարցրեք իմ որդիների ու դուստրերի մասին

և իմ ձեռքի գործերի համար պատվե՛ր տվեք ինձ։

¹² Ես ստեղծեցի երկիրը, և մարդուն՝ նրա վրա.

ես իմ ձեռքով հաստատեցի երկինքը,

ես հրաման տվեցի բոլոր աստղերին։

¹³ Ես արդարությամբ նրան թագավոր կարգեցի,

և նրա բոլոր ճանապարհներն ուղիղ են.

նա կկառուցի իմ քաղաքը և իմ գերված ժողովրդին հետ կբերի

առանց կաշառքի և առանց ընծաների»,-

ասում է Զորությունների Տերը։

¹⁴ Այսպես է ասում Զորությունների Տերը.

«Եգիպտացիների երկրի վաստակը,

եթովպացիների առևտուրը

և սաբայեցի մեծամեծ այրերը քո ձեռքը պիտի անցնեն և քեզ ծառայեն,

ձեռնակապերով շղթայված՝ քո հետևից պիտի շրջեն

և քեզ պիտի ներկայանան,

քեզ պիտի երկրպագեն

և ուխտ պիտի դնեն քեզ հետ,

որովհետև Աստված քո մեջ է,

ու պիտի ասեն՝ “Ուրիշ Աստված չկա, քեզնից բացի”»։

¹⁵ Դու ես Աստվածը,

իսկ մենք չգիտեինք, ո՛վ Աստված՝ փրկիչդ Իսրայելի։

¹⁶ Պիտի ամաչեն, ամոթահար պիտի լինեն նրա բոլոր հակառակորդները,

ամոթով պիտի հեռանան։ Նորոգվե՛ք իմ առաջ, ո՛վ կղզիներ,

¹⁷ քանզի Իսրայելը փրկվելու է հավիտենական փրկությամբ։

Դուք չեք ամաչելու,

այլևս ամոթահար չեք լինելու մինչև հավիտենություն։

¹⁸ Արդարև, այսպես է ասում Տերը, որ ստեղծեց երկինքը,

Աստված, որ արարեց ու հաստատեց երկիրը,

նա, որ կարգավորեց այն.

զուր տեղը չարարեց այն,

այլ ստեղծեց բնակության համար.

«Ես եմ Տերը, ուրիշը չկա։

¹⁹ Ո՛չ գաղտնի խոսեցի և ո՛չ էլ երկրի մութ տեղում.

Հակոբի սերնդին չասացի՝ “Սնոտի բաներ եք փնտրում”։

Ես եմ, ես եմ Տերը, որ խոսում եմ արդարությունը և հայտնում ճշմարտությունը»։

Աշխարհի Տերը և Բաբելոնի կուռքերը

²⁰ «Հավաքվե՛ք և եկե՛ք, միասին խորհե՛ք,

ո՛վ դուք՝ հեթանոսներից փրկվածներ։

Ովքեր վերցրել, բերում էին փայտե կուռքը և աղոթում էին աստվածներին,

չգիտակցեցին, որ նրանք չէին կարող փրկել իրենց։

²¹ Եթե պիտի հայտնեն, թող մոտ գան,

որպեսզի միասին իմանան,

թե այդ ամենի մասին սկզբից ո՛վ լուր տվեց։

Եվ այժմ էլ ասվում է ձեզ.

“Ես եմ Աստվածը, ինձնից բացի ուրիշը չկա,

արդար ու փրկող Աստվածը,

ինձնից բացի մեկ ուրիշը չկա”։

²² Դարձե՛ք ինձ մոտ, և կփրկվեք,

դուք, որ եկել եք երկրի չորս ծագերից։

Ես եմ Աստվածը. ուրիշը չկա։

²³ Անձովս եմ երդվում,

որ ինչ էլ դուրս գա իմ բերանից, արդարություն է,

և իմ խոսքերը չեն եղծվելու։

Ամեն ծունկ ինձ է խոնարհվելու,

ամեն լեզու Աստծուն է խոստովանելու

²⁴ և ասելու, որ արդարությունն ու փառքը դեպի նա կգնան։

Եվ բոլոր նրանք, ովքեր իրենց անձը բաժանելու են Աստծուց,

ամոթով են մնալու։

²⁵ Աստծով պիտի արդարանա և փառավորվի

իսրայելացիների ամեն մի սերունդ»։

46

Տերը պահպանում է Իսրայելին

¹ «Ընկավ Բելը, խորտակվեց Դագովնը.

նրանց կուռքերը դրվեցին կենդանիների և անասունների վրա։

Իբրև բեռ դրանք կապեցիք ու բարձեցիք տանջված ² ու քաղցած կենդանիների վրա.

անզոր լինելով փրկվելու պատերազմից, լքված ու խեղճ՝

գրաստների հետ միասին գերության քշվեցին։

³ Լսե՛ք ինձ, ո՛վ դու Հակոբի տուն

և դուք, Իսրայելի բոլոր կենդանի մնացածնե՛ր,

դուք, որ որովայնից իսկ ընտրյալ եք

և մանկությունից

⁴ մինչև ծերություն՝ խրատված,

քանզի ես եմ։

Դուք մինչև խոր ծերություն էլ որ հասնեք, սակայն ես եմ.

ես համբերությամբ պիտի տանեմ ձեզ,

ես ստեղծեցի և ես էլ պիտի հանդուրժեմ,

ես պիտի ընդունեմ ու փրկեմ ձեզ։

⁵ Ո՞ւմ կնմանեցնեիք ինձ,

հապա մտածե՛ք, ո՛վ դուք, մոլորյալնե՛ր,

⁶ որ քսակից ոսկեղեն եք հանում,

արծաթ եք կշռում կշեռքով

և ոսկերիչներ վարձում,

որպեսզի ձեռակերտ կուռքեր պատրաստեն,

և խոնարհվելով երկրպագում եք դրանց։

⁷ Վերցնում, ուսերիդ վրա դրած՝ բերում եք,

և երբ գետնին եք դնում,

այդպես մնում են տեղում ու չեն շարժվում.

եթե որևէ մեկը կանչի դրանց,

չեն լսի և չարիքից չեն փրկի նրան։

⁸ Հիշե՛ք այս և հոգո՛ց հանեք,

զղջացե՛ք դուք, մոլորյալնե՛ր,

սրտանց դարձի՛ եկեք,

⁹ մտաբերե՛ք առաջին գործերը՝ վաղուց կատարվածները,

քանզի ես եմ Աստվածը,

և ինձնից բացի մեկ ուրիշը չկա,

¹⁰ որ նախապես պատմի վերջում կատարվելիք բաների մասին,

երբ դեռ չեն եղել,

բայց անպայման կատարվելու են։

Ես ասացի, որ իմ բոլոր խորհուրդներն իրականանալու են,

և ամեն բան, ինչ որ ցանկանամ, կատարելու եմ։

¹¹ Ես արևելքից կանչեցի թռչուններին,

իսկ հեռավոր երկրից՝ նրան, ում մասին մտածեցի.

խոսեցի ու բերեցի,

հաստատեցի և կատարեցի,

բերեցի նրան և դրեցի հաջող ճանապարհի վրա։

¹² Լսե՛ք ինձ դուք, սրտով մոլորվածնե՛ր

և արդարությունից հեռացածներ.

¹³ մոտեցրի իմ արդարությունը,

և այն այլևս չի հեռանա,

իմ ճշմարտությունն ու փրկությունը չեմ ուշացնի.

ես Սիոնում փրկություն տվեցի Իսրայելին՝

որպես փառավորություն»։

47

Բաբելոնի դատաստանը

¹ «Իջի՛ր ու նստի՛ր հողին,

ո՛վ Բաբելոնի կույս օրիորդ,

նստի՛ր գետնին, որովհետև աթոռ չկա,

խավարի մե՛ջ մտիր, քաղդեացիների՛ դուստր,

դու, որ այլևս չես շարունակելու քնքուշ ու փափկասուն կոչվել։

² Երկա՛նք վերցրու, ալյո՛ւր աղա,

դե՛ն նետիր քողդ, քաշի՛ր մազերդ.

մերկացրո՛ւ սրունքներդ և անցի՛ր գետի միջով,

³ ու թող բացահայտվի քո ամոթը,

թող երևա քո նախատինքը,

քանզի քեզնից վերցնելու եմ քո իրավունքները։

Նա, որ փրկեց քեզ,

քեզ այլևս չի մատնի մարդկանց.

⁴ նրա անունը Զորությունների Տեր է, Իսրայելի Սուրբ։

⁵ Նստի՛ր թախծոտ ու զղջացած,

մտի՛ր խավարի մեջ, ո՛վ քաղդեացիների դուստր,

էլ չես կոչվի թագավորների զորություն։

⁶ Ես բարկացել էի իմ ժողովրդի վրա,

որովհետև պղծեցին իմ ժառանգությունը։

Ես նրանց մատնեցի քո ձեռքը,

իսկ դու ողորմածություն չարեցիր նրանց նկատմամբ։

Ծերերի լուծը սաստիկ ծանրացրիր

⁷ և ասացիր.

“Ես հավիտյան իշխան կմնամ”։

Երբեք չմտածեցիր ու չհիշեցիր վախճանի մասին։

⁸ Արդ, լսի՛ր այս, ո՛վ դու փափկասուն,

որ նստել էիր ինքնագոհ և սրտիդ մեջ ասում էիր.

“Ե՛ս եմ, և ինձ հավասար ոչ ոք չկա,

որբևայրություն չեմ քաշելու

և որբություն չեմ ճանաչելու”։

⁹ Սակայն դրանք երկուսն էլ՝

որբևայրությունն ու անզավակությունը,

մեկ օրվա մեջ հանկարծակի քեզ վրա են հասնելու,

անսպասելի քեզ վրա են գալու քո դյութությունների,

քո սաստկացող կախարդությունների պատճառով,

¹⁰ քո չարության վրա հույս դնելու պատճառով,

որովհետև ասում էիր. “Ես եմ, և ինձ հավասար ոչ ոք չկա”։

Դու, որ այդպես ես մտածում,

իմացի՛ր, որ քո պոռնկությունն ամոթանք պիտի լինի քեզ համար,

քանզի քո սրտի մեջ ասացիր.

“Ես եմ, և ինձ հավասար ոչ ոք չկա”։

¹¹ Այնպիսի կորուստ է քեզ վրա հասնելու,

որ չես իմանալու,

այնպիսի խորխորատ,

որ ընկնելու ես նրա մեջ.

քեզ վրա մի թշվառություն է գալու,

որ չես կարողանալու մաքուր մնալ,

քեզ վրա հանկարծակի կորուստ է գալու,

որ դու չես գիտակցելու։

¹² Դե հիմա մնա՛ քո դյութությունների

ու քո բազում կախարդությունների մեջ,

որոնք քո մանկությունից սկսած սովորեցիր.

գուցե կարողանաս օգո՞ւտ քաղել,

¹³ գուցե կարողանաս ո՞ւժ առնել։

Չարչարվեցիր քո խորհուրդներով։

Թող վեր կենան ու քեզ փրկեն աստղագուշակները,

որոնք դիտում են երկնքի աստղերը,

թող պատմեն քեզ,

թե ի՛նչ է գալու քո գլխին։

¹⁴ Ահավասիկ նրանք բոլորը խռիվի պես,

պիտի այրվեն կրակի մեջ

և իրենց հոգիները չպիտի կարողանան փրկել բոցից.

նստած ես կրակի կայծերի վրա.

¹⁵ դրանք քեզ համար օգնություն պիտի լինեն։

Քո վաստակն այն վաճառականները եղան,

որոնց հետ առևտուր արեցիր քո մանկությունից.

նրանք բոլորն էլ իրար հետևից մոլորվեցին,

և դու փրկություն չունես»։

48

Իսրայելը չի լսում Տիրոջը

¹ «Լսե՛ք այս, ո՛վ Հակոբի տուն,

Իսրայելի անունով կոչվածնե՛ր և Հուդայի սերնդի՛ց ծնվածներ,

որ երդվում եք Տիրոջ՝ Իսրայելի Աստծու անունով և հիշում նրան,

բայց ո՛չ ճշմարտությամբ, ո՛չ արդարությամբ։

² Դուք ձեզ խրախուսում եք սուրբ քաղաքի անունով

և ձեզ հաստատուն եք համարում Իսրայելի Աստծու շնորհիվ,

որի անունը Զորությունների Տեր է։

³ Մինչև հիմա պատմում էի առաջին եղելությունների մասին.

դրանք իմ բերանից ելան և լսելի դարձան.

ես հանկարծակի կատարեցի,

և եղան։

⁴ Գիտեի, որ դու խիստ ես,

քո պարանոցը երկաթե ջղերից է,

ու քո ճակատը՝ պղնձից։

⁵ Քեզ պատմվեց մինչև այժմ կատարվածը,

դեռ չեղած՝ դրանց մասին լուր տվեցի քեզ,

որպեսզի երբեք չասես. “Դրանք իմ կուռքերը կատարեցին”,

չասես. “Քանդակվածները և ձուլածո կուռքերը պատմեցին ինձ”։

⁶ Լսեցիք ամեն ինչ և ձեր մտքում չպահեցիք,

սակայն քեզ լսելի դարձրի այն նորի մասին,

որ այսուհետև պիտի լինի։

Բայց չասացիր, թե՝ ⁷ Այժմ պիտի լինի և ոչ թե վաղուց է եղել,

հնում, և դու չես լսել այդ մասին։

Մի՛ ասա. “Այո՛, գիտեմ դա”,

⁸ որովհետև ո՛չ գիտես և ո՛չ էլ իմացել ես,

և հենց սկզբից քո ականջները չբացեցիր.

քանզի գիտեմ, որ չափազանց արհամարհող ես

և դեռ որովայնից անօրեն ես կոչվում։

⁹ Իմ անվան համար ես քեզ ցույց տվեցի իմ բարկությունը և իմ փառքը,

որ բերել եմ քեզ վրա,

որպեսզի քեզ չոչնչացնեմ։

¹⁰ Ահավասիկ վաճառեցի քեզ,

բայց ոչ հանուն արծաթի,

և փրկեցի քեզ աղքատության հնոցից։

¹¹ Իմ անվան համար արեցի այդ,

որպեսզի իմ անունը չհայհոյվի.

ես իմ փառքը ուրիշին չեմ տա»։

Տերը հորդորում է ելնել Բաբելոնից

¹² «Լսի՛ր ինձ, Հակո՛բ,

և դու, Իսրայե՛լ, որին կանչում եմ ես. ես եմ առաջինը,

ես եմ և հավիտենականը։

¹³ Իմ ձեռքը դրեց երկրի հիմքերը,

իմ աջը հաստատեց երկինքը.

կկանչեմ նրանց բոլորին, և նրանք միասին կկանգնեն։

¹⁴ Կհավաքվեն ամենքը և կլսեն,

թե սա ո՛վ պատմեց նրանց։

Հանուն քո սիրո կատարեցի կամքդ Բաբելոնի նկատմամբ՝

վերացնելու համար քաղդեացիների սերունդը։

¹⁵ Ես կանչեցի և ես խոսեցի,

ես բերեցի նրան և հաջողեցրի նրա ճանապարհը։

¹⁶ Մոտեցե՛ք ինձ և լսե՛ք այս.

հենց սկզբից ես ո՛չ գաղտնի խոսեցի

և ո՛չ էլ ինչ-որ խավար տեղում.

երբ դրանք կատարվում էին, ես այնտեղ էի»։

Եվ այժմ Տերն ինձ ուղարկեց,

Տերը և նրա Հոգին։

¹⁷ Այսպես է ասում Տերը՝ Իսրայելի Սուրբը, որ փրկեց քեզ.

«Ես եմ քո Աստվածը,

ես քեզ ճանապարհ ցույց տվի, որով դու գնալու ես։

¹⁸ Եվ եթե դու հետևեիր իմ պատվիրաններին,

ապա քո խաղաղությունը գետի նման կլիներ,

և քո արդարությունը՝ ծովի ալիքների նման։

¹⁹ Քո սերունդը ավազի չափ կլիներ,

և քո որովայնից ծնվածները՝ երկրի հողի չափ։

Սակայն դու այժմ չես ոչնչանալու,

և քո անունը չի կորչելու իմ առաջ»։

²⁰ Դո՛ւրս եկեք Բաբելոնից,

փախե՛ք քաղդեացիներից,

ուրախ ձայնով պատմե՛ք.

թող լսելի լինի այն,

մինչև աշխարհի ծագերը հայտնե՛ք ու ասացե՛ք.

«Տերը փրկեց իր ծառա Հակոբին»։

²¹ Եվ եթե անապատում նրանք ծարավեն,

նրանց համար նա վեմից ջուր կհանի։

Վեմը կպատռվի,

ջրեր կբխեն,

և իմ ժողովուրդը կխմի։

²² «Ամբարիշտներն ուրախություն չեն տեսնելու»,-

ասում է Տերը։

49

Իսրայելը՝ ազգերի լույս

¹ «Լսե՛ք ինձ, կղզինե՛ր,

ակա՛նջ դրեք, ազգե՛ր.

շատ ժամանակներ անց պիտի հաստատվի դա»,- ասում է Տերը։

Ինձ կանչեց, երբ ես դեռ արգանդում էի,

իմ անունը տվեց, երբ ես դեռ իմ մոր որովայնում էի։

² Իմ բերանը հաստատեց սուր սուսերի պես

և ինձ թաքցրեց իր ձեռքի հովանու տակ,

ինձ դարձրեց ինչպես մի ընտիր նետ և թաքցրեց իր կապարճի մեջ։

³ Նա ինձ ասաց.

«Դու իմ ծառան ես, Իսրայե՛լ,

ես քեզնով պիտի փառավորվեմ»։

⁴ Իսկ ես ասացի.

«Ուրեմն զուր տեղը հոգնեցի,

իմ ուժն ունայն ծախսեցի,

բայց իմ իրավունքը Տիրոջից է,

և իմ վաստակն իմ Աստծու առաջ է։

⁵ Արդ, Տերը, որն ինձ որովայնից իր համար ծառա ստեղծեց,

ասաց, որ Հակոբին և Իսրայելին իր շուրջը հավաքեմ։

Պիտի հավաքվեմ ու փառավորվեմ Տիրոջ առաջ,

և իմ Աստվածն ինձ համար զորություն է լինելու։

⁶ Ապա ասաց ինձ.

«Մեծ բան է քեզ համար այն, որ քեզ իմ ծառան եմ կոչում,

որպեսզի հաստատես Հակոբի ցեղերը

և Իսրայելի ցրվածներին վերադարձնես։

Ահավասիկ ազգի համար քեզ իբրև ուխտ հաստատեցի

և հեթանոսների համար՝ իբրև լույս,

որպեսզի փրկություն լինես մինչև աշխարհի ծագերը»։

⁷ Այսպես է ասում Տերը՝

Իսրայելի Աստվածը, որ փրկեց քեզ.

«Սրբացրե՛ք նրան, ով անարգում է իր անձը,

ով արհամարհված է ազգերի կողմից և իշխանների ծառաներից,

թագավորները պիտի տեսնեն նրան և ոտքի ելնեն,

իշխանները պիտի երկրպագեն նրան հանուն Տիրոջ, որովհետև հավատարիմ է

Իսրայելի Սուրբը, որն ընտրեց քեզ»։

Իսրայելի մեծ վերադարձը գերությունից

⁸ Այսպես է ասում Տերն Իսրայելին.

«Պատեհ ժամանակ քեզ լսեցի

և փրկության օրը օգնեցի.

ես քեզ ստեղծեցի և ուխտի համար հեթանոսներին տվեցի քեզ՝

երկիրը վերականգնելու և ավերակ ժառանգությունները ժառանգներին տալու,

⁹ շղթայվածներին ասելու՝ ելե՛ք,

իսկ խավարի մեջ գտնվողներին՝ հայտնվե՛ք։

Նրանք պիտի արածեն բոլոր ճանապարհներին,

նրանց արոտը պիտի լինի բոլոր շավիղների վրա։

¹⁰ Նրանք ո՛չ քաղց են զգալու, ո՛չ ծարավելու,

ո՛չ էլ արևից խորշակահար են լինելու,

և նա, որ ողորմելու է, պիտի մխիթարի նրանց,

աղբյուրների ակունքների մոտ պիտի տանի նրանց։

¹¹ Բոլոր լեռները նրանց համար ճանապարհ պիտի դարձնեմ

և բոլոր շավիղներս արոտների վերածեմ։

¹² Ահա ոմանք պիտի գան հեռաստանից,

ոմանք՝ հյուսիսից և ծովից,

և ոմանք՝ պարսից երկրից»։

¹³ Ուրախացի՛ր, երկի՛նք,

և թող ցնծա երկիրը,

թող լեռները ցնծություն կանչեն,

և բլուրները՝ արդարություն,

քանզի Աստված ողորմեց իր ժողովրդին,

մխիթարեց իր ժողովրդի հեզերին։

¹⁴ Բայց Սիոնն ասաց.

«Տերն ինձ թողեց, Աստված ինձ մոռացավ»։

¹⁵ «Մի՞թե կինը կմոռանա իր մանկանը կամ չի՞ գթա իր որովայնի ծնունդներին,

և եթե կինը մոռանալու էլ լինի այդ,

ես, սակայն, քեզ չեմ մոռանա,-

ասում է Տերը։-

¹⁶ Ահա իմ ձեռքերի վրա գծագրեցի քո պարիսպը,

և ամեն ժամ դու իմ առաջ ես։

¹⁷ Դու արագորեն պիտի վերաշինվես նրանց ձեռքով,

որոնք քանդեցին քեզ։

Քեզ ավերողները քո միջից պիտի վտարվեն։

¹⁸ Բարձրացրո՛ւ քո աչքերը,

նայի՛ր շուրջդ և տե՛ս բոլորին.

ահա հավաքվել ու գալիս են դեպի քեզ։

Կենդանի եմ ես,- ասում է Տերը։

Նրանց բոլորին պիտի հագնես պատմուճանի պես,

նրանց քո վրա պիտի կրես հարսի զարդի պես։

¹⁹ Արդարև, քո ավերակները,

ամայացած ու կործանված երկիրը

նեղվածք պիտի լինեն իրենց բնակիչների համար,

և քեզ կուլ տվողները քեզնից պիտի հեռանան։

²⁰ Քո որդիները, որոնց դու կորցրիր,

քո ականջին պիտի ասեն.

“Այս տեղը նեղ է մեզ համար.

ընդարձակի՛ր մեզ համար, որ բնակվենք”։

²¹ Եվ քո մտքում պիտի ասես.

“Ո՞վ ինձ համար ծնեց սրանց.

չէ՞ որ ես անզավակ ու այրի էի,

պանդուխտ ու արգելափակված.

ո՞վ սրանց սնեց ինձ համար,

չէ՞ որ ես միայնակ էի մնացել,

սրանք որտե՞ղ էին”»։

²² Այսպես է ասում Տերը.

«Ահա իմ ձեռքը պիտի բարձրացնեմ ազգերի վրա

և իմ դրոշը կանգնեցնեմ կղզիներում,

ու քո որդիներին իրենց գիրկն առած

և քո դուստրերին իրենց ուսերին դրած պիտի բերեն։

²³ Թագավորները քո խնամակալներն են դառնալու,

իսկ նրանց կանայք՝ քո ծծմայրերը,

երկրի երեսին քեզ են երկրպագելու

և լիզելու քո ոտքերի փոշին.

պիտի գիտակցես, որ ես եմ Տերը,

ու ինձ ապավինողները չպիտի ամաչեն։

²⁴ Որևէ մեկը մի՞թե կարող է խլել հսկայի կողոպուտը

կամ կարո՞ղ է հանիրավի գերեվարվել ու ազատվել»։

²⁵ Այսպես է ասում Տերը.

«Եթե որևէ մեկը հսկային գերեվարի,

կառնի նրա ավարը.

նա, ով հսկայի ավարը կվերցնի,

շատ լավ էլ կազատվի։

Բայց ես իմ դատաստանն եմ անելու

և փրկելու եմ իմ որդիներին։

²⁶ Քեզ նեղողներն իրենց մարմինը պիտի ուտեն

և, ինչպես նոր գինի, պիտի խմեն իրենց արյունն ու հարբեն։

Եվ ամեն մարմին պիտի իմանա,

թե ես եմ Տերը, որ փրկեցի ու օգնեցի քեզ

և զորավոր դարձրի Հակոբին»։

50

Իսրայելը բաժանված չէ իր Տիրոջից

¹ Այսպես է ասում Տերը.

«Ո՞ւր է ապահարզանի թուղթը, որով արձակեցի ձեր մորը,

կամ ո՞ւր է վաճառականների մուրհակը, որով վաճառեցի ձեզ։

Դուք ձեր մեղքերով վաճառվեցիք,

և ձեր անօրենությունների պատճառով արձակեցի ձեր մորը։

² Եկա, և մարդ չկար.

կանչեցի, բայց ոչ ոք չկար, որ լսեր.

մի՞թե իմ ձեռքը չի կարող փրկել,

կամ մի՞թե ես ի զորու չեմ ազատելու։

Ահա իմ սպառնանքով կցամաքեցնեմ ծովը,

կչորացնեմ գետերը,

և ջրերի պակասությունից կչորանան նրանց ձկները

ու կսատկեն ծարավից։

³ Խավար կհագցնեմ երկնքին,

նրա հանդերձը քուրձ կդարձնեմ»։

Ծառան ապավինում է Տիրոջ օգնությանը

⁴ Տերը ինձ խրատող լեզու է տալիս,

որ կարողանամ ճիշտ ժամանակին խոսք ասել,

ամեն առավոտ ինձ զգուշացրեց,

սրեց իմ լսելիքը, որ ունկնդիր լինեմ։

⁵ Տիրոջ խրատը կբացի իմ ականջները,

և ես անհնազանդ չեմ դառնա ու չեմ ընդդիմանա։

⁶ Թիկունքս հարվածների տվեցի, ծնոտներս՝ ապտակի,

և երեսս շուռ չտվեցի երեսիս թքելու նախատինքից։

⁷ Տերը եղավ ինձ օգնական,

դրա համար էլ ամոթ չզգացի,

այլ իմ երեսը դարձրի կարծր քարի պես։

Գիտեմ, որ չեմ ամաչելու,

⁸ քանի որ մոտ է նա, ով արդարացնելու է ինձ։

Ո՞վ է իմ ոսոխը, թող գա և կանգնի մեջտեղը.

ո՞վ է նա, որ դատապարտելու է ինձ, թող մոտենա ինձ.

⁹ ահա Տերն է ինձ օգնական,

և ո՞վ է, որ չարչարելու է ինձ։

Ահա դուք բոլորդ ձորձերի պես պիտի հնանաք,

և ցեցը պիտի ուտի ձեզ։

¹⁰ Ձեր մեջ ո՞վ կա, որ վախենում է Տիրոջից,

թող լսի նրա ծառայի ձայնը։

Ովքեր գնում էին խավարի մեջ,

և լույս չկար նրանց համար,

թող իրենց հույսը դնեն Տիրոջ անվան վրա և խրախուսվեն Աստծով։

¹¹ Ահա դուք ամենքդ, որ վառված եք հրով,

պիտի պարտվեք բոցից, պիտի ընթանաք ձեր իսկ կրակի լույսի միջով

ու պիտի բորբոքվեք բոցով։

Դա իմ պատճառով պիտի հասնի ձեզ,

և դուք տրտմության մեջ պիտի ննջեք։

51

Խրախույս Տիրոջը փնտրողների համար

¹ «Լսե՛ք ինձ դուք, որ արդարության եք հետամուտ

և փնտրում եք Տիրոջը,

նայե՛ք այն հաստատուն վեմին, որից կերտվել եք,

և այն հորի փոսին, որից հանվել եք։

² Ձեր հայր Աբրահամի՛ն նայեք և Սառայի՛ն, որ ծնեց ձեզ.

քանի որ մենակ էր և կանչեցի նրան,

օրհնեցի նրան, սիրեցի նրան և բազմացրի նրան։

³ Արդ, ես մխիթարելու եմ քեզ, Սիո՛ն,

մխիթարելու եմ քո բոլոր ավերակները.

նրա բոլոր ավերակները դրախտի եմ վերածելու,

արևմտյան կողմն էլ՝ Տիրոջ դրախտի.

ուրախություն ու ցնծություն են նրա մեջ տեղ գտնելու,

փառաբանություն ու օրհնության ձայն։

⁴ Լսի՛ր ինձ, լսի՛ր ինձ, ո՛վ ժողովուրդ,

ակա՛նջ դրեք ինձ, ո՛վ թագավորներ,

քանզի ինձնից է դուրս գալիս օրենքը,

և իմ դատաստանը լույս է հեթանոսների համար։

⁵ Արագ, արա՛գ պիտի մոտենա իմ արդարությունը,

և իմ փրկությունը պիտի ելնի լույսի պես.

հեթանոսներն իմ բազկին պիտի ապավինեն,

կղզիները պիտի սպասեն ինձ և հույս դնեն իմ բազկի վրա։

⁶ Դեպի երկի՛նք բարձրացրեք ձեր աչքերը

և նայե՛ք դեպի ցած՝ երկրին.

երկինքը հաստատված է ծխի պես,

և երկիրը պիտի մաշվի ձորձի պես,

նրա բնակիչները ևս նույն կերպ պիտի կորչեն,

բայց իմ փրկությունը հավիտենապես պիտի մնա,

և իմ արդարությունը չի պակասելու։

⁷ Դուք, որ ճանաչում եք իրավունքը,

և դու, իմ ժողովո՛ւրդ, որ սրտիդ մեջ իմ օրենքն ես կրում,

լսե՛ք ինձ.

մի՛ վախեցեք մարդկանց նախատինքից,

և նրանց բամբասանքը թող ձեզ ամոթանք չպատճառի,

⁸ քանզի ժամանակի ընթացքում դրանք պիտի մաշվեն ձորձերի պես

և ինչպես բուրդ, որին ուտում է ցեցը,

բայց իմ արդարությունը պիտի մնա հավիտյան,

և իմ փրկությունը՝ սերնդից սերունդ»։

Զարթնի՛ր, Երուսաղե՛մ

⁹ Զարթնի՛ր, զարթնի՛ր, Երուսաղե՛մ,

և հագի՛ր քո բազկի զորությունը,

զարթնի՛ր, ինչպես հին օրերում,

ինչպես վաղեմի ժամանակներում։

Մի՞թե դու նա չես, որ հատեցիր լայնությունը,

վանեցիր վիշապին.

Դու այն չե՞ս, ¹⁰ որ ցամաքեցրեց ծովը,

անդունդների ջրերի հորդությունը

և ծովերի խորությունները ճանապարհ դարձրեց,

որպեսզի այնտեղով անցնեն փրկվողներն ¹¹ ու ազատվողները։

Տիրոջ շնորհիվ պիտի լինի վերադարձը,

և նրանք Սիոն են գալու ցնծությամբ ու հավիտենական ուրախությամբ.

նրանց գլխի վրա օրհնություն պիտի լինի,

և ուրախությունը պիտի հասնի նրանց.

ցավը, տրտմությունն ու հեծությունը հեռացան։

¹² «Ես եմ, ես այն նույնն եմ, որ մխիթարեցի քեզ։

Իմացի՛ր, թե դու ո՛վ էիր,

որ վախեցար մահկանացու մարդուց և ադամորդուց,

որոնք չորացան խոտի պես։

¹³ Դու մոռացար Աստծուն՝ քո Արարչին,

որ ստեղծեց երկինքը և հաստատեց երկիրը,

դու միշտ՝ ամեն օր, վախենում էիր քեզ նեղողի բարկությունից՝

մտածելով, թե նա կբնաջնջի քեզ։

Բայց ո՞ւր է քեզ նեղողի բարկությունը։

¹⁴ Քո փրկությունը նա չի կարող կասեցնել,

չի կարող ուշացնել,

ոչ էլ կարող է քեզ ոչնչացնելով սպանել.

և քո հացը չի պակասելու։

¹⁵ Ես եմ Տերը՝ քո Աստվածը,

որ ալեկոծում եմ ծովը

և նրա ալիքներին ստիպում գոչել.

Զորությունների Տեր է իմ անունը։

¹⁶ Իմ խոսքերը քո բերանը պիտի դնեմ

և իմ ձեռքի հովանու տակ պիտի առնեմ,

որովհետև երկինքը կանգնեցրեցի,

երկրի հիմքերը հաստատեցի և ասացի Սիոնին.

“Դու իմ ժողովուրդն ես”»։

¹⁷ Զարթնի՛ր, զարթնի՛ր, վե՛ր կաց, Երուսաղե՛մ,

դու, որ Տիրոջ ձեռքից խմեցիր նրա բարկության բաժակը,

կործանման բաժակը,

ցասման բաժակը,

որ խմեցիր ու դատարկեցիր։

¹⁸ Եվ քո բոլոր որդիների մեջ, որոնց դու ծնեցիր,

մեկը չեղավ, որ մխիթարեր քեզ.

քո բոլոր որդիների մեջ, որոնց դու մեծացրիր,

մեկը չեղավ, որ զորավիգ դառնար քեզ։

¹⁹ Երկու բան կա քեզ հակառակ.

և ո՞վ է, որ ցավակից է լինելու քեզ.

կործանում և կոտորած, սով և սուր է լինելու,

և ո՞վ է ցավակցելու քեզ։

²⁰ Քո որդիները տարակուսած քուն են մտել բոլոր ճանապարհների խաչմերուկներում։

Նրանք կարծես կիսեփ ճակնդեղ լինեն։

Նրանց մեջ Տիրոջ բարկությունն է լցված,

նրանք խզված են Տիրոջից՝ Աստծուց։

²¹ Դրա համար էլ լսի՛ր, ո՛վ տառապյալդ,

որ հարբած ես, բայց ոչ գինուց։

²² Այսպես է ասում Տերը՝ Աստված,

որ դատում է իր ժողովրդին.

«Ահա քո ձեռքից հեռացրի կործանման բաժակը,

իմ բարկության բաժակը,

և դու այլևս չես խմելու այն։

²³ Այն տալու եմ քեզ անիրավողների ձեռքը,

նրանց ձեռքը, ովքեր տառապեցրին քեզ,

ովքեր քեզ ասում էին.

“Խոնարհվի՛ր, որ անցնենք”։

Եվ քո մեջքը գետնին հավասար դարձրին քո վրայով անցնողների համար»։

52

Փրկության ուրախ լուրը

¹ Զարթնի՛ր, զարթնի՛ր, Սիո՛ն,

հագի՛ր քո զորությունը, Սիո՛ն.

դու էլ քո փա՛ռքը հագիր,

ո՛վ սուրբ քաղաքդ Երուսաղեմ,

որովհետև պիղծերն ու անթլփատներն այլևս չեն անցնելու քո միջով։

² Թոթափի՛ր քո փոշին, ոտքի՛ ել ու նստի՛ր, ո՛վ Երուսաղեմ,

քանդի՛ր քո պարանոցի կապը,

ո՛վ դու Սիոնի գերի դուստր։

³ Արդարև, այսպես է ասում Տերը. «Դուք ձրի վաճառվեցիք և արծաթով չեք փրկվելու»։ ⁴ Այսպես է ասում Տերը. «Իմ ժողովուրդը նախ եգիպտացիների երկիրն իջավ, որպեսզի իբրև նժդեհ ապրի այնտեղ, ապա բռնությամբ Ասորեստան քշվեց։ ⁵ Բայց այժմ ինչո՞ւ եք այստեղ»։ Այսպես է ասում Տերը. «Իմ ժողովուրդը զուր տեղը քշվեց. նրանք ապշահար էին մնացել և լաց էին լինում»։ Այսպես է ասում Տերը. «Ձեր պատճառով իմ անունը մշտապես հայհոյվում է հեթանոսների մեջ։ ⁶ Դրա համար իմ ժողովուրդն այդ օրը պիտի ճանաչի իմ անունը, իմանա, որ ես նույնն եմ, որի մասին խոսում էին, և ահա եկել հասել եմ»։

⁷ Լեռների վրա ի՜նչ գեղեցիկ են ոտքերը նրա,

ով խաղաղության լուրն է ավետում,

ով բարության ավետիսն է բերում

և քո փրկության մասին հայտնում՝ Սիոնին ասելով.

«Քեզ վրա թագավորելու է Աստված»։

⁸ Քո պահապանների ձայնը բարձրացավ,

բոլորն առհասարակ ցնծալով ձայն են տալու,

որովհետև իրենց աչքերով են տեսնելու այն ժամանակը,

երբ Տերը ողորմելու է Սիոնին։

⁹ Լեռները Երուսաղեմի ավերակների հետ միասին ցնծության կոչ պիտի արձակեն,

քանզի Տերը ողորմեց նրանց և փրկեց Երուսաղեմը։

¹⁰ Տերն իր սուրբ բազուկը պիտի ցույց տա ի տես բոլոր ազգերի,

և երկրի բոլոր կողմերը պիտի տեսնեն մեր Աստծու փրկությունը։

¹¹ Հեռացե՛ք, հեռացե՛ք,

ելե՛ք այդտեղից և պիղծերին մի՛ մոտեցեք.

ելե՛ք այդ երկրի միջից և հեռացե՛ք,

դուք, որ վերցրել բերում եք Տիրոջ սպասքը։

¹² Ո՛չ խռովությամբ պիտի ելնեք

և ո՛չ էլ փախչելով գնաք,

քանզի ձեր առջևից Տերն ինքն է ընթանալու,

և ձեզ հավաքելու է նա, որ Աստվածն է Իսրայելի։

Տիրոջ ծառան պիտի բարձրանա

¹³ Ահավասիկ խելահաս պիտի դառնա իմ ծառան,

պիտի հառնի, բարձրանա ու մեծապես փառավորվի։

¹⁴ Ինչպես որ շատերը քեզ վրա պիտի զարմանան,

այդպես էլ կանշքանա քո տեսքը մարդկանց համար

և քո փառքը՝ մարդկանց որդիների համար,

¹⁵ այդպես էլ բազում ազգեր զարմանալու են քեզ վրա,

թագավորների բերանները պապանձվելու են,

որովհետև տեսնելու են այն,

ինչի մասին նրանց չի պատմվել,

և իմանալու են այն,

ինչի մասին չեն լսել։

53

Տիրոջ ծառան պիտի անարգվի մարդկանցից

¹ Տե՛ր, ո՞վ հավատաց մեր տված լուրին,

և ո՞ւմ հայտնի դարձավ Տիրոջ բազուկը։

² Նրա առջև կանգնեցինք որպես մանուկ,

որպես արմատ՝ ելած անջրդի հողից.

ո՛չ տեսք ուներ նա, ո՛չ էլ վեհություն։

Տեսանք մենք նրան,

բայց նա ո՛չ տեսք ուներ, ո՛չ էլ գեղեցկություն։

³ Նրա տեսքն ավելի անարգ էր ու նսեմ,

քան բոլոր մարդկանց որդիներինը։

Նա հարվածների ենթակա մի մարդ եղավ,

որ ցավերին համբերել գիտի.

իր երեսը դարձնելով՝ արհամարհվեց ու բանի տեղ չդրվեց։

⁴ Նա մեր մեղքերն էր վերցնում

և մեզ համար չարչարվում,

սակայն մենք նրա ցավերը,

հարվածներն ու չարչարանքները համարեցինք

իբրև Աստծուց եկած բան։

⁵ Բայց նա վիրավորվեց մեր մեղքերի համար

և մեր անօրենությունների համար պատժվեց.

մեր խաղաղության համար նա՛ պատիժ կրեց,

և նրա վերքերով մենք բժշկվեցինք։

⁶ Ամենքն էլ մոլորված ոչխարներ են.

մարդն իր ճանապարհին մոլորվեց,

և Տերը նրա՛ն մատնեց մեր մեղքերի համար։

⁷ Ու նա վշտից իր բերանն անգամ չի բացում։

Նա մորթվելու տարվեց ոչխարի պես.

և գառան նման անմռունչ կանգնած է խուզողի առաջ

և այնպես իր բերանը չի բացում։

⁸ Նրա խոնարհության շնորհիվ նրա դատաստանը վերացավ,

և նրա ազգատոհմի մասին ո՞վ պիտի պատմի։

Երկրի վրա վերջ տվեցին նրա կյանքին.

իմ ժողովրդի անօրենությունների պատճառով նա մահվան մատնվեց։

⁹ Պիտի պատժեմ չարերին

նրա գերեզմանի փոխարեն և հարուստներին՝

նրա մահվան փոխարեն,

որովհետև նա անօրենություն չգործեց,

և նենգությունը տեղ չգտավ նրա բերանում։

¹⁰ Տերը կամենում է մաքրել նրան վերքերից։

Եթե մեղքերի զոհը մատուցեք,

ապա երկարակյաց սերնդի կարժանանաք,

որի միջոցով Տերը կցանկանա ազատել

¹¹ նրան իր ցավերից, նրան լույս ցույց տալ և օժտել իմաստությամբ,

արդարացնել արդարին,

որը հոժարակամ ծառայեց շատերին

և իր վրա է վերցնելու նրանց մեղքերը։

¹² Ահա թե ինչու նա շատ բան պիտի ժառանգի

և հզորների ավարը պիտի բաժանի,

որովհետև նրա անձը մահվան մատնվեց,

և նա հանցավորների հետ դասվեց։

Նա շատերի մեղքերը կրեց

և նրանց անօրենությունների համար դատապարտվեց։

54

Խաղաղության ուխտը չի խախտվի

¹ Ուրախացի՛ր, ո՛վ ամուլ, որ չէիր ծնում,

կանչի՛ր ու աղաղա՛կ բարձրացրու, որ երկունքի ցավով չէիր բռնվում,

քանզի բազում են անամուսին կնոջից ծնված որդիները,

ավելի շատ, քան ամուսին ունեցող կնոջից ծնված որդիները։

Չէ՞ որ Տերն ասաց.

² «Ընդարձակի՛ր քո վրանի և քո սրահների տեղը,

կանգնեցրո՛ւ և խնայողություն մի՛ արա.

երկարացրո՛ւ քո պարանները, հաստատի՛ր քո ցցերը։

³ Աջ ու ձա՛խ տարածվիր,

և քո սերունդը պիտի ժառանգի հեթանոսներին

և պիտի կառուցի ավերված քաղաքները։

⁴ Մի՛ վախեցիր, որ քեզ ամոթահար արեցին,

մի՛ նեղվիր, որ քեզ նախատեցին,

որովհետև վաղնջական ամոթը պիտի մոռանաս

և որբևայրությանդ նախատինքն այլևս չպիտի հիշես»։

⁵ Տերն է քեզ համար անելու այդ,

Զորությունների Տեր է նրա անունը,

և նա, որ փրկեց քեզ,

Իսրայելի նույն Աստվածն է, որը կկոչվի ողջ երկրի Աստվածը։

⁶ Տերը քեզ չկանչեց որպես լքված ու հուսահատ կնոջ

և ոչ էլ իբրև մի կնոջ, որ մանկուց ատելի է եղել,

այլ Աստված ասաց.

⁷ «Միառժամանակ լքեցի քեզ,

բայց մեծ գթությամբ պիտի ողորմեմ քեզ։

⁸ Փոքր-ինչ բարկանալու պատճառով երեսս շրջեցի քեզնից,

բայց մեծ ողորմությամբ հավիտենապես պիտի ողորմեմ քեզ»։

Այդպես ասաց Տերը, որ փրկեց քեզ։

⁹ «Սա ինձ համար նույնն է, ինչ Նոյի օրոք՝ ջրհեղեղի ժամանակ.

ինչպես որ այն ժամանակ նրան երդվեցի,

որ չեմ բարկանա երկրի վրա,

այնպես էլ երդվեցի, որ չեմ բարկանա քեզ վրա։

¹⁰ Իմ սպառնալիքով չեմ շարժելու լեռները,

չեմ փոփոխելու բլուրները.

ո՛չ իմ ողորմությունն է պակասելու քեզնից,

ո՛չ էլ քո խաղաղության ուխտը պիտի վերանա»,- ասաց Տերը։

Երուսաղեմը պիտի գեղեցկանա

¹¹ «Ո՛վ դու, որ տառապյալ ես և խախտված,

ես հաշտվել եմ քեզ հետ,

մինչև որ մխիթարվես։

Ահա ես քո քարերը սուտակից

¹² և քո հիմքերը շափյուղայից եմ պատրաստել.

քո աշտարակները հասպիսից պիտի կանգնեցնեմ, դռներդ՝ բյուրեղից

և քո շուրջը պարիսպ պիտի քաշեմ թանկագին և ընտիր-ընտիր քարերից։

¹³ Աստծուց խրատված որդիներ պիտի ունենաս,

քո մանուկները մեծ խաղաղության մեջ պիտի լինեն։

¹⁴ Արդարությամբ պիտի շենանաս։

Հեռո՛ւ կանգնիր անիրավից, որ ահ չունենաս,

և դողը քեզ չբռնի։

¹⁵ Ահա ինձ համար դեպի քեզ եկվորներ պիտի գան,

քեզ մոտ պիտի պանդխտեն և քեզ ապաստանեն։

¹⁶ Ահավասիկ ես քեզ հաստատեցի,

բայց ոչ որպես մի դարբին,

որ փուքսով կայծեր է արծարծում

և գործիքներ է շինում իր համար.

ես քեզ հաստատեցի ո՛չ կորստի ու ոչնչացման համար։

¹⁷ Ոչ մի վնասակար գործիք քո դեմ հաջողություն չպիտի ունենա,

և դու քո դեմ դատաստանի ելնող ամեն մի լեզու պարտության ես մատնելու,

նրա հետ նաև քո բոլոր ամբաստանողներին։

Որովհետև Տիրոջ ծառաների համար ժառանգություն կա,

և դուք արդար պիտի լինեք իմ առջև»,-

ասում է Տերը։

55

Եկեք առանց արծաթի

¹ «Ո՛վ դուք, որ ծարաված եք, գնացե՛ք ջրի,

և դուք, որ բոլորովին արծաթ չունեք,

գնացե՛ք, գնե՛ք ու կերե՛ք առանց արծաթի,

առանց գինու և ճարպի համար վճարելու։

² Բայց ինչո՞ւ եք արծաթով մի բան գնում, որը հաց չէ, և

ձեր վաստակը վատնում ոչ կշտանալու համար։

Լսե՛ք ինձ և բարիքնե՛ր ճաշակեք,

ու բարության մեջ ձեր հոգիները վայելք պիտի զգան։

³ Ակա՛նջ դրեք ինձ և հետևե՛ք իմ ճանապարհին։

Լսե՛ք ինձ, և ձեր հոգիները կապրեն բարության մեջ,

ու ես ձեզ հետ հավիտենական ուխտ կկնքեմ՝

շնորհելով ձեզ Դավթին խոստացված անանց սրբությունները։

⁴ Ահա նրան տվեցի որպես վկայություն

ազգերին, իշխան և հրամանատար նրանց։

⁵ Քեզ չիմացող ազգերը պիտի կանչեն քեզ,

և քեզ չճանաչող ժողովուրդները քեզ մոտ պիտի ապաստանեն

հանուն Տիրոջ՝ քո Աստծու, Իսրայելի Սրբի, որը փառավորեց քեզ»։

⁶ Փնտրե՛ք Տիրոջը և երբ գտնեք,

կանչե՛ք նրան.

երբ նա ձեզ մոտենա,

⁷ ամբարիշտը թող հրաժարվի իր ընթացքից,

անօրեն մարդը՝ իր խորհուրդներից,

թող նա վերադառնա Տիրոջ մոտ

և ողորմություն կգտնի

մեր Աստծու մոտ,

որը բազմապատիկ թողություն պիտի շնորհի ձեր անօրենություններին։

⁸ «Իմ խորհուրդները նման չեն ձեր խորհուրդներին,

և ոչ էլ իմ ճանապարհները՝ ձեր ճանապարհներին,-

ասում է Տերը,-

⁹ այլ ինչպես երկինքն է հեռու երկրից,

այնպես էլ իմ ճանապարհներն են հեռու ձեր ճանապարհներից,

և իմ խորհուրդները՝ ձեր խորհուրդներից։

¹⁰ Ինչպես որ, ասենք, երբ անձրև կամ ձյուն է իջնում երկնքից

և կրկին այնտեղ չի վերադառնում, քանի դեռ չի ոռոգել երկիրը,

չի ծլեցրել ու պտղաբերել այն,

սերմանողին սերմ և ուտելու հաց չի տվել,

¹¹ այդպես էլ պիտի լինի իմ խոսքը, որ ելնում է իմ բերանից.

նա դատարկ չի վերադառնալու,

մինչև որ չկատարի այն,

ինչ կամենում եմ ես։

Պիտի հեշտացնեմ քո ճանապարհները,

որպեսզի իմ հրահանգներն էլ դու պահպանես։

¹² Ուրախությամբ պիտի ելնեք և ցնծությամբ պիտի սովորեք.

լեռներն ու բլուրները պիտի խայտան,

խնդությամբ ընդունեն ձեզ,

և անտառի բոլոր ծառերը պիտի ծափահարեն ձեզ իրենց ճյուղերով։

¹³ Գիհու փոխարեն նոճի պիտի բուսնի,

դժնիկի փոխարեն մրտենի պիտի աճի.

և դա պիտի լինի հանուն Տիրոջ

և ի նշան հավիտենականության, և երբեք չի նվազի»։

56

Աղոթքի տուն բոլոր ժողովուրդների համար

¹ Այսպես է ասում Տերը.

«Պահպանե՛ք իրավունքը և կատարե՛ք արդարությունը,

քանզի եկել հասել է իմ փրկությունը,

և հայտնվելու է իմ ողորմությունը։

² Երանի՜ այն մարդուն, որ կանի այդ,

և նրան, որ հավատարիմ կմնա դրան,

կպահի իմ շաբաթներն ու չի պղծի

և իր ձեռքը հետ կքաշի անիրավություն անելուց»։

³ Օտարազգին, որ եկել հարել է Տիրոջը, թող չասի.

«Տերը մերժեց ու վանեց ինձ իր ժողովրդից»,

և ներքինին էլ թող չասի.

«Ես չոր փայտ եմ»։

⁴ Այսպես է ասում Տերը ներքինիներին.

«Ովքեր կպահեն իմ պատվիրանները,

կնախընտրեն այն, ինչ ես եմ կամենում,

և իմ ուխտի մեջ կմնան,

⁵ նրանց իմ Տան մեջ և իմ պարսպի ներսում ավելի պատվավոր տեղ կտամ,

քան որդիներին ու դուստրերին,

նրանց հավիտենական մի անուն կտամ, որ չի կորչելու։

⁶ Իսկ այն օտարազգիներին, որոնք եկել հարել են Տիրոջը,

որպեսզի ծառայեն նրան և սիրեն նրա անունը,

նրա համար ծառաներ և աղախիններ լինեն,

ու բոլոր նրանց, որոնք կպահեն իմ շաբաթները և չեն պղծի,

ու կմնան իմ ուխտի մեջ,

⁷ նրանց կտանեմ իմ սուրբ լեռը,

կուրախացնեմ նրանց իմ աղոթքի տան մեջ,

նրանց ողջակեզներն ու ընծաներն ընդունելի կլինեն իմ սեղանի վրա,

քանզի իմ տունը բոլոր ազգերի համար աղոթքի տուն պիտի կոչվի»։

⁸ Այսպես ասաց Տերը,

որ հավաքում է Իսրայելի բոլոր ցրվածներին.

«Նրանց վրա ես պիտի հավաքեմ վայրի բոլոր գազաններին»։

Կույր պահապաններ

⁹ Եկեք կերե՛ք, վայրի բոլո՛ր գազաններ։

¹⁰ Տեսե՛ք, ամենքն էլ կուրացել են

և չգիտեն, թե ի՛նչ է իմաստությունը.

ամենքն էլ կարծես համրացած շներ են, որ չեն կարողանում հաչել,

իրենց անկողիններում երազներով են տարված,

սիրում են նիրհել։

¹¹ Իրենց հոգով լիրբ եղան շների նման,

որ անկուշտ են, չար են և չգիտեն, թե ի՛նչ է իմաստությունը.

ամենքն իրենց ճանապարհներով գնացին։

¹² «Եկե՛ք,- ասում են,-

գինի առնենք և հարբենք գինով.

այդպիսի օրը մեզ համար ամենամեծ զոհաբերությունը կլինի»։

57

Մեղադրանքներ կռապաշտներին

¹ «Տեսե՛ք, ինչպե՜ս կորավ արդարը, և չկա մեկը, որ սրտին մոտ ընդունի.

արդար մարդիկ վերանում են,

և ոչ ոք ուշադրություն չի դարձնում,

որ արդարն անիրավության պատճառով է վերանում։

² Թող խաղաղ լինի նրա գերեզմանը,

ով վերացավ մեջտեղից։

³ Բայց դուք մոտեցե՛ք, առա՛ջ եկեք,

անօրե՛ն որդիներ,

պոռնկածի՛ն որդիներ, շնությա՛ն որդիներ։

⁴ Ինչո՞վ եք գոռոզանում,

ո՞ւմ վրա եք բացում ձեր բերանները

և կամ ո՞ւմ վրա եք հանում ձեր լեզուները.

մի՞թե դուք կորստյան որդիներ չեք,

անօրենության սերունդ,

⁵ որ սաղարթախիտ ծառերի տակ ընկած՝

աղաչում էիք ձեր կուռքերին,

անդունդներում՝ ժայռերի կատարներին, և խոր ձորերում

զոհում էիք ձեր որդիներին։

⁶ Այդ է քո բաժինը, այդ նույնն է քո վիճակը.

նրանց առաջ խմելու ընծա թափեցիր,

նրանց զոհեր մատուցեցիր,

և այս ամենի վրա մի՞թե չեմ բարկանալու,- ասում է Տերը։

⁷ Այնտեղ՝ բարձր ու մեծ լեռան վրա է քո անկողինը,

և դու այնտեղ ելար զոհեր մատուցելու։

⁸ Ապա դռների դրանդիների հետևում հաստատեցիր քո հիշատակները։

Կարծում էիր՝ եթե ինձնից հեռանաս,

ավելի՞ բան պիտի գտնես։

Քո անկողինները լայնացրիր և փռվեցիր դրանց վրա.

սիրեցիր քո հոմանիներին

⁹ և հաճախակի դարձրիր քո պոռնկությունը նրանց հետ։

Հեռավորներից շատերին քե՛զ կապեցիր

և պատգամաբերներ ուղարկեցիր քո սահմաններից դուրս։

Նկուն դարձար ու գերեզման իջար,

¹⁰ հոգնատանջ եղար քո բազում ճանապարհորդություններից

և չասացիր. “Այժմ հանգստանամ”,

որովհետև ուժիդ համեմատ էիր գործում,

դրա համար էլ չհնազանդվեցիր ինձ։

¹¹ Ո՞ւմից վախեցար ու զարհուրեցիր,

որ ստեցիր և չհիշեցիր ինձ,

միտքդ չբերեցիր, սրտիդ մեջ չդրեցիր,

իսկ ես քեզ տեսա ու անտեսեցի։

Ես այն եմ, որ հավիտենական եմ,

իսկ դու ինձնից չվախեցար։

¹² Արդ, ես պիտի պատմեմ իմ արդարության և քո չարիքների մասին,

որոնք քեզ չեն օգնելու,

¹³ երբ աղաղակես,

և քեզ չեն փրկելու քո նեղությունից.

դրանց բոլորին հողմերը պիտի տանեն

և մրրիկները բաժան-բաժան պիտի անեն։

Իսկ նրանք, ովքեր ինձ վրա են հույս դրել,

պիտի ստանան երկիրը և ժառանգեն իմ սուրբ լեռը։

Խաղաղություն հեռավորներին և մերձավորներին

¹⁴ Նրանք պիտի ասեն.

“Նրա առաջ բացե՛ք ճանապարհները,

խոչ ու խութերը հեռացրե՛ք իմ ժողովրդի ճանապարհից”»։

¹⁵ Այսպես է ասում Բարձրյալը,

որ հավիտենապես բնակվում է բարձունքներում,

Սուրբը սրբերի մեջ.

նրա անունը Բարձրյալ է,

և նա սրբերի մեջ է հանգչում,

համբերություն է տալիս տարակուսանքի մեջ ընկածներին

և կյանք՝ նրանց, որոնք սրտամաշ են եղել։

¹⁶ Ես հավիտյան վրեժխնդիր չեմ լինելու ձեզնից

և ոչ էլ մշտապես բարկանալու եմ ձեզ վրա,

քանզի հոգին ինձնից է բխում,

և ամեն շունչ ես եմ ստեղծել։

¹⁷ Մեղքի պատճառով սակավ ժամանակ տրտմություն հասցրի նրան,

հարվածեցի նրան ու իմ երեսը շրջեցի նրանից,

և նա տրտմեց ու իմ առաջ թախծելով՝ գնաց իր ճանապարհները։

¹⁸ Ես տեսա նրա սրտի ճանապարհները և բժշկեցի նրան,

սփոփեցի ու ճշմարիտ մխիթարություն տվեցի նրան։

Նրա սգավորների համար պտուղ ստեղծեցի։

¹⁹ Թող խաղաղություն, խաղաղություն լինի

հեռավորներին և մերձավորներին,- ասում է Տերը,-

ու ես պիտի բժշկեմ նրանց։

²⁰ Իսկ անօրենները պիտի ալեկոծվեն և հանգիստ չգտնեն,

ու նրա ջրերը պիտի անհետանան՝ կոխկրտվելով ու կավի հետ խառնվելով։

²¹ Ամբարիշտների համար խաղաղություն չկա»,-

ասում է Տերը։

58

Ծոմապահություն

¹ Ուժգի՛ն կանչիր և մի՛ խնայիր,

շեփորի պես բարձրացրո՛ւ ձայնդ,

հայտարարի՛ր իմ ժողովրդին իր մեղքերի

և Հակոբի տանը՝ իր անօրենությունների մասին։

² Օր օրի ինձ են փնտրում

և ցանկանում ճանաչել իմ ճանապարհները,

իբրև մի ժողովուրդ, որ արդարություն է գործել

և իր Աստծու իրավունքը զանց չի առել.

ահա նրանք եկել և արդար դատաստան են որոնում։

Փափագում են մերձենալ Աստծուն

³ և ասում են. «Այդ ինչպե՞ս է, որ մենք ծոմ պահեցինք,

և դու չտեսար,

զրկանքների ենթարկեցինք մեզ,

և դու չիմացար։

Արդ, ձեր ծոմապահության օրերին ձեր ցանկություններն եք կատարում

և կսկիծ պատճառում բոլոր նրանց, ովքեր ենթակա են ձեզ։

⁴ Հակառակության և կռիվների մեջ եք ծոմ պահում

և բռնցքահարում տկարին։

Իսկ իմ ինչի՞ն է պետք այդպիսի ծոմապահության օրը.

դուք պիտի գաք բողոքեք ինձ,

և ես չպիտի լսեմ ձեզ։

⁵ Ես այդպիսի ծոմապահությունը չընտրեցի,

և ոչ էլ այնպիսի օրը, երբ մարդ իր անձն է տանջում։

Եթե պարանոցդ կորացնես օղակի նման

ու տակդ քուրձ ու մոխիր տարածես,

⁶ սակայն այդ էլ չեմ համարի ծոմ և ընդունելի օր.

ես այդպիսի ծոմապահությունը չընտրեցի,-

ասում է Տերը։-

Քանդի՛ր անիրավության հանգույցը,

վերացրո՛ւ քո վաճառականական խարդախությունն ու բռնությունը,

ների՛ր ու արձակի՛ր նեղյալներին

և պատռի՛ր բոլոր անիրավ մուրհակները։

Հացդ կիսի՛ր քաղցածի հետ

⁷ Քաղցածների՛ն բաժանիր քո հացը

և անօթևան աղքատներին տա՛ր քո տունը.

եթե մերկ մարդ տեսնես՝ հագցրո՛ւ նրան,

բայց քո ընտանիքի զավակին մի՛ անտեսիր։

⁸ Այն ժամանակ այգաբացի պես կծավալվի քո լույսը,

և արագորեն կհասնի քո ապաքինումը,

քո առջևից կընթանա քո արդարությունը,

և Աստծու փառքը կպատի քեզ։

⁹ Այն ժամանակ կկանչես,

և Աստված կլսի քեզ.

մինչև դու խոսես, նա կասի. «Ահա հասել եմ»։

Եթե դու քո միջից հեռացնես խարդախությունը,

ձեռնձգությունն ու տրտունջի խոսքերը,

¹⁰ քո հացը հոժար սրտով քաղցածներին տաս

և չքավոր մարդկանց կշտացնես,

այն ժամանակ խավարի մեջ կծագի քո լույսը,

քո խավարը կվերածվի միջօրեի։

¹¹ Քո Աստվածն ամեն ժամ քեզ հետ կլինի,

քո անձն ըստ ցանկության հագեցում կստանա,

և քո ոսկորները կլիանան, ու կլինես ինչպես ջրարբի պարտեզ,

ինչպես աղբյուր, որից ջուրը չի պակասի։

¹² Քո դարավոր ավերակները կվերաշինվեն,

և քո հիմքերը մշտնջենական կլինեն սերնդից սերունդ.

դու կհառնես ու կկոչվես պարսպապատերի փլատակները վերականգնող

և նրանց ճամփամիջյան դարուփոսերը վերացնող։

¹³ Եթե ոտքդ հետ քաշես

և սրբության օրը քո ուզածը չկատարես,

զվարճության շաբաթները համարես Աստծուն նվիրված և փառավոր,

ոտքդ դուրս չդնես գործի համար ու քո բերանով բարկության ոչ մի խոսք չասես,

այն ժամանակ կարող ես ապավինել Տիրոջը։

¹⁴ Նա քեզ կառաջնորդի դեպի երկրի բարիքները

և իբրև սնունդ քեզ կտա քո հայր Հակոբի ժառանգությունը,

քանզի Տիրոջ բերանը խոսեց այս։

59

Մարգարեն դատապարտում է ժողովրդի մեղքը

¹ Մի՞թե Տիրոջ ձեռքն անկարող է փրկել,

կամ նա ծանրացրել է իր ականջը, որ չլսի.

² ո՛չ, ձեր մեղքերն են պատնեշ դարձել ձեր և Աստծու միջև,

ձեր անօրենությունների պատճառով է նա իր երեսը շրջել ձեզնից, որ չգթա։

³ Արդարև, ձեր ձեռքերը պղծված են արյամբ,

և ձեր մատները՝ մեղքով.

ձեր շուրթերն անօրենություն խոսեցին,

և ձեր լեզուներն անիրավություն են խորհում։

⁴ Չկա մեկը, որ արդարություն խոսի, և բացակայում է ճշմարիտ դատաստանը.

հույս են դրել սնոտի բաների վրա և ունայնություն են խոսում,

ցավեր են հղանում և անօրենություն ծնում։

⁵ Քարբ օձի ձվեր են ծակում և սարդերի ոստայն հյուսում.

եթե որևէ մեկը կամենա ուտել դրանցից,

ծակ բացելով՝ նրա մեջ ջուր և քարբ օձ կգտնի։

⁶ Նրանց ոստայնները հագուստ չեն դառնա,

և ոչ էլ նրանք կարող են զգեստավորվել իրենց ձեռքի գործերով,

քանզի նրանց գործերն անօրենության գործեր են,

նրանց ձեռքերի մեջ անիրավության գործեր կան։

⁷ Նրանց ոտքերը դեպի չարն են ընթանում,

շտապում են անմեղ արյուն թափել.

նրանց խորհուրդներն անզգամների խորհուրդներ են,

նրանց ճանապարհներին կործանում է ու թշվառություն։

⁸ Նրանք չճանաչեցին խաղաղության ճանապարհը,

ու նրանց ուղիներում արդարություն չկա,

որովհետև նրանց շավիղները, որոնցով ընթանում են, խոտորված են,

և նրանք խաղաղությունը չեն ճանաչում։

Ժողովուրդը ճանաչում է իր մեղքը

⁹ Ահա թե ինչու իրավունքը հեռա ցավ նրանցից,

և արդարությունը չի հասնելու նրանց.

մինչ նրանք լույս էին ակնկալում,

խավար եղավ նրանց համար,

մինչ լույսի էին սպասում,

մթի մեջ քայլեցին։

¹⁰ Կույրերի պես նրանք պատերն են շոշափելու,

խարխափելու են աչքերից զրկվածների պես,

կեսօրին գլորվելու են, ինչպես կեսգիշերին,

օրհասական մարդկանց պես հոգեվարքի տանջանքներ են տանելու

¹¹ և առհասարակ թափառելու են արջերի ու աղավնիների նման։

Մենք երկար սպասեցինք դատաստանի, բայց չեղավ,

սպասեցինք փրկության, բայց այն հեռացավ մեզնից,

¹² քանզի բազում են մեր անօրենությունները քո առաջ,

և մեր մեղքերը հակառակ կանգնեցին մեզ.

մեր անօրենությունները մեր մեջ են,

մենք ինքներս գիտենք մեր անիրավությունները։

¹³ Ամբարիշտ դարձանք և ստեցինք Տիրոջ առաջ,

հետ կանգնեցինք մեր Աստծուց,

անիրավություն խոսեցինք և ապստամբեցինք,

մեր սրտերում անիրավության խոսքեր հղացանք ու որոճացինք։

¹⁴ Վանեցինք իրավունքը,

և արդարությունը հեռացավ մեզնից։

Ճշմարտությունը սպառվեց նրանց ճանապարհներին.

նրանք ուղիղ ճանապարհով չկարողացան գնալ,

¹⁵ և արդարությունը վերացավ նրանց միջից.

արգելք դրեցին իրենց սրտերին, որ չիմանան։

Աստված կհատուցի

Տեսավ Տերը և չհավանեց,

որովհետև իրավունքը բացակայում էր։

¹⁶ Նայեց, բայց մարդ չկար,

դիտեց, բայց չկար մեկը, որ օգնական լիներ.

և իր բազկով հատուցեց ու ըստ իր ողորմության հաստատեց նրանց։

¹⁷ Իբրև զրահ հագավ արդարությունը, իբրև սաղավարտ՝ գլխին դրեց փրկությունը,

իբրև հանդերձ ու պատմուճան՝

իր վրա գցեց վրեժխնդրությունը,

որ հատուցում տա նրանց։

¹⁸ Նա նախատինք ու հատուցում պիտի տա հակառակորդներին ու կղզիների բնակիչներին։

¹⁹ Արևմուտքում Տիրոջ անունից պիտի սարսափեն,

արևելքում՝ նրա փառավոր անունից։

Բարկությունը գետի պես ուժգնորեն պիտի գա Տիրոջից,

կատաղորեն վրա պիտի հասնի։

²⁰ «Եվ փրկիչ պիտի գա Սիոնից

ու պիտի վանի Հակոբի ամբարշտությունները»,- ասում է Տերը։

²¹ «Այս է իմ ուխտը նրանց հետ,- ասում է Տերը։- Իմ հոգին, որ քեզ վրա է, և իմ խոսքերը, որ քո բերանը դրեցի, այսուհետև մինչև հավիտենություն չպիտի պակասեն քո բերանից, քո զավակի բերանից և քո զավակի սերունդների բերանից»,-

ասում է Տերը։

60

Երուսաղեմը լուսավորում է աշխարհը

¹ Լուսավորվի՛ր, լուսավորվի՛ր, Երուսաղե՛մ,

քանզի հասել է քո լույսը,

և Տիրոջ փառքը քեզ վրա է ծագելու։

² Ահա խավարը ծածկեց երկիրը,

մառախուղը՝ հեթանոսներին,

բայց քո մեջ է հայտնվելու Տերը,

և նրա փառքը քո մեջ է երևալու։

³ Թագավորները քո լույսով պիտի ընթանան

և ազգերը՝ քո լույսի փայլով։

⁴ Աչքերդ բարձրացրո՛ւ և շո՛ւրջդ նայիր

ու տե՛ս մոտդ հավաքված քո բոլոր մանուկներին.

քանի որ որդիներդ եկան հասան հեռուներից

և իրենց ուսերին առած՝ բերում են քո դուստրերին։

⁵ Այնժամ դու պիտի տեսնես ու խնդաս,

երկյուղես ու ապշես քո մտքում,

որովհետև ծովերի, ազգերի ու ժողովուրդների հարստությունը

քո կողմը պիտի դառնա։

⁶ Դեպի քեզ են գալու ուղտերի երամակները,

քեզ ծածկելու են Մադիամի և Գեփայի ուղտերի երամակները.

բոլորը Սաբայից պիտի գան՝

բերելով ոսկի, կնդրուկ ու թանկագին քարեր

և տալու են Տիրոջ փրկության ավետիսը։

⁷ Կեդարի ոչխարների բոլոր հոտերը քեզ մոտ պիտի հավաքվեն,

Նաբեոթի խոյերը պիտի բերվեն

ու իմ սեղանի վրա պիտի մատուցվեն իբրև ընդունելի զոհ,

և իմ աղոթքի Տունը պիտի փառավորվի։

⁸ Ովքե՞ր են սրանք, որ թռչում են ամպի պես

և ձագերի հետ խառնված աղավնիների պես՝

երամով գալիս են ինձ մոտ։

⁹ Ինձ են սպասում կղզիները և Թարսիսի նավերը,

որպեսզի սկզբից հեռուներից բերեն քո որդիներին

և նրանց հետ՝ արծաթն ու ոսկին,

Տիրոջ սուրբ անվան համար,

Իսրայելի փառավորյալ Սրբի համար։

¹⁰ Օտարազգիների որդիները պիտի շինեն քո պարիսպները,

ու նրանց թագավորները պիտի ծառայեն քեզ,

որովհետև իմ բարկության պատճառով հարվածեցի քեզ

և իմ գթասրտության համար սիրեցի քեզ։

¹¹ Քո դռները զօր ու գիշեր միշտ բաց պիտի լինեն և չպիտի փակվեն,

որպեսզի քո մեջ տեղափոխեն ազգերի հարստությունը

և նրանց թագավորներին բերեն քեզ մոտ։

¹² Իսկ այն ազգերն ու թագավորները,

որոնք քեզ չեն ծառայելու,

կորչելու են.

ազգերը բոլորովին պիտի կործանվեն։

¹³ Լիբանանի փառքը դեպի քեզ է գալու՝

դափնիով, սոսիով, նոճիով ու մայրիով,

որպեսզի լիապես փառավորեն իմ սրբարանի տեղը,

և ես փառավորեմ իմ ոտքերի տեղը։

¹⁴ Քեզ մոտ պիտի գան քեզ նեղողների և զայրացնողների զարհուրած որդիները,

քո ոտնահետքերին երկրպագություն պիտի անեն բոլոր նրանք,

որոնք զարհուրեցնում էին քեզ,

ու դու պիտի կոչվես Տիրոջ՝

Իսրայելի Սրբի քաղաք։

Տիրոջ փառքը՝ հավիտենական լույս

¹⁵ Դու եղար լքված ու ատելի,

և ոչ ոք չկար, որ օգներ քեզ,

ես քեզ կդարձնեմ հավիտենական ուրախություն,

ցնծություն՝ սերնդից սերունդ։

¹⁶ Դու պիտի ծծես հեթանոսների կաթը

և ուտես թագավորների հարստությունը,

պիտի իմանաս, որ ես եմ Տերը՝

Իսրայելի Աստվածը, որ ազատում ու փրկում եմ քեզ։

¹⁷ Պղնձի փոխարեն ոսկի եմ բերելու քեզ,

երկաթի փոխարեն արծաթ եմ բերելու քեզ,

փայտի փոխարեն պղինձ եմ բերելու քեզ,

քարի փոխարեն երկաթ եմ տալու քեզ,

խաղաղություն եմ տալու քո իշխաններին,

և քո վերակացուներին՝ արդարություն։

¹⁸ Քո երկրում անիրավության մասին այլևս չի լսվելու

և ոչ էլ քո սահմաններում՝ կոտորածի ու թշվառության մասին.

քո պարիսպները փրկություն են անվանվելու,

և քո դռները՝ ցնծություն։

¹⁹ Այլևս արեգակը չէ, որ քեզ համար ցերեկվա լույս է լինելու,

և ոչ էլ լուսնի ծագումն է քեզ գիշերը լույս տալու,

այլ քեզ համար Տերն է հավիտենական լույս լինելու,

և Աստված՝ քո փառքը։

²⁰ Արեգակը քեզ համար մայր չի մտնելու,

և լուսինը քեզնից չի պակասելու,

որովհետև Տերը քեզ համար հավիտենական լույս է լինելու։

Քո սգո օրերը պիտի վերջանան։

²¹ Քո ժողովուրդը բոլորովին արդար պիտի լինի

և հավիտենապես պիտի ժառանգի երկիրը.

տունկն ապահով է լինելու, նրանց ձեռքի գործերը փառք են բերելու։

²² Սակավաթիվը հազարավոր է դառնալու,

փոքրը՝ մեծ ազգ,

քանզի ես՝ Տերս, ժամանակ առ ժամանակ հավաքելու եմ նրանց։

61

Ազատագրման բարի լուրը

¹ Տիրոջ Հոգին ինձ վրա է,

հենց դրա համար նա օծեց ինձ, ուղարկեց ինձ՝ ավետարանելու աղքատներին,

բժշկելու սրտով բեկվածներին,

գերիներին ազատություն քարոզելու

և կույրերին՝ տեսողություն,

² հռչակելու Տիրոջ ընդունելի տարին

և մեր Աստծու կողմից հատուցման օրը,

մխիթարելու բոլոր սգավորներին,

³ փառավորելու Սիոնի սգավորներին,

որ մոխրի փոխարեն ուրախության օծման յուղի պիտի արժանանան,

իսկ սգավորները վհատ հոգու փոխարեն՝ փառքի զգեստի։

Եվ նրանք պիտի կոչվեն ազգ արդարության, տունկ՝ ի փառս Տիրոջ։

⁴ Պիտի վերաշինեն դարավոր ավերակները,

նախկինում ավերվածները պիտի վերականգնեն

և նորոգեն դարերից ի վեր փլատակված քաղաքները։

⁵ Օտարածինները պիտի գան ու լինեն քո ոչխարների հոտերի հովիվները,

այլազգիները՝ քո մաճկալներն ու այգեգործները։

⁶ Իսկ դուք Տիրոջ քահանաներ պիտի կոչվեք,

մեր Աստծու պաշտոնյաներ պիտի անվանվեք,

ազգերի հարստությունը պիտի ուտեք

և նրանց մեծությամբ պիտի փառավորվեք։

⁷ Ձեր ամոթի փոխարեն՝ կրկնակի ուրախություն,

ձեր անարգանքի փոխարեն ցնծություն պիտի վայելեք

և ապա դարձյալ պիտի ժառանգեք երկիրը,

և հավիտենական ուրախություն պիտի լինի ձեզ համար։

⁸ Ես՝ Տերս, սիրում եմ արդարությունը

և ատում անիրավ հափշտակությունը.

արդարներին պիտի տամ իրենց վաստակը

և հավիտենական ուխտ պիտի անեմ նրանց հետ։

⁹ Պիտի ճանաչվի նրանց սերունդը ազգերի մեջ

և նրանց զավակները՝ ժողովուրդների մեջ.

ամենքն էլ, երբ տեսնեն,

պիտի ճանաչեն նրանց և ասեն.

«Սրանք Աստծու օրհնյալ զավակներն են»,

ու ցնծությամբ պիտի ուրախ լինեն Տիրոջով։

¹⁰ Թող ցնծա իմ անձը Տիրոջով,

որովհետև նա ինձ փրկության զգեստ և ուրախության պատմուճան հագցրեց,

որպես փեսայի՝ պսակ դրեց իմ գլխին

և որպես հարսի՝ զուգեց ինձ զարդով։

¹¹ Ինչպես երկիրն է աճեցնում իր ծաղիկները,

և ինչպես պարտեզն է ծլեցնում իր սերմերը,

այնպես էլ Տերն է ծագեցնելու

իր արդարությունն ու ցնծությունը բոլոր ազգերի առաջ։

62

Երուսաղեմը պիտի վերագտնի իր փառքը

¹ Չեմ լռի հանուն Սիոնի և չեմ ների հանուն Երուսաղեմի,

մինչև լույսի պես չծագի նրա արդարությունը,

և փայլակի պես չբոցավառվի նրա փրկությունը։

² Բոլոր ազգերը պիտի տեսնեն քո արդարությունը,

թագավորները՝ քո փառքը,

և դու նոր անունով ես կոչվելու,

որ Տերն է անվանելու։

³ Տիրոջ ձեռքին վայելչության պսակ պիտի դառնաս

և քո Աստծու ձեռքին՝ արքայական թագ։

⁴ Այլևս չես կոչվելու Լքյալ,

ոչ էլ քո երկիրն է կոչվելու Ավերակ։

Քեզ պիտի կոչեն Իմ կամքը,

իսկ քո երկիրը՝ Շեն բնակություն,

որովհետև Տերը բարյացակամ է լինելու քո նկատմամբ,

և քո երկիրը բնակությամբ պիտի լցվի։

⁵ Ինչպես որ երիտասարդն է ամուսնանում կույսի հետ,

այնպես էլ քո որդիները պիտի ապրեն քեզ հետ,

և ինչպես որ, օրինակ, փեսան է ուրախանում հարսի համար,

այնպես էլ Տերն է ուրախ լինելու քեզ համար։

⁶ Քո պարիսպների վրա, ո՛վ Երուսաղեմ,

ամբողջ օրն ու ողջ գիշերը պահապաններ պիտի կարգեմ,

որ մինչև վերջ չդադարեն հիշել Տիրոջը։

⁷ Ձեր նմանը չի լինի, երբ նա վերստին ուղղի

և Երուսաղեմը պարծանք դարձնի երկրի վրա։

⁸ Տերը երդվեց իր փառքով և իր բազկի զորությամբ,

որ քո ցորենն ու կերակուրը չի տա քո թշնամիների ձեռքը,

և օտարների որդիները չեն խմի քո գինին,

որի համար դու հոգնեցիր,

⁹ այլ ովքեր այդ ամբարեցին,

նրանք պիտի ուտեն և օրհնեն Տիրոջը,

և ովքեր այդ հավաքեցին,

նրանք պիտի խմեն իմ սուրբ սրահներում։

¹⁰ Նե՛րս մտեք իմ դռներով,

պատրաստե՛ք ճանապարհները,

շտկե՛ք շավիղները,

ճամփա՛ բացեք իմ ժողովրդի համար,

ճանապարհը մաքրեք քարերից

և դրոշա՛կ բարձրացրեք՝ որպես նշան ազգերի մեջ։

¹¹ Ահա թե ինչ ազդարարեց Տերը մինչև երկրի ծագերը.

«Ասացե՛ք Սիոնի դստերը.

ահավասիկ գալիս է քո Փրկիչը,

և իր վարձն իր հետ է,

գործը՝ իր աչքի առաջ»։

¹² Տիրոջ ձեռքով փրկված Սուրբ ժողովուրդ է կոչելու նրան,

իսկ դու կոչվելու ես Փնտրված քաղաք և ոչ թե Լքված»։

63

Տերը նախանձախնդիր է արդար իրավունքի

¹ Ո՞վ է սա, որ ելել գալիս է Եդովմից.

նրա հագուստների կարմիրը Բոսորայից է,

նա գեղեցիկ պատմուճանով է և հուժկու զորությամբ։

Ես խոսում եմ արդարության և փրկության իրավունքի մասին։

² Քո հագուստներն ինչո՞ւ են կարմիր,

քո հագուստներն ասես հնձանահարի հագուստներ լինեն,

³ որ տրորում է լեցուն հնձանը։

Ես մենակ ճմլեցի հնձանը,

հեթանոսներից ոչ ոք ինձ հետ չէր.

զայրույթով տրորեցի նրանց,

բարկությամբ ճմլեցի նրանց և գետնին հավասարեցրի

ու իմ բոլոր զգեստներն արյունաթաթախ արեցի.

⁴ քանզի հասել էր նրանց հատուցման օրը,

փրկության տարին եկել հասել էր։

⁵ Նայեցի, բայց օգնող չկար,

տեսա, որ ոչ ոք

թիկունք չեղավ։

Իմ բազուկը փրկեց նրանց,

և միայն իմ բարկությունը նրանց դեմ կանգնեց։

⁶ Իմ բարկությամբ տրորեցի և իմ զայրույթով մորթեցի նրանց,

գետնին հավասարեցրի նրանց։

Տիրոջ բարությունը Իսրայելի հանդեպ

⁷ Տիրոջ ողորմությունը պիտի հիշեմ,

Տիրոջ մեծագործությունը միտքս պիտի բերեմ այն բարիքների համար,

որ Տերն է հատուցելու մեզ։

Տերն Իսրայելի տան բարերար դատավորն է,

որ իր ողորմածությամբ և իր մեծ արդարությամբ վարձատրելու է մեզ։

⁸ Նա ասաց.

«Իմ ժողովուրդն իմ որդիներն են,

որոնք չեն անարգի ինձ».

և նա փրկություն բերեց նրանց

⁹ իրենց բոլոր նեղություններից։

Ոչ թե ինչ-որ պատգամաբեր կամ հրեշտակ փրկեց նրանց, այլ Տերն ինքը.

և որովհետև նա սիրում ու խնայում էր նրանց,

ինքն էլ փրկեց նրանց,

ոտքի կանգնեցրեց և բարձրացրեց նրանց հար ու հավիտյան։

¹⁰ Բայց նրանք ըմբոստացան ու բարկացրին նրա Սուրբ Հոգին,

և Տերը նրանց թշնամի դարձավ,

հենց ինքը պատերազմեց նրանց դեմ։

¹¹ Այնժամ հիշեց հին ժամանակները՝ ասելով.

«Որտե՞ղ են Մովսեսը և նրա ժողովուրդը,

որտե՞ղ է նա, որ երկրից դուրս բերեց հոտերի հովվին,

որտե՞ղ է նա, որ նրանց մեջ դրեց Սուրբ Հոգին.

¹² ո՞վ իր աջով բարձրացրեց Մովսեսին

և որի առաջ իր փառավոր բազկով կասեցրեց ջրերը՝

իր անունը հավերժացնելու համար։

¹³ Նրանց անցկացրեց անդունդներով,

ինչպես ձին է անցնում անապատով,

¹⁴ կամ ինչպես գրաստը՝ դաշտով,

ու նրանք չհոգնեցին։ Տիրոջ Հոգին իջավ և առաջնորդեց նրանց»։

Քո ժողովրդին դու այնպես առաջնորդեցիր,

որ քո անունը փառավորվի։

Աղոթք օգնության

¹⁵ Արդ, դարձի՛ր երկնքից

և քո սուրբ ու փառավոր տաճարից նայի՛ր,

թե որտե՛ղ են քո նախանձախնդրությունն ու զորությունը,

որտե՛ղ են քո մեծ ողորմությունն ու գթությունը,

որոնցով ներում էիր մեզ։

¹⁶ Դու ես մեր հայրը։

Աբրահամը չգիտեր մեզ,

Իսրայելը մեզ չէր ճանաչում,

բայց դու, Տե՛ր, Հա՛յր մեր, փրկի՛ր մեզ,

որովհետև սկզբից ի վեր մեզ վրա է քո անունը։

¹⁷ Ինչո՞ւ մեզ թողեցիր, որ մոլորվենք քո ճանապարհներից, ո՛վ Տեր,

ինչո՞ւ կարծրացրիր մեր սրտերը, որ քեզնից չվախենանք.

դարձի՛ր ի սեր քո ծառաների,

դարձի՛ր ի սեր քո ժողովրդի,

որ քո ժառանգությունն է։

¹⁸ Գուցե քո սուրբ լեռը չկարողանանք ժառանգել։

Մեր թշնամիները նեղեցին մեզ

և ոտնակոխ արեցին քո սրբությունը։

¹⁹ Եղանք առաջվա պես,

երբ դու մեզ չէիր տիրում,

և քո անունը մեզ վրա չէր։

Եթե բացես երկինքը,

քո ահից լեռները կսասանվեն և կհալվեն,

64

Աղոթք գթության

¹ Ինչպես մոմը՝ կրակի դիմաց,

կրակը կայրի քո հակառակորդներին,

և քո անունը հայտնի կդառնա թշնամիներիդ.

քո ներկայությունից հեթանոսները խռովության կմատնվեն։

² Երբ հրաշալի գործեր կատարես,

քո ահից լեռները կսասանվեն։

³ Հնուց ի վեր չլսեցինք,

և ոչ էլ մեր աչքերը քեզնից բացի տեսան մեկ այլ Աստված,

որ քո ողորմության վրա հույս դնողների համար այսպիսի բաներ աներ,

⁴ ընդառաջ գնար նրանց, որոնք արդարություն են գործում

և հիշում քո ճանապարհները։

Եվ ահա դու բարկացար,

որովհետև մենք մեղք գործեցինք

և դրա համար էլ մոլորվեցինք։

⁵ Մենք ամենքս պիղծ դարձանք,

և մեր ամբողջ արդարությունը դաշտանի շորերի նմանվեց,

մեր անօրենությունների պատճառով

մենք ամենքս տերևի նման ցած թափվեցինք.

հողմերը քշեցին մեզ։

⁶ Ոչ մեկը չի կանչում քո անունը,

ոչ ոք չի մտածում քեզ ապաստանել.

ահա թե ինչու քո երեսը մեզնից շրջեցիր

և մեր մեղքերի համար մեզ դատապարտեցիր։

⁷ Տե՜ր, մեր Հայրն ես դու.

մենք կավ ենք, իսկ դու՝ մեր ստեղծիչը,

մենք ամենքս քո ձեռքի գործն ենք։

⁸ Տե՜ր, սաստիկ մի՛ բարկացիր մեզ վրա

և մեր մեղքերը հավիտյան մի՛ հիշիր։

Եվ հիմա նայի՛ր, Տե՛ր,

մենք ամենքս քո ժողովուրդն ենք։

⁹ Քո սուրբ քաղաք Սիոնն ավերակ դարձավ,

Երուսաղեմն անապատ դարձավ ու անեծքի մատնվեց։

¹⁰ Մեր սուրբ տաճարն ու փառքը,

որտեղ մեր հայրերն օրհներգում էին,

հրո ճարակ դարձավ,

և մեր ողջ փառավորությունը կործանվեց։

¹¹ Եվ այս ամենը դու հանդուրժում ես, Տե՛ր,

լռություն ես պահում ու սաստիկ նվաստացնում մեզ։

65

Տերը կհատուցի անօրենությունների համար

¹ Հայտնվեցի նրանց, որոնք իմ մասին չէին հարցնում,

ինձ գտան նրանք, որոնք ինձ չէին փնտրում։

«Ահավասիկ ես կամ»,- ասացի այն ազգին,

որն իմ անունը չկանչեց։

² Ամեն օր իմ ձեռքը երկարեցի դեպի անհնազանդ ու թշնամի ժողովուրդը,

որ ընթանում էր ոչ թե ճիշտ ճանապարհով,

այլ իրենց մեղքերի հետևից։

³ Այս ժողովուրդը միշտ բարկացնում էր ինձ.

զոհեր էին մատուցում իրենց պարտեզներում

և իրենց աղյուսների վրա խունկ ծխում գոյություն չունեցող դևերին։

⁴ Քարանձավներում էին պառկում ու քնում,

որպեսզի երազ տեսնեին.

խոզի միս էին ուտում ու զոհերի մսաջուր,

և նրանց բոլոր ամանները պղծված էին։

⁵ Ասում էին. «Հեռո՛ւ կաց ինձնից,

մի՛ մոտեցիր ինձ,

որովհետև ես սուրբ եմ»։

Դա ծուխն է իմ բարկության,

որի մեջ ամեն օր բորբոքվում է կրակը։

⁶ Ահա իմ առջև գրված է.

«Չեմ լռելու, մինչև որ նրանց չհատուցեմ իրենց մեղքերի

⁷ և իրենց հայրերի մեղքերի համար,- ասում է Տերը,-

նրանց, որ խնկարկում էին լեռների վրա

և բլուրների վրա նախատում էին ինձ.

մեծապես պատժելու եմ նրանց այս արարքների համար»։

⁸ Այսպես է ասում Տերը.

«Ճիշտ այնպես, ինչպես ողկույզների մեջ մի ճութ է գտնվում,

և ասում են. “Մի՛ ապականիր դա,

որովհետև Տիրոջ օրհնությունը կա դրա մեջ”,

այնպես էլ ես նույն կերպ պիտի վարվեմ իմ ծառայի համար.

հանուն նրա չեմ կործանելու բոլորին։

⁹ Հակոբի և Հուդայի սերնդին պիտի բարձրացնեմ,

որպեսզի ժառանգեն իմ սուրբ լեռը.

իմ ընտրյալներն ու ծառաները պիտի ժառանգեն այն

և բնակվեն այնտեղ։

¹⁰ Անտառի մեջ պիտի լինեն հովիվների մակաղատեղերը,

և Աքովրի ձորը պիտի դառնա նախիրների հանգստավայրն իմ ժողովրդի,

որն ինձ է փնտրել։

¹¹ Բայց դուք թողեցիք ինձ,

մոռացաք իմ սուրբ լեռը

և սեղան գցեցիք դևերին՝

բաժակ բարձրացնելով Բախտի աստծու պատվին։

¹² Ես ձեզ սրի եմ մատնելու,

և ամենքդ կոտորվելու եք,

որովհետև կանչեցի ձեզ, բայց չլսեցիք,

խոսեցի, բայց դուք ականջ չդրեցիք,

իմ առաջ չարություն կատարեցիք

և, ինչ չէի ցանկանում, ա՛յն ընտրեցիք»։

¹³ Դրա համար էլ Տերն այսպես է ասում.

«Ահավասիկ նրանք, որ ինձ են ծառայում, պիտի ուտեն,

իսկ դուք քաղցած եք մնալու.

ահավասիկ նրանք, որ ինձ են ծառայում, պիտի խմեն,

իսկ դուք ծարավ եք մնալու.

ահավասիկ նրանք, որ ինձ են ծառայում, ուրախ պիտի լինեն,

իսկ դուք ամոթով եք մնալու։

¹⁴ Ահավասիկ նրանք, որ ինձ են ծառայում,

սրտի ուրախությամբ պիտի ցնծան,

իսկ դուք ձեր սրտի ցավից աղաղակելու եք,

ձեր հոգու կսկիծից ողբալու եք։

¹⁵ Ձեր անունն իմ ընտրյալների նողկանքի համար պիտի թողնեք,

և Տերը ձեզ պիտի մեռցնի։

Իմ ծառաներին նոր անուն պիտի տրվի,

¹⁶ որը պիտի օրհնաբանվի երկրի վրա։

Պիտի օրհնեն ճշմարիտ Աստծուն և

երկրի վրա երդվողները պիտի երդվեն ճշմարիտ Աստծով,

առաջվա նեղությունը պիտի մոռանան,

այլևս իրենց միտքը չպիտի բերեն։

Նոր երկինք, նոր երկիր

¹⁷ Նոր երկինք ու նոր երկիր պիտի լինի,

առաջվաններն այլևս չպիտի հիշեն

և այլևս իրենց միտքը չպիտի բերեն։

¹⁸ Այլ ուրախություն ու ցնծություն են գտնելու այն բանի մեջ,

ինչ ես հաստատելու եմ։

Ահա ես Երուսաղեմը ցնծություն պիտի դարձնեմ

և իմ ժողովրդին՝ ուրախություն։

¹⁹ Պիտի ցնծամ Երուսաղեմով,

պիտի ուրախանամ իմ ժողովրդով.

նրա մեջ այլևս լացի ձայն և կամ գույժի ձայն չպիտի հնչի։

²⁰ Այնտեղ չի լինելու մանկահասակ և կամ ծեր,

որ լցրած չլինի իր կյանքի ժամանակը,

քանզի կրտսեր որդին հարյուր տարեկան պիտի լինի,

իսկ հարյուր տարեկանում մեռնողը մեղավոր և անիծյալ պիտի համարվի։

²¹ Տներ պիտի շինեն և իրե՛նք պիտի բնակվեն,

այգիներ պիտի տնկեն և նրանց պտուղն իրե՛նք պիտի ուտեն։

²² Այլևս նրանք չպիտի շինեն, որ ուրիշները բնակվեն,

նրանք չպիտի տնկեն, որ ուրիշներն ուտեն։

Իմ ժողովրդի օրերը կենաց ծառի օրերի չափ պիտի լինեն,

նրանք երկար պիտի վայելեն իրենց ձեռքի գործերը։

²³ Իմ ընտրյալներն այլևս զուր տեղը չպիտի չարչարվեն

և անեծքի համար որդիներ չպիտի ծնեն,

որովհետև նրանք իրենց զավակների հետ Աստծուց օրհնված սերունդ են։

²⁴ Այնպես պիտի լինի, որ դեռ նրանք ձայն չտված՝ պիտի լսեմ նրանց,

դեռ նրանք չխոսած՝ պիտի ասեմ. “ի՞նչ եք ուզում”։

²⁵ Այն ժամանակ գայլերն ու գառները միասին պիտի արածեն,

և առյուծը հարդ պիտի ուտի եզան նման,

օձը հող պիտի ուտի իբրև հաց։

Մարդիկ չեն մեղանչելու և չեն վնասելու իմ սուրբ լեռան վրա»,-

ասում է Տերը։

66

Տերը դատելու է ազգերին

¹ Այսպես է ասում Տերը.

«Երկինքն իմ աթոռն է,

և երկիրը՝ իմ ոտքերի պատվանդանը։

Ի՞նչ տուն պիտի շինեք ինձ համար,-

ասում է Տերը,-

և կամ իմ հանգստյան տեղն ինչպիսի՞ն պիտի լինի։

² Չէ՞ որ այդ ամենն իմ ձեռքն արեց,

և ամեն ինչ իմն է,-

ասում է Տերը.-

ու ես ո՞ւմ եմ նայելու, եթե ոչ հեզերին ու խոնարհներին

և նրանց, ովքեր դողում են իմ խոսքից։

³ Բայց անօրենը, որ ինձ եզ է զոհաբերում,

նույնն է, թե մարդու գանգ է ջախջախում,

իսկ նա, որ ոչխար է զոհաբերում,

նույնն է, թե շուն է մորթում,

իսկ նա, որ նաշիհ է ընծայաբերում,

նույնն է, թե խոզի արյուն է թափում,

իսկ նա, որ հիշատակների խնկարկման համար կնդրուկ է մատուցում,

նույնն է, թե հայհոյում է։

Նրանք ընտրեցին իրենց ճանապարհները

և իրենց այն գարշելի բաները,

որոնք ախորժելի էին իրենց հոգիներին։

⁴ Ու ես պիտի անդրադառնամ նրանց խաբեություններին

և հատուցեմ նրանց ըստ իրենց մեղքերի,

որովհետև կանչեցի, բայց ինձ չլսեցին,

խոսեցի, բայց ականջ չդրեցին,

չարիք գործեցին իմ առաջ

և ընտրեցին այն, ինչ ես չէի կամենում»։

⁵ Տիրոջ պատգամնե՛րը լսեք դուք,

որ դողում եք նրա խոսքերից։

«Մեր եղբայրներ» ասացե՛ք

ձեր ատելիներին և ձեզ զզվանք պատճառողներին,

որպեսզի փառավորվի Տիրոջ անունն ու այն երևա ձեր ուրախության մեջ,

և նրանք ամաչեն։

⁶ Աղաղակի ձայն է հնչում քաղաքից, ձայն՝ տաճարից.

Տիրոջ ձայնն է դա, որ պատժով է հատուցելու թշնամիներին։

⁷ Քանի դեռ հղին չէր ծնել,

քանի դեռ երկունքի ցավերը չէին հասել,

նա ազատվեց, և մի արու զավակ ծնվեց։

⁸ Ո՞վ է լսել, ո՞վ է տեսել այսպիսի բան,

որ երկիրը մեկ օրում ծննդաբերի,

և միանգամից մի ամբողջ ազգ ծնվի.

քանզի Սիոնը երկունքի ցավով բռնվեց և ծնեց իր մանուկներին։

⁹ «Ես տվեցի քեզ այդ հույսը,

բայց դու ինձ չհիշեցիր,-

ասում է Տերը.-

մի՞թե ես չստեղծեցի ամուլին և ծննդկանին»,-

ասում է քո Աստվածը։

¹⁰ Ուրախացի՛ր, Երուսաղե՛մ,

և դուք բոլորդ, որ սիրում եք նրան, հավաքվե՛ք՝

տոնելու այնտեղ,

խնդացե՛ք և ուրախացե՛ք միասին,

որ սուգ եք մտել նրա համար։

¹¹ Որպեսզի սնվեք ու հագենաք նրա մխիթարող ստինքներից

և կուշտ ու պինդ վայելեք նրա գալիք փառքից։

¹² Այսպես է ասում Տերը.

«Ահա ես դեպի նրանց պիտի դարձնեմ խաղաղությունը՝ իբրև գետ

և հեթանոսների փառքը՝ իբրև հորդահոս հեղեղ.

իրենց ուսերին առած՝ նրանք պիտի բերեն դրանց մանուկներին

և իրենց ծնկներին դրած՝ պիտի գգվեն նրանց։

¹³ Ինչպես որ մայրն է գգվում իր մանկանը,

այնպես էլ ես պիտի գգվեմ ձեզ,

և դուք պիտի մխիթարվեք Երուսաղեմում։

¹⁴ Պիտի տեսնեք, ու պիտի խնդան ձեր սրտերը,

ձեր ոսկորները դալար խոտի պես պիտի խայտան»։

Տիրոջ ձեռքը պիտի հայտնվի իր բարեպաշտներին

և սպառնա անհավատներին։

¹⁵ Ահա գալու է Տերը իբրև կրակ,

և նրա կառքը՝ իբրև մրրիկ,

որպեսզի բարկությամբ տա իր հատուցումը

և կրակի բոցով՝ իր արհամարհանքը,

¹⁶ քանզի համայն երկիրը պիտի դատվի Տիրոջ կրակով,

և ամեն մի մարմին՝ նրա սրով.

շատերը պիտի վիրավորվեն Տիրոջ ձեռքից։

¹⁷ «Նրանք, որ իրենց սրբում և մաքրում են իրենց պարտեզների ու սրահների մեջ,

որ խոզի միս, պիղծ բաներ և մուկ են ուտում,

միասին պիտի բնաջնջվեն,-

ասում է Տերը։-

¹⁸ Ես նրանց գործերն ու խորհուրդները գիտեմ.

պիտի գամ, որպեսզի հավաքեմ բոլոր ազգերին ու բոլոր լեզուները.

թող գան ու տեսնեն իմ փառքը։

¹⁹ Նրանց վրա նշան պիտի թողնեմ։

Նրանց միջից փրկվածներին պիտի ուղարկեմ ազգերի մեջ՝

դեպի Թարսիս ու Փուդ,

դեպի Լուդ, Մոսոք և Թոբել,

դեպի Հելլադա և հեռավոր կղզիները,

որոնք չեն լսել իմ անունը

և ոչ էլ իմ փառքն են տեսել.

նրանք պիտի պատմեն իմ փառքն ու իմ անունը ազգերի մեջ։

²⁰ Եվ ինչպես որ Տիրոջ տանն Իսրայելի որդիները

սաղմոսներով իրենց նվերներն են մատուցում ինձ,

այդպես էլ բոլոր ազգերից Երուսաղեմ սուրբ քաղաքը

Տիրոջն ընծա պիտի բերեն իրենց եղբայրներին՝ կառքերի վրա հեծած,

շքեղազարդ ձիերով ու հովանոցներով հանդերձ,-

ասում է Տերը։-

²¹ Եվ նրանցից ինձ համար քահանաներ ու ղևտացիներ կանեմ,-

ասում է Տերը։-

²² Ինչպես որ նոր երկինքն ու նոր երկիրը, որ ես եմ ստեղծում,

մնալու են իմ առաջ,- ասում է Տերը,-

այդպես մնալու է և ձեր սերունդը։

²³ Եվ այնպես պիտի լինի,

որ ամսից ամիս ու շաբաթից շաբաթ

յուրաքանչյուր անձ պիտի գա

Երուսաղեմում իմ առաջ երկրպագելու,-

ասում է Տերը։-

²⁴ Պիտի ելնեն ու տեսնեն իմ հանդեպ հանցանք կատարած մարդկանց ոսկորները,

քանի որ նրանց որդը չի մեռնելու,

նրանց կրակը չի հանգչելու,

և նրանք հայտնի պիտի լինեն բոլոր մարմնավորներին»։

ԵՐԵՄԻԱՅԻ ՄԱՐԳԱՐԵՈՒԹՅՈՒՆԸ

1

¹ Աստծու պատգամը՝ ուղղված Քեղկիայի որդի Երեմիային, որը Բենիամինի երկրում, Անաթովթում ապրող քահանաներից էր։

² Տերը նրա հետ խոսեց Հուդայի արքա Ամովնի որդի Հովսիայի օրոք՝ նրա թագավորության տասներեքերորդ տարում, ³ նաև Հուդայի արքա Հովսիայի որդի Հովակիմի օրոք՝ մինչև Հուդայի արքա Հովսիայի որդի Սեդեկիայի տասնմեկերորդ տարվա վերջը, մինչև Երուսաղեմի բնակչության գերությունը, որ տեղի ունեցավ նույն տարվա հինգերորդ ամսին։

Երեմիա մարգարեի կոչումը

⁴ Տերը խոսքն ուղղեց ինձ և ասաց.

⁵ «Քեզ դեռ որովայնում չստեղծած՝ ընտրեցի քեզ,

և դեռ արգանդից դուրս չեկած՝ սրբացրի քեզ

ու հեթանոսներին մարգարե կարգեցի»։

⁶ Իսկ ես ասացի.

«Տե՛ր, ո՛վ դու Տեր, ահա ես նույնիսկ խոսել չգիտեմ,

քանզի մանուկ եմ»։

⁷ Տերն ինձ ասաց.

«Մի՛ ասա՝ “Մանուկ եմ ես”.

ում մոտ որ ուղարկեմ քեզ, բոլորի մոտ էլ պիտի գնաս,

ու այն ամենը, ինչ որ պատվիրեմ քեզ, պիտի խոսես։

⁸ Չվախենաս նրանցից,- ասում է Տերը,- քանզի ես քեզ հետ եմ՝ քեզ փրկելու համար»։

⁹ Եվ Տերը, ձեռքն ինձ երկարելով, հպեց բերանիս ու ասաց.

«Ահա իմ խոսքը քո բերանը դրեցի։

¹⁰ Ահա քեզ այսօր կարգեցի ազգերի ու թագավորությունների վրա,

որպեսզի դրանք քանդես ու խորտակես,

կործանես ու ավերես, վերակառուցես ու հիմնես»։

Ընկուզենու գավազանը և եռացող կաթսան

¹¹ Տերը, խոսքն ինձ ուղղելով, ասաց.

«Ի՞նչ ես տեսնում, Երե՛միա»։ Ես ասացի. «Ընկուզենու գավազան եմ տեսնում»։

¹² Տերն ինձ ասաց.

«Ճիշտ ես տեսնում.

ես արթուն հետևում եմ,

որպեսզի իմ ասածները կատարվեն»։

¹³ Տերը նորից խոսքն ինձ ուղղեց՝ ասելով.

«Ի՞նչ ես տեսնում»։

Ասացի. «Եռացող կաթսա եմ տեսնում՝ բերանը հյուսիսից դեպի այս կողմ»։

¹⁴ Տերն ինձ ասաց.

«Այս երկրի բնակիչների վրա չարիքները հյուսիսից են բորբոքվելու։

¹⁵ Ահա ես բոլոր թագավորություններին միասին կանչելու եմ հյուսիսի երկրից,-

ասում է Տերը.- գալու են,

և ամեն մեկն իր գահն է հաստատելու Երուսաղեմի դարպասների շեմերին,

նրա շրջակա բոլոր պարիսպների վրա

և Հուդայի երկրի բոլոր քաղաքների վրա։

¹⁶ Ես դատ ու դատաստանով եմ խոսելու նրանց հետ՝

իրենց գործած բոլոր չարիքների համար,

քանի որ նրանք լքեցին ինձ և զոհեր մատուցեցին օտար աստվածներին,

երկրպագեցին իրենց ձեռակերտ կուռքերին։

¹⁷ Դու էլ գոտեպնդվի՛ր, գնա՛ և ասա՛ նրանց այն ամենը,

ինչ որ պատվիրելու եմ քեզ։

Չերկնչես նրանցից և չվախենաս նրանց առաջ,

քանզի ես քեզ հետ եմ՝ քեզ փրկելու համար,- ասում է Տերը։

¹⁸ Ահավասիկ ես այսօր կանգնեցրի քեզ իբրև ամուր քաղաք,

և իբրև երկաթե սյուն և կամ իբրև պղնձե հզոր պարիսպ՝

ընդդեմ Հուդայի երկրի բոլոր թագավորների,

նրա իշխանների, նրա քահանաների ու երկրի ժողովրդի։

¹⁹ Նրանք պիտի կռվեն քեզ հետ,

բայց քեզ ոչ մի բան չպիտի կարողանան անել,

քանզի ես քեզ հետ եմ՝ քեզ փրկելու համար»,- ասում է Տերը։

2

Իսրայելի նախահայրերի մեղքը

¹ Տերը խոսքն ուղղեց ինձ և ասաց.

«Գնա՛, երուսաղեմացիների ականջներին ծանուցի՛ր ու ասա՛.

² Տերն այսպես է ասում.

“Քեզ հիշեցի

և քո մանկության խանդաղատանքն

ու քո չափահասության ժամանակվա սերը՝

ընթանալով Իսրայելի Սրբի հետևից”»,- ասում է Տերը։

³ Իսրայելը սուրբ է Տիրոջ համար.

«Տիրոջն է նրա պտուղների առաջինը։

Բոլոր նրանք, ովքեր ուտելու են այն, զղջալու են.

չարիքներ են հասնելու նրանց վրա»,- ասում է Տերը։

⁴ Լսե՛ք Տիրոջ խոսքը, ո՛վ Հակոբի տուն և Իսրայելի բոլո՛ր տոհմեր։

⁵ Այսպես է ասում Տերը.

«Ձեր հայրերն ի՞նչ սխալ գտան իմ մեջ,

որ հեռացան ինձնից և

սնոտի աստվածների հետևից գնալով՝

սնահավատ դարձան։

⁶ Չասացին. “Ո՞ւր է Տերը, որ մեզ հանեց եգիպտացիների երկրից

և առաջնորդեց մեզ անապատում,

անեզր և անուղի, անջուր և անպտուղ երկրում,

մահվան ստվերների մեջ,

այն երկրում, որտեղով մարդ չէր անցել,

և որտեղ չէր բնակվել մարդու որդին։

⁷ Տարավ մեզ Քերմել՝ ուտելու նրա պտուղն ու բարիքները”.

իսկ դուք մտաք ու պղծեցիք իմ երկիրը, իմ ժառանգությունը պղծության մատնեցիք։

⁸ Եվ քահանաները չասացին. “Ո՞ւր է Տերը”։

Իմ օրենսգետներն ինձ չճանաչեցին,

հովիվներն ամբարշտացան իմ դեմ,

և մարգարեները Բահաղի անունով մարգարեություն արին

ու անօգուտ բաների հետևից գնացին»։

Տիրոջ դատն իր ժողովրդի դեմ

⁹ «Դրա համար էլ դեռ պիտի դատեմ ձեզ,- ասում է Տերը,-

պիտի դատեմ նաև ձեր որդիների որդիներին։

¹⁰ Արդ, անցե՛ք քետիմացիների կղզիներն ու նայե՛ք,

մա՛րդ ուղարկեք նաև Կեդար ու լա՛վ տեղեկացեք,

տեսեք՝ եղե՞լ է այդպիսի բան,

¹¹ որ ազգերն իրենց աստվածներին փոխեն,

թեև նրանք աստվածներ էլ չեն,

բայց իմ ժողովուրդն իր փառքը փոխանակեց նրանց հետ,

որոնցից օգուտ չի ունենալու։

¹² Այդ բանի վրա ապշեց երկինքը և խիստ սոսկաց,- ասում է Տերը,-

¹³ քանզի երկու չարիք գործեց իմ ժողովուրդը.

ինձ՝ կենաց ջրի աղբյուրիս, լքեց և իր համար ծակ փոսեր փորեց,

որոնք ջուր չեն կարող պահել։

¹⁴ Մի՞թե Իսրայելը ծառա է,

կամ Հակոբը՝ ստրո՞ւկ,

որ ավարի մատնվեցին։

¹⁵ Նրա վրա մռնչացին և իրենց ձայներն արձակեցին առյուծները,

որոնք ավերակ դարձրին նրա երկիրը։

Նրա քաղաքները կործանվեցին, այլևս բնակիչներ չունեցան։

¹⁶ Մեմփացիների ու տափնացիների որդիները ճանաչեցին քեզ ու ծաղրեցին։

¹⁷ Մի՞թե դրա պատճառն այն չէր,- ասում է Տերը՝ քո Աստվածը,-

որ այն ժամանակ դու լքեցիր ինձ,

երբ քեզ բերում էի անապատի ճանապարհով։

¹⁸ Եվ հիմա ի՞նչ ես փնտրում եգիպտացիների ճանապարհին.

ուզում ես Գեհոնի ջո՞ւրը խմել

և կամ ի՞նչ ես փնտրում ասորեստանցիների ճանապարհին.

ուզում ես գետերի ջո՞ւրը խմել։

¹⁹ Քո ապստամբությունը քեզ խրատ է լինելու,

և քո չարությունները կշտամբելու են քեզ։

Խելքի կգաս ու կտեսնես, որ քեզ համար դառնաղետ է ինձ լքելը,-

ասում է Տերը՝ քո Աստվածը»։

Իսրայելը որպես անհավատարիմ կին

«Ես չհավանեցի քեզ,- ասում է Տերը՝ քո Աստվածը։-

²⁰ Վաղուց խորտակեցիր քո լուծը,

խզեցիր քո կապանքներն ու ասացիր.

“Չեմ ծառայի, այլ կգնամ

բոլոր բարձր բլուրների վրա և բոլոր ստվերախիտ ծառերի տակ և այնտեղ

կզեխանամ պոռնկության մեջ[60]”։

²¹ Ես քեզ տնկեցի իբրև ամբողջովին ազնիվ և պտղաբեր որթատունկ.

ինձ համար ինչո՞ւ դառնության փոխվեցիր,

ո՛վ դու, օտարացած որթատո՛ւնկ։

²² Եթե բորակով էլ լվացվես

և կամ օճառը ձեռքիցդ վար չգցես,

դարձյալ իմ առաջ քո անիրավությունների մեջ շաղախված կմնաս,-

ասում է Տերը՝ Աստված։-

²³ Ինչպե՞ս ես ասում.

“Չեմ պղծվել և չեմ գնացել Բահաղի հետևից”։

Տե՛ս քո ընթացքը գերեզմաններում

և իմացի՛ր, թե ի՛նչ ես արել։

²⁴ Ամեն երեկո նրա լացի ձայնը տարածվեց իր ճանապարհներին.

հաճախ նա այցելեց անապատի ջրերին.

իր մարմնական ցանկության պատճառով այսահար դարձավ։

Անձնատուր եղավ իր կրքերին,

և ո՞վ հետ պիտի դարձնի նրան։

Բոլոր նրանք, ովքեր կփնտրեն նրան,

նեղություն չեն կրի.

իր տառապանքների մեջ կգտնեն նրան։

²⁵ Դարձրո՛ւ քո սիրտը ծուռ ճանապարհից և քո կոկորդը՝ ծարավից։

Իսկ նա ասում է. “Ուժս տեղն է”,

որովհետև նա սիրում էր օտար աստվածներին և գնում նրանց հետևից»։

Իսրայելի ամոթանքը

²⁶ «Ինչպես որ կամաչի գողը, երբ բռնվի,

այնպես էլ պիտի ամաչեն Իսրայելի որդիները,

իրենք, իրենց թագավորներն ու իրենց իշխանները,

իրենց քահանաներն ու իրենց մարգարեները։

²⁷ Նրանք փայտին ասացին. “Իմ հայրն ես դու”,

և քարին. “Դո՛ւ ծնեցիր ինձ”։

Եվ նրանք ոչ թե իրենց երեսները, այլ թիկունքները դարձրին ինձ,

բայց իրենց փորձության ժամին պիտի ասեն. “Արի փրկի՛ր մեզ”։

²⁸ Հապա ո՞ւր են քո այն աստվածները,

որոնց քեզ համար կերտեցիր.

քո թշվառության ժամանակ նրանք թող ելնեն ու փրկեն քեզ։

Չէ՞ որ քո աստվածները նույնքան էին, որքան քո քաղաքների թիվը,

ո՛վ Հուդա։

Չէ՞ որ Երուսաղեմի ճանապարհների թվով զոհեր էին մատուցում Բահաղին։

²⁹ Ինչո՞ւ եք խոսում ինձ հետ,

որովհետև դուք բոլորդ ամբարշտացաք,

բոլորդ անօրեն եղաք իմ դեմ,-

ասում է Տերը։

³⁰ Զուր ծեծեցի ձեր որդիներին. դուք խրատ չառաք։

Սուրը կերավ ձեր մարգարեներին, առյուծի պես հոշոտեց,

բայց դուք չզարհուրեցիք»։

³¹ Լսե՛ք Տիրոջ պատգամը,

այսպես է ասում Տերը.

«Մի՞թե Իսրայելի համար անապատ եղա

կամ ավեր ու խոպանացյալ երկիր,

որ իմ ժողովուրդն ասաց.

“Անտերունչ կշրջենք, բայց քեզ մոտ չենք գա”։

³² Մի՞թե հարսը կմոռանա իր զարդը,

և կույսը՝ իր լանջագեղ գոտին.

իսկ իմ ժողովուրդը երկար ժամանակ մոռացավ ինձ։

³³ Քո ճանապարհին ուրիշ ի՞նչ միջոցների պիտի դիմես՝ սեր գտնելու համար.

բայց դու ոչ միայն այդպես արեցիր,

այլև նույնիսկ անզգամացար և պղծեցիր քո ճանապարհները։

³⁴ Քո ձեռքերի մեջ հայտնաբերվեց թշվառ ու անմեղ մարդկանց արյունը.

ոչ թե վիհերում գտա նրանց,

այլ բոլոր կաղնիների մոտ։

³⁵ Դու ասացիր. “Անմեղ եմ, թող նրա բարկությունն ինձնից հեռանա”։

Ահավասիկ ես դատաստան եմ տեսնելու քեզ հետ,

որովհետև դու ասացիր՝ չմեղանչեցի։

³⁶ Դու սաստիկ արհամարհեցիր ինձ՝ կրկնելով քո ընթացքը,

բայց դու Եգիպտոսից էլ պիտի ամաչես,

ինչպես Ասորեստանից ամաչեցիր։

³⁷ Այնտեղից էլ պիտի դուրս գաս՝ ձեռքերդ գլխիդ վրա բռնած,

քանզի Տերը մերժեց այն, որ քո հույսն էր,

և նրանով այլևս չես բարգավաճի»։

3

Իսրայելը՝ պոռնկուհի

¹ «Եթե մարդն արձակի իր կնոջը,

և սա հեռանա նրանից ու ամուսնանա ուրիշ տղամարդու հետ,

ապա նորից հետ գա նախկին մարդու մոտ,

արդյոք այդ կինը ամբողջապես պղծված չի՞ լինի։

Իսկ դու պոռնկացար բազում հովիվների հետ

և վերադարձար ինձ մոտ,- ասում է Տերը։-

² Բարձրացրո՛ւ աչքերդ,

ուղիղ դեպի առա՛ջ նայիր և տե՛ս,

թե քո ճանապարհներին ուր ասես պղծությամբ չթաթախվեցիր։

Ագռավի պես մենակ ու անօգնական՝

նստեցիր այդ ճանապարհներին

և քո պոռնկություններով ու չարություններով երկիրը պղծեցիր։

³ Ի գայթակղություն քեզ՝

բազում հովիվներ ունեցար,

պոռնիկ կնոջ կերպարանք առար և բոլորի մոտ կորցրիր քո ամոթը։

⁴ Չընդունեցիր ինձ իբրև Տեր,

իբրև Հայր և Իշխան քո կուսության։

⁵ “Մի՞թե Տերը հավիտյան բարկացած պիտի մնա

և բարկությունն ընդմիշտ պիտի պահի՞”.-

ահա այսպես ասացիր դու,

գործեցիր այդ բոլոր չարիքները և զորացար»։

Իսրայելը և Հուդայի երկիրը պետք է զղջան

⁶ Հովսիա արքայի օրոք Տերն ինձ ասաց. «Տեսա՞ր, թե ի՛նչ արեց Իսրայելի այդ բնակչությունը. միայնակ գնաց և այնտեղ՝ բոլոր բարձր լեռների վրա ու բոլոր սաղարթախիտ ծառերի տակ, պոռնկացավ։

⁷ Այդքան պոռնկանալուց հետո ես նրան ասացի՝ “Ինձ մո՛տ վերադարձիր”, բայց չվերադարձավ։ Նրա ցոփությանն ականատես եղավ ուխտադրուժ Հուդան։

⁸ Նաև այս տեսա. Իսրայելի բնակչությունն ամբողջովին տարվեց շնությամբ և բռնվեց դրա մեջ, արձակեցի նրան, ապահարզանի թուղթ տվեցի ձեռքը, ու ես տեսա, որ նրա ուխտադրուժ քույրը՝ Հուդան, չզարհուրեց, այլ գնաց ու ինքն էլ պոռնկացավ։

⁹ Նա իր պոռնկությամբ, որ չնչին բան էր համարում, երկիրը պղծեց՝ քարի ու փայտի հետ շնանալով։

¹⁰ Այս ամենից հետո,- ասում է Տերը,- նրա ուխտադրուժ քույր Հուդան չվերադարձավ դեպի ինձ ամբողջ սրտով, այլ վերադարձավ ստությամբ։

¹¹ Իսրայելը,- ասում է ինձ Տերը,- արդարացրեց իր ապստամբությունը ուխտազանց Հուդայի համեմատությամբ։

¹² Այլ գնա՛ և այս պատգամները հռչակի՛ր հյուսիսի կողմերում՝ ասելով.

“Ինձ մո՛տ վերադարձիր, ո՛վ դու Իսրայելի բնակչություն,- ասում է Տերը։-

Ես ձեզ վրա չեմ բարկանա,

քանզի ես ողորմած եմ,-

ասում է Տերը,

ձեր դեմ հավիտյան ոխ չեմ պահի։

¹³ Բայց դու գիտակցի՛ր քո անօրենությունները,

որովհետև դու ամբարշտացար Տիրոջ՝ քո Աստծու դեմ

և օտարների համար քո ճանապարհները տարածեցիր բոլոր սաղարթախիտ ծառերի տակ,

իսկ իմ ձայնը չլսեցիր,- ասում է Տերը։-

¹⁴ Ինձնից հեռացա՛ծ որդիներ, դարձե՛ք ինձ մոտ, որպեսզի ես ձեզ տիրեմ,- ասում է Տերը։- Կվերցնեմ ձեզ. ամեն քաղաքից՝ մեկին և ամեն ցեղից՝ երկուսին ու ձեզ կտանեմ Սիոն։

¹⁵ Իմ սրտին հաճելի հովիվներ կտամ ձեզ. թող նրանք հովվեն ձեզ՝ հովվելով իմաստությամբ։

¹⁶ Ու երբ երկրի վրա այն օրերին դուք բազմանաք ու աճեք,- ասում է Տերը,- այլևս չեն ասելու՝ “Իսրայելի Սուրբի Ուխտի տապանակը”. չի հիշվելու այն, նրա անունն այնտեղ չի տրվելու, այլևս չի փնտրվելու այն և նորը չի շինվելու։

¹⁷ Այն օրերին ու այն ժամանակ Երուսաղեմը Տիրոջ աթոռ են կոչելու. բոլոր ազգերը Տիրոջ անվան համար հավաքվելու են Երուսաղեմում և այլևս չեն հետևելու իրենց սրտերի չար խորհուրդներին։

¹⁸ Այն օրերին Իսրայելի տունը միանալու է Հուդայի տանը, և հյուսիսից ու բոլոր գավառներից միասին գալու են այն երկիրը, որն իբրև ժառանգություն տվեցի նրանց հայրերին”»։

Անառակ ժողովրդի վերադարձը

¹⁹ Ես ասացի. «Թող լինի՛, Տե՛ր»։

«Ձեզ որդիներիս մեջ կարգել կամեցա՝

ձեզ տալու ընտիր երկիրը՝

իբրև ազգերի Ամենակալ Աստծու մեծահռչակ ժառանգություն.

ասացի, որ հայր կոչես ինձ

և այլևս երես չթեքես ինձնից։

²⁰ Բայց ինչպես կինն է անարգում իր ամուսնուն,

այնպես էլ դու անարգեցիր ինձ, ո՛վ Իսրայելի տուն,- ասում է Տերը։-

²¹ Լացի ու պաղատանքի ձայն լսվեց իսրայելացիների շուրթերից,

քանի որ անիրավություն գործեցին իրենց ճանապարհներին

և մոռացան Աստծուն՝ իրենց Սրբին։

²² Դարձե՛ք, որդինե՛ր, դարձե՛ք, և ես կբուժեմ ձեր վերքերը»։

Նրանք ասացին. «Ահա մենք կանք,

քանզի դու ես Տերը՝ մեր Աստվածը։

²³ Արդարև, ունայն էին բլուրների և բարձունքների պաշտամունքը

և նրանց զորությունը.

Իսրայելի տան փրկությունը Տիրոջ՝ մեր Աստծու ձեռքին է։

²⁴ Մեր մանկությունից ի վեր խայտառակությունը սպառեց մեր հայրերի վաստակը՝

նրանց հոտերն ու նախիրները, նրանց տղաներին ու աղջիկներին։

²⁵ Մեր ամոթով քուն մտանք,

և մեր անարգանքները մեզ ծածկեցին,

քանի որ մենք և մեր հայրերը մանկությունից մինչև այսօր

մեր Աստծու առաջ մեղք գործեցինք և Տիրոջ՝ մեր Աստծու ձայնը չլսեցինք»։

4

Իսրայելի անվտանգ վերադարձը

¹ «Եթե Իսրայելը վերադառնալու է դեպի ինձ, թող վերադառնա,- ասում է Տերը,-

եթե հանուն Երուսաղեմի Աստծու

նա իր բերանից դուրս թափի գարշելի կուռքերի անունները,

վախենա ինձնից

² և ճշմարտությամբ, իրավամբ ու արդարությամբ երդվի՝

“Տերը կենդանի է”,

նրանով պիտի օրհնվեն ազգերը

և նրանով փառաբանվեն»։

³ Այսպես է ասում Տերը ձեզ՝ Հուդայի մարդկանց

և Երուսաղեմի բնակիչներիդ.

«Հերկե՛ր հերկեք ձեզ համար, փշերի մեջ մի՛ սերմանեք։

⁴ Հուդայի մարդի՛կ և Երուսաղեմի բնակիչնե՛ր,

ձեր Աստծո՛ւ համար թլփատվեք, ձեր սրտի անթլփատությո՛ւնը թլփատեք,

որովհետև գուցե ձեր չար գործերի պատճառով

իմ բարկությունն իբրև հուր ելնի ու բորբոքվի,

և մեկը չգտնվի, որ հանգցնի այն»։

Աղետի տագնապ Հուդայի երկրում

⁵ «Գուժե՛ք Հուդայի մեջ,

լուրը թող հասնի Երուսաղեմ,

ասացե՛ք, փո՛ղ հնչեցրեք երկրով մեկ,

աղաղա՛կ բարձրացրեք, գոչե՛ք,

հավաքվե՛ք և մտե՛ք պարսպապատ քաղաքները։

⁶ Ելեք փախե՛ք դեպի Սիոն,

շտապե՛ք, մի՛ դանդաղեք,

որովհետև ես չարիք ու մեծ կոտորած եմ բերելու հյուսիսից։

⁷ Առյուծն իր որջից դուրս եկավ,

որպեսզի հոշոտի ազգերին,

շարժվեց ու ելավ իր տեղից, որպեսզի քո երկիրն ավերակ դարձնի։

Քո քաղաքները քանդվելու են՝ այնտեղ բնակիչ չլինելու պատճառով։

⁸ Դրա համար քո՛ւրձ հագեք,

կոծե՛ք ու ճի՛չ բարձրացրեք,

քանզի Տիրոջ ցասումը հետ չդարձավ ձեզնից։

⁹ Այն օրը,- ասում է Տերը,-

թագավորն ու իշխանները սրտաբեկ պիտի լինեն,

քահանաները պիտի հիմարանան,

մարգարեները՝ ապշեն»։

¹⁰ Եվ ես ասացի.

«Ո՛վ Տիրակալ Աստված,

ուրեմն խաբելով խաբեցիր այդ ժողովրդին ու Երուսաղեմին,

քանի որ ասացիր՝ “Խաղաղություն պիտի լինի ձեզ”,

մինչդեռ սուրը նրանց անձերին պիտի հասնի։

¹¹ Այն ժամանակ դու պիտի ասես այդ ժողովրդին ու Երուսաղեմին.

“Սա անապատում քո մոլորության համար է։

Իմ ժողովրդի դստեր ճանապարհը ո՛չ մաքրության,

ո՛չ էլ սրբության համար էր։

¹² Լրության ոգին նրանցից գալու է դեպի ինձ.

այսուհետև ես էլ նրանց հետ իմ դատաստաններով եմ խոսելու”»։

¹³ Ահա նա ելնելու է որպես ամպ.

նրա կառքերը նման են մրրիկի,

նրա երիվարներն ավելի արագընթաց են, քան արծիվները։

Վա՜յ մեզ, որ թշվառացանք։

¹⁴ «Երուսաղեմ, լվա՛ քո սրտի չարությունները, որ փրկվես.

քո ցավերի խորհուրդները մինչև ե՞րբ պիտի մնան քո մեջ։

¹⁵ Բոթաբեր ձայն է հնչում Դանից

և տառապանքի լուր՝ Եփրեմի լեռից։

¹⁶ Ա՛յս բանը գուժեք ազգերին.

իմա՛ց տվեք, թե գնդեր են գալիս հեռավոր երկրից.

ահա հասել են Երուսաղեմ.

նրանք իրենց ձայնն են արձակում Հուդայի երկրի քաղաքների դեմ

¹⁷ և ինչպես ագարակի պահապաններ,

շրջապատել են այն։ Դու անտեսեցիր ինձ,- ասում է Տերը.-

¹⁸ քո ճանապարհներն ու քո ընթա՛ցքը քեզ հասցրին այդ ամենը։

Դա է քո չարությունը, ինչպես և դառնությունը, որ հասավ սրտիդ»։

Երեմիան ողբում է իր ժողովրդի ցավը

¹⁹ Որովա՜յնս, որովայնս ցավ է ընկել, և հեծում են սրտիս զգայարանները։

Սիրտս ճմլվում է, և հոգիս հանգստություն չունի,

որովհետև ես շեփորի ձայն լսեցի

և պատերազմի ու թշվառության գույժ։

²⁰ Հարված հարվածի վրա եկավ.

բողո՛ք բարձրացրեք, քանզի ողջ երկիրը միանգամից թշվառացավ,

վրանս խորտակվեց,

և քանդվեցին վրանիս ծածկոցները։

²¹ Մինչև ե՞րբ պիտի փախստականներ տեսնեմ,

շեփորի ձայն լսեմ։

²² Իմ ժողովրդի իշխաններն ինձ չճանաչեցին,

որովհետև նրանք ոչ թե խելացի, այլ անմիտ որդիներ են.

չարություն գործելիս իմաստուն են,

իսկ բարի բան անել չգիտեն։

Ամայի երկրի տեսիլքը

²³ Նայեցի երկրին. ամայի էր, ոչինչ չկար,

նայեցի դեպի երկինք, և չկար նրա լույսը։

²⁴ Նայեցի և տեսա, որ լեռները երերում էին,

բոլոր բլուրները՝ սասանվում։

²⁵ Նայեցի, բայց ահա մարդ չկար,

և երկնքի բոլոր թռչունները սարսափահար էին եղել։

²⁶ Նայեցի և տեսա, որ Կարմելոսն ավերակ էր,

իսկ նրա բոլոր քաղաքները՝ հրի մատնված։

Տիրոջ պատճառով, նրա բարկության ու ցասման պատճառով դրանք կործանվեցին։

²⁷ Այսպես է ասում Տերը.

«Ավերվելու է համայն երկիրը,

բայց ես չեմ բերելու նրա վախճանը։

²⁸ Այս ամենի համար երկիրը սուգ պիտի անի,

և վերից երկինքը պիտի խավարի,

որովհետև ես ասացի և չեմ զղջալու,

ես ձեռնարկեցի և հետ չեմ կանգնելու դրանից»։

²⁹ Հեծյալների ձայնից և լարված աղեղներից ամբողջ երկիրը խույս տվեց,

մարդիկ սողոսկեցին քարայրները,

թաքնվեցին անտառներում,

բարձրացան քարանձավները.

բոլոր քաղաքները լքվեցին,

ու նրանց մեջ մարդ չի բնակվում։

³⁰ Իսկ դու, թշվառակա՛ն, ի՞նչ ես անելու։

Եթե կարմիր հագնես,

ոսկի զարդով զարդարվես ու քո աչքերին ծարիր քսես,

քո զարդարանքները զուր են լինելու։

Հոմանիներդ քեզ մերժեցին և հոգիդ առնել են ուզում։

³¹ Լսեցի քո հեծեծանքը,

որը կարծես իր անդրանիկ որդուն ծնելու երկունքով բռնված կնոջ ձայնը լիներ։

Սիոնի դստեր ձայնը պիտի նվաղի,

և նրա ձեռքերը պիտի թուլանան ու պիտի ասի.

«Վա՜յ ինձ, որովհետև հոգիս նվաղեց սպանվածների համար»։

5

Երուսաղեմի մեղքը

¹ «Երուսաղեմի փողոցներով այս ու այն կո՛ղմ շարժվեք, նայե՛ք,

իմացե՛ք և փնտրե՛ք նրա հրապարակներում.

եթե այնտեղ գտնեք մի մարդու, որ արդարություն է գործում և հավատարմության

հետամուտ լինում,

ապա ես թողություն կտամ նրանց»,- ասում է Տերը։-

² Եթե նրանք նույնիսկ ասեն, թե կենդանի է Տերը,

միևնույն է, սուտ երդված կլինեն։

³ Տե՛ր, աչքերդ հառած հավատարմությանը՝ տանջեցիր նրանց,

բայց նրանք ցավ չզգացին,

ոչնչացրիր նրանց, բայց խրատ ընդունել չկամեցան,

իրենց երեսներն ապառաժից ավելի կարծրացրին

և չուզեցին դարձի գալ։

⁴ Ուստի ասացի. «Թերևս աղքատ լինելով՝

անկարող եղան ճանաչելու Տիրոջ ճանապարհներն ու Աստծու օրենքները.

⁵ գնամ հարուստների մոտ և նրանց հետ խոսեմ.

գուցե նրանք գիտենան Տիրոջ ճանապարհն ու Աստծու օրենքները»։

Բայց ահավասիկ նրանք էլ առհասարակ խորտակեցին լուծն ու խզեցին կապերը։

⁶ Դրա համար էլ անտառի առյուծը կոտորեց նրանց,

և գայլը ոչնչացրեց նրանց՝ հասնելով մինչև տները.

նրանց քաղաքներին սպառնաց ընձառյուծը,

և բոլորը, ովքեր այնտեղից դուրս կգան՝

կընկնեն իբրև դիակ,

քանզի իրենց ամբարշտությունները բազմացրին

և իրենց անհնազանդության մեջ զորացան։

⁷ «Սրանցից որի՞ համար հաշտվեմ քեզ հետ.

քո որդիներն ինձ լքեցին և չաստվածներով երդվեցին.

ես կշտացրի նրանց,

բայց նրանք շնացան ու պոռնկանոցներում օթևանեցին։

⁸ Նրանք դարձան իգամոլ ձիեր,

և ամեն մեկն իր ընկերոջ կնոջ վրա էր վրնջում։

⁹ Այս ամենից հետո,- ասում է Տերը,-

մի՞թե չեմ այցելելու և

այդպիսի ազգից վրեժ չե՞մ լուծելու։

¹⁰ Բարձրացե՛ք քաղաքի աշտարակների վրա և կործանե՛ք,

բայց իսպառ մի՛ ավերեք.

թողե՛ք մնան նրա հիմքերը,

որովհետև դրանք Տիրոջն են։

¹¹ Հիրավի, Իսրայելի տունը և Հուդայի տունը

չափազանց արհամարհեցին ինձ»,- ասում է Տերը։

¹² Նրանք ստեցին իրենց Տիրոջը և ասացին.

«Բան չկա, մեզ վրա չարիքներ չեն գա,

սուր ու սով չենք տեսնի։

¹³ Մեր մարգարեները քամի էին,

նրանք չունեին Տիրոջ պատգամը։

Այդպես էլ թող լինի նրանց»։

¹⁴ Դրա համար էլ այսպես է ասում Ամենակալ Տերը՝ Աստվածը.

«Քանի որ այդ բանը խոսեցիք,

ահավասիկ իմ խոսքը քո բերանն եմ դնում իբրև կրակ,

թող լափի նրանց՝ այդ ժողովրդին, փայտի պես։

¹⁵ Ո՛վ Իսրայելի տուն,- ասում է Տերը,-

ահա հեռվից ես ձեզ վրա պիտի բերեմ մի ազգ, որ ուժեղ է ու հին,

ազգ, որի լեզուն լսած չեք լինի և խոսքը չեք հասկանա։

Նրա կապարճները նման են բաց գերեզմանների։

¹⁶ Ամենքն էլ զորավոր են.

¹⁷ ուտելու են ձեր հունձն ու հացը, ուտելու են ձեր տղաներին ու աղջիկներին,

ուտելու են ձեր ոչխարն ու արջառը,

ուտելու են ձեր այգիները, թզենիներն ու ձիթենիները,

ավերելու են ձեր անառիկ քաղաքները.

ինչով որ դուք պարծենում եք,

սրով կործանելու են։

¹⁸ Բայց այն օրն էլ,-

ասում է Տերը՝ քո Աստվածը,-

ձեզ ձեր վախճանին չեմ հասցնելու.

¹⁹ և երբ ասելու լինեն.

“Տերը՝ մեր Աստվածը, այս ամենն ինչո՞ւ արեց մեզ”,

կասես նրանց. “Քանի որ ինձ լքեցիք

և ձեր երկրում ծառայեցիք օտար աստվածներին,

այդպես էլ օտարներին եք ծառայելու մի երկրում, որը ձերը չի լինելու”»։

Աստված զգուշացնում է իր ժողովրդին

²⁰ Այդ մասին իմա՛ց տվեք Հակոբի տանը,

թող լսելի դառնա նաև Հուդայի տանը. ասացե՛ք.

²¹ «Լսե՛ք այս բանը, հիմա՛ր և անմի՛տ ժողովուրդ,

որ աչքեր ունեք, բայց չեք տեսնում,

ականջներ ունեք, բայց չեք լսում։

²² Մի՞թե ինձնից չեք երկնչում,-

ասում է Տերը,-

իմ երեսից չե՞ք դողում,

ինձնից, որ ավազը ծովին սահման կարգեցի հավիտենական հրամանով,

որ նա չանցնի դրանից,

ալեկոծվի, բայց չկարողանա դուրս գալ,

նրա ալիքները մռնչան, բայց չկարողանան անցնել դրանից։

²³ Այս ժողովուրդն անհնազանդ ու ըմբոստ սիրտ ունի.

խոտորվեցին ու անցան գնացին։

²⁴ Իրենց մտքում անգամ չասացին.

“Վախենանք Տիրոջից՝ մեր Աստծուց,

որը ըստ մեր հնձի ժամանակի,

նրանից առաջ և հետո

անձրև է տալիս մեզ և պահպանում է մեզ։

²⁵ Մեր անօրենությունները խախտեցին այդ կարգը,

և մեր մեղքերը մեզնից հեռացրին բարիքները”։

²⁶ Արդարև, իմ ժողովրդի մեջ գտնվեցին ամբարիշտներ

և մարդկանց ոչնչացնելու համար

թռչնորսների թակարդների պես որոգայթներ ու ցանցեր լարեցին և որսում էին։

²⁷ Ինչպես որոգայթներն են լի թռչուններով,

այնպես էլ նրանց տներն են լեցուն նենգությամբ։

Դրա համար էլ նրանք հարստացան, մեծացան,

գիրացան ու պարարտացան

²⁸ և չարությամբ զանց առան իմ խոսքերը.

արդար դատաստան չարեցին,

որբի իրավունքը չպաշտպանեցին, այրուն արդար դատով չդատեցին։

²⁹ Այս ամենից հետո,-

ասում է Տերը,-

մի՞թե չեմ այցելելու,

կամ այդպիսի ազգից ես վրեժ չե՞մ լուծելու։

³⁰ Հիմարություններ ու արհավիրքներ կատարվեցին երկրի վրա։

³¹ Մարգարեները սուտ մարգարեություն են անում,

քահանաները ծափահարում են նրանց,

և իմ ժողովուրդը սիրեց այդ։

Իսկ ի՞նչ եք անելու դրանից հետո»։

6

Երուսաղեմը շրջապատված թշնամիներով

¹ Բենիամինի՛ որդիներ, արիացե՛ք Երուսաղեմում,

փո՛ղ հնչեցրեք Թեկուեում

և դրո՛շ բարձրացրեք Բեթաքարմայի վրա,

որովհետև հյուսիսից հայտնվել են չարիքներ,

² մեծ կործանում է լինելու քեզ՝ գեղեցկիդ և փափկացյալիդ,

վերանալու է քո մեծամտությունը, դո՛ւստր Սիոնի։

³ Հովիվներն իրենց հոտերով նրա մոտ են գալու

և իրենց վրաններն են խփելու նրա շուրջը,

յուրաքանչյուրը հովվելու է իր ձեռքով։

⁴ Պատերազմի՛ պատրաստվեք նրա դեմ,

եկեք նրա դեմ ելնենք կեսօրին.

վա՜յ մեզ, որովհետև ցերեկն անցավ,

և մեզ վրա հասան երեկոյի ստվերները։

⁵ Եկեք գիշերով ելնենք և խորտակենք նրա հիմքերը։

⁶ Այսպես է ասում Զորությունների Տերը.

«Ջարդե՛ք նրա փայտաշեն տները,

զո՛րք հանեք Երուսաղեմի դեմ,

որովհետև նա ամբողջապես սուտ քաղաք է,

բռնությունն է իշխում նրա մեջ։

⁷ Ինչպես գուբն է իր ջուրը սառեցնում,

այնպես էլ նա է սառեցնում իր չարությունները.

այնտեղ՝ նրա հանդիման,

մշտապես ամբարշտություն

ու չարություն է լսվում ցավերով ու տանջանքներով։

⁸ Պիտի խրատվես, Երուսաղե՛մ։

Թող այնպես չլինի, որ ես բաժանվեմ քեզնից,

չլինի, որ քեզ դարձնեմ մի անապատ երկիր,

որտեղ ոչ ոք երբեք չի բնակվել»։

Իսրայելը պիտի ավերվի

⁹ Այսպես է ասում Զորությունների Տերը.

«Քաղե՛ք, քաղե՛ք,

Իսրայելի այդ մնացորդներին ճռաքա՛ղ արեք

և նորից նույն գործի՛ն վերադարձեք

ինչպես այգին քաղողն է վերադառնում դեպի իր զամբյուղը»։

¹⁰ Արդ, ո՞ւմ հետ խոսեմ

և ո՞ւմ մոտ վկայություն անեմ, որ լսի.

ահավասիկ նրանց ականջներն անթլփատ են,

և նրանք չեն կարողանում լսել։

Ահա Տիրոջ խոսքը նրանց համար նախատինք եղավ,

և այն այլևս ախորժելի չի լինելու նրանց։

¹¹ Ես լցվեցի բարկությամբ և այն զսպեցի իմ մեջ,

բայց նրանց չմեռցրի։

«Ես այն դուրս պիտի թափեմ տղաների վրա,

նաև երիտասարդների բազմության վրա.

այր ու կին առհասարակ գերեվարվելու են,

ծերը և հասուն տարիք ունեցողները քշվելու են։

¹² Նրանց տները նրանց արտերի ու կանանց հետ,

ընկնելու են օտարների ձեռքը,

քանզի,- ասում է Տերը,-

իմ ձեռքը պիտի երկարեմ այդ երկրի բնակիչների դեմ։

¹³ Նրանք՝ փոքրերից մինչև մեծերը, բոլորն էլ անօրենություններ գործեցին,

քահանայից մինչև սուտ մարգարեն բոլորն էլ սուտ խոսեցին։

¹⁴ Իմ ժողովրդի դստեր վերքերը նրանք բուժում էին արհամարհանքով

ու ասում՝ “Խաղաղությո՜ւն է, խաղաղությո՜ւն”.

բայց ո՞ւր է խաղաղությունը։

¹⁵ Խայտառակ եղան, որովհետև ձախողվեցին,

բայց ամոթի զգացում ունեցողների պես չպատկառեցին

և իրենց կրած անարգանքի մասին չմտածեցին,

դրա համար իրենց կործանումն են գտնելու,

և երբ իրենց այցելելու լինեմ՝

բնաջնջվելու են»,- ասում է Տերը։

Իսրայելը մերժում է Տիրոջ ճանապարհը

¹⁶ Այսպես է ասում Տերը.

«Կանգնե՛ք ճանապարհներին և դիտե՛ք,

հարցրե՛ք Տիրոջ հավիտենական ճանապարհների մասին,

տեսե՛ք, թե ո՛րն է բարի ճանապարհը և գնացե՛ք դրանով

ու քավություն կգտնեք ձեր հոգիների համար։

Իսկ նրանք ասացին՝ չե՛նք գնա։

¹⁷ Ձեզ վրա հսկիչներ կարգեցի՝ ասելով. «Լսե՛ք փողի ձայնը»։

Իսկ նրանք ասում են՝ չե՛նք լսի։

¹⁸ Այդ մասին իմացան ազգերը,

նաև նրանք, որ նրանց մեջ հովվություն էին անում հոտերին։

¹⁹ Լսի՛ր, երկի՛ր, ահավասիկ ես այդ ժողովրդի վրա չարիքներ եմ բերելու՝

իբրև իրենց ապստամբության պտուղ,

որովհետև իմ խոսքերին չանսացին և իմ օրենքը մերժեցին։

²⁰ Ինչի՞ համար է այդ խունկը, որ բերում ես ինձ Սաբայից,

և կինամոնը՝ հեռավոր երկրից.

ձեր ողջակեզներն ընդունելի չեն,

և ձեր զոհերն ինձ հաճելի չեն»։

²¹ Դրա համար էլ Տերն այսպես է ասում.

«Ահավասիկ ես հիվանդություն կբերեմ այդ ժողովրդի վրա,

հայրերն ու զավակները միասին կվարակվեն նրանով,

հարևան ու ընկեր կկորչեն միասին»։

Վրեժխնդրության արշավանք

²² Այսպես է ասում Տերը.

«Ահավասիկ զորք է գալիս հյուսիսից, մի մեծ ազգ։

Երկրի ծագերից հառնելու են բազում թագավորներ,

²³ աղեղնավորներ ու նիզակակիրներ,

հանդուգն ու անողորմ մի ազգ։

Նրա ձայնը նման է ալեկոծ ծովի ձայնի։

Կառքերով ու երիվարներով ճակատամարտ պիտի տա,

ինչպես կրակ՝ կազմ ու պատրաստ

պիտի պատերազմի քո դեմ, ո՛վ Սիոնի դուստր»։

²⁴ Նրանց լուրն առանք,

և մեր ձեռքերը թուլացան.

ծննդկանի երկունքի պես մեզ պաշարեցին նեղությունները։

²⁵ Դուրս մի՛ ելեք դեպի հանդերը

և մի՛ գնացեք ճանապարհներով, որովհետև ամենուր թշնամիների սուրն է շրջապատել։

²⁶ «Իմ ժողովրդի դո՛ւստր,

քո՛ւրձ հագիր, մոխի՛ր ցանիր, սո՛ւգ արա սիրելիի համար,

աղիողորմ լաց ու կո՛ծ արա,

որովհետև քո վրա թշվառությունը հանկարծակի է գալու։

²⁷ Ես քեզ կարգեցի պաշարված ժողովուրդների համար որպես փորձիչ,

և դու կիմանաս, երբ ես փորձեմ նրանց ճանապարհները»։

²⁸ Բոլորն անհնազանդ են և գնում են կամակորությամբ.

իբրև պղինձ և երկաթ՝

բոլորն էլ ապականված են։

²⁹ Փուքսերը ոչնչացան կրակից,

կապարն սպառվեց,

արծաթագործը զուր է չարչարվում։

Նրանց չարիքները չհալվեցին։

³⁰ Խոտան արծա՛թ կոչեք նրանց,

որովհետև Տերը նրանց խոտանեց։

Լսի՛ր Տիրոջ պատգամները, համա՛յն Հուդայի երկիր։

7

Երեմիան կոչ է անում

¹ Ահա այն պատգամը, որ Տերը տվեց Երեմիային՝ ասելով. ² «Կանգնի՛ր Տիրոջ տան դռան մոտ և այնտեղ կարդա՛ այս խոսքերն ու ասա՛. “Լսի՛ր Տիրոջ խոսքը, ո՛ղջ Հուդա, դու, որ մտնում ես այս դռներով՝ երկրպագելու Տիրոջը։ ³ Այսպես է ասում Զորությունների Տերը՝ Աստվածն Իսրայելի. “Ուղղե՛ք ձեր ընթացքն ու վարքը, և ձեզ կբնակեցնեմ այս վայրում։ ⁴ Մի՛ ապավինեք սուտ խոսքերին. նրանք, որ ասում են՝ “Տիրոջ տաճարն է”, բոլորովին ձեզ չեն օգնի։ ⁵ Եթե իսկապես ուղղեք ձեր ընթացքն ու վարքը, եթե այր մարդու և նրա ընկերոջ միջև օրենք ու արդարություն պահեք, ⁶ օտարականին, որբին ու այրուն չնեղեք, անմեղ արյուն չթափեք այդտեղ և չարության չհանդիպելու համար օտար աստվածներին չհետևեք, ⁷ ապա ձեզ կբնակեցնեմ այդ վայրում, այն երկրում, որ հավիտյանս հավիտենից տվեցի ձեր հայրերին։ ⁸ Իսկ եթե դուք սուտ խոսքերին ապավինեք, ինչից ոչ մի օգուտ չեք ունենալու, ⁹ և գողանաք, սպանեք, շնություն անեք, սուտ երդում տաք, խնկարկեք Բահաղին, հետևեք օտար սուտ աստվածներին, որոնց չեք ճանաչում, ապա ձեզ բաժին կհասնի չարիքը։ ¹⁰ Ու դուք կգաք, կկանգնեք իմ առաջ, այս Տան մեջ, որի վրա իմ անունն է դրված, և կասեք. “Հրաժարվեցինք բոլոր այն գարշելի գործերը կատարելուց”։ ¹¹ Մի՞թե ձեր աչքին ավազակների քարայր է դարձել իմ այս տունը, որի վրա իմ անունն է դրված։ Ահավասիկ ես տեսա,- ասում է Տերը։- ¹² Գնացե՛ք Սելով՝ իմ այն տեղը, որտեղ առաջ հաստատել էի իմ անունը, տեսեք, թե ինչպե՛ս վարվեցի նրա հետ Իսրայելի իմ ժողովրդի չարությունների պատճառով։ ¹³ Եվ հիմա,- ասում է Տերը,- քանի որ դուք այդ բոլոր գործերը կատարեցիք, իսկ ես խոսեցի ձեզ հետ՝ կանխավ իսկ ասելով այդ մասին, բայց դուք ականջ չդրեցիք ինձ, կանչեցի ձեզ, բայց պատասխան չտվեցիք ինձ։ ¹⁴ Այդ տան հետ, որի վրա դրված է իմ անունը, և որտեղ դուք ապաստան եք գտել, նույնն եմ անելու, ինչ արեցի Սելովի հետ, նաև այն երկրի հետ, որ տվեցի ձեզ և ձեր հայրերին։ ¹⁵ Ձեզ իմ աչքից գցելու եմ, ինչպես գցեցի ձեր եղբայրներին՝ Եփրեմի ամբողջ սերնդին»։

Աղոթք, որ մերժում է Տերը

¹⁶ «Դու մի՛ աղոթիր այդ ժողովրդի համար, դրանց համար ողորմություն մի՛ խնդրիր և մի՛ աղաչիր, իմ առաջ մի՛ խոնարհվիր դրանց համար, որովհետև քեզ չեմ լսելու։ ¹⁷ Չե՞ս տեսնում, թե ինչե՛ր են անում դրանք Հուդայի քաղաքներում և Երուսաղեմի ճանապարհներին. ¹⁸ նրանց որդիները փայտ են հավաքում, նրանց հայրերը կրակ են վառում, իսկ նրանց կանայք խմոր են հունցում, որպեսզի երկնքի զորությունների համար կարկանդակ թխեն. ընծաներ են նվիրում օտար աստվածներին, որպեսզի բարկացնեն ինձ։ ¹⁹ Բայց մի՞թե ինձ են բարկացնում,- ասում է Տերը,- թե՞ իրենք իրենց, որովհետև ամաչելու են իրենք»։ ²⁰ Դրա համար էլ Տերն այսպես է ասում. «Ահա իմ ցասումն ու բարկությունը կթափեմ այդ տեղի վրա, մարդու և անասունի վրա, ագարակի ծառի վրա, հողի բարիքների վրա. թող կրակը բորբոքվի ու չմարի»։

²¹ Այսպես է ասում Զորությունների Տերը՝ Իսրայելի Աստվածը. «Ձեր ողջակեզները ձեր զոհերի հետ հավաքե՛ք և մի՛ս կերեք։ ²² Ձեր հայրերի հետ ոչինչ չխոսեցի և ոչ էլ պատվեր տվեցի նրանց ողջակեզների և զոհերի մասին այն օրը, երբ նրանց հանեցի եգիպտացիների երկրից։ ²³ Բայց այս բանը պատվիրեցի նրանց՝ ասելով. “Ակա՛նջ դրեք իմ ձայնին, և ես ձեզ համար Աստված կլինեմ, իսկ դուք ինձ համար կլինեք ժողովուրդ և կգնաք իմ այն բոլոր ճանապարհներով, որ ձեզ պատվիրեցի, որպեսզի լավ լինի ձեզ համար”։ ²⁴ Սակայն նրանք ինձ չլսեցին, նրանց ականջը չանսաց. հետևեցին իրենց չար սրտերի խորհուրդներին ու հետ գնացին և ոչ թե առաջ ²⁵ այն օրից սկսած, երբ նրանց հայրերը դուրս եկան եգիպտացիների երկրից։ Ու ես ձեզ մոտ ուղարկեցի իմ բոլոր ծառաներին՝ մարգարեներին, ուղարկեցի ամեն օր, առավոտ կանուխ։ ²⁶ Սակայն նրանք չլսեցին ինձ, նրանց ականջը չանսաց, և նրանք ավելի խստապարանոց դարձան, քան իրենց հայրերը։ ²⁷ Այս խոսքերը դու կասես նրանց, բայց քեզ չեն լսի, դու կկանչես նրանց, բայց քեզ պատասխան չեն տա։ ²⁸ Եվ դու կասես նրանց. “Սա այն ազգն է, որ չանսաց Տիրոջ՝ իր Աստծու ձայնին, ոչ էլ խրատ ընդունեց։ Հավատքը նվազեց, և ճշմարտությունը վերացավ նրա բերանից”»։

Կոտորած Ենովմացիների ձորում

²⁹ «Կտրի՛ր մազերդ ու դե՛ն նետիր,

շրթունքներդ թող ողբան,

որովհետև Տերը խոտանեց ու մերժեց այն ազգին,

որ այս բաներն էր անում։

³⁰ Արդարև,- ասում է Տերը,- Հուդայի որդիները չարություն արեցին իմ առաջ. իրենց գարշելի աստվածներին կարգեցին իմ անունը կրող տան մեջ, որպեսզի պղծեն այն։ ³¹ Նաև Ենովմացիների ձորում Տափեթին բագին կանգնեցրին՝ իրենց տղաներին ու աղջիկներին կրակի մեջ այրելու համար, մինչդեռ այդպիսի հրաման ես նրանց չտվեցի և ոչ էլ մտքովս անցկացրի։ ³² Ահա թե ինչու գալու են օրեր,- ասում է Տերը,- երբ այլևս չեն ասի Տափեթի բագին կամ Ենովմացիների ձոր, այլ Սպանվածների ձոր և, տեղի պակասության պատճառով մեռելներին թաղելու են հենց Տափեթի մեջ։ ³³ Այդ ժողովրդի դիերը կերակուր պիտի դառնան երկնքի թռչունների և երկրի գազանների համար, և մարդ չի լինելու, որ հեռու քշի նրանց։ ³⁴ Հուդայի քաղաքներից և Երուսաղեմի փողոցներից վերացնելու եմ խրախճանքի ձայնը և ցնծացողների ձայնը, հարսի ձայնը և փեսայի ձայնը, որպեսզի երկիրը անապատ դառնա»։

8

Մեղք և պատիժ

¹ «Այն ժամանակ,- ասում է Տերը,- Հուդայի թագավորների ոսկորները և նրանց իշխանների ոսկորները, քահանաների ոսկորները և մարգարեների ոսկորները, նաև Երուսաղեմի բնակիչների ոսկորները պիտի հանեն իրենց գերեզմաններից, ² պիտի չորացնեն արևի տակ, լուսնի և բոլոր աստղերի տակ, երկնքի այն բոլոր զորությունների առաջ, որոնց սիրեցին ու ծառայեցին, որոնց հետևից ընթացան և որոնց ապավինեցին ու երկրպագեցին։ Նրանք լաց ու կոծի չեն արժանանալու, այլ երկրի երեսին նշավակ են լինելու, ³ քանի որ մահը նախընտրեցին և ոչ թե կյանքը, իսկ այս չար ազգի մնացորդներին, որոնք պահպանվել են, ամեն տեղ մնացածների հետ պիտի արտաքսեմ»,- ասում է Զորությունների Տերը։

⁴ «Ու դու կասես նրանց այսպես է ասում Տերը.

“Նա, որ գլորվում է, մի՞թե չի ելնում,

կամ նա, որ շեղվում է, հետ չի՞ դառնում”։

⁵ Արդ, Երուսաղեմն այդ ժողովրդի հետ ինչո՞ւ խոտորվեց ժպիրհ խոտորումով.

իրենց կամակորության մեջ համառեցին ու չցանկացան դարձի գալ։

⁶ Ակա՛նջ դրեք և լսե՛ք.

այդպես չպետք է խոսեն.

մարդ չկա, որ զղջա իր չարությունների համար

և ասի. “Ի՞նչ գործեցի”։

Արշավողը կասեցրեց իր ընթացքը,

ինչպես քրտինք մտած ձին է կանգնում խրխնջալիս։

⁷ Արդ, արագիլը երկնքում իր ժամանակը գիտի,

վայրի թռչուններ տատրակն ու ծիծեռնակը

չեն մոռանում իրենց վերադարձի ժամանակը,

իսկ իմ ժողովուրդը չճանաչեց Տիրոջ օրենքները։

Սուտ իմաստունները

⁸ Ինչո՞ւ եք ասում. “Մենք իմաստուն ենք,

և Աստծու օրենքները մեր մեջ են”.

ահա դրա համար սուտ դուրս եկավ դպիրների կարգը,

⁹ իմաստուններն ամոթահար եղան,

զարհուրեցին ու պարտվեցին,

որովհետև անարգեցին Տիրոջ խոսքը։

Նրանց մեջ ի՞նչ իմաստություն կա։

¹⁰ Դրա համար նրանց կանանց ուրիշներին պիտի տամ,

իսկ նրանց ագարակները՝ օտար ժառանգներին,

որովհետև նրանցից ամեն ոք՝

փոքրից մինչև մեծերը, չափից ավելի ագահություն է անում,

յուրաքանչյուրը՝ մարգարեից մինչև քահանան՝ անիրավություն։

¹¹ Իմ ժողովրդի դստեր վերքը նրանք բուժում էին արհամարհանքով և ասում.

“Խաղաղությո՜ւն է, խաղաղությո՜ւն”,

մինչդեռ խաղաղություն չկար։

¹² Պիտի ամաչե՞ն, որ պղծություն գործեցին։

Սակայն այդպես էլ ամոթ ու ամաչել չիմացան

և մտքներում պատկառանք չզգացին,

դրա համար երբ իրենց այցելելու լինեմ,

ընկածների հետ պիտի ընկնեն և ուժասպառ լինեն,-

ասում է Տերը։

¹³ Նրանք հավաքելու են իրենց բերքը,-

ասում է Տերը,-

բայց խաղող չի լինի նրանց այգիներում,

ոչ էլ թուզ՝ նրանց թզենիների վրա, որոնց տերևն անգամ պիտի թափվի.

ինչ տվել եմ նրանց, պիտի գնա նրանցից»։

¹⁴ Իսկ հիմա մենք ինչո՞ւ ենք նստել.

հավաքվե՛ք՝ գնանք մտնենք ամուր քաղաքները և այնտեղ մեռնենք,

քանի որ Տերը՝ մեր Աստվածը, լքեց մեզ

և դառնության ջուր խմեցրեց մեզ.

արդարև, մեղք գործեցինք նրա հանդեպ։

¹⁵ Հավաքվեցինք խաղաղության համար, բայց բարություն չկար,

հավաքվեցինք բժշկության համար, բայց ահա տագնապ է։

¹⁶ Դանից մեզ հասավ նրա արագընթաց երիվարների ձայնը.

նրա նժույգների խրխնջոցի ձայնից ցնցվեց ողջ երկիրը։

Թող գա և ուտի երկիրն իր ամեն ինչով,

նրա քաղաքներն ու բնակիչներին։

¹⁷ «Ես ահավասիկ ձեզ վրա սպանիչ օձեր եմ արձակելու,

որոնց վրա թովչությունները չեն ազդելու,-

ասում է Տերը,-

և նրանք պիտի խայթեն ձեզ՝

¹⁸ անբուժելի ցավեր պատճառելով ձեր տարակուսած սրտերին։

¹⁹ Ահա և իմ ժողովրդի դստեր գույժի ձայնը լսվում է հեռավոր երկրից.

“Մի՞թե Տերը Սիոնում չէ,

կամ այնտեղ թագավոր չկա՞”։

Ինչո՞ւ ինձ բարկացրին իրենց կուռքերով ու սնոտի աստվածություններով»։

²⁰ Հնձի ժամանակն անցավ,

ամառն անցավ, բայց մենք չփրկվեցինք։

²¹ Իմ ժողովրդի դստեր վերքն ինձ խորտակեց,

խավարեցի տարակուսանքի մեջ,

հալումաշ եղա, ինչպես ծննդկանը՝ երկունքից։

²² Մի՞թե Գաղաադում դեղ չի ճարվում,

կամ այնտեղ բժիշկ չկա՞.

իմ ժողովրդի դստեր համար ինչո՞ւ բժշկություն չեղավ։

²³ Ո՞վ կտար իմ գլխին ջուր

և իմ աչքերին՝ արտասուքի աղբյուրներ,

որ ես զօր ու գիշեր ողբայի այս ժողովրդին

և իմ ժողովրդի դստեր վիրավորներին։

9

Սուտն իշխում է երկրի վրա

¹ Ո՞վ կտար ինձ անապատում մի խղճուկ օթևան,

որ ես թողնեի իմ ժողովրդին,

հեռանայի նրանից,

քանզի բոլորն էլ անխտիր շնացող են

և արհամարողների բազմություն։

² «Նրանք լարեցին իրենց լեզուներն աղեղի պես.

ստությունը և ոչ թե հավատքը զորացավ երկրի վրա,

որովհետև նրանք չարությունից չարություն գնացին

և ինձ չճանաչեցին,- ասում է Տերը։

³ Յուրաքանչյուրդ ձեր ընկերոջից զգո՛ւյշ եղեք

և հույս մի՛ դրեք ձեր եղբայրների վրա,

որովհետև ամեն եղբայր խաբելով խաբում է,

և ամեն բարեկամ ընթանում է նենգությամբ։

⁴ Յուրաքանչյուրն այպանում է իր բարեկամին,

ճշմարտություն չեն խոսում.

նրանց լեզուն սովորեց սուտ խոսել։

Նրանք զրկեցին, բայց չհանգստացան,

⁵ վաշխ կուտակեցին վաշխի վրա

և նենգություն՝ նենգության վրա

և չկամեցան ճանաչել ինձ»,- ասում է Տերը։

⁶ Դրա համար էլ այսպես է ասում Աստված՝ Զորությունների Տերը.

«Ահավասիկ ես կրակով պիտի հալեմ նրանց

և պիտի փորձեմ նրանց,

որովհետև չարությունների պատճառով

ուրիշ ինչպե՞ս վարվեմ իմ ժողովրդի դստեր հետ։

⁷ Նրանց նենգավոր լեզուները խոցոտող նետ են։

Նրանց բերանի խոսքերը

իրենց ընկերոջ հետ խաղաղության մասին են խոսում,

իսկ նրանք իրենց սրտում թշնամություն ունեն։

⁸ Մի՞թե սրանց համար չեմ այցելելու նրանց,-

ասում է Տերը,-

կամ այդպիսի ազգից ես վրեժխնդիր չե՞մ լինելու։

⁹ Սգացե՛ք լեռների վրա

և ողբացե՛ք անապատի բլուրների վրա, աղաղակե՛ք,

որովհետև դրանք ամայացան. այլևս մարդիկ չեն անցնում այդ տեղերով,

և չեն լսվում անասունների ձայները։

Երկնային թռչուններից մինչև անասունները բոլորը զարմացան ու գնացին։

¹⁰ Երուսաղեմը գերության եմ մատնելու

և այն տալու եմ վիշապներին՝ բնակության համար,

իսկ Հուդայի քաղաքներն ավերածության եմ ենթարկելու,

որպեսզի բնակիչներ չլինեն»։

¹¹ Ով իմաստուն այր է, թող հասկանա այս բանը,

և ում տրված է Տիրոջ բերանի խոսքը,

նա մեզ թող պատմի, թե ինչի՛ համար կորստյան դատապարտվեց երկիրը։

Լքվեց ինչպես անապատ՝ անցորդներ չլինելու պատճառով։

¹² Եվ Տերն ինձ ասում է. «Քանի որ դրանք թողեցին իմ Օրենքը, որ դրել էի նրանց աչքի առաջ, և ականջ չդրեցին իմ ձայնին, ¹³ հետևեցին իրենց չար սրտերի հաճույքներին ու այն կուռքերին, որոնց հետևել սովորեցրին իրենց հայրերը, ¹⁴ դրա համար էլ այսպես է ասում Զորությունների Տերը՝ Իսրայելի Աստվածը. “Ահավասիկ այդ ժողովրդին վտանգով եմ կերակրելու և դառնության ջուր եմ խմեցնելու։ ¹⁵ Դրանց ցրելու եմ այն ազգերի մեջ, որոնց չէին ճանաչում ո՛չ իրենց հայրերը, ո՛չ էլ իրենք։ Դրանց վրա սուր եմ արձակելու, մինչև որ սրով կոտորեմ դրանց”»։

Կոչ եղերամայրերին

¹⁶ Այսպես է ասում Զորությունների Տերը.

«Մտածե՛ք և կանչե՛ք լալական կանանց, որ գան,

և մա՛րդ ուղարկեք՝ կանչելու իմաստուն կանանց.

թող նրանք կոծեն,

¹⁷ թող ստիպեն, թող ողբան ձեզ վրա։

Թող ձեր աչքերն արտասուք թափեն,

իսկ ձեր արտևանունքները ջուր հոսեցնեն»։

¹⁸ Սիոնում տարածվեց աղիողորմ մի ձայն.

«Ինչպե՜ս թշվառացանք ու խիստ ամաչեցինք,

որովհետև լքեցինք երկիրը, թողեցինք մեր բնակավայրերը»։

¹⁹ Կանա՛յք, լսե՛ք Տիրոջ պատգամները,

և թող ձեր ականջներն ընկալեն նրա բերանի խոսքերը։

Ձեր դուստրերին կոծե՛լ սովորեցրեք,

իսկ կինն իր ընկերոջը թող ողբալ սովորեցնի,

²⁰ քանզի մահը ձեր պատուհաններով բարձրացավ և մտավ ձեր երկիրը՝

տներից դուրս մանուկներին,

իսկ երիտասարդներին հրապարակներից ջնջելու համար։

²¹ Այսպես է ասում Տերը.

«Թող մարդկանց դիակները

խայտառակության օրինակ դառնան ձեր երկրի դաշտերի երեսին.

թող լինեն ինչպես խոտն է մնում հնձողից հետո,

և չի լինի մեկը, որ այն հավաքի»։

²² Այսպես է ասում Տերը.

«Թող իմաստունն իր իմաստությամբ չպարծենա,

թող հզորն իր զորությամբ չպարծենա,

և թող հարուստն իր հարստությամբ չպարծենա,

²³ այլ պարծեցողը թող այս բանով պարծենա՝

իմանալ և ճանաչել ինձ, որ ես եմ Տերը՝ Աստված,

որ երկրի վրա իրավ դատաստան,

ողորմություն ու արդարություն եմ անում,

որոնք հաճելի են ինձ,- ասում է Տերը։

²⁴ Ահա գալու են օրեր,- ասում է Տերը,-

երբ ես այցելելու եմ անթլփատ մնացած բոլոր թլփատվածներին՝

²⁵ Եգիպտոսին և Հուդայի երկրին, եդովմացիներին ու ամովնացիներին,

մովաբացիներին և երեսներն ածիլած բոլոր անապատաբնակներին,

որովհետև բոլոր ազգերն անթլփատ են մարմնով,

իսկ ողջ Իսրայելն անթլփատ է իր սրտով»։

10

Կռապաշտություն և ճշմարիտ երկրպագություն

¹ Ո՛վ Իսրայելի տուն, լսի՛ր Տիրոջ պատգամները, որ քեզ են ուղղված։

² Այսպես է ասում Տերը.

«Մի՛ սովորեք գնալ հեթանոսների ճանապարհներով

և մի՛ զարհուրեք երկնքի նշաններից,

որոնցից նրանք են վախենում։

³ Հեթանոսների բոլոր կուռքերը սնոտի բաներ են՝

անտառից կտրված փայտ,

հյուսների ձեռքի գործեր,

⁴ արծաթով և ոսկով զարդարված ձուլածո բաներ։

Մուրճերով և գամերով ամրացրել են դրանք, որ չշարժվեն.

հղկված արծաթ են,

Թարսիսի բանված արծաթ և ոսկի՝ բերված Մեմփաթայից։

⁵ Ոսկերչի ձեռքը ճարտար վարպետի գործ է արել.

կապույտ ու ծիրանի են հագցնում նրանց,

բայց նրանք չեն կարող գնալ,

այլ պետք է բարձվելով տարվեն.

ոտքով մի քայլ էլ չեն փոխի,

ոչ էլ իրենք իրենց կարող են բարձրանալ այն բանի վրա,

որով տանում են։

Մի՛ վախեցեք նրանցից,

որովհետև չարություն չեն անում,

բայց բարություն էլ չկա նրանց մեջ։

⁶ Քեզ նման ոչ ոք չկա, Տե՛ր,

մեծ ես դու և մեծ է քո անունը զորությամբ։

⁷ Ո՞վ չի երկնչի քեզնից, ազգերի՛ Թագավոր,

դա քեզ է միայն վայել,

քանզի բոլոր հեթանոս իմաստունների

և նրանց բոլորը թագավորների մեջ ո՞վ է քեզ նման։

⁸ Թող միանգամից այրվեն,

թող տկարանան սրտերը սնոտի աստվածների, որովհետև դրանք փայտ են,

⁹ Թարսիսից բերված ընտիր արծաթ և ոսկի՝ Սովփաթայից։

Դրանք բոլորը վարպետների և ոսկերիչների ձեռքի գործն են.

դրանց կապուտակ ու ծիրանի բոլոր զգեստները

հնարամիտ վարպետների գործ են։

¹⁰ Իսկ մեր Տերը՝ Աստված, ճշմարիտ է,

կենդանի Աստված է և հավիտենական Թագավոր։

Նրա բարկությունից երկիրը կշարժվի,

ազգերը չեն դիմանա նրա բարկությանը։

¹¹ Այսպես կասեք նրանց.

«Այն աստվածները, որոնք երկինքն ու երկիրը չեն ստեղծել,

կորչելու են երկրից և այս երկնքի տակից»։

Փառաբանության երգ

¹² Տերն է, որ իր զորությամբ ստեղծեց երկիրը,

իր իմաստությամբ հաստատեց տիեզերքը

և իր հանճարով տարածեց երկինքը։

¹³ Իր ձայնն արձակելիս նա երկինքը լցնում է ջրերի առատությամբ,

երկրի ծայրերից ամպեր է բարձրացնում,

իր փայլատակումներն անձրևների վերածում,

հողմեր է հանում իր շտեմարաններից։

¹⁴ Ամեն մարդ, գիտությունից զրկված, ապուշ դարձավ,

իրենց արձանների պատճառով բոլոր ոսկերիչներն ամոթահար եղան,

որովհետև սուտ բաներ ձուլեցին,

և նրանց մեջ շունչ չկա.

¹⁵ սնոտի ու խաբեական գործեր են դրանք.

իրենց այցելելու ժամանակ կորստյան են մատնվելու։

¹⁶ Սակայն այդպիսին չէ Հակոբի բաժինը.

նրա բաժինը նա է, որ ստեղծեց ամենայն ինչ,

որի ժառանգության գավազանն Իսրայելն է,

և նրա անունը Զորությունների Տեր է։

Մոտալուտ աքսոր

¹⁷ Ո՛վ դու, որ բնակվում ես ընտրյալների մեջ,

հեռուներից հավաքի՛ր քո զորությունը։

¹⁸ Այսպես է ասում Տերը.

«Ահա ես նեղությունն իբրև խոչընդոտ քար եմ դնելու

այդ երկրի բնակիչների ոտքերի տակ

և հալածելու եմ նրանց, որ չգտնվեն»։

¹⁹ Վա՜յ քո կործանումին, քանզի ցավալի են քո վերքերը.

իսկ ես ասում եմ. «Արդարև հենց դրանք են իմ վերքերը, որ վիճակվեցին ինձ.

²⁰ խորանն իմ խորտակվեց, վերացավ,

իմ վրանի բոլոր վարագույրները քանդվեցին,

իմ որդիներն ու հոտերը ոչ մի տեղ չեն երևում.

այլևս չկա իմ խորանի տեղը,

չկա և իմ վարագույրների տեղը»։

²¹ Հովիվներն անմտացան և Տիրոջը չփնտրեցին,

դրա համար ողջ հոտը չճանաչեց նրանց ու ցիրուցան եղան։

²² Բոթաբեր ձայն է գալու և մեծ դղրդում՝ հյուսիսի երկրից,

որպեսզի Հուդայի քաղաքներն ավերածության ենթարկի

և ջայլամների կայան դարձնի։

²³ Գիտեմ, Տե՛ր, որ մարդու ուղին իրենից կախված չէ,

այր մարդն ի վիճակի չէ տնօրինելու իր ճանապարհի հաջողությունը։

²⁴ Խրատի՛ր մեզ, Տե՛ր,

բայց արդարությամբ և ոչ թե ցասմամբ,

որ մեզ սակավաթիվ չդարձնես։

²⁵ Քո բարկությունը թափի՛ր հեթանոսների վրա,

որոնք չեն ճանաչում քեզ,

և այն ազգերի վրա,

որոնք չկանչեցին քո անունը,

որովհետև նրանք հոշոտեցին Հակոբին,

սպառեցին նրան, վախճանի հասցրին նրան

և ավերեցին նրա արոտավայրերը։

11

Տիրոջ նզովքը Հուդայի երկրի դեմ

¹ Սա այն խոսքն է, որ Երեմիան ստացավ Տիրոջից.

² «Լսե՛ք այս ուխտի խոսքերը և հայտնե՛ք Հուդայի մարդկանց ու Երուսաղեմի բնակիչներին։

³ Եվ կասես նրանց. այսպես է ասում Տերը՝ Աստվածն Իսրայելի. “Թող անիծյալ լինի այն մարդը, որը չի լսի այս ուխտի խոսքերը, ⁴ որ ավանդել եմ ձեր հայրերին այն օրը, երբ նրանց հանում էի եգիպտացիների երկրից՝ երկաթի հնոցից՝ ասելով. “Ակա՛նջ դրեք իմ ձայնին և ինչ որ պատվիրեմ ձեզ, կատարե՛ք ըստ ամենայնի, և դուք իմ ժողովուրդը կլինեք, իսկ ես՝ ձեր Աստվածը”։ ⁵ Կհաստատեմ իմ երդումը, որ երդվեցի ձեր հայրերին՝ տալու նրանց այն երկիրը, որը մեղր ու կաթ է բխեցնում, ինչպես և այսօր”»։

Պատասխանեցի և ասացի. «Այո՛, Տե՛ր, թող այդպես լինի»։

⁶ Եվ Տերն ինձ ասաց. «Այդ բոլոր խոսքերն ընթերցի՛ր այդտեղ՝ Հուդայի քաղաքներում ու Երուսաղեմից դուրս, և ասա՛. “Լսե՛ք այս ուխտի պատգամները և կատարե՛ք դրանք։ ⁷ Չէ՞ որ այն օրը, երբ ես նրանց հանեցի եգիպտացիների երկրից, ու մինչև այսօր, ամեն առավոտ կանուխ, ձեր հայրերին խստագույնս խրատեցի և ասացի. “Ակա՛նջ դրեք իմ ձայնին”, բայց նրանք չլսեցին։ ⁸ Ականջները շուռ տվեցին և բոլորն իրենց հոժար սրտով գնացին դեպի չարիքը։ Եվ որովհետև ինչ որ պատվիրեցի նրանց անել, չարեցին, իմ այս ուխտի բոլոր խոսքերը կկատարեմ նրանց նկատմամբ”»։

⁹ Եվ Տերն ինձ ասաց. «Հուդայի մարդկանց և Երուսաղեմի այդ բնակիչների մեջ դավադրություն գտնվեց։ ¹⁰ Նրանք դարձ կատարեցին դեպի իրենց նախահայրերի անիրավությունը, որոնք չէին կամենում հետևել իմ խոսքերին։ Ահավասիկ նրանք գնում են օտար աստվածների հետևից, որպեսզի ծառայեն նրանց։ Իսրայելի տունը և Հուդայի տունը խախտեցին իմ ուխտը, որ կապել էի նրանց հայրերի հետ»։ ¹¹ Դրա համար էլ Տերն այսպես է ասում. «Ահավասիկ ես չարիք կբերեմ նրանց վրա, որից չպիտի կարողանան դուրս գալ։ Ինձ են կանչելու, բայց չեմ լսելու նրանց։ ¹² Հուդայի քաղաքներն ու Երուսաղեմի բնակիչները կգնան, կկանչեն իրենց աստվածներին, որոնց խունկ էին ծխում, բայց նրանցից փրկություն չի լինելու իրենց նեղության ժամանակ։ ¹³ Քո աստվածները, Հուդա՛, թվով այնքան էին, որքան քո քաղաքները, և ըստ Երուսաղեմի փողոցների թվի՝ ամոթի բագիններ ու սեղաններ կանգնեցրիք Բահաղին խունկ ծխելու համար։ ¹⁴ Իսկ դու մի՛ աղոթիր այդ ժողովրդի համար, խնդրանքներով մի՛ աղաչիր ու պաղատիր դրանց համար, որովհետև երբ իրենց նեղության ժամանակ կանչեն ինձ, ես չպիտի լսեմ։

¹⁵ Իմ սիրելի ժողովրդի մասին եմ ասում,

քանզի նա իմ տաճարի ներսում պղծություն գործեց։

Մի՞թե աղոթքը և զոհերի միսը քեզնից կվերացնեն քո չարիքները,

կամ թե դրանցով դու կփրկվե՞ս։

¹⁶ Տերը քո անունը գեղատես ու վարսավոր ձիթենի դրեց։

Նրանց թլփատության ձայնից դու մեծ նեղության մեջ ես.

անպետքացան քո ոստերը։

¹⁷ Զորությունների Տերը, որ քեզ տնկեց, Իսրայելի տան և Հուդայի տան չարությունների պատճառով քո հանդեպ չար խոսեց. նրանք իրենք իրենց դեմ գործեցին, ինձ բարկացնելով՝ Բահաղին խնկարկեցին»։

Դավ Երեմիայի կյանքի դեմ

¹⁸ Տե՛ր, ճանաչե՛լ տուր ինձ, և ես կճանաչեմ. այն ժամանակ կտեսնեմ նրանց գործերը։ ¹⁹ Ես՝ իբրև անմեղ մի գառ, որին մորթելու են տանում, չիմացա, որ իմ մասին չար խորհուրդ են արել և ասում են. «Եկեք նրա հացի մեջ փայտ գցենք և նրան ջնջենք ողջերի երկրից, թող նրա անունն այլևս չհիշվի»։

²⁰ Զորությունների՛ Տեր, դու, որ արդար ես վարվում,

քննում ես երիկամներն ու սրտերը,

թող ես տեսնեմ, որ վրեժխնդիր ես լինում նրանցից,

քանզի քե՛զ հանձնեցի իմ դատը։

²¹ Դրա համար էլ Տերն այսպես է ասում Անաթովթի մարդկանց մասին, որոնք քո անձն են փնտրում՝ ասելով. «Մեր մասին մի՛ մարգարեացիր, ապա թե ոչ կմեռնես մեր ձեռքով»։ ²² Ահա թե ինչու այսպես է ասում Զորությունների Տերը. «Ահավասիկ ես պիտի այցելեմ նրանց. նրանց երիտասարդները սրով պիտի սպանվեն, տղաներն ու աղջիկները սովից պիտի վախճանվեն։ ²³ Նրանցից ոչ ոք չի մնալու, որովհետև Անաթովթի բնակիչներին չարիք եմ բերելու այն տարին, երբ գամ նրանց այցելելու»։

12

Երեմիայի գանգատը

¹ Արդար ես դու, Տե՛ր,

և քո առջև խնդրանք պիտի դնեմ

ու իմ իրավունքի մասին խոսեմ.

ինչպե՞ս է, որ ամբարիշտների բռնած գործերը հաջողվում են,

և բոլոր նրանք, ովքեր արհամարհում են ու անարգում,

երջանիկ դարձան։

² Տնկեցիր նրանց, և նրանք արմատ գցեցին,

որդիներ ունեցան, պտուղ տվեցին։

Դու, Տե՛ր, նրանց շուրթերին ես,

սակայն հեռու ես նրանց երիկամներից։

³ Դու, ո՛վ Տեր, գիտես ինձ,

տեսար ինձ և քո առաջ փորձեցիր իմ սիրտը.

հավաքի՛ր նրանց իբրև մորթելու ոչխար և

մաքրագործի՛ր նրանց սպանության օրվա համար։

⁴ Երկիրը մինչև ե՞րբ պետք է սուգ պահի,

ու ամբողջ վայրի խոտը չորանա։

Անասուն ու թռչուն կոտորվեցին

երկրի բնակիչների չարությունների պատճառով,

որովհետև ասացին.

«Աստված չի տեսնի մեր ընթացքը»։

⁵ Քո ոտքերը ընթանում են, բայց քեզ պիտի լքեն,

էլ ինչպե՞ս պիտի մրցես ձիավորների հետ։

Եվ հիմա այս խաղաղ երկրի՞ վրա ես հույսդ դրել.

իսկ ի՞նչ ես անելու, երբ Հորդանան գետը բարձրանա,

⁶ քանի որ քո եղբայրներն ու քո հոր տունը՝

նրա՛նք անգամ դավաճանեցին քեզ,

նրանք էլ աղաղակ բարձրացրին քո հետևից

և կուտակվեցին քո գլխին։

Մի՛ հավատա նրանց, որովհետև չարախոսում են քո մասին։

Տիրոջ վիշտը իր ժողովրդի համար

⁷ Ես լքեցի իմ տունը,

թողեցի իմ ժառանգությունը

և իմ հոգու սիրելիին տվեցի իր թշնամիների ձեռքը։

⁸ Իմ ժառանգությունն ինձ համար դարձավ անապատի առյուծ,

իր ձայնը բարձրացրեց ինձ վրա,

դրա համար էլ ատեցի նրան։

⁹ Մի՞թե իմ ժառանգությունն ինձ համար բորենու որջ է լինելու

կամ այն շրջապատող քարանձա՞վ.

շրջե՛ք, հավաքե՛ք անապատի բոլոր գազաններին,

որ գան այն ուտելու։

¹⁰ Բազում հովիվներ ապականեցին իմ այգին,

եղծեցին իմ բաժինը,

իմ ցանկալի դաշտը խոպան անապատ դարձրին.

¹¹ այն ենթարկվեց ավերի ու ապականության։

Ողջ երկիրն իմ պատճառով քայքայվեց ու քանդվեց,

որովհետև ոչ ոք իմ զգուշացումներին ունկնդիր չեղավ,

և չկա մեկը, որի սիրտը ցավի դրա համար։

¹² Մարդիկ թշվառացած անցան անապատի բոլոր ճանապարհներով,

քանզի երկրի մի ծայրից մինչև մյուսը Տիրոջ սուրն է լափում.

ոչ մի մարմնի համար հանգիստ չկա։

¹³ Ցորեն ցանեցիք, սակայն փուշ եք հնձելու,

և ձեր հողաբաժիններն օգուտ չեն տալու ձեզ։

Ձեր հպարտությունն ամոթանքի է փոխվելու այն նախատինքից,

որ կրելու եք Տիրոջ առաջ։

Չար հարևաններ

¹⁴ Այսպես է ասում Տերը. «Բոլոր չար հարևանները, որոնք ձեռք են բարձրացնում այն երկրի վրա, որ բաշխեցի Իսրայելի իմ ժողովրդին, ահավասիկ ես նրանց հեռացնելու եմ իրենց երկրից, Հուդայի տունը ևս հանելու եմ նրանց միջից։ ¹⁵ Բայց նրանց արտաքսելուց հետո ես նորից պիտի դառնամ ու գթամ նրանց և յուրաքանչյուրին բնակեցնեմ իր ժառանգության մեջ, ամեն մեկին՝ իր երկրում։ ¹⁶ Եվ եթե նրանք լավ սովորեն իմ ժողովրդի ճանապարհը, երդվեն իմ անունով, թե կենդանի է Տերը, ինչպես որ սովորեցրին իմ ժողովրդին երդվել Բահաղին, ապա նրանք կհաստատվեն իմ ժողովրդի մեջ։ ¹⁷ Իսկ եթե դարձի չգան, ես կջնջեմ այդ ազգին, կորստյան մատնելով՝ կվերացնեմ նրանց»,- ասում է Տերը։

13

Փտած գոտու դասը

¹ Այսպես է ասում Տերը. «Գնա՛, քեզ համար ձե՛ռք բեր կտավե գոտի, փաթաթի՛ր մեջքիդ, բայց ջրի միջով չանցնես»։ ² Հետևելով Տիրոջ խոսքին՝ ես ձեռք բերեցի մի գոտի ու փաթաթեցի մեջքիս։ ³ Տերը, խոսքը կրկին ինձ ուղղելով, ասաց. ⁴ «Այդ գոտին, որ ձեռք բերեցիր, հանի՛ր քո մեջքից, վեր կաց գնա՛ Եփրատի ափը և դա թաքցրո՛ւ այնտեղ՝ ժայռի խոռոչում»։ ⁵ Ես գնացի և այն թաքցրի Եփրատի ափին, ինչպես պատվիրել էր ինձ Տերը։ ⁶ Եվ ահա շատ օրեր անց Տերն ինձ ասաց. «Վեր կաց գնա՛ Եփրատի ափը և վերցրո՛ւ այն գոտին, որը հրամայեցի քեզ այնտեղ թաքցնել»։

⁷ Գնացի Եփրատ գետի ափը, փորեցի և վերցրի գոտին այնտեղից, որտեղ այն թաղել էի. բայց ահա գոտին փտել էր և ոչ մի բանի պիտանի չէր։ ⁸ Տերը, խոսքն ինձ ուղղելով, ասաց. ⁹ այսպես է ասում Տերը. «Այդպես էլ ապականելու եմ Հուդայի հպարտությունը և Երուսաղեմի հպարտությունը, ¹⁰ քաղաքն ու իմ չար ժողովրդին, որոնք չէին ուզում ականջ դնել իմ խոսքերին, որոնք գնում են իրենց չար սրտերի ցանկությամբ, ընթանում են օտար աստվածների հետևից, որպեսզի ծառայեն նրանց և երկրպագեն. նրանք պիտի դառնան այդ գոտու պես, որը ոչ մի բանի պիտանի չէ։ ¹¹ Ինչպես որ գոտին պատում է մարդու մեջքը, այդպես իմ շուրջը պատեցի Իսրայելի ամբողջ տունը և Հուդայի ամբողջ տունը,- ասում է Տերը,- որպեսզի նրանք ինձ համար դառնան անվանի ժողովուրդ և պարծանք ու փառք. բայց նրանք չլսեցին ինձ»։

Գինու տիկի դասը

¹² «Այդ ժողովրդին կհայտնես այդ պատգամը. այսպես է ասում Տերը՝ Իսրայելի Աստվածը. “Ամեն տիկ գինով պետք է լցվի։ Եվ եթե այնպես լինի, որ քեզ ասեն. “Մի՞թե մենք չենք հասկանում ու չգիտենք, որ ամեն մի տիկ գինով պիտի լցվի”, ¹³ ապա կասես նրանց. այսպես է ասում Տերը. “Ահա ես պիտի լցնեմ ու հարբեցնեմ այդ երկրի բոլոր բնակիչներին և թագավորներին՝ Դավթի որդիներին, որոնք նստում են նրա աթոռին, քահանաներին ու մարգարեներին, Հուդայի ու Երուսաղեմի բոլոր բնակիչներին։ ¹⁴ Ցրելու եմ դրանց՝ մարդուն իր եղբոր, հորն իր զավակների հետ,- ասում է Տերը.- չեմ գթալու և չեմ խնայելու, առանց ողորմելու բնաջնջելու եմ դրանց”»։

Սիոնի դստեր խայտառակությունը

¹⁵ Լսե՛ք, ունկնդի՛ր եղեք և մի՛ հպարտացեք,

քանզի Տերը խոսեց։

¹⁶ Տիրոջը՝ ձեր Աստծուն, փա՛ռք տվեք,

քանի դեռ խավարը չի պատել,

և ձեր ոտքերը խավար լեռների վրա չեն սայթաքել։

Լույս պիտի ակնկալեք,

իսկ այնտեղ մահվան ստվերներ են.

ձեզ դնելու են խավարի մեջ։

¹⁷ Եվ եթե չլսեք նրան,

ձեր հոգու խորքում լաց պիտի լինեք թշնամիների երեսից,

արցունքը պիտի խեղդի ձեզ,

ձեր աչքերից արտասուք պիտի թափվի,

որովհետև կործանվեց Տիրոջ հոտը։

¹⁸ Թագավորին ու բռնացող իշխաններին ասացե՛ք.

«Խոնարհվե՛ք ու գետնի՛ն նստեք,

քանի որ ձեր փառքի պսակն ընկավ ձեր գլուխներից։

¹⁹ Հարավի կողմի քաղաքները փակվեցին,

և ոչ ոք չկա, որ բաց անի.

Հուդան գերվեց ամբողջական գերությամբ՝

կատարելապես հատուցելով»։

²⁰ «Բարձրացրո՛ւ քո աչքերը, Երուսաղե՛մ,

և նայի՛ր հյուսիսից հարձակվողներին.

ո՞ւր է այն հոտը, որ տրվեց քեզ,

քո փառավոր ոչխարներն ո՞ւր են։

²¹ Երբ քեզնից պահանջեն,

այն ժամանակ ի՞նչ պատասխան ես տալու.

դու ինքդ սովորեցրիր նրանց, որ իշխեն քեզ վրա։

Մի՞թե երկունքի ցավերը չեն բռնելու քեզ,

ինչպես ծննդկան կնոջը։

²² Եվ եթե քո սրտում ասես՝ “Ինչո՞ւ այս բանը պատահեց ինձ հետ”,

ապա դա եղավ քո բազում անիրավությունների պատճառով,

քանի որ քո կրունկները բացվեցին քո հետևից՝

խայտառակելով քեզ։

²³ Թե որ հնդիկը փոխի իր մաշկը, ընձառյուծը՝ իր պուտերը,

դուք էլ կկարողանաք բարություն անել,

դուք, որ սովորել եք չարիք գործել։

²⁴ Ես ցրելու եմ նրանց՝

անապատում հողմակոծ խռիվի նման։

²⁵ Ինձ չհավանելուդ համար այդ է քո մասն ու բաժինը,

քանի որ մոռացար ինձ և հույսդ սուտ աստվածների վրա դրեցիր։

²⁶ Ես պիտի մերկացնեմ քո հետևը՝

փեշդ քաշելով քո գլխին ու երեսին,

որ երևան քո ամոթույքը,

²⁷ քո շնությունն ու վրնջյունը, դու, որ քո պոռնկությամբ խորթացար ինձնից։

Ես տեսա քո գարշելի կուռքերը բագիններում ու անդաստաններում։

Վա՜յ քեզ, Երուսաղե՛մ,

որ իմ հետևից գալով՝ չես մաքրվելու։

Մինչև ե՞րբ ես այդպես մնալու»։

14

Երաշտը

¹ Տիրոջ խոսքը, որ նա ասաց Երեմիային երաշտի մասին.

² «Սուգ մտավ Հուդայի երկիր, նրա դռները մնացին թափուր,

խավարեցին երկրի վրա,

և Երուսաղեմի աղաղակը բարձրացավ։

³ Նրանց մեծամեծներն իրենց երիտասարդներին ջրի ուղարկեցին.

նրանք եկան ջրհորները և ջուր չգտան.

իրենց ամանները դատարկ հետ բերեցին։

Ամաչեցին ու ամոթահար ծածկեցին իրենց գլուխները։

⁴ Երկրագործությունը դադարեց, որովհետև հողն առանց անձրևի մնաց.

մշակներն ամոթահար եղան,

ծածկեցին իրենց գլուխները։

⁵ Հանդում եղնիկները ձագ ծնեցին,

սակայն թողեցին իրենց ձագերին,

որովհետև բուսականություն չկար.

⁶ ցիռերը դաշտերում վիշապների պես օդ ծծեցին,

նրանց աչքերը տկարացան, որովհետև խոտ չկար»։

⁷ Թեպետ մեր մեղքերը կանգնեցին մեր դեմ,

բայց դու, Տե՛ր, վարվի՛ր հանուն քո անվան։

Բազում են մեր մեղքերը քո առաջ.

մեղք ենք գործել քո հանդեպ,

⁸ ո՛վ հույսդ Իսրայելի։

Տե՛ր, նեղության ժամին փրկի՛ր մեզ։

Ինչո՞ւ երկրի վրա պանդուխտի պես եղար

կամ երկրի մի բնակչի պես, որ իր իջևանն է վերադառնում։

⁹ Մի՞թե դու քնած մի մարդ ես,

կամ մի այր, որ զուրկ է փրկելու կարողությունից։

Բայց դու, Տե՛ր, մեր մեջ ես,

և քո անունը դրված է մեզ վրա, մի՛ մոռացիր մեզ։

¹⁰ Այսպես է ասում Տերն այդ ժողովրդին. «Այդպես սիրեցին նրանք թափառել ու իրենց չխնայեցին»։ Եվ Աստված բարեհաճ չեղավ նրանց հանդեպ. այժմ պիտի հիշի նրանց անիրավությունները և պիտի այցելի նրանց իրենց մեղքերի համար։

¹¹ Տերն ինձ ասում է. «Այն ժողովրդին բարիք անելու համար մի՛ աղոթիր։ ¹² Եթե ծոմ պահեն, չեմ լսելու նրանց խնդրանքները. եթե ողջակեզներ ու զոհեր մատուցեն, դրան հաճություն ցույց չեմ տալու. սրով, սովով ու մահով պիտի սպառեմ նրանց»։

¹³ Իսկ ես ասում եմ. «Ո՛վ Տեր, ահա մարգարեներն ասում են նրանց, թե՝ “Սուր չեք տեսնելու, սով չի լինելու ձեր մեջ, քանզի ճշմարտություն ու խաղաղություն պիտի շնորհվեն երկրի և այդ տեղի վրա”»։

¹⁴ Տերն ինձ ասում է. «Մարգարեներն իմ անունով սուտ մարգարեություն են անում. ես ո՛չ ուղարկել եմ նրանց, ո՛չ պատվեր եմ տվել նրանց, ո՛չ էլ խոսել եմ նրանց հետ. նրանք ձեզ մարգարեանում են սուտ տեսիլներ, սնոտի գուշակություններ ու հմայություններ և իրենց սրտի ցանկությունները»։ ¹⁵ Դրա համար Տերն այսպես է ասում մարգարեների մասին. «Նրանք մարգարեություն են անում իմ անունով, բայց ես չեմ ուղարկել նրանց, ոչ էլ պատվիրել եմ նրանց, որ ասեն. “Սուր ու սով չպիտի լինի այս երկրում”։ Մահվան քայքայիչ հիվանդությամբ և սրով ու սովով պիտի ոչնչանան այդ մարգարեները, ¹⁶ նաև այն ժողովուրդը, որի համար նրանք մարգարեանում են. նրանք սրից ու սովից ընկած պիտի մնան Երուսաղեմի ճանապարհներին, թե՛ նրանք, թե՛ նրանց կանայք և թե՛ նրանց որդիներն ու դուստրերը, և նրանց թաղող չպիտի լինի. իրենց չարությունն իրենց վրա պիտի թափեմ։

¹⁷ Նրանց կասես նաև այս խոսքը.

“Զոր ու գիշեր ձեր աչքերից արտասո՛ւք թափեք,

և թող վերջ չլինի դրան,

քանզի իմ ժողովրդի կույս աղջիկը մեծ կոտորածի,

ամենացավագին հարվածների ենթարկվեց։

¹⁸ Դաշտ եմ դուրս գալիս,

և ահա սրից վիրավորվածներ,

քաղաք եմ մտնում,

և ահա սովից տանջվողներ,

որովհետև մարգարեն ու քահանան գնացին իրենց չճանաչած երկիրը”»։

Զղջման աղերսանք

¹⁹ Մի՞թե իսպառ երես թեքեցիր Հուդայից,

կամ նրանից բոլորովին հեռացա՞վ քո հոգին.

ինչո՞ւ այնպես հարվածեցիր մեզ,

որ բժշկություն չլինի մեզ համար։

Խաղաղություն ակնկալեցինք,

բայց բարի բան չկատարվեց,

սպասեցինք բժշկության ժամին,

բայց ահա խռովություն եղավ։

²⁰ Տե՛ր, գիտակցեցինք մեր մեղքերը և մեր հայրերի անիրավությունները,

քանզի մեղք գործեցինք քո առաջ։

²¹ Քո անվան համար մեղմի՛ր բարկությունդ,

կորստյան մի՛ մատնիր քո փառքի աթոռը.

հիշի՛ր, մի՛ խզիր քո ուխտը,

որ կապել ես մեզ հետ։

²² Հեթանոսական կուռքերի մեջ կա՞ արդյոք մի կուռք,

որ անձրև բերի,

կամ թե երկի՞նքն է անձրև տեղացնում.

այդ անողը մի՞թե դու ինքդ չես, ո՛վ Տեր՝ Աստված մեր,

և մենք քեզ վրա ենք դնում մեր հույսը,

քանզի դու ես այդ ամենը կատարում։

15

Պատիժ Մանասեի մեղքի համար

¹ Տերն ինձ ասում է. «Եթե Մովսեսն ու Սամուելն իմ դիմաց կանգնեն, ես հոգով այդ ժողովրդի հետ չեմ լինի. այդ ժողովրդին հեռո՛ւ վանիր ինձնից, թող հեռանա։ ² Եվ եթե պատահի, որ հարցնեն քեզ՝ ո՞ւր գնանք, կասես նրանց. այսպես է ասում Տերը.

“Ովքեր մահվան համար են, թող գնան դեպի մահ,

ովքեր սրի համար են՝ դեպի սուր,

ովքեր սովի համար են՝ դեպի սով,

իսկ ովքեր գերության համար են՝ դեպի գերություն”։

³ Ես նրանց պիտի պատժեմ չորս միջոցով,- ասում է Տերը.- սրին՝ սպանելու համար, շներին՝ պատառոտելու համար, երկնքի թռչուններին և երկրի գազաններին՝ հոշոտելու և ոչնչացնելու համար։ ⁴ Հուդայի թագավոր Եզեկիայի որդի Մանասեի պատճառով և այն ամենի պատճառով, որ նա կատարեց Երուսաղեմում, նրանց աշխարհի բոլոր թագավորությունների տանջանքին պիտի մատնեմ։

⁵ Ո՞վ կխնայի քեզ, Երուսաղե՛մ, կամ ո՞վ կտրտմի քեզ համար,

և կամ ո՞վ կդառնա դեպի քեզ՝

հարցնելու քո խաղաղության մասին,

⁶ քանի որ դու երես թեքեցիր ինձնից,-

ասում է Տերը,-

և հետ ես գնալու։

Իմ ձեռքը պիտի երկարեմ քեզ վրա

և պիտի կործանեմ քեզ։ Այլևս նրանց չեմ լսի,

⁷ պիտի ցրեմ ու սփռեմ նրանց.

իմ ժողովուրդն անզավակ մնաց դռներին,

որովհետև նրանց չարության պատճառով ես կորցրի իմ ժողովրդին,

քանի որ նրանք չուղղվեցին։

⁸ Նրա չարիքները ծովի ավազից ավելի բազմացան իմ շուրջը։

Ե՛վ նրանց վրա, և՛ իրենց մոր վրա շարժեցի երիտասարդներին։

Միջօրեին նրանց շուրջը թշնամություն գցեցի.

հանկարծակի դող ու տագնապ եկավ։

⁹ Յոթ զավակ ունեցողը տկարացավ,

նրա հոգին նվաղեց.

միջօրեին նրա արևը մայր մտավ.

ամոթն ու նախատինքն են պատել նրան։

Նրանց մնացորդներին իրենց թշնամիների առջև

սրի պիտի մատնեմ»,- ասում է Տերը։

Երեմիայի գանգատը Տիրոջը

¹⁰ Վա՜յ ինձ, վա՜յ ինձ, մա՛յր իմ.

իբրև ո՞ւմ ծնեցիր ինձ.

իբրև մի մարդո՞ւ, որին երկրում ամենուրեք դատափետել են,

քաշքշել դատարան։

Ո՛չ ես եմ ինչ-որ բան պարտք,

ո՛չ էլ ուրիշն է ինձ որևէ բան պարտք,

բայց ինձ անիծողներից իմ ուժն սպառվեց։

¹¹ Թող նրանք հաջողություն գտնեն բարի բաների մեջ, Տե՛ր,

որ չլինի թե քո առջև կանգնեմ նրանց փորձության ժամին

կամ նրանց նեղության ժամանակ՝

թշնամիների դիմաց՝ նրանց բարիքի համար։

¹² Երկաթի զորությունը կարո՞ղ է ճանաչվել,

իսկ քո զորությունը քաղաքի պղնձե պարսպի զորության պես է։

¹³ «Բոլոր մեղքերիդ պատճառով

քո երկրի բոլոր սահմաններում քո գանձերը

տալու եմ օտարներին՝ իբրև փրկանք։

¹⁴ Քեզ ծառայեցնելու եմ քո թշնամիներին

մի երկրում, որ դու չգիտես,

քանզի իմ բարկությունից կրակ է վառվում,

որ բորբոքվելու է ձեզ վրա։

¹⁵ Դու գիտես, Տե՛ր,

հիշի՛ր ինձ, Տե՛ր,

այցելի՛ր ինձ, անարա՛տ արա ինձ իմ թշնամիներից.

ինձ համար մի՛ ուշացիր,

գիտցի՛ր, քեզ համար որքա՜ն նախատինք կրեցի

¹⁶ քո խոսքերն արհամարհողներից։ Մեռցրո՛ւ նրանց, և քո խոսքն ինձ ուրախություն

և իմ սրտի համար ցնծություն կլինի,

քանզի քո անունն ինձ վրա է դրված,

ո՛վ Տեր, Ամենակալ Աստված։

¹⁷ Ծաղր անողների հետ ատյան չնստեցի,

այլ երկյուղ կրելով քեզնից՝ նստում էի առանձին,

որովհետև դառնությամբ էի լցված։

¹⁸ Ինչո՞ւ նրանք, որ ինձ տրտմություն են պատճառում, զորանում են,

իսկ իմ վերքերն ահավոր են.

ինչպե՞ս պիտի բժշկվեմ։

Ինձ համար եղավ անպետք ջուր,

որին չի կարելի վստահել։

¹⁹ Դրա համար էլ այսպես է ասում Տերը.

«Եթե նորից դարձի գաս,

քեզ կպատսպարեմ,

և իմ աչքի առաջ կապրես.

ու եթե անարգի միջից դուրս հանես պատվականը,

կլինես ինչպես իմ բերանը,

ու եթե նրանք վերադառնան դեպի քեզ, և ոչ թե դու նորից դառնաս դեպի նրանց,

²⁰ ես քեզ կտամ այդ ժողովրդին՝ իբրև պղնձե ամուր պարիսպ.

նրանք պիտի կռվեն քեզ հետ,

բայց չեն կարողանա սասանել քեզ,

քանզի ես քեզ հետ եմ՝ քեզ փրկելու և պահպանելու համար,-

ասում է Տերը,-

²¹ ես քեզ կազատեմ չար մարդկանց ձեռքերից,

քեզ կփրկեմ ժանտ մարդկանց ձեռքերից»։

16

Երեմիային մխիթարության բաժակ չեն տալիս

¹ Տերը՝ Իսրայելի Աստվածը, ասում է. «Քեզ համար կին մի՛ առ, ² և այդտեղ թող քեզ տղաներ ու աղջիկներ չծնվեն», ³ քանզի Տերն այսպես է ասում այն որդիների ու դուստրերի մասին, որ պիտի ծնվեն այդտեղ, նաև նրանց մայրերի մասին, որ պիտի ծնեն նրանց, ինչպես և նրանց հայրերի մասին, որ այդ երկրում պիտի ունենան նրանց։ ⁴ «Նրանք հիվանդությամբ պիտի հյուծվեն ու մեռնեն. լաց ու կոծի արժանի չեն լինելու և ոչ էլ թաղման, այլ երկրի երեսին պիտի խայտառակվեն. սրով պիտի ընկնեն ու սովից սպառվեն, իսկ նրանց դիակները երկնքի թռչուններին և երկրի գազաններին կեր պիտի դառնան»։

⁵ Այսպես է ասում Տերը. «Նրանց համար լաց մի՛ լինիր, նրանց համար ողբ ու կոծի մի՛ գնա և ոչ էլ նրանց վրա սուգ պահիր, որովհետև իմ խաղաղությունը, ողորմությունն ու գթությունը հետ եմ վերցրել այդ ժողովրդից,- ասում է Տերը։ Թե՛ մեծերը և թե՛ փոքրերը պիտի մեռնեն այդ երկրում. նրանց համար չեն կոծելու, ⁶ նրանց համար արյունբզիկ չեն լինելու և մազերը չեն փետելու. նրանք լացի չեն արժանանալու և ոչ էլ թաղման։ ⁷ Նրանց սգո հացը մեռնողի վրա մխիթարության համար կտրող չի լինելու, և ոչ էլ նրա հոր ու մոր հիշատակին մխիթարության բաժակ են խմելու։ ⁸ Նրանց հետ կերուխումի նստելու համար խնջույքի տուն մի՛ մտիր». ⁹ քանզի այսպես է ասում Զորությունների Տերը՝ Իսրայելի Աստվածը. «Ահավասիկ իմ աչքի առաջ և ձեր իսկ օրերում այդտեղից կվերացնեմ ձայնը ցնծության և ձայնն ուրախության, ձայնը փեսայի և ձայնը հարսի։ ¹⁰ Եվ երբ պատահի, որ այն ժողովրդին պատմես այս բոլոր պատգամների մասին, ու քեզ ասեն՝ “Ինչո՞ւ այդ բոլոր մեծ չարիքները Տերը խոսեց մեր դեմ, ի՞նչ անիրավություն կա մեր մեջ կամ ի՞նչ մեղք, որով մեղանչած լինեինք Տիրոջ՝ մեր Աստծու առաջ”, ¹¹ նրանց կասես. «Որովհետև ձեր հայրերը լքեցին ինձ,- ասում է Տերը,- և գնացին օտար աստվածների հետևից, ծառայեցին նրանց, երկրպագեցին նրանց, իսկ ինձ թողեցին և իմ օրենքը չպահեցին։ ¹² Բայց դուք այնքան անզգամ եղաք, որ արեցիք ավելին, քան ձեր հայրերը. ահավասիկ դուք յուրաքանչյուրդ ինձ չլսելու համար ընթանում եք ձեր չար սրտերի հաճույքների հետևից։ ¹³ Այս երկրից ես ձեզ կնետեմ մի երկիր, որը չգիտեք ո՛չ դուք, ո՛չ էլ ձեր հայրերը. այնտեղ օր ու գիշեր կծառայեք օտար աստվածներին, բայց ձեզ ողորմածություն չեն անի»։

Վերադարձ աքսորից

¹⁴ «Ահա այս պատճառով էլ օրեր են գալու,- ասում է Տերը,- և այլևս չեն ասի՝ “Կենդանի է Տերը, որ իսրայելացիներին հանեց եգիպտացիների երկրից”, ¹⁵ այլ կասեն՝ “Կենդանի է Տերը, որ իսրայելացիներին հանեց հյուսիսի երկրից և այն բոլոր երկրներից, ուր արտաքսվել էին, ու նրանց վերստին կպատսպարի իրենց երկրում, որը տվել էր նրանց հայրերին”»։

Գալիք պատուհասը

¹⁶ «Ահավասիկ ես կուղարկեմ բազում ձկնորսների,- ասում է Տերը,- և նրանք կորսան նրանց. այնուհետև կուղարկեմ բազում որսորդների, և նրանք կորսան նրանց բոլոր լեռների վրա, բոլոր բլուրների վրա ու ժայռերի ծերպերից։ ¹⁷ Իմ աչքը նրանց բոլոր ճանապարհներին է. նրանք իմ տեսողությունից չեն թաքնվել, ոչ էլ նրանց անիրավություններն են ծածկվել իմ աչքերի առաջ։ ¹⁸ Ես նախ նրանց կրկնակի կհատուցեմ իրենց անիրավությունների դիմաց, նաև նրանց մեղքերի դիմաց, որոնցով պղծեցին իմ երկիրը, իրենց կուռքերի մեռելոտիներով և իրենց անօրենություններով լցրին իմ ժառանգությունը»։

¹⁹ Տե՛ր, ո՛վ իմ զորություն,

իմ օգնություն և չար օրերի իմ ապավեն.

աշխարհի ծայրերից հեթանոսները քեզ մոտ են գալու և ասելու.

«Ինչպե՜ս էին սուտ կուռքեր ստեղծում մեր հայրերը,

իսկ նրանցից օգուտ չկար։

²⁰ Մի՞թե մարդ ինքն իր համար աստվածներ կշինի.

չէ՞ որ նրանք աստվածներ չեն»։

²¹ «Դրա համար էլ այժմ ես նրանց ցույց կտամ իմ ձեռքը,

ճանաչել կտամ նրանց նաև իմ զորությունը,

ու թող գիտենան, որ իմ անունը Տեր է»։

17

Հուդայի երկրի մեղքերը և պատիժը

¹ «Հուդայի մեղքերը գրված են երկաթե գրչով,

ադամանդե գրչածայրով,

որոնք փորագրված պիտի լինեն նրանց սրտերի տախտակներին

և նրանց զոհասեղանների եղջյուրներին,

² մինչև այն ժամանակ,

քանի դեռ նրանց որդիները կհիշեն իրենց զոհասեղանները

և իրենց պաշտամունքային փայտե սյուները՝

վարսավոր ծառերի տակ,

բարձր բլուրների

³ և ամայի լեռների վրա։ Քո զորությունը, քո բոլոր գանձերը

և քո մեղքի բարձունքները,

քո բոլոր սահմանների մեջ ավարի պիտի մատնեմ։

⁴ Թող նկուն լինես ու զրկվես քո ժառանգությունից, որ քեզ տվեցի։

Քո թշնամիների ձեռքով քեզ պիտի արտաքսեմ մի երկիր,

որը չգիտես դու,

քանզի իմ բարկության մեջ կրակ է վառվել

և այն հավիտյան պիտի բորբոքվի»։

Տերն է մարդու ապավենը

⁵ Այսպես է ասում Տերը.

«Թող անիծյալ լինի այն մարդը,

որ իր հույսը կդնի մարդու վրա՝

ապավինելով նրա մարմնին ու բազկին,

իսկ նրա սիրտը կապստամբի Տիրոջ դեմ։

⁶ Նա կլինի ինչպես վայրի մոշին անապատում

և երբ բարիքը գա, չի տեսնի.

կբնակվի անապատի աղուտներում,

մի աղտաղտուկ,

երբեք չբնակեցված երկրում։

⁷ Բայց թող օրհնյալ լինի այն մարդը,

որ հույսը Տիրոջ վրա կդնի,

ու Տերը նրա հույսը կդառնա։

⁸ Նա կլինի հոսող ջրերի մոտ աճած ծառի նման

և իր արմատները կձգի դեպի ջրերի հոսանքը.

երբ տոթը հասնի, չի վախենա.

նրա սաղարթն անտառի պես կտարածվի իր շուրջը.

երաշտ տարուց չի վախենա

և չի դադարի պտուղ տալուց։

⁹ Սիրտը խոր է ամեն բանից ավելի.

մարդ արարած է, ո՞վ կարող է ճանաչել նրան։

¹⁰ Ես՝ Տերս, քննում եմ սրտերը

և փորձում երիկամները,

որպեսզի յուրաքանչյուրին հատուցեմ

ըստ իր ընթացքի և ըստ իր գործերի արդյունքի»։

¹¹ Կաքավը ձայն տվեց,

հավաքեց նրանց, որոնց ինքը չէր ծնել.

այնպես էլ նա, ով անարդար ճանապարհով հարստություն է դիզում,

իր օրերի կեսին պիտի թողնի այն

ու իր վախճանի ժամին պիտի զգա իր անմտությունը։

¹² Փառքի՛ Աթոռ, բարձր ի սկզբանե,

մեր սրբության վայր,

¹³ հույս Իսրայելի, Տե՛ր,

բոլոր նրանք, որ քեզ թողեցին, պիտի ամաչեն։

Քեզնից հեռացածները պիտի կորչեն երկրի խորքում,

որովհետև լքեցին Տիրոջը՝ կենաց ջրի աղբյուրը։

Երեմիան խնդրում է Տիրոջ օգնությունը

¹⁴ Բժշկի՛ր ինձ, Տե՛ր,

և ես բուժված կլինեմ,

փրկի՛ր ինձ, Տե՛ր,

և ես փրկված կլինեմ,

քանզի դու ես իմ պարծանքը։

¹⁵ Ահավասիկ նրանք ինձ ասում են.

«Ո՞ւր է Տիրոջ խոսքը,

թող այստեղ հասնի»։

¹⁶ Իսկ ես քո հետևից գալով չհոգնեցի

և մարդու օրվան չցանկացա։

Դու ինքդ իսկ գիտես,

որ ինչ իմ շուրթերից ելնում է,

այդ լինում է քո ներկայությամբ։

¹⁷ Ինձնից մի՛ օտարացիր,

խնայի՛ր դու ինձ չար օրը։

¹⁸ Իմ հալածիչնե՛րը թող ամոթահար լինեն,

և ոչ թե ես ամաչեմ,

նրա՛նք թող զարհուրեն,

և ոչ թե ես զարհուրեմ.

սև օ՛ր բեր նրանց գլխին,

կրկնակի հարվածի ենթարկելով՝ կոտորի՛ր նրանց։

Պահել շաբաթ օրը

¹⁹ Այսպես է ասում Տերը. «Գնա կանգնի՛ր քո ժողովրդի դռներին, որտեղով մտնում ու ելնում են Հուդայի թագավորները, նաև Երուսաղեմի բոլոր դռներին. ²⁰ ու կասես նրանց. “Լսե՛ք Տիրոջ պատգամները, Հուդայի թագավորնե՛ր, համա՛յն Հուդայի երկիր և դուք, Երուսաղեմի բոլո՛ր բնակիչներ, որ մտնում եք այդ դռներով։ ²¹ Այսպես է ասում Տերը. “Զգո՛ւյշ եղեք ձեր հոգիների համար. բեռներ մի՛ բարձեք շաբաթ օրը, Երուսաղեմի դռներով դուրս մի՛ ելեք, ²² շաբաթ օրը ձեր տներից բեռներ մի՛ հանեք, ոչ մի գործ մի՛ արեք և շաբաթ օրը սո՛ւրբ պահեք, ինչպես պատվիրեցի ձեր հայրերին։ Բայց նրանք չլսեցին, չխոնարհեցրին իրենց ականջները ²³ և ավելի խստապարանոց դարձան, քան իրենց հայրերը, որպեսզի չլսեն ինձ և խրատ չընդունեն։

²⁴ Եվ եթե լինի այնպես,- ասում է Տերը,- որ իսկապես լսեք ինձ, շաբաթ օրը բեռ չբերեք այդ քաղաքի դռներով, շաբաթ օրը սուրբ պահեք, այդ օրը ոչ մի գործ չանեք, ²⁵ ապա այդ քաղաքի դռներով ներս պիտի մտնեն թագավորներ ու իշխաններ, որ պիտի նստեն Դավթի աթոռին. նրանք պիտի բարձրանան իրենց կառքերն ու հեծնեն իրենց երիվարները, նրանք ու նրանց իշխանները, Հուդայի մարդիկ և Երուսաղեմի բնակիչները։ Եվ այդ քաղաքը հավիտյան բնակված պիտի լինի։ ²⁶ Ու ամեն կողմից Հուդայի քաղաքներից պիտի գան Երուսաղեմ, պիտի գան նաև Բենիամինի երկրից, դաշտերից, լեռնավայրերից և հարավի կողմերից՝ բերելով ողջակեզներ, խունկ, ընծա ու կնդրուկ և օրհնություն պիտի մատուցեն Տիրոջ տան մեջ։ ²⁷ Իսկ եթե ինձ չլսեք, շաբաթ օրը սուրբ չպահեք, շաբաթ օրը բեռներ բարձեք և մտնեք Երուսաղեմի դռներով, ապա կրակ կվառեմ նրա դռներին, որն ամեն կողմից կլափի Երուսաղեմն ու չի հանգչի”»։

18

Երեմիան բրուտի տանը

¹ Երեմիային ուղղելով իր խոսքը՝ Տերն ասաց.

² «Վե՛ր կաց, իջի՛ր բրուտի տունը և այնտեղ կլսես իմ խոսքերը»։

³ Ես իջա բրուտի տունը, և ահա նա գործ էր անում քարերի վրա։ ⁴ Մի աման, որը նա պատրաստում էր կավից, ընկավ նրա ձեռքից, բայց նա դարձյալ այն վերածեց մի ուրիշ ամանի, ինչպես որ իր աչքին հաճելի թվաց անել։ ⁵ Եվ Տերը, խոսքն ինձ ուղղելով, ասաց. ⁶ «Մի՞թե այդ բրուտի պես չեմ կարող անել ձեզ, ո՛վ Իսրայելի տուն։ Ահավասիկ,- ասում է Տերը,- ինչպես այդ կավն է բրուտի ձեռքին, այդպես էլ դու ես իմ ձեռքին, ո՛վ Իսրայելի տուն։

⁷ Եթե վճիռ կարդամ մի ազգի կամ թագավորության վախճանի մասին՝ նրանց վերացնելու, քանդելու և կործանելու համար, ⁸ և եթե այն ազգը դարձի գա իր չարություններից, որոնց մասին խոսեցի,- ես ևս կզղջամ այն չարիքների համար, որ մտածեցի անել նրանց։ ⁹ Իսկ եթե վճիռ կարդամ մի ազգի կամ թագավորության մասին՝ նրան շենացնելու և կանգուն պահելու համար, ¹⁰ բայց նրանք չարություն անեն իմ առաջ՝ ականջ չդնելով իմ ձայնին,- ես ևս կզղջամ այն բարիքների համար, որ ասացի, թե կանեմ նրանց։

¹¹ Արդ, խոսի՛ր Հուդայի տղամարդկանց ու Երուսաղեմի բնակիչների հետ և կասես նրանց. “Այսպես է ասում Տերը. ահավասիկ ձեր դեմ ես չարիքներ կնյութեմ, ձեր մասին խորհուրդներ կխորհեմ. ամեն ոք թող դառնա իր չար ընթացքից. ուղղե՛ք ձեր ընթացքն ու ձեր ճանապարհները”։

¹² Բայց նրանք ասում են. “Մենք պիտի քաջ լինենք, պիտի հետևենք մեր ապստամբություններին, և յուրաքանչյուր ոք իր չար սրտի հաճույքները պիտի անի”»։

Ժողովուրդը մերժում է Տիրոջը

¹³ Դրա համար էլ Տերն այսպես է ասում.

«Այժմ հարցո՛ւմ արեք ազգերի մեջ՝

ո՞վ է լսել այնպիսի զարհուրելի բան,

որ իրոք արեց Իսրայելի կույսը։

¹⁴ Մի՞թե կցամաքի ջուրը ժայռի ստինքներից,

կամ ձյունը՝ Լիբանանից,

կամ թե հողմի սաստկությունից ջրերը բռնությամբ հետ կշրջվե՞ն։

¹⁵ Սակայն ինձ մոռացավ իմ ժողովուրդը.

զուր տեղը խունկ ծխեցին։

Իրենց վաղեմի ճանապարհներից դուրս գալով՝

նրանք պիտի տկարանան՝ մտնելով այն շավիղները,

որոնցով գնալու ճանապարհ չկա.

¹⁶ իրենց երկիրը պիտի ենթարկվի կործանման ու հավիտենական ծաղրի։

Ամենքն էլ, որ անցնելու են նրա միջով,

պիտի զարմանան և շարժեն իրենց գլուխները։

¹⁷ Ինչպես տապախառն հողմ՝

ես նրանց ցրիվ եմ տալու իրենց թշնամիների առաջ,

ծոծրա՛կս և ոչ թե երեսս պիտի ցույց տամ նրանց իրենց կորստյան օրը»։

Դավ Երեմիայի դեմ

¹⁸ Իսկ նրանք ասացին. «Եկե՛ք մի բան մտածենք Երեմիայի դեմ, քանզի օրենքը չի կորչի քահանայից, խորհուրդը՝ իմաստուններից և խոսքը՝ մարգարեից։ Եկե՛ք նրան լեզվով ջախջախենք և նրա բոլոր խոսքերին ականջ չդնենք»։

¹⁹ Լսի՛ր ինձ, Տե՛ր,

անսա՛ իմ իրավունքի ձայնին.

²⁰ արդյոք կարելի՞ է բարու փոխարեն չար հատուցել.

նրանք միասին իմ անձի դեմ չար բաներ խորհեցին՝

ծածուկ պահելով իրենց հարվածները։

Հիշի՛ր, թե ես ինչպե՛ս կանգնեցի քո առաջ,

նրանց համար բարեխոսություն արեցի՝

քո բարկությունը նրանցից դարձնելու համար։

²¹ Դրա համար էլ նրանց որդիներին սովի՛ մատնիր,

հավաքի՛ր ու սրի ձե՛ռքը տուր նրանց.

թող նրանց կանայք անզավակ ու այրի դառնան,

նրանց տղամարդիկ մահվամբ կոտորվեն,

իսկ նրանց երիտասարդները սրով ընկնեն պատերազմի մեջ։

²² Նրանց տներում թող գույժ լսվի,

երբ նրանց վրա հանկարծակի ավազակներ բերես,

որովհետև նրանք մտադրվեցին բռնել ինձ

և իմ դեմ գաղտնի որոգայթներ լարեցին։

²³ Ո՛վ Տեր, դու իմացար

ինձ մահ բերելու մասին նրանց բոլոր դիտավորությունները,

քավություն չտաս նրանց անիրավություններին,

քո աչքի առաջ նրանց մեղքերը չջնջես,

թող նրանք հիվանդությամբ տառապեն քո առաջ,

քո բարկության ժամին այդպե՛ս վարվիր նրանց հետ։

19

Փշրված կավե կուժը

¹ Այն ժամանակ Տերն ինձ ասաց. «Գնա՛, քեզ համար ձե՛ռք բեր կավից շինված մի կուժ, ժողովրդի ավագներից և քահանաների ավագներից մարդի՛կ վերցրու քեզ հետ, ² բարձրացի՛ր նրանց որդիների գերեզմանոցը, որը գտնվում է Քարսիդի դռների մուտքի առաջ, և ընթերցի՛ր այնտեղ այն բոլոր բաները, որ պիտի խոսեմ քեզ հետ։ ³ Կասես նրանց. “Ո՛վ Հուդայի թագավորներ, Հուդայի երկրի մարդիկ և Երուսաղեմի բնակիչներ, լսե՛ք Տիրոջ պատգամը։ Այսպես է ասում Զորությունների Տերը՝ Իսրայելի Աստվածը. ահավասիկ այդ վայրի վրա ես այնպիսի չարիքներ եմ բերելու, որ ով լսի, ականջները դժժան, ⁴ որովհետև նրանք լքեցին ինձ, այս վայրն ինձ համար օտար դարձրին, այստեղ խունկ ծխեցին օտար աստվածներին, որոնց իրենք և իրենց հայրերը չէին ճանաչում։ Հուդայի թագավորներն այս վայրը լցրին անմեղների արյամբ։ ⁵ Բահաղին բագիններ կանգնեցրին, որպեսզի իրենց որդիներին՝ որպես Բահաղի ողջակեզների, հրով այրեն, մի բան, որ ես չեմ պատվիրել և չեմ ասել, ոչ էլ անցել է իմ մտքով։

⁶ Դրա համար էլ ահա օրեր են գալու,- ասում է Տերը,- երբ այդ վայրի անունն այլևս չի կոչվելու Գլորման վայր կամ Ենովմացիների գերեզման, այլ Կոտորածի ձոր։ ⁷ Այդտեղ պիտի խափանեմ Հուդայի խորհուրդը և խորհուրդը Երուսաղեմի. սրով, ինչպես և նրանց հոգիները փնտրողների ձեռքով նրանց դիտապաստ պիտի գցեմ իրենց թշնամիների առաջ։ Նրանց դիակներն իբրև կերակուր պիտի տամ երկնքի թռչուններին ու երկրի գազաններին։ ⁸ Այդ քաղաքն էլ պիտի մատնեմ կործանման ու ծաղրի ենթարկեմ. ամեն ոք, ով անցնի նրա միջով, պիտի տրտմի և ցավի նրա կրած բոլոր հարվածների համար։ ⁹ Նեղության ու պաշարման մեջ նրանք ուտելու են իրենց որդիների մարմինները և մարմինները դուստրերի, յուրաքանչյուրը՝ իր ընկերոջ մարմինը։ Նրանց պաշարելու են իրենց թշնամիները, որոնք ցանկանում էին տիրել նրանց հոգիներին։

¹⁰ Կփշրես կուժն այն մարդկանց առաջ, որ բարձրանալու են քեզ հետ, ¹¹ ու կասես նրանց. այսպես է ասում ինձ Զորությունների Տերը. “Նույն կերպ էլ պիտի խորտակեմ այդ ժողովրդին ու այդ քաղաքը, ինչպես որ փշրվում է խեցե ամանը, որն այլևս չի կարող վերականգնվել։ Եվ թող նրանք թաղվեն Տափեթում՝ թաղելու տեղ չլինելու պատճառով։ ¹² Այդպես պիտի վարվեմ այդ վայրի հետ,- ասում է Տերը,- նաև բնակչության հետ, որ դրա մեջ է՝ այդ քաղաքը մատնելով կործանման։ ¹³ Ու թող Երուսաղեմի տներն ու Հուդայի թագավորների տները դառնան սպանության վայր այն պղծությունների պատճառով, որ կատարեցին բոլոր տներում, որտեղ իրենց տանիքների վրա խունկ էին ծխում երկնքի բոլոր զորություններին և նվերներ ընծայաբերում օտար աստվածներին”»։

¹⁴ Երեմիան եկավ Տափեթից, այն է՝ Գլորման վայրից, ուր ուղարկել էր նրան Տերը՝ մարգարեանալու այնտեղ։ Նա կանգնեց Տիրոջ տան սրահում և ասաց ամբողջ ժողովրդին.

¹⁵ «Այսպես է ասում Զորությունների Տերը՝ Իսրայելի Աստվածը. “Ահավասիկ այս քաղաքի վրա բերելու եմ ամենայն չարիք, ինչպես ասացի նրա մասին, նաև սրա մյուս բոլոր քաղաքների ու ավանների վրա, քանզի նրանք խստապարանոց դարձան, որպեսզի չլսեն իմ խոսքերը”»։

20

Երեմիան բախվում է Պասքոր քահանայի հետ

¹ Եմմերի որդին՝ Պասքոր քահանան, որ Տիրոջ տան հրամանատարն էր և իշխանը, լսեց այդ խոսքերը Երեմիայից, երբ սա մարգարեանում էր։ ² Պասքորը հարվածեց Երեմիա մարգարեին և արգելափակեց նրան բանտում՝ Բենիամինի դարպասի մոտ, Տիրոջ տան վերնահարկում։

³ Իսկ երբ հաջորդ օրը Պասքորը Երեմիային հանեց բանտից, Երեմիան նրան ասաց. «Տերը քո անունը դրեց ոչ թե Պասքոր, այլ Թափառական գերի։ ⁴ Արդարև, այսպես է ասում Տերը. “Ահավասիկ քեզ քո բոլոր բարեկամներով հանդերձ պիտի գերության մատնեմ. նրանք պիտի ընկնեն իրենց թշնամիների սրով, և քո աչքերը պիտի տեսնեն դա։ Քեզ և Հուդայի այդ ամբողջ տունը պիտի տամ բաբելացիների թագավորի ձեռքը. թող նրանց գերի տանեն Բաբելոն և կոտորեն նրանց սրով։ ⁵ Այս քաղաքի ամբողջ զորությունը, նրա բոլոր վաստակները, նրա ողջ փառքն ու Հուդայի թագավորի բոլոր գանձերը պիտի տամ իրենց թշնամիների ձեռքը, նրանք պիտի հափշտակեն, վերցնեն դրանք ու տանեն Բաբելոն։ ⁶ Իսկ դու, Պասքո՛ր, դու և քո տան բոլոր բնակիչները պիտի գերի գնաք Բաբելոն, պիտի գնաք և այնտեղ մեռնեք ու այնտեղ էլ թաղվեք, դու և քո բոլոր բարեկամները, որոնց համար դու սուտ մարգարեություն արեցիր”»։

Երեմիայի գանգատը Տիրոջը

⁷ Տե՛ր, խաբեցիր ինձ, ու ես խաբվեցի.

հաղթեցիր ու զորացար։

Ծաղր ու ծանակի առարկա դարձա,

օրս մթնեցրի ծաղրանքի մեջ,

⁸ որովհետև իմ խոսքերի դառնությամբ ծաղր ու արհամարհանք վաստակեցի։

Իմ թշվառության պատճառով ես բողոք եմ բարձրացնելու,

քանզի Տիրոջ խոսքը նախատինք

և հանապազօրյա ծաղրուծանակ բերեց ինձ։

⁹ Ես ասացի. «Չեմ տա Տիրոջ անունը,

այլևս չեմ խոսի նրա անունից»։

Սակայն իմ սրտում կարծես կրակ վառվեց,

բորբոքվեց ոսկորներիս մեջ,

ու ես ամեն կողմից լքված մնացի,

չկարողացա հանդարտվել։

¹⁰ Լսեցի շատերի պարսավանքը,

որոնք խառնիխուռն հավաքվել էին իմ շուրջը.

«Ո՛վ դուք բոլորդ, որ դրա բարեկամներն եք,

եկե՛ք հարձակվենք դրա վրա,

մի հնարք հնարենք դրա դեմ,

գուցե խաբվի, և մենք հաղթենք

ու մեր վրեժը լուծենք դրանից»։

¹¹ Բայց Տերն ինձ հետ էր որպես պատերազմող և ուժ էր տալիս։

Դրա համար էլ նրանք հալածեցին ինձ,

բայց ոչ մի հնարք չկարողացան գտնել,

խիստ ամոթով մնացին,

որովհետև ոչինչ չկարողացան հնարել։

Նրանց անարգանքը թող հավիտյանս չմոռացվի։

¹² Ո՛վ Զորությունների Տեր, որ արդար ես կշռում,

քննում ես սրտերն ու երիկամները,

այնպե՛ս արա, որ տեսնեմ քո վրեժխնդրությունը նրանցից.

չէ՞ որ իմ աղերսանքը քեզ հայտնեցի։

¹³ Օրհնեցե՛ք Տիրոջը, գովե՛ք նրան,

քանզի նա տնանկի հոգին փրկեց չարագործների ձեռքից։

¹⁴ Անիծյալ լինի այն օրը, երբ ես ծնվեցի.

թող ուխտի օր չլինի այն օրը, երբ իմ մայրը ծնեց ինձ։

¹⁵ Անիծյալ լինի այն մարդը,

որն ավետիս տվեց իմ հորը

և ասաց. «Քեզ արու մանուկ ծնվեց»,

և ցնծությամբ ուրախացրեց նրան։

¹⁶ Թող այդ մարդը դառնա այն քաղաքների պես,

որոնք Տերը բարկությամբ կործանեց և չզղջաց.

թող նա առավոտները բոթ լսի,

իսկ միջօրեի ժամին՝ աղաղակ,

¹⁷ որովհետև Տերը հենց արգանդի մեջ չսպանեց ինձ,

որպեսզի իմ մայրն ինձ համար դառնար գերեզման

ու արգանդ հավիտենական հղության։

¹⁸ Ինչո՞ւ այսպես պատահեց,

որ ես դուրս ելա արգանդից՝

տեսնելու վշտեր ու տառապանքներ,

և իմ օրերն ամոթալի վախճան ունեցան։

21

Երեմիայի պատասխանը Սեդեկիայի հարցին

¹ Սա է Տիրոջ խոսքը՝ ուղղված Երեմիային, երբ Սեդեկիան վերջինիս մոտ ուղարկեց Մելքիայի որդի Պասքորին և Մասիայի որդի Սոփոնիա քահանային՝ ասելով.

² «Մեր մասին հարցրո՛ւ Տիրոջը, որովհետև բաբելացիների Նաբուքոդոնոսոր արքան հարձակվեց մեզ վրա. գուցե Տերն իր բոլոր հրաշքների համաձայն մի բան անի մեզ համար և նրան վանի մեզնից»։

³ Իսկ Երեմիան նրանց ասաց. «Այսպե՛ս ասեք Սեդեկիային. ⁴ “Այսպես է ասում Տերը՝ Իսրայելի Աստվածը. ահավասիկ ես շուռ եմ տալու ձեր պատերազմական զենքերը, որ բռնել եք ձեռքներիդ և նրանցով կռվում եք բաբելացիների արքայի ու քաղդեացիների դեմ, որոնք ձեր պարիսպների դրսից պաշարել են ձեզ։ Այդ զենքերը հավաքելու եմ այդ քաղաքի մեջ։ ⁵ Ես էլ պիտի պատերազմեմ ձեր դեմ՝ ձեռքս երկարած, բազուկս բարձրացրած, սրտմտությամբ, բարկությամբ ու մեծ ցասումով։ ⁶ Այդ քաղաքի բնակիչներին, մարդ թե անասուն, պիտի կոտորեմ սոսկալի մահով, ու նրանք պիտի մեռնեն։ ⁷ Իսկ դրանից հետո,- այսպես է ասում Տերը,- Հուդայի արքա Սեդեկիային, իր ծառաներին ու ժողովրդին, որ այդ քաղաքի մեջ փրկված կլինեն մահից, սրից ու սովից, պիտի մատնեմ բաբելացիների Նաբուքոդոնոսոր արքայի ձեռքը, իրենց թշնամիների ձեռքը, այն մարդկանց ձեռքը, ովքեր հետամուտ էին սպանելու նրանց. նրանք սրի սայրով պիտի կոտորեն դրանց։ Ես չեմ խնայելու դրանց, չեմ ողորմելու դրանց և չեմ գթալու դրանց”։ ⁸ Ու ժողովրդին կասես. “Այսպես է ասում Տերը. “Ահավասիկ ես ձեր դիմաց դրել եմ կյանքի ճանապարհը և մահվան ճանապարհը։ ⁹ Ով որ նստի այդ քաղաքում, սրով, սովով ու մահով պիտի մեռնի, իսկ նա, ով ելնի ու կանգնի քաղդեացիների առաջ, որոնք պաշարել են ձեզ, պիտի ապրի. նրա հոգին իրեն պարգև պիտի լինի, և նա ողջ պիտի մնա։ ¹⁰ Երեսս դեպի այդ քաղաքը դարձրի՝ չարիք պատճառելու համար և ոչ թե բարիք,- ասում է Տերը.- այդ քաղաքը պիտի մատնվի բաբելացիների թագավորի ձեռքը, որը հրով պիտի այրի դա”»։

Տիրոջ պատգամը արքայական տանը

¹¹ Ո՛վ Հուդայի թագավորի տուն

¹² և Դավթի տուն,

լսե՛ք Տիրոջ պատգամը։ Այսպես է ասում Տերը.

«Առավոտից սկսած արդա՛ր դատաստան արեք,

օրինապա՛հ եղեք,

կողոպտվածին փրկե՛ք նրան զրկողի ձեռքից,

որպեսզի իմ բարկությունը չբորբոքվի որպես կրակ,

թե չէ այն կվառվի,

և ձեր անիրավ ընթացքի պատճառով ոչ ոք չի լինի, որ հանգցնի։

¹³ Ահա ես կանգնած եմ քո դեմ,

ո՛վ դու, որ բնակվում ես Տյուրոսի ծործորներում ու դաշտերում,-

ասում է Տերը.-

դուք էիք, որ ասում էիք.

“Ո՞վ կզարհուրեցնի մեզ,

կամ ո՞վ կմտնի մեր բնակատեղին”։

¹⁴ Ձեր չար ընթացքի համեմատ ես կայցելեմ ձեզ,-

ասում է Տերը,-

կրակ կվառեմ ձեր Անտառներում,

և նա ամեն ինչ կլափի իր շուրջը»։

22

Երեմիայի պատգամը արքայական տանը

¹ Այսպես է ասում Տերը. «Գնա՛ և իջի՛ր Հուդայի թագավորի տունը և այս խոսքը հայտնի՛ր այնտեղ՝ ² ասելով. “Լսի՛ր Տիրոջ պատգամները, ո՛վ թագավորդ Հուդայի, որ բազմում ես Դավթի աթոռին, դո՛ւ և քո ծառաներն ու քո ժողովուրդը, որոնք ներս են մտնում այս դռներով”։ ³ Այսպես է ասում Տերը. «Իրավունք ու արդարությո՛ւն արեք, կողոպտվածին փրկե՛ք իրեն զրկողի ձեռքից, պանդուխտին, որբին ու այրուն մի՛ բռնադատեք և ամբարիշտ մի՛ եղեք, այդտեղ անմեղ արյուն մի՛ թափեք։ ⁴ Եթե այս բանը կատարեք, ապա այդ տան դռներով ներս կմտնեն թագավորներ, որոնք կբազմեն Դավթի աթոռին և կնստեն կառքեր ու կհեծնեն երիվարներ, թե՛ իրենք և թե՛ իրենց ծառաներն ու իրենց ժողովուրդը։ ⁵ Իսկ եթե չկատարեք այս բաները, ապա իմ անձով եմ երդվում,- ասում է Տերը,- որ ավերակ կդառնա այդ տունը»։

⁶ Ահա այսպես է ասում Տերը Հուդայի թագավորի տան մասին.

«Գաղաա՛դ, դու ես ինձ համար Լիբանանի գլուխը,

բայց քեզ ավերակի ու անբնակ քաղաքների կվերածեմ։

⁷ Քո դեմ կհանեմ ավերողներ՝

յուրաքանչյուրին իր տապարով,

որոնք կկոտորեն քո ընտիր-ընտիր մայրիները

և կնետեն կրակի մեջ։

⁸ Բազում ազգեր կանցնեն այդ քաղաքի միջով,

և յուրաքանչյուրն իր ընկերոջը կասի.

“Այդ մեծ քաղաքի հետ Տերն ինչո՞ւ այդպես վարվեց”։

⁹ Ու կպատասխանեն.

“Որովհետև թողեցին իրենց Տիրոջ՝ Աստծու ուխտը,

երկրպագեցին օտար աստվածներին ու ծառայեցին նրանց”»։

¹⁰ Լաց մի՛ եղեք մեռածի վրա,

մի՛ ողբացեք նրան,

այլ լալով լացեք նրա՛ վրա,

ով կհեռանա և այլևս չի դառնա ու չի տեսնի իր ժողովրդի երկիրը։

¹¹ Այսպես է ասում Տերը Հովսիայի որդի Սելենի մասին, որը թագավորեց՝ հաջորդելով իր հայր Հովսիային, և որն այդտեղից դուրս էր եկել. «Նա այլևս չի վերադառնա, ¹² կմեռնի այնտեղ, որտեղ գերեցին նրան, այլևս այս երկիրը չի տեսնի»։

¹³ Վա՜յ նրան, ով կառուցում է իր տունը,

բայց ոչ արդարությամբ,

և իր վերնահարկերը, բայց անիրավությամբ։

Նրա մերձավորը նրա համար ձրի գործ է անում

և նրա վարձը չի հատուցում նրան։

¹⁴ Քեզ համար հարմարավետ տուն շինեցիր՝

կառուցելով լուսամուտներով հովասուն վերնատուն,

պատելով մայրի փայտի տախտակներով և ներկելով նավթով։

¹⁵ Եթե դու մայրի փայտից կերտված քո հոր այս տան մեջ զայրացար,

ի՛նչ է, կարծում ես թագավորելո՞ւ ես։

Թող ո՛չ ուտեն, ո՛չ խմեն,

որովհետև իրավունքը, արդարությունն ու բարությունը չճանաչեցին,

¹⁶ տնանկի իրավունքը չպահեցին

և աղքատին չարդարացրին։

«Իսկ դա հենց ինձ չճանաչել չի՞ նշանակում»,-

ասում է Տերը։

¹⁷ Ահավասիկ քո աչքերը և քո սիրտը հակված են ոչ թե դեպի բարություն,

այլ դեպի ագահություն,

դեպի անպարտ արյունահեղություն,

դեպի անիրավություն ու սպանություն։

¹⁸ Դրա համար էլ Տերը

Հուդայի թագավոր Հովսիայի որդի Հովակիմի մասին այսպես է ասում.

«Թող այդ մարդու վրա չողբան և չասեն. “Վա՜յ, վա՜յ եղբայր”,

թող չկոծեն ու չասեն. “Վա՜յ, վա՜յ տեր,

վա՜յ, վա՜յ, սիրելի՛”։

¹⁹ Թող նա էշի թաղումով թաղվի,

թող նեխված Երուսաղեմի դարպասից այն կողմ գցվի»։

Երեմիայի պատգամը Երուսաղեմի մասին

²⁰ Ե՛լ դեպի Լիբանան ու գուժի՛ր,

ձայնդ արձակի՛ր դեպի Բասան,

աղաղա՛կ բարձրացրու ծովի այն կողմը,

որովհետև քո բոլոր հոմանիները միասին խորտակվեցին։

²¹ Խոսեցի քեզ հետ, երբ դու սխալվեցիր,

բայց ասացիր. «Քեզ չեմ լսի»։

Քո մանկությունից սկսած՝ դա է եղել քո ճանապարհը,

քանզի ականջ չդրեցիր իմ ձայնին։

²² Քո բոլոր հովիվներին քամիները պիտի հովվեն,

և քո բոլոր հոմանիները գերության պիտի գնան,

որպեսզի այն ժամանակ ամաչես

և անարգվես քո բոլոր սիրելիներից։

²³ Դու, որ Լիբանանում ես բնակվում

և ամրացել ես մայրիների մեջ,

պիտի հեծեծես, երբ քեզ հասնեն ցավերն ու երկունքը,

ինչպես ծննդկան կնոջը։

Տերը դատում է Հեքոնիային

²⁴ «Կենդանի եմ ես,- ասում է Տերը։-

Դու, Հուդայի արքա Հովակիմի որդի Հեքոնիա՛, եթե իմ աջ ձեռքին կնիք դառնալու լինես, այդտեղից էլ կկորզեմ քեզ, ²⁵ կմատնեմ քեզ քո անձը փնտրողների ձեռքը, նրանց ձեռքը, որոնց երեսից զարհուրում էիր, բաբելացիների արքա Նաբուքոդոնոսորի ձեռքը և քաղդեացիների ձեռքը. ²⁶ քեզ ու քո մորը կնետեմ օտար երկիր, որտեղ դու չես եղել, և այնտեղ կմեռնեք։ ²⁷ Նրանք չեն վերադառնա այն երկիրը, ուր իրենք հոգով ուխտած կլինեն վերադառնալ, ²⁸ քանզի ինքն ու իր զավակն օտար երկիր ընկան, արհամարհված բերանը տարագիր դարձավ, շպրտվելով անարգվեց Հեքոնիա ասված մարդը, ինչպես անպետք աման, շպրտվեց մի երկիր, որը չէր ճանաչում»։

²⁹ Երկի՛ր, երկի՛ր, ո՛վ երկիր, լսի՛ր Տիրոջ պատգամները։ Այսպես է ասում Տերը. ³⁰ «Այդ մարդուն համարի՛ր տարագիր այր, նա իր տարիներին չբարգավաճի, թող նրա զավակից տղամարդ չաճի, որ նստի Դավթի աթոռին՝ իբրև Հուդայի տան իշխան»։

23

Անհավատարիմ առաջնորդներ և արդար թագավոր

¹ «Վա՜յ հովիվներին, որ կորցրին ու ցրեցին քո արոտի ոչխարներին»,- ասում է Տերը։ ² Ահա թե ինչու Տերը՝ Իսրայելի Աստվածը, այսպես է ասում այդ հովիվների մասին, որոնք հովվում են իմ ժողովրդին. «Դուք ցրեցիք իմ ոչխարներին, հեռացրիք նրանց, չխնամեցիք նրանց։ Այժմ ահա ես վրեժ եմ լուծելու ձեզնից՝ ձեր չար ընթացքի համեմատ»,- ասում է Տերը։

³ «Ես կընդունեմ իմ ժողովրդի բոլոր մնացորդներին ամեն մի երկրից, ուր նրանց վտարել եմ, և նրանց կհաստատեմ իրենց արոտներում. թող աճեն ու բազմանան։ ⁴ Հովիվներ կկարգեմ, որ հովվեն նրանց, և նրանք այլևս չեն վախենա, չեն զարհուրի, ու անխնամ չեն թողնվի»,- ասում է Տերը։

⁵ «Ահա օրեր են գալու,- ասում է Տերը,-

և ես Դավթի համար ծնունդ եմ տալու մի արդար շառավիղի,

որ թագավորելու է որպես արքա.

նա խելամիտ է լինելու,

իրավունք ու արդարություն է պաշտպանելու երկրի վրա։

⁶ Նրա ժամանակ փրկվելու է Հուդան,

Իսրայելը հույսով է ապրելու։

Եվ նրա անունը, որով կոչելու է նրան Տերը,

այս է՝ Հովսեդեկ, այսինքն՝ մարգարեների մեջ մեր արդարությունը։

⁷ Ահա թե ինչու օրեր են գալու,- ասում է Տերը,- երբ այլևս չեն ասի՝ “Կենդանի է Տերը, որն Իսրայելի ժողովրդին հանեց եգիպտացիների երկրից”, ⁸ այլ՝ “Կենդանի է Տերը, որն Իսրայելի բոլոր զավակներին դուրս հանեց հյուսիսի երկրից և այն բոլոր երկրներից, ուր նրանց վտարել էր, և վերստին պատսպարեց նրանց իրենց երկրում”»։

Երեմիան կեղծ մարգարեների մասին

⁹ Մարգարեների համար սիրտս մեջս կտոր-կտոր եղավ,

ցնցվեցին բոլոր ոսկորներս.

ես դարձել եմ մի խեղված մարդ,

գլուխը գինուց կորցրած է մի մարդ՝

Աստծու և նրա մեծավայելուչ փառքի պատճառով,

¹⁰ քանզի երկիրը լցվել է շնացողներով,

նզովքից երկիրը սուգ է բռնել,

անապատի արոտավայրերը չորացել են.

չար է նրանց ընթացքը,

նրանց ուժն էլ այն չէ, ինչ պետք է լինի։

¹¹ «Արդարև, մարգարե ու քահանա պիղծ են դարձել.

իմ տան մեջ անգամ ես տեսա նրանց չարությունները,- ասում է Տերը։-

¹² Ահա թե ինչու նրանց ճանապարհն իրենց համար սայթաքուն պիտի դառնա.

խավարի մեջ պիտի գայթեն ու կործանվեն նրա մեջ,

որովհետև այն տարին, երբ նրանց այցելելու լինեմ,

չարիք պիտի բերեմ նրանց վրա,-

ասում է Տերը։

¹³ Նաև Սամարիայի մարգարեների մեջ տեսա անօրենություն,

քանի որ Բահաղի անունից մարգարեացան

և մոլորեցրին իմ ժողովրդին՝ Իսրայելին։

¹⁴ Երուսաղեմի մարգարեների մեջ ավելի զարհուրելի բաներ տեսա,

քանզի նրանք շնանում ու գնում էին սուտ աստվածների հետևից

և զորավիգ դառնում չար ձեռքերին,

որպեսզի ոչ մեկը հետ չդառնա իր չար ճանապարհից։

Ամենքն ինձ համար եղան Սոդոմի նման,

իսկ նրա բնակիչները՝ Գոմորի»։

¹⁵ Դրա համար էլ Զորությունների Տերն այսպես է ասում մարգարեների մասին.

«Ահավասիկ ես դրանց ցավեր եմ տալու իբրև կերակուր,

դրանց խմեցնելու եմ լեղի ջուր,

որովհետև պղծությունը ողջ երկրում տարածվեց Երուսաղեմի մարգարեներից»։

¹⁶ Այսպես է ասում Զորությունների Տերը.

«Մի՛ լսեք այն մարգարեների խոսքերը,

որ ձեզ համար մարգարեություն են անում.

դրանք փուչ բաներ են ասում ձեզ,

իրենց մտքի տեսիլքներից են խոսում

և ոչ թե Տիրոջ բերանից։

¹⁷ Տիրոջ խոսքի դեմ ըմբոստացածներին նրանք ասում են.

“Խաղաղությո՜ւն լինի ձեզ”.

բոլոր նրանց, ովքեր ընթանում են ըստ իրենց կամքի,

կամ յուրաքանչյուրին, ով ընթանում է ըստ իր սրտի մոլորության,

ասում են. “Քո գլխին չարիք չի գալու”։

¹⁸ Իսկ ո՞վ մնաց Տիրոջ խորհրդի մեջ, ո՞վ լսեց ու անսաց նրա խոսքին։

Ո՞վ լսեց ու ականջ դրեց իմ խոսքին»։

¹⁹ Ահա մի դղրդոց, որ գալիս է Տիրոջից,

նրա բարկությունը մրրկաշարժ պիտի բարձրանա ամբարիշտների վրա, պիտի գա

²⁰ Տիրոջ ցասումը և չնահանջի,

մինչև որ կատարի և հաստատի իր սրտի փափագը.

և դա պիտի իմանան ու գիտակցեն վերջին ժամանակներում։

²¹ «Ե՛ս չուղարկեցի այդ մարգարեներին,

սակայն նրանք գնում էին,

չխոսեցի նրանց հետ,

սակայն նրանք մարգարեություն էին անում։

²² Եթե իմ խորհրդի մեջ մնային,

ապա իմ խոսքերը լսելի կդարձնեին իմ ժողովրդին,

հետ կպահեին նրան իր չար ճանապարհներից,

իր չար վարքից։

²³ Ես մերձավոր Աստված եմ և ոչ թե հեռավոր Աստված,- ասում է Տերը։

²⁴ Եթե մարդը թաքնվի թաքստոցում,

մի՞թե ես նրան չեմ տեսնի,-

ասում է Տերը։

Մի՞թե երկինքն ու երկիրը ես չեմ լցնում,-

ասում է Տերը։

²⁵ Ես լսեցի, թե ի՛նչ են խոսում մարգարեները, որոնք սուտ մարգարեություններ էին անում իմ անունով և ասում. “Ես մի երազ, մի տեսիլ տեսա”։ ²⁶ Մինչև ե՞րբ պետք է ստությունը տեղ գտնի այդ մարգարեների սրտում, որոնք մարգարեանում են. նրանք իրենց սրտի ցանկությունն են մարգարեանում, ²⁷ մտածում են իրենց տեսիլքներով, որ նրանցից ամեն մեկը պատմում է իր ընկերոջը՝ մոռացության տալ իմ ժողովրդին իմ օրենքները, ինչպես նրանց հայրերը Բահաղի միջոցով մոռացության տվեցին իմ անունը։ ²⁸ Այն մարգարեն, որը տեսիլք ունի, թող պատմի իր տեսիլքը, իսկ ով իմ խոսքն ունի, իմ խոսքը թող հայտնի ճշմարտությամբ։

Ցորենի մոտ ի՞նչ է հարդը,- ասում է Տերը։

²⁹ Իմ խոսքերն արդյոք կրակի նման չե՞ն,- ասում է Տերը,- կամ մուրճի, որ քար է կտրում։

³⁰ Ահա դրա համար էլ ես դեմ եմ այդ մարգարեներին,- ասում է Տերը,- նրանցից ամեն մեկն իմ խոսքերն է գողանում իր ընկերոջից։ ³¹ Ահա ես դեմ եմ այդ մարգարեներին,- ասում է Տերը,- որոնք իրենց լեզվից վանում են իմ մարգարեությունը և իրենց քունն են քնում։ ³² Ահա ես դեմ եմ այդ մարգարեներին, որոնք մարգարեանում են սուտ տեսիլքներ,- ասում է Տերը,- պատմում են դրանք և իրենց ստությամբ մոլորեցնում իմ ժողովրդին. բայց ես չեմ նրանց ուղարկել, պատվեր չեմ տվել նրանց, և նրանք որևէ օգուտ չեն կարող տալ այդ ժողովրդին,- ասում է Տերը։

³³ Եթե այդ ժողովուրդը կամ որևէ մարգարե և կամ քահանա քեզ հարց տան ու ասեն. “Ի՞նչ տեսիլք է դա Տիրոջ կողմից”, ապա նրանց կասես. “Դուք եք տեսիլքը, և ես կործանելու եմ ձեզ”,- ասում է Տերը։ ³⁴ Մարգարե լինի, քահանա թե ժողովուրդ, ով ասի՝ “Տիրոջ տեսիլքը”, այդ մարդուց և նրա ընտանիքից վրեժխնդիր եմ լինելու։ ³⁵ Հապա ինչո՞ւ ամեն ոք իր ընկերոջը և կամ ամեն մեկն իր եղբորը չի ասում. “Ի՞նչ պատասխան տվեց Տերը, ի՞նչ խոսեց Տերը”։ ³⁶ Այլևս մի՛ անվանեք Տիրոջ տեսիլք, քանզի մարդու համար Տիրոջ տեսիլք է դառնում իր խոսքը։ Դուք աղավաղել եք տվել կենդանի Աստծու՝ Զորությունների Տեր մեր Աստծու տեսիլքները։ ³⁷ Այսպե՛ս ասեք մարգարեին. «Ի՞նչ պատասխան տվեց քեզ Տերը, ի՞նչ խոսեց Տերը»։ ³⁸ Եթե Տիրոջ տեսիլք եք ասելու, ապա դրա համար Տերն այսպես է ասում. «Քանի որ ասացիք այդ խոսքը՝ Տիրոջ տեսիլք, ես էլ ուղարկեցի ձեզ մոտ՝ պատվիրելու՝ “Մի՛ ասեք Տիրոջ տեսիլք”։ ³⁹ Ահա թե ինչու ես ձեզ վերցնելու եմ իբրև ավար, իմ աչքի առաջ կործանելու եմ և՛ ձեզ, և՛ այդ քաղաքը, որ տվեցի ձեզ ու ձեր հայրերին։ ⁴⁰ Ձեզ վրա հավիտենական նախատինք եմ դնելու և հավիտենական անարգանք, որ չեն մոռացվելու»։

24

Երկու կողով թուզ

¹ Տերն ինձ ցույց տվեց թզի երկու կողով, որոնք դրված էին Տիրոջ տաճարի առաջ այն բանից հետո, երբ բաբելացիների արքա Նաբուքոդոնոսորը Երուսաղեմից գերեց Հուդայի արքա Հովակիմի որդի Հեքոնիային, Հուդայի իշխաններին, արհեստավորներին, դարբիններին ու մեծամեծներին և նրանց տարավ Բաբելոն։ ² Կողովներից մեկը լցված էր անչափ քաղցր թզով, ինչպիսին լինում է վաղահաս թուզը, իսկ երկրորդ կողովը՝ ժանտահամ թզով, որն իր դառնության պատճառով չի ուտվում։

Տերն ինձ ասաց.

«Ի՞նչ ես տեսնում, Երե՛միա»։

³ Ասացի. «Թուզ, քաղցր թուզ,

շատ քաղցր թուզ, նաև ժանտ թուզ, անչափ ժանտ,

որ իր դառնության պատճառով չի ուտվում»։

⁴ Տերը, խոսքն ուղղելով Երեմիային, ասաց. ⁵ «Այսպես է ասում Տերը՝ Իսրայելի Աստվածը. ինչպես այդ քաղցր թուզն է, այդպես են ինձ համար Հուդայի գերյալները, որոնց այդտեղից ուղարկեցի քաղդեացիների երկիրը՝ բարիք անելու համար. ⁶ իմ աչքը պիտի պահեմ նրանց վրա բարության համար, նրանց պիտի վերահաստատեմ այս երկրում. պիտի կառուցեմ նրանց և ոչ թե քանդեմ, պիտի տնկեմ նրանց և ոչ թե արմատախիլ անեմ։ ⁷ Ես նրանց այնպիսի սիրտ եմ տալու, որ ճանաչեն ինձ, թե ես եմ Տերը. նրանք ինձ համար ժողովուրդ պիտի լինեն, իսկ ես նրանց համար կլինեմ Աստված, որպեսզի նրանք իրենց ամբողջ սրտով ինձ դառնան։

⁸ Ինչպես այդ ժանտ թուզը, որն իր դառնության պատճառով չի ուտվում,- այսպես է ասում Տերը,- այդ վիճակին պիտի մատնեմ Հուդայի արքա Սեդեկիային, նրա մեծամեծներին, Երուսաղեմում մնացածներին, այդ երկրում մնացածներին և Եգիպտոսում բնակվողներին։ ⁹ Դրանց պիտի ցրեմ աշխարհի բոլոր ազգերի ու թագավորությունների մեջ՝ նախատինքի, անարգանքի, ատելության ու անեծքի արժանացնելով ամենուրեք, ուր էլ որ վտարեմ դրանց։ ¹⁰ Դրանց վրա սուր, սով ու մահ պիտի ուղարկեմ, մինչև որ անհետանան այն երկրից, որը տվեցի իրենց և իրենց հայրերին»։

25

Թշնամին հյուսիսից

¹ Այս է Երեմիային ուղղված խոսքը՝ Հուդայի ժողովրդի մասին, ասված Հուդայի արքա Հովսիայի որդի Հովակիմի չորրորդ տարում, որ համապատասխանում է բաբելացիների Նաբուքոդոնոսոր արքայի առաջին տարուն,- ² այն խոսքը, որ հայտնեց Երեմիա մարգարեն Հուդայի համայն ժողովրդին և Երուսաղեմի բնակիչներին՝ ասելով. ³ «Հուդայի արքա Ամովնի որդի Հովսիայի տասներեքերորդ տարուց մինչև այսօր, այսինքն՝ քսաներեք տարի, Տերը խոսեց ինձ հետ, ու ես վաղ առավոտից խոսում էի ձեզ հետ, ասում, բայց դուք չլսեցիք»։ ⁴ «Վաղօրոք արձակեցի ու ձեզ մոտ ուղարկեցի իմ ծառաներին՝ մարգարեներին, բայց դուք չլսեցիք, չանսացիք ու ձեր ականջներով չլսեցիք։ ⁵ Ասում էի. “Ամենքդ դարձե՛ք ձեր չար ճանապարհից, ձեր չար ընթացքից, որպեսզի բնակվեք այդ երկրում, որ հավիտյանս հավիտենից տվել եմ ձեզ ու ձեր հայրերին։ ⁶ Չգնաք օտար աստվածների հետևից՝ նրանց ծառայելու և երկրպագելու համար, չբարկացնեք ինձ ձեր ձեռքի գործերով, որպեսզի չպատուհասեմ ձեզ”։ ⁷ Բայց դուք ինձ չլսեցիք,- ասում է Տերը,- քանի որ ինձ բարկացրիք ձեր ձեռքի գործերով, որպեսզի պատուհասեմ ձեզ»։

⁸ Դրա համար այսպես է ասում Զորությունների Տերը. «Քանի որ չհավատացիք իմ խոսքերին, ⁹ ահա ես կուղարկեմ, կվերցնեմ հյուսիսի բոլոր ազգերին,- ասում է Տերը,- նաև բաբելացիների Նաբուքոդոնոսոր արքային՝ իմ ծառային, և նրանց կբերեմ այդ երկրի վրա, դրա բնակիչների վրա, այն բոլոր ազգերի վրա, որ դրա շուրջն են, կբնաջնջեմ դրանց, կմատնեմ ավարի ու ապականության, ծաղրանքի ու հավիտենական նախատինքի։ ¹⁰ Դրանց միջից կվերացնեմ ուրախության ձայնը և ձայնը ցնծության, փեսայի ձայնը և ձայնը հարսի, երկանքի ձայնը և ճրագի լույսը։ ¹¹ Այդ ողջ երկիրը կավերվի ու կանհետանա, և յոթանասուն տարի կծառայեն այդ ազգերին և բաբելացիների արքային։ ¹² Իսկ երբ լրանա յոթանասուն տարին, վրեժխնդիր կլինեմ բաբելացիների արքայից և այդ ազգից՝ իրենց անօրենությունների համար,- ասում է Տերը,- ինչպես և քաղդեացիների երկրից. նրանց հավիտենապես կանհետացնեմ։ ¹³ Այդ ամբողջ երկրի վրա կբերեմ այն ամենը, ինչ ասել եմ նրա մասին այն ամենի համաձայն, ինչ գրված է այս գրքում, ¹⁴ որ մարգարեացել է Երեմիան բոլոր ազգերի մասին։ Բազում ազգեր և մեծամեծ թագավորություններ պիտի գերեվարեն նրանց. ես էլ պիտի հատուցեմ նրանց իրենց անօրենությունների համեմատ, իրենց ձեռքի գործերի համեմատ»։

Տիրոջ բարկության բաժակը

¹⁵ Այսպես է ասում ինձ Տերը՝ Իսրայելի Աստվածը. «Անխառն գինու այս բաժակը վերցրո՛ւ իմ ձեռքից և խմեցրո՛ւ այն բոլոր ազգերին, որոնց մոտ կուղարկեմ քեզ. ¹⁶ նրանք կխմեն այն ցմրուր և խելքները կթռցնեն այն սրի ահից, որ ես նրանց վրա եմ ուղարկելու»։

¹⁷ Ես Տիրոջ ձեռքից վերցրի բաժակը և խմեցրի այն բոլոր ազգերին, որոնց մոտ ուղարկեց ինձ Տերը՝ ¹⁸ Երուսաղեմին և Հուդայի քաղաքներին, նրանց թագավորներին և նրանց իշխաններին՝ նրանց մատնելու ավերի ու անապատի, ծաղրանքի ու անեծքի, ինչպես որ այս օրերում են, ¹⁹ նաև եգիպտացիների արքա փարավոնին, նրա պաշտոնյաներին և նրա մեծամեծներին, նրա ամբողջ ազգին, ²⁰ նրա ամբողջ խառնակված զորքին, նաև կղզու բոլոր թագավորներին և այլազգիների երկրի բոլոր թագավորներին՝ Ասկաղոնին ու Գազային, Ակկարոնին ու Ազովտոսի մնացորդներին, ²¹ եդովմացիներին, մովաբացիներին և ամովնացիներին, ²² նաև Տյուրոսի բոլոր թագավորներին, սիդովնացիների բոլոր թագավորներին և այն կղզու թագավորներին, որ գտնվում է ծովի մյուս կողմում, ²³ Դեդանին, Թեմանին, Բովկին և բոլոր նրանց, ովքեր երեսներն են ածիլում, ²⁴ նաև արաբացիների բոլոր թագավորներին և անապատում ապրող խառնիճաղանջ ցեղերի բոլոր թագավորներին. ²⁵ նաև Զամբրիի բոլոր թագավորներին, Ելամի բոլոր թագավորներին ու պարսից բոլոր թագավորներին. ²⁶ նաև հյուսիս-արևելքի բոլոր թագավորներին՝ մերձավոր կամ հեռավոր, յուրաքանչյուրին իր եղբոր հետ, ինչպես և երկրի բոլոր թագավորներին, որոնք կան աշխարհի երեսին։ Իսկ ամենավերջում պիտի խմի Սիսաքի թագավորը։

²⁷ «Ապա ասա՛ նրանց. այսպես է ասում Ամենակալ Տերը՝ Իսրայելի Աստվածը. “Պիտի խմեք ու հարբեք, հիմարանաք ու կործանվեք և ոտքի չեք կանգնելու այն սրի պատճառով, որ ես ուղարկելու եմ ձեզ վրա”։ ²⁸ Իսկ երբ այնպես լինի, որ խմելու համար քո ձեռքից չկամենան ընդունել բաժակը, կասես նրանց. այսպես է ասում Զորու թյունների Տերը. “Անպայման պիտի խմեք, ²⁹ որովհետև չարչարանքի սկիզբը դնելու եմ այն քաղաքից, որի վրա դրված է իմ անունը։ Իսկ դուք չե՞ք պատժվի. անշուշտ պիտի պատժվեք, որովհետև ես սրի պիտի մատնեմ բոլորին, ովքեր բնակվում են երկրի վրա”,- ասում է Զորությունների Տերը։

³⁰ Դու էլ նրանց համար կմարգարեանաս իմ այս բոլոր պատգամները և կասես նրանց.

“Տերն իր սուրբ բարձունքից հրաման պիտի տա,

իր ձայնը, հրամանի իր խոսքը պիտի արձակի իր տեղից,

և նրանք այգեկութ անողների պես

երկրի բոլոր բնակիչների համար պատասխան պիտի տան,

³¹ թե ոչնչացումը վրա հասավ երկրից,

քանի որ Տերն ազգերի մեջ դատաստան պիտի տեսնի,

պիտի դատի ամեն մարդու,

և ամբարիշտները սրի են մատնվելու”»,- ասում է Տերը։

³² Այսպես է ասում Զորությունների Տերը.

«Ահա և ազգերը՝ մեկից մյուսը, չարիքներ պիտի տեսնեն,

երկրի ծագերից մեծ մրրիկ պիտի բարձրանա,

³³ և Տիրոջ օրն աշխարհի մի ծայրից մինչև մյուսը

Տիրոջ կողմից խոցվածներ պիտի ընկնեն։

Նրանք կոծի չեն արժանանալու,

չեն հավաքվելու,

աղբի նման թափված են մնալու դաշտի երեսին։

³⁴ Գո՛ւյժ բարձրացրեք և աղաղակե՛ք, ո՛վ հովիվներ,

ողբացե՛ք, ոչխարների հոտի խոյե՛ր,

որովհետև հասան ձեր մորթվելու և ցիրուցան լինելու օրերը.

պիտի զոհ գնաք իբրև ընտիր խոյեր։

³⁵ Հովիվները փախչելու տեղ չեն գտնելու,

իսկ ոչխարների հոտի խոյերը՝ փրկություն։

³⁶ Ահա լսվում է հովիվների գույժի ձայնը,

ոչխարների հոտի խոյերի աղաղակը,

քանզի Տերը ոչնչացրեց նրանց արոտները։

³⁷ Տիրոջ բարկության ու ցասման պատճառով

պիտի վերանա խաղաղության հետքը։

³⁸ Նրանք լքեցին երկիրը,

ինչպես առյուծն՝ իր որջը,

և նրանց երկիրն անապատ դարձավ

ահեղ սրի բարկությունից ու ցասումից,

Տիրոջ բարկությունից ու ցասումից»։

26(33)

Երեմիան մահվան սպառնալիքի տակ

¹ Այս է Տիրոջ խոսքը՝ ասված Հուդայի արքա Հովսիայի որդի Հովակիմի թագավորության սկզբում. ² այսպես է ասում Տերը. «Կանգնի՛ր Տիրոջ տան գավթում և Հուդայի երկրի ողջ ժողովրդին, որ երկրպագելու է գալիս Տիրոջ տանը, մարգարեացի՛ր այն բոլոր բաները, որ պատվիրեցի քեզ մարգարեանալ նրանց համար։ Ոչ մի բան չպակասեցնես։ ³ Թերևս լսեն, ու ամեն մեկը հետ կանգնի իր չար ճանապարհից, ես էլ հետ կանգնեմ այն չարիքներից, որ մտածում եմ անել նրանց՝ ի պատասխան իրենց չար ընթացքի»։

⁴ Ապա կասես նրանց. այսպես է ասում Տերը. «Եթե ինձ չլսեք, չընթանաք ձեզ համար կարգած իմ օրենքով, ⁵ ականջ չդնեք իմ ծառա մարգարեների խոսքերին, որոնց ես կանխավ ուղարկեցի ձեզ մոտ. ուղարկեցի, բայց դուք չլսեցիք. ⁶ ապա այդ տաճարը կդարձնեմ Սելովի նման, իսկ այս քաղաքն աշխարհի բոլոր ազգերի անեծքին կդատապարտեմ»։

⁷ Տիրոջ տան մեջ այս խոսքերն ասելիս քահանաները, սուտ մարգարեներն ու ողջ ժողովուրդը լսեցին Երեմիային։

⁸ Իսկ երբ Երեմիան դադարեց խոսելուց՝ ամբողջ ժողովրդին ամեն բան ասելով այնպես, ինչպես նրան հրամայել էր Տերը, նրան բռնեցին քահանաները, սուտ մարգարեներն ու ողջ ժողովուրդը և ասացին. «Դու անպայման պիտի մեռնես, ⁹ որովհետև Տիրոջ անունից մարգարեացար և ասացիր, թե այս տունը պիտի դառնա Սելովմի նման, և այս քաղաքը պիտի ամայանա բնակիչներից»։

Ժողովուրդը Տիրոջ տան մեջ կուտակվեց Երեմիայի դեմ։ ¹⁰ Հուդայի իշխանները, լսելով այս բաները, թագավորի պալատից եկան Տիրոջ տունը և նստեցին Տիրոջ տան նոր դարպասի առաջ։ ¹¹ Քահանաներն ու սուտ մարգարեներն իշխաններին և ողջ ժողովրդին ասացին. «Այդ մարդը մահվան դատավճռի է արժանի, որովհետև, ինչպես ձեր իսկ ականջներով լսեցիք, մարգարեացավ այս քաղաքի մասին»։

¹² Իսկ Երեմիան բոլոր իշխաններին և ողջ ժողովրդին ասաց. «Տերն ինձ ուղարկեց այս տան և քաղաքի վերաբերյալ մարգարեանալու այն բոլոր խոսքերը, որ լսեցիք. ¹³ ուրեմն ձեր ճանապարհներին ու ձեր գործերին ուղի՛ղ ընթացք տվեք և ակա՛նջ դրեք Տիրոջ՝ ձեր Աստծու ձայնին, որպեսզի Տերը հետ կանգնի այն չարիքներից, որոնց մասին հայտնեց ձեզ։ ¹⁴ Ես ահավասիկ ձեր ձեռքերում եմ. վարվե՛ք ինձ հետ, ինչպես ձեզ համար օգտակար կամ լավ կհամարեք։ ¹⁵ Բայց լա՛վ իմացեք, որ եթե դուք ինձ սպանեք, անմեղ արյան տակ պիտի ընկնեք դուք և այս քաղաքն ու իր բնակիչները, քանի որ արդարև Տերն ինձ ուղարկեց ձեզ մոտ՝ ձեր ականջին ասելու այս բոլոր խոսքերը»։

¹⁶ Իշխաններն ու ողջ ժողովուրդն ասացին քահանաներին և սուտ մարգարեներին. «Այդ մարդը մահվան դատավճռի ենթակա չէ, որովհետև Տիրոջ՝ Աստծու անունից խոսեց մեզ հետ»։

¹⁷ Երկրի ծերերից մի քանի մարդ ոտքի ելան և ասացին հավաքված ողջ ժողովրդին.

¹⁸ «Հուդայի արքա Եզեկիայի ժամանակ Միքիա Մորստացին մարգարեացել է և ասել Հուդայի ամբողջ ժողովրդին.

“Այսպես է ասում Զորությունների Տերը.

“Սիոնը, որպես ագարակ,

արորով պիտի հերկվի,

Երուսաղեմը պիտի վերածվի այգեպանների հյուղակների,

իսկ տաճարի լեռը՝ մայրու անտառի”։

¹⁹ Բայց արդյոք Հուդայի Եզեկիա արքան և համայն Հուդայի երկիրը դրա համար նրան սպանեցի՞ն. մի՞թե չվախեցան Տիրոջից ու չխնդրեցի՞ն Տիրոջը, և Տերը հրաժարվեց այն բոլոր չարիքներից, որ ասել էր նրանց դեմ։ Իսկ մենք ինքներս մեծ չարիք ենք բերելու մեզ”»։

²⁰ Մի մարդ էլ կար՝ կարիաթարիմցի Սամեայի որդի Ուրիան, որ մարգարեություն արեց Տիրոջ անունից. մարգարեություն արեց այս քաղաքի ու այս երկրի վերաբերյալ՝ հար և նման Երեմիայի բոլոր ասածներին։ ²¹ Նրա բոլոր խոսքերը լսեցին Հովակիմ արքան, նրա բոլոր մեծամեծներն ու բոլոր իշխանները և ուզում էին սպանել նրան։ Ուրիան լսելով վախեցավ ու փախավ գնաց եգիպտացիների երկիրը։ ²² Իսկ Հովակիմ արքան մարդիկ ուղարկեց Եգիպտոս. նա Աքովբորի որդի Եղնաթանին մի քանի մարդկանց հետ ուղարկեց Եգիպտոս։ ²³ Նրան այնտեղից հանեցին և բերեցին Հովակիմ արքայի մոտ. սա սրով սպանեց նրան և գցեց հասարակաց գերեզմանոցը։

²⁴ Բայց Սափանի որդի Աքիկամի բազուկը Երեմիայի հետ էր, որ չլինի թե նա ժողովրդի ձեռքը մատնվի, ու նրան սպանեն։

27(34)

Երեմիայի կրած լուծն ու կապանքները

¹ Այս է Տիրոջ խոսքը՝ ասված Երեմիային Հուդայի արքա Հովսիայի որդի Հովակիմի թագավորության սկզբում։

² Տերն այսպես է ասում ինձ. «Քեզ համար կապանքներ ու լո՛ւծ պատրաստիր և գցի՛ր պարանոցիդ։ ³ Դրանցից ուղարկի՛ր նաև եդովմացիների թագավորին և մովաբացիների թագավորին, ամովնացիների թագավորին, Տյուրոսի թագավորին և սիդովնացիների թագավորին՝ նրանց դեսպանների միջոցով, որոնք գալիս են Երուսաղեմ Հուդայի երկրի արքա Սեդեկիայի մոտ։ ⁴ Նրանց կպատվիրես հայտնելու իրենց տերերին, թե այսպես է ասում Զորությունների Տերը՝ Իսրայելի Աստվածը. այսպես կասեք ձեր տերերին.

⁵ «Ես իմ մեծ զորությամբ և հաղթ բազուկով ստեղծեցի երկիրը, մարդկանց, անասուններին ու այն ամենը, ինչ կա երկրի երեսին. ես այն կտամ նրան, ով հաճելի է իմ աչքին։ ⁶ Արդ, ես ինքս բաբելացիների Նաբուքոդոնոսոր արքայի՝ իմ ծառայի ձեռքը տվեցի ամբողջ երկիրը, տվեցի նաև անապատի գազաններին, որ ծառայեն նրան։ ⁷ Ու բոլոր ազգերը պիտի ծառայեն նրան և նրա որդուն ու նրա որդու որդուն, մինչև որ գա նրա և նրա երկրի վրա իմ բարկանալու ժամանակը։ Նրան պիտի ծառայեն բազում ազգեր և մեծամեծ թագավորներ։ ⁸ Իսկ եթե լինեն ազգեր ու թագավորություններ, որոնք չենթարկվեն բաբելացիների արքա Նաբուքոդոնոսորին, անմիջապես իրենց պարանոցները չդնեն բաբելացիների արքայի լծի տակ, այդպիսի ազգերին սրով, սովով ու մահվամբ պիտի այցելեմ,- ասում է Տերը,- մինչև որ ոչնչացվեն նրա ձեռքով։

⁹ Դուք մի՛ լսեք ձեր մարգարեներին ու ձեր գուշակներին, ձեր երազատեսներին ու ձեր վհուկներին, ձեր հավահմաներին և ձեր կախարդներին, որոնք ձեզ ասում են՝ “Չենթարկվե՛ք բաբելացիների արքային”, ¹⁰ քանի որ դրանք ձեզ համար սուտ մարգարեություն են անում, որպեսզի հեռացնեն ձեզ ձեր երկրից, որպեսզի ցրիվ տամ ձեզ, ու դուք կորչեք։

¹¹ Իսկ այն ազգին, որն իր պարանոցը կդնի բաբելացիների արքայի լծի տակ և կենթարկվի նրան, կթողնեմ իր երկրում,- ասում է Տերը.- կմշակի այն և կբնակվի այնտեղ»։

¹² Այս բոլոր բաները մեկ առ մեկ հայտնեցի նաև Հուդայի արքա Սեդեկիային՝ ասելով. «Ձեր պարանոցները դրե՛ք բաբելացիների արքայի լծի տակ, ծառայե՛ք նրան ու նրա ազգին, որպեսզի ապրեք։ ¹³ Ինչի՞ համար սրով, սովով ու մահով մեռնեք դու և քո ժողովուրդը, ինչպես որ Տերն ասաց այն ազգի մասին, որը չի ուզի ծառայել բաբելացիների արքային։ ¹⁴ Մի՛ լսեք այն մարգարեների խոսքերը, որոնք ձեզ ասում են. “Չենթարկվե՛ք բաբելացիների արքային”։ Նրանք սուտ մարգարեություն են անում ձեզ համար։ ¹⁵ «Ե՛ս չեմ ուղարկել նրանց,- ասում է Տերը,- իսկ նրանք իմ անունից սուտ մարգարեություն են անում, միայն թե կորստի մատնեն ձեզ։ Դուք էլ, ձեր մարգարեներն էլ, որ ձեզ համար անտեղի ու սուտ մարգարեություն են անում, կորստյան եք դատապարտվելու»։

¹⁶ Ինչ որ խոսեցի, կհայտնես նաև քահանաներին ու համայն ժողովրդին, թե այսպես է ասում Տերը. «Ականջ մի՛ դրեք այն մարգարեների խոսքերին, որ մարգարեություն են անում ձեզ համար և ասում. “Ահա Տիրոջ տան սպասքն այժմ ևեթ Բաբելոնից պիտի վերադարձվի”։ Բայց դա զուր են մարգարեանում ձեզ համար. ե՛ս չեմ ուղարկել նրանց։ ¹⁷ Մի՛ լսեք նրանց, այլ ծառայե՛ք բաբելացիների արքային, որպեսզի ապրեք։ Ինչո՞ւ այս քաղաքն ավերակ դառնա։ ¹⁸ Եթե մարգարեներ են, ու նրանց մեջ կա Տիրոջ խոսքը, թող գան դեմս կանգնեն»։ Տերն այսպես է ասում. «Մնացած սպասքը, որ չհափշտակեց բաբելացիների արքան, երբ Հեքոնիային գերի տարավ Երուսաղեմից, պիտի Բաբելոն գնա»,- ասում է Զորությունների Տերը։ Իսկ Տիրոջ տանը և Հուդայի թագավորի տանը մնացած սպասքի՝ Երուսաղեմից Բաբելոն չտարվելու մասին ¹⁹ այսպես է ասում Զորությունների Տերը. սյուների մասին, մեծ ավազանի մասին, խարիսխների ու մնացած սպասքի մասին, որ մնացին այս քաղաքում, ²⁰ որոնք չհափշտակեց բաբելացիների Նաբուքոդոնոսոր արքան, երբ ինքը Հուդայի արքա Հովակիմի որդի Հեքոնիային և Հուդայի ու Երուսաղեմի բոլոր ազնվականներին Երուսաղեմից գերի տարավ Բաբելոն,- ²¹ ահա այսպես է ասում Զորությունների Տերը՝ Իսրայելի Աստվածը, Տիրոջ տանը, Հուդայի թագավորի տանը և Երուսաղեմում մնացած այդ սպասքի մասին. ²² «Թող դրանք Բաբելոն տարվեն ու այնտեղ մնան մինչև այն օրը, երբ այցելություն կտամ նրանց»։ Այսպես է ասում Տերը. «Կհանեմ դրանք և կվերադարձնեմ այստեղ»։

28(35)

Երեմիան և Անանիա մարգարեն

¹ Այդ նույն տարում՝ Հուդայի արքա Սեդեկիայի թագավորության սկզբում, չորրորդ տարվա հինգերորդ ամսին, Ազովրի որդին՝ սուտ մարգարե Անանիան, որ Գաբավոնից էր, Տիրոջ տանը՝ քահանաների և ողջ ժողովրդի առաջ, ասաց ինձ, թե ² այսպես է ասում Զորությունների Տերը՝ Իսրայելի Աստվածը. «Բաբելացիների արքայի լուծը պիտի խորտակվի. ³ երկու տարուց հետո ես այստեղ պիտի վերադարձնեմ Տիրոջ տան այն ամբողջ սպասքը, որ մի ժամանակ բաբելացիների Նաբուքոդոնոսոր արքան վերցրել էր այստեղից և տարել Բաբելոն. ⁴ նաև Հուդայի արքա Հովակիմի որդի Հեքոնիային և Հուդայի երկրի բոլոր գերիներին, որոնք տարվեցին Բաբելոն, ես պիտի վերադարձնեմ այս վայրը,- ասում է Տերը,- թե՛ Հեքոնիային և թե՛ Հուդայի երկրի գերյալներին, քանզի պիտի խորտակեմ բաբելացիների արքայի լուծը»։

⁵ Իսկ Երեմիա մարգարեն Տիրոջ տանը գտնվող քահանաների ներկայությամբ ամբողջ ժողովրդի առաջ ասաց սուտ մարգարե Անանիային։ ⁶ «Արդարև, թող այդպես անի Տերը. թող հաստատի քո խոսքը, որ մարգարեացար այս տան սպասքը և բոլոր գերիներին Բաբելոնից այստեղ վերադարձնելու մասին։ ⁷ Սակայն լսե՛ք Տիրոջ պատգամները, որ ես կասեմ ձեր ականջներին և ամբողջ ժողովրդի ականջներին։ ⁸ Այն մարգարեները, որոնք ինձնից ու քեզնից առաջ միշտ էլ եղել են, բազում երկրների և մեծամեծ թագավորությունների համար մարգարեացել են պատերազմի, չարիքի ու մահվան մասին. ⁹ իսկ այն մարգարեն, որ խաղաղության մասին է մարգարեանում, և այդ մարգարեի խոսքը կատարվում է, այդ մարգարեին ընդունում են իբրև մեկին, որին իսկապես Տերն է ուղարկել նրանց մոտ»։

¹⁰ Այն ժամանակ Անանիա մարգարեն ողջ ժողովրդի առաջ Երեմիայի պարանոցից վերցրեց լուծը և խորտակեց։ ¹¹ Անանիան համայն ժողովրդի ներկայությամբ ասաց. «Այսպես է ասում Տերը.

“Երկու տարուց հետո այսպես պիտի խորտակեմ բաբելացիների արքա Նաբուքոդոնոսորի լուծը բոլոր ազգերի պարանոցներից”»։

¹² Եվ Երեմիա մարգարեն գնաց իր ճանապարհով։ Այն բանից հետո, երբ Անանիա մարգարեն Երեմիա մարգարեի պարանոցից խորտակեց լուծը, Տերը խոսքն ուղղեց Երեմիային՝ ասելով.

¹³ «Գնա խոսի՛ր Անանիայի հետ և ասա՛, թե այսպես է ասում Տերը. “Փայտե լուծը դու խորտակեցիր, բայց նրա փոխարեն ես երկաթե լուծ պիտի շինեմ”»։

¹⁴ Այսպես է ասում Զորությունների Տերը՝ Իսրայելի Աստվածը. «Երկաթե լուծ դրեցի այդ բոլոր ազգերի պարանոցին՝ հպատակվելու բաբելացիների Նաբուքոդոնոսոր արքային, և նրանք պիտի ծառայեն նրան. նաև անապատի գազաններին ենթարկեցի նրան»։

¹⁵ Իսկ Երեմիա մարգարեն ասաց Անանիա մարգարեին. «Այժմ լսի՛ր, Անա՛նիա. Տերը քեզ չի ուղարկել, և դու իզուր փուչ բաների համար հույս տվեցիր այդ ժողովրդին։ ¹⁶ Դրա համար Տերն այսպես է ասում. “Ահա ես վռնդելու եմ քեզ երկրի երեսից։ Այս տարվա մեջ պիտի մեռնես դու, որովհետև հակառակ բաներ խոսեցիր Տիրոջ անունից”»։

¹⁷ Եվ Անանիա մարգարեն նույն այդ տարվա մեջ՝ յոթերորդ ամսին, մեռավ։

29(36)

Երեմիայի նամակը Բաբելոնի գերիներին

¹ Սրանք են այն նամակի խոսքերը, որ Երեմիա մարգարեն Երուսաղեմից ուղարկեց գերության մեջ գտնվող ծերերին, քահանաներին և սուտ մարգարեներին։ Սույն նամակը հղված էր Բաբելոն՝ գերիներին և առհասարակ ժողովրդին, որոնց Նաբուքոդոնոսորը գերեվարեց Երուսաղեմից Բաբելոն, ² Հեքոնիա արքային և տիկնոջը, ներքինիներին ու Հուդայի երկրի իշխաններին, ինչպես և բոլոր ազնվականներին, արհեստավորներին ու դարբիններին Երուսաղեմից տանելուց հետո։ ³ Նամակն ուղարկված էր Սափանի որդի Ելարիայի և Քեղկիայի որդի Գամարիայի ձեռքով, որոնց Սեդեկիա արքան ուղարկեց Բաբելոն՝ բաբելացիների արքա Նաբուքոդոնոսորի մոտ՝ ասելով.

⁴ «Այսպես է ասում Զորությունների Տերը՝ Իսրայելի Աստվածը, գերիներիդ մասին, որ Երուսաղեմից գերեվարվեցիք Բաբելոն.

⁵ “Տնե՛ր շինեք և բնակվե՛ք, այգինե՛ր տնկեք և կերե՛ք դրանց պտուղները, ⁶ կի՛ն առեք, և թող ծնվեն տղաներ ու աղջիկներ, ձեր տղաների համար կի՛ն առեք, իսկ ձեր աղջիկներին մարդո՛ւ տվեք, և թող ծնվեն տղաներ ու աղջիկներ, բազմացե՛ք այդտեղ և մի՛ նվազեք։ ⁷ Խաղաղությա՛մբ ապրեք այդ երկրում, ուր գերեվարեցի ձեզ, այդ երկրի համար աղո՛թք արեք Տիրոջը, որովհետև նրա խաղաղությամբ ձեզ համար ևս խաղաղություն կլինի”»։

⁸ Այսպես է ասում Զորությունների Տերը՝ Իսրայելի Աստվածը. «Թող ձեզ չհրապուրեն ձեր սուտ մարգարեները, որոնք ձեր մեջ են, նաև ձեր գուշակները, ուշք մի՛ դարձրեք ձեր տեսիլքներին, որ դուք տեսնում եք, ⁹ որովհետև նրանք սուտ մարգարեություն են անում իմ անունից, իսկ ես նրանց չեմ ուղարկել»,- ասում է Տերը։

¹⁰ Այսպես է ասում Տերը. «Երբ որ մոտենա Բաբելոնի յոթանասուն տարին լրանալու ժամանակը, ես այցի կգամ ձեզ և կհաստատեմ ձեր մասին իմ բարի խոսքերը՝ վերադարձնելու ձեզ այս վայրը, ¹¹ քանզի միայն ես գիտեմ իմ մտադրությունները, որ խորհում եմ և պիտի խորհեմ ձեր մասին,- ասում է Տերը.- խաղաղությա՛ն մտադրություն և ոչ թե չարության։ Դրանից հետո ես հույս կտամ ձեզ, ¹² և դուք կկանչեք ինձ, կգնաք և կաղոթեք ինձ, ու ես կլսեմ ձեզ։ ¹³ Կփնտրեք ինձ և կգտնեք, որովհետև ինձ փնտրելու եք ձեր ամբողջ սրտով։ ¹⁴ Ես կերևամ ձեզ,- ասում է Տերը,- և կվերացնեմ ձեր գերությունը. կհավաքեմ ձեզ բոլոր ազգերի միջից և բոլոր վայրերից, ուր ցրեցի ձեզ,- ասում է Տերը,- և կվերադարձնեմ ձեզ այնտեղ, որտեղից գերեվարեցի ձեզ, ¹⁵ քանի որ դուք ասացիք. “Տերը մեզ համար մարգարեներ կարգեց նաև Բաբելոնում”»։

¹⁶ Այսպես է ասում Տերը թագավորի մասին, որ նստում է Դավթի աթոռին, ամբողջ ժողովրդի մասին, որ բնակվում է այդ քաղաքում, ձեր եղբայրների մասին, որոնք ձեզ հետ գերության չգնացին։

¹⁷ Այսպես է ասում Զորությունների Տերը. «Ահավասիկ ես նրանց մեջ ուղարկում եմ սով, սուր և մահ։ Նրանց պիտի դարձնեմ գարշ ու ժանտ թզի պես, որ իր դառնության պատճառով չի ուտվում։ ¹⁸ Նրանց պիտի հալածեմ սրով, սովով ու մահով, նրանց պիտի մատնեմ աշխարհի բոլոր թագավորությունների արհավիրքին, նզովքին, ապականությանը, ծաղրանքի ու նախատինքի այն բոլոր ազգերի մեջ, ուր պիտի ցրեմ նրանց, ¹⁹ որովհետև նրանք չանսացին իմ խոսքերին,- ասում է Տերը.- ես նրանց մոտ ուղարկեցի իմ ծառաներին՝ մարգարեներին. կանխապես ուղարկեցի, բայց դուք չլսեցիք,- ասում է Տերը։-

²⁰ Իսկ դուք, բոլո՛ր գերիներդ, որոնց Երուսաղեմից ուղարկել եմ Բաբելոն, լսե՛ք Տիրոջ խոսքը. ²¹ այսպես է ասում Զորությունների Տերը՝ Իսրայելի Աստվածը, Ուլկիի որդի Աքիաբի և Մաասի որդի Սեդեկիայի մասին, որոնք սուտ մարգարեացան իմ անունից. «Ահավասիկ ես նրանց կհանձնեմ բաբելացիների Նաբուքոդոնոսոր արքայի ձեռքը, որը նրանց կսպանի ձեր աչքի առաջ։ ²² Եվ նրանցից այս անեծքը կմնա Հուդայի երկրի բոլոր գերիների մեջ, որոնք գտնվում են Բաբելոնում։ Նրանք պիտի ասեն. “Թող Տերը քեզ անի այնպես, ինչպես արեց Սեդեկիային և Աքիաբին, որոնց բաբելացիների արքան կրակի վրա խորովեց”։ ²³ Արդարև, նրանք անօրենություններ գործեցին Իսրայելում. շնություն էին անում համաքաղաքացիների կանանց հետ, իմ անունից սուտ պատգամներ էին ասում, որը նրանց չէի հրամայել. ես ինքս դրան իրազեկ և վկա եմ»,- ասում է Տերը։

Սամեայի նամակը

²⁴ Կհայտնես նաև ելիմացի Սամեային, ²⁵ թե այսպես է ասում Զորությունների Տերը՝ Իսրայելի Աստվածը. «Դու իմ անունից նամակներ ես ուղարկել Երուսաղեմ՝ ամբողջ ժողովրդին,- մինչդեռ իմ կողմից ես քեզ չեմ ուղարկել,- նաև Մաաս քահանայի որդի Սոփոնիային, ինչպես և բոլոր քահանաներին և ասել, ²⁶ թե Տերը քեզ քահանա կարգեց Հովիդիա քահանայի փոխարեն, որպեսզի Տիրոջ տանը վերակացու լինես ամեն մարդու վրա, որ կմարգարեանա, և ամեն մեկի վրա, որ սուտ գուշակություն կանի, ու նրանց բանտի մեջ շղթայի զարնես։ ²⁷ Արդ, ինչո՞ւ չպատուհասեցիք անաթովթացի Երեմիային, որ մարգարեություն է անում ձեզ համար։ ²⁸ Նա մեզ լուր է ուղարկել Բաբելոն՝ ասելով. “Հեռու է ժամանակը. տնե՛ր կառուցեք և բնակվե՛ք, այգինե՛ր տնկեք և կերե՛ք նրանց պտուղները”»։

²⁹ Սոփոնիա քահանան Երեմիա մարգարեի ականջին ընթերցեց նամակը։ ³⁰ Եվ Տերը, խոսքն ուղղելով Երեմիային, ասաց.

³¹ «Լո՛ւր ուղարկիր բոլոր գերվածներին և հայտնի՛ր. այսպես է ասում Տերը ելիմացի Սամեայի մասին.

“Քանի որ Սամեան, որին ես չեմ ուղարկել, մարգարեացավ և ձեզ փուչ բաների հույս տվեց, ³² դրա համար Տերն այսպես է ասում. “Ահավասիկ ես դատաստան պիտի տեսնեմ ելիմացի Սամեայի և նրա սերնդի հետ. նրանից չի լինելու որևէ մեկը, որ նստի ձեր մեջ՝ տեսնելու այն բարիքը, որ ես անելու եմ ձեզ,- ասում է Տերը,- քանզի նա Աստծուն հակառակ խոսքեր ասաց”»։

30(37)

Մարգարեություն Իսրայելի ազատագրման մասին

¹ Այս է այն խոսքը, որ Տերն ուղղեց Երեմիային՝ ասելով.

² «Այսպես է ասում Տերը՝ Իսրայելի Աստվածը. այն բոլոր բաները, որ քեզ հրամայեցի, քեզ համար գրի՛ առ մատյանի մեջ։ ³ Ահա օրեր են գալու,- ասում է Տերը,- երբ Իսրայելի իմ գերյալ ժողովրդին, նաև Հուդայի ժողովրդին վերադարձնելու եմ. վերադարձնելու եմ այն երկիրը,- ասում է Տերը,- որ տվեցի նրանց հայրերին, որպեսզի տիրեն նրան»։ ⁴ Սրանք են այն խոսքերը, որ խոսեց Տերն Իսրայելի և Հուդայի մասին։

⁵ Այսպես է ասում Տերը.

«Սարսափի ձայն պիտի լսեք,

ձայնը ահեղ գույժի,

որից մարդկանց մեջքերը պիտի դողան,

և փրկություն ու խաղաղություն չպիտի լինի։

⁶ Հարցրե՛ք ու տեսե՛ք, թե երբևէ արուն ծնե՞լ է.

որովհետև ամեն տղամարդու տեսնում եմ իր ձեռքերը մեջքին պահած,

ինչպես ծննդկան կինը,

և բոլորի դեմքի գույնը դալուկ դարձած.

⁷ քանզի մեծ է այն օրը,

և նրա նմանը չկա։

Դա Հակոբի համար սարսափելի նեղության ժամանակ է լինելու,

բայց նա փրկվելու է դրանից։

⁸ Այն օրը,- ասում է Զորությունների Տերը,-

նրանց պարանոցից խորտակելու եմ լուծը,

խզելու եմ նրանց կապանքները.

նրանք այլևս օտարներին չեն ծառայելու,

⁹ այլ ծառայելու են Տիրոջը՝ իրենց Աստծուն.

նրանց պիտի տամ Դավիթ արքայի նման մեկին։

¹⁰ Սակայն դու մի՛ երկնչիր,

ո՛վ իմ ծառա Հակոբ,-

ասում է Տերը,-

չզարհուրես, ո՛վ Իսրայել,

որովհետև ահավասիկ քեզ ազատելու եմ հեռաստանից,

իսկ քո սերնդին՝ իր գերության երկրից։

Պիտի վերադառնա Հակոբը,

հանգստություն պիտի գտնի ու բարեկեցիկ կյանք ունենա,

ոչ ոք չի լինի, որ զարհուրեցնի նրան։

¹¹ Ահա ես քեզ հետ եմ,- ասում է Տերը,-

որպեսզի փրկեմ քեզ և կործանեմ այն ազգերին,

որոնց մեջ ցրեցի քեզ։

Բայց քեզ չեմ ոչնչացնելու.

քեզ արդարությամբ եմ խրատելու

և քավություն տալով՝ անմեղ չեմ համարելու քեզ»։

¹² Այսպես է ասում Տերը.

«Սաստկացրի քո տառապանքը.

քո կրած հարվածները ցավագին են,

¹³ քո դատը պաշտպանող չկա։

Դու բժշկվեցիր քո ցավերից,

բայց դա քեզ օգուտ չբերեց։

¹⁴ Քո բոլոր բարեկամները քեզ մոռացան

և չեն հարցնում քո մասին։

Իբրև սոսկալի խրատ՝

ես թշնամական հարվածներ հասցրի քեզ։

Քո բոլոր անօրենությունների պատճառով բազմացան մեղքերդ։

¹⁵ Քո կրած հարվածների համար ի՞նչ ես աղաղակ բարձրացնում։

Բայց ես քեզ չեմ ոչնչացնելու։

Բուռն են քո ցավերը.

դրանք սաստկացան քո բազում անօրենությունների պատճառով,

դրանք քո մեղքերի հետևանքն են։

¹⁶ Սակայն ամենքը, որ հոշոտում էին քեզ,

իրե՛նք պետք է հոշոտվեն,

քո բոլոր թշնամիները պիտի հոշոտեն իրենց մարմինները։

Քո անօրենությունները բազմացան ու հաճախակի դարձան.

դրանք քո մեղքերի հետևանքն են։

Քեզ ավերողներն իրե՛նք պիտի ավերի ենթարկվեն,

քո բոլոր ավարառուներին ես ավարի պիտի մատնեմ։

¹⁷ Քո ցավագին վերքերին բժշկություն պիտի բերեմ,

պիտի բժշկեմ քեզ,- ասում է Տերը,-

որովհետև, Սիո՛ն, դու աստանդական կոչվեցիր.

ասացին. “Դա է ձեր որսը,

բայց ով փնտրի, չի գտնի նրան”»։

¹⁸ Այսպես է ասում Տերը.

«Ահավասիկ ես Հակոբի վտարանդի վրանները կվերադարձնեմ,

ողորմած կլինեմ նրա գերյալների նկատմամբ.

քաղաքը կվերաշինվի իր բարձունքի վրա,

տաճարն իր կարգ ու կանոնով կվերականգնվի։

¹⁹ Այնտեղից կծավալվի երգիչների ու պարողների ձայնը։

Պիտի բազմացնեմ նրանց,

և նրանք չպիտի նվազեն,

պիտի տարածեմ նրանց,

և նրանք չպիտի թուլանան։

²⁰ Նրանք առաջվա պես ելումուտ պիտի անեն.

նրանց վկայություններն իմ աչքին հաստատուն պիտի դառնան։

Դատաստան պիտի կարդամ նրանց նեղողների գլխին,

²¹ և իրենցից հզորներն իրենց վրա պիտի իշխեն։

Իրենց իշխանը իրենց միջից պիտի ելնի։

Պիտի հավաքեմ նրանց,

ու նրանք պիտի վերադառնան ինձ մոտ,

քանզի ո՞վ ինքն իրեն սիրտ կանի դառնալ Տիրոջ մոտ,-

ասում է Տերը։-

²² Դուք ինձ համար ժողովուրդ կլինեք,

իսկ ես ձեզ համար կլինեմ Աստված»։

²³ Ահա Տիրոջ բարկությունը ցասմամբ բորբոքվեց,

մրրիկի պես բորբոքվեց նրա բարկությունն ամբարիշտների վրա։

²⁴ Տիրոջ բարկությունն ու զայրույթը կգան ու հետ չեն շրջվի,

մինչև որ նա կատարի իր սրտի կամքը։

Վերջին օրերին դուք կհասկանաք դա։

31(38)

Տերն Իսրայելին վերադարձնում է տուն է

¹ «Այն ժամանակ,- ասում է Տերը,- ես Իսրայելի ազգի համար Աստված կլինեմ, իսկ նրանք ինձ համար` ժողովուրդ»։

² Այսպես է ասում Տերը.

«Այնտեղ` անապատում, նրանք հանդիպեցին տապի

և սուսերով սպանվողների»։

Հեռացե՛ք, մի՛ բնաջնջեք Իսրայելը:

³ Հեռու-հեռվից նրան երևաց Տերը.

«Հավիտենական սիրով սիրեցի քեզ,

դրա համար էլ քեզ գթությամբ պարուրեցի:

⁴ Նորից պիտի շենացնեմ քեզ,

ու դու պիտի շենանաս,

ո՛վ Իսրայելի կույս:

Դարձյալ պիտի առնես քո թմբուկը

և խառնվես պարողների խմբերին:

⁵ Դարձյալ այգիներ պիտի տնկեք Սամարիա լեռան վրա,

տունկեր պիտի տնկեք և փառաբանեք,

⁶ քանզի հասել է օրը,

երբ Եփրեմի լեռներում կոչնակները ձայնելու են.

“Եկեք ելնե՜նք Սիոն` Տիրոջ՝ մեր Աստծու մոտ”»:

⁷ Այսպես է ասում Տերը.

«Ցնծացե՛ք Հակոբի համար,

ուրա՛խ եղեք և կանչե՛ք

ազգերի մեջ գլխավորներին,

իմա՛ց տվեք, օրհնեցե՛ք ու ասե՛ք.

“Տերը փրկեց իր ժողովրդին` Իսրայելի մնացորդներին”:

⁸ Ահա ես պասեքի տոնին նրանց պիտի բերեմ հյուսիսի երկրներից,

աշխարհի ծագերից պիտի հավաքեմ նրանց,

նրանց մեջ` կույրին ու կաղին, հղիին և ծննդաբերածին,

մեծ բազմությամբ որդիներ պիտի ծնվեն,

բոլորը պիտի վերադառնան։

⁹ Նրանք լալով հեռացան,

բայց ես մխիթարելով պիտի բերեմ նրանց`

հանգիստ պարգևելով ջրերի վտակների մոտ,

ուղիղ ճանապարհով,

որպեսզի չմոլորվեն նրա վրա,

քանզի Իսրայելի համար ես հայր եղա,

և Եփրեմն իմ անդրանիկն է:

¹⁰ Ո՛վ ազգեր, լսե՛ք Տիրոջ պատգամները,

պատմե՛ք հեռավոր կղզիներում և ասե՛ք.

“Ով ցրեց Իսրայելը,

նա էլ կհավաքի նրան և կպահպանի,

ինչպես նախրապանը` իր հոտը”։

¹¹ Տերն ազատեց Հակոբին

և փրկեց նրան նրա վրա բռնացողների ձեռքից։

¹² Պիտի գան և ուրախանան,

պիտի ցնծան Սիոնի լեռան վրա,

պիտի գան դեպի Տիրոջ բարիքները՝

ցորենի ու գինու,

բերքի ու հոտերի,

արջառի ու ոչխարի երկիրը.

նրանց անձերը պիտի լինեն պտղալից ծառի պես,

այլևս քաղց չպիտի զգան:

¹³ Այն ժամանակ կույսերը պիտի ցնծան երիտասարդների տոնախմբության մեջ,

ծերերը պիտի խնդան։

Նրանց սուգը խնդության պիտի վերածեմ,

իրենց տրտմությունից ուրախ պիտի դարձնեմ նրանց:

¹⁴ Ղևիի որդի քահանաների հոգիները զմայլանքով պիտի լցնեմ ու արբեցնեմ,

և իմ ժողովուրդը պիտի լիանա իմ բարիքներով»,- ասում է Տերը:

Ռաքելի ողբը

¹⁵ Այսպես է ասում Տերը.

«Մի ձայն լսվեց Ռամայում,

ողբ, լաց ու գույժ.

Ռաքելը ողբում էր իր որդիներին,

որդիների համար չէր ուզում մխիթարվել,

քանի որ նրանք չկային»:

¹⁶ Այսպես է ասում Տերը.

«Թող քո անձը դադարի լաց լինելուց,

իսկ քո աչքերը` արտասուքից,

որովհետև քո գործերի համար վարձ կա,- ասում է Տերը։-

Նրանք կվերադառնան թշնամիների երկրից,

¹⁷ և վերջում քո հույսը կիրականանա,- ասում է Տերը.-

քո որդիները կվերաբնակվեն իրենց սահմաններում:

¹⁸ Ուշադրությամբ լսեցի Եփրեմի այս ողբը. “Խրատեցիր ինձ, Տե՛ր,

ու ես խրատվեցի, բայց չսովորեցի,

ինչպես մատաղահասակ երինջ:

Դարձրո՛ւ ինձ, և ես կդառնամ,

քանզի դու Տերը՝ իմ Աստվածն ես:

¹⁹ Իմ գերությունից հետո զղջացի.

երբ խելքի եկա, իմ ամոթալի օրերի համար հոգոց հանեցի

և քեզ ցույց տվեցի, որ իմ տղայության պատճառով նախատինք կրեցի”:

²⁰ Եփրեմն իմ սիրելի որդին է,

գուրգուրելի մանուկը.

հենց որ իմ խոսքը նրա մասին է լինում,

նորից հիշում եմ նրան:

Ահա թե ինչու շտապում եմ օգնել նրան,

անչափ պիտի ողորմեմ նրան»,- ասում է Տերը:

²¹  «Պատրաստի՛ր ինքդ քեզ, ո՛վ Սիոն,

արդարության վրե՛ժ խնդրիր, քո սիրտը թող քո

թիկունքի վրա լինի,

ճանապա՛րհ ընկիր,

վերադարձի՛ր, ո՛վ Իսրայելի կույս,

ողբալով դարձի՛ր դեպի քո քաղաքները:

²² Մինչև ե՞րբ պիտի թափառես,

ո՛վ անարգված դուստր.

չէ՞ որ Տերը փրկություն է հաստատել նոր ստեղծած վայրում,

որպեսզի մարդիկ ազատագրված շրջեն այնտեղ»։

Մարգարեություն վերադարձի նոր ուխտի մասին

²³ Այսպես է ասում Զորությունների Տերը` Իսրայելի Աստվածը.

«Հուդայի երկրում և նրա քաղաքներում

երբ վերադարձնեմ նրա գերյալներին,

պիտի կրկնեն այս խոսքը

“Օրհնյա՜լ է Տերն իր արդար ու սուրբ լեռան վրա”։

²⁴ Եվ Հուդայի երկրի բնակիչներն իրենց քաղաքներով ու գործավորներով հանդերձ պիտի հարստանան հոտերով, ²⁵ քանզի ես արբեցրի բոլոր ծարավ հոգիներին, բոլոր քաղցած հոգիներին լիացրի: ²⁶ Ահա թե ինչու արթնացա ու նայեցի, և իմ քունն ինձ համար քաղցրացավ»:

²⁷  «Ահա օրեր են գալու,- ասում է Տերը,- ու Իսրայելի տունը և Հուդայի տունը սերմանելու եմ մարդու սերնդով և անասունի սերնդով: ²⁸ Ու ինչպես որ հետևում էի նրանց՝ խլելու և կործանելու, քանդելու, կորստյան մատնելու և չարչարելու համար, այդպես էլ պիտի հսկեմ նրանց վրա,- ասում է Տերը,- կառուցելու և տնկելու համար: ²⁹ Այն օրերին այլևս չեն ասելու. “Հայրերն ազոխ կերան, որդիների ատամներն առան”, ³⁰ այլ յուրաքանչյուրն իր մեղքով պիտի մեռնի, և ով ազոխ է ուտելու, նրա՛ ատամներն են առնելու։

³¹ Ահավասիկ օրեր են գալու,- ասում է Տերը,- երբ նոր ուխտ եմ կապելու Իսրայելի տան հետ և Հուդայի տան հետ: ³² Ոչ թե ըստ այն ուխտի, որ ես ուխտեցի նրանց հայրերի հետ, երբ բռնեցի նրանց ձեռքից՝ նրանց հանելու եգիպտացիների երկրից, բայց նրանք իմ ուխտին հավատարիմ չմնացին, ու ես նրանց անտես արեցի,- ասում է Տերը,- ³³ այլ այս ուխտն է, որ ուխտելու եմ Իսրայելի տան հետ այն օրերից հետո,- ասում է Տերը,- իմ օրենքները նրանց մտքի մեջ եմ դրոշմելու, դրանք նրանց սրտերի մեջ եմ գրելու, նրանց համար Աստված եմ լինելու, իսկ նրանք ինձ համար լինելու են ժողովուրդ: ³⁴ Եվ այլևս ամեն մեկն իր ընկերոջը չի սովորեցնելու, կամ ամեն մեկն իր եղբորը չի ասելու` “Ճանաչի՛ր Տիրոջը”, քանզի ամենքը՝ նրանց փոքրերից մինչև մեծերը, ճանաչելու են ինձ,- ասում է Տերը,- որովհետև նրանց անիրավությունները պիտի ներեմ և նրանց մեղքերն այլևս չպիտի հիշեմ»:

³⁵ Տերը, որ արևը հաստատեց ցերեկվա լուսավորության,

իսկ լուսինն ու աստղերը` գիշերվա լուսավորության համար,

աղաղակ տվեց ծովին,

ու նրա ալիքները շառաչում են,

նա, որի անունը Տեր Ամենակալ է, այսպես է ասում.

³⁶  «Եթե իմ աչքի առաջ այս օրենքները դադարեն գործելուց,

ապա Իսրայելի ազգն էլ,-

ասում է Տերը,-

իմ աչքի առաջ ընդմիշտ պիտի դադարի ազգ լինելուց»։

³⁷ Այսպես է ասում Տերը.

«Եթե անգամ երկինքը դեպի վեր բարձրանա,

իսկ երկրի հատակները դեպի վար խոնարհվեն,

ես դարձյալ չեմ անտեսի համայն Իսրայելի ազգին այն ամենի համար,

որ նա կատարեց:

³⁸ Ահա օրեր պիտի գան,- ասում է Տերը,- երբ Անամայելի աշտարակից մինչև Անկյան դուռը Տիրոջ համար քաղաք պիտի շինվի: ³⁹ Եվ դեռ պիտի ձգվի չնափալարը և նրանց առջևով պիտի երկարի մինչև Գարեբի բլուրը՝ այն բոլորելով ընտիր քարերից շինված պատով: ⁴⁰ Փաքադիմի ու Մոխիրների ողջ ձորը, ողջ Սարեմոթը, մինչև Կեդրոնի ձորը, մինչև արևելյան կողմի Ձիերի դռան անկյունը պետք է դառնան Տիրոջ սրբությունը, և այս բոլորը այլևս չեն հափշտակվելու և չեն ավերվելու մինչև հավիտենություն»։

32(39)

Երեմիան արգելափակված է Սեդեկիայի ապարանքում

¹ Այս է այն խոսքը, որ Հուդայի Սեդեկիա արքայի տասներորդ տարում, այն է՝ բաբելացիների Նաբուքոդոնոսոր արքայի տասնութերորդ տարում, Տերն ուղղեց Երեմիային։ ² Այն ժամանակ բաբելացիների արքայի զորքը պաշարել էր Երուսաղեմը, իսկ Երեմիա մարգարեն կալանավորված էր Հուդայի թագավորի ապարանքի բանտի սրահում, ³ որտեղ Սեդեկիա արքան արգելափակել էր նրան՝ ասելով. «Դու ինչո՞ւ ես մարգարեություն անում և ասում, թե այսպես է ասում Տերը՝ “Ահավասիկ ես այս քաղաքը բաբելացիների թագավորի ձեռքը պիտի հանձնեմ, նա պիտի վերցնի դա, ⁴ և Հուդայի Սեդեկիա արքան չպիտի փրկվի քաղդեացիների ձեռքից, պիտի անպայման մատնվի բաբելացիների թագավորի ձեռքը, դեմառդեմ պիտի խոսի նրա հետ, և իր աչքերը պիտի տեսնեն նրա աչքերը։ ⁵ Սեդեկիան պիտի մտնի Բաբելոն և պիտի նստի այնտեղ, մինչև որ այցելության գամ իրեն,- ասում է Տերը.- ինչո՞ւ եք մարտնչում քաղդեացիների դեմ, որից ոչ մի հաջողություն չեք ունենալու”»։

⁶ Տերը, խոսքն ուղղելով Երեմիային, ասում է. ⁷ «Ահա քո հորեղբայր Սելովմի որդի Անամայելը քեզ մոտ է գալու և ասելու. “Դու քեզ համար գնի՛ր իմ ագարակը, որը գտնվում է Անաթովթում, որովհետև ազգակցության կարգով պատշաճ է, որ այն դո՛ւ առնես որպես սեփականություն”»։

⁸ Իմ հորեղբայր Սելովմի որդի Անամայելը Տիրոջ խոսքի համաձայն ինձ մոտ՝ բանտի սրահը, եկավ և ասաց ինձ. «Գնի՛ր իմ ագարակը, որը գտնվում է Անաթովթում՝ Բենիամինի երկրում, որովհետև քեզ է հարմար ձեռք բերել այդ ժառանգությունը, քանզի ավագը դու ես»։

Այն ժամանակ ես հասկացա, որ դա Տիրոջ խոսքն է, ⁹ և իմ հորեղբոր որդի Անամայելից գնեցի ագարակը, որն Անաթովթում է։ Նրա համար կշռեցի յոթ սիկղ արծաթ և տասն արծաթադրամ. ¹⁰ մուրհակ գրեցի ու կնքեցի, վկաներ դրեցի և արծաթը կշեռքով կշռեցի։ ¹¹ Ապա, ըստ հրամանի ու իրավունքի, վերցրի սեփականության մասին կնքված մուրհակն ու չկնքվածը ¹² և սեփականության մասին մուրհակն իմ հորեղբոր որդի Անամայելի ներկայությամբ՝ այնտեղ գտնվողների աչքի առաջ, տվեցի Մաասի որդի Ներիայի որդի Բարուքին։ Բանտի սրահում նստած բոլոր հրեաների առաջ նրանք ստորագրեցին սեփականության մասին մուրհակը։ ¹³ Ու նրանց առաջ պատվիրեցի Բարուքին՝ ասելով.

¹⁴ «Այսպես է ասում Ամենակալ Տերը՝ Իսրայելի Աստվածը. “Վերցրո՛ւ այդ մուրհակները, սեփականության մասին կնքված մուրհակը ու չկնքված մուրհակը և դի՛ր խեցե ամանի մեջ, որ պահպանվեն բազում օրեր”։

¹⁵ Այսպես է ասում Ամենակալ Տերը՝ Իսրայելի Աստվածը. “Այս երկրի մեջ տները, ագարակներն ու այգիները նորից պիտի գնվեն”»։

Երեմիայի աղոթքը

¹⁶ Երբ սեփականության մասին մուրհակը հանձնեցի Ներիայի որդի Բարուքին, աղոթեցի Տիրոջը և ասացի.

¹⁷ «Տե՛ր, Աստվա՛ծ, քո մեծ զորությամբ և քո հաղթ բազկով դու ստեղծեցիր երկինքն ու երկիրը. չկա ոչ մի բան, որ կարողանա թաքնվել քեզնից։ ¹⁸ Հազարավոր սերունդների ողորմածություն ես անում և հայրերի մեղքերի պատիժը նրանցից հետո հատուցում ես նրանց որդիներին։ Մե՛ծ և հզո՛ր Աստված, քո անունը Զորությունների Տեր է, ¹⁹ խորհուրդներով մեծ ես և գործերով՝ զորավոր։ Ո՛վ դու Ամենակալ, մեծանուն Տեր, քո աչքերը բաց են մարդկանց որդիների բոլոր ճանապարհների վրա՝ յուրաքանչյուրին հատուցելու ըստ իր ճանապարհի և ըստ իր գործերի արդյունքի։

²⁰ Դու հրաշքներ ու սքանչելիքներ կատարեցիր եգիպտացիների երկրում, նաև մինչև այժմ՝ Իսրայելում ու ողջ աշխարհի մարդկանց մեջ, քեզ համար վաստակեցիր մի անուն, որ կա առ այսօր. ²¹ Իսրայելի քո ժողովրդին դու եգիպտացիների երկրից հանեցիր հրաշքներով ու սքանչելիքներով, հզոր ձեռքով ու հաղթ բազկով և մեծամեծ տեսիլքներով։ ²² Նրանց տվեցիր այս երկիրը, ինչպես երդվել էիր իրենց հայրերին՝ տալ նրանց մի երկիր, որ կաթ ու մեղր է բխեցնում։ ²³ Նրանք մտան և ժառանգեցին այն, բայց ականջ չդրեցին քո ձայնին և չընթացան ըստ քո հրամանների, և այն ամենը, ինչ նրանց պատվիրեցիր անել, չկատարեցին, այլ արեցին այնպես, որ այս բոլոր չարիքները եկան նրանց գլխին։

²⁴ Եվ ահա զորքն այս քաղաքի վրա է հասել, որպեսզի այն գրավի, ու քաղաքը մատնվել է քաղդեացիների ձեռքը, որոնք պատերազմում են նրա հետ սրի, սովի ու մահվան միջոցով։ Ինչպես ասել էիր, այդպես էլ եղավ. դու ինքդ էլ տեսնում ես։ ²⁵ Իսկ դու, Տե՛ր, ասում ես ինձ. “Արծաթով քեզ համար ագարա՛կ գնիր”։ Ես մուրհակ գրեցի ու կնքեցի և վկաներ դրեցի, բայց քաղաքը մատնվեց քաղդեացիների ձեռքը»։

²⁶ Եվ Տերը խոսքն ինձ ուղղեց՝ ասելով.

²⁷ «Ահա ես բոլոր մարմնավորների Տերը՝ Աստվածն եմ. մի՞թե որևէ բան կարող է ինձնից թաքուն մնալ»։ ²⁸ Դրա համար էլ Տերն այսպես է ասում. «Այդ քաղաքն անպայման պիտի մատնվի քաղդեացիների ձեռքը և բաբելացիների Նաբուքոդոնոսոր արքայի ձեռքը, որը պիտի գրավի դա։ ²⁹ Պիտի գան քաղդեացիները, որպեսզի պատերազմեն այդ քաղաքի դեմ և հրով այրեն դա. պիտի կրակի մատնեն այն տները, որոնց տանիքներին խունկ էին ծխում Բահաղին ու զոհեր մատուցում օտար աստվածներին, որպեսզի ինձ դառնություն պատճառեին։

³⁰ Իսրայելի որդիներն ու Հուդայի որդիներն իրենց մանկությունից սկսած իմ աչքերի առաջ միմիայն չարիք էին գործում։ Բայց Իսրայելի որդիներն իրենց ձեռքի գործերով բարկացրին ինձ,- ասում է Տերը։- ³¹ Այն օրից, ինչ շինեցի այդ քաղաքը, մինչև այսօր այն գոյություն ունեցավ ինձ բարկացնելու և զայրացնելու համար. իմ աչքի առաջ պետք է ջնջել ³² դա այն բոլոր չարիքների համար, որ ինձ դառնացնելու նպատակով կատարեցին Իսրայելի որդիներն ու Հուդայի որդիները, իրենք, իրենց թագավորներն ու իրենց մեծամեծները, իրենց քահանաներն ու իրենց մարգարեները, Հուդայի մարդիկ և Երուսաղեմի բնակիչները։ ³³ Նրանք իրենց թիկունքները դարձրին ինձ և ոչ թե երեսները։ Վաղուց սովորեցրի նրանց, սովորեցրի, բայց չուզեցին խրատ ընդունել։ ³⁴ Իրենց պղծությունները դրեցին այն տան մեջ, որը կրում է իմ անունը։ ³⁵ Իրենց աղտեղությունների համար Ենովմացիների ձորում Բահաղին բագիններ կանգնեցրին, որպեսզի իրենց տղաներին ու աղջիկներին զոհ մատուցեն Մողոքին, մի բան, որ ես չէի պատվիրել նրանց, և ոչ էլ մտքովս անցել էր նրանց կատարել տալ այդ պղծությունը՝ Հուդային հանցանքի մեջ գցելու համար»։

Տիրոջ խոստումը՝ վերականգնելու երկիրը

³⁶ Արդ, այսպես է ասում Տերը՝ Իսրայելի Աստվածը, այդ քաղաքի վերաբերյալ, որի մասին դու ասացիր, թե մատնվեց բաբելացիների Նաբուքոդոնոսոր արքայի ձեռքը՝ սրի, սովի ու գերության։ ³⁷ «Ահա ես նրանց կհավաքեմ այն բոլոր երկրներից, ուր ցրեցի նրանց իմ բարկությամբ, զայրույթով ու մեծ ցասումով. նրանց կվերադարձնեմ այս վայրը, ապահով կբնակեցնեմ նրանց, ³⁸ նրանք ինձ համար ժողովուրդ կլինեն, իսկ ես նրանց համար կլինեմ Աստված։ ³⁹ Ես նրանց կտամ մեկ այլ սիրտ ու ճանապարհ՝ հանապազ երկնչելու ինձնից իրենց բարօրության համար, իսկ իրենցից հետո՝ իրենց որդիների բարօրության համար։ ⁴⁰ Նրանց հետ հավիտենական ուխտ կկնքեմ, որից չեմ հրաժարվի՝ բարություն անելով նրանց, և իմ երկյուղը կդնեմ նրանց սրտերի մեջ, որպեսզի նրանք չապստամբեն իմ դեմ։ ⁴¹ Բարություն անելու համար այցի կգնամ նրանց, հավատով, իմ ամբողջ սրտով և իմ ամբողջ հոգով նրանց կտնկեմ այս երկրում»։

⁴² Արդարև, այսպես է ասում Տերը. «Ինչպես որ այդ ժողովրդի վրա բերեցի այս բոլոր մեծամեծ չարիքները, այնպես էլ նրա համար կբերեմ բարիքներ, ինչպես ասել էի դրանց մասին։ ⁴³ Նորից ագարակներ պիտի առնեն այդ երկրում, որի մասին դու ինքդ ասացիր, թե թափուր է դարձել մարդ ու անասունից, որոնք մատնվել են քաղդեացիների ձեռքը։ ⁴⁴ Նրանք արծաթով ագարակներ պիտի գնեն, մուրհակներ պիտի գրեն և կնքեն և վկաներ կարգեն Բենիամինի երկրում և Երուսաղեմի շրջակայքում, Հուդայի քաղաքներում և լեռան քաղաքներում, Սեփելայի քաղաքներում և Նագեբի քաղաքներում, որովհետև նրանց պիտի վերադարձնեմ գերությունից»,- ասում է Տերը։

33(40)

Խոստումներ Երուսաղեմի համար

¹ Աստված երկրորդ անգամ իր խոսքն ուղղեց Երեմիային, որ տակավին փակված էր բանտի սրահում, և ասաց. ² այսպես է ասում Տերը, որ արարեց երկիրը, ստեղծեց և հաստատեց այն. Տեր է նրա անունը։

³ «Կանչի՛ր ինձ, և ես պատասխան կտամ քեզ, կպատմեմ քեզ մեծամեծ ու զորավոր բաների մասին, որ դու չգիտես»։ ⁴ Այսպես է ասում Տերը՝ Իսրայելի Աստվածը, այս քաղաքի տների մասին և Հուդայի արքայի ապարանքի մասին, որոնք քանդվել են աշտարակներ և մարտկոցներ կառուցելու նպատակով, ⁵ որպեսզի եկողները մարտնչեն քաղդեացիների դեմ և դրանք լցնեն այն մարդկանց դիակներով, որոնց հարվածեցի իմ բարկությամբ ու զայրույթով և իմ երեսը շուռ տվեցի նրանցից իրենց բոլոր չարությունների պատճառով։

⁶ «Ահավասիկ ես պիտի բուժեմ նրանց վերքերը, պիտի բժշկեմ նրանց. խաղաղության ձայնը և ապահովություն պիտի բերեմ նրանց։ ⁷ Պիտի վերադարձնեմ Հուդայի և Երուսաղեմի գերյալներին ու վերականգնեմ նրանց իրենց նախկին վիճակի մեջ։ ⁸ Նրանց պիտի մաքրեմ այն բոլոր անիրավություններից, որ գործեցին իմ նկատմամբ, ու այլևս չպիտի հիշեմ նրանց մեղքերը, որ գործեցին իմ հանդեպ՝ ապստամբելով իմ դեմ։ ⁹ Նրանք ինձ համար ուրախություն, օրհնանք ու պարծանք պիտի դառնան աշխարհի բոլոր ժողովուրդների առաջ, որոնք, իմանալով այն բոլոր բարի բաների մասին, որ ես անելու եմ նրանց համար, երկյուղ պիտի կրեն ու դառնանան նրանց համար կատարած իմ բոլոր բարիքների և խաղաղության պատճառով»։

¹⁰ Այսպես է ասում Տերը. «Այդ տեղում, որի մասին դուք ինքներդ ասում եք, թե մարդկանցից ու անասուններից թափուր է, Հուդայի քաղաքներում և Երուսաղեմից դուրս, որոնք ավերակների են վերածվել, որովհետև չկան մարդիկ, չկան բնակիչներ, չկան անասուններ,- դարձյալ պիտի հնչեն ¹¹ ձայնն ուրախության և ձայնը ցնծության, ձայնը փեսայի և ձայնը հարսի, որոնք պիտի ասեն՝

“Գոհությո՛ւն մատուցեք Ամենակալ Տիրոջը,

քանզի քաղցր է նա,

և հավիտենական է նրա ողորմությունը”։

Օրհնության նվերներ պիտի բերեն Տիրոջ տունը,

քանի որ այդ երկրի գերյալներին

առաջվա վիճակին պիտի վերադարձնեմ»,-

ասում է Տերը։

¹² Այսպես է ասում Զորությունների Տերը. «Մարդ ու անասունից զուրկ այդ ավերակ վայրում և դրա բոլոր քաղաքներում դարձյալ պիտի լինեն հովվական իջևաններ ու ոչխարների հոտերի մակաղատեղիներ։ ¹³ Լեռնային քաղաքներում, Սեփելայի քաղաքներում ու Նագեբի քաղաքներում, Բենիամինի երկրում, Երուսաղեմի շրջակայքում և Հուդայի քաղաքներում դարձյալ ոչխարների հոտեր են անցնելու դրանք հաշվողի ձեռքի տակով,- ասում է Տերը։- ¹⁴ Ահա օրեր են գալու,- ասում է Տերը,- և ես հաստատ կատարելու եմ իմ բարի խոսքերը, որ հայտնեցի Իսրայելի տան մասին և Հուդայի տան մասին։ ¹⁵ Այն օրերում և այն ժամանակ Դավթի համար մի արդար շառավիղ պիտի ծնեմ, որն իրավունք ու արդարություն պիտի պաշտպանի երկրի վրա։ ¹⁶ Այն օրերում Հուդան պիտի փրկվի, և Երուսաղեմը ապահով պիտի ապրի։ Այս է այն անունը, որով նա պիտի կոչվի՝ “Տերն է մեր արդարությունը”»։

¹⁷ Տերն այսպես է ասում. «Դավթի սերնդից Իսրայելի տան գահին նստող մարդ չպիտի պակասի, ¹⁸ և ղևտացի քահանաներից իմ առաջ ամեն օր ողջակեզ մատուցող, զոհաբերություն անող և խունկ ծխող մարդ երբեք չպիտի պակասի»։

¹⁹ Տերն իր խոսքն ուղղեց Երեմիա մարգարեին՝ ասելով. ²⁰ այսպես է ասում Տերը. «Եթե կարողանաք խափանել ցերեկվա իմ ուխտը և գիշերվա իմ ուխտը այնպես, որ ցերեկն ու գիշերը իրենց ժամանակին չլինեն, ²¹ ապա կխափանվի նաև իմ ուխտը, որ կնքել եմ իմ ծառա Դավթի հետ,- նաև իմ պաշտոնյաների՝ ղևտացի քահանաների հետ,- թե՝ չի ունենա նա որդի, որ թագավորի նրա գահի վրա։ ²² Ինչպես որ անթվելի են երկնքի աստղերը, և անչափելի ծովի ավազը, այդպես էլ պիտի բազմացնեմ իմ ծառա Դավթի սերունդը և ղևտացիներին՝ իմ պաշտոնյաներին»։

²³ Տերը, իր խոսքն ուղղելով Երեմիա մարգարեին, ասում է.

²⁴ «Չե՞ս տեսնում՝ ի՛նչ է խոսում այդ ժողովուրդը՝ ասելով. “Աստված, որ ընտրել էր երկու ազգատոհմերի, մերժեց նրանց”։ Այդպիսով նրանք զայրացնում են իմ ժողովրդին, կարծես նրանց համար նա այլևս ազգ չէ»։

²⁵ Այսպես է ասում Տերը. «Եթե ցերեկվա ու գիշերվա, երկնքի ու երկրի մասին իմ ուխտը չեմ հաստատել, ²⁶ ապա Հակոբի և իմ ծառա Դավթի սերունդը կանարգեմ, Աբրահամի, Իսահակի և Հակոբի սերնդի վրա նրա սերնդից իշխան չեմ դնի, սակայն ես նրանց գերյալներին պիտի վերադարձնեմ, պիտի ողորմեմ նրանց»։

34(41)

Պատգամ Սեդեկիային

¹ Երբ բաբելացիների Նաբուքոդոնոսոր արքան իր բոլոր զորքերով, իր իշխանությանը ենթակա բոլոր երկրներով ու բոլոր ժողովուրդներով պատերազմի ելավ Երուսաղեմի և Հուդայի բոլոր քաղաքների դեմ, Տերը խոսքն ուղղեց Երեմիային՝ ասելով.

² «Այսպես է ասում Տերը՝ Իսրայելի Աստվածը. գնա՛ Հուդայի Սեդեկիա արքայի մոտ և ասա՛ նրան. այսպես է ասում Տերը. “Այդ քաղաքն անպայման պիտի մատնվի բաբելացիների արքայի ձեռքը, որը պիտի գրավի ու հրով այրի այն։ ³ Դու էլ նրա ձեռքից չպիտի փրկվես, անպայման պիտի բռնվես ու մատնվես նրա ձեռքը։ Քո աչքերը պիտի տեսնեն նրա աչքերը, դեմառդեմ պիտի խոսես նրա հետ և գնաս Բաբելոն”։ ⁴ Բայց լսի՛ր Տիրոջ պատգամները, ո՛վ Հուդայի Սեդեկիա արքա. այսպես է ասում Տերը քո մասին. “Սրով չպիտի մեռնես, ⁵ այլ խաղաղության մեջ պիտի մեռնես, և ինչպես որ ողբացին քո հայրերին՝ առաջին թագավորներին, որոնք նախորդեցին քեզ, այնպես էլ պիտի ողբան քեզ. “Վա՜յ, վա՜յ, տեր”։ Պիտի լացուկոծ անեն քեզ համար, քանզի շատ խիստ խոսեցի”»,- ասում է Տերը։

⁶ Երեմիա մարգարեն այս բոլոր բաները Երուսաղեմում հայտնեց Հուդայի Սեդեկիա արքային։ ⁷ Իսկ բաբելացիների թագավորի զորքը կռվում էր Երուսաղեմի և Հուդայի մնացած բոլոր քաղաքների դեմ՝ Լաքիսի և Ազեկայի դեմ, որովհետև Հուդայի քաղաքների մեջ միայն սրանք էին մնացել որպես ամուր քաղաքներ։

Վատ վերաբերմունք գերիների հանդեպ

⁸ Տերն իր խոսքն ուղղեց Երեմիային այն բանից հետո, երբ Սեդեկիա արքան ազատության կոչ արեց, ուխտ կնքեց Երուսաղեմում եղած ամբողջ ժողովրդի հետ, ⁹ որպեսզի յուրաքանչյուր ոք իր ծառային, և ամեն մեկն իր աղախնին, լինի եբրայեցի տղամարդ կամ եբրայեցի կին, ազատություն տա և արձակի, որպեսզի Հուդայի ազգատոհմից ոչ մի մարդ իր եղբորը ծառա չդառնա։ ¹⁰ Եվ բոլոր մեծամեծներն ու ամբողջ ժողովուրդը, որոնք ուխտ էին դրել ազատ արձակելու՝ յուրաքանչյուրն իր ծառային, և ամեն մեկն իր աղախնին, լինի եբրայեցի տղամարդ կամ եբրայեցի կին, ազատ արձակեցին, որպեսզի նրանք այլևս իրենց չծառայեն։ Լսեցին ու արձակեցին, ¹¹ իսկ հետո հետ կանգնեցին և նորից բերեցին իրենց ծառաներին ու աղախիններին, որոնց ազատ էին արձակել, և նրանց ծառաներ ու աղախիններ դարձրին։

¹² Տերը, խոսքն ուղղելով Երեմիային, ասաց.

¹³ «Այսպես է ասում Տերը՝ Իսրայելի Աստվածը. ես ուխտ կնքեցի ձեր հայրերի հետ այն օրը, երբ նրանց փրկեցի եգիպտացիների երկրից՝ ստրկության տնից և ասացի. ¹⁴ “Երբ վեց տարին լրանա, քո եբրայեցի եղբորը, որ քեզ կվաճառվի և վեց տարի քեզ համար կաշխատի, քեզնից ազա՛տ արձակիր”, բայց ձեր հայրերը չլսեցին ինձ, չխոնարհեցրին իրենց ականջները։ ¹⁵ Այսօր նրանք հետ են դարձել, որպեսզի իմ աչքի առաջ անեն այն, ինչ հաճելի է ինձ, որ յուրաքանչյուրն ազատ հայտարարի իր ընկերոջը, իմ աչքի առաջ կատարեն ուխտն այն տան մեջ, որի վրա դրված է իմ անունը։ ¹⁶ Բայց դուք շրջվեցիք ու պղծեցիք իմ անունը, յուրաքանչյուրը վերադարձրեց իր ծառային, ամեն մեկը՝ իր աղախնին, որոնց ձեր հոգու համար ազատ էիք արձակել, և վերադարձրիք, որպեսզի ծառա ու աղախին լինեն ձեզ համար»։

¹⁷ Դրա համար էլ Տերն այսպես է ասում. «Դուք չլսեցիք ինձ, յուրաքանչյուրն իր եղբորը, և ամեն մեկն իր մերձավորին ազատ չհայտարարեց. ահա ես էլ ձեզ համար ազատություն պիտի հռչակեմ սրի, սովի ու մահվան միջոցով,- ասում է Տերը.- ¹⁸ ձեզ պիտի ցրեմ աշխարհի բոլոր թագավորությունների մեջ։ Այն մարդկանց, որոնք խախտեցին իմ ուխտը և իմ առաջ կատարած իրենց ուխտի պատգամներին հավատարիմ չմնացին, հորթը երկու մասի բաժանեցին և անցան նրա երկու մասերի միջով, Հուդայի երկրի իշխաններին ¹⁹ և Երուսաղեմի իշխաններին, ներքինիներին ու քահանաներին, նաև երկրի ամբողջ ժողովրդին, որոնք անցան հորթի երկու մասերի միջով,- ²⁰ այդ մարդկանց ես տալու եմ իրենց թշնամիների ձեռքը, նրանց հոգիները պահանջողների ձեռքը, նրանց դիակներն իբրև կերակուր պիտի նետեմ երկնքի թռչուններին ու երկրի գազաններին։ ²¹ Իսկ Հուդայի երկրի Սեդեկիա արքային ու նրա իշխաններին պիտի մատնեմ իրենց թշնամիների ձեռքը, նրանց հոգիները պահանջողների ձեռքը, բաբելացիների արքայի զորքի ձեռքը, որ եկել հասել են նրանց վրա։ ²² Ահավասիկ ես հրաման եմ տալու,- ասում է Տերը,- և նրանց նորից արձակելու եմ այդ քաղաքի վրա. նրանք պիտի պատերազմեն դրա դեմ, գրավեն ու հրով այրեն այն։ Հուդայի քաղաքներն իրենց բնակիչներից թափուր եմ դարձնելու»։

35(42)

Ռաքաբիմի գերդաստանը հրաժարվում է գինի խմելուց

¹ Հուդայի արքա Հովսիայի որդի Հովակիմի օրերին Տերն իր խոսքն ուղղեց Երեմիային՝ ասելով.

² «Գնա՛ Ռաքաբիմների տունը, կանչի՛ր նրանց, բե՛ր Տիրոջ տան սրահներից մեկը և գինի՛ խմեցրու նրանց»։

³ Ես Քաբասինիայի որդի Երեմի որդի Հեքոնիային, նրա եղբայրներին ու նրա բոլոր որդիներին՝ Ռաքաբիմի ամբողջ գերդաստանը, ⁴ բերեցի Տիրոջ տունը, Աստծու մարդ Գոդողիայի որդի Անանի որդու սրահը, որը գտնվում էր իշխանների տան մոտ, ձիերի դռան պահապան Սելովմի որդի Մաասի տան վերևում։ ⁵ Ռաքաբիմի որդիների առաջ դրեցի մի աման լիքը գինի ու բաժակներ և ասացի նրանց. «Խմե՛ք այդ գինին»։ ⁶ Նրանք ասացին. «Գինի չենք խմում, որովհետև մեր հայր Հոնադաբը՝ Ռեքաբի որդին, մեզ պատվիրել է ու ասել.

“Դուք և ձեր որդիները հավիտյանս գինի մի՛ խմեք,

⁷ նաև տներ մի՛ շինեք,

սերմ մի՛ ցանեք և այգիներ մի՛ տնկեք,

այլ ձեր բոլոր օրերում բնակվե՛ք վրանների մեջ,

որպեսզի այդ երկրում, որտեղ դուք պանդուխտ եք,

շատ օրեր ապրեք”։

⁸ Եվ մենք ամեն բանում, ինչ պատվիրել էր մեզ, ականջ դրեցինք մեր հայր Հոնադաբի՝ Ռեքաբի որդու ձայնին,- թե՛ մենք և թե՛ մեր կանայք, թե՛ մեր տղաներն ու աղջիկները,- որ մեր բոլոր օրերում գինի չխմենք, ⁹ տներ չշինենք և չբնակվենք նրանց մեջ. մենք չունեցանք այգիներ, հանդեր ու ցանքեր. ¹⁰ բնակվեցինք վրանների տակ և լսեցինք ու կատարեցինք այն ամենը, ինչ պատվիրել էր մեզ մեր հայր Հոնադաբը»։ ¹¹ Բայց երբ բաբելացիների Նաբուքոդոնոսոր արքան մտավ այս երկիրը, ասացինք. «Քաղդեացիների զորքի պատճառով, ասորեստանցիների զորքի պատճառով վեր կենանք գնանք Երուսաղեմ և այնտեղ ապրենք»։

¹² Եվ Տերը խոսքն ինձ ուղղեց՝ ասելով.

¹³ «Այսպես է ասում Զորությունների Տերը՝ Իսրայելի Աստվածը. գնա՛ և հայտնի՛ր Հուդայի մարդկանց ու Երուսաղեմի բնակիչներին. “Խրատ չե՞ք առնում՝ իմ խոսքերին հետևելու համար”,- ասում է Տերը։ ¹⁴ Ռեքաբի որդի Հոնադաբի որդիները հավատարիմ մնացին այն պատվիրանին, որ նա տվել էր իր որդիներին՝ գինի չխմել։ Եվ նրանք չխմեցին մինչև օրս, որովհետև հնազանդվեցին իրենց հոր պատվիրանին։ Իսկ ես սկզբից ևեթ խոսեցի ձեզ հետ, բայց դուք չլսեցիք ինձ։ ¹⁵ Ձեզ մոտ ուղարկեցի իմ բոլոր ծառաներին՝ մարգարեներին, կանխավ ուղարկեցի, որ ամենքդ հետ դառնաք ձեր չար ճանապարհից, ավելի բարի գործեր կատարեք, չհետևեք օտար աստվածներին ու չծառայեք նրանց, որպեսզի բնակվեք այդ երկրում, որ տվեցի ձեզ ու ձեր հայրերին։ Բայց դուք չխոնարհեցրիք ձեր ականջները և չլսեցիք ինձ։ ¹⁶ Ռեքաբի որդի Հոնադաբի որդիները պահեցին իրենց հոր տված պատվիրանը, իսկ այդ ժողովուրդը չլսեց ինձ»։

¹⁷ Դրա համար էլ այսպես է ասում Զորությունների Տերը՝ Իսրայելի Աստվածը. «Ահավասիկ ես Հուդայի և Երուսաղեմի բոլոր բնակիչների վրա պիտի բերեմ այն բոլոր չարիքները, որոնց մասին խոսել էի, որովհետև ասացի նրանց, բայց չլսեցին, կանչեցի նրանց, բայց ինձ պատասխան չտվին»։

¹⁸ Իսկ Ռեքաբի տան մարդկանց այսպես ասաց Երեմիան. «Այսպես է ասում Զորությունների Տերը՝ Իսրայելի Աստվածը.

“Քանի որ Ռեքաբի որդի Հոնադաբի որդիները հետևեցին իրենց հոր պատվիրանին, հավատարիմ մնացին նրա բոլոր հրամաններին՝ կատարելով այն ամենը, ինչ որ նրանց պատվիրել էր իրենց հայրը, ¹⁹ դրա համար այսպես է ասում Զորությունների Տերը՝ Իսրայելի Աստվածը. այս աշխարհի ողջ գոյության ընթացքում թող Ռեքաբի որդի Հոնադաբի որդիներից այր մարդ չպակասի իմ առաջ կանգնելու համար”»։

36(43)

Բարուքը տաճարում կարդում է մատյանը

¹ Հուդայի արքա Հովսիայի որդի Հովակիմի չորրորդ տարում Տերը խոսեց ինձ հետ՝ ասելով.

² «Քեզ համար մատյա՛ն վերցրու և նրա մեջ գրի՛ր այն բոլոր բաները, ինչ ասել եմ քեզ Իսրայելի, Հուդայի և բոլոր ազգերի մասին՝ սկսած այն օրից, երբ խոսեցի քեզ հետ՝ Հուդայի արքա Հովսիայի օրերից մինչև այժմ. ³ թերևս Հուդայի տունն իմանա այն բոլոր չարիքների մասին, որ մտածել եմ կատարել նրա նկատմամբ, որպեսզի յուրաքանչյուրը հետ դառնա իր չար ճանապարհից, և ես քավիչ լինեմ նրա անօրենություններին ու նրա մեղքերին»։

⁴ Երեմիան կանչեց Ներիայի որդի Բարուքին, և Բարուքը Երեմիայի բերանից մատյանում գրի առավ այն բոլոր բաները, որ Տերը հրամայել էր նրան։

⁵ Երեմիան Բարուքին պատվիրեց ու ասաց. «Ես կալանքի մեջ եմ և չեմ կարող մտնել Տիրոջ տունը. ⁶ դու կգնաս և այն, ինչ գրի առար իմ բերանից՝ Տիրոջ խոսքերը, պահեցողության օրը Տիրոջ տանն այդ մատյանից կընթերցես ի լուր ժողովրդի, կընթերցես նաև ի լուր Հուդայի բոլոր մարդկանց, որոնք եկած կլինեն իրենց քաղաքներից։ ⁷ Թերևս Տիրոջ առաջ նրանց սիրտը գութ ընկնի, և ամենքն իրենց չար ճանապարհներից հետ դառնան, քանզի սաստիկ են զայրույթն ու բարկությունը, որ Տերը խոսեց այդ ժողովրդի մասին»։

⁸ Ներիայի որդի Բարուքն ամեն ինչ կատարեց այնպես, ինչպես նրան պատվիրել էր Երեմիա մարգարեն՝ Տիրոջ տան մեջ մատյանից ընթերցել Տիրոջ պատգամները։ ⁹ Հուդայի արքա Հովսիայի որդի Հովակիմի հինգերորդ տարում՝ իններորդ ամսին, Երուսաղեմի ամբողջ բնակչությունը, Հուդայի քաղաքներից Երուսաղեմ եկած համայն ժողովուրդը և Հուդայի տունը հավաքվեցին Տիրոջ առաջ՝ պահեցողության համար։ ¹⁰ Իսկ Բարուքը Տիրոջ տանը՝ Սափանիա ատենադպրի որդի Գամարիայի գավթում, Տիրոջ տան Նոր դարպասի մուտքի մոտ, ի լուր ամբողջ ժողովրդի՝ մատյանից կարդաց Երեմիայի խոսքերը։

Բարուքը մատյանը կարդում է երկրորդ անգամ

¹¹ Երբ Սափանիայի որդի Գամարիայի որդի Միքիան այդ մատյանից լսեց Տիրոջ բոլոր պատգամները, ¹² իջավ թագավորի տունը, ատենադպրի դիվանը, որտեղ նստած էին բոլոր իշխանները՝ Եղիսամա ատենադպիրը, Սամեայի որդի Դալիան, Աքոբովրի որդի Եղնաթանը, Սափանիայի որդի Գամարիան, Անանիայի որդի Սեդեկիան և բոլոր իշխանները։ ¹³ Միքիան նրանց հաղորդեց իր լսած այն բոլոր խոսքերը, որ մատյանից ընթերցել էր Բարուքը՝ ի լուր ամբողջ ժողովրդի։

¹⁴ Այն ժամանակ բոլոր իշխանները Քուսիի որդի Սելեմիայի որդի Նաթանի որդի Հուդիին ուղարկեցին Բարուքի մոտ և հայտնեցին. «Այն մատյանը, որ ընթերցում էիր ի լուր ժողովրդի, ձե՛ռքդ առ և ե՛կ այստեղ»։ Ներիայի որդի Բարուքը մատյանն իր ձեռքն առավ ու գնաց նրանց մոտ։ ¹⁵ Նրան ասացին. «Դե, նորի՛ց կարդա, որ մենք էլ լսենք»։ Եվ Բարուքը կարդաց, որ լսեն։ ¹⁶ Իսկ երբ նրանք բոլոր պատգամները լսեցին, միմյանց հետ խորհուրդ արեցին ու ասացին Բարուքին. «Մենք այդ բոլոր բաներն անպայման կպատմենք արքային»։ ¹⁷ Բարուքին հարց տվեցին՝ ասելով. «Դե մեզ պատմի՛ր՝ որտեղի՞ց գրեցիր այդ բոլոր խոսքերը, ո՞ւմ բերանից»։ ¹⁸ Բարուքը նրանց պատասխանեց. «Երեմիայի բերանից. նա է ինձ պատմել այդ բոլոր բաները, իսկ ես թանաքով գրել եմ այս մատյանի մեջ»։ ¹⁹ Իշխանները Բարուքին ասացին. «Գնա թաքնվի՛ր Երեմիայի հետ. թող ոչ ոք չիմանա, թե որտե՛ղ եք գտնվում»։

Թագավորը այրում է մատյանը

²⁰ Մատյանը պահ տալով Եղիսամա ատենադպրի տանը՝ նրանք գնացին սրահ՝ արքայի մոտ, և ամեն բան պատմեցին արքային։ ²¹ Իսկ արքան մատյանը բերելու ուղարկեց Հուդիին, որն այն բերեց Եղիսամա ատենադպրի տնից։ Հուդին, ի լուր թագավորի և ի լուր թագավորի շուրջը գտնվող բոլոր իշխանների, ընթերցեց մատյանը։ ²² Իններորդ ամիսն էր, և թագավորը նստած էր ձմեռային պալատում, իսկ նրա դիմաց գտնվում էր վառվող կրակարանը։ ²³ Երբ Հուդին ընթերցում էր երեք կամ չորս էջ, թագավորը ատենադպրի զմելիով կտրում էր այն ու նետում կրակարանի կրակի մեջ, մինչև որ ամբողջ մատյանը կրակարանի բոցի մեջ ոչնչացավ։ ²⁴ Թագավորն ու նրա բոլոր պաշտոնյաները, որ լսեցին այդ բոլոր խոսքերը, չաղաչեցին Տիրոջը և չպատառոտեցին իրենց պատմուճանները։ ²⁵ Եղնաթանը, Դալիան և Գամարիան արքային թեպետ հուշեցին չայրել մատյանը, բայց նա նրանց չլսեց։ ²⁶ Արքան հրաման տվեց արքայորդի Հերեմիելին, Եսրիելի որդի Սարեային և Աբդիելի որդի Սեմեղիային, որ բռնեն Բարուք ատենադպրին և Երեմիա մարգարեին, սակայն սրանք հեռացան ու թաքնվեցին։

Երեմիան ուրիշ մատյան է գրում

²⁷ Այն բանից հետո, երբ թագավորն այրեց մատյանը, որտեղ Բարուքը Երեմիայի բերանից գրի էր առել նրա բոլոր խոսքերը, Տերը խոսեց Երեմիայի հետ՝ ասելով.

²⁸ «Դու նորից այլ մատյա՛ն վերցրու և նրա մեջ գրի՛ր նախորդ բոլոր խոսքերը, որոնք տեղ էին գտել առաջին մատյանում, որ այրեց Հուդայի Հովակիմ արքան։ ²⁹ Իսկ Հուդայի Հովակիմ արքային էլ կասես, թե այսպես է ասում Տերը.

“Դու վառեցիր այն մատյանը և ասացիր՝ “Ինչո՞ւ նրա մեջ գրեցիր ու հայտնեցիր, թե բաբելացիների արքան պիտի ներխուժի ու ջնջի այս երկիրը, պիտի զրկի այն մարդ ու անասունից”»։ ³⁰ Դրա համար էլ Տերն այսպես է ասում Հուդայի Հովակիմ արքայի մասին. «Նրա սերնդից մարդ չի մնալու, որ նստի Դավթի աթոռին, և նրանց դիակները ցերեկն ընկած պիտի մնան տոթի, իսկ գիշերը՝ ցրտի մեջ։ ³¹ Իր անօրենությունների համար այցելելու եմ նրան, նրա ցեղին ու նրա ծառաներին, նրանց վրա, Երուսաղեմի բնակչության վրա և Հուդայի երկրի վրա բերելու եմ այն բոլոր չարիքները, որոնց մասին հայտնեցի նրանց, բայց նրանք չլսեցին»։

³² Երեմիան այլ մատյան վերցրեց ու հանձնեց Ներիայի որդուն՝ Բարուք ատենադպրին, որը նրա մեջ Երեմիայի բերանից գրի առավ այն մատյանի բոլոր խոսքերը, որ կրակի մեջ այրել էր Հուդայի արքա Հովակիմը։ Այդ մատյանի մեջ ուրիշ խոսքեր ևս ավելացան, առավել, քան նախորդ խոսքերը։

37(44)

Սեդեկիան աղոթք է խնդրում Երեմիայից

¹ Հովակիմի որդի Հեքոնիայի փոխարեն թագավորեց Հովսիայի որդի Սեդեկիան, որին Հուդայի երկրի վրա թագավոր կարգեց բաբելացիների Նաբուքոդոնոսոր արքան։ ² Նա, իր ծառաներն ու երկրի ժողովուրդը ևս ականջ չդրեցին Տիրոջ խոսքերին, որ հայտնել էր Երեմիա մարգարեի միջոցով։

³ Սեղեմիայի որդի Հովաքաղին և Մաասիայի որդի Սոփոնիային, որ քահանա էր, Սեդեկիա արքան ուղարկեց Երեմիա մարգարեի մոտ՝ ասելով. «Դու մեզ համար աղոթի՛ր Տիրոջը՝ մեր Աստծուն»։

⁴ Երեմիան գնում-գալիս էր ամբոխի մեջ, ու նրան բանտ չգցեցին։ Այն ժամանակ փարավոնի զորքը ելավ եգիպտացիների երկրից, որի մասին լսելով՝ քաղդեացիները, որոնք պաշարել էին Երուսաղեմը, հեռացան Երուսաղեմից։ ⁵ Տերը խոսեց Երեմիա մարգարեի հետ և ասաց. ⁶ «Այսպես է ասում Տերը՝ Իսրայելի Աստվածը. այսպես կասեք Հուդայի արքային, որն ինձ մոտ է ուղարկել ձեզ՝ փնտրելու ինձ. ահա փարավոնի զորքը, որը եկել է ձեզ օգնության, նորից պիտի վերադառնա Եգիպտոս, ⁷ իսկ քաղդեացիները կրկին պիտի վերադառնան այստեղ. պիտի պատերազմեն այս քաղաքի դեմ, պիտի գրավեն և հրով այրեն այն»։

⁸ Այսպես է ասում Տերը. «Դուք ինքներդ ձեր մեջ մի՛ մտածեք. “Քաղդեացիները ելան հեռացան մեզնից”։ Նրանք ձեզնից ձեռք չեն քաշելու։ ⁹ Անգամ եթե ձեզ հետ կռվող քաղդեացիների ամբողջ զորքը կոտորեք, այն վիրավորները, որոնք մնալու են նրանցից, ամեն կողմից պիտի ելնեն ու հրով այրեն այս քաղաքը»։

Երեմիան ձերբակալվում է և բանտարկվում

¹⁰ Երբ քաղդեացիների բանակը եգիպտացիների զորքերի ահից հեռացավ Երուսաղեմից, ¹¹ Երեմիան դուրս եկավ Երուսաղեմից, որպեսզի գնա Բենիամինի երկիրը և այնտեղ՝ ժողովրդի մեջ, գնի իր բաժին հողը։ ¹² Նա եկավ հասավ Բենիամինի դուռը։ Այդտեղ մի մարդ կար, որի մոտ իջևանել էր, անունը՝ Սարու, Անանիայի որդի Սեղեմիայի տղան, որը բռնեց Երեմիա մարգարեին և ասաց. «Դու փախել ես և ուզում ես քաղդեացիների մոտ գնալ»։ ¹³ Իսկ Երեմիան ասաց. «Սուտ ես ասում, ես չեմ փախչում քաղդեացիների մոտ»։ Բայց նա չլսեց նրան։ Սարուն Երեմիային բռնեց և բերեց իշխանների մոտ։ ¹⁴ Իշխանները զայրացան Երեմիայի վրա, գանահարեցին ու բանտարկեցին նրան Հովնաթան ատենադպրի ապարանքում, քանի որ սրա ապարանքը բանտի էին վերածել։ ¹⁵ Երեմիան ընկավ Այերինովթ, այն տունը, որտեղ գուբն էր։ Այդտեղ Երեմիան անցկացրեց երկար օրեր։ ¹⁶ Սեդեկիա արքան մարդ ուղարկեց ու կանչեց նրան։ Իր տան մեջ թագավորը ծածուկ հարցրեց նրան՝ ասելով. «Տիրոջ կողմից որևէ պատգամ չկա՞ արդյոք»։ Երեմիան ասաց. «Այո՛, կա»։ Ապա ասաց. «Բաբելացիների թագավորի ձեռքը պիտի մատնվես։ ¹⁷ Քո և քո ծառաների ու ժողովրդի հանդեպ ի՞նչ մեղք գործեցի,- ասաց Երեմիան Սեդեկիա թագավորին,- որ դու ինձ բանտ ես նստեցրել։ ¹⁸ Իսկ ո՞ւր են ձեր այն մարգարեները, որոնք մարգարեություն էին անում ու ասում, թե բաբելացիների արքան չի գալու այս երկիրը՝ ձեզ վրա։ ¹⁹ Արդ, լսի՛ր, աղաչում եմ, տե՛ր իմ արքա, թող աղերսանքս քո առաջ գա. ինչո՞ւ ես ինձ նորից հետ դարձնում Հովնաթան ատենադպրի տունը, որ այնտեղ մեռնեմ»։

²⁰ Սեդեկիա արքան հրաման արձակեց, և նրան գցեցին բանտի գավիթը։ Նրան դրսից հացագործներն օրը մի նկանակ հաց էին տալիս, մինչև որ հացը քաղաքից բոլորովին կտրվեց։ Եվ Երեմիան մնաց բանտի գավթում։

38(45)

Երեմիային նետում են գբի մեջ

¹ Մատթանի որդի Սափատիան, Պասքորի որդի Գոդողիան, Սեղեմիայի որդի Հովաքաղը և Մելքիայի որդի Պասքորը լսեցին Երեմիայի խոսքերը, որ նա խոսում էր ամբողջ ժողովրդին՝ ասելով. ² այսպես է ասում Տերը. «Ով որ մնա այս քաղաքում, սրով, սովով ու մահով պիտի մեռնի, իսկ ով գնա քաղդեացիների մոտ, պիտի ապրի. նրա համար իր հոգին վերագտնվածի պես պիտի լինի, նա պիտի փրկվի»։

³ Այսպես է ասում Տերը. «Այդ քաղաքն անպատճառ պիտի մատնվի բաբելացիների թագավորի զորքի ձեռքը, պիտի գրավեն դա»։

⁴ Իշխաններն ասացին թագավորին. «Թող սպանվի այս մարդը, որովհետև այդպես նա թուլացնում է բազուկները կռվող մարդկանց, որոնք մնացել են այս քաղաքում, և բազուկները ամբողջ ժողովրդի՝ այդպիսի խոսքեր ասելով նրան. այս մարդը ոչ թե օգուտի և խաղաղության խոսքեր է ասում ժողովրդին, այլ չարության»։

⁵ Իսկ Սեդեկիա արքան, ամենևին ձեռնհաս չլինելով նրանց դեմ որևէ բան անելու, ասաց. «Ահա նա ձեր ձեռքում է»։

⁶ Առան Երեմիային և նրան գցեցին թագավորի որդի Մելքիայի գուբը, որ գտնվում էր բանտի գավթում։ Երեմիային պարաններով իջեցրին գուբը։ Գբի մեջ ջուր չկար, այլ լոկ տիղմ էր։ Երեմիան մնաց տիղմի մեջ։

⁷ Եթովպացի Աբդիմելեքը՝ ներքինի մի մարդ, որը թագավորի ապարանքում էր, լսեց, որ Երեմիային գցել էին գուբը։ Արքան նստած էր Բենիամինի դռանը. ⁸ թագավորական ապարանքից նրա մոտ գնաց Աբդիմելեքը, խոսեց թագավորի հետ ու ասաց. ⁹ «Տե՛ր արքա, այդպես վարվելով Երեմիա մարգարեի հետ՝ այդ մարդիկ չարիք գործեցին, որովհետև նրան նետեցին գուբը, որի ներսում նա մեռնելու է։ Դու չարիք գործեցիր՝ սովի միջոցով մահվան մատնելով Աստծու մարդուն, քանի որ այս քաղաքում հաց չկա»։

¹⁰ Թագավորը եթովպացի Աբդիմելեքին հրաման տվեց ու ասաց. «Դու քեզ հետ այստեղից երեսուն մա՛րդ վերցրու, մարգարեին հանե՛ք այն գբից, որպեսզի չմեռնի»։

¹¹ Աբդիմելեքն իր հետ վերցրեց մարդկանց, գնաց թագավորի ապարանքը, գետնափոր գանձատունը, այնտեղից առավ հին կապերտներ ու հին պարաններ և դրանք իջեցրեց Երեմիայի մոտ՝ գբի մեջ։

¹² Եթովպացի Աբդիմելեքը Երեմիային ասաց. «Հին կապերտներն ու բրդերը դի՛ր քո թևատակերին՝ պարանների տակ»։ Երեմիան այդպես էլ արեց։ ¹³ Նրան պարաններով քաշեցին և հանեցին այդ գբից։ Երեմիան նստեց բանտի գավթի մեջ։

Սեդեկիան դիմում է Երեմիայի խորհրդին

¹⁴ Սեդեկիա արքան մարդ ուղարկեց և մարգարեին կանչեց իր մոտ՝ Ասսալիսայի կացարանը, որը գտնվում էր Տիրոջ տաճարի մեջ։ Արքան նրան ասաց. «Մի բան պիտի հարցնեմ քեզ, բայց չլինի թե ինձնից բան պահես»։ ¹⁵ Իսկ Երեմիան թագավորին ասաց. «Եթե պատմեմ քեզ, արդյոք ինձ մահով չե՞ս մեռցնի, իսկ եթե քեզ որևէ խրատ տամ, ինձ չե՞ս լսի»։ ¹⁶ Սեդեկիա արքան գաղտնի երդում տվեց նրան և ասաց. «Կենդանի է Տերը, որ մեր մեջ այս շունչն է արարել. քեզ չեմ սպանելու և չեմ մատնելու այն մարդկանց ձեռքը, որոնք քո հոգին են պահանջում»։ ¹⁷ Երեմիան նրան ասաց. այսպես է ասում Զորությունների Տերը՝ Իսրայելի Աստվածը. «Եթե ելնես գնաս բաբելացիների արքայի զորավարի մոտ, ապա քո անձը ողջ կմնա, և այս քաղաքը հրով չի այրվի, կապրեք դու էլ, քո տունն էլ։ ¹⁸ Իսկ եթե չգնաս բաբելացիների արքայի իշխանների մոտ, այս քաղաքը կմատնվի քաղդեացիների ձեռքը, դա հրով կայրեն, և դու նրանց ձեռքից չես փրկվի»։

¹⁹ Սեդեկիա արքան Երեմիային ասաց. «Ես կասկած ունեմ քաղդեացիների մոտ փախած հրեաների նկատմամբ. գուցե ինձ մատնեն նրանց ձեռքը, և նրանք ծաղրուծանակի ենթարկեն ինձ»։ ²⁰ Իսկ Երեմիան ասաց. «Չեն մատնի քեզ, սակայն լսի՛ր Տիրոջ խոսքերը, որ ես հայտնում եմ քեզ. քեզ համար լավ կլինի, և քո անձը կփրկվի։ ²¹ Իսկ եթե չկամենաս գնալ, ապա արդյունքը կլինի այն բանը, որ Տերն ինձ ցույց է տվել։ ²² Ահավասիկ այն բոլոր կանայք, որոնք մնացել են քո՝ Հուդայի թագավորիդ տանը, պիտի տարվեն բաբելացիների արքայի իշխանների մոտ։ Նրանք պիտի ասեն. “Մարդիկ, որոնք քեզ հետ խաղաղության մեջ էին, քեզ խաբեցին և հաղթեցին, մոլորության մեջ գցեցին քո ոտքերը և երես դարձրին քեզնից։ ²³ Քո բոլոր կանանց ու որդիներին պիտի հանեն տանեն քաղդեացիների մոտ, և դու էլ նրանց ձեռքից չես փրկվելու, որովհետև բաբելացիների թագավորի ձեռքով պիտի բռնվես, իսկ այս քաղաքը պիտի այրվի հրով”»։

²⁴ Թագավորը նրան ասաց. «Ո՛վ մարդ, թող ոչ ոք չիմանա այդ բաների մասին, թե չէ կմեռնես։ ²⁵ Իսկ եթե իշխանները լսեն, որ խոսեցի քեզ հետ, և գան քեզ մոտ ու ասեն. “Պատմի՛ր մեզ՝ ի՛նչ խոսեցիր արքայի հետ, մեզնից մի՛ թաքցրու, մենք քեզ չենք սպանի” կամ թե՝ “Արքան քեզ ի՞նչ ասաց”,- ²⁶ ապա նրանց կասես. “Ես գութ աղերսեցի արքայի առաջ, որ ինձ նորից հետ չդարձնի Հովնաթանի տունը, որ այնտեղ մեռնեմ”»։

²⁷ Բոլոր իշխանները եկան Երեմիայի մոտ ու հարցուփորձ արեցին նրան. նա պատմեց նրանց այն ամենը, ինչ իրեն պատվիրել էր թագավորը, ու նրան հանգիստ թողեցին, որովհետև ոչինչ հայտնի չդարձավ։ ²⁸ Ու Երեմիան նստեց բանտի գավթում մինչև այն ժամանակ, երբ Երուսաղեմը գրավվեց։

39(46)

Երուսաղեմի անկումը

¹ Երուսաղեմի գրավվելու ժամանակ՝ Հուդայի Սեդեկիա արքայի իններորդ տարում, տասներորդ ամսին, բաբելացիների Նաբուքոդոնոսոր արքան ինքն իր ամբողջ զորքով եկավ հասավ Երուսաղեմ և պաշարեց այն։ ² Սեդեկիայի տասնմեկերորդ տարում՝ չորրորդ ամսին, ամսի իններորդ օրը, պարիսպը ճեղք տվեց, ³ և բաբելացիների արքայի բոլոր զորավարները՝ Ներգել-Սարասարը, Սարմագադ-Նաբուվը, Սարսեքիմը, Ռափսարիսը և Ներգելսարասարը, Ռաբմագն ու բաբելացիների արքայի այլ իշխաններ, մտան և բազմեցին միջին դռան առաջ։

⁴ Երբ Հուդայի Սեդեկիա արքան և բոլոր կռվող մարդիկ տեսան նրանց, գիշերով փախան և արքունի այգու ճանապարհով, պարիսպների միջև գտնվող դարպասով ելան քաղաքից, դուրս եկան Արաբայի ճանապարհը։ ⁵ Նրանց հետապնդեցին քաղդեացիների զորքերը և Երիքովի դաշտում հասան Սեդեկիային, բռնեցին նրան ու բերեցին Եմաթի երկիրը՝ Դեբլաթա, բաբելացիների Նաբուքոդոնոսոր արքայի առաջ, որը նրա հետ դատաստան տեսավ։ ⁶ Բաբելացիների արքան Դեբլաթայում Սեդեկիայի առաջ սպանեց նրա որդիներին։ Բաբելացիների արքան նաև կոտորեց Հուդայի բոլոր ազնվականներին, ⁷ Սեդեկիայի աչքերը կուրացրեց, կապեց նրան պղնձե շղթաներով, որպեսզի նրան տանի Բաբելոն։

⁸ Քաղդեացիները հրով այրեցին թագավորի տունն ու ժողովրդի տները և քանդեցին Երուսաղեմի պարիսպները։ ⁹ Ժողովրդի մնացած մասին, որ մնացին քաղաքում, և իրենց կողմն անցածներին, ինչպես և ժողովրդի թափթփուկներին Նաբուզարդան դահճապետը քշեց Բաբելոն։ ¹⁰ Աղքատ ու ընչազուրկ ժողովրդին Նաբուզարդան դահճապետը թողեց նույն տեղում՝ Հուդայի երկրում, և այն օրն իսկ նրանց տվեց այգիներ ու ջրարբի հողեր։

Երեմիան ազատության մեջ

¹¹ Բաբելացիների Նաբուքոդոնոսոր արքան Երեմիային հանձնեց Նաբուզարդան դահճապետի ձեռքը և պատվիրեց նրան՝ ասելով. ¹² «Վերցրո՛ւ դրան, աչքդ պահի՛ր դրա վրա. ոչ մի վատ բան չանես դրան, այլ ինչ որ քեզ ասի, կանես դրա համար»։ ¹³ Ապա Նաբուզարդան դահճապետին ու Նաբուսազաբան ներքինապետին, Ներգելսարասար մոգպետին ու բաբելացիների արքայի բոլոր մեծամեծներին ուղարկեցին Երեմիայի մոտ, ¹⁴ նրան հանեցին բանտից և հանձնեցին Սափանի որդի Աքիկամի որդի Գոդողիային. նրան տարան մի տուն, և նա ապրում էր ժողովրդի մեջ։

Մարգարեություն Աբդիմելեքի մասին

¹⁵ Մինչ Երեմիան բանտի գավթում նեղության մեջ էր, Տերը խոսեց նրա հետ և ասաց.

¹⁶ «Գնա՛ և հայտնի՛ր եթովպացի Աբդիմելեքին, թե այսպես է ասում Զորությունների Տերը՝ Իսրայելի Աստվածը. “Ահա ես այդ քաղաքի մասին ասած իմ խոսքը պիտի գործադրեմ չարիքի և ոչ թե բարիքի համար. դա պիտի կատարվի այն օրը, քո աչքի առաջ։ ¹⁷ Իսկ քեզ այդ օրը պիտի փրկեմ,- ասում է Տերը։- Քեզ ոչ թե պիտի տամ այն մարդկանց ձեռքը, որոնցից դու երկնչում ես, ¹⁸ այլ անպայման պիտի ազատեմ քեզ. դու սրով չպիտի ընկնես, և քո անձը քեզ համար պիտի լինի վերստին գտնված, քանզի դու հույսդ ինձ վրա դրեցիր”»,- ասում է Տերը։

40(47)

Երեմիան մնում է Գոդողիայի մոտ

¹ Սա է այն խոսքը, որ Տերն ուղղեց Երեմիային այն բանից հետո, երբ Նաբուզարդան դահճապետը նրան ազատ արձակեց Ռամայում։ Նրան, ձեռքերը շղթայակապ, վերցրին Երուսաղեմի և Հուդայի բոլոր գերիների միջից, որոնց քշում էին Բաբելոն։ ² Դահճապետը նրան վերցրեց ու ասաց. «Տերը՝ քո Աստվածը, հենց ա՛յս տեղի համար խոսեց այդ չարիքների մասին։ ³ Տերը կատարեց այնպես, ինչպես խոսել էր, քանզի մեղանչեցիք Տիրոջ հանդեպ և ականջ չդրեցիք նրա ձայնին, որի համար էլ այդ բանը պատահեց ձեզ հետ։ ⁴ Եվ ահա այժմ արձակեցի քեզ այն կապանքներից, որոնք քո ձեռքերին էին. եթե քեզ համար հաճելի է թվում ինձ հետ Բաբելոն գնալը, արի՛, աչք կպահեմ քեզ վրա, իսկ եթե քո աչքին վատ է թվում ինձ հետ Բաբելոն գնալը, մնա՛ այստեղ։ Ահա այս ամբողջ երկիրը քո առաջ է՝ ի բարօրություն քեզ. ուր որ հաճելի է քեզ, այնտեղ էլ գնա՛։ ⁵ Քանի դեռ ես այստեղ եմ, գնա՛, ում մոտ որ կամենում ես։ Վերադարձի՛ր Սափանի որդի Աքիկամի որդի Գոդողիայի մոտ, որին բաբելացիների արքան Հուդայի երկրի՝ քո երկրի վրա վերակացու կարգեց. նրա հետ կբնակվես ժողովրդի մեջ։ Իսկ եթե չես ուզում, քո աչքին ուր որ դուր է գալիս գնալ, գնա՛»։

Ապա դահճապետը նրան պաշար ու պարգևներ տվեց և արձակեց։ ⁶ Երեմիան գնաց Մասեփա՝ Աքիկամի որդի Գոդողիայի մոտ, և բնակվեց այնտեղ՝ երկրում մնացած ժողովրդի մեջ։

Գոդողիան Հուդայի երկրի կառավարիչ

⁷ Զորքի բոլոր հրամանատարները, որոնք գտնվում էին դաշտում, իրենք ու իրենց զորքերը լսեցին, որ բաբելացիների արքան երկրին վերակացու է կարգել Աքիկամի որդի Գոդողիային՝ նրան հանձնելով տղամարդկանց ու կանանց և մեծաթիվ ժողովրդի, ինչպես և երկրի բնակչության աղքատ մասին, որոնց չէր գաղթեցրել Բաբելոն։ ⁸ Իրենց հետ եղած մարդկանցով Գոդողիայի մոտ՝ Մասեփա եկան Նաթանի որդի Իսմայելը, Կարեի որդիներ Հովնանն ու Հովնաթանը, Թանաթեմի որդի Սարեան, Նետոփատի որդի Ովփերի որդիներն ու Մաքաթիի որդի Հեզոնիան։ ⁹ Սափանի որդի Աքիկամի որդի Գոդողիան նրանց ու նրանց հետ եղած մարդկանց երդում տվեց ու ասաց. «Մի՛ վախեցեք քաղդեացի պաշտոնյաներից, ապրե՛ք այս երկրում, հարկատո՛ւ դարձեք բաբելացիների արքային, և ձեզ համար լավ կլինի։ ¹⁰ Ես էլ ահավասիկ մնում եմ Մասեփայում, որպեսզի դեմ կանգնեմ այն քաղդեացիներին, որոնք կհարձակվեն ձեզ վրա։ Իսկ դուք գինի ու մի՛րգ մթերեք, ձեր ամանների մեջ յուղ կուտակե՛ք և բնակվե՛ք ձեր քաղաքներում, որոնք դուք քաջությամբ պահեցիք»։

¹¹ Բոլոր հրեաները, որոնք մովաբացիների երկրում էին և ամովնացիների մեջ, որոնք Եդովմում էին, ոմանք էլ՝ տարբեր երկրներում, լսեցին, որ բաբելացիների արքան ժողովրդի մի մասին թողել է Հուդայի երկրում և նրանց վրա վերակացու է դրել Սափանի որդի Աքիկամի որդի Գոդողիային,- ¹² այդ բոլոր հրեաներն ամեն տեղից, ուր ցրված էին, եկան Հուդայի երկիրը՝ Մասեփա, Գոդողիայի մոտ, և չափազանց շատ գինի ու միրգ մթերեցին։

Դավ Գոդողիայի դեմ

¹³ Կարեի որդի Հովնանն ու զորքի բոլոր հրամանատարները, որոնք դաշտում էին, Մասեփայում ներկայացան Գոդողիային ¹⁴ և ասացին նրան. «Գիտե՞ս այն մասին, որ ամովնացիների Բայաելիս թագավորը Նաթանի որդի Իսմայելին ուղարկել է քեզ մոտ, որպեսզի սպանի քեզ»։ Բայց Աքիկամի որդի Գոդողիան չհավատաց նրանց։ ¹⁵ Ապա Կարեի որդի Հովնանը Մասեփայում Գոդողիային գաղտնի ասաց. «Թո՛ւյլ տուր գնամ սպանեմ Նաթանի որդի Իսմայելին, ու ոչ ոք թող չիմանա. գուցե մի օր նա սպանի քեզ, և հրեաները, որոնք հավաքված են քեզ մոտ, ցրվեն, ու Հուդայի մնացորդներն էլ կորչեն»։ ¹⁶ Բայց Աքիկամի որդի Գոդողիան Կարեի որդի Հովնանին ասաց. «Մի՛ արա, ինչպես ասացիր, քանզի Իսմայելի մասին դու սուտ խոսեցիր»։

41(48)

Գոդողիայի սպանությունը

¹ Պատահեց այնպես, որ յոթերորդ ամսին թագավորազարմ Եղիսամայի որդի Նաթանի որդի Իսմայելը թագավորի ծառաների և տասը մարդու ուղեկցությամբ եկավ Մասեփա՝ Աքիկամի որդի Գոդողիայի մոտ, և նրանք միասին հաց կերան Մասեփայում։ ² Ապա Նաթանի որդի Իսմայելն իր հետ եղած տասը տղամարդկանցով վեր կացավ, սրով հարվածեց Սափանի որդի Աքիկամի որդի Գոդողիային և սպանեց նրան, որին բաբելացիների արքան երկրի վրա վերակացու էր դրել։ ³ Բոլոր հրեաներին ևս, որոնք Գոդողիայի հետ Մասեփայում էին, ինչպես նաև այնտեղ գտնված բոլոր քաղդեացիներին, որոնք պատերազմող մարդիկ էին, Իսմայելը կոտորեց։

⁴ Գոդողիայի սպանության հաջորդ օրը, երբ դեռ ոչ ոք այդ մասին չգիտեր, ⁵ Սյուքեմից, Սաղեմից և Շամրինից մարդիկ եկան, ութսուն տղամարդ՝ մորուքները սափրած, զգեստները պատառոտած, կոծ անելով, ձեռքներին ընծաներ և կնդրուկ, որպեսզի տանեն Տիրոջ տունը։ ⁶ Մասեփայում նրանց ընդառաջ ելավ Նաթանի որդի Իսմայելը. նա գնում էր ու լաց լինում։ Իսկ երբ մոտեցավ նրանց, ասաց. «Մտե՛ք Աքիկամի որդի Գոդողիայի մոտ»։ ⁷ Հենց որ քաղաքամեջ հասան, Նաթանի որդի Իսմայելն իր հետ եղած մարդկանցով քաղաքի մեջ կոտորեց նրանց և լցրեց ջրհորը։ ⁸ Այնտեղ տասը մարդ կար, որոնք Իսմայելին ասացին. «Մեզ մի՛ սպանիր, որովհետև մենք դաշտում գանձեր ունենք՝ ցորեն ու գարի, մեղր ու յուղ»։ Նա զիջեց, ընկերների միջից միայն նրանց չսպանեց։ ⁹ Իսկ ջրհորը, որի մեջ Իսմայելը լցրել էր այն բոլոր մարդկանց դիակները, որոնց կոտորել էր Գոդողիայի պատճառով, մեծ ջրհոր էր, որը Իսրայելի Բաասա արքայի վախից շինել էր Ասա արքան. Նաթանի որդի Իսմայելն այն լցրեց սպանվածներով։

¹⁰ Իսմայելը գերեվարեց Մասեփայում մնացած ամբողջ ժողովրդին և թագավորի դուստրերին՝ Մասեփայում եղած ժողովրդի թափթփուկների հետ միասին, որոնց Նաբուզարդան դահճապետը հանձնել էր Աքիկամի որդի Գոդողիային։ Նաթանի որդի Իսմայելն առավոտ կանուխ ելավ գնաց մյուս կողմը՝ ամովնացիների մոտ։

¹¹ Երբ Կարեի որդի Հովնանը և զորքի բոլոր հրամանատարները, որոնք նրա հետ էին, լսեցին այն բոլոր չարիքների մասին, որ գործել էր Նաթանի որդի Իսմայելը, ¹² հավաքեցին իրենց բոլոր զինվորներին և շարժվեցին, որպեսզի գնան ու պատերազմ մղեն Նաթանի որդի Իսմայելի դեմ։ Նրան հանդիպեցին Գաբավոնում՝ հորդ ջրերի մոտ։ ¹³ Իսկ երբ Իսմայելի հետ եղած ամբողջ ժողովուրդը նկատեց Կարեի որդի Հովնանին և բոլոր զորապետներին, որ նրա հետ էին, ուրախացավ։ ¹⁴ Ամբողջ ժողովուրդը, որին Իսմայելը գերել էր Մասեփայում, անցավ նրանց կողմը, եկավ Կարեի որդի Հովնանի մոտ։ ¹⁵ Բայց Նաթանի որդի Իսմայելը ութ տղամարդու հետ փրկվեց Հովնանի ձեռքից և ընկավ ամովնացիների մոտ։

¹⁶ Ապա Կարեի որդի Հովնանն ու բոլոր զորապետները, որ նրա հետ էին, Մասեփայից վերցրին ժողովրդի այն մասը, որ մնացել էր, ազատեցին նրանց Նաթանի որդի Իսմայելի ձեռքից այն բանից հետո, երբ սա սպանեց Աքիկամի որդի Գոդողիային, գաբավոնացիների երկրից առան հզոր ու պատերազմող մարդկանց, կանանց, տղամարդկանց ու ներքինիներին, ¹⁷ գնացին ու կանգ առան Բերութքամամ երկրում, Բեթղեհեմի դիմաց, որպեսզի քաղդեացիների երկյուղից անցնեն գնան եգիպտացիների երկիրը։ ¹⁸ Նրանք վախենում էին նրանցից, քանի որ Իսմայելն սպանել էր Աքիկամի որդի Գոդողիային, որին բաբելացիների արքան երկրի վրա վերակացու էր կարգել։

42(49)

Երեմիան հորդորում է չգաղթել երկրից

¹ Զորքի բոլոր հրամանատարները, Կարեի որդի Հովնանը, Ովսեի որդի Հեզոնիան և ամբողջ ժողովուրդը՝ փոքրից մինչև մեծերը, մոտեցան ² ու ասացին Երեմիա մարգարեին. «Թող մեր աղերսն ընդունելի լինի քո առաջ. մեզ համար, այս մնացորդացիս համար, աղոթի՛ր Տիրոջը՝ քո Աստծուն։ Շատերից այս քչերս ենք մնացել, ինչպես դու տեսնում ես մեզ քո աչքերով։ ³ Թող Տերը՝ քո Աստվածը, մեզ ցույց տա ճանապարհը, որով ընթանանք, կամ այն բանը, որ կատարենք»։

⁴ Երեմիա մարգարեն նրանց ասաց. «Լսեցի. ձեր խնդրանքի համար այժմ ես աղոթքի կկանգնեմ Տիրոջ՝ մեր Աստծու առաջ, և Տերն ինչ պատասխան որ տա, կհայտնեմ ձեզ, ոչ մի բան ձեզնից չեմ թաքցնի»։

⁵ Իսկ նրանք Երեմիային ասացին. «Թող Տերը մեզ համար արդար ու ճշմարիտ վկա լինի, եթե ամեն բան չանենք ըստ այն խոսքի, որ Տերը մեզ համար կուղարկի քեզ։ ⁶ Մենք կանսանք Տիրոջ՝ մեր Աստծու ձայնին, որի մոտ ենք ուղարկում քեզ, այն բարի լինի թե չար, որպեսզի մեզ համար լավ լինի։ Մենք կանսանք Տիրոջ՝ մեր Աստծու ձայնին»։

Տիրոջ պատասխանը Երեմիային

⁷ Երբ անցել էր տասը օր, Աստված խոսեց Երեմիայի հետ, ⁸ որը կանչեց Կարեի որդի Հովնանին, զորքի բոլոր հրամանատարներին, որոնք նրա հետ էին, և ամբողջ ժողովրդին՝ փոքրից մինչև մեծերը, ⁹ ու ասաց նրանց. «Այսպես է ասում Տերը՝ Իսրայելի Աստվածը, որի մոտ ուղարկեցիք ինձ, որպեսզի գութ աղերսեմ նրա առաջ.

¹⁰ “Եթե իսկապես մնաք այս երկրում,

ձեզ կշենացնեմ և ոչ թե կքանդեմ,

ձեզ կտնկեմ և ոչ թե արմատախիլ կանեմ,

որովհետև մեղմացել եմ այն չարությունից,

որ ասացի, թե ձեր նկատմամբ պիտի անեմ։

¹¹ Մի՛ վախեցեք բաբելացիների արքայից,

որից զարհուրած էիք,

չվախենաք նրանից,- ասում է Տերը,- քանզի ես ձեզ հետ եմ,

որպեսզի փրկեմ ձեզ և ազատեմ նրանց ձեռքից։

¹² Կգթամ ձեզ, կողորմեմ ձեզ

ու կվերադարձնեմ ձեզ ձեր երկիրը։

¹³ Իսկ եթե ասեք՝ “Չենք բնակվի այս երկրում և չենք անսա Տիրոջ՝ մեր Աստծու ձայնին, ¹⁴ այլ կգնանք եգիպտացիների երկիրը, որտեղ պատերազմ չենք տեսնի, շեփորի ձայն չենք լսի, հացից քաղցած չենք մնա և այնտեղ կապրենք”,- ¹⁵ ապա այդ մասին լսե՛ք Տիրոջ պատգամները, ո՛վ Հուդայի երկրի մնացորդներ»։ Այսպես է ասում Զորությունների Տերը՝ Իսրայելի Աստվածը.

«Եթե դուք երեսներդ շուռ տաք ու մտնեք Եգիպտոս,

որպեսզի այնտեղ բնակվեք,

¹⁶ ապա այն սուրը, որից դուք վախենում եք,

այնտեղ՝ եգիպտացիների երկրում,

պիտի գտնի ձեզ,

և այն սովը, որից տագնապում եք,

այնտեղ՝ եգիպտացիների երկրում,

պիտի հասնի ձեզ,

և այնտեղ պիտի մեռնեք։

¹⁷ Բոլոր մարդիկ, որոնք կդիմեն ու կանցնեն եգիպտացիների երկիրը,

որպեսզի բնակվեն այնտեղ,

սրով, սովով ու հիվանդություններով պիտի ոչնչանան,

նրանցից ոչ ոք չպիտի կարողանա փրկվել այն չարիքներից,

որ բերելու եմ նրանց գլխին»։

¹⁸ Այսպես է ասում Զորությունների Տերը՝ Իսրայելի Աստվածը. «Ինչպես որ իմ զայրույթն ու բարկությունը թափվեց Երուսաղեմի բնակիչների վրա, նույնպես էլ իմ զայրույթը պիտի կաթի ձեզ վրա, երբ դուք մտնեք Եգիպտոս։ Պիտի լինեք անապատում, վտարանդի, նզովված ու նախատված, այլևս չպիտի տեսնեք այս վայրերը», ¹⁹ ինչպես ասաց Տերը ձեզ՝ Հուդայի մնացորդներիդ՝ «Չմտնե՛ք Եգիպտոս»։ Բայց այժմ լա՛վ իմացեք, այսօր ձեր առաջ վկայում եմ, ²⁰ որ մեղք գործեցիք ձեր հոգում, քանի որ ինձ ուղարկեցիք Տիրոջ՝ ձեր Աստծու մոտ՝ ասելով. «Մեզ համար աղոթի՛ր Տիրոջը՝ մեր Աստծուն, և այն ամենը, ինչ որ Տերը՝ մեր Աստվածը, խոսի քեզ հետ՝ նույն ձևով հայտնի՛ր մեզ, ու մենք կկատարենք»։ ²¹ Եվ ես հայտնեցի ձեզ այսօր, բայց դուք Տիրոջ՝ ձեր Աստծու ձայնին չանսացիք, որի համար նա ինձ ձեզ մոտ էր ուղարկել։ ²² Արդ, իմացե՛ք, որ սրով, սովով ու հիվանդություններով պիտի ոչնչանաք նույն այն տեղում, ուր դուք կամենում եք գնալ ու բնակվել։

43(50)

Երեմիայի մարգարեությունը բաբելացիների Եգիպտոս արշավանքի մասին

¹ Երբ Երեմիան վերջացրեց ամբողջ ժողովրդին հայտնել Տիրոջ՝ նրանց Աստծու բոլոր խոսքերը, որոնք նրանց էր հղել Տերը՝ իրենց Աստվածը, ² այն ժամանակ Օսեի որդի Հեզոնիան, Կարեի որդի Հովնանը և բոլոր ամբարտավան մարդիկ Երեմիային ասացին. «Դու սուտ ես խոսում. Տերը՝ մեր Աստվածը, քեզ չի ուղարկել մեզ մոտ՝ ասելու՝ “Մի՛ մտեք Եգիպտոս՝ այնտեղ բնակվելու համար”, ³ այլ քեզ մեր դեմ է գրգռում Ներիայի որդի Բարուքը, որպեսզի մեզ մատնես քաղդեացիների ձեռքը, որ մեզ կոտորեն և գերի տանեն Բաբելոն»։

⁴ Կարեի որդի Հովնանը, զորքի բոլոր հրամանատարներն ու ամբողջ ժողովուրդը չանսացին Տիրոջ ձայնին՝ բնակվելու Հուդայի երկրում։ ⁵ Կարեի որդի Հովնանը և զորքի բոլոր հրամանատարներն առան Հուդայի բոլոր մնացորդներին, որոնք Հուդայի երկրում ապրելու համար վերադարձել էին այն բոլոր ազգերի մոտից, ուր ցրված էին, ⁶ տղամարդկանց, կանանց ու մանուկներին, թագավորի դուստրերին և այն անձանց, որոնց Նաբուզարդան դահճապետը թողել էր Սափանի որդի Աքիկամի որդի Գոդողիայի մոտ, ինչպես և Երեմիա մարգարեին ու Ներիայի որդի Բարուքին, ⁷ և գնացին եգիպտացիների երկիրը, որովհետև չանսացին Տիրոջ ձայնին, և հասան Տափնաս։

⁸ Տափնասում Տերն իր խոսքն ուղղեց Երեմիային և ասաց.

⁹ «Դու մեծ-մեծ քարե՛ր վերցրու, թաղի՛ր Տափնասում, նախադռան թաքստոցի մեջ, փարավոնի ապարանքի մուտքի մոտ՝ ի տես Հուդայի մարդկանց, ¹⁰ և ասա՛ նրանց. այսպես է ասում Զորությունների Տերը՝ Իսրայելի Աստվածը. ահավասիկ ես կուղարկեմ ու կբերեմ բաբելացիների Նաբուքոդոնոսոր արքային՝ իմ ծառային, որն իր գահը պիտի կանգնեցնի այդ քարերի վրա, որոնք դու թաքցրիր։ Դրանց վրա կանգնած՝ նա պիտի կապի իր զենքերը, ¹¹ պիտի գա ու հարված հասցնի եգիպտացիների երկրին. ում մահ է վիճակված, մահվան պիտի դատապարտի, ում գերություն՝ գերության, ում սուր՝ սրի։ ¹² Նրանց աստվածների տան մեջ կրակ պիտի գցի, պիտի այրի նրանց ու գերի տանի։ Պիտի փնտրի եգիպտացիների երկրում, ինչպես հովիվն է քրքրում իր հագուստները, և այդտեղից հանգիստ պիտի դուրս գա։ ¹³ Պիտի խորտակի եգիպտացիների երկրում գտնվող Արեգ քաղաքի սյուները և նրանց աստվածների մեհյաններն այրի հրով»։

44(51)

Երեմիայի մարգարեությունը Տիրոջ բարկության մասին

¹ Տերը Երեմիայի միջոցով խոսեց բոլոր հրեաների մասին, որոնք բնակվում էին եգիպտացիների երկրում, գտնվում էին Մագդողում, Տափնասում, Մեմփիսում և Պաթուրես երկրում, ու ասաց. ² այսպես է ասում Զորությունների Տերը՝ Իսրայելի Աստվածը. «Դուք ինքներդ գիտեք այն բոլոր չարիքները, որ բերեցի Երուսաղեմի վրա և Հուդայի երկրի բոլոր քաղաքների վրա։ Ահա դրանք այսօր ամայի են բնակիչներից ³ այն չարիքների պատճառով, որ նրանք կատարեցին՝ ինձ դառնացնելու համար, քանզի գնացին խունկ ծխելու և պաշտելու օտար աստվածներին, որոնց դուք և ձեր հայրերը չէիք ճանաչում։ ⁴ Ու ես միշտ էլ կանխավ ձեզ մոտ ուղարկեցի իմ բոլոր ծառաներին՝ մարգարեներին, և ասացի. “Մի՛ արեք այդ պիղծ բաները, որ ես ատում եմ”։ ⁵ Բայց նրանք չլսեցին ինձ և չխոնարհեցրին իրենց ականջները, որ դարձի գան իրենց չարություններից, խունկ չծխեն օտար աստվածներին։ ⁶ Եվ իմ բարկությունն ու զայրույթը կաթեց ու բորբոքվեց Հուդայի քաղաքներում և Երուսաղեմից դուրս, որոնք ավեր ու անապատ դարձան, ինչպես այսօր են»։

⁷ Արդ, այսպես է ասում Զորությունների Տերը՝ Իսրայելի Աստվածը. «Ինչո՞ւ ձեր հոգիների դեմ մեծամեծ մեղքեր եք գործում, որ Հուդայի միջից ջնջեք ձեր տղամարդուն, կնոջն ու ծծկեր մանկանը, որ ձեզնից որևէ մեկը չմնա, ⁸ ձեր ձեռքի գործերով ինձ դառնություն պատճառեք և եգիպտացիների երկրում, ուր դուք գնացել եք բնակվելու, խնկարկեք օտար աստվածներին, որ բնաջնջվեք և անեծքի ու նախատինքի առարկա դառնաք աշխարհի բոլոր ազգերի մեջ, ⁹ որովհետև դուք մոռացության չտվեցիք ձեր հայրերի չար գործերը, Հուդայի թագավորների չարությունները, նրանց կանանց չարությունները, ձեր չարությունները և ձեր կանանց չարությունները, որ նրանք կատարեցին Հուդայի երկրում և Երուսաղեմից դուրս։ ¹⁰ Մինչև այսօր նրանք հետ չկանգնեցին, չվախեցան և ոչ էլ հավատարիմ մնացին իմ օրենքին ու պատվիրաններին, որ դրեցի ձեր աչքի առաջ և ձեր հայրերի աչքի առաջ»։

¹¹ Դրա համար էլ այսպես է ասում Զորությունների Տերը՝ Իսրայելի Աստվածը. «Ահա ես իմ երեսը դարձնում եմ դեպի ձեզ՝ չարիքի համար, ամբողջ Հուդան ոչնչացնելու համար։ ¹² Պիտի առնեն Հուդայի մնացորդներին, որոնք դիմեցին ու եկան եգիպտացիների երկիրը՝ այստեղ բնակվելու համար, Եգիպտոսում եղած բոլոր մնացորդներին պիտի կորստյան մատնեն. սրի պիտի քաշվեն և սովից բնաջնջվեն, փոքրից մինչև մեծերը սրից պիտի ընկնեն ու սովից մեռնեն, պիտի մատնվեն նզովքի ու կորստյան, անեծքի ու նախատինքի։ ¹³ Եվ նրանց, որ եգիպտացիների երկրում են բնակվում, պիտի այցելեմ սրով, սովով ու մահով, ինչպես այցելեցի Երուսաղեմին, ¹⁴ և Հուդայի մնացորդներից, որոնք բնակվում են եգիպտացիների երկրում, ոչ ոք չպիտի փրկվի, որ վերադառնա Հուդայի երկիրը, ուր վերադառնալու և այնտեղ բնակվելու հույսն էին փայփայում իրենց հոգում։ Չպիտի վերադառնան, բացի միայն ազատվածներից»։

¹⁵ Այն բոլոր տղամարդիկ, որոնք գիտեին, որ իրենց կանայք խունկ են ծխում օտար աստվածներին, նաև այնտեղ եղած բոլոր կանանց մեծ բազմությունն ու ամբողջ ժողովուրդը, որ բնակվում էր եգիպտացիների երկրում, Պաթուրեսում, պատասխան տվեցին Երեմիային՝ ասելով. ¹⁶ «Մենք չենք լսի քո այդ խոսքը, որ Տիրոջ անունից ասացիր մեզ, ¹⁷ բայց անպայման կկատարենք ամեն բան, ինչ ելավ մեր բերանից. խունկ կծխենք երկնքի թագուհուն, նրան նվերներ կընծայենք, ինչպես արել ենք մենք ու մեր հայրերը, մեր թագավորներն ու մեր իշխանները Հուդայի քաղաքներում ու Երուսաղեմից դուրս, երբ առատ էինք հացով, վայելքի մեջ էինք ու չարիք չէինք տեսնում։ ¹⁸ Իսկ երբ դադարեցինք երկնքի թագուհուն խունկ ծխելուց և նրան նվերներ ընծայելուց, ամեն ինչի կարոտ մնացինք և սրով ու սովով կոտորվեցինք։ ¹⁹ Երբ մենք երկնքի թագուհուն խունկ էինք ծխում և նրան նվերներ ընծայում, ի՞նչ է, առանց մեր ամուսինների իմացությա՞ն էինք թխվածք ու կարկանդակներ պատրաստում կամ նվերներ ընծայում նրան»։

²⁰ Ժողովրդի բոլոր զորավոր մարդկանց ու նրանց կանանց և ամբողջ ժողովրդին, որոնք իրեն այդպիսի պատասխան խոսք ասացին, Երեմիան պատասխանեց՝ ասելով.

²¹ «Արդյոք Տերը չհիշե՞ց, նրա միտքը չընկա՞վ այդ խունկը, որ դուք ու ձեր հայրերը, ձեր թագավորները, ձեր իշխաններն ու երկրի ժողովուրդը ծխում էիք Հուդայի քաղաքներում ու Երուսաղեմից դուրս։ ²² Ձեր չար արարքների և ձեր արած գարշելի գործերի պատճառով Տերը չկարողացավ համբերել, և ձեր երկիրը, բնակիչներից զրկված, դարձավ ավերակ ու անապատ և նզովքի առարկա, ինչպես այսօր է։ Այն բանի համար, ²³ որ դուք դրանց խնկարկում եք և դրանով իսկ մեղանչում Տիրոջ հանդեպ, չեք լսում Տիրոջ ձայնը և չեք ընթանում ըստ նրա օրենքների, ըստ նրա վկայությունների և հրամանների, դրա համար ձեզ վիճակվեցին այդ չարիքները, ինչպիսիք այսօր էլ կան»։

²⁴ Երեմիան ամբողջ ժողովրդին ու բոլոր կանանց ասաց. «Լսե՛ք Տիրոջ պատգամները, Հուդայի բոլոր մարդիկ, որ գտնվում եք եգիպտացիների երկրում. ²⁵ այսպես է ասում Զորությունների Տերը՝ Իսրայելի Աստվածը. «Դուք և ձեր կանայք ինչ որ ասացիք ձեր բերաններով, այն էլ արեցիք ձեր ձեռքերով. ասում եք՝ “Մեր դավանածը պիտի դավանենք, խունկ պիտի ծխենք երկնքի թագուհուն և նվերներ ընծայենք”։ Դուք հաստատ մնացիք ձեր դավանությանը և ճշտորեն կատարեցիք ձեր ուխտը։ ²⁶ Դրա համար էլ լսե՛ք Տիրոջ պատգամը, Հուդայի բոլո՛ր մարդիկ, որ բնակվում եք եգիպտացիների երկրում. «Ահա ես երդվեցի իմ մեծ անձով,- ասում է Տերը՝ Աստված,- որ եթե իմ անունը նորից հնչի Հուդայի որևէ մարդու բերանից, եթե ասեն՝ “Տերը կենդանի է եգիպտացիների այս ամբողջ երկրում”, ²⁷ ապա ես կծառանամ դրանց դեմ՝ դրանց չարչարելու և ոչ թե բարություն անելու համար։ Եվ Հուդայի բոլոր մարդիկ, որ ապրում են եգիպտացիների երկրում, պիտի կոտորվեն սրով ու սովով, մինչև որ նվազեն։ ²⁸ Իսկ սրից ազատվածները՝ սակավաթիվ մարդիկ, եգիպտացիների երկրից պիտի վերադառնան Հուդայի երկիրը։ Եվ Հուդայի բոլոր մնացորդները, որ բնակվում են եգիպտացիների երկրում, պիտի իմանան, թե ո՛ւմ խոսքն է հաստատվելու՝ ի՞մը, թե՞ իրենցը։ ²⁹ Եվ սա թող ձեզ նշան լինի,- ասում է Տերը,- որ այստեղ ես ձեզ այցելելու պիտի գամ, որպեսզի գիտենաք, որ իմ խոսքերը ձեր նկատմամբ ի չարը պիտի կատարվեն»։ ³⁰ Այսպես է ասում Տերը. «Ահա ես եգիպտացիների արքա Վափառ փարավոնին կհանձնեմ իր թշնամիների ձեռքը, իր հոգին պահանջողների ձեռքը, ինչպես որ Սեդեկիա արքային տվեցի իր թշնամու և իր հոգին պահանջողի՝ բաբելացիների Նաբուքոդոնոսոր արքայի ձեռքը»։

45

Տիրոջ խոստումը Բարուքին

¹ [61]Ահա այն խոսքը, որ Հուդայի արքա Հովսիայի որդի Հովակիմի չորրորդ տարում Երեմիա մարգարեն հայտնեց Ներիայի որդի Բարուքին, որն այն ժամանակ մատյանում Երեմիայի բերանից գրի առավ այս բաները։

² Այսպես է ասում քո մասին Տերը՝ Իսրայելի Աստվածը. «Ո՛վ Բարուք, ³ դու, որ ասացիր՝ “Վա՜յ ինձ, վա՜յ ինձ, քանզի Տերն իմ ցավերի վրա տառապանք ավելացրեց, ես հեծեծանքով քուն մտա և հանգստություն չգտա”, ⁴ այսպես կասես նրան, թե այսպես է ասում Տերը.

«Ահա ինչ որ ես շինեցի,

ինքս քանդում եմ,

և ինչ որ ես տնկեցի,

ինքս եմ արմատախիլ անում՝ այս ամբողջ երկիրը։

⁵ Իսկ դու քեզ համար մեծ-մեծ բաներ ես խնդրում.

մի՛ խնդրիր, որովհետև,- ասում է Տերը,-

ահա յուրաքանչյուր մարմնի ես չարիք եմ բերելու,

սակայն դու ամենուրեք,

ուր էլ որ գնալու լինես,

փրկություն ես գտնելու»։

46(26)

Եգիպտոսը պարտվում է Նաբուքոդոնոսորից

Եգիպտոսի մասին

¹ Ահա Երեմիա մարգարեին ուղղված Տիրոջ խոսքը եգիպտական բոլոր ազգերի մասին ² և եգիպտացիների արքա Նեքավով փարավոնի զորաբանակի մասին, որը գտնվում էր Եփրատ գետի մոտ՝ Քարքամիսում, և որին Հովսիայի որդու՝ Հուդայի երկրի արքա Հովակիմի չորրորդ տարում ջախջախեց բաբելացիների Նաբուքոդոնոսոր արքան։

³ «Զենք ու վահա՛ն վերցրեք,

մտե՛ք մարտի մեջ,

⁴ պատրաստե՛ք երիվարները,

ձի՛ հեծեք, ո՛վ սպառազինվածներ,

դրե՛ք սաղավարտները,

առա՛ջ ուղղեք գեղարդները,

հագե՛ք ձեր զրահները։

⁵ Բայց այդ ի՞նչ է կատարվում.

դրանք ահավասիկ զարհուրածներն են,

որ դեպի հետ են շարժվում,

որովհետև նրանց զորավոր մարդիկ ջախջախվեցին,

և իրենք փախուստի են դիմել,

իսկ դրանցից նրանք, որ շրջապատման մեջ ընկան,

չպիտի վերադառնան,- ասում է Տերը։-

⁶ Ո՛չ արագաշարժը պիտի փախչի,

ո՛չ էլ հզորը փրկվի.

հյուսիսի կողմերում, Եփրատ գետի մոտ,

նրանք ուժասպառ եղան ու կործանվեցին։

⁷ Ո՞վ է սա, որ բարձրացել է գետի պես,

և ջրեր կուտակած գետերի պես հորձանք է տալիս։

⁸ Եգիպտոսի ջրերը գետի պես հորդել են,

գետի պես ալեկոծված են նրա ջրերը,

և ասում է. “Ես կելնեմ ու կծածկեմ երկիրը,

կկործանեմ քաղաքներն ու նրանց բնակիչներին։

⁹ Երիվարնե՛ր հեծեք,

կառքե՛ր լծեք, ելե՛ք,

ո՛վ եթովպացի մարտիկներ և զինավառ լիբիացիներ,

վե՛ր կացեք, աղեղներդ լարե՛ք,

ո՛վ լյուդացիներ”»։

¹⁰ Այս օրն ահա Տիրոջ՝ մեր Աստծու վրեժխնդրության օրն է՝

իր թշնամիներից վրեժ առնելու համար։

Սուրը պիտի ուտի և հագենա,

պիտի հարբի նրանց արյունից,

որովհետև Զորությունների Տիրոջ զոհը հյուսիսի երկրից պիտի լինի,

Եփրատ գետի ափին։

¹¹ Գնա՛ Գաղաադ

և բուսայուղ դե՛ղ հավաքիր

եգիպտացիների կույս դստեր համար.

իզուր ես դեղաբույսեր հավաքում.

ոչ մի տեղից քեզ օգուտ չկա։

¹² Ազգերը լսեցին քո գույժը, և երկիրը լցվեց քո աղաղակով.

պատերազմողը պատերազմողի հետ բախվեց ու թուլացավ,

և երկուսն էլ միասին ընկան»։

Նաբուքոդոնոսորի հարձակումը Եգիպտոսի վրա

¹³ Ահա այն խոսքը, որ Տերը հայտնեց Երեմիա մարգարեի միջոցով, երբ բաբելացիների Նաբուքոդոնոսոր արքան եկավ՝ հարված հասցնելու եգիպտացիների երկրին.

¹⁴ Գուժե՛ք Եգիպտոսում,

ձա՛յն արձակեք Մագդողում,

իմա՛ց տվե՛ք Մեմփիսին,

ազդարարե՛ք Տափնասին.

«Արի՛, պատրա՛ստ եղիր,

որովհետև սուրը կերավ քո ճյուղերը,

¹⁵ քո ընտիր ցուլը փախուստ տվեց, չմնաց,

քանի որ Տերը լքեց նրան»։

¹⁶ Եվ բազմությունը տկարացավ ու ընկավ.

ամեն մեկն իր ընկերոջն ասաց.

“Եկե՛ք հեթանոսի սրից յուրաքանչյուրս դառնանք դեպի մեր ժողովուրդը,

ամեն մեկը գնա իր երկիրը։

¹⁷ Եգիպտացիների փարավոն արքայի անունը դրե՛ք Սաովն-Եբիր-Մովեդ։

¹⁸ «Կենդանի եմ ես,- ասում է Տերը,-

Զորությունների թագավոր է նրա անունը։

Ինչպես գահավանդակն է լեռների մեջ,

կամ ինչպես Կարմելոսը՝ ծովում,

նա պետք է գա։

¹⁹ Գերության պատրաստությո՛ւն տես,

ո՛վ դուստր, բնակի՛չ Եգիպտոսի,

քանզի Մեմփիսն ավերակ պիտի դառնա,

և վայ պիտի տան նրան՝

այնտեղ բնակիչներ չլինելու պատճառով։

²⁰ Եգիպտոսը զարդարված ու գեղեցիկ երինջ է.

նրա կործանումը հյուսիսից եկավ։

²¹ Նրա վարձկանները նրա մեջ նման են պարարտ եզների,

ու նրանք էլ առհասարակ փախուստի պիտի դիմեն և չպիտի հանդարտվեն,

որովհետև նրանց վրա եկավ կործանման օրը,

և հասավ վրեժխնդրության ժամանակը։

²² Նրանց ձայնը լինելու է օձի շչյունի նման,

քանի որ նրանք ավազի միջով են գնալու։

Տապարակիրները նրա վրա են գալու

անտառահատների պես։

²³ Կտրե՛ք նրա Անտառները,- ասում է Տերը,-

քանզի նրանց հաշիվը ոչ ոք չի կարող անել.

նրանք մորեխից ավելի են բազմացել,

նրանց թիվ չկա։

²⁴ Ամոթով մնաց Եգիպտոսի դուստրը,

նա մատնվեց հյուսիսի զորքերի ձեռքը»։

²⁵ Զորությունների Տերը՝ Իսրայելի Աստվածն ասում է. «Ահա ես վրեժխնդիր եմ լինելու նրա որդի Ամովնից, փարավոնից ու եգիպտացիներից, նրանց աստվածներից ու նրա թագավորներից, փարավոնից ու նրան ապավինողներից. ²⁶ նրանց մատնելու եմ նրանց հոգիները պահանջողների ձեռքը, բաբելացիների Նաբուքոդոնոսոր արքայի ձեռքը ու նրա պաշտոնյաների ձեռքը, և այնուհետև այն պիտի բնակեցվի առաջվա նման,- ասում է Տերը։

²⁷ Բայց դու մի՛ վախեցիր, ո՛վ իմ ծառա Հակոբ,

դու մի՛ զարհուրիր, ո՛վ Իսրայել,

քանզի ես ահա փրկելու եմ քեզ հեռաստանից,

իսկ քո սերունդը՝ նրանց գերությունից։

Պիտի վերադառնա Հակոբը,

դադար պիտի առնի ու ննջի,

և չի լինելու որևէ մեկը, որ լլկի նրան։

²⁸ Դու մի՛ վախեցիր, ո՛վ իմ ծառա Հակոբ,- ասում է Տերը,-

որովհետև ես քեզ հետ եմ.

եթե ես բնաջնջեմ այն բոլոր ազգերին,

որոնց մեջ ցրեցի քեզ,

քե՛զ, սակայն, չեմ բնաջնջելու։

Քեզ արդարությամբ պիտի խրատեմ, թեև լրիվ չպիտի արդարացնեմ»։

47

Փղշտացիների կործանումը

Այլազգիների մասին

¹ [62]Տիրոջ խոսքն այլազգիների մասին՝ ուղղված Երեմիա մարգարեին, երբ փարավոնը դեռ չէր ավերել Գազան։

² Այսպես է ասում Տերը.

«Ահավասիկ ջրեր են բարձրանում հյուսիսից,

որոնք, հորդահոս հեղեղների վերածվելով,

պիտի ողողեն երկիրն ամբողջությամբ,

քաղաքն իր բնակիչներով։

Պիտի գոչեն մարդիկ,

և երկրի բոլոր բնակիչները աղաղակ պիտի բարձրացնեն

³ ասպատակող հեծելազորի զենքերի ու ոտքերի ձայնից,

նրա կառքերի շաչյունից

և դրանց անիվների շառաչից։ Հայրերը չպիտի դառնան դեպի իրենց որդիները,

որովհետև նրանց ձեռքերը պիտի թուլանան

⁴ այն օրը, որը վրա է հասնելու

բոլոր այլազգիներին կորստյան մատնելու համար։

Կորստյան պիտի մատնեմ նաև Ծուրն ու Ծայդանը [* և Ο΄ Տյուրոսն ու Սիդովնը]

և նրանց մյուս բոլոր օգնականներին»։

Տերը ոչնչացնելու է կղզիներում և Գամիրքում մնացած այլազգիներին։

⁵ Գազայում այնպիսի սուգ պիտի լինի,

որ մարդիկ խուզեն իրենց գլուխները,

Ասկաղոնը պիտի ոչնչանա,

ինչպես և Ենակի որդիների մնացորդները։ Մինչև ե՞րբ պիտի կոտորես,

⁶ դու, Տիրո՛ջ սուր,

մինչև ե՞րբ դադար չպիտի առնես,

վերադարձի՛ր քո պատյանը,

հանգի՛ստ առ, հե՛տ կանգնիր։

⁷ Ինչպե՞ս դադար առնի նա.

չէ՞ որ Տերը հրամայեց նրան հարձակվել Ասկաղոնի և նրանց վրա,

ովքեր մնացել էին ծովեզերքին։

48

Մովաբի կործանումը

Մովաբի մասին

¹ [63]Այսպես է ասում Զորությունների Տերը՝ Իսրայելի Աստվածը.

«Վա՜յ Նաբավին, որ կործանվեց,

Կարիաթիմն ամոթահար եղավ, գրավվեց.

ամոթահար եղավ Մոսոգամբն ու պարտության մատնվեց։

² Մովաբն այլևս Եսեբոնում պարծենալու բան չունի։

Նրա մասին չարիք են նյութում,

թե՝ “Եկե՛ք ազգի միջից նրան ոչնչացնենք,

թող լռի ու պապանձվի”։

Հուրն է շրջում քո հետևից։

³ Որովնայիմից լսվում է գուժկանների բոթը.

“Մահ և կործանում.

⁴ Մովաբն ավերվեց”։

Գո՛ւյժ տվեք Սոգովրին,

⁵ քանզի Աղովթը ողբով լցվեց,

և լացով են բարձրանում Որովնայիմի ճանապարհով։

Տագնապ ու կոտորածի բոթ լսեցի.

⁶ փախե՛ք ու փրկե՛ք ձեր անձերը

ու կլինեք անապատի ցիռի նման։

⁷ Հույսդ դրել էիր քո ամրոցների վրա,

բայց պիտի վրա հասնեն նեղությունները,

ու դու պիտի բռնվես։

Քամոսը գերի պիտի գնա իր քուրմերի ու իր իշխանների հետ։

⁸ Միանգամից կործանում պիտի հասնի բոլոր քաղաքներին,

մի քաղաք անգամ չպիտի փրկվի,

բնակիչը պիտի ոչնչանա,

դաշտեցին՝ բնաջնջվի»։ Այսպես է ասում Տերը.

⁹ «Մի նշա՛ն տվեք Մովաբին,

որը տոչորվելով պիտի տոչորվի,

իսկ նրա բոլոր քաղաքները անապատի պիտի վերածվեն

բնակիչներ չլինելու պատճառով»։

¹⁰ Թող անիծյալ լինի նա, ով Տիրոջ գործը անհոգությամբ կկատարի,

թող անիծյալ լինի նաև նա, ով Տիրոջ սուրը արյունից հետ կպահի։

Մովաբի քաղաքների կործանումը

¹¹ «Իր մանկությունից ի վեր Մովաբը հանգի՜ստ էր,

իր փառքին էր ապավինել.

ամանից աման չէր թափվել

և գերության չէր գնացել,

դրա համար էլ նրա համն իր մեջ էր մնացել,

և բույրը չէր նվազել։

¹² Ահա թե ինչու օրեր պիտի գան,- ասում է Տերը,-

ու ես մարդիկ պիտի ուղարկեմ նրա մոտ,

որոնք պիտի խոնարհեցնեն նրան,

նրա անոթները պիտի մանրեն ու նրա ամանները փշրեն։

¹³ Մովաբը պիտի ամաչի Քամովսից,

ինչպես Իսրայելի տունն ամաչեց Բեթելից՝ իր ապավենից։

¹⁴ Ինչո՞ւ եք ասում. “Հզոր ենք,

կռվի մեջ զորեղ տղամարդ ենք”։

¹⁵ Կորստյան մատնվեցին Մովաբը և նրա քաղաքները,

նրա ընտիր-ընտիր երիտասարդները գնացին մեռնելու,-

ասում է արքան, որի անունը Զորությունների Տեր է։

¹⁶ Մովաբի օրհասը մոտ է,

և ձախորդությունները մեծ արագությամբ նրա վրա են գալիս։

¹⁷ Բոլորդ, որ նրա շուրջն եք, ցնցվե՛ք նրանով.

ամենքդ, որ գիտեք նրա անունը, ասացե՛ք.

“Ինչպե՞ս խորտակվեց գեղեցիկ ցուպը՝ մեծարանքի գավազանը”։

¹⁸ Խոնարհվի՛ր քո փառքից

և նստի՛ր խոնավության մեջ, ո՛վ դու դուստր,

որ բազմել ես Դեբոնում,

քանզի Մովաբը կորստյան մատնվեց,

վրա հասավ քո ամրոցները կործանողը։

¹⁹ Դու, որ նստում ես Արոերում,

կանգնի՛ր ճանապարհներին,

նայի՛ր և հարցրո՛ւ փախստականներին ու փրկվածներին,

ասա՛. “Ի՞նչ տեղի ունեցավ”։

²⁰ Ամոթահար եղավ Մովաբը,

որովհետև կործանվեց։

Ճչա՛ և աղաղակի՛ր,

գո՛ւյժ տուր Առնովնին,

թե Մովաբը կործանվեց։

²¹ Դատաստանն է սպառնում Միսովրի երկրին՝ Քիլովնին, Հասսային, Մովփաթին,

²² Դեբոնին և Նաբավին, Բեթ Դեբլաթայիմին

²³ ու Կարիաթայիմին, Բեթ Գամովղին և Բեթ Մավոնին,

²⁴ Կարիավովթին, Բոսորին և Մովաբի երկրի հեռավոր ու մոտիկ բոլոր քաղաքներին։

²⁵ Ջարդվեց Մովաբի եղջյուրը,

և նրա հանդգնությունը խորտակվեց»,- ասում է Տերը։

Մովաբը պիտի դառնա ծաղրի առարկա

²⁶ «Հարբեցրե՛ք նրան,

որովհետև նա հոխորտաց Տիրոջ դեմ.

Մովաբը թող ծափ տա,

որպեսզի ինքն էլ խայտառակ լինի։

²⁷ Արդյոք Իսրայելը քեզ համար ծաղրի առարկա չէ՞ր, իբրև թե գողության մեջ բռնված,

երբ մարտնչում էիր նրա դեմ.

նրա կողմից դու պիտի գերվես։

²⁸ Մովաբի բնակիչները թողեցին քաղաքները

և բնակվեցին քարերի ծերպերում.

նմանվեցին քարերի ծերպերում և խոռոչների ճեղքերում բույն դրած աղավնիներին։

²⁹ Լսեցի Մովաբի գոռոզության մասին,

քանզի նա խիստ գոռոզացավ իր վեսությամբ,

խրոխտությամբ ու ամբարտավանությամբ,

մեծամիտ դարձավ նա։

³⁰ Ես էլ իմացա նրա արած գործերը։

Մի՞թե ըստ նրա կարողության չէին նրա բազուկները,

բայց նա այդպես չգործեց։

³¹ Այդ պատճառով ճի՛չ բարձրացրեք Մովաբի համար,

ամեն կողմից ողբացե՛ք Մովաբին,

այն մարդկանց, որոնք խզում,

փետում ու մրում են իրենց մազերը։

³² Պիտի մրմնջա Հազերի լացով.

պիտի լաց լինենք քեզ համար,

ո՛վ դու Սաբեմի՛ այգի։

Քո ճյուղերը տարածվում են ծովի վրայով և

հասնում մինչև Հազեր.

քո մրգերին և քո այգեքաղին հասավ կոտորածը։

³³ Կարմելոսից և մովաբացիների երկրից վերացան ուրախությունն ու ցնծությունը։

Գինի կար քո հնձաններում.

այսուհետև առավոտները խաղող չպիտի ճմլեն,

և երեկոները հնձանահարների ձայն չպիտի լսվի։

³⁴ Եսեբոնի աղաղակը հասավ մինչև Ելելա և մինչև Հասսա.

նրանց քաղաքները,

Սեգովրից մինչև Որովնայիմ,

իրենց ձայնը բարձրացրին և գուժեցին մինչև Սաղես,

որովհետև Եբերիմի ջուրն անգամ խորշակի տապից ցամաքեց։

³⁵ Կորստյան պիտի մատնեմ Մովաբը,- ասում է Տերը,-

որ բագիններն էր բարձրանում

և խնկարկում օտար աստվածներին։

³⁶ Դրա համար էլ իմ սիրտն իբրև փող գոչում է Մովաբի վրա,

սիրտն իմ՝ իբրև շեփորի ձայն, ուղղված է այն մարդկանց,

որոնք ընկած են պատերի տակ։

Դրա համար էլ ինչ հարստություն որ ուներ,

մարդկանց ձեռքով պիտի կորչի։

³⁷ Բոլոր գլուխներն ամենուրեք պիտի սափրվեն,

բոլոր մորուքները կտրվեն,

բոլոր ձեռքերը կուրծք ծեծեն,

բոլոր մարմինները քուրձ պիտի հագնեն։

³⁸ Մովաբի բոլոր տանիքներին ու նրա հրապարակներում

ամբողջովին լաց ու կոծ է լինելու։

Ես փշրեցի Մովաբը ինչպես մի աման,

որ ոչ մի բանի պիտանի չէ,- ասում է Տերը։-

³⁹ Ինչպե՜ս այլակերպվեց, ողբացե՛ք,

ինչպե՜ս իր թիկունքը դարձրեց

ամոթալի ու ծաղրելի դարձավ,

և նրան քինախնդիր եղան իրեն շրջապատողները»։

Մովաբը չի ազատվի

⁴⁰ Այսպես է ասում Տերը.

«Ահա արծվի նման թշնամին առաջ պիտի սլանա

և իր թևերը տարածի Մովաբի վրա։

⁴¹ Պիտի գրավվի Կարիավովթը,

պիտի նվաճվեն նրա ամրոցները,

և այն օրը Մովաբի զորավոր մարդկանց սիրտը

պիտի դառնա երկունքի մեջ գտնվող կանանց սրտի պես։

⁴² Մովաբը՝ իբրև ժողովուրդ, պիտի կորչի,

որովհետև նա հոխորտաց Տիրոջ դեմ։

⁴³ Վիհ, սարսափ ու որոգայթ պիտի լինի քեզ համար,

ո՛վ դու, որ բնակվում ես Մովաբում.

⁴⁴ ու նա, որ փախուստ է տալու սարսափից,

պիտի ընկնի վիհը,

իսկ վիհից ելնողը պիտի բռնվի որոգայթի մեջ,

քանզի այն տարին, երբ դատելու լինեմ Մովաբին,

ամեն ինչ նրա գլխին պիտի բերեմ,- ասում է Տերը։

⁴⁵ Որոգայթից փախչողները հասան Եսեբոնի տանիքների տակ,

բայց Եսեբոնից կրակ դուրս եկավ,

ու Սեհովն քաղաքից՝ բոց,

լափեց Մովաբի իշխաններին

և հարվածեց ամովնացիներին։

⁴⁶ Վա՜յ քեզ, Մովա՛բ, որ կորցրիր Քամոսի ժողովրդին,

քանզի նրա որդիներն ու դուստրերը գերեվարվեցին։

⁴⁷ Բայց վերջին օրերը,- ասում է Տերը,-

Մովաբի գերյալներին պիտի վերադարձնեմ»։

Մովաբի դատաստանը մինչև այստեղ է լինելու։

49

Ամովնացիների մասին

¹ [64]Այսպես է ասում Տերը.

«Մի՞թե Իսրայելը որդիներ չունի

և կամ վերակացուներ չունի՞։

Ինչո՞ւ Մեղքոմը տիրեց Գադի հողերին,

ու Մեղքոմի ժողովուրդը նրա քաղաքներում է բնակվում։

² Դրա համար էլ,- ասում է Տերը,- օրեր են գալու,

երբ Ռաբբաթում ամովնացիներին գույժ պիտի տամ քաղաքների մասին,

որոնք անապատի պիտի վերածվեն ու անհետանան,

նրանց բագինները հրով պիտի այրվեն,

և Իսրայելը պիտի ստանա իր իշխանությունը,- ասում է Տերը։

³ Աղաղակի՛ր, Եսեբո՛ն,

որովհետև Գեհը կործանվեց,

բողո՛ք բարձրացրեք, ո՛վ Ռաբայի դուստրեր,

քո՛ւրձ հագեք, մոլեգնե՛ք,

սգացե՛ք և ցանկապատերի շուրջն այս ու այն կո՛ղմ թափառեք,

որովհետև Մեղքոմն իր քրմերի ու իշխանների հետ միասին գերի է գնում։

⁴ Ինչո՞ւ ես ցնծում քո վրանների մեջ, ո՛վ Զեփ,

և քո դաշտերում, ո՛վ անզգամ դուստր,

որ ապավինել էիր քո գանձերին և ասում էիր.

“Ո՞վ պիտի գա ինձ վրա”։

⁵ Ահա ամեն կողմից սարսափ պիտի բերեմ քեզ

քո շուրջը բնակվողներից,-

ասում է Զորությունների Տերը.- դուք ցրվելու եք ամեն կողմ,

ու ոչ ոք չի լինելու, որ հավաքի թափառականներին։

⁶ Դրանից հետո եմ վերադարձնելու գերյալ ամովնացիներին»,- ասում է Տերը։

Եդովմի մասին

⁷ [65]Այսպես է ասում Զորությունների Տերը.

«Այլևս իմաստություն չկա՞ Թեմանում,

հանճարեղները խելակորո՞ւյս եղան.

գնա՞ց նրանց իմաստությունը։

⁸ Ծաղրի առարկա դարձավ նրա երկիրը։

Գնացե՛ք ապրելու թաքուն և դժվարին տեղերում,

ո՛վ Դեդանի բնակիչներ,

որովհետև նրանց վրա պիտի բերեմ մի ժամանակ,

երբ գամ այցելելու նրանց։

⁹ Այգեկութ անողները վրա հասան քեզ

և մնացորդներ չեն թողնելու քեզ,

ինչպես գիշերվա գողեր՝

իրենց ձեռքերը դնելու են նրանց վրա։

¹⁰ Ես կործանեցի Եսավին և նրա թաքստյան տեղերը հայտնի դարձրի.

այլևս նրանք չեն կարող թաքնվել։

Նրա զավակը կորստյան մատնվեց

իր եղբոր և դրացու ձեռքով.

¹¹ չկա քո որբը, որ ապրի,

իսկ նրանց այրիներն ինձ վրա էին հույս դրել»։

¹² Այսպես է ասում Տերը.

«Ահա նրանք, ում թույլատրված չէր բաժակից խմել, խմելով հարբեցին,

իսկ դու բոլորովին անպատի՞ժ պիտի մնաս.

դու չես արդարանա, այլ խմելով պիտի հարբես,

¹³ քանի որ ես իմ անձով երդվեցի,- ասում է Տերը,-

որ Եդովմի ժառանգության մեջ ապականություն, նախատինք,

անապատ ու անեծք պիտի դառնաս,

իսկ նրանց բոլոր քաղաքները հավիտյանս ավերակ պիտի դառնան»։

¹⁴ Լուր առա Տիրոջից, որ սուրհանդակներ ուղարկեց ազգերի մոտ, թե՝

«Հավաքվե՛ք ու գնացե՛ք նրա վրա,

պատերազմի՛ դուրս ելեք,

¹⁵ որովհետև ահա մի փոքր ժամանակ ևս,

և ես քեզ ազգերի մեջ փոքր ու մարդկանց մեջ արհամարհված կդարձնեմ։

¹⁶ Այդ բանը քո գլխին բերեց քո նախատինքը,

քո սրտի լրբությունը քեզ ստիպեց ժայռերի մեջ ծակամուտ լինել

և խլեց քո բարձրացած բլրի զորությունը,

որովհետև եթե արծվի պես բարձրացնես քո բույնը,

այնտեղից էլ կիջեցնեմ քեզ,- ասում է Տերը։

¹⁷ Եդովմն անապատ պիտի դառնա,

ամեն ոք, ով անցնի նրա միջով,

պիտի զարմանա ու սուլի նրա կրած բոլոր աղետների համար։

¹⁸ Ինչպես Սոդոմն ու Գոմորը

և նրանց բնակիչները կործանվեցին,- ասում է Տերը,-

այնպես էլ մարդ չպիտի նստի նրա մեջ,

մարդու որդի չպիտի բնակվի նրա մեջ։

¹⁹ Ահա իբրև առյուծ՝

թշնամին Հորդանանի միջից դուրս պիտի գա դեպի Եթեմմա վայրը,

որպեսզի արագորեն հալածական դարձնեմ նրանց այնտեղից։

Ո՞վ է այնտեղ ընտրյալը,

որ այցի գամ նրան,

կամ ո՞վ կհամարձակվի ելնել իմ դեմ,

ո՞վ է այն հովիվը, որ կկանգնի իմ առջև»։

²⁰ Դրա համար լսե՛ք Տիրոջ խորհուրդը,

որ նա խորհել է եդովմացիների վերաբերյալ,

և նրա խորհուրդը, որ խորհել է Թեմանի բնակիչների մասին.

«Ոչխարների հոտի վերջիններն էլ պիտի հարվածվեն,

որ գնան, կանգնած չմնան,

և հոտը չցրվի։

²¹ Նրա կործանման ձայնից երկիրը ցնցվեց,

քո բոթը հասավ Կարմիր ծով,

լսվեց քո աղաղակը։

²² Ահավասիկ թշնամին պիտի երևա արծվի պես,

պիտի սլանա ու տարածի իր թևերը նրա ամրոցների վրա,

և այդ օրը Եդովմի զորավոր մարդկանց սիրտը պիտի դառնա

երկունքի մեջ գտնվող կանանց սրտի պես»։

Դամասկոսի մասին

²³ [66] «Ամաչեցին Եմաթն ու Արփաթը,

որովհետև չար լուր լսեցին,

ալեկոծվեցին ծովի պես,

զայրացան և չեն կարողանում հանգստանալ։

²⁴ Դամասկոսը վհատվեց,

փախուստի դիմեց և կործանվեց.

դողը բռնեց նրան,

երկունքը վրա հասավ նրան,

ինչպես ծննդկանին։

²⁵ Ինչպե՞ս է, որ նա չխնայեց իմ քաղաքը,

այն ավանը, որը ես սիրեցի։

²⁶ Դրա համար քո հրապարակներում պիտի ընկնեն երիտասարդները,

բոլոր կռվող մարդիկ պիտի զոհվեն այն օրը,- ասում է Զորությունների Տերը։-

²⁷ Ես կրակ պիտի վառեմ Դամասկոսի պարսպի մեջ,

որը պիտի ճարակի Ադերի որդիների հրապարակները»։

Կեդարի մասին

²⁸ [67]Թագուհու ապարանքի մասին, որին հարված հասցրեց բաբելացիների Նաբուքոդոնոսոր արքան, այսպես է ասում Տերը.

«Եկե՛ք հարձակվե՛ք Կեդարի վրա

և սպանե՛ք Կեդեմի որդիներին։

²⁹ Նրանց վրանները, նրանց ոչխարները պիտի խլեն,

նրանց շորերը, նրանց ամբողջ կահկարասին,

նրանց ուղտերի երամակները պիտի վերցնեն իրենց համար։

Աղաղա՛կ բարձրացրեք,

որ չորս կողմից նրանց կորուստ է սպառնում։

³⁰ Արա՛գ փախեք,

ապրելու համար թաքստոցնե՛րը մտեք,

ո՛վ ապարանքի բնակիչներ,-

ասում է Տերը,-

որովհետև բաբելացիների Նաբուքոդոնոսոր արքան

ձեր մասին խորհուրդ է խորհել,

խորհել է խորհուրդ քո դեմ։

³¹ Վե՛ր կաց,- ասում է Տերը,-

գնա՛ այն ազգի վրա,

որը խաղաղ ապրում է հանգստության մեջ,

որը ո՛չ դռներ ունի և ո՛չ էլ նիգեր,

ապրում է առանձին։

³² Թող նրանց ուղտերի երամակներն ավար դառնան,

նրանց ոչխարների բազմությունները կորստյան մատնվեն,

պիտի քշեմ,

քամու բերանը պիտի տամ երեսները ածիլածներին,

բոլոր կողմերից նրանց կործանում պիտի բերեմ,- ասում է Տերը։-

³³ Ապարանքը հավիտյան պիտի վերածվի

ջայլամների բնակավայրի և անապատի.

մարդ չպիտի բնակվի այնտեղ,

հողածնի որդին այնտեղ չպիտի ապրի»։

Ելամի մասին

³⁴ [68]Հուդայի արքա Սեդեկիայի թագավորության սկզբում Տերը Երեմիա մարգարեի միջոցով խոսեց Ելամի մասին և ասաց. ³⁵ այսպես է ասում Զորությունների Տերը՝ Իսրայելի Աստվածը.

«Ահա խորտակվեց Ելամի աղեղը՝

նրանց բռնապետությունը։

³⁶ Երկրի չորս ծագերից չորս հողմ եմ բերելու Ելամի վրա

և նրանց ցրիվ եմ տալու այդ չորս հողմերին։

Չի լինելու մի ազգ,

որի մոտ չհասնեն Ելամի թափառականները։

³⁷ Նրանց պիտի սարսափեցնեմ իրենց թշնամիների առաջ,

որոնք պահանջում էին նրանց հոգիները։

Նրանց վրա պիտի բերեմ իմ բարկությունն ու ցասումը,-

ասում է Տերը,-

և իմ սուրը պիտի արձակեմ նրանց հետևից,

մինչև որ այն իսպառ ջնջի նրանց։

³⁸ Իմ աթոռը Ելամում պիտի դնեմ

և այնտեղից պիտի վերացնեմ թագավորներին ու մեծամեծներին,-

ասում է Տերը։-

³⁹ Բայց ես վերջին օրերին Ելամի գերյալներին պիտի վերադարձնեմ»,- ասում է Տերը։

Ելամի մասին այս խոսքը հայտնվեց Սեդեկիայի թագավորության սկզբին։

50(27)

Բաբելացիների մասին

¹ Ահա այն խոսքը, որ Տերը Երեմիա մարգարեի միջոցով ասաց Բաբելոնի՝ քաղդեացիների երկրի մասին։

² «Պատմե՛ք ազգերին,

լո՛ւր տվեք, նշա՛ն արեք,

լսելի՛ դարձրեք,

մի՛ ծածկեք, ասացե՛ք.

“Բաբելոնը գրավվեց,

Բելը՝ այդ փափկասունն ու անվախը, ամոթով մնաց,

Մերոդաքը մատնվեց,

խայտառակվեցին նրա կուռքերը,

ամոթահար եղան նրա աստվածները”։

³ Արդարև, հյուսիսից նրա վրա հարձակվեց մի ազգ,

որը նրա երկիրն ավերակ պիտի դարձնի,

և ոչ ոք չպիտի բնակվի այնտեղ՝

մարդուց մինչև անասուն,

որովհետև բոլորը պիտի քանդվեն ու գնան»։

Իսրայելի վերադարձը

⁴ «Այն օրերին և այն ժամանակ,- ասում է Տերը,-

պիտի գան Իսրայելի որդիները,

նրանք և Հուդայի որդիները՝ միասին,

պիտի շրջեն ու լալով գան դեպի Տերը՝ իրենց Աստվածը,

⁵ պիտի փնտրեն նրան մինչև Սիոն, պիտի հարցնեն նրա ճանապարհի մասին,

դեպի այստեղ պիտի ուղղվեն,

պիտի գան ու ապավինեն Տիրոջը,

որովհետև ուխտը հավիտենական է, և դրանք չպիտի մոռացվեն։

⁶ Իմ ժողովուրդը նմանվեց կորած ոչխարների.

հովիվները լեռները քշեցին նրանց,

մոլորեցրին նրանց լեռ ու բլրի վրա։

Նրանք գնացին ու մոռացան իրենց մակաղելու տեղերը,

⁷ և բոլոր նրանք, ովքեր գտնում էին,

սպանում էին նրանց։

Նրանց թշնամիներն ասացին.

“Չպիտի ներենք նրանց,

որովհետև մեղք գործեցինք Տիրոջ առաջ։

Արդարության արոտ է Տերը,

որ հավաքեց նրանց հայրերին”։

⁸ Հեռացե՛ք Բաբելոնի միջից,

քաղդեացիների երկրից դո՛ւրս ելեք

և եղե՛ք ինչպես վիշապներ՝ ոչխարների հոտի առաջ։

⁹ Ահա ես ոտքի պիտի հանեմ

և հյուսիսի երկրից բաբելացիների վրա պիտի բերեմ

մեծամեծ ազգերի բազմություններ,

որոնք ճակատ պիտի կազմեն նրա շուրջը,

և նա պիտի գրավվի նույնքան հաստատ,

որքան հմուտ պատերազմողի նետը, որ չի վրիպում։

¹⁰ Քաղդեացիների երկիրն ավարառության պիտի ենթարկվի,

և նրա բոլոր ավարառուները պիտի հագենան,- ասում է Տերը.-

դուք ուրախանում էիք և պարծենում՝

հափշտակելով իմ ժառանգությունը.

¹¹ խայտում էիք, ինչպես հորթերը՝ դալար խոտի վրա,

և ցուլերի պես կռվում իրար դեմ։

¹² Ձեր մայրը խիստ ամոթահար եղավ,

մայրը, որ բարության մեջ էր։

Ահա ազգերի մեջ հետինը եղավ,

դարձավ ավերված, անջուր և անապատ։

¹³ Տիրոջ բարկության պատճառով նա բնակելի չպիտի լինի,

այլ ամբողջովին ապականության պիտի վերածվի,

և յուրաքանչյուր ոք, ով անցնի Բաբելոնով,

պիտի վշտանա ու սուլի նրա բոլոր աղետների համար։

¹⁴ Ճակա՛տ կազմեք Բաբելոնի շուրջը,

ո՛վ դուք բոլոր աղեղնավորներ,

նետահարե՛ք նրան,

մի՛ խնայեք ձեր նետերը,

որովհետև նա Տիրոջ դեմ մեղք գործեց։

¹⁵ Ցնծության աղաղա՛կ բարձրացրեք նրա շուրջը,

որովհետև թուլացան նրա ձեռքերը,

տապալվեցին աշտարակները,

և կործանվեցին նրա պարիսպները,

քանզի վրեժխնդրությունն Աստծուց է։

Վրեժխնդի՛ր եղեք դրանից. ինչպես ինքն արեց՝ իրե՛ն արեք։

¹⁶ Բաբելոնից վերացրե՛ք

հնձի ժամանակ մանգաղն իր ձեռքն առնող սերնդին.

հեթանոսի սրի պատճառով յուրաքանչյուրը կվերադառնա դեպի իր ժողովուրդը,

ամեն մեկը կփախչի դեպի իր երկիրը»։

Իսրայելացիների վերադարձը

¹⁷ Իսրայելը մոլորյալ ոչխար է,

առյուծներն են փախցրել նրան.

նախ նրան կերավ ասորեստանցիների թագավորը,

իսկ ապա բաբելացիների արքան կերավ նրա ոսկորները։

¹⁸ Դրա համար այսպես է ասում Զորությունների Տերը՝ Իսրայելի Աստվածը.

«Ահավասիկ ես վրեժխնդիր եմ լինելու բաբելացիների արքայից և նրա երկրից,

ինչպես վրեժխնդիր եղա ասորեստանցիների արքայից։

¹⁹ Իսկ Իսրայելին նորից պատսպարելու եմ իր արոտավայրերում,

նա պիտի արածի Կարմելոսում, Բասանում,

Եփրեմի լեռան վրա և Գաղաադում,

ու նրանց հոգիները պիտի հագուրդ ստանան։

²⁰ Այն օրերին ու այն ժամանակ,- ասում է Տերը,-

Իսրայելի մոտ անօրենություն պիտի փնտրեն,

բայց այլևս այն չի լինելու,

պիտի փնտրեն նաև Հուդայի մեղքերը,

բայց չեն գտնելու,

քանզի ես երկրի վրա

քավություն պիտի տամ նրանց անիրավություններին»։

Բաբելոնի ավերածությունը

²¹ «Դառն զայրույթով հարձակվի՛ր նրա վրա և վրեժխնդի՛ր եղիր նրա բնակիչներից։

Սուրն ու ավերածությունը թող հետապնդեն նրան,- ասում է Տերը.-

ամեն ինչ արա՛ այնպես,

ինչպես պատվիրեցի քեզ։

²² Քաղդեացիների երկրից պատերազմի ձայն է լսվում.

մեծ կոտորած է։

²³ Ինչպե՜ս խորտակվեց ու փշրվեց ամբողջ երկրի մուրճը,

ինչպե՜ս Բաբելոնը ազգերի մեջ ամայի դարձավ։

²⁴ Կհարձակվեն քեզ վրա,

դու կբռնվես, ո՛վ Բաբելոն, և չես իմանա.

ահա գտնվեցիր ու բռնվեցիր,

որովհետև Տիրոջ դեմ դարձար»։

²⁵ Տերը բաց արեց իր պահոցը և հանեց իր բարկության զենքերը,

քանզի Զորությունների Տերն անելիք ունի քաղդեացիների երկրում։

²⁶ Հասել է նրա ժամանակը,

բացե՛ք նրա շտեմարանները,

խուզարկե՛ք նրան քարայրների պես

և սպանե՛ք նրան.

թող նրանից մնացորդներ չլինեն։

²⁷ Չորացրե՛ք նրա բոլոր զավակներին.

թող իջնեն սպանվելու համար.

վա՜յ նրանց, որովհետև հասել է նրանց օրը,

նրանցից վրեժխնդիր լինելու ժամը։

²⁸ Բաբելոնի երկրից փախածների ու փրկվածների ձայնն է հնչում,

որ Սիոնում իմաց տա Տիրոջ՝ մեր Աստծու վրեժխնդրության մասին,

նրա տաճարի վրեժխնդրության մասին։

²⁹ Հրամա՛ն տվեք ամենքին՝ գնալու Բաբելոնի վրա,

բոլոր աղեղնավորներին, թե՝ «Բանա՛կ դրեք դրա շուրջը,

որպեսզի ոչ ոք այդտեղից չփրկվի։

Հատուցե՛ք դրան ըստ իր գործերի,

իր ամբողջ կատարածի համեմա՛տ արեք դրան,

որովհետև ընդդիմացավ Տիրոջը՝

Իսրայելի սուրբ Աստծուն»։

³⁰ «Ահա թե ինչու նրա երիտասարդները պիտի ընկնեն նրա հրապարակներում,

նրա բոլոր կռվող մարդիկ պիտի կոտորվեն այն օրը,- ասում է Տերը։-

³¹ Ահա ես քեզ վրա եմ գալու,-

ասում է Զորությունների Տերը,-

քեզ վրա, ո՛վ դու ամբարտավան,

որովհետև հասել է քո օրը,

քեզնից վրեժխնդիր լինելու ժամանակը։

³² Հպարտությունդ տեղի պիտի տա,

և ոչնչանա.

ոչ ոք այն չի վերականգնի։

Կրակ պիտի վառեմ քո Անտառներում,

որ իր շուրջը եղած ամեն բան պիտի լափի»։

³³ Այսպես է ասում Զորությունների Տերը.

«Բռնության ենթարկվեցին իսրայելացիները,

ինչպես և Հուդայի որդիները,

բոլորն էլ, ովքեր գերեցին նրանց,

բռնությամբ պահեցին ու չկամեցան արձակել նրանց։

³⁴ Նրանց հզոր փրկիչը, որի անունը Տեր Ամենակալ է,

նրա ոսոխների հետ դատաստան պիտի տեսնի,

որպեսզի վերացնի երկիրը և զայրանա Բաբելոնի բնակիչների վրա։

³⁵ Սուրը թող բարձրանա քաղդեացիների վրա,- ասում է Տերը,-

Բաբելոնի բնակիչների վրա,

նրա բոլոր մեծամեծների վրա

ու նրա խորհրդակիցների վրա։

³⁶ Սուրը թող բարձրանա նրա գուշակների վրա,

և թող վերանան նրանք.

թող բարձրանա սուրը նրա պատերազմողների վրա,

և թող լքվեն նրանք։

³⁷ Թող բարձրանա սուրը նրա երիվարների ու կառքերի վրա,

թող բարձրանա սուրը նրանց քաջամարտիկների վրա,

այդտեղ եղած համայն խառնամբոխի վրա,

և թող նրանք դառնան կանանց նման։

Թող բարձրանա սուրը նրա գանձերի վրա,

և դրանք թող հափշտակվեն։

³⁸ Թող բարձրանա սուրը նրա ջրերի վրա,

և թող ամաչեն,

որովհետև իրենց երկիրը կուռքերի երկիր է,

նաև թող բարձրանա կղզիների վրա,

որոնցով նրանք պարծենում էին.

³⁹ դրա համար էլ թող ճիվաղները բնակվեն կղզիներում,

թող հուշկապարիկների դուստրերն ապրեն այնտեղ,

թող այդ երկիրն այլևս իսպառ չվերաշինվի,

թող այնտեղ հավիտյան այլևս բնակվող չլինի։

⁴⁰ Ինչպես Աստված բնաջնջեց սոդոմացիների ու գոմորացիների երկիրը

և նրանց դրացիներին,- ասում է Տերը,-

այդպես էլ թող այնտեղ մարդ չբնակվի,

թող մարդու որդին չպանդխտի այնտեղ։

⁴¹ Ահա հյուսիսից մի զորագունդ է գալիս, մի մեծ ազգ,

նաև բազում թագավորներ ոտքի են ելնելու երկրի ծայրերից՝

⁴² աղեղն ու նիզակը ձեռքներին։

Նրանք հանդուգն են ու անողորմ,

նրանց ձայնը որոտում է ծովի պես,

ձիեր հեծած՝ նրանք պատրաստ են կրակի պես կռվի նետվելու քեզ վրա,

ո՛վ բաբելացիների դուստր։

⁴³ Բաբելացիների արքան երբ նրանց լուրն առավ,

նրա ձեռքերը թուլացան,

նեղությունը ծննդկան կնոջ երկունքի պես տագնապի մեջ գցեց նրան։

⁴⁴ Ահա իբրև առյուծ՝

Հորդանան գետի հորձանքներից դուրս պիտի գա դեպի Եթամա վայրը,

որպեսզի արագորեն հալածեմ նրան այնտեղից

ու բոլոր երիտասարդներին ոտքի հանեմ նրա դեմ։

Ո՞վ է ինձ նման,

ո՞վ կհամարձակվի ելնել իմ դեմ,

ո՞վ է այն հովիվը, որ կկանգնի ինձ հակառակ»։

⁴⁵ Դրա համար լսե՛ք Տիրոջ խորհուրդը,

որ նա խորհել է Բաբելոնի մասին,

նրա խորհուրդը, որ խորհել է քաղդեացի բնակչության մասին։

Մի՞թե չպիտի ոչնչացվեն նրանց հոտի գառները,

մի՞թե արոտները չպիտի ամայանան նրանցից,

⁴⁶ որովհետև Բաբելոնի կործանման ձայնից երկիրը պիտի ցնցվի,

նրա բոթը պիտի լսվի ազգերի մեջ։

51(28)

Կործանարար քամի Բաբելոնի դեմ

¹ Այսպես է ասում Տերը.

«Ահա ես Բաբելոնի վրա և նրա բնակիչների վրա

պիտի բերեմ զայրույթով լցված մի սիրտ,

կործանարար հողմ ու խորշակ։

² Անարգողներ պիտի ուղարկեմ Բաբելոն.

թող նախատեն նրան և ապականեն նրա երկիրը,

քանզի Բաբելոնի վրա նրա չարչարանքի օրը ամեն կողմից վայ է գալու»։

³ Ով լարելու է, թող լարի իր աղեղը,

և ով զրահ ունի, թող վերցնի այն։

Մի՛ խնայեք նրա երիտասարդներին,

ոչնչացրե՛ք նրա ողջ զորությունը։

⁴ Վիրավորները պիտի թափվեն քաղդեացիների երկրում,

իսկ նրա շուրջը՝ խոցվածները,

⁵ քանի որ Իսրայելը և Հուդան

իրենց Աստծուց և Տեր Ամենակալից չայրիացան,

թեև նրանց երկիրն Իսրայելի սրբությունների դեմ անիրավություններով լցվեց։

⁶ Փախե՛ք Բաբելոնի միջից,

թող ամեն մեկն իրեն փրկի,

որպեսզի չկործանվեք նրա անիրավությունների պատճառով,

քանզի հասել է ժամանակը,

երբ Տերը նրանից վրեժխնդիր է լինելու,

ինքն է հատուցելու նրա պատիժը։

⁷ Բաբելոնը Տիրոջ ձեռքին ոսկի բաժակ է,

որն իր գինուց արբեցնում է ամբողջ երկիրը.

խմեցին հեթանոսները,

և սասանվեցին ազգերը,

⁸ և Բաբելոնը հանկարծակի վայր ընկավ ու փշրվեց։

Ողբացե՛ք նրա վրա,

նրա վերքերին դե՛ղ արեք.

թերևս բժշկվի։

⁹ Փորձեցինք բուժել Բաբելոնին, բայց նա չբժշկվեց,

թողնենք նրան և յուրաքանչյուրս գնանք մեր երկիրը,

որովհետև նրա դատաստանը մինչև երկինք հասավ,

բարձրացավ մինչև աստղերը,

¹⁰ և Տերը պատժեց նրանց։

Եկե՛ք Սիոնում պատմենք Տիրոջ՝ մեր Աստծու գործերը։

¹¹ Պատրաստե՛ք աղեղները,

լցրե՛ք կապարճները,

քանի որ Տերն արթնացրեց մարերի թագավորի հոգին,

քանի որ նրա բարկությունը Բաբելոնի վրա է.

պիտի ջնջի նրան,

քանզի Տիրոջ վրեժխնդրությունն է դա,

նրա տաճարի վրեժխնդրությունը։

¹² Բաբելոնի պարիսպների վրա դրո՛շ կանգնեցրեք,

պահապաննե՛ր կարգեք,

արթնացրե՛ք առաջապահներին,

զենքերը պատրաստե՛ք,

քանզի Տերը ձեռնամուխ եղավ անելու այն,

ինչ ասել է Բաբելոնի բնակիչների մասին,

¹³ որոնք ապրում են հորդառատ ջրերի մոտ

և նստում անթիվ գանձերի վրա։

Հասել է քո վախճանը, արդարև այն ստուգապես քո փորն է մտել։

¹⁴ Զորությունների Տերը երդվեց իր բազկով.

«Քեզ լցնելու եմ զորքով՝ իբրև մորեխով,

նրանք իջնելու են քեզ մոտ

և աղաղակ են բարձրացնելու քեզ վրա»։

Փառաբանության երգ

¹⁵ Նա իր զորությամբ ստեղծեց երկիրը,

իր իմաստությամբ հիմնեց տիեզերքը,

իր հանճարով տարածեց երկինքը,

¹⁶ իր հրամանով երկնքում տեղավորեց շառաչող ջրերի առատությունը.

նա երկրի ծագերից ամպեր է հանում,

փայլատակումներ առաջացնում անձրևների ժամանակ,

լույս է հանում իր շտեմարաններից։

¹⁷ Յուրաքանչյուր մարդ խելակորույս դարձավ,

բոլոր ոսկերիչներն իրենց կուռքերի պատճառով ամոթահար եղան,

որովհետև սուտ բաներ ձուլեցին,

նրանց մեջ հոգի չկա.

¹⁸ սնոտի ու խայտառակ գործեր են.

երբ ես իրենց այցելության գնամ,

կորստյան են մատնվելու։

¹⁹ Այդպիսին չէ Հակոբի բաժինը.

նրա բաժինը և նրա ժառանգության գավազանը նա է, ով ստեղծեց ամենայն ինչ,

և նրա անունը Զորությունների Տեր է։

Բաբելոնի վախճանը

²⁰ «Դու ինձ համար ցիրուցան պիտի անես պատերազմական զենքերդ,

իսկ ես քո միջոցով ցիրուցան պիտի անեմ ազգերին,

քո միջից վերացնեմ թագավորներին,

²¹ քեզնով պիտի ոչնչացնեմ նրանց այրուձին,

ոչնչացնեմ նրանց կառքերն ու հեծյալներին։

²² Քո միջոցով պիտի ոչնչացնեմ տղամարդուն ու կնոջը,

քեզնով պիտի ոչնչացնեմ ծերին ու երիտասարդին,

քեզնով պիտի ոչնչացնեմ տղային ու աղջկան։

²³ Քո միջոցով պիտի ոչնչացնեմ հովվին ու նրա հոտը,

քեզնով պիտի ոչնչացնեմ հողագործին ու նրա հողագործությունը,

քեզնով պիտի ոչնչացնեմ քո զորավարներին ու զորագլուխներին։

²⁴ Բաբելոնին և քաղդեացի բնակիչներին

պիտի փոխհատուցեմ այն բոլոր չարիքների համար,

որ ձեր աչքի առաջ գործեցին Սիոնի նկատմամբ,- ասում է Տերը։-

²⁵ Ահա ես քո դեմ եմ, ո՛վ դու կործանիչ լեռ,- ասում է Տերը,-

դու, որ կործանում էիր ամբողջ երկիրը.

իմ ձեռքը քեզ վրա եմ երկարելու

և քեզ ժայռերից ներքև եմ գլորելու,

քեզ վերածելու եմ խանձված լեռան։

²⁶ Եվ այլևս քեզնից չեն վերցնելու

ո՛չ անկյունաքար, ո՛չ էլ հիմքի քար,

որովհետև դու հավիտյան պիտի լինես ապականության մեջ,- ասում է Տերը։

²⁷ Դրո՛շ բարձրացրեք երկրի վրա,

փո՛ղ փչեք բոլոր ազգերի մեջ,

զորագնդե՛ր կանչեք նրա դեմ։

Իմ կողմից հրամա՛ն տվեք

Այրարատյան թագավորություններին և Ասքանազյան գնդին,

նրա շուրջը նետաձիգ սարքե՛ր կանգնեցրեք,

հարձակվե՛ք նրանց վրա։

Շարժվեց ու տանջվեց երկիրը,

որովհետև Բաբելոնի վրա հասավ Տիրոջ խորհուրդը,

և երիվարները հասան իբրև մորեխի բազմություն։

²⁸ Նրա վրա՛ հրավիրեք ազգերին և մարերի թագավորին,

նրա զորավարներին ու նրանց բոլոր զորագլուխներին,

երկրի բոլոր իշխանություններին՝

²⁹ ավերածության ենթարկելու համար բաբելացիների երկիրը,

որպեսզի այնտեղ բնակություն չլինի։

³⁰ Բաբելոնի քաջամարտիկները պատերազմից հետ կանգնեցին,

մնացին պաշարման մեջ,

բեկվեց նրանց զորությունը,

նրանք դարձան կանանց նման, հրդեհի մատնվեցին նրանց տները,

ջարդվեցին դրանց փականքները։

³¹ Փախչողը փախչողի պիտի պատահի,

գուժկանը պիտի հանդիպի գուժկանի՝

բոթը տալու բաբելացիների թագավորին,

թե նրա քաղաքը գրավված է,

³² ելքերը բռնված են չորս կողմից,

բնակիչները կրակի մեջ այրվել են,

իսկ պատերազմող մարդիկ խույս են տվել դեպի դարպասները»։

³³ Այսպես է ասում Զորությունների Տերը՝ Իսրայելի Աստվածը.

«Բաբելացիների տունը պիտի կալսվի հասուն օրանի նման,

մի քիչ ևս, և կգա նրա հնձի ժամանակը»։

³⁴ «Կերավ ինձ, հասավ ինձ վրա,

բաժանեց ինձ բաբելացիների Նաբուքոդոնոսոր արքան,

ինձ դարձրեց կարծես մի դատարկ աման,

վիշապի նման ինձ կուլ տվեց,

իր փորը լցրեց իմ փափկություններով։ Հեռացան իմ տանջանքները,

³⁵ և ինձ հասած տառապանքները Բաբելոնին հասան»,- պիտի ասի Սիոնի բնակիչը։

«Իմ արյունը քաղդեացի բնակիչների վրա՛ թող լինի»,- պիտի ասի Երուսաղեմը։

³⁶ Դրա համար էլ այսպես է ասում Տերը.

«Ահա ես պիտի դատեմ քո ոսոխին

և պիտի առնեմ քո վրեժը,

պիտի ավերեմ նրա ծովը

և ցամաքեցնեմ նրա աղբյուրները։

³⁷ Բաբելոնը բլուրների պիտի վերածվի, վիշապների բնակավայրի,

ավերածության ու ծաղրանքի,

բնակելի չպիտի լինի։

³⁸ Նրանց բոլոր որդիները պատրաստվեցին իբրև առյուծներ,

իբրև առյուծի կորյուններ.

³⁹ իրենց տաք անկողինների մեջ՝ նրանց արհավիրք եմ բերելու,

հարբեցնելու եմ նրանց,

որ թմրեն ու ննջեն հավիտենական քնով

և չարթնանան,- ասում է Տերը։-

⁴⁰ Իջեցրո՛ւ, մորթելո՛ւ տար նրանց որպես ոչխարների,

որպես խոյերի ու այծերի»։

Ողբ Բաբելոնի վրա

⁴¹ Ինչպե՜ս պարտության մատնվեցիր, ո՛վ Սիսակ,

ինչպե՜ս որսի պես բռնվեցիր, ո՛վ դու պարծանքդ ամենայն երկրի։

Ինչպե՜ս Բաբելոնն ամայացավ հանուր ազգերի մեջ։

⁴² Իր ալիքների գոչյունով ծովը բարձրացավ Բաբելոնի վրա,

և նա ծածկվեց։

⁴³ Նրա քաղաքները դարձան ավեր,

անջուր երկիր ու անապատ,

որտեղ ոչ ոք չի բնակվելու,

որտեղ մարդու որդին կանգ չի առնելու։

⁴⁴ «Բաբելոնում վրեժխնդիր պիտի լինեմ Բելից,

և ինչ որ նա կուլ տվեց,

նրա բերանի՛ց պիտի հանեմ։

Ազգերն այլևս նրա մոտ չեն հավաքվի։

Բաբելոնի պարիսպներն էլ խորտակվեցին։

⁴⁵ Դո՛ւրս արի նրա միջից, ո՛վ իմ ժողովուրդ,

ամեն մեկդ ձեր ա՛նձը փրկեք Տիրոջ ցասումից ու բարկությունից։

⁴⁶ Թող երբեք չահաբեկվեն ձեր սրտերը,

մի՛ վախեցեք այն լուրերից, որ կլսեք երկրում,

որովհետև նույն տարում պիտի գա մի լուր,

իսկ հաջորդ տարում՝ այլ լուր,

և անիրավություն պիտի լինի երկրում,

խայտառակություն՝ խայտառակության վրա։

⁴⁷ Դրա համար ահա օրեր պիտի գան,- ասում է Տերը,-

երբ ես պիտի պատժեմ բաբելացիների կուռքերին,

և նրա ողջ երկիրն ամոթով պիտի մնա,

նրա բոլոր վիրավորները պիտի ընկնեն նրա մեջ։

⁴⁸ Այն ժամանակ Բաբելոնի վրա պիտի ցնծան երկինք ու երկիր

և նրանցում եղած ամեն ինչ,

քանի որ հյուսիսից պիտի գան նրան թշվառացնողները,-

ասում է Տերը,-

⁴⁹ և ամբողջ երկրի վիրավորները պիտի ընկնեն Բաբելոնում»։

Աստծու պատգամը Բաբելոնի իսրայելացիներին

⁵⁰ Ելե՛ք այդ երկրից, ո՛վ փրկվածներ,

մի՛ մնացեք, հիշե՛ք Տիրոջը, ո՛վ դուք հեռավորներ,

և թող Երուսաղեմը ձեր միտքը գա։

⁵¹ Ամոթահար եղանք, որովհետև լսեցինք մեր նախատինքը,

մեր անարգանքը ծածկեց մեր երեսը,

այլազգիները Տիրոջ տուն՝ մեր սրբարան ներխուժեցին։

⁵² «Դրա համար ահա օրեր են գալու,- ասում է Տերը,-

ու ես վրեժխնդիր եմ լինելու նրա կուռքերից,

ամբողջ երկրում ընկնելու են վիրավորները։

⁵³ Եվ եթե Բաբելոնը միչև իսկ երկինք բարձրանա

և այնտեղ հաստատվի ամրությամբ,

միևնույն է, իմ կողմից կործանողներ պիտի գան նրա համար»,- ասում է Տերը։

Բաբելոնի ավերումը

⁵⁴ «Բոթն է հնչում Բաբելոնում,

մեծ կոտորած է քաղդեացիների երկրում,

⁵⁵ քանզի Տերն ավերեց Բաբելոնը

և այնտեղից չքացրեց նրա բարձր ձայնը՝

նրա ալիքների գոչյունը,

կարծես բազում ջրեր ձայնեցին նրա կործանման մասին։

⁵⁶ Բաբելոնի վրա հասավ թշվառությունը,

նրա սպառազեն մարդիկ բռնվեցին,

նրա աղեղնավորները զարհուրեցին։

Չէ՞ որ Աստված հատուցանող է.

Տերն ինքը պիտի հատուցի նրա պատիժը

⁵⁷ և սաստիկ հարբեցնի նրա զորավարներին

ու նրա իմաստուններին,

նրա իշխաններին,

նրա զորագլուխներին

ու նրա զորավոր մարդկանց.

նրանք պիտի ննջեն հավիտենական քնով ու չարթնանան»,-

ասում է արքան, որի անունը Տեր Ամենակալ է։

⁵⁸ Այսպես է ասում Զորությունների Տերը.

«Լայն էր Բաբելոնի պարիսպը,

բայց նա կործանվելով պիտի կործանվի,

նրա բարձր դարպասները հրով պիտի այրվեն,

ժողովուրդները զուր չարչարվեցին,

և ազգերն սկզբից ևեթ պիտի ոչնչանային»։

Երեմիայի պատգամը ուղարկվում է Բաբելոն

⁵⁹ Այն խոսքը, որ Տերը պատվիրեց Երեմիա մարգարեին՝ ասելու Մաասիայի որդի Ներիայի որդի Սարեային, երբ սա Հուդայի Սեդեկիա արքայի կողմից նրա թագավորության չորրորդ տարում գնում էր Բաբելոն։ Սարեան նրա գանձապետն էր։ ⁶⁰ Երեմիան մի մատյանի մեջ նկարագրեց այն բոլոր չարիքները, որ գալու էին Բաբելոնի վրա, այսինքն՝ Բաբելոնի մասին գրված այս բոլոր բաները։ ⁶¹ Երեմիան ասաց Սարեային. «Երբ Բաբելոն գնաս և նայես ու կարդաս այս բոլոր բաները, ⁶² կասես. “Տե՛ր, դու խոսեցիր այս վայրի մասին, որ բնաջնջես սա, որ այստեղ այլևս բնակիչ չմնա՝ մարդուց մինչև անասուն, որ հավիտյան ամայություն լինի”։ ⁶³ Իսկ երբ վերջացնես այդ մատյանի ընթերցումը, քար կկապես դրան, կգցես Եփրատի մեջ ⁶⁴ ու կասես. “Թող Բաբելոնն այսպես ընկղմվի ու չբարձրանա այն չարիքներից, որ ես բերելու եմ նրա վրա”»։

Երեմիա մարգարեի խոսքերն այստեղ վերջանում են։

52

Նաբուքոդոնոսորը կալանավորում է Սեդեկիային

Այս խոսքերը Թագավորների չորրորդ գրքից են[69]։

¹ Քսանմեկ տարեկան էր Սեդեկիա արքան, երբ թագավոր դարձավ։ Տասնմեկ տարի թագավորեց Երուսաղեմում։ Նրա մոր անունն Ամիտաալ էր. սա դուստրն էր Երեմիայի, որը Լուբենայից էր։ ² Սեդեկիան Տիրոջ առաջ չարիք գործեց, ինչպես Հովակիմն էր գործել։ ³ Տերը զայրացել էր Երուսաղեմի և Հուդայի վրա այն աստիճան, որ նրանց իր աչքից գցեց. Սեդեկիան ապստամբեց բաբելացիների արքայի դեմ։

⁴ Նրա թագավորության իններորդ տարում՝ տասներորդ ամսին, ամսի տասին, բաբելացիների Նաբուքոդոնոսոր արքան իր ամբողջ զորքով եկավ Երուսաղեմ և պաշարեց այն։ Նրա շուրջը քառակուսի քարերից բարձր պատնեշ կանգնեցրեց։ ⁵ Մինչև Սեդեկիա արքայի տասնմեկերորդ տարին քաղաքն ընկավ նեղության մեջ։

⁶ Չորրորդ ամսին, երբ ամսի ինն էր, քաղաքում սաստկացավ սովը. հաց չկար, որ երկրի բնակչությունն ուտեր։ ⁷ Քաղաքի պարիսպը ճեղք տվեց, բոլոր կռվող մարդիկ փախուստի դիմեցին և գիշերով, երբ քաղդեացիները քաղաքի շուրջն էին, ներքին և արտաքին պարիսպների մեջ ընկած դարպասի ճանապարհով, արքունի պարտեզի կողմով դուրս եկան քաղաքից և շարժվեցին դեպի Արաբա տանող ճանապարհով։ ⁸ Քաղդեացիների թագավորի զորքերը հետապնդեցին և Երիքովից այն կողմ հասան Սեդեկիա արքային, իսկ նրա բոլոր ծառաները թողեցին հեռացան նրանից։ ⁹ Բռնեցին թագավորին և բերեցին Դեբլաթա, Եմաթի երկիրը, բաբելացիների արքայի մոտ, որը նրա հետ դատաստան տեսավ։ ¹⁰ Բաբելացիների արքան Սեդեկիայի առաջ կոտորեց նրա որդիներին, Դեբլաթայում կոտորեց նաև Հուդայի բոլոր իշխաններին, ¹¹ Սեդեկիայի աչքերը կուրացրեց և ձեռքերը կապեց շղթաներով։ Բաբելացիների արքան տարավ նրան Բաբելոն և մինչև նրա մահվան օրը նրան պահեց ջրաղացի մեջ։

Տիրոջ տաճարի կործանումը

¹² Հինգերորդ ամսին, ամսի տասին,- դա բաբելացիների Նաբուքոդոնոսոր արքայի տասնիններորդ տարին էր,- բաբելացիների արքայի թիկնազորի պետ Նաբուզարդան դահճապետը եկավ, ¹³ կրակի մատնեց Տիրոջ տունը և արքունի ապարանքները, քաղաքի բոլոր տներն ու բոլոր մեծամեծ պալատները հրով այրեց, ¹⁴ իսկ քաղդեացի բոլոր զորքերը, որոնք եկել էին դահճապետի հետ, Երուսաղեմի պարիսպներն ամբողջապես շուրջանակի քանդեցին։ ¹⁵ Բայց ժողովրդի չքավոր մասին ու թափթփուկներին, որոնք մնացել էին քաղաքում, ինչպես և փախստականներին, որոնք փախել էին բաբելացիների արքայի մոտ, և մնացած բազմությանը Նաբուզարդան դահճապետը ձեռք չտվեց։ ¹⁶ Երկրի աղքատների մի մասին Նաբուզարդան դահճապետը թողեց այգեգործներ ու հողագործներ լինելու համար։

¹⁷ Տիրոջ տան պղնձե սյուներն ու խարիսխները և պղնձե մեծ ավազանը, որ Տիրոջ տան մեջ էր, քաղդեացիները ջարդեցին և ամբողջ պղինձը տարան Բաբելոն։ ¹⁸ Դահճապետն առավ նաև եռոտանիներն ու վերնախարիսխները, պսակներն ու տաշտերը, մսի պատառաքաղներն ու պղնձե ամանեղենը, որոնցով սպասարկում էին։ ¹⁹ Դահճապետն առավ նաև կոնքերն ու թաղարները, քամիչներն ու աշտանակները, խնկամաններն ու տուփերը. որը ոսկի էր, վերցրեց իբրև ոսկի, որն արծաթ էր՝ իբրև արծաթ։

²⁰ Սյուները երկուսն էին, մեծ ավազանը՝ մեկը. իսկ ավազանի տակ տասներկու ցուլեր կային, որոնք Տիրոջ տան մեջ շինել էր Սողոմոն արքան։ Իսկ պղնձին ու պղնձե բոլոր անոթներին հաշիվ չկար։ ²¹ Սյուներից ամեն մեկի բարձրությունը երեսունհինգ կանգուն էր, որոնցից յուրաքանչյուրի շուրջը տարածվում էր տասներկու կանգուն երկարությամբ շղթա՝ չորս մատ հաստությամբ։ ²² Նրանց գլխին պղնձե խոյակներ կային, ամեն մի խոյակի բարձրությունը՝ հինգ կանգուն. խոյակի մակերեսը շուրջանակի բոլորում էին ցանցակերպ և նռնաձև զարդերը՝ բոլորն էլ պղնձից։ Նույն ձևի էր և երկրորդ սյունինը, տասներկու կանգուններից ամեն մի կանգունը՝ ութ նռնազարդով։ ²³ Նռնազարդերի թիվը մի կողմի վրա իննսունվեց էր, իսկ բոլոր նռնազարդերը շուրջանակի ցանցի վրա հարյուր հատ էին։

Հուդայի երկրի ժողովուրդը գերի է տարվում Բաբելոն

²⁴ Դահճապետը բռնեց Սարեային՝ գլխավոր քահանային, Սոփոնիային՝ երկրորդ քահանային, ու երեք դռնապանների։ ²⁵ Այդ քաղաքից ձերբակալեց նաև մի ներքինու, որ պատերազմող մարդկանց զորապետն էր, և յոթ անվանի մարդկանց, որոնք թագավորի առջև նրա սպասին էին կանգնում և որոնց գտան քաղաքում, ինչպես և ատենադպրին՝ զորքի իշխանին, երկրի ժողովրդի ատենադպրին ու երկրի բնակչությունից վաթսուն մարդու, որոնց գտան քաղաքում։ ²⁶ Նաբուզարդան դահճապետն առավ նրանց ու տարավ բաբելացիների արքայի մոտ՝ Դեբլաթա։ ²⁷ Բաբելացիների արքան մահվան դատապարտեց նրանց ու սպանեց Դեբլաթայում՝ Եմաթի երկրում։ Հուդայի ժողովուրդն իր երկրից գերեվարվեց։

²⁸ Սրանք են թվերը նրանց, որոնց գերեց Նաբուքոդոնոսոր արքան. յոթերորդ տարում՝ երեք հազար քսաներեք հրեա, ²⁹ Նաբուքոդոնոսորի տասնութերորդ տարում Երուսաղեմից տարան ութ հարյուր երեսուներկու հոգի, ³⁰ Նաբուքոդոնոսորի քսաներեքերորդ տարում Նաբուզարդան դահճապետը հրեաներից գերեվարեց յոթ հարյուր քառասունհինգ հոգի, բոլորը միասին՝ չորս հազար վեց հարյուր հոգի։

³¹ Հուդայի արքա Հովակիմի գերության երեսունյոթերորդ տարին էր, տասներկուերորդ ամիսը, ամսի քսանչորսը, երբ բաբելացիների Ուլմարովդաք արքան իր թագավոր դարձած տարին պատվի արժանացրեց Հուդայի արքա Հովակիմին. նրան հանեց այն տնից, որտեղ նա գտնվում էր հսկողության տակ, ³² նրա հետ քաղցրությամբ խոսեց և նրա բարձն ավելի վեր դրեց, քան այն թագավորների բարձերը, որոնք Բաբելոնում նրա մոտ էին։ ³³ Փոխեց բանտի նրա պատմուճանը, և նա ինչքան ժամանակ որ ապրեց, ամեն օր միշտ արքայի մոտ էր հաց ուտում։ ³⁴ Նրա համար սահմանվեց մշտական ռոճիկ, որը նրա կյանքի ամբողջ ընթացքում բաբելացիների արքայի կողմից տալիս էին նրան օրըստօրե՝ մինչև նրա մահվան օրը։

ՈՂԲ ԵՐԵՄԻԱ ՄԱՐԳԱՐԵԻ

1

Իսրայելի գերությունից և Երուսաղեմի ավերածությունից հետո էր, երբ Երեմիան նստել լաց էր լինում և այս ողբն ասում Երուսաղեմի վրա։

Երուսաղեմը՝ լքված որբևայրի

¹ Ալեֆ Ինչպե՜ս զատվեց ու նստեց միայնակ՝

քաղաքը բազմամարդ,

տրտմությամբ լցված որբևայրի մի կին դարձավ հեթանոսների մեջ.

երկրի իշխանը հարկատու դարձավ։

² Բեթ Նա գիշերը դառնորեն լաց եղավ.

արցունքներ կան նրա ծնոտներին։

Այդ օրը նրա սիրելիների մեջ չգտնվեց մեկը,

որ մխիթարիչ լիներ նրան.

նրա բոլոր բարեկամներն անարգեցին նրան ու թշնամիներ դարձան։

³ Գիմել Հուդան մատնվեց գերության,

բազում տառապանքների,

նեղության, ստրկության ու ծառայության.

նա նստեց հեթանոսների մեջ և հանգիստ չգտավ.

թշնամական պաշարման մեջ՝ բոլոր հալածիչները նրա վրա հասան։

⁴ Դալեթ Սիոնի ճանապարհները սուգ բռնեցին,

որովհետև նրա տարեկան տոներին եկողներ չկան։

Նրա դարպասներն ամայացան,

նրա քահանաները հեծում,

հառաչում ու հոգոց են հանում։

Նրա կույսերը գերեվարվեցին,

իսկ ինքն էլ դառնացած է իր հոգում։

⁵ Հեյ Նրան նեղողները կանգնեցին նրա գլխին,

նրա թշնամիներն ուրախության մեջ են,

քանի որ Տերը խոնարհեցրեց նրան նրա բազմաթիվ ամբարշտությունների համար.

նրա մանուկները, նեղողների առաջն ընկած, գերի քշվեցին։

⁶ Վավ Սիոնի դուստրերի ամբողջ վայելչությունը վերացավ.

նրանց իշխանները նմանվեցին այն խոյերին,

որոնք կեր չեն գտնում.

նրանք իրենց այնքան ցանկալի իրերը տվեցին կերակուրների համար,

որպեսզի հագեցնեն իրենց մարմինները։

Գնում էին նրանք մտամոլոր,

նեղողների առաջն ընկած,

հալածիչներից քշված։

⁷ Զայն Երուսաղեմը հիշեց իր տառապանքի օրը և օրն իր բաժանումի,

թախծեց այն բոլոր փափագելի բաների համար,

որոնց արժանացել էր սկզբում։

Երբ ժողովուրդը թշնամիների ձեռքն ընկավ,

ոչ ոք չկար, որ օգներ նրան,

տեսան դա նրա ատելիները,

քամահրեցին ու ծաղրեցին նրա գերությունը։

⁸ Խեթ Մեղք գործեց Երուսաղեմը,

դրա համար էլ նրան մեծարողները խայտառակեցին նրան,

քանզի տեսան նրա անարգանքը,

և նա ինքն էլ հետ դառնալով հոգոց էր հանում։

⁹ Տեթ Նրա պղծությունն իր ոտքերի առաջ էր,

սակայն նա իր վախճանի մասին չմտածեց.

առատորեն արցունք թափեց,

բայց ոչ ոք չկար, որ մխիթարեր նրան։

Նայի՛ր տառապանքներիս, ո՛վ Տեր,

քանզի թշնամիներս հպարտացան իմ դեմ։

¹⁰ Յոդ Թշնամին իր ձեռքը երկարեց իմ գանձերին։

Ես տեսա հեթանոսներին,

որոնք մտան քո սրբարանը,

մինչդեռ նրանց հրամայել էիր,

որ քո ժողովրդի սրբավայրը չմտնեն։

¹¹ Կաֆ Ամբողջ ժողովուրդը հաց էր փնտրում ու հառաչում.

ամեն բան, ինչ թանկ էր նրան,

տվեց հացի դիմաց, որպեսզի պահի իրեն։

Նայի՛ր, ո՛վ Տեր, և տե՛ս,

որ ես դարձա անարգված։

¹² Լամեդ Ձե՛զ եմ ասում, ձե՛զ, ո՛վ անցորդներ,

հե՛տ դարձեք, նայե՛ք ու տեսե՛ք՝

ինձ հասած ցավերի նման ցավեր եղե՞լ են արդյոք.

Տերը ձայնը բարձրացրեց ինձ վրա

և իր բարկության ու ցասման ժամին խոնարհեցրեց ինձ։

¹³ Մեմ Իր բարձունքից կրակ ուղարկեց իմ ոսկորներին,

ցանց գցեց իմ ոտքերին և ինձ հետ շպրտեց,

կործանեց իմ անձը՝ հանապազօրյա տառապանքի ու տրտմության մեջ։

¹⁴ Նուն Տերը կանխավ ասաց ինձ իմ ամբարշտության մասին,

իր ձեռքը գցեց և իմ պարանոցին ծանրացրեց իր լուծը.

իմ զորությունը տկարացավ։

Տերն ինձ մատնեց իմ ցավերին, ու ես չեմ կարողանում հանդարտվել։

¹⁵ Սամեխ Նա ջնջեց իմ միջից իմ ընտիր-ընտիր զորավորներին,

իմ ընտրյալների կոտորածի ժամն ազդարարեց.

Տերը, ինչպես հնձանում, ճզմեց կույսին՝ Հուդայի դստերը։

Այն Ահա թե ինչու եմ ինձ լացի տվել։

¹⁶ Աչքն իմ արցունք թափեց,

քանզի նրանք, ովքեր իմ մխիթարիչներն էին

և իմ հոգին ինձ էին վերադարձնում,

հեռացան ինձնից։

Իմ որդիները մատնվեցին կործանման,

որովհետև թշնամիներս զորացան։

¹⁷ Պե Սիոնն իր բազուկները տարածեց առ Աստված,

բայց չկար ոչ ոք, որ մխիթարեր նրան։

Նրա շուրջը նրան նեղողներն են.

նրանց մեջ Երուսաղեմը մի նողկալի կին դարձավ։

¹⁸ Ցադե Արդար է Տերը,

ես դառնացրի նրան։

Ո՜վ ժողովուրդներ, բոլորդ լսե՛ք այս

և տեսե՛ք իմ ցավերը.

իմ օրիորդներն ու երիտասարդները քշվեցին գերության։

¹⁹ Քոֆ Ես կանչեցի իմ սիրեկաններին,

բայց նրանք արհամարհեցին ինձ.

իմ քահանաներն ու երեցներն այստեղ՝ քաղաքում, մեռան.

կերակուր փնտրեցին կենդանի մնալու համար,

սակայն չգտնվեց։

²⁰ Ռեշ Նայի՛ր, Տե՛ր, ես նեղության մեջ եմ.

ոսկորներս հալումաշ եղան,

սիրտս մեջս տրորվեց, դառնացած եմ։

Դրսից սուրն ինձ անժառանգ դարձրեց,

ինչպես մահը՝ ներսից։

²¹ Շին Լսե՛ք, լսե՛ք այս.

ես հեծում ու հառաչում եմ,

և ոչ ոք չկա, որ մխիթարի ինձ։

Իմ բոլոր թշնամիներն իմացան

իմ վրա եկած չարիքների մասին

և ոտնահարեցին ինձ,

քանզի դո՛ւ ստեղծեցիր այդ օրը,

դո՛ւ կանչեցիր այդ ժամանակը,

որ վայը գա ինձ վրա։

²² Տավ Բոլոր չար գործերը թող կանգնեն քո առաջ,

և դու ճռաքա՛ղ արա նրանց այնպես,

ինչպես ճռաքաղ արեցիր ինձ իմ բոլոր մեղքերի համար,

քանզի անթիվ են իմ հառաչանքները,

և սիրտն իմ լի է տրտմությամբ։

2

Ողբ ժողովրդի դստեր մասին

¹ Ալեֆ Ինչպե՜ս խավարեցրեց Տերը Սիոնի դստերը իր ցասումով ու բարկությամբ,

Իսրայելի փառքը երկնքից երկիր նետեց

և չհիշեց իր ոտքերի պատվանդանը։

Բեթ Իր ցասման ու բարկության օրը

² Տերն անխնա խորտակեց Հակոբի տան գեղեցկությունը,

քանդեց ու չխնայեց,

Հուդայի դստեր ամրոցները գետնին հավասարեցրեց,

անարգեց նրանց իշխաններին ու թագավորներին։

³ Գիմել Տերն իր ցասման ու բարկության օրը

փշրեց Իսրայելի բոլոր եղջյուրները

և նրան հետ շպրտեց իր թշնամիների առաջ։

Կրակը պատեց Հակոբին,

լափեց ու ոչնչացրեց ամեն բան, ինչ կար նրա շուրջը։

⁴ Դալեթ Նրա գիրկը մտավ իբրև թշնամի,

իր աջը հաստատեց նրա վրա

և սպանեց Սիոնի դստեր բոլոր սիրելիներին,

իր ցասումն ու բարկությունը կրակի պես թափեց նրա վրա։

⁵ Հեյ Տերը, իբրև թշնամի, կործանեց Իսրայելը,

կործանեց նրա թագավորին,

կործանեց նրա բոլոր ամրոցները

և Հուդայի դստեր տառապանքներին տառապանքներ ավելացրեց։

⁶ Վավ Այգու պես հատեց նրա վրանները,

վերացրեց նրա տարեկան տոները.

Տերը մոռացության տվեց տարեկան այն տոներն ու շաբաթները,

որ կատարում էր Սիոնը.

իր բարկության պահին մռնչալիս

տագնապի մատնեց թագավորներին,

իշխաններին ու քահանաներին։

⁷ Զայն Տերը մերժեց իր զոհասեղանը,

հեռու վանեց իր սրբությունները,

կործանեց իր տաճարների պարիսպներն ու աշտարակները.

Տիրոջ Տան մեջ թշնամիները աղմկեցին ու գոչեցին,

ինչպես նրա տարեկան տոների օրերին։

⁸ Խեթ Սիոնի դստեր պարիսպն ընկավ ու կործանվեց.

չափալարը քաշեցին և բաց չթողեցին իրենց ձեռքերից.

աշտարակները սուգ մտան,

և բոլոր պարիսպները ցնցվեցին ու կործանվեցին։

⁹ Տեթ Նրա դռները տապալեցին,

խորտակեցին նրա նիգերը։

Նրանց թագավորներն ու իշխանները հեթանոսների մեջ էին.

օրենք ու մարգարեներ չկային,

չկային և նրանք, ովքեր տեսիլքներ էին տեսնում Տիրոջ կողմից։

¹⁰ Յոդ Իջան ու գետնին հավասարվեցին։

Սիոնի դստեր ծերերը պապանձվեցին,

հող ցանեցին իրենց գլխին,

քուրձ հագան։

Երուսաղեմի կույսերի իշխաններին գետնին տապալեցին։

¹¹ Կաֆ Իմ ժողովրդի դստեր կործանման համար

արցունք թափելուց աչքերիս լույսը խավարեց,

որովայնս տակնուվրա եղավ,

փառքս հողին հավասարվեց,

քանզի քաղաքի բոլոր փողոցներում մեռնում են ծծկեր մանուկները։

¹² Լամեդ Նրանք հաց ու գինի էին խնդրում իրենց մայրերից,

մինչ քաղաքի մեջ ընկած ու ցրված՝

մեռնում, իրենց հոգիներն էին ավանդում։

¹³ Մեմ Քո մասին ի՞նչ վկայություն բերեմ

կամ քեզ ո՞ւմ նմանեցնեմ,

դո՛ւստր Երուսաղեմի.

ո՞վ պիտի մխիթարի քեզ, Սիոնի կո՛ւյս աղջիկ.

ծանրացավ քո վշտի բաժակը,

ո՞վ է, որ պիտի կարողանա բժշկել քեզ։

¹⁴ Նուն Մարգարեները զուր, խաբուսիկ ու անշահ տեսիլքներ տեսան քեզ համար

և քեզ չհայտնեցին քո անիրավությունները,

որ կարողանայիր վերադառնալ քո գերությունից,

այլ քեզ տվեցին սնոտի առասպելներ

քո բնակավայրից հեռանալու մասին։

¹⁵ Սամեխ Բոլոր անցորդները ծափ զարկեցին,

սուլում էին ու շարժում իրենց գլուխները Սիոնի դստեր վրա.

«Ա՞յս է այն քաղաքը,- ասում էին,-

որ ամբողջ երկրի փառքի պսակն էր և ուրախությունը»։

¹⁶ Պե Քո բոլոր թշնամիներն իրենց բերանները բացեցին քեզ վրա,

սուլում էին և կրճտում իրենց ատամները՝ ասելով.

«Եկեք կո՛ւլ տանք սրան. չէ՞ որ սա այն օրն է, որին սպասում էինք.

ահավասիկ տեսանք, գտանք ու հասանք նրան»։

¹⁷ Այն Տերն ինչ խոսել էր՝ արեց,

կատարեց իր ասածները,

ինչ պատվիրել էր հին օրերում.

քանդեց ու չխնայեց,

քո թշնամիներին քեզ վրա ծիծաղել տվեց

և բարձրացրեց քեզ նեղողների եղջյուրը։

¹⁸ Ցադե Նրանց սրտերը պիտի աղաղակեն

դեպի Սիոնի դստեր պարիսպները,

գիշեր ու ցերեկ հեղեղի պես արցունք պիտի թափեն.

մի՛ լռիր, մի՛ դադարիր,

աչքդ արտասուքից թող հանգիստ չառնի։

¹⁹ Քոֆ Վե՛ր կաց խոստովանության գիշերը,

քո պահեցողության սկզբին,

քո սիրտը, ինչպես ջուր, թափի՛ր Տիրոջ առաջ,

ձեռքդ վե՛ր կարկառիր քո մանուկների հոգիների համար,

որոնք սովամահ էին լինում քո երթևեկության բոլոր ճանապարհներին։

²⁰ Ռեշ Տե՛ս, ո՛վ Տեր, նայի՛ր՝ ո՞ւմ այսպես ճռաքաղ արեցիր,

որ կանայք ուտեն իրենց որովայնի պտուղը,

ճռաքաղ արեցիր, ներս տարար, տվեցիր խոհարարներին,

որ ներսում՝ Տիրոջ սրբարանի մեջ,

մորթեն ծծկեր մանուկներին,

քահանային ու մարգարեին։

²¹ Շին Ծերն ու տղան միասին վախճանվեցին ճանապարհների գլխին,

կույսն ու երիտասարդը քշվեցին գերության.

քո բարկության օրը սրի քաշեցիր,

կոտորեցիր, մորթեցիր, կերակուր դարձրիր ու չխնայեցիր։

²² Տավ Պանդխտությանս օրը, ինչպես տարեկան տոներին,

հրավիրեցիր, որ նրանք իմ շուրջը հավաքվեն,

բայց ոչ ոք չգտնվեց, որ Տիրոջ ցասման ու բարկության ժամին

փրկված կամ կենդանի մնացած լիներ,

մինչդեռ իմ բոլոր թշնամիներն ապրեցին ու բազմացան։

3

Անմխիթար վշտացյալը

¹ Ալեֆ Ո՛վ հզոր Աստված, նայի՛ր իմ թշվառությանը։

Իր ցասման գավազանով նա

² ընկղմեց ինձ ու ինձ վրա խավար բերեց և ոչ թե լույս,

³ նաև իր ձեռքն հանապազ շարունակ իմ դեմ դարձրեց։

⁴ Բեթ Նա մաշեց իմ մորթն ու մարմինը, իմ բոլոր ոսկորները փշրեց,

⁵ կուտակեց վրաս և պատեց իմ գլխի շուրջը,

⁶ առանց հապաղելու ինձ խավարի մեջ նստեցրեց,

ինչպես հավիտենական մի մեռելի։

⁷ Գիմել Կուտակեց դրանք ինձ վրա,

և ես այլևս չեմ կարող խլրտալ, պղնձի նման ծանրացրեց ինձ վրա,

⁸ ու թեև ասացի, թե պիտի կանչեմ ու աղաղակեմ,

սակայն նա փակել ու կապանք է դրել,

որ աղոթքներս իրեն չհասնեն։

⁹ Դալեթ Իմ ճանապարհներին արգելքներ կանգնեցրեց,

խցանեց իմ շարժվելու շավիղները, ինձ խրտնեցրեց.

¹⁰ ինձ համար դարանակալ արջ և թաքնված առյուծ դարձավ.

¹¹ հետապնդեց ինձ, հասավ ու հալածեց,

ուժասպառ արեց ինձ, կործանեց ինձ։

¹² Հեյ Մտավ իմ գիրկը,

ինձ թիրախ դարձրեց ու լցրեց նետերով.

¹³ երիկամներս մեջտեղից կիսեց,

նետահարեց ինձ,

¹⁴ ծաղր դարձրեց իմ ժողովրդի համար

և խաղք ու խայտառակ հավիտենապես։

¹⁵ Վավ Ինձ լեղի տվեց ուտելու

և հարբեցրեց դառնությամբ,

¹⁶ իմ ատամները քարերով փշրեց

և մոխիր տվեց ինձ ուտելու.

¹⁷ իմ անձը զրկեց հանգստությունից.

ես մոռացա բարությունը.

¹⁸ կորավ իմ արիությունը, և իմ հույսը՝ առ Տեր։

¹⁹ Զայն Հիշեցի իմ թշվառության ու հալածանքի մասին.

²⁰ միտքս եկան միայն դառնությունն ու բարկությունը,

հոգիս մեջս վհատվեց.

²¹ այդ եմ մտաբերում և դրա համար էլ համբերում եմ։

²² Խեթ Անսպառ են Տիրոջ ողորմությունները, նրա գթությունները չեն նվազում։

²³ Ամեն նոր առավոտի հետ բազմանում է քո ճշմարտությունը, Տե՛ր։

²⁴ Իմ հոգին ասաց, թե՝ «Նա իմ բաժինն է»,

ահա թե ինչու հույսս պետք է դնեմ նրա վրա։

²⁵ Տեթ Աստված բարերար է նրանց հանդեպ,

ովքեր իրենց հույսը դնում են նրա վրա, քանզի այն անձը, ով փնտրում

²⁶ և ճշմարտությամբ ապավինում է նրան,

բարի է և Տիրոջ փրկությամբ հանգստություն կգտնի։

²⁷ Մարդու համար լավ է, եթե իր մանկությունից կրի խոնարհության լուծը։

²⁸ Յոդ Միայնակ ու լռիկ նա կնստի իր տանը,

որովհետև ինքն անձամբ հանձն առավ քո լուծը։

²⁹ Նա կխոնարհվի՝ իր բերանով համբուրելու հողը,

որովհետև նրա համար հույս կա.

³⁰ իր ծնոտները դեմ կտա հարվածողներին,

կկրի շատ նախատինքներ,

³¹ բայց Տերը նրան ընդմիշտ չի մերժի։

³² Կաֆ Նա, ով տառապանքներ տվեց նրան,

ինքն էլ իր անսահման ողորմածությամբ կողորմի նրան.

³³ Տերը սրտով չի կամենում մարդկանց պատժել

և նվաստացնել մարդու որդիներին։

³⁴ Լամեդ Երբ մեկը երկրի բոլոր կալանավորներին իր ոտքերի տակ ստորացնում է

և մարդուն մատնում Տիրոջ դատաստանին,

³⁵ երբ Բարձրյալի առաջ խեղաթյուրում է մարդու իրավունքները,

³⁶ երբ դատարանում անիրավում է մարդուն,

Տերը չի՞ տեսնում։

³⁷ Մեմ Չասա՞ց, թե՝

«Այսպես է ասում Տերը», և կատարվեց։

Բարձրյալի բերանը չէ՞ր, որ պատվիրեց.

³⁸ «Այնտեղից ո՛չ չարիք պիտի դուրս գա և ո՛չ էլ բարիք»։

³⁹ Մարդը, կենդանի մարդը իր եղբոր սիրո պատճառով

ինչո՞ւ է տրտնջում իր մեղքերի համար։

⁴⁰ Նուն Մեր ընթացքը քննության առնվեց ու հանդիմանվեց.

դառնա՛նք դեպի Տերը,

⁴¹ մեր ձեռքերը մեր սրտերի հետ, կարկառենք դեպի երկնքի բարձունքները։

⁴² Մեղք գործեցինք, ամբարիշտ դարձանք,

դրա համար էլ մեր հանդեպ բարեհաճ չեղար։

⁴³ Սամեխ Այցի եկար ցասումով ու բարկությամբ

և հալածեցիր մեզ, կոտորեցիր ու չխնայեցիր.

⁴⁴ երկինքն ամպերով ծածկեցիր,

որ մեր աղոթքները քեզ չհասնեն.

⁴⁵ քամահրեցիր ու հեռացրիր մեզ,

հեթանոսների ամբոխի մեջ արհամարհված ու անարգված դարձրիր մեզ։

⁴⁶ Պե Մեր բոլոր թշնամիների բերանները բացել տվեցիր մեր դեմ։

⁴⁷ Ահ ու սարսափ եկավ մեզ վրա, ավեր ու կոտորած։

⁴⁸ Իմ ժողովրդի դստեր կործանման պատճառով

մեր աչքերը ջրի հեղեղներ թափեցին։

⁴⁹ Այն Իմ աչքերը լցվեցին արցունքով,

բայց ես չեմ լռի և ականջ չեմ դնի,

⁵⁰ մինչև որ երկնքից չհայտնվի և չտեսնի Տերը։

⁵¹ Իմ քաղաքների բոլոր դուստրերի չափ

աչքս արցունք է թափում իմ հոգու համար։

⁵² Ցադե Ինչպես թռչնորսներ, իմ թշնամիները զուր տեղը ինձ որսացին,

⁵³ իմ կյանքը գբի մեջ խեղդեցին,

քար դրեցին ինձ վրա,

⁵⁴ գլուխս ջրով հեղեղեցին,

ու ես ասացի. «Ահա կործանվեցի»։

⁵⁵ Քոֆ Տառապանքի գբից քո անունը կանչեցի, Տե՛ր,

⁵⁶ և դու լսեցիր իմ ձայնը։

Քո անունն իմ աղաչանքներից մի՛ ծածկիր,

ազատությո՛ւն տուր ինձ, փրկի՛ր ինձ։

⁵⁷ Դու մոտեցար, որպեսզի ինձ օգնես,

և ասացիր. «Այն օրը, երբ ինձ կանչես, չվախենաս»։

⁵⁸ Ռեշ Դա՛տ արա, ո՛վ Տեր, իմ հոգու դա՛տն արա։

Փրկեցիր իմ կյանքը,

⁵⁹ տեսար իմ խռովքը,

իմ դատաստանն արեցիր, Տե՛ր։

⁶⁰ Տեսար իմ ողջ արդարությունը,

նայեցիր իմ բոլոր խորհուրդներին։

⁶¹ Շին Տե՛ր, լսեցիր նախատինքներն ու իմ նկատմամբ ունեցած բոլոր դիտավորություններն այն մարդկանց,

⁶² ովքեր իրենց շուրթերը շարունակ իմ դեմ են շարժում։

⁶³ Իրենց խորհուրդներից ես հասկացա,

թե նրանք ինչո՛ւ են նստում ու վեր կենում։

⁶⁴ Տավ Նայի՛ր նրանց ամբարտավան աչքերին, ո՛վ Տեր,

և նրանց արժանի հատուցումը նրանց գլխի՛ն բեր,

⁶⁵ հատուցի՛ր նրանց ըստ իրենց սրտերի կարծրության,

⁶⁶ քո ցասմամբ հալածի՛ր նրանց,

քո բարկությամբ ոչնչացրո՛ւ նրանց երկնքի ներքո։

4

Ողբ ժողովրդի թշվառության մասին

¹ Ալեֆ Ինչպե՜ս խամրեց ոսկին,

գունաթափվեց սպիտակ արծաթը,

նրանց թանկագին քարերը հալվեցին ու ցրիվ եկան

իրենց ճանապարհների խաչմերուկներում։

² Բեթ Սիոնի պատվական որդիները,

որ ավելի պատվական էին, քան թանկագին քարերը,

ինչպե՜ս համարվեցին խեցեղեն ամաններ՝

բրուտների ձեռքի աշխատանք։

³ Գիմել Ինչպես վիշապներ, նրանք մերկացրին իրենց ստինքները

և կաթ տվեցին իրենց կորյուններին.

իմ ժողովրդի որդիները տանջահար եղան,

և չկա բժշկություն նրանց համար.

անապատի ջայլամների պես տառապեցին նրանք։

⁴ Դալեթ Ծարավից կաթնակեր մանուկների լեզուներն իրենց քիմքերին կպան.

երեխաները հաց խնդրեցին,

բայց նրանց հաց կտրող չեղավ։

⁵ Հեյ Ովքեր կերակուրով էին սնվել,

ճանապարհների վրա սովամահ եղան,

ովքեր գրկերի մեջ գուրգուրանք ու գգվանք էին վայելել,

աղբանոցները գրկած՝ թաթավեցին ու թավալվեցին։

⁶ Վավ Իմ ժողովրդի դստեր մեղքերն ավելի շատացան,

քան կործանված Սոդոմի անօրենությունները.

նրանք փութով վեր էին կենում,

բայց նրանց ձեռքերի վաստակը ոչ մի տեղ չէր երևում։

⁷ Զայն Նրանց ուխտավորները,

որոնք մաքուր էին,

ձյան պես սպիտակ,

կաթի պես անարատ,

փայլուն ինչպես շափյուղա, ակնեղեն, իրենց հատուցման ժամանակ

⁸ Խեթ ածուխի նման սևացավ նրանց տեսքը,

ու ոչ ոք չէր ճանաչում նրանց.

նրանց դրել էին ճանապարհների խաչմերուկներում։

Նրանց կաշին ոսկորներին էր կպել. նրանք կոշտացել ու չորացած փայտ էին դարձել։

⁹ Տեթ Սրից հասած վերքերից

ընկածներն ավելի բախտավոր էին,

քան սովից մեռածները։

Խումբ-խումբ շարժվում էին վիրավոր մարդիկ։

¹⁰ Յոդ Գթասիրտ կանանց ձեռքերը եփեցին իրենց մանուկներին,

որոնք իմ ժողովրդի դստեր կործանման ժամանակ

նրանց համար կերակուր դարձան։

¹¹ Կաֆ Տերն ի կատար ածեց իր ցասումն ու բարկությունը,

թափեց իր ցասումն ու բարկությունը

և կրակ բորբոքեց Սիոնում,

որը լափեց նրա հիմքերը։

¹² Լամեդ Աշխարհում գոյություն ունեցող բոլոր երկրների թագավորները չհավատացին,

թե թշնամին կարող է ներս մտնել Երուսաղեմի դարպասներից։

¹³ Մեմ Բայց դա տեղի ունեցավ նրանց մարգարեների մեղքով,

նրանց քահանաների մեղքով,

քանզի նրանք այնտեղ թափում էին արդար մարդկանց արյունը։

¹⁴ Նուն Ճանապարհների գլխին ցնցվեց ու սասանվեց նրանց զորությունը,

մեռածների արյամբ պղծվեցին ու թաթախվեցին այնպես,

որ նրանց հագուստները հնարավոր չէր մաքուր վիճակում նրանց վրայից հանել։

¹⁵ Սամեխ «Հեռո՛ւ կացեք,

պի՛ղծ անվանեք նրանց,

հեռո՛ւ մնացեք,

հեռո՛ւ մնացեք,

մի՛ մոտեցեք»։

Եվ նրանք շարժվեցին ու բարկացած հեռացան։

«Ասե՛ք հեթանոսներին,

որ նրանք այլևս չշարունակեն ապրել նրանց մեջ»։

¹⁶ Այն Մեր կենդանության ժամանակ իսկ նվաղեցին մեր աչքերը իզուր օգնություն սպասելուց,

որովհետև զուր տեղը մենք նրանց հսկիչ էինք կարգել սնոտի բաների վրա։

¹⁷ Պե Տերն իր երեսը շրջել է նրանցից

և այլևս չի նայելու նրանց։

Քահանաները չլսեցին ծերերին,

նրանց որդիների նկատմամբ անողորմ եղան։

Աչքներս պահած՝ նայում էինք այն ազգերին,

որոնք մեզ չէին կարող փրկել։

¹⁸ Ցադե Որսացին մեզ.

մի փոքր ժամանակ ևս,

և մեզ սպանած-բնաջնջած կլինեն մեր քաղաքներից։

Հասել է ժամը, հասել է ժամանակը,

լրացան մեր օրերը,

լրացան ժամանակները։

¹⁹ Քոֆ Լեռների վրա մեզ հալածողները թեթևաշարժ են.

նրանք, ինչպես երկնային արծիվներ,

ճախրեցին բարձր լեռների վրա

և անապատում դարան մտած՝ պաշարեցին մեզ։

²⁰ Ռեշ Տեր Քրիստոսը մեր անձի շունչն է.

իրենց ապականությամբ նրանք պաշարեցին նրան,

մինչդեռ մենք մտածում էինք,

թե կնստենք նրա հովանու տակ

և կապրենք հեթանոսների մեջ։

²¹ Շին Ցնծա՛ և ուրախացի՛ր, ո՛վ եդովմացիների դուստր,

որ բնակվում ես օստացիների այդ երկրում,

քեզ էլ կհասնի այս բաժակը.

վեր կկենաս ու կխմես,

կխմես ու նորից կվերադարձնես։

²² Տավ Քո անօրենությունները պիտի վերջ գտնեն, Սիո՛ն,

և դու այլևս չպիտի պատժվես.

բայց քեզ, ո՛վ Եդովմի դուստր,

քո մեղքերի համար Տերն այցելելու եկավ՝

հայտնի դարձնելով քո բոլոր ամբարշտությունները։

5

Խնդրանք

Երեմիա մարգարեի աղոթքը

¹ Հիշի՛ր, Տե՛ր, թե ինչե՜ր կատարվեցին մեզ հետ,

նայի՛ր և տե՛ս մեր կրած նախատինքները։

² Մեր ժառանգությունն անցավ օտար ազգերին,

մեր տները՝ օտարականներին։

³ Որբ մնացինք մենք, հայր չկար մեզ համար,

մեր մայրերը մեր աչքի առաջ այրիացան։

⁴ Մեր ջուրը փողով խմեցինք,

և մեր փայտը գնելու հոգսը միշտ

⁵ մեր վզին է ծանրացած։ Հալածական եղանք և հանգստություն չգտանք։

⁶ Եգիպտացիներն ու ասորեստանցիները ձեռք մեկնեցին՝

մեզ հացով կշտացնելու համար։

⁷ Մեր հայրերը մեղք գործեցին,

նրանցից ոչ ոք հիմա չկա,

և հայրերի մեղքը մենք ենք քաշում։

⁸ Մեզ վրա տիրեցին ծառաները,

և մեզ նրանց ձեռքից փրկող այլևս չկա։

⁹ Անապատի սրի ահից եկեք մեր պաշարները ներս տանենք։

¹⁰ Սոսկալի սովից մեր կաշին հնացած թոնրի նման ճաք է տվել։

¹¹ Կանանց խայտառակեցին Սիոնում,

իսկ կույսերին՝ Հուդայի քաղաքներում։

¹² Ծերերին կախեցին իրենց բութ մատներից,

չխնայեցին նաև պառավներին։

¹³ Ընտիր ու պատվական մարդիկ ողբում էին բարձրաձայն,

իսկ երիտասարդները, փայտածեծ արվելով, ուժասպառ եղան։

¹⁴ Ծերերն այլևս չէին նստում դարպասների մոտ,

իսկ ընտրյալ մարդիկ դադարեցին օրհնություններ երգելուց։

¹⁵ Մեր սրտերը զրկվեցին ուրախությունից,

և մեր օրհներգություններն ու պարերը փոխվեցին սգի։

¹⁶ Պսակը վայր ընկավ մեր գլուխներից.

վա՜յ մեզ, վա՜յ մեզ, քանզի մենք մեղք գործեցինք։

¹⁷ Ահա թե ինչու ցավն առավ մեր սրտերը,

ահա թե ինչու մեր աչքերին խավարը պատեց

¹⁸ Սիոնի լեռան վրա, որն ավերակ է դարձել,

և աղվեսներն են ելումուտ անում նրա սրահներում։

¹⁹ Տե՛ր, դու կաս հավիտյան,

և քո աթոռը մնում է սերնդից սերունդ։

²⁰ Ինչո՞ւ իսպառ մոռացար մեզ,

պատժեցիր, թողեցիր ու երկար ժամանակով լքեցիր մեզ։

²¹ Հե՛տ դարձրու մեզ, ո՛վ Տեր,

և մենք կվերադառնանք,

նորոգի՛ր մեզ, Տե՛ր,

ինչպես վաղնջական ժամանակներում։

²² Դու մերժելով մերժեցիր մեզ,

քո ցասումն ու բարկությունն անչափ բորբոքվեցին մեզ վրա։

ԵԶԵԿԻԵԼԻ ՄԱՐԳԱՐԵՈՒԹՅՈՒՆԸ

1

Եզեկիելի առաջին տեսիլքը

(1.1–7.27)

Բուզիի որդի Եզեկիել քահանայի տեսիլքը, որ նա տեսավ քաղդեացիների երկրում՝ Քոբար գետի ափին։

Աստծու գահը

¹ Երեսուներորդ տարում՝ չորրորդ ամսին, ամսվա հինգերորդ օրը, երբ ես Քոբար գետի ափին գերեվարվածների մեջ էի, երկինքը բացվեց, և ես տեսա Աստծուց տրված մի տեսիլք։ ² Ամսվա հինգերորդ օրն էր. դա Հովակիմ արքայի գերության հինգերորդ տարին էր։ ³ Տիրոջ խոսքն ուղղվեց Եզեկիել քահանային՝ Բուզիի որդուն, քաղդեացիների երկրում՝ Քոբար գետի ափին։ Այնտեղ Տիրոջ ձեռքը հանգչեց ինձ վրա, ⁴ ու տեսա, որ ահա մի հողմ բարձրացած գալիս էր հյուսիսից, մի մեծ ամպ էլ՝ նրա կողքից։ Շուրջը լույս էր և հուր էր փայլատակում նրանից։ Նրա մեջ սաթի տեսքով մի բան կար՝ ճառագայթներն էլ մեջը։ ⁵ Դրա մեջ չորս կենդանի էակների կերպարանքներ կային։ Եվ այս էր նրանց տեսքը. նրանք մարդկային կերպարանք ունեին։ ⁶ Նրանցից ամեն մեկը չորս դեմք ուներ, ամեն մեկը՝ չորս թև։ ⁷ Նրանց ազդրերն ուղիղ էին, ոտքերը՝ թևավոր, կճղակները նման էին հորթերի կճղակների, և նրանցից կայծեր էին թափվում՝ նման պղնձի փայլատակումներին։ Նրանց թևերն արագաշարժ էին։ ⁸ Նրանց թևերի տակ, նրանց չորս կողմերում, մարդկային ձեռքեր կային։ Նրանք չորսն էլ երեսներ ու թևեր ունեին։ Նրանք խառնված թևակցում էին միմյանց։ ⁹ Գնալիս երեսները հետ չէին դարձնում. յուրաքանչյուրն իր դեմքի ուղղությամբ էր գնում։ ¹⁰ Նրանց չորսի երեսներն էլ աջից մարդու ու առյուծի կերպարանք ունեին, իսկ ձախից՝ եզան ու արծվի կերպարանք։ Այս էր նրանց կերպարանքը։ ¹¹ Նրանց չորսի թևերը տարածված էին վերևից. յուրաքանչյուր երկուսն իրար էին կցված, և երկուսը վերևից ծածկում էին իրենց մարմինները։ ¹² Եվ յուրաքանչյուրն իր դեմքի ուղղությամբ էր գնում. դեպի ո՛ր կողմը հողմն էր փչում, նրանք այն կողմն էլ գնում էին և գնալիս հետ չէին դառնում։ ¹³ Կենդանի էակների մեջ մի պատկեր կար՝ նման հրաբորբոք ածուխների և նման լապտերների, որ խառնիխուռն շարժվում էր կենդանիների մեջ. կրակի լույս կար, և այդ կրակից փայլատակումներ էին դուրս ցայտում։ ¹⁴ Կենդանի էակներն արագ էին ընթանում ու թեթև վերադառնում էին փայլակի նմանողությամբ։

¹⁵ Եվ ահա երկրի վրա՝ չորս կենդանի էակների հետևից, յուրաքանչյուր կողմում մի անիվ էի տեսնում. անիվների կերպարանքն ու դրանց շինվածքը ոսկեքարի տեսքն ունեին։ ¹⁶ Ե՛վ չորսի կերպարանքը, և՛ նրանց տեսքը, և՛ նրանց կառուցվածքն այնպիսին էին, որ կարծես թե անվի մեջ անիվ էր պտտվում։ ¹⁷ Նրանք իրենց դեմքերի չորս ուղղությամբ էլ գնում էին ու հետ չէին դառնում իրենց թիկունքով։ ¹⁸ Բարձր էին։ Նայում էի նրանց ու տեսնում, որ նրանց թիկունքները չորս կողմերում լի էին աչքերով։ ¹⁹ Երբ կենդանի էակները գնում էին, անիվներն էլ նրանց հետ էին գնում, իսկ երբ երկրից բարձրանում էին, անիվներն էլ էին բարձրանում։ ²⁰ Որ կողմն ընթանում էին ամպն ու հողմը, կենդանի էակներն էլ գնում էին, և անիվները նրանց հետ բարձրանում էին, որովհետև այդ անիվների մեջ կենդանի ոգի կար։ ²¹ Երբ նրանք գնում էին, անիվներն էլ էին գնում, երբ կանգնում էին, կանգ էին առնում, երբ երկրից նրանք բարձրանում էին, անիվներն էլ նրանց հետ էին բարձրանում, որովհետև այդ անիվների մեջ կենդանի ոգի կար։ ²² Եվ կենդանի էակների գլխավերևում երկնակամարի նման մի բան կար, որ բյուրեղի տեսք ուներ ու վերևից տարածվում էր նրանց թևերի վրա։ ²³ Իսկ երկնակամարի տակ նրանք, թևերը պարզած, սավառնում էին իրար հետ. յուրաքանչյուրը երկուական թև, որով ծածկում էին իրենց մարմինները։ ²⁴ Երբ նրանք սավառնում էին, լսում էի նրանց թևերի ձայնը՝ նման հորդառատ ջրերի ձայնին և նման Ամենակալի ձայնին։ Իսկ երբ շարժվում էին, լսում էի իրարանցման ձայն՝ նման բանակումի ձայնին։ Երբ նրանք կանգ էին առնում, թևերն էլ դադար էին առնում։ ²⁵ Եվ ահա, երբ նրանք կանգ էին առնում ու իրենց թևերը բարձրացնում, ավելի վերից, քան նրանց գլխավերևի երկնակամարն էր, մի ձայն էր լսվում։ ²⁶ Նրանց գլխավերևում գտնվող երկնակամարից է՛լ ավելի վեր, իբրև շափյուղա ակ՝ գահի պես մի բան կար, իսկ գահի վրա՝ մարդու կերպարանքով մեկը։ ²⁷ Սաթի տեսքով մի պատկեր էի տեսնում, նրանից ավելի ներքև՝ շուրջանակի կրակի տեսքով մի պատկեր. գոտկատեղից վեր՝ արեգակի նմանությամբ, իսկ գոտկատեղից վար՝ կրակի։ ²⁸ Եվ լույսը, որ նրա շուրջն էր պատել, ուներ ծիածանի տեսք, որ անձրևային օրերին տարածվում է ամպերի մեջ։ Եվ այսպես լույսի ահագին պատկեր կար նրա շուրջը։

2

Աստված Եզեկիելին ուղարկում է իսրայելացիների մոտ

¹ Այս տեսիլքը նման էր Տիրոջ փառքին։ Երբ այն տեսա՝ երեսս ի վայր ընկա և լսեցի մի ձայն, որ խոսում էր ինձ հետ ու ասում. «Մարդո՛ւ որդի, ոտքի՛ կանգնիր. խոսելու եմ քեզ հետ»։ ² Հոգին եկավ ինձ վրա, բարձրացրեց ինձ և ոտքերիս վրա կանգնեցրեց։ Լսում էի, որ նա խոսում էր ինձ հետ ³ ու ասում. «Մարդո՛ւ որդի, ես քեզ ուղարկելու եմ Իսրայելի դառնացնող ժողովրդի մոտ, նրանց մոտ, ովքեր դառնացրին ինձ, նրանք և իրենց հայրերը. անարգեցին ինձ մինչև այսօր։ Ում մոտ քեզ ուղարկում եմ, պնդերես ու խստասիրտ որդիներ են. ⁴ նրանց կասես. “Այսպես է ասում Տերը՝ Աստված”։ ⁵ Եթե պատահի, որ լսեն կամ սարսափեն (քանի որ դառնացնող ժողովուրդ են) և կամ ամբողջովին ճանաչեն, որ դու մարգարե ես նրանց մեջ, ⁶ դու էլ, մարդո՛ւ որդի, նրանցից չվախենաս ու նրանց տեսքից չսարսափես, որովհետև զայրանալով պիտի զայրանան, ու քեզ վրա պիտի հարձակվեն, քանի որ դու կարիճների մեջ բնակվելիս պիտի լինես։ Նրանց խոսքերից չվախենաս ու նրանց տեսքից չսարսափես, որովհետև դառնացնող ժողովուրդ են։ ⁷ Նրանց հետ այս բաները կխոսես. արդյո՞ք կլսեն կամ կսարսափեն, քանի որ դառնացնող ժողովուրդ են։ ⁸ Դու էլ, մարդո՛ւ որդի, լսի՛ր այն բաները, որ քեզ հետ խոսում եմ. դառնացնող ժողովրդի պես դառնացնող մի՛ եղիր, բա՛ց բերանդ ու կե՛ր, ինչ որ տալիս եմ քեզ»։ ⁹ Տեսա, որ ահա մի ձեռք էր երկարել դեպի ինձ, ու դրա մեջ մի գրամատյան կար։ Այն փռեց իմ առաջ, ու դրա մեջ՝ ներսից ու դրսից, ողբեր, սգերգեր ու վայեր էին գրված։

3

¹ Եվ ինձ ասաց. «Մարդո՛ւ որդի, ինչ որ դրա մեջ գտնես, կե՛ր. մանր-մանր կե՛ր այդ մատյանը և գնա՛ ու խոսի՛ր Իսրայելի որդիների հետ»։ ² Բաց արեց բերանս և այդ մատյանը պատառ-պատառ տվեց, որ ուտեմ, ու ինձ ասաց. ³ «Մարդո՛ւ որդի, քո բերանը թող ուտի, և քո որովայնը թող լցվի այդ մատյանով, որ քեզ տրվեց»։ Կերա այն, և բերանիս մեջ մեղրի պես քաղցր եղավ։ ⁴ Եվ ինձ ասաց. «Մարդո՛ւ որդի, դու գնա՛ ու մտի՛ր Իսրայելի տուն. նրանց իմ պատգամները կհաղորդես, ⁵ որովհետև ոչ թե խրթնախոս ու ծանրալեզու մի ժողովրդի մոտ ես ուղարկվում, այլ Իսրայելի տուն, ⁶ ո՛չ էլ բազում օտարազգիների կամ այլալեզուների և ո՛չ էլ խրթին լեզու ունեցողների, որոնց խոսքը չես հասկանում։ Եթե այդպիսիների մոտ անգամ ուղարկեի քեզ, նրանք, այնուամենայնիվ, քեզ կլսեին։ ⁷ Սակայն Իսրայելի տունը չի կամենալու քեզ լսել, որովհետև չի կամենում ինձ լսել, քանի որ Իսրայելի ողջ տունը կամակոր ու խստասիրտ է։ ⁸ Ահա ես քեզ հաստատուն դարձրի նրանց առջև. քո զորությունն ավելի կամրացնեմ նրանց հակառակության դեմ։ ⁹ Եվ քո զորությունը վեմի պես մշտապես հաստատուն կլինի։ Մի՛ վախեցիր նրանցից ու մի՛ սարսափիր նրանց ներկայությունից, որովհետև նրանք դառնացնող ժողովուրդ են»։ ¹⁰ Ապա Տերն ինձ ասաց. «Մարդո՛ւ որդի, այն բոլոր բաները, որ քեզ հետ խոսեցի, ականջներո՛վդ լսիր ու սրտիդ մե՛ջ պահիր։ ¹¹ Գնա՛ ու մտի՛ր գերության մեջ գտնվող քո ժողովրդի որդիների մոտ։ Նրանց հետ կխոսես ու կասես. “Այս է ասում Տերը՝ Աստված”, գուցե լսեն և անսան»։ ¹² Եվ Հոգին ինձ բարձրացրեց, ու հետևիցս մեծ դղրդոցի ձայն լսեցի. ասում էին. «Օրհնյա՜լ է Տիրոջ փառքը իր երկնային բնակարանում»։ ¹³ Տեսա, որ դա ձայնն էր միմյանց հետ սավառնող կենդանի էակների թևերի, ձայնը նրանց հետ պտտվող անիվների և ձայնը դղրդոցի։ ¹⁴ Տիրոջ Հոգին ինձ վերցրեց, վեր բարձրացրեց, ու համբառնալով գնում էի՝ հետևելով իմ հոգու մղումին։ Տիրոջ ձեռքն ինձ վրա զորավոր եղավ։ ¹⁵ Վեր բարձրացած՝ մտա գերյալների մեջ ու գնացի Քոբար գետի բնակիչների մոտ, որոնք այնտեղ էին։ Ու դադար առնելով՝ յոթ օր նստեցի նրանց մեջ։

Տերը Եզեկիելին պահակ է կարգում

¹⁶ Յոթ օր հետո Տիրոջ խոսքն ուղղվեց ինձ ու ասաց. ¹⁷ «Մարդո՛ւ որդի, քեզ դետ կարգեցի Իսրայելի տանը. ինձնից պատգամներ կլսես և նրանց կսպառնաս իմ անունից։ ¹⁸ Երբ անօրենին ասեմ՝ հաստատապես կմեռնես, և դու նրան չզգուշացնես, ոչ էլ անօրենին ասես, որ զգուշանա, հետ դառնա իր չար ճանապարհից ու ապրի, այդ անօրենն իր անօրենության մեջ կմեռնի, իսկ նրա արյունը քեզնից կպահանջեմ։ ¹⁹ Իսկ եթե դու անօրենին զգուշացնես, և նա հետ չդառնա իր անօրենությունից ու իր ճանապարհից, այդ անօրենն իր անօրենության մեջ կմեռնի, իսկ դու ինքդ քեզ կփրկես։ ²⁰ Երբ արդարն իր արդար գործերից շեղվի ու հանցանքներ գործի, նրա գլխին տանջանքներ կբերեմ. ինքը կմեռնի, որովհետև իր արդար գործերը, որ կատարել է, չեն հիշվի։ Բայց քանի որ դու նրան չես զգուշացրել, նրա արյունը քեզնից կպահանջեմ։ ²¹ Իսկ եթե դու զգուշացնես արդարին, որպեսզի մեղք չգործի, արդարն հաստատապես կապրի, որովհետև զգուշացրել ես նրան. դու էլ ինքդ քեզ կփրկես»։

Եզեկիելը՝ լռության դատապարտված Աստծու կողմից

²² Այնտեղ Տիրոջ ձեռքն ինձ վրա հանգչեց ու ինձ ասաց. «Վե՛ր կաց և այն դա՛շտը ելիր, ու այնտեղ քեզ հետ պիտի խոսեմ»։ ²³ Վեր կացա ելա այն դաշտը։ Եվ ահա այնտեղ էր իջել Տիրոջ փառքը, ինչպես այն տեսիլքն ու փառքը, որ տեսել էի Քոբար գետի ափին, ու երեսս ի վայր ընկա։ ²⁴ Իսկ Հոգին ինձ վրա եկավ ու ինձ ոտքի կանգնեցրեց։ Խոսեց ինձ հետ ու ասաց. «Մտի՛ր ու փակվի՛ր քո տան մեջ։ ²⁵ Մարդո՛ւ որդի, ահա քեզ համար կապանքներ են պատրաստված, քեզ դրանցով կապելու են, և դու դուրս չես գալու դրանց միջից։ ²⁶ Լեզուդ էլ կապելու եմ քո քիմքին, ու համր ես լինելու։ Դու նրանց համար իբրև հանդիմանող մի մարդ չես լինելու, որովհետև նրանք դառնացնող ժողովուրդ են։ ²⁷ Ու երբ քեզ հետ խոսեմ, կբացեմ քո բերանը, և դու նրանց կասես. “Այսպես է ասում Ամենակալ Տերը՝ Աստված”։ Ով լսելու է, թող լսի, իսկ ով արհամարհելու է, թող արհամարհի, քանի որ նրանք դառնացնող ժողովուրդ են»։

4

Եզեկիելը հայտնում է Երուսաղեմի պաշարման մասին

¹ «Եվ դու, մարդո՛ւ որդի, քեզ համար մի աղյո՛ւս վերցրու, այն դի՛ր քո առաջ։ Դրա վրա կպատկերես Երուսաղեմ քաղաքը, ² շուրջը կհաստատես նրա պաշարումը։ Նրա շուրջը մարտկոցներ կշինես, պատնեշով կշրջապատես, շուրջը բանակներ կկանգնեցնես ու պարսպակործաններ կտեղադրես չորս կողմը։ ³ Քեզ համար երկաթե մի տապակ կվերցնես և այն՝ իբրև երկաթե պարիսպ, կկանգնեցնես քո ու քաղաքի միջև։ Դեմքդ էլ նրա վրա կուղղես, սա պաշարման մեջ կլինի, և այն կպաշարես։ Սա նշան է Իսրայելի որդիների համար։ ⁴ Դու կննջես քո ձախ կողքի վրա և Իսրայելի տան անիրավություններն էլ կդնես դրա վրա՝ ըստ այն օրերի թվի, որ ննջելու ես դրա վրա՝ հարյուր իննսուն օր, և նրանց անիրավությունները կկրես։ ⁵ Ես քեզ եմ տվել նրանց երկու անիրավությունները օրերի թվով՝ հարյուր իննսուն օր։ Եվ կկրես Իսրայելի տան անիրավությունները, ⁶ կամբողջացնես ամենը։ Դարձյալ կննջես՝ աջ կողքիդ վրա, և Հուդայի տան անիրավությունները կկրես քառասուն օր. յուրաքանչյուր տարվա դիմաց մեկ օր եմ սահմանել քեզ։ ⁷ Դեմքդ կուղղես դեպի Երուսաղեմի պաշարումը, կզորացնես բազուկներդ և նրա դեմ կմարգարեանաս։ ⁸ Իսկ ես ահա քեզ վրա կապանքներ եմ դրել, և չես կարողանա շրջվել մի կողքից մյուսը, մինչև որ չլրանան արգելափակմանդ օրերը։ ⁹ Եվ դու քեզ համար ա՛ռ ցորեն ու գարի, ոսպ ու ոլոռ, կորեկ ու հաճար, դրանք դի՛ր խեցե մի ամանի մեջ և քեզ համար հա՛ց պատրաստիր։ Ու ըստ կողքիդ վրա քո քնելու օրերի թվի՝ հարյուր իննսուն օր, կուտես այն։ ¹⁰ Կերակուրդ կշռով կուտես. օրական քսան սիկղ դրանից կուտես որոշված ժամերին։ ¹¹ Ջուրն էլ մի դորակի չափով կխմես։ ¹² Կերակուրդ գարուց պատրաստված նկանակի ձևով կուտես. մարդկանց կղանքի վրա կեփես այն, նրանց աչքի առաջ։ ¹³ Ու կասես. “Այսպես է ասում Իսրայելի Տերը՝ Աստված. “Իսրայելի որդիներն այսպես՝ պղծությամբ են ուտելու իրենց հացն այն ազգերի մեջ, ուր ցրիվ եմ տալու նրանց”»։ ¹⁴ Ես էլ ասում եմ. «Քա՛վ լիցի, Տե՛ր, Աստվա՛ծ Իսրայելի, թե հոգիս երբևէ ապականվի պղծությունների մեջ. ես մեռելոտի կամ գազանից հոշոտված անասունի միս ծննդիցս ի վեր մինչև այժմ երբեք չեմ կերել, ու բերանս էլ որևէ պիղծ միս չի մտել»։ ¹⁵ Եվ ինձ ասաց. «Ահա քեզ մարդու կղանքի փոխարեն արջառի թրիք եմ տվել. դրա վրա կեփես հացդ»։

¹⁶ Ապա Տերն ինձ ասաց. «Մարդո՛ւ որդի, ահա ես վերացնում եմ Երուսաղեմում հացի պաշարը. թող հացը կշռով ու պակասությամբ ուտեն, ջուրն էլ չափով ու պակասությամբ խմեն, ¹⁷ որպեսզի հացի ու ջրի կարոտ մնան։ Թող կործանվեն մարդն ու իր եղբայրը և թող հյուծվեն իրենց անիրավությունների մեջ»։

5

Աստված պատժելու է իսրայելացիներին

¹ «Եվ դու, մարդո՛ւ որդի, քեզ հեսանով սրված սուսե՛ր առ՝ ավելի սուր, քան վարսավիրների ածելին։ Այն ձեռք կբերես քեզ համար և կանցկացնես գլխիդ ու մորուքիդ վրայով, ապա կշեռքը կվերցնես և կտրված մազերը կկշռես։ ² Մեկ չորրորդ մասը կրակով կայրես քաղաքի մեջ, երբ լրանան արգելափակմանդ օրերը, մեկ չորրորդ մասն էլ սրով կկտրատես ու կսփռես քաղաքի շուրջը, իսկ մեկ չորրորդ մասն էլ քամուն կտաս. սուր կքաշեմ նրանց հետևից։ ³ Դրանցից հաշվով մի փոքր մաս կառնես և թիկնոցիդ մեջ կամփոփես։ ⁴ Դրանցից դարձյալ կվերցնես և կրակի մեջ կգցես, կայրես դրանք կրակով, և այնտեղից կրակ դուրս կգա։ Ու Իսրայելի ամբողջ տանը կասես. ⁵ “Այսպես է ասում Ամենակալ Տերը. “Սա այն Երուսաղեմն է և նրա շրջակա գավառները, որ դրել եմ հեթանոսների մեջ։ ⁶ Քանի որ իմ իրավունքը փոխարինեցին հեթանոսների անիրավության հետ և իմ օրենքները՝ իրենց շուրջը գտնվող երկրների օրենքների հետ, որովհետև մերժեցին իմ իրավունքը և իմ օրենքներով չընթացան”։ ⁷ Դրա համար Ամենակալ Տերն այսպես է ասում. “Այն բանի համար, որ ձեր պատճառները գալիս են այն ազգերից, որոնք ձեր շուրջն են, և դուք իմ օրենքներով չընթացաք, իմ իրավունքը չկատարեցիք, այլև ձեր շուրջը գտնվող հեթանոսների իրավունքի համաձայն չգործեցիք”։ ⁸ Ուստի Ամենակալ Տերն այսպես է ասում. “Ահա ես ձեր դեմ եմ ու ձեր մեջ դատաստան կանեմ այդ ազգերի առաջ ⁹ և ձեր պղծությունների պատճառով ձեզ կանեմ այն, ինչ երբեք չեմ արել ու այլևս դրա նման ոչինչ չեմ անի։ ¹⁰ Դրա համար ձեր մեջ հայրերը կուտեն որդիներին, որդիներն էլ՝ հայրերին։ Ձեր մեջ դատաստան կանեմ և այն ամենը, ինչ կմնա ձեզանից, ցրիվ կտամ բոլոր ուղղություններով։ ¹¹ Հետևապես, կենդանի եմ ես,- ասում է Ամենակալ Տերը,- քանի որ իմ սրբությունները պղծեցիք ձեր ամեն տեսակի կուռքերով ու ամեն տեսակի պիղծ պաշտամունքներով, ես էլ կմերժեմ ձեզ, աչքս ձեզ չի խնայի, ոչ էլ ձեզ ողորմություն կանեմ։ ¹² Ձեր մեկ չորրորդ մասը մահով կոչնչանա, մեկ չորրորդ մասն էլ սովից կմեռնի ձեր մեջ, մյուս չորրորդ մասը բոլոր ուղղություններով ցրիվ կտամ, իսկ մեկ չորրորդ մասն էլ ձեր շուրջը սրից կընկնի. սուր կքաշեմ նրանց հետևից։ ¹³ Նրանց վրա իմ բարկությունն ու ցասումը ի կատար կածվի, ու կմխիթարվեմ։ Եվ կիմանան, որ ես՝ Տերս, խոսեցի իմ վրեժխնդրությամբ, որպեսզի իրենց վրա իմ բարկությունն ի կատար ածեի։ ¹⁴ Ես ձեզ անապատի մեջ կդնեմ՝ ձեզ շրջապատող հեթանոսների նախատինքի մեջ, իսկ ձեր դուստրերին էլ, ովքեր ձեր շուրջն են, ի տես կդնեմ ճանապարհի անցորդներին։ ¹⁵ Եվ կլինես ողբալի ու եղկելի, ծաղր ու ցուցանք՝ ձեզ շրջապատող ազգերի մեջ, երբ ես ձեր մեջ դատաստան կանեմ բարկությամբ, ցասումով ու ցասումնալի վրեժխնդրությամբ”։ Ես՝ Տերս, ասացի։ ¹⁶ “Երբ ես սովի սուր նետերս արձակեմ նրանց վրա, ոչնչացման կմատնվեն։ Դրանք կարձակեմ նրանց վրա։ Սով կբերեմ ձեր գլխին, կվերացնեմ ձեր հացի պաշարը, ¹⁷ ձեր դեմ սով ու կատաղի գազաններ կուղարկեմ և ձեզ կպատժեմ. մահն ու արյունը կանցնեն ձեր վրայով, ձեր շուրջն էլ սրածություն կանեմ”։ Այս ամենը ես՝ Տերս, ասացի»։

6

Ընդդեմ կռապաշտների

¹ Տիրոջ խոսքն ինձ ուղղվեց ու ասաց. ² «Մարդո՛ւ որդի, դեմքդ ուղղի՛ր դեպի Իսրայելի այդ լեռները, մարգարեացի՛ր դրանց դեմ ³ ու ասա՛. “Իսրայելի՛ լեռներ, լսե՛ք Ամենակալ Տիրոջ պատգամները։ Ամենակալ Տերը լեռներին ու բլուրներին, ձորերին ու դաշտերին այսպես է ասում. “Ահա սուր եմ բերում ձեզ վրա, և ամայի են դառնալու ձեր բարձրադիր վայրերը, ⁴ ջարդուփշուր են լինելու ձեր զոհասեղանները և խորտակվելու են ձեր մեհյանները. ձեր խոցվածներին գետնին եմ փռելու ձեր կուռքերի առաջ։ ⁵ Ձեր արձանների առաջ դիաթավալ եմ անելու Իսրայելի որդիներիդ ու ձեր ոսկորները ցրիվ եմ տալու ձեր զոհասեղանների շուրջը, ⁶ ձեր բոլոր բնակավայրերում։ Քաղաքներն ավերվելու են, բարձրադիր վայրերը՝ ամայանալու, որպեսզի ձեր զոհասեղանները ջնջվեն ու վերանան, ձեր կուռքերը ջարդուփշուր լինեն ու անհետանան, ձեր մեհյանները ոչնչանան, ձեր ձեռքի գործերն անհետ կորչեն, ⁷ ու խոցվածներն ընկնեն ձեր մեջ, և պիտի իմանաք, որ ես եմ Տերը։ ⁸ Սակայն ազգերի մեջ ձեզանից սրից ազատվածներ եմ թողնելու՝ օտար երկրներում ցիր ու ցան։ ⁹ Եվ ազգերի մեջ, որտեղ էլ որ գերված լինեն նրանց մեջ, ձեր ազատվածներն ինձ հիշելու են, որ երդվեցի նրանց սրտի դեմ, որ շնացել ու ապստամբել են իմ դեմ, նրանց աչքերի դեմ, որ պոռնկացել են իրենց ընթացքով։ Նրանք ծեծելու են իրենց երեսներն այն չարիքների համար, որ արել են իրենց բոլոր կռատներում և իրենց ողջ կյանքի ընթացքում։ ¹⁰ Եվ պիտի իմանան, որ ես եմ Տերը, և իզուր չեմ ասել, որ անելու եմ նրանց այս բոլոր չարիքները”։ ¹¹ Ամենակալ Տերն այսպես է ասում. “Ձեռքերով ծա՛փ զարկ, ոտքերով դոփի՛ր ու վա՜շ-վա՜շ ասա Իսրայելի տան կուռքերի ու չարի գործերի համար, որովհետև սրից, ժանտախտից ու սովից են ընկնելու։ ¹² Ով որ հեռու է, ժանտախտից է մեռնելու, ով էլ որ մոտ է, սրից է ընկնելու, իսկ ով որ մնում է և ով պաշարման մեջ է, սովից են կոտորվելու։ Այսպիսով իմ բարկությունն եմ իրագործելու նրանց վրա։ ¹³ Եվ պիտի իմանան, որ ես եմ Տերը, երբ ձեր վիրավորներն ընկնեն ձեր կուռքերի մեջ, ձեր զոհասեղանների շուրջը, բոլոր բարձր բլուրների ու լեռների գագաթների վրա, ինչպես նաև բոլոր սաղարթախիտ ծառերի, հաստաբուն կաղնիների տակ, որտեղ խունկ էին ծխում իրենց բոլոր կուռքերին։ ¹⁴ Ես իմ ձեռքը երկարելու եմ նրանց դեմ և երկիրը մատնելու եմ կործանման ու ոչնչացման՝ Դեբլաթի անապատից սկսած՝ իրենց բոլոր բնակավայրերում։ Եվ պիտի իմանաք, որ ես եմ Տերը”»։

7

Իսրայելի մոտալուտ վախճանը

¹ Տիրոջ խոսքն ինձ ուղղվեց ու ասաց. ² «Եվ դու, մարդո՛ւ որդի, կասես. Ամենակալ Տերն այսպես է ասում. “Իսրայելացիների երկրի վախճանը հասել է, երկրի չորս կողմերի վախճան էլ հասել է. ³ ահա հասել է քո վախճանը։ Բարկությունս ուղարկելու եմ ⁴ քեզ վրա ու քո բռնած ճանապարհին համապատասխան՝ քեզնից վրեժխնդիր եմ լինելու, քեզ հատուցել եմ տալու քո բոլոր կուռքերի համար։ Աչքս քեզ չի խնայելու, ոչ էլ ողորմելու եմ, որովհետև քո ընթացքին համապատասխան՝ հատուցել եմ տալու քեզ, և քո կուռքերը քո մեջ են մնալու։ Եվ պիտի իմանաս, որ ես եմ Տերը”։ ⁵ Տերը՝ Աստված, այսպես է ասում. “Ահա մի չարիք, մի չարիք է վրա հասել. ⁶ հասել է վախճանը, թևածում է քեզ վրա։ ⁷ Ահա տագնապն է հասել քեզ, քեզ, որ բնակվել ես այդ երկրում։ Հասել է ժամանակը, մոտեցել օրը, սակայն ո՛չ աղմուկով, ո՛չ էլ երկունքով։ ⁸ Այլ այժմ՝ շուտով իմ բարկությունը քեզ վրա թափելու եմ, իմ զայրույթն ի կատար եմ ածելու, քեզ հետ դատաստան եմ տեսնելու ըստ քո բռնած ճանապարհի և քեզ քո պաշտամունքների բոլոր պղծությունների համար պատժելու եմ։ ⁹ Աչքս քեզ չի խնայելու, ոչ էլ ողորմելու եմ, որովհետև ըստ քո բռնած ճանապարհի հատուցել եմ տալու քեզ, և քո կուռքերը քո մեջ են մնալու։ Պիտի իմանաս, որ ես եմ Տերը, որ հարվածում եմ քեզ։

¹⁰ Ահա և Տիրոջ օրը. ահա հասել է վախճանը։ Եկել է տագնապը, ծաղկել է գավազանը. գլուխ է բարձրացրել ամբարտավանությունը։ ¹¹ Խորտակելու ես անօրենի հենարանը, սակայն ո՛չ աղմուկով, ո՛չ էլ փութով։ Նրանք ո՛չ միտք ունեն, ո՛չ էլ գեղեցկություն։ ¹² Հասել է ժամանակը, ահա եկել է օրը։ Գնորդը թող չուրախանա, վաճառողն էլ թող չողբա, որովհետև ամբողջ բազմության վրա բարկությունն է տիրում։ ¹³ Նա, ով գնում է, վաճառողի մոտ թող այլևս չվերադառնա. նրանցից ոչ մեկ կենդանի չի մնալու, որովհետև այս տեսիլքը, որ նրանց ողջ բազմության դեմ է, հետ չպիտի դառնա. որևէ մարդ ապրելու հույս թող չունենա։ ¹⁴ Փողահարե՛ք և ամեն բան պատրաստե՛ք, սակայն չի լինի մեկը, որ պատերազմի գնա, որովհետև բարկություն է իջել նրա բազմության վրա”։

Ոչ ոք չի խուսափելու պատժից

¹⁵ “Սրով պատերազմ է լինելու՝ դրսից, սով ու ժանտախտ՝ ներսից։ Ովքեր բնակավայրից դուրս են լինելու, սրով են մեռնելու, իսկ ովքեր քաղաքում լինեն, սովից ու ժանտախտից են մեռնելու։ ¹⁶ Բայց փրկվելու են նրանք, ովքեր ճողոպրելու են և լինելու են լեռների վրա՝ անձանձրույթ մնչացող աղավնիների պես։ Բոլորին էլ կոտորելու եմ, յուրաքանչյուրին՝ ըստ իր անիրավության։

¹⁷ Ամեն ձեռք թուլանալու է,

ամեն ազդր՝ խոնավությամբ աղտոտվելու։

¹⁸ Մեջքներին քուրձեր են առնելու.

նրանք ցնորքներով են պարուրվելու, ամեն երես ամոթով է պատվելու,

իսկ ամեն գլուխ՝ ճաղատությամբ։

¹⁹ Նրանց արծաթն ընկած է մնալու հրապարակներում,

իսկ ոսկին արհամարհվելու է։

Տիրոջ բարկության օրը նրանց արծաթն ու ոսկին նրանց փրկել չեն կարողանալու։

Նրանց հոգիները չեն հագենալու,

որովայններն էլ չեն լցվելու,

որովհետև տանջանքները նրանց անիրավությունների պատճառով եղան։

²⁰ Զարդերից ամենաընտիրներն են գործածել՝ հպարտանալու համար,

դրանցից իրենց պաշտամունքի կուռքերն ու պատկերներն են պատրաստել։

Դրա համար էլ դրանք նրանց համար պղծության առարկա եմ դարձնելու

²¹ ու մատնելու եմ օտարների ձեռքը՝ հափշտակելու,

չարագործների ձեռքը՝ ավարի ենթարկելու։

Եվ դրանք պղծելու են։

²² Երեսս շուռ եմ տալու նրանցից։

Պղծելու են իմ սրբարանները,

անխտիր մտնելու են դրանց մեջ, պղծելու են ²³ և

խառնակություն են անելու,

որովհետև երկիրը լցվել է նրանց արյունալի դատաստաններով,

քաղաքներն էլ լի են անօրենություններով։

²⁴ Ազգերի միջից ամենավատերին եմ բերելու,

ովքեր նրանց տներն են ժառանգելու։

Ջախջախելու եմ բռնացողների ամբարտավանությունը։

Պղծվելու են նրանց սրբավայրերը։

²⁵ Քավության զոհ մատուցելով՝

խաղաղություն են փնտրելու, բայց չեն գտնելու։

²⁶ Վայը վայի վրա է լինելու, գույժը՝ գույժի։

Մարգարեներից տեսիլքներ են խնդրելու,

քահանայից՝ դյուրացնող օրենքներ,

ծերերից՝ խորհուրդներ, բայց չեն գտնելու։

²⁷ Թագավորը սգալու է,

իշխանը ոչնչանալու է,

երկրի ժողովրդի ձեռքերն էլ թուլանալու են.

ըստ նրանց բռնած ճանապարհի եմ վարվելու նրանց հետ

և ըստ նրանց կայացրած որոշումների եմ վրեժխնդիր լինելու նրանցից։

Պիտի իմանան, որ ես եմ Տերը”»։

8

Աստծու երկրորդ տեսիլքը Եզեկիելին

Կռապաշտություն Աստծու տաճարում

¹ Վեցերորդ տարում՝ հինգերորդ ամսին, ամսվա հինգերորդ օրը, ես նստած էի իմ տանը, իսկ Հուդայի երկրի ծերերը նստած էին իմ առաջ։ Այդ ժամանակ Ամենակալ Տիրոջ ձեռքն ինձ վրա հանգչեց, ² ու ահա տեսնում էի մարդու կերպարանք, մեջքից վար՝ կրակ, մեջքից վեր՝ եթերի տեսքով, սաթի նման։ ³ Ձեռքի նման մի բան պարզեց և իմ գլխի գագաթին դրեց։ Հոգին ինձ բարձրացրեց երկնքի ու երկրի միջև, ինձ աստվածային տեսիլքի մեջ Երուսաղեմ տարավ ու կանգնեցրեց ներսի այն դռան մուտքի մոտ, որ դեպի հյուսիս է նայում, որտեղ գտնվում էր կիրք բորբոքող կուռքը։ ⁴ Այնտեղ էր նաև Իսրայելի Աստծու փառքը, ինչպես այն տեսիլքի մեջ, որ տեսել էի դաշտում։ ⁵ Եվ ինձ ասաց. «Մարդո՛ւ որդի, աչքերովդ դեպի հյուսի՛ս նայիր»։ Աչքերս բարձրացրի դեպի հյուսիսային կողմը, և ահա զոհասեղանի դռան հյուսիսային կողմում՝ մուտքի մոտ, որ դեպի արևելք էր նայում, նախանձի կուռքն էր դրված։ ⁶ Եվ ինձ ասաց. «Մարդո՛ւ որդի, տեսնո՞ւմ ես, թե ի՛նչ մեծ անօրենություններ է գործում այստեղ Իսրայելի տունը, որպեսզի հեռանամ իմ սրբավայրից։ Դեռևս սրանցից է՛լ ավելի մեծ անօրենություններ կտեսնես»։ ⁷ Եվ ինձ գավթի դռների առաջ տարավ. ահա պատի մեջ մի ծակ տեսա։ ⁸ Եվ ինձ ասաց. «Մարդո՛ւ որդի, փորի՛ր այդ պատը»։ Փորեցի պատը։ Եվ ահա մի դուռ։ ⁹ Ասաց ինձ. «Մարդո՛ւ որդի, մտի՛ր, տե՛ս անօրենություններն ու չարիքները, որ դրանք այստեղ գործում են»։ ¹⁰ Մտա ու տեսա ամեն տեսակի սնոտի կուռքեր՝ նման սողունի ու անասունի։ Տեսա նաև Իսրայելի տան բոլոր կուռքերը՝ դրանց շուրջը պատկերված։ ¹¹ Իսրայելի տան ծերերից յոթանասուն հոգի և նրանց մեջ՝ Սափանի որդի Հեզոնիան, որ նրանց առջև էր կանգնած։ Յուրաքանչյուրի ձեռքում՝ բուրվառ։ Խնկի ծուխն էլ բարձրանում, կուտակվում էր ամպի պես։ ¹² Եվ Տերն ինձ ասաց. «Մարդո՛ւ որդի, տեսնո՞ւմ ես, թե Իսրայելի տան ծերերն ինչե՛ր են անում այստեղ՝ խավարի մեջ, յուրաքանչյուրը ծածուկ, իր սենյակում։ Նրանք ասում են, թե Տերը լքել է և չի նայում երկրին»։ ¹³ Ապա ինձ ասաց. «Դեռևս ավելի մեծ անօրենություններ կտեսնես, որ գործում են դրանք»։ ¹⁴ Եվ ինձ տարավ Տիրոջ տան դռան առաջ, որ դեպի հյուսիս է նայում։ Ահա այնտեղ կանայք էին նստած և Թամուզին[70] էին ողբում։ ¹⁵ Եվ ինձ ասաց. «Տեսնո՞ւմ ես այդ, մարդո՛ւ որդի. դեռևս սրանից է՛լ ավելի մեծ չարագործություններ կտեսնես»։ ¹⁶ Եվ ինձ Տիրոջ տան գավիթը մտցրեց։ Ահա Տիրոջ տաճարի դռների վերևում՝ զոհասեղանի ու պատշգամբի միջև, մոտ քսանհինգ մարդիկ կային, ովքեր թիկունքները շուռ էին տվել Տիրոջ տաճարի կողմը, երեսները՝ դեպի արևելք ու երկրպագում էին արևին։ ¹⁷ Եվ ինձ ասաց. «Տեսա՞ր այդ, մարդո՛ւ որդի։ Մի՞թե փոքր բան է Իսրայելի տան անօրենությունը, որ այստեղ գործում են, քանի որ երկիրն անօրենություններով լցրին ու դարձան ինձ բարկացնելու։ Ահա ճյուղն էլ պարզում են որպես արհամարհանքի նշան։ ¹⁸ Ես էլ դրանց հետ բարկությամբ եմ վարվելու. աչքս չի խնայելու, և ոչ էլ ողորմելու եմ։ Ականջիս գոռան էլ, նրանց չեմ լսելու»։

9

Երուսաղեմը պատժվում է

¹ Ականջիս բարձրաձայն աղաղակեց ու ասաց. «Այդ քաղաքից վրեժխնդիր լինելու ժամը մոտեցել է»։ Ամեն մարդ սպանության գործիք ուներ ձեռքին։ ² Ահա դեպի հյուսիս նայող բարձր դռան ճանապարհով վեց մարդ էր գալիս՝ յուրաքանչյուրի ձեռքին տապար։ Նրանց մեջ նաև մի մարդ կար՝ մինչև ոտնաթաթերը հասնող մի զգեստ հագին, իսկ մեջքին՝ շափյուղայով ակնազարդ գոտի։ Մտան, կանգնեցին պղնձե զոհասեղանի առաջ։ ³ Եվ Իսրայելի Աստծու փառքը քերովբեներից վեր՝ դեպի տաճարի բացօթյա տարածքը բարձրացավ։ Կանչեց այն մարդուն, որ մինչև ոտնաթաթերը հասնող զգեստ էր հագել և մեջքին գոտի ուներ։ ⁴ Տերը նրան ասաց. «Անցի՛ր Երուսաղեմ քաղաքի միջով ու նշա՛ն դիր այն մարդկանց ճակատին, որ հեծեծում ու հոգոց են հանում իրենց մեջ գործված անօրենությունների վրա»։ ⁵ Մյուսներին էլ ինձ լսելի ձևով ասաց. «Նրա հետևից քաղա՛ք գնացեք և կոտորե՛ք։ Ձեր աչքը թող չխնայի. ⁶ չխղճաք ծերին ու մանկանը, կույսին ու երիտասարդին։ Կանանց էլ կոտորե՛ք, ջնջե՛ք։ Բայց ում վրա նշան կա, չմոտենաք։ Սկսե՛ք իմ սրբարանից»։ Եվ սկսեցին ծեր մարդկանցից, որոնք տաճարի ներսում էին։ ⁷ Ապա նրանց ասաց. «Պղծե՛ք այդ տունը և այն դիակներո՛վ լցրեք, դո՛ւրս ելեք, կոտորե՛ք և հարվածե՛ք այդ քաղաքին»։ ⁸ Մինչ նրանց կոտորում էին, նայեցի ու տեսա և երեսս ի վայր ընկնելով՝ աղաղակեցի ու ասացի. «Վա՛յ ինձ, Ամենակա՛լ Տեր. ահա դու Իսրայելի տան մնացորդներին ես ջնջում՝ քո զայրույթը Երուսաղեմի վրա թափելով»։ ⁹ Եվ ինձ ասաց. «Իսրայելի ու Հուդայի տան անիրավությունները սաստիկ շատացան, որովհետև այդ երկիրը լցվեց բազմաթիվ ժողովուրդներով, քաղաքն էլ՝ անօրենությամբ ու պղծությամբ, քանի որ ասացին. “Տերը լքել է երկիրը և այլևս չի նայում”։ ¹⁰ Արդ, աչքս չի խնայելու, և ոչ էլ ողորմելու եմ, այլ ըստ իրենց բռնած ճանապարհի էլ իրենց գլխին եմ բերելու»։ ¹¹ Եվ ահա այն մարդը, որ մինչև ոտնաթաթերը հասնող զգեստ էր հագել և մեջքին գոտի ուներ, պատասխանեց ու ասաց. «Արեցի այնպես, ինչպես ինձ հրամայել էիր»։

10

Տերը նորից է երևում Եզեկիելին

¹ Եվ տեսնում էի, որ ահա երկնակամարի վրա, որ քերովբեների գլխավերևում էր, իբրև շափյուղա ակ՝ գահի նման մի բան կար։ ² Եվ այն մարդուն, որ պատմուճան էր հագել, ասաց. «Մտի՛ր այդ անիվների միջև, որ քերովբեների տակ են, բուռդ լցրո՛ւ այդ քերովբեների միջև եղող կրակե ածուխներով ու շա՛ղ տուր քաղաքի վրա»։ Եվ իմ աչքի առաջ նա մտավ։ ³ Երբ այդ մարդը մտնում էր, քերովբեները կանգնած էին տաճարի աջ կողմում. ծխի ամպն էլ լցրել էր ներքին գավիթը։ ⁴ Եվ Տիրոջ փառքն այդ քերովբեներից վեր՝ դեպի տաճարի բացօթյա տարածքը բարձրացավ. տաճարը լցվեց ծխի ամպով, գավիթն էլ՝ Տիրոջ փառքի լույսով։ ⁵ Եվ քերովբեների թևերի ձայնը լսելի էր մինչև արտաքին գավիթը, նման Ամենակալի ձայնի նման, երբ խոսում էր։ ⁶ Մինչ հրահանգ էր տալիս մարդուն, որ սուրբ պատմուճան էր հագել, ու ասում էր՝ «Կրա՛կ վերցրու այդ անիվների միջից՝ քերովբեների միջից»,- սա մտավ ու կանգնեց անիվների միջև։ ⁷ Եվ քերովբեների միջից մեկը ձեռքը մեկնեց կրակի մեջ, որ քերովբեների միջև էր, այն վերցրեց ու տվեց նրա ձեռքը, ով սուրբ պատմուճան էր հագել. նա վերցրեց ու այնտեղից դուրս եկավ։ ⁸ Նայում էի քերովբեներին ու նրանց թևերի տակ մարդու ձեռքի նման մի բան էի տեսնում։ ⁹ Տեսնում էի նաև, որ ահա չորս անիվներ կային քերովբեների մոտ, ամեն մի քերովբեի հետևում՝ մի անիվ։ Եվ անիվների տեսքը կարկեհան ակի տեսքին նման էր։ ¹⁰ Տեսքով չորսն էլ այնպես նման էին, որ կարծես թե մի անիվը մյուսի մեջ էր։ ¹¹ Եվ երբ քերովբեները գնում էին, իրենց չորս կողմերն էին գնում ու հետ չէին դառնում, որովհետև ո՛ր կողմը նայում էր առջևի գնացողը, նրա հետևից էլ ընթանում էին, և գնալիս հետ չէին դառնում։ ¹² Նրանց և՛ ամբողջ մարմինները, և՛ ձեռքերը, և՛ թևերը, ինչպես նաև անիվները լի էին աչքերով. չորս անիվներն էլ շուրջանակի լի էին աչքերով։ ¹³ Ես ինքս լսեցի, որ անիվները «Գեղգեղ» անունով էին կոչվում։ ¹⁴ Քերովբեներից ամեն մեկը չորս դեմք ուներ. մեկի դեմքը՝ քերովբեի, երկրորդինը՝ մարդու, երրորդինը՝ առյուծի, իսկ չորրորդինը՝ արծվի։ ¹⁵ Ու քերովբեները վեր բարձրացան։ Սա այն կենդանի էակն էր, որ տեսել էի Քոբար գետի ափին։ ¹⁶ Երբ քերովբեները գնում էին, անիվներն էլ ընթանում էին նրանց հետևից, իսկ երբ քերովբեներն իրենց թևերն էին վեր պարզում՝ երկրից վեր բարձրանալու համար, անիվները հետ չէին դառնում, որովհետև նրանց հետ էին։ ¹⁷ Երբ քերովբեները կանգ էին առնում, անիվներն էլ կանգ էին առնում, իսկ երբ քերովբեները վեր էին բարձրանում, անիվներն էլ նրանց հետ վեր էին բարձրանում, որովհետև նրանց մեջ կենդանի հոգի կար։

Տիրոջ փառքը գնում է տաճարից

¹⁸ Տիրոջ փառքը տաճարի նախագավթից դուրս ելավ ու քերովբեների վրա նստեց։ ¹⁹ Քերովբեներն էլ իրենց թևերը վեր պարզեցին և աչքիս առաջ երկրից վեր բարձրացան, անիվներն էլ՝ նրանց հետևից։ Եվ կանգնեցին Տիրոջ տան դռան շեմին, որ նայում էր դեպի արևելք. Իսրայելի Աստծու փառքն էլ նրանց վերևում էր։ ²⁰ Սա այն կենդանի էակն էր, որին ես տեսել էի Քոբար գետի ափին՝ Իսրայելի Աստծու ներքո, ու իմացա, որ դրանք քերովբեներ են։ ²¹ Ամեն մեկը չորսական դեմք ուներ, ամեն մեկը՝ ութական թև, թևերի տակ էլ՝ մարդու ձեռքերի նման ձեռքեր, երեսներն էլ՝ նման մարդու երեսի։ ²² Սրանք այն դեմքերն էին, որոնց ես տեսել էի Իսրայելի Աստծու փառքի ներքո՝ Քոբար գետի ափին, նույն տեսքը և նույն քերովբեները. յուրաքանչյուրն իր դեմքի ուղղությամբ էր ընթանում։

11

Երուսաղեմը դատապարտվելու է իր գործած ոճիրների համար

¹ Հոգին բարձրացրեց ինձ ու բերեց Տիրոջ տան դռան դիմաց, որ նայում էր դեպի արևելք։ Եվ ահա գավթի դռան առաջ մոտ քսանհինգ մարդ կար։ Նրանց մեջ տեսա Հազերի որդի Հեզոնիային և Բանիայի որդի Փաղտիային՝ ժողովրդի առաջնորդներին։ ² Տերն ինձ ասաց. «Մարդո՛ւ որդի, սրանք են այն մարդիկ, ովքեր սնոտի բաներ են մտածում և այդ քաղաքում չար խրատներ տալիս ³ ու ասում են. “Այս տները նոր շինված չեն, այլ այս քաղաքը մի կաթսա է, մենք էլ՝ միս”։ ⁴ Դրա համար էլ մարգարեացի՛ր նրանց դեմ, մարգարեացի՛ր, մարդո՛ւ որդի»։ ⁵ Տիրոջ Հոգին իջավ ինձ վրա ու ասաց. «Ամենակալ Տերն այսպես է ասում. “Այսպե՛ս ասացիք, Իսրայելի՛ տուն, և ես գիտեմ ձեր հոգու խորհուրդը։ ⁶ Դուք ձեր դիակները բազմապատկեցիք այդ քաղաքում և նրա ճանապարհները վիրավորներով լցրեցիք։ ⁷ Դրա համար էլ Ամենակալ Տերն այսպես է ասում. “Ձեր դիակները, որ քաղաքի մեջտեղում էիք դնում, միսն են, իսկ քաղաքն էլ՝ կաթսան։ Ձեզ դուրս եմ բերելու նրա միջից։ ⁸ Դուք վախենում էիք սրից, սուր եմ բերելու ձեզ վրա,- ասում է Ամենակալ Տերը։- ⁹ Ձեզ նրա միջից դուրս եմ բերելու ու օտարների ձեռքն եմ մատնելու, ձեր մեջ դատաստան եմ անելու, ¹⁰ որովհետև սրով եք ընկնելու. Իսրայելի լեռների վրա եմ ձեզ դատելու, և կիմանաք, որ ես եմ Տերը։ ¹¹ Այն ձեզ համար կաթսա չի լինելու, ոչ էլ դուք նրա մեջ՝ միս։ Իսրայելի լեռների վրա եմ ձեզ դատելու, ¹² և կիմանաք, որ ես եմ Տերը։ Դուք ըստ իմ օրենքների չընթացաք, իմ իրավունքը չգործադրեցիք, այլ ձեր շուրջը գտնվող ազգերի կրոնների համաձայն շարժվեցիք”»։ ¹³ Մինչ ես մարգարեանում էի, Բանիայի որդի Փաղտիան մեռավ։ Երեսս ի վայր ընկա ու բարձրաձայն աղաղակեցի՝ ասելով. «Վա՜յ ինձ, վա՜յ ինձ, Ամենակա՛լ Տեր, Իսրայելի մնացորդները վախճանին հասցրիր»։

Աստված պիտի հավաքի ցրված ժողովրդին

¹⁴ Ապա Տիրոջ խոսքն ինձ ուղղվեց ու ասաց. ¹⁵ «Մարդո՛ւ որդի, քո եղբայրների՝ քեզ հետ գերության մեջ գտնվողների, Իսրայելի ամբողջ տան վախճանը հասել է։ Երուսաղեմի բնակիչները նրանց ասել են. “Հեռացե՛ք Տիրոջից, որովհետև այս երկիրը մեզ է տրված որպես ժառանգություն”։ ¹⁶ Դրա համար ասա՛. “Ամենակալ Տերն այսպես է ասում, թե նրանց ինձնից հեռու եմ վանելու ազգերի մեջ, ցրելու եմ ողջ երկրով մեկ, սակայն նրանց համար մի փոքր սրբարան եմ լինելու այն գավառներում, որտեղ մտնելու են”։ ¹⁷ Ուստի նրանց ասա՛. “Ամենակալ Տերն այսպես է ասում. նրանց ազգերի միջից ինձ մոտ եմ առնելու, նրանց հավաքելու եմ ա՛յն երկրներից, ուր նրանց ցրել էի, և Իսրայելի երկիրը նրանց եմ տալու։ ¹⁸ Մտնելու են այնտեղ, վերացնելու են այնտեղի բոլոր կուռքերը և նրա միջից՝ բոլոր անօրենությունները։ ¹⁹ Եվ ուրիշ սիրտ եմ նրանց տալու, նոր հոգի եմ նրանց պարգևելու, նրանց մարմիններից քարեղեն սիրտը հանելու եմ և մարմնեղեն սիրտ եմ տալու, ²⁰ որպեսզի իմ հրամանների համաձայն ընթանան, իմ իրավունքը պահեն ու կատարեն և ինձ համար ժողովուրդ լինեն, ես էլ իրենց համար՝ Աստված։ ²¹ Բայց կուռքերին նվիրված նրանց սրտի համար, այն անօրենությունների համար, որ գործել են, և այն ճանապարհի համար, որ ընթանում էին, պատիժ եմ բերելու նրանց գլխին”»,- ասում է Ամենակալ Տերը։

Աստծու փառքը հեռանում է Երուսաղեմից

²² Եվ քերովբեներն իրենց թևերը վեր պարզեցին, անիվներն էլ նրանց հետևից բարձրացան։ Իսրայելի Աստծու փառքն էլ նրանց բոլորի վրա էր։ ²³ Տիրոջ փառքը քաղաքի միջից վեր բարձրացավ և կանգ առավ այն լեռան վրա, որ քաղաքի դիմացն էր։ ²⁴ Եվ Հոգին ինձ բարձրացրեց, բերեց քաղդեացիների երկիրը՝ գերիների մեջ՝ Աստծու Հոգով տրված տեսիլքով։ ²⁵ Եվ սթափվեցի այն տեսիլքից, որ տեսել էի, ու գերիների առաջ խոսեցի այն բոլոր բաների մասին, որ Տերն ինձ ցույց էր տվել։

12

Եզեկիելը աքսոր է գուշակում

¹ Տիրոջ խոսքն ինձ ուղղվեց ու ասաց. ² «Մարդո՛ւ որդի, դու բնակվում ես նրանց անօրենությունների մեջ, ովքեր աչքեր ունեն տեսնելու, բայց չեն տեսնում, ականջներ ունեն լսելու, բայց չեն լսում, քանի որ դառնացնող ժողովուրդ են։ ³ Դո՛ւ էլ, մարդո՛ւ որդի, քեզ գերության հանդերձա՛նք պատրաստիր, ցերեկը նրանց աչքի առաջ գերությա՛ն գնա, քո տեղից ուրիշ տե՛ղ տարագրվիր նրանց աչքի առաջ, որպեսզի տեսնեն, քանի որ նրանք դառնացնող ժողովուրդ են։ ⁴ Նրանց աչքի առաջ ի ցույց կհանես հանդերձանքդ, որ պատրաստած կլինես գերության համար։ ⁵ Երեկոյան նրանց առաջ դուրս կելնես, ինչպես գերին է դուրս ելնում, նրանց աչքի առաջ պատը կծակես ու դրա միջով նրանց առաջ դուրս կելնես, ⁶ գլխիկոր կգնաս, գաղտագողի դուրս կելնես, գլուխդ ձորձով կպատես, որ գետինը չտեսնես, քանի որ քեզ Իսրայելի տան համար նշան դարձրի»։ ⁷ Ամբողջությամբ արեցի այնպես, ինչպես որ Տերն ինձ պատվիրել էր. ցերեկը գերության հանդերձանք հագա, երեկոյան էլ իմ ձեռքով պատը փորեցի, և նրանց աչքի առաջ գաղտագողի, գլխիկոր էի գնում։ ⁸ Իսկ առավոտյան Տիրոջ խոսքն ինձ ուղղվեց ու ասաց. ⁹ «Մարդո՛ւ որդի, Իսրայելի տունը՝ դառնացնող ժողովուրդը, քեզ չասա՞ց. “Այդ ի՞նչ ես անում”։ ¹⁰ Արդ, նրանց ասա՛. “Տերը՝ Աստված, այսպես է ասում Երուսաղեմի իշխաններին ու առաջնորդներին, Իսրայելի ամբողջ տանը, որ նրանց մեջ են բնակվում. ¹¹ “Ես նշան եմ անելու Երուսաղեմի մեջ”. ինչպես որ արել եմ քեզ, այնպես էլ լինելու է նրանց հետ, որովհետև պանդխտության ու գերության են գնալու։ ¹² Իշխանն էլ նրանց մեջ գլխիկոր է գնալու, գաղտագողի է շրջելու, պատը փորելով է դուրս գալու, երեսը ծածկած է գնալու, որպեսզի գետինը չտեսնի։ ¹³ Ցանցս նրա շուրջն եմ գցելու, և ուռկանով պատվելու-պաշարվելու է։ Նրան Բաբելոն՝ քաղդեացիների երկիրն եմ տանելու, բայց նա այն չի տեսնելու և այնտեղ էլ մեռնելու է։ ¹⁴ Եվ նրա բոլոր օգնականներին, որոնք նրա շուրջն են, նրա բոլոր պաշտպաններին ցրիվ եմ տալու բոլոր կողմերով ու նրանց հետևից սուր եմ քաշելու։ ¹⁵ Երբ ես նրանց ցրիվ տամ ազգերի մեջ և սփռեմ երկրներով մեկ, կիմանան, որ ես եմ Տերը։ ¹⁶ Սակայն նրանցից սակավաթիվ մարդկանց զերծ եմ թողնելու սովից, սրից ու ժանտախտից, որպեսզի իրենց բոլոր անօրենությունները պատմեն այն ազգերի մեջ, ուր մտնելու են։ Ու կիմանան, որ ես եմ Տերը”»։

Դողացող մարգարեի նշանը

¹⁷ Տիրոջ խոսքն ինձ ուղղվեց ու ասաց. ¹⁸ «Մարդո՛ւ որդի, հացդ պակասով ես ուտելու և ջուրդ տանջանքով ու նեղությամբ ես խմելու։ ¹⁹ Եվ այդ երկրի ժողովրդին կասես. “Ամենակալ Տերն այսպես է ասում Երուսաղեմի, Իսրայելի երկրի բնակիչներին։ Իրենց հացը պակասով են ուտելու, իրենց ջուրն ամայության մեջ են խմելու, մինչև որ երկիրն ամայանա իր ամբողջության մեջ, որովհետև նրա բոլոր բնակիչներն ամբարշտության մեջ են։ ²⁰ Նրանց բնակեցված քաղաքներն ավերվելու են, նրանց երկիրն ամայության է մատնվելու։ Ու կիմանան, որ ես եմ Տերը”»։

Տիրոջ խոսքը իրականանալու է

²¹ Տիրոջ խոսքն ինձ ուղղվեց ու ասաց. ²² «Մարդո՛ւ որդի, այդ ի՞նչ առակ է, որ ասվում է Իսրայելի երկրում, թե՝ “Հեռու են օրերը, ու չքացել են բոլոր տեսիլքները”։ ²³ Ուստի նրանց ասա՛. “Ամենակալ Տերն այսպես է ասում. չեղյալ եմ համարելու այդ առակը, և Իսրայելի տունն այլևս այդ առակը չի ասելու, որովհետև պիտի ասես նրանց, որ մոտ են օրերն ու կատարվելու են բոլոր տեսիլքների պատգամները։ ²⁴ Այլևս ոչ մի սուտ տեսիլք չի լինելու, ոչ էլ մարդահաճո գուշակներ՝ Իսրայելի որդիների մեջ։ ²⁵ Արդարև, ես՝ Տերս, այս բաներն ասացի, ասացի և դրանք իրագործելու եմ, չեմ հետաձգելու, որովհետև, ո՛վ դառնացնող ժողովուրդ, ձեր օրոք այդ բաներն ասացի և դրանք իրագործելու եմ”»,- ասում է Ամենակալ Տերը։

²⁶ Տիրոջ խոսքն ինձ ուղղվեց ու ասաց. ²⁷ «Մարդո՛ւ որդի, ահա Իսրայելի տունը՝ դառնացնող ժողովուրդը, ասում է. “Տեսիլքը, որ դա տեսնում է, բազմաթիվ օրեր հետո է իրագործվելու, իսկ այն, ինչ մարգարեանում է՝ հեռավոր ժամանակներում”։ ²⁸ Դրա համար էլ նրանց ասա՛. “Ամենակալ Տերն այսպես է ասում. այսուհետև բոլոր այն բաները, որ ասացի, չեն դանդաղելու, այլ ինչ որ ասացի՝ իրագործելու եմ”»,- ասում է Ամենակալ Տերը։

13

Ընդդեմ կեղծ մարգարեների

¹ Տերը խոսեց ինձ հետ ու ասաց. ² «Մարդո՛ւ որդի, մարգարեացի՛ր Իսրայելի այն մարգարեների դեմ, ովքեր մարգարեանում են այնտեղ, և ասա՛ այն մարգարեներին, ովքեր իրենց սրտի ուզածի պես են մարգարեանում. մարգարեացի՛ր ու նրանց ասա՛. “Լսե՛ք Տիրոջ պատգամները։ ³ Ամենակալ Տերն այսպես է ասում. վա՛յ նրանց, որ իրենց սրտի ուզածի պես են մարգարեանում, որ իրենց սրտի ուզածին են հետևում և ոչինչ չեն տեսնում”։ ⁴ Ո՛վ Իսրայել, քո մարգարեներն այնպես էին, ինչպես աղվեսները՝ ավերակների մեջ. ⁵ նրանք հաստատուն չմնացին։ Հոտեր ժողովեցին Իսրայելի տան դեմ, ու չհաստատվեցին այն խոսքերը, որ նրանք խոսում էին Տիրոջ անունից, ⁶ սուտ տեսիլքներ էին տեսնում, սնոտի գուշակություն անում ու ասում էին՝ “Այսպես է ասում Տերը”։ Բայց ես՝ Տերս չէի ուղարկել նրանց։ Եվ սկսեցին խոսքեր տարածել։ ⁷ Չէ՞ որ սուտ տեսիլքներ էիք տեսնում, սնոտի գուշակություններ էիք անում, երբ ասում էիք, թե այսպես է ասել Տերը։ Բայց ես՝ Տերս չէի ասել։ ⁸ Ուստի ասա՛. “Ամենակալ Տերն այսպես է ասում. քանի որ ձեր խոսքերը սուտ են, ձեր գուշակություններն էլ՝ սնոտի, ահա դրա համար,- ասում է Ամենակալ Տերը,- ⁹ ես իմ ձեռքը երկարելու եմ ձեր և ձեր մարգարեների դեմ, ովքեր սուտ տեսիլքներ էին տեսնում ու սնոտի բաներ խոսում։ Իմ ժողովրդի ուսուցմանը մասնակից չպիտի լինեն, Իսրայելի տան գրքերում չպիտի հիշվեն, ոչ էլ Իսրայելի երկիրը պիտի մտնեն։ Եվ կիմանան, որ ես եմ Ամենակալ Տերը։ ¹⁰ Այն բանի համար, որ իմ ժողովրդին մոլորեցնում էին՝ ասելով՝ խաղաղությո՜ւն, խաղաղությո՜ւն, բայց խաղաղություն չկար, և որ ժողովուրդը պատ էր կառուցում, իսկ նրանք այնպես էին ծեփում, որ փլվեր,- ¹¹ Տերն այդ ծեփողներին ասում է. “Դա անզգամություն է, քանի որ փլվելու է, անձրև է գալու և ողողելու։ Եվ ռմբաքարերով քարկոծելու եմ նրանց որմնակապերը, ու խորտակվելու են։ Հողմ է բարձրանալու ու տապալելու։ ¹² Ահա խորտակված է պատը, և այն ժամանակ ձեզ չե՞ն ասելու՝ “Ո՞ւր է ձեր ծեփը, որով ծեփեցիք”։ ¹³ Արդ, Ամենակալ Տերն այսպես է ասում. “Իմ զայրույթով հողմ եմ բերելու, որ ամեն ինչ վերացնի։ Իմ բարկությամբ անձրև է գալու՝ ողողելու համար։ Ցասումով ռմբաքար ժայռեր եմ արձակելու դրա վրա, որ տապալվի։ ¹⁴ Գետնին եմ հավասարեցնելու այն պատը, որ ծեփում էիք, և այն կործանվելու է։ Հողին եմ հավասարեցնելու այն, ու նրա հիմքերը երևալու են։ Ընկնելու և վերջ է գտնելու անպատվությամբ։ Ու կիմանաք, որ ես եմ Տերը։ ¹⁵ Եվ զայրույթս եմ իրագործելու թե՛ պատի, թե՛ այն ծեփողների վրա։ Եվ այն կործանվելու է։ Եվ ձեզ ասելու եմ, որ պատն այլևս չկա, ոչ էլ այն ծեփողները՝ ¹⁶ Իսրայելի մարգարեները, որոնք մարգարեանում էին Երուսաղեմի վրա և նրա համար խաղաղություն էին գուշակում, բայց խաղաղություն չկար”»,- ասում է Ամենակալ Տերը։

Ընդդեմ սուտ մարգարեուհիների

¹⁷ «Եվ դո՛ւ, մարդո՛ւ որդի, դեմքդ ուղղի՛ր քո ժողովրդի դուստրերի դեմ, ովքեր իրենց սրտի ուզածի պես էին մարգարեանում։ Մարգարեացի՛ր նրանց դեմ ¹⁸ ու ասա՛. “Ամենակալ Տերն այսպես է ասում. վա՛յ նրանց, որ բարձիկներ են կարում-կարկատում ձեռքի ամեն արմունկի տակ և գլխաշորեր են պատրաստում ամեն հասակի մարդկանց գլխի համար՝ մոլորեցնելու նրանց հոգիները, որովհետև իմ ժողովրդի հոգիները մոլորվել են։ ¹⁹ Խելքահան էին անում նրանց, իմ ժողովրդի առաջ բամբասում էին իմ մասին մի բուռ գարու կամ մի պատառ հացի համար, որպեսզի սպանեին մարդկանց, ովքեր մահապարտ չէին, և կենդանի պահեին նրանց, ովքեր չպետք է ապրեին՝ խոսելով ժողովրդի ականջին, որ ախորժում է սին խոսքերը”։ ²⁰ Ուստի Տերը՝ Աստված, այսպես է ասում. “Ահա ես ձեր այդ բարձիկների դեմ եմ, որոնց օգնությամբ հոգիներ էիք որսում. դրանք ձեր բազուկներից պատռել-պոկելու եմ, ազատելու եմ հոգիներին, որոնց դուք մոլորեցնում էիք՝ ցրիվ տալու համար։ ²¹ Պատառոտելու եմ ձեր գլխաշորերը, իմ ժողովրդին ազատելու եմ ձեր ձեռքից, ու նրանք այլևս ձեր ձեռքում չեն լինելու որպես որսի ավար։ Եվ կիմանաք, որ ես եմ Տերը։ ²² Այն բանի համար, որ անիրավությամբ խոտորում էիք արդարի սիրտը (ե՛ս չէի նրան մոլորեցնում), իսկ անօրենի ձեռքն էլ զորացնում էիք, որպեսզի նա երբեք հետ չդառնար իր անօրենությունից, իր չար ճանապարհից ու ապրեր, ²³ ուստի այլևս սուտ տեսիլքներ չպիտի տեսնեք և հաճոյական գուշակություններ չպիտի անեք։ Իմ ժողովրդին փրկելու եմ ձեր ձեռքից, ու կիմանաք, որ ես եմ Տերը”»։

14

Ընդդեմ կռապաշտության

¹ Իսրայելի ծերերից ոմանք ինձ մոտ եկան և իմ առջև նստեցին։ ² Եվ Տիրոջ խոսքն ինձ ուղղվեց ու ասաց. ³ «Մարդո՛ւ որդի, այդ մարդիկ իրենց կռապաշտական խորհուրդներն իրենց սրտի մեջ են դրել, իրենց անիրավությունների պատճառած տանջանքներն էլ՝ իրենց առջև։ Չլինի՞ թե ես եմ նրանց պատասխան տալու։ ⁴ Ուստի խոսի՛ր նրանց հետ ու ասա՛. “Ամենակալ Տերն այսպես է ասում. Իսրայելի տնից ամեն ոք, ով իր կռապաշտական խորհուրդներն իր սրտի մեջ դնի, իր անիրավությունների պատճառած տանջանքներն էլ՝ իր աչքի առաջ և գա մարգարեի մոտ՝ նրա միջոցով ինձնից պատգամ հարցնելու, ես՝ Տերս, նրան պատասխան եմ տալու ըստ այն բանի, թե ի՛նչ ունի իր մտքում, ⁵ որպեսզի Իսրայելի տունը չխոտորեցնեն ըստ իրենց սրտերի, որ իրենց ընթացքով օտարացած են ինձնից”։ ⁶ Ուստի ասա՛ Իսրայելի տանը. “Այսպես է ասում Տերը, Ամենակալն Աստված. դարձի եկե՛ք, հեռացե՛ք ձեր ընթացքից, ձեր բոլոր ամբարշտություններից, ձեր երեսը դեպի ի՛նձ դարձրեք։ ⁷ Քանի որ եթե Իսրայելի այդ տնից կամ եկվորներից ու պանդուխտներից ամեն ոք, ով ինձնից օտարանա և կռապաշտական խորհուրդները սրտի մեջ դնի, իր անիրավությունների պատճառած տանջանքներն իր առջև դնի ու գա մարգարեի մոտ՝ նրա միջոցով ինձնից պատգամ հարցնելու, ես՝ Տերս, նրան պատասխան եմ տալու ըստ այն բանի, թե ի՛նչ ունի իր մտքում։ ⁸ Երեսս այդ մարդու դեմ եմ դարձնելու, նրան որպես կործանման օրինակ եմ դնելու և իմ ժողովրդի միջից վերացնելու եմ, ու կիմանաք, որ ես եմ Տերը։ ⁹ Եվ եթե մի մարգարե խաբի և ինչ-որ բան խոսի, թե իբր ես՝ Տերս եմ այդ մարգարեին մոլորեցրել, իմ ձեռքը նրա դեմ եմ երկարելու և նրան Իսրայելի իմ ժողովրդի միջից ոչնչացնելու եմ։ ¹⁰ Եվ նրանք իրենց անիրավության պատիժն են ստանալու, ինչպես հարցնողը, այնպես էլ մարգարեն, ¹¹ որպեսզի Իսրայելի տունն ինձնից այլևս չմոլորվի, և իրենց բոլոր հանցանքներով այլևս չպղծվեն. ինձ համար ժողովուրդ լինեն, ես էլ նրանց համար՝ Աստված”»,- ասում է Ամենակալ Տերը։

Ոչ մի բան արգելք չի լինելու Աստծու դատաստանին

¹² Եվ Տիրոջ խոսքն ինձ ուղղվեց ու ասաց. ¹³ «Մարդո՛ւ որդի, եթե մի երկիր իմ դեմ ինչ-որ հանցանք գործի, իմ ձեռքը նրա դեմ եմ երկարելու, նրա հացի պաշարն եմ կտրելու, նրա վրա սով եմ բերելու և նրա միջից վերացնելու եմ մարդ ու անասուն։ ¹⁴ Իսկ եթե այնտեղ լինեն այն երեք մարդիկ՝ Նոյը, Հոբն ու Դանիելը, նրանք են միայն փրկվելու իրենց արդարության շնորհիվ»,- ասում է Ամենակալ Տերը։ ¹⁵ «Եվ եթե չար գազաններ ուղարկեմ այդ երկրի վրա ու նրան պատժեմ, և այն աստիճան ավերում լինի, որ գազանների պատճառով այնտեղից անցնել չլինի, ¹⁶ այդ մարդիկ էլ այնտեղ լինեն, կենդանի եմ ես,- ասում է Ամենակալ Տերը,- եթե տղաներ ու աղջիկներ էլ ունենան, ոչ մեկն էլ չի փրկվելու, այլ միայն նրանք երեքը, իսկ երկիրը հիմնահատակ ավերվելու է։ ¹⁷ Եվ եթե այն երկրի վրա սուր բերեմ ու սրին ասեմ՝ անցնելու ես երկրի միջով, նրան միջից մարդ ու անասուն վերացնեմ, ¹⁸ այդ երեք մարդիկ էլ այնտեղ լինեն, կենդանի եմ ես,- ասում է Ամենակալ Տերը,- նրանք իրենց տղաներին ու աղջիկներին չեն փրկելու, այլ իրենք երեքն են միայն փրկվելու։ ¹⁹ Եվ եթե այդ երկրի վրա ժանտախտ բերեմ, արյան միջոցով զայրույթս նրա վրա թափեմ՝ նրա միջից մարդ ու անասուն վերացնելու համար, ²⁰ Նոյը, Հոբն ու Դանիելն էլ այնտեղ լինեն, կենդանի եմ ես,- ասում է Ամենակալ Տերը,- որ նրանց տղաներն ու աղջիկները չեն մնալու, այլ նրանք երեքն են միայն իրենց հոգիները փրկելու իրենց արդարության շնորհիվ»։ ²¹ Ամենակալ Տերն այսպես է ասում. «Եթե նույնիսկ Երուսաղեմի վրա չորս ահավոր պատուհասներս արձակեմ՝ սուրն ու սովը, չար գազաններն ու ժանտախտը՝ նրա միջից մարդ ու անասուն վերացնելու համար, ²² նրանում ողջ մնացած ստորները դուրս են բերելու իրենց տղաներին ու աղջիկներին։ Ահա նրանք դուրս են գալու ձեզ մոտ նրանց հետ, և դուք տեսնելու եք նրանց ճանապարհներն ու խորհուրդները և զղջալու եք այն չարիքի համար, որ բերել եմ Երուսաղեմի վրա, բոլոր այն չարիքների համար, որ բերել եմ նրա վրա։ ²³ Ու նրանք մխիթարություն են պատճառելու ձեզ, որովհետև տեսնելու եք նրանց ճանապարհներն ու խորհուրդները և հասկանալու եք, որ զուր տեղը չեմ արել այն ամենը, ինչ արել եմ նրանց հետ»,- ասում է Ամենակալ Տերը։

15

Որթատունկի փայտի մասին

Առակ որթատունկի մասին

¹ Տիրոջ խոսքն ինձ ուղղվեց ու ասաց. ² «Մարդո՛ւ որդի, բոլոր այն ճյուղերի փայտերի համեմատությամբ, որ անտառի ծառերից են, ինչի՞ կծառայի որթատունկի փայտը։ ³ Մի՞թե նրանից փայտ կարող են վերցնել՝ որևէ գործիք սարքելու համար, կամ նրանից մի ցից կարող են վերցնել՝ դրանից աման կախելու համար։ ⁴ Այն միայն կրակին է տրվում, որ սպառվի, քանի որ կրակը նրանից հատված ճյուղը տարեցտարի սպառում է, և որթատունկն իսպառ վերանում է. մի՞թե այն որևէ գործի համար պիտանի է լինում։ ⁵ Նույնիսկ եթե որթատունկն ամբողջական է հատվում, դարձյալ ոչ մի գործի համար պիտանի չէ, ուր մնաց երբ իսպառ հրո ճարակ է դառնում. ոչ մի բանի բոլորովին պիտանի չէ։ ⁶ Ուստի ասա՛. “Ամենակալ Տերն այսպես է ասում. ինչպես որ անտառի փայտերի միջից որթատունկի փայտն եմ հանձնել՝ հրո ճարակ լինելու, նույնպես էլ Երուսաղեմի բնակիչներին եմ հանձնելու։ ⁷ Դեմքս նրանց դեմ եմ ուղղելու։ Կրակից դուրս են գալու, բայց կրակն է նրանց ճարակելու։ Ու երբ դեմքս նրանց դեմ ուղղեմ, կիմանան, որ ես եմ Տերը։ ⁸ Եվ երկիրն ամայության եմ մատնելու այն բանի համար, որ հանցանքներ գործեցին”»,- ասում է Ամենակալ Տերը։

16

Լքյալ Երուսաղեմը

¹ Տիրոջ խոսքն ինձ ուղղվեց ու ասաց. ² «Մարդո՛ւ որդի, Երուսաղեմին վկայի՛ր իր անօրենությունների մասին ³ և ասա՛. “Ամենակալ Տերն այսպես է ասում Երուսաղեմին. քո արմատն ու ծնունդը քանանացիների երկրից են. հայրդ ամորհացի է, մայրդ՝ քետացի։ ⁴ Քո ծննդի ժամանակ՝ այն օրը, երբ ծնվեցիր, ոչ ոք պորտդ չկտրեց, ստինքներդ չկապեցին, ջրով չլվացվեցիր՝ սրբագործվելու համար, աղով չաղվեցիր, ոչ էլ խանձարուրի մեջ փաթաթվեցիր։ ⁵ Աչքս էլ քեզ չխնայեց. քեզ համար ոչինչ չարեցի՝ զգուշացնելու այն ամենից, որ կարող էր քեզ պատահել։ Այն օրը, երբ դու ծնվեցիր, դաշտի մեջ շպրտվեցիր քո խոտոր մտքերի համար։ ⁶ Մոտովդ անցա ու քեզ արյան մեջ թաթախված տեսա։ Ասացի քեզ. “Կենդանացի՛ր արյանդ միջից. կյանքդ արյունից է։ ⁷ Բազմացի՛ր, քանի որ քեզ դաշտի բույսի պես դարձրի”։ Բազմացար և մեծացար, եկար մտար վիթխարի քաղաքները։ Ստինքներդ կազմավորվեցին, մազերդ փարթամացան, բայց դու խայտառակ կերպով մերկ էիր։ ⁸ Եվ եկա հասա քեզ ու տեսա, որ ժամանակդ հասել էր, ինչպես նաև կուսությունդ խախտողների ժամանակը։ Թևերս քեզ վրա տարածեցի և մերկությունդ ծածկեցի։ Երդում արեցի և ուխտ կապեցի քեզ հետ,- ասում է Ամենակալ Տերը,- և իմը եղար։ ⁹ Քեզ ջրով լվացի, քեզ քո արյունից մաքրեցի և քեզ յուղով օծեցի։ ¹⁰ Քեզ պես-պես հագցրի. երկնագույն զգեստ հագցրի քեզ, մեջքիդ բեհեզ գոտի կապեցի, քեզ վրա ընտիր մետաքս գցեցի։ ¹¹ Զարդեղենով զարդարեցի քեզ. ձեռքիդ ապարանջաններ դրեցի, պարանոցիդ՝ քառամանյակ։ ¹² Քթիդ գինդեր ու ականջներիդ օղեր դրեցի, գլխիդ՝ պերճաշուք պսակ։ ¹³ Եվ դու զարդարվեցիր ոսկե ու արծաթե զարդերով։ Հագուստդ բեհեզ էր, կերպաս և դիպակ։ Նաշիհ կերար, յուղ ու մեղր, չափազանց գեղեցիկ եղար, արքայական փափկության մեջ գուրգուրանք ստացար։ ¹⁴ Քո գեղեցկության համբավը տարածվեց բոլոր ազգերի մեջ, որովհետև քո վայելչությունը, որ քեզ վրա էի կազմավորել, կատարյալ էր”,- ասում է Ամենակալ Տերը։

Պոռնկացած Երուսաղեմը

¹⁵ “Եվ դու քո գեղեցկության պանծանքով վստահ եղար, հոմանիներիդ հետ պոռնկացար և պոռնկությունդ տարածեցիր բոլոր այն անցորդների վրա, որոնց այդպիսի բան չէր պատահել։ ¹⁶ Քո հագուստներից վերցրիր և դրանցից քեզ համար մտացածին կուռքեր պատրաստեցիր ու դրանց հետ պոռնկացար։ Սակայն այնտեղ չմտնես, որովհետև դրանք չկային ու չեն լինելու։ ¹⁷ Քո պերճաշուք զարդեղենը՝ իմ ոսկուց ու արծաթից, որ քեզ էի տվել, վերցրիր, քեզ համար տղամարդու պատկերներ պատրաստեցիր և դրանց հետ պոռնկացար։ ¹⁸ Քո գեղեցիկ հագուստը վերցրիր և նրանց վրա գցեցիր, իմ յուղն ու խունկն էլ նրանց առաջ դրեցիր։ ¹⁹ Հացն էլ, որ տվել էի քեզ, նաշիհը, յուղն ու մեղրը, որոնցով սնել էի քեզ, որպես անուշահոտություն՝ նրանց առաջ դրեցիր։ Եվ դրանից հետո,- ասում է Ամենակալ Տերը,- ²⁰ վերցրիր տղաներիդ ու դուստրերիդ, որոնց ինձ համար էիր ծնել, սպանեցիր ու նրանց զոհ մատուցեցիր։ Իբր թե քիչ համարեցիր այդ պոռնկությունը, ²¹ իմ որդիներին էլ մորթեցիր և նրանց քավության զոհ դարձրիր։ ²² Իսկ դա ավելի սաստիկ բան եղավ, քան քո բոլոր պոռնկություններն ու պղծությունները։ Ու չհիշեցիր քո մանկության օրերը, երբ մերկ էիր ու խայտառակ, արյանդ մեջ թաթախված, որի միջից էիր կենդանություն ստացել։ ²³ Եվ այդ բոլոր չարիքներից հետո վա՜յ եղավ քեզ, վա՜յ քեզ,- ասում է Ամենակալ Տերը։- ²⁴ Քեզ համար պոռնկության տուն շինեցիր, բոլոր հրապարակներում քեզ համար բագիններ կանգնեցրիր, ²⁵ բոլոր ճանապարհների գլուխներին քո պոռնկանոցները շինեցիր, դեմքիդ գեղեցկությունը փչացրիր, ճանապարհի ամեն անցորդի առաջ սրունքներդ բացեցիր և պոռնկությունդ բազմապատկեցիր։ ²⁶ Պոռնկացար նաև քեզ սահմանակից Եգիպտոսի որդիների հետ, պոռնկացար բազմիցս, որպեսզի ինձ բարկացնես։ ²⁷ Արդ, ես իմ ձեռքը երկարելու եմ քո դեմ և քո իրավունքն եմ վերացնելու, քեզ մատնելու եմ քեզ ատելի այլազգիների դուստրերի ձեռքը, որոնք շեղում էին քեզ քո ճանապարհից։ Ամբարշտություն արեցիր ²⁸ ու պոռնկացար նաև Ասորեստանի որդիների հետ, բայց և այնպես չհագեցար։ Բազմապատկեցիր պոռնկությունդ, բայց և այնպես չհագեցար։ ²⁹ Բազմապատկեցիր դաշինքներդ Քանանի երկրի ու քաղդեացիների հետ, բայց և այնպես չհագեցար։ ³⁰ Ինչպե՞ս վարվեմ քո դուստրերի հետ,- ասում է Ամենակալ Տերը,- այն ամենից հետո, որ գործեցիր պոռնիկ կնոջ պես, քանի որ բազմիցս պոռնկացար ³¹ անգամ դուստրերիդ հետ։ Պոռնկանոցներ շինեցիր բոլոր ճանապարհների գլուխներին և կոթողներ էիր կանգնեցնում բոլոր հրապարակներում։ Դու մի պարզ պոռնիկ կին չեղար, որ վարձ է հավաքում, ³² որովհետև ամեն պոռնիկ կին քեզ նման չի շնանում իր ամուսնու հետ, ամուսնուց դրամ է առնում ու վարձ տալիս իր հոմանիներին։ ³³ Բոլոր պոռնիկներն իրենց համար են վարձ առնում, մինչդեռ դու էիր հոմանիներիդ վարձ տալիս և նրանց նվերներով հրապուրում, որ բոլոր կողմերից քեզ մոտ գային՝ քեզ հետ շնանալու։ ³⁴ Եվ քո պոռնկության մեջ քեզ հետ, ի տարբերություն բոլոր կանանց, հակառակը տեղի ունեցավ, և քեզ պես չպոռնկացան, քանի որ նրանք տղամարդկանցից վարձ էին առնում, մինչդեռ հոմանիներիդ դու էիր վարձ տալիս։ Ու քեզ հետ հակառակը տեղի ունեցավ”։

Աստծու դատաստանը Երուսաղեմի մասին

³⁵ “Ուստի, պոռնի՛կ, լսի՛ր Տիրոջ պատգամները։ ³⁶ Այսպես է ասում Ամենակալ Տերը. այն բանի համար, որ դրամդ վատնեցիր ու հոմանիներիդ առաջ պոռնկական ամոթալի արարքդ ու բոլոր պիղծ խորհուրդներդ բացահայտեցիր, ինչպես նաև որդիներիդ արյան համար, որոնց հոմանիներիդ էիր տալիս, ³⁷ ահա սրանց համար քո դեմ եմ հավաքելու բոլոր հոմանիներիդ, որոնց հետ խառնակվում էիր, քո բոլոր սիրելիներին ու ատելիներին քո դեմ եմ հանելու, նրանց հավաքելու և քեզ շրջապատել եմ տալու, քո բոլոր չարագործությունները բացահայտելու եմ նրանց առաջ, ու նրանք տեսնելու են քո բոլոր խայտառակությունները։ ³⁸ Քեզնից վրեժխնդիր եմ լինելու շնանալու և արյուն թափելու համար, քեզնից քո արյունն եմ պահանջելու՝ զայրույթի ու նախանձի արյունը։ ³⁹ Քեզ նրանց ձեռքն եմ մատնելու, և նրանք քո պոռնկանոցներն են կործանելու, քո կոթողներն են քանդելու, քեզ քո զգեստներից են մերկացնելու, քո պերճաշուք պսակն են վերցնելու և քեզ մերկ ու խայտառակված թողնելու։ ⁴⁰ Նաև ամբոխին են քո դեմ հանելու, քարերով քեզ քարկոծելու և իրենց սրերով քեզ կտոր-կտոր անելու։ ⁴¹ Տներդ են կրակով այրելու, բազում կանանց առաջ քեզնից վրեժխնդիր են լինելու։ Քեզ քո պոռնկությունից հետ եմ դարձնելու, և դու այլևս նրանց վարձ չես տալու։ ⁴² Զայրույթս քեզ վրա եմ թափելու և խնամքս քո վրայից վերցնելու եմ. հանգստանալու եմ և այլևս հոգ չեմ անելու։ ⁴³ Այն բանի համար, որ մանկությանդ օրերը չհիշեցիր և այդ ամենով ինձ տրտմեցնում էիր, ես էլ ահա քո բռնած ճանապարհի համար այս ամենը գլխիդ բերեցի,- ասում է Ամենակալ Տերը։- Այսպես քո բոլոր անօրենությունների վրա ամբարշտություն էլ գործեցիր”։

Երուսաղեմն ավելի վատ է, քան մյուս քաղաքները

⁴⁴ Այս ամենի պատճառով քո մասին առակներով փսփսում են ու ասում. “Ինչպիսին մայրն է, այնպիսին էլ աղջիկն է”։ ⁴⁵ Արդ, դու ճիշտ քո մոր դուստրն ես, որ ամուսնուն ու որդիներին վռնդեց, և քույրն ես քո այն քույրերի, ովքեր ամուսիններին ու որդիներին վռնդեցին։ Ձեր մայրը քետացի էր, ձեր հայրն էլ՝ ամորհացի։ ⁴⁶ Ձեր ավագ քույրը Սամարիան է, որ իր դուստրերի հետ բնակվում է քո ձախ կողմում, իսկ կրտսեր քույրը՝ Սոդոմը, որ իր դուստրերի հետ բնակվում է քո աջ կողմում։ ⁴⁷ Սակայն դու ըստ նրանց ճանապարհների չընթացար, ոչ էլ ըստ նրանց անօրենություններ գործեցիր, այլ դու քո ընթացքի մեջ նրանց փոքր-ինչ գերազանցեցիր։ ⁴⁸ Կենդանի եմ ես,- ասում է Ամենակալ Տերը,- Սոդոմը՝ քո քույրը, ու նրա դուստրերն ավելին արեցին, քան դու և քո դուստրերը։ ⁴⁹ Սոդոմի՝ քո քրոջ անօրենությունն այս էր. ամբարտավանություն, հացի լիության և գինու զեխության մեջ մեղկ կյանք էին վարում ինքն ու իր դուստրերը։ Սրանով գերազանցում էին ինքն էլ, դուստրերն էլ։ Աղքատին ու տնանկին ձեռք չէին մեկնում, ⁵⁰ մեծամտանում և իմ առաջ անօրենություններ անում։ Երբ դա տեսա, նրանց մեջտեղից վերացրի։ ⁵¹ Սամարիան նույնպես քո մեղքերի կեսը չգործեց։ Իսկ դու բազմապատկեցիր քո անօրենություններն ավելի, քան նրանք, և քո գործած բոլոր անօրենություններով քո քույրերին արդարացրիր։ ⁵² Արդ, տանջանքներդ ստացի՛ր, որ քույրերիդ ապականեցիր այն անօրենություններով, որոնք գործեցիր նրանցից առավել, որ նրանց քեզնից շատ ավելի արդար երևալ տվեցիր։ Արդ, ամաչի՛ր և անարգա՛նք կրիր, որ քո քույրերին քեզնից ավելի արդար երևալ տվեցիր։

Սոդոմն ու Սամարիան կվերականգվեն

⁵³ Նրանց իրենց նախկին վիճակին կվերահաստատեմ՝ Սոդոմին ու նրա դուստրերին՝ իրենց նախկին վիճակին, Սամարիային ու նրա դուստրերին՝ իրենց նախկին վիճակին. քեզ էլ քո նախկին վիճակին կվերահաստատեմ նրանց մեջ, ⁵⁴ որպեսզի տանջանքներդ ստանաս և անարգվես այն ամենի համար, ինչ կատարել ես՝ ինձ բարկացնելու համար։ ⁵⁵ Քո քույրը՝ Սոդոմը, ու նրա դուստրերը, վերստին հաստատվելու են այն վիճակի մեջ, որպիսին էին ի սկզբանե. Սամարիան ու նրա դուստրերն էլ վերստին հաստատվելու են այն վիճակի մեջ, որպիսին էին ի սկզբանե. դու և քո դուստրերն էլ հաստատվելու եք նույն վիճակի մեջ, որպիսին էիք ի սկզբանե։ ⁵⁶ Եվ քանի որ քո քույր Սոդոմը հպարտությանդ օրերին չէր հիշվում քո բերանում, ⁵⁷ քանի դեռ չարագործություններդ չէին բացահայտվել, ինչպես այժմ, որ Ասորիքի ու նրա շուրջը գտնվող բոլոր այլազգիների դուստրերի կողմից նախատվում ես բոլոր կողմերից, ⁵⁸ ուրեմն քաղի՛ր քո ամբարշտությունների և անօրենությունների պտուղները»,- ասում է Տերը։

Հավիտենական ուխտ

⁵⁹ «Ամենակալ Տերն այսպես է ասում. “Քեզ հետ վարվելու եմ այնպես, ինչպես դու ես վարվել, ինչպես որ ամեն բան անարգել ես ու իմ ուխտը զանց առել։ ⁶⁰ Բայց ես ուխտս հիշելու եմ, որ քեզ հետ կապել էի մանկությանդ օրերին, և ինձ համար հավիտենական ուխտ եմ հաստատելու։ ⁶¹ Հիշելու եմ նաև քո ընթացքը. անարգվելու ես, երբ քո ավագ ու կրտսեր քույրերիդ միտքդ բերես։ Նրանց քեզ որպես փորձություն եմ տալու և ոչ թե որպես դաշնակից։ ⁶² Ես իմ ուխտն եմ հաստատելու քեզ հետ, և կիմանաս, որ ես եմ Տերը, ⁶³ որպեսզի հիշես ու ամաչես և քո անարգանքների պատճառով այլևս չհամարձակվես բերանդ բաց անել, երբ քեզ քավություն տամ այն բոլոր գործերիդ համար, որ կատարել ես”»,- ասում է Ամենակալ Տերը։

17

Առակ արծիվների մասին

Արծիվը և որթատունկը

¹ Տիրոջ խոսքն ինձ ուղղվեց ու ասաց. ² «Մարդո՛ւ որդի, մի պատմությո՛ւն պատմիր, մի առա՛կ բեր Իսրայելի տան համար ³ և ասա՛. “Ամենակալ Տերն այսպես է ասում.

մի մեծ արծիվ՝ մեծաթև, երկայնատարած,

խոշոր մագիլներով,

մտադրվեց Լիբանան մտնել,

մայրիների ամենաընտիրից վերցրեց, ⁴ մի մատաղատունկ պոկեց,

քանանացիների երկիրը տարավ և այն պարսպապատ քաղաքում տնկեց։

⁵ Վերցրեց նաև երկրի սերմից, դաշտի երեսին տնկի դրեց

և այն առատ ջրերի մոտ՝ երևացող մի տեղում հաստատեց։

⁶ Բուսնեց և ցածր ու փոքր որթատունկ դարձավ,

որի ոստերը ձգվեցին դեպի վեր,

իսկ արմատները տարածվեցին իր տակ։

Նա փարթամ որթատունկ դարձավ,

ողկույզներ տվեց, շիվերն արձակեց։

⁷ Ապա երևաց մի ուրիշ մեծ արծիվ՝ մեծաթև ու բազմամագիլ։

Եվ ահա այս որթատունկը սրան փաթաթվեց,

արմատները սրա կողմը ձգվեցին,

ճյուղերն էլ՝ սրա տակ, որպեսզի ջրի նրան այն մարգերից, որտեղ տնկվել էր։

⁸ Գեղեցիկ դաշտում՝ առատ ջրի մոտ, պիտի փարթամանար՝ ոստեր արձակելու,

պտղաբերելու և մեծ որթատունկ դառնալու համար”։

⁹ Այս մասին ասա՛. “Ամենակալ Տերն այսպես է ասում.

Արդյոք որթատունկը փարթամանալո՞ւ է։

Չէ՞ որ նրա նուրբ արմատներն ու պտուղները նեխելու են,

նրա բոլոր ոստերը չորանալու են։

Ո՛չ մեծ բազուկ է պետք,

ո՛չ էլ շատ մարդ՝

ձեռք գցելու և այն արմատախիլ անելու համար։

¹⁰ Արդ, որթատունկը փարթամանալո՞ւ է։

Չի՛ փարթամանալու.

չէ՞ որ խորշակը երբ մոտենա,

չորանալու է ամբողջ բույսը՝ իր ոստերով”»։

Առակի բացատրությունը

¹¹ Տիրոջ խոսքն ինձ հետ ուղղվեց ու ասաց. ¹² «Մարդո՛ւ որդի, ասա՛ Իսրայելի տանը՝ դառնացնող ժողովրդին. չգիտե՞ք, թե այդ ի՛նչ բան էր, որ ձեզ ասացի։ Երբ բաբելացիների թագավորը Երուսաղեմ գա, նրա թագավորին ու իշխաններին պիտի վերցնի և նրանց իր մոտ՝ Բաբելոն տանի։ ¹³ Թագավորական սերնդից մեկին պիտի վերցնի, նրա հետ ուխտ պիտի դնի և նրան հավատարմության երդում անել պիտի տա։ Երկրի իշխաններին էլ պիտի վերացնի, որպեսզի թագավորությունը տկարանա, ¹⁴ ամենևին ոտքի չկանգնի, իր ուխտը պահի ու դրա մեջ հավատարիմ մնա։ ¹⁵ Սակայն նրա դեմ պիտի ապստամբի՝ սուրհանդակներ ուղարկելով Եգիպտոս, որպեսզի իրեն ձիեր ու բազում զորք տան։ Բայց արդյոք հաջողությո՞ւն է ունենալու։ Արդյոք փրկվելո՞ւ է նա, ով այսպիսի հակառակ բաներ է անում և դրժում ուխտը։ Արդյոք փրկվելո՞ւ է։ ¹⁶ Կենդանի եմ ես,- ասում է Ամենակալ Տերը,- որ ճիշտ այն տեղում, որտեղ թագավորը նրան թագավոր դարձրեց, որտեղ ինձ տված հավատարմության երդումն անարգեց և նրա հետ կնքած իմ ուխտը դրժեց, հենց Բաբելոնում մեռնելու է։ ¹⁷ Փարավոնն էլ ոչ թե իր մեծ զորությամբ, ոչ թե բազում գնդերով է նրա դեմ պատերազմելու, այլ պատնեշներ ու պարսպակործաններ է սարքելու, որպեսզի շատերին ոչնչացնի։ ¹⁸ Քանի որ երդումն անարգել է, ուխտն էլ դրժել, և ահա Բաբելոնի թագավորի ձեռքն եմ մատնել և նրա դեմ այս ամենն արել, մի՞թե փրկվելու է։ ¹⁹ Դրա համար ասա՛. “Այսպես է ասում Ամենակալ Տերը. Կենդանի եմ ես,- ասում է Ամենակալ Տերը,- ըստ իմ ուխտի, որ դրժել է, ըստ իմ երդման, որ անարգել է, նրան հատուցել եմ տալու։ ²⁰ Նրա վրա իմ ուռկանն եմ նետելու. նա ընկնելու է իմ պաշարման մեջ։ Նրան Բաբելոն եմ բերելու և այնտեղ էլ նրա հետ դատաստան եմ տեսնելու այն անիրավությունների համար, որ գործել է իմ նկատմամբ։ ²¹ Նաև բոլոր նրանք, ովքեր նրա բոլոր պատերազմներում խույս են տվել, սրով են ընկնելու. իսկ բոլոր նրանց, ովքեր մնալու են, չորս ուղղություններով ցրիվ եմ տալու։ Եվ կիմանաք, որ ես՝ Տերս եմ ասել”»։

Տիրոջ խոստումները

²² «Այս մասին Ամենակալ Տերն այսպես է ասում. “Բարձրավանդակի ընտիր-ընտիր մայրիների ճյուղերից մեկի գագաթից ոստ եմ կտրելու և բարձր լեռան վրա եմ տնկելու. այն կախ եմ տալու ²³ Իսրայելի բարձրաբերձ լեռից։ Տնկելու եմ, և ոստեր է արձակելու, պտղաբերելու է և մեծ մայրի է դառնալու։ Նրա տակ հանգստանալու են բոլոր կենդանիները, և նրա հովանու տակ օթևանելու են բոլոր թռչունները։ Նրա ճյուղերը հաստատ են մնալու նրա վրա։ ²⁴ Եվ դաշտի բոլոր ծառերը կիմանան, որ ես՝ Տերս եմ խոնարհեցնում բարձրացած ծառը և բարձրացնում խոնարհված ծառը, չորացնում եմ դալար ծառը և դալարեցնում չորացած ծառը։ Ես՝ Տերս եմ ասել սա և անելու եմ”»։

18

Անձնական պատասխանատվություն

¹ Տիրոջ խոսքն ինձ ուղղվեց ու ասաց. ² «Մարդո՛ւ որդի, ի՞նչ է նշանակում այն ասացվածքը, որ ասվում է ձեր՝ Իսրայելի որդիներիդ մեջ, թե՝ “Հայրերը թթու խաղող կերան, որդիների ատամներն առան”։ ³ Կենդանի եմ ես,- ասում է Ամենակալ Տերը,- Իսրայելում այդ ասացվածքը այլևս չի ասվելու, ⁴ որովհետև բոլորի հոգիներն էլ իմն են՝ ինչպես հորը, այնպես էլ որդունը. ով մեղանչի, հենց ինքն էլ պիտի մեռնի։ ⁵ Բայց այն մարդը, որ արդար է, օրենքներն ու արդարությունն է գործադրում, ⁶ լեռների վրա զոհաբերվածից չի ուտում, Իսրայելի տան կուռքերին աչք չի գցում, իր մերձավորի կնոջը չի պղծում, իր կնոջն էլ դաշտանի ժամանակ չի մերձենում, ⁷ մարդու հանդեպ բռնություն չի կատարում, պարտապանի ավանդը վերադարձնում է, հափշտակություն չի անում, իր հացը քաղցածներին է տալիս, մերկին էլ հագցնում է, ⁸ իր դրամը փոխ չի տալիս, տոկոսով էլ հետ չի պահանջում, անիրավությունից իր ձեռքը հետ է պահում, մարդու և նրա մերձավորի միջև արդար դատ է անում, ⁹ իմ հրամանների համաձայն է ընթանում, իմ օրենքներն է պահում ու գործադրում, այդպիսին արդար է և հաստատապես պիտի ապրի,- ասում է Ամենակալ Տերը։- ¹⁰ Իսկ եթե մեկը որդի ծնի՝ այլասերված, մարդասպան, որ մեղքեր գործի, ¹¹ իր արդար հոր ճանապարհով չընթանա, լեռների վրա զոհաբերվածից ուտի, իր մերձավորի կնոջը պղծի, ¹² աղքատին ու տնանկին բռնադատի, հափշտակություն անի, ավանդը չվերադարձնի, կուռքերի պաշտամունքին աչք գցի, անօրենություն գործի, ¹³ իր դրամը փոխ տա, վաշխով ու տոկոսով էլ հետ պահանջի, նա չպիտի ապրի. ով այս բոլոր անօրենությունները գործի, հաստատապես պիտի մեռնի, իր արյունն էլ իր վրա պիտի լինի։ ¹⁴ Եվ եթե որդի ծնի, սա էլ տեսնի իր հոր գործած բոլոր մեղքերը, վախենա և նույն բաները չանի, ¹⁵ լեռների վրա զոհաբերվածից չուտի, Իսրայելի տան կուռքերին աչք չգցի, իր մերձավորի կնոջը չպղծի, ¹⁶ որևէ մարդու չբռնադատի, ավանդը չյուրացնի, հափշտակություն չանի, իր հացը տա քաղցածներին, մերկին հագցնի, ¹⁷ անիրավությունից իր ձեռքը հետ պահի, վաշխ ու տոկոս չառնի, արդարություն գործի, իմ հրամաններով ընթանա, նա իր հոր անիրավությունների համար չպիտի մեռնի, այլ հաստատապես պիտի ապրի։ ¹⁸ Բայց նրա հայրը, եթե սաստկապես նեղի և անողոքաբար կողոպտի իր եղբորը, իմ ժողովրդի մեջ հակառակ գործած կլինի, պիտի մեռնի իր անիրավության համար։ ¹⁹ Եվ կասեք, թե՝ “Ինչպե՞ս է, որ հոր անիրավության համար որդին պատասխան չի տալիս”։ Քանի որ որդին ողորմություն ու արդարություն գործած, իմ բոլոր օրենքներն էլ պահած ու գործադրած կլինի. նա հաստատապես պիտի ապրի։ ²⁰ Ով մեղանչի, հենց ինքն էլ պիտի մեռնի, իսկ որդին հոր մեղքի տակ չպիտի ընկնի, ոչ էլ հայրը՝ իր որդու անիրավությունների։ Արդարի արդարությունն իր վրա է լինելու, անօրենի անօրենությունը՝ իր»։

Հորդոր՝ բարին գործելու

²¹ «Անօրենը եթե իր գործած բոլոր անօրենություններից հետ դառնա և իմ բոլոր պատվիրանները պահի, արդարություն ու ողորմություն անի, հաստատապես կապրի ու չի մեռնի։ ²² Նրա բոլոր մեղքերը, որ գործած կլինի, և բոլոր անիրավությունները, որ կատարած կլինի, չեն հիշվելու, այլ իր արդարության համար, որ արած կլինի, ապրելու է։ ²³ Մի՞թե ես մեղավորի մահն եմ տենչում,- ասում է Տերը՝ Աստված,- և ոչ թե այն, որ նա չար ճանապարհից հետ դառնա ու ապրի։ ²⁴ Իսկ երբ արդարն իր արդարությունից շեղվի, անիրավություն գործի, անօրեն մարդու արած բոլոր անօրենությունների նման, նրա բոլոր արդար գործերը, որ կատարած կլինի, չեն հիշվելու։ Այն հանցանքների համար, որոնց մեջ նա ընկած կլինի, և այն մեղքերի համար, որ գործած կլինի,- դրանց մեջ էլ մեռնելու է։ ²⁵ Կասեք՝ “Տիրոջ ճանապարհն ուղիղ չէ”։ Արդ, լսե՛ք, ո՛վ Իսրայելի տուն։ Մի՞թե իմ ճանապարհն ուղիղ չէ։ Չէ՞ որ ձեր ճանապարհներն ուղիղ չեն։ ²⁶ Երբ արդարն իր արդարությունից շեղվի և անիրավություն գործի, մեռնելու է իր անօրենության մեջ, որ գործել է։ ²⁷ Իսկ երբ անօրենը հետ կանգնի իր գործած անօրենությունից, իրավունք ու արդարություն անի, ինքն իր հոգին փրկելու է, ²⁸ որովհետև տեսել է ու իր կատարած բոլոր ամբարշտություններից հետ դարձել։ Հաստատապես ապրելու է ու չի մեռնելու։ ²⁹ Բայց Իսրայելի տունը կասի՝ “Տիրոջ ճանապարհն ուղիղ չէ”։ Մի՞թե իմ ճանապարհն ուղիղ չէ, ո՛վ Իսրայելի տուն։ Չէ՞ որ ձեր ճանապարհներն ուղիղ չեն։ ³⁰ Ուստի ձեզնից յուրաքանչյուրին ըստ իր բռնած ճանապարհի եմ դատելու, ո՛վ Իսրայելի տուն,- ասում է Ամենակալ Տերը։- Դարձե՛ք և հե՛տ կանգնեք ձեր բոլոր ամբարշտություններից, և անիրավության համար տանջանքների չեք մատնվի։ ³¹ Դե՛ն նետեք ձեզնից ձեր բոլոր ամբարշտությունները, որ կատարել եք իմ հանդեպ. ձեր մեջ նոր սիրտ ու նոր հոգի՛ դրեք, իմ բոլոր պատվիրանները կատարե՛ք։ Ինչո՞ւ մեռնեք, ո՛վ Իսրայելի տուն,- ասում է Տերը,- ³² քանի որ ես մեղանչածի մահը չեմ կամենում,- ասում է Ամենակալ Տերը,- այլ այն, որ իր չար ճանապարհներից հետ դառնա ու իր հոգին փրկի։ Արդ, դարձի՛ եկեք և ապրե՛ք»։

19

Ողբ Իսրայելի իշխանի վրա

¹ «Եվ դու, մարդո՛ւ որդի, ո՛ղբ ասա Իսրայելի իշխանի վրա։ ² Ասա՛.

“Ի՞նչ եղավ քո մայրն առյուծների մեջ,

ո՜վ կորյուն. առյուծների մեջ բազմացրեց իր կորյուններին։

³ Նրա կորյունների մեջ մի կորյուն հասակ առավ, առյուծ դարձավ,

հափշտակություն անել սովորեց և մարդակեր եղավ։

⁴ Նրա մասին լսեցին ազգեր,

նրան բռնեցին՝ սպանելու համար,

դնչակալով եգիպտացիների երկիրը տարան։

⁵ Երբ տեսավ, որ նրանից զրկվեց,

հույսն էլ կորավ, և իր կորյուններից մեկ այլ կորյունի առյուծ դարձրեց։

⁶ Սա շրջում էր առյուծների մեջ։

Առյուծ դարձավ,

հափշտակություն անել սովորեց և մարդակեր եղավ։

⁷ Հանդգնությամբ որս էր անում, քաղաքներ կործանում,

մռնչոցով երկիրն ամբողջովին ավերում։

⁸ Եվ շրջակա երկրներից ազգեր ելան նրա դեմ,

թակարդներ լարեցին նրա շուրջը՝ սպանելու համար,

⁹ դնչակալ հագցրին, վանդակի մեջ տարան բաբելացիների արքայի մոտ,

բանտ դրեցին,

որպեսզի Իսրայելի լեռների վրա նրա ձայնն այլևս չլսվի։

¹⁰ Քո մայրը նման էր որթատունկի

և նռնենու ծաղիկի պես տնկված էր հոսող ջրերի մոտ։

Նրա տունկն ու պտուղն ուռճացան

առատ ջրերի շնորհիվ։

¹¹ Նրա զորավոր գավազանն իշխեց ազգի իշխանների վրա.

որպես ծառ բարձրացավ ծառաստանների մեջ.

իր վեհությունը տեսավ իր ճյուղերի առատության մեջ։

¹² Բայց բարկությամբ ջարդվեց ու գետնին տապալվեց։

Խորշակը նրա ճյուղերը չորացրեց։

Այսպիսով նրանից վրեժ լուծվեց,

և նրա զորավոր գավազանը չորացավ։

Կրակն էլ ճարակեց այն։

¹³ Եվ ուրեմն այն տնկեցին անապատում,

անջրդի հողի մեջ։

¹⁴ Նրա ամենաընտիր ճյուղերից կրակ դուրս ելավ

և նրան այրեց։

Նրա մեջ զորավոր գավազան չմնաց։

Ազգը ողբի առակ է դարձել,

ողբի համար էլ պիտի լինի”»։

20

Իսրայելի անհավատարմությունների պատմությունը

Իսրայելի տան ավագներին

¹ Յոթերորդ տարում՝ հինգերորդ ամսին, ամսվա տասներորդ օրը, Իսրայելի տան ծերերից մարդիկ եկան՝ Տիրոջից հարցում անելու, ու նստեցին իմ առաջ։ ² Եվ Տիրոջ խոսքն ինձ ուղղվեց ու ասաց. ³ «Մարդո՛ւ որդի, խոսի՛ր Իսրայելի տան ծերերի հետ ու նրանց ասա՛. “Ամենակալ Տերն այսպես է ասում. ինձ մոտ հարցում անելո՞ւ եք գալիս. կենդանի եմ ես, որ ձեզ պատասխան չեմ տալու”,- ասում է Ամենակալ Տերը։ ⁴ Նրանցից վրե՞ժ լուծեմ, մարդո՛ւ որդի. իրենց հայրերի մեղքերի վկայությունը դի՛ր իրենց առաջ։ ⁵ Եվ նրանց ասա՛. “Տերը՝ Աստված, այսպես է ասում. այն օրվանից, երբ Իսրայելի տունն ընտրեցի, երբ ինձ հայտնեցի Հակոբի տան զավակին, երբ եգիպտացիների երկրում ինձ նրանց հայտնեցի, նրանց ձեռք մեկնեցի ու ասացի. “Ես եմ ձեր Տերը՝ Աստված”,- ⁶ այն օրը նրանց ձեռք մեկնեցի՝ եգիպտացիների երկրից դուրս բերելու դեպի այն երկիրը, որ նրանց համար էի պատրաստել, երկիր, որ կաթ ու մեղր է բխեցնում, որ ավելի քաղցր է, քան ուրիշ որևէ երկրինը։ ⁷ Եվ նրանց ասացի. “Յուրաքանչյուր ոք իր կուռքերն իր աչքերից թող դե՛ն նետի. եգիպտացիների ընթացքով մի՛ պղծվեք։ Ես եմ ձեր Տերը՝ Աստված”։ ⁸ Սակայն նրանք իմ դեմ ապստամբեցին և չուզեցին ինձ անսալ։ Յուրաքանչյուր ոք իր կուռքերն իր աչքերից դեն չնետեց. եգիպտացիների ընթացքը չթողեցին։ Ես էլ ասացի, որ իմ զայրույթն եմ թափելու նրանց վրա, իմ բարկությունն եմ ի կատար ածելու նրանց վրա եգիպտացիների մեջ։ ⁹ Բայց դա արեցի, որպեսզի իմ անունը երբեք չպղծվի այն ազգերի առաջ, որոնց մեջ էին գտնվում նրանք։ Այնտեղ նրանց հայտնվեցի՝ եգիպտացիների երկրից նրանց դուրս բերելու համար։ ¹⁰ Նրանց եգիպտացիների երկրից դուրս բերեցի, անապատ առաջնորդեցի, ¹¹ նրանց իմ պատվիրանները տվեցի, նրանց իմ օրենքները ցույց տվեցի, որ մարդ կգործադրի ու դրանցով կապրի։ ¹² Իմ շաբաթն էլ նրանց տվեցի, որպեսզի իմ ու նրանց միջև նշան լինի, և որպեսզի նրանք իմանան, որ ես եմ Տերը, որ նրանց սրբագործում եմ։ ¹³ Եվ այն անապատում Իսրայելի տանն ասացի. “Իմ հրամաններո՛վ շարժվեք”, բայց չշարժվեցին։ “Իմ օրենքները պահե՛ք՝ գործադրելով դրանք, որոնք եթե մարդ գործադրի, դրանցով էլ կապրի”։ Սակայն Իսրայելի տունն ինձ դառնացրեց անապատում։ Իմ հրամաններով չշարժվեցին, իմ օրենքները մերժեցին, որոնք եթե մարդ գործադրի, դրանցով էլ կապրի։ Իմ շաբաթները սաստիկ պղծեցին։ Եվ ասացի, որ անապատում նրանց վրա իմ զայրույթն եմ թափելու՝ նրանց ոչնչացնելու համար։ ¹⁴ Եվ դա արեցի, որպեսզի իմ անունը երբեք չպղծվի այն ազգերի առաջ, որոնց միջից և որոնց առջև նրանց դուրս բերեցի։ ¹⁵ Եվ ես անապատում նրանց վրա ձեռքս բարձրացրի՝ նրանցից ոչ մեկին չտանելու համար այն երկիրը, որ նրանց էի հատկացրել, երկիր, որ կաթ ու մեղր է բխեցնում, որ ավելի քաղցր է, քան ուրիշ որևէ երկրինը, ¹⁶ այն բանի համար, որ իմ օրենքները մերժեցին, իմ հրամաններով չշարժվեցին, իմ շաբաթները պղծեցին և իրենց սրտի խորհուրդներին հետևեցին։ ¹⁷ Սակայն աչքս նրանց խնայեց, այնպես որ նրանց չջնջեցի և անապատում նրանց վերջը չտվեցի։ ¹⁸ Ու անապատում նրանց ասացի. “Ձեր հայրերի կարգ ու կանոնով մի՛ առաջնորդվեք, նրանց օրենքները մի՛ պահեք, նրանց ընթացքին մի՛ խառնակվեք ու մի՛ պղծվեք։ ¹⁹ Ես եմ ձեր Տերը՝ Աստված, իմ հրամաններո՛վ շարժվեք, իմ օրենքնե՛րը պահեք ու դրանք գործադրե՛ք, ²⁰ իմ շաբաթները սո՛ւրբ պահեք, և դա իմ ու ձեր միջև թող նշան լինի, որպեսզի իմանաք, որ ես եմ ձեր Տերը՝ Աստված”։ ²¹ Նրանց որդիներն էլ ինձ դառնացրին, իմ հրամաններով չշարժվեցին, չջանացին պահելու իմ օրենքները՝ դրանք գործադրելու համար, որոնք եթե մարդ գործադրի, դրանցով էլ կապրի։ Եվ պղծում էին իմ շաբաթները։ Ես էլ ասացի, որ անապատում իմ զայրույթը թափելու եմ նրանց վրա՝ իմ բարկությունն ի կատար ածելու համար։ Եվ ձեռքս նրանց վրայից հետ քաշեցի։ ²² Դա արեցի, որպեսզի իմ անունը երբեք չպղծվի այն ազգերի առաջ, որոնց միջից նրանց դուրս բերեցի նրանց առջև։ ²³ Եվ ես այդ անապատում ձեռքս նրանց վրա բարձրացրի՝ ազգերի մեջ նրանց ցրիվ տալու և երկրներով մեկ ցիրուցան անելու համար, ²⁴ այն բանի համար, որ իմ օրենքները չգործադրեցին, իմ հրամանները մերժեցին, իմ շաբաթները պղծեցին, և աչքներն էլ իրենց հայրերի խորհուրդների վրա էին պահում։ ²⁵ Ուստի նրանց տվեցի ոչ բարի հրամաններ և օրենքներ, որոնցով չէին կարող ապրել։ ²⁶ Ապականելու եմ նրանց իրենց զոհաբերությունների ժամանակ, երբ անցնեմ բոլոր նրանց միջով, որ արգանդ են բացում, որպեսզի ոչնչացնեմ նրանց։ Եվ կիմանան, որ ես եմ Տերը»։

Աստված վերջ է դնելու Իսրայելի կռապաշտությանը

²⁷ «Ուստի խոսի՛ր Իսրայելի տան հետ, մարդո՛ւ որդի, ու նրանց ասա՛. “Ամենակալ Տերն այսպես է ասում. ձեր հայրերն ինձ այսչափ բարկացրին իմ հանդեպ գործած մեղքերով. ²⁸ նրանց տարա այն երկիրը, որ երդվել էի նրանց տալ, սակայն նրանք այնտեղ տեսան բոլոր բարձր բլուրները, սաղարթախիտ ծառերը, իրենց աստվածներին զոհեր մատուցեցին, իրենց զոհաբերությունների կարգը հաստատեցին, իրենց անուշահոտ խունկը ծխեցին, իրենց նվերներն ընծայաբերեցին։ ²⁹ Եվ նրանց ասացի. “Ի՞նչ է այդ բարձրադիր վայրը, ուր դուք մտնում եք”։ Եվ այն կոչվեց Բամա։ Այդպես էլ կոչվում է մինչև այսօր։

³⁰ Ուստի Իսրայելի տանն ասա՛. “Տերը՝ Աստված, այսպես է ասում. ձեր հայրերի անօրենությամբ պղծվում եք, նրանց կուռքերի հետ պոռնկանում, ³¹ ձեր նվերների երախայրիքը մատուցում, ձեր որդիներին ընծայաբերում եք, ձեր որդիներին առանձնացնում եք՝ կրակի միջով անցկացնելու համար։ Մինչև օրս պղծվում եք ձեր բոլոր մտածումների մեջ։ Եվ ես ձեզ պատասխա՞ն եմ տալու, ո՛վ տունդ Իսրայելի։ Կենդանի եմ ես,- ասում է Ամենակալ Տերը,- ես ձեզ պատասխան չեմ տալու, ոչ էլ ձեր մտքով թող անցնի։ ³² Չի լինելու այնպես, ինչպես դուք եք ասում, թե՝ “Մենք կլինենք հեթանոսների կամ երկրի այն ազգերի նման, ովքեր ծառեր ու քարեր են պաշտում”։

Աստված պատժում է և ներում

³³ “Ուստի կենդանի եմ ես,- ասում է Ամենակալ Տերը,- հզոր ձեռքով, բարձրացած բազկով ու հորդացող ցասումով եմ թագավորելու ձեզ վրա։ ³⁴ Ձեզ հանելու եմ ազգերի միջից, դուրս եմ բերելու այն երկրներից, որտեղ դուք ցրիվ եք եկել, հզոր ձեռքով, բարձրացած բազկով ու հորդացող ցասումով։ ³⁵ Ձեզ ազգերի անապատն եմ բերելու, ձեզ հետ երես առ երես դատի եմ նստելու, ³⁶ ինչպես որ այն անապատում դատի նստեցի ձեր հայրերի հետ, երբ նրանց եգիպտացիների երկրից դուրս հանեցի։ Այդպես եմ դատելու ձեզ,- ասում է Տերը՝ Ամենակալ Աստված։ ³⁷ Ձեզ անց եմ կացնելու իմ մականի տակով, մտցնելու եմ իմ հետ ուխտ կապածների թվի մեջ ³⁸ ու ձեր միջից զատորոշելու եմ ամբարիշտներին և ապստամբներին, որպեսզի նրանց հանեմ իրենց բնակված վայրերից, ու նրանք չմտնեն Իսրայելի երկիրը։ Եվ կիմանաք, որ ես եմ Տերը՝ Աստված։ ³⁹ Իսկ դուք, ո՛վ տունդ Իսրայելի, Տերը՝ Աստված, այսպես է ասում. նախ յուրաքանչյուրդ հրաժարվե՛ք ձեր ընթացքից, ապա և լսե՛ք ինձ, իմ սուրբ անունը մի՛ պղծեք ձեր նվերներով ու ձեր ընթացքով, ⁴⁰ որովհետև իմ սուրբ լեռան վրա, Իսրայելի բարձր լեռան վրա,- ասում է Տերը՝ Աստված,- Իսրայելի բովանդակ տունը մշտապես ինձ է ծառայելու, այնտեղ եմ ձեզ ընդունելու, այնտեղ եմ ձեր ընծաներին բարեհաճությամբ նայելու, ձեր բոլոր երախայրիքները ձեր սուրբ ընծաներով հանդերձ ⁴¹ ընդունելու եմ որպես անուշահոտություն՝ ձեզ դուրս բերելու ժողովուրդների միջից և ձեզ ընդունելու համար այն երկրներից, որտեղ ցրիվ էիք եկել։ Ու ձեր մեջ՝ ժողովուրդների դիմաց, սրբաբանվելու եմ։ ⁴² Եվ կիմանաք, որ ես եմ Տերը, երբ ձեզ Իսրայելի երկիրը տանեմ, երկիր, որ երդվել եմ ձեր հայրերին տալ։ ⁴³ Եվ այնտեղ հիշելու եք ձեր բռնած ճանապարհն ու ընթացքը, որոնցով պղծվեցիք։ Ձեր երեսներն եք ծեծելու ձեր գործած բոլոր անիրավությունների համար։ ⁴⁴ Եվ կիմանաք, որ ես եմ Տերը. այդպես եմ անում, որպեսզի իմ անունը չպղծվի ըստ ձեր չար ճանապարհների ու ձեր ապականված ընթացքի”»,- ասում է Ամենակալ Տերը։

Կրակ հարավում

⁴⁵ Տիրոջ խոսքն ինձ ուղղվեց ու ասաց. ⁴⁶ «Մարդո՛ւ որդի, դեմքդ ուղղի՛ր դեպի Թեման, նայի՛ր Դագովնի կողմը և մարգարեացի՛ր Նագեբ իշխանի անտառի վերաբերյալ։ ⁴⁷ Եվ Նագեբի անտառին կասե՛ս. “Լսի՛ր Տիրոջ պատգամները, Տերը՝ Ամենակալ Աստված, այսպես է ասում. ահա ես քեզ վրա կրակ եմ թափելու, որ ճարակելու է քեզանում ամեն դալար ծառ և ամեն չոր ծառ. բորբոքված բոցը չի հանգչելու, և նրա մեջ այրվելու է ամեն ինչ՝ արևելքից մինչև հյուսիս։ ⁴⁸ Եվ ամեն արարած կիմանա, որ ես՝ Տերս եմ վառել այն, ու դա չի հանգչելու”»։ ⁴⁹ Ու ասում եմ. «Քա՛վ լիցի, Տե՛ր, Տե՛ր,- ասում են նրանք ինձ,- չէ՞ որ դա առակ է, որ ասվում է»։

21

Կրակ հարավում

¹ Տիրոջ խոսքն ինձ ուղղվեց ու ասաց. ² «Մարդո՛ւ որդի, դեմքդ ուղղի՛ր դեպի Թեման, նայի՛ր Դագովնի կողմը և մարգարեացի՛ր Նագեբ իշխանի անտառի վերաբերյալ։ ³ Եվ Նագեբի անտառին կասե՛ս. “Լսի՛ր Տիրոջ պատգամները, Տերը՝ Ամենակալ Աստված, այսպես է ասում. ահա ես քեզ վրա կրակ եմ թափելու, որ ճարակելու է քեզանում ամեն դալար ծառ և ամեն չոր ծառ. բորբոքված բոցը չի հանգչելու, և նրա մեջ այրվելու է ամեն ինչ՝ արևելքից մինչև հյուսիս։ ⁴ Եվ ամեն արարած կիմանա, որ ես՝ Տերս եմ վառել այն, ու դա չի հանգչելու”»։ ⁵ Ու ասում եմ. «Քա՛վ լիցի, Տե՛ր, Տե՛ր,- ասում են նրանք ինձ,- չէ՞ որ դա առակ է, որ ասվում է»։

Աստծու սուրը

⁶ Տիրոջ խոսքն ինձ ուղղվեց ու ասաց. ⁷ «Դրա համար մարգարեացի՛ր, մարդո՛ւ որդի, դեմքդ ուղղի՛ր Երուսաղեմի վրա, նայի՛ր նրանց սրբավայրերին։ Կմարգարեանաս Իսրայելի երկրի դեմ ⁸ և Իսրայելի երկրին կասես. “Տերը՝ Ամենակալ Աստված, այսպես է ասում. ահա ես քո դեմ եմ. մերկացնելու եմ իմ սուրն իր պատյանից և քո միջից ոչնչացնելու եմ անիրավին ու անօրենին։ ⁹ Քանի որ քո միջից ոչնչացնելու եմ անիրավին ու անօրենին, ուստի իմ սուրն իր պատյանից դուրս է գալու բոլոր արարածների վրա՝ արևելքից մինչև հյուսիս։ ¹⁰ Եվ ամեն մարդ կիմանա, որ ես՝ Տերս եմ մերկացրել սուրս իր պատյանից, ու հետ՝ իր տեղը չի դրվելու։ ¹¹ Դո՛ւ էլ, մարդո՛ւ որդի, մեջքդ խոնարհած՝ հեծեծի՛ր, ցավագի՛ն հեծեծիր նրանց առաջ։ ¹² Եվ եթե քեզ հարցնեն՝ “Ինչո՞ւ ես հեծեծում”, կասես. “Որովհետև մի բոթ լսեցի, և այն վրա է հասնելու. ամեն սիրտ կոտրվելու է, ամեն ձեռք՝ թուլանալու, ամեն մարմին՝ չորանալու, ամեն շունչ՝ կտրվելու, ամեն ազդր՝ խոնավությամբ աղտոտվելու։ Ահա վրա է հասնում և լինելու է”»,- ասում է Տերը՝ Ամենակալ Աստված։ ¹³ Տիրոջ խոսքը դարձյալ ինձ ուղղվեց ու ասաց. ¹⁴ «Մարդո՛ւ որդի, մարգարեացի՛ր ու ասա՛. “Ամենակալ Տերն այսպես է ասում.

Սո՛ւր, սո՛ւր, սրվի՛ր ու մոլեգնի՛ր,

¹⁵ որպեսզի մեծ կոտորած անես։

Սրվի՛ր ու շողշողա՛,

պատրաստվի՛ր հարվածելու,

կոտորի՛ր, արհամարհի՛ր,

որդյա՛կ իմ, կտրի՛ր ամեն ծառ”։

¹⁶ Եվ սուրը տվեց պատրաստի վիճակում՝ ձեռքում բռնելու։

Այն սրված է, պատրաստ՝

ջարդարարի ձեռքը տալու համար։

¹⁷ Աղաղակի՛ր, ճի՛չ բարձրացրու, մարդո՛ւ որդի,

որովհետև սուրը եկել-հասել է իմ ժողովրդի և

Իսրայելի իշխանների վրա։

Նրանք պանդուխտ են լինելու,

քանի որ սուրը հասել է իմ ժողովրդի վրա։

Ուստի ձեռքերով ծա՛փ զարկիր,

¹⁸ որովհետև ասածս արդարացավ։

Եվ ի՞նչ է, ազգը փրկվելո՞ւ է։

“Դա չի՛ լինելու”,- ասում է Տերը՝ Աստված։

¹⁹ Դո՛ւ էլ, մարդո՛ւ որդի,

մարգարեացի՛ր,

ձեռքերով ծա՛փ զարկիր։

Դու էլ երկրո՛րդ սուրը վերցրու,

որովհետև երրորդ սուրը խոցվածների համար է լինելու.

սուրը խոցվածների վրա է ծանրացել

և նրանց զարհուրեցնելու է,

²⁰ որպեսզի նրանց սրտերը թուլանան,

նրանց բոլոր դռներին տկարները բազմանան,

որովհետև մատնված են սրի քաշվելու։

Սուրը փայլով գեղեցկացել է,

պիտանի դարձել՝ սպանելու համար։

²¹ Սո՛ւր, շրջվի՛ր, այս ու այն կո՛ղմ գնա,

աջից ու ձախի՛ց սրվիր.

ուր որ քո շեղբը սաստկանա,

²² ես այնտեղ ծափ եմ զարկելու, ուրախ թռչկոտելու,

իմ ձայնը բարձրացնելու.

ես՝ Տերս, խոսեցի»։

Բաբելոնի թագավորի սուրը

²³ Տիրոջ խոսքն ինձ ուղղվեց ու ասաց. ²⁴ «Մարդո՛ւ որդի, քեզ համար երկու ճանապա՛րհ պատրաստիր, ուր բաբելացիների արքայի սուրն է մտնելու, այնպես որ երկուսն էլ նույն երկրից սկիզբ առնեն։ Քաղաք տանող ճանապարհի գլխին ուղեցույց նշա՛ն պատրաստիր։ ²⁵ Ճանապարհի սկզբի՛ն հաստատվիր։ Պատրաստի՛ր ու ճանապա՛րհ հարթիր, որպեսզի սուրը մուտք գործի Ռաբոթ՝ ամովնացիների քաղաքը, նաև Հուդա, Երուսաղեմ, որ նրա մեջ է։ ²⁶ Բաբելացիների արքան գալու և կանգնելու է հին ճանապարհի վրա, երկու ճանապարհների գլխին՝ հմայություն անելու, գավազան նետելու, կուռքերին հարցում անելու, լյարդի վրա հմայություն անելու։ Նրա աջ ձեռքից ²⁷ գուշակություն է դուրս եկել Երուսաղեմի դեմ՝ պատնեշ կանգնեցնելու, լիաբերան գոչելու, աղաղակ բարձրացնելու, դարպասները խոյահարելու, հող թափելու և պարսպակործաններ շինելու»։

Գրոհ Երուսաղեմի դեմ

²⁸ «Եվ նա երուսաղեմացիներին այնպես է երևալու, կարծես մեկն իրենց առաջ հմայություններ է անում. շաբաթվա ընթացքում նրանց համար յոթ անգամ կրկնելու է։ Սակայն նա՝ բաբելացիների թագավորը, նրանց հիշեցնելու է, որ իրենց անիրավությունները մտաբերեն»։ ²⁹ Ուստի Տերը՝ Ամենակալ Աստված, այսպես է ասում. «Այն բանի համար, որ ձեր անիրավությունները հիշեցրիք՝ ձեր ամբարշտությունները հայտնի դարձնելով, ձեր մեղքերը՝ ձեր բոլոր ամբարշտություններն ու ձեր ընթացքը երևան բերելով, այն բանի համար, որ դուք ինքներդ եք նրանց հիշեցրել, ուրեմն ոչնչանալու եք։ ³⁰ Դու էլ, Իսրայելի պիղծ ու անօրե՛ն իշխան, որի օրը հասել է՝ անիրավության ժամանակի վերջը,- ³¹ Տերը՝ Աստված, քեզ այսպես է ասում. “Քո վրայից վերցրո՛ւ խույրդ, հանի՛ր պսակդ, որովհետև դա այդպես չի վերջանալու։ Դու բարձրացածին խոնարհեցրել ես, խոնարհին՝ բարձրացրել։ ³² Արդ, ես անիրավությունը մյուս անիրավությունների վրա եմ բարդելու։ Դա այդպես չի մնալու, մինչև որ գա նա, ում վայել է, և ես տալու եմ նրա ձեռքը”»։

Գրոհ ամովնացիների դեմ

³³ «Եվ դո՛ւ, մարդո՛ւ որդի, մարգարեացի՛ր ու ասա՛. “Տերը՝ Ամենակալ Աստված, այսպես է ասում ամովնացիներին նրանց նախատինքների վերաբերյալ”։ Կասես.

“Սո՛ւր, սո՛ւր, որ հանվել է սպանելու համար,

մերկացվել՝ վերջ տալու համար.

զարթնի՛ր, որպեսզի փայլես ³⁴ ունայն տեսքով

և սուտ գուշակություններ անելու ժամանակ խոցվածների՝

անօրենների պարանոցները քեզ մատնես.

սրանց օրը եկել հասել է՝

անիրավության ժամանակի վերջը։

³⁵ Հե՛տ դարձիր, մի՛ իջևանիր այնտեղ, որտեղ ծնվել ես.

նույն քո երկրում եմ քեզ դատելու,

³⁶ իմ բարկությունն եմ քեզ վրա թափելու,

իմ զայրույթի հուրն եմ քեզ վրա փչելու,

քեզ բարբարոս մարդկանց ձեռքն եմ մատնելու,

որոնք պղծություն են գործում։

³⁷ Եվ հրո ճարակ ես դառնալու,

արյունդ թափվելու է քո երկրում,

հիշատակդ էլ չի պահվելու։

Ես՝ Տերս, խոսեցի”»։

22

Երուսաղեմի ոճիրները

Իսրայելացիներին

¹ Տիրոջ խոսքն ինձ ուղղվեց ու ասաց. ² «Եվ դու, մարդո՛ւ որդի, եթե դատելու ես, դատի՛ր արյունահեղության քաղաքը և խայտառակի՛ր նրա բոլոր անօրենությունները։ ³ Կասես. “Տերը՝ Ամենակալն Աստված, այսպես է ասում. ո՛վ քաղաք, որ իր մեջ արյուն է թափում, որպեսզի իր ժամանակը հասնի. իր ներսում խորհուրդներ է անում, որպեսզի նրանց արյունով իրեն պղծի։ ⁴ Իզուր արյուն թափեցիր ու թաթախվեցիր, քո արած խորհուրդներով պղծվեցիր, քո օրերը մոտեցրիր և քո կյանքի վախճանին մոտեցար։ Դրա համար քեզ ազգերին նախատինք դարձրի, բոլոր երկրների համար՝ ծաղրի առարկա, ⁵ որպեսզի որոնք մոտ էին քեզ կամ քեզնից հեռու, քեզ ծաղրեն ու ասեն. “Դո՛ւ, անվանի՛ քաղաք, պղծության մատնվեցիր, որովհետև անօրենություններով լիացար”։ ⁶ Ահա Իսրայելի տան առաջնորդները. քո մեջ յուրաքանչյուրն իր ազգակցի հետ խառնակություն էր կազմակերպում, որպեսզի արյուն թափեր. ⁷ քո մեջ հայր ու մայր էին անարգում, քո մեջ եկվորի ու պանդուխտի հետ անիրավությամբ էին վարվում, քո մեջ որբին ու այրուն էին բռնադատում, ⁸ քո մեջ իմ սրբություններն էին արհամարհում ու իմ շաբաթները պղծում։ ⁹ Քո մեջ ավազակներ էին բնակվում, որպեսզի քո մեջ արյուն թափեին։ Քո մեջ լեռների վրա էլ զոհեր էին մատուցում և քո մեջ անմաքուր գործեր էին անում։ ¹⁰ Քո մեջ իրենց հոր ամոթն էին մեջտեղ հանում և քո մեջ պղծությամբ դաշտանավոր կնոջ էին բռնաբարում։ ¹¹ Քո մեջ յուրաքանչյուրն իր մերձավորի կնոջն էր պղծում, յուրաքանչյուրն ամբարշտությամբ իր հարսին էր պղծում, յուրաքանչյուրն իր քրոջը՝ իր հոր դստերն էր բռնաբարում։ ¹² Քո մեջ կաշառք էին վերցնում, որպեսզի արյուն թափեին, քո մեջ վաշխ ու տոկոս էին առնում։ Եվ քո չարագործություններին՝ ըստ քո գործած բռնության, վերջ եմ տալու, որովհետև մոռացել ես ինձ,- ասում է Տերը՝ Աստված։- ¹³ Ահա ծափ եմ զարկելու քո կատարած գործերի և քո մեջ կատարված արյունահեղության համար։ ¹⁴ Պիտի դիմանա՞ քո սիրտը, պիտի զորանա՞ն քո ձեռքերն այն օրերին, երբ այդպես վարվեմ քեզ հետ։ Ես՝ Տերս եմ ասում և անելու եմ։ ¹⁵ Քեզ ցրիվ եմ տալու ազգերի մեջ, ցիրուցան եմ անելու երկրներով մեկ, և քո միջից քո պղծությունը վերանալու է։ ¹⁶ Դա եմ քեզ ժառանգություն թողնելու ազգերին ի տես, և կիմանաք, որ ես եմ Տերը”»։

Աստծու զտող փուռը

¹⁷ Տիրոջ խոսքն ինձ ուղղվեց ու ասաց. ¹⁸ «Մարդո՛ւ որդի, ահա Իսրայելի տունն ինձ համար դարձավ խառնակված մի բան, ինչպես հալոցում խառնվում են պղինձն ու երկաթը, անագը, կապարն ու արծաթը։ ¹⁹ Ուստի ասա՛. “Տերը՝ Աստված, այսպես է ասում. այն բանի համար, որ դուք բոլորդ էլ խառնուրդ դարձաք, ուրեմն ձեզ ընդունելու եմ Երուսաղեմում, ²⁰ ինչպես որ մեկը հալոցում արծաթն ու պղինձը, երկաթն ու կապարն է հավաքում՝ նրա վրա կրակ փչելու և ձուլելու համար։ Նույն ձևով էլ ձեզ եմ ընդունելու իմ բարկությամբ. հավաքելու և ձուլելու եմ ձեզ. ²¹ ձեզ իմ բարկության հրով եմ հալեցնելու, ու դուք ձուլվելու եք նրա մեջ. ²² ինչպես որ արծաթն է ձուլվում քուրայում, այնպես էլ դուք եք ձուլվելու դրա մեջ։ Եվ կիմանաք, որ ես՝ Տերս եմ իմ զայրույթը ձեզ վրա թափել”»։

Իսրայելի առաջնորդների մեղքը

²³ Տիրոջ խոսքն ինձ ուղղվեց ու ասաց. ²⁴ «Մարդո՛ւ որդի, նրան ասա՛. “Դու այն երկիրն ես, որ չես թրջվում. քեզ վրա անձրև չի կաթել բարկության օրը։ ²⁵ Դու այն երկիրն ես, որի իշխաններն այնտեղ հափշտակություն անելիս առյուծների պես մռնչում էին. բռնությամբ տնանկների մարմիններն էին հոշոտում և անիրավությամբ պատիվներ ստանում։ Եվ քո մեջ այրիները բազմացան։ ²⁶ Նրա քահանաներն իմ օրենքներն էին անարգում և իմ սրբությունները պղծում. մաքուրի ու պիղծի միջև ընտրություն չէին անում, արատավորն անարատից չէին զատում. իմ շաբաթների վրա աչք էին փակում և իմ շաբաթները պղծում էին իրենց մեջ։ ²⁷ Նրա իշխանները հափշտակիչ գայլերի պես էին նրա մեջ՝ հափշտակություն անելու, արյուն թափելու և մարդկանց կորստի մատնելու համար, որպեսզի իրենց սաստիկ ագահությանը հագուրդ տային։ ²⁸ Նրա մարգարեները, ովքեր նրանց կոծկում էին, ընկնելու են, նրանք, որ սին տեսիլքներ էին տեսնում, նրանց համար սուտ գուշակություններ էին անում և ասում էին. “Ամենակալ Տերն այսպես է ասում”, մինչդեռ Տերը նման բան չէր ասել։ ²⁹ Երկրի ժողովրդին տառապեցնում էին անիրավությամբ, հափշտակություններ էին անում. աղքատին ու տնանկին բռնադատում էին, պանդուխտի հետ արդարությամբ չէին վարվում։ ³⁰ Նրանց միջից մի մարդ փնտրեցի, որ ուղիղ ընթանար, բարկության ժամանակ իմ առջև հոժարակամ կանգներ, որպեսզի չջնջեի նրանց, բայց չգտա։ ³¹ Եվ նրանց վրա թափեցի իմ զայրույթը՝ իմ բարկության հրով նրանց ոչնչացնելու։ Ըստ նրանց ճանապարհի էլ նրանց գլխին բերեցի”»,- ասում է Տերը՝ Աստված։

23

Մեղավոր քույրերը

¹ Տիրոջ խոսքն ինձ ուղղվեց ու ասաց. ² «Մարդո՛ւ որդի, երկու կանայք կային՝ մի մոր դուստրեր. ³ իրենց մանկության հասակում պոռնկացան Եգիպտոսում։ Այնտեղ նրանց ստինքները թուլացան-կախվեցին, այնտեղ նրանք զրկվեցին իրենց կուսությունից։ ⁴ Ավագ դստեր անունը Ոողա էր, քրոջ անունը՝ Ոողիբա։ Նրանք իմը եղան և տղաներ ու աղջիկներ ծնեցին. սրանց անուններն էին, Սամարիայինը՝ Ոողա, Երուսաղեմինը՝ Ոողիբա։ ⁵ Ոողան, ինձ թողնելով, պոռնկացավ, աչքը գցեց իր հոմանիների՝ իրեն հարևան ասորեստանցիների վրա, ⁶ որոնք ծիրանի ու կարմիր էին հագնում, իշխանների ու զորագլուխների, երիտասարդների, ամեն ինչով ընտրյալների, սպառազեն, երիվարներով հեծյալների վրա։ ⁷ Ոողան իր պոռնկությունը տարածեց նրանց վրա, Ասորեստանի բոլոր ընտրյալ որդիների վրա, բոլոր նրանց վրա, որոնց հետևից գնացել էր իր բոլոր խորհուրդներով, ու պղծվեց։ ⁸ Եգիպտացիների երկրից բերած իր պոռնկությունը չթողեց նա, որովհետև նրանց հետ պղծվում էր իր մանկությունից ի վեր. նրանք էին կուսությունից զրկել նրան, իրենց պոռնկությունը թափել նրա վրա։ ⁹ Դրա համար նրան մատնեցին իր հոմանիների ձեռքը, ասորեստանցիների ձեռքը, որոնց հետևից էր նա գնում։ ¹⁰ Նրանք մեջտեղ հանեցին սրա խայտառակությունը, նրա տղաներին ու աղջիկներին վերցրին, սրան էլ սրով սպանեցին։ Եվ կատարվեց կանանց խոսքը. նրանից վրեժ լուծեցին իր դուստրերի միջոցով։

¹¹ Այս բանը տեսավ նրա քույր Ոողիբան և իր ապականված ցանկասիրությամբ իր քրոջը գերազանցեց, իր քրոջը գերազանցեց նաև պոռնկությամբ։ ¹² Գնաց իրեն հարևան ասորեստանցիների հետևից՝ իշխանների ու զորավարների, որոնք ազնիվ ծիրանի էին հագնում, սպառազեն և երիվարներով հեծյալների, ամեն ինչով ընտրյալ երիտասարդների հետևից։ ¹³ Տեսա, որ պղծվեցին. երկուսի ճանապարհն էլ նույնն էր։ ¹⁴ Սա իր պոռնկության մեջ ավելի առաջ գնաց. քաղդեացի տղամարդկանց պատկերող որմնանկարներ տեսավ՝ վրձնով նկարված, ¹⁵ մեջքներին տեսակ-տեսակ գոտիներ, գլուխներին՝ ներկված խույրեր (խայտաբղետ գույներ էին ցոլանում բոլորից էլ, Բաբելոնի որդիների նմանությամբ՝ իրենց հայրենի երկրում՝ քաղդեացիների երկրում), ¹⁶ և իր նայվածքով նրանց վրա աչք դրեց, նրանց մոտ՝ քաղդեացիների երկիրը, սուրհանդակներ ուղարկեց։ ¹⁷ Նրա մոտ եկան Բաբելոնի որդիները՝ նրա անկողնում օթևանելու, և նրան իր պոռնկության մեջ պղծեցին։ Նա պղծվեց նրանց հետ, և իր հոգին նրանցից հագեցավ զզվելու աստիճան։ ¹⁸ Բացահայտեց իր պոռնկությունը և ի ցույց հանեց իր ամոթը։ Եվ իմ հոգին նրանից հեռացավ, ինչպես որ նրա քրոջից էր հեռացել։ ¹⁹ Բայց դու պոռնկությունդ սաստկացրիր, այնքան որ հիշեցնում էիր մանկությանդ օրերը, երբ Եգիպտոսում պոռնկություն էիր անում։ ²⁰ Աչք գցեցիր քաղդեացիների վրա, որոնց անդամներն էշերի ու ձիերի անդամների նման էին։ ²¹ Պատժելու եմ քեզ մանկությանդ անօրենությունների համար, որոնք գործեցիր եգիպտացիների երկրում՝ քո օթևանում, որտեղ էլ ստինքներդ թուլացան-կախվեցին, և կուսությունդ խախտվեց»։

Երուսաղեմի պատիժը

²² «Ուստի, ո՛վ Ոողիբա, Տերը՝ Աստված, այսպես է ասում. “Ահա քո դեմ եմ հանելու հոմանիներիդ, որոնցից հոգիդ հագեցավ զզվելու աստիճան։ Նրանց բերելու եմ՝ քեզ նրանցով շրջապատելու. ²³ Բաբելոնի որդիներին ու բոլոր քաղդեացիներին, Փակուդին, Սվեին ու Կվեին, նրանց հետ՝ Ասորեստանի բոլոր որդիներին՝ ընտրյալ երիտասարդների, իշխանների, զորավարների, սպառազեն, երիվարներով հեծյալների։ ²⁴ Բոլորն էլ քեզ վրա հյուսիսից են գալու. կառքեր ու անիվներ՝ ազգերի մի բազմությամբ, սաղավարտավորներ ու վահանավորներ։ Շուրջդ պահակություն են հաստատելու։ Քեզ նրանց առաջ դատելու եմ, նրանք էլ քեզնից վրեժ են լուծելու իրենց դատաստանով։ ²⁵ Քո դեմ եմ ուղղելու նաև քո հանդեպ ունեցած իմ վրեժխնդրությունը. նրանք քեզ հետ վարվելու են իմ զայրույթի չափով. կտրելու են քիթդ ու ականջներդ, և ինչ որ մնա քեզնից, սրով կոտորելու են. վերցնելու են տղաներիդ ու աղջիկներիդ, իսկ մնացածներին կրակով ոչնչացնելու են։ ²⁶ Վրայիցդ հանելու են հագուստներդ ու քեզանից վերցնելու են պարծանքիդ զարդերը։ ²⁷ Այսպիսով քեզնից հեռացնելու եմ ամբարշտությունդ ու պոռնկությունդ, որ եգիպտացիների երկրից էին։ Եվ աչքդ նրա ուղղությամբ այլևս չես բարձրացնի, այլևս Եգիպտոսը չես հիշի”։

²⁸ Ուստի Տերը՝ Աստված, այսպես է ասում. “Ահա քեզ մատնելու եմ քեզ ատելի մարդկանց ձեռքը, որոնցից հոգիդ հագեցավ զզվելու աստիճան։ ²⁹ Քեզ հետ վարվելու են ատելությամբ, վերցնելու են քո ամբողջ վաստակն ու աշխատանքի արդյունքը։ Լինելու ես մերկ ու խայտառակված։ Ի ցույց է դրվելու պոռնկությանդ ամոթը, քո ամբարշտությունն ու պոռնկությունը։ ³⁰ Դա անելու եմ քո դեմ, որովհետև պոռնկանում էիր ազգերի հետ և պղծվում նրանց խորհուրդներով։ ³¹ Քրոջդ ճանապարհով ընթացար, նրա բաժակն էլ ձեռքդ եմ տալու”։ ³² Տերը՝ Աստված, այսպես է ասում.

“Ըմպելու ես քրոջդ բաժակը՝

խորն ու լայն,

և դառնալու ծաղր ու ծանակ.

կատարելապես ³³ հարբելու ես։

Բոլորովին թուլանալու ես։

Ըմպելու ես քո կործանման բաժակը,

Սամարիա քրոջդ բաժակը

³⁴ քամելու ես ցմրուր։

Մազերդ ես փետելու և կրծքերդ պատառոտելու։

Տոներն ու ամսագլուխներն էլ վերացնելու եմ քեզնից.

այդ ե՛ս խոսեցի”,-

ասում է Ամենակալ Տերը։

³⁵ Ուստի Ամենակալ Տերն այսպես է ասում. “Այն բանի համար, որ ինձ մոռացար ու անտեսեցիր, դո՛ւ էլ կրիր ամբարշտությանդ ու պոռնկությանդ հետևանքը”»։

Աստծու դատաստանը երկու քույրերին

³⁶ Տերն ինձ ասաց. «Մարդո՛ւ որդի, մի՞թե չես դատելու Ոողային ու Ոողիբային, նրանց պատմելու իրենց անօրենությունները. ³⁷ քանի որ նրանք շնացան, և արյուն կա նրանց ձեռքերին։ Նրանք իրենց խորհուրդների մեջ էլ էին շնանում։ Իրենց որդիներին, որ ինձ համար էին ծնել, բոցի միջով էին անցկացնում։ ³⁸ Այն աստիճան գործեցին իմ դեմ, որ նույն օրն իսկ սրբություններս էին պղծում, շաբաթներս ապականում։ ³⁹ Երբ իրենց որդիներին կուռքերին էին զոհաբերում, նույն օրն էլ իմ սրբավայրերն էին մտնում և պղծում դրանք։ Այսպես էին վարվում իմ տան մեջ։ ⁴⁰ Հեռվից եկած մարդիկ էլ, որոնց մոտ սուրհանդակներ էիր ուղարկել, հենց որ գալիս էին, բաղնիք էիր մտնում, ծարիրով ու սնգույրով շպարվում, զարդեղենով զարդարվում ⁴¹ ու նստում էիր զարդարված բազմոցի վրա։ Նրանց առջև սեղան էիր գցում, իմ խունկն ու յուղն էիր վերցնում և նրանց հետ զվարճանում։ ⁴² Նրանք ներդաշնակ ձայնով նվագում էին։ Այդ մարդկանց կողքին անապատից եկած ուրիշ բազմաթիվ գինեմոլ մարդիկ էլ կային։ Ապարանջաններ էիր դնում նրանց ձեռքերին, պարծանքի պսակներ՝ նրանց գլխին։ ⁴³ Ես ասում էի. “Պոռնկական գործերով թող նրանց հետ չշնանա”, բայց նա պոռնկանում էր։ ⁴⁴ Նրա մոտ էին մտնում, ինչպես պոռնիկ մի կնոջ։ Նույն ձևով մտնում էին նաև Ոողայի ու Ոողիբայի մոտ՝ անօրենություն գործելու։ ⁴⁵ Եվ նրանք, որ արդար մարդիկ էին, սրանցից վրեժ են լուծելու, վրեժ, որ պահանջում են շնացածներից, նաև արյան վրեժ, որովհետև սրանք շնացողներ էին, և արյունն իրենց ձեռքերի վրա էր։

⁴⁶ Տերը՝ Աստված, այսպես է ասում. “Զո՛րք արձակիր, նրանց մեջ խռովությո՛ւն ու հափշտակությո՛ւն գցիր, ⁴⁷ զորքերի քարերով քարկոծի՛ր նրանց, խոցոտի՛ր նրանց իրենց սրերով։ Նրանց տղաներն ու աղջիկները թող կոտորվեն։ Իսկ նրանց տները թող հրդեհեն։ ⁴⁸ Ամբարշտությունը վերացնելու եմ երկրից. բոլոր կանայք խրատվելու են և այլևս չեն հետևելու սրանց ամբարշտությանը։ ⁴⁹ Ձեր ամբարշտությունը ձեզ վրա է գալու, և պատիժ եք կրելու ըստ ձեր խորհուրդների։ Ու կիմանաք, որ ես եմ Տերը՝ Աստված”»։

24

Երուսաղեմը՝ ժանգոտ կաթսա

¹ Տիրոջ խոսքն ինձ ուղղվեց իններորդ տարում՝ տասներորդ ամսին, ամսվա տասներորդ օրը, և ասաց. ² «Մարդո՛ւ որդի, քեզ համար գրի՛ր այն օրվա նշանը, երբ բաբելացիների արքան, ճիշտ այդ օրվանից սկսած, Երուսաղեմի վրա հարձակվեց։ ³ Այս առակը կպատմես դառնացնող ժողովրդին ու նրանց կասես. “Տերը՝ Աստված, այսպես է ասում.

կաթսա՛ տեղադրիր,

տեղադրի՛ր և դրա մեջ ջո՛ւր լցրու։

⁴ Մեջը դի՛ր մսի կտորները,

բոլոր ընտիր կտորները՝ ազդրն ու թիակը՝

ոսկորներից զատված և վերցված,

⁵ ընտիր-ընտիր անասուններից,

իսկ ոսկորները կաթսայի տակ կայրեք։

Թող եռա, շատ եռա,

նրա մեջ ոսկորները թող եփվեն”։

⁶ Դրա համար Ամենակալ Տերն այսպես է ասում.

“Ո՛վ արյունոտ քաղաք,

կաթսա՝ լի ժանգով.

ժանգն էլ նրա միջից դեռ չի անցել։

Միսը կտոր-կտոր դուրս է հանել դրա միջից՝

նրա վրա առանց վիճակ գցելու,

⁷ որովհետև նրա արյունը դեռ նրա մեջ է։

Այն սալաքարի վրա եմ դրել,

այլ ոչ թե գետնին թափել՝

հողով ծածկելու համար,

⁸ մինչև որ իմ զայրույթը ելնի՝

վրեժխնդրություն պահանջելու։

Արյունն էլ եմ դրել սալաքարի վրա, որպեսզի ծածուկ չմնա”։

⁹ Դրա համար Ամենակալ Տերն այսպես է ասում.

“Վա՜յ արյունոտ քաղաքին.

¹⁰ ես ավելացնելու եմ փայտը,

շատացնելու եմ փայտի կտորները,

բորբոքելու եմ կրակը,

որպեսզի միսը հալվի,

մսաջուրը պակասի, ոսկորներն էլ խանձվեն,

¹¹ և կաթսան թող իր ածուխների վրա մնա։

Կրակը թող բորբոքված լինի,

որպեսզի կաթսան վառվի, կրակ կտրի,

նրա պղինձը հալվի,

պղծությունն էլ՝ նրա ներսում,

նրա ժանգը վերանա։

¹² Եվ նրա ժանգը կնվազի, բայց նրա առատ ժանգը միջից դուրս չի գա, այլ իբրև ամոթանք կմնա մսաջրի մեջ, ¹³ այն բանի համար, որ պղծվում էիր, և չես մաքրվելու քո պղծությունից։ Ինչպե՞ս կարող է մաքրվել, քանի դեռ իմ զայրույթը նրա հանդեպ ի կատար չեմ ածել։ ¹⁴ Ես՝ Տերս, խոսեցի։ Կգա ժամանակ, այդպես կանեմ ու հետ չեմ կանգնի, ոչ էլ կողորմեմ, ոչ էլ կսփոփեմ, այլ ըստ քո բռնած ճանապարհի ու քո վարմունքի էլ քեզ կպատժեմ,- ասում է Ամենակալ Տերը։- Ուստի քեզ դատելու եմ ըստ քո թափած արյան, ըստ քո խորհուրդների եմ քեզ պատժելու, ո՛վ դու, պի՛ղծ ու անվանարկյա՛լ, որ սաստկացրել ես ինձ դառնացնելը”»։

Եզեկիել մարգարեի սուգը

¹⁵ Տիրոջ խոսքն ինձ ուղղվեց ու ասաց. ¹⁶ «Մարդո՛ւ որդի, ահա ես մի հարվածով քեզնից վերցնում եմ այն, ինչ ցանկալի է քո աչքին, իսկ դու չկոծես ու չողբաս, քեզնից թող արցունք դուրս չգա, ¹⁷ որովհետև հեծությունն արյան ու սգի մեջ է։ Թող վարսերդ չհյուսվեն, կոշիկներդ կրկին ոտքերիդ լինեն, չմխիթարվես նրանց շուրթերի խոսքերով և չուտես մարդկանց հացը»։ ¹⁸ Առավոտյան խոսեցի ժողովրդի հետ, ինչպես որ Տերն էր ինձ պատվիրել։ Իսկ երեկոյան կինս մեռավ։ Հաջորդ առավոտյան արեցի այնպես, ինչպես որ Տերն էր ինձ պատվիրել։ ¹⁹ Եվ ժողովուրդն ինձ ասաց. «Չես հայտնում մեզ, թե այդ ի՛նչ ես անում»։ ²⁰ Ու նրանց ասացի. «Տիրոջ խոսքն ինձ ուղղվեց ու ասաց. ²¹ “Ասա՛ Իսրայելի տանը. Տերը՝ Աստված, այսպես է ասում. ահա ես պղծելու եմ իմ սրբարանը՝ ձեր զորության պարծանքի առարկան, այն, որ ցանկալի է ձեր աչքին, և նրանց, որոնց մասին ձեր հոգիները խնամք են տանում. ձեր տղաներն ու աղջիկները, որ ձեզնից են մնացել, սրով են ընկնելու։ ²² Դուք էլ անելու եք այնպես, ինչպես ես եմ արել. նրանց բերանի խոսքերով չեք մխիթարվելու, մարդկանց հացն էլ չեք ուտելու։ ²³ Ձեր վարսերը մնալու են ձեր գլուխներին, կոշիկները՝ ձեր ոտքերին։ Չեք կոծելու և ողբալու, հալվելու-մաշվելու եք ձեր անիրավությունների մեջ, և յուրաքանչյուրն իր եղբորը չի մխիթարելու։ ²⁴ Եզեկիելը ձեզ համար մի նշան է լինելու. ինչ որ ինքն անի, նրա օրինակով դուք էլ նույնն եք անելու։ Երբ այդ ամենը վրա հասնի, կիմանաք, որ ես եմ Ամենակալ Տերը։

²⁵ Դո՛ւ էլ, մարդո՛ւ որդի. չէ՞ որ այն օրը, երբ նրանցից վերցնեմ իրենց զորությունը, հպարտությունն ու պարծանքը, նրանց աչքի համար ցանկալին, իրենց հոգիների հպարտությունը, նրանց տղաներին ու աղջիկներին, ²⁶ չէ՞ որ այդ օրը փրկվածը քեզ մոտ է գալու՝ քո ականջներին գույժը հաղորդելու։ ²⁷ Այն օրը փրկվածի առջև բացվելու է բերանդ. խոսելու ես, այլևս համր չես մնալու և նրանց համար նշան ես լինելու։ Եվ կիմանան, որ ես եմ Տերը”»։

25

Մարգարեություն ամովնացիների դեմ

¹ Տիրոջ խոսքն ինձ ուղղվեց ու ասաց. ² «Մարդո՛ւ որդի, դեմքդ ուղղի՛ր ամովնացիների դեմ և մարգարեացի՛ր նրանց վերաբերյալ։ ³ Ամովնացիներին կասես. “Լսե՛ք Ամենակալ Տիրոջ պատգամները։ Ամենակալ Տերն այսպես է ասում. այն բանի համար, որ չարախնդացիք իմ պղծված սրբարանի, կործանված Իսրայելի երկրի, գերության մատնված Հուդայի տան վրա, ⁴ այդ պատճառով ես ձեզ ահա մատնում եմ Կեդեմի որդիների ձեռքը՝ որպես ժառանգություն։ Իրենց մեղքերով բնակվելու են քո մեջ, իրենց վրանները կանգնեցնելու են քո մեջ, ուտելու են քո պտուղը, խմելու քո կաթը։ ⁵ Ամովնացիների քաղաքը տալու եմ ուղտերին՝ արածելու, իսկ ամովնացիներին՝ արածող հոտերին։ Ու կիմանաք, որ ես եմ Տերը։ ⁶ Տերը՝ Աստված, այսպես է ասում. “Այն բանի համար, որ ձեռքերովդ ծափ զարկեցիր ու ոտքերովդ դոփեցիր, հոգեպես ուրախացար Իսրայելի երկրի վրա,- ⁷ այդ պատճառով ահա ես ձեռքս քո դեմ եմ պարզելու և քեզ ավար եմ դարձնելու ազգերի մեջ։ Քեզ ոչնչացնելու եմ ժողովուրդների միջից, քեզ հաստատապես կորստյան եմ մատնելու երկրների միջից։ Ու կիմանաս, որ ես եմ Տերը”»։

⁸ Մովաբի դեմ։ «Ամենակալ Տերն այսպես է ասում. “Այն բանի համար, որ Մովաբն ու Սեիրն ասացին, թե՝ “Ահա ինչպես մյուս ազգերն են, նույնպես էլ Իսրայելի և Հուդայի տունն է, ⁹ այդ պատճառով ահա ես թուլացնելու եմ Մովաբի թիկունքը քաղաքների բարձրավանդակների կողմից, ընտրագույն երկիրը՝ Բեթի ու Ասիմոթի տունը, որ քաղաքի աղբյուրից ավելի վերև է՝ ծովեզերքի մոտերքը։ ¹⁰ Կեդեմի որդիներին էլ, ամովնացիների հետ, տվել եմ նրան՝ որպես ժառանգություն, որպեսզի ամովնացիների հիշատակն ազգերի մեջ չմնա։ ¹¹ Մովաբից էլ եմ վրեժխնդիր լինելու։ Ու կիմանան, որ ես եմ Տերը”»։

¹² Եդովմի դեմ։ «Ամենակալ Տերն այսպես է ասում. “Այն բանի համար, որ Եդովմը վրեժխնդիր եղավ Հուդայի տնից, ոխ պահեց ու վրեժ պահանջեց, ¹³ այդ պատճառով Ամենակալ Տերն այսպես է ասում. ձեռքս պարզելու եմ Եդովմի դեմ, նրա միջից ոչնչացնելու եմ մարդ ու անասուն և այն անապատի եմ վերածելու, իսկ ովքեր Թեմանից փախուստի են դիմել, սրից են ընկնելու։ ¹⁴ Եդովմից Իսրայելի իմ ժողովրդի միջոցով եմ վրեժխնդիր լինելու. Եդովմի հետ վարվելու են իմ բարկության ու զայրույթի համեմատ։ Ու կճանաչեն իմ վրեժխնդրությունը”»,- ասում է Ամենակալ Տերը։

¹⁵ Փղշտացիների դեմ։ «Այդ մասին Ամենակալ Տերն այսպես է ասում. “Այն բանի համար, որ այլազգիները ոխ պահեցին, զայրույթով ու չարախնդությամբ վրեժխնդրություն գրգռեցին՝ իսպառ ոչնչացնելու,- ¹⁶ ուստի Ամենակալ Տերն այսպես է ասում. ահա ես ձեռքս պարզելու եմ այդ այլազգիների դեմ, ոչնչացնելու եմ այդ կրետացիներին, կորստյան եմ մատնելու մնացած ծովեզերաբնակներին ¹⁷ ու նրանցից վրեժխնդիր եմ լինելու մեծամեծ կշտամբանքներով ու զայրույթով։ Ու կիմանան, որ ես եմ Ամենակալ Տերը, երբ նրանցից վրեժխնդիր լինեմ”»։

26

Տյուրոսի դեմ

¹ Տասնմեկերորդ տարում՝ ամսվա առաջին օրը, Տիրոջ խոսքն ինձ ուղղվեց ու ասաց. ² «Մարդո՛ւ որդի, այն բանի համար, որ Տյուրոսը չարախնդաց Երուսաղեմի վրա ու ասաց. “Վա՜շ-վա՜շ, քանի որ ջախջախվեց, կորստյան մատնվեց Երուսաղեմը, ազգերը դեպի ինձ են դառնալու, որովհետև այն, ինչ շեն էր, ավերվեց”,- ³ այդ պատճառով Ամենակալ Տերն այսպես է ասում.

“Ահա ես քո դեմ եմ, Տյուրո՛ս,

բազում ազգերի քո դեմ եմ հանելու,

ինչպես որ ծովն է ելնում իր ալիքներով։

⁴ Նրանք Տյուրոսի պարիսպները կործանելու են,

նրա նաև աշտարակներն են կործանելու։

Հողն էլ նրա վրայից ցրիվ եմ տալու

և այն ապառաժի եմ վերածելու։

⁵ Ծովի մեջտեղում նա ուռկաններ գցելու տեղ է լինելու,

որովհետև ե՛ս խոսեցի”,- ասում է Տերը՝ Աստված։-

“Ազգերի համար նա ավար է դառնալու.

⁶ նրա դուստրերը բնակավայրից դուրս սրով են սպանվելու։

Եվ նրանք պիտի իմանան, որ ես եմ Տերը”»։

⁷ Ամենակալ Տերն այսպես է ասում.

«Ահա ես, Տյուրո՛ս, հյուսիսից քո դեմ եմ հանելու

բաբելացիների թագավոր Նաբուքոդոնոսորին,

որ արքայից արքա է՝

կառքերով ու երիվարներով,

բազմաթիվ ազգերի գունդ-գունդ հեծյալներով։

⁸ Նա քո դուստրերին բնակավայրից դուրս սրով կոտորելու է,

շուրջդ պահակություն է հաստատելու, փոս փորելու,

պատնեշ ու ռազմական ամրոցներ է կանգնեցնելու,

իր գեղարդները քո ուղղությամբ է պահելու,

⁹ պարիսպներդ ու աշտարակներդ իր սրով է կործանելու։

¹⁰ Նրա հեծյալների բազմությունից առաջացած փոշին ծածկելու է քեզ.

հեծյալների և նրանց անիվների ու կառքերի ձայնից

դղրդալու են պարիսպներդ,

երբ նա ներս մտնի քո դարպասներից,

ինչպես մեկը դաշտից քաղաք է մտնում։

¹¹ Իրենց երիվարների սմբակներով հրապարակներդ կոխկրտելու են,

ժողովրդիդ սրով կոտորելու է,

զորավոր ամրոցներդ հողին է հավասարեցնելու։

¹² Ամրոցներդ ավարի է մատնելու,

ունեցվածքդ՝ կողոպտելու,

պարիսպներդ՝ կործանելու,

շքեղ ապարանքներդ՝ տապալելու,

քարերը, փայտերն ու հողն էլ ծովն է թափելու։

¹³ Նա երաժիշտներիդ բազմությունը ցրելու է,

և քո մեջ երգի ձայներ այլևս չեն լսվելու։

¹⁴ Քեզ ապառաժի եմ վերածելու,

ուռկաններ գցելու տեղ ես լինելու։

Այլևս չես վերաշինվելու, որովհետև ես խոսեցի»,- ասում է Ամենակալ Տերը։

¹⁵ Տերը՝ Աստված, Տյուրոսին այսպես է ասում.

«Չէ՞ որ քո կործանման ձայնից,

վիրավորների հեծեծելուց,

քո մեջ սրի մերկանալուց դղրդալու են քո կղզիները։

¹⁶ Ծովի ժողովուրդների բոլոր իշխաններն իջնելու են իրենց գահերից,

գլուխներից իրենց խույրերը հանելու են,

իրենց գույնզգույն հագուստներից մերկանալու են,

ուժեղ տագնապելու են,

գետնին են տապալվելու,

իրենց կործանման ժամանակ զարհուրելու են,

հոգոց են հանելու քեզ վրա, ¹⁷ ողբալու և ասելու են.

“Ինչպե՞ս կորստյան մատնվեցիր,

ծովի մեջ տապալվեցիր, ո՛վ հոյակապ քաղաք,

զորացել էիր ծովում,

դու և քո բնակիչները,

մինչ զարհուրեցնում էիր բոլոր բնակիչներին։

¹⁸ Կղզիներն են սարսափելու քո կործանման օրից.

ծովիդ կղզիներն են խռովվելու քո անկումից”։

¹⁹ Տերը՝ Աստված, այսպես է ասում. «Երբ քեզ՝ քաղաքդ, ավերածության մատնեմ այն քաղաքների պես, որ այլևս չեն բնակեցվել, երբ անդունդները քեզ վրա հանեմ, ու քեզ առատ ջրեր ողողեն, ²⁰ քեզ իջեցնելու եմ նրանց մոտ, ովքեր խորխորատ են իջել՝ հավիտենապես հավաքվածների մոտ, քեզ երկրի ընդերքում եմ բնակեցնելու՝ իբրև հավիտենական ավերակ, նրանց կողքին, ովքեր հավիտենապես խորխորատ են իջել, որպեսզի այլևս բնակելի չդառնաս, կյանք ունեցող երկրի վրա չվերահաստատվես։ ²¹ Կորստյան եմ մատնելու քեզ, և դու այլևս գոյություն չես ունենալու։ Փնտրվելու ես, բայց հավիտյան չես գտնվելու»։

27

Ողբ Տյուրոսի վրա

¹ Տիրոջ խոսքն ինձ ուղղվեց ու ասաց.

² «Մարդո՛ւ որդի, ողբա՛ Տյուրոսի վրա։ ³ Տյուրոսին կասես.

“Դու, որ բնակվում ես այդ ծովի մուտքին,

առևտրի կենտրոն՝ բազմաթիվ կղզիաբնակ ժողովուրդների համար”,

Տերը՝ Աստված, Տյուրոսին այսպես է ասում.

“Դու ասում էիր՝

Ես եմ ինձ զարդարել իմ գեղեցկությամբ։

⁴ Մինչդեռ ծովի սրտում են քո սահմանները.

քո շինարարներն են քո գեղեցկությունը կատարյալ դարձրել։

⁵ Սանիր լեռան մայրիները քեզ որմնակապ են դարձել,

նոճու տախտակները Լիբանանից են առնվել՝

քեզ համար եղևնափայտե կայմեր սարքելու,

⁶ Բասանի փայտից նավերիդ թիերն են պատրաստվել,

փղոսկրից քո մեհյաններն են շինվել,

քետիմացիների կղզիների շինանյութերից՝

անտառներով շրջապատված ապարանքներդ,

⁷ Եգիպտոսի գույնզգույն թելերով բեհեզը քեզ համար

որպես անկողնու ծածկոց է գործվել՝

շուրջդ փառք հյուսելու,

իսկ ելիմացիների կղզիների ծիրանի ու կապուտակ հանդերձանքն էլ

քեզ համար պաճուճանքի զարդ է եղել։

⁸ Քո իշխանները Սիդովնի բնակիչներն են եղել,

նավավարները՝ արադացիները։

Իմաստունները, Տյուրո՛ս, որ ապրում էին քո մեջ,

քեզ համար նրանք են նավապետներ եղել,

⁹ Բիբլոսի ծերերն ու նրա իմաստունները, որ ապրում էին քո մեջ,

նրանք են քեզ զորացրել քո խորհուրդների մեջ։

Ծովի բոլոր նավերն ու դրանց նավավարներն են քեզ առաջնորդել

մինչև ծայրագույն արևմուտք։

¹⁰ Լիդացիներն ու լիբիացիներն են եղել քո զորքն ու թիկունքը՝

պատերազմող ընտիր մարդիկ,

որոնք իրենց վահաններն ու սաղավարտները քեզ մոտ են կախել,

նրանք են փառավորել քեզ։

¹¹ Արադացիների որդիներն են իրենց զորքերով պարիսպներդ օղակի մեջ առել,

աշտարակներդ պաշտպանել,

իրենց կապարճները պարիսպներիդ վրա շուրջանակի կախ տվել։

Հենց նրանք են կատարյալ դարձրել գեղեցկությունդ։

¹² Կարկեդոնացիներն են քեզ հետ առևտուր արել քո մեծաքանակ հարստության համար. արծաթն ու ոսկին, պղինձն ու երկաթը, անագն ու կապարը նրանք են քո շուկաները մատակարարել։ ¹³ Հույներն ու նրանց շուրջը գտնվող ժողովուրդներն են քեզ հետ ստրուկների առևտրով զբաղվել, պղնձե անոթներ են քո շուկաները մատակարարել։ ¹⁴ Թորգոմա տնից են քո շուկաները լցրել ձիերով, հեծյալներով ու ջորիներով։ ¹⁵ Ռոդոսցիներն են քեզ հետ առևտուր արել. կղզիներից փղոսկրյա ժանիքներով աշխուժացրել են քո առևտուրը, դու էլ եկող-գնացող մարդկանց վճարել ես։ ¹⁶ Արամայեցիները քեզ հետ առևտուր են արել քո ապրանքների բազմազանության համար՝ փոխանակելով կարկեհան, ասեղնագործ կարմիր կերպաս, բեհեզ, ապարանջան, հակինթ։ ¹⁷ Հուդան ու Իսրայելի որդիներն են քեզ հետ առևտուր արել. ցորենով ու խնկով, դարչինով ու ընտիր-ընտիր մեղրով, յուղով ու խեժով են լցրել քո խառնիխուռն առևտուրը։ ¹⁸ Դամասկոսն է քեզ հետ առևտուր արել բազմազան ապրանքներով քո մեծաքանակ հարստության համար, Քելբոնից՝ գինին, Միլիտեից՝ բուրդը։ ¹⁹ Դանը և Հավանը Մեոզենից են գինի մատակարարել քեզ՝ քո շուկաներին, Ասեղից են մատակարարել կռածո երկաթ, պատրաստի անիվներ՝ քո շուկաներին։ ²⁰ Դեդանացիները քո այն վաճառականներն են, որ ընտիր կառքեր են մատակարարել քեզ՝ ջորիներով հանդերձ։ ²¹ Արաբներն ու Կեդարի բոլոր իշխանները (նրանք էլ վաճառականներ են քո ձեռքի տակ) ուղտեր, խոյեր ու գառներ են վաճառել քո մեջ։ ²² Սաբան ու Ռեգման (նրանք էլ քո վաճառականներն են) անուշահոտ յուղեր, թանկարժեք քարեր ու ոսկի են մատակարարել քո շուկաներին։ ²³ Խառանը, Քանանն ու Դադանը (նրանք էլ քո վաճառականներն են), Սաբան, Ասուրն ու Քալմանը՝ քո վաճառականները, ²⁴ Մաքլիմի ու Գալիմի վրայով քեզ ապրանքներ են մատակարարել՝ կարմիր ու կապուտակ պարեգոտ, երփներանգ նարոտներ, պարաններով կապված ընտիր գանձեր։ ²⁵ Նոճուց պատրաստված նավերով, որոնցով իրականացվում էր քո առևտուրը (քո մեծաքանակ առևտրի ու խառնիխուռն ապրանքների առատության պատճառով), լցվեցիր, սաստիկ ծանրացար։ ²⁶ Քո նավավարները քեզ ծովի խորքը, առատ ջրերի մեջ են վարել. հարավային հողմն է քեզ խորտակել ծովի խորքում։ ²⁷ Բայց քո հարստությունն էլ, քո եկամուտն էլ, քո խառնիխուռն ապրանքներից ստացածն էլ, քո նավավարներն ու նավապետներն էլ, քո խորհրդականներն էլ, քո խառնիխուռն ապրանքներն էլ, քո միջի բոլոր պատերազմող մարդիկ էլ, քո միջի ողջ ժողովուրդն էլ քո կործանման օրն ընկնելու են ծովի խորքը։ ²⁸ Աղաղակիդ ձայնից քո նավավարները խիստ սարսափելու են ²⁹ և իջնելու են իրենց նավերից։ Քո բոլոր նավավարներն ու առաջապահ նավորդները ծովափին են կանգնելու ³⁰ և բարձրաձայն սգալու են քեզ վրա և փոխելով իրենց ձայները՝ դառնապես ողբալու են, հող են ածելու իրենց գլխին ու մոխիրների մեջ են թավալվելու, ³¹ ածիլելու, ճաղատացնելու են գլուխները, քուրձեր են հագնելու և դառնացած սրտով լաց են լինելու քեզ վրա։ ³² Նրանց որդիները քեզ վրա դառնորեն կոծելու են, ողբ են ասելու ու ողբ են երգելու՝ ասելով. “Ո՞վ եղավ Տյուրոսի պես, որ լռեց, հանգիստ առավ ծովի մեջ։ ³³ Քեզ համար ինչքա՜ն եկամուտ գտար այդ ծովից, քո հարստությամբ ազգերին լիացրիր, քո խառնիխուռն ապրանքներով երկրի բոլոր թագավորներին հարստացրիր։ ³⁴ Իսկ հիմա ջախջախվեցիր այդ ծովում, ջրերի խորքերն ընկան քո շուկաներն ու քո միջի ժողովուրդը, քո բոլոր նավավարները։ ³⁵ Տխրեցին քեզ համար կղզիների բոլոր բնակիչները, և նրանց թագավորները խիստ սարսափեցին, երեսներն արցունքով ողողեցին։ ³⁶ Ժողովուրդների վաճառականները զարմանքի ու ափսոսանքի ձայն արձակեցին քեզ համար։ Կորստյան մատնվեցիր ու այլևս գոյություն չես ունենալու հավիտյան”»,- ասում է Տերը՝ Աստված։

28

Տյուրոսի իշխանի դեմ

¹ Տիրոջ խոսքն ինձ ուղղվեց ու ասաց. ² «Եվ դու, մարդո՛ւ որդի, Տյուրոսի իշխանին ասա՛. “Տերը՝ Աստված, այսպես է ասում. այն բանի համար, որ քո սիրտը հպարտացավ, ու ասացիր, թե՝ “Աստված եմ ես և որպես աստված բնակվեցի ծովի խորքում”, սակայն մարդ ես դու, ոչ թե Աստված, թեև սիրտդ իբրև Աստծու սիրտ ներկայացրիր։ ³ Մի՞թե դու ավելի իմաստուն ես, քան Դանիելը, կամ մի՞թե իմաստուններ են քեզ խրատել իրենց հանճարով։ ⁴ Մի՞թե քո իմաստությամբ կամ խելքով ես քեզ համար հարստություն դիզել և ոսկի ու արծաթ ձեռք բերել քո գանձարանի համար։ ⁵ Կամ քո իմաստության ու առևտրի առատությա՞մբ ես հարստությունդ բազմապատկել. իսկ սիրտդ քո հարստությամբ է հպարտացել”։ ⁶ Ուստի Տերը՝ Աստված, այսպես է ասում. “Քանի որ քո սիրտը որպես Աստծու սիրտ ես ներկայացրել, ⁷ դրա համար ահա ես օտարների եմ բերելու քո դեմ, ազգերից ամենադաժաններին, և նրանք իրենց սուրն են քաշելու քեզ վրա, քո իմաստության գեղեցկության վրա և քո գեղեցկությունը կորստյան են մատնելու, ⁸ կործանելու են քեզ, ու խոցվածների մահով ես մեռնելու ծովի խորքում։ ⁹ Մի՞թե քեզ կոտորողների առջև շարունակելու ես ասել՝ “Աստված եմ ես”։ Բայց դու մարդ ես, ոչ թե Աստված։ ¹⁰ Եվ քեզ մահացու վիրավորող անթլփատների բազմության մեջ ես մեռնելու օտարների ձեռքով, որովհետև ես խոսեցի”»,- ասում է Ամենակալ Տերը։

Տյուրոսի իշխանի անկումը

¹¹ Տիրոջ խոսքն ինձ ուղղվեց ու ասաց. ¹² «Մարդո՛ւ որդի, ողբա՛ Տյուրոսի իշխանի վրա։ Նրան կասես. “Տերը՝ Աստված, այսպես է ասում. դու համեմատության կնիք ես եղել՝ լի իմաստությամբ, և գեղեցկության պսակ։ ¹³ Աստծու դրախտի փափկության մեջ ես եղել, քեզ վրա ես կապել բոլոր թանկարժեք քարերը՝ սարդիոն ու տպազիոն, զմրուխտ ու կարկեհան, շափյուղա ու հասպիս, արծաթ ու ոսկի, սուտակ, ակաթ, մեղեսիկ, ոսկեքար, բյուրեղ, եղնգաքար. ոսկով ես լցրել քո գանձարաններն ու շտեմարանները։ Սկսած այն օրից, երբ ստեղծվեցիր ու պատրաստվեցիր, ¹⁴ հովանավոր քերովբեի հետ էիր. քեզ Աստծու սուրբ լեռան վրա դրեցի, և հրեղեն քարերի մեջ էիր։ ¹⁵ Անարատ եղար քո օրերում՝ ստեղծվելուցդ ի վեր, մինչև որ քո մեջ անիրավություններ գտնվեցին։ ¹⁶ Քո առևտրի առատության հետևանքով անիրավություններով լցրիր շտեմարաններդ, մեղանչեցիր և անարգվելով արտաքսվեցիր Աստծու լեռից. հովանավոր քերովբեն քեզ հրեղեն քարերի միջից իջեցրեց։ ¹⁷ Քո գեղեցկության պատճառով սիրտդ հպարտացավ, և իմաստությունդ ապականվեց՝ քո գեղեցկությամբ հանդերձ։ Քո մեղքերի առատության պատճառով քեզ գետնին գցեցի, թագավորների առաջ քեզ խայտառակության մատնեցի։ ¹⁸ Քո մեղքերի առատությամբ և առևտրիդ խարդախությամբ պղծել ես սրբություններդ։ Կրակ եմ հանելու քո միջից, նա էլ այրելու է քեզ. քո երկրում՝ բոլոր ականատեսների առաջ, քեզ մոխրի եմ վերածելու։ ¹⁹ Եվ ազգերի միջից բոլոր նրանք, ովքեր քեզ ճանաչեն, տրտմելու են քեզ համար, որովհետև կորստյան ես մատնվել ու այլևս հավիտյան գոյություն չես ունենալու”»։

²⁰ Սիդովնի դեմ։ Տիրոջ խոսքն ինձ ուղղվեց ու ասաց. ²¹ «Մարդո՛ւ որդի, դեմքդ ուղղի՛ր Սիդովնի կողմը և մարգարեացի՛ր նրա վերաբերյալ։ ²² Կասես. “Ամենակալ Տերն այսպես է ասում. ահա ես քո դեմ եմ, Սիդո՛ն։ Փառավորվելու եմ քո մեջ։ Ու կիմանաս, որ ես եմ Տերը, երբ քո դատաստանն անեմ։ Եվ ես սրբաբանվելու եմ քո մեջ։ ²³ Ժանտախտ եմ ուղարկելու քեզ վրա և արյուն՝ քո հրապարակներին։ Քո մեջ ընկնելու են խոցվածները սրերից, որ քեզ վրա են թափվելու տարբեր կողմերից։ Ու կիմանան, որ ես եմ Տերը։ ²⁴ Իսրայելի տան համար այլևս խայթող տատասկներ չեն լինելու, ոչ էլ ցավ պատճառող փշեր այն բոլոր մարդկանց կողմից, որոնք չորս կողմից անարգեցին նրանց։ Ու կիմանան, որ ես եմ Ամենակալ Տերը”»։

Իսրայելը պիտի ապրի ապահովության մեջ

²⁵ Ամենակալ Տերն այսպես է ասում. «Հավաքելու եմ Իսրայելի տունն այն ազգերից, որոնց մեջ նրանք ցրիվ են եկել, և սրբաբանվելու եմ նրանց մեջ՝ ազգերի ու ժողովուրդների առաջ։ Նրանք բնակվելու են իրենց երկրում, որ տվել եմ իմ ծառա Հակոբին։ ²⁶ Այնտեղ ապրելու են ապահով. տներ են շինելու և այգիներ տնկելու, ապրելու են ապահով, երբ դատաստան տեսնեմ բոլոր նրանց հետ, ովքեր ամեն կողմից նրանց անարգեցին։ Ու կիմանան, որ ես եմ նրանց Տերը՝ Աստված՝ նրանց հայրերի Աստվածը»։

29

Եգիպտոսի ու եգիպտացիների արքա փարավոնի մասին

¹ Տասներորդ տարում՝ տասներորդ ամսին, ամսվա առաջին օրը, Տիրոջ խոսքն ինձ ուղղվեց ու ասաց. ² «Մարդո՛ւ որդի, դեմքդ ուղղի՛ր եգիպտացիների արքա փարավոնի դեմ, մարգարեացի՛ր նրա և ամբողջ Եգիպտոսի վերաբերյալ, խոսի՛ր ³ ու ասա՛. “Տերը՝ Աստված, այսպես է ասում. ահա ես քո դեմ եմ, փարավո՛ն, եգիպտացիների արքա՛, օ՜ մեծ վիշապ, որ նստում ես գետերի միջև, որ ասում ես՝ “Իմն են այս գետերը, և ես եմ սրանց ստեղծել”։ ⁴ Սանձ եմ դնելու քո ծնոտներին, այնպես եմ անելու, որ գետիդ ձկները կպչեն թևերիդ. քո այդ գետերը հանելու քո միջից, և քո գետի բոլոր ձկները թևերիդ են կպչելու։ ⁵ Քեզ և գետիդ բոլոր ձկներին անմիջապես տապալելու եմ։ Դու կընկնես դաշտի երեսին, չես ժողովվի և այլևս չես հավաքվի, քանի որ քեզ որպես կերակուր տվեցի երկրի գազաններին ու երկնքի թռչուններին։ ⁶ Եգիպտոսի բոլոր բնակիչները կիմանան, որ ես եմ Տերը, քանի որ Իսրայելի տան համար եղեգնյա գավազան եղար. ⁷ երբ քեզ վրա էին հենվում, նրանց ձեռքն էիր խրվում, իսկ երբ ամեն ձեռք քեզնից էր բռնվում, երբ քեզ վրա էին հենվում, ջարդվում էիր և նրանց բոլորի մեջքը կոտրում”»։ ⁸ Դրա համար էլ Տերը՝ Աստված, այսպես է ասում. «Ահա ես քո վրա սուր եմ բերելու, քո միջից վերացնելու եմ մարդուն ու անասունին, ⁹ և եգիպտացիների քո երկիրը կործանված ու ավերակ է լինելու։ Ու կիմանաս, որ ես եմ Տերը։ Այն բանի համար, որ ասում էիր՝ “Այս գետերն իմն են, և ես եմ սրանց ստեղծել”, ¹⁰ դրա համար էլ ահա ես քո և քո բոլոր գետերի դեմ եմ և եգիպտացիների քո երկիրն ավերածության, սրի ու կործանման եմ մատնելու Մակդոդից ու Սուհենից մինչև եթովպացիների սահմանները։ ¹¹ Նրա վրայով մարդու ոտք չի անցնելու, նրա վրայով ոչ էլ անասունի կճղակ է գնալու, և քառասուն տարի չի բնակեցվելու։ ¹² Նրա երկիրը կործանման եմ մատնելու ավերակ երկրների մեջ, նրա քաղաքներն էլ՝ ավերված քաղաքների մեջ։ Եվ քառասուն տարի կործանված են լինելու. եգիպտացիներին էլ ցրիվ եմ տալու ազգերի մեջ, նրանց սփռելու եմ երկրներով մեկ»։ ¹³ Տերը՝ Աստված, այսպես է ասում. «Քառասուն տարի հետո եգիպտացիներին հավաքելու եմ այն ազգերից, որոնց մեջ ցրիվ էին եկել, ¹⁴ եգիպտացիներին վերադարձնելու եմ գերությունից և նրանց բնակեցնելու եմ Պաթուրեսի երկրում, այն երկրում, որտեղից գերի էին քշվել։ Եվ այնտեղ գոյություն է ունենալու մի իշխանություն՝ ավելի խեղճ, ¹⁵ քան բոլոր իշխանությունները։ Այն լինելու է ավելի տկար ու այլևս չի իշխելու ազգերի վրա։ Նրանց սակավաթիվ եմ դարձնելու, որպեսզի ազգերի մեջ այլևս չբազմանան։ ¹⁶ Իսրայելի տան համար այլևս ապավեն չեն լինելու, որ անօրենություն է հիշեցնելու նրանց սրտի ուզածով գնալիս։ Եվ կիմանան, որ ես եմ Ամենակալ Տերը»։

Նաբուքոդոնոսոր արքան տիրելու է Եգիպտոսին

¹⁷ Դարձյալ Եգիպտոսի վերաբերյալ։ Քսանյոթերորդ տարում՝ առաջին ամսին, առաջին օրը, Տիրոջ խոսքն ինձ ուղղվեց ու ասաց. ¹⁸ «Մարդո՛ւ որդի, բաբելացիների Նաբուքոդոնոսոր արքան իր զորքերին մեծ զրկանքների ենթարկեց՝ ուղարկելով Տյուրոսի դեմ։ Ամեն գլուխ ճաղատացել էր, ամեն ուս՝ քերծվել։ Տյուրոսի դեմ ինձ մատուցած ծառայության համար ինքն էլ, իր զորքերն էլ վարձ չեն ստացել»։ ¹⁹ Ուստի Տերը՝ Աստված, այսպես է ասում. «Ահա ես բաբելացիների Նաբուքոդոնոսոր արքային եմ տալու եգիպտացիների երկիրը, և նա թալանելու է նրա լիությունը, նրան ավարի է ենթարկելու, նրան կողոպտելու է, և դա լինելու է նրա զորքի վարձը։ ²⁰ Տյուրոսում ինձ մատուցած ծառայության փոխարեն նրան եմ տալու եգիպտացիների երկիրը, տալու եմ այն ամենի դիմաց, ինչ արել է ինձ համար»։ Տերը՝ Աստված, այսպես է ասում. ²¹ «Այդ օրն Իսրայելի ողջ տան համար եղջյուր է վեր բարձրանալու, և բաց եմ անելու քո բերանը՝ նրանց մեջ խոսելու։ Եվ կիմանան, որ ես եմ Տերը»։

30

Տերը պատժելու է Եգիպտոսին

¹ Տիրոջ խոսքն ինձ ուղղվեց ու ասաց. ² «Մարդո՛ւ որդի, մարգարեացի՛ր ու ասա՛. “Ամենակալ Տերը՝ Աստված, այսպես է ասում. օ՜հ, օ՜հ, ի՜նչ օր, ³ քանզի մոտ է Տիրոջ օրը՝ միգապատ օրը. հասել է ազգերի վախճանը։ ⁴ Սուր է գալու եգիպտացիների վրա, և խռովություն է լինելու եթովպացիների կողմերում։ Խոցվածներ են ընկնելու Եգիպտոսում, թալանելու են նրա լիությունը, տապալվելու են նրա հիմքերը։ ⁵ Պարսիկները, կրետացիները, լիդացիներն ու լիբիացիները, բոլոր խառնիճաղանջ ամբոխները, նաև նրանք, որ այնտեղ են իմ ուխտի որդիներից, սրով են կոտորվելու”։ Ամենակալ Տերն այսպես է ասում. ⁶ “Խորտակվելու են եգիպտացիների հենարանները, իջնելու է նրանց զորության հպարտությունը, Մակդոդից մինչև Սուհեն սրով են ընկնելու այնտեղ”,- ասում է Ամենակալ Տերը։- ⁷ “Եվ ավերվելու է երկիրն ապականված երկրների մեջ, նրանց քաղաքներն էլ՝ ավերված քաղաքների մեջ։ ⁸ Ու կիմանան, որ եմ Տերը, երբ կրակ գցեմ եգիպտացիների վրա, և խորտակվեն նրա բոլոր օգնականները։ ⁹ Այն օրը փութով հրեշտակներ են ելնելու իմ կողմից՝ ոչնչացնելու եթովպացիների սին հույսերը, և խռովություն է լինելու նրանց մեջ եգիպտացիների վախճանի օրը, քանի որ ահա այն հասել է”։ ¹⁰ Տերը՝ Աստված, այսպես է ասում. “Եգիպտացիների բազմությունը ոչնչացնելու եմ բաբելացիների արքա Նաբուքոդոնոսորի ձեռքով, ¹¹ և՛ իրեն, և՛ իր ազգն էլ՝ հետը։ Ազգերի միջից ամենից անգութներն են ուղարկվելու՝ երկիրը կործանելու, և իջեցնելու են իրենց սրերը Եգիպտոսի վրա. երկիրը լցվելու է խոցվածներով։ ¹² Նրանց գետերն անապատի եմ վերածելու, երկիրն էլ չարագործների ձեռքն եմ մատնելու, երկիրն իր ամեն ինչով ոչնչացնելու եմ այլազգիների ձեռքով, որովհետև ես՝ Տերս եմ խոսել”։ ¹³ Տերը՝ Աստված, այսպես է ասում. “Կործանելու եմ կուռքերը, վերջ եմ տալու մեմփացիների մեծամեծներին, եգիպտացիների երկրից էլ՝ իշխաններին. նրանք այլևս չեն լինի։ Սարսափ եմ գցելու եգիպտացիների երկրի վրա։ ¹⁴ Կործանելու եմ Պաթուրես երկիրը, կրակ եմ գցելու Տայանի վրա, վրեժխնդիր եմ լինելու դիոսպոլացիներից։ ¹⁵ Զայրույթս թափելու եմ Սայինի՝ եգիպտացիների ամրոցի վրա ու կործանելու եմ մեմփացիների հարստությունը։ ¹⁶ Կրակի եմ մատնելու Եգիպտոսը. Սայինում մեծ իրարանցում է լինելու, դիոսպոլացիների քաղաքը բզկտվելու է, և ջրեր են բխելու։ ¹⁷ Արեգ քաղաքի ու Բուբաստի երիտասարդները սրով են ընկնելու, իսկ նրանց կանայք գերի են տարվելու։ ¹⁸ Ցերեկը խավարելու է Տափնասում, երբ այնտեղ փշրեմ եգիպտացիների իշխանական մականը։ Եվ այն ժամանակ կորչելու է նրա զորության հպարտությունը. նրան մեգն է ծածկելու։ Նրա դուստրերն էլ գերի են քշվելու։ ¹⁹ Եվ իմ դատաստանն եմ անելու Եգիպտոսում։ Եվ կիմանան, որ ես եմ Տերը”»։

Տերը զորացնում է բաբելացիների արքայի բազկի ուժը

²⁰ Դարձյալ Եգիպտոսի վերաբերյալ։ Տասնմեկերորդ տարում՝ առաջին ամսին, ամսվա յոթերորդ օրը, Տիրոջ խոսքն ուղղվեց ինձ ու ասաց. ²¹ «Մարդո՛ւ որդի, փշրելու եմ փարավոնի՝ եգիպտացիների արքայի բազուկները, և այլևս չեն վիրակապվելու բուժվելու համար, ո՛չ էլ սպեղանի է դրվելու դրանց վրա և ո՛չ էլ զորանալու են ձեռքին սուր բռնելու համար»։ ²² Ուստի Տերը՝ Աստված, այսպես է ասում. «Ահա ես փարավոնի՝ եգիպտացիների արքայի դեմ եմ. փշրելու եմ նրա հզոր, մկանուտ ու ջլուտ բազուկները, նրա ձեռքից գցելու եմ սուրը։ ²³ Եգիպտացիներին ցրիվ եմ տալու ազգերի մեջ, նրանց սփռելու եմ երկրներով մեկ։ ²⁴ Իսկ բաբելացիների արքայի բազուկները զորացնելու եմ, իմ սուրն էլ նրա ձեռքն եմ տալու։ Եվ նա այն քաշելու է եգիպտացիների երկրի վրա, նրան ավարի է ենթարկելու, նրան կողոպտելու է։ ²⁵ Զորացնելու եմ բաբելացիների արքայի բազուկները, իսկ փարավոնի բազուկները թուլանալու են։ Եվ կիմանան, որ ես եմ Տերը, երբ սուրս տամ բաբելացիների արքայի ձեռքը և նրան դուրս բերեմ եգիպտացիների երկրի վրա։ ²⁶ Եգիպտացիներին ցրիվ եմ տալու ազգերի մեջ, սփռելու եմ նրանց երկրներով մեկ։ Եվ բոլոր եգիպտացիները կիմանան, որ ես եմ Տերը»։

31

Եգիպտոսի արքան համեմատվում է մայրի ծառի հետ

¹ Տասնմեկերորդ տարում՝ երրորդ ամսին, ամսվա առաջին օրը, Տիրոջ խոսքն ինձ ուղղվեց ու ասաց. ² «Մարդո՛ւ որդի, փարավոնին՝ եգիպտացիների արքային, ու նրա զորքին ասա՛. “Քո ամբարտավանության մեջ քեզ ո՞ւմ հետ համեմատեցիր։ ³ Ահա Ասուրը՝ իբրև մի նոճի Լիբանանում՝ գեղեցիկ ճյուղերով, թավ ոստերով ու մեծությամբ բարձր. ամպերի մեջ էր նրա կատարը։ ⁴ Ջուրը նրան սնուցել էր. խորքային ջրերը նրան բարձրացրել էին, նրա գետերն էին բերել իր տունկերի շուրջը, իր ջրանցքներն էին տարածել դաշտի բոլոր ծառերի ուղղությամբ։ ⁵ Դրա համար էլ նա բարձրացավ ավելի վեր, քան դաշտի բոլոր ծառերը. նրա ոստերը տարածվեցին, ճյուղերը բարձրացան՝ շնորհիվ առատ ջրերի։ ⁶ Ու երբ ծավալվեց, երկնքի բոլոր թռչունները նրա ճյուղերին բնակություն հաստատեցին, վայրի բոլոր կենդանիները նրա ոստերի տակ ձագեր հանեցին, և բազմաթիվ ազգեր նրա հովանու ներքո բնակություն հաստատեցին։ ⁷ Ճյուղերի երկարության շնորհիվ նա գեղեցկացել էր իր բարձրությամբ, որովհետև նրա արմատներն էլ առատ ջրերի մեջ էին։ ⁸ Աստծու դրախտի եղևնին, կաղնին ու նոճին չէին հավասարվում նրա ճյուղերին, մայրիներն ու սոսիները չէին նմանվում նրա ոստերին։ Աստծու դրախտի ոչ մի ծառ գեղեցկությամբ չէր նմանվում նրան, ⁹ որովհետև նա սաղարթախիտ ոստեր ուներ։ Աստծու բերկրալից դրախտի բոլոր ծառերը նախանձում էին նրան”»։ ¹⁰ Ուստի Տերը՝ Աստված, այսպես է ասում. «Այն բանի համար, որ չափից շատ բարձրացար, ճյուղերիդ ծայրերը հասան ամպերին, և ես տեսա ամբարտավանությունդ, ¹¹ քեզ մատնեցի ազգերի իշխանի ձեռքը։ Նրան կործանման մատնեցին. ¹² նրան դուրս հանեցին, ազգերի միջից ելած օտար չարագործները նրան արմատախիլ արեցին և լեռների վրա տապալեցին։ Նրա ոստերն ընկան բոլոր ձորերը, նրա բունը կտոր-կտոր եղավ երկրի բոլոր դաշտերով մեկ, նրա հովանուց իջան բոլոր ազգերը և նրան գետնին հավասարեցրին։ ¹³ Ու երբ տապալվեց, երկնքի բոլոր թռչունները հանգիստ առան նրա վրա, վայրի բոլոր կենդանիները նրա բնի վրա հասան, ¹⁴ որպեսզի ջրասուն բոլոր ծառերն իրենց բարձրությամբ այլևս չամբարտավանանան, իրենց կատարներն էլ մինչև ամպերը չարձակեն և չմնան իրենց գոռոզության մեջ, ինչպես նա, որ ջուր էր խմում։ Բոլորն էլ մահվան մատնվեցին երկրի խորքերում՝ խորխորատ իջած մարդկանց որդիների մոտ»։ ¹⁵ Տերը՝ Աստված, այսպես է ասում. «Այն օրը, երբ նա գերեզման իջավ, խորքային ջրերը նրա վրա սգացին։ Խափանեցի նրա գետերը, խցանեցի հորդ ջրերը։ Նրա վրա Լիբանանը տխրեց. դաշտի բոլոր ծառերը նրա պատճառով լքված մնացին։ ¹⁶ Նրա կործանման աղմուկից ազգերը ցնցվեցին, երբ գուբ իջածների հետ նրան էլ գերեզման իջեցրի։ Եվ սանդարամետում մխիթարեցին նրան բերկրալից դրախտի բոլոր ծառերը, Լիբանանի ընտիր ու գեղեցիկ ջրարբի ծառերը։ ¹⁷ Նրանք գերեզման իջան նրա հետ՝ սրից խոցվածներով հանդերձ։ Իսկ նրա զավակները, որ բնակություն էին հաստատել նրա հովանու ներքո, զրկվելով իրենց կյանքից, բնաջնջվեցին։

¹⁸ Ո՞ւմ հետ համեմատվեցիր զորությամբ, փառքով ու մեծությամբ՝ բերկրալից ծառերի մեջ։ Իջի՛ր, ցա՛ծ իջիր երկրի խորքը՝ քո բերկրալից դրախտի ծառերով հանդերձ, անթլփատ ննջեցյալների մեջ՝ սրով խոցվածների հետ։ Այսպես են լինելու նաև փարավոնն ու նրա զորքերի ողջ բազմությունը»,- ասում է Տերը՝ Աստված։

32

Եգիպտոսի թագավորը համեմատվում է կոկորդիլոսի հետ

¹ Տասներկուերորդ տարում՝ տասներկուերորդ ամսին, ամսի առաջին օրը, Տիրոջ խոսքն ինձ ուղղվեց ու ասաց. ² «Մարդո՛ւ որդի, ողբա՛ փարավոնի՝ եգիպտացիների արքայի վրա ու նրան ասա՛.

“Առյուծացար ազգերի մեջ

և վիշապի նմանվեցիր ծովում։

Մարտնչում էիր քո գետերի դեմ,

սմբակի տակ պղտորում էիր ջրերը,

ոտնակոխ էիր անում քո գետերը”։

³ Տերը՝ Աստված, այսպես է ասում.

“Քեզ շրջապատելու եմ իմ թակարդներով

ու հավաքված բազմաթիվ զորքերով։

Քեզ դուրս եմ հանելու իմ կարթով,

գետնահար փռելու եմ քեզ երկրի երեսին,

⁴ քեզնով լցվելու են դաշտերը։

Քեզ վրա եմ իջեցնելու երկնքի բոլոր թռչուններին,

քեզնով հագեցնելու՝ երկրի բոլոր գազաններին։

⁵ Մարմինդ գցելու եմ լեռների վրա,

ձորերը լցնելու եմ քո արյունով։

⁶ Երկիրը ողողվելու է քո կղանքով՝

լեռների վրա քո զորքերի բազմության պատճառով։

Ձորերը լցվելու են քեզանով։

⁷ Երբ դու մարես, երկինքը քողով եմ ծածկելու,

խավարեցնելու եմ նրա աստղերը,

արեգակը ծածկելու եմ ամպերով,

լուսինն էլ իր լույսը չի տալու։

⁸ Քեզ վրա խավարեցնելու եմ բոլոր լուսատուները,

քեզ վրա խավար եմ բերելու”,-

ասում է Տերը՝ Աստված։-

⁹ “Բազմաթիվ ազգերի սիրտն եմ զայրացնելու այն ժամանակ,

երբ ազգերի հետ քեզ գերությունից դուրս բերեմ դեպի այն երկիրը,

որ դու չգիտես։

¹⁰ Քեզ համար տրտմելու են բազմաթիվ ազգեր,

իսկ նրանց թագավորները սաստիկ զարհուրելու են,

երբ սուրս թռչի նրանց դիմաց.

քո կործանման օրից նրանք սպասելու են իրենց կործանմանը”։

¹¹ Տերը՝ Աստված, այսպես է ասում.

“Բաբելացիների արքայի սուրը գալու է քեզ վրա ¹² հսկաների սրով հանդերձ,

և կործանելու եմ քո զորությունը։

Ազգերի ամենից անգութներն են գալու

և ջնջելու են եգիպտացիների ամբարտավանությունը.

խորտակվելու է նրանց ամբողջ զորությունը։

¹³ Ոչնչացնելու եմ նրա բոլոր անասուններին առատ ջրերի միջից.

դրանք չի պղտորելու մարդու ոտքը,

ոչ էլ կոխոտելու է անասունի կճղակը։

¹⁴ Ապա նրա ջրերը հանդարտվելու են,

իսկ գետերը յուղի պես են հոսելու”,-

ասում է Ամենակալ Տերը։-

¹⁵ “Երբ Եգիպտոսը կործանման մատնեմ,

երկիրն էլ ամբողջովին ավերվելու է։

Երբ այնտեղից ցրիվ տամ բոլոր բնակիչներին,

կիմանան, որ ես եմ Տերը՝ Աստված։

¹⁶ Ողբեր են սրանք, և ողբալու են նրան.

ազգերի դուստրերն են ողբալու նրան,

ողբալու են Եգիպտոսի ու նրա ամբողջ զորության վրա”»,-

ասում է Տերը՝ Աստված։

Ողբ փարավոնի ու Եգիպտոսի վրա։

¹⁷ Տասներկուերորդ տարում՝ առաջին ամսին, ամսվա տասնհինգերորդ օրը, Տիրոջ խոսքն ինձ ուղղվեց ու ասաց.

¹⁸ «Մարդո՛ւ որդի, ողբա՛ Եգիպտոսի զորության վրա։

Ազգերը նրա մեռյալ դուստրերին

կիջեցնեն երկրի խորքը՝ նրանց մոտ,

ովքեր վայելչության ջրերից խորխորատ են իջել։

¹⁹ Վայելչության ջրերից

իջի՛ր, ննջի՛ր անթլփատների հետ, խոցվածների մեջ։

²⁰ Սրով ընկնելու են նրա հետ,

վերջ է գտնելու նրա ամբողջ զորությունը։

²¹ Եվ հսկաներն ասելու են քեզ.

“Ե՛կ, իջի՛ր անդունդների խորքերը.

դու ումի՞ց էիր լավ։

Իջի՛ր և հանգրվանի՛ր անթլփատների հետ,

սրից խոցվածների մեջ”։

²² Այնտեղ են Ասուրը և նրա ողջ զորքը՝

բոլորն էլ խոցված։

²³ Այնտեղ՝ խորխորատի խորքերում է նրանց գերեզման տրվել,

բոլորը հավաքվել են նրա շիրիմների շուրջը։

Սրից էին ընկել բոլոր խոցվածները,

ովքեր գուբերի հատակն իրենց գերեզման դարձրին։

Բոլորը հավաքվել են նրա շիրիմների շուրջը։

Ամենքն էլ խոցված էին՝ սրով ընկած,

ովքեր իրենց սարսափն էին տարածել ողջերի երկրի վրա։

²⁴ Այնտեղ էր Եղամը,

նրա ողջ զորքը՝ նրա գերեզմանի շուրջը։

Բոլոր սրախողխող ընկածներն անթլփատ իջան երկրի խորքերը,

ովքեր իրենց սարսափն էին տարածել ողջերի երկրի վրա։

Նրանք իրենց տանջանքներն ստացել են խորխորատ իջածների հետ,

²⁵ խոցվածների մեջ։

²⁶ Այնտեղ դրվեցին Մոսոքն ու Թոբելը

ու նրանց ամբողջ զորքը՝ նրանց գերեզմանի շուրջ, նրա բոլոր խոցվածները,

նրա՝ սրից ընկած բոլոր անթլփատ խոցվածները,

ովքեր իրենց սարսափն էին տարածել ողջերի երկրի վրա։

²⁷ Նրանք ննջել են հավիտենապես ընկած հսկաների հետ,

որոնք գերեզման էին իջել իրենց պատերազմական զենքերով.

նրանց անիրավություններն էլ դրվել են նրանց ոսկորների վրա,

որովհետև զարհուրեցրել էին հսկաներին իրենց կենդանության ժամանակ։

²⁸ Դու էլ ես անթլփատների մեջ խորտակվելու

և ննջելու սրով խոցվածների մեջ։

²⁹ Այնտեղ են Եդովմը,

նրա բոլոր թագավորներն ու իշխանները,

ովքեր իրենց զորությամբ հանդերձ ընկան սրի հարվածներից։

Նրանք էլ են ննջել խորխորատ իջած խոցվածների հետ։

³⁰ Այնտեղ են հյուսիսի բոլոր իշխանները

(բոլորն էլ՝ Ասորեստանի զորավարներ),

որոնք խոցված գերեզման են իջել իրենց ահազդու զորքերով հանդերձ։

Նրանք ևս ամոթահար ու անթլփատ ննջել են սրով խոցվածների հետ,

տարել իրենց տանջանքները խորխորատ իջածների հետ։

³¹ Փարավոնը տեսնելու է նրանց

և ցավ է ապրելու իր զորքերի համար,

փարավոնի սրահար վիրավորները և նրա ողջ զորքը,-

ասում է Տերը՝ Աստված,-

³² քանզի իր ահն էր տարածել ողջերի երկրի վրա,

բայց փարավոնը և նրա հետ իր ողջ զորքը

ննջելու են սրով խոցված անթլփատների մեջ»,-

ասում է Տերը՝ Աստված։

33

Աստված Եզեկիելին պահակ է կարգում

Հակոբի որդիներին

¹ Տիրոջ խոսքն ինձ ուղղվեց ու ասաց. ² «Մարդո՛ւ որդի, խոսի՛ր քո ժողովրդի որդիների հետ ու նրանց ասա՛. “Մի երկիր կա, որի վրա սուր եմ բերելու։ Եվ այդ երկրի ժողովուրդն իր միջից մի մարդ է ընտրելու, նրան դետ է կարգելու։ ³ Սա տեսնելու է, որ երկրի վրա սուր է գալիս, փող է փչելու և ազդարարելու է ժողովրդին։ ⁴ Ժողովուրդն անպայման լսելու է փողի ձայնը, բայց չի զգուշանալու։ Եվ սուրը հասնելու, բռնելու է նրան. թող նրա արյունն իր գլխին լինի, ⁵ քանի որ փողի ձայնը լսել էր, բայց չէր զգուշացել։ Թող նրա արյունն իր գլխին լինի։ Իսկ նա, ով զգուշացրել էր, փրկելու է իր անձը։ ⁶ Իսկ եթե դետը տեսնի, որ սուրը գալիս է, բայց փողով նշան չտա, ժողովուրդն էլ չզգուշանա, վրա հասած սուրը նրանցից մեկին բռնի, ապա սա իր անօրենության պատճառով բռնված կլինի. բայց սրա արյունը դետից եմ պահանջելու”։ ⁷ Եվ դո՛ւ, մարդո՛ւ որդի. քեզ դետ կարգեցի Իսրայելի տան վրա։ Դու պիտի լսես իմ բերանի խոսքերը և իմ կողմից նրանց պիտի զգուշացնես։ ⁸ Երբ ես մեղավորին ասեմ, թե՝ հաստատ կմեռնես, իսկ դու չխոսես ու ամբարիշտին չզգուշացնես իր ճանապարհից, ինքը՝ անօրենն իր անօրենության մեջ կմեռնի, բայց նրա արյունը քեզնից կպահանջեմ։ ⁹ Իսկ եթե ամբարիշտին նախօրոք ասես իր ճանապարհի մասին, որպեսզի հետ դառնա դրանից, բայց նա հետ չկանգնի իր ճանապարհից, ինքն իր ամբարշտության մեջ կմեռնի, իսկ դու քո հոգին կփրկես»։

Աստված չի ուզում ամբարիշտի մահը

¹⁰ «Եվ դո՛ւ, մարդո՛ւ որդի, Իսրայելի տանն ասա՛. “Այսպես խոսե՛ք ու ասե՛ք. մեր մոլորություններն ու անօրենությունները մեր մեջ են, և մենք դրանց մեջ մաշվում ենք, ինչպե՞ս ապրենք”։ ¹¹ Նրանց ասա՛. “Կենդանի եմ ես,- ասում է Ամենակալ Տերը,- և ամբարիշտի մահը չեմ կամենում, այլ նրա հետ կանգնելն իր չար ճանապարհից ու ապրելը։ Դարձե՛ք, հե՛տ դարձեք ձեր չար ճանապարհից. ինչո՞ւ մեռնեք, ո՛վ տուն Իսրայելի”։ ¹² Եվ դո՛ւ, մարդո՛ւ որդի, քո ժողովրդի որդիներին ասա՛. “Արդարի արդարությունը նրան չի փրկելու այն օրը, երբ մոլորվի, անօրենի անօրենությունն էլ նրան չի չարչարելու այն օրը, երբ հետ կանգնի իր բոլոր անօրենություններից։ Արդարը չի կարողանալու փրկվել իր մեղանչելու օրը։ ¹³ Երբ ես արդարին ասեմ՝ հաստատ ապրելու ես, իսկ նա էլ, հույսը դնելով իր արդարության վրա, անօրենություն գործի, նրա բոլոր արդար գործերը չեն հիշվելու, այլ իր կատարած անօրենության համար մեռնելու է։ ¹⁴ Իսկ երբ ես ամբարիշտին ասեմ՝ հաստատ մեռնելու ես, բայց նա հետ կանգնի իր մեղքերից, իրավունք և արդար գործ կատարի, ¹⁵ պարտապանին հետ տա գրավը, վերադարձնի հափշտակածը, ընթանա կյանքի պատվիրաններով, անիրավություններ չգործի, հաստատ ապրելու է ու չի մեռնելու։ ¹⁶ Նրա գործած բոլոր մեղքերը չեն հիշվելու, որովհետև իրավունք ու արդար գործ է կատարել, դրա համար էլ ապրելու է”։ ¹⁷ Քո ժողովրդի որդիներն ասում են. “Տիրոջ ճանապարհն ուղիղ չէ”։ Իրենց ճանապարհն ուղիղ չէ։ ¹⁸ Երբ արդարն իր արդար ճանապարհից շեղվի և անիրավություններ կատարի, դրանց պատճառով էլ մեռնելու է։ ¹⁹ Իսկ երբ մեղավորը հետ կանգնի իր անօրենությունից, իրավունք ու արդար գործ կատարի, դրա շնորհիվ ապրելու է։ ²⁰ Ա՞յս բանի համար եք ասում. “Տիրոջ ճանապարհն ուղիղ չէ”։ Ձեզանից յուրաքանչյուրին իր ճանապարհի համեմատ եմ դատելու, ո՛վ տուն Իսրայելի»։

Եզեկիելի մարգարեությունը ավերված Երուսաղեմի մասին

²¹ Մեր գերության տասներկուերորդ տարում՝ տասներորդ ամսին, ամսվա հինգերորդ օրը, Երուսաղեմից ազատված մեկն ինձ մոտ եկավ ու ասաց. «Քաղաքը գրավված է»։ ²² Երեկոյան՝ մինչև նրա գալը, Տիրոջ ձեռքն ինձ վրա էր. նա բաց արեց բերանս նախքան առավոտյան նրա՝ ինձ մոտ գալը։ Երբ բերանս բացեցի, այլևս չէի կարող լուռ մնալ։ ²³ Տիրոջ խոսքն ինձ ուղղվեց ու ասաց. ²⁴ «Մարդո՛ւ որդի, Իսրայելի երկրի ավերակների բնակիչներն ասում են. “Աբրահամը մեկ հոգի էր ու երկիրը գրավեց, իսկ հիմա մենք շատ ենք, երկիրը մեզ է ժառանգություն տրվել, չժառանգե՞նք այն”։ ²⁵ Ուստի նրանց ասա՛. “Ամենակալ Տերն այսպես է ասում. քանի որ արյունոտ միս եք ուտում և աչքներդ գցում եք կուռքերին, արյուն եք թափում, դեռ ուզում եք երկի՞րն էլ ժառանգել։ ²⁶ Դա ձեզ համար սրով կլինի, որովհետև պղծություններ եք կատարել, յուրաքանչյուրն իր մերձավորի կնոջն է պղծել։ Եվ դեռ ուզում եք երկի՞րն էլ ժառանգել”։ Ուստի ասա՛ նրանց. “Տերը՝ Աստված, այսպես է ասում. ²⁷ ես՝ Տերս, կենդանի եմ. ովքեր ավերակների մեջ լինեն, սրով են ընկնելու, ովքեր դաշտի երեսին, անապատի գազաններին կեր են տրվելու, իսկ ովքեր պարիսպների մեջ կամ քարայրներում, ժանտախտից են կոտորվելու։ ²⁸ Երկիրն ավերի ու կործանման եմ մատնելու, և ոչնչանալու է նրա զորության ամբարտավանությունը։ Ամայի են դառնալու Իսրայելի լեռները, որպեսզի չլինի թե որևէ մեկն անցնի դրանցով։ ²⁹ Եվ կիմանան, որ ես եմ Տերը։ Նրանց երկիրն ավերակ եմ դարձնելու. այն ամայի է դառնալու իրենց կատարած բոլոր գարշելի գործերի պատճառով”»։

Ժողովուրդը լսում է մարգարեի խոսքը, բայց չի կատարում

³⁰ «Եվ դո՛ւ, մարդո՛ւ որդի. քո ժողովրդի որդիները շրջում են, քրթմնջում քեզ վրա պարիսպների մոտ, պալատների դռներին և մեկը մյուսին, եղբայրն իր եղբորն ասում է. “Հավաքվենք գնանք և լսենք Տիրոջ կողմից ասված պատգամները”։ ³¹ Հիմա գալիս են քեզ մոտ, ինչպես ժողովուրդն է հավաքվում. և իմ ժողովուրդը նստելու է քո առաջ, լսելու է քո խոսքերը, սակայն չի կատարելու դրանք, որովհետև նրանց բերաններում սուտն է, և նրանց սրտերն իրենց պղծությանն են հետևում։ ³² Դու նրանց համար կլինես հորինված քաղցրաբարբառ երգի ձայնի պես. կլսեն խոսքերդ, բայց չեն կատարի։ ³³ Իսկ երբ գա, ասելու են՝ “Ահա հասել է”, ու կիմանան, որ մարգարե կար իրենց մեջ»։

34

Մարգարեություն Իսրայելի հովիվների դեմ

Իսրայելի հովիվներին

¹ Տիրոջ խոսքն ինձ ուղղվեց ու ասաց. ² «Մարդո՛ւ որդի, մարգարեացի՛ր Իսրայելի հովիվների վրա, մարգարեացի՛ր ու այդ հովիվներին ասա՛. “Տերը՝ Աստված, այսպես է ասում. ո՛վ հովիվներ Իսրայելի, մի՞թե հովիվներն իրենք իրենց են արածեցնում. չէ՞ որ հովիվները հոտերն են արածեցնում։ ³ Ահա կաթը խմում եք, բուրդը հագնում, պարարտներին մորթում, բայց իմ հոտերը չեք արածեցնում. ⁴ տկարացածին չեք զորացրել, հիվանդացածին չեք բժշկել, չարչարվածին չեք խնամել, վիրավորվածին չեք փաթաթել, մոլորվածին հետ չեք դարձրել, կորածին չեք փնտրել, դիմացկունին տանջել եք։ ⁵ Իմ հոտերը ցրիվ են եկել, քանի որ հովիվներ չունեին, և անապատի գազաններին կեր են դարձել։ ⁶ Իմ հոտերը ցրիվ են եկել ու մոլորվել բոլոր լեռներով մեկ, բոլոր բարձր բլուրներով մեկ. երկրի երեսով մեկ ցրիվ են եկել իմ հոտերը։ Եվ ոչ ոք չկար, որ փնտրեր, և ոչ էլ հետ դարձներ”։ ⁷ Ուստի, հովիվնե՛ր, լսե՛ք Տիրոջ պատգամները. ⁸ “Կենդանի եմ ես,- ասում է Ամենակալ Տերը՝ Աստված.- քանի որ իմ հոտերը ավարի մատնվեցին, իմ հոտերն անապատի գազաններին կեր դարձան, որովհետև հովիվներ չկային, հովիվներն իմ հոտերը չփնտրեցին, հովիվներն իրենք իրենց մասին հոգ տարան և իմ հոտերը չարածեցրին”,- ⁹ դրա համար էլ լսե՛ք, հովիվնե՛ր, Տիրոջ պատգամները։ ¹⁰ Տերը՝ Աստված, այսպես է ասում. “Ահավասիկ ես այդ հովիվների դեմ եմ և հոտերս նրանց ձեռքից պահանջելու եմ, նրանց արգելելու եմ արածեցնել հոտերս, և այլևս նրանց չեն արածեցնելու։ Փրկելու եմ հոտերս նրանց ձեռքից. այլևս նրանք համար կերակուր չեն լինելու”։

Տերը փնտրում է իր հոտերը

¹¹ Տերը՝ Աստված, այսպես է ասում. “Ահա ես ինքս եմ փնտրելու հոտերս, խնամելու եմ նրանց։ ¹² Ինչպես որ հովիվն է իր հոտը փնտրում այն օրը, երբ մեգ ու մառախուղ է լինում իր ցրված հոտերի վրա, այնպես էլ ես եմ փնտրելու հոտերս, հավաքելու եմ նրանց այն բոլոր տեղերից, ուր ցրվել են մեգ ու մառախուղի օրը։ ¹³ Նրանց դուրս եմ բերելու ազգերից և նրանց հավաքելու եմ երկրներից, նրանց տանելու եմ իրենց երկիրը և ¹⁴ նրանց արածեցնելու եմ Իսրայելի լեռների վրա, ձորերում ու երկրի բոլոր բնակավայրերում։ Փարթամ արոտավայրերում եմ արածեցնելու նրանց՝ Իսրայելի բարձր լեռների վրա։ Այնտեղ են լինելու նրանց մակաղելու տեղերը. այնտեղ են դադար առնելու և այնտեղ են հանգստանալու բարության ու գուրգուրանքի մեջ։ Պարարտ արոտավայրերում են արածելու նրանք՝ Իսրայելի լեռների վրա։ ¹⁵ Ես եմ արածեցնելու հոտերս, ես եմ հանգիստ տալու նրանց։ Եվ կիմանան, որ ես եմ Տերը”։ Տերը՝ Աստված, այսպես է ասում. ¹⁶ “Կորածին փնտրելու եմ, մոլորվածին՝ հետ դարձնելու, վիրավորվածին՝ փաթաթելու, հյուծվածին՝ զորացնելու. գերին ու հզորին՝ պահելու։ Բոլորին արածեցնելու եմ արդարությամբ”։

Տերը պիտի դատի իր ոչխարներին

¹⁷ “Դուք էլ, իմ հոտե՛ր,- այսպես է ասում ձեզ Տերը՝ Աստված.- ահա ես դատելու եմ ձեզ ոչխար առ ոչխար, խոյ առ խոյ։ ¹⁸ Մի՞թե ձեզ բավարար չէին այն գեղեցիկ արոտավայրերը, որ առաջ արածում էիք, այլև այն, ինչ մնում էր, ոտնակոխ էիք անում, զուլալ ջուրը խմում էիք, իսկ այն, ինչ մնում էր, ոտքի տակ պղտորում։ ¹⁹ Իմ հոտերն էլ ձեր ոտնակոխ արածն էին արածում, ձեր կճղակներից պղտորված ջրերը խմում։ ²⁰ Ուստի Տերը՝ Աստված, այսպես է ասում. ահա ես դատ եմ անելու ուժեղ ու տկար ոչխարների միջև նրա համար, ²¹ որ ձեր կողերով և ուսերով հրում էիք, ձեր եղջյուրներով հարվածում ու չարչարում բոլոր տկարներին, քշում էիք նրանց, մինչև որ հոտերս ցիրուցան եղան։ ²² Սակայն փրկելու եմ հոտերս, և այլևս հափշտակության չեն մատնվի։ Դատելու եմ խոյ առ խոյ ²³ ու նրանց վրա մի հովիվ եմ կարգելու՝ իմ ծառա Դավթին, և նա հովվելու է նրանց։ Նա է նրանց համար հովիվ լինելու, ²⁴ իսկ ես՝ Տերս, նրանց Աստվածն եմ լինելու, իմ ծառա Դավիթն էլ՝ իշխան նրանց մեջ։ Ես՝ Տերս, խոսեցի։ ²⁵ Դավթի հետ խաղաղության ուխտ եմ կնքելու. չար գազաններին վերացնելու եմ երկրից, իսկ իմ հոտերն ապահով բնակվելու են անապատում և ննջելու են անտառներում։ ²⁶ Իմ լեռան շուրջը նրանց օրհնություն եմ տալու, ձեզ էլ անձրև եմ տալու. և անձրևներն օրհնաբեր են լինելու։ ²⁷ Ագարակի ծառերն իրենց պտուղներն են տալու, իսկ հողը տալու է իր զորությունը։ Իրենց երկրում նրանք խաղաղ ու ապահով են բնակվելու։ Ու կիմանան, որ ես եմ Տերը, երբ փշրեմ նրանց վզի լուծը։ Նրանց փրկելու եմ իրենց ծառայեցնողների ձեռքից, ²⁸ ու այլևս նրանք ավար չեն դառնալու ազգերի մեջ, այլևս երկրի գազանները նրանց չեն ուտելու։ Ապրելու են ապահով։ Ոչ ոք չի լինելու, որ նրանց սարսափեցնի։ ²⁹ Նրանց համար խաղաղության տունկ եմ աճեցնելու, ու երկրի վրա նրանք այլևս սովից չեն հյուծվելու և ոչ էլ նախատինք են կրելու ազգերի կողմից։ ³⁰ Ու կիմանան, որ ես՝ նրանց Տերը՝ Աստվածս, իրենց հետ եմ, նրանք էլ՝ Իսրայելի տունը, իմ ժողովուրդն է,- ասում է Տերը՝ Աստված։- ³¹ Դուք էլ, իմ հոտե՛ր, իմ արոտի՛ ոչխարներ, մարդիկ եք, ես էլ՝ ձեր Տերը՝ Աստված”»,- ասում է Տերը՝ Աստված։

35

Մարգարեություն Սեիրի դեմ

Եդովմացիների մասին

¹ Տիրոջ խոսքն ինձ ուղղվեց ու ասաց. ² «Մարդո՛ւ որդի, դեմքդ դարձրո՛ւ դեպի Սեիր լեռը, մարգարեացի՛ր նրա վրա ³ ու ասա՛. “Տերը՝ Աստված, այսպես է ասում. ահա ես քո դեմ եմ, ո՛վ Սեիր լեռ։ Ձեռքս մեկնելու եմ քո դեմ և քեզ անապատի եմ վերածելու. ավերվելու ես, ⁴ քաղաքներդ էլ ավերակի եմ վերածելու։ Դու ավերակ ես լինելու։ Ու կիմանաս, որ ես եմ Տերը։ ⁵ Քանի որ հավիտենական թշնամի եղար և Իսրայելի տան համար դարանակալ նստում էիր նենգությամբ, թշնամիների ձեռքով՝ սրի միջոցով, երբ նա նեղության մեջ էր, և երբ նրանց անիրավությունը հասել էր իր վախճանին, ⁶ ահա դրա համար էլ, կենդանի եմ ես,- ասում է Տերը՝ Աստված,- քանի որ դու արյամբ մեղանչեցիր, արյունն էլ հալածելու է քեզ. այն արյունը, որ ատեցիր, հենց նույն արյունն էլ հալածելու է քեզ։ ⁷ Ավերակի ու անապատի եմ վերածելու Սեիր լեռը, նրա վրայից վերացնելու եմ մարդ ու անասուն։ ⁸ Լեռներդ լցնելու եմ քո խոցվածներով, նաև բլուրներդ ու ձորերդ, և սրից խոցվածներն ընկնելու են քո բոլոր դաշտերում։ ⁹ Քեզ հավիտենապես ավերակ եմ դարձնելու, և քո քաղաքներն այլևս չեն վերաշինվելու։ Եվ կիմանաս, որ ես եմ Տերը։ ¹⁰ Քանի որ ասում էիր, թե երկու ազգերն ու երկու երկրներն էլ իմն են լինելու, ես ժառանգելու եմ դրանք (թեև Տերն այնտեղ էր), ¹¹ դրա համար էլ կենդանի եմ ես,- ասում է Տերը՝ Աստված,- քեզ հետ վարվելու եմ ըստ քո թշնամության, ըստ քո նախանձի, որով ատել ես նրանց։ Քեզ ճանաչել կտամ ինձ, երբ դատեմ քեզ։ ¹² Ու կիմանաս, որ ես եմ Տերը։ Լսել եմ քո հայհոյանքների ձայնը, որ ասում էիր՝ “Իսրայելի ավերակ լեռները մեզ կերակուր են տրված”։ ¹³ Քո բերանով գոռոզացել ես իմ դեմ և մեծ-մեծ խոսել իմ հասցեին, և ես լսել եմ դրանք”։ ¹⁴ Տերը՝ Աստված, այսպես է ասում. “Երբ արար աշխարհ ուրախության մեջ լինի, քեզ ավերակ եմ դարձնելու այն բանի համար, որ ոտնահարեցիր ժառանգությունն Իսրայելի տան, որ կործանվեց։ Նույնն էլ քեզ եմ անելու, ¹⁵ և ավերակ ես լինելու, ո՛վ Սեիր լեռ, և ամբողջ Եդովմն էլ բնաջնջվելու է։ Եվ կիմանաս, որ ես եմ նրանց Տերը՝ Աստված”»։

36

Սպառնալիքներ եդովմացիների դեմ

Իսրայելի լեռների մասին

¹ «Եվ դո՛ւ, մարդո՛ւ որդի, մարգարեացի՛ր Իսրայելի լեռներին վրա և ասա՛. “Լսե՛ք Տիրոջ պատգամները։ ² Տերը՝ Աստված, այսպես է ասում. “Այն բանի համար, որ թշնամին ձեր մասին ասել է՝ վա՜շ-վա՜շ, հավերժական ավերակները մեզ ժառանգություն եղան,- ³ դրա համար մարգարեացի՛ր ու ասա՛. Տերը՝ Աստված, այսպես է ասում. “Այն բանի համար, որ ձեր շուրջը գտնվող բոլոր ազգերի անարգանքին ենթարկվեցիք, տարագրվեցիք բազում ազգերի կողմից, ծաղրի առարկա ու ազգերի նախատինք եղաք, ⁴ դրա համար, ո՛վ լեռներ Իսրայելի, լսե՛ք Ամենակալ Տիրոջ պատգամները”։ Ամենակալ Տերը՝ Աստված, այսպես է ասում լեռներին ու բլուրներին, անդունդներին ու ձորերին, ամայացած ավերակներին ու լքված քաղաքներին, որոնք ավեր են դարձել ու ոտնակոխ եղել ազգերի կողմից, որոնք մնացել են ձեր շուրջը,- ⁵ դրա համար Տերը՝ Աստված, այսպես է ասում. “Չեմ կարող իմ զայրույթի հրով չխոսել մյուս ազգերի մասին, նաև բոլոր եդովմացիների մասին, որովհետև իմ երկիրն իրենց համար վտարանդի դարձրին, ոտնահարելով անարգեցին բնակիչներին՝ ավերի ու ավարի մատնելով”։ ⁶ Ուստի մարգարեացի՛ր Իսրայելի երկրի վրա ու ասա՛ լեռներին ու բլուրներին, ձորերին ու դաշտերին. Տերը՝ Աստված, այսպես է ասում. “Ահա ես իմ նախանձով ու բարկությամբ խոսեցի այն բանի համար, որ դուք հեթանոսներից նախատինք եք կրել”։ ⁷ Ուստի Ամենակալ Տերն այսպես է ասում. “Ձեռքս բարձրացնելու եմ ձեր շուրջը գտնվող ազգերի վրա. նրանք կստանան իրենց անարգանքը”։ ⁸ Բայց, ո՛վ լեռներ Իսրայելի, ձեր խաղողն ու բերքն Իսրայելի իմ ժողովուրդն է ուտելու, որ վերադառնալու ակնկալիք ունի։ ⁹ Ահա ես նայելու եմ ձեզ. դուք հերկվելու և սերմանվելու եք։ ¹⁰ Բազմացնելու եմ ձեր մեջ մարդկանց, առհասարակ Իսրայելի տունն ամբողջովին։ Վերաբնակեցվելու են քաղաքները, վերաշինվելու՝ ավերակները։ ¹¹ Բազմացնելու եմ ձեր մեջ մարդ ու անասուն. բազմանալու և աճելու են նրանք։ Ձեզ էլ բնակեցնելու եմ, ինչպես սկզբնական ժամանակներում. բարիք եմ անելու ձեզ, ինչպես նախկինում, ու կիմանաք, որ ես եմ Տերը։ ¹² Այնպես եմ անելու, որ մարդիկ՝ Իսրայելի իմ ժողովուրդը, տիրեն ձեզ։ Նրանք ժառանգելու են ձեզ. բնակավայր եք լինելու նրանց համար և այլևս անզավակ չեք մնալու նրանցից։ ¹³ Տերը՝ Աստված, այսպես է ասում. այն բանի համար, որ քեզ ասացի, թե՝ դու մարդակուլ երկիր ես ու քո ազգից անզավակ ես մնացել,- ¹⁴ դրա համար այլևս մարդակուլ չես լինելու և քո ազգն այլևս անզավակ չես դարձնելու,- ասում է Տերը՝ Աստված։- ¹⁵ Եվ ձեզ վրա ազգերի անարգանքն այլևս չի լինելու, ժողովուրդներից այլևս նախատինք չեք կրելու, և ձեր ազգն այլևս անզավակ չի մնալու”»,- ասում է Տերը՝ Աստված։

Տերը բարեկարգում է Իսրայելը

¹⁶ Տիրոջ խոսքն ինձ ուղղվեց ու ասաց. ¹⁷ «Մարդո՛ւ որդի, Իսրայելի տունը բնակվեց իր երկրում, սակայն այն պղծեց իր ընթացքով, իր կուռքերով ու իր պիղծ արարքներով՝ դաշտանի պղծության նման. նրա ընթացքն իմ առաջ է եղել։ ¹⁸ Բարկությունս թափեցի նրանց վրա այն արյան համար, որ թափել էին այդ երկրում, և որ իրենց կուռքերով պղծել էին այն։ ¹⁹ Նրանց ցրեցի ազգերի մեջ, սփռեցի նրանց երկրներով մեկ։ Դատեցի նրանց ըստ իրենց ընթացքի և ըստ իրենց մեղքերի։ ²⁰ Նրանք մտան ազգերի մեջ, և ուր որ մտան, այնտեղ էլ պղծեցին իմ սուրբ անունը, երբ նրանց ասացին. “Սրանք Տիրոջ ժողովուրդն են, բայց դուրս ելան նրա երկրից”։ ²¹ Բայց նրանց խնայեցի հանուն իմ սուրբ անվան, որ պղծեց Իսրայելի տունն այն ազգերի մեջ, ուր մտան։ ²² Ուստի ասա՛ Իսրայելի տանը. Տերը՝ Աստված, այսպես է ասում. “Ո՛վ տունդ Իսրայելի, ձեզ համար չէ, որ բան անում եմ, այլ հանուն իմ սուրբ անվան, որ պղծեցիք այն ազգերի մեջ, ուր մտաք։ ²³ Եվ ես մաքրելու եմ իմ մեծ անունը, որ պղծվեց այդ ազգերի մեջ, որը դուք պղծեցիք նրանց մեջ։ Եվ այդ ազգերը կիմանան, որ ես եմ Տերը,- ասում է Ամենակալ Տերը,- երբ սրբագործվեմ ձեր մեջ, դրանց աչքի առաջ։ ²⁴ Ես վերցնելու եմ ձեզ հեթանոսներից, հավաքելու եմ ձեզ բոլոր ազգերից և ձեզ ձեր երկիրն եմ տանելու։ ²⁵ Ձեզ վրա սուրբ ջուր եմ ցողելու, և դուք մաքրվելու եք ձեր բոլոր պղծություններից. ձեր բոլոր կուռքերից մաքրելու եմ ձեզ։ ²⁶ Նոր սիրտ եմ տալու ձեզ, նոր հոգի եմ դնելու ձեր մեջ. ձեր մարմիններից հանելու եմ քարեղեն սիրտը և մարմնեղեն սիրտ եմ տալու ձեզ. ²⁷ իմ հոգին եմ տալու ձեզ։ Եվ այնպես եմ անելու, որ իմ արդարությամբ ընթանաք, օրենքներս պահեք ու կատարեք դրանք, ²⁸ բնակվեք այն երկրում, որ տվել էի ձեր հայրերին, և ինձ համար ժողովուրդ լինեք, ես էլ ձեզ համար՝ Աստված։ ²⁹ Ձեզ ազատելու եմ ձեր բոլոր պղծություններից։ Դիմելու եմ ցորենին ու բազմացնելու եմ այն և ձեզ վրա սով չեմ բերելու։ ³⁰ Բազմացնելու եմ ծառերի պտուղներն ու արտերի բերքը, որպեսզի ազգերի մեջ այլևս սովի նախատինքը չստանաք։ ³¹ Հիշելու եք ձեր չար ճանապարհներն ու ձեր ոչ բարի ընթացքը, և դուք զզվելու եք ձեր բոլոր անօրենություններից ու գարշելի արարքներից։ ³² Ձեզ համար չէ, որ անում եմ այս բաները,- ասում է Տերը՝ Աստված,- այլ թող հայտնի լինի ձեզ. ամաչե՛ք ու ամոթահար եղե՛ք ձեր ընթացքի պատճառով, ո՛վ տուն Իսրայելի։ ³³ Տերը՝ Աստված, այսպես է ասում. “Այն օրը, երբ ձեզ մաքրեմ ձեր բոլոր անօրենություններից, ավերակները վերաշինվելու են, քաղաքներն էլ վերաբնակեցնելու եմ, ³⁴ և մշակվելու է ամայացած հողը, փոխանակ բոլոր անցորդների առաջ ամայացած լինելու։ ³⁵ Եվ ասելու են. “Ավերված երկիրը փարթամ պարտեզ է դարձել, իսկ ավերակ, կործանված ու քանդված քաղաքները՝ ամրացած ու բնակեցված”։ ³⁶ Եվ այն ազգերը, որ մեկընդմիշտ կմնան ձեր շուրջը, կիմանան, որ ես եմ Տերը, որ վերաշինեցի այն, ինչ ավերված էր, և վերահաստատեցի այն, ինչ ամայացած էր։ Ես՝ Տերս, խոսեցի, և անելու եմ։ ³⁷ Տերը՝ Աստված, այսպես է ասում. “Ես դարձյալ այցի եմ գալու Իսրայելի տանը՝ իրագործելու դրանք. բազմացնելու եմ մարդկանց՝ հոտերի պես։ ³⁸ Եվ ինչպես սուրբ ոչխարները, ինչպես Երուսաղեմի ոչխարները՝ նրա տոների ժամանակ, այնպես են լինելու ավերված քաղաքները՝ մարդկանց խմբերով լի։ Եվ կիմանան, որ ես եմ Տերը”»։

37

Չորացած ոսկորների տեսիլքը

Հարության մասին

¹ Տիրոջ ձեռքը հանգչեց ինձ վրա. դուրս բերեց ինձ Տիրոջ Հոգով և դրեց ինձ մի դաշտի մեջ, որ լի էր մարդկանց ոսկորներով։ ² Ինձ ոսկորների շուրջը ման տվեց։ Դրանք շա՜տ-շատ էին դաշտի երեսին ու սաստիկ չորացած էին։ ³ Եվ ինձ ասաց. «Մարդո՛ւ որդի, արդյոք կկենդանանա՞ն այդ ոսկորները»։ Ես ասացի. «Տե՛ր, Աստվա՛ծ, այդ դու գիտես»։ ⁴ Եվ ինձ ասաց. «Մարդո՛ւ որդի, մարգարեացի՛ր այդ ոսկորների վրա և նրանց ասա՛. “Չորացա՛ծ ոսկորներ, լսե՛ք Տիրոջ պատգամները։ ⁵ Տերը՝ Աստված, այդ ոսկորներին այսպես է ասում. “Ահա ես ձեզ վրա կենդանի շունչ եմ բերելու, ⁶ ձեզ ջղեր եմ տալու, ձեզ վրա միս եմ բերելու և ձեզ մաշկով եմ պատելու, ձեզ իմ հոգին եմ տալու, և դուք կենդանանալու եք։ Ու կիմանաք, որ ես եմ Տերը”»։ ⁷ Ես մարգարեացա, ինչպես որ հրամայել էր ինձ Տերը։ Եվ երբ մարգարեացա, մի ձայն լսեցի, հետո շարժում եղավ. ոսկորը ոսկորին մոտեցավ, յուրաքանչյուրն իր կցման տեղը։ ⁸ Տեսա, որ ջղերն ու մսերը պատում էին նրանց, և մաշկն էլ նրանց վրա էր ձգվում, բայց նրանց մեջ դեռևս շունչ չկար։ ⁹ Եվ ինձ ասաց. «Մարգարեացի՛ր, մարդո՛ւ որդի, մարգարեացի՛ր շնչի վրա և շնչին ասա՛. “Տերը՝ Աստված, այսպես է ասում. “Ե՛կ, ո՛վ շունչ, չորս կողմերից, ու փչի՛ր այս մեռելների վրա, և նրանք կկենդանանան”»։ ¹⁰ Ես մարգարեացա, ինչպես որ Տերը հրամայել էր ինձ։ Եվ շունչը նրանց մեջ մտավ, ու կենդանացան։ Ելան կանգնեցին իրենց ոտքերի վրա. չափազանց շատ ժողովուրդ էր։ ¹¹ Տերը խոսեց ինձ հետ ու ասաց. «Մարդո՛ւ որդի, այդ ոսկորներն Իսրայելի ամբողջ տունն են։ Նրանք ասում են. “Չորացան մեր ոսկորները, մեր հույսը կտրվեց, ու մենք մեռանք”։ ¹² Ուստի մարգարեացի՛ր ու նրանց ասա՛. “Տերը՝ Աստված, այսպես է ասում. “Ահա ես բացելու եմ ձեր գերեզմանները և ձեզ հանելու եմ ձեր գերեզմաններից, ո՛վ իմ ժողովուրդ։ Ձեզ տանելու եմ Իսրայելի երկիրը։ ¹³ Եվ կիմանաք, որ ես եմ Տերը, երբ բացեմ ձեր գերեզմաններն ու ձեզ հանեմ ձեր գերեզմաններից, ո՛վ իմ ժողովուրդ։ ¹⁴ Իմ հոգին տալու եմ ձեզ, և դուք կենդանանալու եք։ Ձեզ դնելու եմ ձեր երկրում, ու կիմանաք, որ ես եմ Տերը։ Խոսեցի ու կատարելու եմ”»,- ասում է Տերը՝ Աստված։

Իսրայելի միությունը

¹⁵ Տիրոջ խոսքն ինձ ուղղվեց ու ասաց. ¹⁶ «Եվ դու, մարդո՛ւ որդի, քեզ համար մի գավազա՛ն վերցրու և վրան գրի՛ր՝ “Հուդան ու Իսրայելի որդիները՝ նրա մերձավորները”։ Մի երկրորդ գավազան էլ կվերցնես ու վրան կգրես՝ “Հովսեփին՝ Եփրեմի գավազանը, և Իսրայելի բոլոր որդիները, որ միավորված են նրան”։ ¹⁷ Եվ կկցես դրանք, իրար հետ կապելով, այնպես որ լինեն մեկ գավազան, որը քո ձեռքին կլինի։ ¹⁸ Եվ եթե այնպես լինի, որ քո ժողովրդի որդիները քեզ ասեն. “Չե՞ս ասի մեզ, թե այդ ի՛նչ է քո ձեռքին”,- ¹⁹ նրանց կասես, թե Տերը՝ Աստված, այսպես է ասում. “Ահա ես վերցնելու եմ Հովսեփի ցեղին, որ Եփրեմի ձեռքին է, նաև Իսրայելի ցեղին՝ նրա մերձավորներին, և նրանց տալու եմ Հուդայի ցեղին։ Եվ նրանք լինելու են մեկ գավազան, ու լինելու են մեկ Հուդայի ձեռքին”։ ²⁰ Իսկ այն գավազանները, որոնց վրա դու գրեցիր, լինելու են քո ձեռքին, նրանց աչքի առաջ։ ²¹ Կասես նրանց. Տերը՝ Աստված, այսպես է ասում. “Ահա ես վերցնում եմ Իսրայելի տունը ազգերի միջից, որոնց մեջ մտել էին, հավաքելու եմ նրանց իրենց շուրջը գտնվող բոլոր ազգերից ու տանելու եմ Իսրայելի երկիրը։ ²² Նրանց դարձնելու եմ մեկ ազգ իմ երկրում՝ Իսրայելի լեռների վրա. որպես թագավոր՝ մեկ իշխան է լինելու նրանց վրա։ Այլևս երկու ազգ չեն լինելու, ոչ էլ երկու թագավորությունների բաժանված, ²³ որպեսզի այլևս չպղծվեն իրենց կուռքերով, իրենց գարշելի արարքներով, իրենց ամեն տեսակ ամբարշտություններով։ Նրանց փրկելու եմ իրենց բոլոր անօրենություններից, որոնցով մեղանչեցին, և մաքրելու եմ նրանց, և նրանք ինձ համար ժողովուրդ են լինելու, ես էլ իրենց համար՝ Աստված, ²⁴ իմ ծառա Դավիթն էլ՝ իշխան նրանց մեջ. լինելու է մեկ հովիվ նրանց բոլորի համար, որպեսզի նրանք իմ պատվիրաններով ընթանան, օրենքներս պահեն ու դրանք գործադրեն։ ²⁵ Բնակվելու են իրենց երկրում, որ ես եմ տվել իմ ծառա Հակոբին, և որտեղ բնակվել են իրենց հայրերը։ Նրանք էլ են բնակվելու այնտեղ, նրանց որդիներն ու որդոց որդիներն էլ՝ մինչև հավիտյան։ Իմ ծառա Դավիթն էլ իշխան է լինելու նրանց համար հավիտյան։ ²⁶ Խաղաղության ուխտ եմ կնքելու նրանց հետ, և նրանց հետ այդ ուխտը հավիտենական է լինելու։ Հաստատուն եմ դարձնելու նրանց ու բազմացնելու, սրբարանս էլ դնելու եմ նրանց մեջ՝ հավիտենապես։ ²⁷ Եվ բնակությանս վայրը նրանց մեջ է լինելու. ես նրանց համար Աստված եմ լինելու, իսկ նրանք ինձ համար՝ ժողովուրդ։ ²⁸ Եվ ազգերը կիմանան, որ ես եմ Տերը, որ նրանց մաքրեցի, որպեսզի սրբարանս հավիտենապես նրանց մեջ լինի”»։

38

Մարգարեություն Գովգի դեմ

Գովգի ու Մագովգի մասին

¹ Տիրոջ խոսքն ինձ ուղղվեց ու ասաց. ² «Մարդո՛ւ որդի, դեմքդ ուղղի՛ր Գովգի ու Մագովգի երկրի դեմ, Ռոսմեսոքի ու Թոբելի իշխանի դեմ և մարգարեացի՛ր նրա վերաբերյալ, ասա՛ նրան. ³ “Տերը՝ Աստված, այսպես է ասում. ահա ես քո դեմ եմ, ո՛վ իշխան Ռոսմեսոքի ու Թոբելի, ⁴ ես պաշարելու եմ քեզ, սանձ եմ գցելու քո ծնոտներին, հավաքելու եմ քեզ ու քո բոլոր զորքերը, հեծյալներին ու երիվարները, բազում ազգերի զինավառվածներին ու սպառազինվածներին, վահանավորներին, սաղավարտավորներին ու սուսերավորներին, բոլորին միասին՝ ⁵ պարսիկներին ու եթովպացիներին, լիբիացիներին ու լիդացիներին, բոլորին, որ սաղավարտակիր են ու վահանավոր, ⁶ Գոմերին ու բոլոր նրանց, որ նրա շուրջն են, Թորգոմա տունը՝ հյուսիսի ծագերից, ու բոլոր նրանց, որ նրա շուրջն են, բազմաթիվ ազգերի էլ՝ քեզ հետ։ ⁷ Պատրաստվի՛ր ու պատրաստի՛ր քո անձը, դու և քեզ մոտ հավաքված ամբողջ բազմությունը։ Դու ինձ համար առաջապահ ես լինելու։ ⁸ Թող պատրաստվի, որ բազում օրեր հետո, երբ գա ժամանակների վախճանը, հասնի սրից ապահով երկիրը՝ շատ ազգերից հավաքվելով Իսրայելի երկրում, որ ամբողջովին ավերակ է դարձել։ Նույն ազգերից հավաքվելով՝ բոլորն էլ խաղաղությամբ են ապրելու։ ⁹ Ելնելու ես անձրևի պես, հասնելու ես ամպի պես ու ծածկելու ես երկիրը։ Պիտի լինես դու և բազում ազգերը, որ քո շուրջն են, քեզ հետ”։ ¹⁰ Տերը՝ Աստված, այսպես է ասում. “Այն օրը սրտիդ մեջ խորհուրդներ են առաջանալու, չար մտածումներ ես ունենալու ¹¹ և ասելու ես. “Վեր կենամ բարգավաճ երկրի դեմ, հասնեմ նրանց վրա, ովքեր հանդարտության ու անհոգության մեջ են, ապրում են խաղաղաղության մեջ, բոլոր նրանց վրա, ովքեր բնակվում են այն երկրում, որ ո՛չ պարիսպներ ունի, ո՛չ նիգեր, ո՛չ էլ դռներ, ¹² որպեսզի ավար առնեմ, կողոպտեմ նրանց ունեցվածքը, ձեռքս բարձրացնեմ այն երկրի վրա, որ ավերվել ու վերաբնակեցվել է, այն ազգի վրա, որ ժողովվել է բազում ազգերից, ունեցվածք ու դաստակերտ է ձեռք բերել ու բնակվում է երկրի սրտում”։ ¹³ Սաբան, Դեդան, կարկեդոնացիների վաճառականներն ու նրա բոլոր ավանները քեզ ասելու են. “Արշավում-գալիս ես ավար առնելու համար, հավաքել ես բազմությունդ՝ արծաթն ու ոսկին վերցնելու, ունեցվածքները գերեվարելու, մեծ կողոպուտ կատարելու համար”։ ¹⁴ Ուստի մարգարեացի՛ր, մարդո՛ւ որդի, և Գովգին ասա՛. “Տերը՝ Աստված, այսպես է ասում. “Չէ՞ որ այն օրը, երբ իմ ժողովուրդը՝ Իսրայելը, խաղաղությամբ ապրելիս լինի, դու զարթնելու ¹⁵ ու գալու ես քո տեղից՝ հյուսիսի ծագերից, դու և քեզ հետ բազում ազգեր՝ երիվարներ հեծած, բոլորն էլ բազում զորագնդեր կազմած։ ¹⁶ Դու վեր ես կենալու իմ ժողովրդի՝ Իսրայելի դեմ՝ իբրև ամպ, որ ծածկում է երկիրը։ Դա լինելու է վերջին ժամանակներում. ես քեզ բերելու եմ իմ երկիրը, որպեսզի բոլոր ազգերն ինձ ճանաչեն, երբ սրբանամ քո մեջ, նրանց առաջ, ո՛վ Գովգ”»։

Աստծու պատիժը Գովգին

¹⁷ «Տերը՝ Աստված, Գովգին այսպես է ասում. “Դու նա ես, ում մասին խոսել եմ հին օրերում, իմ ծառաների՝ Իսրայելի իմ մարգարեների միջոցով, այն օրերին ու տարիներին, որ քեզ նրանց դեմ էի բերելու։ ¹⁸ Եվ այն օրը, երբ Գովգը գա Իսրայելի երկրի դեմ,- ասում է Տերը՝ Աստված,- դուրս է հորդելու զայրույթս, ¹⁹ նաև նախանձս՝ իմ բարկության հրով։ Խոսեցի, թե այն օրն Իսրայելի երկրի վրա մի՞թե մեծ երկրաշարժ չի լինելու. ²⁰ ծովի ձկները, երկնքի թռչունները, դաշտերի գազանները, երկրի բոլոր սողունները, նաև երկրի երեսին գտնվող բոլոր մարդիկ դողալու են իմ ներկայությունից։ Ճեղքվելու են լեռները, տապալվելու են ձորերը, կործանվելու են երկրի բոլոր պարիսպները։ ²¹ Սրի ահն եմ նրա վրա բերելու,- ասում է Տերը՝ Աստված.- յուրաքանչյուրի սուրն իր եղբոր դեմ է լինելու։ ²² Նրան դատաստան եմ տեսնելու արյունով ու ժանտախտով, անձրևների հեղեղներով ու քարե կարկուտով. հուր ու ծծումբ եմ տեղալու նրա ու բոլոր նրանց վրա, որ նրա հետ կլինեն, բազմաթիվ ազգերի վրա, որ կլինեն նրա հետ։ ²³ Այսպես եմ ես ցույց տալու իմ մեծությունը, սրբանալու եմ, փառավորվելու ու ճանաչվելու ազգերի առաջ։ Եվ կիմանան, որ ես եմ Տերը”»։

39

Գովգի պարտությունը

¹ «Եվ դու, մարդո՛ւ որդի, մարգարեացի՛ր Գովգի վերաբերյալ ու ասա՛. “Տերը՝ Աստված, այսպես է ասում. ահա ես քո դեմ եմ, Գո՛վգ, իշխա՛ն Ռոսմեսոքի ու Թոբելի։ ² Հավաքելու եմ քեզ և առաջնորդելու եմ քեզ, հանելու եմ քեզ հյուսիսի ծագերից և բերելու եմ քեզ Իսրայելի լեռների վրա։ ³ Աղեղդ դեն եմ գցելու քո ձախ ձեռքից, նետերդ՝ քո աջ ձեռքից։ Կործանելու եմ քեզ ⁴ Իսրայելի լեռների վրա, և դու ընկնելու ես բոլոր նրանց հետ, որ քո շուրջն են լինելու։ Այն ազգերը, որ քեզ հետ են լինելու, կեր են դառնալու թևավորների ու բոլոր թռչունների համար։ Քեզ էլ կեր եմ դարձնելու անապատի բոլոր գազանների համար. ⁵ ընկնելու ես դաշտի երեսով մեկ, որովհետև ես խոսեցի,- ասում է Տերը՝ Աստված։- ⁶ Հուր եմ ուղարկելու Մագովգի վրա, և կղզիներն ապրելու են խաղաղության մեջ։ Ու կիմանան, որ ես եմ Տերը՝ Աստված։ ⁷ Անունս էլ սուրբ է ճանաչվելու իմ ժողովրդի՝ Իսրայելի մեջ ու այլևս չի պղծվելու։ Եվ երկրի բոլոր ազգերը կիմանան, որ ես եմ Տերը՝ Իսրայելի սուրբը։ ⁸ Ահա հասել է օրը, և կիմանաս, որ դա լինելու է,- ասում է Տերը՝ Աստված.- այս է այն օրը, որի մասին խոսեցի։ ⁹ Պիտի ելնեն Իսրայելի քաղաքների բնակիչները, պիտի այրեն իրենց զենքերը՝ նիզակների ու ասպարների կոթերը, նետերը, աղեղների բեկորները, տեգերի բները, սվինների կոթերը. յոթ տարի այրելու են իրենց, այրելու են ենթակա իրերը. ¹⁰ փայտ չեն վերցնելու դաշտերից, փայտ չեն կտրելու անտառներից, այլ զենքերն են այրելու կրակի մեջ։ Ավարի են ենթարկելու նրանց, ովքեր իրենց էին ավարի ենթարկում, կողոպտելու են նրանց, ովքեր իրենց էին կողոպտում”,- ասում է Տերը՝ Աստված։

Գովգի թաղումը

¹¹ «Այն օրը Գովգին Իսրայելի երկրում գերեզմանի համար տեղ եմ տալու, Մեռյալ ծովից արևելք, որ փակելու է ուղևորների ճանապարհը։ Այնտեղ թաղելու են Գովգին ու նրա ողջ զորքը, և այդ գերեզմանը կոչվելու է Գեհ։ ¹² Իսրայելի տունն է թաղելու նրանց, որպեսզի մաքրվի երկիրը։ Յոթ ամիս շարունակ ¹³ երկրի բոլոր ժողովուրդները թաղելու են նրանց։ Եվ նրանց համար նշանավոր է լինելու այն օրը, երբ ես փառավորվելու եմ,- ասում է Տերը՝ Աստված։- ¹⁴ Եվ այդ պատճառով մարդիկ են հավաքելու, որպեսզի գնան շրջեն երկրով մեկ, թաղեն նրանց, ովքեր մնացել են երկրի երեսին և յոթ ամիս շարունակ այն մաքրեն։ ¹⁵ Ամեն ոք, ով անցնի երկրով և երբ մարդու ոսկոր տեսնի, նրա մոտ պետք է որևէ նշան անի, մինչև որ թաղողներն այն թաղեն Գեհի՝ Գովգի գերեզմանի մեջ։ ¹⁶ Քաղաքի անունն էլ Գերեզման է կոչվելու, և երկիրը մաքրվելու է։ ¹⁷ Եվ դո՛ւ, մարդո՛ւ որդի,- այսպես է ասում Տերը՝ Աստված,- բոլոր թևավորներին՝ թռչուններին, և դաշտի բոլոր գազաններին ասա՛. “Հավաքվե՛ք ու եկե՛ք, հավաքվե՛ք երկրի բոլոր կողմերից իմ զոհաբերությանը, որ ես կատարեցի ձեզ համար, մեծ զոհաբերությանն Իսրայելի լեռների վրա։ Մի՛ս կերեք ու արյո՛ւն խմեք։ ¹⁸ Կերե՛ք հսկաների միսը, խմե՛ք երկրի իշխանների արյունը, խոյերը, զվարակներն ու նոխազները, որովհետև բոլոր զվարակներն էլ պարարտ են։ ¹⁹ Հագենալու աստիճան ճա՛րպ կերեք և հարբելու աստիճան արյո՛ւն խմեք իմ զոհաբերությունից, որ կատարել եմ ձեզ համար։ ²⁰ Եվ կհագենաք իմ սեղանից՝ ուտելով հեծյալներին, երիվարներին, հսկաներին ու պատերազմող բոլոր մարդկանց,- ասում է Տերը՝ Աստված։- ²¹ Եվ իմ փառքը տալու եմ ձեզ, ու բոլոր ազգերը տեսնելու են իմ դատաստանը, որ արել եմ, և իմ ձեռքը, որ բերելու եմ նրանց վրա։ ²² Եվ Իսրայելի տունը կիմանա, որ ես եմ իրենց Տերը՝ Աստված՝ սկսած այն օրից և հետագայում”։

Հակոբի տոհմի վերադարձը գերությունից

²³ “Բոլոր ազգերը կիմանան, որ Իսրայելի տունն իր մեղքերի պատճառով գերեվարվեց։ Քանի որ ինձ անարգեցին, ես էլ նրանցից երես դարձրի և նրանց իրենց թշնամիների ձեռքը մատնեցի, ու բոլորն էլ սրից ընկան։ ²⁴ Դա արեցի նրանց պղծությունների ու անօրենությունների համար և նրանցից երես դարձրի։ ²⁵ Դրա համար էլ Տերը՝ Աստված, այսպես է ասում. “Այժմ Հակոբին գերությունից հետ եմ դարձնելու, ողորմելու եմ Իսրայելի տանը, նախանձախնդիր եմ լինելու իմ սուրբ անվան համար։ ²⁶ Եվ ստացած կլինեն իրենց անարգանքն ու կատարած անիրավությունների պատիժը, երբ նրանց բնակեցնեմ իրենց երկրում խաղաղությամբ, և ոչ ոք նրանց չի ահաբեկի, ²⁷ երբ ես նրանց վերադարձնեմ ազգերից ու հավաքեմ հեթանոսների երկրներից։ Եվ սուրբ եմ լինելու նրանց մեջ, ազգերի առաջ։ ²⁸ Եվ կիմանան, որ ես եմ նրանց Տերը՝ Աստված, երբ ես նրանց հայտնվեմ ազգերի մեջ։ Նրանց հավաքելու եմ իրենց երկրում և այլևս նրանցից ոչ մեկին որևէ տեղ չեմ թողնելու։ ²⁹ Եվ այլևս երես չեմ դարձնելու նրանցից, քանի որ Իսրայելի տան վրա թափեցի զայրույթս”»,- ասում է Տերը՝ Աստված։

40

Ապագա տաճարի տեսիլքը

Տաճարի շինվածքի մասին

¹ Մեր գերության քսանհինգերորդ տարում՝ առաջին ամսին, ամսվա տասնմեկերորդ օրը, քաղաքի գրավման տասնչորսերորդ տարում, նույն այդ օրը Տիրոջ ձեռքը հանգչեց ինձ վրա։ ² Աստվածային տեսիլքի մեջ նա ինձ բերեց Իսրայելի երկիրն ու դրեց մի չափազանց բարձր լեռան վրա, իսկ դրա վրա՝ դեմ հանդիման, կար քաղաքի պես մի շինվածք։ ³ Ինձ ներս տարավ։ Ահա մի մարդ կար այնտեղ, որի տեսքը փայլուն պղնձի նման էր։ Ձեռքին շինարարի լար ու չափաձող ուներ։ Ինքն էլ կանգնած էր դարպասի մոտ։ ⁴ Մարդն ասաց ինձ. «Տեսար, մարդո՛ւ որդի։ Արդ, աչքերովդ նայի՛ր, ականջներովդ լսի՛ր և մտքումդ հաստա՛տ պահիր այն ամենը, ինչ քեզ ցույց եմ տալու, որովհետև քեզ ցույց տալու համար եմ այստեղ եկել։ Եվ ինչ որ ինքդ տեսնես, ցույց ես տալու Իսրայելի տանը»։

Արևելյան դուռը

⁵ Ահա տաճարի շուրջը պարիսպներ կային։ Մարդու ձեռքին կար մի չափաձող՝ վեց կանգուն ու մեկ թիզ երկարությամբ։ Պարսպի լայնությունը նա չափեց մեկ ձողի հավասար, բարձրությունն էլ՝ մեկ ձողի հավասար։ ⁶ Մտավ այն դռնից, որ արևելք էր նայում և ուներ յոթ աստիճաններ։ Չափեց դռան վեցական կամարների խցերը. ⁷ մեկ խցի երկարությունը մեկ ձողի հավասար էր, լայնությունը՝ մեկ ձողի հավասար. խցերի միջի կամարները վեց կանգուն էին։ Երկրորդ խուցը լայնքով հավասար էր մեկ ձողի, երկայնքով էլ՝ մեկ ձողի հավասար. կամարը հինգ կանգուն էր։ ⁸ Երրորդ խուցն էլ լայնքով հավասար էր մեկ ձողի, երկայնքով էլ՝ մեկ ձողի հավասար. ⁹ դարպասի կամարը՝ գագաթի մոտ, ութ կանգուն էր։ Կամարները երկու կանգուն էին, և դրանք ներքին դռան կամարներն էին։ ¹⁰ Դռան խցերն իրար դիմաց էին, երեքն այս կողմից, երեքը՝ մյուս։ Երեքն էլ մի չափի էին, կամարներն էլ՝ մի չափի՝ այս և մյուս կողմերից։ ¹¹ Դռան մուտքի լայնությունը չափեց տասը կանգուն, երկարությունը՝ տասներեք կանգուն։ ¹² Դեմ դիմաց գտնվող խցերի թռիչքը մի կանգուն էր. մի կանգուն՝ այս կողմից, մի կանգուն՝ մյուս կողմից։ Երկու կողմերի խցերը վեցական կանգուն էին։ ¹³ Դուռը չափեց խցի մի պատից մյուսը. լայնքով քսանհինգ կանգուն էր. դուռը դռան վրա էր։ ¹⁴ Դռան կամարի թռիչքը, դռան շուրջը գտնվող խցերի հետ, վաթսուն կանգուն էր։ ¹⁵ Արտաքին գավթից մինչև ներքին դուռը կամարի թռիչքը հիսուն կանգուն էր։ ¹⁶ Գաղտնի լուսամուտներ կային ինչպես խցերի վրա, այնպես էլ գավթի ներքին դռան կամարներին՝ չորս կողմը։ Նաև լուսամուտներ մյուս կամարներին՝ ներսից ու դրսից։ Կամարների վերևում՝ այս ու այն կողմերից, արմավենիներ կային։

Գավիթը

¹⁷ Նա ինձ արտաքին գավիթը տարավ։ Ահա տեսա սենյակներ և սյուներ՝ գավթի չորս կողմը, որոնք շինված էին սենյակների շուրջը։ Շրջանակաձև սյուների միջև երեսուն սենյակներ կային։ ¹⁸ Սյուներն իրար դիմաց էին, դռների երկայնքով, նաև շրջանակաձև սյուներ կային ներսում։ ¹⁹ Նա չափեց գավթի լայնքը արտաքին դռնից մինչև ներքին դուռը, որ արևելք էր նայում. հարյուր կանգուն էր։

Հյուսիսային դուռը

Նա ինձ հյուսիսային կողմը տարավ։ ²⁰ Ահա մի դուռ տեսա, որ նայում էր արտաքին գավթի հյուսիսային կողմը։ Չափեց նրա երկարությունն ու լայնությունը, ²¹ նրա այս ու այն կողմը գտնվող խցերը, կամարը, կամարակապերն ու արմավենիները. այն արևելք նայող դռան չափն ուներ. հիսուն կանգուն երկարությունն էր, քսանհինգ կանգուն՝ լայնությունը։ ²² Նրա լուսամուտները, կամարներն ու արմավենիները արևելք նայող դռան համեմատ էին։ Յոթ աստիճաններ էին ելնում դեպի նա. ներսից կամարակապ էր։ ²³ Ներքին գավթի դուռը նայում էր հյուսիսային դռանը, արևելք նայող դռան նման։ Նա գավիթը չափեց դռնից դուռ. հարյուր կանգուն էր։

Հարավային դուռը

²⁴ Նա ինձ հարավային կողմը տարավ։ Ահա մի դուռ տեսա, որ հարավ էր նայում։ Չափեց այն, նաև խցերը, կամարակապերը, կամարները, որոնք նույն չափն ունեին, ինչպես մյուսները։ ²⁵ Նրա լուսամուտներն ու շրջանակաձև կամարներն էլ առաջինի լուսամուտների ու կամարների նման էին. երկարությունը հիսուն կանգուն էր, լայնությունը՝ քսանհինգ կանգուն։ ²⁶ Դուռը յոթ աստիճաններ ուներ, ներսում՝ կամարներ և արմավենիներ այս ու այն կողմերից՝ կամարակապերի վրա։

Ներսի գավիթը. հարավային դուռը

²⁷ Ներքին դուռը գավթի դռան դիմաց էր և դեպի հարավ էր նայում։ Գավիթը նա դռնից դուռ չափեց. հարավային կողմից լայնությունը հարյուր կանգուն էր։ ²⁸ Ինձ տարավ ներքին դռան գավիթը, որ հարավային կողմն էր նայում. չափեց հարավ նայող դուռը, որ նույն չափն ուներ. ²⁹ նույն չափին էին նաև խցերը, կամարներն ու կամարակապերը։ Նրա շրջանակաձև լուսամուտների ու կամարների երկարությունը հիսուն կանգուն էր, լայնությունը՝ քսանհինգ։ ³⁰ Նրա շուրջը կամարներ էին՝ հիսուն կանգուն երկարությամբ ու քսանհինգ կանգուն լայնությամբ։ ³¹ Կամարներ կային և արտաքին գավթում, կամարների վրա՝ արմավենիներ և սանդուղք՝ յոթ աստիճաններով։

Ներսի գավիթը. արևելյան դուռը

³² Ինձ տարավ դեպի այն դուռը, որ արևելյան կողմն էր նայում։ Այն ուներ նախորդի չափը։ Չափեց նաև ³³ խցերը, կամարները, կամարակապերը, որոնք ունեին նախորդի չափը, լուսամուտները՝ նրա վրա և շուրջանակի կամարներ. երկարությունը հիսուն կանգուն էր, լայնությունը՝ քսանհինգ։ ³⁴ Կամարներ կային ներսի գավթում, արմավենիներ՝ կամարների վրա, այս ու այն կողմերից, նաև յոթ աստիճաններ։

Ներսի գավիթը. հյուսիսային դուռը

³⁵ Ինձ տարավ դեպի հյուսիսային դուռը։ Նույն չափով չափեց ³⁶ խցերը, կամարներն ու կամարակապերը, չորս կողմի լուսամուտներն ու կամարները. երկարությունը հիսուն կանգուն էր, լայնությունը՝ քսանհինգ։ ³⁷ Կամարներ կային արտաքին դռան վրա, արմավենիներ՝ կամարների վրա, այս ու այն կողմից, նաև ութ աստիճաններ։

Շինություններ հյուսիսային դռան մոտ

³⁸ Նրա թե՛ սենյակները, թե՛ նրանց մուտքերն ու կամարները երկրորդ դռան դիմաց էին, որտեղ ողջակեզներն էին լվանում։ Դռան կամարի տակ սեղաններ կային, ³⁹ երկուսն այս կողմում, երկուսը՝ մյուս, որպեսզի դրանց վրա մորթեին թե՛ մեղքերի և թե՛ հանցանքների համար զոհագործվող ողջակեզները։ ⁴⁰ Ողջակեզները լվանալու ջրի խողովակի հարավային կողմը՝ այն դռան մուտքին, որ հյուսիս էր նայում, երկու սեղաններ կային, որ արևելք էին նայում։ Իսկ երկրորդ դռան հարավային կողմից՝ դռան կամարների դիմաց, նույնպես երկու սեղաններ կային։ Արևելյան կողմում՝ ութ սեղաններ, ⁴¹ չորսը՝ մի կողմում, չորսը՝ մյուս, հարավային դռան դիմաց։ Այնտեղ՝ ողջակիզման ութ սեղանների վրա էին մորթում զոհերն ու ողջակեզները։ ⁴² Կոփածո քարերից էին ողջակիզման չորս սեղանները՝ կանգուն ու կես երկարությամբ, կանգուն ու կես լայնությամբ և կանգուն ու կես բարձրությամբ, որպեսզի դրանց վրա դնեին գործիքը, որով մորթում էին զոհերն ու ողջակեզները։ ⁴³ Ներսից չորսբոլորը թզաչափ քանդակված եզրեր կային, իսկ սեղանի վրա ծածկ՝ անձրևից ու տապից պատսպարելու համար։ ⁴⁴ Ինձ տարավ ներքին գավիթը։ Ներքին գավիթն ուներ երկու պատշգամբ, մեկը՝ հարավային դռան կողմը, որ հյուսիս էր նայում և հարավ դուրս բերում, մյուսը՝ հյուսիսային դռան կողմը, որ հարավ էր նայում ու հյուսիս դուրս բերում։ ⁴⁵ Նա ասաց ինձ. «Այս պատշգամբը, որ հարավային կողմն է նայում, այն քահանաների համար է, որոնք տաճարի պահպանությունն են կատարում, ⁴⁶ իսկ հյուսիս նայող պատշգամբը՝ այն քահանաների համար, որոնք խորանի ծառայությունն են կատարում։ Դրանք Սադովկի որդիներն են, ղևտացիների ցեղից, որոնք կարող են մոտենալ՝ Տիրոջը պաշտամունք մատուցելու»։

Ներսի գավիթը և տաճարը

⁴⁷ Նա չափեց գավիթը. երկարությունը հարյուր կանգուն էր, լայնությունն էլ՝ հարյուր կանգուն. այն քառակողմ էր։ Տաճարի դիմաց սեղանն էր։ ⁴⁸ Ինձ տարավ դեպի տաճարի սյունազարդ սրահը։ Չափեց սյունազարդ սրահի լայնությունը. մի կողմից հինգ կանգուն էր, մյուս կողմից՝ հինգ կանգուն, մուտքի լայնությունը՝ տասնչորս կանգուն, դռան գլխի խոյակներն այս ու այն կողմերից՝ երեքական կանգուն։ ⁴⁹ Սյունազարդ սրահի բարձրությունը քսան կանգուն էր, նրա լայնությունը՝ տասնմեկ կանգուն։ Տասը աստիճաններով էին բարձրանում այնտեղ. այս ու այն կողմերից երկու սյուներ ուներ։

41

Տաճարի մուտքը

¹ Նա ինձ տարավ տաճար և չափեց նրա կամարը. լայնությունը մի կողմից վեց կանգուն էր, երկարությունը մյուս կողմից՝ վեց կանգուն, ² դռան լայնությունը՝ տասը կանգուն, իսկ դռան խոյակներն այս ու այն կողմերից՝ հինգական կանգուն։ Չափեց նաև դռան երկարությունը. քառասուն կանգուն էր, լայնությունը՝ քսան կանգուն։ ³ Մտավ ներքին գավիթը։ Չափեց մուտքի կամարը. երկու կանգուն էր, մուտքը՝ վեց կանգուն, իսկ մուտքի գլխի խոյակներն այս ու այն կողմերից՝ յոթական կանգուն։ ⁴ Չափեց դռան երկարությունը. քառասուն կանգուն էր, լայնությունը՝ քսան կանգուն տաճարի առաջ։ Եվ ասաց ինձ. «Սա է Սրբություն սրբոցը»։

Տաճարին կից շինությունները

⁵ Նա չափեց տաճարի պատը. վեց կանգուն էր, տան կողքի լայնությունը, շուրջբոլորը՝ չորս կանգուն, ⁶ մի կողմից մյուսը՝ երեսուներեք կանգուն։ Տաճարի որմերի և բոլորաձև կից շինությունների միջև կար մի անջրպետ, որպեսզի նրանք, ովքեր ուզենային նայել ցած, ընկնեին ու երբեք չմոտենային տաճարի որմին։ ⁷ Վերին դռան կողմերին՝ պատերի կողքերի միջև, տան շուրջը, վերին կողմում, մի լայն տարածություն կար, որպեսզի տան մեջ վերևից ու ներքևից ընդարձակ տեղ լիներ, որտեղով ներքին հարկերից բարձրանային միջնահարկերը, այնտեղից էլ՝ վերնահարկերը։ ⁸ Տեսա նաև տան ձեղունի բարձրությունը. բոլորաձև մի անջրպետ կար, ձողին հավասար, որը վեց կանգուն էր։ ⁹ Արտաքին կողմի որմի հաստությունը հինգ կանգուն էր, ¹⁰ ամբողջ տաճարի և կից շինությունների սենյակների միջև ընկած բաց տարածությունը՝ քսան կանգուն։ ¹¹ Սենյակների դռները՝ միջանցքում մի դռան, որ հյուսիսային կողմում էր, մի դուռն էլ հարավային կողմում էր։ Ընդարձակ տեղի լայնությունը, միջանցքը լուսավորելու համար, շուրջանակի հինգ կանգուն էր։

Արևմտյան շենքը

¹² Անջրպետի դիմաց գտնվող շինությունը, որ նայում էր դեպի ծովակողմ ճանապարհը, ուներ յոթանասուն կանգուն երկարություն. անջրպետի պատի հաստությունը հինգ կանգուն էր, երկարությունը՝ իննսուն կանգուն։

Տաճարի շենքի ընդհանուր չափը

¹³ Նա չափեց տաճարի առաջը. երկարությունը հարյուր կանգուն էր։ Խորշերը, անջրպետները և պատերը հարյուր կանգուն երկարություն ունեին։ ¹⁴ Տաճարի առջևի տարածության լայնությունը, նրա դիմացի խորշերը հարյուր կանգուն էին։

Տաճարի շենքի մանրամասները

¹⁵ Չափեց նաև խորշերի դիմաց, տաճարի հետևում գտնվող անջրպետի երկարությունը. այդ տարածությունը և այս ու այն կողմերի խորշերը հարյուր կանգուն երկարություն ունեին։ Արտաքին տաճարը, ¹⁶ անկյուններն ու կամարները, առաստաղները երեք կողմերից վանդակապատ լուսամուտներ ու լուսանցույցներ ունեին՝ նայելու համար։ Թե՛ տաճարը և թե՛ առհասարակ նրա առաստաղները, հատակից մինչև լուսամուտները, տախտակապատ էին։ Լուսամուտները երեքտակ էին՝ նայելու համար, ¹⁷ ինչպես ներսից, այնպես էլ դրսից։ Ամբողջ տաճարի վրա՝ շուրջբոլորը, ներսից ու դրսից, ¹⁸ քերովբեներ էին քանդակված ու արմավենիներ. մի արմավենին քերովբեների արանքում էր, երկու քերովբեները՝ իրար դիմաց։ ¹⁹ Արմավենու մի կողմում քերովբեներից մեկի դեմքը մարդու դեմք էր, արմավենու մյուս կողմում՝ առյուծի դեմք։ Եվ այդպես էր քանդակված ամբողջ տաճարը բոլոր կողմերից։ ²⁰ Հատակից մինչև առաստաղները քերովբեներ ու արմավենիներ էին քանդակված։ ²¹ Սրբարանն ու տաճարը թևատարած էին ու քառանկյունաձև բացված։

Փայտե սեղանը

²² Սրբարանի դեմ հանդիման մի պատկեր կար՝ փայտե խորանի նմանությամբ, երեք կանգուն բարձրությամբ, երկու կանգուն երկարությամբ և երկու կանգուն լայնությամբ, վրան՝ եղջյուրաձև զարդեր։ Նրա թե՛ հատակը և թե՛ պատերը փայտյա էին։ Նա ասաց ինձ. «Սա է Տիրոջ առջև եղած զոհասեղանը»։

Դռները

²³ Տաճարն ուներ երկու դուռ, սրբարանն էլ՝ ²⁴ երկու մուտք։ Երկու դռներն էլ երկուական փեղկ ունեին. երկու փեղկ՝ մեկ դուռը, երկու փեղկ՝ մյուսը։ ²⁵ Նրանց վրա՝ տաճարի մուտքերի վերևում, քանդակված էին քերովբեներ ու արմավենիներ՝ ըստ սրբարանի քանդակների։ Ազնիվ փայտից մի կերտվածք կար կամարի դեմ հանդիման՝ արտաքին կողմից։ ²⁶ Նաև գաղտնի լուսամուտներ։ Այս ու այն կողմերից նա չափեց կամարի առաստաղները, տան կողմերն էլ՝ իրար հետ վերցրած։

42

Սրբազան երկու շենք տաճարի մոտ

¹ Նա դուրս բերեց ինձ արտաքին գավիթը, դեպի արևելք, հյուսիսի դռան դեմ դիմաց, ու ներս տարավ ինձ։ Ես տեսա հինգ սենյակներ՝ հյուսիսակողմ միջանցքներով ու խորշերով, ² հարյուր կանգուն երկարությամբ ու հիսուն կանգուն լայնությամբ, ³ նկարազարդված ըստ ներքին սրահի դռան օրինակի։ Դրանք չորս կողմը սյուներ ունեցող արտաքին սրահի նման էին՝ երեք հարկերը դեմ առ դեմ դասավորված։ ⁴ Սենյակների դեմ հանդիման տասը կանգուն լայնությամբ ու հարյուր կանգուն երկարությամբ մի անցուղի կար, ճանապարհից մեկ կանգուն ավելի ներս. դրանց դռները դեպի հյուսիս էին նայում։ ⁵ Անցուղիներ կային նաև վերնատներում, որովհետև սյուները չորս կողմում՝ ներքևից վերև, խառն էին։ Խառն էին նաև անջրպետները և շրջանաձև սյուները, անջրպետներն ու հենափայտերը, ⁶ որովհետև եռահարկ էին։ Եվ սենյակների սյուների պես սյուներ չկային. դրա համար ներքևի կողմից միջանցքներ կային։ Միջնահարկերն էլ գետնից հիսուն կանգուն բարձր էին։ ⁷ Դրսից լույս ունեին, ինչպես որ արտաքին բակի սենյակները, որոնք նայում էին հյուսիսային սենյակների ճիշտ դիմացը, հիսուն կանգուն երկարությամբ։ ⁸ Արտաքին սրահին նայող սենյակների երկարությունը հիսուն կանգուն էր, և դրանք իրար դիմաց էին, բոլորը միասին՝ հարյուր կանգուն։ ⁹ Արևելյան մուտքի սենյակների դռները, որոնք արտաքին սրահից մտնելու համար էին, ¹⁰ շինված էին հարավային կողմում առաջին անցուղու լուսամուտի համեմատ, հարավին դեմ հանդիման, միջանցքների ու հատվածների դիմաց։ ¹¹ Սենյակներն ու դրանց դիմացի անցուղիները հյուսիս տանող ճանապարհի սենյակի չափով էին, դրանց լայնությամբ ու դրանց երկարությամբ, դրանց ելքերի ու շրջանակների չափով, ¹² նաև հյուսիսակողմ սենյակների մուտքերի չափով, նաև հարավահայաց սենյակների մուտքերի չափով, նաև առաջին անցուղու մուտքի չափով, որպեսզի միջանցքներին ուղիղ լույս տային, և հնարավոր լիներ դրանց միջոցով դեպի արևելք գնալ։ ¹³ Նա ասաց ինձ. «Այն սենյակները, որ հյուսիս են նայում, նաև այն սենյակները, որ հարավ, բաց տարածության կողմն են նայում,- դրանք սրբարանի սենյակներ են, որտեղ Սադովկի քահանա որդիները, որոնք մոտենում են Տիրոջը, ուտում են ամենասուրբ բաները, և այնտեղ պիտի դնեն ամենասուրբ բաները, զոհերը՝ իրենց մեղքերի ու հանցանքների համար, որովհետև սուրբ է այդ տեղը, ¹⁴ և ոչ ոք, բացի քահանաներից, չի մտնելու այնտեղ։ Սրանք էլ այն սուրբ տեղից չպետք է դուրս գան արտաքին գավիթը, որպեսզի ամեն անգամ, երբ Տիրոջը մերձենան, սուրբ մնան, ժողովրդին մոտենան իրենց պատմուճաններով, որոնցով պաշտամունք են մատուցում, որովհետև սուրբ են դրանք, այլ ժողովրդին մոտենալիս ուրիշ հանդերձներ հագնեն»։

Տաճարի տարածության չափերը

¹⁵ Այսպես ավարտվեց տաճարի ներսի չափումը։ Նա հանեց ինձ արևելք նայող դռնով, չափեց տաճարի հատակագիծը շուրջանակի՝ ըստ շինվածքի։ ¹⁶ Եկավ կանգ առավ հարավային դռան մոտ, որ արևելք էր նայում, չափեց հինգ հարյուր ձողաչափ։ ¹⁷ Դարձավ հյուսիսային կողմը և հյուսիսի դիմաց չափեց հինգ հարյուր ձողաչափ։ ¹⁸ Դարձավ արևմուտք և ծովի դիմաց չափեց հինգ հարյուր ձողաչափ։ ¹⁹ Դարձավ հարավային կողմը և հարավի դիմաց չափեց հինգ հարյուր ձողաչափ։ ²⁰ Չափեց տաճարի չորս կողմերի և պարիսպների արանքը նույն չափով։ Տաճարը սրբավայրերից և պարիսպներից անջրպետելու համար թողեց մի արանք, որ հինգ հարյուր կանգուն էր դեպի արևելք և հինգ հարյուր կանգուն լայնություն ուներ։

43

Տերը վերադառնում է տաճար

¹ Նա ինձ դուրս բերեց և հանեց այն դռան մոտ, որ արևելք էր նայում։ ² Եվ ահա Իսրայելի Աստծու փառքը գալիս էր արևելքի ճանապարհով. բանակի ձայնը գալիս էր բազմության ձայնի արձագանքի պես։ Գետինը չորս կողմից լուսավորվեց փառքի լույսով։ ³ Եվ տեսիլքը, որ ես էի տեսնում, նման էր այն տեսիլքին, որ ես տեսա, երբ քաղաքն օծելու էի մտնում։ Իմ տեսած կառքի տեսիլքը նման էր այն տեսիլքին, որ ես տեսա Քոբար գետի մոտ։ Երեսս ի վայր ընկա։ ⁴ Տիրոջ փառքը արևելք նայող դռնով տաճար մտավ։ ⁵ Հոգին ինձ բարձրացրեց ու տարավ ներքին գավիթը։ Ահա տաճարը լի էր Տիրոջ փառքով։ ⁶ Ես էլ կանգնած էի այնտեղ։ Ահա մի ձայն այն տաճարից խոսում էր ինձ հետ։ Մի մարդ կար մոտս. ⁷ նա ինձ ասաց. «Մարդո՛ւ որդի, տեսա՞ր իմ գահավորակի տեղը, իմ ոտնահետքերի տեղը. դրանցով է հավիտյան ապրելու անունս Իսրայելի մեջ։ Իսրայելի զավակներն այլևս չեն պղծելու իմ սուրբ անունը, ո՛չ իրենք, ո՛չ նրանց առաջնորդներն իրենց պոռնկությամբ, ո՛չ էլ նրանց միջի իշխանները՝ իրենց սպանություններով, ⁸ երբ դուռս դնեմ նրանց դռների, սեմս՝ նրանց սեմերի մոտ։ Նրանք պարիսպներ են կանգնեցրել իմ ու իրենց միջև, իրենց կատարած անօրենությամբ պղծել են իմ սուրբ անունը։ Խորտակեցի նրանց իմ բարկությամբ և սպանելով։ ⁹ Գոնե հիմա իրենց պոռնկությունը, իրենց իշխանների սպանությունն ինձնից հեռու պահեն։ Եվ ես հավիտյան բնակություն կհաստատեմ նրանց մեջ։ ¹⁰ Դու էլ, մարդո՛ւ որդի, Իսրայելի տանը ցո՛ւյց տուր այդ տաճարը, ու թող հետ կանգնեն իրենց մեղքերից։ Ցո՛ւյց տուր դրա պատկերը, ձևն ու հորինվածքը։ ¹¹ Եվ նրանք թող տանջանքներ ստանան իրենց կատարած ամեն ինչի համար։ Նկարի՛ր այդ տաճարը, նրա կառուցվածքը, ելքը, մուտքն ու կահավորանքը։ Դրա բոլոր պատվիրաններն ու օրենքները, կանոնները ցո՛ւյց տուր նրանց, գրի՛ր նրանց առաջ։ Եվ թող պահեն իմ բոլոր օրենքներն ու պատվիրաններն ու կատարեն դրանք։ ¹² Լեռան կատարի տան պատկերը, նրա չորս կողմերի սահմանները ամենասուրբ են։ Այս է տաճարի օրենքը»։

Զոհասեղանը

¹³ Զոհասեղանի չափն այս է. մի կանգուն բարձրությունը, մի կանգուն ու չորս մատ՝ խորությունը, մի կանգուն՝ լայնությունը, մի թիզ՝ եզրերի շուրջ գտնվող պսակը։ Այս է զոհասեղանի բարձրությունը. ¹⁴ փորվածքի սկզբից մինչև մեծ քավությունը՝ տակից երկու կանգուն, մի կանգուն լայնությամբ, փոքր քավությունից մինչև մեծ քավությունը՝ չորս կանգուն, մի կանգուն լայնությամբ։ ¹⁵ Զոհասեղանը՝ չորս կանգուն, բնից վեր մինչև եղջյուրները՝ մեկ կանգուն, ¹⁶ զոհասեղանը չորս կողմերից՝ տասներկուական կանգուն, լայնությամբ ու երկարությամբ քառակուսի։ ¹⁷ Քավությունը տասնչորս կանգուն երկարությամբ էր, տասնչորս կանգուն լայնությամբ, չորս կողմերից էլ հավասար. նրան շրջապատող եզրերը՝ կես կանգուն, շրջանակը՝ մեկ կանգուն։ Աստիճաններն էլ արևելյան էին։

Զոհասեղանի օծումը

¹⁸ Տերն ինձ ասաց. «Մարդո՛ւ որդի, այսպես է ասում Տերը՝ Աստված. “Զոհասեղանը գործածելու օրվա հրահանգները սրանք են՝ նրա վրա ողջակեզ մատուցել, շուրջը արյուն ցողել։ ¹⁹ Սադովկի որդուց սերած ղևտացի քահանաներին, որոնք պաշտամունք մատուցելու համար ինձ կմոտենան,- ասում է Տերը՝ Աստված,- մեղքերի քավության համար նախիրից մի զվարակ կտաս ողջակիզելու։ ²⁰ Թող վերցնեն սրա արյունից, դնեն զոհասեղանի չորս եղջյուրներին և քավության չորս անկյուններին, ցանեն հատակի շուրջն ու դրանով սրբագործեն։ ²¹ Թող վերցնեն մեղքերի համար ողջակիզվող զվարակը և այրեն տաճարում առանձնացված մի տեղում՝ սրբարանից դուրս։ ²² Երկրորդ օրը առանց արատի այծերից երկու նոխազ թող վերցնեն իրենց մեղքերի համար, սրբագործեն զոհասեղանը, ինչպես որ զվարակով սրբագործեցին։ ²³ Քավությունը սրբագործելը վերջացնելուց հետո թող նախիրներից առանց արատի մի զվարակ մատուցեն, հոտից էլ՝ առանց արատի մի խոյ. ²⁴ դրանք մատուցեն Տիրոջ առաջ, քահանաները դրանց վրա աղ ցանեն ու տանեն ողջակիզելու Տիրոջ համար։ ²⁵ Թող յոթ օր անընդհատ իրենց մեղքերի համար մի նոխազ մատուցեն, նախիրներից՝ մի զվարակ, հոտերից՝ առանց արատի մի խոյ, ²⁶ ու յոթ օր սրբագործեն զոհասեղանը, մաքրեն այն։ Թող մաքրեն նաև իրենց ձեռքերը։ Երբ օրերն ավարտվեն, ²⁷ և երբ ութերորդ օրը լինի, քահանաները թող սեղանի վրա անեն ձեր ողջակեզը, և դա թող լինի ձեր փրկության համար։ Ես էլ կընդունեմ ձեզ”»,- ասում է Տերը՝ Աստված։

44

Արևելյան դռան գործածությունը

¹ Ինձ հետ դարձրեց սրբարանի արտաքին դռան ճանապարհով, որ նայում էր դեպի արևելք։ Այն փակված էր։ ² Տերն ինձ ասաց. «Այդ դուռը փակ է մնալու ու չի բացվելու, նրանով ոչ ոք չի անցնելու, որպեսզի Իսրայելի Տերը՝ Աստված, մտնի այդտեղով։ Այն փակ է լինելու, ³ որովհետև առաջնորդ իշխանն է ներսում նստելու՝ Տիրոջ առաջ հաց ուտելու համար։ Նա մտնելու է դռան կամարի տակի ճանապարհով և նույն տեղով էլ դուրս է գալու»։

Տաճար մտնելու կանոնները

⁴ Նա ինձ տարավ մի դռնով, որ դեպի հյուսիս՝ տաճարի դիմաց էր նայում։ Տեսնում էի. ահա Տիրոջ տունը լի էր Տիրոջ փառքով։ Երեսս ի վայր ընկա ու խոնարհություն արեցի։ ⁵ Տերն ինձ ասաց. «Մարդո՛ւ որդի, սրտիդ մե՛ջ դիր, աչքերովդ տե՛ս ու ականջներովդ լսի՛ր այն ամենը, ինչ որ քեզ կասեմ Տիրոջ տաճարի բոլոր հրահանգների ու նրա օրենքների մասին։ Դու սրտիդ մեջ կպահես այդ տաճար մտնելու ու նրա սրբարանից ելնելու կարգը։ ⁶ Կասես Իսրայելի ժողովրդին՝ դառնացնող ժողովրդին. “Այսպես է ասում Տերը՝ Աստված. թող բավական լինեն ձեր բոլոր անօրենությունները, ո՛վ տունդ Իսրայելի, ⁷ որ ձեր մեջ եք մտցրել այլազգիներին՝ սրտով անթլփատներին ու մարմնով անթլփատներին։ Նրանք մտել են իմ սրբարանը և պղծել այն, մինչ դուք մատուցում էիք իմ հացը՝ ճարպով ու արյունով։ Դուք, որ զանց եք առնում ուխտս ձեր բոլոր անօրենություններով, ⁸ չեք պահել ու պահպանել սրբավայրերս, այլազգիներին եք պահապան կարգել իմ սրբություն սրբոցի վրա”»։

Ղևտացիները հեռացվում են քահանայությունից

⁹ Ուստի այսպես է ասում Տերը՝ Աստված. «Ոչ մի օտարածին զավակ՝ սրտով անթլփատ ու մարմնով անթլփատ, չի մտնելու իմ սրբարանը, ոչ մեկն այն այլազգիների բոլոր որդիներից, որ կան Իսրայելի այդ տանը։ ¹⁰ Նաև ղևտացիները, որոնք ինձնից հեռացել են, երբ ժողովուրդը մոլորվել էր, մոլորվել-հեռացել ինձնից՝ հետևելով իրենց խորհուրդներին,- նրանք էլ են պատժվելու ըստ իրենց անօրենությունների։ ¹¹ Նրանք իմ սրբարանում՝ այդ տան դռներին, դռնապան ծառաներ են լինելու և տաճարի սպասավորներ։ Նրանք են մորթելու ժողովրդի ողջակեզներն ու զոհաբերությունները. նրանք են կանգնելու ժողովրդի առաջ՝ լինելով նրա սպասավորները։ ¹² Այն բանի համար, որ իրենք սպասավորներ էին նրանց կուռքերի առաջ, այդ անիրավության համար էլ Իսրայելի տունը տանջանքների է մատնվել։ Դրա համար ձեռքս բարձրացրի նրանց վրա,- ասում է Տերը՝ Աստված,- և ըստ իրենց անիրավությունների էլ նրանք պատժվելու են։ ¹³ Թող ինձ չմերձենան նրանք, ինձ համար քահանա չլինեն ու չդիպչեն ո՛չ Իսրայելի զավակների սրբություններին, ո՛չ էլ իմ ամենասուրբ բոլոր սրբություններին։ Նրանք կրելու են իրենց անարգանքն իրենց արած մոլորության համար։ ¹⁴ Նրանց պահապան են կարգել այն տան, նրա բոլոր գործերի, այն ամենի վրա, ինչ անելու են այնտեղ»։

Սադովկի որդիները լինելու են քահանաներ

¹⁵ «Իսկ ղևտացի քահանաները՝ Սադովկի այն որդիները, որոնք պահպանել են իմ սրբարանը, երբ Իսրայելի տունը մոլորվել-հեռացել էր ինձնից,- նրանք մերձենալու են ինձ՝ պաշտամունք մատուցելու համար ինձ։ Կանգնելու են իմ դիմաց և ինձ զոհեր, ճարպ ու արյուն են մատուցելու,- ասում է Տերը՝ Աստված։- ¹⁶ Նրանք մտնելու են իմ սրբարանը, մերձենալու են սեղանիս՝ ինձ պաշտամունք մատուցելու, և պահպանություն են անելու։ ¹⁷ Երբ նրանք ներքին գավթի դռնով մտնեն, պետք է կտավե պատմուճաններ հագած լինեն և իրենց պաշտամունքը մատուցելու ժամանակ բրդեղեն հագած չպետք է լինեն՝ սկսած ներքին գավթի դռնից։ ¹⁸ Գլուխներին կտավե խույրեր են ունենալու, սրունքներին՝ կտավե անդրավարտիքներ։ Ծանր հագնված չպետք է լինեն։ ¹⁹ Ու երբ դուրս գան արտաքին գավիթ՝ ժողովրդի մոտ, հանելու են իրենց պատմուճանները, որոնցով պաշտամունք են մատուցում, դրանք դնելու են սուրբ սենյակը և հագնելու են ուրիշ պատմուճաններ, որպեսզի ժողովրդին իրենց պատմուճաններով չսրբագործեն։ ²⁰ Գլուխները չեն ածիլելու, մազերը չեն նոսրացնելու. պինդ ծածկելու են իրենց գլուխները։ ²¹ Ներքին գավիթ մտնելիս ոչ մի քահանա գինի թող չխմի։ ²² Որբևայրի կամ արձակված կնոջն իրենց կին թող չառնեն, այլ Իսրայելի տան ծնունդ կույսերի կամ քահանայից մնացած որբևայրու։ ²³ Եվ իմ ժողովրդին թող սովորեցնեն ընտրություն կատարել սրբի ու պղծվածի, անարատի ու արատավորվածի միջև։ ²⁴ Արյան դատաստանի ժամանակ նրանք քննիչ թող լինեն, ըստ իմ օրենքների դատաստան անեն և ըստ իմ կանոնների իրավունք գործադրեն։ Բոլոր տոներին իմ օրենքներն ու հրահանգները թող պահեն, շաբաթներս սուրբ պահեն։ ²⁵ Մարդու դիակի մոտ թող չգան, որ չպղծվեն, բացի հոր կամ մոր, որդու կամ դստեր, եղբոր կամ չամուսնացած քրոջ դիակից։ ²⁶ Եվ այն սրբագործելուց հետո պետք է հաշվել յոթ օր. ²⁷ ո՛ր օրը ներքին գավիթը, սրբավայրը մտնեն՝ պաշտամունք մատուցելու, քավության զոհ թող մատուցեն,- ասում է Տերը՝ Աստված։- ²⁸ Նրանք ուրիշ ժառանգություն չեն ունենալու, քանի որ ես եմ նրանց համար ժառանգություն. Իսրայելի զավակների մեջ նրանց կալվածք թող չտրվի, քանի որ ես եմ նրանց համար ժառանգություն։ ²⁹ Նրանք են ուտելու զոհերը՝ մեղքերի համար լինեն դրանք թե հանցանքի, ու Իսրայելի բոլոր նվերները նրանցն են լինելու։ ³⁰ Բոլոր առաջին պտուղները, բոլոր առաջին ծնունդները, ձեր բոլոր պտուղների երախայրիքը քահանաներինն են լինելու։ Ձեր առաջին բերքը քահանային եք տալու, որպեսզի ձեր տներն օրհնի։ ³¹ Քահանաները չեն ուտելու որևէ մեռելոտի, լինի գազան, հոշոտած թռչուն կամ անասուն»։

45

Հողաբաժիններ

¹ «Երբ ձեր մեջ հողի՝ իբրև ժառանգության համար վիճակ գցեք ու բաժանեք, այդ հողից Տիրոջ համար առանձնացնելու եք սուրբ տարածք՝ քսանհինգ հազար ձողաչափ երկարությամբ ու տասը հազար ձողաչափ լայնությամբ, այնպես որ բոլոր սահմաններում չորս կողմերից էլ սրբագործված լինի։ ² Դրանից սրբարանինն է լինելու հինգ հարյուրական ձողաչափ՝ չորս կողմերից, բաց տարածությունների շուրջն էլ՝ հիսունական կանգուն։ ³ Այս տարածքից չափվելու է քսանհինգ հազար ձողաչափ երկարությամբ, տասը հազար ձողաչափ լայնությամբ մի բաժին. այնտեղ է լինելու Սրբություն սրբոցը։ ⁴ Նվիրված հողից բաժին է լինելու այն քահանաներին, որոնք սրբատեղիում պաշտամունք են մատուցում, նրանց, որ մոտենում են՝ պաշտամունք մատուցելու Տիրոջը։ Նրանց համար, նրանց սուրբ տան համար տեղ է առանձնացված լինելու՝ ⁵ երկարությունը քսանհինգ հազար ձողաչափ, լայնությունը՝ տասը հազար։ Ղևտացիների համար, որոնք ծառայություն են անում տաճարում, քաղաքում բնակության համար կալվածք է լինելու։ ⁶ Բնակության համար քաղաքին տալու ես հինգ հազար ձողաչափ լայնությամբ և քսանհինգ հազար ձողաչափ երկարությամբ տարածություն՝ ըստ Իսրայելի ամբողջ տնից սրբարանին տրված երախայրիքների»։

Առաջնորդի կալվածքը

⁷ «Իշխանին բաժին է հատկացվելու քաղաքի տարածքում, սուրբ երախայրիքի տարածքի այս ու այն կողմերում, սուրբ երախայրիքի տարածքի դիմաց, քաղաքի բնակավայրերի դեմ հանդիման, ծովի կողմը, ծովից էլ՝ դեպի արևելք. երկարությունը՝ ըստ մեկ բաժնի սահմանների դեպի ծովակողմը, լայնությունը՝ ըստ հողի մեկ բաժնի սահմանների դեպի արևելք։ ⁸ Եվ դա նրա համար լինելու է իր կալվածքն Իսրայելում։ Եվ իշխանները այլևս չեն բռնանալու իսրայելացիների՝ իմ ժողովրդի վրա. բաժանված հողն էլ Իսրայելի տունն է ժառանգելու ըստ իրենց ցեղերի»։

Առաջնորդի իրավունքներն ու պարտականությունները

⁹ Այսպես է ասում Տերը՝ Աստված. «Բավական է ձեզ, ո՛վ իշխաններ Իսրայելի։ Արդ, հեռո՛ւ վանեցեք անիրավությունն ու զրկանքը, օրենքով ու արդարությա՛մբ վարվեք, հեռո՛ւ տարեք բռնությունն իմ ժողովրդից»,- ասում է Տերը՝ Աստված։ ¹⁰ «Արդա՛ր չափով չափեք. ձեր կշեռքը թող արդար լինի, չափը՝ արդար, կապիճը՝ արդար։ ¹¹ Կապիճը թող նույնը լինի՝ տալիս թե առնելիս։ Գրիվի մեկ տասներորդը մեկ կապիճ կլինի. մեկ տասներորդ գրիվը՝ կապիճը, իր կշռով հավասար կլինի մեկ արդուի։ ¹² Քսան դանգը հավասար կլինի մեկ սիկղի, իսկ քսանհինգ սիկղը՝ ձեր մեկ մնասին։ ¹³ Եվ սա կլինի այն նվերը, որ դուք կբաժանեք. գրիվի մեկ վեցերորդ մաս ցորեն, արդվի մեկ վեցերորդ մաս գարի։ ¹⁴ Ձեթի վերաբերյալ հրահանգն այս է. մի քսեստ՝ մեկ տասներորդ սափոր յուղ (քանի որ տասը քսեստը մեկ սափոր է)։ ¹⁵ Տասը ոչխարից մեկը նվեր կլինի Իսրայելի բոլոր ցեղերից՝ ձեր քավության և փրկության զոհերի ու ողջակեզների համար,- ասում է Տերը՝ Աստված։- ¹⁶ Երկրիդ ամբողջ ժողովուրդը այս երախայրիքները պետք է տա Իսրայելի իշխաններին։ ¹⁷ Իշխանի ձեռքով պետք է կատարվեն ողջակեզները, զոհերն ու սպանդը՝ տոներին, ամսագլուխներին, շաբաթներին։ Եվ Իսրայելի այդ տան բոլոր տոներին նա պետք է մատուցի զոհերն ու ողջակեզները՝ մեղքերի համար ու փրկության, Իսրայելի այդ տունը սրբագործելու համար»։

Սրբարանի սրբագործման օրը

¹⁸ Այսպես է ասում Տերը՝ Աստված. «Առաջին ամսին՝ ամսվա առաջին օրը, նախրից առանց արատի մի զվարակ կառնեք՝ սրբարանը սրբագործելու համար։ ¹⁹ Քահանան կվերցնի սրբագործման արյունից, կցանի տան սեմերին, տաճարի չորս անկյուններին, զոհասեղանի վրա, ներքին գավթի դռան սեմերին։ ²⁰ Այսպես կանի ամսվա յոթերորդ օրը՝ տաճարը սրբագործելու համար բոլոր անգիտակցաբար և պարզամտորեն մեղանչածներից։ ²¹ Առաջին ամսին՝ ամսվա տասնչորսերորդ օրը, ձեզ համար զատկի օր կլինի. յոթ օր բաղարջ կուտեք։ ²² Իշխանն այդ օրը իր ու իր տան համար, երկրի ամբողջ ժողովրդի համար արջառներից մի զվարակ կզոհաբերի մեղքերի թողության համար։ ²³ Տոնի յոթ օրերին ողջակեզներ կմատուցեն Տիրոջը՝ յոթ զվարակ, առանց արատի յոթ խոյ՝ յոթ օր շարունակ, օր օրի, մեղքերի քավության համար՝ այծերից էլ մեկ նոխազ օր օրի։ ²⁴ Զոհ մատուցվող յուրաքանչյուր զվարակի և խոյի հետ պետք է բերել մեկ քսեստ ազնիվ ալյուր և մեկ քսեստ յուղ՝ հաց պատրաստելու համար։ ²⁵ Երրորդ ամսին՝ ամսվա տասնհինգերորդ օրը, այն յոթ օրերի պես տոն կկատարեն մեղքերի քավության համար՝ նույնպիսի ողջակեզներով, ազնիվ ալյուրով ու ձեթով»։

46

Հատուկ կանոններ առաջնորդի համար

¹ Այսպես է ասում Տերը՝ Աստված. «Ներքին գավթի դուռը, որ արևելք է նայում, վեց աշխատանքային օրերին փակ կլինի, իսկ շաբաթ օրը կբացվի։ Ամսագլխի օրն էլ կբացվի։ ² Իշխանը կմտնի արտաքին կամարի դռնով ու կկանգնի դռան սեմին։ Քահանաները նրա համար ողջակիզում կկատարեն, փրկության զոհ կմատուցեն նրա համար։ Ինքը կերկրպագի դռան սեմին ու դուրս կգա։ Մինչև երեկո դուռը չի փակվի։ ³ Երկրի ժողովուրդն էլ շաբաթ օրերն ու ամսագլուխներին կերկրպագի դռան մուտքի առաջ, Տիրոջ առաջ։ ⁴ Եվ այն ողջակեզները, որ շաբաթ օրերին իշխանը կմատուցի Տիրոջը, կլինեն առանց արատի վեց գառ և առանց արատի մի խոյ, ⁵ եփված մաննա՝ խոյի ու գառների հետ, զոհեր ու նվերներ, ինչպես ինքը կկամենար տալ, և մեկ քսեստ յուղ՝ հացի հետ։ ⁶ Իսկ ամսամուտի օրը կմատուցի առանց արատի մի զվարակ, որ լինի հորթեր ծնած կովի ձագ (վեց գառներն ու խոյն էլ առանց արատի պետք է լինեն)։ ⁷ Կմատուցի նաև շարմաղ ալյուր՝ զվարակի հետ, շարմաղ ալյուր ու մաննա՝ խոյի ու գառների հետ, ինչպես որ ինքը կկամենար տալ, շարմաղ ալյուրի հետ էլ՝ յուղ։ ⁸ Իշխանը մտնելիս կամարի դռնով կմտնի, նույն դռնով էլ դուրս կգա։ ⁹ Իսկ երբ երկրի ժողովուրդը տոներին մտնի Տիրոջ առաջ երկրպագելու, ով հյուսիսային դռնով մտնի, հարավային դռնով դուրս կգա, իսկ ով հարավային դռնով մտնի, հյուսիսային դռնով դուրս կգա։ Չի վերադառնա այն դռնով, որով մտել էր, այլ հակառակ դռնով դուրս կգա։ ¹⁰ Իշխանն էլ նրանց մեջ, մտնելիս նրանց հետ կմտնի, ելնելիս էլ նրանց հետ դուրս կգա։ ¹¹ Տոներին ու հանդիսավոր հավաքույթներին եփված մաննա կլինի զվարակի հետ, մաննա՝ խոյի ու գառների հետ, ինչպես ինքը կկամենար տալ. մեկ քսեստ յուղ էլ՝ հացի հետ։ ¹² Ապա իշխանը Տիրոջը կմատուցի խոստովանության ու կամավոր փրկության ողջակեզները, իր համար բաց կանի արևելք նայող դուռը և կմատուցի փրկության համար իր ողջակեզները նույն ձևով, ինչպես կատարում էր շաբաթ օրերին։ Ապա դուրս կգա և իր ելնելուց հետո կփակի դռները։ ¹³ Նա Տիրոջը որպես ողջակեզ կմատուցի առանց արատի մի ամլիկ գառ, և դա կանի ամեն օր՝ վաղ առավոտյան։ ¹⁴ Դրա հետ վաղ առավոտյան կմատուցի նաև մաննա արդուի չափի մեկ վեցերորդ մասով և քսեստի մեկ երրորդի չափով յուղ՝ ազնիվ ալյուրին խառնելու համար։ Մաննայի ընծայումը Տիրոջը հավիտենական հրահանգ է. ¹⁵ ամեն օր վաղ առավոտյան պետք է մատուցվի գառը, մաննան ու յուղը՝ որպես մշտնջենական ողջակեզ»։

Առաջնորդի որդիների ժառանգությունը

¹⁶ Այսպես է ասում Տերը՝ Աստված. «Եթե իշխանն իր որդիներից որևէ մեկին պարգև տա իր ժառանգությունից, դա նրա որդիների ժառանգական կալվածքը կլինի։ ¹⁷ Իսկ եթե իր ժառանգությունից պարգև տա իր ծառաներից մեկին, դա նրանը կլինի մինչև թողության տարին, ապա նորից կվերադարձվի իշխանին։ Բայց նրա որդիների ժառանգությունը նրանցը կլինի։ ¹⁸ Իշխանը չպետք է իր ժողովրդի ժառանգությունից վերցնի՝ նրան բռնադատելով, այլ իր կալվածքներից ու իր ժառանգությունից պետք է ավանդ թողնի իր որդիներին, որպեսզի իմ ժողովուրդը չցրվի՝ յուրաքանչյուրն իր բնակավայրից»։

Տաճարի խոհանոցները

¹⁹ Նա ինձ հարավային դռնով տարավ դեպի քահանաների սուրբ սենյակը, որ հյուսիս է նայում։ Եվ ահա մի առանձնացված տեղ կար։ ²⁰ Նա ասաց ինձ. «Սա է այն տեղը, որտեղ քահանաները եփելու են զոհերի միսը՝ հանցանքների ու մեղքերի թողության համար։ Այնտեղ են եփելու նաև մաննան՝ ժողովրդին սրբագործելու համար ամենևին դուրս չգալով արտաքին գավիթը»։ ²¹ Նա ինձ դուրս բերեց արտաքին գավիթը, պտտեցրեց գավթի չորսբոլորը։ Ահա տեսա գավիթներ ²² ու գավիթներ՝ սրահի չորս կողմերում։ Փոքր գավիթը քառասուն կանգուն երկարություն և երեսուն կանգուն լայնություն ուներ։ Չորսն էլ մի չափի էին, ²³ չորսի շուրջն էլ սենյակներ կային։ Խոհանոցներ էլ կային սենյակի տակ՝ չորս կողմերում։ ²⁴ Նա ինձ ասաց. «Սրանք խոհանոցներ են, որտեղ տաճարի սպասավորները ժողովրդի մատուցած զոհերի միսն են եփում»։

47

Տաճարի աղբյուրը

¹ Նա ինձ բերեց տաճարի դռան առաջ։ Ահա տաճարի արևելյան կողմի վարագույրների տակից ջուր էր դուրս գալիս և հոսում դեպի արևելք, որովհետև տաճարի ճակատային մասը դեպի արևելք էր նայում. իսկ ջուրը գալիս էր տաճարի հյուսիսային կողմից՝ աջից դեպի զոհասեղանի կողմը։ ² Ինձ դուրս բերեց հյուսիսային դռան ճանապարհով ու դրսից պտտեցրեց արտաքին դռան չորս կողմը, որ արևելք էր նայում։ Ահա ջուրը հոսում էր աջ կողմից։ ³ Երբ դուրս եկա, մարդը ելավ իմ դիմաց. ձեռքին չափ ուներ։ Իր չափով հազար ձողաչափ չափեց ու անցավ ջրի, հորդ ջրի միջով։ ⁴ Դարձյալ հազար ձողաչափ չափեց իր չափով ու անցավ ջրի միջով։ Ջուրը մինչև նրա երանքներն էր հասնում։ Նա հազար ձողաչափ չափեց իր չափով ու անցավ ջրի միջով։ Ջուրը մինչև գոտկատեղն էր հասնում։ ⁵ Իր չափով նա հազար ձողաչափ չափեց հոսքը ու չէր կարողանում անցնել, որովհետև ջուրը հեղեղի հորձանք էր տալիս, որի միջով ոչ ոք չէր կարող անցնել։ ⁶ Նա ասաց ինձ. «Տեսա՞ր, մարդո՛ւ որդի»։ Ու ինձ հետ դարձրեց, տարավ գետի ափը։ ⁷ Երբ շրջում էի այնտեղ, ահա գետափին՝ այս ու այն կողմերում, բազմաթիվ տնկած ծառեր տեսա։ ⁸ Նա ասաց ինձ. «Այս ջուրը, որ դեպի արևելք՝ գալիլեացիների կողմն է դուրս գալիս, իջնում է Արաբիա ու գալիս է մինչև ծով՝ ջրերի ելքը, և ջրերը պիտի բուժի։ ⁹ Ամեն շնչավոր ու շարժվող էակ, բոլոր նրանք, որոնց վրա այս գետը գա, ապրելու են։ Այնտեղ շատ ձուկ է բազմանալու, որովհետև այս ջուրը, հասնելով այնտեղ, բուժիչ է լինելու։ Կենդանանալու և ապրելու է ամեն ոք, ում վրա հասնի այս գետը։ ¹⁰ Նրա մեջ կանգնելու են ձկնորսներ՝ Ենգադիսից մինչև Ենգալիմ։ Ուռկանները գցելու տեղեր են լինելու. նրա ձկներն էլ մեծ ծովի ձկների պես շատ, խիստ շատ են լինելու։ ¹¹ Բայց նրա դուրս գալու, ծանծաղելու և հորդելու տեղերում ջրերն առողջարար չեն լինելու, այլ թողնվելու են աղ ունենալու համար։ ¹² Գետի մոտերքը՝ ափերի այս ու այն կողմերում, պտղատու ծառեր են բուսնելու, որոնք չեն ծերանալու նրա շուրջը, պտուղն էլ նրանց վրայից չի պակասելու։ Հենց սկզբից էլ դալար ճյուղեր են արձակելու, որովհետև գետի ջրերը սուրբ վայրերից են դուրս գալիս։ Նրանց պտուղը սնունդ է լինելու, տերևը՝ բուժիչ»։

Երկրի սահմանները

¹³ Այսպես է ասում Տերը՝ Աստված. «Սրանք են երկիրը ժառանգելու այն սահմանները, նաև այն հավելյալ բաժինը, որ ժառանգություն են թողնվելու իսրայելացիների տասներկու ցեղերին։ ¹⁴ Այն ժառանգություն է ստանալու ամեն ոք՝ որպես եղբայր, որովհետև ես, ձեռքս բարձրացրած, երդվել էի ձեր հայրերին տալ այն։ Եվ այժմ երկիրը ձեզ է հասնում որպես ժառանգության բաժին։ ¹⁵ Սրանք են երկրի սահմանները. հյուսիսայինը սկսվելու է Մեծ ծովից և ձգվելու է դեպի արևելք՝ անցնելով Եմաթի մուտքով և Սեդադայով, ¹⁶ Դամասկոսի ու Եմաթի միջև գտնվող Բերովթով ու Սաբարսիմով, և հասնելու է մինչև Հազեր Ենան, որ գտնվում է Ավրանի սահմանին։ ¹⁷ Սրանք են հյուսիսային սահմանները, որ ծովի կողմից ձգվում են մինչև Հազեր Ենան, Դամասկոսից հարավ, Եմաթը սահման ունենալով հյուսիսից։ ¹⁸ Արևելյան սահմանը կսկսվի Ավրանի և Դամասկոսի սահմանագծից և կձգվի դեպի հարավ։ Հորդանան գետը բնական սահման կլինի Գաղաադի և Իսրայելի միջև, հյուսիսային կետից մինչև Արմավենիների քաղաքը Մեռյալ ծովի մերձակայքում։ Այս կլինի արևելյան սահմանը։ ¹⁹ Հարավային սահմանները կձգվեն Թեմանից՝ Արմավենիների քաղաքից մինչև Մարիմովթ Կադեսի ջրերը, այնտեղից ձգվելով դեպի Մեծ ծովը։ Այս կլինի հարավային սահմանը։ ²⁰ Արևմտյան սահմանը Մեծ ծովի այս մասից կձգվի մինչև Եմաթի մուտքը։ Այս կլինի արևմտյան սահմանը։ ²¹ Դուք երկիրը բաժանելու եք նրանց միջև. ²² վիճակ կգցեք Իսրայելի ցեղերի՝ ձեր և եկվորների ու ձեր մեջ գտնվող պանդուխտների միջև, որոնք ձեր մեջ զավակներ են ունեցել։ Իսրայելի զավակների մեջ սրանք ձեզ համար երկրածինների պես են լինելու. ձեզ հետ են ապրելու, ժառանգությունից են օգտվելու Իսրայելի ցեղերի մեջ։ ²³ Նրանք ձեր մեջ գտնվող պանդուխտների պես պանդուխտներ են լինելու, և դուք նրանց այնտեղ ժառանգություն եք տալու»,- ասում է Տերը՝ Աստված։

48

Հյուսիսային յոթ ցեղերի բաժինները

¹ «Սրանք են ցեղերի սահմանները. հյուսիսային սահմանից սկսած, որ Մեծ ծովից ձգվելու է Եմաթի մուտքով դեպի Հազեր Ենան՝ Դամասկաոսի և Եմաթի սահմանագիծը, յուրաքանչյուր ցեղ արևելքից դեպի արևմուտք մի բաժին պիտի ստանա։ Նախ մի բաժին կստանա Դանի ցեղը։ ² Դանի սահմաններից հարավ, արևելքից մինչև արևմուտք, մեկ բաժին կստանա Ասերի ցեղը։ ³ Ասերից հետո, արևելքից մինչև արևմուտք, մեկ բաժին կստանա Նեփթաղիմի ցեղը։ ⁴ Նեփթաղիմից հետո, արևելքից մինչև արևմուտք, մեկ բաժին կստանա Մանասեի ցեղը։ ⁵ Մանասեից հետո, արևելքից մինչև արևմուտք, մեկ բաժին կստանա Եփրեմի ցեղը։ ⁶ Եփրեմից հետո, արևելքից մինչև արևմուտք, մեկ բաժին կստանա Ռուբենի ցեղը։ ⁷ Ռուբենից հետո, արևելքից մինչև արևմուտք, մեկ բաժին կստանա Հուդայի ցեղը։

⁸ Հուդայի սահմաններից հարավ, արևելքից մինչև արևմուտք, մեկ բաժին կառանձնացվի։ Այդ բաժնի երկարությունը հավասար կլինի մյուս ցեղերի բաժինների երկարությանը, արևելքից մինչև արևմուտք, իսկ լայնությունը կլինի քսանհինգ հազար ձողաչափ։ Այս բաժնում կկառուցվի սրբարանը։ ⁹ Այդ հատվածը, որ տրվելու է սրբարանին, կունենա քսանհինգ հազար ձողաչափ երկարություն ու տասը հազար ձողաչափ լայնություն։ ¹⁰ Քահանաները այս սուրբ բաժնում կունենան հարավային կողմում՝ քսանհինգ հազար ձողաչափ երկարությամբ, արևմուտքում՝ տասը հազար ձողաչափ լայնությամբ, արևելքում՝ տասը հազար ձողաչափ լայնությամբ, իսկ հյուսիսում՝ քսանհինգ հազար ձողաչափ երկարությամբ մի մաս։ Այդ մասի մեջտեղում կլինի սրբարանը։ ¹¹ Այդ մասը Սադովկի որդիներից՝ սրբագործված քահանաներինը կլինի, որոնք Տիրոջ տան պահպանությունն են կատարում, որոնք չմոլորվեցին իսրայելացիների մոլորությամբ, ինչպես մոլորվեցին ղևտացիները։ ¹² Այդ պատճառով նրանցը կլինի մի առանձնացված մաս, մի սուրբ մաս ղևտացիների սահմանների մոտ։ ¹³ Քահանաների մասին սահմանակից կլինի ղևտացիների մասը քսանհինգ հազար ձողաչափ երկարությամբ ու տասը հազար ձողաչափ լայնությամբ։ ¹⁴ Երկրի այս բաժնի ոչ մի հատված չի վաճառվի, ոչ էլ կփոխանակվի, որովհետև այն Տիրոջն է նվիրված։ ¹⁵ Իսկ քսանհինգ հազարից մնացած հինգ հազար լայնությամբ հողամասը կպատկանի քաղաքին՝ իբրև բնակավայր ու իբրև արոտավայր։ Քաղաքը դրա մեջտեղում կլինի։ ¹⁶ Սրանք են նրա չափերը. հյուսիսային կողմից՝ չորս հազար հինգ հարյուր ձողաչափ, հարավային կողմից՝ չորս հազար հինգ հարյուր, արևելյան կողմից՝ չորս հազար հինգ հարյուր և արևմտյան կողմից՝ չորս հազար հինգ հարյուր։ ¹⁷ Քաղաքի շրջակա ազատ տարածքը կլինի. հյուսիսի ուղղությամբ՝ երկու հարյուր հիսուն ձողաչափ, հարավի ուղղությամբ՝ երկու հարյուր հիսուն, արևելքի ուղղությամբ՝ երկու հարյուր հիսուն և արևմուտքի ուղղությամբ՝ երկու հարյուր հիսուն։ ¹⁸ Իսկ մնացած այն տարածությունը, որ մոտ է սուրբ տարածքին, արևելքի ուղղությամբ կունենա տասը հազար ձողաչափ երկարություն, արևմուտքի ուղղությամբ՝ տասը հազար։ Դա ընծա կլինի սրբատեղիներին։ Նրա բերքը քաղաքի գործավորի համար հաց կլինի. ¹⁹ անկախ թե Իսրայելի որ ցեղից են, քաղաքի բոլոր գործավորներն էլ կմշակեն այն։

²⁰ Այսպիսով, Տիրոջը նվիրված տարածքը քաղաքի բնակելի տարածքի հետ միասին, որպես սուրբ տարածք, քառակուսի մի տարածություն կլինի՝ քսանհինգ հազար ձողաչափ անգամ քսանհինգ հազար ձողաչափ։ ²¹ Դրանից ավելացածը իշխանինը կլինի։ Նույն տեղից քսանհինգ հազար ձողաչափ լայնությամբ մինչև արևելյան կողմի սահմանները և քսանհինգ հազար ձողաչափ լայնությամբ արևմտյան կողմի սահմանները իշխանինը կլինեն։ Այսպիսով, Տիրոջը նվիրված մասը և սրբարանը, որ կկառուցվի դրա մեջտեղում, կլինի առանձնահատուկ բաժնի կենտրոնում։ ²² Ղևտացիների մասը և քաղաքի մասը իշխանի մասը կկիսեն երկու հատվածի, որ կտարածվի հյուսիսից Հուդայի, հարավից Բենիամինի բաժինների միջև»։

Հարավային հինգ ցեղերի բաժինները

²³ «Ինչ վերաբերում է մնացած ցեղերին, ապա արևելյան կողմերից մինչև արևմուտք մեկ բաժին կլինի Բենիամինի ցեղին։ ²⁴ Բենիամինի սահմաններից հարավ՝ արևելքից մինչև արևմուտք, մեկ բաժին կստանա Շմավոնի ցեղը։ ²⁵ Շմավոնի սահմաններից հարավ՝ արևելքից մինչև արևմուտք, մեկ բաժին կստանա Իսաքարի ցեղը։ ²⁶ Իսաքարի սահմաններից հարավ՝ արևելքից մինչև արևմուտք, մեկ բաժին կստանա Զաբուղոնի ցեղը։ ²⁷ Զաբուղոնի սահմաններից հարավ՝ արևելքից մինչև արևմուտք, մեկ բաժին կստանա Գադի ցեղը։ ²⁸ Գադի հարավային սահմանը՝ Թեմանից մինչև Մարիմովթ-Կադեսի ջրերը և մինչև Մեծ ծովը, կլինի երկրի հարավային սահմանը։ ²⁹ Ահա սա է այն երկիրը, որ վիճակով բաժանելու եք Իսրայելի ցեղերին, և սրանք են նրանց բաժինները»,- ասում է Տերը՝ Աստված։

Երուսաղեմի դռները

³⁰ «Այժմ քաղաքի ելքի ու մուտքի դռների մասին. հյուսիսային ուղղությամբ, որ չորս հազար հինգ հարյուր ձողաչափ երկարություն կունենա, ³¹ երեք դուռ կլինի։ Քաղաքի դռները պիտի կոչվեն Իսրայելի ցեղերի անուններով։ Հյուսիսային կողմում. մի դուռը՝ Ռուբենի անունով, մի դուռը՝ Հուդայի և մի դուռը՝ Ղևիի։ ³² Արևելքի ուղղությամբ, որ նույնպես չորս հազար հինգ հարյուր ձողաչափ երկարություն կունենա, երեք դուռ կլինի. մի դուռը՝ Հովսեփի անունով, մի դուռը՝ Բենիամինի և մի դուռը՝ Դանի։ ³³ Հարավի ուղղությամբ, որը չորս հազար հինգ հարյուր ձողաչափ կունենա, երեք դուռ կլինի. մի դուռը՝ Շմավոնի անունով, մի դուռը՝ Իսաքարի և մի դուռը՝ Զաբուղոնի։ ³⁴ Արևմուտքի ուղղությամբ էլ, որը չորս հազար հինգ հարյուր ձողաչափ կունենա, երեք դուռ կլինի. մի դուռը՝ Գադի անունով, մի դուռը՝ Ասերի և մի դուռը՝ Նեփթաղիմի։ ³⁵ Ընդհանուր շրջագիծը՝ տասնութ հազար ձողաչափ։ Եվ այդ օրից քաղաքի անունը կլինի “Տերն այնտեղ է”»։

ԴԱՆԻԵԼԻ ՄԱՐԳԱՐԵՈՒԹՅՈՒՆԸ

13

Դանիելի դատաստանը

¹ [71]Մի մարդ էր բնակվում Բաբելոնում, և նրա անունը Հովակիմ էր։ ² Եվ կին առավ իրեն Շուշան անունով. Քեղկիայի դուստրն էր՝ շատ գեղեցիկ, Տիրոջից երկյուղած։ ³ Նրա ծնողներն արդար էին և իրենց դստերը կրթել էին ըստ Մովսեսի օրենքների։ ⁴ Հովակիմը չափազանց հարուստ էր։ Նա մի պարտեզ ուներ իր ապարանքին մոտ, և հրեաները նրա մոտ էին հավաքվում, որովհետև բոլորից առավել անվանի էր։ ⁵ Եվ երևացին այդ ժողովրդից երկու ծերեր՝ այդ տարվա դատավորները, որոնց մասին Տերն ասել էր. «Անօրենությունը ելավ Բաբելոնից՝ ծեր դատավորներից, որոնք կարծում էին, թե առաջնորդում են ժողովրդին»։ ⁶ Նրանք մշտապես Հովակիմի տանն էին, և բոլորը նրանց մոտ էին գալիս դատաստանի։ ⁷ Եվ լինում էր, երբ ժողովուրդը կեսօրին հեռանում էր, Շուշանը մտնում ու զբոսնում էր իր ամուսնու պարտեզում։ ⁸ Այն երկու ծերերը միշտ տեսնում էին նրան, որ մտնում ու զբոսնում էր, և ցանկացան նրան. ⁹ շեղեցին իրենց միտքն ու խոտորեցրին իրենց աչքերը՝ չնայելու երկինք և չհիշելու արդար դատաստանը։ ¹⁰ Երկուսն էլ սիրահարվել էին նրան, բայց միմյանց չէին պատմում իրենց ցավերը, ¹¹ որովհետև ամաչում էին պատմել իրենց ցանկությունը, քանի որ ուզում էին նրա հետ լինել։ ¹² Եվ հաճախ էին սպասում նրան՝ մշտապես տեսնելու նրան։ ¹³ Եվ ասացին միմյանց. «Գնանք տուն, որովհետև ճաշի ժամ է»։ Ելան, բաժանվեցին իրարից ¹⁴ և դարձյալ նույն տեղը եկան՝ միմյանց մոտ, և իրար հարցնելով պատճառը՝ խոստովանեցին իրենց ցանկությունը։ Ապա իրար հետ ժամադրվեցին, թե ե՛րբ կարող են նրան մենակ գտնել։

¹⁵ Եվ այնպես եղավ, որ մի հարմար օր, երբ նրանք սպասում էին նրան, միայն երկու աղջիկների հետ նա եկավ, մտավ, ինչպես որ երեկ և նախորդ օրը, և ցանկացավ լողանալ այն պարտեզում, որովհետև տոթ էր։ ¹⁶ Ոչ ոք չկար այնտեղ, բացի միայն երկու թաքնված ծերերից, որ սպասում էին նրան։ ¹⁷ Եվ ասաց աղջիկներին. «Գնացե՛ք, յուղ և օճա՛ռ բերեք ինձ համար և փակե՛ք պարտեզի դռները, որպեսզի լողանամ»։ ¹⁸ Եվ արեցին, ինչպես ասաց իրենց. փակեցին պարտեզի դռները և ելան դռների կողմով՝ բերելու այն, ինչ հրամայեց իրենց, և չտեսան ծերերին, քանի որ թաքնված էին։ ¹⁹ Եվ այնպես եղավ, երբ աղջիկները դուրս ելան, երկու ծերերը վեր կացան, դիմեցին դեպի նա ²⁰ և ասացին. «Ահա այս պարտեզի դռները փակված են, և չկա մեկը, որ տեսնի մեզ։ Մենք ցանկացել ենք քեզ։ Դրա համար էլ դու, մեզ հետ համաձայնվելով, եղի՛ր մեզ հետ, ²¹ այլապես կվկայենք քո մասին, թե մի պատանի կար քեզ հետ, որի համար էլ աղջիկներին հեռացրիր քեզնից»։ ²² Շուշանը հոգոց հանեց և ասաց. «Տագնապ է ինձ բոլոր կողմերից. եթե դա անեմ, մահ է ինձ համար, իսկ եթե չանեմ, չեմ ազատվելու ձեր ձեռքից։ ²³ Բայց ավելի լավ է ես դա չանեմ և ընկնեմ ձեր ձեռքը, քան թե մեղք գործեմ Տիրոջ առաջ»։ ²⁴ Եվ Շուշանը բարձրաձայն աղաղակեց. նրա հետ աղաղակեցին և երկու ծերերը։ ²⁵ Ապա մեկը գնաց, բացեց պարտեզի դռները։ ²⁶ Երբ ընտանիքը լսեց ճչի ձայնն այն պարտեզում, դռան կողմից ներս ընկավ՝ տեսնելու, թե ի՛նչ պատահեց նրա հետ։ ²⁷ Երբ ծերերն ասացին իրենց խոսքը, ծառաները սաստիկ ամոթահար եղան, որովհետև երբեք այնպիսի բաներ չէին ասվել Շուշանի մասին։

²⁸ Եվ այնպես եղավ, որ հաջորդ առավոտյան, երբ ժողովուրդը եկավ նրա ամուսնու՝ Հովակիմի մոտ, եկան նաև Շուշանի մասին անօրեն միտք ունեցող երկու ծերերը՝ սպանելու նրան, ²⁹ և ասացին ժողովրդի առաջ. «Այստե՛ղ ուղարկեք Շուշանին՝ Քեղկիայի դստերը, որ Հովակիմի կինն է»։ Եվ նրանք ուղարկեցին։ ³⁰ Եկան նա և նրա ծնողները, նրա որդիներն ու նրա բոլոր ազգականները։ ³¹ Շուշանը շատ քնքուշ էր ու տեսքով գեղեցիկ։ ³² Անօրենները հրամայեցին առանց քողի թողնել նրան, քանի որ ծածկված էր քողով, որպեսզի հագենան նրա գեղեցկությամբ։ ³³ Լաց էին լինում յուրայինները և բոլոր նրանք, որ ճանաչում էին նրան։ ³⁴ Վեր կացան երկու ծերերը ժողովրդի միջից և իրենց ձեռքերը դրեցին նրա գլխին։ ³⁵ Նա լաց լինելով նայեց երկինք, որովհետև նրա սիրտը հույսը դրել էր Տիրոջ վրա։ ³⁶ Երկու ծերերն ասացին. «Մինչ մենք մենակ զբոսնում էինք պարտեզում, նա այնտեղ մտավ երկու աղջիկների հետ, փակեց պարտեզի դռները և բաց թողեց աղջիկներին։ ³⁷ Եվ մի պատանի, որ թաքնված էր, եկավ նրա մոտ ու եղավ նրա հետ։ ³⁸ Մենք պարտեզի մի անկյունում էինք։ Երբ տեսանք անօրենությունը, ընթացանք նրանց մոտ ³⁹ և տեսանք դրանց՝ իրար հետ լինելը։ Նրան չկարողացանք բռնել, որովհետև մեզանից ավելի ուժեղ էր. դռները բացեց ու դուրս փախավ։ ⁴⁰ Սրան, որ բռնեցինք, հարցրինք, թե ո՛վ էր այն պատանին, ⁴¹ սակայն չկամեցավ մեզ պատմել. այս ենք վկայում»։ Եվ ատյանը հավատաց նրանց՝ որպես ժողովրդի ծերերի և դատավորների, և նրան դատապարտեցին մեռնելու։ ⁴² Շուշանը բարձրաձայն աղաղակեց և ասաց. «Ո՛վ հավիտենական ծածկագետ Աստված, որ գիտես ամեն ինչ, նախքան դրանց լինելը։ ⁴³ Դու գիտես, որ սուտ են վկայում իմ մասին։ Ահա մեռնում եմ, որ ոչինչ չեմ արել, ինչ որ դրանք նյութում են իմ դեմ»։ ⁴⁴ Եվ Տերը լսեց նրա ձայնը։

⁴⁵ Եվ մինչ նրան տանում էին կորստյան մատնելու, Աստված արթնացրեց Սուրբ Հոգին մի մանուկ տղայի մեջ, որի անունը Դանիել էր։ ⁴⁶ Եվ բարձրաձայն աղաղակեց և ասաց. «Ես անպարտ եմ դրա արյունից»։ ⁴⁷ Ողջ ժողովուրդը շրջվեց դեպի նա և ասաց. «Ի՞նչ է այդ խոսքը, որ դու ասացիր»։ ⁴⁸ Եվ նա կանգնեց նրանց մեջ և ասաց. «Այդպես անմի՞տ եք, Իսրայելի՛ որդիներ. ո՛չ քննեցիք, ո՛չ էլ իրավահասու եղաք և դատապարտեցի՞ք Իսրայելի այդ դստերը։ ⁴⁹ Վերադարձե՛ք ատյան, որովհետև դրանք սուտ վկայեցին նրա մասին»։ ⁵⁰ Ժողովուրդն անմիջապես վերադարձավ, և ծերերն ասացին նրան. «Ե՛կ, նստի՛ր մեր մեջ և պատմի՛ր մեզ, որովհետև Աստված քե՛զ տվեց ավագությունը»։ ⁵¹ Դանիելն ասաց նրանց. «Դրանց հեռացրե՛ք իրարից, և քննենք դրանց»։ ⁵² Երբ իրարից հեռացվեցին, կանչեց նրանցից մեկին և ասաց նրան. «Ա՛յ չարության օրերով ծերացած, քո մեղքերը, որ գործում էիր հնում, ահա այժմ եկան հասունացան, ⁵³ քանի որ անիրավությամբ էիր դատաստան անում. դատապարտում էիր անմեղներին և ազատ արձակում վնասակարներին, ուր Աստված ասել էր, թե անմեղին և արդարին չսպանես։ ⁵⁴ Բայց արդ, եթե տեսել ես դրանց, ասա՛, ո՞ր ծառի տակ բռնեցիր դրանց, մինչ խոսում էին իրար հետ»։ Եվ նա ասաց. «Հերձիի[72] տակ»։ ⁵⁵ Դանիելն ասաց. «Բարվոք ստեցիր քո գլխով։ Ահա Աստծու հրեշտակը, հրաման առնելով, քեզ մեջտեղից կհերձի»։ ⁵⁶ Եվ դուրս հանեց նրան։ Հրամայեց բերել մյուսին և ասաց նրան. «Զավա՛կ Քանանի և ո՛չ Հուդայի. նրա գեղեցկությունը խաբե՞ց քեզ, և ցանկությունը հեղաշրջե՞ց քո սիրտը։ ⁵⁷ Այդպե՞ս էիք անում Իսրայելի դուստրերին, և նրանք վախից մերձենում էին ձեզ, սակայն Հուդայի այդ դուստրը հանձն չառավ ձեր անօրենությունները։ ⁵⁸ Բայց լավ, արդ ասա՛, ո՞ր ծառի տակ բռնեցիր դրանց, մինչ խոսում էին իրար հետ»։ ⁵⁹ Եվ նա ասաց. «Սղոցիի[73] տակ»։ Դանիելն ասաց նրան. «Դու էլ բարվոք ստեցիր քո գլխով, քանի որ ահա Աստծու հրեշտակը կանգնած է՝ մերկ սուրը ձեռքին՝ քեզ մեջտեղից սղոցելու, որպեսզի սատկեցնի քեզ»։ ⁶⁰ Ամբողջ ժողովուրդը մեծաձայն աղաղակեց, և օրհնաբանեցին Աստծուն, որ փրկում է իրեն հուսացողներին։ ⁶¹ Եվ հարձակվեցին այն երկու ծերերի վրա, քանի որ Դանիելը նրանց հանդիմանեց իրենց բերանների սուտ վկայություններով, և վարվեցին նրանց հետ ըստ Մովսեսի օրենքի, ինչպես ընկերոջ դեմ չարության մտադրություն ունեցողների, ⁶² և սպանեցին նրանց։ Եվ այդ օրը մի արդար արյուն փրկվեց։ ⁶³ Իսկ Քեղկիան և նրա կինն օրհնաբանեցին Աստծուն իրենց դստեր՝ Շուշանի համար, նրա ամուսնու՝ Հովակիմի և նրա բոլոր ազգականների հետ, քանի որ գարշելի բաներ չգտնվեցին նրա մեջ։ ⁶⁴ Եվ Դանիելն այդ օրվանից և դրանից հետո մեծարվեց ժողովրդի առաջ։

1

Երկրորդ տեսիլք

Դանիելի և ընկերների պատմությունը

¹ Հուդայի արքա Հովակիմի թագավորության երրորդ տարում բաբելացիների Նաբուքոդոնոսոր արքան եկավ Երուսաղեմ և պաշարեց այն։ ² Տերը նրա ձեռքը տվեց Հուդայի արքա Հովակիմին և Աստծու տան սպասքի մի մասը, և նա դրանք տարավ Սենաարի երկիրը և սպասքը դրեց իր աստծու տան գանձարանում։ ³ Թագավորն իր ներքինապետ Ասփանեզին ասաց, որ Իսրայելի գերության որդիներից, թագավորական սերնդից և ազնվականներից բերի ⁴ անարատ մանուկների՝ գեղեցիկ դեմքով, ամեն իմաստության խելահաս, գիտության հմուտ, հանճարամիտ և ուժեղ, տաճարում՝ թագավորի առաջ կանգնելու և դպրություն ու քաղդեացիների լեզուն նրանց ուսուցանելու համար։ ⁵ Թագավորը նրանց համար սահմանեց ամենօրյա ուտելիքի բաժին արքայի սեղանից և գինուց, որ ինքն էր խմում՝ նրանց երեք տարի սնելու և ապա թագավորի առաջ կանգնեցնելու համար։ ⁶ Նրանց մեջ էին Հուդայի որդիներից Դանիելը, Անանիան, Միսայելը և Ազարիան։ ⁷ Ներքինապետը նրանց անուններ տվեց. Դանիելին՝ Բաղդասար, Անանիային՝ Սեդրաք, Միսայելին՝ Միսաք և Ազարիային՝ Աբեդնագով։ ⁸ Սակայն Դանիելն իր մտքում դրեց չճաշակել թագավորի սեղանից, ոչ էլ նրա խմած գինուց և աղաչեց ներքինապետին, որ չճաշակի։ ⁹ Եվ Աստված շնորհ և ողորմություն արեց Դանիելին ներքինապետի առաջ։ ¹⁰ Եվ ներքինապետն ասաց Դանիելին. «Ես երկնչում եմ իմ տեր արքայից, որ ձեզ համար սահմանեց ձեր կերակուրն ու ըմպելիքը. գուցե տեսնի ձեր դեմքերն ավելի դալուկ, քան ձեր հասակակից ուրիշ մանուկներինը, և ինձ գլխով պարտական դարձնեք թագավորի առաջ»։ ¹¹ Դանիելն ասաց պահապանին, որին ներքինապետը նշանակել էր Դանիելի, Անանիայի, Միսայելի և Ազարիայի վրա. ¹² «Լավ, տասը օր փորձի՛ր քո ծառաներին. թող մեզ ընդեղեն տան՝ ուտենք, և ջուր՝ խմենք։ ¹³ Ապա կերևա քո առաջ մեր գույնը և այն մանուկների գույնը, որ ուտում են թագավորի սեղանից, և ինչպես տեսնես, վարվի՛ր քո ծառաների հետ»։ ¹⁴ Նա անսաց նրանց և տասը օր փորձեց նրանց։ ¹⁵ Եվ տասն օրերի լրանալուց հետո նրանց երեսները նրան ավելի լավ երևացին, և մարմնով՝ ավելի ուժեղ, քան բոլոր այն մանուկներինը, որ ուտում էին թագավորի սեղանից։ ¹⁶ Ամեղասադը վերցնում էր նրանց ընթրիքն ու նրանց խմելու գինին և ընդեղեն էր տալիս չորս մանուկներին։ ¹⁷ Աստված նրանց իմաստություն ու հանճար տվեց ամեն տեսակի դպրության և իմաստության մեջ, և Դանիելը խելամուտ էր բոլոր տեսիլքներին ու երազներին։ ¹⁸ Օրերի լրանալուց հետո թագավորը հրաման տվեց բերել նրանց, և ներքինապետը նրանց բերեց Նաբուքոդոնոսորի առաջ, ¹⁹ և արքան խոսեց նրանց հետ։ Եվ բոլորի մեջ չգտնվեցին Դանիելի, Անանիայի, Միսայելի և Ազարիայի նման, և կանգնել էին թագավորի առաջ։ ²⁰ Իմաստության ու գիտության բոլոր բաներում, որ թագավորը նրանց հարցնում էր, նրանց տասնապատիկ առավել էր գտնում, քան բոլոր գուշակներին ու մոգերին, որ նրա թագավորության մեջ էին։ ²¹ Եվ Դանիելը մնաց մինչև Կյուրոս արքայի առաջին տարին։

2

Երրորդ տեսիլք

Նաբուքոդոնոսորի առաջին երազը

¹ Իր թագավորության երկրորդ տարում Նաբուքոդոնոսորը երազ տեսավ, և նրա հոգին ցնորվեց, ու քունը փախավ նրանից։ ² Եվ թագավորն ասաց. «Կանչե՛ք գուշակներին, մոգերին, կախարդներին ու քաղդեացիներին[74]՝ թագավորին պատմելու իր երազը»։ Եկան և կանգնեցին թագավորի առաջ։ ³ Եվ թագավորն ասաց նրանց. «Երազ տեսա, և իմ հոգին ցնորվեց՝ խելամուտ լինելու երազին»։ ⁴ Քաղդեացիները թագավորի հետ խոսեցին ասորերեն.[75] «Արքա՛, հավիտյա՛ն ապրիր։ Դու ասա՛ երազը քո ծառաներին, և դրա մեկնությունը կասենք»։ ⁵ Արքան պատասխան տվեց և ասաց քաղդեացիներին. «Խոսքը դուրս ելավ ինձնից. արդ, եթե ինձ ցույց չտաք երազն ու դրա մեկնությունը, կորստյան կմատնվեք, և ձեր տները կավերվեն։ ⁶ Իսկ եթե երազն ու դրա մեկնությունը ցույց տաք ինձ, պարգևներ, բազում ընծաներ ու պատիվներ կստանաք ինձնից, բայց միայն թե երազն ու դրա մեկնությունը հայտնե՛ք ինձ»։ ⁷ Կրկին պատասխան տվեցին և ասացին. «Թող արքան երազն ասի իր ծառաներին, և դրա մեկնությունը կհայտնենք»։ ⁸ Արքան պատասխան տվեց և ասաց. «Ճշմարտապես գիտեմ, որ ժամավաճառ եք լինում, որովհետև տեսաք, որ խոսքը դուրս ելավ ինձնից։ ⁹ Արդ, եթե երազը չպատմեք ինձ, գիտեմ, որ միաբանվել եք սուտ և եղծարար բան ասելու իմ առաջ, մինչև ժամանակն անցնի։ Ասացե՛ք ինձ իմ երազը, և կիմանամ, որ դրա մեկնությունն էլ եք ինձ հայտնելու»։ ¹⁰ Կրկին պատասխան տվեցին քաղդեացիները թագավորի առաջ և ասացին. «Երկրի վրա չկա մի մարդ, որ կարող է հայտնել թագավորի խնդիրը, քանի որ ամեն մեծ թագավոր և իշխան այդպիսի բան չի հարցնում գուշակի, մոգի և քաղդեացու, ¹¹ որովհետև բանը, որ արքան հարցնում է, ծանր է, և չկա ուրիշ մեկը, որ այն պատմի արքայի առաջ, բացի աստվածներից, որոնք բնակություն չունեն որևէ մարմնավորի մեջ»։

Աստված հայտնում է Դանիելին երազի մեկնությունը

¹² Այն ժամանակ թագավորը բարկությամբ ու սաստիկ զայրույթով ասաց կոտորել բաբելացիների բոլոր իմաստուններին։ ¹³ Հրամանը ելավ, և իմաստունները կոտորվում էին։ Փնտրում էին նաև Դանիելին ու նրա ընկերներին՝ սպանելու։ ¹⁴ Այն ժամանակ Դանիելը խորհրդի և խրատի համար խոսեց արքայի դահճապետի՝ Արիովքի հետ, որ ելել կոտորում էր բաբելացիների իմաստուններին։ ¹⁵ Հարցրեց նրան և ասաց. «Թագավորի իշխա՛ն, այդ խիստ հրամանն ինչո՞ւ ելավ արքայի կողմից»։ Եվ Արիովքը բանը հայտնեց Դանիելին։ ¹⁶ Եվ Դանիելն ասաց. «Մտի՛ր և աղաչի՛ր արքային», որպեսզի իրեն ժամանակ տա, և դրա մեկնությունը պատմի թագավորին։ ¹⁷ Ապա Դանիելը մտավ իր տունը և բանը հայտնեց իր ընկերներին՝ Անանիային, Ազարիային և Միսայելին։ ¹⁸ Եվ գթություն էին խնդրում երկնքի Աստծուց, որպեսզի Դանիելը և իր ընկերները կորստյան չմատնվեն բաբելացիների մնացած իմաստունների հետ։ ¹⁹ Այդ ժամանակ, գիշերվա տեսիլքի մեջ, Դանիելին հայտնվեց խորհուրդը։ Դանիելն օրհնաբանեց երկնքի Աստծուն ²⁰ և ասաց.

«Թող օրհնյա՜լ լինի Տիրոջ անունը հավիտենից մինչև հավիտյան,

որովհետև նրանն է իմաստությունը, հանճարը և զորությունը։

²¹ Նա է փոփոխում ժամանակներն ու ժամերը։

Թագավորներ է կարգում և փոփոխում,

իմաստություն է տալիս իմաստուններին

և միտք՝ հանճարներին։

²² Ինքն է հայտնում խորին բաներն ու գաղտնիքները,

գիտի՝ ի՛նչ կա խավարի մեջ,

և լույսը նրա հետ է։

²³ Գոհաբանում և օրհնաբանում եմ քեզ, մեր հայրերի՛ Աստված,

որովհետև իմաստություն և զորություն տվեցիր ինձ

և հայտնեցիր ինձ, ինչ որ մենք աղոթքով խնդրեցինք քեզնից,

և թագավորի տեսիլքը ցույց տվեցիր ինձ»։

Դանիելը մեկնում է թագավորի երազը

²⁴ Դանիելը մտավ Արիովքի մոտ, որին թագավորը նշանակել էր՝ կորստյան մատնելու բաբելացիների իմաստուններին, և ասաց նրան. «Մի՛ կոտորիր բաբելացիների իմաստուններին, այլ ինձ տա՛ր թագավորի առաջ, և ես մեկնությունը կհայտնեմ թագավորին»։ ²⁵ Այն ժամանակ Արիովքը Դանիելին շտապ տարավ թագավորի մոտ և ասաց նրան. «Հուդայի երկրի գերության որդիների միջից գտա մի մարդու, որ մեկնությունը կհայտնի արքային»։ ²⁶ Թագավորը պատասխան տվեց և ասաց Դանիելին, որի անունը Բաղդասար էր. «Կկարողանա՞ս ինձ պատմել երազը, որ տեսա, և դրա մեկնությունը»։ ²⁷ Դանիելը պատասխան տվեց թագավորի առաջ և ասաց. «Այդ խորհուրդը, որն արքան հարցնում է, իմաստունները, մոգերը, գուշակներն ու հմայողները չեն կարող պատմել արքայի առաջ, ²⁸ այլ կա Աստված երկնքում, որ հայտնում է խորհուրդները և ցույց տվեց Նաբուքոդոնոսոր արքային, ի՛նչ որ լինելու է վերջին օրերում։ Երազը և քո գլխի տեսիլքը քո անկողնում այս է, արքա՛։ ²⁹ Քո մտքերը տանջահարում էին քեզ քո անկողնում, թե ի՛նչ է լինելու սրանից հետո, և խորհուրդներ հայտնողը ցույց տվեց քեզ՝ ի՛նչ է լինելու։ ³⁰ Խորհուրդն ինձ հայտնվեց ոչ թե ինչ-որ իմաստության պատճառով, որ կա իմ մեջ ավելի, քան բոլոր կենդանի էակների մեջ, այլ արքային ցույց տալու մեկնությունը, որպեսզի ճանաչես քո սրտի խորհուրդները։ ³¹ Դու, արքա՛, տեսնում էիր, և ահա մի արձան, մեծ արձան. նրա երեսն ու նրա տեսքը շատ զարհուրելի էր, և կանգնած էր քո առաջ։ Շատ ահավոր էր արձանը, ³² որի գլուխը մաքուր ոսկուց էր, նրա ձեռքերը, կուրծքն ու բազուկները՝ արծաթե, նրա մեջքն ու ազդրերը՝ պղնձե, ³³ սրունքները՝ երկաթե, ոտքերը՝ կեսը՝ երկաթից, և կեսը՝ խեցուց։ ³⁴ Նայում էիր, մինչև առանց ձեռք դիպչելու մի վեմ պոկվեց և հարվածեց արձանին՝ երկաթե և խեցե ոտքերին, և ամբողջությամբ փշրեց դրանք։ ³⁵ Այդ ժամանակ առհասարակ փշրվեցին խեցին ու երկաթը, պղինձը, արծաթն ու ոսկին և դարձան ամառային կալի փոշու պես, և հողմի սաստկությունը քշեց դրանք, և տեղ չէր գտնվում դրանց համար։ Եվ վեմը, որ հարվածեց արձանին, դարձավ մեծ լեռ ու լցրեց ամբողջ երկիրը։ ³⁶ Սա է երազը, և դրա մեկնությունը կասենք արքայի առաջ։ ³⁷ Դու արքա ես, արքայի՛ց արքա, որին երկնքի Աստված հզոր ու փառավոր թագավորություն տվեց, ³⁸ և բոլոր վայրերով մեկ, որտեղ բնակվում են մարդկանց որդիները, վայրի գազաններին, երկնքի թռչուններին ու ծովի ձկներին քո ձեռքը տվեց և քեզ ամեն ինչի տեր կարգեց։ Դու ես ոսկե գլուխը, ³⁹ բայց քեզնից հետո վեր կհառնի ուրիշ թագավորություն՝ քեզնից ավելի ցածր, և երրորդ թագավորությունը, որ պղինձն է, կտիրի ողջ երկրին։ ⁴⁰ Իսկ չորրորդ թագավորությունը երկաթի պես ամուր կլինի։ Ինչպես որ երկաթն է փշրում և մանրացնում ամեն ինչ, նույնպես նա կփշրի և կմանրացնի ամեն բան։ ⁴¹ Եվ որ տեսնում էիր ոտքերն ու մատները, կեսը՝ երկաթից, և կեսը՝ խեցուց, թագավորությունը կբաժանվի, և նրա մեջ երկաթի արմատից կլինի, ինչպես որ տեսնում էիր երկաթը խեցուն խառնված։ ⁴² Ոտքերի մատները՝ մի մասը՝ երկաթից, և մի մասը՝ խեցուց. թագավորության մի մասը հզոր կմնա, և նրանից կլինի ջախջախվածը։ ⁴³ Որ տեսնում էիր երկաթը խեցուն խառնված, կխառնվեն մարդկանց սերնդի հետ, բայց իրար չեն հարվի, ինչպես որ երկաթը չի խառնվում խեցուն։

⁴⁴ Այդ թագավորների օրերին երկնքի Աստված վեր կհանի մի թագավորություն, որ հավիտյան չպիտի կործանվի, և նրա թագավորությունն ուրիշ ազգի չպիտի մնա. պիտի փշրի և ցիրուցան անի բոլոր թագավորությունները, և ինքը պիտի մնա հավիտյան։ ⁴⁵ Ինչպես տեսնում էիր, թե լեռից առանց ձեռք դիպչելու վեմ պոկվեց և փշրեց խեցին ու երկաթը, պղինձը, արծաթն ու ոսկին. մեծն Աստված ցույց տվեց արքային, ինչ որ լինելու է հետո։ Ճիշտ է երազը, և արժանահավատ՝ դրա մեկնությունը»։

Թագավորը մեծարում է Դանիելին

⁴⁶ Այն ժամանակ Նաբուքոդոնոսոր արքան իր երեսի վրա ընկավ և երկրպագեց Դանիելին, ապա հրամայեց զոհեր և անուշահոտ խնկեր մատուցել նրա համար։ ⁴⁷ Թագավորը պատասխան տվեց և ասաց Դանիելին. «Արդարև, ձեր Աստվածը, նա՛ է աստվածների Աստվածը, տերերի Տերը և թագավորների Թագավորը, որ հայտնում է խորհուրդները, քանի որ կարողացար հայտնել այդ խորհուրդը»։ ⁴⁸ Եվ թագավորը մեծարեց Դանիելին, մեծամեծ ու բազում պարգևներ տվեց նրան և նրան բաբելացիների նահանգի վրա, նախարարների իշխան և բաբելացիների բոլոր իմաստունների վրա կարգեց։ ⁴⁹ Դանիելն արքային խնդրեց, և նա բաբելացիների նահանգի գործերի վրա կարգեց Սեդրաքին, Միսաքին և Աբեդնագովին։ Եվ Դանիելը մնում էր արքայի պալատում։

3

Չորրորդ տեսիլք

Թագավորը հրամայում է երկրպագել ոսկե արձանին

¹ Նաբուքոդոնոսոր արքայի տասնութերորդ տարում նա ոսկե մի արձան պատրաստեց. նրա բարձրությունը վաթսուն կանգուն էր, նրա լայնությունը՝ վեց կանգուն, և այն կանգնեցրեց բաբելացիների նահանգում՝ Դեերայի դաշտում։ ² Եվ ուղարկեց հավաքել զորավարներին, զորագլուխներին և կուսակալներին, պետերին, իշխանավորներին, գործակալներին և նահանգների բոլոր իշխաններին՝ գալու արձանի նավակատիքին, որ կանգնեցրել էր Նաբուքոդոնոսոր արքան։ ³ Հավաքվեցին կուսակալները, զորավարներն ու զորագլուխները, պետերը, իշխանավորները, մեծավորները, գործակալներն ու նահանգների բոլոր իշխանները՝ գալու արձանի նավակատիքին, որ կանգնեցրել էր Նաբուքոդոնոսոր արքան։ Եվ կանգնել էին արձանի առաջ, որ կանգնեցրել էր Նաբուքոդոնոսոր արքան։ ⁴ Մունետիկն ուժեղ գոչում էր և ասում. «Ձեզ է ասվում, ազգե՛ր, ժողովուրդնե՛ր և լեզունե՛ր։ ⁵ Երբ լսեք փողի, սրնգի, թմբուկի, քնարի, տավղի, միասնական երգերի և բոլոր տեսակի երաժշտությունների ձայնը, կընկնեք և կերկրպագեք արձանին, որ կանգնեցրել է Նաբուքոդոնոսոր արքան։ ⁶ Իսկ ով չընկնի-չերկրպագի, նույն ժամին կնետվի բորբոքված կրակի հնոցը»։ ⁷ Եվ այնպես եղավ, երբ ազգերը լսեցին փողի, սրնգի, տավղի, նվագարանների և բոլոր տեսակի երաժշտությունների ձայնը, բոլոր ազգերը, ժողովուրդներն ու լեզուներն ընկնում ու երկրպագում էին ոսկե արձանին, որ կանգնեցրել էր Նաբուքոդոնոսոր արքան։

Դանիելի երեք ընկերները հավատարիմ են մնում Տիրոջը

⁸ Այն ժամանակ մոտեցան քաղդեացի մարդիկ ու Նաբուքոդոնոսորին չարախոսեցին հրեաների մասին ⁹ և ասացին. «Արքա՛, հավիտյա՛ն ապրիր։ ¹⁰ Դու հրաման տվեցիր ամեն մարդու, որ երբ լսի փողի, սրնգի, քնարի, տավղի, նվագարանների և բոլոր տեսակի երաժշտությունների ձայնը ¹¹ և չընկնի-չերկրպագի ոսկե արձանին, կնետվի բորբոքված կրակի հնոցը։ ¹² Արդ, այստեղ կան հրեա մարդիկ, որոնց նշանակեցիր բաբելացիների նահանգի գործերի վրա՝ Սեդրաքը, Միսաքը և Աբեդնագովը, որ չհնազանդվեցին քո հրամանին, արքա՛. ո՛չ պաշտում են քո աստվածներին, ո՛չ էլ երկրպագում ոսկե արձանիդ, որ կանգնեցրիր։ ¹³ Այն ժամանակ Նաբուքոդոնոսորը ցասումով ու բարկությամբ հրամայեց բերել Սեդրաքին, Միսաքին և Աբեդնագովին, և բերեցին թագավորի առաջ։ ¹⁴ Նաբուքոդոնոսորը խոսեց և ասաց նրանց. «Սեդրա՛ք, Միսա՛ք և Աբեդնագո՛վ, իրո՞ք իմ աստվածներին չեք պաշտելու և ոսկե արձանին, որ կանգնեցրի, չեք երկրպագելու։ ¹⁵ Բայց արդ, եթե պատրաստ լինեք, երբ որ լսեք փողի, սրնգի, թմբուկի, քնարի և բոլոր տեսակի երաժշտությունների միասնական ձայնը, կընկնեք և կերկրպագեք ոսկե արձանին, որ կանգնեցրի։ Իսկ եթե չերկրպագեք, նույն ժամին կնետվեք բորբոքված կրակի հնոցը, և ո՞վ է Աստված, որ կփրկի ձեզ իմ ձեռքից»։ ¹⁶ Սեդրաքը, Միսաքը և Աբեդնագովը պատասխան տվեցին և ասացին Նաբուքոդոնոսոր արքային. «Կարիք չկա քեզ այդ բանի համար պատասխան տալ, ¹⁷ որովհետև երկնքում է մեր Աստված, նա, որին մենք պաշտում ենք, կարող է փրկել մեզ բորբոքված կրակիդ հնոցից և ազատել մեզ քո ձեռքից, արքա՛։ ¹⁸ Իսկ եթե ոչ, թող այս բանը քեզ հայտնի լինի, արքա՛, որ քո աստվածներին մենք չենք պաշտում և ոսկե արձանիդ, որ կանգնեցրիր, չենք երկրպագում»։

Դանիելի երեք ընկերները նետվում են հնոցը

¹⁹ Այն ժամանակ Նաբուքոդոնոսորը լցվեց սաստիկ բարկությամբ, և նրա երեսի գույնը փոխվեց Սեդրաքի, Միսաքի և Աբեդնագովի վրա, և ասաց. «Վառե՛ք հնոցը յոթնապատիկ, որպեսզի մինչև վերջ այրվեն։ ²⁰ Հինգ ուժեղ մարդիկ թող ամուր կապեն Սեդրաքին, Միսաքին և Աբեդնագովին՝ նետելու բորբոքված կրակի հնոցը»։ ²¹ Այդ ժամանակ այն մարդիկ կապվեցին իրենց պատմուճաններով, վարտիքներով, գլխի ապարոշներով, ծնկակապերով և նետվեցին բորբոքված կրակի հնոցը։ ²² Քանի որ թագավորի հրամանը խստանում էր, հնոցն էլ յոթնապատիկ ավելի խիստ էր բորբոքվում։ ²³ Եվ նրանք երեքը՝ Սեդրաքը, Միսաքը և Աբեդնագովը, կապված գցվեցին հնոցը։

Երեք ընկերներն ազատվում են ու մեծարվում

²⁴ Քայլում էին կրակի մեջ, օրհնաբանում և գովաբանում էին Տիրոջը՝ Աստծուն։ ²⁵ Ազարիան ելավ և այսպես աղոթքի կանգնեց, կրակի մեջ բացեց իր բերանը և ասաց. ²⁶ «Օրհնյա՜լ ես, Տե՛ր, մեր հայրերի՛ Աստված, հավիտյանս գովաբանված և փառավորված է քո անունը, ²⁷ որովհետև արդար ես ամեն ինչում, որ բերեցիր մեզ վրա. ճշմարիտ են քո բոլոր գործերը, և ուղիղ են քո ճանապարհները, և ճշմարտություն՝ քո բոլոր դատաստանները։ ²⁸ Ըստ ամենայնի ճշմարիտ դատաստան արեցիր, ինչ որ արեցիր մեզ և մեր հայրերի սուրբ քաղաք Երուսաղեմին, որովհետև ճշմարտությամբ և հիրավի բերեցիր այս ամենը մեր մեղքերի պատճառով, ²⁹ քանի որ մեղանչեցինք և անօրենություն գործեցինք՝ ապստամբելով քո դեմ, և առավել մեղանչեցինք ամեն ինչում։ ³⁰ Քո պատվիրաններին չանսացինք, չպահեցինք ու չարեցինք այնպես, ինչպես պատվիրեցիր մեզ, որպեսզի բարի լինի մեզ։ ³¹ Այն ամենը, որ բերեցիր մեզ վրա, և այն ամենը, որ արեցիր մեր դեմ, արդար դատաստանով արեցիր։ ³² Մեզ մատնեցիր մեր անօրեն, խիստ և ապստամբ թշնամիների և ողջ աշխարհից ավելի անիրավ ու չար թագավորի ձեռքը։

³³ Եվ արդ, մենք չենք կարող բացել մեր բերանները, որովհետև ամոթահար ու նախատինք եղանք քո ծառա պաշտոնյաների համար։ ³⁴ Բայց իսպառ մի՛ մատնիր մեզ հանուն քո անվան և մի՛ ցրիր քո ուխտը։ ³⁵ Մի՛ հեռացրու քո ողորմությունը մեզնից հանուն քո սիրելի Աբրահամի, հանուն քո ծառա Իսահակի և հանուն քո սուրբ Իսրայելի, ³⁶ որոնց խոստացար բազմացնել նրանց սերունդը երկնքի աստղերի չափ և ծովափի ավազի չափ։ ³⁷ Արդ, Տե՛ր, ավելի նվաղեցինք, քան բոլոր ազգերը, և այսօր տառապյալ ենք ամբողջ աշխարհում մեր մեղքերի պատճառով։ ³⁸ Չկա այս ժամանակներում ո՛չ իշխան, մարգարե և առաջնորդ, ո՛չ ողջակեզներ, ո՛չ զոհեր, ո՛չ զոհաբերություններ, ո՛չ խունկեր, ո՛չ էլ տեղ՝ քո առաջ երախայրիք մատուցելու և ողորմություն գտնելու։ ³⁹ Այլ կոտրված անձով և տառապած հոգով թող ընդունելի լինենք, ինչպես խոյերի և զվարակների ողջակեզները և ինչպես բյուրավոր պարարտ գառները։ ⁴⁰ Թող այդպես լինի մեր զոհաբերությունն այսօր քո առաջ՝ կատարյալ լինելու քեզնից հետո, որովհետև քեզ հուսացողներս ամոթով չենք մնում։ ⁴¹ Արդ, գալիս ենք քո հետևից մեր ամբողջ սրտով, մենք վախենում ենք քեզնից և քո երեսն ենք փնտրում. ամոթով մի՛ թող մեզ, ⁴² այլ վարվի՛ր մեզ հետ ըստ քո հեզության և ըստ քո բազում ողորմության։ ⁴³ Փրկի՛ր մեզ քո հրաշքներով և փա՛ռք բեր քո անվանը, Տե՛ր։ ⁴⁴ Թող ամոթով մնան բոլոր նրանք, որ չարիք են պատճառում քո ծառաներին. թող ամաչեն իրենց ամեն բռնությունից, և նրանց զորությունը թող խորտակվի։ ⁴⁵ Եվ թող ճանաչեն, որ դու ես Տերը՝ միակ Աստվածը, և փառավորյալը ողջ տիեզերքում»։

⁴⁶ Թագավորի սպասավորները, որ նրանց գցեցին հնոցը, չէին դադարում այն բորբոքելուց նավթով, ձեթով, վուշով և որթով։ ⁴⁷ Բոցը ելնում, դիզվում էր հնոցից քառասունինը կանգուն ավելի վեր, ⁴⁸ պտտվում-պատում էր հնոցի շուրջը և այրում էր այն քաղդեացիներից, ում գտնում էր։ ⁴⁹ Եվ Աստծու հրեշտակն իջավ, կանգնեց Ազարիայենց հետ այն հնոցում և կրակի բոցը թոթափեց այն հնոցից։ ⁵⁰ Եվ հնոցի մեջ հողմի պես արեց, որ խոնավ ցող փչի. կրակն ամենևին ո՛չ մոտենում էր նրանց, ո՛չ տանջում, ո՛չ էլ նեղում էր նրանց։ ⁵¹ Այն ժամանակ երեքը, կարծես մի բերանով, հնոցի մեջ օրհնաբանում, գովաբանում և փառավորում էին Աստծուն և ասում.

⁵² «Օրհնյա՜լ ես դու, Տե՛ր, մեր հայրերի՛ Աստված,

գովյալ և առավել փառավորյալ հավիտյան,

և օրհնյա՜լ է քո փառքի սուրբ անունը,

գովյալ և առավել փառավորյալ հավիտյան։

⁵³ Օրհնյա՜լ ես քո սրբության փառքի տաճարում,

գովյալ և առավել փառավորյալ հավիտյան։

⁵⁴ Օրհնյա՜լ ես քո արքայության աթոռի վրա,

գովյալ և առավել փառավորյալ հավիտյան։

⁵⁵ Օրհնյա՜լ ես, որ նայում ես անդունդներին և նստում ես քերովբեների վրա,

գովյալ և առավել փառավորյալ հավիտյան։

⁵⁶ Օրհնյա՜լ ես, որ նստում ես երկնքի տարածության վրա,

գովյալ և առավել փառավորյալ հավիտյան։

⁵⁷ Օրհնաբանե՛ք Տիրոջը, Տիրոջ բոլո՛ր գործեր,

օրհնաբանե՛ք և փառաբանե՛ք նրան հավիտյան։

⁵⁸ Օրհնաբանե՛ք Տիրոջը, երկինքնե՛ր,

օրհնաբանե՛ք և փառաբանե՛ք նրան հավիտյան։

⁵⁹ Օրհնաբանե՛ք Տիրոջը, Տիրո՛ջ հրեշտակներ,

օրհնաբանե՛ք և փառաբանե՛ք նրան հավիտյան։

⁶⁰ Օրհնաբանե՛ք Տիրոջը, երկնքից ավելի վեր գտնվող բոլո՛ր ջրեր,

օրհնաբանե՛ք և փառաբանե՛ք նրան հավիտյան։

⁶¹ Օրհնաբանե՛ք Տիրոջը, Տիրոջ բոլո՛ր զորություններ,

օրհնաբանե՛ք և փառաբանե՛ք նրան հավիտյան։

⁶² Օրհնաբանե՛ք Տիրոջը, արև՛ ու լուսի՛ն,

օրհնաբանե՛ք և փառաբանե՛ք նրան հավիտյան։

⁶³ Օրհնաբանե՛ք Տիրոջը, երկնքի բոլո՛ր աստղեր,

օրհնաբանե՛ք և փառաբանե՛ք նրան հավիտյան։

⁶⁴ Օրհնաբանե՛ք Տիրոջը, բոլո՛ր անձրևներ և ցողե՛ր,

օրհնաբանե՛ք և փառաբանե՛ք նրան հավիտյան։

⁶⁵ Օրհնաբանե՛ք Տիրոջը, բոլո՛ր հողմեր,

օրհնաբանե՛ք և փառաբանե՛ք նրան հավիտյան։

⁶⁶ Օրհնաբանե՛ք Տիրոջը, հո՛ւր և տա՛պ,

օրհնաբանե՛ք և փառաբանե՛ք նրան հավիտյան։

⁶⁷ Օրհնաբանե՛ք Տիրոջը, ցո՛ւրտ և սառնամանի՛ք,

օրհնաբանե՛ք և փառաբանե՛ք նրան հավիտյան։

⁶⁸ Օրհնաբանե՛ք Տիրոջը, եղյա՛մ և ձյո՛ւն,

օրհնաբանե՛ք և փառաբանե՛ք նրան հավիտյան։

⁷¹ Օրհնաբանե՛ք Տիրոջը, ցերեկնե՛ր և գիշերնե՛ր[76],

օրհնաբանե՛ք և փառաբանե՛ք նրան հավիտյան։

⁷² Օրհնաբանե՛ք Տիրոջը, լո՛ւյս և խավա՛ր,

օրհնաբանե՛ք և փառաբանե՛ք նրան հավիտյան։

⁷³ Օրհնաբանե՛ք Տիրոջը, ամպե՛ր և փայլակնե՛ր,

օրհնաբանե՛ք և փառաբանե՛ք նրան հավիտյան։

⁷⁴ Օրհնաբանե՛ք Տիրոջը, երկի՛ր,

օրհնաբանե՛ք և փառաբանե՛ք նրան հավիտյան։

⁷⁵ Օրհնաբանե՛ք Տիրոջը, լեռնե՛ր և բարձունքնե՛ր,

օրհնաբանե՛ք և փառաբանե՛ք նրան հավիտյան։

⁷⁶ Օրհնաբանե՛ք Տիրոջը, երկրի բոլո՛ր բույսեր,

օրհնաբանե՛ք և փառաբանե՛ք նրան հավիտյան։

⁷⁷ Օրհնաբանե՛ք Տիրոջը, աղբյուրնե՛ր,

օրհնաբանե՛ք և փառաբանե՛ք նրան հավիտյան։

⁷⁸ Օրհնաբանե՛ք Տիրոջը, ծովե՛ր ու գետե՛ր,

օրհնաբանե՛ք և փառաբանե՛ք նրան հավիտյան։

⁷⁹ Օրհնաբանե՛ք Տիրոջը, կետե՛ր և բոլո՛ր կայտառներ, որ ջրերում եք,

օրհնաբանե՛ք և փառաբանե՛ք նրան հավիտյան։

⁸⁰ Օրհնաբանե՛ք Տիրոջը, երկնքի՛ թռչուններ,

օրհնաբանե՛ք և փառաբանե՛ք նրան հավիտյան։

⁸¹ Օրհնաբանե՛ք Տիրոջը, բոլո՛ր գազաններ և անասուններ,

օրհնաբանե՛ք և փառաբանե՛ք նրան հավիտյան։

⁸² Օրհնաբանե՛ք Տիրոջը, մարդկա՛նց որդիներ,

օրհնաբանե՛ք և փառաբանե՛ք նրան հավիտյան։

⁸³ Թող Իսրայելն օրհնաբանի Տիրոջը, թող օրհնաբանի և փառաբանի նրան հավիտյան։

⁸⁴ Օրհնաբանե՛ք Տիրոջը, քահանանե՛ր,

օրհնաբանե՛ք և փառաբանե՛ք նրան հավիտյան։

⁸⁵ Օրհնաբանե՛ք Տիրոջը, Տիրո՛ջ ծառաներ,

օրհնաբանե՛ք և փառաբանե՛ք նրան հավիտյան։

⁸⁶ Օրհնաբանե՛ք Տիրոջը, արդարների՛ հոգիներ և շունչեր,

օրհնաբանե՛ք և փառաբանե՛ք նրան հավիտյան։

⁸⁷ Օրհնաբանե՛ք Տիրոջը, սուրբե՛ր և սրտով խոնարհնե՛ր,

օրհնաբանե՛ք և փառաբանե՛ք նրան հավիտյան։

⁸⁸ Օրհնաբանե՛ք Տիրոջը, Անանիա՛, Ազարիա՛ և Միսայե՛լ,

օրհնաբանե՛ք և փառաբանե՛ք նրան հավիտյան։

Քանի որ մեզ փրկեց դժոխքից և մահվան ձեռքից մեզ ազատեց,

փրկեց մեզ այս հնոցից և բորբոքված այս բոցի միջից

և այս կրակի միջից մեզ փրկեց։

⁸⁹ Գոհաբանենք Տիրոջը, որովհետև քաղցր է,

որովհետև հավիտյան է նրա ողորմությունը։

⁹⁰ Օրհնաբանե՛ք աստվածների Աստծուն,

Տիրոջ բոլո՛ր պաշտոնյաներ,

օրհնաբանե՛ք և գոհաբանե՛ք,

որովհետև հավիտյան է նրա ողորմությունը»։

Նաբուքոդոնոսորը մեծարում է Դանիելի ընկերներին

⁹¹ Եվ Նաբուքոդոնոսորը, երբ լսեց նրանց օրհնաբանությունները, զարմացավ, տագնապահար ելավ և ասաց իր մեծամեծներին. «Կապված երեք մարդ չգցեցի՞նք կրակը»։ Թագավորին ասացին. «Այո՛, ճիշտ ես ասում, արքա՛»։ ⁹² Թագավորն ասաց. «Բայց ես տեսնում եմ արձակված չորս մարդու. քայլում են կրակի մեջ, և ոչ մի վնասվածք չկա նրանց վրա, իսկ չորրորդի տեսքը նման է Աստծու որդուն»։ ⁹³ Այն ժամանակ Նաբուքոդոնոսորը մոտեցավ բորբոքված կրակի հնոցի դռանը և ասաց. «Սեդրա՛ք, Միսա՛ք և Աբեդնագո՛վ, բարձրյալ Աստծու ծառանե՛ր, ելե՛ք և եկե՛ք»։ Սեդրաքը, Միսաքն ու Աբեդնագովը դուրս ելան կրակի միջից։ ⁹⁴ Ապա հավաքվեցին նախարարները, կուսակալները, զորավարներն ու թագավորի զորավորները և տեսնում էին այն մարդկանց, որ կրակը չէր տիրել նրանց մարմիններին, նրանց գլխի մազը չէր խանձվել, նրանց վարտիքները չէին գունափոխվել, և կրակի հոտ չկար նրանց վրա։ ⁹⁵ Թագավորը նրանց առաջ երկրպագեց Տիրոջը։ Ապա Նաբուքոդոնոսորը պատասխան տվեց և ասաց. «Օրհնյա՜լ է Սեդրաքի, Միսաքի և Աբեդնագովի Աստվածը, որ ուղարկեց իր հրեշտակին և փրկեց իր ծառաներին, որովհետև հույսը դրեցին իր վրա, թագավորի խոսքն անարգեցին և իրենց մարմինները մատնեցին կրակին, որպեսզի չպաշտեն և չերկրպագեն որևէ աստծու, այլ միայն իրենց Աստծուն։ ⁹⁶ Արդ, ես հրաման եմ տալիս. բոլոր ազգերը, ժողովուրդներն ու լեզուները, որ հայհոյանքով կխոսեն Սեդրաքի, Միսաքի և Աբեդնագովի Աստծու մասին, կորստյան կմատնվեն, իսկ նրանց տները՝ հափշտակության, որովհետև չկա ուրիշ Աստված, որ կարողանա այդպես փրկել»։

⁹⁷ Այն ժամանակ թագավորն առավել մեծարեց Սեդրաքին, Միսաքին և Աբեդնագովին բաբելացիների նահանգում և նրանց բարձրացրեց, նաև աղաչեց նրանց՝ լինելու իշխան այն բոլոր հրեաների, որոնք իր թագավորության մեջ էին։

⁹⁸ Նաբուքոդոնոսոր արքան՝ բոլոր ազգերին, ժողովուրդներին և լեզուներին, որ բնակվում են ողջ աշխարհում. «Թող խաղաղությունն առատանա ձեզ համար։

⁹⁹ Նշաններն ու հրաշքները, որ արեց ինձ համար Բարձրյալը, իմ առաջ հաճելի թվաց պատմել ձեզ, ¹⁰⁰ թե ինչքան մեծ ու զորավոր են. նրա արքայությունը հավիտենական արքայություն է, և նրա իշխանությունը՝ սերնդից սերունդ։

4

Հինգերորդ տեսիլք

Նաբուքոդոնոսորի երկրորդ երազը

¹ Ես՝ Նաբուքոդոնոսորս, ուրախ էի իմ տանը և զվարթացած։ ² Երազ տեսա, և զարհուրեցրեց ինձ, և խռովվեցի իմ անկողնում. իմ գլխի տեսիլքը տագնապեցրեց ինձ։ ³ Ինձնից հրաման տրվեց՝ իմ առաջ բերելու բաբելացիների բոլոր իմաստուններին, որպեսզի երազի մեկնությունն ինձ հայտնեն։ ⁴ Եվ իմ առաջ եկան գուշակներ, մոգեր, հմայողներ ու քաղդեացիներ, և իմ երազն ասացի նրանց առաջ, բայց դրա մեկնությունն ինձ չհայտնեցին, ⁵ մինչև եկավ Դանիելը, որի անունը Բաղդասար էր՝ ըստ իմ աստծու անվան, որովհետև Աստծու Սուրբ Հոգի կա նրա մեջ, որին և ասացի. ⁶ «Բաղդասա՛ր իշխան, գուշակի՛ր այն, ինչ ես տեսել եմ։ Գիտեմ, որ Աստծու Սուրբ Հոգի կա քո մեջ, և ոչ մի խորհուրդ չի թաքցվում քեզնից։ Արդ, դու լսի՛ր իմ երազը, որ տեսել եմ, և դրա մեկնությունը կասես ինձ։ ⁷ Տեսնում էի իմ անկողնում, և ահա մի ծառ երկրի մեջտեղում, և նրա բարձրությունը չափազանց մեծ էր։ ⁸ Ծառը մեծացավ, հզորացավ, և նրա բարձրությունը հասավ մինչև երկինք, իսկ նրա լայնությունը՝ ողջ երկրի ծագերը։ ⁹ Նրա տերևը գեղեցիկ էր, նրա պտուղը՝ առատ, և բոլորի կերակուրը նրա վրա էր։ Նրա ներքո էին բնակվել վայրի գազանները, և նրա ոստերի վրա էին հանգչել երկնքի թռչունները, և ամեն մարմին նրանից էր կերակրվում։ ¹⁰ Տեսնում էի գիշերվա տեսիլքի մեջ, իմ անկողնում, և ահա մի հրեշտակ և սուրբ էր երկնքից իջնում, ¹¹ խոսում էր բարձրաձայն և ասում էր այսպես. “Կտրե՛ք այդ ծառը և հատե՛ք դրա ոստերը, թափահարե՛ք դրա տերևները և ցիրուցա՛ն արեք դրա պտուղը. թող գազանները հեռանան դրա տակից, և թռչունները՝ դրա ոստերի վրայից։ ¹² Բայց դրա արմատի շառավիղը թողե՛ք երկրի վրա՝ երկաթապատ ու պղնձապատ, դալար վայրում, և թող երկնքի ցողից հանգստանա. թող դրա բաժինն անապատի գազանների հետ և երկրի խոտի մեջ լինի։ ¹³ Նրա սիրտը մարդկանցից թող փոփոխվի, և գազանների սիրտ թող տրվի նրան, և յոթ ժամանակներ թող փոփոխվեն նրա վրա”։ ¹⁴ Այս բանը հրեշտակի մեկնությամբ է, և այս հարցը՝ սրբերի պատգամը, որ կենդանի արարածները ճանաչեն, թե Բարձրյալն է տիրում մարդկանց թագավորությանը և ում կամենա, կտա այն, և մարդկանցից արհամարհվածին է բարձրացնում դրա վրա։ ¹⁵ Այս է այն երազը, որ տեսա ես՝ Նաբուքոդոնոսոր արքաս։ Իսկ դու, Բաղդասա՛ր, ասա՛ ինձ դրա մեկնությունը, որովհետև իմ թագավորության բոլոր իմաստունները չկարողացան ինձ հայտնել դրա մեկնությունը, բայց դու, Դանիե՛լ, կարող ես, որովհետև Աստծու Սուրբ Հոգի կա քո մեջ»։

Դանիելը մեկնում է երազը

¹⁶ Այն ժամանակ Դանիելը, որի անունը Բաղդասար էր, մոտ մեկ ժամ ապշահար մնաց, և նրա մտքերը խռովեցնում էին նրան։ Թագավորը պատասխան տվեց և ասաց նրան. «Բաղդասա՛ր, երազը և իր մեկնությունը թող չտագնապեցնեն քեզ»։ Բաղդասարը պատասխան տվեց և ասաց. «Տե՛ր, երազը՝ քեզ ատողներին, իսկ նրա մեկնությունը՝ քո թշնամիներին։ ¹⁷ Այն ծառը, որ տեսնում էիր մեծացած ու հզորացած, որի բարձրությունը հասնում էր մինչև երկինք, և նրա լայնությունը՝ ողջ երկիրը. ¹⁸ նրա տերևը՝ գեղեցիկ, և նրա պտուղը՝ առատ, և բոլորի կերակուրը՝ նրա վրա. նրա ներքո բնակվել էին անապատի գազանները, իսկ նրա ոստերի վրա հանգչել երկնքի թռչունները, դու ես, արքա՛։ ¹⁹ Քանի որ մեծացար ու հզորացար, քո մեծությունը բարձրացավ, հասավ մինչև երկինք, և քո տերությունը՝ երկրի բոլոր ծագերը։ ²⁰ Իսկ այն, որ տեսնում էիր, արքա՛, թե հրեշտակը և սուրբն իջնում էր երկնքից և ասում. «Կտրե՛ք այդ ծառը և ոչնչացրե՛ք այն, բայց դրա արմատի շառավիղը թողե՛ք երկրի վրա՝ երկաթապատ ու պղնձապատ, դալար վայրում, թող երկնքի ցողից հանգստանա. նրա բաժինը՝ անապատի գազանների հետ, մինչև յոթ ժամանակներ փոփոխվեն նրա վրա»։ ²¹ Սա է դրա մեկնությունը, արքա՛, և Բարձրյալի դատաստանը հասել է իմ տեր արքայի վրա։ ²² Քեզ կհալածեն մարդկանց միջից, և անապատի գազանների հետ կլինի քո բնակությունը։ Որպես արջառի՝ քեզ խոտով կկերակրեն, և երկնքի ցողից կհանգստանաս։ Յոթ ժամանակներ կփոփոխվեն քեզ վրա, մինչև ճանաչես, որ Բարձրյալն է տիրում մարդկանց թագավորությանը և ում կամենա, նրան կտա։ ²³ Իսկ որ ասաց, թե՝ «Թողե՛ք ծառի արմատի շառավիղը», քո թագավորությունը քեզ կմնա, մինչև ճանաչես Երկնավորի իշխանությունը։ ²⁴ Դրա համար, արքա՛, թող իմ խրատը հաճելի թվա քեզ. քո մեղքերը քավի՛ր ողորմությամբ, և քո անօրենությունները՝ տնանկներին գթալով, թերևս Աստված ներողամիտ լինի քո հանցանքների հանդեպ»։

²⁵ Այս ամենը եկավ հասավ Նաբուքոդոնոսոր արքայի վրա ²⁶ տասներկու ամիս հետո, մինչ ճեմում էր իր թագավորական պալատում՝ Բաբելոնում։ ²⁷ Թագավորն սկսեց խոսել և ասաց. «Սա այն մեծ Բաբելոնը չէ՞, որ ես իմ զորության ուժով շինեցի որպես թագավորության տուն՝ ի պատիվ իմ փառքի»։ ²⁸ Մինչ բառերը թագավորի բերանում էին, երկնքից ձայն եղավ և ասաց. «Քեզ եմ ասում, ո՛վ Նաբուքոդոնոսոր արքա, քո թագավորությունը վերցվել է քեզնից։ ²⁹ Քեզ կհալածեն մարդկանց միջից, և անապատի գազանների հետ կլինի քո բնակությունը։ Որպես արջառի՝ քեզ խոտով կկերակրեն, և յոթ ժամանակներ կփոփոխվեն քեզ վրա, մինչև ճանաչես, որ Բարձրյալն է տիրում մարդկանց թագավորությանը և ում կամենա, նրան կտա»։ ³⁰ Նույն ժամին այդ բանը կատարվեց Նաբուքոդոնոսորի հետ. մարդկանց միջից հալածվեց և արջառի պես խոտ էր ուտում։ Նրա մարմինը ներկվեց երկնքի ցողից, մինչ նրա մազերը, ինչպես առյուծներինը, և նրա եղունգները, ինչպես թռչուններինը, երկարեցին։

Նաբուքոդոնոսորն ապաքինվում է

³¹ «Այդ օրերի ավարտից հետո ես՝ Նաբուքոդոնոսորս, իմ աչքերը երկինք բարձրացրի, և միտքս վերադարձավ ինձ. օրհնաբանեցի Բարձրյալին և գովաբանեցի ու փառավորեցի հավիտենից Կենդանիին, որովհետև նրա իշխանությունը հավիտենական իշխանություն է, և նրա տերությունը՝ սերնդից սերունդ։ ³² Երկրի բոլոր բնակիչները ոչինչ համարվեցին։ Նա ըստ իր կամքի է գործում երկնքի զորքերի և երկրի բնակիչների մեջ, և չկա մեկը, որ ընդդիմանա նրա զորությանը և ասի. «Ի՞նչ արեցիր»։ ³³ Այդ նույն ժամանակ միտքս ինձ վերադարձավ, և եկա իմ թագավորության պատվին, և իմ կերպարանքն ինձ վերադարձավ։ Իմ իշխաններն ու իմ մեծամեծները փնտրեցին ինձ, և կրկին իմ թագավորության վրա հաստատվեցի, և առավել մեծություն ինձ համար ավելացավ։ ³⁴ Արդ, ես՝ Նաբուքոդոնոսորս, օրհնաբանում, առավել բարձրացնում ու փառավորում եմ Երկնքի արքային, որովհետև նրա բոլոր գործերը ճշմարիտ են, նրա շավիղները՝ արդարություն, և բոլորին, որ ընթանում են ամբարտավանությամբ, կարող է խոնարհեցնել»։

5

Բաղդասարի հրավերքը

¹ Բաղդասար արքան ընթրիք պատրաստել տվեց իր մեծամեծների՝ հազար մարդու համար, նույնպես և գինի՝ հազարի համար։ ² Երբ Բաղդասարը հարբեց, հրամայեց բերել արծաթե և ոսկե սպասքը, որը նրա հայրը՝ Նաբուքոդոնոսորը, հանել էր այն տաճարից, որ Երուսաղեմում էր, որպեսզի թագավորը, նրա մեծամեծները, նրա հարճերն ու կանայք դրանցով խմեն։ ³ Բերեցին ոսկե և արծաթե սպասքը, որ բերվել էր Աստծու այն տաճարից, որ Երուսաղեմում էր, և թագավորը, նրա մեծամեծները, նրա հարճերն ու կանայք խմում էին դրանցով։ ⁴ Գինի էին խմում և օրհնաբանում էին ոսկե, արծաթե, պղնձե, երկաթե, փայտե և քարե աստվածներին, իսկ հավիտենական Աստծուն, որ իշխանություն ուներ նրանց հոգիների վրա, չօրհնաբանեցին։ ⁵ Նույն ժամին մարդու ձեռքի մատներ ելան և գրում էին կանթեղի դիմաց՝ թագավորի պալատի պատի ծեփի վրա, և թագավորը տեսնում էր այն ձեռքի թաթը, որ գրում էր։ ⁶ Այն ժամանակ թագավորի գույնը հատվեց, և նրա մտքերը խռովեցնում էին նրան։ Նրա մեջքի հոդերը խախտվում էին, և նրա ծնկներն իրար էին բախվում։ ⁷ Եվ թագավորն ուժգին աղաղակեց, որ բերեն մոգերին, քաղդեացիներին, գուշակներին, և ասաց բաբելացիների իմաստուններին. «Ով կարդա այդ գրությունը և ինձ հայտնի դրա մեկնությունը, ծիրանի կհագնի, ոսկե մանյակ՝ իր պարանոցին, և իմ թագավորության երրորդ տեղին կտիրանա»։ ⁸ Բաբելացիների բոլոր իմաստունները մտնում և չէին կարողանում կարդալ գրությունը և հայտնել նրա մեկնությունը թագավորին։ ⁹ Բաղդասար արքան խռովվեց, և նրա երեսի գույնը փոխվեց, նրա մեծամեծներն էլ խռովվեցին նրա հետ։ ¹⁰ Թագուհին մտավ խրախճանքի պալատը և ասաց. «Արքա՛, հավիտյա՛ն ապրիր, թող քո մտքերը քեզ չխռովեցնեն, և թող քո երեսի գույնը չեղծվի, ¹¹ որովհետև քո թագավորության մեջ կա մի մարդ, որի մեջ Աստծու Սուրբ Հոգի կա. քո հոր օրերին զորություն և իմաստություն էին գտնվում նրա մեջ, և քո հայրը՝ Նաբուքոդոնոսոր արքան, նրան իշխան կարգեց գուշակների, մոգերի, քաղդեացիների և հմայողների վրա, ¹² որովհետև նրա մեջ իմաստության և հանճարի առավել ոգի կա. մեկնում է երազները, հայտնում է առակները և քանդում կապված բաները. Դանիելն է, և արքան Բաղդասար անունը տվեց նրան։ Արդ, թող կանչվի և հայտնի դրա մեկնությունը»։

Դանիելը մեկնում է գրությունը

¹³ Այն ժամանակ Դանիելին ներս բերեցին թագավորի առաջ։ Եվ թագավորն ասաց Դանիելին. «Դո՞ւ ես Դանիելը՝ Հուդայի երկրի գերության որդիներից, որին բերեց իմ հայր Նաբուքոդոնոսորը։ ¹⁴ Լսեցի քո մասին, որ Աստծու Սուրբ Հոգի կա քո մեջ, և առավել զորություն, հանճար և իմաստություն գտնվեցին քո մեջ։ ¹⁵ Արդ, ահա իմաստուններ, մոգեր ու հմայողներ մտան ինձ մոտ, որպեսզի այդ գրությունը կարդան և ինձ հայտնեն դրա մեկնությունը, բայց չկարողացան ինձ հայտնել։ ¹⁶ Ես լսեցի քո մասին, թե կարող ես մեկնություններ անել։ Արդ, եթե կարողանաս այդ գրությունը կարդալ և ինձ հայտնել դրա մեկնությունը, ծիրանի կհագնես, ոսկե մանյակ՝ քո պարանոցին, և իմ թագավորության երրորդ տեղին կտիրանաս»։

¹⁷ Դանիելն ասաց թագավորի առաջ. «Քո պարգևները թող քեզ մնան, և քո տան պատիվն ուրիշի՛ն տուր, բայց այդ գրությունը ես կկարդամ և կհայտնեմ քեզ դրա մեկնությունը։ ¹⁸ Արքա՛, Բարձրյալն Աստված մեծություն, թագավորություն, պատիվ ու փառք տվեց քո հորը՝ Նաբուքոդոնոսորին, ¹⁹ և այն մեծությունից, որ տվեց նրան, բոլոր ազգերը, ժողովուրդներն ու լեզուները զարհուրելով դողում էին նրա առաջ. ում կամենում, հարվածում էր, ում կամենում, սպանում էր. ում ինքը կամենում, բարձրացնում էր, և ում ինքը կամենում, խոնարհեցնում էր։ ²⁰ Երբ նրա սիրտը գոռոզացավ, և նրա ոգին զորացավ՝ ամբարտավանանալու, ընկավ իր թագավորության աթոռից, և պատիվը վերցվեց նրանից։ ²¹ Հալածվեց մարդկանց միջից, սիրտ տրվեց նրան գազանների հետ, և վայրի էշերի հետ էր նրա բնակությունը, ինչպես արջառի՝ խոտով էին կերակրում նրան, երկնքի ցողից նրա մարմինը ներկվեց, մինչև ճանաչեց, որ Բարձրյալն է տիրում մարդկանց թագավորությանը և ում կամենա, նրան կտա։ ²² Եվ դու՝ նրա որդի Բաղդասարդ, քո սիրտը չխոնարհեցրիր Աստծու առաջ, որտեղից այդ ամենը գտար. ²³ երկնքի Աստծու դեմ հպարտացար, և նրա տան սպասքը բերեցին քո առաջ, և դու, քո մեծամեծները, քո հարճերն ու քո կանայք դրանցով գինի էիք խմում, և ոսկե, արծաթե, պղնձե, երկաթե, փայտե և քարե աստվածներին, որ ո՛չ տեսնում, ո՛չ լսում և ո՛չ էլ իմանում են, օրհնաբանում էիր, իսկ Աստծուն, որի ձեռքում են քո շունչը և քո բոլոր ճանապարհները, չփառավորեցիր։ ²⁴ Դրա համար նրա կողմից ուղարկվեց ձեռքի թաթը և գրեց այդ գրությունը։ ²⁵ Ահա այս է այդ գրությունը, որ գրված է. ՄԱՆԵ, ԹԵԿԵՂ, ՓԱՐԵՍ։

²⁶ Եվ այս է այդ բանի մեկնությունը. ՄԱՆԵ՝ Աստված չափեց քո թագավորությունը և վախճանեց այն. ²⁷ ԹԵԿԵՂ՝ կշեռքով կշռվեց և պակաս գտնվեց. ²⁸ ՓԱՐԵՍ՝ քո թագավորությունը բաժանվեց և տրվեց մարերին ու պարսիկներին»։ ²⁹ Ապա Բաղդասարը հրաման տվեց, և նրան ծիրանի հագցրին ու ոսկե մանյակ՝ նրա պարանոցին, և հայտարարեց նրա առաջ՝ իր թագավորության երրորդ իշխանը լինելու։ ³⁰ Նույն գիշեր սպանվեց քաղդեացիների Բաղդասար արքան։ ³¹ Եվ Դարեհ արքան, որ վաթսուներկու տարեկան էր, վերցրեց թագավորությունը։

6

Դանիելն առյուծների գբի մեջ

¹ Դարեհի աչքին հաճելի թվաց, և թագավորության վրա հարյուր քսան նախարար կարգեց, որպեսզի լինեն իր ողջ թագավորության մեջ, ² և նրանց վրա՝ երեք հրամանատար,- և նրանցից մեկը Դանիելն էր,- որ նրանք նախարարներին հրաման տան, որպեսզի արքան չհոգնի։ ³ Դանիելը նրանցից առավել էր, որովհետև նրա մեջ առավել հոգի կար, և թագավորը նրան կարգեց իր ողջ թագավորության վրա։ ⁴ Հրամանատարներն ու նախարարները նախանձում և պատճառներ էին փնտրում Դանիելի դեմ, բայց ամենևին պատճառներ, հանցանքներ ու մեղքեր չէին գտնում նրա դեմ, որովհետև հավատարիմ էր։ ⁵ Եվ հրամանատարներն ասացին. «Որևէ տեղից պատճառներ չենք գտնում Դանիելի դեմ, բացի նրա Աստծու օրենքներից»։ ⁶ Այն ժամանակ հրամանատարներն ու նախարարները կանգնեցին թագավորի առաջ և ասացին նրան. «Դարե՛հ արքա, հավիտյա՛ն ապրիր։ ⁷ Բոլորը, որ քո թագավորության մեջ են, զորավարները, նախարարները, իշխաններն ու կուսակալները, խորհրդակցեցին՝ արքունական զորությամբ հաստատելու և ամրագրելու մի ուխտ, որ եթե մեկը մինչև երեսուն օր որևէ բան խնդրի որևէ աստծուց կամ մարդուց, բացի քեզնից, արքա՛, նետվի առյուծների գուբը։ ⁸ Արդ, արքա՛, հաստատի՛ր ուխտը և հրամա՛ն գրիր, որպեսզի չեղծվի մարերի և պարսիկների օրենքը»։ ⁹ Այն ժամանակ Դարեհ արքան հրամանը գրելու պատվեր տվեց։ ¹⁰ Դանիելը երբ իմացավ, որ հրամանը հաստատվել է, մտավ իր տունը, և իր վերնահարկերում պատուհանները բաց էին նրա համար Երուսաղեմի դիմաց։ Օրվա մեջ երեք անգամ ծնրադրում և աղոթքի էր կանգնում, գոհություն էր հայտնում իր Աստծու առաջ, ինչպես առաջ էր անում։ ¹¹ Այնժամ այն մարդիկ հետևեցին և գտան Դանիելին, որ աղոթքի էր կանգնել և աղաչում էր իր Աստծուն։ ¹² Մոտեցան և ասացին թագավորին. «Արքա՛, դու մի ուխտ չհաստատեցի՞ր, թե ամեն մարդ, որ մինչև երեսուն օր որևէ բան խնդրի որևէ աստծուց կամ մարդուց, բացի քեզնից՝ արքայիցդ, կնետվի առյուծների գուբը»։ Արքան ասաց. «Ճշմարիտ է այդ բանը, և օրինավոր չէ մարերի և պարսիկների հրամանը շրջանցել»։ ¹³ Այն ժամանակ պատասխան տվեցին արքային և ասացին. «Դանիելը, որ Հուդայի երկրի գերության որդիներից է, չհնազանդվեց քո հրամանին, արքա՛, և երեք անգամ ինչ-որ բան է խնդրում իր Աստծուց»։ ¹⁴ Այն ժամանակ թագավորը, երբ լսեց այդ բանը, շատ տրտմեց Դանիելի համար և ջանում էր փրկել նրան և մինչև ընթրիք ջանաց փրկել նրան։ ¹⁵ Այնժամ այն մարդիկ ասացին թագավորին. «Իմացի՛ր, արքա՛, որ մարերի և պարսիկների հրամանը և ամեն ուխտ ու հաստատագիր, որ արքան է հաստատում, օրինավոր չէ շրջանցել»։

¹⁶ Այն ժամանակ թագավորը հրաման տվեց, և Դանիելին բերեցին ու նրան նետեցին առյուծների գուբը։ Եվ արքան ասաց Դանիելին. «Այն Աստվածը, որին դու հաճախ պաշտում ես, նա կփրկի քեզ»։ ¹⁷ Եվ մի վեմ բերեցին ու դրեցին գբի վրա. թագավորը կնքեց իր մատանիով և մեծամեծների մատանիներով, որպեսզի ուրիշ տեսակ բաներ չփոփոխվեն Դանիելի համար։ ¹⁸ Թագավորը գնաց իր տունը, ննջեց առանց ընթրիքի, և խորտիկ չմատուցեցին նրան, և քունը փախավ նրանից։ Աստված խցանեց առյուծների բերանները, և չվնասեցին Դանիելին։ ¹⁹ Առավոտ լույսով արքան վեր կացավ և շտապ եկավ առյուծների գուբը։ ²⁰ Եվ երբ մոտեցավ գբին, բարձրաձայն աղաղակեց և ասաց. «Դանիե՛լ, կենդանի Աստծու ծառա՛, քո Աստվածը, որին դու հաճախ պաշտում էիր, կարողացա՞վ քեզ փրկել այդ առյուծների բերանից»։ ²¹ Եվ Դանիելն ասաց արքային. «Արքա՛, հավիտյա՛ն ապրիր. ²² իմ Աստվածն ուղարկեց իր հրեշտակին և խցանեց այս առյուծների բերանները, և չվերացրին ինձ, որովհետև ես արդարություն գտա նրա առաջ, իսկ քո առաջ, արքա՛, ոչ մի մեղք չեմ գործել»։ ²³ Այն ժամանակ թագավորն ուրախացավ նրա անձի համար և հրաման տվեց՝ հանելու Դանիելին այն գբից։ Դանիելը հանվեց այն գբից, և բոլորովին վնասվածք չգտնվեց նրա վրա, որովհետև հավատաց իր Աստծուն։ ²⁴ Եվ թագավորը հրաման տվեց, և բերեցին Դանիելի դեմ չարախոսող այն մարդկանց, և նրանք, նրանց որդիներն ու նրանց կանայք գցվեցին առյուծների գուբը. դեռ չէին հասել գբի հատակին, առյուծները նրանց հափշտակեցին և մանրեցին նրանց բոլոր ոսկորները։ ²⁵ Այն ժամանակ Դարեհ արքան գրեց բոլոր ազգերին, ժողովուրդներին ու լեզուներին, որ բնակվում էին ողջ երկրում. «Թող խաղաղությունն առատանա ձեզ համար. ²⁶ իմ կողմից դրվեց այս հրամանն իմ թագավորության բոլոր իշխանություններին, որպեսզի երկնչեն և դողան Դանիելի Աստծու երեսից, որովհետև նա է կենդանի Աստվածը և կա հավիտյան. նրա արքայությունը չի եղծվում, և նրա տերությունն անվախճան է։ ²⁷ Օգնական է լինում և փրկում է, հրաշքներ է գործում երկնքում և երկրի վրա, նա, ով փրկեց Դանիելին առյուծների բերանից»։ ²⁸ Եվ Դանիելը հաջողություն էր գտնում Դարեհի և պարսիկ Կյուրոսի թագավորության ժամանակ։

7

Դանիելի տեսիլքը չորս գազանների մասին

¹ Քաղդեացիների Բաղդասար արքայի առաջին տարում Դանիելը երազ տեսավ, և նրա գլխի տեսիլքը նրա անկողնում էր, և գրեց երազը։ ² «Ես՝ Դանիելս, տեսնում էի գիշերվա տեսիլքում, և ահա երկնքի չորս հողմերը բախում էին մեծ ծովը։ ³ Այն ծովից ելնում էին չորս մեծ գազաններ՝ միմյանցից այլակերպ։ ⁴ Առաջինը նման էր թևավոր մատակ առյուծի, և նրա թևերն արծվի թևերի նման էին. նայում էի, մինչև նրա թևերը թափվեցին, և ջնջվեց երկրից, ապա մարդու պես կանգնեց ոտքերի վրա, և մարդու սիրտ տրվեց նրան։ ⁵ Իսկ ահա երկրորդ գազանը նման էր արջի. մի կողմ կանգնեց, և երեք կողեր կային նրա բերանում՝ նրա ժանիքների մեջ։ Այսպես էին ասում նրան. «Ելի՛ր, կե՛ր շատերի մարմինները»։ ⁶ Դրանից հետո նայում էի. ահա մի այլ գազան՝ ընձի նման. թռչնի չորս թևեր և գազանի չորս գլուխներ կային նրա վրա, և իշխանություն տրվեց նրան։ ⁷ Եվ դրանից հետո նայում էի. ահա չորրորդ գազանը՝ ահեղ, զարմանալի և առավել հզոր, և նրա ժանիքները երկաթյա էին. ուտում ու մանրում էր և մնացորդները ոտքով կոտրատում։ Սա առավել այլակերպ էր, քան բոլոր գազանները, որ նրանից առաջ էին, և տասը եղջյուրներ կային նրա վրա։ ⁸ Ապշահար նայում էի նրա եղջյուրներին, և ահա ուրիշ փոքրիկ եղջյուր էր ելնում դրանց միջից, իսկ նախկիններից երեք եղջյուրներ արմատախիլ էին արվում նրա երեսից. և ահա մարդու աչքերի պես աչքեր այդ եղջյուրի վրա և բերան, որ մեծամեծ բաներ էր խոսում։

Դատաստանի տեսարանը

⁹ Տեսնում էի, մինչև աթոռներ էին ընկնում, և Հինավուրցն էր նստում. նրա հագուստը սպիտակ էր ձյան պես, և նրա գլխի մազերը՝ ինչպես մաքուր բուրդը, նրա աթոռը կրակի բոցի էր նման, իսկ նրա անիվները՝ բորբոքված կրակի պես։ ¹⁰ Նրա առաջից կրակե գետ էր հորդելով ելնում. հազար-հազարավորներ պաշտում էին նրան, և բյուր-բյուրավորներ կային նրա առաջ։ Նա ատյան նստեց, և գրքերը բացվեցին։ ¹¹ Այն ժամանակ տեսնում էի այն մեծամեծ խոսքերի ձայնի պատճառով, որ այն եղջյուրն էր խոսում, մինչև որ գազանը վերցվեց ու կորստյան մատնվեց, և նրա մարմինը տրվեց կրակի այրմանը։ ¹² Մյուս գազանների իշխանությունը փոփոխվեց, և կյանքի երկարություն տրվեց նրանց մինչև ինչ-որ ժամանակ։ ¹³ Տեսնում էի գիշերվա տեսիլքի մեջ, և ահա Մարդու Որդու նման մեկը երկնքի ամպերի հետ գալիս և հասնում էր մինչև Հինավուրցը և մոտեցվեց նրա առաջ։ ¹⁴ Նրան տրվեցին իշխանություն, պատիվ և արքայություն, և բոլոր ազգերը, ժողովուրդներն ու լեզուները նրան պիտի ծառայեն. նրա իշխանությունը հավիտենական իշխանություն է, որ չի անցնում, և նրա թագավորությունը չի եղծվի։

Առաջին տեսիլքի մեկնությունը

¹⁵ Իմ մարմինը սոսկաց իմ անձի մեջ. ինձ՝ Դանիելիս, խռովեցրեց իմ գլխի տեսիլքը։ ¹⁶ Եվ մոտեցա այնտեղ կանգնածներից մեկին և խնդրում էի ճշմարտությունը սովորել այն ամենի մասին, և ինձ ասաց ճշմարտությունը և այն բաների մեկնությունն ինձ հայտնեց։

¹⁷ Այն մեծամեծ գազանները. չորս թագավորություններ կբարձրանան երկրի վրա։ ¹⁸ Կվերանան, և Բարձրյալի սրբերը կվերցնեն թագավորությունը և կպահեն այն մինչև հավիտյանս հավիտենից։ ¹⁹ Ճշմարտապես քննում էի չորրորդ գազանին, որովհետև առավել այլակերպ էր, քան բոլոր գազանները, որ նրանից առաջ էին, և սաստիկ ահավոր. նրա ժանիքները՝ երկաթե, և նրա մագիլները՝ պղնձե. ուտում ու մանրում էր և մնացորդները ոտքով կոտրատում։ ²⁰ Իսկ տասը եղջյուրների մասին, որ նրա գլխին կային, և այն մյուսի մասին, որ ելնում և այն երեքին արմատախիլ էր անում, որ աչքեր ուներ և բերան, որ մեծամեծ բաներ էր խոսում, նրա տեսքն առավել հզոր էր, քան մյուսներինը։ ²¹ Տեսնում էի, և այն եղջյուրը պատերազմ էր տալիս սրբերի հետ և զորանում էր նրանց դեմ, ²² մինչև եկավ Հինավուրցը և իրավունք տվեց Բարձրյալի սրբերին. ժամանակը հասավ, և սրբերն արքայությունը վերցրին։ ²³ Եվ ասաց. «Չորրորդ գազանը. չորրորդ թագավորություն կելնի երկրի վրա, որ առավել հզոր կլինի, քան բոլոր թագավորությունները, և կուտի ողջ երկիրը, կկոխոտի և կհարվածի այն։

²⁴ Նրա տասը եղջյուրները. տասը թագավորներ կբարձրանան, և նրանցից հետո կբարձրանա մեկ ուրիշը, որ չարիքներով առավել կլինի, քան բոլոր նախորդները, և կխոնարհեցնի երեք թագավորներին, ²⁵ Բարձրյալի դեմ բաներ կխոսի և Բարձրյալի սրբերին կմոլորեցնի, կկարծի փոփոխել ժամանակներն ու օրենքները, և կտրվի նրա ձեռքը մինչև ինչ-որ ժամանակ, ժամանակներ և ժամանակների կեսը։ ²⁶ Ատյան կնստի, և նրա իշխանությունը կփոխեն՝ ոչնչացնելու և իսպառ կորստյան մատնելու։ ²⁷ Եվ թագավորների թագավորությունն ու մեծությունը, որ կան երկնքի ներքո, տրվեցին Բարձրյալի սրբերին. նրա արքայությունը հավիտենական արքայություն է, և բոլոր իշխանությունները նրան պիտի ծառայեն ու հնազանդվեն։ ²⁸ Մինչև այստեղ է խոսքիս վերջը։ Ինձ՝ Դանիելիս, իմ մտքերը շատ էին խռովեցնում, և իմ երեսի գույնը փոխվեց, և այս բանն իմ սրտում էի պահում»։

8

Դանիելի տեսիլքը խոյի և քոշի մասին

¹  «Բաղդասար արքայի թագավորության երրորդ տարում ինձ տեսիլք երևաց, ինձ` Դանիելիս, առաջին տեսիլքից հետո: ² Շոշ ապարանքում էի, որ Էլամի երկրում է, և կանգնել էի Ուբաղի վրա: ³ Բարձրացրի աչքերս և տեսա. ահա մի խոյ կար Ուբաղի դիմաց. նրա եղջյուրները բարձր էին, բայց մեկն ավելի բարձր էր, քան մյուսները, և այն, որ բարձր էր, հետո էր ելնում: ⁴ Տեսնում էի, որ խոյը եղջյուրներով կռվում էր ծովի, հյուսիսի և հարավի դեմ, և ոչ մի գազան չկար նրա առաջ, և չկար մեկը, որ ազատվեր նրա ձեռքից, և անում էր ըստ իր կամքի և մեծանում էր: ⁵ Ես մտածում էի: Եվ ահա մի այծերի քոշ էր գալիս արևմուտքից երկրի վրայով, բայց երկրին չէր մոտենում. քոշը մի եղջյուր ուներ իր աչքերի միջև։ ⁶ Եվ հասավ մինչև եղջյուրավոր խոյը, որ տեսնում էի, որ կար Ուբաղի դիմաց, և իր ուժի զորությամբ նրա վրա հարձակվեց: ⁷ Եվ տեսնում էի նրան, որ հասավ մինչև խոյը. կատաղեց, հարվածեց խոյին և ոչնչացրեց նրա երկու եղջյուրները, իսկ խոյն ուժ չուներ նրա դեմն առնելու։ Գցեց նրան գետնին և իր ոտքերի կոխան արեց նրան, և չկար մեկը, որ խոյին ազատեր քոշի ձեռքից։

⁸ Ապա այծերի քոշը խիստ մեծությամբ հզորացավ, և նրա հզորանալու ժամանակ խորտակվեց նրա մեծ եղջյուրը, և դրա տակից չորս այլ եղջյուրներ ելան երկնքի չորս հողմերի դեմ: ⁹ Դրանցից մեկից ելավ մի հզոր եղջյուր և առավել հզորացավ հյուսիսի դեմ, ¹⁰ ապա զորություն առավ ու բարձրացավ մինչև երկնքի զորությունները և երկիր գցեց երկնքի զորքերից և աստղերից և կոխոտեց դրանք, ¹¹ մինչև զորավարը գերիներին փրկի։ Նրա պատճառով զոհաբերությունները խանգարվեցին, և այնպես եղավ, որ հաջողվեց նրան. սրբարանը պիտի ավերվի։ ¹² Մեղքեր տրվեցին զոհաբերությունների համար, իսկ արդարությունն ընկավ երկիր և գործեց ու հաջողվեց։

¹³ Ես մի սուրբից լսեցի, որ խոսում էր, և մի սուրբ ասում էր Փելմոնին, որ խոսում էր. «Այդ տեսիլքը մինչև ե՞րբ պիտի մնա. վերացած զոհաբերություններ, ավերածության տրված մեղքեր. սրբարանն ու զորությունն էլ պիտի կոխոտվեն»: ¹⁴ Եվ ասաց նրան. «Մինչև երեկո և վաղորդայն, հազար երկու հարյուր վաթսունութ օրեր, և սրբարանը կսրբվի»։

Երկրորդ տեսիլքի մեկնությունը

¹⁵  «Այնպես եղավ, որ երբ ես` Դանիելս, տեսա տեսիլքը և փնտրում էի խելամուտ լինել, ահա իմ առջև կանգնեց մեկը՝ մարդու տեսքի նման, <sup>16</sup> և մարդու ձայն լսեցի Ուբաղի միջից և կանչեց ու ասաց. «Գաբրիե՛լ, դրան իմացրո՛ւ այդ տեսիլքը»: <sup>17</sup> Եվ նա եկավ կանգնեց այնտեղ, որտեղ ես էի կանգնած: Նրա գալու ժամանակ ես ցնորվեցի և ընկա երեսիս վրա: Եվ ասաց ինձ. «Իմացի՛ր, մարդո՛ւ որդի, որ այդ տեսիլքը դեռևս վախճանի ժամանակների համար է»։ <sup>18</sup> Եվ մինչ նա խոսում էր ինձ հետ, ցնորվեցի և երեսիս վրա գետին ընկա, բայց ձեռքը գցեց ինձանից ու ոտքերիս վրա կանգնեցրեց <sup>19</sup> և ասաց ինձ. «Ահա ես քեզ ցույց կտամ այն, ինչ որ վերջում լինելու է երկրի վրա, քանի որ վախճանը դեռևս ժամանակների համար է: <sup>20</sup> Եղջյուրավոր այն խոյը, որ տեսնում էիր, պարսիկների և մարերի թագավորն է, <sup>21</sup> իսկ այծերի քոշը հույների թագավորն է. այն մեծ եղջյուրը, որ նրա աչքերի միջև էր, նույն ինքն առաջին թագավորն է: <sup>22</sup> Երբ նա, որի ներքո այլ եղջյուրներ կային, խորտակվի, նրա ազգից չորս թագավորներ կելնեն, բայց ոչ իրենց զորությամբ։ <sup>23</sup> Նրանց թագավորությունից հետո և նրանց մեղքերի ավարտին ժպիրհ երեսով մի թագավոր կբարձրանա՝ առակներից հասկացող: <sup>24</sup> Հզոր է, նրա զորությունը, և սքանչելի բաները կոչնչացնի, կհաջողվի և գործի կանցնի. կկործանի հզորներին և սուրբ ժողովրդին: <sup>25</sup> Նրա ճնշման լուծը հաջողություն կգտնի, և նենգությունը` նրա ձեռքում, կմեծամտանա իր սրտում, նենգությամբ շատերի կվերացնի, կորստյան կմատնի շատերի և ինչպես ձու կփշրի ձեռքում:

²⁶ Երեկոյի և առավոտվա տեսիլքը, որ ասվեց, ճշմարիտ է, և դու կնքի՛ր այդ տեսիլքը, որովհետև բազում օրերի համար է»:

²⁷ Եվ ես՝ Դանիելս, ննջեցի և հիվանդացա, ապա ելա և արքունի գործը կատարեցի և զարմացել էի այդ տեսիլքի վրա, և չկար մեկը, որ հասկացներ»:

9

Դանիելը խոստովանում է Իսրայելի մեղքը

¹ «Մարերի սերնդից Արշավիրի որդու՝ Դարեհի առաջին տարում, որ թագավորեց քաղդեացիների թագավորության վրա, ² ես՝ Դանիելս, գրքերից խելամուտ եղա այն տարիների թվին, որ Տիրոջ խոսքը եղավ Երեմիա մարգարեին՝ յոթանասուն տարիներ Երուսաղեմի ավերածության կատարման համար։ ³ Եվ երեսս դարձրի դեպի Տերը՝ իմ Աստվածը, խնդրելով աղոթքներով և աղաչանքներով, պահքով ու խորգով. ⁴ աղոթքի կանգնեցի առ Տերը՝ Աստված, գոհաբանություն հայտնեցի և ասացի. «Տե՛ր, մեծ և սքանչելագո՛րծ Աստված, որ պահում ես ուխտն ու ողորմությունը քո սիրելիների համար, որոնք պահում են քո պատվիրանները։ ⁵ Մեղանչեցինք, անօրենություն և անիրավություն գործեցինք, ապստամբեցինք և խոտորվեցինք քո պատվիրաններից և քո արդարադատությունից ⁶ և չլսեցինք քո ծառա մարգարեներին, որոնք մեր թագավորների, մեր իշխանների, մեր հայրերի և երկրի ողջ ժողովրդի հետ քո անունով խոսեցին։ ⁷ Քոնն է, Տե՛ր, արդարությունը, և այս օրվա պես երեսի ամոթը՝ մերը, Հուդայի մարդունը, Երուսաղեմի բնակիչներինը և ողջ Իսրայելինը՝ մոտիկ ու հեռու գտնվողներինը ողջ երկրի վրա, այնտեղ, ուր ցրեցիր նրանց իրենց անհնազանդության պատճառով, որ չհնազանդվեցին քեզ։ ⁸ Տե՛ր, մեր երեսի ամոթը մերն է, մեր թագավորներինը, մեր իշխաններինն ու մեր հայրերինը, որ մեղանչեցինք, ⁹ իսկ գթությունն ու քավությունը՝ Տիրոջը՝ մեր Աստծունը. քանի որ ապստամբեցինք Տիրոջ դեմ ¹⁰ և չլսեցինք Տիրոջ՝ մեր Աստծու ձայնը՝ գնալու նրա օրենքներով, որ դրեց մեր առաջ իր ծառա մարգարեների ձեռքով։ ¹¹ Ամբողջ Իսրայելը զանց առավ քո օրենքները և խոտորվեց, որ չլսի քո ձայնը, և քո ծառա Մովսեսի օրենքում գրված անեծքն ու երդումը եկան մեզ վրա, Տե՛ր, քանի որ մեղանչեցինք նրա դեմ։ ¹² Եվ հաստատեց իր խոսքերը, որ խոսել էր մեր դեմ և մեր դատավորների դեմ, որ դատում էին մեզ՝ մեծամեծ չարիքներ մեզ վրա բերելով, որ չեն եղել ողջ երկնքի տակ, ինչպես որ եղան Երուսաղեմում։

¹³ Ինչպես որ գրված է Մովսեսի օրենքում, այն բոլոր չարիքները եկան մեզ վրա, բայց չաղաչեցինք Տիրոջ՝ մեր Աստծու առաջ՝ հետ դառնալու մեր հայրերի անիրավություններից և խելամուտ լինելու քո ողջ ճշմարտությանը։ ¹⁴ Եվ Տերը՝ մեր Աստվածը, ելավ մեր չարիքների դեմ և դրանք մեզ վրա բերեց, որովհետև Տերը՝ մեր Աստվածը, արդար է իր բոլոր գործերի հանդեպ, որ արեց մեր դեմ, բայց չլսեցինք նրա ձայնը։ ¹⁵ Եվ արդ, Տե՛ր, Աստվա՛ծ մեր, որ հզոր ձեռքով հանեցիր քո ժողովրդին եգիպտացիների երկրից և քեզ համար անուն ստեղծեցիր, ինչպես և այսօր. մեղանչեցինք և անօրենություն գործեցինք։ ¹⁶ Տե՛ր, քո ողջ ողորմության շնորհիվ թող անցնի քո զայրույթը և վերանա քո բարկությունը քո քաղաք Երուսաղեմի և քո սուրբ լեռան վրայից, որովհետև մեղանչեցինք, և մեր ու մեր հայրերի անօրենության պատճառով Երուսաղեմը և քո ամբողջ ժողովուրդը որպես նախատինք եղան բոլորի համար, որ մեր շուրջն էին։ ¹⁷ Արդ, Տե՛ր, Աստվա՛ծ մեր, լսի՛ր քո ծառայի աղոթքներն ու խնդրանքները և հանուն քեզ ցո՛ւյց տուր քո երեսը սրբարանին, որ ավերվեց։ ¹⁸ Խոնարհեցրո՛ւ, Աստվա՛ծ իմ, քո ականջը և լսի՛ր ինձ, բա՛ց քո աչքերը և տե՛ս մեր ապականությունը և քո քաղաքինը, որի վրա դրված է քո անունը, որովհետև մեր արդարության պատճառով չենք մեր պաղատանքները քո առջև դնում, այլ հանուն քո բազում գթության, Տե՛ր։ ¹⁹ Լսի՛ր, Տե՛ր, քավի՛ր, Տե՛ր, անսա՛, Տե՛ր, և հանուն քեզ մի՛ հապաղիր, Աստվա՛ծ իմ, որովհետև քո անունն է դրված քո քաղաքի վրա»։

Գաբրիելը բացատրում է մարգարեությունը

²⁰ «Եվ մինչ ես խոսում և աղոթքի մեջ էի, խոստովանում էի իմ մեղքերը և Իսրայելի ժողովրդի մեղքերը և պաղատանքներ էի դնում Տիրոջ՝ իմ Աստծու առաջ սուրբ լեռան համար, ²¹ մինչ խոսում էի աղոթքի մեջ, ահա այն մարդը՝ Գաբրիելը, որին տեսնում էի նախկին տեսիլքի մեջ, թռավ և մոտեցավ ինձ մոտավորապես երեկոյան զոհաբերության ժամին ²² և խելամուտ դարձրեց ինձ, խոսեց ինձ հետ և ասաց. “Դանիե՛լ, այժմ եկա խելամուտ դարձնելու քեզ։ ²³ Քո աղոթքի սկզբում պատգամ ելավ, և ես եկա պատմելու քեզ, քանի որ դու հաճելի մարդ ես։ Արդ, մի՛տքդ բեր այդ խոսքը և այդ տեսիլքը մի՛տքդ պահիր։ ²⁴ Յոթանասուն շաբաթ սահմանվեց քո ժողովրդի վրա և սուրբ քաղաքի վրա՝ մեղքերը վերջացնելու, անօրենությունները կնքելու, անիրավությունները ջնջելու, ամբարշտությունները քավելու, հավիտենական արդարություն բերելու, տեսիլքն ու մարգարեն կնքելու և Սրբություն սրբոցն օծելու համար։ ²⁵ Պիտի իմանաս ու խելամուտ լինես՝ այն ելած խոսքին պատասխան տալու։ Երուսաղեմի շինվելուց մինչև Օծյալ Առաջնորդը կա յոթ շաբաթ և վաթսուներկու շաբաթ։ Եվ կդառնան ու կշինվեն հրապարակներն ու պարիսպները, և կնորոգվեն ժամանակները։ ²⁶ Վաթսուներկու շաբաթ հետո Օծյալը կվերանա, և արդարադատություն չի լինի նրա մեջ. քաղաքն ու սրբարանը կկործանվեն առաջնորդի հետ, որ պիտի գա, և կջնջվեն հեղեղով, և մինչև սահմանված պատերազմի վախճանն ավերածություն կհաստատի և կզորացնի շատերի ուխտը։ Մեկուկես շաբաթ կդադարեցնի սեղաններն ու զոհաբերությունները և մինչև անկյան ծայրը՝ ավերածություն, մինչև որ վախճան ու տագնապ բերի ավերածության վրա։

²⁷ Եվ կզորացնի շատերի ուխտը։ Մեկուկես շաբաթ կվերանան զոհերն ու ընծաները, և տաճարի վրա կլինի “ավերածության պղծությունը”, և մինչև ժամանակի վախճանը ավերածությանը վերջ կտրվի”»։

10

Դանիելի վերջին մեծ տեսիլքը

¹ Պարսից Կյուրոս արքայի երրորդ տարում մի բան հայտնվեց Դանիելին, որի անունը կոչվեց Բաղդասար։ Ճշմարիտ է այն բանը, և մեծ զորություն ու հանճար տրվեց նրան տեսիլքի մեջ։ ² «Այդ օրերին ես՝ Դանիելս, ամբողջ երեք շաբաթ սգի մեջ էի։ ³ Ախորժակով հաց չկերա, միս ու գինի չմտան իմ բերանը, և յուղով չօծվեցի մինչև ամբողջ երեք շաբաթվա վերջը։ ⁴ Առաջին ամսվա քսանչորսերորդ օրը ես կանգնած էի մեծ գետի ափին, որ Տիգրիս-Դկլաթն է։ ⁵ Բարձրացրի աչքերս, և ահա փառահեղ հագնված մի մարդ՝ իր մեջքին Ոփազի ոսկուց գոտի կապած։ ⁶ Նրա մարմինը ծովագույն էր, նրա երեսը նման էր փայլակի տեսքի, նրա աչքերը՝ կրակի ճառագայթների, նրա բազուկներն ու ազդրերը՝ փայլուն պղնձի տեսքի, և նրա խոսքերի ձայնը՝ զորքի ձայնի։ ⁷ Եվ միայն ես՝ Դանիելս, տեսա տեսիլքը, և այն մարդիկ, որ ինձ հետ էին, չտեսան տեսիլքը, այլ մեծ ահ ընկավ նրանց վրա, և զարհուրած փախան։ ⁸ Ես մենակ մնացի և տեսա այն մեծ տեսիլքը, և իմ մեջ ուժ չմնաց. փառքս ոչնչության վերածվեց, և չդիմացա զորությանը։ ⁹ Եվ նրա խոսքերի ձայնը լսեցի. նրա խոսքերի ձայնը լսելիս քարացել էի, և դեմքս գետին էր խոնարհվել։ ¹⁰ Եվ ահա ձեռքն ինձ մեկնելով՝ ինձ ծնկներիս և ձեռքերիս թաթերի վրա կանգնեցրեց ¹¹ և ինձ ասաց. «Դանիե՛լ, հաճելի՛ մարդ, խելամո՛ւտ եղիր խոսքերիս, որ պիտի խոսեմ քեզ հետ, և մնա՛ քո տեղում, որովհետև այժմ ուղարկվեցի քեզ մոտ»։ Եվ երբ նա ինձ հետ այս բաներն էր խոսում, դողալով ոտքի ելա։ ¹² Եվ ինձ ասաց. «Մի՛ վախեցիր, Դանիե՛լ, որովհետև այն օրվանից, երբ սիրտդ տվեցիր խելամուտ լինելու և վշտանալու քո Աստծու առաջ, քո խոսքերը լսելի եղան, և ես եկա քո խոսքերի պատճառով։ ¹³ Պարսից թագավորության իշխանը քսանմեկ օր ինձ հակառակվում էր, և ահա Միքայելը՝ առաջին իշխաններից մեկը, եկավ ինձ օգնելու, և թողեցի նրան այնտեղ՝ պարսից թագավորության իշխանի հետ, ¹⁴ և եկա քեզ խելամուտ դարձնելու, թե վերջին օրերին ինչքա՛ն և ի՛նչ դեպքեր են անցնելու քո ժողովրդի վրայով, որովհետև այդ տեսիլքն օրերի համար է»։ ¹⁵ Եվ երբ նա ինձ հետ այս խոսքերով խոսում էր, երեսիս վրա գետին ընկա և քարացել էի։ ¹⁶ Եվ ահա մեկը՝ մարդու որդու նմանությամբ, մոտենում էր իմ շրթունքներին. բերանս բացեցի, խոսեցի և ասացի այն մարդուն, որ իմ դիմացն էր. «Տե՛ր, երբ դու ինձ երևացիր, փորս խռովվեց իմ մեջ, և զորություն չկար իմ մեջ։ ¹⁷ Ինչպե՞ս պիտի կարողանա քո ծառան, տե՛ր, խոսել իմ տիրոջ հետ։ Իմ մեջ պահելու զորություն այլևս չկա, և շունչ չմնաց իմ մեջ»։ ¹⁸ Եվ մարդու տեսքով մեկն է՛լ ավելի ինձ մոտեցավ և ինձ զորացրեց։ ¹⁹ Եվ ասաց. «Մի՛ վախեցիր, հաճելի՛ մարդ, խաղաղությո՛ւն քեզ, զորացի՛ր և քա՛ջ եղիր»։ Երբ նա ինձ հետ խոսում էր, զորացա և ասացի. «Թող խոսի տերը, որովհետև ինձ զորացրիր»։ ²⁰ Եվ ասաց. «Գիտե՞ս, թե ինչո՛ւ եկա քեզ մոտ. արդ վերադառնում եմ պատերազմ տալու պարսից իշխանի դեմ. ես գնում էի, և գալիս էր հունաց իշխանը։ ²¹ Բայց կպատմեմ քեզ, ինչ սահմանված է ճշմարտության գրքում, և ոչ ոք ինձ օգնական չէ այս բաներում, բացի ձեր Միքայել իշխանից»։

11

Պատերազմ Պարսկաստանի և Հունաստանի միջև

¹ «Ես Կյուրոսի առաջին տարում ամուր և զորեղ էի։ ² Արդ քեզ կպատմեմ ճշմարտությունը։ Ահա երեք թագավորներ կբարձրանան պարսից երկրի վրա, և չորրորդը մեծ հարստությամբ բոլորից ավելի հարուստ կլինի, և նա իր հարստությամբ հզորանալուց հետո կհարձակվի հույների թագավորությունների վրա։

³ Հզոր թագավոր կբարձրանա, կտիրի մի մեծ տերության և կգործի ըստ իր կամքի։ ⁴ Եվ երբ բարձրանա, նրա թագավորությունը կփշրվի ու կբաժանվի երկնքի չորս հողմերին, բայց ո՛չ ըստ նրա վախճանի, ո՛չ էլ ըստ նրա տերության, որին տիրեց, քանի որ նրա թագավորությունը կխլվի, և կլինի ուրիշներինը, բացի իրենցից։ ⁵ Հարավի թագավորը կզորանա, իսկ իշխաններից մեկը կհզորանա նրա դեմ և կտիրի մի մեծ տերության։ ⁶ Իրենց տարիներից հետո կխառնակվեն միմյանց հետ, և հարավի արքայի դուստրը կմտնի հյուսիսի արքայի մոտ՝ նրա հետ դաշինք կնքելու, բայց չի դիմանա բազկի զորությանը, և նրա սերունդը չի մնա, և կմատնվեն ինքն ու իրեն բերողները և օրիորդն ու նա, ով ժամանակին զորացնում էր իրեն։ ⁷ Նրա արմատի ծաղկից մեկը նրա պատրաստության վրա կելնի. կգա զորքի դեմ, կմտնի հյուսիսի թագավորության ամրությունները, կգործի նրանց դեմ և կզորանա։ ⁸ Եվ կկործանի նրանց աստվածներին՝ նրանց ձուլածուներով հանդերձ, և նրանց ոսկե և արծաթե ողջ ցանկալի սպասքն ավար առնելով կբերի Եգիպտոս, և ինքն առավել հզոր կլինի, քան հյուսիսի թագավորը։ ⁹ Եվ կմտնի հարավի արքայի թագավորությունը և կվերադառնա իր երկիրը։ ¹⁰ Նրա որդիները մեծաթիվ զորքերի բազմություն կհավաքեն. հարձակվելով կմտնի, հեղեղ կբերի, կանցնի ու դադար կառնի և կգրգռի մինչև իսկ իր զորքին։ ¹¹ Հարավի թագավորը կկատաղի և կելնի ու պատերազմ կտա հյուսիսի թագավորի դեմ. մեծաթիվ զորք կհավաքի, բայց զորքը կմատնվի նրա ձեռքը։ ¹² Կվերցնի բազմությունը, և նրա սիրտը կհպարտանա, բյուրավորների կկործանի, բայց չի զորանա։ ¹³ Հյուսիսի արքան կդառնա և նախկինից ավելի շատ զորք կբերի և ժամանակների վախճանին մեծ զորքով ու շատ ունեցվածքով կգա կմտնի։ ¹⁴ Այդ ժամանակներում շատերը կելնեն հարավի թագավորի դեմ։ Քո ժողովրդի մնացած որդիները կբարձրանան՝ հաստատելու տեսիլքը, և կտկարանան։ ¹⁵ Հարավի թագավորը կմտնի, ցեխ կկուտակի և կվերցնի ամուր քաղաքները, բայց արքայի բազուկները չեն դիմանա։ Եվ կելնեն նրա ընտրյալները, բայց պահելու զորություն չի լինի։ ¹⁶ Եվ ով մտնի նրա մոտ, նրա կամքը կկատարի, և չի լինի մեկը, որ նրա դեմ կկանգնի։ Փառքի երկրում կմնա ու նրա ձեռքով կվախճանվի։ ¹⁷ Նա իր երեսը կուղղի՝ իր ուժով մտնելու նրա ողջ թագավորությունը և բոլոր ուղղությունները կվերցնի նրա դեմ։ Կանանց դստերը նրան կտա կորստյան համար, բայց թող չդանդաղի, և նա թող չլինի նրանը։ ¹⁸ Իր երեսը դեպի կղզիները կդարձնի, կվերցնի շատերը և կայրի այն իշխաններին, որ նախատեցին նրանց, և նրանց նախատինքը իրենց երեսին կդարձնի։ ¹⁹ Ապա նա զորությամբ կդառնա իր երկիրը, բայց կտկարանա, կընկնի և չի գտնվի։ ²⁰ Նրա արմատից թագավորության տունկ կելնի նրա պատրաստության վրա և կբռնադատի՝ թագավորության փառքը վերցնելու, և այդ օրերին կխորտակվի, և բացեիբաց ու պատերազմով ²¹ չի մնա իր պատրաստության վրա, քանի որ արհամարհվեց, և նրան չտվեցին թագավորության փառքը, բայց հաջողությամբ կգա ու գայթակղություններով կբռնադատի թագավորություններին։ ²² Այն բազուկները, որ հեղեղ կբերեն, նրա երեսից էլ կհեղեղվեն, ուխտի առաջնորդն էլ կխորտակվի։ ²³ Եվ նրանց, որ խառնվեն, նրանով նենգություն կանի և կելնի ու քիչ ազգով կզորանա նրանց դեմ։ ²⁴ Հաջողությամբ, բազում շրջաններով կգա և կանի այն, ինչ չարեցին ո՛չ նրա հայրերը, ո՛չ էլ նրա հայրերի հայրերը, և ավարը, կողոպուտը և ունեցվածքը նրանց կբաշխի և մինչև որոշ ժամանակ եգիպտացիների դեմ դավեր կխորհի. ²⁵ նրա զորությունն ու նրա սիրտը մեծ զորությամբ կարթնանան հարավի թագավորի դեմ։ Եվ հարավի թագավորը չափազանց հզոր ու մեծ զորքով պատերազմ կգումարի, բայց չի դիմանա, որովհետև նրա դեմ դավեր կխորհեն։ ²⁶ Եվ կուտեն, ինչ որ նրան կհասնի. նրան կխորտակեն ու զորքերը կայրեն, և բազում վիրավորներ կընկնեն։ ²⁷ Երկու թագավորների համար էլ նրանց սրտերը կմնան չարության մեջ. մի սեղանի վրա սուտ կխոսեն, բայց չի հաջողվի, որովհետև վախճանը ժամանակների համար է։ ²⁸ Բազում մեծությամբ կվերադառնա իր երկիրը, և նրա սիրտը սուրբ ուխտի դեմ կլինի, և գործի կանցնի ու կվերադառնա իր երկիրը։ ²⁹ Ժամանակին կդառնա ու կգա հարավի դեմ, բայց վերջինն առաջինի նման չի լինի։ ³⁰ Եվ կիտացիների բանակները նրա մոտ կմտնեն ու կխոնարհվեն. կդառնա ու կբարկանա սուրբ ուխտի վրա, գործի կանցնի, կդառնա ու կհավաքվի նրանց դեմ, որոնք թողեցին սուրբ ուխտը։ ³¹ Նրանից սերունդներ կելնեն և բռնությամբ կպղծեն սրբարանը, կփոխեն պաշտամունքի շարունակությունը և “ավերածության պղծությունը” կդնեն։ ³² Ուխտն ապականողներն իրենց վրա գայթակղություն կբերեն։ Եվ ժողովուրդը, որ ճանաչում է իր Աստծուն, կզորանա և գործի կանցնի։ ³³ Ժողովրդի հանճարեղ մարդիկ շատ բաների խելամուտ կլինեն, բայց օրերով կտկարանան սրով ու հրով, գերությամբ ու հափշտակությամբ։ ³⁴ Իրենց տկարանալու ժամանակ փոքր-ինչ օգնականություն կգտնեն, և շատերը գայթակղություններով կավելանան նրանց վրա։ ³⁵ Եվ հանճարեղներից կտկարանան՝ նրանց փորձելու, ընտրելու և հայտնելու համար մինչև ժամանակի վախճանը, որովհետև դեռ ժամանակ կա։ ³⁶ Կգործի ըստ իր կամքի։ Եվ թագավորը կբարձրանա ու կհպարտանա բոլոր աստվածների դեմ, ամբարտավան բաներ կխոսի աստվածների Աստծու դեմ և կհաջողվի, մինչև բարկությունն անցնի, որովհետև վախճանվելու է։ ³⁷ Կմտածի իր հայրերի աստվածների և կանանց ցանկության մասին, միտքը որևէ աստծու չի բերի և ամեն ինչի հանդեպ կհպարտանա։ ³⁸ Իր տեղից կփառավորի հզոր աստծուն. և աստծուն, որին նրա հայրերը չճանաչեցին, կփառավորի ոսկով, արծաթով և թանկարժեք ու ցանկալի քարերով։ ³⁹ Ըստ օտար աստծու կանցնի փախստականների օրերով և փառք կավելացնի, շատերին կհնազանդեցնի իրեն և երկիրը պարգևով կբաժանի։ ⁴⁰ Եվ վախճանի ժամանակ գազանաբար կկռվի հարավի արքայի դեմ։ Հյուսիսի արքան նրա դեմ կառքերով, հեծյալներով ու բազում նավերով զորաժողով կանի, կմտնի երկիրը և կխորտակի. ⁴¹ կանցնի և կմտնի Սաբայիմ երկիրը, և շատերը կտկարանան։

Եվ սրանք են, որ նրա ձեռքից կփրկվեն՝ Եդովմը, Մովաբը և Ամովնի որդիների իշխանությունը։ ⁴² Իր ձեռքը դեպի երկիրը կմեկնի, և եգիպտացիների երկրին փրկություն չի լինի։ ⁴³ Կտիրի ոսկու և արծաթի գաղտնիքներին և եգիպտացիների, լիբիացիների և եթովպացիների ամրոցներում եղող բոլոր ցանկալի բաներին։ ⁴⁴ Ապա լուրերն ու տագնապներն արևելքից կստիպեն նրան, և հյուսիսից կգա՝ մեծ բարկությամբ կործանելու շատերին։ ⁴⁵ Եվ իր վրանը կխփի Եփագնոնում՝ ծովերի միջև, սուրբ Սաբային լեռան վրա, և կգա մինչև նրա մի կողմը, և ոչ ոք չի լինի, որ փրկի»։

12

Ծանր ժամանակը

¹ «Այն ժամանակ կելնի Միքայել մեծ իշխանը, որ կանգնած է քո ժողովրդի որդիների համար։ Եվ կլինի նեղության ժամանակ, նեղություն, որպիսին չի եղել այն օրվանից, երբ ազգ եղավ երկրի վրա, մինչև այն ժամանակը։ Եվ այն ժամանակ կփրկվի քո ժողովուրդը, ամեն ոք, որ գրված կլինի գրքի մեջ։ ² Երկրի հողում ննջեցյալներից շատերը կարթնանան. ոմանք՝ հավիտենական կյանքի համար, իսկ ոմանք՝ նախատինքի և հավիտենական ամոթի համար։ ³ Իմաստունները կծագեն ինչպես լուսավորություն երկնակամարում, և արդարներից շատերը՝ իբրև հավիտենական ու հավերժ աստղեր։ ⁴ Եվ դու, Դանիե՛լ, փակի՛ր այդ խոսքերը և կնքի՛ր այդ գիրքը մինչև վախճանի ժամանակը, մինչև շատերը սրբվեն, և շատանա գիտությունը»։

Դանիելի վերջին տեսիլքը

⁵ «Ես՝ Դանիելս, տեսա. և ահա երկու հոգի կային գետի այս կողմում և այն կողմում ⁶ և ասացին այն մարդուն, որ բեհեզ էր հագել և կանգնել էր գետի ջրերի վրա. “Մինչև ե՞րբ պիտի տևի այդ հրաշքների վախճանը, որ ասացիր”։ ⁷ Եվ լսեցի այն մարդուց, որ բեհեզ էր հագել և կանգնել էր գետի ջրերի վրա. իր աջ ձեռքը և իր ձախ ձեռքը դեպի երկինք բարձրացրեց ու երդվեց հավիտենական Կենդանիով, թե ժամանակին, ժամանակներում և ժամանակի կեսին, երբ սրբված ժողովրդի ուժի ցրումն ավարտվի, կիմանան այդ ամենը։ ⁸ Ես լսեցի, բայց չհասկացա և ասացի. “Տե՛ր, ի՞նչ է դրանց վախճանը”։ ⁹ Ասաց. “Գնա՛, Դանիե՛լ, քանի որ այս խոսքերն արգելված ու կնքված են մինչև վախճանի ժամանակը։ ¹⁰ Շատերը կընտրվեն, կսպիտակեն, կփորձվեն ու կսրբվեն. անօրեններն անօրենություն կգործեն, և ամբարիշտները չեն հասկանա, բայց իմաստունները կիմանան ¹¹ պաշտամունքի շարունակության փոփոխման ժամանակից։ Եվ հազար երկու հարյուր երեսունհինգ օր “ավերածության պղծությունը” կպաշտվի։ ¹² Երանի՜ նրան, ով կհամբերի և կհասնի հազար երեք հարյուր երեսունհինգ օրերին։ ¹³ Իսկ դու եկ հանգստացի՛ր, որովհետև դեռ օրեր ու ժամեր կան մինչև վախճանի ավարտը. դու կհանգստանաս և կարթնանաս քո ժամանակին՝ օրերի վախճանին”»։

14

Դանիելը և Բելի քրմերը

⁶⁵ Աստիագես թագավորն ամփոփվեց իր հայրերի մոտ, իսկ պարսիկ Կյուրոսն առավ նրա թագավորությունը։ ¹ Դանիելը թագավորի կյանքի ընկերակիցն էր և ավելի փառավոր վիճակում էր, քան նրա բոլոր բարեկամները։ ² Բաբելացիները մի կուռք ունեին՝ Բել անունով, և նրան մեկ օրվա բաժին էր ընկնում տասներկու արդու ընտիր ալյուր, քառասուն ոչխար և վեց մար գինի։ ³ Թագավորը պաշտում էր նրան և միշտ գնում երկրպագում էր նրան։ Բայց Դանիելն իր Աստծուն էր երկրպագում։ Եվ թագավորը նրան ասաց. «Դու ինչո՞ւ չես երկրպագում Բելին»։ ⁴ Եվ նա ասաց. «Քանի որ չեմ պաշտում ձեռակերտ կուռքերին, այլ կենդանի Աստծուն՝ երկնքի և երկրի Արարչին, որ իշխանություն ունի ամեն մարմնի վրա»։ ⁵ Եվ թագավորը նրան ասաց. «Իսկ քեզ չի՞ թվում, որ Բելը կենդանի Աստված է. մի՞թե չես տեսնում, թե որքա՛ն է միշտ ուտում ու խմում»։ ⁶ Դանիելը ծիծաղելով ասաց. «Մի՛ խաբվիր, արքա՛, որովհետև դա ներսից կավ է, իսկ դրսից՝ պղինձ. դա երբեք ո՛չ կերել, ո՛չ էլ խմել է»։ ⁷ Թագավորը բարկանալով կանչեց իր քրմերին, և թագավորը նրանց ասաց. «Եթե ինձ չասեք՝ ո՛վ է ուտում այն սեղանից, մահով կմեռնեք։ ⁸ Իսկ եթե ցույց տաք, որ Բելն է ուտում այդ բոլորը, կմեռնի Դանիելը, որովհետև Բելին հայհոյեց»։ Եվ Դանիելն ասաց թագավորին. «Թող քո խոսքի համաձայն լինի»։ ⁹ Բելի քրմերը յոթանասուն հոգի էին՝ չհաշված կանանց ու մանուկներին։ Թագավորը Դանիելի հետ եկավ Բելի տաճարը։ ¹⁰ Բելի քրմերն ասացին. «Ահա մենք դուրս կելնենք, իսկ դու, արքա՛, դի՛ր նրա առաջ. կերակուրներն ու գինին խառնված կդնես, ապա դռները փակի՛ր ու կնքի՛ր քո մատանիով։ ¹¹ Եվ առավոտյան գալով, եթե այդ ամենը կերված չլինի Բելից, թող մե՛նք մեռնենք, իսկ եթե ոչ՝ Դանիելը, որ մեր մասին սուտ խոսեց»։ ¹² Նրանք վստահ էին, քանի որ սեղանի տակ գաղտնի մուտք էին շինել և միշտ նրանով էին մտնում և այն ուտում։

¹³ Եվ այնպես եղավ, երբ դուրս ելան, թագավորը կերակուրները դրեց Բելի առաջ։ Ապա Դանիելը հրաման տվեց իր ծառաներին, և մոխիր բերեցին ու միայն թագավորի առաջ ողջ մեհյանով մեկ ցանեցին։ Եվ դուրս ելնելով՝ դուռը փակեցին, թագավորի մատանիով կնքեցին ու գնացին։ ¹⁴ Եվ քրմերը, իրենց սովորության համաձայն, գիշերն իրենց կանանց ու որդիների հետ մտան, ամբողջը կերան, խմեցին և ոչինչ չթողեցին։ ¹⁵ Թագավորը վաղ առավոտյան Դանիելի հետ եկավ ¹⁶ և ասաց. «Այդ կնիքներն անխա՞խտ են, Դանիե՛լ»։

Նա ասաց. «Անխախտ են, արքա՛»։ ¹⁷ Եվ այնպես եղավ, երբ դռները բացեցին, թագավորը նայեց սեղանին, բարձրաձայն աղաղակեց և ասաց. «Մեծ ես, Բե՛լ, և քո մեջ ոչ մի նենգություն չկա»։ ¹⁸ Դանիելը ծիծաղեց, բռնեց թագավորին, որ ներս չմտնի, և ասաց. «Լավ, նայի՛ր այդ հատակին և տե՛ս՝ ո՞ւմն են այդ հետքերը»։ ¹⁹ Թագավորն ասաց. «Տեսնում եմ տղամարդկանց, կանանց և մանուկների հետքեր»։ ²⁰ Այն ժամանակ թագավորը բարկանալով բռնեց քրմերին, նրանց կանանց ու որդիներին, և նրան ցույց տվեցին գաղտնի դռները, որտեղով մտնում և սպառում էին սեղանը։ ²¹ Թագավորը նրանց կոտորեց, իսկ Բելին Դանիելի ձեռքը տվեց, և կործանեց այն ու նրա մեհյանը։

²² Եվ մի մեծ վիշապ կար, և բաբելացիները պաշտում էին նրան։ ²³ Թագավորն ասաց Դանիելին. «Մի՞թե դրա մասին էլ կասես, թե պղնձյա է. ահա կենդանի է, ուտում և խմում է, և չես կարող ասել, թե դա կենդանի աստված չէ։ Արդ, ե՛կ, երկրպագի՛ր դրան»։ ²⁴ Դանիելն ասաց նրան. «Ես Տիրոջը՝ իմ Աստծուն եմ երկրպագում, որովհետև նա է կենդանի Աստվածը, ²⁵ բայց դու, արքա՛, իշխանությո՛ւն տուր, և ես առանց սրի ու գավազանի այդ վիշապին քո առաջ կսպանեմ»։ Թագավորն ասաց. «Տալիս եմ քեզ»։ ²⁶ Դանիելը յուղ, ձյութ, ճարպ ու մազ վերցրեց, միասին եփեց, գնդեր շինեց ու խփեց վիշապի բերանին, և երբ կերավ, պայթեց։ Եվ ասաց. «Տեսե՛ք ձեր պաշտամունքը»։ ²⁷ Եվ երբ բաբելացիները լսեցին, շատ բարկացան, հավաքվեցին թագավորի դեմ և ասացին. «Հրեա եղավ թագավորը. Բելին կործանեց, վիշապին սպանեց, քրմերին կոտորեց»։

²⁸ Եվ երբ եկան, թագավորին ասացին. «Դանիելին մեր ձե՛ռքը տուր, իսկ եթե ոչ՝ կսպանենք քեզ և քո ընտանիքը»։ ²⁹ Երբ թագավորը տեսավ, որ շատ են տագնապեցնում իրեն, Դանիելին հարկադրված նրանց ձեռքը տվեց։ ³⁰ Եվ նրանք նրան առյուծների փոսը նետեցին, և այնտեղ էր վեց օր։ ³¹ Փոսի մեջ յոթ առյուծներ կային։ Նրանց միշտ երկու մարդ և երկու անասուն էին տալիս, բայց այն ժամանակ նրանց ոչինչ չգցեցին, որպեսզի Դանիելին անմիջապես ուտեին։

³² Ամբակում մարգարե կար Հուդայի երկրում. թան եփեց, հաց բրդեց ամանի մեջ և հանդ էր գնում՝ իր մշակներին տանելու։ ³³ Եվ Տիրոջ հրեշտակն Ամբակումին ասաց. «Այդ ճաշը, որ ունես, Բաբելոն՝ Դանիելին տա՛ր. առյուծների փոսի մեջ է»։ ³⁴ Ամբակումն ասաց. «Տե՛ր, ես Բաբելոնը չեմ տեսել և չգիտեմ՝ փոսը որտե՛ղ է»։ ³⁵ Հրեշտակը ձեռքը գցեց նրա գագաթից, բռնեց նրա գլխի մազերից և իր հոգու զորությամբ նրան դրեց Բաբելոնում՝ փոսի վրա։ ³⁶ Ամբակումն աղաղակեց և ասաց. «Դանիե՛լ, Դանիե՛լ, ելի՛ր, վերցրո՛ւ այդ ճաշը, որ Աստված քեզ համար ուղարկեց»։ ³⁷ Դանիելն ասաց. «Հիշեցի՛ր ինձ, Աստվա՛ծ, և չլքեցիր քո սիրելիներին»։ ³⁸ Դանիելը վեր կացավ ու կերավ։ Եվ Աստծու հրեշտակը նույն ժամին Ամբակումին կրկին իր տեղը տարավ։ ³⁹ Թագավորը յոթերորդ օրը եկավ ողբալու Դանիելի վրա։ Երբ եկավ փոսի բերանը, նայեց ու տեսավ, որ Դանիելը նստած էր։ ⁴⁰ Բարձրաձայն աղաղակեց և ասաց. «Մեծ ես, Դանիելի՛ Տեր, Աստվա՛ծ, և քեզնից բացի ուրիշ մեկը չկա»։ Եվ նրան վեր հանեց։ ⁴¹ Իսկ նրան կորստյան մատնող վնասարարներին փոսը նետեցին, և նրա առաջ իսկույն պատառոտվեցին։

ՈՎՍԵԵԻ ՄԱՐԳԱՐԵՈՒԹՅՈՒՆԸ

1

¹ Տիրոջ խոսքը, որ եղավ Երիի որդի Ովսեեին Հուդայի թագավորներ Ոզիայի, Հովաթամի, Աքազի և Եզեկիայի օրերին և Իսրայելի թագավոր Հերոբովամի՝ Հովասի որդու ժամանակ։

Ովսեեի կինն ու զավակները

² Տիրոջ խոսքերի սկիզբը՝ Ովսեեին։ Տերն ասաց Ովսեեին.

«Գնա՛, դու քեզ համար պոռնկացող կին

և պոռնկության որդինե՛ր առ,

որովհետև երկիրը պոռնկանալով հեռանալու է Տիրոջից»։

³ Եվ գնաց առավ Գոմերին՝ Դաբելայիմի դստերը. և հղիացավ ու նրան որդի ծնեց։ ⁴ Եվ Տերն ասաց նրան.

«Նրա անունը դի՛ր Հեզրայել,

որովհետև մի փոքր ևս,

կպահանջեմ Հեզրայելի արյունը Հեուի տնից

և կդադարեցնեմ Իսրայելի տան թագավորությունը։

⁵ Այն օրը կփշրեմ Իսրայելի աղեղը Հեզրայելի հովտում»։

⁶ Կրկին հղիացավ և դուստր ծնեց։ Եվ Տերն ասաց նրան.

«Նրա անունը դի՛ր “Ողորմություն չգտած” [* Լո-Ռուխամա],

որովհետև այլևս չեմ ողորմի Իսրայելի տանը,

այլ կընդդիմանամ նրանց հակառակությամբ։

⁷ Հուդայի որդիներին, սակայն, կողորմեմ

և նրանց կփրկեմ Տիրոջ՝ իրենց Աստծու ձեռքով,

բայց չեմ փրկի նրանց ո՛չ աղեղի,

ո՛չ սրի և ո՛չ պատերազմի, ո՛չ կառքերի

և ո՛չ ձիերի, ո՛չ էլ հեծյալների միջոցով»։

⁸ Ողորմություն չգտածին կտրեց կրծքից։ Դարձյալ հղիացավ ու որդի ծնեց։

⁹ Եվ ասաց.

«Նրա անունը դի՛ր “Ոչ իմ ժողովուրդ” [* Լո-Ամմի],

քանի որ դուք իմ ժողովուրդը չեք,

ես էլ ձեր ոչ մի բանը չեմ»։

2

Իսրայելը պիտի վերահաստատվի

¹ «Կգա ժամանակ, և Իսրայելի որդիների թիվը

ծովի ավազի պես անչափ ու անթիվ կլինի.

և նրանք, որ կոչվեցին

«Դուք իմ ժողովուրդը չեք»,

կկոչվեն «Կենդանի Աստծու որդիներ»։

² Եվ Հուդայի որդիներն ու Իսրայելի որդիները նորից կմիանան,

իրենց համար մի իշխան կընտրեն

և կսերեն այն երկրից,

որովհետև մեծ է Հեզրայելի օրը։

Անհավատարիմ Գոմերը և անհավատարիմ Իսրայելը

³ Ձեր եղբորն ասացե՛ք՝ «Իմ ժողովուրդ» [* Ամմի],

իսկ ձեր քրոջը՝ «Ողորմություն գտած» [* Ռուխամա]։

⁴ Դա՛տ արեք ձեր մոր հետ, դա՛տ արեք,

քանի որ նա իմ կինը չէ,

ո՛չ էլ ես նրա ամուսինն եմ։

Կվերացնեմ նրա պոռնկությունն իմ առջևից

և նրա շնությունը՝ իր ստինքների միջից։

⁵ Մերկ կդարձնեմ նրան

ու կդնեմ նրան իր ծննդյան օրերի նման.

կդարձնեմ նրան անապատի պես,

կվերածեմ նրան անջուր հողի

և ծարավից կսպանեմ նրան։

⁶ Նրա որդիներին չեմ ողորմի,

որովհետև պոռնկության որդիներ են,

⁷ քանի որ սաստիկ պոռնկացավ նրանց մայրը

և ամոթահար արեց նրանց, որոնց ծնեց, քանի որ ասաց.

«Կգնամ իմ հոմանիների հետևից,

որոնք ինձ կտան իմ հացն ու ջուրը,

հագուստը և իմ կերպասը,

իմ գինին, իմ ձեթը

և այն ամենը, ինչ որ ինձ պետք է»։

⁸ Դրա համար ես կփակեմ նրա ճանապարհները պատնեշներով ու

կցանկապատեմ նրա ճանապարհները,

և չի գտնի իր շավիղները։

⁹ Նա կընթանա իր հոմանիների հետևից, բայց չի հասնի նրանց,

կփնտրի նրանց, բայց նրանց չի գտնի

և կասի. «Գնամ, վերադառնամ իմ նախկին ամուսնու մոտ,

որովհետև այն ժամանակ ինձ համար ավելի լավ էր, քան հիմա»։

¹⁰ Եվ նա չիմացավ, որ ե՛ս տվեցի նրան ցորենը, գինին ու ձեթը

և արծաթ բազմացրի նրա համար,

բայց նա արծաթեղեն պատրաստեց ու ոսկեղեն ավելացրեց Բահաղի համար։

¹¹ Դրա համար կդառնամ ու կառնեմ իմ ցորենն իր ժամանակին,

իմ գինին ու ձեթը՝ իրենց ժամանակին.

նրանից կխլեմ նաև իմ հագուստը և իմ կերպասը,

որպեսզի չծածկի իր ամոթույքը։

¹² Եվ արդ, նրա պղծությունը հայտնի կդարձնեմ իր հոմանիների առաջ,

և ոչ ոք չի ազատի նրան իմ ձեռքից։

¹³ Նաև հետ կդարձնեմ նրա բոլոր ուրախությունները՝

նրա տոները և նրա ամսագլուխները,

նրա շաբաթները և նրա բոլոր նորալուսինները։

¹⁴ Կոչնչացնեմ նրա այգիներն ու թզենիները,

որոնց համար մի անգամ ասաց՝

«Իմ վարձն են սրանք, որ ինձ տվել են իմ հոմանիները».

կդնեմ դրանք որպես վկայություն,

և դրանք կուտեն անապատի գազանները,

երկնքի թռչուններն ու երկրի սողունները։

¹⁵ Նրանից վրեժխնդիր կլինեմ Բահաղիմի օրերի համար,

երբ զոհ էր մատուցում նրան,

ականջօղեր էր դնում,

իր քառամանյակներն էր գցում,

գնում էր իր հոմանիների հետևից

և մոռացել էր ինձ»,- ասում է Տերը։

Տիրոջ սերն իր ժողովրդի հանդեպ

¹⁶ «Դրա համար ես ահա կմոլորեցնեմ նրան

ու կտանեմ անապատ և կխոսեմ նրա սրտին։

¹⁷ Եվ այնտեղից կտամ նրան իր ունեցվածքը,

և Աքովրի հովիտը՝ բացելու նրա միտքը,

և նա խոնարհ կդառնա այնտեղ,

ինչպես իր մանկության օրերին,

և ինչպես եգիպտացիների երկրից իր ելնելու օրերին»։

¹⁸ «Եվ այն օրը,- ասում է Տերը,- ինձ կանվանի «Ամուսին իմ» [* Իշի]

և ինձ չի անվանի «Բահաղիմ» [Տեր իմ]։

¹⁹ Կվերացնեմ Բահաղիմի անունները նրա բերանից,

և այլևս չեն հիշվի նրա անունները։

²⁰ Եվ այն օրը ուխտ կհաստատեմ նրանց համար՝

անապատի գազանների, երկնքի թռչունների և գետնի սողունների հետ,

և երկրից կվերացնեմ աղեղը, սուրն ու ճակատամարտը

և քեզ հույսով կբնակեցնեմ։

²¹ Քեզ կնշանեմ ինձ հետ հավիտյան,

քեզ կնշանեմ ինձ հետ արդարությամբ և իրավունքով,

ողորմությամբ և գթությամբ։

²² Քեզ կնշանեմ ինձ հետ հավատարմությամբ,

և դու կճանաչես Տիրոջը»։

²³ «Այն օրը,- ասում է Տերը,- ես կլսեմ երկնքին,

երկինքը կլսի երկրին,

²⁴ երկիրը կլսի ցորենին, գինուն ու ձեթին,

և նրանք կլսեն Հեզրայելին։

²⁵ Կսերմանեմ նրան երկրի վրա ինձ համար.

կողորմեմ Ողորմություն չգտածին

ու կասեմ նրան, որ իմ ժողովուրդը չէ՝

«Դու իմ ժողովուրդն ես»,

և նա կասի՝ «Դու Տերը՝ իմ Աստվածն ես»։

3

Ովսեեն և անհավատարիմ կինը

¹ Եվ Տերն ինձ ասաց. «Դու դարձյալ գնա՛ և չարություն ու շնություն սիրող մի կնո՛ջ սիրիր, ինչպես Աստված է սիրում Իսրայելի որդիներին, բայց նրանք օտար աստվածների վրա են իրենց հայացքը հառել և չամիչով խմորեղեն են սիրում»։ ² Նրան ինձ համար վարձեցի տասնհինգ արծաթով, մի քոռ գարիով և մի մատնաչափ գինիով։ ³ Եվ ասացի նրան. «Դու շատ օրեր կբնակվես ինձ հետ և այլևս ո՛չ կպոռնկանաս, ո՛չ էլ ուրիշ տղամարդունը կլինես, և ես կլինեմ քոնը»։ ⁴ Ահա շատ օրեր Իսրայելի որդիները կբնակվեն առանց թագավորի և առանց իշխանի, առանց զոհաբերությունների և առանց զոհասեղանի, առանց քահանայության և առանց հայտնությունների։ ⁵ Դրանից հետո Իսրայելի որդիները կդառնան ու կփնտրեն Տիրոջը՝ իրենց Աստծուն, և Դավթին՝ իրենց թագավորին, և վերջին օրերին կզորանան Տիրոջով ու նրա բարիքներով։

4

Տերն ամբաստանում է Իսրայելին

¹ Լսե՛ք Տիրոջ խոսքը, ո՛վ Իսրայելի որդիներ.

«Տիրոջ դատաստանը երկրի բնակիչների հետ է,

քանի որ չկա ճշմարտություն նրանց մեջ, ո՛չ էլ ողորմություն

և Աստծու գիտություն երկրի վրա։

² Անեծք, ստություն, սպանություն,

գողություն և շնություն ողողել են երկիրը,

և արյունն արյանն են խառնում։

³ Դրա համար երկիրը կսգա

և կնվաղի իր բոլոր բնակիչների,

անապատի գազանների, գետնի սողունների և երկնքի թռչունների հետ,

կպակասեն նաև ծովի ձկները։

⁴ Արդ, թող ոչ ոք ո՛չ դատի, ո՛չ էլ հանդիմանի.

իմ ժողովուրդը, սակայն, հակառակող քահանայի է նման»։

Տերն ամբաստանում է քահանաներին

⁵ «Կտկարանաք օրը ցերեկով,

քեզ հետ կտկարանա և մարգարեն.

քո մորը նմանեցրի գիշերվան։

⁶ Իմ ժողովուրդը նմանվեց նրան, որի մեջ գիտություն չկա։

Քանի որ դու մերժեցիր գիտությունը,

ես էլ քեզ կմերժեմ, որպեսզի քահանայություն չանես ինձ համար.

մոռացար քո Աստծու օրենքը,

ես էլ կմոռանամ քո որդիներին։

⁷ Ըստ իրենց թվաքանակի էլ մեղք գործեցին իմ դեմ.

նրանց փառքն անարգանքի կհասցնեմ։

⁸ Իմ ժողովրդի մեղքերը կուտեն

և իրենց անիրավություններով իրենց անձերը կլցնեն։

⁹ Եվ կլինի քահանան այնպիսին, ինչպիսին ժողովուրդն է.

ես վրեժխնդիր կլինեմ նրանից

իր ճանապարհների համար և իր խորհուրդների համաձայն կհատուցեմ նրան։

¹⁰ Կուտեն և չեն հագենա,

կպոռնկանան և հաջողություն չեն գտնի,

որովհետև լքեցին Տիրոջը՝ անխտիր մնալով պոռնկության մեջ»։

Տերը դատապարտում է կռապաշտությունը

¹¹ «Գինին ու հարբեցողությունը գրավեցին իմ ժողովրդի սիրտը։

¹² Հարցնում էին վիճակաքարերով

և նրա գուշակաձողերով հայտնում էին նրան.

պոռնկության ոգով մոլորվեցին և պոռնկանալով հեռացան իրենց Աստծուց։

¹³ Լեռների գագաթներին զոհ էին մատուցում

և ողջակեզ էին անում բլուրների վրա,

կաղնիների, կաղամախիների և սաղարթախիտ ծառերի տակ,

քանզի հովանին հաճելի էր նրանց։

Դրա համար ձեր դուստրերը կպոռնկանան,

և ձեր հարսները կշնանան։

¹⁴ Ես չեմ այցելի ձեր դուստրերին, երբ պոռնկանան,

և ձեր հարսներին, երբ շնանան,

քանի որ նրանք պոռնիկների հետ էին թավալվում,

զոհ էին մատուցում նվիրյալների հետ,

և քո ժողովուրդը, որ չէր հասկանում այդ,

խառնակվում էր պոռնիկներին։

¹⁵ Բայց դո՛ւ, Իսրայե՛լ, տգետ մի՛ եղիր,

և դո՛ւ, Հուդա՛, մի՛ մտեք Գաղգաղա,

մի՛ ելեք Ովնի տուն[77]

և չերդվե՛ք կենդանի Տիրոջով։

¹⁶ Քանի որ Իսրայելն ինձ համար եղավ լծընկեց երինջի պես,

արդ, Տերը նրանց որպես գառ կարածեցնի ընդարձակ տեղում։

¹⁷ Եփրեմը հաղորդ դարձավ կուռքերին,

իր անձին գայթակղություն բերեց։

¹⁸ Տենչացին քանանացիների կուռքերին,

բոլորը գինի սիրեցին. թողե՛ք այն։

Ամբողջությամբ պոռնկացան,

նրա հպարտությունից ելնելով՝ սիրեցին անարգությունը։

¹⁹ Հողմամրրիկը կփչի նրա թևերի վրա,

և կամաչեն իրենց զոհասեղանների համար»։

5

¹ Ա՛յս լսեք, քահանանե՛ր, և ուշադի՛ր լսեք, դու, ո՛վ Իսրայելի տուն,

և դու, ո՛վ թագավորի տուն, ունկնդի՛ր եղեք,

ձեր դեմ դատաստան է լինելու,

քանի որ թակարդ եղաք դիտանոցի համար և ցանց՝ նետված գահավանդի գլխին,

² որ որսորդները դրեցին որսի համար։

«Ես եմ ձեզ խրատողը։

³ Ես ճանաչեցի Եփրեմին,

և Իսրայելն ինձնից հեռու չէ,

քանի որ Եփրեմն այժմ պոռնկացել է,

և Իսրայելը պղծվել է»։

⁴ Նրանք չխորհեցին վերադառնալ իրենց Աստծուն,

որովհետև պոռնկության ոգին նրանց մեջ է,

և Տիրոջը չճանաչեցին։

⁵ Իսրայելի հպարտությունը կխոնարհվի իր երեսին,

և Իսրայելն ու Եփրեմը կտկարանան իրենց անօրենությունների մեջ,

կտկարանա և Հուդան նրանց հետ։

⁶ Նրանք խոյերով ու պատարագներով կգնան Տիրոջը փնտրելու,

բայց չեն գտնի նրան,

որովհետև խույս տվեց իրենցից։

⁷ Քանի որ Տիրոջը լքեցին,

որովհետև օտար որդիներ ծնեցին իրենց համար,

ահա այժմ թրթուրը կուտի նրանց

և նրանց ժառանգությունը։

Պատերազմ Հուդայի երկրի և Իսրայելի միջև

⁸ Փո՛ղ հնչեցրեք բլուրների վրա,

աղաղակե՛ք բարձունքների վրա,

ազդարարե՛ք Ովնի տանը, թե հիմարացավ Բենիամինը,

⁹ և կործանվեց Եփրեմը.

հանդիմանության օրերին Իսրայելի ցեղերի մեջ ցույց տվեցի հավատարմությունը։

¹⁰ Հուդայի իշխանները նմանվեցին նրանց, որ փոփոխում են սահմանները.

նրանց վրա ջրի պես կթափեմ իմ ասպատակությունը։

¹¹ Եփրեմը զրկեց իր ոսոխին

և ոտնակոխ արեց արդարությունը,

քանի որ սկսեց սնոտի բաների հետևից գնալ։

¹² Ես Եփրեմի համար խռովության պես կլինեմ

և Հուդայի տան համար՝ խայթոցի պես։

¹³ Եփրեմը տեսավ իր հիվանդությունը,

և Հուդան՝ իր ցավերը.

Եփրեմը գնաց ասորեստանցիների մոտ

և պատգամավորներ ուղարկեց Հարիմի արքային,

բայց նա չկարողացավ ո՛չ ձեզ փրկել, ո՛չ էլ հանգստացնել ձեզ ցավերից։

¹⁴ Քանզի ես որպես հովազ եմ Եփրեմի համար

և որպես առյուծ՝ Հուդայի տան համար,

կհարձակվեմ ու կհափշտակեմ նրանց, կառնեմ նրանց, և ոչ ոք չի լինի, որ փրկի։

¹⁵ Կգնամ ու կվերադառնամ իմ տեղը,

մինչև որ ոչնչանան, ապա կփնտրեն իմ երեսը։

6

Ժողովրդի կեղծ զղջումը

¹ Իրենց նեղության ժամանակ կշտապեն ինձ մոտ ու կասեն.

«Դառնանք ու գնանք Տիրոջ՝ մեր Աստծու մոտ.

որովհետև նա է մեզ հարվածել, ինքն էլ կբժշկի,

վիրավորել է և կվիրակապի մեզ։

² Երկու օրից կկենդանացնի մեզ,

իսկ երրորդ օրը կհառնենք ու կկանգնենք նրա առաջ

³ և կճանաչենք

ու հետևից կգնանք՝ ճանաչելու Տիրոջը։

Նրան պատրաստակամ կգտնենք, ինչպես առավոտը,

և կգա մեզ մոտ, ինչպես վաղորդյան և ուշացած անձրևը՝ երկրի վրա»։

⁴ Ի՞նչ անեմ քեզ, Եփրե՛մ,

կամ ի՞նչ պատճառեմ քեզ, Հուդա՛,

որովհետև ձեր ողորմությունը վաղորդյան ամպի պես է

և նման՝ առավոտյան ցողի, որ անհետանում է։

⁵ Դրա համար հնձեցի ձեր մարգարեներին

և կոտորեցի նրանց իմ բերանի խոսքով.

քո արդարադատությունը կծագի լույսի պես։

⁶ Քանզի կամենում եմ ողորմություն և ոչ թե զոհաբերություն,

և առավել Աստծու գիտություն, քան ողջակեզներ։

⁷ Սակայն նրանք նմանվեցին մի մարդու, որը դրժում է ուխտը։ Արդ, արհամարհեց ինձ

⁸ Գաղաադը, քաղաք, որ սնոտի բաներ է անում և խառնում ջրերը.

⁹ քո զորությունն ավազակ մարդու զորության պես է։

Քահանաները թաքցրին ճանապարհը,

սպանեցին Սյուքեմը, որովհետև անօրենություն գործեցին

¹⁰ Իսրայելի տան մեջ։ Տեսա արհավիրքները.

արդ, պոռնկացավ Եփրեմը,

և պղծվեց Իսրայելը։

¹¹ Հուդան սկսեց այգեկութը,

երբ ես դարձրի իմ ժողովրդի գերությունը»։

7

¹ «Երբ Իսրայելին բժշկեմ,

Եփրեմի չարիքներն ու Սամարիայի չարիքները հայտնի կդառնան,

քանի որ սուտ գործեցին.

գող կմտնի նրա մոտ,

և ավազակը կմերկացնի նրա ճանապարհներին։

² Միասին կմրմնջան,

ինչպես մրմնջում են իրենց մտքում.

նրանց բոլոր չարիքները հիշեցի. արդ, նրանց խորհուրդները պաշարեցին նրանց.

եղան իմ երեսի առաջ։

Դավադրություն պալատում

³ Իրենց չարիքներով ուրախացրին թագավորին

և իրենց ստով՝ իշխաններին։

⁴ Բոլորը շնացել են ինչպես թոնիրը,

վառված՝ եփելու համար, բորբոքվելով կրակից և ճարպի զանգվածից,

մինչև դրանով խմորվեն

⁵ ձեր թագավորների օրերը։

Իշխաններն սկսեցին զայրանալ գինուց

և ձեռք մեկնեցին չարագործներին,

⁶ որովհետև նրանց սրտերը հնոցի պես բորբոքվեցին՝ անիծելու նրանց։

Ողջ գիշեր քնով հագեցավ Եփրեմը.

առավոտ եղավ,

և բորբոքվեցին կրակի բոցի նման։

⁷ Բոլորն այրվեցին վառված հնոցի նման,

և հուրը կերավ նրանց դատավորներին.

նրանց բոլոր թագավորներն ընկան,

և նրանց մեջ չկար մեկը, որ օգնության կանչեր ինձ։

Իսրայելը և ժողովուրդները

⁸ Եփրեմը խառնակվում էր ժողովուրդներին,

Եփրեմը եղավ չշրջված նկանակ.

⁹ օտարները կերան նրա զորությունը, և նա չիմացավ.

ճերմակեցին նրա մազերը, և նա չզգաց։

¹⁰ Իսրայելի հպարտությունը կխոնարհվի նրա երեսին,

և չդարձան Տրոջը՝ իրենց Աստծուն,

և չփնտրեցին նրան այս ամենի մեջ։

¹¹ Եփրեմը նման էր անմիտ աղավնու, որ սիրտ չունի.

Եգիպտոս էին կանչվում,

բայց գնացին ասորեստանցիների մոտ։

¹² Ուր էլ որ գնան, նրանց վրա կգցեմ իմ ցանցը,

երկնքի թռչունների նման ցած կբերեմ նրանց

և կխրատեմ նրանց իրենց նեղության համբավով։

¹³ Վա՜յ նրանց, քանի որ ապստամբեցին իմ դեմ,

ողորմելի են, քանի որ ամբարշտություն գործեցին իմ դեմ։

Ես փրկեցի նրանց, իսկ նրանք սուտ խոսքերով բամբասեցին ինձնից։

¹⁴ Նրանց սրտերն ինձ չաղաղակեցին, այլ ողբացին իրենց անկողիններում,

պատառոտվում էին ցորենի և գինու համար.

խրատվեցին ինձանով։

¹⁵ Ես զորացրի նրանց բազուկները,

և չարիք խորհեցին իմ դեմ։

¹⁶ Դարձան ոչնչին

և եղան լարված աղեղի պես։

Սրով կընկնեն նրանց իշխաններն

իրենց լեզվի խստության, անկրթության պատճառով,

քանի որ սա նրանց նախատինքն է եգիպտացիների երկրում»։

8

Տերը հանդիմանում է Իսրայելին կռապաշտության համար

¹ «Կիջնի նրանց մեջտեղում՝ իբրև երկիր,

և ինչպես արծիվ՝ Տիրոջ տան վրա,

քանի որ դրժեցին իմ ուխտը

և իմ օրենքի դեմ ամբարշտություն գործեցին։

² Կաղաղակեն ինձ. «Աստվա՛ծ, ճանաչեցինք քեզ»։

³ Քանի որ Իսրայելը դարձավ բարիքներից,

հալածեցին թշնամուն։

⁴ Անձամբ թագավորեցին,

բայց ոչ ինձանով.

տիրեցին, բայց ցույց չտվեցին ինձ,

իրենց արծաթից և ոսկուց իրենց համար կուռքեր շինեցին,

որպեսզի կործանվեն։

⁵ Խորտակի՛ր քո հորթը, Սամարիա՛.

իմ բարկությունը բորբոքվեց նրանց դեմ.

մինչև ե՞րբ պիտի չկարողանան մաքրվել ⁶ Իսրայելում։

Հյուսնը պատրաստեց այն,

ուստի Աստված չէ,

որովհետև քո հորթը մոլորեցնող է, Սամարիա՛։

⁷ Քանի որ խորշակահար սերմ ցանեցին,

նրանց կործանումն էլ կընդունի այն։

Նրանց խուրձը խյուսի զորություն չի տա.

եթե տա էլ, օտարները կուտեն այն։

⁸ Իսրայելն ընկղմվեց.

այժմ ազգերի մեջ եղավ անպիտան անոթի պես։

⁹ Քանի որ գնացին ասորեստանցիների մոտ,

Եփրեմն առանձին ուրախացավ, սիրեց կաշառքը,

¹⁰ դրա համար կմատնվեն ազգերին։

Բայց այժմ կընդունեմ նրանց,

և մի փոքր կդադարեն թագավորներ և իշխաններ օծելուց։

¹¹ Քանի որ Եփրեմը շատացրեց զոհասեղանները,

նրա համար մեղք դարձան սիրելի զոհասեղանները։

¹² Նրանց համար շատ բաներ կգրեմ,

բայց նրա կրոնն օտարոտի համարվեց։

Սիրելի զոհասեղանները.

¹³ թեպետև զոհեր կմատուցեն և դրանց միսը կուտեն,

Տերը չի ընդունի այն։

Արդ, կհիշի նրանց անիրավությունները

և վրեժխնդիր կլինի նրանց անօրենությունների համար,

քանի որ նրանք Եգիպտոս վերադարձան

և պիղծ բաներ կուտեն ասորեստանցիների մեջ։

¹⁴ Իսրայելը մոռացավ իր Արարչին,

և մեհյաններ շինեցին.

Հուդան շատացրեց պարսպապատ քաղաքները,

բայց կրակ կուղարկեմ նրա քաղաքների վրա,

և կուտի դրանց հիմքերը»։

9

Ովսեեն հայտնում է Իսրայելի պատիժը

¹ Մի՛ խնդա, Իսրայե՛լ, և մի՛ ուրախացիր երկրի ժողովուրդների նման,

որովհետև պոռնկանալով հեռացար քո Աստծուց.

կաշառք սիրեցիր ցորենի բոլոր կալերի համար։

² Կալերն ու հնձանները նրանց չճանաչեցին,

և գինին ստեց նրանց։

³ Չբնակվեցին Տիրոջ երկրում.

Եփրեմը կբնակվի Եգիպտոսում,

և ասորեստանցիների մեջ պիղծ բաներ կուտեն։

⁴ Ո՛չ գինի նվիրեցին Տիրոջը,

ո՛չ էլ քաղցրացրին նրան.

նրանց զոհերը որպես սգո հաց կլինեն նրանց համար.

բոլորը, որ ուտեն դրանից, կպղծվեն,

քանի որ իրենց հացն իրենց կմնա և թող չմտնի Տիրոջ տունը։

⁵ Ի՞նչ պիտի անեք տարեկանի օրերին[78]

և Տիրոջ տոնի օրերին։

⁶ Դրա համար ահա կընթանան դեպի եգիպտացիների թշվառությունը.

նրանց կընդունի Մեմփիսը,

և նրանց կթաղի Մաքմասը։

Կորուստը կժառանգի նրանց արծաթը,

և փուշ կբուսնի նրանց վրաններում։

⁷ Հասել է քո վրեժխնդրության իրավունքը,

հասել են քո հատուցման օրերը,

և Իսրայելը կչարչարվի հիմարացած մարգարեի պես,

ինչպես մի այսակիր մարդ.

քո անիրավությունների բազմության պատճառով շատացավ մոլորությունը։

⁸ Եփրեմն Աստծու հետ տեսուչ է,

մարգարեն՝ գայթակղության թակարդ նրա բոլոր ճանապարհներին.

մոլորություն տնկեցին Աստծու տան մեջ։

⁹ Ապականվեցին ըստ բարձունքի օրերի.

կհիշի նրանց անօրենությունները

և վրեժխնդիր կլինի նրանց մեղքերի համար։

Իսրայելի մեղքը և նրա հետևանքը

¹⁰ Գտա Իսրայելին, ինչպես խաղող անապատում,

և տեսա նրանց հայրերին՝ որպես վաղահաս պտուղ թզենու վրա։

Նրանք մտան Բելփեգովր

և համոթ իրենց օտարացան,

և գարշությունները դարձան սիրելի։

¹¹ Եփրեմը թռավ թռչնի պես,

և նրանց փառքը՝ ծնունդներից, երկունքներից և հղիություններից։

¹² Թեպետև կմեծացնեն իրենց երեխաներին,

անզավակ կմնան մարդկանցից,

քանի որ վա՜յ նրանց. իմ մարմինը նրանցից է։

¹³ Ինչպես որ տեսա Եփրեմին,

որսի դեմ տվեցին իրենց որդիներին,

և Եփրեմն սկսեց իր որդիներին խոցոտման հանել։

¹⁴ Տո՛ւր նրանց, Տե՛ր.

ի՞նչ պիտի տաս նրանց.

տո՛ւր նրանց անորդի արգանդ ու ցամաքած ստինքներ։

Աստծու դատաստանն Իսրայելին

¹⁵ «Նրանց բոլոր չարիքները Գաղգաղայում են,

քանի որ այնտեղ ատեցի նրանց իրենց ընթացքի չարության համար.

իմ տնից կվտարեմ նրանց

և այլևս չեմ սիրի նրանց։

Նրանց բոլոր իշխաններն ապստամբ են։

¹⁶ Հիվանդացան Եփրեմի արմատները,

չորացան և այլևս պտուղ չեն տա,

քանի որ թեպետ և ծնեն,

անզավակ կդարձնեմ նրանց որովայնների ցանկալի պտուղները»։

Մարգարեն խոսում է Իսրայելի մասին

¹⁷ Աստված կմերժի նրանց,

քանի որ չլսեցին իրեն և թափառական կլինեն ազգերի մեջ։

10

¹ Ճյուղառատ, պտղալից որթատունկ է Իսրայելը.

ըստ իր պտուղների առատության զոհասեղաններ ավելացրեց,

ըստ իրենց հողի պարարտության արձաններ կանգնեցրին։

² Բաժան-բաժան արեցին իրենց սրտերը, արդ կորստյան կմատնվեն։

Նա կկործանի նրանց զոհասեղանները.

թշվառության մեջ կընկնեն նրանց արձանները։

³ Քանի որ հիմա կասեն. «Մենք թագավոր չունենք,

որովհետև Տիրոջից չվախեցանք,

բայց թագավորը մեզ ի՞նչ կանի»։

⁴ Եթե խոսքեր ասի՝ ստապատիր են.

ուխտ կկնքի, և արդարադատությունն ինչպես սիզախոտ

կաճի ագարակի անմշակ հողում։

⁵ Ովնի տան կուռքի՝ հորթի պատճառով Սամարիայի բնակիչները պանդուխտ կլինեն,

որովհետև նրա ժողովուրդը սուգ արեց նրա վրա.

և ինչպես դառնացրին նրան,

կչարախնդան նրա փառքի վրա,

քանի որ գերեվարվեցին նրանից։

⁶ Եվ նրան կապկպած ասորեստանցիների մոտ՝ Հարիմ արքային նվեր կտանեն.

կաշառքով կընդունի Եփրեմին.

Իսրայելը կամաչի իր խորհուրդների համար։

⁷ Սամարիան մերժեց իր թագավորին,

ինչպես չոր ոստը՝ ջրի երեսից։

⁸ Կվերցվեն Ովնի մեհյանները՝ Իսրայելի մեղքերը.

փուշ ու տատասկ կբուսնեն նրանց զոհասեղաններին,

և կասեն լեռներին. «Ընկե՛ք մեզ վրա»,

և բլուրներին. «Ծածկե՛ք մեզ»։

Աստված հայտնում է Իսրայելի վճիռը

⁹ «Այն օրվանից, ինչ բարձունքները կան,

Իսրայելը մեղանչել է։

Այնտեղ կանգ առան,

բայց նրանք չեն հասնի բարձունքներին.

պատերազմ եկավ անօրենության որդիների վրա՝ ¹⁰ խրատելու նրանց.

և ազգերը կհավաքվեն նրանց դեմ՝

խրատելու նրանց իրենց երկու անիրավությունների համար։

¹¹ Եփրեմը վարժված երինջ է, հակառակասեր,

բայց ես վերահասու կլինեմ նրա պարանոցի գեղեցկությանը.

կելնեմ Եփրեմի վրա և կանտեսեմ Հուդային,

և Հակոբը կհզորանա նրա դեմ։

¹² Սերմանե՛ք ձեզ համար արդարությամբ

և քաղե՛ք կենաց պտուղ.

լուսավո՛ր դարձրեք ձեզ համար գիտության լույսը,

փնտրե՛ք Տիրոջը,

մինչև արդարության պտուղները գան ձեզ։

¹³ Ինչո՞ւ չլսելու տվեցիք ամբարշտությունը,

փայփայեցիք նրա անօրենությունները

և կերաք ստության պտուղը.

որովհետև հույսդ դրեցիր քո կառքերի վրա,

քո զորքերի բազմության վրա։

¹⁴ Քո ժողովրդի վրա ավեր կգա,

և քո բոլոր պարսպապատ քաղաքները կկործանվեն,

ինչպես Սաղմանա իշխանը՝ Հերոբովի տնից

պատերազմի օրերին. մորը կոտորեցին որդիների կողքին,

¹⁵ նույնպես կանեն ձեզ, ո՛վ Իսրայելի տուն,

ձեր չարիքների երեսից»։

11

Աստծու սերն ապստամբ ժողովրդի հանդեպ

¹ «Ընկան առավոտյան,

ընկավ Իսրայելի թագավորը։

Քանի որ Իսրայելը մանուկ էր,

ես սիրեցի նրան և Եգիպտոսից կանչեցի նրա որդիներին։

² Ինչպես կանչեցի նրանց, այնպես մերժվեցին իմ երեսից։

Նրանք Բահաղիմին էին զոհ մատուցում

և խնկարկում էին կուռքերի արձաններին։

³ Ես խափանեցի Եփրեմին

և վերցրի նրան իմ բազուկների վրա,

և չիմացան, որ բժշկում եմ նրանց

⁴ մարդկանց ապականությունից։

Քաշեցի նրանց իմ սիրո կապանքներով.

նրանց համար կլինեմ մեկի պես,

որ կապտակի նրա ծնոտին.

կնայեմ նրան ու կհաղթեմ նրան։

⁵ Եփրեմը բնակվեց Եգիպտոսում,

իսկ ասորեստանցին՝ նրան թագավոր,

քանի որ չկամեցան վերադառնալ։

⁶ Սրով տկարացավ նրա քաղաքներում

և դադար առավ նրա ձեռքերում.

կուտեն նրանց խորհուրդները։

⁷ Նրա ժողովուրդը կախված կմնա իր բնակավայրից,

և Աստված նրա իշխանավորների վրա կբարկանա

և չի բարձրացնի նրանց։

⁸ Ի՞նչ անեմ քեզ, Եփրե՛մ,

բայց կպաշտպանեմ քեզ, Իսրայե՛լ,

ի՞նչ անեմ քեզ.

քեզ կհամարեմ ինչպես Ադամա և ինչպես Սեբոյիմ։ Սիրտս շրջվեց, գութս շարժվեց։

⁹ Ըստ իմ սաստիկ բարկության չեմ վարվի ու չեմ թողնի

Եփրեմին ջնջեն, քանի որ ես Աստված եմ

և ոչ մարդ,

Սուրբ՝ ձեր մեջ, և քաղաք չեմ մտնի։

¹⁰ Այլ կգնամ Տիրոջ հետևից.

առյուծի պես կմռնչա.

քանի որ նա կմռնչա և կհիմարացնի արևմուտքի՝ ծովի որդիներին։

¹¹ Կթռչեն կգան Եգիպտոսից թռչունի պես,

և աղավնիների պես՝ ասորեստանցիների երկրից,

և կպատսպարեմ նրանց իրենց տներում»,- ասում է Տերը։

12

Իսրայելը և Հուդան դատապարտված են

¹ Եփրեմն ինձ պաշարեց ստությամբ,

և Իսրայելի և Հուդայի տունը՝ ամբարշտությամբ.

արդ՝ Աստված ճանաչեց նրանց,

² Սակայն Եփրեմը չար ոգի է.

հետևեց խորշակին,

հանապազ ունայն և սնոտի բաներ ավելացրեց,

ուխտ կնքեց ասորեստանցիների հետ

և յուղ էր տանում Եգիպտոս։

³ Տիրոջ դատաստանը Հուդայի հետ է՝

Հակոբից վրեժխնդիր լինելու համար.

ըստ նրա ճանապարհների և ըստ նրա ընթացքի կհատուցի նրան։

⁴ Արգանդում խաբեց իր եղբորը

և իր ջանքերով հզորացավ Աստծու առաջ։

⁵ Պինդ բռնվեց հրեշտակի դեմ և հզորացավ։

Լաց եղան ու փնտրեցին ինձ և գտան ինձ իմ տանը.

այնտեղ պատմվեց նրանց,

⁶ և Տերը՝ Ամենակալ Աստված, կդառնա նրանց հիշատակը։

Դատապարտության այլ խոսքեր

⁷ «Դու քո Աստծուն կդառնաս, ողորմություն և արդարադատություն կպահպանես

և ամենայն ժամ կմերձենաս Տիրոջը՝ քո Աստծուն»։

⁸ Անիրավության կշեռքը Քանանի ձեռքում է,

և նա սիրեց հարստահարել։

⁹ Եփրեմն ասաց. «Հարստացա,

հանգիստ գտա իմ անձի համար».

նրա բոլոր վաստակները չեն մնա նրան,

քանի որ անօրենությունների պատճառով մեղանչեց։

¹⁰ «Բայց ես՝ Տերը՝ քո Աստվածը,

որ հանեցի քեզ եգիպտացիների երկրից,

դարձյալ կբնակեցնեմ քեզ վրաններում ըստ տոների օրերի

¹¹ և կխոսեմ մարգարեների հետ։

Ես տեսիլքներ կավելացնեմ

և մարգարեների միջոցով կնմանեցվեմ։

¹² Եթե Գաղաադը չլիներ, ապա սուտ էին իշխանները

Գաղգաղայում, որ զոհ էին մատուցում,

և նրանց զոհասեղանները կրիաներ էին ագարակի անմշակ հողի վրա։

¹³ Հակոբը գնաց ասորիների դաշտը, Իսրայելը ծառայեց հանուն կնոջ

և կնոջ ձեռքով զգուշացվեց։

¹⁴ Տերը մարգարեի միջոցով Իսրայելը հանեց եգիպտացիների երկրից,

և պահպանվեց մարգարեի միջոցով։

¹⁵ Իսրայելն ինձ բարկացրեց ու զայրացրեց.

նրա արյունն իր վրա կթափվի,

և նրա նախատինքների դիմաց Տերը կհատուցի նրան»։

13

Իսրայելի վերջնական վճիռը

¹ Ըստ Եփրեմի խոսքերի, նա Իսրայելի Աստծու օրենքներն առավ,

դրանք դրեց Բահաղի մեջ ու մեռավ։

² Արդ, դարձյալ աճեցին մեղանչելու մեջ

և իրենց համար կուռքերի պատկերի նմանությամբ

ձուլածոներ ստեղծեցին իրենց արծաթից՝

նրանց ճարտարների գործ նվիրելով։

Նրանք ասում են. «Զոհաբերե՛ք մարդկանց,

քանի որ հորթերը պակասեցին»։

³ Դրա համար կլինեն առավոտյան ամպի պես

և վաղորդյան ցողի պես, որ անցնում է,

կալից քշված փոշու պես,

և ծխնելույզներից ելնող ծխի պես։

⁴ «Ես եմ Տերը՝ քո Աստվածը,

որ հաստատեցի երկինքը և ստեղծեցի երկիրը,

որի ձեռքերն արարեցին երկնքի բոլոր զորությունները,

բայց ցույց չտվեցի քեզ՝ նրանց հետևից գնալու համար.

ես հանեցի քեզ եգիպտացիների երկրից.

ոչ մի աստծու, ինձնից բացի, չճանաչես,

և ինձնից բացի, փրկիչ չկա։

⁵ Ես էի քեզ հովվում անապատում՝ անշեն երկրում։

⁶ Ըստ իրենց արոտավայրերի հագեցան ու լիացան,

հպարտացան իրենց սրտերով,

դրա համար մոռացան ինձ։

⁷ Ես նրանց համար կլինեմ հովազի պես

և ընձառյուծի պես՝ ասորեստանցիների ճանապարհին։

⁸ Կհանդիպեմ նրանց քաղցած արջի պես

և կպատառոտեմ նրանց սրտերի առագաստը.

անտառի կորյունները կուտեն նրանց,

և վայրի գազանները կհոշոտեն նրանց։

⁹ Քո կործանման ժամանակ, Իսրայե՛լ,

ո՞վ պիտի օգնի քեզ։

¹⁰ Ո՞ւր է քո թագավորը. նա՛ կփրկի քեզ,

քո բոլոր քաղաքներում կդատի քեզ,

որի մասին ասացիր.

«Տո՛ւր ինձ թագավոր և իշխան»։

¹¹ Քեզ թագավոր տվեցի իմ բարկությամբ

և ընդհատեցի իմ ցասումով։

¹² Եփրեմն անիրավությունների կապոց է,

և նրա մեղքերը ծածկված են։

¹³ Ծննդկանի երկունքի պես ցավեր կհասնեն նրան.

դա է քո իմաստուն որդին.

դրա համար այժմ չի կարողանա դիմանալ որդիների կործանմանը։

¹⁴ Դժոխքի ձեռքից կազատեմ նրանց և մահից կփրկեմ նրանց։

Ո՞ւր է, մա՛հ, քո հաղթանակը,

ո՞ւր է, դժո՛խք, քո խայթոցը։

Մխիթարությունը ծածկված է իմ աչքերից.

¹⁵ քանի որ նա եղբայրների մեջ կզատորոշի,

Տերը նրա վրա անապատից խորշակի հողմ կբերի,

կցամաքեցնի նրա առվակները

և կավերի նրա աղբյուրները։

Դա կչորացնի նրա երկիրը և նրա ցանկալի բոլոր անոթները»։

14

Ովսեեի աղերսն Իսրայելին

¹ Կկործանվի Սամարիան,

որովհետև ընդդիմացավ իր Աստծուն. սրով կընկնեն,

նրա կաթնակերները քարի կզարնվեն,

և նրա հղիները կպայթեն։

² Դարձի՛ր, Իսրայե՛լ, Տիրոջը՝ քո Աստծուն,

քանի որ տկարացար քո անօրենություններով։

³ Ձեզ հետ խոսքե՛ր վերցրեք,

դարձե՛ք Տիրոջը՝ ձեր Աստծուն, և ասե՛ք նրան.

«Կարո՛ղ ես ներել մեր մեղքերը, որպեսզի անիրավություն չգործենք,

այլ բարիք ընդունենք և հատուցենք մեր շուրթերի պտուղը»,

և կվայելեն ձեր սրտերը բարության մեջ։

⁴ Ասորեստանցին չի փրկում մեզ.

ձի չենք հեծնի

և այլևս մեր ձեռակերտներին մեզ աստված չենք ասի,

որովհետև ով որ քո մեջ է, կգթա որբերին։

Տերը նոր կյանք է խոստանում

⁵ «Կվերականգնեմ նրանց բնակավայրերը

և ամբողջապես կսիրեմ նրանց,

որովհետև իմ բարկությունը հեռացավ նրանցից։

⁶ Եվ կլինի որպես ցող Իսրայելի համար,

կծաղկի, ինչպես շուշանը

և կարձակի իր արմատը, ինչպես Լիբանոսը[79]։

⁷ Կտարածվեն նրա ոստերը և կլինեն պտղալից ձիթենու պես,

և նրա հոտը կբուրի կնդրուկի պես։

⁸ Կդառնան ու կնստեն նրա հարկի ներքո,

կապրեն ու կզորանան ցորենով,

կծաղկի նրա հիշատակը որթատունկի պես,

և կլինի Լիբանանի գինու պես

⁹ Եփրեմի համար։

Այլևս ի՞նչ գործ ունի նա կուռքերի հետ.

ե՛ս խոնարհեցրի նրան,

ես էլ կզորացնեմ նրան.

ես պտղառատ այգի եմ.

ինձնից պտուղ գտնվեց քեզ վրա»։

¹⁰ Ո՞վ է իմաստուն, որ հասկանա սա,

հանճարեղ, որ ճանաչի սա.

քանի որ ուղիղ են Տիրոջ ճանապարհները,

և արդարները կընթանան դրանցով,

իսկ ամբարիշտները կտկարանան դրանց մեջ։

ՀՈՎԵԼԻ ՄԱՐԳԱՐԵՈՒԹՅՈՒՆԸ

1

¹ Տիրոջ պատգամը, որ եղավ Բաթուելի որդի Հովելին Եզեկիայի օրերին։

Միջատների հարձակում և երաշտ

² Լսե՛ք այս, ծերե՛ր,

ակա՛նջ դրեք, երկրի բոլո՛ր բնակիչներ.

եղե՞լ է այսպիսի բան ձեր օրերում կամ ձեր հայրերի օրերում։

³ Պատմե՛ք սա ձեր որդիներին,

և ձեր որդիները՝ իրենց որդիներին,

և նրանց որդիները՝ ուրիշ սերնդի։

⁴ Թրթուրի մնացորդները մորեխը կերավ,

մորեխի մնացորդները ջորյակը կերավ,

և ջորյակի մնացորդները կերավ երևիլը։

⁵ Սթափվե՛ք, գինուց հարբածնե՛ր,

լացե՛ք և սգացե՛ք բոլորդ,

որ խմում եք գինին մինչև հարբելը,

որովհետև վերցվեց ձեր բերանից ուրախությունն ու խնդությունը։

⁶ Քանի որ մի հզոր և անթիվ ազգ ելավ իմ երկրի դեմ.

նրա ատամները՝ առյուծի ատամներ,

և նրա ժանիքներն առյուծի կորյունի ժանիքներ են։

⁷ Ավերեց իմ որթատունկը և իմ թզենիները ոչնչացրեց,

ամբողջությամբ ցնցեց ու գցեց այն և կեղևահան արեց նրա ճյուղերը։

⁸ Ողբա՛ ինձ, ինչպես քուրձ հագած հարսը՝ իր ամուսնու համար։

⁹ Զոհաբերություններն ու պատարագները վերացան Տիրոջ տնից.

սո՛ւգ արեք, քահանանե՛ր՝ զոհասեղանի պաշտոնյանե՛ր,

¹⁰ քանի որ ավերվեցին դաշտերը։

Թող սուգ անի երկիրը, որովհետև ապականվեց ցորենը,

ցամաքեց գինին, նվազեց ձեթը։

¹¹ Ողբացե՛ք, մշակնե՛ր՝ ունեցվածքով հանդերձ, ցորենի և գարու վրա,

որովհետև վերացավ այգեկութն ագարակից,

¹² ցամաքեց որթատունկը, պակասեցին թուզն ու նուռը, արմավն ու խնձորը,

և ագարակի ամեն ծառ չորացավ,

քանի որ մարդկանց որդիներն ուրախությունն ամոթ դարձրին։

Կոչ պահեցողության և աղոթքի

¹³ Քո՛ւրձ հագեք, ողբացե՛ք, քահանանե՛ր,

սո՛ւգ արեք, զոհասեղանի պաշտոնյանե՛ր,

մտե՛ք, քուրձո՛վ քնեք, Աստծու պաշտոնյանե՛ր,

քանի որ ձեր Աստծու տնից պակասեցին զոհաբերություններն ու պատարագները։

¹⁴ Սրբագործե՛ք պահքը,

աղո՛թքը քարոզեք,

հավաքե՛ք ծերերին, երկրի բոլո՛ր բնակիչներ, ձեր Աստծու տանը

և ամբողջ սրտով աղաղակե՛ք Տիրոջը։

Տիրոջ բարկության օրը

¹⁵ Վա՜յ ինձ, վա՜յ ինձ, վա՜յ ինձ այն օրը,

որովհետև մոտ է Տիրոջ օրը.

որպես թշվառության վրա թշվառություն կգա

¹⁶ ձեր աչքերի առաջ. ձեր Աստծու տնից

պակասեցին կերակուրները, ուրախությունն ու խնդությունը։

¹⁷ Խայտացին երինջներն իրենց մսուրներում,

ավերվեցին գանձարանները,

կործանվեցին շտեմարանները,

քանի որ ցորենը խորշակահար եղավ։

¹⁸ Ի՞նչ ամբարեմ նրանց մեջ։

Լացեցին նախիրների հոտերը,

որովհետև նրանք արոտավայր չունեին,

և ոչխարների հոտերը սատկեցին։

Մարգարեի աղոթքը

¹⁹ Քեզ եմ աղաղակելու, Տե՛ր,

որովհետև հուրը ոչնչացրեց անապատի գեղեցկությունը,

և բոցն այրեց ագարակի բոլոր ծառերը։

²⁰ Վայրի երեն քեզ նայեց,

քանի որ ցամաքեցին ջրերի վտակները,

և հուրը կերավ անապատի գեղեցկությունը։

2

Մոտ է Տիրոջ օրը

¹ Փո՛ղ հնչեցրեք Սիոնում,

քարո՛զ կարդացեք իմ սուրբ լեռան վրա.

թող հավաքվեն երկրի բոլոր բնակիչները,

քանի որ հասել է Տիրոջ օրը, քանի որ մոտ է

² խավարի և մեգի օրը, ամպի և մառախուղի օրը։

Իբրև առավոտ՝ բազմամարդ և հզոր զորքը կտարածվի լեռների վրա.

դրա նմանը չի եղել երբևիցե,

և դրանից հետո էլ չի լինի սերնդեսերունդ։

³ Նրա առջևից լափող կրակ է,

նրա հետևից՝ բորբոքված բոց.

նրա առջևում երկիրը որպես վայելչության դրախտ է,

իսկ նրա հետևում՝ ավերված դաշտ.

և փրկվող չի լինի նրանից։

⁴ Նրա տեսքը երիվարների տեսքի նման է.

կարշավեն հեծյալների նման,

⁵ կասպատակեն ինչպես կառքերի շաչյունը՝ լեռների գագաթներին,

ինչպես կրակի բոցի ձայնը, որ ուտում է եղեգը,

ինչպես պատերազմի պատրաստված բազմամարդ ու հզոր զորքը։

⁶ Նրա առջև կկործանվեն ազգեր,

և ամեն մի դեմք սևացած պտուկի կնմանվի։

⁷ Կհարձակվեն որպես ախոյաններ,

և պատերազմող մարդկանց նման կելնեն պարիսպների վրա.

յուրաքանչյուրն իր ճանապարհով կգնա,

և չեն շեղվի իրենց շավիղներից։

⁸ Մարդն իր եղբորից և ընկերոջից չի զատվի։

Իրենց ծանր զենքերով կգնան

և իրենց նետերով կընկնեն, բայց չեն վախճանվի։

⁹ Կարշավեն քաղաքի վրա,

կընթանան պարիսպների վրայով,

կդիմեն դեպի ապարանքները

և գողերի նման ներս կմտնեն պատուհաններից։

¹⁰ Նրա առջև երկիրը կխռովվի, և երկինքը կշարժվի,

արեգակն ու լուսինը կխավարեն,

և աստղերը կթաքցնեն իրենց լույսը։

¹¹ Եվ Տերն իր ձայնը կհնչեցնի իր զորքի առաջ,

քանի որ չափազանց մեծաթիվ է նրա բանակը,

և հզոր՝ նրա պատերազմական գործը.

քանի որ մեծ է Տիրոջ օրը, մեծ և չափազանց փառավոր,

և ո՞վ կարժանանա դրան։

Կոչ ապաշխարության

¹² «Եվ արդ, ասում է Տերը՝ ձեր Աստվածը,

դարձե՛ք ինձ ձեր ամբողջ սրտով,

պահքով, լալով ու կոծելով։

¹³ Պատռե՛ք ձեր սրտերը և ոչ թե հագուստները

և դարձե՛ք Տիրոջը՝ ձեր Աստծուն,

որովհետև ողորմած է և գթած,

համբերատար և բազումողորմ

և զղջում է մարդկանց չարիքների համար»։

¹⁴ Ո՞վ գիտի, թերևս դառնա ու զղջա

և իր հետևից թողնի օրհնություն,

զոհաբերություններ ու պատարագներ Տիրոջը՝ մեր Աստծուն։

Կոչ ծոմապահության և պաղատանքի

¹⁵ Փո՛ղ հնչեցրեք Սիոնում,

սրբագործե՛ք պահքը,

աղո՛թքը քարոզեք.

¹⁶ հավաքե՛ք ձեր ժողովրդին,

սրբագործե՛ք ժողովարանը,

ընտրե՛ք ծերերին,

հավաքե՛ք կաթնակեր երեխաներին.

թող փեսան ելնի իր սենյակից և հարսը՝ առագաստից։

¹⁷ Թող աստիճանների և զոհասեղանի միջև

քահանաներն ու Տիրոջ պաշտոնյաները լաց լինեն և ասեն.

«Խնայի՛ր, Տե՛ր, քո ժողովրդին,

և քո ժառանգությունը նախատինքի մի՛ հանձնիր,

որ ազգերը տիրեն նրան,

որպեսզի հեթանոսների մեջ չասեն.

“Ո՞ւր է նրանց Աստվածը”»։

Տիրոջ պատասխանը

¹⁸ Տերը նախանձախնդրությամբ լցվեց իր երկրի համար ու խնայեց իր ժողովրդին։

¹⁹ Եվ Տերը պատասխան տվեց իր ժողովրդին և ասաց.

«Ահա ես ձեզ ցորեն, գինի և յուղ եմ ուղարկում.

կգոհանաք դրանցով,

և այլևս ձեզ չեմ հանձնի ազգերի նախատինքին։

²⁰ Հյուսիսայինով կհալածեմ ձեզնից

և նրան անջուր երկիր կվտարեմ,

կկործանեմ նրա սկիզբն առաջին ծովում

և նրա վերջը՝ վերջին ծովում.

նրա թարախը կելնի, և կբուրի նրա հոտը,

քանի որ մեծացան նրա գործերը։

²¹ Քաջալերվի՛ր, երկի՛ր, ցնծա՛ և ուրախացի՛ր,

որովհետև Տերը մեծացրեց իր գործերը քեզ համար։

²² Քաջալերվի՛ր, վայրի՛ երե,

որովհետև անապատի դաշտերը դալարեցին,

որովհետև ծառը տվեց իր պտուղը,

որթատունկն ու թզենին ցույց տվեցին իրենց զորությունը։

²³ Սիոնի՛ որդիներ, ցնծացե՛ք և ուրախացե՛ք Տիրոջով՝ ձեր Աստծով,

քանի որ Տերը ձեզ արդար կերակուր տվեց.

և ձեզ համար կտեղան գարնանային

և աշնանային անձրևները, ինչպես նախկինում։

²⁴ Կլցվեն ցորենի կալերը,

և կհորդեն գինու և յուղի հնձանները։

²⁵ Ձեզ կհատուցեմ այն տարիների դիմաց,

երբ մորեխը, ջորյակն ու թրթուրը կերան,

և իմ մեծ զորքը, որ ուղարկեցի ձեզ վրա։

²⁶ Եվ ուտելով կուտեք ու կհագենաք

և կօրհնաբանեք Տիրոջ՝ ձեր Աստծու անունը,

որ հրաշքներ գործեց ձեզ համար,

և իմ ժողովուրդն այլևս չի ամաչի հավիտյան։

²⁷ Եվ կիմանաք, որ ես Իսրայելի մեջ եմ,

և ես եմ Տերը՝ ձեր Աստվածը,

և չկա ոչ ոք ինձնից բացի,

և իմ ժողովուրդը չի ամաչի հավիտյան։

²⁸ Եվ կլինի, որ սրանից հետո իմ Հոգուց կհեղեմ ամեն մարմնի վրա,

և կմարգարեանան ձեր որդիներն ու ձեր դուստրերը,

ձեր ծերերը երազներով կերազեն,

և ձեր երիտասարդները տեսիլքներ կտեսնեն։

²⁹ Իմ ծառաների վրա և

իմ աղախինների վրա այն օրերին իմ Հոգուց կհեղեմ, և կմարգարեանան։

³⁰ Նշաններ ցույց կտամ վերևում՝ երկնքում,

և նշաններ ներքևում՝ երկրի վրա. արյուն, հուր և ծխե մրրիկ։

³¹ Արեգակը կփոխվի խավարի, և լուսինը՝ արյան,

նախքան Տիրոջ մեծ ու փառավոր օրվա գալուստը»։

³² Եվ կլինի, որ ամեն ոք, ով կանչի Տիրոջ անունը, կապրի,

քանի որ Սիոն լեռան վրա և Երուսաղեմում կլինի փրկվածը,

ինչպես որ ասաց Տերը, և ավետարանվածը,

որոնց Տերը կկանչի իր մոտ։

3

Տերը դատում է ազգերին

¹ Եվ կլինի, որ սրանից հետո իմ Հոգուց կհեղեմ ամեն մարմնի վրա,

և կմարգարեանան ձեր որդիներն ու ձեր դուստրերը,

ձեր ծերերը երազներով կերազեն,

և ձեր երիտասարդները տեսիլքներ կտեսնեն։

² Իմ ծառաների վրա և

իմ աղախինների վրա այն օրերին իմ Հոգուց կհեղեմ, և կմարգարեանան։

³ Նշաններ ցույց կտամ վերևում՝ երկնքում,

և նշաններ ներքևում՝ երկրի վրա. արյուն, հուր և ծխե մրրիկ։

⁴ Արեգակը կփոխվի խավարի, և լուսինը՝ արյան,

նախքան Տիրոջ մեծ ու փառավոր օրվա գալուստը։

⁵ Եվ կլինի, որ ամեն ոք, ով կանչի Տիրոջ անունը, կապրի,

քանի որ Սիոն լեռան վրա և Երուսաղեմում կլինի փրկվածը,

ինչպես որ ասաց Տերը, և ավետարանվածը,

որոնց Տերը կկանչի իր մոտ։

4

Տերը դատում է ազգերին

¹ «Քանի որ ահա ես այն օրերին և այն ժամանակ,

երբ դարձնեմ Հուդայի և Երուսաղեմի գերությունը,

² կհավաքեմ բոլոր ազգերին, կիջեցնեմ նրանց Հովսափաթի ձորը

և կդատեմ նրանց այնտեղ՝ հանուն

իմ ժողովրդի և Իսրայելի՝ իմ ժառանգության,

որ ցրվեցին բոլոր ազգերի մեջ

և իմ երկիրը բաժանեցին։

³ Իմ ժողովրդի վրա վիճակ էին գցում.

պատանիներին պոռնիկներին վարձ տվեցին,

աղջիկներին վաճառում էին գինու դիմաց և խմում։

⁴ Եվ դուք դեռևս ինձ,

ո՛վ Ծուր և Ծայդան [* և Ο΄ Տյուրոս և Սիդովն] և այլազգիների ո՛ղջ Գալիլեա,

մի՞թե ինչ-որ հատուցում կտաք ինձ կամ ոխ կպահեք իմ դեմ.

անմիջապես ձեր հատուցումը ձեր գլխին կտամ։

⁵ Քանի որ իմ արծաթն ու ոսկին վերցրիք

և ամենաընտիր ու գեղեցիկ անոթները տարաք ձեր մեհյանները,

⁶ Հուդայի որդիներին ու Երուսաղեմի որդիներին վաճառեցիք հույների որդիներին,

որպեսզի նրանց մերժեք իրենց սահմաններից։

⁷ Արդ, ես կկանգնեցնեմ նրանց այնտեղից,

որտեղ վաճառեցիք նրանց,

և ձեր հատուցումը ձեր գլխին կտամ։

⁸ Ձեր որդիներին ու ձեր դուստրերին կմատնեմ Հուդայի որդիների ձեռքը,

և նրանց գերության կվաճառեն հեռու-հեռավոր ազգի,

քանի որ Տե՛րը խոսեց»։

⁹ Այս քարո՛զ կարդացեք ազգերին, մարտի ժա՛մ նշանակեք,

արթնացրե՛ք պատերազմողներին,

հավաքվե՛ք և ելե՛ք, պատերազմի բոլո՛ր տղամարդիկ։

¹⁰ Ձեր խոփերից սրե՛ր կռեք

և ձեր գերանդիներից՝ գեղարդներ։

Թող տկարն ինքն իրեն խրախուսի, թե՝ «Հզոր եմ ես»։

¹¹ Հավաքվե՛ք և մտե՛ք, բոլո՛ր ազգեր, շուրջանակի

խմբվե՛ք այնտեղ.

թող խաղաղ մարդը պատերազմող դառնա։

¹² Թող բոլոր ազգերը զարթնեն ու գնան Հովսափաթի ձորը,

քանի որ այնտեղ պիտի նստեմ՝ շուրջանակի դատելու բոլոր ազգերին։

¹³ Գործի՛ դրեք մանգաղը, որովհետև հասել է հունձը,

մտե՛ք, կոխոտե՛ք,

որովհետև լցվել են հնձանները, և հորերը՝ լեփ-լեցուն,

քանի որ շատացան նրանց չարիքները։

¹⁴ Ձայներ հնչեցին դատաստանի ձորում,

որովհետև Տիրոջ օրը մոտ է դատաստանի ձորին։

¹⁵ Արեգակն ու լուսինը կխավարեն,

և աստղերը կթաքցնեն իրենց լույսը։

¹⁶ Տերը Սիոնից կգոչի

և Երուսաղեմից իր ձայնը կհնչեցնի,

և կշարժվեն երկինքն ու երկիրը։

Սակայն Տերը կխնայի իր ժողովրդին

և կզորացնի Իսրայելի որդիներին։

¹⁷ «Եվ կճանաչեք, որ ես եմ Տերը՝ Աստված,

որ բնակվում եմ իմ սուրբ լեռան՝ Սիոնի վրա.

Երուսաղեմը սուրբ կլինի,

և այլազգիներն այլևս չեն անցնի նրա միջով»։

¹⁸ Եվ կլինի, որ այն օրը լեռները քաղցրություն կբխեցնեն,

բլուրները կաթ կհորդեն,

և Հուդայի բոլոր աղբյուրները ջուր կբխեցնեն։

Եվ Տիրոջ տնից աղբյուր կբխի և կոռոգի եղեգների ձորը։

¹⁹ Եգիպտոսն ավերածության կվերածվի, և Եդովմը՝ ամայի դաշտի,

Հուդայի որդիների անիրավությունների պատճառով,

քանի որ արդար արյուն թափեցին իրենց մեջ։

²⁰ Սակայն Հուդայի երկիրը հավիտյան կբնակվի,

և Երուսաղեմը՝ սերնդեսերունդ։

²¹ Եվ կպահանջեմ նրանց արյունը

և անպարտ չեմ թողնի,

և Տերը կբնակվի Սիոնում։

ԱՄՈՎՍԻ ՄԱՐԳԱՐԵՈՒԹՅՈՒՆԸ

1

¹ Ամովսի պատգամները, որ եղան Թեկվայի Ակկարիմում, որոնք տեսավ Երուսաղեմի համար Հուդայի արքա Ոզիայի օրերին և Իսրայելի արքա Հովասի որդու՝ Հերոբովամի օրերին՝ երկրաշարժից երկու տարի առաջ, և ասաց.

² «Տերը Սիոնից խոսեց

և Երուսաղեմից հնչեցրեց իր ձայնը.

սուգ արեցին հոտերի արոտավայրերը,

և չորացան Կարմելոսի բարձունքները»։

Տերը դատում է Իսրայելին և նրա հարևաններին

ա. Դամասկոսի դեմ

³ Տերն ասում է.

«Դամասկոսի երեք անօրենությունների և չորսի պատճառով

առանց պատժելու չեմ դառնա նրանից,

քանի որ երկաթե սղոցներով կտրատում էին գաղաադացիների հղիներին»։

⁴ «Կրակ կուղարկեմ Ազայելի տան վրա,

և կուտի Ադերի որդու հիմքերը։

⁵ Եվ կփշրեմ Դամասկոսի նիգերը,

կբնաջնջեմ Ովնի դաշտերի բնակիչներին

և կկոտորեմ Խառանի տղամարդկանց ցեղը,

և կգերեվարվի ասորիների ընտիր ժողովուրդը»,- ասում է Տերը։

⁶ Այսպես է ասում Տերը.

«Գազայի երեք ամբարշտությունների և չորսի պատճառով

առանց պատժելու չեմ դառնա նրանցից,

քանի որ գերեվարեցին Սողոմոնի գերիներին՝

արգելափակելով Եդովմում»։

⁷ «Կրակ կուղարկեմ Գազայի պարիսպների վրա,

և կուտի նրա հիմքերը։

⁸ Կբնաջնջեմ բնակիչներին Ազովտից,

և կվերացվի ցեղն Ասկաղոնից,

իմ ձեռքը կտարածեմ Ակկարոնի դեմ,

և կկորչեն այլազգիների մնացորդները»,- ասում է Տեր Տերը։

բ. Տյուրոսի դեմ

⁹ Այսպես է ասում Տերը.

«Ծուրի երեք ամբարշտությունների և չորսի պատճառով

առանց պատժելու չեմ դառնա նրանից,

քանի որ Սողոմոնի գերիներին արգելափակեցին Եդովմում

և չհիշեցին եղբայրների ուխտը։

¹⁰ Կրակ կուղարկեմ Ծուրի պարիսպների վրա,

և կուտի նրա հիմքերը»։

գ. Եդովմի դեմ

¹¹ Այսպես է ասում Տերը.

«Եդովմի երեք ամբարշտությունների և չորսի պատճառով

առանց պատժելու չեմ դառնա նրանցից,

քանի որ սրով հալածեց իր եղբորը

և կործանեց եղբորը երկրի վրա.

հափշտակեց իր սարսափը վկայության համար

և իր հանդգնությունը պահեց հակառակության համար։

¹² Կրակ կուղարկեմ Թեմանի վրա,

և կրակը կուտի նրա պարիսպների հիմքերը»։

դ. Ամովնի դեմ

¹³ Այսպես է ասում Տերը.

«Ամովնի որդիների երեք ամբարշտությունների և չորսի պատճառով

առանց պատժելու չեմ դառնա նրանցից,

քանի որ հերձում էին գաղաադացիների հղիներին,

որպեսզի ընդարձակեն իրենց սահմանները։

¹⁴ Կրակ կբորբոքեմ Հռաբայի պարիսպների վրա,

և պատերազմի օրն աղաղակով կուտի նրա հիմքերը,

և կսասանվի իր վախճանի օրը»։

¹⁵ «Գերության կգնան նրանց թագավորները,

նրանց քրմերն ու նրանց իշխաններն էլ՝ միասին»,- ասում է Տեր Տերը։

2

ե. Մովաբի դեմ

¹ Այսպես է ասում Տերը.

«Մովաբի երեք ամբարշտությունների և չորսի պատճառով

առանց պատժելու չեմ դառնա նրանից,

քանի որ այրեցին եդովմացիների թագավորների ոսկորները՝

մոխրացնելու համար»։

² «Կրակ կուղարկեմ Մովաբի վրա,

և կրակը կուտի նրա քաղաքների հիմքերը,

և կմեռնի Մովաբը տկարության մեջ,

աղաղակով և փողի ձայնով։

³ Նրա միջից կվերացնեմ դատավորին

և նրա բոլոր իշխաններին կկոտորեմ նրա հետ»,- ասում է Տերը։

զ. Հուդայի երկրի դեմ

⁴ Այսպես է ասում Տերը.

«Հուդայի որդիների երեք

ամբարշտությունների և չորսի պատճառով

առանց պատժելու չեմ դառնա նրանից,

քանի որ մերժեցին Տիրոջ օրենքները և նրա հրամանները չպահեցին,

մոլորեցրին նրանց իրենց ստեղծած սնոտի բաներով,

որոնց հետևից գնացին նրանց հայրերը։

⁵ Կրակ կուղարկեմ Հուդայի վրա,

և կուտի Երուսաղեմի հիմքերը»։

է. Իսրայելի դեմ

⁶ Այսպես է ասում Տերը.

«Իսրայելի երեք ամբարշտությունների և չորսի պատճառով

առանց պատժելու չեմ դառնա նրանից,

քանի որ արդարին վաճառեցին արծաթով

և տնանկին՝ կոշիկների դիմաց,

⁷ որ կոխկռտում են երկրի հողը,

կռփահարում էին աղքատների գլուխները և

շեղում խոնարհների ճանապարհները,

և հայր ու որդի միևնույն բոզի մոտ էին մտնում,

որպեսզի պղծեն իրենց Աստծու անունը։

⁸ Իրենց զգեստները որպես ծածկոց էին գցում իրենց վրա ու զոհասեղանին

և զրպարտությունների գինի էին խմում իրենց աստծու տան մեջ։

⁹ Բայց ես ամորհացուն վերացրի նրա երեսից,

որի հասակը մայրու բարձրություն ուներ,

և հզոր էր կաղնու պես.

վերացրի նրա պտուղը՝ վերևից,

և նրա արմատները՝ ներքևից»։

¹⁰ «Ես հանեցի ձեզ եգիպտացիների երկրից

և քառասուն տարի պտտեցրի ձեզ անապատում՝

ժառանգել տալու ամորհացիների երկիրը։

¹¹ Եվ վերցրի ձեր որդիներից մարգարեների համար

և ձեր երիտասարդներից՝ ուխտավորների համար։

Մի՞թե այդ բաները չեն լինի, Իսրայելի՛ որդիներ»,- ասում է Տերը։

¹² «Հարբեցնում էիք իմ ուխտավորներին՝ գինի խմեցնելով,

և մարգարեներին պատվիրում, որ չմարգարեանան։

¹³ Դրա համար ահա ես գլորվում եմ ձեր ներքո,

ինչպես որ հասկով լի սայլն է գլորվում։

¹⁴ Փախչելը կանհետանա վազողից, և ով հզոր լինի,

չի հզորանա իր հզորության մեջ,

և պատերազմողը չի փրկի իր անձը։

¹⁵ Աղեղնավորը չի կարողանա ընդդիմանալ,

և ով արագընթաց լինի, չի փրկվի,

հեծյալն էլ չի փրկի իր անձը։

¹⁶ Նրա սիրտը զորություն չի գտնի, և մերկը կհալածվի այն օրը»,- ասում է Տերը։

3

Տիրոջ կշտամբանքն իսրայելացիներին

¹ Լսե՛ք այս պատգամը,

որ Տերը խոսեց ձեզ համար, ո՛վ Իսրայելի տուն,

և բոլոր այն ազգերի համար,

որոնց հանեցի եգիպտացիների երկրից։

² Բայց ձե՛զ ընտրեցի երկրի բոլոր ազգերից.

դրա համար ձեզնից վրեժխնդիր կլինեմ ձեր բոլոր չարիքների համար։

Մարգարեն չի կարող լռել

³ Երկու հոգի երբևէ միասին կգնա՞ն, եթե չճանաչեն իրար։

⁴ Առյուծն անտառից կմռնչա՞, եթե որս արած չլինի,

առյուծի կորյունն իր որջից իր ձայնը կհնչեցնի՞, եթե ոչինչ հափշտակած չլինի։

⁵ Թռչունն առանց որսորդի գետնին կընկնի՞,

թակարդը գետնի վրա կշրխկա՞,

եթե ոչինչ բռնած չլինի։

⁶ Կլինի՞, որ փող հնչի քաղաքում,

և ժողովուրդը չխռովվի.

քաղաքում չարիքներ լինեն, և Տերն արած չլինի։

⁷ Դրա համար Տերը՝ Աստված, ոչ մի բան չի անի,

մինչև խրատ չհայտնի իր ծառա մարգարեներին։

⁸ Առյուծը կմռնչա,

և ո՞վ կլինի, որ չի սարսռա։

Տերը՝ Աստված, խոսեց,

և ո՞վ կլինի, որ չի մարգարեանա։

Սամարիայի դեմ

⁹ Հայտարարե՛ք ասորեստանցիների գավառներում

և եգիպտացիների երկրի գավառներում և ասե՛ք.

«Հավաքվե՛ք Սամարիայի լեռան վրա

և տեսե՛ք բազում հրաշալիքներ նրա մեջ ու բռնությունը նրա մեջ։

¹⁰ Եվ չիմացավ իր գալիք եղեռնը,- ասում է Տերը,-

քանի որ անօրենություն և թշվառություն էին գանձում իրենց գավառներում»։

¹¹ Դրա համար Տերը՝ Աստված, այսպես է ասում Տյուրոսին.

«Այդ երկիրը, որ քո շուրջն է,

կավերվի, և քեզնից կվերանա քո ամբողջ զորությունը,

և կկողոպտվեն քո գավառները»։

¹² Քանի որ այսպես է ասում Տերը.

«Ինչպես օրինակ, եթե հովիվը կարողանա

առյուծի բերանից պրծացնել կենդանու երկու սրունք

կամ ականջի մի բլթակ,

այնպես դուրս կպրծնեն Իսրայելի որդիները,

որ բնակվում են Սամարիայում՝

այն ազգի առջև,

և դամասկացիների մեջ։

¹³ Քահանանե՛ր, լսե՛ք և վկայությո՛ւն տվեք Հակոբի տան համար,-

ասում է Ամենակալ Տերը։

¹⁴ Քանի որ այն օրը,

երբ Իսրայելի ամբարշտությունների համար վրեժխնդիր կլինեմ նրանից,

վրիժառու կլինեմ նաև Բեթելի զոհասեղանի համար,

և կփշրվեն զոհասեղանի անկյուններն ու կթափվեն գետնին։

¹⁵ Եվ կոչնչացնեմ ձմեռային ապարանքներն ամառային ապարանքների վրա,

կանհետանան փղոսկրյա ապարանքները,

և շատ ուրիշ ապարանքներ կկործանվեն»,- ասում է Տերը։

4

Սամարիայի կանանց դեմ

¹ «Լսե՛ք Տիրոջ խոսքը, Բասանի՛ երինջներ,

որ Սամարիայի լեռներում եք,

որ հարստահարում եք աղքատներին և ոտնահարում տնանկին,

որ ասում էիք ձեր տերերին՝

«Գինի՛ մատուցեք մեզ, որ խմենք»։

² Տերը երդվում է իր սրբություններով.

«Ահա օրեր կգան ձեզ վրա,

և կվերցնեն ձեզ զենքերով,

և նրանց, որ ձեզ հետ են,

կգցեն եռացած կաթսաները։

³ Մերկ կելնեք միմյանց դեմ դիմաց

և կնետվեք Ռեմանի լեռը»,- ասում է Տերը։

Իսրայելի զանցառությունը

⁴ «Մտաք Բեթել և մեղանչեցիք,

Գաղգաղայում շատացրիք մեղք գործելը,

առավոտյան մատուցեցիք ձեր զոհերն

ու երեք օրը մեկ՝ ձեր տասանորդները։

⁵ Ընթերցում էին Օրենքը դրսում և կանչում էին խոստովանությունների.

հայտարարե՛ք, թե սա սիրեցին Իսրայելի որդիները»,- ասում է Տերը։

⁶ «Ես ատամնացավ բերեցի ձեզ վրա ձեր բոլոր քաղաքներում

և հացի կարոտություն՝ ձեր բոլոր վայրերում,

բայց չդարձաք ինձ»,- ասում է Տերը։

⁷ «Եվ այգեկութից առաջ երեք ամսով ձեզ զրկեցի անձրևից.

մի քաղաքի վրա կտեղացնեմ,

իսկ մյուս քաղաքի վրա չեմ տեղացնի.

մի մասը կխոնավացնեմ,

իսկ մյուսը, որտեղ տեղացրած չեմ լինի, կչորանա։

⁸ Երկու և երեք քաղաքներ կհավաքվեն մի քաղաքում՝ ջուր խմելու

և չեն հագենա.

բայց չդարձաք ինձ»,- ասում է Տերը։

⁹ «Հարվածեցի ձեզ տապով

և դալկություն բերեցի ձեզ վրա։

Շատացրիք ձեր պարտեզները և այգիները,

ձեր թզենիներն ու ձիթենիները, և թրթուրը կերավ դրանք,

բայց և այնպես չդարձաք ինձ»,- ասում է Տերը։

¹⁰ «Մահ ուղարկեցի ձեզ վրա եգիպտացիների ճանապարհին

և սրով կոտորեցի ձեր երիտասարդներին՝

գերեվարված ձեր երիվարների հետ,

և այրեցի ձեր բանակատեղիներն իմ բարկության կրակով,

բայց և այնպես չդարձաք ինձ»,- ասում է Տերը։

¹¹ «Կործանեցի ձեզ, ինչպես Աստված կործանեց Սոդոմն ու Գոմորը,

և եղաք կրակից դուրս պրծած խանձված փայտի պես,

բայց և այնպես չդարձաք ինձ»,- ասում է Տերը։

¹² «Դրա համար այսպես կանեմ քեզ, Իսրայե՛լ,

բայց քանի որ այսպես եմ անելու քեզ,

պատրա՛ստ եղիր կանչելու քո Տիրոջ՝ Իսրայելի Աստծու անունը։

¹³ Քանի որ ահա ես եմ, որ հաստատում եմ երկինքը

և զորացնում հողմերը.

ով հռչակում է մարդկանց մեջ իր օծյալին,

կարգավորում է առավոտն ու մեգը

և ելնում է երկրի բարձունքների վրա,

Ամենակալ Տեր Աստված է նրա անունը»։

5

Տերը գթասիրտ է Հովսեփի տան հանդեպ

¹ Լսե՛ք այս խոսքը,

որով ես ողբալու եմ ձեզ վրա։

Ընկավ Իսրայելի տունը և այլևս չի կարողանա ոտքի ելնել։

² Իսրայելի կույսը կործանվեց իր երկրում,

և չկա մեկը, որ կանգնեցնի նրան։

³ Քանի որ այսպես է ասում Տեր Տերը.

«Այն քաղաքից, որից հազարավորներ էին ելնում, կմնան հարյուրը,

և որից հարյուրավորներ էին ելնում, կմնան տասը Իսրայելի տան համար»։

⁴ Քանզի այսպես է ասում Տերն Իսրայելի տան համար.

«Փնտրե՛ք ինձ և կապրեք.

⁵ մի՛ փնտրեք Բեթելը և Գաղգաղա մի՛ մտեք,

Երդման ջրհոր մի՛ ելեք,

քանի որ Գաղգաղան ամբողջությամբ կգերեվարվի,

և Բեթելը չեղածի նման կլինի»։

⁶ Փնտրե՛ք Տիրոջը և կապրեք,

որպեսզի կրակի պես չբորբոքվի Հովսեփի տունը

և ուտի նրան,

և ոչ ոք չի լինի, որ հանգցնի։

⁷ Նա, ով արդարադատություն է անում բարձունքներում,

արդարություն դրեց երկրի վրա,

⁸ ով ամեն ինչ ստեղծում և նորոգում է,

մահվան ստվերները վերածում է այգի

և ցերեկը գիշերով մթնեցնում,

ով կանչում է ծովի ջրերը

և թափում երկրի երեսին, Ամենակալ Տեր է նրա անունը.

⁹ ով կործանում է տարածում զորության դեմ

և թշվառություն բերում ամրոցների վրա։

¹⁰ Ատեցին հանդիմանողներին դռների առաջ

և սուրբ խոսքերը պղծեցին։

¹¹ Դրա համար, քանի որ կռփահարում էիք աղքատներին

և ընտիր կաշառք էիք վերցնում նրանցից,

շքեղազարդ ապարանքներ կշինեք,

բայց չեք բնակվի նրանց մեջ,

գեղեցիկ այգիներ կտնկեք,

բայց դրանց գինին չեք խմի,

¹² քանի որ ես իմացա ձեր բազում ամբարշտությունները,

և սաստիկ են ձեր մեղքերը։

Ոտնակոխ էիք անում արդարին՝ կաշառքներ առնելով,

և մոլորեցնում էիք աղքատին դռների առաջ։

¹³ Դրա համար նա, ով իմաստուն է,

այն ժամանակ կլռի, քանի որ ժամանակը չար է։

¹⁴ Բարի՛ն փնտրեք և ոչ թե չարը,

որպեսզի ապրեք,

և Տերը՝ Ամենակալ Աստված, կլինի ձեզ հետ.

ինչպես որ ասացիք՝

¹⁵ «Ատեցինք չարիքը և սիրեցինք բարին»։

Արդարադատությո՛ւն հաստատեք ձեր դռների առաջ,

որպեսզի Տերը՝ Աստված, ողորմի Հովսեփի մնացորդներին։

¹⁶ Դրա համար այսպես է ասում Տերը՝ Ամենակալ Աստված.

«Բոլոր հրապարակներում՝ կոծ,

և բոլոր ճանապարհներին վա՜յ, վա՜յ է ասվելու.

մշակը կկանչվի սգի ու կոծի և ողբալացի.

¹⁷ բոլոր ճանապարհներին կոծ կլինի,

որովհետև անցնելու եմ քո միջով»,- ասում է Տերը։

¹⁸ «Վա՜յ նրան, ով ցանկանում է Տիրոջ օրը.

ի՞նչ գործ ունեք դուք Տիրոջ օրվա հետ.

այն խավար է և ոչ թե լույս։

¹⁹ Ինչպես օրինակ, եթե մարդ փախչի առյուծի երեսից,

և նրան արջ հանդիպի, տուն փախչի

և իր ձեռքը հենի պատին, և նրան օձը խայթի,

²⁰ մի՞թե խավար չէ Տիրոջ օրը և ոչ թե լույս.

աղջամղջային է, և նրա մեջ ճաճանչ չկա»։

²¹ «Ատեցի, մերժեցի ձեր տոները

և ձեր տարեկանները չեմ հոտոտի։

²² Քանի որ եթե մատուցեք ձեր ողջակեզներն ու զոհերը,

չեմ ընդունի և ձեր փրկության հայտնի զոհաբերություններին ես չեմ նայի։

²³ Հեռո՛ւ տար ինձնից քո երգերի ձայնը,

և քո սրինգների նվագը ես չեմ լսի։

²⁴ Բայց թող հորդի արդարադատությունը ջրի պես,

և արդարությունը՝ անհուն հեղեղի պես։

²⁵ Մի՞թե ողջակեզներ և զոհեր մատուցեցիք ինձ այնտեղ՝

անապատում, քառասուն տարի, ո՛վ Իսրայելի տուն։

²⁶ Եվ վերցրիք Մողոքի խորանը և Հռեմփայի՝

ձեր աստծու աստղը և նրանց արձանները,

որ պատրաստեցիք ձեզ համար։

²⁷ Եվ կփոխադրեմ ձեզ Դամասկոսից այն կողմ»,- ասում է Տերը.

Ամենակալ Աստված է նրա անունը։

6

Տիրոջ զայրույթն Իսրայելի տան դեմ

¹ «Վա՜յ նրանց, որ արհամարհում են Սիոնը

և հույսները դրել են Սամարիայի լեռան վրա։

Հավաքեցին ազգերի իշխաններին

և մտան նրանց մեջ, ո՛վ Իսրայելի տուն։

² Բոլորդ անցե՛ք Քանան և տեսե՛ք,

այնտեղից անցե՛ք մեծ Եմաթ-Հռաբա և իջե՛ք այլազգիների Գեթ քաղաքը.

ավելի հզոր են, քան այն բոլոր քաղաքները,

նրանց սահմաններն ավելի մեծ են, քան ձեր սահմանները։

³ Դուք, որ գալիս եք դեպի չարիքի օրը,

մոտենում եք հասնելու ստությունների շաբաթներին,

⁴ դուք, որ ննջում եք փղոսկրյա գահավորակների վրա

և մեղկանում ձեր անկողիններում,

ուլեր եք ուտում հոտերից և կաթնակեր հորթեր՝ նախիրներից,

⁵ դուք, որ դոփահարում էիք սրինգների առաջ,

որոնք որպես հաստատուն հաճույքներ համարեցիք և ոչ անցավոր,

⁶ նաև խմում եք անապակ գինի և անուշահոտ յուղերով օծվում

ու չէիք ցավում Հովսեփի կործանման համար,-

⁷ արդ, դրա համար կգերեվարվեն

բռնակալների իշխանության կողմից,

և կկտրվի Եփրեմի երիվարների խրխնջյունը»։

Սամարիայի կործանումը

⁸ Քանի որ Տերը երդվեց իր անձով,

և Տերը՝ Զորությունների Աստվածը, ասում է.

«Գարշելի կդարձնեմ Հակոբի ամբողջ հպարտությունը,

կատեմ նրա երկրները և կվերացնեմ նրա քաղաքները՝ բոլոր բնակիչներով»։

⁹ Եվ կլինի, որ եթե տասը մարդ մնա մի տանը,

կմեռնեն,

¹⁰ իսկ մնացողները կվերցնեն իրենց հարազատներին

և կիջնեն հանելու նրանց ոսկորներն այն տնից

ու կասեն նրանց, ովքեր կանգնած կլինեն տան առաջ.

«Ուրիշ բան մնա՞ց այդտեղ, քեզ մոտ»։

¹¹ Եվ նա կասի՝ ոչ,

և չի ասի՝ լո՛ւռ մնա.

դրա համար չէին տալիս Տիրոջ անունը։

¹² Քանի որ ահա Տերը հրաման կտա և կհարվածի մեծ ապարանքներին՝ կործանելով,

և փոքր ապարանքներին՝ ջարդուփշուր անելով։

¹³ Կլինի՞, որ երիվարներն արշավեն ժայռերին ընդառաջ

կամ հանդարտվեն մատակների մեջ,

քանի որ արդարադատությունը փոխեցիք բարկության

և արդարության պտուղը՝ դառնության,

¹⁴ ուրախանում էիք ոչինչ բաներով.

որ ասում էին. «Մեր քաջությամբ չէ՞ր, որ զորություն ունեցանք»։

¹⁵ Ահա դրա համար, ո՛վ Իսրայելի տուն,

ձեր դեմ կհանեմ մի ազգ,- ասում է Զորությունների Տերը,- և կնեղեն ձեզ,

որպեսզի այլևս չմտնեք Եմաթ և մինչև արևմտյան գետը»։

7

Ամովսի տեսիլքները

ա. Մորեխների մասին

¹ Այսպես ցույց տվեց ինձ Տեր Տերը.

«Ահա մորեխի պարս էր գալիս առավոտյան,

և ահա մի ջորյակ՝ Գովգ արքան։

² Եվ կլինի, որ կվերջացնի երկրի խոտն ուտելը,

և կասեմ. «Տե՛ր, Տե՛ր, խնայի՛ր,

որովհետև ո՞վ կլինի, որ ոտքի կկանգնեցնի Հակոբին,

քանի որ սակավաթիվ է։

³ Զղջա՛, Տե՛ր, դրա համար»։

«Դա այլևս չի լինի»,- ասում է Տերը»։

բ. Կրակի մասին

⁴ Այսպես ցույց տվեց ինձ Տեր Տերը.

«Ահա կրակով դատաստան հրավիրեց Տեր Տերը,

և լափեց բազում անդունդներ ու կերավ մի մասը։

⁵ Եվ կասեմ. «Տե՛ր, Տե՛ր, դադարեցրո՛ւ դա,

որովհետև ո՞վ է, որ ոտքի կկանգնեցնի Հակոբին,

քանի որ սակավաթիվ է։

⁶ Զղջա՛, Տե՛ր, դրա համար»։

«Դա այլևս չի լինի»,- ասում է Տերը»։

գ. Ադամանդի մասին

⁷ Այսպես ցույց տվեց ինձ Տեր Տերը.

«Ահա մի մարդ կար ադամանդե պարսպի վրա,

և նրա ձեռքին՝ ադամանդ։

⁸ Եվ Տերն ինձ ասաց. «Ի՞նչ ես տեսնում, Ամո՛վս»։

Ասացի՝ ադամանդ։

Եվ Տերն ինձ ասաց. «Ահա ես ադամանդ կդնեմ Իսրայելի իմ ժողովրդի մեջ

և այլևս չեմ շարունակի շրջանցել նրանց։

⁹ Կկործանվեն ծաղրական բագինները,

և Իսրայելի մեհյանները կավերվեն,

և սրով կելնեմ Հերոբովամի տան վրա»։

Ամասիա քուրմն սպառնում է Ամովսին

¹⁰ Եվ Բեթելի քուրմ Ամասիան մարդ ուղարկեց Իսրայելի արքա Հերոբովամի մոտ և ասաց.

«Ամովսը քո դեմ դավադրություններ է նյութում Իսրայելի տան մեջ,

և մեր երկիրը չի կարողանում տանել նրա բոլոր խոսքերը,

¹¹ քանի որ այսպես է ասում Ամովսը.

«Հերոբովամը սրով կվախճանվի,

և Իսրայելն ամբողջությամբ կգերեվարվի իր երկրից»։

¹² Եվ Ամասիան ասաց Ամովսին.

«Ո՛վ դու, տեսանո՛ղ, տեղի՛ տուր,

գնա՛ Հուդայի երկիրը,

այնտեղ ապրի՛ր և այնտեղ մարգարեացի՛ր։

¹³ Բեթելում այլևս չշարունակես մարգարեանալ,

որովհետև թագավորի սրբարանն ու թագավորության տունն է»։

¹⁴ Պատասխան տվեց Ամովսը և ասաց Ամասիային.

«Ես ո՛չ մարգարե էի, ո՛չ էլ մարգարեի որդի,

այլ հովիվ էի և թութ էի քաղում.

¹⁵ Տերն ինձ վերցրեց ժողովուրդների միջից, և ասաց ինձ Տերը.

«Դու գնա՛ և մարգարեացի՛ր Իսրայելի իմ ժողովրդի համար»։

¹⁶ Արդ, լսի՛ր Տիրոջ պատգամները.

դու ասում ես. «Մի՛ մարգարեացիր Իսրայելի համար,

և ամբոխ մի՛ հավաքիր Հակոբի տան դեմ»։

¹⁷ Դրա համար այսպես է ասում Տեր Տերը. «Քո կինն այդ քաղաքում կպոռնկանա,

և քո որդիներն ու քո դուստրերը սրով կընկնեն,

քո երկիրը լարերով կբաժանվի,

դու պիղծ երկրում կվախճանվես,

և Իսրայելն ամբողջությամբ կգերեվարվի իր երկրից»։

8

դ. Տեսիլք թռչնորսորդների գործիքի մասին

¹ Այսպես ցույց տվեց ինձ Տեր Տերը, և ահա թռչնորսորդների մի գործիք,

² և ասաց. «Ի՞նչ ես տեսնում, Ամո՛վս»։

Ասացի՝ թռչնորսորդների գործիք։

Եվ Տերն ինձ ասաց. «Վախճանը հասել է Իսրայելի իմ ժողովրդի վրա,

և այլևս չեն շարունակի շրջանցել նրանց։

³ Այն օրը տաճարի ձեղունները կողբան,- ասում է Տերը,-

շատերը կկործանվեն,

և բոլոր վայրերի վրա լռություն կբերեմ»։

Ագահությունն աղետ է բերում

⁴ Լսե՛ք սա, որ նեղում էիք տնանկին

առավոտյան ու հարստահարում աղքատին երեկոյան

⁵ և ասում էիք. «Ե՞րբ պիտի անցնի այս ամիսը, որ շահ անենք,

և այս շաբաթը, որ բացենք գանձարկղերը՝ չափը

փոքրացնելու և կշիռը մեծացնելու,

ստության կշռաքարեր սարքելու համար.

⁶ որ արծաթով առնենք աղքատներին,

տնանկներին՝ կոշիկների գնով,

և մեր բոլոր վաճառքներից շահ ստանանք»։

⁷ Երդվում է Տերը Հակոբի հպարտության համար,

թե՝ «Իսպառ չեն մոռացվի ձեր բոլոր գործերը։

⁸ Դրա համար երկիրը կխռովվի, նրա բոլոր բնակիչները

սուգ կանեն, և կելնի

նրա վախճանը գետի նման

և կիջնի եգիպտացիների գետի պես»։

⁹ «Եվ կլինի այն օրը,- ասում է Տեր Տերը,-

որ արեգակը մայր կմտնի միջօրեին,

և երկրի վրա լույսը կխավարի ցերեկով։

¹⁰ Ձեր տոները սգի կվերածեմ,

և ձեր բոլոր երգերը՝ ողբի,

քուրձ կգցեմ ամեն տարիքի մարդկանց վրա

և բոլոր գլուխներին՝ ճաղատություն.

նրա համար կդարձնեմ որպես սիրելիի սուգ,

և նրանց համար, որ նրա հետ կլինեն՝ որպես ցավերի օր։

¹¹ Ահա գալիս են օրեր,- ասում է Տեր Տերը,-

և սով կուղարկեմ երկիր,

ոչ թե հացի սով և ոչ թե ջրի ծարավ,

այլ Տիրոջ խոսքը լսելու սով։

¹² Ջրերը կհուզվեն ծովից մինչև ծով

և հյուսիսից մինչև արևելք.

կընթանան՝ Տիրոջ խոսքը փնտրելու, բայց չեն գտնի։

¹³ Այն օրը ծարավից կնեղվեն գեղեցիկ կույսերն ու երիտասարդները,

¹⁴ որոնք երդվում էին Սամարիայի քավության զոհերով

և ասում. “Կենդանի է քո աստվածը, Դա՛ն,

և կենդանի է քո աստվածը, Բերսաբեե՛”.

կկործանվեն և այլևս ոտքի չեն կանգնի»։

9

Տաճարի կործանման տեսիլքը

¹ Տեսա Տիրոջը, որ զոհասեղանի վրա էր և ասաց.

«Հարվածի՛ր այդ զոհասեղանին,

և կշարժվեն դրանդիները.

կտրիր գցի՛ր բոլորի գլուխներին,

իսկ նրանց մնացորդները սրով կկոտորեմ.

չի փրկվի նրանցից փախածը,

և չի ազատվի նրանցից ճողոպրածը։

² Քանի որ եթե թաքնվեն դժոխքում, այնտեղից

իմ ձեռքը դուրս կբերի նրանց,

և եթե ելնեն երկինք,

այնտեղից էլ կիջեցնեմ նրանց,

և եթե թաքնվեն Կարմելոսի բարձունքներում,

այնտեղ էլ կփնտրեմ ու կբռնեմ նրանց։

³ Եթե իմ աչքից նետվեն ծովի խորքերը,

այնտեղ էլ կհրամայեմ վիշապին, որ խայթի նրանց։

⁴ Եթե գերության գնան իրենց թշնամիների առջևից,

այնտեղ էլ հրաման կտամ սրին, և կսպանի նրանց։

Իմ աչքը նրանց դեմ կդնեմ չարության և ոչ թե բարության համար»։

⁵ Եվ Տերը՝ Ամենակալ Աստված, երբ մոտենա երկրին և շարժի այն,

սուգ կանեն նրա բոլոր բնակիչները,

և կելնի նրա վախճանը գետի նման

ու կիջնի եգիպտացիների գետի պես։

⁶ Նա, ով պատրաստում է իր համբառնալը դեպի երկինք

և իր ավետիսն է երկրի վրա հաստատում,

ով կանչում է ծովի ջրերը և թափում երկրի երեսին,

Ամենակալ Տեր է նրա անունը։

⁷ «Մի՞թե դուք ինձ համար եթովպացիների որդիների պես չեք,

Իսրայելի՛ որդիներ,- ասում է Տերը,-

Իսրայելին չհանեցի՞ եգիպտացիների երկրից,

այլազգիներին՝ Գամիրքից և ասորիներին՝ Բոթորից»։

Տերը խնայում է Իսրայելի տան մնացորդներին

⁸ Ահա Տիրոջ աչքերը մեղավորներիդ թագավորության դեմ են.

«Կվերացնեմ դա երկրի երեսից,

սակայն իսպառ չեմ ջնջի Հակոբի տունը»,- ասում է Տերը։

⁹ «Քանի որ ահա ես հրաման եմ տալիս և կցրեմ ձեզ

բոլոր ազգերի մեջ,

ո՛վ Իսրայելի տուն,

ինչպես որ ցորենն է հեծանոցով քամուն տրվում,

բայց նրա փշուրը չի ընկնի գետնին։

¹⁰ Սրով կվախճանվեն իմ ժողովրդի բոլոր մեղավորները,

որոնք ասում էին.

«Չեն մոտենա ու չեն հասնի մեզ վրա չարիքները»։

Դավթի խորանի վերականգնումը

¹¹ «Այն օրը կկանգնեցնեմ Դավթի ընկած խորանն

ու կվերականգնեմ նրա ավերակները,

նրա հիմնահատակ ավերվածները վերստին կկանգնեցնեմ

և կվերաշինեմ այն, ինչպես հին օրերին,

¹² որպեսզի փնտրեն ինձ մարդկանց մնացորդներն ու բոլոր ազգերը,

որոնց վրա կոչված է իմ անունը»,-

ասում է Տերը, որ անում է սա։

¹³ «Ահա գալիս են օրեր,- ասում է Տերը,-

և կալերը կհասունանան՝ բերքահավաքի, կհասնի

խաղողը վարուցանքի ժամանակ,

լեռները քաղցրություն կբխեցնեն,

և բոլոր բլուրներն անտառախիտ կդառնան։

¹⁴ Եվ կդարձնեմ Իսրայելի իմ ժողովրդի գերությունը.

և կշինեն ավերված քաղաքներն ու բնակություն կհաստատեն,

այգիներ կտնկեն ու դրանց գինին կխմեն,

պարտեզներ կաճեցնեն ու դրանց պտուղը կուտեն։

¹⁵ Եվ նրանց կտնկեմ իրենց երկրում,

և այլևս չեն վտարվի իրենց երկրից,

որ ես տվեցի նրանց»,- ասում է Տերը՝ Ամենակալ Աստված։

ԱԲԴԻՈՒԻ ՄԱՐԳԱՐԵՈՒԹՅՈՒՆԸ

1

Տերը հայտնում է Եդովմի կործանումը

¹ Աբդիուի տեսիլքը[80], որ Տերը հայտնեց Եդովմի մասին.

«Տերը պատգամաբեր ուղարկեց ազգերին,

և լսեցինք նրա պատգամը.

“Ելնենք պատերազմելու Եդովմի դեմ”»։

² Եվ Եդովմին Տերն ասաց.

«Ահա քեզ սակավաթիվ դարձրի ազգերի մեջ,

և դու շատ ես անարգված։

³ Քո սրտի հպարտությունը քեզ բարձրացրեց՝

բնակվելու ժայռերի փոսերում,

բարձրացնելու իր բնակավայրը

և ասելու իր սրտում.

“Ո՞վ ինձ գետին կիջեցնի”»։

⁴ «Եթե բարձրանաս արծվի պես,

և եթե աստղերի մեջ դնես քո բույնը,

այնտեղից էլ կիջեցնեմ քեզ,- ասում է Տերը։

⁵ Եթե գողերն ու գիշերվա ավազակները մտնեին քեզ մոտ,

որտե՞ղ պիտի թաքնվեիր,

և արդյո՞ք իրենց համար բավականին բան չէին գողանա,

և եթե այգեկութ անողները մտնեին քեզ մոտ,

մի՞թե մի ողկույզ անգամ կթողնեին։

⁶ Ինչպե՞ս քննության ենթարկվեց Եսավը,

և բացահայտվեցին նրա գաղտնիքները։

⁷ Մինչև սահմանները քեզ ուղարկեցին,

քո ուխտի բոլոր մարդիկ քո դեմ դարձան,

քո խաղաղության մարդիկ քո դեմ զորացան,

դարանակալեցին քեզ.

իմաստություն չկար նրա մեջ»։

⁸ «Այն օրը,- ասում է Տերը,- կվերացնեմ իմաստությունը Եդովմի երկրից

և հանճարը՝ Եսավի լեռից։

⁹ Եվ կսարսեն քո պատերազմողները, որ Թեմանայում են,

քանի որ կվերանա մարդը Եսավի լեռից

¹⁰ եղբոր՝ Հակոբի սպանության և նրա դեմ ամբարշտության պատճառով։

Ամոթը կծածկի քեզ,

և կջնջվես հավիտյան»։

Եդովմի մեղքը

¹¹ «Այն օրվանից, երբ հակառակվեցիր,

այն օրը, երբ այլազգիները գերեվարեցին նրա զորքերը,

և օտարները մտան նրա դռներով,

և Երուսաղեմի վրա վիճակ էին գցում.

դուք էլ նրանցից մեկի նման էիք։

¹² Պետք չէ տեսնեիր քո եղբոր անկումն օտարների օրը,

պետք չէ ոտնահարեիր Հուդայի որդիներին նրանց կորստյան օրերին

և պետք չէ մեծաբանեիր նեղության օրը։

¹³ Պետք չէ մտնեիր ժողովուրդների [* իմ ժողովրդի] դռներով նրանց ցավերի օրը,

պետք չէ տեսնեիր նրանց ժողովարանները նրանց կործանման օրը

և պետք չէ հարվածեիր նրանց զորքին նրանց կորստյան օրը։

¹⁴ Պետք չէ գրավեիր նրանց կիրճերը՝ նրանցից ազատվածներին սպանելու համար,

և պետք չէ պաշարեիր նրանց փախստականներին նրանց նեղության օրը»։

Իսրայելի վրեժխնդրությունը

¹⁵ «Քանի որ մոտ է Տիրոջ օրը բոլոր ազգերի համար.

ինչպես որ դու արեցիր, լինելու է քեզ համար,

և քո հատուցումը գալու է քո գլխին.

¹⁶ քանզի ինչպես որ խմեցիր իմ սուրբ լեռան վրա,

գինի կխմեն բոլոր ազգերը,

կխմեն, կընկնեն ու կլինեն չեղածների նման»։

Իսրայելի հաղթանակը

¹⁷ «Բայց Սիոն լեռան վրա կլինի փրկությունը,

և սրբարանը կլինի,

և Հակոբի տունը կժառանգեն նրա ժառանգորդները։

¹⁸ Հակոբի տունը կրակ կդառնա,

Հովսեփի տունը՝ բոց,

և Եսավի տունը՝ եղեգ.

կվառվեն նրա շուրջը

և կուտեն այն,

և Եսավի տան համար կրակաբեր չի մնա,

քանի որ Տերը խոսեց։

¹⁹ Նագեբացիները կժառանգեն Եսավի լեռը,

սեփելացիները՝ այլազգիներին,

և կժառանգեն Եփրեմի լեռը, Սամարիայի դաշտը,

Բենիամինին և գաղաադացուն։

²⁰ Եվ սա կլինի Իսրայելի որդիների գերության տիրույթը,

քանանացիների երկիրը մինչև Սարփաթ,

և Երուսաղեմի գերությունը մինչև Եփրաթա,

և կժառանգեն Նագեբի քաղաքները։

²¹ Եվ կելնեն փրկվածները Սիոն լեռից՝

վրեժ լուծելու Եսավի լեռից. և Տիրոջն է լինելու արքայությունը»։

ՀՈՎՆԱՆԻ ՄԱՐԳԱՐԵՈՒԹՅՈՒՆԸ

1

Որ եղավ Ոզիայի օրերին։

Հովնանը փորձում է փախչել Տիրոջից

¹ Տիրոջ խոսքը եղավ Ամաթիի որդի Հովնանին, և ասաց. ² «Ելի՛ր և գնա՛ Նինվե մեծ քաղաքը և քարոզի՛ր այնտեղ, քանի որ նրա չարության աղաղակն ինձ հասավ»։ ³ Սակայն Հովնանը ելավ Տիրոջ երեսից փախչելու Թարսիս. իջավ Հոպպե և գտավ մի նավ, որ Թարսիս էր գնում. տվեց գինը և այնտեղ մտավ՝ Տիրոջ երեսից նրանց հետ Թարսիս նավարկելու։

⁴ Տերը հողմ բարձրացրեց ծովի վրա, և մեծ փոթորիկ եղավ ծովի վրա, և նավը խորտակվելու վտանգի մեջ էր։ ⁵ Նավավարները խիստ վախեցան, և յուրաքանչյուրն աղաղակում էր իր աստծուն, և գույքը, որ նավի վրա էր, ծովը գցեցին, որպեսզի թեթևացնեն իրենցից։ Իսկ Հովնանը, իջնելով նավի մի խորշը, ննջում էր և խռմփացնում։ ⁶ Նավապետը մոտեցավ նրան և ասաց. «Ի՞նչ ես խռմփացնում, վե՛ր կաց, կանչի՛ր Տիրոջը՝ քո Աստծուն, Աստված թերևս փրկի մեզ, և կորստյան չմատնվենք»։

⁷ Եվ յուրաքանչյուրն ասաց իր ընկերոջը. «Եկե՛ք վիճակ գցենք և իմանանք, թե ո՛ւմ պատճառով են այս չարիքները մեր դեմ»։ Վիճակ գցեցին, և վիճակը ելավ Հովնանին։ ⁸ Նրան ասացին. «Պատմի՛ր մեզ՝ ինչո՛ւ են այս չարիքները մեզ վրա, ի՛նչ արհեստ ունես, որտեղի՛ց ես գալիս կամ ո՛ւր ես գնում, ո՛ր երկրից ես կամ ո՛ր ժողովրդից»։ ⁹ Ասաց նրանց. «Ես Տիրոջ ծառա եմ [*  եբրայեցի եմ], պաշտում եմ Տիրոջը՝ երկնքի Աստծուն, որն ստեղծեց ծովն ու ցամաքը»։ ¹⁰ Մարդիկ խիստ վախեցան և ասացին նրան. «Այդ ի՞նչ ես արել», որովհետև իմացան, որ փախել էր Տիրոջ երեսից, քանի որ պատմեց նրանց։ ¹¹ Եվ ասացին նրան. «Ի՞նչ անենք քեզ, որ ծովը մեզնից հանգստանա», քանի որ ծովն է՛լ ավելի էր ալեկոծվել և փոթորիկ էր բարձրացնում նրանց վրա։ ¹² Հովնանն ասաց նրանց. «Ինձ վերցրե՛ք ծովը գցեք, և ծովը ձեզնից կհանգստանա, որովհետև ես գիտեմ, որ իմ պատճառով է այս մեծ մրրիկը ձեր դեմ»։

¹³ Մարդիկ ջանում էին նավը ցամաք վերադարձնել, բայց չէին կարողանում, քանի որ ծովն ավելի ու ավելի էր ալեկոծվում ու սաստկանում նրանց դեմ։ ¹⁴ Աղաղակեցին Տիրոջը և ասացին. «Քա՛վ լիցի, Տե՛ր, թող կորստյան չմատնվենք այս մարդու անձի պատճառով, արդար արյուն մի՛ բեր մեզ վրա, քանի որ դու, Տե՛ր, ինչպես կամեցար՝ արեցիր»։ ¹⁵ Եվ Հովնանին վերցրին ու ծովը գցեցին։ Ծովը դադարեց իր ալեկոծությունից։ ¹⁶ Մարդիկ խիստ վախեցան Տիրոջից, զոհ մատուցեցին Տիրոջը և ուխտ կնքեցին։

2

Հովնանի աղոթքը

¹ Տերը հրաման տվեց մի խոշոր կետի կուլ տալ Հովնանին, և երեք ցերեկ ու երեք գիշեր Հովնանը կետի փորում էր։

² Հովնանն աղոթեց Տիրոջը՝ Աստծուն, կետի փորի մեջ ³ և ասաց.

«Իմ նեղության մեջ կանչեցի Տիրոջը՝ իմ Աստծուն,

և լսեց ինձ՝ իմ աղաչանքը, դժոխքի որովայնից։

Տե՛ր, լսի՛ր իմ ձայնը։

⁴ Ինձ գցեցիր ծովի սրտի խորքերը,

և գետերը պաշարեցին ինձ։

Քո բոլոր կոհակներն ու քո ալիքներն անցան իմ վրայով,

⁵ և ասացի, թե՝ “Մերժվեցի քո աչքից.

արդ նորից կկարողանա՞մ նայել քո սուրբ տաճարին”։

⁶ Ջրերը թափվեցին ինձ վրա մինչև շունչս։

Դժնդակ անդունդները պաշարեցին ինձ։ Գլուխս մտավ

⁷ լեռների փապարներով,

իջա երկիր, որի նիգերն իր հավիտենական փականքներն են.

իմ կյանքը դուրս կգա կործանումից։

Տե՛ր իմ, Աստվա՛ծ, ⁸ իմ հոգու տկարանալու ժամանակ

քեզ կանչեցի,

հիշեցի Տիրոջը.

և թող իմ աղոթքները գան դեպի քո սուրբ տաճարը։

⁹ Ովքեր պահում էին ունայնությունն ու ստությունը,

թողեցին իրենց ողորմությունը։

¹⁰ Բայց ես օրհնության և խոստովանության ձայնով

քեզ պատարագ կմատուցեմ, որ ուխտեցի

և կհատուցեմ Տիրոջ փրկության համար»։

¹¹ Եվ Տիրոջից հրաման տրվեց վիշապ ձկանը, և նրան ցամաք թքեց։

3

Հովնանը քարոզում է Նինվեում

¹ Տիրոջ խոսքը երկրորդ անգամ եղավ Հովնանին, և ասաց. ² «Ելի՛ր, գնա՛ Նինվե մեծ քաղաքը և նրա մեջ քարոզի՛ր ըստ նախկին քարոզության, որ խոսեցի քեզ հետ»։ ³ Հովնանը ելավ ու գնաց Նինվե, ինչպես Տերը խոսել էր նրա հետ։ Նինվեն Աստծու մեծ քաղաք էր՝ երեք օրվա գնալու ճանապարհի չափ։ ⁴ Հովնանն սկսեց մտնել այն քաղաքը, երբ մի օրվա ճանապարհ անցավ, քարոզեց և ասաց. «Եվս այլ երեք [*  քառասուն] օրեր, և Նինվեն կործանվելու է»։

⁵ Եվ նինվեացի մարդիկ հավատացին Աստծուն, պահք քարոզեցին, և նրանց մեծից մինչև փոքրը քուրձ հագավ։ ⁶ Լուրը հասավ նինվեացիների թագավորին. իր գահից ելավ ու հանեց իր պատմուճանը, քուրձ հագավ և նստեց մոխրի վրա։ ⁷ Թագավորի և իր մեծամեծների կողմից Նինվեում քարոզվեց ու հայտարարվեց, թե մարդ և անասուն, հոտ և արջառ թող ոչինչ չուտեն, չճարակեն և ջուր չխմեն։ ⁸ Մարդ և անասուն քուրձ հագան և ամբողջ սրտով աղաղակեցին Աստծուն. դարձավ յուրաքանչյուրն իր չար ճանապարհներից և անօրենությունից, որ իր ձեռքում ուներ, և ասացին. ⁹ «Ո՞վ գիտի, Աստված կզղջա և կդառնա իր խիստ բարկությունից, և կորստյան չենք մատնվի»։ ¹⁰ Եվ Աստված տեսավ նրանց գործերը, որ յուրաքանչյուրը դարձավ իր չար ճանապարհներից, և Աստված զղջաց չարիքների համար, որ ասել էր, թե կաներ նրանց, բայց չարեց։

4

Հովնանը հասկանում է, թե Տերն ինչո՛ւ խղճաց Նինվեին

¹ Հովնանն ամբողջությամբ տրտմեց ու խռովվեց։ ² Աղոթեց Տիրոջը՝ Աստծուն, և ասաց. «Ո՛վ Տեր, դրանք իմ այն բառերը չէի՞ն, մինչ այնտեղ՝ իմ երկրում էի։ Դրա համար էլ շտապեցի փախչել Թարսիս, քանի որ գիտեի, որ դու ողորմած ես և գթած, համբերող ու բազումողորմ և զղջում ես չարիքների համար։ ³ Արդ, Տե՛ր, Տե՛ր, հոգիս վերցրո՛ւ ինձանից, որովհետև ինձ համար ավելի լավ է մեռնելը, քան թե ողջ մնամ»։ ⁴ Եվ Տերն ասաց Հովնանին. «Իսկապես շա՞տ ես տրտմել»։

⁵ Հովնանը դուրս ելավ այն քաղաքից, նստեց քաղաքի դիմաց [*  քաղաքից արևելք], իր համար հովանի պատրաստեց և նստեց հովանու տակ, մինչև որ տեսներ, թե ի՛նչ էր լինելու քաղաքին։ ⁶ Աստված հրաման տվեց դդմենուն, և Հովնանի գլխի վրա ելավ՝ նրա գլխի վրա նրան հովանի լինելու, նրան զովացնելու իր տառապանքներից։ Հովնանը շատ ուրախացավ դդմենու համար։

⁷ Հաջորդ օրը՝ վաղ առավոտյան, Աստված հրաման տվեց որդին. վնասեց դդմենին, և չորացավ։ ⁸ Եվ երբ արևը ծագեց, Աստված հրաման տվեց տապախառն խորշակ քամուն, և արևն ընկավ Հովնանի գլխին. տառապանքի մեջ էր, և նրա հոգին դուրս էր գալիս, և ասում էր. «Ինձ համար ավելի լավ էր մեռնելը, քան իմ այս կյանքը»։

⁹ Եվ Տերը՝ Աստված, ասաց Հովնանին. «Իսկապես շա՞տ ես տրտմած մնալու դդմենու համար», և ասաց. «Շատ եմ տրտմած մնալու մինչև մահ»։

¹⁰ Տերն ասաց. «Դու ափսոսացիր դդմենուն, որի համար ոչ մի ջանք չէիր թափել ու չէիր աճեցրել այն. գիշերը ելավ և հաջորդ գիշեր կորավ։ ¹¹ Ես չխնայե՞մ Նինվե մեծ քաղաքը, որտեղ բնակվում են ավելի քան տասներկու բյուր մարդիկ, որոնք իրենց աջն ու ձախը չգիտեն, նաև բազում անասուններ»։

ՄԻՔԻԱՅԻ ՄԱՐԳԱՐԵՈՒԹՅՈՒՆԸ

1

¹ Տիրոջ խոսքը, որ եղավ մորստացի Միքիային Հուդայի թագավորներ Հովաթամի, Աքազի և Եզեկիայի օրերին, որը տեսավ Սամարիայի և Երուսաղեմի համար։

Աստված դատապարտում է իր ժողովրդին

² Լսե՛ք, բոլո՛ր ժողովուրդներ,

և թող ականջ դնեն երկիրը և իր բոլոր բնակիչները։

Ձեր մեջ Տերը՝ Աստված, կլինի որպես վկայություն,

Տերը՝ իր սուրբ տնից։

³ Քանի որ ահա կշարժվի իր տեղից,

կիջնի և կհասնի երկրի բարձունքների վրա։

⁴ Լեռները կշարժվեն նրա ներքո,

ձորերը կհալվեն, ինչպես մոմը՝ կրակի առաջ,

և ինչպես զառիվայր հոսող ջուրը։

⁵ Այդ ամենը Հակոբի ամբարշտությունների

և Իսրայելի տան մեղքերի պատճառով է։

Իսկ արդ, ո՞վ է Հակոբի ամբարշտությունը, եթե ոչ Սամարիան,

և ո՞վ է Հուդայի տան մեղքը, եթե ոչ Երուսաղեմը։

⁶ Սամարիան կդարձնեմ որպես հյուղակ ագարակի մրգապահների համար

և որպես տնկի այգու համար,

խորխորատի մեջ կկործանեմ նրա քարերը

և նրա հիմքերը կմերկացնեմ։

⁷ Նրա բոլոր քանդակները ջարդուփշուր կանեն

և նրա բոլոր արձանները կրակով կայրեն.

նրա բոլոր կուռքերը կկործանեմ,

քանի որ պոռնկության վարձից կուտակեց

և պոռնկության վարձից հավաքեց։

Դժբախտություն է հասնում Երուսաղեմին

⁸ Դրա համար կկոծի և կողբա,

մերկ ու բոբիկ կքայլի,

կոծ կանի վիշապների նման

և կսգա հուշկապարիկների դուստրերի պես,

⁹ որովհետև սաստկացան նրա հարվածները,

քանի որ հասան մինչև Հուդա

և մոտեցան մինչև իմ ժողովրդի դռները և Երուսաղեմ։

¹⁰ Դուք, որ Գեթում եք, մի՛ մեծախոսեք,

և դուք, որ Ակկարոնում եք, մի՛ նորոգեք խայտառակությունը տան մեջ.

գլխի հո՛ղ եղեք ձեր բնակավայրի համար։

¹¹ Բարությամբ բնակվողը չելա՞վ իր քաղաքներից.

Սենարի՛ բնակիչներ, կո՛ծ արեք այն տան վրա, որ մոտ է նրան.

ձեզնից կվերցնի ցավի հարվածները։

¹² Ո՞վ սկսեց բարիք անել ցավերի մեջ բնակվողին,

քանի որ փորձանքներ իջան Տիրոջից Երուսաղեմի դռների վրա։

¹³ Կառքերի շաչյուն և երիվարների դրնդյուն.

Լաքիսի՛ բնակիչներ, նա է մեղքերի առաջնորդը Սիոնի դստեր,

քանի որ քո մեջ գտնվեցին Իսրայելի ամբարշտությունները։

¹⁴ Դրա համար արձակել կտա մինչև Գեթի ժառանգությունը,

սնոտի տները ունայնություն դարձան Իսրայելի թագավորների համար.

¹⁵ մինչև բերեն քո ժառանգորդներին, ժառանգությամբ Լաքիսի՛ բնակիչ,

մինչև Ոդողամ հասնի Սիոնի դստեր փառքը։

¹⁶ Ածիլվի՛ր և կտրի՛ր մազերդ քո փափկասուն որդիների համար,

լայնացրո՛ւ մազերիդ կտրվածքն արծվի պես,

քանի որ գերեվարվեցին քեզնից։

2

Ընդդեմ չարաշահողների

¹ Նեղություններ խորհեցին.

չարիք են գործում իրենց անկողիններում

և այգաբացին լույսով նույնն ի կատար են ածում,

քանի որ չբարձրացրին իրենց ձեռքերն առ Աստված։

² Տենչում էին հանդերի,

հափշտակում էին որբերին

և բռնագրավում տները,

հափշտակում էին մարդուն և նրա տունը,

մարդուն և նրա ժառանգությունը։

³ Դրա համար այսպես է ասում Տերը.

«Ահա ես այդ ազգի դեմ փորձանքներ եմ խորհում,

որոնց միջից վեր չեք հանելու ձեր պարանոցները,

ո՛չ էլ իսկույն ուղիղ եք գնալու,

քանի որ ժամանակը չար է»։

⁴ Այն օրը ձեր դեմ առակ կհորինեմ.

ողբեր կհնչեցնեն ողբաձայն և կասեն.

«Բոլորովին թշվառացանք։

Իմ ժողովրդի մի մասը լարով չափվեց,

և չկար մեկը, որ արգելեր նրան հետ դարձնելու.

մեր հանդերը բաժանվեցին»։

⁵ Դրա համար չի լինի մեկը, որ վիճակով լարաբաժին գցի։

Մարգարեի պատգամին հակադրվողները

⁶ Արտասուքով մի՛ լացեք Տիրոջ եկեղեցում,

և թող չարտասվեն դրա համար,

քանի որ չի հեռացնի նախատինքները։

⁷ Ով ասաց, թե Իսրայելի տունը բարկացրեց Տիրոջ Հոգին,

թե սա կլինի նրա ընթացքը,

ճիշտ չեն նրա խոսքերը նրա հետ.

իմ ժողովուրդն ուղիղ չի գնացել իմ առջևից։

⁸ Թշնամության համար հակառակ կանգնեց իր խաղաղության դեմ։

Նրան մորթազերծ կանեն՝ վերացնելու հույսը, պատերազմի արհավիրքը։

⁹ Դրա համար իմ ժողովրդի առաջնորդները դուրս կնետվեն իրենց վայելչագեղ տներից.

իրենց չար ընթացքի համար վտարվեցին։

Մոտեցե՛ք հավիտենական լեռներին։

¹⁰ Ոտքի՛ կանգնիր և գնա՛, քանի որ դու հանգիստ չունես այնտեղ.

պղծության պատճառով ամբողջությամբ կործանվեցիք,

¹¹ հալածվեցիք առանց որևէ մեկի հալածելու։ Չար ոգին ելավ,

քո մեջ գինի և արբեցություն կաթեցրեց.

այդ կաթումից այս ժողովրդին էլ կհասնի։

¹² Ամբողջովին կհավաքվի Հակոբը՝ բոլորով հանդերձ,

և միանգամայն կընդունի Իսրայելի մնացորդներին,

և միասին կվերադարձնեմ նրանց՝ որպես նեղության մեջ գտնվող ոչխարների,

իրենց մակաղատեղիում եղող հոտերի պես։

Մարդկանցից առաջ կընթանան խրամատով,

¹³ քանի որ նրանց առաջ խրամատներ կբացվեն.

կանցնեն դռնով և դուրս կելնեն նրանով,

թագավորն էլ կելնի նրանց առաջ,

և Տերը կառաջնորդի նրանց։

3

Միքիայի ազդարարությունն Իսրայելի իշխաններին

¹ Եվ կասի.

«Լսե՛ք, Հակոբի՛ տան իշխաններ և Իսրայելի՛ տան մնացորդներ։

Դուք չէ՞, որ պիտի իմանաք արդարադատությունը,

² դուք, որ ատում եք բարին և չարիք եք փնտրում,

հեռացնում եք նրանցից իրենց մաշկը

և նրանց միսը՝ իրենց ոսկորներից»։

³ Ինչպես որ կերան իմ ժողովրդի միսը

և նրանց մաշկը քերթեցին նրանց վրայից,

նրանց ոսկորները փշրեցին

և կտրատեցին նրանց մարմինները՝

իբրև թե կաթսաների,

և նրանց միսը՝ իբրև թե պուտուկների մեջ եփելու համար,

⁴ այնպես էլ կաղաղակեն Տիրոջը,

բայց չի լսի նրանց

և իր երեսը կդարձնի նրանցից այն ժամանակ,

քանի որ նրանց չարչարեցին իրենց գործերով։

Ընդդեմ այն մարգարեների, որոնք մոլորեցնում են Իսրայելին

⁵ Այսպես է ասում Տերն այն մարգարեների համար,

որոնք մոլորեցնում են իմ ժողովրդին,

որոնք կծոտում են իրենց ատամներով

և խաղաղություն են քարոզում նրան,

սակայն ոչինչ չդրվեց նրանց բերանը,

և պատերազմ հարուցեցին նրանց դեմ։

⁶ Դրա համար տեսիլքի փոխարեն գիշեր կլինի ձեզ համար,

և խավար կլինի ձեզ համար գուշակության փոխարեն.

արեգակը մայր կմտնի մարգարեների վրա,

և ցերեկը կխավարի նրանց վրա։

⁷ Երազատեսները կամաչեն, գուշակները կծաղրվեն,

և բոլորը կբամբասեն նրանց,

որովհետև չի լինի մեկը, որ լսի նրանց։

⁸ Բայց ես զորությամբ լցվեցի Տիրոջ Հոգով,

արդարադատությամբ և կարողությամբ՝

Հակոբին հայտնելու իր ամբարշտությունները և Իսրայելին՝ իր մեղքերը։

Միքիան կանխատեսում է Իսրայելի կործանումը

⁹ Լսե՛ք սա, Հակոբի՛ տան առաջնորդներ

և Իսրայելի՛ տան մնացորդներ,

որ անարգում եք արդարադատությունը

և շեղում եք բոլոր արդարներին,

¹⁰ որ Սիոնն արյամբ եք կառուցում

և Երուսաղեմը՝ անիրավությամբ։

¹¹ Նրա առաջնորդները կաշառքներով էին դատում,

նրա քահանաները վարձով էին պատասխան տալիս,

նրա մարգարեներն արծաթով էին հայտնում գուշակությունները

և Տիրոջն էին ապավինում և ասում.

«Մի՞թե Տերը մեզ հետ չէ. մեզ վրա չարիք չի գա»։

¹² Դրա համար Սիոնը ձեր պատճառով կհերկվի արորով,

Երուսաղեմը կլինի մրգապահների հյուղակի պես,

իսկ տաճարի լեռը՝ մայրիների անտառի նման։

4

Երուսաղեմը՝ խաղաղության մայրաքաղաք

¹ Եվ կլինի, որ վերջին օրերին կհայտնվի Տիրոջ լեռը՝

հաստատված լեռների գագաթների վրա.

կբարձրանա բլուրների վրա,

և շատ ժողովուրդներ կշտապեն դեպի նա։

² Եվ շատ ազգեր կգնան ու կասեն.

«Եկե՛ք ելնենք Տիրոջ լեռը և Հակոբի Աստծու տունը.

մեզ ցույց կտան նրա ճանապարհները,

և կգնանք նրա շավիղներով»։

Քանի որ Սիոնից կելնեն օրենքները,

և Տիրոջ խոսքը՝ Երուսաղեմից։

³ Դատաստան կանի բազում ժողովուրդների մեջ

և կհանդիմանի հզոր ազգերին

մինչև հեռավորները.

իրենց սրերից խոփեր կկոփեն, և իրենց գեղարդներից՝ մանգաղներ,

և այլևս ազգն ազգի վրա սուր չի բարձրացնի,

և այլևս չեն սովորի պատերազմել։

⁴ Յուրաքանչյուրը կհանգստանա իր որթատունկի տակ և իր թզենու ներքո,

և չի լինի մեկը, որ զարհուրեցնի,

քանի որ Ամենակալ Տիրոջ բերանը խոսեց սա։

⁵ Եթե բոլոր ժողովուրդներն ընթանան յուրաքանչյուրն իր ճանապարհներով, մենք,

սակայն, կընթանանք Տիրոջ՝ մեր Աստծու անունով հավիտյանս և մշտապես։

Աստված հավաքում է ցրվածներին

⁶ «Այն օրը,- ասում է Տերը,-

կհավաքեմ փշրվածին

և կընդունեմ հեռացածին ու նրանց, որոնց մերժեցին.

⁷ կոտրվածին կդարձնեմ որպես մնացորդ և փշրվածին՝ հզոր ազգ,

և Տերը նրանց կթագավորի Սիոն լեռան վրա այսուհետև մինչև հավիտյան։

⁸ Եվ դո՛ւ, հոտի՛ աշտարակ,

Սիոնի՛ խավար դուստր,

Բաբելոնից կգա քեզ վրա

Երուսաղեմի դստեր թագավորության առաջին իշխանությունը և ներս կմտնի»։

⁹ Եվ արդ, ինչո՞ւ ճանաչեցիր չարը,

մի՞թե դու թագավոր չունեիր,

կամ թե անհետացա՞վ քո խորհրդատուն,

քանի որ սաստկացավ քո երկունքը՝ ինչպես ծննդկանինը։

¹⁰ Երկնի՛ր,

զորացի՛ր և մոտեցի՛ր, Սիոնի՛ դուստր, ինչպես ծննդկան,

որովհետև հիմա պիտի ելնես քաղաքից,

և քեզ կբնակեցնեմ դաշտում.

կհասնես մինչև Բաբելոն,

և Տերը՝ քո Աստվածը, այնտեղից կփրկի քեզ

և այնտեղից կազատի քեզ քո թշնամիների ձեռքից։

¹¹ Եվ արդ հավաքվեցին քո դեմ բազում ազգեր, որոնք ասում էին.

«Եկե՛ք ծաղրենք,

և մեր աչքերը թող տեսնեն Սիոնը»։

¹² Նրանք չիմացան Տիրոջ միտքը և չհասկացան նրա կամքը,

քանի որ հավաքեց նրանց, ինչպես հասկը՝ կալի համար։

¹³ «Կանգնի՛ր և կալսի՛ր նրանց, Սիոնի՛ դուստր,

որովհետև քո եղջյուրները երկաթե կդարձնեմ, քո կճղակները՝ պղնձե,

և կխորտակես բազում ժողովուրդների,

դրանցով ազգեր կփշրես,

նրանց առատությունը կմատուցես Տիրոջը

և նրանց զորությունը՝ Ամենակալ Տիրոջը»։

¹⁴ Արդ, դուստրը կպաշարվի ցանկապատով,

քանի որ նեղություն բերեց ձեզ վրա.

գավազանով կհարվածեն Իսրայելի ցեղերի ծնոտներին։

5

Տերը խոստանում է Փրկիչ Բեթղեհեմից

¹ «Եվ դու, Բեթղեհե՛մ,

Եփրաթայի տո՛ւն,

Հուդայի հազարավորների մեջ սակավաթիվ ես լինելու.

ինձ համար քեզնից պիտի ելնի մեկը՝ Իսրայելի իշխան լինելու,

և նրա ելքն աշխարհի օրերի սկզբից է։

² Դրա համար նրանց կտա մինչև ծննդկանի ժամանակը.

կծնի, և նրա եղբայրների մնացորդները կդառնան Իսրայելի որդիների մոտ։

³ Եվ կկանգնի, կտեսնի և կհովվի իր հոտը Տիրոջ զորությամբ,

և կհաստատվեն Տիրոջ՝ իրենց Աստծու անվան փառքի մեջ,

քանի որ այժմ մեծարվելու են մինչև երկրի ծայրերը,

⁴ և խաղաղություն կլինի նրա համար.

երբ ասորեստանցին գա ձեր երկիրը

և երբ հասնի ձեր աշխարհը,

նրա դեմ յոթ հովիվ և ութ առաջնորդ մարդիկ կելնեն։

⁵ Եվ սրով կհովվեն ասորեստանցուն և Նեբրովթի երկիրը՝ իր պատնեշի մեջ,

և կփրկի քեզ ասորեստանցուց,

երբ գա ձեր երկիրը և երբ հասնի ձեր սահմաններին։

Իսրայելի մնացորդներն ազգերի մեջ

⁶ «Հակոբի մնացորդները հեթանոսների՝

բազում ազգերի մեջ կլինեն Տիրոջից ընկած ցողի պես

և ինչպես գառները սիզախոտի վրա,

որպեսզի ո՛չ մեկը հավաքի, ո՛չ էլ մնա մարդկանց որդիների մեջ։

⁷ Հակոբի մնացորդները հեթանոսների՝ բազում ազգերի մեջ կլինեն

ինչպես առյուծը հոտի մեջ՝ անտառում,

և ինչպես առյուծի կորյունը՝ ոչխարների հոտի մեջ,

ինչպես օրինակ, երբ

անցնելով զատի և հափշտակի,

ոչ ոք չի լինի, որ ազատի։

⁸ Քո ձեռքը կբարձրանա քեզ նեղողների վրա,

և քո բոլոր թշնամիները կկործանվեն։

⁹ Եվ կլինի այն օրը,- ասում է Տերը,- քո միջից

կվերացնեմ քո երիվարները

և կորստյան կմատնեմ քո կառքերը,

¹⁰ կվերացնեմ քո երկրի քաղաքները

և կկործանեմ քո բոլոր ամրոցները,

¹¹ քո ձեռքից կվերացնեմ քո բոլոր կախարդությունները,

և գուշակներ չեն լինի քո մեջ։

¹² Քո միջից կջնջեմ քո քանդակներն ու քո արձանները,

և այլևս չես երկրպագի քո ձեռակերտներին։

¹³ Կոչնչացնեմ քո պաշտամունքային փայտե սյուները քո միջից

և կկործանեմ քո քաղաքները,

¹⁴ բարկությամբ ու ցասումով վրեժխնդիր կլինեմ ազգերից,

քանի որ չլսեցին»։

6

Տիրոջ դատն Իսրայելի դեմ

¹ Լսե՛ք սա, որ Տերն ասաց.

«Վե՛ր կաց և դա՛տ արա լեռների հետ,

և բլուրները թող լսեն քո ձայնը։

² Լսե՛ք Տիրոջ դատաստանը, բլուրնե՛ր, ձորե՛ր և երկրի՛ հիմքեր,

որովհետև Տիրոջ դատաստանն իր ժողովրդի հետ է, և Իսրայելի հետ կհանդիմանվի։

³ «Իմ ժողովո՛ւրդ, ի՞նչ եմ արել քեզ

կամ ինչո՞վ եմ տրտմեցրել քեզ կամ ինչո՞վ եմ նեղացրել քեզ,

ինձ պատասխա՛ն տուր։

⁴ Քանի որ հանեցի քեզ եգիպտացիների երկրից,

փրկեցի քեզ ծառայության տնից

և քո առջև ուղարկեցի Մովսեսին, Ահարոնին և Մարիամին։

⁵ Իմ ժողովո՛ւրդ, հիշի՛ր՝ ի՛նչ խորհեց քո մասին մովաբացիների Բաղակ թագավորը,

և ի՛նչ պատասխան տվեց նրան Բեովրի որդի Բաղաամը, այն եղեգներից մինչև Գաղգաղ,

որպեսզի ճանաչվի Տիրոջ արդարությունը»։

⁶ Ինչո՞վ շտապեմ Տիրոջ մոտ.

կապավինեմ իմ բարձրյալ Աստծուն.

թե՞ շտապեմ նրա մոտ ողջակեզներով և տարեկան հորթերով։

⁷ Եթե այդպես լինի, Տերը կընդունի՞ հազարավոր խոյեր

կամ բյուրավոր պարարտ նոխազներ,

թե՞ ամբարշտությունների պատճառով տամ իմ անդրանիկները

և իմ միջի պտուղը՝ իմ անձի մեղքերի համար։

⁸ Ցույց տրվեց քեզ, ո՛վ մարդ,

ի՛նչ է բարին, կամ ի՛նչ է պահանջում քեզնից Տերը,

բայց արդարություն գործել, ողորմություն սիրել

և պատրաստ լինել Տիրոջ՝ քո Աստծու հետևից գնալու։

⁹ Տիրոջ ձայնը կհնչի քաղաքի վրա և կփրկի նրա անունից երկյուղածներին։

«Լսի՛ր, ա՛զգ, ո՞վ է հանդերձավորելու քաղաքը,

¹⁰ եթե ոչ հուրը և անօրենի տունը,

որ գանձում է անօրեն գանձեր անիրավության հպարտությամբ։

¹¹ Եվ կլինի՞, որ անօրենն արդարանա կաշառքով

ու նենգության կշեռքի պայուսակով.

¹² ուստի իրենց տները լցրին ամբարշտություններով,

նրա բնակիչներն անիրավություն խոսեցին,

և նրանց լեզուները մեծախոսեցին իրենց բերաններում։

¹³ Ես կործանումով հարվածեցի քեզ քո մեղքերի համար։

¹⁴ Դու կուտես և չես հագենա.

մերժեցի քեզ.

կբռնվես և չես ազատվի,

և ովքեր որ ազատվեն, սրի կմատնվեն։

¹⁵ Դու կսերմանես, բայց չես հնձի,

ձեթ կքամես, բայց չես օծվի յուղով,

և գինի, բայց գինի չես խմի։

Կվերանան իմ ժողովրդի անօրենները

¹⁶ և Աքաաբի տան բոլոր գործերը.

ըստ նրա խորհուրդների գնացիք,

որ ձեզ մատնեմ կորստյան

և քո բնակիչներին՝ սուլոցի.

ժողովուրդների նախատինքները կընդունեք»։

7

Մարգարեի ողբը

¹ Վա՜յ ինձ, որովհետև եղա ինչպես հասկաքաղը հունձքի ժամանակ և ճռաքաղը՝

այգեկութի ժամանակ,

և չկար ողկույզ առաջին բերքից, որից ուտում էի։

Վա՜յ իմ անձին, ² որովհետև երկյուղածն անհետացավ երկրից,

և չկա արդար մարդկանց մեջ.

բոլորն արյամբ են դատում,

յուրաքանչյուրը սաստիկ նեղում է իր ընկերոջը։

³ Իրենց ձեռքերը պատրաստ են չարության։

Իշխանը պահանջում է,

և դատավորը խաղաղության խոսքեր է ասում ըստ իր անձի ցանկության։

⁴ Կհանեմ նրանց բարիքները, ինչպես ցեցը,

որ ուտում է և շրջվում օրենքի դեմ այցելության օրը։

Վա՜յ, վա՜յ, եկավ հասավ քո վրեժխնդրությունը.

արդ, նրանց համար լացողներ կլինեն։

⁵ Մի՛ հավատացեք սիրելիներին

և մի՛ ապավինեք իշխաններին,

և զգո՛ւյշ եղիր քո կողակցից՝ նրան ինչ-որ բան պատմելու.

⁶ որովհետև որդին անարգում է հորը,

և դուստրը կելնի իր մոր դեմ, հարսը՝ իր սկեսրոջ դեմ,

և մարդու թշնամին իր ընտանիքը կլինի։

⁷ Սակայն ես Տիրոջ վրա աչքս կհառեմ,

կսպասեմ իմ փրկիչ Աստծուն,

և Տերը՝ իմ Աստվածը, կլսի ինձ։

Ժողովրդի հույսն ու աղոթքը

⁸ Մի՛ չարախնդա ինձ վրա, ո՛վ իմ թշնամի.

եթե գլորվեցի, դարձյալ կկանգնեմ,

եթե խավարում նստեմ, Տերն է իմ լույսը։

⁹ Տիրոջ բարկությանը կհամբերեմ,

որովհետև մեղանչեցի նրա դեմ,

մինչև արդարացնի իմ դատաստանը և ինձ արդարությամբ դատի,

ինձ հանի դեպի լույսը, և տեսնեմ նրա արդարությունը։

¹⁰ Եվ ինձ կտեսնի իմ թշնամին,

և ամոթը կպատի նրան, որ ասում էր ինձ.

«Ո՞ւր է Տերը՝ քո Աստվածը»։

Իմ աչքերը կտեսնեն նրան։

Արդ, ոտքի կոխան կլինի, ինչպես ցեխը՝ ճանապարհի վրա։

¹¹ Աղյուսի ծեփի օրը. այդ օրը կլինի քո կործանումը,

և կմերժի քո օրենքները։

¹² Այդ օրը քո քաղաքները կենթարկվեն ասորեստանցիների պաշարման և ավարին,

իսկ քո ամուր քաղաքները՝ բաժանման, Ծուրից մինչև գետը,

ծովից մինչև ծով և լեռից մինչև լեռ։

¹³ Եվ երկիրը կկործանվի իր բնակիչներով հանդերձ՝

նրանց գործերի պտղի պատճառով։

¹⁴ Քո ցեղերի գավազանով արածեցրո՛ւ քո ժողովրդին

և քո ժառանգության հոտերը,

որ առանձին բնակվում են անտառում՝ Կարմելոսում.

թող արածեն Բասանում և Գաղաադում, ինչպես հին օրերին։

¹⁵ Եվ եգիպտացիների երկրից քո ելքի օրերի

նման հրաշքներ ցույց կտամ նրանց։

¹⁶ Հեթանոսները կտեսնեն ու կամաչեն իրենց ամբողջ զորությունից.

ձեռքները կդնեն իրենց բերաններին,

և նրանց ականջները կխլանան։

¹⁷ Կլիզեն հողը, ինչպես օձերը, որ սողում են երկրի վրա,

կխռովվեն իրենց պաշարման մեջ

և կզարհուրեն Տիրոջից՝ մեր Աստծուց, և կվախենան քեզնից։

¹⁸ Կա՞ այլ Աստված քեզ նման, որ ջնջում է անօրենությունները,

անտեսում է իր ժառանգության երկրի մնացորդների անիրավությունները

և չի պահում իր բարկությունը՝ որպես վկայություն,

քանի որ ողորմություն կամեցող է։

¹⁹ Կդառնա ու կգթա մեզ, կընկղմի մեր մեղքերը

և ծովի խորքերը կնետի մեր բոլոր անօրենությունները։

²⁰ Ճշմարտություն կտա Հակոբին,

ողորմություն՝ Աբրահամին,

ինչպես երդվեց մեր հայրերին հին օրերում։

ՆԱՎՈՒՄԻ ՄԱՐԳԱՐԵՈՒԹՅՈՒՆԸ

1

¹ Նինվեի տեսիլքը։ Նավում Եղկեսացու տեսիլքի գիրքը։

Տերը վրեժխնդիր է և բարի

² Աստված նախանձախնդիր է, և վրեժխնդիր է Տերը.

Տերը վրեժխնդիր է բարկությամբ,

Տերը վրեժ է լուծում իր հակառակորդներից,

և ինքն է վերացնում իր թշնամիներին։

³ Համբերատար է Տերը,

և մեծ է նրա զորությունը,

Տերն արդարացնելով չի արդարացնում։

Նրա ընթացքը մահով ու երկրաշարժով է.

քամին նրա ձին է [* ճանապարհն է], ամպերը՝ նրա ոտքերի փոշին։

⁴ Սաստում է ծովը և ցամաքեցնում այն,

ավերում է բոլոր գետերը։

Տկարացան բասանացին ու Կարմելոսը,

Լիբանանի բոլոր ծաղիկները պակասեցին։

⁵ Լեռները շարժվեցին նրանից,

և բլուրները սասանվեցին,

նրա առջև խախտվեց երկիրը,

և նրա բոլոր բնակիչները։

⁶ Նրա բարկության առաջ ո՞վ կդիմանա,

և ո՞վ կկանգնի նրա սաստիկ բարկության դեմ։

Նրա ցասումը հալեցնում է իշխանությունները [* իջավ որպես կրակ],

և ժայռերը խորտակվեցին նրանից։

⁷ Բարեհաճ է Տերը նրանց նկատմամբ,

որոնք սպասում են իրեն նեղության օրը.

և ճանաչում է իրենից երկյուղածներին։

⁸ Բայց վրա հասնող հեղեղով վերջ կտա ընդդեմ ելածներին,

և խավարը կհալածի նրա թշնամիներին։

Պատգամներ Հուդայի երկրին

⁹ Ի՞նչ եք խորհում Տիրոջ դեմ.

ավարտն ինքն է անելու և երկու անգամ նույն վրեժը չի լուծի նեղության ժամանակ։

¹⁰ Մինչև իրենց հիմքը խոպան կդառնան.

կուտվի պատված բաղեղի պես

և ինչպես եղեգը՝ երաշտով լի։

¹¹ Քեզնից միտք կելնի Տիրոջ դեմ՝

հակառակությամբ չարիք խորհելու։

¹² Այսպես է ասում Տերը բազում ջրերի իշխանների համար.

«Այնպես կզատվեն,

որ քո լուրն այլևս չի լսվի։

¹³ Արդ՝ կփշրեմ նրա գավազանը քեզնից

և քո կապանքները կխզեմ»։

¹⁴ Եվ Տերը հրաման կտա քեզ համար,

և քո անունով այլևս չի սերմանվի.

«Քո աստծու տնից կվերացնեմ քանդակները

և ձուլածո կուռքերը քեզ համար գերեզման կդարձնեմ»։

2

Պատգամ Նինվեին

¹ Ահա արագընթաց են լեռների վրա ոտքերն ավետարանչի,

որ խաղաղություն է հայտարարում։

Տոնի՛ր քո տոները, Հուդա՛,

կատարի՛ր քո ուխտերը,

որպեսզի այլևս չշարունակեն անցնել՝ հնանալու։

Վախճանվեց. մաշվեց ու վերացավ։

² Քանի որ ելավ նա, ով փչում է քո երեսին

և փրկում նեղությունից.

հսկի՛ր ճանապարհը,

պնդացրո՛ւ մեջքդ, զորացի՛ր մեծ ուժով.

³ քանի որ Տերը շրջեց Հակոբի հպարտությունն

Իսրայելի հպարտության նման,

որովհետև ամբողջությամբ մերժեցին նրանց և ոչնչացրին նրա ճյուղերը,

⁴ նրա զորքի զենքը մարդկանց միջից, հզոր մարդկանց,

որ կրակի հետ խաղացին.

նրանց կառքերի սանձերը,

հեծյալները կշփոթվեն ⁵ ճանապարհներին

և կմոլորվեն հրապարակներում։

Նրանց տեսքը կրակե լամպերի նման է,

և փայլակի պես այս ու այն կողմ են ընթանում։

⁶ Կհիշեն նրա մեծամեծները և կփախչեն ցերեկը,

կտկարանան իրենց ճանապարհներին,

կշտապեն դեպի պարիսպները

և կպատրաստեն իրենց առաջապահներին։

⁷ Քաղաքների [* գետերի] դռները բացվեցին,

արքունիքները կործանվեցին,

⁸ և ունեցվածքները բացահայտվեցին։

Ինքը ելնում էր,

և իր նաժիշտներն առջևից էին գալիս.

աղավնիների պես մնչում էին իրենց սրտերում։

⁹ Նինվեի ջրերը նման էին ավազանի ջրերի.

նրանք փախան քեզնից և դադար չառան,

ու չկար մեկը, որ հետ նայեր։

¹⁰ Հափշտակում էին արծաթը,

հափշտակում էին ոսկին,

և նրա զարդեղենին չափ չկար։

Ծանրացան ավելի, քան նրա բոլոր ցանկալի սպասքները։

¹¹ Ցնցում և նկրտում,

սրտի սոսկում

և ծնկների թուլացում,

և ցավ՝ ամեն մեջքի վրա.

և բոլորի երեսները մրոտված պտուկի էին նման։

Նինվեն նման է պարտված առյուծի

¹² Ո՞ւր են առյուծների որջերն ու նրանց կորյունների որսերը,

ուր առյուծը գնաց մտնելու, առյուծի կորյունը,

և չկար մեկը, որ զարհուրեցներ։

¹³ Առյուծը բավականին որսաց իր կորյունների համար

և կենդանի խեղդեց իր կորյունների համար,

իր որջը լցրեց որսով

և իր բնակավայրը՝ հափշտակությամբ։

¹⁴ «Ահա ես դեմ եմ քեզ,- ասում է Ամենակալ Տերը,-

ծխով կայրեմ քո բազմությունը,

և սուրը կուտի քո առյուծներին,

երկրից կվերացնեմ քո որսը,

և այլևս չեն լսվի քո գործերը»։

3

Սպանդի մատնված ոճրային քաղաքը

¹ Ո՛վ արյան քաղաք,

բոլորովին սուտ,

անիրավությամբ լի,

որի որսը զննվելու է։

² Հարվածի ձայն,

անիվի շարժման ձայն,

կառքերի շաչյուն,

հեծյալների արշավանք,

³ զենքի փայլ, սուսերի շող,

վիրավորների թավալգլոր անկում.

և վերջ չկար նրանց ազգերին, բայց կտկարանան իրենց մարմինների մեջ

⁴ բազում պոռնկությունների պատճառով։

Գեղապանծ պոռնիկ,

կախարդների գլխավոր,

որ վաճառում էր ազգերին իր պոռնկության մեջ

և տոհմերին՝ իր կախարդանքներով։

⁵ «Ահա ես դեմ եմ քեզ,- ասում է Տերը՝ Ամենակալ Աստված,-

կբացեմ քո զգեստները

և կգցեմ քո երեսի վրա,

ազգերին ցույց կտամ քո մերկությունը

և թագավորություններին՝ քո անարգանքը։

⁶ Քեզ վրա կնետեմ քո պղծություններն ու աղտեղությունները

և քեզ խայտառակ կանեմ։

⁷ Եվ կլինի,

որ ով քեզ տեսնի, կիջնի և կասի.

«Դո՛ւ, խե՛ղճ Նինվե, ո՞վ կլինի, որ հեծեծի քեզ համար»,

որտեղի՞ց մխիթարություն փնտրենք քեզ համար»։

⁸ Բաժի՛ն պատրաստիր, քնա՛ր լարիր, Ովնի՛ բաժնեմաս.

նա, որ բնակվում է գետերի մեջ, և ջրերը շրջապատել են նրան,

որի սկիզբը ծովն է,

և ջրերը՝ նրա պարիսպը։

⁹ Եթովպացիներն ու Եգիպտոսը նրա զորությունն են,

և չափ չկա նրա փախչելուն.

լիբիացիները եղան նրա օգնականները։

¹⁰ Սակայն նա էլ հողդողդալով գերի կգնա,

և նրա մանուկներին քարին կխփեն նրա ճանապարհների սկզբին,

նրա բոլոր թանկարժեք իրերի վրա վիճակ կգցեն,

և նրա բոլոր մեծամեծները ձեռնակապերով կկապվեն։

¹¹ Դու կհարբես, կհիմարանաս ու քո թշնամիներից

քեզ համար ոտնատեղ կխնդրես։

¹² Քո բոլոր ամրոցները նման են թզենու պտղի,

որ եթե շարժվի, կընկնի ուտողների բերանը։

¹³ Ահա քո ժողովուրդները կանանց նման են քո մեջ.

քո երկրի դռներն ամբողջությամբ կբացվեն

քո թշնամիների համար,

և կրակը կուտի քո նիգերը։

¹⁴ Պաշարման համար քեզ ջո՛ւր լցրու և ամրացրո՛ւ քո ամրոցները.

մտի՛ր ցեխը,

կոխոտի՛ր հարդի հետ և պնդացրո՛ւ աղյուսից ավելի։

¹⁵ Այնտեղ կրակը կուտի քեզ,

և սուրը կկործանի քեզ,

կուտի քեզ մորեխի պես

և կծարավի ջորյակի նման։

¹⁶ Շատացրիր քո վաճառելիքները երկնքի աստղերի չափ.

ջորյակը եկավ ու թռավ,

¹⁷ խաղաց գրվիճի պես.

քո խառնիճաղանջ ամբոխը

նման է ցուրտ օրը ցանկապատին կպած մորեխի.

արևը ծագեց, և խաղաց ու չճանաչեց իր տեղը։

Վա՜յ նրանց։

¹⁸ Ընկան քո զորավարները,

ո՜վ Աշուրի թագավոր,

կոտորվեցին քո զորքերը,

քո ժողովուրդը ցրվեց լեռները,

և չկա մեկը, որ նրանց հավաքի։

¹⁹ Թարախակալվեցին քո վերքերը,

և քո անկմանը բուժում չկա.

բոլորը, որ լսեցին քո գույժը,

կծափահարեն քո անկման համար,

քանզի ո՞ւմ վրա հանապազ չի գնացել քո չարությունը։

ԱՄԲԱԿՈՒՄԻ ՄԱՐԳԱՐԵՈՒԹՅՈՒՆԸ

1

¹ Տեսիլք, որը տեսավ Ամբակում մարգարեն։

Ամբակումի գանգատն անարդարության դեմ

² Մինչև ե՞րբ, Տե՛ր, աղաղակեմ, և չլսես,

զրկված՝ ձայն տամ քեզ, և չփրկես։

³ Ինչո՞ւ ինձ տառապանք ու հոգնություն ցույց տվեցիր՝

թշվառություն և ամբարշտություն տեսնելու։

Իմ առաջ դատաստան եղավ, և դատավորը կաշառք էր վերցնում։

⁴ Դրա համար օրենքը մերժվեց,

և արդարադատությունը գլուխ չի գալիս.

քանի որ ամբարիշտը ճնշում է արդարին,

որի համար սխալ դատաստան էր լինում։

Աստծու պատասխանը. բաբելացիների ներխուժումը

⁵ Տեսե՛ք, արհամարհողնե՛ր, և նայե՛ք,

հիացմունքով զարմացե՛ք և չքացե՛ք,

որովհետև ես մի գործ եմ անում ձեր օրերում,

որին չեք հավատա, թեպետ մեկը պատմի ձեզ։

⁶ Ահա ես արթնացնում եմ քաղդեացիներին՝

դաժան և արագընթաց ազգին,

որ ընթանում է երկրի լայնությամբ՝

ժառանգելու վրանները, որոնք իրենը չեն։

⁷ Ահեղ ու երևելի է.

նրա դատաստանն իրենից կլինի,

և իր տեսիլքն իրենից կելնի։

⁸ Նրանց ձիերն ավելի արագ կվազեն, քան ընձառյուծները,

ավելի կատաղի, քան արաբացիների գայլերը.

նրանց զինյալները կասպատակեն,

կդիմեն հեռուներից և կսլանան,

ինչպես արծիվները ցանկությամբ՝ կերակուրի վրա։

⁹ Ամբարիշտների վախճանը կհասնի նրա երեսի դեմ դարձածների համար։

Գերությունը կհավաքի, ինչպես ավազը։

¹⁰ Ինքը թագավորների հետ զեխություն կանի,

բռնակալները նրա խաղալիքն են,

և ինքը բոլոր ամրոցների հետ ամբողջությամբ խաղ կանի,

հողակույտեր կհավաքի և կպահի այն։

¹¹ Այն ժամանակ կփոխվի նրա միտքը,

կանցնի և կախորժի՝ ասելով.

«Այս զորությունն իմ աստծունն է»։

Ամբակումը նորից է գանգատվում

¹² Ի սկզբանե մի՞թե դու չես Տերը՝ մեր Աստվածը.

չենք մեռնի.

Տե՛ր, նրան դրեցիր դատաստանի և ստեղծեցիր ինձ՝

հանդիմանելու նրա խաղը։

¹³ Սուրբ է քո աչքը չարիքներ տեսնելու համար,

և չես կարողանա նայել տառապանքներին.

ինչո՞ւ նայեցիր արհամարհողներին և չսաստեցիր,

երբ ամբարիշտը կուլ էր տալիս արդարին։

¹⁴ Մարդկանց կդարձնես ծովի ձկների

և սողունների՞ պես, որոնք առաջնորդ չունեն։

¹⁵ Վախճանը կարթով կորզեց,

իր ցանցով բռնեց նրան և իր ուռկաններով ժողովեց նրան,

որի համար կուրախանա և կցնծա նրա սիրտը։

¹⁶ Դրա համար զոհ կմատուցի իր ուռկանին

և խունկ կծխի իր ցանցին,

քանի որ նրանցով ուռճացրեց իր բաժինը

և իր ընտիր կերակուրը։

¹⁷ Դրա համար կտարածի իր ցանցը

և չի խնայի մշտապես կոտորելու ազգերին։

2

Աստծու պատասխանն Ամբակումին

¹ Իմ պահակակետում կկանգնեմ,

կելնեմ ժայռի վրա և կդիտեմ՝ տեսնելու,

թե ի՛նչ պիտի խոսի ինձ հետ

և ի՛նչ պատասխան պիտի տա իմ հանդիմանությանը։

² Տերն ինձ պատասխան տվեց և ասաց.

«Այդ տեսիլքը հստակորեն գրի՛ր տախտակների վրա,

որպեսզի ով կարդա, վստահ կարդա,

³ որովհետև այդ տեսիլքը դեռևս ժամանակների համար է

և կծագի վերջում և ոչ ունայնության մեջ։

Բայց եթե ուշանա, հույսով սպասի՛ր նրան,

որովհետև նա, ով գալու է, կգա և չի ուշանա։

⁴ Եվ եթե մեկը երկմտի,

իմ անձը նրան չի հավանի,

քանի որ իմ արդարն իմ հավատքով է ապրելու»։

Արդարության վճիռ

⁵ Սակայն կասկածողն ու արհամարհողն ամբարտավան մարդ է

և ոչինչ ավարտին չի հասցնի,

ով իր անձն ընդարձակեց դժոխքի պես

և անհագ եղավ, ինչպես մահը,

իր մոտ հավաքեց բոլոր հեթանոսներին

և իր մեջ կամփոփի բոլոր ժողովուրդներին։

⁶ Մի՞թե այս բոլորը նրա դեմ առակ չեն հորինի

և չեն հեգնի նրան և ասեն.

«Վա՜յ նրան, ով ավելացնում է իր անձի համար այն, ինչ իրենը չէ.

մինչև ե՞րբ է ծանրացնելու իր լուծը ծանրությամբ»,

⁷ որովհետև հանկարծակի կելնեն նրան ուտողները,

և կզարթնեն նրան դավաճանողները,

և հափշտակություն կդառնաս նրանց համար։

⁸ Քանի որ դու կողոպտեցիր բազում ազգերի, քեզ էլ կկողոպտեն

ժողովուրդների բոլոր մնացորդները

մարդկանց արյան և քաղաքի

ու նրա բոլոր բնակիչների և երկրի անօրենության պատճառով։

⁹ Վա՜յ նրան, ով իր տան համար չար ագահություն է սաստիկ ցանկանում՝

իր բույնը բարձունքներում դնելու,

չար ձեռքերից ազատվելու համար։

¹⁰ Քո տան համար ամոթ խորհեցիր,

ոչնչացրիր բազում ժողովուրդների, և քո անձը մեղանչեց.

¹¹ քանի որ քարը հիմքից կաղաղակի,

և որդը փայտի միջից կգոչի այդ։

¹² Վա՜յ նրան, ով քաղաքն արյամբ է կառուցում

և անիրավությամբ է հաստատում քաղաքը։

¹³ Այդ ամենն Ամենակալ Տիրոջից չէ՞.

շատ ժողովուրդներ կոչնչանան կրակից.

և շատ ազգեր տկարացան,

¹⁴ որպեսզի երկիրը լցվի Տիրոջ փառքի գիտությամբ,

ինչպես բազում ջրերը, որ ծածկում են ծովերը։

¹⁵ Վա՜յ նրան, ով իր ընկերոջը թունավոր ըմպելիք է մատուցում և արբեցնում,

որպեսզի նայի նրանց քարայրներին։

¹⁶ Դու ևս փառքի փոխարեն անարգանքի

հագուրդը խմի՛ր, շարժվի՛ր և դողա՛։

Պաշարեց քեզ Տիրոջ Աջի բաժակը,

և անարգանք կուտակվեց քո փառքի վրա.

¹⁷ քանի որ Լիբանանի ամբարշտությունը կծածկի քեզ,

և գազանների թշվառությունը կզարհուրեցնի քեզ՝

մարդկանց արյան և քաղաքի ու նրա բոլոր բնակիչների

և երկրի անօրենության պատճառով։

¹⁸ Ի՞նչ օգուտ ունի քանդակը,

որ քանդակեցին այն,

որպես ձուլածո այն ստեղծեցին,

մի սուտ պատկեր, քանի որ նա,

ով ստեղծեց, հույսը դրեց իր ստեղծածի վրա՝

իր համար անօգուտ կուռքեր շինելու։

¹⁹ Վա՜յ նրան, ով փայտին ասում է՝ սթափվի՛ր և զարթնի՛ր,

և քարին՝ բարձրացի՛ր.

և՛ մեկն է թվացյալ երևույթ,

և՛ մյուսն է արծաթից ու ոսկուց կռած,

և բոլորովին շունչ չկա դրանց մեջ։

²⁰ Սակայն Տերն իր սուրբ տաճարի մեջ է,

և ողջ երկիրը թող վախենա նրա երեսից։

3

Ամբակումի աղոթքը

¹ Ամբակում մարգարեի աղոթքը՝ երգով։

² «Տե՛ր, քո լուրը լսեցի և վախեցա,

Տե՛ր, նայեցի քո գործերին և զարհուրեցի։

Կճանաչվես երկու գազանների մեջ.

երբ տարիները մոտենան՝ կհայտնվես,

երբ ժամանակը հասնի՝ կերևաս,

երբ իմ անձը խռովվի՝ բարկության մեջ ողորմություն կհիշես։

³ Աստված Թեմանից կգա,

և Սուրբը՝ զով և անտառախիտ լեռից։ (Դադար)։

Նրա փառքը ծածկեց երկինքը,

նրա օրհնությամբ լցվեց երկիրը։

⁴ Նրա ճառագայթները լույսի պես կլինեն,

և եղջյուրներ՝ նրա ձեռքում,

և իր զորության ուժգին սերը հաստատեց։

⁵ Նրա երեսի առջևից խոսք կգնա

և նրա հետևից դեպի դաշտերը կելնի։

⁶ Կանգնեց, և երկիրը շարժվեց,

նայեց, և հալվեցին ազգերը,

բռնությամբ խորտակվեցին լեռները,

և հալվեցին հավիտենական բլուրները։

Նրա հավիտենական ընթացքը

⁷ տառապանքների դիմաց տեսա։

Զարհուրեցին եթովպացիների վրանները

և Մադիամի երկրի վրանները։

⁸ Մի՞թե գետերի վրա կբարկանաս, Տե՛ր,

կամ քո բարկությունը գետերի՞ վրա է,

կամ քո ասպատակությունը՝ ծովերի՞ վրա,

քանի որ կելնես քո ձիերի վրա,

և քո ձի հեծնելը փրկություն է։

⁹ Լարելով կլարես քո աղեղն իշխանության դեմ,-

ասում է Տերը. (Դադար)

գետերից պատռվեց երկիրը։

¹⁰ Ժողովուրդները կտեսնեն քեզ և կերկնեն,

որ ցանում ես ընթացող ջրերը։

Անդունդներն իրենց ձայնը բարձրացրին, իրենց սաստիկ բարձրությունը։

¹¹ Արեգակը բարձրացավ,

և լուսինը մնաց իր ընթացքի մեջ։

Քո նետերը կգնան լույսով,

քո զենքերի փայլատակումների փայլով։

¹² Սպառնալիքներով խոնարհեցրիր երկիրը

և բարկությամբ կտկարացնես ազգերին։

¹³ Ելար քո ժողովրդի փրկության համար՝

քո օծյալներին փրկելու,

մահ բերեցիր անօրենների գլխին.

իսպառ սաստկացրիր կապանքները մինչև պարանոցները։ (Դադար)

¹⁴ Ապշությամբ ջախջախեցիր բռնակալների գլուխները.

կսասանվեն դրա մեջ,

գաղտնակեր տնանկի պես կարձակեն իրենց սանձերը։

¹⁵ Ծով հանեցիր քո երիվարները՝ շատ ջրեր պղտորելու։

¹⁶ Զգուշացա, և իմ սիրտը զարհուրեց իմ շուրթերի աղոթքների ձայնից.

դող մտավ ոսկորներիս մեջ,

և փորս ներքուստ խռովվեց։

Կհանգստանամ նեղության օրը,

երբ ելնեմ դեպի իմ պանդխտության ժողովուրդը։

¹⁷ Թեև թզենին չի տա իր պտուղը,

և որթատունկը ծնունդ չի ունենա,

ձիթենու բերքը կխաբի, և դաշտերը կերակուր չեն տա,

հոտերը կպակասեն արոտավայրից,

և մսուրների մեջ եզներ չեն լինի,

¹⁸ բայց ես կցնծամ Տիրոջով

և կուրախանամ իմ փրկիչ Աստծով։

¹⁹ Տերը՝ Աստված է իմ զորությունը.

իմ ոտքերն ամբողջովին կուղղի

և ինձ կհանի բարձունքները՝ իր երգով հաղթելու»։

ՍՈՓՈՆԻԱՅԻ ՄԱՐԳԱՐԵՈՒԹՅՈՒՆԸ

1

¹ Խոսքը, որ եղավ Եզեկիայի որդու՝ Ամարիայի որդու՝ Գողգողիայի որդու՝ Քուսիի որդուն՝ Սոփոնիային, Հուդայի արքայի՝ Ամովնի որդու՝ Հովսիայի օրերում։

Տիրոջ դատաստանի օրը

² «Ամեն ինչ ամբողջովին կպակասի երկրի երեսից»,- ասում է Տերը։

³ «Կպակասեն մարդ և անասուն,

կպակասեն երկնքի թռչուններն ու ծովի ձկները,

կտկարանան ամբարիշտները,

և անօրեններին կվերացնեմ երկրի երեսից»,- ասում է Տերը։

Տիրոջ դատաստանը Հուդայի երկրի և Երուսաղեմի դեմ

⁴ «Իմ ձեռքը կերկարեմ Հուդայի վրա

և Երուսաղեմի բոլոր բնակիչների վրա

և կվերացնեմ

Բահաղի անունն այդտեղից և քրմերի անունը՝ քահանաներով հանդերձ,

⁵ որ տանիքների վրա երկրպագում են երկնքի զորություններին,

և որոնք երդվում էին իրենց արքայի՝ Տիրոջ անունով,

⁶ և որոնք խոտորվում էին Տիրոջից,

որոնք ո՛չ փնտրում էին Տիրոջը,

ո՛չ էլ Տիրոջ կողմն էին լինում»։

⁷ Վախեցե՛ք Տիրոջ՝ Աստծու հայացքից,

քանի որ մոտ է Տիրոջ օրը,

որովհետև Տերը պատրաստել է իր զոհաբերությունները

և կանչել է իր հրավիրյալներին։

⁸ «Եվ կլինի Տիրոջ զոհաբերության օրը, որ վրեժխնդիր կլինեմ իշխաններից,

թագավորի տնից և բոլորից,

որոնք օտար հագուստներ են հագել։

⁹ Այն օրը վրեժխնդիր կլինեմ Բարձունքների վրա ցատկողներից,

որոնք Տիրոջ տունը լցնում են ամբարշտությամբ։

¹⁰ Եվ այն օրը,- ասում է Տերը,-

աղաղակի ձայն կլինի խոցոտվածների դռնից,

գույժ՝ երկրորդ դռնից, և մեծ կոտորած՝ բլուրներից։

¹¹ Ողբացե՛ք, կոտորվածների բնակիչնե՛ր,

քանի որ ողջ ժողովուրդը նմանվեց քանանացիներին.

կործանվեցին բոլորը,

որոնք հպարտացել էին արծաթով։

¹² Եվ կլինի այն օրը, որ ճրագով կխուզարկեմ Երուսաղեմը

և վրեժխնդիր կլինեմ այն մարդկանցից,

որոնք արհամարհեցին իրենց պահպանությանը հանձնված բաները,

որ ասում էին իրենց սրտերում.

“Ո՛չ բարի բան է անում Տերը, ո՛չ էլ չար”։

¹³ Նրանց զորությունը հափշտակված կլինի,

և նրանց տները՝ ավերակ.

տներ կշինեն, բայց չեն բնակվի դրանց մեջ,

այգիներ կտնկեն, բայց չեն խմի դրանց գինին»։

Տիրոջ օրը

¹⁴ Քանի որ մոտ է Տիրոջ մեծ օրը,

մոտ է և շատ արագահաս.

Տիրոջ օրվա ձայնը խիստ է և դառն՝

զորավոր կարգված։

¹⁵ Բարկության օր է այն օրը,

նեղության և վտանգի օր,

թշվառության և կործանման օր,

խավարի և մեգի օր,

ամպի և մառախուղի օր,

¹⁶ շեփորի և աղաղակի օր

ամուր քաղաքների և բարձր անկյունների դեմ։

¹⁷ «Կնեղեմ մարդկանց,

և կույրերի պես կընթանան,

քանի որ մեղանչեցին Տիրոջ դեմ

և նրա անունը վերցրին սնոտի բաների համար,

որոնք ոչինչ չեն կարողանա անել՝ նրանց օգնելու.

կթափի նրանց արյունը հողի նման,

և նրանց մարմինները՝ աղբի պես»։

¹⁸ Նրանց արծաթն ու ոսկին չեն կարողանա նրանց փրկել Տիրոջ բարկության օրը,

բայց նրա նախանձախնդրության կրակով կմաշվի համայն երկիրը,

որովհետև վախճան ու տագնապ կբերի

երկրի բոլոր բնակիչների վրա։

2

Կոչ խոնարհներին

¹ Հավաքվե՛ք և աղաչե՛ք, ո՛վ անխրատ ազգեր,

² քանի դեռ չեք դարձել անցավոր ծաղկի պես,

քանի դեռ չի եկել Տիրոջ սաստիկ բարկության օրը։

³ Փնտրե՛ք Տիրոջը, երկրի բոլո՛ր խոնարհներ,

արդարադատությո՛ւն արեք և արդարությո՛ւն փնտրեք

և պատասխա՛ն տվեք նրանց,

որպեսզի թաքնվեք Տիրոջ բարկության օրը։

Սպառնալիքներ արևմուտքի ժողովուրդներին

⁴ Քանի որ Գազան կհափշտակվի,

և Ասկաղոնը կավերվի, Ազովտոսը միջօրեին կկործանվի,

և Ակկարոնն արմատախիլ կարվի։

⁵ Վա՜յ ձեզ, որ բնակվում եք ծովի եզերքում,

կրետացի բնակիչնե՛ր,

Տիրոջ պատգամը ձեր դեմ է.

Քանա՛ն, այլազգիների երկի՛ր, կվերացնեմ ձեզ բնակավայրից,

⁶ և Կրետեն կդառնա հոտերի արոտավայր և ոչխարների գոմ։

⁷ Ծովեզերքը Հուդայի տան մնացորդներինը կլինի,

և նրանց մեջ կճարակեն

և Հուդայի որդիների երեսից

երեկոյան դադար կառնեն Ասկաղոնի տներում,

քանի որ նրանց այցի է ելել Տերը՝ իրենց Աստվածը,

և կվերացնի նրանց գերությունը։

Սպառնալիքներ արևելքի ժողովուրդներին

⁸ «Լսեցի Մովաբի նախատինքները

և Ամովնի որդիների թշնամանքները,

որոնցով նախատում էին իմ ժողովրդին

և մեծաբանում իմ սահմանների դեմ։

⁹ Նրա համար եմ ես կենդանի,-

ասում է Տերը՝ Զորությունների Աստվածը, Իսրայելի Աստվածը,-

որ Մովաբը Սոդոմի պես դառնա,

և Ամովնի որդիները՝ Գոմորի պես,

իսկ Դամասկոսը՝ լքված, ինչպես կալի դեզը,

և հավիտյան ավերված։

Իմ ժողովրդի մնացորդները կհափշտակեն նրանց,

և իմ ազգի մնացորդները կժառանգեն նրանց»։

¹⁰ Եվ դա կլինի նրանց՝ իրենց հպարտության փոխարեն,

քանի որ նախատեցին և մեծաբանեցին Ամենակալ Տիրոջ դեմ։

¹¹ Տերը կերևա նրանց դեմ

և կկործանի ազգերի բոլոր աստվածներին,

և կերկրպագեն նրան յուրաքանչյուրն իր տեղից

ազգերի բոլոր կղզիները։

Սպառնալիքներ հյուսիսի և հարավի ժողովուրդներին

¹² «Դուք ևս, եթովպացինե՛ր, իմ սրից սպանվածն եք։

¹³ Իմ ձեռքը կերկարեմ հյուսիսի վրա

և կկործանեմ ասորեստանցուն,

Նինվեն ավերակ կդարձնեմ, անջրդի՝ ինչպես անապատը,

¹⁴ և կարածեն նրա մեջ հոտերն ու երկրի բոլոր գազանները,

գետնառյուծներն ու ոզնիները կբնակվեն նրա հարկերում,

գազանները կոռնան նրա նկուղներում,

և ագռավները՝ նրա դռների վրա,

քանի որ մայրու պես է նրա բարձրությունը»։

¹⁵ Սա վրիժագործ քաղաք է՝ հույսով բնակվելով,

որ ասում էր իր սրտում.

«Ես եմ, և այլևս ոչ ոք չի լինի ինձանից հետո»։

Ինչպե՞ս դարձավ ավերակ, գազանների ճարակ.

ամեն ոք, որ անցնի նրա միջով,

կշչա և կշարժի իր գլուխը։

3

Ընդդեմ Երուսաղեմի

¹ Վա՜յ ապստամբ, ապականված և բռնակալ քաղաքին.

² ո՛չ ձայնին անսաց, ո՛չ էլ խրատն ընդունեց,

ո՛չ Տիրոջ վրա հույսը դրեց, ո՛չ էլ Աստծուն մերձեցավ։

³ Նրա իշխանները կմռնչան առյուծների պես,

և նրա դատավորները՝ երեկոյի շնագայլերի նման,

որ մինչև առավոտ ոչինչ չեն թողնում։

⁴ Նրա մարգարեներն այսակիր են, արհամարհող,

նրա քահանաները պղծում են սրբություններն ու մեղանչում օրենքի դեմ։

⁵ Սակայն Տերն արդար է նրա մեջ և անիրավություն չի անի,

վաղ առավոտյան իմ դատաստանը կբերի դեպի լույսը և չի թաքցնի,

պահանջելիս ո՛չ անիրավություն կճանաչի,

⁶ ո՛չ էլ իսպառ անօրենություն.

ամբողջությամբ կկործանի ամբարտավաններին։

Ոչնչացան նրանց անկյունները. կավերեմ նրա ճանապարհները,

որպեսզի բոլորովին դրանցով չգնան։

Նրանց քաղաքները կպակասեն բնակիչներ չունենալու պատճառով։

⁷ Ասացի. «Վախեցե՛ք ինձանից և ընդունե՛ք խրատը

և ըստ ամենայնի չեք մեռնի նրա երեսից,

ինչքան էլ որ վրեժ լուծեմ նրանից։

Պատրաստվի՛ր, վա՛ղ արթնացիր առավոտյան.

պակասեցին նրա բոլոր ողկույզները։

⁸ Դրա համար սպասի՛ր ինձ,- ասում է Տերը,-

իմ հարության օրը վկայության համար։

Քանի որ իմ դատաստանն ազգերի դեմ է՝

բռնելու թագավորներին,

նրանց վրա թափելու իմ բարկությունը,

իմ սրտմտության ողջ բարկությունը,

որովհետև իմ նախանձախնդրության կրակով կմաշվի ողջ երկիրը։

⁹ Այն ժամանակ ժողովուրդներին կվերադարձնեմ լեզու նրանց ազգերի համար,

որպեսզի բոլորը Տիրոջ անունը կանչեն,

և նրանք ծառայեն նրան մի լծի տակ։

¹⁰ Ցրվածների հետ կընդունեմ նրանց եթովպացիների գետից.

ինձ համար զոհ կմատուցեն։

¹¹ Այն օրը չես ամաչի քո բոլոր գործերից,

որոնցով մեղանչեցիր իմ դեմ,

որովհետև այն ժամանակ քեզնից կպոկեմ քո ամբարտավանության չարությունը,

և այլևս չես շարունակի մեծաբանել իմ սուրբ լեռան վրա։

¹² Քեզ կթողնեմ հեզ և խոնարհ ժողովուրդ, և կվախենան Տիրոջ անունից

¹³ Իսրայելի մնացորդները. ո՛չ անիրավություն կանեն,

ո՛չ սնոտի բաներ կխոսեն,

ո՛չ էլ նրանց բերանում նենգավոր լեզու կգտնվի,

որովհետև նրանք կարածեն և կմակաղեն,

և չի լինի մեկը, որ վախեցնի նրանց»։

Երուսաղեմի վերականգնումը

¹⁴ Մեծապես ուրախացի՛ր, դո՛ւստր Սիոնի,

և գոչի՛ր, դո՛ւստր Երուսաղեմի [* Իսրայելի՛ ժողովուրդ],

ուրախացի՛ր և զվարճացի՛ր քո ամբողջ սրտով, դո՛ւստր Երուսաղեմի,

¹⁵ որովհետև Տերը քեզնից հեռացրեց շրջակա անիրավությունները,

Տերը քեզ փրկեց քո թշնամիների ձեռքից.

Իսրայելի թագավորը՝ Տերը, քո մեջ է,

և այլևս չարիք չես տեսնի։

¹⁶ Այն ժամանակ Տերը կասի Երուսաղեմին.

«Քաջալերվի՛ր, Սիո՛ն, թող չթուլանան քո ձեռքերը։

¹⁷ Տերը՝ Աստված, հզորը, քո մեջ է և կփրկի քեզ,

ուրախություն կբերի քեզ վրա,

կնորոգի քեզ իր սիրով

և կուրախանա քեզնով զվարթությամբ, ինչպես տոնի օրը։

¹⁸ Եվ կհավաքեմ քո փշրվածներին։

Վա՜յ որ կնախատի նրան։

¹⁹ Ահա ես կգործեմ այն ժամանակ քեզ համար.

կփրկեմ ճնշվածին,

կընդունեմ մերժվածին

և ողջ աշխարհով մեկ նրանց պանծալի և անվանի կդարձնեմ։

²⁰ Կամաչեն և՛ այն ժամանակ, երբ ձեզ բարիք անեմ,

և՛ այն ժամանակ, երբ ձեզ ընդունեմ,

որովհետև ձեզ անվանի և պանծալի կդարձնեմ

երկրի բոլոր ազգերի մեջ,

երբ ես ձեր գերությունը ձեր առաջ դարձնեմ»,- ասում է Տերը։

ԱՆԳԵՈՍԻ ՄԱՐԳԱՐԵՈՒԹՅՈՒՆԸ

1

Տիրոջ խոսքը տաճարի վերակառուցման մասին

¹ Դարեհ արքայի երկրորդ տարում՝ վեցերորդ ամսին, որ ամսվա առաջին օրն էր, Տիրոջ խոսքը եղավ Անգեոս մարգարեի միջոցով և ասաց. «Խոսի՛ր Զորաբաբելի՝ Հուդայի ցեղից Սաղաթիելի որդու, և Հեսուի՝ Հովսեդեկ քահանայապետի որդու հետ և ասա՛. ² “Այսպես է ասում Ամենակալ Տերը. “Այդ ժողովուրդն ասում է, թե չի հասել Տիրոջ տունը շինելու ժամանակը”»։ ³ Եվ Տիրոջ խոսքը եղավ Անգեոս մարգարեի միջոցով, և ասաց. ⁴ «Միայն ձե՞զ համար կլինի ժամանակ՝ գմբեթավոր տներում բնակվելու, իսկ իմ տունն ավերակ է»։ ⁵ Արդ, այսպես է ասում Ամենակալ Տերը. «Քննեցե՛ք ձեր սրտերը ձեր ճանապարհներին։ ⁶ Ցանում էիք շատ և հավաքում քիչ, ուտում էիք, բայց չէիք հագենում, խմում էիք, բայց հագուրդ չէիք ստանում, հագնում էիք, բայց չէիք տաքանում դրանցով, և ով իր վարձն էր հավաքում, ծակոտված կապոցների մեջ էր հավաքում»։ ⁷ Այսպես է ասում Ամենակալ Տերը. «Քննեցե՛ք ձեր սրտերը ձեր ճանապարհներին։ ⁸ Բարձրացե՛ք լեռը, փա՛յտ կտրեք և շինե՛ք այդ տունը, և կհիանամ դրանով ու կփառավորվեմ,- ասում է Տերը։ ⁹ Շատին սպասեցիք, և քիչը եղավ, դուք ներս՝ տներ կրեցիք, իսկ ես դուրս փչեցի այն»։ Դրա համար այսպես է ասում Ամենակալ Տերը. «Քանի որ իմ տունն ավերակ է, և դուք շտապում եք յուրաքանչյուրն իր տունը, ¹⁰ դրա համար երկինքը կպահի քո անձրևը, և երկիրը կխափանի իր արդյունքը։ ¹¹ Ես սուր կբերեմ երկրի վրա, ցորենի վրա, գինու վրա, յուղի վրա ու երկրի բոլոր բույսերի վրա, մարդկանց վրա ու անասունի վրա և նրանց ձեռքերի բոլոր վաստակների վրա»։

Ժողովուրդը հնազանդվում է Տիրոջ ձայնին

¹² Եվ Զորաբաբելը՝ Հուդայի ցեղից Սաղաթիելի որդին, Հեսուն՝ Հովսեդեկ քահանայապետի որդին, և ժողովրդի բոլոր մնացորդները լսեցին Տիրոջ՝ իրենց Աստծու ձայնը և Անգեոս մարգարեի պատգամները, ինչպես որ Տերը՝ իրենց Աստվածը, նրան ուղարկեց իրենց մոտ. և ժողովուրդը վախեցավ Տիրոջ հայացքից։ ¹³ Եվ Անգեոսը՝ Տիրոջ պատգամաբերների մեջ Տիրոջ պատգամաբերը, ժողովրդին ասաց. «Ես ձեզ հետ եմ,- ասում է Տերը»։ ¹⁴ Եվ Տերն արթնացրեց Զորաբաբելի՝ Հուդայի ցեղից Սաղաթիելի որդու ոգին, Հեսուի՝ Հովսեդեկ քահանայապետի որդու ոգին և ժողովրդի բոլոր մնացորդների ոգին. և մտնում և իրենց Աստծո՝ Ամենակալ Տիրոջ տանը գործ էին անում։ ¹⁵ Վեցերորդ ամսվա քսանչորսին՝ Դարեհ արքայի երկրորդ տարում։

2

Նոր տաճարի պայծառությունը

¹ Յոթերորդ ամսում, որ ամսվա քսանմեկերորդ օրն էր, Տերը խոսեց Անգեոս մարգարեի միջոցով և ասաց. ² «Ասա՛ Զորաբաբելին՝ Հուդայի ցեղից Սաղաթիելի որդուն, Հեսուին՝ Հովսեդեկ քահանայապետի որդուն, և ժողովրդի բոլոր մնացորդներին. ³ “Ձեզնից ո՞վ տեսած կլինի այս տունն իր նախկին փառքի մեջ, և հիմա ինչպիսի՞ն եք տեսնում այն. կարծես ոչինչ է ձեր առջև”»։ ⁴ «Եվ արդ, զորացի՛ր դու, Զորաբաբե՛լ,- ասում է Տերը,- զորացի՛ր, Հեսո՛ւ, Հովսեդեկ քահանայապետի որդի՛, և թող զորանա այդ երկրի ողջ ժողովուրդը,- ասում է Տերը,- գործի՛ անցեք, որովհետև ես ձեզ հետ եմ,- ասում է Ամենակալ Տերը։ Այն խոսքով, որ ուխտեցի ձեզ հետ եգիպտացիների երկրից ելնելիս, ⁵ և իմ Հոգով, որ կա ձեր մեջ, քաջալերվե՛ք»։ ⁶ Քանի որ այսպես է ասում Ամենակալ Տերը. «Դարձյալ կշարժեմ երկինքն ու երկիրը, ծովն ու ցամաքը։ ⁷ Բոլոր ազգերին միասին կսասանեմ. բոլոր ազգերի ընտիր-ընտիր ինչքերը կգան, և այդ տունը փառքով կլցնեմ,- ասում է Ամենակալ Տերը։ ⁸ Իմն է արծաթը, և իմն է ոսկին,- ասում է Ամենակալ Տերը,- ⁹ որպեսզի այդ տան վերջին փառքը լինի ավելի մեծ, քան նախկինինը,- ասում է Ամենակալ Տերը։ Եվ այդ տեղին խաղաղություն կտամ,- ասում է Ամենակալ Տերը,- հոգիների՛ խաղաղություն, փրկություն ամեն մեկի, ով կաշխատի ոտքի հանել այդ տաճարը»։

Պիղծ ընծաների դեմ

¹⁰ Իններոդ ամսվա քսանչորսին՝ Դարեհի երկրորդ տարում, Տիրոջ խոսքը եղավ Անգեոս մարգարեին, և ասաց. ¹¹ «Այսպես է ասում Ամենակալ Տերը. “Հարցրո՛ւ օրենքը ձեր քահանաներից և ասա՛. ¹² “Եթե մարդ սրբագործված միս դնի իր հագուստի քղանցքի մեջ, և իր հագուստը դիպչի հացի կամ թանի, կամ գինու, կամ յուղի, կամ որևէ կերակուրի, մի՞թե այն կսրբանա”»։ Քահանաները պատասխան տվեցին և ասացին՝ ո՛չ։ ¹³ Եվ Անգեոսն ասաց. «Եթե պիղծը կամ հոգով անսուրբը դիպչի դրանցից որևէ մեկի, մի՞թե այն կպղծվի»։ Քահանաները պատասխան տվեցին և ասացին՝ կպղծվի։ ¹⁴ Պատասխան տվեց Անգեոսը և ասաց. «Նույնպես և այս ժողովուրդը, նույնպես և այս ազգը՝ իմ առաջ,- ասում է Տերը,- նույնպես և նրանց ձեռքերի բոլոր գործերը. ինչ որ դիպչի նրանց, կպղծվի նրանց նախկին հափշտակությունների պատճառով, և կմորմոքեն իրենց չարիքների երեսից. և ատեցիք դռների առաջ հանդիմանողներին»։

Տերը խոստանում է իր օրհնությունը

¹⁵ «Եվ արդ, դրե՛ք ձեր սրտում այս օրվանից և սրանից առաջ, երբ դեռ Տիրոջ տաճարի քարը քարի վրա չէր դրվել։ ¹⁶ Ո՞վ էիք, երբ քսան քոռ գարի էիք լցնում ձեր ամանները, բայց տասը քոռ գարի էր լինում, և լցնում էիք ձեր հնձանները՝ հիսուն մար գինի հանելու համար, բայց քսան էր լինում։ ¹⁷ Անպտղությամբ, խորշակով ու կարկուտով հարվածեցի ձեզ և ձեր ձեռքերի բոլոր գործերը, բայց դուք չդարձաք դեպի ինձ,- ասում է Տերը։ ¹⁸ Կարգի բերե՛ք ձեր սրտերն այս օրվանից և սրանից հետո, իններորդ ամսվա քսանչորսերորդ օրից և այն օրվանից, երբ Տիրոջ տաճարի հիմքը դրվեց։ Դրե՛ք ձեր սրտերում. ¹⁹ մի՞թե կհայտնվի ինչ-որ բան ձեր կալի և որթատունկի, թզենու, նռնենու և ձիթենու վրա, որ չէին պտղաբերում. այս օրվանից կօրհնեմ»։

Տիրոջ խոստումը Զորաբաբելին

²⁰ Եվ Տիրոջ խոսքը դարձյալ եղավ Անգեոս մարգարեին ամսի քսանչորսին, և ասաց. ²¹ «Ասա՛ Զորաբաբելին՝ Հուդայի ցեղից Սաղաթիելի որդուն. “Դարձյալ շարժում եմ երկինքն ու երկիրը, ծովն ու ցամաքը. ²² կկործանեմ թագավորների գահերը և կոչնչացնեմ թագավորների զորությունը, կկործանեմ կառքերն ու հեծյալներին։ Կընկնեն երիվարներն ու սրանց հեծյալները, յուրաքանչյուրը սրով՝ իր եղբոր դեմ։ ²³ Այն օրը,- ասում է Ամենակալ Տերը,- Զորաբաբե՛լ, Սաղաթիելի որդի՛, կվերցնեմ քեզ՝ իմ ծառային, և կդնեմ քեզ որպես կնիք, քանի որ քեզ ընտրեցի”»,- ասում է Ամենակալ Տերը։

ԶԱՔԱՐԻԱՅԻ ՄԱՐԳԱՐԵՈՒԹՅՈՒՆԸ

1

Տիրոջ խոսքը Զաքարիային

¹ Դարեհ արքայի երկրորդ տարում՝ ութերորդ ամսին, Տիրոջ խոսքը եղավ Ադդովի որդու՝ Բարաքիայի որդուն՝ Զաքարիա մարգարեին, և ասաց. ² «Տերը մեծ ցասումով բարկացավ ձեր հայրերի վրա։ ³ Կասես նրանց. “Այսպես է ասում Ամենակալ Տերը. “Դարձե՛ք դեպի ինձ,- ասում է Զորությունների Տերը,- և կդառնամ դեպի ձեզ,- ասում է Զորությունների Տերը։- ⁴ Մի՛ եղեք ձեր հայրերի նման, որոնց սաստիկ հանդիմանում էին նախկին մարգարեները և ասում. “Այսպես է ասում Ամենակալ Տերը. “Դարձե՛ք ձեր բոլոր չար ճանապարհներից և ձեր չար ընթացքից”։ Բայց չլսեցին ու չանսացին ինձ լսելու,- ասում է Տերը։ ⁵ Ո՞ւր են ձեր հայրերն ու մարգարեները, մի՞թե հավիտյան պիտի ապրեն։ ⁶ Բայց իմ խոսքերը և իմ օրենքներն ընդունե՛ք, որոնք ես իմ Հոգով հրամայում եմ իմ ծառա մարգարեներին, որ հասան ձեր հայրերին”։ Պատասխան տվեցին և ասացին. “Ինչպես որ Ամենակալ Տերը սահմանեց մեզ անել ըստ մեր ճանապարհների և ըստ մեր ընթացքի, նույնպես արեց և մեզ համար”»։

Զաքարիայի տեսիլքները

ա. Ձիերի տեսիլքը

⁷ Տասնմեկերորդ ամսվա քսանչորսին, որ նույն Արացն է, Դարեհի երկրորդ տարում, Տիրոջ խոսքը եղավ Ադդովի որդու՝ Բարաքիայի որդուն՝ Զաքարիա մարգարեին, և ասաց. ⁸ «Գիշերվա տեսիլքի մեջ տեսա. ահա մի մարդ՝ աշխետ ձի հեծած, կանգնած էր երկու անտառախիտ լեռների միջև, և նրա հետևում՝ աշխետ, բծավոր ու սպիտակ ձիեր»։ ⁹ Եվ ասացի. «Ի՞նչ են դրանք, տե՛ր»։ Հրեշտակը, որ խոսում էր ինձ հետ, ասաց ինձ. «Ես քեզ ցույց կտամ՝ ի՛նչ են դրանք»։ ¹⁰ Պատասխան տվեց այն մարդը, որ կանգնած էր լեռների միջև, և ասաց ինձ. «Դրանք են, որոնց Տերն ուղարկեց շրջելու երկրով մեկ»։ ¹¹ Պատասխան տվեցին Տիրոջ հրեշտակին, որ կանգնած էր լեռների միջև, և ասացին. «Շրջեցինք ողջ երկրով մեկ, և ահա ողջ երկիրը բնակեցված ու հանդարտ է»։ ¹² Պատասխան տվեց հրեշտակը և ասաց. «Ամենակա՛լ Տեր, մինչև ե՞րբ չես ողորմելու Երուսաղեմին և Հուդայի քաղաքներին, որոնց անտեսեցիր այս յոթանասուն տարիներին»։ ¹³ Եվ Ամենակալ Տերը պատասխան տվեց հրեշտակին, որ ինձ բարության խոսքեր և մխիթարության խոսքեր էր ասում։ ¹⁴ Եվ հրեշտակը, որ խոսում էր ինձ հետ, ասաց ինձ.

«Աղաղակի՛ր և ասա՛.

Այսպես է ասում Ամենակալ Տերը.

“Ամբողջովին մեծ նախանձախնդրությամբ լցվեցի

Երուսաղեմի և Սիոնի համար

¹⁵ և սաստիկ բարկությամբ եմ բարկացած այն ազգերի վրա,

որ միասին հարձակվեցին նրանց վրա։

Քանի որ ես փոքր-ինչ բարկացել էի նրանց վրա,

բայց նրանք միասին հարձակվեցին չարիքի համար”։

¹⁶ Դրա համար այսպես է ասում Տերը.

“Կդառնամ դեպի Երուսաղեմը գթությամբ,

և իմ տունը վերստին կշինվի,-

ասում է Ամենակալ Տերը.

վերստին սահման կգծվի Երուսաղեմի համար”»։

¹⁷ Եվ հրեշտակը, որ խոսում էր ինձ հետ, ասաց ինձ.

«Աղաղակի՛ր և ասա՛.

Այսպես է ասում Ամենակալ Տերը. “Քաղաքները դարձյալ կլցվեն բարիքներով.

և Տերը ողորմելու է Սիոնին և վերստին ընտրելու է Երուսաղեմը”»։

2

բ. Եղջյուրների տեսիլքը

¹ Բարձրացրի իմ աչքերն ու տեսա ահա չորս եղջյուրներ ² և ասացի հրեշտակին, որ խոսում էր ինձ հետ. «Ի՞նչ են դրանք, տե՛ր»։ Ասաց ինձ. «Դրանք այն եղջյուրներն են, որ ցիրուցան արեցին Հուդան և Իսրայելը»։ ³ Եվ Տերն ինձ ցույց տվեց չորս հյուսն։ ⁴ Եվ ասացի. «Իսկ դրանք ի՞նչ անելու են գալիս»։ Ասաց ինձ. «Այդ եղջյուրներն են, որ ցիրուցան արեցին Հուդան և խորտակեցին Իսրայելը, և նրանցից ոչ ոք չբարձրացրեց իր գլուխը։ Եվ սրանք ելել են իրենց ձեռքով սրելու դրանք՝ չորս եղջյուրները, Տիրոջ երկրի դեմ եղջյուր բարձրացրած ազգերը՝ ցիրուցան անելու այն»։

գ. Չափելու լարի տեսիլքը

⁵ Բարձրացրի իմ աչքերն ու տեսա ահա մի մարդ, և իր ձեռքին երկրաչափ լար ուներ։ ⁶ Ասացի նրան. «Ո՞ւր ես գնում»։ Եվ ասաց ինձ. «Երուսաղեմը չափելու և տեսնելու, թե որչա՛փ է նրա լայնությունը և որչա՛փ՝ երկարությունը»։ ⁷ Եվ ահա հրեշտակը, որ խոսում էր ինձ հետ, հանգիստ կանգնած էր, և ուրիշ հրեշտակ ելավ նրան ընդառաջ ⁸ և ասաց նրան. «Գնա՛ և խոսի՛ր այն երիտասարդի հետ և ասա՛. “Պտղալից Երուսաղեմը կբարեկարգվի իր մեջ եղող անասունի և մարդկանց բազմության պատճառով։

⁹ Ես նրա համար շուրջանակի հրեղեն պարիսպ կլինեմ և փառքով կբնակվեմ նրա մեջ”»։

Տիրոջ վերադարձի հրավեր

¹⁰ «Հե՛յ, հե՛յ, փախե՛ք հյուսիսի երկրից,- ասում է Տերը,-

քանի որ երկնքի չորս հողմերից

կհավաքեմ ձեզ,- ասում է Տերը։

¹¹ Դեպի Սիոն դիմելով փրկվե՛ք,

Բաբելոնի դստեր բնակիչնե՛ր»։

¹² Քանի որ այսպես է ասում Ամենակալ Տերը. «Փառքի հետևից ինձ արձակեց դեպի այն ազգերը, որ կողոպտեցին ձեզ, որովհետև ով մոտենա ձեզ, նման է նրան, ով հարվածում է իր աչքի բիբին։ ¹³ Ահավասիկ ես իմ ձեռքը կբերեմ նրանց վրա, և կկողոպտվեն նրանց ծառայեցնողները, և կիմանաք, որ Ամենակալ Տերն ինձ ուղարկեց։

¹⁴ «Խնդա՛ և ուրախացի՛ր, դո՛ւստր Սիոնի,

քանի որ ահա ես կգամ

ու կբնակվեմ քո մեջ,- ասում է Տերը,-

¹⁵ և այդ օրը շատ ազգեր կապավինեն Տիրոջը

և կլինեն նրա համար ժողովուրդ ու կբնակվեն քո մեջ»։

Եվ կիմանաս, որ Ամենակալ Տերն ինձ ուղարկեց քեզ մոտ։ ¹⁶ Եվ Տերը սուրբ երկրում կժառանգի Հուդան՝ իր բաժինը, և դարձյալ կընտրի Երուսաղեմը. ¹⁷ և թող ամեն մարմին երկնչի Տիրոջ երեսից, քանի որ Տերը բարձրացել է իր սուրբ ամպերից։

3

դ. Քահանայապետի տեսիլքը

¹ Եվ Տերն ինձ ցույց տվեց Հեսու քահանայապետին, որ կանգնած էր Տիրոջ հրեշտակի առաջ, իսկ սատանան կանգնած էր նրա աջ կողմում՝ նրան հակառակվելու համար։ ² Եվ Տերն ասաց սատանային. «Տերը կսաստի քեզ, սատանա՛, կսաստի քեզ Տերը, որն ընտրեց Երուսաղեմը. արդ մի՞թե այն կրակից ազատված մի խանձափայտ չէ»։ ³ Եվ Հեսուն կեղտոտ հագուստներ էր հագել ու կանգնած էր Տիրոջ հրեշտակի առաջ։ ⁴ Պատասխան տվեց և ասաց նրանց, որ կանգնած էին իր առաջ. «Նրա վրայից հանե՛ք կեղտոտ հագուստները»։ Եվ ասաց նրան. «Ահա վերացրի քեզնից քո անօրենությունները։ Երկար պատմուճա՛ն հագցրեք դրան ⁵ և մաքուր խո՛ւյր դրեք դրա գլխին»։ Եվ մաքուր խույր դրեցին նրա գլխին ու հագուստներ հագցրին նրան։ Տիրոջ հրեշտակը կանգնած էր, ⁶ և Տիրոջ հրեշտակը վկայություն տվեց Հեսուին և ասաց.

⁷ «Այսպես է ասում Ամենակալ Տերը.

“Եթե իմ ճանապարհներով գնաս

և իմ հրամանները պահես,

դու կդատես իմ տունը,

և եթե պահես իմ գավիթները,

քեզ կտամ,

որ շրջեն դրանց մեջ,

որ կանգնած են ահա։

⁸ Բայց լսի՛ր, Հեսու քահանայապե՛տ,

դու և քո մերձավորները, որ նստում են քո առաջ,

որովհետև կախարդ մարդիկ են։

Ահա ես բերում եմ իմ ծառա Ծագումին։

⁹ Քանի որ այն քարը, որ դրեցի Հեսուի երեսի առջև,

այն քարի վրա յոթ աչքեր կան.

ահա ես խորխորատ կփորեմ,-

ասում է Ամենակալ Տերը,-

և կշոշափեմ այդ երկրի բոլոր անօրենությունները մի օրում։

¹⁰ Այն օրը,- ասում է Ամենակալ Տերը,- բոլորդ կկանչեք,

յուրաքանչյուրն իր ընկերոջը,

որթատունկի տակ և թզենու տակ”»։

4

ե. Աշտանակի տեսիլքը

¹ Եվ դարձավ հրեշտակը, որ խոսում էր ինձ հետ և արթնացրեց ինձ, ինչպես երբ մարդ արթնանում է իր քնից, ² և ասաց ինձ. «Դու ի՞նչ ես տեսնում»։ Եվ ասացի. «Ահա տեսնում եմ ոսկեձույլ աշտանակ և գունդ՝ նրա վրա, յոթ ճրագ՝ նրա վրա և յոթ ճրագակալ՝ նրա վրա, ³ և երկու ձիթենի՝ նրա վրա, մեկը՝ վառված գնդի աջ կողմում, իսկ մյուսը՝ ձախ կողմում։ ⁴ Հարցրի և ասացի հրեշտակին, որ խոսում էր ինձ հետ՝ «Ի՞նչ են դրանք, տե՛ր»։ ⁵ Պատասխան տվեց հրեշտակը, որ խոսում էր ինձ հետ, և ասաց ինձ. «Չգիտե՞ս ինչ են դրանք»։ Եվ ասացի՝ «Ո՛չ, տե՛ր»։

Տիրոջ խոստումը Զորաբաբելին

⁶ Պատասխան տվեց հրեշտակը և ասաց ինձ.

«Սա Տիրոջ խոսքն է Զորաբաբելին,-

ասաց,- ո՛չ մեծ զորությամբ և ո՛չ ուժգնությամբ, այլ իմ Հոգով,-

ասում է Ամենակալ Տերը։

⁷ Ո՞վ ես դու, մե՛ծ լեռ՝

Զորաբաբելի առջև կանգնած.

դուրս կհանեմ ժառանգության վեմը՝

շնորհների հավասարությունը՝ նրան շնորհելու»։

⁸ Եվ Տիրոջ խոսքը եղավ ինձ և ասաց.

⁹ «Զորաբաբելի ձեռքերն այդ տան համար հիմք գցեցին,

նրա ձեռքերն էլ կկանգնեցնեն այդ,

և կիմանաս, որ Ամենակալ Տերն ինձ ուղարկեց քեզ մոտ։

¹⁰ Քանի որ ո՞վ է, որ արհամարհեց փոքր օրերը. և կուրախանա, ու կտեսնեն անագե վեմը Զորաբաբելի ձեռքին. սրանք են այն յոթ աչքերը, որ նայում են ողջ երկրին»։

¹¹ Պատասխան տվեցի և ասացի նրան. «Իսկ ի՞նչ են երկու ձիթենիները, որ կան աշտանակի աջ և ձախ կողմերում»։ ¹² Եվ կրկին հարցրի և ասացի նրան. «Ի՞նչ են այն ձիթենիների երկու ոստերը, որ երկու ոսկե ճրագակալների միջոցով յուղը լցնում և վեր են հանում կոնքաձև ոսկե ճրագակալները»։ ¹³ Ասաց ինձ. «Չգիտե՞ս՝ ի՞նչ են դրանք»։ Եվ ասացի. «Ո՛չ, տե՛ր»։ ¹⁴ Եվ ասաց ինձ. «Դրանք պարարտության որդիներն են, որ կանգնած են ողջ աշխարհի Տիրոջ առաջ»։

5

զ. Թռչող գերանդու տեսիլքը

¹ Եվ դարձա ու բարձրացրի աչքերս և տեսա ահա մի թռչող գերանդի։ ² Եվ ասաց ինձ. «Ի՞նչ ես տեսնում»։ Ասացի. «Թռչող գերանդի եմ ես տեսնում՝ քսան կանգուն երկարությամբ և տասը կանգուն լայնությամբ»։ ³ Եվ ասաց ինձ. «Դա անեծքն է, որ շարժվում է ողջ երկրի երեսի վրա, որովհետև ամեն գողի համար մահացու վրեժ կպահանջվի դրանով, և ամեն սուտ երդվողի համար մահացու վրեժ կպահանջվի դրանով»։ ⁴ «Կհանեմ դրան,- ասում է Ամենակալ Տերը,- ու կմտնի գողերի տները և նրանց տները, ովքեր սուտ կերդվեն իմ անունով. կբնակվի նրա տանը և վերջ կտա նրան, նրա փայտին ու նրա քարերին»։

է. Կապարե կշեռքի տեսիլքը

⁵ Եվ ելավ հրեշտակը, որ խոսում էր ինձ հետ, և ասաց ինձ. «Նայի՛ր քո աչքերով և տե՛ս այն, որ ելնում է»։ ⁶ Եվ ասացի՝ «Ի՞նչ է»։ Ասաց ինձ. «Դա չափելու գործիք է, որ ելնում է», և ասաց. «Դա նրանց անիրավությունն է ողջ երկրով մեկ»։ ⁷ Եվ ահա մի կապարե կշեռք բարձրացավ, և մի կին նստած էր այն չափելու գործիքի մեջ։ ⁸ Եվ հրեշտակն ասաց. «Դա անիրավությունն է»։ Եվ գցեց նրան այն չափելու գործիքի մեջ ու կապարե քարը դրեց նրա բերանին։ ⁹ Եվ աչքերս բարձրացրի և տեսա. ահա երկու կանայք էին ելնում. հողմ՝ նրանց թևերի վրա, և նրանց թևերը նման էին հոպոպի թևերի. չափելու գործիքը բարձրացրին երկրի ու երկնքի միջև։ ¹⁰ Եվ ասացի հրեշտակին, որ խոսում էր ինձ հետ. «Նրանք ո՞ւր են տանում չափելու գործիքը»։ ¹¹ Եվ ասաց ինձ. «Բաբելացիների երկրում նրա համար տուն շինելու և պատրաստելու. և այն դնելու են այնտեղ՝ իր պատրաստածի վրա»։

6

ը. Չորս կառքերի տեսիլքը

¹ Դարձա ու բարձրացրի աչքերս և տեսա. ահա չորս կառքեր էին ելնում երկու լեռների միջից, և լեռները պղնձե լեռներ էին։ ² Առաջին կառքում աշխետ ձիեր էին, երկրորդ կառքում՝ սև ձիեր, ³ երրորդ կառքում՝ սպիտակ ձիեր, և չորրորդ կառքում՝ զանազան բծավոր ձիեր։ ⁴ Պատասխան տվեցի և ասացի հրեշտակին, որ խոսում էր ինձ հետ. «Ի՞նչ են դրանք, տե՛ր»։ ⁵ Պատասխան տվեց հրեշտակը, որ խոսում էր ինձ հետ, և ասաց. «Դրանք երկնքի չորս հողմերն են, որ ելնում են ողջ աշխարհի Տիրոջ առջև կանգնելու»։ ⁶ Կառքը, որի մեջ սև ձիերն էին, ելնում էր դեպի հյուսիսի երկիր, սպիտակները ելնում էին նրանց հետևից, և բծավորները ելնում էին դեպի հարավի երկիր ⁷ և նայում էին շրջելու ողջ երկրով մեկ։ Եվ ասաց. «Գնացե՛ք և շրջե՛ք երկրով մեկ»։ Եվ շրջեցին երկրով մեկ։ ⁸ Եվ աղաղակեց և ասաց ինձ. «Ահա, նրանք, որ ելնում են հյուսիսի երկիրը, հանդարտեցրին իմ բարկությունը հյուսիսի երկրում»։

Մարգարեություն Հովսիայի պսակադրման մասին

⁹ Եվ Տիրոջ խոսքը եղավ ինձ և ասաց. ¹⁰ «Դու ինձ համար վերցրո՛ւ իշխանների, նրա պիտանի մարդկանց ու նրա գիտունների այն գերության ավարից և այն օրը կմտնես Սոփոնիայի, որ եկել է Բաբելոնից, որդու՝ Հովսիայի տունը։ ¹¹ Ոսկի և արծաթ կվերցնես, պսակ կպատրաստես ու կդնես Հովսեդեկ քահանայապետի որդու՝ Հեսուի գլխին ¹² և կասես նրան. “Այսպես է ասում Ամենակալ Տերը.

“Ահա՛ մարդը, որի անունը Ծագում է.

կծագի իր ներսից և կշինի Տիրոջ տունը։

¹³ Նա քաջություն կառնի,

կնստի և կտիրի իր աթոռին։

Քահանան կլինի նրա աջ կողմում,

և խաղաղության խորհուրդը՝ երկուսի միջև։

¹⁴ Այդ պսակը կլինի նրանց համար,

ովքեր սպասում են,

և նրա պիտանի մարդկանց ու նրանց համար,

ովքեր ճանաչում են այն.

որպես շնորհք՝ Սոփոնիայի որդուն

և երգեր՝ Տիրոջ տան համար”»։

¹⁵ Եվ նրանցից հեռավորները կգան ու կշինեն Տիրոջ տունը, և կիմանաք, որ Ամենակալ Տերն ինձ ուղարկեց ձեզ մոտ։ Եվ սա կլինի, եթե ամբողջությամբ անսաք Տիրոջ՝ ձեր Աստծու ձայնին։

7

Երուսաղեմի ավերումը հիշատակող ծոմապահություն

¹ Եվ այնպես եղավ, որ Դարեհ արքայի չորրորդ տարում՝ իններորդ ամսի, որ Քասղևն է, չորրորդ օրը, Տիրոջ խոսքը եղավ Զաքարիային։ ² Եվ Բեթելից Սարասար ու Աբուսադ թագավորները և իրենց մարդիկ ուղարկվեցին աղաչելու Տիրոջը ³ և ասելու քահանաներին, որ Ամենակալ Տիրոջ տանն էին, և մարգարեներին, թե սրբությունը մտա՞վ այնտեղ հինգերորդ ամսում, քանի որ այդ անում էին շատ տարիներ։ ⁴ Եվ Զորությունների Տիրոջ խոսքը եղավ ինձ, և ասաց. ⁵ «Խոսի՛ր երկրիդ ժողովրդի և քահանաների հետ ու կասես. “Եթե պահք պահեք և կոծ անեք հինգերորդ կամ յոթերորդ ամիսներին, ահա յոթանասուն տարի, մի՞թե ինձ համար պահք պահած կլինեք։ ⁶ Եվ երբ ուտում և խմում եք, մի՞թե դուք ձեզ համար չեք ուտում և խմում”»։

⁷ Սրանք չե՞ն այն խոսքերը, որ Տերը խոսեց իր նախկին մարգարեների միջոցով, երբ Երուսաղեմը դեռ շեն էր ու բարիքների մեջ, և նրանց քաղաքները՝ շուրջանակի, և բնակեցված էին և՛ լեռնայինները, և՛ դաշտայինները։

Գթության աղերս

⁸ Եվ Տիրոջ խոսքը եղավ Զաքարիային, և ասաց.

⁹ «Այսպես է ասում Ամենակալ Տերը.

“Արդար դատաստանո՛վ դատեք,

ողորմությո՛ւն և գթությո՛ւն արեք յուրաքանչյուրդ ձեր եղբորը։

¹⁰ Մի՛ հարստահարեք այրուն և որբին, պանդուխտին և տնանկին,

և թող ոչ ոք իր սրտում ոխ չպահի իր ընկերոջ չարիքի համար”»։

¹¹ Բայց չկամեցան լսել, այլ դարձրին իրենց թիկունքը հիմարությամբ և ծանրացրին իրենց ականջները՝ չլսելու համար։ ¹² Իրենց սրտերն անհնազանդ դարձրին՝ չլսելու իմ օրենքներն ու խոսքերը, որ Ամենակալ Տերն ուղարկեց իր Հոգով՝ նախկին մարգարեների միջոցով. մեծ բարկություն եղավ Ամենակալ Տիրոջից։

¹³ «Եվ կլինի,

որ ինչպես երբ նա խոսեց, և չլսեցին նրան,

նույնպես երբ աղաղակեն,

չի լսի նրանց»,-

ասում է Ամենակալ Տերը։

¹⁴ «Նրանց կվտարեմ այն բոլոր ազգերի մեջ, որոնց չեն ճանաչի,

և այդ երկիրը կավերվի նրանցից հետո,

որովհետև ոչ ոք չի լինի, որ ելնի և դառնա.

ընտիր երկիրն ավերակ դարձրին»։

8

Տերը խաղաղություն և բարօրություն է խոստանում Սիոնին

¹ Եվ Ամենակալ Տիրոջ խոսքը եղավ ինձ և ասաց.

² «Այսպես է ասում Ամենակալ Տերը.

“Ամբողջովին մեծ նախանձախնդրությամբ լցվեցի Երուսաղեմի և Սիոնի համար

և մեծ բարկությամբ նախանձախնդիր եղա նրա համար”։

³ Այսպես է ասում Տերը.

“Կվերադառնամ Սիոն և կբնակվեմ Երուսաղեմում.

Երուսաղեմը կկոչվի ճշմարիտ քաղաք,

և Ամենակալ Տիրոջ լեռը՝ սուրբ լեռ”։

⁴ Այսպես է ասում Ամենակալ Տերը.

“Երուսաղեմի հրապարակներում դարձյալ կնստեն ծերունիներ ու պառավներ,

յուրաքանչյուրն իր ձեռքին ցուպ՝

մեծ տարիքի պատճառով։

⁵ Քաղաքի հրապարակները կլցվեն պատանիներով և աղջիկներով,

որ խաղան նրա հրապարակներում”։

⁶ Այսպես է ասում Ամենակալ Տերը.

“Եթե անհնարին բան լինի այդ ժողովրդի մնացորդների առջև

այդ օրերին, մի՞թե իմ առջև էլ անհնարին բան կլինի”,-

ասում է Ամենակալ Տերը։

⁷ Այսպես է ասում Ամենակալ Տերը.

“Ահա ես փրկում եմ իմ ժողովրդին

արևելքի երկրից և արևմուտքի երկրից.

⁸ նրանց կբերեմ ու կբնակեցնեմ Երուսաղեմում,

և ինձ համար ժողովուրդ կլինեն,

և ես կլինեմ նրանց համար Աստված՝ ճշմարտությամբ և արդարությամբ”։

⁹ Այսպես է ասում Ամենակալ Տերը.

“Թող զորանան ձեր ձեռքերը,

որ այս օրերին լսում եք մարգարեների բերաններից այս խոսքերն այն օրվանից,

երբ Ամենակալ Տիրոջ տան հիմքը գցեցիք,

և երբ այս տաճարը շինվեց։

¹⁰ Քանի որ այն օրերից առաջ մարդկանց վարձելն օգուտ չէր,

անասուններ վարձելն էլ հարգի չէր,

և ելնողի ու մտնողի համար չկար խաղաղություն նեղության պատճառով.

կուղարկեմ բոլոր մարդկանց,

յուրաքանչյուրին իր ընկերոջ դեմ։

¹¹ Բայց արդ նախկին օրերի նման ես չեմ անի այդ ժողովրդի մնացորդներին,-

ասում է Ամենակալ Տերը,-

¹² այլ խաղաղություն ցույց կտամ։

Այգին կտա իր պտուղը,

հողը կտա իր բերքը,

երկինքը կտա իր ցողը,

և այդ ամենը ժառանգություն կտամ իմ ժողովրդի մնացորդներին։

¹³ Եվ կլինի,

ինչպես որ անեծք էիք ազգերի մեջ,

Հուդայի՛ տուն և Իսրայելի՛ տուն,

նույնպես կփրկեմ ձեզ, և կլինեք օրհնություն.

քաջալերվե՛ք, և թող զորանան ձեր ձեռքերը”։

¹⁴ Քանի որ այսպես է ասում Ամենակալ Տերը.

“Ինչպես խորհեցի ձեզ չարչարել,

երբ ձեր հայրերը բարկացրին ինձ,-

ասում է Ամենակալ Տերը,- և չզղջացի,

¹⁵ նույնպես պատրաստվում ու խորհում եմ

այս օրերին բարիք անել Երուսաղեմին և Հուդայի տանդ.

քաջալերվե՛ք։

¹⁶ Այս բաներն են, որ պիտի անեք.

խոսե՛ք ճշմարտությունը, յուրաքանչյուրն իր ընկերոջը,

խաղաղությա՛ն դատաստան և արդա՛ր դատ արեք ձեր դռների առաջ.

¹⁷ թող յուրաքանչյուրն իր սրտում չարիք չխորհի իր ընկերոջ համար.

մի՛ սիրեք սուտ երդումը,

որովհետև ատեցի այդ ամենը”,-

ասում է Ամենակալ Տերը»։

Պահեցողության օրերը պիտի դառնան տոնի օրեր

¹⁸ Ամենակալ Տիրոջ խոսքը եղավ ինձ, և ասաց.

¹⁹ «Այսպես է ասում Ամենակալ Տերը.

“Չորրորդ պահքը

և հինգերորդ պահքը,

յոթերորդ պահքը

և տասներորդ պահքը

թող Հուդայի տանդ համար լինեն խնդություն, ուրախություն և բարության տոներ.

ուրա՛խ եղեք և սիրե՛ք ճշմարտությունն ու խաղաղությունը”։

²⁰ Այսպես է ասում Ամենակալ Տերը.

“Դարձյալ կգան շատ ժողովուրդներ և բազում քաղաքների բնակիչներ,

²¹ և մեկի բնակիչները կհավաքվեն մյուս քաղաքում և կասեն.

“Գնանք աղաչելու Տիրոջ առջև և փնտրելու Ամենակալ Աստծու երեսը”. ես էլ կգնամ։

²² Շատ ժողովուրդներ կգան՝

փնտրելու Ամենակալ Տիրոջ երեսը Երուսաղեմում

և Տիրոջ հետ հաշտություն գտնելու”։

²³ Այսպես է ասում Ամենակալ Տերը.

“Այն օրերին, եթե ազգերի բոլոր լեզուներից տասը տղամարդիկ բռնեն,

կբռնեն հրեա տղամարդու քղանցքից ու կասեն.

“Մենք կգանք քեզ հետ,

որովհետև լսեցինք, որ Աստված քեզ հետ է”»։

9

Հարևան ազգերի դատաստանը

¹ Տիրոջ խոսքի հայտնությունը Սեդրաքի երկրում,

և նրա զոհաբերությունը Դամասկոսի մեջ,

քանի որ Տերը տեսնում է մարդկանց

և Իսրայելի բոլոր ցեղերին.

² և Եմաթում, նրա սահմաններում,

Տյուրոսը և Սիդովնը, որովհետև խիստ արհամարհեցին։

³ Տյուրոսն ամրոցներ շինեց իր համար և արծաթը գանձեց

հողի պես, և ոսկին՝

ճանապարհների ցեխի պես։

⁴ Դրա համար Տերը կժառանգի այն

և ծովը կնետի նրա զորությունը,

և նա հրով կոչնչանա։

⁵ Ասկաղոնը կտեսնի և կվախենա,

Գազան սաստիկ կմորմոքի, նաև Ակկարոնը,

քանի որ ամաչեց իր հանցանքների համար։

Գազայից կվերանա թագավորը,

և Ակկարոնը չի բնակեցվի։

⁶ Այլազգիներ կբնակվեն Ազովտոսում,

և կկործանեմ այլազգիների հպարտությունը։

⁷ Նրանց արյունը կվերացնեմ նրանց բերանից,

և նրանց գարշությունները՝

նրանց ատամների միջից,

բայց նրանք ևս կմնան մեր Աստծուն

և կլինեն որպես հազարապետներ Հուդայի մեջ,

և Ակկարոնը՝ հեբուսացու պես։

⁸ Եվ իմ տան համար պաշտպան կկարգեմ,

որպեսզի չանցնի և չդառնա,

և նրանց վրա այլևս չի գա,

որ հալածի նրանց,

քանի որ այժմ տեսա իմ աչքերով։

Պատգամ Փրկչի գալստյան մասին

⁹ Մեծապես ուրախացի՛ր, դո՛ւստր Սիոնի,

ազդարարի՛ր, դո՛ւստր Երուսաղեմի,

ահա քո Թագավորը գալիս է քեզ մոտ,

արդարը և փրկիչը. նա հեզ է՝

հեծած էշի վրա և նրա ավանակի վրա։

¹⁰ Եվ կոչնչացնի կառքերը Եփրեմից

և երիվարները՝ Երուսաղեմից.

կփշրվի պատերազմող աղեղը, և ազգերի միջից՝

բազմությունն ու խաղաղությունը.

կտիրի ջրերին՝ ծովից մինչև ծով

և գետերից մինչև երկրի ծագերը։

Գերիների ազատագրումը

¹¹ Եվ դու քո ուխտի արյամբ արձակեցիր քո կալանավորներին անջրդի գբից։

¹² Եվ կնստեք ամրոցներում, դուք, ժողովրդի կալանավորնե՛ր,

և քո պանդխտության մեկ օրվա դիմաց

կրկնակին կհատուցեմ քեզ։

¹³ Քանի որ քեզ, ո՛վ Հուդա, կլարեմ ինձ համար աղեղի պես,

նաև լցրեցի Եփրեմին,

և ոտքի կհանեմ քո որդիներին, ո՛վ Սիոն,

հույների որդիների դեմ,

և կշոշափեմ քեզ պատերազմողի պողպատե սուսերի պես։

¹⁴ Տերը վերակացու կլինի նրանց,

և կելնի նրա նետը փայլակի պես։

Տերը, Ամենակալ Տերը կփողահարի,

և կընթանա իր սպառնալիքի շարժումով։

¹⁵ Ամենակալ Տերը կպաշտպանի նրանց։

Կոչնչացնեն նրանց ու կթաղեն նրանց պարսատիկների քարերով,

կխմեն նրանց արյունը գինու պես

և կլցնեն տաշտերը զոհասեղանի պես։

¹⁶ Եվ այն օրը Տերը՝ նրանց Աստվածը,

կփրկի նրանց՝ իր ժողովրդին, ինչպես ոչխարների,

որովհետև սուրբ քարեր են գլորվում նրա երկրում։

¹⁷ Քանի որ այն, ինչ որ բարի է, նրանն է, և այն,

ինչ որ լավ է, նրանն է.

ցորենը՝ երիտասարդներին,

և անուշարար գինին՝ կույսերին։

10

Խնդրել Տիրոջից և ոչ կուռքերից

¹ «Խնդրե՛ք Տիրոջից անձրև ըստ ժամանակի՝

վաղաժամ և ուշացած։

Տերը հրաշքներ գործեց և ձմեռային

անձրև կբերի նրանց հանդի յուրաքանչյուր խոտի վրա։

² Քանի որ վհուկները նեղություններ բարբառեցին,

և կախարդները սուտ տեսիլքներ ու սուտ երազներ էին խոսում և իզուր մխիթարում,

դրա համար ցամաքեցին հոտերի նման ու չարիքներ կրեցին,

որովհետև բժշկություն չկար»։

Գերեդարձության խոստումներ

³ «Իմ բարկությունը բորբոքվեց հովիվների դեմ,

և գառների համար այցելություն կանեմ։

Եվ Տերը՝ Ամենակալ Աստված, կայցելի իր հոտին՝ Հուդայի տանը,

և կպատրաստի նրանց իր համար

որպես պատերազմի գեղեցիկ երիվար։

⁴ Նրանից դիտեց ու նրանից պատրաստեց,

նրանից է իր աղեղը բարձրությամբ,

և նրանից կելնի ամեն ոք,

ով կհալածի նրանով։

⁵ Եվ կլինեն պատերազմողների պես,

որ կկոխկռտեն ցեխը պատերազմի ճանապարհներին

ու ճակատամարտ կտան,

որովհետև Տերը նրանց հետ է,

և կամաչեն հեծյալները երիվարների վրա։

⁶ Եվ կզորացնեմ Հուդայի տունը և Հովսեփի տունը

կփրկեմ

ու կբնակեցնեմ նրանց,

որովհետև սիրեցի նրանց.

և կլինեն, կարծես թե նրանցից դարձած չլինեի,

որովհետև ես եմ Տերը՝ նրանց Աստվածը,

և կլսեմ նրանց։

⁷ Եվ կլինեն Եփրեմի պատերազմողների պես,

և նրանց սիրտը կխնդա, ինչպես գինուց,

նրանց որդիները կտեսնեն և կուրախանան,

և նրանց սրտերը կցնծան Տիրոջով։

⁸ Կազդարարեմ նրանց

և կընդունեմ նրանց,

քանի որ կփրկեմ նրանց,

և կբազմանան, ինչպես որ բազմաթիվ էին։

⁹ Կսերմանեմ նրանց ազգերի մեջ,

և նրանք, որ հեռու լինեն, կհիշեն ինձ։

Կմեծացնեն իրենց որդիներին ու կվերադառնան։

¹⁰ Եվ կդարձնեմ նրանց եգիպտացիների երկրից,

ասորեստանցիներից կընդունեմ նրանց

և Գաղաադ ու Լիբանան կմտցնեմ նրանց,

և նրանցից և ոչ մեկը չի պակասի։

¹¹ Կանցնեն նեղ ծովով

և կխփեն ծովի ալիքներին.

կցամաքեն գետերի բոլոր խորությունները,

կկործանվի ասորեստանցիների ողջ հպարտությունը,

և կվերանա եգիպտացիների իշխանությունը։

¹² Եվ նրանց կզորացնեմ Տիրոջով՝ նրանց Աստծով,

և նրա անունով կպարծենան»,- ասում է Տերը։

11

Մեծ ավերածություններ. անարժան հովիվներ

¹ Բացի՛ր քո դռները, Լիբանա՛ն,

և թող կրակն ուտի քո մայրիները։

² Թող ողբան նոճիները,

որովհետև մայրիները տապալվեցին,

և մեծապես թշվառացան մեծամեծները։

Ողբացե՛ք, Բասանի՛ կաղնիներ,

որովհետև քանդվեց ծառախիտ անտառը։

³ Հովիվների ողբալու ձայնն է,

որովհետև նսեմացավ նրանց մեծությունը։

Առյուծների մռնչալու ձայնն է,

որովհետև ցածրացավ Հորդանանի բարձրությունը։

⁴ Այսպես է ասում Ամենակալ Տերը.

«Արածեցրո՛ւ մորթվելիք ոչխարները,

⁵ որոնք տերերը մորթում էին ու վաճառում դրանք և ասում.

“Օրհնյա՜լ է Տերը, հարստացանք”։

Եվ նրանց հովիվները բնավ չէին ցավում նրանց համար։

⁶ «Դրա համար այլևս չեմ խնայի այդ երկրի բնակիչներին,- ասում է Տերը,- և ահա ես կմատնեմ մարդկանց, յուրաքանչյուրին իր ընկերոջ ձեռքը և իր թագավորի ձեռքը, և կհարվածեն, և չեմ փրկի նրանց ձեռքից։

⁷ Եվ մորթվելիք ոչխարը կհովվեմ քանանացիների երկրում։ Եվ ինձ համար երկու գավազան կվերցնեմ. մեկը կանվանեմ Գեղեցկություն, իսկ երկրորդը կանվանեմ Վիճակ և կարածեցնեմ ոչխարները։ ⁸ Կվերացնեմ երեք հովիվներին մի ամսվա մեջ, և կծանրանա իմ հոգին նրանց վրա, քանի որ նրանց հոգիներն էլ գոչում էին իմ դեմ։

⁹ Եվ ասացի. «Չեմ հովվի ձեզ. ով մեռնելու է, թող մեռնի, ով սատկելու է, թող սատկի, իսկ մնացածները թող ուտեն յուրաքանչյուրն իր ընկերոջ մարմինը»։

¹⁰ Եվ կվերցնեմ իմ գավազանը՝ Գեղեցկությունը, ու կնետեմ այն՝ խզելու իմ ուխտը, որ կնքեցի բոլոր ժողովուրդների հետ, ¹¹ և կխզվի այն օրը. և քանանացիները կճանաչեն իմ պահպանած հոտերը, քանի որ Տիրոջ խոսքն է։

¹² Եվ ասացի նրանց. «Եթե բարի է թվում ձեր աչքին, տվե՛ք իմ վարձը, իսկ եթե ոչ, ասացե՛ք»։ Եվ կշռեցին իմ վարձը երեսուն արծաթով։

¹³ Եվ Տերն ինձ ասաց. «Դու գցի՛ր դա բովը և քննի՛ր, թե փորձվա՞ծ է, ինչպես որ ես փորձվեցի նրանց համար»։ Եվ վերցրի երեսուն արծաթը և գցեցի Տիրոջ տունը՝ բովի մեջ։ ¹⁴ Եվ նետեցի երկրորդ գավազանը՝ Վիճակը, խզելու իմ ուխտը Հուդայի և Իսրայելի միջև։

¹⁵ Եվ Տերն ինձ դարձյալ ասաց. «Դու քեզ համար տգետ հովվի հովվության գործի՛ք վերցրու, ¹⁶ որովհետև ահա ես տգետ հովիվ եմ ոտքի հանում երկրի վրա. տկարին չի խնամելու, ցրվածին չի փնտրելու, վիրավորվածին չի բժշկելու, ողջին հոգ չի տանելու, բայց ուտելու է ընտիրների միսը և փշրելու է նրանց ոտքերը։

¹⁷ Ո՛վ դատարկ արոտներ,

որ լքում եք ոչխարները։

Սուրը նրա բազկին է և նրա աջ աչքին։

Նրա բազուկն ամբողջությամբ կչորանա,

և նրա աջ աչքն ամբողջությամբ կկուրանա։

12

Երուսաղեմը ենթարկվում է աղետների

¹ Տիրոջ խոսքի հայտնությունն Իսրայելին։

Ասաց Տերը, որ տարածեց երկինքն

ու գցեց երկրի հիմքերը

և ստեղծում է մարդու հոգին նրա մեջ.

² «Ահա ես Երուսաղեմը դարձնում եմ որպես երերուն շեմեր բոլոր ժողովուրդների համար, որ նրա շուրջն են, և Հուդայի երկրում կլինի պաշարում Երուսաղեմի դեմ։ ³ Եվ կլինի, որ այն օրը Երուսաղեմը կդարձնեմ մի կոխկռտվող քար բոլոր հեթանոսների համար. ամեն ոք, ով կոխոտի այն, ամբողջությամբ կծաղրի նրան, և նրա դեմ կհավաքվեն երկրի բոլոր ազգերը։ ⁴ Այն օրը,- ասում է Ամենակալ Տերը,- կհարվածեմ բոլոր երիվարներին խուճապով և նրա հեծյալներին՝ հիմարությամբ, բայց կբացեմ իմ աչքերը Հուդայի տան վրա և ազգերի բոլոր երիվարներին կհարվածեմ կուրությամբ։ ⁵ Եվ Հուդայի հազարապետներն իրենց սրտերում կասեն. “Մենք Երուսաղեմի բնակիչներին կգտնենք իրենց Ամենակալ Տեր Աստծու ձեռքով”։ ⁶ Այն օրը Հուդայի հազարապետներին կդարձնեմ փայտերի մեջ հրձիգ ձողերի նման և եղեգնի մեջ հրավառ ջահերի պես, և աջից ու ձախից շուրջանակի կուտեն բոլոր ժողովուրդներին, և Երուսաղեմը դարձյալ կբնակվի առանձին, Երուսաղեմում։

⁷ Եվ Տերը կփրկի Հուդայի վրանները, որ ի սկզբանե կային, որպեսզի Դավթի տան պարծանքն ու Երուսաղեմի բնակիչների հպարտությունը չմեծաբանեն Հուդայի տան դեմ։ ⁸ Եվ կլինի, որ այն օրը Տերը կպաշտպանի Երուսաղեմի բոլոր բնակիչներին. և կլինի, որ այն օրը տկարը կլինի Դավթի պես, և Դավթի տունը՝ Աստծու տան պես, Տիրոջ հրեշտակի պես՝ նրանց առաջ»։

Համատարած սուգ Երուսաղեմում

⁹ «Եվ կլինի, որ այն օրը կփնտրեմ կործանել Երուսաղեմի վրա եկած բոլոր ազգերին։ ¹⁰ Դավթի տան վրա և Երուսաղեմի բնակիչների վրա կհեղեմ շնորհների ու գթության հոգին. և կնայեն ինձ վրա, որ խոցեցին, պարելու փոխարեն, և ամբողջովին կկոծեն նրա համար, ինչպես սիրելիի համար, և ամբողջությամբ կսգան, ինչպես անդրանիկ զավակի համար։ ¹¹ Այն օրը Երուսաղեմում սուգը կսաստկանա դաշտում կտրտված նռնենիների սգի նման, ¹² և երկիրը կսգա՝ ըստ բազում, առանձին ցեղերի. Դավթի տան ցեղը՝ առանձին, և նրանց կանայք՝ առանձին, Նաթանի տան ցեղը՝ առանձին, և նրանց կանայք՝ առանձին, ¹³ Ղևիի տան ցեղը՝ առանձին, և նրանց կանայք՝ առանձին, Շմավոնի տան ցեղը՝ առանձին, և նրանց կանայք՝ առանձին։ ¹⁴ Մնացած բոլոր ցեղերը՝ առանձին, և նրանց կանայք՝ առանձին»։

13

Կուռքերի և սուտ մարգարեների կործանումը

¹ Այն օրը Դավթի տան համար ամենուրեք բաց կլինի՝ փոփոխման ու ցողման համար։ ² Եվ կլինի, որ այն օրը Տերը կուռքերի անունները կվերացնի երկրից, և այլևս չի լինի նրանց հիշատակը. և երկրից կվերացնեմ սուտ մարգարեներին ու պիղծ ոգիներին։ ³ Եվ կլինի, որ եթե մեկը դեռևս մարգարեանա, նրա հայրն ու մայրն էլ, որ ծնել են նրան, կասեն նրան. «Չապրես, որովհետև սուտ խոսեցիր Տիրոջ անունով». և նրա հայրն ու մայրը, որ ծնել են նրան, կարգելեն նրան մարգարեանալ։ ⁴ Եվ կլինի, որ այն օրը մարգարեներն իրենց մարգարեանալու ժամանակ կամաչեն յուրաքանչյուր տեսիլքից և մազեղեն քուրձեր կհագնեն, քանի որ ստեցին։ ⁵ Եվ կասի. «Ես մարգարե չեմ, այլ հողագործ մարդ եմ. ինձ մարդ ծնեց իմ մանկությունից»։ ⁶ Եվ ասացի նրան. «Այդ ի՞նչ վերքեր են քո ձեռքերի մեջ». և կասի՝ «Որոնցով վիրավորվեցի իմ սիրելիի տանը»։

⁷ «Արթնացի՛ր, ո՛վ սուր, իմ հովվի դեմ

և նրա ընկերոջ մարդու դեմ,-

ասում է Ամենակալ Տերը.

կհարվածեմ հովվին,

և ոչխարները կցրվեն,

և իմ ձեռքը կդարձնեմ հովիվների դեմ։

⁸ Եվ կլինի այն օրը,- ասում է Տերը,- նրա մեջ երկու մասեր կանհետանան ու կպակասեն, բայց երրորդը կմնա նրա մեջ։ ⁹ Եվ երրորդ մասը կանցկացնեմ հրի միջով ու կտաքացնեմ նրանց, ինչպես արծաթն է տաքանում, և կփորձեմ նրանց, ինչպես ոսկին է փորձվում. նա կկանչի իմ անունը, և ես կլսեմ նրան ու կասեմ. «Իմ ժողովուրդն է սա», իսկ նա կասի՝ «Տերը՝ իմ Աստվածն ես դու»։

14

Վերջին ճակատամարտը և Տիրոջ գալուստը

¹ Ահա Տիրոջ օրերը կգան,

և քո ավարը կբաժանվի քո մեջ։

² Եվ կհավաքի բոլոր ազգերին

Երուսաղեմի դեմ պատերազմի.

և քաղաքը կգրավվի,

տները կկողոպտվեն,

կանայք կպղծվեն,

և քաղաքի կեսը գերության կտարվի,

բայց իմ ժողովրդի մնացորդները չեն վերանա այն քաղաքից։

³ Եվ Տերը կելնի ու պատերազմ կտա այդ ազգերի դեմ,

ինչպես պատերազմի օրը՝ իր ճակատամարտի օրը։

⁴ Այն օրը նրա ոտքերը կկանգնեն Ձիթենյաց լեռան վրա՝

արևելքից Երուսաղեմի դիմաց,

և Ձիթենյաց լեռը կպատռվի,

նրա մի կեսը՝ դեպի արևելք,

նրա մյուս կեսը՝ դեպի ծովը.

շատ մեծ վիհ կլինի,

և լեռան մի կեսը կխոնարհվի դեպի հյուսիս,

նրա մյուս կեսը՝ դեպի հարավ։

⁵ Եվ ձորը կկցվի իմ լեռներին մինչև Ասայել ու կխցանվի,

ինչպես որ խցանվեց երկրաշարժի պատճառով

Հուդայի արքա Ոզիայի օրերին։

Եվ կգա կհասնի Տերը՝ իմ Աստվածը,

և բոլոր սուրբերը՝ նրա հետ։

⁶ Եվ կլինի, որ այն օրը լույս չի լինի,

բայց ցուրտ ու սառը

⁷ կլինի մի օր, և այդ օրը հայտնի է Տիրոջը.

ո՛չ ցերեկ կլինի, ո՛չ էլ գիշեր,

բայց երեկոյան լույս կլինի։

⁸ Այն օրը կենդանի ջուր կբխի Երուսաղեմում,

նրա մի կեսը՝ դեպի առջևի ծովը,

նրա մյուս կեսը՝ դեպի հետևի ծովը,

այդպես կլինի նաև ամռանն ու գարնանը։

⁹ Եվ Տերը թագավոր կլինի ողջ երկրի վրա։

Այն օրը մի Տեր կլինի, և նրա անունը՝ մի,

¹⁰ պատելով ողջ երկիրը, անապատը՝

Գաբայից մինչև Ռեմոն՝ Երուսաղեմի հարավային կողմը,

և Հռամն իր տեղում կմնա,

Բենիամինի դռնից մինչև Առաջին դռան տեղը,

մինչև Անկյունների դուռը,

մինչև Անամայելի աշտարակը,

մինչև թագավորի հնձանները։

¹¹ Եվ կբնակվեն նրա մեջ,

և այլևս նզովք չի լինի,

և Երուսաղեմը կբնակեցվի հույսով։

¹² Եվ սրանք կլինեն այն հարվածները, որոնցով Տերը կհարվածի բոլոր ազգերին,

որ զորաժողով արեցին Երուսաղեմի դեմ.

նրանց մարմինները կհալվեն, մինչ իրենց ոտքերի վրա կանգնած լինեն,

նրանց աչքերը կծորեն իրենց ակնակապիճներից,

և նրանց լեզուները կհալվեն իրենց բերաններում։

¹³ Եվ այն օրը Տիրոջից մեծ վախ կլինի նրանց վրա,

և յուրաքանչյուրն իր ընկերոջ ձեռքից կբռնի

և իր ձեռքը կխառնվի իր ընկերոջ ձեռքին։

¹⁴ Հուդան կճակատամարտի Երուսաղեմում

և կհավաքի շրջակա բոլոր ազգերի կարողությունը՝

ոսկի, արծաթ և մեծ թվով հանդերձանք։

¹⁵ Եվ սրանք կլինեն հարվածները

ձիերի, ջորիների, ուղտերի, էշերի

և ամեն մի անասունի դեմ,

որ կլինեն այդ բանակների մեջ՝ ըստ նույն հարվածների։

¹⁶ Եվ կլինեն, որ երբ մնան Երուսաղեմի դեմ ելած բոլոր ազգերից,

տարեցտարի կելնեն՝ երկրպագելու Թագավորին՝ Ամենակալ Տեր Աստծուն,

և կատարելու Տաղավարահարաց տոնը։

¹⁷ Եվ կլինի, որ երբ չելնեն երկրի բոլոր ազգերից Երուսաղեմ՝

երկրպագելու Թագավորին՝ Ամենակալ Տեր Աստծուն,

սրանք ևս նրանց վրա կավելանան։

¹⁸ Եվ եթե եգիպտացիների ազգը չելնի ու չգա,

ապա նրանց դեմ կլինեն այն հարվածները,

որոնցով Տերը կհարվածի բոլոր այն ազգերին,

որ չեն ելնի Տաղավարահարաց տոնը կատարելու։

¹⁹ Նույնը կլինի եգիպտացիների մեղքերի համար

և բոլոր ազգերի մեղքերի համար,

որ չեն ելնի Տաղավարահարաց տոնը կատարելու։

²⁰ Այն օրը ձիու սանձերի վրա կլինի Տիրոջ Սրբությունը։

Եվ կաթսաները՝ Տիրոջ տան մեջ, կլինեն որպես տաշտեր զոհասեղանի առջև։

²¹ Եվ ամեն կաթսա, որ Երուսաղեմում և Հուդայի մեջ է,

կընծայաբերվի Ամենակալ Տիրոջը։

Եվ կգան բոլոր նրանք,

ովքեր զոհ պիտի մատուցեն,

կվերցնեն դրանցից

ու կեփեն դրանցով.

և այլևս այն օրը քանանացի չի լինի Ամենակալ Տիրոջ տանը։

 ՄԱՂԱՔԻԱՅԻ ՄԱՐԳԱՐԵՈՒԹՅՈՒՆԸ

1

Տիրոջ բարեհաճությունն Իսրայելի նկատմամբ

¹ Տիրոջ խոսքի հայտնությունն Իսրայելին իր պատգամաբերի միջոցով։ Ձեր սրտերո՛ւմ դրեք։

² «Սիրեցի ձեզ»,- ասում է Տերը, և ասացիք. «Ինչպե՞ս սիրեցիր մեզ»։ «Եսավը Հակոբի եղբայրը չէ՞ր,- ասում է Տերը,- բայց Հակոբին սիրեցի, ³ իսկ Եսավին ատեցի և նրա լեռները ամայացրեցի և նրա երկիրը տվեցի շնագայլերին։ ⁴ Եթե Եդովմն ասի՝ “Ահա կործանվեցինք. դառնանք և շինենք ավերված քաղաքները”, այսպես է ասում Ամենակալ Տերը. “Նրանք կշինեն, բայց ես կկործանեմ, և նրանք կկոչվեն “Անօրենության սահմաններ” և “Ժողովուրդ”, որի հետ Տերը հավիտյան պատերազմ կմղի”։ ⁵ Ձեր աչքերը կտեսնեն, և դուք իսկ կասեք, որ Տերը բարձրացավ Իսրայելի սահմանների վրա»։

Տիրոջ բարեհաճությունը քահանաների նկատմամբ

⁶ «Որդին փառավորում է հորը, և ծառան երկնչում է իր տիրոջից։ Իսկ արդ, եթե ես Հայր եմ, ո՞ւր է իմ փառքը, և եթե Տեր եմ, ո՞ւր է իմ պատիվը,- ասում է Ամենակալ Տերը։ Դուք, քահանանե՛ր, որ անարգում եք իմ անունը և ասում. “Ինչո՞վ անարգեցինք քո անունը”։ ⁷ Քանի որ իմ սեղանին պղծված հաց եք մատուցում և ասացիք. “Ինչո՞վ պղծեցինք դրանք”. երբ դուք ասում եք, թե՝ “Տիրոջ սեղանն արհամարհված է, և այն՝ ինչ դրվում է նրա վրա”։ ⁸ Քանի որ եթե կույր կենդանի զոհ մատուցեք, չար գործ չի՞ լինի, և եթե կաղ կամ հիվանդոտ կենդանի մատուցեք, չար գործ չի՞ լինի։ Լավ, այն քո իշխանի՛ն մատուցիր, մի՞թե կընդունի քեզ կամ նկատի կառնի քեզ,- ասում է Ամենակալ Տերը։ ⁹ Եվ այժմ աղաչե՛ք ձեր Աստծու երեսը և հաշտեցրե՛ք նրան. ձեր ձեռքով եղավ դա. մի՞թե աչառությամբ որևէ բան կվերցնեմ ձեզնից,- ասում է Ամենակալ Տերը։ ¹⁰ Քանի որ ձեզ համար դռները կփակվեն, և իզուր մի՛ մոտեցեք իմ սեղանին, որովհետև իմ կամքը ձեր մեջ չէ,- ասում է Ամենակալ Տերը,- զոհեր չեմ ընդունի ձեր ձեռքից։ ¹¹ Արևելքից մինչև արևմուտք իմ անունը փառավորված է ազգերի մեջ, և ամեն տեղ խունկ է մատուցվում իմ անվանը և սուրբ պատարագ, որովհետև մեծ է իմ անունը հեթանոսների մեջ,- ասում է Ամենակալ Տերը։ ¹² Սակայն դուք պղծեցիք այն, երբ ասացիք, թե՝ “Տիրոջ սեղանը պղծված է, և այն կերակուրը, որ դրվում է նրա վրա՝ արհամարհված”։ ¹³ Ասում էիք՝ “Դա չարչարանքից է”. այն դուրս կփչեմ,- ասում է Ամենակալ Տերը։ Եվ եթե ինձ հափշտակված, կաղ ու վտիտ զոհ մատուցեք, մի՞թե դրանք կընդունեմ ձեր ձեռքից,- ասում է Ամենակալ Տերը։ ¹⁴ Թող անիծյալ լինի այն մարդը, որ կխաբի. նրա հոտի մեջ որձ կլինի, բայց արատավորը կմատուցի Տիրոջը. նրա ուխտն իր անձի վրա է։ Քանի որ ես հաղթող Թագավոր եմ,- ասում է Ամենակալ Տերը,- և իմ անունը նշանավոր է ազգերի մեջ»։

2

Հավատարմության հորդոր քահանաներին

¹ «Եվ արդ, այս է իմ պատվերը ձեզ, ո՛վ քահանաներ։ ² Եթե չլսեք և ձեր սրտում չդնեք փառք տալ իմ անվան,- ասում է Ամենակալ Տերը,- ձեզ վրա անեծք կուղարկեմ և կանիծեմ ձեր օրհնությունը, կնզովեմ այն և կցրեմ ձեր օրհնությունները, և չի լինի ձեր մեջ, քանի որ դուք ձեր սրտում չդրեցիք։ ³ Ահա ես ձեզ թիկունք կդարձնեմ և աղբ շաղ կտամ ձեր երեսին, ձեր տոների աղբը և դրանով կվերացնեմ ձեզ։ ⁴ Եվ կիմանաք, որ ես ուղարկեցի ձեզ այն պատվերը, որ իմ ուխտը ղևտացիների հետ է,- ասում է Ամենակալ Տերը։ ⁵ Նրա հետ իմ ուխտը կյանքի և խաղաղության ուխտ է. ես նրան երկյուղ տվեցի՝ երկնչելու ինձանից և խորշելու իմ անունից։ ⁶ Ճշմարտության օրենքն էր նրա բերանում, և անիրավություն չգտնվեց նրա շուրթերին, խաղաղ և ուղիղ ընթացավ ինձ հետ և շատերին անիրավությունից դարձրեց։ ⁷ Քահանայի շուրթերը գիտություն պիտի պահպանեն, և նրա բերանից օրենք պիտի փնտրեն, քանի որ Ամենակալ Տիրոջ պատգամաբեր է։ ⁸ Իսկ դուք խոտորվեցիք ճանապարհից, շատերին տկարացրիք օրենքով և ապականեցիք Ղևիի ուխտը,- ասում է Ամենակալ Տերը։ ⁹ Եվ ես ձեզ լքված և արհամարհված դարձրի բոլոր ազգերի մեջ, քանի որ չպահեցիք իմ ճանապարհները, այլ օրենքով աչառություն էիք անում»։

Հավատարմության հորդոր ժողովրդին

¹⁰ Չէ՞ որ դուք բոլորդ մի Հայր ունեք. մի Աստված չստեղծե՞ց ձեզ, ինչո՞ւ է, որ յուրաքանչյուրդ թույլ եք տալիս ձեր եղբորը՝ պղծելու ձեր հայրերի ուխտը։ ¹¹ Անարգեց Հուդան, գարշություններ կատարվեցին Իսրայելում և Երուսաղեմում, որովհետև Հուդան պղծեց Տիրոջ սրբությունները նրանց ձեռքով, որոնց սիրեց և հարեց օտար աստվածներին։ ¹² Տերը կկործանի այն մարդուն, որը կանի դա, մինչև որ հալածվի Հակոբի վրաններից և Ամենակալ Տիրոջը զոհեր մատուցողների միջից։ ¹³ Եվ ինչ որ ես ատում էի, այն էիք անում. ծածկեցիք իմ սեղանն արցունքներով, նեղությունների լացով ու հեծությամբ։ Արժե՞ արդյոք դարձյալ նայել ձեր զոհերին և կամ ընդունել ձեր ձեռքից։ ¹⁴ Ասացիք՝ ինչո՞ւ։ Քանի որ Տերն ուխտ կնքեց քո և քո երիտասարդության կնոջ միջև, որին թողեցիր. նա էր քո ուխտի ամուսինն ու կինը։ ¹⁵ Եվ ուրիշ մեկը չարեց, այլ նրա հոգու հատորն է։ Բայց ասացիք. «Ուրիշ ի՞նչ է փնտրում Աստված, եթե ոչ զավակ»։ Պահպանե՛ք ձեր հոգիները, և քո երիտասարդության կնոջը մի՛ լքիր, ¹⁶ բայց եթե ատելու պատճառով արձակես,- ասում է Տերը՝ Իսրայելի Աստվածը,- ամբարշտությունը կծածկի քո մտքերը,- ասում է Ամենակալ Տերը,- պահպանե՛ք ձեր հոգիները և մի՛ լքեք։

¹⁷ Դուք, որ բարկացնում եք Աստծուն ձեր խոսքերով և ասում՝ «Ինչո՞վ բարկացրինք նրան». երբ ասում էիք, թե՝ «Ամեն ոք, ով չարն է գործում, բարի է համարվում Տիրոջ առաջ, և հենց այդ հավանեց նա. ո՞ւր է արդարության Աստվածը»։

3

¹ «Ահա ես ուղարկում եմ իմ պատգամաբերին, և կքննի իմ ճանապարհներն իմ առաջ։ Եվ հանկարծակի իր տաճարը կգա Տերը, որին դուք փնտրում եք, և ուխտի պատգամաբերը, որին դուք հավանում եք։ Ահա գալիս է,- ասում է Ամենակալ Տերը,- ² ո՞վ կհամբերի նրա մուտքի օրվան, և կամ ո՞վ կդիմանա նրա հայտնությանը, քանի որ նա կմտնի հնոցի բոցի պես և բաղնիքի օճառի նման։ ³ Եվ կնստի՝ սրբելու և ձուլելու արծաթի պես և ոսկու պես. կսրբացնի Ղևիի որդիներին և կհալեցնի նրանց ոսկու նման և արծաթի նման, և կլինի, որ արդարությամբ զոհեր կմատուցեն Տիրոջը։ ⁴ Հուդայի և Երուսաղեմի զոհաբերությունը հաճելի կլինի Տիրոջը հին օրերի նման և նախկին տարիների պես։ ⁵ Ձեզ վրա կհասնեմ դատաստանով և արագահաս վկա կլինեմ կախարդների և շնացած կանանց դեմ և նրանց դեմ, ովքեր ստությամբ կերդվեն իմ անունով, ովքեր կկտրեն վարձկանի վարձը, ովքեր հարստահարում են այրիներին և ծեծում որբերին, կխեղաթյուրեն պանդուխտի իրավունքը և չեն երկնչի ինձանից,- ասում է Ամենակալ Տերը»։

Տասանորդի վճարումը

⁶ «Ես եմ Տերը՝ ձեր Աստվածը, և չեմ փոփոխվում։ Բայց դուք, Հակոբի՛ որդիներ, հեռու չմնացիք ⁷ ձեր հայրերի մեղքերից, խուսափեցիք իմ օրենքներից և չպահեցիք դրանք։ Դարձե՛ք դեպի ինձ, և ես կդառնամ դեպի ձեզ,- ասում է Ամենակալ Տերը։ Սակայն ասացիք. “Ինչո՞վ դառնանք”։ ⁸ Արդյո՞ք մարդ Աստծուն կխաբի, որովհետև դուք խաբեցիք ինձ և ասացիք. “Ինչո՞վ խաբեցինք քեզ”։ Քանի որ տասանորդներն ու պտուղները ձեզ մոտ են, ⁹ և ամբողջությամբ նախանձում և խաբում եք ինձ։ Տարին ավարտվեց, ¹⁰ և ամբողջ բերքը ձեր շտեմարաններում հավաքեցիք, բայց ձեր տները կբռնազավթվեն. դարձե՛ք դրա համար,- ասում է Ամենակալ Տերը։ Մի՞թե չեմ բացի ձեզ համար երկնքի պատուհանները և իմ օրհնությունը չեմ հեղի ձեզ վրա, մինչև բավարարվեք։ ¹¹ Կպահպանեմ ձեր կերակուրները, չեմ ոչնչացնի ձեր երկրի բերքը, և ձեր որթատունկն այգում անպտուղ չի մնա,- ասում է Ամենակալ Տերը։ ¹² Բոլոր ազգերը ձեզ երանի կտան, քանի որ դուք ինձ համար հաճելի երկիր կլինեք,- ասում է Ամենակալ Տերը»։

Աստված ներում է խոստանում

¹³ «Խստացրիք ձեր խոսքերն իմ դեմ,- ասում է Տերը,- բայց ասացիք՝ “Ինչո՞վ բամբասեցինք քո մասին”։ ¹⁴ Քանի որ ասում էիք՝ “Իզուր է այն ամենը, որ ծառայում է Աստծուն. ի՞նչն է ավելի, որ պահեցինք նրա պատվիրանները և պաղատանքներով ընդառաջ գնացինք Ամենակալ Տիրոջը։ ¹⁵ Եվ այժմ մենք երանի ենք տալիս ուրիշներին, և բարեշեն են բոլոր նրանք, որ անօրենություն են գործում և ընդդիմացան Աստծուն ու փրկվեցին”»։

¹⁶ Այսպես տրտնջացին Տիրոջից երկյուղածները, յուրաքանչյուրն իր ընկերոջ հետ։ Եվ անսաց Տերը, լսեց ու հիշատակի գիրք գրեց Տիրոջից երկյուղածների առաջ և նրանց համար, ովքեր սարսում են նրա անունից։ ¹⁷ «Եվ կլինեն ինձ համար,- ասում է Ամենակալ Տերը,- այն օրը, երբ ես փրկություն կբերեմ ու կփայփայեմ նրանց, ինչպես հայրն է փայփայում իրեն լավ ծառայած որդուն։ ¹⁸ Ապա կդառնաք և ընտրություն կանեք արդարի և անօրենի միջև, Աստծուն ծառայածի և չծառայածի միջև»։

Տիրոջ գալստյան օրը

¹⁹ «Ահա Տիրոջ օրը կգա բորբոքված հնոցի պես և կայրի նրանց, և բոլոր այլազգիներն ու բոլոր նրանք, որ անօրենություն են գործում, կդառնան եղեգ, և կայրվի նրանցով այն օրը, որ գալու է,- ասում է Ամենակալ Տերը,- և նրանց արմատն ու ճյուղը չեն մնա։ ²⁰ Բայց ձեզ՝ իմ անունից երկյուղածներիդ համար կծագի արդարության Արեգակը, և բժշկություն՝ նրա թևերին. կելնեք ու կխայտաք կապից արձակված հորթերի պես։ ²¹ Եվ կկոխկռտեք անօրեններին, և մոխիր կդառնան ձեր ոտքերի տակ այն օրը, որ ես կսահմանեմ,- ասում է Ամենակալ Տերը։ ²² Ահա ես ձեզ մոտ եմ ուղարկում թեզբացի Եղիային, քանի դեռ չի եկել Տիրոջ մեծ ու նշանավոր օրը, ²³ որ պատրաստի հոր սիրտը որդու հանդեպ և մարդու սիրտը՝ իր ընկերոջ հանդեպ. գուցե գալով հարվածեմ երկիրը միանգամից։ ²⁴ Հիշեցե՛ք իմ ծառա Մովսեսի օրենքները, ինչպես որ պատվիրեցի նրան Քորեբի վրա. բոլոր հրամաններն ու պատվիրանները»։